ᠦᠭᠡ ᠶ᠋ᠢᠨ ᠵᠦᠢ01ᠮᠣᠩᠭᠣᠯ ᠬᠡᠯᠡᠨ ᠦ ᠦᠭᠡ ᠶ᠋ᠢᠨ ᠪᠦᠲᠦᠴᠡÜgiin züiҮгийн зүй
283ᠮᠣᠩᠭᠣᠯ ᠬᠡᠯᠡᠨ ᠦ᠌ ᠦᠭᠡ ᠶ᠋ᠢᠨ ᠵᠦᠢ
ᠮᠣᠩᠭᠣᠯ ᠬᠡᠯᠡᠨ ᠦ᠌ ᠲᠣᠭᠲᠠᠭᠰᠠᠨ ᠤᠳᠬᠠ ᠲᠠᠢ ᠪᠥᠭᠡᠳ ᠪᠡᠶᠡ ᠪᠡᠨ ᠳᠠᠭᠠᠭᠠᠵᠤ ᠬᠡᠷᠡᠭᠯᠡᠭᠳᠡᠳᠡᠭ ᠬᠠᠮᠤᠭ ᠤ᠋ᠨ ᠵᠢᠵᠢᠭ ᠨᠢᠭᠡᠴᠢ ᠶ᠋ᠢ ᠦᠭᠡ ᠭᠡᠨᠡ᠃ ᠮᠣᠩᠭᠣᠯ ᠬᠡᠯᠡᠨ ᠳ᠋ᠦ᠍ ᠦᠭᠡ ᠪᠦᠲᠦᠬᠦ ᠪᠠ ᠦᠭᠡ ᠬᠤᠪᠢᠯᠬᠤ ᠶ᠋ᠢᠨ ᠲᠤᠬᠠᠢ ᠬᠡᠯᠡᠨ ᠦ᠌ ᠵᠦᠢ ᠶ᠋ᠢᠨ ᠨᠢᠭᠡ ᠰᠠᠯᠪᠤᠷᠢ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠢ᠋ ᠦᠭᠡ ᠶ᠋ᠢᠨ ᠵᠦᠢ ᠭᠡᠨᠡ᠃ ᠦᠭᠡ ᠶ᠋ᠢᠨ ᠵᠦᠢ ᠳ᠋ᠦ᠍᠂ ᠦᠭᠡ ᠶ᠋ᠢᠨ ᠬᠡᠯᠡᠨ ᠦ᠌ ᠵᠦᠢ ᠶ᠋ᠢᠨ ᠤᠳᠬᠠ᠂ ᠬᠡᠯᠪᠡᠷᠢ ᠶ᠋ᠢ ᠴᠢᠬᠤᠯᠠᠴᠢᠯᠠᠨ ᠰᠤᠳᠤᠯᠬᠤ ᠡᠴᠡ ᠭᠠᠳᠠᠨᠠ᠂ ᠬᠡᠯᠡᠨ ᠦ᠌ ᠵᠦᠢ ᠶ᠋ᠢᠨ ᠤᠳᠬᠠ ᠬᠡᠯᠪᠡᠷᠢ ᠲᠡᠢ ᠨᠢᠭᠲᠠ ᠬᠣᠯᠪᠣᠭᠠ ᠪᠦᠬᠦᠢ ᠦᠭᠡ ᠪᠦᠲᠦᠬᠦ ᠶ᠋ᠢᠨ ᠶᠣᠰᠣᠨ᠂ ᠦᠭᠡᠰ ᠦ᠋ᠨ ᠬᠡᠢᠰᠪᠦᠷᠢ ᠤᠳᠬᠠ᠂ᠦᠭᠡ ᠪᠠ ᠥᠭᠦᠯᠡᠪᠦᠷᠢ ᠶ᠋ᠢᠨ ᠵᠦᠢ ᠶ᠋ᠢᠨ ᠬᠢᠨᠢ ᠣᠨᠴᠠᠯᠢᠭ ᠳᠡᠭᠡᠷᠡ ᠦᠨᠳᠦᠰᠦᠯᠡᠨ ᠪᠦᠬᠦ ᠦᠭᠡᠰ ᠢ᠋ ᠠᠢᠮᠠᠭᠯᠠᠬᠤ ᠶᠣᠰᠣᠨ ᠢ᠋ ᠪᠠᠰᠠ ᠰᠤᠳᠤᠯᠤᠨᠠ᠃
ᠨᠢᠭᠡ᠃ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠦᠭᠡ ᠶ᠋ᠢᠨ ᠪᠦᠲᠦᠴᠡ
ᠮᠣᠩᠭᠣᠯ ᠦᠭᠡ ᠶ᠋ᠢ ᠲᠡᠭᠦᠨ ᠦ᠌ ᠤᠳᠬᠠ ᠶ᠋ᠢᠨ ᠲᠠᠯᠠ ᠪᠠ ᠬᠡᠯᠡᠨ ᠦ᠌ ᠵᠦᠢ ᠶ᠋ᠢᠨ ᠬᠡᠯᠪᠡᠷᠢ ᠶ᠋ᠢᠨ ᠲᠠᠯᠠ ᠡᠴᠡ ᠠᠪᠴᠤ ᠦᠵᠡᠪᠡᠯ ᠨᠢᠭᠡ ᠪᠤᠶᠤ ᠬᠡᠳᠦ ᠬᠡᠳᠦᠨ ᠤᠳᠬᠠ ᠪᠦᠬᠦᠢ ᠬᠡᠰᠡᠭ ᠢ᠋ᠶ᠋ᠡᠷ ᠪᠦᠷᠢᠯᠳᠦᠭᠰᠡᠨ ᠪᠠᠢᠳᠠᠭ᠃ ᠵᠢᠱ᠌ᠢᠶᠡᠯᠡᠪᠡᠯ᠄《ᠰᠤᠷᠤᠭᠴᠢ》 ᠭᠡᠰᠡᠨ ᠦᠭᠡ ᠨᠢ《ᠰᠤᠷ》᠂《ᠰᠤᠷᠤᠭᠴᠢ》 ᠭᠡᠰᠡᠨ ᠬᠣᠶᠠᠷ ᠵᠦᠢᠯ ᠦ᠋ᠨ ᠤᠳᠬᠠ ᠪᠦᠬᠦᠢ ᠬᠡᠰᠡᠭ ᠡᠴᠡ ᠪᠦᠲᠦᠭᠰᠡᠨ ᠪᠠ《ᠮᠡᠳᠡᠭᠦᠯᠪᠡ》 ᠭᠡᠰᠡᠨ ᠦᠭᠡ ᠨᠢ《ᠮᠡᠳᠡ》᠂《ᠮᠡᠳᠡᠭᠦᠯ》᠂《ᠮᠡᠳᠡᠭᠦᠯᠪᠡ》 ᠭᠡᠬᠦ ᠮᠡᠲᠦ ᠭᠤᠷᠪᠠᠨ ᠵᠦᠢᠯ ᠦ᠋ᠨ ᠤᠳᠬᠠ ᠪᠦᠬᠦᠢ ᠬᠡᠰᠡᠭ ᠡᠴᠡ ᠪᠦᠲᠦᠵᠡᠢ᠃《ᠰᠤᠷ》᠂《ᠮᠡᠳᠡ》 ᠭᠡᠳᠡᠭ ᠨᠢ ᠤᠤᠯ ᠦᠭᠡ ᠶ᠋ᠢᠨ ᠦᠨᠳᠦᠰᠦᠨ ᠤᠳᠬᠠ ᠶ᠋ᠢ ᠢᠯᠡᠷᠡᠭᠦᠯᠵᠦ᠂《ᠰᠤᠷᠤᠭᠴᠢ》᠂《ᠮᠡᠳᠡᠭᠦᠯ》᠂《ᠮᠡᠳᠡᠭᠦᠯᠪᠡ》 ᠭᠡᠳᠡᠭ ᠨᠢ ᠲᠤᠬᠠᠢ ᠶ᠋ᠢᠨ ᠦᠢᠯᠡ ᠶᠠᠪᠤᠳᠠᠯ ᠢ᠋ ᠭᠦᠢᠴᠡᠳᠬᠡᠬᠦ ᠡᠵᠡᠨ ᠡᠲᠡᠭᠡᠳ ᠢ᠋ ᠵᠢᠭᠠᠭᠰᠠᠨ ᠪᠤᠶᠤ ᠤᠤᠯ ᠦᠭᠡ ᠶ᠋ᠢᠨ ᠤᠳᠬᠠ ᠳᠠᠭᠠᠤ ᠲᠥᠷᠥᠯ ᠦᠭᠡ ᠪᠣᠢ ᠪᠣᠯᠵᠤ ᠰᠢᠨᠡ ᠤᠳᠬᠠ ᠶ᠋ᠢ ᠢᠯᠡᠷᠡᠭᠦᠯᠪᠡ᠃ ᠡᠨᠡ ᠮᠡᠲᠦ ᠪᠡᠷ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠦᠭᠡᠰ ᠨᠢ ᠦᠨᠳᠦᠰᠦᠨ ᠤᠳᠬᠠ ᠶ᠋ᠢ ᠬᠠᠳᠠᠭᠠᠯᠠᠭᠰᠠᠨ ᠢᠵᠠᠭᠤᠷ ᠤ᠋ᠨ ᠬᠡᠰᠡᠭ ᠭᠡᠵᠦ ᠪᠠᠢᠬᠤ ᠪᠥᠭᠡᠳ ᠳᠠᠭᠠᠪᠤᠷᠢ ᠵᠠᠯᠭᠠᠬᠤ ᠳ᠋ᠤ᠌ ᠡᠭᠦᠰᠦᠭᠰᠡᠨ ᠰᠢᠨᠡ ᠤᠳᠬᠠ ᠶ᠋ᠢ ᠢᠯᠡᠷᠡᠭᠦᠯᠬᠦ ᠡᠭᠦᠰᠦᠮᠡᠯ ᠬᠡᠰᠡᠭ ᠭᠡᠵᠦ ᠪᠠᠢᠬᠤ ᠲᠤᠯᠠ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠦᠭᠡᠰ ᠢ᠋ ᠢᠵᠠᠭᠤᠷ᠂ ᠦᠨᠳᠦᠰᠦ᠂ ᠳᠠᠭᠠᠪᠤᠷᠢ ᠭᠡᠵᠦ ᠢᠯᠭᠠᠵᠤ ᠪᠣᠯᠳᠠᠭ᠃
ᠦᠭᠡ ᠶ᠋ᠢᠨ ᠢᠵᠠᠭᠤᠷ
ᠦᠭᠡ ᠶ᠋ᠢᠨ ᠤᠳᠬᠠ ᠶ᠋ᠢ ᠨᠢ ᠰᠤᠳᠤᠯᠬᠤ ᠳ᠋ᠤ᠌ ᠴᠠᠭᠠᠰᠢ ᠵᠠᠳᠠᠯᠵᠤ ᠪᠣᠯᠬᠤ ᠦᠭᠡᠢ ᠪᠣᠯᠤᠭᠰᠠᠨ᠂ ᠦᠭᠡ ᠶ᠋ᠢᠨ ᠢᠵᠠᠭᠤᠷ ᠤ᠋ᠨ ᠤᠳᠬᠠ ᠶ᠋ᠢ ᠬᠠᠳᠠᠭᠠᠯᠠᠵᠤ ᠪᠠᠢᠭᠠ ᠬᠡᠰᠡᠭ ᠢ᠋ ᠦᠭᠡ ᠶ᠋ᠢᠨ ᠨᠢᠭᠡᠳᠦᠭᠡᠷ ᠦᠨᠳᠦᠰᠦ ᠭᠡᠬᠦ ᠪᠤᠶᠤ ᠦᠭᠡ ᠶ᠋ᠢᠨ ᠢᠵᠠᠭᠤᠷ ᠭᠡᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄《ᠰᠤᠷᠤᠭᠴᠢ᠂ ᠮᠡᠳᠡᠭᠡᠷᠡᠢ᠂ ᠶᠠᠪᠤᠭᠲᠤᠨ᠂ ᠮᠠᠯᠴᠢᠨ᠂ ᠲᠠᠷᠢᠶᠠᠴᠢᠨ》᠂《ᠠᠭᠰᠠᠨ᠂ ᠠᠰᠤᠭᠠᠢ᠂ ᠪᠥᠯᠥᠭᠡ᠂ ᠬᠣᠢᠭᠤᠷ᠂ ᠬᠣᠢᠨᠠ》 ᠭᠡᠬᠦ ᠮᠡᠲᠦ ᠶ᠋ᠢᠨ ᠦᠭᠡᠰ ᠦ᠋ᠨ《ᠰᠤᠷ᠂ ᠮᠡᠳᠡ᠂ ᠶᠠᠪᠤ᠂ ᠳᠠᠷᠢ》᠂《ᠠ᠊᠂ ᠪᠦ᠊᠂ ᠬᠤᠢ》 ᠭᠡᠰᠡᠨ ᠬᠡᠰᠡᠭ ᠨᠢ ᠴᠠᠭᠠᠰᠢ ᠳᠠᠬᠢᠨ ᠦᠭᠡ ᠶ᠋ᠢᠨ ᠦᠨᠳᠦᠰᠦ᠂ ᠳᠠᠭᠠᠪᠤᠷᠢ ᠪᠠᠷ ᠵᠠᠳᠠᠯᠵᠤ ᠪᠣᠯᠬᠤ ᠦᠭᠡᠢ ᠶᠦᠮ᠃ ᠡᠨᠡ ᠨᠢ ᠦᠭᠡ ᠶ᠋ᠢᠨ ᠢᠵᠠᠭᠤᠷ ᠪᠤᠶᠤ ᠨᠢᠭᠡᠳᠦᠭᠡᠷ ᠦᠨᠳᠦᠰᠦ ᠪᠣᠯᠤᠨᠠ᠃
ᠦᠭᠡ ᠶ᠋ᠢᠨ ᠢᠵᠠᠭᠤᠷ ᠢ᠋ ᠪᠠᠰᠠ ᠠᠮᠢᠳᠤ ᠢᠵᠠᠭᠤᠷ ᠪᠠ ᠮᠥᠬᠥᠭᠰᠡᠨ ᠢᠵᠠᠭᠤᠷ ᠭᠡᠵᠦ ᠬᠣᠶᠠᠷ ᠵᠦᠢᠯ ᠢ᠋ᠶ᠋ᠡᠷ ᠬᠤᠪᠢᠶᠠᠵᠤ ᠪᠣᠢ᠃ ᠮᠣᠩᠭᠣᠯ ᠬᠡᠯᠡ ᠳ᠋ᠦ᠍ ᠪᠡᠶᠡ ᠪᠡᠨ ᠳᠠᠭᠠᠭᠠᠵᠤ ᠬᠡᠷᠡᠭᠯᠡᠭᠳᠡᠨ᠂ ᠶᠠᠮᠠᠷ ᠨᠢᠭᠡᠨ ᠤᠳᠬᠠ ᠶ᠋ᠢ ᠢᠯᠡᠳᠬᠡᠵᠦ ᠪᠠᠢᠭᠠ ᠢᠵᠠᠭᠤᠷ ᠢ᠋ ᠠᠮᠢᠳᠤ ᠢᠵᠠᠭᠤᠷ ᠭᠡᠬᠦ ᠪᠠ ᠪᠡᠶᠡ ᠪᠡᠨ ᠳᠠᠭᠠᠭᠠᠭᠰᠠᠨ ᠤᠳᠬᠠ ᠦᠭᠡᠢ᠂ ᠵᠥᠪᠬᠡᠨ ᠳᠠᠭᠠᠪᠤᠷᠢ ᠲᠠᠢ ᠪᠠᠨ ᠨᠡᠢᠯᠡᠭᠡᠳ ᠰᠠᠶᠢ ᠶᠠᠮᠠᠷ ᠨᠢᠭᠡᠨ ᠤᠳᠬᠠ ᠶ᠋ᠢ ᠢᠯᠡᠷᠡᠭᠦᠯᠵᠦ ᠪᠠᠢᠭᠠ ᠢᠵᠠᠭᠤᠷ ᠢ᠋ ᠮᠥᠬᠥᠭᠰᠡᠨ ᠢᠵᠠᠭᠤᠷ ᠭᠡᠳᠡᠭ᠃ ᠳᠡᠭᠡᠷᠡᠬᠢ ᠵᠢᠱ᠌ᠢᠶᠡᠨ ᠳ᠋ᠡᠬᠢ《ᠰᠤᠷ᠂ ᠮᠡᠳᠡ᠂ ᠶᠠᠪᠤ᠂ ᠮᠠᠯ᠂ ᠳᠠᠷᠢ》 ᠪᠣᠯ ᠠᠮᠢᠳᠤ ᠢᠵᠠᠭᠤᠷ ᠮᠥᠨ᠂《ᠠ᠊᠂ ᠪᠦ᠊᠂ ᠬᠤᠢ》 ᠪᠣᠯ ᠮᠥᠬᠥᠭᠰᠡᠨ ᠢᠵᠠᠭᠤᠷ ᠪᠣᠯᠤᠨᠠ᠃
ᠦᠭᠡ ᠶ᠋ᠢᠨ ᠦᠨᠳᠦᠰᠦ
ᠦᠭᠡᠰ ᠦ᠋ᠨ ᠪᠦᠷᠢᠯᠳᠦᠬᠦᠨ ᠦ᠌ ᠤᠳᠬᠠ ᠶ᠋ᠢ ᠬᠠᠳᠠᠭᠠᠯᠠᠵᠤ᠂ ᠦᠭᠡ ᠶ᠋ᠢᠨ ᠵᠦᠢ ᠶ᠋ᠢᠨ ᠶᠣᠰᠣᠭᠠᠷ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠳᠠᠭᠠᠪᠤᠷᠢ ᠵᠠᠯᠭᠠᠵᠤ ᠴᠢᠨᠠᠭᠰᠢ ᠪᠠᠨ ᠬᠤᠪᠢᠯᠵᠤ ᠪᠣᠯᠬᠤ ᠦᠭᠡ ᠶ᠋ᠢᠨ ᠲᠡᠢᠮᠦ ᠬᠡᠰᠡᠭ ᠢ᠋ ᠦᠭᠡ ᠶ᠋ᠢᠨ ᠦᠨᠳᠦᠰᠦ ᠭᠡᠨᠡ᠃ ᠦᠭᠡ ᠶ᠋ᠢᠨ ᠦᠨᠳᠦᠰᠦ ᠪᠣᠯ ᠤᠤᠯ ᠦᠭᠡ ᠶ᠋ᠢᠨ ᠦᠨᠳᠦᠰᠦᠨ ᠤᠳᠬᠠ ᠶ᠋ᠢ ᠵᠢᠭᠠᠵᠤ᠂ ᠦᠭᠡᠨ ᠳ᠋ᠦ᠍ ᠰᠢᠨᠡ ᠤᠳᠬᠠ ᠣᠷᠣᠭᠤᠯᠬᠤ ᠲᠡᠳᠦᠢ ᠡᠭᠦᠷᠭᠡ ᠲᠡᠢ ᠶᠦᠮ᠃ ᠦᠭᠡ ᠶ᠋ᠢᠨ ᠢᠵᠠᠭᠤᠷ ᠲᠤ᠌ ᠦᠭᠡ ᠪᠦᠲᠦᠭᠡᠬᠦ ᠳᠠᠭᠠᠪᠤᠷᠢ ᠶ᠋ᠢ ᠵᠠᠯᠭᠠᠪᠠᠯ ᠦᠭᠡ ᠶ᠋ᠢᠨ ᠬᠣᠶᠠᠳᠤᠭᠠᠷ᠂ ᠭᠤᠷᠪᠠᠳᠤᠭᠠᠷ᠂ ᠳᠥᠷᠪᠡᠳᠦᠭᠡᠷ ᠭᠡᠬᠦ ᠮᠡᠲᠦ ᠪᠡᠷ ᠬᠡᠳᠦ ᠬᠡᠳᠦᠨ ᠰᠢᠨᠡ ᠦᠨᠳᠦᠰᠦ ᠪᠣᠢ ᠪᠣᠯᠵᠤ ᠰᠢᠨᠡ ᠤᠳᠬᠠ ᠶ᠋ᠢ ᠢᠯᠡᠷᠡᠭᠦᠯᠳᠡᠭ᠃᠃
ᠵᠢᠱ᠌ᠢᠶᠡᠯᠡᠪᠡᠯ᠄《ᠰᠤᠷ— ᠰᠣᠷᠣᠭ᠂ ᠰᠤᠷᠤᠭᠴᠢ᠂ ᠰᠤᠷᠤᠭᠴᠢᠳ》《ᠪᠦᠯᠬᠦᠮ— ᠪᠦᠯᠬᠦᠮᠳᠡ᠂ ᠪᠦᠯᠬᠦᠮᠳᠡᠬᠦᠯ᠂
ᠪᠦᠯᠬᠦᠮᠳᠡᠬᠦᠯᠦᠭᠰᠡᠨ》 ᠭᠡᠬᠦ ᠮᠡᠲᠦ ᠪᠡᠷ《ᠰᠤᠷ᠂ ᠪᠦᠯᠬᠦᠮ》 ᠭᠡᠰᠡᠨ ᠢᠵᠠᠭᠤᠷ ᠦᠨᠳᠦᠰᠦᠨ ᠳ᠋ᠦ᠍ ᠳᠠᠭᠠᠪᠤᠷᠢ ᠵᠠᠯᠭᠠᠵᠤ᠂ ᠤᠤᠯ ᠦᠭᠡ ᠶ᠋ᠢᠨ ᠲᠥᠷᠥᠯ ᠤᠳᠬᠠ ᠪᠦᠬᠦᠢ ᠡᠭᠦᠰᠦᠮᠡᠯ ᠦᠨᠳᠦᠰᠦ ᠬᠣᠶᠠᠳᠤᠭᠠᠷ᠂ ᠭᠤᠷᠪᠠᠳᠤᠭᠠᠷ᠂ ᠳᠥᠷᠪᠡᠳᠦᠭᠡᠷ ᠦᠨᠳᠦᠰᠦ ᠡᠭᠦᠰᠴᠡᠢ᠃
ᠦᠭᠡ ᠶ᠋ᠢᠨ ᠳᠠᠭᠠᠪᠤᠷᠢ
ᠦᠭᠡ ᠶ᠋ᠢᠨ ᠢᠵᠠᠭᠤᠷ ᠦᠨᠳᠦᠰᠦ ᠳ᠋ᠦ᠍ ᠵᠠᠯᠭᠠᠵᠤ᠂ ᠤᠤᠯ ᠦᠭᠡᠨ ᠳ᠋ᠦ᠍ ᠰᠢᠨᠡ ᠤᠳᠬᠠ ᠣᠷᠣᠭᠤᠯᠬᠤ ᠪᠠ ᠦᠭᠡᠰ ᠦ᠋ᠨ ᠬᠣᠭᠣᠷᠣᠨᠳᠣᠬᠢ ᠬᠣᠯᠪᠣᠭᠳᠠᠯ ᠊ᠢ ᠵᠢᠭᠠᠬᠤ ᠬᠡᠰᠡᠭ ᠊ᠢ ᠦᠭᠡ ᠶ᠋ᠢᠨ ᠳᠠᠭᠠᠪᠤᠷᠢ ᠭᠡᠨᠡ᠃ ᠦᠭᠡ ᠶ᠋ᠢᠨ ᠳᠠᠭᠠᠪᠤᠷᠢ ᠳ᠋ᠤ᠌ ᠦᠭᠡ ᠪᠦᠲᠦᠭᠡᠬᠦ ᠳᠠᠭᠠᠪᠤᠷᠢ ᠪᠠ ᠦᠭᠡ ᠬᠤᠪᠢᠯᠭᠠᠬᠤ ᠳᠠᠭᠠᠪᠤᠷᠢ ᠭᠡᠵᠦ ᠪᠠᠢᠳᠠᠭ᠃ ᠨᠢᠭᠡ ᠦᠭᠡ ᠡᠴᠡ ᠥᠭᠡᠷᠡ ᠰᠢᠨᠡ ᠦᠭᠡ ᠪᠦᠲᠦᠭᠡᠬᠦ ᠳ᠋ᠦ᠍ ᠬᠡᠷᠡᠭᠯᠡᠬᠦ ᠳᠠᠭᠠᠪᠤᠷᠢ ᠶ᠋ᠢ ᠦᠭᠡ ᠪᠦᠲᠦᠭᠡᠬᠦ ᠳᠠᠭᠠᠪᠤᠷᠢ ᠭᠡᠳᠡᠭ᠃ ᠨᠡᠷᠡ ᠦᠭᠡ ᠶ᠋ᠢᠨ ᠲᠡᠢᠨ ᠢᠯᠭᠠᠯ᠂ ᠣᠯᠠᠨ ᠲᠣᠭᠠ᠂ ᠬᠠᠮᠢᠶᠠᠳᠠᠭᠤᠯᠬᠤ᠂ ᠦᠢᠯᠡ ᠦᠭᠡ ᠶ᠋ᠢᠨ ᠬᠡᠯᠪᠡᠷᠢ᠂ ᠬᠡᠪ᠂ ᠪᠠᠢᠳᠠᠯ ᠵᠡᠷᠭᠡ ᠬᠡᠯᠡᠨ ᠦ᠌ ᠵᠦᠢ ᠶ᠋ᠢᠨ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠤᠳᠬᠠ ᠶ᠋ᠢ ᠢᠯᠡᠷᠡᠭᠦᠯᠬᠦ ᠳᠠᠭᠠᠪᠤᠷᠢ ᠶ᠋ᠢ ᠦᠭᠡ ᠬᠤᠪᠢᠯᠭᠠᠬᠤ ᠳᠠᠭᠠᠪᠤᠷᠢ ᠭᠡᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄《ᠮᠣᠳᠣ— ᠮᠣᠳᠣᠴᠢᠨ》᠂《ᠡᠷᠡ— ᠡᠷᠡᠯᠬᠡᠭ》᠂《ᠦᠵᠡ— ᠦᠵᠡᠭᠴᠢ》 ᠭᠡᠬᠦ ᠮᠡᠲᠦ ᠶ᠋ᠢᠨ ᠦᠭᠡᠰ ᠦ᠋ᠨ《ᠮᠣᠳᠣ᠂ ᠡᠷᠡ᠂ ᠦᠵᠡ》 ᠭᠡᠳᠡᠭ ᠨᠢ ᠤᠤᠯ ᠦᠭᠡᠰ ᠦ᠋ᠨ ᠢᠵᠠᠭᠤᠷ ᠤ᠋ᠨ ᠤᠳᠬᠠ ᠶ᠋ᠢ ᠢᠯᠡᠷᠡᠭᠦᠯᠦᠭᠰᠡᠨ ᠰᠢᠨᠡ ᠦᠭᠡ ᠡᠭᠦᠰᠴᠡᠢ᠃《ᠪᠠᠭᠰᠢ ᠨᠠᠷ ᠡᠴᠡ ᠪᠠᠨ》᠂《ᠰᠤᠷᠤᠯᠴᠠᠭᠤᠯᠪᠠ》 ᠭᠡᠬᠦ ᠳ᠋ᠦ᠍《ᠪᠠᠭᠰᠢ》᠂《ᠰᠤᠷ》 ᠭᠡᠳᠡᠭ ᠬᠣᠶᠠᠷ ᠦᠭᠡ ᠶ᠋ᠢᠨ ᠢᠵᠠᠭᠤᠷ ᠲᠤ᠌ ᠦᠭᠡ ᠬᠤᠪᠢᠯᠭᠠᠬᠤ ᠳᠠᠭᠠᠪᠤᠷᠢ ᠶ᠋ᠢ ᠵᠠᠯᠭᠠᠬᠤ ᠳ᠋ᠤ᠌ ᠤᠤᠯ ᠦᠭᠡ ᠶ᠋ᠢᠨ ᠤᠳᠬᠠ ᠣᠭᠲᠣ ᠥᠭᠡᠷᠡ ᠪᠣᠯᠤᠭᠰᠠᠨ ᠦᠭᠡᠢ᠃ ᠵᠥᠪᠬᠡᠨ《ᠪᠠᠭᠰᠢ》 ᠭᠡᠳᠡᠭ ᠨᠡᠷᠡ ᠦᠭᠡ ᠶ᠋ᠢᠨ ᠬᠡᠯᠡᠨ ᠦ᠌ ᠵᠦᠢ ᠶ᠋ᠢᠨ ᠬᠡᠯᠪᠡᠷᠢ ᠶ᠋ᠢ ᠢᠯᠡᠷᠡᠭᠦᠯᠦᠭᠰᠡᠨ ᠪᠠ《ᠰᠤᠷ》 ᠭᠡᠳᠡᠭ ᠦᠢᠯᠡ ᠦᠭᠡ ᠶ᠋ᠢᠨ ᠲᠡᠭᠦᠨ ᠦ᠌ ᠡᠵᠡᠨ ᠪᠡᠶᠡ ᠲᠡᠢ ᠪᠡᠨ ᠬᠡᠷᠬᠢᠨ ᠬᠣᠯᠪᠣᠭᠳᠠᠬᠤ ᠪᠣᠯᠤᠨ ᠦᠢᠯᠡ ᠶ᠋ᠢᠨ ᠴᠠᠭ ᠲᠤ᠌ ᠬᠡᠷᠬᠢᠨ ᠬᠣᠯᠪᠣᠭᠳᠠᠬᠤ ᠶ᠋ᠢ ᠵᠢᠭᠠᠵᠠᠢ᠃
ᠦᠭᠡ ᠶ᠋ᠢᠨ ᠪᠦᠲᠦᠴᠡ ᠶ᠋ᠢ ᠬᠦᠰᠦᠨᠦᠭ ᠢ᠋ᠶ᠋ᠡᠷ ᠦᠵᠡᠭᠦᠯᠪᠡᠯ᠄
| ᠵᠢᠱ᠌ᠢᠶᠡ ᠦᠭᠡ | ᠢᠵᠠᠭᠤᠷ | ᠦᠨᠳᠦᠰᠦ | ᠪᠦᠲᠦᠭᠡᠬᠦ ᠳᠠᠭᠠᠪᠤᠷᠢ | ᠬᠤᠪᠢᠯᠭᠠᠬᠤ ᠳᠠᠭᠠᠪᠤᠷᠢ |
|---|---|---|---|---|
| ᠠᠵᠢᠯᠴᠢᠨ ᠡᠴᠡ | ᠠᠵᠢᠯ | ᠠᠵᠢᠯᠴᠢᠨ | ᠴᠢᠨ | ᠡᠴᠡ |
| ᠲᠠᠷᠢᠶᠠᠴᠢᠨ ᠳ᠋ᠤ᠌ | ᠳᠠᠷᠢ | ᠲᠠᠷᠢᠶᠠᠴᠢᠨ | ᠶᠠ᠊᠂ ᠴᠢᠨ | ᠳ᠋ᠦ᠍ |
| ᠮᠠᠯᠴᠢᠨ ᠤ᠋ ᠪᠠᠨ | ᠮᠠᠯ | ᠠᠯᠴᠢᠨ | ᠴᠢᠨ | ᠤ᠋ ᠪᠠᠨ |
| ᠰᠤᠷᠤᠯᠴᠠᠭᠤᠯᠪᠠ | ᠰᠤᠷ | ᠰᠤᠷᠤᠯᠴᠠᠭᠤᠯᠪᠠ | — ᠊ᠯᠴᠡ᠊᠂ ᠊ᠭᠤᠯ᠊ ᠊ᠪᠠ | ᠊ᠯᠴᠡ᠊᠂ ᠊ᠭᠤᠯ᠊ ᠊ᠪᠠ |
| ᠶᠠᠪᠤᠲᠠᠯᠠ | ᠶᠠᠪᠤ | ᠶᠠᠪᠤᠲᠠᠯᠠ | — ᠳ᠋ᠠᠯᠠ | ᠳ᠋ᠠᠯᠠ |
| ᠬᠦᠴᠦᠷᠬᠡᠭ | ᠬᠦᠴᠦ | ᠬᠦᠴᠦᠷᠬᠡᠭ | ᠊ᠭ᠌ | ᠷᠬᠡ |
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠯᠲᠠᠨᠴᠢᠮᠡᠭ᠂ ᠤᠷᠠᠨᠴᠢᠮᠡᠭ᠂ ᠪᠠᠢ᠂ ᠰᠠᠷᠠᠨᠠ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠨᠠᠷᠠᠨ᠂ᠰᠡᠬᠡᠭᠡᠷᠡᠯ