ᠦᠭᠡ ᠶ᠋ᠢᠨ ᠵᠦᠢ02-03(ᠭᠤᠷᠪᠠ) ᠲᠣᠭᠠᠨ ᠤ᠋ ᠦᠭᠡ ᠪᠠ ᠲᠣᠭᠠᠨ ᠤ᠋ ᠦᠭᠡ ᠡᠭᠦᠰᠬᠦ
200(ᠭᠤᠷᠪᠠ) ᠲᠣᠭᠠᠨ ᠤ᠋ ᠦᠭᠡ ᠪᠠ ᠲᠣᠭᠠᠨ ᠤ᠋ ᠦᠭᠡ ᠡᠭᠦᠰᠬᠦ
ᠬᠥᠮᠦᠨ ᠶᠠᠭᠤᠮᠠ᠂ ᠬᠡᠷᠡᠭ ᠪᠣᠳᠠᠰ ᠪᠠ ᠦᠵᠡᠭᠳᠡᠯ ᠦ᠋ᠨ ᠲᠣᠭᠠ ᠬᠡᠮᠵᠢᠶᠡ᠂ ᠳᠡᠰ ᠳ᠋ᠦ᠍ᠭᠡᠷ᠂ ᠵᠢᠴᠢ ᠦᠢᠯᠡ ᠶ᠋ᠢᠨ ᠪᠣᠯᠤᠭᠰᠠᠨ ᠤᠳᠠᠭᠠ ᠵᠡᠷᠭᠡ ᠶ᠋ᠢ ᠵᠢᠭᠠᠭᠰᠠᠨ ᠦᠭᠡᠰ ᠢ᠋ ᠲᠣᠭᠠᠨ ᠤ᠋ ᠦᠭᠡ ᠭᠡᠨᠡ᠃ ᠲᠣᠭᠠᠨ ᠤ᠋ ᠦᠭᠡ ᠨᠢ ᠬᠡᠳᠦ? ᠬᠡᠳᠦᠨ? ᠬᠡᠳᠦᠳᠦᠭᠡᠷ? ᠬᠡᠳᠦᠭᠦᠯᠡ? ᠬᠡᠳᠦ ᠬᠡᠳᠦᠨ? ᠬᠡᠳᠦᠢ ᠣᠷᠴᠢᠮ? ᠬᠡᠳᠦᠨ ᠤᠳᠠᠭᠠ? ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠬᠠᠷᠢᠭᠤᠯᠬᠤ ᠦᠭᠡᠰ ᠪᠠᠢᠳᠠᠭ᠃
ᠲᠣᠭᠠᠨ ᠤ᠋ ᠦᠭᠡ ᠶ᠋ᠢᠨ ᠠᠢᠮᠠᠭ ᠲᠤ᠌ ᠪᠠᠭᠲᠠᠬᠤ ᠦᠭᠡᠰ ᠢ᠋ ᠤᠳᠬᠠ ᠶ᠋ᠢᠨ ᠲᠠᠯᠠ ᠪᠠᠷ ᠠᠪᠴᠤ ᠦᠵᠡᠪᠡᠯ ᠨᠢᠭᠡ᠂ ᠬᠣᠶᠠᠷ᠂ ᠭᠤᠷᠪᠠ᠂ ᠨᠢᠭᠡᠳᠦᠭᠡᠷ᠂ ᠬᠣᠶᠠᠳᠤᠭᠠᠷ᠂ ᠭᠤᠷᠪᠠᠳᠤᠭᠠᠷ᠂ ᠬᠣᠶᠠᠭᠤᠯᠠ᠂ ᠭᠤᠷᠪᠠᠭᠤᠯᠠ᠂ ᠨᠠᠢ᠍ᠮᠠᠭᠤᠯᠠ᠂ ᠨᠢᠵᠡᠭᠡᠳ᠂ ᠠᠷᠪᠠᠭᠠᠳ᠂ ᠭᠤᠴᠢᠭᠠᠳ᠂ ᠬᠣᠶᠠᠷᠲᠠ᠂ ᠭᠤᠷᠪᠠᠨᠲᠠ᠂ ᠳᠥᠷᠪᠡᠨᠲᠡ᠂ ᠲᠠᠪᠤᠨ ᠤ᠋ ᠨᠢᠭᠡ᠂ ᠳᠣᠯᠣᠭᠠᠨ ᠤ᠋ ᠬᠣᠶᠠᠷ ᠭᠡᠬᠦ ᠮᠡᠲᠦ ᠲᠣᠭᠠᠨ ᠤ᠋ ᠦᠭᠡ ᠪᠠᠢᠬᠤ ᠪᠠ ᠵᠢᠩ᠂ ᠯᠠᠩ᠂ ᠴᠢᠨ᠂ ᠳ᠋ᠧᠦ᠂ ᠱᠧᠩ᠂ ᠠᠶᠠᠭᠠ᠂ ᠮᠧᠲ᠋ᠷ᠂ ᠲᠣᠬᠣᠢ᠂ ᠢᠮᠠᠬᠤ᠂ ᠠᠯᠲᠠ᠂ ᠠᠯᠬᠤᠮ᠂ ᠲᠥᠭᠡ᠂ ᠲᠥᠭᠥᠷᠢᠭ᠂ ᠮᠥᠩᠭᠥ᠂ ᠣᠨ᠂ ᠰᠠᠷᠠ᠂ ᠡᠳᠦᠷ᠂ ᠭᠡᠬᠦ ᠮᠡᠲᠦ ᠬᠡᠮᠵᠢᠭᠦᠷ ᠢ᠋ ᠵᠢᠭᠠᠭᠰᠠᠨ ᠦᠭᠡᠰ ᠪᠠᠢᠳᠠᠭ᠃
ᠲᠣᠭᠠᠨ ᠤ᠋ ᠦᠭᠡ ᠶ᠋ᠢ ᠦᠭᠡ ᠶ᠋ᠢᠨ ᠵᠦᠢ ᠶ᠋ᠢᠨ ᠲᠠᠯᠠ ᠪᠠᠷ ᠠᠪᠴᠤ ᠦᠵᠡᠪᠡᠯ ᠴᠡᠪᠡᠷ ᠲᠣᠭᠠ ᠶ᠋ᠢ ᠵᠢᠭᠠᠭᠰᠠᠨ ᠤᠳᠬᠠ ᠪᠦᠬᠦᠢ ᠭᠠᠵᠠᠷ ᠲᠡᠢᠨ ᠢᠯᠭᠠᠯ ᠤ᠋ᠨ ᠳᠠᠭᠠᠪᠤᠷᠢ᠂ ᠬᠠᠮᠢᠶᠠᠳᠠᠭᠤᠯᠬᠤ ᠶ᠋ᠢᠨ ᠳᠠᠭᠠᠪᠤᠷᠢ᠂ ᠣᠯᠠᠨ ᠲᠣᠭᠠᠨ ᠤ᠋ ᠳᠠᠭᠠᠪᠤᠷᠢ ᠠᠪᠬᠤ ᠦᠭᠡᠢ᠃ ᠬᠡᠷᠪᠡ ᠲᠣᠭᠠᠨ ᠤ᠋ ᠦᠭᠡ ᠨᠢ ᠳᠠᠩ ᠭᠠᠭᠴᠠ ᠦᠨᠳᠦᠰᠦ ᠪᠡᠷ ᠢ᠋ᠶ᠋ᠡᠨ ᠪᠠᠢᠬᠤ ᠪᠣᠯᠪᠠᠴᠤ ᠨᠡᠷᠡ ᠦᠭᠡ ᠶ᠋ᠢᠨ ᠤᠳᠬᠠ ᠪᠠᠷ ᠬᠡᠷᠡᠭᠯᠡᠭᠳᠡᠭᠰᠡᠨ ᠪᠣᠯ ᠲᠡᠢᠨ ᠢᠯᠭᠠᠯ ᠢ᠋ᠶ᠋ᠠᠷ ᠢᠯᠭᠠᠯᠯᠠᠭᠳᠠᠵᠤ᠂ ᠬᠠᠮᠢᠶᠠᠳᠠᠭᠤᠯᠬᠤ ᠶ᠋ᠢᠨ ᠳᠠᠭᠠᠪᠤᠷᠢ ᠲᠠᠢ ᠪᠠᠢᠵᠤ ᠪᠣᠯᠤᠨᠠ᠃ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠲᠣᠭᠠᠨ ᠤ᠋ ᠦᠭᠡ ᠨᠢ ᠴᠡᠷᠢᠭ ᠦ᠋ᠨ ᠵᠠᠬᠢᠷᠭᠠ ᠪᠠ ᠣᠪᠣᠭ ᠠᠢᠮᠠᠭ ᠢ᠋ ᠨᠡᠷᠡᠯᠡᠭᠰᠡᠨ ᠴᠤ᠌ ᠪᠠᠢᠬᠤ ᠪᠥᠭᠡᠳ ᠢᠩᠭᠢᠵᠦ ᠬᠡᠷᠡᠭᠯᠡᠭᠰᠡᠨ ᠭᠠᠵᠠᠷ ᠣᠯᠠᠨ ᠲᠣᠭᠠᠨ ᠤ᠋ ᠳᠠᠭᠠᠪᠤᠷᠢ ᠠᠪᠴᠤ ᠨᠡᠷᠡ ᠦᠭᠡ ᠪᠣᠯᠤᠭᠰᠠᠨ ᠪᠣᠢ᠃
ᠵᠢᠱ᠌ᠢᠶᠡᠯᠡᠪᠡᠯ ᠄ ᠰᠣᠩᠭᠣᠮᠠᠯ ᠵᠣᠬᠢᠶᠠᠯ ᠠ᠋ᠴᠠ ᠲᠠᠪᠤᠨ ᠳᠡᠪᠲᠡᠷ(ᠴᠡᠪᠡᠷ ᠲᠣᠭᠠ) ᠠᠪᠤᠪᠠ᠃
ᠮᠠᠨ ᠤ᠋ ᠪᠠᠭᠰᠢ ᠨᠠᠷ ᠤ᠋ᠨ ᠬᠣᠶᠠᠷ ᠨᠢ(ᠨᠡᠷᠡ ᠦᠭᠡ) ᠰᠤᠷᠤᠯᠴᠠᠬᠤ ᠪᠠᠷ ᠶᠠᠪᠤᠯᠠ᠃
ᠳᠠᠯᠠᠳ ᠬᠣᠰᠢᠭᠤ(ᠨᠡᠷᠡ ᠦᠭᠡ) ᠳᠠᠪᠰᠢᠵᠤ ᠪᠠᠢᠨᠠ᠃
ᠲᠠᠪᠤ ᠶ᠋ᠢ ᠭᠤᠷᠪᠠ ᠪᠠᠷ(ᠨᠡᠷᠡ ᠦᠭᠡ) ᠦᠷᠡᠵᠢᠭᠦᠯᠪᠡᠯ ᠠᠷᠪᠠᠨ ᠲᠠᠪᠤ(ᠴᠡᠪᠡᠷ ᠲᠣᠭᠠ) ᠪᠣᠯᠤᠨᠠ᠃
ᠲᠣᠭᠠᠨ ᠤ᠋ ᠦᠭᠡ ᠶ᠋ᠢ ᠥᠭᠦᠯᠡᠪᠦᠷᠢ ᠶ᠋ᠢᠨ ᠵᠦᠢ ᠶ᠋ᠢᠨ ᠲᠠᠯᠠ ᠪᠠᠷ ᠠᠪᠴᠤ ᠦᠵᠡᠪᠡᠯ ᠭᠣᠣᠯ ᠲᠥᠯᠥᠪ ᠲᠣᠳᠣᠳᠬᠠᠯ᠂ ᠪᠠᠢᠴᠠ ᠪᠣᠯᠬᠤ ᠪᠣᠯᠪᠠᠴᠤ ᠥᠭᠦᠯᠡᠪᠦᠷᠢ ᠶ᠋ᠢᠨ ᠪᠤᠰᠤᠳ ᠶᠠᠮᠠᠷ ᠴᠤ᠌ ᠭᠡᠰᠢᠭᠦᠨ ᠪᠠᠢᠵᠤ ᠪᠣᠯᠤᠨᠠ᠃ ᠥᠭᠦᠯᠡᠭᠳᠡᠬᠦᠨ ᠪᠣᠯᠬᠤ ᠳ᠋ᠠᠭᠠᠨ ᠭᠣᠣᠯ ᠲᠥᠯᠥᠪ《ᠮᠢᠨᠢ᠂ ᠴᠢᠨᠢ᠂ ᠨᠢ》 ᠭᠡᠬᠦ ᠮᠡᠲᠦ ᠶ᠋ᠢᠨ ᠬᠠᠮᠢᠶᠠᠳᠠᠭᠤᠯᠬᠤ ᠶ᠋ᠢᠨ ᠳᠠᠭᠠᠪᠤᠷᠢ ᠲᠠᠢ ᠪᠠᠢᠳᠠᠭ ᠪᠠ ᠲᠤᠰᠤᠭᠳᠠᠬᠤᠨ ᠪᠣᠯᠬᠤ ᠳ᠋ᠠᠭᠠᠨ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠢ᠋ᠶ᠋ᠠᠷ ᠬᠡᠯᠪᠡᠷᠢᠵᠢᠭᠰᠡᠨ ᠪᠠᠢᠳᠠᠭ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠠᠷᠪᠠ ᠨᠢ(ᠥᠭᠦᠯᠡᠭᠳᠡᠬᠦᠨ) ᠢᠷᠡᠯᠡ᠃ ᠬᠣᠷᠢ ᠶ᠋ᠢ(ᠲᠤᠰᠤᠭᠳᠠᠬᠤᠨ) ᠬᠣᠴᠣᠷᠭᠠᠯᠠ᠃ ᠲᠠᠪᠤᠨ ᠤ᠋(ᠲᠣᠳᠣᠳᠬᠠᠯ) ᠭᠤᠷᠪᠠ ᠨᠢ ᠳᠠᠪᠰᠢᠪᠠ᠃ ᠲᠡᠷᠢᠭᠦᠨ ᠦ᠌ ᠠᠵᠢᠯᠲᠠᠨ ᠠᠷᠪᠠᠭᠠᠳ(ᠪᠠᠢᠴᠠ) ᠨᠡᠮᠡᠭᠳᠡᠪᠡ᠃
ᠲᠣᠭᠠᠨ ᠤ᠋ ᠦᠭᠡ ᠶ᠋ᠢ ᠲᠡᠭᠦᠨ ᠦ᠌ ᠤᠳᠬᠠ ᠪᠠ ᠥᠭᠦᠯᠡᠪᠦᠷᠢ ᠳ᠋ᠦ᠍ ᠭᠦᠢᠴᠡᠳᠬᠡᠬᠦ ᠡᠭᠦᠷᠭᠡ᠂ ᠬᠡᠯᠡᠨ ᠦ᠌ ᠵᠦᠢ ᠶ᠋ᠢᠨ ᠬᠡᠯᠪᠡᠷᠢ ᠪᠡᠷ ᠨᠢ ᠦᠨᠳᠦᠰᠦᠯᠡᠨ ᠠᠩᠭᠢᠯᠠᠪᠠᠯ ᠳᠣᠣᠷᠠᠬᠢ ᠮᠡᠲᠦ ᠵᠢᠷᠭᠤᠭᠠᠨ ᠵᠦᠢᠯ ᠪᠣᠢ᠃
1 ᠦᠨᠳᠦᠰᠦᠨ ᠲᠣᠭᠠᠨ ᠤ᠋ ᠦᠭᠡ᠄
ᠨᠢᠭᠡ᠂ ᠬᠣᠶᠠᠷ᠂ ᠭᠤᠷᠪᠠ᠂ ᠲᠠᠪᠤ᠂ ᠳᠣᠯᠣᠭᠠ᠂ ᠠᠷᠪᠠ᠂ ᠵᠠᠭᠤ᠂ ᠮᠢᠩᠭᠠ᠂ ᠲᠦᠮᠡ᠂ ᠳ᠋ᠦᠩᠰᠢᠭᠤᠷ ᠭᠡᠬᠦ ᠮᠡᠲᠦ᠃
2 ᠳᠡᠰ ᠲᠣᠭᠠᠨ ᠤ᠋ ᠦᠭᠡ᠄
ᠦᠨᠳᠦᠰᠦᠨ ᠲᠣᠭᠠᠨ ᠤ᠋ ᠦᠭᠡᠨ ᠳ᠋ᠦ᠍《ᠳ᠋ᠤᠭᠠᠷ᠂ ᠳ᠋ᠦ᠍ᠭᠡᠷ᠂ ᠲᠡᠬᠢ》 ᠳᠠᠭᠠᠪᠤᠷᠢ ᠶ᠋ᠢ ᠵᠠᠯᠭᠠᠬᠤ ᠵᠡᠷᠭᠡ ᠠᠷᠭᠠ ᠪᠠᠷ ᠳᠡᠰ ᠲᠣᠭᠠᠨ ᠤ᠋ ᠦᠭᠡ ᠡᠭᠦᠰᠦᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠨᠢᠭᠡᠳᠦᠭᠡᠷ᠂ ᠬᠣᠶᠠᠳᠤᠭᠠᠷ᠂ ᠭᠤᠷᠪᠠᠳᠤᠭᠠᠷ᠂ ᠠᠷᠪᠠᠳᠤᠭᠠᠷ᠂ ᠭᠤᠴᠢᠳᠤᠭᠠᠷ᠂ ᠲᠠᠪᠢᠳᠤᠭᠠᠷ᠂ ᠵᠠᠭᠤᠳᠤᠭᠠᠷ᠂ ᠮᠢᠩᠭᠠᠳᠤᠭᠠᠷ᠂ ᠭᠤᠲᠠᠭᠠᠷ᠂ ᠲᠦᠳᠡᠬᠡᠷ᠂ ᠨᠢᠭᠡᠳᠡᠬᠢ᠂ ᠬᠣᠶᠠᠳᠠᠬᠢ᠂ ᠭᠤᠷᠪᠠᠳᠠᠬᠢ᠂ ᠳᠥᠷᠪᠡᠳᠡᠬᠢ᠂ ᠲᠠᠪᠤᠳᠠᠬᠢ ᠭᠡᠬᠦ ᠮᠡᠲᠦ᠃
3 ᠬᠠᠮ ᠲᠣᠭᠠᠨ ᠤ᠋ ᠦᠭᠡ᠄
ᠦᠨᠳᠦᠰᠦᠨ ᠲᠣᠭᠠᠨ ᠤ᠋ ᠦᠭᠡᠨ ᠳ᠋ᠦ᠍ 《᠊᠊ᠭᠤᠯᠠ᠂ ᠊᠊ᠬᠦᠯᠡ》 ᠳᠠᠭᠠᠪᠤᠷᠢ ᠵᠠᠯᠭᠠᠵᠤ᠂ ᠬᠠᠮ ᠲᠣᠭᠠᠨ ᠤ᠋ ᠦᠭᠡ ᠡᠭᠦᠰᠦᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠬᠣᠶᠠᠭᠤᠯᠠ᠂ ᠭᠤᠷᠪᠠᠭᠤᠯᠠ᠂ ᠳᠥᠷᠪᠡᠭᠦᠯᠡ᠂ ᠳᠣᠯᠣᠭᠤᠯᠠ᠂ ᠨᠠᠢ᠍ᠮᠠᠭᠤᠯᠠ᠂ ᠠᠷᠪᠠᠭᠤᠯᠠ᠂ ᠠᠷᠪᠠᠨ ᠲᠠᠪᠤᠭᠤᠯᠠ᠂ ᠣᠯᠠᠭᠤᠯᠠ᠂ ᠬᠡᠳᠦᠭᠦᠯᠡ ᠭᠡᠬᠦ ᠮᠡᠲᠦ᠃
4 ᠲᠣᠢᠮᠣ ᠪᠤᠶᠤ ᠲᠦᠭᠡᠭᠡᠯ ᠲᠣᠭᠠᠨ ᠤ᠋ ᠦᠭᠡ᠄
ᠦᠨᠳᠦᠰᠦᠨ ᠲᠣᠭᠠᠨ ᠤ᠋ ᠦᠭᠡᠨ ᠳ᠋ᠦ᠍《᠊ᠭᠠᠳ᠂᠊ᠭᠡᠳ》 ᠳᠠᠭᠠᠪᠤᠷᠢ ᠶ᠋ᠢ ᠵᠠᠯᠭᠠᠬᠤ ᠵᠡᠷᠭᠡ ᠠᠷᠭᠠ ᠪᠠᠷ ᠲᠣᠢᠮᠣ ᠪᠤᠶᠤ ᠲᠦᠭᠡᠭᠡᠯ ᠲᠣᠭᠠᠨ ᠤ᠋ ᠦᠭᠡ ᠡᠭᠦᠰᠦᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠨᠢᠵᠢᠭᠡᠳ᠂ ᠬᠣᠰᠢᠶᠠᠳ᠂ ᠨᠢᠭᠡ ᠨᠢᠭᠡ᠂ ᠬᠣᠶᠠᠷ ᠬᠣᠶᠠᠷ᠂ ᠠᠷᠪᠠ ᠠᠷᠪᠠ᠂ ᠳᠥᠴᠢ ᠳᠥᠴᠢ᠂ ᠵᠠᠭᠤ ᠵᠠᠭᠤ᠂ ᠠᠷᠪᠠ ᠣᠷᠴᠢᠮ᠂ ᠬᠣᠷᠢ ᠣᠷᠴᠢᠮ᠂ ᠠᠷᠪᠠᠭᠠᠳ᠂ ᠬᠣᠷᠢᠭᠠᠳ᠂ ᠲᠠᠪᠢᠭᠠᠳ᠂ ᠵᠠᠭᠤᠭᠠᠳ᠂ ᠮᠢᠩᠭᠠᠭᠠᠳ ᠭᠡᠬᠦ ᠮᠡᠲᠦ᠃
5ᠳᠠᠭᠢᠬᠤ ᠲᠣᠭᠠᠨ ᠤ᠋ ᠦᠭᠡ᠄
ᠦᠨᠳᠦᠰᠦᠨ ᠲᠣᠭᠠᠨ ᠤ᠋ ᠦᠭᠡᠨ ᠳ᠋ᠦ᠍《ᠳᠡ》 ᠳᠠᠭᠠᠪᠤᠷᠢ ᠶ᠋ᠢ ᠵᠠᠯᠭᠠᠬᠤ ᠵᠡᠷᠭᠡ ᠠᠷᠭᠠ ᠪᠠᠷ ᠳᠠᠭᠢᠬᠤ ᠲᠣᠭᠠᠨ ᠤ᠋ ᠦᠭᠡ ᠡᠭᠦᠰᠦᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠭᠤᠷᠪᠠᠨᠲᠠ᠂ ᠳᠥᠷᠪᠡᠨᠲᠡ᠂ ᠶᠢᠰᠦᠨᠲᠡ᠂ ᠠᠷᠪᠠᠨᠲᠠ᠂ ᠵᠠᠭᠤᠨᠲᠠ᠂ ᠮᠢᠩᠭᠠᠨᠲᠠ᠂ ᠬᠣᠶᠠᠷ ᠤᠳᠠᠭᠠ᠂ ᠭᠤᠷᠪᠠᠨ ᠤᠳᠠᠭᠠ᠂ ᠲᠠᠪᠤᠨ ᠳᠠᠬᠢᠨ᠂ ᠳᠣᠯᠣᠭᠠ ᠳᠠᠬᠢᠨ᠂ ᠠᠷᠪᠠ ᠳᠠᠬᠢᠨ ᠭᠡᠬᠦ ᠮᠡᠲᠦ᠃
6 ᠴᠢᠮᠠᠯᠠᠭᠰᠠᠨ᠂ ᠬᠢᠵᠠᠭᠠᠷᠯᠠᠭᠰᠠᠨ ᠲᠣᠭᠠᠨ ᠤ᠋ ᠦᠭᠡ
ᠦᠨᠳᠦᠰᠦᠨ ᠲᠣᠭᠠ᠂ ᠬᠠᠮ ᠲᠣᠭᠠ᠂ ᠲᠣᠢᠮᠣ ᠪᠤᠶᠤ ᠲᠦᠭᠡᠭᠡᠯ ᠲᠣᠭᠠᠨ ᠤ᠋ ᠦᠭᠡᠨ ᠳ᠋ᠦ᠍《᠊ᠬᠠᠨ᠂᠊ᠬᠡᠨ》 ᠳᠠᠭᠠᠪᠤᠷᠢ ᠶ᠋ᠢ ᠵᠠᠯᠭᠠᠬᠤ ᠵᠡᠷᠭᠡ ᠠᠷᠭᠠ ᠪᠠᠷ ᠴᠢᠮᠠᠯᠠᠭᠰᠠᠨ ᠬᠢᠵᠠᠭᠠᠷᠯᠠᠭᠰᠠᠨ ᠲᠣᠭᠠᠨ ᠤ᠋ ᠦᠭᠡ ᠡᠭᠦᠰᠬᠦ ᠪᠠ ᠦᠨᠳᠦᠰᠦᠨ ᠲᠣᠭᠠ ᠶ᠋ᠢ ᠲᠡᠢᠨ ᠢᠯᠭᠠᠯ ᠢ᠋ᠶ᠋ᠠᠷ ᠬᠡᠯᠪᠡᠷᠢᠵᠢᠭᠦᠯᠪᠡᠯ ᠬᠢᠵᠠᠭᠠᠷᠯᠠᠬᠤ ᠰᠠᠨᠠᠭᠠ ᠶ᠋ᠢ ᠢᠯᠡᠳᠬᠡᠭᠰᠡᠨ ᠲᠣᠭᠠᠨ ᠤ᠋ ᠦᠭᠡ ᠡᠭᠦᠰᠴᠦ ᠪᠣᠯᠤᠨᠠ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠬᠣᠶᠠᠷᠬᠠᠨ᠂ ᠭᠤᠷᠪᠠᠬᠠᠨ᠂ ᠳᠦᠷᠪᠡᠭᠡᠨ᠂ ᠬᠣᠶᠠᠭᠤᠯᠠᠬᠠᠨ᠂ ᠭᠤᠷᠪᠠᠭᠤᠯᠠᠬᠠᠨ᠂ ᠳᠥᠷᠪᠡᠭᠦᠯᠡᠬᠡᠨ᠂ ᠠᠷᠪᠠᠭᠠᠳᠬᠠᠨ᠂ ᠬᠣᠷᠢᠭᠠᠳᠬᠠᠨ᠂ ᠭᠤᠴᠢᠭᠠᠳᠬᠠᠨ᠂ ᠭᠤᠷᠪᠠᠨ ᠤ᠋ ᠨᠢᠭᠡ᠂ ᠠᠷᠪᠠᠨ ᠤ᠋ ᠬᠣᠶᠠᠷ᠂ ᠳᠥᠴᠢ ᠶᠢᠰᠦᠨ ᠦ᠌ ᠳᠣᠯᠣᠭᠠ᠂ ᠭᠤᠷᠪᠠᠨ ᠰᠠᠷᠠ ᠶ᠋ᠢᠨ ᠨᠠᠢ᠍ᠮᠠᠨ᠂ ᠲᠠᠪᠤᠨ ᠰᠠᠷᠠ ᠶ᠋ᠢᠨ ᠨᠢᠭᠡᠨ᠂ ᠥᠷᠯᠥᠭᠡᠨ ᠦ᠌ ᠨᠠᠢ᠍ᠮᠠᠨ ᠴᠠᠭ᠂ ᠦᠳᠡ ᠶ᠋ᠢᠨ ᠠᠷᠪᠠᠨ ᠬᠣᠶᠠᠷ ᠴᠠᠭ᠂ ᠣᠷᠣᠢ ᠶ᠋ᠢᠨ ᠳᠣᠯᠣᠭᠠᠨ ᠴᠠᠭ᠂ ᠰᠥᠨᠢ ᠶ᠋ᠢᠨ ᠬᠣᠶᠠᠷ ᠴᠠᠭ᠂ ᠠᠷᠪᠠᠨ ᠲᠠᠪᠤᠨ ᠠ᠋ᠴᠠ ᠬᠣᠢᠰᠢ᠂ ᠬᠣᠷᠢᠨ ᠢ᠋ ᠥᠩᠭᠡᠷᠡᠪᠡᠯ᠂ ᠠᠷᠪᠠᠨ ᠰᠠᠷᠠ ᠶ᠋ᠢᠨ ᠨᠢᠭᠡᠨ ᠳ᠋ᠦ᠍ ᠭᠡᠬᠦ ᠮᠡᠲᠦ᠃
ᠬᠥᠮᠦᠨ ᠶᠠᠭᠤᠮᠠ᠂ ᠦᠯᠡ ᠬᠥᠳᠡᠯᠭᠡᠭᠡᠨ ᠦ᠌ ᠬᠡᠮᠵᠢᠶᠡ ᠪᠤᠶᠤ ᠨᠢᠭᠡᠴᠢ ᠶ᠋ᠢ ᠵᠢᠭᠠᠭᠰᠠᠨ ᠦᠭᠡᠰ ᠢ᠋ ᠬᠡᠮᠵᠢᠭᠦᠷ ᠦ᠋ᠨ ᠦᠭᠡ ᠭᠡᠳᠡᠭ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠲᠤᠨ᠂ ᠵᠢᠩ᠂ ᠯᠠᠩ᠂ ᠴᠢᠨ᠂ ᠳ᠋ᠧᠦ᠂ ᠱᠧᠩ᠂ ᠠᠶᠠᠭᠠ᠂ ᠰᠢᠨᠠᠭᠠ᠂ ᠪᠢᠲᠡᠭᠦᠦ᠂ ᠯᠣᠩᠬᠣ᠂ ᠠᠯᠲᠠ᠂ ᠮᠧᠲ᠋ᠷ᠂ ᠲᠣᠬᠣᠢ᠂ ᠢᠮᠠᠬᠤ᠂ ᠲᠥᠭᠥᠷᠢᠭ᠂ ᠮᠥᠩᠭᠥ ᠮᠢᠨᠦ᠋ᠲ᠂ ᠰᠠᠭᠤᠷᠢ᠂ ᠪᠠᠭᠴᠠ᠂ ᠬᠡᠰᠡᠭ᠂ ᠪᠦᠯᠦᠭ᠂ ᠪᠠᠳᠠᠭ᠂ ᠵᠠᠬᠠ᠂ ᠲᠣᠯᠣᠭᠠᠢ᠂ ᠰᠦᠷᠦᠭ᠂ ᠬᠣᠣᠰ᠂ ᠤᠳᠠᠭᠠ᠂ ᠳᠠᠬᠢᠨ᠂ ᠠᠯᠬᠤᠮ᠂ ᠲᠥᠭᠡ᠂ ᠰᠥᠭᠥᠮ ᠭᠡᠬᠦ ᠮᠡᠲᠦ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠬᠡᠯᠡᠰᠣᠶᠣᠯ (ᠪᠤᠤ ᠵᠢᠨ ᠬᠤᠸᠠ)᠂ ᠳ᠂ ᠣᠶᠤᠨᠪᠢᠯᠢᠭ᠌᠂ ᠠᠯᠲᠠᠨᠴᠢᠮᠡᠭ᠂ ᠨᠠᠷᠠᠨᠲᠤᠶᠠᠭᠠ᠂ ᠤᠷᠠᠨᠴᠢᠮᠡᠭ
ᠬᠢᠨᠠᠭᠴᠢ᠄ ᠨᠠᠷᠠᠨ᠂ ᠣᠳᠬᠠᠨᠰᠣᠠ