ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ03ᠭᠤᠲᠠᠭᠠᠷ ᠳᠡᠪᠲᠡᠷ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠲᠡᠮᠳᠡᠭᠯᠡᠯ ᠣᠷᠣᠰᠢᠪᠠᠢ-ᠳ· ᠵᠠᠮᠢᠶᠠᠨГалдан бошгот хаан-Т·Жамъян
497ᠭᠤᠲᠠᠭᠠᠷ ᠳᠡᠪᠲᠡᠷ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠲᠡᠮᠳᠡᠭᠯᠡᠯ ᠣᠷᠣᠰᠢᠪᠠᠢ
ᠨᠢᠭᠡ
ᠡᠴᠢᠭᠡ ᠬᠠᠭᠠᠨ ᠤ᠋ ᠬᠣᠣᠷᠯᠠᠭᠳᠠᠭᠰᠠᠨ ᠰᠢᠯᠲᠠᠭᠠᠨ ᠢ᠋ ᠰᠡᠩᠭᠡ ᠠᠬᠠ ᠥᠰᠢᠶᠡᠲᠡᠨ ᠦ᠌ ᠥᠷᠢ ᠨᠡᠬᠡᠭᠰᠡᠨ ᠲᠡᠢ ᠬᠣᠯᠪᠣᠵᠤ ᠲᠠᠢᠯᠪᠤᠷᠢᠯᠠᠭᠰᠠᠨ ᠪᠣᠯᠪᠠᠴᠤ ᠠᠮᠢᠨᠳᠠᠷᠠ ᠬᠠᠲᠤᠨ ᠨᠢᠭᠤᠴᠠᠯᠢᠭ ᠬᠡᠪ ᠢ᠋ᠶ᠋ᠡᠷ ᠦᠯᠡᠳᠡᠵᠦ ᠪᠢᠯᠡ᠁
ᠪᠢᠲᠡᠭᠦᠦ ᠰᠢᠷᠠ ᠴᠡᠴᠡᠭ ᠲᠡᠢ ᠬᠠᠷᠭᠠᠨᠠ ᠶ᠋ᠢᠨ ᠰᠢᠭᠤᠢ ᠳᠤᠮᠳᠠ ᠥᠷᠭᠡᠨ ᠳᠡᠨᠵᠢ ᠪᠠᠢᠨᠠ᠃ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠪᠤᠳᠠᠭᠠᠯᠠᠵᠤ ᠠᠰᠠᠷ᠂ ᠴᠠᠴᠠᠷ᠂ ᠵᠣᠳᠣᠭᠠᠷ ᠢ᠋ᠶ᠋ᠠᠨ ᠪᠠᠷᠢᠵᠤ᠂ ᠮᠣᠷᠢᠳ ᠢ᠋ᠶ᠋ᠠᠨ ᠠᠮᠠᠷᠠᠭᠠᠪᠠ᠃ ᠬᠠᠯᠵᠠ ᠳᠣᠯᠣᠭᠠᠨ ᠳ᠋ᠤ᠌ ᠢᠯᠠᠭᠳᠠᠭᠰᠠᠨ ᠶᠠᠩᠭᠢᠷ ᠰᠤᠯᠲᠠᠨ ᠤ᠋ ᠴᠡᠷᠢᠭ ᠦ᠋ᠳ ᠦ᠋ᠨ ᠠᠷᠤ ᠠ᠋ᠴᠠ ᠨᠡᠬᠡᠨ ᠪᠠᠢᠯᠳᠤᠵᠤ᠂ᠬᠡᠰᠡᠭ ᠪᠤᠰᠠᠭ ᠢ᠋ᠶ᠋ᠠᠷ ᠨᠢ ᠲᠠᠰᠤᠯᠤᠨ ᠰᠠᠷᠨᠢᠭᠤᠯᠵᠤ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠵᠠᠬᠠ ᠳ᠋ᠤ᠌ ᠲᠤᠯᠤᠭᠰᠠᠨ ᠲᠤᠯᠠ ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠣᠢᠷᠠᠳ ᠮᠣᠩᠭᠣᠯ ᠴᠡᠷᠢᠭ ᠢ᠋ᠶ᠋ᠡᠨ ᠪᠠᠭᠤᠳᠠᠯᠯᠠᠬᠤ ᠶ᠋ᠢ ᠲᠤᠰᠢᠶᠠᠵᠠᠢ᠃
ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠳ᠋ᠤ᠌ ᠲᠠᠪᠢᠨ ᠪᠣᠢ ᠵᠠᠯᠠᠭᠤ ᠪᠦᠷᠭᠦᠳ ᠢ᠋ ᠬᠠᠳᠬᠤᠮᠠᠯᠳᠤᠨ ᠬᠡᠩᠬᠦᠳᠡᠭ ᠳᠡᠭᠡᠷᠡ ᠨᠢ ᠬᠠᠰ ᠤᠷᠠᠯᠠᠭᠰᠠᠨ ᠡᠭᠦᠳᠡ ᠲᠡᠢ ᠬᠡᠭᠡᠷᠡ ᠶ᠋ᠢᠨ ᠲᠣᠮᠣ ᠠᠰᠠᠷ ᠪᠠᠷᠢᠵᠠᠢ᠃ ᠬᠣᠩ ᠲᠠᠢᠵᠢ ᠲᠦᠭᠰᠢᠭᠦᠷᠢ ᠲᠡᠢ ᠪᠠᠢᠯᠠ᠃ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠠᠮᠢᠨᠳᠠᠷᠠ ᠶ᠋ᠢ ᠬᠦᠴᠦᠷᠬᠡᠢᠯᠡᠨ ᠪᠣᠭᠲᠣᠯᠠᠵᠤ ᠪᠠᠭᠠ ᠬᠠᠲᠤᠨ ᠢ᠋ᠶ᠋ᠠᠨ ᠪᠣᠯᠭᠠᠭᠰᠠᠨ ᠠ᠋ᠴᠠ ᠲᠡᠭᠦᠨ ᠦ᠌ ᠬᠦᠰᠡᠯ ᠢ᠋ ᠪᠡᠶᠡᠯᠡᠭᠦᠯᠵᠦ ᠬᠣᠭᠣᠯᠠ᠂ ᠨᠣᠢᠷ ᠳᠠᠭᠠᠭᠤᠯᠵᠤ ᠶᠠᠪᠤᠬᠤ ᠪᠥᠯᠥᠭᠡ᠃ ᠬᠠᠷᠢᠨ ᠡᠴᠢᠭᠡ᠂ ᠡᠬᠡ ᠳ᠋ᠡᠭᠡᠨ ᠵᠣᠯᠭᠠᠶᠠ ᠭᠡᠬᠦ ᠳ᠋ᠦ᠍ᠨᠢ ᠰᠢᠭᠤᠳ ᠲᠠᠲᠠᠭᠠᠯᠵᠠᠭᠰᠠᠨ ᠪᠠᠢᠨᠠ᠃ᠬᠦᠣᠰᠢ ᠬᠠᠭᠠᠨᠤ ᠠᠪᠤᠷᠢ ᠠᠷᠠᠨᠰᠢᠨ ᠥᠭᠡᠷᠡᠴᠢᠯᠡᠭᠳᠡᠨ ᠮᠠᠨᠵᠤ ᠶ᠋ᠢᠨ ᠲᠠᠯᠠ ᠶ᠋ᠢ ᠬᠡᠳᠦ ᠳᠠᠭᠠᠬᠤ ᠪᠣᠯᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠲᠡᠭᠦᠨ ᠢ᠋ ᠦᠵᠡᠨ ᠶᠠᠳᠠᠳᠠᠭ ᠪᠣᠯᠵᠠᠢ᠃ᠥᠬᠢᠨ ᠠᠮᠢᠨᠳᠠᠷᠠ ᠶ᠋ᠢ ᠨᠢ ᠶᠡᠬᠡ ᠵᠠᠮ ᠤ᠋ᠨ ᠳᠡᠭᠡᠷᠡᠮᠴᠢᠨ ᠯᠤᠭᠠ ᠪᠣᠭᠲᠣᠯᠠᠵᠤ ᠠᠪᠤᠭᠰᠠᠨ ᠳ᠋ᠤ᠌ ᠭᠦᠦᠰᠢ ᠬᠠᠭᠠᠨ ᠵᠠᠨᠤᠯᠲᠠᠢ ᠪᠠᠢᠯᠠ᠃
ᠶᠠᠳᠠᠬᠤ ᠳ᠋ᠠᠭᠠᠨ ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠥᠬᠢᠨ ᠢ᠋ ᠨᠢ ᠢᠩᠭᠢᠵᠦ ᠪᠡᠯᠡᠭ ᠰᠡᠯᠲᠡ ᠦᠭᠡᠢ ᠭᠦᠦᠰᠢ ᠬᠠᠭᠠᠨ ᠳ᠋ᠤ᠌ ᠬᠦᠷᠭᠡᠬᠦᠯᠵᠤ ᠬᠡᠯᠡ ᠮᠡᠳᠡᠭᠡ ᠳᠣᠭᠣᠯᠭᠠᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠴᠢᠮᠡᠭᠡ ᠦᠭᠡᠢ ᠥᠩᠭᠡᠷᠡᠪᠡ᠃ ᠳᠤᠷᠠ ᠵᠣᠷᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠮᠢᠨᠳᠠᠷᠠ ᠴᠡᠷᠢᠭ ᠦ᠋ᠳ ᠦ᠋ᠨ ᠬᠠᠮᠲᠤ ᠣᠷᠣᠰ ᠤ᠋ᠨ ᠨᠤᠲᠤᠭ ᠲᠤ᠌ ᠣᠴᠢᠵᠤ ᠰᠢᠷᠠ ᠴᠡᠴᠡᠭ ᠤᠷᠠᠯᠠᠭᠰᠠᠨ ᠠᠯᠴᠢᠭᠤᠷ ᠬᠤᠳᠠᠯᠳᠤᠵᠤ ᠠᠪᠬᠤ ᠪᠠᠷ ᠵᠠᠮ ᠳ᠋ᠠᠭᠠᠨ ᠣᠢᠷᠠᠳ ᠤ᠋ᠨ ᠬᠠᠭᠠᠨ ᠤ᠋ ᠰᠠᠪᠠᠷ ᠲᠤ᠌ ᠠᠳᠬᠤᠭᠤᠯᠤᠭᠰᠠᠨ ᠶᠣᠮᠰᠠᠨᠵᠠᠢ᠃
— ᠪᠦᠷᠭᠦᠳ ᠠᠳᠬᠤᠭᠰᠠᠨ ᠣᠯᠵᠠ ᠶ᠋ᠢ ᠲᠠᠯᠪᠢᠳᠠᠭ ᠦᠭᠡᠢ ᠶᠦᠮ᠃ ᠪᠦᠷᠭᠦᠳ ᠦ᠋ᠨ ᠰᠠᠪᠠᠷ ᠲᠤ᠌ ᠣᠷᠣᠭᠰᠠᠨ ᠪᠣᠯ ᠪᠢᠴᠠ ᠠᠳᠬᠤᠭᠤᠯᠤᠨᠠ᠃ ᠡᠰᠡᠪᠡᠯ ᠲᠡᠨᠳᠡ ᠪᠡᠨ ᠵᠢᠷᠭᠠᠨᠠ ᠭᠡᠵᠦ ᠠᠩᠬᠠ ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠬᠡᠯᠡᠭᠰᠡᠨ ᠶᠤᠮᠰᠠᠨᠵᠠᠢ᠃ᠬᠣᠩ ᠲᠠᠢᠵᠢ ᠳ᠋ᠤ᠌ ᠬᠦᠴᠦᠨᠳᠡᠭᠥᠯᠵᠤ ᠪᠠᠢᠬᠤ ᠳ᠋ᠠᠭᠠᠨ ᠠᠮᠢᠨᠳᠠᠷᠠ᠂
— ᠡᠪᠡᠳᠬᠡᠭᠡᠳ ᠥᠭᠭᠦᠭᠡᠴᠢ ᠁ ᠭᠡᠮᠡᠨ ᠭᠠᠰᠠᠯᠤᠨᠠ᠃
ᠭᠠᠰᠠᠯᠠᠩᠲᠤ ᠪᠦᠰᠡᠭᠦᠢ ᠶ᠋ᠢᠨ ᠳᠠᠭᠤ ᠶ᠋ᠢ ᠰᠥᠨᠢ ᠶ᠋ᠢᠨ ᠲᠠᠯᠠ ᠳ᠋ᠤ᠌ ᠮᠣᠳᠣᠨ ᠲᠡᠷᠭᠡᠨ ᠦ᠌ ᠬᠢᠬᠤᠨᠠᠬᠤ ᠴᠢᠮᠡᠭᠡ ᠳᠠᠷᠤᠵᠤ ᠪᠠᠢᠯᠠ᠃ ᠪᠦᠰᠡᠭᠦᠢ ᠶ᠋ᠢᠨ ᠭᠠᠰᠠᠯᠠᠩ ᠢᠷᠡᠬᠦ ᠴᠠᠭ ᠤ᠋ᠨ ᠢᠷᠣᠠ ᠶ᠋ᠢ ᠳᠠᠯᠠᠯᠤᠨ ᠳᠠᠭᠤᠳᠠᠨᠠ᠃ ᠪᠦᠰᠡᠭᠦᠢ ᠳ᠋ᠦ᠍ ᠰᠢᠷᠠ ᠴᠡᠴᠡᠭ ᠲᠡᠢ ᠰᠠᠴᠤᠭ ᠪᠦᠬᠦᠢ ᠠᠯᠴᠢᠭᠤᠷ ᠥᠭᠭᠦᠶᠡ ᠭᠡᠬᠦ ᠳ᠋ᠦ᠍ ᠠᠮᠢᠨᠳᠠᠷᠠ ᠰᠢᠭᠤᠳ ᠲᠠᠲᠠᠭᠠᠯᠵᠠᠵᠤ ᠪᠠᠢᠵᠠᠢ᠃ ᠬᠣᠩ ᠲᠠᠢᠵᠢ ᠶ᠋ᠢᠨ ᠡᠷᠬᠢᠮᠰᠦᠭ ᠪᠡᠯᠡᠭ ᠡᠴᠡ ᠬᠠᠳᠠᠨ ᠤ᠋ ᠮᠥᠭᠥ ᠢᠯᠡᠭᠦᠦ ᠦᠨᠡ ᠲᠡᠢ ᠶ᠋ᠢ ᠪᠣᠳᠣᠬᠤ ᠳ᠋ᠤ᠌ ᠠᠮᠢᠨᠳᠠᠷᠠ ᠰᠠᠨᠠᠭᠠ ᠪᠤᠷᠤᠭᠤᠯᠠᠭᠰᠠᠨ ᠪᠠᠢᠵᠤ ᠮᠠᠭᠠᠳ ᠦᠭᠡᠢ ᠠᠵᠢ᠃ ᠠᠮᠢᠨᠳᠠᠷᠠ ᠶ᠋ᠢᠨ ᠬᠤᠪᠢ ᠵᠠᠶᠠᠭᠠ ᠡᠷᠭᠢᠵᠡᠢ᠃ ᠪᠠᠯᠴᠢᠷᠬᠠᠨ ᠵᠢᠷᠦᠬᠡᠨ ᠳ᠋ᠡᠭᠡᠨ ᠠᠮᠢᠨᠳᠠᠷᠠ ᠲᠣᠷᠭᠤᠳ ᠤ᠋ᠨ ᠨᠠᠭᠤᠷ ᠪᠠᠭᠠᠲᠤᠷ ᠢ᠋ ᠪᠣᠳᠣᠵᠤ ᠶᠠᠪᠤᠭᠰᠠᠨ ᠶᠤᠮ ᠪᠢᠯᠡ᠃ ᠨᠠᠭᠤᠷ ᠪᠠᠭᠠᠲᠤᠷ ᠦᠬᠦᠵᠡᠢ᠃
ᠬᠣᠶᠠᠷ
ᠡᠨᠡ ᠦᠶᠡ ᠪᠣᠯ1653 ᠣᠨ ᠤ᠋ ᠬᠠᠷᠠᠭᠴᠢᠨ ᠮᠣᠭᠠᠢ ᠵᠢᠯ ᠦ᠋ᠨ ᠨᠠᠮᠤᠷ ᠪᠠᠢᠯᠠ᠃ ᠲᠤᠯᠤᠯᠳᠤᠭᠠᠨ ᠵᠠᠪᠰᠠᠷᠯᠠᠭᠰᠠᠨ ᠤ᠋ ᠳᠠᠷᠠᠭᠠ ᠬᠠᠰᠠᠭ ᠤ᠋ᠨ ᠵᠠᠭᠤᠲᠤ ᠨᠤᠭᠤᠳ ᠵᠦᠭ ᠪᠤᠷᠤᠭᠤᠯᠠᠨ ᠪᠤᠲᠠᠷᠠᠭᠰᠠᠨ ᠨᠢ ᠬᠣᠩ ᠲᠠᠢᠵᠢ ᠶ᠋ᠢᠨ ᠪᠣᠳᠣᠯ ᠢ᠋ᠶ᠋ᠠᠷ ᠰᠠᠨᠠᠮᠰᠠᠷ ᠦᠭᠡᠢ ᠵᠢᠭᠤᠲᠠᠯᠲᠠ ᠪᠢᠰᠢ ᠪᠥᠭᠡᠳ ᠰᠡᠳᠬᠢᠯ ᠨᠢ ᠲᠣᠭᠲᠠᠵᠤ ᠥᠭᠬᠦ ᠦᠭᠡᠢ ᠪᠠᠢᠯᠠ᠃ ᠰᠡᠳᠬᠢᠯ ᠢ᠋ᠶ᠋ᠡᠨ ᠲᠣᠭᠲᠠᠭᠠᠬᠤ ᠭᠡᠵᠦ ᠡᠷᠳᠡᠨᠢᠪᠠᠭᠠᠲᠤᠷ ᠬᠠᠭᠠᠨ ᠬᠦᠴᠦ ᠪᠡᠷ ᠤᠷᠤᠯᠳᠤᠵᠤ ᠦᠵᠡᠪᠡ᠃
ᠠᠮᠢᠨᠳᠠᠷᠠ ᠶ᠋ᠢ ᠰᠡᠦᠬᠡ ᠲᠡᠷᠭᠡᠨ ᠡᠴᠡ ᠬᠣᠯᠠᠳᠤᠨ ᠣᠳᠬᠤ ᠳ᠋ᠤ᠌ ᠪᠠᠷᠠ ᠪᠣᠯᠤᠭᠰᠠᠨ ᠣᠭᠲᠣ ᠰᠡᠵᠢᠭᠯᠡᠭᠡ ᠦᠭᠡᠢ ᠠᠲᠠᠯᠠ ᠬᠣᠩ ᠲᠠᠢᠵᠢ ᠳ᠋ᠤ᠌ ᠤᠷᠢᠳ ᠡᠮᠦᠨᠡ ᠳᠥᠷᠥᠭᠡ ᠦᠭᠡᠢ ᠮᠠᠭᠤ ᠰᠤᠪᠢᠨ ᠲᠠᠲᠠᠵᠠᠢ᠃ ᠬᠠᠲᠤᠨ ᠡᠷᠭᠢᠵᠦ ᠢᠷᠡᠬᠦ ᠳ᠋ᠡᠭᠡᠨ ᠪᠦᠷᠭᠦᠳ ᠦ᠋ᠨ ᠲᠤᠬᠠᠢ ᠠᠰᠠᠭᠤᠭᠰᠠᠨ ᠨᠢ ᠲᠡᠭᠦᠨ ᠦ᠌ ᠮᠠᠭᠤ ᠰᠤᠪᠢᠨ ᠢ᠋ ᠪᠠᠲᠤᠯᠠᠬᠤ ᠰᠢᠭ᠋ ᠪᠣᠯᠵᠠᠢ᠃ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠠᠮᠢᠨᠳᠠᠷᠠ ᠶ᠋ᠢ ᠰᠤᠷᠠᠭᠠᠳ ᠦᠵᠡᠬᠦ ᠪᠡᠷ ᠰᠢᠢᠳᠴᠡᠢ᠃
— ᠦᠬᠦᠯ ᠡᠴᠡ ᠠᠶᠤᠬᠤ ᠦᠭᠡᠢ ᠪᠠᠢᠨᠠ ᠤᠤ?
— ᠲᠠ ᠨᠠᠮᠠᠶ᠋ᠢ ᠵᠣᠪᠠᠯᠠᠩᠲᠤ ᠡᠮᠡ ᠪᠣᠯᠭᠠᠭᠰᠠᠨ᠃ ᠵᠠᠯᠠᠭᠤ ᠪᠠᠷ ᠢ᠋ᠶ᠋ᠠᠨ ᠬᠠᠭᠰᠠᠷᠠᠭᠰᠠᠨ ᠠ᠋ᠴᠠ ᠦᠬᠦᠭᠰᠡᠨ ᠨᠢ ᠳᠡᠭᠡᠷᠡ᠃
— ᠨᠠᠮᠠᠶ᠋ᠢ ᠦᠬᠦᠪᠡᠯ ᠴᠢ ᠶᠠᠭᠠᠬᠢᠬᠤᠪ?
— ᠪᠢ ᠰᠠᠪᠳᠡᠨᠵᠡᠯ ᠳ᠋ᠦ᠍ ᠣᠴᠢᠨᠠ᠃
— ᠬᠠᠷᠠᠩᠭᠤᠢ ᠬᠠᠳᠠᠨ ᠤ᠋ ᠴᠠᠭᠠᠨᠠ ᠰᠠᠪᠳᠡᠨᠵᠡᠯ ᠪᠠᠢᠭᠰᠠᠨ ᠤᠤ? ᠥᠭᠡᠷᠡ ᠁ ᠠᠮᠠ ᠠᠯᠳᠠᠪᠠᠯ ᠪᠠᠷᠢᠵᠤ ᠪᠣᠯᠳᠠᠭ ᠦᠭᠡᠢ᠂ ᠬᠠᠳᠠᠨ ᠤ᠋ ᠮᠥᠭᠥ ᠬᠡᠨ ᠪᠣᠢ?
— ᠦᠭᠡᠢ ᠠ᠋᠂ ᠲᠡᠨᠳᠡ ᠬᠡᠨ ᠴᠦ᠍ ᠪᠠᠢᠭᠠ ᠦᠭᠡᠢ᠃ ᠨᠠᠮᠠᠶ᠋ᠢ ᠦᠬᠦᠯ ᠬᠦᠯᠢᠶᠡᠵᠦ ᠪᠠᠢᠭᠠ᠃ ᠦᠬᠦᠯ ᠨᠠᠳᠠ ᠤᠷᠤᠭᠤ ᠢᠷᠡᠪᠡᠯ ᠪᠢ ᠲᠠᠯᠠᠷᠬᠠᠨᠠ᠃ ᠲᠠ ᠨᠠᠳᠠ ᠠ᠋ᠴᠠ ᠠᠶᠤᠵᠤ ᠪᠠᠢᠨᠠ ᠤᠤ? ᠭᠡᠵᠦ ᠠᠰᠠᠭᠤᠭᠰᠠᠨ᠂ ᠪᠢ ᠠᠶᠤᠳᠠᠭ ᠦᠭᠡᠢ᠃
— ᠲᠡᠭᠡᠭᠡᠳ ᠶᠠᠭᠤᠨ ᠤ᠋ ᠤᠴᠢᠷ ᠰᠠᠪᠳᠠᠨᠵᠡᠯ ᠢ᠋ ᠰᠣᠨᠢᠷᠬᠠᠪᠠ᠃ ᠲᠡᠷᠡ ᠴᠢᠨᠢ ᠰᠠᠭᠰᠠᠭᠤ ᠪᠠᠷᠳᠠᠮ ᠵᠠᠯᠠᠭᠤ᠂ ᠴᠢᠮᠠ ᠳ᠋ᠤ᠌ ᠪᠠᠢᠲᠤᠭᠠᠢ ᠨᠠᠳᠠᠳᠤ ᠨᠡᠮᠡᠷᠢ ᠪᠣᠯᠬᠤ ᠦᠭᠡᠢ᠃ ᠴᠢᠮᠠᠶ᠋ᠢ ᠠᠯᠠᠴᠢᠬᠠᠨᠠ᠃
— ᠬᠠᠭᠠᠨ ᠲᠠ ᠡᠨᠳᠡᠭᠦᠷᠡᠵᠦ ᠪᠠᠢᠨᠠ᠃ ᠲᠠᠨ ᠤ᠋ ᠬᠥᠪᠡᠭᠦᠳ ᠦ᠋ᠨ ᠰᠤᠷ ᠨᠢ᠃
— ᠶᠠᠭᠠᠬᠢᠭᠠᠳ?
— ᠲᠡᠷᠡ ᠵᠠᠯᠠᠭᠤ ᠤᠷᠭᠤᠭᠠ ᠴᠢᠯᠠᠭᠤ ᠰᠢᠭ᠋ ᠰᠠᠨᠠᠭᠳᠠᠳᠠᠭ᠃
— ᠪᠢ ᠲᠡᠭᠡᠪᠡᠯ᠁
— ᠲᠠ ᠪᠣᠯ ᠤᠷᠤᠰᠬᠠᠯ ᠤᠰᠤ ᠰᠢᠭ᠋ ᠬᠥᠮᠦᠨ᠃
— ᠪᠢ ᠲᠡᠭᠡᠪᠡᠯ᠁
— ᠬᠠᠯᠠᠭᠤᠨ ᠴᠢᠰᠤ ᠲᠠᠢ ᠡᠷᠡ ᠶ᠋ᠢ ᠬᠦᠰᠡᠵᠦ ᠪᠠᠢᠭᠠ ᠶᠤᠮ ᠰᠢᠪ ᠳᠡ᠃ ᠬᠠᠲᠤᠨᠲᠠᠨ!
— ᠲᠠ ᠨᠠᠮᠠᠶ᠋ᠢ ᠣᠢᠯᠠᠭᠠᠭᠰᠠᠨ ᠦᠭᠡᠢ᠂ ᠲᠠ ᠮᠢᠨᠦ ᠥᠬᠢᠨ ᠪᠡᠶᠡ ᠶ᠋ᠢ ᠦᠭᠡᠢ ᠬᠢᠭᠰᠡᠨ᠃ᠲᠡᠢᠮᠦ ᠤᠴᠢᠷ ᠠ᠋ᠴᠠ ᠪᠢ ᠥᠪᠡᠷ ᠦ᠋ᠨ ᠴᠢᠰᠤ ᠶ᠋ᠢ ᠣᠢᠷᠠᠳ ᠤ᠋ᠨ ᠴᠢᠰᠤ ᠲᠠᠢ ᠬᠣᠯᠢᠵᠤ᠂ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠢ᠋ ᠲᠥᠷᠥᠭᠦᠯᠬᠦ ᠶᠣᠰᠣᠲᠠᠢ ᠪᠢᠯᠡ᠃ ᠬᠠᠭᠠᠨ ᠲᠠᠨ ᠤ᠋ ᠦᠷᠡ ᠵᠠᠶᠠᠭᠠᠬᠤ ᠦᠭᠡᠢ ᠪᠣᠯᠤᠯᠲᠠᠢ᠃ ᠲᠡᠭᠡᠬᠦ ᠪᠡᠷ ᠪᠢ ᠰᠡᠪᠳᠡᠨᠵᠡᠯ ᠳ᠋ᠦ᠍ ᠣᠴᠢᠪᠠᠯ ᠲᠠᠨ ᠤ᠋ ᠤᠳᠤᠮ ᠨᠠᠳᠠ ᠪᠠᠷ ᠳᠡᠮᠵᠢᠵᠦ ᠲᠥᠷᠥᠬᠦ ᠪᠤᠰᠤ ᠤᠤ?
— ᠭᠦᠩᠵᠦᠲᠡᠨ ᠬᠣᠷᠣᠰᠤᠭᠰᠠᠭᠠᠷ ᠶᠠᠪᠤᠨᠠ ᠤᠤ? ᠰᠡᠪᠳᠡᠨᠵᠡᠯ ᠳ᠋ᠦ᠍ ᠣᠴᠢᠨᠠ ᠬᠡᠮᠡᠨᠡ᠃ ᠡᠴᠢᠭᠡ᠂ ᠦᠷᠡ ᠶ᠋ᠢᠨ ᠬᠣᠭᠣᠷᠣᠨᠳᠣ ᠶᠠᠰᠤ ᠬᠠᠶᠠᠬᠤ ᠶᠠᠭᠤᠨ᠂ ᠲᠡᠭᠦᠨ ᠢ᠋ ᠬᠣᠷᠣᠭᠠᠬᠤ ᠰᠢᠯᠲᠠᠭ ᠨᠠᠳᠠᠳᠤ ᠣᠳᠣᠬᠠᠨ ᠳ᠋ᠠᠭᠠᠨ ᠠᠯᠠᠭᠠ᠃ ᠭᠡᠬᠦ ᠳ᠋ᠡᠭᠡᠨ ᠪᠢ ᠲᠡᠭᠦᠨ ᠳ᠋ᠦ᠍ ᠳᠤᠷᠠ ᠦᠭᠡᠢ᠃
— ᠰᠡᠪᠳᠡᠨᠵᠡᠯ ᠬᠠᠷᠠ ᠶᠡᠬᠡᠲᠡᠢ᠃ ᠬᠠᠭᠠᠨ ᠲᠠᠨ ᠤ᠋ ᠬᠥᠪᠡᠭᠦᠳ ᠦ᠋ᠨ ᠨᠢᠭᠡ ᠮᠥᠨ᠃ ᠲᠠ ᠥᠪᠡᠷ ᠢ᠋ᠶ᠋ᠡᠨ ᠨᠠᠮᠠᠶ᠋ᠢ ᠦᠬᠦᠪᠡᠯ ᠴᠢ ᠶᠠᠭᠠᠬᠢᠬᠤ ᠪᠣᠢ ᠭᠡᠮᠡᠨ ᠠᠰᠠᠭᠤᠭᠰᠠᠨ ᠪᠤᠰᠤ ᠤᠤ?
— ᠠᠮᠢᠨᠳᠠᠷᠠ ᠴᠡᠪᠳᠡᠭ᠂ ᠨᠢᠭᠤᠴᠠᠯᠢᠭ ᠵᠠᠩ ᠲᠠᠢ ᠪᠢᠯᠡ᠃ ᠭᠡᠲᠡᠯᠡ ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶᠠᠭᠤᠨ ᠤ᠋ ᠤᠴᠢᠷ ᠢᠯᠠᠨ ᠳᠠᠯᠠᠨ ᠦᠭᠡᠢ ᠱᠣᠷᠪᠣᠭ ᠭᠠᠰᠢᠭᠤᠨ ᠰᠠᠨᠠᠭᠠ ᠪᠠᠨ ᠭᠠᠷᠭᠠᠪᠠ᠃ ᠬᠣᠩ ᠲᠠᠢᠵᠢ ᠰᠥᠨᠢ ᠲᠤᠷᠰᠢᠲᠠ ᠪᠣᠳᠣᠯᠭᠠᠰᠢᠷᠠᠵᠤ ᠠᠮᠢᠨᠳᠠᠷᠠ ᠶ᠋ᠢ ᠡᠷᠬᠡᠯᠡᠭᠦᠯᠦᠨ ᠢᠯᠢᠵᠦ ᠲᠠᠭᠠᠯᠠᠬᠤ ᠡᠨᠳᠡᠯᠡ ᠪᠡᠨ ᠲᠠᠰᠤ ᠥᠭᠡᠷᠡ ᠶᠠᠭᠤᠮᠠ ᠪᠣᠳᠣᠨ ᠨᠣᠢᠷ ᠮᠠᠭᠤᠲᠠᠢᠬᠠᠨ ᠬᠣᠨᠣᠵᠠᠢ᠃
ᠬᠣᠩ ᠲᠠᠢᠵᠢ ᠥᠷ ᠴᠠᠢᠬᠤ ᠦᠶᠡᠰ ᠵᠡᠭᠦᠳᠦᠨ ᠡᠴᠡ ᠬᠠᠭᠠᠴᠠᠪᠠ᠃ ᠠᠮᠢᠨᠳᠠᠷᠠ ᠨᠣᠢᠷᠮᠤᠭ ᠴᠢᠷᠠᠢᠯᠠᠨᠠ᠃
— ᠰᠥᠨᠢᠵᠢᠨ ᠪᠣᠯᠵᠣᠮᠣᠷ ᠳᠡᠷᠬᠢᠯᠡ᠃ ᠬᠠᠷᠭᠠᠨᠠ ᠶ᠋ᠢᠨ ᠰᠢᠭᠤᠢ ᠳ᠋ᠤ᠌ ᠠᠷᠢᠶᠠᠲᠠᠨ ᠡᠭᠦᠷᠯᠡᠭᠰᠡᠨ ᠶᠦᠮ ᠪᠣᠯᠪᠠᠤ? ᠭᠡᠵᠦ ᠠᠮᠢᠨᠳᠠᠷᠠ ᠠᠰᠠᠭᠤᠬᠤ ᠳ᠋ᠤ᠌᠂
— ᠴᠢ ᠰᠡᠷᠭᠡᠭ᠃ ᠣᠳᠣᠬᠠᠨ ᠭᠠᠳᠠᠭᠠᠯᠠᠭᠠᠳ ᠢᠷᠡᠶᠡ ᠭᠡᠳ ᠬᠣᠩ ᠲᠠᠢᠵᠢ ᠨᠥᠮᠥᠭᠡᠨ ᠭᠠᠷᠤᠯᠠ᠃
ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶ᠋ᠢᠨ ᠠᠰᠠᠷ ᠢ᠋ ᠬᠦᠷᠢᠶᠡᠯᠡᠭᠡᠳ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠥᠷᠭᠡᠰᠴᠡᠢ᠃ ᠬᠠᠷᠭᠠᠨᠠ ᠶ᠋ᠢᠨ ᠨᠡᠯᠮᠡᠢᠭᠰᠡᠨ ᠰᠢᠷᠠ ᠰᠢᠭᠤᠢ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠦ᠌ ᠭᠠᠳᠠᠨᠠᠬᠢ ᠶᠡᠬᠡ ᠬᠦᠷᠢᠶᠡᠨ ᠡᠴᠡ ᠦᠷᠭᠦᠯᠵᠢᠯᠡᠨᠡ᠃ ᠬᠠᠷᠠᠭᠤᠯ᠂ ᠬᠡᠪᠲᠡᠭᠦᠯ ᠴᠡᠷᠢᠭ ᠦ᠋ᠳ ᠰᠣᠨᠣᠷ ᠰᠣᠷᠭᠣᠭ ᠪᠢᠯᠡ᠃ ᠬᠠᠷᠭᠠᠨᠠ ᠶ᠋ᠢᠨ ᠰᠢᠭᠤᠢ ᠳᠣᠲᠣᠷᠠ ᠶᠠᠩᠭᠢᠷ ᠰᠤᠯᠲᠠᠨ ᠤ᠋ ᠬᠥᠪᠡᠭᠦᠨ ᠦᠰ ᠵᠠᠩᠭᠢᠳᠤᠨ ᠬᠣᠷᠣᠰᠤᠯ᠂ ᠣᠮᠣᠭ᠂ ᠠᠭᠤᠷ ᠰᠢᠷᠠ ᠳ᠋ᠠᠭᠠᠨ ᠰᠢᠲᠠᠨ ᠬᠡᠪᠲᠡᠵᠦ ᠪᠠᠢᠪᠠ᠃
ᠡᠨᠡ ᠮᠥᠴᠡ ᠳ᠋ᠦ᠍ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠥᠪᠡᠷ ᠡᠴᠡ ᠪᠡᠨ ᠠᠰᠠᠭᠤᠨᠠ᠃ ᠲᠡᠭᠦᠨ ᠦ᠌ ᠶᠠᠷᠢᠶᠠ ᠰᠣᠨᠣᠰᠤᠭᠳᠠᠨᠠ᠃
《ᠠᠮᠢᠨᠳᠠᠷᠠ ᠶᠠᠭᠠᠬᠢᠭᠠᠳ ᠰᠡᠪᠳᠡᠨᠵᠠᠯ ᠳ᠋ᠤ᠌ ᠣᠴᠢᠨᠠ ᠭᠡᠪᠡ᠃ ᠠᠮᠢᠨᠳᠠᠷᠠ ᠶ᠋ᠢᠨ ᠡᠬᠡ ᠶ᠋ᠢᠨ ᠲᠠᠯᠠ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠤ᠋ ᠰᠦᠯᠪᠡᠭᠡᠳᠡᠨ ᠭᠡᠳᠡᠭ᠃ ᠡᠰᠡᠪᠡᠯ ᠠᠮᠢᠨᠳᠠᠷᠠ ᠨᠠᠳᠠ ᠪᠠᠷ ᠰᠡᠪᠳᠡᠨᠵᠠᠯ ᠢ᠋ ᠬᠣᠣᠷᠯᠠᠭᠤᠯᠬᠤ ᠰᠠᠨᠠᠭᠠ ᠲᠠᠢ ᠶᠤᠮ ᠤᠤ? ᠦᠷᠭᠦᠭᠡᠨ ᠳ᠋ᠡᠭᠡᠨ ᠣᠴᠢᠭᠰᠠᠨ ᠬᠣᠢᠨᠠ ᠰᠡᠪᠳᠡᠨᠵᠠᠯ ᠢ᠋ ᠪᠠᠢᠴᠠᠭᠠᠯᠭᠠᠵᠤ ᠤᠴᠢᠷ ᠢ᠋ ᠣᠯᠬᠤ ᠦᠭᠡᠢ ᠪᠣᠯ ᠁》ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶ᠋ᠢ ᠥᠪᠡᠷ ᠲᠡᠢ ᠪᠡᠨ ᠶᠠᠷᠢᠭᠠᠳ ᠡᠷᠭᠢᠲᠡᠯᠡ ᠲᠡᠭᠦᠨ ᠦ᠌ ᠨᠢᠷᠤᠭᠤᠨ ᠳ᠋ᠤ᠌ ᠦᠬᠦᠯ ᠦ᠋ᠨ ᠰᠤᠮᠤ ᠵᠣᠭᠣᠭᠳᠠᠪᠠ᠃ ᠰᠤᠮᠤ ᠶ᠋ᠢᠨ ᠬᠤᠰᠢᠭᠤᠨ ᠳ᠋ᠤ᠌ ᠬᠣᠣᠷ ᠲᠦᠷᠬᠢᠭᠰᠡᠨ ᠪᠠᠢᠵᠠᠢ᠃
ᠭᠤᠷᠪᠠ
ᠰᠢᠪ ᠰᠢᠷᠠ ᠴᠡᠴᠡᠭ ᠲᠡᠢ ᠬᠠᠷᠭᠠᠨᠠ ᠶ᠋ᠢᠨ ᠰᠢᠭᠤᠢ ᠦᠷᠭᠦᠯᠵᠢᠯᠡᠨ ᠶᠠᠪᠤᠭᠰᠠᠭᠠᠷ ᠠᠭᠤᠯᠠ ᠶ᠋ᠢᠨ ᠪᠠᠯ ᠬᠣᠷᠮᠣᠢ ᠬᠦᠷᠴᠡᠢ᠃ ᠰᠢᠭᠤᠢ ᠳᠡᠭᠡᠭᠦᠷ ᠡᠷᠲᠡᠴᠢ ᠪᠣᠯᠵᠣᠮᠣᠷ ᠪᠥᠭᠡᠮ ᠪᠥᠭᠡᠮ ᠢ᠋ᠶ᠋ᠡᠷ ᠡᠷᠭᠢᠨᠡ᠃ ᠰᠢᠷᠠ ᠴᠡᠴᠡᠭ ᠲᠡᠢ ᠠᠯᠴᠢᠭᠤᠷ ᠢ᠋ ᠠᠮᠢᠨᠳᠠᠷᠠ ᠬᠦᠰᠡᠳᠡᠭ ᠪᠤᠰᠤ ᠤᠤ?ᠰᠢᠷᠠ ᠴᠡᠴᠡᠭ ᠦ᠋ᠨ ᠳᠤᠮᠳᠠ ᠬᠣᠨᠣᠭᠯᠠᠪᠠ᠃
ᠠᠮᠢᠨᠳᠠᠷᠠ ᠳ᠋ᠤ᠌ ᠳᠤᠷᠠᠯᠠᠭᠰᠠᠨ ᠳ᠋ᠠᠭᠠᠨ ᠪᠣᠯᠵᠤ ᠡᠴᠢᠭᠡ ᠬᠠᠭᠠᠨ ᠬᠣᠣᠷ ᠰᠢᠩᠭᠡᠭᠡᠭᠰᠡᠨ ᠰᠤᠮᠤᠨ ᠳ᠋ᠤ᠌ ᠰᠢᠪᠡᠭᠦᠯᠵᠡᠢ᠃ᠬᠠᠷᠢᠨ ᠬᠠᠷᠠᠭᠠᠨᠠᠲᠤ ᠰᠢᠭᠤᠢ ᠠ᠋ᠴᠠ ᠶᠠᠩᠭᠢᠷ ᠰᠤᠯᠲᠠᠨ ᠤ᠋ ᠬᠥᠪᠡᠭᠦᠨ ᠢ᠋ ᠪᠠᠷᠢᠵᠤ ᠠᠪᠴᠢᠷᠠᠵᠠᠢ᠃ᠲᠡᠷᠡ ᠬᠥᠪᠡᠭᠦᠨ ᠳᠡᠰ ᠬᠠᠷᠠ ᠪᠤᠷᠵᠢᠭᠢᠷ ᠦᠰᠦ ᠲᠡᠢ᠂ ᠮᠤᠤᠷ ᠤ᠋ᠨ ᠰᠢᠭ᠋ ᠴᠡᠩᠬᠡᠷ ᠨᠣᠭᠣᠭᠠᠨ ᠨᠢᠳᠦ ᠲᠡᠢ ᠰᠢᠵᠠᠭᠤᠷ ᠵᠠᠭᠤᠭᠰᠠᠨ ᠨᠢᠭᠡᠨ ᠪᠠᠢᠪᠠ᠃ ᠰᠡᠷᠡᠮᠵᠢ ᠠᠯᠳᠠᠭᠰᠠᠨ ᠣᠢᠷᠠᠳ ᠤ᠋ᠨ ᠲᠣᠷᠭᠠᠨ ᠴᠡᠷᠢᠭ ᠦ᠋ᠨ ᠴᠢᠰᠤ ᠪᠠᠷ ᠬᠠᠷᠭᠠᠨᠠ ᠶ᠋ᠢᠨ ᠰᠢᠷᠠ ᠴᠡᠴᠡᠭ ᠪᠣᠳᠣᠭᠳᠠᠪᠠ᠃ᠬᠥᠪᠡᠭᠦᠨ ᠢ᠋ ᠪᠠᠢᠴᠠᠭᠠᠬᠤ ᠭᠡᠰᠡᠨ ᠪᠣᠯᠪᠠᠴᠤ ᠪᠤᠷᠤᠭᠤ ᠬᠠᠷᠠᠵᠤ ᠭᠦᠷᠢᠯᠡᠭᠡᠳ ᠪᠠᠢᠯᠠ᠃ᠲᠡᠷᠡ ᠠᠯᠠᠭᠠᠳᠠᠬᠤ ᠳ᠋ᠤ᠌ ᠦᠰᠦᠷᠴᠦ ᠤᠨᠠᠴᠢᠬᠠᠭᠠᠳ ᠪᠣᠰᠤᠨᠠ᠃ ᠬᠥᠪᠡᠭᠦᠨ ᠭᠠᠩᠬᠤᠵᠤ ᠪᠠᠢᠭᠠᠳ ᠲᠣᠭᠲᠠᠨᠠ᠃
— ᠡᠨᠡ ᠴᠢᠳᠬᠥᠷ ᠢ᠋ ᠶᠠᠭᠠᠬᠢᠯᠲᠠᠢ ᠪᠣᠢ?
— ᠪᠠᠷᠠᠭᠤᠨ ᠭᠠᠷ ᠢ᠋ ᠨᠢ ᠳᠠᠰᠤᠯ!
— ᠬᠠᠮᠢᠭᠠᠭᠤᠷ ᠲᠠᠰᠤᠯᠬᠤ ᠪᠣᠢ?
— ᠳᠤᠮᠳᠠ ᠴᠢᠮᠥᠭᠡ ᠪᠡᠷ ᠨᠢ ᠴᠠᠪᠴᠢ᠃
— ᠦᠬᠦᠴᠢᠬᠡᠬᠦ ᠦᠭᠡᠢ ᠪᠠᠢᠭᠠ?
— ᠦᠬᠦᠬᠦ ᠦᠭᠡᠢ ᠠ᠋ ᠂ ᠨᠠᠭᠠᠳᠤᠬᠢ ᠴᠢᠨᠢ ᠰᠢᠷᠣᠢ ᠳᠦᠷᠭᠢᠭᠡᠳ ᠡᠳᠡᠭᠡᠨᠡ ᠪᠢᠵᠡ᠃ ᠬᠥᠮᠦᠨ ᠦ᠌ ᠨᠤᠲᠤᠭ ᠲᠤ᠌ ᠥᠩᠭᠡᠯᠵᠡᠵᠦ ᠶᠠᠪᠤᠳᠠᠭ ᠰᠢᠭᠠᠷᠤ ᠨᠤᠭᠤᠳ ᠲᠤ᠌ ᠰᠤᠷᠭᠠᠮᠵᠢ ᠪᠣᠯᠤᠭ᠃ ᠬᠥᠮᠦᠨ ᠦ᠌ ᠭᠠᠵᠠᠷ ᠤ᠋ᠨ ᠬᠦᠢᠲᠡᠨ ᠢ᠋ ᠮᠡᠳᠡᠭᠦᠯᠦᠶᠡ᠃ ᠴᠠᠪᠴᠢᠬᠠᠭᠠᠳ ᠯᠠ ᠶᠠᠪᠤᠭᠤᠯᠴᠢᠬᠠ᠃ ᠦᠬᠦᠪᠡᠯ ᠦᠬᠦᠭ᠃ ᠠᠮᠢᠳᠤ ᠦᠯᠡᠳᠡᠪᠡᠯ ᠡᠷᠭᠢᠵᠦ ᠨᠣᠴᠣᠨᠠ ᠪᠢᠵᠡ᠃
ᠶᠠᠩᠭᠢᠷ ᠰᠤᠯᠲᠠᠨ ᠤ᠋ ᠬᠥᠪᠡᠭᠦᠨ ᠬᠡᠳᠦᠢᠪᠡᠷ ᠨᠠᠰᠤ ᠪᠠᠭᠠ ᠠᠪᠠᠴᠤ ᠭᠠᠭᠴᠠ ᠰᠤᠮᠤ ᠮᠡᠷᠭᠡᠨ ᠤᠨᠤᠭᠰᠠᠨ ᠨᠢ ᠬᠠᠷᠠ ᠨᠢᠯᠬᠠ ᠠ᠋ᠴᠠ ᠪᠠᠨ ᠰᠤᠷᠭᠠᠭᠤᠯᠢ ᠰᠠᠢᠨ ᠬᠢᠭᠰᠡᠨ ᠦ᠌ ᠬᠢ᠃
ᠬᠥᠪᠡᠭᠦᠨ ᠦ᠌ ᠭᠠᠷ ᠢ᠋ ᠲᠡᠮᠡᠭᠡᠨ ᠦ᠌ ᠬᠣᠮ ᠮᠣᠳᠣᠨ ᠤ᠋ ᠳᠡᠭᠡᠷᠡ ᠪᠠᠭᠯᠠᠵᠤ ᠪᠣᠭᠣᠯᠠ᠃ ᠢᠷᠪᠢᠰ ᠦ᠋ᠨ ᠴᠢᠰᠤ ᠪᠥᠭᠡᠷᠡᠩᠬᠡᠢ ᠳᠤᠰᠤᠯ ᠢ᠋ᠶ᠋ᠠᠷ ᠬᠥᠭᠡᠭᠡᠴᠡᠯᠳᠦᠨ ᠤᠨᠠᠵᠤ ᠪᠠᠢᠭᠰᠠᠨ ᠭᠠᠭᠴᠠ ᠰᠡᠯᠡᠮᠡ ᠪᠡᠷ ᠬᠦᠦ ᠶ᠋ᠢᠨ ᠭᠠᠷ ᠢ᠋ ᠴᠠᠪᠴᠢᠵᠤ ᠣᠷᠬᠢᠯᠠ᠃
ᠬᠥᠪᠡᠭᠦᠨ ᠦ᠌ ᠭᠠᠷ ᠰᠢᠷᠣᠢ ᠳᠡᠭᠡᠷᠡ ᠤᠨᠠᠪᠠ᠃ ᠬᠤᠷᠤᠭᠤ ᠨᠢ ᠠᠷᠪᠠᠯᠵᠠᠨ ᠬᠥᠳᠡᠯᠦᠨᠡ᠃ ᠠᠭᠠᠵᠢᠮ ᠢ᠋ᠶ᠋ᠠᠷ ᠬᠢᠮᠤᠰᠤ ᠨᠢ ᠬᠥᠬᠡ ᠪᠣᠯᠵᠤ᠂ ᠬᠡᠷᠴᠢᠭᠳᠡᠭᠰᠡᠨ ᠬᠡᠰᠡᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠶᠠᠭᠠᠷᠠᠵᠤ ᠪᠠᠢᠭᠠᠳ ᠬᠥᠳᠡᠯᠬᠦ ᠪᠡᠨ ᠪᠣᠯᠢᠬᠤ ᠳ᠋ᠤ᠌ ᠰᠡᠯᠡᠮᠡ ᠶ᠋ᠢᠨ ᠢᠷ ᠲᠦ᠍ ᠭᠠᠭᠴᠠ ᠳᠤᠰᠤᠯ ᠴᠢᠰᠤ ᠪᠥᠩᠵᠢᠭᠢᠨᠡᠨ ᠪᠠᠢᠯᠠ᠃ ᠬᠥᠪᠡᠭᠦᠨ ᠦ᠌ ᠪᠠᠷᠠ ᠬᠠᠷᠭᠠᠨᠠ ᠶ᠋ᠢᠨ ᠳᠤᠮᠳᠠᠭᠤᠷ ᠳᠠᠯᠳᠠ ᠣᠷᠣᠪᠠ᠃ᠶᠠᠩᠭᠢᠷ ᠰᠤᠯᠲᠠᠨ ᠤ᠋ ᠬᠥᠪᠡᠭᠦᠨ ᠮᠠᠭᠤᠵᠢᠷᠠᠵᠤ ᠤᠨᠠᠯ ᠦᠭᠡᠢ ᠶᠠᠪᠤᠴᠢᠬᠠᠭᠰᠠᠨ ᠳ᠋ᠤ᠌ ᠣᠢᠷᠠᠳ ᠴᠡᠷᠢᠭ ᠦ᠋ᠳ ᠪᠡᠶᠡ ᠪᠡᠶᠡ ᠪᠡᠨ ᠬᠠᠷᠠᠵᠠᠭᠠᠯᠠ᠃
ᠳᠥᠷᠪᠡ
ᠳᠠᠯᠠᠢ ᠯᠠᠮᠠ᠂ ᠪᠠᠨᠴᠢᠡᠡᠷᠳᠡᠨᠢ ᠲᠡᠷᠢᠭᠦᠲᠡᠨ ᠮᠢᠨᠳᠤᠬᠲᠡᠨ ᠨᠤᠭᠤᠳ ᠭᠠᠯᠳᠠᠨ ᠢ᠋ ᠠᠳᠢᠰᠯᠠᠪᠠ᠃ ᠭᠠᠯᠳᠠᠨ ᠰᠥᠬᠥᠷᠡᠵᠦ ᠠᠳᠢᠰ ᠬᠦᠷᠲᠡᠪᠡ᠃ᠳᠤᠭᠠᠩᠴᠢ ᠯᠠᠮᠠ ᠱᠠᠪᠢᠯᠠᠨ ᠰᠠᠭᠤᠬᠤ ᠣᠳᠣ ᠶ᠋ᠢᠨ ᠦᠷᠭᠦᠭᠡᠨᠡ ᠭᠠᠯᠳᠠᠨ ᠢ᠋ ᠲᠥᠪᠬᠢᠨᠡᠭᠦᠯᠪᠡ᠃ ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠨᠠᠮᠬᠠᠢᠵᠠᠮᠰᠤ 《ᠭᠠᠯᠳᠠᠨ ᠳᠥᠷᠪᠡᠨ ᠨᠢᠳᠦ ᠲᠡᠢ᠂᠂᠂᠂》 ᠭᠡᠵᠦ ᠪᠤᠷᠬᠠᠨ ᠱᠠᠰᠢᠨ ᠤ᠋ ᠬᠣᠶᠠᠷ ᠮᠢᠨᠳᠤᠬᠲᠡᠨ ᠳ᠋ᠦ᠍ ᠠᠢᠯᠠᠳᠤᠭᠰᠠᠨ ᠶᠤᠮᠰᠠᠨᠵᠠᠢ᠃
ᠲᠠᠪᠤᠳᠤᠭᠠᠷ ᠳᠠᠯᠠᠢ ᠯᠠᠮᠠ ᠯᠤᠪᠰᠠᠩᠵᠠᠮᠰᠤ《ᠪᠠᠷᠠᠭᠤᠨ ᠵᠡᠭᠦᠨ ᠨᠢᠳᠦᠨ ᠦ᠌ ᠪᠡᠨ ᠳᠡᠭᠡᠳᠦ ᠵᠣᠪᠬᠢ ᠳᠡᠭᠡᠷᠡ ᠮᠡᠩᠭᠡ ᠲᠡᠢ ᠶ᠋ᠢ ᠪᠢ ᠴᠦ᠍ ᠪᠠᠰᠠ ᠠᠩᠵᠠᠭᠠᠷᠠᠪᠠ᠃ ᠤᠷᠢᠳᠤ ᠲᠥᠷᠥᠯ ᠨᠢ ᠬᠡᠨ ᠶᠦᠮ ᠪᠣᠯ ᠂᠂᠂᠂》 ᠭᠡᠵᠦ ᠠᠰᠠᠭᠤᠪᠠ᠃
ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠨᠠᠮᠬᠠᠢᠵᠠᠮᠰᠤ《ᠴᠢᠩᠭᠢᠰ ᠬᠠᠭᠠᠨ ᠤ᠋ ᠳᠡᠭᠡᠳᠦ ᠢᠵᠠᠭᠤᠷ ᠤ᠋ᠨ ᠳᠤᠸᠠ ᠰᠣᠬᠣᠷ ᠴᠣᠬᠣᠨ ᠳᠡᠭᠡᠷᠡ ᠪᠡᠨ ᠮᠡᠩᠭᠡ ᠲᠡᠢ ᠪᠠᠢᠵᠠᠢ᠃ᠲᠡᠷᠡ ᠨᠢ ᠪᠢᠯᠢᠭ ᠦ᠋ᠨ ᠨᠢᠳᠦ ᠪᠠᠢᠵᠠᠢ᠃ ᠤᠳᠤᠮᠰᠢᠯ᠂᠂᠂᠂》ᠭᠡᠪᠡ᠃
ᠪᠠᠨᠴᠢᠠᠡᠷᠳᠡᠨᠢ ᠪᠡᠷ《ᠭᠠᠯᠳᠠᠨ ᠤ᠋ ᠡᠨᠡ ᠪᠣᠰᠤᠭᠠ ᠵᠣᠪᠬᠢ ᠪᠣᠯ ᠲᠥᠷᠥ ᠲᠠᠯᠠ ᠳ᠋ᠠᠭᠠᠨ ᠢᠯᠡᠭᠦᠦ ᠪᠤᠰᠤ ᠤᠤ? ᠣᠢ ᠤᠬᠠᠭᠠᠨ ᠰᠡᠷᠭᠦᠯᠡᠩ ᠦ᠋ᠨ ᠭᠣᠢᠳᠠ ᠰᠢᠨᠵᠢ》ᠭᠡᠯᠡ᠃
—ᠬᠥᠪᠡᠭᠦᠨ ᠢ᠋ ᠪᠢᠰᠢᠯᠭᠠᠯ ᠳ᠋ᠤ᠌ ᠭᠦᠨᠵᠡᠭᠡᠢᠷᠡᠭᠦᠯᠵᠦ ᠣᠢᠷᠠᠳ᠂ ᠲᠥᠪᠡᠳ ᠦ᠋ᠨ ᠬᠣᠭᠣᠷᠣᠨᠳᠣ ᠭᠦᠦᠷ ᠪᠣᠯᠭᠠᠬᠤ ᠠᠪᠠᠰᠤ ᠱᠠᠰᠢᠨ ᠤ᠋ ᠳᠠᠬᠢᠨ ᠳᠡᠯᠭᠡᠷᠡᠯᠲᠡ ᠳ᠋ᠦ᠍ ᠲᠤᠩ ᠶᠡᠬᠡ ᠲᠤᠰᠠᠲᠠᠢ ᠭᠡᠮᠡᠨ ᠳᠠᠯᠠᠢ ᠯᠠᠮᠠ ᠠᠢᠯᠠᠳᠪᠠ᠃
— ᠵᠡᠭᠦᠨᠭᠠᠷ ᠲᠦ᠍ ᠰᠦᠮᠡ ᠬᠡᠢᠳ ᠬᠡᠳᠦ ᠬᠡᠳᠦ ᠶ᠋ᠢ ᠪᠣᠰᠬᠠᠯᠠ᠃ ᠰᠦᠰᠦᠭᠲᠡᠨ ᠨᠦᠭᠦᠳ ᠣᠯᠠᠨ ᠪᠠᠢᠨᠠ᠃ ᠭᠠᠯᠳᠠᠨ ᠯᠤᠭᠠ ᠬᠤᠪᠢᠯᠭᠠᠨ ᠯᠠᠮᠠ ᠲᠥᠷᠥᠭᠦᠯᠬᠦ ᠬᠡᠷᠡᠭᠲᠡᠢ᠃ ᠣᠢᠷᠠᠳ ᠤ᠋ᠨ ᠳᠡᠭᠡᠳᠦ ᠢᠵᠠᠭᠤᠷ ᠲᠠᠢ ᠵᠠᠭᠤᠨ ᠨᠠᠢ᠍ᠮᠠᠨ ᠬᠥᠪᠡᠭᠦᠨ ᠢ᠋ ᠠᠪᠴᠢᠷᠠᠪᠠ ᠭᠡᠵᠦ ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠥᠴᠢᠯᠡ᠃
— ᠲᠥᠪᠡᠳ ᠤᠷᠤᠭᠤ ᠳᠥᠷᠪᠡᠨ ᠣᠢᠷᠠᠳ ᠤ᠋ᠨ ᠬᠣᠱᠤᠳ ᠣᠪᠣᠭ ᠤ᠋ᠨ ᠬᠢᠨ ᠨᠡᠭᠦᠵᠦ ᠢᠷᠡᠭᠡᠳ ᠨᠤᠲᠤᠭᠯᠠᠵᠤ ᠪᠠᠢᠨᠠ᠃ ᠴᠠᠭᠠᠰᠢᠳᠠ ᠪᠠᠨ ᠪᠤᠷᠬᠠᠨ ᠤ᠋ ᠡᠯᠴᠢ ᠬᠤᠪᠢᠯᠭᠠᠳ ᠢ᠋ ᠣᠢᠷᠠᠳ᠂ ᠮᠣᠩᠭᠣᠯ ᠳᠠᠶᠠᠭᠠᠷ ᠲᠠᠷᠬᠠᠭᠠᠬᠤ ᠠᠪᠠᠰᠤ ᠰᠡᠳᠬᠢᠯ ᠰᠠᠨᠠᠭᠠ ᠨᠢ ᠲᠥᠪᠡᠳ ᠤᠷᠤᠭᠤ ᠨᠡᠭᠦᠵᠦ ᠢᠷᠡᠨᠡ ᠭᠡᠰᠡᠨ ᠦᠭᠡ᠃ ᠮᠠᠨ ᠤ᠋ ᠲᠥᠪᠡᠳ ᠦ᠋ᠨ ᠪᠣᠳᠣᠯᠭᠠ ᠰᠦᠰᠦᠭᠲᠡᠨ ᠦ᠌ ᠰᠡᠳᠬᠢᠯ ᠰᠠᠨᠠᠭᠠ ᠶ᠋ᠢ ᠲᠠᠲᠠᠬᠤ ᠪᠣᠳᠣᠯᠭᠠ ᠰᠢᠦ᠃ ᠡᠨᠡ ᠪᠣᠳᠣᠯᠭᠠ ᠶ᠋ᠢ ᠭᠡᠭᠡᠨ ᠲᠠ ᠲᠤᠩᠭᠠᠬᠤ ᠪᠣᠢ ᠊ᠢᠠ ᠭᠡᠵᠦ ᠳᠠᠯᠠᠢ ᠯᠠᠮᠠ ᠲᠣᠳᠣ ᠬᠡᠯᠡᠪᠡ᠃
— ᠪᠢ ᠪᠤᠷᠬᠠᠨ ᠤ᠋ ᠬᠤᠸᠠᠷᠠᠭ ᠤ᠋ᠳ ᠢ᠋ ᠲᠥᠯᠥᠭᠡᠯᠡᠵᠦ ᠣᠯᠠᠨ ᠠᠮᠢᠲᠠᠨ ᠤ᠋ ᠯᠠᠢ ᠯᠠᠨᠴᠢᠭ ᠠ᠋ᠴᠠ ᠭᠠᠷᠬᠤ ᠳ᠋ᠤᠨᠢ ᠲᠤᠰᠠᠯᠠᠵᠤ ᠶᠠᠪᠤᠭᠠ ᠪᠢᠯᠡ᠃ ᠨᠠᠳᠠ ᠳᠠᠪᠬᠤᠷ ᠰᠠᠨᠠᠭᠠ ᠦᠭᠡᠢ᠃ ᠲᠠᠨ ᠤ᠋ ᠵᠢᠭᠠᠪᠤᠷᠢ ᠶ᠋ᠢ ᠶᠣᠰᠣᠴᠢᠯᠠᠨ ᠪᠡᠶᠡᠯᠡᠭᠦᠯᠦᠭᠰᠡᠭᠡᠷ ᠡᠳᠦᠢ ᠬᠦᠷᠪᠡ᠃ ᠵᠡᠭᠦᠨᠭᠠᠷ ᠣᠳᠣ ᠮᠢᠨᠦ ᠵᠣᠬᠢᠶᠠᠭᠰᠠᠨ ᠲᠣᠳᠣ ᠪᠢᠴᠢᠭ ᠢ᠋ᠶ᠋ᠡᠷ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠢ᠋ ᠶᠠᠪᠤᠭᠤᠯᠬᠤ ᠪᠣᠯᠪᠠ ᠭᠡᠵᠦ ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠮᠠᠰᠢ ᠣᠨᠣᠴᠠᠲᠠᠢ ᠥᠭᠦᠯᠡᠪᠡ᠃
ᠪᠤᠷᠬᠠᠨ ᠱᠠᠰᠢᠨ ᠤ᠋ ᠭᠤᠷᠪᠠᠨ ᠮᠢᠨᠳᠤᠭᠲᠠᠨ ᠳᠣᠣᠷᠠ ᠳᠣᠣᠷᠠ ᠪᠠᠨ ᠨᠢᠭᠡ ᠶ᠋ᠢ ᠪᠢᠰᠢᠯᠭᠠᠨ᠂ ᠮᠠᠨᠢ ᠮᠡᠭᠵᠡᠮ ᠤᠩᠰᠢᠵᠤ᠂ ᠡᠷᠳᠡᠨᠢᠰ ᠢ᠋ᠶ᠋ᠡᠷ ᠪᠦᠲᠦᠭᠡᠭᠰᠡᠨ ᠡᠷᠢᠭᠡ ᠪᠡᠨ ᠡᠷᠭᠢᠭᠦᠯᠦᠨᠡ᠃
ᠡᠷᠢᠭᠡ ᠱᠠᠵᠢᠭᠢᠨᠠᠨ ᠡᠷᠭᠢᠬᠦ ᠨᠢ ᠡᠭᠡᠯ ᠦᠭᠡᠢ ᠶᠡᠬᠡ ᠶ᠋ᠢ ᠪᠢᠰᠢᠯᠭᠠᠨ᠂ ᠪᠣᠳᠣᠯ ᠰᠡᠳᠬᠢᠯ ᠲᠡᠢ ᠪᠡᠨ ᠮᠠᠷᠭᠤᠨ ᠲᠡᠮᠡᠴᠡᠯᠳᠦᠬᠦ ᠶᠡᠬᠡᠰ ᠯᠠᠮᠠ ᠨᠠᠷ ᠤ᠋ᠨ ᠠᠮᠢᠳᠤᠷᠠᠯ ᠤ᠋ᠨ ᠬᠡᠯᠬᠢᠶᠡᠰᠦ ᠶ᠋ᠢ ᠦᠷᠭᠦᠯᠵᠢᠯᠡᠭᠦᠯᠬᠦ ᠠᠵᠤᠭᠤ᠃ ᠳᠠᠯᠠᠢ ᠯᠠᠮᠠ ᠯᠤᠪᠰᠠᠩᠵᠠᠮᠰᠤ《ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶ᠋ᠢᠨ ᠬᠠᠷᠠᠬᠤ ᠵᠦᠭ ᠨᠢ ᠲᠥᠪᠡᠳ ᠪᠠᠢᠬᠤ ᠶᠣᠰᠣᠲᠠᠢ᠃ ᠲᠡᠷᠡ ᠬᠠᠭᠠᠨ ᠲᠥᠪᠡᠳ ᠦ᠋ᠨ ᠵᠦᠭ ᠬᠠᠷᠠᠵᠤ ᠪᠠᠢᠪᠠᠯ ᠪᠢᠳᠡᠨ ᠦ᠌ ᠦᠭᠡ ᠪᠡᠷ ᠶᠠᠪᠤᠨᠠ ᠭᠡᠰᠡᠨ ᠦᠭᠡ᠃ᠬᠥᠪᠡᠭᠦᠨ ᠦ᠌ ᠰᠡᠳᠬᠢᠯ ᠢ᠋ ᠶᠠᠭᠠᠬᠢᠵᠤ ᠲᠣᠭᠲᠠᠭᠠᠬᠤ ᠪᠠᠨ ᠮᠡᠳᠡᠨᠡ》 ᠭᠡᠮᠡᠨ ᠪᠢᠰᠢᠯᠭᠠᠨᠠ᠃ ᠬᠠᠷᠢᠨ ᠲᠡᠭᠦᠨ ᠲᠡᠢ ᠬᠠᠶᠠ ᠬᠠᠷᠠᠴᠠ ᠮᠥᠷᠭᠥᠬᠦ ᠪᠠᠨ᠋ᠴᠢᠨ᠋ᠡᠷᠳᠡᠨᠢ ᠥᠭᠡᠷᠡ ᠪᠣᠳᠣᠯ ᠲᠠᠢ ᠪᠠᠢᠯᠠ᠃ ᠡᠨᠡ ᠭᠠᠯᠳᠠᠨ ᠶᠡᠷᠦ ᠨᠢ ᠪᠣᠰᠤᠭᠠ ᠣᠷᠣᠯᠠᠩ ᠰᠢᠭ᠋ ᠦᠯᠦ ᠪᠠᠷᠢᠭᠳᠠᠬᠤ ᠰᠡᠳᠬᠢᠯ ᠲᠡᠢ ᠶᠦᠮ ᠃ᠭᠠᠯᠳᠠᠨ ᠨᠣᠮ ᠤ᠋ᠨ ᠴᠠᠭᠠᠨᠠ ᠭᠠᠷᠤᠨᠠ᠃ᠲᠡᠢᠮᠦ ᠲᠣᠰᠤᠮ ᠢ᠋ᠶ᠋ᠠᠨ ᠪᠢᠳᠡᠨ ᠳ᠋ᠦ᠍ ᠲᠤᠰᠠ ᠪᠣᠯᠬᠤ ᠠ᠋ᠴᠠ ᠪᠠᠨ ᠢᠯᠡᠭᠦᠦ ᠳᠠᠷᠤᠮᠲᠠ ᠡᠭᠦᠰᠬᠡᠨᠡ᠃ᠡᠢᠮᠦ ᠯᠠᠢ ᠠ᠋ᠴᠠ ᠬᠣᠯᠠᠳᠠᠬᠤ ᠶ᠋ᠢᠨ ᠲᠤᠯᠠᠳᠠ ᠭᠠᠯᠳᠠᠨ ᠢ᠋ ᠪᠢ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠳᠡᠷᠭᠡᠳᠡ ᠰᠠᠭᠤᠯᠭᠠᠨᠠ᠃ ᠣᠢᠷᠠᠬᠠᠨ ᠪᠠᠢᠬᠤ ᠲᠣᠰᠤᠮ ᠭᠠᠯᠳᠠᠨ ᠨᠠᠳᠠ ᠬᠠᠯᠠ ᠪᠡᠯᠡ ᠪᠠᠭᠠ ᠲᠠᠢ ᠰᠢᠦ ᠳᠡ᠃ ᠪᠡᠡᠴᠢᠨ ᠪᠣᠭᠳᠠ ᠭᠠᠯᠳᠠᠨ ᠤ᠋ ᠬᠦᠴᠦ ᠶ᠋ᠢ ᠮᠡᠳᠡᠷᠡᠬᠦ ᠰᠢᠭ ᠪᠣᠯᠵᠠᠢ᠃ᠭᠠᠯᠳᠠᠨ ᠮᠠᠰᠢ ᠬᠦᠴᠦᠲᠡᠢ ᠭᠡᠳᠡᠭ ᠨᠢ ᠲᠡᠷᠡᠬᠡᠨ ᠪᠣᠭᠣᠨᠢ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠮᠡᠳᠡᠷᠡᠭᠳᠡᠭᠰᠡᠨ ᠪᠠᠢᠵᠠᠢ᠃ ᠨᠥᠭᠦᠭᠡ ᠲᠠᠯᠠ ᠪᠠᠷ ᠬᠠᠭᠠᠨ ᠤ᠋ ᠬᠥᠪᠡᠭᠦᠨ ᠦ᠌ ᠲᠥᠯᠥᠭᠡ ᠵᠡᠭᠦᠨᠭᠠᠷ ᠤ᠋ᠨ ᠶᠡᠬᠡ ᠴᠡᠷᠢᠭ ᠬᠥᠳᠡᠯᠵᠦ ᠮᠡᠳᠡᠬᠦ ᠳᠠᠯᠳᠠ ᠬᠣᠯᠠ ᠶ᠋ᠢᠨ ᠵᠠᠨᠤᠯ ᠨᠢᠭᠤᠷᠯᠠᠭᠤᠰᠢᠲᠠᠢ ᠭᠡᠳᠡᠭ ᠢ᠋ ᠪᠡᠡᠴᠢᠨ ᠪᠣᠭᠳᠠ ᠬᠠᠰᠢᠷ ᠤᠬᠠᠭᠠᠨ ᠳ᠋ᠠᠭᠠᠨ ᠲᠤᠩᠭᠠᠭᠰᠠᠨ ᠪᠢᠯᠡ᠃
ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠤ᠋ ᠬᠥᠪᠡᠭᠦᠨ ᠢ᠋ ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨᠲᠡᠨ ᠠᠪᠴᠢᠷᠠᠬᠤ ᠪᠣᠯᠤᠭᠰᠠᠨ ᠰᠢᠯᠲᠠᠭᠠᠨ ᠨᠢ ᠤᠭ ᠠ᠋ᠴᠠ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠳᠠᠭᠠᠭᠠᠯᠭᠠᠪᠤᠷᠢ ᠶᠤᠮ᠃
ᠳᠠᠯᠠᠢ ᠯᠠᠮᠠ ᠵᠡᠭᠦᠨᠭᠠᠷ ᠢ᠋ ᠬᠦᠴᠦᠷᠬᠡᠭᠵᠢᠬᠦ ᠡᠴᠡ ᠡᠮᠦᠨᠡ ᠥᠪᠡᠷ ᠦ᠋ᠨ ᠬᠠᠷᠠᠭᠠ ᠬᠢᠨᠠᠯᠲᠠ ᠳ᠋ᠤ᠌ ᠪᠠᠢᠯᠭᠠᠬᠤ ᠬᠦᠰᠡᠯ ᠲᠡᠢ ᠪᠢᠯᠡ᠃ ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨᠲᠠᠨ ᠮᠣᠷᠢᠯᠠᠨ ᠰᠠᠭᠠᠲᠠᠬᠤ ᠳ᠋ᠤ᠌ ᠳᠠᠯᠠᠢ ᠯᠠᠮᠠ ᠥᠭᠦᠯᠡᠷᠦᠨ᠄
— ᠵᠡᠭᠦᠨᠭᠠᠷ ᠤ᠋ᠨ ᠨᠡᠭᠦᠳᠡᠯᠴᠢᠳ ᠤᠮᠠᠷᠠᠲᠤ ᠣᠷᠣᠰ᠂ ᠵᠡᠭᠦᠨ ᠯᠠᠯᠤ ᠶ᠋ᠢᠨ ᠤᠯᠤᠰ ᠪᠠᠷᠠᠭᠤᠨ ᠲᠠᠢᠰᠢ ᠪᠠᠨ ᠬᠠᠯᠬᠠ᠂ ᠣᠷᠣᠭᠰᠢ ᠪᠠᠨ ᠲᠥᠪᠡᠳ ᠲᠡᠢ ᠬᠢᠯᠢ ᠵᠠᠯᠭᠠᠭᠠ ᠣᠷᠣᠰᠢᠨᠠ᠃ ᠮᠠᠨᠵᠤ ᠨᠤᠭᠤᠳ ᠴᠠᠬᠠᠷ ᠲᠡᠷᠢᠭᠦᠲᠡᠨ ᠳᠥᠴᠢᠨ ᠶᠢᠰᠦᠨ ᠬᠣᠰᠢᠭᠤ ᠶ᠋ᠢ ᠳᠠᠭᠠᠷᠠ ᠣᠷᠣᠭᠤᠯᠤᠭᠰᠠᠨ ᠲᠤᠯᠠ ᠬᠥᠬᠡᠨᠠᠭᠤᠷ ᠤ᠋ᠨ ᠲᠠᠯᠠ ᠨᠤᠲᠤᠭ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶ᠋ᠢᠨ ᠮᠠᠲᠠᠯ ᠳ᠋ᠤ᠌ ᠪᠠᠢᠨᠠ᠃ ᠶᠠᠪᠤᠭᠠᠨ ᠳ᠋ᠠᠭᠠᠨ ᠬᠣᠰᠢᠭᠤ ᠨᠤᠲᠤᠭ ᠢ᠋ᠶ᠋ᠠᠨ ᠠᠯᠳᠠᠬᠤ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠴᠡᠷᠢᠭ᠂ ᠵᠡᠪᠰᠡᠭ ᠦ᠋ᠨ ᠬᠦᠴᠦ ᠶ᠋ᠢ ᠬᠥᠬᠡᠨᠠᠭᠤᠷ ᠲᠤ᠌ ᠲᠥᠪᠯᠡᠷᠡᠭᠦᠯᠬᠦ ᠪᠢᠵᠡ᠃ ᠬᠠᠮᠤᠭ ᠤ᠋ᠨ ᠭᠣᠣᠯ ᠨᠢ ᠵᠡᠭᠦᠨᠭᠠᠷ ᠤ᠋ᠨ ᠬᠢᠨ ᠲᠣᠷᠭᠠᠨ ᠤ᠋ ᠵᠠᠮ ᠢ᠋ ᠬᠠᠭᠠᠵᠤ ᠪᠣᠭᠣᠬᠤ ᠡᠷᠬᠡ ᠲᠡᠢ᠃ ᠲᠣᠷᠭᠠᠨ ᠤ᠋ ᠵᠠᠮ ᠢ᠋ᠶ᠋ᠠᠷ ᠬᠤᠳᠠᠯᠳᠤᠭᠠᠴᠢᠳ ᠮᠥᠷᠭᠥᠯᠴᠢᠳ ᠶᠠᠪᠤᠳᠠᠭ᠃ ᠮᠥᠷᠭᠥᠯᠴᠢᠳ ᠦ᠋ᠨ ᠪᠣᠯᠤᠨ ᠬᠤᠳᠠᠯᠳᠤᠭᠠᠴᠢᠨ ᠤ᠋ ᠵᠠᠮ ᠢ᠋ ᠬᠠᠭᠠᠯᠭᠠᠵᠤ ᠦᠯᠦ ᠪᠣᠯᠤᠨᠠ᠃ ᠡᠨᠡ ᠵᠠᠮ ᠲᠥᠪᠡᠳ ᠤᠷᠤᠭᠤ ᠢᠷᠡᠳᠡᠭ ᠡᠳ᠋ ᠠᠭᠤᠷᠠᠰᠤ᠂ ᠮᠠᠯ ᠲᠠᠸᠠᠷ ᠤ᠋ᠨ ᠴᠢᠳᠬᠤᠯᠠᠩ ᠶᠤᠮ ᠰᠢᠦ᠃ ᠭᠡᠭᠡᠨᠲᠡᠨ ᠲᠠ ᠲᠡᠭᠡᠬᠦ ᠪᠡᠷ ᠲᠥᠪᠡᠳ ᠦ᠋ᠨ ᠴᠢᠳᠬᠤᠯᠠᠩ ᠊ᠢ ᠠᠷᠪᠢᠨ ᠪᠠᠢᠯᠭᠠᠬᠤ ᠬᠡᠷᠡᠭᠲᠡᠢ᠃ ᠲᠡᠢᠮᠦ ᠶ᠋ᠢᠨ ᠲᠤᠯᠠᠳᠠ ᠵᠡᠭᠦᠨᠭᠠᠷ ᠬᠡᠮᠡᠬᠦ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠢᠷᠭᠡᠳ ᠦ᠋ᠨ ᠶᠠᠳᠠᠵᠤ ᠭᠤᠴᠢᠨ ᠬᠤᠪᠢ ᠶ᠋ᠢ ᠪᠤᠷᠬᠠᠨ ᠤ᠋ ᠦᠨᠡᠨᠴᠢ ᠱᠠᠪᠢ ᠪᠣᠯᠭᠠᠵᠤ ᠬᠡᠢᠳ ᠲᠦ᠍ ᠲᠥᠪᠯᠡᠷᠡᠭᠦᠯᠦᠨ ᠰᠠᠭᠤᠯᠭᠠ᠃ᠵᠡᠪᠰᠡᠭ ᠠᠳᠬᠤᠳᠠᠭ ᠭᠠᠷ ᠴᠥᠭᠡᠷᠡᠨᠡ᠃ ᠵᠡᠭᠦᠨᠭᠠᠷ ᠤ᠋ᠨ ᠶᠡᠬᠡᠰ ᠳᠡᠭᠡᠳᠦᠰ ᠦ᠋ᠨ ᠦᠷᠡ ᠬᠡᠦᠬᠡᠳ ᠊ᠢ ᠯᠠᠮᠠ ᠬᠤᠸᠠᠷᠠᠭ ᠪᠣᠯᠭᠠᠵᠤ ᠵᠠᠮ ᠮᠥᠷ ᠊ᠢ ᠨᠢ ᠲᠡᠭᠰᠢᠯᠡᠵᠦ ᠥᠭᠬᠦ ᠶ᠋ᠢᠨ ᠲᠤᠯᠠᠳᠠ ᠬᠣᠩ ᠲᠠᠢᠵᠢ ᠶ᠋ᠢᠨ ᠬᠥᠪᠡᠭᠦᠳ ᠲᠦ᠍ ᠠᠩᠬᠠᠷᠤᠯ ᠲᠠᠢ ᠪᠠᠢ ᠭᠡᠮᠡᠨ ᠵᠠᠬᠢᠵᠠᠢ᠃
ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶ᠋ᠢᠨ ᠬᠥᠪᠡᠭᠦᠨ ᠰᠡᠩᠭᠡ᠂ ᠭᠠᠯᠳᠠᠨ ᠨᠠᠷ ᠊ᠢ ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠪᠣᠯᠭᠣᠭᠠᠨ ᠰᠣᠨᠢᠷᠬᠠᠵᠤ᠂ ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠦ᠌ ᠬᠦᠪᠡᠭᠡᠨᠠ ᠣᠷᠣᠰᠢᠬᠤ ᠬᠣᠲᠠ ᠬᠦᠷᠢᠶᠡ ᠶ᠋ᠢᠨ ᠬᠢᠨᠢ ᠬᠠᠪᠢᠴᠠᠭᠠ ᠰᠦᠮᠡ ᠳᠤᠭᠠᠩ ᠪᠣᠰᠬᠠᠵᠠᠢ᠃ ᠡᠨᠡ ᠦᠶᠡ ᠳ᠋ᠦ᠍ ᠬᠣᠲᠠ ᠬᠦᠷᠢᠶᠡ ᠤᠯᠠᠮ ᠥᠷᠭᠡᠵᠢᠨ ᠳᠡᠯᠡᠪᠡ᠃ᠮᠥᠷᠭᠥᠯᠴᠢᠳ᠂ᠨᠡᠭᠦᠳᠡᠯᠴᠢᠳ ᠶᠡᠬᠡ ᠪᠠᠭᠠ ᠪᠠᠷ ᠴᠤᠪᠤᠷᠠᠨ ᠢᠷᠡᠵᠦ᠂ ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠦ᠌ ᠡᠪᠡᠰᠦ ᠶᠡᠬᠡᠲᠡᠢ ᠬᠥᠨᠳᠡᠢ ᠳ᠋ᠦ᠍ ᠪᠠᠭᠤᠳᠠᠯᠯᠠᠨ᠂ ᠰᠦᠮᠡ ᠳᠤᠭᠠᠩ ᠰᠦᠰᠦᠭᠲᠡᠨ ᠢ᠋ᠶ᠋ᠡᠷ ᠳᠦᠭᠦᠷᠪᠡ᠃ ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶᠡᠬᠡᠳᠡ ᠪᠡᠯᠭᠡᠰᠢᠶᠡᠵᠦ᠂
— ᠲᠠᠯᠠ᠂ ᠬᠥᠨᠳᠡᠢ ᠮᠠᠯ ᠢ᠋ᠶ᠋ᠠᠷ ᠳᠦᠭᠦᠷᠪᠡ᠃ ᠬᠣᠲᠠ ᠬᠦᠷᠢᠶᠡ ᠮᠢᠨᠢ ᠠᠶᠠᠯᠠᠴᠢᠨ᠂ ᠭᠡᠢᠴᠢᠨ ᠣᠯᠠᠨ ᠲᠠᠢ ᠪᠣᠯᠪᠠ᠃ ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠦ᠌ ᠰᠦᠮᠡ ᠶ᠋ᠢᠨ ᠬᠣᠩᠬᠣ ᠳᠠᠮᠠᠷᠤ ᠶ᠋ᠢᠨ ᠳᠠᠭᠤᠨ ᠢ᠋ᠶ᠋ᠠᠷ ᠬᠥᠯ ᠬᠥᠳᠡᠯᠭᠡᠭᠡᠨ ᠶᠡᠬᠡᠰᠴᠦ ᠰᠡᠳᠬᠢᠯ ᠪᠠᠶᠠᠰᠬᠠᠨᠠ᠃ᠰᠦᠮᠡ ᠶ᠋ᠢᠨ ᠵᠢᠰᠠ ᠳ᠋ᠤ᠌ ᠮᠢᠨᠦ ᠬᠥᠷᠥᠩᠭᠡ ᠡᠴᠡ ᠠᠳᠤᠭᠤ ᠮᠠᠯ ᠮᠢᠩᠭᠠ ᠶ᠋ᠢ ᠲᠠᠰᠤᠳᠠᠨ ᠥᠭᠴᠦ᠂ ᠬᠣᠨᠢᠴᠢᠨ ᠮᠠᠯᠴᠢᠨ ᠡᠷᠦᠬᠡ ᠲᠡᠢ ᠪᠣᠯᠭᠠᠵᠤ ᠲᠤᠰᠠᠯᠠ ᠭᠡᠮᠡᠨ ᠵᠠᠷᠯᠢᠭ ᠪᠣᠯᠵᠠᠢ᠃ ᠲᠡᠭᠦᠨ ᠦ᠌ ᠰᠠᠢᠬᠠᠨ ᠰᠡᠳᠬᠢᠯ ᠳ᠋ᠦ᠍ ᠲᠠᠯᠠᠷᠬᠠᠭᠰᠠᠨ ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨᠲᠡᠨ ᠰᠦᠰᠦᠭᠲᠡᠨ ᠲᠦᠮᠡᠨ ᠳ᠋ᠦ᠍ ᠬᠠᠨᠳᠤᠵᠤ᠂
— ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠢᠪᠡᠭᠡᠯᠡ᠃ᠲᠩᠷᠢ ᠤᠭᠰᠠᠭᠠᠲᠠᠨ ᠤ᠋ ᠬᠡᠰᠢᠭ ᠊ᠢ ᠬᠦᠷᠲᠡᠭᠰᠡᠨ ᠲᠤᠯᠠ ᠬᠣᠩ ᠲᠠᠢᠵᠢ ᠶ᠋ᠢᠨ ᠪᠤᠶᠠᠨ ᠠᠷᠪᠢᠵᠢᠨ ᠳᠡᠯᠭᠡᠷᠡᠬᠦ ᠪᠣᠯᠲᠤᠭᠠᠢ ᠭᠡᠮᠡᠨ ᠵᠠᠷ ᠲᠠᠷᠬᠠᠭᠠᠪᠠ᠃
ᠲᠡᠭᠡᠲᠡᠯᠡ ᠭᠠᠯᠳᠠᠨ ᠬᠥᠪᠡᠭᠦᠨ ᠨᠢ ᠴᠠᠭᠠᠨ ᠢᠷᠪᠢᠰ ᠲᠡᠢ ᠴᠣᠭ ᠠᠯᠲᠠᠢ ᠶ᠋ᠢᠨ ᠴᠠᠰᠤᠲᠤ ᠣᠷᠭᠢᠯ ᠳ᠋ᠤ᠌ ᠬᠦᠷᠦᠭᠡᠳ ᠢᠷᠡᠭᠰᠡᠨ ᠲᠤᠬᠠᠢ ᠲᠦᠮᠡ᠂ ᠪᠤᠮ ᠤ᠋ᠨ ᠬᠥᠮᠦᠰ ᠠᠮᠠ ᠪᠤᠯᠢᠶᠠᠯᠳᠤᠨ ᠶᠠᠷᠢᠵᠤ ᠵᠠᠯᠪᠠᠷᠢᠬᠤ ᠪᠣᠯᠤᠭᠰᠠᠨ ᠪᠠᠢᠨᠠ᠃
ᠣᠢᠷᠠᠳ ᠤ᠋ᠨ ᠬᠠᠭᠠᠨ ᠤ᠋ ᠬᠥᠪᠡᠭᠦᠨ ᠬᠥᠮᠦᠨ ᠪᠠᠢᠲᠤᠭᠠᠢ ᠰᠠᠯᠬᠢ ᠲᠣᠭᠲᠠᠳᠠᠭ ᠦᠭᠡᠢ ᠢᠷᠪᠢᠰ ᠦ᠋ᠨ ᠳᠡᠭᠡᠷᠡ ᠲᠠᠷᠴᠤᠭᠯᠠᠨ ᠣᠳᠤᠭᠰᠠᠨ ᠨᠢ ᠭᠠᠢᠬᠠᠭᠠᠳ ᠪᠠᠷᠠᠰᠢ ᠦᠭᠡᠢ ᠶᠠᠪᠤᠳᠠᠯ ᠪᠣᠯᠪᠠ᠃ ᠴᠠᠭᠠᠨ ᠢᠷᠪᠢᠰ ᠦ᠋ᠨ ᠳᠣᠮᠣᠭ ᠡᠬᠢᠯᠡᠭᠰᠡᠨ ᠰᠢᠭ ᠢ᠋ᠶ᠋ᠡᠨ ᠦᠷᠭᠦᠯᠵᠢᠯᠡᠵᠦ ᠪᠠᠢᠯᠠ᠃ᠴᠣᠬᠣᠮ ᠡᠨᠡ ᠳᠣᠮᠣᠭ ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠳ᠋ᠦ᠍ ᠣᠯᠵᠠ ᠪᠠᠢᠪᠠ᠃ᠠᠯᠳᠠᠵᠤ ᠪᠣᠯᠤᠮᠠ ᠦᠭᠡᠢ ᠰᠠᠢᠬᠠᠨ ᠲᠣᠬᠢᠶᠠᠯᠳᠤᠯ ᠭᠡᠭᠡᠨᠲᠡᠨ ᠳ᠋ᠦ᠍ ᠣᠯᠳᠠᠵᠠᠢ᠃ᠬᠥᠪᠡᠭᠦᠨ ᠊ᠢ ᠢᠷᠪᠢᠰ ᠲᠡᠢ ᠴᠣᠭ ᠣᠳᠤᠭᠰᠠᠨ ᠊ᠢ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ᠂ ᠵᠠᠩᠵᠤᠨ ᠳᠡᠮᠪᠡᠷᠢᠯ ᠨᠠᠷ ᠬᠠᠷᠠᠵᠤ ᠴᠢᠳᠠᠯ ᠦᠭᠡᠢ ᠠᠯᠳᠠᠵᠠᠢ᠃
ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠤᠷᠤᠭᠤ ᠶᠠᠭᠠᠷᠠᠨ ᠣᠴᠢᠪᠠ᠃ᠰᠦᠮᠡ ᠶ᠋ᠢᠨ ᠠᠷᠴᠠ ᠬᠦᠵᠢ ᠠᠩᠬᠢᠯᠤᠭᠰᠠᠨ ᠦᠷᠭᠦᠭᠡᠨ ᠳ᠋ᠦ᠍ ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠶᠣᠰᠣᠷᠬᠠᠭᠤ ᠰᠠᠭᠤᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠬᠣᠩ ᠲᠠᠢᠵᠢ ᠶ᠋ᠢ ᠬᠠᠷᠠᠩᠭᠤᠲᠠ ᠠᠯᠠᠭᠠ ᠪᠠᠨ ᠳᠡᠯᠭᠡᠨ ᠪᠠᠷᠠᠭᠤᠨ ᠳᠡᠭᠡᠳᠦ ᠰᠠᠭᠤᠳᠠᠯ ᠳ᠋ᠤ᠌ ᠤᠷᠢᠪᠠ᠃
— ᠭᠠᠯᠳᠠᠨ ᠬᠥᠪᠡᠭᠦᠨ ᠢᠷᠪᠢᠰ ᠲᠡᠢ ᠴᠣᠭ ᠶᠠᠪᠤᠴᠢᠬᠠᠵᠠᠢ᠃ᠪᠢ ᠴᠦ᠍ ᠮᠡᠳᠡᠭᠰᠡᠨ ᠦᠭᠡᠢ᠂ ᠬᠡᠨ ᠴᠦ᠍ ᠮᠡᠳᠡᠭᠰᠡᠨ ᠦᠭᠡᠢ᠃ ᠬᠣᠲᠠ ᠬᠦᠷᠢᠶᠡ ᠪᠡᠷ ᠢ᠋ᠶ᠋ᠡᠨ ᠱᠤᠤᠭᠢᠵᠤ ᠪᠠᠢᠨᠠ᠃
ᠶᠥᠮ ᠠᠭᠠ ᠬᠠᠲᠤᠨ ᠤᠬᠢᠯᠠᠵᠤ ᠰᠠᠭᠤᠨᠠ᠃ ᠬᠤᠪᠢᠯᠭᠠᠨ ᠲᠠ ᠲᠤᠰᠠ ᠪᠣᠯᠵᠤ ᠪᠤᠷᠬᠠᠨ ᠤ᠋ ᠷᠢᠳᠢ ᠰᠢᠳᠢ ᠪᠡᠷ ᠬᠥᠪᠡᠭᠦᠨ ᠢ᠋ ᠮᠢᠨᠢ ᠡᠷᠭᠢᠭᠦᠯᠦᠨ ᠠᠪᠴᠢᠷᠠᠵᠤ ᠲᠤᠰᠠᠯᠠᠭᠠᠴᠢ᠃ ᠨᠠᠳᠠᠳᠤ ᠴᠡᠷᠢᠭ ᠪᠠᠢᠨᠠ᠃ ᠴᠡᠷᠢᠭ ᠪᠠᠢᠯᠠ ᠭᠡᠳ ᠶᠠᠭᠠᠬᠢᠬᠤ ᠪᠢᠯᠡ᠃ ᠨᠠᠳᠠᠳᠤ ᠠᠯᠲᠠ ᠮᠥᠩᠭᠥ ᠪᠠᠢᠨᠠ᠂ᠠᠯᠲᠠ ᠮᠥᠩᠭᠥ ᠪᠠᠢᠯᠠ ᠭᠡᠳ ᠶᠠᠭᠠᠬᠢᠬᠤ ᠪᠢᠯᠡ᠃ᠬᠤᠪᠢᠯᠭᠠᠨ ᠲᠠ ᠲᠤᠰᠠᠯᠠᠵᠤ ᠴᠢᠳᠠᠨᠠ ᠭᠡᠮᠡᠨ ᠭᠡᠭᠡᠨᠲᠡᠨ ᠳ᠋ᠦ᠍ ᠲᠤᠯᠭᠠᠨ ᠥᠭᠦᠯᠡᠪᠡ᠃ᠭᠡᠭᠡᠨᠲᠡᠨ᠂ᠨᠢᠳᠦ ᠪᠡᠨ ᠬᠠᠭᠠᠰ ᠠᠨᠢᠵᠤ ᠵᠠᠯᠪᠠᠷᠢᠯ ᠦᠢᠯᠡᠳᠦᠭᠰᠡᠨ ᠴᠡᠭ ᠲᠡᠭᠡᠨ᠂
— ᠭᠠᠯᠳᠠᠨ ᠳ᠋ᠤ᠌ ᠪᠦᠦ ᠵᠣᠪᠠ ᠭᠡᠪᠡ᠃
ᠬᠣᠩ ᠲᠠᠢᠵᠢ ᠶ᠋ᠢᠨ ᠤᠯᠠᠭᠠᠨ ᠰᠠᠬᠠᠯ ᠳ᠋ᠤ᠌ ᠰᠢᠷᠠ ᠲᠤᠶᠠᠭᠠ ᠨᠡᠪᠴᠢᠭᠡᠳ᠂ ᠪᠠᠷᠤᠭᠠᠷ ᠴᠢᠷᠠᠢ ᠳ᠋ᠤ᠌ ᠴᠠᠭᠠᠨ ᠭᠡᠭᠡ ᠲᠠᠲᠠᠵᠤ᠂
— ᠬᠥᠪᠡᠭᠦᠨ ᠣᠳᠣ ᠬᠠᠮᠢᠭᠠ ᠪᠠᠢᠨᠠ ᠭᠡᠵᠦ ᠠᠰᠠᠭᠤᠯᠠ᠃ ᠱᠤᠪᠲᠤᠩ ᠮᠥᠷᠥ᠂ᠰᠢᠪᠠᠭᠤᠨ ᠴᠡᠭᠡᠵᠢ ᠲᠡᠢ ᠭᠡᠭᠡᠨᠳᠡᠨ ᠰᠠᠭᠤᠳᠠᠯ ᠳᠡᠭᠡᠷᠡ ᠪᠡᠨ ᠵᠠᠢᠮᠤᠴᠢᠨ ᠪᠠᠢᠵᠤ᠂
— ᠭᠠᠯᠳᠠᠨ ᠬᠥᠪᠡᠭᠦᠨ ᠢ᠋ ᠪᠤᠷᠬᠠᠨ ᠤ᠋ ᠢᠪᠡᠭᠡᠯ ᠬᠠᠢᠷᠠ ᠳ᠋ᠤ᠌ ᠪᠠᠭᠲᠠᠭᠠᠬᠤ ᠲᠠᠯᠠ ᠪᠠᠷ ᠬᠠᠭᠠᠨ ᠲᠠᠨ ᠲᠠᠢ ᠪᠢ ᠬᠥᠭᠡᠷᠦᠯᠳᠦᠬᠦ ᠶ᠋ᠢ ᠬᠦᠰᠡᠨᠡ ᠭᠡᠵᠦ ᠵᠠᠭᠠᠲᠤᠨᠠᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠨ ᠮᠠᠭᠠᠵᠢᠭᠰᠠᠨ ᠰᠢᠭ᠋ ᠬᠡᠯᠡᠪᠡ᠃
ᠬᠠᠭᠠᠨ ᠤ᠋ ᠡᠮᠦᠨᠡ ᠴᠢᠯᠠᠭᠤᠨ ᠰᠢᠷᠡᠬᠡᠨᠡ ᠠᠭᠠᠭ ᠲᠠᠢ ᠴᠠᠢ᠂ ᠬᠣᠯᠢᠭᠰᠠᠨ ᠲᠣᠰᠣ᠂ ᠠᠭᠠᠷᠤᠤᠯ᠂ ᠥᠷᠥᠮᠡ ᠮᠡᠲᠦ ᠶ᠋ᠢ ᠠᠶᠠᠭᠠᠴᠢ ᠯᠠᠮᠠ ᠥᠷᠥᠵᠦ᠂ ᠢᠳᠡᠭᠡ ᠪᠤᠳᠠᠭᠠ ᠵᠣᠭᠣᠭᠯᠠᠬᠤ ᠶ᠋ᠢ ᠬᠦᠰᠡᠵᠦ ᠬᠢᠴᠢᠶᠡᠩᠭᠦᠢᠯᠡᠨ ᠳᠣᠩᠬᠣᠯᠵᠠᠬᠤ ᠪᠥᠯᠥᠭᠡ᠃
ᠲᠠᠪᠤ
ᠲᠥᠪᠡᠳ ᠲᠦ᠍ ᠣᠴᠢᠭᠠᠳ ᠵᠢᠷᠭᠤᠭᠠᠨ ᠣᠨ ᠥᠩᠭᠡᠷᠡᠵᠡᠢ᠃ ᠪᠤᠳ᠋ᠳ᠋ᠾᠠ ᠵᠢᠨ ᠶᠡᠬᠡ ᠬᠤᠳᠠ ᠯᡁᠠᠰᠨ ᠬᠡᠮᠡᠬᠦ ᠰᠦᠮᠡ ᠳᠤᠭᠠᠩ ᠰᠢᠪᠠᠭᠠᠷᠠᠭᠰᠠᠨ ᠣᠯᠠᠨ ᠤ᠋ ᠬᠥᠯ ᠳ᠋ᠦ᠍ ᠳᠠᠷᠤᠭᠳᠠᠭᠰᠠᠨ ᠨᠤᠲᠤᠭ ᠣᠷᠣᠨ ᠳ᠋ᠤ᠌ ᠱᠠᠪᠢᠯᠠᠨ ᠰᠠᠭᠤᠵᠤ ᠲᠡᠰᠪᠡ᠃ᠲᠠᠰᠤᠯᠭᠠᠨ ᠠ᠋ᠴᠠ ᠲᠠᠰᠤᠯᠭᠠᠨ ᠳ᠋ᠤ᠌᠂ ᠥᠷᠥᠭᠡᠨ ᠡᠴᠡ ᠥᠷᠥᠭᠡᠨ ᠳ᠋ᠦ᠍ ᠭᠦᠨ ᠪᠠᠶᠠᠰᠠᠳᠯᠠᠩ ᠤ᠋ᠨ ᠮᠥᠷ ᠪᠠᠳᠠᠭ ᠢ᠋ ᠴᠡᠭᠡᠵᠢᠯᠡᠵᠦ᠂ ᠨᠣᠮ ᠤ᠋ᠨ ᠬᠦᠷᠳᠦ ᠶ᠋ᠢ ᠡᠷᠭᠢᠭᠦᠯᠳᠡᠭ ᠯᠠᠮᠠ ᠬᠤᠸᠠᠷᠠᠭ ᠤ᠋ᠳ ᠭᠠᠳᠠᠭᠠᠯᠠᠨ ᠶᠠᠪᠤᠵᠠᠭᠠᠬᠤ ᠪᠥᠯᠥᠭᠡ᠃ᠡᠨᠡ ᠦᠶᠡ ᠪᠣᠯ 1656 ᠣᠨ᠃ ᠭᠠᠯᠳᠠᠨ ᠤ᠋ ᠬᠤᠪᠢ ᠳ᠋ᠤ᠌ ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠨ ᠰᠡᠭᠦᠳᠡᠷ ᠲᠣᠬᠢᠶᠠᠭᠰᠠᠨ ᠤᠯᠠᠭᠠᠨ ᠪᠡᠴᠢᠨ ᠵᠢᠯ ᠶᠦᠮ᠃
ᠪᠤᠷᠬᠠᠨ ᠤ᠋ ᠨᠣᠮ ᠦᠵᠡᠭᠰᠡᠨ ᠡᠳᠦᠷ ᠡᠴᠡ ᠪᠡᠨ ᠬᠡᠦᠬᠡᠳ ᠨᠠᠰᠤ ᠪᠠᠨ ᠭᠡᠭᠡᠵᠦ᠂ ᠥᠭᠡᠷᠡ ᠳᠦᠷᠢ ᠲᠥᠷᠬᠦ ᠳ᠋ᠦ᠍ ᠬᠤᠪᠢᠷᠠᠵᠤ᠂ᠨᠤᠮᠤ ᠰᠤᠮᠤ ᠬᠠᠷᠪᠤᠬᠤ ᠪᠠᠨ ᠪᠣᠯᠢᠵᠤ᠂ᠲᠣᠪᠰᠢᠭᠤᠷ ᠲᠠᠲᠠᠬᠤ ᠪᠠᠨ ᠣᠷᠬᠢᠭᠰᠠᠨ ᠨᠢ ᠭᠠᠯᠳᠠᠨ ᠳ᠋ᠤ᠌ ᠤᠢᠳᠬᠠᠷ ᠭᠤᠨᠢᠭ ᠲᠠᠢ ᠪᠠᠢᠭᠰᠠᠨ ᠴᠤ ᠡᠨᠡ ᠥᠪᠡᠷᠮᠢᠴᠡ ᠣᠷᠴᠢᠨ ᠳ᠋ᠤ᠌ ᠳᠠᠰᠬᠤ ᠠ᠋ᠴᠠ ᠠᠷᠭᠠ ᠦᠭᠡᠢ ᠳ᠋ᠦ᠍ ᠬᠦᠷᠦᠭᠰᠡᠨ ᠪᠢᠯᠡ᠃ ᠯᠠᠮᠠ ᠨᠠᠷ ᠤ᠋ᠨ ᠳᠤᠮᠳᠠ ᠪᠡᠶᠡ ᠶ᠋ᠢᠨ ᠳᠠᠰᠬᠠᠯ ᠬᠢᠳᠡᠭ ᠰᠣᠨᠢᠷᠬᠠᠯ ᠲᠠᠢ ᠲᠥᠷᠥᠯ ᠪᠠᠢᠯᠠ᠃ᠨᠣᠮ ᠬᠤᠷᠠᠬᠤ ᠠ᠋ᠴᠠ ᠪᠤᠰᠤᠳ ᠴᠠᠭ ᠲᠤ ᠭᠠᠯᠳᠠᠨ ᠵᠣᠳᠣᠭᠠᠨ ᠤ᠋ ᠤᠷᠠᠯᠢᠭ ᠲᠤ ᠬᠦᠴᠦ ᠪᠡᠨ ᠰᠣᠷᠢᠨᠠ᠃ᠳᠣᠷᠣᠨᠠᠳᠠᠬᠢᠨ ᠤ᠋ ᠡᠨᠡ ᠭᠠᠢᠬᠠᠮᠰᠢᠭ ᠲᠠᠢ ᠤᠷᠠᠯᠢᠭ ᠢ᠋ ᠯᠠᠮᠠ ᠨᠠᠷ ᠤ᠋ᠨ ᠳᠤᠮᠳᠠ ᠨᠢᠭᠤᠴᠠ ᠪᠠᠷ ᠨᠡᠪᠲᠡᠷᠡᠭᠦᠯᠵᠦ ᠷᠢᠳᠢ ᠰᠢᠳᠢ ᠲᠡᠢ ᠬᠣᠯᠪᠣᠨ ᠲᠠᠢᠯᠪᠤᠷᠢᠯᠠᠳᠠᠭ ᠵᠢᠷᠠᠨ ᠳᠥᠷᠪᠡᠨ ᠵᠦᠢᠯ ᠲᠡᠭᠦᠰ ᠲᠡᠭᠦᠯᠳᠡᠷ ᠡᠷᠳᠡᠮ ᠳ᠋ᠦ᠍ ᠪᠣᠯᠪᠠᠰᠤᠷᠠᠬᠤ ᠶ᠋ᠢ ᠭᠠᠯᠳᠠᠨ ᠳ᠋ᠤ᠌ ᠬᠦᠰᠡᠵᠡᠢ᠃
ᠭᠠᠯᠳᠠᠨ ᠵᠣᠳᠣᠭᠠᠨ ᠤ᠋ ᠵᠢᠷᠠᠨ ᠳᠥᠷᠪᠡᠨ ᠡᠷᠳᠡᠮ ᠦ᠋ᠨ ᠳᠠᠰᠬᠠᠯ ᠢ᠋ ᠨᠢᠭᠡ ᠨᠢᠭᠡ ᠪᠡᠷ ᠬᠢᠳᠡᠭ ᠪᠠᠢᠯᠠ᠃ᠲᠥᠪᠡᠳ ᠦ᠋ᠨ ᠥᠨᠳᠥᠷ ᠠᠭᠤᠯᠠ ᠨᠢᠷᠤᠭᠤᠨ ᠳ᠋ᠤ᠌ ᠢᠮᠠᠭᠲᠠ ᠴᠠᠰᠤ ᠲᠠᠢ ᠪᠠᠢᠬᠤ ᠪᠥᠭᠡᠳ ᠵᠤᠨ ᠴᠠᠭ ᠲᠤ᠌ ᠪᠣᠷᠣᠭᠠ ᠠᠰᠬᠠᠳᠠᠭ ᠪᠢᠯᠡ᠃ᠶᠡᠬᠡ ᠪᠣᠷᠣᠭᠠᠨ ᠲᠠᠢ ᠡᠳᠦᠷ ᠭᠠᠯᠳᠠᠨ ᠮᠣᠩᠭᠣᠯ ᠤ᠋ᠨ ᠠᠩᠬᠠᠳᠤᠭᠠᠷ ᠪᠣᠭᠳᠠ ᠵᠢᠪᠽᠤᠨᠳᠠᠮᠪᠠ ᠥᠨᠳᠥᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ ᠲᠤ ᠪᠠᠷᠠᠭᠠᠯᠠᠪᠠ᠃
— ᠪᠣᠭᠳᠠ ᠯᠠᠮᠠ ᠲᠠᠨ ᠢ᠋ ᠨᠤᠲᠤᠭ ᠪᠠᠭᠤᠬᠤ ᠰᠤᠷᠠᠭ ᠳᠤᠭᠤᠯᠤᠭᠠᠳ ᠢᠷᠡᠯᠡ ᠭᠡᠬᠦ ᠳ᠋ᠦ᠍ ᠥᠨᠳᠥᠷ ᠭᠡᠭᠡᠨ ᠨᠢᠳᠦᠨ ᠳ᠋ᠡᠭᠡᠨ ᠭᠤᠨᠢᠭ ᠰᠢᠩᠭᠡᠭᠡᠵᠦ᠂
— ᠬᠠᠭᠠᠨ ᠡᠴᠢᠭᠡ ᠨᠠᠰᠤᠨ ᠬᠤᠲᠤᠭ ᠪᠣᠯᠵᠤ ᠬᠣᠢᠲᠤ ᠲᠥᠷᠥᠯ ᠳ᠋ᠡᠭᠡᠨ ᠮᠣᠷᠢᠯᠠᠵᠠᠢ ᠭᠡᠪᠡ᠃ᠭᠠᠯᠳᠠᠨ ᠯᠠᠮᠠ ᠡᠴᠢᠭᠡ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶ᠋ᠢᠨ ᠲᠡᠭᠦᠰᠬᠡᠯ ᠢ᠋ ᠰᠠᠨᠠᠵᠤ ᠤᠢᠳᠬᠠᠷ ᠲᠠᠢ ᠪᠠᠷ᠂
— ᠪᠢ ᠪᠠᠰᠠ ᠣᠢᠷᠠᠳ ᠨᠤᠲᠤᠭ ᠲᠠᠭᠠᠨ ᠶᠠᠪᠤᠨᠠ ᠭᠡᠪᠡ᠃
— ᠪᠢ ᠰᠣᠨᠣᠰᠤᠭᠰᠠᠨ᠃ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶ᠋ᠢ ᠪᠦᠬᠦ ᠣᠢᠷᠠᠳ ᠤ᠋ᠨ ᠬᠠᠭᠠᠨ ᠪᠣᠯᠳᠠᠭ ᠬᠥᠬᠡᠭᠴᠢᠨ ᠭᠠᠬᠠᠢ ᠵᠢᠯ ᠪᠢ ᠲᠥᠷᠥᠭᠰᠡᠨ ᠶᠦᠮ ᠰᠢᠦ ᠳᠡ᠃ᠲᠡᠷᠡ ᠶᠡᠬᠡ ᠬᠥᠮᠦᠨ ᠢ᠋ ᠴᠢᠮᠠ ᠪᠠᠷ ᠲᠥᠰᠦᠭᠡᠯᠡᠳᠡᠭ᠃ᠦᠷᠡ ᠵᠢᠮᠢᠰ ᠢ᠋ᠶ᠋ᠡᠷ ᠨᠢ ᠬᠥᠮᠦᠨ ᠢ᠋ ᠲᠠᠨᠢᠳᠠᠭ ᠪᠤᠰᠤ ᠤᠤ?
— ᠭᠡᠭᠡᠨᠲᠡᠨ ᠲᠠ ᠡᠷᠭᠢᠵᠦ ᠬᠡᠵᠢᠶᠡ ᠢᠷᠡᠬᠦ ᠪᠣᠢ?
— ᠬᠦᠨᠡᠰᠦᠨ ᠦ᠌ ᠲᠠᠬᠢᠯᠭᠠ ᠳᠠᠭᠤᠰᠬᠠᠭᠠᠳ ᠪᠤᠴᠠᠵᠤ ᠢᠷᠡᠨᠡ᠃ ᠴᠢ ᠪᠢᠳᠡ ᠬᠣᠶᠠᠷ ᠤ᠋ᠨ ᠠᠯᠲᠠᠨ ᠠᠷᠭᠠᠮᠵᠢᠶᠠ ᠶ᠋ᠢᠨ ᠦᠵᠦᠭᠦᠷ ᠡᠨᠳᠡ᠃ ᠨᠢᠭᠡ ᠦᠵᠦᠭᠦᠷ ᠨᠢ ᠮᠣᠩᠭᠣᠯ ᠳ᠋ᠤ᠌ ᠁
— ᠲᠡᠢᠮᠦ ᠠ᠋᠂ ᠵᠢᠷᠤᠭ ᠲᠥᠭᠡᠷᠭᠡ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠪᠢᠳᠡᠨ ᠢ᠋ ᠬᠣᠯᠪᠣᠵᠠᠢ᠃ᠪᠦᠷ ᠲᠡᠭᠡᠬᠦ ᠳ᠋ᠡᠭᠡᠨ ᠨᠢᠭᠡ ᠠᠷᠭᠠᠮᠵᠢᠶᠠ ᠠ᠋ᠴᠠ ᠁
— ᠴᠢᠮᠠ ᠳ᠋ᠤ᠌ ᠨᠢᠭᠡ ᠡᠷᠢᠭᠡ ᠪᠡᠯᠡᠳᠦᠭᠰᠡᠨ ᠶᠤᠮᠰᠠᠨ᠃
— ᠲᠠ ᠨᠠᠳᠠᠳᠤ ᠶᠠᠭᠤᠨ ᠤ᠋ ᠤᠴᠢᠷ ᠡᠷᠢᠭᠡ ᠪᠡᠯᠡᠳᠪᠡ᠃
— ᠭᠠᠯᠳᠠᠨ ᠬᠤᠪᠢᠯᠭᠠᠨ ᠲᠠ ᠰᠠᠢᠨ ᠰᠣᠨᠣᠰ᠃ᠬᠠᠯᠬᠠ᠂ ᠣᠢᠷᠠᠳ ᠬᠥᠮᠦᠰ ᠬᠣᠯᠠ ᠶ᠋ᠢᠨ ᠪᠤᠰᠤ ᠣᠢᠷᠠ ᠶ᠋ᠢᠨ ᠠᠬᠠ ᠳᠡᠭᠦᠦᠰ ᠪᠢᠯᠡ᠃ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠦᠶᠡ ᠶ᠋ᠢᠨ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠵᠡᠭᠦᠨ ᠪᠠᠷᠠᠭᠤᠨ ᠭᠡᠮᠡᠨ ᠣᠷᠣᠰᠢᠵᠤ ᠪᠠᠢᠨᠠ᠃ᠲᠡᠭᠡᠬᠦ ᠪᠡᠷ ᠣᠢᠷᠠᠳ᠂ ᠬᠠᠯᠬᠠ ᠬᠣᠶᠠᠷ ᠢ᠋ ᠰᠠᠯᠭᠠᠵᠤ ᠶᠠᠭᠠᠬᠢᠨ ᠪᠣᠯᠤᠨᠠ᠃ ᠬᠤᠪᠢᠯᠭᠠᠨ ᠲᠠᠨ ᠤ᠋ ᠴᠢᠰᠤ ᠨᠠᠳᠠ ᠪᠣᠢ᠃ ᠴᠢᠰᠤ ᠪᠠᠨ ᠳᠠᠭᠠᠭᠰᠠᠨ ᠴᠤ᠂ ᠶᠠᠰᠤ ᠪᠠᠨ ᠳᠠᠭᠠᠭᠰᠠᠨ ᠴᠤ ᠣᠢᠷᠠ ᠶ᠋ᠢᠨ ᠲᠥᠷᠥᠯ ᠭᠡᠳᠡᠭ ᠢ᠋ᠶ᠋ᠡᠨ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠮᠢᠨᠢ ᠮᠡᠳᠡᠲᠦᠭᠡᠢ᠃ ᠡᠷᠢᠭᠡ ᠶ᠋ᠢᠨ ᠲᠤᠬᠠᠢ ᠳ᠋ᠤ᠌ ᠪᠣᠯ ᠪᠤᠷᠬᠠᠨ ᠤ᠋ ᠨᠢᠳᠦ ᠬᠡᠮᠡᠬᠦ ᠵᠢᠮᠢᠰ ᠦ᠋ᠨ ᠶᠠᠰᠤ ᠪᠠᠷ ᠬᠡᠯᠬᠢᠭᠰᠡᠨ ᠪᠢᠯᠡ᠃ ᠡᠨᠡ ᠡᠷᠢᠭᠡ ᠶ᠋ᠢᠨ ᠵᠠᠩᠬᠢᠯᠠᠭᠠᠨ ᠳ᠋ᠤᠨᠢ ᠮᠢᠨᠦ ᠰᠡᠢᠯᠪᠦᠷᠢ ᠪᠣᠢ᠃ᠨᠢᠭᠡᠨ ᠴᠠᠭ ᠲᠤ ᠲᠡᠷᠡ ᠳᠦᠷᠰᠦ ᠶ᠋ᠢ ᠬᠠᠷᠠᠬᠤ ᠪᠣᠯᠤᠨᠠ᠃
— ᠵᠠ ᠭᠡᠭᠡᠨᠲᠡᠨ ᠮᠢᠨᠢ!
— ᠲᠠ ᠬᠡᠳᠦᠢ ᠳ᠋ᠦ᠍ ᠬᠥᠳᠡᠯᠬᠦ ᠪᠣᠢ? ᠬᠤᠪᠢᠯᠭᠠᠲᠠᠨ!
— ᠮᠠᠷᠭᠠᠰᠢ ᠨᠠᠷᠠ ᠪᠢᠲᠡᠭᠦᠦ ᠁
— ᠴᠣᠭ ᠠᠶᠠᠨ ᠳ᠋ᠤ᠌ ᠭᠠᠷᠬᠤ ᠨᠢ ᠃ ᠥᠯᠵᠡᠢ ᠲᠡᠢ ᠶᠠᠪᠤᠳᠠᠯ ᠪᠣᠯᠤᠯᠠ᠃
ᠡᠴᠢᠭᠡ ᠬᠣᠩ ᠲᠠᠢᠵᠢ ᠲᠩᠷᠢ ᠳ᠋ᠦ᠍ ᠬᠠᠯᠢᠵᠤ᠂ ᠠᠬᠠ ᠰᠡᠩᠭᠡ ᠬᠠᠭᠠᠨ ᠲᠥᠷᠥ ᠶ᠋ᠢᠨ ᠵᠢᠯᠣᠭᠣ ᠶ᠋ᠢ ᠠᠳᠬᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠭᠠᠯᠳᠠᠨ ᠨᠤᠲᠤᠭ ᠲᠠᠭᠠᠨ ᠣᠴᠢᠯ ᠦᠭᠡᠢ ᠵᠢᠷᠭᠤᠳᠠᠬᠢ ᠵᠢᠯ ᠦ᠋ᠨ ᠪᠣᠱᠣᠭ ᠠᠯᠬᠤᠵᠠᠢ᠃ᠭᠠᠯᠳᠠᠨ ᠤ᠋ ᠣᠢᠷᠠᠳ ᠲᠤ᠌ ᠶᠠᠪᠤᠬᠤ ᠵᠠᠮ ᠳ᠋ᠤ᠌ ᠸᠴᠢᠷᠲᠤ ᠰᠡᠴᠡᠨ ᠬᠠᠭᠠᠨ ᠤ᠋ ᠬᠦᠷᠢᠶᠡ ᠪᠣᠢ᠃ ᠲᠡᠷᠡ ᠬᠦ᠌ ᠭᠣᠶᠣᠮᠰᠣᠭ ᠬᠦᠷᠢᠶᠡᠨ ᠳ᠋ᠦ᠍ ᠠᠨᠤᠳᠠᠷᠠ᠂ ᠠᠬᠠᠳᠠᠷᠠ ᠬᠡᠮᠡᠭᠴᠢ ᠡᠭᠡᠴᠢ ᠳᠡᠭᠦᠦ ᠪᠦᠰᠡᠭᠦᠢᠴᠦᠦᠯ ᠰᠤᠳᠤᠷ ᠦᠵᠡᠵᠦ᠂ ᠮᠣᠷᠢ ᠪᠠᠷ ᠳᠠᠪᠬᠢᠵᠤ᠂ ᠴᠡᠷᠢᠭ ᠦ᠋ᠨ ᠡᠷᠳᠡᠮ ᠳ᠋ᠦ᠍ ᠪᠣᠯᠪᠠᠰᠤᠷᠠᠵᠤ ᠪᠣᠢ᠃
ᠣᠢᠷᠠᠳ ᠨᠤᠲᠤᠭ ᠪᠣᠯ ᠭᠠᠯᠳᠠᠨ ᠤ᠋ ᠮᠥᠷᠥᠭᠡᠳᠦᠯ ᠦ᠋ᠨ ᠵᠦᠭ ᠪᠠᠢᠪᠠ᠃ ᠠᠯᠲᠠᠢ ᠶ᠋ᠢᠨ ᠴᠠᠰᠤᠲᠤ ᠠᠭᠤᠯᠠᠨ ᠤ᠋ ᠴᠠᠭᠠᠨ ᠢᠷᠪᠢᠰ ᠣᠯᠵᠠ ᠣᠮᠣᠭ ᠲᠠᠭᠠᠨ ᠡᠷᠡᠮᠰᠢᠨ ᠳᠡᠭᠦᠯᠢᠵᠦ ᠶᠠᠪᠤᠭᠠ ᠪᠢᠵᠡ᠃
ᠦᠳᠡᠰᠢ ᠶ᠋ᠢᠨ ᠨᠠᠮᠤᠭᠤᠬᠠᠨ ᠠᠭᠠᠷ ᠢ᠋ ᠳᠣᠯᠭᠢᠶᠠᠯᠠᠭᠤᠯᠤᠨ ᠲᠣᠪᠰᠢᠭᠤᠷ ᠤ᠋ᠨ ᠠᠶᠠᠰ ᠡᠭᠡᠰᠢᠭᠯᠡᠵᠦ ᠲᠤᠤᠯᠢ ᠬᠠᠢᠯᠠᠬᠤ ᠳ᠋ᠤ᠌ ᠦᠷᠴᠢᠭᠢᠷ ᠡᠮᠡᠭᠡᠳ ᠬᠣᠯᠠ ᠣᠳᠤᠭᠰᠠᠨ ᠦᠷᠡ ᠬᠡᠦᠬᠡᠳ ᠢ᠋ᠶ᠋ᠡᠨ ᠰᠠᠨᠠᠭᠠᠯᠵᠠᠨ ᠨᠢᠯᠪᠤᠰᠤ ᠤᠨᠠᠭᠠᠵᠤ ᠰᠠᠭᠤᠭᠠ ᠪᠢᠯᠡ᠃
ᠭᠠᠯᠳᠠᠨ ᠤ᠋ ᠴᠡᠭᠡᠵᠢᠨ ᠳ᠋ᠦ᠍ ᠲᠣᠭᠰᠢᠨ ᠳᠠᠪᠠᠯᠭᠠᠯᠠᠭᠰᠠᠨ ᠣᠯᠠᠨ ᠪᠤᠳᠠᠩ ᠳᠤᠮᠳᠠ ᠠᠨᠤᠳᠠᠷᠠ ᠶ᠋ᠢᠨ ᠲᠡᠭᠰᠢ ᠭᠡᠮᠲᠦ ᠴᠠᠭᠠᠨ ᠴᠢᠷᠠᠢ᠂ᠨᠢᠯ ᠴᠡᠴᠡᠭ ᠦ᠋ᠨ ᠥᠩᠭᠡᠲᠦ ᠶᠠᠭᠠᠨ ᠤᠷᠤᠭᠤᠯ᠂ᠵᠢᠪᠬᠤᠭᠠᠯᠢᠭ ᠬᠥᠳᠡᠯᠭᠡᠭᠡᠨ ᠦᠯᠦ ᠬᠠᠭᠠᠴᠠᠨᠠ᠃ᠲᠡᠭᠦᠨ ᠦ᠌ ᠳᠡᠭᠦᠦ ᠠᠬᠠᠳᠠᠷᠠ ᠡᠭᠡᠴᠢ ᠡᠴᠡ ᠪᠡᠨ ᠬᠥᠭᠡᠷᠦᠬᠦᠨ ᠠᠲᠠᠯᠠ ᠵᠣᠷᠢᠮᠠᠭ ᠪᠤᠰᠤ ᠰᠠᠨᠠᠭᠳᠠᠬᠤ ᠨᠢ ᠶᠠᠭᠤᠨ ᠤ᠋ ᠪᠢᠯᠡ᠃
ᠠᠨᠤᠳᠠᠷᠠ ᠶ᠋ᠢᠨ ᠥᠨᠳᠡᠭᠡᠲᠦ ᠴᠥᠭᠥᠷᠥᠮ ᠳ᠋ᠦ᠍ ᠡᠳᠦᠢ ᠳ᠋ᠦ᠍ ᠪᠣᠷᠣ ᠪᠣᠷᠣ ᠶ᠋ᠢᠨ ᠪᠢᠯᠵᠤᠬᠠᠢ ᠪᠣᠰᠤᠨ ᠰᠠᠭᠤᠨ ᠵᠢᠷᠭᠢᠵᠦ ᠪᠠᠢᠭᠠ ᠭᠡᠳᠡᠭ ᠢ᠋ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠨᠢᠳᠦᠨ ᠳ᠋ᠡᠭᠡᠨ ᠬᠠᠷᠠᠵᠤ ᠪᠠᠢᠯᠠ᠃
ᠮᠣᠩᠭᠣᠯ ᠤ᠋ᠨ ᠠᠩᠬᠠᠳᠤᠭᠠᠷ ᠪᠣᠭᠳᠠ ᠥᠨᠳᠥᠷ ᠭᠡᠭᠡᠨ ᠣ ᠰᠦᠰᠦᠭᠯᠡᠵᠦ ᠪᠠᠷᠢᠭᠰᠠᠨ ᠡᠷᠢᠭᠡ ᠶ᠋ᠢ ᠲᠡᠷᠡ ᠡᠳᠦᠷ ᠡᠴᠡ ᠬᠣᠢᠰᠢ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠴᠡᠭᠡᠵᠢᠨ ᠳ᠋ᠡᠭᠡᠨ ᠵᠡᠭᠦᠬᠦ ᠪᠤᠶᠤ ᠡᠰᠡ ᠪᠥᠭᠡᠰᠦ ᠭᠠᠷ ᠤ᠋ᠨ ᠱᠤ᠌ ᠳ᠋ᠤ᠌ ᠣᠷᠢᠶᠠᠵᠤ ᠮᠣᠳᠣᠷ ᠤ᠋ᠨ ᠠᠳᠢᠰ ᠬᠦᠷᠲᠡᠭᠡᠬᠦ ᠪᠥᠯᠥᠭᠡ᠃
ᠵᠢᠷᠭᠤᠭᠠ
ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠬᠠᠷᠠᠭᠠᠨᠠᠲᠤ ᠰᠢᠷᠠ ᠬᠥᠨᠳᠡᠢ ᠡᠴᠡ ᠶᠡᠬᠡ ᠥᠷᠭᠥᠭᠡ ᠪᠦᠬᠦᠢ ᠴᠣᠷᠣᠰ ᠠᠢᠮᠠᠭ ᠤ᠋ᠨ ᠬᠦᠷᠢᠶᠡᠨ ᠳ᠋ᠡᠭᠡᠨ ᠢᠷᠡᠪᠡ᠃ ᠮᠠᠩᠨᠤᠭᠲᠤ ᠴᠡᠷᠢᠭ ᠦ᠋ᠳ ᠵᠣᠭᠰᠣᠪᠠ᠃ ᠮᠣᠷᠢᠳ ᠤ᠋ᠨ ᠡᠷᠳᠡᠨᠢᠲᠦ ᠲᠣᠯᠣᠭᠠᠢ ᠭᠣᠳᠣᠢᠵᠤ ᠶᠡᠬᠡ ᠳᠡᠯ ᠨᠢ ᠭᠠᠵᠠᠷ ᠰᠢᠭᠦᠷᠡᠨ ᠤᠨᠵᠢᠢᠵᠠᠢ᠃ ᠣᠢᠷᠠᠳ ᠤ᠋ᠨ ᠪᠠᠭᠠᠲᠤᠷ ᠴᠡᠷᠢᠭ ᠦ᠋ᠳ ᠲᠡᠢᠨ ᠳᠣᠯᠣᠭᠠᠨ ᠠ᠋ᠴᠠ ᠢᠷᠡᠬᠦ ᠳ᠋ᠡᠭᠡᠨ ᠢᠮᠠᠭᠲᠠ ᠬᠦᠯᠦᠭ ᠮᠣᠷᠢᠳ ᠤ᠋ᠨ ᠬᠠᠲᠠᠷᠢᠭᠠ ᠪᠠᠷ ᠬᠣᠲᠠ ᠬᠦᠷᠢᠶᠡ ᠶ᠋ᠢ ᠥᠯᠮᠡᠢᠳᠡᠨ ᠪᠠᠭᠤᠳᠠᠭ ᠪᠤᠰᠤ ᠤᠤ?ᠡᠨᠡ ᠤᠳᠠᠭᠠ ᠴᠡᠷᠢᠭ ᠦ᠋ᠳ ᠦ᠋ᠨ ᠨᠢᠳᠦᠨ ᠳ᠋ᠦ᠍ ᠭᠦᠨ ᠤᠢᠳᠬᠠᠷ ᠲᠠᠢ ᠪᠥᠭᠡᠳ ᠰᠡᠯᠡᠮᠡ ᠪᠡᠨ ᠬᠤᠢ ᠠ᠋ᠴᠠ ᠨᠢ ᠰᠤᠭᠤᠯᠵᠤ᠂ ᠮᠣᠷᠢᠳ ᠤ᠋ᠨ ᠰᠠᠭᠠᠭ ᠲᠤᠰᠢᠶᠠ ᠤᠨᠵᠢᠭᠤᠯᠵᠠᠢ᠃
ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠡᠮᠡᠭᠡᠯ ᠳᠡᠭᠡᠷᠡ ᠡᠴᠡ ᠪᠡᠨ ᠪᠠᠭᠤᠯ ᠦᠭᠡᠢ ᠪᠡᠷ ᠶᠦᠮ ᠠᠭᠠ ᠬᠠᠲᠤᠨ ᠢ᠋ᠶ᠋ᠠᠨ ᠳᠠᠭᠤᠳᠠᠭᠤᠯᠵᠠᠢ᠃ ᠶᠦᠮ ᠠᠭᠠ ᠭᠦᠶᠦᠨ ᠢᠷᠡᠵᠦ ᠳᠥᠷᠦᠭᠡᠨ ᠡᠴᠡ ᠰᠢᠭᠦᠷᠡᠭᠡᠳ᠂
— ᠬᠣᠩ ᠲᠠᠢᠵᠢ ᠲᠠ ᠮᠢᠨᠢ᠂ ᠶᠠᠭᠠᠬᠢᠴᠢᠬᠠᠪᠠ ᠠ᠋ ᠁ ᠭᠡᠮᠡᠨ ᠥᠮᠥᠯᠵᠡᠨ ᠥᠭᠦᠯᠡᠪᠡ᠃
— ᠪᠢ ᠥᠰᠢᠶᠡᠲᠡᠨ ᠳ᠋ᠡᠭᠡᠨ ᠥᠷᠯᠥᠭᠳᠡᠪᠡ ᠭᠡᠮᠡᠨ ᠬᠣᠩ ᠲᠠᠢᠵᠢ ᠬᠦᠩᠭᠢᠨᠡᠪᠡ᠃
— ᠦᠷᠭᠦᠭᠡᠨ ᠳ᠋ᠡᠭᠡᠨ ᠮᠣᠷᠢᠯᠠᠵᠤ ᠣᠷᠣᠭᠲᠤᠨ ᠭᠡᠵᠦ ᠶᠦᠮ ᠠᠭᠠ ᠬᠡᠯᠡᠯᠡ᠃
ᠲᠡᠭᠦᠨ ᠦ᠌ ᠴᠠᠭᠠᠨᠠ ᠭᠠᠯᠳᠠᠮᠠ ᠵᠠᠩᠵᠤᠨ᠂ᠠᠷᠴᠠ ᠪᠠᠭᠠᠲᠤᠷ ᠲᠡᠷᠢᠭᠦᠲᠡᠨ ᠣᠢᠷᠠ ᠶ᠋ᠢᠨ ᠬᠥᠮᠦᠰ ᠦᠷᠭᠦᠯᠵᠢᠯᠡᠭᠡᠳ ᠲᠣᠷᠭᠠᠨ ᠴᠡᠷᠢᠭ ᠦ᠋ᠳ ᠪᠠᠢᠯᠠ᠃ᠬᠠᠷᠢᠨ ᠲᠡᠳᠡᠨ ᠦ᠌ ᠳᠤᠮᠳᠠ ᠵᠢᠤᠵᠠ ᠲᠡᠷᠭᠡᠨ ᠡᠴᠡ ᠠᠮᠢᠨᠳᠠᠷᠡ ᠬᠠᠲᠤᠨ ᠲᠦᠰᠢᠭᠦᠯᠦᠨ ᠪᠠᠭᠤᠬᠤ ᠠᠵᠢ᠃ᠡᠨᠡ ᠭᠤᠨᠢᠭ ᠲᠠᠢ ᠳᠦᠷᠢ ᠵᠢᠷᠤᠭ ᠶᠦᠮ ᠠᠭᠠ ᠬᠠᠲᠤᠨ ᠢ᠋ ᠮᠠᠰᠢᠳᠠ ᠴᠣᠴᠢᠷᠳᠠᠭᠤᠯᠵᠠᠢ᠃ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠬᠠᠲᠤᠨ ᠲᠠᠢᠰᠢ ᠪᠠᠨ ᠭᠡᠢᠩᠭᠡ ᠲᠣᠭᠲᠠᠭᠤᠨ ᠬᠠᠷᠠᠴᠠ ᠢᠯᠡᠭᠡᠵᠦ᠂
— ᠪᠢ ᠡᠷᠳᠡᠨᠢᠲᠦ ᠬᠦᠯᠦᠭ ᠦ᠋ᠨ ᠵᠣ ᠳᠡᠭᠡᠷᠡ ᠨᠠᠰᠤᠨ ᠡᠯᠡᠭᠡᠪᠡ᠃ ᠮᠢᠨᠦ ᠡᠴᠢᠭᠡ ᠳᠡᠭᠡᠳᠦᠰ ᠨᠠᠳᠠ ᠲᠠᠢ ᠠᠳᠠᠯᠢᠬᠠᠨ ᠲᠡᠢᠨ ᠳᠣᠯᠣᠭᠠᠨ ᠤ᠋ ᠤᠷᠲᠤ ᠵᠠᠮ ᠲᠤᠭᠤᠯᠵᠤ ᠠᠶᠠᠨ ᠤ᠋ ᠳᠥᠷᠦᠭᠡᠨ ᠳ᠋ᠦ᠍ ᠨᠢᠭᠡᠨ ᠪᠡᠶᠡ ᠪᠡᠨ ᠡᠯᠡᠭᠡᠭᠰᠡᠨ ᠬᠥᠮᠦᠰ᠂ ᠣᠢᠷᠠᠳ ᠤ᠋ᠨ ᠭᠠᠵᠠᠷ ᠨᠤᠲᠤᠭ ᠤ᠋ᠨ ᠬᠠᠶᠠᠭᠠ ᠬᠠᠲᠠᠪᠴᠢ ᠶ᠋ᠢ ᠪᠦᠲᠦᠨ ᠪᠠᠢᠯᠭᠠᠬᠤ ᠶ᠋ᠢᠨ ᠲᠥᠯᠥᠭᠡ ᠮᠡᠰᠡ ᠳᠠᠯᠠᠢᠵᠤ ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ ᠳ᠋ᠤ᠌ ᠬᠦᠷᠲᠡᠯᠡ ᠲᠤᠯᠤᠯᠳᠤᠵᠤ ᠶᠠᠪᠤᠯᠠ᠃ ᠨᠠᠮᠠᠶ᠋ᠢ ᠵᠥᠪ ᠰᠠᠨᠠᠭᠠ ᠲᠠᠢ᠂ ᠴᠢᠯᠠᠭᠤᠨ ᠵᠢᠷᠦᠬᠡ ᠲᠡᠢ ᠶᠠᠪᠤᠭᠰᠠᠨ ᠢ᠋ ᠲᠩᠷᠢ ᠮᠡᠳᠡᠨᠡ ᠭᠡᠳ ᠬᠣᠷᠣᠮ ᠲᠡᠳᠦᠢ ᠳᠠᠭᠤ ᠪᠠᠨ ᠬᠤᠷᠢᠶᠠᠪᠠ᠃
ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶ᠋ᠢᠨ ᠳᠠᠭᠤ ᠪᠠᠨ ᠬᠤᠷᠢᠶᠠᠭᠰᠠᠨ ᠴᠥᠭᠡᠨ ᠠᠭᠱᠠᠨ ᠪᠣᠯ ᠵᠠᠭᠤᠨ ᠵᠢᠯ ᠥᠩᠭᠡᠷᠡᠭᠰᠡᠨ ᠮᠡᠲᠦ ᠰᠠᠨᠠᠭᠳᠠᠵᠤ᠂ᠭᠠᠭᠴᠠᠭᠠᠷᠳᠠᠯ ᠤᠨ ᠬᠠᠷᠠᠩᠭᠤᠢ ᠮᠠᠨᠠᠨ ᠳ᠋ᠤ᠌ ᠶᠦᠮ ᠠᠭᠠ ᠡᠬᠡ ᠪᠦᠳᠦᠴᠢᠨ ᠣᠢᠷᠠᠲᠤᠯᠠ᠃ ᠬᠠᠭᠠᠨ ᠤ᠋ ᠡᠮᠡᠭᠡᠯ ᠦ᠋ᠨ ᠪᠥᠭᠥᠷᠭᠡᠨ ᠡᠴᠡ ᠵᠠᠭᠤᠷᠠᠬᠤ ᠵᠢᠷᠦᠬᠡ ᠳᠤᠲᠠᠨ ᠣᠢᠷᠠᠳᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠳᠠᠭᠤ ᠳᠠᠬᠢᠨ ᠬᠦᠩᠭᠢᠨᠡᠨ ᠴᠡᠭᠡᠯ ᠬᠣᠭᠣᠯᠠᠢ ᠪᠠᠷ᠂
— ᠶᠦᠮ ᠠᠭᠠ ᠬᠠᠲᠤᠨ ᠲᠩᠷᠢ ᠵᠠᠶᠠᠭᠠᠲᠠᠢ ᠪᠢᠯᠡ᠃ᠰᠡᠩᠭᠡ ᠬᠥᠪᠡᠭᠦᠨ ᠨᠠᠮᠠᠶ᠋ᠢ ᠵᠠᠯᠭᠠᠮᠵᠢᠯᠠᠬᠤ ᠤᠴᠢᠷᠲᠠᠢ᠃ᠰᠡᠩᠭᠡ ᠶ᠋ᠢᠨ ᠳᠤᠲᠠᠭᠤ ᠶ᠋ᠢ ᠭᠠᠯᠳᠠᠨ ᠨᠥᠬᠥᠵᠦ ᠨᠢᠭᠡ ᠪᠡᠶᠡ ᠮᠡᠲᠦ ᠶᠠᠪᠤᠰᠤᠭᠠᠢ ᠭᠡᠵᠦ ᠬᠥᠪᠡᠭᠦᠳ ᠲᠡᠭᠡᠨ ᠵᠠᠬᠢᠭᠠᠷᠠᠢ᠃ᠬᠠᠲᠤᠳ᠂ᠬᠥᠪᠡᠭᠦᠳ ᠳᠣᠲᠣᠷᠠ ᠠ᠋ᠴᠠ ᠶᠦᠮ ᠠᠭᠠ ᠬᠠᠲᠤᠨ ᠢ᠋ ᠣᠨᠴᠠᠯᠠᠬᠤ ᠶ᠋ᠢᠨ ᠤᠴᠢᠷ ᠡᠨᠡ ᠪᠢᠯᠡ᠃ ᠬᠠᠭᠠᠨ ᠰᠠᠭᠤᠳᠠᠯ ᠤ᠋ᠨ ᠲᠥᠯᠥᠭᠡ ᠬᠡᠨ ᠲᠡᠮᠡᠴᠡᠨᠡ ᠲᠡᠷᠡ ᠲᠣᠯᠣᠭᠠᠢ ᠦᠭᠡᠢ ᠪᠣᠯᠤᠨᠠ ᠭᠡᠳᠡᠭ ᠢ᠋ ᠰᠡᠩᠭᠡ ᠳ᠋ᠦ᠍ ᠮᠡᠳᠡᠷᠡᠭᠦᠯᠳᠡᠭ ᠶᠦᠮ ᠰᠢᠦ᠃ᠭᠠᠯᠳᠠᠨ ᠬᠥᠪᠡᠭᠦᠨ ᠦ᠌ ᠬᠤᠪᠢ ᠵᠠᠶᠠᠭᠠ ᠶ᠋ᠢ ᠪᠤᠷᠬᠠᠨ ᠳᠠᠭᠠᠭᠠᠨᠠ ᠪᠢᠵᠡ ᠭᠡᠳ ᠨᠢᠳᠦᠨ ᠦ᠌ ᠬᠢᠨᠢ ᠭᠠᠯ ᠪᠥᠬᠥᠬᠦ ᠳ᠋ᠦ᠍ ᠬᠦᠯᠦᠭ ᠮᠣᠷᠢᠨ ᠦᠦᠷᠰᠡᠨ ᠢᠨᠴᠠᠭᠠᠪᠠ᠃
ᠣᠢᠷᠠᠳ ᠤ᠋ᠨ ᠶᠡᠬᠡ ᠴᠡᠷᠢᠭ ᠬᠠᠭᠠᠨ ᠡᠵᠡᠨ ᠦ᠌ ᠵᠠᠬᠢᠶᠠᠰᠤ ᠶ᠋ᠢ ᠳᠡᠮᠵᠢᠬᠦ ᠮᠡᠲᠦ ᠬᠤᠷᠤᠢᠯᠠᠪᠠ᠃
ᠳᠣᠯᠣᠭᠠ
ᠭᠠᠯᠳᠠᠨ ᠡᠴᠢᠭᠡ ᠬᠣᠩ ᠲᠠᠢᠵᠢ ᠶ᠋ᠢᠨ ᠳᠣᠲᠣᠨᠣ ᠶ᠋ᠢᠨ ᠬᠥᠮᠦᠨ ᠳᠡᠮᠪᠡᠷᠢᠯ ᠵᠠᠩᠵᠤᠨ ᠤ᠋ ᠴᠢᠨᠳᠠᠷ ᠢ᠋ ᠲᠥᠪᠡᠳ ᠲᠦ᠍ ᠲᠠᠬᠢᠯ ᠤ᠋ᠨ ᠳᠤᠭᠠᠩ ᠳ᠋ᠤ᠌ ᠪᠠᠢᠷᠢᠯᠠᠭᠤᠯᠤᠭᠰᠠᠨ ᠪᠢᠯᠡ᠃ ᠣᠢᠷᠠᠳ ᠵᠠᠩᠵᠤᠨ ᠤ᠋ ᠴᠢᠨᠳᠠᠷ ᠢ᠋ ᠭᠡᠷᠡᠯᠲᠦ ᠪᠦᠷᠭᠦᠳ ᠦ᠋ᠨ ᠬᠦᠵᠦᠭᠦᠨ ᠳ᠋ᠦ᠍ ᠪᠤᠮᠪᠠᠯᠠᠨ ᠵᠡᠭᠦᠯᠭᠡᠵᠦ᠂ ᠵᠡᠭᠦᠨᠭᠠᠷ ᠤ᠋ᠨ ᠨᠤᠲᠤᠭ ᠢ᠋ᠶ᠋ᠠᠷ ᠲᠦᠭᠡᠭᠡᠵᠦ ᠰᠠᠴᠤᠭᠰᠠᠨ ᠭᠡᠳᠡᠭ᠃
ᠽᠠᠮᠪᠤᠭᠠᠷᠪᠤ ᠠᠭᠤᠯᠠ ᠶ᠋ᠢᠨ ᠪᠠᠯᠠ᠋ᠴᠠ ᠣᠢᠷᠠᠳ ᠤ᠋ᠨ ᠮᠣᠷᠢᠲᠠᠨ ᠪᠠᠭᠠᠲᠤᠷ ᠤ᠋ᠳ ᠂ ᠴᠡᠷᠢᠭ ᠡᠷᠡᠰ ᠪᠦᠷᠭᠦᠳ ᠦ᠋ᠨ ᠳᠦᠷᠰᠦ ᠪᠦᠬᠦᠢ ᠲᠤᠭ ᠬᠢᠭᠢᠷᠢ ᠪᠡᠨ ᠡᠷᠭᠦᠨ ᠳᠠᠪᠬᠢᠯᠳᠤᠨᠠ᠃
ᠴᠢᠨᠳᠠᠷᠯᠠᠬᠤ ᠶᠣᠰᠣᠯᠠᠯ ᠲᠡᠭᠦᠰᠴᠡᠢ᠃
ᠮᠣᠷᠢᠲᠠᠨ ᠪᠠᠭᠠᠲᠤᠷ ᠤ᠋ᠳ ᠤ᠋ᠨ ᠲᠣᠭᠣᠰᠣᠨ ᠳᠤᠮᠳᠠ ᠤᠷᠢᠶᠠᠩᠬᠠᠢ ᠶ᠋ᠢᠨ ᠬᠣᠷᠵᠢᠯᠤ ᠪᠥᠬᠡ᠂
— ᠵᠢᠷᠦᠬᠡ ᠶ᠋ᠢ ᠲᠠᠬᠢᠬᠤ ᠦᠭᠡᠢ᠃ ᠴᠡᠷᠢᠭ ᠦ᠋ᠳ ᠲᠦ᠍ ᠬᠤᠪᠢᠶᠠᠵᠤ ᠠᠮᠰᠠᠭᠤᠯᠤᠨᠠ ᠭᠡᠵᠦ ᠬᠡᠯᠡᠪᠡ᠃ ᠠᠷᠴᠠ ᠪᠠᠭᠠᠲᠤᠷ᠂
— ᠲᠠ ᠥᠪᠡᠷ ᠢ᠋ᠶ᠋ᠡᠨ ᠠᠮᠰᠠᠵᠤ ᠦᠵᠡᠬᠦ ᠰᠠᠨᠠᠭᠠ ᠲᠠᠢ ᠤᠤ ? ᠭᠡᠵᠦ ᠠᠰᠠᠭᠤᠪᠠ᠃
— ᠮᠢᠨᠦ ᠵᠢᠷᠦᠬᠡ ᠴᠡᠭᠡᠵᠢᠨ ᠳ᠋ᠡᠭᠡᠨ ᠯᠤᠭᠰᠢᠨᠠ ᠭᠡᠮᠡᠨ ᠶᠥᠭᠡᠳᠡᠩᠭᠦᠢ ᠥᠭᠦᠯᠡᠪᠡ᠃ ᠠᠷᠴᠠ ᠪᠠᠭᠠᠲᠤᠷ ᠴᠢᠨᠠᠭᠰᠢᠭᠤᠯᠵᠤ᠂
— ᠲᠠᠨ ᠤ᠋ ᠵᠢᠷᠦᠬᠡ ᠬᠣᠶᠠᠷ ᠪᠣᠯ ᠦᠬᠦᠬᠦ ᠦᠭᠡᠢ ᠪᠤᠰᠤ ᠤᠤ? ᠭᠡᠵᠦ ᠰᠢᠪᠡᠨᠡᠪᠡ᠃ ᠬᠤᠷᠵᠢᠯᠤ ᠪᠥᠬᠡ ᠦᠯᠦ ᠲᠣᠭᠣᠨ᠂
— ᠴᠡᠷᠢᠭ ᠦ᠋ᠨ ᠵᠣᠷᠢᠭ ᠢ᠋ ᠴᠢᠩᠭᠠᠯᠠᠵᠤ᠂ ᠵᠢᠷᠦᠬᠡ ᠶ᠋ᠢ ᠨᠢ ᠡᠪᠡᠳᠳᠡᠭ ᠦᠭᠡᠢ ᠪᠣᠯᠭᠠᠵᠤ ᠪᠠᠢᠭᠠ ᠶᠤᠮ᠃ ᠬᠡᠷᠪᠡ ᠴᠡᠷᠢᠭ ᠵᠣᠷᠢᠭ ᠦᠭᠡᠢ ᠪᠣᠯ ᠠᠶᠤᠭᠰᠠᠨ ᠳ᠋ᠠᠭᠠᠨ ᠦᠩᠬᠦᠯᠴᠡᠭ ᠵᠢᠷᠦᠬᠡ ᠨᠢ ᠬᠠᠭᠠᠷᠠᠵᠤ ᠦᠬᠦᠳᠡᠭ᠃ ᠵᠣᠷᠢᠭ ᠵᠢᠷᠦᠬᠡ ᠶ᠋ᠢ ᠴᠢᠩᠭᠠᠯᠠᠬᠤ ᠶ᠋ᠢᠨ ᠲᠤᠯᠠᠳᠠ ᠴᠡᠷᠢᠭ ᠦ᠋ᠨ ᠵᠠᠩᠵᠤᠨ ᠤ᠋ ᠵᠢᠷᠦᠬᠡᠨ ᠡᠴᠡ ᠠᠮᠰᠠᠭᠤᠯᠵᠤ ᠪᠠᠢᠭᠠ ᠶᠤᠮ᠃ ᠳᠠᠢᠰᠤᠨ ᠤ᠋ ᠵᠢᠷᠦᠬᠡ ᠪᠡᠷ ᠲᠤᠭ ᠲᠠᠬᠢᠬᠤ ᠳ᠋ᠤ᠌ ᠴᠡᠷᠢᠭ ᠦ᠋ᠳ ᠪᠠᠶᠠᠰᠳᠠᠭ ᠪᠤᠰᠤ ᠤᠤ? ᠣᠢᠷᠠᠳ ᠤ᠋ᠨ ᠪᠠᠭᠠᠲᠤᠷ ᠴᠡᠷᠢᠭ ᠦ᠋ᠳ ᠠᠷᠢᠶᠠᠲᠠᠨ ᠤ᠋ ᠵᠢᠷᠦᠬᠡ ᠲᠡᠢ ᠪᠠᠢᠬᠤ ᠬᠡᠷᠡᠭᠲᠡᠢ ᠭᠡᠵᠦ ᠥᠭᠦᠯᠡᠪᠡ᠃
ᠢᠳᠡᠷ ᠵᠠᠯᠠᠭᠤᠬᠠᠨ ᠠᠷᠴᠠ ᠪᠠᠭᠠᠲᠤᠷ ᠬᠤᠷᠵᠢᠯᠦ ᠪᠥᠬᠡ ᠶ᠋ᠢᠨ ᠱᠠᠭᠠᠨᠲᠤ ᠴᠢᠮᠥᠭᠡ ᠶ᠋ᠢᠨ ᠬᠢ ᠰᠢᠭ ᠲᠣᠯᠣᠭᠠᠢ ᠶ᠋ᠢ ᠵᠢᠪᠡᠭᠦᠴᠡᠨ ᠬᠠᠷᠠᠵᠤ᠂
— ᠲᠠ ᠨᠠᠭᠠᠳᠤ ᠴᠢᠷᠠᠢ ᠵᠢᠰᠦ ᠪᠡᠨ ᠴᠢᠰᠤ ᠪᠠᠷ ᠤᠬᠢᠶᠠᠳᠠᠭ ᠶᠤᠮ ᠪᠢᠰᠢ ᠪᠢᠵᠡ ᠭᠡᠬᠦ ᠳ᠋ᠦ᠍ ᠂ ᠪᠥᠬᠡ ᠶ᠋ᠢᠨ ᠬᠥᠬᠡ ᠦᠳᠡᠭᠡᠷᠢ ᠮᠡᠲᠦ ᠴᠢᠷᠠᠢ ᠦᠯᠦ ᠬᠤᠪᠢᠷᠠᠵᠤ᠂
— ᠴᠡᠷᠢᠭ ᠦ᠋ᠳ ᠶᠠᠭᠠᠬᠢᠬᠤᠪ ᠳᠠ᠂ ᠦᠬᠦᠬᠦ ᠶ᠋ᠢᠨ ᠲᠥᠯᠥᠭᠡ ᠲᠥᠷᠥᠭᠰᠡᠨ ᠶᠦᠮ᠃ ᠨᠢᠭᠡ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠲᠡᠳᠡᠨ ᠦ᠌ ᠠᠮᠢ ᠨᠠᠰᠤ ᠶ᠋ᠢ ᠬᠡᠷᠡᠭᠯᠡᠬᠦ ᠶ᠋ᠢᠨ ᠲᠤᠯᠠᠳᠠ ᠲᠣᠮ ᠬᠢᠵᠦ ᠪᠠᠢᠭᠠ ᠶᠤᠮ᠃ ᠬᠥᠮᠦᠨ ᠦ᠌ ᠵᠢᠷᠦᠬᠡ ᠭᠠᠯ ᠳ᠋ᠤ᠌ ᠰᠢᠲᠠᠳᠠᠭ ᠦᠭᠡᠢ ᠤᠴᠢᠷᠠ᠋ᠴᠠ ᠲᠡᠮᠦᠷ ᠰᠢᠭ᠋ ᠬᠠᠲᠠᠭᠤ ᠪᠠᠢᠳᠠᠭ᠃ ᠠᠷᠢᠭᠤᠨ ᠴᠢᠨᠳᠠᠷ ᠬᠢᠬᠦ ᠳ᠋ᠦ᠍ ᠵᠢᠷᠦᠬᠡ ᠨᠢ ᠬᠡᠪ ᠢ᠋ᠶ᠋ᠡᠷ ᠦᠯᠡᠳᠡᠳᠡᠭ ᠲᠤᠯᠠ ᠲᠣᠷᠭᠠᠨ ᠴᠡᠷᠢᠭ ᠦ᠋ᠳ ᠲᠦ᠍ ᠲᠣᠮ ᠬᠢᠪᠡ᠃ ᠨᠠᠮᠠᠶ᠋ᠢ ᠠᠯᠲᠠᠢ ᠶ᠋ᠢᠨ ᠠᠭᠤᠯᠠ ᠶ᠋ᠢᠨ ᠳᠣᠮᠴᠢ ᠪᠥᠬᠡ ᠪᠣᠯᠭᠠᠭᠰᠠᠨ ᠨᠢ ᠲᠡᠢᠨ ᠳᠣᠯᠣᠭᠠᠨ ᠤ᠋ ᠠᠴᠢ ᠰᠢᠦ ᠳᠡ ᠭᠡᠮᠡᠨ ᠪᠠᠬᠠᠷᠬᠠᠯᠲᠠᠢ ᠬᠥᠬᠥᠷᠡᠨᠡ᠃
ᠮᠣᠷᠢᠲᠤ ᠴᠡᠷᠢᠭ ᠦ᠋ᠳ ᠦ᠋ᠨ ᠲᠣᠭᠣᠰᠣ ᠡᠷᠴᠢᠯᠡᠨᠡ᠃ ᠲᠣᠭᠣᠰᠣᠨ ᠤ᠋ ᠲᠦᠷᠦᠭᠦᠨ ᠳ᠋ᠦ᠍ ᠠᠷᠴᠠ ᠪᠠᠭᠠᠲᠤᠷ᠂ ᠬᠤᠷᠵᠢᠯᠤ ᠪᠥᠬᠡ ᠶ᠋ᠢᠨ ᠬᠠᠮᠲᠤ ᠳᠣᠪᠲᠣᠯᠭᠠᠬᠤ ᠪᠥᠯᠥᠭᠡ᠃ ᠬᠤᠷᠵᠢᠯᠦ ᠪᠥᠬᠡ ᠵᠠᠯᠠᠭᠤᠬᠠᠨ ᠪᠠᠭᠠᠲᠤᠷ ᠤ᠋ᠨ ᠴᠢᠷᠠᠢ ᠶ᠋ᠢ ᠪᠤᠯᠤᠩᠳᠠᠵᠤ ᠬᠠᠷᠠᠭᠠᠳ《ᠨᠠᠮᠠᠶ᠋ᠢ ᠦᠯᠦ ᠲᠣᠭᠣᠬᠤ ᠨᠢ ᠠᠷᠭᠠ ᠦᠭᠡᠢ᠃ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠢ᠋ ᠨᠤᠲᠤᠭ ᠲᠠᠭᠠᠨ ᠢᠷᠡᠬᠦ ᠪᠡᠷ ᠪᠢ ᠦᠨᠡ ᠦᠭᠡᠢᠳᠡᠬᠦ ᠪᠢᠵᠡ᠃ ᠴᠢᠰᠤ ᠤᠷᠤᠰᠤᠭᠰᠠᠨ ᠭᠠᠵᠠᠷ ᠲᠤ᠌ ᠰᠢᠷᠠ ᠬᠡᠷᠢᠶᠡ ᠲᠡᠢ ᠴᠣᠭ ᠣᠴᠢᠭᠠᠳ ᠪᠠᠭᠠᠲᠤᠷ ᠡᠷᠡ ᠨᠠᠰᠤ ᠪᠠᠷᠠᠪᠠᠯ ᠴᠢᠨᠳᠠᠷᠯᠠᠭᠠᠳ ᠪᠠᠢᠨᠠ ᠳᠠ᠃ ᠡᠨᠡ ᠠᠷᠴᠠ ᠪᠠᠭᠠᠲᠤᠷ ᠨᠢᠭᠡ ᠯᠡ ᠡᠳᠦᠷ ᠮᠢᠨᠦ ᠭᠠᠷ ᠢ᠋ᠶ᠋ᠠᠷ ᠴᠢᠨᠳᠠᠷᠯᠠᠭᠤᠯᠵᠤ᠂ ᠠᠳᠬᠣᠬᠠᠨ ᠵᠢᠷᠦᠬᠡ ᠨᠢ ᠴᠡᠷᠢᠭ ᠦ᠋ᠳ ᠦ᠋ᠨ ᠰᠢᠳᠦᠨ ᠦ᠌ ᠴᠢᠭᠵᠢᠶᠡᠰᠦ ᠪᠣᠯᠵᠤ ᠮᠡᠳᠡᠨᠡ᠃ ᠥᠨᠥᠳᠥᠷ ᠠᠮᠠ ᠠᠰᠠᠭᠤᠵᠤ ᠪᠠᠢᠭ》 ᠭᠡᠮᠡᠨ ᠣᠭᠲᠣ ᠬᠡᠷᠡᠭ ᠦᠭᠡᠢ ᠰᠢᠬᠠᠮ ᠵᠦᠢᠯ ᠢ᠋ ᠶᠣᠷᠣᠯᠠᠨ ᠪᠣᠳᠣᠨᠠ᠃ ᠠᠷᠴᠠ ᠪᠠᠭᠠᠲᠤᠷ ᠬᠡᠮᠡᠭᠴᠢ ᠨᠢ ᠴᠣᠷᠣᠰ ᠠᠢᠮᠠᠭ ᠤ᠋ᠨ ᠳᠡᠮᠪᠡᠷᠢᠯ ᠵᠠᠩᠵᠤᠨ ᠤ᠋ ᠶᠡᠬᠡ ᠬᠥᠪᠡᠭᠦᠨ ᠪᠢᠯᠡ᠃
ᠨᠠᠢ᠍ᠮᠠ
ᠭᠠᠯᠳᠠᠨ ᠢ᠋ ᠲᠥᠪᠡᠳ ᠲᠦ᠍ ᠱᠠᠪᠢᠯᠠᠨ ᠰᠠᠭᠤᠭᠰᠠᠨ ᠤ᠋ ᠡᠬᠢᠨ ᠦ᠌ ᠵᠢᠷᠭᠤᠭᠠᠨ ᠵᠢᠯ ᠳ᠋ᠦ᠍ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠲᠡᠭᠦᠨ ᠳ᠋ᠦ᠍ ᠲᠦᠪᠡᠭ ᠤᠴᠠᠷᠠᠭᠤᠯᠤᠭᠰᠠᠨ ᠪᠢᠯᠡ᠁
ᠬᠠᠰᠠᠭ ᠤ᠋ᠨ ᠶᠠᠩᠭᠢᠷ ᠰᠤᠯᠲᠠᠨ ᠪᠠᠢᠨ ᠪᠠᠢᠨ ᠬᠢᠯᠢ ᠵᠥᠷᠢᠴᠡᠵᠦ᠂ ᠮᠠᠯ ᠳᠡᠭᠡᠷᠡᠮᠳᠡᠨ ᠨᠤᠲᠤᠭ ᠤ᠋ᠨ ᠠᠷᠠᠳ ᠢᠷᠭᠡᠳ ᠢ᠋ ᠠᠶᠤᠯᠭᠠᠵᠤ ᠰᠣᠴᠢᠭᠠᠭᠠᠳ ᠭᠠᠵᠠᠷ ᠪᠤᠯᠢᠶᠠᠯᠳᠤᠭᠰᠠᠨ ᠤ᠋ ᠬᠠᠷᠢᠭᠤ ᠳ᠋ᠤ᠌ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠡᠯᠴᠢ ᠢᠯᠡᠭᠡᠬᠦ ᠪᠡᠷ ᠪᠣᠯᠵᠠᠢ᠃ ᠬᠣᠩ ᠲᠠᠢᠵᠢ ᠥᠪᠡᠷ ᠦ᠋ᠨ ᠪᠣᠳᠣᠯ ᠢ᠋ ᠴᠢᠭᠤᠯᠭᠠᠨ ᠳ᠋ᠤ᠌ ᠥᠭᠦᠯᠡᠬᠦ ᠳ᠋ᠦ᠍᠂
— ᠶᠠᠩᠭᠢᠷ ᠰᠤᠯᠲᠠᠨ ᠪᠣᠯᠪᠠᠰᠤ ᠤᠯᠤᠰ ᠤ᠋ᠨ ᠡᠵᠡᠨ ᠪᠤᠰᠤ ᠳᠡᠭᠡᠷᠡᠮ ᠦ᠋ᠨ ᠪᠦᠯᠦᠭ ᠦ᠋ᠨ ᠲᠣᠯᠣᠭᠠᠢᠯᠠᠭᠴᠢ᠂ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠨᠤᠲᠤᠭ ᠤᠷᠤᠭᠤ ᠥᠩᠭᠡᠯᠵᠡᠨ ᠨᠤᠲᠤᠭ ᠪᠤᠯᠢᠶᠠᠵᠤ ᠰᠠᠭᠤᠬᠤ ᠨᠢ ᠪᠠᠰᠤᠵᠤ ᠳᠣᠷᠣᠮᠵᠢᠯᠠᠭᠰᠠᠨ ᠬᠡᠷᠡᠭ ᠪᠣᠯᠤᠨᠠ᠃ ᠨᠢᠭᠡ ᠤᠳᠠᠭᠠ ᠲᠡᠭᠦᠨ ᠳ᠋ᠦ᠍ ᠡᠪ ᠢ᠋ ᠬᠦᠰᠡᠭᠰᠡᠨ ᠪᠢᠴᠢᠭ ᠢᠯᠡᠭᠡᠶᠡ᠃ ᠳᠠᠷᠠᠭᠠᠴᠢ ᠶ᠋ᠢᠨ ᠤᠳᠠᠭᠠ ᠰᠢᠭᠤᠳ ᠬᠥᠨᠥᠭᠡᠶᠡ ᠭᠡᠮᠡᠨ ᠶᠡᠬᠡᠰ ᠳᠡᠭᠡᠳᠦᠰ ᠠᠢᠯᠠᠳᠪᠠ᠃
ᠬᠣᠩ ᠲᠠᠢᠵᠢ ᠪᠤᠳᠤᠷᠤᠨ᠄《ᠶᠠᠩᠭᠢᠷ ᠪᠣᠯ ᠥᠯᠥᠭᠴᠢᠨ ᠴᠢᠨᠣᠠ ᠬᠥᠬᠥᠵᠦ ᠥᠰᠦᠭᠰᠡᠨ ᠭᠡᠳᠡᠭ᠃ ᠡᠢᠮᠦ ᠬᠥᠮᠦᠨ ᠦᠭᠡ ᠣᠢᠯᠠᠭᠠᠬᠤ ᠪᠣᠯᠪᠠ ᠤᠤ? ᠦᠭᠡ ᠣᠢᠯᠠᠭᠠᠳᠠᠭ ᠦᠭᠡᠢ ᠲᠣᠯᠣᠭᠠᠢ ᠳ᠋ᠤ᠌ ᠮᠡᠰᠡ ᠬᠡᠷᠡᠭᠯᠡᠬᠦ ᠠᠪᠠᠰᠤ ᠳᠤᠭᠤᠯᠭᠠᠪᠤᠷᠢ ᠲᠠᠢ ᠪᠣᠯᠤᠨᠠ᠃ ᠲᠣᠯᠣᠭᠠᠢ ᠶ᠋ᠢ ᠨᠢ ᠴᠠᠪᠴᠢᠬᠤᠠ᠋ᠴᠠ ᠡᠮᠦᠨᠡ ᠪᠢᠴᠢᠭ ᠢᠯᠡᠭᠡᠶᠡ᠃ ᠪᠢᠴᠢᠭ ᠦ᠋ᠨ ᠬᠠᠷᠢᠭᠤᠠ᠋ᠴᠠ ᠶᠠᠯᠠ ᠠᠰᠠᠭᠤᠬᠤ ᠡᠰᠡᠬᠦ ᠪᠡᠨ ᠰᠢᠢᠳᠦᠶᠡ᠃ ᠬᠠᠷᠠᠬᠤᠯᠠ ᠨᠣᠶᠠᠨ ᠤ᠋ ᠬᠦᠦ ᠲᠡᠢ ᠬᠠᠷᠭᠤᠯᠳᠤᠵᠤ ᠭᠡᠨᠡ᠃ ᠳᠡᠭᠡᠷᠡᠮᠴᠢᠳ ᠲᠣᠰᠤᠮ ᠢ᠋ᠶ᠋ᠠᠨ ᠦᠭᠡ ᠬᠡᠯᠡ ᠪᠡᠨ ᠣᠯᠤᠯᠴᠠᠬᠤ ᠳ᠋ᠤ᠌ ᠪᠡᠷᠬᠡ ᠲᠡᠢ ᠶᠦᠮ》᠃ ᠲᠤᠯᠤᠯᠳᠤᠭᠠᠨ ᠡᠬᠢᠯᠡᠬᠦ ᠡᠴᠡ ᠬᠡᠳᠦ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠬᠣᠩ ᠲᠠᠢᠵᠢ ᠢᠢᠨ ᠬᠦ᠌ ᠪᠣᠳᠣᠯᠬᠢᠯᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠳᠡᠮᠪᠡᠷᠢᠯ ᠵᠠᠩᠵᠤᠨ ᠢ᠋ ᠳᠠᠭᠤᠳᠠᠵᠤ᠄
— ᠴᠡᠷᠢᠭ ᠦ᠋ᠳ ᠦ᠋ᠨ ᠨᠢᠭᠤᠷ ᠢ᠋ ᠬᠠᠷᠠ ᠰᠢᠪᠠᠷ ᠢ᠋ᠶ᠋ᠠᠷ ᠲᠠᠯᠠᠯᠠᠵᠤ ᠪᠣᠳᠣ᠂ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠣᠷᠣᠬᠤ ᠳ᠋ᠤ᠌ ᠬᠥᠮᠦᠨ ᠪᠤᠰᠤ ᠬᠡᠯᠪᠡᠷᠢ ᠳᠦᠷᠰᠦ ᠲᠡᠢ ᠪᠠᠢᠭ᠃ ᠶᠠᠩᠭᠢᠷ ᠢ᠋ ᠢᠷᠡᠭᠦᠯ᠂ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠳᠠᠭᠤᠳᠠᠨᠠ᠃ ᠢᠷᠡᠭᠦᠯ ᠲᠤᠯᠤᠯᠳᠤᠭᠠᠨ ᠢ᠋ ᠰᠥᠨᠢ ᠬᠢᠨᠡ᠃ ᠬᠠᠷᠠᠩᠭᠤᠢ ᠶ᠋ᠢ ᠭᠡᠷᠡᠯᠲᠦᠭᠦᠯᠬᠦ ᠶ᠋ᠢᠨ ᠲᠤᠯᠠᠳᠠ ᠪᠦᠷᠭᠦᠳ ᠦ᠋ᠨ ᠬᠦᠵᠦᠭᠦᠨ ᠳ᠋ᠦ᠍ ᠣᠯᠣᠰᠣ ᠠᠰᠠᠭᠠᠵᠤ ᠭᠠᠯᠲᠤ ᠪᠠᠮᠪᠠᠷ ᠮᠡᠲᠦ ᠪᠣᠯᠭᠠ᠃ ᠰᠥᠨᠢ ᠭᠡᠷᠡᠯᠲᠦᠳᠡᠭ ᠶᠣᠰᠣ ᠪᠠᠷ ᠬᠣᠶᠠᠷ ᠪᠦᠷᠭᠦᠳ ᠢ᠋ ᠪᠣᠳᠣ᠂ ᠣᠢᠷᠠᠳ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠠᠶᠤᠮᠰᠢᠬᠤ ᠶᠠᠪᠤᠳᠠᠯ ᠭᠠᠷᠭᠠᠬᠤ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠤᠴᠢᠷ ᠪᠠᠢᠳᠠᠯ ᠢ᠋ ᠲᠠᠢᠯᠪᠤᠷᠢᠯᠠᠬᠤ ᠶ᠋ᠢ ᠠᠷᠪᠠᠲᠤ᠂ ᠵᠠᠭᠤᠲᠤ᠂ ᠮᠢᠩᠭᠠᠲᠤ ᠶ᠋ᠢᠨ ᠨᠣᠶᠠᠳ ᠲᠤ᠌ ᠬᠡᠯᠡᠭᠡᠷᠡᠢ᠃ ᠪᠢ ᠡᠨᠡ ᠤᠳᠠᠭᠠ ᠵᠢᠷᠦᠬᠡ ᠶ᠋ᠢ ᠨᠢ ᠦᠬᠦᠭᠦᠯᠳᠡᠭ ᠠᠷᠭᠠ ᠬᠡᠷᠡᠭᠯᠡᠨᠡ᠃ ᠠᠮᠢᠳᠤ ᠮᠥᠷᠲᠡᠭᠡᠨ ᠵᠢᠷᠦᠬᠡ ᠨᠢ ᠦᠬᠦᠭᠰᠡᠨ ᠴᠡᠷᠢᠭ ᠬᠥᠯᠳᠡᠭᠦᠰᠦ ᠰᠢᠭ ᠬᠥᠰᠢᠨᠡ ᠰᠢᠦ ᠳᠡ ᠭᠡᠮᠡᠨ ᠥᠭᠦᠯᠡᠪᠡ᠃
ᠳᠣᠯᠣᠭᠠᠨ ᠤ᠋ ᠲᠡᠭᠦᠰᠬᠡᠯ ᠶᠦᠮ ᠤᠤ᠂ ᠡᠬᠢᠯᠡᠯ ᠶᠦᠮ ᠤᠤ ᠦᠯᠦ ᠮᠡᠳᠡᠭᠳᠡᠨᠡ᠃ ᠦᠬᠦᠳᠡᠯ ᠬᠡᠭᠦᠷ᠂ ᠪᠤᠲᠠᠷᠠᠵᠤ ᠰᠠᠯᠵᠤ ᠤᠨᠠᠭᠰᠠᠨ ᠣᠨᠢ᠂ ᠲᠣᠭᠣᠨᠣ᠂ ᠴᠢᠰᠤ ᠲᠠᠢ ᠬᠤᠪᠴᠠᠰᠤ᠂ ᠥᠷᠥᠭᠡᠰᠦᠨ ᠭᠠᠷ ᠬᠥᠯ ᠦᠷᠭᠦᠯᠵᠢᠯᠡᠨᠡ᠃
ᠬᠠᠰᠬᠢᠷᠤᠯᠳᠤᠬᠤ᠂ ᠴᠠᠪᠴᠢᠯᠳᠤᠬᠤ ᠴᠢᠮᠡᠭᠡᠨ ᠳᠤᠮᠳᠠ ᠡᠷᠡᠮᠡᠬᠡᠢ ᠪᠠᠭᠠᠲᠤᠷ ᠭᠠᠷᠴᠤ ᠢᠷᠡᠨᠡ᠃ ᠡᠨᠡ ᠬᠥᠮᠦᠨ ᠪᠣᠯ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠠᠵᠢ᠃ ᠲᠡᠷᠡ ᠪᠡᠷ ᠨᠠᠷᠢᠨ ᠰᠤᠷ ᠢ᠋ᠶ᠋ᠠᠷ ᠬᠣᠶᠠᠷ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠱᠤ᠌ ᠶ᠋ᠢ ᠣᠷᠢᠶᠠᠵᠤ᠂ ᠮᠠᠬᠢᠷ ᠰᠡᠯᠡᠮᠡ ᠠᠳᠬᠤᠵᠤ᠂ ᠣᠷᠣᠢ ᠳ᠋ᠠᠭᠠᠨ ᠰᠤᠮᠤ ᠶ᠋ᠢᠨ ᠵᠡᠪᠡ ᠪᠦᠬᠦᠢ ᠲᠡᠮᠦᠷ ᠳᠤᠭᠤᠯᠠᠭᠠ ᠡᠮᠦᠰᠴᠡᠢ᠃ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶ᠋ᠢᠨ ᠨᠢᠭᠤᠷ ᠬᠥᠯᠥᠰᠥᠨ ᠳ᠋ᠡᠭᠡᠨ ᠵᠠᠭᠠᠯᠳᠤᠵᠤ ᠬᠠᠴᠠᠷ ᠳᠡᠭᠡᠭᠦᠷ ᠨᠢ ᠬᠠᠷᠠ ᠬᠥᠯᠥᠰᠥ ᠤᠷᠤᠰᠤᠭᠠᠳ ᠭᠦᠨ ᠰᠣᠷᠪᠢ ᠰᠢᠭ᠋ ᠬᠠᠷᠠᠭᠳᠠᠨᠠ᠃
ᠮᠣᠷᠢᠳ ᠤ᠋ᠨ ᠲᠤᠭᠤᠷᠠᠢ ᠪᠠᠷ ᠭᠠᠵᠠᠷ ᠪᠥᠮᠪᠥᠷᠢᠳᠦᠨ ᠤᠬᠤᠰᠬᠢᠬᠤ ᠳ᠋ᠤ᠌ ᠰᠡᠯᠡᠮᠡ ᠵᠢᠳᠠ ᠶ᠋ᠢᠨ ᠣᠯᠠᠨ ᠦᠵᠦᠭᠦᠷ ᠢᠷᠡᠰᠬᠢᠨ ᠲᠩᠷᠢ ᠴᠢᠴᠢᠵᠦ᠂ ᠬᠥᠬᠡ ᠥᠩᠭᠡ ᠶ᠋ᠢᠨ ᠲᠤᠭ ᠬᠢᠭᠢᠷᠢ ᠵᠣᠷᠢᠭᠲᠤ ᠡᠷᠡᠰ ᠢ᠋ ᠳᠠᠭᠤᠳᠠᠬᠤ ᠮᠡᠲᠦ ᠨᠠᠮᠢᠯᠵᠠᠨ ᠮᠣᠷᠢᠲᠤ ᠴᠡᠷᠢᠭ ᠦ᠋ᠳ ᠦᠶᠡᠷᠯᠡᠪᠡ᠃
ᠡᠮᠦᠨᠡᠬᠡᠨ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶᠠᠩᠭᠢᠷ ᠰᠤᠯᠲᠠᠨ ᠳ᠋ᠤ᠌ ᠡᠯᠴᠢ ᠵᠠᠷᠤᠵᠤ ᠴᠠᠭᠠᠨ ᠬᠤᠷᠠᠭᠠ ᠶ᠋ᠢᠨ ᠡᠯᠳᠡᠭᠦᠷ ᠨᠢ ᠬᠠᠨᠤᠭᠰᠠᠨ ᠲᠣᠷᠭᠠ ᠰᠢᠭ᠋ ᠠᠷᠠᠰᠤᠨ ᠳᠡᠭᠡᠷᠡ ᠳᠤᠲᠠᠭᠤ ᠰᠢᠲᠠᠭᠠᠭᠰᠠᠨ ᠬᠠᠷᠭᠠᠨᠠ ᠶ᠋ᠢᠨ ᠬᠠᠷᠠ ᠬᠦ ᠪᠡᠷ《ᠡᠪ ᠢ᠋ ᠪᠢᠴᠢᠶᠡ᠃ ᠨᠤᠲᠤᠭ ᠨᠤᠲᠤᠭ ᠲᠠᠭᠠᠨ ᠡᠵᠡᠨ ᠰᠠᠭᠤᠶᠠ᠃ ᠥᠲᠡᠭᠦᠰ ᠡᠮᠡᠰ ᠦ᠋ᠨ ᠨᠢᠯᠪᠤᠰᠤ ᠤᠷᠤᠰᠬᠠᠵᠤ᠂ ᠥᠨᠥᠴᠢᠨ ᠬᠡᠦᠬᠡᠳ ᠦ᠋ᠨ ᠲᠣᠭᠠ ᠶ᠋ᠢ ᠨᠡᠮᠡᠬᠦ ᠪᠡᠨ ᠪᠣᠯᠢᠶᠠ》 ᠭᠡᠵᠦ ᠪᠢᠴᠢᠭᠡᠳ ᠢᠯᠡᠭᠡᠵᠡᠢ᠃ ᠡᠨᠡ ᠶᠠᠪᠤᠳᠠᠯ ᠬᠡᠭᠡᠷᠡ ᠶ᠋ᠢᠨ ᠠᠰᠠᠷ ᠤ᠋ᠨ ᠡᠭᠦᠳᠡᠨ ᠳ᠋ᠦ᠍ ᠪᠣᠯᠤᠭᠰᠠᠨ ᠪᠢᠯᠡ᠃
— ᠡᠭᠦᠨ ᠢ᠋ ᠬᠡᠨ ᠶᠠᠩᠭᠢᠷ ᠰᠤᠯᠲᠠᠨ ᠳ᠋ᠤ᠌ ᠠᠪᠠᠴᠢᠨᠠ ᠭᠡᠬᠦ ᠳ᠋ᠦ᠍ ᠵᠠᠩᠵᠤᠨ ᠳᠡᠮᠪᠡᠷᠢᠯ᠂
— ᠪᠢ ᠪᠣᠯᠬᠤ ᠤᠤ? ᠭᠡᠮᠡᠨ ᠲᠦᠷᠦᠭᠦᠨ ᠳᠡᠭᠡᠷᠡ ᠪᠡᠨ ᠪᠣᠰᠤᠯᠠ᠃ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ᠂
— ᠶᠠᠩᠭᠢᠷ ᠵᠢᠪᠡᠭᠦᠨ ᠠᠷᠠᠨᠰᠢᠨ ᠲᠠᠢ᠃ ᠠᠮᠢ ᠡᠷᠡᠰᠳᠡᠪᠡᠯ ᠶᠠᠭᠠᠬᠢᠨᠠ? ᠭᠡᠮᠡᠨ ᠲᠡᠭᠦᠨ ᠢ᠋ ᠥᠷᠥᠪᠳᠦᠨ ᠲᠤᠷᠰᠢᠪᠠ᠃ ᠳᠡᠮᠪᠡᠷᠢᠯ᠂
— ᠲᠡᠢᠨ ᠳ᠋ᠦ᠍ ᠦᠷᠡᠭᠳᠡᠬᠦ ᠶ᠋ᠢᠨ ᠲᠤᠯᠠᠳᠠ ᠨᠠᠳᠠ ᠠᠮᠢ ᠪᠠᠢᠭᠠ ᠪᠤᠰᠤ ᠤᠤ? ᠭᠡᠵᠦ ᠡᠷᠡᠰᠬᠡᠨ ᠥᠭᠦᠯᠡᠪᠡ᠃
ᠲᠤᠯᠤᠯᠳᠤᠭᠠᠨ ᠤ᠋ ᠵᠠᠪᠰᠠᠷᠯᠠᠭᠠ ᠪᠠᠷ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠥᠨᠳᠥᠷ ᠳᠠᠭᠤ ᠪᠠᠷ᠂
— ᠠᠭᠤᠯᠠ ᠶ᠋ᠢᠨ ᠰᠠᠷᠬᠢᠶᠠᠭ ᠬᠡᠭᠦᠷ ᠢ᠋ᠶ᠋ᠡᠷ ᠳᠦᠭᠦᠷᠪᠡ᠃ ᠤᠭ ᠨᠢ ᠲᠥᠪᠡᠳ ᠤᠷᠤᠭᠤ ᠨᠡᠭᠦᠭᠰᠡᠨ ᠬᠣᠱᠤᠳ ᠣᠪᠣᠭᠲᠠᠨ᠂ ᠢᠵᠢᠯ ᠮᠥᠷᠡᠨ ᠲᠠᠢᠰᠢ ᠣᠳᠤᠭᠰᠠᠨ ᠲᠣᠷᠭᠤᠳ᠂ ᠳᠥᠷᠪᠡᠳ ᠤᠭᠰᠠᠭᠠᠲᠠᠨ ᠢ᠋ᠶ᠋ᠠᠨ ᠡᠷᠭᠢᠭᠦᠯᠦᠨ ᠬᠤᠮᠢᠵᠤ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠭᠣᠯᠣᠮᠲᠠ ᠶ᠋ᠢ ᠠᠰᠠᠭᠠᠭᠰᠠᠨ ᠶᠤᠮᠰᠠᠨ᠃ ᠭᠡᠲᠡᠯᠡ ᠬᠠᠰᠠᠭ ᠤ᠋ᠨ ᠶᠠᠩᠭᠢᠷ ᠰᠤᠯᠲᠠᠨ ᠮᠢᠨᠦ ᠡᠯᠴᠢ ᠶ᠋ᠢ ᠠᠯᠠᠵᠤ ᠨᠤᠲᠤᠭ ᠤ᠋ᠨ ᠳᠡᠭᠡᠰᠦ ᠰᠡᠲᠡᠯᠵᠦ ᠶᠣᠰᠣ ᠦᠭᠡᠢ ᠵᠠᠩᠨᠠᠪᠠ᠃ ᠨᠠᠳᠠᠠ᠋ᠴᠠ ᠡᠬᠢᠯᠡᠭᠡᠳ ᠮᠣᠩᠭᠣᠯ ᠤ᠋ᠨ ᠨᠡᠭᠦᠳᠡᠯᠴᠢᠳ ᠢ᠋ ᠨᠢᠭᠡᠨ ᠲᠤᠭ ᠤ᠋ᠨ ᠳᠣᠣᠷᠠ ᠰᠢᠬᠠᠮᠳᠠᠨ ᠪᠥᠭᠡᠮᠨᠡᠷᠡᠭᠦᠯᠬᠦ ᠶᠣᠰᠣᠲᠠᠢ ᠭᠡᠵᠦ ᠬᠡᠭᠡᠷᠡ ᠶ᠋ᠢᠨ ᠠᠰᠠᠷ ᠤ᠋ᠨ ᠡᠷᠭᠢᠨ ᠲᠣᠭᠣᠷᠢᠨ ᠳ᠋ᠤ᠌ ᠪᠣᠢ ᠵᠠᠩᠵᠤᠨ ᠪᠠᠭᠠᠲᠤᠷ ᠤ᠋ᠳ ᠰᠢᠳᠠᠷ ᠨᠣᠶᠠᠳ᠂ ᠲᠣᠷᠭᠠᠨ ᠴᠡᠷᠢᠭ ᠦ᠋ᠳ ᠲᠦ᠍ ᠥᠭᠦᠯᠡᠪᠡ᠃ ᠳᠡᠮᠪᠡᠷᠢᠯ ᠠᠰᠠᠭᠤᠷᠤᠨ᠂
— ᠬᠣᠩ ᠲᠠᠢᠵᠢ ᠲᠠ ᠬᠠᠲᠠᠭᠤ ᠦᠭᠡ ᠶᠠᠭᠤᠨ ᠳ᠋ᠤ᠌ ᠤᠷᠤᠰᠬᠠᠪᠠ᠃ ᠨᠠᠮᠠᠶ᠋ᠢ ᠦᠳᠲᠡᠷ ᠲᠦᠷᠭᠡᠨ ᠣᠳᠬᠤ ᠶ᠋ᠢ ᠪᠣᠯᠭᠣᠭᠠᠨᠠ ᠤᠤ? ᠭᠡᠯᠡ᠃ ᠬᠣᠩ ᠲᠠᠢᠵᠢ᠂
— ᠪᠠᠭ ᠴᠡᠷᠢᠭ ᠳᠠᠭᠠᠭᠤᠯᠵᠤ ᠣᠳ᠃
ᠪᠤᠰᠤᠳ ᠨᠢ ᠥᠨᠳᠥᠷᠯᠢᠭ ᠲᠦ᠍ ᠬᠠᠷᠠᠭᠤᠯᠳᠠᠵᠤ ᠬᠣᠴᠣᠷᠤᠭᠠᠳ ᠳᠡᠮᠪᠡᠷᠢᠯ ᠭᠠᠭᠴᠠᠭᠠᠷ ᠰᠤᠯᠲᠠᠨ ᠳ᠋ᠤ᠌ ᠣᠴᠢ! ᠭᠡᠪᠡ᠃ ᠣᠷᠣᠢᠬᠠᠨ ᠪᠠᠭᠠ ᠴᠡᠷᠢᠭ ᠪᠤᠴᠠᠵᠤ ᠢᠷᠡᠪᠡ᠃ ᠡᠯᠳᠡᠭᠦᠷ ᠨᠢ ᠬᠠᠨᠤᠭᠰᠠᠨ ᠴᠠᠭᠠᠨ ᠬᠤᠷᠠᠭᠠᠨ ᠤ᠋ ᠠᠷᠠᠰᠤᠨ ᠳ᠋ᠤ᠌ ᠳᠡᠮᠪᠡᠷᠢᠯ ᠵᠠᠩᠵᠤᠨ ᠤ᠋ ᠴᠠᠪᠴᠢᠭᠤᠯᠤᠭᠰᠠᠨ ᠲᠣᠯᠣᠭᠠᠢ ᠶ᠋ᠢ ᠪᠣᠭᠣᠵᠠᠢ᠃ ᠨᠢᠭᠡᠨ ᠴᠡᠷᠢᠭ᠂
— ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠮᠢᠨᠢ ᠥᠷᠥᠰᠢᠶᠡ! ᠲᠠᠨ ᠤ᠋ ᠡᠯᠴᠢ ᠶ᠋ᠢ ᠬᠣᠷᠣᠭᠠᠪᠠ᠃ ᠲᠠᠨ ᠢ᠋ ᠪᠠᠰᠤᠮᠵᠢᠯᠠᠨ ᠵᠠᠩᠵᠤᠨ ᠤ᠋ ᠲᠣᠯᠣᠭᠠᠢ ᠪᠠᠷ ᠬᠠᠷᠢᠭᠤ ᠪᠠᠷᠢᠯᠠ ᠭᠡᠪᠡ᠃ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠵᠥᠷᠢᠭᠦᠦ ᠬᠠᠷᠠᠵᠤ᠂
— ᠶᠠᠩᠭᠢᠷ ᠰᠤᠯᠲᠠᠨ ᠢ᠋ ᠢᠷᠡᠭᠦᠯ᠂ ᠬᠠᠯᠵᠠ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠳᠠᠭᠤᠳᠠ᠃ ᠭᠠᠯᠳᠠᠮᠠ ᠪᠠᠭᠠᠲᠤᠷ ᠢ᠋ ᠪᠡᠯᠡᠳᠭᠡ᠃ ᠳᠡᠮᠪᠡᠷᠢᠯ ᠵᠠᠩᠵᠤᠨ ᠤ᠋ ᠲᠣᠯᠣᠭᠠᠢ ᠶ᠋ᠢ ᠪᠦᠷᠭᠦᠳ ᠦ᠋ᠨ ᠬᠠᠯᠢᠯ ᠳ᠋ᠤ᠌ ᠠᠪᠠᠴᠢᠵᠤ ᠳᠡᠯᠪᠢ ᠭᠡᠪᠡ᠃
ᠵᠠᠩ ᠥᠨᠳᠥᠷ ᠬᠠᠳᠠᠨ ᠬᠠᠯᠢᠯ ᠤ᠋ᠨ ᠣᠷᠣᠢ ᠳ᠋ᠤ᠌ ᠰᠡᠬᠦᠢᠬᠦ ᠡᠯᠢᠭᠡᠨ ᠬᠠᠳᠠᠨᠠ ᠳᠡᠮᠪᠡᠷᠢᠯ ᠦ᠋ᠨ ᠰᠠᠩᠭᠠᠰ ᠴᠠᠢᠷᠠᠵᠤ ᠪᠠᠢᠯᠠ᠃ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶ᠋ᠢᠨ ᠬᠠᠷᠠᠴᠠ ᠲᠠᠢᠰᠢ ᠪᠠᠨ ᠲᠤᠰᠪᠠ᠃
ᠲᠡᠭᠦᠨ ᠦ᠌ ᠨᠢᠳᠦ ᠴᠢᠭᠢᠭ ᠳᠠᠭᠠᠭᠠᠵᠤ ᠳᠣᠭᠣᠯᠠᠩ ᠨᠢᠯᠪᠤᠰᠤ ᠬᠤᠷᠠᠵᠠᠢ᠃ ᠭᠡᠪᠡᠴᠦ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠲᠥᠷᠥᠯᠬᠢ ᠶ᠋ᠢᠨ ᠬᠠᠲᠠᠭᠤ ᠴᠢᠩᠭᠠ ᠵᠠᠩ ᠲᠠᠢ ᠲᠤᠯᠠ ᠬᠥᠮᠥᠭᠡᠢ ᠵᠠᠭᠤᠵᠤ᠂ ᠨᠢᠯᠪᠤᠰᠤ ᠪᠠᠨ ᠵᠠᠯᠭᠢᠵᠤ ᠵᠣᠭᠰᠣᠨᠠ᠃《ᠳᠡᠮᠪᠡᠷᠢᠯ ᠮᠢᠨᠢ ᠳᠠᠩᠴᠤ ᠶᠠᠭᠠᠬᠢᠪᠠ ᠳᠠ᠃ ᠴᠢᠨᠦᠬᠢ ᠪᠡᠨ ᠠᠮᠢ ᠶ᠋ᠢ ᠪᠢ ᠵᠣᠯᠢᠪᠠ᠃ ᠶᠠᠩᠭᠢᠷ ᠢ᠋ ᠮᠡᠳᠡᠭᠰᠡᠭᠡᠷ ᠪᠠᠢᠵᠤ ᠶᠠᠭᠤᠨ ᠳ᠋ᠤ᠌ ᠡᠯᠴᠢ ᠵᠠᠷᠤᠪᠠ᠃ ᠭᠡᠨᠡᠨ ᠵᠠᠩ ᠠ᠋ᠴᠠ ᠪᠠᠨ ᠬᠡᠵᠢᠶᠡ ᠰᠠᠯᠤᠨᠠ ᠪᠣᠢ? ᠪᠢ᠃ ᠠᠩᠭᠠᠵᠤ ᠴᠠᠩᠭᠠᠨ ᠥᠯᠥᠰᠴᠦ ᠳᠠᠩᠴᠤ ᠮᠣᠷᠢᠨ ᠳᠡᠯ ᠳᠡᠭᠡᠷᠡ ᠥᠩᠭᠡᠷᠡᠭᠰᠡᠨ ᠡᠳᠦᠷ ᠬᠣᠨᠣᠭ ᠤ᠋ᠨ ᠲᠣᠭᠠ ᠬᠡᠳᠦ ᠪᠣᠢ? ᠲᠡᠷᠡ ᠣᠯᠠᠨ ᠡᠳᠦᠷ ᠰᠥᠨᠢ ᠳᠡᠮᠪᠡᠷᠢᠯ ᠮᠢᠨᠢ ᠨᠠᠳᠠ ᠨᠢᠳᠦ ᠴᠢᠬᠢ ᠪᠣᠯᠵᠤ ᠪᠠᠢᠭᠰᠠᠨ ᠢ᠋ ᠪᠢ ᠮᠠᠷᠲᠠᠨᠠ ᠭᠡᠵᠦ ᠤᠤ? ᠬᠠᠳᠠ ᠰᠠᠭᠤᠭᠰᠠᠨ ᠡᠷᠡ ᠬᠥᠮᠦᠨ ᠪᠠᠢᠭᠰᠠᠨ ᠶᠤᠮ ᠳᠠ᠃ ᠰᠠᠢᠨ ᠵᠠᠩᠵᠤᠨ᠂ ᠰᠠᠢᠬᠠᠨ ᠨᠥᠬᠥᠷ ᠢ᠋ᠶ᠋ᠡᠨ ᠠᠯᠳᠠᠯᠠ᠃ ᠦᠷᠦ ᠵᠢᠷᠦᠬᠡ ᠥᠮᠥᠷᠡᠵᠦ ᠪᠠᠢᠨᠠ᠃ ᠥᠰᠢᠶᠡ ᠵᠠᠩᠭᠢᠳᠵᠤ ᠬᠠᠷᠢᠭᠤ ᠨᠡᠬᠡᠬᠦ ᠦᠯᠡᠲᠡᠯᠡ》 ᠭᠡᠮᠡᠨ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠤ᠋ ᠵᠢᠷᠦᠬᠡ ᠰᠡᠮᠡᠷᠡᠨᠡ᠃
ᠲᠡᠷᠡ ᠡᠳᠦᠷ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠳᠡᠮᠪᠡᠷᠢᠯ ᠵᠠᠩᠵᠤᠨ ᠤ᠋ ᠬᠥᠪᠡᠭᠦᠨ ᠠᠷᠴᠠ ᠪᠠᠭᠠᠲᠤᠷ ᠢ᠋ ᠢᠷᠡᠭᠦᠯᠵᠦ᠂
— ᠬᠦᠦ ᠮᠢᠨᠢ ᠡᠴᠢᠭᠡ ᠶ᠋ᠢᠨ ᠣᠷᠣ ᠶ᠋ᠢ ᠵᠠᠯᠭᠠ ᠭᠡᠵᠡᠢ᠃
ᠢᠷᠡᠭᠦᠯ ᠲᠤᠯᠤᠯᠳᠤᠭᠠᠨ ᠤ᠋ ᠳᠠᠷᠠᠭᠠ ᠶ᠋ᠢᠨ ᠡᠳᠦᠷ ᠠᠷᠴᠠ ᠪᠠᠭᠠᠲᠤᠷ ᠡᠴᠢᠭᠡ ᠶ᠋ᠢᠨ ᠪᠡᠶᠡ ᠶ᠋ᠢ ᠣᠯᠵᠤ ᠬᠣᠷᠵᠢᠯᠣ ᠪᠥᠬᠡ ᠬᠢᠭᠡᠳ ᠲᠣᠷᠭᠠᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠬᠠᠮᠲᠤ ᠠᠷᠢᠭᠤᠰᠬᠠᠨ ᠴᠢᠨᠳᠠᠷᠯᠠᠵᠤ ᠳᠠᠭᠤᠰᠬᠠᠵᠠᠢ᠃
ᠶᠢᠰᠦ
ᠰᠡᠩᠭᠡ ᠠᠬᠠ ᠶ᠋ᠢ ᠬᠠᠭᠠᠨ ᠡᠷᠭᠦᠮᠵᠢᠯᠡᠬᠦ ᠦᠶᠡ ᠪᠡᠷ ᠠᠬᠠ ᠳᠡᠭᠦᠦ ᠨᠠᠷ ᠤ᠋ᠨ ᠲᠠᠷ ᠨᠢ ᠲᠠᠨᠢᠭᠳᠠᠵᠤ᠂ ᠠᠳᠬᠤᠭᠰᠠᠨ ᠱᠠᠭᠠ ᠪᠤᠲᠠᠷᠠᠭᠰᠠᠨ ᠤ᠋ ᠡᠬᠢᠯᠡᠯ ᠪᠣᠢ ᠪᠣᠯᠤᠭᠰᠠᠨ ᠢ᠋ ᠬᠠᠲᠤᠨ ᠡᠬᠡ ᠭᠠᠯᠳᠠᠨ ᠳ᠋ᠤ᠌ ᠥᠭᠦᠯᠡᠵᠦ ᠪᠢᠯᠡ᠁
ᠶᠡᠬᠡ ᠦᠷᠭᠦᠭᠡᠨ ᠦ᠌ ᠬᠠᠭᠠᠨ ᠰᠡᠨᠳᠡᠢ ᠳ᠋ᠦ᠍ ᠰᠡᠩᠭᠡ ᠵᠠᠯᠠᠷᠠᠵᠠᠢ᠃ ᠬᠠᠭᠠᠨ ᠰᠠᠭᠤᠳᠠᠯ ᠤ᠋ᠨ ᠪᠠᠷᠠᠭᠤᠨ ᠲᠠᠯᠠ ᠪᠠᠷ ᠰᠡᠩᠭᠡ ᠬᠠᠭᠠᠨ ᠤ᠋ ᠠᠬᠠ ᠨᠠᠷ ᠪᠣᠯᠬᠤ ᠴᠡᠴᠡᠨ᠂ ᠵᠣᠳᠪᠠᠪᠠᠭᠠᠲᠤᠷ᠂ ᠰᠡᠪᠲᠡᠨᠵᠡᠯ᠂ ᠵᠣᠷᠢᠭᠲᠤ ᠬᠣᠰᠢᠭᠤᠴᠢ᠂ ᠣᠨᠣᠴᠢᠨ ᠨᠠᠷ ᠪᠣᠯᠤᠨ ᠰᠡᠩᠭᠡ ᠶ᠋ᠢᠨ ᠳᠡᠭᠦᠦ ᠪᠤᠮ᠂ ᠳᠣᠷᠵᠢᠵᠠᠪ᠂ ᠫᠣᠩᠰᠤᠭᠳᠠᠰᠢ᠂ ᠲᠠᠷᠮᠠ ᠨᠠᠷ ᠡᠷᠡᠮᠪᠡ ᠪᠡᠷ ᠰᠠᠭᠤᠵᠠᠢ᠃
ᠬᠠᠭᠠᠨ ᠰᠠᠭᠤᠳᠠᠯ ᠤ᠋ᠨ ᠵᠡᠭᠦᠨ ᠲᠠᠯᠠ ᠪᠠᠷ ᠰᠡᠩᠭᠡ ᠶ᠋ᠢᠨ ᠡᠬᠡ ᠶᠦᠮ ᠠᠭᠠ ᠬᠠᠲᠤᠨ᠂ ᠺᠢᠷᠭᠢᠽ ᠭᠠᠷᠤᠯ ᠲᠠᠢ ᠶᠡᠬᠡ ᠬᠠᠲᠤᠨ ᠪᠠᠯᠵᠢᠳᠠᠷᠠ᠂ ᠤᠳᠬᠤᠨ ᠬᠠᠲᠤᠨ ᠠᠮᠢᠨᠳᠠᠷᠠ ᠪᠣᠯᠤᠨ ᠬᠡᠳᠦᠨ ᠭᠦᠩᠵᠦ᠂ ᠬᠠᠨ ᠬᠥᠪᠡᠭᠦᠳ ᠳᠠᠷᠠᠭᠠᠯᠠᠵᠠᠢ᠃
ᠬᠠᠭᠠᠨ ᠰᠡᠩᠭᠡ ᠶ᠋ᠢᠨ ᠪᠠᠷᠠᠭᠤᠨ ᠵᠡᠭᠦᠨ ᠲᠠᠯᠠ ᠳ᠋ᠤ᠌ ᠴᠡᠷᠢᠭ ᠦ᠋ᠨ ᠪᠠᠭᠠᠲᠤᠷ ᠵᠠᠩᠵᠤᠨ ᠨᠤᠭᠤᠳ᠂ ᠰᠢᠳᠠᠷ ᠲᠤᠰᠠᠯᠠᠬᠤ ᠨᠣᠶᠠᠳ ᠤ᠋ᠳ ᠵᠣᠭᠰᠣᠵᠤ ᠪᠠᠢᠯᠠ᠃ ᠬᠠᠭᠠᠨ ᠲᠦᠰᠢᠯᠭᠡ ᠶ᠋ᠢ ᠭᠠᠯ ᠤ᠋ᠨ ᠳᠥᠯᠥ ᠮᠡᠲᠦ ᠰᠡᠢᠯᠪᠦᠷᠢᠯᠡᠵᠡᠢ᠃ ᠳᠥᠯᠥ ᠳᠤᠮᠳᠠ ᠳᠠᠯᠠᠪᠴᠢ ᠪᠠᠨ ᠳᠡᠯᠭᠡᠭᠰᠡᠨ ᠪᠦᠷᠭᠦᠳ ᠢ᠋ ᠲᠡᠷᠢᠭᠦᠨ ᠢ᠋ᠶ᠋ᠡᠨ ᠡᠷᠭᠦᠵᠦ᠂ ᠵᠣᠷᠢᠭᠲᠤ ᠨᠢᠳᠦ ᠪᠡᠨ ᠦᠯᠦ ᠴᠠᠪᠴᠢᠨ᠂ ᠮᠠᠬᠢᠷ ᠬᠣᠰᠢᠭᠤ ᠪᠠᠨ ᠲᠠᠰᠤ ᠵᠠᠭᠤᠵᠤ᠂ ᠬᠤᠷᠴᠠ ᠬᠢᠮᠤᠰᠤ ᠪᠠᠷ ᠢ᠋ᠶ᠋ᠠᠨ ᠬᠣᠬᠢᠮᠠᠢ ᠠᠳᠬᠤᠭᠰᠠᠨ ᠪᠠᠢᠳᠠᠯ ᠲᠠᠢ ᠪᠠᠳᠠᠷᠠᠩᠭᠤᠢ ᠤᠷᠠᠯᠠᠵᠠᠢ᠃
ᠬᠠᠭᠠᠨ ᠰᠡᠩᠭᠡ ᠲᠡᠰᠢᠶᠡ ᠲᠤᠯᠵᠤ᠂ ᠪᠠᠷᠠᠭᠤᠨ ᠭᠠᠷ ᠢ᠋ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠰᠠᠭᠤᠷᠢᠯᠠᠭᠤᠯᠵᠠᠢ᠃ ᠰᠡᠩᠭᠡ ᠡᠷᠡᠰᠭᠦᠳ ᠳᠠᠭᠤ ᠪᠠᠷ᠂
— ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠰᠡᠩᠭᠡ ᠨᠠᠮᠠᠶ᠋ᠢ ᠮᠡᠳᠡᠲᠦᠭᠡᠢ᠃ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠪᠠᠢᠭᠤᠯᠤᠭᠰᠠᠨ ᠶᠡᠬᠡ ᠤᠯᠤᠰ ᠦᠭᠡᠢᠯᠡᠭᠳᠡᠵᠦ ᠪᠠᠢᠨᠠ᠃ ᠣᠮᠣᠭᠯᠠᠩ ᠣᠢᠷᠠᠳ ᠮᠣᠩᠭᠣᠯᠴᠤᠳ ᠬᠠᠷᠠ ᠰᠦᠯᠳᠡ ᠳ᠋ᠡᠭᠡᠨ ᠨᠢᠭᠡᠳᠴᠦ᠂ ᠬᠠᠮᠲᠤ ᠳ᠋ᠠᠭᠠᠨ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠰᠦᠨᠡᠰᠦ ᠶ᠋ᠢ ᠳᠠᠭᠤᠳᠠᠵᠤ᠂ ᠠᠳᠬᠤᠭᠰᠠᠨ ᠱᠠᠭᠠ ᠰᠢᠭ᠋ ᠡᠪᠯᠡᠷᠡᠬᠦ ᠶ᠋ᠢ ᠪᠢ ᠬᠦᠰᠡᠨᠡ᠃ ᠨᠠᠮᠠᠶ᠋ᠢ ᠡᠰᠡ ᠳᠠᠭᠠᠪᠠᠰᠤ ᠲᠡᠷᠡ ᠲᠣᠯᠣᠭᠠᠢ ᠦᠭᠡᠢ᠃ ᠨᠠᠮᠠᠶ᠋ᠢ ᠳᠠᠭᠠᠪᠠᠰᠤ ᠨᠣᠶᠠᠨ ᠰᠠᠭᠤᠳᠠᠯ ᠳ᠋ᠤ᠌ ᠰᠠᠭᠤᠨᠠ᠃ ᠡᠯᠢᠭᠡ ᠨᠢᠭᠡᠲᠦ ᠠᠬᠠ ᠳᠡᠭᠦᠦ ᠨᠠᠷ ᠮᠢᠨᠢ ᠠ᠋᠃ ᠢᠩᠭᠢᠵᠦ ᠮᠡᠬᠦᠰ ᠪᠢ ᠪᠣᠳᠣᠨᠠ ᠭᠡᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠵᠦᠭ ᠲᠣᠯᠣᠭᠠᠢ ᠲᠣᠬᠢᠵᠠᠭᠠᠪᠠ᠃ ᠶᠦᠮ ᠠᠭᠠ ᠬᠠᠲᠤᠨ᠂
— ᠲᠤᠯᠭᠠᠨ ᠳ᠋ᠤ᠌ ᠭᠠᠯ ᠨᠡᠮᠡ! ᠭᠡᠬᠦ ᠳ᠋ᠦ᠍᠂ ᠰᠢᠪᠡᠭᠴᠢᠨ ᠠᠷᠭᠠᠯ ᠵᠡᠷᠭᠡᠯᠡᠪᠡ᠃ ᠬᠢᠷᠬᠢᠽ ᠭᠠᠷᠤᠯ ᠲᠠᠢ ᠵᠣᠳᠪᠠ ᠬᠠᠲᠤᠳ ᠳᠡᠭᠦᠦ ᠨᠠᠷ ᠢ᠋ᠶ᠋ᠠᠨ ᠲᠣᠭᠣᠷᠢᠭᠤᠯᠤᠨ ᠬᠠᠷᠠᠵᠤ᠂ ᠰᠠᠭᠤᠳᠠᠯ ᠢ᠋ᠶ᠋ᠠᠨ ᠵᠠᠰᠠᠵᠤ ᠬᠣᠭᠣᠯᠠᠢ ᠪᠠᠨ ᠬᠠᠬᠢᠷᠴᠤ ᠣᠯᠠᠨ ᠤ᠋ ᠠᠩᠬᠠᠷᠤᠯ ᠢ᠋ ᠲᠠᠲᠠᠪᠠ᠃ ᠵᠣᠳᠪᠠᠪᠠᠭᠠᠲᠤᠷ᠂
— ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶ᠋ᠢᠨ ᠶᠡᠬᠡ ᠬᠥᠪᠡᠭᠦᠨ ᠴᠡᠴᠡᠨ ᠪᠠᠢᠭᠰᠠᠭᠠᠷ ᠪᠠᠢᠲᠠᠯᠠ ᠰᠡᠩᠭᠡ ᠬᠠᠭᠠᠨ ᠰᠠᠭᠤᠬᠤ ᠨᠢ ᠶᠣᠰᠣ ᠪᠤᠰᠤ᠁ ᠴᠢᠩᠭᠢᠰ ᠬᠠᠭᠠᠨ᠁ ᠴᠢᠩᠭᠢᠰ ᠬᠠᠭᠠᠨ᠁ ᠬᠠᠭᠠᠨ ᠤ᠋ ᠬᠥᠪᠡᠭᠦᠳ ᠴᠢᠩᠭᠢᠰ ᠬᠠᠭᠠᠨ ᠢ᠋ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠮᠥᠷᠥᠭᠡᠳᠴᠦ ᠪᠠᠢᠭᠠ ᠰᠢᠦ ᠳᠡ᠃ ᠴᠡᠴᠡᠨ᠂ ᠰᠡᠩᠭᠡ ᠬᠣᠶᠠᠷ ᠤ᠋ᠨ ᠬᠡᠨ ᠨᠢ ᠬᠠᠭᠠᠨ ᠰᠠᠭᠤᠳᠠᠯ ᠳ᠋ᠤ᠌ ᠰᠠᠭᠤᠬᠤ ᠶ᠋ᠢ ᠬᠡᠯᠡᠯᠴᠡᠵᠦ ᠰᠣᠩᠭᠣᠪᠠᠯ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠢ? ᠭᠡᠵᠦ ᠭᠠᠯ ᠳ᠋ᠤ᠌ ᠲᠣᠰᠣ ᠠᠰᠠᠭᠠᠬᠤ ᠮᠡᠲᠦ ᠦᠭᠡ ᠥᠳᠥᠭᠡᠪᠡ᠃᠃ ᠶᠦᠮ ᠠᠭᠠ ᠬᠠᠲᠤᠨ ᠰᠠᠭᠤᠳᠠᠯ ᠵᠠᠰᠠᠭᠠᠳ᠂
— ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠵᠠᠯᠭᠠᠮᠵᠢᠯᠠᠭᠴᠢ ᠪᠠᠨ ᠨᠢᠭᠡᠨᠲᠡ ᠨᠡᠷᠡᠯᠡᠭᠰᠡᠨ ᠲᠤᠯᠠ ᠡᠳᠦᠭᠡ ᠰᠠᠭᠤᠳᠠᠯ ᠪᠤᠯᠢᠶᠠᠴᠠᠯᠳᠤᠬᠤ ᠨᠢ ᠵᠦᠢ ᠳ᠋ᠦ᠍ ᠦᠯᠦ ᠨᠡᠢᠴᠡᠨᠡ᠃ ᠬᠠᠷᠢᠨ ᠤᠯᠤᠰ ᠭᠡᠷ ᠢ᠋ᠶ᠋ᠡᠨ ᠥᠭᠡᠳᠡ ᠲᠠᠲᠠᠵᠤ᠂ ᠤᠷᠤᠭ ᠲᠥᠷᠥᠯ ᠢ᠋ᠶ᠋ᠡᠨ ᠪᠡᠬᠢᠵᠢᠭᠦᠯᠬᠦ ᠲᠤᠬᠠᠢ ᠵᠥᠪᠯᠡᠯᠳᠦᠪᠡᠯ ᠥᠯᠵᠡᠢ ᠪᠣᠯᠤᠨᠠ ᠭᠡᠵᠦ ᠠᠶᠠᠳᠠᠭᠤᠬᠠᠨ ᠬᠢᠷᠢᠨᠡ ᠰᠡᠩᠭᠡ ᠬᠥᠪᠡᠭᠦᠨ ᠢ᠋ ᠥᠷᠯᠥᠭ ᠴᠡᠭᠡᠵᠢ ᠪᠡᠷ ᠢ᠋ᠶ᠋ᠡᠨ ᠬᠠᠮᠠᠭᠠᠯᠠᠨᠠ ᠭᠡᠳᠡᠭ ᠰᠠᠨᠠᠭᠠ ᠪᠠᠨ ᠰᠢᠭᠤᠳ ᠢᠯᠡ ᠭᠠᠷᠭᠠᠵᠤ ᠬᠡᠯᠡᠪᠡ᠃
— ᠨᠠᠳᠠ ᠨᠢᠭᠡ ᠬᠣᠰᠢᠭᠤ ᠠᠯᠢ᠃ ᠪᠢ ᠪᠡᠶᠡ ᠪᠡᠨ ᠳᠠᠭᠠᠭᠠᠵᠤ ᠬᠤᠳᠠᠯᠳᠤᠭᠠ ᠮᠠᠢᠮᠠᠢ ᠮᠠᠢᠮᠠᠢ ᠬᠢᠵᠦ ᠠᠮᠢᠳᠤᠷᠠᠮᠠᠷ ᠪᠠᠢᠨᠠ᠃ ᠬᠠᠭᠠᠨ ᠤ᠋ ᠰᠠᠩ ᠤ᠋ᠨ ᠲᠥᠯᠥᠳᠡᠭ ᠲᠠᠲᠠᠪᠤᠷᠢ ᠪᠠᠨ ᠲᠥᠯᠥᠨᠡ᠃ ᠬᠠᠷᠢ ᠳᠠᠢᠰᠤᠨ ᠳᠣᠪᠲᠣᠯᠪᠠᠯ ᠴᠡᠷᠢᠭ ᠬᠥᠳᠡᠯᠭᠡᠵᠦ ᠬᠠᠮᠲᠤ ᠳ᠋ᠠᠭᠠᠨ ᠲᠤᠯᠤᠯᠳᠤᠨᠠ᠃ ᠬᠠᠷᠢᠨ ᠮᠢᠨᠦ ᠡᠷᠬᠡ ᠴᠢᠯᠥᠭᠡ ᠶ᠋ᠢ ᠬᠠᠭᠠᠵᠤ ᠪᠣᠯᠬᠤ ᠦᠭᠡᠢ ᠪᠠᠢᠬᠤ ᠶ᠋ᠢ ᠰᠡᠩᠭᠡ ᠬᠠᠭᠠᠨ ᠠ᠋ᠴᠠ ᠬᠦᠰᠡᠨᠡ ᠭᠡᠵᠦ ᠰᠡᠪᠳᠡᠨᠵᠠᠯ ᠰᠠᠶᠢᠬᠠᠨ ᠠ᠋ᠴᠠ ᠰᠥᠷᠪᠡᠢᠲᠡᠯᠡ ᠤᠷᠭᠤᠵᠤ ᠪᠣᠢ ᠰᠠᠬᠠᠯ ᠢ᠋ᠶ᠋ᠠᠨ ᠬᠥᠳᠡᠯᠭᠡᠪᠡ᠃ ᠰᠡᠩᠭᠡ ᠠᠬᠠ ᠳᠠᠭᠤ ᠴᠢᠩᠭᠠᠷᠠᠵᠤ᠂
— ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠨᠡᠭᠦᠭᠰᠡᠨ ᠬᠣᠱᠤᠳ᠂ ᠲᠣᠷᠭᠤᠳ᠂ ᠳᠥᠷᠪᠡᠳ ᠣᠪᠣᠭ ᠠᠢᠮᠠᠭ ᠤ᠋ᠳ ᠡᠷᠭᠢᠭᠡᠳ ᠢᠷᠡᠵᠦ ᠪᠠᠢᠨᠠ᠃ ᠲᠡᠭᠡᠬᠦ ᠳ᠋ᠦ᠍ ᠪᠢᠳᠡ ᠨᠡᠬᠡᠢ ᠶ᠋ᠢᠨ ᠭᠣᠳ ᠬᠠᠢᠴᠢᠯᠠᠬᠤ ᠮᠡᠲᠦ ᠬᠣᠰᠢᠭᠤ ᠨᠤᠲᠤᠭ ᠢ᠋ᠶ᠋ᠠᠨ ᠬᠤᠪᠢᠶᠠᠨ ᠲᠠᠰᠤᠳᠠᠵᠤ ᠪᠣᠯᠬᠤ ᠦᠭᠡᠢ᠃ ᠨᠤᠲᠤᠭ ᠵᠢᠵᠢᠭᠷᠡᠬᠦ ᠲᠣᠰᠤᠮ ᠵᠠᠯᠭᠢᠬᠤ ᠳ᠋ᠤ᠌ ᠬᠢᠯᠪᠠᠷ ᠪᠣᠯᠬᠤ ᠪᠤᠰᠤ ᠤᠤ? ᠰᠡᠪᠳᠡᠨᠵᠠᠯ ᠤ᠋ᠨ ᠰᠠᠨᠠᠭᠠ ᠪᠤᠷᠤᠭᠤ ᠭᠡᠮᠡᠨ ᠲᠠᠰᠤ ᠴᠣᠬᠢᠯᠠ᠃
ᠲᠡᠭᠦᠨ ᠡᠴᠡ ᠬᠣᠢᠰᠢ ᠲᠤᠯᠭᠠ ᠲᠠᠢ ᠭᠠᠯ ᠤᠷᠤᠭᠤ ᠭᠥᠯᠢᠷᠡᠵᠦ ᠰᠠᠭᠤᠭᠰᠠᠨ ᠺᠢᠷᠭᠢᠽ ᠬᠠᠲᠤᠨ ᠤ᠋ ᠬᠥᠪᠡᠭᠦᠨ ᠴᠡᠴᠡᠨ ᠲᠠᠢᠵᠢ ᠦ ᠡᠷᠢᠭᠰᠡᠨ ᠮᠡᠲᠦ ᠵᠤᠤᠮᠠᠯᠵᠠᠵᠤ᠂
— ᠰᠡᠩᠭᠡ ᠳᠡᠭᠦᠦ ᠬᠠᠭᠠᠨ ᠪᠣᠯᠪᠠ᠃ᠬᠠᠭᠠᠨ ᠲᠠ ᠤᠷᠲᠤ ᠭᠠᠷ ᠲᠠᠢ ᠪᠠᠢᠶᠠ ᠭᠡᠪᠡᠯ ᠪᠢᠳᠡᠨ ᠦ᠌ ᠦᠭᠡᠨ ᠳ᠋ᠦ᠍ ᠣᠷᠣᠮᠠᠷ ᠰᠠᠨ᠃ ᠬᠠᠭᠠᠨ ᠤ᠋ ᠭᠠᠷ ᠬᠥᠯ ᠬᠡᠳᠦᠢ ᠣᠯᠠᠨ ᠪᠣᠯ ᠨᠤᠲᠤᠭ ᠤ᠋ᠨ ᠬᠢᠵᠠᠭᠠᠷ ᠲᠡᠳᠦᠢ ᠪᠤᠰᠤ ᠣᠷᠣᠰ᠂ ᠬᠢᠲᠠᠳ᠂ ᠮᠠᠨᠵᠤ ᠳ᠋ᠤ᠌ ᠬᠦᠷᠬᠦ ᠨᠢ ᠮᠡᠳᠡᠭᠡᠵᠢ᠃ ᠭᠠᠭᠴᠠ ᠮᠣᠳᠣ ᠭᠠᠯ ᠪᠣᠯᠳᠠᠭ ᠦᠭᠡᠢ ᠭᠡᠵᠦ ᠦᠭᠡ ᠲᠡᠢ ᠰᠠᠨ ᠭᠡᠯᠡ᠃ ᠡᠨᠡ ᠦᠭᠡᠨ ᠳ᠋ᠦ᠍ ᠰᠡᠩᠭᠡ ᠶ᠋ᠢᠨ ᠡᠭᠳᠡᠭᠦᠦ ᠬᠥᠳᠡᠯᠵᠦ᠂
— ᠬᠣᠶᠠᠷ ᠲᠣᠯᠣᠭᠠᠢ ᠲᠠᠢ ᠮᠣᠭᠠᠢ ᠬᠣᠶᠠᠷ ᠲᠠᠢᠰᠢ ᠪᠠᠨ ᠵᠢᠳᠬᠦᠨᠡ᠃ ᠵᠡᠭᠦᠨᠭᠠᠷ ᠪᠣᠯ ᠨᠢᠭᠡ ᠲᠣᠯᠣᠭᠠᠢ ᠲᠠᠢ ᠮᠣᠭᠠᠢ᠃ ᠵᠡᠭᠦᠨᠭᠠᠷ ᠢ᠋ᠶ᠋ᠠᠨ ᠨᠢᠭᠡ ᠲᠣᠯᠣᠭᠠᠢ ᠲᠠᠢ ᠪᠠᠢᠯᠭᠠᠶᠠ᠃ ᠲᠡᠷᠡ ᠨᠢᠭᠡ ᠲᠣᠯᠣᠭᠠᠢ ᠨᠢ ᠬᠠᠭᠠᠨ ᠰᠡᠩᠭᠡ ᠭᠡᠮᠡᠨ ᠥᠷᠪᠥᠯᠵᠡᠨ ᠪᠣᠢ ᠠᠬᠠ ᠨᠠᠷ ᠤ᠋ᠨ ᠢ᠋ᠶ᠋ᠠᠨ ᠣᠮᠣᠭ ᠢ᠋ ᠨᠣᠮᠣᠬᠠᠳᠬᠠᠨ ᠥᠭᠦᠯᠡᠪᠡ᠃ ᠶᠦᠮ ᠠᠭᠠ ᠬᠠᠲᠤᠨ᠂
— ᠬᠣᠳᠣᠭᠣᠳᠣ ᠬᠠᠭᠠᠷᠠᠭᠰᠠᠨ ᠴᠤ᠌ ᠲᠣᠭᠣᠭᠠᠨ ᠳᠣᠲᠣᠷᠠ ᠭᠡᠳᠡᠭ᠃ᠠᠬᠠ ᠳᠡᠭᠦᠦ ᠲᠠ ᠨᠠᠷ ᠮᠠᠷᠭᠤᠯᠳᠤᠨ ᠮᠡᠳᠬᠡᠯᠴᠡᠬᠦ ᠦᠭᠡᠢ ᠪᠡᠷ ᠬᠣᠩ ᠲᠠᠢᠵᠢ ᠶ᠋ᠢᠨ ᠳᠤᠲᠠᠭᠤ ᠶ᠋ᠢ ᠳᠦᠭᠦᠷᠭᠡᠬᠦ ᠬᠡᠷᠡᠭᠲᠡᠢ᠃ ᠵᠡᠭᠦᠨᠭᠠᠷ ᠳᠤ᠌ ᠳᠠᠢᠰᠤᠨ ᠣᠯᠠᠨ ᠪᠠᠢᠭᠠ ᠰᠢᠦ ᠭᠡᠪᠡ᠃
— ᠬᠠᠭᠠᠨ ᠡᠴᠢᠭᠡ ᠥᠭᠡᠷᠡ ᠪᠣᠳᠣᠯ ᠲᠠᠢ ᠪᠠᠢᠭᠰᠠᠨ᠃ᠬᠠᠲᠤᠳ ᠡᠮᠡᠰ ᠦ᠋ᠨ ᠬᠠᠳᠬᠤᠭᠤᠯᠡᠭᠠ ᠪᠠᠷ ᠡᠢᠮᠦ ᠪᠣᠯᠪᠠ᠃ ᠶᠠᠭᠠᠬᠢᠬᠤᠪ᠂ ᠬᠠᠭᠠᠨ ᠰᠠᠭᠤᠳᠠᠯ ᠳ᠋ᠤ᠌ ᠰᠡᠩᠭᠡ ᠰᠠᠭᠤᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠠᠭᠤᠭ᠃ ᠬᠠᠷᠢᠨ ᠪᠢᠳᠡ ᠶᠣᠰᠣ ᠲᠥᠷᠥ ᠶ᠋ᠢᠨ ᠠᠯᠠᠭᠠᠨ ᠤ᠋ ᠠᠮᠲᠠ ᠶ᠋ᠢ ᠮᠡᠳᠡᠭᠦᠯᠦᠨᠡ ᠁ ᠭᠡᠮᠡᠨ ᠵᠣᠳᠪᠠ ᠣᠮᠣᠭᠳᠠᠪᠠ᠃
— ᠬᠡᠨ ᠳ᠋ᠦ᠍ ᠲᠡᠷᠡ ᠭᠡᠬᠦ ᠪᠣᠢ? ᠭᠡᠵᠦ ᠶᠦᠮ ᠠᠭᠠ ᠬᠠᠲᠤᠨ ᠠᠰᠠᠭᠤᠪᠠ᠃
— ᠬᠡᠨ ᠳᠤᠤᠭᠠᠷᠤᠭᠰᠠᠨ ᠬᠥᠮᠦᠨ ᠳ᠋ᠦ᠍! ᠬᠠᠭᠠᠨ ᠰᠠᠭᠤᠳᠠᠯ ᠤ᠋ᠨ ᠲᠥᠯᠥᠭᠡ ᠪᠤᠤ ᠤᠯᠠᠩᠭᠠᠰ ᠭᠡᠵᠦ ᠵᠣᠳᠪᠡᠪᠠᠭᠠᠲᠤᠷ ᠠᠮᠢᠰᠬᠤᠭᠠᠳᠠᠪᠠ᠃
ᠰᠡᠩᠭᠡ ᠬᠠᠭᠠᠨ ᠤ᠋ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠲᠡᠮᠳᠡᠭᠯᠡᠯ ᠬᠥᠲᠥᠯᠵᠦ ᠠᠭᠰᠠᠨ ᠲᠥᠷᠥ ᠶ᠋ᠢᠨ ᠰᠠᠢᠳ ᠮᠡᠷᠭᠡᠨ ᠬᠡᠮᠡᠬᠦ ᠪᠤᠭᠤᠷᠤᠯ ᠦᠰᠦ ᠲᠡᠢ᠂ᠨᠠᠮᠪᠠ ᠳᠣᠯᠢᠩ ᠰᠠᠢᠬᠠᠨ ᠲᠠᠢ ᠡᠷᠬᠢᠮ ᠨᠢᠭᠡᠨ ᠪᠣᠰᠴᠤ ᠢᠷᠡᠪᠡ᠃
— ᠤᠭ ᠠ᠋ᠴᠠ ᠪᠠᠨ ᠪᠢ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠲᠦ᠍ ᠨᠢᠭᠡᠨ ᠰᠠᠨᠠᠭᠠ ᠪᠠᠷ ᠲᠤᠢᠯᠳᠠᠵᠤ ᠶᠠᠪᠤᠭᠠ ᠬᠥᠮᠦᠨ᠃ᠬᠥᠪᠡᠭᠦᠳ ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠰᠦᠨᠡᠰᠦ ᠶ᠋ᠢ ᠭᠣᠮᠣᠳᠠᠭᠠᠵᠤ ᠪᠡᠶᠡᠰ ᠦ᠋ᠨ ᠥᠭᠡᠳᠡ ᠡᠴᠡ ᠴᠢᠯᠠᠭᠤ ᠰᠢᠳᠡᠬᠦ ᠶᠠᠭᠤᠨ᠃ᠨᠢᠭᠡᠨ ᠭᠠᠷ ᠳᠣᠣᠷᠠ ᠡᠷᠬᠡᠰᠢᠶᠡᠪᠡᠯ ᠵᠡᠭᠦᠨᠭᠠᠷ ᠤ᠋ᠨ ᠬᠠᠷᠠᠴᠤ ᠪᠣᠭᠣᠯ᠂ᠠᠷᠠᠳ ᠢᠷᠭᠡᠳ ᠠᠮᠤᠷ ᠲᠦᠪᠰᠢᠨ ᠠᠮᠢᠳᠤᠷᠠᠨᠠ᠃ᠰᠠᠯᠵᠤ ᠰᠠᠷᠨᠢᠵᠤ ᠪᠤᠲᠠᠷᠠᠪᠠᠯ ᠲᠣᠭᠣᠨᠣ ᠦᠭᠡᠢ ᠭᠡᠷ᠂ ᠭᠠᠯ ᠦᠭᠡᠢ ᠲᠤᠯᠭᠠ ᠮᠡᠲᠦ ᠪᠣᠯᠤᠨᠠ ᠰᠢᠦ᠃ᠬᠠᠨ ᠬᠥᠪᠡᠭᠦᠳ ᠨᠢᠮᠪᠠᠢ ᠪᠣᠳᠣᠭᠠᠷᠠᠢ!ᠬᠠᠲᠤᠨ ᠡᠬᠡ ᠶ᠋ᠢᠨ ᠰᠠᠨᠠᠭᠠ ᠵᠥᠪ ᠁ ᠭᠡᠯᠡ᠃
ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠵᠢᠪᠡᠬᠡᠢ ᠬᠦᠢᠲᠡᠨ ᠠᠭᠤᠷ ᠠᠮᠢᠰᠬᠤᠯ ᠪᠦᠷᠢᠯᠳᠦᠪᠡ᠃ ᠬᠠᠮᠤᠭ ᠠ᠋ᠴᠠ ᠢᠯᠡᠭᠦᠦ ᠰᠡᠳᠬᠢᠯ ᠵᠣᠪᠠᠨᠢᠬᠤ ᠶᠦᠮ ᠠᠭᠠ ᠬᠠᠲᠤᠨ ᠤ᠋ ᠭᠡᠭᠡᠨ ᠲᠤᠩᠭᠠᠯᠠᠭ ᠴᠢᠷᠠᠢ ᠶ᠋ᠢ ᠰᠡᠭᠦᠳᠡᠷ ᠳᠠᠷᠤᠵᠠᠢ᠃ ᠬᠠᠭᠠᠨ ᠲᠥᠷᠥ ᠶ᠋ᠢᠨ ᠲᠠᠮᠠᠭᠠ ᠰᠡᠩᠭᠡ ᠶ᠋ᠢᠨ ᠭᠠᠷ ᠲᠤ ᠦᠯᠡᠳᠡᠪᠡ᠃
ᠬᠠᠭᠠᠨ ᠤ᠋ ᠦᠷᠭᠦᠭᠡᠨ ᠡᠴᠡ ᠬᠥᠪᠡᠭᠦᠳ᠂ ᠬᠠᠲᠤᠳ ᠡᠮᠡᠰ᠂ᠲᠥᠷᠥ ᠶ᠋ᠢᠨ ᠰᠠᠢᠳ᠂ᠨᠣᠶᠠᠳ ᠤᠪᠤᠨ ᠴᠤᠪᠤᠷᠠᠵᠤ ᠭᠠᠷᠴᠤ ᠣᠳᠬᠤ ᠳ᠋ᠤ᠌ ᠠᠯᠲᠠᠨ ᠨᠠᠷᠠ ᠲᠡᠳᠡᠨ ᠢ᠋ ᠠᠯᠠᠭᠴᠢᠯᠠᠯ ᠦᠭᠡᠢ ᠢᠪᠡᠭᠡᠪᠡ᠃ ᠭᠣᠣᠯ ᠤ᠋ᠨ ᠤᠯᠢᠶᠠᠰᠤᠨ ᠰᠢᠭᠤᠢ ᠰᠢᠪᠠᠭᠤ ᠪᠠᠷ ᠳᠦᠭᠦᠷᠡᠩ ᠪᠠᠢᠯᠠ᠃
ᠰᠢᠭᠤᠢ ᠳᠣᠲᠣᠷᠠ ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶ᠋ᠢᠨ ᠳᠡᠭᠦᠦ ᠴᠦᠬᠦᠢ ᠤᠪᠠᠰᠢ ᠬᠡᠮᠡᠬᠦ ᠬᠠᠭᠠᠨ ᠰᠠᠭᠤᠳᠠᠯ ᠳ᠋ᠤ᠌ ᠰᠠᠨᠠᠭᠠᠷᠬᠠᠭᠰᠠᠨ ᠨᠠᠭᠠᠯ ᠰᠠᠬᠠᠯ ᠲᠠᠢ ᠡᠷᠡ ᠪᠠᠯᠵᠢᠳᠠᠷᠠ ᠶ᠋ᠢᠨ ᠢᠳᠬᠠᠯᠭᠠ ᠳ᠋ᠤ᠌ ᠭᠦᠨ ᠠᠪᠲᠠᠭᠰᠠᠨ ᠲᠤᠯᠠ ᠲᠡᠭᠦᠨ ᠦ᠌ ᠬᠦᠦ ᠴᠡᠴᠡᠨ᠂ᠵᠣᠳᠪᠠᠪᠠᠭᠠᠲᠤᠷ ᠨᠠᠷ ᠤ᠋ᠨ ᠭᠠᠷ ᠢ᠋ᠶ᠋ᠠᠷ ᠮᠣᠭᠠᠢ ᠪᠠᠷᠢᠭᠤᠯᠬᠤ ᠪᠠᠷ ᠠᠳᠬᠠᠨ ᠬᠦᠯᠢᠶᠡᠵᠦ ᠪᠠᠢᠯᠠ᠃ ᠴᠠᠭᠠᠨᠠ ᠨᠢ ᠳᠠᠸᠠᠴᠢ ᠬᠡᠮᠡᠬᠦ ᠬᠣᠣᠷᠯᠠᠭᠴᠢᠨ ᠬᠣᠰᠢᠭᠤ ᠨᠤᠲᠤᠭ ᠳᠠᠮᠵᠢᠨ ᠲᠡᠨᠦᠵᠦ ᠶᠠᠪᠤᠪᠠ᠃ᠨᠢᠭᠡ ᠯᠡ ᠡᠳᠦᠷ ᠳᠠᠸᠠᠴᠢ ᠢᠷᠡᠨᠡ᠃ᠲᠡᠷᠡ ᠳᠠᠸᠠᠴᠢ ᠬᠣᠣᠷᠯᠠᠬᠤ ᠬᠥᠨᠥᠭᠡᠬᠦ ᠦᠢᠯᠡ ᠳ᠋ᠦ᠍ ᠭᠠᠷᠰᠢᠵᠤ ᠶᠠᠪᠤᠭᠠ ᠲᠡᠢᠮᠦ ᠤᠴᠢᠷ ᠠ᠋ᠴᠠ ᠲᠡᠭᠦᠨ ᠦ᠌ ᠭᠠᠷ ᠢ᠋ᠶ᠋ᠠᠷ ᠮᠣᠭᠠᠢ ᠪᠠᠷᠢᠭᠤᠯᠬᠤ ᠨᠢ ᠴᠦᠬᠦᠢ ᠣᠪᠠᠰᠢ ᠳ᠋ᠤ᠌ ᠠᠮᠠᠷᠬᠠᠨ ᠪᠠᠢᠬᠤ ᠪᠢᠵᠡ᠃
ᠠᠷᠪᠠ
ᠬᠥᠬᠡ ᠬᠠᠯᠵᠠ ᠲᠠᠢ ᠦᠷᠭᠦᠭᠡᠨ ᠦ᠌ ᠡᠮᠦᠨᠡ ᠰᠡᠩᠭᠡ᠂ ᠭᠠᠯᠳᠠᠨ ᠨᠠᠷ ᠤ᠋ᠨ ᠥᠷᠯᠥᠭ ᠡᠬᠡ ᠶᠦᠮ ᠠᠭᠠ ᠬᠠᠲᠤᠨ᠂ ᠴᠡᠴᠡᠨ᠂ ᠵᠣᠳᠪᠠᠪᠠᠭᠠᠲᠣᠷ ᠨᠠᠷ ᠤ᠋ᠨ ᠥᠷᠯᠥᠭ ᠡᠬᠡ ᠪᠠᠯᠵᠢᠳᠠᠷᠠ ᠬᠠᠲᠤᠨ ᠬᠣᠭᠣᠷᠣᠨᠳᠣ ᠪᠠᠨ ᠮᠠᠰᠢᠳᠠ ᠳᠣᠲᠣᠨᠣ ᠬᠥᠭᠡᠷᠦᠯᠳᠦᠨᠡ᠃ᠲᠡᠳᠡᠨ ᠦ᠌ ᠴᠢᠷᠠᠢ ᠳ᠋ᠤ᠌ ᠰᠡᠳᠬᠢᠯ ᠦ᠋ᠨ ᠰᠢᠨᠠᠯᠤᠯ ᠢᠯᠡᠳᠲᠡ ᠠᠵᠢ᠃
ᠨᠢᠭᠡᠨ ᠴᠠᠭ ᠲᠤᠷ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶ᠋ᠢᠨ ᠬᠠᠲᠤᠳ ᠪᠠᠢᠵᠤ᠂ ᠨᠠᠢᠷᠰᠠᠭ ᠳᠣᠲᠣᠨᠣ ᠬᠠᠷᠢᠴᠠᠭᠠ ᠲᠠᠢ ᠶᠠᠪᠤᠭᠰᠠᠨ᠂ ᠡᠳᠦᠭᠡ ᠬᠣᠶᠠᠭᠤᠯᠠ ᠪᠠᠨ ᠪᠡᠯᠪᠡᠰᠦᠷᠡᠭᠰᠡᠨ ᠭᠤᠸᠠ ᠬᠠᠲᠤᠳ ᠰᠡᠳᠬᠢᠯ ᠲᠥᠪᠳᠡᠨ ᠪᠠᠢᠪᠠ᠃
— ᠮᠢᠨᠦ ᠬᠣᠶᠠᠷ ᠬᠥᠪᠡᠭᠦᠨ ᠬᠡᠳᠦᠢᠪᠡᠷ ᠶᠡᠬᠡ ᠬᠠᠲᠤᠨ ᠲᠠᠨ ᠤ᠋ ᠬᠥᠪᠡᠭᠦᠳ ᠡᠴᠡ ᠨᠠᠰᠤ ᠪᠠᠷ ᠳᠡᠭᠦᠦ ᠪᠣᠯᠪᠠᠴᠤ ᠡᠷᠡ ᠶ᠋ᠢᠨ ᠴᠡᠭᠡᠯ ᠳ᠋ᠦ᠍ ᠬᠦᠷᠴᠡᠢ᠃ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠰᠡᠩᠭᠡ ᠶ᠋ᠢ ᠮᠢᠨᠦ ᠵᠠᠯᠭᠠᠮᠵᠢᠯᠠᠭᠴᠢ ᠭᠡᠵᠦ ᠬᠡᠯᠡᠬᠦ ᠶ᠋ᠢ ᠬᠠᠲᠤᠨ ᠲᠠ ᠮᠢᠨᠦ ᠨᠢᠭᠡᠨ ᠠᠳᠠᠯᠢ ᠰᠣᠨᠣᠰᠤᠭᠰᠠᠨ ᠪᠤᠰᠤ ᠤᠤ? ᠭᠡᠲᠡᠯᠡ ᠴᠡᠴᠡᠨ᠂ ᠵᠣᠳᠪᠠᠪᠠᠭᠠᠲᠣᠷ ᠨᠠᠷ ᠦᠯᠦ ᠵᠥᠪᠰᠢᠶᠡᠷᠡᠵᠦ᠂ᠳᠤᠷᠠ ᠦᠭᠡᠢᠴᠡᠵᠦ ᠪᠠᠢᠨᠠ ᠭᠡᠵᠦ ᠶᠥᠮ ᠠᠭᠠ ᠬᠠᠲᠤᠨ ᠶᠠᠷᠢᠶᠠ ᠡᠬᠢᠯᠡᠪᠡ᠃
— ᠬᠥᠪᠡᠭᠦᠳ ᠦ᠋ᠨ ᠬᠣᠭᠣᠷᠣᠨᠳᠣ ᠡᠪᠳᠡᠷᠡᠯ ᠦ᠋ᠨ ᠡᠭᠦᠳᠡ ᠪᠣᠯᠤᠭᠤᠵᠠᠢ ᠭᠡᠮᠡᠨ ᠬᠠᠲᠤᠨ ᠡᠬᠡ ᠪᠢ ᠠᠶᠤᠨᠠ᠃ᠴᠡᠴᠡᠨ᠂ ᠵᠣᠳᠪᠠᠪᠠᠭᠠᠲᠣᠷ ᠬᠣᠶᠠᠷ ᠤ᠋ᠨ ᠰᠠᠨᠠᠭᠠ ᠶ᠋ᠢ ᠡᠬᠡ ᠪᠢ ᠶᠠᠭᠠᠬᠢᠨ ᠮᠡᠳᠡᠨᠡ᠃ᠮᠠᠨᠤᠰ ᠪᠡᠶᠡ ᠶ᠋ᠢ ᠲᠥᠷᠥᠭᠦᠯᠬᠦ ᠡᠴᠡ ᠪᠤᠰᠤ ᠰᠠᠨᠠᠭᠠ ᠶ᠋ᠢ ᠲᠥᠷᠥᠭᠦᠯᠳᠡᠭ ᠦᠭᠡᠢ ᠪᠢᠯᠡ ᠭᠡᠵᠦ ᠪᠠᠯᠵᠢᠳᠠᠷᠠ ᠬᠠᠲᠤᠨ ᠡᠬᠡ ᠦᠯᠦ ᠮᠡᠳᠡᠭᠴᠢ ᠴᠢᠷᠠᠢᠯᠠᠨᠠ᠃
— ᠰᠡᠩᠭᠡ ᠶ᠋ᠢ ᠭᠠᠭᠴᠠᠭᠠᠷᠳᠠᠭᠤᠯᠬᠤ ᠭᠡᠰᠡᠨ ᠰᠠᠨᠠᠭᠠ ᠢᠯᠡᠷᠬᠡᠢ ᠪᠣᠯᠤᠯᠠ᠃ᠪᠢ ᠭᠠᠯᠳᠠᠮᠠ ᠪᠠᠭᠠᠲᠤᠷ ᠢ᠋ ᠳᠠᠭᠤᠳᠠᠭᠤᠯᠤᠭᠰᠠᠨ᠃ᠲᠡᠷᠡ ᠬᠥᠮᠦᠨ ᠢ᠋ ᠬᠠᠭᠠᠨ ᠬᠥᠪᠡᠭᠦᠨ ᠦ᠌ ᠳᠡᠷᠭᠡᠳᠡ ᠪᠠᠢᠯᠭᠠᠬᠤ ᠰᠠᠨᠠᠭᠠ ᠲᠠᠢ ᠭᠡᠵᠦ ᠳᠣᠲᠣᠭᠠᠳᠤ ᠪᠣᠳᠣᠯ ᠢ᠋ᠶ᠋ᠠᠨ ᠶᠥᠮ ᠠᠭᠠ ᠬᠠᠲᠤᠨ ᠨᠢᠭᠤᠬᠤ ᠦᠭᠡᠢ ᠳᠡᠯᠭᠡᠬᠦ ᠳ᠋ᠦ᠍ ᠪᠠᠯᠵᠢᠳᠠᠷᠠ ᠬᠠᠲᠤᠨ ᠡᠪ ᠦᠭᠡᠢᠴᠡᠭᠰᠡᠨ ᠪᠣᠯᠪᠠᠴᠤ ᠰᠠᠨᠠᠭᠠ ᠪᠠᠨ ᠨᠢᠭᠤᠵᠤ᠂
— ᠡᠨᠡ ᠵᠥᠪ ᠰᠢᠦ ᠬᠠᠳᠣᠨᠲᠠᠨ! ᠡᠪᠯᠡᠵᠦ ᠣᠢᠯᠠᠭᠠᠭᠤᠯᠬᠤ ᠳ᠋ᠤ᠌ ᠭᠠᠯᠳᠠᠮᠠ ᠪᠠᠭᠠᠲᠤᠷ ᠮᠡᠳᠡᠭᠡᠵᠢ ᠲᠤᠰᠠᠯᠠᠨᠠ ᠭᠡᠵᠦ ᠶᠥᠮ ᠠᠭᠠ ᠬᠠᠲᠤᠨ ᠤ᠋ ᠰᠠᠨᠠᠭᠠ ᠶ᠋ᠢ ᠳᠡᠮᠵᠢᠵᠦ ᠪᠠᠢᠭᠠ ᠳᠦᠷᠢ ᠦᠵᠡᠭᠦᠯᠵᠦ《ᠨᠠᠳᠠᠳᠤ ᠪᠠᠷᠳᠠᠮᠨᠠᠵᠤ ᠪᠠᠢᠨᠠ》 ᠭᠡᠮᠡᠨ ᠬᠣᠷᠣᠰᠤᠨ ᠪᠣᠳᠣᠪᠠ᠃ᠪᠠᠯᠵᠢᠲᠠᠷᠠ ᠬᠠᠲᠤᠨ ᠤ᠋ ᠪᠣᠳᠣᠯ ᠥᠭᠡᠷᠡ ᠪᠠᠢᠵᠠᠢ᠃ ᠶᠥᠮ ᠠᠭᠠ ᠬᠠᠲᠤᠨ ᠢ᠋ ᠢᠷᠡᠭᠰᠡᠨ ᠴᠠᠭ ᠠ᠋ᠴᠠ ᠥᠷᠭᠥᠭᠡ ᠭᠡᠷ ᠲᠤᠰᠠᠭᠠᠷ ᠪᠠᠢᠵᠤ᠂ᠬᠣᠩ ᠲᠠᠢᠵᠢ ᠶ᠋ᠢᠨ ᠪᠠᠷᠠ ᠶ᠋ᠢ ᠬᠠᠷᠠᠬᠤ ᠪᠠᠨ ᠪᠣᠯᠢᠭᠰᠠᠨ ᠪᠢᠯᠡ᠃ᠬᠣᠩ ᠲᠠᠢᠵᠢ ᠬᠦᠯᠦᠭ ᠦ᠋ᠨ ᠢ᠋ᠶ᠋ᠡᠨ ᠡᠮᠡᠭᠡᠯ ᠳᠡᠭᠡᠷᠡ ᠲᠥᠷᠥᠯ ᠠᠷᠠᠯᠵᠢᠬᠤ ᠳ᠋ᠠᠭᠠᠨ《ᠰᠡᠩᠭᠡ ᠳ᠋ᠦ᠍ ᠨᠠᠮᠠᠶ᠋ᠢ ᠵᠠᠯᠭᠠᠮᠵᠢᠯᠠᠭᠤᠯᠤᠨ ᠬᠠᠭᠠᠨ ᠣᠷᠣ ᠰᠠᠭᠤᠯᠭᠠᠵᠤ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠢ᠋ ᠡᠷᠬᠡᠰᠢᠶᠡᠬᠦ ᠡᠷᠬᠡ ᠶ᠋ᠢ ᠣᠯᠭᠣ᠃ᠤᠭ ᠨᠢ ᠭᠠᠯᠳᠠᠨ᠁ ᠭᠠᠯᠳᠠᠨ ᠢ᠋ ᠪᠤᠷᠬᠠᠨ ᠢᠪᠡᠭᠡᠬᠦ ᠪᠢᠵᠡ᠃ᠭᠠᠯᠳᠠᠨ ᠬᠥᠪᠡᠭᠦᠨ ᠪᠤᠷᠬᠠᠨ ᠤ᠋ ᠢᠪᠡᠭᠡᠯ ᠳ᠋ᠦ᠍ ᠣᠷᠣᠭᠰᠠᠨ᠃ᠬᠥᠬᠡ ᠲᠩᠷᠢ ᠮᠢᠨᠢ ᠁》 ᠭᠡᠵᠦ ᠬᠡᠯᠡᠵᠡᠢ᠃ᠬᠠᠭᠠᠨ ᠤ᠋ ᠡᠷᠳᠡᠨᠢᠲᠦ ᠬᠦᠯᠦᠭ ᠦ᠋ᠨ ᠣᠮᠣᠷᠤᠤ ᠳᠣᠣᠷᠠ ᠪᠠᠯᠵᠢᠲᠠᠷᠠ ᠬᠠᠲᠤᠨ ᠣᠯᠠᠨ ᠢ᠋ ᠳᠠᠭᠠᠨ ᠤᠬᠢᠯᠠᠵᠤ᠂ᠳᠠᠷᠠᠭᠠ ᠨᠢ ᠬᠣᠩ ᠲᠠᠢᠵᠢ ᠶ᠋ᠢᠨ ᠳᠡᠭᠦᠦ ᠴᠦᠬᠥᠢ ᠤᠪᠠᠰᠢ ᠬᠡᠮᠡᠬᠦ ᠮᠣᠩᠬᠣᠷ ᠬᠠᠮᠠᠷ ᠲᠠᠢ᠂ ᠨᠣᠭᠣᠭᠠᠨ ᠨᠢᠳᠦ ᠲᠡᠢ ᠡᠷᠡ ᠳ᠋ᠦ᠍ ᠰᠣᠨᠣᠰᠤᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠵᠦ᠂
— ᠵᠠ ᠶᠠᠭᠠᠬᠢᠬᠤᠪ᠂ ᠴᠡᠴᠡᠨ᠂ᠵᠣᠳᠪᠠᠪᠠᠭᠠᠠᠳᠣᠷ ᠬᠣᠶᠠᠷ ᠰᠢᠭᠠᠷᠤᠯᠠᠭᠳᠠᠯᠠ᠃ᠶᠠᠭᠤᠨ ᠤ᠋ ᠤᠴᠢᠷ ᠠᠬᠠᠮᠠᠳ ᠬᠥᠪᠡᠭᠦᠨ ᠳ᠋ᠡᠭᠡᠨ ᠭᠠᠳᠠᠭᠤᠷᠬᠠᠪᠠ᠃ ᠡᠨᠡ ᠪᠣᠯ ᠶᠥᠮ ᠠᠭᠠ ᠬᠠᠲᠤᠨ ᠤ᠋ ᠬᠣᠷᠣᠨ ᠰᠠᠨᠠᠭᠠ ᠪᠢᠵᠡ᠃ᠲᠡᠭᠡᠬᠦ ᠪᠡᠷ ᠲᠠ ᠬᠠᠭᠠᠨ ᠪᠣᠯ ᠁ ᠭᠡᠮᠡᠨ ᠳᠣᠭᠣᠯᠭᠠᠵᠤ ᠥᠭᠦᠯᠡᠪᠡ᠃ᠴᠦᠬᠥᠢ ᠤᠪᠠᠰᠢ ᠶ᠋ᠢᠨ ᠨᠣᠭᠣᠭᠠᠨ ᠨᠢᠳᠦᠨ ᠳ᠋ᠦ᠍ ᠭᠡᠷᠡᠯ ᠠᠰᠠᠭᠰᠠᠨ ᠢ᠋ᠶ᠋ᠠᠨ ᠲᠦᠳᠡᠬᠡᠨ ᠤᠨᠲᠠᠷᠠᠵᠤ᠂
— ᠪᠦᠲᠦᠬᠦ ᠤᠤ? ᠭᠡᠵᠦ ᠠᠰᠠᠭᠤᠪᠠ᠃
— ᠡᠨᠡ ᠤᠳᠠᠭᠠ ᠪᠢᠰᠢ ᠭᠡᠬᠦ ᠳ᠋ᠦ᠍ ᠳᠠᠷᠠᠭᠠ ᠨᠢ ᠪᠦᠲᠦᠬᠦ ᠶᠣᠰᠣᠲᠠᠢ᠃ᠬᠠᠭᠠᠨ ᠤ᠋ ᠠᠯᠪᠠ ᠬᠠᠯᠠᠭᠠ ᠲᠠᠢ ᠪᠠᠢᠳᠠᠭ ᠶᠤᠮ ᠭᠡᠵᠦ ᠴᠦᠬᠥᠢ ᠤᠪᠠᠰᠢ ᠶ᠋ᠢ ᠢᠳᠬᠠᠭᠰᠠᠨ ᠪᠢᠯᠡ᠃ ᠲᠡᠷᠡ ᠪᠠᠢᠲᠤᠭᠠᠢ ᠶᠥᠮ ᠠᠭᠠ ᠬᠠᠲᠤᠨ ᠲᠠᠢ ᠳᠡᠷᠡ ᠨᠡᠢᠯᠡᠭᠦᠯᠵᠦ ᠪᠣᠯᠬᠤ ᠪᠢᠰᠢᠦ ᠭᠡᠰᠡᠨ ᠨᠢᠭᠡᠨ ᠦᠮᠡᠬᠡᠢ ᠦᠭᠡ ᠶ᠋ᠢ ᠴᠦᠬᠥᠢ ᠤᠪᠠᠰᠢ ᠳ᠋ᠤ᠌ ᠰᠢᠳᠡᠭᠡᠳ ᠠᠮᠵᠢᠵᠠᠢ᠃ ᠴᠥᠬᠥᠢ ᠤᠪᠠᠰᠢ ᠨᠢ ᠪᠠᠯᠵᠢᠲᠠᠷᠠ ᠶ᠋ᠢᠨ ᠲᠡᠷᠡ ᠦᠭᠡᠨ ᠡᠴᠡ ᠢᠯᠡᠳᠲᠡ ᠴᠡᠷᠪᠡᠵᠦ᠂
— ᠶᠦᠮ ᠠᠭᠠ ᠠ᠋ᠴᠠ ᠬᠣᠯᠠᠬᠠᠨ ᠶᠠᠪᠤᠬᠤ ᠮᠢᠨᠢ᠁ ᠭᠡᠮᠡᠨ ᠳᠤᠤᠭᠠᠷᠴᠠᠢ᠃ ᠴᠣᠬᠣᠮ ᠳ᠋ᠠᠭᠠᠨ ᠴᠦᠭᠦᠢ ᠤᠪᠠᠰᠢ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠬᠥᠪᠡᠭᠦᠳ ᠰᠡᠩᠭᠡ᠂ ᠭᠠᠯᠳᠠᠨ ᠬᠣᠶᠠᠷ ᠠ᠋ᠴᠠ ᠠᠶᠤᠵᠤ ᠪᠠᠢᠯᠠ᠃
ᠶᠦᠮ ᠠᠭᠠ ᠬᠠᠲᠤᠨ ᠶᠡᠬᠡ ᠬᠠᠲᠤᠨ ᠤ᠋ ᠪᠦᠦᠳᠡᠭᠡᠷ ᠴᠢᠷᠠᠢ ᠠ᠋ᠴᠠ ᠰᠠᠢᠨ ᠰᠠᠨᠠᠭᠠᠨ ᠤ᠋ ᠦᠷᠡ ᠵᠢᠮᠢᠰ ᠳᠡᠯᠭᠡᠷᠡᠬᠦ ᠡᠰᠡᠬᠦ ᠳ᠋ᠦ᠍ ᠡᠷᠡᠭᠡᠯᠵᠡᠭᠰᠡᠨ ᠴᠦ᠍ ᠭᠡᠯᠡ ᠦᠭᠡ ᠪᠡᠨ ᠭᠦᠢᠴᠡᠭᠡᠵᠦ᠂
— ᠬᠠᠲᠤᠨ ᠡᠬᠡ ᠲᠠ ᠥᠪᠡᠷ ᠦ᠋ᠨ ᠬᠥᠪᠡᠭᠦᠳ ᠦ᠋ᠨ ᠢ᠋ᠶ᠋ᠡᠨ ᠪᠠᠢᠷᠢ ᠪᠠᠢᠴᠠ ᠶ᠋ᠢ ᠳᠡᠩᠳᠡᠵᠦ ᠪᠠᠢᠬᠤ ᠴᠢᠨᠢ᠂ ᠲᠡᠳᠡ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠲᠦ᠍ ᠵᠢᠳᠬᠦᠬᠦ ᠶᠣᠰᠣᠲᠠᠢ᠃ ᠬᠡᠷᠪᠡ ᠰᠠᠨᠠᠭᠠ ᠤᠷᠪᠠᠬᠤ ᠠᠪᠠᠰᠤ ᠵᠠᠶᠠᠭᠠ ᠨᠢ ᠬᠡᠯᠲᠡᠢᠨᠡ ᠰᠢᠦ ᠃ ᠵᠡᠭᠦᠨᠭᠠᠷ ᠤ᠋ᠨ ᠰᠢᠨᠡ ᠵᠠᠯᠠᠭᠤ ᠬᠠᠭᠠᠨ ᠵᠣᠷᠢᠭ ᠲᠠᠢ ᠤᠴᠢᠷ ᠠ᠋ᠴᠠ ᠬᠡᠨ ᠬᠡᠨ ᠳ᠋ᠦ᠍ᠨᠢ ᠮᠠᠭᠤ ᠶᠠᠭᠤᠮᠠ ᠪᠣᠯᠤᠭᠤᠵᠢᠨ ᠭᠡᠮᠡᠨ ᠵᠠᠬᠢᠪᠠ᠃ ᠪᠠᠯᠵᠢᠳᠠᠷᠠ ᠬᠠᠲᠤᠨ ᠪᠣᠳᠣᠯᠬᠢᠯᠠᠵᠤ᠂
— ᠪᠢ ᠴᠢᠬᠢ ᠲᠠᠯᠪᠢᠨᠠ᠃ ᠴᠢᠬᠢᠨ ᠦ᠌ ᠭᠠᠳᠠᠭᠤᠷ ᠥᠴᠢᠨᠡᠬᠡᠨ ᠬᠣᠪ ᠵᠢᠪ ᠥᠩᠭᠡᠷᠡᠳᠡᠭ᠂ ᠬᠠᠷᠢᠨ ᠴᠢᠬᠢᠨ ᠳ᠋ᠦ᠍ ᠣᠷᠣᠭᠰᠠᠨ ᠢ᠋ ᠨᠢ ᠳᠣᠭᠣᠯᠭᠠᠨᠠ᠃ ᠨᠡᠭᠡᠷᠡᠨ ᠬᠠᠭᠠᠨ ᠵᠠᠯᠠᠭᠤ ᠤᠴᠢᠷ ᠠ᠋ᠴᠠ ᠭᠡᠨᠡᠨ ᠴᠦ᠍ ᠪᠢᠵᠡ᠂ ᠣᠮᠣᠭᠯᠠᠩ ᠴᠤ᠌ ᠪᠢᠵᠡ᠁ ᠭᠡᠮᠡᠨ ᠡᠷᠡᠭᠡᠯᠵᠡᠩᠭᠦᠢ ᠥᠭᠦᠯᠡᠪᠡ᠃ ᠶᠦᠮ ᠠᠭᠠ ᠡᠬᠡ ᠶᠡᠬᠡ ᠬᠠᠲᠤᠨ ᠤ᠋ ᠲᠦᠢᠪᠡᠭᠦᠯᠦᠨ ᠥᠩᠭᠡᠷᠡᠭᠡᠬᠦ ᠭᠡᠰᠡᠨ ᠦᠭᠡ ᠳᠤᠮᠳᠠ ᠰᠡᠩᠭᠡ ᠬᠠᠭᠠᠨ ᠢ᠋ ᠪᠠᠰᠤᠮᠵᠢᠯᠠᠬᠤ ᠠᠶᠠᠰ ᠲᠣᠳᠣ ᠮᠡᠳᠡᠭᠳᠡᠭᠰᠡᠨ ᠲᠤᠯᠠ《ᠶᠡᠷᠦ ᠡᠴᠡ ᠪᠡᠨ ᠭᠠᠯᠳᠠᠮᠠ ᠪᠠᠭᠠᠲᠤᠷ ᠤ᠋ᠨ ᠮᠢᠩᠭᠠᠲᠤ ᠶ᠋ᠢ ᠲᠣᠷᠭᠠᠨ ᠴᠡᠷᠢᠭ ᠦ᠋ᠨ ᠬᠤᠸᠠᠷᠠᠨ ᠤ᠋ ᠳᠡᠷᠭᠡᠳᠡ ᠪᠠᠢᠷᠢᠰᠢᠭᠤᠯᠵᠤ ᠬᠠᠭᠠᠨ ᠤ᠋ ᠤᠷᠲᠤ ᠥᠷᠭᠥᠭᠡ ᠶ᠋ᠢ ᠬᠠᠷᠠᠭᠠᠯᠵᠠᠭᠤᠯᠬᠤ ᠠ᠋ᠴᠠ ᠭᠠᠳᠠᠨᠠ ᠣᠷᠣᠰ᠂ ᠬᠠᠰᠠᠭ᠂ ᠺᠢᠷᠭᠢᠽ᠂ ᠮᠠᠨᠵᠤ᠂ ᠲᠥᠪᠡᠳ ᠨᠤᠲᠤᠭ ᠠ᠋ᠴᠠ ᠶᠠᠪᠤᠭᠠ ᠬᠤᠳᠠᠯᠳᠤᠭᠠᠴᠢᠳ᠂ ᠮᠥᠷᠭᠥᠯᠴᠢᠳ᠂ ᠠᠶᠠᠯᠠᠴᠢᠨ ᠭᠡᠢᠴᠢᠨ ᠦ᠌ ᠪᠢᠴᠢᠭ ᠲᠠᠮᠠᠭᠠ ᠶ᠋ᠢ ᠰᠢᠯᠭᠠᠳᠠᠭ ᠪᠣᠯᠭᠠᠶᠠ》 ᠭᠡᠵᠦ ᠪᠣᠳᠣᠪᠠ᠃ ᠪᠠᠯᠵᠢᠳᠠᠷᠠ ᠬᠠᠲᠤᠨ ᠡᠨᠡ ᠦᠶᠡ ᠳ᠋ᠦ᠍《ᠨᠢᠭᠡᠨᠲᠡ ᠬᠠᠲᠤᠨ ᠡᠬᠡ ᠪᠣᠯᠤᠭᠰᠠᠨ ᠶᠤᠮ ᠴᠢᠨᠢ ᠬᠥᠪᠡᠭᠦᠳ ᠢ᠋ᠶ᠋ᠡᠨ ᠬᠠᠭᠠᠨ ᠤ᠋ ᠰᠠᠭᠤᠳᠠᠯ ᠳ᠋ᠤ᠌ ᠰᠠᠭᠤᠯᠭᠠᠬᠤ ᠶ᠋ᠢ ᠪᠣᠳᠣᠨᠠ ᠰᠢᠦ ᠳᠡ᠃ ᠶᠦᠮ ᠠᠭᠠ ᠳᠡᠩᠳᠡᠭᠦᠦ ᠬᠤᠪᠢ ᠪᠠᠨ ᠬᠢᠴᠢᠶᠡᠬᠦ ᠶᠦᠮ᠃ ᠬᠠᠷᠠ ᠨᠢᠳᠦᠨ ᠡᠴᠡ ᠬᠥᠮᠥᠰᠬᠡ ᠭᠠᠳᠠᠭᠤᠷ ᠭᠡᠳᠡᠭ ᠦᠭᠡ ᠪᠣᠢ᠂ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠲᠦ᠍ ᠪᠢ ᠬᠠᠮᠢᠶᠠ ᠦᠭᠡᠢ ᠪᠢᠰᠢ ᠬᠠᠷᠢᠨ ᠴᠢ ᠶᠡᠬᠡ ᠬᠠᠮᠢᠶᠠ ᠲᠠᠢ 》 ᠭᠡᠵᠦ ᠥᠪᠡᠷ ᠢ᠋ ᠪᠡᠨ ᠵᠥᠪᠳᠡᠭᠡᠨ ᠪᠠᠢᠯᠠ᠃
ᠶᠦᠮ ᠠᠭᠠ ᠬᠠᠲᠤᠨ ᠭᠣᠶᠣᠮᠰᠣᠭ ᠳᠡᠪᠡᠯ ᠦ᠋ᠨ ᠢ᠋ᠶ᠋ᠡᠨ ᠲᠣᠪᠴᠢ ᠰᠢᠯᠪᠢ ᠶ᠋ᠢ ᠢᠮᠡᠷᠴᠦ ᠦᠵᠡᠭᠡᠳ ᠲᠠᠭᠠᠯᠠᠮᠵᠢᠲᠠᠢᠶᠠ ᠢᠨᠢᠶᠡᠮᠰᠦᠭᠯᠡᠵᠦ᠂
— ᠶᠡᠬᠡ ᠬᠠᠲᠤᠨ ᠲᠠᠨ ᠲᠠᠢ ᠰᠠᠨᠠᠭᠠ ᠨᠡᠢᠯᠡᠯᠡ᠃ ᠪᠢ ᠲᠠᠨ ᠳ᠋ᠤ᠌ ᠲᠠᠯᠠᠷᠬᠠᠨᠠ᠃ ᠬᠥᠪᠡᠭᠦᠳ ᠥᠪᠡᠷ ᠵᠠᠭᠤᠷᠠ ᠪᠠᠨ ᠡᠪ ᠲᠡᠢ ᠪᠠᠢᠭᠠᠰᠠᠢ ᠭᠡᠳ ᠥᠷᠭᠥᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠵᠦᠭ ᠠᠯᠬᠤᠪᠠ᠃ ᠪᠠᠯᠵᠢᠳᠠᠷᠠ ᠲᠣᠯᠣᠭᠠᠢ ᠪᠠᠨ ᠪᠥᠬᠥᠢᠰᠬᠢᠯᠭᠡᠨ ᠬᠠᠷᠢᠭᠤ ᠬᠦᠨᠳᠦᠯᠡᠯ ᠦᠵᠡᠭᠦᠯᠦᠭᠡᠳ ᠠᠲᠠᠭᠠᠷᠬᠠᠩᠭᠤᠢ ᠬᠠᠷᠠᠵᠠᠢ᠃
ᠠᠷᠪᠠᠨ ᠨᠢᠭᠡ
ᠰᠡᠩᠭᠡ ᠶ᠋ᠢ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠤ᠋ ᠰᠠᠭᠤᠳᠠᠯ ᠳ᠋ᠤ᠌ ᠮᠣᠷᠢᠯᠠᠩᠭᠤᠲᠠ ᠶᠦᠮ ᠠᠭᠠ ᠡᠬᠡ ᠨᠣᠢᠷ ᠮᠠᠭᠤᠲᠠᠢ᠂ ᠰᠡᠳᠬᠢᠯ ᠲᠣᠭᠲᠠᠪᠤᠷᠢ ᠦᠭᠡᠢ ᠪᠣᠯᠪᠠ᠃ ᠶᠦᠮ ᠠᠭᠠ ᠬᠠᠲᠤᠨ ᠭᠣᠶᠣᠮᠰᠣᠭ ᠲᠣᠭᠣᠷᠴᠣᠭ ᠡᠮᠦᠰᠴᠡᠢ᠃ ᠲᠣᠭᠣᠷᠴᠣᠭ ᠨᠢ ᠠᠯᠤᠬᠠ ᠶ᠋ᠢᠨ ᠬᠡ ᠪᠡᠷ ᠪᠢᠲᠡᠭᠦᠦ ᠡᠮᠵᠢᠭᠰᠡᠨ ᠪᠥᠭᠡᠳ ᠶᠠᠭᠠᠨ ᠥᠩᠭᠡ ᠶ᠋ᠢᠨ ᠤᠲᠠᠰᠤ ᠪᠠᠷ ᠰᠠᠴᠤᠭ ᠤᠨᠵᠢᠭᠤᠯᠵᠠᠢ᠃ ᠡᠩ ᠦ᠋ᠨ ᠬᠡ ᠲᠡᠢ ᠭᠣᠶᠣᠮᠰᠣᠭ ᠲᠣᠭᠣᠷᠴᠣᠭ ᠶᠦᠮ ᠠᠭᠠ ᠬᠠᠲᠤᠨ ᠳ᠋ᠤ᠌ ᠵᠣᠬᠢᠭᠰᠠᠨ ᠪᠠᠢᠯᠠ᠃ ᠶᠦᠮ ᠠᠭᠠ ᠬᠠᠲᠤᠨ ᠤ᠋ ᠬᠥᠬᠥ ᠲᠦᠭᠦᠷᠡᠩᠭᠡ᠂ᠨᠢᠷᠤᠭᠤ ᠬᠣᠲᠣᠭᠣᠷ᠂ ᠥᠭᠡᠵᠡᠭ ᠬᠣᠨᠳᠣᠯᠠᠢ ᠬᠡᠯᠪᠡᠷᠢ ᠰᠠᠢᠲᠠᠢ ᠭᠤᠸᠠᠯᠢᠭ ᠠᠵᠢ᠃ ᠵᠠᠯᠠᠭᠤ ᠭᠤᠸᠠᠯᠢᠭ ᠨᠠᠰᠤᠨ ᠳ᠋ᠠᠭᠠᠨ ᠪᠡᠯᠪᠡᠰᠦᠷᠡᠭᠰᠡᠨ ᠴᠦ᠍ ᠲᠥᠷᠥ ᠶ᠋ᠢᠨ ᠲᠥᠯᠥᠭᠡ ᠰᠠᠨᠠᠭᠠ ᠵᠣᠪᠠᠨᠢᠨ ᠪᠠᠢᠨᠠ᠃ᠦᠷᠭᠦᠭᠡᠨ ᠳ᠋ᠦ᠍ ᠭᠠᠯᠳᠠᠮᠠ ᠪᠠᠭᠠᠲᠤᠷ ᠰᠠᠭᠤᠨᠠ᠃
—ᠡᠴᠢᠭᠡ ᠬᠠᠭᠠᠨ ᠰᠦᠢᠲᠦ ᠪᠦᠰᠡᠭᠦᠢ ᠶ᠋ᠢᠨ ᠡᠳᠦᠷ ᠰᠤᠳᠤᠷ ᠢ
ᠠᠰᠠᠭᠤᠵᠤ ᠪᠠᠢᠨᠠ ᠭᠡᠮᠡᠨ ᠭᠠᠯᠳᠠᠮᠠ ᠠᠮᠢᠨ ᠴᠢᠬᠤᠯᠠ ᠬᠡᠷᠡᠭ ᠢ ᠶᠦᠮ ᠠᠭᠠ ᠬᠠᠲᠤᠨ ᠳ᠋ᠤ᠌ ᠥᠴᠢᠪᠡ᠃
—ᠬᠣᠩ ᠲᠠᠢᠵᠢ ᠬᠣᠯᠠ ᠶ᠋ᠢᠨ ᠪᠣᠳᠣᠯ ᠲᠠᠢ ᠪᠣᠯᠬᠣᠷ ᠠᠨᠤᠳᠠᠷᠠ ᠳ᠋ᠤ᠌ ᠰᠦᠢ ᠲᠠᠯᠪᠢᠭᠰᠠᠨ ᠶᠤᠮ ᠪᠢᠯᠡ ᠃ᠠᠨᠤᠳᠠᠷᠠ ᠥᠬᠢᠨ ᠰᠡᠩᠭᠡ ᠳ᠋ᠦ᠍ ᠶᠠᠭ ᠲᠣᠬᠢᠷᠠᠨᠠ᠃ᠮᠡᠩᠭᠡ ᠲᠥᠭᠡᠷᠭᠡ ᠨᠢ ᠨᠡᠢᠯᠡᠭᠰᠡᠨ ᠭᠡᠵᠦ ᠰᠤᠳᠤᠷ ᠲᠤ᠌ ᠪᠢᠴᠢᠭᠰᠡᠨ ᠪᠠᠢᠨᠠ᠃ᠸᠴᠢᠷᠲᠦ ᠰᠡᠴᠡᠨ ᠬᠠᠭᠠᠨ ᠤ᠋ ᠲᠠᠯᠠ ᠪᠠᠷ ᠰᠠᠢᠨ ᠡᠳᠦᠷ ᠢ᠋ ᠲᠣᠪᠯᠠᠶᠠ ᠭᠡᠮᠡᠨ ᠪᠣᠳᠣᠭᠰᠠᠭᠠᠷ ᠡᠳᠦᠢ ᠬᠦᠷᠦᠯᠡ ᠭᠡᠵᠦ ᠶᠦᠮ ᠠᠭᠠ ᠬᠠᠲᠤᠨ ᠡᠬᠡ ᠶ᠋ᠢᠨ ᠶᠣᠰᠣᠭᠠᠷ ᠠᠰᠠᠭᠤᠯᠠ᠃
ᠭᠠᠯᠳᠠᠮᠠ ᠪᠠᠭᠠᠲᠤᠷ ᠤ᠋ᠨ ᠨᠠᠰᠤ ᠵᠠᠯᠠᠭᠤ ᠬᠢᠷᠢᠨᠡ᠂ᠤᠬᠠᠭᠠᠨᠲᠤ ᠡᠴᠢᠭᠡ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠥᠰᠦᠭᠰᠡᠨ ᠲᠤᠯᠠ᠂
— ᠨᠠᠮᠤᠷ ᠤ᠋ᠨ ᠳᠤᠮᠳᠠ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠳᠣᠯᠣᠭᠠᠨ ᠭᠡᠵᠦ ᠡᠴᠢᠭᠡ ᠰᠠᠨᠠᠭᠠ ᠪᠠᠨ ᠬᠡᠯᠡᠪᠡ᠃ᠬᠠᠷᠢᠨ ᠬᠠᠲᠤᠨ ᠡᠬᠡ ᠳ᠋ᠦ᠍ ᠥᠭᠡᠷᠡ ᠰᠠᠨᠠᠭᠠ ᠪᠠᠢᠬᠤ ᠡᠰᠡᠬᠦ ᠶ᠋ᠢ ᠮᠡᠳᠡᠭᠡᠷᠡᠢ ᠭᠡᠮᠡᠨ ᠬᠦᠰᠡᠭᠰᠡᠨ ᠪᠢᠯᠡ ᠭᠡᠪᠡ᠃ ᠶᠦᠮ ᠠᠭᠠ ᠬᠠᠲᠤᠨ ᠤ᠋ ᠴᠢᠷᠠᠢ ᠶᠠᠭᠠᠷᠠᠨ ᠲᠤᠨᠤᠷᠠᠵᠤ᠂
— ᠨᠠᠳᠠᠳᠤ ᠲᠤᠩ ᠨᠡᠢᠴᠡᠨᠡ ᠭᠡᠪᠡ᠃
ᠭᠠᠯᠳᠠᠮᠠ ᠪᠠᠭᠠᠲᠤᠷ ᠬᠠᠲᠤᠨ ᠡᠬᠡ ᠶ᠋ᠢᠨ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠶᠠᠪᠤᠬᠤ ᠶ᠋ᠢ ᠵᠠᠪᠳᠤᠬᠤ ᠮᠡᠲᠦ ᠪᠣᠯᠬᠤ ᠳ᠋ᠤ᠌ ᠶᠦᠮ ᠠᠭᠠ ᠬᠠᠲᠤᠨ ᠠᠶᠠᠭᠠᠴᠢ ᠪᠦᠰᠡᠭᠦᠢ ᠶ᠋ᠢ ᠭᠠᠷᠬᠤ ᠬᠣᠭᠣᠷᠣᠨᠳᠣ᠂
—ᠪᠢ ᠰᠡᠩᠭᠡ ᠳ᠋ᠦ᠍ ᠵᠣᠪᠠᠨᠠ᠃ ᠬᠠᠲᠤᠨ ᠠᠨᠤᠳᠠᠷᠠ ᠤᠬᠠᠭᠠᠨ ᠲᠠᠢ ᠲᠤᠯᠠ ᠶᠡᠬᠡ ᠲᠦᠰᠢᠭ ᠪᠣᠯᠤᠨᠠ᠃ᠭᠡᠲᠡᠯᠡ ᠠᠬᠠ ᠳᠡᠭᠦᠦ ᠴᠡᠴᠡᠨ᠂ ᠵᠣᠳᠪᠠᠪᠠᠭᠠᠲᠤᠷ ᠨᠠᠷ ᠵᠠᠯᠠᠭᠤ ᠬᠠᠭᠠᠨ ᠢ᠋ ᠪᠣᠭᠣᠷᠯᠠᠬᠤ ᠪᠣᠯᠤᠯᠲᠠᠢ ᠭᠡᠵᠦ ᠶᠠᠷᠢᠶᠠ ᠡᠭᠦᠰᠬᠡᠪᠡ᠃ ᠭᠠᠯᠳᠠᠮᠠ ᠲᠣᠭᠣᠨᠣ ᠶ᠋ᠢᠨ ᠳᠡᠭᠡᠭᠦᠷ ᠰᠢᠪᠠᠭᠤ ᠥᠩᠭᠡᠷᠡᠬᠦ ᠳ᠋ᠦ᠍ ᠰᠡᠷᠳ᠋ᠬᠢᠨ ᠬᠠᠷᠠᠭᠰᠠᠨ ᠢᠶᠠᠨ᠂
— ᠪᠢ ᠵᠣᠳᠪᠠᠪᠠᠭᠠᠲᠤᠷ ᠢ ᠮᠡᠳᠡᠨᠡ ᠭᠡᠵᠦ ᠨᠡᠯᠢᠶᠡᠳ ᠨᠤᠬᠤᠴᠠᠲᠠᠢ ᠬᠡᠯᠡᠪᠡ᠃ ᠶᠦᠮ ᠠᠭᠠ ᠬᠠᠲᠤᠨ᠂
— ᠲᠡᠢᠮᠦ ᠤᠤ? ᠲᠠ ᠤᠤ ᠁ ᠭᠡᠵᠦ ᠲᠡᠭᠡᠨᠡᠭᠡᠯᠵᠡᠨ ᠠᠰᠠᠭᠤᠬᠤ ᠳ᠋ᠤᠨᠢ《ᠶᠠᠭᠠᠬᠢᠭᠠᠳ ᠮᠡᠳᠡᠳᠡᠭ ᠪᠢᠯᠡ》 ᠭᠡᠰᠡᠨ ᠡᠷᠡᠭᠡᠯᠵᠡᠭᠡ ᠲᠥᠷᠥᠭᠦᠯᠦᠭᠰᠡᠨ ᠠᠰᠠᠭᠤᠯᠲᠠ ᠪᠠᠢᠯᠠ᠃
— ᠨᠠᠳᠠ ᠲᠠᠢ ᠪᠦᠷᠭᠦᠳ ᠦ᠋ᠨ ᠴᠠᠭᠴᠠᠬᠠᠢ ᠪᠠᠷᠢᠬᠤ ᠪᠠᠷ ᠬᠠᠳᠠᠨ ᠳ᠋ᠤ᠌ ᠠᠪᠠᠷᠢᠵᠤ ᠶᠠᠪᠤᠭᠠᠳ ᠨᠢᠰᠴᠦ ᠦᠬᠦᠬᠦ ᠰᠢᠬᠠᠭᠰᠠᠨ ᠶᠤᠮ ᠃ᠵᠣᠳᠪᠠᠪᠠᠭᠠᠲᠤᠷ ᠢ᠋ ᠪᠢ ᠪᠤᠭᠤᠢᠯᠢᠳᠠᠵᠤ ᠲᠣᠭᠲᠠᠭᠠᠭᠰᠠᠨ᠃ᠭᠡᠲᠡᠯᠡ ᠲᠡᠷᠡ ᠢᠴᠢᠬᠦ ᠳ᠋ᠡᠭᠡᠨ ᠮᠢᠨᠦ ᠥᠷᠥᠭᠡᠰᠦᠨ ᠭᠤᠲᠤᠯ ᠢ᠋ ᠰᠤᠭᠤ ᠲᠠᠲᠠᠵᠤ ᠬᠠᠳᠠᠨ ᠬᠠᠪᠴᠢᠯ ᠤᠷᠤᠭᠤ ᠰᠢᠳᠡᠴᠢᠬᠡᠭᠡᠳ ᠤᠬᠢᠯᠠᠵᠤ ᠪᠠᠢᠭᠰᠠᠨ᠃ ᠳᠠᠷᠠᠭᠠ ᠨᠢ ᠴᠠᠭᠴᠠᠬᠠᠢ ᠶᠢ ᠲᠡᠪᠡᠷᠢᠵᠦ《ᠨᠠᠮᠠ ᠶ᠋ᠢ ᠪᠠᠷᠢᠭᠰᠠᠨ ᠭᠡᠵᠦ ᠬᠡᠯᠡᠴᠢᠬᠡᠶᠡ᠃ ᠬᠠᠭᠠᠨ ᠪᠣᠯᠬᠤ ᠬᠥᠮᠦᠨ ᠡᠷᠲᠡ ᠲᠠᠨᠢᠭᠳᠠᠬᠤ ᠶᠣᠰᠣᠲᠠᠢ》 ᠭᠡᠵᠦ ᠪᠠᠢᠭᠰᠠᠨ᠃ᠲᠡᠭᠡᠬᠦ ᠳ᠋ᠦ᠍ ᠪᠢ 《ᠦᠬᠦᠴᠢᠬᠡᠭᠡ ᠦᠭᠡᠢ ᠴᠢᠨᠢ ᠶᠡᠬᠡ ᠶᠠᠭᠤᠮᠠ ᠪᠢᠰᠢᠦ》ᠭᠡᠵᠦ ᠬᠡᠯᠡᠭᠰᠡᠨ ᠭᠡᠮᠡᠨ ᠭᠠᠯᠳᠠᠮᠠ ᠪᠠᠭᠠᠲᠤᠷ ᠬᠠᠲᠤᠨ ᠳ᠋ᠤ᠌ ᠥᠭᠦᠯᠡᠪᠡ᠃
— ᠵᠣᠳᠪᠠᠪᠠᠭᠠᠲᠤᠷ ᠲᠡᠭᠡᠪᠡᠯ ᠪᠦᠷ ᠡᠷᠲᠡᠨ ᠡᠴᠡ ᠬᠠᠭᠠᠨ ᠪᠣᠯᠬᠤ ᠶ᠋ᠢ ᠰᠠᠨᠠᠭᠠᠷᠬᠠᠳᠠᠭ ᠪᠠᠢᠵᠠᠢ ᠭᠡᠮᠡᠨ ᠶᠦᠮ ᠠᠭᠠ ᠡᠬᠡ ᠬᠡᠯᠡᠭᠡᠳ《ᠢᠴᠢᠭᠦᠷᠢᠲᠡᠢ ᠶᠦᠮ》 ᠭᠡᠵᠦ ᠪᠣᠳᠣᠪᠠ᠃
— ᠵᠣᠳᠪᠠᠪᠠᠭᠠᠲᠣᠷ ᠤ᠋ᠨ ᠴᠠᠭᠠᠨᠠ ᠬᠡᠨ ᠨᠢᠭᠡᠨ ᠪᠠᠢᠵᠤ ᠮᠡᠳᠡᠨᠡ᠃
ᠬᠠᠷᠢᠨ ᠬᠡᠨ ᠪᠠᠢᠵᠤ ᠲᠠᠭᠠᠷᠠᠬᠤᠪ?
— ᠯᠠᠪ ᠠᠬᠠ ᠨᠢ ᠪᠠᠢᠭᠠ᠃
— ᠴᠡᠴᠡᠨ ᠳᠠᠭᠤ ᠴᠥᠭᠡᠨᠲᠡᠢ᠂ ᠳᠣᠲᠣᠭᠤᠷ ᠲᠠᠮᠢᠷ ᠲᠠᠢ᠃
ᠵᠣᠳᠪᠠᠪᠠᠭᠠᠲᠣᠷ᠂ ᠴᠡᠴᠡᠨ ᠬᠣᠶᠠᠷ ᠬᠤᠤᠪᠢᠯᠳᠤᠵᠤ ᠬᠠᠭᠠᠨ ᠳ᠋ᠤ᠌ ᠭᠡᠮ ᠬᠢᠵᠦ ᠮᠡᠳᠡᠨᠡ᠃ ᠰᠡᠩᠭᠡ ᠪᠣᠯ ᠬᠠᠭᠠᠨ ᠰᠠᠭᠤᠳᠠᠯ ᠳ᠋ᠤ᠌ ᠲᠡᠩᠴᠡᠬᠦ ᠬᠥᠮᠦᠨ᠃ ᠲᠡᠷᠡ ᠪᠠᠯᠴᠢᠷ ᠪᠤᠰᠤ᠂ᠲᠡᠳᠡᠨ ᠦ᠌ ᠬᠤᠤᠪᠢᠯᠳᠤᠯᠭᠠᠨ ᠢ᠋ ᠵᠣᠭᠰᠣᠭᠠᠬᠤ ᠬᠡᠷᠡᠭᠲᠡᠢ᠃
— ᠰᠡᠪᠳᠡᠡᠵᠡᠯ ᠨᠢᠭᠤᠷ ᠪᠤᠷᠤᠭᠤᠯᠠᠭᠰᠠᠨ᠁
— ᠮᠢᠨᠦ ᠮᠢᠩᠭᠠᠲᠤ ᠴᠡᠷᠢᠭ ᠴᠣᠷᠣᠰ ᠠᠢᠮᠠᠭ ᠤ᠋ᠨ ᠬᠦᠷᠢᠶᠡᠨ ᠦ᠌ ᠣᠢᠷᠠᠯᠴᠠᠭᠠ ᠬᠤᠸᠠᠷᠠᠩᠨᠠᠵᠤ᠂ᠢᠯᠡ ᠳᠠᠯᠳᠠ ᠶᠠᠪᠤᠳᠠᠯ ᠳ᠋ᠤ᠌ ᠰᠣᠨᠣᠷ ᠰᠣᠷᠭᠣᠭ ᠪᠠᠢᠶᠠ᠃
ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠪᠤᠯᠠᠩᠭᠢᠷᠲᠤᠨ ᠤᠷᠤᠰᠴᠤ ᠪᠠᠢᠯᠠ᠃ ᠬᠣᠲᠠ ᠬᠦᠷᠢᠶᠡᠨ ᠦ᠌ ᠳᠤᠮᠳᠠᠭᠤᠷ ᠠᠶᠠᠨᠴᠢᠳ ᠤ᠋ᠨ ᠬᠥᠰᠬᠡ ᠥᠩᠭᠡᠷᠡᠵᠦ᠂ ᠴᠠᠢ ᠳᠠᠪᠤᠰᠤ ᠬᠤᠳᠠᠯᠳᠤᠨ ᠠᠪᠴᠤ ᠣᠷᠣᠨ ᠳ᠋ᠤᠨᠢ ᠰᠠᠪᠠ᠂ ᠰᠠᠭᠤᠯᠠᠭᠠ ᠥᠭᠴᠦ ᠪᠠᠢᠨᠠ᠃ᠬᠣᠯᠲᠣᠰᠣ ᠨᠢ ᠪᠠᠷᠤᠭ ᠴᠢᠯᠠᠭᠤᠵᠢᠬᠤ ᠰᠢᠬᠠᠭᠰᠠᠨ ᠤᠯᠢᠶᠠᠰᠤᠨ ᠤ᠋ ᠳᠣᠣᠭᠤᠷ ᠭᠠᠯᠳᠠᠮᠠ ᠪᠠᠭᠠᠲᠤᠷ ᠬᠠᠷᠬᠢᠭᠤᠯᠤᠨ ᠣᠳᠪᠠ᠃ᠤᠯᠢᠶᠠᠰᠤᠨ ᠤ᠋ ᠥᠷᠭᠡᠨ ᠰᠤᠨᠢᠶᠠᠭᠠᠷ ᠮᠥᠴᠢᠷ ᠳᠡᠭᠡᠷᠡ ᠵᠣᠣᠪᠠ ᠲᠠᠢᠭᠠᠨ ᠬᠡᠪᠲᠡᠨᠡ᠃ ᠵᠣᠣᠪᠠ ᠲᠠᠢᠭᠠᠨ ᠤ᠋ ᠭᠡᠷ ᠢ᠋ ᠶᠦᠮ ᠠᠭᠠ ᠬᠠᠲᠤᠨ ᠤ᠋ ᠭᠡᠷ ᠡᠴᠡ ᠬᠣᠯᠠᠳᠤᠭᠤᠯᠵᠤ ᠪᠣᠷᠣᠴᠤᠳ ᠤ᠋ᠨ ᠬᠣᠷᠢᠶᠠᠯᠠᠯ ᠳ᠋ᠤ᠌ ᠪᠠᠷᠢᠵᠠᠢ᠃
ᠠᠷᠪᠠᠨ ᠬᠣᠶᠠᠷ
ᠪᠢᠰᠢᠯᠭᠠᠯ ᠠ᠋ᠴᠠ ᠭᠠᠯᠳᠠᠨ ᠯᠠᠮᠠ ᠨᠡᠯᠢᠶᠡᠳ ᠶᠠᠳᠠᠷᠠᠭᠤ ᠢᠷᠡᠪᠡ᠃ ᠲᠡᠭᠦᠨ ᠦ᠌ ᠪᠡᠶᠡ ᠪᠠᠷᠤᠭᠲᠠᠢ ᠶ᠋ᠢ ᠠᠵᠢᠭᠯᠠᠭᠰᠠᠨ ᠭᠠᠢᠳᠠᠪ ᠰᠥᠬᠥᠷᠡᠨ ᠰᠠᠭᠤᠵᠤ᠂
—ᠯᠠᠮᠠᠳᠠᠨ ᠲᠠᠨ ᠤ᠋ ᠯᠠᠭᠱᠠᠨ ᠳᠣᠣᠷᠠᠳᠠᠪᠠ ᠤᠤ? ᠶᠠᠭᠤᠨ ᠠ᠋ᠴᠠ ᠪᠣᠯᠪᠠ? ᠲᠠᠨ ᠤ᠋ ᠴᠢᠷᠠᠢ ᠰᠢᠷᠠ ᠪᠠᠢᠨᠠ᠃ᠲᠤᠢᠯᠳᠠᠵᠤ ᠰᠢᠨᠠᠯᠵᠠᠢ ᠭᠡᠮᠡᠨ ᠥᠴᠢᠬᠦ ᠳ᠋ᠦ᠍ ᠭᠠᠯᠳᠠᠨ ᠰᠠᠢᠨ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠥᠷᠦᠪᠴᠢ ᠰᠡᠳᠬᠢᠯ ᠢ᠋ ᠵᠥᠭᠡᠯᠡᠯᠡᠵᠦ᠂
— ᠳᠣᠲᠣᠭᠠᠳᠤ ᠲᠠᠮᠢᠷ ᠠᠯᠳᠠᠷᠠᠭᠠᠳ᠁ ᠭᠡᠵᠦ ᠠᠷᠠᠢᠬᠠᠨ ᠥᠴᠢᠭᠡᠳ ᠡᠪᠬᠡᠷᠡᠪᠡ᠃
ᠭᠠᠯᠳᠠᠨ ᠢ᠋ ᠡᠪᠡᠳᠬᠦ ᠳ᠋ᠦ᠍ ᠭᠠᠢᠳᠠᠪ ᠬᠠᠮᠲᠤ ᠡᠪᠡᠳᠴᠦ ᠪᠢᠯᠡ᠃ ᠴᠣᠬᠣᠮ ᠳ᠋ᠠᠭᠠᠨ ᠭᠠᠢᠳᠠᠪ ᠤ᠋ᠨ ᠪᠡᠶᠡ ᠡᠷᠡᠭᠦᠯ ᠬᠢᠷᠢᠨᠡ ᠰᠡᠳᠬᠢᠯ ᠡᠪᠡᠳᠦᠭᠰᠡᠨ ᠪᠠᠢᠪᠠ᠃ ᠭᠠᠢᠳᠠᠪ ᠤ᠋ᠨ ᠨᠢᠳᠦᠨ ᠳ᠋ᠦ᠍ ᠲᠤᠩᠭᠠᠯᠠᠭ ᠨᠢᠯᠪᠤᠰᠤ ᠴᠠᠢᠯᠡᠩᠨᠠᠵᠤ ᠪᠠᠢᠬᠤ ᠶ᠋ᠢ ᠬᠠᠷᠠᠪᠠ᠃ ᠲᠥᠪᠡᠳ ᠦ᠋ᠨ ᠴᠠᠰᠤᠲᠤ ᠠᠭᠤᠯᠠ ᠶ᠋ᠢᠨ ᠶᠠᠩ ᠲᠠᠭᠲᠤ ᠳ᠋ᠤ᠌ ᠵᠠᠭᠤ ᠵᠠᠭᠤᠨ ᠵᠢᠯ ᠳᠠᠷᠤᠭᠳᠠᠵᠤ ᠡᠪᠡᠰᠦ ᠨᠣᠭᠣᠭᠠᠨ ᠤ᠋ ᠳᠦᠷᠰᠦ ᠬᠡᠯᠪᠡᠷᠢ ᠨᠢ ᠬᠦᠷᠲᠡᠯᠡ ᠥᠭᠡᠷᠡᠴᠢᠯᠡᠭᠳᠡᠵᠦ ᠡᠮ ᠦ᠋ᠨ ᠠᠭᠤᠯᠤᠮᠵᠢᠲᠠᠢ ᠪᠣᠯᠤᠭᠰᠠᠨ ᠲᠢᠶᠠᠨ ᠱᠢ ᠤᠷᠭᠤᠮᠠᠯ ᠢ᠋ᠶ᠋ᠠᠷ ᠮᠢᠨᠦ ᠬᠣᠣᠷᠳᠠᠯ ᠢ᠋ ᠲᠠᠢᠯᠬᠤ ᠭᠡᠵᠦ ᠡᠮ ᠪᠠᠷᠢᠶᠠᠴᠢ ᠮᠠᠷᠠᠮᠪᠠ ᠨᠠᠷ ᠴᠥᠬᠥᠷᠡᠯᠲᠡ ᠦᠭᠡᠢ ᠣᠷᠣᠯᠳᠣᠪᠠ᠃ᠲᠠᠪᠤᠨ ᠴᠤᠯᠤ ᠡᠷᠬᠡᠲᠡᠨ ᠰᠢᠷᠠ ᠠ᠋ᠴᠠ ᠪᠣᠯᠵᠤ ᠱᠦᠭᠦᠷᠡᠯ ᠨᠢ ᠠᠯᠳᠠᠭᠳᠠᠭᠰᠠᠨ ᠭᠡᠵᠦ ᠳᠣᠮᠴᠢ ᠮᠠᠷᠠᠮᠪᠠ ᠠᠢᠯᠠᠳᠤᠭᠰᠠᠨ ᠪᠢᠯᠡ᠃ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠲᠤ ᠲᠥᠪᠡᠳ ᠦ᠋ᠨ ᠳ᠋ᠶ᠋ᠸᠠ ᠰᠠᠩᠵᠠᠢᠵᠠᠮᠰᠤ ᠡᠯᠴᠢ ᠳᠣᠪᠲᠣᠯᠭᠠᠨ ᠣᠴᠢᠵᠤ ᠬᠠᠲᠤᠨ ᠡᠬᠡ ᠳ᠋ᠦ᠍ ᠬᠡᠯᠡ ᠳᠣᠭᠣᠯᠭᠠᠵᠤ《ᠠᠮᠤᠷ ᠲᠠᠢᠪᠤᠩ ᠪᠠᠢ᠃ ᠠᠶᠠᠨᠳᠠᠭᠠᠨ ᠬᠤᠪᠢᠯᠭᠠᠨ ᠯᠠᠮᠠ ᠶ᠋ᠢᠨ ᠪᠡᠶᠡ ᠢᠯᠠᠷᠢᠰᠢᠵᠤ ᠬᠡᠪ ᠦ᠋ᠨ ᠪᠣᠯᠤᠨᠠ》ᠭᠡᠬᠦ ᠳ᠋ᠦ᠍ ᠶᠦᠮ ᠠᠭᠠ ᠬᠠᠲᠤᠨ ᠡᠬᠡ᠂
— ᠮᠠᠨ ᠤ᠋ ᠣᠢᠷᠠᠳ ᠮᠣᠩᠭᠣᠯᠴᠤᠳ ᠡᠬᠡ ᠲᠡᠢ ᠬᠥᠮᠦᠨ ᠦᠬᠦᠳᠡᠭ ᠦᠭᠡᠢ ᠭᠡᠵᠦ ᠶᠠᠷᠢᠳᠠᠭ᠃ᠨᠠᠳᠠ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠡᠮᠨᠡᠬᠦ ᠡᠮ ᠪᠣᠢ ᠭᠡᠮᠡᠨ ᠬᠡᠯᠡᠭᠡᠳ ᠡᠮᠴᠢ ᠵᠠᠷᠤᠨ ᡀᠠᠰᠠ ᠬᠣᠲᠠᠨᠠ ᠬᠦᠷᠦᠯᠴᠡᠨ ᠢᠷᠡᠭᠰᠡᠨ ᠶᠤᠮᠳᠠᠭ᠃ᠢᠷᠡᠭᠰᠡᠨ ᠳᠠᠷᠤᠢ ᠳ᠋ᠠᠭᠠᠨ ᠬᠠᠲᠤᠨ ᠡᠬᠡ ᠨᠢᠭᠡᠨ ᠵᠦᠢᠯ ᠦ᠋ᠨ ᠰᠢᠩᠭᠡᠨ ᠢ᠋ ᠭᠠᠤᠯᠢᠨ ᠴᠥᠭᠥᠴᠡ ᠪᠡᠷ ᠭᠠᠯᠳᠠᠨ ᠳ᠋ᠤ᠌ ᠤᠤᠭᠤᠯᠭᠠᠪᠠ᠃ᠡᠪᠡᠳᠴᠢᠨ ᠳ᠋ᠦ᠍ ᠳᠠᠷᠤᠩᠭᠤᠢᠯᠠᠭᠳᠠᠭᠰᠠᠨ ᠴᠢᠷᠠᠢ ᠶ᠋ᠢ ᠠᠵᠢᠭᠰᠠᠨ ᠡᠬᠡ᠂
— ᠬᠥᠪᠡᠭᠦᠨ ᠮᠢᠨᠢ ᠳᠣᠯᠣᠭᠠ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠰᠠᠷᠠᠭᠤᠯᠬᠠᠨ ᠪᠣᠯᠤᠨᠠ᠃ᠴᠢᠨᠦ ᠵᠣᠪᠬᠢ ᠳ᠋ᠤ᠌ ᠨᠠᠷᠠ ᠰᠠᠷᠠ ᠪᠠᠢᠨᠠ᠃ᠳᠣᠲᠣᠭᠠᠳᠤ ᠲᠠᠮᠢᠷ ᠰᠡᠷᠭᠦᠨᠡ ᠭᠡᠵᠦ ᠥᠭᠦᠯᠡᠪᠡ᠃
ᠭᠠᠯᠳᠠᠨ ᠢ᠋ ᠠᠰᠠᠷᠠᠵᠤ ᠪᠣᠢ ᠭᠠᠢᠳᠠᠪ᠂ᠠᠶᠠᠭᠠᠴᠢ ᠯᠠᠮᠠ ᠴᠣᠢ ᠬᠣᠶᠠᠭᠤᠯᠠ ᠪᠠᠨ ᠬᠠᠲᠤᠨ ᠡᠬᠡ ᠳ᠋ᠦ᠍ ᠲᠤᠰᠠᠯᠠᠳᠠᠭ ᠪᠠᠢᠯᠠ᠃ᠬᠠᠲᠤᠨ ᠡᠬᠡ ᠶ᠋ᠢ ᡀᠠᠰᠠ ᠳ᠋ᠤ᠌ ᠢᠷᠡᠬᠦ ᠦᠶᠡ ᠪᠡᠷ ᠲᠦᠮᠡᠨ ᠭᠠᠵᠠᠷ ᠤ᠋ᠨ ᠮᠥᠷᠭᠥᠯᠴᠢᠳ ᠪᠤᠳᠠᠭᠠᠯᠠᠵᠤ ᠣᠯᠠᠨ ᠤ᠋ ᠬᠥᠯ ᠶᠡᠬᠡᠰᠦᠭᠰᠡᠨ ᠪᠢᠯᠡ᠃ ᠡᠬᠡ ᠶ᠋ᠢᠨ ᠴᠢᠷᠠᠢ ᠤᠭ ᠤ᠋ᠨ ᠴᠠᠢᠪᠤᠷ ᠪᠥᠭᠡᠳ ᠥᠩᠭᠡ ᠵᠢᠰᠦ ᠨᠢ ᠨᠠᠮᠪᠠ ᠲᠡᠭᠦᠯᠳᠡᠷ᠂ ᠦᠭᠡ ᠶᠠᠷᠢᠶᠠ ᠨᠢ ᠳᠥᠯᠭᠡᠬᠡᠨ ᠶᠠᠩᠵᠤ ᠪᠠᠷ ᠢ᠋ᠶ᠋ᠠᠨ ᠪᠥᠯᠥᠭᠡ᠃ ᠬᠣᠯᠠ ᠣᠳᠤᠭᠰᠠᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠶᠡᠬᠡᠳᠡ ᠪᠡᠭᠲᠡᠷᠡᠵᠦ᠂ ᠡᠴᠢᠭᠡ ᠬᠣᠩ ᠲᠠᠢᠵᠢ ᠠ᠋ᠴᠠ ᠬᠣᠢᠰᠢ ᠭᠠᠭᠴᠠᠭᠠᠷᠳᠠᠯ ᠤ᠋ᠨ ᠡᠭᠦᠯᠡ ᠮᠠᠨᠠᠨ ᠪᠦᠷᠬᠦᠭᠰᠡᠨ ᠠᠲᠠᠯᠠ ᠶᠦᠮ ᠠᠭᠠ ᠬᠠᠲᠤᠨ ᠬᠡᠳᠦᠢᠨ ᠵᠣᠷᠢᠭ ᠲᠡᠪᠴᠢᠶᠡᠷᠢ ᠭᠠᠷᠭᠠᠵᠠᠢ᠃ ᠶᠦᠮ ᠠᠭᠠ ᠬᠠᠲᠤᠨ ᠤ᠋ ᠲᠡᠪᠴᠢᠶᠡᠷᠢ ᠶ᠋ᠢᠨ ᠲᠤᠢᠯ ᠢ᠋ ᠰᠡᠩᠭᠡ ᠭᠠᠯᠳᠠᠨ ᠬᠣᠶᠠᠷ ᠴᠢᠩᠭᠠᠯᠠᠵᠤ᠂ᠲᠡᠷᠡ ᠬᠦ᠌ ᠴᠠᠭ ᠲᠤ ᠦᠯᠦ ᠮᠤᠯᠲᠤᠷᠠᠬᠤ ᠪᠥᠭᠡᠰᠦ ᠬᠠᠲᠤᠨ ᠡᠬᠡ ᠶ᠋ᠢᠨ ᠡᠮᠡ ᠪᠡᠶᠡ ᠶ᠋ᠢᠨ ᠭᠠᠩᠰᠠᠷᠠᠯ ᠶᠠᠭᠤ ᠴᠤ ᠪᠢᠰᠢ ᠪᠥᠯᠥᠭᠡ᠃
ᠬᠠᠲᠤᠨ ᠡᠬᠡ ᠶ᠋ᠢᠨ ᠲᠠᠯᠠ ᠰᠢᠭᠦᠷ ᠳᠠᠢᠴᠢᠩ ᠤ᠋ᠨ ᠤᠳᠤᠮ ᠤ᠋ᠨ ᠬᠢᠨ ᠢᠵᠢᠯ ᠮᠥᠷᠡᠨ ᠦ᠌ ᠬᠥᠪᠡᠭᠡᠨᠡ ᠰᠠᠭᠤᠷᠢᠯᠠᠵᠤ ᠣᠷᠣᠰ᠂ ᠲᠠᠲ᠋ᠠᠷ ᠴᠢᠰᠤ ᠲᠠᠢ ᠠᠯᠢ ᠡᠷᠲᠡ ᠬᠣᠯᠢᠯᠳᠤᠵᠠᠢ᠃ ᠢᠵᠢᠯ ᠮᠥᠷᠡᠨ ᠦ᠌ ᠬᠥᠪᠡᠭᠡᠨ ᠳ᠋ᠦ᠍ ᠠᠯᠲᠠᠢ ᠶ᠋ᠢᠨ ᠬᠣᠨᠢ ᠨᠤᠲᠤᠭᠰᠢᠭᠤᠯᠵᠤ ᠪᠠᠭᠠ ᠰᠢᠤᠬᠠᠨ ᠴᠡᠮᠪᠡ ᠶ᠋ᠢᠨ ᠹᠠᠪᠷᠢᠺ ᠢ᠋ ᠰᠠᠯᠬᠢᠨ ᠰᠡᠩᠰᠡ ᠪᠡᠷ ᠠᠵᠢᠯᠯᠠᠭᠤᠯᠤᠨᠠ᠃ ᠶᠦᠮ ᠠᠭᠠ ᠬᠠᠲᠤᠨ ᠤ᠋ ᠳᠡᠭᠦᠦ ᠬᠥᠪᠡᠭᠦᠨ 1 ᠪᠥᠬᠡᠪᠦᠩ ᠹᠠᠪᠷᠢᠺ ᠤ᠋ᠨ ᠡᠵᠡᠨ ᠶᠦᠮ᠃ᠪᠥᠬᠡᠪᠦᠩ ᠭᠤᠷᠪᠠᠨ ᠬᠥᠪᠡᠭᠦᠨ ᠲᠡᠢ᠃ᠠᠵᠢᠯ ᠳ᠋ᠤ᠌ ᠱᠠᠯᠠᠮᠠᠭ ᠬᠥᠪᠡᠭᠦᠨ ᠢ᠋ ᠦᠯᠡᠮᠵᠢ ᠭᠡᠨᠡ᠃ ᠹᠠᠪᠷᠢᠺ ᠤ᠋ᠨ ᠡᠭᠡᠷᠡᠭᠰᠡᠨ ᠨᠣᠣᠰᠣ ᠪᠠᠷ ᠰᠡᠪᠰᠡᠭᠡᠷ ᠴᠡᠮᠪᠡ ᠨᠡᠬᠡᠵᠦ ᠦᠯᠡᠮᠵᠢ ᠬᠥᠪᠡᠭᠦᠨ ᠢᠵᠢᠯ ᠮᠥᠷᠡᠨ ᠦ᠌ ᠬᠥᠪᠡᠭᠡ ᠪᠡᠷ ᠬᠣᠲᠠ ᠲᠣᠰᠬᠣᠨ ᠢ᠋ᠶ᠋ᠠᠷ ᠭᠡᠷᠦᠨ ᠶᠠᠪᠤᠵᠤ ᠬᠤᠳᠠᠯᠳᠤᠭᠠᠨ ᠤ᠋ ᠵᠠᠮ ᠭᠠᠷᠭᠠᠭᠰᠠᠨ ᠢ᠋ ᠭᠠᠯᠳᠠᠨ ᠢ᠋ ᠰᠠᠬᠢᠬᠤ ᠵᠠᠭᠤᠷᠠ ᠶᠦᠮ ᠠᠭᠠ ᠡᠬᠡ ᠬᠦᠦᠷᠨᠢᠨᠡ᠃ᠶᠦᠮ ᠠᠭᠠ ᠡᠬᠡ ᠳᠡᠭᠦᠦ ᠪᠡᠨ ᠮᠥᠷᠥᠭᠡᠳᠦᠨ ᠰᠠᠨᠠᠭᠠᠯᠵᠠᠬᠤ ᠨᠢ ᠡᠯᠢᠭᠡ ᠵᠦᠰᠦᠮᠡ᠃ ᠬᠠᠲᠤᠨ ᠠᠪᠠᠬᠠᠢ ᠶ᠋ᠢᠨ ᠶᠣᠰᠣ ᠵᠢᠷᠤᠮ ᠰᠠᠬᠢᠵᠤ᠂ ᠬᠥᠪᠡᠭᠦᠳ ᠦ᠋ᠨ ᠢ᠋ᠶ᠋ᠡᠨ ᠲᠥᠯᠥᠭᠡ ᠥᠪᠡᠷ ᠢ᠋ ᠪᠡᠨ ᠡᠯᠡᠭᠡᠵᠦ ᠵᠢᠳᠬᠦᠬᠦ ᠡᠬᠡ ᠶ᠋ᠢᠨ ᠬᠢᠨᠢ ᠰᠠᠨᠴᠢᠭ ᠲᠤ ᠴᠡᠴᠡᠭ ᠦ᠋ᠨ ᠲᠣᠭᠣᠰᠣ ᠮᠡᠲᠦ ᠪᠤᠭᠤᠷᠤᠯ ᠣᠷᠣᠵᠠᠢ᠃ ᠭᠠᠯᠳᠠᠨ᠂
— ᠡᠵᠢ ᠮᠢᠨᠢ᠂ ᠲᠠᠨ ᠤ᠋ ᠰᠠᠨᠴᠢᠭ ᠲᠤ ᠁ ᠭᠡᠲᠡᠯᠡ ᠶᠦᠮ ᠠᠭᠠ ᠡᠬᠡ ᠬᠡᠵᠢᠶᠡᠨᠡᠢ ᠮᠡᠳᠡᠵᠦ ᠪᠠᠢᠭᠰᠠᠨ ᠲᠤᠯᠠ᠂
— ᠠᠯᠲᠠᠢ ᠶ᠋ᠢᠨ ᠠᠭᠤᠯᠠ ᠪᠤᠭᠤᠷᠤᠯᠲᠤᠵᠤ ᠪᠠᠢᠬᠤ ᠳ᠋ᠤ᠌ ᠡᠵᠢ ᠨᠢ ᠠᠷᠭᠠ ᠦᠭᠡᠢ ᠰᠢᠦ ᠳᠡ ᠭᠡᠵᠡᠢ᠃
ᠬᠡᠳᠦ ᠬᠣᠨᠣᠭᠠᠳ ᠭᠠᠯᠳᠠᠨ ᠬᠡᠪ ᠦ᠋ᠨ ᠪᠣᠯᠪᠠ᠃ᠭᠤᠷᠪᠠᠨ ᠰᠠᠷᠠ ᠢᠯᠡᠭᠦᠦ ᠲᠠᠷᠴᠢᠯᠠᠭᠠᠭᠰᠠᠨ ᠵᠣᠪᠠᠭᠤᠷᠢ ᠨᠢ ᠡᠬᠡ ᠶ᠋ᠢᠨ ᠤᠰᠤᠨ ᠤ᠋ ᠠᠴᠢ ᠪᠠᠷ ᠢᠯᠠᠷᠢᠰᠢᠵᠤ ᠡᠳᠡᠭᠡᠵᠡᠢ᠃ᠲᠥᠪᠡᠳ ᠮᠠᠷᠠᠮᠪᠠ᠂
—ᠮᠣᠩᠭᠣᠯᠴᠤᠳ ᠰᠢᠳᠢ ᠲᠡᠢ ᠬᠥᠮᠦᠰ᠃ ᠡᠬᠡ ᠶ᠋ᠢᠨ ᠤᠰᠤ ᠴᠤᠯᠤ ᠡᠷᠬᠡᠲᠡᠨ ᠢ᠋ ᠲᠡᠩᠴᠡᠪᠤᠷᠢᠵᠢᠭᠦᠯᠬᠦ ᠳ᠋ᠦ᠍ ᠶᠠᠭᠤᠲᠠᠢ ᠠᠴᠢᠲᠠᠨ ᠪᠣᠢ᠃ ᠬᠤᠪᠢᠯᠭᠠᠨ ᠯᠠᠮᠠ ᠲᠠᠨ ᠢ᠋ ᠪᠢ ᠪᠤᠰᠤ ᠲᠥᠷᠥᠭᠦᠯᠦᠭᠰᠡᠨ ᠡᠬᠡ ᠴᠢᠨᠢ ᠡᠮᠴᠢᠯᠡᠪᠡ᠃ ᠡᠬᠡ ᠶ᠋ᠢᠨ ᠤᠰᠤ ᠪᠠᠷ ᠡᠮᠴᠢᠯᠡᠳᠡᠭ ᠲᠤᠯᠠ ᠵᠠᠰᠠᠯ ᠢ ᠮᠡᠳᠡᠵᠦ ᠠᠪᠤᠯᠠ᠃ ᠵᠣᠷ ᠮᠡᠳᠡᠬᠦ ᠦᠭᠡᠢ ᠯᠠᠮᠠ ᠠ᠋ᠴᠠ ᠵᠣᠪᠠᠯᠠᠩ ᠦᠵᠡᠭᠰᠡᠨ ᠴᠢᠪᠠᠭᠠᠨᠴᠠ ᠳᠡᠭᠡᠷᠡ ᠭᠡᠮᠡᠨ ᠤᠨᠤᠵᠤ ᠬᠡᠯᠡᠵᠦ ᠰᠢᠦ ᠭᠡᠵᠦ ᠭᠠᠯᠳᠠᠨ ᠳ᠋ᠤ᠌ ᠥᠭᠦᠯᠡᠪᠡ᠃ᠭᠠᠯᠳᠠᠨ ᠬᠠᠷᠢᠭᠤ ᠳ᠋ᠤᠨᠢ᠂
— ᠮᠠᠷᠠᠮᠪᠠ ᠲᠠᠨ ᠳ᠋ᠤ᠌ ᠲᠠᠯᠠᠷᠬᠠᠪᠠ᠃ᠬᠠᠲᠤᠨ ᠡᠬᠡ ᠮᠥᠳᠳᠥ ᠪᠤᠴᠠᠨᠠ᠃ ᠠᠷᠢᠭᠤᠨ ᠳᠤᠭᠠᠩ ᠳ᠋ᠠᠭᠠᠨ ᠪᠢ ᠴᠦ᠍ ᠣᠴᠢᠨᠠ ᠭᠡᠯᠡ᠃
ᠮᠠᠷᠠᠮᠪᠠ ᠶ᠋ᠢᠨ ᠲᠠᠷᠭᠤᠨ ᠤᠯᠠᠭᠠᠨ ᠨᠢᠭᠤᠷ ᠲᠣᠰᠣ ᠳᠠᠭᠠᠭᠠᠵᠤ ᠪᠠᠢᠪᠠ᠃ᠭᠠᠯᠳᠠᠨ ᠵᠠᠪᠢᠯᠠᠭᠠ ᠲᠠᠢ ᠰᠠᠭᠤᠨᠠ᠃ᠪᠤᠷᠬᠠᠳ ᠤ᠋ᠨ ᠳᠦᠷᠢ ᠨᠦ᠍ᠭᠦᠳ ᠶᠦᠮ ᠠᠭᠠ ᠬᠠᠲᠤᠨ᠂ᠮᠠᠷᠠᠮᠪᠠ ᠬᠢᠭᠡᠳ ᠭᠠᠢᠲᠠᠪ᠂ ᠠᠶᠠᠭᠠᠴᠢ ᠯᠠᠮᠠ ᠶ᠋ᠢ ᠬᠦᠷᠲᠡᠯᠡ ᠠᠳᠠᠯᠢᠬᠠᠨ ᠭᠡᠷᠡᠯᠲᠦᠭᠦᠯᠦᠨ ᠭᠢᠯᠠᠯᠵᠠᠵᠤ ᠠᠪᠠᠢ᠃
ᠠᠷᠪᠠᠨ ᠭᠤᠷᠪᠠ
ᠮᠣᠳᠣᠨ ᠤ᠋ ᠦᠨᠳᠦᠰᠦ ᠪᠡᠷ ᠳᠥᠩᠭᠡᠵᠦ ᠬᠢᠭᠰᠡᠨ ᠬᠥᠩᠭᠡᠪᠲᠦᠷ ᠠᠶᠠᠭᠠᠨ ᠳ᠋ᠤ᠌ ᠶᠦᠮ ᠠᠭᠠ ᠡᠬᠡ ᠴᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠭᠡᠵᠢ ᠶ᠋ᠢ ᠠᠶᠠᠭᠠᠯᠠᠵᠤ ᠪᠠᠷᠢᠬᠤ ᠳ᠋ᠤ᠌᠂ᠭᠠᠯᠳᠠᠨ ᠴᠠᠢ ᠶ᠋ᠢᠨ ᠥᠩᠭᠡ ᠶ᠋ᠢ ᠭᠠᠢᠬᠠᠪᠠ᠃ ᠴᠠᠢ ᠶ᠋ᠢᠨ ᠥᠩᠭᠡ ᠨᠣᠭᠣᠭᠠᠨ ᠪᠠᠢᠪᠠ᠃ᠭᠠᠯᠳᠠᠨ ᠴᠠᠢ ᠶ᠋ᠢᠨ ᠥᠩᠭᠡ ᠶ᠋ᠢ ᠠᠵᠢᠭᠯᠠᠬᠤ ᠶ᠋ᠢ ᠬᠠᠲᠤᠨ ᠡᠬᠡ ᠮᠡᠳᠡᠭᠡᠳ᠂
— ᠨᠤᠲᠤᠭ ᠤ᠋ᠨ ᠴᠠᠢ ᠭᠡᠵᠦ ᠬᠡᠯᠡᠪᠡ᠃
— ᠣᠢᠷᠠᠳ ᠲᠤ᠌ ᠨᠣᠭᠣᠭᠠᠨ ᠴᠠᠢ ᠤᠷᠭᠤᠳᠠᠭ ᠪᠣᠯᠤᠭᠰᠠᠨ ᠶᠤᠮ ᠤᠤ? ᠭᠡᠵᠦ ᠬᠤᠪᠢᠯᠭᠠᠨ ᠯᠠᠮᠠ ᠠᠰᠠᠭᠤᠪᠠ᠃
— ᠬᠦᠷᠵᠢ ᠶ᠋ᠢᠨ ᠰᠢᠬᠠᠮᠠᠯ ᠴᠠᠢ ᠲᠠᠰᠤᠷᠠᠭᠰᠠᠨ᠃ᠲᠡᠢᠨ ᠦ᠌ ᠬᠥᠯ ᠳ᠋ᠦ᠍ ᠴᠠᠢ ᠶ᠋ᠢᠨ ᠲᠠᠷᠢᠶᠠᠯᠠᠩ ᠰᠦᠢᠳᠦᠭᠰᠡᠨ ᠭᠡᠨᠡ ᠯᠠᠢ᠃ᠣᠢᠷᠠᠳ ᠤᠷᠤᠭᠤ ᠴᠠᠢ ᠶᠠᠪᠤᠭᠤᠯᠬᠤ ᠪᠠᠨ ᠪᠣᠯᠢᠭᠠᠳ ᠤᠳᠠᠵᠤ ᠪᠠᠢᠨᠠ᠃ᠮᠠᠨ ᠤ᠋ ᠨᠤᠲᠤᠭ ᠤ᠋ᠨ ᠬᠢᠨ ᠠᠭᠤᠯᠠᠨ ᠳ᠋ᠠᠭᠠᠨ ᠴᠠᠢ ᠶ᠋ᠢᠨ ᠤᠷᠭᠤᠮᠠᠯ ᠲᠠᠢ ᠶᠤᠮ᠃ᠣᠳᠣ ᠠᠢᠯ ᠪᠦᠷᠢ ᠤᠷᠭᠤᠮᠠᠯ ᠢ᠋ᠶ᠋ᠠᠨ ᠤᠤᠭᠤᠵᠤ ᠪᠠᠢᠨᠠ ᠭᠡᠵᠦ ᠶᠦᠮ ᠠᠭᠠ ᠡᠬᠡ ᠬᠡᠯᠡᠪᠡ᠃
— ᠲᠡᠷᠡ ᠴᠠᠢ ᠶ᠋ᠢᠨ ᠤᠷᠭᠤᠮᠠᠯ ᠳᠠᠩ ᠨᠣᠭᠣᠭᠠᠨ ᠥᠩᠭᠡ ᠲᠡᠢ ᠤᠤ?
— ᠦᠭᠡᠢ ᠠ᠋ ᠂ᠬᠥᠪᠡᠭᠦᠨ! ᠨᠣᠭᠣᠭᠠᠨ᠂ ᠰᠢᠷᠠ᠂ ᠤᠯᠠᠭᠠᠨ᠂ ᠬᠥᠬᠡ ᠥᠩᠭᠡ ᠲᠡᠢ᠃ᠶᠠᠭᠠᠬᠢᠵᠤ ᠬᠠᠲᠠᠭᠠᠨᠠ᠂ᠲᠡᠷᠡ ᠥᠩᠭᠡ ᠪᠡᠷ ᠢ᠋ᠶ᠋ᠡᠨ ᠴᠠᠢ ᠪᠣᠯᠳᠠᠭ᠃
— ᠶᠠᠮᠠᠷ ᠤᠷᠭᠤᠮᠠᠯ ᠶᠤᠮ ᠪᠣᠢ?
— ᠮᠢᠭᠮᠠᠨᠰᠠᠩᠵᠠᠢ ᠬᠡᠮᠡᠬᠦ ᠭᠤᠷᠪᠠᠨ ᠬᠣᠣᠰ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠠᠯᠠᠭᠠᠯᠠᠵᠤ ᠤᠷᠭᠤᠳᠠᠭ ᠨᠠᠪᠴᠢᠲᠤ ᠤᠷᠭᠤᠮᠠᠯ ᠪᠠᠢᠳᠠᠭ ᠶᠤᠮ᠃
—ᠡᠵᠢ ᠠ᠋᠂ᠮᠢᠭᠮᠠᠨᠰᠠᠩᠵᠠᠢ ᠭᠡᠨᠡ᠃ ᠳᠡᠮᠪᠡᠷᠢᠯ ᠵᠠᠩᠵᠤᠨ ᠤ᠋ ᠥᠬᠢᠨ ᠮᠢᠭᠮᠠᠨᠰᠠᠩᠵᠠᠢ ᠰᠠᠢᠨ ᠪᠢᠵᠡ ᠳᠡ᠃
— ᠮᠢᠭᠮᠠᠨᠰᠠᠩᠵᠠᠢ ᠨᠥᠬᠥᠷ ᠲᠦ᠍ ᠭᠠᠷᠤᠭᠰᠠᠨ ᠰᠢᠦ ᠳᠡ᠃
ᠵᠡᠭᠦᠳᠦᠨ ᠳ᠋ᠡᠭᠡᠨ ᠲᠣᠭᠯᠠᠵᠤ᠂ᠠᠭᠲᠠ ᠶ᠋ᠢᠨ ᠰᠠᠢᠨ ᠢ᠋ᠶ᠋ᠠᠷ ᠲᠣᠭᠯᠠᠵᠤ ᠥᠰᠦᠭᠰᠡᠨ ᠮᠢᠭᠮᠠᠨᠰᠠᠩᠵᠠᠢ ᠨᠢ ᠦᠷᠭᠦᠭᠰᠡᠨ ᠵᠡᠭᠡᠷᠡ ᠶ᠋ᠢᠨ ᠬᠢ ᠰᠢᠭ ᠲᠣᠷᠮᠣᠯᠵᠠᠭᠰᠠᠨ ᠨᠢᠳᠦ ᠪᠡᠷ ᠰᠢᠷᠲᠡᠵᠦ ᠰᠠᠨᠠᠭᠳᠠᠬᠤ ᠳ᠋ᠤ᠌ ᠭᠠᠯᠳᠠᠨ ᠤ᠋ ᠨᠢᠭᠤᠷ ᠤᠯᠠᠢᠪᠠ᠃ᠴᠠᠢ ᠶ᠋ᠢᠨ ᠨᠠᠪᠴᠢ ᠶ᠋ᠢ ᠮᠢᠭᠮᠠᠨᠰᠠᠩᠵᠠᠢ ᠭᠡᠳᠡᠭ ᠢ ᠡᠬᠡ ᠡᠴᠡ ᠪᠡᠨ ᠰᠣᠨᠣᠰᠤᠭᠠᠳ《ᠬᠣᠪᠣᠷᠬᠠᠨ ᠨᠡᠷᠡ ᠲᠡᠢ ᠥᠬᠢᠨ ᠮᠢᠭᠮᠠᠨᠰᠠᠩᠵᠠᠢ ᠨᠠᠳᠠ ᠳᠤᠷᠠᠰᠤᠭᠳᠠᠬᠤ ᠲᠡᠳᠦᠢ ᠦᠯᠡᠳᠡᠵᠡᠢ᠃ ᠮᠢᠭᠮᠠᠨᠰᠠᠩᠵᠠᠢ ᠴᠡᠴᠡᠭ ᠦ᠋ᠨ ᠪᠤᠳᠠᠩ ᠳᠤᠮᠳᠠ ᠣᠴᠢᠵᠤ ᠪᠠᠢᠭᠠ ᠳᠠ》 ᠭᠡᠮᠡᠨ ᠠᠲᠠᠭᠠᠷᠠᠩᠭᠣᠢ ᠪᠣᠳᠣᠭᠰᠠᠨ ᠭᠠᠯᠳᠠᠨ᠂
—ᠪᠥᠭᠡᠷᠡ ᠠᠪᠠᠭᠠᠢ ᠪᠡᠶᠡ ᠯᠠᠭᠰᠢᠨ ᠲᠠᠪᠠᠲᠠᠢ ᠤᠤ?ᠭᠡᠵᠦ ᠡᠬᠡ ᠡᠴᠡ ᠪᠡᠨ ᠠᠰᠠᠭᠤᠯᠠ᠃ᠡᠬᠡ ᠨᠢ᠂
—ᠳᠡᠮᠪᠡᠷᠢᠯ ᠵᠠᠩᠵᠤᠨ ᠠ᠋ᠴᠠ ᠬᠣᠢᠰᠢ ᠳᠡᠮᠡᠢ ᠤᠳᠠᠯ ᠦᠭᠡᠢ ᠱᠠᠮᠪᠠᠯ ᠤ᠋ᠨ ᠣᠷᠣᠨ ᠳ᠋ᠤ᠌ ᠵᠠᠯᠠᠷᠠᠭᠰᠠᠨ ᠭᠡᠪᠡ᠃
ᠪᠥᠭᠡᠷᠡ ᠡᠬᠡᠨᠡᠷ ᠦ᠋ᠨ ᠡᠴᠢᠭᠡ ᠨᠢ ᠬᠠᠭᠠᠨ ᠤ᠋ ᠠᠭᠲᠠᠴᠢᠨ ᠪᠠᠢᠵᠠᠢ᠃ ᠳᠡᠮᠪᠡᠷᠢᠯ ᠮᠥᠨ ᠠᠭᠲᠠᠴᠢᠨ ᠪᠠᠢᠪᠠ᠃ᠡᠴᠢᠭᠡ ᠲᠡᠢ ᠨᠢ ᠡᠭᠡᠯᠵᠢᠯᠡᠨ ᠠᠭᠲᠠ ᠮᠠᠨᠠᠳᠠᠭ ᠪᠠᠢᠬᠤ ᠳ᠋ᠠᠭᠠᠨ ᠳᠡᠮᠪᠡᠷᠢᠯ ᠰᠥᠨᠢ ᠬᠤᠭᠤᠰᠯᠠᠨ ᠪᠥᠭᠡᠷᠡ ᠲᠡᠢ ᠠᠭᠤᠯᠵᠠᠨᠠ᠃ ᠪᠥᠭᠡᠷᠡ ᠪᠣᠷᠣᠭᠠᠨ ᠲᠠᠢ᠂ ᠴᠠᠰᠤ ᠲᠠᠢ ᠠᠯᠢ ᠴᠤ᠌ ᠴᠠᠭ ᠲᠤ᠌ ᠳᠡᠮᠪᠡᠷᠢᠯ ᠦ᠋ᠨ ᠮᠣᠷᠢᠨ ᠲᠦᠪᠡᠷᠭᠡᠨ ᠢ ᠴᠢᠩᠨᠠᠵᠤ ᠳᠥᠷᠥᠭᠡ ᠬᠠᠩᠭᠢᠬᠤ ᠳ᠋ᠤ᠌ ᠪᠡᠶᠡᠰᠦᠨᠡ᠃ᠳᠡᠮᠪᠡᠷᠢᠯ ᠦ᠋ᠨ ᠳ᠋ᠦ᠍ ᠬᠥᠪᠡᠭᠦᠨ ᠥᠬᠢᠨ ᠬᠣᠶᠠᠷ ᠵᠠᠶᠠᠭᠠᠵᠠᠢ᠃ ᠬᠥᠪᠡᠭᠦᠨ ᠠᠷᠴᠠ ᠡᠪᠦᠭᠡ ᠡᠴᠢᠭᠡ ᠰᠢᠭ ᠢ᠋ᠶ᠋ᠡᠨ ᠭᠥᠷᠥᠭᠡᠴᠢᠨ ᠪᠣᠯᠵᠠᠢ᠃ ᠬᠥᠪᠡᠭᠦᠨ ᠠᠷᠴᠠ ᠶ᠋ᠢ ᠭᠥᠷᠥᠭᠡᠴᠢᠨ ᠦ᠌ ᠬᠠᠷᠭᠤᠢ ᠵᠠᠮ ᠠ᠋ᠴᠠ ᠡᠴᠢᠭᠡ ᠨᠢ ᠠᠮᠢᠳᠤ ᠠᠬᠤᠢ ᠳ᠋ᠠᠭᠠᠨ ᠲᠡᠳᠡᠨ ᠭᠠᠷᠭᠠᠵᠤ ᠬᠠᠭᠠᠨ ᠤ᠋ ᠲᠣᠷᠭᠠᠨ ᠴᠡᠷᠢᠭ ᠲᠦ᠍ ᠠᠪᠴᠢᠷᠠᠪᠠ᠃ᠠᠩᠬᠠᠨ ᠳ᠋ᠠᠭᠠᠨ ᠠᠷᠴᠠ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠦ᠌ ᠡᠳᠦᠷ ᠳᠣᠳᠣᠮ ᠤ᠋ᠨ ᠪᠣᠷᠣᠭ ᠠᠮᠢᠳᠤᠷᠠᠯ ᠠ᠋ᠴᠠ ᠤᠢᠳᠴᠤ᠂
— ᠡᠴᠢᠭᠡ ᠮᠢᠨᠢ ᠨᠠᠮᠠᠶ᠋ᠢ ᠴᠡᠷᠢᠭ ᠡᠴᠡ ᠴᠢᠯᠥᠭᠡᠯᠡᠵᠦ ᠥᠭᠭᠦᠭᠡᠴᠢ ᠭᠡᠵᠦ ᠬᠦᠰᠡᠬᠦ ᠳ᠋ᠦ᠍ ᠳᠡᠮᠪᠡᠷᠢᠯ ᠵᠠᠩᠵᠤᠨ᠂
— ᠴᠢᠮᠠᠶ᠋ᠢ ᠣᠢᠷᠠᠳ ᠰᠡᠯᠡᠮᠡ ᠪᠣᠯᠭᠠᠨᠠ᠃ᠰᠡᠯᠡᠮᠡ ᠪᠣᠯ ᠴᠠᠪᠴᠢᠬᠤ ᠳ᠋ᠤ᠌ ᠵᠣᠷᠢᠭᠤᠯᠤᠭᠳᠠᠭᠰᠠᠨ ᠪᠢᠯᠡ᠃ ᠴᠠᠪᠴᠢᠵᠤ ᠡᠰᠡ ᠴᠢᠳᠠᠪᠠᠯ ᠴᠢ ᠦᠬᠦᠨᠡ᠃ᠴᠢᠨᠦ ᠡᠪᠦᠭᠡ ᠡᠴᠢᠭᠡ ᠰᠠᠬᠠᠯᠲᠤ ᠭᠥᠷᠥᠭᠡᠴᠢᠨ ᠤᠭᠠᠯᠵᠠ ᠶ᠋ᠢᠨ ᠠᠷᠤ ᠠ᠋ᠴᠠ ᠤᠬᠠᠭᠠᠨ ᠦᠭᠡᠢ ᠠᠯᠳᠠᠵᠤ ᠶᠠᠪᠤᠭᠠᠳ ᠬᠠᠳᠠᠨ ᠠ᠋ᠴᠠ ᠨᠢᠰᠴᠦ ᠦᠬᠦᠭᠰᠡᠨ ᠶᠦᠮ᠃ᠴᠢ ᠣᠢᠷᠠᠳ ᠤ᠋ᠨ ᠳᠠᠢᠰᠤᠨ ᠢ ᠨᠣᠮᠣᠬᠠᠷᠠᠭᠤᠯᠬᠤ ᠳ᠋ᠤ᠌ ᠠᠮᠢ ᠪᠠᠨ ᠥᠭ ᠭᠡᠯᠡ᠃ᠠᠷᠴᠠ ᠬᠥᠪᠡᠭᠦᠨ ᠡᠴᠢᠭᠡ ᠶ᠋ᠢ ᠪᠡᠨ ᠶᠠᠩᠵᠤ ᠪᠦᠷᠢ ᠪᠡᠷ ᠢᠳᠬᠠᠬᠤ ᠶ᠋ᠢ ᠣᠷᠣᠯᠳᠣᠭᠠᠳ ᠡᠰᠡ ᠳᠡᠢᠯᠵᠡᠢ᠃ ᠪᠦᠷ ᠰᠡᠭᠦᠯ ᠳ᠋ᠡᠭᠡᠨ ᠠᠷᠴᠠ᠂
— ᠨᠠᠮᠠᠶ᠋ᠢ ᠲᠠ ᠭᠥᠷᠥᠭᠡᠴᠢᠨ ᠤᠳᠤᠮ ᠠ᠋ᠴᠠ ᠮᠢᠨᠢ ᠰᠠᠯᠭᠠᠪᠠ᠃ ᠪᠢ ᠠᠯᠲᠠᠢ᠂ᠬᠠᠩᠭᠠᠢ ᠶ᠋ᠢᠨ ᠬᠡᠰᠡᠭ ᠢ ᠣᠯᠠᠨ ᠢ᠋ᠶ᠋ᠠᠷ ᠠᠪᠠᠯᠠᠬᠤ ᠪᠠᠢᠭᠰᠠᠨ ᠶᠤᠮ᠃ ᠲᠡᠭᠡᠲᠡᠯᠡ ᠲᠠ ᠨᠠᠮᠠᠶ᠋ᠢ ᠬᠥᠮᠦᠨ ᠠᠯᠠᠬᠤ ᠳᠣᠩᠲᠠᠨ ᠪᠣᠯᠭᠠᠪᠠ᠃ᠲᠠᠨ ᠤ᠋ ᠬᠢ ᠪᠡᠷ ᠪᠣᠯᠤᠶᠠ ᠭᠡᠵᠡᠢ᠃ᠬᠠᠷᠢᠨ ᠡᠴᠢᠭᠡ ᠪᠡᠨ ᠭᠡᠨᠡ ᠰᠡᠷᠡᠭ ᠦᠭᠡᠢ ᠠᠯᠠᠭᠳᠠᠬᠤ ᠳ᠋ᠤ᠌ ᠠᠷᠴᠠ ᠪᠠᠭᠠᠲᠤᠷ ᠬᠠᠷᠠᠭᠤᠰᠴᠤ᠂
—ᠪᠢ ᠰᠡᠯᠡᠮᠡ ᠪᠡᠨ ᠴᠢᠰᠤᠨ ᠳ᠋ᠤ᠌ ᠲᠥᠷᠥᠨᠡ ᠭᠡᠮᠡᠨ ᠬᠠᠰᠬᠢᠷᠴᠠᠢ᠃
ᠠᠷᠪᠠᠨ ᠳᠥᠷᠪᠡ
ᠭᠠᠯᠳᠠᠨ ᠪᠡᠶᠡ ᠢᠯᠠᠷᠢᠰᠢᠵᠤ ᠬᠠᠲᠤᠨ ᠡᠬᠡ ᠶ᠋ᠢᠨ ᠬᠥᠰᠬᠡ ᠨᠡᠭᠦᠳᠡᠯ ᠣᠳᠤᠭᠰᠠᠨ ᠬᠣᠢᠨᠠ ᠥᠪᠡᠷ ᠢ᠋ ᠪᠡᠨ ᠳᠠᠬᠢᠨ ᠲᠥᠷᠥᠭᠰᠡᠨ ᠭᠠᠯᠳᠠᠨ ᠪᠠᠢᠭᠠ ᠶ᠋ᠢ ᠣᠯᠵᠤ ᠮᠡᠳᠡᠪᠡ᠃
ᠬᠠᠲᠤᠨ ᠡᠬᠡ ᠨᠠᠮᠠᠶ᠋ᠢ ᠳᠠᠬᠢᠨ ᠳᠦᠷᠦᠭᠦᠯᠦᠭᠡᠳ ᠪᠤᠴᠠᠭᠰᠠᠨ ᠶᠤᠮᠰᠠᠨᠵᠠᠢ᠃ ᠭᠠᠯᠳᠠᠨ ᠤ᠋ ᠪᠡᠶᠡ ᠲᠡᠩᠬᠡᠷᠡᠪᠡ᠃ ᠨᠠᠰᠤ ᠵᠠᠯᠠᠭᠤ ᠲᠤᠯᠠ ᠡᠬᠡ ᠶ᠋ᠢᠨ ᠤᠰᠤ ᠪᠠᠷ ᠳᠣᠲᠣᠭᠠᠳᠤ ᠡᠷᠬᠡᠲᠡᠨ ᠦ᠌ ᠲᠡᠩᠴᠡᠪᠦᠷᠢ ᠶ᠋ᠢ ᠬᠠᠩᠭᠠᠵᠠᠢ᠃ ᠤᠷᠤᠭᠤᠯ ᠣᠮᠣᠭᠣᠯᠲᠤᠨ ᠰᠢᠯᠦᠰᠦᠨ ᠳ᠋ᠡᠭᠡᠨ ᠲᠦᠯᠡᠭᠳᠡᠬᠦ ᠮᠡᠲᠦ ᠬᠠᠭᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠣᠯᠢᠪᠠ᠃ ᠭᠠᠯᠳᠠᠨ ᠳ᠋ᠤ᠌ ᠡᠪᠡᠳᠬᠦ ᠡᠪᠡᠳᠴᠢᠨ ᠦᠭᠡᠢ ᠪᠣᠯᠵᠠᠢ᠃
ᠭᠠᠯᠳᠠᠨ ᠤ᠋ ᠬᠥᠯ ᠳᠣᠣᠷᠠ ᠡᠪᠡᠰᠦ ᠨᠣᠭᠣᠭᠠ ᠬᠥᠷᠪᠡᠬᠡᠯᠡᠨ ᠤᠷᠭᠤᠬᠤ ᠨᠢ ᠮᠡᠳᠡᠷᠡᠭᠳᠡᠨᠡ᠃ ᠴᠣᠬᠣ ᠬᠣᠷᠣᠬᠠᠢ᠂ ᠰᠢᠷᠭᠤᠯᠵᠢ ᠬᠥᠯ ᠦ᠋ᠨ ᠤᠯᠠ ᠠ᠋ᠴᠠ ᠠᠮᠢᠰᠬᠤᠯ ᠢ᠋ᠶ᠋ᠠᠨ ᠮᠡᠳᠡᠷᠡᠭᠦᠯᠦᠨ ᠭᠦᠶᠦᠯᠳᠦᠬᠦ ᠨᠢ ᠪᠠᠰᠠ ᠰᠣᠨᠢᠨ ᠰᠠᠨᠠᠭᠳᠠᠨᠠ᠃ ᠢᠩᠭᠢᠲᠡᠯᠡ ᠮᠡᠳᠡᠷᠡᠮᠡᠲᠡᠭᠡᠢ ᠥᠭᠡᠨᠲᠡᠭᠴᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠬᠤ ᠦᠭᠡᠢ ᠪᠠᠢᠯᠠ᠃
ᠬᠠᠲᠤᠨ ᠡᠬᠡ ᠶ᠋ᠢᠨ ᠪᠠᠷᠠ ᠪᠣᠯᠣᠭᠰᠠᠳ ᠴᠠᠪᠴᠢᠮᠠ ᠬᠠᠳᠠ ᠲᠠᠢ᠂ ᠨᠠᠷᠠ ᠰᠠᠯᠬᠢᠨ ᠳ᠋ᠤ᠌ ᠡᠯᠡᠭᠳᠡᠵᠦ ᠮᠥᠯᠢᠭᠡ ᠦᠭᠡᠢ ᠠᠭᠤᠯᠠ ᠶ᠋ᠢᠨ ᠰᠤᠭᠤ ᠪᠠᠷ ᠳᠠᠯᠳᠠ ᠣᠷᠣᠪᠠ᠃ ᠳᠠᠪᠠᠭᠠ ᠥᠭᠡᠳᠡ ᠬᠡᠷᠬᠢᠨ ᠥᠭᠰᠥᠵᠦ ᠶᠠᠪᠤᠭᠠ ᠨᠢ ᠨᠢᠳᠦᠨ ᠳ᠋ᠦ᠍ ᠢᠯᠡᠬᠡᠨ᠃ ᠬᠠᠲᠤᠨ ᠡᠷᠭᠢᠨ ᠬᠠᠷᠠᠵᠤ ᠪᠠᠢᠨᠠ᠃ ᠥᠷᠯᠥᠭᠡ ᠡᠷᠲᠡ ᠶ᠋ᠢᠨ ᠪᠣᠯᠵᠣᠮᠣᠷ ᠰᠡᠷᠡᠬᠦ ᠳ᠋ᠦ᠍ ᠡᠵᠢ ᠮᠢᠨᠢ ᠳᠡᠷᠭᠡᠳᠡ ᠢᠷᠡᠵᠦ᠂
— ᠬᠥᠪᠡᠭᠦᠨ ᠴᠢᠮᠠ ᠳ᠋ᠤ᠌ ᠤᠰᠤ ᠪᠠᠨ ᠦᠯᠡᠳᠡᠭᠡᠪᠡ᠃ ᠸᠠᠭᠠᠷ ᠤ᠋ᠨ ᠰᠠᠪᠠᠨ ᠳ᠋ᠤ᠌ ᠶᠡᠭᠦᠯᠡᠵᠦ ᠣᠷᠬᠢᠪᠠ᠃ ᠬᠡᠷᠪᠡ ᠰᠠᠷᠠ ᠶ᠋ᠢᠨ ᠳᠣᠲᠣᠷᠠ ᠦᠯᠦ ᠬᠡᠷᠡᠭᠯᠡᠬᠦ ᠠᠪᠠᠰᠤ ᠠᠰᠬᠠᠭᠠᠷᠠᠢ! ᠤᠳᠠᠭᠠᠵᠤ ᠪᠣᠯᠬᠤ ᠦᠭᠡᠢ ᠰᠢᠦ ᠳᠡ᠃
— ᠡᠬᠡ ᠶ᠋ᠢᠨ ᠤᠰᠤ ᠷᠠᠰᠢᠶᠠᠨ ᠪᠤᠰᠤ ᠤᠤ? ᠭᠡᠵᠦ ᠨᠠᠮᠠᠶ᠋ᠢ ᠲᠡᠭᠡᠨᠡᠭᠡᠯᠵᠡᠨ ᠥᠭᠦᠯᠡᠬᠦ ᠳ᠋ᠦ᠍᠂
— ᠴᠢᠮᠠ ᠳ᠋ᠤ᠌ ᠷᠠᠰᠢᠶᠠᠨ ᠮᠥᠨ᠃ ᠲᠥᠷᠥᠭᠦᠯᠦᠭᠰᠡᠨ ᠦᠷᠡ ᠳ᠋ᠡᠭᠡᠨ ᠬᠦᠷᠲᠡᠭᠡᠳᠡᠭ ᠷᠠᠰᠢᠶᠠᠨ ᠰᠢᠦ᠃ ᠡᠵᠢ ᠨᠢ ᠥᠷᠭᠥᠭᠡ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠭᠠᠯ ᠢ᠋ ᠰᠡᠷᠭᠦᠭᠡᠭᠡᠳ ᠪᠠᠢᠵᠤ ᠪᠠᠢᠶᠠ ᠭᠡᠪᠡ᠃
ᠡᠬᠡ ᠶ᠋ᠢᠨ ᠨᠢᠳᠦᠨ ᠦ᠌ ᠬᠠᠷᠠᠴᠠᠨ ᠳ᠋ᠤ᠌ ᠭᠦᠨ ᠤᠢᠳᠬᠠᠷ ᠰᠢᠩᠭᠡᠵᠡᠢ᠃ ᠭᠠᠯᠳᠠᠨ ᠢᠨᠢᠶᠡᠮᠰᠦᠭᠯᠡᠨ《ᠲᠠᠨ ᠤ᠋ ᠵᠠᠮ ᠮᠥᠷ ᠰᠠᠭᠠᠳ ᠦᠭᠡᠢ》 ᠭᠡᠵᠦ ᠡᠬᠡ ᠳ᠋ᠡᠭᠡᠨ ᠬᠡᠯᠡᠪᠡ᠃ ᠶᠥᠮ ᠠᠭᠠ ᠬᠠᠲᠤᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠰᠠᠢᠲᠤᠷ ᠠᠵᠢᠭᠯᠠᠵᠤ ᠬᠠᠷᠠᠨᠠ᠃ ᠲᠡᠭᠦᠨ ᠦ᠌ ᠬᠠᠷᠠᠴᠠᠨ ᠳ᠋ᠤ᠌ ᠭᠠᠯᠳᠠᠨ ᠤ᠋ ᠳᠠᠯᠳᠠ ᠤᠪᠠᠳᠢᠰ ᠵᠣᠪᠬᠢᠨ ᠳᠡᠭᠡᠷᠡᠬᠢ ᠮᠡᠩᠭᠡ ᠪᠡᠷ ᠨᠢ ᠲᠣᠳᠣᠷᠠᠨᠠ᠃ ᠭᠠᠯᠳᠠᠨ ᠨᠢᠳᠦ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠭᠡᠳᠦ ᠲᠠᠯᠠ ᠳ᠋ᠤ᠌ ᠨᠠᠷᠠᠨ ᠰᠠᠷᠠᠨ ᠲᠠᠢ ᠪᠢᠯᠡ᠃
ᠠᠯᠢ ᠡᠷᠲᠡᠨ ᠡᠴᠡ ᠲᠣᠳᠣᠷᠠᠭᠰᠠᠨ ᠨᠠᠷᠠᠨ ᠰᠠᠷᠠᠨ ᠡᠬᠡ ᠶ᠋ᠢᠨ ᠰᠠᠨᠠᠭᠠ ᠠᠮᠤᠷᠵᠢᠭᠤᠯᠤᠨ ᠲᠠᠢᠳᠬᠤᠷᠠᠭᠤᠯᠪᠠ᠃
ᠡᠵᠢ ᠨᠢ ᠰᠡᠩᠭᠡ ᠬᠠᠭᠠᠨ ᠬᠦᠦ ᠳ᠋ᠡᠭᠡᠨ ᠶᠡᠬᠡᠳᠡ ᠵᠣᠪᠠᠨᠢᠨ ᠪᠠᠢᠯᠠ᠃ ᠪᠠᠯᠵᠢᠲᠠᠷᠠ ᠬᠠᠲᠤᠨ ᠤ᠋ ᠥᠩᠭᠡᠨ ᠳᠡᠭᠡᠷᠡ ᠪᠡᠨ ᠠᠶᠠᠳᠠᠭᠤᠬᠠᠨ ᠪᠠᠢᠬᠤ ᠶ᠋ᠢ ᠬᠢᠴᠢᠶᠡᠵᠦ ᠴᠠᠭᠠᠨᠠ ᠪᠠᠨ ᠬᠦᠢᠲᠡᠨ ᠰᠠᠨᠠᠭᠠ ᠲᠠᠢ ᠶᠠᠪᠤᠭᠠ ᠶ᠋ᠢ ᠶᠥᠮ ᠠᠭᠠ ᠡᠬᠡ ᠠᠩᠵᠠᠭᠠᠷᠠᠵᠠᠢ᠃ ᠴᠡᠴᠡᠨ᠂ ᠵᠣᠳᠪᠡᠪᠠᠭᠠᠲᠣᠷ ᠬᠣᠶᠠᠭᠤᠯᠠ ᠡᠬᠡ ᠶ᠋ᠢᠨ ᠦᠭᠡᠨ ᠡᠴᠡ ᠵᠥᠷᠢᠬᠦ ᠶᠠᠭᠤᠨ᠃ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠤ᠋ ᠥᠷᠭᠥᠭᠡ ᠶ᠋ᠢ ᠲᠣᠭᠣᠷᠢᠭᠰᠠᠨ ᠠᠲᠠᠭᠠ ᠵᠢᠲᠥᠭᠡ ᠶᠦᠮ ᠠᠭᠠ ᠡᠬᠡ ᠶ᠋ᠢ ᠵᠣᠪᠠᠭᠠᠵᠤ ᠪᠠᠢᠯᠠ᠃ ᠠᠨᠤ ᠬᠠᠲᠤᠨ ᠳ᠋ᠤ᠌ ᠨᠠᠢᠳᠠᠵᠤ ᠪᠣᠯᠤᠨᠠ᠃ ᠭᠡᠬᠦ ᠳ᠋ᠡᠭᠡᠨ ᠬᠠᠭᠠᠨ ᠤ᠋ ᠣᠷᠳᠣᠨ ᠤ᠋ ᠨᠦᠬᠡ ᠰᠦᠪᠡ ᠶ᠋ᠢ ᠺᠢᠷᠭᠢᠽ ᠬᠠᠲᠤᠨ ᠤ᠋ ᠬᠥᠪᠡᠭᠦᠳ ᠠᠨᠳᠠᠬᠤ ᠦᠭᠡᠢ ᠪᠢᠯᠡ᠃
ᠭᠠᠯᠳᠠᠨ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠣᠳᠤᠭᠰᠠᠨ ᠨᠤᠲᠤᠭ ᠤ᠋ᠨ ᠵᠦᠭ ᠬᠠᠷᠠᠭᠰᠠᠭᠠᠷ ᠪᠠᠢᠯᠠ᠃ ᠲᠩᠷᠢ ᠳ᠋ᠦ᠍ ᠵᠢᠭᠦᠷᠲᠡᠨ ᠠᠯᠠᠭᠠ᠃ ᠪᠢᠲᠡᠭᠦᠦ ᠨᠣᠭᠣᠭᠠᠨ ᠭᠠᠵᠠᠷ ᠳᠡᠯᠡᠬᠡᠢ ᠥᠳᠥ ᠰᠢᠪᠠᠵᠢ ᠲᠠᠢ ᠪᠠᠨ ᠴᠣᠭ ᠭᠠᠯᠳᠠᠨ ᠲᠠᠢ ᠬᠠᠨᠢᠰᠠᠨᠠ᠃
ᠭᠠᠯᠳᠠᠨ ᠳᠣᠲᠣᠷ ᠬᠥᠮᠦᠨ ᠲᠡᠢ ᠪᠣᠯᠤᠭᠰᠠᠨ ᠳ᠋ᠠᠭᠠᠨ ᠭᠡᠨᠡᠳᠲᠡ ᠶᠠᠭᠤ ᠶᠠᠭᠤᠨ ᠠ᠋ᠴᠠ ᠢᠯᠡᠭᠦᠦ ᠪᠡᠶᠡᠰᠪᠡ᠃ ᠤᠷᠢᠳ ᠡᠮᠦᠨᠡᠬᠢ ᠰᠢᠭ ᠬᠥᠨᠳᠡᠯᠡᠨ ᠦ᠌ ᠬᠥᠮᠦᠨ ᠲᠡᠢ ᠬᠠᠷᠢᠴᠠᠵᠤ ᠪᠠᠢᠪᠠᠯ ᠬᠠᠭᠤᠷᠠᠢ ᠬᠣᠭᠣᠰᠣᠨ ᠪᠤᠰᠤ ᠤᠤ? ᠭᠡᠲᠡᠯᠡ ᠭᠠᠯᠳᠠᠨ ᠥᠪᠡᠷ ᠲᠡᠢ ᠪᠡᠨ ᠭᠠᠢᠬᠠᠮᠠᠷ ᠵᠥᠷᠢᠴᠡᠯᠳᠦᠨ ᠵᠥᠪᠰᠢᠯᠴᠡᠨ ᠬᠠᠷᠢᠴᠠᠬᠤ ᠪᠣᠯᠵᠠᠢ᠃ ᠭᠠᠢᠳᠠᠪ᠂ ᠭᠠᠯᠳᠠᠨ ᠠ᠋ᠴᠠ ᠵᠠᠢᠳᠠᠭᠤ ᠵᠣᠭᠰᠣᠨᠠ᠃
ᠭᠠᠯᠳᠠᠨ ᠤ᠋ ᠳᠣᠲᠣᠭᠠᠳᠤ ᠰᠡᠳᠬᠢᠯ ᠦ᠋ᠨ ᠦᠢᠮᠡᠭᠡᠨ᠂ ᠮᠠᠷᠭᠤᠭᠠᠨ᠂ ᠭᠠᠢᠬᠠᠮᠠ ᠡᠪᠰᠡᠯ ᠢ᠋ ᠭᠠᠢᠳᠠᠪ ᠣᠭᠲᠣᠬᠠᠨ ᠦᠯᠦ ᠮᠡᠳᠡᠬᠦ ᠪᠢᠯᠡ᠃ 《ᠡᠬᠡ ᠮᠢᠨᠢ ᠲᠠᠨ ᠤ᠋ ᠤᠢᠳᠬᠠᠷᠲᠤ ᠬᠠᠷᠠᠴᠠ ᠶ᠋ᠢ ᠪᠢ ᠶᠠᠭᠠᠬᠢᠨ ᠮᠠᠷᠲᠠᠨᠠ᠃ ᠭᠠᠵᠠᠷ ᠤ᠋ᠨ ᠬᠣᠯᠠ ᠤᠰᠤᠨ ᠤ᠋ ᠤᠷᠲᠤ ᠠ᠋ᠴᠠ ᠬᠥᠪᠡᠭᠦᠳ ᠦ᠋ᠨ ᠢ᠋ᠶ᠋ᠡᠨ ᠬᠣᠭᠣᠷᠣᠨᠳᠣ ᠲᠠ ᠠᠶᠠᠯᠠᠵᠤ ᠪᠠᠢᠨᠠ᠃ ᠰᠡᠩᠭᠡ ᠠᠬᠠ ᠳ᠋ᠤ᠌ ᠲᠠ ᠣᠴᠢᠪᠠᠴᠤ ᠭᠠᠯᠳᠠᠨ ᠨᠠᠳᠠ ᠰᠡᠳᠬᠢᠯ ᠢ᠋ᠶ᠋ᠡᠨ ᠦᠯᠡᠳᠡᠭᠡᠪᠡ᠃ ᠬᠠᠲᠤᠨ ᠡᠬᠡ ᠲᠠ ᠮᠢᠨᠢ ᠥᠪᠡᠷ ᠢ᠋ ᠪᠡᠨ ᠬᠣᠶᠠᠷ ᠬᠤᠪᠢᠶᠠᠵᠤ᠂ ᠬᠥᠪᠡᠭᠦᠳ ᠲᠡᠭᠡᠨ ᠲᠡᠩᠴᠡᠭᠦᠬᠡᠨ ᠡᠨᠡᠷᠢᠯ ᠬᠠᠢᠷᠠ ᠰᠢᠩᠭᠡᠭᠡᠵᠦ ᠶᠠᠪᠤᠨᠠ᠃ ᠲᠠᠨ ᠢ᠋ ᠪᠢᠳᠡ ᠬᠣᠶᠠᠷ ᠡᠯᠡᠭᠡᠵᠦ ᠳᠠᠭᠤᠰᠬᠠᠬᠤ ᠶᠤᠮ ᠪᠠᠢᠨᠠ ᠳᠠ》᠃
ᠭᠠᠢᠳᠠᠪ ᠲᠤ᠌ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠤ᠋ ᠬᠣᠶᠠᠷ ᠬᠥᠯ ᠭᠠᠵᠠᠷ ᠠ᠋ᠴᠠ ᠦᠨᠳᠦᠰᠦᠯᠡᠭᠰᠡᠨ ᠮᠡᠲᠦ ᠪᠠᠲᠤ ᠪᠡᠬᠢ ᠪᠥᠭᠡᠳ ᠭᠠᠯᠳᠠᠨ ᠤᠷᠭᠤᠭᠠ ᠮᠣᠳᠣ ᠠᠳᠠᠯᠢ ᠬᠠᠷᠠᠭᠳᠠᠨᠠ᠃
ᠠᠷᠪᠠᠨ ᠲᠠᠪᠤ
ᠭᠠᠯᠳᠠᠨ ᠯᠠᠮᠠ᠂ ᠪᠣᠭᠳᠠ ᠭᠡᠭᠡᠨ ᠵᠠᠨᠠᠪᠠᠽᠠᠷ ᠲᠠᠢ ᠠᠭᠤᠯᠵᠠᠵᠤ ᠡᠷᠢᠭᠡ ᠭᠠᠷᠳᠠᠨ ᠠᠪᠤᠭᠠᠳ ᠪᠤᠴᠠᠬᠤ ᠵᠠᠮ ᠳ᠋ᠠᠭᠠᠨ ᠲᠠᠰᠢᠯᠠᠾᠨᠮᠤ ᠬᠡᠮᠡᠬᠦ ᠲᠡᠷᠢᠭᠦᠨ ᠳᠤᠭᠠᠩ ᠤ᠋ᠨ ᠳᠡᠷᠭᠡᠳᠡᠭᠦᠷ ᠥᠩᠭᠡᠷᠡᠪᠡ᠃ ᠭᠠᠯᠳᠠᠨ ᠤ᠋ ᠨᠢᠳᠦᠨ ᠳ᠋ᠦ᠍ ᠳᠤᠭᠠᠩ ᠤ᠋ᠨ ᠳᠡᠷᠪᠡᠭᠡᠷ ᠳᠡᠭᠡᠪᠦᠷ ᠦ᠋ᠨ ᠪᠠᠷᠠᠭᠤᠨ ᠵᠡᠭᠦᠨ ᠲᠠᠯᠠ ᠳ᠋ᠤ᠌ ᠪᠡᠶᠡᠰ ᠢ᠋ ᠲᠠᠭᠠᠰᠢᠶᠠᠯ ᠲᠠᠢ ᠬᠠᠷᠠᠵᠤ᠂ ᠠᠮᠤᠭᠤᠯᠠᠩ ᠵᠣᠭᠰᠣᠬᠤ ᠪᠣᠳᠢ ᠭᠥᠷᠦᠭᠡᠰᠦᠨ ᠦ᠌ ᠴᠢᠬᠢ ᠬᠥᠳᠡᠯᠪᠡ᠃ ᠭᠠᠯᠳᠠᠨ ᠴᠢᠭᠢᠭᠲᠦ ᠨᠣᠭᠣᠭᠠ ᠶ᠋ᠢᠨ ᠳᠡᠭᠡᠷᠡ ᠵᠣᠭᠰᠣᠭᠠᠳ ᠰᠠᠢᠲᠤᠷ ᠬᠠᠷᠠᠪᠠ᠃
ᠡᠷᠡ᠂ ᠡᠮᠡ ᠪᠣᠳᠢ ᠭᠥᠷᠥᠭᠡᠰᠦ ᠪᠤᠷᠬᠠᠳ ᠤ᠋ᠨ ᠣᠷᠣᠰᠢᠬᠤ ᠰᠦᠮᠡ ᠶ᠋ᠢᠨ ᠳᠡᠭᠡᠪᠦᠷ ᠳᠡᠭᠡᠷᠡ ᠬᠡᠳᠦᠢ ᠳ᠋ᠦ᠍ ᠵᠠᠯᠠᠷᠠᠭᠰᠠᠨ ᠶᠤᠮ ᠪᠤᠤ ᠮᠡᠳᠡ᠃ ᠪᠤᠷᠬᠠᠨ ᠤ᠋ ᠠᠮᠢᠲᠠᠨ ᠤᠴᠢᠷ ᠠ᠋ᠴᠠ ᠰᠦᠮᠡ ᠬᠡᠢᠳ ᠦ᠋ᠨ ᠣᠷᠣᠢ ᠳ᠋ᠤ᠌ ᠣᠷᠣᠰᠢᠨᠠᠮ ᠪᠣᠢ ᠢ᠋ᠠ᠃
ᠪᠣᠳᠢ ᠭᠥᠷᠦᠭᠡᠰᠦᠨ ᠦ᠌ ᠴᠢᠩᠬᠠ ᠴᠠᠭᠠᠨᠠ ᠨᠠᠷᠠ ᠲᠠᠰᠢᠷᠯᠠᠵᠠᠢ᠃ ᠠᠯᠲᠠᠨ ᠴᠢᠳᠬᠤᠮᠠᠯ ᠪᠣᠳᠢ ᠭᠥᠷᠥᠭᠡᠰᠦ ᠨᠢ ᠨᠠᠷᠠᠨ ᠤ᠋ ᠳᠡᠪᠢᠰᠬᠡᠷᠲᠦ ᠲᠠᠮᠠᠭᠠ ᠳᠠᠷᠤᠭᠰᠠᠨ ᠮᠡᠲᠦ ᠭᠤᠸᠠ ᠦᠵᠡᠰᠬᠦᠯᠡᠩ ᠲᠡᠢ ᠂ ᠰᠦᠷ ᠵᠢᠪᠬᠤᠯᠠᠩ ᠲᠠᠢ᠂ ᠥᠭᠭᠢᠶᠡᠮᠦᠷ᠂ ᠳᠤᠯᠠᠭᠠᠨ ᠣᠷᠣᠰᠢᠨᠠ᠃
ᠲᠠᠪᠤᠳᠤᠭᠠᠷ ᠳᠠᠯᠠᠢ ᠯᠠᠮᠠ ᠯᠣᠪᠰᠠᠩᠵᠠᠮᠰᠣ᠂ᠭᠠᠯᠳᠠᠨ ᠢ᠋ ᠦᠷᠭᠦᠭᠡᠨ ᠳ᠋ᠡᠭᠡᠨ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠴᠣᠭᠣ ᠰᠢᠷᠳᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠲᠡᠭᠦᠨ ᠢ᠋ ᠵᠠᠯᠪᠠᠷᠢᠬᠤ ᠳ᠋ᠤᠨᠢ ᠨᠢᠳᠦ ᠪᠡᠨ ᠠᠨᠢᠯᠠ᠃
— ᠶᠠᠭᠤ ᠪᠣᠯᠪᠠ
ᠭᠡᠮᠡᠨ ᠳᠠᠯᠠᠢ ᠯᠠᠮᠠ ᠲᠠᠢᠪᠤᠩ ᠠᠰᠠᠭᠤᠯᠠ᠃
—ᠳᠤᠸᠠ ᠰᠣᠬᠣᠷ ᠵᠡᠭᠦᠳᠦᠨ ᠳ᠋ᠦ᠍ ᠢᠷᠡᠪᠡ ᠭᠡᠵᠦ ᠭᠠᠯᠳᠠᠨ ᠥᠴᠢᠯᠡ᠃
ᠳᠤᠸᠠ ᠰᠣᠬᠣᠷ ᠤ᠋ᠨ ᠲᠤᠬᠠᠢ ᠵᠡᠭᠦᠳᠦ ᠭᠠᠯᠳᠠᠨ ᠳ᠋ᠤ᠌ ᠣᠯᠠᠨ ᠪᠥᠯᠥᠭᠡ᠃ ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠦ᠌ ᠬᠥᠪᠡᠭᠡᠨ ᠳ᠋ᠦ᠍ ᠮᠣᠷᠢ ᠲᠠᠢ ᠪᠠᠨ ᠳᠠᠪᠬᠢᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠭᠠᠯᠳᠠᠨ ᠭᠡᠨᠡᠳᠲᠡ ᠮᠣᠷᠢᠨ ᠠ᠋ᠴᠠ ᠪᠠᠨ ᠣᠢᠴᠢᠪᠠ᠃
ᠬᠣᠩ ᠲᠠᠢᠵᠢ ᠶ᠋ᠢᠨ ᠬᠥᠪᠡᠭᠦᠨ ᠮᠣᠷᠢᠨ ᠠ᠋ᠴᠠ ᠪᠠᠨ ᠣᠢᠴᠢᠭᠰᠠᠨ ᠲᠡᠷᠡ ᠭᠠᠵᠠᠷ ᠢ᠋ᠶ᠋ᠠᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠡᠮᠡᠭᠡᠯ ᠳᠡᠭᠡᠷᠡ ᠡᠴᠡ ᠪᠡᠨ ᠦᠰᠦᠷᠦᠨ ᠪᠠᠭᠤᠵᠤ ᠳᠡᠷᠭᠡᠳᠡ ᠨᠢ ᠣᠴᠢᠭᠰᠠᠨ ᠳᠠᠨᠵᠢᠯᠠ ᠬᠥᠪᠡᠭᠦᠨ᠂ ᠮᠢᠭᠮᠠᠨᠰᠠᠩᠵᠠᠢ ᠥᠬᠢᠨ ᠬᠣᠶᠠᠷ ᠲᠤ᠌ ᠥᠭᠦᠯᠡᠷᠦᠨ᠂
— ᠳᠤᠸᠠ ᠰᠣᠬᠣᠷ ᠶᠠᠭ ᠡᠨᠳᠡ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠶᠤᠮ ᠭᠡᠵᠡᠢ᠃
ᠥᠬᠢᠨ ᠦ᠌ ᠦᠷᠭᠦᠭᠰᠡᠨ ᠵᠡᠭᠡᠷᠡ ᠶ᠋ᠢᠨ ᠬᠢ ᠰᠢᠭ ᠲᠣᠷᠮᠣᠯᠵᠠᠭᠰᠠᠨ ᠡᠷᠪᠡᠭᠡᠷ ᠨᠢᠳᠦ ᠭᠠᠢᠬᠠᠭᠰᠠᠨ ᠮᠡᠲᠦ ᠪᠣᠯᠤᠭᠠᠳ᠂
— ᠬᠡᠨ ᠵᠣᠭᠰᠣᠵᠤ ᠪᠠᠢᠪᠠ ᠭᠡᠵᠦ ᠠᠰᠠᠭᠤᠪᠠ᠃ ᠭᠠᠯᠳᠠᠨ᠂
— ᠳᠤᠸᠠ ᠰᠣᠬᠣᠷ ᠭᠡᠵᠦ ᠬᠠᠷᠢᠭᠤᠯᠪᠠ᠃ ᠳᠠᠨᠵᠢᠯᠠ᠂
— ᠳᠤᠸᠠ ᠰᠣᠬᠣᠷ ᠡᠨᠳᠡ ᠠᠯᠠᠭᠠ ᠪᠠᠢᠨᠠ ᠰᠢᠦ ᠳᠡ ᠭᠡᠬᠦ ᠳ᠋ᠦ᠍᠂ ᠭᠠᠯᠳᠠᠨ ᠲᠡᠨᠡᠭ ᠲᠡᠢ ᠮᠡᠳᠬᠡᠯᠴᠡᠬᠦ ᠶ᠋ᠢ ᠬᠦᠰᠡᠭᠰᠡᠨ ᠦᠭᠡᠢ ᠲᠤᠯᠠ᠂
— ᠨᠠᠳᠠ ᠬᠠᠷᠠᠭᠳᠠᠭᠰᠠᠨ ᠶᠤᠮ᠂ ᠵᠡᠭᠦᠳᠦ ᠪᠠᠢᠵᠠᠢ ᠭᠡᠪᠡ᠃
ᠭᠠᠯᠳᠠᠨ ᠤ᠋ ᠣᠢ ᠲᠣᠢ ᠳ᠋ᠤ᠌ ᠪᠠᠯᠠᠷ ᠡᠷᠲᠡ ᠴᠠᠭ ᠲᠤ᠌ ᠠᠮᠢᠳᠤᠷᠠᠵᠤ᠂ ᠪᠤᠳᠠᠩᠲᠤ ᠣᠷᠴᠢᠯᠠᠩ ᠳ᠋ᠤ᠌ ᠨᠡᠷᠡ ᠪᠡᠨ ᠦᠯᠡᠳᠡᠭᠡᠭᠡᠳ ᠣᠳᠤᠭᠰᠠᠨ ᠳᠤᠸᠠ ᠰᠣᠬᠣᠷ ᠬᠡᠮᠡᠬᠦ ᠲᠩᠷᠢ ᠡᠴᠢᠭᠡ ᠨᠢ ᠪᠠᠢᠨ ᠪᠠᠢᠨ ᠡᠷᠭᠢᠵᠦ ᠢᠷᠡᠨᠡ᠃ ᠣᠢᠷᠠᠳ ᠤ᠋ᠳ ᠲᠤᠤᠯᠢ ᠬᠠᠢᠯᠠᠬᠤ ᠦᠶᠡ ᠪᠡᠷ《ᠳᠤᠸᠠ ᠰᠣᠬᠣᠷ ᠬᠠᠷᠠᠵᠤ ᠪᠠᠢᠭᠠ ᠰᠢᠦ》 ᠭᠡᠨᠡ᠃ᠨᠢᠭᠡ ᠤᠳᠠᠭᠠ ᠳᠠᠨᠵᠢᠯᠠ ᠶ᠋ᠢᠨ ᠡᠴᠢᠭᠡ ᠣᠨᠣᠴᠢᠨ ᠠᠪᠠᠭᠠ ᠨᠢ《ᠳᠤᠸᠠ ᠰᠣᠬᠣᠷ ᠭᠡᠬᠦ ᠶᠦᠮ᠃ ᠲᠡᠷᠡ ᠲᠩᠷᠢ ᠡᠴᠢᠭᠡ ᠰᠣᠬᠣᠷ ᠪᠠᠢᠭᠰᠠᠨ ᠤᠤ?ᠡᠰᠡᠬᠦᠯᠡ ᠳᠤᠬᠤᠨ ᠳᠡᠭᠡᠷᠡ ᠪᠡᠨ ᠭᠠᠭᠴᠠ ᠨᠢᠳᠦ ᠲᠡᠢ᠂ᠲᠡᠷᠡ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠥᠷᠲᠡᠭᠡ ᠭᠠᠵᠠᠷ ᠬᠠᠷᠠᠳᠠᠭ ᠭᠡᠬᠦ ᠶᠦᠮ᠃ ᠳᠤᠸᠠ ᠰᠣᠬᠣᠷ ᠪᠣᠯ ᠬᠥᠮᠦᠨ ᠦ᠌ ᠨᠡᠷᠡ ᠪᠢᠵᠡ ᠳᠡ》 ᠭᠡᠵᠦ ᠠᠰᠠᠭᠤᠵᠠᠢ᠃ᠲᠤᠤᠯᠢ ᠬᠠᠢᠯᠠᠬᠤ ᠶ᠋ᠢ ᠰᠣᠨᠣᠰᠴᠤ ᠰᠠᠭᠤᠭᠰᠠᠨ ᠡᠪᠦᠭᠡᠳ ᠡᠮᠡᠭᠡᠳ《ᠣᠨᠣᠴᠢᠨ ᠭᠦᠵᠢᠷᠮᠡᠭ ᠬᠠᠷᠠ ᠬᠥᠮᠦᠨ ᠰᠢᠦ》 ᠭᠡᠮᠡᠨ ᠦᠯᠦ ᠲᠣᠭᠣᠵᠤ᠂
— ᠳᠤᠸᠠ ᠰᠣᠬᠣᠷ ᠬᠠᠷᠠᠵᠤ ᠪᠠᠢᠭᠠ ᠭᠡᠵᠡᠭᠡᠪᠡ᠃
— ᠯᠠᠮᠠᠳᠠᠨ ᠲᠠ ᠰᠠᠶᠢ ᠶᠠᠭᠤ ᠦᠵᠡᠪᠡ ᠭᠡᠵᠦ ᠳᠠᠯᠠᠢ ᠯᠠᠮᠠ ᠠᠰᠠᠭᠤᠪᠠ᠃
— ᠰᠦᠮᠡ ᠶ᠋ᠢᠨ ᠳᠡᠭᠡᠪᠦᠷ ᠳᠡᠭᠡᠷᠡᠬᠢ ᠪᠣᠳᠢ ᠭᠥᠷᠦᠭᠡᠰᠦᠨ ᠦ᠌ ᠴᠢᠬᠢ ᠬᠥᠳᠡᠯᠬᠦ ᠶ᠋ᠢ ᠬᠠᠷᠠᠯᠠ ᠭᠡᠵᠦ ᠪᠠᠭᠰᠢ ᠳ᠋ᠠᠭᠠᠨ ᠬᠦᠯᠢᠴᠡᠩᠭᠦᠢ ᠥᠴᠢᠯᠡ᠃
— ᠭᠠᠯᠳᠠᠨ ᠬᠤᠪᠢᠯᠭᠠᠨ᠂ ᠡᠬᠡ ᠪᠡᠨ ᠮᠥᠷᠥᠭᠡᠳᠴᠦ ᠰᠠᠨᠠᠳᠠᠭ ᠪᠤᠰᠤ ᠤᠤ? ᠭᠡᠬᠦ ᠳ᠋ᠦ᠍᠂
— ᠲᠡᠢᠮᠦ ᠠ᠋᠂ ᠳᠠᠯᠠᠢ ᠪᠠᠭᠰᠢ ᠠ᠋᠂᠂᠂᠂ ᠭᠡᠮᠡᠨ ᠴᠠᠢᠯᠭᠠᠨ ᠴᠠᠭᠠᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠥᠭᠦᠯᠡᠪᠡ᠃
— ᠬᠤᠪᠢᠯᠭᠠᠨ ᠲᠠ᠂ ᠡᠬᠡ ᠪᠡᠨ ᠰᠠᠨᠠᠵᠤ ᠪᠠᠢᠭᠠ ᠨᠢ ᠰᠠᠢᠨ ᠬᠡᠷᠡᠭ ᠪᠤᠰᠤ ᠤᠤ? ᠵᠣᠪᠠᠯᠠᠩ ᠢ᠋ ᠪᠡᠶᠡ ᠪᠡᠷ ᠨᠢᠭᠡ ᠮᠡᠳᠡᠷᠡᠵᠦ ᠪᠣᠯᠤᠨᠠ᠃ ᠮᠥᠨ ᠵᠣᠪᠠᠯᠠᠩ ᠤ᠋ᠨ ᠡᠭᠦᠳᠡ ᠬᠠᠭᠠᠯᠭᠠ ᠪᠥᠭᠡᠳ ᠲᠠᠨ ᠢ᠋ ᠴᠦ᠍ ᠳᠠᠭᠠᠷᠢᠵᠤ ᠪᠠᠢᠭᠠ ᠨᠢ ᠡᠨᠡ᠂᠂᠂᠂ ᠭᠡᠮᠡᠨ ᠭᠠᠯᠳᠠᠨ ᠢ᠋ ᠰᠣᠨᠵᠢᠨ ᠬᠡᠯᠡᠬᠦ ᠳ᠋ᠦ᠍᠂
— ᠪᠤᠷᠬᠠᠨ ᠪᠠᠭᠰᠢ ᠶ᠋ᠢᠨ ᠰᠤᠷᠭᠠᠯ ᠢ᠋ᠶ᠋ᠠᠷ ᠪᠣᠯ ᠮᠢᠨᠦ ᠪᠡᠶᠡ ᠵᠣᠪᠠᠯᠠᠩ ᠢ᠋ ᠲᠡᠪᠴᠢᠬᠦ ᠬᠡᠷᠡᠭᠲᠡᠢ᠂᠂᠂᠂ ᠭᠡᠮᠡᠨ ᠭᠠᠯᠳᠠᠨ ᠲᠦᠪᠡᠭ ᠦᠭᠡᠢ ᠬᠠᠷᠢᠭᠤᠯᠤᠨᠠ᠃
— ᠬᠠᠢᠷᠠᠯᠠᠬᠤ ᠶ᠋ᠢᠨ ᠰᠢᠨᠠᠯᠭᠠᠯ ᠠ᠋ᠴᠠ ᠰᠠᠯᠬᠤ ᠶ᠋ᠢᠨ ᠲᠤᠯᠠᠳᠠ ᠳᠣᠲᠣᠭᠠᠳᠤ ᠪᠢᠰᠢᠯᠭᠠᠯ ᠬᠢ ᠭᠡᠵᠦ ᠱᠠᠪᠢ ᠳ᠋ᠠᠭᠠᠨ ᠬᠡᠯᠡᠬᠦ ᠳ᠋ᠡᠭᠡᠨ ᠪᠢᠲᠡᠭᠦᠦ ᠳᠠᠯᠳᠠ ᠨᠢᠭᠡᠨ ᠰᠢᠯᠲᠠᠭᠠᠨ ᠡᠭᠦᠰᠴᠦ ᠪᠣᠢ ᠪᠣᠯᠤᠭᠰᠠᠨ ᠭᠡᠳᠡᠭ ᠢ᠋ ᠳᠠᠯᠠᠢ ᠯᠠᠮᠠ ᠰᠤᠪᠢᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠠᠭᠠᠪᠤᠷᠢᠯᠠᠵᠤ ᠪᠠᠢᠯᠠ᠃
— ᠨᠠᠮᠠᠶ᠋ᠢ ᠲᠩᠷᠢ ᠡᠴᠢᠭᠡ ᠵᠡᠭᠦᠳᠦ ᠪᠡᠷ ᠳᠠᠭᠤᠳᠠᠵᠤ ᠪᠠᠢᠨᠠ᠃ ᠪᠣᠳᠢ ᠭᠥᠷᠥᠭᠡᠰᠦ ᠶᠠᠭᠤᠨ ᠤᠴᠢᠷ ᠴᠢᠬᠢ ᠪᠡᠨ ᠬᠥᠳᠡᠯᠭᠡᠪᠡ ᠭᠡᠮᠡᠨ ᠳᠠᠯᠠᠢ ᠯᠠᠮᠠ ᠠ᠋ᠴᠠ ᠠᠰᠠᠭᠤᠬᠤ ᠠᠶᠠᠰ ᠲᠠᠢ ᠥᠭᠦᠯᠡᠪᠡ᠃
ᠳᠠᠯᠠᠢ ᠯᠠᠮᠠ᠂ᠭᠠᠯᠳᠠᠨ ᠬᠤᠪᠢᠯᠭᠠᠨ ᠤ᠋ ᠦᠯᠦ ᠰᠢᠨᠲᠠᠷᠠᠬᠤ ᠬᠠᠷᠠᠴᠠ᠂ ᠵᠣᠪᠬᠢ ᠵᠢᠷᠪᠢᠯᠵᠡᠬᠦ ᠶ᠋ᠢ ᠰᠠᠢᠲᠤᠷ ᠠᠵᠢᠭᠯᠠᠨᠠ᠃ ᠳᠠᠯᠠᠢ ᠯᠠᠮᠠ ᠳ᠋ᠤ᠌ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠳᠥᠷᠪᠡᠨ ᠨᠢᠳᠦ ᠲᠡᠢ ᠦᠵᠡᠭᠳᠡᠵᠡᠢ᠃
— ᠭᠠᠯᠳᠠᠨ ᠮᠢᠨᠢ ᠨᠤᠲᠤᠭ ᠲᠠᠭᠠᠨ ᠣᠴᠢᠬᠤ ᠭᠡᠵᠦ ᠪᠠᠢᠨᠠ ᠤᠤ? ᠡᠨᠡ ᠦᠶᠡ ᠳ᠋ᠦ᠍ ᠪᠤᠷᠬᠠᠨ ᠤ᠋ ᠱᠠᠰᠢᠨ ᠤ᠋ ᠲᠡᠷᠢᠭᠦᠨ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠦᠷᠭᠦᠭᠡᠨ ᠳ᠋ᠦ᠍ ᠪᠠᠨᠴᠢᠠᠡᠷᠲᠡᠨᠢ ᠮᠣᠷᠢᠯᠠᠨ ᠣᠷᠣᠵᠤ ᠢᠷᠡᠪᠡ᠃
— ᠭᠠᠯᠳᠠᠨ ᠬᠤᠪᠢᠯᠭᠠᠨ ᠤ᠋ ᠰᠡᠳᠬᠢᠯ ᠬᠥᠳᠡᠯᠦᠭᠰᠡᠨ ᠨᠢ ᠢᠯᠡᠳᠲᠡ ᠪᠠᠢᠨᠠ ᠭᠡᠮᠡᠨ ᠰᠢᠷᠠ ᠣᠷᠬᠢᠮᠵᠢ ᠪᠠᠨ ᠵᠠᠰᠠᠩᠭᠠ ᠲᠡᠷᠡ ᠪᠡᠷ ᠬᠡᠯᠡᠪᠡ᠃
— ᠮᠣᠷᠢᠳ ᠮᠢᠨᠢ ᠪᠣᠳᠣᠭᠳᠠᠭᠰᠠᠨ ᠶᠤᠮ ᠠ᠋ ᠭᠡᠵᠦ ᠭᠠᠯᠳᠠᠨ ᠯᠠᠮᠠ ᠬᠡᠯᠡᠪᠡ᠃
ᠳᠠᠯᠠᠢ ᠯᠠᠮᠠ ᠢᠨᠢᠶᠡᠮᠰᠦᠭᠯᠡᠨ《ᠮᠣᠷᠢᠨ ᠳ᠋ᠤ᠌ ᠳᠤᠷᠠᠲᠠᠢ᠂᠂᠂᠂ ᠮᠣᠩᠭᠣᠯ ᠬᠥᠮᠦᠨ ᠮᠥᠨ ᠳᠡ᠂᠂᠂᠂》ᠭᠡᠮᠡᠨ ᠦᠨᠡᠨ ᠭᠣᠣᠯ ᠠ᠋ᠴᠠ ᠪᠠᠨ ᠲᠠᠭᠠᠰᠢᠶᠠᠵᠤ ᠪᠠᠢᠯᠠ᠃
— ᠬᠤᠪᠢᠯᠭᠠᠨ ᠯᠠᠮᠠ ᠲᠠ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡ᠃ᠲᠠ ᠬᠠᠢᠷᠠᠯᠠᠬᠤ ᠶ᠋ᠢᠨ ᠲᠤᠯᠠᠳᠠ ᠡᠵᠢ ᠲᠡᠢ᠂ ᠨᠤᠲᠤᠭ ᠤᠰᠤ ᠲᠠᠢ ᠶᠠᠪᠤᠭᠠ᠃ ᠵᠣᠪᠠᠯᠠᠩ ᠤ᠋ᠨ ᠰᠠᠪᠠᠨ ᠳ᠋ᠠᠭᠠᠨ ᠬᠠᠢᠷᠠ ᠳᠦᠭᠦᠷᠭᠡᠭᠡᠳ ᠢᠷᠡᠨᠡ ᠪᠣᠢ ᠊ᠢᠡ ᠭᠡᠵᠦ ᠳᠠᠯᠠᠢ ᠯᠠᠮᠠ ᠲᠥᠪ ᠳᠠᠷᠤᠤ ᠥᠭᠦᠯᠡᠪᠡ᠃
ᠳᠤᠭᠠᠩ ᠳᠣᠲᠣᠷᠠ ᠪᠣᠷᠣᠭᠠᠨ ᠤ᠋ ᠳᠠᠷᠠᠭᠠ ᠴᠢᠭᠢᠭ ᠥᠨᠢᠷᠲᠦᠬᠦ ᠠᠳᠠᠯᠢ ᠮᠠᠰᠢ ᠲᠠᠭᠠᠲᠠᠢ ᠪᠣᠯᠵᠤ᠂ ᠳᠠᠯᠠᠢ ᠯᠠᠮᠠ᠂ ᠪᠠᠨᠴᠢᠨᠡᠷᠳᠡᠨᠢ᠂ ᠭᠠᠯᠳᠠᠨ ᠯᠠᠮᠠ ᠨᠠᠷ ᠰᠦ ᠲᠡᠢ ᠬᠢᠷᠠᠮᠠ ᠤᠤᠭᠤᠵᠤ᠂ᠰᠠᠷᠯᠤᠭ ᠤ᠋ᠨ ᠨᠣᠢᠲᠠᠨ ᠥᠷᠥᠮᠡ ᠠᠷᠪᠠᠢ ᠶ᠋ᠢᠨ ᠭᠤᠯᠢᠷ ᠲᠠᠢ ᠪᠠᠭᠰᠤᠷᠴᠤ ᠢᠷᠡᠯᠡ᠃ᠳᠠᠯᠠᠢ ᠯᠠᠮᠠ《ᠡᠨᠡ ᠭᠠᠯᠳᠠᠨ ᠶᠠᠭᠤᠨ ᠤᠴᠢᠷ ᠥᠨᠳᠥᠷ ᠭᠡᠭᠡᠨ ᠲᠡᠢ ᠠᠭᠤᠯᠵᠠᠵᠤ᠂ ᠶᠠᠪᠤᠬᠤ ᠴᠠᠭ᠂ ᠨᠠᠷᠠ ᠪᠠᠨ ᠲᠣᠬᠢᠷᠠᠳᠠᠭ ᠪᠢᠯᠡ᠃ᠭᠠᠯᠳᠠᠨ ᠵᠠᠨᠠᠪᠠᠽᠠᠷ ᠬᠣᠶᠠᠷ ᠴᠠᠭᠠᠨᠠ ᠪᠠᠨ ᠳᠣᠲᠣᠨᠣ ᠶᠤᠮ ᠭᠡᠭᠴᠢ᠃ᠠᠷᠤ ᠬᠠᠯᠬᠠ ᠶ᠋ᠢᠨ ᠨᠣᠶᠠᠳ᠂ ᠣᠢᠷᠠᠳ ᠤ᠋ᠨ ᠶᠡᠬᠡᠰ ᠳᠡᠭᠡᠳᠦᠰ ᠬᠣᠭᠣᠷᠣᠨᠳᠣ ᠪᠠᠨ ᠰᠥᠵᠢᠷᠡᠬᠦᠦ ᠮᠥᠷᠲᠡᠭᠡᠨ ᠵᠥᠷᠢᠴᠡᠯ ᠶᠡᠬᠡᠲᠡᠢ᠃ᠭᠠᠯᠳᠠᠨ ᠵᠠᠨᠠᠪᠠᠽᠠᠷ ᠬᠣᠶᠠᠷ ᠬᠦᠢ ᠶ᠋ᠢᠨ ᠬᠣᠯᠪᠣᠭᠠ ᠲᠠᠢ᠂ᠤᠳᠤᠮ ᠤᠭᠰᠠᠭᠠ ᠪᠠᠨ ᠮᠡᠳᠡᠳᠡᠭ ᠪᠢᠵᠡ᠃ᠨᠠᠮᠠᠶ᠋ᠢ ᠲᠣᠭᠣᠷᠢᠭᠠᠳ ᠪᠠᠢᠵᠤ ᠪᠠᠢᠭ》 ᠭᠡᠮᠡᠨ ᠲᠦᠮᠡᠨ ᠠᠮᠤᠭᠤᠯᠠᠩᠲᠤ ᠪᠣᠳᠣᠯ ᠬᠡᠯᠬᠢᠨᠡ᠃
ᠵᠠᠪᠢᠯᠠᠵᠤ ᠰᠠᠭᠤᠭᠰᠠᠨ ᠪᠠᠨᠴᠢᠨ ᠪᠣᠭᠳᠠ ᠭᠠᠯᠳᠠᠨ ᠢ᠋ ᠬᠠᠷᠠᠭᠠᠳ《ᠮᠡᠰᠡ ᠡᠷᠭᠢᠭᠦᠯᠬᠦ ᠨᠢ ᠤᠷᠠᠨ ᠭᠠᠷ ᠤ᠋ᠨ ᠡᠷᠳᠡᠮ᠃ ᠭᠠᠯᠳᠠᠨ ᠤ᠋ ᠪᠡᠶᠡ ᠮᠠᠬᠠᠪᠣᠳ᠂ ᠣᠶᠤᠨ ᠰᠠᠨᠠᠭᠠ ᠠᠳᠠᠯᠢᠬᠠᠨ ᠡᠷᠴᠢ ᠲᠡᠢ ᠶᠦᠮ᠃ᠪᠠᠷᠠᠭᠤᠨ ᠵᠡᠭᠦᠨ ᠲᠠᠷᠢᠬᠢ ᠨᠢ ᠬᠣᠶᠠᠭᠤᠯᠠ ᠪᠠᠨ ᠬᠥᠭᠵᠢᠭᠰᠡᠨ ᠪᠠᠢᠬᠤ ᠶ᠋ᠢ ᠪᠣᠳᠣᠬᠤ ᠳ᠋ᠤ᠌ ᠲᠠᠢᠯᠤᠭᠳᠠᠰᠢ ᠦᠭᠡᠢ ᠣᠨᠢᠰᠣᠭᠠ᠃ᠬᠡᠷᠪᠡᠵᠢᠶᠡ ᠲᠥᠪᠡᠳ ᠲᠦ᠍ ᠢᠷᠡᠭᠡ ᠦᠭᠡᠢ ᠰᠠᠨ ᠪᠣᠯ ᠵᠠᠯᠠᠵᠤ ᠵᠢᠯᠣᠭᠣᠳᠬᠤ ᠠᠷᠭᠠ ᠦᠭᠡᠢ ᠪᠣᠰᠤᠭᠠ ᠣᠷᠣᠯᠠᠩ ᠪᠠᠢᠵᠠᠢ》 ᠭᠡᠵᠦ ᠡᠷᠭᠢᠴᠡᠭᠦᠯᠦᠨᠡ᠃
ᠭᠠᠯᠳᠠᠨ ᠯᠠᠮᠠ᠂ᠪᠠᠭᠰᠢ ᠨᠠᠷ ᠤ᠋ᠨ ᠢ᠋ᠶ᠋ᠠᠨ ᠨᠢᠳᠦᠨ ᠦ᠌ ᠬᠣᠣᠷ ᠢ᠋ ᠭᠠᠷᠭᠠᠭᠰᠠᠨ ᠳ᠋ᠠᠭᠠᠨ ᠪᠠᠭᠠ ᠵᠡᠷᠭᠡ ᠬᠡᠷᠪᠡᠰᠢᠶᠡᠨ《ᠪᠡᠶᠡ᠂ ᠰᠡᠳᠬᠢᠯ᠂ ᠠᠮᠠ ᠬᠡᠯᠡ ᠪᠡᠷ ᠦᠢᠯᠡᠳᠬᠦ ᠨᠢᠭᠦᠯ ᠨᠠᠮᠠᠶ᠋ᠢ ᠲᠣᠭᠣᠷᠢᠬᠤ ᠦᠭᠡᠢ ᠪᠣᠯᠤᠯᠲᠠᠢ᠃ ᠪᠤᠷᠬᠠᠨ ᠬᠠᠮᠢᠭᠠ ᠪᠠᠢᠨᠠ᠃ᠡᠷᠡ ᠡᠮᠡ ᠪᠣᠳᠢ ᠭᠥᠷᠥᠭᠡᠰᠦ ᠪᠤᠷᠬᠠᠨ ᠤ᠋ ᠠᠮᠢᠲᠠᠨ ᠲᠤᠯᠠ ᠪᠤᠷᠬᠠᠨ ᠤ᠋ ᠰᠡᠳᠬᠢᠯ ᠢ᠋ᠶ᠋ᠡᠷ ᠨᠠᠮᠠᠶ᠋ᠢ ᠬᠠᠷᠠᠳᠠᠭ᠃ᠥᠨᠳᠥᠷ ᠭᠡᠭᠡᠨ ᠦ᠌ ᠡᠷᠢᠭᠡ ᠴᠡᠭᠡᠵᠢᠨ ᠳ᠋ᠦ᠍ ᠪᠣᠢ᠃ ᠠᠷᠪᠠᠨ ᠨᠠᠰᠤᠨ ᠤ᠋ ᠵᠥᠷᠢᠶᠡ ᠲᠡᠢ ᠪᠢᠳᠡ ᠲᠡᠭᠦᠰ ᠲᠡᠭᠦᠯᠳᠡᠷ ᠦ᠋ᠨ ᠲᠤᠢᠯ ᠳ᠋ᠤ᠌ ᠬᠦᠷᠬᠦ ᠪᠡᠷ ᠴᠣᠭ ᠲᠠᠭᠠᠨ ᠶᠠᠪᠤᠵᠤ ᠪᠠᠢᠬᠤ ᠵᠠᠭᠤᠷᠠ ᠬᠠᠭᠠᠨ ᠡᠴᠢᠭᠡ ᠡᠴᠡ ᠪᠡᠨ ᠬᠣᠶᠠᠭᠤᠯᠠ ᠬᠠᠭᠠᠴᠠᠪᠠ᠃ ᠬᠣᠭᠣᠰᠣᠨ ᠴᠢᠨᠠᠷ ᠪᠦᠬᠦᠢ ᠠᠮᠢᠳᠤᠷᠠᠯ ᠪᠤᠷᠬᠠᠨ ᠦᠭᠡᠢ ᠪᠠᠢᠭᠰᠠᠨ ᠪᠣᠯ ᠶᠠᠭᠠᠬᠢᠭᠰᠠᠨ ᠤᠢᠳᠬᠠᠷ ᠲᠠᠢ᠃ᠪᠤᠷᠬᠠᠨ ᠢ᠋ᠶ᠋ᠠᠨ ᠰᠡᠳᠬᠢᠯ ᠳ᠋ᠡᠭᠡᠨ ᠵᠠᠯᠠᠭᠠᠳ ᠳ᠋ᠦᠩᠰᠢᠭᠤᠷ ᠮᠠᠨᠢ ᠶ᠋ᠢᠨ ᠴᠠᠭᠠᠨᠠ ᠭᠠᠷᠤᠨᠠ ᠳᠠ》 ᠭᠡᠵᠦ ᠲᠠᠰᠤ ᠥᠭᠡᠷᠡ ᠶᠠᠭᠤᠮᠠ ᠪᠣᠳᠣᠵᠤ ᠪᠡᠶᠡ ᠪᠡᠨ ᠲᠠᠢᠪᠤᠰᠢᠷᠠᠭᠤᠯᠵᠤ ᠰᠠᠭᠤᠯᠠ᠃
ᠠᠷᠪᠠᠨ ᠵᠢᠷᠭᠤᠭᠠ
ᠣᠷᠣᠢ ᠪᠣᠯᠵᠠᠢ᠃ ᠭᠠᠯᠳᠠᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠲᠣᠪᠰᠢᠭᠤᠷ ᠡᠯᠭᠦᠭᠡ ᠲᠡᠢ ᠪᠥᠯᠥᠭᠡ᠃ᠭᠠᠯᠳᠠᠨ ᠲᠣᠪᠰᠢᠭᠤᠷ ᠤ᠋ᠨ ᠤᠲᠠᠰᠤ ᠶ᠋ᠢ ᠬᠤᠷᠤᠭᠤᠨ ᠤ᠋ ᠠᠶᠠᠰ ᠢ᠋ᠶ᠋ᠠᠷ ᠭᠡᠭᠡᠯᠵᠡᠲᠡᠯᠡ ᠲᠠᠲᠠᠵᠤ ᠲᠥᠪᠡᠳ ᠦ᠋ᠨ ᠥᠨᠳᠥᠷ ᠠᠭᠤᠯᠠᠨ ᠳ᠋ᠤ᠌ ᠪᠣᠷᠣᠭᠠ ᠴᠠᠢᠷᠠᠵᠤ ᠪᠠᠢᠭᠠ ᠶ᠋ᠢ ᠭᠡᠭᠡᠪᠴᠢ ᠪᠡᠷ ᠰᠢᠷᠲᠡᠨᠡ᠃ ᠲᠣᠪᠰᠢᠭᠤᠷ ᠤ᠋ᠨ ᠠᠶᠠᠯᠭᠤ ᠪᠣᠷᠣᠭᠠᠨ ᠤ᠋ ᠳᠤᠰᠤᠯ ᠰᠢᠷᠬᠡᠭ ᠮᠡᠲᠦ ᠨᠢᠭᠡ ᠨᠢᠭᠡ ᠪᠡᠷ ᠤᠨᠠᠵᠤ᠂ ᠭᠠᠯᠳᠠᠨ ᠤ᠋ ᠰᠡᠳᠬᠢᠯ ᠦ᠋ᠨ ᠴᠢᠨᠠᠳᠤ ᠣᠷᠣᠰᠢᠨ ᠪᠦᠬᠦᠢ ᠨᠤᠲᠤᠭ ᠢ᠋ᠶ᠋ᠠᠨ ᠰᠠᠨᠠᠭᠰᠠᠨ ᠰᠡᠳᠬᠢᠯ ᠦ᠋ᠨ ᠤᠲᠠᠰᠤ ᠶ᠋ᠢ ᠭᠦᠨᠳᠡᠪᠡ᠃ ᠠᠯᠲᠠᠢ ᠶ᠋ᠢᠨ ᠠᠭᠤᠯᠠᠰ ᠪᠣᠷᠣᠭᠠᠨ ᠲᠠᠢ ᠡᠳᠦᠷ ᠨᠠᠮᠢᠯᠵᠠᠨ ᠬᠥᠳᠡᠯᠳᠡᠭ ᠪᠢᠯᠡ᠃ ᠥᠷᠭᠥᠭᠡ ᠭᠡᠷ ᠲᠦ᠍ ᠭᠠᠯ ᠥᠷᠲᠥᠬᠦ ᠳ᠋ᠦ᠍ ᠪᠣᠷᠣᠭᠠᠨ ᠤ᠋ ᠦᠨᠦᠷ ᠤᠯᠠᠮ ᠲᠠᠩᠰᠤᠭ ᠢᠯᠳᠠᠮ ᠪᠣᠯᠤᠨᠠ᠃ᠪᠣᠷᠣᠭᠠ ᠳᠠᠭᠠᠭᠠᠳ ᠰᠡᠳᠬᠢᠯ ᠵᠢᠷᠦᠬᠡ ᠵᠦᠰᠡᠷᠡᠳᠡᠭ ᠪᠤᠰᠤ ᠤᠤ?
ᠭᠠᠯᠳᠠᠨ ᠪᠠᠭᠠ ᠳ᠋ᠠᠭᠠᠨ ᠣᠢᠷᠠᠳ ᠤ᠋ᠨ ᠶᠡᠬᠡ ᠪᠠᠭᠠᠲᠤᠷ ᠡᠷᠡ ᠭᠠᠯᠳᠠᠮᠠ ᠶ᠋ᠢᠨ ᠲᠤᠬᠠᠢ ᠳᠠᠭᠤᠤ ᠶ᠋ᠢ ᠠᠶᠠᠯᠵᠤ ᠰᠤᠷᠤᠭᠠᠳ ᠬᠦᠯᠦᠭ ᠦ᠋ᠨ ᠳᠥᠷᠦᠭᠡᠨ ᠳ᠋ᠦ᠍ ᠠᠰᠠᠬᠤ ᠪᠦᠷᠢ ᠳ᠋ᠡᠭᠡᠨ ᠰᠡᠳᠬᠢᠯ ᠨᠢ ᠬᠥᠭᠡᠷᠦᠨ ᠲᠡᠷᠡ ᠬᠦ᠌ ᠳᠠᠭᠤᠤ ᠶ᠋ᠢ ᠠᠶᠠᠯᠳᠠᠭ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠮᠠᠷᠲᠠᠳᠠᠭ ᠦᠭᠡᠢ ᠶᠦᠮ᠃ ᠭᠠᠯᠳᠠᠨ ᠢ᠋ ᠳᠠᠭᠤᠯᠠᠬᠤ ᠪᠠᠷ ᠮᠢᠭᠮᠠᠨᠰᠠᠩᠵᠠᠢ ᠳᠠᠭᠠᠵᠤ ᠳᠠᠭᠤᠯᠠᠨᠠ᠃ ᠮᠣᠷᠢᠨ ᠳᠡᠭᠡᠷᠡ ᠳᠠᠭᠤᠯᠠᠳᠠᠭ ᠳᠠᠭᠤᠤ ᠪᠠᠢᠵᠠᠢ᠃ ᠮᠣᠷᠢᠳ ᠳᠠᠭᠤᠨ ᠳ᠋ᠤ᠌ ᠤᠶᠠᠷᠠᠳᠠᠭ ᠪᠤᠰᠤ ᠤᠤ?
ᡀᠠᠰᠠ ᠬᠡᠮᠡᠬᠦ ᠪᠤᠷᠬᠠᠨ ᠱᠠᠰᠢᠨ ᠤ᠋ ᠬᠥᠯ ᠶᠡᠬᠡᠲᠡᠢ ᠬᠣᠲᠠᠨ ᠳ᠋ᠤ᠌ ᠢᠷᠡᠭᠰᠡᠨ ᠬᠣᠢᠨᠠ ᠪᠠᠨ ᠮᠥᠨᠥᠬᠢ ᠭᠠᠯᠳᠠᠮᠠ ᠪᠠᠭᠠᠲᠤᠷ ᠤ᠋ᠨ ᠲᠤᠬᠠᠢ ᠳᠠᠭᠤᠤ ᠶ᠋ᠢ ᠠᠶᠠᠯᠤᠭᠰᠠᠭᠠᠷ ᠪᠠᠢᠨᠠ᠃ᠭᠠᠯᠳᠠᠨ ᠵᠥᠪᠬᠡᠨ ᠥᠪᠡᠷ ᠲᠡᠭᠡᠨ ᠳᠠᠭᠤᠯᠠᠳᠠᠭ ᠪᠣᠯᠵᠠᠢ᠃ ᠭᠠᠯᠳᠠᠨ ᠨᠢᠳᠦᠨ ᠳ᠋ᠡᠭᠡᠨ ᠪᠠᠭᠠᠲᠤᠷ ᠡᠷᠡᠰ ᠢ᠋ ᠬᠠᠷᠠᠨᠠ᠃
ᠰᠥᠭᠡᠩᠭᠢᠳᠡᠭᠦᠦ ᠭᠤᠨᠢᠭᠲᠤ ᠬᠣᠭᠣᠯᠠᠢ ᠪᠠᠷ ᠨᠢᠭᠡᠨ ᠬᠡᠪ ᠢ᠋ᠶ᠋ᠡᠷ ᠲᠣᠪᠰᠢᠭᠤᠷ ᠲᠣᠪᠰᠢᠨ ᠭᠠᠯ ᠦᠯᠢᠶᠡᠬᠦ ᠯᠦ᠍ᠭᠡ ᠰᠡᠳᠬᠢᠯ ᠰᠡᠮᠡᠯᠡᠨ ᠳᠠᠭᠤᠯᠠᠬᠤ ᠠᠵᠠᠢ᠃
᠁ ᠬᠤᠶᠠᠭ ᠳᠤᠭᠤᠯᠠᠭᠠ ᠪᠠᠨ ᠡᠮᠦᠰᠦᠭᠰᠡᠨ ᠭᠠᠯᠳᠠᠮᠠ
ᠬᠠᠭᠠᠨ ᠤ᠋ ᠣᠷᠳᠣᠨ ᠤ᠋ ᠡᠭᠦᠳᠡᠨ ᠳ᠋ᠦ᠍ ᠵᠣᠭᠰᠣᠨᠠᠮ
ᠬᠠᠩᠬᠠᠯᠵᠠᠭᠣᠷ ᠬᠡᠭᠡᠷ ᠮᠣᠷᠢ ᠨᠢ ᠡᠮᠡᠭᠡᠯ ᠲᠡᠢ ᠪᠡᠨ
ᠬᠠᠪᠴᠢᠯ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠰᠣᠢᠯᠲᠠᠲᠠᠢ ᠪᠠᠢᠨᠠᠮ
ᠰᠠᠭᠠᠳᠠᠭ ᠨᠤᠮᠤ ᠨᠢ ᠨᠢᠷᠤᠭᠤᠨ ᠳ᠋ᠤ᠌ ᠪᠡᠬᠢᠯᠡᠵᠦ
ᠰᠠᠢᠨ ᠨᠥᠬᠥᠳ ᠨᠢ ᠠᠮᠢ ᠨᠢᠭᠡᠳᠦᠨ
ᠳᠥᠷᠪᠡᠨ ᠨᠠᠰᠤᠲᠠᠢ ᠬᠠᠯᠢᠭᠤᠨᠡ ᠪᠡᠨ
ᠴᠢᠳᠥᠷ ᠤᠶᠠᠭᠠᠨ ᠳ᠋ᠤᠨᠢ ᠳᠠᠰᠬᠠᠪᠠ
ᠳᠥᠴᠢᠨ ᠰᠢᠯᠢᠳᠡᠭ ᠪᠠᠭᠠᠲᠤᠷ ᠢ᠋ᠶ᠋ᠠᠨ
ᠲᠡᠢᠨ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠪᠡᠯᠡᠳᠬᠡᠪᠡ
ᠬᠠᠭᠰᠠᠭᠠᠵᠤ ᠰᠣᠢᠭᠰᠠᠨ ᠬᠠᠯᠢᠭᠤᠨᠠ ᠪᠠᠨ
ᠴᠢᠳᠥᠷ ᠤᠶᠠᠭᠠᠨ ᠳ᠋ᠤ᠌ ᠳᠠᠰᠬᠠᠪᠠ
ᠬᠠᠷᠴᠠᠭᠠᠢ ᠱᠣᠩᠬᠣᠷ ᠰᠢᠪᠠᠭᠤ ᠪᠠᠨ
ᠬᠤᠨ ᠪᠠᠷᠢᠶᠠᠨ ᠳ᠋ᠤ᠌ ᠰᠤᠷᠭᠠᠪᠠ ᠁
ᠭᠠᠯᠳᠠᠨ ᠤ᠋ ᠵᠢᠷᠦᠬᠡᠨ ᠳ᠋ᠦ᠍ ᠭᠠᠯᠳᠠᠮᠠ ᠪᠠᠭᠠᠲᠤᠷ ᠤ᠋ᠨ ᠲᠤᠬᠠᠢ ᠳᠠᠭᠤᠤ ᠪᠠᠢᠩᠭᠤ ᠡᠭᠡᠰᠢᠭᠯᠡᠨᠡ᠃ᠲᠡᠷᠡ ᠪᠡᠷ ᠳᠠᠭᠤᠤ ᠪᠠᠨ ᠰᠠᠨᠠᠮᠰᠠᠷ ᠦᠭᠡᠢ ᠠᠶᠠᠯᠠᠲᠠᠯᠠ ᠳᠡᠭᠡᠳᠦ ᠶ᠋ᠢᠨ ᠶᠡᠬᠡ ᠪᠠᠭᠰᠢ ᠳᠠᠯᠠᠢ ᠯᠠᠮᠠ ᠳᠡᠷᠭᠡᠳᠡ ᠨᠢ ᠪᠠᠢᠵᠠᠢ᠃
— ᠬᠤᠪᠢᠯᠭᠠᠨ ᠲᠠ ᠳᠠᠭᠤᠤ ᠠᠶᠠᠯᠤᠨᠠ ᠤᠤ? ᠭᠡᠵᠦ ᠳᠠᠯᠠᠢ ᠯᠠᠮᠠ ᠬᠡᠯᠡᠪᠡ᠃
— ᠰᠠᠨᠠᠭᠠᠨ ᠳ᠋ᠤ᠌᠁ ᠠᠶᠠᠯᠪᠠ ᠭᠡᠮᠡᠨ ᠭᠠᠯᠳᠠᠨ ᠯᠠᠮᠠ ᠰᠣᠴᠢᠰᠬᠢᠨ ᠥᠭᠦᠯᠡᠪᠡ᠃
ᠳᠠᠯᠠᠢ ᠯᠠᠮᠠ ᠢᠨᠢᠶᠡᠮᠰᠦᠭᠯᠡᠵᠦ ᠳᠠᠭᠤᠯᠠᠬᠤ ᠭᠡᠳᠡᠭ ᠤᠬᠢᠯᠠᠬᠤ ᠠ᠋ᠴᠠ ᠡᠬᠢ ᠲᠡᠢ ᠶᠦᠮ᠃ᠡᠬᠡ ᠡᠴᠡ ᠲᠥᠷᠥᠭᠡᠳ ᠤᠬᠢᠯᠠᠭᠰᠠᠨ ᠲᠡᠷᠡ ᠳᠠᠭᠤᠤ ᠪᠣᠯ ᠨᠢᠭᠡ ᠨᠠᠰᠤᠨ ᠤ᠋ ᠠᠮᠢᠰᠬᠤᠯ ᠤ᠋ᠨ ᠲᠣᠭᠠᠨ ᠤ᠋ ᠡᠬᠢᠯᠡᠯ᠃ᠨᠠᠳᠠ ᠳᠠᠭᠤᠯᠠᠵᠤ ᠥᠭᠭᠦᠭᠡᠴᠢ ᠭᠡᠮᠡᠨ ᠭᠠᠯᠳᠠᠨ ᠢ ᠠᠷᠭᠠᠳᠠᠪᠠ᠃ᠭᠠᠯᠳᠠᠨ ᠪᠠᠭᠰᠢ ᠶ᠋ᠢᠨ ᠡᠮᠦᠨᠡ ᠵᠣᠭᠰᠣᠭᠠᠳ ᠪᠦᠳᠡᠭᠢᠬᠡᠨ ᠢ᠋ᠶ᠋ᠡᠷ ᠳᠠᠭᠤᠯᠠᠬᠤ ᠳ᠋ᠤ᠌ ᠳᠠᠯᠠᠢ ᠯᠠᠮᠠ ᠪᠡᠶᠡᠰᠦᠨ ᠬᠥᠭᠡᠷᠴᠡᠢ᠃
— ᠭᠠᠯᠳᠠᠨ ᠬᠤᠪᠢᠯᠭᠠᠨ ᠲᠠ ᠪᠣᠯ ᠣᠢᠷᠠᠳ ᠨᠤᠲᠤᠭ ᠲᠠᠢ ᠪᠠᠨ ᠤᠶᠠᠭᠠᠲᠠᠢ ᠰᠢᠦ᠃ᠲᠡᠢᠮᠦ ᠨᠠᠨᠳᠢᠨ ᠤᠶᠠᠭᠠ ᠶ᠋ᠢ ᠬᠦᠢ ᠶ᠋ᠢᠨ ᠬᠣᠯᠪᠣᠭᠠ ᠭᠡᠳᠡᠭ ᠪᠤᠰᠤ ᠤᠤ?ᠬᠡᠮᠡᠭᠡᠳ ᠮᠣᠲ᠋ᠣᠷ ᠤ᠋ᠨ ᠠᠳᠢᠰ ᠬᠦᠷᠲᠡᠭᠡᠪᠡ᠃ ᠡᠳᠦᠷ ᠨᠢ ᠳᠠᠯᠠᠢ ᠯᠠᠮᠠ ᠭᠠᠯᠳᠠᠨ ᠢ ᠠᠳᠢᠰᠯᠠᠬᠤ ᠪᠠᠨ ᠮᠠᠷᠲᠠᠭᠰᠠᠨ ᠪᠠᠢᠵᠠᠢ᠃ ᠲᠡᠢᠮᠦ ᠪᠣᠯᠬᠣᠷ ᠣᠷᠣᠢ ᠶ᠋ᠢᠨ ᠲᠣᠭᠲᠠᠭᠤᠨ ᠳ᠋ᠤ᠌ ᠭᠠᠳᠠᠭᠠᠯᠠᠬᠤ ᠵᠠᠭᠤᠷᠠ ᠪᠠᠨ ᠲᠡᠭᠦᠨ ᠦ᠌ ᠦᠷᠭᠦᠭᠡᠨ ᠳ᠋ᠦ᠍ ᠣᠴᠢᠭᠰᠠᠨ ᠪᠠᠢᠯᠠ᠃
ᠳᠠᠯᠠᠢ ᠯᠠᠮᠠ ᠣᠢᠷᠠᠳ ᠤ᠋ᠨ ᠬᠥᠪᠡᠭᠦᠳ ᠢ᠋
ᠣᠨᠴᠠᠭᠠᠢ ᠠᠩᠬᠠᠷᠬᠤ ᠪᠥᠯᠥᠭᠡ᠃ ᡀᠠᠰᠠ ᠬᠡᠮᠡᠬᠦ ᠪᠤᠷᠬᠠᠨ ᠤ᠋ ᠥᠯᠥᠭᠡᠢ ᠬᠣᠲᠠ ᠳ᠋ᠤ᠌ ᠬᠣᠯᠠ ᠣᠢᠷᠠ ᠶ᠋ᠢᠨ ᠮᠥᠷᠭᠥᠯᠴᠢᠨ᠂ᠭᠤᠶᠤᠯᠭᠠᠴᠢᠨ᠂ᠵᠣᠯᠪᠢᠩ ᠨᠣᠬᠠᠢ ᠴᠤᠭᠯᠠᠷᠠᠭᠰᠠᠨ ᠠ᠋ᠴᠠ ᠭᠠᠳᠠᠨᠠ ᠭᠣᠢᠳᠠ ᠡᠷᠳᠡᠮ ᠴᠢᠳᠠᠯ ᠲᠠᠢ ᠂ᠭᠠᠵᠠᠷ ᠲᠩᠷᠢ ᠡᠴᠡ ᠬᠡᠰᠢᠭ ᠳᠠᠯᠠᠯᠭᠠ ᠲᠠᠢ ᠭᠠᠯᠳᠠᠨ ᠵᠠᠨᠠᠪᠠᠽᠠᠷ ᠮᠡᠲᠦ ᠶ᠋ᠢᠨ ᠬᠤᠪᠢᠯᠭᠠᠨ ᠣᠯᠠᠨ ᠪᠢᠯᠡ᠃ᠭᠠᠯᠳᠠᠨ᠂ᠵᠠᠨᠠᠪᠠᠽᠠᠷ ᠬᠣᠶᠠᠷ ᠪᠡᠶᠡ ᠪᠡᠶᠡ ᠤᠷᠤᠭᠤ ᠪᠠᠨ ᠨᠡᠭᠦᠵᠦ ᠡᠬᠢᠯᠡᠵᠡᠢ᠃ᠡᠨᠡ ᠨᠡᠭᠦᠳᠡᠯ ᠦᠯᠦ ᠲᠠᠰᠤᠷᠠᠬᠤ ᠶ᠋ᠢᠨ ᠡᠬᠢᠯᠡᠯ ᠪᠣᠯᠪᠠ᠃
ᠰᠠᠢᠨ ᠮᠠᠭᠤ᠂ ᠰᠠᠢᠬᠠᠨ ᠮᠠᠭᠤᠬᠠᠢ ᠬᠥᠭᠯᠡᠷᠡᠭᠰᠡᠨ ᡀᠠᠰᠠ ᠬᠡᠮᠡᠬᠦ ᠪᠤᠷᠬᠠᠨ ᠤ᠋ ᠶᠡᠬᠡ ᠬᠦᠷᠢᠶᠡᠨ ᠦ᠌ ᠥᠨᠳᠥᠷ ᠳᠡᠨᠵᠢᠨ ᠳ᠋ᠦ᠍ ᠪᠤᠳᠠᠯᠠᠩ ᠣᠷᠳᠣᠨ ᠪᠠᠷᠠ ᠰᠦᠷ ᠲᠡᠢ ᠲᠦᠩᠬᠦᠢᠨ ᠪᠠᠢᠬᠤ ᠳ᠋ᠤ᠌ ᠡᠬᠢᠯᠡᠭᠡᠳ ᠭᠠᠯᠳᠠᠨ ᠯᠠᠮᠠ ᠶ᠋ᠢᠨ ᠬᠥᠰᠬᠡ᠂ ᠳᠠᠷᠠᠭᠠᠯᠠᠭᠠᠳ ᠥᠨᠳᠥᠷ ᠭᠡᠭᠡᠨ ᠦ᠌ ᠬᠥᠰᠬᠡ ᠬᠥᠳᠡᠯᠪᠡ᠃ ᠭᠠᠯᠳᠠᠨ ᠯᠠᠮᠠ《ᠠᠷᠤ ᠠ᠋ᠴᠠ ᠥᠨᠳᠥᠷ ᠭᠡᠭᠡᠨ ᠶᠠᠪᠤᠨᠠ᠃ ᠪᠢ ᠲᠦᠷᠦᠭᠦᠯᠡᠵᠦ ᠬᠥᠳᠡᠯᠪᠡ᠃ᠪᠣᠭᠳᠠ ᠯᠠᠮᠠ ᠬᠡᠵᠢᠶᠡ ᠴᠦ᠍ ᠲᠦᠷᠦᠭᠦᠯᠡᠵᠦ ᠬᠥᠳᠡᠯᠬᠦ ᠦᠭᠡᠢ᠃ᠬᠠᠷᠢᠨ ᠪᠢ ᠪᠣᠯ ᠡᠷᠴᠢ ᠲᠡᠢ ᠤᠴᠢᠷ ᠠ᠋ᠴᠠ ᠰᠢᠭᠤᠳ ᠡᠬᠢᠯᠡᠳᠡᠭ᠃ᠡᠷᠴᠢ ᠪᠡᠨ ᠰᠠᠭᠠᠷᠠᠭᠤᠯᠵᠤ ᠪᠣᠯᠬᠤ ᠦᠭᠡᠢ ᠴᠦ᠍ ᠪᠣᠳᠣᠬᠤ ᠬᠡᠷᠡᠭᠲᠡᠢ》 ᠭᠡᠮᠡᠨ ᠪᠣᠳᠣᠨᠠ᠃
ᠠᠷᠪᠠᠨ ᠳᠣᠯᠣᠭᠠ
ᠬᠥᠬᠡᠨᠠᠭᠤᠷ ᠲᠤ᠌ ᠵᠤᠰᠠᠵᠤ ᠪᠣᠢ ᠸᠴᠢᠷᠲᠤ ᠰᠡᠴᠡᠨ ᠬᠠᠭᠠᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠭᠠᠯᠳᠠᠨ ᠰᠠᠭᠠᠳᠠᠭᠠᠳ ᠬᠥᠳᠡᠯᠪᠡ᠃ᠠᠨᠤᠳᠠᠷᠠ ᠪᠦᠰᠡᠭᠦᠢ ᠰᠡᠩᠭᠡ ᠬᠠᠭᠠᠨ ᠤ᠋ ᠬᠠᠲᠤᠨ ᠪᠣᠯᠵᠤ ᠣᠳᠴᠠᠢ᠃ᠥᠨᠳᠡᠭᠡᠲᠦ ᠪᠣᠷᠣ ᠴᠥᠭᠥᠷᠥᠮ ᠳ᠋ᠦ᠍ ᠡᠪᠡᠰᠦᠨ ᠦᠨᠳᠦᠰᠦ ᠲᠣᠭᠠᠯᠠᠨ ᠠᠩᠭᠠᠬᠠᠢ ᠱᠣᠯᠤᠭᠤᠨᠠᠨ ᠪᠠᠢᠨᠠ᠃ ᠨᠣᠭᠣᠭᠠᠨ᠂ᠰᠢᠷᠠ᠂ᠪᠣᠷᠣ ᠥᠩᠭᠡ ᠪᠡᠷ ᠬᠣᠣᠰᠯᠠᠭᠰᠠᠨ ᠥᠨᠳᠡᠭᠡᠲᠦ ᠳᠤᠭᠤᠢ ᠲᠣᠭᠣᠷᠢᠮ ᠭᠠᠯᠳᠠᠨ ᠳ᠋ᠤ᠌ ᠤᠢᠳᠬᠠᠷ ᠲᠥᠷᠥᠭᠦᠯᠳᠡᠭ᠃ ᠠᠨᠤᠳᠠᠷᠠ ᠶ᠋ᠢ ᠬᠠᠷᠠᠭᠰᠠᠨ ᠪᠣᠯ ᠶᠠᠭᠠᠬᠢᠵᠤ ᠪᠠᠢᠭᠰᠠᠨ ᠢ ᠪᠤᠤ ᠮᠡᠳᠡ᠁ ᠠᠬᠠᠳᠠᠷᠠ ᠪᠦᠰᠡᠭᠦᠢ ᠭᠠᠯᠳᠠᠨ ᠠ᠋ᠴᠠ ᠴᠡᠷᠪᠡᠨᠡ᠃ ᠠᠬᠠᠳᠠᠷᠠ ᠪᠦᠰᠡᠭᠦᠢ ᠭᠠᠯᠳᠠᠨ ᠤ᠋ ᠡᠮᠦᠨᠡ ᠡᠴᠡ ᠡᠭᠴᠡᠯᠡᠵᠦ ᠬᠠᠷᠠᠬᠤ ᠦᠭᠡᠢ ᠠᠵᠢ᠃
ᠲᠥᠪᠡᠳ ᠦ᠋ᠨ ᠮᠥᠩᠬᠡ ᠴᠠᠰᠤᠲᠤ ᠠᠭᠤᠯᠠ ᠶ᠋ᠢᠨ ᠳᠠᠪᠠᠭᠠᠨ ᠳ᠋ᠤ᠌ ᠨᠢᠭᠡᠨ ᠬᠥᠪᠡᠭᠦᠨ ᠡᠬᠡ ᠶ᠋ᠢᠨ ᠤᠮᠠᠢ ᠠ᠋ᠴᠠ ᠨᠢᠭᠦᠯᠲᠦ ᠬᠣᠷᠸᠠ ᠳ᠋ᠤ᠌ ᠲᠥᠷᠥᠵᠦ ᠠᠬᠤᠢ ᠴᠠᠭ ᠲᠤᠷ ᠶᠦᠮ ᠠᠭᠠ ᠬᠠᠲᠤᠨ ᠤ᠋ ᠶᠡᠬᠡ ᠦᠷᠭᠦᠭᠡᠨ ᠦ᠌ ᠡᠭᠦᠳᠡᠨ ᠳ᠋ᠦ᠍ ᠭᠠᠯᠳᠠᠨ ᠤ᠋ ᠡᠯᠴᠢ ᠪᠠᠭᠤᠵᠤ ᠪᠠᠢᠯᠠ᠃ᠬᠠᠲᠤᠨ ᠤ᠋ ᠦᠷᠭᠦᠭᠡᠨ ᠦ᠌ ᠪᠣᠱᠣᠭᠠ ᠪᠠᠷ ᠠᠯᠬᠤᠩᠭᠤᠲᠠ ᠡᠯᠴᠢ ᠨᠠᠮᠤᠰᠬᠢᠨ ᠬᠦᠨᠳᠦᠳᠬᠡᠯ ᠦᠵᠡᠭᠦᠯᠦᠭᠡᠳ᠂
—ᠭᠠᠯᠳᠠᠨ ᠬᠤᠪᠢᠯᠭᠠᠨ ᠁ ᠭᠡᠵᠦ ᠬᠡᠯᠡ ᠳᠣᠭᠣᠯᠭᠠᠪᠠ᠃ᠶᠥᠮ ᠠᠭᠠ ᠬᠠᠲᠤᠨ ᠤ᠋ ᠶᠠᠭᠠᠨ ᠴᠢᠷᠠᠢ ᠳ᠋ᠤ᠌ ᠤᠴᠠᠷᠠᠯ ᠤ᠋ᠨ ᠭᠡᠷᠡᠯ ᠭᠢᠯᠠᠯᠵᠠᠨ ᠥᠩᠭᠡᠷᠡᠭᠰᠡᠨ ᠢ᠋ᠶ᠋ᠡᠨ ᠪᠡᠭᠲᠡᠷᠡᠯ ᠦ᠋ᠨ ᠰᠡᠭᠦᠳᠡᠷ ᠲᠠᠲᠠᠬᠤ ᠮᠡᠲᠦ ᠪᠣᠯᠪᠠ᠃ ᠬᠠᠲᠤᠨ ᠨᠠᠮᠪᠠᠯᠢᠭ ᠢ᠋ ᠬᠢᠴᠢᠶᠡᠪᠡᠴᠦ ᠬᠦᠦ ᠪᠡᠨ ᠢᠷᠡᠵᠦ ᠪᠠᠢᠭᠠ ᠶ᠋ᠢ ᠰᠣᠨᠣᠰᠤᠭᠠᠳ ᠲᠥᠪᠳᠡᠭᠰᠡᠨ ᠦᠭᠡᠢ ᠥᠷᠭᠥᠭᠡ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠭᠠᠳᠠᠭᠠ ᠭᠠᠷᠤᠯᠠ᠃
ᠬᠠᠷᠠ ᠡᠷᠴᠢᠰ ᠮᠣᠷᠢᠨ ᠤ᠋ ᠤᠷᠲᠤ ᠬᠥᠨᠳᠡᠢ ᠬᠥᠬᠡ ᠨᠣᠭᠣᠭᠠᠨ ᠤ᠋ ᠪᠤᠳᠠᠩ᠂ᠠᠯᠤᠰ ᠤ᠋ᠨ ᠵᠡᠷᠭᠡᠯᠭᠡᠨ ᠳ᠋ᠦ᠍ ᠰᠦᠮᠡᠢᠨᠡ᠃ ᠲᠡᠷᠲᠡᠭᠡ ᠬᠣᠯᠠ ᠠ᠋ᠴᠠ ᠮᠣᠷᠢᠳ ᠤ᠋ᠨ ᠲᠣᠭᠣᠰᠣ ᠵᠤᠷᠠᠢᠵᠤ ᠪᠠᠢᠨᠠ᠃
ᠶᠦᠮ ᠠᠭᠠ ᠬᠠᠲᠤᠨ ᠭᠡᠷ ᠲᠡᠭᠡᠨ ᠡᠷᠭᠢᠵᠦ ᠣᠷᠣᠭᠠᠳ ᠴᠡᠭᠡᠵᠢ ᠪᠡᠨ ᠳᠠᠷᠤᠵᠤ ᠰᠡᠭᠦᠷᠡᠰᠦ ᠠᠯᠳᠠᠭᠠᠳ ᠴᠢᠮᠡᠭᠡ ᠴᠡᠩᠨᠠᠬᠤ ᠮᠡᠲᠦ ᠠᠨᠢᠷᠲᠤᠨ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶ᠋ᠢᠨ ᠡᠵᠡᠭᠦᠢᠷᠡᠭᠰᠡᠨ ᠰᠠᠭᠤᠳᠠᠯ ᠢ᠋ ᠬᠠᠷᠠᠪᠠ᠃ᠬᠠᠭᠠᠨ ᠤ᠋ ᠣᠯᠪᠣᠭ ᠳᠡᠭᠡᠷᠡᠬᠢ ᠫᠧᠷᠰ ᠭᠠᠵᠠᠷ ᠤ᠋ᠨ ᠬᠡᠪᠢᠰ ᠲᠡᠭᠦᠨ ᠢ᠋ ᠡᠮᠵᠢᠵᠦ ᠪᠦᠬᠦᠢ ᠤᠲᠠᠰᠤ ᠰᠠᠴᠤᠭ ᠡᠵᠡᠭᠦᠢᠷᠡᠭᠰᠡᠨ ᠢ᠋ᠶ᠋ᠡᠨ ᠣᠭᠲᠣᠬᠠᠨ ᠦᠯᠦ ᠮᠡᠳᠡᠨ ᠴᠡᠮᠴᠡᠢᠨᠡ᠃ ᠬᠠᠭᠠᠨ ᠤ᠋ ᠣᠯᠪᠣᠭ ᠤ᠋ᠨ ᠴᠠᠭᠠᠨᠠ ᠬᠠᠨᠠ ᠶ᠋ᠢᠨ ᠡᠷᠡᠰ ᠨᠠᠯᠣᠯᠠᠭᠰᠠᠨ ᠲᠦᠰᠢᠯᠭᠡ ᠳᠡᠭᠡᠷᠡᠬᠢ ᠳᠠᠯᠠᠪᠴᠢ ᠪᠠᠨ ᠪᠠᠷᠳᠠᠮᠬᠠᠨ ᠢ᠋ᠶ᠋ᠠᠷ ᠡᠷᠭᠦᠵᠦ᠂ᠬᠤᠷᠤᠭᠤ ᠬᠢᠮᠤᠰᠤ᠂ ᠰᠣᠴᠢᠮᠠᠭ ᠠᠷᠠᠭᠠ ᠪᠠᠷ ᠢ᠋ᠶ᠋ᠠᠨ ᠠᠢᠳᠠᠰ ᠬᠦᠷᠭᠡᠬᠦ ᠪᠦᠷᠭᠦᠳ ᠦ᠋ᠨ ᠳᠦᠷᠰᠦ ᠬᠠᠲᠤᠨ ᠳ᠋ᠤ᠌ ᠵᠣᠷᠢᠭ ᠥᠭᠪᠡ᠃ᠲᠡᠷᠡ ᠪᠦᠷᠭᠦᠳ ᠢ᠋ ᠶᠦᠮ ᠠᠭᠠ ᠬᠠᠲᠤᠨ ᠤᠷᠠᠯᠠᠵᠠᠢ᠃
ᠦᠷᠭᠦᠭᠡᠨ ᠦ᠌ ᠭᠠᠳᠠᠨᠠ ᠳᠥᠷᠥᠭᠡ ᠬᠤᠷᠰᠢᠬᠤ᠂ ᠬᠥᠮᠦᠰ ᠳᠦᠩᠭᠡᠷ ᠳᠦᠩᠭᠡᠷ ᠶᠠᠷᠢᠯᠴᠠᠬᠤ᠂ᠵᠢᠤᠵᠠ
ᠲᠡᠷᠭᠡᠨ ᠦ᠌ ᠬᠠᠭᠠᠯᠭᠠ ᠬᠠᠭᠠᠭᠳᠠᠬᠤ ᠵᠡᠷᠭᠡ ᠠᠨᠢᠷ ᠴᠢᠮᠡᠭᠡ ᠰᠣᠨᠣᠰᠳᠠᠬᠤ ᠶ᠋ᠢ ᠶᠦᠮ ᠠᠭᠠ
ᠬᠠᠲᠤᠨ ᠵᠢᠷᠦᠬᠡ ᠪᠡᠷ ᠢ᠋ᠶ᠋ᠡᠨ ᠰᠣᠨᠣᠰᠴᠤ ᠪᠠᠢᠪᠠ᠃
ᠭᠠᠯᠳᠠᠨ ᠯᠠᠮᠠ ᠬᠤᠪᠴᠠᠰᠤ ᠲᠠᠢ᠂ᠴᠢᠷᠠᠢ ᠰᠢᠩᠭᠡᠨ᠂ᠮᠣᠩᠬᠣᠷᠳᠠᠭᠤ ᠬᠠᠮᠠᠷ ᠤ᠋ᠨ ᠬᠢᠨᠢ ᠤᠭᠠᠯᠵᠠ ᠨᠡᠯᠢᠶᠡᠳ ᠲᠣᠳᠣᠷᠠᠵᠤ᠂ᠨᠢᠳᠦᠨ ᠬᠠᠷᠠᠴᠠ ᠶᠠᠯᠢᠭᠦᠢ ᠬᠦᠢᠲᠡᠨ᠂ᠬᠠᠢᠷᠠ ᠶ᠋ᠢᠨ ᠢᠯᠴᠢᠨ ᠳ᠋ᠦ᠍ ᠳᠤᠯᠠᠭᠠᠴᠠᠭᠠ ᠦᠭᠡᠢ ᠥᠩᠭᠡᠷᠡᠭᠰᠡᠨ ᠪᠠᠭᠠ ᠨᠠᠰᠤ ᠪᠠᠨ ᠦᠭᠡᠢᠯᠡᠬᠦ ᠮᠡᠲᠦ ᠪᠣᠯᠵᠠᠢ᠃ᠭᠠᠯᠳᠠᠨ ᠢᠮᠠᠭᠲᠠ ᠡᠪᠦᠷᠲᠦᠯᠡᠵᠦ ᠶᠠᠪᠤᠳᠠᠭ ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠦ᠌ ᠪᠡᠨ ᠴᠢᠯᠠᠭᠤ ᠶ᠋ᠢ ᠠᠳᠬᠤᠬᠤ ᠳ᠋ᠤ᠌ ᠴᠢᠭᠢᠭ ᠳᠠᠭᠠᠭᠠᠳ ᠪᠠᠢᠯᠠ᠃ᠴᠣᠷᠣᠰ ᠠᠢᠮᠠᠭ ᠤ᠋ᠨ ᠶᠡᠬᠡ ᠶᠡᠬᠡ ᠬᠦᠷᠢᠶᠡ ᠤᠷᠢᠳᠤᠬᠢ ᠠ᠋ᠴᠠ ᠪᠠᠨ ᠥᠷᠭᠡᠵᠢᠨ ᠳᠡᠯᠡᠵᠡᠢ᠃ ᠨᠤᠮᠤᠷᠠᠭᠰᠠᠨ ᠤᠷᠲᠤ ᠬᠣᠰᠢᠭᠤ ᠶ᠋ᠢᠨ ᠲᠡᠨᠳᠡ ᠤᠤᠬᠠᠢᠯᠠᠬᠤ ᠰᠣᠨᠣᠰᠤᠭᠳᠠᠨᠠ᠃ ᠲᠡᠷᠡ ᠬᠠᠷᠠ ᠬᠣᠰᠢᠭᠤ ᠶ᠋ᠢ ᠣᠷᠢᠶᠠᠵᠤ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ᠂ ᠪᠠᠭᠠᠲᠤᠷ ᠵᠠᠩᠵᠤᠨ ᠤ᠋ ᠠᠭᠲᠠ ᠮᠣᠷᠢᠳ ᠤ᠋ᠨ ᠵᠦᠴᠡᠭᠡ᠂ᠪᠡᠬᠢᠯᠡᠯᠲᠡ ᠪᠠᠢᠷᠢᠯᠠᠳᠠᠭ᠃ᠬᠠᠶᠠᠭᠠ ᠵᠠᠯᠭᠠᠭᠰᠠᠨ ᠳᠤᠭᠠᠩ ᠠ᠋ᠴᠠ ᠴᠠᠩ ᠬᠡᠩᠭᠡᠷᠭᠡ᠂ᠪᠦᠷᠢᠶᠡ ᠪᠢᠰᠬᠢᠭᠦᠷ ᠦ᠋ᠨ ᠨᠢᠭᠡᠨ ᠭᠡᠮ ᠦ᠋ᠨ ᠳᠠᠭᠤ ᠬᠠᠳᠠᠨᠠ᠃
ᠭᠠᠯᠳᠠᠨ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠥᠷᠭᠥᠭᠡ ᠭᠡᠷ ᠦ᠋ᠨ ᠪᠠᠢᠷᠢ ᠪᠠᠢᠷᠢᠯᠠᠯ ᠢ᠋ ᠠᠵᠢᠭᠯᠠᠨ ᠬᠠᠷᠠᠨᠠ᠃ᠲᠡᠷᠡ ᠪᠡᠷ ᠥᠪᠡᠷ ᠦ᠋ᠨ ᠭᠡᠷ ᠲᠦ᠍ ᠱᠠᠯᠠᠮᠠᠭᠠᠢᠯᠠᠨ ᠣᠷᠣᠬᠤ ᠭᠡᠲᠡᠯᠡ ᠬᠠᠮᠢᠭᠠ ᠨᠢᠭᠡ ᠲᠡᠢ ᠡᠴᠡ ᠬᠡᠨ ᠨᠢᠭᠡᠨ《ᠵᠢᠭᠠᠬᠠᠨ ᠪᠠᠢᠵᠠᠨᠠ》 ᠭᠡᠬᠦ ᠰᠢᠭ ᠪᠣᠯᠤᠨᠠ᠃ᠡᠨᠡ ᠬᠦ᠌ ᠬᠦᠯᠢᠶᠡᠯᠲᠡ ᠡᠬᠡ ᠬᠥᠪᠡᠭᠦᠨ ᠬᠣᠶᠠᠷ ᠢ᠋ ᠵᠠᠭᠠᠭᠯᠠᠵᠤ ᠪᠠᠢᠪᠠ᠃ᠴᠠᠭ ᠬᠤᠭᠤᠴᠠᠭᠠᠨ ᠤ᠋ ᠡᠷᠬᠡᠰᠢᠶᠡᠯ ᠳ᠋ᠦ᠍ ᠠᠪᠲᠠᠭᠰᠠᠨ ᠭᠠᠯᠳᠠᠨ ᠯᠠᠮᠠ ᠠᠯᠲᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠳᠠᠪᠬᠤᠷ ᠳᠠᠪᠬᠤᠷ ᠪᠣᠰᠤᠭᠠ ᠠᠭᠤᠯᠠᠰ᠂ ᠬᠥᠬᠡ ᠨᠣᠭᠣᠭᠠ ᠬᠠᠬᠠᠭᠰᠠᠨ ᠬᠤᠷᠤᠭᠤᠨ ᠤ᠋ ᠦᠶᠡ ᠰᠢᠭ ᠬᠥᠪᠡᠭᠡ ᠲᠤᠯᠤᠭᠠᠳ᠂ ᠤᠰᠤᠨ ᠤ᠋ ᠡᠷᠭᠢ ᠭᠠᠩᠭᠠ ᠶ᠋ᠢ ᠬᠠᠰᠢᠭᠰᠠᠨ ᠣᠢ ᠲᠠᠢᠭᠠ ᠶ᠋ᠢ ᠠᠵᠢᠭᠯᠠᠨ《ᠡᠵᠢ ᠮᠢᠨᠢ ᠶᠠᠭᠠᠬᠢᠳᠠᠭ ᠪᠣᠯ ᠤᠷᠢᠳᠠᠵᠣ ᠬᠡᠯᠡ ᠲᠤᠭᠣᠯᠭᠠᠭᠰᠠᠨ ᠪᠣᠯᠬᠣᠷ ᠪᠡᠭᠳᠡᠷᠡᠭᠰᠡᠨ ᠰᠡᠳᠬᠢᠯ ᠨᠢ ᠳᠡᠪᠲᠦᠭᠰᠡᠨ ᠪᠣᠢ ᠊ᠢᠠ》 ᠭᠡᠮᠡᠨ ᠰᠠᠨᠠᠨᠠ᠃
ᠦᠷᠭᠦᠭᠡᠨ ᠦ᠌ ᠡᠭᠦᠳᠡ ᠰᠡᠬᠦᠭᠳᠡᠨ ᠭᠠᠯᠳᠠᠨ ᠣᠷᠣᠵᠤ ᠢᠷᠡᠪᠡ᠃ ᠭᠠᠯᠳᠠᠨ ᠤ᠋ ᠴᠢᠷᠠᠢ ᠨᠢ ᠰᠢᠩᠭᠡᠷᠡᠵᠦ ᠥᠨᠳᠥᠷ ᠨᠢᠷᠤᠭᠤ ᠲᠠᠢ ᠂ᠪᠣᠳᠣᠯᠬᠢᠯᠠᠭᠰᠠᠨ ᠬᠠᠷᠠᠴᠠ ᠲᠠᠢ ᠬᠠᠷᠠᠭᠳᠠᠨᠠ᠃ᠲᠡᠷᠡ ᠪᠡᠷ ᠰᠢᠷᠠ ᠤᠯᠠᠭᠠᠨ ᠬᠣᠣᠰᠯᠠᠭᠰᠠᠨ ᠯᠠᠮᠠ ᠬᠤᠪᠴᠠᠰᠤ ᠡᠮᠦᠰᠬᠡᠯ ᠲᠡᠢ ᠲᠤᠯᠠ ᠬᠠᠲᠤᠨ ᠡᠬᠡ ᠨᠢ《ᠮᠢᠨᠦ ᠬᠥᠪᠡᠭᠦᠨ ᠮᠥᠨ ᠤᠤ?》 ᠭᠡᠬᠦ ᠰᠢᠭ ᠰᠤᠨᠵᠢᠨ ᠬᠠᠷᠠᠬᠤ ᠳ᠋ᠤ᠌ ᠬᠦᠷᠪᠡ᠃ ᠶᠥᠮ ᠠᠭᠠ ᠥᠨᠳᠡᠢᠰᠬᠢᠨ᠂
— ᠮᠢᠨᠦ ᠬᠥᠪᠡᠭᠦᠨ ᠁ ᠭᠠᠯᠳᠠᠨ ᠁! ᠭᠡᠵᠦ ᠳᠠᠭᠤ ᠠᠯᠳᠠᠯᠠ᠃ ᠡᠨᠡ ᠰᠠᠴᠠᠭᠤ ᠭᠠᠯᠳᠠᠨ᠂
— ᠡᠵᠢ ᠠ᠋ ᠁ ᠭᠡᠪᠡ᠃
—᠁ ᠡᠵᠢ ᠠ᠋ ᠁ ᠬᠠᠲᠤᠨ ᠬᠤᠪᠴᠠᠰᠤᠨ ᠤ᠋ ᠱ᠌ᠢᠷᠦ᠂ ᠰᠤᠪᠤᠳ ᠤ᠋ᠨ ᠰᠢᠭᠢᠳᠬᠡᠭᠡ ᠤᠨᠵᠢᠯᠭᠠ ᠮᠡᠲᠦ ᠶᠢ ᠦᠯᠦ ᠤᠭᠤᠷᠤᠨ ᠭᠠᠯᠳᠠᠨ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠴᠠᠷ ᠲᠤ᠌ ᠬᠠᠴᠠᠷ ᠢ᠋ᠶ᠋ᠠᠨ ᠨᠠᠭᠠᠪᠠ᠃
ᠡᠬᠡ ᠶ᠋ᠢᠨ ᠨᠢᠯᠪᠤᠰᠤ ᠭᠠᠯᠳᠠᠨ ᠤ᠋ ᠨᠢᠯᠪᠤᠰᠤ ᠲᠠᠢ ᠨᠡᠢᠯᠡᠨ ᠤᠷᠤᠰᠤᠨᠠ᠃
ᠶᠥᠮ ᠠᠭᠠ ᠬᠠᠲᠤᠨ《ᠬᠥᠪᠡᠭᠦᠨ ᠮᠢᠨᠢ ᠮᠡᠨᠳᠦ ᠠᠮᠤᠷ ᠬᠦᠷᠦᠭᠡᠳ ᠢᠷᠡᠯᠡ᠃ᠴᠢᠮᠠ ᠳ᠋ᠤ᠌ ᠬᠡᠯᠡ ᠬᠦᠷᠭᠡᠬᠦ ᠶ᠋ᠢ ᠡᠴᠢᠭᠡ ᠬᠣᠩ ᠲᠠᠢᠵᠢ ᠬᠣᠷᠢᠭᠰᠠᠨ》ᠭᠡᠪᠡ᠃
— ᠡᠴᠢᠭᠡ ᠶ᠋ᠢᠨ ᠬᠠᠲᠠᠭᠤ ᠠᠷᠠᠨᠰᠢᠨ ᠢ᠋ ᠪᠢ ᠮᠡᠳᠡᠨᠡ ᠭᠡᠵᠦ ᠭᠠᠯᠳᠠᠨ ᠬᠡᠯᠡᠯᠡ᠃ᠲᠡᠭᠦᠨ ᠢ᠋ ᠴᠠᠰᠤᠲᠤ ᠶ᠋ᠢᠨ ᠣᠷᠣᠨᠠ ᠱᠠᠪᠢᠯᠠᠨ ᠰᠠᠭᠤᠬᠤ ᠪᠠᠷ ᠣᠳᠬᠤ ᠶ᠋ᠢᠨ ᠡᠮᠦᠨᠡ ᠡᠴᠢᠭᠡ ᠬᠣᠩ ᠲᠠᠢᠵᠢ ᠨᠢ ᠬᠠᠲᠤᠨ ᠦᠷᠭᠦᠭᠡᠨ ᠳ᠋ᠦ᠍ ᠪᠠᠷᠠᠭᠠᠯᠠᠬᠤ ᠪᠢᠯᠡ᠃ᠡᠴᠢᠭᠡ ᠬᠣᠩ ᠲᠠᠢᠵᠢ ᠲᠡᠭᠷᠢ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠬᠠᠯᠢᠨ ᠣᠳᠴᠠᠢ᠃ᠡᠴᠢᠭᠡ ᠶ᠋ᠢᠨ ᠰᠠᠭᠤᠳᠠᠯ ᠡᠵᠡᠭᠦᠢ ᠬᠠᠩᠬᠠᠢᠵᠤ ᠪᠠᠢᠪᠠ᠃ ᠶᠥᠮ ᠠᠭᠠ ᠬᠠᠲᠤᠨ ᠬᠥᠪᠡᠭᠦᠨ ᠦ᠌ ᠬᠠᠴᠠᠷ ᠤ᠋ᠨ ᠯᠠᠷᠢᠶᠠᠯᠢᠭᠳᠠᠭᠣ ᠵᠥᠭᠡᠯᠡᠨ ᠠᠷᠠᠰᠤ ᠶ᠋ᠢ ᠨᠢ ᠰᠢᠬᠠᠵᠤ ᠲᠡᠭᠦᠨ ᠦ᠌ ᠳᠤᠬᠤᠨ ᠳᠡᠭᠡᠷᠡ ᠦᠨᠦᠰᠦᠭᠡᠳ᠂
— ᠡᠵᠢ ᠨᠢ ᠬᠦᠦ ᠪᠡᠨ ᠶᠡᠬᠡ ᠰᠠᠨᠠᠭᠰᠠᠨ᠃ᠴᠢᠮᠠᠶ᠋ᠢ ᠵᠡᠭᠦᠳᠦᠯᠡᠬᠦ ᠪᠡᠷ ᠢ᠋ᠶ᠋ᠡᠨ ᠴᠢᠨᠦ ᠬᠠᠪᠴᠢᠶᠠᠬᠠᠢ ᠨᠤᠮᠤ ᠶ᠋ᠢ ᠳᠡᠷᠡ ᠶ᠋ᠢᠨ ᠳᠣᠣᠷᠠ ᠪᠠᠨ ᠢᠪᠡᠵᠦ ᠤᠨᠲᠠᠳᠠᠭ ᠭᠡᠮᠡᠨ ᠬᠦᠦᠷᠨᠢᠪᠡ᠃
ᠬᠠᠲᠤᠨ ᠡᠬᠡ ᠶ᠋ᠢᠨ ᠥᠷᠥᠭᠡᠨ ᠦ᠌ ᠭᠠᠳᠠᠨᠠ ᠮᠣᠷᠢᠳ ᠳᠣᠷᠭᠢᠵᠤ ᠂ᠭᠠᠭᠴᠠ ᠳᠥᠷᠥᠭᠡ ᠶ᠋ᠢᠨ ᠴᠢᠮᠡᠭᠡ ᠭᠠᠷᠤᠯᠠ᠃
— ᠬᠠᠭᠠᠨ ᠢᠷᠡᠯᠡ ᠁ ᠭᠡᠵᠦ ᠶᠥᠮ ᠠᠭᠠ ᠡᠬᠡ ᠰᠢᠪᠡᠨᠡᠪᠡ᠃ ᠭᠠᠯᠳᠠᠨ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠷᠭᠡᠳᠡ ᠡᠴᠡ ᠪᠣᠰᠴᠤ ᠡᠴᠢᠭᠡ ᠶ᠋ᠢᠨ ᠣᠯᠪᠣᠭᠲᠣ ᠰᠠᠭᠤᠳᠠᠯ ᠤ᠋ᠨ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠵᠠᠪᠢᠯᠠᠨ ᠰᠠᠭᠤᠵᠤ ᠵᠠᠭᠤᠷᠠ ᠡᠭᠦᠳᠡ ᠴᠠᠯᠠᠢᠲᠠᠯᠠ ᠨᠡᠭᠡᠭᠡᠭᠳᠡᠨ ᠣᠢ ᠮᠣᠳᠣ᠂ᠠᠯᠤᠰ ᠤ᠋ᠨ ᠠᠭᠤᠯᠠᠰ ᠢ᠋ ᠬᠠᠯᠬᠠᠯᠠᠨ ᠵᠡᠭᠥᠨᠭᠠᠷ ᠤ᠋ᠨ ᠬᠠᠭᠠᠨ ᠰᠡᠩᠭᠡ ᠪᠣᠱᠣᠭᠠ ᠪᠠᠷ ᠠᠯᠬᠤᠪᠠ᠃
ᠠᠬᠠ ᠳᠡᠭᠦᠦ ᠬᠣᠶᠠᠷ ᠤ᠋ᠨ ᠬᠠᠷᠠᠴᠠ ᠳᠤᠯᠠᠭᠠᠷᠠᠨ ᠵᠢᠷᠭᠤᠭᠠᠨ ᠵᠢᠯ ᠦ᠋ᠨ ᠪᠠᠶᠠᠷ᠂ ᠭᠤᠨᠢᠭ ᠢ᠋ ᠨᠢᠳᠦᠨ ᠡᠴᠡ ᠪᠡᠨ ᠨᠡᠪᠲᠡ ᠬᠠᠷᠠᠵᠠᠭᠠᠪᠠ᠃ ᠰᠡᠩᠭᠡ ᠬᠠᠭᠠᠨ ᠵᠢᠪᠬᠤᠭᠠᠯᠢᠭ ᠠᠵᠢ᠃ᠭᠠᠯᠳᠠᠨ ᠯᠠᠮᠠ ᠴᠠᠭ ᠤ᠋ᠨ ᠤᠷᠤᠰᠬᠠᠯ ᠢ᠋ ᠢᠪᠡᠭᠡᠬᠦ ᠮᠡᠲᠦ ᠢᠨᠢᠶᠡᠮᠰᠦᠭᠯᠡᠪᠡ᠃ ᠭᠠᠯᠳᠠᠨ ᠤ᠋ ᠢᠨᠢᠶᠡᠮᠰᠦᠭᠯᠡᠯ ᠪᠡᠶᠡ ᠪᠡᠨ ᠴᠡᠨᠡᠭᠰᠡᠨ ᠦ᠌ ᠢᠯᠡᠷᠡᠯ ᠪᠣᠯᠵᠠᠢ᠃ ᠰᠡᠩᠭᠡ ᠥᠪᠡᠷ ᠲᠡᠭᠡᠨ ᠡᠷᠡᠮᠰᠢᠵᠦ ᠶᠠᠪᠤᠭᠠ ᠬᠠᠷᠠᠭᠳᠠᠯᠠ᠃
ᠠᠷᠪᠠᠨ ᠨᠠᠢ᠍ᠮᠠ
ᠣᠷᠴᠢᠯᠠᠩ ᠤ᠋ᠨ ᠨᠠᠷᠠ ᠰᠠᠷᠠ ᠶ᠋ᠢ ᠬᠠᠭᠠᠨ ᠠᠬᠠ ᠲᠠᠢ ᠪᠠᠨ ᠨᠢᠭᠡ ᠵᠦᠭ ᠡᠴᠡ ᠬᠠᠷᠠᠬᠤ ᠪᠣᠯᠤᠭᠰᠠᠨ ᠨᠢ ᠭᠠᠯᠳᠠᠨ ᠳ᠋ᠤ᠌ ᠲᠠᠭᠠᠲᠠᠢ ᠪᠠᠢᠯᠠ᠃
ᠭᠠᠯᠳᠠᠨ ᠲᠡᠮᠳᠡᠭᠯᠡᠯ ᠢ᠋ᠶ᠋ᠡᠨ ᠦᠷᠭᠦᠯᠵᠢᠯᠡᠭᠦᠯᠦᠭᠰᠡᠭᠡᠷ ᠁
― ᠬᠠᠭᠠᠨ ᠦᠷᠭᠦᠭᠡᠨ ᠳ᠋ᠦ᠍ ᠵᠢᠪᠠᠷ ᠳᠠᠭᠠᠭᠠᠵᠤ ᠪᠠᠢᠨᠠ ᠭᠡᠵᠦ ᠭᠠᠯᠳᠠᠨ ᠥᠭᠦᠯᠡᠪᠡ᠃
ᠡᠴᠢᠭᠡ ᠬᠣᠩ ᠲᠠᠢᠵᠢ ᠶ᠋ᠢ ᠲᠩᠷᠢ ᠳ᠋ᠦ᠍ ᠬᠠᠯᠢᠭᠰᠠᠨ ᠴᠠᠭ ᠠ᠋ᠴᠠ ᠬᠣᠢᠰᠢ ᠬᠠᠭᠠᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠮᠣᠷᠢᠯᠠᠬᠤ ᠪᠠᠢᠲᠤᠭᠠᠢ ᠣᠢᠷᠠᠳ ᠨᠤᠲᠤᠭ ᠲᠠᠭᠠᠨ ᠢᠷᠡᠭᠡ ᠦᠭᠡᠢ ᠭᠠᠯᠳᠠᠨ ᠳ᠋ᠤ᠌ ᠨᠢᠭᠡᠯᠡ ᠬᠠᠴᠢᠨ ᠮᠡᠳᠡᠷᠡᠮᠵᠢ ᠲᠥᠷᠥᠭᠡᠳ ᠪᠠᠢᠯᠠ᠃ ᠡᠴᠢᠭᠡ ᠶ᠋ᠢᠨ ᠰᠠᠭᠤᠳᠠᠯ ᠳᠡᠭᠡᠷᠡ ᠰᠡᠩᠭᠡ ᠠᠬᠠ ᠰᠠᠭᠤᠬᠤ ᠨᠢ ᠠᠷᠠᠢ ᠵᠢᠵᠢᠭᠳᠡᠭᠰᠡᠨ ᠮᠡᠲᠦ ᠰᠡᠨᠳᠡᠢ ᠳᠦᠭᠦᠷᠴᠦ ᠥᠭᠬᠦ ᠦᠭᠡᠢ ᠪᠠᠢᠯᠠ᠃ ᠰᠡᠨᠳᠡᠢ ᠶ᠋ᠢᠨ ᠬᠣᠶᠠᠷ ᠲᠠᠯᠠ ᠪᠠᠷ ᠵᠠᠢ ᠲᠠᠢ ᠠᠵᠢ᠃ ᠡᠨᠡ ᠬᠠᠭᠠᠨ ᠰᠠᠭᠤᠳᠠᠯ ᠳᠡᠭᠡᠷᠡ ᠡᠴᠢᠭᠡ ᠨᠢ ᠳᠦᠭᠦᠷᠡᠩ ᠪᠠᠢᠳᠠᠭ ᠰᠠᠨ᠃ ᠭᠡᠲᠡᠯᠡ ᠶᠠᠭᠤᠨ ᠤ᠋ ᠤᠴᠢᠷ ᠬᠠᠭᠠᠨ ᠰᠠᠭᠤᠳᠠᠯ ᠬᠠᠩᠬᠠᠢ ᠳᠤᠮᠳᠠᠭᠤᠷ ᠬᠠᠷᠠᠭᠳᠠᠪᠠ᠃ ᠰᠡᠩᠭᠡ ᠠᠬᠠ ᠨᠢ ᠣᠮᠣᠭᠯᠠᠩ᠂ ᠬᠠᠷᠠᠭᠠ ᠳᠡᠭᠡᠭᠦᠷ᠂ ᠨᠢᠳᠦ ᠬᠤᠷᠴᠠ ᠶᠡᠬᠡᠳᠡ ᠡᠷᠬᠢᠮᠰᠦᠭ ᠪᠥᠭᠡᠳ ᠶᠠᠯᠢᠮ ᠦᠭᠡᠢ ᠲᠣᠭᠰᠢᠨ ᠦᠵᠡᠭᠳᠡᠨᠡ᠃
ᠰᠡᠩᠭᠡ ᠠᠬᠠ ᠳᠥᠷᠪᠡᠨ ᠲᠠᠯᠠ ᠲᠠᠢ᠂ ᠭᠤᠷᠪᠠᠨ ᠲᠠᠯᠠ ᠳᠡᠭᠡᠷᠡ ᠨᠢ ᠲᠩᠷᠢ ᠶ᠋ᠢᠨ ᠬᠦᠴᠦᠲᠡᠨ ᠬᠠᠨ ᠭᠠᠷᠤᠳᠢ᠂ ᠪᠦᠷᠭᠦᠳ᠂ ᠴᠠᠭᠠᠨ ᠱᠣᠩᠬᠣᠷ ᠰᠢᠪᠠᠭᠤ ᠶ᠋ᠢ ᠤᠷᠠᠯᠠᠭᠰᠠᠨ᠂ᠰᠢᠯᠢᠨ ᠬᠦᠵᠦᠭᠦᠦ ᠤᠷᠤᠭᠤ ᠨᠢ ᠳᠠᠪᠬᠤᠷ ᠬᠥᠬᠡ ᠲᠤᠤᠵᠠ ᠤᠨᠵᠢᠭᠤᠯᠤᠭᠰᠠᠨ ᠲᠣᠭᠣᠷᠴᠣᠭ ᠮᠠᠯᠠᠭᠠᠢ ᠡᠮᠦᠰᠴᠡᠢ᠃ ᠰᠡᠩᠭᠡ ᠬᠠᠭᠠᠨ ᠠᠭᠤᠵᠢᠮ ᠳᠡᠪᠡᠯ ᠲᠡᠢ᠂ᠲᠡᠭᠦᠨ ᠦ᠌ ᠰᠤᠷ ᠤ᠋ᠨ ᠪᠦᠰᠡ ᠶ᠋ᠢ ᠨᠢ ᠵᠡᠰ ᠢ᠋ᠶ᠋ᠡᠷ ᠲᠣᠨᠣᠭᠯᠠᠵᠤ ᠬᠠᠰ ᠰᠢᠭᠢᠳᠬᠡᠨ ᠬᠢᠭᠰᠡᠨ ᠪᠠᠢᠯᠠ᠃
ᠬᠠᠭᠠᠨ ᠰᠡᠩᠭᠡ ᠶ᠋ᠢᠨ ᠨᠢᠳᠦ ᠵᠢᠷᠲᠠᠭᠠᠷ᠂ᠰᠢᠨᠠ ᠨᠢ ᠡᠴᠢᠭᠡ ᠰᠢᠭ ᠥᠷᠭᠡᠨ᠂ ᠭᠠᠭᠴᠠᠬᠦ ᠮᠣᠩᠬᠣᠷ ᠬᠠᠮᠠᠷ᠂ᠤᠷᠲᠤᠪᠲᠤᠷ ᠵᠤᠵᠠᠭᠠᠨ ᠡᠷᠡᠦ ᠨᠢ ᠭᠠᠯᠳᠠᠨ ᠯᠠᠮᠠ ᠯᠤᠭᠠ ᠠᠳᠠᠯᠢ ᠠᠵᠢ᠃ ᠭᠠᠯᠳᠠᠨ ᠯᠠᠮᠠ᠂
ᠠᠬᠠ ᠶ᠋ᠢᠨ ᠢᠶᠠᠨ ᠬᠥᠳᠡᠯᠭᠡᠭᠡᠨ ᠳ᠋ᠦ᠍ ᠨᠠᠮᠪᠠ ᠲᠣᠨᠣᠵᠤ ᠰᠠᠭᠤᠭᠰᠠᠨ ᠢ ᠠᠵᠢᠭᠯᠠᠪᠠ᠃ ᠲᠡᠷᠡ ᠪᠡᠷ ᠣᠭᠵᠣᠮ ᠲᠦᠷᠭᠡᠨ ᠬᠥᠳᠡᠯᠭᠡᠭᠡᠨ ᠲᠡᠢ ᠂ᠱᠠᠯᠠᠮᠠᠭ ᠳᠠᠢᠴᠢᠨ ᠵᠠᠯᠠᠭᠤ ᠪᠠᠢᠵᠠᠢ᠃ ᠲᠡᠷᠡ ᠶᠠᠩᠵᠤ ᠪᠠᠷ ᠢ᠋ᠶ᠋ᠠᠨ ᠠᠵᠢ᠃
ᠰᠡᠩᠭᠡ ᠶ᠋ᠢᠨ ᠲᠡᠷᠡ ᠬᠦ᠌ ᠳᠠᠢᠴᠢᠨ ᠴᠢᠨᠠᠷ ᠨᠢᠭᠡᠨ ᠴᠠᠭ ᠲᠤ᠌ ᠠᠭᠤᠴᠢᠯᠠᠰᠢ ᠦᠭᠡᠢ ᠠᠯᠳᠠᠭᠠᠨ ᠳ᠋ᠤ᠌ ᠬᠦᠷᠭᠡᠵᠦ ᠪᠣᠯᠬᠤ ᠶ᠋ᠢ ᠭᠠᠯᠳᠠᠨ ᠠᠵᠢᠭᠯᠠᠵᠤ ᠪᠠᠢᠪᠠᠴᠤ ᠬᠠᠭᠠᠨ ᠠᠬᠠ ᠶ᠋ᠢᠨ ᠶᠠᠷᠢᠬᠤ ᠶ᠋ᠢ ᠬᠦᠯᠢᠭᠡᠯᠵᠡᠨᠡ᠃ ᠰᠡᠩᠭᠡ ᠶ᠋ᠢᠨ ᠵᠢᠷᠲᠠᠭᠠᠷ ᠬᠣᠮᠣᠬᠠᠢ ᠨᠢᠳᠦ ᠡᠴᠢᠭᠡ ᠬᠣᠩ ᠲᠠᠢᠵᠢ ᠶ᠋ᠢᠨ ᠳᠤᠷᠠᠯᠠᠮᠠᠬᠠᠢ ᠵᠠᠩ ᠢ ᠥᠪᠯᠡᠵᠦ ᠠᠪᠤᠭᠰᠠᠨ ᠲᠠᠢ ᠬᠣᠯᠪᠣᠭᠠ ᠲᠠᠢ ᠪᠢᠯᠡ᠃
—ᠭᠠᠯᠳᠠᠨ ᠳᠡᠭᠦᠦ ᠮᠢᠨᠢ ᠪᠢ ᠴᠢᠮᠠᠶ᠋ᠢ ᠮᠥᠷᠥᠭᠡᠳᠴᠦ᠂ᠰᠠᠨᠠᠵᠤ ᠪᠠᠢᠯᠠ ᠭᠡᠵᠦ ᠰᠡᠩᠭᠡ ᠬᠠᠭᠠᠨ ᠦᠭᠡ ᠪᠡᠨ ᠬᠡᠯᠡᠪᠡ᠃
᠁ ᠡᠴᠢᠭᠡ ᠬᠣᠩ ᠲᠠᠢᠵᠢ ᠶ᠋ᠢᠨ ᠲᠣᠷᠭᠠᠨ ᠰᠦᠷᠦᠭ ᠡᠴᠡ ᠲᠠᠰᠤᠳᠠᠨ ᠬᠥᠭᠡᠭᠡᠵᠡᠢ᠃ ᠴᠢᠨᠦ ᠰᠡᠲᠡᠷᠲᠦ ᠰᠢᠷᠭᠠ ᠠᠯᠠᠭᠠ ᠪᠣᠯᠤᠭᠠᠳ ᠤᠳᠠᠯᠠ᠃ ᠬᠠᠭᠠᠨ ᠤ᠋ ᠰᠦᠷᠦᠭ ᠲᠦ᠍ ᠬᠠᠯᠳᠠᠭᠰᠠᠨ ᠨᠢ ᠣᠢᠷᠠ ᠶ᠋ᠢᠨ ᠬᠥᠮᠦᠰ ᠦ᠋ᠨ ᠬᠤᠤᠪᠢᠯᠳᠤᠭᠠᠨ ᠭᠡᠵᠦ ᠪᠣᠳᠣᠨᠠ᠃ ᠡᠨᠡ ᠶᠠᠪᠤᠳᠠᠯ ᠮᠢᠨᠦ ᠰᠡᠳᠬᠢᠯ ᠰᠠᠨᠠᠭᠠ ᠶ᠋ᠢ ᠲᠠᠪᠠ ᠦᠭᠡᠢᠳᠡᠭᠦᠯᠵᠦ ᠪᠠᠢᠨᠠ᠃ ᠴᠢᠮᠠᠶ᠋ᠢ ᠢᠷᠡᠬᠦ ᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠯᠠ᠃ ᠳᠡᠭᠦᠦ ᠶ᠋ᠢᠨ ᠡᠷᠳᠡᠮ ᠴᠢᠳᠠᠯ ᠨᠠᠳᠠ ᠬᠡᠷᠡᠭ ᠲᠡᠢ ᠪᠣᠯᠤᠯᠠ᠃ ᠵᠡᠭᠦᠨᠭᠠᠷ ᠤ᠋ᠨ ᠠᠬᠠ ᠳᠡᠭᠦᠦᠰ ᠦ᠋ᠨ ᠲᠤᠬᠠᠢ ᠳ᠋ᠤ᠌ ᠶᠠᠷᠢᠶᠠ ᠶᠡᠬᠡᠲᠡᠢ᠃ ᠭᠡᠬᠦ ᠳ᠋ᠡᠭᠡᠨ ᠪᠠᠢᠨ ᠰᠠᠭᠤᠨ ᠶᠠᠷᠢᠵᠠᠭᠠᠨᠠᠮ ᠁
ᠭᠠᠯᠳᠠᠨ ᠬᠤᠪᠢᠯᠭᠠᠨ ᠴᠡᠭᠡᠵᠢᠨ ᠡᠴᠡ ᠪᠡᠨ ᠥᠨᠳᠥᠷ ᠭᠡᠭᠡᠨ ᠦ᠌ ᠱᠦᠩᠰᠢᠭᠯᠡᠵᠦ ᠵᠡᠭᠦᠭᠰᠡᠨ ᠡᠷᠢᠭᠡ ᠶ᠋ᠢ ᠠᠪᠴᠤ ᠬᠡᠳᠦ ᠲᠠᠰᠤᠯᠵᠤ ᠭᠦᠶᠦᠯᠭᠡᠭᠡᠳ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠪᠠᠷᠳᠠᠮ ᠴᠢᠷᠠᠢ ᠥᠭᠡᠳᠡ ᠬᠠᠷᠠᠪᠠ᠃ ᠰᠡᠩᠭᠡ ᠬᠠᠭᠠᠨ ᠰᠡᠨᠳᠡᠢ ᠶ᠋ᠢᠨ ᠲᠦᠰᠢᠯᠭᠡ ᠶ᠋ᠢ ᠨᠠᠯᠠᠵᠤ ᠭᠠᠯᠳᠠᠨ ᠤ᠋ ᠦᠢᠯᠡᠳᠦᠯ ᠢ᠋ ᠠᠵᠢᠭᠯᠠᠨᠠ᠃ ᠭᠠᠯᠳᠠᠨ ᠳᠣᠲᠣᠷ ᠬᠥᠮᠦᠨ ᠲᠡᠢ ᠪᠡᠨ ᠮᠠᠷᠭᠤᠨ ᠬᠥᠭᠡᠷᠦᠯᠳᠦᠪᠡ᠃ ᠨᠢᠳᠦ ᠪᠡᠷ ᠲᠠᠩᠳᠠᠬᠤ᠂ᠳᠣᠲᠣᠷᠠ ᠪᠠᠨ ᠪᠣᠳᠣᠬᠤ ᠬᠣᠶᠠᠷ ᠵᠥᠷᠢᠶᠡ ᠲᠡᠢ ᠪᠤᠰᠤ ᠶᠠᠪ ᠴᠠᠪ ᠨᠢᠭᠡᠳᠦᠨᠡ᠃ᠬᠤᠪᠢᠯᠭᠠᠨ ᠯᠠᠮᠠ ᠡᠷᠢᠭᠡ ᠪᠡᠨ ᠢᠮᠡᠴᠢᠨ ᠭᠦᠶᠦᠯᠭᠡᠨᠡ᠃ ᠡᠷᠢᠭᠡ ᠶ᠋ᠢᠨ ᠰᠢᠷᠬᠡᠭ ᠢ᠋ ᠯᠠᠮᠠ ᠨᠢᠭᠲᠠᠯᠠᠨ ᠬᠠᠷᠠᠨᠠ᠃
— ᠠᠳᠤᠭᠤᠨ ᠰᠦᠷᠦᠭ ᠡᠰᠡᠨ ᠮᠡᠨᠳᠦ ᠪᠠᠢᠨᠠ᠃ ᠤᠳᠠᠬᠤ ᠦᠭᠡᠢ ᠪᠡᠯᠴᠢᠭᠡᠷ ᠤᠰᠤ ᠪᠠᠨ ᠬᠥᠭᠡᠭᠡᠭᠰᠡᠭᠡᠷ ᠢᠷᠡᠨᠡ᠃ ᠬᠠᠷᠢᠨ ᠳᠠᠪ ᠪᠤᠵᠠᠷ ᠲᠠᠢ ᠪᠠᠢᠵᠤ ᠮᠠᠭᠠᠳ᠃ ᠪᠢ ᠲᠡᠷᠡ ᠪᠤᠵᠠᠷ ᠢ᠋ ᠠᠷᠢᠭᠤᠰᠬᠠᠨᠠ ᠭᠡᠮᠡᠨ ᠭᠠᠯᠳᠠᠨ ᠢ᠋ᠶ᠋ᠠᠷ ᠬᠦᠢᠲᠡᠪᠲᠦᠷ ᠬᠦᠷᠡᠩ ᠨᠢᠳᠦ ᠪᠡᠨ ᠴᠠᠪᠴᠢᠯᠠᠨ ᠪᠠᠢᠵᠤ ᠥᠭᠦᠯᠡᠪᠡ᠃
— ᠬᠡᠳᠦᠢ ᠳ᠋ᠦ᠍ ᠰᠦᠷᠦᠭ ᠦ᠋ᠨ ᠮᠠᠩᠨᠠᠢ ᠪᠡᠯᠴᠢᠭᠡᠷ ᠲᠡᠭᠡᠨ ᠢᠷᠡᠬᠦ ᠪᠣᠯ ᠭᠡᠮᠡᠨ ᠰᠡᠩᠭᠡ ᠬᠠᠭᠠᠨ ᠳᠡᠭᠦᠦ ᠡᠴᠡ ᠪᠡᠨ ᠲᠤᠯᠭᠠᠨ ᠠᠰᠠᠭᠤᠪᠠ᠃ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠡᠷᠢᠭᠡ ᠪᠡᠨ ᠬᠦᠵᠦᠭᠦᠨ ᠳ᠋ᠡᠭᠡᠨ ᠵᠡᠭᠦᠬᠦ ᠵᠠᠭᠤᠷᠠ᠂
— ᠮᠠᠷᠭᠠᠰᠢ ᠪᠠᠭᠠ ᠦᠳᠡ ᠳ᠋ᠦ᠍ ᠪᠡᠯᠴᠢᠭᠡᠷ ᠲᠡᠭᠡᠨ ᠢᠷᠡᠨᠡ ᠭᠡᠪᠡ᠃
ᠰᠡᠩᠭᠡ ᠠᠬᠠ ᠨᠢ ᠲᠠᠭᠠᠲᠠᠢᠬᠠᠨ ᠮᠤᠰᠢᠯᠵᠠᠭᠠᠳ᠂
— ᠶᠠᠭ ᠪᠢᠵᠡ ᠭᠡᠬᠦ ᠳ᠋ᠦ᠍ ᠭᠠᠯᠳᠠᠨ ᠲᠡᠭᠦᠨ ᠦ᠌ ᠡᠷᠡᠭᠡᠯᠵᠡᠭᠡ ᠶ᠋ᠢ ᠲᠠᠰᠤ ᠴᠣᠬᠢᠬᠤ ᠮᠡᠲᠦ᠂
— ᠲᠡᠷᠡ ᠴᠠᠭ ᠲᠤ᠌ ᠬᠣᠶᠠᠭᠤᠯᠠ ᠪᠠᠨ ᠣᠴᠢᠨᠠ ᠭᠡᠯᠡ᠃
ᠰᠡᠩᠭᠡ ᠡᠷᠡᠭᠡᠯᠵᠡᠭᠰᠡᠨ ᠬᠡᠪ ᠢ᠋ᠶ᠋ᠡᠷ《ᠭᠠᠯᠳᠠᠨ ᠢ᠋ ᠬᠤᠪᠢᠯᠭᠠᠨ ᠭᠡᠬᠦ ᠶᠦᠮ᠃ ᠪᠠᠭᠠ ᠳ᠋ᠠᠭᠠᠨ ᠴᠠᠭᠠᠨ ᠢᠷᠪᠢᠰ ᠲᠡᠢ ᠴᠣᠭ ᠠᠯᠠᠭᠠ ᠪᠣᠯᠤᠭᠰᠠᠨ ᠶᠤᠮᠳᠠᠭ᠃ ᠲᠥᠪᠡᠳ ᠲᠦ᠍ ᠪᠤᠷᠬᠠᠨ ᠤ᠋ ᠨᠣᠮ ᠵᠢᠭᠠᠯᠭᠠᠵᠤ ᠷᠢᠳᠢ ᠰᠢᠳᠢ ᠨᠢ ᠤᠯᠠᠮ ᠭᠦᠨᠵᠡᠭᠡᠢᠷᠡᠭᠰᠡᠨ ᠪᠠᠢᠵᠤ ᠲᠠᠭᠠᠷᠠᠨᠠ᠃ ᠳᠡᠭᠦᠦ ᠯᠠᠮᠠ ᠶ᠋ᠢ ᠢᠷᠡᠭᠰᠡᠨ ᠡᠴᠡ ᠬᠣᠢᠰᠢ ᠣᠢᠷᠠᠳ ᠤ᠋ᠨ ᠥᠲᠡᠭᠦᠰ ᠪᠤᠭᠤᠷᠤᠯ ᠤ᠋ᠳ᠂ ᠶᠡᠬᠡᠰ ᠳᠡᠭᠡᠳᠦᠰ ᠴᠤᠪᠤᠬᠤ ᠪᠣᠯᠤᠯᠠ᠃ ᠭᠠᠯᠳᠠᠨ ᠬᠥᠮᠦᠰ ᠢ᠋ ᠰᠣᠷᠢᠨᠵᠢᠨ ᠮᠡᠲᠦ ᠲᠠᠲᠠᠵᠤ ᠪᠠᠢᠨᠠ᠃ ᠡᠨᠡ ᠴᠤ᠌ ᠨᠠᠳᠠ ᠪᠠᠰᠠ ᠨᠥᠯᠥᠭᠡ ᠲᠡᠢ》 ᠭᠡᠮᠡᠨ ᠪᠣᠳᠣᠪᠠ᠃
ᠮᠠᠷᠭᠠᠰᠢ ᠶ᠋ᠢᠨ ᠪᠠᠭᠠ ᠦᠳᠡ ᠳ᠋ᠦ᠍ ᠰᠦᠷᠦᠭ ᠦ᠋ᠨ ᠪᠡᠯᠴᠢᠭᠡᠷ ᠲᠦ᠍ ᠰᠡᠲᠡᠷᠲᠦ ᠰᠢᠷᠭᠠ ᠲᠡᠷᠢᠭᠦᠲᠡᠢ ᠬᠠᠭᠠᠨ ᠤ᠋ ᠲᠣᠷᠭᠠᠨ ᠰᠦᠷᠦᠭ ᠦ᠋ᠨ ᠮᠠᠩᠨᠠᠢ ᠬᠠᠲᠠᠷᠢᠭᠰᠠᠭᠠᠷ ᠨᠡᠢᠯᠡᠬᠦ ᠶ᠋ᠢ ᠰᠡᠩᠭᠡ ᠬᠠᠭᠠᠨ᠂ ᠭᠠᠯᠳᠠᠨ ᠤ᠋ ᠬᠠᠮᠲᠤ ᠬᠠᠷᠠᠵᠠᠢ᠃ ᠠᠳᠤᠭᠤᠨ ᠰᠦᠷᠦᠭ ᠬᠤᠢᠯᠠᠷᠠᠨ ᠦᠷᠭᠦᠨᠡ᠃
ᠠᠳᠤᠭᠤᠨ ᠤ᠋ ᠶᠡᠬᠡ ᠳᠡᠯ ᠬᠡᠢᠰᠴᠦ ᠵᠤᠯᠠᠷᠠᠨ ᠬᠤᠢᠯᠠᠷᠠᠵᠤ᠂ ᠬᠠᠮᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠥᠩᠭᠡᠬᠡᠨ ᠱᠣᠷᠬᠢᠷᠠᠵᠤ ᠲᠣᠭᠣᠰᠣ ᠪᠣᠰᠬᠠᠨᠠ᠃ ᠭᠡᠲᠡᠯᠡ ᠬᠠᠭᠠᠨ ᠰᠦᠷᠦᠭ ᠦ᠋ᠨ ᠴᠡᠩᠬᠡᠷ ᠠᠵᠢᠷᠭᠠᠨ ᠤ᠋ ᠰᠡᠭᠦᠯ ᠳ᠋ᠦ᠍ ᠨᠢᠭᠡᠨ ᠴᠠᠭᠠᠨ ᠶᠠᠭᠤᠮᠠ ᠤᠶᠠᠭᠠᠲᠠᠢ ᠬᠠᠷᠠᠭᠳᠠᠪᠠ᠃ ᠣᠢᠷᠠᠳ ᠠᠵᠢᠭᠯᠠᠪᠠᠰᠤ ᠲᠡᠷᠡ ᠴᠠᠭᠠᠨ ᠵᠦᠢᠯ ᠨᠢ ᠬᠥᠮᠦᠨ ᠦ᠌ ᠭᠠᠪᠠᠯᠠ ᠪᠠᠢᠪᠠ᠃
—ᠭᠠᠪᠠᠯᠠ ᠶ᠋ᠢᠨ ᠶᠠᠰᠤ ᠶ᠋ᠢ ᠮᠣᠷᠢᠨ ᠤ᠋
ᠰᠡᠭᠦᠯ ᠳ᠋ᠦ᠍ ᠬᠡᠨ ᠵᠡᠭᠦᠪᠡ ᠭᠡᠵᠦ ᠰᠡᠩᠭᠡ ᠠᠰᠠᠭᠤᠪᠠ᠃ ᠭᠠᠯᠳᠠᠨ ᠬᠠᠷᠢᠭᠤ ᠳ᠋ᠤᠨᠢ᠂
— ᠮᠣᠷᠢ ᠲᠠᠰᠤᠳᠠᠵᠤ ᠬᠥᠭᠡᠭᠡᠭᠰᠡᠨ ᠬᠡᠨ ᠨᠢᠭᠡᠨ ᠨᠢ ᠵᠡᠭᠦᠵᠡᠢ ᠭᠡᠮᠡᠨ ᠥᠭᠦᠯᠡᠪᠡ᠃
— ᠮᠠᠨ ᠤ᠋ ᠬᠢᠨ ᠦ᠌ ᠨᠢᠭᠡ ᠨᠢ ᠪᠠᠢᠬᠤ ᠨᠢ ᠠ᠋᠃
— ᠮᠡᠳᠡᠳᠡᠭ ᠬᠥᠮᠦᠨ ᠦ᠌ ᠬᠢᠭᠰᠡᠨ ᠦᠢᠯᠡ ᠯᠠᠢ ᠁
— ᠣᠳᠣ ᠶᠠᠭᠠᠬᠢᠬᠤ ᠪᠢᠯᠡ?
— ᠳᠠᠪ ᠪᠤᠵᠠᠷ ᠢ᠋ ᠠᠷᠢᠯᠭᠠᠵᠤ ᠴᠡᠭᠡᠷ ᠭᠠᠷᠭᠠᠨᠠ᠃
—ᠬᠠᠭᠠᠨ ᠤ᠋ ᠰᠦᠷᠦᠭ ᠲᠦ᠍
ᠬᠠᠯᠳᠠᠭᠰᠠᠨ ᠶᠤᠮ ᠴᠢᠨᠢ ᠮᠥᠳᠳᠥ ᠬᠠᠭᠠᠨ ᠲᠥᠷᠥ ᠳ᠋ᠦ᠍ ᠲᠡᠷᠰᠯᠡᠬᠦ ᠶᠦᠮ ᠪᠠᠢᠨᠠ᠃
— ᠬᠠᠭᠠᠨ ᠠᠬᠠ ᠶ᠋ᠢ ᠲᠣᠭᠣᠷᠢᠭᠰᠠᠨ
ᠬᠤᠤᠪᠢᠯᠳᠤᠭᠠᠨ! ᠡᠨᠡ ᠶᠠᠪᠤᠳᠠᠯ ᠢ᠋
ᠵᠣᠭᠰᠣᠭᠠᠨᠠ ᠲᠡᠭᠡᠬᠦ ᠳ᠋ᠦ᠍ ᠵᠢᠷᠦᠬᠡ ᠶ᠋ᠢ ᠨᠢ
ᠦᠬᠦᠭᠦᠯᠵᠦ ᠵᠣᠭᠰᠣᠭᠠᠬᠤ ᠪᠣᠯᠤᠨᠠ᠃
ᠭᠠᠯᠳᠠᠨ ᠯᠠᠮᠠ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠬᠢᠯᠢᠩ ᠪᠠᠳᠠᠷᠠᠵᠤ ᠪᠠᠢᠯᠠ᠃ᠰᠡᠩᠭᠡ ᠠᠬᠠ ᠨᠢ ᠳᠡᠭᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠬᠦᠷᠡᠩ ᠪᠣᠷᠣ ᠨᠢᠳᠦᠨ ᠡᠴᠡ ᠣᠴᠢ ᠰᠠᠴᠤᠷᠠᠵᠤ ᠪᠠᠢᠬᠤ ᠶ᠋ᠢ ᠬᠠᠷᠠᠭᠠᠳ
《ᠡᠨᠡ ᠭᠠᠯᠳᠠᠨ ᠥᠭᠡᠷᠡᠴᠢᠯᠡᠭᠳᠡᠵᠡᠢ》 ᠭᠡᠵᠦ ᠪᠠᠲᠤᠲᠠᠢ ᠪᠣᠳᠣᠪᠠ᠃
ᠴᠡᠭᠡᠷ ᠭᠠᠷᠭᠠᠬᠤ ᠠᠷᠭᠠ ᠶ᠋ᠢ ᠭᠠᠯᠳᠠᠨ ᠮᠡᠳᠡᠵᠦ ᠪᠠᠢᠯᠠ᠃ ᠱᠣᠩ ᠤ᠋ᠨ ᠣᠢᠷᠠ ᠳ᠋ᠤ᠌ ᠭᠠᠪᠠᠯᠠ ᠶ᠋ᠢᠨ ᠶᠠᠰᠤ ᠶ᠋ᠢ ᠬᠡᠳᠦᠨ ᠪᠣᠭᠣᠯ ᠡᠯᠭᠦᠪᠡ᠃ ᠠᠳᠤᠭᠤᠨ ᠤ᠋ ᠤᠶᠠᠭᠠ ᠶ᠋ᠢᠨ ᠵᠠᠬᠠ ᠳ᠋ᠤ᠌ ᠭᠠᠪᠠᠯᠠ ᠶ᠋ᠢᠨ ᠶᠠᠰᠤ ᠣᠯᠠᠨ ᠤ᠋ ᠨᠢᠳᠦᠨ ᠳ᠋ᠦ᠍ ᠢᠯᠡᠬᠡᠨ᠃ ᠲᠡᠷᠡ ᠬᠦ᠌ ᠶᠠᠰᠤᠨ ᠤ᠋ ᠤᠬᠤᠷᠬᠠᠢ ᠬᠠᠷᠠᠯᠠᠵᠤ᠂ ᠨᠠᠷᠮᠠᠢ ᠨᠢ ᠴᠥᠮᠥᠷᠡᠵᠦ᠂ ᠡᠷᠡᠦ ᠨᠢ ᠠᠩᠭᠠᠢᠵᠠᠢ᠃ ᠭᠠᠪᠠᠯᠠ ᠶ᠋ᠢᠨ ᠶᠠᠰᠤ ᠵᠠᠷᠢᠮ ᠬᠡᠰᠡᠭ ᠲᠡᠭᠡᠨ ᠤᠰᠤ ᠲᠠᠢ ᠠᠵᠢ᠃ᠱᠣᠩ ᠮᠣᠳᠣᠨ ᠳ᠋ᠤ᠌ ᠡᠯᠭᠦᠭᠰᠡᠨ ᠶᠠᠰᠤᠨ ᠠ᠋ᠴᠠ ᠬᠥᠮᠦᠰ ᠲᠣᠭᠣᠷᠢᠵᠤ ᠴᠡᠷᠪᠡᠨᠡ᠃
ᠨᠣᠬᠠᠳ ᠰᠥᠨᠢᠵᠢᠨ ᠢ᠋ᠶ᠋ᠡᠨ ᠣᠯᠢᠵᠤ ᠪᠣᠷᠭᠣᠨᠠ᠃ ᠨᠢᠭᠡᠨ ᠮᠠᠭᠤ ᠢᠷᠣᠠ ᠱᠦᠭᠯᠡᠭᠰᠡᠨ ᠢ᠋ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠨᠣᠮ ᠤ᠋ᠨ ᠬᠦᠴᠦ ᠪᠡᠷ ᠲᠠᠷᠨᠢᠳᠠᠨ ᠴᠡᠭᠡᠷ ᠭᠠᠷᠭᠠᠵᠤ᠂ ᠭᠠᠪᠠᠯᠠ ᠶ᠋ᠢᠨ ᠶᠠᠰᠤ ᠶ᠋ᠢ ᠰᠢᠲᠠᠭᠠᠵᠤ᠂ ᠦᠨᠡᠰᠦ ᠴᠢᠨᠳᠠᠷ ᠢ᠋ ᠨᠢ ᠨᠦᠳᠦᠭᠦᠯᠵᠦ ᠡᠷᠡᠬᠡᠢ ᠶ᠋ᠢᠨ ᠴᠢᠨᠡᠭᠡ ᠲᠤᠯᠤᠮ ᠳ᠋ᠤ᠌ ᠬᠢᠵᠡᠢ᠃ ᠣᠢᠷᠠᠳ ᠠᠢᠮᠠᠭ ᠤ᠋ᠨ ᠬᠣᠲᠠ ᠬᠦᠷᠢᠶᠡ ᠪᠡᠷ ᠬᠤᠪᠢᠯᠭᠠᠨ ᠯᠠᠮᠠ ᠲᠣᠮ ᠲᠠᠷᠨᠢ ᠶ᠋ᠢ ᠰᠠᠴᠤᠵᠤ ᠪᠢᠯᠡ᠃
ᠶᠡᠬᠡ ᠦᠷᠭᠦᠭᠡᠨ ᠳ᠋ᠦ᠍ ᠰᠡᠩᠭᠡ ᠬᠠᠭᠠᠨ᠂ᠳᠡᠭᠦᠦ ᠯᠠᠮᠠ ᠶ᠋ᠢᠨ ᠬᠠᠮᠲᠤ ᠰᠠᠭᠤᠭᠠᠳ ᠵᠥᠭᠡᠬᠡᠢ ᠲᠡᠢ ᠴᠠᠢ ᠤᠤᠭᠤᠵᠤ᠂ᠢᠰᠬᠦᠯᠡᠩ ᠲᠠᠷᠠᠭ ᠰᠢᠮᠡᠨᠡ᠃ ᠭᠠᠯᠳᠠᠨ ᠬᠡᠯᠡᠷᠦᠨ᠂
— ᠵᠢᠷᠦᠬᠡ ᠶ᠋ᠢ ᠨᠢ ᠦᠬᠦᠭᠦᠯᠦᠯᠡ᠃
ᠨᠡᠢᠲᠡ ᠣᠯᠠᠨ ᠤ᠋ ᠵᠢᠷᠦᠬᠡ ᠠᠮᠠᠨ ᠳ᠋ᠠᠭᠠᠨ
ᠪᠠᠢᠳᠠᠭ᠃ ᠠᠮᠠᠨ ᠠ᠋ᠴᠠ ᠠᠮᠠ ᠳᠡᠮᠵᠢᠵᠦ᠂ᠠᠢᠯ ᠠ᠋ᠴᠠ ᠠᠢᠯ ᠳ᠋ᠤ᠌ ᠶᠠᠷᠢᠭᠳᠠᠬᠤ ᠬᠣᠪ ᠵᠢᠪ ᠮᠡᠲᠦ ᠶᠠᠷᠢᠶᠠᠨ ᠳ᠋ᠤ᠌ ᠬᠥᠮᠦᠰ ᠢᠲᠡᠭᠡᠵᠦ ᠠᠶᠤᠳᠠᠭ ᠶᠤᠮ᠃ ᠬᠠᠭᠠᠨ ᠨᠢ ᠬᠠᠭᠠᠨ ᠰᠢᠭ᠋ ᠪᠠᠢᠵᠤ ᠠᠷᠠᠳ ᠣᠯᠠᠨ ᠰᠣᠴᠢᠵᠤ ᠪᠠᠢᠪᠠᠯ ᠰᠠᠢᠨ᠃ ᠨᠠᠳᠠ ᠲᠠᠢ ᠠᠭᠤᠯᠵᠠᠵᠤ ᠪᠣᠢ
ᠰᠦᠰᠦᠭᠲᠡᠨ ᠨᠦ᠍ᠭᠦᠳ ᠠᠢᠳᠠᠰ ᠲᠠᠢ ᠪᠠᠢᠨᠠ᠃ ᠶᠠᠪᠤᠭᠠᠨ ᠳ᠋ᠠᠭᠠᠨ ᠠᠷᠠᠳ ᠢᠷᠭᠡᠳ ᠦ᠋ᠨ ᠰᠣᠴᠢᠭᠠ ᠭᠠᠷᠤᠨᠠ ᠪᠢᠵᠡ ᠳᠡ ᠭᠡᠵᠦ ᠬᠡᠯᠡᠪᠡ᠃
ᠰᠡᠩᠭᠡ ᠬᠠᠭᠠᠨ ᠶᠠᠷᠢᠶᠠ ᠶ᠋ᠢ ᠡᠯᠭᠦᠨ ᠠᠪᠴᠤ ᠴᠤᠴᠠᠯᠢ ᠦᠯᠢᠶᠡᠵᠦ ᠭᠠᠯ ᠠᠰᠠᠭᠠᠬᠤ ᠮᠡᠲᠦ᠂
— ᠨᠠᠮᠠᠶ᠋ᠢ ᠬᠣᠣᠷᠯᠠᠬᠤ ᠰᠠᠨᠠᠭᠠᠲᠠᠨ ᠠᠬᠠ ᠳᠡᠭᠦᠦᠰ ᠳᠤᠮᠳᠠ ᠪᠠᠢᠨᠠ ᠲᠡᠳᠡᠨ ᠢ᠋ ᠬᠡᠷᠬᠢᠨ ᠨᠣᠮᠣᠬᠠᠷᠠᠭᠤᠯᠬᠤ
ᠶᠤᠮ ᠪᠣᠢ?ᠡᠨᠳᠡ ᠮᠥᠷ ᠦ᠋ᠨ ᠠᠪᠤᠷᠢ ᠭᠠᠷᠭᠠᠬᠤ ᠨᠢ ᠬᠢᠷᠢ ᠡᠴᠡ ᠬᠡᠲᠦᠷᠡᠯᠡ᠃ ᠳᠡᠭᠦᠦ ᠬᠤᠪᠢᠯᠭᠠᠨ ᠶᠠᠭᠤ ᠪᠣᠳᠣᠨᠠ ᠭᠡᠵᠦ ᠠᠰᠠᠭᠤᠪᠠ᠃ᠭᠠᠯᠳᠠᠨ ᠤ᠋ ᠰᠡᠳᠬᠢᠯ ᠳ᠋ᠦ᠍ ᠴᠡᠴᠡᠨ ᠠᠬᠠ ᠶ᠋ᠢᠨ ᠬᠡᠯᠡᠭᠰᠡᠨ《ᠴᠢ ᠡᠷᠲᠡᠬᠡᠨ ᠮᠢᠨᠦ ᠵᠠᠮ ᠠ᠋ᠴᠠ ᠬᠣᠯᠠᠳᠤᠯᠠ》ᠭᠡᠰᠡᠨ ᠦᠭᠡ ᠬᠠᠳᠠᠭᠠᠰᠤᠲᠠᠢ ᠪᠠᠢᠪᠠ᠃ ᠮᠥᠨ《ᠯᠠᠮᠠ ᠬᠥᠮᠦᠨ᠂ᠲᠠᠢᠭᠠᠨ ᠬᠣᠶᠠᠷ ᠢᠵᠢᠯᠢᠬᠡᠨ ᠪᠠᠢᠳᠠᠭ》 ᠭᠡᠰᠡᠨ ᠬᠣᠣᠷᠯᠠᠯ ᠲᠠᠢ ᠰᠠᠨᠠᠭᠠ ᠨᠢ ᠭᠠᠯᠳᠠᠨ ᠤ᠋ ᠲᠠᠷᠢᠬᠢᠨ ᠭᠦᠨ ᠳ᠋ᠦ᠍ ᠦᠯᠡᠳᠡᠵᠡᠢ᠃
ᠠᠷᠪᠠ ᠶᠢᠰᠦ
ᠴᠡᠴᠡᠨ ᠢ᠋ ᠲᠠᠢᠭᠠᠨ ᠪᠣᠯᠭᠠᠪᠠ ᠭᠡᠵᠦ ᠭᠠᠯᠳᠠᠨ ᠲᠡᠮᠳᠡᠭᠯᠡᠪᠡ᠃ᠬᠠᠭᠠᠨ ᠤ᠋ ᠥᠷᠭᠥᠭᠡ ᠡᠵᠡᠭᠦᠢ ᠮᠡᠲᠦ ᠪᠠᠢᠪᠠᠴᠤ ᠰᠡᠩᠭᠡ ᠲᠣᠳᠣ ᠪᠢᠴᠢᠭ ᠦ᠋ᠨ ᠵᠠᠬᠢᠳᠠᠯ ᠤᠩᠰᠢᠵᠤ ᠰᠠᠭᠤᠨᠠ᠃ ᠡᠨᠡ ᠵᠠᠬᠢᠳᠠᠯ ᠢ᠋ ᠰᠡᠪᠳᠡᠨᠵᠠᠯ ᠪᠢᠴᠢᠵᠡᠢ᠃ ᠲᠡᠷᠡ ᠪᠡᠷ ᠬᠣᠰᠢᠭᠤ ᠲᠠᠰᠤᠳᠠᠵᠤ ᠪᠡᠶᠡ ᠳᠠᠭᠠᠭᠠᠭᠰᠠᠨ ᠪᠢᠯᠡ᠃ ᠨᠠᠳᠠ ᠬᠣᠰᠢᠭᠤ ᠨᠤᠲᠤᠭ ᠴᠢᠮᠠᠯᠠᠭᠳᠠᠨᠠ᠃ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠮᠢᠨᠦ ᠵᠢᠳᠬᠦᠯ ᠢ᠋ ᠦᠨᠡᠯᠡᠨ ᠰᠠᠢᠰᠢᠶᠠᠵᠤ ᠵᠢᠶᠦ᠋ᠨ ᠸᠠᠩ ᠴᠣᠯᠠ ᠣᠯᠭᠣᠵᠤ ᠪᠠᠢᠬᠤ ᠳ᠋ᠤ᠌ ᠰᠡᠩᠭᠡ ᠬᠠᠭᠠᠨ ᠴᠢᠬᠢᠨ ᠳᠦᠯᠡᠢ ᠰᠠᠭᠤᠬᠤ ᠨᠢ ᠶᠠᠭᠤᠨ ᠤ᠋ ᠬᠢ ᠪᠢᠯᠡ? ᠰᠠᠪᠳᠠᠨᠵᠠᠯ ᠮᠢᠨᠦ ᠵᠢᠶᠦ᠋ᠨ ᠸᠠᠩ ᠴᠣᠯᠠ ᠳ᠋ᠤ᠌ ᠲᠣᠬᠢᠷᠠᠬᠤ ᠨᠤᠲᠤᠭ ᠤᠰᠤ ᠬᠡᠷᠡᠭ ᠲᠡᠢ ᠪᠠᠢᠨᠠ᠃ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠰᠡᠩᠭᠡ ᠳ᠋ᠦ᠍ ᠡᠴᠢᠭᠡ ᠨᠢᠭᠡᠲᠦ ᠰᠠᠪᠳᠠᠨᠵᠠᠯ ᠨᠢ ᠢᠢᠨ ᠬᠦ᠌ ᠲᠤᠯᠭᠠᠨ ᠱᠠᠭᠠᠷᠳᠠᠵᠤ ᠵᠠᠬᠢᠳᠠᠯ ᠢᠯᠡᠭᠡᠵᠡᠢ᠃
ᠲᠥᠪᠡᠳ ᠨᠤᠲᠤᠭ ᠠ᠋ᠴᠠ ᠢᠷᠡᠭᠰᠡᠨ ᠴᠠᠭ ᠠ᠋ᠴᠠ ᠬᠣᠢᠰᠢ ᠬᠡᠢᠳ ᠲᠦ᠍ ᠱᠠᠪᠢᠯᠠᠨ ᠰᠠᠭᠤᠵᠤ ᠪᠤᠶᠠᠨ ᠤ᠋ ᠮᠥᠷ ᠬᠥᠭᠡᠭᠡᠵᠦ ᠪᠣᠢ ᠳᠡᠭᠦᠦ ᠭᠠᠯᠳᠠᠨ ᠨᠢ ᠨᠠᠮᠤᠭᠤᠬᠠᠨ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠰᠡᠩᠭᠡ ᠶ᠋ᠢᠨ ᠴᠢᠷᠠᠢ ᠳ᠋ᠤ᠌ ᠭᠡᠷᠡᠯ ᠭᠡᠢᠪᠡ᠃
— ᠬᠠᠭᠠᠨ ᠠᠬᠠ ᠶᠠᠭᠤᠨ ᠳ᠋ᠤ᠌ ᠤᠢᠮᠤᠷᠠᠯᠠ
ᠪᠣᠢ ᠭᠡᠵᠦ ᠭᠠᠯᠳᠠᠨ ᠠᠰᠠᠭᠤᠬᠤ ᠳ᠋ᠤ᠌ ᠰᠡᠩᠭᠡ᠂
— ᠰᠡᠪᠳᠡᠨᠵᠠᠯ ᠳᠠᠬᠢᠭᠠᠳ ᠨᠤᠲᠤᠭ ᠲᠠᠰᠤᠳᠠᠬᠤ ᠰᠠᠨᠠᠭᠠ ᠲᠠᠢ ᠪᠠᠢᠨᠠ ᠭᠡᠯᠡ᠃
ᠭᠠᠯᠳᠠᠨ ᠥᠭᠦᠯᠡᠷᠦᠨ᠂
— ᠬᠠᠭᠠᠨ ᠠᠬᠠ ᠳ᠋ᠤ᠌ ᠪᠢ ᠲᠤᠰᠠᠯᠠᠬᠤ ᠶ᠋ᠢ
ᠬᠢᠴᠢᠶᠡᠨᠡ᠃ ᠮᠢᠨᠦ ᠳᠣᠣᠭᠤᠷ ᠤᠷᠭᠤᠮᠠᠯ ᠤ᠋ᠨ
ᠦᠨᠳᠦᠰᠦ ᠴᠢᠭᠢᠭ ᠬᠥᠬᠥᠵᠦ ᠪᠠᠢᠭᠠ ᠨᠢ ᠮᠡᠳᠡᠷᠡᠭᠳᠡᠨᠡ᠃ ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠦ᠌ ᠤᠰᠤ ᠳᠣᠷᠣᠭᠰᠢ ᠪᠠᠨ ᠨᠠᠪᠴᠢᠨ ᠪᠠᠷᠠᠭᠳᠠᠰᠢ ᠦᠭᠡᠢ ᠶᠡᠬᠡ ᠴᠢᠭᠢᠭ ᠪᠣᠯᠵᠠᠢ᠃ᠨᠠᠳᠠ ᠬᠡᠢ ᠪᠡᠶᠡ ᠣᠷᠣᠰᠢᠨᠠ᠃ ᠬᠡᠢ ᠪᠡᠶᠡ ᠪᠥᠭᠡᠰᠦ ᠬᠥᠮᠦᠰ ᠦ᠋ᠨ ᠰᠡᠳᠬᠢᠯ ᠰᠠᠨᠠᠭᠠ ᠶ᠋ᠢ ᠮᠡᠳᠡᠷᠡᠳᠡᠭ ᠪᠢᠯᠡ ᠭᠡᠵᠦ ᠰᠡᠩᠭᠡ ᠬᠠᠭᠠᠨ ᠤ᠋ ᠲᠠᠷᠢᠬᠢ ᠲᠣᠯᠣᠭᠠᠢ ᠳ᠋ᠤ᠌ ᠬᠡᠵᠢᠶᠡ ᠴᠦ᠍ ᠪᠣᠳᠣᠭᠳᠠᠵᠤ ᠪᠠᠢᠭᠠ ᠦᠭᠡᠢ ᠵᠦᠢᠯ ᠢ᠋ ᠬᠡᠯᠡᠪᠡ᠃
ᠰᠡᠩᠭᠡ ᠬᠠᠭᠠᠨ᠂
— ᠰᠡᠪᠳᠡᠨᠵᠠᠯ ᠢ᠋ ᠶᠠᠭᠠᠬᠢᠯᠲᠠᠢ ᠪᠣᠢ? ᠭᠡᠵᠦ ᠠᠰᠠᠭᠤᠪᠠ᠃
— ᠬᠠᠭᠠᠨ ᠠᠬᠠ ᠪᠤᠤ ᠴᠢᠬᠤᠯᠳᠠ! ᠨᠠᠭᠠᠨᠠ ᠨᠢ ᠨᠢᠭᠡ ᠴᠡᠭᠡᠷ ᠭᠠᠷᠭᠠᠨᠠ᠃ ᠪᠣᠯᠵᠤ ᠥᠭᠪᠡᠯ ᠰᠠᠪᠳᠠᠨᠵᠠᠯ ᠢ᠋ ᠵᠠᠯᠠᠵᠤ ᠠᠪᠴᠢᠷᠠᠭᠲᠤᠨ᠃
— ᠶᠠᠮᠠᠷ ᠴᠡᠭᠡᠷ ᠪᠢᠯᠡ?
— ᠬᠠᠭᠠᠨ ᠣᠯᠪᠣᠭ ᠪᠤᠵᠠᠷᠲᠤᠭᠰᠠᠨ ᠪᠠᠢᠨᠠ᠃ ᠣᠯᠪᠣᠭ ᠳᠡᠭᠡᠷᠡ ᠪᠢᠳᠡᠨ ᠦ᠌ ᠲᠣᠮᠣ ᠠᠬᠠ ᠴᠡᠴᠡᠨ ᠶᠣᠰᠣ ᠪᠤᠰᠤ ᠪᠠᠷ ᠪᠦᠰᠡᠭᠦᠢ ᠨᠣᠣᠯᠠᠵᠤ᠂ ᠮᠠᠨ ᠤ᠋ ᠠᠬᠠ ᠳᠡᠭᠦᠦᠰ ᠦ᠋ᠨ ᠲᠠᠩᠭᠠᠷᠢᠭ ᠲᠤ᠌ ᠰᠡᠪ ᠰᠠᠭᠤᠪᠠ᠃ ᠲᠡᠢᠮᠦ ᠶ᠋ᠢᠨ ᠲᠤᠯᠠ ᠴᠡᠴᠡᠨ ᠠᠬᠠ ᠶ᠋ᠢ ᠨᠢᠭᠦᠯ ᠦᠢᠯᠡᠳᠬᠦ ᠡᠴᠡ ᠰᠡᠷᠡᠮᠵᠢᠯᠡᠭᠦᠯᠦᠨ ᠲᠠᠢᠭᠠᠨ ᠪᠣᠯᠭᠠᠶᠠ᠃
— ᠴᠡᠴᠡᠨ ᠠᠬᠠ ᠲᠠᠪᠤᠨ ᠬᠡᠦᠬᠡᠳ ᠲᠡᠢ ᠪᠤᠰᠤ ᠤᠤ?
— ᠲᠡᠷᠡ ᠲᠣᠰᠤᠮ ᠢ᠋ᠶ᠋ᠠᠨ ᠰᠠᠢᠨ᠃ ᠲᠠᠢᠭᠠᠨ ᠨᠠᠷ ᠤ᠋ᠨ ᠶᠠᠪᠤᠳᠠᠯ ᠢ ᠴᠡᠴᠡᠨ ᠠᠬᠠ ᠬᠢᠨᠠᠵᠤ ᠪᠠᠢᠭ᠃ ᠵᠣᠣᠪᠠ ᠲᠠᠢᠭᠠᠨ ᠳ᠋ᠤ᠌ ᠡᠨᠡ ᠬᠦ᠌ ᠴᠡᠭᠡᠷ ᠭᠠᠷᠭᠠᠬᠤ ᠶᠣᠰᠣᠯᠠᠯ ᠢ᠋ ᠪᠡᠶᠡᠴᠢᠯᠡᠨ ᠦᠢᠯᠡᠳᠬᠦ ᠳᠠᠭᠠᠭᠠᠯᠭᠠᠪᠤᠷᠢ ᠬᠠᠭᠠᠨ ᠠᠬᠠ ᠥᠭᠭᠥᠭᠲᠥᠨ!
— ᠴᠡᠴᠡᠨ ᠠᠬᠠ ᠶ᠋ᠢᠨ ᠦᠷᠡ ᠦᠨᠳᠦᠰᠦ ᠲᠠᠰᠤᠷᠠᠬᠤ ᠦᠭᠡᠢ ᠪᠣᠯᠬᠣᠷ ᠬᠤᠪᠢᠯᠭᠠᠨ ᠳᠡᠭᠦᠦ ᠵᠥᠪ ᠪᠣᠳᠣᠵᠠᠢ᠃
— ᠭᠡᠭᠡᠨ ᠡᠳᠦᠷ ᠣᠪᠣᠬᠠᠢ ᠳ᠋ᠤ᠌ ᠦᠢᠯᠡᠳᠬᠦ ᠶ᠋ᠢ ᠰᠠᠢᠲᠤᠷ ᠮᠡᠳᠡᠭᠡᠷᠡᠢ᠃ᠲᠡᠭᠡᠬᠦ ᠳ᠋ᠡᠭᠡᠨ ᠲᠠ ᠪᠤᠷᠤᠭᠤ ᠰᠠᠨᠠᠭᠠ ᠲᠠᠢ ᠠᠬᠠ ᠳᠡᠭᠦᠦᠰ ᠢ᠋ ᠲᠡᠨᠳᠡ ᠪᠠᠢᠯᠭᠠᠬᠤ ᠶ᠋ᠢ ᠬᠢᠴᠢᠶᠡᠭᠡᠷᠡᠢ!
— ᠶᠠᠮᠠᠷ ᠮᠡᠷᠭᠡᠨ ᠰᠠᠨᠠᠭᠠ ᠪᠣᠢ᠃ ᠲᠡᠭᠷᠢ ᠡᠴᠡ ᠡᠢᠮᠦ ᠰᠠᠨᠠᠭᠠ ᠲᠥᠷᠥᠭᠦᠯᠦᠨᠡ ᠰᠢᠦ᠃
— ᠪᠢ ᠮᠥᠨ ᠯᠡ ᠵᠢᠷᠦᠬᠡ ᠶ᠋ᠢ ᠨᠢ ᠦᠬᠦᠭᠦᠯᠵᠦ ᠪᠠᠢᠭᠠ ᠶᠤᠮ᠃
ᠴᠥᠭᠡᠨ ᠬᠥᠮᠦᠨ ᠦ᠌ ᠵᠢᠷᠦᠬᠡ ᠵᠣᠷᠢᠭ ᠨᠢᠳᠦᠨ ᠳ᠋ᠡᠭᠡᠨ ᠪᠠᠢᠳᠠᠭ᠃ ᠨᠢᠳᠦ ᠪᠡᠷ ᠦᠵᠡᠭᠰᠡᠨ ᠬᠡᠵᠢᠶᠡ ᠴᠤ ᠦᠯᠦ ᠮᠠᠷᠲᠠᠨᠠ᠃ᠴᠣᠭᠴᠠᠰ ᠮᠥᠴᠢᠯᠡᠳᠡᠭ ᠲᠥᠪᠡᠳ ᠦ᠋ᠳ ᠦ᠋ᠨ ᠭᠠᠷ ᠠ᠋ᠴᠠ ᠬᠡᠨ ᠴᠦ᠍ ᠮᠢᠬᠠ ᠠᠪᠴᠤ ᠢᠳᠡᠳᠡᠭ ᠦᠭᠡᠢ᠃ ᠴᠡᠴᠡᠨ ᠠᠬᠠ ᠡᠮᠡᠰ ᠬᠡᠦᠬᠡᠨ ᠡᠴᠡ ᠬᠣᠯᠠ ᠶᠠᠪᠤᠭ᠃
— ᠳᠡᠭᠦᠦ ᠮᠢᠨᠦ ᠡᠨᠡ ᠪᠣᠯ ᠶᠣᠷᠣ ᠪᠤᠰᠤ ᠤᠤ?
— ᠠᠬᠠ ᠲᠠ ᠶᠠᠭᠤᠨ ᠳ᠋ᠤ᠌ ᠡᠮᠢᠶᠡᠨᠡ?
— ᠡᠮᠡᠰ ᠥᠬᠢᠳ ᠲᠦ᠍ ᠳᠤᠷᠠᠲᠠᠢ ᠡᠷᠡ ᠬᠥᠮᠦᠨ ᠢ᠋ ᠲᠠᠢᠭᠠᠨ ᠪᠣᠯᠭᠠᠬᠤ ᠠᠶᠤᠯ ᠥᠰᠢᠶᠡ ᠵᠠᠩᠭᠢᠳᠬᠤ ᠪᠣᠢ ᠢᠡ᠃
— ᠬᠡᠨ ᠳ᠋ᠦ᠍ ᠁?
— ᠲᠤᠬᠠᠢᠯᠠᠪᠠᠯ ᠬᠠᠭᠠᠨ ᠤ᠋ ᠤᠷᠤᠭ ᠲᠥᠷᠥᠯ ᠳ᠋ᠦ᠍ ᠁
— ᠥᠪᠡᠷ ᠢ᠋ᠶ᠋ᠡᠨ ᠬᠠᠭᠠᠨ ᠤ᠋ ᠤᠷᠤᠭ ᠤ᠋ᠨ ᠬᠥᠮᠦᠨ ᠤᠴᠢᠷ ᠢᠩᠭᠢᠵᠦ ᠴᠤᠴᠢᠷᠠᠬᠤ ᠦᠭᠡᠢ ᠪᠣᠯ ᠨᠢᠭᠡ ᠳᠣᠪᠣ ᠨᠢᠭᠡ ᠠᠭᠤᠯᠠ ᠨᠢ ᠬᠥᠮᠦᠨ ᠦ᠌ ᠬᠢ ᠪᠣᠯᠤᠭᠰᠠᠭᠠᠷ
ᠵᠡᠭᠥᠨᠭᠠᠷ ᠤ᠋ᠨ ᠨᠤᠲᠤᠭ ᠳᠠᠭᠤᠰᠤᠨᠠ᠃ ᠨᠥᠭᠦᠭᠡ ᠲᠠᠯᠠ ᠪᠠᠷ ᠪᠣᠢ ᠪᠠᠭᠠ ᠦᠭᠡᠢ ᠮᠢᠬᠠᠨ ᠪᠡᠶᠡᠳᠡᠨ ᠨᠦ᠍ᠭᠦᠳ ᠨᠢᠭᠡᠨ ᠢ᠋ᠶ᠋ᠡᠨ ᠠᠯᠠᠵᠤ
ᠲᠡᠯᠡᠨᠡ᠃ ᠬᠠᠭᠠᠨ ᠤ᠋ ᠲᠣᠷᠭᠠᠨ ᠰᠦᠷᠦᠭ ᠤᠷᠤᠭᠤ ᠬᠠᠯᠳᠠᠵᠤ ᠪᠠᠢᠭᠠ ᠶᠤᠮ ᠴᠢᠨᠢ ᠠᠮᠢ ᠨᠠᠰᠤ ᠶ᠋ᠢ ᠬᠥᠨᠥᠭᠡᠬᠦ ᠠᠮᠠᠷᠬᠠᠨ ᠪᠢᠵᠡ ᠳᠡ᠃ ᠣᠢᠷᠠᠬᠠᠨ ᠠ᠋ᠴᠠ ᠵᠠᠨᠤᠭᠠᠳ ᠪᠠᠢᠨᠠ ᠰᠢᠦ ᠳᠡ᠃
— ᠬᠤᠪᠢᠯᠭᠠᠨ ᠲᠠ ᠳᠠᠷᠠᠰᠤ ᠳᠠᠭᠠᠯᠠᠬᠤ ᠤᠤ?
— ᠦᠭᠡᠢ᠂ ᠪᠢ ᠳᠠᠷᠠᠰᠤ ᠪᠠᠷ ᠰᠡᠷᠵᠢᠮ ᠡᠷᠭᠦᠮᠦᠢ!
ᠲᠦᠷᠺ ᠰᠢᠪᠡᠷ ᠸᠠᠭᠠᠷ ᠲᠠᠢ ᠳᠠᠷᠠᠰᠤ ᠶ᠋ᠢ ᠠᠶᠠᠭᠠᠴᠢ ᠠᠪᠴᠢᠷᠠᠪᠠ᠃ ᠳᠠᠷᠠᠰᠤ ᠬᠦᠷᠡᠩ ᠥᠩᠭᠡ ᠲᠡᠢ ᠠᠵᠢ᠃ ᠳᠠᠷᠠᠰᠤ ᠶ᠋ᠢᠨ ᠰᠡᠩᠭᠢᠨᠡᠭᠰᠡᠨ ᠠᠩᠬᠢᠯᠤᠭᠤᠨ ᠦᠨᠦᠷ ᠥᠷᠭᠥᠭᠡ ᠪᠡᠷ ᠳᠦᠭᠦᠷᠡᠩ ᠬᠠᠩᠬᠤᠯᠤᠨᠠ᠃ ᠲᠦᠷᠺ ᠳᠡᠷᠡᠰᠦᠨ ᠦ᠌ ᠦᠨᠦᠷ ᠬᠠᠮᠠᠷ ᠠᠮᠠ ᠪᠠᠷ ᠴᠣᠷᠭᠢᠨ ᠴᠡᠭᠡᠵᠢᠨ ᠭᠦᠨ ᠤᠷᠤᠭᠤ ᠨᠢᠯ ᠬᠢᠨ ᠣᠷᠣᠵᠤ ᠢᠷᠡᠪᠡ᠃ ᠭᠠᠯᠳᠠᠨ ᠥᠭᠦᠯᠡᠪᠡ᠃
— ᠲᠠ ᠪᠣᠯ ᠬᠠᠭᠠᠨ ᠬᠥᠮᠦᠨ᠃ ᠬᠠᠭᠠᠨ ᠪᠣᠯ ᠬᠣᠶᠠᠷ ᠬᠥᠯᠲᠡᠨ ᠦ᠌ ᠬᠣᠬᠢᠮᠠᠢ ᠲᠣᠯᠣᠭᠠᠢ ᠶ᠋ᠢ
ᠬᠢᠷᠭᠠᠳᠠᠭ ᠪᠥᠭᠡᠳ ᠪᠠᠰᠠ ᠥᠷᠥᠰᠢᠶᠡᠳᠡᠭ᠃ ᠬᠠᠷᠢᠨ ᠪᠤᠷᠬᠠᠨ ᠤ᠋ ᠬᠤᠲᠤᠭᠲᠤ ᠬᠤᠪᠢᠯᠭᠠᠨ ᠪᠥᠭᠡᠰᠦ ᠣᠶᠤᠨ ᠰᠠᠨᠠᠭᠠ ᠶ᠋ᠢ ᠴᠡᠪᠡᠷᠰᠢᠭᠦᠯᠵᠦ ᠪᠤᠯᠠᠩᠭᠢᠷ ᠢ᠋ ᠠᠷᠢᠯᠭᠠᠵᠤ ᠪᠠᠢᠳᠠᠭ ᠪᠢᠯᠡ᠃ ᠲᠡᠭᠡᠬᠦ ᠪᠡᠷ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠬᠥᠬᠡ ᠲᠩᠷᠢ ᠶ᠋ᠢᠨ ᠳᠣᠣᠷᠠ ᠬᠠᠮᠤᠭ ᠤ᠋ᠨ ᠬᠦᠴᠦᠲᠡᠢ ᠪᠢᠯᠡ᠃
— ᠪᠢ ᠵᠥᠭᠡᠯᠡᠳᠡᠭᠡᠳ ᠪᠠᠢᠵᠠᠢ᠃ ᠴᠡᠴᠡᠨ ᠢ᠋ ᠲᠠᠢᠭᠠᠨ ᠪᠣᠯᠭᠠᠶᠠ᠃
— ᠬᠠᠭᠠᠨ ᠪᠣᠯ ᠬᠠᠲᠠᠭᠤ ᠵᠥᠭᠡᠯᠡᠨ ᠬᠣᠶᠠᠷ ᠤ᠋ᠨ ᠲᠤᠢᠯ ᠪᠠᠢᠪᠠᠰᠤ ᠵᠣᠬᠢᠯᠲᠠᠢ᠃ ᠭᠡᠮᠲᠡᠨ ᠢ᠋ ᠭᠡᠰᠬᠡᠨ᠂ ᠢᠷᠭᠡᠳ ᠠᠷᠠᠳ ᠢ᠋ ᠮᠠᠩᠨᠠᠢ ᠲᠡᠨᠢᠢᠯᠭᠡᠵᠦ ᠪᠠᠢᠬᠤ ᠨᠢ ᠵᠥᠪ᠃ ᠡᠷᠲᠡᠨ ᠦ᠌
ᠰᠤᠳᠤᠷ ᠲᠤ᠌ ᠢᠩᠭᠢᠵᠦ ᠪᠢᠴᠢᠭᠰᠡᠨ ᠪᠠᠢᠳᠠᠭ ᠶᠤᠮ᠃
— ᠳᠡᠭᠦᠦ ᠯᠠᠮᠠ ᠶ᠋ᠢᠨ ᠬᠤᠪᠢᠯᠭᠠᠨ ᠰᠢᠨᠵᠢ ᠳ᠋ᠦ᠍ ᠢᠲᠡᠭᠡᠨᠡ᠃
ᠬᠠᠭᠠᠨ ᠰᠡᠩᠭᠡ ᠳᠡᠭᠦᠦ ᠲᠡᠢ ᠪᠡᠨ ᠰᠠᠨᠠᠭᠠ ᠨᠡᠢᠯᠡᠭᠰᠡᠨ ᠪᠢᠯᠡ᠃ ᠳᠡᠭᠦᠦ ᠯᠠᠮᠠ ᠶ᠋ᠢᠨ ᠤᠩᠰᠢᠭᠰᠠᠨ ᠮᠡᠳᠡᠭᠰᠡᠨ ᠡᠭᠡᠯ ᠦᠭᠡᠢ ᠲᠤᠯᠠ ᠣᠢ ᠲᠣᠢ ᠳ᠋ᠤ᠌ ᠰᠢᠩᠭᠡᠭᠡᠬᠦ ᠪᠡᠷᠬᠡ᠃ ᠲᠩᠷᠢ ᠶ᠋ᠢᠨ ᠣᠳᠣᠳ ᠪᠦᠷᠢᠨ ᠵᠢᠷᠭᠠᠭᠰᠠᠨ ᠬᠣᠢᠨᠠ ᠭᠠᠯᠳᠠᠨ ᠭᠠᠳᠠᠭᠠᠯᠠᠪᠠ᠃ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠶᠡᠬᠡᠲᠡᠨ ᠭᠠᠢᠬᠠᠰᠢᠷᠠᠭᠰᠠᠨ ᠪᠠᠢᠯᠠ᠃ ᠲᠡᠭᠦᠨ ᠢ᠋ ᠴᠠᠰᠤᠲᠤ ᠶ᠋ᠢᠨ ᠣᠷᠣᠨ ᠲᠥᠪᠡᠳ ᠲᠦ᠍
ᠶᠠᠪᠤᠬᠤ ᠶ᠋ᠢᠨ ᠡᠮᠦᠨᠡᠬᠡᠨ ᠲᠠᠢᠭᠠᠨ ᠬᠡᠮᠡᠬᠦ ᠡᠷᠡ ᠴᠤ᠌ ᠪᠢᠰᠢ᠂ ᠡᠮᠡ ᠴᠤ᠌ ᠪᠢᠰᠢ ᠵᠣᠪᠠᠯᠠᠩᠲᠠᠨ ᠤ᠋ ᠡᠮᠭᠡᠨᠢᠯᠲᠦ ᠬᠤᠪᠢ ᠵᠠᠶᠠᠭᠠ ᠶ᠋ᠢ
ᠴᠡᠴᠡᠨ ᠠᠬᠠ ᠨᠢ ᠭᠠᠯᠳᠠᠨ ᠳ᠋ᠤ᠌ ᠲᠣᠬᠣᠵᠠᠢ᠃ ᠲᠡᠷᠡ ᠬᠦ᠌ ᠵᠡᠭᠦᠳᠦ ᠮᠡᠲᠦ ᠶᠠᠷᠢᠶᠠ ᠨᠢᠭᠡᠨ ᠴᠠᠭ ᠲᠤ᠌ ᠪᠠᠶᠠᠯᠠᠨᠠ ᠭᠡᠳᠡᠭ ᠢ᠋ ᠪᠠᠭᠠᠬᠠᠨ ᠭᠠᠯᠳᠠᠨ ᠶᠠᠭᠠᠬᠢᠵᠤ ᠭᠠᠳᠠᠷᠯᠠᠬᠤ ᠪᠢᠯᠡ᠃
ᠭᠡᠲᠡᠯᠡ ᠲᠠᠢᠭᠠᠨ ᠤ᠋ ᠵᠣᠪᠠᠯᠠᠩᠲᠤ ᠵᠠᠶᠠᠭᠠ ᠨᠢ ᠴᠡᠭᠡᠷ ᠭᠠᠷᠭᠠᠬᠤ ᠰᠢᠯᠢᠳᠡᠭ ᠠᠷᠭᠠ
ᠪᠠᠢᠭᠰᠠᠨ ᠢ᠋ ᠲᠩᠷᠢ ᠨᠢᠭᠡ ᠡᠳᠦᠷ
ᠭᠠᠯᠳᠠᠨ ᠳ᠋ᠤ᠌ ᠬᠡᠯᠡᠵᠦ ᠥᠭᠪᠡ᠃
ᠭᠠᠯᠳᠠᠨ ᠬᠤᠪᠢᠯᠭᠠᠨ ᠲᠡᠷᠡ ᠦᠭᠡ ᠶ᠋ᠢ ᠬᠠᠭᠠᠨ ᠠᠬᠠ ᠰᠡᠩᠭᠡ ᠳ᠋ᠦ᠍ ᠬᠡᠯᠡᠵᠦ ᠥᠭᠪᠡ᠃ ᠦᠭᠡᠨ ᠦ᠌ ᠦᠵᠦᠭᠦᠷ ᠤᠲᠠᠰᠤ ᠬᠦᠪᠦᠷᠡᠬᠦ ᠮᠡᠲᠦ ᠤᠷᠲᠤᠰᠤᠭᠰᠠᠭᠠᠷ ᠨᠢᠭᠡ ᠡᠳᠦᠷ ᠠᠶᠤᠩᠭᠠ ᠳᠤᠤᠭᠠᠷᠬᠤ ᠯᠤᠭᠠ ᠠᠮᠠᠨ ᠵᠠᠷᠯᠢᠭ ᠴᠡᠴᠡᠨ ᠬᠡᠮᠡᠬᠦ ᠡᠷᠡ ᠶ᠋ᠢᠨ ᠵᠠᠰᠠᠭᠠ ᠶ᠋ᠢ ᠣᠨᠣᠭᠠᠯᠠ᠃ ᠴᠡᠴᠡᠨ ᠢ᠋ ᠲᠠᠢᠭᠠᠨ ᠪᠣᠯᠭᠠᠭᠰᠠᠨ ᠨᠢ ᠰᠡᠪᠳᠡᠨᠵᠠᠯ ᠤ᠋ᠨ ᠠᠭᠠᠭ ᠣᠮᠣᠭ ᠢ᠋ ᠱᠠᠯᠴᠢᠢᠯᠭᠠᠵᠠᠢ᠃
ᠰᠡᠪᠳᠡᠨᠵᠠᠯ ᠨᠢᠳᠦᠨ ᠳ᠋ᠡᠭᠡᠨ ᠠᠢᠳᠠᠰ ᠲᠠᠢ ᠬᠣᠴᠣᠷᠴᠠᠢ᠃ ᠲᠡᠭᠡᠭᠡᠳ ᠰᠡᠪᠳᠡᠨᠵᠠᠯ ᠭᠡᠨᠡᠳᠲᠡ ᠠᠢᠳᠠᠰ ᠠ᠋ᠴᠠ ᠪᠠᠨ ᠰᠠᠯᠪᠠ᠃ ᠤᠴᠢᠷ ᠨᠢ ᠴᠡᠴᠡᠨ ᠲᠡᠭᠦᠨ ᠳ᠋ᠦ᠍《ᠪᠢ ᠡᠮᠡᠰ ᠲᠡᠢ ᠨᠥᠬᠥᠴᠡᠭᠰᠡᠨ ᠬᠡᠪ ᠢ᠋ᠶ᠋ᠡᠷ᠃ ᠰᠡᠩᠭᠡ ᠨᠠᠮᠠᠶ᠋ᠢ ᠥᠷᠥᠰᠢᠶᠡᠵᠦ ᠭᠡᠨᠡᠳᠡᠭᠰᠡᠨ》 ᠭᠡᠵᠡᠢ᠃ ᠰᠡᠪᠳᠡᠨᠵᠠᠯ ᠠᠬᠠ ᠶ᠋ᠢᠨ
ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠳᠠᠪᠠᠷᠠᠵᠠᠢ᠃
ᠬᠣᠷᠢ
ᠲᠡᠷᠡ ᠴᠠᠭᠠᠨ ᠢᠷᠪᠢᠰ ᠨᠠᠮᠠᠶ᠋ᠢ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠤᠴᠠᠭᠠᠳ ᠶᠠᠪᠤᠴᠢᠬᠠᠯᠠ᠃ ᠬᠡᠩᠬᠦᠳᠡᠭ ᠳᠡᠭᠡᠭᠦᠷ ᠢᠶᠡᠨ ᠬᠠᠷᠠ ᠣᠯᠣᠮ ᠲᠠᠢ ᠪᠠᠢᠪᠠ ᠭᠡᠮᠡᠨ ᠭᠠᠯᠳᠠᠨ ᠪᠣᠳᠣᠪᠠ᠃
ᠮᠣᠷᠢᠳ ᠤ᠋ᠨ ᠬᠠᠮᠠᠷ ᠲᠠᠴᠢᠭᠢᠨᠠᠵᠤ᠂ ᠮᠣᠷᠢᠳ ᠦᠷᠭᠦᠬᠦ ᠳ᠋ᠦ᠍ ᠬᠥᠯ ᠢ᠋ᠶ᠋ᠡᠷ ᠨᠢ ᠠᠰᠬᠠ ᠴᠢᠯᠠᠭᠤ ᠨᠤᠷᠠᠵᠤ ᠠᠯᠲᠠᠢ ᠶ᠋ᠢᠨ ᠴᠠᠰᠤᠲᠤ ᠬᠢᠷᠠ ᠠ᠋ᠴᠠ ᠠᠭᠠᠵᠢᠮ ᠢ᠋ᠶ᠋ᠠᠷ ᠴᠤᠪᠤᠷᠠᠭᠰᠠᠭᠠᠷ ᠪᠠᠭᠤᠬᠤ ᠨᠢ ᠴᠣᠷᠣᠰ ᠣᠪᠣᠭ ᠤ᠋ᠨ ᠬᠢᠨ ᠪᠠᠢᠯᠠ᠃ ᠭᠠᠯᠳᠠᠨ ᠲᠠᠢ ᠬᠠᠷᠠᠴᠠ ᠲᠤᠯᠭᠠᠷᠠᠭᠰᠠᠨ ᠢᠷᠪᠢᠰ ᠦ᠋ᠨ ᠨᠢᠳᠦ ᠨᠢ ᠰᠢᠷᠠ ᠴᠥᠭᠥᠴᠡ ᠲᠡᠢ᠂ ᠴᠠᠭᠠᠨ ᠲᠤᠶᠠᠭᠠ ᠲᠠᠢ ᠠᠵᠢ᠃ ᠢᠷᠪᠢᠰ ᠦᠯᠦ ᠴᠠᠪᠴᠢᠷᠠᠨ ᠭᠠᠯᠳᠠᠨ ᠤ᠋ ᠪᠣᠷᠣ ᠨᠢᠳᠦ ᠶ᠋ᠢ ᠰᠢᠷᠲᠡᠭᠰᠡᠨ ᠢ᠋ᠶ᠋ᠡᠨ ᠬᠠᠷᠠᠴᠠ ᠪᠠᠨ ᠤᠷᠤᠭᠰᠢᠯᠠᠭᠤᠯᠤᠭᠰᠠᠭᠠᠷ ᠳᠡᠰ ᠬᠠᠷᠠ ᠴᠢᠯᠠᠭᠤ ᠶ᠋ᠢ ᠣᠨᠣᠭᠠᠵᠤ ᠬᠠᠷᠠᠪᠠ᠃ ᠭᠠᠯᠳᠠᠨ ᠮᠣᠷᠢᠳ ᠤ᠋ᠨ ᠬᠠᠮᠠᠷ ᠲᠠᠴᠢᠭᠢᠨᠠᠨ ᠠᠰᠬᠠ ᠨᠤᠷᠠᠬᠤ ᠴᠢᠮᠡᠭᠡ ᠪᠡᠷ ᠡᠷᠭᠢᠵᠦ ᠬᠠᠷᠠᠬᠤ ᠳ᠋ᠤ᠌ ᠠᠳᠤᠭᠤᠨ ᠤ᠋ ᠨᠢᠳᠦᠨ ᠳ᠋ᠦ᠍ ᠬᠣᠣᠷ ᠰᠢᠩᠭᠡᠨ ᠪᠠᠴᠢᠮᠳᠠᠬᠤ ᠳ᠋ᠠᠭᠠᠨ ᠪᠡᠶᠡ ᠪᠡᠨ ᠠᠭᠳᠠᠯᠠᠨ ᠴᠢᠩᠭᠠᠯᠠᠵᠤ ᠨᠠᠯᠠᠤ ᠠᠰᠬᠠ ᠬᠠᠳᠠ ᠤᠷᠤᠭᠤ ᠨᠢᠰᠴᠢᠬᠡᠵᠦ ᠳᠥᠭᠥᠵᠡᠢ᠃ ᠣᠷᠣᠢ ᠪᠣᠯᠵᠤ ᠨᠠᠷᠠᠨ ᠤ᠋ ᠲᠤᠶᠠᠭᠠ ᠠᠭᠤᠯᠠ ᠶ᠋ᠢᠨ ᠠᠰᠬᠠᠲᠤ ᠡᠩᠭᠡᠷ ᠢ᠋ ᠨᠢᠭᠡᠵᠢᠨ ᠰᠡᠳᠡ ᠲᠠᠯᠪᠢᠵᠤ ᠠᠰᠬᠠᠷᠠᠬᠤ ᠮᠥᠨᠥᠬᠢ ᠴᠠᠭᠠᠨ ᠢᠷᠪᠢᠰ ᠳᠣᠭᠣᠯᠠᠩ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠠᠢᠪᠤᠭᠤᠬᠠᠨ ᠠᠯᠬᠤᠵᠤ ᠪᠠᠢᠯᠠ᠃
ᠭᠠᠯᠳᠠᠨ ᠤ᠋ ᠳᠡᠷᠭᠡᠳᠡ ᠶᠠᠪᠤᠭᠰᠠᠨ ᠠᠷᠴᠠ ᠪᠠᠭᠠᠲᠤᠷ ᠰᠤᠮᠤ ᠲᠠᠯᠪᠢᠬᠤ ᠶ᠋ᠢ ᠬᠣᠷᠢᠭᠯᠠᠵᠤ᠂
— ᠢᠷᠪᠢᠰ ᠨᠢᠭᠡ ᠡᠳᠦᠷ ᠡᠷᠭᠢᠭᠡᠳ
ᠢᠷᠡᠨᠡ ᠭᠡᠪᠡ᠃
— ᠲᠠ ᠶᠠᠭᠠᠬᠢᠵᠤ ᠮᠡᠳᠡᠪᠡ ᠭᠡᠵᠦ ᠠᠷᠴᠠ ᠪᠠᠭᠠᠲᠤᠷ ᠠᠰᠠᠭᠤᠪᠠ᠃
— ᠨᠠᠮᠠᠶ᠋ᠢ ᠲᠠᠨᠢᠭᠰᠠᠨ ᠤᠴᠢᠷ ᠠ᠋ᠴᠠ ᠪᠤᠴᠠᠭᠠᠳ ᠶᠠᠪᠤᠯᠠ ᠰᠢᠦ ᠳᠡ ᠭᠡᠵᠦ ᠭᠠᠯᠳᠠᠨ ᠯᠠᠮᠠ ᠶ᠋ᠢ ᠬᠡᠯᠡᠬᠦ ᠳ᠋ᠦ᠍᠂
— ᠲᠡᠷᠡ ᠵᠢᠯ ᠦ᠋ᠨ ᠨᠥᠭᠦᠭᠡ ᠢᠷᠪᠢᠰ ᠮᠥᠨ ᠤᠤ? ᠭᠡᠵᠦ ᠠᠷᠴᠠ ᠪᠠᠭᠠᠲᠤᠷ ᠭᠠᠢᠬᠠᠪᠠ᠃
— ᠮᠥᠨ ᠭᠡᠵᠦ ᠭᠠᠯᠳᠠᠨ ᠯᠠᠮᠠ ᠲᠠᠢᠪᠤᠩ ᠥᠭᠦᠯᠡᠯᠡ᠃
— ᠣᠳᠣ ᠪᠢᠳᠡ ᠬᠠᠮᠢᠭᠠᠰᠢ ᠣᠳᠤᠨᠠ ᠭᠡᠵᠦ ᠠᠷᠴᠠ ᠶ᠋ᠢ ᠲᠡᠭᠡᠨᠡᠭᠡᠯᠵᠡᠬᠦ ᠳ᠋ᠦ᠍ ᠭᠠᠯᠳᠠᠨ᠂
— ᠯᠠᠮᠠ ᠬᠤᠪᠢᠯᠭᠠᠳ ᠤ᠋ᠨ ᠵᠤᠰᠠᠯᠠᠩ ᠳ᠋ᠤ᠌ ᠬᠦᠷᠦᠨᠡ ᠭᠡᠯᠡ᠃
ᠬᠣᠷᠢᠨ ᠨᠢᠭᠡ
ᠠᠩ ᠳ᠋ᠤ᠌ ᠮᠣᠷᠳᠠᠭᠰᠠᠳ ᠤ᠋ᠨ ᠴᠤᠭᠯᠠᠭᠠᠨ ᠳᠡᠭᠡᠷᠡ ᠣᠴᠢᠬᠤ ᠳ᠋ᠤ᠌ ᠴᠣᠷᠣᠰ ᠣᠪᠣᠭ ᠤ᠋ᠨ ᠠᠬᠠ ᠳᠡᠭᠦᠦ ᠭᠠᠯᠳᠠᠨ ᠢ᠋ ᠲᠣᠭᠣᠷᠢᠨ ᠪᠦᠴᠢᠵᠦ
― ᠴᠡᠴᠡᠨ ᠲᠠᠢᠵᠢ ᠬᠠᠮᠢᠭᠠ ᠣᠴᠢᠭᠰᠠᠨ ᠪᠣᠢ? ᠭᠡᠮᠡᠨ ᠰᠢᠯᠭᠠᠪᠠ᠃ ᠭᠡᠲᠡᠯᠡ ᠬᠡᠨ ᠨᠢᠭᠡ ᠨᠢ᠂
― ᠣᠷᠣᠰ ᠬᠤᠳᠠᠯᠳᠤᠭᠠᠴᠢᠨ ᠤ᠋ ᠪᠦᠷᠬᠦᠬᠡᠷ ᠮᠠᠯᠠᠭᠠᠢ ᠲᠠᠢ ᠡᠬᠡᠨᠡᠷ ᠢ᠋ ᠳᠠᠭᠠᠭᠠᠳ ᠶᠠᠪᠤᠭᠰᠠᠨ ᠭᠡᠪᠡ᠃
ᠭᠠᠯᠳᠠᠨ ᠲᠡᠮᠳᠡᠭᠯᠡᠯ ᠢ᠋ᠶ᠋ᠡᠨ ᠲᠦᠷ ᠬᠣᠢᠰᠢᠯᠠᠭᠤᠯᠵᠤ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠯᠠ᠃ ᠴᠡᠴᠡᠨ ᠲᠠᠢᠭᠠᠨ ᠪᠤᠰᠤ ᠤᠤ? ᠡᠰᠡᠬᠦᠯᠡ ᠬᠠᠭᠠᠨ ᠠᠬᠠ ᠠᠯᠳᠠᠭᠠ ᠭᠠᠷᠭᠠᠪᠠ ᠤᠤ? ᠵᠣᠣᠪᠠ ᠲᠠᠢᠭᠠᠨ ᠨᠠᠳᠠ《ᠴᠡᠴᠡᠨ ᠲᠠᠢᠵᠢ ᠶ᠋ᠢᠨ ᠲᠥᠮᠥᠰᠥ ᠶ᠋ᠢ ᠨᠣᠬᠠᠢ ᠠᠮᠠᠨ ᠳ᠋ᠠᠭᠠᠨ ᠬᠦᠯᠬᠦᠵᠦ ᠦᠵᠡᠭᠰᠡᠨ ᠢ᠋ᠶ᠋ᠡᠨ ᠬᠡᠯᠡ ᠪᠡᠷ ᠢ᠋ᠶ᠋ᠡᠨ ᠪᠤᠴᠠᠭᠠᠭᠠᠳ ᠲᠦᠯᠬᠢᠴᠢᠬᠡᠭᠰᠡᠨ᠃ ᠵᠠᠭᠠᠷ ᠠ᠋ᠴᠠ ᠨᠢ ᠪᠣᠯᠤᠭᠠᠳ ᠲᠥᠮᠥᠰᠥ ᠶ᠋ᠢ ᠨᠣᠬᠠᠢ ᠢᠳᠡᠭᠡ ᠦᠭᠡᠢ》 ᠭᠡᠰᠡᠨ᠃ ᠴᠡᠴᠡᠨ ᠲᠠᠢᠵᠢ ᠪᠦᠷᠬᠦᠬᠡᠷ ᠮᠠᠯᠠᠭᠠᠢ ᠲᠠᠢ ᠣᠷᠣᠰ ᠡᠬᠡᠨᠡᠷ ᠳᠠᠭᠠᠭᠠᠳ ᠶᠠᠪᠤᠳᠠᠭ ᠨᠢ ᠶᠠᠭᠤᠨ? ᠦᠨᠡᠨ ᠢ᠋ ᠬᠡᠨ ᠮᠡᠳᠡᠬᠦ ᠪᠢᠯᠡ? ᠰᠡᠩᠭᠡ ᠬᠠᠭᠠᠨ ᠯᠠᠪ ᠮᠡᠳᠡᠨᠡ᠃
ᠭᠠᠯᠳᠠᠨ ᠢᠢᠨ ᠬᠦ᠌ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠯᠠ᠃
— ᠬᠠᠭᠠᠨ ᠠᠬᠠ ᠲᠠ ᠴᠡᠴᠡᠨ ᠢ᠋
ᠥᠷᠥᠰᠢᠶᠡᠵᠡᠢ ᠭᠡᠮᠡᠨ ᠭᠠᠯᠳᠠᠨ ᠲᠡᠭᠦᠨ ᠦ᠌ ᠠᠰᠠᠷ ᠲᠤ᠌ ᠣᠷᠣᠭᠰᠠᠨ ᠬᠣᠢᠨᠠ ᠪᠠᠨ ᠲᠤᠯᠭᠠᠵᠤ ᠠᠰᠠᠭᠤᠪᠠ᠃
— ᠴᠢᠮᠠ ᠳ᠋ᠤ᠌ ᠬᠡᠨ ᠬᠡᠯᠡᠪᠡ ᠭᠡᠮᠡᠨ ᠰᠡᠩᠭᠡ ᠬᠠᠭᠠᠨ ᠰᠣᠴᠢᠨ ᠬᠠᠷᠢᠭᠤ ᠠᠰᠠᠭᠤᠯᠠ᠃
— ᠪᠢ ᠮᠡᠳᠡᠭᠰᠡᠨ᠃
— ᠡᠷᠡ ᠬᠥᠮᠦᠨ ᠪᠣᠯᠬᠤ ᠪᠠᠷ ᠨᠢ ᠥᠷᠥᠭᠡᠰᠦᠨ ᠲᠥᠮᠥᠰᠥ ᠲᠡᠢ ᠨᠢ ᠦᠯᠡᠳᠡᠭᠡᠴᠢᠬᠡᠭᠰᠡᠨ ᠶᠦᠮ᠃
— ᠬᠠᠭᠠᠨ ᠠᠬᠠ ᠲᠠ ᠠᠯᠳᠠᠵᠠᠢ᠃
— ᠪᠢ ᠥᠷᠦᠪᠳᠦᠭᠰᠡᠨ ᠪᠢᠯᠡ᠃
— ᠬᠣᠭ ᠤ᠋ᠨ ᠤᠷᠭᠤᠮᠠᠯ ᠶᠡᠬᠡᠳᠡᠪᠡᠯ ᠬᠡᠭᠡᠷᠡ ᠶ᠋ᠢᠨ ᠨᠣᠭᠣᠭᠠ ᠶ᠋ᠢ ᠰᠦᠢᠳᠬᠡᠳᠡᠭ
ᠶᠦᠮ ᠳᠡ᠃ ᠬᠣᠭ ᠤ᠋ᠨ ᠤᠷᠭᠤᠮᠠᠯ ᠦᠨᠳᠦᠰᠦ ᠦᠭᠡᠢ ᠮᠥᠷᠳᠡᠯᠡ ᠪᠡᠨ ᠠᠮᠠᠷᠬᠠᠨ ᠲᠠᠷᠬᠠᠳᠠᠭ ᠪᠤᠰᠤ ᠤᠤ? ᠬᠣᠭ ᠤ᠋ᠨ ᠤᠷᠭᠤᠮᠠᠯ ᠭᠠᠭᠴᠠ ᠬᠣᠷᠭᠣᠯ ᠢ᠋ ᠬᠦᠷᠲᠡᠯᠡ ᠰᠦᠪᠡᠯᠡᠭᠡᠳ ᠤᠷᠭᠤᠳᠠᠭ ᠰᠢᠦ ᠳᠡ᠃
— ᠴᠡᠴᠡᠨ ᠣᠳᠣ ᠵᠢᠷᠦᠬᠡ ᠦᠭᠡᠢ ᠪᠣᠯᠤᠭᠰᠠᠨ᠃
— ᠦᠭᠡᠢ᠂ ᠲᠡᠷᠡ ᠠᠷᠢᠶᠠᠲᠠᠨ ᠪᠣᠯᠤᠭᠰᠠᠨ᠃
—ᠴᠡᠴᠡᠨ ᠡᠴᠡ ᠪᠢ ᠠᠶᠤᠬᠤ ᠦᠭᠡᠢ ᠪᠠᠢᠨᠠ᠃
— ᠳᠤᠲᠠᠭᠤ ᠪᠣᠳᠣᠭᠰᠠᠨ ᠦᠢᠯᠡ ᠠᠯᠳᠠᠭᠠ ᠪᠦᠬᠦᠨ ᠦ᠌ ᠡᠬᠢᠯᠡᠯ ᠪᠣᠯᠳᠠᠭ ᠵᠢᠮᠡ ᠲᠡᠢ᠃ ᠦᠢᠯᠡ ᠶ᠋ᠢᠨ ᠦᠷᠡ ᠠᠶᠠᠨᠳᠠᠭᠠᠨ ᠬᠡᠵᠢᠶᠡ ᠨᠢᠭᠡᠨ ᠴᠠᠭ ᠲᠤ᠌ ᠭᠠᠢ ᠲᠠᠷᠢᠵᠤ ᠮᠡᠳᠡᠬᠦ ᠤᠴᠢᠷ ᠠ᠋ᠴᠠ ᠡᠷᠲᠡᠬᠡᠨ ᠲᠠᠰᠤᠯᠬᠤ ᠬᠡᠷᠡᠭᠲᠡᠢ᠃
— ᠨᠠᠮᠠᠶ᠋ᠢ ᠶᠠᠭᠤᠨ ᠳ᠋ᠤ᠌ ᠵᠢᠮᠡᠯᠡᠪᠡ?
— ᠲᠠ ᠪᠥᠭᠡᠷᠡᠩᠬᠡᠢ ᠰᠠᠨᠠᠭᠠ ᠲᠠᠢ ᠶᠤᠮ᠃
— ᠨᠠᠳᠠ ᠥᠪᠡᠷ ᠦ᠋ᠨ ᠪᠣᠳᠣᠯ ᠪᠠᠢᠵᠤ ᠪᠣᠯᠬᠤ ᠦᠭᠡᠢ ᠭᠡᠵᠦ ᠤᠤ?
—ᠥᠩᠭᠡᠷᠡᠭᠰᠡᠨ ᠦ᠌ ᠬᠣᠢᠨᠠ ᠠ᠋ᠴᠠ
ᠬᠣᠶᠠᠭᠤᠯᠠ ᠪᠠᠨ ᠠᠮᠠ ᠵᠥᠷᠢᠬᠦ ᠪᠡᠨ ᠬᠢᠴᠢᠶᠡᠶᠡ᠃
ᠰᠡᠩᠭᠡ ᠬᠠᠭᠠᠨ 《ᠡᠨᠡ ᠭᠠᠯᠳᠠᠨ ᠯᠠᠮᠠ ᠪᠤᠷᠬᠠᠨ ᠤ᠋ ᠪᠦᠷᠢᠯᠸᠠ ᠮᠥᠷᠲᠡᠯᠡ ᠪᠡᠨ ᠶᠠᠮᠠᠷ ᠬᠠᠲᠠᠭᠤ ᠬᠥᠮᠦᠨ ᠪᠣᠢ᠃ ᠭᠠᠯᠳᠠᠨ ᠢ᠋ ᠲᠥᠪᠡᠳ ᠤᠷᠤᠭᠤ ᠶᠠᠭᠠᠷᠠᠨ ᠪᠤᠴᠠᠭᠠᠬᠤ ᠬᠡᠷᠡᠭᠲᠡᠢ᠃ ᠣᠷᠣᠰ ᠤ᠋ᠨ ᠬᠤᠳᠠᠯᠳᠤᠭᠠᠴᠢᠳ ᠲᠤ᠌ ᠮᠥᠨ ᠬᠠᠲᠠᠭᠤᠷᠠᠭᠠᠳ ᠪᠠᠢᠨᠠ᠃ ᠣᠷᠣᠰ ᠬᠤᠳᠠᠯᠳᠤᠭᠠᠴᠢᠳ ᠲᠠᠲᠠᠪᠤᠷᠢ ᠬᠥᠯᠥᠰᠥ ᠡᠴᠡ ᠵᠢᠭᠤᠲᠠᠭᠰᠠᠨ᠃ ᠨᠠᠮᠠᠶ᠋ᠢ ᠬᠡᠯᠡᠭᠰᠡᠭᠡᠷ ᠪᠠᠢᠲᠠᠯᠠ ᠭᠠᠯᠳᠠᠨ ᠬᠤᠳᠠᠯᠳᠤᠭᠠᠴᠢᠳ ᠢ᠋ ᠠᠯᠪᠠ ᠭᠤᠪᠴᠢᠭᠤᠷ ᠢ᠋ᠶ᠋ᠠᠷ ᠳᠠᠷᠤᠮᠲᠠᠯᠠᠵᠤ ᠪᠠᠢᠨᠠ᠃ ᠭᠠᠯᠳᠠᠨ ᠡᠭᠦᠨ ᠡᠴᠡ ᠬᠣᠢᠰᠢ ᠨᠣᠮ ᠤ᠋ᠨ
ᠮᠥᠷ ᠢ᠋ᠶ᠋ᠡᠨ ᠬᠥᠭᠡᠭᠡᠪᠡᠯ ᠲᠠᠭᠠᠷᠠᠨᠠ》 ᠭᠡᠵᠦ ᠰᠡᠳᠬᠢᠨ ᠪᠣᠳᠣᠯᠠ᠃
ᠡᠨᠡ ᠦᠶᠡ ᠳ᠋ᠦ᠍ ᠲᠤᠩᠭᠠᠯᠠᠭ ᠪᠤᠯᠠᠭ᠂ᠬᠠᠷᠠᠵᠠ ᠤᠰᠤᠨ ᠤ᠋ ᠣᠢᠷᠠᠯᠴᠠᠭᠠ ᠵᠠᠳᠠᠭᠠᠢ ᠭᠠᠯ ᠥᠷᠲᠥᠵᠡᠢ᠃ ᠭᠠᠯ ᠳ᠋ᠤ᠌ ᠮᠢᠬᠠ ᠰᠢᠷᠠᠵᠤ ᠢᠳᠡᠵᠡᠭᠡᠨᠡ᠃ ᠠᠪᠠ ᠬᠣᠮᠣᠷᠭᠠᠨ ᠳ᠋ᠤ᠌ ᠬᠡᠢᠮᠣᠷᠢ ᠨᠢ ᠰᠡᠷᠭᠦᠭᠰᠡᠨ ᠠᠬᠠ ᠳᠡᠭᠦᠦ ᠨᠠᠷ ᠢᠨᠢᠶᠡᠳᠦ ᠬᠥᠷ ᠲᠡᠢ ᠪᠠᠢᠯᠠ᠃ ᠵᠠᠪᠠᠵᠢᠨ ᠠ᠋ᠴᠠ ᠪᠠᠨ ᠨᠠᠷᠢᠬᠠᠨ ᠰᠠᠬᠠᠯ ᠤᠷᠭᠤᠭᠤᠯᠤᠭᠰᠠᠨ ᠰᠡᠪᠳᠡᠨᠵᠡᠯ
ᠲᠡᠳᠡᠨ ᠦ᠌ ᠬᠢᠨ ᠦ᠌ ᠳᠠᠭᠤᠳᠠᠯᠭᠠ ᠪᠠᠷ ᠢᠷᠡᠵᠡᠢ᠃ ᠮᠣᠷᠢᠳ ᠤ᠋ᠨ ᠡᠮᠡᠭᠡᠯ ᠲᠣᠨᠣᠭᠯᠠᠯ᠂ ᠳᠠᠭᠠᠭᠤᠯᠢ ᠴᠡᠷᠢᠭ ᠦ᠋ᠳ ᠦ᠋ᠨ ᠵᠢᠰᠦ ᠴᠢᠷᠠᠢ ᠥᠩᠭᠡᠯᠢᠭ ᠠᠵᠢ᠃
ᠵᠠᠳᠠᠭᠠᠢ ᠭᠠᠯ ᠢ᠋ ᠲᠣᠭᠣᠷᠢᠭᠠᠳ ᠥᠨᠳᠥᠷ ᠮᠥᠷᠭᠥᠴᠡᠭ ᠪᠠᠢᠬᠤ ᠪᠥᠭᠡᠳ ᠳᠠᠷᠠᠰᠤ ᠪᠢᠲᠡᠭᠦᠦ ᠤᠷᠭᠤᠭᠰᠠᠨ ᠪᠠᠶᠠᠨ ᠪᠦᠷᠢᠳᠦ ᠪᠣᠯᠠᠢ᠃ ᠭᠠᠯᠳᠠᠨ ᠡᠩ ᠦ᠋ᠨ ᠠᠷᠠᠳ ᠮᠠᠶᠢᠭ ᠢ᠋ᠶ᠋ᠠᠷ ᠰᠢᠷᠠ ᠳᠡᠪᠡᠯ ᠡᠮᠦᠰᠴᠦ᠂
ᠶᠡᠦᠳᠡᠨ ᠮᠠᠯᠠᠭᠠᠢ ᠮᠥᠷᠥ ᠪᠡᠨ ᠬᠠᠯᠠᠭᠯᠠᠨ ᠲᠠᠯᠪᠢᠵᠤ᠂ ᠮᠠᠯᠠᠭᠠᠢ ᠶ᠋ᠢᠨ ᠪᠦᠴᠡ ᠶ᠋ᠢ
ᠵᠠᠩᠭᠢᠳᠴᠤ ᠤᠨᠵᠢᠭᠤᠯᠤᠭᠰᠠᠨ ᠠᠭᠠᠳ ᠬᠢᠲᠤᠭᠠ ᠮᠡᠰᠡ᠂ ᠨᠤᠮᠤ ᠰᠤᠮᠤ ᠦᠭᠡᠢ ᠠᠵᠢ᠃
— ᠬᠤᠳᠠᠯᠳᠤᠭᠠ ᠬᠢᠬᠦ ᠶ᠋ᠢ ᠪᠢ ᠴᠢᠯᠥᠭᠡᠲᠡᠢ ᠪᠣᠯᠭᠠᠭᠰᠠᠨ ᠶᠤᠮ᠃ ᠣᠷᠣᠰ᠂ ᠬᠢᠲᠠᠳ᠂ ᠲᠥᠪᠡᠳ᠂ ᠮᠠᠨᠵᠤ ᠶ᠋ᠢᠨ ᠲᠥᠯᠥᠭᠡᠨ ᠦ᠌ ᠡᠯᠴᠢ ᠨᠠᠷ ᠥᠷᠲᠡᠭᠡ ᠤᠯᠠᠭᠠ ᠪᠠᠷ ᠵᠠᠷ ᠦᠭᠡᠢ ᠨᠡᠪᠲᠡᠷᠡᠵᠦ ᠪᠠᠢᠭᠠ ᠭᠡᠮᠡᠨ ᠰᠦᠷ ᠬᠦᠴᠦᠨ ᠳ᠋ᠡᠭᠡᠨ ᠪᠠᠬᠠᠷᠬᠠᠬᠤ ᠠᠶᠠᠰ ᠲᠠᠢ ᠰᠡᠩᠭᠡ ᠬᠠᠭᠠᠨ ᠥᠭᠦᠯᠡᠪᠡ᠃
— ᠲᠠᠲᠠᠪᠤᠷᠢ ᠭᠤᠪᠴᠢᠭᠤᠷ ᠠᠪᠬᠤ ᠬᠡᠷᠡᠭᠲᠡᠢ ᠭᠡᠮᠡᠨ ᠠᠬᠠ ᠳᠡᠭᠦᠤᠰ ᠤ᠋ᠨ ᠳᠤᠮᠳᠠ ᠭᠠᠯᠳᠠᠨ ᠦᠭᠡ ᠴᠢᠯᠠᠭᠤᠳᠠᠪᠠ᠃
— ᠪᠣᠭᠣᠮᠲᠠ ᠪᠠᠷ ᠨᠡᠪᠲᠡᠷᠡᠬᠦ ᠳ᠋ᠡᠭᠡᠨ ᠫᠢᠶᠣᠣ ᠪᠢᠴᠢᠭ ᠠᠪᠴᠤ ᠲᠠᠲᠠᠪᠤᠷᠢ ᠲᠥᠯᠥᠵᠦ ᠪᠠᠢᠭᠠ᠃ ᠵᠠᠷᠢᠮ ᠨᠢ ᠬᠠᠷᠠᠭᠤᠯ ᠤ᠋ᠨ ᠪᠣᠭᠣᠮᠲᠠ ᠪᠠᠷ ᠪᠢᠰᠢ ᠥᠭᠡᠷᠡ ᠭᠠᠵᠠᠷ ᠢ᠋ᠶ᠋ᠠᠷ ᠨᠡᠪᠲᠡᠷᠡᠵᠦ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠤ᠋ ᠴᠠᠭᠠᠵᠠ ᠶ᠋ᠢ ᠵᠥᠷᠢᠴᠡᠳᠡᠭ᠃ ᠬᠠᠭᠠᠨ ᠴᠠᠭᠠᠵᠠ ᠪᠣᠯ ᠨᠢᠭᠡ ᠡᠳᠦᠷ ᠢᠯᠡᠳᠲᠡ ᠪᠣᠯᠤᠨ ᠲᠡᠳᠡᠨ ᠦ᠌ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠠᠭᠤᠬᠤ ᠶᠣᠰᠣᠲᠠᠢ ᠪᠤᠰᠤ ᠤᠤ? ᠭᠡᠮᠡᠨ ᠰᠡᠩᠭᠡ ᠠᠬᠠ ᠳᠡᠭᠦᠤᠰ ᠤ᠋ᠨ ᠨᠢᠳᠦ ᠶ᠋ᠢ ᠬᠠᠷᠠᠵᠤ ᠬᠠᠲᠠᠭᠤᠬᠠᠨ ᠥᠭᠦᠯᠡᠪᠡ᠃
ᠬᠠᠭᠠᠨ ᠰᠡᠩᠭᠡ ᠶ᠋ᠢᠨ ᠡᠨᠡ ᠬᠠᠲᠠᠭᠤ ᠦᠭᠡ ᠰᠡᠪᠳᠡᠨᠵᠡᠯ ᠦ᠋ᠨ ᠵᠢᠷᠦᠬᠡᠨ ᠳ᠋ᠦ᠍ ᠰᠢᠪᠡᠪᠡ᠃ ᠰᠡᠪᠳᠡᠨᠵᠡᠯ ᠦ᠋ᠨ ᠪᠡᠶᠡ ᠳᠠᠭᠠᠭᠠᠬᠤ ᠭᠡᠰᠡᠨ ᠬᠣᠮᠣᠬᠠᠢ ᠪᠣᠳᠣᠯ ᠳ᠋ᠤ᠌ ᠰᠡᠩᠭᠡ ᠬᠠᠭᠠᠨ ᠢᠯᠡᠳᠲᠡ ᠳᠤᠷᠠ ᠦᠭᠡᠢ ᠪᠢᠯᠡ᠃ ᠮᠥᠨ ᠭᠠᠯᠳᠠᠨ ᠯᠠᠮᠠ᠂ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠤᠷᠢᠶᠠᠵᠤ ᠬᠤᠮᠢᠭᠰᠠᠨ ᠨᠤᠲᠤᠭ ᠤᠰᠤ ᠶ᠋ᠢ ᠪᠤᠰᠤᠳ ᠤ᠋ᠨ ᠬᠥᠯ ᠢ᠋ᠶ᠋ᠡᠷ ᠭᠢᠰᠬᠢᠭᠦᠯᠵᠦ ᠳᠠᠯᠠᠬᠠᠭᠣᠯᠵᠦ ᠲᠡᠳᠡᠨ ᠦ᠌ ᠮᠠᠯ ᠤ᠋ᠨ ᠪᠡᠯᠴᠢᠭᠡᠷ ᠪᠣᠯᠭᠠᠬᠤ ᠦᠭᠡᠢ ᠶᠤᠮᠰᠠᠨ ᠬᠡᠮᠡᠬᠦ ᠬᠠᠲᠠᠭᠤ ᠰᠠᠨᠠᠭᠠ ᠲᠠᠢ ᠪᠠᠢᠪᠠ᠃ ᠪᠠᠷᠢᠭᠳᠠᠵᠤ ᠠᠯᠠᠭᠤᠯᠤᠭᠰᠠᠨ ᠣᠷᠣᠰ ᠬᠤᠳᠠᠯᠳᠤᠭᠠᠴᠢᠨ ᠢ᠋ ᠰᠡᠪᠳᠡᠨᠵᠡᠯ ᠳᠠᠭᠠᠭᠤᠯᠵᠤ ᠶᠠᠪᠤᠭᠠᠳ ᠵᠢᠭᠤᠲᠠᠭᠰᠠᠨ ᠪᠢᠯᠡ᠃
ᠵᠠᠳᠠᠭᠠᠢ ᠭᠠᠯ ᠤ᠋ᠨ ᠪᠢᠯᠢᠭ ᠤᠯᠠᠭᠠᠨ ᠭᠠᠯ ᠠᠬᠠ ᠳᠡᠭᠦᠦ ᠨᠠᠷ ᠤ᠋ᠨ ᠬᠤᠪᠴᠠᠰᠤ ᠪᠣᠯᠤᠨ ᠨᠢᠭᠤᠷ ᠴᠢᠷᠠᠢ ᠶ᠋ᠢ ᠬᠠᠶᠠ ᠰᠡᠭᠦᠳᠡᠷᠳᠡᠭᠦᠯᠵᠥ ᠂ ᠬᠠᠶᠠ ᠭᠡᠷᠡᠯᠲᠦᠭᠦᠯᠦᠨ ᠪᠠᠢᠨᠠ᠃ ᠤᠳᠠᠭᠠᠨ ᠰᠠᠭᠤᠵᠤ ᠬᠥᠭᠡᠷᠦᠯᠳᠦᠨ ᠶᠠᠷᠢᠵᠤ ᠪᠣᠢ
ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶ᠋ᠢᠨ
ᠬᠥᠪᠡᠭᠦᠳ ᠦ᠋ᠨ ᠴᠠᠭᠠᠨᠠ ᠳᠠᠭᠠᠭᠤᠯᠢ ᠴᠡᠷᠢᠭ ᠦ᠋ᠳ ᠭᠠᠯ ᠲᠦᠯᠡᠵᠦ᠂ ᠮᠢᠬᠠ ᠰᠢᠷᠠᠵᠤ ᠢᠳᠡᠵᠡᠭᠡᠨ ᠫᠡᠷ ᠫᠡᠷ ᠬᠥᠭᠡᠷᠦᠯᠳᠦᠵᠦ ᠪᠥᠯᠥᠭᠡ᠃
ᠭᠠᠯ ᠤ᠋ᠨ ᠳᠡᠷᠭᠡᠳᠡ ᠪᠡᠶᠡ ᠪᠡᠨ ᠲᠥᠭᠡᠨᠡᠨ᠂ ᠦᠬᠡᠭᠦᠰᠢᠯᠡᠨ ᠰᠠᠭᠤᠬᠤ ᠠᠬᠤᠢ ᠳ᠋ᠤ᠌ ᠰᠠᠪᠳᠠᠨᠵᠠᠯ ᠣᠭᠲᠣᠬᠠᠨ ᠦᠯᠦ ᠳᠤᠤᠭᠠᠷᠬᠤ ᠪᠥᠭᠡᠳ ᠬᠠᠶᠠ ᠵᠠᠯᠢᠵᠢᠨ ᠢᠨᠢᠶᠡᠮᠰᠦᠭᠯᠡᠵᠦ ᠪᠠᠢᠯᠠ᠃ ᠰᠠᠪᠳᠠᠨᠵᠠᠯ
ᠭᠠᠯ ᠤ᠋ᠨ ᠳᠥᠯᠥ ᠳ᠋ᠦ᠍ ᠰᠡᠭᠦᠳᠡᠷᠳᠡᠬᠦ ᠴᠡᠴᠡᠨ ᠲᠠᠢᠵᠢ ᠤᠷᠤᠭᠤ ᠨᠢᠳᠦ ᠢᠷᠮᠡᠪᠡ᠃ ᠴᠡᠴᠡᠨ ᠲᠠᠢᠵᠢ ᠶ᠋ᠢᠨ ᠳᠡᠷᠡᠰᠦᠨ ᠳ᠋ᠦ᠍ ᠬᠠᠯᠠᠮᠴᠠᠵᠤ ᠤᠯᠠᠢᠭᠰᠠᠨ ᠴᠢᠷᠠᠢ ᠳ᠋ᠤ᠌ ᠲᠡᠯᠴᠢᠯᠡᠭᠰᠡᠨ ᠵᠠᠨᠤᠯ ᠭᠦᠶᠦᠭᠡᠳ ᠥᠩᠭᠡᠷᠡᠬᠦ ᠳ᠋ᠦ᠍ ᠲᠡᠷᠡ ᠪᠡᠷ ᠬᠣᠭᠣᠯᠠᠢ ᠵᠠᠰᠠᠪᠠ᠃
— ᠪᠢᠳᠡᠨ ᠦ᠌ ᠥᠩᠭᠡᠨ ᠳᠡᠭᠡᠷᠡ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠮᠠᠨᠳᠤᠨ ᠪᠠᠳᠠᠷᠠᠨᠠ᠃ ᠲᠡᠢᠮᠦ ᠤᠤ? ᠭᠡᠮᠡᠨ ᠴᠡᠴᠡᠨ ᠲᠠᠯᠠ ᠵᠠᠰᠠᠬᠤ ᠮᠠᠶᠢᠭ ᠢ᠋ᠶ᠋ᠠᠷ ᠬᠡᠯᠡᠬᠦ ᠳ᠋ᠦ᠍ ᠴᠠᠭᠠᠨᠠ ᠨᠢ ᠬᠣᠷᠣᠰᠤᠯ ᠢᠯᠡᠳᠲᠡ ᠮᠡᠳᠡᠷᠡᠭᠳᠡᠵᠦ ᠪᠠᠢᠯᠠ᠃ ᠰᠡᠩᠭᠡ ᠵᠤᠵᠠᠭᠠᠨ ᠣᠯᠪᠣᠭ ᠲᠤ ᠪᠡᠶᠡ ᠪᠡᠨ ᠲᠤᠬᠠᠯᠠᠨ《ᠪᠢᠳᠡᠨ ᠦ᠌ ᠥᠩᠭᠡᠨ ᠳᠡᠭᠡᠷᠡ ᠭᠡᠨᠡ ᠠ᠋ ᠁ ᠪᠢᠳᠡᠨ ᠦ᠌ ᠭᠡᠨᠡ ᠤᠤ? ᠪᠢᠳᠡ ᠪᠢᠰᠢ᠁ ᠬᠠᠭᠠᠨ ᠰᠡᠩᠭᠡ ᠶ᠋ᠢᠨ ᠥᠩᠭᠡ᠁
ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠤ᠋ᠳ ᠢ᠋ ᠬᠡᠳᠦᠨ ᠲᠣᠯᠣᠭᠠᠢ ᠲᠡᠢ ᠪᠠᠢᠯᠭᠠᠬᠤ ᠭᠡᠪᠡᠯ ᠴᠡᠴᠡᠨ ᠠᠬᠠ ᠶ᠋ᠢᠨ ᠰᠠᠨᠠᠭᠠ ᠪᠦᠲᠦᠬᠦ ᠦᠭᠡᠢ ᠪᠢᠵᠡ᠃ ᠥᠷᠥᠭᠡᠰᠦᠨ ᠵᠠᠰᠠᠭᠠ ᠲᠠᠢ ᠦᠯᠡᠳᠡᠭᠰᠡᠨ ᠡᠨᠡ ᠡᠷᠡ ᠦᠮᠡᠬᠡᠢ ᠪᠡᠨ ᠲᠠᠯᠪᠢᠬᠤ ᠦᠭᠡᠢ ᠨᠢ ᠪᠣᠯᠤᠯᠲᠠᠢ᠃ ᠦᠷᠦ ᠡᠪᠡᠳᠬᠦ ᠪᠡᠷ ᠦᠷᠦ ᠤᠷᠤᠭᠤ ᠢᠰᠬᠦᠯᠦᠨᠡ ᠭᠡᠳᠡᠭ ᠦᠨᠡᠨ ᠶᠦᠮ᠃ ᠴᠢᠮᠠᠶ᠋ᠢ ᠲᠣᠯᠣᠭᠠᠢ ᠦᠭᠡᠢ ᠪᠣᠯᠭᠠᠭᠰᠠᠨ ᠴᠤ᠌ ᠪᠢ ᠴᠢᠳᠠᠨᠠ》 ᠭᠡᠵᠦ ᠰᠢᠵᠠᠭᠤᠷ ᠵᠠᠭᠤᠨ ᠪᠣᠳᠣᠭᠠᠳ᠂
— ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠨᠢᠭᠡ ᠠᠭᠠᠷ ᠢ᠋ᠶ᠋ᠠᠷ ᠠᠮᠢᠰᠬᠤᠯᠯᠠᠬᠤ ᠲᠠᠭᠠᠲᠠᠢ ᠪᠠᠢᠨᠠ ᠰᠢᠦ ᠭᠡᠵᠦ ᠴᠡᠴᠡᠨ ᠲᠠᠢᠵᠢ ᠳ᠋ᠤ᠌ ᠬᠠᠷᠢᠭᠤ ᠪᠠᠷᠢᠪᠠ᠃ ᠴᠡᠴᠡᠨ ᠦ᠌ ᠳᠣᠲᠣᠷᠠ ᠰᠢᠲᠠᠵᠤ《ᠵᠣᠣᠪᠠ ᠲᠠᠢᠭᠠᠨ ᠨᠠᠳᠠ ᠬᠠᠯᠳᠠᠭᠰᠠᠨ ᠨᠢ ᠶᠠᠭᠠᠬᠢᠪᠠᠴᠤ ᠲᠡᠭᠦᠨ ᠦ᠌ ᠰᠠᠨᠠᠭᠠ ᠪᠢᠰᠢ᠃ ᠡᠨᠡ ᠰᠡᠩᠭᠡ᠂ ᠭᠠᠯᠳᠠᠨ ᠬᠣᠶᠠᠭᠤᠯᠠ ᠶ᠋ᠢᠨ
ᠶᠠᠪᠤᠭᠤᠯᠤᠯᠭᠠ᠃ ᠭᠠᠯᠳᠠᠨ ᠨᠤᠲᠤᠭ ᠲᠠᠭᠠᠨ
ᠢᠷᠡᠭᠰᠡᠨ ᠢ᠋ᠶ᠋ᠡᠷ ᠣᠯᠠᠨ ᠤ᠋ ᠰᠡᠳᠬᠢᠯ ᠢ᠋ ᠥᠪᠡᠷ
ᠲᠡᠭᠡᠨ ᠲᠠᠲᠠᠵᠤ᠂ ᠬᠠᠭᠠᠨ ᠤ᠋ ᠭᠣᠯᠣᠮᠲᠠ ᠶ᠋ᠢ
ᠴᠡᠪᠡᠷᠯᠡᠵᠦ ᠪᠠᠢᠨᠠ᠃ ᠭᠠᠯᠳᠠᠨ ᠯᠠᠮᠠ ᠴᠤ ᠯᠤᠤᠰ
ᠰᠠᠪᠳᠠᠭ ᠢ᠋ ᠠᠷᠭᠠᠳᠠᠵᠤ᠂ ᠲᠡᠭᠷᠢ ᠭᠠᠵᠠᠷ ᠊ᠢ ᠲᠠᠢᠳᠬᠤᠷᠠᠭᠤᠯᠬᠤ ᠪᠤᠷᠬᠠᠨ ᠤ᠋
ᠡᠷᠳᠡᠮ ᠳ᠋ᠦ᠍ ᠰᠤᠷᠤᠯᠴᠠᠵᠠᠢ᠃ ᠡᠨᠡ ᠬᠣᠶᠠᠷ ᠰᠠᠯᠤᠩᠭᠢᠳᠠ ᠪᠠᠢᠪᠠᠯ ᠰᠠᠢᠨ ᠰᠠᠨ᠃ ᠬᠣᠶᠠᠭᠤᠯᠠ ᠪᠠᠨ ᠨᠡᠢᠯᠡᠬᠦ ᠪᠡᠷ ᠳᠡᠢᠯᠦᠭᠳᠡᠰᠢ ᠦᠭᠡᠢ ᠨᠢ》 ᠭᠡᠮᠡᠨ ᠪᠣᠳᠣᠬᠤ ᠵᠠᠭᠤᠷᠠ᠂
— ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠲᠥᠯᠥᠭᠡ ᠪᠢ ᠵᠢᠳᠬᠦᠨᠡ ᠭᠡᠵᠦ ᠲᠦᠢᠪᠡᠭᠦᠯᠦᠨ ᠥᠩᠭᠡᠷᠡᠬᠦ ᠶ᠋ᠢ ᠬᠢᠴᠢᠶᠡᠪᠡ᠃
ᠵᠤᠳᠪᠠᠪᠠᠭᠠᠲᠤᠷ ᠡᠨᠡ ᠦᠶᠡ ᠳ᠋ᠦ᠍ ᠴᠡᠴᠡᠨ ᠲᠠᠢᠵᠢ ᠲᠡᠢᠰᠢ ᠴᠡᠬᠡᠯᠵᠡᠨ ᠬᠠᠷᠠᠭᠠᠳ《ᠴᠡᠴᠡᠨ ᠠᠬᠠ ᠶ᠋ᠢᠨ ᠭᠤᠢᠪᠠᠮᠠᠬᠠᠢ ᠵᠠᠩ ᠢ᠋ ᠶᠠᠭᠠᠬᠢᠨᠠ ᠳᠠ》 ᠭᠡᠵᠦ ᠴᠢᠬᠤᠯᠳᠠᠭᠠᠳ᠂
— ᠠᠬᠠ ᠳᠡᠭᠦᠦ ᠪᠢᠳᠡᠨᠦᠰ ᠨᠢᠭᠡ ᠠᠳᠬᠤᠨ ᠳ᠋ᠤ᠌ ᠪᠠᠢᠭᠠ ᠱᠠᠭᠠ ᠪᠤᠰᠤ ᠤᠤ? ᠶᠠᠭᠠᠬᠢᠵᠤ ᠪᠣᠯᠭᠣᠭᠠᠬᠤ ᠪᠠᠨ ᠬᠠᠭᠠᠨ ᠲᠠ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡᠨᠡ ᠪᠣᠢ ᠵᠠ᠃ ᠳᠥᠷᠪᠡᠨ ᠣᠢᠷᠠᠳ ᠤ᠋ᠨ ᠨᠡᠭᠦᠳᠡᠯᠴᠢᠳ ᠬᠠᠯᠢᠮᠠᠭ ᠠ᠋ᠴᠠ᠂ ᠲᠦᠷᠺ ᠡᠴᠡ᠂ ᠬᠥᠬᠡᠨᠠᠭᠤᠷ ᠠ᠋ᠴᠠ ᠢᠷᠡᠭᠰᠡᠭᠡᠷ ᠪᠠᠢᠨᠠ᠃ ᠮᠠᠨ ᠤ᠋ ᠬᠠᠯᠬᠠᠴᠤᠳ ᠡᠯᠢᠭᠡ ᠨᠢᠭᠡᠲᠡᠨ ᠢ᠋ᠶ᠋ᠡᠨ ᠲᠦᠰᠢᠬᠦ ᠶ᠋ᠢ ᠬᠡᠨ ᠪᠠᠢᠭ ᠭᠡᠬᠦᠪ᠃ ᠬᠡᠷᠪᠡ ᠣᠢᠷᠠᠳ᠂ ᠬᠠᠯᠬᠠ ᠬᠣᠶᠠᠷ ᠬᠠᠨᠠᠲᠤ ᠭᠡᠷ ᠲᠡᠭᠡᠨ ᠴᠣᠭ ᠠᠮᠢᠳᠤᠷᠠᠬᠤ ᠴᠠᠭ ᠢᠷᠡᠪᠡᠯ ᠪᠢ ᠯᠠᠪ ᠳᠤᠷᠠᠲᠠᠢ ᠪᠠᠢᠨᠠ ᠭᠡᠵᠦ ᠵᠠᠭᠤᠨ ᠳᠡᠮᠵᠢᠵᠦ ᠬᠣᠯᠠᠳᠴᠤ ᠣᠳᠤᠭᠰᠠᠨ ᠠᠬᠠ ᠳᠡᠭᠦᠦ ᠪᠡᠨ ᠳᠤᠷᠠᠰᠬᠤ ᠮᠡᠲᠦ ᠭᠤᠨᠢᠭ ᠲᠠᠢ ᠪᠠᠷ ᠥᠭᠦᠯᠡᠬᠦ ᠳᠦ ᠬᠠᠭᠠᠨ ᠠᠰᠠᠷ ᠲᠤ ᠴᠢᠮᠡᠭᠡ ᠨᠠᠮᠳᠠᠵᠤ ᠬᠦᠯᠢᠶᠡᠯᠲᠡ ᠡᠭᠦᠰᠦᠯᠡ᠃ ᠲᠡᠳᠡ ᠨᠢᠭᠡᠳᠴᠦ ᠠᠮᠢᠳᠤᠷᠠᠬᠤ ᠶ᠋ᠢ ᠬᠦᠯᠢᠶᠡᠭᠰᠡᠭᠡᠷ ᠳᠥᠷᠪᠡᠨ ᠵᠠᠭᠤᠨ ᠢ᠋ ᠥᠷᠲᠡᠭᠡᠯᠡᠭᠰᠡᠨ ᠲᠩᠷᠢᠯᠢᠭ ᠡᠪᠦᠭᠡᠳ ᠦ᠋ᠨ ᠢ᠋ᠶ᠋ᠡᠨ ᠰᠠᠨᠠᠭᠠ ᠶ᠋ᠢ ᠭᠦᠢᠴᠡᠭᠡᠵᠦ᠂ᠦᠢᠯᠡᠰ ᠢ᠋ ᠦᠷᠭᠦᠯᠵᠢᠯᠡᠭᠦᠯᠬᠦ ᠶ᠋ᠢ ᠬᠦᠰᠡᠵᠦ ᠪᠠᠢᠯᠠ᠃ ᠳᠥᠷᠪᠡᠨ ᠣᠢᠷᠠᠳ ᠤ᠋ᠨ ᠭᠠᠯ ᠳ᠋ᠤ᠌ ᠴᠤᠴᠠᠯᠢ ᠨᠡᠮᠡᠵᠦ ᠶᠠᠪᠤᠭᠠ ᠶᠠᠰᠤᠨ ᠤ᠋ ᠦᠶᠡ ᠨᠤᠭᠦᠳ ᠨᠢᠭᠡᠨ ᠦ᠌ ᠪᠡᠨ ᠳᠡᠭᠡᠷᠡ ᠭᠠᠷᠬᠤ ᠶ᠋ᠢ ᠰᠠᠨᠠᠭᠠᠷᠬᠠᠨ ᠲᠡᠮᠡᠴᠡᠯᠳᠦᠭᠰᠡᠭᠡᠷ ᠪᠠᠢᠯᠠ᠃
ᠭᠠᠯ ᠤ᠋ᠨ ᠰᠢᠩᠬᠤᠨ ᠤᠯᠠᠭᠠᠨ ᠳᠥᠯᠥ ᠵᠤᠳᠪᠠᠪᠠᠭᠠᠲᠤᠷ ᠤ᠋ᠨ ᠨᠢᠭᠤᠷ ᠢ᠋ ᠳᠣᠯᠢᠶᠠᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠵᠡᠷᠭᠡᠴᠡᠭᠡ ᠰᠠᠭᠤᠭᠠ ᠴᠡᠴᠡᠨ ᠲᠠᠢᠵᠢ ᠳᠡᠰ ᠬᠠᠷᠠ ᠦᠵᠡᠭᠳᠡᠨᠡ᠃ᠬᠠᠭᠠᠨ ᠤ᠋ ᠬᠡᠭᠡᠷᠡ ᠶ᠋ᠢᠨ ᠠᠰᠠᠷ ᠲᠤ ᠠᠰᠠᠭᠠᠭᠰᠠᠨ ᠭᠠᠯ ᠨᠢ ᠴᠣᠷᠭᠢᠷᠠᠭᠰᠠᠭᠠᠷ ᠤᠯᠠᠭᠠᠨ ᠥᠩᠭᠡ ᠪᠡᠷ ᠰᠡᠭᠦᠳᠡᠷᠲᠡᠭᠦᠯᠵᠦ ᠪᠠᠢᠯᠠ᠃ ᠰᠡᠩᠭᠡ ᠬᠠᠭᠠᠨ᠂
— ᠬᠠᠯᠬᠠ ᠶ᠋ᠢ ᠪᠢ ᠮᠥᠷᠥᠭᠡᠳᠬᠦ ᠦᠭᠡᠢ᠃ ᠲᠡᠳᠡ ᠪᠢᠳᠡ ᠯᠤᠭᠠ ᠠᠳᠠᠯᠢ ᠮᠣᠩᠭᠣᠯᠴᠤᠳ᠃ ᠬᠠᠷᠢᠨ ᠪᠢ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠢ᠋ ᠪᠠᠢᠭᠤᠯᠤᠮᠠᠷ ᠪᠠᠢᠨᠠ ᠭᠡᠬᠦ ᠳ᠋ᠦ᠍ ᠭᠠᠯᠳᠠᠨ ᠯᠠᠮᠠ᠂
— ᠠᠬᠠ ᠬᠠᠭᠠᠨ ᠢ᠋ ᠪᠢ ᠳᠡᠮᠵᠢᠨᠡ᠃ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠡᠳᠦᠭᠡ ᠳᠡᠭᠡᠳᠦ ᠮᠣᠩᠭᠣᠯᠴᠤᠳ ᠭᠡᠰᠡᠨ ᠨᠡᠷᠡ ᠡᠴᠡ ᠴᠢᠨᠠᠭᠰᠢ ᠦᠭᠡᠢ ᠪᠣᠯᠵᠠᠢ᠃ ᠬᠠᠯᠬᠠ ᠶ᠋ᠢᠨ ᠨᠣᠶᠠᠳ ᠪᠠᠰᠠ ᠬᠠᠭᠠᠨ ᠠᠬᠠ ᠶ᠋ᠢᠨ ᠰᠠᠨᠠᠭᠰᠠᠨ ᠢ᠋ ᠰᠠᠨᠠᠵᠤ᠂ ᠮᠥᠷᠥᠭᠡᠳᠦᠭᠰᠡᠨ ᠢ᠋ ᠮᠥᠷᠥᠭᠡᠳᠴᠦ ᠶᠠᠪᠤᠭᠠ ᠪᠢᠵᠡ᠃ ᠨᠢᠭᠡ ᠵᠦᠭ ᠲᠦ᠍ ᠶᠠᠪᠤᠭᠠ ᠪᠠᠨ ᠮᠡᠳᠡᠯᠴᠡᠬᠦ ᠠᠪᠠᠰᠤ ᠶᠡᠬᠡ ᠦᠷᠭᠦᠭᠡᠨ ᠦ᠌ ᠪᠡᠨ ᠪᠠᠢᠷᠢ ᠶ᠋ᠢ ᠴᠣᠭ ᠲᠠᠭᠠᠨ ᠵᠠᠰᠠᠯᠴᠠᠵᠤ ᠪᠣᠯᠤᠨᠠ ᠭᠡᠮᠡᠨ ᠮᠠᠰᠢ ᠲᠣᠳᠣ ᠥᠭᠦᠯᠡᠪᠡ᠃
ᠴᠡᠴᠡᠨ ᠲᠠᠢᠵᠢ᠂ ᠵᠤᠳᠪᠠᠪᠠᠭᠠᠲᠤᠷ ᠨᠣᠶᠠᠨ᠂ ᠰᠡᠪᠳᠡᠨᠵᠡᠯ ᠸᠠᠩ ᠤ᠋ᠨ ᠵᠢᠷᠭᠤᠭᠠᠨ ᠨᠢᠳᠦ ᠯᠠᠮᠠ ᠳᠡᠭᠦᠦ ᠪᠡᠨ ᠰᠢᠷᠲᠡᠵᠦ ᠮᠠᠰᠢᠳᠠ ᠭᠠᠢᠬᠠᠭᠰᠠᠨ ᠪᠠᠢᠳᠠᠯ ᠲᠠᠢ ᠪᠣᠯᠪᠠ᠃ ᠴᠡᠴᠡᠨ ᠲᠠᠢᠵᠢ《ᠡᠨᠡ ᠭᠠᠯᠳᠠᠨ ᠪᠤᠷᠬᠠᠨ ᠤ᠋ ᠨᠣᠮ ᠠ᠋ᠴᠠ ᠠᠯᠢᠵᠠᠢ》 ᠭᠡᠵᠦ ᠪᠣᠳᠣᠨᠠ᠃ ᠵᠤᠳᠪᠠᠪᠠᠭᠠᠲᠤᠷ ᠨᠣᠶᠠᠨ《ᠭᠠᠯᠳᠠᠨ ᠤ᠋ ᠣᠶᠤᠨ ᠰᠠᠨᠠᠭᠠ ᠶ᠋ᠢ ᠵᠣᠭᠰᠣᠭᠠᠬᠤ ᠠᠷᠭᠠ ᠦᠭᠡᠢ ᠪᠣᠯᠵᠠᠢ》 ᠭᠡᠮᠡᠨ ᠠᠳᠬᠠᠪᠠ᠃ ᠰᠡᠪᠳᠡᠨᠵᠡᠯ 《ᠡᠨᠡ ᠯᠠᠮᠠ ᠲᠥᠪᠡᠳ ᠡᠴᠡ ᠬᠠᠮᠢᠭᠠᠰᠢ ᠣᠳᠪᠠ ᠭᠡᠵᠦ᠃ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠲᠦ᠍ ᠬᠤᠳᠬᠤᠯᠳᠤᠬᠤ ᠰᠠᠨᠠᠭᠠ ᠲᠠᠢ ᠶᠤᠮ》 ᠭᠡᠵᠦ ᠵᠢᠷᠦᠬᠡ ᠪᠡᠨ ᠡᠪᠡᠳᠭᠡᠪᠡ ᠃
ᠣᠳᠣᠳ ᠬᠤᠴᠢᠭᠰᠠᠨ ᠲᠠᠯᠠ ᠬᠡᠭᠡᠷᠡ ᠨᠤᠲᠤᠭ ᠲᠤ ᠣᠢᠷᠠᠳ ᠤ᠋ᠨ ᠠᠬᠠ ᠳᠡᠭᠦᠦᠰ ᠬᠦᠵᠦᠭᠦᠨ ᠦ᠌ ᠶᠠᠰᠤ ᠮᠥᠯᠵᠢᠵᠦ᠂ ᠳᠠᠷᠠᠰᠤ ᠰᠥᠩᠨᠡᠵᠦ᠂ ᠥᠷ ᠦ᠋ᠨ ᠭᠡᠭᠡ ᠲᠠᠲᠠᠲᠠᠯᠠ ᠰᠠᠭᠤᠵᠠᠭᠠᠪᠠ᠃ ᠭᠡᠨᠡᠳᠲᠡ ᠭᠠᠯᠳᠠᠨ ᠯᠠᠮᠠ ᠴᠡᠴᠡᠨ ᠲᠠᠢᠵᠢ ᠠ᠋ᠴᠠ ᠠᠰᠠᠭᠤᠪᠠ᠃
— ᠴᠦᠬᠦᠢ ᠤᠪᠠᠰᠢ ᠠᠪᠠᠭᠠ ᠬᠠᠭᠠᠨ ᠰᠠᠭᠤᠨᠠ ᠭᠡᠯᠡ᠃ ᠴᠡᠴᠡᠨ ᠰᠣᠴᠢᠨ ᠰᠡᠳᠬᠢᠯ ᠦ᠋ᠨ ᠢ᠋ᠶ᠋ᠡᠨ ᠬᠥᠨᠳᠡᠭᠦᠷ ᠢ᠋ ᠮᠡᠳᠡᠭᠳᠡᠬᠦ ᠦᠭᠡᠢ ᠶ᠋ᠢ ᠬᠢᠴᠢᠶᠡᠨ ᠪᠠᠢᠵᠤ᠂
— ᠶᠡᠬᠡ ᠬᠠᠲᠤᠨ ᠤ᠋ ᠳᠤ ᠰᠠᠭᠤᠳᠠᠭ ᠪᠣᠯᠤᠭᠰᠠᠨ ᠭᠡᠬᠦ ᠨᠢ ᠡᠵᠢ ᠪᠡᠨ ᠬᠠᠢᠷᠠᠯᠠᠭᠰᠠᠨ
ᠠ᠋ᠴᠠ ᠶᠡᠬᠡ ᠬᠠᠲᠤᠨ ᠭᠡᠵᠦ ᠳᠠᠭᠤᠳᠠᠵᠠᠢ᠃
ᠶᠡᠬᠡ ᠬᠠᠲᠤᠨ ᠪᠠᠯᠵᠢᠳᠠᠷᠠ ᠪᠣᠯ ᠴᠡᠴᠡᠨ ᠵᠤᠳᠪᠠᠪᠠᠭᠠᠲᠤᠷ ᠬᠣᠶᠠᠷ ᠤ᠋ᠨ ᠡᠬᠡ ᠪᠢᠯᠡ᠃ ᠡᠬᠡ ᠨᠢ ᠡᠴᠢᠭᠡ ᠬᠣᠩ ᠲᠠᠢᠵᠢ ᠶ᠋ᠢᠨ ᠳᠡᠭᠦᠦ ᠲᠡᠢ ᠳᠡᠷᠡ ᠨᠡᠢᠯᠡᠭᠦᠯᠦᠭᠰᠡᠨ ᠪᠠᠢᠵᠠᠢ᠃
— ᠶᠡᠬᠡ ᠬᠠᠲᠤᠨᠲᠠᠨ ᠠᠮᠤᠭᠤᠯᠠᠩ ᠤᠤ? ᠭᠡᠵᠦ ᠭᠠᠯᠳᠠᠨ ᠯᠠᠮᠠ ᠴᠡᠴᠡᠨ ᠡᠴᠡ ᠳᠠᠭᠠ ᠦᠭᠡᠢᠬᠡᠨ ᠠᠰᠠᠭᠤᠬᠤ ᠳ᠋ᠤ᠌᠂
— ᠡᠵᠢ ᠨᠣᠢᠷ ᠲᠠᠭᠠᠨ ᠰᠠᠢᠨ ᠭᠡᠵᠦ ᠬᠠᠷᠢᠭᠤᠯᠤᠭᠰᠠᠨ ᠨᠢ《ᠴᠢᠮᠠ ᠳ᠋ᠤ᠌ ᠬᠦᠷᠲᠡᠭᠡᠯ ᠦᠭᠡᠢ》 ᠭᠡᠰᠡᠨ ᠲᠡᠢ ᠠᠳᠠᠯᠢ ᠪᠠᠢᠯᠠ᠃ ᠴᠡᠴᠡᠨ ᠲᠠᠢᠵᠢ ᠶ᠋ᠢᠨ ᠳᠠᠭᠠ ᠦᠭᠡᠢ ᠪᠠᠢᠳᠠᠯ ᠢ᠋
ᠲᠦᠢᠪᠡᠭᠦᠯᠬᠦ ᠰᠠᠨᠠᠭᠠ ᠲᠠᠢ ᠭᠠᠯᠳᠠᠨ ᠯᠠᠮᠠ᠂
— ᠡᠴᠢᠭᠡ ᠶ᠋ᠢᠨ ᠰᠢᠷᠠ ᠰᠢᠯᠦᠭᠦᠰᠦ ᠠᠳᠤᠭᠤᠨ ᠰᠦᠷᠦᠭ ᠲᠡᠭᠡᠨ ᠪᠠᠢᠨᠠ ᠤᠤ? ᠭᠡᠬᠦ ᠳ᠋ᠦ᠍ ᠵᠣᠳᠪᠠ ᠨᠣᠶᠠᠨ ᠡᠯᠭᠦᠨ ᠠᠪᠴᠤ᠂
— ᠥᠲᠡᠯᠦᠭᠰᠡᠨ ᠠᠳᠤᠭᠤᠰᠤ ᠬᠠᠮᠢᠭᠠ ᠣᠴᠢᠬᠤᠪ ᠭᠡᠯᠡ᠃
— ᠮᠢᠨᠦ ᠬᠠᠢᠷᠠᠲᠠᠢ ᠮᠣᠷᠢ ᠁! ᠭᠡᠵᠦ ᠭᠠᠯᠳᠠᠨ ᠬᠡᠯᠡᠪᠡ᠃
— ᠰᠢᠷᠠ ᠰᠢᠯᠦᠭᠦᠰᠦ ᠶ᠋ᠢᠨ ᠤᠳᠤᠮ ᠮᠠᠨ ᠤ᠋ ᠰᠦᠷᠦᠭ ᠲᠦ᠍ ᠴᠤ᠌ ᠪᠣᠢ ᠭᠡᠵᠦ
ᠵᠣᠳᠪᠠᠪᠠᠭᠠᠲᠤᠷ ᠨᠣᠶᠠᠨ ᠰᠠᠢᠷᠬᠠᠯᠠ᠃
— ᠠᠳᠤᠭᠤᠨ ᠰᠦᠷᠦᠭ ᠢ᠋ ᠲᠠᠰᠤᠯᠵᠤ ᠲᠠᠭᠤᠳᠠᠭ ᠡᠵᠡᠨ ᠦ᠌ ᠬᠥᠯ ᠢ᠋ ᠮᠤᠬᠤᠷᠯᠠᠵᠤ ᠴᠡᠭᠡᠷ ᠭᠠᠷᠭᠠᠭᠰᠠᠨ ᠭᠡᠳ ᠭᠠᠯᠳᠠᠨ ᠺᠢᠷᠭᠢᠽ ᠡᠬᠡ ᠲᠡᠢ ᠴᠡᠴᠡᠨ᠂ ᠵᠣᠳᠪᠠᠪᠠᠭᠠᠲᠤᠷ ᠬᠣᠶᠠᠷ ᠢ᠋ ᠬᠠᠷᠠᠪᠠ᠃ ᠵᠣᠳᠪᠠᠪᠠᠭᠠᠳᠤᠷ ᠨᠣᠶᠠᠨ ᠨᠢᠳᠦ ᠪᠡᠨ ᠨᠢᠭᠤᠵᠤ᠂ ᠴᠡᠴᠡᠨ ᠲᠠᠢᠵᠢ ᠵᠢᠰᠢᠭᠦᠦ ᠬᠠᠷᠠᠵᠤ ᠪᠠᠢᠯᠠ᠃ ᠡᠷᠲᠡᠨ ᠡᠴᠡ ᠭᠠᠯᠳᠠᠨ ᠠ᠋ᠴᠠ ᠲᠡᠷᠡ ᠬᠣᠶᠠᠷ ᠠᠬᠠ ᠨᠢ ᠬᠠᠷᠠᠴᠠ ᠪᠤᠷᠤᠭᠤᠯᠠᠬᠤ ᠪᠣᠯᠵᠠᠢ᠃ ᠭᠠᠯᠳᠠᠨ ᠯᠠᠮᠠ ᠪᠠᠭᠠ ᠨᠠᠰᠤᠨ ᠠ᠋ᠴᠠ ᠪᠠᠨ ᠲᠡᠳᠡᠨ ᠦ᠌ ᠰᠠᠨᠠᠭᠠ ᠮᠠᠭᠤᠲᠠᠢ ᠭᠡᠳᠡᠭ ᠢ᠋ ᠮᠡᠳᠡᠭᠰᠡᠨ ᠪᠢᠯᠡ᠃
ᠰᠠᠷᠠᠨ ᠤ᠋ ᠴᠠᠭᠠᠨ ᠭᠡᠷᠡᠯ ᠣᠢᠷᠠᠳ ᠤ᠋ᠨ ᠬᠠᠷᠠ ᠲᠠᠯᠠ ᠶ᠋ᠢ ᠳᠦᠭᠦᠷᠭᠡᠵᠡᠢ᠃ ᠬᠠᠭᠠᠨ ᠤ᠋ ᠠᠰᠠᠷ ᠢ᠋ ᠲᠣᠭᠣᠷᠢᠭᠠᠳ ᠣᠯᠠᠨ ᠲᠦᠳᠡᠭ ᠤᠯᠠᠯᠵᠠᠨᠠ᠃
ᠭᠠᠯᠳᠠᠨ ᠯᠠᠮᠠ ᠶ᠋ᠢᠨ ᠬᠡᠢ ᠪᠡᠶᠡ ᠶ᠋ᠢᠨ ᠬᠠᠮᠢᠭᠠ ᠨᠢᠭᠡ ᠲᠡᠢ ᠡᠴᠡ《ᠰᠢᠷᠠ ᠰᠢᠯᠦᠭᠦᠰᠦ ᠰᠠᠢᠬᠠᠨ ᠮᠣᠷᠢ ᠪᠠᠢᠭᠰᠠᠨ᠃ ᠮᠢᠭᠮᠠᠨᠰᠠᠩᠵᠠᠢ ᠰᠠᠢᠨ ᠮᠡᠳᠡᠨᠡ᠃ ᠳᠠᠨᠵᠢᠯᠠ ᠠᠷᠴᠠ ᠬᠣᠶᠠᠷ ᠴᠤ ᠠᠨᠳᠠᠬᠤ ᠦᠭᠡᠢ ᠮᠡᠳᠡᠨᠡ᠃ ᠬᠠᠷᠢᠨ ᠳᠣᠲᠣᠨᠣ ᠶ᠋ᠢᠨ ᠨᠥᠬᠥᠷ ᠭᠠᠢᠳᠠᠪ ᠮᠠᠨᠢ ᠲᠡᠷᠡ ᠰᠠᠢᠬᠠᠨ ᠬᠦᠯᠦᠭ ᠮᠣᠷᠢ ᠶ᠋ᠢ ᠦᠵᠡᠭᠡ ᠦᠭᠡᠢ》 ᠭᠡᠮᠡᠨ ᠪᠣᠳᠣᠭᠳᠠᠪᠠ᠃ ᠲᠡᠭᠡᠭᠡᠳ ᠮᠢᠭᠮᠠᠨᠰᠠᠩᠵᠠᠢ ᠶ᠋ᠢᠨ ᠳᠦᠷᠢ ᠶ᠋ᠢ ᠰᠠᠨᠠᠬᠤ ᠭᠡᠵᠦ ᠭᠠᠯᠳᠠᠨ ᠣᠷᠣᠯᠳᠣᠨᠠ᠃ ᠴᠡᠴᠡᠭ ᠦ᠋ᠨ ᠪᠤᠳᠠᠩ ᠳᠤᠮᠳᠠ ᠮᠢᠭᠮᠠᠨᠰᠠᠩᠵᠠᠢ ᠲᠣᠷᠮᠣᠢᠵᠤ ᠪᠠᠢᠨᠠ᠃ ᠪᠦᠰᠡᠭᠦᠢ ᠶ᠋ᠢᠨ ᠨᠢᠳᠦ ᠭᠠᠯᠳᠠᠨ ᠤ᠋ ᠣᠢ ᠲᠣᠢ ᠳ᠋ᠤ᠌ ᠬᠠᠳᠠᠭᠠᠰᠤᠲᠠᠢ ᠦᠯᠡᠳᠡᠭᠰᠡᠨ ᠶᠦᠮ᠃
ᠡᠨᠡ ᠰᠠᠴᠠᠭᠤ ᠭᠠᠯᠳᠠᠨ《ᠪᠢ ᠲᠠᠢᠭᠠᠨ ᠪᠢᠰᠢ ᠡᠷᠡ ᠬᠥᠮᠦᠨ》ᠭᠡᠮᠡᠨ ᠪᠣᠳᠣᠬᠤ ᠳ᠋ᠠᠭᠠᠨ ᠶᠠᠭᠠᠬᠢᠭᠠᠳ ᠮᠢᠭᠮᠠᠨᠰᠠᠩᠵᠠᠢ ᠰᠠᠨᠠᠭᠳᠠᠭᠠᠳ ᠪᠠᠢᠳᠠᠭ ᠢ᠋ ᠳᠠᠭᠠᠵᠤ ᠶᠠᠳᠠᠪᠠ᠃ ᠲᠡᠭᠦᠨ ᠦ᠌ ᠬᠡᠢ ᠪᠡᠶᠡ᠂ ᠮᠢᠬᠠᠨ ᠪᠡᠶᠡ ᠶ᠋ᠢᠨ ᠠᠯᠢ ᠨᠢᠭᠡ ᠬᠡᠰᠡᠭ ᠲᠦ᠍ ᠮᠢᠭᠮᠠᠨᠰᠠᠩᠵᠠᠢ ᠬᠡᠮᠡᠬᠦ ᠲᠣᠷᠮᠣᠭᠣᠷ ᠳᠥᠯᠭᠡᠬᠡᠨ ᠪᠦᠰᠡᠭᠦᠢ ᠦᠯᠡᠳᠡᠵᠡᠢ᠃
ᠭᠠᠯᠳᠠᠨ ᠪᠦᠰᠡᠭᠦᠢ ᠶ᠋ᠢᠨ ᠳᠦᠷᠢ ᠶ᠋ᠢ ᠨᠢᠳᠦᠨ ᠡᠴᠡ ᠪᠡᠨ ᠬᠥᠭᠡᠭᠡᠬᠦ ᠶ᠋ᠢ ᠬᠦᠰᠡᠭᠰᠡᠨ ᠦᠭᠡᠢ ᠤᠳᠠᠲᠠᠯᠠ ᠰᠠᠭᠤᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠳ᠂ ᠣᠶᠤᠨᠴᠢᠮᠡᠭ᠂ ᠠ᠊·ᠮᠢᠬᠣᠸᠠᠷ᠂ ᠨᠠ᠊᠂ ᠴᠠᠭᠠᠨ᠂ ᠨᠠᠷᠠᠨᠲᠣᠭᠣᠰ᠂ ᠠᠨᠢᠷ᠂ ᠣᠳᠬᠠᠨᠴᠡᠴᠡᠭ᠂ ᠪᠦᠷᠢᠨᠴᠡᠴᠡᠭ᠂ ᠠ᠊·ᠴᠠᠭᠠᠨ᠂ ᠠᠨᠢᠷ᠂ ᠤᠤᠭᠠᠨᠵᠢᠳ᠂ ᠡᠷᠳᠡᠨᠢᠪᠢᠯᠢᠭ᠂ ᠤᠳᠤᠨᠭᠡᠷᠡᠯ᠂ ᠬᠣᠨᠢᠴᠢᠨ ᠴᠠᠰᠤᠨᠠ᠂
ᠬᠢᠨᠠᠭᠴᠢ ᠪᠠᠭᠰᠢ᠄ ᠠᠨᠢᠷ᠂ ᠣᠳᠬᠠᠨᠰᠣᠠ᠂ ᠨᠠᠷᠠᠨ᠂ ᠲᠣᠳᠣᠭᠡᠷᠡᠯ᠂ ᠤᠤᠭᠠᠨᠵᠢᠳ