ᠪᠠᠲᠤ ᠬᠠᠭᠠᠨ 2-11 ᠸᠠᠸᠢᠯ ᠡᠪᠦᠭᠡᠨ-ᠪᠠᠲᠤ ᠬᠠᠭᠠᠨ ᠥᠷᠥᠨᠡ ᠵᠦᠭ ᠲᠦ᠍ ᠬᠥᠳᠡᠯᠦᠯᠡ-Bat khaan Бат хаан-ᠷᠣᠮᠠᠨ
210ᠠᠷᠪᠠᠨ ᠨᠢᠭᠡ ᠸᠠᠸᠢᠯ ᠡᠪᠦᠭᠡᠨ
ᠲᠡᠨᠳᠡ ᠡᠴᠡ ᠪᠠᠲᠤ ᠬᠠᠭᠠᠨ᠂ ᠬᠠᠳ᠋ᠵᠢ ᠷᠠᠾᠢᠮ ᠢ᠋ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠠᠯᠲᠠᠨ ᠰᠢᠷᠠ ᠠᠰᠠᠷ ᠲᠤ᠌ ᠭᠠᠳᠠᠭᠠᠳᠤ ᠶ᠋ᠢᠨ ᠬᠥᠮᠦᠰ ᠲᠡᠢ ᠶᠠᠷᠢᠶᠠ ᠬᠢᠬᠦ ᠳ᠋ᠦ᠍ ᠪᠠᠢᠯᠴᠠ ᠭᠡᠵᠦ ᠲᠤᠰᠢᠶᠠᠵᠠᠢ᠃
ᠲᠡᠭᠡᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠬᠣᠷᠭᠣᠢ ᠬᠦᠷᠮᠡ ᠡᠮᠦᠰᠴᠦ ᠬᠤᠷᠤᠭᠤ ᠪᠦᠷᠢ ᠳ᠋ᠡᠭᠡᠨ ᠠᠯᠮᠠᠰ ᠪᠦᠯᠡᠵᠡᠭ ᠵᠡᠭᠦᠨ ᠭᠢᠯᠲᠠᠭᠠᠨᠠᠭᠤᠯᠵᠤ ᠭᠡᠷᠡᠯᠲᠦ᠂ ᠠᠰᠠᠷ ᠤ᠋ᠨ ᠬᠣᠢᠮᠣᠷ ᠠᠯᠲᠠᠨ ᠰᠠᠭᠤᠳᠠᠯ ᠳᠡᠭᠡᠷᠡ ᠰᠠᠭᠤᠪᠠ᠃
ᠵᠡᠭᠦᠨ ᠡᠲᠡᠭᠡᠳ ᠲᠦ᠍ ᠳᠤᠭᠤᠢ ᠳᠠᠷᠤᠩᠭᠤᠢ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ᠂ ᠶᠡᠷᠦᠩᠬᠡᠢ ᠴᠡᠷᠢᠭ ᠦ᠋ᠨ ᠵᠠᠬᠢᠷᠤᠯ ᠤ᠋ᠳ ᠳᠡᠭᠡᠳᠦ ᠶ᠋ᠢᠨ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠦᠭᠡᠳ ᠰᠠᠭᠤᠯᠠ᠃ ᠪᠠᠷᠠᠭᠤᠨ ᠡᠲᠡᠭᠡᠳ ᠲᠦ᠍ ᠰᠤᠪᠤᠳ ᠤᠲᠠᠰᠤ ᠪᠠᠷ ᠬᠡᠷᠦᠭᠰᠡᠨ ᠥᠨᠳᠥᠷ ᠮᠠᠯᠠᠭᠠᠢ᠂ ᠠᠯᠲᠠᠨ ᠴᠡᠴᠡᠭ ᠬᠠᠳᠬᠤᠭᠰᠠᠨ ᠲᠣᠷᠭᠠᠨ ᠳᠡᠪᠡᠯ ᠡᠮᠦᠰᠦᠭᠰᠡᠨ ᠬᠠᠭᠠᠨ ᠤ᠋ ᠳᠥᠷᠪᠡᠨ ᠮᠣᠩᠭᠣᠯ ᠬᠠᠲᠤᠨ ᠦᠯᠢᠭᠡᠷ ᠦ᠋ᠨ ᠰᠢᠪᠠᠭᠤ ᠰᠢᠭ᠋ ᠭᠠᠩᠭᠠᠯᠠᠨ ᠰᠠᠭᠤᠵᠠᠢ᠃ ᠨᠢᠭᠤᠴᠠ ᠶ᠋ᠢ ᠡᠷᠬᠢᠯᠡᠬᠦ ᠴᠢᠬᠤᠯᠠ ᠵᠥᠪᠯᠡᠯᠭᠡᠨ ᠵᠥᠪᠯᠡᠬᠦ ᠳ᠋ᠦ᠍ ᠵᠥᠪᠬᠡᠨ ᠮᠣᠩᠭᠣᠯ ᠬᠠᠲᠤᠨ ᠢ᠋ ᠪᠠᠢᠯᠭᠠᠬᠤ ᠠ᠋ᠴᠠ ᠪᠤᠰᠤ ᠥᠭᠡᠷᠡ ᠬᠠᠲᠤᠳ ᠢ᠋ ᠣᠷᠣᠭᠤᠯᠳᠠᠭ ᠦᠭᠡᠢ ᠵᠠᠩᠰᠢᠯ ᠲᠠᠢ ᠪᠥᠭᠡᠳ ᠳ᠋ᠵᠢᠬᠠᠩᠭᠢᠷ ᠺᠢᠫᠴᠡᠺ ᠨᠤᠭᠤᠳ ᠢᠯᠠᠩᠭᠤᠶᠠ ᠡᠬᠡᠨᠡᠷ ᠦ᠋ᠳ ᠨᠢ ᠵᠠᠳᠠᠭᠠᠢ ᠠᠮᠠ ᠲᠠᠢ ᠬᠤᠳᠠᠯᠴᠢ ᠭᠡᠵᠦ ᠣᠯᠠᠨ ᠤᠳᠠᠭᠠ ᠰᠡᠷᠡᠮᠵᠢᠯᠡᠭᠦᠯᠦᠭᠰᠡᠨ ᠠᠵᠢ᠃
ᠵᠠᠷᠤᠴᠠ ᠨᠠᠷ ᠬᠤᠷᠠᠭᠰᠠᠨ ᠪᠦᠭᠦᠳᠡ ᠳ᠋ᠦ᠍ ᠦᠨᠡᠲᠦ ᠠᠶᠠᠭᠠᠨ ᠳ᠋ᠤ᠌ ᠠᠢᠷᠠᠭ ᠬᠢᠵᠦ ᠪᠠᠷᠢᠬᠤ ᠲᠤᠯᠠ ᠬᠥᠭᠡᠰᠦᠷᠡᠨ ᠱᠤᠤᠭᠢᠵᠤ ᠡᠨᠡ ᠤᠮᠳᠠᠭᠠᠨ ᠰᠢᠨᠡᠬᠡᠨ ᠪᠥᠭᠡᠳ ᠲᠦᠢᠮᠡᠷᠳᠡᠨ ᠰᠢᠲᠠᠭᠠᠭᠰᠠᠨ ᠪᠦᠭᠴᠢᠮ ᠲᠠᠯᠠ ᠶ᠋ᠢᠨ ᠳᠤᠮᠳᠠᠭᠤᠷ ᠥᠨᠥ ᠠᠶᠠᠯᠠᠭᠰᠠᠨ ᠤ᠋ ᠳᠠᠷᠠᠭᠠ ᠡᠢᠮᠦ ᠬᠦᠢᠲᠡᠨ ᠢᠰᠬᠦᠯᠡᠩ ᠤᠮᠳᠠ ᠶ᠋ᠢ ᠤᠤᠭᠤᠬᠤ ᠳ᠋ᠤ᠌ ᠲᠠᠭᠠᠯᠠᠮᠵᠢᠲᠠᠢ ᠪᠠᠢᠳᠠᠭ ᠪᠢᠯᠡ᠃ ᠡᠩ ᠲᠦᠷᠦᠭᠦᠨ ᠳ᠋ᠦ᠍ ᠦᠯᠦ ᠳᠡᠢᠯᠦᠭᠳᠡᠭᠴᠢ ᠶ᠋ᠢᠨ ᠵᠠᠬᠢᠷᠤᠯ ᠵᠠᠭᠤᠨ ᠤ᠋ ᠳᠠᠷᠤᠭᠠ ᠠᠷᠠᠫᠱᠠ ᠣᠷᠣᠵᠤ ᠢᠷᠡᠯᠡ᠃ ᠮᠣᠩᠭᠣᠯᠴᠤᠳ ᠤ᠋ᠨ ᠶᠡᠷᠦᠳᠡ ᠶ᠋ᠢᠨ ᠴᠢᠬᠢ ᠲᠡᠢ ᠮᠠᠯᠠᠭᠠᠢ ᠶ᠋ᠢ ᠡᠨᠡᠳᠬᠡᠭ ᠳᠥᠷᠪᠡᠨ ᠪᠣᠭᠣᠯᠲᠠ ᠪᠠᠷ ᠰᠣᠯᠢᠰᠨᠧᠢ ᠶ᠋ᠢᠨ ᠨᠢᠭᠡ ᠦᠵᠦᠭᠦᠷ ᠵᠡᠭᠦᠨ ᠮᠥᠷᠥ ᠤᠷᠤᠭᠤ ᠤᠨᠵᠢᠢᠵᠤ ᠰᠢᠯᠤᠭᠤᠨ ᠮᠥᠷᠥ ᠲᠡᠢ ᠲᠤᠷᠠᠩᠬᠠᠢ ᠭᠣᠶᠣᠮᠰᠣᠭ ᠪᠡᠶᠡ ᠳ᠋ᠡᠭᠡᠨ ᠠᠷᠠᠪ ᠨᠣᠣᠰᠣᠨ ᠳᠡᠪᠡᠯ ᠡᠮᠦᠰᠴᠡᠢ᠃ ᠰᠦᠷᠡᠬᠡᠢ ᠬᠠᠷᠠ ᠨᠢᠳᠦ ᠨᠢ ᠢᠮᠠᠭᠲᠠ ᠡᠭᠴᠡ ᠬᠠᠷᠠᠬᠤ ᠪᠥᠭᠡᠳ ᠡᠨᠡ ᠬᠡᠬᠦᠯᠵᠡᠭᠦᠷ ᠲᠠᠩᠨᠠᠭᠤᠯ ᠤ᠋ᠨ ᠢᠨᠢᠶᠡᠬᠦ ᠶ᠋ᠢ ᠬᠡᠨ ᠴᠦ᠍ ᠦᠵᠡᠭᠰᠡᠨ ᠦᠭᠡᠢ ᠠᠵᠢ᠃
ᠠᠷᠠᠫᠱᠠ ᠶ᠋ᠢᠨ ᠬᠣᠢᠨᠠ ᠮᠦᠰᠥ᠋ᠺ ᠣᠷᠣᠵᠤ ᠢᠷᠡᠭᠰᠡᠨ᠂ ᠡᠭᠦᠨ ᠳ᠋ᠦ᠍ ᠲᠡᠷᠡ ᠨᠢ ᠨᠢᠭᠤᠷ ᠢ᠋ᠶ᠋ᠠᠨ ᠡᠷᠢᠶᠡᠨ ᠳᠠᠪᠤᠤ ᠪᠠᠷ ᠪᠣᠭᠣᠭᠰᠠᠨ ᠪᠠᠢᠯᠠ᠃ ᠤᠷᠢᠳ ᠡᠳᠦᠷ ᠨᠢ ᠬᠠᠳ᠋ᠵᠢ ᠷᠠᠾᠢᠮ ᠪᠠᠭᠳᠠᠳ᠋ ᠲᠤ᠌ ᠰᠤᠷᠤᠭᠰᠠᠨ ᠬᠠᠮᠤᠭ ᠴᠢᠳᠠᠯ ᠢ᠋ᠶ᠋ᠠᠨ ᠭᠠᠷᠭᠠᠵᠤ ᠴᠤᠬᠠᠭ ᠬᠥᠮᠦᠨ ᠢ᠋ ᠪᠠᠷᠢᠬᠤ ᠳ᠋ᠤ᠌ ᠪᠠᠢᠯᠳᠤᠨ ᠣᠯᠤᠭᠰᠠᠨ ᠰᠢᠷᠬᠠ ᠶ᠋ᠢ ᠠᠭᠠᠭ ᠲᠠᠢ ᠴᠠᠢ ᠪᠠᠷ ᠤᠬᠢᠶᠠᠨ ᠪᠣᠭᠣᠭᠰᠠᠨ ᠲᠤᠯᠠ ᠪᠠᠲᠤ ᠬᠠᠭᠠᠨ ᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ ᠮᠦᠰᠥ᠋ᠺ ᠪᠣᠯᠤᠨ ᠢᠵᠢᠯ ᠮᠥᠷᠡᠨ ᠦ᠌ ᠡᠷᠭᠢᠨ ᠳᠡᠭᠡᠷᠡ ᠣᠷᠣᠰᠢᠭᠴᠢ ᠪᠠᠷᠢᠭᠳᠠᠯ ᠬᠥᠮᠦᠨ ᠬᠣᠶᠠᠷ ᠤ᠋ᠨ ᠶᠠᠷᠢᠶᠠ ᠶ᠋ᠢ ᠰᠣᠨᠣᠰᠬᠤ ᠶ᠋ᠢ ᠬᠦᠰᠡᠭᠰᠡᠨ ᠪᠠᠢᠵᠠᠢ᠃ ᠲᠡᠳᠦᠢ ᠥᠳᠬᠡᠨ ᠪᠤᠭᠤᠷᠤᠯ ᠰᠠᠬᠠᠯ ᠲᠠᠢ ᠬᠠᠯᠵᠠᠨ ᠡᠪᠦᠭᠡᠨ ᠠᠰᠠᠷ ᠲᠤ᠌ ᠣᠷᠣᠵᠠᠢ᠃ ᠲᠡᠭᠦᠨ ᠦ᠌ ᠭᠠᠷ ᠢ᠋ ᠠᠷᠤ ᠳ᠋ᠤᠨᠢ ᠬᠦᠯᠢᠵᠦ ᠬᠦᠵᠦᠭᠦᠦ ᠶ᠋ᠢ ᠳᠠᠷᠤᠭᠰᠠᠨ ᠰᠤᠷ ᠤ᠋ᠨ ᠬᠢᠨᠢ ᠦᠵᠦᠭᠦᠷ ᠢ᠋ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠡᠷᠡ ᠬᠤᠢᠯᠠᠨ ᠪᠠᠷᠢᠭᠰᠠᠨ ᠪᠠᠢᠯᠠ᠃ ᠡᠪᠦᠭᠡᠨ ᠦ᠌ ᠭᠠᠩᠳᠠᠭᠰᠠᠨ ᠨᠢᠭᠤᠷ ᠪᠣᠯᠤᠨ ᠬᠠᠯᠵᠠᠨ ᠳᠤᠬᠤ ᠳ᠋ᠤᠨᠢ ᠬᠠᠲᠠᠭᠰᠠᠨ ᠰᠢᠷᠬᠠ ᠦᠵᠡᠭᠳᠡᠬᠦ ᠪᠥᠭᠡᠳ ᠲᠡᠷᠡ ᠨᠢ ᠡᠭᠴᠡ ᠰᠢᠯᠤᠭᠤᠨ ᠵᠣᠭᠰᠣᠵᠤ ᠪᠦᠳᠡᠭᠢ ᠴᠠᠢᠪᠤᠷ ᠨᠢᠳᠦᠨ ᠳ᠋ᠦ᠍ᠨᠢ ᠠᠶᠤᠬᠤ ᠲᠡᠮᠳᠡᠭ ᠦᠭᠡᠢ ᠠᠵᠢ᠃ ᠣᠷᠣᠬᠴᠢᠳ ᠠᠯᠲᠠᠨ ᠰᠢᠷᠡᠭᠡᠨ ᠦ᠌ ᠡᠮᠦᠨᠡ ᠵᠡᠷᠭᠡᠴᠡᠨ ᠰᠥᠭᠥᠳᠬᠦ ᠳ᠋ᠦ᠍ ᠡᠪᠦᠭᠡᠨ ᠦ᠌ ᠦᠯᠦ ᠮᠡᠳᠡᠭᠳᠡᠬᠦ ᠦᠭᠡ ᠶ᠋ᠢ ᠬᠣᠶᠠᠷ ᠬᠡᠯᠡᠮᠦᠷᠴᠢ ᠣᠷᠴᠢᠭᠤᠯᠤᠨ ᠨᠢᠭᠡ ᠨᠢ ᠲᠡᠭᠦᠨ ᠡᠴᠡ ᠢᠩᠭᠢᠵᠦ ᠠᠰᠠᠭᠤᠵᠠᠢ᠂
— ᠳᠡᠯᠡᠬᠡᠢ ᠳ᠋ᠠᠬᠢᠨ ᠢ᠋ ᠡᠵᠡᠯᠡᠭᠴᠢ ᠡᠴᠡ ᠴᠢ ᠬᠡᠨ ᠭᠡᠭᠴᠢ ᠨᠡᠷᠡ ᠲᠡᠢ ᠠᠯᠢ ᠭᠠᠵᠠᠷ ᠤ᠋ᠨ ᠬᠥᠮᠦᠨ᠂ ᠡᠨᠡ ᠮᠥᠷᠡᠨ ᠳ᠋ᠦ᠍ ᠬᠡᠷᠬᠢᠨ ᠢᠷᠡᠭᠰᠡᠨ ᠢ᠋ ᠮᠡᠳᠡᠬᠦ ᠭᠡᠨᠡ ᠭᠡᠬᠦ ᠳ᠋ᠦ᠍ᠨᠢ
—ᠪᠢ ᠣᠩᠭᠣᠨ ᠤᠷᠤᠭ ᠠᠭᠤᠯᠠ ᠶ᠋ᠢ ᠰᠠᠬᠢᠭᠴᠢ ᠶᠡᠬᠡ ᠶᠢᠯᠸᠢᠢ᠍ᠴᠢ ᠣᠳᠣᠨ ᠲᠣᠭᠠᠯᠠᠭᠴᠢ ᠭᠠᠽᠤᠢ᠍ᠺ ᠤ᠋ᠨ ᠵᠠᠷᠤᠴᠠ᠂ ᠪᠢ ᠲᠡᠭᠦᠨ ᠦ᠌ ᠶᠠᠳᠠᠭᠤ ᠪᠣᠭᠣᠯ ᠂ ᠨᠠᠳᠠ ᠳᠡᠭᠡᠷᠡ ᠮᠢᠨᠦ ᠡᠵᠡᠨ ᠦ᠌ ᠲᠠᠮᠠᠭᠠ ᠪᠣᠢ ᠭᠡᠪᠡ᠃
ᠪᠠᠲᠤ ᠬᠠᠭᠠᠨ ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠳᠣᠬᠢᠭᠠᠳ ᠦᠵᠡᠭᠦᠯ ᠭᠡᠬᠦ ᠳ᠋ᠦ᠍ᠨᠢ ᠳᠥᠴᠢᠨ ᠵᠢᠯ ᠦ᠋ᠨ ᠡᠮᠦᠨᠡ ᠮᠢᠨᠦ ᠭᠤᠶᠠ ᠳᠡᠭᠡᠷᠡ ᠳᠠᠷᠤᠭᠰᠠᠨ ᠪᠢᠯᠡ ᠭᠡᠪᠡ᠃
ᠮᠣᠩᠭᠣᠯ ᠴᠡᠷᠢᠭ ᠡᠪᠦᠭᠡᠨ ᠦ᠌ ᠰᠠᠷᠢᠰᠤᠨ ᠥᠮᠥᠳᠥ ᠶ᠋ᠢ ᠰᠢᠪᠲᠤᠯᠬᠤ ᠳ᠋ᠤ᠌ ᠡᠪᠦᠭᠡᠨ᠂ ᠬᠠᠭᠠᠨ ᠤ᠋ ᠵᠦᠭ ᠲᠠᠮᠠᠭᠠᠯᠠᠭᠰᠠᠨ ᠲᠤᠷᠠᠩᠬᠠᠢ ᠭᠤᠶᠠ ᠪᠠᠨ ᠡᠷᠭᠢᠭᠦᠯᠦᠨ ᠬᠠᠷᠠᠭᠤᠯᠪᠠ᠃ ᠭᠤᠶᠠᠨ ᠳᠡᠭᠡᠷᠡ ᠨᠢ ᠬᠣᠶᠠᠷ ᠡᠪᠡᠷᠳᠡᠢ ᠳᠤᠭᠤᠢ ᠲᠠᠮᠠᠭᠠ ᠪᠠᠢᠯᠠ᠃
—ᠡᠨᠡ ᠲᠠᠮᠠᠭᠠ ᠶᠠᠮᠠᠷ ᠤᠴᠢᠷ ᠲᠠᠢ ᠶᠤᠮ ᠪᠣᠢ? ᠶᠠᠭᠤᠨ ᠤ᠋ ᠲᠠᠮᠠᠭᠠ ᠪᠠᠢᠨᠠ? ᠭᠡᠬᠦ ᠳ᠋ᠦ᠍ᠨᠢ ᠡᠪᠦᠭᠡᠨ ᠮᠣᠩᠭᠣᠯ ᠤ᠋ᠨ ᠵᠦᠭ ᠬᠠᠨᠳᠤᠵᠤ ᠰᠠᠨᠳᠤᠷᠤᠨ ᠬᠡᠯᠡᠭᠰᠡᠨ ᠨᠢ᠄
—ᠴᠢ ᠮᠢᠨᠦ ᠥᠮᠥᠳᠥ ᠶ᠋ᠢ ᠰᠢᠪᠲᠤᠯᠤᠭᠰᠠᠨ ᠲᠤᠯᠠ ᠣᠳᠣ ᠳᠠᠬᠢᠨ ᠡᠮᠦᠰᠬᠡᠭᠲᠦᠨ᠂ ᠭᠠᠷ ᠢ᠋ᠶ᠋ᠠᠨ ᠬᠥᠳᠡᠯᠭᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠬᠤ ᠶ᠋ᠢ ᠮᠢᠨᠢ ᠦᠵᠡᠬᠦ ᠦᠭᠡᠢ ᠪᠠᠢᠨᠠ ᠤᠤ? ᠭᠡᠪᠡ᠃
ᠮᠣᠩᠭᠣᠯ ᠬᠥᠮᠦᠨ ᠥᠮᠥᠳᠥ ᠶ᠋ᠢ ᠵᠠᠰᠠᠭᠰᠠᠨ ᠳ᠋ᠤ᠌ ᠡᠪᠦᠭᠡᠨ᠂ ᠪᠠᠲᠤ ᠬᠠᠭᠠᠨ ᠤ᠋ ᠵᠦᠭ ᠥᠭᠦᠯᠡᠭᠰᠡᠨ ᠨᠢ᠄
—ᠴᠢ ᠮᠥᠷᠡᠨ ᠦ᠌ ᠲᠡᠷᠲᠡᠭᠡ ᠡᠷᠭᠢᠨ ᠳᠡᠭᠡᠷᠡᠬᠢ ᠪᠤᠭᠤᠷᠤᠯ ᠠᠭᠤᠯᠠ ᠶ᠋ᠢ ᠬᠠᠷᠠᠪᠠ ᠤᠤ? ᠲᠡᠭᠦᠨ ᠢ᠋ ᠦᠷᠡᠺ ᠬᠠᠭᠠᠨ ᠤ᠋ ᠪᠠᠯᠭᠠᠳ ᠭᠡᠳᠡᠭ ᠶᠤᠮ᠂ ᠲᠡᠨᠳᠡ ᠡᠪᠦᠭᠡᠨ ᠶᠢᠯᠸᠢᠢ᠍ᠴᠢ ᠭᠠᠽᠤᠢ᠍ᠺ ᠰᠠᠭᠤᠳᠠᠭ᠂ ᠲᠡᠷᠡ ᠵᠠᠭᠤ ᠭᠠᠷᠤᠢ ᠨᠠᠰᠤᠯᠠᠭᠰᠠᠨ ᠲᠤᠯᠠ ᠪᠢ ᠴᠦ᠍ ᠭᠡᠰᠡᠨ ᠲᠡᠭᠦᠨ ᠦ᠌ ᠵᠥᠪᠬᠡᠨ ᠠᠴᠢ ᠲᠠᠢ ᠨᠢ ᠲᠡᠩᠴᠡᠨᠡ᠃ ᠲᠡᠷᠡ ᠪᠣᠯ ᠡᠷᠲᠡ ᠬᠠᠭᠤᠴᠢᠨ ᠴᠠᠭ ᠲᠤ᠌ ᠶᠠᠮᠠᠷ ᠪᠠᠢᠭᠰᠠᠨ ᠢ᠋ ᠴᠥᠮ ᠢ᠋ ᠳᠤᠷᠠᠰᠤᠨ ᠰᠠᠨᠠᠵᠤ ᠶᠡᠬᠡ ᠶᠠᠭᠤᠮᠠ ᠶᠠᠷᠢᠳᠠᠭ᠃ ᠠᠷᠪᠠᠨ ᠲᠠᠪᠤᠨ ᠪᠦᠷᠢ ᠳ᠋ᠦ᠍ ᠠᠭᠤᠯᠠᠨ ᠳᠡᠭᠡᠷᠡ ᠭᠠᠷᠴᠤ ᠲᠡᠭᠷᠢ ᠯᠤᠤᠰ ᠢ᠋ ᠳᠠᠬᠢᠵᠤ ᠵᠠᠯᠪᠠᠷᠢᠳᠠᠭ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠺᠦᠮᠡᠨ ᠵᠡᠷᠭᠡ ᠪᠠᠰᠠ ᠪᠤᠰᠤᠳ ᠲᠠᠯᠠ ᠭᠠᠵᠠᠷ ᠤ᠋ᠨ ᠬᠥᠮᠦᠰ ᠢᠷᠡᠵᠦ ᠬᠠᠷᠠ ᠢᠮᠠᠭᠠ ᠨᠢᠲᠤᠯᠤᠨ ᠳᠠᠢᠯᠠᠯᠭᠠ ᠬᠢᠵᠦ ᠠᠢᠷᠠᠭ ᠤᠤᠭᠤᠨᠠ᠃ ᠲᠡᠢᠮᠦ ᠶ᠋ᠢᠨ ᠤᠴᠢᠷ ᠠ᠋ᠴᠠ ᠭᠠᠽᠥ᠋ᠺ ᠦ᠋ᠨ ᠲᠠᠮᠠᠭᠠ ᠨᠢ ᠬᠦᠷᠲᠡᠯᠡ ᠢᠮᠠᠭᠠᠨ ᠤ᠋ ᠡᠪᠡᠷᠳᠡᠢ ᠪᠠᠢᠳᠠᠭ ᠭᠡᠪᠡ᠃
— ᠴᠢᠨᠦ ᠨᠡᠷᠡ ᠬᠡᠨ ᠪᠣᠢ? ᠭᠡᠬᠦ ᠳ᠋ᠦ᠍ᠨᠢ
—ᠮᠢᠨᠦ ᠨᠡᠷᠡ ᠸᠠᠸᠢᠯ ᠡᠪᠦᠭᠡᠨ ᠭᠡᠳᠡᠭ᠃ ᠷᠶᠠᠽᠠᠨ ᠳ᠋ᠤ᠌ ᠲᠥᠷᠥᠭᠰᠡᠨ᠃ ᠵᠥᠭᠡᠢ ᠲᠡᠵᠢᠭᠡᠵᠦ ᠪᠠᠯ ᠬᠤᠷᠢᠶᠠᠵᠤ ᠠᠮᠢᠳᠤᠷᠠᠳᠠᠭ ᠪᠠᠢᠭᠰᠠᠨ᠃ ᠨᠤᠸᠤᠭᠤᠷᠤᠳ᠋ ᠤ᠋ᠨ ᠦᠱᠺᠤᠢ᠌ᠨᠢᠺ ᠦ᠋ᠳ ᠮᠡᠬᠡᠯᠡᠨ ᠪᠠᠷᠢᠵᠤ ᠭᠣᠣᠯ ᠢ᠋ ᠤᠷᠤᠭᠤᠳᠠᠭᠤᠯᠤᠨ ᠨᠢᠭᠡᠨ ᠬᠤᠳᠠᠯᠳᠤᠭᠠᠴᠢᠨ ᠳ᠋ᠤ᠌ ᠬᠤᠳᠠᠯᠳᠤᠭᠰᠠᠨ ᠨᠢ ( ᠳ᠋ᠦ᠍ )ᠲᠡᠷᠡ ᠪᠠᠰᠠ ᠳᠠᠮ ᠬᠤᠳᠠᠯᠳᠤᠭᠰᠠᠨ ᠲᠤᠯᠠ ᠲᠡᠭᠡᠵᠦ ᠣᠯᠠᠨ ᠬᠥᠮᠦᠨ ᠦ᠌ ᠭᠠᠷ ᠳᠡᠮᠵᠢᠵᠦ ᠶᠠᠪᠤᠭᠰᠠᠭᠠᠷ ᠶᠢᠯᠸᠢ᠍ᠢᠴᠢ ᠭᠠᠽᠥ᠋ᠺ ᠦ᠋ᠨ ᠭᠠᠷ ᠲᠤ᠌ ᠣᠷᠣᠭᠰᠠᠨ ᠪᠢᠯᠡ᠃ ᠰᠦᠪᠡᠭᠡᠳᠠᠢ ᠪᠠᠭᠠᠲᠤᠷ ᠦᠭᠡ ᠶ᠋ᠢ ᠨᠢ ᠲᠠᠰᠤᠯᠵᠤ᠂
—ᠪᠠᠢᠵᠠ᠂ ᠴᠢ ᠵᠥᠪᠬᠡᠨ ᠠᠰᠠᠭᠤᠭᠰᠠᠨ ᠵᠦᠢᠯ ᠢ᠋ ᠬᠠᠷᠢᠭᠤᠯ ᠭᠡᠪᠡ᠃
— ᠲᠡᠷᠲᠡᠭᠡ ᠲᠠᠯᠠ ᠳ᠋ᠤ᠌ ᠶᠠᠮᠠᠷ ᠶᠠᠮᠠᠷ ᠴᠡᠷᠢᠭ ᠪᠠᠢᠭᠠ ᠶ᠋ᠢ ᠴᠢ ᠦᠵᠡᠭᠰᠡᠨ ᠤᠤ? ᠶᠠᠪᠠᠭᠠᠨ ᠮᠣᠷᠢᠲᠠᠢ ᠴᠡᠷᠢᠭ ᠦ᠋ᠨ ᠡᠷᠡᠰ ᠣᠯᠠᠨ ᠤᠤ? ᠭᠡᠬᠦ ᠳ᠋ᠦ᠍ᠨᠢ
— ᠪᠢ ᠵᠢᠭᠠᠰᠤᠴᠢ ᠲᠤᠯᠠ ᠤᠰᠤ ᠪᠠᠷ ᠶᠠᠪᠤᠨᠠ᠃ ᠵᠡᠭᠡᠰᠦᠨ ᠳᠣᠲᠣᠷᠠ ᠪᠢ ᠶᠠᠭᠤᠨ ᠣᠯᠠᠨ ᠢ᠋ ᠦᠵᠡᠬᠦ ᠪᠣᠢ ᠳ᠋ᠠ᠃
— ᠲᠡᠢᠮᠦ ᠪᠣᠯ ᠶᠠᠭᠤ ᠰᠣᠨᠣᠰᠤᠭᠰᠠᠨ ᠪᠣᠢ?
— ᠰᠣᠨᠣᠰᠤᠭᠰᠠᠨ ᠮᠢᠨᠢ ᠺᠥ᠋ᠮᠡᠨ ᠦ᠌ ᠬᠠᠭᠠᠳ ᠰᠠᠶᠢᠪᠲᠤᠷᠬᠠᠨ ᠵᠠᠭᠤᠷᠠ ᠨᠡᠭᠦᠳᠡᠯᠯᠡᠵᠦ ᠶᠠᠪᠤᠨᠠ ᠭᠡᠵᠦ ᠲᠤᠭᠤᠯᠤᠭᠰᠠᠨ᠂ ᠭᠡᠲᠡᠯᠡ ᠳᠠᠷᠠᠭᠠ ᠨᠢ ᠠᠶᠤᠨ ᠰᠠᠨᠳᠤᠷᠴᠠᠭᠠᠵᠤ ᠲᠠᠯᠠ ᠤᠷᠤᠭᠤ ᠪᠠᠨ ᠭᠦᠨ ᠣᠷᠣᠵᠠᠭᠠᠵᠤ ᠠᠳᠤᠭᠤ ᠮᠠᠯ᠂ ᠭᠡᠷ ᠪᠠᠷᠠᠭᠠ ᠶ᠋ᠢ ᠠᠪᠴᠤ ᠶᠠᠪᠤᠵᠠᠭᠠᠭᠰᠠᠨ᠂ ᠤᠷᠢᠳᠤ ᠢᠩᠭᠢᠵᠦ ᠵᠢᠭᠤᠲᠠᠵᠤ ᠳᠦᠷᠪᠡᠭᠡᠭᠰᠡᠨ ᠤᠳᠠᠭᠠ ᠶᠡᠷᠦ ᠦᠭᠡᠢ ᠪᠠᠢᠯᠠ ᠭᠡᠪᠡ᠃
— ᠲᠡᠳᠡ ᠠᠯᠢ ᠵᠦᠭ ᠲᠦ᠍ ᠨᠡᠭᠦᠵᠦ ᠪᠠᠢᠨᠠ ᠪᠣᠢ? ᠭᠡᠬᠦ ᠳ᠋ᠦ᠍ᠨᠢ
— ᠯᠦᠺᠤᠮᠤᠷᠢ ᠶ᠋ᠢᠨ ᠵᠦᠭ᠂ ᠬᠥᠬᠡ ᠳᠠᠯᠠᠢ ᠶ᠋ᠢᠨ ᠴᠢᠭ ᠤᠷᠤᠭᠤ ᠭᠡᠵᠦ ᠡᠪᠦᠭᠡᠨ ᠪᠤᠭᠤᠷᠤᠯ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠳᠴᠤ ᠪᠤᠬᠢᠨᠢᠳᠤᠨ ᠵᠣᠭᠰᠣᠪᠠ᠃
ᠰᠦᠪᠡᠭᠡᠲᠡᠢ ᠪᠠᠰᠠ ᠯᠠ ᠬᠥᠨᠳᠡᠯᠡᠨ ᠡᠴᠡ ᠣᠷᠣᠵᠤ᠂
— ᠴᠢ ᠣᠢᠷᠠᠯᠴᠠᠭᠠ ᠨᠡᠭᠦᠳᠡᠯᠯᠡᠨ ᠶᠠᠪᠤᠭᠰᠠᠨ ᠺᠦᠮᠠᠨ ᠬᠠᠭᠠᠳ ᠤ᠋ᠨ ᠨᠡᠷᠡᠰ ᠢ᠋ ᠮᠡᠳᠡᠬᠦ ᠤᠤ? ᠭᠡᠬᠦ ᠳ᠋ᠦ᠍ ᠡᠪᠦᠭᠡᠨ ᠤᠴᠠᠭᠠᠷᠯᠠᠵᠤ᠂
— ᠪᠠᠰᠠ ᠤᠤ᠂ ᠶᠠᠭᠠᠬᠢᠭᠰᠠᠨ ᠳᠤᠷᠠᠲᠠᠢ ᠶᠤᠮ ᠪᠣᠢ? ᠲᠡᠳᠡᠨ ᠲᠡᠢ ᠬᠤᠳᠠᠯᠳᠤᠭᠠ ᠮᠠᠢᠮᠠᠢ ᠬᠢᠵᠦ ᠮᠣᠷᠢ ᠮᠠᠯ ᠰᠣᠯᠢᠯᠴᠠᠭᠰᠠᠨ ᠪᠣᠯ ᠮᠡᠳᠡᠬᠦ ᠰᠠᠨ᠂ ᠴᠢ ᠬᠠᠷᠢᠨ ᠡᠨᠡ ᠮᠥᠷᠡᠨ ᠳ᠋ᠦ᠍ ᠶᠠᠮᠠᠷ ᠶᠠᠮᠠᠷ ᠵᠢᠭᠠᠰᠤ ᠪᠠᠢᠨᠠ? ᠤᠰᠸᠲ᠋ᠷ᠂ ᠴᠤᠷᠬᠠᠢ ᠣᠯᠠᠨ ᠪᠣᠢ ᠤᠤ? ᠵᠢᠭᠠᠰᠤ ᠡᠯᠪᠡᠭᠲᠡᠢ ᠭᠠᠵᠠᠷ ᠬᠠᠮᠢᠭᠠ ᠪᠠᠢᠨᠠ? ᠭᠡᠬᠦ ᠵᠡᠷᠭᠡ ᠪᠡᠷ ᠠᠰᠠᠭᠤᠪᠠᠯ ᠳᠡᠭᠡᠷᠡ ᠪᠠᠢᠭᠰᠠᠨ ᠶᠤᠮ᠃ ᠲᠡᠭᠡᠪᠡᠯ ᠪᠢ ᠴᠥᠮ ᠢ᠋ ᠤᠰᠤᠨ ᠤ᠋ ᠢᠷᠣᠭᠠᠷ ᠲᠤ᠌᠂ ᠤᠰᠤᠨ ᠡᠪᠦᠭᠡᠨ ᠦ᠌ ᠬᠢᠨ ᠳ᠋ᠦ᠍ ᠵᠣᠴᠢᠯᠠᠵᠤ ᠣᠴᠢᠭᠠᠳ ᠢᠷᠡᠭᠰᠡᠨ ᠶᠤᠮ ᠰᠢᠭ ᠮᠡᠳᠡᠭᠦᠯᠬᠦ ᠪᠠᠢᠭᠰᠠᠨ ᠪᠢᠯᠡ᠃
—ᠤᠰᠤᠨ ᠡᠪᠦᠭᠡᠨ ᠭᠡᠵᠦ ᠬᠡᠨ ᠪᠣᠢ? ᠭᠡᠵᠦ ᠪᠠᠲᠤ ᠬᠠᠭᠠᠨ ᠠᠰᠠᠭᠤᠬᠤ ᠳ᠋ᠤ᠌᠂
— ᠮᠡᠳᠡᠬᠦ ᠦᠭᠡᠢ ᠭᠡᠵᠢ ᠤᠤ ᠳ᠋ᠠ? ᠲᠡᠷᠡ ᠪᠣᠯ ᠤᠰᠤᠨ ᠤ᠋ ᠳᠣᠣᠷᠠᠲᠤ ᠢᠷᠣᠭᠠᠷ ᠲᠤ᠌ ᠰᠠᠭᠤᠳᠠᠭ ᠳᠠᠯᠠᠢ ᠶ᠋ᠢᠨ ᠯᠤᠤᠰ ᠤ᠋ᠨ ᠬᠠᠭᠠᠨ᠂ ᠲᠤᠩ ᠶᠡᠬᠡ ᠪᠠᠶᠠᠨ᠂ ᠵᠠᠭᠤᠨ ᠥᠬᠢᠨ ᠲᠡᠢ᠂ ᠲᠡᠳᠡᠨ ᠢ᠋ ᠨᠢ ᠯᠤᠤᠰ ᠤ᠋ᠨ ᠳᠠᠭᠢᠨᠢ ᠭᠡᠳᠡᠭ᠃
— ᠴᠢ ᠦᠵᠡᠭᠰᠡᠨ ᠤᠤ?
— ᠳᠥᠴᠢᠨ ᠵᠢᠯ ᠵᠢᠭᠠᠰᠤ ᠠᠩᠨᠠᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠦᠵᠡᠬᠦ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ? ᠦᠵᠡᠬᠦ ᠪᠡᠷ ᠪᠠᠷᠠᠬᠤ ᠦᠭᠡᠢ ᠪᠠᠰᠠ ᠳᠠᠭᠤ ᠶ᠋ᠢ ᠨᠢ ᠰᠣᠨᠣᠰᠳᠠᠭ ᠪᠠᠢᠭᠰᠠᠨ᠂ ᠯᠤᠤᠰ ᠤ᠋ᠨ ᠳᠠᠭᠢᠨᠢᠰ ᠰᠥᠨᠢ ᠳᠠᠭᠤᠯᠠᠵᠤ ᠤᠬᠢᠯᠠᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠶᠠᠪᠤᠭᠤᠯ ᠤ᠋ᠨ ᠬᠥᠮᠦᠰ ᠢ᠋ ᠳᠠᠭᠤᠳᠠᠬᠤ ᠢᠨᠢᠶᠡᠬᠦ ᠲᠡᠷᠢᠭᠦᠲᠡᠨ ᠡᠯᠳᠡᠪ ᠢ᠋ᠶ᠋ᠡᠷ ᠠᠭᠠᠰᠢᠯᠠᠳᠠᠭ᠂ ᠬᠡᠨ ᠨᠢᠭᠡ ᠬᠥᠮᠦᠨ ᠡᠷᠬᠡᠨ ᠳ᠋ᠦ᠍ᠨᠢ ᠣᠷᠣᠵᠤ ᠯᠤᠤᠰ ᠤ᠋ᠨ ᠥᠬᠢᠳ ᠢ᠋ ᠢᠲᠡᠭᠡᠮᠵᠢᠯᠡᠪᠡᠯ ᠲᠡᠳᠡ ᠴᠦᠩᠬᠦᠯ ᠤᠷᠤᠭᠤ ᠲᠠᠲᠠᠵᠤ ᠣᠷᠣᠭᠤᠯᠤᠭᠠᠳ ᠭᠡᠳᠡᠷᠭᠦ ᠨᠢ ᠶᠡᠷᠦ ᠲᠠᠯᠪᠢᠳᠠᠭ ᠦᠭᠡᠢ ᠶᠤᠮ ᠭᠡᠬᠦ ᠳ᠋ᠦ᠍ᠨᠢ ᠮᠣᠩᠭᠣᠯᠴᠤᠳ ᠳᠠᠭᠤ ᠠᠯᠳᠠᠴᠢᠬᠠᠪᠠ᠃
ᠮᠣᠩᠭᠣᠯ ᠬᠠᠲᠤᠨ ᠠᠯᠠᠭᠠ ᠪᠠᠨ ᠬᠠᠪᠰᠤᠷᠤᠨ ᠭᠠᠢᠬᠠᠯᠳᠤᠵᠤ ᠬᠣᠭᠣᠷᠣᠨᠳᠣ ᠪᠠᠨ ᠰᠢᠪᠡᠨᠡᠯᠳᠦᠪᠡ᠃
— ᠯᠤᠤᠰ ᠤ᠋ᠨ ᠬᠠᠭᠠᠨ ᠢ᠋ ᠴᠢ ᠮᠥᠨ ᠦᠵᠡᠭᠰᠡᠨ ᠤᠤ? ᠭᠡᠵᠦ ᠪᠠᠲᠤ ᠬᠠᠭᠠᠨ ᠠᠰᠠᠭᠤᠭᠰᠠᠨ ᠳ᠋ᠤ᠌᠂
— ᠦᠵᠡᠬᠦ ᠪᠡᠷ ᠪᠠᠷᠠᠬᠤ ᠤᠤ᠂ ᠲᠡᠷᠡ ᠪᠣᠯ ᠵᠡᠭᠡᠰᠦᠨ ᠳᠣᠣᠷᠠ ᠠ᠋ᠴᠠ ᠮᠢᠨᠦᠬᠢ ᠰᠢᠭ ᠥᠰᠥᠷᠬᠡᠭ ᠳᠦᠷᠰᠦ ᠪᠡᠨ ᠴᠤᠬᠤᠢᠯᠭᠠᠵᠤ ᠰᠠᠬᠠᠯ ᠢ᠋ᠶ᠋ᠠᠨ ᠤᠰᠤᠨ ᠳ᠋ᠤ᠌ ᠵᠠᠢᠯᠳᠠᠭ ᠪᠠᠢᠭᠰᠠᠨ᠂ ᠪᠠᠰᠠ ᠨᠢᠳᠦ ᠪᠡᠨ ᠪᠦᠯᠲᠡᠢᠯᠭᠡᠵᠦ ᠬᠠᠭᠠᠨ— ᠥᠷᠡᠺ! ᠬᠠᠭᠠᠨ— ᠥᠷᠡᠺ! ᠭᠡᠵᠦ ᠬᠦᠩᠭᠢᠨᠡᠨ ᠳᠠᠭᠤᠳᠠᠳᠠᠭ ᠶᠤᠮ ᠭᠡᠪᠡ᠃
ᠲᠡᠳᠦᠢ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ᠂ ᠪᠠᠲᠤ ᠬᠠᠭᠠᠨ ᠤ᠋ ᠵᠦᠭ ᠬᠠᠨᠳᠤᠵᠤ᠂
— ᠭᠡᠷᠡᠯᠲᠦ ᠠ᠋᠂ ᠪᠢ ᠨᠢᠭᠡ ᠦᠭᠡ ᠠᠢᠯᠠᠳᠬᠠᠶᠠ᠂ ᠡᠨᠡ ᠡᠪᠦᠭᠡᠨ ᠲᠤᠩ ᠬᠡᠷᠡᠭ ᠲᠡᠢ ᠬᠥᠮᠦᠨ ᠪᠠᠢᠨᠠ᠃ ᠦᠯᠢᠭᠡᠷ ᠳᠣᠮᠣᠭ ᠶᠡᠬᠡ ᠮᠡᠳᠡᠳᠡᠭ ᠪᠣᠯᠤᠯᠲᠠᠢ᠂ ᠢᠯᠠᠩᠭᠤᠶᠠ ᠠᠶᠠᠭᠠᠨ ᠳ᠋ᠤᠨᠢ ᠠᠢᠷᠠᠭ ᠬᠢᠵᠦ ᠥᠭᠪᠡᠯ ᠨᠢᠭᠡ ᠪᠠᠢᠲᠤᠭᠠᠢ ᠬᠣᠶᠠᠷ ᠡᠳᠦᠷ ᠴᠦ᠍ ᠶᠠᠷᠢᠵᠤ ᠴᠢᠳᠠᠬᠤ ᠪᠠᠢᠨᠠ᠃ ᠴᠠᠭᠠᠵᠠ ᠪᠠᠷ ᠠᠪᠠᠴᠢᠭᠠᠳ ᠶᠠᠭᠠᠬᠢᠪᠠ( ᠶᠠᠭᠠᠬᠢᠬᠤᠪ )᠂ ᠬᠠᠷᠢᠨ ᠡᠨᠳᠡ ᠪᠡᠨ ᠪᠠᠢᠯᠭᠠᠪᠠᠯ ᠣᠷᠣᠰ ᠭᠠᠵᠠᠷ ᠣᠳᠬᠤ ᠳ᠋ᠤ᠌ ᠬᠡᠷᠡᠭ ᠲᠡᠢ ᠪᠣᠯᠵᠤ ᠶᠠᠭᠤ ᠮᠠᠭᠠᠳ᠂ ᠪᠡᠶᠡ ᠪᠡᠨ ᠰᠠᠭᠠᠲᠠᠭᠤᠯᠬᠤ ᠪᠠᠷ ᠠᠪᠴᠤ ᠪᠠᠢᠭᠰᠠᠨ ᠴᠥ᠍ ᠪᠣᠯᠤᠨᠠ᠃ ᠪᠢᠳᠡᠨ ᠳ᠋ᠦ᠍ ᠴᠢᠬᠤᠯᠠ ᠮᠡᠳᠡᠭᠡ ᠬᠡᠯᠡᠵᠦ ᠥᠭᠭᠦᠯᠡ᠃ ᠺᠦᠮᠡᠨ ᠬᠠᠭᠠᠳ ᠵᠠᠢᠯᠠᠵᠤ᠂ ᠮᠠᠯ ᠢ᠋ᠶ᠋ᠠᠨ ᠲᠠᠭᠤᠵᠤ ᠪᠠᠢᠨᠠ ᠭᠡᠨᠡ ᠰᠢᠦ ᠳ᠋ᠠ᠃ ᠲᠡᠳᠡᠨ ᠢ᠋ ᠶᠠᠭᠠᠷᠠᠨ ᠭᠦᠢᠴᠡᠬᠦ ᠬᠡᠷᠡᠭᠲᠡᠢ ᠪᠣᠯᠤᠯᠠ᠃ ᠶᠠᠳᠠᠷᠠᠭᠰᠠᠨ ᠴᠡᠷᠢᠭ ᠦ᠋ᠨ ᠬᠣᠭᠣᠯᠠ ᠬᠦᠨᠡᠰᠦᠨ ᠳ᠋ᠦ᠍ ᠣᠯᠠᠨ ᠮᠠᠯ ᠬᠡᠷᠡᠭ ᠲᠡᠢ ᠰᠢᠦ ᠳ᠋ᠠ᠃ ᠢᠵᠢᠯ ᠮᠥᠷᠡᠨ ᠢ᠋ ᠲᠦᠷᠭᠡᠪᠴᠢᠯᠡᠨ ᠭᠠᠲᠤᠯᠪᠠᠯ ᠵᠣᠬᠢᠬᠤ ᠪᠣᠯᠵᠤ ᠪᠠᠢᠨᠠ ᠭᠡᠪᠡ᠃
— ᠲᠡᠷᠡ ᠶᠣᠰᠣᠭᠠᠷ ᠪᠣᠯᠭᠠᠶᠠ ᠭᠡᠵᠦ ᠪᠠᠲᠤ ᠬᠠᠭᠠᠨ ᠬᠡᠯᠡᠭᠡᠳ᠂《ᠵᠠᠭᠤᠨ ᠤ᠋ ᠳᠠᠷᠤᠭᠠ ᠠᠷᠠᠫᠱᠠ ᠡᠨᠡ ᠡᠪᠦᠭᠡᠨ ᠦ᠌ ᠭᠠᠷ ᠢ᠋ ᠳᠡᠯᠪᠢ᠂ ᠤᠷᠠᠬᠠ ᠶ᠋ᠢ ᠠᠪ᠂ ᠠᠮᠠᠷᠠᠭᠤᠯ 》ᠭᠡᠪᠡ᠃
ᠠᠷᠠᠫᠱᠠ ᠪᠣᠰᠴᠤ ᠪᠥᠰᠡᠨ ᠳ᠋ᠡᠭᠡᠨ ᠪᠠᠢᠭᠰᠠᠨ ᠬᠢᠲᠤᠭᠠ ᠪᠠᠷ ᠪᠠᠷᠢᠭᠳᠠᠯ ᠤ᠋ᠨ ᠭᠠᠷ ᠤ᠋ᠨ ᠰᠤᠷ ᠢ᠋ ᠣᠭᠲᠣᠯᠤᠨ᠂ ᠬᠦᠵᠦᠭᠦᠨ ᠡᠴᠡ ᠨᠢ ᠪᠤᠯᠢᠭᠠᠷᠢ ᠤᠷᠠᠬᠠ ᠶ᠋ᠢ ᠰᠠᠯᠭᠠᠨ ᠠᠪᠴᠤ ᠡᠪᠦᠭᠡᠨ ᠢ᠋ ᠰᠡᠭᠰᠦᠷᠦᠭᠡᠳ
— ᠳ᠋ᠵᠢᠬᠠᠩᠬᠢᠷ ᠲᠸ᠋ ᠪᠡᠶᠡᠰᠦᠨ ᠲᠠᠯᠠᠷᠬᠠ! ᠭᠡᠷᠡᠯᠲᠦ᠂ ᠴᠢᠨᠦ ᠠᠮᠢ ᠶ᠋ᠢ ᠬᠡᠯᠲᠦᠷᠢᠭᠦᠯᠪᠡ᠃ ᠢᠲᠡᠭᠡᠯ ᠢ᠋ ᠬᠠᠷᠢᠭᠤᠯᠵᠤ ᠬᠠᠭᠠᠨ ᠤ᠋ ᠵᠢᠭᠠᠰᠤᠴᠢ᠂ ᠦᠯᠢᠭᠡᠷᠴᠢ ᠬᠡᠯᠡᠮᠦᠷᠴᠢ ᠴᠦ᠍ ᠪᠣᠯᠵᠤ ᠶᠠᠭᠤ ᠮᠠᠭᠠᠳ᠃ ᠮᠥᠷᠭᠥᠭᠡᠳ᠂ ᠭᠠᠵᠠᠷ ᠦᠨᠦᠰ ᠭᠡᠪᠡ᠃
ᠡᠪᠦᠭᠡᠨ ᠭᠠᠷ ᠢ᠋ᠶ᠋ᠠᠨ ᠰᠤᠩᠭᠠᠵᠤ ᠨᠤᠭᠤᠯᠬᠤ ᠭᠡᠲᠡᠯᠡ ᠬᠦᠯᠢᠭ ᠲᠸ᠋ ᠴᠢᠨᠦᠷᠡᠵᠦ ᠬᠠᠪᠤᠳᠤᠭᠠᠳ ᠳᠥᠩᠭᠡᠵᠦ ᠬᠥᠳᠡᠯᠬᠦ ᠲᠡᠳᠦᠢ ᠪᠠᠢᠯᠠ᠃ ᠮᠣᠩᠭᠣᠯᠴᠤᠳ ᠲᠡᠭᠦᠨ ᠢ᠋ ᠲᠦᠰᠢᠨ ᠠᠪᠴᠤ ᠠᠰᠠᠷ ᠠ᠋ᠴᠠ ᠬᠥᠲᠥᠯᠦᠨ ᠭᠠᠷᠭᠠᠯᠠ᠃
ᠪᠠᠲᠤ ᠬᠠᠭᠠᠨ ᠮᠦᠰᠦᠢ᠍ᠺ ᠡᠴᠡ ᠵᠢᠭᠠᠰᠤᠴᠢᠨ ᠢ᠋ ᠬᠡᠷᠬᠢᠨ ᠪᠠᠷᠢᠭᠰᠠᠨ ᠢ᠋ ᠠᠰᠠᠭᠤᠭᠠᠳ ᠰᠡᠳᠬᠢᠯ ᠳ᠋ᠦ᠍ ᠲᠣᠬᠢᠷᠠᠭᠰᠠᠨ ᠤᠴᠢᠷ ᠮᠦᠰᠦᠢ᠍ᠺ ᠲᠤ᠌ ᠲᠣᠷᠭᠠᠨ ᠳᠡᠪᠡᠯ ᠱᠠᠩᠨᠠᠰᠤᠭᠠᠢ ᠭᠡᠵᠦ ᠲᠤᠰᠢᠶᠠᠯᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠯᠲᠠᠨᠴᠢᠮᠡᠭ᠂ ᠪᠠᠶᠠᠨᠴᠡᠴᠡᠭ᠂ ᠬᠡᠷᠡᠢᠳ· ᠮᠥᠩᠬᠡᠨᠠᠰᠤᠨ᠂ ᠠᠯᠲᠠᠨᠴᠢᠮᠡᠭ ᠂ ᠠᠷᠢᠭᠤᠨ
ᠬᠢᠨᠠᠭᠴᠢ᠄ ᠪᠠᠶᠠᠨᠴᠡᠴᠡᠭ᠂ ᠠᠯᠲᠠᠨᠴᠢᠮᠡᠭ᠂ ᠠᠷᠢᠭᠤᠨ᠂ ᠪᠠᠯ᠂ ᠲ· ᠬᠦᠮᠦᠵᠢᠯᠲᠦ