ᠪᠠᠲᠤ ᠬᠠᠭᠠᠨ 2-13 ᠴᠢᠰᠤᠲᠤ ᠰᠣᠯᠢᠷ-ᠪᠠᠲᠤ ᠬᠠᠭᠠᠨ ᠥᠷᠥᠨᠡ ᠵᠦᠭ ᠲᠦ᠍ ᠬᠥᠳᠡᠯᠦᠯᠡ-Bat khaan Бат хаан-ᠷᠣᠮᠠᠨ
235ᠠᠷᠪᠠᠨ ᠭᠤᠷᠪᠠ ᠴᠢᠰᠤᠲᠤ ᠰᠣᠯᠢᠷ
ᠢᠵᠢᠯ ᠮᠥᠷᠡᠨ ᠦ᠌ ᠡᠷᠭᠢ ᠳ᠋ᠦ᠍ ᠬᠣᠶᠠᠷ ᠪᠦᠬᠦ ᠲᠡᠢ ᠤᠯᠠᠭᠠᠨ ᠲᠡᠮᠡᠭᠡᠳ ᠵᠣᠭᠰᠣᠵᠤ ᠭᠢᠯᠲᠠᠭᠠᠨᠠᠭᠰᠠᠨ ᠪᠦᠯᠲᠡᠭᠡᠷ ᠨᠢᠳᠦ ᠲᠡᠢ ᠰᠡᠭᠯᠡᠭᠡᠷ ᠲᠣᠯᠣᠭᠠᠢ ᠶ᠋ᠢ ᠡᠷᠭᠦᠵᠦ ᠤᠷᠤᠭᠤᠯ ᠢ᠋ ᠤᠨᠵᠢᠭᠤᠯᠤᠨ ᠤᠰᠤ ᠶᠡᠬᠡᠲᠦ ᠮᠥᠷᠡᠨ ᠦ᠌ ᠰᠦᠷᠯᠢᠭ ᠤᠷᠤᠰᠬᠠᠯ ᠳ᠋ᠤ᠌ ᠰᠠᠨᠳᠤᠷᠬᠤ ᠣᠯᠠᠨ ᠬᠥᠮᠦᠰ ᠢ᠋ ᠲᠣᠭᠣᠮᠰᠠᠷ ᠦᠭᠡᠢ ᠶᠡᠬᠡᠮᠰᠦᠭ ᠬᠠᠷᠠᠵᠤ ᠪᠠᠢᠯᠠ᠃ ᠲᠡᠭᠦᠨ ᠡᠴᠡ ᠬᠠᠳ᠋ᠵᠢ ᠷᠠᠾᠢᠮ ᠠᠷᠤᠭ ᠳᠣᠲᠣᠷᠠ ᠠᠲᠤᠷᠢᠵᠤ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠨᠣᠮ ᠲᠠᠯᠪᠢᠨ ᠰᠠᠭᠤᠭᠠᠳ ᠬᠢᠴᠢᠶᠡᠩᠭᠦᠢ ᠪᠡᠷ ᠪᠢᠴᠢᠭᠰᠡᠨ ᠨᠢ᠄《ᠲᠩᠷᠢ ᠭᠠᠵᠠᠷ ᠪᠦᠬᠦ ᠶᠢᠷᠲᠢᠨᠴᠦ ᠠᠮᠤᠭᠤᠯᠠᠩ ᠲᠠᠢᠪᠤᠩ ᠪᠠᠢᠬᠤ ᠳ᠋ᠤ᠌ ᠶᠠᠭᠤᠨ ᠳ᠋ᠤ᠌ ᠢᠩᠭᠢᠲᠡᠯᠡ ᠪᠡᠨ ᠰᠠᠮᠭᠠᠷᠳᠠᠨᠠ? ᠶᠠᠭᠤ ᠴᠥ᠍ ᠬᠤᠪᠢᠷᠠᠬᠤ ᠦᠭᠡᠢ ᠭᠠᠵᠠᠷ ᠨᠤᠲᠤᠭ ᠭᠡᠳᠡᠭ ᠬᠢᠵᠠᠭᠠᠷ ᠦᠭᠡᠢ᠃ ᠡᠢᠮᠦ ᠶ᠋ᠢᠨ ᠲᠤᠯᠠᠳᠠ ᠲᠠᠯᠠ ᠪᠠᠷ ᠠᠯᠭᠤᠷ ᠶᠠᠪᠤᠨᠠ ᠭᠡᠳᠡᠭ ᠮᠡᠷᠭᠡᠨ ᠬᠡᠷᠡᠭ ᠪᠢᠰᠢ ᠤᠤ? ᠮᠣᠷᠢ ᠪᠠᠷ ᠬᠤᠢ ᠬᠡᠢᠰᠦᠨ ᠬᠦᠷᠬᠦ ᠭᠠᠵᠠᠷ ᠪᠠᠰᠠ ᠲᠠᠢᠪᠤᠩ ᠢ᠋ᠶ᠋ᠠᠷ ᠶᠠᠪᠤᠵᠤ ᠨᠢᠭᠡᠨ ᠠᠳᠠᠯᠢ ᠪᠢᠰᠢ ᠤᠤ? 》ᠭᠡᠵᠡᠢ᠃ ᠶᠦᠯᠳᠦ᠋ᠽ ᠲᠡᠮᠡᠭᠡᠨ ᠳᠡᠭᠡᠷᠡ ᠰᠠᠯᠬᠢᠨ ᠳ᠋ᠤ᠌ ᠰᠠᠯᠭᠠᠨᠠᠨ ᠬᠡᠢᠰᠬᠦ ᠬᠥᠰᠢᠭᠡ ᠶ᠋ᠢᠨ ᠳᠣᠣᠷᠠ ᠰᠠᠭᠤᠵᠤ᠂ ᠣᠯᠠᠨ ᠮᠢᠩᠭᠠᠨ ᠴᠡᠷᠢᠭ ᠱᠤᠤᠭᠢᠨ ᠱᠠᠭᠢᠨ ᠤᠰᠤ ᠭᠠᠲᠤᠯᠬᠤ ᠶ᠋ᠢ ᠭᠠᠢᠬᠠᠨ ᠬᠠᠷᠠᠵᠤ ᠨᠢᠳᠦ ᠪᠡᠨ ᠶᠡᠬᠡ ᠪᠣᠯᠭᠠᠨ ᠠᠵᠢᠭᠯᠠᠨ ᠰᠠᠭᠤᠵᠠᠢ᠃ ᠤᠰᠤᠨ ᠳ᠋ᠤ᠌ ᠬᠥᠪᠬᠦ ᠮᠣᠷᠢᠳ ᠬᠠᠷᠠ ᠵᠠᠪᠢ ᠶ᠋ᠢ ᠬᠠᠷᠠᠨ ᠶᠦᠯᠳᠦ᠋ᠽ ᠭᠣᠣᠯ ᠢ᠋ ᠭᠠᠲᠤᠯᠤᠨ ᠬᠥᠪᠬᠦ ᠮᠣᠷᠢᠳ ᠬᠠᠷᠠ ᠵᠠᠪᠢ ᠨᠤᠭᠤᠳ ᠢ᠋ ᠠᠵᠢᠭᠯᠠᠨ ᠬᠠᠷᠠᠵᠤ ᠪᠠᠢᠬᠤ ᠳ᠋ᠠᠭᠠᠨ ᠭᠣᠣᠯ ᠤᠷᠤᠭᠤ ᠪᠠᠭᠤᠬᠤ ᠮᠣᠷᠢᠲᠠᠨ ᠤ᠋ ᠬᠠᠮᠲᠤ ᠪᠠᠷ ᠭᠤᠸᠠᠯᠢᠭ ᠪᠡᠶᠡᠲᠡᠢ᠂ ᠵᠠᠯᠠᠭᠤ ᠡᠷᠡ ᠶ᠋ᠢ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠡᠷᠢᠵᠦ ᠪᠠᠢᠯᠠ᠃ ᠮᠣᠷᠢᠲᠠᠨ ᠤ᠋ ᠵᠠᠷᠢᠮ ᠨᠢ ᠲᠡᠭᠦᠨ ᠲᠡᠢ ᠲᠥᠰᠲᠡᠢ ᠶᠤᠮ ᠰᠢᠭ ᠬᠠᠷᠠᠭᠳᠠᠪᠠᠴᠤ᠂ ᠲᠡᠷᠡ ᠪᠢᠰᠢ ᠪᠠᠢᠪᠠ᠂ ᠲᠡᠭᠦᠨ ᠲᠡᠢ ᠠᠳᠠᠯᠢ ᠮᠤᠤᠷ ᠰᠢᠭ᠋ ᠭᠠᠪᠰᠢᠭᠠᠢ ᠪᠢᠰᠢ ᠪᠠᠢᠪᠠ᠃ ᠮᠦᠰᠦ᠋ᠺ ᠣᠭᠲᠣ ᠦᠵᠡᠭᠳᠡᠬᠦ ᠦᠭᠡᠢ ᠬᠠᠮᠢᠭᠠ ᠲᠡᠨᠦᠵᠦ ᠶᠠᠪᠤᠭᠠ ᠪᠣᠯ? ᠠᠮᠢᠳᠤ ᠪᠣᠯ ᠤᠤ᠂ ᠡᠰᠡᠪᠡᠯ ᠬᠢᠵᠠᠭᠠᠷ ᠦᠭᠡᠢ ᠲᠠᠯᠠ ᠳ᠋ᠤ᠌ ᠪᠠᠭᠠᠬᠠᠨ ᠬᠡᠷᠢᠶᠡ᠂ ᠪᠦᠷᠭᠦᠳ ᠦ᠋ᠨ ᠬᠣᠭᠣᠯᠠ ᠪᠣᠯᠵᠤ ᠬᠡᠪᠲᠡᠭᠡ ᠪᠣᠯ ᠤᠤ ? ᠭᠡᠬᠦ ᠵᠡᠷᠭᠡ ᠪᠡᠷ ᠮᠥᠷᠥᠭᠡᠳᠬᠦ ᠰᠡᠳᠬᠢᠯ ᠦ᠋ᠨ ᠣᠷᠣᠨ ᠳ᠋ᠤ᠌ ᠵᠠᠷᠢᠮ ᠳ᠋ᠠᠭᠠᠨ ᠠᠭᠤᠷ ᠬᠢᠯᠢᠩ ᠪᠠᠳᠠᠷᠠᠨᠠ᠃ ᠬᠡᠷᠪᠡ ᠡᠷᠭᠦᠮᠡᠯ ᠳᠡᠭᠦᠦ ᠪᠡᠨ ᠬᠤᠳᠠᠯᠳᠤᠬᠤ ᠶᠠᠪᠤᠳᠠᠯ ᠳ᠋ᠤ᠌ ᠥᠪᠡᠷ ᠢ᠋ᠶ᠋ᠡᠨ ᠣᠷᠣᠯᠴᠠᠭᠰᠠᠨ ᠪᠣᠯ ᠶᠠᠭᠠᠬᠢᠬᠤ ᠪᠣᠢ? ᠶᠠᠭᠤᠨ ᠤ᠋ ᠤᠴᠢᠷ ᠠ᠋ᠴᠠ ᠭᠡᠪᠡᠯ ᠬᠡᠷᠪᠡ ᠶᠦᠯᠳᠦ᠋ᠽ ᠦᠭᠡᠢ ᠪᠣᠯ ᠡᠨᠡ ᠲᠡᠢᠨ ᠳ᠋ᠦ᠍ ᠪᠡᠶᠡ ᠪᠡᠷ ᠮᠣᠷᠳᠠᠬᠤ ᠨᠥᠬᠥᠴᠡᠯ ᠪᠦᠷᠢᠳᠦᠨᠡ ᠭᠡᠵᠦ ᠪᠣᠳᠣᠭᠰᠠᠨ ᠪᠠᠢᠵᠤ ᠶᠠᠭᠤ ᠮᠠᠭᠠᠳ᠂ ᠬᠡᠷᠪᠡ ᠲᠡᠢᠮᠦ ᠪᠣᠯᠪᠠᠯ ᠲᠡᠷᠡ ᠮᠠᠭᠠᠳ ᠮᠢᠬᠠᠴᠢᠨ ᠰᠢᠪᠠᠭᠤᠨ ᠳ᠋ᠤ᠌ ᠵᠤᠯᠭᠠᠯᠭᠠᠵᠤ ᠬᠠᠯᠠᠭᠤᠨ ᠭᠣᠪᠢ ᠳ᠋ᠤ᠌ ᠬᠠᠳᠠᠨ ᠦᠬᠦᠭ᠂ ᠴᠠᠩᠭᠠᠨ ᠬᠠᠲᠠᠭᠰᠠᠨ ᠠᠮᠠᠨ ᠳ᠋ᠠᠭᠠᠨ ᠪᠠᠯᠭᠤ ᠤᠮᠳᠠ ᠪᠦᠦ ᠣᠯᠤᠭ ᠭᠡᠬᠦ ᠵᠡᠷᠭᠡ ᠪᠡᠷ ᠪᠣᠳᠣᠨᠠ᠃ ᠨᠥᠭᠦᠭᠡ ᠲᠠᠯᠠ ᠶ᠋ᠢᠨ ᠠᠷᠤᠭ ᠲᠸ᠋ ᠰᠠᠭᠤᠭᠠ ᠬᠢᠲᠠᠳ ᠬᠡᠦᠬᠡᠨ ᠶᠦᠯᠳᠦ᠋ᠽ ᠦ᠋ᠨ ᠮᠥᠷᠦᠨ ᠳ᠋ᠦ᠍ ᠰᠡᠮᠬᠡᠨ ᠬᠦᠷᠴᠦ᠄《ᠵᠠᠩᠵᠤᠨ ᠨᠠᠰᠢ ᠪᠠᠨ ᠬᠠᠷᠠᠵᠤ ᠪᠠᠢᠨᠠ 》ᠭᠡᠪᠡ᠃
ᠪᠠᠲᠤ ᠬᠠᠭᠠᠨ ᠡᠯᠡᠰᠦᠨ ᠡᠷᠭᠢ ᠶ᠋ᠢᠨ ᠳᠡᠭᠡᠭᠦᠷ ᠣᠯᠠᠨ ᠮᠣᠷᠢᠲᠠᠨ ᠤ᠋ ᠲᠡᠷᠢᠭᠦᠨ ᠳ᠋ᠦ᠍ ᠴᠠᠰᠤᠨ ᠴᠠᠭᠠᠨ ᠮᠣᠷᠢ ᠤᠨᠤᠵᠤ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠬᠠᠵᠠᠭᠤ ᠲᠡᠰᠢ ᠡᠷᠭᠢᠵᠦ ᠬᠥᠲᠥᠯ ᠳᠡᠭᠡᠷᠡ ᠭᠠᠷᠪᠠ᠃ ᠲᠡᠨᠳᠡ ᠡᠴᠡ ᠭᠣᠣᠯ ᠤ᠋ᠨ ᠲᠡᠷᠲᠡᠭᠡ ᠲᠠᠯᠠ ᠤᠷᠤᠭᠤ ᠭᠠᠷ ᠢ᠋ᠶ᠋ᠠᠷ ᠵᠢᠭᠠᠭᠠᠳ ᠪᠠᠷᠠ ᠪᠣᠯᠤᠭᠴᠢᠳ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ ᠮᠣᠷᠢᠲᠠᠢ ᠬᠥᠮᠦᠰ ᠲᠤᠰᠢᠶᠠᠯ ᠢ᠋ ᠭᠦᠢᠴᠡᠳᠬᠡᠬᠦ ᠪᠡᠷ ᠤᠳᠠᠭᠠ ᠳᠠᠷᠠᠭᠠᠪᠠᠷ ᠰᠠᠯᠵᠤ ᠶᠠᠪᠤᠭᠰᠠᠭᠠᠷ ᠠᠷᠠᠪ ᠲᠥᠯᠭᠡᠴᠢ ᠪᠠ ᠮᠦᠰᠦᠢ᠍ᠯᠢᠮ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠵᠠᠯᠠᠭᠤ ᠴᠡᠷᠢᠭ ᠲᠡᠮᠡᠭᠡᠨ ᠳᠡᠭᠡᠷᠡ ᠢᠷᠡᠪᠡ᠃ ᠶᠦᠯᠳᠦᠢ᠍ᠽ ᠤᠷᠲᠤ ᠶ᠋ᠢᠨ ᠵᠠᠮ ᠳ᠋ᠤ᠌ ᠡᠨᠡ ᠬᠥᠮᠦᠨ ᠢ᠋ ᠣᠯᠠᠨᠲᠠ ᠬᠠᠷᠠᠭᠰᠠᠨ ᠲᠤᠯᠠ ᠪᠠᠲᠤ ᠬᠠᠭᠠᠨ ᠢ᠋ ᠦᠷᠭᠦᠯᠵᠢ ᠳᠠᠭᠠᠵᠤ ᠶᠠᠪᠤᠳᠠᠭ ᠵᠠᠭᠤᠨ ᠤ᠋ ᠳᠠᠷᠤᠭᠠ ᠂ ᠨᠡᠷᠡ ᠶ᠋ᠢ ᠨᠢᠰᠢᠷᠢ ᠶ᠋ᠢᠨ ᠠᠷᠠᠫ᠊ᠱᠠ ᠭᠡᠳᠡᠭ ᠢ᠋ ᠮᠡᠳᠡᠬᠦ ᠪᠠᠢᠵᠠᠢ᠃ ᠲᠡᠷᠡ ᠨᠢ ᠳᠥᠩᠭᠡᠵᠢ ᠰᠠᠶᠢᠬᠠᠨ ᠪᠠᠷᠠᠭᠤᠨ ᠡᠷᠭᠢ ᠳᠡᠭᠡᠷᠡ ᠡᠴᠡ ᠪᠤᠴᠠᠵᠤ ᠢᠷᠡᠭᠰᠡᠨ ᠪᠥᠭᠡᠳ ᠡᠯᠡᠰᠦᠨ ᠳᠡᠭᠡᠷᠡ ᠰᠠᠭᠤᠵᠠᠭᠠᠬᠤ ᠨᠠᠷᠠ ᠰᠠᠯᠬᠢᠨ ᠳ᠋ᠤ᠌ ᠭᠠᠩᠳᠠᠮᠠᠯ ᠬᠠᠷᠠ ᠴᠢᠷᠠᠢᠲᠤ ᠭᠠᠵᠠᠷᠴᠢ ᠨᠠᠷ ᠲᠤ᠌ ᠲᠤᠰᠢᠶᠠᠯ ᠥᠭᠬᠦ ᠳ᠋ᠦ᠍ ᠲᠡᠳᠡ ᠨᠢ ᠪᠣᠰᠴᠠᠭᠠᠵᠤ ᠲᠡᠮᠡᠭᠡᠨ ᠦ᠌ ᠨᠣᠬᠳᠣᠨ ᠠ᠋ᠴᠠ ᠬᠥᠲᠥᠯᠵᠦ ᠭᠣᠣᠯ ᠤᠷᠤᠭᠤ ᠣᠷᠣᠭᠤᠯᠪᠠ᠃
ᠰᠡᠯᠢᠭᠦᠷᠴᠢᠳ ᠤᠷᠲᠤ ᠬᠠᠷᠠ ᠵᠠᠪᠢ ᠨᠤᠭᠤᠳ ᠢ᠋ ᠭᠤᠷᠪᠠ ᠭᠤᠷᠪᠠ ᠪᠠᠷ ᠵᠡᠷᠭᠡᠴᠡᠭᠦᠯᠦᠨ ᠬᠥᠨᠳᠡᠯᠡᠨ ᠪᠠᠩᠵᠠ ᠳᠡᠪᠢᠰᠴᠦ ᠣᠯᠣᠰᠣ ᠪᠠᠷ ᠬᠦᠯᠢᠬᠦ ᠳ᠋ᠦ᠍ ᠪᠥᠬᠡ ᠰᠠᠯ ᠬᠥᠯᠭᠡ ᠪᠣᠯᠤᠨᠠ᠃ ᠠᠷᠠᠫ᠊ᠱᠠ ᠢᠯᠡᠭᠦᠦ ᠬᠥᠳᠡᠯᠭᠡᠭᠡ ᠦᠭᠡᠢ ᠲᠣᠳᠣᠷᠬᠠᠢ ᠲᠤᠰᠢᠶᠠᠯ ᠢ᠋ ᠥᠭᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠲᠤᠰᠢᠶᠠᠯ ᠢ᠋ ᠦᠭᠡ ᠳᠠᠭᠤ ᠦᠭᠡᠢ ᠦᠳᠲᠡᠷ ᠲᠦᠷᠭᠡᠨ ᠭᠦᠢᠴᠡᠳᠬᠡᠨᠡ᠂ ᠪᠣᠭᠣᠯᠴᠤᠳ ᠪᠠᠩᠵᠠ ᠱᠣᠩ ᠵᠥᠭᠡᠭᠡᠵᠦ ᠠᠪᠴᠢᠷᠠᠨ ᠰᠦᠬᠡ ᠪᠡᠷ ᠪᠠᠯᠪᠠᠨ᠂ ᠤᠰᠤᠨ ᠤ᠋ ᠬᠥᠪᠡᠭᠡᠨ ᠳ᠋ᠦ᠍ ᠱᠣᠩ ᠢ᠋ ᠰᠠᠭᠤᠯᠭᠠᠵᠤ ᠪᠤᠷᠭᠠᠰᠤᠨ ᠮᠥᠴᠢᠷ ᠢ᠋ᠶ᠋ᠡᠷ ᠬᠡᠯᠬᠢᠪᠡ᠃ ᠴᠥᠮ ᠮᠠᠰᠢ ᠬᠤᠷᠳᠤᠨ ᠬᠥᠳᠡᠯᠮᠦᠷᠢᠯᠡᠵᠦ ᠰᠠᠵᠢᠯᠠᠵᠤ ᠠᠯᠬᠤᠬᠤ ᠵᠠᠪ ᠦᠭᠡᠢ ᠭᠦᠶᠦᠵᠦ ᠬᠠᠷᠠᠢᠵᠠᠭᠠᠨᠠ᠃ ᠲᠡᠳᠦᠢ ᠡᠷᠭᠢᠨ ᠡᠴᠡ ᠤᠰᠤᠨ ᠤ᠋ ᠵᠠᠬᠠ ᠬᠦᠷᠦᠭᠰᠡᠨ ᠭᠢᠰᠬᠢᠭᠦᠷ ᠱᠠᠲᠤ ᠶ᠋ᠢ ᠬᠢᠵᠦ ᠰᠠᠯ ᠢ᠋ ᠠᠪᠴᠢᠷᠠᠵᠤ ᠲᠡᠭᠦᠨ ᠳ᠋ᠡᠭᠡᠨ ᠲᠤᠯᠭᠠᠪᠠ᠃ ᠮᠣᠳᠣᠨ ᠳᠠᠷᠬᠠᠴᠤᠳ ᠢ᠋ ᠵᠢᠭᠲᠡᠢ ᠥᠷᠭᠡᠨ ᠬᠤᠪᠴᠠᠰᠤ ᠲᠠᠢ ᠥᠨᠳᠥᠷ ᠪᠦᠳᠦᠭᠦᠨ ᠬᠥᠮᠦᠨ ᠳᠠᠷᠤᠭᠠᠯᠠᠵᠤ᠂ ᠲᠡᠭᠦᠨ ᠦ᠌ ᠪᠢᠴᠢᠬᠠᠨ ᠬᠥᠬᠡ ᠮᠠᠯᠠᠭᠠᠢ ᠠ᠋ᠴᠠ ᠰᠢᠪᠠᠭᠤᠨ ᠤ᠋ ᠤᠷᠲᠤ ᠥᠳᠥ ᠨᠢᠷᠤᠭᠤ ᠤᠷᠤᠭᠤ ᠤᠨᠵᠢᠢᠵᠠᠢ᠃ ᠲᠡᠷᠡ ᠬᠥᠮᠦᠨ ᠤᠰᠤᠨ ᠤ᠋ ᠵᠠᠬᠠ ᠳ᠋ᠤ᠌ ᠬᠥᠳᠡᠯᠦᠯ ᠦᠭᠡᠢ ᠶᠠᠭ ᠵᠣᠭᠰᠣᠵᠤ ᠠᠵᠢᠯ ᠢ᠋ ᠬᠢᠨᠠᠵᠤ ᠪᠠᠢᠭᠠ ᠠᠷᠠᠫ᠊ᠱᠠ ᠲᠠᠢ ᠪᠠᠢᠨ ᠪᠠᠢᠨ ᠶᠠᠷᠢᠯᠴᠠᠨᠠ᠃ ᠬᠢᠲᠠᠳ ᠪᠦᠰᠡᠭᠦᠢ ᠳᠠᠬᠢᠨ ᠰᠢᠪᠡᠨᠡᠨ ᠬᠡᠯᠡᠭᠰᠡᠨ ᠨᠢ᠄ 《ᠮᠠᠯᠠᠭᠠᠢ ᠳᠡᠭᠡᠷᠡ ᠪᠡᠨ ᠤᠷᠲᠤ ᠥᠳᠥ ᠲᠡᠢ ᠲᠡᠷᠡ ᠬᠥᠮᠦᠨ᠂ ᠲᠤᠩ ᠤᠷᠠᠨ ᠳᠠᠷᠬᠠᠨ ᠪᠠᠷᠢᠯᠭᠠᠴᠢ ᠯᠢ ᠲᠦᠩ ᠫᠤᠤ ᠭᠡᠭᠴᠢ ᠪᠢᠯᠡ᠃ ᠪᠠᠢᠰᠢᠩ᠂ ᠣᠷᠳᠣᠨ᠂ ᠬᠠᠷᠰᠢ᠂ ᠬᠥᠩᠭᠡᠨ ᠪᠥᠬᠥᠭᠡ ᠴᠥᠮ ᠢ᠋ ᠪᠠᠢᠭᠤᠯᠵᠤ ᠴᠢᠳᠠᠳᠠᠭ ᠲᠡᠷᠡ ᠬᠥᠮᠦᠨ ᠶᠠᠭᠠᠬᠢᠵᠤ ᠰᠡᠭᠦᠷᠡᠰᠦᠨ ᠠᠯᠲᠠᠨ ᠮᠠᠨ ᠤ᠋ ᠬᠡᠯᠡ ᠪᠡᠷ ᠬᠠᠷᠢᠶᠠᠬᠤ ᠶ᠋ᠢ ᠪᠢ ᠰᠣᠨᠣᠰᠤᠯᠠ᠃《ᠡᠨᠳᠡ ᠮᠢᠨᠦ ᠠᠮᠢᠳᠤᠷᠠᠬᠤ ᠭᠠᠵᠠᠷ ᠪᠤᠰᠤ᠂ ᠡᠨᠡ ᠵᠡᠷᠯᠢᠭ ᠣᠷᠣᠨ ᠨᠠᠳᠠᠳᠤ ᠲᠣᠬᠢᠷᠠᠬᠤ ᠦᠭᠡᠢ 》ᠭᠡᠨᠡ᠃ ᠪᠠᠷᠢᠭᠳᠠᠭᠰᠠᠨ ᠡᠷᠳᠡᠮᠲᠡᠢ ᠬᠢᠲᠠᠳ ᠬᠥᠮᠦᠨ ᠭᠡᠨᠡ ᠪᠢᠯᠡ᠃ ᠨᠤᠲᠤᠭ ᠲᠠᠭᠠᠨ ᠪᠠᠢᠬᠤ ᠳ᠋ᠤ᠌ ᠬᠦᠷᠲᠡᠯᠡ ᠲᠡᠭᠦᠨ ᠢ᠋ ᠰᠣᠨᠣᠰᠤᠭᠰᠠᠨ ᠭᠡᠪᠡ᠃ ᠡᠭᠡᠴᠢᠮᠡᠳ ᠬᠠᠲᠤᠨ ᠰᠠᠨᠳᠤᠷᠤᠨ ᠰᠢᠪᠠᠭᠤ ᠵᠢᠷᠭᠢᠬᠦ ᠮᠡᠲᠦ ᠨᠠᠷᠢᠨ ᠳᠠᠭᠤ ᠪᠠᠷ ᠬᠡᠯᠡᠭᠰᠡᠨ ᠨᠢ᠄ 《ᠵᠠᠪᠢ ᠬᠥᠮᠥᠷᠢᠪᠡᠯ ᠶᠠᠭᠠᠬᠢᠬᠤᠪ( ᠶᠠᠭᠠᠬᠢᠬᠤ ᠪᠣᠢ ? ) ᠪᠢᠳᠡ ᠶᠠᠪᠤᠬᠤ ᠦᠭᠡᠢ᠂ ᠤᠷᠢᠳᠠᠪᠡᠷ ᠥᠭᠡᠷᠡ ᠬᠥᠮᠦᠨ ᠰᠣᠷᠢᠵᠤ ᠭᠠᠷᠭᠠ 》ᠭᠡᠪᠡ᠃
ᠠᠷᠠᠫᠱᠠ ᠬᠠᠭᠠᠨ ᠤ᠋ ᠬᠠᠲᠤᠳ ᠤ᠋ᠨ ᠵᠦᠭ ᠬᠠᠷᠠᠯ ᠦᠭᠡᠢ ᠬᠠᠷᠢᠭᠤ ᠴᠥ᠍ ᠬᠡᠯᠡᠯ ᠦᠭᠡᠢ ᠪᠣᠭᠣᠯᠴᠤᠳ ᠲᠸ᠋ ᠰᠠᠯ ᠪᠦᠷᠢ ᠳᠡᠭᠡᠷᠡ ᠨᠢᠭᠡ ᠨᠢᠭᠡ ᠲᠡᠮᠡᠭᠡ ᠠᠪᠴᠤ ᠭᠠᠷᠭᠠ ᠭᠡᠵᠦ ᠲᠤᠰᠢᠶᠠᠬᠤ ᠳ᠋ᠤ᠌ ᠬᠠᠲᠤᠳ ᠪᠠᠰᠠ ᠳᠠᠬᠢᠨ ᠪᠣᠭᠢᠮᠳᠠᠵᠤ ᠂《ᠲᠦᠷᠦᠭᠦᠨ ᠳ᠋ᠦ᠍ ᠮᠤᠤᠰᠠᠢᠨ ᠡᠩ ᠦ᠋ᠨ ᠡᠬᠡᠨᠡᠷ ᠦ᠋ᠳ ᠢ᠋ ᠶᠠᠪᠤᠭᠤᠯᠤᠭᠲᠤᠨ᠂ ᠵᠢᠪᠴᠦ ᠦᠬᠦᠬᠦ ᠡᠰᠡᠬᠦ ᠶ᠋ᠢ ᠨᠢ ᠪᠢᠳᠡ ᠦᠵᠡᠶᠡ 》ᠭᠡᠪᠡ᠃
ᠠᠷᠠᠫᠱᠠ ᠠᠵᠢᠯᠴᠢᠳ ᠲᠸ᠋ ᠶᠦᠯᠳᠦ᠋ᠽ ᠬᠢᠲᠠᠳ ᠠᠶᠠᠭᠠᠴᠢ ᠶ᠋ᠢᠨ ᠬᠠᠮᠲᠤ ᠰᠠᠭᠤᠵᠤ ᠶᠠᠪᠤᠳᠠᠭ ᠬᠠᠮᠤᠭ ᠤ᠋ᠨ ᠵᠠᠬᠠ ᠶ᠋ᠢᠨ ᠳᠣᠯᠣᠳᠤᠭᠠᠷ ᠲᠡᠮᠡᠭᠡ ᠶ᠋ᠢ ᠰᠠᠯ ᠳᠡᠭᠡᠷᠡ ᠭᠠᠷᠭᠠ ᠭᠡᠵᠦ ᠲᠤᠰᠢᠶᠠᠪᠠ᠃ ᠲᠡᠮᠡᠭᠡ ᠠᠷᠠᠫᠱᠠ ᠲᠠᠢ ᠵᠡᠷᠭᠡᠴᠡᠨ ᠢᠷᠡᠬᠦ ᠳ᠋ᠦ᠍ ᠢ ᠯᠡ ᠾᠧ ᠲᠡᠭᠦᠨ ᠳ᠋ᠦ᠍ ᠬᠡᠯᠡᠭᠰᠡᠨ ᠨᠢ᠄ 《ᠳᠠᠷᠬᠠᠨ ᠯᠢ ᠲᠦᠩ ᠫᠤᠤ ᠶ᠋ᠢ ᠵᠢᠭᠠᠵᠤ ᠡᠭᠦᠨ ᠢ᠋ ᠶᠦᠯᠳᠦ᠋ᠽ ᠬᠠᠲᠤᠨ ᠤ᠋ ᠬᠠᠮᠲᠤ ᠶᠠᠪᠤᠭᠤᠯᠤᠨᠠ ᠤᠤ? 》ᠭᠡᠪᠡ᠃ ( ᠢ ᠯᠡ ᠾᠧ ᠳᠠᠷᠬᠠᠨ ᠯᠢ ᠲᠦᠩ ᠫᠤᠤ ᠶ᠋ᠢ ᠵᠢᠭᠠᠵᠤ ᠲᠡᠭᠦᠨ ᠳ᠋ᠦ᠍ ᠬᠡᠯᠡᠭᠰᠡᠨ ᠨᠢ᠄《ᠡᠭᠦᠨ ᠢ᠋ ᠶᠦᠯᠳᠥ᠋ᠽ ᠬᠠᠲᠤᠨ ᠤ᠋ ᠬᠠᠮᠲᠤ ᠶᠠᠪᠤᠭᠤᠯᠤᠨᠠ ᠤᠤ? 》 ᠭᠡᠪᠡ᠃ )
ᠠᠷᠠᠫᠱᠠ ᠬᠢᠲᠠᠳ ᠪᠦᠰᠡᠭᠦᠢ ᠶ᠋ᠢᠨ ᠵᠦᠭ ᠦᠯᠦ ᠢᠲᠡᠭᠡᠮᠵᠢᠯᠡᠬᠦ ᠬᠦᠢᠲᠡᠨ ᠴᠢᠷᠠᠢ ᠪᠠᠷ ᠥᠩᠭᠥᠢᠭᠡᠳ ᠪᠤᠷᠤᠭᠤ ᠬᠠᠨᠳᠤᠪᠠ᠃ ᠭᠢᠰᠬᠢᠭᠦᠷ ᠦ᠋ᠨ ᠳᠡᠷᠭᠡᠳᠡ ᠲᠡᠮᠡᠭᠡ ᠶ᠋ᠢ ᠰᠥᠭᠦᠳᠦᠭᠦᠯᠵᠦ᠂ ᠬᠢᠲᠠᠳ ᠪᠦᠰᠡᠭᠦᠢ ᠶᠦᠯᠳᠦ᠋ᠽ ᠬᠣᠶᠠᠷ ᠪᠣᠯᠭᠣᠮᠵᠢᠯᠠᠨ ᠣᠢᠷᠠᠬᠠᠨ ᠠᠯᠬᠤᠵᠤ ᠰᠠᠯ ᠳᠡᠭᠡᠷᠡ ᠭᠠᠷᠤᠭᠰᠠᠨ ᠳ᠋ᠤ᠌ ᠬᠢᠲᠠᠳ ᠳᠠᠷᠬᠠᠨ ᠲᠦᠷᠦᠭᠦᠨ ᠳ᠋ᠦ᠍ ᠶᠠᠪᠤᠨ ᠲᠡᠳᠡᠨ ᠢ᠋ ᠬᠠᠯᠲᠤᠷᠢᠵᠤ ᠤᠨᠠᠬᠤ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠪᠠ᠃ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠪᠤᠰᠤᠳ ᠬᠥᠮᠦᠰ ᠠᠰᠤᠷᠤ ᠲᠣᠮᠣ ᠰᠡᠭᠰᠡᠭᠡᠷ ᠲᠡᠮᠡᠭᠡ ᠶ᠋ᠢ ᠰᠠᠯ ᠳᠡᠭᠡᠷᠡ ᠠᠪᠴᠢᠷᠠᠬᠤ ᠳ᠋ᠤ᠌ ᠲᠡᠮᠡᠭᠡᠳ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠴᠦ ᠤᠷᠲᠤ ᠤᠷᠤᠭᠤᠯ ᠠ᠋ᠴᠠ ᠪᠠᠨ ᠴᠠᠭᠠᠨ ᠬᠥᠭᠡᠰᠦ ᠰᠠᠬᠠᠷᠠᠭᠤᠯᠤᠨ ᠭᠣᠭᠣᠵᠢᠭᠤᠯᠬᠤ ᠦᠵᠡᠭᠳᠡᠯᠡ᠂ ᠲᠡᠮᠡᠭᠡ ᠰᠠᠯ ᠳᠡᠭᠡᠷᠡ ᠬᠡᠪᠲᠡᠵᠦ ᠥᠭᠭᠦᠭᠰᠡᠨ ᠦᠭᠡᠢ᠃ ᠲᠣᠭᠠ ᠲᠣᠮᠰᠢ ᠦᠭᠡᠢ ᠣᠯᠠᠨ ᠴᠡᠷᠢᠭ ᠥᠷᠭᠡᠨ ᠮᠥᠷᠡᠨ ᠢ᠋ ᠭᠠᠲᠤᠯᠬᠤ ᠶ᠋ᠢ ᠰᠣᠨᠢᠷᠬᠠᠨ ᠬᠠᠷᠠᠭᠴᠢᠳ ᠤ᠋ᠨ ᠨᠢᠭᠡᠨ ᠪᠣᠯᠬᠤ ᠭᠡᠰᠡᠨ ᠶᠤᠮᠰᠢᠭ ᠲᠣᠯᠣᠭᠠᠢ ᠳ᠋ᠠᠭᠠᠨ( ᠪᠡᠨ )ᠡᠷᠭᠢᠯᠳᠦᠭᠦᠯᠦᠨ ᠶᠡᠬᠡᠮᠰᠦᠭ ᠢ᠋ᠶ᠋ᠡᠷ ᠵᠣᠭᠰᠣᠪᠠ᠃ ᠲᠣᠮᠣ ᠰᠢᠷᠠ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠲᠣᠯᠣᠭᠠᠢ ᠪᠠᠨ ᠪᠦᠲᠡᠭᠡᠭᠰᠡᠨ ᠶᠦᠯᠳᠥ᠋ᠽ ᠰᠠᠯ ᠤ᠋ᠨ ᠥᠨᠴᠥᠭ ᠳᠡᠭᠡᠷᠡᠬᠢ ᠳᠡᠪᠢᠰᠬᠡᠷ ᠳᠡᠭᠡᠷᠡ ᠰᠠᠭᠤᠵᠤ᠂ ᠠᠷᠤᠨ ᠳ᠋ᠤ᠌ ᠬᠢᠲᠠᠳ ᠪᠦᠰᠡᠭᠦᠢ ᠢ ᠯᠡ ᠾᠧ ᠵᠣᠭᠰᠣᠬᠤ ᠳ᠋ᠤ᠌ ᠶᠠᠭᠠᠨ ᠲᠡᠷᠯᠢᠭ ᠨᠢ ( ᠤ᠋ᠨ )ᠨᠢᠮᠭᠡᠨ ᠫᠠᠩᠰᠠᠨ ᠤ᠋ ᠨᠤᠭᠤᠯᠤᠭᠠ ᠰᠠᠯᠬᠢᠨ ᠳ᠋ᠤ᠌ ᠪᠥᠵᠢᠭᠯᠡᠨ ᠰᠠᠷᠪᠠᠯᠵᠠᠨᠠ᠃ ᠰᠡᠯᠢᠭᠦᠷᠴᠢᠳ ᠰᠡᠯᠢᠭᠦᠷ ᠢ᠋ ᠤᠰᠤᠨ ᠳ᠋ᠤ᠌ ᠲᠥᠷᠥᠨ ᠪᠣᠭᠣᠯᠴᠤᠳ ᠠᠷᠭᠠᠮᠵᠢ ᠶ᠋ᠢᠨ ᠦᠵᠦᠭᠦᠷ ᠢ᠋ ᠬᠤᠢᠯᠠᠪᠠ᠃ ᠬᠦᠯᠢᠶᠡᠭᠲᠦᠨ ᠭᠡᠵᠦ ᠬᠠᠰᠬᠢᠷᠬᠤ ᠳᠠᠭᠤᠨ ᠨᠢ ᠰᠣᠨᠣᠰᠳᠠᠪᠠ᠃ ᠪᠠᠲᠤ ᠬᠠᠭᠠᠨ ᠴᠠᠭᠠᠨ ᠮᠣᠷᠢ ᠶ᠋ᠢ ᠤᠨᠤᠵᠤ ᠭᠢᠰᠬᠢᠭᠦᠷ ᠳᠡᠭᠡᠷᠡ ᠢᠷᠡᠭᠡᠳ ᠱᠠᠯᠠᠮᠠᠭ ᠬᠠᠷᠠᠢᠨ ᠪᠠᠭᠤᠮᠠᠭᠴᠠ ᠦᠷᠭᠦᠯᠵᠢ ᠬᠠᠮᠠᠷ ᠢ᠋ᠶ᠋ᠠᠨ ᠬᠠᠪᠴᠢᠭᠢᠨᠠᠭᠤᠯᠬᠤ ᠮᠣᠷᠢ ᠶ᠋ᠢ ᠥᠪᠡᠷ ᠢ᠋ᠶ᠋ᠡᠨ ᠬᠥᠲᠥᠯᠦᠨ ᠰᠠᠯ ᠳᠡᠭᠡᠷᠡ ᠠᠪᠴᠢᠷᠠᠵᠤ ᠲᠡᠮᠡᠭᠡᠨ ᠦ᠌ ᠳᠡᠷᠭᠡᠳᠡ ᠵᠣᠭᠰᠣᠭᠠᠪᠠ᠃ ᠶᠡᠬᠡ ᠵᠠᠩᠵᠤᠨ ᠤ᠋ ᠬᠣᠢᠨᠠ ᠠ᠋ᠴᠠ ᠠᠷᠠᠫᠱᠠ ᠳᠠᠭᠠᠵᠠᠢ᠃ ᠬᠡᠳᠦᠨ ᠮᠣᠩᠭᠣᠯ ᠬᠥᠮᠦᠨ ᠰᠠᠯ ᠤᠷᠤᠭᠤ ᠭᠦᠶᠦᠨ ᠠᠢᠰᠤᠢ᠂ ᠠᠷᠠᠫᠱᠠ ᠶ᠋ᠢ ᠡᠷᠭᠢᠵᠦ ᠲᠦᠯᠬᠢᠨ ᠪᠤᠴᠠᠭᠠᠬᠤ ᠳ᠋ᠤ᠌ ᠨᠢᠭᠡ ᠨᠢ ᠬᠠᠯᠲᠤᠷᠢᠵᠤ ᠤᠰᠤᠨ ᠳ᠋ᠤ᠌ ᠤᠨᠠᠯᠠ᠃ ᠲᠡᠷᠡ ᠬᠥᠮᠦᠨ ᠭᠢᠰᠬᠢᠭᠦᠷ ᠡᠴᠡ ᠬᠣᠯᠠᠳᠠᠨ ᠵᠠᠢᠯᠠᠬᠤ ᠳ᠋ᠤ᠌ ᠠᠷᠠᠫᠱᠠ ᠰᠠᠯ ᠤᠷᠤᠭᠤ ᠬᠠᠷᠠᠢᠯᠠ᠃
ᠪᠠᠲᠤ ᠬᠠᠭᠠᠨ᠂ ᠴᠠᠭᠠᠨ ᠮᠣᠷᠢ ᠰᠦᠷᠡᠬᠡᠢ ᠲᠡᠮᠡᠭᠡ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠵᠣᠭᠰᠣᠵᠤ ᠶᠡᠬᠡᠳᠡ ᠰᠡᠳᠬᠢᠯ ᠬᠥᠳᠡᠯᠦᠭᠰᠡᠨ ᠴᠢᠷᠠᠢ ᠪᠠᠷ ᠡᠰᠢ ᠲᠡᠰᠢ ᠠᠵᠢᠭᠯᠠᠨ ᠬᠠᠷᠠᠵᠤ ᠪᠠᠢᠯᠠ᠃ ᠡᠮᠦᠨᠡ ᠨᠢ ᠲᠡᠭᠦᠨ ᠢ᠋ ᠪᠠᠯᠠᠷᠠᠰᠢ ᠦᠭᠡᠢ ᠠᠯᠳᠠᠷ ᠢ᠋ᠶ᠋ᠠᠨ ᠮᠠᠨᠳᠤᠭᠤᠯᠬᠤ ᠨᠤᠲᠤᠭ ᠦᠵᠡᠭᠳᠡᠨᠡ᠃
ᠪᠠᠲᠤ ᠬᠠᠭᠠᠨ ᠲᠣᠷᠭᠠᠨ ᠪᠦᠲᠡᠭᠡᠯᠭᠡ ᠪᠡᠷ ᠪᠦᠲᠡᠭᠡᠭᠰᠡᠨ ᠪᠢᠴᠢᠬᠠᠨ ᠬᠡᠦᠬᠡᠨ ᠦ᠌ ᠵᠦᠭ ᠬᠠᠨᠳᠤᠵᠤ᠂
— ᠵᠢᠭᠠᠬᠠᠨ ᠬᠡᠦᠬᠡᠨ ᠴᠢᠨᠦ ᠨᠡᠷᠡ ᠬᠡᠨ ᠪᠣᠢ? ᠭᠡᠵᠦ ᠠᠰᠠᠭᠤᠪᠠ᠃
— ᠡᠵᠡᠨ ᠮᠢᠨᠢ ᠂ ᠮᠢᠨᠦ ᠨᠡᠷᠡ ᠶᠦᠯᠳᠥ᠋ᠽ ᠭᠡᠵᠦ ᠬᠡᠯᠡᠪᠡ᠃
— ᠴᠣᠭ ᠵᠠᠯᠢ ᠳᠡᠯᠭᠡᠷᠡᠭᠦᠯᠬᠦ ᠥᠯᠵᠡᠢ ᠲᠡᠢ ᠨᠡᠷᠡ ᠪᠠᠢᠨᠠ ᠭᠡᠪᠡ᠃
ᠬᠢᠲᠠᠳ ᠳᠠᠷᠬᠠᠨ ᠯᠢ ᠲᠦᠩ ᠫᠤᠤ ᠬᠦᠷᠴᠦ ᠢᠷᠡᠭᠡᠳ ᠬᠡᠯᠡᠭᠰᠡᠨ ᠨᠢ᠂
— ᠥᠨᠥᠳᠥᠷ ᠡᠷᠬᠢᠮ ᠰᠠᠢᠨ ᠡᠳᠦᠷ ᠭᠡᠷᠡᠯᠲᠦ ᠴᠢᠨᠦ ᠪᠡᠶᠡ ᠥᠷᠥᠨᠡ ᠳᠣᠷᠣᠨᠠ ᠬᠣᠶᠠᠷ ᠢ᠋ ᠲᠠᠰᠤᠯᠤᠭᠰᠠᠨ ᠶᠡᠬᠡ ᠮᠥᠷᠡᠨ ᠢ᠋ ᠭᠠᠲᠤᠯᠵᠤ ᠪᠠᠢᠨᠠ᠃ ᠴᠢᠨᠦ ᠪᠡᠶᠡ ᠵᠢᠪᠬᠤᠯᠠᠩᠲᠠᠢ ᠰᠠᠢᠬᠠᠨ ᠮᠣᠷᠢ᠂ ᠪᠣᠭᠣᠯ ᠬᠥᠮᠦᠨ᠂ ᠬᠦᠴᠦᠲᠦ ᠲᠡᠮᠡᠭᠡᠨ ᠦ᠌ ᠬᠠᠮᠲᠤ ᠬᠥᠪᠴᠦ ᠶᠠᠪᠤᠨᠠ᠃ ᠴᠢᠨᠦ ᠡᠮᠦᠨᠡ ᠴᠣᠭ ᠵᠠᠯᠢ ᠶ᠋ᠢ ᠪᠠᠳᠠᠷᠠᠭᠤᠯᠬᠤ ᠶᠦᠯᠳᠥ᠋ᠽ ᠣᠳᠣᠨ ᠬᠡᠷᠡᠯᠳᠦᠵᠦ ᠪᠠᠢᠨᠠ᠃ ᠢ ᠯᠡ ᠾᠧ ᠶᠦᠯᠳᠥ᠋ᠽ ᠲᠦ᠍ ᠰᠡᠮᠬᠡᠨ ᠬᠡᠳᠦᠨ ᠦᠭᠡ ᠰᠢᠪᠡᠨᠡᠪᠡ᠃ ᠶᠦᠯᠳᠥ᠋ᠽ᠂ ᠡᠬᠡ ᠬᠠᠲᠤᠨ ᠤᠷᠢ ᠹᠦᠵᠢᠨ( ᠤ᠋ ) ᠬᠢᠲᠠᠳ ᠪᠦᠰᠡᠭᠦᠢ ᠶ᠋ᠢᠨ ᠦᠭᠡ ᠵᠠᠬᠢᠶᠠ ᠶ᠋ᠢ ᠳᠠᠭᠠᠵᠤ ᠶᠠᠪᠤ ᠭᠡᠵᠦ ᠲᠤᠰᠢᠶᠠᠭᠰᠠᠨ ᠢ᠋ ᠰᠠᠨᠠᠵᠤ᠂ ᠬᠦᠨᠳᠦᠳᠬᠡᠨ ᠪᠣᠰᠤᠭᠠᠳ ᠰᠦᠷᠳᠡᠨ ᠨᠢᠭᠤᠷ ᠤᠯᠠᠢᠵᠤ ᠪᠠᠲᠤ ᠬᠠᠭᠠᠨ ᠳ᠋ᠤ᠌ ᠴᠢᠩᠭᠠ ᠪᠠᠷ ᠬᠡᠯᠡᠭᠰᠡᠨ ᠨᠢ᠄
— ᠴᠢᠨᠦ ᠠᠯᠳᠠᠷ ᠬᠠᠷᠠᠩᠭᠤᠢ ᠣᠭᠲᠠᠷᠭᠤᠢ ᠶ᠋ᠢᠨ ᠣᠷᠭᠢᠯ ᠳ᠋ᠤ᠌ ᠨᠢᠰᠬᠦ ᠬᠤᠷᠴᠠ ᠣᠳᠣᠨ ᠰᠣᠯᠢᠷ ᠤ᠋ᠨ ᠠᠳᠠᠯᠢ ᠮᠠᠨᠳᠤᠵᠤ᠂ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠵᠠᠮ ᠢ᠋ ᠨᠢᠳᠦ ᠭᠢᠯᠪᠠᠮᠠ ᠢᠯᠠᠯᠲᠠ ᠶ᠋ᠢᠨ ᠲᠤᠶᠠᠭᠠ ᠪᠠᠷ ᠭᠡᠷᠡᠯᠲᠦᠭᠦᠯᠦᠨᠡ ᠭᠡᠪᠡ᠃ ᠪᠠᠲᠤ ᠬᠠᠭᠠᠨ ᠦᠯᠦ ᠮᠡᠳᠡᠭ ᠢᠨᠢᠶᠡᠮᠰᠦᠭᠯᠡᠭᠡᠳ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠳᠤᠭᠠᠳ ᠳᠠᠬᠢᠨ ᠬᠦᠢᠲᠡᠨ ᠴᠢᠷᠠᠢ ᠲᠠᠢ ᠪᠣᠯᠵᠤ᠂
—ᠪᠢ ᠮᠣᠩᠭᠣᠯ ᠤ᠋ᠨ ᠬᠥᠳᠡᠯᠦᠰᠢ ᠦᠭᠡᠢ ᠪᠠᠲᠤ ᠵᠠᠰᠠᠭ ᠤ᠋ᠨ ᠡᠷᠬᠡ ᠶ᠋ᠢ ᠳᠡᠯᠡᠬᠡᠢ ᠶ᠋ᠢᠨ ᠬᠢᠵᠠᠭᠠᠷ ᠲᠤ᠌ ᠬᠦᠷᠭᠡᠵᠦ ᠠᠭᠤᠤ ᠶᠡᠬᠡ ᠦᠢᠯᠡᠰ ᠪᠦᠲᠦᠭᠡᠨᠡ ᠭᠡᠪᠡ᠃
ᠴᠠᠭᠠᠨ ᠮᠣᠷᠢ ᠨᠢ ᠬᠠᠷᠠ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠤᠰᠤᠨ ᠤ᠋ ᠳᠣᠯᠭᠢᠶᠠᠨ ᠴᠠᠯᠭᠢᠬᠤ ᠶ᠋ᠢ ᠰᠢᠷᠳᠡᠵᠦ ᠤᠷᠲᠤ ᠰᠡᠯᠢᠭᠦᠷ ᠳᠠᠯᠠᠢᠬᠤ ᠪᠦᠷᠢ ᠳ᠋ᠦ᠍ ᠬᠥᠯ ᠢ᠋ᠶ᠋ᠡᠨ ᠵᠥᠭᠡᠭᠡᠵᠦ ᠲᠠᠯᠪᠢᠨᠠ᠃ ᠨᠥᠭᠦᠭᠡ ᠡᠲᠡᠭᠡᠳ ᠲᠦ᠍ ᠶᠡᠬᠡᠮᠰᠦᠭ ᠣᠮᠣᠷᠬᠠᠭ ᠲᠡᠮᠡᠭᠡ ᠭᠢᠯᠠᠯᠵᠠᠬᠤ ᠨᠢᠳᠦ ᠪᠡᠷ ᠠᠰᠤᠷᠤ ᠶᠡᠬᠡ ᠤᠰᠤᠨ ᠤ᠋ ᠠᠭᠤᠳᠠᠮ ᠳ᠋ᠤ᠌ ᠪᠠᠶᠠᠰᠬᠤ ᠮᠡᠲᠦ ᠬᠠᠷᠠᠨ ᠵᠣᠭᠰᠣᠵᠠᠢ᠃ ᠨᠥᠭᠦᠭᠡ ᠲᠠᠯᠠ ᠶ᠋ᠢᠨ ᠡᠷᠭᠢ ᠣᠢᠷᠠᠲᠤᠬᠤ ᠶ᠋ᠢᠨ ᠬᠠᠮᠲᠤ ᠡᠯᠡᠰᠦᠨ ᠬᠡᠴᠡ ᠳᠡᠭᠡᠷᠡ ᠬᠠᠩᠭᠢᠨᠠᠭᠰᠠᠨ ᠡᠷᠢᠶᠡᠨ ᠲᠡᠮᠳᠡᠭ ᠪᠦᠬᠦᠢ ᠮᠣᠩᠭᠣᠯ ᠤ᠋ᠨ ᠰᠢᠳᠠᠷ ᠵᠠᠭᠤᠨ ᠤ᠋ ᠬᠢᠨ ᠵᠢᠳᠠ ᠪᠠᠷᠢᠨ ᠵᠢᠭᠰᠠᠵᠤ᠂ ᠢᠮᠠᠭᠠᠨ ᠪᠦᠷᠢᠶᠡ ᠶᠠᠩᠭᠢᠨᠠᠭᠠᠳ᠂ 《ᠠᠶᠤᠭᠲᠤᠨ! ᠪᠢᠰᠢᠷᠡᠭᠲᠦᠨ! 》ᠭᠡᠵᠦ ᠬᠠᠰᠬᠢᠷᠤᠯᠳᠤᠪᠠ᠃ ᠮᠣᠩᠭᠣᠯ ᠲᠠᠲ᠋ᠠᠷ ᠤ᠋ᠨ ᠶᠡᠬᠡ ᠴᠡᠷᠢᠭ ᠢᠵᠢᠯ ᠮᠥᠷᠡᠨ ᠢ᠋ ᠣᠯᠠᠨ ᠬᠣᠨᠣᠭ ᠤ᠋ᠨ ᠲᠤᠷᠰᠢ ᠭᠠᠲᠤᠯᠬᠤ ᠳ᠋ᠤ᠌ ᠳᠠᠪᠠᠷᠬᠠᠢᠳᠠᠭᠰᠠᠨ ᠶᠡᠬᠡ ᠪᠠᠭᠠ ᠣᠯᠠᠨ ᠵᠠᠪᠢ ᠴᠡᠷᠢᠭ ᠦ᠋ᠨ ᠣᠯᠠᠨ ᠡᠷᠡᠰ᠂ ᠲᠡᠳᠡᠨ ᠦ᠌ ᠠᠶᠠᠨ ᠤ᠋ ᠠᠴᠢᠶᠠ᠂ ᠭᠡᠷ ᠪᠠᠷᠠᠭᠠ᠂ ᠪᠤᠳᠠᠭᠠ᠂ ᠭᠤᠯᠢᠷ ᠲᠠᠢ ᠬᠡᠦᠳᠡᠢ ᠲᠡᠷᠢᠭᠦᠲᠡᠨ ᠢ᠋ ᠲᠠᠰᠤᠷᠠᠯᠲᠠ ᠦᠭᠡᠢ ᠵᠥᠭᠡᠭᠡᠵᠦ ᠮᠥᠷᠡᠨ ᠢ᠋ ᠭᠡᠲᠦᠯᠦᠭᠰᠡᠭᠡᠷ ᠪᠠᠢᠯᠠ᠃ ᠦᠯᠢᠶᠡᠭᠰᠡᠨ ᠲᠣᠮᠣ ᠲᠤᠯᠤᠮ ᠢ᠋ ᠬᠣᠯᠪᠣᠨ ᠰᠠᠯ ᠬᠢᠵᠦ ᠳᠡᠭᠡᠷᠡ ᠨᠢ ᠲᠡᠮᠡᠭᠡ ᠵᠡᠷᠭᠡ ᠪᠤᠰᠤᠳ ᠮᠠᠯ ᠢ᠋ ᠭᠠᠷᠭᠠᠳᠠᠭ ᠪᠠᠢᠭᠰᠠᠨ ᠲᠤᠯᠠ ᠴᠥᠮ ᠭᠣᠣᠯ ᠤ᠋ᠨ ᠳᠡᠭᠡᠭᠦᠷ ᠱᠤᠤᠭᠢᠨ᠂ ᠬᠠᠰᠬᠢᠷᠤᠨ ᠪᠠᠷᠬᠢᠷᠠᠨ ᠲᠡᠷᠲᠡᠭᠡ ᠡᠷᠭᠢ ᠤᠷᠤᠭᠤ ᠬᠥᠪᠴᠦ ᠪᠠᠢᠯᠠ᠃ ᠪᠠᠲᠤ ᠬᠠᠭᠠᠨ ᠦᠷᠡᠺ ᠭᠡᠳᠡᠭ ᠠᠭᠤᠯᠠ ᠶ᠋ᠢᠨ ᠣᠷᠴᠢᠮ ᠨᠢᠭᠡᠨ ᠬᠡᠰᠡᠭ ᠦᠶᠡ ᠲᠦᠳᠡᠵᠡᠢ᠃ ᠲᠡᠭᠡᠭᠡᠳ ᠭᠣᠣᠯ ᠭᠠᠲᠤᠯᠤᠭᠰᠠᠨ ᠲᠦᠷᠦᠭᠦᠨ ᠦ᠌ ᠣᠲ᠋ᠷᠢᠶᠠᠳ᠋ ᠢ᠋ᠶ᠋ᠠᠨ ( ᠳ᠋ᠤ᠌ ᠪᠠᠨ ) ᠲᠤᠰᠢᠶᠠᠭᠰᠠᠨ ᠨᠢ ᠄《ᠤᠷᠤᠭᠰᠢ ᠲᠠᠪᠰᠢᠵᠤ ᠺᠢᠫᠴᠡᠺ ᠦ᠋ᠨ ᠠᠭᠤᠳᠠᠮ ᠶᠡᠬᠡ ᠲᠠᠯᠠ ᠳ᠋ᠤ᠌ ᠬᠦᠷᠴᠦ ᠡᠮᠦᠨᠡ᠂ ᠥᠷᠥᠨᠡ ᠵᠦᠭ ᠲᠦ᠍ ᠲᠦᠷᠭᠡᠯᠡᠵᠦ ᠵᠠᠢᠯᠠᠵᠤ ᠪᠠᠢᠭᠠ ᠺᠢᠫᠴᠡᠺ ᠦ᠋ᠨ ᠵᠢᠵᠢᠭ ᠤᠯᠤᠰ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠬᠥᠭᠡᠭᠡᠬᠦ ᠬᠡᠷᠡᠭᠲᠡᠢ 》ᠭᠡᠵᠡᠢ᠃ 《ᠬᠡᠨ ᠡᠰᠡᠷᠭᠦᠴᠡᠪᠡᠯ ᠲᠡᠭᠦᠨ ᠢ᠋ ᠤᠰᠠᠳᠬᠠᠭᠲᠤᠨ᠃ ᠺᠢᠫᠴᠡᠺ ᠦ᠋ᠨ ᠬᠠᠭᠠᠳ ᠠ᠋ᠴᠠ ᠬᠡᠨ ᠨᠢᠭᠡᠨ ᠡᠲᠡᠭᠡᠳ ᠥᠪᠡᠷ ᠦ᠋ᠨ ᠣᠪᠣᠭ ᠠᠢᠮᠠᠭ ᠤ᠋ᠨ ᠬᠠᠮᠲᠤ ᠪᠠᠭᠤᠵᠤ ᠥᠭᠪᠡᠯ ᠪᠠᠷᠢᠵᠤ ᠢᠷᠡᠭᠲᠦᠨ᠂ ᠬᠠᠷᠢᠨ ᠲᠡᠭᠦᠨ ᠦ᠌ ᠮᠠᠯ ᠪᠣᠯᠤᠨ ᠪᠦᠬᠦ ᠬᠥᠷᠥᠩᠭᠡ ᠨᠢ ᠪᠠᠢᠯᠳᠤᠭᠠᠨ ᠤ᠋ ᠣᠯᠵᠠ ᠶ᠋ᠢᠨ ᠵᠢᠷᠤᠮ ᠢ᠋ᠶ᠋ᠠᠷ ᠮᠣᠩᠭᠣᠯ ᠴᠡᠷᠢᠭ ᠲᠦ᠍ ᠬᠡᠷᠡᠭᠯᠡᠭᠳᠡᠬᠦ ᠶᠣᠰᠣᠲᠠᠢ᠃
ᠺᠢᠫᠴᠠᠺ ᠪᠣᠯᠤᠨ ᠪᠤᠰᠤᠳ ᠦᠨᠳᠦᠰᠦᠲᠡᠨ ᠮᠢᠨᠦ ᠠᠭᠤᠤ ᠶᠡᠬᠡ ᠴᠡᠷᠢᠭ ᠦ᠋ᠨ ᠬᠠᠮᠲᠤ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠣᠷᠣᠪᠠᠯ ᠠᠰᠤᠷᠤ ᠶᠡᠬᠡ ᠰᠢᠳᠤᠷᠭᠤ ᠶ᠋ᠢ ᠭᠦᠢᠴᠡᠳᠬᠡᠭᠰᠡᠨ ᠳ᠋ᠦ᠍ ᠲᠣᠭᠠᠯᠠᠭᠳᠠᠬᠤ ᠲᠤᠯᠠ ᠲᠡᠳᠡ ᠥᠪᠡᠷᠰᠡᠳ ᠦ᠋ᠨ ᠢᠯᠠᠯᠲᠠ ᠪᠠᠷ ᠰᠢᠨᠡ ᠪᠠᠶᠠᠯᠢᠭ ᠢ᠋ ᠬᠤᠷᠠᠮᠯᠠᠭᠤᠯᠬᠤ ᠪᠣᠯᠤᠨᠠ ᠭᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠨᠴᠡᠴᠡᠭ᠂ ᠭᠡᠷᠡᠯ᠂ ᠬᠡᠷᠡᠢᠳ· ᠮᠥᠩᠬᠡᠨᠠᠰᠤᠨ᠂ ᠠᠯᠲᠠᠨᠴᠢᠮᠡᠭ
ᠬᠢᠨᠠᠭᠴᠢ᠄ ᠪᠠᠯ᠂ ᠠᠷᠢᠭᠤᠨ᠂ ᠠᠯᠲᠠᠨᠴᠢᠮᠡᠭ᠂ ᠪᠠᠶᠠᠨᠴᠡᠴᠡᠭ᠂ ᠲ· ᠬᠦᠮᠦᠵᠢᠯᠲᠦ