ᠪᠠᠲᠤ ᠬᠠᠭᠠᠨ 2-14 ᠦᠷᠡᠺ ᠠᠭᠤᠯᠠ ᠶ᠋ᠢᠨ ᠡᠪᠦᠭᠡᠨ ᠪᠥᠬᠡ-ᠪᠠᠲᠤ ᠬᠠᠭᠠᠨ ᠥᠷᠥᠨᠡ ᠵᠦᠭ ᠲᠦ᠍ ᠬᠥᠳᠡᠯᠦᠯᠡ-Bat khaan Бат хаан-ᠷᠣᠮᠠᠨ
171ᠠᠷᠪᠠᠨ ᠳᠥᠷᠪᠡ ᠦᠷᠡᠺ ᠠᠭᠤᠯᠠ ᠶ᠋ᠢᠨ ᠡᠪᠦᠭᠡᠨ ᠪᠥᠬᠡ
ᠨᠢᠭᠡ ᠮᠢᠩᠭᠠ ᠬᠣᠶᠠᠷ ᠵᠠᠭᠤᠨ ᠭᠤᠴᠢᠨ ᠳᠣᠯᠣᠳᠤᠭᠠᠷ ᠣᠨ ᠤ᠋ ᠨᠠᠮᠤᠷ ᠪᠠᠲᠤ ᠬᠠᠭᠠᠨ ᠤ᠋ ᠥᠷᠭᠥᠭᠡ ᠥᠷᠡᠺ ᠠᠭᠤᠯᠠᠨ ᠳ᠋ᠤ᠌ ᠣᠢᠷᠠᠬᠠᠨ ᠤᠰᠤ ᠶᠡᠬᠡᠲᠡᠢ ᠢᠵᠢᠯ ᠮᠥᠷᠡᠨ ᠳ᠋ᠦ᠍ ᠵᠡᠭᠦᠨ ᠭᠠᠷ ᠠ᠋ᠴᠠ ᠴᠢᠳᠬᠤᠭᠰᠠᠨ ᠶᠸᠷᠦᠰᠯᠠᠨᠠ ᠭᠣᠣᠯ ᠤ᠋ᠨ ᠠᠳᠠᠭ ᠲᠤᠰᠢᠶᠠ ᠪᠠᠷᠠᠭᠤᠨ ᠡᠷᠭᠢ ᠳᠡᠭᠡᠷᠡ ᠪᠠᠢᠵᠠᠢ᠃ ᠪᠣᠯᠭᠠᠷᠢ ᠬᠠᠷᠠ ᠠᠭᠤᠯᠠ ᠶ᠋ᠢᠨ ᠪᠠᠯ ᠳ᠋ᠤ᠌ ᠪᠠᠢᠭᠠ ᠪᠤᠯᠠᠭ ᠤ᠋ᠨ ᠳᠡᠷᠭᠡᠳᠡ ᠠᠯᠲᠠᠯᠢᠭ ᠬᠡ ᠤᠭᠠᠯᠵᠠ ᠪᠣᠯᠤᠭᠰᠠᠨ ᠠᠯᠲᠠᠨ ᠰᠢᠷᠠ ᠠᠰᠠᠷ ᠳᠥᠩᠭᠡᠵᠢ ᠲᠡᠷᠡ ᠠᠰᠠᠷ ᠤ᠋ᠨ ᠳᠡᠷᠭᠡᠳᠡ ᠶᠢᠰᠦᠨ ᠰᠢᠯᠢᠳᠡᠭ ᠮᠣᠷᠢ ᠪᠡᠯᠡᠬᠡᠨ ᠰᠣᠢᠯᠭᠠᠲᠠᠢ ᠪᠠᠢᠬᠤ ᠨᠢ ᠲᠡᠳᠡᠨ ᠦ᠌ ᠳᠣᠲᠣᠷᠠ ᠠ᠋ᠴᠠ ᠭᠤᠸᠠᠯᠢᠭ ᠬᠥᠩᠭᠡᠨ ᠬᠥᠳᠡᠯᠭᠡᠭᠡᠨ ᠢ᠋ᠶ᠋ᠡᠷ ᠵᠠᠩᠵᠤᠨ ᠤ᠋ ᠠᠯᠳᠠᠷᠲᠤ ᠴᠠᠭᠠᠨ ᠮᠣᠷᠢ ᠢᠯᠭᠠᠷᠠᠨ ᠦᠵᠡᠭᠳᠡᠳᠡᠭ ᠪᠢᠯᠡ᠃ ᠴᠢᠨᠠᠭᠰᠢᠳᠠ ᠪᠠᠢᠭᠤᠯᠤᠭᠰᠠᠨ ᠠᠰᠠᠷ ᠤ᠋ᠳ ᠨᠢ ᠭᠡᠪᠡᠯ ᠪᠠᠲᠤ ᠬᠠᠭᠠᠨ ᠤ᠋ ᠳᠣᠯᠣᠭᠠᠨ ᠣᠳᠣᠨ ᠭᠡᠵᠦ ᠠᠯᠳᠠᠷᠰᠢᠭᠰᠠᠨ ᠦᠵᠡᠰᠬᠦᠯᠡᠩᠲᠦ ᠡᠬᠡᠨᠡᠷ ᠦ᠋ᠳ ᠦ᠋ᠨ ᠬᠢᠨᠢ ᠣᠷᠳᠣᠨ ᠪᠢᠯᠡ᠃ ᠵᠠᠩᠵᠤᠨ ᠤ᠋ ᠠᠰᠠᠷ ᠤ᠋ᠨ ᠳᠡᠭᠡᠷᠡ ᠥᠨᠳᠥᠷ ᠬᠤᠯᠤᠰᠤᠨ ᠡᠰᠢᠨ ᠳ᠋ᠦ᠍ ᠬᠢᠲᠠᠳ ᠰᠡᠢᠯᠪᠦᠷᠢ ᠪᠡᠷ ᠴᠢᠮᠡᠭᠯᠡᠭᠳᠡᠭᠰᠡᠨ ᠲᠠᠪᠤᠨ ᠪᠤᠯᠤᠩ ᠲᠠᠢ ᠶᠢᠰᠦᠨ ᠬᠡᠯᠡ ᠲᠡᠢ ᠲᠤᠭ ᠬᠡᠢᠰᠴᠦ ᠪᠠᠢᠵᠠᠢ᠃
ᠴᠢᠩᠭᠢᠰ ᠦ᠋ᠨ ᠪᠤᠰᠤᠳ ᠬᠠᠭᠠᠨ ᠬᠥᠪᠡᠭᠦᠳ ᠨᠢ ᠥᠪᠡᠷᠰᠡᠳ ᠦ᠋ᠨ ᠠᠰᠠᠷ ᠤ᠋ᠳ ᠢ᠋ ᠭᠣᠣᠯ ᠤ᠋ᠨ ᠡᠷᠭᠢ ᠳᠠᠭᠠᠭᠤᠯᠤᠨ ᠪᠠᠢᠭᠤᠯᠤᠭᠰᠠᠨ ᠪᠠᠢᠯᠠ᠃ ᠠᠰᠠᠷ ᠪᠦᠬᠦᠨ᠂ ᠬᠦᠷᠢᠶᠡᠯᠡᠭᠰᠡᠨ ᠭᠡᠷ ᠦ᠋ᠳ ᠦ᠋ᠨ ᠲᠥᠪ ᠳᠤᠮᠳᠠ ᠣᠷᠣᠰᠢᠬᠤ ᠪᠥᠭᠡᠳ ᠡᠳᠡᠭᠡᠷ ᠭᠡᠷ ᠦ᠋ᠳ ᠲᠦ᠍ ᠪᠡᠶᠡ ᠪᠡᠨ ᠬᠠᠮᠠᠭᠠᠯᠠᠭᠴᠢ ᠲᠣᠷᠭᠤᠳ ᠪᠥᠬᠡ ᠨᠠᠷ ᠪᠣᠯᠤᠨ ᠮᠡᠷᠭᠡᠴᠢ ᠲᠥᠯᠭᠡᠴᠢᠳ᠂ ᠳᠡᠪᠢᠭᠦᠷ ᠪᠠᠷᠢᠭᠴᠢ ᠬᠢᠶᠡ ᠨᠠᠷ᠂ ᠤᠮᠳᠠᠭᠠᠨ ᠪᠠᠷᠢᠬᠤ ᠠᠶᠠᠭᠠᠴᠢ ᠲᠣᠭᠣᠭᠠᠴᠢ ᠨᠠᠷ᠂ ᠪᠥᠷᠭᠡᠳᠡᠴᠢᠨ᠂ ᠨᠣᠬᠠᠢᠴᠢᠨ᠂ ᠯᠢᠩᠪᠦᠴᠢᠨ᠂ ᠪᠦᠷᠢᠶᠡᠴᠢᠨ᠂ ᠡᠮᠴᠢ ᠨᠠᠷ ᠪᠣᠯᠤᠨ ᠪᠠᠰᠠ ᠪᠤᠰᠤ ᠪᠠᠷᠠ ᠪᠣᠯᠤᠭᠴᠢᠳ ᠰᠠᠭᠤᠨᠠ᠃ ᠭᠣᠣᠯ ᠤ᠋ᠨ ᠬᠣᠶᠠᠷ ᠡᠷᠭᠢ ᠪᠡᠷ ᠳᠠᠭᠤ ᠴᠢᠮᠡᠭᠡ ᠶᠡᠬᠡᠲᠡᠢ ᠯᠠᠬᠧᠷ ᠦ᠋ᠳ ᠦᠷᠭᠦᠯᠵᠢᠯᠡᠬᠦ ᠨᠢ ᠮᠣᠩᠭᠣᠯ ᠲᠠᠲ᠋ᠠᠷ ᠨᠠᠷ ᠤ᠋ᠨ ᠴᠡᠷᠢᠭ ᠲᠦ᠍ ᠨᠡᠢᠯᠡᠭᠰᠡᠨ ᠵᠦᠢᠯ ᠪᠦᠷᠢ ᠶ᠋ᠢᠨ ᠣᠪᠣᠭ ᠦᠨᠳᠦᠰᠦᠲᠡᠨ ᠪᠣᠯᠤᠨ ᠵᠢᠩᠬᠢᠨᠢ ᠴᠡᠷᠢᠭ ᠦ᠋ᠨ ᠣᠲ᠋ᠷᠢᠶᠠᠳ᠋ ᠤ᠋ᠳ ᠪᠠᠢᠵᠠᠢ᠃ ᠵᠠᠪᠢ ᠨᠤᠭᠤᠳ ᠪᠣᠯᠤᠨ ᠰᠠᠯ ᠨᠤᠭᠤᠳ ᠲᠠᠰᠤᠷᠠᠯᠲᠠ ᠦᠭᠡᠢ ᠬᠥᠪᠴᠦ᠂ ᠪᠠᠢᠯᠳᠤᠭᠴᠢᠳ ᠠᠳᠤᠭᠤ ᠮᠠᠯ ᠠᠴᠢᠶᠠ ᠪᠠᠷᠠᠭᠠ ᠵᠥᠭᠡᠭᠡᠳᠡᠭ ᠪᠠᠢᠯᠠ᠃ ᠭᠣᠣᠯ ᠤ᠋ᠨ ᠵᠡᠭᠦᠨ ᠡᠷᠭᠢ ᠳ᠋ᠡᠬᠢ ᠨᠣᠭᠣᠭᠠᠨ ᠵᠦᠯᠭᠡᠨ ᠳᠡᠭᠡᠷᠡ ᠤᠰᠤ ᠭᠠᠲᠤᠯᠵᠤ ᠠᠮᠵᠢᠭᠠ ᠦᠭᠡᠢ ᠣᠲ᠋ᠷᠢᠶᠠᠳ᠋ ᠤ᠋ᠨ ᠣᠯᠠᠨ ᠮᠢᠩᠭᠠᠨ ᠠᠭᠲᠠ ᠪᠡᠯᠴᠢᠭᠡᠷᠯᠡᠨ ᠪᠠᠢᠵᠠᠢ᠃ ᠭᠤᠷᠪᠠ ᠬᠣᠨᠣᠭᠰᠠᠨ ᠤ᠋ ᠬᠣᠢᠨᠠ ᠤᠰᠤ ᠶ᠋ᠢ ᠭᠠᠲᠤᠯᠤᠭᠰᠠᠨ ᠤ᠋ ᠳᠠᠷᠠᠭᠠ ᠡᠵᠡᠯᠡᠵᠦ ᠠᠪᠤᠭᠠ ᠦᠭᠡᠢ ᠪᠠ ᠲᠠᠨᠢᠵᠤ ᠮᠡᠳᠡᠭᠡ ᠦᠭᠡᠢ ᠪᠤᠰᠤᠳ ᠠᠷᠠᠳ ᠲᠦᠮᠡᠨ ᠦ᠌ ᠨᠤᠲᠤᠭᠯᠠᠬᠤ ᠶᠡᠬᠡ ᠭᠣᠣᠯ ᠤ᠋ᠨ ᠪᠠᠷᠠᠭᠤᠨ ᠡᠷᠭᠢ ᠳᠡᠭᠡᠷᠡ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠦ᠋ᠳ ᠢᠷᠡᠭᠰᠡᠨ ᠲᠤᠬᠠᠢ ᠳ᠋ᠤ᠌ ᠵᠣᠷᠢᠭᠤᠯᠵᠤ ᠪᠠᠶᠠᠷ ᠨᠠᠭᠠᠳᠤᠮ ᠵᠠᠷᠯᠢᠭᠳᠠᠵᠠᠢ᠃
ᠣᠲ᠋ᠷᠢᠶᠠᠳ᠋ ᠤ᠋ᠨ ᠳᠠᠷᠤᠭᠠ ᠨᠠᠷ ᠥᠪᠡᠷᠰᠡᠳ ᠦ᠋ᠨ ᠪᠠᠢᠯᠳᠤᠭᠠᠨ ᠤ᠋ ᠲᠤᠭ ᠤ᠋ᠳ ᠢ᠋ ᠦᠷᠠᠺ ᠠᠭᠤᠯᠠᠨ ᠤ᠋ ᠬᠢᠷᠠ ᠳᠡᠭᠡᠷᠡ ᠠᠪᠴᠢᠷᠠᠨ ᠬᠠᠳᠬᠤᠭᠰᠠᠨ ᠲᠤᠯᠠ ᠥᠨᠳᠥᠷ ᠡᠰᠢ ᠲᠡᠢ ᠬᠤᠷᠴᠠ ᠭᠢᠯᠠᠭᠠᠷ ᠲᠤᠭ ᠤ᠋ᠳ ᠬᠠᠪᠤᠷ ᠤ᠋ᠨ ᠬᠦᠴᠦᠲᠡᠢ ᠰᠠᠯᠬᠢᠨ ᠳ᠋ᠤ᠌ ᠰᠠᠪᠠᠭᠳᠠᠨ ᠬᠡᠢᠰᠴᠦ ᠪᠠᠢᠯᠠ᠃ ᠡᠨᠡ ᠣᠯᠠᠨ ᠲᠤᠭ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ ᠴᠢᠩᠭᠢᠰ ᠦ᠋ᠨ ᠠᠷᠪᠠᠨ ᠨᠢᠭᠡᠨ ᠬᠥᠪᠡᠭᠦᠳ ᠦ᠋ᠨ ᠠᠰᠤᠷᠤ ᠣᠯᠠᠨ ᠥᠩᠭᠡᠲᠦ ᠲᠣᠷᠭᠠᠨ ᠲᠤᠭ ᠢᠯᠭᠠᠷᠠᠨ ᠬᠠᠷᠠᠭᠳᠠᠭᠠᠳ ᠬᠦᠴᠦᠲᠦ ᠭᠣᠣᠯ ᠤ᠋ᠨ ᠪᠣᠷᠣ ᠳᠠᠪᠠᠯᠭᠠ ᠶ᠋ᠢ ᠰᠠᠯᠬᠢ ᠳᠡᠯᠡᠳᠦᠨ ᠬᠥᠭᠡᠭᠡᠵᠦ ᠤᠷᠲᠤ ᠬᠠᠷᠠ ᠵᠠᠪᠢ ᠨᠤᠭᠤᠳ ᠬᠤᠷᠳᠤᠯᠠᠨ ᠬᠥᠪᠴᠦ ᠠᠭᠤᠤ ᠶᠡᠬᠡ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠤᠭᠲᠤᠯᠭᠠ ᠶ᠋ᠢᠨ ᠪᠠᠶᠠᠷ ᠲᠤ᠌ ᠪᠠᠢᠯᠳᠤᠭᠴᠢᠳ ᠤ᠋ᠨ ᠶᠠᠭᠤᠮᠠ ᠶ᠋ᠢ ᠵᠥᠭᠡᠭᠡᠵᠦ ᠪᠠᠢᠯᠠ᠃ ᠪᠠᠲᠤ ᠬᠠᠭᠠᠨ ᠰᠢᠳᠠᠷ ᠬᠠᠭᠠᠳ ᠤ᠋ᠳ ᠲᠠᠢ ᠪᠠᠨ᠄《ᠡᠨᠡ ᠠᠭᠤᠯᠠ ᠶ᠋ᠢᠨ ᠡᠪᠦᠭᠡᠨ ᠪᠥᠬᠡ ᠶ᠋ᠢᠨ ᠢᠳᠡ ᠰᠢᠲᠠ( ᠷᠢᠳᠢ ᠰᠢᠳᠢ ) ᠡᠴᠡ ᠪᠣᠯᠭᠣᠮᠵᠢᠯᠠᠬᠤ ᠬᠡᠷᠡᠭᠲᠡᠢ 》ᠭᠡᠵᠦ ᠬᠡᠳᠦᠭᠦᠯᠡ ᠵᠥᠪᠯᠡᠵᠡᠢ᠃ 《ᠲᠡᠷᠡ ᠪᠥᠬᠡ ᠰᠢᠭᠤᠷᠭᠠ ᠰᠢᠭᠤᠷᠤᠭᠤᠯᠬᠤ ᠮᠠᠭᠠᠳ ᠦᠭᠡᠢ᠂ ᠬᠡᠷᠪᠡ ᠤᠰᠤ ᠶᠡᠬᠡᠲᠦ ᠭᠣᠣᠯ ᠦᠶᠡᠷᠯᠡᠬᠦ ᠶᠤᠮ ᠪᠣᠯ ᠪᠢᠳᠡᠨ ᠦ᠌ ᠵᠣᠴᠢᠳ ᠢ᠋ ᠬᠠᠮᠤᠵᠤ ᠤᠷᠤᠰᠬᠠᠵᠤ ᠪᠣᠯᠵᠣᠰᠢ ᠦᠭᠡᠢ 》ᠭᠡᠬᠦ ᠮᠡᠲᠦ ᠪᠡᠷ ᠵᠥᠪᠯᠡᠵᠡᠢ᠃ ᠲᠡᠭᠡᠵᠦ ᠪᠠᠢᠲᠠᠯᠠ ᠮᠣᠩᠭᠣᠯᠴᠤᠳ ᠦᠷᠠᠺ ᠠᠭᠤᠯᠠᠨ ᠳ᠋ᠤ᠌ ᠨᠢᠭᠤᠭᠳᠠᠭᠰᠠᠨ ᠡᠪᠦᠭᠡᠨ ᠪᠥᠬᠡ ᠶ᠋ᠢ ᠣᠯᠵᠠᠢ᠃ ᠭᠠᠽᠦᠢ᠍ᠺ ᠭᠡᠳᠡᠭ ᠡᠪᠦᠭᠡᠨ ᠪᠥᠬᠡ ᠦᠷᠠᠺ ᠠᠭᠤᠯᠠᠨ ᠤ᠋ ᠠᠭᠤᠢ ᠳ᠋ᠤ᠌ ᠨᠢᠭᠤᠭᠳᠠᠵᠤ ᠬᠠᠷᠢ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠤᠳᠤᠷᠢᠳᠤᠭᠴᠢ ᠳ᠋ᠤ᠌ ᠪᠠᠶᠠᠷ ᠬᠦᠷᠭᠡᠬᠦ ᠪᠡᠷ ᠭᠠᠷᠴᠤ ᠢᠷᠡᠭᠰᠡᠨ ᠦᠭᠡᠢ ᠪᠢᠯᠡ᠃ ᠠᠭᠤᠢ ᠶ᠋ᠢᠨ ᠠᠮᠠᠰᠠᠷ ᠳᠡᠭᠡᠷᠡ ᠬᠠᠷᠠᠭᠤᠯ ᠢ᠋ ᠲᠠᠯᠪᠢᠵᠤ ᠬᠡᠨ ᠢ᠋ ᠴᠦ᠍ ᠳᠣᠲᠣᠭᠰᠢ ᠣᠷᠣᠭᠤᠯᠳᠠᠭ ᠦᠭᠡᠢ ᠪᠠᠢᠯᠠ᠃ ᠪᠠᠲᠤ ᠬᠠᠭᠠᠨ ᠠ᠋ᠴᠠ ᠬᠠᠲᠠᠭᠤ ᠲᠤᠰᠢᠶᠠᠯ ᠭᠠᠷᠭᠠᠭᠰᠠᠨ ᠨᠢ ᠄《ᠮᠠᠨ ᠤ᠋ ᠴᠡᠷᠢᠭ ᠦ᠋ᠳ ᠪᠥᠬᠡ ᠨᠠᠷ ᠢ᠋ ᠥᠷᠥᠰᠢᠶᠡᠨ ᠬᠦᠨᠳᠦᠳᠬᠡᠬᠦ ᠬᠡᠷᠡᠭᠲᠡᠢ᠂ ᠬᠢᠯᠢᠩᠨᠡᠭᠦᠯᠵᠦ ᠶᠠᠭᠠᠬᠢᠭᠰᠠᠨ ᠴᠤ᠌ ᠪᠣᠯᠬᠤ ᠦᠭᠡᠢ᠃ᠬᠡᠷᠪᠡ ᠲᠡᠭᠷᠢ ᠳ᠋ᠦ᠍ ᠦᠯᠦ ᠰᠦᠰᠦᠭᠯᠡᠭᠴᠢᠳ᠂ ᠠᠶᠤᠩᠭᠠ ᠶ᠋ᠢᠨ ᠡᠵᠡᠨ ᠬᠥᠬᠡᠳᠡᠢ ᠮᠡᠷᠭᠡᠨ ᠲᠡᠭᠷᠢ ᠶ᠋ᠢ ᠬᠢᠯᠢᠩᠨᠡᠭᠦᠯᠬᠦ ᠶᠤᠮ ᠪᠣᠯ ᠭᠠᠵᠠᠷ ᠤ᠋ᠨ ᠶᠠᠮᠠᠷ ᠴᠤ᠌ ᠬᠦᠴᠦ ᠲᠡᠭᠦᠨ ᠢ᠋ ᠠᠶᠤᠩᠭᠠ ᠳ᠋ᠤ᠌ ᠨᠢᠷᠭᠡᠭᠦᠯᠬᠦ ᠡᠴᠡ ᠨᠢ ᠠᠪᠤᠷᠠᠵᠤ ᠴᠢᠳᠠᠬᠤ ᠦᠭᠡᠢ᠂ ᠲᠡᠢᠮᠦ ᠶ᠋ᠢᠨ ᠲᠤᠯᠠᠳᠠ ᠠᠯᠢ ᠴᠤ᠌ ᠦᠨᠳᠦᠰᠦᠲᠡᠨ ᠦ᠌ ᠢᠳᠤᠭᠠᠨ ᠪᠥᠬᠡ ᠨᠠᠷ ᠢ᠋ ᠠᠰᠠᠷᠠᠨ ᠬᠠᠮᠠᠭᠠᠯᠠᠵᠤ ᠲᠡᠳᠡᠨᠡᠷ ᠢ᠋ᠶ᠋ᠡᠷ ᠰᠠᠢᠨ ᠪᠠ ᠮᠠᠭᠤ ᠵᠦᠭ ᠦ᠋ᠨ ᠲᠩᠷᠢ ᠳ᠋ᠦ᠍ ᠵᠠᠯᠪᠠᠷᠢᠯ ᠦᠢᠯᠡᠳᠦᠭᠦᠯᠵᠦ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠦ᠋ᠨ ᠢᠯᠠᠯᠲᠠ ᠳ᠋ᠤ᠌ ᠬᠦᠴᠦᠨ ᠲᠤᠰᠠᠯᠠᠮᠵᠢ ᠭᠤᠶᠤᠯᠭᠠᠵᠣ ᠪᠠᠢᠬᠤ ᠬᠡᠷᠡᠭᠲᠡᠢ 》ᠭᠡᠵᠡᠢ᠃
ᠪᠠᠲᠤ ᠬᠠᠭᠠᠨ ᠠ᠋ᠴᠠ ᠪᠠᠰᠠ ᠲᠤᠰᠢᠶᠠᠭᠰᠠᠨ ᠨᠢ᠄
— ᠬᠥᠬᠡᠳᠡᠢ ᠮᠡᠷᠭᠡᠨ ᠦ᠌ ᠶᠡᠷᠦᠩᠬᠡᠢ ᠪᠥᠬᠡ ᠭᠠᠽᠤᠢ᠍ᠺ ᠭᠡᠭᠴᠢ ᠨᠠᠭᠠᠳᠤᠮ ᠳ᠋ᠤ᠌ ᠢᠷᠡᠵᠦ ᠵᠠᠯᠪᠠᠷᠢᠯ ᠤᠩᠰᠢᠵᠤ ᠦᠭᠭᠦᠭᠲᠦᠨ ᠭᠡᠬᠦ ᠳ᠋ᠦ᠍ᠨᠢ ᠪᠤᠰᠤᠳ ᠪᠥᠬᠡ ᠨᠠᠷ ᠤ᠋ᠨ ᠢᠷᠡᠵᠦ ᠬᠡᠯᠡᠭᠰᠡᠨ ᠨᠢ᠄
— ᠭᠠᠽᠦᠢ᠍ᠺ ᠪᠣᠯ ᠮᠢᠩᠭᠠ ᠭᠠᠷᠤᠢ ᠨᠠᠰᠤᠯᠠᠬᠤ ᠵᠠᠪᠰᠠᠷ ᠭᠠᠵᠠᠷ ᠲᠤ᠌ ᠨᠠᠭᠠᠯᠳᠤᠵᠤ ᠭᠠᠵᠠᠷ ᠲᠠᠢ ᠦᠷᠭᠦᠯᠵᠢ ᠪᠣᠯᠤᠭᠰᠠᠨ ᠲᠤᠯᠠ ᠲᠡᠭᠦᠨ ᠢ᠋ ᠨᠢᠭᠡ ᠭᠠᠵᠠᠷ ᠠ᠋ᠴᠠ ᠬᠥᠳᠡᠯᠭᠡᠵᠦ ᠪᠣᠯᠬᠤ ᠦᠭᠡᠢ ᠭᠡᠵᠡᠢ᠃
ᠪᠠᠲᠤ ᠬᠠᠭᠠᠨ ᠥᠪᠡᠷ ᠦ᠋ᠨ ᠰᠡᠴᠡᠨ ᠵᠥᠪᠯᠡᠭᠴᠢ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠲᠤ᠌ ᠬᠡᠯᠡᠭᠰᠡᠨ ᠨᠢ᠄
— ᠬᠥᠬᠡᠳᠡᠢ ᠮᠡᠷᠭᠡᠨ ᠦ᠌ ᠦᠢᠯᠡᠴᠢᠯᠡᠭᠴᠢ ᠶ᠋ᠢ ᠣᠯᠵᠤ ᠠᠭᠤᠯᠵᠠᠬᠤ ᠬᠡᠷᠡᠭᠲᠡᠢ᠂ ᠲᠡᠭᠡᠭᠡᠳ ᠲᠡᠷᠡ ᠨᠢ ᠠᠭᠤᠢ ᠳᠣᠲᠣᠷᠠ ᠪᠠᠨ ᠶᠠᠭᠤ ᠬᠢᠵᠦ ᠪᠠᠢᠭᠠ ᠶ᠋ᠢ ᠮᠡᠳᠡᠬᠦ ᠨᠢ ᠴᠢᠬᠤᠯᠠ᠃ ᠲᠡᠷᠡ ᠪᠢᠳᠡᠨ ᠢ᠋ ᠡᠰᠡᠷᠭᠦᠴᠡᠨ ᠪᠥᠬᠡᠯᠡᠵᠦ ᠪᠠᠢᠬᠤ ᠶᠠᠭᠤ ᠮᠠᠭᠠᠳ᠂ ᠡᠰᠡᠪᠡᠯ ᠲᠡᠷᠡ ᠬᠥᠭᠰᠢᠨ ᠳ᠋ᠦ᠍ ᠦᠨᠢᠶᠡ ᠮᠠᠯ ᠪᠣᠯᠤᠨ ᠶᠠᠭᠤ ᠳᠤᠷᠠᠯᠠᠭᠰᠠᠨ ᠢ᠋ ᠨᠢ ᠪᠡᠯᠡᠭᠯᠡᠵᠦ ᠦᠵᠡᠳᠡᠭ ᠶᠤᠮ ᠪᠣᠯ ᠤᠤ? ᠡᠰᠡᠪᠡᠯ ᠲᠡᠭᠦᠨ ᠢ᠋ ᠦᠭᠡᠢ ᠬᠢᠬᠦ ᠤᠤ? ᠭᠡᠬᠦ ᠳ᠋ᠦ᠍ᠨᠢ:
— ᠶᠡᠬᠡ ᠨᠠᠰᠤᠲᠠᠨ ᠨᠤᠭᠤᠳ ᠭᠠᠭᠴᠠᠬᠠᠨ ᠠᠯᠳᠠᠷ ᠬᠦᠨᠳᠦ ᠪᠠ ᠠᠯᠲᠠᠨ ᠮᠥᠩᠭᠥᠨ ᠳ᠋ᠦ᠍ ᠳᠤᠷᠠᠯᠠᠨᠠ᠂ ᠮᠢᠨᠦ ᠪᠣᠳᠣᠬᠤ ᠳ᠋ᠤ᠌ ᠲᠡᠷᠡ ᠨᠢ ᠰᠦᠰᠦᠭᠲᠡᠨ ᠨᠠᠷ ᠠ᠋ᠴᠠ ᠠᠯᠲᠠᠨ ᠮᠥᠩᠭᠥᠨ ᠴᠤᠭᠯᠠᠭᠤᠯᠵᠤ ᠠᠮᠵᠢᠭᠰᠠᠨ ᠲᠤᠯᠠ ᠲᠠᠨ ᠤ᠋ ᠪᠦᠬᠦ ᠵᠠᠮ ᠳ᠋ᠠᠭᠠᠨ ᠴᠤᠭᠯᠠᠭᠤᠯᠤᠭᠰᠠᠨ ᠠᠯᠲᠠᠨ ᠠ᠋ᠴᠠ ᠢᠯᠡᠭᠦᠦ ᠪᠠᠢᠨᠠ ᠤᠤ ᠭᠡᠬᠦ ᠡᠴᠡ ᠪᠠᠭᠠ ᠪᠠᠢᠬᠤ ᠦᠭᠡᠢ ᠨᠢ ᠮᠠᠭᠠᠳ ᠭᠡᠬᠦ ᠳ᠋ᠦ᠍ᠨᠢ
ᠪᠠᠲᠤ ᠬᠠᠭᠠᠨ ᠤᠷᠤᠭᠤ ᠴᠢᠷᠠᠢᠯᠠᠵᠤ ᠬᠢ ᠬᠢ ᠭᠡᠵᠦ ᠢᠨᠢᠶᠡᠭᠡᠳ᠂
— ᠪᠢ ᠲᠡᠭᠦᠨ ᠢ᠋ ᠲᠡᠮᠡᠭᠡᠨ ᠳᠡᠭᠡᠷᠡ ᠲᠡᠩᠨᠡᠭᠦᠯᠵᠦ ᠠᠪᠴᠢᠷᠠᠨᠠ ᠭᠡᠪᠡ᠃ ᠰᠦᠪᠡᠭᠡᠳᠡᠢ ᠵᠠᠭᠤᠲᠤ ᠶ᠋ᠢᠨ ᠳᠠᠷᠤᠭᠠ ᠠᠷᠠᠫᠱᠠ ᠶ᠋ᠢ ᠳᠠᠭᠤᠳᠠᠮᠠᠭᠴᠠ ᠲᠡᠷᠡ ᠳᠠᠷᠤᠢ ᠢᠷᠡᠵᠦ ᠰᠦᠪᠡᠭᠡᠲᠡᠢ ᠶ᠋ᠢᠨ ᠦᠭᠡ ᠶ᠋ᠢ ᠠᠩᠬᠠᠷᠤᠯᠲᠠᠢ ᠪᠠᠷ ᠰᠣᠨᠣᠰᠤᠭᠠᠳ᠂
— ᠪᠢ ᠭᠠᠭᠴᠠᠭᠠᠷ ᠶᠠᠭᠤ ᠴᠤ᠌ ᠬᠢᠵᠦ ᠴᠢᠳᠠᠬᠤ ᠦᠭᠡᠢ ᠪᠢᠵᠡ ᠭᠡᠬᠦ ᠳ᠋ᠦ᠍ᠨᠢ᠂
— ᠴᠢᠮᠠᠲᠤ ᠮᠠᠨ ᠤ᠋ ᠪᠥᠬᠡ ᠨᠠᠷ ᠲᠤᠰᠠᠯᠠᠯᠴᠠᠨᠠ ᠭᠡᠪᠡ᠃
— ᠦᠭᠡᠢ᠂ ᠡᠨᠳᠡ ᠲᠡᠳᠡᠨᠡᠷ ᠦ᠋ᠨ ᠬᠡᠷᠡᠭ ᠠᠯᠠᠭᠠ᠂ ᠬᠠᠷᠢᠨ ᠵᠠᠭᠤᠨ ᠨᠥᠬᠥᠳ ᠬᠡᠷᠡᠭ ᠲᠡᠢ ᠭᠡᠬᠦ ᠳ᠋ᠦ᠍ᠨᠢ᠂
— ᠭᠤᠷᠪᠠᠨ ᠵᠠᠭᠤ ᠶ᠋ᠢ ᠴᠦ᠍ ᠠᠪᠤᠭᠲᠤᠨ᠂ ᠬᠠᠷᠢᠨ ᠬᠥᠭᠰᠢᠨ ᠭᠠᠽᠥ᠋ᠺ ᠲᠦ᠍ ᠳᠣᠭᠰᠢᠨ ᠰᠠᠬᠢᠭᠤᠰᠤ ᠲᠤᠰᠠᠯᠠᠵᠤ ᠪᠣᠯᠤᠨᠠ ᠰᠢᠦ᠂ ᠲᠡᠳᠡᠨᠡᠷ ᠢ᠋ ᠬᠢᠯᠢᠩᠨᠡᠭᠦᠯᠬᠦ ᠦᠭᠡᠢ ᠶ᠋ᠢ ᠪᠣᠳᠣᠵᠤ ᠪᠣᠯᠭᠣᠮᠵᠢᠯᠠᠨ ᠠᠩᠬᠠᠷᠤᠭᠲᠤᠨ ᠭᠡᠪᠡ᠃
ᠰᠦᠪᠡᠭᠡᠳᠡᠢ ᠵᠠᠭᠤᠲᠤ ᠶ᠋ᠢᠨ ᠬᠣᠶᠠᠷ ᠳᠠᠷᠤᠭᠠ ᠶ᠋ᠢ ᠠᠪᠴᠢᠷᠠᠭᠤᠯᠵᠤ ᠠᠷᠠᠫᠱᠠ ᠠ᠋ᠴᠠ ᠲᠡᠳᠡᠨᠡᠷ ᠲᠦ᠍ ᠲᠠᠢᠯᠪᠤᠷᠢᠯᠠᠬᠤ ᠶ᠋ᠢ ᠰᠣᠨᠣᠰᠪᠠ᠃
— ᠪᠢᠳᠡᠨᠡᠷ ᠡᠨᠡ ᠠᠭᠤᠯᠠ ᠠ᠋ᠴᠠ ᠪᠦᠭᠦᠳᠡ ᠡᠴᠡ ᠬᠦᠴᠦᠲᠦ ᠮᠡᠬᠡ ᠶᠡᠬᠡᠲᠦ ᠬᠤᠪᠢᠯᠭᠠᠨ ᠪᠥᠬᠡ ᠭᠠᠽᠥ᠋ᠺ ᠢ᠋ ᠭᠠᠷᠭᠠᠵᠤ ᠠᠪᠴᠢᠷᠠᠬᠤ ᠬᠡᠷᠡᠭ ᠲᠡᠢ ᠪᠣᠯᠪᠠ᠃ ᠥᠭᠦᠯᠡᠬᠦ ᠨᠢ᠄ ᠲᠡᠷᠡ ᠪᠥᠬᠡ ᠪᠠᠭᠠᠪᠠᠭᠠᠢ᠂ ᠮᠣᠭᠠᠢ᠂ ᠬᠢᠷᠰᠠ ᠪᠤᠶᠤ ᠬᠣᠷᠣᠬᠠᠢ ᠪᠣᠯᠵᠤ ᠬᠤᠪᠢᠷᠠᠳᠠᠭ ᠭᠡᠨᠡ᠃ ᠬᠡᠳᠦᠢ ᠲᠡᠢᠮᠦ ᠪᠣᠯᠤᠭᠰᠠᠨ ᠴᠤ᠌ ᠠᠶᠤᠬᠤ ᠬᠡᠷᠡᠭ ᠦᠭᠡᠢ᠃ ᠪᠢᠳᠡᠨ ᠦ᠌ ᠬᠠᠮᠲᠤ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠤ᠋ᠨ ᠲᠤᠰᠢᠶᠠᠯ ᠪᠠᠢᠨᠠ᠃ ᠡᠨᠡ ᠪᠣᠯ ᠲᠡᠭᠷᠢ ᠪᠤᠰᠤ ᠬᠥᠮᠦᠰ ᠦ᠋ᠨ ᠳᠣᠲᠣᠷᠠ ᠬᠠᠮᠤᠭ ᠬᠦᠴᠦᠲᠡᠢ ᠨᠢ ᠶᠤᠮ᠃ ᠡᠭᠦᠨ ᠢ᠋ ᠪᠠᠢᠯᠳᠤᠭᠠᠨ ᠤ᠋ ᠠᠭᠤᠤ ᠶᠡᠬᠡ ᠰᠦᠯᠳᠡ ᠲᠡᠭᠷᠢ ᠬᠠᠮᠠᠭᠠᠯᠠᠵᠤ ᠪᠠᠢᠭᠠ ᠶᠤᠮ ᠭᠡᠬᠦ ᠳ᠋ᠦ᠍ᠨᠢ᠂
— ᠵᠥᠪ ᠭᠡᠵᠦ ᠰᠦᠪᠡᠭᠡᠳᠡᠢ ᠬᠡᠯᠡᠪᠡ᠃
— ᠪᠢᠳᠡ ᠠᠶᠤᠵᠤ ᠪᠠᠢᠭᠠ ᠪᠡᠶᠡᠰ ᠢ᠋ᠶ᠋ᠡᠷ ᠶᠠᠩᠵᠤᠯᠳᠤᠬᠤ ᠪᠣᠯ ᠠᠶᠤᠬᠤ ᠶᠠᠪᠤᠳᠠᠯ ᠦᠭᠡᠢ᠂ ᠬᠠᠷᠢᠨ ᠮᠣᠭᠠᠢ ᠪᠠ ᠬᠣᠷᠣᠬᠠᠢ ᠪᠣᠯᠤᠨ ᠬᠤᠪᠢᠷᠠᠭᠰᠠᠨ ᠪᠥᠬᠡ ᠶ᠋ᠢ ᠣᠯᠵᠤ ᠪᠠᠷᠢᠬᠤ ᠶᠠᠪᠤᠳᠠᠯ ᠪᠢᠳᠡᠨ ᠳ᠋ᠦ᠍ ᠲᠣᠬᠢᠶᠠᠯᠳᠤᠭᠠ ᠦᠭᠡᠢ ᠬᠡᠷᠡᠭ ᠶᠤᠮ ᠭᠡᠵᠦ ᠵᠠᠭᠤᠲᠤ ᠶ᠋ᠢᠨ ᠳᠠᠷᠤᠭᠠ ᠶ᠋ᠢᠨ ᠨᠢᠭᠡᠨ ᠨᠢ ᠰᠢᠪᠡᠨᠡᠪᠡ᠃
ᠥᠨᠥᠳᠥᠷ ᠲᠤᠷᠰᠢᠵᠤ ᠦᠵᠡᠭᠲᠦᠨ᠂ ᠬᠡᠷᠪᠡ ᠬᠡᠷᠡᠭ ᠴᠢᠨᠢ ᠪᠦᠲᠦᠪᠡᠯ ᠲᠠᠨᠠᠷ ᠪᠠᠲᠤ ᠬᠠᠭᠠᠨ ᠤ᠋ ᠶᠡᠬᠡ ᠱᠠᠩᠨᠠᠯ ᠢ᠋ ᠬᠦᠷᠲᠡᠬᠦ ᠪᠣᠯᠤᠨᠠ ᠭᠡᠪᠡ᠃
— ᠲᠡᠢᠮᠦ ᠲᠡᠢᠮᠦ ᠱᠠᠩᠨᠠᠯ ᠲᠠᠢ ᠭᠡᠵᠦ ᠰᠦᠪᠡᠭᠡᠳᠠᠢ ᠬᠡᠯᠡᠪᠡ᠃
— ᠢᠩᠭᠢᠵᠦ ᠰᠢᠢ᠍ᠳᠴᠡᠭᠡᠶᠡ᠂ ᠲᠡᠷᠡ ᠪᠣᠯ ᠦᠨᠡᠭᠡ ᠳᠣᠷᠣᠭᠣ ᠮᠡᠲᠦ ᠨᠦᠬᠡᠨ ᠳ᠋ᠦ᠍ ᠠᠮᠢᠳᠤᠷᠠᠨᠠ᠃ ᠬᠡᠷᠪᠡ ᠨᠣᠬᠠᠢ ᠨᠦᠬᠡ ᠶ᠋ᠢ ᠨᠢ ᠰᠠᠮᠤᠷᠳᠠᠬᠤ ᠪᠣᠯ ᠵᠢᠭᠤᠲᠠᠬᠤ ᠶ᠋ᠢᠨ ᠲᠤᠯᠠᠳᠠ ᠪᠡᠯᠡᠳᠬᠡᠯ ᠵᠠᠮ ᠣᠯᠠᠨᠲᠠᠢ ᠪᠠᠢᠳᠠᠭ᠃
—ᠣᠢᠯᠠᠭᠠᠪᠠ ᠤᠤ?
—ᠨᠥᠬᠥᠳ ᠲᠠᠨᠠᠷ ᠠᠭᠤᠯᠠ ᠶ᠋ᠢ ᠪᠦᠰᠡᠯᠡᠵᠦ ᠠᠪᠤᠭᠠᠳ ᠪᠡᠯᠡᠳᠬᠡᠯ ᠭᠠᠷᠠᠮ ᠢ᠋ ᠣᠯᠵᠠᠭᠠ! ᠬᠥᠭᠰᠢᠨ ᠪᠥᠬᠡ ᠠᠭᠤᠢ ᠳ᠋ᠠᠭᠠᠨ ᠪᠠᠢᠪᠠᠯ ᠲᠠᠨᠠᠷ ᠲᠡᠭᠦᠨ ᠢ᠋ ᠪᠠᠷᠢᠵᠤ ᠪᠣᠯᠤᠨᠠ᠃ ᠬᠡᠷᠪᠡ ᠵᠢᠭᠤᠲᠠᠯᠠ ᠭᠡᠰᠡᠨ ᠴᠦ᠍ ᠬᠣᠯᠠᠳᠠᠭᠠ ᠦᠭᠡᠢ( ᠪᠣᠯ )ᠣᠯᠵᠤ ᠪᠠᠷᠢᠭᠲᠤᠨ᠃
— ᠣᠢᠯᠠᠭᠠᠪᠠ ᠤᠤ?
— ᠲᠤᠩ ᠠᠩᠬᠠᠷᠤᠯᠲᠠᠢ ᠬᠠᠷᠠᠵᠠᠭᠠᠨᠠ ᠰᠢᠦ᠃ ᠡᠨᠳᠡ ᠲᠡᠨᠳᠡ ᠪᠡᠯᠡᠳᠬᠡᠭᠰᠡᠨ ᠮᠣᠷᠢ ᠲᠡᠮᠡᠭᠡ ᠪᠠᠢᠵᠤ ᠮᠡᠳᠡᠨᠡ᠃ ᠬᠥᠮᠦᠨ ᠣᠷᠣᠵᠤ ᠪᠣᠯᠬᠤ ᠨᠦᠬᠡ ᠠᠭᠤᠢ ᠪᠦᠷᠢ ᠶ᠋ᠢ ᠰᠢᠯᠭᠠᠨ ᠦᠵᠡᠭᠡᠳ ᠲᠡᠭᠦᠨ ᠦ᠌ ᠳᠡᠷᠭᠡᠳᠡ ᠬᠠᠷᠠᠭᠤᠯ ᠲᠠᠯᠪᠢᠬᠤ ᠬᠡᠷᠡᠭᠲᠡᠢ᠃
—ᠮᠡᠳᠡᠪᠡ ᠤᠤ?
—ᠨᠣᠬᠠᠢ ᠠᠪᠴᠤ ᠶᠠᠪᠤᠭᠲᠤᠨ᠃ ᠨᠣᠬᠠᠢ ᠪᠣᠯ ᠶᠡᠬᠡ ᠲᠤᠰᠠ ᠪᠣᠯᠤᠨᠠ ᠰᠢᠦ᠃ ᠪᠢ ᠶᠡᠬᠡ ᠠᠭᠤᠢ ᠶ᠋ᠢᠨ ᠭᠣᠣᠯ ᠡᠭᠦᠳᠡ ᠪᠡᠷ ᠣᠷᠣᠵᠤ ᠪᠥᠬᠡ ᠨᠠᠷ ᠪᠣᠯᠤᠨ ᠭᠠᠽᠤᠢ᠍ᠺ ᠤ᠋ᠨ ᠲᠤᠰᠠᠯᠠᠭᠴᠢᠳ ᠢ᠋ ᠰᠡᠷᠡᠮᠵᠢᠯᠡᠨᠡ ᠭᠡᠵᠦ ᠠᠷᠠᠫᠱᠠ ᠬᠡᠯᠡᠪᠡ᠃ ᠲᠡᠭᠡᠭᠡᠳ ᠭᠤᠷᠪᠠᠨ ᠵᠠᠭᠤᠨ ᠮᠣᠷᠢᠲᠤ ᠴᠡᠷᠢᠭ ᠢ᠋ ᠲᠠᠩᠨᠠᠭᠤᠯ ᠳ᠋ᠤ᠌ ᠭᠠᠷᠭᠠᠯᠠ᠃ ᠴᠥᠮ ᠳ᠋ᠦ᠍ᠨᠢ ᠱᠠᠩᠨᠠᠯ ᠤ᠋ᠨ ᠲᠤᠬᠠᠢ ᠳᠤᠷᠠᠳᠤᠭᠰᠠᠨ᠃ ᠲᠡᠳᠡ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠦᠷᠡᠺ ᠠᠭᠤᠯᠠ ᠶ᠋ᠢᠨ ᠪᠥᠬᠡ ᠨᠠᠷ ᠤ᠋ᠨ ᠨᠢᠭᠤᠭᠰᠠᠨ ᠠᠯᠲᠠᠨ ᠳ᠋ᠤ᠌ ᠬᠦᠰᠡᠯ ᠲᠠᠯᠪᠢᠨᠠ᠃ ᠮᠣᠷᠢᠲᠤ ᠴᠡᠷᠢᠭ ᠦ᠋ᠳ ᠲᠠᠷᠠᠵᠤ ᠠᠭᠤᠯᠠ ᠶ᠋ᠢ ᠲᠣᠭᠣᠷᠢᠨ ᠪᠦᠰᠡᠯᠡᠵᠦ ᠳᠣᠪᠣ ᠪᠦᠷᠢ᠂ ᠨᠦᠬᠡ ᠪᠦᠷᠢ ᠶ᠋ᠢ ᠲᠡᠮᠲᠡᠷᠢᠵᠦ ᠪᠠᠢᠬᠤ ᠳ᠋ᠤ᠌ ᠠᠷᠠᠫ᠊ᠱᠠ ᠠᠭᠤᠢ ᠳ᠋ᠤ᠌ ᠣᠷᠣᠵᠤ ᠭᠣᠣᠯ ᠡᠭᠦᠳᠡᠨ ᠦ᠌ ᠳᠡᠷᠭᠡᠳᠡ ᠬᠦᠯᠢᠶᠡᠪᠡ᠃ ᠣᠷᠣᠬᠤ ᠭᠠᠵᠠᠷ ᠨᠢ ᠠᠰᠬᠠ ᠴᠢᠯᠠᠭᠤᠨ ᠪᠣᠯᠤᠨ ᠲᠣᠮᠣ ᠬᠠᠳᠠ ᠪᠠᠷ ᠪᠦᠰᠡᠯᠡᠭᠳᠡᠵᠡᠢ᠃ ᠭᠡᠲᠡᠯᠡ ᠨᠠᠷᠢᠬᠠᠨ ᠬᠠᠪᠴᠢᠯ ᠠ᠋ᠴᠠ ᠤᠷᠲᠤ ᠦᠰᠦᠲᠡᠢ ᠯᠣᠪᠤᠤᠵᠠ ᠡᠮᠦᠰᠦᠭᠰᠡᠨ ᠲᠣᠯᠣᠭᠠᠢ ᠴᠤᠬᠤᠢᠯᠠ᠃ ᠲᠡᠷᠡ ᠨᠢ ᠪᠤᠭᠤᠷᠤᠯ ᠰᠠᠬᠠᠯ ᠲᠠᠢ ᠪᠠ ᠨᠢᠯᠪᠤᠰᠤ ᠴᠤᠪᠤᠭᠰᠠᠨ ᠤᠯᠠᠭᠠᠨ ᠨᠢᠳᠦ ᠲᠡᠢ ᠶ᠋ᠢᠨ ᠳᠡᠭᠡᠷᠡ ᠰᠢᠳᠦ ᠦᠭᠡᠢ ᠠᠮᠠ ᠪᠠᠷ ᠢ᠋ᠶ᠋ᠠᠨ ᠦᠯᠦ ᠣᠢᠯᠠᠭᠠᠭᠳᠠᠬᠤ ᠶᠠᠭᠤᠮᠠ ᠴᠠᠯᠴᠢᠵᠤ ᠪᠠᠢᠯᠠ᠃
—ᠡᠨᠡ ᠶᠡᠷᠦᠩᠬᠡᠢ ᠪᠥᠬᠡ ᠨᠢ ᠮᠥᠨ ᠤᠤ? ᠭᠡᠵᠦ ᠠᠷᠠᠫᠱᠠ ᠯᠠᠪᠯᠠᠪᠠᠯ᠂
— ᠦᠭᠡᠢ᠂ ᠡᠨᠡ ᠪᠣᠯ ᠲᠡᠭᠦᠨ ᠦ᠌ ᠠᠴᠢ᠂ ᠠᠴᠢ ᠬᠦᠦ᠃ ᠭᠠᠽᠥ᠋ᠺ ᠥᠪᠡᠷ ᠢ᠋ᠶ᠋ᠡᠨ ᠠᠭᠤᠢ ᠶ᠋ᠢᠨ ᠢᠷᠣᠭᠠᠷ ᠲᠤ᠌ ᠬᠥᠳᠡᠯᠵᠦ ᠴᠢᠳᠠᠬᠤ ᠦᠭᠡᠢ ᠰᠠᠭᠤᠵᠤ ᠪᠠᠢᠨᠠ᠃ ᠤᠴᠢᠷ ᠨᠢ ᠲᠡᠭᠦᠨ ᠦ᠌ ᠬᠥᠯ ᠡᠴᠡ ᠤᠷᠲᠤ ᠪᠦᠳᠦᠭᠦᠨ ᠦᠨᠳᠦᠰᠦ ᠨᠦ᠍ᠭᠦᠳ ᠭᠠᠵᠠᠷ ᠲᠤ᠌ ᠰᠢᠭᠢᠳᠦᠨ ᠤᠷᠭᠤᠵᠠᠢ ᠭᠡᠪᠡ᠃ ᠪᠥᠬᠡ ᠶ᠋ᠢᠨ ᠲᠤᠰᠠᠯᠠᠭᠴᠢᠳ ᠠ᠋ᠴᠠ ᠲᠠᠩᠭᠠᠷᠢᠭᠯᠠᠬᠤ ᠨᠢ᠂
—ᠠᠭᠤᠢ ᠳᠣᠲᠣᠷᠠ ᠣᠷᠣᠵᠤ ᠦᠯᠦ ᠪᠣᠯᠤᠨᠠ᠂ ᠥᠭᠡᠷᠡ ᠬᠠᠭᠠᠯᠭᠠ ᠦᠭᠡᠢ᠂ ᠡᠨᠡ ᠨᠠᠷᠢᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠭᠠᠽᠥ᠋ᠺ ᠥᠪᠡᠷ ᠢ᠋ᠶ᠋ᠡᠨ ᠰᠥᠨᠢ ᠶ᠋ᠢᠨ ᠴᠠᠭ ᠲᠤ᠌ ᠰᠠᠷᠢᠰᠤᠨ ᠪᠠᠭᠪᠠᠬᠠᠢ ᠪᠣᠯᠤᠨ ᠬᠤᠪᠢᠷᠠᠵᠤ ᠨᠢᠰᠦᠨ ᠣᠳᠤᠨᠠ ᠭᠡᠪᠡ᠃
ᠠᠷᠠᠫᠱᠠ ᠶ᠋ᠢᠨ ᠱᠠᠭᠠᠷᠳᠠᠯᠭᠠ ᠪᠠᠷ ᠬᠦᠷᠵᠡ ᠴᠠᠷᠢᠯ ᠪᠦᠬᠦᠢ ᠣᠯᠵᠠᠯᠠᠭᠳᠠᠭᠴᠢᠳ ᠢ᠋ ᠠᠭᠤᠯᠠᠨ ᠳ᠋ᠤ᠌ ᠠᠪᠴᠢᠷᠠᠵᠤ ᠪᠥᠬᠡ ᠶ᠋ᠢᠨ ᠡᠭᠦᠳᠡᠨ ᠦ᠌ ᠳᠡᠷᠭᠡᠳᠡᠬᠢ ᠭᠠᠵᠠᠷ ᠢ᠋ ᠤᠬᠤᠵᠤ ᠡᠬᠢᠯᠡᠪᠡ᠃
ᠭᠡᠲᠡᠯᠡ ᠵᠠᠪᠰᠠᠷ ᠠ᠋ᠴᠠ ᠰᠢᠷᠠ ᠰᠢᠪᠠᠭᠤ ᠦᠵᠡᠭᠳᠡᠵᠦ ᠲᠥᠭᠥᠷᠢᠭ ᠨᠢᠳᠦ ᠪᠡᠨ ᠲᠣᠮᠣ ᠨᠡᠭᠡᠭᠡᠵᠦ ᠳᠤᠤᠭᠠᠷᠪᠠ᠃
— ᠵᠠᠢᠯᠠᠭᠲᠤᠨ ᠭᠡᠵᠦ ᠠᠷᠠᠫᠱᠠ ᠲᠡᠭᠦᠨ ᠢ᠋ ᠰᠢᠭᠦᠷᠦᠨ ᠠᠪᠴᠤ ᠠᠭᠠᠷ ᠲᠤ᠌ ᠬᠠᠶᠠᠪᠠᠯ᠂ ᠲᠡᠷᠡ ᠰᠢᠷᠠ ᠰᠢᠪᠠᠭᠤ ᠬᠠᠪᠰᠤᠷᠴᠤ ᠭᠠᠵᠠᠷ ᠠ᠋ᠴᠠ ᠥᠨᠳᠥᠷ ᠲᠦ᠍ ᠨᠢᠰᠦᠭᠰᠡᠭᠡᠷ ᠥᠳᠬᠡᠨ ᠡᠪᠡᠰᠦ ᠲᠡᠢ ᠲᠠᠯᠠ ᠳ᠋ᠤ᠌ ᠳᠠᠯᠳᠠ ᠣᠷᠣᠪᠠ᠃ ᠨᠢᠭᠡ ᠪᠥᠬᠡ ᠡᠴᠡ ᠠᠷᠠᠫᠱᠠ ᠳ᠋ᠤ᠌ ᠬᠡᠯᠡᠭᠰᠡᠨ ᠨᠢ᠄
— ᠬᠠᠷᠠᠪᠠ ᠤᠤ? ᠴᠢ! ᠭᠠᠽᠥ᠋ᠺ ᠬᠢᠯᠢᠩᠨᠡᠵᠦ ᠰᠢᠷᠠ ᠰᠢᠪᠠᠭᠤᠨ ᠬᠤᠪᠢᠯᠪᠠ᠃ ᠣᠳᠣ ᠣᠯᠠᠨ ᠭᠠᠮᠰᠢᠭ ᠵᠣᠪᠠᠯᠠᠩ ᠳᠡᠭᠳᠡᠵᠦ( ᠳᠡᠭᠳᠡᠬᠦ ) ᠪᠣᠯᠤᠨᠠ ᠳ᠋ᠠ᠂ ᠡᠨᠡ ᠰᠥᠨᠢ ᠤᠷᠢᠳᠤ ᠦᠵᠡᠭᠳᠡᠭᠡ ᠦᠭᠡᠢ ᠰᠢᠭᠤᠷᠭᠠ ᠬᠥᠳᠡᠯᠦᠨᠡ ᠭᠡᠪᠡ᠃
— ᠲᠡᠢᠮᠦ ᠪᠣᠯ ᠤᠯᠠᠮ ᠰᠠᠢᠨ᠃
— ᠲᠡᠢᠮᠦ ᠪᠣᠯ ᠮᠠᠨ ᠤ᠋ ᠴᠡᠷᠢᠭ ᠦ᠋ᠳ ᠦᠷᠡᠺ ᠦ᠋ᠨ ᠪᠥᠬᠡ ᠲᠠᠨᠠᠷ ᠢ᠋ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠢᠳᠡᠨ ᠳ᠋ᠦ᠍ ᠮᠠᠭᠤ ᠢᠷᠣᠠ ᠬᠦᠰᠡᠭᠴᠢ ᠨᠠᠷ ᠭᠡᠵᠦ ᠦᠵᠡᠭᠡᠳ ᠡᠭᠦᠨ ᠦ᠌ ᠲᠥᠯᠥᠭᠡᠰᠦᠨ ᠳ᠋ᠦ᠍ ᠪᠦᠭᠦᠳᠡ ᠶ᠋ᠢ ᠴᠢᠨᠢ ᠠᠮᠢᠳᠤ ᠪᠠᠷ ᠰᠢᠷᠠᠵᠤ ᠠᠯᠠᠨᠠ᠃
— ᠡᠢᠮᠦ ᠶᠠᠭᠤᠮᠠ ᠪᠤᠤ ᠦᠢᠯᠡᠳᠦᠭᠲᠦᠨ ᠭᠡᠵᠦ ᠪᠥᠬᠡ ᠨᠠᠷ ᠰᠠᠨᠳᠤᠷᠴᠠᠭᠠᠵᠤ᠂《ᠪᠢᠳᠡ ᠲᠠᠨᠠᠷ ᠤ᠋ᠨ ᠡᠷᠡᠭᠦᠯ ᠮᠡᠨᠳᠦ ᠰᠠᠢᠨ ᠰᠠᠢᠬᠠᠨ ᠢ᠋ ᠬᠦᠰᠡᠨᠡ᠃ ᠪᠢᠳᠡ ᠲᠠᠨᠠᠷ ᠤ᠋ᠨ ᠲᠥᠯᠥᠭᠡ ᠪᠦᠭᠦᠳᠡ ᠶ᠋ᠢ ᠦᠢᠯᠡᠳᠦᠨᠡ 》 ᠭᠡᠪᠡ᠃
ᠣᠯᠵᠠᠯᠠᠭᠳᠠᠭᠴᠢᠳ ᠬᠠᠳᠠ ᠶ᠋ᠢ ᠦᠷᠭᠦᠯᠵᠢᠯᠡᠨ ᠬᠠᠩᠭᠢᠨᠠᠭᠤᠯᠤᠭᠰᠠᠭᠠᠷ ᠠᠭᠠᠵᠢᠮ ᠢ᠋ᠶ᠋ᠠᠷ ᠬᠥᠨᠳᠡᠢᠯᠡᠵᠦ ᠡᠴᠦᠰ ᠲᠦ᠍ ᠡᠭᠦᠳᠡ ᠨᠢ ᠨᠡᠭᠡᠭᠡᠭᠳᠡᠪᠡ᠃ ᠠᠷᠠᠫᠱᠠ ᠬᠣᠶᠠᠷ ᠮᠣᠩᠭᠣᠯ ᠤ᠋ᠨ ᠬᠠᠮᠲᠤ ᠠᠭᠤᠢ ᠳᠣᠲᠣᠷᠠ ᠣᠷᠣᠵᠤ ᠪᠤᠰᠤᠳ ᠨᠥᠬᠥᠳ ᠡᠭᠦᠳᠡᠨ ᠳᠡᠭᠡᠷᠡ ᠵᠣᠭᠰᠣᠭᠰᠠᠨ ᠳ᠋ᠤ᠌ ᠬᠦᠯᠢᠭᠳᠡᠭᠰᠡᠨ ᠪᠥᠬᠡ ᠨᠠᠷ ᠴᠡᠷᠢᠭ ᠦ᠋ᠳ ᠡᠴᠡ ᠠᠶᠤᠨ ᠤᠬᠢᠯᠠᠯᠳᠤᠵᠤ ᠪᠠᠰᠠ ᠬᠠᠰᠬᠢᠷᠤᠯᠳᠤᠬᠤ ᠨᠢ᠄
— ᠣᠳᠣ ᠲᠩᠷᠢ᠂ ᠭᠠᠵᠠᠷ ᠳᠡᠭᠡᠷᠡ ᠤᠨᠠᠵᠤ ᠳᠡᠯᠡᠬᠡᠢ ᠳᠠᠶᠠᠭᠠᠷ ᠰᠥᠨᠥᠨᠡ᠂ ᠭᠠᠽᠦᠢ᠍ᠺ ᠲᠦ᠍ ᠭᠠᠷ ᠪᠤᠤ ᠬᠥᠷᠥᠭᠲᠦᠨ ᠭᠡᠵᠡᠭᠡᠨᠡ᠃
ᠠᠭᠤᠢ ᠶ᠋ᠢᠨ ᠨᠣᠢᠲᠠᠨ ᠬᠠᠨᠠ ᠳ᠋ᠤ᠌ ᠱᠤᠷᠭᠠᠭ ᠪᠣᠯᠤᠨ ᠰᠢᠷ ᠢ᠋ᠶ᠋ᠡᠷ ᠬᠢᠭᠰᠡᠨ ᠣᠷᠣ ᠪᠠᠢᠨᠠ᠃ ᠠᠭᠤᠢ ᠶ᠋ᠢᠨ ᠳᠤᠮᠳᠠ ᠡᠷᠲᠡ ᠪᠠᠯᠠᠷ ᠴᠠᠭ ᠤ᠋ᠨ ᠬᠦᠷᠡᠯ ᠲᠣᠭᠣᠭᠠ( ᠶ᠋ᠢ ) ᠭᠤᠷᠪᠠᠨ ᠬᠥᠯ ᠲᠡᠢ ᠲᠤᠯᠭᠠ ᠶ᠋ᠢᠨ ᠳᠡᠭᠡᠷᠡ ᠲᠠᠯᠪᠢᠭᠰᠠᠨ ᠪᠠᠢᠬᠤ ᠪᠠ ᠪᠠᠰᠠ ᠨᠡᠭᠦᠷᠡᠰᠦᠨ ᠤ᠋ ᠴᠣᠭ ᠬᠠᠷᠠᠭᠳᠠᠨᠠ᠃
ᠬᠠᠵᠠᠭᠤ ᠳ᠋ᠤᠨᠢ ᠣᠩᠭᠤᠢᠯᠭᠠᠰᠤᠲᠠᠢ ᠠᠷᠠᠰᠤᠨ ᠠᠪᠳᠠᠷᠠ ᠦᠵᠡᠭᠳᠡᠨᠡ᠃ ᠲᠡᠭᠦᠨ ᠦ᠌ ᠳᠡᠷᠭᠡᠳᠡ ᠡᠮᠬᠢ ᠦᠭᠡᠢ ᠬᠠᠶᠠᠭᠰᠠᠨ ᠣᠪᠤᠭᠠᠯᠠᠲᠠᠢ ᠳᠡᠪᠡᠯ ᠦ᠋ᠳ᠂ ᠨᠡᠬᠡᠢ ᠨᠦ᠍ᠭᠦᠳ᠂ ᠭᠠᠤᠯᠢᠨ ᠠᠶᠠᠭᠠ ᠰᠠᠪᠠ ᠰᠠᠭᠤᠯᠠᠭᠠ ᠪᠣᠯᠤᠨ ᠬᠠᠷᠠᠩᠭᠤᠢ ᠪᠤᠯᠤᠩ ᠳ᠋ᠤ᠌ ᠦᠯᠦ ᠬᠥᠳᠡᠯᠬᠦ ᠮᠠᠨᠤᠤᠬᠠᠢ ᠠᠪᠠᠭᠠᠯᠳᠠᠢ ᠡᠯᠭᠦᠭᠡᠰᠦᠲᠡᠢ ᠪᠠᠢᠨᠠ᠃ ᠠᠷᠠᠫᠱᠠ ᠨᠡᠭᠦᠷᠡᠰᠦ ᠶ᠋ᠢ ᠦᠯᠢᠶᠡᠵᠦ ᠪᠡᠯᠡᠳᠬᠡᠭᠰᠡᠨ ᠲᠦᠯᠡᠰᠢ ᠶ᠋ᠢ ᠨᠣᠴᠣᠭᠠᠯᠠ᠃ ᠠᠭᠤᠢ ᠬᠡᠷᠡᠯᠳᠦᠵᠦ ᠠᠷᠠᠫᠱᠠ ᠳ᠋ᠤ᠌ ᠤᠷᠲᠤ ᠪᠠᠷ ᠬᠣᠶᠠᠷ ᠠᠯᠲᠠ ᠥᠨᠳᠥᠷ ᠪᠥᠭᠡᠳ ᠠᠨᠢᠰᠬᠠ ᠨᠢ ᠪᠠᠭᠤᠵᠤ ᠡᠪᠦᠳᠦᠭ ᠡᠴᠡ ᠥᠩᠭᠡᠷᠡᠭᠰᠡᠨ᠂ ᠤᠷᠲᠤ ᠭᠠᠷ ᠢ᠋ᠶ᠋ᠠᠨ ᠤᠨᠵᠢᠭᠤᠯᠤᠨ ᠪᠣᠭᠣᠨᠢ ᠬᠥᠯ ᠢ᠋ᠶ᠋ᠡᠨ ᠡᠪᠦᠳᠦᠭ ᠢ᠋ᠶ᠋ᠡᠷ ᠨᠤᠭᠤᠯᠤᠨ ᠰᠠᠭᠤᠬᠤ ᠴᠢᠯᠠᠭᠤᠨ ᠳᠦᠷᠰᠦ ᠦᠵᠡᠭᠳᠡᠪᠡ᠃
— ᠭᠠᠽᠦᠢ᠍ᠺ ᠵᠢᠭᠤᠲᠠᠵᠠᠢ ᠭᠡᠵᠦ ᠨᠥᠬᠥᠳ ᠦ᠋ᠨ ᠨᠢᠭᠡᠨ ᠨᠢ ᠬᠡᠯᠡᠭᠰᠡᠨ ᠳ᠋ᠦ᠍᠂
— ᠲᠡᠷᠡ ᠬᠣᠯᠠᠳᠠᠭᠠ ᠦᠭᠡᠢ ᠪᠣᠯᠤᠯᠲᠠᠢ ᠭᠡᠵᠦ ᠨᠥᠭᠦᠭᠡ ᠨᠢᠭᠡᠨ ᠨᠢ ᠬᠡᠯᠡᠪᠡ᠃
— ᠲᠡᠷᠡ ᠰᠠᠨᠳᠤᠷᠬᠤ ᠳ᠋ᠠᠭᠠᠨ ᠠᠪᠴᠤ ᠠᠮᠵᠢᠭᠰᠠᠨ ᠦᠭᠡᠢ ᠭᠡᠵᠦ ᠠᠷᠠᠫᠱᠠ ᠭᠠᠵᠠᠷ ᠲᠤ᠌ ᠬᠡᠪᠲᠡᠬᠦ ᠬᠡᠳᠦᠨ ᠵᠣᠭᠣᠰ ᠢ᠋ ᠵᠢᠭᠠᠪᠠ᠃ ᠴᠡᠷᠢᠭ ᠤ᠋ᠳ ᠣᠪᠣᠭᠠᠷᠠᠯᠳᠤᠨ ᠲᠡᠭᠦᠵᠦ ᠠᠪᠤᠪᠠ᠃ ᠵᠣᠭᠣᠰ ᠨᠢ ᠡᠷᠲᠡ ᠪᠠᠯᠠᠷ ᠴᠠᠭ ᠤ᠋ᠨ ᠪᠣᠯᠤᠯᠲᠠᠢ ᠪᠥᠭᠡᠳ ᠨᠣᠴᠣᠵᠤ ᠪᠦᠬᠦᠢ ᠵᠤᠯᠠ ᠰᠡᠢᠯᠦᠭᠰᠡᠨ ᠵᠣᠭᠣᠰ ᠪᠠᠢᠯᠠ᠃
ᠠᠷᠠᠫᠱᠠ ᠴᠢᠯᠠᠭᠤᠨ ᠬᠥᠮᠦᠨ ᠢ᠋ ᠠᠵᠢᠭᠯᠠᠨ ᠬᠠᠷᠠᠵᠤ ᠲᠡᠭᠦᠨ ᠳ᠋ᠦ᠍ ᠭᠠᠷ ᠬᠦᠷᠪᠡᠯ ᠲᠡᠷᠡ ᠬᠥᠳᠡᠯᠵᠦ ᠪᠠᠢᠪᠠ᠃ ᠭᠡᠲᠡᠯᠡ 《ᠨᠠᠮᠠᠶ᠋ᠢ ᠪᠤᠤ ᠠᠯᠠᠭᠲᠤᠨ 》ᠭᠡᠵᠦ ᠳᠠᠭᠤ ᠭᠠᠷᠴᠤ ᠭᠠᠵᠠᠷ ᠲᠤ᠌ ᠣᠷᠣᠬᠤ ᠨᠦᠬᠡ ᠶ᠋ᠢᠨ ᠠᠮᠠᠰᠠᠷ ᠳᠡᠭᠡᠷᠡ ᠨᠢᠷᠤᠭᠤ ᠨᠢ ᠪᠥᠭᠲᠥᠢᠭᠰᠡᠨ ᠡᠮᠡᠭᠡᠨ ᠭᠠᠷ ᠰᠤᠩᠭᠠᠨ ᠥᠷᠥᠰᠢᠶᠡᠯ ᠭᠤᠶᠤᠵᠤ ᠪᠠᠢᠪᠠ᠃
— ᠴᠢ ᠬᠡᠨ ᠪᠣᠢ᠂ ᠭᠠᠽᠥ᠋ᠺ ᠬᠠᠮᠢᠭᠠ ᠪᠠᠢᠨᠠ? ᠭᠡᠬᠦ ᠳ᠋ᠦ᠍᠂
— ᠲᠡᠷᠡ ᠬᠤᠳᠠᠯᠴᠢ ᠡᠪᠦᠭᠡᠨ ᠨᠠᠮᠠᠶ᠋ᠢ ᠬᠠᠮᠲᠤ ᠠᠪᠴᠤ ᠶᠠᠪᠤᠨᠠ ᠭᠡᠳ ᠡᠨᠳᠡ ᠣᠷᠬᠢᠭᠠᠳ ᠵᠢᠭᠤᠲᠠᠭᠰᠠᠨ ᠭᠡᠵᠦ ᠡᠮᠡᠭᠡᠨ ᠬᠠᠷᠢᠭᠤᠯᠪᠠ᠃ 《ᠠᠯᠲᠠ ᠪᠣᠯᠤᠭᠠᠳ ᠵᠠᠯᠠᠭᠤ ᠡᠬᠡᠨᠡᠷ ᠢ᠋ᠶ᠋ᠡᠨ ᠠᠪᠴᠤ ᠣᠳᠤᠭᠰᠠᠨ 》ᠭᠡᠵᠦ ᠡᠮᠡᠭᠡᠨ ᠭᠠᠰᠠᠯᠤᠭᠰᠠᠭᠠᠷ ᠨᠢᠯᠪᠤᠰᠤ ᠴᠤᠪᠤᠭᠤᠯᠤᠨ ᠨᠦᠬᠡᠨ ᠡᠴᠡ ᠭᠠᠷᠴᠤ ᠠᠪᠳᠠᠷᠠ ᠶ᠋ᠢ ᠬᠠᠵᠠᠭᠤ ᠲᠡᠰᠢ ᠵᠠᠢᠯᠠᠭᠤᠯᠪᠠ᠃ ᠲᠡᠭᠦᠨ ᠦ᠌ ᠠᠷᠤ ᠲᠠᠯᠠ ᠳ᠋ᠤ᠌ ᠪᠢᠴᠢᠬᠠᠨ ᠨᠠᠮᠬᠠᠨ ᠬᠠᠭᠠᠯᠭᠠ ᠪᠠᠢᠯᠠ᠃
— ᠡᠭᠦᠪᠡᠷ ᠣᠷᠣᠵᠤ ᠡᠪᠦᠳᠦᠭ ᠢ᠋ᠶ᠋ᠡᠷ ᠮᠥᠯᠬᠥᠨ ᠶᠠᠪᠤᠪᠠᠯ ᠮᠢᠩᠭᠠᠨ ᠠᠯᠬᠤᠮ ᠤ᠋ᠨ ᠴᠠᠭᠠᠨᠠ ᠠᠭᠤᠵᠢᠮ ᠠᠭᠤᠢ ᠳ᠋ᠤ᠌ ᠣᠷᠣᠬᠤ ᠡᠭᠦᠳᠡ ᠪᠠᠢᠨᠠ᠃ ᠲᠡᠨᠳᠡ ᠲᠡᠭᠦᠨ ᠦ᠌ ᠮᠣᠷᠢ ᠨᠢ ᠬᠦᠯᠢᠶᠡᠵᠦ ᠪᠠᠢᠭᠠ ᠭᠡᠪᠡ᠃ ᠠᠷᠠᠫᠱᠠ ᠲᠦᠷᠦᠭᠦᠴᠢ ᠶ᠋ᠢᠨ ᠪᠠᠢᠷᠢᠨ ᠳ᠋ᠤ᠌ ᠴᠢᠯᠠᠭᠤᠨ ᠳᠦᠷᠰᠦ ᠶ᠋ᠢ ᠲᠠᠯᠪᠢᠵᠤ ᠴᠡᠷᠢᠭ ᠲᠡᠭᠡᠨ ᠠᠭᠤᠢ ᠪᠠ ᠡᠮᠡᠭᠡᠨ ᠢ᠋ ᠮᠠᠨᠠᠵᠤ ᠪᠠᠢᠬᠤ ᠶ᠋ᠢ ᠲᠤᠰᠢᠶᠠᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠲᠤ᠌ ᠣᠴᠢᠬᠤ ᠪᠠᠷ ᠲᠦᠷᠭᠡᠯᠡᠪᠡ᠃ ᠭᠡᠲᠡᠯᠡ ᠲᠡᠢᠮᠦ ᠴᠦ᠍ ᠤᠳᠠᠭᠠᠨ ᠬᠦᠯᠢᠶᠡᠯᠭᠡᠭᠰᠡᠨ ᠦᠭᠡᠢ᠂ ᠲᠠᠩᠨᠠᠭᠤᠯ ᠳ᠋ᠤ᠌ ᠢᠯᠡᠭᠡᠭᠰᠡᠨ ᠴᠡᠷᠢᠭ ᠦ᠋ᠨ ᠨᠢᠭᠡᠨ ᠨᠢ ᠲᠦᠳᠡᠬᠡᠨ ᠡᠷᠭᠢᠵᠦ ᠢᠷᠡᠵᠡᠢ᠃ ᠡᠨᠳᠡ ᠢᠷᠡᠭᠡᠳ ᠪᠣᠭᠴᠣ ᠭᠠᠨᠵᠤᠭᠠᠯᠠᠭᠰᠠᠨ ᠮᠣᠷᠢᠳ ᠢ᠋ ᠬᠤᠢᠯᠠᠷᠠᠭᠤᠯᠤᠨ ᠨᠠᠮᠨᠠᠬᠤ ᠪᠥᠭᠡᠳ ᠮᠣᠷᠢᠳ ᠤ᠋ᠨ ᠨᠢᠭᠡ ᠶ᠋ᠢ ᠪᠠᠭᠠᠪᠠᠭᠠᠢ ᠶ᠋ᠢᠨ ᠠᠷᠠᠰᠤᠨ ᠳᠡᠪᠡᠯ ᠲᠡᠢ ᠪᠥᠭᠲᠥᠷ ᠡᠪᠦᠭᠡᠨ ᠤᠨᠤᠵᠠᠢ᠃ ᠨᠢᠭᠤᠷ ᠲᠤᠨᠢ ᠥᠳᠬᠡᠨ ᠰᠠᠬᠠᠯ ᠤᠷᠭᠤᠵᠤ ᠪᠤᠭᠤᠷᠤᠯ ᠦᠰᠦ ᠨᠢ ᠡᠰᠢ ᠲᠠᠰᠢ ᠪᠠᠨ ᠠᠷᠵᠠᠢᠨ ᠪᠣᠰᠴᠤ ᠤᠴᠠᠷᠠᠭᠰᠠᠨ ᠡᠲᠡᠭᠡᠳ ᠢ᠋ ᠦᠯᠦ ᠠᠩᠬᠠᠷᠤᠨ ᠰᠥᠭᠡᠩᠭᠢ ᠬᠣᠭᠣᠯᠠᠢ ᠪᠠᠷ ᠡᠭᠡᠰᠢᠭᠯᠡᠭᠦᠯᠦᠨ ᠠᠶᠠᠯᠵᠤ ᠦᠯᠦ ᠮᠡᠳᠡᠭᠳᠡᠬᠦ ᠬᠡᠯᠡ ᠪᠡᠷ ᠶᠠᠭᠤᠮᠠ ᠤᠩᠰᠢᠬᠤ ᠶ᠋ᠢᠨ ᠳᠡᠭᠡᠷᠡ ᠠᠯᠲᠠᠨ ᠪᠠᠷᠢᠭᠤᠯ ᠲᠠᠢ ᠲᠠᠶᠠᠭ ᠢ᠋ᠶ᠋ᠠᠷ ᠳᠠᠯᠠᠯᠤᠨᠠ᠃ ᠨᠥᠭᠦᠭᠡ ᠨᠢᠭᠡ ᠮᠣᠷᠢᠨ ᠳᠡᠭᠡᠷᠡ ᠳᠣᠭᠰᠢᠨ ᠬᠠᠷᠠ ᠨᠢᠳᠦᠲᠡᠢ᠂ ᠬᠡᠷᠴᠡᠭᠡᠢ ᠵᠠᠩᠲᠠᠢ᠂ ᠪᠤᠳᠤᠩᠭᠤᠢ ᠴᠢᠷᠠᠢ ᠲᠠᠢ ᠵᠠᠯᠠᠭᠤ ᠪᠦᠰᠡᠭᠦᠢ ᠰᠠᠭᠤᠵᠤ ᠣᠢᠷᠠᠲᠤᠭᠰᠠᠨ ᠪᠦᠬᠦᠨ ᠢ᠋ ᠭᠢᠯᠤᠢᠨ ᠬᠠᠷᠠᠵᠤ ᠰᠢᠳᠦ ᠪᠡᠨ ᠬᠠᠪᠢᠷᠤᠨ ᠵᠥᠭᠡᠨᠡ᠃ ᠰᠦᠪᠡᠭᠡᠳᠠᠢ ᠪᠠᠭᠠᠲᠤᠷ ᠮᠢᠩᠭᠠᠨ ᠨᠠᠰᠤᠲᠠᠢ ᠪᠥᠬᠡ ᠶ᠋ᠢ ᠦᠵᠡᠬᠦ ᠶ᠋ᠢᠨ ᠲᠤᠯᠠᠳᠠ ᠭᠡᠷ ᠡᠴᠡ ᠭᠠᠷᠴᠤ ᠬᠡᠯᠡᠭᠰᠡᠨ ᠨᠢ᠄
— ᠮᠢᠨᠦ ᠪᠢᠴᠢᠭᠡᠴᠢ ᠡᠨᠡ ᠵᠠᠯᠢᠲᠤ ᠬᠥᠭᠰᠢᠨ ᠶᠠᠭᠤ ᠠᠪᠴᠢᠷᠠᠭᠰᠠᠨ ᠢ᠋ ᠪᠦᠭᠦᠳᠡ ᠶ᠋ᠢ ᠦᠵᠡᠵᠦ ᠪᠢᠴᠢᠵᠦ ᠠᠪᠤᠭ᠃ ᠬᠡᠷᠪᠡ ᠦᠨᠡᠲᠦ ᠶᠠᠭᠤᠮᠠ ᠭᠠᠷᠪᠠᠯ ᠴᠥᠮ ᠢ᠋ ᠵᠠᠩᠵᠤᠨ ᠤ᠋ ᠶᠠᠭᠤᠮᠠ ᠪᠣᠯᠭᠠ᠃ ᠡᠨᠡ ᠪᠥᠬᠡ ᠶ᠋ᠢ ᠦᠳᠡᠰᠢ ᠪᠠᠲᠤ ᠬᠠᠭᠠᠨ ᠳ᠋ᠤ᠌ ᠠᠪᠠᠴᠢᠵᠤ ᠦᠭᠭᠦᠭᠲᠦᠨ᠃ ᠪᠢᠳᠡ ᠮᠢᠩᠭᠠᠨ ᠵᠢᠯ ᠦ᠋ᠨ ᠳᠣᠲᠣᠷᠠ ᠶᠠᠭᠤ ᠪᠣᠯᠤᠭᠰᠠᠨ ᠲᠤᠬᠠᠢ ᠦᠯᠢᠭᠡᠷ ᠢ᠋ ᠰᠣᠨᠣᠰᠬᠤ ᠶ᠋ᠢ ᠬᠦᠰᠡᠨᠡ᠃
— ᠴᠥᠮ ᠢ᠋ ᠮᠡᠳᠡᠪᠡᠯ ᠲᠤᠰᠠᠲᠠᠢ ᠪᠠᠢᠵᠤ ᠶᠠᠭᠤ ᠮᠠᠭᠠᠳ ᠪᠥᠭᠡᠳ ᠭᠢᠨᠵᠢ ᠵᠡᠭᠦᠯᠭᠡᠬᠦ ᠬᠡᠷᠡᠭᠲᠡᠢ᠂ ᠳᠠᠬᠢᠨ ᠲᠡᠭᠡᠵᠦ ᠪᠢᠳᠡᠨ ᠡᠴᠡ ᠨᠢᠭᠤᠭᠳᠠᠬᠤ ᠪᠠᠨ ᠪᠠᠰᠠ ᠪᠤᠯᠢᠭ᠃ ᠪᠠᠰᠠ ᠪᠤᠰᠤᠳ ᠨᠢ ᠦᠵᠡᠵᠦ ᠲᠤᠷᠰᠢᠯᠭᠠ ᠠᠪᠤᠭ ᠭᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠭᠡᠷᠡᠯ᠂ ᠠᠷᠢᠭᠤᠨ ᠂ ᠬᠡᠷᠡᠢᠳ· ᠮᠥᠩᠬᠡᠨᠠᠰᠤᠨ᠂ ᠠᠯᠲᠠᠨᠴᠢᠮᠡᠭ ᠂ ᠪᠠᠶᠠᠨᠴᠡᠴᠡᠭ ᠂᠂
ᠬᠢᠨᠠᠭᠴᠢ᠄ ᠲ᠂ ᠬᠦᠮᠦᠵᠢᠯᠲᠦ᠂ ᠪᠠᠶᠠᠨᠴᠡᠴᠡᠭ᠂ ᠠᠷᠢᠭᠤᠨ᠂ ᠠᠯᠲᠠᠨᠴᠢᠮᠡᠭ᠂᠂᠂