ᠪᠠᠲᠤ ᠬᠠᠭᠠᠨ 3-08 ᠵᠡᠷᠯᠢᠭ ᠲᠠᠯᠠ ᠳ᠋ᠤ᠌-ᠮᠣᠩᠭᠣᠯᠴᠤᠳ ᠣᠷᠣᠰ ᠲᠡᠰᠢ ᠬᠥᠳᠡᠯᠪᠡ-Bat khaan Бат хаан-ᠷᠣᠮᠠᠨ
104ᠨᠠᠢ᠍ᠮᠠ ᠵᠡᠷᠯᠢᠭ ᠲᠠᠯᠠ ᠳ᠋ᠤ᠌
ᠭᠤᠷᠪᠠᠨ ᠡᠳᠦᠷ ᠴᠡᠷᠢᠭ ᠦ᠋ᠳ ᠡᠮᠦᠨᠡ ᠵᠦᠭ ᠶᠠᠪᠤᠵᠤ ᠵᠡᠷᠯᠢᠭ ᠲᠠᠯᠠ ᠳ᠋ᠤ᠌ ᠤᠯᠠᠮ ᠭᠦᠨᠵᠡᠭᠡᠢᠷᠡᠨ ᠣᠷᠣᠪᠠ᠃ ᠣᠷᠣᠰ ᠣᠷᠣᠨ ᠤ᠋ ᠪᠠᠮᠪᠠᠢ ᠲᠤᠯᠭᠠᠭᠤᠷ ᠪᠣᠯᠤᠭᠰᠠᠨ ᠷᠶᠡᠽᠡᠨ ᠥᠪᠡᠷ ᠦ᠋ᠨ ᠪᠦᠬᠦ ᠰᠣᠴᠢᠯ ᠰᠠᠨᠳᠤᠷᠤᠯ ᠤ᠋ᠨ ᠬᠠᠮᠲᠤ ᠠᠷᠤ ᠳ᠋ᠤ᠌ ᠬᠣᠢᠨᠠ ᠦᠯᠡᠳᠡᠪᠡ᠃
ᠲᠡᠷᠢᠭᠦᠨ ᠳ᠋ᠦ᠍ᠨᠢ ᠮᠣᠷᠢᠲᠤ ᠣᠲ᠋ᠷᠢᠶᠠᠳ᠋᠂ ᠸᠠᠩ ᠸᠠᠰᠸᠸᠣᠯᠤᠳ᠋ ᠫᠷᠤᠨᠰᠺ ᠤ᠋ᠨ ᠵᠠᠬᠢᠷᠭᠠᠨ ᠳᠣᠣᠷᠠ ᠬᠥᠳᠡᠯᠵᠦ ᠴᠤᠪᠤᠯᠳᠤᠨ ᠶᠠᠪᠤᠵᠤ ᠪᠠᠢᠪᠠ᠃ ᠪᠦᠷ ᠴᠠᠭᠠᠨᠠ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠᠨ ᠳ᠋ᠤ᠌ ᠳᠠᠢᠰᠤᠨ ᠤ᠋ ᠣᠲ᠋ᠷᠢᠶᠠᠳ᠋ ᠤ᠋ᠨ ᠡᠨᠳᠡ ᠲᠡᠨᠳᠡ ᠪᠣᠢ ᠦᠭᠡᠢ ᠶ᠋ᠢ ᠳᠠᠩᠨᠠᠭᠤᠯᠬᠤ ᠪᠠᠷ ᠶᠠᠪᠤᠭᠤᠯᠤᠭᠰᠠᠨ ᠮᠣᠷᠢ ᠲᠠᠢ ᠲᠠᠩᠨᠠᠭᠤᠯ ᠤ᠋ᠳ ᠦᠵᠡᠭᠳᠡᠨᠡ᠃
ᠲᠡᠳᠡ ᠨᠠᠷ ᠭᠠᠭᠴᠠ ᠨᠢᠭᠡᠨ ᠬᠥᠪᠡᠭᠡ ᠳᠣᠪᠣᠴᠠᠭ ᠳᠡᠭᠡᠷᠡ ᠭᠠᠷᠴᠤ ᠮᠠᠯᠠᠭᠠᠢ ᠪᠠᠨ ᠳᠡᠭᠡᠭᠰᠢ ᠬᠠᠶᠠᠬᠤ᠂ ᠳᠣᠣᠷᠠ ᠪᠠᠨ ᠡᠷᠭᠢᠯᠳᠦᠬᠦ ᠵᠡᠷᠭᠡᠪᠡᠷ ᠮᠡᠳᠡᠭᠡ ᠲᠡᠮᠳᠡᠭ ᠥᠭᠴᠦ ᠳᠠᠬᠢᠨ ᠴᠠᠰᠢ ᠶᠠᠪᠤᠨᠠ᠃ ᠡᠷᠭᠢᠨ ᠲᠣᠭᠣᠷᠢᠨ ᠴᠠᠰᠤ ᠪᠠᠷ ᠪᠦᠷᠬᠦᠮᠡᠯ ᠡᠵᠡᠭᠦᠢ ᠲᠠᠯᠠ ᠦᠷᠭᠦᠯᠵᠢᠯᠡᠬᠦ ᠪᠥᠭᠡᠳ ᠬᠠᠶᠠ ᠡᠨᠳᠡ ᠲᠡᠨᠳᠡ ᠰᠣᠨᠳᠤᠤᠯᠠ ᠶ᠋ᠢᠨ ᠣᠷᠴᠢᠮ ᠤᠷᠭᠤᠮᠠᠯ ᠴᠤᠬᠤᠢᠨ ᠦᠵᠡᠭᠳᠡᠵᠦ ᠤᠯᠠᠭᠠᠨ ᠰᠢᠷᠠ ᠨᠠᠪᠴᠢ ᠨᠢ ᠢᠯᠭᠠᠷᠠᠨ ᠬᠠᠷᠠᠭᠳᠠᠬᠤ ᠪᠤᠶᠤ ᠡᠰᠡᠪᠡᠯ ᠬᠣᠯᠠ ᠭᠠᠵᠠᠷ ᠲᠤ᠌ ᠤᠩᠬᠢᠯᠠᠨ ᠣᠷᠣᠭᠰᠠᠨ ᠭᠣᠣᠯ ᠤ᠋ᠨ ᠳᠠᠭᠠᠤ ᠴᠠᠷᠠᠰᠤᠨ ᠮᠣᠳᠣᠨ ᠤ᠋ ᠨᠠᠪᠴᠢ ᠬᠠᠷᠠᠯᠠᠨ ᠦᠵᠡᠭᠳᠡᠨᠡ᠃
ᠲᠡᠳᠡ ᠡᠮᠦᠨᠡ ᠵᠦᠭ ᠢ᠋ ᠴᠢᠭᠯᠡᠨ ᠦᠷᠭᠦᠯᠵᠢᠯᠡᠬᠦ ᠪᠥᠭᠡᠳ ᠬᠣᠯᠠ ᠶ᠋ᠢᠨ ᠰᠣᠷᠠᠵᠠ( ᠺᠷᠢᠮ) ᠬᠣᠲᠠ ᠠ᠋ᠴᠠ ᠢᠷᠡᠬᠦ ᠠᠶᠠᠨ ᠤ᠋ ᠭᠦᠨ ᠲᠠᠯᠠ ᠶ᠋ᠢᠨ ᠠᠳᠤᠭᠤᠨ ᠰᠦᠷᠦᠭ ᠪᠠ ᠲᠦᠷᠭᠡᠨ ᠣᠲ᠋ᠷᠢᠶᠠᠳ᠋ ᠤ᠋ᠳ ᠪᠣᠯᠤᠨ ᠲᠠᠯᠠ ᠶ᠋ᠢᠨ ᠠᠷᠢᠶᠠᠲᠠᠨ ᠨᠤᠭᠤᠳ ᠲᠤ᠌ ᠳᠠᠪᠲᠠᠭᠳᠠᠭᠰᠠᠨ ᠡᠨᠡ ᠲᠠᠯᠠ ᠪᠠᠷ ᠲᠡᠷᠡ ᠦᠶᠡ ᠳ᠋ᠦ᠍ ᠬᠣᠢᠲᠤ ᠣᠷᠣᠰ ᠭᠡᠵᠦ ᠨᠡᠷᠡᠯᠡᠵᠦ ᠪᠠᠢᠭᠰᠠᠨ ᠣᠢ ᠶ᠋ᠢᠨ ᠴᠠᠭᠠᠳᠤᠬᠢ ᠣᠷᠣᠨ ᠳ᠋ᠤ᠌ ᠨᠢᠭᠡ ᠬᠡᠰᠡᠭ ᠨᠢ ᠠᠷᠠᠯᠵᠢᠶᠠ ᠬᠤᠳᠠᠯᠳᠤᠭᠠ ᠬᠢᠬᠦ ᠶ᠋ᠢᠨ ᠲᠤᠯᠠᠳᠠ᠂ ᠨᠥᠭᠦᠭᠡ ᠬᠡᠰᠡᠭ ᠨᠢ ᠳᠣᠪᠲᠣᠯᠬᠤ ᠳᠡᠭᠡᠷᠡᠮᠳᠡᠬᠦ ᠶ᠋ᠢᠨ ᠲᠤᠯᠠᠳᠠ ᠵᠣᠷᠴᠢᠨ ᠶᠠᠪᠤᠵᠠᠭᠠᠳᠠᠭ ᠪᠠᠢᠵᠠᠢ᠃
ᠳᠣᠷᠤᠫᠺᠡ ᠵᠠᠮ ᠢ᠋ᠶ᠋ᠠᠷ ᠠᠯᠬᠤᠯᠠᠬᠤ ᠪᠥᠭᠡᠳ ᠮᠣᠷᠢᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠬᠣᠢᠨᠠ ᠠ᠋ᠴᠠ ᠬᠣᠮᠣᠬᠠᠢᠷᠠᠨ ᠬᠠᠷᠠᠭᠰᠠᠭᠠᠷ ᠶᠠᠪᠤᠵᠠᠢ᠃ ᠥᠪᠡᠷ ᠦ᠋ᠨ ᠡᠮᠦᠨᠡ ᠳᠡᠯᠭᠡᠷᠡᠬᠦ ᠲᠠᠯᠠ ᠶ᠋ᠢᠨ ᠠᠭᠤᠳᠠᠮ ᠳ᠋ᠤ᠌᠂ ᠰᠡᠳᠬᠢᠯ ᠬᠠᠨᠤᠭᠤᠨ ᠶᠠᠪᠤᠬᠤ ᠲᠤᠯᠠ ᠪᠣᠯᠬᠤ ᠭᠡᠵᠦ ᠪᠠᠢᠭᠠ ᠶᠠᠮᠠᠷ ᠠᠶᠤᠯ ᠤ᠋ᠨ ᠲᠤᠬᠠᠢ ᠪᠠᠭᠠ ᠪᠣᠳᠣᠨᠠ᠃ ᠭᠠᠭᠴᠠᠬᠦ ᠡᠷᠡ ᠬᠥᠮᠦᠨ ᠦ᠌ ᠵᠡᠷᠭᠡ ᠳ᠋ᠦ᠍ ᠬᠦᠷᠴᠦ ᠠᠶᠠᠨ ᠲᠡᠢᠨ ᠳ᠋ᠦ᠍ ᠶᠠᠪᠤᠵᠤ ᠪᠠᠢᠭᠠ ᠳ᠋ᠠᠭᠠᠨ ᠣᠮᠣᠭ ᠵᠣᠷᠢᠭ ᠨᠢ ᠪᠠᠳᠠᠷᠠᠬᠤ ᠲᠤᠯᠠ ᠲᠠᠨᠢᠯ ᠪᠤᠰᠤ ᠠᠶᠤᠮᠰᠢᠭᠲᠠᠢ ᠬᠥᠮᠦᠰ ᠲᠠᠲ᠋ᠠᠷ ᠤ᠋ᠳ ᠲᠠᠢ ᠴᠣᠬᠢᠯᠴᠠᠬᠤ ᠶᠠᠪᠤᠳᠠᠯ ᠬᠥᠭᠵᠢᠯᠲᠡᠢ ᠪᠥᠭᠡᠳ ᠬᠠᠴᠢᠨ ᠪᠣᠳᠣᠭᠳᠠᠨᠠ᠃ ᠪᠠᠢᠯᠳᠤᠭᠴᠢᠳ ᠤ᠋ᠨ ᠨᠢᠳᠦᠨ ᠦ᠌ ᠡᠮᠦᠨᠡ ᠰᠢᠯᠭᠠᠷᠠᠪᠠᠯ ᠭᠠᠪᠢᠶᠠ ᠪᠠᠢᠭᠤᠯᠵᠤ ᠮᠠᠭᠠᠳ ᠦᠭᠡᠢ ᠭᠡᠵᠦ ᠪᠣᠳᠣᠨᠠ᠃ ᠶᠠᠪᠤᠬᠤ ᠶ᠋ᠢᠨ ᠬᠢᠨᠢ ᠡᠮᠦᠨᠡ ᠠᠪᠤ ᠶ᠋ᠢᠨ ᠬᠢᠨᠢ ᠬᠡᠯᠡᠭᠰᠡᠨ ᠦᠭᠡ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠨᠠ᠃ ᠴᠢᠮᠠ ᠲᠠᠢ ᠪᠢᠳᠡ ᠪᠠᠭᠠᠪᠠᠭᠠᠢ ᠠᠩᠨᠠᠬᠤ ᠪᠠᠷ ᠶᠠᠪᠤᠬᠤ ᠳ᠋ᠤ᠌ ᠴᠢ ᠠᠷᠢᠶᠠᠲᠠᠨ ᠦᠵᠡᠭᠡ ᠦᠭᠡᠢ ᠪᠠᠢᠭᠠᠳ ᠠᠶᠤᠮᠰᠢᠭᠲᠠᠢ ᠭᠡᠵᠦ ᠰᠠᠨᠠᠳᠠᠭ ᠪᠠᠢᠭᠰᠠᠨ ᠪᠣᠯ ᠲᠡᠭᠦᠨ ᠢ᠋ ᠦᠵᠡᠬᠦ ᠶ᠋ᠢᠨ ᠬᠠᠮᠲᠤ ᠵᠢᠭᠤᠲᠠᠭᠠᠳ ᠪᠤᠤ ᠶᠠᠪᠤᠴᠢᠬᠠᠭᠠᠰᠠᠢ ᠭᠡᠵᠦ ᠰᠠᠨᠠᠳᠠᠭ ᠪᠣᠯᠤᠭᠰᠠᠨ ᠪᠢᠯᠡ᠃ ᠣᠳᠣ ᠪᠢᠳᠡ ᠲᠠᠲ᠋ᠠᠷ ᠤ᠋ᠳ ᠲᠠᠢ ᠪᠠᠢᠯᠳᠤᠨᠠ᠃ ᠲᠠᠲ᠋ᠠᠷ ᠤ᠋ᠳ ᠪᠣᠯ ᠪᠢᠳᠡᠨ ᠲᠡᠢ ᠠᠳᠠᠯᠢᠬᠠᠨ ᠬᠥᠮᠦᠰ᠂ᠥᠴᠦᠬᠡᠨ ᠴᠦ᠍ ᠢᠯᠡᠭᠦᠦ ᠬᠦᠴᠦᠲᠡᠢ ᠪᠤᠰᠤ᠃ ᠳᠠᠭᠠᠷᠢᠬᠤ ᠳ᠋ᠠᠭᠠᠨ ᠲᠡᠳᠡ ᠪᠠᠷᠬᠢᠷᠠᠯᠳᠤᠨᠠ᠂ ᠤᠴᠢᠷ ᠨᠢ ᠲᠡᠳᠡ ᠠᠶᠤᠭᠰᠠᠨ ᠳᠡᠭᠡᠷᠡ ᠡᠴᠡ ᠲᠡᠭᠡᠵᠦ ᠪᠠᠷᠬᠢᠷᠠᠵᠤ ᠪᠠᠢᠭᠠ ᠶᠤᠮ᠂ ᠪᠠᠰᠠ ᠠᠶᠤᠭᠰᠠᠨ ᠠ᠋ᠴᠠ ᠪᠣᠯᠵᠤ ᠨᠢᠳᠦ ᠪᠡᠨ ᠪᠦᠯᠲᠡᠢᠯᠭᠡᠨ ᠴᠢᠷᠠᠯᠠᠨᠠ᠃ ᠴᠢ ᠪᠣᠯ ᠬᠣᠶᠠᠭᠤᠯᠠ ᠶ᠋ᠢ ᠬᠠᠷᠠᠵᠤ ᠶᠠᠪᠤ᠂ ᠭᠡᠳᠡᠷᠭᠦ ᠪᠤᠤ ᠵᠢᠭᠤᠲᠠ᠂ ᠵᠢᠭᠤᠲᠠᠪᠠᠯ ᠳᠠᠢᠰᠤᠨ ᠳ᠋ᠤ᠌ ᠵᠣᠷᠢᠭ ᠨᠡᠮᠡᠭᠳᠡᠨᠡ᠃ ᠲᠡᠭᠦᠨ ᠳ᠋ᠦ᠍ ᠰᠦᠬᠡ ᠶ᠋ᠢᠨ ᠢᠷ ᠬᠢᠲᠤᠭᠠ ᠶ᠋ᠢᠨ ᠦᠵᠦᠭᠦᠷ ᠢ᠋ᠶ᠋ᠡᠷ ᠪᠡᠯᠡᠭ ᠪᠠᠷᠢᠬᠤ ᠬᠡᠷᠡᠭᠲᠡᠢ ᠭᠡᠪᠡ᠃
ᠠᠪᠤ ᠮᠢᠨᠢ ᠪᠠᠢᠯᠳᠤᠭᠠᠨ ᠤ᠋ ᠶᠠᠪᠤᠳᠠᠯ ᠮᠡᠳᠡᠨᠡ ᠭᠡᠵᠦ ᠲᠣᠷᠤᠫᠺᠠ ᠳ᠋ᠤ᠌ ᠰᠠᠨᠠᠭᠳᠠᠨᠠ᠃ ᠲᠡᠷᠡ ᠰᠦᠽᠳᠠᠯᠢ ᠶ᠋ᠢᠨ ᠬᠢᠨ ᠲᠡᠢ ᠪᠠᠢᠯᠳᠤᠵᠤ ᠮᠥᠨ ᠡᠨᠡ ᠡᠵᠡᠭᠦᠢ ᠲᠠᠯᠠ ᠳ᠋ᠤ᠌ ᠶᠠᠪᠤᠵᠤ ᠪᠠᠢᠭᠰᠠᠨ ᠪᠠ ᠴᠢᠰᠤᠨ ᠳ᠋ᠤ᠌ ᠪᠠᠨ ᠬᠤᠳᠬᠤᠯᠳᠤᠵᠤ ᠰᠢᠷᠬᠠ ᠪᠠᠨ ᠪᠣᠭᠣᠵᠤ ᠣᠷᠢᠶᠠᠭᠠᠳ ᠪᠤᠴᠠᠵᠤ ᠣᠴᠢᠭᠰᠠᠨ ᠨᠢ ᠨᠢᠭᠡ ᠤᠳᠠᠭᠠ ᠪᠤᠰᠤ ᠪᠠᠢᠵᠠᠢ᠃ ᠲᠣᠷᠤᠫᠺᠠ ᠶ᠋ᠢᠨ ᠲᠣᠭᠠᠯᠠᠬᠤ ᠪᠠᠷ ᠪᠣᠯ ᠴᠡᠷᠢᠭ ᠦ᠋ᠨ ᠲᠣᠭᠠ ᠬᠣᠶᠠᠷ ᠮᠢᠩᠭᠠ ᠣᠷᠴᠢᠮ ᠪᠣᠯᠤᠨᠠ᠃ ᠬᠡᠨ ᠳ᠋ᠦ᠍ ᠬᠠᠮᠢᠭᠠ ᠰᠠᠢᠬᠠᠨ ᠲᠣᠬᠢᠷᠠᠮᠵᠢᠲᠠᠢ ᠰᠠᠨᠠᠭᠳᠠᠨᠠ᠂ ᠲᠡᠷᠡ ᠬᠥᠮᠦᠨ ᠲᠡᠨᠳᠡ ᠣᠴᠢᠵᠤ ᠵᠠᠭᠤᠲᠤ ᠳ᠋ᠤ᠌ ᠬᠤᠪᠢᠶᠠᠭᠳᠠᠵᠤ ᠳᠤᠷᠠ ᠪᠠᠷ ᠶᠠᠪᠤᠨᠠ᠃ ᠵᠠᠭᠤᠲᠤ ᠶ᠋ᠢᠨ ᠳᠣᠲᠣᠷᠠᠬᠢ ᠬᠥᠮᠦᠨ ᠨᠢᠭᠡ ᠨᠢᠭᠡᠨ ᠳ᠋ᠡᠭᠡᠨ ᠰᠢᠬᠠᠯᠴᠠᠯᠳᠤᠨ ᠶᠠᠪᠤᠬᠤ ᠪᠥᠭᠡᠳ ᠪᠤᠰᠤᠳ ᠵᠠᠭᠤᠲᠤ ᠲᠠᠢ ᠬᠣᠯᠢᠯᠳᠤᠬᠤ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠲᠡᠭᠡᠵᠦ ᠶᠠᠪᠤᠬᠤ ᠠᠵᠢ᠃
ᠵᠠᠭᠤᠲᠤ ᠶ᠋ᠢ ᠵᠠᠭᠤᠲᠤ ᠶ᠋ᠢᠨ ᠳᠠᠷᠤᠭᠠ ᠸᠠᠩ ᠤ᠋ᠨ ᠨᠥᠬᠥᠳ ᠤᠳᠤᠷᠢᠳᠤᠨᠠ᠃ ᠡᠳᠡ ᠨᠠᠷ ᠨᠢ ᠭᠠᠤᠯᠢᠨ ᠬᠤᠳᠠᠷᠭᠠ ᠮᠣᠯᠴᠣᠭ ᠢ᠋ᠶ᠋ᠠᠷ ᠴᠢᠮᠡᠭᠯᠡᠭᠰᠡᠨ ᠴᠡᠪᠡᠷ ᠰᠠᠢᠬᠠᠨ ᠮᠣᠷᠢ ᠤᠨᠤᠵᠤ ᠶᠠᠪᠤᠨᠠ᠃ ᠬᠡᠳᠦᠨ ᠵᠠᠭᠤᠲᠤ ᠶ᠋ᠢᠨ ᠲᠦᠷᠦᠭᠦᠨ ᠳ᠋ᠦ᠍ ᠪᠠᠢᠯᠳᠤᠭᠠᠨ ᠤ᠋ ᠠᠬᠠᠯᠠᠭᠴᠢ ᠤᠳᠤᠷᠢᠳᠤᠭᠴᠢ ᠶᠠᠪᠤᠬᠤ᠂ ᠡᠭᠦᠨ ᠳ᠋ᠦ᠍ ᠲᠡᠷᠡ ᠨᠢ ᠪᠠᠢᠯᠳᠤᠭᠠᠨ ᠤ᠋ ᠶᠠᠪᠤᠳᠠᠯ ᠢ᠋ ᠮᠡᠳᠡᠬᠦ ᠪᠥᠭᠡᠳ ᠤᠷᠢᠳᠤ ᠴᠦᠯ ᠲᠠᠯᠠ ᠳ᠋ᠤ᠌ ᠶᠠᠪᠤᠭᠰᠠᠨ ᠬᠥᠮᠦᠨ ᠭᠡᠨᠡ᠃ ᠵᠠᠭᠤᠲᠤ ᠪᠦᠷᠢ ᠶ᠋ᠢᠨ ᠬᠣᠢᠨᠠ ᠠᠴᠢᠶᠠ ᠦᠷᠭᠦᠯᠵᠢᠯᠡᠨᠡ᠃ ᠲᠡᠷᠭᠡ ᠪᠤᠶᠤ ᠰᠦᠯᠵᠢᠮᠡᠯ ᠪᠤᠷᠭᠠᠰᠤᠨ ᠬᠠᠰᠢᠯᠭᠠ ᠲᠠᠢ ᠮᠠᠲᠠᠮᠠᠯ ᠴᠢᠷᠭᠠ ᠨᠤᠭᠤᠳ ᠲᠤ᠌ ᠲᠠᠯᠬᠠ᠂ ᠰᠢᠭᠤᠳᠠᠢ ᠲᠠᠢ ᠭᠤᠷᠢᠯ( ᠭᠤᠯᠢᠷ)᠂ ᠠᠷᠪᠠᠢ᠂ ᠥᠭᠡᠬᠦ ᠲᠣᠰᠣ᠂ ᠪᠠᠰᠠ ᠬᠤᠶᠠᠭ ᠳᠤᠭᠤᠯᠠᠭᠠ᠂ ᠵᠡᠪᠰᠡᠭ᠂ ᠲᠡᠭᠳᠡᠢ ᠲᠡᠷᠢᠭᠦᠲᠡᠨ ᠢ᠋ᠶ᠋ᠡᠨ ᠬᠢᠵᠦ ᠴᠡᠷᠢᠭ ᠦ᠋ᠳ ᠦ᠋ᠨ ᠶᠠᠪᠤᠬᠤ ᠳ᠋ᠤ᠌ ᠬᠥᠩᠭᠡᠨ ᠪᠣᠯᠭᠠᠵᠠᠢ᠃ ᠭᠠᠵᠠᠷ ᠤ᠋ᠨ ᠤᠷᠤᠭᠤ ᠪᠤᠶᠤ ᠥᠭᠡᠳᠡ ᠲᠠᠰᠢᠭᠤ ᠳ᠋ᠤ᠌ ᠴᠢᠷᠭᠠ ᠬᠠᠵᠠᠭᠤᠯᠠᠳᠠᠵᠦ ᠮᠠᠭᠠᠳ ᠲᠤᠯᠠ ᠴᠡᠷᠢᠭ ᠦ᠋ᠳ ᠭᠦᠶᠦᠯᠳᠦᠨ ᠢᠷᠡᠵᠦ ᠣᠩᠬᠣᠯᠳᠠᠭᠤᠯᠤᠯ ᠦᠭᠡᠢ ᠶᠠᠪᠤᠭᠤᠯᠤᠨᠠ᠃ ᠫᠧᠷᠦ᠋ᠨᠣᠧ — ᠪᠣᠷ ᠤ᠋ᠨ ᠴᠡᠷᠢᠭ ᠦ᠋ᠳ ᠬᠣᠭᠣᠷᠣᠨᠳᠣ ᠪᠠᠨ ᠡᠪᠲᠡᠢ ᠶᠡᠷᠦ᠋ᠰᠲ᠋ᠣᠸᠧᠺ ᠦ᠋ᠨ ᠲᠠᠷᠢᠶᠠᠴᠢᠳ ᠲᠠᠢ ᠨᠢᠭᠡᠨ ᠵᠠᠭᠤᠲᠤ ᠪᠣᠯᠵᠤ ᠶᠠᠪᠤᠨᠠ᠃ ᠤᠷᠲᠤ ᠨᠢ ᠥᠷᠭᠡᠨ ᠴᠡᠭᠡᠵᠢ ᠲᠡᠢ ᠨᠠᠮᠬᠠᠨ ᠪᠡᠶᠡ ᠲᠡᠢ ᠸᠡᠦ᠋ᠯ ᠮᠣᠷᠳ᠋ᠸᠢᠯ ᠶᠠᠪᠤᠵᠤ᠂ ᠮᠣᠷᠳ᠋ᠸᠢᠯ ᠳᠠᠭᠤᠤ ᠠᠶᠠᠯᠵᠤ ᠶᠠᠪᠤᠬᠤ ᠪᠥᠭᠡᠳ ᠭᠡᠨᠡᠳᠲᠡ ᠡᠮᠦᠨᠡ ᠪᠡᠨ ᠶᠠᠮᠠᠷ ᠨᠢᠭᠡᠨ ᠰᠢᠨᠡ ᠪᠤᠶᠤ ᠥᠪᠡᠷ ᠦ᠋ᠨ ᠮᠡᠳᠡᠬᠦ ᠦᠭᠡᠢ ᠵᠦᠢᠯ ᠠᠵᠢᠭᠯᠠᠭᠳᠠᠪᠠᠯ ᠳᠠᠭᠤᠯᠠᠬᠤ ᠶ᠋ᠢ ᠪᠣᠯᠢᠨᠠ᠃ ᠡᠨᠡ ᠠᠩᠬᠠᠳᠤᠭᠠᠷ ᠤᠳᠠᠭᠠ ᠭᠣᠪᠢ ᠲᠠᠯᠠ ᠶ᠋ᠢ ᠦᠵᠡᠵᠦ ᠪᠣᠢ ᠪᠥᠭᠡᠳ ᠪᠦᠬᠦ ᠨᠠᠰᠤᠨ ᠳ᠋ᠠᠭᠠᠨ ᠣᠢ ᠳᠣᠲᠣᠷᠠ ᠠᠮᠢᠳᠤᠷᠠᠵᠤ ᠶᠠᠪᠤᠭᠰᠠᠨ ᠠᠵᠢ᠃ ᠨᠢᠭᠡᠨ ᠰᠦᠷᠦᠭ ᠵᠡᠭᠡᠷᠡ᠂ ᠲᠠᠯᠠ ᠳᠣᠲᠣᠷᠠ ᠠ᠋ᠴᠠ ᠭᠠᠷᠴᠤ ᠣᠯᠠᠨ ᠬᠥᠮᠦᠨ ᠢ᠋ ᠠᠵᠢᠭᠯᠠᠨ ᠬᠠᠷᠠᠵᠤ ᠡᠪᠡᠷ ᠢ᠋ᠶ᠋ᠡᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠪᠡᠨ ᠭᠡᠳᠡᠢᠯᠭᠡᠵᠦ ᠬᠣᠯᠠ ᠳᠡᠪᠬᠡᠷᠦᠨ ᠦᠰᠦᠷᠬᠦ ᠳ᠋ᠦ᠍ ᠸᠠᠦᠢ᠍ᠯ ᠭᠠᠢᠬᠠᠭᠰᠠᠨ ᠳ᠋ᠠᠭᠠᠨ ᠳᠣᠷᠣᠭᠰᠢ ᠭᠤᠶᠠ ᠪᠠᠨ ᠠᠯᠠᠭᠠᠳᠠᠨᠠ᠃
ᠤᠷᠲᠤ ᠬᠥᠯᠲᠦ ᠬᠡᠷᠵᠡᠭᠡᠷ ᠲᠤᠷᠠᠩᠬᠠᠢ ᠼᠪᠶᠠᠭᠠ᠂ ᠸᠠᠤᠢ᠍ᠯ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠬᠥᠭᠵᠢᠯ ᠦᠭᠡᠢ ᠶᠠᠭᠤᠮᠠ ᠪᠣᠳᠣᠭᠰᠠᠭᠠᠷ ᠤᠳᠠᠭᠠᠨ ᠠᠯᠭᠤᠷ ᠢ᠋ᠶ᠋ᠠᠷ ᠠᠯᠬᠤᠯᠠᠵᠤ ᠶᠠᠪᠤᠨᠠ᠃
— ᠠ᠋ ᠬᠦᠢ᠂ ᠼᠪᠶᠠᠭᠠ! ᠬᠥᠯ ᠴᠢᠨᠢ ᠤᠷᠲᠤ ᠲᠤᠯᠠ ᠲᠡᠷᠡ ᠢᠮᠠᠭᠠ ᠶ᠋ᠢ ᠬᠥᠭᠡᠭᠡᠵᠦ ᠰᠡᠭᠦᠯ ᠡᠴᠡ ᠨᠢ ᠪᠠᠷᠢᠭᠠᠳ ᠠᠪᠤᠭᠠᠴᠢ ᠭᠡᠬᠦ ᠳ᠋ᠦ᠍ᠨᠢ:
— ᠨᠠᠳᠠᠳᠤ ᠡᠨᠡ ᠢᠮᠠᠭᠠ ᠲᠠᠢ ᠬᠥᠭᠡᠭᠡᠴᠡᠯᠳᠦᠬᠦ ᠬᠡᠷᠡᠭ ᠠᠯᠠᠭᠠ᠂ ᠭᠦᠶᠦᠵᠦ ᠶᠠᠪᠤᠭᠠ ᠲᠠᠤᠯᠠᠢ ( ᠶ᠋ᠢ ) ᠴᠢᠬᠢᠨ ᠡᠴᠡ ᠨᠢ ᠪᠠᠷᠢᠵᠤ ᠠᠪᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠠ ᠨᠠᠷ ᠮᠣᠷᠳ᠋ᠸᠢᠯ ᠨᠤᠭᠤᠳ ᠪᠠᠷᠢᠬᠤ ᠦᠭᠡᠢ ᠤᠤ? ᠭᠡᠵᠦ ᠲᠡᠷᠡ ᠬᠠᠷᠢᠭᠤᠯᠤᠨᠠ᠃ ᠺᠦᠳ᠋ᠷᠶᠠᠱ ᠬᠠᠵᠠᠭᠤ ᠳ᠋ᠤ᠌ ᠨᠡᠯᠢᠶᠡᠳ ᠵᠠᠢᠳᠠᠭᠤ ᠶᠠᠪᠤᠨᠠ᠃ ᠲᠡᠷᠡ ᠨᠢ ᠵᠠᠷᠢᠮ ᠳ᠋ᠠᠭᠠᠨ ᠬᠢᠷᠭᠢᠰ ᠡᠭᠦᠷ ᠳᠡᠭᠡᠷᠡ ᠭᠦᠶᠦᠨ ᠭᠠᠷᠴᠤ ᠠᠯᠤᠰ ᠢ᠋ ᠵᠢᠭᠠᠨ ᠥᠭᠦᠯᠡᠬᠦ ᠨᠢ᠄
— ᠲᠡᠨᠳᠡ ᠳᠣᠷᠣᠨᠠ ᠵᠦᠭ ᠡᠴᠡ ᠨᠠᠷᠠᠰᠤᠨ ᠤ᠋ ᠭᠣᠣᠯ᠂ ᠲᠡᠷᠡ ᠪᠠᠷᠠᠭᠤᠨ ᠵᠦᠭ ᠡᠴᠡ ᠭᠥᠵᠡᠭᠡᠯᠵᠡᠭᠡᠨ ᠭᠣᠣᠯ ᠤᠷᠤᠰᠤᠨᠠ᠃ ᠬᠣᠶᠠᠷ ᠭᠣᠣᠯ ᠬᠣᠶᠠᠭᠤᠯᠠ ᠸᠣᠷᠤᠨ᠋ᠸᠵ ᠭᠣᠣᠯ ᠳ᠋ᠤ᠌ ᠴᠢᠳᠬᠤᠨᠠ᠃ ᠲᠡᠨᠳᠡ ᠲᠡᠷᠡ ᠭᠣᠣᠯ ᠤ᠋ᠨ ᠳᠠᠭᠠᠤ ᠥᠩᠭᠡᠷᠡᠭᠰᠡᠨ ᠵᠢᠯ ᠫᠣᠯᠤᠸᠸᠼᠠ ᠶ᠋ᠢᠨ ᠬᠠᠭᠠᠨ ᠤ᠋ ᠴᠠᠭᠠᠨ ᠭᠡᠷ ᠦ᠋ᠳ ᠪᠠᠢᠭᠰᠠᠨ ᠶᠤᠮ᠃ ᠲᠡᠳᠡᠨᠡᠷ ᠬᠣᠨᠢ᠂ ᠦᠬᠡᠷ ᠠᠪᠴᠢᠷᠠᠵᠤ ᠬᠤᠳᠠᠯᠳᠤᠳᠠᠭ ᠪᠠᠢᠭᠰᠠᠨ᠃ ᠪᠢ ᠲᠡᠳᠡ ᠨᠠᠷ ᠲᠠᠢ ᠠᠷᠪᠠᠨ ᠬᠣᠶᠠᠷ ᠬᠣᠨᠣᠭ ᠬᠠᠮᠲᠤ ᠪᠠᠢᠭᠰᠠᠨ᠃ ᠲᠡᠳᠡ ᠨᠠᠷ ᠤ᠋ᠨ ᠬᠠᠨᠢᠲᠠᠨ ᠲᠡᠷᠭᠡᠨ ᠳᠡᠭᠡᠷᠡ ᠨᠢ ᠲᠡᠮᠦᠷ ᠬᠠᠢᠰᠤ᠂ ᠲᠡᠷᠭᠡᠨ ᠦ᠌ ᠬᠢᠨᠢ ᠳᠤᠭᠤᠢ ᠳ᠋ᠤ᠌ ᠲᠡᠮᠦᠷ ᠲᠠᠲᠠᠵᠤ ᠦᠭᠭᠦᠭᠰᠡᠨ ᠪᠢᠯᠡ᠃ ᠲᠡᠳᠡ ᠨᠠᠷ ᠥᠪᠡᠷᠰᠡᠳ ᠢ᠋ ᠪᠡᠨ ᠺᠤᠮᠠᠨ ᠭᠡᠵᠦ ᠨᠠᠷᠠᠯᠠᠨᠠ᠃ ᠲᠡᠳᠡ ᠨᠠᠷ ᠤ᠋ᠨ ᠳᠤᠮᠳᠠ ᠲᠠᠨᠢᠯ ᠲᠠᠢ ᠪᠣᠯᠤᠭᠰᠠᠨ ᠶᠤᠮᠰᠠᠨ᠃ ᠬᠠᠪᠤᠷ ᠤ᠋ᠨ ᠴᠠᠭ ᠲᠸ᠋ ᠭᠣᠪᠢ ᠲᠠᠯᠠ ᠳ᠋ᠤ᠌ ᠶᠡᠬᠡ ᠰᠠᠢᠬᠠᠨ ᠡᠪᠡᠰᠦ ᠨᠢ ᠬᠥᠮᠦᠨ ᠲᠡᠢ ᠰᠠᠴᠠᠭᠤ ᠤᠷᠭᠤᠬᠤ ᠲᠤᠯᠠ ᠡᠪᠡᠷ ᠲᠡᠢ ᠦᠬᠡᠷ ᠴᠦ᠍ ᠦᠯᠦ ᠦᠵᠡᠭᠳᠡᠨᠡ᠃ ᠬᠠᠪᠤᠷ ᠠᠳᠤᠭᠤᠴᠢᠨ ᠳ᠋ᠤ᠌ ᠰᠦ᠋ ᠡᠯᠪᠡᠭ᠂ ᠲᠡᠳᠡ ᠨᠠᠷ ᠬᠣᠨᠢᠨ ᠤ᠋ ᠰᠦ᠋ ᠪᠡᠷ ᠪᠢᠰᠢᠯᠠᠭ ᠬᠢᠨᠡ᠂ ᠭᠡᠭᠦᠦ ᠶ᠋ᠢᠨ ᠰᠦ᠋ ᠪᠡᠷ ᠠᠢᠷᠠᠭ ᠨᠡᠷᠡᠨᠡ᠃ ᠨᠠᠮᠤᠷ ᠪᠣᠯᠬᠤ ᠳ᠋ᠤ᠌ ᠪᠦᠬᠦ ᠫᠤᠯᠤᠸᠧᠼᠠ ᠨᠤᠭᠤᠳ ᠬᠥᠭᠵᠢᠯᠲᠡᠢ ᠪᠣᠯᠵᠤ ᠭᠠᠯ ᠤ᠋ᠨ ᠳᠡᠷᠭᠡᠳᠡ ᠳᠠᠭᠤᠤ ᠳᠠᠭᠤᠯᠠᠨ ᠴᠡᠩᠭᠡᠨᠡ ᠭᠡᠪᠡ᠃
ᠳ᠋ᠢᠺᠦᠷᠦᠰ ᠳᠠᠭᠤ ᠦᠭᠡᠢ᠂ ᠰᠡᠳᠬᠢᠯ ᠵᠣᠪᠠᠨᠢᠨ ᠠᠯᠬᠤᠯᠠᠬᠤ ᠪᠥᠭᠡᠳ ᠪᠣᠳᠣᠵᠤ ᠶᠠᠪᠤᠭᠠᠳ ᠲᠣᠷᠤᠫᠺᠠ ᠳ᠋ᠤ᠌ ᠬᠣᠶᠠᠷ ᠳᠠᠬᠢᠨ ᠦᠭᠡ ᠬᠡᠯᠡᠭᠰᠡᠨ ᠨᠢ᠂
— ᠮᠡᠳᠡᠬᠦ ᠦᠭᠡᠢ᠂ ᠭᠡᠷ ᠲᠡᠭᠡᠨ ᠪᠢᠳᠡ ᠨᠠᠷ ᠪᠦᠲᠦᠨ ᠡᠭᠡᠵᠦ ᠬᠠᠷᠢᠳᠠᠭ ᠪᠣᠯ ᠤᠤ? ᠭᠡᠵᠡᠢ᠃ ᠪᠦᠷᠦᠩᠬᠦᠢ ᠪᠣᠯᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠵᠠᠭᠤᠲᠤ ᠭᠣᠣᠯ ᠤ᠋ᠨ ᠡᠷᠭᠢ ᠭᠠᠩᠭᠠᠨ ᠳ᠋ᠤ᠌ ᠪᠡᠬᠢᠯᠡᠯᠲᠡ ᠦᠢᠯᠡᠳᠦᠯᠡ᠃ ᠨᠥᠭᠦᠭᠡ ᠡᠷᠭᠢ ᠨᠢ ᠥᠨᠳᠥᠷ ᠪᠥᠭᠡᠳ ᠡᠭᠴᠡ ᠲᠤᠯᠠ ᠲᠡᠨᠳᠡ ᠰᠥᠨᠢ ᠳ᠋ᠡᠭᠡᠨ ᠬᠠᠷᠠᠭᠤᠯ ᠤ᠋ᠨ ᠴᠡᠷᠢᠭ ᠪᠠᠢᠷᠢᠯᠠᠵᠠᠢ᠃ ᠴᠢᠷᠭᠠ ᠨᠤᠭᠤᠳ ᠢ᠋ ᠲᠣᠭᠣᠷᠢᠭᠤᠯᠤᠨ ᠲᠠᠯᠪᠢᠵᠤ ᠳᠤᠮᠳᠠ ᠨᠢ ᠭᠠᠯ ᠨᠣᠴᠣᠭᠠᠵᠠᠢ᠃ ᠰᠥᠨᠢ ᠳᠦᠯᠢᠨ ᠭᠠᠯ ᠢ᠋ᠶ᠋ᠠᠨ ᠦᠯᠦ ᠤᠨᠲᠠᠷᠠᠭᠠᠬᠤ ᠶ᠋ᠢᠨ ᠲᠤᠯᠠ ᠬᠠᠷᠭᠠᠨᠠ ᠪᠤᠲᠠᠷᠭᠠᠨᠠ ᠶ᠋ᠢ ᠶᠡᠬᠡᠪᠡᠷ ᠴᠤᠭᠯᠠᠭᠤᠯᠵᠠᠢ᠃ ᠴᠢᠳᠥᠷ ᠲᠡᠢ ᠮᠣᠷᠢᠳ ᠬᠣᠯᠠ ᠪᠤᠰᠤ ᠪᠡᠯᠴᠢᠵᠦ ᠥᠩᠭᠡᠷᠡᠭᠰᠡᠨ ᠵᠢᠯ ᠦ᠋ᠨ ᠬᠠᠲᠠᠭᠰᠠᠨ ᠡᠪᠡᠰᠦ ᠶ᠋ᠢ ᠢᠳᠡᠨᠡ᠃ ᠲᠠᠷᠢᠶᠠᠴᠢᠳ ᠲᠡᠷᠭᠡᠨ ᠡᠴᠡ ᠳᠠᠬᠤ ᠲᠡᠭᠳᠡᠢ ᠨᠤᠭᠦᠳ ᠢ᠋ᠶ᠋ᠡᠨ ᠠᠪᠴᠤ ᠭᠠᠯ ᠤ᠋ᠨ ᠳᠡᠷᠭᠡᠳᠡ ᠰᠠᠭᠤᠵᠠᠭᠠᠭᠠᠳ ᠵᠡᠷᠯᠢᠭ ᠲᠠᠯᠠ ᠶ᠋ᠢᠨ ᠲᠤᠬᠠᠢ ᠪᠠ ᠫᠣᠯᠤᠸᠧᠼᠠ ᠳ᠋ᠤ᠌ ᠣᠯᠵᠠᠯᠠᠭᠳᠠᠭᠠᠳ ᠵᠢᠭᠤᠲᠠᠵᠤ ᠭᠠᠷᠤᠭᠰᠠᠨ ᠣᠷᠣᠰ ᠬᠥᠮᠦᠰ ᠦ᠋ᠨ ᠠᠮᠢᠳᠤᠷᠠᠯ ᠤ᠋ᠨ ᠲᠤᠬᠠᠢ ᠦᠯᠢᠭᠡᠷ ᠳᠣᠮᠣᠭ ᠢ᠋ ᠶᠠᠷᠢᠯᠴᠠᠨᠠ᠃
ᠰᠥᠨᠢ ᠳᠤᠮᠳᠠ ᠡᠴᠢᠭᠡ ᠨᠢ ᠲᠣᠷᠤᠫᠺᠠ ᠶ᠋ᠢ ᠰᠡᠷᠢᠭᠡᠵᠦ ᠦᠷ ᠴᠠᠢᠲᠠᠯᠠ ᠥᠨᠳᠥᠷ ᠬᠥᠪᠡᠭᠡᠨ ᠳᠡᠭᠡᠷᠡ ᠭᠠᠷᠴᠤ ᠬᠠᠷᠠᠭᠤᠯ ᠬᠠᠷᠠᠬᠤ ᠶ᠋ᠢ ᠲᠤᠰᠢᠶᠠᠪᠠ᠃
— ᠲᠡᠨᠳᠡ ᠬᠠᠷᠠᠭᠳᠠᠯ ᠦᠭᠡᠢ ᠨᠢᠭᠤᠭᠳᠠᠵᠤ ᠪᠡᠶᠡ ᠪᠡᠨ ᠪᠤᠤ ᠦᠵᠡᠭᠦᠯ᠂ ᠴᠢᠮᠡᠭᠡ ᠪᠤᠤ ᠭᠠᠷᠭᠠ᠂ ᠲᠠᠲ᠋ᠠᠷ ᠤ᠋ᠳ ᠮᠥᠯᠬᠥᠵᠦ ᠢᠷᠡᠭᠡᠳ ᠬᠢᠲᠤᠭᠠᠯᠠᠵᠤ ᠮᠡᠳᠡᠨᠡ᠃ ᠶᠠᠮᠠᠷ ᠨᠢᠭᠡ ᠶᠠᠭᠤᠮᠠ ᠦᠵᠡᠪᠡᠯ ᠲᠤᠰᠠᠯᠠᠮᠵᠢ ᠡᠷᠢᠵᠦ ᠪᠠᠷᠬᠢᠷᠠ ᠭᠡᠪᠡ᠃
ᠲᠣᠷᠤᠫᠺᠠ ᠳᠣᠪᠣᠴᠠᠭ ᠳᠡᠭᠡᠷᠡ ᠭᠠᠷᠴᠤ ᠬᠠᠲᠠᠭᠰᠠᠨ ᠳᠡᠷᠡᠰᠦᠨ ᠳᠣᠲᠣᠷᠠ ᠨᠢᠭᠤᠭᠳᠠᠪᠠ᠃ ᠡᠷᠭᠢᠨ ᠲᠣᠭᠣᠷᠢᠨ ᠬᠠᠷᠠᠩᠭᠤᠢ ᠪᠥᠭᠡᠳ ᠭᠣᠣᠯ ᠤ᠋ᠨ ᠡᠷᠭᠢ ᠶ᠋ᠢᠨ ᠭᠠᠩᠭᠠ ᠳᠣᠲᠣᠷᠠ ᠭᠠᠯ ᠤᠯᠠᠯᠵᠠᠨᠠ᠃ ᠲᠡᠭᠦᠨ ᠦ᠌ ᠳᠡᠷᠭᠡᠳᠡ ᠲᠠᠷᠢᠶᠠᠴᠢᠳ ᠠᠮᠤᠭᠤᠯᠠᠩ ᠤᠨᠲᠠᠵᠠᠭᠠᠵᠤ ᠪᠠᠢᠨᠠ᠃ ᠬᠣᠯᠠ ᠪᠤᠰᠤ ᠭᠠᠵᠠᠷ ᠠᠷᠢᠶᠠᠲᠠᠨ ᠠᠮᠢᠲᠠᠨ ᠤ᠋ ᠴᠢᠮᠡᠭᠡ ᠠᠪᠤᠭᠰᠠᠨ ᠮᠡᠲᠦ ᠮᠣᠷᠢᠨ ᠤ᠋ ᠲᠤᠷᠭᠢᠬᠤ ᠰᠣᠨᠣᠰᠳᠠᠪᠠ᠃ ᠲᠣᠷᠤᠫᠺᠠ ᠬᠠᠷᠠᠭᠤᠯ ᠬᠠᠷᠠᠬᠤ ᠦᠶᠡ ᠳ᠋ᠡᠭᠡᠨ ᠭᠠᠷ ᠲᠠᠭᠠᠨ ᠵᠢᠳᠠ ᠪᠠᠨ ᠴᠢᠩᠭᠠ ᠪᠠᠷᠢᠵᠤ ᠰᠡᠷᠡᠮᠵᠢᠯᠡᠨ ᠰᠠᠭᠤᠬᠤ ᠪᠥᠭᠡᠳ ᠨᠣᠢᠷ ᠴᠤ᠌ ᠬᠤᠯᠵᠢᠵᠤ ᠶᠠᠳᠠᠷᠠᠭᠰᠠᠨ ᠨᠢ ᠴᠦ᠍ ᠮᠠᠷᠲᠠᠭᠳᠠᠪᠠ᠃ ᠬᠠᠷᠠᠩᠭᠤᠢ ᠳ᠋ᠤ᠌ ᠤᠷᠲᠤ ᠬᠢᠲᠤᠭᠠ ᠰᠢᠲᠦᠨ ᠳ᠋ᠡᠭᠡᠨ ᠵᠠᠭᠤᠭᠰᠠᠨ ᠲᠠᠲ᠋ᠠᠷ ᠲᠡᠭᠦᠨ ᠦ᠌ ᠵᠦᠭ ᠲᠦ᠍ ᠮᠥᠯᠬᠥᠨ ᠬᠦᠷᠴᠦ ᠢᠷᠡᠵᠦ ᠶᠠᠪᠤᠭᠠ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠵᠤ ᠪᠠᠢᠪᠠ᠃ ᠲᠤᠨᠤᠷᠠᠨ ᠪᠠᠢᠬᠤ ᠮᠠᠨᠠᠨ ᠪᠤᠳᠠᠩ ᠤ᠋ᠨ ᠲᠠᠰᠤᠷᠬᠠᠢ ᠪᠠᠷ ᠵᠢᠵᠢᠭᠬᠡᠨ ᠣᠳᠣᠲᠠᠢ ᠬᠠᠷᠠ ᠲᠡᠭᠷᠢ ᠬᠠᠷᠠᠭᠳᠠᠨᠠ ᠃ ᠬᠠᠷᠭᠠᠨᠠ ᠠᠶᠠᠷᠬᠠᠨ ᠰᠦᠷᠴᠢᠭᠢᠨᠡᠬᠦ ᠰᠢᠭ᠌ ᠪᠣᠯᠤᠯᠠ᠃ ᠲᠡᠷᠡ ᠨᠢ ᠪᠣᠳᠣᠯᠭᠠ ᠪᠣᠳᠣᠵᠤ ᠪᠠᠢᠭᠠᠳ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠡᠯᠡᠭᠰᠡᠨ ᠰᠡᠭᠦᠯᠴᠢ ᠶ᠋ᠢᠨ ᠦᠭᠡ᠂ ᠲᠡᠪᠡᠷᠢᠨ ᠦᠨᠦᠰᠬᠦ᠂ ᠡᠮᠦᠨᠡ ᠨᠢ ᠶᠠᠪᠤᠵᠤ ᠪᠠᠢᠭᠠ ᠲᠠᠷᠢᠶᠠᠴᠢᠳ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠪᠠᠷᠬᠢᠷᠠᠬᠤ ᠡᠮᠡᠭᠲᠡᠢᠴᠦᠳ ᠦ᠋ᠨ ᠳᠠᠭᠤ ᠪᠣᠯᠤᠨ ᠬᠠᠵᠠᠭᠤ ᠳ᠋ᠤᠨᠢ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠸᠸᠱᠨ᠋ᠶᠠᠩᠺᠠ ᠨᠢᠳᠦ ᠪᠡᠨ ᠲᠣᠮᠣ ᠪᠣᠯᠭᠠᠵᠤ ᠬᠥᠳᠡᠯᠦᠯ ᠦᠭᠡᠢ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠵᠡᠷᠭᠡ ᠨᠢ ᠴᠥᠮ ᠰᠠᠨᠠᠭᠳᠠᠪᠠ᠃
ᠪᠠᠰᠠ ᠬᠥᠩᠭᠡᠨ ᠭᠤᠸᠠᠯᠢᠭ ᠫᠤᠯᠤᠸᠸᠼᠠ ᠮᠣᠷᠢ᠂ ᠲᠠᠯᠠ ᠳᠤᠮᠳᠠᠭᠤᠷ ᠳᠠᠪᠬᠢᠵᠤ ᠶᠠᠪᠤᠭᠰᠠᠨ ᠨᠢ ᠶᠠᠭᠤᠨ ᠠ᠋ᠴᠠ ᠴᠤ᠌ ᠢᠯᠡᠭᠦᠦ ᠲᠣᠳᠣᠬᠠᠨ ᠬᠠᠷᠠᠭᠳᠠᠬᠤ ᠰᠢᠭ᠋᠂ ᠲᠡᠭᠡᠭᠡᠳ ᠲᠡᠷᠢᠭᠦᠨ ᠦ᠌ ᠬᠡᠰᠦᠭᠦᠯ ᠳ᠋ᠦ᠍ ᠡᠨᠡ ᠮᠣᠷᠢ ᠲᠠᠢ ᠭᠠᠷᠴᠤ ᠨᠢᠭᠤᠭᠳᠠᠭᠰᠠᠨ ᠲᠠᠲ᠋ᠠᠷ ᠤ᠋ᠳ ᠢ᠋ ᠣᠯᠵᠤ ᠪᠠᠷᠢᠬᠤ ᠭᠡᠵᠦ ᠲᠣᠷᠣᠫᠺᠡ ᠪᠦᠬᠦ ᠪᠣᠳᠣᠯ ᠳ᠋ᠤ᠌ ᠡᠢᠮᠦ ᠶᠠᠭᠤᠮᠠ ᠣᠷᠣᠰᠢᠬᠤ ᠪᠣᠯᠤᠨᠠ᠃ ᠲᠠᠯᠠ ᠳᠣᠲᠣᠷᠠ ᠠ᠋ᠴᠠ ᠤᠷᠲᠤ ᠲᠠᠲᠠᠭᠰᠠᠨ ᠳᠠᠭᠤ ᠨᠤᠭᠤᠳ ᠭᠠᠷᠬᠤ ᠨᠢ ᠵᠠᠷᠢᠮ ᠳ᠋ᠠᠭᠠᠨ ᠰᠥᠨᠢ ᠣᠢ ᠳᠣᠲᠣᠷᠠ ᠰᠢᠷᠠ ᠰᠢᠪᠠᠭᠤ ᠲᠡᠭᠡᠵᠦ ᠪᠠᠷᠬᠢᠷᠠᠳᠠᠭ ᠪᠢᠯᠡ᠃ ᠴᠣᠬᠣᠮ ᠬᠠᠮᠢᠭᠠᠬᠢ ᠶ᠋ᠢ ᠪᠤᠤ ᠮᠡᠳᠡ᠂ ᠨᠠᠷᠢᠨ ᠢ᠋ᠶ᠋ᠠᠷ ᠣᠯᠢᠬᠤ ᠲᠠᠨᠢᠭᠳᠠᠭᠠ ᠦᠭᠡᠢ ᠳᠠᠭᠤᠨ ᠣᠢᠷᠠᠬᠠᠨ ᠰᠣᠨᠣᠰᠳᠠᠨᠠ᠃ ᠡᠨᠡ ᠶᠠᠭᠤ ᠪᠣᠢ? ᠴᠢᠨᠣᠠ ᠤᠤ? ᠡᠰᠡᠪᠡᠯ ᠲᠠᠲ᠋ᠠᠷ ᠤ᠋ᠨ ᠴᠡᠷᠢᠭ ᠦ᠋ᠳ ᠨᠢᠭᠡ ᠨᠢᠭᠡᠨ ᠳ᠋ᠡᠭᠡᠨ ᠬᠠᠷᠠᠩᠭᠤᠢ ᠳ᠋ᠤ᠌ ᠮᠡᠳᠡᠭᠡ ᠥᠭᠴᠦ ᠪᠠᠢᠨᠠ ᠤᠤ? ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ ᠳᠤᠮᠳᠠᠭᠤᠷ ᠲᠡᠭᠷᠢ ᠴᠡᠯᠮᠡᠵᠦ ᠬᠠᠭᠤᠷᠠᠢ ᠬᠠᠷᠭᠠᠨᠠ ᠶ᠋ᠢᠨ ᠮᠥᠴᠢᠷ ᠲᠣᠳᠣᠷᠠᠨ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃ ᠨᠢᠭᠡ ᠭᠠᠵᠠᠷ ᠳᠡᠷᠡᠰᠦᠨ ᠦ᠌ ᠡᠰᠢ ᠬᠦᠴᠦᠲᠡᠢ ᠪᠡᠷ ᠬᠥᠳᠡᠯᠪᠡ᠃ ᠠ᠋᠂ ᠡᠨᠡ ᠡᠩ ᠦ᠋ᠨ ᠬᠡᠷᠡᠭ ᠪᠢᠰᠢ᠂ ᠡᠪᠡᠰᠦᠨ ᠦ᠌ ᠴᠠᠭᠠᠨᠠ ᠠ᠋ᠴᠠ ᠬᠥᠮᠦᠨ ᠭᠡᠲᠡᠵᠦ ᠪᠠᠢᠨᠠ ᠭᠡᠵᠦ ᠪᠣᠳᠣᠲᠠᠯᠠ ᠬᠥᠮᠦᠨ ᠦ᠌ ᠲᠣᠯᠣᠭᠠᠢ ᠦᠵᠡᠭᠳᠡᠪᠡ᠃ ᠬᠥᠮᠦᠨ ᠥᠨᠳᠡᠢᠵᠦ ᠡᠷᠭᠢᠨ ᠲᠣᠭᠣᠷᠢᠨ( ᠢ᠋ )ᠬᠠᠷᠠᠭᠠᠳ ᠳᠠᠬᠢᠨ ᠴᠢᠮᠡᠭᠡ ᠭᠠᠷᠭᠠᠯ ᠦᠭᠡᠢ ᠡᠪᠡᠰᠦᠨ ᠳᠣᠲᠣᠷᠠ ᠬᠡᠪᠲᠡᠪᠡ᠃ ᠥᠪᠡᠷ ᠦ᠋ᠨ ᠬᠥᠮᠦᠨ ᠤᠤ? ᠳᠠᠢᠰᠤᠨ ᠤᠤ? ᠲᠤᠰᠠᠯᠠᠮᠵᠢ ᠡᠷᠢᠵᠦ ᠬᠠᠰᠬᠢᠷᠬᠤ ᠤᠤ? ᠳᠠᠢᠰᠤᠨ ᠪᠣᠯ ᠵᠢᠭᠤᠲᠠᠵᠤ ᠣᠷᠬᠢᠨᠠ᠃ ᠬᠡᠷᠪᠡ ᠥᠪᠡᠷ ᠦ᠋ᠨ ᠬᠥᠮᠦᠨ ᠪᠣᠯ ᠳᠡᠮᠡᠢ ᠪᠠᠷᠬᠢᠷᠠᠯᠠ ᠭᠡᠵᠦ ᠢᠨᠢᠶᠡᠳᠦᠮ ᠲᠣᠭᠯᠠᠭᠠᠮ ᠪᠣᠯᠭᠠᠨᠠ ᠭᠡᠵᠦ ᠪᠣᠳᠣᠭᠠᠳ ᠲᠤᠷᠤᠫᠺᠡ ᠠᠪᠢᠶᠠ ᠪᠦᠷᠢ ᠶ᠋ᠢ ᠴᠢᠩᠨᠠᠵᠤ ᠬᠦᠯᠢᠶᠡᠬᠦ ᠪᠡᠷ ᠰᠢᠢᠳᠴᠦ ᠳᠠᠬᠢᠭᠠᠳ ᠲᠣᠯᠣᠭᠠᠢ ᠬᠠᠷᠠᠭᠳᠠᠬᠤ ᠦᠭᠡᠢ ᠶᠤᠮ ᠪᠣᠯ ᠤᠤ? ᠭᠡᠵᠦ ᠪᠣᠳᠣᠪᠠ᠃ ᠭᠡᠲᠡᠯᠡ ᠳᠠᠬᠢᠭᠠᠳ ᠦᠯᠦ ᠲᠠᠨᠢᠭᠳᠠᠬᠤ ᠬᠥᠮᠦᠨ ᠪᠠᠷᠠᠭᠤᠨ ᠲᠠᠯᠠ ᠠ᠋ᠴᠠ ᠨᠢ ᠣᠢᠷᠠᠬᠠᠨ ᠦᠵᠡᠭᠳᠡᠯᠡ᠃ ᠲᠣᠷᠤᠫᠺᠠ ᠬᠦᠯᠢᠶᠡᠵᠦ ᠵᠡᠭᠦᠨ ᠲᠠᠯᠠ ᠠ᠋ᠴᠠ ᠢᠷᠡᠬᠦ ᠠᠷᠢᠶᠠᠲᠠᠨ ᠤ᠋ ᠠᠮᠢᠰᠬᠤᠭᠤᠯᠬᠤ ᠲᠠᠢ ᠶᠠᠭ ᠠᠳᠠᠯᠢ ᠲᠡᠢᠮᠦ ᠠᠮᠢᠰᠬᠤᠯ ᠢ᠋ ᠰᠣᠨᠣᠰᠪᠠ᠃ ᠬᠣᠨᠢᠨ ᠤ᠋ ᠨᠡᠬᠡᠢ ᠦᠨᠦᠷᠲᠦᠵᠦ᠂ ᠰᠢᠪᠡᠨᠡᠬᠦ ᠨᠢ ᠣᠢᠯᠠᠭᠠᠭᠳᠠᠬᠤ ᠦᠭᠡᠢ ᠶᠠᠷᠢᠶᠠ ᠪᠠᠢᠯᠠ᠃ ᠣᠷᠣᠰ ᠪᠤᠰᠤ ᠶᠠᠮᠠᠷ ᠬᠥᠮᠦᠨ ᠪᠣᠢ? ᠲᠡᠭᠦᠨ ᠦ᠌ ᠳᠡᠭᠡᠷᠡ ᠡᠳᠡ ᠪᠦᠷ ᠣᠢᠷᠠᠬᠠᠨ ᠢᠷᠡᠭᠰᠡᠨ ᠳ᠋ᠦ᠍ ᠤᠳᠠᠭᠠᠰᠢᠷᠠᠭᠤᠯᠵᠤ ᠪᠣᠯᠬᠤ ᠦᠭᠡᠢ᠃ ᠰᠡᠯᠡᠮᠡ ᠶᠤᠮ ᠤᠤ᠂ ᠨᠤᠮᠤ ᠰᠤᠮᠤ ᠪᠠᠷ ᠰᠦᠯᠪᠡᠵᠦ ᠮᠡᠳᠡᠨᠡ᠃ ᠲᠡᠭᠦᠨ ᠡᠴᠡ ᠤᠷᠢᠲᠠᠬᠤ ᠬᠡᠷᠡᠭᠲᠡᠢ᠁
ᠡᠪᠦᠭᠡᠳ ᠨᠠᠰᠤᠲᠠᠨ ᠤ᠋ ᠪᠠᠨ ᠡᠮᠦᠨᠡ ᠥᠪᠡᠷ ᠦ᠋ᠨ ᠡᠷᠡᠯᠬᠡᠭ ᠵᠣᠷᠢᠭᠲᠤ ᠶᠠᠪᠤᠳᠠᠯ ᠭᠠᠪᠢᠶᠠ ᠶ᠋ᠢ ᠪᠠᠢᠭᠤᠯᠵᠤ ᠶᠠᠭᠤ ᠮᠠᠭᠠᠳ ᠭᠡᠳᠡᠭ ᠰᠠᠶᠢᠬᠠᠨ ᠤ᠋ ᠪᠣᠳᠣᠯ ᠳᠠᠬᠢᠨ ᠪᠣᠳᠣᠭᠳᠠᠪᠠ᠃ ᠭᠠᠷ ᠲᠸ᠋ ᠪᠠᠢᠭᠠ ᠵᠢᠳᠠ᠂ ᠰᠢᠪᠦᠭᠡ ᠮᠡᠲᠦ ᠬᠤᠷᠴᠠ ᠦᠵᠦᠭᠦᠷ ᠲᠡᠢ ᠪᠥᠭᠡᠳ ᠪᠡᠯᠡᠨ ᠵᠡᠭᠦᠭᠡᠰᠦᠲᠡᠢ ᠲᠤᠯᠠ ᠲᠣᠷᠤᠫᠺᠠ ᠪᠦᠬᠦ ᠬᠦᠴᠦ ᠪᠡᠨ ᠬᠥᠪᠴᠢᠯᠡᠵᠦ ᠤᠷᠤᠭᠰᠢ ᠦᠰᠦᠷᠪᠡ᠃ ᠲᠡᠭᠡᠭᠡᠳ ᠵᠢᠳᠠ ᠪᠠᠨ ᠵᠥᠭᠡᠯᠡᠨ ᠶᠠᠭᠤᠮᠠᠨ ᠳ᠋ᠤ᠌ ᠲᠦᠷᠦᠲᠡᠯᠡ ᠶᠣᠢᠯᠠᠬᠤ ᠨᠢ ᠪᠡᠶᠡ ᠪᠡᠨ ᠪᠠᠷᠢᠭᠰᠠᠨ ᠰᠢᠨᠵᠢᠲᠡᠢ ᠴᠢᠩᠭᠠ ᠪᠤᠰᠤ ᠪᠠᠢᠯᠠ᠃ ᠲᠡᠳᠦᠢ ᠭ᠌ᠱᠠᠨ ᠵᠠᠭᠤᠷᠠ ᠳ᠋ᠤ᠌ ᠬᠦᠨᠳᠦ ᠵᠣᠪᠠᠯᠠᠩ ᠲᠣᠷᠤᠫᠺᠠ ᠶ᠋ᠢᠨ ᠳᠡᠭᠡᠷᠡ ᠡᠴᠡ ᠪᠠᠭᠤᠯᠠ᠃ ᠥᠭᠡᠷᠡ ᠨᠢᠭᠡ ᠨᠢ ᠬᠥᠯ ᠳᠡᠭᠡᠷᠡ ᠨᠢ ᠳᠠᠷᠤᠪᠠ᠃ ᠰᠢᠷᠦᠭᠦᠨ ᠠᠯᠠᠭᠠ ᠨᠢᠭᠤᠷ ᠢ᠋ ᠲᠠᠭᠯᠠᠵᠤ ᠬᠠᠮᠠᠷ ᠢ᠋ ᠨᠢ ᠳᠠᠷᠤᠨᠠ᠃ ᠠᠮᠠ ᠶ᠋ᠢ ᠨᠢ ᠴᠢᠩᠭᠠ ᠳᠠᠷᠤᠵᠤ ᠠᠮᠢᠰᠬᠤᠯ ᠦᠯᠦ ᠠᠪᠤᠭᠤᠯᠬᠤ ᠲᠤᠯᠠ ᠲᠣᠷᠤᠫᠺᠠ ᠮᠤᠯᠲᠤᠷᠠᠵᠤ ᠡᠷᠭᠢᠯᠳᠦᠬᠦ ᠶ᠋ᠢ ᠣᠷᠣᠯᠳᠣᠪᠠᠴᠤ ᠤᠯᠠᠮ ᠬᠦᠨᠳᠦᠷᠡᠵᠦ ᠪᠠᠭᠠᠯᠵᠤᠷ ᠢ᠋ ᠨᠢ ᠪᠠᠷᠢᠨᠠ᠃ ᠪᠠᠷᠬᠢᠷᠠᠵᠤ ᠴᠥ᠍ ᠪᠣᠯᠬᠤ ᠦᠭᠡᠢ᠂ ᠴᠢᠯᠥᠭᠡᠲᠡᠢ ᠠᠮᠢᠰᠬᠤᠯᠠᠵᠤ ᠴᠥ᠍ ᠪᠣᠯᠬᠤ ᠦᠭᠡᠢ᠂ ᠭᠠᠵᠠᠷ ᠢ᠋ᠶ᠋ᠠᠷ ᠴᠢᠷᠦᠭᠳᠡᠨ ᠶᠠᠪᠤᠵᠤ ᠪᠠᠢᠯᠠ᠃ ᠡᠴᠢᠭᠡ ᠳ᠋ᠡᠭᠡᠨ ᠮᠡᠳᠡᠭᠡ ᠶᠠᠭᠠᠬᠢᠵᠤ ᠥᠭᠳᠡᠭ ᠪᠢᠯᠡ? ᠵᠣᠪᠠᠯᠠᠩ ᠳ᠋ᠤ᠌ ᠤᠴᠠᠷᠠᠭᠰᠠᠨ ᠬᠦᠦ ᠪᠡᠨ ᠡᠴᠢᠭᠡ ᠨᠢ ᠣᠷᠬᠢᠬᠤ ᠦᠭᠡᠢ ᠰᠠᠨ ᠳ᠋ᠠ ᠭᠡᠵᠦ ᠪᠣᠳᠣᠪᠠᠴᠤ ᠲᠣᠷᠤᠫᠺᠠ ᠪᠠᠷᠬᠢᠷᠠᠬᠤ ᠪᠠᠢᠲᠤᠭᠠᠢ ᠠᠮᠢᠰᠬᠤᠭᠤᠯᠬᠤ ᠪᠡᠷᠬᠡᠲᠡᠢ ᠪᠥᠭᠡᠳ ᠲᠡᠭᠦᠨ ᠢ᠋ ᠡᠪᠡᠰᠦᠨ ᠳᠡᠭᠡᠭᠦᠷ ᠴᠢᠷᠴᠦ ᠬᠠᠲᠠᠭᠰᠠᠨ ᠤᠷᠭᠤᠮᠠᠯ ᠤ᠋ᠨ ᠮᠥᠴᠢᠷ ᠬᠠᠷᠭᠠᠨᠠ ᠨᠤᠭᠤᠳ ᠬᠤᠪᠴᠠᠰᠤ ᠶ᠋ᠢ ᠨᠢ ᠤᠷᠠᠨᠠ᠃ ᠭᠠᠷ ᠨᠢ ᠬᠦᠴᠦᠷᠬᠡᠭ ᠰᠢᠷᠦᠭᠦᠨ ᠪᠥᠭᠡᠳ ᠬᠠᠷᠢ ᠬᠥᠮᠦᠨ ᠦ᠌ ᠦᠨᠦᠷ ᠬᠠᠩᠬᠤᠯᠤᠨᠠ᠃ ᠠᠮᠠᠨ ᠳ᠋ᠤᠨᠢ ᠠᠯᠴᠢᠭᠤᠷ ᠴᠢᠬᠢᠵᠦ ᠨᠢᠭᠤᠷ ᠢ᠋ ᠨᠢ ᠪᠣᠭᠣᠵᠠᠢ᠃ ᠭᠠᠷ ᠬᠥᠯ ᠢ᠋ ᠨᠢ ᠣᠯᠣᠰᠣ ᠪᠠᠷ ᠴᠢᠩᠭᠠ ᠬᠦᠯᠢᠵᠡᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠨᠴᠡᠴᠡᠭ᠂ ᠠᠯᠲᠠᠨᠴᠢᠮᠡᠭ᠂ ᠭᠡᠷᠡᠯ᠂ ᠬᠡᠷᠡᠢᠳ· ᠮᠥᠩᠬᠡᠨᠠᠰᠤᠨ ᠂᠂
ᠬᠢᠨᠠᠭᠴᠢ᠄ ᠮᠥᠩᠬᠡᠨᠠᠰᠤᠨ᠂ ᠠᠷᠢᠭᠤᠨ᠂ ᠠᠯᠲᠠᠨᠴᠢᠮᠡᠭ᠂ ᠲ· ᠬᠦᠮᠦᠵᠢᠯᠲᠦ᠂ ᠪᠠᠯ