ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ04ᠳᠥᠲᠥᠭᠡᠷ ᠳᠡᠪᠲᠡᠷ-ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠲᠡᠮᠳᠡᠭᠯᠡᠯ ᠣᠷᠣᠰᠢᠪᠠᠢГалдан бошгот хаан-Т·Жамъян
219ᠳᠥᠲᠥᠭᠡᠷ ᠳᠡᠪᠲᠡᠷ-ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠲᠡᠮᠳᠡᠭᠯᠡᠯ ᠣᠷᠣᠰᠢᠪᠠᠢ
ᠨᠢᠭᠡ
ᠭᠠᠯᠳᠠᠨ ᠵᠡᠭᠡᠰᠦ ᠶ᠋ᠢᠨ ᠳᠡᠷᠭᠡᠳᠡ ᠰᠠᠭᠤᠵᠤ ᠪᠠᠢᠬᠤ ᠶ᠋ᠢ ᠬᠠᠷᠠᠭᠠᠳ 《ᠲᠡᠷᠡ ᠠᠩᠭᠢᠷ ᠨᠢᠰᠳᠡᠭ ᠦᠭᠡᠢ ᠶᠦᠮ ᠪᠠᠢᠨᠠ》 ᠭᠡᠵᠦ ᠬᠦᠷᠢᠶᠡᠨ ᠤ᠋ ᠨᠢᠭᠡ ᠨᠢ ᠬᠡᠯᠡᠵᠡᠢ᠃ ᠬᠦᠷᠢᠶᠡᠨ ᠤ᠋ ᠬᠢᠨ ᠣᠯᠠᠨ ᠢ᠋ᠶ᠋ᠠᠷ ᠴᠤᠭᠯᠠᠷᠠᠵᠠᠢ᠃ ᠭᠡᠲᠡᠯᠡ ᠨᠢᠭᠡ ᠨᠢ ᠯᠠᠮᠠ ᠪᠠᠢᠨᠠ ᠰᠢᠦ ᠳᠡ ᠭᠡᠵᠦ ᠬᠠᠰᠬᠢᠷᠴᠠᠢ᠃ ᠠᠩᠭᠢᠷ ᠰᠢᠪᠠᠭᠤ ᠶ᠋ᠢ ᠲᠡᠷᠡ ᠴᠠᠭ ᠡᠴᠡ ᠯᠠᠮᠠ ᠰᠢᠪᠠᠭᠤ ᠭᠡᠮᠡᠨ ᠨᠡᠷᠡᠯᠡᠭᠰᠡᠨ ᠭᠡᠳᠡᠭ᠃ ᠭᠠᠯᠳᠠᠨ ᠲᠡᠮᠳᠡᠭᠯᠡᠯ ᠢ᠋ᠶ᠋ᠡᠨ ᠦᠷᠭᠦᠯᠵᠢᠯᠡᠭᠦᠯᠦᠨᠡ᠃
ᠠᠭᠤᠯᠠ ᠶ᠋ᠢᠨ ᠬᠡᠴᠡ ᠳᠡᠷᠡᠯᠡᠭᠰᠡᠨ ᠨᠠᠷᠠᠨ ᠤ᠋ ᠲᠠᠰᠢᠭᠤ ᠲᠤᠶᠠᠭᠠᠨ ᠳᠣᠣᠭᠤᠷ ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠮᠤᠰᠬᠢᠷᠠᠨ ᠤᠷᠤᠰᠬᠤ ᠨᠢ ᠬᠣᠯᠠ ᠡᠴᠡ ᠬᠠᠷᠠᠭᠳᠠᠬᠤ ᠪᠥᠭᠡᠳ ᠣᠢᠷᠠᠲᠤᠨ ᠣᠴᠢᠬᠤ ᠠᠭᠱᠠᠨᠠ ᠪᠢᠲᠡᠭᠦᠦ ᠨᠣᠭᠣᠭᠠᠨ ᠵᠡᠭᠡᠰᠦ ᠤᠰᠤᠨ ᠤ᠋ ᠤᠷᠤᠰᠬᠠᠯ ᠢ᠋ ᠬᠠᠭᠠᠵᠤ ᠨᠠᠢᠭᠤᠨᠠ᠃
ᠭᠠᠯᠳᠠᠨ ᠵᠡᠭᠡᠰᠦ ᠶ᠋ᠢᠨ ᠵᠠᠬᠠ ᠳ᠋ᠤ᠌ ᠮᠣᠷᠢᠨ ᠡᠴᠡ ᠪᠠᠭᠤᠯᠠ᠃ ᠭᠠᠯᠳᠠᠨ ᠬᠥᠩᠭᠡᠨ ᠰᠢᠩᠭᠡᠨ ᠠᠯᠬᠤᠭᠰᠠᠭᠠᠷ ᠵᠡᠭᠡᠰᠦ ᠤᠷᠤᠭᠤ ᠣᠴᠢᠵᠤ ᠳᠣᠷᠣᠭᠰᠢ ᠪᠠᠨ ᠲᠣᠩᠭᠣᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠵᠡᠭᠡᠰᠦ ᠨᠠᠢᠭᠤᠯᠤᠨ ᠬᠡᠳᠦ ᠠᠯᠬᠤᠵᠤ ᠰᠠᠭᠤᠨᠠ᠃
ᠭᠠᠯᠳᠠᠨ ᠤ᠋ ᠡᠮᠦᠨᠡ ᠰᠢᠪᠠᠭᠤᠨ ᠤ᠋ ᠡᠭᠦᠷ ᠪᠠᠢᠯᠠ᠃ ᠮᠠᠰᠢᠳᠠ ᠨᠢᠮᠪᠠᠢᠯᠠᠨ ᠵᠠᠰᠠᠭᠰᠠᠨ ᠡᠭᠦᠷ ᠲᠦ᠍ ᠭᠤᠷᠪᠠᠨ ᠥᠨᠳᠡᠭᠡ ᠬᠠᠷᠠᠭᠳᠠᠨᠠ᠃
ᠨᠠᠷᠠᠨ ᠤ᠋ ᠲᠤᠶᠠᠭᠠᠨ ᠤ᠋ ᠡᠰᠡᠷᠭᠦ ᠲᠠᠯᠠ ᠳ᠋ᠤ᠌ ᠭᠠᠯᠳᠠᠨ ᠯᠠᠮᠠ ᠰᠠᠭᠤᠵᠤ᠂ ᠵᠡᠭᠡᠰᠦᠨ ᠳᠡᠭᠡᠭᠦᠷ ᠰᠠᠴᠤᠷᠠᠬᠤ ᠨᠠᠷᠠᠨ ᠤ᠋ ᠵᠦᠭ ᠰᠠᠷᠠᠪᠴᠢᠯᠠᠨ ᠥᠨᠳᠡᠭᠡ ᠶ᠋ᠢ ᠡᠩᠬᠦᠷᠡᠢᠯᠡᠬᠦ ᠮᠡᠲᠦ ᠬᠠᠷᠠᠨᠠ᠃
ᠭᠡᠲᠡᠯᠡ ᠤᠰᠤ ᠴᠠᠯᠭᠢᠬᠤ᠂ ᠳᠣᠯᠭᠢᠶᠠᠯᠠᠬᠤ ᠴᠢᠮᠡᠭᠡ ᠭᠠᠯᠳᠠᠨ ᠯᠠᠮᠠ ᠶ᠋ᠢᠨ ᠴᠢᠬᠢᠨ ᠳ᠋ᠦ᠍ ᠰᠣᠨᠣᠰᠤᠭᠳᠠᠵᠤ ᠵᠡᠭᠡᠰᠦᠲᠦ ᠲᠣᠬᠣᠢ ᠳ᠋ᠤ᠌ ᠠᠩᠭᠢᠷ ᠨᠦᠷᠭᠢᠨᠡ᠃ ᠭᠠᠯᠳᠠᠨ ᠢ᠋ ᠲᠥᠪᠡᠳ ᠣᠷᠣᠨ ᠳ᠋ᠤ᠌ ᠣᠴᠢᠬᠤ ᠪᠠᠷ ᠶᠠᠪᠤᠬᠤ ᠵᠠᠮ ᠵᠠᠭᠤᠷᠠ ᠳ᠋ᠤ᠌ ᠥᠨᠳᠡᠭᠡᠲᠦ ᠴᠥᠭᠥᠷᠥᠮ ᠲᠠᠭᠠᠷᠠᠵᠤ᠂ ᠡᠵᠡᠭᠦᠢᠷᠡᠭᠰᠡᠨ ᠲᠦᠮᠡᠨ ᠰᠢᠪᠠᠭᠤᠨ ᠤ᠋ ᠡᠭᠦᠷ ᠢ᠋ ᠠᠨᠤ ᠲᠡᠭᠦᠨ ᠳ᠋ᠤ᠌ ᠦᠵᠡᠭᠦᠯᠵᠦ ᠪᠢᠯᠡ᠃ ᠲᠡᠷᠡ ᠬᠦ᠌ ᠥᠨᠳᠡᠭᠡᠲᠦ ᠴᠥᠭᠥᠷᠥᠮ ᠳ᠋ᠤ᠌ ᠠᠳᠤᠭᠤᠨ ᠰᠦᠷᠦᠭ ᠪᠡᠯᠴᠢᠳᠡᠭ ᠦᠭᠡᠢ ᠪᠥᠭᠡᠳ ᠲᠠᠯᠠ ᠶ᠋ᠢᠨ ᠪᠠᠭᠠᠲᠤᠷ ᠤ᠋ᠳ ᠲᠣᠭᠣᠷᠢᠵᠤ ᠥᠩᠭᠡᠷᠡᠳᠡᠭ ᠠᠵᠢ᠃ ᠰᠡᠩᠭᠡ ᠠᠬᠠ ᠶ᠋ᠢᠨ ᠰᠦᠢ ᠲᠠᠯᠪᠢᠭᠰᠠᠨ ᠪᠦᠰᠡᠭᠦᠢ ᠠᠨᠤᠳᠠᠷᠠ ᠲᠡᠭᠦᠨ ᠤ᠋ ᠪᠠᠭᠠ ᠬᠠᠲᠤᠨ ᠪᠣᠯᠵᠤ᠂ ᠴᠣᠷᠣᠰ ᠣᠪᠣᠭ ᠤ᠋ᠨ ᠶᠡᠬᠡ ᠦᠷᠭᠦᠭᠡᠨ ᠳ᠋ᠤ᠌ ᠵᠠᠯᠠᠷᠠᠭᠰᠠᠨ ᠡᠴᠡ ᠬᠣᠢᠰᠢ ᠬᠡᠳᠦ ᠬᠡᠳᠦᠨ ᠣᠨ ᠤᠯᠠᠷᠢᠨ ᠥᠩᠭᠡᠷᠡᠵᠦ ᠭᠠᠯᠳᠠᠨ ᠤ᠋ ᠣᠢ ᠲᠣᠢ ᠳ᠋ᠤ᠌ ᠪᠦᠰᠡᠭᠦᠢ ᠬᠥᠮᠦᠨ ᠤ᠋ ᠲᠤᠬᠠᠢ ᠰᠠᠷᠠᠯ ᠮᠡᠳᠡᠷᠡᠮᠵᠢ ᠡᠭᠦᠰᠴᠡᠢ᠃
ᠭᠠᠯᠳᠠᠨ ᠯᠠᠮᠠ ᠶ᠋ᠢᠨ ᠣᠴᠢᠳᠠᠭ ᠲᠡᠷᠡ ᠬᠦ᠌ ᠵᠡᠭᠡᠰᠦᠲᠦ ᠴᠥᠭᠥᠷᠥᠮ ᠢ᠋ ᠬᠣᠵᠢᠮ《ᠯᠠᠮᠠ ᠰᠢᠪᠠᠭᠤᠨ ᠤ᠋ ᠨᠠᠭᠤᠷ》᠂ 《ᠠᠩᠭᠢᠷᠳᠤ ᠴᠥᠭᠥᠷᠥᠮ》 ᠭᠡᠮᠡᠨ ᠶᠠᠩᠵᠤ ᠪᠦᠷᠢ ᠪᠡᠷ ᠨᠡᠷᠡᠯᠡᠬᠦ ᠪᠣᠯᠵᠤ ᠠᠩᠭᠢᠷ ᠢ᠋ ᠯᠠᠮᠠ ᠰᠢᠪᠠᠭᠤ ᠭᠡᠮᠡᠨ ᠬᠦᠨᠳᠦᠳᠬᠡᠵᠦ᠂ ᠠᠶᠤᠯᠭᠠᠬᠤ᠂ ᠰᠣᠴᠢᠭᠠᠬᠤ᠂ ᠠᠯᠠᠬᠤ ᠵᠡᠷᠭᠡ ᠶ᠋ᠢ ᠬᠥᠮᠦᠰ ᠰᠡᠳᠬᠢᠯ ᠳ᠋ᠡᠭᠡᠨ ᠬᠣᠷᠢᠵᠠᠢ᠃ ᠯᠠᠮᠠ ᠰᠢᠪᠠᠭᠤᠨ ᠤ᠋ ᠡᠭᠦᠷ ᠡᠵᠡᠭᠦᠢᠷᠡᠵᠡᠢ᠃
ᠭᠠᠯᠳᠠᠨ ᠯᠠᠮᠠ ᠰᠢᠪᠠᠭᠤᠨ ᠤ᠋ ᠡᠭᠦᠷ ᠢ᠋ ᠪᠣᠯᠭᠣᠮᠵᠢᠲᠠᠢ ᠲᠣᠭᠣᠷᠢᠵᠤ ᠵᠡᠭᠡᠰᠦ ᠳᠤᠮᠳᠠᠭᠤᠷ ᠳᠠᠭᠤᠴᠠᠨ ᠶᠠᠪᠤᠪᠠ᠃ ᠠᠩᠭᠢᠷᠳᠤ ᠴᠥᠭᠥᠷᠥᠮ ᠳ᠋ᠦ᠍ ᠨᠢᠮᠭᠡᠨ ᠲᠣᠷᠭᠠᠮᠰᠤᠭ ᠬᠤᠪᠴᠠᠰᠤ ᠲᠠᠢ ᠪᠦᠰᠡᠭᠦᠢ ᠤᠰᠤᠨ ᠳ᠋ᠤ᠌ ᠪᠡᠶᠡ ᠪᠡᠨ ᠪᠤᠯᠬᠠᠵᠤ᠂ ᠭᠡᠵᠢᠭᠡ ᠪᠡᠨ ᠰᠤᠯᠠ ᠵᠠᠳᠠᠭᠠᠢ ᠨᠠᠮᠢᠷᠠᠭᠤᠯᠤᠭᠰᠠᠨ ᠨᠢ ᠭᠠᠯᠳᠠᠨ ᠤ᠋ ᠰᠣᠨᠢᠭᠤᠴᠢ ᠵᠠᠩ ᠢ᠋ ᠲᠠᠲᠠᠯᠠ᠃ ᠰᠠᠢᠲᠤᠷ ᠠᠵᠢᠭᠯᠠᠨ ᠬᠠᠷᠠᠪᠠᠰᠤ ᠮᠥᠨᠥᠬᠢ ᠪᠦᠰᠡᠭᠦᠢ ᠪᠣᠯ ᠬᠠᠭᠠᠨ ᠤ᠋ ᠪᠠᠭᠠ ᠬᠠᠲᠤᠨ ᠠᠨᠤᠳᠡᠷᠠ ᠠᠵᠢ᠃
ᠠᠨᠤᠳᠠᠷᠠ ᠪᠣᠯ ᠡᠷᠬᠡ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠡᠷᠡᠮᠡᠬᠡᠢ ᠵᠣᠯᠪᠣᠭᠠᠯᠢᠭ ᠪᠦᠰᠡᠭᠦᠢ ᠪᠢᠯᠡ᠃ ᠲᠡᠭᠦᠨ ᠦ᠌ ᠠᠬᠠ ᠶ᠋ᠢ ᠭᠠᠯᠳᠠᠮᠠ ᠪᠠᠭᠠᠲᠤᠷ ᠭᠡᠨᠡ᠃ ᠠᠨᠤᠳᠠᠷᠠ ᠶ᠋ᠢ ᠪᠠᠭᠠ ᠡᠴᠡ ᠨᠢ ᠬᠣᠱᠤᠳ ᠣᠪᠣᠭ ᠤ᠋ᠨ ᠬᠢᠨ ᠠᠨᠤ ᠭᠡᠮᠡᠨ ᠨᠡᠷᠡᠯᠡᠭᠰᠡᠭᠡᠷ ᠠᠨᠤ ᠨᠡᠷᠡ ᠳ᠋ᠡᠭᠡᠨ ᠶᠡᠬᠡᠳᠡ ᠳᠠᠰᠤᠯ ᠪᠣᠯᠵᠠᠢ᠃ ᠬᠣᠱᠤᠳ ᠤ᠋ᠨ ᠸᠴᠢᠷᠲᠤ ᠰᠡᠴᠡᠨ ᠬᠠᠭᠠᠨ ᠤ᠋ ᠥᠬᠢᠨ ᠭᠣᠣᠯ ᠤ᠋ᠨ ᠡᠨᠡ ᠬᠦ᠌ ᠴᠡᠩᠬᠡ ᠴᠥᠭᠥᠷᠥᠮ ᠢ᠋ ᠮᠡᠳᠡᠳᠡᠭ ᠪᠠᠢᠵᠠᠢ᠃ ᠠᠨᠤ ᠶᠢᠨ ᠤᠰᠤ ᠦᠰᠦᠴᠢᠭᠦᠯᠦᠨ ᠰᠡᠯᠢᠬᠦ᠂ ᠱᠤᠩᠪᠠᠨ ᠵᠤᠭᠠᠴᠠᠬᠤ ᠲᠡᠷᠢᠭᠦᠲᠡᠨ ᠢ᠋ ᠭᠠᠯᠳᠠᠨ ᠰᠣᠨᠢᠷᠬᠠᠵᠤ ᠨᠢᠮᠭᠡᠨ ᠲᠣᠷᠭᠠᠮᠰᠤᠭ ᠳᠡᠪᠡᠯ ᠦ᠋ᠨ ᠴᠠᠭᠠᠨᠠ ᠡᠴᠡ ᠬᠡᠷᠡᠯᠳᠦᠬᠦ ᠨᠢᠴᠦᠭᠦᠨ ᠪᠡᠶᠡ᠂ ᠡᠪᠡᠰᠦ ᠨᠣᠭᠣᠭᠠ ᠮᠡᠲᠦ ᠤᠷᠭᠤᠵᠤ ᠪᠣᠢ ᠬᠣᠶᠠᠷ ᠲᠣᠮᠪᠣᠭᠣᠷ ᠬᠥᠬᠥ᠂ ᠨᠠᠷᠢᠬᠠᠨ ᠭᠤᠸᠠᠯᠢᠭ ᠪᠡᠯᠬᠡᠭᠦᠰᠦ᠂ ᠲᠡᠭᠰᠢ ᠤᠷᠲᠤ ᠰᠢᠯᠪᠢ ᠨᠢ ᠯᠠᠮᠠ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠡᠭᠡᠯᠵᠢ ᠳᠠᠷᠠᠭᠠᠯᠠᠨ ᠥᠷᠲᠥᠨᠡ᠃
ᠭᠠᠯᠳᠠᠨ ᠯᠠᠮᠠ ᠰᠣᠨᠣᠰᠤᠭᠳᠠᠬᠤᠢᠴᠠ ᠪᠠᠷ᠂
— ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠨᠢᠭᠦᠯ ᠦᠢᠯᠡᠳᠬᠦ ᠨᠢ ᠪᠤᠷᠬᠠᠨ ᠤ᠋ ᠶᠣᠰᠣᠨ ᠳ᠋ᠤ᠌ ᠦᠯᠦ ᠨᠡᠢᠴᠡᠨᠡ᠃ ᠪᠤᠷᠬᠠᠨ ᠪᠤᠳ᠋ᠳ᠋ᠾᠠ ᠬᠥᠮᠦᠰ ᠡᠴᠡ ᠲᠥᠷᠥᠭᠰᠡᠨ ᠠᠲᠠᠯᠠ ᠪᠢ ᠶᠠᠭᠤᠨ ᠳ᠋ᠤ᠌ ᠢᠴᠢᠨᠡ᠃ ᠭᠠᠯᠳᠠᠨ ᠬᠤᠸᠠᠷᠠᠭ ᠴᠢ ᠡᠴᠢᠭᠡ ᠡᠬᠡ ᠶ᠋ᠢᠨ ᠳᠤᠮᠳᠠ ᠡᠴᠡ ᠡᠭᠦᠰᠦᠭᠰᠡᠨ ᠪᠤᠰᠤ ᠤᠤ? ᠭᠡᠮᠡᠨ ᠰᠢᠪᠡᠨᠡᠨ ᠥᠭᠦᠯᠡᠵᠦ ᠥᠪᠡᠷ ᠲᠡᠭᠡᠨ ᠵᠥᠪ ᠪᠤᠷᠤᠭᠤ ᠶ᠋ᠢᠨ ᠠᠯᠢ ᠠᠯᠢᠨ ᠢ᠋ ᠨᠢᠯᠵᠠᠭᠠᠵᠤ ᠪᠠᠢᠪᠠ᠃
ᠠᠨᠤ ᠪᠡᠶᠡ ᠪᠡᠨ ᠬᠡᠰᠡᠭ ᠪᠤᠯᠬᠠᠭᠰᠠᠨ ᠤ᠋ ᠡᠴᠦᠰ ᠲᠦ᠍ ᠴᠡᠩᠬᠡ ᠴᠥᠭᠥᠷᠥᠮ ᠡᠴᠡ ᠭᠠᠷᠴᠤ ᠵᠡᠭᠡᠰᠦᠨ ᠳᠣᠲᠣᠷᠠ ᠠᠯᠠᠭᠠ ᠪᠣᠯᠪᠠ᠃
ᠠᠨᠤ ᠶ᠋ᠢᠨ ᠭᠡᠷᠡᠯᠲᠦ ᠨᠢᠳᠦ᠂ ᠲᠤᠩᠭᠠᠯᠠᠭ ᠤᠰᠤᠨ ᠡᠴᠡ ᠥᠭᠡᠷᠡ ᠶᠠᠭᠤᠮᠠ ᠬᠦᠷᠦᠮᠡ ᠦᠭᠡᠢ ᠴᠣᠭᠴᠠᠰ᠂ ᠦᠵᠡᠮᠵᠢᠲᠦ ᠲᠠᠩᠰᠤᠭ ᠪᠠᠢᠳᠠᠯ ᠳ᠋ᠤ᠌ ᠭᠠᠯᠳᠠᠨ ᠯᠠᠮᠠ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠠᠪᠲᠠᠭᠰᠠᠨ ᠪᠠᠢᠪᠠ᠃ ᠵᠡᠭᠡᠰᠦᠲᠦ ᠲᠣᠬᠣᠢ ᠳᠡᠭᠡᠭᠦᠷ ᠠᠩᠭᠢᠷ ᠭᠠᠩᠭᠠᠨᠠᠨ ᠴᠤᠤᠷᠢᠶᠠᠵᠤ᠂ ᠨᠠᠷᠠᠨ ᠤ᠋ ᠠᠯᠲᠠᠨ ᠤᠲᠠᠰᠤ ᠪᠢᠲᠡᠭᠦᠦ ᠨᠣᠭᠣᠭᠠᠷᠠᠵᠤ ᠵᠡᠭᠡᠰᠦᠨ ᠰᠢᠭᠤᠢ ᠳ᠋ᠤ᠌ ᠤᠶᠠᠭᠠ ᠲᠠᠢ ᠪᠠᠢᠨᠠ᠂᠃
ᠲᠡᠷᠡ ᠴᠠᠭ ᠡᠴᠡ ᠠᠨᠤ ᠪᠦᠰᠡᠭᠦᠢ ᠭᠠᠯᠳᠠᠨ ᠯᠠᠮᠠ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠲᠣᠭᠲᠠᠵᠠᠢ᠃ᠤᠨᠲᠠᠪᠠᠴᠤ ᠰᠡᠷᠡᠪᠡᠴᠦ ᠠᠨᠤ ᠬᠠᠷᠠᠭᠳᠠᠬᠤ ᠨᠢ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠤ᠋ ᠵᠢᠷᠦᠬᠡ ᠶ᠋ᠢ ᠴᠡᠴᠡᠷᠡᠭᠦᠯᠳᠡᠭ ᠪᠠᠢᠯᠠ᠃
ᠤᠷᠢᠳ ᠡᠮᠦᠨᠡ ᠨᠢ ᠬᠥᠬᠡᠨᠠᠭᠤᠷ ᠤ᠋ᠨ ᠶᠡᠬᠡ ᠡᠪᠡᠰᠦᠲᠦ ᠲᠠᠯᠠ ᠳ᠋ᠤ᠌ ᠰᠢᠪᠠᠭᠤᠨ ᠤ᠋ ᠡᠭᠦᠷ ᠦᠵᠡᠭᠡᠳ ᠭᠦᠶᠦᠵᠦ ᠶᠠᠪᠤᠬᠤ ᠳ᠋ᠠᠭᠠᠨ ᠭᠠᠯᠳᠠᠨ ᠬᠥᠪᠡᠭᠦᠨ ᠠᠨᠤᠳᠠᠷᠠ᠂ ᠠᠬᠠᠳᠠᠷᠠ ᠬᠣᠶᠠᠷ ᠤ᠋ᠨ ᠲᠠᠯᠠ ᠪᠠᠷ ᠵᠦᠩ ᠰᠤᠪᠢᠨ ᠤ᠋ ᠲᠥᠰᠦᠭᠡᠯᠡᠯ ᠲᠡᠢ ᠪᠣᠯᠵᠠᠢ᠃
— ᠴᠢ ᠰᠡᠩᠭᠡ ᠠᠬᠠ ᠶ᠋ᠢᠨ ᠰᠦᠢᠲᠦ ᠪᠦᠰᠡᠭᠦᠢ ᠮᠥᠨ ᠤᠤ?
— ᠮᠥᠨ᠂ ᠪᠢ ᠡᠬᠡᠨᠡᠷ ᠨᠢ ᠪᠣᠯᠤᠨᠠ
— ᠬᠡᠵᠢᠶᠡ ᠁
— ᠶᠠᠭᠤ ᠬᠡᠵᠢᠶᠡ ᠭᠡᠵᠦ᠁ ᠥᠨᠥ ᠪᠣᠯ ᠥᠨᠥ᠂ ᠮᠠᠷᠭᠠᠰᠢ ᠪᠣᠯ ᠮᠠᠷᠭᠠᠰᠢ᠂ ᠨᠠᠮᠠᠶ᠋ᠢ ᠣᠯᠠᠨ ᠳᠠᠭᠠᠭᠤᠯᠢ ᠲᠠᠢ᠂ ᠰᠡᠦᠬᠡ ᠲᠡᠷᠭᠡ ᠲᠡᠢ ᠢᠷᠡᠵᠦ ᠠᠪᠤᠨᠠ᠃ ᠲᠡᠭᠡᠭᠡᠳ ᠴᠣᠷᠣᠰ ᠣᠪᠣᠭᠲᠠᠨ ᠢ᠋ ᠲᠥᠷᠥᠭᠦᠯᠦᠨᠡ ᠳᠡ᠃
— ᠴᠢᠮᠠᠶ᠋ᠢ ᠠᠬᠠ ᠡᠴᠡ ᠥᠭᠡᠷᠡ ᠬᠡᠨ ᠭᠤᠶᠤᠭᠰᠠᠨ ᠪᠣᠢ?
— ᠮᠡᠳᠡᠬᠦ ᠦᠭᠡᠢ᠂ ᠭᠤᠶᠤᠭᠰᠠᠨ ᠴᠤ᠌ ᠮᠠᠨ ᠤ᠋ ᠠᠪᠤ ᠥᠭᠬᠦ ᠦᠭᠡᠢ᠃ ᠨᠠᠮᠠᠶ᠋ᠢ ᠰᠡᠩᠭᠡ ᠳ᠋ᠦ᠍ ᠦᠨᠡᠨᠴᠢ ᠪᠠᠢᠬᠤ ᠶ᠋ᠢ ᠰᠤᠷᠭᠠᠭᠰᠠᠨ᠃
— ᠨᠠᠮᠠᠶ᠋ᠢ ᠲᠥᠪᠡᠳ ᠡᠴᠡ ᠢᠷᠡᠬᠦ ᠳ᠋ᠦ᠍ ᠴᠢ ᠬᠡᠦᠬᠡᠳ ᠳᠦᠷᠦᠭᠦᠯᠴᠢᠬᠡᠭᠡᠳ ᠪᠠᠢᠬᠤ ᠶᠤᠮ ᠪᠠᠢᠨᠠ᠃
— ᠲᠡᠭᠡᠨᠡ᠃
— ᠪᠢ ᠯᠠᠮᠠ ᠪᠣᠯᠤᠨᠠ᠃ ᠡᠬᠡᠨᠡᠷ ᠠᠪᠳᠠᠭ ᠦᠭᠡᠢ ᠬᠥᠮᠦᠨ ᠢ᠋ ᠯᠠᠮᠠ ᠪᠣᠯᠭᠠᠳᠠᠭ᠃ ᠯᠠᠮᠠ ᠬᠥᠮᠦᠨ ᠠᠪᠠᠭᠠᠢ ᠦᠭᠡᠢ ᠪᠠᠢᠬᠤ ᠶᠣᠰᠣᠲᠠᠢ᠃
— ᠠᠢ ᠬᠥᠭᠡᠷᠦᠬᠦᠢ᠁
— ᠶᠠᠭᠠᠬᠢᠭᠠᠳ ᠬᠥᠭᠡᠷᠦᠬᠦᠢ ᠭᠡᠵᠦ?
— ᠯᠠᠮᠠ ᠪᠠᠭᠰᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠰᠠᠭᠤᠬᠤ ᠪᠠᠷ ᠤᠢᠳᠬᠠᠷ ᠲᠠᠢ ᠭᠡᠵᠦ ᠪᠣᠳᠣᠭᠰᠠᠨ ᠶᠤᠮ᠃
— ᠶᠡᠬᠡ ᠨᠣᠮ ᠤᠩᠰᠢᠵᠤ ᠴᠡᠭᠡᠵᠢᠯᠡᠳᠡᠭ ᠪᠣᠯᠬᠣᠷ ᠤᠢᠳᠬᠤ ᠵᠠᠪ ᠪᠠᠢᠬᠤ ᠦᠭᠡᠢ ᠭᠡᠵᠦ ᠭᠡᠭᠡᠨᠲᠡᠨ ᠬᠡᠯᠡᠭᠰᠡᠨ᠃
— ᠴᠢ ᠭᠡᠷ ᠢ᠋ᠶ᠋ᠡᠨ ᠰᠠᠨᠠᠬᠤ ᠤᠤ?
— ᠰᠠᠨᠠᠭᠠᠳ ᠡᠬᠢᠯᠡᠴᠢᠬᠡᠭᠰᠡᠨ ᠶᠠᠪᠤᠵᠤ ᠪᠠᠢᠨᠠ᠃
— ᠭᠡᠷ ᠣᠷᠣᠨ᠂ ᠨᠤᠲᠤᠭ ᠤᠰᠤ ᠪᠠᠨ ᠰᠠᠨᠠᠬᠤ ᠪᠠᠷ ᠨᠢᠭᠡ ᠶᠠᠭᠤᠮᠠ ᠠᠪᠴᠤ ᠶᠠᠪᠤᠳᠠᠭ ᠭᠡᠨᠡ ᠯᠠᠢ᠃ ᠴᠢᠮᠠ ᠳ᠋ᠤ᠌ ᠲᠡᠢᠮᠦ ᠶᠠᠭᠤᠮᠠ
ᠪᠣᠢ ᠤᠤ?
— ᠤᠬᠢᠶᠠᠭᠰᠠᠨ ᠭᠣᠣᠯ ᠤ᠋ᠨ ᠴᠢᠯᠠᠭᠤ ᠪᠠᠢᠭᠠ ᠁
— ᠬᠡᠨ ᠥᠭᠭᠦᠭᠰᠡᠨ ᠶᠦᠮ?
— ᠬᠠᠲᠤᠨ ᠡᠬᠡ᠃
— ᠶᠦᠮ ᠠᠭᠠ ᠬᠠᠲᠤᠨ ᠡᠬᠡ ᠮᠢᠨᠦ ᠴᠤ᠌ ᠬᠠᠲᠤᠨ ᠡᠬᠡ ᠪᠣᠯᠤᠨᠠ᠃
— ᠲᠡᠢᠮᠦ ᠠ᠋᠂ ᠮᠢᠨᠦ ᠡᠵᠢ ᠴᠢᠨᠦ ᠬᠠᠳᠠᠮ ᠡᠬᠡ ᠪᠣᠯᠬᠤ ᠶᠤᠮ ᠪᠠᠢᠨᠠ᠃
— ᠶᠦᠮ ᠠᠭᠠ ᠬᠠᠲᠤᠨ ᠰᠠᠢᠨ ᠬᠥᠮᠦᠨ ᠭᠡᠨᠡ ᠯᠠᠢ᠃ ᠠᠪᠤ ᠨᠠᠳᠠ ᠬᠡᠯᠡᠭᠰᠡᠨ᠃ ᠬᠠᠳᠠᠮ ᠡᠬᠡ ᠭᠡᠨᠡ ᠰᠢᠦ ᠁
— ᠮᠢᠨᠦ ᠡᠵᠢ ᠨᠡᠭᠡᠷᠡᠨ ᠶᠡᠬᠡ ᠰᠠᠢᠨ ᠬᠥᠮᠦᠨ᠃
— ᠠ᠋! ᠭᠢᠯᠠᠢ᠂ ᠶᠠᠭᠠᠬᠢᠭᠰᠠᠨ ᠰᠠᠢᠬᠠᠨ ᠪᠣᠢ?
ᠭᠠᠯᠳᠠᠨ ᠢ ᠲᠥᠪᠡᠳ ᠡᠴᠡ ᠢᠷᠡᠭᠰᠡᠨ ᠬᠣᠢᠨᠠ ᠬᠠᠲᠤᠨ ᠡᠬᠡ ᠶᠦᠮ ᠠᠭᠠ ᠶᠡᠬᠡᠳᠡ ᠰᠠᠨᠠᠭᠠᠰᠢᠷᠠᠨ ᠪᠠᠢᠵᠤ᠂
—ᠡᠴᠢᠭᠡ ᠡᠴᠡ ᠲᠠᠨᠢ ᠬᠣᠢᠰᠢ ᠡᠵᠢ ᠨᠢ ᠶᠡᠬᠡ ᠭᠠᠭᠴᠠᠭᠠᠷᠳᠠᠵᠤ ᠪᠠᠢᠯᠠ᠃ ᠭᠡᠲᠡᠯᠡ ᠠᠨᠤ ᠢᠷᠡᠵᠦ ᠰᠡᠳᠬᠢᠯ ᠦ᠋ᠨ ᠰᠢᠷᠬᠠ ᠨᠥᠬᠥᠭᠳᠡᠪᠡ᠃ ᠵᠢᠰᠦ ᠴᠢᠷᠠᠢ ᠨᠢ ᠴᠦ᠍ ᠰᠠᠢᠬᠠᠨ ᠪᠦᠰᠡᠭᠦᠢ ᠶᠦᠮ᠃ ᠵᠢᠷᠦᠬᠡ ᠰᠡᠳᠬᠢᠯ ᠨᠢ ᠴᠦ᠍ ᠢᠪᠡᠭᠡᠯ ᠲᠡᠢ ᠶᠦᠮ᠃ ᠪᠤᠷᠬᠠᠨ ᠡᠨᠡ ᠬᠡᠦᠬᠡᠨ ᠢ᠋ ᠪᠢᠳᠡᠨ ᠳ᠋ᠦ᠍ ᠶᠠᠪᠤᠭᠤᠯᠵᠠᠢ ᠭᠡᠵᠦ ᠪᠣᠳᠣᠳᠠᠭ ᠭᠡᠮᠡᠨ ᠶᠠᠷᠢᠭᠰᠠᠨ ᠢ᠋ ᠴᠥᠭᠥᠷᠥᠮ ᠦ᠋ᠨ ᠬᠥᠪᠡᠭᠡᠨ ᠳ᠋ᠦ᠍ ᠰᠠᠨᠠᠭᠠᠯᠵᠠᠪᠠ᠃
ᠠᠩᠭᠢᠷ ᠦᠷᠭᠦᠬᠦ ᠦᠭᠡᠢ ᠪᠠᠢᠯᠠ᠃ ᠠᠩᠭᠢᠷ ᠠᠨᠤᠳᠠᠷᠠ ᠬᠠᠲᠤᠨ ᠳ᠋ᠤ᠌ ᠳᠠᠰᠴᠠᠢ᠃ ᠯᠠᠮᠠ ᠰᠢᠪᠠᠭᠤᠨ ᠤ᠋ ᠨᠠᠭᠤᠷ ᠲᠤ᠌ ᠲᠤᠩᠭᠠᠯᠠᠭ ᠤᠰᠤᠲᠤ ᠬᠣᠷᠢᠨ ᠨᠢᠭᠡᠨ ᠭᠣᠷᠣᠬᠠ ᠴᠢᠳᠬᠤᠳᠠᠭ᠃
ᠬᠣᠷᠢᠨ ᠨᠢᠭᠡᠨ ᠭᠣᠷᠣᠬᠠ ᠶ᠋ᠢᠨ ᠨᠡᠢᠯᠡᠳᠡᠭ ᠴᠢᠳᠬᠤᠯᠠᠩ ᠨᠢ ᠯᠠᠮᠠ ᠰᠢᠪᠠᠭᠤᠨ ᠤ᠋ ᠨᠠᠭᠤᠷ ᠪᠢᠯᠡ᠃ ᠨᠠᠭᠤᠷ ᠡᠴᠡ ᠨᠢᠭᠡᠨ ᠭᠣᠣᠯ ᠤᠷᠤᠰᠴᠤ᠂ ᠬᠤᠷᠴᠠ ᠱᠣᠪᠬᠣ ᠣᠷᠣᠢ ᠲᠠᠢ ᠠᠭᠤᠯᠠᠰ ᠤ᠋ᠨ ᠳᠤᠮᠳᠠᠬᠢ ᠤᠷᠲᠤ ᠬᠥᠨᠳᠡᠢ ᠶ᠋ᠢ ᠤᠮᠳᠠᠭᠠᠯᠠᠨ ᠮᠢᠷᠠᠯᠵᠠᠵᠤ ᠪᠠᠴᠢᠭᠤ ᠬᠣᠭᠣᠯᠠᠢ ᠤᠷᠤᠭᠤ ᠬᠦᠷᠬᠢᠷᠡᠭᠡᠨ ᠡᠭᠦᠰᠬᠡᠨ ᠴᠢᠳᠬᠤᠵᠤ ᠶᠠᠪᠤᠭᠠᠨ ᠳ᠋ᠠᠭᠠᠨ ᠲᠠᠯᠠ ᠬᠡᠭᠡᠷᠡ ᠶ᠋ᠢᠨ ᠰᠠᠬᠤᠯᠢᠭ ᠡᠪᠡᠰᠦᠨ ᠳᠤᠮᠳᠠᠭᠤᠷ ᠳᠣᠯᠭᠢᠶᠠᠨ ᠢ᠋ᠶ᠋ᠠᠨ ᠬᠥᠭᠡᠭᠡᠴᠡᠯᠳᠦᠨ ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠢ᠋ ᠵᠣᠷᠢᠨᠠ᠃
ᠯᠠᠮᠠ ᠰᠢᠪᠠᠭᠤᠨ ᠤ᠋ ᠨᠠᠭᠤᠷ ᠡᠴᠡ ᠬᠣᠯᠠᠳᠠᠭᠰᠠᠨ ᠬᠣᠢᠨᠠ ᠪᠠᠨ ᠭᠠᠯᠳᠠᠨ ᠢ ᠡᠷᠭᠢᠨ ᠬᠠᠷᠠᠬᠤ ᠳ᠋ᠤ᠌ ᠬᠣᠶᠠᠷ ᠠᠩᠭᠢᠷ᠂ ᠬᠣᠶᠠᠷ ᠳᠡᠭᠳᠡᠭᠡᠬᠡᠢ ᠳᠠᠭᠠᠭᠤᠯᠤᠨ ᠵᠡᠭᠡᠰᠦ ᠶ᠋ᠢᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠨᠢᠭᠡ ᠢᠯᠡ ᠭᠠᠷᠴᠤ᠂ ᠨᠢᠭᠡ ᠳᠠᠯᠳᠠ ᠣᠷᠣᠵᠤ ᠬᠥᠪᠦᠨᠡ᠃
ᠬᠣᠶᠠᠷ
ᠰᠡᠩᠭᠡ ᠬᠠᠭᠠᠨ ᠤ᠋ ᠬᠥᠬᠡ ᠬᠠᠯᠵᠠ ᠲᠠᠢ ᠠᠭᠤᠵᠢᠮ ᠦᠷᠭᠦᠭᠡᠨ ᠳ᠋ᠦ᠍ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠮᠣᠷᠢᠯᠠᠨ ᠣᠷᠣᠬᠤ ᠳ᠋ᠤ᠌᠂ ᠠᠬᠠ ᠡᠴᠡ ᠨᠢ ᠥᠭᠡᠷᠡ ᠬᠥᠮᠦᠨ ᠪᠠᠢᠭᠰᠠᠨ ᠦᠭᠡᠢ ᠳ᠋ᠦ᠍ ᠲᠡᠷᠡ ᠪᠡᠷ ᠶᠡᠬᠡᠳᠡ ᠣᠯᠵᠠᠭᠤᠷᠬᠠᠪᠠ᠃ ᠰᠡᠩᠭᠡ ᠲᠣᠳᠣ ᠰᠤᠳᠤᠷ ᠤᠩᠰᠢᠵᠤ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠳᠡᠷᠭᠡᠳᠡᠬᠢ ᠱᠣᠭᠣᠯ ᠳᠡᠭᠡᠷᠡ ᠲᠠᠯᠪᠢᠭᠠᠳ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠤ᠋ ᠵᠣᠪᠬᠢ ᠥᠭᠡᠳᠡ ᠤᠨᠤᠵᠤ ᠬᠠᠷᠠᠪᠠ᠃
ᠭᠠᠯᠳᠠᠨ ᠬᠤᠪᠢᠯᠭᠠᠨ《ᠠᠬᠠ ᠲᠠ ᠠᠵᠠᠲᠠᠢ》 ᠭᠡᠪᠡ᠃ ᠰᠡᠩᠭᠡ ᠭᠠᠢᠬᠠᠨ ᠠᠰᠠᠭᠤᠬᠤ ᠮᠡᠲᠦ ᠬᠠᠷᠠᠪᠠ᠃
— ᠸᠴᠢᠷᠲᠣ ᠰᠡᠴᠡᠨ ᠬᠠᠭᠠᠨ ᠲᠠᠢ ᠤᠷᠤᠭ ᠪᠠᠷᠢᠯᠳᠤᠭᠰᠠᠨ ᠨᠢ ᠭᠠᠵᠠᠷ ᠰᠢᠷᠣᠢ ᠪᠣᠯᠤᠨ ᠪᠡᠶᠡ ᠮᠠᠬᠠᠪᠣᠳ ᠤ᠋ᠨ ᠬᠠᠷᠰᠢᠯ ᠦᠭᠡᠢ ᠲᠩᠷᠢ ᠶ᠋ᠢᠨ ᠲᠠᠭᠠᠯᠠᠯ ᠳ᠋ᠤ᠌ ᠨᠡᠢᠴᠡᠨᠡ᠃ ᠠᠨᠤ ᠬᠠᠲᠤᠨ ᠬᠥᠪᠡᠭᠦᠨ ᠲᠥᠷᠥᠭᠦᠯᠦᠨᠡ᠃ ᠵᠢᠷᠤᠬᠠᠢ ᠶ᠋ᠢᠨ ᠵᠢᠷᠤᠯᠭᠠ ᠲᠡᠢᠮᠦ ᠪᠠᠢᠨᠠ ᠭᠡᠵᠦ ᠭᠠᠯᠳᠠᠨ ᠠᠢᠯᠠᠳᠪᠠ᠃
—ᠡᠵᠢ ᠵᠢᠷᠤᠬᠠᠢ ᠵᠢᠷᠤᠭᠤᠯᠵᠠᠢ ᠭᠡᠮᠡᠨ ᠰᠡᠩᠭᠡ ᠬᠠᠭᠠᠨ ᠲᠠᠭᠠᠮᠠᠭᠯᠠᠪᠠ᠃
— ᠲᠡᠢᠮᠦ ᠠ᠋᠂ ᠡᠵᠢ ᠡᠴᠡ ᠥᠭᠡᠷᠡ ᠬᠡᠨ ᠪᠠᠢᠬᠤ ᠪᠢᠯᠡ ᠭᠡᠵᠦ᠂ ᠭᠠᠯᠳᠠᠨ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠲᠠᠭᠠᠯᠠᠯ ᠳ᠋ᠤ᠌ ᠨᠡᠢᠴᠡᠭᠦᠯᠵᠦ ᠥᠭᠦᠯᠡᠪᠡ᠃ ᠬᠠᠭᠠᠨ ᠢ᠋ᠶ᠋ᠠᠷ ᠭᠦᠨᠵᠡᠭᠡᠢ ᠦᠯᠡᠳᠡᠴᠡ ᠲᠡᠢ ᠬᠡᠯᠡᠭᠡᠳ ᠰᠡᠭᠦᠷᠡᠰᠦ ᠠᠯᠳᠠᠵᠤ᠂
— ᠬᠥᠪᠡᠭᠦᠨ ᠲᠥᠷᠥᠪᠡᠰᠦ ᠨᠡᠭᠡᠷᠡᠨ ᠪᠢ ᠠᠵᠠᠲᠠᠢ᠃ ᠨᠠᠳᠠ ᠨᠢᠭᠡ ᠪᠤᠰᠤ ᠬᠡᠳᠦ ᠬᠡᠳᠦᠨ ᠬᠥᠪᠡᠭᠦᠨ ᠬᠡᠷᠡᠭ ᠲᠡᠢ ᠭᠡᠵᠦ ᠯᠠᠪᠰᠢᠷᠠᠭᠤᠯᠤᠨ ᠥᠭᠦᠯᠡᠪᠡ᠃
— ᠬᠥᠪᠡᠭᠦᠨ ᠲᠥᠷᠥᠬᠦ ᠨᠢ ᠲᠣᠳᠣᠷᠬᠠᠢ᠃ ᠲᠡᠷᠭᠡᠯ ᠰᠠᠷᠠ ᠲᠠᠢ ᠰᠥᠨᠢ ᠭᠡᠷ ᠥᠷᠭᠥᠭᠡ ᠶ᠋ᠢᠨ ᠰᠡᠭᠦᠳᠡᠷ ᠠᠷᠢᠯᠳᠠᠭ ᠪᠢᠯᠡ᠃ ᠪᠦᠲᠦᠨ ᠰᠠᠷᠠᠨ ᠤ᠋ ᠲᠤᠶᠠᠭᠠ ᠡᠷᠡ ᠡᠮᠡ ᠠᠮᠢᠲᠠᠨ ᠤ᠋ ᠬᠡᠪᠡᠯᠢ ᠶ᠋ᠢ ᠬᠦᠷᠲᠡᠯᠡ ᠬᠡᠷᠡᠯᠳᠦᠭᠦᠯᠳᠡᠭ ᠵᠢᠮᠡ ᠲᠡᠢ ᠭᠡᠵᠦ ᠭᠠᠯᠳᠠᠨ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠰᠡᠳᠬᠢᠯ ᠵᠢᠷᠦᠬᠡᠨ ᠦ᠌ ᠭᠡᠭᠡ ᠶ᠋ᠢ ᠡᠯᠪᠡᠭ ᠬᠠᠩᠭᠠᠯᠤᠭᠤᠨ ᠪᠣᠯᠭᠠᠯᠠ᠃ ᠰᠡᠩᠭᠡ᠂ ᠳᠡᠭᠦᠦ ᠯᠠᠮᠠ ᠶ᠋ᠢᠨ ᠢ᠋ᠶ᠋ᠡᠨ ᠳᠦᠭᠦᠷᠡᠩ ᠤᠬᠠᠭᠠᠨ ᠢ᠋ ᠪᠢᠰᠢᠷᠡᠨ ᠰᠠᠭᠤᠨᠠ᠃《ᠭᠠᠯᠳᠠᠨ ᠢ᠋ ᠪᠢ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠢ᠋ᠶ᠋ᠡᠷ ᠣᠷᠣᠰ ᠭᠠᠵᠠᠷ ᠤ᠋ᠨ ᠳᠣᠪᠣᠯᠰᠺ ᠰᠠᠭᠤᠷᠢᠨ ᠳ᠋ᠤ᠌ ᠢᠯᠡᠭᠡᠪᠡ᠃ ᠭᠠᠯᠳᠠᠨ ᠲᠡᠨᠳᠡᠬᠢ ᠮᠣᠩᠭᠣᠯᠴᠤᠳ ᠪᠤᠶᠤ ᠳᠠᠯᠠᠩ ᠤ᠋ᠳ ᠡᠴᠡ ᠲᠠᠲᠠᠪᠤᠷᠢ ᠠᠪᠬᠤ ᠶ᠋ᠢ ᠪᠣᠯᠢᠭᠤᠯᠵᠤ᠂ ᠨᠤᠲᠤᠭ ᠤ᠋ᠨ ᠢᠷᠭᠡᠳ ᠦ᠋ᠨ ᠠᠳᠠᠯᠢ ᠠᠵᠤ ᠲᠥᠷᠥᠬᠦ ᠪᠣᠯᠭᠠᠭᠰᠠᠨ᠃
ᠭᠠᠯᠳᠠᠨ ᠳᠡᠭᠦᠦ ᠪᠠᠢᠭᠠᠯᠢ ᠪᠣᠯᠤᠨ ᠬᠥᠮᠦᠨ ᠦ᠌ ᠳᠣᠲᠣᠭᠠᠳᠤ ᠠᠷᠠᠨᠰᠢᠨ᠂ ᠯᠤᠤᠰ ᠰᠠᠪᠳᠠᠭ ᠤ᠋ᠨ ᠬᠣᠣᠷᠯᠠᠯ᠂ ᠬᠠᠷᠠ ᠮᠠᠭᠤ ᠰᠠᠨᠠᠭᠠᠨ ᠤ᠋ ᠴᠡᠭᠡᠷ ᠶᠣᠷᠣᠯᠠᠯ ᠢ᠋ ᠮᠡᠳᠡᠬᠦ ᠳ᠋ᠡᠭᠡᠨ ᠭᠠᠷᠭᠠᠭᠤᠨ ᠪᠣᠯᠵᠠᠢ᠃ ᠳᠡᠭᠦᠦ ᠯᠠᠮᠠ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠲᠦ᠍ ᠶᠡᠬᠡ ᠲᠤᠰᠠ ᠪᠣᠯᠤᠨᠠ᠃ ᠮᠥᠨ ᠠᠷᠠᠳ ᠣᠯᠠᠨ ᠤ᠋ ᠰᠠᠨᠠᠭᠠ ᠰᠡᠳᠬᠢᠯ ᠢ᠋ ᠪᠤᠷᠬᠠᠨ ᠤ᠋ ᠤᠬᠠᠭᠠᠨ ᠢ᠋ᠶ᠋ᠠᠷ ᠵᠥᠪ ᠪᠣᠯᠭᠠᠬᠤ ᠳ᠋ᠤ᠌ ᠨᠠᠳᠠ ᠶᠡᠬᠡ ᠲᠤᠰᠠᠯᠠᠨᠠ᠃ ᠪᠢ ᠳᠡᠭᠦᠦ ᠪᠡᠨ ᠴᠠᠰᠤᠲᠤ ᠶ᠋ᠢᠨ ᠣᠷᠣᠨ ᠲᠠᠢᠰᠢ ᠦᠳᠡᠵᠦ ᠵᠠᠮ ᠵᠠᠭᠤᠷᠠ ᠠᠨᠤ ᠬᠠᠲᠤᠨ ᠤ᠋ ᠪᠠᠨ ᠠᠬᠠ ᠳᠡᠭᠦᠦ ᠲᠡᠢ ᠵᠣᠯᠭᠠᠨᠠ》 ᠭᠡᠮᠡᠨ ᠰᠡᠩᠭᠡ ᠰᠠᠨᠠᠨᠠ᠃
ᠭᠠᠯᠳᠠᠨ ᠯᠠᠮᠠ ᠠᠷᠠᠢ ᠥᠭᠡᠷᠡ ᠪᠣᠳᠣᠯ ᠲᠠᠢ ᠪᠠᠢᠪᠠ᠃《ᠬᠠᠭᠠᠨ ᠠᠬᠠ ᠮᠢᠨᠢ ᠬᠤᠲᠤᠭᠲᠤ ᠨᠠᠳᠠ ᠡᠴᠡ ᠴᠠᠭᠠᠨ ᠰᠡᠳᠬᠢᠯ ᠲᠡᠢ ᠢᠲᠡᠭᠡᠮᠡᠲᠡᠭᠡᠢ ᠶᠦᠮ᠃ ᠴᠡᠴᠡᠨ ᠲᠠᠢᠵᠢ ᠶ᠋ᠢ ᠡᠷᠲᠡ ᠰᠡᠷᠡᠭᠡᠴᠢᠬᠡᠯᠡ᠃ ᠴᠡᠴᠡᠨ ᠬᠡᠳᠦ ᠡᠴᠡ ᠪᠡᠨ ᠰᠠᠨᠠᠭᠠ ᠮᠠᠭᠤᠲᠠᠢ᠃ ᠵᠤᠳᠪᠠᠪᠠᠭᠠᠲᠤᠷ ᠨᠣᠶᠠᠨ ᠠᠬᠠ ᠶ᠋ᠢ ᠪᠡᠨ ᠳᠠᠭᠠᠳᠠᠭ᠃ ᠪᠠᠯᠵᠢᠳᠠᠷᠡ ᠬᠠᠲᠤᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠰᠠᠭᠤᠳᠠᠯ ᠵᠠᠰᠠᠵᠤ ᠲᠤᠬᠠᠯᠠᠭᠰᠠᠨ ᠠᠪᠠᠭᠠ ᠠᠬᠠ ᠴᠥᠬᠥᠢ ᠤᠪᠠᠰᠢ ᠬᠡᠨ ᠰᠠᠨ ᠪᠢᠯᠡ᠃ ᠡᠳᠡᠨᠥᠰ ᠥᠭᠰᠥᠭᠰᠡᠭᠡᠷ ᠪᠠᠢᠭᠠᠳ ᠠᠬᠠ ᠶ᠋ᠢ ᠮᠢᠨᠢ ᠬᠣᠷᠣᠭᠠᠬᠤ ᠪᠣᠢ》 ᠭᠡᠮᠡᠨ ᠭᠠᠯᠳᠠᠨ ᠰᠠᠨᠠᠭᠰᠠᠨ ᠢ᠋ᠶ᠋ᠠᠨ ᠲᠡᠭᠡᠲᠡᠯᠡ ᠬᠠᠮᠢᠭᠠ ᠴᠤ᠌ ᠥᠪᠡᠷ ᠢ᠋ ᠪᠡᠨ ᠲᠠᠢᠪᠤᠰᠢᠷᠠᠭᠤᠯᠪᠠ᠃
— ᠬᠠᠭᠠᠨ ᠠᠬᠠ ᠲᠠᠨ ᠢ᠋ ᠳᠠᠭᠠᠭᠰᠠᠨ ᠴᠢᠨᠣᠠ ᠶ᠋ᠢᠨ ᠰᠦᠷᠦᠭ ᠤᠯᠠᠢᠷᠠᠭᠰᠠᠭᠠᠷ ᠪᠠᠢᠨᠠ᠃ ᠲᠡᠳᠡᠨ ᠦ᠌ ᠭᠡᠳᠡᠰᠦ ᠴᠠᠳᠬᠤᠯᠠᠩ ᠴᠤ᠌ ᠰᠡᠳᠬᠢᠯ ᠨᠢ ᠥᠯᠥᠰᠬᠦᠯᠡᠩ ᠶᠦᠮ᠃ ᠡᠷᠬᠡ ᠮᠠᠲᠠᠯ ᠳ᠋ᠤ᠌ ᠶᠡᠬᠡ ᠰᠢᠨᠤᠯ ᠲᠠᠢ ᠭᠡᠮᠡᠨ ᠭᠠᠯᠳᠠᠨ ᠰᠠᠨᠠᠭᠤᠯᠬᠤ ᠠᠶᠠᠰ ᠢ᠋ᠶ᠋ᠠᠷ ᠥᠭᠦᠯᠡᠪᠡ᠃
ᠬᠠᠭᠠᠨ ᠰᠡᠩᠭᠡ ᠰᠡᠳᠬᠢᠯ ᠦ᠋ᠨ ᠳᠤᠯᠠᠭᠠᠬᠠᠨ ᠳᠣᠭᠳᠣᠯᠤᠯ ᠢ᠋ᠶ᠋ᠠᠨ ᠪᠠᠷᠢᠵᠤ ᠶᠠᠳᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠠᠭᠠᠵᠢᠮ ᠢ᠋ᠶ᠋ᠠᠷ ᠴᠢᠷᠠᠢ ᠨᠢ ᠬᠤᠪᠢᠷᠠᠪᠠ᠃
— ᠲᠡᠭᠡᠬᠦ ᠪᠡᠷ ᠶᠠᠭᠠᠬᠢᠪᠠᠯ ᠵᠣᠬᠢᠯᠲᠠᠢ ᠶ᠋ᠢ ᠪᠢ ᠮᠡᠳᠡᠨᠡ᠃ ᠥᠯᠥᠰᠦᠭᠰᠡᠨ ᠰᠡᠳᠬᠢᠯ ᠵᠠᠭᠥᠨᠭᠠᠷ ᠤ᠋ᠨ ᠬᠠᠭᠠᠨ ᠤ᠋ ᠰᠠᠭᠤᠳᠠᠯ ᠢ᠋ ᠠᠨᠠᠵᠤ ᠪᠠᠢᠨᠠ᠃ ᠠᠬᠠ ᠳᠡᠭᠦᠦ ᠨᠠᠷ ᠡᠴᠡ ᠭᠠᠳᠠᠨᠠ ᠠᠪᠠᠭᠠ ᠠᠬᠠ ᠴᠥᠬᠥᠢ ᠤᠪᠠᠰᠢ ᠰᠦᠷᠦᠭ ᠴᠢᠨᠣᠠ ᠳ᠋ᠤ᠌ ᠨᠡᠢᠯᠡᠴᠢᠬᠡᠭᠰᠡᠨ ᠤᠴᠢᠷ ᠰᠣᠨᠣᠷ ᠰᠡᠷᠭᠡᠭ ᠪᠠᠢᠵᠤ᠂ ᠬᠤᠰᠢᠭᠤᠨ ᠤ᠋ ᠣᠯᠠᠨ ᠲᠦᠮᠡᠨ ᠢ᠋ ᠲᠡᠳᠡᠨ ᠢ᠋ ᠲᠠᠨᠢᠳᠠᠭ ᠪᠣᠯᠭᠠᠶᠠ ᠭᠡᠮᠡᠨ ᠬᠠᠭᠠᠨ ᠢ᠋ᠶ᠋ᠠᠷ ᠳᠠᠪᠬᠤᠷ ᠪᠣᠳᠣᠯ ᠢ᠋ᠶ᠋ᠠᠨ ᠨᠡᠭᠡᠭᠡᠪᠡ᠃
— ᠨᠠᠮᠠᠶ᠋ᠢ ᠶᠠᠪᠤᠴᠢᠬᠠᠬᠤ ᠪᠠᠷ ᠪᠣᠯᠭᠣᠮᠵᠢᠲᠠᠢ ᠪᠠᠢᠭᠠᠷᠠᠢ᠃ ᠠᠨᠤ ᠬᠠᠲᠤᠨ᠂ ᠬᠠᠲᠤᠨ ᠡᠬᠡ ᠬᠣᠶᠠᠷ ᠢ᠋ ᠪᠠᠢᠭᠠ ᠪᠣᠯᠬᠣᠷ ᠰᠡᠳᠬᠢᠯ ᠲᠦᠪᠳᠡᠬᠦ ᠦᠭᠡᠢ ᠪᠠᠢᠨᠠ ᠭᠡᠵᠦ ᠭᠠᠯᠳᠠᠨ ᠬᠡᠯᠡᠪᠡ᠃
— ᠲᠥᠪᠡᠳ ᠣᠷᠣᠬᠤ ᠵᠠᠮ ᠵᠠᠭᠤᠷᠠ ᠳ᠋ᠤ᠌ ᠮᠠᠨ ᠤ᠋ ᠬᠠᠳᠠᠮ ᠸᠴᠢᠷᠲᠤ ᠰᠡᠴᠡᠨ ᠬᠠᠭᠠᠨ ᠤ᠋ ᠬᠢ ᠨᠤᠲᠤᠭᠯᠠᠵᠤ ᠪᠣᠢ᠃ ᠲᠡᠳᠡᠨ ᠦ᠌ ᠬᠣᠲᠠ ᠠᠢᠯ ᠬᠥᠬᠡᠨᠠᠭᠤᠷ ᠲᠤ ᠵᠤᠰᠠᠵᠤ ᠪᠠᠢᠭᠠ ᠪᠣᠯᠬᠣᠷ ᠴᠢᠮᠠᠶ᠋ᠢ ᠪᠢ ᠴᠠᠰᠤᠲᠤ ᠶ᠋ᠢᠨ ᠣᠷᠣᠨ ᠤ᠋ ᠵᠠᠬᠠ ᠳ᠋ᠤ᠌ ᠬᠦᠷᠭᠡᠨᠡ ᠭᠡᠵᠦ ᠭᠠᠯᠳᠠᠨ ᠳᠡᠭᠦᠦ ᠳ᠋ᠡᠭᠡᠨ ᠨᠠᠢᠷ ᠲᠠᠯᠪᠢᠨ ᠥᠭᠦᠯᠡᠪᠡ᠃ ᠨᠥᠭᠦᠭᠡ ᠲᠠᠯᠠ ᠪᠠᠷ ᠬᠣᠱᠤᠳ ᠲᠦᠮᠡᠨ ᠢ᠋ᠶ᠋ᠡᠨ ᠡᠷᠭᠢᠵᠦ ᠲᠣᠭᠣᠷᠢᠬᠤ ᠳᠠᠪᠬᠤᠷ ᠰᠠᠨᠠᠭᠠ ᠶ᠋ᠢ ᠰᠡᠩᠭᠡ ᠬᠠᠭᠠᠨ ᠠᠭᠤᠯᠤᠭᠰᠠᠨ ᠪᠥᠯᠥᠭᠡ᠃
ᠠᠨᠤ ᠬᠠᠲᠤᠨ ᠤ᠋ ᠨᠡᠷᠡ ᠶ᠋ᠢ ᠬᠡᠯᠡᠬᠦ ᠳ᠋ᠡᠭᠡᠨ ᠭᠠᠯᠳᠠᠨ ᠤ᠋ ᠬᠣᠭᠣᠯᠠᠢ ᠴᠡᠴᠡᠷᠬᠢᠯᠡᠬᠦ ᠨᠢ ᠲᠣᠳᠣ ᠮᠡᠳᠡᠷᠡᠭᠳᠡᠨᠡ᠃ ᠭᠠᠯᠳᠠᠨ ᠯᠠᠮᠠ ᠠᠨᠤ ᠬᠠᠲᠤᠨ ᠢ᠋ ᠬᠠᠷᠠᠬᠤ ᠳᠤᠷᠠᠲᠠᠢ ᠪᠣᠯᠵᠠᠢ᠃ ᠠᠨᠤ ᠶ᠋ᠢᠨ ᠵᠤᠤᠪᠠᠩᠳᠠᠭᠤ ᠴᠠᠭᠠᠨ ᠴᠢᠷᠠᠢ ᠤᠰᠬᠠᠯ ᠳᠥᠯᠭᠡᠬᠡᠨ ᠬᠠᠷᠠᠴᠠ ᠳ᠋ᠤ᠌ ᠢᠮᠠᠭᠲᠠ ᠡᠨᠡᠷᠢᠯ ᠬᠠᠢᠷᠠ ᠪᠢᠯᠬᠠᠨ ᠬᠡᠷᠡᠯᠳᠦᠵᠦ ᠪᠠᠢᠬᠤ ᠨᠢ ᠯᠠᠮᠠ ᠰᠢᠪᠠᠭᠤᠨ ᠤ᠋ ᠨᠠᠭᠤᠷ ᠲᠠᠢ ᠠᠳᠠᠯᠢ ᠪᠥᠯᠥᠭᠡ᠃
ᠭᠤᠷᠪᠠ
ᠬᠥᠬᠡᠨᠠᠭᠤᠷ ᠬᠡᠮᠡᠬᠦ ᠶᠡᠬᠡ ᠡᠪᠡᠰᠦᠲᠦ ᠲᠠᠯᠠ ᠨᠤᠲᠤᠭ ᠤ᠋ᠨ ᠵᠠᠬᠠ ᠤᠷᠤᠭᠤ ᠳᠥᠩᠭᠡᠵᠦ ᠤᠷᠤᠭᠤᠳᠠ ᠳᠠᠭᠠᠨᠠ᠂ ᠬᠦᠮᠡᠯᠢ ᠪᠠᠭᠴᠠ ᠪᠠᠷ ᠤᠷᠭᠤᠵᠤ᠂ ᠰᠢᠷᠡᠭᠡ ᠪᠦᠬᠦ ᠲᠡᠢ ᠴᠠᠳᠬᠤᠯᠠᠩ ᠲᠡᠮᠡᠭᠡᠳ ᠰᠦᠷᠦᠭᠯᠡᠨ᠂ ᠲᠡᠭᠷᠢ ᠶ᠋ᠢᠨ ᠬᠠᠶᠠᠭᠠᠨ ᠳ᠋ᠤ᠌ ᠮᠡᠲᠦ ᠵᠠᠢᠳᠠᠭᠤ ᠬᠣᠯᠠ ᠳ᠋ᠤ᠌ ᠬᠣᠲᠠ ᠠᠢᠯ ᠤ᠋ᠨ ᠤᠲᠤᠭᠠ ᠰᠤᠭᠤᠨᠠᠭᠯᠠᠨᠠ᠃ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠤ᠋ ᠵᠢᠣᠵᠠ ᠲᠡᠷᠭᠡᠨ ᠦ᠌ ᠰᠡᠬᠡᠭᠡᠪᠴᠢ ᠪᠡᠷ ᠨᠢ ᠰᠠᠯᠬᠢ ᠤᠯᠠᠭᠠᠯᠠᠵᠤ ᠣᠷᠣᠬᠤ ᠳ᠋ᠤ᠌ ᠲᠠᠰᠢᠭᠤ ᠵᠠᠬᠠ ᠲᠠᠢ᠂ ᠥᠷᠭᠡᠨ ᠡᠮᠵᠢᠶᠡᠷᠢ ᠲᠡᠢ ᠳᠡᠪᠡᠯ ᠡᠮᠦᠰᠴᠦ᠂ ᠬᠡ ᠲᠡᠢ ᠲᠣᠭᠣᠷᠴᠣᠭ ᠲᠠᠢ ᠬᠡᠰᠡᠭ ᠮᠥᠷᠭᠥᠯᠴᠢᠳ ᠨᠣᠭᠣᠭᠠᠨ ᠲᠠᠯᠠ ᠳ᠋ᠤ᠌ ᠵᠠᠯᠪᠠᠷᠢᠨ ᠬᠡᠪᠲᠡᠭᠰᠡᠭᠡᠷ ᠦᠳᠡᠪᠡ᠃ ᠵᠢᠣᠵᠠ ᠶ᠋ᠢᠨ ᠳᠡᠷᠭᠡᠳᠡ ᠳ᠋ᠦ᠍ ᠵᠡᠷᠭᠡᠴᠡᠵᠦ ᠶᠠᠪᠤᠭᠠ ᠰᠡᠩᠭᠡ ᠬᠠᠭᠠᠨ《ᠬᠠᠲᠤᠨ ᠡᠬᠡ ᠴᠢᠮᠠᠶ᠋ᠢ ᠶᠡᠬᠡ ᠰᠠᠨᠠᠨᠠ ᠳᠠ》 ᠭᠡᠮᠡᠨ ᠶᠠᠭᠠᠬᠢᠭᠠᠳ ᠴᠤ ᠶᠤᠮ ᠰᠡᠳᠬᠢᠯ ᠨᠢ ᠭᠡᠭᠡᠯᠵᠡᠭᠰᠡᠨ ᠪᠣᠯᠤᠯᠲᠠᠢ ᠬᠡᠯᠡᠪᠡ᠃ ᠭᠠᠯᠳᠠᠨ ᠦᠭᠡ ᠶ᠋ᠢᠨ ᠬᠠᠷᠢᠭᠤ ᠳ᠋ᠤᠨᠢ᠂
— ᠬᠠᠲᠤᠨ ᠡᠬᠡ ᠶ᠋ᠢᠨ ᠬᠡᠪᠡᠯᠢ ᠡᠴᠡ ᠣᠭᠣᠨᠣ ᠶ᠋ᠢᠨ ᠡᠪᠡᠷ ᠰᠢᠭ ᠬᠣᠶᠠᠭᠤᠯᠠᠬᠠᠨ ᠢ᠋ᠶ᠋ᠠᠨ ᠲᠥᠷᠥᠪᠡ᠃ ᠬᠠᠲᠤᠨ ᠡᠬᠡ ᠶ᠋ᠢ ᠲᠠ ᠠᠰᠠᠷᠠᠨᠠ᠃ ᠳᠦᠦᠭᠡᠦᠷ ᠦ᠋ᠨ ᠴᠢᠯᠠᠭᠤ ᠰᠢᠭ᠋ ᠬᠣᠯᠠᠳᠤᠯᠠ᠃ ᠬᠠᠲᠤᠨ ᠡᠬᠡ ᠬᠣᠶᠠᠷ ᠬᠥᠪᠡᠭᠦᠨ ᠳ᠋ᠡᠭᠡᠨ ᠲᠡᠩᠴᠡᠭᠦᠬᠡᠨ ᠢᠪᠡᠭᠡᠯ ᠲᠡᠢ ᠪᠢᠯᠡ ᠭᠡᠵᠦ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠠᠴᠢᠶᠠᠨ ᠳ᠋ᠤ᠌ ᠵᠣᠪᠠᠨᠢᠨ ᠥᠭᠦᠯᠡᠪᠡ᠃
ᠰᠡᠩᠭᠡ ᠬᠠᠭᠠᠨ《ᠨᠠᠮᠠᠶ᠋ᠢ ᠪᠠᠢᠬᠤ ᠳ᠋ᠤ᠌ ᠬᠠᠲᠤᠨ ᠡᠵᠢ ᠳ᠋ᠡᠭᠡᠨ᠂ ᠬᠠᠭᠠᠨ ᠲᠥᠷᠥᠯ ᠳ᠋ᠡᠭᠡᠨ ᠪᠤᠤ ᠵᠣᠪᠠᠭᠲᠤᠨ᠃ ᠡᠬᠡ ᠶ᠋ᠢ ᠪᠢ ᠬᠢᠴᠢᠶᠡᠵᠦ ᠠᠰᠠᠷᠠᠬᠤ ᠪᠣᠯᠤᠨᠠ᠃ ᠬᠡᠷᠪᠡ ᠴᠡᠴᠡᠨ᠂ ᠵᠤᠳᠪᠠᠪᠠᠭᠠᠲᠤᠷ ᠨᠠᠷ ᠢ᠋ ᠦᠰ ᠡᠰᠡ ᠳᠤᠭᠤᠯᠪᠠᠰᠤ ᠲᠥᠷᠥ ᠶ᠋ᠢᠨ ᠬᠠᠲᠠᠭᠤ ᠨᠢᠳᠤᠷᠭᠠ ᠦᠵᠡᠭᠦᠯᠪᠡᠯ ᠶᠠᠮᠠᠷ ᠪᠣᠯ ᠭᠡᠵᠦ ᠪᠣᠳᠣᠨᠠ》 ᠭᠡᠮᠡᠨ ᠳᠡᠭᠦᠦ ᠯᠠᠮᠠ ᠲᠠᠢ ᠪᠠᠨ ᠵᠥᠪᠯᠡᠬᠦ ᠮᠡᠲᠦ ᠬᠡᠯᠡᠪᠡ᠃
ᠭᠠᠯᠳᠠᠨ ᠬᠤᠪᠢᠯᠭᠠᠨ《ᠬᠠᠭᠠᠨ ᠠᠬᠠ ᠲᠠ ᠬᠦᠯᠢᠶᠡᠴᠡᠲᠡᠢ ᠪᠠᠢᠳᠠᠭ ᠶᠤᠮ ᠰᠢᠦ᠃ ᠭᠡᠰᠭᠡᠭᠡᠯ ᠦᠵᠡᠭᠦᠯᠬᠦ ᠴᠠᠭ ᠵᠠᠪ ᠵᠥᠩᠳᠡᠭᠡᠨ ᠣᠯᠳᠠᠨᠠ᠃ ᠵᠤᠳᠪᠠᠪᠠᠭᠠᠲᠤᠷ ᠠᠬᠠ ᠨᠣᠮᠣᠬᠠᠨ ᠪᠤᠰᠤ᠃ ᠭᠡᠬᠦ ᠳ᠋ᠡᠭᠡᠨ ᠬᠥᠳᠡᠯᠬᠦ ᠪᠣᠯᠤᠭᠠ ᠦᠭᠡᠢ ᠪᠢᠵᠡ᠃ ᠴᠡᠴᠡᠨ ᠡᠷᠲᠡᠨ ᠡᠴᠡ ᠡᠴᠢᠭᠡ ᠬᠣᠩ ᠲᠠᠢᠵᠢ ᠶ᠋ᠢᠨ ᠰᠠᠭᠤᠳᠠᠯ ᠳ᠋ᠤ᠌ ᠰᠠᠨᠠᠭᠠᠷᠬᠠᠵᠤ ᠬᠠᠨᠴᠤᠢ ᠳ᠋ᠠᠭᠠᠨ ᠬᠢᠲᠤᠭᠠ ᠨᠢᠭᠤᠭᠰᠠᠨ᠃ ᠰᠠᠶᠢ ᠴᠡᠴᠡᠨ ᠲᠠᠢᠵᠢ ᠥᠳᠥᠭᠡᠨ ᠬᠠᠳᠬᠤᠭᠰᠠᠨ᠃ᠲᠡᠭᠦᠨ ᠳ᠋ᠦ᠍ ᠬᠠᠷᠢᠭᠤ ᠪᠠᠷᠢᠭᠰᠠᠨ ᠠᠪᠠᠴᠤ ᠠᠷᠠᠢ ᠳᠤᠲᠠᠭᠤᠳᠠᠭᠤᠯᠤᠭᠰᠠᠨ ᠪᠠᠢᠵᠤ ᠮᠡᠳᠡᠨᠡ᠃ ᠴᠣᠷᠣᠰ ᠣᠪᠣᠭ ᠳᠣᠲᠣᠷᠠ ᠪᠠᠨ ᠬᠠᠭᠠᠷᠠᠵᠠᠢ᠃ ᠬᠠᠭᠠᠷᠠᠭᠰᠠᠨ ᠴᠤ᠌ ᠲᠣᠭᠣᠭᠠᠨ ᠳᠣᠲᠣᠷᠠ ᠪᠠᠨ ᠬᠠᠭᠠᠷᠠᠬᠤ ᠶᠤᠮ ᠰᠢᠦ᠃ ᠪᠤᠷᠬᠠᠨ ᠪᠢᠳᠡᠨ ᠢ᠋ ᠬᠠᠷᠠᠵᠤ ᠪᠠᠢᠭᠠ᠃ ᠰᠡᠳᠬᠢᠯ ᠢ᠋ᠶ᠋ᠡᠨ ᠪᠤᠤ ᠴᠢᠯᠡᠭᠡ》 ᠭᠡᠵᠦ ᠠᠭᠤᠯᠠᠰ ᠤ᠋ᠨ ᠬᠢᠷᠠ ᠬᠠᠷᠠᠵᠤ ᠶᠠᠪᠤᠬᠤ ᠵᠠᠭᠤᠷᠠ ᠭᠠᠯᠳᠠᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠢᠯᠡᠴᠢᠯᠡᠪᠡ᠃ ᠠᠯᠲᠠᠢ ᠶ᠋ᠢᠨ ᠠᠭᠤᠯᠠᠰ ᠤ᠋ᠨ ᠬᠢᠷᠠ ᠳᠡᠭᠡᠭᠦᠷ ᠵᠢᠩ ᠦ᠋ᠨ ᠲᠡᠮᠡᠭᠡ ᠴᠥᠷᠬᠡᠯᠡᠭᠡ ᠲᠡᠢ ᠳᠠᠪᠠᠵᠤ ᠶᠠᠪᠤᠭᠠ ᠨᠢ ᠪᠤᠳᠠᠩ ᠤ᠋ᠨ ᠬᠥᠯ ᠳ᠋ᠦ᠍ ᠳᠡᠭᠦᠵᠢᠯᠡᠭᠡᠰᠦᠲᠡᠢ ᠶᠦᠮ ᠰᠢᠭ᠋ ᠰᠣᠨᠢᠬᠠᠨ᠃ ᠨᠤᠲᠤᠭ ᠤ᠋ᠨ ᠶᠠᠭᠤᠮᠠ ᠪᠦᠬᠦᠨ ᠤᠷᠢᠳ ᠡᠮᠦᠨᠡ ᠡᠴᠡ ᠪᠡᠨ ᠰᠣᠨᠢᠨ ᠪᠠᠢᠭᠠ ᠨᠢ ᠭᠠᠯᠳᠠᠨ ᠳ᠋ᠤ᠌ ᠡᠷᠭᠢᠵᠦ ᠠᠭᠤᠯᠵᠠᠬᠤ ᠶ᠋ᠢᠨ ᠪᠡᠯᠭᠡᠳᠡᠯ ᠣᠢᠷᠠᠬᠠᠨ ᠰᠠᠨᠠᠭᠳᠠᠨᠠ᠃ ᠭᠠᠯᠳᠠᠨ ᠡᠨᠡ ᠤᠳᠠᠭᠠ ᠬᠠᠭᠠᠨ ᠠᠬᠠ ᠳ᠋ᠠᠭᠠᠨ ᠮᠠᠰᠢ ᠲᠣᠳᠣ ᠪᠠᠷ《ᠴᠡᠴᠡᠨ ᠲᠠᠢᠵᠢ ᠣᠩᠭᠣᠨ ᠲᠠᠭᠰᠢᠨ ᠰᠦᠷᠦᠭ ᠲᠦ᠍ ᠮᠢᠨᠢ ᠳᠠᠪ ᠰᠠᠭᠤᠯᠭᠠᠬᠤ ᠭᠡᠵᠦ ᠦᠵᠡᠯᠡ᠃ ᠲᠡᠷᠡ ᠲᠠᠢᠵᠢ ᠴᠢᠨᠠᠭᠰᠢᠯᠠᠭᠠᠳ ᠲᠥᠷᠥ ᠶ᠋ᠢᠨ ᠡᠷᠬᠡ ᠶ᠋ᠢ ᠪᠤᠯᠢᠶᠠᠬᠤ ᠪᠠᠷ ᠬᠠᠨᠴᠤᠢ ᠰᠢᠮᠠᠯᠠᠬᠤ ᠠᠪᠠᠰᠤ ᠬᠠᠭᠠᠨ ᠠᠬᠠ ᠨᠢᠳᠤᠷᠭᠠᠨ ᠠᠮᠲᠠ ᠦᠵᠡᠭᠦᠯᠬᠦ ᠨᠢ ᠮᠢᠨᠦ ᠪᠣᠳᠣᠯ ᠢ᠋ᠶ᠋ᠠᠷ ᠰᠠᠢᠨ ᠬᠠᠮᠠᠭᠠᠯᠠᠯᠲᠠ ᠪᠣᠯᠤᠨᠠ》 ᠭᠡᠵᠦ ᠲᠦᠷᠦᠭᠦᠴᠢ ᠶ᠋ᠢᠨ ᠰᠡᠬᠦᠭᠳᠡᠭᠰᠡᠨ ᠠᠰᠠᠭᠤᠯᠲᠠ ᠳ᠋ᠤ᠌ ᠬᠠᠷᠢᠭᠤᠯᠬᠤ ᠨᠢ ᠲᠡᠳᠡᠨ ᠦ᠌ ᠪᠣᠳᠣᠯ ᠨᠢᠭᠡ ᠪᠠᠢᠭᠠ ᠶ᠋ᠢ ᠨᠤᠲᠠᠯᠠᠵᠤ ᠪᠠᠢᠯᠠ᠃
ᠭᠠᠯᠳᠠᠨ ᠬᠤᠪᠢᠯᠭᠠᠨ ᠪᠠᠢᠨ ᠪᠠᠢᠨ ᠠᠮᠢᠳᠤᠷᠠᠯ ᠲᠠᠮᠤ ᠬᠣᠶᠠᠷ ᠤ᠋ᠨ ᠲᠤᠬᠠᠢ ᠡᠷᠭᠢᠴᠡᠭᠦᠯᠦᠨᠡ᠃ ᠠᠮᠢᠳᠤᠷᠠᠯ ᠲᠠᠮᠤ ᠬᠣᠶᠠᠷ ᠤ᠋ᠨ ᠵᠥᠷᠢᠯᠭᠡ ᠳᠡᠭᠡᠷᠡ ᠬᠥᠮᠦᠨ ᠪᠣᠯᠵᠤ ᠲᠥᠷᠥᠭᠡᠳ ᠲᠡᠷᠡ ᠬᠦ᠌ ᠵᠥᠷᠢᠯᠭᠡ ᠪᠡᠷ ᠪᠡᠳᠡᠷᠢᠭᠰᠡᠭᠡᠷ ᠲᠡᠭᠦᠰᠳᠡᠭ ᠪᠤᠰᠤ ᠤᠤ? ᠭᠡᠵᠦ ᠪᠣᠳᠣᠨᠠ᠃ ᠭᠠᠯᠳᠠᠨ ᠪᠤᠷᠬᠠᠨ ᠤ᠋ ᠨᠣᠮ ᠢ᠋ ᠨᠢᠳᠦᠨ ᠳ᠋ᠡᠭᠡᠨ ᠰᠢᠩᠭᠡᠬᠡᠨ ᠠᠮᠢᠳᠤᠷᠠᠯ ᠢ᠋ ᠬᠠᠷᠠᠬᠤ ᠭᠡᠲᠡᠯᠡ ᠠᠮᠢᠳᠤᠷᠠᠯ ᠬᠠᠲᠠᠭᠤ ᠭᠦᠲᠦᠭᠦᠦ ᠬᠠᠷᠠᠭᠳᠠᠨᠠ᠃ ᠦᠬᠦᠵᠦ ᠪᠠᠢᠨᠠ᠂ ᠲᠥᠷᠥᠵᠦ ᠪᠠᠢᠨᠠ᠂ ᠳᠠᠢᠳᠤᠵᠤ ᠪᠠᠢᠨᠠ᠂ ᠦᠬᠦᠵᠦ ᠪᠠᠢᠨᠠ᠃ ᠡᠨᠡ ᠶᠠᠪᠤᠳᠠᠯ ᠪᠤᠷᠬᠠᠨ ᠤ᠋ ᠨᠣᠮ ᠲᠠᠢ ᠬᠠᠷᠰᠢᠯᠠᠬᠤ ᠦᠭᠡᠢ ᠪᠣᠯᠪᠠᠴᠤ ᠲᠥᠷᠥᠯᠬᠢ ᠴᠢᠨᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠠᠲᠠᠭᠤ ᠬᠠᠤᠯᠢ ᠶ᠋ᠢ ᠵᠥᠷᠢᠴᠡᠬᠦ ᠥᠭᠡᠷᠡᠴᠢᠯᠡᠬᠦ ᠠᠷᠭᠠ ᠦᠭᠡᠢ ᠪᠢᠯᠡ᠃ ᠮᠣᠳᠣ ᠤᠷᠭᠤᠮᠠᠯ ᠡᠴᠡ ᠠᠮᠢ ᠨᠡᠬᠡᠵᠦ᠂ ᠠᠷᠢᠶᠠᠲᠠᠨ ᠵᠢᠭᠦᠷᠲᠡᠨ ᠡᠴᠡ ᠠᠮᠢ ᠨᠡᠬᠡᠵᠦ ᠠᠮᠢᠳᠤᠷᠠᠳᠠᠭ ᠬᠥᠮᠦᠨ ᠬᠡᠮᠡᠭᠴᠢ ᠶ᠋ᠢᠨ ᠰᠡᠳᠬᠢᠯ ᠶᠡᠬᠡ ᠶᠦᠮ᠃ ᠬᠥᠮᠦᠰ ᠢ᠋ ᠠᠷᠭᠠᠳᠠᠬᠤ ᠶ᠋ᠢᠨ ᠲᠤᠯᠠᠳᠠ ᠤᠬᠠᠭᠠᠷᠠᠭᠤᠯᠬᠤ ᠶ᠋ᠢᠨ ᠲᠤᠯᠠᠳᠠ ᠪᠤᠷᠬᠠᠨ ᠣᠷᠣᠰᠢᠮᠤᠢ᠃ ᠪᠤᠷᠬᠠᠨ ᠤ᠋ ᠨᠢᠳᠦ ᠪᠡᠷ ᠶᠢᠷᠲᠢᠨᠴᠦ ᠶ᠋ᠢ ᠬᠠᠷᠠᠬᠤ ᠨᠢ ᠳᠡᠩᠳᠡᠭᠦᠦ ᠥᠷᠥᠭᠡᠰᠦᠯ ᠪᠠᠢᠯᠠ᠃ ᠪᠤᠷᠬᠠᠨ ᠤ᠋ ᠨᠢᠳᠦ ᠪᠣᠯ ᠬᠠᠢᠷᠠ᠂ ᠨᠢᠭᠦᠯᠡᠰᠦᠯ᠂ ᠦᠷᠦᠪᠲᠦᠯ᠂ ᠡᠨᠡᠷᠢᠯ ᠪᠥᠭᠡᠳ ᠣᠶᠤᠨ ᠰᠠᠨᠠᠭᠠ᠂ ᠤᠬᠠᠭᠠᠷᠠᠯ ᠤ᠋ᠨ ᠨᠢᠳᠦ ᠶᠦᠮ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠠᠷᠢᠭᠤᠨ ᠨᠠᠨᠳᠢᠨ ᠶᠣᠰᠣ ᠰᠤᠷᠲᠠᠬᠤᠨ ᠤ᠋ ᠢᠯᠡᠷᠬᠡᠢᠯᠡᠯ ᠪᠢᠯᠡ᠃ ᠠᠮᠢᠳᠤᠷᠠᠯ ᠳᠡᠭᠡᠷᠡ ᠴᠢᠰᠤᠨ ᠤ᠋ ᠥᠩᠭᠡ ᠤᠯᠠᠭᠠᠨ ᠪᠠᠢᠳᠠᠭ ᠪᠣᠯ ᠪᠤᠷᠬᠠᠨ ᠳ᠋ᠤ᠌ ᠴᠢᠰᠤ ᠤᠷᠤᠰᠬᠠᠬᠤ ᠨᠢ ᠨᠢᠭᠦᠯ ᠪᠥᠭᠡᠳ ᠲᠡᠭᠦᠨ ᠡᠴᠡ ᠢᠮᠠᠭᠲᠠ ᠵᠠᠢᠯᠠᠰᠬᠢᠬᠤ ᠶ᠋ᠢ ᠨᠣᠮᠯᠠᠳᠠᠭ ᠤᠴᠢᠷ ᠲᠠᠢ᠃
ᠴᠢᠰᠤ ᠶ᠋ᠢ ᠴᠠᠭᠠᠨ ᠥᠩᠭᠡ ᠲᠡᠢ ᠭᠡᠵᠦ ᠨᠣᠮᠯᠠᠵᠤ ᠪᠠᠰᠠ ᠪᠣᠯᠤᠨᠠ᠃ ᠭᠠᠯᠳᠠᠨ ᠦᠶᠡ ᠵᠠᠢ ᠦᠭᠡᠢ ᠪᠣᠳᠣᠯ ᠬᠡᠯᠬᠢᠵᠦ᠂ ᠪᠢᠰᠢᠯᠭᠠᠵᠤ ᠶᠠᠪᠤᠲᠠᠯᠠ ᠬᠠᠭᠠᠨ ᠠᠬᠠ ᠨᠢ ᠡᠢᠨ ᠬᠦ᠌ ᠠᠮᠠ ᠨᠡᠭᠡᠭᠡᠪᠡ᠃
— ᠢᠯᠡᠳᠲᠡ ᠵᠥᠷᠢᠭᠦᠯᠬᠦ ᠠᠪᠠᠰᠤ ᠴᠢᠰᠤ ᠤᠷᠤᠰᠬᠤ ᠪᠤᠰᠤ ᠤᠤ? ᠲᠡᠭᠡᠬᠦ ᠪᠡᠷ ᠡᠨᠡ ᠨᠢᠭᠦᠯ ᠡᠴᠡ ᠪᠢ ᠶᠠᠭᠠᠬᠢᠵᠤ ᠵᠠᠢᠯᠠᠬᠤ ᠪᠢᠯᠡ᠃ ᠨᠠᠳᠠ ᠮᠠᠭᠤ ᠢᠷᠣᠠ ᠶ᠋ᠢᠨ ᠵᠡᠭᠦᠳᠦ ᠵᠦᠩ ᠪᠠᠢᠬᠤ ᠪᠣᠯᠤᠯᠠ᠃
— ᠬᠥᠮᠦᠨ ᠬᠡᠮᠡᠭᠴᠢ ᠥᠪᠡᠷ ᠢ᠋ ᠪᠡᠨ ᠪᠣᠯᠤᠨ ᠥᠷᠥᠭᠡᠯ ᠢ᠋ ᠰᠦᠢᠳᠬᠡᠳᠡᠭ᠃ ᠲᠡᠢᠮᠦ ᠪᠣᠯᠬᠣᠷ ᠦᠢᠯᠡ ᠶ᠋ᠢᠨ ᠦᠷᠡ ᠲᠡᠢ ᠠᠮᠢᠲᠠᠨ᠃ ᠦᠢᠯᠡ
ᠯᠠᠢ ᠪᠠᠨ ᠡᠳ᠋ᠯᠡᠬᠦ ᠶ᠋ᠢ ᠲᠠᠮᠤ ᠳ᠋ᠤ᠌ ᠤᠨᠠᠨᠠ ᠭᠡᠳᠡᠭ᠃ ᠮᠥᠨ ᠲᠠᠮᠤ ᠶ᠋ᠢᠨ ᠠᠮᠢᠲᠠᠨ ᠲᠠᠮᠤ ᠳ᠋ᠠᠭᠠᠨ ᠵᠢᠷᠭᠠᠯ ᠲᠠᠢ ᠭᠡᠳᠡᠭ᠃
— ᠪᠢ ᠲᠠᠢᠪᠤᠰᠢᠷᠠᠬᠤ ᠬᠡᠷᠡᠭᠲᠡᠢ ᠪᠠᠢᠨᠠ᠃
— ᠬᠠᠭᠠᠨ ᠲᠠ ᠰᠡᠳᠬᠢᠯ ᠢ᠋ᠶ᠋ᠡᠨ ᠵᠠᠰᠠ᠃ ᠰᠡᠳᠬᠢᠯ ᠦ᠋ᠨ ᠵᠠᠰᠠᠯ ᠤ᠋ᠨ ᠣᠯᠠᠨ ᠠᠷᠭᠠ ᠨᠤᠭᠤᠳ ᠪᠠᠢᠳᠠᠭ ᠤ᠋ᠨ ᠨᠢᠭᠡ ᠨᠢ ᠲᠠᠢᠪᠤᠩ ᠪᠠᠢᠬᠤ᠃ ᠲᠠᠢᠪᠤᠩ ᠪᠠᠢᠬᠤ ᠶ᠋ᠢᠨ ᠲᠤᠯᠠᠳᠠ ᠪᠦᠬᠦᠨ ᠢ᠋ ᠥᠷᠥᠰᠢᠶᠡᠬᠦ ᠬᠡᠷᠡᠭᠲᠡᠢ᠃ ᠴᠡᠴᠡᠨ ᠲᠠᠢᠵᠢ ᠪᠤᠷᠤᠭᠤ ᠲᠠᠢ ᠪᠢᠰᠢ ᠰᠢᠦ ᠳᠡ᠃ ᠲᠡᠷᠡ ᠲᠠᠢᠵᠢ ᠶᠠᠭᠠᠬᠢᠭᠠᠳ ᠬᠠᠭᠠᠨ ᠰᠠᠭᠤᠳᠠᠯ ᠳ᠋ᠤ᠌ ᠰᠠᠭᠤᠵᠤ᠂ ᠲᠥᠷᠥ ᠶ᠋ᠢᠨ ᠲᠠᠮᠠᠭᠠ ᠠᠳᠬᠤᠵᠤ ᠪᠣᠯᠳᠠᠭ ᠦᠭᠡᠢ ᠪᠢᠯᠡ᠃ ᠲᠠᠢᠵᠢ ᠶᠡᠷᠦ ᠡᠴᠡ ᠪᠡᠨ ᠪᠦᠬᠦᠨ ᠢ᠋ ᠪᠣᠳᠣᠵᠤ ᠰᠡᠳᠬᠢᠵᠦ ᠪᠣᠯᠤᠨᠠ᠃ ᠬᠥᠮᠦᠨ ᠪᠣᠯᠤᠭᠰᠠᠨ ᠬᠣᠢᠨᠠ ᠬᠥᠮᠦᠨ ᠦ᠌ ᠪᠣᠳᠣᠳᠠᠭ ᠢ᠋ ᠪᠣᠳᠣᠵᠤ ᠪᠠᠢᠭᠠ᠂ ᠭᠡᠪᠡᠴᠦ ᠁
— ᠤᠷᠭᠤᠭᠤᠯᠤᠭᠠᠳ ᠪᠣᠳᠣᠭᠠᠳ ᠪᠠᠢᠪᠠᠯ ᠠᠭᠤᠴᠢᠯᠠᠵᠤ ᠪᠣᠯᠬᠤ ᠦᠭᠡᠢ ᠶᠠᠭᠤᠮᠠ ᠠᠯᠠᠭᠠ᠃ ᠴᠢᠮᠠ ᠰᠢᠭ᠋ ᠬᠤᠪᠢᠯᠭᠠᠨ ᠯᠠᠮᠠ ᠬᠥᠮᠦᠨ ᠳ᠋ᠦ᠍ ᠰᠠᠪᠠ ᠰᠢᠮᠡ ᠶᠢᠷᠲᠢᠨᠴᠦ ᠶ᠋ᠢᠨ ᠣᠷᠣᠨ ᠵᠠᠢ ᠡᠴᠡ ᠢᠯᠡᠭᠦᠦ ᠲᠡᠢ ᠣᠶᠤᠨ ᠰᠠᠨᠠᠭᠠᠨ ᠤ᠋ ᠶᠢᠷᠲᠢᠨᠴᠦ ᠪᠠᠢᠳᠠᠭ ᠪᠤᠰᠤ ᠤᠤ? ᠠᠭᠤᠵᠢᠭᠤ ᠪᠣᠳᠣᠵᠤ ᠤᠷᠲᠤ ᠰᠠᠨᠠᠵᠤ ᠶᠠᠪᠤᠶᠠ᠃
ᠬᠠᠭᠠᠨ ᠰᠡᠩᠭᠡ ᠳᠡᠭᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠶᠠᠷᠢᠶᠠᠨ ᠳ᠋ᠤ᠌ ᠤᠷᠮᠠᠰᠢᠨ ᠠᠶᠠᠨᠴᠢᠳ᠂ᠮᠥᠷᠭᠥᠯᠴᠢᠳ ᠦ᠋ᠨ ᠵᠠᠮ ᠢ᠋ ᠣᠭᠲᠣᠯᠤᠨ ᠠᠢᠰᠤᠢ ᠮᠣᠷᠢᠲᠠᠨ ᠨᠤᠭᠤᠳ ᠢ᠋ ᠬᠠᠷᠠᠵᠤ᠂
— ᠡᠯᠴᠢ ᠢᠷᠡᠯᠡ ᠭᠡᠵᠦ ᠳᠤᠤᠭᠠᠷᠪᠠ᠃
— ᠬᠠᠮᠢᠭᠠᠬᠢ ᠶ᠋ᠢᠨ ᠡᠯᠴᠢ ᠪᠢᠯᠡ?
— ᠸᠴᠢᠷᠳᠣ ᠰᠡᠴᠡᠨ ᠬᠠᠭᠠᠨ ᠤ᠋ ᠡᠯᠴᠢ ᠪᠣᠯᠤᠯᠲᠠᠢ᠃ ᠪᠢ ᠬᠡᠯᠡ ᠳᠣᠭᠣᠯᠭᠠᠭᠰᠠᠨ ᠶᠤᠮ᠃ ᠴᠡᠷᠢᠭ ᠦ᠋ᠨ ᠠᠬᠠᠯᠠᠭᠴᠢ ᠵᠠᠮ ᠬᠥᠨᠳᠡᠯᠡᠨ ᠠᠢᠰᠤᠢ ᠮᠣᠷᠢᠲᠠᠨ ᠨᠤᠭᠤᠳ ᠤ᠋ᠨ ᠥᠭᠡᠳᠡ ᠡᠴᠡ ᠤᠭᠲᠤᠨ ᠢᠯᠡᠭᠡᠪᠡ᠃ ᠤᠭᠲᠤᠭᠤᠯ ᠳᠦᠭᠦᠷᠡᠩ ᠨᠣᠭᠣᠭᠠ ᠲᠠᠢ ᠲᠠᠯᠠ ᠳᠤᠮᠳᠠᠭᠤᠷ ᠮᠣᠷᠢᠨ ᠤ᠋ ᠬᠤᠷᠳᠤ ᠪᠠᠷ ᠴᠠᠬᠢᠯᠠᠵᠤ ᠣᠳᠤᠯᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠭᠠᠯᠳᠠᠨ ᠳ᠋ᠤ᠌ 《ᠪᠣᠷᠣ ᠲᠠᠯᠠ ᠳ᠋ᠤ᠌ ᠥᠨᠳᠡᠭᠡᠲᠦ ᠴᠥᠭᠥᠷᠥᠮ ᠪᠣᠢ᠃ ᠡᠳᠦᠢ ᠳ᠋ᠦ᠍ ᠳᠡᠭᠳᠡᠭᠡᠬᠡᠢ ᠱᠤᠤᠭᠢᠵᠤ ᠪᠣᠢ᠃ ᠥᠨᠳᠡᠭᠡᠲᠦ ᠴᠥᠭᠥᠷᠥᠮ ᠦ᠋ᠨ ᠬᠥᠪᠡᠭᠡᠨ ᠳ᠋ᠦ᠍ ᠠᠨᠤᠳᠠᠷᠠ ᠵᠣᠭᠰᠣᠵᠤ < ᠲᠥᠪᠡᠳ ᠤᠷᠤᠭᠤ ᠣᠳᠬᠤ ᠪᠦᠷᠢ ᠳ᠋ᠡᠭᠡᠨ ᠡᠨᠡᠭᠦᠷ ᠶᠠᠪᠤᠵᠤ ᠪᠠᠢᠭᠠᠷᠠᠢ>ᠭᠡᠳ ᠤᠯᠠᠭᠠᠨ᠂ ᠰᠢᠷᠠ᠂ ᠬᠥᠬᠡ᠂ ᠴᠠᠭᠠᠨ ᠠᠭᠤᠯᠠ ᠶ᠋ᠢᠨ ᠵᠦᠭ ᠵᠢᠭᠠᠵᠤ ᠪᠠᠢᠭᠰᠠᠨ》 ᠭᠡᠵᠦ ᠰᠠᠨᠠᠪᠠ᠃ ᠥᠬᠢᠨ ᠦ᠌ ᠰᠠᠪᠬᠠ ᠮᠡᠲᠦ ᠨᠠᠷᠢᠨ ᠴᠡᠮᠴᠡᠭᠡᠷ ᠬᠤᠷᠤᠭᠤ ᠲᠥᠪᠡᠳ ᠦ᠋ᠨ ᠠᠭᠤᠯᠠᠰ ᠢ᠋ ᠬᠡᠷᠬᠢᠨ ᠤᠨᠤᠵᠤ ᠪᠠᠢᠭᠰᠠᠨ ᠢ᠋ ᠬᠤᠪᠢᠯᠭᠠᠨ ᠯᠠᠮᠠ ᠶ᠋ᠢᠨ ᠴᠡᠭᠡᠵᠢᠨᠠ ᠵᠢᠷᠤᠭᠳᠠᠨ ᠦᠯᠡᠳᠡᠪᠡ᠃
ᠳᠥᠷᠪᠡ
ᠭᠠᠯᠳᠠᠨ ᠳ᠋ᠤ᠌ ᠥᠭᠡᠷᠡ ᠨᠢᠭᠡ ᠵᠢᠷᠤᠭ ᠪᠣᠢ᠃ ᠲᠡᠷᠡ ᠵᠢᠷᠤᠭ ᠪᠣᠯ ᠮᠢᠭᠮᠠᠨᠰᠠᠩᠵᠠᠢ ᠪᠢᠯᠡ᠃ ᠢᠷᠪᠢᠰ ᠲᠡᠢ ᠲᠤᠯᠭᠠᠷᠠᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠴᠡᠴᠡᠭ ᠦ᠋ᠨ ᠪᠤᠳᠠᠩ ᠲᠠᠲᠠᠳᠠᠭ ᠠᠢᠷᠠᠭᠳᠣ ᠬᠠᠪᠴᠢᠯ ᠤᠷᠤᠭᠤ ᠭᠠᠯᠳᠠᠨ ᠨᠢᠳᠦ ᠪᠡᠨ ᠴᠢᠯᠡᠭᠡᠵᠦ ᠤᠳᠠᠭᠠᠨ ᠬᠠᠷᠠᠵᠠᠢ ᠲᠡᠷᠡ ᠬᠦᠩᠬᠦᠬᠡᠷ ᠳᠤᠭᠤᠢ ᠬᠦᠷᠢᠶᠡᠨ ᠳ᠋ᠦ᠍ ᠠᠩ ᠠᠮᠢᠲᠠᠨ ᠲᠠᠢ ᠲᠣᠭᠯᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠪᠠ᠃ ᠢᠷᠪᠢᠰ ᠦ᠋ᠨ ᠰᠢᠳᠦ ᠲᠣᠭᠠᠯᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠠᠯᠳᠠᠨ ᠪᠣᠳᠣᠵᠤ ᠮᠢᠭᠮᠠᠨᠰᠠᠩᠵᠠᠢ ᠶ᠋ᠢᠨ ᠲᠣᠷᠮᠣᠭᠣᠷ ᠨᠢᠳᠦᠨ ᠳ᠋ᠦ᠍ ᠳᠦᠭᠦᠷᠡᠩ ᠠᠢᠳᠠᠰ ᠬᠤᠷᠠᠵᠤ᠂ ᠴᠡᠭᠡᠵᠢ ᠪᠡᠨ ᠳᠠᠷᠤᠨ ᠳᠣᠣᠷᠠ ᠪᠠᠨ ᠳᠡᠪᠬᠡᠴᠡᠵᠦ ᠪᠠᠢᠵᠤ ᠪᠢᠯᠡ᠃ ᠭᠠᠯᠳᠠᠨ ᠲᠡᠭᠡᠬᠦ ᠡᠴᠡ ᠲᠡᠭᠡᠬᠦ ᠭᠡᠰᠡᠨ ᠶᠦᠮ ᠰᠢᠭ ᠢᠷᠪᠢᠰ ᠦ᠋ᠨ ᠰᠣᠶᠣᠭᠠ ᠶ᠋ᠢ ᠲᠠᠲᠠᠵᠤ ᠦᠵᠡᠵᠡᠢ᠃ ᠳᠠᠷᠠᠭᠠ ᠨᠢ ᠮᠢᠭᠮᠠᠨᠰᠠᠩᠵᠠᠢ ᠥᠬᠢᠨ ᠲᠡᠢ ᠲᠣᠪᠰᠢᠭᠤᠷ ᠲᠠᠲᠠᠬᠤ ᠳ᠋ᠤ᠌ ᠬᠤᠷᠤᠭᠤ ᠨᠢ ᠡᠪᠯᠡᠵᠦ ᠥᠭᠭᠥ ᠦᠭᠡᠢ ᠴᠡᠴᠡᠷᠡᠵᠦ ᠪᠠᠢᠵᠤ ᠪᠢᠯᠡ᠃
ᠲᠥᠪᠡᠳ ᠡᠴᠡ ᠢᠷᠡᠭᠰᠡᠨ ᠳᠠᠷᠤᠢ ᠳ᠋ᠠᠭᠠᠨ ᠭᠠᠯᠳᠠᠨ ᠯᠠᠮᠠ ᠣᠯᠠᠨ ᠬᠥᠮᠦᠨ ᠳ᠋ᠦ᠍ ᠰᠠᠬᠢᠯ ᠰᠠᠨᠸᠠᠷ ᠬᠦᠷᠲᠡᠭᠡᠵᠦ᠂ ᠪᠤᠷᠬᠠᠨ ᠤ᠋ ᠨᠣᠮ ᠢ ᠲᠣᠳᠣ ᠦᠰᠦᠭ ᠢ᠋ᠶ᠋ᠡᠷ ᠬᠠᠭᠤᠯᠪᠤᠷᠢᠯᠠᠨ ᠣᠷᠴᠢᠭᠤᠯᠵᠤ ᠪᠠᠢᠬᠤ ᠳ᠋ᠠᠭᠠᠨ 《ᠮᠢᠭᠮᠠᠨᠰᠠᠩᠵᠠᠢ ᠣᠷᠣᠭᠠᠳ ᠢᠷᠡᠪᠡ》 ᠭᠡᠵᠦ ᠬᠡᠳᠦ ᠬᠡᠳᠦ ᠪᠣᠳᠣᠵᠠᠢ᠃ ᠭᠡᠲᠡᠯᠡ ᠮᠢᠭᠮᠠᠨᠰᠠᠩᠵᠠᠢ ᠣᠭᠲᠣ ᠰᠤᠷᠠᠭ ᠦᠭᠡᠢ ᠪᠠᠢᠵᠤ ᠭᠠᠯᠳᠠᠨ ᠡᠴᠡ ᠲᠥᠭᠡᠷᠢᠵᠡᠢ᠃ ᠬᠤᠪᠢᠯᠭᠠᠨ ᠯᠠᠮᠠ ᠶ᠋ᠢᠨ ᠳᠣᠲᠣᠭᠠᠳᠤ ᠲᠠᠮᠢᠷ ᠠᠯᠳᠠᠷᠠᠵᠤ᠂ ᠬᠠᠯᠠᠭᠤᠨ ᠶᠡᠬᠡᠰᠴᠦ᠂ ᠲᠠᠪᠤᠨ ᠴᠤᠯᠤ ᠳᠦᠯᠡᠢᠷᠡᠵᠦ ᠪᠠᠢᠬᠤ ᠦᠶᠡ ᠳ᠋ᠦ᠍ ᠶᠥᠮ ᠠᠭᠠ ᠡᠬᠡ ᠪᠤᠤᠬᠢᠶᠠᠯᠠᠨ ᠣᠴᠢᠵᠤ ᠢᠯᠠᠷᠢᠰᠢᠭᠤᠯᠬᠤ ᠳ᠋ᠤ᠌ ᠭᠠᠯᠳᠠᠨ ᠡᠬᠡ ᠶ᠋ᠢᠨ ᠥᠭᠭᠥᠭᠰᠠᠨ ᠨᠣᠭᠣᠭᠠᠨ ᠴᠠᠢ ᠶ᠋ᠢ ᠤᠤᠭᠤᠵᠤ ᠰᠠᠭᠤᠬᠤ ᠳ᠋ᠠᠭᠠᠨ᠂
— ᠡᠵᠢ ᠮᠢᠨᠢ ᠡᠨᠡ ᠴᠠᠢ ᠮᠠᠨ ᠤ᠋ ᠨᠤᠲᠤᠭ ᠤ᠋ᠨ ᠬᠢ ᠶᠦᠮ ᠪᠢᠵᠡ ᠳᠡ ᠭᠡᠮᠡᠨ ᠠᠰᠠᠭᠤᠵᠠᠢ᠃
ᠡᠬᠡ ᠨᠢ᠂
— ᠮᠢᠭᠮᠠᠨᠰᠠᠩᠵᠠᠢ ᠬᠡᠮᠡᠬᠦ ᠤᠷᠭᠤᠮᠠᠯ ᠤ᠋ᠨ ᠨᠠᠪᠴᠢ ᠭᠡᠵᠦ ᠥᠭᠦᠯᠡᠵᠡᠢ᠃
《ᠴᠠᠢ ᠶ᠋ᠢᠨ ᠤᠷᠭᠤᠮᠠᠯ ᠤ᠋ᠨ ᠨᠡᠷᠡ ᠲᠡᠢ ᠮᠢᠭᠮᠠᠨᠰᠠᠩᠵᠠᠢ ᠨᠠᠳᠠ ᠡᠴᠡ ᠲᠥᠭᠡᠷᠢᠵᠦ ᠣᠳᠬᠤ ᠨᠢ ᠬᠣᠷᠸᠠ ᠶ᠋ᠢᠨ ᠵᠠᠪᠰᠠᠷ ᠵᠠᠢ ᠲᠠᠢ ᠡᠴᠡ ᠪᠣᠯᠪᠠᠤ? ᠲᠡᠷᠡ ᠪᠦᠰᠡᠭᠦᠢ ᠡᠷᠡ ᠳ᠋ᠦ᠍ ᠭᠠᠷᠴᠤ᠂ ᠡᠷᠡ ᠪᠡᠨ ᠳᠠᠭᠠᠵᠤ ᠡᠨᠡ ᠠᠭᠤᠳᠠᠮ ᠵᠠᠢ ᠳ᠋ᠤ᠌ ᠪᠥᠭᠯᠡᠷᠡᠵᠦ ᠶᠠᠪᠤᠭᠠ ᠪᠢᠵᠡ᠃ ᠨᠠᠮᠠᠶ᠋ᠢ ᠨᠤᠲᠤᠭ ᠲᠠᠭᠠᠨ ᠵᠠᠯᠠᠷᠠᠵᠤ ᠢᠷᠡᠭᠰᠡᠨ ᠢ ᠲᠤᠭᠤᠯᠤᠭᠰᠠᠨ ᠪᠠᠢᠮᠠᠷ ᠶᠤᠮ᠃ ᠲᠤᠭᠤᠯᠵᠤ ᠰᠣᠨᠣᠰᠤᠭᠰᠠᠨ ᠪᠣᠯ ᠬᠦᠷᠦᠭᠡᠳ ᠢᠷᠡᠮᠡᠷ ᠶᠦᠮ᠃ ᠪᠢ ᠲᠡᠭᠦᠨ ᠢ᠋ ᠰᠡᠳᠬᠢᠯ ᠳ᠋ᠡᠭᠡᠨ ᠪᠠᠭᠲᠠᠭᠠᠭᠠᠳ ᠶᠠᠪᠤᠵᠤ ᠪᠠᠢᠨᠠ᠃ ᠰᠡᠳᠬᠢᠯ ᠳ᠋ᠦ᠍ ᠪᠠᠭᠲᠠᠬᠤ ᠦᠭᠡᠢ ᠶᠠᠭᠤᠮᠠ ᠨᠡᠷᠡᠲᠦ ᠳ᠋ᠦ᠍ ᠪᠣᠢ ᠭᠡᠵᠦ ᠤᠤ? ᠪᠡᠶᠡ ᠳ᠋ᠡᠭᠡᠨ ᠪᠠᠭᠲᠠᠬᠤ ᠦᠭᠡᠢ ᠶᠠᠭᠤᠮᠠ ᠵᠥᠩᠳᠡᠭᠡᠨ᠃ ᠬᠣᠭᠣᠯᠠ ᠶᠡᠬᠡ ᠢᠳᠡᠪᠡᠯ ᠬᠣᠳᠣᠭᠣᠳᠣ ᠪᠠᠭᠲᠠᠭᠠᠵᠤ ᠳᠡᠢᠯᠬᠦ ᠦᠭᠡᠢ ᠪᠤᠰᠤ ᠤᠤ? ᠮᠢᠨᠦ ᠬᠡᠢ ᠪᠡᠶᠡ ᠳ᠋ᠦ᠍ ᠮᠢᠭᠮᠠᠨᠰᠠᠩᠵᠠᠢ ᠣᠷᠣᠰᠢᠵᠤ ᠪᠠᠢᠯᠠ᠃》
ᠲᠠᠪᠤ
ᠶᠥᠮ ᠠᠭᠠ ᠬᠠᠲᠤᠨ ᠬᠦᠦ ᠳ᠋ᠡᠭᠡᠨ ᠨᠢᠭᠡᠨ ᠤᠭᠤᠲᠠ ᠲᠠᠢ ᠵᠦᠢᠯ ᠢ ᠥᠭᠴᠦ ᠪᠠᠢᠨᠠ᠃ ᠡᠬᠡ ᠶ᠋ᠢᠨ ᠴᠡᠪᠡᠷᠬᠡᠨ ᠠᠯᠠᠭᠠᠨ ᠳᠡᠭᠡᠷᠡ ᠰᠠᠢᠲᠤᠷ ᠬᠠᠷᠠᠬᠤ ᠳ᠋ᠤ᠌ ᠦᠬᠡᠷ ᠦ᠋ᠨ ᠦᠩᠬᠦᠯᠴᠡᠭ ᠭᠡᠮᠡᠷ ᠢᠯᠭᠢ ᠶ᠋ᠢᠨ ᠤᠭᠤᠲᠠ ᠪᠠᠢᠨᠠ᠃ ᠲᠡᠭᠦᠨ ᠦ᠌ ᠪᠥᠭᠡᠷᠡ ᠶ᠋ᠢᠨ ᠳᠡᠭᠡᠷᠡ ᠲᠦᠮᠡᠨ ᠨᠠᠰᠤᠨ ᠬᠡ ᠶ᠋ᠢᠨ ᠡᠬᠢᠯᠡᠯ ᠬᠠᠰ ᠢ ᠨᠠᠷᠠᠨ ᠵᠥᠪ ᠳᠤᠭᠤᠢ ᠬᠡᠯᠪᠡᠷᠢ ᠲᠡᠢ ᠤᠷᠠᠯᠠᠵᠠᠢ᠃
ᠤᠭᠤᠲᠠ ᠶ᠋ᠢ ᠶᠥᠮ ᠠᠭᠠ ᠬᠠᠲᠤᠨ ᠠᠯᠠᠭᠠᠨ ᠳᠡᠭᠡᠷᠡ ᠪᠡᠨ ᠡᠷᠭᠢᠭᠦᠯᠬᠦ ᠳ᠋ᠡᠭᠡᠨ ᠨᠥᠭᠦᠭᠡ ᠲᠠᠯᠠ ᠳ᠋ᠤᠨᠢ ᠬᠠᠰ ᠢ ᠨᠠᠷᠠ ᠪᠤᠷᠤᠭᠤ ᠤᠷᠠᠯᠠᠵᠠᠢ᠃ ᠤᠭᠤᠲᠠᠨ ᠤ᠋ ᠬᠣᠶᠠᠷ ᠲᠠᠯᠠ ᠳ᠋ᠤ᠌ ᠳᠤᠭᠤᠢ ᠬᠦᠷᠢᠶᠡ ᠪᠦᠬᠦᠢ ᠬᠠᠰ ᠲᠠᠢ ᠠᠵᠢ᠃
ᠶᠥᠮ ᠠᠭᠠ ᠬᠠᠲᠤᠨ ᠬᠡᠯᠡᠷᠦᠨ ᠄《ᠡᠨᠡ ᠤᠭᠤᠲᠠᠨ ᠳ᠋ᠤ᠌ ᠠᠳᠬᠤ ᠰᠢᠷᠣᠢ ᠪᠣᠢ᠃ ᠶᠠᠭᠤᠨ ᠤ᠋ ᠰᠢᠷᠣᠢ ᠬᠡᠮᠡᠪᠡᠯ ᠣᠢᠷᠠᠳ ᠮᠣᠩᠭᠣᠯ ᠤ᠋ᠨ ᠪᠠᠭᠠᠲᠤᠷ ᠤ᠋ᠳ ᠤ᠋ᠨ ᠴᠢᠰᠤ᠂ ᠬᠥᠯᠥᠰᠥ᠂ ᠡᠪᠦᠭᠡᠳ ᠳᠡᠭᠡᠳᠦᠰ ᠦ᠋ᠨ ᠮᠠᠨᠢ ᠪᠡᠶᠡ ᠴᠣᠭᠴᠠᠰ ᠤ᠋ᠨ ᠢᠯᠵᠠᠮᠠᠭ ᠪᠠᠢᠭᠠ ᠶᠤᠮ᠃ ᠨᠣᠢᠷ ᠮᠠᠭᠤᠳᠠᠪᠠᠯ ᠳᠡᠷᠡ ᠶ᠋ᠢᠨ ᠳᠣᠣᠷᠠ ᠪᠠᠨ ᠠᠭᠤᠯᠵᠤ ᠪᠠᠢᠯᠲᠠᠢ᠃ ᠲᠠᠪᠤᠨ ᠴᠤᠯᠤ ᠡᠪᠡᠳᠬᠦ ᠠᠬᠤᠯᠠ ᠪᠥᠭᠡᠷᠡ ᠨᠢᠷᠤᠭᠤᠨ ᠳ᠋ᠠᠭᠠᠨ ᠢᠪᠡᠵᠦ ᠬᠣᠨᠣᠭᠠᠷᠠᠢ᠃ ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠲᠠᠨᠢ ᠠᠮᠢ ᠴᠥᠯᠪᠡᠭᠰᠡᠨ ᠳᠣᠯᠣᠭᠠᠨ ᠤ᠋ ᠭᠠᠵᠠᠷ ᠡᠴᠡ ᠢᠷᠡᠭᠰᠡᠨ ᠰᠢᠦ ᠳᠡ》 ᠭᠡᠯᠡ᠃ ᠭᠠᠯᠳᠠᠨ ᠪᠣᠬᠢᠷᠴᠤ ᠰᠠᠭᠤᠭᠠᠳ ᠲᠣᠰᠴᠤ ᠠᠪᠤᠨᠠ᠃ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠥᠭᠦᠯᠡᠷᠦᠨ᠂
— ᠡᠴᠢᠭᠡ ᠶ᠋ᠢᠨ ᠪᠡᠶᠡ ᠰᠢᠷᠣᠢ ᠳ᠋ᠤ᠌ ᠬᠤᠪᠢᠯᠬᠤ ᠳ᠋ᠤ᠌ ᠳᠡᠭᠡᠵᠢ ᠶ᠋ᠢ ᠨᠢ ᠬᠠᠰ ᠲᠡᠮᠳᠡᠭᠲᠦ ᠤᠭᠤᠲᠠᠨ ᠳ᠋ᠤ᠌ ᠶᠡᠭᠦᠯᠡᠭᠰᠡᠨ ᠪᠢᠵᠡ ᠭᠡᠮᠡᠨ ᠭᠦᠨ ᠶᠡᠬᠡ ᠬᠦᠨᠳᠦᠳᠬᠡᠯ ᠲᠡᠢ ᠬᠡᠯᠡᠪᠡ᠃
— ᠪᠤᠷᠬᠠᠨ ᠤ᠋ ᠲᠠᠭᠠᠯᠠᠯ ᠢ᠋ᠶ᠋ᠠᠷ ᠵᠣᠪᠠᠯᠠᠩ ᠢ᠋ ᠪᠠᠰᠠ ᠶᠡᠭᠦᠯᠡᠭᠰᠡᠨ ᠭᠡᠵᠦ ᠬᠠᠲᠤᠨ ᠡᠬᠡ ᠬᠡᠯᠡᠪᠡ᠃
— ᠮᠢᠬᠠ ᠴᠢᠰᠤᠨ ᠳ᠋ᠤ᠌ ᠲᠥᠷᠥᠭᠰᠡᠨ ᠪᠦᠬᠦ ᠬᠥᠮᠦᠨ ᠳ᠋ᠦ᠍ ᠵᠣᠪᠠᠯᠠᠩ ᠪᠠᠢᠳᠠᠭ ᠶᠤᠮᠰᠠᠨ ᠰᠢᠦ ᠳᠡ᠃
— ᠪᠤᠷᠬᠠᠨ ᠳ᠋ᠤ᠌ ᠬᠦᠷᠲᠡᠯᠡ ᠵᠣᠪᠠᠯᠠᠩ ᠪᠠᠢᠳᠠᠭ ᠪᠠᠢᠬᠤ ᠨᠢ ᠠ᠋ ᠁
— ᠵᠣᠪᠠᠯᠠᠩ ᠢ᠋ ᠳᠠᠭᠠᠭᠠᠵᠤ ᠳᠠᠪᠠᠭᠰᠠᠨ ᠲᠡᠷᠡ ᠬᠥᠮᠦᠨ ᠪᠤᠷᠬᠠᠨ ᠪᠤᠰᠤ ᠤᠤ? ᠵᠣᠪᠠᠯᠠᠩ ᠲᠥᠷᠥᠭᠦᠯᠬᠦ ᠠᠪᠠᠰᠤ ᠲᠡᠪᠴᠢᠵᠦ ᠲᠤᠭᠤᠯᠬᠤ ᠶ᠋ᠢ ᠪᠤᠷᠬᠠᠨ ᠤ᠋ ᠠᠷᠢᠭᠤᠨ ᠭᠡᠭᠡᠨᠳᠡᠨ ᠨᠦ᠍ᠭᠦᠳ ᠨᠠᠳᠠ ᠨᠣᠮᠯᠠᠳᠠᠭ ᠪᠢᠯᠡ᠃ ᠵᠢᠷᠭᠤᠭᠠᠨ ᠵᠦᠢᠯ ᠦ᠋ᠨ ᠬᠠᠮᠤᠭ ᠠᠮᠢᠲᠠᠨ ᠤ᠋ ᠲᠤᠰᠠ ᠶ᠋ᠢᠨ ᠲᠤᠯᠠᠳᠠ ᠲᠡᠳᠡᠨ ᠢ᠋ ᠡᠨᠡᠷᠢᠵᠦ ᠨᠢᠭᠦᠯᠡᠰᠬᠦ ᠭᠡᠵᠦ ᠪᠤᠷᠬᠠᠨ ᠵᠣᠪᠠᠳᠠᠭ ᠶᠤᠮ᠃ ᠪᠤᠷᠬᠠᠨ ᠲᠠᠩᠳᠠ ᠬᠥᠮᠦᠨ ᠦ᠌ ᠲᠥᠯᠥᠭᠡ ᠵᠣᠪᠠᠳᠠᠭ᠃ ᠬᠥᠮᠦᠨ ᠦ᠌ ᠦᠢᠯᠡᠳᠦᠭᠰᠡᠨ ᠬᠢᠯᠢᠨᠴᠡ ᠶ᠋ᠢ ᠳᠤᠮᠳᠠᠯᠠᠬᠤ ᠭᠡᠵᠦ ᠪᠤᠷᠬᠠᠨ ᠬᠠᠢᠷᠠ ᠬᠡᠰᠢᠭ ᠢ᠋ᠶ᠋ᠡᠨ ᠬᠥᠮᠦᠰ ᠲᠦ᠍ ᠥᠭᠳᠡᠭ ᠪᠢᠯᠡ᠃ ᠪᠤᠶᠠᠨ ᠦᠢᠯᠡᠳᠬᠦ ᠶ᠋ᠢ ᠪᠤᠷᠬᠠᠨ ᠬᠦᠰᠡᠳᠡᠭ᠃ ᠭᠡᠲᠡᠯᠡ ᠬᠥᠮᠦᠰ ᠪᠤᠷᠬᠠᠨ ᠤ᠋ ᠬᠠᠢᠷᠠ ᠬᠡᠰᠢᠭ ᠢ᠋ ᠵᠠᠷᠢᠮ ᠳ᠋ᠠᠭᠠᠨ ᠬᠦᠯᠢᠶᠡᠵᠦ ᠴᠢᠳᠠᠳᠠᠭ ᠦᠭᠡᠢ᠃ ᠪᠤᠷᠬᠠᠨ ᠪᠠᠭᠰᠢ ᠪᠣᠯ ᠨᠠᠳᠠ ᠰᠢᠭ᠋ ᠡᠬᠡ ᠡᠴᠡ ᠲᠥᠷᠥᠭᠰᠡᠨ᠃ ᠪᠤᠷᠬᠠᠨ ᠪᠠᠭᠰᠢ ᠶ᠋ᠢᠨ ᠡᠬᠡ ᠨᠢ ᠲᠠᠨ ᠰᠢᠭ᠋ ᠡᠵᠢ ᠪᠠᠢᠭᠰᠠᠨ᠃ ᠪᠤᠷᠬᠠᠨ ᠪᠠᠭᠰᠢ ᠬᠥᠮᠦᠨ ᠢ᠋ ᠬᠡᠬᠡᠷᠡᠭᠦᠯᠬᠦ ᠶ᠋ᠢᠨ ᠲᠤᠯᠠᠳᠠ ᠥᠪᠡᠷ ᠦ᠋ᠨ ᠬᠦᠴᠦ ᠲᠠᠮᠢᠷ ᠢ᠋ᠶ᠋ᠠᠨ ᠰᠢᠪᠬᠠᠵᠤ ᠪᠠᠢᠳᠠᠭ᠃ ᠡᠵᠢ ᠲᠠ ᠮᠢᠨᠢ ᠪᠤᠷᠬᠠᠨ ᠰᠢᠦ ᠳᠡ᠃
ᠡᠬᠡ ᠨᠢ ᠭᠠᠯᠳᠠᠨ ᠳ᠋ᠤ᠌᠂ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠶᠥᠮ ᠠᠭᠠ ᠡᠬᠡ ᠳ᠋ᠡᠭᠡᠨ ᠰᠥᠬᠥᠷᠡᠨ ᠲᠡᠷᠡ ᠬᠦ᠌ ᠬᠠᠰ ᠲᠠᠢ ᠤᠭᠤᠲᠠ ᠶ᠋ᠢ ᠭᠠᠷ ᠡᠴᠡ ᠭᠠᠷ ᠳᠤ ᠳᠡᠮᠵᠢᠵᠦ ᠥᠭᠬᠦ ᠳ᠋ᠦ᠍ ᠠᠰᠤᠷᠤ ᠶᠡᠬᠡ ᠭᠡᠷᠡᠯ ᠰᠠᠴᠤᠷᠠᠨᠠ᠃ ᠤᠭᠤᠲᠠ ᠲᠠᠢ ᠰᠢᠷᠣᠢ ᠡᠬᠡ ᠬᠥᠪᠡᠭᠦᠨ ᠬᠣᠶᠠᠷ ᠤ᠋ᠨ ᠠᠯᠠᠭᠠᠨ ᠳᠡᠭᠡᠷᠡ ᠭᠡᠷᠡᠯ ᠪᠣᠯᠵᠠᠢ᠃ ᠭᠡᠷᠡᠯ ᠲᠠᠲᠠᠬᠤ ᠳ᠋ᠤ᠌ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠵᠣᠪᠬᠢ ᠪᠠᠨ ᠡᠷᠭᠦᠨᠡ᠃ ᠲᠡᠭᠦᠨ ᠦ᠌ ᠵᠣᠪᠬᠢ ᠳᠡᠭᠡᠷᠡᠬᠢ ᠡᠷᠪᠡᠯᠵᠡᠭᠰᠡᠨ ᠬᠠᠷᠠ ᠣᠳᠣ ᠮᠡᠲᠦ ᠲᠣᠳᠣᠷᠠᠨᠠ᠃ ᠭᠠᠯᠳᠠᠨ ᠤᠭ ᠡᠴᠡ ᠪᠠᠨ ᠵᠣᠪᠬᠢᠨ ᠳᠡᠭᠡᠷᠡ ᠪᠡᠨ ᠨᠠᠷᠠ ᠰᠠᠷᠠ ᠲᠠᠢ ᠪᠢᠯᠡ᠃
ᠭᠠᠯᠳᠠᠨ ᠡᠬᠡ ᠡᠴᠡ ᠪᠡᠨ ᠥᠪ ᠵᠠᠯᠭᠠᠮᠵᠢᠯᠠᠨ ᠵᠢᠷᠦᠬᠡ ᠨᠢ ᠪᠠᠳᠠᠷᠠᠵᠠᠢ᠃ ᠪᠢᠴᠢᠬᠠᠨ ᠢᠯᠭᠢ ᠶ᠋ᠢᠨ ᠤᠭᠤᠲᠠᠨ ᠳ᠋ᠤ᠌ ᠪᠠᠢᠭᠠ ᠰᠢᠷᠣᠢ ᠣᠢᠷᠠᠳ ᠢ᠋ ᠲᠥᠯᠥᠭᠡᠯᠡᠵᠦ ᠪᠠᠢᠯᠠ᠃ ᠭᠠᠯᠳᠠᠨ ᠤᠨᠠᠭᠰᠠᠨ ᠭᠠᠵᠠᠷ ᠲᠠᠢ ᠪᠠᠨ ᠴᠣᠭ ᠲᠥᠪᠡᠳ ᠲᠦ᠍ ᠰᠠᠭᠤᠳᠠᠭ ᠪᠢᠯᠡ᠃ ᠲᠡᠷᠡ ᠰᠢᠷᠣᠢ ᠴᠥᠭᠥᠴᠡ ᠥᠷᠥᠵᠦ ᠵᠤᠯᠠ ᠪᠠᠳᠠᠷᠠᠭᠠᠭᠰᠠᠨ ᠰᠢᠷᠡᠭᠡᠨ ᠦ᠌ ᠳᠡᠭᠡᠷᠡ ᠲᠠᠯᠪᠢᠭᠠ ᠲᠠᠢ ᠪᠠᠢᠬᠤ ᠪᠥᠭᠡᠳ ᠡᠳᠦᠷ ᠪᠦᠷᠢ ᠭᠠᠯᠳᠠᠨ ᠯᠠᠮᠠ ᠮᠠᠩᠨᠠᠢ ᠳ᠋ᠠᠭᠠᠨ ᠠᠳᠢᠰᠯᠠᠨᠠ᠃ ᠭᠠᠯᠳᠠᠨ ᠳ᠋ᠤ᠌ ᠡᠳᠦᠭᠡ ᠭᠤᠷᠪᠠᠨ ᠵᠦᠢᠯ ᠡᠷᠳᠡᠨᠢ ᠮᠡᠲᠦ ᠬᠠᠳᠠᠭᠠᠯᠠᠭᠳᠠᠪᠠ᠃ ᠠᠩᠬᠠᠨ ᠤ᠋ ᠬᠢᠨᠢ ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠦ᠌ ᠴᠢᠯᠠᠭᠤ ᠶᠤᠮ᠃ ᠲᠡᠷᠡ ᠴᠢᠯᠠᠭᠤ ᠣᠯᠠᠨ ᠠᠷᠪᠢᠨ ᠵᠢᠯ ᠤᠰᠤᠨ ᠤ᠋ ᠭᠦᠨ ᠴᠡᠭᠡᠯ ᠳ᠋ᠦ᠍ ᠪᠠᠢᠵᠤ ᠴᠡᠩᠭᠡᠭ ᠤᠰᠤ ᠪᠠᠷ ᠵᠦᠯᠭᠦᠭᠦᠯᠦᠭᠰᠡᠭᠡᠷ ᠪᠠᠢᠵᠤ ᠮᠥᠯᠢᠢᠵᠡᠢ᠃ ᠳᠤᠸᠠ ᠰᠣᠬᠣᠷ ᠬᠡᠮᠡᠬᠦ ᠲᠩᠷᠢ ᠣᠪᠣᠭ ᠤ᠋ᠨ ᠦᠶᠡ ᠳ᠋ᠦ᠍ ᠬᠠᠳᠠ ᠪᠠᠢᠭᠰᠠᠨ ᠪᠠᠢᠵᠤ ᠲᠠᠭᠠᠷᠠᠨᠠ᠃ ᠲᠡᠮᠡᠭᠡᠨ ᠴᠢᠨᠡᠭᠡᠨ ᠬᠠᠳᠠ ᠶ᠋ᠢ ᠴᠢᠯᠠᠭᠤ ᠪᠣᠯᠲᠠᠯᠠ ᠳᠣᠯᠢᠶᠠᠭᠰᠠᠨ ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠦ᠌ ᠤᠷᠤᠰᠬᠠᠯ ᠠᠭᠤᠤ ᠵᠥᠭᠡᠯᠡᠨ ᠪᠢᠯᠡ᠃
ᠳᠠᠷᠠᠭᠠᠬᠢ ᠶ᠋ᠢᠨ ᠬᠢᠨᠢ ᠮᠣᠩᠭᠣᠯ ᠤ᠋ᠨ ᠠᠩᠬᠠᠳᠤᠭᠠᠷ ᠪᠣᠭᠳᠠ ᠥᠨᠳᠥᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ ᠤ᠋ᠨ ᠥᠭᠭᠦᠭᠰᠡᠨ ᠡᠷᠢᠭᠡ ᠶᠦᠮ᠃ ᠲᠡᠷᠡ ᠡᠷᠢᠭᠡ ᠵᠢᠮᠢᠰ ᠪᠣᠯᠤᠨ ᠳᠡᠯᠭᠡᠷᠡᠵᠦ ᠪᠠᠢᠵᠠᠢ᠃ ᠵᠢᠯ ᠳ᠋ᠡᠭᠡᠨ ᠤᠷᠭᠤᠵᠤ᠂ ᠵᠢᠯ ᠳ᠋ᠡᠭᠡᠨ ᠬᠠᠭᠳᠠᠷᠠᠵᠤ ᠪᠠᠢᠳᠠᠭ ᠵᠢᠮᠢᠰ ᠢ ᠪᠣᠯᠣᠴᠠ ᠨᠢ ᠭᠦᠢᠴᠡᠭᠰᠡᠨ ᠬᠣᠢᠨᠠ ᠲᠡᠭᠦᠵᠦ ᠬᠠᠲᠠᠭᠠᠭᠠᠳ ᠭᠤᠷᠪᠠᠨ ᠣᠨ ᠥᠩᠭᠡᠷᠡᠬᠦ ᠳ᠋ᠦ᠍ ᠭᠠᠩᠭᠠ ᠮᠥᠷᠡᠨ ᠦ᠌ ᠤᠰᠤ ᠪᠠᠷ ᠤᠬᠢᠶᠠᠵᠤ᠂ ᠦᠬᠡᠷ ᠦ᠋ᠨ ᠰᠦ ᠳ᠋ᠦ᠍ ᠴᠢᠨᠠᠵᠤ ᠪᠥᠭᠡᠷᠡᠩᠬᠡᠢ ᠶᠠᠰᠤ ᠶ᠋ᠢ ᠨᠢ ᠠᠪᠳᠠᠭ᠃ ᠵᠢᠮᠢᠰ ᠦ᠋ᠨ ᠶᠠᠰᠤ ᠪᠣᠯᠭᠠᠨ ᠳᠡᠭᠡᠷᠡ ᠬᠣᠶᠠᠷ ᠪᠢᠴᠢᠬᠠᠨ ᠬᠣᠩᠬᠣᠷ ᠪᠠᠢᠬᠤ ᠨᠢ ᠨᠢᠳᠦ ᠪᠣᠯᠠᠢ᠃
ᠵᠢᠮᠢᠰ ᠦ᠋ᠨ ᠶᠠᠰᠤᠨ ᠳᠡᠭᠡᠷᠡᠬᠢ ᠨᠢᠳᠦ ᠶ᠋ᠢ ᠪᠤᠷᠬᠠᠨ ᠤ᠋ ᠨᠢᠳᠦ ᠭᠡᠨᠡ᠃ ᠪᠤᠷᠬᠠᠨ ᠤ᠋ ᠨᠢᠳᠦᠲᠦ ᠡᠷᠢᠭᠡ ᠶ᠋ᠢ ᠥᠨᠳᠥᠷ ᠭᠡᠭᠡᠨ ᠱᠦᠩᠰᠢᠭᠯᠡᠨ ᠬᠡᠯᠬᠢᠵᠦ ᠵᠠᠩᠬᠢᠯᠠᠭᠠᠨ ᠳ᠋ᠤᠨᠢ ᠨᠢᠭᠡᠨ ᠵᠦᠢᠯ ᠦ᠋ᠨ ᠦᠯᠦ ᠲᠠᠢᠯᠤᠭᠳᠠᠬᠤ ᠤᠷᠠᠯᠠᠯ ᠰᠢᠩᠭᠡᠭᠡᠵᠦ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠳ᠋ᠤ᠌ ᠡᠷᠭᠦᠨ ᠪᠠᠷᠢᠵᠠᠢ᠃
ᠰᠡᠭᠦᠯ ᠦ᠋ᠨ ᠨᠠᠨᠳᠢᠨ ᠵᠦᠢᠯ ᠪᠣᠯᠪᠠᠰᠤ ᠶᠦᠮ ᠠᠭᠠ ᠬᠠᠲᠤᠨ ᠡᠬᠡ ᠶ᠋ᠢᠨ ᠥᠭᠭᠦᠭᠰᠡᠨ ᠡᠪᠦᠭᠡᠳ ᠳᠡᠭᠡᠳᠦᠰ ᠦ᠋ᠨ ᠰᠦᠨᠡᠰᠦ᠂ ᠪᠡᠶᠡ ᠮᠠᠬᠠᠪᠣᠳ ᠠᠭᠤᠯᠤᠭᠳᠠᠭᠰᠠᠨ ᠰᠢᠷᠣᠢ ᠶᠤᠮ᠃ ᠡᠨᠡ ᠰᠢᠷᠣᠢ ᠶ᠋ᠢᠨ ᠳᠡᠭᠡᠭᠦᠷ ᠾᠦᠩᠨᠦ᠂ ᠬᠢᠳᠠᠨ᠂ ᠶᠡᠬᠡ ᠮᠣᠩᠭᠣᠯ ᠭᠦᠷᠦᠨ ᠦ᠌ ᠠᠭᠲᠠ ᠮᠣᠷᠢᠳ ᠤ᠋ᠨ ᠲᠤᠭᠤᠷᠠᠢ ᠪᠦᠮᠪᠦᠷᠢᠳᠡᠵᠦ᠂ ᠴᠢᠰᠤᠲᠤ ᠳᠣᠯᠣᠭᠠᠨ ᠳ᠋ᠤ᠌ ᠮᠣᠩᠭᠣᠯ ᠡᠷᠡᠰ ᠠᠮᠢ ᠪᠠᠨ ᠠᠯᠳᠠᠵᠤ᠂ ᠥᠬᠢᠳ᠂ ᠡᠮᠡᠰ᠂ ᠡᠮᠡᠭᠡᠳ ᠦ᠋ᠨ ᠲᠤᠩᠭᠠᠯᠠᠭ ᠨᠢᠯᠪᠤᠰᠤ ᠰᠢᠩᠭᠡᠵᠦ ᠪᠠᠢᠭᠰᠠᠨ ᠪᠢᠯᠡ᠃ ᠰᠢᠷᠣᠢ ᠲᠠᠢ ᠪᠠᠨ ᠴᠣᠭ ᠬᠣᠯᠠ ᠭᠠᠵᠠᠷ ᠣᠳᠳᠠᠭ ᠬᠥᠮᠦᠰ ᠮᠣᠩᠭᠣᠯᠴᠤᠳ ᠡᠴᠡ ᠥᠭᠡᠷᠡ ᠪᠣᠢ ᠭᠡᠵᠦ ᠤᠤ ?
ᠭᠠᠯᠳᠠᠨ ᠬᠤᠪᠢᠯᠭᠠᠨ ᠤ᠋ ᠰᠡᠳᠬᠢᠯ ᠳᠤᠮᠳᠠᠭᠤᠷ ᠮᠢᠨᠢ ᠡᠷᠲᠡᠨ ᠦ᠌ ᠪᠣᠯᠤᠨ ᠴᠠᠭ ᠦᠶᠡ ᠶ᠋ᠢᠨ ᠰᠢᠭᠤᠷᠭᠠ ᠰᠠᠯᠬᠢ ᠢᠰᠬᠡᠷᠦᠨ ᠳᠦᠩᠭᠡᠷᠡᠵᠦ᠂ ᠰᠦᠮᠡ ᠶ᠋ᠢᠨ ᠣᠷᠣᠢ ᠳᠡᠭᠡᠷᠡᠬᠢ ᠨᠣᠮᠣᠬᠠᠨ ᠬᠢᠴᠢᠶᠡᠩᠭᠦᠢ ᠪᠣᠳᠢ ᠭᠥᠷᠥᠭᠡᠰᠦ ᠪᠢᠰᠢᠯᠭᠠᠯ ᠤ᠋ᠨ ᠠᠨᠢᠷ ᠦᠭᠡᠢ ᠭᠦᠨ ᠳ᠋ᠦ᠍ ᠲᠠᠢᠪᠤᠩ ᠵᠣᠭᠰᠣᠬᠤ ᠪᠥᠯᠥᠭᠡ᠃
ᠵᠢᠷᠭᠤᠭᠠ
— ᠪᠢ ᠭᠤᠷᠪᠠᠨ ᠬᠠᠰᠠᠭ ᠲᠡᠷᠭᠡ ᠪᠤᠷᠬᠠᠨ ᠤ᠋ ᠰᠤᠳᠤᠷ ᠴᠡᠭᠡᠵᠢᠯᠡᠵᠡᠢ᠃ ᠪᠤᠷᠬᠠᠨ ᠤ᠋ ᠰᠤᠷᠭᠠᠯ ᠶᠠᠭᠤᠲᠠᠢ ᠶᠡᠬᠡ ᠪᠣᠢ? ᠪᠤᠷᠬᠠᠨ ᠤ᠋ ᠰᠤᠷᠭᠠᠯ ᠳ᠋ᠤ᠌ ᠲᠡᠭᠦᠰᠬᠡᠯ ᠦᠭᠡᠢ ᠪᠠᠢᠨᠠ᠃ ᠬᠥᠮᠦᠨ ᠦ᠌ ᠣᠢ ᠤᠬᠠᠭᠠᠨ ᠳ᠋ᠤ᠌ ᠡᠴᠦᠰ ᠦᠭᠡᠢ ᠪᠠᠢᠨᠠ᠃ ᠪᠢ ᠡᠴᠦᠰ ᠲᠡᠭᠦᠰᠬᠡᠯ ᠦᠭᠡᠢ ᠦᠷᠭᠦᠯᠵᠢᠯᠡᠯ ᠦ᠋ᠨ ᠳᠤᠮᠳᠠ ᠶᠠᠪᠤᠨᠠ ᠭᠡᠮᠡᠨ ᠭᠠᠯᠳᠠᠨ ᠲᠡᠮᠳᠡᠭᠯᠡᠵᠡᠢ᠃
ᠭᠠᠯᠳᠠᠨ ᠪᠥᠭᠡᠰᠦ ᠣᠶᠤᠨ ᠰᠠᠨᠠᠭᠠ ᠶ᠋ᠢ ᠬᠣᠭᠣᠰᠣᠨ ᠭᠡᠵᠦ ᠢᠲᠡᠭᠡᠨᠡ᠃ ᠳᠦᠭᠦᠷᠡᠩ ᠰᠠᠪᠠ ᠨᠢ ᠬᠣᠭᠣᠰᠣᠨ ᠭᠡᠵᠦ ᠪᠣᠳᠣᠬᠤ ᠨᠢ ᠶᠠᠭᠤᠨ ᠤ᠋ ᠬᠢ ᠪᠣᠢ? ᠭᠠᠷ ᠲᠤ᠌ ᠪᠠᠷᠢᠭᠳᠠᠬᠤ ᠦᠭᠡᠢ᠂ ᠨᠢᠳᠦᠨ ᠳ᠋ᠦ᠍ ᠬᠠᠷᠠᠭᠳᠠᠬᠤ ᠦᠭᠡᠢ ᠳᠦᠭᠦᠷᠡᠩ ᠢ ᠭᠠᠯᠳᠠᠨ ᠬᠣᠭᠣᠰᠣᠨ ᠡᠴᠡ ᠬᠣᠭᠣᠰᠣᠨ ᠭᠡᠳᠡᠭ ᠢ ᠭᠠᠳᠠᠷᠯᠠᠨᠠ᠃ ᠡᠨᠡ ᠶᠢᠷᠲᠢᠨᠴᠦ ᠶ᠋ᠢᠨ ᠡᠪᠡᠰᠦ ᠤᠷᠭᠤᠮᠠᠯ ᠭᠠᠭᠴᠠᠬᠠᠨ ᠦᠨᠳᠦᠰᠦ ᠲᠡᠢ᠃ ᠲᠡᠷᠡ ᠦᠨᠳᠦᠰᠦ ᠶ᠋ᠢ ᠣᠯᠵᠤ ᠬᠠᠷᠠᠬᠤ ᠶ᠋ᠢ ᠬᠤᠪᠢᠯᠭᠠᠨ ᠯᠠᠮᠠ ᠬᠢᠴᠢᠶᠡᠨᠡ᠃
ᠲᠥᠪᠡᠳ ᠦ᠋ᠨ ᠠᠭᠯᠠᠭ ᠠᠭᠤᠯᠠᠨ ᠳ᠋ᠤ᠌ ᠤᠷᠭᠤᠳᠠᠭ ᠬᠥᠪᠳᠥ ᠠᠯᠲᠠᠢ ᠶ᠋ᠢᠨ ᠨᠢᠷᠤᠭᠤᠨ ᠤ᠋ ᠪᠣᠷᠣᠭ ᠡᠪᠡᠰᠦ ᠶᠢᠷᠲᠢᠨᠴᠦ ᠶ᠋ᠢᠨ ᠭᠠᠭᠴᠠ ᠦᠨᠳᠦᠰᠦᠨ ᠲᠡᠵᠢᠭᠡᠯ ᠠᠪᠳᠠᠭ ᠭᠡᠮᠡᠨ ᠪᠣᠳᠣᠳᠠᠭ ᠪᠠᠢᠯᠠ᠃ ᠬᠥᠮᠦᠨ ᠰᠦᠷᠦᠭ ᠠᠭᠤᠯᠠ᠂ ᠭᠣᠪᠢ᠂ ᠬᠡᠭᠡᠷᠡ ᠲᠠᠯᠠ ᠳ᠋ᠤ᠌ ᠨᠡᠭᠦᠳᠡᠯᠯᠡᠨ ᠠᠮᠢᠳᠤᠷᠠᠬᠤ ᠠᠭᠠᠳ ᠠᠷᠢᠶᠠᠲᠠᠨ᠂ᠵᠢᠭᠦᠷᠲᠡᠨ ᠲᠡᠢ ᠤᠷᠠᠯᠴᠠᠨ ᠠᠮᠢᠳᠤᠷᠠᠵᠤ ᠪᠠᠢᠪᠠ᠃ ᠲᠡᠭᠡᠲᠡᠯᠡ ᠨᠢ ᠤᠬᠠᠭᠠᠨ ᠳᠡᠢᠯᠵᠡᠢ᠃ ᠪᠤᠷᠬᠠᠨ ᠤ᠋ ᠰᠤᠷᠭᠠᠯ ᠬᠥᠮᠦᠨ ᠢ᠋ ᠬᠥᠮᠦᠨ ᠪᠣᠯᠭᠠᠪᠠ᠃ ᠬᠥᠮᠦᠨ ᠦ᠌ ᠣᠶᠤᠨ ᠰᠠᠨᠠᠭᠠ ᠲᠠᠷᠠᠭᠯᠠᠭᠠᠵᠢᠪᠡ᠃ ᠪᠤᠷᠬᠠᠨ ᠬᠥᠮᠦᠨ ᠦ᠌ ᠲᠠᠷᠢᠬᠢᠨ ᠳ᠋ᠤ᠌ ᠳᠡᠢᠯᠦᠭᠳᠡᠰᠢ ᠦᠭᠡᠢ ᠬᠦᠴᠦ ᠢᠯᠡᠭᠡᠵᠦ᠂ ᠲᠡᠷᠡ ᠨᠢ ᠠᠳᠠᠭᠤᠰᠤᠨ ᠠᠮᠢᠲᠠᠰ ᠢ᠋ ᠭᠡᠷ ᠦ᠋ᠨ ᠲᠡᠵᠢᠭᠡᠮᠡᠯ ᠪᠣᠯᠭᠠᠵᠤ᠂ ᠡᠪᠡᠰᠦ ᠨᠣᠭᠣᠭᠠ᠂ ᠵᠢᠮᠢᠰ ᠢ ᠮᠣᠳᠣᠨ ᠢ᠋ ᠬᠣᠭᠣᠯᠠ ᠬᠦᠨᠡᠰᠦ ᠪᠣᠯᠭᠠᠪᠠ᠃
ᠭᠠᠯᠳᠠᠨ ᠯᠠᠮᠠ ᠬᠤᠪᠢᠯᠭᠠᠨ ᠲᠥᠷᠬᠦ ᠳ᠋ᠡᠭᠡᠨ ᠠᠭᠠᠵᠢᠮ ᠢ᠋ᠶ᠋ᠠᠷ ᠰᠢᠯᠵᠢᠭᠰᠡᠨ ᠨᠢ ᠨᠣᠮ ᠤ᠋ᠨ ᠬᠦᠴᠦ ᠪᠢᠯᠡ᠃ ᠨᠣᠮ ᠤ᠋ᠨ ᠬᠦᠴᠦ ᠭᠠᠯᠳᠠᠨ ᠤ᠋ ᠲᠠᠷᠢᠬᠢ ᠲᠣᠯᠣᠭᠠᠢ ᠳ᠋ᠤ᠌ ᠬᠤᠪᠢᠯᠤᠨ ᠣᠷᠣᠵᠤ ᠨᠢᠳᠦ ᠪᠡᠷ ᠨᠢ ᠭᠡᠷᠡᠯᠲᠦᠨᠡ᠃ ᠨᠢᠭᠡ ᠡᠳᠦᠷ ᠭᠠᠯᠳᠠᠨ ᠵᠣᠳᠣᠭᠠᠨ ᠤ᠋ ᠡᠷᠳᠡᠮ ᠳ᠋ᠦ᠍ ᠬᠢᠴᠢᠶᠡᠯᠯᠡᠬᠦ ᠪᠡᠷ ᠣᠴᠢᠬᠤ ᠦᠶᠡ ᠳ᠋ᠦ᠍ ᠪᠠᠨᠳᠢ ᠨᠠᠷ᠂ ᠯᠠᠮᠠ ᠬᠤᠸᠠᠷᠠᠭ ᠤ᠋ᠳ ᠲᠡᠭᠦᠨ ᠡᠴᠡ ᠳᠦᠯᠢᠵᠦ ᠪᠠᠢᠯᠠ᠃
— ᠶᠠᠭᠠᠬᠢᠪᠠ? ᠦᠵᠡᠯᠴᠡᠶᠡ ᠭᠡᠵᠦ ᠭᠠᠯᠳᠠᠨ ᠢ᠋ ᠬᠡᠯᠡᠬᠦ ᠳ᠋ᠦ᠍᠂
— ᠦᠭᠡᠢ᠂ ᠠᠶᠤᠵᠤ ᠪᠠᠢᠨᠠ ᠭᠡᠵᠡᠭᠡᠪᠡ᠃
— ᠤᠷᠢᠳ ᠨᠢ ᠠᠶᠤᠳᠠᠭ ᠦᠭᠡᠢ ᠪᠤᠰᠤ ᠤᠤ? ᠭᠡᠪᠡᠯ᠂
— ᠲᠡᠷᠡ ᠴᠠᠭ ᠥᠩᠭᠡᠷᠡᠭᠰᠡᠨ᠃ ᠲᠡᠷᠡ ᠴᠠᠭ ᠥᠭᠡᠷᠡ ᠪᠠᠢᠭᠰᠠᠨ ᠭᠡᠵᠡᠭᠡᠨᠡ᠃
— ᠣᠳᠣ ᠶᠠᠭᠤ ᠪᠣᠯᠪᠠ?
— ᠮᠡᠳᠡᠬᠦ ᠦᠭᠡᠢ᠂
— ᠨᠢᠭᠡ ᠨᠢᠭᠡ ᠪᠡᠷ ᠢ᠋ᠶ᠋ᠡᠨ ᠣᠷᠣᠭᠠᠳ ᠢᠷᠡᠭᠡᠷᠡᠢ᠃
— ᠯᠠᠮᠠᠳᠠᠨ ᠲᠠᠨ ᠡᠴᠡ ᠵᠢᠷᠦᠬᠡᠰᠢᠶᠡᠭᠡᠳ ᠪᠠᠢᠨᠠ᠃
— ᠶᠠᠭᠤᠨ ᠳ᠋ᠤ᠌ ᠲᠡᠷᠡ ᠪᠢᠯᠡ?
— ᠲᠠᠨ ᠤ᠋ ᠨᠢᠳᠦᠨ ᠡᠴᠡ ᠵᠢᠷᠦᠬᠡ ᠠᠯᠳᠠᠬᠤ ᠪᠣᠯᠤᠯᠠ᠃
— ᠲᠠ ᠨᠠᠷ ᠨᠠᠮᠠᠶ᠋ᠢ ᠵᠣᠷᠢᠭᠤᠳᠠ ᠭᠠᠭᠴᠠᠭᠠᠷᠳᠠᠭᠤᠯᠵᠤ ᠵᠣᠳᠣᠭᠠᠨ ᠤ᠋ ᠡᠷᠳᠡᠮ ᠰᠤᠷᠬᠤ ᠡᠴᠡ ᠴᠢᠯᠥᠭᠡᠯᠡᠵᠦ ᠪᠠᠢᠨᠠ ᠤᠤ?
— ᠲᠠ ᠲᠡᠭᠡᠵᠦ ᠰᠠᠨᠠᠵᠤ ᠪᠠᠢᠭᠠ ᠪᠣᠯ ᠳᠠᠰᠬᠠᠯ ᠰᠤᠷᠭᠠᠭᠤᠯᠢ ᠳ᠋ᠠᠭᠠᠨ ᠣᠷᠣᠬᠤ ᠡᠴᠡ ᠳᠠ᠃
— ᠥᠨᠥᠳᠥᠷ ᠵᠢᠷᠠᠨ ᠳᠥᠷᠪᠡᠳᠡᠬᠢ ᠳᠠᠰᠬᠠᠯ᠃ ᠬᠣᠶᠠᠷ ᠡᠪᠦᠳᠦᠭ᠂ ᠬᠣᠶᠠᠷ ᠲᠣᠬᠣᠢ ᠪᠠᠷ ᠢ᠋ᠶ᠋ᠠᠨ ᠲᠤᠯᠤᠯᠳᠤᠨᠠ᠃
— ᠵᠣᠳᠣᠭᠠᠨ ᠤ᠋ ᠤᠷᠠᠯᠢᠭ ᠳᠠᠭᠤᠰᠤᠭᠰᠠᠨ ᠤᠤ?
— ᠮᠠᠷᠭᠠᠰᠢ ᠳᠠᠰᠬᠠᠯ ᠢ᠋ᠶ᠋ᠠᠨ ᠬᠦᠨᠳᠦᠷᠡᠭᠦᠯᠦᠨᠡ᠃
ᠲᠡᠭᠰᠢ ᠳᠥᠷᠪᠡᠯᠵᠢᠨ ᠪᠡᠶᠡ ᠲᠡᠢ᠂ ᠦᠰᠦ ᠰᠠᠬᠠᠯ ᠦᠭᠡᠢ᠂ ᠨᠢᠳᠦ ᠬᠦᠢᠲᠡᠨ ᠪᠠᠨᠳᠢ ᠵᠣᠳᠣᠭᠠᠨ ᠤ᠋ ᠪᠠᠭᠰᠢ ᠡᠩᠨᠡᠭᠡ ᠳᠣᠲᠣᠷᠠ ᠡᠴᠡ ᠭᠠᠯᠳᠠᠨ ᠢ᠋ ᠴᠢᠭᠯᠡᠨ ᠢᠷᠡᠭᠡᠳ᠂
— ᠲᠠᠨ ᠢ᠋ ᠰᠣᠩᠭᠣᠵᠤ ᠪᠠᠢᠨᠠ ᠭᠡᠯᠡ᠃
ᠭᠠᠯᠳᠠᠨ ᠴᠢᠩᠭᠠ ᠭᠡᠭᠴᠢ ᠬᠠᠰᠬᠢᠷᠴᠤ ᠵᠣᠳᠣᠭᠠᠨ ᠤ᠋ ᠲᠠᠯᠠᠪᠠᠢ ᠳ᠋ᠤ᠌ ᠭᠠᠷᠪᠠ᠃ ᠭᠠᠯᠳᠠᠨ ᠬᠣᠶᠠᠷ ᠡᠪᠦᠳᠦᠭ ᠢ᠋ᠶ᠋ᠡᠷ ᠪᠠᠭᠰᠢ ᠶ᠋ᠢᠨ ᠵᠤᠵᠠᠭᠠᠨ ᠭᠤᠶᠠ᠂ ᠬᠣᠶᠠᠷ ᠲᠣᠬᠣᠢ ᠪᠠᠷ ᠭᠠᠷ ᠤ᠋ᠨ ᠡᠷᠢᠶᠡᠨ ᠪᠤᠯᠴᠢᠩ ᠳᠡᠭᠡᠷᠡ ᠨᠢᠳᠤᠷᠴᠤ ᠳᠡᠭᠡᠷᠡᠬᠢ ᠦᠢᠯᠡᠳᠦᠯ ᠢ᠋ ᠳᠠᠪᠲᠠᠨ ᠬᠢᠬᠦ ᠳ᠋ᠦ᠍ ᠪᠠᠭᠰᠢ ᠲᠠᠩᠨᠠᠢ ᠲᠠᠰᠢᠵᠤ ᠵᠣᠭᠰᠣᠭᠠᠭᠠᠳ᠂
— ᠲᠠᠨ ᠤ᠋ ᠳᠣᠲᠣᠭᠠᠳᠤ ᠲᠠᠮᠢᠷ ᠳᠠᠪᠠᠮᠠᠭᠠᠢ ᠲᠤᠯᠠ ᠪᠢᠷᠠ ᠬᠦᠴᠦ ᠶ᠋ᠢ ᠦᠯᠦ ᠠᠰᠢᠭᠯᠠᠨ ᠢᠯᠡᠭᠦᠳᠡᠯ ᠬᠡᠢ ᠪᠡᠷ ᠬᠥᠮᠦᠨ ᠢ᠋ ᠪᠠᠢᠲᠤᠭᠠᠢ ᠮᠠᠯ ᠠᠳᠤᠭᠤᠰᠤ ᠶ᠋ᠢ ᠠᠯᠠᠬᠤ ᠶᠤᠮ ᠪᠠᠢᠨᠠ᠃ ᠬᠣᠶᠠᠭᠤᠯᠠ ᠮᠢᠨᠦ ᠪᠢᠴᠢᠬᠠᠨ ᠥᠷᠥᠭᠡᠨ ᠳ᠋ᠦ᠍ ᠶᠠᠷᠢᠯᠴᠠᠬᠤ ᠤᠤ? ᠭᠡᠵᠡᠢ᠃
ᠪᠤᠷᠬᠠᠨ ᠱᠠᠰᠢᠨ ᠤ᠋ ᠭᠣᠷᠲᠢᠭ ᠳᠣᠲᠣᠷᠠ ᠭᠠᠯᠳᠠᠨ ᠶᠣᠰᠣ ᠵᠢᠷᠤᠮ᠂ ᠴᠡᠭᠡᠷ ᠳᠢᠭᠯᠢᠮ ᠢ᠋ ᠦᠨᠡᠨᠴᠢ ᠰᠢᠳᠤᠷᠭᠤ ᠰᠠᠬᠢᠭᠰᠠᠭᠠᠷ ᠡᠨᠡ ᠳᠦᠷᠢ ᠲᠡᠢ ᠵᠣᠯᠭᠠᠵᠠᠢ᠃
ᠮᠥᠷᠭᠥᠯ ᠦ᠋ᠨ ᠶᠡᠬᠡ ᠳᠤᠭᠠᠩ ᠡᠴᠡ ᠳᠠᠯᠠᠢ ᠯᠠᠮᠠ᠂ ᠪᠠᠨᠴᠢᠨ᠌ᠡᠷᠳᠡᠨᠢ《ᠪᠠᠨ᠋ᠴᠢᠨ᠋ᠡᠷᠳᠡᠨᠢ》᠂ ᠥᠨᠳᠥᠷ ᠭᠡᠭᠡᠨ ᠨᠠᠷ ᠤ᠋ᠨ ᠬᠠᠮᠲᠤ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠭᠠᠷᠴᠤ ᠢᠷᠡᠪᠡ᠃ ᠲᠡᠳᠡ ᠴᠥᠮ ᠤᠯᠠᠭᠠᠨ ᠰᠢᠷᠠ ᠥᠩᠭᠡ ᠶ᠋ᠢᠨ ᠣᠷᠬᠢᠮᠵᠢ ᠨᠥᠮᠥᠷᠴᠦ᠂ ᠬᠤᠪᠴᠠᠰᠤ ᠬᠤᠨᠠᠷ ᠨᠢ ᠰᠢᠷᠠ ᠰᠣᠯᠣᠩᠭᠠ ᠲᠠᠲᠠᠬᠤ ᠮᠡᠲᠦ ᠲᠤᠨᠤᠷᠠᠨᠠ᠃ ᠣᠢᠷᠠᠯᠴᠠᠭᠠ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠬᠣᠱᠤᠳ ᠣᠪᠣᠭ ᠤ᠋ᠨ ᠭᠠᠢᠲᠠᠪ ᠴᠢᠭᠢᠷᠠᠭ ᠳᠥᠷᠪᠡᠯᠵᠢᠨ ᠴᠡᠭᠡᠵᠢ ᠲᠡᠢ ᠬᠠᠩᠬᠠᠷ ᠡᠷᠡ ᠪᠣᠯᠤᠭᠰᠠᠨ ᠪᠥᠭᠡᠳ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠤ᠋ ᠵᠠᠷᠤᠯ ᠳ᠋ᠤ᠌ ᠡᠢᠰᠢ ᠲᠠᠢᠰᠢ ᠥᠷᠲᠡᠭᠡᠴᠢᠯᠡᠨ ᠣᠳᠴᠤ᠂ ᠭᠣᠣᠯ ᠲᠥᠯᠥᠪ ᠭᠡᠷ ᠵᠠᠭᠤᠷᠠ ᠶ᠋ᠢᠨ ᠠᠵᠢᠯ ᠠᠮᠵᠢᠭᠤᠯᠵᠤ ᠨᠢᠭᠡ ᠶᠣᠰᠣᠨ ᠳ᠋ᠠᠭᠠᠨ ᠬᠤᠪᠢᠯᠭᠠᠨ ᠤ᠋ ᠬᠠᠮᠠᠭᠠᠯᠠᠭᠴᠢ ᠮᠡᠲᠦ ᠪᠠᠢᠬᠤ ᠪᠥᠯᠥᠭᠡ᠃
ᠲᠠᠪᠤᠳᠤᠭᠠᠷ ᠳᠠᠯᠠᠢ ᠯᠠᠮᠠ ᠯᠤᠪᠰᠠᠩᠵᠠᠮᠰᠤ ᠥᠭᠦᠯᠡᠷᠦᠨ᠂
— ᠭᠠᠯᠳᠠᠨ ᠬᠤᠪᠢᠯᠭᠠᠨ ᠰᠠᠢᠲᠤᠷ ᠲᠤᠩᠭᠠᠨ ᠪᠤᠳᠤᠭᠲᠤᠨ! ᠭᠠᠨᠳᠠᠩ ᠰᠢᠷᠡᠭᠡᠲᠦ ᠶ᠋ᠢᠨ ᠰᠠᠭᠤᠳᠠᠯ ᠬᠣᠭᠣᠰᠣᠨ ᠪᠣᠯᠪᠠ᠃ ᠲᠡᠷᠡ ᠰᠠᠭᠤᠳᠠᠯ ᠳ᠋ᠤ᠌ ᠬᠤᠪᠢᠯᠭᠠᠨ ᠲᠠᠨ ᠢ᠋ ᠵᠠᠯᠠᠬᠤ ᠪᠣᠳᠣᠯ ᠲᠠᠢ ᠪᠠᠢᠨᠠ ᠭᠡᠳ ᠡᠷᠳᠡᠨᠢ ᠶ᠋ᠢᠨ ᠴᠢᠯᠠᠭᠤᠨ ᠡᠷᠢᠭᠡ ᠪᠡᠨ ᠨᠢᠭᠡ ᠨᠢᠭᠡ ᠪᠡᠷ ᠬᠥᠳᠡᠯᠭᠡᠨ ᠠᠮᠠᠨ ᠳ᠋ᠠᠭᠠᠨ ᠤᠩᠰᠢᠯᠭᠠ ᠰᠢᠪᠡᠨᠡᠨᠡ᠃ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠦᠭᠡ ᠶ᠋ᠢ ᠲᠠᠭᠠᠯᠠᠨ ᠪᠣᠯᠭᠣᠭᠠᠵᠤ ᠲᠣᠯᠣᠭᠠᠢ ᠳᠣᠬᠢᠭᠰᠠᠨ ᠪᠠᠨᠴᠢᠨ᠌ᠡᠷᠳᠡᠨᠢ᠂
— ᠰᠢᠷᠡᠭᠡᠲᠦ ᠯᠠᠮᠠ ᠪᠥᠭᠡᠰᠦ ᠳᠠᠯᠠᠢ ᠯᠠᠮᠠ ᠪᠢᠳᠡᠨ ᠦ᠌ ᠠᠳᠠᠯᠢ ᠵᠡᠷᠭᠡ ᠵᠢᠩᠳᠠᠭᠠ ᠲᠠᠢ᠂ ᠪᠤᠷᠬᠠᠨ ᠤ᠋ ᠡᠮᠦᠨᠡ ᠲᠠᠪᠤᠨ ᠳᠡᠮᠵᠢᠶᠡ ᠳᠦᠭᠦᠷᠭᠡᠵᠦ ᠬᠡᠬᠡᠷᠡᠭᠰᠡᠨ ᠬᠥᠮᠦᠨ ᠦ᠌ ᠥᠨᠳᠥᠷ ᠰᠠᠭᠤᠳᠠᠯ ᠪᠢᠯᠡ ᠭᠡᠮᠡᠨ ᠢᠳᠬᠠᠵᠤ ᠰᠡᠩᠬᠡᠷᠡᠭᠦᠯᠬᠦ ᠠᠶᠠᠰ ᠲᠠᠢ ᠥᠭᠦᠯᠡᠬᠦ ᠠᠵᠢ᠃
ᠡᠨᠡ ᠦᠶᠡ ᠳ᠋ᠦ᠍ ᠭᠠᠯᠳᠠᠨ ᠤ᠋ ᠪᠣᠰᠤᠭᠠ ᠲᠡᠭᠰᠢ ᠰᠢᠨᠠ᠂ ᠮᠣᠩᠬᠣᠷᠳᠠᠭᠤ ᠬᠠᠮᠠᠷ ᠤᠭ ᠡᠴᠡ ᠴᠠᠢᠪᠤᠷ ᠴᠢᠷᠠᠢ ᠳ᠋ᠤ᠌ ᠪᠣᠯᠭᠣᠮᠵᠢᠯᠠᠬᠤ ᠠᠶᠠᠰ ᠢᠯᠡᠳᠲᠡ ᠮᠡᠳᠡᠷᠡᠭᠳᠡᠨᠡ᠃ ᠭᠠᠯᠳᠠᠨ ᠬᠤᠪᠢᠯᠭᠠᠨ᠂
— ᠳᠠᠯᠠᠢ ᠯᠠᠮᠠ᠂ ᠪᠠᠨᠴᠢᠨ᠌ᠡᠷᠳᠡᠨᠢ ᠪᠠᠭᠰᠢ ᠲᠠ ᠬᠣᠶᠠᠷ ᠲᠠᠭᠠᠨ ᠲᠠᠯᠠᠷᠬᠠᠨᠠ᠃ ᠪᠢ ᠪᠠᠰᠠ ᠥᠨᠳᠥᠷ ᠭᠡᠭᠡᠨ ᠯᠦ᠍ᠭᠡ ᠪᠤᠷᠬᠠᠨ ᠤ᠋ ᠦᠨᠡᠨᠴᠢ ᠱᠠᠪᠢ ᠪᠢᠯᠡ᠃ ᠨᠠᠮᠠᠶ᠋ᠢ ᠪᠤᠷᠬᠠᠳ ᠤ᠋ᠨ ᠵᠢᠩᠳᠠᠭᠠᠨ ᠳ᠋ᠤ᠌ ᠪᠣᠳᠣᠨ ᠰᠢᠷᠡᠭᠡᠲᠦ ᠯᠠᠮᠠ ᠶ᠋ᠢᠨ ᠰᠠᠭᠤᠳᠠᠯ ᠳ᠋ᠤ᠌ ᠵᠠᠯᠠᠬᠤ ᠨᠢ ᠤᠴᠠᠷᠠᠯ ᠲᠣᠬᠢᠶᠠᠯᠳᠤᠯ ᠪᠣᠢ ᠭ᠌ᠠ᠃ ᠪᠠᠭᠰᠢᠲᠠᠨ ᠳᠠᠬᠢᠨ ᠪᠣᠯᠭᠣᠮᠵᠢᠯᠠᠪᠠᠯ ᠶᠠᠮᠠᠷ ᠪᠣᠢ? ᠣᠢᠷᠠᠳ ᠮᠣᠩᠭᠣᠯ ᠤ᠋ᠨ ᠨᠤᠲᠤᠭ ᠲᠤ᠌ ᠴᠤ᠌ ᠰᠦᠮᠡ ᠳᠤᠭᠠᠩ ᠪᠣᠰᠬᠠᠵᠤ᠂ ᠰᠦᠰᠦᠭᠲᠡᠨ ᠯᠠᠮᠠ ᠴᠤᠪᠤᠷᠠᠭᠰᠠᠭᠠᠷ ᠭᠡᠨᠡ᠃ ᠨᠠᠮᠠᠶ᠋ᠢ ᠨᠤᠲᠤᠭ ᠡᠴᠡ ᠳᠠᠭᠤᠳᠠᠬᠤ ᠪᠣᠯᠤᠯᠲᠠᠢ ᠭᠡᠵᠦ ᠠᠴᠠᠨ ᠰᠠᠯᠠᠭᠠᠨ ᠳ᠋ᠤ᠌ ᠥᠭᠦᠯᠡᠪᠡ᠃
ᠪᠤᠳ᠋ᠳ᠋ᠾᠠ ᠶ᠋ᠢᠨ ᠱᠠᠰᠢᠨ ᠤ᠋ ᠮᠢᠨᠳᠤᠭᠳᠠᠨ ᠨᠢᠭᠡ ᠨᠢᠭᠡᠨ ᠳ᠋ᠡᠭᠡᠨ ᠨᠠᠢᠷ ᠲᠠᠯᠪᠢᠨ ᠳᠣᠲᠣᠨᠣᠰᠣᠭ ᠢ᠋ᠶ᠋ᠠᠷ ᠬᠦᠨᠳᠦᠳᠬᠡᠯ ᠢᠯᠡᠷᠬᠡᠢᠯᠡᠨ ᠳᠤᠭᠠᠩ ᠤ᠋ᠨ ᠢ᠋ᠶ᠋ᠠᠨ ᠡᠭᠦᠳᠡ ᠡᠴᠡ ᠭᠤᠷᠪᠠᠨ ᠲᠡᠢᠰᠢ ᠰᠠᠯᠵᠤ ᠣᠳᠪᠠ᠃ ᠭᠤᠷᠪᠠᠨ ᠵᠠᠮ ᠪᠠᠢᠯᠠ᠃ ᠳᠠᠯᠠᠢ ᠯᠠᠮᠠ ᠪᠣᠯᠬᠤ ᠪᠠᠷ ᠭᠠᠯᠳᠠᠨ ᠢ᠋ ᠲᠥᠪᠡᠳ᠂ ᠣᠢᠷᠠᠳ ᠤ᠋ᠨ ᠬᠣᠭᠣᠷᠣᠨᠳᠣ ᠭᠦᠦᠷ ᠪᠣᠯᠤᠨᠠ ᠭᠡᠵᠦ ᠦᠵᠡᠳᠡᠭ ᠪᠢᠯᠡ᠃ ᠪᠠᠨᠴᠢᠬᠷᠳᠡᠨᠢ ᠪᠣᠯᠬᠤ ᠪᠠᠷ ᠭᠠᠯᠳᠠᠨ ᠢ᠋ ᠦᠯᠦ ᠰᠢᠨᠲᠠᠷᠠᠬᠤ ᠵᠣᠷᠢᠭ ᠲᠠᠢ᠂ ᠬᠤᠪᠢᠯᠭᠠᠨ ᠰᠢᠳᠢ ᠲᠡᠢ᠂ ᠪᠣᠰᠤᠭᠠ ᠣᠷᠣᠯᠠᠩ ᠰᠢᠭ᠋ ᠬᠦᠴᠦᠲᠡᠨ ᠭᠡᠮᠡᠨ ᠪᠣᠳᠣᠨᠠ᠃
ᠥᠨᠳᠥᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ ᠭᠠᠯᠳᠠᠨ ᠢ᠋ ᠰᠤᠯᠠ ᠳᠣᠷᠣᠢ ᠪᠤᠰᠤ ᠴᠢᠩᠭᠠ ᠬᠠᠲᠠᠭᠤ ᠡᠷᠡ᠃ ᠲᠣᠮᠣ ᠴᠤ᠌ ᠯᠠᠮᠠ᠃ ᠱᠣ ᠳ᠋ᠤ᠌ ᠡᠭᠡᠳᠡᠷᠡᠭᠡ ᠲᠡᠢ ᠪᠠᠭᠤᠳᠠᠭ ᠬᠤᠪᠢ ᠵᠠᠶᠠᠭᠠ ᠲᠠᠢ᠃ ᠮᠣᠷᠢᠨ ᠳᠡᠭᠡᠷᠡ ᠲᠡᠭᠦᠰᠬᠦ ᠪᠠᠢᠬᠤ ᠳᠠ᠃ ᠨᠢᠭᠡ ᠯᠡ ᠡᠳᠦᠷ ᠭᠠᠯᠳᠠᠨ ᠢᠷᠪᠢᠰ ᠮᠡᠲᠦ ᠴᠠᠬᠢᠯᠠᠭᠠᠳ ᠠᠯᠠᠭᠠ ᠪᠣᠯᠤᠨᠠ ᠭᠡᠮᠡᠨ ᠪᠣᠳᠣᠳᠠᠭ ᠪᠠᠢᠵᠠᠢ᠃
ᠪᠤᠳᠠᠯᠠᠩ ᠬᠡᠢᠳ ᠮᠠᠨᠠᠨ ᠳᠤᠮᠳᠠ ᠣᠷᠢᠶᠠᠴᠠᠯᠳᠤᠨᠠ᠃ ᠬᠡᠢᠳ ᠡᠴᠡ ᠬᠣᠯᠠᠳᠬᠤ ᠲᠣᠰᠤᠮ ᠮᠠᠨᠠᠨ ᠪᠢᠲᠡᠭᠦᠷᠡᠵᠦ ᠭᠠᠯᠳᠠᠨ ᠤ᠋ ᠳᠦᠷᠢ ᠵᠢᠷᠤᠭ ᠲᠣᠳᠣᠷᠠᠵᠤ ᠪᠠᠢᠯᠠ᠃ ᠲᠡᠷᠡ ᠪᠡᠷ ᠦᠷᠭᠦᠭᠡᠨ ᠳ᠋ᠡᠭᠡᠨ ᠣᠷᠣᠭᠠᠳ ᠰᠡᠭᠦᠯ ᠳ᠋ᠦ᠍ ᠨᠤᠲᠤᠭ ᠡᠴᠡ ᠪᠠᠨ ᠠᠪᠴᠢᠷᠠᠭᠰᠠᠨ ᠲᠣᠪᠰᠢᠭᠤᠷ ᠢ᠋ᠶ᠋ᠠᠨ ᠡᠪᠦᠷ ᠳᠡᠭᠡᠷᠡ ᠪᠡᠨ ᠪᠦᠪᠡᠢᠯᠡᠨ ᠲᠣᠭᠯᠠᠵᠤ᠂ ᠨᠤᠲᠤᠭ ᠤᠰᠤᠨ ᠤ᠋ ᠪᠠᠨ ᠴᠢᠮᠡᠭᠡ ᠶ᠋ᠢ ᠰᠣᠨᠣᠰᠴᠤ᠂ ᠲᠥᠪᠡᠳ᠂ ᠠᠯᠲᠠᠢ ᠶ᠋ᠢᠨ ᠠᠭᠤᠯᠠ ᠶ᠋ᠢᠨ ᠳᠤᠮᠳᠠ ᠬᠡᠴᠡ ᠲᠠᠲᠠᠭᠰᠠᠨ ᠮᠡᠲᠦ ᠬᠣᠯᠠ ᠶ᠋ᠢ ᠪᠣᠳᠣᠨ ᠪᠤᠷᠬᠠᠨ ᠢ᠋ ᠪᠢᠰᠢᠯᠭᠠᠮᠤᠢ᠃
ᠳᠣᠯᠣᠭᠠ
ᠨᠠᠳᠠ ᠪᠠᠭᠠᠲᠤᠷ ᠵᠠᠩᠵᠤᠨ ᠣᠯᠠᠨ ᠪᠠᠢᠪᠠᠴᠤ ᠭᠠᠢᠳᠠᠪ ᠪᠠᠭᠠᠲᠤᠷ ᠬᠠᠮᠤᠭ ᠤ᠋ᠨ ᠣᠢᠷᠠ ᠳᠣᠲᠣᠨᠣ ᠪᠢᠯᠡ ᠭᠡᠵᠦ ᠭᠠᠯᠳᠠᠨ ᠲᠡᠮᠳᠡᠭᠯᠡᠯ ᠢ᠋ᠶ᠋ᠡᠨ ᠪᠢᠴᠢᠵᠡᠢ᠃ ᠭᠠᠢᠳᠠᠪ ᠪᠣᠯ ᠲᠥᠪᠡᠳ ᠲᠦ᠍ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠴᠡᠭᠡᠵᠢ ᠶ᠋ᠢ ᠳᠥᠰᠢᠨ ᠢᠷᠡᠭᠡᠳ ᠲᠡᠨᠳᠡ ᠨᠤᠲᠤᠭᠯᠠᠭᠤᠯᠵᠤ᠂ ᠭᠠᠯᠳᠠᠨ ᠢ᠋ ᠡᠷᠢᠵᠦ ᠰᠤᠷᠠᠭᠰᠠᠭᠠᠷ ᠢᠷᠡᠵᠦ ᠮᠥᠷᠭᠥᠭᠰᠡᠨ ᠶᠦᠮ᠃ ᠡᠵᠢ ᠨᠢ ᠠᠮᠢᠳᠤ ᠠᠬᠤᠢ ᠳ᠋ᠠᠭᠠᠨ ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶ᠋ᠢᠨ ᠬᠥᠪᠡᠭᠦᠨ ᠳ᠋ᠦ᠍ ᠮᠥᠷᠭᠥᠬᠦ ᠶ᠋ᠢ ᠬᠦᠰᠡᠵᠦ ᠪᠠᠢᠵᠠᠢ᠃ ᠭᠠᠢᠳᠠᠪ ᠬᠥᠪᠡᠭᠦᠨ ᠡᠬᠡ ᠶ᠋ᠢᠨ ᠲᠤᠢᠯ ᠤ᠋ᠨ ᠬᠦᠰᠡᠯ ᠢ᠋ ᠭᠦᠢᠴᠡᠭᠡᠪᠡ᠃ ᠲᠡᠭᠡᠭᠡᠳ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠤ᠋ ᠳᠡᠷᠭᠡᠳᠡ ᠦᠯᠡᠳᠡᠵᠡᠢ᠃
— ᠴᠢ ᠪᠣᠷᠣᠭᠠᠨ ᠳ᠋ᠤ᠌ ᠳᠤᠷᠠᠲᠠᠢ ᠪᠤᠰᠤ ᠤᠤ? ᠭᠡᠵᠦ ᠭᠠᠯᠳᠠᠨ ᠢ᠋ ᠥᠭᠦᠯᠡᠬᠦ ᠳ᠋ᠦ᠍ ᠭᠠᠢᠳᠠᠪ᠂
— ᠬᠤᠷᠠ ᠪᠣᠷᠣᠭᠠᠨ ᠳ᠋ᠤ᠌ ᠪᠢ ᠳᠤᠷᠠᠲᠠᠢ ᠭᠡᠵᠦ ᠬᠡᠯᠡᠯᠡ᠃
ᠤᠰᠤ ᠪᠠᠭᠠ ᠲᠠᠢ ᠰᠢᠷᠬᠡᠭ ᠨᠢ ᠦᠯᠦ ᠮᠡᠳᠡᠭᠳᠡᠮᠡ ᠪᠣᠷᠣᠭᠠᠨ ᠤ᠋ ᠮᠠᠨᠠᠨ ᠪᠢᠲᠡᠭᠦᠦ ᠪᠦᠷᠬᠦᠵᠡᠢ᠃ ᠣᠢᠷᠠᠬᠠᠨ ᠤ᠋ ᠬᠡᠢᠳ᠂ ᠰᠦᠮᠡ ᠳᠤᠭᠠᠩ ᠴᠥᠮ ᠮᠠᠨᠠᠨ ᠳ᠋ᠤ᠌ ᠵᠢᠪᠵᠡᠢ᠃ ᠬᠣᠯᠠ ᠠᠯᠤᠰ ᠲᠤ᠌ ᠲᠦᠩᠬᠦᠢᠨ ᠪᠠᠢᠳᠠᠭ ᠴᠠᠰᠤᠲᠤ ᠥᠨᠳᠥᠷ ᠠᠭᠤᠯᠠᠰ ᠲᠩᠷᠢ ᠶ᠋ᠢᠨ ᠬᠠᠮᠢᠭᠠ ᠨᠢᠭᠡ ᠲᠡᠢ ᠡᠴᠡ ᠨᠢᠳᠦᠨ ᠳ᠋ᠦ᠍ ᠬᠠᠷᠠᠭᠳᠠᠨᠠ᠃
ᠭᠠᠯᠳᠠᠨ ᠯᠠᠮᠠ《ᠨᠠᠮᠠᠶ᠋ᠢ ᠪᠤᠳᠠᠩ ᠳᠤᠮᠳᠠ ᠡᠭᠦᠷᠢᠳᠡ ᠦᠯᠡᠳᠡᠭᠡᠬᠦ ᠨᠢ ᠳᠠᠯᠠᠢ ᠯᠠᠮᠠ ᠳ᠋ᠤ᠌ ᠲᠠᠭᠠᠯᠠᠯ ᠲᠠᠢ ᠪᠣᠯᠤᠯᠲᠠᠢ᠃ ᠳᠠᠯᠠᠢ ᠯᠠᠮᠠ ᠨᠠᠳᠠ ᠡᠴᠡ ᠶᠠᠭᠤ ᠬᠦᠰᠡᠨᠡ᠃ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠢ᠋ ᠬᠦᠷᠳᠦᠨ ᠳ᠋ᠦ᠍ ᠣᠷᠣᠭᠤᠯᠵᠤ ᠥᠪᠡᠷ ᠦ᠋ᠨ ᠳᠤᠷᠠ ᠪᠠᠷ ᠡᠷᠭᠢᠭᠦᠯᠵᠦ ᠪᠠᠢᠬᠤ ᠶ᠋ᠢ ᠲᠥᠪᠡᠳ ᠦ᠋ᠳ ᠰᠠᠨᠠᠭᠠᠷᠬᠠᠪᠠᠴᠤ ᠪᠦᠲᠦᠰᠢ ᠦᠭᠡᠢ᠃ ᠶᠠᠪᠠᠭᠠᠨ ᠰᠢᠷᠡᠭᠡᠨ ᠳᠡᠭᠡᠷᠡᠬᠢ ᠬᠦᠷᠳᠦ ᠶᠡᠷᠦ ᠳ᠋ᠡᠭᠡᠨ ᠬᠤᠷᠤᠭᠤᠨ ᠤ᠋ ᠦᠵᠦᠭᠦᠷ ᠲᠦ᠍ ᠡᠷᠭᠢᠯᠳᠦᠳᠡᠭ ᠪᠤᠰᠤ ᠤᠤ? ᠬᠦᠷᠳᠦ ᠶ᠋ᠢ ᠵᠥᠪᠬᠡᠨ ᠨᠠᠷᠠ ᠵᠥᠪ ᠡᠷᠭᠢᠭᠦᠯᠳᠡᠭ᠃ ᠣᠷᠴᠢᠯᠠᠩ ᠤ᠋ᠨ ᠬᠦᠷᠳᠦ ᠨᠠᠷᠠ ᠪᠤᠷᠤᠭᠤ ᠡᠷᠭᠢᠬᠦ ᠪᠣᠯᠣᠮᠵᠢᠲᠠᠢ ᠴᠤ᠌ ᠨᠠᠷᠠ ᠵᠥᠪ ᠡᠷᠭᠢᠭᠦᠯᠳᠡᠭ᠃ ᠨᠠᠮᠠᠶ᠋ᠢ ᠶᠠᠭᠠᠬᠢᠵᠤ ᠡᠷᠭᠢᠭᠦᠯᠬᠦ ᠪᠣᠯ? ᠮᠢᠨᠦ ᠲᠣᠯᠣᠭᠠᠢ ᠬᠦᠷᠳᠦ ᠲᠡᠢ ᠢᠵᠢᠯᠢᠬᠡᠨ᠃ ᠵᠥᠪ ᠴᠤ᠌ ᠡᠷᠭᠢᠵᠦ ᠪᠣᠯᠤᠨᠠ᠂ ᠪᠤᠷᠤᠭᠤ ᠴᠤ᠌ ᠡᠷᠭᠢᠵᠦ ᠪᠣᠯᠤᠨᠠ᠃ ᠵᠡᠭᠦᠨᠭᠠᠷ ᠨᠠᠮᠠᠶ᠋ᠢ ᠶᠠᠭᠠᠬᠢᠵᠤ ᠡᠷᠭᠢᠭᠦᠯᠦᠨᠡ ᠪᠢ ᠲᠡᠭᠡᠵᠦ ᠡᠷᠭᠢᠨᠡ᠃ ᠪᠤᠷᠬᠠᠨ ᠤ᠋ ᠰᠤᠷᠭᠠᠯ ᠳ᠋ᠤ᠌ ᠬᠡᠬᠡᠷᠡᠪᠡ᠃ ᠳᠣᠲᠣᠭᠠᠳᠤ ᠨᠢᠳᠦ ᠨᠡᠭᠡᠭᠡᠭᠳᠡᠯᠡ᠃ ᠮᠠᠨᠠᠨ ᠪᠤᠳᠠᠩ ᠠᠷᠢᠯᠬᠤ ᠳ᠋ᠤ᠌ ᠠᠯᠤᠰ ᠤ᠋ᠨ ᠠᠭᠤᠯᠠ ᠲᠣᠳᠣᠷᠠᠳᠠᠭ ᠰᠢᠭ᠋ ᠪᠢ ᠳᠣᠲᠣᠭᠠᠳᠤ ᠮᠠᠨᠠᠨ ᠡᠴᠡ ᠪᠠᠨ ᠰᠠᠯᠪᠠ᠃ ᠳᠠᠯᠠᠢ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠠᠴᠢ ᠶ᠋ᠢ ᠬᠠᠷᠢᠭᠤᠯᠤᠨᠠ᠃ ᠴᠣᠬᠣᠮ ᠶᠠᠭᠠᠬᠢᠵᠤ᠂᠂᠂᠂》 ᠭᠡᠮᠡᠨ ᠪᠣᠳᠣᠨᠠ᠃ ᠵᠥᠭᠡᠯᠡᠨ ᠲᠤᠨᠤᠳᠠᠰᠤᠯᠢᠭ ᠪᠣᠷᠣᠭᠠᠨ ᠤ᠋ ᠰᠢᠷᠬᠡᠭ ᠪᠦᠷᠢ ᠪᠤᠷᠬᠠᠨ ᠤ᠋ ᠬᠣᠲᠠ ᡀᠠᠰᠠ ᠶ᠋ᠢᠨ ᠳᠡᠭᠡᠷᠡ ᠵᠦᠰᠡᠷᠡᠵᠦ ᠪᠠᠢᠯᠠ᠃
— ᠬᠤᠪᠢᠯᠭᠠᠨ ᠯᠠᠮᠠᠳᠠᠨ ᠬᠣᠭᠣᠯᠠ ᠪᠠᠨ ᠵᠣᠭᠣᠭᠯᠠᠨᠠ ᠤᠤ?
— ᠨᠠᠮᠠᠶ᠋ᠢ ᠰᠢᠷᠡᠭᠡᠲᠦ ᠯᠠᠮᠠ ᠶ᠋ᠢᠨ ᠰᠠᠭᠤᠳᠠᠯ ᠳ᠋ᠤ᠌ ᠵᠠᠯᠠᠬᠤ ᠪᠣᠯᠤᠯᠲᠠᠢ᠃
— ᠪᠤᠷᠬᠠᠨ ᠮᠢᠨᠢ᠂᠂᠂᠂
— ᠭᠠᠢᠳᠠᠪ ᠴᠢ ᠪᠤᠷᠬᠠᠨ ᠡᠴᠡ ᠶᠠᠭᠤ ᠭᠤᠶᠤᠪᠠ? ᠥᠷᠥᠰᠢᠶᠡᠯ ᠭᠤᠶᠤᠪᠠ ᠤᠤ?
— ᠪᠤᠷᠬᠠᠨ ᠬᠠᠮᠢᠭᠠ ᠪᠠᠢᠳᠠᠭ ᠶᠤᠮ ᠪᠣᠢ? ᠪᠤᠷᠬᠠᠨ ᠪᠢᠳᠡᠨ ᠢ᠋ ᠥᠷᠥᠰᠢᠶᠡᠨᠡ᠃
— ᠬᠥᠬᠡ ᠲᠩᠷᠢ ᠳ᠋ᠦ᠍᠂᠂᠂᠂!
— ᠲᠩᠷᠢ ᠮᠢᠨᠢ᠂᠂᠂᠂
ᠬᠣᠱᠤᠳ ᠮᠠᠶᠢᠭ ᠤ᠋ᠨ ᠥᠷᠭᠡᠨ ᠡᠮᠵᠢᠶᠡᠷᠢ ᠲᠡᠢ᠂ ᠴᠠᠢᠪᠤᠷ ᠲᠡᠷᠯᠢᠭ ᠡᠮᠦᠰᠦᠭᠰᠡᠨ ᠭᠠᠢᠳᠠᠪ᠂ ᠬᠤᠪᠢᠯᠭᠠᠨ ᠪᠠᠭᠰᠢ ᠡᠴᠡ ᠨᠢᠭᠡ ᠠᠯᠬᠤᠮ ᠮᠠᠨᠠᠨᠲᠤ ᠲᠩᠷᠢ ᠶ᠋ᠢᠨ ᠳᠣᠣᠷᠠ ᠵᠣᠭᠰᠣᠨᠠ᠃
— ᠲᠩᠷᠢ ᠴᠢᠮᠠᠶ᠋ᠢ ᠢᠪᠡᠭᠡᠭ᠃
— ᠬᠤᠪᠢᠯᠭᠠᠨ ᠪᠠᠭᠰᠢ ᠮᠢᠨᠢ᠂ ᠭᠢᠯᠠᠢᠯᠠ᠃
— ᠲᠥᠪᠡᠳ ᠦ᠋ᠨ ᠠᠭᠤᠯᠠᠨ ᠳ᠋ᠤ᠌ ᠪᠣᠷᠣᠭᠠ ᠣᠷᠣᠵᠤ ᠪᠠᠢᠨᠠ᠃
— ᠵᠢᠯ ᠦ᠋ᠨ ᠳᠥᠷᠪᠡᠨ ᠤᠯᠠᠷᠢᠯ ᠳ᠋ᠤ᠌ ᠪᠣᠷᠣᠭᠠ ᠴᠠᠰᠤ ᠲᠠᠢ ᠪᠠᠢᠬᠤ ᠶᠤᠮ᠃ ᠬᠤᠷᠠ ᠶ᠋ᠢᠨ ᠳᠠᠯᠠᠯᠭᠠ ᠲᠠᠢ ᠭᠠᠵᠠᠷ᠂᠂᠂᠂
— ᠣᠢᠷᠠᠳ ᠨᠤᠲᠤᠭ ᠡᠴᠡ ᠮᠥᠷᠭᠥᠯᠴᠢᠳ ᠶᠠᠪᠤᠨᠠ ᠤᠤ?
— ᠵᠥᠩᠳᠡᠭᠡᠨ᠃ ᠤᠷᠢᠳᠤ ᠰᠥᠨᠢ ᠲᠠᠪᠤᠨ ᠮᠠᠢᠬᠠᠨ ᠲᠠᠢ ᠮᠥᠷᠭᠥᠯᠴᠢᠳ ᠪᠠᠭᠤᠳᠠᠯᠯᠠᠭᠰᠠᠨ ᠪᠠᠢᠨᠠ ᠯᠠᠢ᠃ ᠴᠠᠭᠠᠳᠤ ᠰᠥᠨᠢ ᠭᠤᠷᠪᠠᠨ ᠮᠠᠢᠬᠠᠨ ᠪᠣᠰᠤᠭᠰᠠᠨ᠁
— ᠪᠦᠷᠢᠯᠦᠭᠡᠴᠢ ᠶ᠋ᠢᠨ ᠭᠠᠵᠠᠷ ᠳᠡᠭᠡᠷᠡ ᠬᠣᠶᠠᠭᠤᠯᠠ ᠪᠠᠨ ᠣᠴᠢᠨᠠ᠃
— ᠡᠵᠢ ᠮᠢᠨᠢ ᠁
— ᠪᠢ ᠡᠵᠢ ᠪᠡᠨ ᠪᠡᠭᠲᠡᠷᠡᠲᠡᠯᠡ ᠰᠠᠨᠠᠳᠠᠭ ᠰᠢᠦ᠃ ᠰᠠᠨᠠᠬᠤ ᠳ᠋ᠤ᠌ ᠰᠡᠷᠡᠳᠡᠭ ᠶᠤᠮ ᠠ᠋᠃ ᠭᠠᠢᠳᠠᠪ ᠮᠢᠨᠢ᠂ ᠬᠠᠲᠠᠭᠤ ᠪᠠᠢ ᠁ ᠬᠣᠷᠸᠠ ᠪᠥᠭᠡᠷᠡᠩᠬᠡᠢ ᠰᠢᠦ ᠳᠡ᠃
ᠪᠣᠷᠣᠭᠠ ᠴᠠᠰᠤᠨ ᠤ᠋ ᠪᠤᠳᠠᠩ ᠳᠤᠮᠳᠠ ᠣᠷᠣᠰᠢᠬᠤ ᠲᠥᠪᠡᠳ ᠦ᠋ᠨ ᠥᠨᠳᠥᠷ ᠠᠭᠤᠯᠠᠰ ᠤ᠋ᠨ ᠴᠢᠨᠠᠳᠤ ᠭᠠᠯᠳᠠᠨ ᠬᠤᠪᠢᠯᠭᠠᠨ᠂ ᠭᠠᠢᠳᠠᠪ ᠬᠣᠶᠠᠷ ᠰᠡᠳᠬᠢᠯ ᠢ᠋ᠶ᠋ᠡᠨ ᠪᠡᠯᠴᠢᠭᠡᠨ ᠪᠠᠢᠬᠤ ᠳ᠋ᠤ᠌ ᠪᠤᠳᠠᠯᠠᠩ ᠰᠦᠮᠡ ᠶ᠋ᠢᠨ ᠬᠠᠰ ᠡᠷᠳᠡᠨᠢ ᠶ᠋ᠢᠨ ᠬᠠᠨᠠ᠂ ᠰᠦᠮᠡ ᠶ᠋ᠢᠨ ᠳᠡᠭᠡᠪᠦᠷ ᠳᠡᠭᠡᠷᠡ ᠮᠥᠩᠬᠡᠳᠡ ᠵᠣᠭᠰᠣᠬᠤ ᠡᠷᠡ ᠡᠮᠡ ᠪᠣᠳᠢ ᠭᠥᠷᠥᠭᠡᠰᠦ ᠠᠮᠤᠭᠤᠯᠠᠩ ᠵᠠᠯᠠᠷᠠᠬᠤ ᠪᠥᠯᠥᠭᠡ᠃ ᠣᠷᠣᠢ ᠳ᠋ᠠᠭᠠᠨ ᠴᠠᠰᠤ ᠲᠠᠢ ᠱᠣᠪᠬᠣ ᠱᠣᠪᠬᠣ ᠠᠭᠤᠯᠠᠰ ᠤ᠋ᠨ ᠳᠦᠷᠰᠦ ᠮᠠᠨᠠᠨ ᠳᠤᠮᠳᠠ ᠲᠣᠳᠣᠷᠠᠨᠠ᠃
ᠪᠤᠳᠠᠯᠠᠩ ᠪᠣᠯ ᡀᠠᠰᠠ ᠶ᠋ᠢᠨ ᠬᠠᠮᠤᠭ ᠤ᠋ᠨ ᠲᠣᠮᠣ᠂ ᠬᠠᠮᠤᠭ ᠤ᠋ᠨ ᠰᠦᠷᠯᠢᠭ ᠬᠡᠢᠳ ᠪᠥᠭᠡᠳ ᠪᠤᠷᠬᠠᠳ ᠢ᠋ ᠰᠢᠩᠭᠡᠭᠡᠭᠰᠡᠨ ᠣᠶᠤᠨ ᠤᠬᠠᠭᠠᠨ ᠤ᠋ ᠠᠰᠤᠷᠤ ᠲᠣᠭᠰᠢᠨ ᠣᠷᠣᠨ ᠪᠥᠯᠥᠭᠡ᠃
ᠵᠠᠯᠠᠭᠤ ᠬᠠᠯᠠᠭᠤᠨ ᠨᠠᠰᠤᠨ ᠳ᠋ᠤ᠌ ᠤᠴᠠᠷᠠᠭᠰᠠᠨ ᠬᠤᠪᠢᠯᠭᠠᠨ ᠯᠠᠮᠠ᠂ ᠭᠠᠶ᠋ᠢᠲᠠᠪ ᠬᠣᠶᠠᠷ ᠤ᠋ᠨ ᠬᠣᠢᠴᠢ ᠶ᠋ᠢᠨ ᠮᠥᠷ ᠶᠠᠮᠠᠷᠬᠠᠨ ᠪᠣᠯᠬᠤ ᠶ᠋ᠢ ᠪᠤᠷᠬᠠᠨ ᠡᠴᠡ ᠬᠡᠨ ᠠᠰᠠᠭᠤᠬᠤ ᠪᠢᠯᠡ᠃ ᠪᠤᠷᠬᠠᠨ ᠬᠥᠮᠦᠨ ᠲᠡᠢ ᠠᠳᠠᠯᠢᠬᠠᠨ ᠤᠬᠢᠯᠠᠳᠠᠭ ᠪᠣᠯ ᠤᠬᠢᠯᠠᠨᠠ᠂ ᠳᠠᠭᠤᠯᠠᠳᠠᠭ ᠪᠣᠯ ᠳᠠᠭᠤᠯᠠᠨᠠ᠃ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠭᠠᠳᠠᠭᠠᠯᠠᠭᠰᠠᠭᠠᠷ ᠤᠳᠠᠪᠠ᠃ ᠪᠢᠲᠡᠭᠦᠦ ᠮᠠᠨᠠᠨ ᠰᠡᠢᠷᠡᠭᠵᠢᠨ ᠵᠠᠮᠬᠠᠷᠠᠵᠤ ᠡᠷᠡ ᠡᠮᠡ ᠪᠣᠳᠢ ᠭᠥᠷᠦᠭᠡᠰᠦᠨ ᠦ᠌ ᠴᠢᠬᠢ ᠰᠣᠷᠲᠣᠰᠬᠢᠨ ᠬᠥᠳᠡᠯᠬᠦ ᠶ᠋ᠢ ᠭᠠᠯᠳᠠᠨ ᠭᠡᠨᠡᠳᠲᠡ ᠮᠡᠳᠡᠪᠡ᠃ ᠡᠭᠦᠯᠡ ᠮᠠᠨᠠᠨ ᠠᠷᠢᠯᠤᠭᠰᠠᠨ ᠬᠣᠢᠨᠠ ᠪᠣᠳᠢ ᠭᠥᠷᠥᠭᠡᠰᠦ ᠪᠤᠷᠬᠠᠨ ᠤ᠋ ᠦᠭᠡ ᠶ᠋ᠢ ᠬᠡᠪ ᠭᠡᠨᠡᠳᠲᠡ ᠭᠠᠯᠳᠠᠨ ᠳ᠋ᠤ᠌ ᠳᠣᠭᠣᠯᠭᠠᠨᠠ ᠤᠤ?
ᠳᠠᠯᠠᠪᠴᠢ ᠨᠢ ᠪᠤᠭᠤᠷᠤᠯ ᠪᠦᠷᠭᠦᠳ ᠲᠩᠷᠢ ᠳ᠋ᠦ᠍ ᠳᠡᠭᠦᠯᠢᠨᠡ᠃ ᠰᠦᠮᠡ ᠶ᠋ᠢᠨ ᠪᠤᠳᠠᠭᠠ ᠲᠠᠷᠢᠶᠠᠨ ᠳ᠋ᠤ᠌ ᠡᠷᠭᠢᠯᠳᠦᠨ ᠬᠤᠢᠯᠠᠷᠠᠬᠤ ᠬᠥᠬᠡ ᠪᠤᠬᠠ᠂ ᠲᠤᠷᠯᠢᠶᠠᠬᠠ᠂ ᠪᠣᠯᠵᠣᠮᠣᠷ ᠲᠡᠷᠢᠭᠦᠲᠡᠨ ᠲᠠᠯᠠ ᠲᠠᠯᠠ ᠲᠠᠢᠰᠢ ᠪᠠᠨ ᠰᠦᠷᠦᠭᠯᠡᠨ ᠨᠢᠰᠴᠦ ᠠᠯᠠᠭᠠ ᠪᠣᠯᠤᠯᠠ᠃
ᠭᠠᠯᠳᠠᠨ ᠬᠤᠪᠢᠯᠭᠠᠨ ᠪᠣᠯᠤᠨ ᠪᠤᠳᠠᠯᠠᠩ ᠬᠡᠢᠳ ᠦ᠋ᠨ ᠳᠡᠭᠡᠭᠦᠷ ᠪᠦᠷᠭᠦᠳ ᠡᠷᠭᠢᠨᠡ᠂ ᠪᠤᠭᠤᠷᠤᠯ ᠳᠠᠯᠠᠪᠴᠢ ᠪᠠᠨ ᠳᠡᠪᠢᠨᠡ᠃ ᠪᠦᠷᠭᠦᠳ ᠲᠩᠷᠢ ᠶ᠋ᠢᠨ ᠦᠯᠦ ᠦᠵᠡᠭᠳᠡᠬᠦ ᠵᠠᠢ ᠬᠢᠵᠠᠭᠠᠷ ᠦᠭᠡᠢ ᠬᠣᠯᠠᠬᠢ ᠴᠢᠯᠥᠭᠡᠨ ᠡᠴᠡ ᠢᠷᠡᠵᠡᠢ᠃ ᠠᠯᠲᠠᠢ ᠶ᠋ᠢᠨ ᠪᠦᠷᠭᠦᠳ ᠳᠠᠯᠠᠪᠴᠢ ᠪᠠᠨ ᠡᠴᠡᠭᠡᠨ ᠶᠠᠭᠤᠨ ᠳ᠋ᠤ᠌ ᠢᠷᠡᠨᠡᠮ᠃ ᠨᠠᠮᠤᠷ ᠤ᠋ᠨ ᠰᠡᠷᠢᠭᠦᠨ ᠤᠨᠠᠬᠤ ᠳᠥᠭᠥᠭᠰᠡᠨ ᠦᠶᠡ ᠳ᠋ᠦ᠍ ᠪᠦᠷᠭᠦᠳ ᠦ᠋ᠨ ᠲᠤᠭᠤᠯᠬᠤ ᠭᠡᠮ ᠤᠷᠲᠤ ᠪᠢᠯᠡ᠃ ᠴᠣᠷᠣᠰ ᠣᠪᠣᠭ ᠤ᠋ᠨ ᠪᠦᠷᠭᠦᠳ ᠬᠠᠭᠠᠨ ᠤ᠋ ᠣᠢᠷᠠ ᠳᠣᠲᠣᠨᠣ ᠬᠥᠮᠦᠰ ᠦ᠋ᠨ ᠠᠴᠢᠶᠠ ᠬᠥᠰᠬᠡ ᠶ᠋ᠢ ᠳᠠᠭᠠᠳᠠᠭ ᠪᠤᠰᠤ ᠤᠤ? ᠬᠦᠵᠦᠭᠦᠨ ᠳ᠋ᠡᠭᠡᠨ ᠭᠠᠯᠲᠤ ᠤᠷᠭᠤᠮᠠᠯ ᠤ᠋ᠨ ᠰᠦᠯᠵᠢᠶᠡ ᠤᠶᠠᠭᠤᠯᠵᠤ ᠢᠷᠡᠭᠦᠯ ᠲᠤᠯᠤᠯᠳᠤᠭᠠᠨ ᠢ᠋ ᠬᠡᠷᠡᠯᠳᠦᠭᠦᠯᠳᠡᠭ ᠪᠦᠷᠭᠦᠳ ᡀᠠᠰᠠ ᠳᠡᠭᠡᠭᠦᠷ ᠡᠷᠭᠢᠯᠳᠦᠵᠦ ᠪᠠᠢᠨᠠ᠃ ᠪᠣᠷᠣᠭᠠ᠂ ᠴᠠᠰᠤ ᠣᠷᠣᠬᠤ ᠪᠦᠷᠢ ᠳ᠋ᠦ᠍ ᠭᠠᠯᠳᠠᠨ ᠢ᠋ ᠲᠣᠭᠣᠷᠢᠵᠤ ᠢᠷᠣᠠ ᠵᠦᠩ ᠡᠭᠦᠰᠳᠡᠭ᠃ ᠲᠡᠷᠡ ᠬᠦ᠌ ᠢᠷᠣᠠ ᠵᠦᠩ ᠦ᠋ᠨ ᠰᠤᠷᠠᠭ ᠢ᠋ ᠳᠣᠭᠣᠯᠭᠠᠬᠤ ᠪᠠᠷ ᠪᠦᠷᠭᠦᠳ ᠢᠷᠡᠳᠡᠭ ᠶᠤᠮᠰᠠᠨᠵᠠᠢ᠃
ᠨᠠᠢ᠍ᠮᠠ
ᠴᠠᠰᠤ ᠮᠥᠰᠥᠨ ᠦ᠌ ᠬᠥᠯ ᠳ᠋ᠦ᠍ ᠭᠠᠢᠳᠡᠪ ᠲᠡᠢ ᠣᠴᠢᠪᠠ᠃ ᠲᠡᠨᠳᠡ ᠳᠡᠷᠡ ᠮᠡᠲᠦ ᠬᠠᠪᠲᠠᠭᠠᠢ ᠴᠢᠯᠠᠭᠤ ᠪᠠᠢᠯᠠ᠃ ᠴᠢᠯᠠᠭᠤᠨ ᠳᠡᠭᠡᠷᠡ ᠳᠠᠷᠤᠬᠤ ᠳ᠋ᠤ᠌ ᠬᠦᠢᠲᠡᠨ ᠠᠵᠢ᠃ ᠭᠠᠢᠳᠡᠪ ᠰᠥᠬᠥᠷᠡᠵᠦ ᠰᠠᠭᠤᠭᠠᠳ᠂
— ᠡᠵᠢ ᠮᠢᠨᠢ ᠲᠠ᠂ ᠬᠠᠮᠢᠭᠠᠰᠢ ᠣᠳᠪᠠ ᠭᠡᠮᠡᠨ ᠥᠮᠥᠯᠵᠡᠨ ᠡᠬᠢᠯᠡᠪᠡ᠃
— ᠪᠤᠷᠬᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠣᠴᠢᠭᠰᠠᠨ ᠭᠡᠵᠦ ᠭᠠᠯᠳᠠᠨ ᠯᠠᠮᠠ ᠥᠭᠦᠯᠡᠪᠡ᠃
— ᠡᠵᠢ ᠶ᠋ᠢᠨ ᠮᠢᠨᠢ ᠰᠦᠨᠡᠰᠦ ᠲᠠᠢᠪᠤᠰᠢᠷᠠᠬᠤ ᠪᠣᠯᠤᠭᠠᠰᠠᠢ᠃ ᠪᠢ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠦᠰᠡᠯ ᠢ᠋ ᠭᠦᠢᠴᠡᠭᠡᠭᠰᠡᠨ᠃ ᠡᠵᠢ ᠮᠢᠨᠢ ᠨᠠᠳᠠ《ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶ᠋ᠢᠨ ᠬᠥᠪᠡᠭᠦᠨ ᠳ᠋ᠦ᠍ ᠮᠥᠷᠭᠥᠬᠦ ᠶᠤᠮᠰᠠᠨ᠃ ᠪᠤᠰᠤᠳ ᠨᠢ ᠶᠠᠭᠠᠬᠢᠬᠤ ᠪᠣᠢ? ᠲᠡᠷᠡ ᠬᠤᠪᠢᠯᠭᠠᠨ ᠯᠠᠮᠠ ᠳ᠋ᠤ᠌ ᠭᠠᠭᠴᠠ ᠬᠥᠪᠡᠭᠡᠨ ᠢ᠋ᠶ᠋ᠡᠨ ᠳᠠᠭᠠᠳᠬᠠᠭᠠᠳ ᠨᠢᠳᠦ ᠠᠨᠢᠬᠤ ᠮᠢᠨᠢ ᠁ ᠭᠡᠮᠡᠨ ᠶᠠᠷᠢᠭᠰᠠᠭᠠᠷ ᠪᠠᠢᠭᠰᠠᠨ》 ᠭᠡᠮᠡᠨ ᠭᠠᠯᠳᠠᠨ ᠯᠠᠮᠠ ᠳ᠋ᠤ᠌ ᠴᠡᠭᠡᠵᠢᠨ ᠭᠦᠨ ᠳ᠋ᠦ᠍ ᠤᠳᠠᠲᠠᠯᠠ ᠬᠠᠳᠠᠭᠠᠯᠠᠭᠳᠠᠭᠰᠠᠨ ᠨᠠᠨᠳᠢᠨ ᠳᠤᠷᠠᠰᠤᠮᠵᠢ ᠶ᠋ᠢ ᠭᠠᠢᠳᠡᠪ ᠠᠭᠤᠳᠠᠯᠠᠪᠠ᠃ ᠬᠤᠪᠢᠯᠭᠠᠨ ᠯᠠᠮᠠ ᠨᠥᠬᠥᠷ ᠦ᠋ᠨ ᠬᠡᠯᠡᠭᠰᠡᠨ ᠢ᠋ ᠣᠢᠰᠢᠶᠠᠨ᠂
— ᠪᠤᠷᠬᠠᠨ ᠬᠥᠮᠦᠨ ᠳ᠋ᠦ᠍ ᠢᠲᠡᠭᠡᠳᠡᠭ ᠶᠦᠮ᠃ ᠬᠥᠮᠦᠨ ᠪᠤᠷᠬᠠᠨ ᠳ᠋ᠤ᠌ ᠢᠲᠡᠭᠡᠬᠦ ᠶᠣᠰᠣᠲᠠᠢ᠃ ᠪᠤᠷᠬᠠᠨ ᠡᠵᠢ ᠶ᠋ᠢᠨ ᠲᠠᠨᠢ ᠬᠦᠰᠡᠯ ᠢ᠋ ᠰᠣᠨᠣᠰᠤᠭᠰᠠᠨ ᠤᠴᠢᠷ ᠡᠴᠡ ᠬᠠᠷᠠᠩᠭᠤᠢ ᠰᠥᠨᠢ ᠴᠢ ᠨᠠᠮᠠᠶ᠋ᠢ ᠣᠯᠵᠤ ᠣᠴᠢᠭᠰᠠᠨ᠃ ᠬᠠᠷᠠᠩᠭᠤᠢ ᠪᠠᠢᠲᠤᠭᠠᠢ ᠭᠡᠭᠡᠨ ᠡᠳᠦᠷ ᠵᠥᠷᠢᠵᠦ ᠣᠳᠬᠤ ᠶ᠋ᠢ ᠬᠡᠨ ᠪᠠᠢᠭ ᠭᠡᠬᠦᠪ᠃ ᠪᠤᠷᠬᠠᠨ ᠤ᠋ ᠬᠡᠰᠢᠭ ᠬᠦᠷᠲᠡᠬᠦ ᠬᠤᠪᠢ ᠲᠠᠢ ᠪᠠᠢᠵᠠᠢ ᠭᠡᠵᠦ ᠭᠠᠢᠳᠠᠪ ᠲᠤ᠌ ᠬᠡᠯᠡᠪᠡ᠃
ᠯᠠᠮᠠ ᠶ᠋ᠢᠨ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠭᠠᠢᠳᠡᠪ ᠨᠢᠳᠦ ᠪᠡᠨ ᠠᠨᠢᠪᠠ᠃ ᠲᠡᠭᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠪᠤᠭᠤᠷᠤᠯ ᠰᠠᠨᠴᠢᠭ ᠲᠠᠢ᠂ᠳᠤᠬᠤᠨ ᠳ᠋ᠠᠭᠠᠨ ᠥᠷᠴᠢᠯᠡᠭᠡᠰᠤᠳᠠᠢ᠂ ᠵᠢᠵᠢᠭᠡᠪᠲᠦᠷ ᠵᠤᠤᠪᠠᠩ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠡᠵᠢ ᠨᠢ ᠬᠠᠷᠠᠭᠳᠠᠬᠤ ᠪᠥᠯᠥᠭᠡ᠃ ᠡᠵᠢ ᠨᠢ ᠳᠦᠷᠢ ᠪᠡᠷ ᠢ᠋ᠶ᠋ᠡᠨ ᠪᠠᠢᠯᠠ᠃ ᠬᠥᠪᠡᠭᠦᠨ ᠳ᠋ᠡᠭᠡᠨ ᠲᠠᠯᠠᠷᠬᠠᠬᠤ ᠠᠵᠢ᠃ ᠡᠵᠢ ᠶ᠋ᠢᠨ ᠬᠢᠨᠢ ᠨᠢᠳᠦᠨ ᠳ᠋ᠦ᠍ ᠬᠠᠢᠷᠠ ᠡᠨᠡᠷᠢᠯ ᠬᠤᠷᠠᠵᠠᠢ᠃ ᠬᠥᠪᠡᠭᠦᠨ ᠳ᠋ᠡᠭᠡᠨ ᠲᠠᠯᠠᠷᠬᠠᠨ ᠪᠣᠢ ᠡᠵᠢ ᠨᠢ《ᠬᠥᠮᠦᠨ ᠦ᠌ ᠪᠤᠶᠠᠨ᠂ ᠬᠤᠳᠳᠤᠭ ᠤ᠋ᠨ ᠤᠰᠤ ᠬᠣᠶᠠᠷ ᠬᠡᠮᠵᠢᠶᠡ ᠲᠡᠢ ᠶᠦᠮ ᠭᠡᠨᠡ ᠯᠠᠢ ᠨᠢᠭᠡ ᠪᠣᠯ ᠳᠦᠭᠦᠷᠡᠩ ᠪᠠᠢᠳᠠᠭ᠃ ᠨᠢᠭᠡ ᠪᠣᠯ ᠳᠤᠮᠳᠠᠭᠤᠷ ᠪᠠᠢᠳᠠᠭ᠃ ᠮᠢᠨᠦ ᠬᠥᠪᠡᠭᠦᠨ ᠦ᠌ ᠪᠤᠶᠠᠨ ᠤ᠋ ᠰᠠᠪᠠ ᠳᠦᠭᠦᠷᠡᠩ ᠪᠣᠯᠲᠤᠭᠠᠢ᠃ ᠬᠤᠪᠢᠯᠭᠠᠨ ᠯᠠᠮᠠ ᠶ᠋ᠢᠨ ᠳᠡᠷᠭᠡᠳᠡ ᠡᠴᠡ ᠬᠣᠯᠠᠳᠴᠤ ᠪᠤᠯᠠᠬᠤ ᠦᠭᠡᠢ ᠰᠢᠦ᠃ ᠡᠨᠡ ᠶᠡᠬᠡ ᠬᠥᠮᠦᠨ ᠦ᠌ ᠪᠤᠶᠠᠨ ᠬᠤᠲᠤᠭ ᠨᠢ ᠴᠠᠭᠯᠠᠰᠢ ᠦᠭᠡᠢ ᠪᠢᠵᠡ ᠠ᠋》 ᠭᠡᠮᠡᠨ ᠥᠭᠦᠯᠡᠬᠦ ᠶ᠋ᠢ ᠭᠠᠢᠳᠠᠪ ᠴᠢᠬᠢ ᠪᠡᠷ ᠢ᠋ᠶ᠋ᠡᠨ ᠰᠣᠨᠣᠰᠴᠤ ᠨᠢᠳᠦ ᠪᠡᠨ ᠨᠡᠭᠡᠭᠡᠪᠡ᠃
ᠲᠡᠭᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠪᠣᠷᠣᠭᠠ ᠴᠠᠢᠷᠠᠭᠰᠠᠨ ᠱᠣᠪᠬᠣ ᠠᠭᠤᠯᠠᠰ᠂ ᠬᠠᠳᠠᠨ ᠬᠠᠯᠢᠯ᠂ ᠬᠡᠵᠢᠯᠡᠭᠦᠷ ᠵᠠᠮ ᠲᠠᠢ ᠬᠠᠳᠠ ᠠᠰᠬᠠ ᠦᠵᠡᠭᠳᠡᠨᠡ᠃ ᠡᠵᠢ ᠪᠡᠨ ᠪᠤᠷᠬᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠪᠠᠢᠭᠠ ᠳ᠋ᠤ᠌ ᠭᠠᠢᠳᠠᠪ ᠢᠲᠡᠭᠡᠪᠡ᠃ ᠱᠠᠮᠪᠠᠯᠠ ᠶ᠋ᠢᠨ ᠣᠷᠣᠨ ᠲᠥᠪᠡᠳ ᠦ᠋ᠨ ᠥᠨᠳᠥᠷ ᠠᠭᠤᠯᠠᠰ ᠤ᠋ᠨ ᠣᠷᠭᠢᠯ ᠲᠡᠷᠢᠭᠦᠨ ᠡᠴᠡ ᠥᠨᠳᠥᠷ᠂ ᠡᠭᠦᠯᠡ ᠡᠴᠡ ᠴᠠᠭᠠᠨᠠ ᠣᠳᠣᠳ ᠤ᠋ᠨ ᠳᠤᠮᠳᠠ ᠣᠷᠣᠰᠢᠳᠠᠭ ᠪᠤᠰᠤ ᠤᠤ? ᠳᠡᠭᠡᠳᠦ᠂ ᠳᠤᠮᠳᠠ᠂ ᠳᠣᠣᠷᠠᠲᠤ ᠲᠢᠪ ᠦ᠋ᠨ ᠳᠡᠭᠡᠷᠡ ᠨᠢ ᠱᠡᠮᠪᠡᠯᠡ ᠶ᠋ᠢᠨ ᠣᠷᠣᠨ ᠪᠠᠢᠳᠠᠭ ᠭᠡᠳᠡᠭ ᠲᠦ᠍ ᠭᠠᠢᠳᠠᠪ ᠢᠲᠡᠭᠡᠯ ᠲᠡᠢ ᠪᠠᠢᠯᠠ᠃
— ᠪᠤᠷᠬᠠᠨ ᠤ᠋ ᠣᠷᠣᠨ ᠬᠣᠯᠠ ᠪᠠᠢᠬᠤ ᠠ᠋ ᠁ ᠭᠡᠵᠦ ᠭᠠᠢᠳᠠᠪ ᠬᠡᠯᠡᠪᠡ᠃
— ᠪᠤᠷᠬᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠬᠥᠮᠦᠨ ᠵᠠᠶᠠᠭᠠᠳᠠᠨ ᠵᠥᠪᠬᠡᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠦᠷᠴᠦ ᠪᠣᠯᠤᠨᠠ ᠭᠡᠵᠦ ᠭᠠᠯᠳᠠᠨ ᠥᠭᠦᠯᠡᠪᠡ᠃
ᠶᠢᠰᠦ
— ᠲᠥᠪᠡᠳ ᠦ᠋ᠨ ᠴᠠᠰᠤᠲᠤ ᠠᠭᠤᠯᠠᠰ ᠤ᠋ᠨ ᠳᠤᠮᠳᠠ ᠠᠮᠤᠭᠤᠯᠠᠩ ᠲᠦᠩᠬᠦᠢᠬᠦ ᠣᠷᠳᠣᠨ ᠬᠡᠢᠳ ᠲᠦ᠍ ᠨᠢᠭᠡᠨ ᠨᠠᠰᠤ ᠶ᠋ᠢ ᠪᠠᠷᠠᠬᠤ ᠤᠤ? ᠪᠤᠶᠠᠨ ᠨᠣᠮ ᠤ᠋ᠨ ᠮᠥᠷ ᠬᠥᠭᠡᠭᠡᠭᠰᠡᠭᠡᠷ ᠬᠥᠮᠦᠨ ᠦ᠌ ᠠᠵᠤ ᠲᠥᠷᠥᠯ᠂ ᠬᠠᠢᠷᠠ ᠰᠡᠳᠬᠢᠯ᠂ ᠰᠢᠨᠤᠯ ᠲᠠᠴᠢᠶᠠᠯ ᠡᠴᠡ ᠲᠠᠰᠤᠷᠠᠵᠤ ᠰᠡᠳᠬᠢᠯ ᠢ᠋ᠶ᠋ᠡᠨ ᠵᠠᠰᠠᠵᠤ ᠣᠷᠣᠰᠢᠬᠤ ᠤᠤ? ᠲᠠᠷᠢᠬᠢᠨ ᠳ᠋ᠤ᠌ ᠦᠢ ᠲᠦᠮᠡᠨ ᠠᠰᠠᠭᠤᠯᠲᠠ ᠡᠷᠭᠢᠯᠳᠦᠵᠦ ᠬᠠᠷᠢᠭᠤ ᠨᠡᠬᠡᠭᠰᠡᠨ ᠦᠶᠡ ᠳ᠋ᠦ᠍ ᠬᠠᠲᠤᠨ ᠡᠬᠡ ᠮᠢᠨᠢ ᠣᠴᠢᠵᠤ ᠪᠢᠯᠡ ᠁ ᠭᠡᠮᠡᠨ ᠭᠠᠯᠳᠠᠨ ᠲᠡᠮᠳᠡᠭᠯᠡᠪᠡ᠃
ᠪᠤᠳᠠᠯᠠᠩ ᠬᠡᠢᠳ ᠦ᠋ᠨ ᠭᠡᠭᠡᠪᠴᠢ ᠪᠡᠷ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠰᠦᠮᠡ ᠶ᠋ᠢᠨ ᠭᠣᠷᠢᠮ ᠳ᠋ᠤ᠌ ᠬᠥᠰᠬᠡ ᠨᠡᠭᠦᠳᠡᠯ ᠬᠦᠪᠦᠷᠡᠨ ᠣᠷᠣᠵᠤ ᠢᠷᠡᠬᠦ ᠶ᠋ᠢ ᠬᠠᠷᠠᠯᠠ᠃ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠳᠡᠷᠭᠡᠳᠡ ᠭᠠᠯᠳᠠᠨ ᠵᠣᠭᠰᠣᠨᠠ᠃ ᠠᠶᠠᠭᠠᠴᠢ ᠯᠠᠮᠠ ᠭᠠᠳᠠᠨᠠ ᠡᠴᠡ ᠣᠷᠣᠵᠤ ᠢᠷᠡᠭᠡᠳ᠂
— ᠭᠠᠯᠳᠠᠨ ᠬᠤᠪᠢᠯᠭᠠᠨ ᠤ᠋ ᠬᠠᠲᠤᠨ ᠡᠬᠡ ᠢᠷᠡᠵᠡᠢ ᠁ ᠭᠡᠵᠦ ᠥᠴᠢᠪᠡ᠃
ᠭᠠᠯᠳᠠᠨ ᠬᠤᠪᠢᠯᠭᠠᠨ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠪᠣᠳᠣᠯᠭᠠᠰᠢᠷᠠᠩᠭᠤᠢ ᠨᠢᠳᠦ ᠤᠷᠤᠭᠤ ᠡᠷᠡᠭᠡᠯᠵᠡᠨ ᠬᠠᠷᠠᠪᠠ᠃
ᠳᠠᠯᠠᠢ ᠯᠠᠮᠠ 《ᠦᠷᠭᠦᠭᠡᠨ ᠳ᠋ᠡᠭᠡᠨ ᠬᠦᠯᠢᠶᠡᠵᠦ ᠠᠪ ᠁》 ᠭᠡᠮᠡᠨ ᠥᠭᠦᠯᠡᠪᠡ᠃ ᠳᠠᠯᠠᠢ ᠯᠠᠮᠠ ᠱᠠᠯᠠᠮᠠᠭᠠᠢᠬᠠᠨ ᠭᠠᠷᠴᠤ ᠣᠳᠪᠠ᠃
ᠤᠭ ᠡᠴᠡ ᠭᠠᠯᠳᠠᠨ ᠮᠡᠳᠡᠵᠦ ᠪᠠᠢᠵᠠᠢ᠃ ᠲᠩᠷᠢ ᠳ᠋ᠦ᠍ ᠲᠥᠷᠥᠭᠰᠡᠨ ᠬᠦᠷᠡᠩ ᠪᠦᠷᠭᠦᠳ ᠵᠠᠷ ᠳᠣᠭᠣᠯᠭᠠᠵᠤ ᠪᠠᠢᠭᠠ ᠶ᠋ᠢ ᠲᠡᠷᠡ ᠪᠡᠷ ᠭᠠᠳᠠᠷᠯᠠᠭᠰᠠᠨ ᠶᠤᠮ᠃ ᠲᠡᠷᠡ ᠪᠦᠷᠭᠦᠳ ᠭᠠᠯᠳᠠᠨ ᠢ᠋ ᠲᠠᠨᠢᠳᠠᠭ ᠪᠥᠭᠡᠳ ᠳᠠᠭᠠᠳᠠᠭ ᠪᠠᠢᠵᠠᠢ᠃ ᠶᠢᠰᠦᠨ ᠨᠠᠰᠤᠨ ᠳᠠᠭᠠᠨ ᠭᠠᠯᠳᠠᠨ ᠢ᠋ ᠴᠥᠪᠳᠡᠬᠦ ᠳ᠋ᠦ᠍ ᠬᠠᠲᠤᠨ ᠡᠬᠡ ᠲᠡᠢ ᠨᠢ ᠴᠣᠭ ᠲᠡᠷᠡ ᠪᠦᠷᠭᠦᠳ ᠢᠷᠡᠭᠰᠡᠨ ᠪᠢᠯᠡ᠃ ᠪᠦᠷᠭᠦᠳ ᠲᠩᠷᠢ ᠳ᠋ᠦ᠍᠂ ᠭᠠᠯᠳᠠᠨ ᠭᠠᠵᠠᠷ ᠲᠤ᠌ ᠪᠡᠶᠡ ᠪᠡᠶᠡ ᠪᠡᠨ ᠦᠭᠡᠢᠯᠡᠨ ᠬᠠᠷᠠᠨᠠ᠃
《ᠪᠦᠷᠭᠦᠳ ᠭᠠᠵᠠᠷ ᠲᠤ᠌ ᠲᠥᠷᠥᠭᠰᠡᠨ ᠲᠤᠯᠠ ᠭᠠᠵᠠᠷ ᠲᠠᠭᠠᠨ ᠥᠲᠡᠯᠦᠨᠡ᠃ ᠪᠦᠷᠭᠦᠳ ᠲᠩᠷᠢ ᠳ᠋ᠦ᠍ ᠳᠡᠭᠦᠯᠢᠨ ᠨᠢᠰᠬᠦ ᠪᠥᠭᠡᠳ ᠭᠠᠵᠠᠷ ᠲᠤ᠌ ᠥᠳᠥ ᠪᠡᠨ ᠰᠠᠴᠤᠵᠤ ᠴᠠᠭ ᠢ᠋ ᠡᠯᠡᠭᠡᠨᠡ᠃ ᠭᠠᠯᠳᠠᠨ ᠯᠠᠮᠠ ᠶ᠋ᠢᠨ ᠬᠡᠢ ᠪᠡᠶᠡ ᠪᠦᠷᠭᠦᠳ ᠲᠡᠢ ᠴᠣᠭ ᠲᠩᠷᠢ ᠳ᠋ᠦ᠍ ᠡᠷᠭᠢᠵᠦ ᠪᠠᠢᠯᠠ᠃ ᠪᠦᠷᠭᠦᠳ ᠲᠤᠢᠯᠳᠠᠵᠤ ᠤᠨᠠᠯ ᠦᠭᠡᠢ ᠪᠡᠷ ᠠᠯᠲᠠᠢ ᠶ᠋ᠢᠨ ᠨᠢᠷᠤᠭᠤᠨ ᠡᠴᠡ ᠲᠥᠪᠡᠳ ᠦ᠋ᠨ ᠥᠨᠳᠥᠷᠯᠢᠭ ᠬᠦᠷᠲᠡᠯᠡᠬᠢ ᠲᠠᠯᠠ ᠬᠡᠭᠡᠷᠡ᠂ ᠭᠣᠪᠢ ᠴᠦᠯ ᠦ᠋ᠨ ᠪᠠᠷᠲᠠᠭᠠ ᠶ᠋ᠢ ᠳᠣᠭᠣᠯᠵᠠᠢ᠃ ᠨᠡᠭᠦᠳᠡᠯᠯᠡᠨ ᠶᠠᠪᠤᠭᠠ
ᠬᠥᠰᠬᠡ ᠶ᠋ᠢᠨ ᠬᠢᠨ ᠪᠦᠷᠭᠦᠳ ᠦ᠋ᠨ ᠢ᠋ᠶ᠋ᠡᠨ ᠬᠣᠭᠣᠯᠠ ᠶ᠋ᠢ ᠬᠣᠨᠣᠭᠯᠠᠬᠤ ᠳ᠋ᠠᠭᠠᠨ ᠬᠠᠮᠢᠭᠠ ᠨᠢᠭᠡᠨ ᠳ᠋ᠡᠭᠡᠨ ᠲᠠᠯᠪᠢᠨᠠ᠃
ᠪᠦᠷᠭᠦᠳ ᠬᠡᠭᠡᠷᠡ ᠶ᠋ᠢᠨ ᠵᠡᠷᠯᠢᠭ ᠠᠮᠢᠲᠠᠳ ᠢ᠋ ᠵᠣᠭᠣᠭᠯᠠᠬᠤ ᠪᠣᠯᠪᠠᠴᠤ ᠵᠠᠷᠢᠮ ᠳ᠋ᠠᠭᠠᠨ ᠠᠩᠴᠢᠳ ᠤ᠋ᠨ ᠪᠡᠯᠡᠳᠬᠡᠭᠰᠡᠨ ᠡᠪᠳᠡᠯ ᠴᠥᠪᠳᠡᠯ ᠮᠢᠬᠠ ᠪᠠᠷ ᠬᠣᠭᠣᠯᠠᠯᠠᠨᠠ᠃ ᠵᠤᠯᠠᠢ ᠳ᠋ᠠᠭᠠᠨ ᠴᠠᠭᠠᠨ ᠰᠤᠷ ᠲᠠᠢ ᠬᠦᠷᠡᠩ ᠪᠦᠷᠭᠦᠳ ᠲᠣᠭᠣᠰᠣᠲᠤ ᠵᠠᠮ ᠢ᠋ ᠲᠤᠭᠤᠯᠵᠤ ᠢᠷᠡᠭᠰᠡᠨ ᠪᠠᠢᠪᠠ᠃ ᠪᠦᠷᠭᠦᠳ ᠢᠷᠡᠭᠰᠡᠨ᠂ ᠪᠢ ᠶᠠᠪᠤᠨᠠ᠃ ᠭᠡᠬᠦ ᠳ᠋ᠡᠭᠡᠨ ᠬᠠᠲᠤᠨ ᠡᠬᠡ ᠮᠢᠨᠢ ᠪᠦᠷᠭᠦᠳ ᠦ᠋ᠨ ᠳᠠᠯᠠᠪᠴᠢ ᠴᠤᠴᠠᠬᠤ ᠭᠠᠵᠠᠷ ᠬᠦᠷᠦᠭᠡᠳ ᠢᠷᠡᠨᠡ ᠰᠢᠦ ᠳᠡ᠃ ᠡᠵᠢ ᠮᠢᠨᠢ ᠨᠠᠳᠠ ᠤᠷᠤᠭᠤ ᠰᠡᠳᠬᠢᠯ ᠵᠢᠷᠦᠬᠡ ᠪᠡᠷ ᠢ᠋ᠶ᠋ᠡᠨ ᠨᠡᠭᠦᠭᠰᠡᠭᠡᠷ ᠪᠠᠢᠳᠠᠭ ᠪᠢᠯᠡ᠃》
ᠡᠬᠡ ᠶ᠋ᠢ ᠪᠡᠨ ᠬᠡᠪ ᠭᠡᠨᠡᠳᠲᠡ ᠬᠦᠷᠴᠦ ᠢᠷᠡᠬᠦ ᠳ᠋ᠤ᠌ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠬᠥᠭᠡᠷᠴᠦ ᠳᠣᠭᠳᠣᠯᠬᠤ ᠦᠭᠡᠢ ᠪᠠᠢᠪᠠ᠃ ᠡᠨᠡ ᠦᠶᠡ ᠪᠣᠯ ᠮᠠᠰᠢ ᠡᠭᠡᠵᠢᠭᠲᠡᠢ ᠴᠠᠭ ᠪᠠᠢᠯᠠ᠃ ᠭᠠᠯᠳᠠᠨ ᠯᠠᠮᠠ ᠳᠣᠲᠣᠷ ᠭᠠᠯᠳᠠᠨ ᠲᠠᠢ ᠪᠠᠨ ᠢᠳᠡ ᠦᠵᠡᠯᠴᠡᠵᠦ᠂ ᠬᠡᠨ ᠬᠡᠨ ᠳ᠋ᠡᠭᠡᠨ ᠪᠠᠭᠤᠵᠤ ᠥᠭᠬᠦ ᠦᠭᠡᠢ ᠪᠠᠢᠵᠠᠢ᠃ ᠭᠠᠯᠳᠠᠨ ᠯᠠᠮᠠ ᠰᠢᠷᠡᠭᠡᠲᠦ ᠯᠠᠮᠠ ᠶ᠋ᠢᠨ ᠰᠠᠭᠤᠳᠠᠯ ᠳ᠋ᠤ᠌ ᠵᠠᠯᠠᠷᠠᠨᠠ᠃ ᠵᠠᠯᠠᠷᠠᠭᠠᠳ ᠬᠥᠮᠦᠨ ᠲᠥᠷᠥᠯ ᠡᠴᠡ ᠪᠡᠨ ᠡᠭᠦᠷᠢᠳᠡ ᠲᠠᠰᠤᠷᠠᠵᠤ ᠰᠠᠯᠬᠤ ᠶ᠋ᠢ ᠢᠷᠦᠭᠡᠬᠦ ᠦᠭᠡᠢ ᠪᠠᠢᠵᠠᠢ᠃
ᠠᠷᠪᠠ
ᠬᠤᠪᠢᠯᠭᠠᠨ ᠯᠠᠮᠠ ᠬᠡᠢᠳ ᠦ᠋ᠨ ᠭᠣᠷᠢᠮ ᠭᠣᠷᠲᠢᠭ ᠡᠴᠡ ᠳᠠᠪᠠᠵᠤ ᠠᠯᠬᠤᠭᠠᠳ ᠥᠷᠥᠭᠡᠨ ᠦ᠌ ᠪᠡᠨ ᠵᠦᠭ ᠬᠠᠷᠠᠪᠠ᠃ ᠠᠭᠤᠯᠠᠰ ᠤ᠋ᠨ ᠪᠤᠳᠠᠩᠲᠤ ᠲᠩᠷᠢ ᠭᠦᠨ ᠤᠢᠳᠬᠠᠷ ᠲᠤ᠌ ᠠᠪᠲᠠᠭᠰᠠᠨ ᠪᠠᠢᠪᠠ᠃ ᠪᠣᠷᠣᠭᠠᠨ ᠤ᠋ ᠪᠤᠳᠠᠩ ᠠᠷᠢᠯᠤᠭᠰᠠᠨ ᠴᠤ᠌ ᠭᠠᠵᠠᠷ ᠡᠴᠡ ᠶᠠᠪᠠᠭᠠᠨ ᠮᠠᠨᠠᠨ ᠳᠡᠭᠳᠡᠨ ᠬᠥᠭᠡᠷᠴᠡᠢ᠃ ᠠᠭᠤᠯᠠ ᠶ᠋ᠢᠨ ᠣᠷᠭᠢᠯ ᠳ᠋ᠤ᠌ ᠬᠦᠷᠴᠦ ᠡᠰᠡ ᠴᠢᠳᠠᠬᠤ ᠴᠠᠭᠠᠨ ᠮᠠᠨᠠᠨ ᠲᠡᠭᠦᠨ ᠦ᠌ ᠪᠠᠯ ᠬᠣᠷᠮᠣᠢ ᠪᠠᠷ ᠨᠠᠪᠰᠠᠢᠲᠠᠯᠠ ᠪᠠᠭᠤᠵᠠᠢ᠃ 《ᠨᠠᠳᠠ ᠶᠠᠭᠠᠬᠢᠭᠠᠳ ᠵᠣᠪᠠᠭᠤᠷᠢ ᠲᠥᠷᠥᠪᠡ᠃ ᠡᠬᠡ ᠮᠢᠨᠢ ᠢᠷᠡᠭᠰᠡᠨ ᠠᠲᠠᠯᠠ ᠰᠡᠳᠬᠢᠯ ᠶᠠᠭᠤᠨ ᠳ᠋ᠤ᠌ ᠡᠵᠡᠭᠦᠢᠷᠡᠪᠡ᠃ ᠬᠣᠷᠸᠠ ᠨᠠᠳᠠ ᠬᠠᠲᠠᠭᠤᠷᠠᠵᠤ ᠬᠠᠩᠬᠤ ᠦᠭᠡᠢ ᠪᠣᠯᠤᠯᠲᠠᠢ᠃ ᠮᠢᠬᠠ ᠴᠢᠰᠤᠨ ᠳ᠋ᠤ᠌ ᠲᠥᠷᠥᠭᠰᠡᠨ ᠬᠥᠮᠦᠨ ᠬᠣᠢᠨᠠ ᠵᠣᠪᠠᠯᠠᠩ ᠵᠢᠷᠭᠠᠯ ᠡᠴᠡ ᠠᠩᠭᠢᠳᠠ ᠣᠷᠣᠰᠢᠨᠠ ᠭᠡᠵᠦ ᠶᠠᠭᠤ ᠰᠠᠨ ᠪᠢᠯᠡ ? ᠡᠵᠢ ᠬᠦᠯᠢᠶᠡᠵᠦ ᠪᠠᠢᠭᠠ》 ᠭᠡᠵᠦ ᠪᠣᠳᠣᠭᠠᠳ ᠭᠠᠯᠳᠠᠨ ᠥᠷᠥᠭᠡ ᠤᠷᠤᠭᠤ ᠪᠠᠨ ᠶᠠᠪᠤᠯᠠ᠃ ᠲᠡᠭᠡᠭᠡᠳ ᠭᠠᠯᠳᠠᠨ ᠵᠣᠭᠰᠣᠪᠠ᠃
ᠭᠠᠯᠳᠠᠨ ᠥᠷᠥᠭᠡᠨ ᠤ᠋ ᠵᠦᠭ ᠬᠠᠷᠠᠵᠤ ᠲᠡᠭᠡᠨᠡᠭᠡᠯᠵᠡᠪᠡ᠃ ᠡᠬᠡ ᠨᠢ ᠭᠠᠯᠳᠠᠨ ᠢ᠋ ᠭᠡᠭᠡᠪᠴᠢ ᠪᠡᠷ ᠲᠠᠨᠢᠵᠤ ᠪᠠᠢᠪᠠ᠃
ᠭᠡᠭᠡᠪᠴᠢ ᠶ᠋ᠢᠨ ᠴᠠᠭᠠᠨᠠᠬᠢ ᠡᠬᠡ ᠶ᠋ᠢᠨ ᠴᠢᠷᠠᠢ ᠶ᠋ᠢ ᠭᠠᠯᠳᠠᠨ ᠬᠡᠪ ᠭᠡᠨᠡᠳᠲᠡ ᠬᠠᠷᠠᠯᠠ᠃ ᠡᠬᠡ ᠶ᠋ᠢᠨ ᠴᠢᠷᠠᠢ ᠰᠡᠭᠦᠳᠡᠷ ᠦᠭᠡᠢ ᠮᠡᠯᠲᠡᠢᠭᠰᠡᠨ ᠴᠠᠭᠠᠨ ᠠᠵᠢ᠃ ᠡᠬᠡ ᠶ᠋ᠢᠨ ᠨᠢᠳᠦ ᠭᠠᠩᠰᠠᠷᠠᠭᠰᠠᠨ ᠪᠠᠢᠪᠠ᠃ ᠲᠡᠷᠲᠡᠭᠡ ᠬᠣᠯᠠ ᠡᠴᠡ ᠬᠠᠲᠤᠨ ᠡᠬᠡ ᠨᠢ ᠪᠡᠶᠡ ᠰᠡᠳᠬᠢᠯ ᠢ᠋ᠶ᠋ᠡᠨ ᠴᠢᠯᠡᠭᠡᠵᠦ ᠢᠷᠡᠳᠡᠭ ᠨᠢ ᠭᠠᠯᠳᠠᠨ ᠤ᠋ ᠵᠢᠷᠦᠬᠡᠨ ᠳ᠋ᠤ᠌ ᠢᠷᠣᠠ ᠳᠠᠯᠠᠯᠤᠭᠰᠠᠨ ᠠᠵᠢ᠃ ᠲᠡᠷᠡ ᠬᠦ᠌ ᠢᠷᠣᠠ ᠶ᠋ᠢ ᠭᠠᠯᠳᠠᠨ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠶᠤᠮᠰᠠᠨᠵᠠᠢ᠃ ᠵᠡᠭᠦᠨᠭᠠᠷ ᠤ᠋ᠨ ᠤᠯᠤᠰ ᠲᠡᠭᠦᠨ ᠢ᠋ ᠮᠥᠨ ᠬᠦᠯᠢᠶᠡᠵᠦ ᠪᠠᠢᠪᠠ᠃ ᠭᠡᠭᠡᠪᠴᠢ ᠶ᠋ᠢᠨ ᠴᠠᠭᠠᠨᠠ ᠬᠠᠲᠤᠨ ᠡᠬᠡ ᠨᠢ ᠤᠬᠢᠯᠠᠵᠤ ᠪᠠᠢᠯᠠ᠃ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠥᠷᠥᠭᠡᠨ ᠳ᠋ᠡᠭᠡᠨ ᠣᠷᠣᠨᠠ᠃ ᠶᠥᠮ ᠠᠭᠠ ᠬᠠᠲᠤᠨ ᠭᠡᠭᠡᠪᠴᠢ ᠪᠡᠷ ᠰᠢᠷᠳᠡᠭᠰᠡᠨ ᠴᠢᠭ ᠲᠡᠭᠡᠨ ᠴᠠᠭᠠᠰᠢ ᠬᠠᠷᠠᠵᠠᠢ᠃ ᠬᠠᠲᠤᠨ ᠡᠬᠡ ᠰᠢᠨᠠᠯᠵᠠᠢ᠃
ᠬᠠᠲᠤᠨ ᠡᠬᠡ ᠶ᠋ᠢᠨ ᠮᠥᠷᠥ ᠴᠡᠴᠡᠭᠡᠨᠡᠨ ᠬᠥᠳᠡᠯᠦᠨᠡ᠃ ᠬᠠᠲᠤᠨ ᠡᠬᠡ ᠶᠥᠮ ᠠᠭᠠ ᠮᠡᠭᠰᠢᠨ ᠤᠬᠢᠯᠠᠬᠤ ᠪᠥᠯᠥᠭᠡ᠃ ᠭᠠᠯᠳᠠᠨ ᠬᠥᠰᠢᠶᠡ ᠮᠡᠲᠦ ᠬᠥᠳᠡᠯᠭᠡᠭᠡᠨ ᠦᠭᠡᠢ ᠵᠣᠭᠰᠣᠨᠠ᠃ ᠶᠥᠮ ᠠᠭᠠ ᠬᠠᠲᠤᠨ ᠠᠭᠠᠵᠢᠭᠤᠬᠠᠨ ᠡᠷᠭᠢᠵᠦ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠬᠦᠦ ᠤᠷᠤᠭᠤ ᠪᠠᠨ ᠲᠠᠭᠠᠮᠠᠭ ᠢ᠋ᠶ᠋ᠠᠷ ᠡᠨᠳᠡ ᠲᠡᠨᠳᠡ ᠭᠢᠰᠬᠢᠨ ᠠᠯᠬᠤᠵᠤ ᠣᠴᠢᠯᠠ᠃
ᠠᠷᠪᠠᠨ ᠨᠢᠭᠡ
ᠭᠠᠯᠳᠠᠨ ᠡᠬᠡ ᠶ᠋ᠢᠨ ᠰᠡᠭᠦᠳᠡᠷ ᠦᠭᠡᠢ ᠡᠨᠡᠯᠦᠩᠳᠦ ᠴᠢᠷᠠᠢ ᠶ᠋ᠢ ᠬᠠᠷᠠᠵᠤ ᠣᠢᠷᠠᠳ ᠨᠤᠲᠤᠭ ᠲᠤ᠌ ᠪᠠᠢᠬᠤ ᠦᠶᠡ ᠳ᠋ᠡᠭᠡᠨ ᠠᠬᠠᠨ ᠳᠡᠭᠦᠦᠰ ᠦ᠋ᠨ ᠬᠣᠭᠣᠷᠣᠨᠳᠣᠬᠢ
ᠰᠥᠷᠭᠥᠯᠳᠦᠭᠡᠨ ᠢ᠋ ᠰᠠᠨᠠᠵᠤ᠂ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠪᠤᠭᠤᠷᠤᠯ ᠱᠠᠩᠬᠤ ᠶ᠋ᠢ ᠢᠯᠢᠯᠡ᠃ ᠡᠨᠡ ᠵᠠᠭᠤᠷᠠ ᠬᠡᠳᠦᠨ ᠬᠣᠷᠣᠮ ᠥᠩᠭᠡᠷᠡᠪᠡ᠃
ᠭᠠᠯᠳᠠᠨ ᠬᠤᠪᠢᠯᠭᠠᠨ᠂
— ᠡᠵᠢ ᠮᠢᠨᠢ ᠤᠬᠢᠯᠠᠭᠰᠠᠨ ᠢ᠋ ᠠᠰᠠᠭᠤ ᠭᠡᠳᠡᠭ ᠰᠠᠨ᠃ ᠲᠠ ᠮᠢᠨᠢ ᠮᠡᠨᠳᠦ ᠰᠠᠢᠨ ᠤᠤ? ᠭᠡᠯᠡ᠃ ᠶᠦᠮ ᠠᠭᠠ ᠡᠬᠡᠷ ᠲᠡᠳᠡᠨ《ᠬᠠᠭᠠᠨ ᠠᠬᠠ ᠲᠠᠨᠢ ᠬᠣᠣᠷᠯᠠᠭᠳᠠᠪᠠ》 ᠭᠡᠮᠡᠨ ᠠᠷᠠᠢᠬᠠᠨ ᠬᠡᠯᠡᠯᠡ᠃
— ᠬᠡᠨ ᠢᠩᠭᠢᠪᠡ ᠭᠡᠵᠦ ᠭᠠᠯᠳᠠᠨ ᠬᠠᠰᠬᠢᠷᠤᠨ ᠠᠰᠠᠭᠤᠯᠠ᠃
— ᠴᠡᠴᠡᠨ ᠲᠠᠢᠵᠢ ᠶ᠋ᠢᠨ ᠲᠠᠯᠠ ᠶ᠋ᠢᠨ ᠠᠬᠠ ᠳᠡᠭᠦᠦ ᠨᠠᠷ ᠁ ᠭᠡᠳ ᠶᠦᠮ ᠠᠭᠠ ᠥᠭᠡᠷᠡ ᠶᠠᠭᠤᠮᠠ ᠬᠡᠯᠡᠯ ᠦᠭᠡᠢ ᠳᠠᠭᠤ ᠪᠠᠨ ᠬᠤᠷᠢᠶᠠᠪᠠ᠃
— ᠳᠠᠩᠴᠤ ᠳᠠ᠂ ᠮᠡᠳᠡᠭᠰᠡᠭᠡᠷ ᠪᠠᠢᠭᠠᠳ ᠠᠬᠠ ᠮᠢᠨᠢ ᠭᠡᠨᠡᠳᠡᠵᠡᠢ᠃ ᠬᠠᠭᠠᠨ ᠠᠬᠠ ᠶ᠋ᠢᠨ ᠠᠮᠢᠨ ᠳ᠋ᠤ᠌ ᠬᠦᠷᠦᠨᠡ ᠭᠡᠳᠡᠭ ᠨᠢᠭᠦᠯ ᠦ᠋ᠨ ᠳᠡᠭᠡᠳᠦ ᠨᠢᠭᠦᠯ ᠪᠤᠰᠤ ᠤᠤ? ᠨᠠᠮᠠᠶ᠋ᠢ ᠲᠡᠳᠡ ᠴᠢᠯᠠᠭᠤ ᠪᠠᠷ ᠳᠠᠬᠢᠭᠠᠳ ᠨᠡᠭᠦᠯᠭᠡᠪᠡ᠃ ᠡᠢᠮᠦ ᠶᠠᠪᠤᠳᠠᠯ ᠢ᠋ ᠬᠡᠷᠬᠢᠪᠡᠴᠦ ᠥᠷᠥᠰᠢᠶᠡᠵᠦ ᠪᠣᠯᠬᠤ ᠦᠭᠡᠢ᠃ ᠳᠠᠩᠴᠤ ᠶᠠᠭᠠᠬᠢᠪᠠ ᠳᠠ ᠭᠡᠮᠡᠨ ᠭᠠᠯᠳᠠᠨ ᠭᠡᠩᠭᠢᠨᠡᠨ ᠬᠠᠰᠬᠢᠷᠵᠤ ᠥᠭᠦᠯᠡᠪᠡ᠃ ᠲᠡᠭᠦᠨ ᠦ᠌ ᠭᠤᠨᠢᠭᠯᠠᠯ ᠭᠠᠢᠳᠠᠪ ᠤ᠋ᠨ ᠵᠢᠷᠦᠬᠡ ᠶ᠋ᠢ ᠪᠠᠵᠠᠭᠰᠠᠨ ᠲᠤᠯᠠ ᠭᠠᠢᠳᠠᠪ ᠬᠥᠮᠥᠭᠡᠢ ᠵᠠᠭᠤᠯᠠ᠃
ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠬᠠᠭᠠᠨ ᠦᠭᠡᠢ ᠪᠡᠷ ᠣᠷᠣᠰᠢᠨᠠ ᠭᠡᠵᠦ ᠤᠤ ᠁ ᠭᠡᠮᠡᠨ ᠪᠣᠳᠣᠬᠤ ᠳ᠋ᠤ᠌ ᠭᠠᠯᠳᠠᠨ ᠤ᠋ ᠨᠢᠭᠤᠷ ᠮᠠᠨᠠᠷᠠᠨ ᠬᠦᠷᠡᠩᠲᠦᠵᠦ᠂ ᠨᠢᠳᠦ ᠨᠢ ᠲᠣᠮᠣᠷᠠᠨ᠂ ᠰᠠᠮᠰᠠ ᠨᠢ ᠰᠡᠷᠲᠡᠯᠵᠡᠵᠦ ᠭᠠᠰᠢᠭᠤᠨ ᠦᠨᠡᠨ ᠦ᠌ ᠡᠮᠦᠨᠡ ᠨᠢ ᠮᠤᠬᠤᠷᠳᠠᠪᠠ᠃ᠭᠠᠯᠳᠠᠨ ᠤᠬᠢᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠯᠠ᠃ ᠲᠡᠭᠦᠨ ᠦ᠌ ᠱᠤ᠌ ᠳ᠋ᠤ᠌ ᠪᠤᠷᠬᠠᠨ ᠤ᠋ ᠨᠢᠳᠦᠨ ᠡᠷᠢᠭᠡ ᠨᠢ ᠣᠷᠢᠶᠠᠯᠲᠠ ᠲᠠᠢ ᠪᠥᠭᠡᠳ ᠡᠷᠢᠭᠡ ᠪᠡᠨ ᠠᠪᠬᠤ ᠲᠥᠬᠥᠭᠡ ᠦᠭᠡᠢ ᠪᠣᠯᠵᠠᠢ᠃
ᠭᠠᠯᠳᠠᠨ ᠳᠠᠬᠢᠭᠠᠳ ᠬᠠᠲᠤᠨ ᠡᠬᠡ ᠡᠴᠡ ᠪᠡᠨ ᠰᠢᠯᠭᠠᠪᠠ᠃
— ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠭᠦᠷᠦᠨ ᠦ᠌ ᠬᠡᠷᠡᠭ ᠢ᠋ ᠬᠡᠨ ᠬᠠᠮᠢᠶᠠᠷᠤᠨᠠ ᠭᠡᠮᠡᠨ ᠥᠭᠦᠯᠡᠪᠡ᠃ ᠶᠦᠮ ᠠᠭᠠ ᠬᠠᠲᠤᠨ ᠬᠠᠷᠢᠭᠤ ᠳ᠋ᠤᠨᠢ᠂
— ᠠᠨᠤ ᠁ ᠠᠨᠤ ᠬᠠᠲᠤᠨ ᠁ ᠭᠡᠵᠦ ᠲᠦᠭᠳᠡᠷᠡᠵᠦ ᠲᠣᠷᠣᠯ ᠦᠭᠡᠢ ᠬᠡᠯᠡᠪᠡ᠃
— ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠢ᠋ ᠠᠨᠤ ᠬᠠᠲᠤᠨ ᠨᠢᠭᠲᠠᠯᠠᠵᠤ ᠴᠢᠳᠠᠨᠠ᠃ ᠲᠡᠭᠦᠨ ᠦ᠌ ᠭᠠᠷ ᠲᠤ᠌ ᠲᠣᠳᠣ ᠥᠰᠥᠭᠲᠦ ᠲᠠᠮᠠᠭᠠ ᠠᠳᠬᠣᠭᠳᠠᠭᠰᠠᠨ ᠪᠣᠯᠬᠣᠷ ᠰᠡᠳᠬᠢᠯ ᠮᠢᠨᠢ ᠲᠦᠷ ᠴᠦ᠍ ᠠᠲᠤᠭᠠᠢ ᠰᠠᠳᠠᠭᠠᠷᠠᠨᠠ᠃ ᠡᠰᠡ ᠪᠥᠭᠡᠰᠦ ᠪᠢ ᠶᠠᠭᠠᠬᠢᠨ ᠠᠮᠤᠷᠬᠤ ᠪᠢᠯᠡ᠃ ᠡᠵᠢ ᠮᠢᠨᠢ! ᠬᠠᠭᠠᠨ ᠠᠬᠠ ᠶ᠋ᠢᠨ ᠳᠤᠲᠠᠭᠤ ᠶ᠋ᠢ ᠭᠦᠢᠴᠡᠭᠡᠵᠦ᠂ ᠳᠤᠮᠳᠠᠭᠤᠷ ᠢ᠋ ᠨᠢ ᠳᠦᠭᠦᠷᠭᠡᠬᠦ ᠬᠤᠪᠢ ᠵᠣᠬᠢᠶᠠᠯ ᠢᠷᠡᠵᠡᠢ ᠭᠡᠮᠡᠨ ᠭᠠᠯᠳᠠᠨ ᠬᠡᠯᠡᠪᠡ᠃
ᠭᠠᠯᠳᠠᠨ ᠯᠠᠮᠠ ᠳᠠᠬᠢᠭᠠᠳ ᠡᠬᠡ ᠡᠴᠡ ᠪᠡᠨ ᠶᠠᠭᠤᠮᠠ ᠠᠰᠠᠭᠤᠬᠤ ᠲᠡᠡᠭᠬᠡᠭᠡᠯ ᠦᠭᠡᠢ ᠪᠣᠯᠵᠠᠢ᠃ ᠶᠦᠮ ᠠᠭᠠ ᠬᠠᠲᠤᠨ ᠳ᠋ᠤ᠌ ᠮᠥᠨ ᠬᠠᠷᠢᠭᠤᠯᠬᠤ ᠲᠡᠩᠬᠡᠭᠡ ᠦᠭᠡᠢ ᠪᠠᠢᠯᠠ᠃ ᠬᠠᠷᠢᠨ ᠭᠠᠯᠳᠠᠨ ᠯᠠᠮᠠ ᠶ᠋ᠢᠨ ᠬᠣᠭᠣᠯᠠᠢ ᠳ᠋ᠤ᠌ ᠨᠢᠭᠡ ᠬᠠᠲᠠᠭᠤ ᠶᠠᠭᠤᠮᠠ ᠪᠥᠭᠡᠮᠨᠡᠷᠡᠵᠡᠢ᠃ ᠲᠡᠭᠦᠨ ᠦ᠌ ᠬᠣᠭᠣᠯᠠᠢ ᠳ᠋ᠤ᠌ ᠪᠥᠭᠡᠮᠨᠡᠷᠡᠵᠦ ᠪᠣᠢ ᠲᠡᠷᠡ ᠵᠦᠢᠯ ᠬᠡᠳᠦᠬᠡᠨ ᠬᠣᠷᠣᠮ ᠤ᠋ᠨ ᠳᠠᠷᠠᠭᠠ ᠱᠣᠷᠪᠣᠭ ᠨᠢᠯᠪᠤᠰᠤ ᠪᠣᠯᠤᠨ ᠠᠰᠬᠠᠷᠠᠵᠤ᠂ ᠦᠶᠡᠷᠯᠡᠨ ᠤᠷᠤᠰᠬᠤ ᠳ᠋ᠤ᠌ ᠪᠡᠯᠡᠨ ᠪᠠᠢᠯᠠ᠃ ᠬᠠᠲᠤᠨ ᠡᠬᠡ ᠪᠣᠭᠴᠣᠨ ᠡᠴᠡ ᠪᠠᠨ ᠪᠥᠰ ᠳᠠᠪᠤᠤ ᠳ᠋ᠤ᠌ ᠪᠣᠭᠣᠭᠰᠠᠨ ᠵᠦᠢᠯ ᠢ᠋ ᠭᠠᠷᠭᠠᠵᠤ ᠪᠣᠭᠣᠳᠠᠯ ᠢ᠋ ᠨᠢ ᠵᠠᠳᠠᠯᠬᠤ ᠶ᠋ᠢ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠬᠠᠷᠠᠵᠤ ᠪᠠᠢᠪᠠ᠃
ᠶᠦᠮ ᠠᠭᠠ ᠬᠠᠲᠤᠨ ᠡᠬᠡ᠂
— ᠡᠨᠡ ᠁ ᠰᠡᠩᠭᠡ ᠶ᠋ᠢᠨ ᠨᠢᠭᠤᠷ ᠤ᠋ᠨ ᠬᠡᠪ ᠭᠡᠮᠡᠨ ᠶᠠᠭ ᠰᠡᠩᠭᠡ ᠰᠢᠭ ᠨᠢᠭᠤᠷ ᠢ᠋ ᠬᠠᠷᠠᠭᠤᠯᠪᠠ᠃ ᠵᠤᠯᠤᠮᠯᠠᠭᠰᠠᠨ ᠠᠷᠠᠰᠤ ᠪᠠᠷ ᠰᠡᠩᠭᠡ ᠶ᠋ᠢ ᠪᠦᠲᠡᠭᠡᠵᠦ ᠠᠮᠢᠰᠬᠤᠯ ᠦᠭᠡᠢ ᠪᠣᠯᠭᠠᠭᠰᠠᠨ ᠪᠠᠢᠪᠠ᠃ ᠰᠡᠩᠭᠡ ᠶ᠋ᠢᠨ ᠶᠢᠰᠦᠨ ᠰᠦᠪᠡ ᠤᠷᠤᠭᠤ ᠲᠡᠷᠡ ᠬᠦ᠌ ᠠᠷᠠᠰᠤ ᠰᠣᠷᠣᠵᠤ ᠨᠠᠭᠠᠯᠳᠤᠵᠠᠢ᠃
— ᠳᠥᠷᠪᠡᠨ ᠣᠢᠷᠠᠳ ᠤ᠋ᠨ ᠪᠤᠵᠠᠷ ᠢ᠋ ᠠᠷᠢᠭᠤᠯᠠᠵᠤ᠂ ᠲᠡᠭᠷᠢ ᠶ᠋ᠢᠨ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠭᠤᠶᠠᠳᠠᠬᠤ ᠮᠢᠨᠢ ᠁ ᠭᠡᠮᠡᠨ ᠬᠥᠮᠥᠭᠡᠢ ᠵᠠᠭᠤᠵᠤ ᠭᠠᠯᠳᠠᠨ ᠠᠬᠠ ᠬᠠᠭᠠᠨ ᠤ᠋ ᠪᠠᠨ ᠨᠢᠭᠤᠷ ᠤ᠋ᠨ ᠬᠡᠪ ᠢ᠋ ᠰᠢᠷᠳᠡᠪᠡ᠃ ᠵᠣᠯᠤᠮᠯᠠᠭᠰᠠᠨ ᠠᠷᠠᠰᠤ ᠶ᠋ᠢ ᠬᠥᠮᠦᠨ ᠦ᠌ ᠨᠢᠭᠤᠷ ᠲᠤ᠌ ᠨᠠᠭᠠᠬᠤ ᠳ᠋ᠤ᠌ ᠲᠡᠷᠡ ᠳᠣᠣᠷᠠᠬᠠᠨᠡ ᠰᠣᠷᠣᠭᠳᠠᠨ ᠪᠢᠪ ᠪᠢᠲᠡᠭᠦᠦ ᠪᠣᠯᠵᠤ ᠠᠮᠢᠰᠬᠤᠯ ᠬᠤᠷᠢᠶᠠᠳᠠᠭ ᠠᠵᠢ᠃ ᠶᠠᠮᠠᠷ ᠬᠣᠣᠷᠯᠠᠯ ᠲᠠᠢ ᠠᠷᠭᠠ ᠰᠡᠳᠥᠪᠡ᠃ ᠴᠡᠴᠡᠨ᠂ ᠵᠤᠳᠪᠠᠪᠠᠭᠠᠲᠤᠷ᠂ ᠴᠥᠭᠦᠢ ᠤᠪᠠᠰᠢ ᠪᠠᠰᠠ ᠲᠡᠷᠡ ᠳᠠᠸᠠᠴᠢ ᠁ ᠭᠠᠯᠳᠠᠨ ᠪᠣᠷᠣᠭᠠᠨ ᠤ᠋ ᠡᠭᠦᠯᠡᠨ ᠳ᠋ᠦ᠍ ᠳᠠᠷᠤᠭᠳᠠᠭᠰᠠᠨ ᠯᠤᠭᠠ ᠪᠥᠭᠲᠥᠢᠨ ᠵᠣᠭᠰᠣᠬᠤ ᠪᠥᠯᠥᠭᠡ᠃
ᠮᠠᠷᠠᠭᠠᠰᠢ ᠨᠢ ᠭᠠᠯᠳᠠᠨ ᠰᠢᠷᠡᠭᠡᠲᠦ ᠯᠠᠮᠠ ᠶ᠋ᠢᠨ ᠰᠠᠭᠤᠳᠠᠯ ᠳ᠋ᠤ᠌ ᠵᠠᠯᠠᠭᠳᠠᠬᠤ ᠪᠠᠢᠯᠠ᠃ ᠰᠢᠷᠡᠭᠡᠲᠦ ᠯᠠᠮᠠ ᠶ᠋ᠢᠨ ᠵᠢᠡᠭᠳᠠᠭᠠ ᠪᠥᠭᠡᠰᠦ ᠳᠠᠯᠠᠢ ᠯᠠᠮᠠ᠂ ᠪᠠᠨᠴᠢᠠᠡᠷᠳᠡᠨᠢ ᠨᠠᠷ ᠤ᠋ᠨ ᠠᠳᠠᠯᠢ ᠪᠥᠯᠥᠭᠡ᠃ ᠮᠣᠩᠭᠣᠯ ᠤ᠋ᠨ ᠠᠩᠬᠠᠳᠤᠭᠠᠷ ᠪᠣᠭᠳᠠ ᠥᠨᠳᠥᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ ᠡᠨᠡ ᠬᠦ᠌ ᠬᠦᠨᠳᠦᠳᠬᠡᠯ ᠦ᠋ᠨ ᠶᠣᠰᠣᠯᠠᠯ ᠳ᠋ᠤ᠌ ᠣᠷᠣᠯᠴᠠᠬᠤ ᠪᠠᠢᠯᠠ᠃ ᠭᠡᠲᠡᠯᠡ ᠵᠡᠭᠥᠨᠭᠠᠷ ᠤ᠋ᠨ ᠬᠠᠭᠠᠨ ᠤ᠋ ᠰᠡᠨᠳᠡᠢ ᠡᠵᠡᠭᠦᠢᠷᠡᠵᠦ ᠶᠦᠮ ᠠᠭᠠ ᠬᠠᠲᠤᠨ ᠥᠪᠡᠷ ᠦ᠋ᠨ ᠬᠥᠪᠡᠭᠦᠨ ᠭᠠᠯᠳᠠᠨ ᠢ᠋ ᠵᠠᠯᠠᠬᠤ ᠪᠠᠷ ᠢᠷᠡᠵᠡᠢ᠃ ᠴᠠᠭ ᠵᠣᠭᠰᠣᠪᠠ᠃
ᠠᠷᠪᠠᠨ ᠬᠣᠶᠠᠷ
— ᠲᠡᠭᠡᠬᠦ ᠳ᠋ᠦ᠍ ᠪᠢ ᠨᠢᠯᠪᠤᠰᠤ ᠶᠢᠨ ᠭᠠᠰᠢᠭᠤᠨ ᠠᠮᠲᠠ ᠶ᠋ᠢ ᠮᠡᠳᠡᠷᠡᠭᠰᠡᠨ ᠪᠢᠯᠡ᠃ ᠳᠠᠩᠴᠤ ᠭᠠᠰᠢᠭᠤᠨ ᠢ᠋ ᠮᠡᠳᠡᠷᠡᠵᠦ ᠪᠢᠯᠡ᠃ᠳᠠᠩᠴᠤ ᠭᠠᠰᠢᠭᠤᠨ ᠨᠢ ᠡᠵᠢ ᠲᠡᠢ ᠠᠭᠤᠯᠵᠠᠬᠤ ᠪᠦᠷᠢ ᠳ᠋ᠦ᠍ ᠪᠢ ᠤᠬᠢᠯᠠᠳᠠᠭ ᠪᠠᠢᠯᠠ ᠭᠡᠵᠦ ᠭᠠᠯᠳᠠᠨ ᠲᠡᠮᠳᠡᠭᠯᠡᠯ ᠢ᠋ᠶ᠋ᠡᠨ ᠪᠢᠴᠢᠯᠡ᠃
ᠭᠠᠯᠳᠠᠨ ᠪᠥᠭᠡᠰᠦ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠤᠭᠤᠷᠠᠭ ᠴᠠᠭᠠᠨ ᠰᠦ ᠶ᠋ᠢ ᠬᠥᠬᠥᠵᠦ᠂ ᠦᠵᠡᠰᠬᠦᠯᠡᠩ ᠰᠢᠷᠪᠥᠰᠥᠯᠢᠭ ᠡᠷᠡ ᠪᠣᠯᠵᠠᠢ᠃ ᠳᠠᠯᠠᠢ ᠯᠠᠮᠠ ᠠᠩᠬᠠᠨ ᠡᠴᠡ ᠪᠠᠨ ᠭᠠᠯᠳᠠᠨ ᠢ᠋ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠱᠠᠰᠢᠨ ᠤ᠋ ᠪᠣᠳᠣᠯᠭᠠ ᠶᠠᠪᠤᠭᠤᠯᠬᠤ ᠭᠦᠦᠷ ᠪᠣᠯᠭᠠᠬᠤ ᠵᠣᠷᠢᠯᠭᠠ ᠲᠠᠢ ᠪᠠᠢᠪᠠ᠃ ᠲᠡᠷᠡ ᠪᠡᠷ ᠵᠣᠷᠢᠯᠭᠠ ᠳ᠋ᠠᠭᠠᠨ ᠬᠦᠷᠴᠡᠢ᠃ ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠨᠠᠮᠬᠠᠢᠵᠠᠮᠰᠣ ᠶ᠋ᠢᠨ ᠱᠣᠣ ᠳ᠋ᠤ᠌ ᠣᠢᠷᠠᠳ ᠤ᠋ᠨ ᠬᠠᠭᠠᠨ ᠡᠷᠳᠡᠨᠢᠪᠠᠭᠠᠲᠤᠷ᠂ ᠶᠦᠮ ᠠᠭᠠ ᠬᠠᠲᠤᠨ ᠬᠣᠶᠠᠷ ᠤ᠋ᠨ ᠬᠡᠪᠡᠯᠢ ᠶ᠋ᠢᠨ ᠨᠡᠢᠯᠡᠵᠦ ᠨᠢᠯᠬᠠᠮᠰᠠᠬᠤ ᠴᠠᠭ ᠢ᠋ ᠲᠣᠭᠲᠠᠭᠠᠵᠤ ᠪᠦᠲᠦᠨ ᠰᠠᠷᠠ ᠲᠡᠢ ᠰᠥᠨᠢ ᠶ᠋ᠢ ᠰᠣᠩᠭᠣᠭᠰᠠᠨ ᠪᠥᠭᠡᠳ ᠪᠦᠬᠦ ᠵᠦᠢᠯ ᠶᠣᠰᠣ ᠪᠠᠷ ᠪᠣᠯᠵᠤ ᠭᠠᠯᠳᠠᠨ ᠲᠥᠷᠥᠭᠰᠡᠨ ᠶᠤᠮᠰᠠᠨᠵᠠᠢ᠃ ᠳᠠᠷᠠᠭᠠ ᠨᠢ ᠭᠠᠯᠳᠠᠨ ᠢ᠋ ᠲᠥᠪᠡᠳ ᠲᠦ᠍ ᠢᠯᠡᠭᠡᠵᠦ ᠪᠤᠷᠬᠠᠨ ᠤ᠋ ᠡᠯᠴᠢ ᠪᠣᠯᠭᠠᠵᠤ ᠠᠮᠵᠢᠭᠰᠠᠨ ᠨᠢ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠴᠢᠷᠮᠠᠢᠯᠲᠠ ᠪᠠᠢᠯᠠ᠃
ᠬᠠᠷᠢᠨ ᠪᠠᠨᠴᠢᠡᠨᠷᠳᠡᠨᠢ ᠭᠠᠯᠳᠠᠨ ᠡᠴᠡ ᠵᠠᠢᠲᠠᠢ ᠪᠠᠢᠬᠤ ᠶ᠋ᠢ ᠡᠷᠡᠮᠡᠯᠵᠡᠪᠡ᠃ ᠭᠠᠯᠳᠠᠨ ᠳ᠋ᠤ᠌ ᠨᠡᠪᠲᠡᠷᠡᠬᠦ ᠵᠠᠮ ᠴᠢᠯᠥᠭᠡᠲᠦ ᠪᠤᠰᠤ᠂ ᠵᠢᠷᠦᠬᠡ ᠨᠢ ᠬᠦᠢᠲᠡᠨ᠂ ᠠᠭᠠᠰᠢ ᠠᠷᠠᠨᠰᠢᠨ ᠲᠤᠢᠯᠪᠤᠷᠢᠲᠠᠢ᠂ ᠬᠠᠲᠠᠭᠤ ᠬᠥᠮᠦᠨ ᠪᠣᠯᠬᠤ ᠶ᠋ᠢ ᠪᠠᠨᠴᠢᠨᠡᠷᠳᠡᠨᠢ ᠪᠣᠭᠳᠠ ᠭᠠᠳᠠᠷᠯᠠᠵᠤ ᠪᠠᠢᠯᠠ᠃ ᠭᠤᠷᠪᠠᠳᠠᠭᠴᠢ ᠬᠥᠮᠦᠨ ᠪᠣᠯ ᠥᠨᠳᠥᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ ᠶᠤᠮ᠃ ᠴᠢᠰᠤᠨ ᠲᠥᠷᠥᠯ ᠦ᠋ᠨ ᠰᠠᠳᠤᠨ ᠭᠠᠯᠳᠠᠨ ᠨᠢ ᠲᠡᠭᠦᠨ ᠦ᠌ ᠱᠠᠪᠢᠯᠠᠨ ᠪᠣᠢ ᠲᠠᠰᠢᠯᠠᡁᠠᠮᠤ ᠬᠡᠢᠳ ᠲᠦ᠍ ᠨᠣᠮ ᠤ᠋ᠨ ᠪᠤᠶᠠᠨ ᠬᠦᠷᠲᠡᠬᠦ ᠪᠣᠯᠤᠭᠰᠠᠨ ᠳ᠋ᠤ᠌ ᠵᠠᠨᠠᠪᠠᠽᠠᠷ ᠭᠡᠭᠡᠨ ᠲᠤᠢᠯ ᠡᠴᠡ ᠣᠯᠵᠠᠭᠤᠷᠬᠠᠪᠠ᠃ ᠭᠠᠯᠳᠠᠨ ᠳ᠋ᠤ᠌ ᠪᠤᠷᠬᠠᠨ ᠤ᠋ ᠨᠢᠳᠦ ᠬᠡᠮᠡᠬᠦ ᠵᠢᠮᠢᠰ ᠦ᠋ᠨ ᠶᠠᠰᠤ ᠪᠠᠷ ᠡᠷᠢᠭᠡ ᠬᠢᠯᠭᠡᠵᠦ ᠥᠭᠭᠦᠭᠡᠳ ᠠᠳᠢᠰ ᠲᠠᠯᠪᠢᠵᠠᠢ᠃ ᠪᠤᠷᠬᠠᠨ ᠤ᠋ ᠨᠢᠳᠦᠨ ᠡᠷᠢᠭᠡ ᠶ᠋ᠢᠨ ᠵᠠᠩᠭᠢᠯᠠᠭᠠᠨ ᠳ᠋ᠤ᠌ ᠥᠨᠳᠥᠷ ᠭᠡᠭᠡᠨ ᠨᠢᠭᠡᠨ ᠨᠢᠭᠤᠴᠠ ᠦᠯᠡᠳᠡᠭᠰᠡᠨ ᠢ᠋ᠶ᠋ᠡᠨ ᠭᠠᠯᠳᠠᠨ ᠳ᠋ᠤ᠌ ᠪᠠᠰᠠ ᠰᠠᠨᠠᠭᠤᠯᠤᠭᠰᠠᠨ ᠪᠠᠢᠯᠠ᠃
ᠪᠤᠳᠠᠯᠠᠩ ᠬᠡᠢᠳ ᠦ᠋ᠨ ᠪᠤᠷᠬᠠᠨ ᠤ᠋ ᠱᠠᠰᠢᠨ ᠤ᠋ ᠮᠢᠨᠲᠤᠭᠲᠠᠳ᠂ ᠭᠡᠭᠡᠨᠲᠡᠳ᠂ ᠬᠤᠪᠢᠯᠭᠠᠳ ᠡᠷᠡᠮᠪᠡ ᠳᠠᠷᠠᠭᠠᠯᠠᠯ ᠢ᠋ᠶ᠋ᠠᠷ ᠰᠠᠭᠤᠳᠠᠯ ᠡᠵᠡᠯᠡᠵᠡᠢ᠃ ᠡᠨᠡ ᠲᠣᠮᠣ ᠬᠤᠷᠠᠯ ᠳ᠋ᠤ᠌ ᠡᠰᠡ ᠪᠥᠭᠡᠰᠦ ᠲᠥᠷᠥ ᠶ᠋ᠢᠨ ᠬᠠᠷᠠ ᠬᠥᠮᠦᠨ ᠪᠣᠯᠭᠠᠵᠤ ᠰᠢᠷᠠ ᠰᠢᠪᠲᠤᠯᠬᠤ ᠲᠤᠬᠠᠢ ᠬᠡᠯᠡᠯᠴᠡᠬᠦ ᠪᠠᠢᠯᠠ᠃ ᠬᠣᠷᠢᠨ ᠨᠢᠭᠡᠨ ᠵᠢᠯ ᠪᠤᠷᠬᠠᠨ ᠪᠠᠭᠰᠢ ᠶ᠋ᠢᠨ ᠰᠤᠷᠭᠠᠯ ᠨᠣᠮᠯᠠᠯ ᠳ᠋ᠤ᠌ ᠨᠡᠪᠴᠢᠵᠦ᠂ ᠪᠤᠳ᠋ᠳ᠋ᠾᠠ ᠪᠤᠷᠬᠠᠨ ᠤ᠋ ᠵᠠᠩ ᠦᠢᠯᠡ ᠳ᠋ᠦ᠍ ᠭᠦᠨᠵᠡᠭᠡᠢᠷᠡᠭᠰᠡᠨ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠡᠨᠡ ᠲᠣᠮᠣ ᠬᠤᠷᠠᠯ ᠳ᠋ᠤ᠌ ᠰᠡᠳᠬᠢᠯ ᠵᠣᠪᠠᠨᠢᠨ ᠨᠣᠢᠷ ᠦᠭᠡᠢ ᠬᠣᠨᠣᠵᠠᠢ᠃
ᠳᠠᠯᠠᠢ ᠯᠠᠮᠠ ᠠᠰᠠᠭᠤᠪᠠ᠃
— ᠭᠠᠯᠳᠠᠨ ᠯᠠᠮᠠ ᠪᠤᠷᠬᠠᠨ ᠳ᠋ᠤ᠌ ᠥᠷᠢ ᠲᠡᠢ ᠤᠤ?
— ᠥᠷᠢ ᠦᠭᠡᠢ ᠪᠢᠯᠡ᠃
— ᠦᠨᠡᠨ ᠪᠢᠵᠡ?
— ᠮᠢᠨᠦ ᠰᠡᠳᠬᠢᠯ ᠵᠢᠷᠦᠬᠡ ᠪᠤᠷᠬᠠᠨ ᠤ᠋ ᠬᠠᠷᠢᠶᠠᠲᠤ ᠪᠢᠯᠡ᠃
— ᠰᠠᠢᠨ ᠪᠠᠢᠨᠠ᠂ ᠭᠠᠯᠳᠠᠨ ᠯᠠᠮᠠ ᠪᠤᠷᠬᠠᠨ ᠤ᠋ ᠥᠮᠴᠢ ᠰᠢᠦ᠃
— ᠪᠢ ᠪᠤᠷᠬᠠᠨ ᠪᠤᠳ᠋ᠳ᠋ᠾᠠ ᠳ᠋ᠤ᠌ ᠦᠨᠡᠨᠴᠢ ᠶᠠᠪᠤᠬᠤ ᠪᠣᠯᠤᠨᠠ᠃
— ᠯᠠᠮᠠ ᠲᠠ ᠲᠡᠭᠡᠭᠡᠳ ᠪᠤᠷᠬᠠᠨ ᠢ᠋ᠶ᠋ᠠᠨ ᠰᠣᠩᠭᠣᠵᠤ ᠪᠠᠢᠨᠠ ᠤᠤ?
— ᠪᠤᠷᠬᠠᠨ ᠨᠠᠮᠠᠶ᠋ᠢ ᠰᠣᠩᠭᠣᠵᠤ ᠢᠪᠡᠭᠡᠯ ᠳ᠋ᠡᠭᠡᠨ ᠠᠪᠤᠭᠰᠠᠨ ᠪᠢᠯᠡ᠃ ᠬᠠᠷᠢᠨ ᠨᠠᠳᠠ ᠰᠣᠩᠭᠣᠬᠤ ᠡᠷᠬᠡ ᠪᠠᠢᠭᠠ ᠪᠣᠯ ᠪᠢ ᠬᠠᠲᠤᠨ ᠡᠬᠡ ᠪᠡᠨ ᠰᠣᠩᠭᠣᠵᠤ ᠪᠠᠢᠨᠠ᠃
— ᠶᠠᠭᠠᠬᠢᠭᠠᠳ?
— ᠪᠢ ᠡᠬᠡ ᠶ᠋ᠢᠨ ᠴᠠᠭᠠᠨ ᠰᠦ ᠶ᠋ᠢᠨ ᠥᠷᠢ ᠶ᠋ᠢ ᠲᠥᠯᠥᠵᠦ ᠳᠡᠢᠯᠬᠦ ᠦᠭᠡᠢ ᠤᠴᠢᠷ ᠡᠴᠡ᠁
— ᠪᠤᠷᠬᠠᠨ ᠪᠠᠭᠰᠢ ᠴᠤ᠌ ᠭᠡᠰᠡᠨ ᠡᠬᠡ ᠡᠴᠡ ᠲᠥᠷᠥᠭᠰᠡᠨ ᠡᠭᠡᠯ ᠬᠥᠮᠦᠨ ᠪᠠᠢᠭᠰᠠᠨ᠃ ᠡᠬᠡ ᠶ᠋ᠢᠨ ᠴᠠᠭᠠᠨ ᠰᠦ ᠶ᠋ᠢᠨ ᠥᠷᠢ ᠶ᠋ᠢ ᠬᠡᠨ ᠲᠥᠯᠥᠵᠦ ᠳᠡᠢᠯᠬᠦ ᠪᠢᠯᠡ᠃ ᠥᠷᠢ ᠪᠡᠨ ᠲᠥᠯᠥᠬᠦ ᠶ᠋ᠢᠨ ᠲᠤᠯᠠᠳᠠ ᠪᠤᠷᠬᠠᠨ ᠤ᠋ ᠰᠠᠭᠤᠳᠠᠯ ᠡᠴᠡ ᠲᠦᠷ ᠴᠢᠯᠥᠭᠡ ᠭᠤᠶᠤᠵᠤ ᠪᠠᠢᠨᠠ ᠤᠤ?
— ᠵᠠ ᠲᠡᠢᠮᠦ ᠠ᠋᠃ ᠨᠠᠳᠠ ᠳ᠋ᠤ᠌ ᠰᠢᠩᠭᠡᠭᠰᠡᠨ ᠪᠤᠷᠬᠠᠨ ᠪᠣᠢ᠃ ᠲᠡᠷᠡ ᠪᠤᠷᠬᠠᠨ ᠨᠠᠮᠠᠶ᠋ᠢ ᠵᠠᠯᠠᠵᠤ ᠵᠢᠯᠣᠭᠣᠳᠬᠤ ᠪᠣᠯᠤᠨᠠ᠃ ᠮᠢᠨᠦ ᠵᠢᠷᠤᠭ᠂ ᠲᠥᠭᠡᠷᠭᠡ ᠪᠤᠷᠬᠠᠨ ᠤ᠋ ᠵᠢᠷᠤᠭᠰᠠᠨ ᠢ᠋ᠶ᠋ᠠᠷ ᠪᠣᠯᠵᠤ ᠪᠠᠢᠨᠠ᠃
— ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠢ᠋ ᠬᠡᠨ ᠬᠠᠮᠢᠶᠠᠷᠴᠤ ᠪᠠᠢᠭᠠ ᠪᠢᠯᠡ? ᠭᠠᠯᠳᠠᠨ ᠬᠤᠪᠢᠯᠭᠠᠨ!
— ᠠᠨᠤ ᠬᠠᠲᠤᠨ!
—ᠠᠨᠤ ᠬᠠᠲᠤᠨ ᠭᠡᠨᠡ?
—ᠲᠡᠢᠮᠦ ᠠ᠋᠂ ᠲᠩᠷᠢ ᠳ᠋ᠦ᠍ ᠬᠠᠯᠢᠭᠰᠠᠨ ᠬᠠᠭᠠᠨ ᠤ᠋ ᠬᠠᠲᠤᠨ!
—ᠲᠡᠷᠡ ᠠᠨᠤ ᠬᠠᠲᠤᠨ ᠵᠠᠯᠠᠭᠤᠬᠠᠨ᠂ ᠡᠷᠡᠮᠡᠬᠡᠢ ᠪᠦᠰᠡᠭᠦᠢ ᠭᠡᠨᠡ ᠯᠠᠢ᠃ ᠯᠠᠮᠠ ᠲᠠᠨ ᠢ᠋ ᠬᠦᠷᠴᠦ ᠣᠴᠢᠲᠠᠯᠠ ᠲᠠᠨ ᠤ᠋ ᠭᠦᠷᠦᠨ ᠤᠯᠤᠰ ᠤ᠋ᠨ ᠳᠣᠲᠣᠭᠠᠳᠤ ᠳ᠋ᠤ᠌ ᠡᠷᠭᠢᠯᠲᠡ ᠭᠠᠷᠬᠤ ᠦᠭᠡᠢ ᠪᠠᠢᠭᠠᠰᠠᠢ!
—ᠮᠢᠨᠦ ᠰᠡᠳᠬᠢᠯ ᠲᠦᠪᠳᠡᠵᠦ ᠪᠠᠢᠨᠠ᠃
ᠳᠠᠷᠠᠭᠠ ᠨᠢ ᠪᠠᠨᠴᠢᠨ᠌ᠡᠷᠳᠡᠨᠢ ᠪᠠᠷᠠᠭᠤᠨ ᠡᠷᠡᠬᠡᠢ᠂ ᠳᠣᠯᠢᠶᠠᠪᠤᠷ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠸᠴᠢᠷ ᠡᠷᠭᠢᠭᠦᠯᠬᠦ ᠵᠠᠭᠤᠷᠠ ᠪᠢᠲᠡᠭᠦᠬᠡᠨ ᠳᠠᠭᠤ ᠪᠠᠷ ᠭᠠᠯᠳᠠᠨ ᠯᠠᠮᠠ ᠡᠴᠡ ᠠᠰᠠᠭᠤᠯᠠ᠃
— ᠯᠠᠮᠠ ᠲᠠ ᠪᠠᠨᠳᠢ ᠵᠣᠳᠣᠭᠠᠨ ᠤ᠋ ᠵᠢᠷᠠᠨ ᠳᠥᠷᠪᠡᠨ ᠬᠤᠪᠢᠯᠪᠤᠷᠢ ᠮᠡᠬᠡᠨ ᠳ᠋ᠦ᠍ ᠴᠢᠯᠥᠭᠡ ᠵᠠᠪ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠤᠷᠤᠯᠴᠠᠭᠰᠠᠨ ᠭᠡᠪᠡ ᠤᠤ?
— ᠪᠣᠭᠳᠠ ᠮᠢᠨᠢ᠂ ᠡᠨᠡ ᠪᠣᠯ ᠪᠡᠶᠡ ᠪᠡᠨ ᠬᠠᠮᠠᠭᠠᠯᠠᠬᠤ ᠲᠡᠳᠦᠢ ᠶᠦᠮ᠃ ᠰᠡᠳᠬᠢᠯ ᠬᠡᠮᠡᠭᠴᠢ ᠠᠭᠤᠤ ᠪᠣᠯᠪᠠᠴᠤ ᠮᠢᠬᠠᠨ ᠪᠡᠶᠡ ᠶ᠋ᠢ ᠶᠠᠭᠠᠬᠢᠨ ᠣᠷᠣᠯᠠᠬᠤ ᠪᠢᠯᠡ᠃ ᠪᠡᠶᠡ ᠶ᠋ᠢ ᠵᠥᠪᠬᠡᠨ ᠬᠦᠴᠦ ᠴᠢᠳᠠᠯ ᠢ᠋ᠶ᠋ᠠᠷ ᠬᠠᠮᠠᠭᠠᠯᠠᠳᠠᠭ ᠶᠤᠮ᠃
—ᠬᠤᠪᠢᠯᠭᠠᠨ ᠯᠠᠮᠠ ᠲᠠ ᠵᠡᠭᠦᠨᠭᠠᠷ ᠤ᠋ᠨ ᠤᠯᠤᠰ ᠢ᠋ ᠪᠤᠷᠬᠠᠨ ᠪᠠᠭᠰᠢ ᠶ᠋ᠢᠨ ᠰᠤᠷᠭᠠᠯ ᠨᠣᠮᠯᠠᠯ᠂ ᠲᠥᠷᠥ ᠶ᠋ᠢᠨ ᠬᠠᠲᠠᠭᠤ ᠴᠠᠭᠠᠵᠠ ᠬᠣᠣᠰᠯᠠᠭᠤᠯᠵᠤ ᠵᠢᠷᠤᠬᠤ ᠤᠤ?
— ᠵᠡᠭᠦᠨᠭᠠᠷ ᠲᠤ᠌ ᠰᠦᠰᠦᠭᠲᠡᠨ ᠴᠦ᠍ ᠣᠯᠠᠨ ᠪᠣᠢ᠃ ᠠᠳᠤᠭᠤᠰᠤᠨ ᠡᠴᠡ ᠳᠣᠣᠷᠠ ᠠᠭᠠᠰᠢᠲᠠᠨ ᠣᠯᠠᠨ ᠪᠣᠢ᠃
ᠠᠯᠢ ᠠᠯᠢᠨ ᠨᠢ ᠨᠠᠮᠠᠶ᠋ᠢ ᠳᠠᠭᠠᠨᠠ᠂ ᠲᠩᠷᠢ ᠮᠡᠳᠡᠨᠡ ᠪᠣᠢ ᠢᠡ᠃
—ᠲᠠ ᠰᠢᠭ᠋ ᠨᠣᠮ ᠲᠠᠢ ᠯᠠᠮᠠ ᠳ᠋ᠤ᠌ ᠠᠢᠳᠠᠰ ᠦᠷᠭᠦᠭᠡᠬᠦ ᠬᠦᠴᠦᠨ ᠮᠡᠬᠦᠰᠳᠡᠬᠦ ᠦᠭᠡᠢ ᠪᠢᠵᠡ᠃ ᠡᠵᠢ ᠪᠡᠨ ᠰᠣᠩᠭᠣᠵᠤ ᠪᠠᠢᠭᠠ ᠲᠠᠨᠢ ᠪᠤᠷᠬᠠᠨ ᠤ᠋ ᠲᠠᠭᠠᠯᠠᠯ ᠳ᠋ᠤ᠌ ᠭᠦᠨ ᠢ᠋ᠶ᠋ᠡᠷ ᠨᠡᠢᠴᠡᠵᠦ ᠪᠠᠢᠨᠠ᠃
ᠪᠠᠨᠴᠢᠨ ᠪᠣᠭᠳᠠ ᠥᠪᠡᠷ ᠦ᠋ᠨ ᠠᠰᠠᠭᠤᠯᠲᠠ ᠳ᠋ᠤ᠌ ᠬᠠᠷᠢᠭᠤᠯᠲᠠ ᠦᠭᠭᠦᠭᠰᠡᠨ ᠭᠠᠯᠳᠠᠨ ᠤ᠋ ᠲᠤᠢᠯ ᠤ᠋ᠨ ᠰᠠᠨᠠᠭᠠ ᠶ᠋ᠢ ᠥᠷᠥᠰᠢᠶᠡᠨ ᠵᠥᠪᠰᠢᠶᠡᠷᠡᠭᠰᠡᠨ ᠢ᠋ᠶ᠋ᠡᠨ ᠨᠢᠭᠤᠭᠰᠠᠨ ᠦᠭᠡᠢ᠃ ᠪᠤᠷᠬᠠᠨ ᠤ᠋ ᠱᠠᠰᠢᠨ ᠤ᠋ ᠲᠠᠪᠤᠨ ᠵᠦᠢᠯ ᠳ᠋ᠦ᠍ ᠡᠷᠳᠡᠮ ᠢ᠋ ᠬᠢᠴᠢᠶᠡᠩᠭᠦᠢᠯᠡᠨ ᠰᠤᠷᠤᠭᠰᠠᠨ ᠭᠠᠯᠳᠠᠨ ᠯᠠᠮᠠ ᠳ᠋ᠤ᠌ ᠬᠠᠷᠢ ᠭᠠᠵᠠᠷ ᠪᠦᠭᠭᠦᠵᠦ ᠰᠠᠭᠤᠭᠰᠠᠨ ᠡᠴᠡ ᠣᠢᠷᠠᠳ ᠤ᠋ᠨ ᠡᠷᠴᠢᠯᠡᠭᠰᠡᠨ ᠤᠯᠠᠭᠠᠨ ᠲᠣᠭᠣᠰᠣ ᠶ᠋ᠢ ᠲᠩᠷᠢ ᠳᠦ ᠲᠤᠰᠬᠠᠵᠤ ᠶᠠᠪᠤᠭᠰᠠᠨ ᠨᠢ ᠬᠠᠪᠢ ᠦᠭᠡᠢ ᠳᠡᠭᠡᠷᠡ ᠪᠣᠯᠬᠤ ᠶ᠋ᠢ ᠪᠠᠨᠴᠢᠨ ᠪᠣᠭᠳᠠ ᠡᠷᠲᠡᠨ ᠡᠴᠡ ᠭᠠᠳᠠᠷᠯᠠᠵᠤ ᠪᠠᠢᠵᠠᠢ᠃ ᠤᠭ ᠡᠴᠡ ᠭᠠᠯᠳᠠᠨ ᠳ᠋ᠤ᠌ ᠡᠴᠢᠭᠡ ᠬᠣᠩ ᠲᠠᠢᠵᠢ ᠶ᠋ᠢᠨ ᠬᠢᠨᠢ ᠲᠦᠢᠮᠡᠷ ᠰᠢᠭ ᠠᠷᠠᠨᠰᠢᠨ ᠨᠢᠭᠤᠭᠳᠠᠮᠠᠯ ᠣᠷᠣᠰᠢᠵᠤ ᠪᠠᠢᠪᠠ᠃
ᠰᠡᠭᠦᠯ ᠳᠦᠨᠢ ᠥᠨᠳᠥᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ ᠪᠣᠯᠭᠣᠮᠵᠢᠲᠠᠢ ᠪᠠᠷ᠂
— ᠬᠠᠯᠬᠠ ᠮᠣᠩᠭᠣᠯ ᠤ᠋ᠨ ᠨᠣᠶᠠᠳ ᠯᠠᠮᠠ ᠲᠠᠨ ᠢ᠋ ᠲᠤᠷᠰᠢᠵᠤ ᠵᠦᠢᠯ ᠪᠦᠷᠢ ᠶ᠋ᠢᠨ ᠵᠠᠩ ᠠᠪᠤᠷᠢ ᠭᠠᠷᠭᠠᠵᠤ ᠮᠡᠳᠡᠨᠡ᠃ ᠤᠭ ᠡᠴᠡ ᠮᠠᠨ ᠤ᠋ ᠬᠢᠨ ᠬᠥᠮᠦᠨ ᠢ᠋ ᠲᠠᠨᠢᠬᠤ ᠡᠴᠡ ᠪᠠᠨ ᠡᠮᠦᠨᠡ ᠥᠳᠥᠭᠡᠳᠡᠭ ᠰᠢᠦ ᠳᠡ᠃ᠥᠳᠥᠭᠡᠯᠲᠡ ᠡᠴᠡ ᠪᠤᠷᠬᠠᠨ ᠢ᠋ ᠪᠣᠳᠣᠵᠤ ᠵᠠᠢᠯᠠᠰᠬᠢᠵᠦ ᠶᠠᠪᠤᠭᠠᠷᠠᠢ ᠭᠡᠵᠦ ᠵᠠᠬᠢᠪᠠ᠃
ᠭᠠᠯᠳᠠᠨ ᠬᠣᠷᠮᠣᠢ ᠪᠠᠨ ᠳᠡᠪᠢᠰᠴᠦ ᠰᠤᠨᠤᠨ ᠮᠥᠷᠭᠥᠭᠡᠳ ᠪᠣᠰᠤᠯᠠ᠃ ᠳᠠᠯᠠᠢ ᠯᠠᠮᠠ ᠳᠣᠲᠣᠨᠣᠰᠣᠭ ᠢ᠋ᠶ᠋ᠠᠷ ᠭᠠᠷ ᠢ᠋ᠶ᠋ᠠᠨ ᠡᠷᠭᠦᠪᠡ᠃ ᠭᠠᠯᠳᠠᠨ ᠯᠠᠮᠠ ᠶ᠋ᠢᠨ ᠮᠠᠩᠨᠠᠢ ᠳ᠋ᠤ᠌ ᠳᠠᠯᠠᠢ ᠯᠠᠮᠠ ᠯᠣᠪᠰᠠᠩᠵᠠᠮᠰᠤ᠂ ᠪᠠᠨᠴᠢᠨ ᠪᠣᠭᠳᠠ᠂ ᠥᠨᠳᠥᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ ᠨᠠᠷ ᠡᠭᠡᠯᠵᠢ ᠳᠠᠷᠠᠭᠠ ᠪᠠᠷ ᠠᠳᠢᠰ ᠲᠠᠯᠪᠢᠵᠤ᠂ ᠢᠷᠦᠭᠡᠯ ᠤᠩᠰᠢᠯᠠ᠃
ᠳᠠᠯᠠᠢ ᠯᠠᠮᠠ ᠮᠥᠨᠥᠬᠢ ᠵᠢᠭᠳᠡ ᠨᠠᠮᠤᠭᠤᠨ ᠳᠠᠭᠤ ᠪᠠᠷ᠂
— ᠭᠠᠯᠳᠠᠨ ᠯᠠᠮᠠ ᠲᠠ ᠪᠤᠷᠬᠠᠨ ᠤ᠋ ᠱᠠᠰᠢᠨ ᠤ᠋ ᠮᠢᠨᠲᠤᠭᠲᠠᠨ ᠤ᠋ ᠪᠠᠨ ᠬᠤᠪᠴᠠᠰᠤ ᠬᠤᠨᠠᠷ᠂ ᠨᠣᠮ ᠰᠤᠳᠤᠷ ᠢ᠋ᠶ᠋ᠠᠨ ᠥᠪᠡᠷᠲᠡᠭᠡᠨ ᠬᠠᠳᠠᠭᠠᠯᠠᠵᠤ ᠶᠠᠪᠤᠭᠠᠷᠠᠢ᠃ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠬᠠᠳᠠᠭᠠᠯᠠᠭᠳᠠᠬᠤ ᠲᠣᠰᠤᠮ ᠢ᠋ᠶ᠋ᠠᠨ ᠰᠠᠢᠨ᠃ ᠲᠠᠨ ᠤ᠋ ᠰᠣᠩᠭᠣᠭᠰᠠᠨ ᠵᠠᠮ ᠥᠯᠵᠡᠢ ᠲᠡᠢ ᠪᠠᠢᠭᠲᠤᠨ᠂ ᠣᠸᠮ ᠰᠠᠢᠨ ᠠᠮᠤᠭᠤᠯᠠᠩ ᠪᠣᠯᠲᠤᠭᠠᠢ ᠭᠡᠪᠡ᠃
ᠠᠷᠪᠠᠨ ᠭᠤᠷᠪᠠ
ᠳᠤᠭᠠᠩ ᠳᠣᠲᠣᠷᠠ ᠨᠠᠮ ᠭᠦᠮ ᠪᠣᠯᠵᠠᠢ᠃ ᠭᠠᠯᠳᠠᠨ ᠯᠠᠮᠠ ᠰᠠᠬᠢᠯ ᠰᠠᠨᠸᠠᠷ ᠢ᠋ᠶ᠋ᠠᠨ ᠡᠷᠭᠦᠬᠦ ᠴᠠᠭ ᠢᠷᠡᠪᠡ᠃ ᠡᠨᠡ ᠬᠦ᠌ ᠨᠠᠮ ᠭᠦᠮ ᠢ᠋ ᠬᠠᠮᠢᠭᠠ ᠨᠢᠭᠡ ᠲᠡᠢ ᠡᠴᠡ ᠦᠷᠭᠦᠭᠡᠬᠦ ᠮᠡᠲᠦ ᠳᠠᠯᠠᠢ ᠯᠠᠮᠠ ᠵᠥᠭᠡᠯᠡᠨ ᠣᠯᠪᠣᠭ ᠢ᠋ᠶ᠋ᠠᠨ ᠬᠣᠩᠬᠣᠢᠯᠭᠠᠨ ᠥᠨᠳᠡᠢᠪᠡ᠃ ᠳᠠᠯᠠᠢ ᠯᠠᠮᠠ ᠳ᠋ᠤ᠌ ᠬᠡᠢᠳ ᠦ᠋ᠨ ᠲᠠᠬᠢᠯᠴᠢ ᠨᠢᠭᠡᠨ ᠭᠠᠪᠠᠯᠠ ᠶ᠋ᠢᠨ ᠶᠠᠰᠤᠨ ᠠᠶᠠᠭᠠ ᠠᠪᠴᠢᠷᠠᠵᠤ ᠥᠭᠭᠦᠯᠡ᠃ ᠪᠠᠨᠴᠢᠨ ᠪᠣᠭᠳᠠ ᠯᠣᠪᠰᠠᠩᠴᠣᠢᠵᠢᠵᠠᠯᠰᠠᠨ ᠪᠣᠰᠴᠤ᠂ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠳᠡᠷᠭᠡᠳᠡ ᠬᠦᠷᠦᠭᠡᠳ ᠤᠭ ᠠᠶᠠᠭᠠᠨ ᠤ᠋ ᠠᠮᠠᠰᠠᠷ ᠲᠤ᠌ ᠲᠣᠮ ᠬᠢᠪᠡ᠃
ᠪᠠᠨᠴᠢᠨ ᠪᠣᠭᠳᠠ ᠶ᠋ᠢᠨ ᠤᠷᠤᠭᠤᠯ ᠳ᠋ᠤ᠌ ᠴᠢᠰᠤ ᠬᠠᠷᠠᠭᠳᠠᠪᠠ᠃ ᠠᠪᠤᠷᠠᠯ ᠤ᠋ᠨ ᠳᠡᠭᠡᠳᠦ ᠪᠠᠭᠰᠢ ᠶ᠋ᠢᠨ ᠬᠠᠮᠠᠷ ᠤ᠋ᠨ ᠰᠢᠩᠬᠤ ᠳᠤᠭᠠᠩ ᠳ᠋ᠤ᠌ ᠵᠡᠷᠭᠡ ᠵᠢᠩᠳᠠᠭᠠ ᠪᠠᠷ ᠢ᠋ᠶ᠋ᠠᠨ ᠰᠠᠭᠤᠳᠠᠯ ᠵᠠᠯᠭᠠᠭᠰᠠᠨ ᠣᠯᠠᠨ ᠯᠠᠮᠠ ᠪᠠ ᠮᠢᠨᠲᠤᠭᠲᠠᠨ ᠤ᠋ ᠰᠡᠳᠬᠢᠯ ᠢ᠋ ᠰᠣᠴᠢᠭᠠᠪᠠ᠃
ᠳᠠᠯᠠᠢ ᠯᠠᠮᠠ ᠥᠭᠦᠯᠡᠷᠦᠨ᠂
— ᠢᠳᠤᠭᠠᠨ ᠡᠮᠡ ᠶ᠋ᠢᠨ ᠭᠠᠪᠠᠯᠠ ᠠᠶᠠᠭᠠᠨ ᠳ᠋ᠤ᠌ ᠪᠠᠨᠴᠢᠠᠡᠷᠳᠡᠨᠢ ᠶ᠋ᠢᠨ ᠬᠠᠮᠠᠷ ᠤ᠋ᠨ ᠰᠢᠩᠬᠤ ᠲᠦᠷᠬᠢᠭᠳᠡᠪᠡ᠃ ᠬᠤᠪᠢᠯᠭᠠᠨ ᠯᠠᠮᠠ ᠭᠠᠯᠳᠠᠨ ᠪᠤᠷᠬᠠᠨ ᠤ᠋ ᠴᠢᠰᠤᠨ ᠲᠥᠷᠥᠯ ᠪᠣᠯᠤᠯᠠ᠃ ᠭᠤᠷᠪᠠᠭᠤᠯᠠ ᠡᠨᠡ ᠠᠶᠠᠭᠠᠨ ᠳ᠋ᠤ᠌ ᠰᠦ ᠳᠦᠭᠦᠷᠭᠡᠵᠦ ᠬᠤᠪᠢᠶᠠᠵᠤ ᠬᠦᠷᠲᠡᠶᠡ ᠭᠡᠪᠡ᠃
ᠴᠠᠭᠠᠨ ᠭᠠᠪᠠᠯᠠ ᠶ᠋ᠢᠨ ᠢᠷᠮᠡᠭ ᠲᠦ᠍ ᠬᠠᠮᠠᠷ ᠤ᠋ᠨ ᠰᠢᠩᠬᠤ ᠲᠣᠯᠪᠣᠳᠠᠨᠠ᠃ ᠤᠯᠠᠭᠠᠨ ᠴᠢᠰᠤ ᠬᠠᠷᠠᠯᠠᠵᠠᠢ᠃
ᠰᠦ ᠬᠤᠪᠢᠶᠠᠵᠤ ᠤᠤᠭᠤᠭᠰᠠᠨ ᠤ᠋ ᠳᠠᠷᠠᠭᠠ ᠳᠠᠯᠠᠢ ᠯᠠᠮᠠ ᠢᠳᠤᠭᠠᠨ ᠡᠮᠡ ᠶ᠋ᠢᠨ ᠭᠠᠪᠠᠯᠠ ᠶ᠋ᠢᠨ ᠠᠶᠠᠭᠠ ᠶ᠋ᠢ ᠭᠠᠯᠳᠠᠨ ᠳ᠋ᠤ᠌ ᠰᠠᠷᠪᠠᠢᠵᠤ᠂
— ᠰᠠᠬᠢᠯ ᠰᠠᠨᠸᠠᠷ ᠢ᠋ᠶ᠋ᠠᠨ ᠮᠠᠷᠲᠠ! ᠭᠡᠮᠡᠨ ᠳᠤᠭᠠᠩ ᠤ᠋ᠨ ᠠᠮᠤᠭᠤᠯᠠᠩ ᠲᠠᠢᠪᠤᠩ ᠢ᠋ ᠴᠠᠯᠭᠢᠯᠠᠭᠤᠯᠤᠨ ᠥᠭᠦᠯᠡᠯᠡ᠃
ᠭᠠᠯᠳᠠᠨ ᠯᠠᠮᠠ ᠭᠡᠭᠡᠷᠡᠯ ᠦ᠋ᠨ ᠴᠢᠨᠠᠳᠤ ᠣᠷᠣᠰᠢᠬᠤ ᠭᠡᠭᠴᠢ ᠶᠠᠭᠤᠲᠠᠢ ᠬᠦᠴᠦᠨ ᠲᠡᠭᠦᠯᠳᠡᠷ ᠪᠣᠯᠬᠤ ᠶ᠋ᠢ ᠪᠢᠰᠢᠷᠡᠵᠦ ᠵᠣᠭᠰᠣᠪᠠ᠃ ᠳᠤᠭᠠᠩ ᠳ᠋ᠤ᠌ ᠴᠠᠩ ᠬᠡᠩᠭᠡᠷᠭᠡ᠂ ᠪᠦᠷᠢᠶᠡ ᠪᠢᠰᠬᠢᠭᠦᠷ ᠦ᠋ᠨ ᠳᠠᠭᠤ ᠳᠥᠭᠥᠯᠡ᠃ ᠲᠤᠩ ᠦᠯᠢᠶᠡᠪᠡ᠃ ᠪᠥᠮᠪᠥᠷ ᠨᠦᠷᠭᠢᠭᠦᠯᠪᠡ᠃ ᠭᠠᠯᠳᠠᠨ ᠯᠠᠮᠠ ᠬᠣᠶᠠᠷ ᠭᠠᠷᠳᠠᠨ ᠬᠦᠯᠢᠶᠡᠵᠦ ᠠᠪᠤᠭᠰᠠᠨ ᠭᠠᠪᠠᠯᠠ ᠶ᠋ᠢᠨ ᠠᠶᠠᠭᠠ ᠪᠠᠨ ᠥᠪᠡᠷ ᠦ᠋ᠨ ᠪᠠᠭᠰᠢ ᠪᠠᠨᠴᠢᠨ ᠪᠣᠭᠳᠠ ᠳ᠋ᠤ᠌ ᠪᠠᠷᠢᠯᠠ᠃
ᠭᠠᠯᠳᠠᠨ ᠯᠠᠮᠠ ᠥᠭᠦᠯᠡᠷᠦᠨ᠂
— ᠨᠠᠮᠠᠶ᠋ᠢ ᠪᠤᠷᠬᠠᠨ ᠥᠷᠥᠰᠢᠶᠡᠵᠦ ᠰᠣᠶᠣᠷᠬᠠᠪᠠ᠃ ᠪᠢ ᠡᠬᠡ ᠶ᠋ᠢᠨ ᠴᠢᠰᠤᠨ ᠡᠴᠡ ᠪᠦᠲᠦᠭᠰᠡᠨ ᠪᠢᠯᠡ᠃ ᠳᠠᠷᠠᠭᠠ ᠨᠢ ᠪᠢ ᠡᠬᠡ ᠶ᠋ᠢᠨ ᠰᠦ ᠪᠡᠷ ᠠᠮᠢᠯᠠᠵᠤ ᠤᠭᠤᠷᠠᠭ ᠴᠠᠭᠠᠨ ᠰᠦ ᠶ᠋ᠢᠨ ᠠᠴᠢ ᠪᠠᠷ ᠬᠥᠮᠦᠨ ᠪᠣᠯᠤᠭᠰᠠᠨ ᠪᠢᠯᠡ᠃ ᠨᠠᠮᠠᠶ᠋ᠢ ᠬᠡᠪᠡᠯᠢ ᠳ᠋ᠡᠭᠡᠨ ᠰᠢᠷᠠ ᠬᠤᠷᠢᠶᠠᠬᠤ ᠳ᠋ᠤ᠌ ᠡᠬᠡ ᠶ᠋ᠢᠨ ᠤᠰᠤ ᠪᠠᠷ ᠳᠠᠬᠢᠨ ᠠᠮᠢᠳᠤᠷᠠᠭᠤᠯᠵᠤ ᠪᠤᠰᠬᠠᠭᠰᠠᠨ ᠪᠢᠯᠡ᠃
ᠡᠬᠡ ᠳ᠋ᠡᠭᠡᠨ ᠮᠥᠷᠭᠥᠶᠡ!
ᠯᠠᠮᠠ ᠪᠠᠭᠰᠢ ᠳ᠋ᠠᠭᠠᠨ ᠮᠥᠷᠭᠥᠶᠡ!
ᠨᠣᠮ ᠳ᠋ᠤᠷ ᠮᠥᠷᠭᠥᠶᠡ! ᠭᠡᠮᠡᠨ ᠭᠦᠨ ᠲᠠᠯᠠᠷᠬᠠᠯ ᠲᠠᠢ ᠥᠴᠢᠨ ᠬᠡᠯᠡᠬᠦ ᠳ᠋ᠦ᠍ ᠪᠤᠷᠬᠠᠨ ᠤ᠋ ᠢᠷᠦᠭᠡᠯ ᠬᠤᠷᠢᠶᠠᠵᠤ᠂ ᠲᠦᠮᠡᠨ ᠵᠤᠯᠠ ᠪᠠᠳᠠᠷᠠᠵᠤ᠂ ᠭᠦᠩᠭᠠᠷᠠᠪᠠ ᠪᠤᠷᠬᠠᠳ ᠭᠢᠯᠠᠯᠵᠠᠵᠤ ᠳᠤᠭᠠᠩ ᠤ᠋ᠨ ᠳᠡᠭᠡᠪᠦᠷ ᠳᠡᠭᠡᠭᠦᠷ ᠪᠤᠮᠠᠨ ᠰᠢᠪᠠᠭᠤᠳ ᠵᠢᠷᠭᠢᠨ ᠱᠠᠭᠰᠢᠪᠠ᠃ ᠭᠠᠯᠳᠠᠨ ᠯᠠᠮᠠ ᠶ᠋ᠢᠨ ᠰᠠᠬᠢᠯ ᠰᠠᠨᠸᠠᠷ ᠢ᠋ᠶ᠋ᠠᠨ ᠡᠷᠭᠦᠬᠦ ᠶᠣᠰᠣᠯᠠᠯ ᠡᠬᠢᠯᠡᠵᠦ ᠪᠠᠢᠭᠠ ᠨᠢ ᠡᠨᠡ᠃ ᠴᠠᠩ ᠬᠡᠩᠭᠡᠷᠭᠡ ᠬᠠᠩᠭᠢᠨᠠᠬᠤ ᠪᠦᠷᠢ ᠭᠠᠯᠳᠠᠨ ᠤ᠋ ᠵᠢᠷᠦᠬᠡᠨ ᠦ᠌ ᠭᠡᠮ ᠳᠣᠷᠭᠢᠨ ᠴᠢᠪᠴᠢᠷᠠᠵᠤ᠂ ᠪᠥᠮᠪᠥᠷ ᠨᠦᠳᠦᠬᠦ ᠳ᠋ᠦ᠍ ᠪᠡᠶᠡ ᠶ᠋ᠢᠨ ᠲᠡᠩᠴᠡᠭᠦᠷᠢ ᠪᠠᠲᠤ ᠪᠣᠯᠤᠨᠠ᠃ ᠬᠤᠪᠢᠯᠭᠠᠨ ᠯᠠᠮᠠ ᠶ᠋ᠢᠨ ᠪᠠᠷᠠᠭᠤᠨ ᠵᠡᠭᠦᠨ ᠬᠥᠯ ᠳᠤᠭᠠᠩ ᠤ᠋ᠨ ᠵᠦᠢᠮᠡᠯ ᠮᠣᠳᠣᠨ ᠱᠠᠯᠠ ᠶ᠋ᠢ ᠭᠢᠰᠬᠢᠭᠰᠡᠨ ᠪᠠᠢᠯᠠ᠃ ᠵᠦᠢᠮᠡᠯ ᠱᠠᠯᠠᠨ ᠳᠡᠭᠡᠷᠡ ᠭᠠᠯᠳᠠᠨ ᠯᠠᠮᠠ ᠰᠢᠭ᠋ ᠢᠩᠭᠢᠵᠦ ᠴᠢᠩᠭᠠ ᠭᠢᠰᠬᠢᠭᠰᠡᠨ ᠲᠣᠬᠢᠶᠠᠯᠳᠤᠯ ᠦᠭᠡᠢ ᠪᠢᠵᠡ᠃
ᠳᠤᠭᠠᠩ ᠳ᠋ᠤ᠌ ᠨᠦᠷᠭᠢᠯᠡᠬᠦ ᠪᠦᠷᠢᠶᠡ ᠪᠢᠰᠬᠢᠭᠦᠷ᠂ ᠬᠡᠩᠭᠡᠷᠭᠡ ᠴᠠᠩ᠂ ᠲᠤᠩ ᠯᠠᠪᠠᠢ᠂ ᠪᠥᠮᠪᠥᠷ ᠦ᠋ᠨ ᠭᠤᠨᠢᠭᠲᠤ ᠰᠠᠭᠠᠷᠮᠠᠭ ᠳᠠᠭᠤᠨ ᠭᠠᠯᠳᠠᠨ ᠤ᠋ ᠵᠢᠷᠦᠬᠡᠨ ᠳ᠋ᠦ᠍ ᠬᠦᠷᠴᠦ ᠬᠥᠨᠳᠡᠭᠦᠷ ᠡᠭᠦᠰᠬᠡᠵᠦ ᠪᠢᠯᠡ᠃ ᠲᠥᠪᠡᠳ ᠦ᠋ᠨ ᠴᠠᠰᠤᠲᠤ ᠠᠭᠤᠯᠠ ᠶ᠋ᠢᠨ ᠨᠣᠭᠣᠭᠠᠨ ᠡᠩᠭᠡᠷ ᠲᠦ᠍ ᠪᠣᠷᠣᠭᠠ ᠴᠠᠢᠷᠠᠵᠤ ᠵᠦᠰᠡᠷᠡᠭᠰᠡᠭᠡᠷ ᡀᠠᠰᠠ ᠬᠡᠮᠡᠬᠦ ᠪᠤᠳ᠋ᠳ᠋ᠾᠠ ᠤ᠋ ᠬᠣᠲᠠ ᠳᠡᠭᠡᠭᠦᠷ ᠮᠠᠨᠠᠨ ᠲᠠᠲᠠᠵᠤ ᠬᠠᠷᠠᠩᠭᠤᠢᠯᠠᠪᠠ᠃ ᠰᠦᠮᠡ ᠶ᠋ᠢᠨ ᠳᠣᠲᠣᠷᠠᠬᠢ ᠲᠦᠮᠡᠨ ᠵᠤᠯᠠ ᠶ᠋ᠢᠨ ᠰᠢᠷᠠ ᠭᠡᠷᠡᠯ ᠳ᠋ᠦ᠍ ᠶᠡᠬᠡᠰ ᠯᠠᠮᠠ ᠨᠠᠷ ᠤ᠋ᠨ ᠨᠢᠭᠤᠷ ᠴᠢᠷᠠᠢ ᠳᠤᠰᠤᠯᠠᠭᠰᠠᠨ ᠮᠡᠲᠦ ᠭᠢᠯᠲᠤᠭᠠᠨᠠᠨᠠ᠃
ᠠᠷᠪᠠᠨ ᠳᠥᠷᠪᠡ
ᠭᠠᠯᠳᠠᠨ ᠯᠠᠮᠠ ᠶ᠋ᠢᠨ ᠰᠠᠬᠢᠯ ᠰᠠᠨᠸᠠᠷ ᠢ᠋ᠶ᠋ᠠᠨ ᠡᠷᠭᠦᠵᠦ ᠪᠣᠢ ᠲᠡᠰᠢᠯᠡᡁᠡᠮᠤ ᠬᠡᠢᠳ ᠪᠣᠯᠪᠠᠰᠤ ᠲᠥᠪᠡᠳ ᠦ᠋ᠨ ᠭᠤᠷᠪᠠᠨ ᠶᠡᠬᠡ ᠬᠡᠢᠳ ᠦ᠋ᠨ ᠨᠢᠭᠡ ᠪᠥᠭᠡᠳ 1147 ᠣᠨ ᠳ᠋ᠤ᠌ ᠠᠩᠬᠠᠳᠤᠭᠠᠷ ᠳᠠᠯᠠᠢ ᠯᠠᠮᠠ ᠭᠡᠨᠳᠤᠨᠳᠥ᠋ᠪ ᠤᠭ ᠬᠡᠢᠳ ᠦ᠋ᠨ ᠦᠨᠳᠦᠰᠦ ᠰᠠᠭᠤᠷᠢ ᠶ᠋ᠢ ᠭᠠᠵᠠᠷ ᠡᠬᠡ ᠲᠡᠢ ᠬᠣᠯᠪᠣᠵᠠᠢ᠃ ᠲᠡᠰᠢᠯᠡᡁᠡᠮᠤ ᠬᠡᠢᠳ ᠬᠣᠵᠢᠮ ᠪᠠᠨᠴᠢᠠᠡᠷᠳᠡᠨᠢ ᠶ᠋ᠢᠨ ᠬᠡᠢᠳ ᠪᠣᠯᠵᠠᠢ᠃
ᠭᠠᠯᠳᠠᠨ ᠢ᠋ ᠡᠨᠡ ᠬᠡᠢᠳ ᠲᠦ᠍ ᠳᠠᠭᠠᠭᠤᠯᠵᠤ ᠣᠷᠣᠭᠰᠠᠨ ᠣᠢᠷᠠᠳ ᠤ᠋ᠨ ᠱᠠᠰᠢᠨ ᠤ᠋ ᠲᠡᠷᠢᠭᠦᠨ ᠷᠠᠪᠵᠠᠮᠪᠠ ᠽᠠᠶᠠ ᠪᠠᠨᠳᠢᠳᠠ ᠨᠠᠮᠬᠠᠢᠵᠠᠮᠰᠣ ᠡᠴᠢᠭᠡ ᠬᠣᠩ ᠲᠠᠢᠵᠢ ᠶ᠋ᠢ ᠲᠠᠭᠠᠯᠠᠯ ᠲᠡᠭᠦᠰᠬᠦ ᠳ᠋ᠦ᠍ ᠳᠡᠷᠡ ᠶ᠋ᠢᠨ ᠬᠢᠨᠢ ᠯᠠᠮᠠ ᠪᠠᠢᠵᠤ᠂ ᠲᠡᠭᠦᠨ ᠡᠴᠡ ᠬᠣᠢᠰᠢ ᠤᠳᠠᠯ ᠦᠭᠡᠢ ᠲᠥᠪᠡᠳ ᠣᠷᠣᠬᠤ ᠵᠠᠮ ᠳ᠋ᠠᠭᠠᠨ ᠵᠠᠡᠭᠴᠢ ᠬᠠᠯᠠᠭᠰᠠᠨ ᠶᠤᠮ᠃ ᠡᠨᠡ ᠶᠠᠪᠤᠳᠠᠯ ᠨᠠᠮᠠᠶ᠋ᠢ ᠭᠠᠨᠳᠠᠩ ᠰᠢᠷᠡᠭᠡᠲᠦ ᠶ᠋ᠢᠨ ᠬᠡᠢᠳ ᠦ᠋ᠨ ᠲᠡᠷᠢᠭᠦᠨ ᠭᠡᠮᠡᠨ ᠡᠷᠭᠦᠮᠵᠢᠯᠡᠬᠦ ᠢᠵᠠᠭᠤᠷ ᠰᠢᠯᠲᠠᠭᠠᠨ ᠮᠥᠨ ᠭᠡᠵᠦ ᠪᠣᠳᠣᠳᠠᠭ᠃ ᠭᠡᠲᠡᠯᠡ ᠲᠡᠷᠢᠭᠦᠨ ᠬᠠᠮᠪᠤ ᠪᠣᠯᠬᠤ ᠮᠠᠨᠢ ᠣᠷᠪᠣᠩ ᠢᠶᠠᠷ ᠢᠶᠡᠨ ᠡᠷᠭᠢᠪᠡ᠃ ᠵᠡᠭᠥᠨᠭᠠᠷ ᠲᠤ᠌ ᠠᠬᠠ ᠰᠡᠩᠭᠡ ᠬᠠᠭᠠᠨ ᠤ᠋ ᠦᠶᠡ ᠳ᠋ᠦ᠍ ᠢᠯᠢ ᠭᠣᠣᠯ ᠤ᠋ᠨ ᠬᠣᠢᠲᠤ᠂ ᠤᠷᠢᠳᠤ ᠡᠷᠭᠢ ᠳ᠋ᠦ᠍ ᠤᠭᠠᠯᠵᠠ ᠪᠣᠯᠤᠨ ᠬᠠᠢᠨᠤᠭ ᠤ᠋ᠨ ᠡᠪᠡᠷ ᠢ᠋ᠶ᠋ᠡᠷ ᠳᠡᠭᠡᠪᠦᠷᠯᠡᠭᠰᠡᠨ ᠬᠣᠶᠠᠷ ᠰᠦᠮᠡ ᠪᠤᠰᠬᠠᠵᠤ ᠰᠦᠰᠦᠭᠲᠡᠨ ᠣᠯᠠᠨ ᠢ᠋ ᠬᠤᠷᠢᠶᠠᠵᠤ᠂ ᠰᠠᠬᠢᠯ ᠬᠦᠷᠲᠡᠭᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠵᠤ ᠵᠣᠭᠰᠣᠪᠠ᠃
ᠪᠠᠠᠴᠢᠠᠡᠷᠳᠡᠨᠢ ᠥᠭᠦᠯᠡᠷᠦᠨ᠂
— ᠳᠠᠯᠳᠠ ᠶ᠋ᠢᠨ ᠮᠠᠭᠤ ᠬᠥᠮᠦᠨ ᠡᠴᠡ ᠬᠠᠮᠠᠭᠠᠯᠠᠵᠤ ᠢᠳᠤᠭᠠᠨ ᠡᠮᠡᠭᠡᠨ ᠦ᠌ ᠭᠠᠪᠠᠯᠠ ᠶ᠋ᠢᠨ ᠴᠣᠢᠵᠢᠯ ᠢ᠋ ᠱᠠᠪᠢ ᠭᠠᠯᠳᠠᠨ ᠳ᠋ᠤ᠌ ᠬᠠᠳᠠᠭᠠᠯᠠᠭᠤᠯᠤᠶᠠ᠃ ᠲᠠ ᠪᠤᠷᠬᠠᠨ ᠳ᠋ᠤ᠌ ᠠᠭᠤᠰᠤᠭᠰᠠᠨ ᠪᠢᠯᠡ᠃ ᠰᠢᠷᠡᠭᠡᠲᠦ ᠯᠠᠮᠠ ᠶ᠋ᠢᠨ ᠵᠡᠷᠭᠡ ᠵᠢᠩᠳᠠᠭᠠ ᠥᠨᠳᠥᠷ ᠪᠣᠯᠪᠠᠴᠤ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠤ᠋ ᠪᠦᠷᠭᠦᠳ ᠲᠡᠢ ᠰᠡᠨᠳᠡᠢ ᠥᠭᠭᠢᠶᠡᠮᠦᠷ ᠠᠵᠢ᠃ ᠬᠠᠲᠤᠨ ᠡᠬᠡ ᠶ᠋ᠢᠨ ᠲᠠᠨᠢ ᠰᠠᠨᠠᠯ ᠭᠠᠯᠳᠠᠨ ᠯᠠᠮᠠ ᠲᠠᠨ ᠢ᠋ ᠪᠦᠷᠢᠨᠡ ᠡᠵᠡᠯᠡᠪᠡ᠃ ᠰᠦ ᠪᠡᠨ ᠠᠮᠰᠠᠭᠤᠯᠵᠤ᠂ ᠤᠰᠤ ᠪᠠᠷ ᠢ᠋ᠶ᠋ᠠᠨ ᠢᠯᠠᠷᠢᠰᠢᠭᠤᠯᠤᠭᠰᠠᠨ ᠬᠠᠲᠤᠨ ᠡᠬᠡ ᠶ᠋ᠢᠨ ᠰᠠᠨᠠᠭᠠ ᠮᠡᠷᠭᠡᠨ ᠪᠣᠢ ᠊ᠢᠠ ᠭᠡᠪᠡ᠃
ᠭᠠᠯᠳᠠᠨ ᠬᠠᠷᠢᠭᠤ ᠳ᠋ᠤᠨᠢ᠂
— ᠮᠢᠨᠦ ᠵᠢᠷᠤᠭ᠂ ᠲᠥᠭᠡᠷᠭᠡ ᠶᠠᠮᠠᠷ ᠪᠣᠯ ᠭᠡᠬᠦ ᠳ᠋ᠦ᠍ ᠪᠠᠨᠴᠢᠠᠡᠷᠳᠡᠨᠢ ᠱᠠᠪᠢ ᠶ᠋ᠢᠨ ᠢ᠋ᠶ᠋ᠡᠨ ᠣᠢ ᠤᠬᠠᠭᠠᠨ ᠰᠡᠷᠭᠦᠯᠡᠩ ᠢ᠋ ᠭᠠᠢᠬᠠᠨ
ᠲᠠᠮᠰᠢᠶᠠᠯᠠᠬᠤ ᠮᠡᠲᠦ ᠪᠣᠯᠤᠭᠠᠳ᠂
— ᠨᠠᠰᠤᠨ ᠤ᠋ ᠪᠤᠷᠬᠠᠨ ᠤ᠋ ᠨᠡᠷᠡ ᠲᠡᠢ ᠬᠥᠮᠦᠨ ᠡᠰᠡ ᠦᠬᠦᠪᠡᠰᠦ ᠥᠷᠢᠰᠦᠯᠳᠦᠭᠡᠨ ᠲᠠᠭᠠᠮᠵᠢᠷᠠᠵᠤ ᠴᠥᠪ ᠡᠭᠦᠰᠦᠨᠡ ᠭᠡᠯᠡ᠃
ᠪᠠᠨᠴᠢᠠᠡᠷᠳᠡᠨᠢ ᠡᠷᠢᠬᠡ ᠪᠠᠨ ᠡᠷᠭᠢᠭᠦᠯᠦᠨ ᠲᠦᠪᠰᠢᠨ ᠳᠦᠷᠢ ᠲᠡᠢ ᠪᠣᠯᠪᠠ᠃
ᠠᠷᠪᠠᠨ ᠲᠠᠪᠤ
ᠭᠠᠯᠳᠠᠨ ᠤ᠋ ᠲᠠᠷᠢᠬᠢᠨ ᠳ᠋ᠤ᠌ ᠡᠷᠴᠢᠯᠡᠭᠰᠡᠨ ᠬᠤᠢ ᠰᠠᠯᠬᠢ ᠪᠣᠰᠴᠠᠢ᠃ ᠨᠠᠰᠤᠨ ᠤ᠋ ᠪᠤᠷᠬᠠᠨ ᠤ᠋ ᠨᠡᠷᠡ ᠪᠣᠯ ᠴᠡᠸᠡᠡᠭᠷᠠᠪᠲᠠᠨ ᠰᠢᠦ ᠳᠡ᠃ ᠶᠡᠬᠡᠰ ᠯᠠᠮᠠ ᠨᠠᠷ ᠮᠥᠨ ᠬᠦ᠌ ᠴᠡᠸᠡᠡᠭᠷᠠᠪᠲᠠᠨ ᠭᠡᠮᠡᠨ ᠪᠣᠳᠣᠵᠠᠭᠠᠪᠠ᠃ ᠳᠠᠰᠢᠯᠠᡁᠡᠮᠤ ᠬᠡᠢᠳ ᠲᠦ᠍ ᠰᠢᠷᠡᠭᠡᠲᠦ ᠯᠠᠮᠠ ᠡᠷᠭᠦᠮᠵᠢᠯᠡᠬᠦ ᠪᠤᠰᠤ ᠰᠠᠬᠢᠯ ᠰᠠᠨᠸᠠᠷ ᠢ᠋ᠶ᠋ᠠᠨ ᠡᠷᠭᠦᠬᠦ ᠭᠠᠯᠳᠠᠨ ᠯᠠᠮᠠ ᠶ᠋ᠢᠨ ᠶᠣᠰᠣᠯᠠᠯ ᠥᠷᠨᠢᠵᠦ ᠪᠠᠢᠨᠠ᠃ ᠰᠡᠩᠭᠡ ᠬᠠᠭᠠᠨ ᠤ᠋ ᠬᠥᠪᠡᠭᠦᠨ ᠭᠠᠯᠳᠠᠨ ᠤ᠋ ᠠᠴᠢ ᠬᠦᠦ ᠶ᠋ᠢ ᠴᠡᠸᠡᠡᠭᠷᠠᠪᠲᠠᠨ ᠭᠡᠳᠡᠭ᠃ ᠠᠨᠤ ᠬᠠᠲᠤᠨ ᠡᠴᠡ ᠲᠥᠷᠥᠭᠰᠡᠨ ᠴᠡᠸᠡᠡᠭᠷᠠᠪᠲᠠᠨ ᠤ᠋ ᠨᠡᠷᠡ ᠭᠠᠯᠳᠠᠨ ᠳ᠋ᠤ᠌ ᠬᠦᠨᠳᠦᠪᠲᠦᠷ ᠰᠣᠨᠣᠰᠤᠭᠳᠠᠪᠠ᠃ ᠵᠡᠬᠥᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠬᠡᠷᠡᠭ ᠶᠠᠪᠤᠳᠠᠯ ᠢ᠋ ᠠᠨᠤ ᠬᠠᠲᠤᠨ ᠡᠷᠬᠡᠰᠢᠶᠡᠵᠦ ᠪᠣᠢ᠃
ᠭᠠᠯᠳᠠᠨ ᠨᠠᠳᠠ ᠴᠡᠸᠠᠩᠷᠠᠪᠳᠠᠨ ᠡᠴᠡ ᠴᠥᠪ ᠡᠭᠦᠰᠦᠨᠡ ᠬᠡᠮᠡᠬᠦ ᠰᠢᠯᠲᠠᠭᠠᠨ ᠢ᠋ ᠨᠣᠮ ᠤᠨ ᠪᠠᠭᠰᠢ ᠪᠠᠨᠴᠢᠠᠡᠷᠳᠡᠨᠢ ᠵᠢᠷᠤᠭᠰᠠᠨ ᠬᠡᠷᠡᠭ᠃ ᠤᠯᠠᠭᠠᠨ ᠤ᠋ ᠲᠠᠯᠠ ᠶ᠋ᠢᠨ ᠬᠢᠨ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠤ᠋ ᠬᠤᠪᠢᠯᠭᠠᠨ ᠯᠠᠮᠠ ᠳ᠋ᠤ᠌ ᠮᠡᠳᠡᠭᠡᠵᠢ ᠳᠠᠭᠠ ᠦᠭᠡᠢ ᠬᠠᠨᠳᠤᠨᠠ᠃ ᠴᠡᠸᠡᠩᠷᠠᠪᠳᠠᠨ ᠢ᠋ ᠠᠨᠤ ᠬᠠᠲᠤᠨ ᠴᠡᠭᠡᠵᠢ ᠪᠡᠷ ᠢ᠋ᠶ᠋ᠡᠨ ᠬᠠᠭᠠᠵᠤ ᠪᠠᠢᠭᠠ᠃ ᠭᠠᠯᠳᠠᠨ ᠤ᠋ ᠬᠡᠢ ᠪᠣᠳᠣᠯ ᠤ᠋ᠨ ᠳᠣᠲᠣᠷᠠ ᠰᠡᠪ ᠰᠠᠭᠤᠪᠠ᠃ ᠨᠢᠭᠡ ᠡᠳᠦᠷ ᠴᠡᠸᠡᠩᠷᠠᠪᠳᠠᠨ ᠢ᠋ ᠦᠬᠦᠭᠦᠯᠬᠦ ᠦᠭᠡᠢ ᠪᠣᠯ ᠭᠠᠯᠳᠠᠨ ᠬᠠᠭᠠᠨ ᠰᠡᠨᠳᠡᠢ ᠳ᠋ᠦ᠍ ᠲᠤᠬᠠᠯᠠᠨᠠ ᠭᠡᠵᠦ ᠤᠤ? ᠬᠠᠭᠠᠨ ᠰᠡᠨᠳᠡᠢ ᠭᠠᠯᠳᠠᠨ ᠳ᠋ᠤ᠌ ᠲᠦᠮᠡᠨ ᠪᠡᠷᠬᠡᠰᠢᠶᠡᠯ ᠠᠪᠴᠢᠷᠠᠨᠠ᠃
ᠠᠩᠬᠠ ᠶ᠋ᠢᠨ ᠪᠡᠷᠬᠡᠰᠢᠶᠡᠯ ᠭᠠᠯᠳᠠᠨ ᠤ᠋ ᠬᠡᠢ ᠪᠣᠳᠣᠯ ᠳ᠋ᠤ᠌ ᠰᠢᠩᠭᠡᠪᠡ᠃ ᠪᠦᠷᠭᠦᠳ ᠲᠡᠢ ᠬᠠᠭᠠᠨ ᠰᠡᠨᠳᠡᠢ ᠭᠠᠯᠳᠠᠨ ᠢ᠋ ᠬᠦᠯᠢᠶᠡᠵᠦ ᠪᠣᠢ ᠲᠤᠯᠠ ᠣᠶᠤᠨ ᠰᠠᠨᠠᠭᠠ ᠪᠠᠨ ᠪᠡᠯᠡᠳᠬᠡᠬᠦ ᠬᠡᠷᠡᠭᠲᠡᠢ ᠭᠡᠳᠡᠭ ᠢ᠋ ᠲᠠᠰᠢᠯᠠᡁᠡᠮᠤ ᠬᠡᠢᠳ ᠦ᠋ᠨ ᠳᠡᠭᠡᠪᠦᠷ ᠳᠣᠣᠷᠠ ᠭᠠᠯᠳᠠᠨ ᠰᠡᠳᠬᠢᠪᠡ᠃
ᠠᠷᠪᠠᠨ ᠵᠢᠷᠭᠤᠭᠠ
ᠭᠠᠯᠳᠠᠨ ᠰᠠᠬᠢᠯ ᠰᠠᠨᠸᠠᠷ ᠢ᠋ᠶ᠋ᠠᠨ ᠡᠷᠭᠦᠨᠡ ᠭᠡᠳᠡᠭ ᠨᠢ ᠥᠪᠡᠷ ᠡᠴᠡ ᠪᠡᠨ ᠤᠷᠪᠠᠭᠰᠠᠨ ᠬᠡᠷᠡᠭ ᠪᠤᠰᠤ᠃ ᠪᠠᠰᠠ ᠥᠪᠡᠷ ᠲᠡᠢ ᠪᠡᠨ ᠡᠪᠯᠡᠷᠡᠭᠰᠡᠨ ᠬᠡᠷᠡᠭ ᠴᠦ᠍ ᠪᠤᠰᠤ᠃ ᠭᠠᠯᠳᠠᠨ ᠥᠪᠡᠷ ᠤᠷᠤᠭᠤ ᠪᠠᠨ ᠶᠠᠪᠤᠭᠠ ᠪᠢᠯᠡ᠃ ᠭᠠᠯᠳᠠᠨ ᠢ᠋ ᠬᠡᠨ ᠴᠦ᠍ ᠲᠠᠨᠢᠬᠤ ᠦᠭᠡᠢ᠃ ᠬᠠᠲᠤᠨ ᠡᠬᠡ ᠶᠥᠮ ᠠᠭᠠ ᠦᠯᠦ ᠲᠠᠨᠢᠨᠠ᠃ ᠭᠠᠯᠳᠠᠨ ᠢ᠋ ᠭᠠᠯᠳᠠᠨ ᠯᠠ ᠲᠠᠨᠢᠨᠠ᠃ ᠭᠠᠯᠳᠠᠨ ᠠᠯᠳᠠᠭᠠ ᠭᠠᠷᠭᠠᠪᠠᠯ ᠭᠠᠯᠳᠠᠨ ᠬᠣᠬᠢᠷᠠᠨᠠ᠃ ᠭᠠᠯᠳᠠᠨ ᠵᠥᠪ ᠶᠠᠪᠤᠪᠠᠯ ᠭᠠᠯᠳᠠᠨ ᠵᠢᠷᠭᠠᠨᠠ᠃ ᠰᠢᠷᠡᠭᠡᠲᠦ ᠯᠠᠮᠠ ᠶ᠋ᠢᠨ ᠰᠠᠭᠤᠳᠠᠯ ᠡᠴᠡ ᠭᠠᠯᠳᠠᠨ ᠲᠠᠲᠠᠭᠠᠯᠵᠠᠵᠤ᠂ ᠵᠠᠬᠥᠡᠭᠠᠷ ᠤ᠋ᠨ ᠬᠠᠭᠠᠨ ᠤ᠋ ᠰᠡᠨᠳᠡᠢ ᠳ᠋ᠦ᠍ ᠵᠢᠳᠬᠦᠭᠰᠡᠨ ᠨᠢ ᠵᠢᠷᠭᠠᠯ ᠪᠤᠰᠤ ᠵᠣᠪᠠᠯᠠᠩ ᠪᠥᠯᠥᠭᠡ᠃
ᠭᠠᠯᠳᠠᠨ ᠵᠢᠷᠭᠠᠬᠤ ᠶ᠋ᠢᠨ ᠲᠤᠯᠠᠳᠠ ᠵᠣᠪᠠᠯᠠᠩ ᠢ᠋ ᠰᠣᠩᠭᠣᠭᠰᠠᠨ ᠪᠠᠢᠵᠠᠢ᠃ ᠭᠠᠯᠳᠠᠨ ᠢ᠋ ᠵᠠᠬᠥᠡᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠢᠷᠭᠡᠳ᠂ ᠴᠡᠷᠢᠭ ᠦ᠋ᠳ᠂ ᠣᠷᠳᠣᠨ ᠤ᠋ ᠬᠢᠨ ᠲᠣᠭᠣᠷᠢᠨ ᠡᠷᠭᠢᠯᠳᠦᠨᠡ᠃
ᠭᠠᠯᠳᠠᠨ ᠮᠥᠩᠬᠡ ᠶ᠋ᠢᠨ ᠬᠦᠯᠢᠶᠡᠯᠲᠡ ᠳ᠋ᠦ᠍ ᠣᠷᠣᠪᠠ᠃ ᠬᠦᠯᠢᠶᠡᠯᠲᠡ ᠶᠠᠭᠤᠨ ᠤ᠋ ᠲᠥᠯᠥᠭᠡ ᠪᠣᠯᠬᠤ ᠶ᠋ᠢ ᠭᠠᠯᠳᠠᠨ ᠤ᠋ ᠬᠡᠢ ᠪᠡᠶᠡ ᠮᠡᠳᠡᠬᠦ ᠡᠴᠡ ᠭᠠᠯᠳᠠᠨ ᠤ᠋ ᠮᠢᠬᠠᠨ ᠪᠡᠶᠡ ᠦᠯᠦ ᠮᠡᠳᠡᠨᠡ᠃
ᠭᠠᠯᠳᠠᠨ ᠢ᠋ ᠰᠠᠬᠢᠯ ᠰᠠᠨᠸᠠᠷ ᠢ᠋ᠶ᠋ᠠᠨ ᠪᠤᠴᠠᠭᠠᠵᠤ ᠡᠷᠭᠦᠬᠦ ᠶ᠋ᠢ ᠬᠠᠮᠤᠭ ᠤ᠋ᠨ ᠬᠠᠲᠠᠭᠤ ᠦᠢᠯᠡ ᠭᠡᠮᠡᠨ ᠬᠠᠲᠤᠨ ᠡᠬᠡ ᠨᠢ ᠪᠣᠳᠣᠭᠰᠠᠨ ᠪᠣᠢ ᠊ᠢᠠ᠃ ᠰᠠᠬᠢᠯ ᠰᠠᠨᠸᠠᠷ ᠢ᠋ᠶ᠋ᠠᠨ ᠡᠷᠭᠦᠨᠡ ᠭᠡᠳᠡᠭ ᠪᠣᠯ ᠭᠠᠯᠳᠠᠨ ᠪᠤᠷᠬᠠᠨ ᠳ᠋ᠠᠭᠠᠨ ᠦᠨᠡᠨᠴᠢ ᠦᠯᠡᠳᠡᠬᠦ ᠶ᠋ᠢᠨ ᠨᠡᠷᠡ ᠶᠦᠮ᠃ ᠭᠠᠯᠳᠠᠨ ᠲᠥᠷᠥ ᠶ᠋ᠢᠨ ᠲᠥᠯᠥᠭᠡ ᠬᠠᠷᠠ ᠬᠥᠮᠦᠨ ᠪᠣᠯᠪᠠ᠃ ᠭᠠᠯᠳᠠᠨ ᠥᠪᠡᠷ ᠲᠡᠭᠡᠨ ᠣᠯᠠᠨ ᠳᠠᠢᠰᠤᠨ ᠲᠠᠢ ᠪᠣᠯᠪᠠ᠃
ᠳᠠᠰᠢᠯᠠᡁᠠᠮᠤ ᠬᠡᠢᠳ ᠦ᠋ᠨ ᠰᠢᠷᠠ ᠸᠠᠭᠠᠷ ᠲᠠᠢ ᠳᠡᠭᠡᠪᠦᠷ ᠡᠴᠡ ᠵᠦᠰᠡᠷᠡᠭᠡ ᠪᠣᠷᠣᠭᠠᠨ ᠤ᠋ ᠤᠰᠤ ᠤᠷᠤᠰᠤᠨᠠ᠃ ᠬᠣᠢᠨᠠ ᠬᠣᠢᠨᠠ ᠡᠴᠡ ᠪᠠᠨ ᠰᠠᠪᠢᠷᠠᠨ ᠤᠷᠤᠰᠬᠤ ᠤᠰᠤᠨ ᠳᠤᠰᠤᠯ ᠤ᠋ᠳ ᠨᠣᠢᠲᠠᠨ ᠭᠠᠵᠠᠷ ᠲᠤ᠌ ᠰᠢᠩᠭᠡᠵᠦ ᠪᠠᠢᠯᠠ᠃ ᠰᠡᠭᠦᠯᠴᠢ ᠶ᠋ᠢᠨ ᠬᠣᠩᠬᠣ ᠳᠠᠮᠠᠷᠤ ᠬᠡᠢᠳ ᠦ᠋ᠨ ᠶᠡᠬᠡ ᠨᠦᠷᠭᠢᠶᠡᠨ ᠢ᠋ ᠲᠡᠭᠦᠰᠬᠡᠯ ᠪᠣᠯᠤᠭᠰᠠᠨ ᠢ᠋ ᠵᠠᠷᠯᠠᠪᠠ᠃ ᠵᠠᠬᠥᠡᠭᠠᠷ ᠤ᠋ᠨ ᠬᠠᠭᠠᠨ ᠢ᠋ ᠠᠪᠠᠴᠢᠬᠤ ᠪᠠᠷ ᠢᠷᠡᠭᠰᠡᠨ ᠲᠣᠷᠭᠠᠨ ᠰᠦᠷᠦᠭ ᠪᠤᠳᠠᠩᠲᠤ ᠭᠣᠣᠯ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠢᠳᠡᠭᠡᠰᠢᠯᠡᠵᠦ ᠪᠠᠢᠯᠠ᠃
ᠠᠷᠪᠠᠨ ᠳᠣᠯᠣᠭᠠ
ᠪᠤᠷᠬᠠᠨ ᠤ᠋ ᠬᠣᠲᠠ ᠳ᠋ᠤ᠌ ᠪᠣᠷᠣᠭᠠᠨ ᠲᠠᠢ ᠪᠠᠢᠯᠠ᠃ ᠭᠠᠯᠳᠠᠨ ᠭᠡᠭᠡᠪᠴᠢ ᠶ᠋ᠢᠨ ᠴᠠᠭᠠᠨᠠ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠴᠢᠷᠠᠢ ᠲᠣᠳᠣᠷᠠᠵᠤ ᠪᠠᠢᠭᠠ ᠶ᠋ᠢ ᠬᠠᠷᠠᠪᠠ᠃ ᡀᠠᠰᠠ ᠶ᠋ᠢᠨ ᠮᠥᠷᠭᠥᠯᠴᠢᠳ ᠦ᠋ᠨ ᠲᠢᠭ ᠳᠣᠲᠣᠷᠠ ᠶᠦᠮ ᠠᠭᠠ ᠬᠠᠲᠤᠨ ᠤ᠋ ᠪᠠᠷᠠ ᠪᠣᠯᠣᠭᠰᠠᠳ᠂ ᠴᠡᠷᠢᠭ ᠦᠨ ᠮᠠᠢᠬᠠᠨ ᠪᠣᠰᠴᠠᠢ᠃ ᠴᠡᠭᠡᠵᠢᠨ ᠳ᠋ᠦ᠍ ᠪᠡᠨ ᠬᠠᠰ ᠲᠠᠢ ᠪᠦᠷᠭᠦᠳ ᠲᠥᠪ ᠠᠰᠠᠷ ᠢ᠋ ᠴᠢᠮᠡᠭᠯᠡᠨᠡ᠃
ᠭᠠᠯᠳᠠᠨ ᠢ᠋ ᠥᠷᠥᠭᠡᠨ ᠳ᠋ᠡᠭᠡᠨ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠬᠠᠲᠤᠨ ᠡᠬᠡ ᠨᠢ᠂
— ᠪᠢ ᠶᠠᠭᠠᠬᠢᠭᠰᠠᠨ ᠦᠢᠯᠡ ᠲᠡᠢ ᠬᠥᠮᠦᠨ ᠪᠣᠢ ᠭᠡᠵᠦ ᠮᠠᠰᠢ ᠬᠠᠷᠠᠮᠰᠠᠯ ᠲᠠᠢ ᠬᠡᠯᠡᠪᠡ᠃ ᠭᠠᠯᠳᠠᠨ ᠤ᠋ ᠨᠢᠳᠦᠨ ᠳ᠋ᠦ᠍ ᠭᠡᠭᠡ ᠲᠠᠲᠠᠵᠤ᠂
— ᠡᠵᠢ ᠮᠢᠨᠢ ᠪᠢ ᠲᠠᠨ ᠡᠴᠡ ᠤᠷᠪᠠᠬᠤ ᠦᠭᠡᠢ᠃ ᠪᠤᠷᠬᠠᠨ ᠨᠠᠳᠠ ᠢᠲᠡᠭᠡᠵᠦ ᠪᠠᠢᠨᠠ ᠭᠡᠯᠡ᠃
ᠡᠬᠡ ᠨᠢ ᠰᠠᠨᠠᠭᠠ ᠠᠯᠳᠠᠭᠠᠳ᠂
— ᠡᠬᠡ ᠬᠥᠮᠦᠨ ᠦ᠌ ᠵᠣᠪᠠᠯᠠᠩ ᠢ᠋ ᠪᠤᠷᠬᠠᠨ ᠨᠢᠮᠭᠡᠯᠡᠨᠡ ᠪᠢᠵᠡ᠃ ᠪᠤᠷᠬᠠᠨ ᠬᠥᠪᠡᠭᠦᠨ ᠢ᠋ ᠮᠢᠨᠢ ᠨᠠᠳᠠ ᠡᠷᠭᠢᠭᠦᠯᠵᠦ ᠥᠭᠭᠦᠯᠡ᠃ ᠪᠢ ᠪᠤᠷᠬᠠᠨ ᠳ᠋ᠤ᠌ ᠲᠠᠯᠠᠷᠬᠠᠵᠤ ᠪᠠᠢᠨᠠ ᠭᠡᠮᠡᠨ ᠰᠡᠳᠬᠢᠯ ᠨᠢ ᠬᠥᠩᠭᠡᠷᠡᠭᠰᠡᠨ ᠪᠣᠯᠤᠯᠲᠠᠢ ᠥᠭᠦᠯᠡᠪᠡ᠃
ᠶᠦᠮ ᠠᠭᠠ ᠬᠠᠲᠤᠨ ᠦᠨᠡᠬᠡᠷ ᠮᠡᠩᠳᠡᠵᠦ ᠪᠠᠢᠵᠠᠢ᠃ ᠬᠥᠪᠡᠭᠦᠨ ᠲᠥᠷᠥᠬᠦ ᠴᠠᠭ ᠬᠤᠭᠤᠴᠠᠭᠠ ᠬᠢᠭᠡᠳ ᠬᠠᠭᠠᠨ ᠬᠠᠲᠤᠨ ᠬᠣᠶᠠᠷ ᠤ᠋ᠨ ᠬᠡᠪᠡᠯᠢ ᠶ᠋ᠢᠨ ᠨᠢᠯᠬᠠᠷᠠᠵᠤ ᠦᠷᠡ ᠵᠠᠶᠠᠭᠠᠬᠤ ᠠᠯᠲᠠᠨ ᠬᠣᠷᠣᠮ ᠢ᠋ ᠪᠤᠷᠬᠠᠨ ᠤ᠋ ᠡᠯᠴᠢ ᠽᠠᠶᠠ ᠪᠠᠨᠳᠢᠳᠠ ᠨᠠᠮᠬᠠᠢᠵᠠᠮᠰᠤ ᠭᠡᠭᠡᠨᠲᠡᠨ ᠬᠡᠯᠡᠭᠰᠡᠨ ᠰᠠᠨ᠃ ᠲᠡᠭᠡᠭᠡᠳ ᠽᠠᠶᠠ ᠪᠠᠨᠳᠢᠳᠠ ᠬᠥᠪᠡᠭᠦᠨ ᠢ᠋ ᠪᠤᠷᠬᠠᠨ ᠤ᠋ ᠬᠤᠪᠢᠯᠭᠠᠨ ᠬᠤᠲᠤᠭᠲᠤ ᠪᠣᠯᠭᠠᠬᠤ ᠪᠠᠷ ᠠᠪᠴᠤ ᠣᠳᠤᠭᠰᠠᠨ᠃ ᠠᠯᠲᠠᠢ ᠶ᠋ᠢᠨ ᠴᠠᠰᠤᠲᠤ ᠠᠭᠤᠯᠠᠨ ᠳ᠋ᠤ᠌ ᠢᠷᠪᠢᠰ ᠲᠡᠢ ᠴᠣᠭ ᠠᠯᠠᠭᠠ ᠪᠣᠯᠬᠤ ᠮᠥᠴᠡ ᠳ᠋ᠦ᠍ ᠭᠡᠭᠡᠨᠲᠡᠨ ᠰᠠᠨᠳᠤᠷᠴᠤ ᠮᠡᠩᠳᠡᠭᠡ ᠦᠭᠡᠢ ᠪᠢᠯᠡ᠃
ᠭᠠᠯᠳᠠᠨ ᠢ᠋ ᠪᠤᠷᠬᠠᠨ ᠥᠮᠴᠢᠯᠡᠵᠦ ᠠᠪᠴᠠᠢ᠃ ᠭᠡᠪᠡᠴᠦ ᠬᠠᠲᠤᠨ ᠡᠬᠡ ᠨᠢ ᠮᠡᠳᠬᠡᠭᠦᠯᠦᠨ᠂ ᠵᠢᠳᠬᠦᠯᠦᠭᠰᠡᠭᠡᠷ ᠢᠷᠡᠬᠦ ᠳ᠋ᠦ᠍᠂
— ᠡᠵᠢ ᠲᠡᠢ ᠪᠡᠨ ᠶᠠᠪᠤ ᠳᠠ ᠭᠡᠵᠦ ᠬᠡᠯᠡᠳᠡᠭ ᠨᠢ ᠬᠥᠮᠦᠨ ᠦ᠌ ᠶᠣᠰᠣ ᠪᠢᠯᠡ᠃ ᠪᠤᠷᠬᠠᠨ ᠤ᠋ ᠶᠣᠰᠣ ᠪᠣᠯ ᠬᠥᠮᠦᠨ ᠦ᠌ ᠶᠣᠰᠣ ᠶᠤᠮ᠃
ᠬᠠᠲᠤᠨ ᠡᠬᠡ ᠭᠠᠯᠳᠠᠨ ᠳ᠋ᠤ᠌ ᠶᠡᠬᠡᠳᠡ ᠰᠦᠵᠢᠭᠷᠡᠭᠡᠣ ᠪᠠᠢᠳᠠᠯ ᠲᠠᠢ᠂
— ᠠᠬᠠ ᠶ᠋ᠢᠨ ᠲᠠᠨᠢ ᠨᠢᠭᠤᠷ ᠤ᠋ᠨ ᠬᠡᠪ ᠢ᠋ ᠪᠤᠷᠬᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠦᠯᠡᠳᠡᠭᠡᠭᠡᠳ ᠶᠠᠪᠤᠪᠠᠯ ᠶᠠᠮᠠᠷ ᠪᠣᠢ? ᠭᠡᠮᠡᠨ ᠲᠡᠭᠡᠨᠡᠭᠡᠯᠵᠡᠨ ᠠᠰᠠᠭᠤᠪᠠ᠃ ᠭᠠᠯᠳᠠᠨ ᠪᠣᠳᠣᠯ ᠪᠣᠯᠵᠤ《ᠥᠨᠳᠥᠷ ᠭᠡᠭᠡᠨᠲᠡᠨ ᠳ᠋ᠦ᠍ ᠬᠡᠯᠡᠪᠡᠯ ᠶᠠᠭᠤ ᠭᠡᠬᠦ ᠪᠣᠯ? ᠥᠨᠳᠥᠷ ᠭᠡᠭᠡᠨᠲᠡᠨ ᠦ᠌ ᠤᠷᠠᠯᠠᠨ ᠳ᠋ᠤ᠌ ᠣᠷᠬᠢᠪᠠᠯ ᠪᠤᠷᠬᠠᠨ ᠪᠦᠲᠦᠭᠡᠬᠦ ᠱᠦᠩᠰᠢᠭ ᠲᠦ᠍ ᠨᠡᠢᠯᠡᠭᠦᠯᠵᠦ ᠪᠣᠯᠬᠤ ᠶᠤᠮ᠃ ᠡᠵᠢ ᠶ᠋ᠢᠨ ᠰᠠᠨᠠᠭᠠ ᠶ᠋ᠢ ᠠᠮᠠᠷᠠᠭᠠᠶᠠ! ᠪᠢ ᠨᠢᠭᠡᠨ ᠴᠠᠭ ᠲᠤ᠌ ᠴᠡᠴᠡᠨ᠂ ᠵᠤᠳᠪᠠᠪᠠᠭᠠᠲᠤᠷ ᠨᠠᠷ ᠡᠴᠡ ᠶᠠᠯᠠ ᠠᠰᠠᠭᠤᠬᠤ ᠳ᠋ᠠᠭᠠᠨ ᠦᠵᠡᠭᠦᠯᠵᠦ ᠪᠣᠯᠬᠤ ᠶᠤᠮ》 ᠭᠡᠬᠦ ᠮᠡᠲᠦᠴᠢᠯᠡᠨ ᠰᠡᠳᠬᠢᠪᠡ᠃
ᠥᠨᠳᠥᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ ᠪᠤᠷᠬᠠᠳ ᠤᠷᠠᠯᠠᠳᠠᠭ ᠳᠠᠪᠴᠢᠭᠤᠬᠠᠨ ᠥᠷᠥᠭᠡᠨ ᠳ᠋ᠡᠭᠡᠨ ᠭᠠᠯᠳᠠᠨ ᠲᠠᠢ ᠠᠭᠤᠯᠵᠠᠪᠠ᠃
— ᠠᠬᠠ ᠶ᠋ᠢᠨ ᠨᠢᠭᠤᠷ ᠤ᠋ᠨ ᠬᠡᠪ ᠭᠡᠳ ᠭᠠᠯᠳᠠᠨ ᠢ᠋ ᠦᠵᠡᠭᠦᠯᠬᠦ ᠳ᠋ᠦ᠍ ᠵᠠᠨᠠᠪᠠᠽᠠᠷ᠂
— ᠡᠨᠡ ᠬᠡᠪ ᠢ᠋ ᠬᠤᠪᠢᠯᠭᠠᠬᠤ ᠬᠡᠷᠡᠭᠲᠡᠢ ᠤᠤ? ᠭᠡᠵᠦ ᠠᠰᠠᠭᠤᠪᠠ᠃
— ᠲᠡᠢᠮᠦ᠃ ᠬᠤᠪᠢᠯᠭᠠᠭᠰᠠᠨ ᠢ᠋ᠶ᠋ᠠᠨ ᠶᠠᠭᠠᠬᠢᠪᠠᠯ ᠳᠡᠭᠡᠷᠡ ᠪᠣᠢ? ᠲᠠᠬᠢᠯ ᠳᠤᠭᠠᠩ ᠳ᠋ᠤ᠌ ᠦᠯᠡᠳᠡᠭᠡᠬᠦ ᠤᠤ?
— ᠨᠠᠳᠠ ᠦᠯᠡᠳᠡᠭᠡᠴᠢᠬᠡ᠃ ᠪᠤᠷᠬᠠᠳ ᠳᠤᠮᠳᠠ ᠵᠠᠢ ᠣᠯᠳᠠᠨᠠ᠃
— ᠬᠡᠪ ᠢ᠋ ᠨᠢ ᠪᠢ ᠠᠪᠤᠨᠠ᠃
— ᠭᠠᠯᠳᠠᠨ ᠬᠤᠪᠢᠯᠭᠠᠨ ᠲᠠ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡ᠃ ᠵᠤᠯᠤᠮᠯᠠᠭᠰᠠᠨ ᠠᠷᠠᠰᠤ ᠶ᠋ᠢ ᠤᠰᠤᠨ ᠳ᠋ᠤ᠌ ᠳᠡᠪᠲᠦᠭᠡᠬᠦ ᠳ᠋ᠦ᠍ ᠡᠷᠭᠢᠭᠡᠳ ᠲᠡᠨᠢᠢᠴᠢᠬᠡᠳᠡᠭ ᠶᠦᠮ᠃ ᠬᠡᠳᠦᠨ ᠴᠤ᠌ ᠤᠳᠠᠭᠠ ᠲᠡᠨᠢᠢᠯᠭᠡᠵᠦ ᠪᠣᠯᠤᠨᠠ᠃ ᠠᠮᠢᠳᠤ ᠪᠠᠢᠬᠤ ᠳ᠋ᠤᠨᠢ ᠬᠥᠮᠦᠨ ᠦ᠌ ᠨᠢᠭᠤᠷ ᠤᠨ ᠬᠡᠪ ᠢ᠋ ᠠᠪᠴᠤ ᠪᠣᠯᠳᠠᠭ ᠰᠢᠦ ᠳᠡ᠃
— ᠥ ᠲᠡᠢᠮᠦ ᠤᠤ? ᠲᠡᠭᠡᠪᠡᠯ ᠨᠠᠳᠠ ᠬᠡᠷᠡᠭ ᠪᠣᠯᠬᠤ ᠶᠤᠮ ᠪᠠᠢᠨᠠ᠃
ᠥᠨᠳᠥᠷ ᠭᠡᠭᠡᠨ ᠰᠦᠮᠡᠢᠭᠰᠡᠨ ᠨᠢᠳᠦ ᠪᠡᠷ ᠭᠠᠯᠳᠠᠨ ᠤ᠋ ᠮᠣᠩᠬᠣᠷ ᠬᠠᠮᠠᠷ᠂ ᠬᠦᠷᠡᠩ ᠨᠢᠳᠦ᠂ ᠥᠳᠬᠡᠨ ᠰᠣᠷᠮᠤᠤᠰᠤ ᠶ᠋ᠢ ᠰᠢᠷᠳᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠂
— ᠪᠢ ᠶᠦᠮ ᠠᠭᠠ ᠬᠠᠲᠤᠨ ᠳ᠋ᠤ᠌ ᠮᠥᠷᠭᠥᠨᠡ᠃ ᠮᠠᠷᠭᠠᠰᠢ ᠶᠡᠬᠡ ᠦᠳᠡ ᠳ᠋ᠦ᠍ ᠣᠴᠢᠶᠠ ᠭᠡᠯᠡ᠃
ᠠᠷᠪᠠᠨ ᠨᠠᠢ᠍ᠮᠠ
ᠥᠨᠳᠥᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ ᠨᠠᠮᠠᠶ᠋ᠢ ᠭᠠᠷᠤᠭᠰᠠᠨ ᠬᠣᠢᠨᠠ ᠶᠠᠭᠤ ᠪᠣᠳᠣᠭᠰᠠᠨ ᠪᠣᠯ? ᠶᠠᠭᠠᠬᠢᠭᠠᠳ ᠨᠢᠭᠤᠷ ᠤ᠋ᠨ ᠬᠡᠪ ᠢ᠋ ᠤᠰᠤᠨ ᠳ᠋ᠤ᠌ ᠠᠭᠤᠰᠬᠠᠵᠤ ᠲᠡᠨᠢᠢᠭᠰᠡᠨ ᠬᠣᠢᠨᠠ ᠨᠢ ᠠᠰᠢᠭᠯᠠᠵᠤ ᠪᠣᠯᠳᠠᠭ ᠢ᠋ ᠨᠠᠳᠠᠳᠤ ᠰᠠᠨᠠᠭᠤᠯᠪᠠ᠃ ᠵᠠᠨᠠᠪᠠᠽᠠᠷ ᠭᠡᠭᠡᠨᠲᠡᠨ ᠪᠠᠷᠤᠭ ᠤ᠋ᠨ ᠶᠠᠭᠤᠮᠠ ᠶ᠋ᠢ ᠰᠢᠷᠭᠢᠭᠡᠵᠦ ᠪᠣᠳᠣᠭᠠᠳ ᠣᠷᠬᠢᠳᠠᠭ ᠰᠠᠨ᠃ ᠠᠬᠠ ᠬᠠᠭᠠᠨ ᠶᠠᠮᠠᠷ ᠪᠤᠷᠬᠠᠨ ᠲᠠᠢ ᠠᠳᠠᠯᠢᠬᠠᠨ ᠪᠣᠢ? ᠨᠠᠳᠠ ᠠᠬᠠ ᠶ᠋ᠢᠨ ᠨᠢᠭᠤᠷ ᠤ᠋ᠨ ᠬᠡᠪ ᠢ᠋ ᠮᠠᠷᠭᠠᠰᠢ ᠨᠢ ᠪᠤᠴᠠᠭᠠᠵᠤ ᠥᠭᠬᠦ ᠳ᠋ᠡᠭᠡᠨ ᠥᠨᠳᠥᠷ ᠭᠡᠭᠡᠨ᠂
— ᠶᠦᠮ ᠠᠭᠠ ᠠᠬᠠᠢᠲᠠᠨ ᠮᠢᠨᠦ ᠬᠠᠲᠤᠨ ᠡᠬᠡ ᠬᠠᠨᠳᠠᠵᠠᠮᠰᠤ ᠲᠠᠢ ᠦᠶᠡ ᠵᠠᠢ ᠦᠭᠡᠢ ᠦᠶᠡᠯᠢ ᠮᠥᠨ ᠶᠦᠮ᠃ ᠡᠵᠢ ᠪᠡᠨ ᠬᠠᠷᠠᠬᠤ ᠰᠢᠭ᠋ ᠪᠣᠯᠤᠭᠰᠠᠨ ᠰᠢᠦ᠃ ᠡᠭᠡᠴᠢ ᠳᠡᠭᠦᠦᠰ ᠦ᠋ᠨ ᠥᠬᠢᠳ ᠬᠣᠢᠨᠠ ᠠᠷᠭᠠ ᠦᠭᠡᠢ ᠪᠢᠵᠡ ᠭᠡᠯᠡ᠃ ᠪᠢ ᠥᠨᠳᠥᠷ ᠭᠡᠭᠡᠨ ᠡᠴᠡ᠂
— ᠲᠣᠮ ᠰᠢᠪᠰᠢᠯᠭᠡ ᠪᠦᠬᠦᠢ ᠢᠳᠤᠭᠠᠨ ᠡᠮᠡ ᠶ᠋ᠢᠨ ᠭᠠᠪᠠᠯᠠ ᠠᠶᠠᠭᠠ ᠶ᠋ᠢ ᠠᠯᠲᠠ ᠮᠥᠩᠭᠥ ᠪᠡᠷ ᠪᠦᠷᠢᠭᠦᠯᠵᠦ ᠬᠠᠳᠠᠭᠠᠯᠠᠬᠤ ᠤᠤ? ᠭᠡᠵᠦ ᠬᠠᠷᠢᠭᠤ ᠣᠯᠤᠭᠠ ᠦᠭᠡᠢ ᠠᠰᠠᠭᠤᠯᠲᠠ ᠪᠠᠨ ᠠᠰᠠᠭᠤᠪᠠ᠃
— ᠰᠢᠩᠬᠤ ᠲᠦᠷᠬᠢᠭᠰᠡᠨ ᠶᠠᠰᠤ ᠶ᠋ᠢ ᠠᠯᠲᠠ ᠮᠥᠩᠭᠥ ᠪᠡᠷ ᠪᠦᠷᠢᠬᠦ ᠠᠪᠠᠰᠤ ᠬᠦᠴᠦᠨ ᠴᠢᠳᠠᠯ ᠨᠢ ᠪᠠᠭᠤᠷᠠᠵᠤ ᠮᠡᠳᠡᠨᠡ᠃ ᠪᠠᠢᠭᠰᠠᠨ ᠢ᠋ᠶ᠋ᠠᠷ ᠨᠢ ᠪᠠᠢᠯᠭᠠᠪᠠᠯ ᠳᠡᠭᠡᠷᠡ ᠭᠡᠵᠦ ᠭᠡᠭᠡᠨᠲᠡᠨ ᠨᠠᠳᠠ ᠠᠢᠯᠠᠳᠪᠠ᠃ ᠲᠡᠷᠡ ᠪᠡᠷ᠂
— ᠰᠠᠬᠢᠯ ᠰᠠᠨᠸᠠᠷ ᠢ᠋ᠶ᠋ᠠᠨ ᠡᠷᠭᠦᠭᠰᠡᠨ ᠯᠠᠮᠠ ᠲᠠᠨ ᠤ᠋ ᠴᠡᠭᠡᠷ ᠢ᠋ ᠰᠠᠢᠨ ᠭᠠᠷᠭᠠᠯᠠ᠃ ᠵᠠᠬᠥᠡᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠲᠤ᠌ ᠮᠣᠷᠢᠯᠠᠭᠰᠠᠨ ᠬᠣᠢᠨᠠ ᠪᠠᠨ ᠢᠯᠳᠦ ᠵᠥᠷᠢᠭᠦᠯᠬᠦ ᠴᠠᠭ ᠲᠣᠬᠢᠶᠠᠯᠳᠤᠪᠠᠯ ᠢᠯᠳᠦ ᠪᠡᠷ᠂ ᠦᠭᠡ ᠶ᠋ᠢᠨ ᠰᠢᠳᠢ ᠶ᠋ᠢ ᠰᠢᠯᠭᠠᠬᠤ ᠦᠶᠡ ᠲᠠᠭᠠᠷᠠᠪᠠᠯ ᠤᠬᠠᠭᠠᠨ ᠢ᠋ᠶ᠋ᠠᠷ ᠤᠷᠤᠯᠳᠤᠵᠤ ᠶᠠᠪᠤᠬᠤ ᠪᠣᠯᠵᠤ ᠳᠠ᠃ ᠳᠥᠷᠪᠡᠨ ᠣᠢᠷᠠᠳ᠂ ᠠᠷᠤ ᠬᠠᠯᠬᠠ ᠶ᠋ᠢᠨ ᠨᠣᠶᠠᠳ ᠤᠴᠢᠷ ᠢ᠋ᠶ᠋ᠠᠨ ᠣᠯᠤᠯᠴᠠᠬᠤ ᠳ᠋ᠤ᠌ ᠨᠠᠮᠠᠶ᠋ᠢ ᠲᠤᠰᠠᠯᠠ ᠭᠡᠪᠡᠯ ᠪᠢ ᠪᠡᠯᠡᠨ᠃ ᠪᠤᠷᠬᠠᠨ ᠤ᠋ ᠱᠠᠰᠢᠨ ᠤ᠋ ᠬᠤᠲᠤᠭᠲᠤ ᠬᠤᠪᠢᠯᠭᠠᠳ ᠭᠠᠯᠳᠠᠨ ᠲᠠᠨ ᠳ᠋ᠤ᠌ ᠲᠤᠰᠠᠯᠠᠬᠤ ᠪᠣᠯᠬᠣᠷ ᠣᠯᠠᠨ ᠠᠷᠠᠳ ᠤ᠋ᠨ ᠢᠲᠡᠭᠡᠯ ᠢ᠋ ᠣᠯᠵᠤ ᠪᠣᠯᠤᠨᠠ᠃ ᠬᠣᠶᠠᠭᠤᠯᠠ ᠪᠠᠨ ᠬᠣᠯᠪᠣᠭᠠ ᠲᠠᠢ ᠶᠠᠪᠤᠶᠠ ᠭᠡᠯᠡ᠃
ᠵᠠᠨᠠᠪᠠᠽᠠᠷ ᠭᠠᠯᠳᠠᠨ ᠢ᠋ ᠣᠢ ᠲᠣᠢ ᠳ᠋ᠠᠭᠠᠨ ᠲᠣᠭᠲᠠᠭᠠᠬᠤ ᠮᠡᠲᠦ ᠨᠢᠳᠦ ᠪᠡᠨ ᠰᠦᠮᠡᠢᠯᠭᠡᠨ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠂
— ᠭᠠᠯᠳᠠᠨ ᠯᠠᠮᠠ ᠪᠠᠨᠳᠢ ᠵᠣᠳᠣᠭᠠᠨ ᠤ᠋ ᠤᠷᠠᠯᠢᠭ ᠢ᠋ ᠡᠷᠬᠡᠰᠢᠶᠡᠭᠰᠡᠨ ᠪᠤᠰᠤ ᠤᠤ? ᠲᠩᠷᠢ ᠴᠢᠮᠠᠶ᠋ᠢ ᠲᠤᠰᠠᠯᠠᠵᠤ ᠪᠠᠢᠵᠠᠢ ᠭᠡᠪᠡ᠃ ᠵᠤᠵᠠᠭᠠᠨ ᠣᠯᠪᠣᠭ ᠳᠡᠭᠡᠷᠡ ᠡᠴᠡ ᠭᠠᠯᠳᠠᠨ ᠪᠣᠰᠬᠤ ᠪᠠᠷ ᠥᠨᠳᠡᠢᠬᠦ ᠳ᠋ᠦ᠍ ᠭᠡᠭᠡᠨ ᠯᠠᠮᠠ᠂
— ᠲᠡᠷᠡ ᠴᠡᠸᠡᠩᠷᠡᠪᠳᠡᠨ ᠬᠡᠨ ᠪᠣᠢ? ᠭᠡᠮᠡᠨ ᠮᠠᠷᠲᠠᠵᠤ ᠰᠠᠨᠠᠭᠠ ᠦᠭᠡᠢ ᠪᠡᠨ ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍ ᠠᠰᠠᠭᠤᠪᠠ᠃ ᠭᠠᠯᠳᠠᠨ ᠯᠠᠮᠠ《ᠥᠨᠳᠥᠷ ᠭᠡᠭᠡᠨ ᠴᠡᠭᠡᠯᠬᠡᠨ ᠤᠬᠠᠭᠠᠨ ᠲᠠᠢ ᠰᠢᠦ》 ᠭᠡᠵᠦ ᠲᠡᠷᠡᠬᠡᠨ ᠵᠠᠭᠤᠷᠠ ᠰᠠᠨᠠᠭᠠᠳ᠂
— ᠰᠡᠩᠭᠡ ᠬᠠᠭᠠᠨ ᠤ᠋ ᠬᠥᠪᠡᠭᠦᠨ ᠭᠡᠪᠡ᠃
— ᠠᠴᠢ ᠠᠮᠢ ᠪᠠᠷᠢᠳᠠᠭ ᠭᠡᠵᠦ ᠦᠭᠡ ᠲᠡᠢ ᠭᠡᠮᠡᠨ ᠥᠨᠳᠥᠷ ᠭᠡᠭᠡᠨ ᠬᠡᠯᠡᠪᠡ᠃ ᠭᠠᠯᠳᠠᠨ ᠤ᠋ ᠲᠠᠷᠢᠬᠢᠨ ᠳ᠋ᠤ᠌ ᠴᠡᠸᠡᠩᠷᠡᠪᠳᠡᠨ ᠦ᠌ ᠨᠡᠷᠡ ᠰᠡᠢᠯᠦᠭᠳᠡᠵᠦ ᠥᠨᠳᠥᠷ ᠭᠡᠭᠡᠨ ᠦ᠌ ᠠᠷᠢᠭᠤᠨ ᠮᠣᠳᠣᠷ ᠡᠴᠡ ᠠᠳᠢᠰ ᠬᠦᠷᠲᠡᠪᠡ᠃ ᠭᠣᠣᠯ ᠤ᠋ᠨ ᠬᠥᠨᠳᠡᠢ ᠳᠦᠭᠦᠷᠡᠩ ᠪᠡᠯᠴᠢᠬᠦ ᠠᠳᠤᠭᠤᠨ ᠰᠦᠷᠦᠭ ᠦ᠋ᠨ ᠳᠤᠮᠳᠠ ᠬᠠᠭᠠᠨ ᠤ᠋ ᠥᠮᠴᠢ ᠶ᠋ᠢᠨ ᠰᠢᠷᠠ ᠠᠵᠢᠷᠭᠠ ᠲᠣᠯᠣᠭᠠᠢ ᠬᠠᠶᠠᠨ ᠲᠦᠬᠦᠯᠵᠡᠵᠦ ᠪᠠᠢᠨᠠ᠃
ᠭᠠᠯᠳᠠᠨ ᠤ᠋ ᠮᠣᠬᠣᠯᠬᠠᠳᠤ ᠰᠡᠦᠬᠡ ᠲᠡᠷᠭᠡ ᠪᠤᠳᠠᠯᠠᠩ ᠣᠷᠳᠣᠨ ᠡᠴᠡ ᠬᠣᠯᠠ ᠦᠭᠡᠢ ᠣᠷᠣᠰᠢᠬᠤ ᠦᠷᠭᠦᠭᠡᠨ ᠦ᠌ ᠭᠠᠳᠠᠨᠠ ᠵᠤᠭᠤᠯᠲᠠ ᠲᠠᠢ ᠠᠵᠢ᠃ ᠭᠠᠯᠳᠠᠨ ᠵᠠᠮ ᠵᠠᠭᠤᠷᠠ ᠳ᠋ᠠᠭᠠᠨ《ᠥᠨᠳᠥᠷ ᠭᠡᠭᠡᠨ ᠨᠠᠮᠠᠶ᠋ᠢ ᠭᠤᠨᠢᠭ ᠲᠠᠢ ᠶᠠᠪᠤᠭᠠ ᠶ᠋ᠢ ᠭᠠᠳᠠᠷᠯᠠᠪᠠ ᠪᠣᠯᠤᠯᠲᠠᠢ᠃ ᠲᠥᠪᠡᠳ ᠲᠦ᠍ ᠡᠭᠦᠷᠢᠳᠡ ᠦᠯᠡᠳᠡᠬᠦ ᠶ᠋ᠢᠨ ᠭᠠᠰᠢᠭᠤᠨ ᠦᠨᠡᠨ ᠡᠴᠡ ᠰᠠᠯᠪᠠ᠃ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠪᠣᠯᠤᠭᠠᠳ ᠵᠣᠪᠠᠯᠠᠩ ᠴᠤ᠌ ᠶᠡᠬᠡ ᠬᠤᠷᠢᠶᠠᠨᠠ᠃ ᠳᠠᠢᠰᠤᠨ ᠴᠤ᠌ ᠣᠯᠠᠨ ᠲᠠᠢ ᠪᠣᠯᠤᠨᠠ᠃ ᠬᠠᠭᠠᠨ ᠪᠣᠯ ᠳᠠᠢᠰᠤᠨ ᠤ᠋ ᠰᠤᠮᠤ ᠪᠠᠨ ᠣᠨᠢᠯᠠᠳᠠᠭ ᠫᠠᠢ ᠮᠥᠨ᠃ ᠮᠢᠨᠦ ᠳᠠᠶ᠋ᠢᠰᠤᠨ ᠨᠤᠭᠤᠳ ᠡᠳᠦᠢ ᠳ᠋ᠦ᠍ ᠨᠠᠳᠠ ᠤᠷᠤᠭᠤ ᠰᠤᠮᠤ ᠪᠠᠨ ᠣᠨᠢᠯᠠᠴᠢᠬᠠᠭᠰᠠᠨ ᠪᠠᠢᠭᠠ᠃ ᠮᠢᠨᠦ ᠠᠬᠠ ᠳᠡᠭᠦᠦ ᠨᠠᠷ ᠪᠣᠢ᠃ ᠪᠢ ᠰᠡᠳᠡᠷᠡᠬᠦ ᠰᠢᠷᠬᠠ ᠲᠠᠢ ᠬᠥᠮᠦᠨ ᠰᠢᠦ ᠳᠡ᠃ ᠵᠢᠷᠤᠨ ᠬᠤᠲᠤᠭᠲᠤ ᠠᠷᠤ ᠡᠴᠡ ᠣᠴᠢᠨᠠ ᠭᠡᠯᠡ᠃ ᠡᠷᠴᠢᠰ ᠦ᠋ᠨ ᠰᠦᠮᠡ ᠳ᠋ᠦ᠍ ᠱᠠᠪᠢᠯᠠᠨ ᠰᠠᠭᠤᠬᠤ ᠰᠠᠨᠠᠭᠠ ᠲᠠᠢ ᠳ᠋ᠠᠭ᠃ ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠡᠴᠡ ᠬᠣᠢᠰᠢ ᠱᠠᠰᠢᠨ ᠤ᠋ ᠲᠣᠮᠣᠬᠠᠨ ᠮᠢᠨᠳᠤᠭᠲᠠᠨ ᠣᠢᠷᠠᠳ ᠲᠤ᠌ ᠣᠴᠢᠭᠠ ᠦᠭᠡᠢ》 ᠭᠡᠵᠦ ᠪᠣᠳᠣᠵᠤ ᠠᠯᠬᠤᠪᠠ᠃
ᠮᠥᠷᠭᠥᠯᠴᠢᠳ ᠦ᠋ᠨ ᠰᠤᠨᠤᠳᠠᠭ ᠪᠠᠨᠵᠠ ᠮᠣᠳᠣᠨ ᠤ᠋ ᠳᠡᠷᠭᠡᠳᠡᠭᠦᠷ ᠥᠩᠭᠡᠷᠡᠬᠦ ᠳ᠋ᠡᠭᠡᠨ ᠭᠠᠯᠳᠠᠨ ᠯᠠᠮᠠ ᠭᠠᠢᠳᠠᠪ ᠲᠤ᠌᠂
— ᠪᠣᠷᠣ ᠲᠠᠯᠠ ᠳ᠋ᠤ᠌ ᠰᠦᠮᠡ ᠪᠠᠢᠭᠤᠯᠤᠨᠠ ᠭᠡᠵᠦ ᠵᠢᠷᠤᠨ ᠬᠤᠲᠤᠭᠲᠤ ᠠᠢᠯᠠᠳᠴᠠᠢ ᠭᠡᠪᠡᠯ ᠭᠠᠢᠳᠠᠪ᠂
— ᠠ᠋᠂ ᠭᠢᠯᠠᠢ ᠭᠡᠵᠦ᠃ ᠬᠣᠱᠤᠳ ᠣᠪᠣᠭ ᠤ᠋ᠨ ᠬᠢᠨ ᠰᠦᠮᠡ ᠲᠡᠢ ᠪᠣᠯᠵᠠᠢ ᠭᠡᠮᠡᠨ ᠰᠡᠳᠬᠢᠯ ᠦ᠋ᠨ ᠢ᠋ᠶ᠋ᠡᠨ ᠮᠤᠬᠤᠷ ᠡᠴᠡ ᠥᠭᠦᠯᠡᠪᠡ᠃
ᠠᠷᠪᠠᠨ ᠶᠢᠰᠦ
ᠮᠣᠩᠭᠣᠯ ᠡᠴᠡ ᠶᠠᠪᠠᠭᠠᠨ ᠮᠥᠷᠭᠥᠯᠴᠢᠳ ᠬᠦᠷᠦᠯᠴᠡᠨ ᠢᠷᠡᠬᠦ ᠶ᠋ᠢ ᠭᠠᠯᠳᠠᠨ ᠬᠠᠷᠠᠭᠠᠳ ᠬᠠᠲᠤᠨ ᠡᠬᠡ ᠳ᠋ᠡᠭᠡᠨ᠂
— ᠮᠥᠷᠭᠥᠯᠴᠢᠳ ᠦ᠋ᠨ ᠴᠤᠪᠤᠭᠠ ᠳ᠋ᠤ᠌ ᠲᠤᠭᠤᠯ ᠲᠠᠢ ᠦᠨᠢᠶᠡ᠂ ᠬᠤᠷᠠᠭᠠ ᠲᠠᠢ ᠬᠣᠨᠢ ᠶᠠᠪᠤᠨᠠ ᠭᠡᠪᠡ᠃ ᠡᠬᠡ ᠨᠢ᠂
— ᠠᠶᠠᠨ ᠵᠠᠮ ᠳ᠋ᠤ᠌ ᠲᠥᠯᠯᠡᠵᠡᠢ᠃ᠰᠠᠭᠠᠯᠢ ᠶ᠋ᠢᠨ ᠮᠠᠯ ᠢ᠋ ᠬᠡᠭᠡᠷᠡ ᠬᠠᠶᠠᠬᠤ ᠦᠭᠡᠢ᠂ᠮᠠᠭᠤᠯᠠᠵᠤ ᠢᠳᠡᠬᠦ ᠦᠭᠡᠢ ᠠᠪᠴᠢᠷᠠᠵᠠᠢ᠃ ᠮᠣᠩᠭᠣᠯᠴᠤᠳ ᠵᠤᠳᠠᠭᠲᠠᠢ ᠁ ᠭᠡᠯᠡ᠃
ᠶᠦᠮ ᠠᠭᠠ ᠬᠠᠲᠤᠨ ᠤ᠋ ᠰᠢᠨᠠᠯᠤᠩᠭᠤᠢ ᠴᠢᠷᠠᠢ ᠳ᠋ᠤ᠌ ᠲᠠᠢᠪᠤᠰᠢᠷᠠᠯ ᠭᠡᠢᠵᠡᠢ᠃ ᠡᠬᠡ ᠨᠢ ᠬᠥᠪᠡᠭᠦᠨ ᠳ᠋ᠡᠭᠡᠨ ᠵᠡᠭᠥᠨᠭᠠᠷ ᠤ᠋ᠨ ᠬᠠᠭᠠᠨ ᠪᠣᠯᠬᠤ ᠶ᠋ᠢ ᠬᠡᠯᠡᠬᠦ ᠶ᠋ᠢᠨ ᠲᠤᠯᠠᠳᠠ ᠠᠬᠠ ᠶ᠋ᠢᠨ ᠬᠢᠨᠢ ᠨᠢᠭᠤᠷ ᠤ᠋ᠨ ᠬᠡᠪ ᠢ᠋ ᠠᠪᠴᠢᠷᠠᠵᠠᠢ᠃ ᠲᠡᠷᠡ ᠬᠦ᠌ ᠠᠯᠠᠯᠭᠠ ᠶ᠋ᠢᠨ ᠭᠡᠷᠡᠴᠢ ᠭᠠᠯᠳᠠᠨ ᠤ᠋ ᠰᠢᠷᠠ ᠶ᠋ᠢ ᠬᠥᠳᠡᠯᠭᠡᠵᠦ ᠲᠡᠭᠦᠨ ᠡᠴᠡ ᠪᠣᠯᠤᠭᠠᠳ ᠲᠥᠪᠡᠳ ᠲᠦ᠍ ᠡᠭᠦᠷᠢᠳᠡ ᠦᠯᠡᠳᠡᠬᠦ ᠲᠠᠪᠢᠯᠠᠩ ᠡᠴᠡ ᠠᠩᠭᠢᠵᠢᠷᠠᠵᠤ᠂ ᠱᠠᠰᠢᠨ ᠤ᠋ ᠭᠦᠨ ᠤᠬᠠᠭᠠᠨ ᠨᠣᠮᠯᠠᠳᠠᠭ᠂ ᠰᠤᠷᠭᠠᠳᠠᠭ᠂ ᠰᠤᠳᠤᠯᠳᠠᠭ ᠪᠠᠭᠰᠢ ᠨᠠᠷ ᠲᠠᠭᠠᠨ ᠤᠴᠢᠷ ᠨᠠᠴᠢᠷ ᠢ᠋ ᠣᠢᠯᠠᠭᠠᠭᠤᠯᠵᠠᠢ᠃ ᠨᠥᠭᠦᠭᠡ ᠲᠠᠯᠠ ᠪᠠᠷ ᠭᠠᠯᠳᠠᠨ ᠲᠠᠢᠭᠠᠨ ᠰᠢᠭ᠋ ᠦᠷᠡ ᠦᠨᠳᠦᠰᠦ ᠦᠭᠡᠢ ᠬᠣᠴᠣᠷᠬᠤ ᠡᠴᠡ ᠥᠷᠦᠰᠢᠶᠡᠭᠳᠡᠪᠡ᠃ ᠭᠠᠯᠳᠠᠨ ᠤ᠋ ᠬᠡᠪᠡᠯᠢ ᠶ᠋ᠢᠨ ᠨᠢᠭᠤᠴᠠ ᠳ᠋ᠤ᠌ ᠠᠰᠠᠭᠰᠠᠨ ᠲᠦᠢᠮᠡᠷ ᠭᠡᠨᠡᠳᠲᠡ ᠳᠦᠷᠡᠯᠵᠡᠵᠦ᠂ ᠡᠮᠡᠰ ᠥᠬᠢᠳ ᠢ᠋ ᠬᠤᠢᠬᠠᠯᠠᠬᠤ ᠴᠠᠭ ᠢᠷᠡᠨᠡ᠃ ᠭᠠᠯᠳᠠᠨ ᠤ᠋ ᠬᠦᠯᠢᠶᠡᠯᠲᠡ ᠶᠠᠮᠠᠷᠬᠠᠨ ᠤᠷᠲᠤ ᠤᠳᠠᠭᠠᠨ ᠦᠷᠭᠦᠯᠵᠢᠯᠡᠬᠦ ᠪᠣᠯ? ᠭᠠᠯᠳᠠᠨ ᠬᠦᠯᠢᠶᠡᠵᠦ ᠰᠤᠷᠴᠠᠢ᠃ ᠭᠠᠯᠳᠠᠨ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠶ᠋ᠢ ᠴᠠᠰᠤᠲᠤ ᠶ᠋ᠢᠨ ᠣᠷᠣᠨ ᠲᠥᠪᠡᠳ ᠲᠦ᠍ ᠰᠠᠨᠠᠭᠠᠯᠵᠠᠨ ᠬᠦᠯᠢᠶᠡᠵᠦ᠂ ᠲᠤᠢᠯᠳᠠᠵᠤ ᠬᠦᠯᠢᠶᠡᠵᠦ᠂ ᠳᠦᠷᠡᠯᠵᠡᠨ ᠬᠦᠯᠢᠶᠡᠵᠦ ᠪᠠᠢᠵᠠᠢ᠃
ᠭᠠᠯᠳᠠᠨ ᠬᠠᠲᠤᠨ ᠡᠬᠡ ᠳ᠋ᠡᠭᠡᠨ᠂
— ᠶᠠᠪᠠᠭᠠᠨ ᠨᠢᠴᠦᠭᠦᠨ ᠮᠥᠷᠭᠥᠯᠴᠢᠳ ᠲᠦ᠍ ᠬᠣᠭᠣᠯᠠ ᠬᠦᠨᠡᠰᠦ᠂ ᠬᠤᠪᠴᠠᠰᠤ ᠬᠤᠨᠠᠷ ᠦᠯᠡᠳᠡᠭᠡᠬᠦ ᠬᠡᠷᠡᠭᠲᠡᠢ ᠭᠡᠵᠦ ᠬᠡᠯᠡᠪᠡ᠃ ᠶᠥᠮ ᠠᠭᠠ ᠬᠠᠲᠤᠨ ᠲᠡᠷᠡ ᠳᠠᠷᠤᠢ ᠬᠥᠰᠬᠡ ᠶ᠋ᠢᠨ ᠠᠬᠠᠯᠠᠭᠴᠢ ᠶ᠋ᠢ ᠳᠠᠭᠤᠳᠠᠪᠠ᠃ ᠨᠢᠭᠤᠷ ᠲᠠᠭᠠᠨ ᠪᠠᠭ ᠡᠮᠦᠰᠦᠭᠰᠡᠨ ᠶᠤᠮ ᠤᠤ ᠭᠡᠯᠲᠡᠢ ᠦᠰᠦᠷᠬᠡᠭ ᠮᠡᠩᠭᠡ ᠲᠡᠢ ᠬᠥᠰᠬᠡ ᠶ᠋ᠢᠨ ᠠᠬᠠᠯᠠᠭᠴᠢ ᠨᠢᠳᠦ ᠪᠡᠨ ᠶᠣᠯᠳᠤᠯᠵᠠᠭᠤᠯᠤᠨ ᠣᠢᠷᠠᠳᠪᠠ᠃ ᠲᠡᠷᠡ ᠡᠷᠡ ᠰᠥᠬᠥᠷᠡᠪᠡ᠃ ᠶᠥᠮ ᠠᠭᠠ ᠡᠬᠡ᠂
— ᠰᠠᠶᠢ ᠶ᠋ᠢᠨ ᠮᠥᠷᠭᠥᠯᠴᠢᠳ ᠲᠦ᠍ ᠬᠣᠭᠣᠯᠠ ᠬᠦᠨᠡᠰᠦ᠂ ᠡᠳ᠋ ᠶᠠᠭᠤᠮᠠᠰ ᠢᠯᠡᠭᠦᠴᠢᠯᠡᠨ ᠥᠭ ᠭᠡᠮᠡᠨ ᠠᠶᠠᠳᠠᠭᠤᠬᠠᠨ ᠲᠤᠰᠢᠶᠠᠪᠠ᠃ ᠬᠡᠭᠡᠷᠡ ᠬᠣᠨᠣᠭᠯᠠᠵᠤ ᠠᠶᠠᠨ ᠳ᠋ᠤ᠌ ᠳᠣᠯᠢᠩᠭᠠᠷᠰᠢᠭᠰᠠᠨ ᠡᠷᠡ ᠭᠠᠯᠳᠠᠨ ᠳ᠋ᠤ᠌ ᠮᠥᠷᠭᠥᠬᠦ ᠮᠥᠷᠲᠡᠭᠡᠨ《ᠶᠣᠰᠣ ᠪᠠᠷ ᠪᠣᠯᠭᠠᠶᠠ》ᠭᠡᠵᠦ ᠲᠠᠮᠰᠢᠶᠠᠯᠠᠪᠠ᠃ ᠬᠥᠰᠬᠡ ᠶ᠋ᠢᠨ ᠠᠬᠠᠯᠠᠭᠴᠢ ᠰᠢᠳᠡᠭᠰᠡᠨ ᠴᠢᠯᠠᠭᠤ ᠰᠢᠭ᠋ ᠭᠦᠶᠦᠵᠦ ᠣᠳᠤᠯᠠ᠃ ᠭᠠᠯᠳᠠᠨ ᠲᠡᠭᠦᠨ ᠦ᠌ ᠬᠣᠢᠨᠠ ᠡᠴᠡ ᠬᠠᠷᠠᠭᠠᠳ《ᠮᠣᠩᠭᠣᠯᠴᠤᠳ ᠴᠢᠯᠠᠭᠤ ᠶᠤᠮ᠃ ᠮᠣᠩᠭᠣᠯᠴᠤᠳ ᠤ᠋ᠨ ᠠᠮᠢᠳᠤᠷᠠᠯ ᠴᠢᠯᠠᠭᠤ ᠰᠢᠭ᠋ ᠬᠠᠲᠠᠭᠤ ᠭᠦᠳᠦᠭᠦᠦ᠃ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠪᠡᠶᠡ ᠴᠢᠯᠠᠭᠤ ᠰᠢᠭ᠋ ᠲᠡᠰᠪᠦᠷᠢ ᠲᠡᠪᠴᠢᠶᠡᠷᠢ ᠲᠡᠢ᠃ ᠮᠣᠩᠭᠣᠯ ᠬᠥᠮᠦᠨ ᠢ᠋ ᠨᠠᠷᠠ ᠰᠠᠯᠬᠢ ᠤᠰᠤ ᠭᠤᠷᠪᠠ ᠡᠯᠡᠭᠡᠵᠦ ᠭᠠᠩᠳᠠᠭᠠᠨᠠ᠃ ᠪᠢ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠴᠢᠯᠠᠭᠤᠨ ᠳᠤᠮᠳᠠ ᠣᠴᠢᠯᠠ》ᠭᠡᠮᠡᠨ ᠪᠣᠳᠣᠵᠠᠢ᠃
ᠬᠣᠷᠢ
ᠭᠠᠯᠳᠠᠨ ᠤ᠋ ᠬᠥᠰᠬᠡ ᠬᠥᠳᠡᠯᠬᠦ ᠳ᠋ᠦ᠍ ᠪᠡᠯᠡᠨ ᠪᠣᠯᠵᠠᠢ᠃ ᠪᠤᠬᠠᠷ ᠭᠠᠵᠠᠷ ᠤᠷᠠᠯᠠᠭᠰᠠᠨ ᠵᠢᠤᠵᠠ ᠲᠡᠷᠭᠡ ᠨᠢ ᠳᠣᠲᠣᠷ ᠭᠠᠵᠠᠷ ᠤ᠋ᠨ ᠭᠣᠶᠣᠮᠰᠣᠭ
ᠰᠡᠦᠬᠡ ᠡᠴᠡ ᠠᠷᠠᠢ ᠪᠠᠬᠢᠮ ᠠᠵᠢ᠃ ᠬᠣᠷᠢ ᠭᠠᠷᠤᠢ ᠵᠢᠯ ᠦ᠋ᠨ ᠲᠡᠷᠲᠡᠭᠡ ᠭᠠᠯᠳᠠᠨ ᠬᠥᠪᠡᠭᠦᠨ᠂ ᠽᠠᠶᠠ ᠪᠠᠨᠳᠢᠳᠠ ᠨᠠᠮᠬᠠᠢᠵᠠᠮᠰᠤ ᠭᠡᠭᠡᠨ ᠤ᠋ ᠬᠠᠮᠲᠤ ᠡᠨᠡ ᠬᠦ᠌ ᠵᠢᠤᠵᠠ ᠲᠡᠷᠭᠡ ᠪᠡᠷ ᠲᠥᠪᠡᠳ ᠲᠦ᠍ ᠢᠷᠡᠵᠡᠢ᠃ ᠵᠢᠤᠵᠠ ᠲᠡᠷᠭᠡ ᠶ᠋ᠢᠨ ᠳᠤᠭᠤᠢ ᠶ᠋ᠢᠨ ᠡᠷᠭᠢᠯᠲᠡ ᠳ᠋ᠦ᠍ ᠭᠠᠯᠳᠠᠨ ᠤ᠋ ᠮᠢᠭᠮᠠᠨᠰᠠᠩᠵᠠᠢ ᠲᠠᠢ ᠲᠣᠭᠯᠠᠬᠤ ᠬᠦᠰᠡᠯ ᠢᠷᠪᠢᠰ ᠲᠡᠢ ᠬᠥᠭᠡᠭᠡᠴᠡᠯᠳᠦᠬᠦ ᠪᠣᠳᠣᠯ᠂ ᠲᠣᠪᠰᠢᠭᠤᠷ ᠬᠥᠭᠯᠡᠬᠦ ᠰᠠᠨᠠᠭᠠᠷᠬᠠᠯ ᠬᠣᠯᠠ ᠬᠣᠴᠣᠷᠴᠠᠢ᠃
ᡀᠠᠰᠠ ᠶ᠋ᠢᠨ ᠮᠥᠷᠭᠥᠯᠴᠢᠳ ᠭᠠᠯᠳᠠᠨ ᠤ᠋ ᠬᠥᠰᠬᠡ ᠶ᠋ᠢ ᠪᠦᠴᠢᠵᠡᠢ᠃ ᠵᠢᠤᠵᠠ ᠲᠡᠷᠭᠡᠨ ᠳ᠋ᠦ᠍ ᠲᠣᠷᠭᠠᠨ ᠬᠤᠪᠴᠠᠰᠤ ᠲᠠᠢ ᠶᠦᠮ ᠠᠭᠠ ᠬᠠᠲᠤᠨ ᠮᠣᠷᠢᠯᠠᠨ ᠰᠠᠭᠤᠵᠤ᠂ ᠭᠠᠯᠳᠠᠨ ᠬᠠᠷᠠ ᠠᠵᠢᠷᠭᠠ ᠪᠠᠨ ᠬᠦᠯᠦᠭᠯᠡᠵᠡᠢ᠃
ᠭᠠᠯᠳᠠᠨ ᠮᠣᠷᠢ ᠲᠠᠢ ᠪᠠᠨ ᠴᠢᠭᠢᠭᠲᠦ ᠬᠥᠨᠳᠡᠢ ᠡᠴᠡ ᠬᠥᠳᠡᠯᠵᠦ ᡀᠠᠰᠠ ᠬᠣᠲᠠ ᠶ᠋ᠢᠨ ᠰᠦᠮᠡ ᠳᠤᠭᠠᠩ ᠤ᠋ᠳ ᠪᠣᠳᠢ ᠭᠥᠷᠦᠭᠡᠰᠦᠨ ᠤ᠋ ᠠᠮᠤᠭᠤᠯᠠᠩ ᠮᠡᠯᠮᠡᠢ ᠶ᠋ᠢᠨ ᠳᠣᠣᠷᠠ ᠲᠡᠳᠡᠨ ᠤ᠋ ᠠᠷᠤ ᠳ᠋ᠤ᠌ ᠦᠯᠡᠳᠡᠪᠡ᠃ ᠰᠦᠮᠡ ᠳ᠋ᠤ᠌ ᠪᠣᠯᠤᠭᠰᠠᠨ ᠶᠠᠷᠢᠶᠠ ᠰᠦᠮᠡ ᠳ᠋ᠡᠭᠡᠨ ᠬᠣᠴᠣᠷᠤᠯᠠ᠃ ᠰᠦᠮᠡ ᠳᠤᠭᠠᠩ ᠠᠷᠤ ᠳ᠋ᠤ᠌ ᠬᠣᠴᠣᠷᠴᠤ ᠠᠭᠤᠯᠠ ᠶ᠋ᠢᠨ ᠠᠰᠬᠠ ᠨᠤᠷᠠᠵᠤ ᠳᠠᠷᠤᠭᠰᠠᠨ ᠭᠣᠣᠯ ᠤ᠋ᠨ ᠬᠥᠨᠳᠡᠢ ᠪᠡᠷ ᠬᠠᠮᠠᠭᠠᠯᠠᠯᠲᠠ ᠶ᠋ᠢᠨ ᠪᠠᠭ ᠴᠡᠷᠢᠭ ᠪᠦᠬᠦᠢ ᠪᠤᠤᠬᠢᠶᠠ ᠬᠥᠰᠬᠡ ᠵᠡᠭᠦᠨᠭᠠᠷ ᠲᠠᠢᠰᠢ ᠵᠢᠯᠣᠭᠣ ᠵᠠᠯᠠᠯᠠ᠃
ᠭᠠᠯᠳᠠᠨ ᠲᠥᠪᠡᠳ ᠲᠦ᠍ ᠤᠬᠢᠯᠠᠵᠤ ᠢᠷᠡᠭᠡ ᠦᠭᠡᠢ᠂ ᠳᠠᠭᠤᠯᠠᠵᠤ ᠪᠤᠴᠠᠭᠠ ᠦᠭᠡᠢ ᠪᠥᠭᠡᠳ ᠰᠥᠨᠢ ᠬᠣᠯᠠ ᠶ᠋ᠢᠨ ᠪᠣᠳᠣᠯ ᠬᠡᠯᠬᠢᠨ ᠴᠡᠴᠡᠭ ᠦᠨᠦᠷᠲᠦᠭᠰᠡᠨ ᠨᠤᠲᠤᠭ ᠢ᠋ᠶ᠋ᠠᠨ ᠵᠣᠷᠢᠯᠠ᠃ ᠬᠠᠷᠠ ᠠᠵᠢᠷᠭᠠ ᠶ᠋ᠢᠨ ᠶᠡᠬᠡ ᠳᠡᠯ ᠡᠪᠡᠰᠦᠨ ᠲᠣᠯᠣᠭᠠᠢ ᠱᠦᠷᠭᠦᠭᠡᠨ᠂ ᠡᠷᠡᠮᠡᠭ ᠲᠣᠯᠣᠭᠠᠢ ᠨᠢ ᠲᠦᠬᠦᠯᠵᠡᠨ ᠭᠦᠶᠦᠨ ᠬᠠᠷᠠ ᠠᠯᠬᠤᠭᠠ ᠪᠠᠷ ᠳᠣᠪᠲᠣᠯᠬᠤ ᠳ᠋ᠤ᠌ ᠭᠠᠯᠳᠠᠨ ᠤ᠋ ᠬᠡᠢᠮᠣᠷᠢ ᠪᠠᠳᠠᠷᠠᠨᠠ᠃
ᠭᠠᠯᠳᠠᠨ《ᠨᠠᠳᠠ ᠠᠰᠬᠠᠭᠰᠠᠨ ᠱᠠᠭᠠ ᠰᠢᠭ᠋ ᠣᠢᠷᠠᠳ ᠦᠯᠡᠲᠡᠯᠡ᠃ ᠪᠢ ᠠᠳᠬᠤᠭᠰᠠᠨ ᠱᠠᠭᠠ ᠰᠢᠭ᠋ ᠪᠣᠯᠭᠠᠬᠤ ᠶᠣᠰᠣᠲᠠᠢ᠂ ᠮᠢᠨᠦ ᠪᠡᠶᠡ ᠳ᠋ᠤ᠌ ᠰᠢᠷᠬᠠ ᠬᠣᠴᠣᠷᠤᠯᠠ᠃ ᠬᠡᠢ ᠪᠡᠶᠡ ᠶ᠋ᠢᠨ ᠰᠢᠷᠬᠠ ᠶ᠋ᠢ ᠡᠮ ᠢ᠋ᠶ᠋ᠡᠷ ᠠᠨᠠᠭᠠᠬᠤ ᠠᠷᠭᠠ ᠦᠭᠡᠢ ᠲᠤᠯᠠ ᠠᠨᠠᠬᠤ ᠶ᠋ᠢ ᠨᠢ ᠬᠦᠯᠢᠶᠡᠬᠦ ᠪᠣᠯᠵᠠᠢ᠃ ᠬᠠᠭᠠᠨ ᠠᠬᠠ ᠶ᠋ᠢᠨ ᠠᠮᠢ ᠠᠮᠢᠨ ᠤ᠋ ᠦᠨᠡ ᠲᠡᠢ ᠪᠤᠰᠤ ᠤᠤ ? ᠠᠮᠢ ᠶ᠋ᠢ ᠠᠮᠢ ᠪᠠᠷ ᠨᠥᠬᠥᠳᠡᠭ ᠪᠤᠷᠬᠠᠨ ᠤ᠋ ᠰᠤᠷᠭᠠᠯ ᠪᠣᠢ᠃ ᠨᠠᠮᠠᠶ᠋ᠢ ᠠᠨᠤ ᠬᠠᠲᠤᠨ ᠬᠦᠯᠢᠶᠡᠵᠦ ᠪᠠᠢᠭᠠ》 ᠭᠡᠵᠦ ᠪᠣᠳᠣᠨ ᠠᠯᠤᠰ ᠤ᠋ᠨ ᠴᠡᠩᠬᠡᠷ ᠠᠭᠤᠯᠠᠰ ᠤ᠋ᠨ ᠮᠠᠩᠨᠠᠢ ᠲᠡᠢᠰᠢ ᠬᠠᠷᠠᠭᠠ ᠳᠡᠭᠡᠭᠦᠷ ᠶᠠᠪᠤᠯᠠ᠃
ᠮᠢᠩᠭᠠ ᠮᠢᠩᠭᠠᠨ ᠪᠣᠳᠢᠰᠠᠳ᠋ᠸᠠ ᠭᠠᠯᠳᠠᠨ ᠢ᠋ ᠳᠠᠭᠠᠯᠳᠤᠨ ᠶᠠᠪᠤᠭᠠ ᠪᠣᠳᠣᠭᠳᠠᠨᠠ᠃ ᠪᠣᠳᠢᠰᠠᠳ᠋ᠸᠠ ᠨᠠᠷ ᠦᠭᠡ ᠳᠠᠭᠤ ᠦᠭᠡᠢ ᠮᠥᠷᠲᠡᠭᠡᠨ ᠴᠠᠭᠠᠨ ᠭᠡᠷᠡᠯ ᠰᠠᠴᠤᠷᠠᠭᠠᠨ ᠬᠤᠪᠢᠯᠭᠠᠨ ᠢ᠋ ᠳᠠᠭᠠᠬᠤ ᠪᠥᠯᠥᠭᠡ᠃ ᠮᠥᠷᠭᠥᠯᠴᠢᠳ ᠡᠪᠡᠰᠦᠨ ᠤ᠋ ᠦᠨᠳᠦᠰᠦ ᠲᠣᠭᠠᠯᠠᠬᠤ ᠯᠤᠭᠠ ᠵᠠᠮ ᠳᠠᠭᠠᠤ ᠰᠤᠨᠤᠵᠤ ᠮᠥᠷᠭᠥᠮᠦᠢ᠃ ᠭᠠᠵᠠᠷ ᠳᠡᠯᠡᠬᠡᠢ ᠶ᠋ᠢᠨ ᠵᠥᠭᠡᠯᠡᠨ ᠬᠡᠪᠡᠯᠢ ᠭᠠᠯᠳᠠᠨ ᠤ᠋ ᠮᠣᠯᠣᠷ ᠡᠷᠳᠡᠨᠢᠲᠦ ᠬᠦᠯᠦᠭ ᠦ᠋ᠨ ᠥᠯᠮᠡᠢ ᠳᠣᠣᠷᠠ ᠬᠦᠪᠦᠷᠡᠵᠦ ᠥᠩᠭᠡᠷᠡᠬᠦ ᠪᠥᠯᠥᠭᠡ᠃
ᠬᠣᠷᠢᠨ ᠨᠢᠭᠡ
ᠠᠨᠤ ᠬᠠᠲᠤᠨ ᠭᠠᠯᠳᠠᠨ ᠤ᠋ ᠢᠷᠡᠬᠦ ᠵᠦᠭ ᠤᠷᠤᠭᠤ ᠬᠠᠷᠠᠭᠠ ᠲᠠᠯᠪᠢᠨ《ᠭᠠᠯᠳᠠᠨ ᠪᠣᠯ ᠬᠤᠪᠢᠯᠭᠠᠨ ᠯᠠᠮᠠ᠃ ᠭᠠᠯᠳᠠᠨ ᠡᠷᠳᠡᠮ ᠨᠣᠮ ᠲᠡᠭᠦᠰ ᠲᠤᠯᠠ ᠲᠥᠪᠡᠳ ᠦ᠋ᠳ ᠲᠡᠭᠦᠨ ᠢ᠋ ᠲᠡᠢᠮᠦ ᠴᠦ᠍ ᠠᠮᠠᠷᠬᠠᠨ ᠴᠢᠯᠥᠭᠡᠯᠡᠵᠦ ᠶᠠᠪᠤᠭᠤᠯᠬᠤ ᠦᠭᠡᠢ ᠪᠢᠵᠡ᠃ ᠵᠡᠭᠥᠨᠭᠠᠷ ᠤ᠋ᠨ ᠬᠠᠭᠠᠨ ᠬᠣᠣᠷᠯᠠᠭᠳᠠᠪᠠ ᠭᠡᠳᠡᠭ ᠢ᠋ ᠳᠠᠯᠠᠢ ᠪᠠᠭᠰᠢ᠂ ᠪᠠᠨᠴᠢᠠᠡᠷᠳᠡᠨᠢ ᠬᠣᠶᠠᠷ ᠶᠠᠭᠠᠬᠢᠵᠤ ᠬᠦᠯᠢᠶᠡᠵᠦ ᠠᠪᠬᠤ ᠪᠣᠯ? ᠬᠠᠲᠤᠨ ᠡᠬᠡ ᠣᠴᠢᠭᠰᠠᠨ ᠪᠣᠯᠬᠣᠷ ᠭᠠᠯᠳᠠᠨ ᠢ᠋ ᠡᠷᠭᠦᠯ ᠪᠠᠷᠢᠴᠠ ᠠᠮᠠᠯᠠᠭᠠᠳ ᠠᠪᠴᠢᠷᠠᠬᠤ ᠨᠢ ᠮᠠᠭᠠᠳ》 ᠭᠡᠮᠡᠨ ᠰᠡᠭᠦᠷᠡᠰᠦ ᠠᠯᠳᠠᠨᠠ᠃ ᠠᠨᠤ ᠬᠠᠲᠤᠨ ᠪᠠᠭ ᠴᠡᠷᠢᠭ ᠢᠯᠡᠭᠡᠵᠦ᠂
— ᠬᠣᠷᠵᠢᠯᠤ ᠪᠥᠬᠡ ᠶ᠋ᠢ ᠳᠠᠷᠤᠢ ᠣᠯᠵᠤ ᠢᠷᠡ ᠭᠡᠮᠡᠨ ᠲᠤᠰᠢᠶᠠᠵᠠᠢ᠃ ᠬᠣᠷᠵᠢᠯᠤ ᠪᠥᠬᠡ ᠲᠡᠢᠨ ᠦ᠌ ᠣᠯᠵᠠ ᠡᠴᠡ ᠬᠦᠷᠲᠡᠵᠦ ᠬᠤᠯᠵᠢ ᠭᠣᠣᠯ ᠤ᠋ᠨ ᠬᠥᠪᠡᠭᠡᠨᠡ ᠣᠷᠣᠨ ᠭᠡᠷ ᠲᠡᠢ ᠪᠣᠯᠵᠠᠢ᠃ ᠬᠤᠯᠵᠢ ᠡᠴᠡ ᠬᠣᠷᠵᠢᠯᠤ ᠪᠥᠬᠡ ᠶ᠋ᠢ ᠠᠪᠴᠢᠷᠠᠬᠤ ᠳ᠋ᠤ᠌ ᠠᠨᠤ ᠬᠠᠲᠤᠨ ᠲᠡᠭᠦᠨ ᠳ᠋ᠦ᠍᠂
— ᠵᠡᠭᠥᠨᠭᠠᠷ ᠤ᠋ᠨ ᠬᠠᠭᠠᠨ ᠬᠡᠨ ᠪᠣᠯᠤᠨᠠᠮ ᠭᠡᠵᠦ ᠰᠢᠭᠤᠳ ᠠᠰᠠᠭᠤᠵᠠᠢ᠃ ᠬᠣᠷᠵᠢᠯᠤ ᠵᠠᠮ ᠵᠠᠭᠤᠷᠠ ᠳ᠋ᠠᠭᠠᠨ ᠣᠯᠠᠨ ᠢ᠋ ᠪᠣᠳᠣᠵᠤ ᠶᠠᠪᠤᠵᠠᠢ᠃ ᠠᠨᠤ ᠬᠠᠲᠤᠨ ᠨᠠᠳᠠ ᠪᠠᠷ ᠶᠠᠭᠤ ᠬᠢᠯᠭᠡᠬᠦ ᠪᠣᠯ? ᠬᠥᠮᠦᠨ ᠦ᠌ ᠵᠢᠷᠦᠬᠡ ᠪᠡᠷ ᠲᠤᠭ ᠲᠠᠬᠢᠬᠤ ᠪᠣᠯᠤᠨᠠ᠃ ᠰᠠᠢᠨ ᠡᠷᠡᠰ ᠦ᠋ᠨ ᠴᠢᠨᠳᠠᠷ ᠢ᠋ ᠪᠤᠮᠪᠠ ᠳ᠋ᠤ᠌ ᠣᠷᠣᠰᠢᠭᠤᠯᠵᠤ ᠨᠤᠲᠤᠭ ᠬᠣᠰᠢᠭᠤ ᠪᠠᠷ ᠰᠠᠴᠤᠵᠤ ᠴᠢᠳᠠᠨᠠ᠂ ᠬᠠᠲᠤᠨ ᠨᠠᠮᠠᠶ᠋ᠢ ᠶᠠᠮᠠᠷ ᠨᠢᠭᠡᠨ ᠪᠣᠬᠢᠷ ᠦᠢᠯᠡ ᠳ᠋ᠦ᠍ ᠵᠠᠷᠤᠬᠤ ᠪᠤᠰᠤ ᠤᠤ? ᠭᠡᠲᠡᠯᠡ ᠠᠨᠤ ᠬᠠᠲᠤᠨ ᠬᠣᠷᠵᠢᠯᠤ ᠪᠥᠬᠡ ᠶ᠋ᠢᠨ ᠪᠣᠳᠣᠭᠠ ᠦᠭᠡᠢ ᠶᠠᠭᠤᠮᠠ ᠶ᠋ᠢ ᠠᠰᠠᠭᠤᠵᠠᠢ᠃ ᠰᠤᠷᠠᠭ ᠴᠢᠮᠡᠭᠡᠨ ᠦ᠌ ᠦᠵᠦᠭᠦᠷ ᠲᠦ᠍ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠬᠠᠭᠠᠨ ᠪᠣᠯᠤᠨᠠ ᠭᠡᠳᠡᠭ ᠢ᠋ ᠬᠣᠷᠵᠢᠯᠤ ᠰᠣᠨᠣᠰᠵᠠᠢ᠃ ᠬᠣᠷᠵᠢᠯᠤ ᠪᠣᠯ ᠨᠢᠭᠡᠨ ᠶᠠᠳᠠᠭᠤ ᠡᠮᠡ ᠶ᠋ᠢᠨ ᠪᠠᠳᠢᠷᠴᠢ ᠬᠦᠦ ᠪᠥᠭᠡᠳ ᠲᠡᠢᠨ ᠦ᠌ ᠬᠥᠯ ᠡᠴᠡ ᠵᠢᠭᠤᠲᠠᠵᠤ ᠶᠠᠪᠤᠭᠰᠠᠨ ᠴᠡᠷᠢᠭ ᠭᠡᠨᠡᠳᠲᠡ ᠢᠷᠡᠭᠰᠡᠨ ᠰᠢᠭ ᠢ᠋ᠶ᠋ᠡᠨ ᠭᠡᠨᠡᠳᠲᠡ ᠠᠯᠠᠭᠠ ᠪᠣᠯᠵᠠᠢ᠃ ᠶᠠᠳᠠᠭᠤ ᠡᠮᠡ ᠭᠠᠭᠴᠠᠭᠠᠷ ᠦᠯᠡᠳᠡᠵᠦ ᠬᠦᠦ ᠲᠥᠷᠥᠭᠦᠯᠦᠭᠰᠡᠨ ᠨᠢ ᠬᠣᠷᠵᠢᠯᠤ ᠠᠭᠠᠳ ᠲᠡᠷᠡ ᠪᠡᠷ ᠬᠠᠷᠢᠶᠠᠯ᠂ ᠢᠷᠦᠭᠡᠯ ᠳᠠᠭᠠᠭᠤᠯᠵᠤ ᠶᠠᠪᠤᠳᠠᠭ ᠨᠢᠭᠡᠨ ᠪᠣᠯᠵᠠᠢ᠃ ᠬᠤᠯᠵᠢ ᠭᠣᠣᠯ ᠤ᠋ᠨ ᠡᠬᠢᠨ ᠡᠴᠡ ᠠᠳᠠᠭ ᠬᠦᠷᠲᠡᠯᠡ ᠪᠠᠳᠢᠷᠴᠢᠯᠠᠨ ᠶᠠᠪᠤᠵᠤ ᠠᠵᠠ ᠲᠦᠰᠢᠵᠦ ᠬᠣᠨᠣᠭᠯᠠᠭᠰᠠᠨ ᠭᠠᠵᠠᠷ ᠡᠴᠡ ᠪᠠᠨ ᠪᠥᠬᠡ ᠶ᠋ᠢᠨ ᠡᠳ᠋ ᠬᠡᠷᠡᠭᠰᠡᠯ ᠣᠯᠵᠠᠢ᠃ ᠬᠣᠷᠵᠢᠯᠤ ᠬᠥᠮᠦᠨ ᠦ᠌ ᠶᠠᠰᠤ ᠪᠠᠷ ᠴᠢᠮᠡᠭᠯᠡᠭᠰᠡᠨ ᠬᠤᠪᠴᠠᠰᠤ ᠡᠮᠦᠰᠦᠭᠡᠳ ᠬᠤᠯᠵᠢ ᠭᠣᠣᠯ ᠤ᠋ᠨ ᠬᠥᠪᠡᠭᠡᠨᠡ ᠠᠢᠯ ᠳ᠋ᠤ᠌ ᠢᠷᠡᠬᠦ ᠳ᠋ᠦ᠍ ᠠᠶᠤᠮᠰᠠᠭᠰᠠᠨ ᠬᠥᠮᠦᠰ ᠴᠤᠤ ᠲᠠᠷᠬᠠᠭᠠᠵᠠᠢ᠃
ᠲᠡᠭᠡᠲᠡᠯᠡ ᠪᠥᠬᠡ ᠶ᠋ᠢᠨ ᠡᠳ᠋ ᠵᠦᠢᠯᠡᠰ ᠦ᠋ᠨ ᠡᠷᠢᠯᠴᠢᠨ ᠬᠣᠷᠵᠢᠯᠤ ᠶ᠋ᠢ ᠣᠯᠵᠠᠢ᠃ ᠲᠡᠷᠡ ᠪᠥᠬᠡ ᠬᠣᠷᠵᠢᠯᠤ ᠶ᠋ᠢ ᠵᠢᠪᠡᠭᠦᠷᠬᠡᠨ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠠᠭᠳᠠᠭᠠᠨᠠᠨ ᠢᠨᠢᠶᠡᠵᠦ᠂
— ᠴᠢᠮᠠᠶ᠋ᠢ ᠪᠥᠬᠡ ᠪᠣᠯᠭᠠᠨᠠ᠃ ᠴᠢ ᠨᠠᠮᠠᠶ᠋ᠢ ᠲᠡᠵᠢᠭᠡᠨᠡ ᠭᠡᠵᠦ ᠬᠡᠯᠡᠵᠡᠢ᠃ ᠬᠣᠷᠵᠢᠯᠤ ᠳ᠋ᠤ᠌ ᠪᠥᠬᠡ ᠶ᠋ᠢᠨ ᠲᠠᠬᠢᠯ ᠰᠢᠲᠦᠭᠡᠨ ᠡᠴᠡ ᠭᠠᠳᠠᠨᠠ ᠡᠯᠳᠡᠪ ᠦ᠋ᠨ ᠬᠠᠷᠠ ᠴᠠᠭᠠᠨ ᠲᠣᠮ ᠵᠢᠭᠠᠵᠤ᠂ ᠪᠠᠢᠯᠳᠤᠭᠠᠨ ᠤ᠋ ᠣᠯᠵᠠ ᠣᠮᠣᠭ ᠡᠴᠡ ᠴᠣᠭ ᠲᠠᠭᠠᠨ ᠬᠦᠷᠲᠡᠯᠴᠡᠬᠦ ᠪᠣᠯᠵᠠᠢ᠃ ᠨᠥᠭᠦᠭᠡ ᠪᠥᠬᠡ ᠬᠣᠷᠵᠢᠯᠤ ᠶ᠋ᠢᠨ ᠰᠠᠪᠠ ᠶ᠋ᠢᠨ ᠬᠡᠮᠵᠢᠶᠡ ᠪᠡᠷ ᠲᠣᠮ ᠵᠢᠭᠠᠵᠤ ᠥᠭᠭᠦᠭᠡᠳ ᠠᠢᠯ ᠤ᠋ᠨ ᠨᠣᠬᠠᠢ ᠳ᠋ᠤ᠌ ᠭᠡᠳᠡᠰᠦ ᠪᠡᠨ ᠬᠠᠤᠯᠠᠭᠤᠯᠵᠤ ᠦᠬᠦᠭᠰᠡᠨ ᠭᠡᠳᠡᠭ᠃ ᠲᠡᠷᠡ ᠴᠠᠭ ᠡᠴᠡ ᠬᠣᠷᠵᠢᠯᠤ ᠠᠳᠠ ᠵᠡᠳᠬᠡᠷ᠂ ᠠᠯᠪᠢᠨ ᠴᠢᠳᠬᠥᠷ ᠲᠡᠢ ᠨᠥᠬᠥᠴᠡᠵᠦ᠂ ᠭᠣᠶᠣᠯᠭᠠ ᠭᠤᠶᠤᠬᠤ ᠪᠠᠨ ᠪᠣᠯᠢᠵᠤ᠂ ᠡᠷᠭᠦᠯ ᠦ᠋ᠨ ᠢᠳᠡᠭᠡ ᠪᠤᠳᠠᠭᠠ ᠪᠠᠷ ᠠᠮᠢᠳᠤᠷᠠᠳᠠᠭ ᠪᠣᠯᠪᠠ᠃
ᠬᠣᠷᠵᠢᠯᠤ ᠪᠣᠳᠣᠵᠤ ᠪᠣᠳᠣᠵᠤ ᠪᠤᠲᠠ ᠶ᠋ᠢᠨ ᠰᠢᠭᠢᠷᠡ ᠳᠥᠷᠪᠡ ᠪᠣᠯᠬᠤ ᠶ᠋ᠢᠨ ᠦᠶᠡᠰ ᠠᠨᠤ ᠬᠠᠲᠤᠨ ᠳ᠋ᠤ᠌ ᠪᠥᠬᠥᠯᠵᠡᠨ ᠬᠠᠨᠳᠤᠵᠤ᠂
— ᠭᠠᠯᠳᠠᠨ ᠬᠠᠭᠠᠨ ᠪᠣᠯᠤᠨᠠ᠃ ᠲᠩᠷᠢ ᠲᠠᠭᠠᠯᠠᠵᠤ ᠪᠠᠢᠨᠠ ᠭᠡᠵᠡᠢ᠃ ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠤᠷᠲᠤ ᠵᠠᠮ ᠤ᠋ᠨ ᠲᠣᠭᠣᠰᠣ ᠪᠠᠨ ᠭᠦᠪᠢᠵᠦ᠂ ᠠᠯᠵᠢᠶᠠᠯ ᠲᠠᠢᠯᠤᠭᠰᠠᠨ ᠣᠢᠷᠠᠳ ᠴᠡᠷᠢᠭ ᠦ᠋ᠳ ᠳᠥᠷᠥᠭᠡᠯᠡᠬᠦ ᠪᠡᠷ ᠵᠡᠬᠡᠵᠦ ᠪᠠᠢᠪᠠ᠃ ᠶᠦᠮ ᠠᠭᠠ ᠡᠬᠡ ᠶ᠋ᠢᠨ ᠮᠠᠩᠨᠠᠢ ᠲᠡᠨᠢᠢᠵᠦ ᠭᠠᠯᠳᠠᠨ ᠬᠥᠪᠡᠭᠦᠨ ᠦ᠌ ᠪᠡᠨ ᠦᠵᠡᠰᠬᠦᠯᠡᠩ ᠴᠢᠩᠭᠠ ᠪᠡᠶᠡ ᠶ᠋ᠢ ᠪᠠᠬᠠᠷᠤᠯᠲᠠᠢ ᠬᠠᠷᠠᠵᠤ᠂
— ᠵᠢᠤᠵᠠ ᠲᠡᠷᠭᠡᠨ ᠳ᠋ᠦ᠍ ᠮᠣᠷᠢᠯᠠᠭᠠᠴᠢ᠂ ᠡᠵᠢ ᠨᠢ ᠬᠥᠭᠡᠷᠬᠦ ᠶᠠᠭᠤᠮᠠ ᠪᠠᠢᠨᠠ ᠭᠡᠵᠡᠢ᠃
ᠭᠠᠯᠳᠠᠨ ᠲᠠᠰᠢᠭᠤ ᠡᠩᠭᠡᠷ ᠲᠡᠢ᠂ ᠥᠷᠭᠡᠨ ᠡᠮᠵᠢᠶᠡᠷᠢ ᠲᠡᠢ ᠲᠡᠷᠯᠢᠭ ᠡᠮᠦᠰᠴᠦ᠂ ᠶᠡᠷᠦᠳᠡ ᠶ᠋ᠢᠨ ᠰᠤᠷ ᠤ᠋ᠨ ᠪᠦᠰᠡ ᠴᠢᠩᠭᠠ ᠪᠦᠰᠡᠯᠡᠭᠰᠡᠨ ᠨᠢ ᠲᠡᠭᠦᠨ ᠦ᠌ ᠲᠡᠭᠰᠢ ᠨᠢᠷᠤᠭᠤ᠂ ᠥᠷᠭᠡᠨ ᠮᠥᠷᠥ ᠶ᠋ᠢ ᠲᠣᠳᠣᠷᠠᠭᠤᠯᠵᠤ᠂ ᠪᠢᠷᠠᠷᠬᠠᠭ ᠪᠡᠶᠡ ᠲᠡᠢ᠂ ᠬᠠᠲᠠᠭᠤ ᠠᠷᠠᠨᠰᠢᠨ ᠲᠠᠢ ᠣᠢᠷᠠᠳ ᠡᠷᠡ ᠶ᠋ᠢᠨ ᠲᠥᠷᠬᠦ ᠳ᠋ᠦ᠍ ᠣᠷᠣᠭᠤᠯᠵᠠᠢ᠃ ᠵᠢᠤᠵᠠ ᠲᠡᠷᠭᠡᠨ ᠳ᠋ᠦ᠍ ᠭᠠᠯᠳᠠᠨ ᠡᠵᠢ ᠲᠡᠢ ᠪᠡᠨ ᠵᠡᠷᠭᠡᠴᠡᠨ ᠠᠭᠢ ᠭᠠᠩᠭᠠ ᠶ᠋ᠢᠨ ᠦᠨᠦᠷᠲᠦ ᠰᠠᠯᠬᠢ ᠪᠠᠷ ᠢᠯᠪᠢᠭᠦᠯᠦᠨ ᠬᠣᠣᠰ ᠮᠣᠷᠢᠨ ᠤ᠋ ᠶᠠᠪᠤᠳᠠᠯ ᠳ᠋ᠤ᠌ ᠪᠦᠪᠡᠢᠯᠡᠭᠳᠡᠨ ᠪᠠᠢᠪᠠ᠃ ᠶᠦᠮ ᠠᠭᠠ ᠬᠠᠲᠤᠨ᠂
— ᠸᠴᠢᠷᠲᠤ ᠰᠡᠴᠡᠨ ᠬᠠᠭᠠᠨ ᠪᠤᠢᠷ ᠵᠢᠭᠠᠭᠠᠳ ᠲᠣᠰᠴᠤ ᠠᠭᠤᠯᠵᠠᠭᠰᠠᠨ ᠦᠭᠡᠢ᠂ ᠭᠡᠬᠦ ᠳ᠋ᠡᠭᠡᠨ ᠬᠥᠯ ᠦᠭᠡᠢ ᠬᠦᠨᠳᠦᠳᠬᠡᠯ ᠦᠵᠡᠭᠦᠯᠪᠡ᠃ ᠬᠥᠬᠡᠨᠠᠭᠤᠷ ᠤ᠋ᠨ ᠬᠢᠨ ᠴᠠᠭᠠᠨᠠ ᠪᠠᠨ ᠥᠭᠡᠷᠡ ᠰᠠᠨᠠᠭᠠ ᠲᠠᠢ ᠭᠡᠵᠦ ᠬᠥᠪᠡᠭᠦᠨ ᠳ᠋ᠡᠭᠡᠨ ᠬᠡᠯᠡᠪᠡ᠃ ᠭᠠᠯᠳᠠᠨ ᠥᠨᠳᠡᠭᠡᠲᠦ ᠴᠥᠭᠥᠷᠥᠮ ᠦ᠋ᠨ ᠲᠤᠬᠠᠢ ᠪᠣᠳᠣᠵᠤ ᠪᠠᠢᠭᠰᠠᠨ ᠲᠤᠯᠠ᠂
— ᠸᠴᠢᠷᠲᠤ ᠰᠡᠴᠡᠨ ᠬᠠᠭᠠᠨ ᠤᠷᠢᠳᠤ ᠶ᠋ᠢᠨ ᠬᠢ ᠡᠴᠡ ᠪᠡᠨ ᠣᠨᠳᠣᠣ ᠪᠣᠯᠵᠠᠢ᠃ ᠭᠡᠬᠦ ᠳ᠋ᠡᠭᠡᠨ ᠵᠡᠭᠦᠨᠭᠠᠷ ᠤ᠋ᠨ ᠬᠠᠷᠢᠶᠠᠨ ᠡᠴᠡ ᠭᠠᠷᠤᠨᠠ ᠭᠡᠵᠦ ᠦᠭᠡᠢ᠃ ᠡᠪᠦᠭᠡᠨ ᠬᠠᠭᠠᠨ ᠭᠦᠵᠡᠭᠡᠨ ᠳ᠋ᠦ᠍ ᠨᠠᠭᠠᠯᠳᠤᠭᠰᠠᠨ ᠳ᠋ᠧᠩᠯᠦ ᠰᠢᠭ ᠪᠠᠢᠬᠤ ᠡᠴᠡ ᠵᠠᠯᠬᠠᠵᠤ ᠭᠦᠢᠴᠡᠵᠡᠢ᠃ ᠴᠢᠭᠤᠯᠭᠠᠨ ᠳᠠᠷᠤᠭᠠ ᠶ᠋ᠢᠨ ᠠᠯᠪᠠ ᠨᠢ ᠸᠴᠢᠷᠲᠤ ᠰᠡᠴᠡᠨ ᠬᠠᠭᠠᠨ ᠢ᠋ ᠵᠡᠭᠦᠨᠭᠠᠷ ᠲᠠᠢ ᠤᠶᠠᠵᠤ ᠪᠠᠢᠭᠠ ᠶᠤᠮ ᠭᠡᠮᠡᠨ ᠬᠠᠷᠢᠭᠤᠯᠪᠠ᠃ ᠬᠠᠲᠤᠨ ᠡᠬᠡ ᠨᠢ᠂
— ᠸᠴᠢᠷᠲᠤ ᠰᠡᠴᠡᠨ ᠦ᠌ ᠡᠴᠢᠭᠡ ᠪᠠᠢᠪᠠᠭᠠᠰ ᠬᠠᠭᠠᠨ ᠴᠢᠨᠦ ᠡᠪᠦᠭᠡ ᠡᠴᠢᠭᠡ ᠬᠠᠷᠠᠬᠤᠯᠨ ᠨᠣᠶᠠᠨ ᠲᠠᠢ ᠥᠷᠢᠰᠦᠯᠳᠦᠭᠴᠢ ᠪᠠᠢᠭᠰᠠᠨ ᠭᠡᠳᠡᠭ᠃ ᠪᠠᠢᠪᠠᠭᠠᠰ ᠬᠠᠭᠠᠨ ᠴᠢᠭᠤᠯᠭᠠᠨ ᠳᠠᠷᠤᠭᠠ ᠪᠠᠨ ᠬᠥᠪᠡᠭᠦᠨ ᠸᠴᠢᠷᠲᠤ ᠰᠡᠴᠡᠨ ᠳ᠋ᠦ᠍ ᠰᠢᠯᠵᠢᠭᠦᠯᠵᠦ ᠬᠠᠤᠯᠢ ᠲᠣᠭᠲᠠᠭᠠᠬᠤ ᠡᠷᠬᠡ ᠪᠡᠨ ᠬᠠᠳᠠᠭᠠᠯᠠᠵᠤ ᠦᠯᠡᠳᠡᠭᠡᠰᠡ ᠪᠢᠯᠡ᠃ ᠬᠥᠪᠡᠭᠦᠨ ᠲᠠᠨ ᠤ᠋ ᠡᠪᠦᠭᠡ ᠡᠴᠢᠭᠡ ᠬᠠᠷᠠᠬᠤᠯᠠ ᠨᠣᠶᠠᠨ ᠨᠢᠭᠡ ᠬᠡᠰᠡᠭ ᠲᠡᠭᠡᠨ ᠴᠢᠭᠤᠯᠭᠠᠨ ᠳᠠᠷᠤᠭᠠ ᠪᠠᠢᠭᠰᠠᠨ ᠶᠤᠮ ᠪᠢᠯᠡ ᠭᠡᠵᠦ ᠴᠢᠭᠤᠯᠭᠠᠨ ᠳᠠᠷᠤᠭᠠ ᠬᠡᠮᠡᠬᠦ ᠦᠭᠡ ᠶ᠋ᠢ ᠲᠣᠳᠣ ᠭᠡᠭᠴᠢ ᠬᠡᠯᠡᠬᠦ ᠶ᠋ᠢ ᠭᠠᠯᠳᠠᠨ ᠠᠩᠬᠠᠷᠤᠨ ᠪᠣᠯᠭᠣᠭᠠᠵᠠᠢ᠃
ᠥᠨᠳᠡᠭᠡᠲᠦ ᠴᠥᠭᠥᠷᠥᠮ ᠳᠤᠮᠳᠠᠭᠤᠷ ᠠᠳᠤᠭᠤ ᠲᠠᠭᠤᠴᠢᠵᠤ ᠥᠩᠭᠡᠷᠡᠳᠡᠭ ᠦᠭᠡᠢ᠂ ᠮᠠᠯ ᠪᠡᠯᠴᠢᠳᠡᠭ ᠦᠭᠡᠢ ᠪᠣᠯᠬᠤ ᠶ᠋ᠢ ᠭᠠᠯᠳᠠᠨ ᠠᠩᠵᠠᠭᠠᠷᠠᠭᠰᠠᠨ ᠪᠠᠢᠵᠠᠢ᠃ ᠬᠠᠭᠠᠨ ᠰᠢᠷᠡᠭᠡ ᠵᠠᠯᠭᠠᠮᠵᠢᠯᠠᠨ ᠰᠠᠭᠤᠩᠭᠤᠲᠠ ᠳᠥᠷᠪᠡᠨ ᠣᠢᠷᠠᠳ ᠤ᠋ᠨ ᠴᠢᠭᠤᠯᠭᠠᠨ ᠢ᠋ ᠬᠤᠷᠠᠯᠳᠤᠭᠤᠯᠬᠤ ᠶᠤᠮ ᠪᠠᠢᠨᠠ ᠭᠡᠳᠡᠭ ᠢ᠋ ᠬᠠᠲᠤᠨ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡᠨ ᠡᠴᠡ ᠭᠠᠯᠳᠠᠨ ᠰᠠᠢᠲᠤᠷ ᠣᠢᠯᠠᠭᠠᠵᠤ ᠪᠢᠯᠡ᠃ ᠵᠢᠤᠵᠠ ᠲᠡᠷᠭᠡᠨᠡ ᠡᠬᠡ ᠶ᠋ᠢᠨ ᠬᠠᠮᠲᠤ ᠣᠳᠬᠤ ᠳ᠋ᠤ᠌ ᠥᠨᠳᠡᠭᠡᠲᠦ ᠴᠥᠭᠥᠷᠥᠮ ᠦ᠋ᠨ ᠲᠦᠮᠡ᠂ ᠪᠤᠮ ᠤ᠋ᠨ ᠠᠩᠭᠠᠬᠠᠢ ᠴᠢᠬᠢᠨᠡ ᠱᠣᠯᠣᠭᠣᠨᠠᠨ ᠠᠨᠤ ᠬᠠᠲᠤᠨ ᠢ᠋ ᠦᠭᠡᠢᠯᠡᠬᠦ ᠮᠡᠲᠦ᠃ ᠭᠠᠯᠳᠠᠨ ᠠᠨᠤ ᠬᠠᠲᠤᠨ ᠢ᠋ᠶ᠋ᠠᠨ ᠵᠣᠷᠢᠵᠤ ᠶᠠᠪᠤᠭᠠ ᠭᠡᠳᠡᠭ ᠲᠦ᠍ ᠢᠲᠡᠭᠡᠮᠡ ᠦᠭᠡᠢ ᠪᠠᠢᠪᠠᠴᠤ ᠠᠨᠤ ᠬᠠᠲᠤᠨ ᠪᠡᠶᠡ ᠪᠡᠨ ᠬᠠᠭᠰᠠᠭᠠᠨ ᠭᠠᠯᠳᠠᠨ ᠢ᠋ ᠬᠦᠯᠢᠶᠡᠵᠦ ᠪᠠᠢᠯᠠ᠃
ᠠᠨᠤ ᠬᠠᠲᠤᠨ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠤ᠋ ᠠᠢᠰᠤᠢ ᠵᠦᠭ ᠤᠷᠤᠭᠤ ᠡᠯᠴᠢ ᠢᠯᠡᠭᠡᠪᠡ᠃ ᠡᠯᠴᠢ ᠥᠷᠲᠡᠭᠡᠯᠡᠨ ᠣᠳᠴᠤ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠢ᠋ ᠲᠣᠰᠴᠤ ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠦ᠌ ᠪᠠᠭᠢᠯ ᠨᠣᠭᠣᠭᠠᠨ ᠰᠢᠭᠤᠢ ᠶ᠋ᠢ ᠡᠮᠵᠢᠨ ᠪᠦᠷᠬᠦᠬᠦ ᠴᠣᠷᠣᠰ ᠠᠢᠮᠠᠭ ᠤ᠋ᠨ ᠶᠡᠬᠡ ᠬᠦᠷᠢᠶᠡᠨ ᠳ᠋ᠦ᠍ ᠤᠯᠠᠭᠠᠯᠠᠨ ᠬᠥᠲᠥᠯᠵᠦ ᠢᠷᠡᠬᠦ ᠳᠠᠭᠠᠭᠠᠯᠭᠠᠪᠤᠷᠢ ᠲᠠᠢ ᠶᠤᠮ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠨᠠᠷᠠᠨᠲᠣᠭᠣᠰ᠂ ᠤᠤᠭᠠᠨᠵᠢᠳ᠂ ᠠ᠊• ᠮᠢᠬᠤᠸᠠᠷ᠂ ᠣᠶᠤᠨᠴᠢᠮᠡᠭ᠂ ᠤᠳᠤᠡᠭᠡᠷᠡᠯ᠂ ᠡᠷᠳᠡᠨᠢᠪᠢᠯᠢᠭ᠂ ᠣᠳᠬᠠᠨᠴᠡᠴᠡᠭ᠂ ᠬᠣᠨᠢᠴᠢᠨ ᠴᠠᠰᠤᠨᠠ᠂ ᠨᠠ᠊᠂ ᠴᠠᠭᠠᠨ᠂ ᠪᠥᠷᠢᠨᠴᠡᠴᠡᠭ
ᠬᠢᠨᠠᠭᠴᠢ ᠪᠠᠭᠰᠢ᠄ ᠲᠣᠳᠣᠭᠡᠷᠡᠯ᠂ ᠠᠨᠢᠷ᠂ ᠤᠤᠭᠠᠨᠵᠢᠳ