ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ01ᠲᠡᠷᠢᠭᠦᠨ ᠳᠡᠪᠲᠡᠷ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠲᠡᠮᠳᠡᠭᠯᠡᠯ ᠣᠷᠣᠰᠢᠪᠠᠢ -ᠳ· ᠵᠠᠮᠢᠶᠠᠨГалдан бошгот хаан-Т·Жамъян
628ᠲᠡᠷᠢᠭᠦᠨ ᠳᠡᠪᠲᠡᠷ
ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠲᠡᠮᠳᠡᠭᠯᠡᠯ ᠣᠷᠣᠰᠢᠪᠠᠢ
ᠨᠢᠭᠡ
ᠠᠯᠲᠠᠢ ᠶ᠋ᠢᠨ ᠰᠦᠷᠯᠢᠭ ᠠᠭᠤᠯᠠᠰ ᠤ᠋ᠨ ᠬᠠᠳᠠ ᠠᠰᠠᠭᠲᠤ ᠨᠢᠭᠡᠨ ᠣᠷᠭᠢᠯ ᠤ᠋ᠨ ᠣᠷᠣᠢ ᠳ᠋ᠤ᠌ ᠨᠠᠪᠴᠢ ᠨᠠᠬᠢᠶᠠ ᠪᠠᠨ ᠳᠡᠯᠭᠡᠭᠰᠡᠨ ᠠᠷᠪᠠᠨ ᠵᠢᠸᠠ ᠮᠥᠴᠢᠷ ᠲᠡᠢ ᠠᠪᠤᠷᠭᠤ ᠬᠠᠢᠯᠠᠰᠤ ᠤᠷᠭᠤᠵᠠᠢ᠃ ᠬᠠᠢᠯᠠᠰᠤ ᠶ᠋ᠢᠨ ᠨᠠᠪᠴᠢᠰ ᠨᠢ ᠴᠠᠭᠠᠨ ᠰᠢᠷᠠ ᠥᠩᠭᠡ ᠲᠡᠢ ᠪᠥᠯᠥᠭᠡ᠃ ᠡᠨᠡᠬᠦ ᠴᠠᠭᠠᠨ ᠰᠢᠷᠠ ᠥᠩᠭᠡ ᠶ᠋ᠢᠨ ᠨᠠᠪᠴᠢᠰ ᠰᠠᠯᠬᠢᠨ ᠤ᠋ ᠠᠶᠠᠰ ᠢ᠋ᠶ᠋ᠠᠷ ᠰᠡᠷᠴᠢᠭᠢᠨᠡᠨ ᠬᠥᠳᠡᠯᠬᠦ ᠪᠥᠭᠡᠳ ᠲᠣᠪᠰᠢᠭᠤᠷ ᠤ᠋ᠨ ᠭᠤᠨᠢᠭᠲᠤ ᠠᠶᠠᠯᠭᠤ ᠡᠭᠡᠰᠢᠭᠯᠡᠬᠦ ᠳ᠋ᠦ᠍ ᠰᠤᠳᠤᠷ ᠤ᠋ᠨ ᠰᠢᠷᠠᠯᠠᠭᠰᠠᠨ ᠬᠠᠭᠤᠳᠠᠰᠤ ᠪᠣᠯᠤᠨ ᠬᠤᠪᠢᠷᠠᠨᠠ᠃ ᠰᠤᠳᠤᠷ ᠤ᠋ᠨ ᠬᠠᠭᠤᠳᠠᠰᠤ ᠳᠤᠮᠳᠠᠭᠤᠷ ᠣᠢᠷᠠᠳ ᠤ᠋ᠨ ᠮᠣᠷᠢᠲᠠᠨ ᠪᠠᠭᠠᠲᠤᠷ ᠤ᠋ᠳ᠂ ᠮᠥᠷᠭᠥᠯᠴᠢᠳ᠂ ᠵᠢᠩᠴᠢᠳ᠂ ᠬᠤᠳᠠᠯᠳᠤᠭᠠᠴᠢᠳ ᠤ᠋ᠨ ᠠᠶᠠᠨ ᠬᠦᠪᠦᠷᠡᠨᠡ᠃
ᠭᠡᠲᠡᠯᠡ ᠲᠡᠷᠡ ᠬᠦ᠌ ᠲᠣᠳᠣ ᠦᠰᠦᠭ ᠢ᠋ᠶ᠋ᠡᠷ ᠪᠢᠴᠢᠭᠰᠡᠨ ᠰᠤᠳᠤᠷ ᠳᠤᠮᠳᠠ ᠡᠴᠡ ᠪᠦᠷᠭᠦᠳ ᠴᠦᠢᠯᠡᠨ ᠣᠷᠣᠢ ᠦᠭᠡᠢ ᠬᠥᠬᠡ ᠲᠡᠭᠷᠢ ᠥᠭᠡᠳᠡ ᠳᠡᠭᠦᠯᠢᠯᠡ᠃ ᠠᠭᠤᠯᠠᠨ ᠣᠷᠣᠢ ᠳᠡᠭᠡᠷᠡᠬᠢ ᠨᠤᠲᠤᠭ ᠤ᠋ᠨ ᠠᠷᠪᠠᠨ ᠵᠢᠸᠠ ᠨᠠᠪᠴᠢ ᠨᠠᠬᠢᠶᠠ᠂ ᠲᠦᠮᠡᠨ ᠮᠥᠴᠢᠷ ᠨᠢ ᠣᠭᠲᠠᠷᠭᠤᠢ ᠶ᠋ᠢᠨ ᠪᠤᠳᠠᠩ ᠳ᠋ᠤ᠌ ᠣᠷᠢᠶᠠᠭᠳᠠᠨ ᠢᠯᠡ ᠭᠠᠷᠴᠤ᠂ ᠳᠠᠯᠳᠠ ᠣᠷᠣᠵᠤ ᠵᠠᠷᠢᠮ ᠳ᠋ᠠᠭᠠᠨ ᠲᠣᠳᠣᠷᠠᠵᠤ᠂ ᠵᠠᠷᠢᠮ ᠳ᠋ᠠᠭᠠᠨ ᠪᠦᠳᠡᠭᠢᠷᠡᠨᠡ᠃
ᠪᠦᠷᠭᠦᠳ ᠲᠣᠳᠣᠷᠠᠨᠠ᠃ ᠪᠦᠷᠭᠦᠳ ᠦ᠋ᠨ ᠮᠠᠬᠢᠷ ᠬᠣᠰᠢᠭᠤ᠂ ᠬᠤᠷᠴᠠ ᠬᠢᠮᠤᠰᠤ ᠶ᠋ᠢ ᠵᠡᠰ ᠢ᠋ᠶ᠋ᠡᠷ ᠪᠦᠷᠢᠵᠡᠢ᠃ ᠪᠦᠷᠭᠦᠳ ᠦ᠋ᠨ ᠬᠤᠷᠴᠠ ᠬᠠᠷᠠᠭᠠᠨ ᠳ᠋ᠤ᠌ ᠽᠠᠮᠪᠤᠭᠠᠷᠪᠤ ᠶ᠋ᠢᠨ ᠴᠠᠰᠤᠲᠤ ᠠᠭᠤᠯᠠᠰ᠂ ᠬᠠᠷᠠ ᠡᠷᠴᠢᠰ ᠮᠥᠷᠡᠨ᠂ ᠪᠣᠷᠣ ᠴᠣᠩᠵᠢ᠂ ᠬᠣᠨᠢᠨ ᠤᠰᠤᠨ ᠤ᠋ ᠭᠣᠪᠢ᠂ ᠣᠪᠰᠣ ᠨᠠᠭᠤᠷ᠂ ᠤᠢᠭᠤᠷ ᠰᠢᠨᠵᠢᠶᠠᠩ ᠤ᠋ᠨ ᠲᠠᠯᠠ ᠨᠤᠲᠤᠭ ᠦᠷᠭᠦᠯᠵᠢᠯᠡᠵᠦ᠂ ᠴᠡᠷᠢᠭ ᠦ᠋ᠨ ᠬᠣᠲᠠ ᠬᠦᠷᠢᠶᠡ᠂ ᠰᠢᠪᠡᠷ ᠬᠡᠷᠡᠮ᠂ ᠪᠡᠬᠢᠯᠡᠯᠲᠡ ᠴᠠᠢᠵᠠ᠂ ᠲᠠᠷᠢᠶᠠ ᠶ᠋ᠢᠨ ᠲᠠᠯᠠᠪᠠᠢ᠂ ᠮᠣᠷᠢᠲᠤ ᠴᠡᠷᠢᠭ ᠦ᠋ᠳ ᠦ᠋ᠨ ᠪᠠᠢᠯᠳᠤᠭᠠᠨ ᠦᠵᠡᠭᠳᠡᠨᠡ᠃
《ᠴᠣᠷᠣᠰ ᠤᠭᠰᠠᠭᠠᠲᠠᠨ ᠡᠭᠦᠰᠪᠡ᠃ ᠴᠣᠷᠣᠰ ᠰᠤᠳᠤᠷ ᠪᠣᠢ ᠪᠣᠯᠪᠠ᠃ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠳᠡᠭᠡᠳᠦ ᠢᠵᠠᠭᠤᠷ ᠳᠤᠸᠠ ᠰᠣᠬᠣᠷ ᠡᠴᠡ ᠡᠬᠢᠲᠡᠢ ᠴᠣᠷᠣᠰ ᠴᠢᠰᠤ ᠴᠡᠪᠡᠷ ᠠᠷᠢᠭᠤᠨ ᠬᠡᠪ ᠢ᠋ᠶ᠋ᠡᠷ ᠳᠥᠷᠪᠡᠨ ᠣᠢᠷᠠᠳ ᠤ᠋ᠨ ᠦᠶᠡ ᠳ᠋ᠦ᠍ ᠢᠷᠡᠵᠡᠢ ᠁
᠁ ᠮᠢᠨᠦ ᠨᠤᠲᠤᠭ ᠤ᠋ᠨ ᠭᠠᠵᠠᠷ ᠡᠴᠡ ᠪᠤᠷᠬᠠᠨ ᠭᠤᠶᠤᠭᠰᠠᠨ ᠴᠤ᠌ ᠪᠤᠤ ᠥᠭ
ᠰᠡᠳᠬᠢᠯ ᠳ᠋ᠦ᠍ ᠪᠠᠭᠲᠠᠭᠰᠠᠨ ᠪᠥᠭᠡᠰᠦ ᠶᠡᠬᠡ ᠂ ᠪᠠᠭᠠ ᠢᠯᠭᠠᠯ ᠦᠭᠡᠢ᠁ ᠭᠡᠮᠡᠨ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠰᠢᠯᠦᠭᠯᠡᠨ ᠭᠡᠷᠢᠶᠡᠰᠦᠯᠡᠪᠡ》᠃
ᠲᠣᠪᠰᠢᠭᠤᠷ ᠤ᠋ᠨ ᠭᠤᠨᠢᠭᠯᠠᠩᠭᠤᠢ ᠠᠶᠠᠰ ᠭᠡᠭᠡᠯᠵᠡᠨ ᠰᠤᠳᠤᠷ ᠤ᠋ᠨ ᠡᠷᠲᠡᠨ ᠦ᠌ ᠬᠠᠭᠤᠳᠠᠰᠤ ᠨᠢ ᠨᠠᠪᠴᠢ ᠮᠡᠲᠦ ᠰᠡᠷᠴᠢᠭᠢᠨᠡᠨ ᠨᠢᠭᠡ ᠨᠢᠭᠡ ᠪᠡᠷ ᠰᠡᠬᠦᠭᠳᠡᠬᠦ ᠪᠥᠯᠥᠭᠡ᠃ ᠡᠨᠡ ᠪᠣᠯ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠲᠡᠮᠳᠡᠭᠯᠡᠯ ᠪᠢᠯᠡ᠃
ᠬᠣᠶᠠᠷ
ᠭᠠᠯᠳᠠᠨ ᠨᠡᠢᠲᠡ ᠶ᠋ᠢᠨ ᠣᠨ ᠲᠣᠭᠠᠯᠠᠯ ᠤ᠋ᠨ1644 ᠣᠨ ᠪᠤᠶᠤ ᠮᠣᠩᠭᠣᠯ ᠤ᠋ᠨ ᠣᠨ ᠲᠣᠭᠠᠯᠠᠯ ᠤ᠋ᠨ ᠠᠷᠪᠠᠨ ᠨᠢᠭᠡᠳᠦᠭᠡᠷ ᠵᠢᠷᠠᠨ ᠤ᠋ ᠬᠥᠬᠡ ᠪᠡᠴᠢᠨ ᠵᠢᠯ ᠡᠴᠡ ᠮᠡᠨᠳᠦᠯᠡᠬᠦ ᠳ᠋ᠦ᠍ ᠲᠡᠭᠦᠨ ᠲᠡᠢ ᠴᠣᠭ ᠨᠢᠭᠡᠨ ᠳᠣᠮᠣᠭ ᠡᠬᠢᠯᠡᠵᠡᠢ᠃ ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠰᠠᠪᠠᠨ ᠳ᠋ᠠᠭᠠᠨ ᠪᠠᠭᠲᠠᠬᠤ ᠦᠭᠡᠢ ᠰᠥᠩ ᠲᠥᠷᠥᠵᠦ᠂ ᠶᠡᠬᠡ ᠶᠡᠬᠡ ᠤᠰᠤᠨ ᠤ᠋ ᠤᠷᠤᠰᠬᠠᠯ ᠪᠤᠯᠠᠩᠭᠢᠷᠲᠠᠢ ᠴᠥᠭᠥᠷᠥᠮ᠂ ᠨᠤᠭᠤ ᠲᠣᠬᠣᠢ ᠤᠬᠢᠶᠠᠭᠳᠠᠵᠤ᠂ ᠭᠣᠣᠯ ᠤ᠋ᠨ ᠰᠠᠪᠠ ᠳᠠᠭᠤ ᠬᠢ ᠮᠣᠳᠣᠨ ᠤ᠋ ᠦᠨᠳᠦᠰᠦ ᠰᠥᠩ ᠲᠥᠷᠥᠬᠦ ᠴᠢᠮᠡᠭᠡᠨ ᠳ᠋ᠦ᠍ ᠰᠡᠷᠭᠦᠵᠦ ᠪᠠᠢᠭᠰᠠᠨ ᠦᠶᠡ ᠳ᠋ᠦ᠍ ᠳᠣᠮᠣᠭ ᠡᠭᠦᠰᠦᠭᠰᠡᠨ ᠭᠡᠨᠡ᠃ ᠠᠯᠲᠠᠢ ᠪᠣᠯᠤᠨ ᠲᠩᠷᠢ ᠠᠭᠤᠯᠠ ᠶ᠋ᠢ ᠬᠣᠯᠪᠣᠭᠰᠠᠨ ᠳᠣᠯᠣᠭᠠᠨ ᠥᠩᠭᠡ ᠶ᠋ᠢᠨ ᠰᠣᠯᠣᠩᠭᠠ ᠭᠦᠦᠷ ᠮᠡᠲᠦ ᠨᠤᠮᠤᠷᠠᠵᠤ᠂ ᠨᠣᠢᠲᠠᠨ ᠴᠠᠰᠤ ᠲᠦᠮᠡ᠂ ᠪᠤᠮᠠᠨ ᠴᠠᠭᠠᠨ ᠡᠷᠪᠡᠬᠡᠢ ᠠᠳᠠᠯᠢ ᠵᠠᠢ ᠵᠠᠪᠰᠠᠷ ᠦᠭᠡᠢ ᠡᠷᠭᠢᠯᠳᠦᠨ ᠬᠤᠢᠯᠠᠷᠠᠵᠤ ᠠᠬᠤᠢ ᠳ᠋ᠤ᠌ ᠡᠭᠦᠯᠡ᠂ ᠠᠭᠤᠯᠠ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣᠭᠤᠷ ᠴᠠᠭᠠᠨ ᠢᠷᠪᠢᠰ ᠴᠠᠬᠢᠯᠠᠨ ᠣᠳᠪᠠ ᠭᠡᠨᠡ᠁ ᠴᠠᠭᠠᠨ ᠢᠷᠪᠢᠰ᠁
ᠭᠠᠵᠠᠷ ᠰᠢᠷᠣᠢ ᠴᠠᠩᠭᠠᠭᠠ ᠪᠠᠨ ᠲᠠᠢᠯᠵᠤ ᠬᠥᠮᠦᠨ᠂ ᠮᠠᠯ ᠤ᠋ᠨ ᠵᠣ ᠨᠢᠷᠤᠭᠤ ᠲᠡᠨᠢᠢᠵᠦ ᠪᠠᠢᠬᠤ ᠳ᠋ᠤ᠌ ᠬᠠᠲᠤᠨ ᠡᠬᠡ ᠶᠦᠮ ᠠᠭᠠ ᠳᠤᠩᠰᠢᠵᠤ ᠬᠥᠪᠡᠭᠦᠨ ᠮᠡᠨᠳᠦᠯᠡᠵᠦ ᠽᠠᠶᠠ ᠪᠠᠨᠳᠢᠳᠠ ᠨᠠᠮᠬᠠᠢᠵᠠᠮᠰᠤ ᠶ᠋ᠢᠨ ᠵᠥᠩᠨᠡᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠡᠩᠰᠡ ᠬᠤᠲᠤᠭᠲᠤ ᠶ᠋ᠢᠨ ᠬᠣᠢᠲᠤ ᠳᠦᠷᠢ ᠬᠡᠮᠡᠬᠦ ᠭᠠᠯᠳᠠᠨ ᠢᠷᠪᠢᠰ ᠰᠣᠴᠢᠲᠠᠯᠠ ᠴᠢᠷᠠᠯᠠᠭᠰᠠᠨ ᠬᠡᠷᠡᠭ᠃ ᠳᠣᠮᠣᠭ ᠡᠬᠢᠯᠡᠬᠦ ᠰᠢᠯᠲᠠᠭᠠᠨ ᠪᠥᠭᠡᠰᠦ ᠽᠠᠶᠠ ᠪᠠᠨᠳᠢᠳᠠ ᠨᠠᠮᠬᠠᠢᠵᠠᠮᠰᠤ ᠭᠡᠭᠡᠨ ᠦ᠌ ᠰᠣᠪᠢᠩᠲᠤ ᠦᠭᠡ ᠪᠥᠭᠡᠳ ᠰᠠᠴᠤᠭᠰᠠᠨ ᠢᠷᠪᠢᠰ ᠬᠣᠲᠠ ᠬᠦᠷᠢᠶᠡᠨ ᠦ᠌ ᠬᠢᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠦᠵᠡᠭᠳᠡᠭᠡᠳ ᠠᠭᠤᠯᠠᠰ ᠤ᠋ᠨ ᠳᠡᠭᠡᠭᠦᠷ ᠳᠡᠭᠦᠯᠢᠨ ᠣᠳᠬᠤ ᠳ᠋ᠤ᠌ ᠵᠠᠯᠪᠠᠷᠢᠬᠤ ᠨᠢ ᠵᠠᠯᠪᠠᠷᠢᠵᠤ᠂ ᠰᠥᠭᠥᠳᠬᠦ ᠨᠢ ᠰᠥᠭᠥᠳᠴᠦ ᠢᠷᠦᠭᠡᠯ᠂ ᠬᠠᠷᠢᠶᠠᠯ ᠤᠷᠤᠰᠬᠠᠵᠠᠢ᠃ ᠴᠠᠭᠠᠨ ᠢᠷᠪᠢᠰ ᠭᠠᠯᠳᠠᠨ ᠲᠠᠢ ᠬᠣᠯᠪᠣᠭᠳᠠᠵᠠᠢ᠃
ᠡᠨᠡ ᠳᠣᠮᠣᠭ ᠢ᠋ ᠬᠠᠲᠤᠨ ᠡᠬᠡ ᠨᠢ ᠶᠠᠷᠢᠵᠤ ᠥᠭᠭᠦᠭᠰᠡᠨ ᠶᠤᠮ᠃ ᠳᠣᠮᠣᠭ ᠭᠠᠯᠳᠠᠨ ᠢ᠋ ᠲᠥᠷᠥᠬᠦ ᠡᠴᠡ ᠡᠮᠦᠨᠡ ᠡᠭᠦᠰᠴᠦ᠂ ᠲᠡᠭᠦᠨ ᠢ᠋ ᠲᠥᠷᠥᠬᠦ ᠳ᠋ᠦ᠍ ᠣᠪᠣᠭ ᠠᠢᠮᠠᠭ ᠤ᠋ᠨ ᠬᠢᠨ ᠢ᠋ ᠭᠠᠢᠬᠠᠰᠢᠷᠠᠭᠤᠯᠵᠤ᠂ ᠲᠥᠷᠥᠭᠰᠡᠨ ᠦ᠌ ᠳᠠᠷᠠᠭᠠ ᠠᠲᠠᠭᠠ ᠵᠢᠲᠥᠭᠡ᠂ ᠬᠠᠷᠠ ᠬᠣᠣᠷ᠂ ᠪᠠᠶᠠᠷ ᠬᠥᠷ᠂ ᠭᠤᠨᠢᠭ ᠵᠣᠪᠠᠯᠠᠩ ᠳᠠᠭᠠᠭᠤᠯᠵᠠᠢ᠃ ᠬᠡᠳᠦᠢ ᠣᠯᠠᠨ ᠵᠢᠯ ᠳᠣᠮᠣᠭ ᠦᠷᠭᠦᠯᠵᠢᠯᠡᠨᠡ ᠪᠣᠢ᠃ ᠳᠥᠷᠪᠡᠨ ᠣᠢᠷᠠᠳ ᠤ᠋ᠨ ᠳᠤᠮᠳᠠ ᠳᠣᠮᠣᠭ ᠬᠡᠳᠦᠢ ᠵᠢᠯ ᠦᠯᠡᠳᠡᠵᠦ ᠬᠣᠴᠣᠷᠬᠤ ᠶ᠋ᠢ ᠲᠡᠮᠳᠡᠭᠯᠡᠨ ᠪᠢᠴᠢᠭᠴᠢ ᠨᠠᠮᠠ ᠪᠠᠷ ᠶᠠᠭᠠᠬᠢᠨ ᠭᠠᠳᠠᠷᠯᠠᠨᠠ᠃
ᠭᠤᠷᠪᠠ
ᠡᠴᠢᠭᠡ ᠬᠣᠩ ᠲᠠᠢᠵᠢ ᠶ᠋ᠢᠨ ᠶᠡᠬᠡ ᠬᠠᠲᠤᠨ ᠪᠠᠯᠵᠢᠳᠠᠷᠠ ᠠᠪᠠᠬᠠᠢ ᠪᠣᠯᠣᠴᠠ ᠨᠢ ᠭᠦᠢᠴᠡᠭᠰᠡᠨ ᠲᠣᠰᠢᠯᠣᠢ ᠰᠢᠭ᠋ ᠤᠯᠠᠭᠠᠨ ᠬᠠᠴᠠᠷ ᠲᠠᠢ᠂ ᠨᠢᠷᠤᠭᠤᠯᠢᠭ᠂ ᠪᠤᠷᠵᠠᠭᠠᠷ ᠬᠠᠷᠠ ᠦᠰᠦ ᠬᠠᠴᠠᠷ ᠢ᠋ ᠨᠢ ᠳᠠᠭᠠᠭᠠᠳ ᠤᠨᠵᠢᠢᠵᠤ ᠪᠠᠢᠳᠠᠭ ᠰᠠᠨ᠃ ᠶᠡᠬᠡ ᠬᠠᠲᠤᠨ ᠠᠪᠠᠬᠠᠢ ᠶ᠋ᠢᠨ ᠲᠣᠮᠣ ᠬᠥᠪᠡᠭᠦᠨ ᠴᠡᠴᠡᠨ᠂ ᠪᠠᠭᠠ ᠬᠥᠪᠡᠭᠦᠨ ᠵᠣᠳᠪᠠᠪᠠᠭᠠᠲᠤᠷ ᠪᠢᠯᠡ᠃ ᠭᠠᠯᠳᠠᠨ ᠢ᠋ ᠪᠠᠭᠠ ᠪᠠᠢᠬᠤ ᠳ᠋ᠤ᠌ ᠲᠡᠳᠡ ᠬᠣᠭᠣᠷᠣᠨᠳᠣ ᠪᠠᠨ ᠨᠢᠭᠡ ᠤᠳᠠᠭᠠ ᠵᠣᠳᠣᠯᠳᠤᠵᠤ ᠪᠢᠯᠡ᠃ ᠪᠣᠷᠣᠴᠤᠤᠯ ᠤ᠋ᠨ ᠬᠣᠭᠣᠷᠣᠨᠳᠣ ᠰᠠᠭᠤᠳᠠᠭ ᠨᠠᠷᠭᠢᠯ ᠪᠦᠰᠡᠭᠦᠢ ᠡᠴᠡ ᠪᠣᠯᠵᠤ ᠵᠣᠳᠣᠯᠳᠤᠭᠰᠠᠨ ᠶᠤᠮ ᠳ᠋ᠠᠭ᠃ ᠴᠡᠴᠡᠨ᠂
— ᠴᠢ ᠨᠠᠷᠭᠢᠯ ᠲᠠᠢ ᠤᠨᠲᠠᠭᠰᠠᠨ ᠤᠤ ᠭᠡᠬᠦ ᠳ᠋ᠦ᠍ ᠵᠣᠳᠪᠠᠪᠠᠭᠠᠲᠤᠷ ᠠᠭᠤᠷᠯᠠᠵᠤ᠂
— ᠨᠠᠷᠭᠢᠯ ᠮᠢᠨᠦᠬᠢ ᠪᠣᠯᠤᠭᠰᠠᠨ ᠭᠡᠪᠡ᠃ ᠭᠡᠲᠡᠯᠡ ᠴᠡᠴᠡᠨ ᠠᠬᠠ ᠨᠢ ᠬᠦᠢᠲᠡᠨ ᠢ᠋ᠶ᠋ᠡᠷ ᠢᠨᠢᠶᠡᠵᠦ᠂
— ᠪᠣᠭᠣᠯ ᠲᠠᠢ ᠪᠠᠨ ᠤᠨᠲᠠᠭᠰᠠᠨ ᠢ᠋ ᠡᠴᠢᠭᠡ ᠬᠣᠩ ᠲᠠᠢᠵᠢ ᠮᠡᠳᠡᠪᠡᠯ ᠴᠢᠨᠦ ᠰᠠᠯᠲᠠᠭᠠᠨ ᠳᠣᠲᠣᠷᠠᠬᠢ ᠶ᠋ᠢ ᠬᠠᠲᠠᠭᠰᠠᠨ ᠴᠢᠪᠠᠭᠠ ᠰᠢᠭ᠋ ᠪᠣᠯᠭᠠᠨᠠ᠃ ᠴᠢ ᠵᠣᠣᠪᠠ ᠲᠠᠢᠭᠠᠨ ᠤ᠋ ᠲᠥᠮᠥᠰᠥ ᠶ᠋ᠢᠨ ᠤᠭᠤᠲᠠ ᠶᠠᠭᠠᠬᠢᠵᠤ ᠬᠠᠲᠠᠭᠰᠠᠨ ᠢ᠋ ᠬᠠᠷᠠᠭᠰᠠᠨ ᠪᠢᠵᠡ ᠳᠡ᠃ ᠡᠴᠢᠭᠡ ᠪᠢᠳᠡᠨ ᠳ᠋ᠦ᠍ ᠬᠠᠷᠠᠭᠤᠯᠤᠭᠠᠳ《ᠵᠢᠩᠬᠢᠨᠢ ᠲᠠᠢᠭᠠᠨ ᠡᠢᠮᠦ ᠪᠠᠢᠳᠠᠭ ᠶᠤᠮ》 ᠭᠡᠰᠡᠨ ᠰᠢᠦ ᠳᠡ ᠭᠡᠮᠡᠨ ᠵᠣᠳᠪᠠᠪᠠᠭᠠᠲᠤᠷ ᠤ᠋ᠨ ᠰᠢᠷᠠ ᠶ᠋ᠢ ᠳᠠᠷᠤᠬᠤ ᠭᠡᠵᠦ ᠵᠢᠳᠬᠦᠪᠡ᠃ ᠵᠣᠳᠪᠠᠪᠠᠭᠠᠲᠤᠷ ᠠᠭᠤᠷ ᠲᠠᠢ ᠲᠤᠯᠠ᠂
— ᠴᠢᠮᠠ ᠡᠴᠡ ᠡᠮᠦᠨᠡ ᠨᠠᠷᠭᠢᠯ ᠢ᠋ ᠥᠪᠡᠷ ᠦ᠋ᠨ ᠪᠣᠯᠭᠠᠵᠤ ᠵᠤᠭᠠ ᠪᠠᠨ ᠭᠠᠷᠭᠠᠭᠰᠠᠨ᠃ ᠬᠣᠢᠰᠢᠳᠠ ᠪᠢ ᠳᠤᠷᠠ ᠲᠠᠢ ᠦᠶᠡ ᠳ᠋ᠡᠭᠡᠨ ᠲᠡᠭᠦᠨ ᠲᠡᠢ ᠵᠤᠭᠠᠴᠠᠬᠤ ᠪᠣᠯᠤᠨᠠ ᠭᠡᠵᠦ ᠥᠳᠥᠭᠡᠪᠡ᠃ ᠴᠡᠴᠡᠨ ᠠᠬᠠ ᠨᠢ ᠲᠡᠭᠦᠨ ᠢ᠋ ᠮᠣᠬᠣᠭᠠᠵᠤ᠂
— ᠨᠠᠳᠠ ᠪᠠᠷ ᠳᠡᠮᠵᠢᠵᠦ ᠴᠢᠮᠠ ᠳ᠋ᠤ᠌ ᠣᠴᠢᠭᠰᠠᠨ ᠬᠡᠦᠬᠡᠨ ᠢ᠋ ᠣᠩᠭᠣᠨ ᠭᠡᠬᠦ ᠤᠤ? ᠨᠠᠷᠭᠢᠯ ᠤ᠋ᠨ ᠠᠷᠠᠰᠤ ᠳᠡᠩᠳᠡᠭᠦᠦ ᠵᠥᠭᠡᠯᠡᠨ᠃ ᠲᠡᠢᠮᠦ ᠲᠣᠷᠭᠠᠨ ᠪᠡᠶᠡ ᠲᠡᠢ ᠬᠡᠦᠬᠡᠨ ᠠᠮᠠᠷᠬᠠᠨ ᠵᠢᠷᠮᠦᠰᠦᠯᠡᠳᠡᠭ ᠶᠤᠮ᠃ ᠤᠳᠠᠬᠤ ᠦᠭᠡᠢ ᠴᠢᠨᠦ ᠬᠡᠦᠬᠡᠳ ᠲᠥᠷᠥᠨᠡ᠃ ᠨᠠᠷᠭᠢᠯ ᠡᠴᠡ ᠤᠯᠴᠠᠩ ᠰᠢᠷᠠ ᠬᠡᠦᠬᠡᠳ ᠲᠥᠷᠥᠬᠦ ᠪᠡᠷ ᠣᠢᠷᠠᠳ ᠤ᠋ᠳ ᠶᠠᠭᠠᠬᠢᠬᠤ ᠪᠣᠯ᠃ ᠵᠤᠳᠪᠠᠪᠠᠭᠠᠲᠤᠷ ᠪᠠᠢᠨᠠ ᠰᠢᠦ ᠳᠡ ᠭᠡᠨᠡ᠃ ᠨᠡᠷᠡ ᠪᠡᠨ ᠪᠠᠭᠠᠰᠤᠳᠠᠯᠠ᠂ ᠮᠢᠨᠦ ᠳᠡᠭᠦᠦ! ᠪᠣᠭᠣᠯ ᠬᠡᠦᠬᠡᠨ ᠡᠴᠡ ᠪᠣᠭᠣᠯ ᠲᠥᠷᠥᠳᠡᠭ᠃ ᠪᠣᠭᠣᠯ ᠲᠠᠢ ᠪᠠᠨ ᠤᠳᠠᠭᠠᠨ ᠨᠥᠬᠥᠴᠡᠬᠦ ᠦᠭᠡᠢ ᠪᠠᠢᠬᠤ ᠶ᠋ᠢ ᠬᠢᠴᠢᠶᠡ ᠭᠡᠯᠡ᠃
ᠵᠤᠳᠪᠠᠪᠠᠭᠠᠲᠤᠷ ᠰᠢᠭᠤᠳ ᠴᠡᠴᠡᠨ ᠦ᠌ ᠰᠢᠨᠠ ᠳ᠋ᠤ᠌ ᠨᠢᠳᠤᠷᠭᠠ ᠪᠠᠭᠤᠯᠭᠠᠪᠠ᠃ ᠴᠡᠴᠡᠨ ᠠᠬᠠ ᠨᠢ ᠦᠰᠦᠷᠴᠦ ᠤᠨᠠᠭᠠᠳ ᠪᠣᠰᠪᠠ᠃ ᠵᠤᠳᠪᠠᠪᠠᠭᠠᠲᠤᠷ ᠠᠬᠠ ᠶ᠋ᠢ ᠪᠡᠨ ᠳᠠᠬᠢᠭᠠᠳ ᠴᠣᠬᠢᠵᠤ᠃ ᠤᠨᠠᠭᠠᠪᠠ᠃ ᠴᠡᠴᠡᠨ ᠪᠣᠰᠴᠤ ᠢᠷᠡᠭᠡᠳ᠂
— ᠨᠠᠷᠭᠢᠯ ᠴᠢᠨᠦᠬᠢ ᠪᠣᠯᠤᠭ᠃ ᠪᠢ ᠲᠠᠢᠰᠢ ᠪᠠᠨ ᠵᠢᠳᠬᠦᠬᠦ ᠦᠭᠡᠢ ᠭᠡᠵᠦ ᠠᠮᠠ ᠥᠭᠪᠡ᠃
ᠴᠡᠴᠡᠨ ᠠᠬᠠ ᠶ᠋ᠢᠨ ᠬᠢᠨᠢ ᠪᠤᠢᠯᠠ ᠡᠴᠡ ᠴᠢᠰᠤ ᠭᠠᠷᠴᠤ᠂ᠵᠤᠳᠪᠠᠪᠠᠭᠠᠲᠤᠷ ᠤ᠋ᠨ ᠬᠤᠷᠤᠭᠤᠨ ᠤ᠋ ᠦᠶᠡ ᠰᠢᠯᠪᠤᠷᠠᠵᠠᠢ᠃ ᠲᠡᠷᠡ ᠨᠠᠷᠭᠢᠯ ᠪᠦᠰᠡᠭᠦᠢ ᠪᠣᠯ ᠲᠣᠮᠣ ᠬᠥᠬᠥ ᠲᠡᠢ᠂ ᠵᠤᠵᠠᠭᠠᠨ ᠤᠷᠤᠭᠤᠯ ᠲᠠᠢ᠂ ᠪᠥᠭᠰᠡ ᠪᠡᠷ ᠢ᠋ᠶ᠋ᠡᠨ ᠬᠣᠯᠪᠤᠯᠵᠢᠨ ᠶᠠᠪᠤᠳᠠᠭ ᠵᠠᠷᠤᠴᠠ ᠪᠠᠢᠭᠰᠠᠨ ᠶᠤᠮ᠃ ᠴᠡᠴᠡᠨ ᠳᠡᠷᠭᠡᠳᠡ ᠪᠡᠨ ᠪᠠᠢᠭᠰᠠᠨ ᠭᠠᠯᠳᠠᠨ ᠢ᠋ ᠭᠡᠨᠡᠳᠲᠡ ᠬᠠᠷᠠᠵᠤ᠂
— ᠭᠠᠯᠳᠠᠨ ᠴᠢ ᠶᠠᠭᠤ ᠬᠢᠵᠦ ᠵᠣᠭᠰᠣᠨᠠ ᠭᠡᠪᠡ᠃
— ᠲᠠ ᠬᠣᠶᠠᠷ ᠬᠡᠦᠬᠡᠨ ᠪᠤᠯᠢᠶᠠᠯᠳᠤᠭᠰᠠᠨ ᠪᠤᠰᠤ ᠤᠤ?
— ᠴᠢ ᠶᠠᠭᠠᠬᠢᠵᠤ ᠮᠡᠳᠡᠭᠰᠡᠨ ᠶᠤᠮ ᠤᠤ?
— ᠨᠠᠷᠭᠢᠯ ᠡᠴᠡ ᠪᠣᠯᠵᠤ ᠵᠣᠳᠣᠯᠳᠤᠭᠰᠠᠨ ᠪᠤᠰᠤ ᠤᠤ?
— ᠶᠡᠬᠡ ᠦᠭᠡ ᠲᠡᠢ ᠴᠢᠮᠠᠶ᠋ᠢ ᠠᠯᠠᠭᠠᠳᠠᠴᠢᠬᠠᠬᠤ ᠶᠤᠮᠰᠠᠨ᠃ ᠳᠠᠩᠴᠤ ᠪᠣᠯᠬᠤ ᠦᠭᠡᠢ᠃ ᠡᠴᠢᠭᠡ ᠬᠣᠩ ᠲᠠᠢᠵᠢ ᠶ᠋ᠢᠨ ᠬᠡᠦᠬᠡᠳ ᠦ᠋ᠳ ᠳᠣᠲᠣᠷᠠ ᠡᠴᠡ ᠴᠢᠮᠠᠶ᠋ᠢ ᠤᠷᠲᠤ ᠦᠨᠳᠦᠰᠦ ᠲᠡᠢ ᠭᠡᠬᠦ ᠶᠤᠮ ᠪᠢᠯᠡ᠃ ᠳᠤᠷᠠ ᠦᠭᠡᠢ ᠬᠦᠷᠭᠡᠭᠡᠳ ᠪᠠᠢᠪᠠᠯ ᠴᠢᠨᠦ ᠦᠨᠳᠦᠰᠦ ᠶ᠋ᠢ ᠲᠠᠰᠤᠯᠤᠨᠠ᠃ ᠮᠡᠳᠡᠵᠦ ᠠᠪᠤᠭᠠᠷᠠᠢ᠃
— ᠲᠠᠨ ᠤ᠋ ᠦᠭᠡ ᠶ᠋ᠢ ᠡᠴᠢᠭᠡ ᠬᠠᠭᠠᠨ ᠳ᠋ᠤ᠌ ᠬᠡᠯᠡᠨᠡ ᠳᠡ᠃
— ᠭᠠᠯᠳᠠᠨ ᠳᠡᠭᠦᠦ ᠲᠣᠭᠯᠠᠭᠠᠮ ᠳᠠᠭᠠᠭᠠᠬᠤ ᠦᠭᠡᠢ ᠶᠤᠮ ᠠ᠋᠃
— ᠲᠠ ᠲᠣᠬᠣᠭᠤᠷᠬᠠᠭᠰᠠᠨ᠃ ᠪᠢ ᠠᠪᠤ ᠡᠴᠡ ᠠᠰᠠᠭᠤᠨᠠ᠃
— ᠶᠠᠭᠤ ᠭᠡᠨᠡ ᠁
— ᠵᠣᠳᠪᠠᠪᠠᠭᠠᠲᠤᠷ ᠠᠬᠠ ᠶ᠋ᠢ ᠵᠣᠣᠪᠠ ᠰᠢᠭ᠋ ᠲᠠᠢᠭᠠᠨ ᠪᠣᠯᠭᠠᠨᠠ ᠭᠡᠳ ᠪᠠᠢᠭᠰᠠᠨ᠃ ᠨᠠᠮᠠᠶ᠋ᠢ ᠪᠣᠯᠬᠤ ᠪᠠᠷ ᠦᠨᠳᠦᠰᠦ ᠶ᠋ᠢ ᠨᠢ ᠲᠠᠰᠤᠯᠤᠨᠠ ᠭᠡᠯᠡ᠃ ᠲᠠ ᠶᠠᠭᠠᠬᠢᠭᠰᠠᠨ ᠳᠡᠭᠡᠷᠡᠯᠬᠡᠦ ᠵᠠᠩ ᠲᠠᠢ ᠶᠤᠮ᠃
— ᠭᠠᠯᠳᠠᠨ ᠳᠡᠭᠦᠦ ᠥᠷᠭᠥᠭᠡ ᠳ᠋ᠡᠭᠡᠨ ᠣᠴᠢ᠃ ᠲᠣᠮᠣᠴᠤᠤᠯ ᠤ᠋ᠨ ᠶᠠᠪᠤᠳᠠᠯ ᠳ᠋ᠤ᠌ ᠪᠤᠤ ᠣᠷᠢᠶᠠᠯᠴᠠ᠃ ᠢᠯᠠᠩᠭᠤᠶᠠ ᠬᠡᠦᠬᠡᠨ ᠦ᠌ ᠶᠠᠪᠤᠳᠠᠯ ᠳ᠋ᠤ᠌ ᠣᠷᠢᠶᠠᠴᠠᠯᠳᠤᠬᠤ ᠴᠠᠭ ᠡᠷᠲᠡ ᠪᠠᠢᠨᠠ᠃ ᠰᠡᠭᠦᠯ ᠳ᠋ᠦ᠍ ᠶᠠᠭᠤᠮᠠ ᠪᠣᠯᠭᠠᠨ ᠢ᠋ ᠮᠡᠳᠡᠨᠡ᠃
ᠲᠡᠷᠡ ᠨᠠᠷᠭᠢᠯ ᠬᠡᠦᠬᠡᠨ ᠴᠡᠴᠡᠨ᠂ ᠵᠣᠳᠪᠠᠪᠠᠭᠠᠲᠤᠷ ᠬᠣᠶᠠᠷ ᠲᠠᠢ ᠠᠮᠠᠷᠠᠭᠯᠠᠵᠤ ᠲᠦᠢᠮᠡᠷᠳᠡᠳᠡᠭ ᠪᠠᠢᠵᠠᠢ᠃ ᠨᠠᠷᠭᠢᠯ ᠤ᠋ᠨ ᠡᠬᠡ ᠨᠢ ᠬᠦᠷᠵᠢ ᠶ᠋ᠢᠨ ᠬᠠᠭᠠᠨ ᠤ᠋ ᠲᠠᠲᠠᠪᠤᠷᠢ ᠡᠮᠡ ᠪᠠᠢᠭᠰᠠᠨ ᠪᠥᠭᠡᠳ ᠺᠧᠮᠴᠢ ᠭᠡᠭᠴᠢ ᠲᠡᠢ ᠨᠥᠬᠥᠴᠡᠭᠰᠡᠨ ᠲᠤᠯᠠ ᠰᠢᠪᠠᠷ ᠣᠷᠳᠣᠨ ᠡᠴᠡ ᠬᠥᠭᠡᠭᠡᠭᠳᠡᠵᠡᠢ᠃ ᠬᠥᠭᠡᠭᠡᠭᠳᠡᠭᠰᠡᠨ ᠢ᠋ᠶ᠋ᠡᠷ ᠦᠯᠦ ᠪᠠᠷᠠᠮ ᠪᠣᠭᠣᠯ ᠺᠧᠮᠴᠢ ᠬᠣᠶᠠᠭᠤᠯᠠ ᠣᠯᠵᠠᠯᠠᠭᠳᠠᠵᠤ ᠵᠡᠭᠦᠨᠭᠠᠷ ᠤ᠋ᠨ ᠤᠯᠤᠰ ᠲᠤ᠌ ᠢᠷᠡᠭᠡᠳ ᠰᠠᠯᠤᠭᠰᠠᠨ ᠶᠤᠮᠰᠠᠨᠵᠠᠢ᠃
ᠨᠠᠷᠭᠢᠯ ᠬᠡᠦᠬᠡᠨ ᠪᠣᠷᠣᠴᠤᠤᠯ ᠤ᠋ᠨ ᠬᠣᠭᠣᠷᠣᠨᠳᠣ ᠠᠮᠢᠳᠤᠷᠠᠵᠤ᠂ ᠬᠥᠬᠡ ᠲᠣᠭᠣᠰᠬᠠ ᠬᠡᠪᠯᠡᠳᠡᠭ ᠰᠢᠪᠠᠷᠴᠢᠨ ᠪᠣᠯᠵᠠᠢ᠃ ᠬᠠᠭᠠᠨ ᠤ᠋ ᠪᠡᠬᠢᠯᠡᠯᠲᠡ ᠪᠠᠷᠢᠬᠤ ᠲᠣᠭᠣᠰᠬᠠ ᠶ᠋ᠢᠨ ᠥᠩᠭᠡ ᠵᠢᠰᠦ᠂ ᠴᠢᠨᠠᠷ ᠴᠢᠨᠰᠠᠭᠠ ᠶ᠋ᠢ ᠦᠵᠡᠬᠦ ᠪᠡᠷ ᠣᠴᠢᠭᠰᠠᠨ ᠴᠡᠴᠡᠨ᠂ ᠵᠣᠳᠪᠠᠪᠠᠭᠠᠲᠤᠷ ᠬᠣᠶᠠᠭᠤᠯᠠ ᠪᠠᠨ ᠨᠠᠷᠭᠢᠯ ᠤ᠋ᠨ ᠲᠣᠮᠣ ᠬᠥᠬᠥ ᠡᠴᠡ ᠨᠢᠳᠦ ᠰᠠᠯᠭᠠᠯ ᠦᠭᠡᠢ ᠪᠠᠢᠭᠰᠠᠭᠠᠷ ᠡᠭᠡᠯᠵᠢᠯᠡᠨ ᠭᠦᠶᠦᠳᠡᠭ ᠪᠣᠯᠵᠠᠢ᠃ ᠨᠠᠷᠭᠢᠯ ᠤ᠋ᠨ ᠡᠬᠡ ᠦᠬᠦᠵᠦ᠂ ᠪᠣᠭᠣᠯ ᠺᠧᠮᠴᠢ ᠬᠣᠱᠤᠳ ᠣᠪᠣᠭᠲᠠᠨ ᠳ᠋ᠤ᠌ ᠵᠠᠷᠤᠴᠠᠯᠠᠭᠳᠠᠪᠠ᠃
ᠳᠥᠷᠪᠡ
ᠬᠡᠦᠬᠡᠨ ᠪᠤᠯᠢᠶᠠᠯᠳᠤᠵᠤ ᠵᠣᠳᠣᠯᠳᠤᠭᠰᠠᠨ ᠤ᠋ ᠪᠠᠨ ᠳᠠᠷᠠᠭᠠ ᠴᠡᠴᠡᠨ᠂ ᠵᠣᠳᠪᠠᠪᠠᠭᠠᠲᠤᠷ ᠬᠣᠶᠠᠷ ᠠᠬᠠ ᠳᠡᠭᠦᠦ ᠶ᠋ᠢᠨ ᠲᠠᠩᠭᠠᠷᠢᠭ ᠲᠠᠢ ᠪᠠᠢᠵᠤ ᠭᠠᠯᠳᠠᠨ ᠲᠠᠢ ᠲᠣᠭᠯᠠᠳᠠᠭ ᠪᠣᠯᠪᠠ᠃ ᠨᠠᠷᠭᠢᠯ ᠢ ᠨᠢᠭᠡ ᠤᠳᠠᠭᠠ ᠡᠳᠡᠨ ᠦ᠌ ᠬᠦᠷᠢᠶᠡᠨ ᠦ᠌ ᠳᠡᠷᠭᠡᠳᠡᠭᠦᠷ ᠶᠠᠪᠤᠵᠤ ᠪᠠᠢᠬᠤ ᠳ᠋ᠤ᠌ ᠬᠠᠪᠴᠢᠶᠠᠬᠠᠢ ᠨᠤᠮᠤ ᠪᠠᠨ ᠣᠨᠢᠯᠠᠵᠤ ᠰᠤᠮᠤ ᠲᠠᠯᠪᠢᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠲᠣᠨᠲᠣᠭᠣᠷ ᠥᠭᠡᠵᠡᠭ ᠢ ᠤᠨᠤᠵᠤ ᠪᠢᠯᠡ᠃ ᠨᠤᠮᠤ ᠪᠠᠨ ᠪᠠᠷᠢᠭᠰᠠᠨ ᠴᠠᠭ ᠲᠠᠭᠠᠨ ᠭᠠᠯᠳᠠᠨ ᠵᠣᠭᠰᠣᠵᠤ ᠪᠠᠢᠬᠤ ᠶ᠋ᠢ ᠬᠠᠷᠠᠭᠠᠳ᠂
— ᠴᠢᠨᠦ ᠨᠠᠰᠤ ᠪᠣᠯᠤᠭᠠ ᠦᠭᠡᠢ᠁ ᠨᠠᠰᠤᠨ ᠳ᠋ᠤ᠌ ᠬᠦᠷᠬᠦ ᠪᠡᠷ ᠠᠬᠠ ᠨᠠᠷ ᠰᠢᠭ᠋ ᠢ᠋ᠶ᠋ᠡᠨ ᠬᠤᠢᠬᠠᠯᠠᠭᠤᠯᠤᠨᠠ ᠭᠡᠮᠡᠨ ᠨᠠᠷᠭᠢᠯ ᠳᠠᠭᠠᠵᠢᠩᠨᠠᠵᠤ ᠥᠭᠦᠯᠡᠪᠡ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠮᠢᠭᠮᠠᠨᠰᠠᠩᠵᠠᠢ ᠳᠡᠷᠭᠡᠳᠡ ᠢᠷᠡᠵᠡᠢ᠃ ᠮᠢᠭᠮᠠᠨᠰᠠᠩᠵᠠᠢ ᠦᠷᠭᠦᠭᠰᠡᠨ ᠵᠡᠭᠡᠷᠡ ᠶ᠋ᠢᠨ ᠬᠢ ᠰᠢᠭ ᠨᠢᠳᠦ ᠪᠡᠷ ᠬᠠᠷᠠᠵᠤ᠂
— ᠬᠠᠨ ᠬᠦᠦ ᠶᠠᠭᠠᠬᠢᠭᠠᠳ ᠡᠮᠡᠭᠲᠡᠢ ᠬᠥᠮᠦᠨ ᠤᠷᠤᠭᠤ ᠰᠤᠮᠤ ᠲᠠᠯᠪᠢᠵᠤ ᠪᠠᠢᠭᠠ ᠶᠤᠮ᠃ ᠨᠠᠭᠠᠳᠤ ᠰᠤᠮᠤ ᠪᠠᠨ ᠳᠠᠢᠰᠤᠨ ᠤᠷᠤᠭᠤ ᠪᠠᠨ ᠣᠨᠢᠯᠠᠳᠠᠭ ᠪᠤᠰᠤ ᠤᠤ ᠭᠡᠮᠡᠨ ᠬᠡᠪ ᠨᠢᠭᠡ ᠥᠭᠦᠯᠡᠪᠡ᠃
ᠮᠢᠭᠮᠠᠨᠰᠠᠩᠵᠠᠢ ᠪᠥᠭᠡᠰᠦ ᠡᠴᠢᠭᠡ ᠬᠣᠩ ᠲᠠᠢᠵᠢ ᠶ᠋ᠢᠨ ᠠᠭᠲᠠᠴᠢᠨ ᠪᠠᠢᠭᠠᠳ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠭᠠᠪᠢᠶᠠ ᠪᠠᠢᠭᠤᠯᠵᠤ ᠵᠠᠩᠵᠤᠨ ᠤ᠋ ᠲᠤᠰᠢᠶᠠᠯ ᠳ᠋ᠤ᠌ ᠳᠠᠪᠰᠢᠭᠰᠠᠨ ᠳᠡᠮᠪᠡᠷᠢᠯ ᠦ᠋ᠨ ᠭᠠᠭᠴᠠ ᠥᠬᠢᠨ ᠪᠢᠯᠡ᠃ ᠮᠢᠭᠮᠠᠨᠰᠠᠩᠵᠠᠢ ᠶ᠋ᠢᠨ ᠠᠬᠠ ᠶ᠋ᠢ ᠠᠷᠴᠠ ᠭᠡᠨᠡ᠃ ᠠᠷᠴᠠ ᠭᠠᠯᠳᠠᠨ ᠲᠠᠢ ᠴᠣᠭ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠳ᠋ᠦ᠍ ᠰᠤᠮᠤ ᠬᠠᠷᠪᠤᠵᠤ᠂ ᠨᠣᠮ ᠤ᠋ᠨ ᠦᠷᠭᠦᠭᠡᠨ ᠳ᠋ᠦ᠍ ᠦᠰᠦᠭ ᠨᠢᠳᠦᠯᠡᠵᠦ ᠡᠳᠦᠷ ᠢ᠋ ᠥᠩᠭᠡᠷᠡᠭᠡᠬᠦ ᠪᠥᠭᠡᠳ ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠦ᠌ ᠭᠦᠨ ᠴᠡᠭᠡᠯ ᠳ᠋ᠦ᠍ ᠰᠡᠯᠢᠳᠡᠭ ᠪᠠᠢᠯᠠ᠃ ᠬᠡᠷᠪᠡ ᠰᠡᠩᠭᠡ ᠠᠬᠠ ᠨᠢ ᠭᠠᠯᠳᠠᠨ ᠲᠠᠢ ᠴᠣᠭ ᠤᠰᠤᠨ ᠳ᠋ᠤ᠌ ᠰᠡᠯᠢᠬᠦ ᠪᠣᠯ ᠠᠷᠴᠠ ᠭᠡᠷ ᠤᠷᠤᠭᠤ ᠪᠠᠨ ᠣᠳᠤᠨᠠ᠃
ᠳᠡᠮᠪᠡᠷᠢᠯ ᠵᠠᠩᠵᠤᠨ ᠤ᠋ ᠡᠬᠡᠨᠡᠷ ᠢ᠋ ᠪᠥᠭᠡᠷᠡ ᠭᠡᠳᠡᠭ᠃ ᠪᠥᠭᠡᠷᠡ ᠡᠬᠡᠨᠡᠷ ᠴᠡᠴᠡᠭᠲᠦ ᠨᠤᠭᠤ ᠶ᠋ᠢᠨ ᠳᠡᠨᠵᠢ ᠳᠡᠭᠡᠷᠡᠬᠢ ᠭᠡᠷ ᠲᠡᠭᠡᠨ ᠪᠣᠷᠪᠢ ᠪᠣᠬᠢᠰᠬᠢᠬᠤ ᠵᠠᠪ ᠦᠭᠡᠢ ᠮᠠᠯ ᠠᠳᠤᠭᠤᠯᠠᠵᠤ᠂ ᠰᠠᠭᠠᠯᠢ ᠰᠦ ᠬᠤᠷᠢᠶᠠᠨᠠ᠃ ᠮᠢᠭᠮᠠᠨᠰᠠᠩᠵᠠᠢ ᠠᠵᠢᠯ ᠳ᠋ᠤ᠌ ᠲᠤᠰᠠᠲᠠᠢ ᠬᠥᠩᠭᠡᠨ ᠰᠢᠩᠭᠡᠨ ᠥᠬᠢᠨ ᠪᠠᠢᠯᠠ᠃ ᠴᠣᠷᠣᠰ ᠨᠤᠲᠤᠭ ᠤ᠋ᠨ ᠳᠡᠮᠪᠡᠷᠢᠯ ᠵᠠᠩᠵᠤᠨ ᠠᠪᠠ ᠬᠣᠮᠣᠷᠭᠠ᠂ ᠲᠡᠢᠨ ᠳᠣᠯᠣᠭᠠᠨ ᠤ᠋ ᠪᠡᠯᠡᠳᠬᠡᠯ᠂ ᠬᠠᠭᠠᠨ ᠤ᠋ ᠠᠯᠪᠠ᠂ ᠣᠯᠵᠠ ᠶ᠋ᠢᠨ ᠠᠢᠯ ᠬᠦᠷᠰᠢ ᠶ᠋ᠢᠨ ᠨᠡᠭᠦᠳᠡᠯ ᠭᠡᠳ ᠪᠣᠷᠣ ᠬᠣᠨᠣᠭ ᠲᠠᠭᠠᠨ ᠭᠡᠷ ᠦ᠋ᠨ ᠪᠠᠷᠠ ᠬᠠᠷᠠᠳᠠᠭ ᠦᠭᠡᠢ᠃ ᠵᠠᠷᠢᠮ ᠳ᠋ᠠᠭᠠᠨ ᠰᠠᠷᠠ᠂ ᠵᠢᠯ ᠢ᠋ᠶ᠋ᠡᠷ ᠣᠳᠴᠤ ᠳᠡᠮᠪᠡᠷᠢᠯ ᠦ᠋ᠨ ᠭᠡᠷ ᠣᠷᠣᠨ ᠢ᠋ ᠪᠥᠭᠡᠷᠡ ᠡᠬᠡᠨᠡᠷ ᠨᠢᠷᠤᠭᠤᠨ ᠳ᠋ᠠᠭᠠᠨ ᠡᠭᠦᠷᠦᠨᠡ᠃
ᠭᠠᠯᠳᠠᠨ ᠲᠡᠷᠡ ᠡᠳᠦᠷ ᠮᠢᠭᠮᠠᠨᠰᠠᠩᠵᠠᠢ ᠳ᠋ᠤ᠌᠂
— ᠬᠣᠶᠠᠭᠤᠯᠠ ᠪᠠᠨ ᠨᠢᠯ ᠶᠠᠭᠠᠨ ᠴᠡᠴᠡᠭ ᠲᠡᠭᠦᠵᠦ᠂ ᠢᠷᠪᠢᠰ ᠢ᠋ ᠤᠨᠲᠠᠭᠤᠯᠬᠤ ᠤᠤ ᠭᠡᠪᠡ᠃ ᠥᠬᠢᠨ ᠲᠡᠭᠦᠨ ᠢ᠋ ᠬᠦᠨᠳᠦᠳᠬᠡᠵᠦ᠂
— ᠬᠠᠨ ᠬᠦᠦ ᠲᠠ ᠢᠷᠪᠢᠰ ᠲᠡᠢ ᠶᠠᠭᠤᠨ ᠳ᠋ᠤ᠌ ᠲᠣᠭᠯᠠᠨᠠ ᠭᠡᠯᠡ᠃
— ᠢᠷᠪᠢᠰ ᠦ᠋ᠨ ᠰᠢᠲᠦ ᠶ᠋ᠢ ᠲᠣᠭᠠᠯᠠᠵᠤ᠂ ᠬᠡᠳᠦᠨ ᠰᠣᠶᠣᠭᠠ ᠲᠠᠢ ᠶ᠋ᠢ ᠮᠠᠲᠠᠮᠠᠷ ᠪᠠᠢᠨᠠ ᠭᠡᠵᠦ ᠭᠠᠯᠳᠠᠨ ᠬᠡᠯᠡᠪᠡ᠃
— ᠢᠷᠪᠢᠰ ᠲᠠᠨ ᠤ᠋ ᠭᠠᠷ ᠢ᠋ ᠲᠠᠰᠤ ᠬᠠᠵᠠᠪᠠᠯ ᠭᠠᠷ ᠦᠭᠡᠢ ᠪᠣᠯᠤᠨᠠ᠃ ᠨᠢᠯ ᠶᠠᠭᠠᠨ ᠴᠡᠴᠡᠭ ᠦᠨᠦᠷᠲᠦᠭᠰᠡᠨ ᠢᠷᠪᠢᠰ ᠤᠨᠲᠠᠬᠤ ᠦᠭᠡᠢ ᠪᠣᠯ ᠬᠠᠨ ᠬᠦᠦ ᠲᠠ ᠰᠣᠶᠣᠭᠠ ᠶ᠋ᠢ ᠨᠢ ᠪᠢᠲᠡᠭᠡᠢ ᠲᠣᠭᠠᠯᠠᠭᠠᠷᠠᠢ᠃ ᠢᠷᠪᠢᠰ ᠦ᠋ᠨ ᠰᠣᠶᠣᠭᠠ ᠵᠣᠳᠪᠠ ᠲᠠᠢᠭᠠᠨ ᠤ᠋ ᠴᠢᠴᠢᠯᠡᠭᠦᠷ ᠬᠢᠲᠤᠭᠠ ᠭᠡᠰᠡᠨ ᠦᠭᠡ ᠭᠡᠮᠡᠨ ᠭᠠᠯᠳᠠᠨ ᠢ᠋ ᠥᠮᠥᠭᠡᠷᠡᠨ ᠮᠡᠭᠮᠠᠨᠰᠠᠩᠵᠠᠢ ᠨᠢᠳᠦ ᠪᠡᠨ ᠲᠣᠷᠮᠣᠯᠵᠠᠭᠤᠯᠪᠠ᠃
ᠲᠠᠪᠤ
ᠭᠠᠯᠳᠠᠨ ᠤ᠋ ᠡᠴᠢᠭᠡ ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠲᠥᠪᠡᠳ ᠣᠷᠣᠨᠠ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠤ᠋ ᠤᠷᠤᠰᠬᠠᠯ ᠦᠯᠦ ᠲᠠᠰᠤᠷᠠᠬᠤ ᠶ᠋ᠢᠨ ᠲᠥᠯᠥᠭᠡᠨᠡ ᠤᠯᠠᠭᠠᠨ ᠤ᠋ ᠤᠷᠤᠰᠬᠠᠯ ᠤ᠋ᠨ ᠡᠰᠡᠷᠭᠦ ᠳᠠᠢᠳᠤᠵᠤ᠂ ᠲᠡᠢᠨ ᠳ᠋ᠦ᠍ ᠢᠯᠠᠵᠤ ᠳᠠᠯᠠᠢ ᠯᠠᠮᠠ ᠠ᠋ᠴᠠ ᠨᠡᠷᠡ ᠲᠥᠷᠥ ᠶ᠋ᠢᠨ ᠱᠠᠩ ᠬᠠᠷᠠᠮᠵᠢ ᠬᠦᠷᠲᠡᠭᠰᠡᠨ ᠬᠥᠮᠦᠨ ᠪᠢᠯᠡ᠃ ᠲᠥᠪᠡᠳ ᠭᠠᠵᠠᠷ ᠭᠦᠦᠰᠢ ᠬᠠᠭᠠᠨ ᠲᠦᠷᠦᠪᠠᠢᠬᠤ ᠴᠡᠷᠢᠭ ᠦ᠋ᠳ ᠪᠣᠯᠤᠨ ᠳᠠᠭᠠᠭᠤᠯᠢ ᠠᠢᠯ ᠤ᠋ᠳ᠂ ᠮᠠᠯ ᠠᠬᠤᠢ ᠲᠠᠢ ᠪᠠᠨ ᠦᠯᠡᠳᠡᠵᠦ ᠡᠴᠢᠭᠡ ᠬᠣᠩ ᠲᠠᠢᠵᠢ ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠳ᠋ᠡᠭᠡᠨ ᠡᠷᠭᠢᠵᠦ ᠢᠷᠡᠵᠡᠢ᠃ ᠲᠡᠷᠡ ᠴᠠᠭ ᠠ᠋ᠴᠠ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠭᠠᠯ ᠭᠣᠯᠣᠮᠲᠠ ᠶ᠋ᠢᠨ ᠴᠤᠴᠠᠯᠢ ᠠᠰᠠᠵᠤ᠂ ᠬᠢᠯᠢ ᠬᠢᠵᠠᠭᠠᠷ ᠢ᠋ᠶ᠋ᠠᠨ ᠲᠣᠭᠲᠠᠭᠠᠵᠤ ᠪᠠᠷᠠᠭᠠᠳ᠂ ᠵᠡᠭᠦᠨ᠂ ᠬᠣᠢᠰᠢ᠂ ᠤᠷᠤᠭᠰᠢ ᠪᠠᠨ ᠬᠠᠶᠠᠭᠠ ᠬᠠᠲᠠᠪᠴᠢ ᠪᠠᠨ ᠲᠡᠯᠡᠵᠦ ᠪᠠᠢᠯᠠ᠃ ᠡᠴᠢᠭᠡ ᠬᠣᠩ ᠲᠠᠢᠵᠢ ᠠ᠋ᠴᠠ ᠡᠮᠦᠨᠡ ᠣᠢᠷᠠᠳ ᠤ᠋ᠳ ᠳᠥᠷᠪᠡ ᠪᠤᠰᠤ ᠨᠠᠢ᠍ᠮᠠ ᠪᠠᠢᠭᠰᠠᠨ ᠭᠡᠨᠡ᠃ ᠡᠴᠢᠭᠡ ᠬᠣᠩ ᠲᠠᠢᠵᠢ ᠶ᠋ᠢᠨ ᠦᠶᠡ ᠮᠤᠯᠲᠤᠷᠠᠵᠤ ᠭᠠᠯᠳᠠᠨ ᠤ᠋ ᠦᠶᠡ ᠡᠬᠢᠯᠡᠭᠰᠡᠨ ᠨᠢ ᠣᠢᠷᠠᠳ ᠣᠪᠣᠭ ᠤ᠋ᠨ ᠬᠢᠨ ᠦ᠌ ᠬᠤᠪᠢ ᠳ᠋ᠤ᠌ ᠶᠡᠬᠡ ᠵᠠᠪᠰᠠᠷᠯᠠᠭᠠ ᠪᠢᠯᠡ᠃
ᠲᠦᠷᠦᠭᠦᠴᠢ ᠶ᠋ᠢᠨ ᠨᠠᠢ᠍ᠮᠠᠨ ᠣᠢᠷᠠᠳ ᠤ᠋ᠨ ᠤᠯᠠ ᠮᠥᠷ ᠪᠠᠯᠠᠷᠠᠭᠠ ᠦᠭᠡᠢ ᠪᠣᠯᠠᠢ᠃
ᠬᠣᠢᠳ᠂ ᠪᠠᠭᠠᠲᠤᠳ ᠪᠠᠷᠭᠤ᠂ ᠪᠤᠷᠢᠶᠠᠳ ᠥᠭᠡᠯᠡᠳ᠂ ᠳᠥᠷᠪᠡᠳ ᠬᠣᠱᠤᠳ᠂ ᠲᠣᠷᠭᠤᠳ ᠪᠥᠯᠥᠭᠡ᠃
ᠪᠠᠷᠭᠤ᠂ ᠪᠤᠷᠢᠶᠠᠳ ᠬᠣᠶᠠᠷ ᠨᠢ ᠬᠠᠯᠬᠠ ᠪᠠᠷ ᠳᠡᠮᠵᠢᠵᠦ ᠣᠷᠣᠰ ᠲᠤ᠌ ᠣᠴᠢᠭᠠᠳ᠂ ᠪᠤᠷᠢᠶᠠᠳ ᠤ᠋ᠳ ᠨᠢ ᠪᠠᠢᠭᠠᠯ ᠳᠠᠯᠠᠢ ᠶ᠋ᠢᠨ ᠣᠷᠴᠢᠮ ᠰᠢᠩᠭᠡᠭᠡᠳ᠂ ᠪᠠᠷᠭᠤ ᠨᠢ ᠬᠥᠯᠥᠨ ᠪᠤᠢᠷ ᠲᠤ᠌ ᠨᠤᠲᠤᠭᠰᠢᠭᠰᠠᠨ ᠠᠵᠤᠭᠤ᠃ ᠬᠠᠷᠢᠨ ᠪᠠᠭᠠᠲᠤᠳ ᠤ᠋ᠨ ᠣᠯᠠᠩᠬᠢ ᠨᠢ ᠵᠡᠭᠦᠨ ᠮᠣᠩᠭᠣᠯ᠂ ᠬᠣᠱᠤᠳ ᠲᠦᠮᠡᠨ ᠦ᠌ ᠳᠤᠮᠳᠠ ᠠᠭᠤᠰᠴᠠᠢ᠃ ᠬᠣᠢᠳ ᠤ᠋ᠳ ᠨᠢ ᠬᠣᠲᠣᠭᠣᠢᠳ ᠪᠣᠯᠵᠠᠢ᠃ ᠶᠡᠬᠡᠩᠬᠢ ᠨᠢ ᠨᠠᠢ᠍ᠮᠠᠨ ᠠᠢᠮᠠᠭ ᠲᠤ᠌ ᠨᠡᠢᠯᠡᠭᠰᠡᠨ ᠪᠥᠯᠥᠭᠡ᠃ ᠨᠠᠢ᠍ᠮᠠᠨ ᠠᠢᠮᠠᠭ ᠪᠣᠯᠪᠠᠰᠤ ᠺᠢᠷᠭᠢᠽ ᠶᠤᠮ᠃
ᠭᠠᠯᠳᠠᠨ ᠤ᠋ ᠦᠶᠡ ᠶ᠋ᠢᠨ ᠳᠥᠷᠪᠡᠨ ᠣᠢᠷᠠᠳ ᠤ᠋ᠨ ᠳᠥᠷᠪᠡᠳ᠂ ᠬᠣᠱᠤᠳ᠂ᠲᠣᠷᠭᠤᠳ᠂ ᠥᠭᠡᠯᠡᠳ ( ᠴᠣᠷᠣᠰ) ᠪᠢᠯᠡ᠃ ᠴᠠᠭᠠᠰᠢᠳᠠ ᠲᠤᠯᠭᠠ ᠶ᠋ᠢᠨ ᠳᠥᠷᠪᠡᠨ ᠲᠣᠲᠣᠭᠣ ᠮᠢᠨᠢ ᠡᠨᠡ ᠶᠤᠮᠰᠠᠨ᠃ ᠳᠥᠷᠪᠡᠨ ᠣᠢᠷᠠᠳ ᠤ᠋ᠨ ᠬᠣᠶᠠᠷ ᠬᠥᠯ ᠨᠢ ᠭᠠᠯᠳᠠᠨ ᠤ᠋ ᠬᠣᠶᠠᠷ ᠬᠥᠯ᠂ ᠬᠣᠶᠠᠷ ᠭᠠᠷ ᠨᠢ ᠭᠠᠯᠳᠠᠨ ᠤ᠋ ᠬᠣᠶᠠᠷ ᠭᠠᠷ ᠰᠢᠦ ᠳᠡ᠃ ᠳᠥᠷᠪᠡᠨ ᠮᠥᠴᠢ ᠨᠢ ᠳᠥᠷᠪᠡᠨ ᠣᠢᠷᠠᠳ ᠪᠢᠯᠡ᠃ ᠣᠢᠷᠠᠳ ᠶᠠᠰᠤᠨ ᠤ᠋ ᠴᠣᠷᠣᠰ ᠣᠪᠣᠭᠲᠠᠨ ᠳ᠋ᠤ᠌ ᠵᠤᠵᠠᠭᠠᠨ ᠲᠡᠦᠬᠡ ᠲᠡᠢ᠃ ᠲᠡᠷᠡ ᠲᠡᠦᠬᠡ ᠠᠭᠤᠯᠠᠨ ᠳ᠋ᠤ᠌ ᠪᠣᠢ᠃ ᠲᠡᠷᠡ ᠣᠪᠣᠭ ᠤᠭᠰᠠᠭᠠᠲᠠᠨ ᠤᠢᠭᠤᠷ ᠰᠢᠨᠵᠢᠶᠠᠩ ᠪᠣᠯᠤᠨ ᠠᠯᠲᠠᠢ ᠶ᠋ᠢᠨ ᠬᠢᠵᠠᠭᠠᠷ᠂ ᠪᠠᠷᠠᠭᠤᠨ ᠮᠣᠩᠭᠣᠯ ᠳ᠋ᠤ᠌ ᠪᠣᠢ᠃ ᠳᠠᠶᠠᠩ ᠳᠡᠯᠡᠬᠡᠢ ᠳ᠋ᠦ᠍ ᠳᠥᠷᠪᠡᠨ ᠣᠢᠷᠠᠳ ᠤ᠋ᠨ ᠨᠡᠷᠡ᠂ ᠮᠥᠷ ᠦᠯᠡᠳᠡᠵᠡᠢ᠃
ᠵᠢᠷᠭᠤᠭᠠ
— ᠴᠣᠷᠣᠰ ᠣᠪᠣᠭᠲᠠᠨ ᠢ᠋ ᠣᠢᠷᠠᠳ ᠭᠡᠨᠡ᠃ ᠣᠢᠷᠠᠳ ᠤᠭᠰᠠᠭᠠᠲᠠᠨ ᠢ᠋ ᠴᠣᠷᠣᠰ ᠭᠡᠨᠡ᠃ ᠣᠢᠷᠠᠳ᠂ ᠴᠣᠷᠣᠰ ᠬᠣᠶᠠᠷ ᠨᠢᠭᠡ ᠶᠠᠭᠤᠮᠠ᠃ ᠶᠠᠰᠤᠨ ᠤ᠋ ᠬᠢᠨᠢ ᠬᠡᠯᠲᠡᠷᠬᠡᠢ ᠢᠵᠢᠯᠢᠬᠡᠨ ᠶᠤᠮ᠃ ᠭᠠᠭᠴᠠ ᠡᠨᠡ ᠬᠦ᠌ ᠶᠠᠰᠤᠨ ᠤ᠋ ᠬᠡᠯᠲᠡᠷᠬᠡᠢ ᠪᠣᠯᠪᠠᠰᠤ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠬᠤᠯᠤᠨᠴᠠ ᠡᠪᠦᠭᠡ ᠳᠤᠸᠠ ᠰᠣᠬᠣᠷ ᠡᠴᠡ ᠡᠬᠢᠲᠡᠢ᠃
ᠳᠤᠸᠠ ᠰᠣᠬᠣᠷ ᠤ᠋ᠨ ᠮᠡᠯᠮᠡᠢ᠂ ᠮᠥᠴᠢ ᠮᠡᠩᠭᠡ᠂ ᠭᠠᠷ᠂ ᠬᠥᠯ ᠬᠣᠯᠠᠬᠢ ᠲᠠᠢᠳ ᠤ᠋ᠨ ᠦᠶᠡ ᠳ᠋ᠦ᠍ ᠠᠮᠢᠳᠤᠷᠠᠬᠤ ᠭᠠᠯᠳᠠᠨ ᠤᠷᠤᠭᠤ ᠢᠯᠡᠭᠡᠭᠳᠡᠵᠦ ᠰᠤᠳᠠᠰᠤ ᠪᠠᠷ ᠨᠢ ᠲᠡᠭᠦᠨ ᠦ᠌ ᠴᠢᠰᠤ᠂ ᠵᠢᠷᠦᠬᠡ ᠶ᠋ᠢ ᠲᠡᠵᠢᠭᠡᠨ ᠤᠷᠤᠰᠴᠤ᠂ ᠨᠤᠭᠤᠰᠤ ᠪᠠᠷ ᠨᠢ ᠲᠡᠭᠦᠨ ᠦ᠌ ᠤᠬᠠᠭᠠᠨ᠂ ᠲᠠᠷᠢᠬᠢ ᠶ᠋ᠢ ᠠᠮᠢᠯᠠᠭᠤᠯᠵᠤ ᠭᠠᠯᠳᠠᠨ ᠢ᠋ ᠪᠦᠷᠢᠯᠳᠦᠭᠦᠯᠦᠭᠰᠡᠨ ᠪᠢᠯᠡ᠃ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠳᠡᠭᠡᠳᠦ ᠡᠪᠦᠭᠡ ᠳᠤᠸᠠ ᠰᠣᠬᠣᠷ ᠳᠥᠷᠪᠡᠨ ᠬᠦᠦ ᠲᠡᠢ ᠪᠠᠢᠯᠠ᠃ ᠳᠥᠷᠪᠡᠨ ᠬᠥᠪᠡᠭᠦᠨ ᠦ᠌ ᠤᠳᠤᠮ ᠤᠭᠰᠠᠭᠠ ᠨᠢ ᠰᠠᠯᠪᠤᠷᠢᠯᠠᠨ ᠥᠭᠡᠷᠡ ᠥᠭᠡᠷᠡ ᠣᠪᠣᠭᠲᠠᠨ ᠪᠣᠯᠤᠭᠰᠠᠨ ᠪᠥᠭᠡᠳ ᠬᠤᠤᠬᠠᠢ ᠳᠠᠶᠤᠤ ᠨᠢ ᠴᠣᠷᠣᠰ ᠣᠪᠣᠭᠲᠠᠨ ᠤ᠋ ᠤᠳᠤᠮ ᠪᠥᠯᠥᠭᠡ᠃
ᠬᠤᠤᠬᠠᠢ ᠶ᠋ᠢᠨ ᠬᠥᠪᠡᠭᠦᠨ ᠢ᠋ ᠪᠠᠲᠤᠯᠠ ᠴᠢᠩᠰᠠᠩ ᠭᠡᠨᠡ᠃ ᠪᠠᠲᠤᠯᠠ ᠴᠢᠩᠰᠠᠩ ᠤ᠋ᠨ ᠬᠥᠪᠡᠭᠦᠨ ᠢ᠋ ᠲᠣᠭᠣᠨ ᠲᠠᠢᠱ᠌ᠢ ᠭᠡᠨᠡ᠃ ᠲᠣᠭᠣᠨ ᠲᠠᠢᠱ᠌ᠢ ᠶ᠋ᠢᠨ ᠬᠥᠪᠡᠭᠦᠨ ᠪᠣᠯ ᠡᠰᠡᠨ ᠲᠠᠢᠱ᠌ᠢ ᠶᠤᠮ᠃ ᠡᠰᠡᠨ ᠲᠠᠢᠰᠢ ᠶ᠋ᠢᠨ ᠬᠥᠪᠡᠭᠦᠨ ᠪᠣᠯ ᠠᠷᠠᠬᠠᠨ ᠲᠠᠢᠰᠢ ᠪᠢᠯᠡ᠃ ᠠᠷᠠᠬᠠᠨ ᠲᠡᠢᠰᠢ ᠶ᠋ᠢᠨ ᠬᠥᠪᠡᠭᠦᠨ ᠣᠩᠭᠣᠨ ᠪᠥᠯᠥᠭᠡ᠃ ᠣᠩᠭᠣᠨ ᠤ᠋ ᠬᠥᠪᠡᠭᠦᠨ ᠠᠷᠪᠢᠳ ᠪᠤᠯᠠ ᠲᠡᠢᠰᠢ ᠶᠤᠮ᠃ ᠠᠷᠪᠢᠳ ᠪᠤᠯᠠ ᠲᠡᠢᠰᠢ ᠶ᠋ᠢᠨ ᠬᠥᠪᠡᠭᠦᠨ ᠬᠠᠷᠠᠬᠤᠯᠠ ᠨᠣᠶᠠᠨ ᠪᠥᠯᠥᠭᠡ᠃ ᠬᠠᠷᠠᠬᠤᠯᠠ ᠨᠣᠶᠠᠨ ᠤ᠋ ᠬᠥᠪᠡᠭᠦᠨ ᠭᠠᠯᠳᠠᠨ ᠤ᠋ ᠡᠴᠢᠭᠡ ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠮᠥᠨ᠃
ᠲᠡᠳᠡᠨ ᠦ᠌ ᠤᠳᠤᠮ ᠪᠣᠯ ᠳᠡᠭᠡᠳᠦ ᠲᠡᠭᠷᠢ ᠶ᠋ᠢᠨ ᠲᠠᠮᠠᠭᠠ ᠲᠠᠢ᠂ ᠬᠥᠬᠡ ᠮᠣᠩᠭᠣᠯ ᠲᠣᠯᠪᠣ ᠲᠠᠢ᠂ ᠵᠢᠷᠦᠬᠡ ᠲᠠᠷᠢᠬᠢ ᠬᠣᠶᠠᠷ ᠲᠠᠭᠠᠨ ᠣᠮᠣᠭ ᠲᠠᠢ᠂ ᠮᠣᠷᠢᠨ ᠳᠡᠭᠡᠷᠡ ᠥᠰᠴᠦ᠂ ᠴᠢᠯᠠᠭᠤᠨ ᠳᠡᠭᠡᠷᠡ ᠤᠨᠲᠠᠳᠠᠭ ᠬᠥᠮᠦᠰ ᠪᠢᠯᠡ᠃ ᠮᠠᠰᠢ ᠲᠣᠪᠴᠢᠬᠠᠨ ᠪᠢᠴᠢᠬᠦ ᠳ᠋ᠦ᠍ ᠶᠡᠬᠡ ᠮᠣᠩᠭᠣᠯᠴᠤᠳ᠃ ᠶᠡᠬᠡ ᠮᠣᠩᠭᠣᠯᠴᠤᠳ ᠢ ᠳᠥᠷᠪᠡᠨ ᠵᠠᠭᠤᠨ ᠵᠢᠯ ᠦ᠋ᠨ ᠲᠤᠷᠰᠢ ᠡᠷᠢᠵᠦ ᠶᠠᠪᠤᠭᠠ ᠮᠣᠩᠭᠣᠯ ᠬᠥᠮᠦᠨ— ᠣᠢᠷᠠᠳ ᠭᠡᠨᠡ᠃ ᠬᠥᠬᠡ ᠴᠢᠨᠣᠠ— ᠣᠢᠷᠠᠳ ᠭᠡᠨᠡ᠁
ᠳᠣᠯᠣᠭᠠ
— ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶ᠋ᠢᠨ ᠵᠢᠷᠭᠤᠳᠤᠭᠠᠷ ᠬᠠᠲᠤᠨ ᠶᠤᠮ ᠠᠭᠠ ᠪᠣᠯ ᠭᠠᠯᠳᠠᠨ ᠤ᠋ ᠡᠬᠡ ᠪᠢᠯᠡ᠃ ᠦᠯᠢᠭᠡᠷᠴᠢ ᠡᠬᠡ ᠨᠢ ᠲᠡᠭᠦᠨ ᠳ᠋ᠦ᠍ ᠦᠳᠡᠰᠢ ᠪᠦᠷᠢ ᠳᠣᠮᠣᠭ ᠬᠦᠦᠷᠨᠢᠨ ᠥᠰᠬᠡᠭᠰᠡᠨ ᠨᠢ ᠡᠳᠦᠭᠡ ᠲᠤᠤᠯᠢᠰ ᠲᠡᠮᠳᠡᠭᠯᠡᠬᠦ ᠶ᠋ᠢᠨ ᠡᠬᠢᠯᠡᠯ ᠪᠣᠯᠤᠭᠰᠠᠨ ᠶᠤᠮ᠃ ᠲᠤᠤᠯᠢᠴᠢ ᠡᠪᠦᠭᠡᠳ ᠦ᠋ᠨ ᠤᠷᠠᠨ ᠬᠤᠷᠤᠭᠤ ᠲᠣᠪᠰᠢᠭᠤᠷ ᠤ᠋ᠨ ᠤᠲᠠᠰᠤ ᠳᠡᠭᠡᠭᠦᠷ ᠵᠥᠭᠡᠯᠡᠨ ᠤᠷᠤᠰᠬᠤ ᠳ᠋ᠤ᠌ ᠠᠯᠲᠠᠢ ᠶ᠋ᠢᠨ ᠴᠠᠰᠤᠲᠤ ᠣᠷᠭᠢᠯ ᠳ᠋ᠤ᠌ ᠪᠦᠷᠭᠦᠳ ᠬᠠᠪᠰᠢᠵᠤ᠂ ᠠᠭᠤᠯᠠ ᠶ᠋ᠢᠨ ᠭᠣᠣᠯ ᠤ᠋ᠨ ᠪᠣᠷᠭᠢᠶᠠ ᠨᠢᠭᠡᠨ ᠭᠡᠮ ᠢ᠋ᠶ᠋ᠡᠷ ᠦᠶᠡᠯᠵᠡᠨ ᠤᠢᠳᠬᠠᠷ ᠲᠥᠷᠥᠵᠦ ᠲᠡᠢᠨ ᠳ᠋ᠦ᠍ ᠦᠷᠡᠭᠳᠡᠭᠰᠡᠳ ᠢ ᠳᠤᠷᠠᠰᠴᠤ ᠦᠷᠴᠢᠭᠢᠷ ᠡᠮᠡᠭᠡᠳ ᠨᠢᠯᠪᠤᠰᠤ ᠤᠨᠠᠭᠠᠨᠠ᠃
ᠡᠬᠡ ᠶ᠋ᠢᠨ ᠨᠤᠲᠤᠭ ᠤᠰᠤ ᠬᠣᠯᠠ᠂ ᠡᠴᠢᠭᠡ ᠡᠬᠡ ᠠᠯᠤᠰ ᠰᠠᠭᠤᠬᠤ ᠲᠤᠯᠠ ᠲᠤᠤᠯᠢ ᠬᠠᠢᠯᠠᠬᠤ ᠶ᠋ᠢ ᠰᠣᠨᠣᠰᠴᠤ ᠰᠡᠳᠬᠢᠯ ᠢ᠋ᠶ᠋ᠡᠨ ᠳᠡᠪᠲᠦᠭᠡᠳᠡᠭ ᠪᠠᠢᠵᠠᠢ᠃ ᠦᠳᠡᠰᠢ ᠶ᠋ᠢᠨ ᠭᠢᠯᠠᠭᠠᠨ ᠲᠩᠷᠢ ᠳ᠋ᠦ᠍ ᠭᠢᠯᠠᠯᠵᠠᠵᠤ ᠣᠳᠣ ᠵᠢᠭᠰᠠᠬᠤ ᠳ᠋ᠤ᠌ ᠦᠯᠢᠭᠡᠷ ᠲᠤᠤᠯᠢᠰ ᠬᠠᠢᠯᠠᠬᠤ ᠴᠠᠭ ᠡᠬᠢᠯᠡᠨᠡ᠃ ᠴᠣᠷᠣᠰ ᠠᠢᠮᠠᠭ ᠤ᠋ᠨ ᠬᠣᠲᠠ ᠬᠦᠷᠢᠶᠡᠨ ᠳ᠋ᠦ᠍ ᠡᠬᠡ ᠨᠢ ᠳᠠᠭᠠᠵᠤ ᠢᠷᠡᠭᠰᠡᠨ ᠲᠣᠷᠭᠤᠳ ᠡᠮᠡᠭᠡᠳ ᠣᠯᠠᠨ ᠪᠠᠢᠪᠠ᠃ ᠲᠣᠷᠭᠤᠳ ᠤ᠋ᠨ ᠬᠤᠰᠤ ᠰᠢᠭ᠋ ᠭᠤᠸᠠᠯᠢᠭ ᠥᠬᠢᠳ ᠲᠡᠢ ᠪᠢᠯᠡ᠃ ᠲᠣᠷᠭᠤᠳ ᠥᠬᠢᠳ ᠦ᠋ᠨ ᠬᠠᠴᠠᠷ ᠤᠯᠠᠭᠠᠨ᠂ ᠤᠷᠤᠭᠤᠯ ᠨᠢ ᠮᠣᠢᠯ ᠤ᠋ᠨ ᠬᠠᠨᠳᠠ ᠲᠦᠷᠬᠢᠭᠰᠡᠨ ᠮᠡᠲᠦ ᠵᠢᠮᠢᠰᠯᠢᠭ ᠶᠠᠭᠠᠨ᠂ ᠪᠡᠯᠬᠡᠭᠦᠰᠦ ᠨᠠᠷᠢᠨ᠂ ᠪᠥᠭᠰᠡ ᠥᠭᠡᠵᠡᠭ ᠪᠥᠭᠡᠷᠡᠩᠬᠡᠢ᠂ ᠠᠯᠬᠤᠬᠤ ᠭᠢᠰᠬᠢᠬᠦ ᠳ᠋ᠡᠭᠡᠨ ᠵᠢᠪᠬᠤᠭᠠᠯᠢᠭ ᠪᠠᠢᠳᠠᠭ᠃
ᠡᠷᠲᠡᠨ ᠦ᠌ ᠬᠡᠷᠢᠶᠡᠳ ᠠᠢᠮᠠᠭ ᠤ᠋ᠨ ᠨᠢᠭᠡ ᠰᠠᠯᠪᠤᠷᠢ ᠪᠣᠯᠬᠤ ᠲᠣᠷᠭᠤᠳ ᠨᠣᠶᠠᠳ ᠲᠣᠭᠣᠨ ᠲᠡᠢᠰᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠣᠢᠷᠠᠳ ᠤ᠋ᠨ ᠬᠠᠪᠢᠷᠭᠠᠨ ᠳ᠋ᠤ᠌ ᠨᠠᠭᠠᠯᠳᠤᠵᠠᠢ᠃ ᠲᠡᠳᠡᠨ ᠦ᠌ ᠤᠳᠤᠮ ᠤ᠋ᠨ ᠰᠢᠬᠦᠷ ᠳᠠᠢᠴᠢᠩ ᠤ᠋ᠨ ᠮᠣᠷᠢᠨ ᠳ᠋ᠤ᠌ ᠡᠷᠡᠮᠡᠬᠡᠢ᠂ ᠦᠢᠯᠡ ᠳ᠋ᠦ᠍ ᠤᠷᠠᠨ᠂ ᠦᠭᠡᠨ ᠳ᠋ᠦ᠍ ᠴᠡᠴᠡᠨ ᠬᠡᠦᠬᠡᠨ ᠨᠤᠭᠦᠳ ᠦ᠋ᠨ ᠨᠢᠭᠡ ᠨᠢ ᠶᠤᠮ ᠠᠭᠠ ᠡᠬᠡ ᠶ᠋ᠢᠨ ᠡᠮᠡᠭᠡ ᠪᠠᠢᠯᠠ᠃ ᠡᠬᠡ ᠨᠢ ᠲᠣᠷᠭᠤᠳ ᠪᠠᠢᠯᠠ᠃
ᠡᠵᠢ ᠨᠢ ᠭᠠᠯᠳᠠᠨ ᠳ᠋ᠤ᠌ ᠪᠦᠷᠭᠦᠳ ᠦ᠋ᠨ ᠲᠣᠯᠣᠭᠠᠢ᠂ ᠬᠤᠷᠴᠠ ᠨᠢᠳᠦ᠂ ᠮᠠᠬᠢᠷ ᠬᠣᠩᠰᠢᠶᠠᠷ ᠢ ᠤᠷᠠᠯᠠᠵᠤ ᠰᠡᠢᠯᠦᠭᠰᠡᠨ ᠲᠣᠪᠰᠢᠭᠤᠷ ᠬᠢᠯᠭᠡᠵᠦ ᠥᠭᠭᠦᠭᠰᠡᠨ ᠪᠢᠯᠡ᠃ ᠲᠡᠢᠮᠦ ᠲᠣᠪᠰᠢᠭᠤᠷ ᠣᠢᠷᠠᠳ ᠲᠤ᠌ ᠭᠠᠭᠴᠠᠬᠠᠨ ᠪᠠᠢᠪᠠ᠃
— ᠬᠥᠪᠡᠭᠦᠨ ᠰᠣᠨᠣᠰᠤᠭᠲᠤᠨ᠂ ᠶᠠᠭᠤᠨ ᠤ᠋ ᠴᠢᠮᠡᠭᠡ ᠪᠢᠯᠡ ᠭᠡᠵᠦ ᠶᠤᠮ ᠠᠭᠠ ᠡᠬᠡ ᠭᠠᠯᠳᠠᠨ ᠡᠴᠡ ᠠᠰᠠᠭᠤᠪᠠ᠃
— ᠮᠣᠷᠢᠳ ᠦᠦᠷᠰᠡᠪᠡ ᠭᠡᠵᠦ ᠭᠠᠯᠳᠠᠨ ᠬᠡᠯᠡᠪᠡ᠃
— ᠶᠠᠭᠠᠬᠢᠵᠤ ᠦᠦᠷᠰᠡᠪᠡ?
— ᠢᠵᠢᠯᠢ ᠰᠦᠷᠦᠭ ᠢ᠋ᠶ᠋ᠡᠨ ᠳᠠᠭᠤᠳᠠᠵᠤ ᠪᠠᠢᠨᠠ᠃
— ᠶᠠᠮᠠᠷ ᠮᠣᠷᠢ ᠦᠦᠷᠰᠡᠪᠡ?
— ᠡᠴᠢᠭᠡ ᠶ᠋ᠢᠨ ᠲᠣᠭᠰᠢᠨ ᠬᠠᠷᠠ ᠠᠵᠢᠷᠭᠠ ᠪᠠᠢᠨᠠ᠃
— ᠮᠣᠷᠢᠳ ᠦᠦᠷᠰᠡᠬᠦ ᠪᠡᠷ ᠶᠠᠭᠠᠬᠢᠳᠠᠭ ᠪᠢᠯᠡ?
— ᠲᠡᠢᠨ ᠳ᠋ᠦ᠍ ᠮᠣᠷᠳᠠᠳᠠᠭ᠂ ᠠᠪᠠ ᠬᠣᠮᠣᠷᠭᠠ ᠳ᠋ᠤ᠌ ᠶᠠᠪᠤᠳᠠᠭ᠂ ᠠᠶᠠᠨ ᠵᠢᠩ ᠲᠡᠭᠡᠭᠡᠵᠦ ᠠᠯᠤᠰ ᠭᠠᠵᠠᠷ ᠣᠳᠳᠠᠭ᠃
— ᠬᠥᠪᠡᠭᠦᠨ ᠮᠢᠨᠢ ᠴᠢᠨᠦ ᠲᠣᠪᠰᠢᠭᠤᠷ ᠮᠣᠷᠢᠳ ᠦᠦᠷᠰᠡᠬᠦ ᠴᠢᠮᠡᠭᠡᠨ ᠢ᠋ᠶ᠋ᠡᠷ ᠠᠮᠢ ᠣᠷᠣᠪᠠ᠃
— ᠬᠠᠲᠤᠨ ᠡᠬᠡ ᠲᠠ ᠨᠠᠳᠠᠳᠤ ᠥᠭᠡᠷᠡ ᠴᠢᠮᠡᠭᠡ ᠰᠣᠨᠣᠰᠤᠭᠠᠴᠢ᠃
— ᠵᠠ᠂ ᠴᠢᠩᠨᠠᠵᠤ ᠪᠠᠢ᠂ ᠬᠥᠪᠡᠭᠦᠨ!
— ᠪᠦᠷᠭᠦᠳ ᠦ᠋ᠨ ᠳᠠᠯᠠᠪᠴᠢ ᠠᠭᠠᠷ ᠵᠦᠰᠦᠪᠡ᠃
— ᠢᠩᠭᠢᠬᠦ ᠪᠡᠷ ᠶᠠᠭᠠᠬᠢᠳᠠᠭ ᠪᠢᠯᠡ?
— ᠣᠯᠵᠠ ᠰᠢᠭᠦᠷᠡᠳᠡᠭ᠁
— ᠪᠦᠷᠭᠦᠳ ᠶᠠᠭᠠᠬᠢᠭᠠᠳ ᠢᠩᠭᠢᠵᠦ ᠰᠢᠭᠤᠷᠬᠠᠢᠯᠠᠪᠠ?
— ᠴᠢᠰᠤᠨ ᠤ᠋ ᠦᠨᠦᠷ ᠠᠪᠬᠤ ᠪᠠᠷ ᠢ᠋ᠶ᠋ᠠᠨ ᠳᠦᠦᠭᠡᠦᠷ ᠦ᠋ᠨ ᠴᠢᠯᠠᠭᠤ ᠰᠢᠭ᠋ ᠡᠷᠴᠢᠯᠡᠳᠡᠭ ᠶᠤᠮ᠃
— ᠴᠢ ᠪᠣᠯ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠴᠣᠷᠣᠰ ᠤ᠋ᠨ ᠢᠰᠬᠦᠯᠡᠩ ᠴᠢᠰᠤ᠃ ᠴᠡᠷᠢᠭ ᠦ᠋ᠨ ᠨᠤᠮᠤ ᠰᠤᠮᠤ ᠬᠠᠷᠪᠤᠭᠠᠴᠢ ᠮᠥᠨ᠃ ᠲᠣᠪᠰᠢᠭᠤᠷ ᠴᠣᠭᠣᠷ ᠤ᠋ᠨ ᠡᠬᠡᠰᠢᠭ ᠰᠣᠨᠣᠰᠴᠤ ᠤᠶᠠᠷᠠᠬᠤ ᠨᠢ ᠴᠦ᠍ ᠪᠠᠰᠠ ᠡᠷᠡ ᠬᠥᠮᠦᠨ ᠦ᠌ ᠵᠢᠷᠦᠬᠡ ᠵᠥᠭᠡᠯᠡᠯᠡᠳᠡᠭ ᠶᠤᠮ᠃
— ᠡᠵᠢ ᠠ᠋᠂ ᠪᠢ ᠬᠠᠲᠠᠭᠤ ᠵᠢᠷᠦᠬᠡ ᠲᠡᠢ ᠤᠤ?
— ᠬᠠᠭᠠᠨ ᠤᠳᠤᠮ ᠲᠠᠢ ᠬᠥᠮᠦᠨ ᠦ᠌ ᠵᠢᠷᠦᠬᠡ ᠬᠦᠢᠲᠡᠨ ᠪᠣᠯ ᠴᠢᠰᠤ ᠶᠡᠬᠡ ᠤᠷᠤᠰᠤᠨᠠ᠃ ᠮᠣᠩᠭᠣᠯᠴᠤᠳ ᠤ᠋ᠨ ᠤᠷᠤᠰᠤᠭᠰᠠᠨ ᠴᠢᠰᠤ ᠡᠷᠴᠢᠰ ᠮᠥᠷᠡᠨ ᠦ᠌ ᠤᠰᠤᠨ ᠡᠴᠡ ᠶᠡᠬᠡ ᠪᠠᠢᠭᠰᠠᠨ᠃ ᠬᠡᠳᠦᠨ ᠵᠠᠭᠤᠨ ᠳ᠋ᠤ᠌ ᠤᠷᠤᠰᠤᠯᠠ ᠰᠢᠦ ᠳᠡ᠃ ᠬᠡᠳᠦᠢ ᠳ᠋ᠦ᠍ ᠡᠨᠡ ᠶᠡᠬᠡ ᠴᠢᠰᠤ ᠲᠠᠲᠠᠷᠠᠬᠤ ᠶᠤᠮ ᠪᠣᠯ᠃ ᠰᠠᠢᠨ ᠬᠠᠭᠠᠨ ᠲᠠᠢ ᠪᠣᠯ᠁
—ᠥᠷᠥᠰᠢᠶᠡᠬᠦ ᠰᠡᠳᠬᠢᠯ ᠢ᠋ ᠦᠭᠡᠢᠯᠡᠵᠦ ᠪᠢ ᠬᠡᠯᠡᠯᠡ᠃ ᠬᠠᠯᠠᠭᠤᠨ ᠵᠢᠷᠦᠬᠡᠲᠡᠨ ᠥᠷᠥᠰᠢᠶᠡᠯ ᠲᠡᠢ ᠪᠠᠢᠳᠠᠭ᠃
— ᠡᠵᠢ ᠠ᠋᠂ ᠪᠢ ᠬᠡᠨ ᠪᠣᠢ?
— ᠮᠢᠨᠦ ᠪᠢᠴᠢᠬᠠᠨ ᠦᠷᠡ᠃
—ᠪᠢ ᠥᠷᠥᠰᠢᠶᠡᠯ ᠲᠡᠢ ᠬᠥᠮᠦᠨ ᠪᠣᠯᠤᠨᠠ᠃
— ᠮᠢᠨᠦ ᠬᠦᠦ ᠶ᠋ᠢᠨ ᠬᠤᠪᠢ ᠲᠠᠪᠢᠯᠠᠩ ᠬᠠᠮᠢᠭᠠᠰᠢ ᠪᠠᠨ ᠡᠷᠭᠢᠬᠦ ᠶ᠋ᠢ ᠳᠠᠭᠠᠬᠤ ᠳ᠋ᠤ᠌ ᠪᠡᠷᠬᠡ᠃ ᠴᠢ ᠶᠡᠬᠡ ᠰᠠᠢᠨ ᠪᠣᠯᠬᠤ ᠶᠣᠰᠣᠲᠠᠢ᠃
— ᠡᠵᠢ ᠠ᠋᠂ ᠲᠠ ᠨᠠᠮᠠᠶ᠋ᠢ ᠬᠡᠦᠬᠡᠳ ᠭᠡᠳᠡᠭ ᠢ᠋ ᠮᠠᠷᠲᠠᠴᠢᠬᠠᠭᠠᠳ ᠲᠣᠮᠣ ᠬᠥᠮᠦᠨ ᠰᠢᠭ ᠶᠠᠷᠢᠬᠤ ᠶᠤᠮ᠃ ᠪᠢ ᠵᠢᠷᠭᠤᠭᠠᠨ ᠨᠠᠰᠤᠲᠠᠢ ᠰᠢᠦ ᠳᠡ᠃ ᠮᠠᠷᠭᠠᠰᠢ ᠮᠢᠭᠮᠠᠨᠰᠠᠩᠵᠠᠢ ᠲᠠᠢ ᠲᠣᠰᠢᠯᠣᠢ ᠲᠡᠭᠦᠨᠡ᠃ ᠱᠡᠵᠢᠭᠡᠢ ᠣᠪᠣᠭᠠᠯᠠᠨ ᠲᠣᠰᠢᠯᠣᠢ ᠲᠡᠭᠦᠨᠡ ᠳᠡ᠃ ᠮᠢᠭᠮᠠᠨᠰᠠᠩᠵᠠᠢ ᠱᠠᠯᠠᠮᠠᠭᠠᠢ᠁
— ᠲᠡᠭᠡᠭᠡᠷᠡᠢ ᠮᠢᠨᠦ ᠬᠥᠪᠡᠭᠦᠨ!
ᠨᠠᠢ᠍ᠮᠠ
ᠮᠢᠭᠮᠠᠨᠰᠠᠩᠵᠠᠢ ᠲᠠᠢ ᠴᠡᠴᠡᠭ ᠦ᠋ᠨ ᠪᠤᠳᠠᠩ ᠲᠠᠲᠠᠭᠰᠠᠨ ᠠᠢᠷᠠᠭᠲᠤ ᠬᠠᠪᠴᠢᠯ ᠬᠦᠷᠪᠡ᠃ ᠨᠢᠯ ᠶᠠᠭᠠᠨ ᠴᠡᠴᠡᠭ ᠪᠢᠲᠡᠭᠦᠦ ᠤᠷᠭᠤᠵᠠᠢ᠃
ᠮᠢᠭᠮᠠᠨᠰᠠᠩᠵᠠᠢ ᠴᠡᠴᠡᠭ ᠦᠨᠦᠷᠲᠦᠨᠡ᠃ ᠪᠢ ᠪᠠᠰᠠ ᠦᠨᠦᠷᠲᠦᠨᠡ᠂ ᠮᠢᠨᠦ ᠨᠢᠳᠦ ᠰᠦᠮᠡᠯᠵᠡᠨ ᠮᠢᠭᠮᠠᠨᠰᠠᠩᠵᠠᠢ ᠶ᠋ᠢᠨ ᠬᠠᠮᠢᠭᠠ ᠶᠠᠪᠤᠬᠤ ᠶ᠋ᠢ ᠬᠠᠷᠠᠬᠤ ᠦᠭᠡᠢ ᠪᠠᠢᠪᠠ᠃
— ᠮᠢᠭᠮᠠᠨᠰᠠᠩᠵᠠᠢ ᠴᠢ ᠬᠠᠮᠢᠭᠠ ᠪᠠᠢᠨᠠ ᠪᠣᠢ?᠁
— ᠭᠠᠯᠳᠠᠨ ᠬᠠᠨ ᠬᠦᠦ ᠬᠠᠮᠢᠭᠠ ᠪᠠᠢᠨᠠ ᠪᠣᠢ? ᠪᠢᠳᠡᠨᠦᠰ ᠨᠢᠭᠡᠨ ᠢ᠋ᠶ᠋ᠡᠨ ᠳᠠᠭᠤᠳᠠᠬᠤ ᠳ᠋ᠤ᠌ ᠣᠢᠷᠠᠬᠠᠨ ᠠᠲᠠᠯᠠ ᠪᠠᠨ ᠬᠣᠯᠠ ᠶᠤᠮ ᠰᠢᠭ᠋ ᠰᠣᠨᠣᠰᠤᠭᠳᠠᠨᠠ᠃ ᠰᠡᠳᠬᠢᠯ ᠶᠡᠬᠡᠳᠡ ᠲᠠᠭᠠᠰᠢᠶᠠᠯ ᠲᠠᠢ ᠪᠣᠯᠵᠠᠢ᠃ ᠴᠣᠷᠣᠰ ᠣᠪᠣᠭ ᠤ᠋ᠨ ᠶᠡᠬᠡ ᠬᠦᠷᠢᠶᠡᠨ ᠳ᠋ᠦ᠍ ᠢᠷᠪᠢᠰ ᠲᠡᠵᠢᠭᠡᠭᠰᠡᠨ ᠦ᠌ ᠳᠠᠷᠠᠭᠠᠬᠠᠨ ᠠᠢᠷᠠᠭᠲᠤ ᠬᠠᠪᠴᠢᠯ ᠳ᠋ᠤ᠌ ᠢᠷᠡᠭᠰᠡᠨ ᠪᠢᠯᠡ᠃ ᠶᠠᠮᠠᠷ ᠭᠠᠢᠬᠠᠮᠠ ᠦᠨᠦᠷ ᠲᠡᠨᠳᠡ ᠣᠷᠣᠰᠢᠨᠠ ᠪᠢᠯᠡ᠃ ᠪᠢ ᠳᠠᠷᠠᠭᠠ ᠨᠢ ᠢᠷᠪᠢᠰ ᠦ᠋ᠨ ᠠᠩᠬᠠ ᠬᠦᠷᠢᠶᠡᠨ ᠳ᠋ᠦ᠍ ᠢᠷᠡᠭᠰᠡᠨ᠂ ᠪᠤᠴᠠᠭᠠᠵᠤ ᠲᠠᠯᠪᠢᠭᠰᠠᠨ ᠲᠤᠬᠠᠢ ᠥᠭᠦᠯᠡᠨᠡ᠃ ᠨᠢᠭᠡᠨᠲᠡ ᠢᠷᠪᠢᠰ ᠲᠡᠢ ᠬᠣᠯᠪᠣᠭᠳᠠᠭᠰᠠᠨ ᠪᠣᠯᠬᠣᠷ ᠮᠢᠭᠮᠠᠨᠰᠠᠩᠵᠠᠢ ᠶ᠋ᠢᠨ ᠲᠣᠷᠮᠣᠭᠣᠷ ᠨᠢᠳᠦ ᠶ᠋ᠢ ᠨᠠᠰᠤᠨ ᠲᠤᠷᠰᠢ ᠮᠠᠷᠲᠠᠭᠠ ᠦᠭᠡᠢ ᠶᠤᠮ᠃
ᠮᠢᠭᠮᠠᠨᠰᠠᠩᠵᠠᠢ ᠲᠡᠪᠡᠷᠢ ᠪᠦᠳᠦᠭᠦᠨ ᠳᠦᠭᠦᠷᠡᠩ ᠨᠢᠯ ᠶᠠᠭᠠᠨ ᠴᠡᠴᠡᠭ ᠲᠡᠭᠦᠪᠡ ᠃ᠴᠡᠴᠡᠭ ᠢ᠋ ᠡᠮᠦᠨᠡ ᠭᠠᠵᠠᠷ ᠤ᠋ᠨ ᠤᠭᠤᠲᠠᠨ ᠳ᠋ᠤ᠌ ᠳᠦᠭᠦᠷᠭᠡᠵᠦ ᠭᠠᠨᠵᠤᠭᠠᠯᠠᠪᠠ᠃ ᠱᠡᠵᠢᠭᠡᠢ ᠲᠡᠢ ᠲᠣᠰᠢᠯᠣᠢ ᠪᠠᠨ ᠬᠥᠲᠥᠯᠦᠭᠡ ᠮᠣᠷᠢᠨ ᠳ᠋ᠠᠭᠠᠨ ᠠᠴᠢᠵᠤ ᠢᠷᠡᠪᠡ᠃ ᠲᠣᠰᠢᠯᠣᠢ ᠲᠡᠪᠡᠷᠢ ᠲᠡᠪᠡᠷᠢ ᠪᠡᠷ ᠤᠷᠭᠤᠭᠰᠠᠨ ᠪᠠᠢᠵᠤ ᠪᠢᠯᠡ᠃
ᠶᠢᠰᠦ
ᠴᠢᠩᠭᠢᠰ ᠬᠠᠭᠠᠨ ᠡᠴᠡ ᠤᠯᠠᠮᠵᠢᠯᠠᠭᠠᠳ ᠭᠠᠯᠳᠠᠨ ᠳ᠋ᠤ᠌ ᠵᠢᠷᠭᠤᠭᠠ ᠶ᠋ᠢᠨ ᠲᠣᠭᠠ ᠪᠡᠯᠭᠡᠰᠢᠶᠡᠯ ᠪᠣᠯᠤᠨ ᠵᠠᠶᠠᠭᠠᠭᠰᠠᠨ ᠪᠠᠢᠪᠠ᠃ ᠴᠢᠩᠭᠢᠰ ᠬᠠᠭᠠᠨ ᠡᠪᠦᠭᠡ ᠳᠡᠭᠡᠳᠦᠰ ᠮᠠᠨᠢ ᠳᠠᠶᠠᠩ ᠳᠡᠯᠡᠬᠡᠢ ᠶ᠋ᠢ ᠮᠣᠷᠢᠨ ᠤ᠋ ᠲᠤᠭᠤᠷᠠᠢ ᠪᠠᠷ ᠲᠠᠮᠠᠭᠠᠯᠠᠵᠤ᠂ ᠠᠳᠤᠭᠤᠨ ᠤ᠋ ᠱᠣᠷᠪᠣᠭ ᠬᠥᠯᠥᠰᠥ᠂ ᠬᠥᠮᠦᠨ ᠦ᠌ ᠬᠠᠯᠠᠭᠤᠨ ᠴᠢᠰᠤ ᠪᠠᠷ ᠭᠠᠵᠠᠷ ᠳᠡᠪᠲᠦᠭᠡᠭᠡᠳ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠢ᠋ ᠪᠠᠢᠭᠤᠯᠤᠭᠰᠠᠨ ᠢ᠋ ᠨᠡᠬᠡᠨ ᠰᠠᠨᠠᠬᠤ ᠳ᠋ᠤ᠌ ᠲᠠᠷᠢᠬᠢ ᠰᠠᠷᠠᠨᠠ᠃ ᠶᠠᠮᠠᠷ ᠭᠠᠢᠬᠠᠮᠰᠢᠭᠲᠠᠢ ᠶᠡᠬᠡ ᠤᠯᠤᠰ ᠪᠠᠢᠪᠠ᠃ ᠴᠠᠭᠠᠲᠠᠢ ᠶ᠋ᠢᠨ ᠤᠯᠤᠰ᠂ ᠶᠡᠬᠡ ᠬᠠᠭᠠᠨᠲᠤ ᠤᠯᠤᠰ᠂ ᠠᠯᠲᠠᠨ ᠣᠷᠳᠣᠨ ᠤ᠋ ᠤᠯᠤᠰ᠂ ᠶᠡᠬᠡ ᠶᠤᠸᠠᠨ ᠤᠯᠤᠰ ᠥᠨᠥᠳᠥᠷ ᠬᠠᠮᠢᠭᠠ ᠣᠴᠢᠪᠠ᠃ ᠮᠣᠩᠭᠣᠯᠴᠤᠳ ᠤ᠋ᠨ ᠤᠷᠤᠰᠬᠠᠭᠰᠠᠨ ᠴᠢᠰᠤᠨ ᠤ᠋ ᠦᠨᠡ ᠰᠢᠷᠣᠢ ᠳ᠋ᠤ᠌ ᠬᠤᠳᠬᠤᠯᠳᠤᠭᠰᠠᠨ ᠢ᠋ ᠰᠠᠨᠠᠬᠤ ᠡᠴᠡ ᠠᠭᠤᠷ ᠬᠦᠷᠴᠦ ᠪᠠᠢᠨᠠ᠃ ᠴᠢᠰᠤ ᠥᠩᠭᠡ ᠦᠭᠡᠢ ᠶᠤᠮ᠃ ᠬᠠᠷᠠᠬᠤ ᠳ᠋ᠤ᠌ ᠤᠯᠠᠭᠠᠨ ᠪᠣᠯᠪᠠᠴᠤ ᠬᠡᠨ ᠳ᠋ᠦ᠍ ᠬᠡᠨ ᠦ᠌ ᠴᠢᠰᠤ ᠠᠭᠤᠯᠤᠭᠳᠠᠵᠤ ᠪᠠᠢᠭᠠ ᠶ᠋ᠢ ᠮᠡᠳᠡᠬᠦ ᠳ᠋ᠦ᠍ ᠪᠡᠷᠬᠡ ᠪᠢᠯᠡ᠃ ᠰᠤᠳᠠᠰᠤ ᠪᠠᠷ ᠭᠦᠶᠦᠬᠦ ᠴᠢᠰᠤ ᠶ᠋ᠢ ᠲᠠᠨᠢᠵᠤ ᠦᠯᠦ ᠪᠣᠯᠤᠨᠠ᠃ ᠲᠡᠷᠡ ᠴᠢᠰᠤ ᠤᠯᠠᠭᠠᠨ ᠥᠩᠭᠡ ᠲᠡᠢ ᠪᠠᠢᠨᠠ ᠤᠤ᠂ ᠴᠠᠭᠠᠨ ᠥᠩᠭᠡ ᠲᠡᠢ ᠪᠠᠢᠨᠠ ᠤᠤ ᠶᠡᠷᠦ ᠬᠠᠮᠢᠶᠠ ᠦᠭᠡᠢ᠃ ᠲᠡᠷᠡ ᠴᠢᠰᠤ ᠮᠣᠩᠭᠣᠯ ᠪᠠᠢᠬᠤ ᠶᠣᠰᠣᠲᠠᠢ ᠪᠢᠯᠡ᠃ ᠮᠣᠩᠭᠣᠯ ᠴᠢᠰᠤ ᠥᠭᠡᠷᠡ ᠦᠨᠳᠦᠰᠦᠲᠡᠨ ᠦ᠌ ᠴᠢᠰᠤ ᠪᠠᠷ ᠰᠡᠯᠪᠢᠭᠳᠡᠬᠦ ᠨᠢ ᠬᠦᠴᠦᠲᠡᠢ ᠪᠠᠢᠬᠤ ᠶ᠋ᠢᠨ ᠪᠠᠲᠤᠯᠠᠭᠠ ᠪᠣᠯᠳᠠᠭ᠃
ᠲᠣᠭᠠᠨ ᠤ᠋ ᠬᠤᠪᠢ ᠳ᠋ᠤ᠌ ᠥᠭᠡᠷᠡ ᠶᠤᠮ᠃ ᠴᠢᠰᠤ ᠰᠢᠭ᠋ ᠪᠣᠳᠠᠲᠠᠢ ᠪᠤᠰᠤ ᠤᠴᠢᠷ ᠲᠣᠭᠠ ᠨᠢ ᠣᠶᠤᠨ ᠰᠠᠨᠠᠭᠠᠨ ᠤ᠋ ᠶᠠᠮᠠᠷᠬᠠᠨ ᠤᠨᠳᠤᠷᠤᠭᠠ ᠲᠠᠢ ᠪᠣᠯᠬᠤ ᠶ᠋ᠢ ᠲᠣᠳᠣᠷᠬᠠᠢᠯᠠᠨᠠ᠃ ᠭᠤᠷᠪᠠᠨ ᠨᠠᠰᠤ ᠲᠠᠢ ᠳ᠋ᠠᠭᠠᠨ ᠲᠣᠭᠠᠯᠠᠵᠤ ᠰᠤᠷᠤᠭᠰᠠᠨ ᠪᠥᠭᠡᠳ ᠨᠡᠮᠡᠬᠦ᠂ ᠬᠠᠰᠤᠬᠤ᠂ ᠬᠤᠪᠢᠶᠠᠬᠤ᠂ ᠦᠷᠡᠵᠢᠭᠦᠯᠬᠦ ᠦᠢᠯᠡᠳᠦᠯ ᠢ ᠪᠠᠢᠭᠠᠯᠢ ᠶ᠋ᠢᠨ ᠳᠡᠪᠢᠰᠬᠡᠷ ᠳᠡᠭᠡᠷᠡ ᠲᠦᠪᠡᠭ ᠦᠭᠡᠢ ᠪᠣᠳᠣᠳᠠᠭ ᠪᠠᠢᠯᠠ᠃
ᠣᠢᠷᠠᠳ ᠡᠪᠦᠭᠡᠳ ᠨᠠᠰᠤ ᠪᠠᠨ ᠬᠡᠯᠡᠯᠴᠡᠬᠦ ᠳᠤᠷᠠᠲᠠᠢ ᠪᠠᠢᠭᠰᠠᠨ ᠨᠢ ᠭᠠᠯᠳᠠᠨ ᠳ᠋ᠤ᠌ ᠲᠤᠰᠠᠯᠠᠭᠰᠠᠨ ᠶᠤᠮᠳᠠᠭ᠃
ᠴᠢᠩᠭᠢᠰ ᠬᠠᠭᠠᠨ ᠵᠢᠷᠠᠨ ᠵᠢᠷᠭᠤᠭᠠᠨ ᠨᠠᠰᠤᠲᠠᠢ ᠳ᠋ᠠᠭᠠᠨ ᠲᠩᠷᠢ ᠳ᠋ᠦ᠍ ᠬᠠᠯᠢᠭᠰᠠᠨ᠃ ᠬᠠᠭᠠᠨ ᠤ᠋ ᠰᠦᠨᠡᠰᠦ ᠶ᠋ᠢ ᠶᠡᠷᠡᠨ ᠶᠢᠰᠦᠨ ᠲᠩᠷᠢ ᠶ᠋ᠢᠨ ᠵᠢᠷᠠᠨ ᠵᠢᠷᠭᠤᠭᠠ ᠳ᠋ᠤ᠌ ᠪᠠᠢᠷᠢᠯᠠᠭᠤᠯᠤᠭᠰᠠᠨ᠃ ᠵᠢᠷᠠᠨ ᠵᠢᠷᠭᠤᠭᠠᠲᠠᠢ ᠲᠩᠷᠢ ᠳ᠋ᠦ᠍ ᠭᠠᠯᠳᠠᠨ ᠤ᠋ ᠣᠳᠣ ᠪᠠᠢᠳᠠᠭ ᠲᠤᠬᠠᠢ ᠽᠠᠶᠠ ᠪᠠᠨᠳᠢᠳᠠ ᠨᠠᠮᠬᠠᠢᠵᠠᠮᠰᠤ ᠬᠤᠪᠢᠯᠭᠠᠨ ᠠᠢᠯᠠᠳᠤᠭᠰᠠᠨ᠃
ᠭᠠᠯᠳᠠᠨ ᠤ᠋ ᠨᠢᠳᠦᠨ ᠳ᠋ᠦ᠍ ᠵᠢᠷᠭᠤᠭᠠ ᠶ᠋ᠢᠨ ᠲᠣᠭᠠ ᠢᠮᠠᠭᠲᠠ ᠬᠠᠷᠠᠭᠳᠠᠨᠠ᠃ ᠡᠨᠡ ᠲᠣᠭᠠ ᠪᠢᠯᠢᠭ ᠦ᠋ᠨ ᠲᠣᠭᠠ ᠶᠤᠮᠰᠠᠨᠵᠠᠢ᠃
ᠠᠷᠪᠠ
ᠭᠠᠯᠳᠠᠨ ᠢ᠋ ᠲᠣᠪᠰᠢᠭᠤᠷ ᠲᠠᠢ ᠪᠣᠯᠤᠭᠰᠠᠨ ᠤ᠋ ᠳᠠᠷᠠᠭᠠᠬᠠᠨ ᠳᠡᠮᠪᠡᠷᠢᠯ ᠵᠠᠩᠵᠤᠨ ᠤ᠋ ᠥᠬᠢᠨ ᠮᠢᠭᠮᠠᠨᠰᠠᠩᠵᠠᠢ ᠲᠣᠪᠰᠢᠭᠤᠷ ᠲᠡᠪᠡᠷᠢᠵᠦ ᠢᠷᠡᠪᠡ᠃ ᠲᠡᠭᠦᠨ ᠦ᠌ ᠲᠣᠪᠰᠢᠭᠤᠷ ᠨᠢ ᠪᠦᠷᠭᠦᠳ ᠦ᠋ᠨ ᠲᠣᠯᠣᠭᠠᠢ ᠲᠠᠢ ᠪᠤᠰᠤ᠂ ᠲᠤᠩ ᠬᠣᠷᠣᠬᠠᠢ ᠶ᠋ᠢᠨ ᠶᠠᠰᠤ ᠪᠠᠷ ᠬᠢᠵᠡᠢ᠃
— ᠡᠴᠢᠭᠡ ᠨᠠᠳᠠᠳᠤ ᠤᠷᠠᠯᠠᠵᠤ ᠥᠭᠪᠡ ᠭᠡᠵᠦ ᠮᠢᠭᠮᠠᠨᠰᠠᠩᠵᠠᠢ ᠨᠢᠳᠦ ᠪᠡᠨ ᠲᠣᠷᠮᠣᠯᠵᠠᠭᠤᠯᠤᠨ ᠬᠡᠯᠡᠪᠡ᠃ ᠲᠡᠭᠦᠨ ᠦ᠌ ᠨᠢᠳᠦ ᠢᠮᠠᠭᠲᠠ ᠲᠣᠷᠮᠣᠯᠵᠠᠨ ᠡᠷᠬᠢᠮ ᠳᠣᠲᠣᠨᠣ ᠪᠠᠷ ᠢᠨᠢᠶᠡᠵᠦ ᠪᠠᠢᠳᠠᠭ ᠰᠠᠨ᠃ ᠮᠢᠭᠮᠠᠨᠰᠠᠩᠵᠠᠢ ᠶ᠋ᠢᠨ ᠲᠣᠪᠰᠢᠭᠤᠷ ᠤ᠋ᠨ ᠲᠣᠯᠣᠭᠠᠢ ᠨᠢ ᠬᠠᠮᠢᠭᠠ ᠨᠢᠭᠡ ᠳ᠋ᠡᠭᠡᠨ ᠦᠵᠡᠭᠳᠡᠳᠡᠭ ᠲᠤᠩ ᠬᠣᠷᠣᠬᠠᠢ ᠶ᠋ᠢᠨ ᠮᠤᠰᠬᠢᠮᠠᠯ ᠴᠠᠮ ᠤ᠋ᠨ ᠶᠠᠰᠤ ᠪᠠᠷ ᠬᠢᠭᠰᠡᠨ ᠨᠢ ᠡᠩ ᠦ᠋ᠨ ᠪᠥᠭᠡᠳ ᠤᠷᠠᠨ ᠬᠠᠷᠠᠭᠳᠠᠬᠤ ᠪᠥᠯᠥᠭᠡ᠃
— ᠳᠡᠮᠪᠡᠷᠢᠯ ᠵᠠᠩᠵᠤᠨ ᠤᠷᠠᠨ ᠬᠥᠮᠦᠨ ᠰᠢᠦ ᠭᠡᠮᠡᠨ ᠮᠢᠭᠮᠠᠨᠰᠠᠩᠵᠠᠢ ᠶ᠋ᠢᠨ ᠳᠡᠪᠡᠷᠡᠭᠰᠡᠨ ᠰᠡᠳᠬᠢᠯ ᠳᠡᠭᠡᠷᠡ ᠳᠤᠰᠤᠭᠠᠪᠠ ᠰᠦ ᠃
— ᠬᠣᠶᠠᠭᠤᠯᠠ ᠪᠠᠨ ᠪᠠᠢᠭᠠᠯᠢ ᠶ᠋ᠢᠨ ᠴᠢᠮᠡᠭᠡ ᠬᠤᠭᠤᠷᠳᠠᠬᠤ ᠤᠤ ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠥᠬᠢᠨ ᠪᠣᠳᠣᠯᠬᠢᠯᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠂
— ᠤᠰᠤᠨ ᠤ᠋ ᠪᠣᠷᠭᠢᠶᠠ ᠶ᠋ᠢ ᠪᠢ ᠰᠠᠢᠨ ᠴᠢᠳᠠᠨᠠ ᠭᠡᠳ ᠲᠣᠪᠰᠢᠭᠤᠷ ᠤ᠋ᠨ ᠤᠲᠠᠰᠤ ᠶ᠋ᠢ ᠠᠶᠠᠷᠬᠠᠨ ᠬᠢᠷᠢᠨᠡ ᠳᠣᠯᠭᠢᠶᠠᠯᠠᠭᠤᠯᠤᠨ ᠲᠠᠲᠠᠯᠠ᠃ ᠠᠯᠲᠠᠢ ᠶ᠋ᠢᠨ ᠨᠢᠷᠤᠭᠤᠨ ᠡᠴᠡ ᠡᠬᠢ ᠠᠪᠤᠭᠰᠠᠨ ᠭᠣᠣᠯ ᠤ᠋ᠨ ᠤᠰᠤᠨ ᠤ᠋ ᠪᠣᠷᠭᠢᠶᠠ ᠭᠠᠯᠳᠠᠨ ᠳ᠋ᠤ᠌ ᠲᠠᠭᠠᠲᠠᠢ ᠰᠠᠨᠠᠭᠳᠠᠯᠠ᠃ ᠪᠠᠢᠭᠠᠯᠢ ᠶ᠋ᠢᠨ ᠴᠢᠮᠡᠭᠡ ᠶ᠋ᠢ ᠨᠢᠳᠦ ᠪᠡᠨ ᠠᠨᠢᠵᠤ ᠰᠣᠨᠣᠰᠬᠤ ᠳ᠋ᠤ᠌ ᠰᠡᠳᠬᠢᠯ ᠦ᠋ᠨ ᠴᠡᠭᠡᠯ ᠤᠷᠤᠭᠤ ᠶᠠᠭᠠᠷᠠᠤᠬᠠᠨ ᠤᠷᠤᠰᠬᠤ ᠨᠢ ᠲᠣᠳᠣ ᠮᠡᠳᠡᠭᠳᠡᠨᠡ᠃ ᠮᠢᠭᠮᠠᠨᠰᠠᠩᠵᠠᠢ᠂
— ᠭᠠᠯᠳᠠᠨ ᠬᠠᠨ ᠬᠦᠦ ᠲᠠ ᠮᠣᠷᠢᠳ ᠦᠦᠷᠰᠡᠬᠦ ᠶ᠋ᠢ ᠰᠣᠨᠣᠰᠳᠠᠭ ᠤᠤ ᠭᠡᠯᠡ᠃
— ᠲᠡᠢᠮᠦ ᠲᠠᠲᠠᠯᠭᠠ ᠶ᠋ᠢ ᠬᠠᠲᠤᠨ ᠡᠬᠡ ᠨᠠᠳᠠᠳᠤ ᠵᠢᠭᠠᠵᠤ ᠥᠭᠭᠦᠭᠰᠡᠨ᠂ ᠴᠢᠨᠦ ᠲᠠᠲᠠᠯᠭᠠ ᠠᠷᠠᠢ ᠥᠭᠡᠷᠡ ᠪᠢᠵᠡ᠃ ᠪᠢ ᠰᠣᠨᠣᠰᠤᠶᠠ ᠭᠡᠯᠡ᠃
ᠮᠣᠷᠢᠳ ᠦᠦᠷᠰᠡᠬᠦ ᠨᠢ ᠰᠥᠨᠢ ᠶ᠋ᠢᠨ ᠬᠡᠭᠡᠷᠡ ᠲᠠᠯᠠ ᠳ᠋ᠤ᠌ ᠢᠵᠢᠯᠢ ᠪᠡᠨ ᠦᠭᠡᠢᠯᠡᠭᠰᠡᠨ ᠳᠠᠭᠤᠳᠠᠯᠭᠠ ᠪᠠᠢᠯᠠ᠃ ᠰᠦᠷᠦᠭ ᠰᠦᠷᠦᠭ ᠠᠳᠤᠭᠤ ᠢᠵᠢᠯᠢ ᠰᠦᠷᠦᠭ ᠢ᠋ᠶ᠋ᠡᠨ ᠳᠠᠭᠤᠳᠠᠨ ᠨᠡᠢᠯᠡᠭᠰᠡᠭᠡᠷ ᠠᠭᠤᠵᠢᠮ ᠲᠠᠯᠠ ᠶ᠋ᠢᠨ ᠬᠠᠶᠠᠭᠠ ᠬᠦᠷᠲᠡᠯᠡ ᠢᠨᠴᠠᠭᠠᠬᠤ ᠪᠥᠭᠡᠳ ᠲᠠᠯᠠ ᠲᠠᠢ ᠵᠠᠯᠭᠠᠯᠳᠤᠬᠤ ᠠᠭᠤᠯᠠᠰ ᠤ᠋ᠨ ᠬᠢᠷᠠ ᠥᠭᠡᠳᠡ ᠮᠣᠷᠢᠳ ᠤ᠋ᠨ ᠦᠦᠷᠰᠡᠬᠦ ᠳᠠᠭᠤᠨ ᠲᠥᠭᠡᠨᠡ᠃
ᠲᠤᠤᠯᠢ ᠬᠠᠢᠯᠠᠳᠠᠭ ᠡᠪᠦᠭᠡᠨ ᠣᠢᠷᠠᠳ ᠳᠠᠶᠠᠭᠠᠷ ᠲᠦᠭᠡᠮᠡᠯ ᠪᠢᠯᠡ᠃ ᠲᠣᠪᠰᠢᠭᠤᠷ ᠤ᠋ᠨ ᠡᠭᠡᠰᠢᠭᠯᠡᠩᠲᠦ ᠠᠶᠠᠯᠭᠤ ᠮᠢᠭᠮᠠᠨᠰᠠᠩᠵᠠᠢ ᠭᠠᠯᠳᠠᠨ ᠬᠣᠶᠠᠷ ᠢ᠋ ᠬᠣᠯᠪᠣᠵᠤ᠂ ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠦ᠌ ᠬᠥᠪᠡᠭᠡᠨ ᠳ᠋ᠦ᠍ ᠪᠥᠭᠡᠷᠡ ᠪᠡᠨ ᠨᠡᠢᠯᠡᠭᠦᠯᠦᠨ ᠰᠠᠭᠤᠭᠠᠳ ᠲᠣᠭᠯᠠᠳᠠᠭ ᠪᠠᠢᠭᠰᠠᠨ ᠶᠤᠮ᠃
ᠮᠢᠭᠮᠠᠨᠰᠠᠩᠵᠠᠢ ᠶ᠋ᠢᠨ ᠡᠴᠢᠭᠡ ᠳᠡᠮᠪᠡᠷᠢᠯ ᠵᠠᠩᠵᠤᠨ ᠪᠥᠭᠡᠰᠦ ᠲᠤᠤᠯᠢᠴᠢ ᠪᠥᠭᠡᠳ ᠲᠣᠪᠰᠢᠭᠤᠷ ᠤ᠋ᠨ ᠡᠬᠡᠰᠢᠭ ᠢ᠋ᠶ᠋ᠡᠷ ᠲᠡᠮᠡᠭᠡ ᠪᠤᠢᠯᠠᠭᠤᠯᠵᠤ ᠴᠢᠳᠠᠨᠠ᠃ ᠪᠣᠲᠣᠭᠣ᠂ ᠲᠣᠷᠣᠮ᠂ ᠢᠩᠭᠡ᠂ ᠪᠤᠤᠷᠠ ᠶ᠋ᠢᠨ ᠪᠤᠢᠯᠠᠭᠠᠨ ᠥᠭᠡᠷᠡ ᠥᠭᠡᠷᠡ ᠪᠠᠢᠳᠠᠭ ᠢ᠋ ᠵᠠᠩᠵᠤᠨ ᠳᠡᠮᠪᠡᠷᠢᠯ ᠰᠠᠨᠠᠭᠠ ᠠᠯᠲᠠᠨ ᠬᠡᠯᠡᠵᠦ ᠥᠭᠳᠡᠭ ᠪᠠᠢᠪᠠ᠃
ᠮᠢᠭᠮᠠᠨᠰᠠᠩᠵᠠᠢ ᠥᠬᠢᠨ ᠪᠢᠳᠡ ᠬᠣᠶᠠᠷ ᠤ᠋ᠨ ᠲᠣᠪᠰᠢᠭᠤᠷ ᠲᠤ᠌ ᠲᠡᠷᠡ ᠦᠶᠡ ᠳ᠋ᠡᠭᠡᠨ ᠪᠠᠴᠢᠭᠤᠷᠠᠭᠰᠠᠨ ᠰᠡᠳᠬᠢᠯ ᠦ᠋ᠨ ᠭᠦᠨ ᠰᠢᠭᠤᠷᠭᠠ ᠪᠤᠰᠤ ᠢᠷᠠᠭᠤᠬᠠᠨ ᠴᠠᠭᠠᠨ ᠤᠶᠠᠩᠭᠠ ᠨᠢᠭᠡᠨ ᠢ᠋ᠶ᠋ᠡᠨ ᠬᠥᠭᠡᠭᠡᠴᠡᠯᠳᠦᠨ ᠪᠠᠢᠳᠠᠭ ᠰᠠᠨ᠃
— ᠲᠣᠪᠰᠢᠭᠤᠷ ᠢ᠋ᠶ᠋ᠠᠨ ᠬᠥᠭᠯᠡᠭᠰᠡᠨ ᠤᠤ?
— ᠡᠴᠢᠭᠡ ᠭᠥᠭᠯᠡᠵᠦ ᠥᠭᠭᠦᠭᠰᠡᠨ᠃
— ᠳᠡᠮᠪᠡᠷᠢᠯ ᠵᠠᠩᠵᠤᠨ ᠥᠬᠢᠨ ᠳ᠋ᠡᠭᠡᠨ ᠠᠮᠢ ᠶᠤᠮ ᠠ᠋᠃
— ᠡᠴᠢᠭᠡ ᠨᠠᠳᠠᠳᠤ ᠰᠠᠢᠨ᠂ ᠮᠠᠭᠤ ᠶᠠᠮᠠᠷ ᠴᠤ᠌ ᠦᠭᠡ ᠶ᠋ᠢ ᠦᠯᠦ ᠬᠡᠯᠡᠨᠡ᠃ ᠨᠠᠳᠠ ᠡᠴᠡ ᠠᠰᠠᠭᠤᠬᠤᠠ᠋ᠴᠠ ᠪᠠᠨ ᠡᠮᠦᠨᠡ ᠮᠢᠨᠦ ᠬᠦᠰᠡᠭᠰᠡᠨ ᠢ᠋ ᠬᠢᠴᠢᠬᠡᠳᠡᠭ᠃ ᠨᠠᠮᠠᠶ᠋ᠢ ᠳᠡᠩᠳᠡᠭᠦᠦ ᠰᠠᠢᠨ ᠮᠡᠳᠡᠳᠡᠭ ᠰᠢᠦ᠃
— ᠲᠣᠪᠰᠢᠭᠤᠷ ᠢ᠋ᠶ᠋ᠠᠨ ᠶᠠᠭᠠᠬᠢᠵᠤ ᠬᠥᠭᠯᠡᠳᠡᠭ ᠪᠣᠢ᠃
— ᠡᠴᠢᠭᠡ ᠠᠮᠠ ᠪᠠᠷ ᠢ᠋ᠶ᠋ᠠᠨ ᠲᠤᠤᠯᠢ ᠬᠠᠢᠯᠠᠵᠤ ᠭᠥᠭᠯᠡᠨᠡ᠃ ᠬᠥᠭᠯᠡᠭᠰᠡᠨ ᠬᠣᠢᠨᠠ ᠪᠠᠨ《ᠮᠢᠨᠦ ᠥᠬᠢᠨ ᠴᠢ ᠰᠣᠨᠣᠰ ᠳᠠ᠃ ᠠᠪᠤ ᠨᠢ ᠭᠠᠵᠠᠷ ᠲᠩᠷᠢ ᠬᠣᠶᠠᠷ ᠢ᠋ ᠬᠠᠮᠲᠤ ᠭᠥᠭᠯᠡᠴᠢᠬᠡᠯᠡ᠃ ᠲᠣᠪᠰᠢᠭᠤᠷ ᠤ᠋ᠨ ᠠᠶᠠᠯᠭᠤᠨ ᠳ᠋ᠤ᠌ ᠪᠣᠷᠣᠭᠠ ᠵᠦᠰᠡᠷᠡᠵᠦ ᠪᠠᠢᠭᠠ ᠪᠢᠵᠡ᠃ ᠲᠣᠪᠰᠢᠭᠤᠷ ᠤ᠋ᠨ ᠡᠬᠡᠰᠢᠭ ᠲᠦ᠍ ᠨᠣᠭᠣᠭᠠ ᠤᠷᠭᠤᠵᠤ ᠪᠠᠢᠨᠠ᠃ ᠲᠣᠪᠰᠢᠭᠤᠷ ᠦᠭᠡᠢ ᠪᠡᠷ ᠬᠥᠮᠦᠨ ᠵᠢᠷᠭᠠᠯ ᠵᠣᠪᠠᠯᠠᠩ ᠤ᠋ᠨ ᠠᠮᠲᠠ ᠶ᠋ᠢ ᠮᠡᠳᠡᠬᠦ ᠦᠭᠡᠢ᠃ ᠶᠠᠪᠤᠭᠠᠨ ᠳ᠋ᠠᠭᠠᠨ ᠴᠢᠨᠦ ᠠᠮᠢᠳᠤᠷᠠᠯ ᠬᠥᠭᠯᠡᠭᠰᠡᠨ ᠲᠣᠪᠰᠢᠭᠤᠷ ᠰᠢᠭ᠋ ᠪᠠᠢᠬᠤ ᠪᠣᠯᠤᠨᠠ᠃ ᠬᠥᠭ ᠦᠭᠡᠢ ᠠᠮᠢᠳᠤᠷᠠᠵᠤ ᠶᠠᠭᠠᠬᠢᠬᠤ ᠶᠤᠮ ᠪᠢᠯᠡ》 ᠭᠡᠵᠦ ᠬᠡᠯᠡᠪᠡ᠃
— ᠮᠢᠨᠦ ᠲᠣᠪᠰᠢᠭᠤᠷ ᠢ᠋ ᠬᠠᠲᠤᠨ ᠡᠬᠡ ᠮᠢᠨᠢ ᠠᠮᠢ ᠣᠷᠣᠭᠤᠯᠳᠠᠭ᠃ ᠲᠣᠷᠭᠤᠳ ᠳᠠᠭᠤᠤ ᠲᠠᠩᠳᠠ ᠳᠠᠭᠤᠯᠠᠨᠠ᠃
ᠦᠯᠢ ᠶ᠋ᠢᠨ ᠣᠪᠣᠭᠠ ᠳᠡᠭᠡᠷᠡ
ᠡᠪᠦᠭᠡᠨ ᠰᠢᠪᠠᠭᠤ ᠲᠣᠷᠣᠢᠨᠠ
ᠥᠭᠡᠯᠡᠳ ᠦ᠋ᠨ ᠰᠢᠷᠠ ᠪᠠᠭᠠᠲᠤᠷ
ᠥᠭᠡᠳᠡ ᠤᠷᠤᠭᠤ ᠪᠠᠨ ᠳᠠᠪᠬᠢᠨᠠ
ᠲᠣᠭᠣᠰᠣ ᠲᠠᠢ ᠴᠠᠭᠠᠨ ᠬᠥᠲᠥᠯ ᠢ᠋ᠶ᠋ᠡᠷ
ᠲᠣᠷᠭᠤᠳ ᠰᠡᠪᠡᠬᠡᠷ ᠢᠷᠡᠨᠡ
ᠳᠣᠮᠪᠣ ᠲᠠᠢ ᠴᠠᠢ ᠪᠠᠨ ᠬᠠᠯᠠᠭᠠᠭᠠᠳ
ᠳᠣᠲᠣᠨᠣ ᠠᠮᠠᠷᠠᠭ ᠢ᠋ᠶ᠋ᠠᠨ ᠬᠦᠯᠢᠶᠡᠨᠡ
ᠡᠬᠡ ᠮᠢᠨᠢ ᠳᠠᠭᠤᠯᠠᠨᠠ ᠴᠤ᠌᠂ ᠤᠬᠢᠯᠠᠨᠠ ᠴᠤ᠌᠁
ᠭᠠᠯᠳᠠᠨ ᠮᠢᠭᠮᠠᠨᠰᠠᠩᠵᠠᠢ ᠥᠬᠢᠨ ᠳ᠋ᠦ᠍ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠭᠰᠠᠨ ᠪᠣᠯᠭᠠᠨ ᠢ᠋ᠶ᠋ᠠᠨ ᠶᠠᠷᠢᠳᠠᠭ ᠪᠠᠢᠯᠠ᠃
— ᠡᠵᠢ ᠲᠠᠨᠢ ᠬᠤᠭᠤᠷ ᠲᠠᠢ ᠪᠠᠨ ᠠᠮᠢᠰᠬᠤᠯ ᠢ᠋ᠶ᠋ᠠᠨ ᠨᠡᠢᠯᠡᠭᠦᠯᠳᠡᠭ ᠶᠤᠮ ᠪᠠᠢᠨᠠ᠃ ᠵᠠᠩᠵᠤᠨ ᠠᠪᠤ ᠮᠢᠨᠢ《ᠬᠤᠭᠤᠷ ᠲᠣᠪᠰᠢᠭᠤᠷ ᠴᠢᠨᠢ ᠬᠥᠮᠦᠨ ᠶᠤᠮ ᠰᠢᠦ ᠳᠡ᠂ ᠲᠣᠪᠰᠢᠭᠤᠷ ᠳᠠᠭᠤᠯᠠᠨᠠ᠂ ᠲᠣᠪᠰᠢᠭᠤᠷ ᠤᠬᠢᠯᠠᠨᠠ》 ᠭᠡᠮᠡᠨ ᠥᠭᠦᠯᠡᠵᠦ ᠪᠠᠢᠭᠰᠠᠨ ᠢ᠋ ᠮᠢᠭᠮᠠᠨᠰᠠᠩᠵᠠᠢ ᠥᠬᠢᠨ ᠰᠠᠨᠠᠪᠠ᠃
— ᠡᠵᠢ ᠲᠠᠨᠢ ᠲᠣᠪᠰᠢᠭᠤᠷ ᠢ᠋ᠶ᠋ᠠᠨ ᠠᠮᠢᠰᠬᠤᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠥᠭᠯᠡᠳᠡᠭ ᠶᠤᠮ ᠤᠤ ᠭᠡᠵᠦ ᠮᠢᠭᠮᠠᠨᠰᠠᠩᠵᠠᠢ ᠥᠬᠢᠨ ᠨᠠᠳᠠ ᠡᠴᠡ ᠠᠰᠠᠭᠤᠪᠠ᠃ ᠨᠠᠳᠠ ᠡᠨᠡ ᠶᠠᠷᠢᠶᠠ ᠲᠠᠭᠠᠲᠠᠢ ᠪᠠᠢᠪᠠ᠃
— ᠬᠠᠲᠤᠨ ᠡᠬᠡ ᠲᠣᠪᠰᠢᠭᠤᠷ ᠢ᠋ᠶ᠋ᠠᠨ ᠰᠠᠯᠬᠢ ᠪᠠᠷ ᠬᠥᠭᠯᠡᠳᠡᠭ ᠶᠤᠮ᠃ ᠬᠤᠭᠤᠷ ᠬᠥᠭᠯᠡᠳᠡᠭ ᠰᠠᠯᠬᠢᠨ ᠤ᠋ ᠴᠢᠮᠡᠭᠡ ᠥᠭᠡᠷᠡ ᠪᠠᠢᠳᠠᠭ᠃ ᠰᠡᠨᠵᠢᠲᠦ ᠬᠠᠳᠠ᠂ ᠴᠣᠭᠣᠷ ᠡᠪᠡᠰᠦ ᠶ᠋ᠢ ᠡᠭᠡᠰᠢᠭᠯᠡᠭᠦᠯᠦᠨ ᠦᠯᠢᠶᠡᠳᠡᠭ ᠰᠠᠯᠬᠢ ᠪᠣᠢ᠃ ᠠᠯᠲᠠᠢ ᠶ᠋ᠢᠨ ᠠᠭᠤᠯᠠ᠂ ᠡᠪᠡᠰᠦ ᠤᠷᠭᠤᠮᠠᠯ ᠲᠠᠢ ᠪᠠᠨ ᠡᠭᠡᠰᠢᠭᠯᠡᠭᠡᠳ ᠡᠬᠢᠯᠡᠬᠦ ᠪᠡᠷ ᠡᠵᠢ ᠮᠠᠨᠢ ᠲᠣᠪᠰᠢᠭᠤᠷ ᠢ᠋ᠶ᠋ᠠᠨ ᠦᠷᠭᠦᠭᠡᠨ ᠡᠴᠡ ᠭᠠᠷᠭᠠᠵᠤ ᠰᠠᠯᠬᠢ ᠪᠠᠷ ᠡᠭᠡᠰᠢᠭᠯᠡᠭᠦᠯᠦᠨ ᠬᠥᠭᠯᠡᠳᠡᠭ ᠪᠢᠯᠡ ᠭᠡᠵᠦ ᠭᠠᠯᠳᠠᠨ ᠪᠢ ᠮᠢᠭᠮᠠᠨᠰᠠᠩᠵᠠᠢ ᠥᠬᠢᠨ ᠳ᠋ᠦ᠍ ᠪᠣᠳᠣᠯᠭᠠᠰᠢᠷᠠᠭᠰᠠᠨ ᠶᠠᠩᠵᠤᠲᠠᠢ ᠥᠭᠦᠯᠡᠪᠡ᠃
ᠥᠬᠢᠨ ᠪᠠᠰᠠ ᠪᠣᠳᠣᠯᠭᠠᠰᠢᠷᠠᠭᠰᠠᠨ ᠠᠵᠢ᠃ ᠮᠢᠭᠮᠠᠨᠰᠠᠩᠵᠠᠢ ᠶ᠋ᠢᠨ ᠦᠷᠭᠦᠭᠰᠡᠨ ᠵᠡᠭᠡᠷᠡ ᠶ᠋ᠢᠨ ᠬᠢ ᠰᠢᠭ ᠲᠣᠷᠮᠣᠯᠵᠠᠭᠰᠠᠨ ᠨᠢᠳᠦᠨ ᠳ᠋ᠦ᠍ ᠶᠡᠷᠦ ᠪᠤᠰᠤ ᠶ᠋ᠢᠨ ᠵᠦᠩ ᠰᠤᠪᠢᠨ ᠬᠤᠷᠠᠨ ᠴᠤᠭᠯᠠᠬᠤ ᠶ᠋ᠢ ᠣᠳᠣ ᠬᠢᠷᠢ ᠰᠠᠨᠠᠭᠠᠯᠵᠠᠨ ᠲᠡᠮᠳᠡᠭᠯᠡᠯ ᠢ᠋ᠶ᠋ᠡᠨ ᠬᠥᠲᠥᠯᠵᠦ ᠪᠠᠢᠨᠠ ᠭᠡᠵᠦ ᠭᠠᠯᠳᠠᠨ ᠪᠢ ᠮᠣᠣᠲᠤᠤ ᠴᠠᠭᠠᠰᠤᠨᠠ ᠳᠤᠷᠠᠢᠲᠠᠯᠠ ᠪᠢᠴᠢᠯᠡ᠃
— ᠶᠦᠮ ᠠᠭᠠ ᠬᠠᠲᠤᠨ ᠲᠣᠪᠰᠢᠭᠤᠷ ᠢ᠋ᠶ᠋ᠠᠨ ᠲᠡᠷᠡ ᠡᠭᠡᠰᠢᠭᠯᠡᠩᠲᠦ ᠰᠠᠯᠬᠢᠨ ᠳ᠋ᠤ᠌ ᠬᠡᠳᠦ ᠬᠣᠨᠣᠭ ᠬᠥᠭᠯᠡᠳᠡᠭ ᠪᠣᠢ ᠭᠡᠵᠦ ᠮᠢᠭᠮᠠᠨᠰᠠᠩᠵᠠᠢ ᠰᠢᠮᠡ ᠲᠡᠢ ᠠᠰᠠᠭᠤᠯᠠ᠃ ᠮᠢᠭᠮᠠᠨᠰᠠᠩᠵᠠᠢ ᠬᠥᠭ ᠠᠶᠠᠯᠭᠤ ᠶ᠋ᠢᠨ ᠤᠴᠢᠷ ᠢ᠋ ᠣᠯᠬᠤ ᠭᠡᠵᠦ ᠳᠡᠮᠣ᠋ᠯᠤᠨᠠ᠃ ᠲᠡᠭᠦᠨ ᠦ᠌ ᠬᠦᠰᠡᠯᠡᠩ ᠶᠡᠷᠦ ᠪᠤᠰᠤ ᠪᠠᠷ ᠨᠠᠮᠠᠶ᠋ᠢ ᠨᠥᠯᠥᠭᠡᠯᠡᠵᠦ《ᠬᠠᠲᠤᠨ ᠡᠬᠡ ᠡᠴᠡ ᠤᠴᠢᠷ ᠢ᠋ ᠠᠰᠠᠭᠤᠵᠤ ᠥᠭᠭᠦᠶᠡ》 ᠭᠡᠮᠡᠨ ᠮᠢᠭᠮᠠᠨᠰᠠᠩᠵᠠᠢ ᠳ᠋ᠤ᠌ ᠠᠮᠠᠯᠠᠪᠠ᠃
ᠦᠨᠡᠨ ᠳ᠋ᠡᠭᠡᠨ ᠭᠠᠯᠳᠠᠨ ᠬᠠᠨ ᠬᠦᠦ ᠪᠢ ᠠᠩᠬᠠ ᠤᠳᠠᠭᠠ ᠪᠦᠰᠡᠭᠦᠢ ᠬᠡᠦᠬᠡᠳ ᠲᠦ᠍ ᠠᠮᠠ ᠥᠭᠭᠦᠭᠰᠡᠨ ᠨᠢ ᠡᠨᠡ᠃ ᠶᠡᠬᠡ ᠠᠯᠲᠠᠢ ᠶ᠋ᠢᠨ ᠠᠭᠤᠯᠠ ᠨᠢᠷᠤᠭᠤ ᠬᠣᠢᠨᠠ ᠬᠣᠢᠨᠠ ᠡᠴᠡ ᠬᠣᠰᠢᠭᠤᠷᠠᠨ ᠲᠣᠭᠲᠠᠵᠤ᠂ ᠵᠢᠯᠠᠭᠠ ᠪᠦᠷᠢ ᠳ᠋ᠦ᠍ᠨᠢ ᠪᠤᠯᠠᠭ ᠱᠠᠩᠳᠠ ᠣᠷᠭᠢᠯᠵᠤ᠂ ᠠᠮᠠ ᠰᠠᠯᠠᠭᠠ ᠪᠣᠯᠭᠠᠨ ᠢ᠋ᠶ᠋ᠠᠷ ᠠᠢᠯ ᠨᠤᠲᠤᠭᠯᠠᠵᠤ ᠮᠠᠯ ᠰᠦᠷᠦᠭ᠂ ᠵᠡᠭᠡᠷᠡ ᠭᠥᠷᠥᠭᠡᠰᠦ ᠪᠡᠯᠴᠢᠵᠦ ᠪᠠᠢᠳᠠᠭ ᠪᠢᠯᠡ᠃
ᠲᠣᠪᠰᠢᠭᠤᠷ ᠬᠤᠭᠤᠷ ᠤ᠋ᠨ ᠤᠶᠠᠬᠠᠨ ᠡᠬᠡᠰᠢᠭ ᠮᠢᠭᠮᠠᠨᠰᠠᠩᠵᠠᠢ ᠪᠢᠳᠡ ᠬᠣᠶᠠᠷ ᠢ᠋ ᠬᠣᠯᠪᠣᠵᠤ᠂ ᠪᠢᠳᠡᠨ ᠦ᠌ ᠪᠢᠴᠢᠬᠠᠨ ᠵᠢᠷᠦᠬᠡ ᠳᠣᠭᠳᠣᠯᠤᠨ ᠴᠣᠬᠢᠯᠠᠳᠠᠭ ᠡᠳᠦᠷ ᠬᠣᠨᠣᠭ ᠨᠡᠭᠦᠳᠡᠯ ᠦ᠋ᠨ ᠲᠡᠮᠡᠭᠡ ᠰᠢᠭ ᠴᠤᠪᠤᠷᠠᠨᠠ᠃
— ᠡᠵᠢ ᠠ᠋᠂ ᠲᠠᠨ ᠤ᠋ ᠲᠣᠪᠰᠢᠭᠤᠷ ᠰᠠᠯᠬᠢᠨ ᠳ᠋ᠤ᠌ ᠬᠥᠭ ᠣᠷᠣᠳᠠᠭ ᠤᠤ? ᠭᠡᠵᠦ ᠭᠠᠯᠳᠠᠨ ᠠᠰᠠᠭᠤᠬᠤ᠂ ᠳᠠᠭᠠᠬᠤ ᠶ᠋ᠢᠨ ᠬᠣᠭᠣᠷᠣᠨᠳᠣ ᠥᠭᠦᠯᠡᠬᠦ ᠳ᠋ᠦ᠍ ᠶᠦᠮ ᠠᠭᠠ ᠡᠬᠡ᠂
— ᠵᠢᠯ ᠦ᠋ᠨ ᠳᠥᠷᠪᠡᠨ ᠤᠯᠠᠷᠢᠯ ᠳ᠋ᠤ᠌ ᠲᠡᠢᠮᠦ ᠡᠭᠡᠰᠢᠭᠯᠡᠩᠲᠦ ᠰᠠᠯᠬᠢ ᠳᠥᠷᠪᠡᠨ ᠤᠳᠠᠭᠠ ᠤᠷᠤᠰᠴᠤ ᠥᠩᠭᠡᠷᠡᠳᠡᠭ ᠶᠤᠮ᠃ ᠠᠩᠵᠠᠭᠠᠷᠠᠵᠤ ᠪᠠᠢᠬᠤ ᠦᠭᠡᠢ ᠪᠣᠯ ᠤᠷᠤᠰᠤᠭᠠᠳ ᠯᠠ ᠥᠩᠭᠡᠷᠡᠴᠢᠬᠡᠨᠡ᠃ ᠲᠡᠷᠡ ᠤᠷᠤᠰᠬᠠᠯ ᠢ᠋ ᠠᠯᠳᠠᠵᠤ ᠪᠣᠯᠬᠤ ᠦᠭᠡᠢ ᠭᠡᠵᠦ ᠬᠥᠪᠡᠭᠦᠨ ᠳ᠋ᠡᠭᠡᠨ ᠬᠡᠯᠡᠪᠡ᠃ ᠬᠤᠭᠤᠷ ᠢ᠋ᠶ᠋ᠠᠨ ᠬᠥᠭᠯᠡᠬᠦ ᠶ᠋ᠢᠨ ᠲᠤᠯᠠᠳᠠ ᠰᠠᠯᠬᠢᠨ ᠤ᠋ ᠴᠢᠮᠡᠭᠡ ᠰᠣᠨᠣᠰᠴᠤ ᠮᠢᠭᠮᠠᠨᠰᠠᠩᠵᠠᠢ ᠲᠠᠢ ᠵᠡᠷᠭᠡᠴᠡᠨ ᠰᠠᠭᠤᠳᠠᠭ ᠰᠠᠨ᠃
ᠲᠡᠷᠡ ᠦᠶᠡ ᠳ᠋ᠦ᠍ ᠲᠡᠳᠡ ᠬᠣᠶᠠᠷ ᠤ᠋ᠨ ᠰᠡᠳᠬᠢᠯ ᠠᠶᠠᠨᠳᠠᠭᠠᠨ ᠬᠥᠭᠯᠡᠭᠳᠡᠵᠦ᠂ ᠮᠥᠷᠡᠨ ᠭᠣᠣᠯ ᠤ᠋ᠨ ᠲᠠᠮᠢᠷᠳᠠᠵᠤ ᠴᠤᠴᠠᠬᠤ ᠦᠭᠡᠢ ᠤᠷᠤᠰᠬᠠᠯ ᠢ᠋ ᠮᠠᠷᠲᠠᠵᠤ ᠣᠷᠬᠢᠳᠠᠭ᠃
ᠠᠷᠪᠠᠨ ᠨᠢᠭᠡ
— ᠭᠠᠯᠳᠠᠨ ᠢ᠋ ᠵᠢᠷᠭᠤᠭᠠᠨ ᠨᠠᠰᠤᠲᠠᠢ ᠪᠠᠢᠬᠤ ᠳ᠋ᠤ᠌ ᠡᠴᠢᠭᠡ ᠬᠣᠩ ᠲᠠᠢᠵᠢ ᠨᠢ ᠴᠠᠰᠤᠲᠤ ᠲᠥᠪᠡᠳ ᠦ᠋ᠨ ᠣᠷᠣᠨ ᠤᠷᠤᠭᠤ ᠢᠯᠡᠭᠡᠵᠦ ᠪᠢᠯᠡ᠃ ᠡᠨᠡ ᠪᠣᠯ ᠳᠣᠮᠣᠭ ᠤ᠋ᠨ ᠦᠷᠭᠦᠯᠵᠢᠯᠡᠯ ᠪᠥᠭᠡᠳ ᠲᠡᠷᠡ ᠵᠢᠯ ᠦ᠋ᠨ ᠬᠠᠪᠤᠷ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠢ᠋ ᠰᠡᠬᠦᠨ ᠳᠤᠷᠠᠰᠬᠤ ᠦᠭᠡᠢ ᠪᠡᠷ ᠲᠡᠦᠬᠡ ᠪᠦᠳᠡᠭᠢᠷᠡᠨᠡ᠃ ᠲᠡᠷᠡ ᠬᠠᠪᠤᠷ ᠨᠡᠭᠡᠷᠡᠨ ᠶᠠᠭᠤ ᠶᠠᠭᠤ ᠪᠣᠯᠤᠭᠰᠠᠨ ᠢ᠋ ᠰᠠᠨᠠᠶᠠ᠃
ᠡᠴᠢᠭᠡ ᠬᠣᠩ ᠲᠠᠢᠵᠢ ᠳᠤᠷᠠᠯᠠᠮᠠᠬᠠᠢ᠂ ᠤᠢᠳᠤᠮᠠᠬᠠᠢ ᠬᠥᠮᠦᠨ ᠪᠠᠢᠭᠰᠠᠨ ᠶᠤᠮᠰᠠᠨ ᠤᠤ᠃ ᠭᠠᠯᠳᠠᠨ ᠢ᠋ ᠲᠥᠪᠡᠳ ᠤᠷᠤᠭᠤ ᠮᠣᠷᠳᠠᠬᠤ ᠶ᠋ᠢᠨ ᠡᠮᠦᠨᠡ ᠨᠠᠢᠮᠠᠳᠠᠬᠢ ᠬᠠᠲᠤᠨ ᠠᠮᠢᠨᠳᠠᠷᠠ ᠶ᠋ᠢ ᠪᠣᠭᠲᠣᠯᠠᠵᠤ ᠠᠪᠤᠭᠰᠠᠨ ᠶᠣᠮᠳᠠᠭ᠃ ᠭᠦᠦᠰᠢ ᠬᠠᠭᠠᠨ ᠤ᠋ ᠥᠬᠢᠨ ᠠᠮᠢᠨᠳᠠᠷᠠ ᠶ᠋ᠢ ᠠᠩᠬᠠ ᠬᠠᠷᠠᠭᠠᠳ ᠭᠠᠯᠳᠠᠨ ᠶᠡᠬᠡᠳᠡ ᠰᠣᠴᠢᠭᠰᠠᠨ ᠪᠢᠯᠡ᠃ ᠲᠡᠢᠮᠦ ᠡᠨᠳᠡ ᠵᠡᠳᠬᠡᠷ ᠦ᠋ᠨ ᠴᠠᠭᠠᠨ ᠰᠣᠷᠮᠤᠤᠰᠤ ᠲᠠᠢ ᠪᠦᠰᠡᠭᠦᠢ ᠶ᠋ᠢ ᠦᠵᠡᠭᠡ ᠦᠭᠡᠢ ᠪᠠᠢᠭᠰᠠᠨ ᠡᠴᠡ ᠪᠡᠷᠬᠡ ᠴᠣᠴᠢᠷᠳᠠᠭᠰᠠᠨ ᠪᠠᠢᠯᠠ᠃
ᠡᠴᠢᠭᠡ ᠰᠢᠨᠡ ᠥᠷᠭᠥᠭᠡ ᠪᠣᠰᠬᠠᠪᠠ᠃ ᠬᠠᠲᠤᠨ ᠡᠬᠡ ᠶᠦᠮ ᠠᠭᠠ᠂ ᠰᠡᠩᠭᠡ ᠠᠬᠠ᠂ ᠭᠠᠯᠳᠠᠨ ᠶᠡᠬᠡ ᠦᠷᠭᠦᠭᠡᠨ ᠳ᠋ᠦ᠍ ᠦᠯᠡᠳᠡᠪᠡ᠃
ᠡᠴᠢᠭᠡ ᠬᠣᠩ ᠲᠠᠢᠵᠢ ᠶ᠋ᠢᠨ ᠤᠯᠠᠭᠠᠨ ᠰᠢᠷᠠ ᠬᠣᠣᠰᠯᠠᠭᠰᠠᠨ ᠰᠠᠬᠠᠯ᠂ ᠵᠡᠷᠲᠡᠭᠡᠷ ᠨᠢᠳᠦ᠂ ᠬᠣᠷᠣᠰᠤᠯᠲᠠᠢ ᠢᠨᠢᠶᠡᠮᠰᠦᠭᠯᠡᠯ ᠰᠡᠳᠬᠢᠯ ᠡᠴᠡ ᠦᠯᠦ ᠰᠠᠯᠤᠨᠠ᠃ ᠲᠡᠷᠡ ᠪᠡᠷ ᠬᠠᠭᠤᠷᠠᠢ ᠡᠪᠡᠰᠦᠨ ᠦ᠌ ᠲᠦᠢᠮᠡᠷ ᠰᠢᠭ ᠵᠠᠩ ᠲᠠᠢ ᠪᠠᠢᠪᠠ᠃ ᠲᠡᠭᠦᠨ ᠦ᠌ ᠦᠭᠡ ᠡᠴᠡ ᠵᠥᠷᠢᠬᠦ ᠠᠷᠭᠠ ᠦᠭᠡᠢ᠃ ᠬᠡᠷᠪᠡ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶ᠋ᠢᠨ ᠦᠭᠡ ᠶ᠋ᠢ ᠵᠥᠷᠢᠭᠦᠦ ᠬᠠᠷᠠᠵᠤ ᠰᠣᠨᠣᠰᠪᠠᠯ ᠲᠠᠰᠢᠭᠤᠷ ᠤ᠋ᠨ ᠠᠮᠲᠠ ᠦᠵᠡᠬᠦ ᠶᠤᠮ ᠤᠤ᠂ ᠡᠰᠡ ᠪᠥᠭᠡᠰᠦ ᠬᠤᠷᠴᠠ ᠰᠡᠯᠡᠮᠡ ᠪᠡᠷ ᠮᠥᠴᠢ ᠡᠴᠡ ᠪᠡᠨ ᠰᠠᠯᠵᠤ ᠮᠡᠳᠡᠨᠡ᠃ ᠵᠠᠯᠠᠭᠤ ᠳ᠋ᠠᠭᠠᠨ ᠳᠡᠩᠳᠡᠭᠦᠦ ᠵᠢᠪᠬᠤᠭᠠ ᠲᠠᠢ᠂ ᠨᠠᠢᠷ ᠲᠤ᠌ ᠰᠡᠷᠭᠡᠭ ᠪᠠᠢᠭᠰᠠᠨ ᠡᠴᠢᠭᠡ ᠬᠣᠩ ᠲᠠᠢᠵᠢ ᠠᠯᠲᠠᠢ ᠶ᠋ᠢᠨ ᠨᠢᠷᠤᠭᠤᠨ ᠡᠴᠡ ᠰᠢᠳᠦᠯᠡᠩ ᠢᠷᠪᠢᠰ ᠪᠤᠭᠤᠢᠯᠢᠳᠠᠵᠤ᠂ ᠮᠠᠭᠤᠵᠢᠷᠠᠭᠰᠠᠨ ᠢᠷᠪᠢᠰ ᠦ᠋ᠨ ᠠᠮᠠᠨ ᠳ᠋ᠤᠨᠢ ᠮᠣᠳᠣ ᠲᠡᠪᠬᠡᠳᠡᠭᠡᠳ ᠭᠡᠷ ᠲᠡᠭᠡᠨ ᠠᠪᠴᠢᠷᠠᠵᠠᠢ᠃
— ᠢᠷᠪᠢᠰ ᠲᠡᠵᠢᠭᠡᠨᠡ ᠭᠡᠵᠦ ᠬᠣᠩ ᠲᠠᠢᠵᠢ ᠬᠡᠯᠡᠪᠡ᠃
— ᠢᠳᠡᠭᠡᠰᠢᠬᠦ ᠤᠤ ᠭᠡᠵᠦ ᠵᠠᠩᠵᠤᠨ ᠳᠡᠮᠪᠡᠷᠢᠯ ᠬᠠᠷᠢᠭᠤ ᠥᠴᠢᠪᠡ᠃
— ᠴᠥᠬᠥ ᠴᠢ᠂ ᠡᠳᠦᠷ ᠲᠦ᠍ ᠨᠢᠭᠡ ᠬᠣᠨᠢ ᠵᠣᠭᠣᠭᠯᠠᠨᠠ ᠪᠢᠵᠡ᠃ ᠮᠢᠬᠠᠴᠢᠨ ᠠᠮᠢᠲᠠᠨ ᠢ᠋ ᠮᠢᠬᠠᠨ ᠳ᠋ᠤ᠌ ᠳᠠᠰᠬᠠᠨᠠ᠃ ᠲᠡᠢᠮᠦ ᠪᠤᠰᠤ ᠤᠤ ᠭᠡᠵᠦ ᠬᠣᠩ ᠲᠠᠢᠵᠢ ᠠᠭᠠᠷᠬᠠᠪᠠ᠃
— ᠤᠯᠠᠭᠠᠨ ᠮᠢᠬᠠᠨ ᠡᠴᠡ ᠪᠣᠯᠵᠤ ᠤᠯᠠᠩᠭᠠᠰᠤᠨᠠ ᠳᠠ ᠭᠡᠮᠡᠨ ᠳᠡᠮᠪᠡᠷᠢᠯ ᠥᠭᠦᠯᠡᠪᠡ᠃
— ᠲᠡᠭᠡᠭᠡᠳ ᠢᠷᠪᠢᠰ ᠢ᠋ ᠴᠠᠭᠠᠨ ᠢᠳᠡᠭᠡ ᠪᠡᠷ ᠬᠣᠭᠣᠯᠠᠯᠠᠬᠤ ᠤᠤ᠂ ᠠᠩ! ᠭᠡᠵᠦ ᠬᠣᠩ ᠲᠠᠢᠵᠢ ᠰᠢᠷᠪᠢ ᠲᠠᠲᠠᠵᠢ᠃
— ᠲᠠ ᠪᠣᠯᠭᠣᠭᠠᠨᠠ ᠪᠢᠵᠡ ᠭᠡᠵᠦ ᠳᠡᠮᠪᠡᠷᠢᠯ ᠵᠠᠩᠵᠤᠨ ᠪᠠᠭᠤᠯᠲᠠ ᠬᠢᠪᠡ᠃
ᠢᠷᠪᠢᠰ ᠦ᠋ᠨ ᠰᠤᠨᠠᠭᠠᠷ ᠤᠷᠲᠤ ᠪᠡᠶᠡ᠂ ᠬᠤᠷᠴᠠ ᠴᠠᠭᠠᠨ ᠰᠢᠲᠦ᠂ ᠬᠣᠷᠣᠰᠤᠭᠰᠠᠨ ᠬᠦᠢᠲᠡ ᠬᠠᠷᠠᠴᠠ ᠶᠡᠷᠦ ᠪᠤᠰᠤ ᠶ᠋ᠢᠨ ᠠᠶᠤᠮᠰᠢᠭᠲᠠᠢ ᠪᠥᠭᠡᠳ ᠨᠢᠭᠤᠴᠠᠯᠢᠭ᠃ ᠰᠡᠷᠡᠯᠵᠢ ᠶ᠋ᠢᠨ ᠪᠢᠲᠡᠭᠦᠦ ᠬᠠᠰᠢᠶᠠᠨ ᠳ᠋ᠤ᠌ ᠢᠷᠪᠢᠰ ᠢ᠋ ᠬᠣᠷᠢᠵᠠᠢ᠃ ᠬᠠᠰᠢᠶᠠ ᠶ᠋ᠢᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠬᠣᠨᠢᠨ ᠤ᠋ ᠬᠥᠯ ᠮᠢᠬᠠ ᠰᠢᠳᠡᠵᠦ᠂ ᠮᠣᠳᠣᠨ ᠴᠣᠬᠣᠤ ᠳ᠋ᠤ᠌ ᠤᠰᠤ ᠳᠦᠭᠦᠷᠭᠡᠵᠦ ᠥᠭᠭᠦᠨᠡ᠃ ᠰᠡᠷᠡᠯᠵᠢ ᠶ᠋ᠢᠨ ᠮᠣᠳᠣ ᠶ᠋ᠢ ᠢᠷᠪᠢᠰ ᠰᠡᠳᠡᠷᠡᠲᠡᠯᠡ ᠮᠡᠷᠡᠵᠦ᠂ ᠬᠥᠮᠦᠨ ᠦᠵᠡᠩᠭᠦᠲᠡ ᠬᠥᠯ ᠦ᠋ᠨ ᠢ᠋ᠶ᠋ᠡᠨ ᠵᠠᠪᠰᠠᠷ ᠲᠣᠯᠣᠭᠠᠢ ᠪᠠᠨ ᠰᠢᠷᠭᠤᠭᠤᠯᠤᠨ ᠨᠢᠳᠦ ᠪᠡᠨ ᠨᠢᠭᠤᠨᠠ᠃ ᠠᠷᠭᠠᠯ ᠤ᠋ᠨ ᠤᠲᠤᠭᠠ᠂ ᠬᠥᠮᠦᠨ᠂ ᠮᠠᠯ ᠤ᠋ᠨ ᠦᠨᠦᠷ ᠲᠦ᠍ ᠲᠠᠷᠴᠢᠯᠠᠭᠰᠠᠨ ᠲᠡᠷᠡ ᠢᠷᠪᠢᠰ ᠡᠷᠬᠡ ᠴᠢᠯᠥᠭᠡ ᠮᠥᠷᠥᠭᠡᠳᠦᠨ ᠰᠢᠲᠦ ᠪᠡᠨ ᠬᠤᠷᠴᠠᠯᠠᠵᠤ ᠬᠡᠪᠲᠡᠬᠦ ᠪᠣᠯᠪᠠ᠃
ᠬᠠᠷᠠ ᠡᠷᠴᠢᠰ ᠦ᠋ᠨ ᠤᠰᠤᠨ ᠳ᠋ᠤ᠌ ᠣᠢᠵᠤ ᠦᠬᠦᠭᠰᠡᠨ ᠬᠣᠶᠠᠷ ᠲᠤᠭᠤᠯ ᠤ᠋ᠨ ᠮᠢᠬᠠ ᠪᠠᠷ ᠬᠣᠭᠣᠯᠠᠯᠠᠬᠤ ᠭᠡᠲᠡᠯᠡ ᠢᠷᠪᠢᠰ ᠲᠡᠭᠦᠨ ᠢ ᠲᠣᠭᠣᠵᠤ ᠵᠣᠭᠣᠭᠯᠠᠭᠰᠠᠨ ᠦᠭᠡᠢ᠂ ᠬᠣᠰᠢᠭᠤ ᠪᠠᠷ ᠢ᠋ᠶ᠋ᠠᠨ ᠲᠥᠷᠥᠵᠦ ᠬᠣᠯᠠᠳᠠᠭᠤᠯᠪᠠ᠃ ᠢᠷᠪᠢᠰ ᠠᠮᠢᠰᠬᠤᠭᠠᠳᠠᠨ ᠴᠡᠭᠡᠵᠢ ᠪᠡᠨ ᠬᠤᠷᠵᠢᠭᠢᠨᠠᠭᠤᠯᠤᠨ ᠬᠣᠷᠣᠰᠤᠯᠲᠠᠢ ᠬᠡᠪᠲᠡᠬᠦ ᠶ᠋ᠢ ᠬᠣᠩ ᠲᠠᠢᠵᠢ ᠣᠯᠠᠨᠲᠠ ᠬᠠᠷᠠᠵᠠᠢ᠃
— ᠢᠷᠪᠢᠰ ᠢ ᠰᠤᠯᠠᠯᠠ! ᠭᠡᠵᠦ ᠬᠣᠩ ᠲᠠᠢᠵᠢ ᠨᠢᠭᠡ ᠡᠳᠦᠷ ᠬᠠᠰᠬᠢᠷᠪᠠ᠃
— ᠮᠡᠳᠡᠯᠡ ᠭᠡᠵᠦ ᠳᠡᠮᠪᠡᠷᠢᠯ ᠬᠠᠷᠢᠭᠤᠯᠪᠠ᠃
ᠠᠷᠳᠠᠭ ᠬᠤᠷᠳᠤᠨ ᠮᠣᠷᠢ ᠲᠠᠢ ᠳᠡᠮᠪᠡᠷᠢᠯ ᠰᠠᠷᠠᠪᠴᠢ ᠶ᠋ᠢᠨ ᠥᠷᠥᠭᠡᠰᠦᠨ ᠪᠤᠯᠤᠩ ᠢ ᠪᠤᠭᠤᠢᠯᠢᠳᠠᠨ ᠲᠠᠲᠠᠵᠤ ᠬᠤᠷᠢᠶᠠᠯᠠ᠃ ᠴᠠᠭᠠᠨ ᠢᠷᠪᠢᠰ ᠴᠠᠭᠠᠨ ᠰᠤᠮᠤ ᠮᠡᠲᠦ ᠳᠡᠭᠦᠯᠢᠯᠡ᠃ ᠢᠷᠪᠢᠰ ᠦ᠋ᠨ ᠬᠣᠰᠢᠭᠤ ᠨᠢ ᠨᠠᠷᠢᠰᠤᠨ ᠰᠢᠪᠠᠭᠤᠨ ᠤ᠋ ᠬᠢ ᠰᠢᠭ ᠪᠣᠯᠵᠤ᠂ ᠤᠷᠲᠤ ᠬᠣᠶᠠᠷ ᠬᠥᠯ ᠢ᠋ᠶ᠋ᠡᠨ ᠬᠥᠪᠴᠢᠯᠡᠨ ᠵᠢᠭᠢᠵᠦ᠂ ᠬᠤᠷᠢᠶᠠᠭᠰᠠᠨ ᠪᠡᠶᠡ ᠨᠢ ᠲᠡᠨᠢᠢᠬᠦ ᠳ᠋ᠦ᠍ ᠭᠡᠳᠡᠰᠦ ᠬᠡᠪᠡᠯᠢ ᠨᠢ ᠰᠤᠨᠵᠤ ᠬᠣᠢᠲᠤ ᠬᠣᠶᠠᠷ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠡᠷᠡᠭᠦᠯ ᠭᠠᠵᠠᠷ ᠢ ᠣᠩᠭᠢᠯᠤᠨ ᠲᠡᠢᠷᠴᠦ ᠲᠣᠭᠣᠰᠣ ᠪᠣᠰᠬᠠᠨ ᠳᠡᠭᠦᠯᠢᠬᠦ ᠳ᠋ᠦ᠍ ᠶᠡᠬᠡ ᠬᠦᠷᠢᠶᠡᠨ ᠦ᠌ ᠭᠠᠳᠠᠨᠠ ᠦᠢᠮᠡᠭᠡᠨ ᠳᠡᠭᠳᠡᠪᠡ᠃
ᠳᠡᠮᠪᠡᠷᠢᠯ ᠵᠠᠩᠵᠤᠨ ᠤ᠋ ᠤᠨᠤᠭᠰᠠᠨ ᠬᠦᠷᠡᠩ ᠮᠣᠷᠢ ᠢᠨᠴᠠᠭᠠᠨ ᠦᠯᠦ ᠦᠰᠦᠷᠬᠦ ᠳ᠋ᠦ᠍ ᠮᠣᠷᠢᠨ ᠤ᠋ ᠭᠦᠷᠡᠭᠡ ᠡᠴᠡ ᠬᠦᠷᠡᠩ ᠴᠢᠰᠤ ᠣᠯᠣᠭᠠᠢᠳᠤᠯᠠ᠃
ᠡᠴᠢᠭᠡ ᠬᠣᠩ ᠲᠠᠢᠵᠢ ᠡᠨᠡ ᠦᠶᠡ ᠳ᠋ᠦ᠍ ᠣᠮᠣᠭᠯᠠᠩ ᠬᠡᠭᠡᠷ ᠮᠣᠷᠢ ᠲᠠᠢ ᠪᠠᠨ ᠡᠷᠴᠢᠯᠡᠨ ᠤᠬᠤᠰᠬᠢᠪᠡ᠃ ᠡᠴᠢᠭᠡ ᠶ᠋ᠢᠨ ᠮᠠᠬᠢᠷ ᠰᠡᠯᠡᠮᠡ ᠶ᠋ᠢᠨ ᠢᠷ ᠡᠴᠡ ᠭᠡᠷᠡᠯ ᠣᠢᠯᠠ᠃ ᠡᠴᠢᠭᠡ ᠬᠠᠭᠠᠨ ᠰᠡᠯᠡᠮᠡ ᠪᠡᠨ ᠰᠤᠭᠤᠯᠵᠤ ᠰᠤᠨᠤᠨ ᠳᠡᠭᠦᠯᠢᠵᠦ ᠶᠠᠪᠤᠭᠠ ᠴᠠᠭᠠᠨ ᠢᠷᠪᠢᠰ ᠢ ᠪᠠᠬᠠᠷᠬᠠᠨ ᠰᠢᠷᠳᠡᠨᠡ᠃
ᠳᠡᠮᠪᠡᠷᠢᠯ ᠪᠣᠯ ᠴᠣᠷᠣᠰ ᠴᠡᠷᠢᠭ ᠦ᠋ᠨ ᠳᠤᠮᠳᠠ ᠡᠴᠡ ᠰᠡᠯᠡᠮᠡᠳᠡᠬᠦ ᠡᠷᠳᠡᠮ ᠳ᠋ᠦ᠍ ᠪᠣᠯᠪᠠᠰᠤᠷᠠᠭᠰᠠᠨ ᠨᠢᠭᠡᠨ ᠶᠤᠮ᠃
ᠪᠤᠵᠢᠭᠢᠨᠠᠭᠠᠨ ᠨᠢᠳᠦ ᠢᠷᠮᠡᠬᠦ ᠵᠠᠭᠤᠷᠠ ᠪᠣᠯᠵᠤ ᠥᠩᠭᠡᠷᠡᠯᠡ᠃ ᠡᠴᠢᠭᠡ ᠬᠣᠩ ᠲᠠᠢᠵᠢ ᠶ᠋ᠢᠨ ᠨᠠᠷᠠᠨ ᠤ᠋ ᠭᠡᠷᠡᠯ ᠣᠢᠬᠤ ᠰᠡᠯᠡᠮᠡ ᠶ᠋ᠢᠨ ᠦᠵᠦᠭᠦᠷ ᠡᠴᠡ ᠴᠢᠰᠤ ᠲᠣᠰᠴᠤ ᠬᠠᠷᠠᠭᠳᠠᠨᠠ᠃ ᠳᠡᠮᠪᠡᠷᠢᠯ ᠫᠡᠷ ᠫᠡᠷ ᠬᠥᠬᠥᠷᠡᠵᠦ᠄
— ᠬᠠᠭᠠᠨ ᠲᠠ ᠬᠡᠳᠦᠢ ᠳ᠋ᠦ᠍ᠨᠢ ᠪᠦᠯᠢᠵᠦ ᠠᠮᠵᠢᠪᠠ ᠭᠡᠵᠡᠢ᠃
ᠬᠠᠭᠠᠨ ᠡᠴᠢᠭᠡ ᠴᠢᠬᠤᠯᠳᠠᠩᠭᠤᠢ᠂
— ᠪᠢ ᠢᠷᠪᠢᠰ ᠡᠴᠡ ᠶᠠᠭᠤᠨ ᠳ᠋ᠤ᠌ ᠳᠤᠲᠠᠨᠠ ᠭᠡᠵᠦ ᠣᠮᠣᠭ ᠲᠠᠢ ᠪᠠᠷᠳᠠᠮ ᠥᠭᠦᠯᠡᠪᠡ᠃
ᠡᠩ ᠰᠠᠴᠠᠭᠤ ᠳᠡᠮᠪᠡᠷᠢᠯ ᠵᠠᠩᠵᠤᠨ᠂
— ᠪᠢ ᠴᠦ᠍ ᠢᠷᠪᠢᠰ ᠡᠴᠡ ᠦᠯᠦ ᠳᠤᠲᠠᠨᠠ ᠭᠡᠳ ᠰᠡᠯᠡᠮᠡ ᠪᠡᠨ ᠰᠡᠭᠰᠦᠷᠬᠦ ᠳ᠋ᠦ᠍ ᠬᠤᠷᠴᠠ ᠲᠣᠷᠭᠠᠨ ᠢᠷ ᠦ᠋ᠨ ᠳᠡᠭᠡᠭᠦᠷ ᠨᠢ ᠪᠦᠨᠵᠢᠢᠭᠰᠡᠨ ᠤᠯᠠᠭᠠᠨ ᠳᠤᠰᠤᠯ ᠤ᠋ᠳ ᠨᠢᠭᠡᠨ ᠢ᠋ᠶ᠋ᠡᠨ ᠬᠥᠭᠡᠭᠡᠴᠡᠯᠳᠦᠬᠦ ᠮᠡᠲᠦ ᠥᠩᠬᠥᠷᠢᠨᠡ᠃
ᠳᠡᠮᠪᠡᠷᠢᠯ ᠦ᠋ᠨ ᠮᠣᠷᠢ ᠦᠬᠦᠳᠬᠢᠨ ᠤᠨᠠᠪᠠ᠃ ᠳᠡᠮᠪᠡᠷᠢᠯ ᠪᠣᠰᠤᠭᠠ ᠪᠠᠷ ᠢ᠋ᠶ᠋ᠠᠨ ᠭᠠᠵᠠᠷ ᠲᠤ᠌ ᠪᠠᠭᠤᠪᠠ᠃ ᠳᠡᠮᠪᠡᠷᠢᠯ ᠮᠣᠷᠢᠨ ᠤ᠋ ᠪᠠᠨ ᠮᠣᠯᠣᠷ ᠡᠷᠳᠡᠨᠢ ᠲᠣᠯᠣᠭᠠᠢ ᠶ᠋ᠢ ᠣᠭᠲᠣᠯᠵᠤ ᠪᠠᠷᠢᠭᠠᠳ ᠬᠠᠳᠠᠨ ᠬᠠᠯᠢᠯ ᠳ᠋ᠤ᠌ ᠠᠪᠠᠴᠢᠵᠤ ᠲᠠᠯᠪᠢᠬᠤ ᠪᠠᠷ ᠮᠣᠷᠳᠠᠯᠠ᠃ ᠬᠠᠷᠢᠨ ᠠᠳᠤᠭᠤᠨ ᠤ᠋ ᠮᠢᠬᠠ ᠶ᠋ᠢ ᠤᠰᠤᠨ ᠳ᠋ᠤ᠌ ᠣᠢᠭᠰᠠᠨ ᠲᠤᠭᠤᠯ ᠤ᠋ᠨ ᠰᠡᠭ ᠳᠡᠭᠡᠷᠡ ᠬᠠᠶᠠᠪᠠ᠃ ᠴᠠᠭᠠᠨ ᠢᠷᠪᠢᠰ ᠰᠡᠷᠪᠡᠩ ᠬᠠᠳᠠ ᠲᠠᠢ ᠡᠩᠭᠡᠷ ᠢ᠋ ᠥᠭᠰᠥᠵᠦ᠂ ᠠᠭᠤᠯᠠ ᠶ᠋ᠢᠨ ᠬᠢᠷᠠ ᠳᠡᠭᠡᠭᠦᠷ ᠳᠡᠭᠦᠯᠢᠭᠰᠡᠭᠡᠷ ᠴᠠᠰᠤ ᠮᠥᠰᠥᠨ ᠦ᠌ ᠬᠥᠯ ᠳ᠋ᠦ᠍ ᠰᠢᠩᠭᠡᠯᠡ᠃— ᠭᠠᠯᠳᠠᠨ! ᠭᠡᠮᠡᠨ ᠶᠦᠮ ᠠᠭᠠ ᠡᠬᠡ ᠬᠠᠰᠬᠢᠷᠤᠨ ᠳᠠᠭᠤᠳᠠᠪᠠ᠃ ᠭᠠᠯᠳᠠᠨ ᠬᠥᠪᠡᠭᠦᠨ ᠬᠠᠮᠢᠭᠠᠰᠢ ᠪᠠᠨ ᠣᠳᠪᠠ᠃ ᠴᠠᠭᠠᠨ ᠢᠷᠪᠢᠰ ᠭᠠᠯᠳᠠᠨ ᠢ᠋ ᠠᠪᠴᠤ ᠣᠳᠪᠠ ᠭᠡᠵᠦ ᠤᠤ? ᠬᠥᠪᠡᠭᠦᠨ ᠮᠢᠨᠢ ᠭᠡᠵᠦ ᠬᠠᠲᠤᠨ ᠡᠬᠡ ᠲᠠᠭᠤᠲᠠᠯᠠ᠃
ᠠᠷᠪᠠᠨ ᠬᠣᠶᠠᠷ
ᠬᠠᠲᠤᠨ ᠡᠬᠡ ᠶᠦᠮ ᠠᠭᠠ ᠶ᠋ᠢᠨ ᠦᠷᠭᠦᠭᠡᠨ ᠳ᠋ᠦ᠍ ᠮᠢᠭᠮᠠᠨᠰᠠᠩᠵᠠᠢ ᠥᠬᠢᠨ ᠢ᠋ ᠪᠥᠭᠡᠷᠡ ᠡᠬᠡᠨᠡᠷ ᠳᠠᠭᠠᠭᠤᠯᠵᠤ ᠢᠷᠡᠭᠡᠳ ᠪᠠᠷᠠᠭᠤᠨ ᠬᠠᠲᠠᠪᠴᠢᠨ ᠤ᠋ ᠡᠷᠢᠶᠡᠨ ᠠᠯᠠᠭ ᠰᠢᠷᠢᠳᠡᠭ ᠳᠡᠭᠡᠷᠡ ᠪᠤᠬᠢᠨᠢᠳᠤᠨ ᠰᠠᠭᠤᠭᠠᠳ᠂
— ᠠᠬᠠᠢᠲᠠᠨ ᠥᠬᠢᠨ ᠢ᠋ ᠠᠪᠴᠢᠷᠠᠯᠠ ᠭᠡᠵᠦ ᠳᠣᠷᠣᠢ ᠨᠠᠮᠤᠭᠤᠬᠠᠨ ᠢ᠋ᠶ᠋ᠠᠷ ᠥᠴᠢᠪᠡ᠃ ᠶᠦᠮ ᠠᠭᠠ ᠨᠡᠯᠢᠶᠡᠳ ᠠᠭᠠᠳᠠᠵᠤ ᠰᠠᠨᠳᠤᠷᠤᠭᠰᠠᠨ ᠪᠡᠶᠡ ᠪᠡᠨ ᠪᠠᠷᠢᠵᠤ᠂
— ᠥᠨᠥᠳᠥᠷ ᠭᠠᠯᠳᠠᠨ ᠲᠠᠢ ᠲᠣᠭᠯᠠᠭᠰᠠᠨ ᠤᠤ ᠭᠡᠮᠡᠨ ᠥᠬᠢᠨ ᠡᠴᠡ ᠠᠶᠠᠳᠠᠭᠤᠬᠠᠨ ᠠᠰᠠᠭᠤᠯᠠ᠃
— ᠲᠣᠭᠯᠠᠭᠰᠠᠨ ᠭᠡᠵᠦ ᠮᠢᠭᠮᠠᠨᠰᠠᠩᠵᠠᠢ ᠥᠭᠦᠯᠡᠪᠡ᠃
— ᠬᠡᠳᠦᠢ ᠳ᠋ᠦ᠍᠂ ᠬᠠᠮᠢᠭᠠ ᠲᠣᠭᠯᠠᠭᠰᠠᠨ ᠶᠤᠮ᠂ ᠮᠢᠨᠦ ᠥᠬᠢᠨ᠁ ᠭᠡᠵᠦ ᠶᠦᠮ ᠠᠭᠠ ᠬᠠᠲᠤᠨ ᠥᠬᠢᠨ ᠡᠴᠡ ᠱᠠᠪᠲᠠᠭᠤᠬᠠᠨ ᠰᠢᠯᠭᠠᠬᠤ ᠳ᠋ᠤ᠌ ᠮᠢᠭᠮᠠᠨᠰᠠᠩᠵᠠᠢ ᠶ᠋ᠢᠨ ᠨᠢᠳᠦ ᠲᠣᠷᠮᠣᠯᠵᠠᠨ ᠡᠬᠡ ᠤᠷᠤᠭᠤ ᠪᠠᠨ ᠬᠠᠷᠠᠪᠠ᠃ ᠪᠥᠭᠡᠷᠡ ᠡᠬᠡᠨᠡᠷ ᠥᠬᠢᠨ ᠦ᠌ ᠪᠡᠨ ᠤᠷᠲᠤ ᠱᠠᠩᠬᠤ ᠶ᠋ᠢ ᠢᠯᠢᠵᠦ᠂
— ᠬᠠᠲᠤᠨ ᠳ᠋ᠤ᠌ ᠬᠠᠮᠢᠭᠠ ᠶᠠᠭᠤ ᠬᠢᠭᠰᠡᠨ ᠢ᠋ᠶ᠋ᠡᠨ ᠬᠡᠯᠡ᠂ ᠬᠡᠯᠡ ᠭᠡᠯᠡ᠃
— ᠮᠢᠭᠮᠠᠨᠰᠠᠩᠵᠠᠢ ᠡᠬᠡ ᠳ᠋ᠡᠭᠡᠨ ᠣᠢᠷᠠᠲᠤᠭᠠᠳ᠂
— ᠴᠠᠭᠠᠨ ᠢᠷᠪᠢᠰ ᠲᠡᠢ ᠲᠣᠭᠯᠠᠭᠰᠠᠨ ᠭᠡᠵᠦ ᠬᠡᠯᠡᠪᠡ᠃
— ᠢᠷᠪᠢᠰ ᠲᠡᠢ ᠬᠡᠨ ᠲᠣᠭᠯᠠᠪᠠ᠃
— ᠭᠠᠯᠳᠠᠨ ᠬᠠᠨ ᠬᠦᠦ᠁
— ᠶᠠᠭᠠᠬᠢᠵᠤ ᠲᠣᠭᠯᠠᠭᠰᠠᠨ ᠪᠣᠢ?
— ᠢᠷᠪᠢᠰ ᠲᠦ᠍ ᠴᠡᠴᠡᠭ ᠦᠨᠦᠷᠲᠦᠭᠦᠯᠵᠦ᠂ ᠨᠢᠳᠦ ᠪᠡᠨ ᠠᠨᠢᠬᠤ ᠪᠠᠷ ᠨᠢ ᠬᠠᠨ ᠬᠦᠦ ᠰᠢᠳᠦ ᠶ᠋ᠢ ᠨᠢ ᠲᠣᠭᠠᠯᠠᠵᠤ᠂ ᠰᠣᠶᠣᠭᠠ ᠶ᠋ᠢ ᠨᠢ ᠦᠵᠡᠭᠰᠡᠨ᠃ ᠰᠣᠶᠣᠭᠠ ᠨᠢ ᠬᠤᠷᠴᠠ ᠰᠢᠪᠦᠭᠡ ᠶᠤᠮ ᠪᠢᠯᠡ᠃ ᠬᠠᠨ ᠬᠦᠦ ᠰᠣᠶᠣᠭᠠ ᠶ᠋ᠢ ᠨᠢ ᠲᠠᠲᠠᠵᠤ ᠴᠢᠩᠭᠠᠭᠠᠵᠤ ᠦᠵᠡᠭᠰᠡᠨ᠂ ᠢᠷᠪᠢᠰ ᠠᠭᠤᠷᠯᠠᠭᠠ ᠦᠭᠡᠢ᠃
— ᠶᠠᠮᠠᠷ ᠴᠡᠴᠡᠭ ᠦᠨᠦᠷᠲᠦᠭᠦᠯᠦᠭᠰᠡᠨ ᠶᠤᠮ᠂ ᠥᠬᠢᠨ ᠮᠢᠨᠢ᠁
— ᠴᠡᠴᠡᠭ ᠦ᠋ᠨ ᠪᠤᠳᠠᠩ ᠳᠣᠲᠣᠷᠠ ᠡᠴᠡ ᠠᠪᠴᠢᠷᠠᠭᠰᠠᠨ ᠶᠠᠭᠠᠨ ᠴᠡᠴᠡᠭ ᠢ᠋ ᠦᠨᠦᠷᠲᠦᠭᠦᠯᠦᠭᠰᠡᠨ᠃
— ᠭᠠᠯᠳᠠᠨ ᠲᠠ ᠬᠣᠶᠠᠷ ᠡᠷᠲᠡ ᠳ᠋ᠦ᠍ ᠲᠣᠰᠢᠯᠣᠢ ᠲᠡᠭᠦᠬᠦ ᠪᠡᠷ ᠶᠠᠪᠤᠬᠤ ᠳ᠋ᠠᠭᠠᠨ ᠴᠡᠴᠡᠭ ᠦ᠋ᠨ ᠪᠤᠳᠠᠩ ᠳ᠋ᠤ᠌ ᠲᠥᠭᠡᠷᠢᠭᠰᠡᠨ ᠪᠢᠯᠡ ᠤᠤ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠴᠡᠴᠡᠭ ᠠᠪᠴᠢᠷᠠᠭᠰᠠᠨ ᠪᠠᠢᠬᠤ ᠨᠢ ᠠ᠋᠃
— ᠲᠡᠢᠮᠦ ᠠ᠋᠂ ᠴᠡᠴᠡᠭ ᠦ᠋ᠨ ᠪᠤᠳᠠᠩ ᠤᠭᠠ᠋ᠴᠠ ᠪᠠᠨ ᠶᠠᠭᠠᠨ ᠥᠩᠭᠡ ᠲᠡᠢ ᠰᠢᠦ ᠳᠡ᠃
— ᠭᠠᠯᠳᠠᠨ ᠬᠥᠪᠡᠭᠦᠨ ᠢ᠋ ᠢᠷᠪᠢᠰ ᠲᠡᠢ ᠴᠣᠭ ᠣᠳᠤᠭᠰᠠᠨ ᠢ᠋ ᠬᠠᠷᠠᠭᠰᠠᠨ ᠤᠤ?
— ᠦᠭᠡᠢ᠂ ᠬᠠᠷᠠᠭᠠ ᠦᠭᠡᠢ᠃ ᠴᠠᠭᠠᠨ ᠢᠷᠪᠢᠰ ᠭᠠᠯᠳᠠᠨ ᠬᠠᠨ ᠬᠦᠦ ᠶ᠋ᠢ ᠳᠠᠭᠠᠬᠤ ᠭᠡᠳ ᠪᠠᠢᠳᠠᠭ ᠶᠤᠮ᠃
— ᠬᠡᠳᠦᠢ ᠡᠴᠡ᠁
— ᠶᠡᠷᠦ ᠨᠢ ᠠᠯᠢ ᠬᠡᠳᠦᠢᠨᠡᠢ ᠡᠴᠡ᠃ ᠲᠡᠷᠡ ᠴᠠᠭᠠᠨ ᠢᠷᠪᠢᠰ ᠦ᠋ᠨ ᠬᠠᠰᠢᠶᠠ ᠰᠠᠷᠠᠪᠴᠢᠨ ᠳ᠋ᠤ᠌ ᠣᠢᠷᠠᠳᠴᠤ᠂ ᠬᠠᠰᠢᠶᠠᠨ ᠳᠣᠲᠣᠷᠠ ᠣᠷᠣᠳᠠᠭ ᠬᠥᠮᠦᠨ ᠪᠣᠯ ᠭᠠᠭᠴᠠᠬᠠᠨ ᠭᠠᠯᠳᠠᠨ᠃ ᠲᠡᠷᠡ ᠢᠷᠪᠢᠰ ᠭᠠᠯᠳᠠᠨ ᠢ᠋ ᠬᠠᠷᠠᠬᠤ ᠪᠠᠷ ᠢ᠋ᠶ᠋ᠠᠨ ᠨᠢᠳᠦ ᠨᠢ ᠬᠠᠴᠢᠨ ᠪᠣᠯᠤᠭᠠᠳ ᠬᠡᠪᠲᠡᠭᠡᠳ ᠥᠭᠳᠡᠭ᠃ ᠬᠠᠲᠤᠨᠲᠠᠨ ᠮᠢᠨᠢ᠃
— ᠭᠠᠯᠳᠠᠨ ᠬᠥᠪᠡᠭᠦᠨ ᠢ᠋ ᠴᠡᠴᠡᠭ ᠦᠨᠦᠷᠲᠦᠭᠦᠯᠬᠦ ᠡᠴᠡ ᠡᠮᠦᠨᠡ ᠲᠡᠭᠡᠵᠦ ᠬᠡᠪᠲᠡᠳᠡᠭ ᠪᠠᠢᠭᠰᠠᠨ ᠤᠤ?
— ᠴᠠᠭᠠᠨ ᠢᠷᠪᠢᠰ ᠭᠠᠯᠳᠠᠨ ᠬᠥᠪᠡᠭᠦᠨ ᠳ᠋ᠦ᠍ ᠳᠠᠰᠤᠭᠰᠠᠨ ᠭᠡᠵᠦ ᠪᠣᠳᠣᠳᠠᠭ᠃ ᠭᠠᠯᠳᠠᠨ ᠬᠠᠨ ᠬᠦᠦ ᠶ᠋ᠢ ᠪᠢ ᠢᠷᠪᠢᠰ ᠡᠴᠡ ᠬᠣᠯᠠ ᠪᠠᠢ ᠭᠡᠬᠦ ᠳ᠋ᠦ᠍ ᠦᠭᠡᠨ ᠳ᠋ᠦ᠍ ᠣᠷᠣᠳᠠᠭ ᠦᠭᠡᠢ᠃
— ᠬᠠᠰᠢᠶᠠ ᠳᠠᠪᠠᠭᠠᠳ ᠭᠠᠯᠳᠠᠨ ᠬᠥᠪᠡᠭᠦᠨ ᠢ᠋ ᠢᠷᠪᠢᠰ ᠲᠡᠢ ᠴᠣᠭ ᠪᠠᠢᠬᠤ ᠶ᠋ᠢ ᠬᠡᠨ ᠬᠠᠷᠠᠭᠰᠠᠨ ᠪᠣᠢ? ᠴᠢᠮᠠ ᠡᠴᠡ ᠥᠭᠡᠷᠡ ᠬᠥᠮᠦᠨ ᠡᠭᠦᠨ ᠢ᠋ ᠮᠡᠳᠡᠬᠦ ᠤᠤ?
— ᠮᠡᠳᠡᠨᠡ᠂ ᠳᠠᠨᠵᠢᠯᠠ ᠮᠡᠳᠡᠨᠡ᠃
— ᠪᠢ ᠳᠠᠨᠵᠢᠯᠠ ᠶ᠋ᠢ ᠳᠠᠭᠤᠳᠠᠶᠠ᠃ ᠮᠢᠭᠮᠠᠨᠰᠠᠩᠵᠠᠢ ᠥᠬᠢᠨ ᠮᠢᠨᠢ ᠭᠠᠯᠳᠠᠨ ᠬᠥᠪᠡᠭᠦᠨ ᠢᠷᠪᠢᠰ ᠲᠡᠢ ᠴᠣᠭ ᠣᠳᠬᠤ ᠶ᠋ᠢ ᠳᠡᠭᠡᠳᠦ ᠬᠣᠲᠠ᠂ ᠬᠦᠷᠢᠶᠡ ᠶ᠋ᠢᠨ ᠬᠢᠨ ᠬᠠᠷᠠᠭᠰᠠᠨ ᠪᠠᠢᠨᠠ᠃ ᠴᠢᠮᠠᠶ᠋ᠢ ᠬᠠᠷᠠᠭᠠ ᠦᠭᠡᠢ ᠪᠣᠯᠬᠤ ᠪᠠᠷ ᠡᠷᠡᠭᠡᠯᠵᠡᠭᠡᠳ ᠪᠠᠢᠭᠠ ᠶᠤᠮ᠃
ᠶᠦᠮ ᠠᠭᠠ ᠬᠠᠲᠤᠨ ᠬᠥᠪᠡᠭᠦᠨ ᠦ᠌ ᠪᠡᠨ ᠠᠷᠢᠶᠠᠲᠠᠨ ᠲᠠᠢ ᠲᠣᠭᠯᠠᠵᠤ ᠪᠠᠢᠭᠰᠠᠨ ᠢ᠋ ᠰᠣᠨᠣᠰᠤᠭᠠᠳ ᠤᠯᠠᠮ ᠶᠡᠬᠡ ᠪᠡᠷ ᠠᠶᠤᠵᠤ ᠰᠠᠨᠳᠤᠷᠪᠠ᠃ ᠡᠬᠡ ᠨᠢ ᠰᠠᠨᠳᠤᠷᠤᠭᠰᠠᠨᠠ᠋ᠴᠠ ᠪᠠᠨ ᠪᠣᠯᠤᠭᠠᠳ ᠣᠢᠷᠠ ᠬᠠᠪᠢ ᠶ᠋ᠢᠨ ᠠᠯᠪᠠᠲᠤ ᠨᠤᠭᠤᠳ ᠢ᠋ ᠴᠤᠭᠯᠠᠭᠤᠯᠪᠠ᠃ ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠳ᠋ᠤ᠌ ᠳᠣᠭᠣᠯᠭᠠᠪᠠ᠃
ᠳᠠᠨᠵᠢᠯᠠ ᠬᠥᠪᠡᠭᠦᠨ ᠪᠣᠯ ᠮᠣᠩᠬᠣᠷ ᠬᠠᠮᠠᠷ ᠲᠠᠢ᠂ ᠵᠢᠷᠲᠡᠭᠡᠷ ᠨᠢᠳᠦ ᠲᠡᠢ᠂ ᠠᠭᠤᠷ ᠲᠠᠢ᠃ ᠭᠠᠯᠳᠠᠨ ᠡᠴᠡ ᠥᠭᠡᠷᠡ ᠬᠡᠦᠬᠡᠳ ᠲᠡᠢ ᠲᠣᠭᠯᠠᠳᠠᠭ ᠦᠭᠡᠢ᠂ ᠵᠣᠵᠢᠭ ᠨᠢᠭᠡᠨ ᠪᠥᠯᠥᠭᠡ᠃ ᠳᠠᠨᠵᠢᠯᠠ ᠬᠠᠲᠤᠨ ᠡᠬᠡ ᠶᠦᠮ ᠠᠭᠠ ᠳ᠋ᠤ᠌᠂
— ᠮᠡᠳᠡᠬᠦ ᠦᠭᠡᠢ ᠭᠡᠬᠦ ᠡᠴᠡ ᠥᠭᠡᠷᠡ ᠦᠭᠡ ᠬᠡᠯᠡᠭᠰᠡᠨ ᠦᠭᠡᠢ᠃ ᠮᠡᠳᠡᠬᠦ ᠦᠭᠡᠢ ᠭᠡᠰᠡᠨ ᠦᠭᠡ ᠮᠢᠩᠭᠠᠨ ᠠᠰᠠᠭᠤᠯᠲᠠ ᠶ᠋ᠢᠨ ᠲᠠᠭᠯᠠᠭᠠ ᠪᠣᠯᠵᠠᠢ᠃ ᠠᠩᠴᠢ ᠨᠣᠬᠠᠢ ᠲᠠᠢ᠂ ᠠᠩᠴᠢ ᠪᠦᠷᠭᠦᠳ ᠲᠡᠢ ᠢᠷᠭᠡᠳ ᠠᠷᠠᠳ ᠢ ᠴᠤᠭᠯᠠᠭᠤᠯᠵᠤ ᠬᠠᠨ ᠬᠦᠦ ᠶ᠋ᠢᠨ ᠡᠷᠢᠯ ᠳ᠋ᠦ᠍ ᠭᠠᠷᠭᠠᠬᠤ ᠪᠠᠷ ᠬᠠᠲᠤᠨ ᠡᠬᠡ ᠰᠢᠢᠳᠴᠡᠢ᠃
ᠮᠢᠩᠭᠠ ᠮᠢᠩᠭᠠᠨ ᠡᠪᠦᠯᠵᠢᠶᠡ ᠬᠠᠪᠤᠷᠵᠢᠶᠠ ᠪᠦᠬᠦᠢ ᠠᠯᠲᠠᠢ ᠶ᠋ᠢᠨ ᠨᠢᠷᠤᠭᠤᠨ ᠤ᠋ ᠲᠦᠮᠡᠨ ᠠᠮᠠ᠂ ᠠᠰᠬᠠ᠂ ᠰᠠᠯᠠᠭᠠ ᠶ᠋ᠢ ᠨᠡᠩᠵᠢᠨᠡ ᠭᠡᠪᠡᠯ ᠣᠢᠷᠠᠳ ᠴᠡᠷᠢᠭ ᠦ᠋ᠨ ᠲᠣᠭᠠ ᠳᠤᠲᠠᠬᠤ ᠪᠠᠷ ᠪᠠᠢᠯᠠ᠃ ᠴᠣᠷᠣᠰ ᠠᠢᠮᠠᠭ ᠤ᠋ᠨ ᠬᠦᠷᠢᠶᠡ ᠬᠥᠯ ᠬᠥᠳᠡᠯᠭᠡᠭᠡᠨ ᠳ᠋ᠦ᠍ ᠣᠷᠣᠪᠠ᠃
ᠠᠷᠪᠠᠨ ᠭᠤᠷᠪᠠ
ᠴᠣᠷᠣᠰ ᠠᠢᠮᠠᠭ ᠤ᠋ᠨ ᠶᠡᠬᠡ ᠬᠦᠷᠢᠶᠡᠨ ᠡᠴᠡ ᠤᠷᠤᠭᠰᠢ ᠪᠠᠨ ᠪᠤᠷᠭᠠᠰᠤ ᠤᠯᠢᠶᠠᠰᠤ ᠬᠣᠯᠢᠯᠳᠤᠨ ᠤᠷᠭᠤᠵᠤ᠂ ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠦ᠌ ᠤᠰᠤᠨ ᠳ᠋ᠤ᠌ ᠢᠳᠡᠭᠳᠡᠭᠰᠡᠨ ᠥᠨᠳᠥᠷ ᠡᠷᠭᠢ᠂ ᠮᠥᠷᠭᠥᠴᠡᠭ ᠢ ᠳᠠᠯᠳᠠᠯᠠᠨ ᠰᠦᠭᠯᠡᠢᠵᠦ ᠨᠡᠪᠰᠡᠢᠨᠡ᠃ ᠶᠡᠬᠡ ᠬᠣᠷᠢᠶᠠᠨ ᠤ᠋ ᠵᠠᠬᠠ ᠪᠠᠷ ᠪᠢᠲᠡᠭᠦᠦ ᠬᠠᠷᠠ ᠮᠣᠳᠣ ᠲᠠᠢ ᠪᠢᠯᠡ᠃ ᠴᠣᠬᠣᠮ ᠳ᠋ᠠᠭᠠᠨ ᠤᠰᠤᠨ ᠳ᠋ᠤ᠌ ᠬᠠᠬᠠᠭᠰᠠᠨ ᠠᠭᠤᠯᠠ ᠶ᠋ᠢᠨ ᠭᠣᠣᠯ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠡᠪᠡᠰᠦᠨ ᠳᠠᠯᠠᠢ ᠳᠣᠯᠭᠢᠶᠠᠯᠠᠵᠤ ᠨᠠᠮᠤᠷ ᠨᠠᠮᠤᠷ ᠲᠤ᠌ ᠬᠠᠲᠠᠵᠤ ᠬᠠᠭᠳᠠᠷᠠᠭᠰᠠᠨ ᠡᠪᠡᠰᠦ᠂ ᠴᠡᠴᠡᠭ ᠦ᠋ᠨ ᠶᠡᠬᠡ ᠲᠣᠭᠣᠰᠣ ᠬᠥᠨᠳᠡᠢ ᠶ᠋ᠢ ᠳᠦᠭᠦᠷᠭᠡᠨᠡ᠃ ᠲᠡᠷᠡ ᠬᠦ᠌ ᠴᠠᠭᠠᠨ ᠲᠣᠭᠣᠰᠣ ᠲᠠᠲᠠᠬᠤ ᠴᠠᠭ ᠢ᠋ᠶ᠋ᠠᠷ ᠵᠡᠭᠡᠷᠡ ᠭᠥᠷᠥᠭᠡᠰᠦ ᠮᠠᠯ ᠠᠬᠤᠢ ᠲᠠᠷᠭᠤ ᠲᠠᠪᠠᠷᠠᠭ ᠠᠪᠴᠤ᠂ ᠠᠶᠠᠨᠴᠢᠨ ᠵᠢᠩᠴᠢᠨ ᠲᠥᠪᠡᠳ᠂ ᠣᠷᠣᠰ᠂ ᠯᠠᠯᠤ ᠶ᠋ᠢᠨ ᠣᠷᠣᠨ ᠤᠯᠤᠰ ᠲᠠᠢᠰᠢ ᠬᠦᠪᠦᠷᠡᠵᠦ ᠬᠠᠭᠠᠨ ᠡᠴᠢᠭᠡ ᠠᠪᠠ ᠬᠣᠮᠣᠷᠭᠠᠨ ᠳ᠋ᠤ᠌ ᠮᠣᠷᠳᠠᠳᠠᠭ ᠪᠢᠯᠡ᠃
ᠢᠷᠪᠢᠰ ᠴᠠᠰᠤ ᠮᠥᠰᠥᠨ ᠳ᠋ᠡᠭᠡᠨ ᠮᠣᠷᠢᠯᠠᠵᠤ ᠣᠳᠤᠭᠰᠠᠨ ᠬᠣᠢᠨᠠ ᠬᠡᠩᠬᠦᠳᠡᠭ ᠳᠡᠭᠡᠭᠦᠷ ᠢ᠋ᠶ᠋ᠡᠨ ᠬᠠᠷᠠ ᠣᠯᠣᠮ ᠲᠠᠢ᠂ ᠵᠡᠭᠦᠨ ᠤᠷᠢᠳᠤ ᠬᠥᠯ ᠨᠢ ᠭᠢᠰᠬᠢᠭᠡ ᠳᠣᠭᠣᠯᠠᠩ ᠴᠠᠭᠠᠨ ᠢᠷᠪᠢᠰ ᠦ᠋ᠨ ᠰᠤᠷᠠᠭ ᠭᠠᠷᠳᠠᠭ ᠪᠠᠢᠭᠰᠠᠨ ᠰᠠᠨ᠃ ᠪᠣᠳᠣᠪᠠᠯ ᠡᠴᠢᠭᠡ ᠬᠠᠭᠠᠨ ᠤ᠋ ᠬᠠᠳᠬᠤᠭᠰᠠᠨ ᠬᠥᠯ ᠨᠢ ᠳᠣᠭᠣᠯᠠᠩ᠂ ᠳᠡᠮᠪᠡᠷᠢᠯ ᠵᠠᠩᠵᠤᠨ ᠤ᠋ ᠵᠦᠰᠦᠭᠰᠡᠨ ᠬᠡᠩᠬᠦᠳᠡᠭ ᠨᠢ ᠬᠠᠷᠠ ᠣᠯᠣᠮ ᠲᠠᠢ ᠪᠣᠯᠤᠭᠰᠠᠨ ᠬᠡᠷᠡᠭ ᠪᠢᠵᠡ᠃ ᠭᠠᠯᠳᠠᠨ ᠬᠥᠪᠡᠭᠦᠨ ᠪᠢ ᠴᠠᠭᠠᠨ ᠢᠷᠪᠢᠰ ᠲᠡᠢ ᠴᠣᠭ ᠠᠯᠠᠭᠠ ᠪᠣᠯᠵᠤ᠂ ᠲᠡᠭᠦᠨ ᠢ ᠴᠠᠰᠤᠲᠤ ᠠᠭᠤᠯᠠᠨ ᠳ᠋ᠤ᠌ ᠶᠠᠪᠤᠬᠤ ᠶ᠋ᠢ ᠬᠣᠨᠢᠴᠢᠨ ᠬᠠᠷᠠᠭᠰᠠᠨ ᠪᠠᠢᠪᠠ᠃ ᠰᠥᠨᠢ ᠠᠰᠠᠭᠠᠭᠰᠠᠨ ᠲᠦᠮᠡᠨ ᠲᠦᠳᠡᠭ ᠭᠠᠯ ᠤ᠋ᠨ ᠭᠡᠷᠡᠯ ᠳ᠋ᠦ᠍ ᠭᠠᠯᠳᠠᠨ ᠪᠢ ᠭᠡᠨᠡᠳᠲᠡ ᠦᠵᠡᠭᠳᠡᠵᠡᠢ᠃
ᠲᠡᠷᠡ ᠵᠢᠯ ᠦ᠋ᠨ ᠵᠤᠨ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶ᠋ᠢᠨ ᠦᠷᠭᠦᠭᠡᠨ ᠳ᠋ᠦ᠍ ᠲᠦᠷᠺᠧᠨ᠋ᠰᠲᠠᠨ ᠤ᠋ ᠰᠤᠯᠲᠠᠨ ᠤ᠋ ᠡᠯᠴᠢ ᠲᠥᠯᠥᠭᠡᠯᠡᠭᠴᠢ ᠪᠠᠷᠠ ᠪᠣᠯᠣᠭᠰᠠᠳ ᠤ᠋ᠨ ᠬᠠᠮᠲᠤ ᠬᠦᠷᠴᠦ ᠢᠷᠡᠪᠡ᠃ ᠲᠡᠳᠡ ᠳᠥᠷᠪᠡᠨ ᠲᠣᠮᠣ ᠳᠤᠭᠤᠢ ᠪᠦᠬᠦᠢ ᠮᠣᠳᠣᠨ ᠲᠡᠷᠭᠡᠨ ᠳᠡᠭᠡᠷᠡ ᠲᠡᠮᠦᠷ ᠰᠡᠷᠡᠯᠵᠢ ᠳᠣᠲᠣᠷᠠ ᠰᠢᠷᠠ ᠴᠣᠬᠣᠷ ᠪᠠᠷᠰ ᠠᠴᠢᠵᠤ ᠢᠷᠡᠪᠡ᠃ ᠬᠣᠶᠠᠷ ᠪᠠᠷᠰ ᠲᠣᠯᠣᠭᠠᠢ ᠳ᠋ᠠᠭᠠᠨ ᠮᠥᠩᠭᠥᠨ ᠲᠣᠨᠣᠭ ᠲᠠᠢ ᠰᠦᠯᠵᠢᠮᠡᠯ ᠨᠣᠭᠲᠣ ᠲᠠᠢ ᠶᠤᠮ᠃ ᠬᠠᠷᠠ ᠰᠠᠬᠠᠯ ᠲᠠᠢ᠂ ᠥᠩᠭᠡᠲᠦ ᠨᠢᠳᠦ ᠲᠡᠢ ᠲᠦᠷᠺ ᠬᠥᠮᠦᠰ ᠪᠠᠷᠰ ᠢ ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠦ᠌ ᠤᠰᠤ ᠪᠠᠷ ᠤᠬᠢᠶᠠᠬᠤ ᠳ᠋ᠤ᠌ ᠲᠡᠳᠡᠨ ᠦ᠌ ᠵᠢᠪᠬᠤᠭᠠᠯᠢᠭ ᠪᠡᠶᠡ ᠭᠠᠢᠬᠠᠯᠲᠠᠢ ᠥᠩᠭᠡᠵᠢᠨ ᠭᠢᠯᠠᠯᠵᠠᠪᠠ᠃
ᠪᠠᠷᠰ ᠬᠦᠴᠦᠷᠬᠡᠭ ᠥᠷᠭᠡᠨ ᠴᠡᠭᠡᠵᠢ ᠲᠡᠢ᠂ ᠬᠢᠯᠢᠩ ᠪᠠᠳᠠᠷᠠᠭᠰᠠᠨ ᠰᠢᠷᠠ ᠤᠶᠠᠭᠠᠲᠤ ᠨᠢᠳᠦ ᠲᠡᠢ᠂ ᠳᠥᠷᠪᠡᠨ ᠬᠥᠯ ᠨᠢ ᠰᠢᠯᠤᠭᠤᠨ᠂ ᠤᠷᠲᠤ ᠴᠣᠬᠣᠷ ᠰᠡᠭᠦᠯ ᠲᠡᠢ ᠪᠠᠢᠪᠠ᠃
ᠪᠠᠷᠰ ᠢ ᠲᠦᠷᠺ ᠦ᠋ᠨ ᠰᠤᠯᠲᠠᠨ ᠤ᠋ ᠬᠠᠲᠤᠳ ᠬᠥᠲᠥᠯᠵᠦ ᠭᠠᠢᠬᠠᠭᠤᠯᠬᠤ ᠡᠴᠡ ᠭᠠᠳᠠᠨᠠ ᠥᠪᠡᠷᠲᠡᠭᠡᠨ ᠳᠠᠰᠬᠠᠵᠤ ᠡᠯᠳᠡᠪ ᠬᠠᠯᠳᠠᠯᠭᠠ ᠳ᠋ᠤ᠌ ᠥᠷᠲᠥᠬᠦ ᠡᠴᠡ ᠪᠡᠶᠡ ᠪᠡᠨ ᠬᠠᠮᠠᠭᠠᠯᠠᠳᠠᠭ ᠪᠠᠢᠵᠠᠢ᠃ ᠪᠠᠷᠰ ᠢ ᠭᠡᠷ ᠲᠦ᠍ ᠢᠳᠡᠭᠡᠰᠢᠭᠦᠯᠬᠦ ᠪᠡᠷ ᠠᠪᠴᠢᠷᠠᠵᠠᠢ᠃
ᠡᠴᠢᠭᠡ ᠬᠠᠭᠠᠨ ᠴᠠᠭᠠᠨ ᠢᠷᠪᠢᠰ ᠢ᠋ ᠭᠡᠷ ᠬᠦᠷᠢᠶᠡᠨ ᠳ᠋ᠦ᠍ ᠳᠠᠰᠬᠠᠵᠤ ᠴᠢᠳᠠᠭᠠ ᠦᠭᠡᠢ ᠲᠤᠯᠠ ᠡᠨᠡ ᠬᠦ᠌ ᠬᠣᠶᠠᠷ ᠪᠠᠷᠰ ᠢ᠋ ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ ᠬᠡᠷᠡᠭ᠃ ᠪᠠᠷᠰ ᠴᠢᠨᠠᠵᠤ ᠪᠣᠯᠭᠣᠭᠠᠭᠰᠠᠨ ᠮᠢᠬᠠ ᠢᠳᠡᠨᠡ᠃ ᠬᠣᠶᠠᠷ ᠪᠠᠷᠰ ᠪᠠᠭᠠ ᠬᠠᠲᠤᠨ ᠠᠮᠢᠨᠳᠠᠷᠠ ᠶ᠋ᠢᠨ ᠦᠷᠭᠦᠭᠡᠨ ᠳ᠋ᠦ᠍ ᠥᠨᠵᠢᠵᠦ᠂ ᠰᠥᠨᠢ ᠶ᠋ᠢᠨ ᠴᠠᠭ ᠲᠤ᠌ ᠲᠤᠰᠬᠠᠢ ᠭᠡᠷ ᠲᠦ᠍ ᠬᠣᠨᠣᠳᠠᠭ ᠢᠳᠡᠷ ᠵᠠᠯᠠᠭᠤ ᠶᠡᠬᠡᠮᠰᠦᠭ ᠠᠮᠢᠲᠠᠳ ᠠᠵᠢ᠃
ᠡᠴᠢᠭᠡ ᠬᠠᠭᠠᠨ ᠳ᠋ᠤ᠌ ᠠᠮᠢᠨᠳᠠᠷᠠ ᠬᠡᠮᠡᠬᠦ ᠴᠠᠭᠠᠨ ᠰᠣᠷᠮᠤᠤᠰᠤᠲᠤ ᠬᠠᠲᠤᠨ ᠨᠢ ᠠᠮᠢᠨ ᠤ᠋ ᠦᠨᠡ ᠲᠡᠢ ᠪᠠᠢᠭᠰᠠᠨ ᠢ᠋ ᠬᠣᠵᠢᠮ ᠮᠡᠳᠡᠭᠰᠡᠨ ᠶᠤᠮ᠃ ᠠᠮᠢᠨᠳᠠᠷᠠ ᠶ᠋ᠢ ᠢᠷᠡᠭᠰᠡᠨ ᠡᠴᠡ ᠬᠣᠢᠰᠢ ᠴᠣᠷᠣᠰ ᠣᠪᠣᠭ ᠤ᠋ᠨ ᠬᠣᠲᠠ ᠬᠦᠷᠢᠶᠡᠨ ᠳ᠋ᠦ᠍ ᠰᠠᠨᠠᠭᠠᠨ ᠳ᠋ᠤ᠌ ᠪᠠᠭᠲᠠᠮᠠ ᠦᠭᠡᠢ ᠶᠠᠪᠤᠳᠠᠯ ᠵᠢᠯ ᠳᠠᠷᠠᠭᠠᠯᠠᠨ ᠪᠣᠯᠤᠭᠰᠠᠨ ᠢ᠋ ᠭᠠᠯᠳᠠᠨ ᠲᠥᠪᠡᠳ ᠲᠦ᠍ ᠣᠴᠢᠭᠰᠠᠨ ᠬᠣᠢᠨᠠ ᠪᠠᠨ ᠮᠠᠭᠤ ᠢᠷᠣᠠ ᠭᠡᠮᠡᠨ ᠭᠤᠨᠢᠭᠯᠠᠨ ᠪᠣᠳᠣᠵᠤ ᠪᠢᠯᠡ᠃ ᠡᠨᠡ ᠪᠦᠬᠦ ᠶᠠᠪᠤᠳᠠᠯ ᠲᠡᠭᠦᠨ ᠢ᠋ ᠵᠢᠷᠭᠤᠭᠠᠨ ᠨᠠᠰᠤ ᠲᠠᠢ ᠵᠢᠯ ᠳ᠋ᠦ᠍ ᠪᠣᠯᠤᠭᠰᠠᠨ ᠶᠤᠮ᠃
ᠭᠠᠯᠳᠠᠨ ᠬᠣᠷᠢᠨ ᠵᠢᠯ ᠦ᠋ᠨ ᠳᠠᠷᠠᠭᠠ ᠲᠡᠮᠳᠡᠭᠯᠡᠯ ᠬᠥᠲᠥᠯᠵᠡᠢ᠃1671 ᠣᠨ ᠳ᠋ᠤ᠌ ᠪᠤᠶᠤ ᠴᠠᠭᠠᠭᠴᠢᠨ ᠭᠠᠬᠠᠢ ᠵᠢᠯ ᠣᠢᠷᠠᠳ ᠤ᠋ᠨ ᠬᠠᠭᠠᠨ ᠪᠣᠯᠵᠤ᠂ ᠳᠤᠷᠠᠯᠠᠯ ᠤ᠋ᠨ ᠪᠠᠯ ᠠᠮᠰᠠᠭᠰᠠᠨ ᠪᠢᠯᠡ᠃ ᠬᠠᠷᠢᠨ ᠲᠡᠷᠡ ᠡᠴᠢᠭᠡ ᠬᠣᠩ ᠲᠠᠢᠵᠢ ᠰᠢᠭ᠋ ᠢ᠋ᠶ᠋ᠡᠨ ᠳᠤᠷᠠᠯᠠᠮᠠᠬᠠᠢ ᠨᠢᠭᠡᠨ ᠪᠠᠢᠭᠠ ᠦᠭᠡᠢ ᠶᠤᠮ᠃ ᠪᠠᠰᠠ ᠤᠢᠳᠤᠮᠠᠬᠠᠢ ᠵᠠᠩ ᠦᠭᠡᠢ ᠪᠠᠢᠯᠠ᠂᠂᠂᠂
ᠲᠡᠭᠡᠬᠦ ᠳ᠋ᠦ᠍ ᠭᠠᠯᠳᠠᠨ ᠬᠣᠶᠠᠷ ᠬᠤᠪᠢᠯᠵᠤ᠂ ᠨᠢᠭᠡ ᠨᠢ ᠥᠭᠭᠢᠶᠡᠮᠦᠷ ᠭᠠᠯᠳᠠᠨ ᠯᠠᠮᠠ᠂ ᠨᠥᠭᠦᠭᠡ ᠨᠢ ᠳᠣᠭᠰᠢᠨ ᠭᠠᠯᠳᠠᠨ ᠬᠠᠭᠠᠨ ᠪᠣᠯᠵᠠᠢ᠃
ᠠᠷᠪᠠᠨ ᠳᠥᠷᠪᠡ
ᠽᠠᠮᠪᠥᠭᠠᠷᠪᠥ ᠶ᠋ᠢᠨ ᠴᠠᠰᠤᠲᠤ ᠣᠷᠭᠢᠯ ᠤ᠋ᠨ ᠴᠢᠩᠬᠠ ᠳᠡᠭᠡᠷᠡ ᠨᠢᠭᠡᠨ ᠪᠦᠳᠡᠭᠢ ᠣᠳᠣ ᠠᠰᠠᠪᠠ᠃ ᠲᠡᠷᠡ ᠬᠦ᠌ ᠪᠦᠭᠡᠭᠡᠨ ᠣᠳᠣᠨ ᠤ᠋ ᠲᠤᠶᠠᠭᠠ ᠡᠷᠬᠡᠰ ᠲᠩᠷᠢ ᠶ᠋ᠢᠨ ᠶᠠᠮᠠᠷᠬᠠᠨ ᠣᠷᠣᠨ ᠵᠠᠢ ᠶ᠋ᠢ ᠭᠡᠢᠭᠦᠯᠦᠨᠡ ᠪᠣᠢ᠃ ᠪᠦᠭᠡᠭᠡᠨ ᠣᠳᠣᠨ ᠤ᠋ ᠬᠥᠬᠡ ᠲᠤᠶᠠᠭᠠ ᠶ᠋ᠢ ᠳᠠᠭᠠᠭᠠᠳ ᠭᠠᠵᠠᠷ ᠳᠡᠯᠡᠬᠡᠢ ᠨᠢᠯ ᠳ᠋ᠡᠭᠡᠨ ᠬᠥᠬᠡ ᠥᠩᠭᠡ ᠪᠡᠷ ᠬᠤᠴᠢᠭᠳᠠᠵᠤ᠂ ᠬᠤᠷᠴᠠ ᠢᠷᠮᠡᠭ ᠲᠡᠢ ᠠᠭᠤᠯᠠᠰ ᠤ᠋ᠨ ᠬᠢᠷᠠ ᠳᠡᠭᠡᠭᠦᠷ ᠴᠠᠢᠪᠤᠷ ᠵᠢᠷᠤᠭᠠᠰᠤ ᠲᠠᠲᠠᠵᠠᠢ᠃ ᠬᠥᠬᠡ ᠠᠭᠤᠯᠠᠰ ᠤ᠋ᠨ ᠪᠠᠯ ᠬᠣᠷᠮᠣᠢ᠂ ᠭᠣᠣ ᠵᠢᠯᠠᠭᠠ᠂ ᠲᠦᠷᠭᠡᠨ ᠤᠷᠤᠰᠬᠠᠯᠲᠤ ᠭᠣᠣᠯ ᠭᠣᠷᠣᠬᠠ᠂ ᠬᠣᠲᠠᠴᠢ ᠨᠣᠬᠠᠳ᠂ ᠬᠣᠨᠢᠨ ᠰᠦᠷᠦᠭ ᠠᠮᠤᠷ ᠲᠠᠢᠪᠤᠩ ᠨᠡᠯᠦᠢᠵᠦ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶ᠋ᠢᠨ ᠮᠣᠷᠢᠲᠤ ᠴᠡᠷᠢᠭ ᠦ᠋ᠳ ᠨᠤᠮᠤᠷᠠᠨ ᠵᠢᠭᠰᠠᠵᠠᠢ᠃ ᠴᠣᠬᠣᠮ ᠳ᠋ᠠᠭᠠᠨ ᠡᠳᠦᠷ ᠰᠥᠨᠢ ᠶ᠋ᠢᠨ ᠠᠯᠢ ᠨᠢ ᠪᠣᠯᠬᠤ ᠶ᠋ᠢ ᠳᠠᠭᠠᠬᠤ ᠳ᠋ᠤ᠌ ᠪᠡᠷᠬᠡ ᠲᠡᠢ ᠴᠦ᠍ ᠴᠡᠷᠢᠭ ᠦ᠋ᠳ ᠦ᠋ᠨ ᠨᠢᠳᠦᠨ ᠳ᠋ᠦ᠍ ᠬᠢᠯᠢᠩ ᠪᠠᠳᠠᠷᠠᠭᠰᠠᠨ ᠪᠠᠢᠯᠠ᠃
ᠵᠢᠭᠰᠠᠭᠠᠯ ᠤ᠋ᠨ ᠨᠥᠭᠦᠭᠡ ᠲᠠᠯᠠ ᠳ᠋ᠤ᠌ ᠳᠡᠰ ᠬᠠᠷᠠ ᠨᠥᠮᠥᠷᠭᠡ ᠲᠡᠢ ᠪᠠᠭᠠᠲᠤᠷ ᠡᠷᠡ ᠭᠠᠷᠴᠤ ᠢᠷᠡᠯᠡ᠃ ᠠᠰᠬᠠ ᠴᠢᠯᠠᠭᠤ ᠱᠠᠵᠢᠭᠢᠨᠠᠭᠤᠯᠤᠨ ᠲᠡᠭᠦᠨ ᠦ᠌ ᠠᠳᠠᠯᠢ ᠳᠡᠰ ᠬᠠᠷᠠ ᠬᠤᠪᠴᠠᠰᠤ ᠲᠠᠢ ᠮᠣᠷᠢᠲᠤ ᠴᠡᠷᠢᠭ ᠦ᠋ᠳ ᠬᠥᠨᠳᠡᠢ ᠳᠦᠭᠦᠷᠭᠡᠪᠡ᠃ ᠡᠨᠡ ᠪᠣᠯ ᠬᠠᠰᠠᠭ ᠤ᠋ᠨ ᠶᠠᠩᠭᠢᠷ ᠰᠤᠯᠲᠠᠨ ᠤ᠋ ᠪᠠᠢᠯᠳᠤᠵᠤ ᠬᠠᠷᠪᠤᠬᠤ ᠳ᠋ᠠᠭᠠᠨ ᠭᠠᠷᠭᠠᠭᠤᠳ ᠵᠡᠷᠯᠢᠭ ᠮᠢᠩᠭᠠᠲᠤ ᠠᠵᠢ᠃ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠠᠭᠤᠷ ᠬᠢᠯᠢᠩ ᠳ᠋ᠡᠭᠡᠨ ᠠᠪᠲᠠᠭᠳᠠᠭᠰᠠᠨ ᠴᠡᠷᠢᠭ ᠡᠷᠡᠰ ᠤᠳᠠᠬᠤ ᠦᠭᠡᠢ ᠪᠣᠯᠬᠤ ᠬᠡᠴᠡᠭᠦᠦ ᠲᠤᠯᠤᠯᠳᠤᠭᠠᠨ ᠢ᠋ ᠬᠦᠯᠢᠶᠡᠵᠦ ᠪᠡᠶᠡ ᠪᠡᠶᠡ ᠤᠷᠤᠭᠤ ᠪᠠᠨ ᠠᠰᠠᠭᠰᠠᠨ ᠭᠠᠯ ᠮᠡᠲᠦ ᠬᠠᠷᠠᠴᠠ ᠴᠢᠯᠠᠭᠤᠳᠠᠨᠠ᠃ ᠴᠡᠷᠢᠭ ᠦ᠋ᠳ ᠦ᠋ᠨ ᠬᠠᠷᠠᠴᠠ ᠨᠢᠭᠡᠨ ᠢ᠋ᠶ᠋ᠡᠨ ᠰᠢᠲᠠᠭᠠᠨᠠ᠃ ᠮᠣᠷᠢᠳ ᠤ᠋ᠨ ᠲᠤᠭᠤᠷᠠᠢ ᠳᠣᠣᠷᠠᠬᠢ ᠬᠠᠢᠷᠭᠤ ᠴᠢᠯᠠᠭᠤᠨ ᠤ᠋ ᠵᠠᠪᠰᠠᠷ ᠬᠣᠭᠣᠷᠣᠨᠳᠣᠭᠤᠷ ᠥᠨᠳᠥᠷ ᠡᠪᠡᠰᠦ ᠤᠷᠭᠤᠵᠠᠢ᠃ ᠡᠪᠡᠰᠦ ᠨᠢ ᠥᠨᠳᠥᠷ ᠪᠣᠯᠪᠠᠴᠤ ᠰᠠᠢᠷ ᠤ᠋ᠨ ᠴᠢᠯᠠᠭᠤ ᠬᠠᠷᠠᠯᠠᠵᠤ ᠬᠠᠷᠠᠭᠳᠠᠨᠠ᠃
ᠳᠡᠰ ᠬᠠᠷᠠ ᠨᠥᠮᠥᠷᠭᠡᠲᠦ ᠶᠠᠩᠭᠢᠷ ᠰᠤᠯᠲᠠᠨ ᠪᠣᠯ ᠬᠠᠰᠠᠭ ᠤ᠋ᠨ ᠴᠤᠤᠲᠠᠢ ᠳᠡᠭᠡᠷᠡᠮᠴᠢᠨ ᠲᠡᠳᠦᠢ ᠦᠭᠡᠢ ᠪᠠᠭᠠ ᠳ᠋ᠠᠭᠠᠨ ᠴᠢᠨᠣᠠ ᠶ᠋ᠢᠨ ᠡᠭᠦᠷ ᠲᠦ᠍ ᠥᠰᠦᠭᠰᠡᠨ ᠬᠡᠮᠡᠬᠦ ᠴᠤᠤᠷᠬᠠᠯ ᠤ᠋ᠨ ᠡᠵᠡᠨ ᠪᠥᠯᠥᠭᠡ᠃ ᠴᠢᠨᠣᠠ ᠶ᠋ᠢᠨ ᠬᠥᠬᠥ ᠳᠠᠯᠠᠩ ᠬᠥᠬᠥᠵᠦ᠂ ᠲᠦᠭᠦᠬᠡᠢ ᠮᠢᠬᠠ ᠢᠳᠡᠵᠦ᠂ ᠴᠢᠨᠣᠠ ᠶ᠋ᠢᠨ ᠰᠦᠷᠦᠭ ᠦ᠋ᠨ ᠳᠤᠮᠳᠠ ᠳᠡᠭᠳᠡᠨ ᠳᠡᠭᠦᠯᠢᠵᠦ ᠶᠠᠪᠤᠭᠰᠠᠨ ᠭᠡᠮᠡᠨ ᠵᠡᠭᠦᠨᠭᠠᠷ ᠳᠠᠶᠠᠭᠠᠷ ᠲᠡᠭᠦᠨ ᠡᠴᠡ ᠠᠶᠤᠮᠰᠠᠨ ᠥᠭᠦᠯᠡᠳᠡᠭ ᠪᠠᠢᠪᠠ᠃ ᠶᠠᠩᠭᠢᠷ ᠰᠤᠯᠲᠠᠨ ᠬᠠᠷᠠ ᠮᠣᠷᠢ ᠲᠠᠢ ᠪᠥᠯᠥᠭᠡ᠃ ᠲᠡᠭᠦᠨ ᠦ᠌ ᠡᠷᠡᠦ ᠳ᠋ᠦ᠍ ᠤᠯᠠᠭᠠᠨ ᠰᠠᠬᠠᠯ ᠪᠠᠪᠠᠢᠲᠠᠯᠠ ᠤᠷᠭᠤᠵᠤ ᠲᠣᠭᠰᠢᠨ ᠨᠣᠭᠣᠭᠠᠨ ᠨᠢᠳᠦ ᠶ᠋ᠢ ᠨᠢ ᠴᠢᠮᠡᠭᠯᠡᠨᠡ᠃ ᠶᠠᠩᠭᠢᠷ ᠰᠤᠯᠲᠠᠨ ᠪᠣᠯᠤᠨ ᠲᠡᠭᠦᠨ ᠦ᠌ ᠮᠣᠷᠢᠲᠤ ᠵᠡᠷᠯᠢᠭ ᠦ᠋ᠳ ᠢᠷ ᠢᠷᠮᠡᠭ ᠨᠢ ᠰᠡᠳᠡ ᠦᠰᠦᠷᠦᠭᠰᠡᠨ ᠲᠡᠮᠦᠷ ᠰᠡᠯᠡᠮᠡ ᠲᠡᠢ᠂ ᠬᠦᠨᠳᠦ ᠬᠠᠷᠠ ᠲᠡᠮᠦᠷ ᠪᠠᠮᠪᠠᠢ ᠲᠠᠢ ᠠᠵᠤᠭᠤ᠃
ᠬᠥᠬᠡ ᠬᠥᠨᠳᠡᠢ ᠪᠡᠷ ᠴᠡᠷᠢᠭ ᠦ᠋ᠳ ᠳᠦᠭᠦᠷᠪᠡ᠃ ᠴᠡᠷᠢᠭ ᠦ᠋ᠳ ᠡᠮᠬᠢ ᠵᠢᠷᠤᠮ ᠲᠠᠢ ᠠᠵᠢ᠃ ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠪᠦᠷᠦᠩᠬᠦᠢ ᠳ᠋ᠦ᠍ ᠭᠢᠯᠠᠯᠵᠠᠭᠰᠠᠨ ᠵᠡᠰ ᠰᠡᠯᠡᠮᠡ᠂ ᠵᠡᠰ ᠳᠤᠭᠤᠯᠠᠭᠠ ᠲᠠᠢ ᠤᠴᠢᠷ ᠴᠠᠭᠠᠨᠠ ᠪᠠᠨ ᠨᠠᠨᠳᠢᠨ ᠪᠥᠭᠡᠳ ᠲᠣᠷᠭᠠᠨ ᠴᠡᠷᠢᠭ ᠦ᠋ᠨ ᠰᠢᠨᠵᠢ ᠪᠦᠷᠢᠳᠴᠡᠢ᠃ ᠤᠭ ᠡᠴᠡ ᠵᠡᠭᠦᠨᠭᠠᠷ ᠤ᠋ᠨ ᠨᠤᠲᠤᠭ ᠤᠰᠤ ᠶ᠋ᠢ ᠡᠵᠡᠯᠡᠬᠦ ᠰᠠᠨᠠᠭᠠᠷᠬᠠᠯ ᠡᠪᠦᠷᠲᠦᠯᠡᠵᠦ᠂ ᠮᠠᠯ ᠤ᠋ᠨ ᠪᠡᠯᠴᠢᠭᠡᠷ ᠡᠳ᠋ ᠪᠠᠶᠠᠯᠢᠭ ᠲᠤᠨᠢ ᠰᠢᠨᠤᠨ ᠳᠤᠷᠠᠯᠠᠵᠤ᠂ ᠦᠶᠡ ᠦᠶᠡ ᠬᠢᠯᠢ ᠶ᠋ᠢᠨ ᠳᠡᠭᠡᠰᠦ ᠠᠯᠬᠤᠵᠤ ᠤᠪᠠᠢ ᠦᠭᠡᠢ ᠳᠡᠭᠡᠷᠡᠮ ᠲᠣᠨᠣᠭᠠ ᠬᠢᠳᠡᠭ ᠬᠠᠰᠠᠭ ᠤ᠋ᠨ ᠵᠡᠷᠯᠢᠭ ᠦ᠋ᠳ ᠲᠦ᠍ ᠱᠠᠩ ᠢ᠋ ᠨᠢ ᠬᠦᠷᠲᠡᠭᠡᠬᠦ ᠴᠠᠭ ᠪᠣᠯᠤᠭᠰᠠᠨ ᠭᠡᠵᠦ ᠬᠣᠩ ᠲᠠᠢᠵᠢ ᠪᠣᠳᠣᠨᠠ᠃
ᠬᠣᠩ ᠲᠠᠢᠵᠢ ᠶ᠋ᠢᠨ ᠮᠣᠷᠢᠲᠤ ᠴᠡᠷᠢᠭ ᠦ᠋ᠨ ᠭᠤᠷᠪᠠᠨ ᠳᠠᠪᠬᠤᠷ ᠵᠢᠭᠰᠠᠭᠠᠯ ᠤ᠋ᠨ ᠴᠠᠭᠠᠨᠠ ᠥᠴᠢᠨᠡᠭᠡᠨ ᠮᠠᠯ ᠠᠳᠤᠭᠤᠰᠤ ᠪᠠᠢᠬᠤ ᠪᠥᠭᠡᠳ ᠵᠢᠤᠵᠠ ᠲᠡᠷᠭᠡᠨ ᠳ᠋ᠦ᠍ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠤ᠋ ᠪᠠᠭᠠ ᠬᠠᠲᠤᠨ ᠠᠮᠢᠨᠳᠠᠷᠠ ᠵᠠᠯᠠᠷᠠᠵᠤ ᠰᠠᠭᠤᠨᠠ᠃ ᠬᠠᠰᠠᠭ ᠤ᠋ᠨ ᠶᠠᠩᠭᠢᠷ ᠰᠤᠯᠲᠠᠨ ᠤ᠋ ᠠᠭᠠᠭ ᠣᠮᠣᠭ ᠢ᠋ ᠳᠠᠷᠤᠵᠤ᠂ ᠬᠣᠩᠰᠢᠶᠠᠷ ᠢ᠋ ᠲᠠᠰᠤ ᠴᠣᠬᠢᠬᠤ ᠰᠤᠷᠠᠭ ᠢ᠋ᠶ᠋ᠠᠷ ᠲᠡᠷᠡ ᠬᠦ᠌ ᠡᠷᠬᠡ ᠲᠠᠩᠬᠢ ᠠᠮᠢᠨᠳᠠᠷᠠ ᠬᠠᠲᠤᠨ ᠬᠣᠩ ᠲᠠᠢᠵᠢ ᠡᠴᠡ ᠲᠡᠢᠨ ᠳ᠋ᠦ᠍ ᠠᠪᠴᠤ ᠶᠠᠪᠤᠬᠤ ᠶ᠋ᠢ ᠭᠤᠶᠤᠭᠰᠠᠨ ᠪᠢᠯᠡ᠃ ᠠᠮᠢᠨᠳᠠᠷᠠ ᠬᠠᠲᠤᠨ ᠤ᠋ ᠵᠢᠤᠵᠠ ᠲᠡᠷᠭᠡ ᠶ᠋ᠢ ᠵᠢᠭᠰᠠᠭᠠᠯ ᠤ᠋ᠨ ᠲᠡᠷᠢᠭᠦᠨ ᠦᠵᠦᠭᠦᠷ ᠲᠦ᠍ ᠵᠣᠭᠰᠣᠭᠠᠪᠠ᠃ ᠠᠮᠢᠨᠳᠡᠷᠠ ᠪᠣᠯ ᠭᠦᠦᠰᠢ ᠬᠠᠨ ᠤ᠋ ᠥᠬᠢᠨ ᠪᠥᠭᠡᠳ ᠦᠯᠢᠭᠡᠷ ᠦ᠋ᠨ ᠭᠦᠩᠵᠦ ᠮᠡᠲᠦ ᠨᠢᠭᠤᠴᠠᠯᠢᠭ ᠪᠦᠰᠡᠭᠦᠢ᠃
ᠠᠩᠬᠠ ᠠᠮᠢᠨᠳᠠᠷᠠ ᠶ᠋ᠢ ᠡᠴᠢᠭᠡ ᠬᠣᠩ ᠲᠠᠢᠵᠢ ᠬᠠᠷᠠᠩᠭᠤᠲᠠ ᠰᠣᠴᠢᠵᠤ᠂ ᠨᠢᠳᠦᠨ ᠳ᠋ᠡᠭᠡᠨ ᠢᠲᠡᠭᠡᠵᠦ ᠶᠠᠳᠠᠨ ᠭᠠᠢᠬᠠᠵᠠᠢ᠂ ᠲᠤᠩ ᠴᠠᠭᠠᠨ ᠴᠢᠷᠠᠢ ᠲᠠᠢ ᠪᠦᠰᠡᠭᠦᠢ ᠶ᠋ᠢᠨ ᠨᠢᠳᠦᠨ ᠦ᠌ ᠴᠡᠴᠡᠭᠡᠢ ᠨᠢ ᠰᠢᠷᠠᠪᠲᠤᠷ ᠲᠤᠩᠭᠠᠯᠠᠭ᠂ ᠰᠣᠷᠮᠤᠤᠰᠤ ᠨᠢ ᠴᠠᠭᠠᠨ ᠲᠤᠯᠠ ᠭᠡᠷᠡᠯ ᠰᠢᠩᠭᠡᠵᠦ ᠴᠠᠭᠠᠨ ᠨᠢᠳᠦ ᠲᠡᠢ ᠬᠠᠷᠠᠭᠳᠠᠵᠠᠢ᠃ ᠡᠢᠮᠦ ᠬᠠᠷᠠᠴᠠ᠂ ᠰᠣᠷᠮᠤᠤᠰᠤ ᠵᠥᠪᠬᠡᠨ ᠦᠯᠢᠭᠡᠷ ᠲᠦ᠍ ᠭᠠᠷᠳᠠᠭ ᠪᠣᠯᠬᠤ ᠡᠴᠡ ᠬᠥᠮᠦᠨ ᠦ᠌ ᠵᠠᠶᠠᠭᠠᠨ ᠳ᠋ᠤ᠌ ᠪᠠᠢᠬᠤ ᠶᠠᠭᠤᠮᠠ ᠭᠡᠵᠦ ᠵᠡᠭᠦᠨᠭᠠᠷ ᠬᠠᠭᠠᠨ ᠲᠥᠰᠦᠭᠡᠯᠡᠭᠡ ᠦᠭᠡᠢ᠃
— ᠴᠢ ᠬᠡᠨ ᠪᠣᠢ ᠭᠡᠮᠡᠨ ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠠᠰᠠᠭᠤᠬᠤ ᠳ᠋ᠤ᠌᠂ ᠪᠦᠰᠡᠭᠦᠢ ᠮᠣᠷᠢᠨ ᠬᠥᠲᠥᠴᠢ᠂ ᠪᠠᠷᠠ ᠪᠣᠯᠤᠭᠴᠢ ᠴᠡᠷᠢᠭ ᠦ᠋ᠳ ᠢ᠋ᠶ᠋ᠡᠨ ᠵᠠᠩᠳᠤᠷᠵᠤ᠂
—ᠶᠠᠭᠤᠨ ᠳ᠋ᠤ᠌ ᠵᠣᠭᠰᠣᠨᠠᠮ᠂ ᠶᠠᠪᠤᠭᠠᠴᠢ ᠭᠡᠯᠡ᠃
— ᠨᠠᠳᠠᠳᠤ ᠬᠠᠷᠢᠭᠤ ᠡᠰᠡ ᠬᠡᠯᠡᠪᠡᠯ ᠴᠢ ᠡᠭᠦᠷᠢᠳᠡ ᠮᠢᠨᠦᠬᠢ ᠪᠣᠯᠤᠨᠠ ᠭᠡᠵᠦ ᠬᠣᠩ ᠲᠠᠢᠵᠢ ᠥᠭᠦᠯᠡᠪᠡᠯ ᠪᠦᠰᠡᠭᠦᠢ ᠤᠴᠠᠭᠠᠷᠯᠠᠨ᠂ ᠴᠢᠮᠠ ᠰᠢᠭ ᠬᠥᠭᠰᠢᠨ ᠦ᠌ ᠦᠭᠡ ᠶ᠋ᠢ ᠪᠢ ᠦᠯᠦ ᠲᠣᠭᠣᠨᠠ᠃ ᠵᠠᠮ ᠡᠴᠡ ᠬᠣᠯᠠᠳᠠ᠁ ᠭᠡᠪᠡ᠃ ᠬᠣᠩ ᠲᠠᠢᠵᠢ ᠵᠢᠪᠡᠭᠦᠦ ᠬᠦᠷᠴᠦ᠂
— ᠳᠠᠭᠠᠭᠤᠯᠢ ᠨᠤᠭᠤᠳ ᠢ᠋ ᠨᠢ ᠪᠡᠷᠢ ᠭᠡᠵᠦ ᠭᠦᠵᠢᠷᠮᠡᠭ ᠳᠠᠢᠴᠢᠳ ᠲᠠᠭᠠᠨ ᠲᠤᠰᠢᠶᠠᠯ ᠪᠠᠭᠤᠯᠭᠠᠪᠠ᠃
ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠤ᠋ ᠪᠠᠭᠠᠲᠤᠷ ᠡᠷᠡᠰ ᠳᠠᠭᠠᠭᠤᠯᠢ ᠴᠡᠷᠢᠭ ᠦ᠋ᠳ ᠢ᠋ ᠮᠣᠷᠢᠨ ᠡᠴᠡ ᠪᠠᠭᠤᠯᠭᠠᠵᠤ᠂ ᠵᠢᠤᠵᠠ ᠲᠡᠷᠭᠡᠨ ᠦ᠌ ᠬᠥᠲᠥᠴᠢ ᠶ᠋ᠢ ᠦᠰᠦᠷᠲᠡᠯᠡ ᠠᠯᠠᠭᠠᠳᠠᠪᠠ᠃ ᠶᠠᠪᠠᠭᠠᠷᠠᠭᠰᠠᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠰᠡᠯᠡᠮᠡ ᠵᠢᠳᠠ ᠶ᠋ᠢ ᠬᠣᠷᠢᠶᠠᠨ ᠠᠪᠤᠪᠠ᠃ ᠬᠣᠷᠣᠮᠬᠠᠨ ᠵᠠᠭᠤᠷᠠ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠳ᠋ᠤ᠌ ᠭᠠᠢᠬᠠᠭᠰᠠᠨ ᠪᠦᠰᠡᠭᠦᠢ ᠮᠥᠨᠥᠬᠢ ᠰᠢᠷᠠ ᠲᠤᠩᠭᠠᠯᠠᠭ ᠨᠢᠳᠦ ᠪᠡᠨ ᠪᠦᠯᠲᠡᠢᠯᠭᠡᠨ᠂ ᠴᠠᠭᠠᠨ ᠰᠣᠷᠮᠤᠤᠰᠤ ᠪᠠᠨ ᠴᠠᠪᠴᠢᠯᠠᠨ ᠰᠠᠨᠳᠤᠷᠴᠤ᠂
— ᠪᠢ ᠭᠦᠦᠰᠢ ᠬᠠᠭᠠᠨ ᠤ᠋ ᠥᠬᠢᠨ ᠠᠮᠢᠨᠳᠠᠷᠠ ᠪᠠᠢᠨᠠ ᠭᠡᠵᠦ ᠬᠣᠭᠣᠯᠠᠢ ᠪᠠᠨ ᠴᠠᠬᠢᠷᠳᠠᠭᠤᠯᠤᠨ ᠬᠡᠯᠡᠪᠡ᠃
ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠡᠷᠳᠡᠨᠢᠪᠠᠭᠠᠲᠤᠷ ᠤ᠋ᠨ ᠵᠢᠷᠲᠡᠭᠡᠷ ᠵᠤᠤᠪᠠᠩ ᠨᠢᠳᠦᠨ ᠦ᠌ ᠬᠠᠷᠠᠴᠠ ᠵᠤᠭᠠ ᠲᠠᠢ ᠭᠢᠯᠠᠯᠵᠠᠨ ᠪᠠᠢᠵᠤ᠂
— ᠭᠦᠩᠵᠦ ᠠᠮᠢᠨᠳᠠᠷᠠ ᠭᠡᠵᠦ ᠴᠢ ᠤᠤ? ᠰᠢᠪᠠᠭᠤᠬᠠᠢ ᠮᠢᠨᠢ ᠲᠣᠣᠷ ᠲᠤ᠌ ᠣᠷᠣᠯᠠ ᠳᠠ᠃ ᠵᠡᠭᠦᠨᠭᠠᠷ ᠤ᠋ᠨ ᠡᠵᠡᠨ ᠦ᠌ ᠠᠯᠲᠠᠨ ᠲᠣᠣᠷ ᠲᠤ᠌ ᠰᠢᠦ᠃ ᠴᠢᠨᠦ ᠡᠴᠢᠭᠡ ᠶ᠋ᠢ ᠪᠢ ᠮᠡᠳᠡᠨᠡ᠃ ᠨᠠᠮᠠᠶ᠋ᠢ ᠨᠠᠢᠲᠠᠭᠠᠬᠤ ᠳ᠋ᠤ᠌ ᠰᠣᠴᠢᠳᠠᠭ ᠬᠥᠮᠦᠨ ᠰᠠᠨ᠃ ᠣᠳᠣ ᠲᠡᠷᠡ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠢᠵᠡ᠃ ᠬᠡᠷᠪᠡ ᠨᠠᠳᠠ ᠡᠴᠡ ᠥᠬᠢᠨ ᠢ᠋ᠶ᠋ᠡᠨ ᠬᠠᠷᠠᠮᠯᠠᠬᠤ ᠠᠪᠠᠰᠤ ᠵᠡᠭᠦᠨᠭᠠᠷ ᠤ᠋ᠨ ᠴᠡᠷᠢᠭ ᠦ᠋ᠳ ᠲᠦ᠍ ᠪᠢᠴᠠ ᠳᠡᠪᠰᠡᠭᠦᠯᠬᠦ ᠪᠣᠯᠤᠨᠠ ᠭᠡᠮᠡᠨ ᠡᠭᠳᠡᠭᠦᠦ ᠲᠡᠢ ᠥᠭᠦᠯᠡᠪᠡ᠃
ᠠᠮᠢᠨᠳᠠᠷᠠ ᠭᠦᠩᠵᠦ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠨᠢᠯᠪᠤᠰᠤ ᠳᠦᠭᠦᠷᠴᠦ ᠴᠠᠭᠠᠨ ᠮᠣᠯᠴᠣᠭ ᠲᠣᠭᠲᠠᠪᠠ᠃ ᠭᠦᠩᠵᠦ ᠶ᠋ᠢᠨ ᠴᠢᠷᠠᠢ ᠴᠣᠩᠬᠢᠢᠵᠠᠢ᠃ ᠠᠷᠠᠴᠢᠭᠠ ᠪᠠᠨ ᠠᠯᠳᠠᠵᠤ ᠵᠡᠪᠰᠡᠭ ᠢ᠋ᠶ᠋ᠡᠨ ᠬᠤᠷᠢᠶᠠᠯᠭᠠᠭᠰᠠᠨ ᠴᠥᠭᠡᠨ ᠳᠠᠭᠠᠭᠤᠯᠢ ᠨᠤᠭᠤᠳ ᠢ᠋ᠶ᠋ᠠᠨ ᠭᠦᠩᠵᠦ ᠴᠡᠬᠡᠯᠵᠡᠨ ᠬᠠᠷᠠᠨᠠ᠃ ᠲᠡᠭᠦᠨ ᠦ᠌ ᠡᠮᠦᠨᠡ ᠠᠭᠰᠤᠮ ᠶᠠᠭᠠᠨ ᠮᠣᠷᠢ ᠲᠠᠢ᠂ ᠡᠩᠭᠡᠷ ᠲᠡᠭᠡᠨ ᠳᠡᠪᠢᠵᠦ ᠪᠣᠢ ᠪᠦᠷᠭᠦᠳ ᠦ᠋ᠨ ᠳᠦᠷᠢ ᠪᠦᠬᠦᠢ ᠳᠤᠭᠤᠢ ᠵᠡᠰ ᠳᠣᠪᠣᠢᠯᠭᠠᠵᠤ᠂ ᠲᠠᠰᠢᠭᠤ ᠡᠩᠭᠡᠷ ᠲᠡᠢ ᠭᠣᠶᠣᠮᠰᠣᠭ ᠳᠡᠪᠡᠯ ᠡᠮᠦᠰᠴᠦ᠂ ᠰᠡᠯᠡᠮᠡ ᠠᠭᠰᠠᠭᠰᠠᠨ ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠲᠠᠰᠢᠶᠠ ᠲᠤᠯᠤᠨ ᠬᠥᠨᠳᠡᠯᠢᠳᠦᠨᠡ᠃ ᠬᠣᠩ ᠲᠠᠢᠵᠢ ᠬᠡᠦᠬᠡᠨ ᠢ᠋ ᠮᠠᠰᠢᠳᠠ ᠱᠣᠬᠣᠭᠣᠷᠬᠠᠨᠠ᠃ ᠬᠣᠩ ᠲᠠᠢᠵᠢ ᠶ᠋ᠢᠨ ᠨᠢᠳᠦᠨ ᠦ᠌ ᠬᠠᠷᠠᠴᠠ ᠤᠢᠳᠬᠠᠷ ᠲᠠᠢ ᠠᠵᠢ᠃ ᠭᠡᠬᠦ ᠳ᠋ᠡᠭᠡᠨ ᠠᠮᠢᠨᠳᠠᠷᠠ ᠪᠦᠰᠡᠭᠦᠢ ᠶ᠋ᠢ ᠠᠯᠢ ᠬᠡᠳᠦᠢᠨᠡᠢ ᠬᠠᠷᠠᠴᠠ ᠪᠠᠷ ᠢ᠋ᠶ᠋ᠠᠨ ᠲᠣᠨᠣᠵᠤ ᠠᠮᠵᠢᠭᠰᠠᠨ ᠲᠤᠯᠠ ᠪᠦᠰᠡᠭᠦᠢ ᠲᠤᠩ ᠶᠡᠬᠡ ᠡᠮᠵᠡᠭᠯᠡᠨᠡ᠃ ᠪᠦᠰᠡᠭᠦᠢ ᠬᠦᠯᠢᠶᠡᠰᠦ ᠲᠡᠢ ᠮᠡᠲᠦ ᠪᠣᠯᠵᠠᠢ᠃ ᠪᠦᠰᠡᠭᠦᠢ ᠦᠭᠡ ᠬᠡᠯᠡᠶᠡ ᠭᠡᠲᠡᠯᠡ ᠬᠡᠯᠡ ᠨᠢ ᠴᠠᠴᠠᠭᠰᠠᠨ ᠪᠠᠢᠯᠠ᠃ ᠵᠥᠷᠢᠵᠦ ᠲᠣᠭᠲᠠᠭᠰᠠᠨ ᠠᠭᠤᠯᠠᠰ ᠤ᠋ᠨ ᠴᠢᠯᠠᠭᠤ ᠨᠤᠷᠠᠵᠤ ᠵᠠᠮ ᠲᠠᠭᠯᠠᠭᠰᠠᠨ ᠲᠤᠯᠠ ᠵᠠᠮ ᠳᠠᠭᠠᠤ ᠬᠣᠩ ᠲᠠᠢᠵᠢ ᠲᠠᠢ ᠲᠠᠭᠠᠷᠠᠨᠠ ᠭᠡᠵᠦ ᠬᠡᠨ ᠪᠣᠳᠣᠬᠤ ᠪᠢᠯᠡ᠃
— ᠨᠠᠮᠠᠶ᠋ᠢ ᠲᠠᠨᠢᠬᠤ ᠤᠤ ᠭᠡᠮᠡᠨ ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠠᠰᠠᠭᠤᠪᠠ᠃
— ᠲᠠ ᠬᠠᠭᠠᠨ ᠬᠥᠮᠦᠨ ᠪᠠᠢᠲᠠᠯᠠ ᠪᠠᠨ ᠶᠡᠬᠡ ᠵᠠᠮ ᠤ᠋ᠨ ᠳᠡᠭᠡᠷᠡᠮᠴᠢᠨ ᠮᠡᠲᠦ ᠵᠠᠩᠨᠠᠬᠤ ᠶᠠᠭᠤᠨ᠃ ᠨᠠᠮᠠᠶ᠋ᠢ ᠲᠠᠯᠪᠢᠵᠤ ᠶᠠᠪᠤᠭᠤᠯᠪᠠᠯ ᠲᠠᠨ ᠤ᠋ ᠨᠡᠷᠡ ᠠᠯᠳᠠᠷ ᠲᠤ᠌ ᠲᠤᠰᠠᠲᠠᠢ ᠪᠤᠰᠤ ᠤᠤ ᠭᠡᠵᠦ ᠠᠮᠢᠨᠳᠠᠷᠠ ᠬᠣᠭᠣᠯᠠᠢ ᠪᠠᠨ ᠴᠡᠴᠡᠷᠭᠡᠨᠡᠭᠦᠯᠦᠨ ᠥᠴᠢᠪᠡ᠃
ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠠᠭᠵᠠᠢᠲᠠᠯᠠ ᠬᠥᠬᠥᠷᠡᠵᠦ᠂
— ᠨᠠᠳᠠᠳᠤ ᠰᠤᠷᠭᠠᠳᠠᠭ ᠴᠢ ᠬᠡᠨ ᠪᠣᠢ? ᠵᠢᠤᠵᠠ ᠲᠡᠷᠭᠡ ᠶ᠋ᠢ ᠮᠣᠷᠢᠨ ᠡᠴᠡ ᠰᠠᠯᠭᠠᠵᠤ ᠠᠳᠤᠭᠤᠨ ᠤ᠋ ᠬᠥᠯᠥᠰᠥ ᠶ᠋ᠢ ᠬᠠᠲᠠᠭᠠ ᠭᠡᠬᠦ ᠳ᠋ᠦ᠍ ᠴᠡᠷᠢᠭ ᠦ᠋ᠳ ᠲᠦᠳᠡᠭᠡᠨᠡ ᠶᠣᠰᠣᠭᠠᠷ ᠪᠣᠯᠭᠠᠬᠤ ᠳ᠋ᠤ᠌ ᠵᠢᠤᠵᠠ ᠳ᠋ᠤ᠌ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠬᠣᠴᠣᠷᠤᠭᠰᠠᠨ ᠠᠮᠢᠨᠳᠠᠷᠠ ᠪᠦᠯᠲᠡᠭᠡᠨᠡᠨᠡ᠃
ᠠᠮᠢᠨᠳᠠᠷᠠ ᠨᠢᠭᠡᠨᠲᠡ ᠬᠠᠭᠠᠨ ᠤ᠋ ᠭᠠᠷ ᠲᠤ᠌ ᠣᠷᠣᠭᠰᠠᠨ ᠪᠣᠯᠬᠣᠷ ᠠᠭᠤᠷᠯᠠᠵᠤ ᠤᠴᠠᠭᠠᠷᠯᠠᠬᠤ ᠪᠠᠨ ᠪᠣᠯᠢᠪᠠ᠃ ᠠᠮᠢᠨᠳᠠᠷᠠ ᠴᠠᠰᠤ ᠮᠡᠲᠦ ᠴᠠᠭᠠᠨ ᠬᠤᠪᠴᠠᠰᠤ ᠲᠠᠢ ᠪᠠᠢᠪᠠ᠃
ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠳᠥᠷᠥᠭᠡ ᠮᠣᠯᠳᠤᠯᠠᠬᠣ ᠳ᠋ᠤ᠌ ᠮᠣᠷᠢᠨ ᠬᠥᠲᠥᠴᠢ ᠴᠤᠯᠪᠤᠭᠤᠷ ᠢ᠋ ᠲᠣᠰᠴᠤ ᠠᠪᠤᠯᠠ᠃ ᠬᠠᠭᠠᠨ ᠵᠢᠤᠵᠠ ᠲᠡᠷᠭᠡᠨ ᠦ᠌ ᠭᠣᠶᠣᠮᠰᠣᠭ ᠬᠥᠨᠳᠡᠯᠡᠨ ᠮᠣᠳᠣᠨ ᠡᠴᠡ ᠠᠳᠬᠤᠵᠤ᠂
— ᠨᠠᠮᠠᠶ᠋ᠢ ᠡᠨᠳᠡ ᠦᠯᠡᠳᠡᠭᠡ ᠭᠡᠵᠦ ᠲᠤᠰᠢᠶᠠᠪᠠ᠃
ᠬᠠᠭᠠᠨ ᠤ᠋ ᠦᠭᠡ ᠶ᠋ᠢ ᠰᠣᠨᠣᠰᠤᠭᠰᠠᠨ ᠡᠷᠡᠴᠦᠳ ᠣᠳᠴᠤ ᠭᠦᠨ ᠬᠠᠪᠴᠢᠯ ᠳᠤᠮᠳᠠ ᠵᠢᠤᠵᠠ ᠲᠡᠷᠭᠡ ᠲᠣᠷᠣᠢᠵᠤ ᠬᠣᠴᠣᠷᠪᠠ᠃ ᠠᠮᠢᠨᠳᠠᠷᠠ ᠶ᠋ᠢᠨ ᠴᠠᠭᠠᠨ ᠰᠣᠷᠮᠤᠤᠰᠤᠲᠤ ᠨᠢᠳᠦᠨ ᠳ᠋ᠦ᠍ ᠲᠣᠨᠣᠭᠰᠠᠨ ᠨᠢᠯᠪᠤᠰᠤ ᠰᠥᠨᠢᠵᠢᠨ ᠤᠷᠤᠰᠴᠤ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠪᠦᠰᠡᠭᠦᠢ ᠶ᠋ᠢ ᠬᠦᠴᠦᠨᠳᠡᠵᠦ ᠦᠷ ᠴᠠᠢᠯᠭᠠᠵᠠᠢ᠃
ᠲᠡᠷᠡ ᠴᠠᠭ ᠡᠴᠡ ᠬᠣᠢᠰᠢ ᠬᠣᠩ ᠲᠠᠢᠵᠢ ᠶ᠋ᠢᠨ ᠬᠠᠮᠤᠭ ᠠᠩᠬᠠᠷᠤᠯ ᠬᠠᠯᠠᠮᠵᠢ ᠠᠮᠢᠨᠳᠠᠷᠠ ᠬᠠᠲᠤᠨ ᠳ᠋ᠤ᠌ ᠰᠢᠯᠵᠢᠭᠰᠡᠨ ᠶᠣᠮᠳᠠᠭ᠃ ᠠᠮᠢᠨᠳᠠᠷᠠ ᠬᠠᠲᠤᠨ ᠰᠡᠩᠭᠡ ᠠᠬᠠ᠂ ᠭᠠᠯᠳᠠᠨ ᠬᠣᠶᠠᠷ ᠢ᠋ ᠪᠠᠢᠩᠭᠤ ᠠᠵᠢᠭᠯᠠᠭᠠᠳ ᠪᠠᠢᠭᠠ ᠶ᠋ᠢ ᠮᠡᠳᠡᠭᠡᠳ ᠬᠠᠲᠤᠨ ᠡᠬᠡ ᠡᠴᠡ ᠠᠰᠠᠭᠤᠬᠤ ᠳ᠋ᠤ᠌᠂
— ᠲᠡᠭᠦᠨ ᠦ᠌ ᠨᠢᠳᠦᠨ ᠡᠴᠡ ᠬᠣᠯᠠ ᠪᠠᠢ ᠭᠡᠵᠦ ᠪᠢᠯᠡ᠃
ᠠᠷᠪᠠᠨ ᠲᠠᠪᠤ
ᠮᠠᠨ ᠤ᠋ ᠶᠡᠬᠡ ᠦᠷᠭᠦᠭᠡᠨ ᠦ᠌ ᠴᠢᠩᠬᠠ ᠡᠭᠦᠳᠡᠨ ᠳ᠋ᠦ᠍ ᠵᠣᠤᠪᠡ ᠲᠠᠢᠭᠠᠨ ᠠᠮᠢᠳᠤᠷᠠᠨᠠ᠃ ᠵᠣᠤᠪᠡ ᠲᠠᠢᠭᠠᠨ ᠬᠠᠲᠤᠨ ᠡᠬᠡ ᠶ᠋ᠢ ᠳᠡᠩᠳᠡᠵᠦ ᠮᠠᠨ ᠤ᠋ ᠳ᠋ᠤ᠌ ᠪᠠᠢᠯᠠ᠃ ᠡᠴᠢᠭᠡ ᠬᠣᠩ ᠲᠠᠢᠵᠢ ᠠᠷᠪᠠᠭᠠᠳ ᠲᠠᠢᠭᠠᠨ ᠲᠠᠢ ᠪᠢᠯᠡ᠃ ᠲᠠᠢᠭᠠᠨ ᠨᠤᠭᠤᠳ ᠠᠪᠤᠷᠢ ᠠᠷᠠᠨᠰᠢᠨ ᠬᠡᠷᠴᠡᠭᠡᠢ᠂ ᠪᠡᠶᠡ ᠥᠰᠬᠦᠯᠡᠩ᠂ ᠲᠡᠩᠬᠡᠭᠡ ᠲᠠᠮᠢᠷ ᠶᠡᠬᠡ᠂ ᠮᠣᠩᠬᠣᠷ ᠬᠠᠷᠠᠳᠠᠮᠠᠲᠠᠭᠠᠢ ᠵᠠᠩ ᠲᠠᠢ ᠪᠠᠢᠳᠠᠭ᠃ ᠴᠣᠷᠣᠰ ᠠᠢᠮᠠᠭ ᠤ᠋ᠨ ᠬᠣᠲᠠ ᠬᠦᠷᠢᠶᠡ ᠨᠢ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠤ᠋ ᠪᠠᠢᠷᠢᠰᠢᠨ ᠰᠠᠭᠤᠬᠤ ᠭᠠᠵᠠᠷ ᠲᠤᠯᠠ ᠥᠷᠭᠡᠵᠢᠨ ᠥᠷᠭᠡᠵᠢᠭᠰᠡᠭᠡᠷ ᠡᠳᠦᠭᠡ ᠶᠢᠰᠦᠨ ᠬᠦᠷᠢᠶᠡᠨ ᠡᠴᠡ ᠪᠦᠲᠦᠬᠦ ᠪᠥᠭᠡᠳ ᠠᠪᠤᠷᠠᠯ ᠤ᠋ᠨ ᠰᠦᠮᠡ ᠳᠤᠭᠠᠩ ᠢ᠋ ᠣᠢᠷᠠᠯᠴᠠᠭᠠ ᠪᠠᠢᠭᠤᠯᠤᠭᠰᠠᠨ ᠲᠤᠯᠠ ᠰᠠᠭᠤᠷᠢᠨ ᠭᠠᠵᠠᠷ ᠤ᠋ᠨ ᠲᠥᠷᠬᠦ ᠲᠥᠯᠥᠪ ᠢ᠋ ᠣᠯᠵᠠᠢ᠃
ᠶᠡᠬᠡ ᠬᠦᠷᠢᠶᠡ ᠶ᠋ᠢ ᠴᠣᠷᠣᠰ ᠠᠢᠮᠠᠭ ᠤ᠋ᠨ ᠬᠦᠷᠢᠶᠡ ᠭᠡᠨᠡ᠃ ᠳᠤᠮᠳᠠᠳᠤ ᠬᠦᠷᠢᠶᠡ ᠨᠢ ᠬᠣᠱᠤᠳ᠂ ᠲᠣᠷᠭᠤᠳ᠂ ᠳᠥᠷᠪᠡᠳ ᠠᠢᠮᠠᠭ ᠤ᠋ᠨ ᠬᠦᠷᠢᠶᠡ ᠪᠣᠯᠤᠨᠠ᠃ ᠪᠤᠰᠤᠳ ᠨᠢ ᠤᠢᠭᠤᠷ᠂ ᠤᠷᠢᠶᠠᠩᠬᠠᠢ᠂ ᠲᠦᠷᠺ᠂ ᠺᠢᠷᠭᠢᠽ᠂ ᠬᠣᠲᠣᠩ᠂ ᠨᠠᠩᠭᠢᠶᠠᠳ ᠢᠷᠭᠡᠳ᠂ ᠯᠠᠮᠠ ᠨᠠᠷ ᠬᠣᠯᠢᠯᠳᠤᠨ ᠰᠠᠭᠤᠳᠠᠭ ᠬᠣᠲᠠ ᠬᠦᠷᠢᠶᠡᠳ ᠪᠠᠢᠪᠠ᠃
ᠵᠣᠳᠪᠠ ᠲᠠᠢᠭᠠᠨ ᠡᠳᠦᠷ ᠲᠦ᠍ ᠦᠬᠦᠭᠰᠡᠨ ᠮᠡᠲᠦ ᠤᠨᠲᠠᠵᠤ᠂ ᠰᠥᠨᠢ ᠳ᠋ᠡᠭᠡᠨ ᠰᠢᠷᠠ ᠰᠢᠪᠠᠭᠤ ᠯᠤᠭᠠ ᠡᠷᠦᠬᠡ ᠭᠡᠷ ᠦ᠋ᠨ ᠡᠭᠦᠳᠡ ᠰᠠᠬᠢᠨᠠ᠃ ᠲᠠᠢᠭᠠᠨ ᠤ᠋ ᠴᠢᠷᠠᠢ ᠵᠢᠰᠦ ᠬᠥᠷᠯᠡᠬᠡᠷ᠂ ᠬᠥᠳᠡᠯᠭᠡᠭᠡᠨ ᠱᠠᠯᠠᠮᠠᠭᠠᠢ᠂ ᠢᠳᠡᠵᠦ ᠤᠤᠭᠤᠬᠤ ᠳ᠋ᠠᠭᠠᠨ ᠬᠣᠪᠳᠣᠭ ᠨᠢᠭᠡᠨ᠃
ᠵᠣᠳᠪᠠ ᠲᠠᠢᠭᠠᠨ ᠡᠴᠢᠭᠡ ᠬᠣᠩ ᠲᠠᠢᠵᠢ ᠶ᠋ᠢ ᠬᠠᠷᠠᠬᠤ ᠪᠠᠷ ᠢ᠋ᠶ᠋ᠠᠨ ᠰᠦ ᠳᠣᠯᠢᠶᠠᠭᠰᠠᠨ ᠭᠥᠯᠥᠭᠡ ᠮᠡᠲᠦ ᠪᠣᠯᠤᠨᠠ᠃ ᠡᠬᠡ ᠬᠠᠲᠤᠨ ᠤ᠋ ᠶᠠᠪᠤᠭᠰᠠᠨ ᠵᠦᠭ ᠲᠡᠢᠰᠢ ᠪᠠᠷᠠ ᠶ᠋ᠢᠨ ᠭᠠᠵᠠᠷ ᠡᠴᠡ ᠬᠠᠷᠠᠭᠠᠴᠢᠯᠠᠨ ᠮᠣᠳᠣ᠂ ᠪᠤᠲᠠ᠂ ᠰᠥᠭᠡᠭ ᠦ᠋ᠨ ᠠᠷᠤ ᠪᠠᠷ ᠨᠢᠭᠤᠭᠳᠠᠵᠤ ᠳᠠᠩᠳᠠᠨ ᠳᠠᠭᠠᠨᠠ᠃ ᠨᠢᠭᠡ ᠤᠳᠠᠭᠠ ᠳᠥᠷᠪᠡᠨ ᠬᠥᠯᠯᠡᠨ ᠤᠯᠢᠶᠠᠰᠤ ᠶ᠋ᠢᠨ ᠰᠤᠨᠠᠭᠠᠷ ᠦᠨᠳᠦᠰᠦ ᠳᠡᠮᠵᠢᠵᠦ ᠪᠠᠢᠬᠤ ᠳ᠋ᠤᠨᠢ ᠰᠡᠩᠭᠡ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠭᠤᠶᠠᠳᠠᠭᠰᠠᠨ ᠶᠤᠮ᠃
ᠵᠣᠣᠪᠠ ᠨᠢᠷᠤᠭᠤ ᠪᠠᠨ ᠬᠣᠲᠣᠢᠯᠭᠠᠨ ᠨᠣᠬᠠᠢ ᠮᠡᠲᠦ ᠭᠠᠩᠭᠢᠨᠠᠵᠤ᠂ ᠬᠥᠭᠡᠴᠦ ᠲᠡᠢ ᠰᠢᠷᠠ ᠰᠢᠲᠦ ᠪᠡᠨ ᠢᠷᠵᠠᠢᠯᠭᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠂
— ᠨᠣᠶᠠᠳ᠁ ᠭᠡᠪᠡ᠃ ᠭᠠᠯᠳᠠᠨ ᠳ᠋ᠤ᠌ ᠲᠡᠷᠡ ᠨᠣᠶᠠᠳ ᠭᠡᠰᠡᠨ ᠦᠭᠡ ᠨᠢ ᠨᠣᠬᠠᠳ ᠭᠡᠮᠡᠨ ᠰᠣᠨᠣᠰᠤᠭᠳᠠᠪᠠ᠃
ᠰᠡᠩᠭᠡ ᠳᠠᠬᠢᠭᠠᠳ ᠳᠠᠬᠢᠭᠠᠳ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠳᠠᠯᠠᠢᠬᠤ ᠳ᠋ᠤ᠌ ᠲᠡᠷᠡ ᠪᠡᠷ ᠲᠣᠯᠣᠭᠠᠢ ᠪᠠᠨ ᠳᠠᠷᠤᠵᠤ ᠠᠲᠤᠷᠢᠪᠠ᠃ ᠰᠡᠩᠭᠡ ᠠᠬᠠ ᠴᠠᠩᠭᠢᠨᠠᠭᠰᠠᠨ ᠳᠠᠭᠤ ᠪᠠᠷ᠂
— ᠵᠣᠣᠪᠠ ᠴᠢ ᠨᠣᠬᠠᠢ ᠮᠥᠨ ᠤᠤ ᠭᠡᠬᠦ ᠳ᠋ᠦ᠍᠂ ᠵᠣᠣᠪᠠ ᠲᠣᠯᠣᠭᠠᠢ ᠲᠣᠬᠢᠨᠠ᠃
ᠰᠡᠩᠭᠡ ᠠᠬᠠ᠂
— ᠵᠣᠣᠪᠠ ᠴᠢ ᠡᠵᠡᠭᠦᠢ ᠣᠢ ᠳ᠋ᠤ᠌ ᠶᠠᠭᠤ ᠪᠠᠨ ᠬᠢᠨᠡ ᠭᠡᠬᠦ ᠳ᠋ᠦ᠍ ᠵᠣᠣᠪᠠ ᠤᠷᠲᠤ ᠬᠢᠮᠤᠰᠤ ᠲᠠᠢ ᠮᠣᠢᠨᠣᠭ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠲᠦᠭᠦᠯ ᠲᠡᠢᠰᠢ ᠵᠢᠭᠠᠪᠠ᠃
ᠵᠠᠷᠢᠮ ᠮᠥᠴᠢᠷ ᠨᠢ ᠥᠭᠢᠷᠡᠰᠢᠵᠦ᠂ ᠵᠠᠷᠢᠮ ᠨᠢ ᠨᠢᠯᠬᠠᠷᠠᠵᠤ ᠰᠠᠭᠰᠠᠢᠭᠰᠠᠨ ᠪᠤᠷᠭᠠᠰᠤᠨ ᠲᠦᠭᠦᠯ ᠦ᠋ᠨ ᠵᠠᠬᠠ ᠳ᠋ᠤ᠌ ᠡᠮᠡᠭᠡᠯ ᠲᠡᠢ ᠮᠣᠷᠢᠳ ᠲᠦᠬᠦᠯᠵᠡᠬᠦ ᠪᠥᠯᠥᠭᠡ᠃
ᠨᠣᠭᠣᠭᠠᠨ ᠭᠥᠯᠢᠮ ᠲᠡᠢ᠂ ᠮᠥᠩᠭᠥᠨ ᠬᠢᠷᠠ ᠪᠦᠬᠦᠢ ᠬᠠᠪᠴᠢᠭ ᠪᠦᠭᠦᠷᠭᠡ ᠲᠡᠢ ᠡᠮᠡᠭᠡᠯ ᠲᠣᠬᠣᠭᠰᠠᠨ ᠬᠣᠯᠠ ᠮᠣᠷᠢ ᠬᠠᠲᠤᠨ ᠡᠬᠡ ᠶ᠋ᠢᠨ ᠤᠨᠤᠭᠠ᠂ ᠨᠥᠭᠦᠭᠡ ᠬᠥᠬᠡ ᠮᠣᠷᠢᠨ ᠤ᠋ ᠡᠮᠡᠭᠡᠯ ᠠᠭᠤᠵᠢᠮ ᠲᠡᠨᠢᠭᠦᠨ᠂ ᠭᠠᠨᠵᠤᠭᠠᠯᠠᠭᠠ ᠤᠷᠲᠤ ᠬᠣᠢᠲᠤ ᠪᠦᠭᠦᠷᠭᠡ ᠳᠠᠮᠨᠠᠭᠤᠯᠤᠨ ᠪᠣᠭᠴᠣ ᠲᠣᠬᠣᠭᠰᠠᠨ ᠵᠡᠷᠭᠡ ᠡᠴᠡ ᠬᠠᠷᠠᠬᠤ ᠳ᠋ᠤ᠌ ᠡᠷᠡ ᠬᠥᠮᠦᠨ ᠦ᠌ ᠤᠨᠤᠭᠠ ᠪᠣᠯᠤᠯᠲᠠᠢ᠃
ᠰᠡᠩᠭᠡ ᠠᠬᠠ ᠵᠣᠣᠪᠠ ᠶ᠋ᠢ ᠪᠤᠴᠠ ᠭᠡᠵᠦ ᠬᠡᠯᠡᠪᠡ᠃ ᠵᠣᠣᠪᠠ ᠶ᠋ᠢᠨ ᠬᠡᠪᠲᠡᠷᠢ ᠪᠣᠯᠬᠤ ᠬᠣᠯᠲᠣᠰᠣ ᠨᠢ ᠬᠣᠪᠬᠣᠷᠠᠵᠤ ᠮᠥᠰᠥ ᠮᠡᠲᠦ ᠭᠢᠯᠲᠠᠢᠭᠰᠠᠨ ᠤᠯᠢᠶᠠᠰᠤ ᠶ᠋ᠢᠨ ᠦᠨᠳᠦᠰᠦ ᠳᠡᠭᠡᠷᠡ ᠰᠡᠩᠭᠡ ᠭᠠᠯᠳᠠᠨ ᠲᠠᠢ ᠵᠡᠷᠭᠡᠴᠡᠨ ᠰᠠᠭᠤᠵᠤ ᠲᠠᠭᠠᠭᠳᠠᠰᠢ ᠦᠭᠡᠢ ᠣᠨᠢᠰᠣᠭᠠ ᠮᠡᠲᠦ ᠲᠡᠷᠡ ᠵᠦᠭ ᠤᠷᠤᠭᠤ ᠰᠢᠷᠳᠡᠨᠡ᠃ ᠵᠣᠣᠪᠠ ᠲᠦᠳᠡᠭᠡᠨᠡ ᠰᠤᠷᠠᠭ ᠦᠭᠡᠢ ᠠᠯᠠᠭᠠ ᠪᠣᠯᠵᠠᠢ᠃ ᠵᠣᠣᠪᠠ ᠠᠭᠤᠷ ᠲᠠᠢ ᠳᠣᠭᠰᠢᠨ ᠲᠤᠯᠠ ᠬᠠᠷᠠᠴᠤᠤᠯ ᠲᠡᠭᠦᠨ ᠡᠴᠡ ᠢᠯᠡᠳᠲᠡ ᠪᠣᠯᠭᠣᠮᠵᠢᠯᠠᠨᠠ᠃ ᠵᠣᠣᠪᠠ ᠬᠠᠷᠠ ᠮᠣᠳᠣᠨ ᠣᠢ ᠶ᠋ᠢᠨ ᠭᠦᠨ ᠳ᠋ᠦ᠍ ᠣᠷᠣᠵᠤ ᠬᠤᠷᠳᠤᠯᠠᠨ ᠭᠦᠶᠦᠭᠰᠡᠭᠡᠷ ᠮᠥᠨᠥᠬᠢ ᠪᠤᠷᠭᠠᠰᠤᠨ ᠲᠦᠭᠦᠯ ᠳ᠋ᠦ᠍ ᠰᠢᠷᠭᠤᠵᠤ ᠠᠮᠵᠢᠪᠠ᠃ ᠲᠡᠷᠡ ᠲᠠᠢᠭᠠᠨ ᠬᠠᠲᠤᠨ ᠡᠬᠡ ᠶ᠋ᠢ ᠬᠠᠷᠠᠳᠠᠬᠤ ᠨᠢ ᠠᠶᠤᠮᠰᠢᠭ ᠲᠠᠢ᠃ ᠲᠠᠢᠭᠠᠨ ᠤ᠋ ᠭᠤᠲᠤᠯ ᠤ᠋ᠨ ᠲᠦᠷᠡᠢ ᠳ᠋ᠦ᠍ ᠯᠠᠮᠠ ᠳᠠᠷᠬᠠᠴᠤᠤᠯ ᠤ᠋ᠨ ᠤᠷᠠᠯᠠᠭᠰᠠᠨ ᠰᠢᠪᠦᠭᠡᠨ ᠦᠵᠦᠭᠦᠷ ᠲᠡᠢ ᠴᠢᠴᠢᠭᠦᠷ ᠬᠢᠲᠤᠭᠠ ᠶᠠᠪᠤᠨᠠ᠃ ᠲᠠᠢᠭᠠᠨ ᠡᠷᠡ ᠭᠤᠲᠤᠯ ᠤ᠋ᠨ ᠢ᠋ᠶ᠋ᠠᠨ ᠥᠰᠥᠭᠡᠢ ᠶ᠋ᠢ ᠠᠯᠠᠭᠠᠳᠠᠬᠤ ᠮᠡᠲᠦ ᠪᠣᠯᠬᠤ ᠳ᠋ᠤ᠌ ᠴᠢᠴᠢᠭᠦᠷ ᠬᠢᠲᠤᠭᠠ ᠲᠡᠭᠦᠨ ᠦ᠌ ᠭᠠᠷ ᠲᠤ᠌ ᠭᠢᠯᠠᠯᠵᠠᠨ ᠬᠠᠷᠠᠭᠳᠠᠨᠠ᠃ ᠬᠢᠲᠤᠭᠠ ᠰᠢᠳᠡᠬᠦ ᠳ᠋ᠡᠭᠡᠨ ᠲᠠᠢᠭᠠᠨ ᠳᠡᠩᠳᠡᠭᠦᠦ ᠭᠠᠷᠮᠠᠭᠠᠢ᠂ ᠴᠡᠷᠢᠭ ᠦ᠋ᠨ ᠬᠦᠨᠡᠰᠦ ᠪᠡᠯᠡᠳᠬᠡᠬᠦ ᠦᠶᠡ ᠪᠡᠷ ᠤᠯᠠᠢᠷᠠᠭᠰᠠᠨ ᠦᠬᠡᠷ ᠦ᠋ᠨ ᠳᠤᠬᠤᠨ ᠳ᠋ᠤ᠌ ᠴᠢᠴᠢᠭᠦᠷ ᠬᠢᠲᠤᠭᠠ ᠵᠣᠭᠣᠭᠠᠵᠤ᠂ ᠦᠬᠡᠷ ᠭᠠᠵᠠᠷ ᠮᠥᠷᠭᠥᠨ ᠤᠨᠠᠬᠤ ᠳ᠋ᠤ᠌ ᠲᠠᠢᠭᠠᠨ ᠬᠢᠲᠤᠭᠠ ᠪᠠᠨ ᠳᠤᠬᠤᠨ ᠠ᠋ᠴᠠ ᠨᠢ ᠰᠤᠭᠤ ᠲᠠᠲᠠᠭᠠᠳ ᠲᠦᠳᠡᠭᠡᠨᠡ ᠦᠬᠡᠷ ᠦ᠋ᠨ ᠰᠡᠪᠡᠰᠦ ᠲᠡᠢ ᠲᠣᠯᠣᠭᠠᠢ ᠶ᠋ᠢ ᠪᠠᠷᠢᠭᠠᠳ ᠵᠣᠭᠰᠣᠵᠤ ᠪᠠᠢᠵᠠᠢ᠃
ᠦᠬᠡᠷ ᠦ᠋ᠨ ᠦᠬᠦᠵᠦ ᠪᠥᠬᠥᠭᠡ ᠦᠭᠡᠢ ᠨᠢᠳᠦ ᠠᠮᠠᠨ ᠬᠦᠵᠦᠭᠦᠦ ᠪᠡᠷ ᠲᠠᠰᠤᠳᠠᠭᠤᠯᠤᠭᠰᠠᠨ ᠲᠣᠯᠣᠭᠠᠢ ᠳ᠋ᠠᠭᠠᠨ ᠡᠷᠭᠢᠯᠳᠦᠨᠡ᠃ ᠵᠣᠣᠪᠠ ᠴᠢᠴᠢᠭᠦᠷ ᠬᠢᠲᠤᠭᠠ ᠪᠠᠨ ᠤᠬᠤᠷᠬᠠᠢ ᠳ᠋ᠤᠨᠢ ᠡᠷᠭᠢᠭᠦᠯᠦᠨ ᠦᠬᠡᠷ ᠦ᠋ᠨ ᠨᠢᠳᠦ ᠶ᠋ᠢ ᠠᠪᠴᠤ ᠰᠢᠲᠠᠪᠠ᠃ ᠵᠣᠣᠪᠠ ᠶ᠋ᠢᠨ ᠪᠠᠬᠠ ᠬᠠᠨᠤᠵᠤ ᠪᠠᠢᠯᠠ᠃ ᠵᠣᠣᠪᠠ ᠪᠣᠯ ᠮᠠᠯ ᠠᠳᠤᠭᠤᠰᠤ ᠪᠠᠢᠲᠤᠭᠠᠢ ᠬᠥᠮᠦᠨ ᠠᠯᠠᠬᠤ ᠳ᠋ᠠᠭᠠᠨ ᠴᠤ᠌ ᠭᠠᠷ ᠰᠢᠷᠦᠭᠦᠨ᠃ ᠵᠣᠣᠪᠠ ᠬᠡᠮᠡᠬᠦ ᠵᠡᠷᠯᠢᠭ ᠲᠠᠢᠭᠠᠨ ᠢ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠣᠯᠵᠠᠯᠠᠵᠤ ᠢᠷᠡᠭᠡᠳ ᠵᠠᠰᠠᠭᠠ ᠶ᠋ᠢ ᠨᠢ ᠥᠪᠡᠷ ᠦ᠋ᠨ ᠭᠠᠷ ᠢ᠋ᠶ᠋ᠠᠷ ᠰᠢᠯᠭᠠᠵᠤ ᠦᠵᠡᠵᠡᠢ᠃ ᠬᠣᠷᠴᠢᠢᠲᠠᠯᠠ ᠬᠠᠲᠠᠭᠰᠠᠨ ᠲᠥᠮᠥᠰᠥ ᠶ᠋ᠢᠨ ᠤᠭᠤᠲᠠ ᠶ᠋ᠢ ᠠᠳᠬᠤᠭᠠᠳ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠭᠤᠶᠠ ᠪᠠᠨ ᠠᠯᠠᠭᠠᠳᠠᠵᠤ᠂
—ᠲᠠᠢᠭᠠᠨ ᠮᠥᠨ ᠪᠠᠢᠨᠠ᠂ ᠶᠠᠭ ᠮᠥᠨ ᠪᠠᠢᠨᠠ ᠭᠡᠵᠡᠢ᠃
ᠵᠤᠤᠪᠠ ᠲᠠᠢᠭᠠᠨ ᠤ᠋ ᠡᠴᠢᠭᠡ ᠬᠣᠷᠭᠣᠯ ᠵᠠᠢᠷᠠᠩ ᠃ ᠬᠣᠷᠭᠣᠯ ᠵᠠᠢᠷᠠᠩ ᠪᠤᠯᠠᠭᠠᠨ ᠭᠣᠣᠯ ᠤ᠋ᠨ ᠬᠠᠰᠠᠭ ᠤ᠋ᠳ ᠲᠠᠢ ᠨᠡᠢᠯᠡᠵᠦ ᠶᠠᠩᠭᠢᠷ ᠰᠤᠯᠲᠠᠨ ᠢ᠋ ᠳᠡᠮᠵᠢᠭᠰᠡᠨ ᠲᠤᠯᠠ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠴᠡᠷᠢᠭᠯᠡᠨ ᠮᠣᠷᠳᠠᠵᠤ᠂ ᠬᠣᠷᠭᠣᠯ ᠵᠠᠢᠷᠠᠩ ᠢ᠋ ᠠᠯᠠᠵᠤ ᠲᠠᠢᠭᠠᠨ ᠵᠤᠤᠪᠠ ᠶ᠋ᠢ ᠣᠯᠵᠠᠯᠠᠨ ᠠᠪᠴᠠᠢ᠃ ᠵᠤᠤᠪᠠ ᠶ᠋ᠢᠨ ᠠᠬᠠ ᠶ᠋ᠢ ᠨᠠᠭᠤᠷ ᠭᠡᠨᠡ᠃ ᠨᠠᠭᠤᠷ ᠪᠥᠭᠡᠰᠦ ᠲᠣᠷᠭᠤᠳ ᠤ᠋ᠨ ᠪᠠᠭᠠᠲᠤᠷ ᠶᠤᠮ᠃ ᠶᠦᠮ ᠠᠭᠠ ᠬᠠᠲᠤᠨ ᠳ᠋ᠤ᠌ ᠪᠠᠭᠠ ᠵᠠᠯᠠᠭᠤᠠ᠋ᠴᠠ ᠪᠠᠨ ᠰᠡᠳᠬᠢᠯ ᠠᠯᠳᠠᠷᠠᠨ᠂ ᠲᠡᠭᠦᠨ ᠦ᠌ ᠬᠠᠮᠢᠭᠠ ᠶᠠᠪᠤᠭᠠ ᠭᠠᠵᠠᠷ ᠥᠳᠥ ᠦᠭᠡᠢ ᠰᠤᠮᠤ ᠢᠯᠡᠭᠡᠳᠡᠭ ᠪᠣᠯᠤᠭᠰᠠᠨ ᠶᠤᠮᠰᠠᠨᠵᠠᠢ᠃ ᠶᠦᠮ ᠠᠭᠠ ᠬᠠᠲᠤᠨ ᠤ᠋ ᠥᠯᠮᠡᠢ ᠳᠣᠣᠷᠠ ᠥᠳᠥ ᠲᠡᠢ ᠰᠤᠮᠤ ᠰᠢᠩᠬᠤ ᠶ᠋ᠢᠨ ᠨᠣᠭᠣᠭᠠ ᠶ᠋ᠢᠨ ᠦᠨᠳᠦᠰᠦ ᠤᠷᠤᠭᠤ ᠲᠦᠷᠢᠵᠦ ᠣᠷᠣᠬᠤ ᠳ᠋ᠤ᠌ ᠬᠠᠲᠤᠨ ᠤ᠋ ᠮᠡᠯᠮᠡᠢ ᠶᠠᠭᠤᠨ ᠳ᠋ᠤ᠌ ᠭᠡᠷᠡᠯ ᠰᠠᠴᠤᠷᠠᠵᠤ ᠵᠠᠷᠤᠴᠠ ᠬᠠᠷᠠ ᠬᠦᠦ ᠳ᠋ᠦ᠍ ᠮᠣᠷᠢ ᠡᠮᠡᠭᠡᠯᠯᠡᠬᠦ ᠶ᠋ᠢ ᠲᠤᠰᠢᠶᠠᠪᠠ᠃
ᠥᠳᠥᠲᠦ ᠰᠤᠮᠤ ᠶᠦᠮ ᠠᠭᠠ ᠬᠠᠲᠤᠨ ᠢ᠋ ᠬᠠᠮᠢᠭᠠ ᠬᠦᠷᠬᠦ ᠶ᠋ᠢ ᠵᠢᠭᠠᠭᠰᠠᠭᠠᠷ ᠪᠤᠷᠭᠠᠰᠤᠨ ᠲᠥᠬᠥᠯ ᠦ᠋ᠨ ᠭᠦᠨ ᠳ᠋ᠦ᠍ ᠠᠪᠴᠢᠷᠠᠪᠠ᠃ ᠨᠠᠭᠤᠷ ᠪᠠᠭᠠᠲᠤᠷ ᠠᠩ ᠤ᠋ᠨ ᠠᠷᠠᠰᠤ ᠶ᠋ᠢᠨ ᠬᠤᠪᠴᠠᠰᠤ ᠬᠤᠨᠠᠷ ᠡᠮᠦᠰᠴᠦ᠂ ᠠᠩᠴᠢᠨ ᠳᠦᠷᠢ ᠪᠡᠷ ᠢᠷᠡᠵᠡᠢ᠃ ᠬᠠᠷᠠ ᠬᠦᠦ ᠶ᠋ᠢᠨ ᠨᠢᠳᠦ ᠲᠤᠨᠤᠮᠠᠯ ᠳᠥᠯᠭᠡᠬᠡᠨ᠂ ᠴᠡᠭᠡᠵᠢ ᠳᠥᠷᠪᠡᠯᠵᠢᠨ ᠬᠠᠩᠬᠠᠭᠠᠷ᠂ ᠵᠣᠯᠪᠣᠭᠠᠯᠢᠭ ᠬᠥᠳᠡᠯᠭᠡᠭᠡᠨ ᠲᠡᠢ ᠪᠢᠷᠠᠯᠢᠭ ᠨᠢᠭᠡᠨ ᠪᠠᠢᠪᠠ᠃ ᠶᠦᠮ ᠠᠭᠠ ᠭᠣᠣᠯ ᠤᠰᠤᠨ ᠤ᠋ ᠪᠠᠨ ᠬᠠᠩᠬᠠᠭᠠᠷ ᠡᠷᠡ ᠶ᠋ᠢ ᠰᠢᠮᠳᠠᠨ ᠬᠠᠷᠠᠭᠠᠳ᠂ ᠳᠤᠷᠠᠮᠠᠬᠠᠨ ᠢ᠋ᠶ᠋ᠠᠷ᠂
— ᠴᠢ ᠭᠡᠷᠯᠡᠭᠰᠡᠨ ᠤᠤ? ᠭᠡᠵᠦ ᠠᠰᠠᠭᠤᠪᠠ᠃ ᠨᠠᠭᠤᠷ ᠪᠠᠭᠠᠲᠤᠷ ᠲᠡᠰᠢᠶᠡ ᠲᠤᠯᠤᠭᠰᠠᠨ ᠬᠡᠪ ᠢ᠋ᠶ᠋ᠡᠷ᠂
— ᠠᠬᠠᠢᠲᠠᠨ ᠲᠠ ᠥᠷᠥᠰᠢᠶᠡ᠂ ᠲᠠᠨ ᠢ᠋ ᠪᠢ ᠬᠠᠷᠠᠵᠤ ᠶᠠᠪᠤᠭᠰᠠᠨ᠃ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠭᠡᠷᠭᠡᠢ ᠪᠡᠨ ᠪᠣᠯᠭᠠᠭᠰᠠᠨ᠃ ᠠᠮᠢᠨᠳᠠᠷᠠ ᠶ᠋ᠢ ᠪᠢ ᠵᠡᠭᠦᠳᠦᠯᠡᠵᠦ ᠮᠥᠷᠥᠭᠡᠳᠳᠡᠭ ᠪᠠᠢᠭᠰᠠᠨ᠃ ᠮᠥᠨ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠬᠦᠴᠦᠷᠬᠡᠢᠯᠡᠵᠦ ᠬᠠᠲᠤᠨ ᠡᠷᠭᠦᠮᠵᠢᠯᠡᠭᠰᠡᠨ᠃ ᠡᠨᠡ ᠤᠴᠢᠷ ᠢ᠋ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠳ᠋ᠤ᠌ ᠠᠢᠯᠠᠳᠬᠠᠬᠤ ᠠᠪᠠᠰᠤ ᠪᠢ ᠲᠣᠯᠣᠭᠠᠢ ᠪᠠᠨ ᠬᠢᠷᠭᠠᠭᠤᠯᠤᠨᠠ᠃ ᠲᠣᠯᠣᠭᠠᠢ ᠲᠠᠢ ᠶᠠᠪᠤᠭᠠ ᠳᠡᠭᠡᠷᠡ ᠪᠡᠨ ᠲᠠᠨ ᠤ᠋ ᠪᠠᠷᠠ ᠶ᠋ᠢ ᠬᠠᠷᠠᠬᠤ ᠪᠠᠷ ᠢᠷᠡᠯᠡ ᠭᠡᠪᠡ᠃
ᠤᠭ ᠡᠴᠡ ᠰᠡᠬᠡᠭᠦᠨ ᠵᠠᠩ ᠦᠭᠡᠢ ᠶᠦᠮ ᠠᠭᠠ᠂
— ᠥᠨᠳᠥᠷ ᠳᠡᠭᠡᠳᠦ ᠶᠣᠰᠣ ᠲᠥᠷᠥ ᠪᠡᠨ ᠪᠣᠳᠣᠵᠤ ᠨᠠᠮᠠᠶ᠋ᠢ ᠮᠠᠷᠲᠠ᠃ ᠮᠢᠨᠦ ᠬᠥᠪᠡᠭᠦᠳ ᠥᠰᠴᠦ ᠪᠠᠢᠨᠠ᠃ ᠨᠡᠷᠡ ᠪᠡᠨ ᠪᠣᠳᠣᠬᠤ ᠨᠢ ᠬᠠᠲᠤᠨ ᠬᠥᠮᠦᠨ ᠦ᠌ ᠶᠣᠰᠣ᠃ ᠴᠢᠮᠠ ᠮᠡᠲᠦ ᠶ᠋ᠢᠨ ᠴᠤᠤᠲᠠᠢ ᠡᠷᠡ ᠳ᠋ᠦ᠍ ᠡᠬᠡᠨᠡᠷ ᠪᠣᠯᠬᠤ ᠪᠦᠰᠡᠭᠦᠢ ᠣᠯᠳᠠᠨᠠ᠃ ᠬᠣᠪᠣᠭᠰᠠᠢᠷ ᠤ᠋ᠨ ᠭᠣᠣᠯ ᠳ᠋ᠤ᠌ ᠲᠣᠭᠯᠠᠵᠤ ᠥᠰᠦᠭᠰᠡᠨ ᠮᠢᠨᠢ ᠦᠨᠡᠨ᠃ ᠬᠡᠵᠢᠶᠡ ᠬᠣᠢᠨᠠ ᠨᠠᠮᠠᠶ᠋ᠢ ᠶᠠᠭᠤᠨ ᠳ᠋ᠤ᠌ ᠵᠣᠪᠠᠭᠠᠨᠠ᠃ ᠨᠠᠳᠠᠳᠤ ᠬᠠᠷᠠᠩᠭᠤᠢ ᠰᠢᠭᠤᠢ ᠳ᠋ᠤ᠌ ᠡᠷᠡ ᠲᠡᠢ ᠠᠭᠤᠯᠵᠠᠬᠤ ᠵᠠᠪ ᠦᠭᠡᠢ ᠪᠠᠢᠨᠠ᠃ ᠰᠠᠯᠠᠭᠠ ᠵᠠᠮ ᠣᠭᠲᠣᠯᠤᠯᠴᠠᠪᠠ ᠭᠡᠵᠦ ᠪᠣᠳᠣ᠃ ᠰᠠᠯᠠᠭᠠ ᠵᠠᠮ ᠳᠠᠬᠢᠭᠠᠳ ᠰᠠᠯᠠᠭᠠᠯᠠᠵᠤ ᠣᠲᠣᠨᠠᠮ᠃ ᠥᠳᠥᠲᠦ ᠰᠤᠮᠤ ᠪᠠᠨ ᠥᠭᠡᠷᠡ ᠡᠬᠡᠨᠡᠷ ᠦ᠋ᠨ ᠵᠦᠭ ᠲᠠᠯᠪᠢᠪᠠᠰᠤ ᠴᠢᠮᠠ ᠳ᠋ᠤ᠌ ᠢᠷᠦᠭᠡᠯ ᠢᠷᠡᠨᠡ ᠭᠡᠵᠦ ᠬᠡᠯᠡᠲᠡᠯᠡ ᠪᠤᠷᠭᠠᠰᠤᠨ ᠤ᠋ ᠮᠥᠴᠢᠷ ᠦ᠋ᠨ ᠲᠣᠭᠠᠯᠠᠩ ᠢ᠋ᠶ᠋ᠠᠷ ᠵᠢᠷᠭᠢᠵᠦ ᠪᠠᠢᠭᠰᠠᠨ ᠪᠣᠷᠣ ᠰᠢᠪᠠᠭᠤ ᠳᠡᠷᠬᠢᠨ ᠨᠢᠰᠦᠯᠡ᠃
— ᠲᠠᠢᠭᠠᠨ ᠢᠷᠡᠯᠡ ᠭᠡᠵᠦ ᠶᠦᠮ ᠠᠭᠠ ᠬᠡᠯᠡᠪᠡ᠃
— ᠪᠢ ᠶᠠᠪᠤᠯᠠ ᠭᠡᠵᠦ ᠨᠠᠭᠤᠷ ᠪᠠᠭᠠᠲᠤᠷ ᠬᠡᠯᠡᠪᠡ᠃
ᠨᠠᠭᠤᠷ ᠪᠠᠭᠠᠲᠤᠷ ᠮᠣᠷᠢᠨ ᠤ᠋ ᠬᠣᠨᠳᠣᠯᠠᠢ ᠳᠡᠭᠡᠷᠡ ᠳᠠᠷᠤᠩᠭᠤᠲᠠ ᠳᠥᠷᠥᠭᠡ ᠪᠡᠨ ᠵᠢᠭᠢᠪᠡ᠃ ᠡᠨᠡ ᠰᠠᠴᠠᠭᠤ ᠠᠭᠠᠷ ᠵᠦᠰᠦᠨ ᠰᠢᠪᠰᠢᠬᠦ ᠴᠢᠮᠡᠭᠡ ᠭᠠᠷᠴᠤ᠂ ᠵᠤᠤᠪᠠ ᠲᠠᠢᠭᠠᠨ ᠤ᠋ ᠴᠢᠴᠢᠭᠦᠷ ᠬᠢᠲᠤᠭᠠ ᠨᠠᠭᠤᠷ ᠪᠠᠭᠠᠲᠤᠷ ᠤ᠋ᠨ ᠨᠤᠭᠤᠰᠤ ᠨᠢᠷᠤᠭᠤᠨ ᠳ᠋ᠤ᠌ ᠰᠢᠭᠢᠨ ᠣᠷᠣᠪᠠ᠃ ᠨᠠᠭᠤᠷ ᠪᠠᠭᠠᠲᠤᠷ ᠪᠢᠲᠡᠭᠦᠦ ᠬᠡᠩᠬᠡᠢᠨ ᠠᠮᠢᠰᠬᠤᠭᠠ ᠠᠪᠤᠭᠰᠠᠨ ᠢ᠋ᠶ᠋ᠠᠨ ᠮᠣᠷᠢᠨ ᠤ᠋ ᠬᠤᠷᠳᠤ ᠪᠠᠷ ᠡᠷᠭᠢ ᠭᠠᠩᠭᠠ ᠳᠡᠭᠡᠭᠦᠷ ᠳᠡᠭᠦᠯᠢᠨ ᠣᠳᠪᠠ᠃ ᠵᠣᠣᠪᠠ ᠲᠠᠢᠭᠠᠨ ᠶᠦᠮ ᠠᠭᠠ ᠬᠠᠲᠤᠨ ᠤ᠋ ᠬᠦᠯᠦᠭ ᠮᠣᠷᠢᠨ ᠤ᠋ ᠳᠡᠷᠭᠡᠳᠡ ᠵᠣᠭᠰᠣᠵᠤ ᠪᠠᠢᠨᠠ᠃
— ᠴᠢ ᠶᠠᠭᠤ ᠬᠢᠪᠡ ᠭᠡᠵᠦ ᠶᠦᠮ ᠠᠭᠠ ᠶ᠋ᠢ ᠠᠰᠠᠭᠤᠬᠤ ᠳ᠋ᠤ᠌ ᠵᠣᠣᠪᠠ ᠲᠠᠢᠭᠠᠨ᠂
— ᠬᠢᠲᠤᠭᠠ ᠰᠢᠳᠡᠭᠰᠡᠨ᠃
— ᠣᠨᠣᠭᠠᠭᠰᠠᠨ ᠤᠤ? ᠭᠡᠵᠦ ᠬᠠᠲᠤᠨ ᠯᠠᠪᠯᠠᠪᠠ᠃
— ᠲᠡᠷᠡ ᠣᠳᠣ ᠦᠬᠦᠳᠡᠯ ᠪᠣᠯᠤᠭᠰᠠᠨ ᠭᠡᠵᠦ ᠲᠠᠢᠭᠠᠨ ᠮᠠᠰᠢ ᠬᠣᠷᠣᠰᠤᠯᠲᠠᠢ ᠥᠭᠦᠯᠡᠨᠡ᠃
ᠶᠦᠮ ᠠᠭᠠ ᠬᠠᠷᠠᠮᠰᠠᠬᠤ ᠳ᠋ᠠᠭᠠᠨ᠄
— ᠲᠥᠷᠥᠭᠰᠡᠨ ᠭᠠᠭᠴᠠ ᠠᠬᠠ ᠶ᠋ᠢ ᠪᠡᠨ ᠬᠥᠨᠥᠭᠡᠴᠢᠬᠡᠯᠡ ᠰᠢᠦ ᠳᠡ ᠭᠡᠮᠡᠨ ᠥᠭᠦᠯᠡᠬᠦ ᠳ᠋ᠦ᠍᠂ ᠲᠠᠢᠭᠠᠨ ᠳᠡᠪᠬᠡᠷᠴᠦ ᠬᠠᠰᠬᠢᠷᠤᠨ ᠬᠠᠳᠠ ᠴᠢᠯᠠᠭᠤᠨ ᠳᠤᠮᠳᠠᠭᠤᠷ ᠣᠷᠢᠯᠠᠭᠰᠠᠭᠠᠷ ᠳᠡᠭᠳᠡᠨ ᠠᠯᠠᠭᠠ ᠪᠣᠯᠪᠠ᠃ ᠲᠠᠢᠭᠠᠨ ᠤ᠋ ᠡᠬᠡᠷ ᠲᠠᠲᠠᠭᠰᠠᠨ ᠴᠢᠷᠠᠯᠠᠭᠠᠨ ᠢ᠋ᠶ᠋ᠠᠷ ᠪᠤᠷᠭᠠᠰᠤᠨ ᠤ᠋ ᠮᠥᠴᠢᠷ ᠪᠦᠷᠢ ᠳ᠋ᠦ᠍ ᠵᠢᠷᠭᠢᠨ ᠪᠠᠢᠭᠰᠠᠨ ᠪᠣᠯᠵᠣᠮᠣᠷ ᠰᠢᠪᠠᠭᠤᠳ ᠰᠦᠷᠦᠭᠯᠡᠨ ᠳᠠᠷᠬᠢᠵᠤ᠂ ᠬᠤᠷᠮᠤᠰᠲᠠ ᠶ᠋ᠢᠨ ᠬᠥᠬᠡ ᠴᠡᠭᠡᠯ ᠳ᠋ᠦ᠍ ᠭᠠᠰᠢᠭᠤᠳᠠᠬᠤ ᠮᠡᠲᠦ ᠡᠷᠭᠢᠯᠳᠦᠨᠡ᠃
ᠬᠠᠷᠠ ᠡᠷᠴᠢᠰ ᠰᠢᠪᠠᠭᠤᠳ ᠤ᠋ᠨ ᠣᠷᠢᠯᠠᠭᠠᠨ ᠳ᠋ᠤ᠌ ᠵᠢᠪᠪᠡ᠃ ᠣᠷᠣᠢ ᠨᠢ ᠠᠮᠢ ᠲᠠᠯᠪᠢᠭᠰᠠᠨ ᠨᠠᠭᠤᠷ ᠪᠠᠭᠠᠲᠤᠷ ᠢ᠋ ᠵᠣᠣᠪᠠ ᠲᠠᠢᠭᠠᠨ ᠲᠡᠪᠡᠷᠢᠵᠦ ᠢᠷᠡᠪᠡ᠃ ᠵᠣᠣᠪᠠ ᠶ᠋ᠢᠨ ᠨᠢᠳᠦ ᠤᠯᠠᠢᠵᠤ᠂ ᠬᠤᠪᠴᠠᠰᠤ ᠬᠤᠨᠠᠷ ᠤᠷᠠᠭᠳᠠᠵᠤ ᠨᠣᠣᠷᠬᠠᠢ ᠪᠣᠯᠵᠠᠢ᠃ ᠲᠠᠢᠭᠠᠨ ᠤ᠋ ᠬᠠᠴᠠᠷ ᠰᠢᠯᠪᠤᠷᠠᠵᠤ᠂ ᠴᠢᠰᠤ ᠬᠠᠳᠠᠵᠠᠢ᠃ ᠴᠣᠬᠣᠮ ᠶᠠᠭᠠᠬᠢᠬᠤ ᠭᠡᠵᠦ ᠦᠬᠦᠳᠡᠯ ᠢ᠋ ᠬᠣᠲᠠ ᠬᠦᠷᠢᠶᠡᠨ ᠳ᠋ᠦ᠍ ᠲᠡᠪᠡᠷᠢᠵᠦ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠲᠠᠢᠭᠠᠨ ᠣᠢᠯᠠᠭᠠᠬᠤ ᠲᠥᠬᠥᠭᠡ ᠦᠭᠡᠢ ᠪᠤᠯᠠᠩᠭᠢᠷᠲᠤ ᠬᠦᠷᠡᠩ ᠨᠢᠳᠦ ᠪᠡᠷ ᠪᠦᠴᠢᠵᠦ ᠵᠣᠭᠰᠣᠭᠰᠠᠨ ᠬᠥᠮᠦᠰ ᠢ᠋ ᠰᠢᠷᠳᠡᠨᠡ᠃ ᠪᠣᠳᠣᠪᠠᠯ ᠡᠵᠡᠨ ᠡᠴᠡ ᠪᠡᠨ ᠰᠠᠢᠨ ᠦᠭᠡ ᠶ᠋ᠢ ᠬᠦᠰᠡᠭᠰᠡᠨ ᠪᠣᠯᠤᠯᠲᠠᠢ᠃ ᠲᠠᠢᠭᠠᠨ ᠤ᠋ ᠨᠢᠳᠦ ᠬᠣᠲᠠ ᠬᠦᠷᠢᠶᠡᠨ ᠦ᠌ ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠠ᠋ᠴᠠ ᠢᠯᠡᠭᠦᠦ ᠲᠡᠢ ᠴᠣᠷᠣᠰ ᠣᠪᠣᠭ ᠤ᠋ᠨ ᠵᠠᠩᠵᠤᠨ ᠳᠡᠮᠪᠡᠷᠢᠯ ᠥᠭᠡᠳᠡ ᠲᠤᠰᠢᠶᠠᠯ ᠬᠦᠯᠢᠶᠡᠵᠦ ᠵᠣᠭᠰᠣᠨᠠ᠃ ᠲᠠᠢᠭᠠᠨ ᠲᠥᠷᠥᠭᠰᠡᠨ ᠠᠬᠠ ᠲᠠᠢ ᠪᠠᠨ ᠠᠮᠢ ᠲᠠᠯᠪᠢᠭᠰᠠᠨ ᠤ᠋ ᠬᠣᠢᠨᠠ ᠨᠢ ᠶᠠᠮᠠᠷ ᠬᠣᠯᠪᠣᠭᠠ ᠲᠠᠢ ᠪᠠᠨ ᠮᠡᠳᠡᠷᠡᠭᠡᠳ ᠪᠠᠢᠬᠤ ᠰᠢᠭ᠋᠃ ᠲᠡᠷᠡ ᠦᠶᠡ ᠳ᠋ᠦ᠍ ᠬᠠᠲᠤᠨ ᠡᠬᠡ ᠦᠷᠭᠦᠭᠡᠨ ᠡᠴᠡ ᠪᠡᠨ ᠭᠠᠷᠴᠤ ᠢᠷᠡᠭᠰᠡᠨ ᠦᠭᠡᠢ᠃ ᠲᠡᠭᠦᠨ ᠦ᠌ ᠰᠠᠢᠬᠠᠨ ᠰᠡᠳᠬᠢᠯ ᠢ᠋ ᠬᠠᠷᠠᠩᠭᠤᠢ ᠮᠠᠨᠠᠨ ᠪᠦᠷᠬᠦᠭᠰᠡᠨ ᠪᠠᠢᠯᠠ᠃
ᠴᠡᠷᠢᠭ ᠦ᠋ᠨ ᠵᠠᠩᠵᠤᠨ ᠳᠡᠮᠪᠡᠷᠢᠯ ᠲᠠᠢᠭᠠᠨ ᠠ᠋ᠴᠠ᠂
— ᠬᠡᠨ ᠢᠩᠭᠢᠪᠡ ᠭᠡᠵᠦ ᠠᠰᠠᠭᠤᠪᠠ᠃
ᠵᠤᠤᠪᠠ ᠶ᠋ᠢᠨ ᠰᠢᠷᠣᠢ ᠳ᠋ᠤ᠌ ᠬᠠᠯᠲᠠᠷᠳᠠᠵᠤ᠂ ᠬᠥᠯᠥᠰᠥ ᠳᠤᠰᠤᠯᠠᠭᠰᠠᠨ ᠨᠢᠭᠤᠷ ᠴᠢᠷᠠᠢ ᠶᠡᠷᠦ ᠬᠤᠪᠢᠷᠠᠬᠤ ᠦᠭᠡᠢ ᠪᠡᠷ᠂
— ᠬᠠᠲᠤᠨ ᠢ ᠬᠣᠷᠣᠭᠠᠭᠰᠠᠨ ᠶᠠᠯᠠ ᠲᠠᠢ ᠤᠴᠢᠷ ᠪᠢ ᠶᠠᠯᠠ ᠠᠰᠠᠭᠤᠪᠠ ᠭᠡᠵᠦ ᠥᠴᠢᠪᠡ᠃
— ᠨᠠᠭᠠᠳᠤᠬᠢ ᠪᠠᠨ ᠠᠪᠠᠴᠢᠵᠤ ᠦᠬᠦᠭᠡᠷ ᠦ᠋ᠨ ᠭᠠᠵᠠᠷ ᠳᠡᠯᠪᠢ ᠭᠡᠵᠦ ᠳᠡᠮᠪᠡᠷᠢᠯ ᠲᠤᠰᠢᠶᠠᠭᠠᠳ ᠵᠣᠣᠪᠠ ᠲᠠᠢᠭᠠᠨ ᠢ ᠪᠠᠷᠠᠭᠤᠨ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠥᠭᠡᠳᠡ ᠥᠭᠰᠥᠵᠦ ᠶᠠᠪᠤᠬᠤ ᠳ᠋ᠤ᠌ ᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠳ᠋ᠤ᠌ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠢ ᠶᠠᠷᠢᠬᠤ ᠳ᠋ᠤ᠌ ᠬᠣᠩ ᠲᠠᠢᠵᠢ᠂
— ᠠᠬᠠ ᠶ᠋ᠢ ᠪᠡᠨ ᠠᠨᠳᠠᠭᠤᠷᠠᠵᠠᠢ᠃ ᠢᠷᠣᠭᠠᠷ ᠦᠭᠡᠢ ᠲᠡᠨᠡᠭ᠁ ᠭᠡᠳ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠪᠠ᠃
ᠲᠡᠭᠡᠬᠦ ᠳ᠋ᠦ᠍ ᠡᠴᠢᠭᠡ ᠬᠠᠭᠠᠨ《ᠶᠡᠷᠦ ᠨᠢ ᠵᠡᠷᠯᠢᠭ ᠦ᠋ᠳ ᠲᠥᠰᠦᠭᠡᠲᠡᠢ ᠪᠤᠰᠤ ᠤᠤ᠂ ᠢᠷᠪᠢᠰ᠂ ᠪᠠᠷᠰ᠂ ᠲᠠᠢᠭᠠᠨ᠂ ᠴᠡᠷᠢᠭ ᠴᠥᠮ ᠠᠳᠠᠯᠢᠬᠠᠨ ᠡᠵᠡᠨ ᠢ᠋ᠶ᠋ᠡᠨ ᠬᠠᠷᠠᠮᠯᠠᠬᠤ ᠶᠤᠮ᠃ ᠲᠠᠢᠭᠠᠨ ᠴᠤ᠌ ᠬᠥᠮᠦᠨ ᠪᠢᠰᠢ᠂ ᠠᠷᠢᠶᠠᠲᠠᠨ ᠠᠵᠢ᠃ ᠳᠤᠷᠠ ᠲᠠᠴᠢᠶᠠᠯ ᠤ᠋ᠨ ᠢ᠋ᠶ᠋ᠠᠨ ᠲᠥᠯᠥᠭᠡ ᠠᠭᠤᠷ ᠣᠮᠣᠭ ᠢ᠋ᠶ᠋ᠠᠨ ᠪᠤᠰᠤᠳ ᠲᠤ᠌ ᠭᠠᠷᠭᠠᠵᠤ᠂ ᠬᠠᠢᠷᠠᠯᠠᠬᠤ ᠰᠡᠳᠬᠢᠯ ᠦᠭᠡᠢ ᠪᠣᠯᠳᠠᠭ》 ᠭᠡᠵᠦ ᠪᠣᠳᠣᠪᠠ᠃
ᠬᠣᠩ ᠲᠠᠢᠵᠢ ᠳᠡᠮᠪᠡᠷᠢᠯ ᠵᠠᠩᠵᠤᠨ ᠳ᠋ᠤ᠌᠂
— ᠥᠨᠥ ᠣᠷᠣᠢ ᠵᠣᠣᠪᠠ ᠳ᠋ᠤ᠌ ᠠᠬᠢᠭᠤᠬᠠᠨ ᠬᠣᠭᠣᠯᠠ ᠥᠭ᠂ ᠲᠡᠭᠦᠨ ᠢ ᠴᠠᠳᠬᠠ ᠭᠡᠪᠡ᠃
— ᠶᠡᠬᠡ ᠴᠠᠳᠬᠤᠯᠠᠩ ᠪᠣᠯ ᠤᠨᠲᠠᠭᠠᠳ ᠰᠡᠷᠡᠬᠦ ᠦᠭᠡᠢ ᠪᠤᠰᠤ ᠤᠤ ᠭᠡᠵᠦ ᠳᠡᠮᠪᠡᠷᠢᠯ ᠬᠡᠯᠡᠪᠡ᠃
— ᠲᠠᠢᠭᠠᠨ ᠢ ᠥᠨᠥᠳᠥᠷ ᠱᠠᠩᠨᠠᠯ ᠢ᠋ᠶ᠋ᠠᠷ ᠴᠠᠳᠬᠤᠭᠠᠵᠤ ᠪᠠᠢᠭᠠ ᠶᠤᠮ ᠭᠡᠮᠡᠨ ᠬᠣᠩ ᠲᠠᠢᠵᠢ ᠥᠭᠦᠯᠡᠪᠡ᠃
ᠠᠷᠪᠠᠨ ᠵᠢᠷᠭᠤᠭᠠ
ᠮᠠᠷᠲᠠᠵᠤ ᠪᠣᠯᠤᠮᠠ ᠦᠭᠡᠢ ᠶᠠᠪᠤᠳᠠᠯ ᠲᠠᠢᠭᠠᠨ ᠵᠣᠣᠪᠠ ᠳ᠋ᠤ᠌ ᠲᠣᠬᠢᠶᠠᠯᠳᠤᠭᠰᠠᠨ ᠪᠢᠯᠡ᠃ ᠵᠣᠣᠪᠠ ᠶᠢᠷᠲᠢᠨᠴᠦ ᠳᠡᠭᠡᠷᠡ ᠣᠷᠣ ᠭᠠᠭᠴᠠᠭᠠᠷ ᠦᠯᠡᠳᠡᠪᠡ᠃ ᠵᠣᠣᠪᠠ ᠳ᠋ᠤ᠌ ᠭᠤᠲᠤᠷᠠᠬᠤ ᠰᠡᠳᠬᠢᠯ ᠳᠡᠢᠯᠦᠩᠭᠦᠢ ᠪᠠᠢᠯᠠ᠃ ᠲᠠᠢᠭᠠᠨ ᠬᠡᠮᠡᠬᠦ ᠵᠠᠰᠠᠭᠤᠯᠤᠭᠰᠠᠨ ᠡᠷᠡ ᠬᠥᠮᠦᠨ ᠦ᠌ ᠠᠵᠠ ᠵᠢᠷᠭᠠᠯ ᠢ ᠬᠥᠮᠦᠰ ᠬᠤᠯᠠᠭᠠᠢᠯᠠᠭᠰᠠᠨ ᠪᠠᠢᠳᠠᠭ᠃ ᠨᠢᠭᠡᠨᠲᠡ ᠬᠤᠯᠠᠭᠠᠢᠯᠠᠭᠳᠠᠭᠰᠠᠨ ᠠᠵᠠ ᠵᠢᠷᠭᠠᠯ ᠳ᠋ᠠᠭᠠᠨ ᠲᠠᠢᠭᠠᠨ ᠬᠠᠷᠠᠮᠰᠠᠭᠠᠳ ᠶᠠᠭᠠᠬᠢᠬᠤ ᠪᠢᠯᠡ᠃
ᠪᠤᠷᠬᠠᠨ ᠤ᠋ ᠬᠠᠢᠷᠠᠯᠠᠭᠰᠠᠨ ᠲᠠᠴᠢᠶᠠᠩᠭᠤᠢ ᠶ᠋ᠢᠨ ᠰᠢᠳᠢᠲᠦ ᠬᠡᠰᠢᠭ ᠢ ᠬᠦᠷᠲᠡᠬᠦ ᠬᠤᠪᠢ ᠦᠭᠡᠢ ᠳ᠋ᠡᠭᠡᠨ ᠲᠠᠢᠭᠠᠨ ᠤ᠋ ᠬᠣᠷᠣᠰᠤᠯ ᠪᠤᠴᠠᠯᠵᠤ ᠶᠠᠪᠤᠳᠠᠭ᠃ ᠲᠡᠷᠡ ᠬᠣᠷᠣᠰᠤᠯ ᠨᠢ ᠴᠢᠰᠤ᠂ ᠨᠢᠯᠪᠤᠰᠤ᠂ ᠦᠬᠦᠯ᠂ ᠬᠠᠭᠠᠴᠠᠯ ᠦᠵᠡᠬᠦ ᠪᠡᠷ ᠢ᠋ᠶ᠋ᠡᠨ ᠳᠠᠷᠤᠭᠳᠠᠵᠤ ᠨᠢᠭᠤᠭᠳᠠᠮᠠᠯ ᠪᠣᠯᠳᠠᠭ᠃ ᠡᠮᠡ ᠶ᠋ᠢ ᠡᠮᠡᠯᠳᠡᠭ ᠪᠣᠯᠤᠭᠰᠠᠨ ᠬᠣᠢᠨᠠ ᠪᠠᠨ ᠵᠣᠣᠪᠠ ᠲᠠᠢᠭᠠᠨ ᠪᠣᠯᠤᠭᠰᠠᠨ ᠭᠡᠳᠡᠭ᠃
ᠲᠡᠭᠦᠨ ᠦ᠌ ᠲᠣᠯᠣᠭᠠᠢ ᠳ᠋ᠤ᠌ ᠦᠯᠡᠳᠡᠭᠰᠡᠨ ᠠᠵᠠ ᠵᠢᠷᠭᠠᠯ ᠤ᠋ᠨ ᠰᠠᠷᠠᠯ ᠦᠶᠡ ᠦᠶᠡ ᠬᠥᠳᠡᠯᠵᠦ᠂ ᠨᠣᠬᠠᠢ ᠮᠡᠲᠦ ᠬᠢᠬᠤᠨᠠᠨ ᠨᠢᠳᠦᠨ ᠳ᠋ᠦ᠍ ᠦᠵᠡᠭᠳᠡᠭᠰᠡᠨ ᠢ᠋ᠶ᠋ᠡᠨ ᠤᠰᠠᠳᠬᠠᠬᠤ ᠶ᠋ᠢ ᠡᠷᠡᠮᠡᠯᠵᠡᠨᠡ᠃
ᠬᠥᠮᠦᠨ ᠢ ᠲᠠᠢᠭᠠᠨ ᠪᠣᠯᠭᠠᠬᠤ ᠠᠶᠤᠯᠲᠠᠢ ᠭᠡᠮᠲᠦ ᠬᠡᠷᠡᠭ ᠪᠢᠯᠡ᠃ ᠭᠡᠮᠲᠦ ᠬᠡᠷᠡᠭ ᠦ᠋ᠨ ᠦ᠌ ᠵᠣᠯᠢᠶᠠᠰᠤ ᠪᠣᠯ ᠵᠣᠣᠪᠠ ᠪᠢᠯᠡ᠃ ᠣᠢᠷᠠᠳ ᠤ᠋ᠨ ᠬᠦᠷᠢᠶᠡᠨ ᠳ᠋ᠦ᠍ ᠠᠮᠢᠳᠤᠷᠠᠵᠤ᠂ ᠡᠮᠡᠰ ᠲᠡᠢ ᠬᠤᠷᠢᠴᠠᠬᠤ ᠶ᠋ᠢ ᠲᠡᠷᠡ ᠬᠦᠰᠡᠨ ᠠᠯᠳᠠᠭᠳᠠᠭᠰᠠᠨ ᠬᠦᠰᠡᠯ ᠢ᠋ᠶ᠋ᠡᠨ ᠭᠦᠢᠴᠡᠭᠡᠬᠦ ᠶ᠋ᠢᠨ ᠲᠤᠯᠠᠳᠠ ᠠᠯᠠᠯᠭᠠ ᠳᠠᠯᠠᠯᠠᠭᠠ᠂ ᠳᠡᠭᠡᠷᠡᠮ ᠲᠤᠨᠤᠭᠠᠨ ᠳ᠋ᠤ᠌ ᠣᠷᠣᠯᠴᠠᠵᠤ ᠡᠨᠳᠡ ᠦᠵᠡᠭᠳᠡᠨᠡ᠃
ᠲᠠᠢᠭᠠᠨ ᠪᠣᠯ ᠠᠮᠢᠳᠤᠷᠠᠯ ᠡᠴᠡ ᠤᠢᠳᠤᠭᠰᠠᠨ ᠬᠥᠮᠦᠰ᠃ ᠲᠠᠢᠭᠠᠨ ᠤ᠋ ᠲᠠᠷᠢᠬᠢᠨ ᠳ᠋ᠤ᠌ ᠠᠮᠢᠳᠤ ᠬᠡᠪ ᠢ᠋ᠶ᠋ᠡᠷ ᠦᠯᠡᠳᠡᠭᠰᠡᠨ ᠲᠡᠷᠡ ᠪᠢᠯᠬᠠᠭᠰᠠᠨ ᠳᠤᠷᠠ ᠬᠦᠰᠡᠯ ᠢ᠋ ᠳᠠᠷᠤᠬᠤ ᠠᠷᠭᠠ ᠦᠭᠡᠢ ᠭᠡᠳᠡᠭ ᠢ᠋ ᠮᠡᠳᠡᠭᠰᠡᠨ ᠢ᠋ᠶ᠋ᠡᠨ ᠬᠡᠯᠡᠶᠡ᠃
ᠬᠠᠭᠠᠨ ᠨᠠᠮᠠᠶ᠋ᠢ ᠲᠡᠮᠳᠡᠭᠯᠡᠯ ᠬᠥᠲᠥᠯᠵᠦ᠂ ᠰᠢᠯᠦᠭ ᠳᠡᠷᠡᠯᠡᠵᠦ᠂ ᠳᠠᠭᠤᠨ ᠬᠥᠷᠪᠡᠭᠦᠯᠭᠡ ᠬᠢᠳᠡᠭ ᠢ᠋ ᠮᠡᠳᠡᠳᠡᠭ ᠰᠠᠨ ᠪᠣᠯ ᠣᠢᠷᠠᠳ ᠤ᠋ᠨ ᠡᠷᠳᠡᠨᠢᠰ ᠦ᠋ᠨ ᠰᠠᠩ ᠡᠴᠡ ᠢᠯᠡᠭᠦᠦ ᠬᠥᠷᠥᠩᠭᠡ ᠭᠡᠮᠡᠨ ᠰᠢᠯᠦᠬᠡᠢᠷᠡᠨ ᠰᠢᠨᠤᠬᠤ ᠪᠠᠢᠭᠰᠠᠨ ᠪᠢᠵᠡ᠃ ᠳᠠᠩᠴᠤ ᠬᠡᠨ ᠪᠣᠭᠠᠢ ᠴᠤ᠌ ᠦᠯᠦ ᠮᠡᠳᠡᠨᠡ᠃ ᠲᠡᠢᠮᠦ ᠶ᠋ᠢᠨ ᠲᠤᠯᠠ ᠰᠢᠩᠰᠢᠯᠡᠬᠦ ᠡᠵᠡᠨ ᠦᠭᠡᠢ ᠪᠢᠯᠡ᠃ ᠨᠠᠳᠠ ᠳ᠋ᠤ᠌ ᠨᠣᠮ ᠪᠢᠴᠢᠭ ᠦ᠋ᠨ ᠥᠪ ᠡᠷᠳᠡᠨᠢ ᠬᠠᠳᠠᠭᠠᠯᠠᠭᠠᠰᠤᠲᠠᠢ ᠪᠠᠢᠳᠠᠭ᠃ ᠨᠣᠮ ᠤ᠋ᠨ ᠥᠷᠭᠥᠭᠡ ᠶ᠋ᠢ ᠵᠤᠤᠪᠠ ᠰᠠᠬᠢᠵᠤ ᠲᠠᠩᠳᠠᠨᠠ᠃
ᠵᠤᠤᠪᠠ ᠲᠠᠢᠭᠠᠨ ᠪᠥᠭᠡᠰᠦ ᠲᠠᠮᠤ ᠳ᠋ᠤ᠌ ᠤᠨᠠᠭᠰᠠᠨ ᠬᠥᠮᠦᠨ᠃
ᠠᠷᠪᠠᠨ ᠳᠣᠯᠣᠭᠠ
ᠭᠠᠯᠳᠠᠨ ᠵᠢᠷᠭᠤᠭᠠᠨ ᠨᠠᠰᠤᠲᠠᠢ ᠳ᠋ᠤ᠌ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠢ᠋ ᠨᠠᠰᠤᠨ ᠲᠤᠷᠰᠢ ᠳ᠋ᠠᠭᠠᠨ ᠮᠠᠷᠲᠠᠯ ᠦᠭᠡᠢ ᠠᠵᠢ᠃ ᠨᠡᠢᠲᠡ ᠶ᠋ᠢᠨ ᠣᠨ ᠲᠣᠭᠠᠯᠠᠯ ᠤ᠋ᠨ1650 ᠣᠨ ᠪᠤᠶᠤ ᠴᠠᠭᠠᠨ ᠪᠠᠷᠰ ᠵᠢᠯ ᠦ᠋ᠨ ᠬᠠᠪᠤᠷ᠂ ᠵᠤᠨ᠂ ᠨᠠᠮᠤᠷ᠂ ᠡᠪᠦᠯ ᠦ᠋ᠨ ᠦᠢᠯᠡ ᠶᠠᠪᠤᠳᠠᠯ ᠤ᠋ᠳ ᠠᠮᠢᠳᠤᠷᠠᠯ ᠤ᠋ᠨ ᠲᠤᠷᠰᠢ ᠡᠷᠭᠢᠯᠲᠡ ᠪᠣᠯᠪᠠ᠃ ᠲᠩᠷᠢ ᠪᠦᠲᠦᠨ ᠰᠠᠷᠠ ᠲᠠᠢ ᠨᠢᠭᠡ ᠦᠳᠡᠰᠢ ᠡᠴᠢᠭᠡ ᠬᠣᠩ ᠲᠠᠢᠵᠢ ᠶᠡᠬᠡ ᠦᠷᠭᠦᠭᠡᠨ ᠳ᠋ᠦ᠍ ᠰᠠᠷᠠᠨ ᠤ᠋ ᠭᠡᠷᠡᠯ ᠲᠡᠢ ᠬᠠᠮᠲᠤ ᠣᠷᠣᠵᠤ ᠢᠷᠡᠪᠡ᠃ ᠬᠠᠲᠤᠨ ᠡᠬᠡ ᠶ᠋ᠢᠨ ᠨᠢᠳᠦ ᠳᠦᠷᠡᠯᠵᠡᠨ ᠪᠠᠳᠠᠷᠠᠭᠠᠳ ᠡᠴᠢᠭᠡ ᠶ᠋ᠢᠨ ᠡᠵᠡᠭᠦᠢᠷᠡᠭᠰᠡᠨ ᠰᠠᠭᠤᠳᠠᠯ ᠥᠭᠡᠳᠡ ᠬᠦᠨᠳᠦᠳᠬᠡᠯᠲᠡᠢ ᠬᠠᠷᠠᠨᠠ᠃ ᠡᠴᠢᠭᠡ ᠨᠢ ᠪᠠᠭᠠ ᠬᠠᠲᠤᠨ ᠠᠮᠢᠨᠳᠠᠷᠠ ᠶ᠋ᠢᠨ ᠡᠪᠦᠷ ᠡᠴᠡ ᠰᠠᠯᠬᠤ ᠪᠠᠨ ᠪᠣᠯᠢᠭᠰᠠᠨ ᠲᠤᠯᠠ ᠭᠡᠨᠡᠳᠲᠡ ᠢᠷᠡᠭᠰᠡᠨ ᠳ᠋ᠦ᠍ ᠭᠠᠢᠬᠠᠯ ᠲᠥᠷᠥᠪᠡ᠃
ᠡᠴᠢᠭᠡ ᠰᠠᠭᠤᠳᠠᠯ ᠳ᠋ᠠᠭᠠᠨ ᠲᠤᠬᠠᠯᠠᠵᠤ ᠲᠡᠭᠦᠨ ᠦ᠌ ᠴᠠᠭᠠᠨᠠ ᠪᠦᠷᠭᠦᠳ ᠦ᠋ᠨ ᠬᠦᠴᠦᠲᠦ ᠳᠠᠯᠠᠪᠴᠢ ᠪᠠᠷᠠᠭᠤᠨ ᠵᠡᠭᠦᠨ ᠮᠥᠷᠥ ᠪᠡᠷ ᠨᠢ ᠳᠡᠪᠡᠷᠡᠵᠦ᠂᠂ ᠡᠯᠢᠭᠡᠨ ᠳ᠋ᠡᠭᠡᠨ ᠬᠣᠩ ᠲᠠᠢᠵᠢ ᠶ᠋ᠢ ᠢᠪᠡᠭᠡᠬᠦ ᠮᠡᠲᠦ ᠬᠠᠷᠠᠭᠳᠠᠨᠠ᠃ ᠡᠴᠢᠭᠡ ᠬᠣᠭᠣᠯᠠᠢ ᠵᠠᠰᠠᠭᠠᠳ᠂
— ᠭᠠᠯᠳᠠᠨ! ᠮᠢᠨᠦ ᠬᠥᠪᠡᠭᠦᠨ ᠁ ᠭᠡᠪᠡ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠲᠦᠷ ᠵᠠᠭᠤᠷᠠᠬᠠᠨ ᠲᠡᠭᠡᠨᠡᠭᠯᠡᠭᠡᠳ ᠴᠢᠮᠠᠶ᠋ᠢ ᠡᠬᠡ ᠶ᠋ᠢᠨ ᠬᠡᠪᠡᠯᠢ ᠳ᠋ᠦ᠍ ᠣᠯᠳᠠᠬᠤ ᠡᠴᠡ ᠡᠮᠦᠨᠡ ᠨᠠᠮᠠᠬᠠᠢᠵᠠᠮᠰᠤ ᠯᠠᠮᠠᠲᠠᠨ ᠪᠢᠯᠢᠭᠦᠨ ᠤᠬᠠᠭᠠᠨ ᠲᠠᠢ ᠪᠣᠯᠬᠤ ᠶ᠋ᠢ ᠮᠡᠳᠡᠭᠰᠡᠨ ᠶᠤᠮ ᠰᠢᠦ ᠳᠡ᠃ ᠭᠡᠭᠡᠨᠲᠡᠨ ᠦ᠌ ᠢᠪᠡᠭᠡᠯ ᠳ᠋ᠦ᠍ ᠮᠢᠨᠦ ᠦᠷᠡ ᠠᠴᠢ ᠨᠠᠷ ᠡᠴᠡ ᠭᠠᠯᠳᠠᠨ ᠴᠢ ᠪᠠᠭᠲᠠᠬᠤ ᠲᠠᠪᠢᠯᠠᠩ ᠲᠠᠢ ᠪᠠᠢᠵᠠᠢ᠃ ᠴᠢᠮᠠ ᠳ᠋ᠤ᠌ ᠪᠢ ᠨᠠᠢᠳᠠᠵᠤ ᠪᠠᠢᠨᠠ᠃ ᠴᠢ ᠣᠢᠷᠠᠳ ᠤ᠋ᠨ ᠠᠪᠤᠷᠠᠯ ᠤ᠋ᠨ ᠡᠬᠢ ᠪᠣᠯᠤᠨᠠ ᠭᠡᠵᠦ ᠬᠡᠯᠡᠭᠡᠳ ᠬᠠᠲᠤᠨ ᠥᠭᠡᠳᠡ ᠬᠠᠷᠠᠪᠠ᠃
ᠭᠠᠯᠳᠠᠨ ᠲᠡᠭᠡᠬᠦ ᠳ᠋ᠦ᠍ᠨᠢ᠂
— ᠠᠪᠤ ᠠ᠋᠂ ᠣᠢᠷᠠᠳ ᠤ᠋ᠨ ᠨᠢᠭᠦᠯ ᠬᠢᠯᠢᠨᠴᠡ ᠰᠠᠪᠠᠨ ᠳ᠋ᠠᠭᠠᠨ ᠪᠠᠭᠲᠠᠬᠤ ᠪᠠᠨ ᠪᠤᠯᠢᠴᠢᠬᠠᠭᠰᠠᠨ ᠶᠤᠮ ᠤᠤ? ᠭᠡᠲᠡᠯᠡ ᠡᠴᠢᠭᠡ᠂
— ᠬᠦᠦ ᠮᠢᠨᠢ᠂ ᠪᠢᠳᠡᠨ ᠳ᠋ᠦ᠍ ᠡᠪ ᠨᠢᠭᠡᠳᠦᠯ ᠬᠡᠷᠡᠭᠲᠡᠢ ᠪᠠᠢᠭᠠ ᠶᠤᠮ ᠭᠡᠯᠡ᠃
ᠡᠴᠢᠭᠡ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠤᠢᠳᠬᠠᠷ ᠬᠤᠷᠠᠵᠠᠢ᠃ ᠲᠡᠭᠦᠨ ᠦ᠌ ᠨᠢᠳᠦ ᠳᠦᠩᠰᠦᠭᠡᠷ ᠪᠠᠢᠯᠠ᠃ ᠡᠴᠢᠭᠡ ᠶ᠋ᠢᠨ ᠱᠠᠩᠬᠤ ᠶ᠋ᠢᠨ ᠦᠰᠦ ᠮᠡᠷ ᠰᠡᠷ ᠴᠠᠢᠭᠰᠠᠨ ᠪᠠᠢᠨᠠ᠃ ᠬᠠᠷᠢᠨ ᠬᠦᠷᠯᠢᠭᠡᠷ ᠨᠢᠭᠤᠷ ᠨᠢ ᠤᠷᠢᠳ ᠤ᠋ᠨ ᠶᠠᠩᠵᠤ ᠪᠠᠷ ᠴᠢᠩᠭᠠ ᠬᠠᠲᠠᠭᠤ ᠪᠠᠢᠳᠠᠯ ᠲᠠᠢ᠃ ᠲᠡᠷᠡ ᠬᠥᠮᠥᠭᠡᠢ ᠪᠡᠨ ᠵᠠᠭᠤᠵᠠᠢ᠃ ᠲᠡᠭᠦᠨ ᠳ᠋ᠦ᠍ ᠡᠷᠡᠭᠡᠯᠵᠡᠭᠡ ᠪᠠᠢᠪᠠ᠃
ᠠᠯᠢᠪᠠ ᠶ᠋ᠢ ᠰᠠᠨᠠᠭᠠᠰᠢᠷᠠᠨ ᠪᠣᠳᠣᠬᠤ ᠵᠠᠭᠤᠷᠠ ᠪᠠᠨ ᠡᠴᠢᠭᠡ ᠬᠣᠩ ᠲᠠᠢᠵᠢ ᠶ᠋ᠢᠨ ᠨᠢᠭᠤᠷ ᠪᠠᠢᠨ ᠪᠠᠢᠨ ᠬᠤᠪᠢᠷᠠᠵᠤ ᠪᠠᠢᠳᠠᠭ ᠰᠠᠨ᠃ ᠨᠢᠭᠡ ᠶᠡᠬᠡ ᠭᠦᠨ ᠪᠣᠳᠣᠯ ᠳ᠋ᠤ᠌ ᠡᠴᠢᠭᠡ ᠠᠪᠲᠠᠵᠠᠢ᠃
ᠡᠴᠢᠭᠡ ᠬᠣᠩ ᠲᠠᠢᠵᠢ ᠣᠯᠪᠣᠭ ᠳᠡᠭᠡᠷᠡ ᠪᠡᠨ ᠲᠤᠬᠠᠯᠠᠭᠠᠳ ᠢᠩᠭᠡ ᠶ᠋ᠢᠨ ᠬᠣᠭᠣᠷᠮᠠᠭ ᠵᠠᠯᠭᠢᠯᠠᠪᠠ᠃ ᠡᠵᠢ ᠶ᠋ᠢᠨ ᠨᠢᠳᠦ ᠰᠡᠷᠭᠦᠵᠦ᠂ ᠬᠠᠭᠠᠨ ᠡᠴᠢᠭᠡ ᠶ᠋ᠢ ᠰᠢᠷᠳᠡᠨᠡ᠃ ᠭᠠᠯᠳᠠᠨ ᠢ᠋ ᠬᠠᠨᠢ ᠲᠠᠲᠠᠵᠤ ᠬᠠᠲᠤᠨ ᠡᠬᠡ ᠦᠷᠭᠦᠭᠡᠨ ᠳ᠋ᠡᠭᠡᠨ ᠬᠣᠨᠣᠭᠤᠯᠤᠭᠰᠠᠨ ᠲᠡᠷᠡ ᠰᠥᠨᠢ ᠡᠴᠢᠭᠡ ᠨᠢ ᠢᠷᠡᠭᠰᠡᠨ ᠶᠦ᠍ᠮ᠃ ᠡᠬᠡ ᠶ᠋ᠢᠨ ᠤᠯᠠᠭᠠ ᠪᠤᠲᠠᠷᠠᠭᠰᠠᠨ ᠬᠠᠷᠠᠴᠠ ᠶ᠋ᠢ ᠢᠯᠢᠵᠦ ᠱᠠᠩᠬᠤ ᠶ᠋ᠢᠨ ᠦᠰᠦ ᠪᠡᠷ ᠤᠷᠤᠯᠳᠤᠵᠤ ᠪᠠᠢᠭᠰᠠᠨ ᠡᠴᠢᠭᠡ ᠬᠣᠩ ᠲᠠᠢᠵᠢ᠂
— ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠨᠠᠮᠠᠶ᠋ᠢ ᠢᠳᠬᠠᠵᠤ ᠳᠥᠩᠭᠡᠯᠡ ᠭᠡᠪᠡ᠃ ᠡᠬᠡ ᠨᠢ᠂
— ᠶᠠᠭᠠᠬᠢᠵᠤ ᠭᠡᠮᠡᠨ ᠠᠰᠠᠭᠤᠪᠠ᠃ ᠡᠴᠢᠭᠡ ᠬᠣᠩ ᠲᠠᠢᠵᠢ᠂
— ᠭᠠᠯᠳᠠᠨ ᠬᠥᠪᠡᠭᠦᠨ ᠢ᠋ ᠯᠠᠮᠠ ᠪᠣᠯᠭᠠᠵᠤ ᠪᠤᠷᠬᠠᠨ ᠨᠣᠮ ᠤ᠋ᠨ ᠦᠢᠯᠡᠰ ᠲᠦ᠍ ᠵᠢᠳᠬᠦᠭᠦᠯᠪᠡᠯ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠲᠥᠪᠡᠳ ᠲᠦ᠍ ᠨᠥᠯᠥᠭᠡ ᠪᠡᠨ ᠪᠡᠬᠢᠵᠢᠭᠦᠯᠦᠨᠡ᠃ ᠬᠠᠮᠤᠭ ᠤ᠋ᠨ ᠭᠣᠣᠯ ᠨᠢ ᠭᠠᠯᠳᠠᠨ ᠰᠢᠭ᠋ ᠰᠡᠷᠭᠦᠯᠡᠩ ᠤᠬᠠᠭᠠᠨ ᠲᠠᠢ ᠤᠳᠤᠮ ᠤᠭᠰᠠᠭᠠ ᠰᠠᠢᠲᠠᠢ ᠬᠥᠪᠡᠭᠦᠨ ᠢ᠋ ᠰᠣᠩᠭᠣᠵᠤ ᠪᠠᠢᠭᠠ ᠭᠡᠨᠡ ᠭᠡᠪᠡ᠃ ᠡᠬᠡ ᠨᠢ᠂
— ᠭᠠᠯᠳᠠᠨ ᠤᠭ ᠨᠢ ᠮᠣᠷᠢᠨ ᠳ᠋ᠤ᠌ ᠡᠷᠡᠮᠡᠬᠡᠢ᠂ ᠬᠠᠲᠠᠭᠤᠵᠢᠯᠲᠠᠢ᠂ ᠬᠠᠷᠪᠤᠵᠤ ᠨᠠᠮᠨᠠᠬᠤ ᠳ᠋ᠠᠭᠠᠨ ᠴᠡᠴᠡ ᠲᠡᠢ ᠬᠦᠦ ᠰᠢᠦ᠃ ᠪᠠᠭᠠᠲᠤᠷ ᠡᠷᠡ ᠪᠣᠯᠤᠨᠠ ᠭᠡᠵᠦ ᠪᠢ ᠪᠣᠳᠣᠳᠠᠭ᠂ ᠲᠣᠪᠰᠢᠭᠤᠷᠳᠠᠵᠤ ᠪᠠᠢᠬᠤ ᠨᠢ ᠶᠡᠷᠦ ᠪᠤᠰᠤ ᠶ᠋ᠢᠨ ᠬᠠᠷᠠᠭᠳᠠᠳᠠᠭ ᠶᠤᠮ᠃ ᠰᠡᠳᠬᠢᠯ ᠦ᠋ᠨ ᠢ᠋ᠶ᠋ᠡᠨ ᠳᠣᠲᠣᠭᠠᠳᠤ ᠴᠢᠮᠡᠭᠡ ᠶ᠋ᠢ ᠰᠠᠢᠨ ᠰᠣᠨᠣᠰᠳᠠᠭ ᠰᠢᠦ᠃ ᠭᠠᠯᠳᠠᠨ ᠬᠦᠦ ᠰᠡᠳᠬᠢᠯ ᠳ᠋ᠡᠭᠡᠨ ᠨᠢᠳᠦ ᠲᠡᠢ ᠁ ᠭᠡᠯᠡ᠃
— ᠭᠠᠯᠳᠠᠨ ᠢ᠋ ᠣᠯᠳᠠᠬᠤ ᠡᠴᠡ ᠡᠮᠦᠨᠡ ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠬᠥᠪᠡᠭᠦᠨ ᠲᠥᠷᠥᠨᠡ ᠭᠡᠵᠦ ᠠᠢᠯᠠᠳᠤᠭᠰᠠᠨ ᠢ᠋ ᠬᠠᠲᠤᠨᠲᠠᠨ ᠰᠠᠨᠠᠵᠤ ᠪᠠᠢᠨᠠ ᠤᠤ?
— ᠰᠠᠨᠠᠬᠤ ᠪᠠᠷ ᠪᠠᠷᠠᠬᠤ ᠤᠤ ᠁
— ᠬᠥᠪᠡᠭᠦᠨ ᠢ᠋ ᠪᠤᠷᠬᠠᠨ ᠤ᠋ ᠣᠷᠣᠨ ᠲᠥᠪᠡᠳ ᠲᠦ᠍ ᠬᠡᠬᠡᠷᠡᠭᠦᠯᠬᠦ ᠪᠡᠷ ᠰᠢᠢᠳᠦᠯᠡ᠃
— ᠭᠡᠭᠡᠨ ᠯᠠᠮᠠ ᠶ᠋ᠢᠨ ᠲᠠᠭᠠᠯᠠᠯ ᠢ᠋ᠶ᠋ᠠᠷ ᠪᠣᠯᠤᠭ!
— ᠳᠥᠷᠪᠡᠨ ᠣᠢᠷᠠᠳ ᠢ᠋ ᠡᠪ ᠡᠶᠡ ᠲᠡᠢ ᠪᠣᠯᠭᠠᠬᠤ ᠶ᠋ᠢᠨ ᠲᠤᠯᠠᠳᠠ ᠰᠦᠮᠡ ᠳᠤᠭᠠᠩ ᠣᠯᠠᠨ ᠢ᠋ ᠪᠤᠰᠬᠠᠵᠤ᠂ ᠨᠣᠮ ᠡᠷᠳᠡᠮ ᠲᠡᠢ ᠯᠠᠮᠠ ᠲᠥᠴᠢᠨᠡᠭᠡᠨ ᠪᠡᠯᠡᠳᠬᠡᠬᠦ ᠶ᠋ᠢ ᠳᠠᠯᠠᠢ ᠪᠠᠭᠰᠢ ᠵᠥᠪᠰᠢᠶᠡᠷᠡᠭᠰᠡᠨ ᠭᠡᠨᠡ᠃
ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠮᠠᠨ ᠤ᠋ ᠨᠤᠲᠤᠭ ᠣᠷᠣᠨ ᠳ᠋ᠤ᠌ ᠤᠳᠠᠭᠠᠨ ᠰᠠᠭᠤᠵᠤ᠂ ᠰᠠᠨᠠᠭᠠ ᠪᠠᠨ ᠭᠦᠢᠴᠡᠳᠬᠡᠵᠦ ᠪᠠᠢᠭᠠ ᠬᠡᠷᠡᠭ ᠃ ᠰᠦᠮᠡ ᠳᠤᠭᠠᠩ ᠴᠤ᠌ ᠬᠡᠳᠦ ᠬᠡᠳᠦ ᠶ᠋ᠢ ᠪᠤᠰᠬᠠᠪᠠ᠃
ᠳᠠᠯᠠᠢ ᠪᠠᠭᠰᠢ ᠭᠡᠭᠡᠨᠲᠡᠨ ᠦ᠌ ᠡᠷᠬᠢᠮ ᠦᠢᠯᠡᠰ ᠲᠦ᠍ ᠰᠠᠢᠰᠢᠶᠠᠭᠤᠰᠢᠲᠠᠢ ᠬᠠᠨᠳᠤᠵᠤ᠂ ᠪᠤᠷᠬᠠᠨ ᠤ᠋ ᠱᠠᠪᠢ ᠪᠣᠯᠬᠤ ᠨᠢᠭᠡ ᠵᠠᠭᠤ ᠨᠠᠢ᠍ᠮᠠᠨ ᠬᠥᠪᠡᠭᠦᠨ ᠢ᠋ ᠠᠪᠴᠢᠷᠠᠬᠤ ᠶ᠋ᠢ ᠪᠣᠯᠭᠣᠭᠠᠵᠠᠢ᠃ ᠲᠡᠷᠢᠭᠦᠨ ᠬᠥᠪᠡᠭᠦᠨ ᠨᠢ ᠭᠠᠯᠳᠠᠨ ᠶᠤᠮ ᠪᠠᠢᠨᠠ᠃ ᠭᠠᠯᠳᠠᠨ ᠳ᠋ᠤ᠌ ᠬᠤᠪᠢᠯᠭᠠᠨ ᠲᠥᠷᠬᠦ ᠪᠣᠢ ᠭᠡᠨᠡ᠃ ᠮᠢᠨᠦ ᠰᠡᠳᠬᠢᠯ ᠭᠡᠭᠡᠨᠲᠡᠨ ᠦ᠌ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠶᠡᠬᠡ ᠳᠣᠭᠳᠣᠯᠪᠠ᠃ ᠲᠡᠭᠡᠭᠡᠳ ᠬᠠᠲᠤᠨ ᠲᠠᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠬᠣᠨᠣᠭᠯᠠᠬᠤ ᠪᠠᠷ ᠢᠷᠡᠪᠡ᠃
— ᠭᠠᠯᠳᠠᠨ ᠬᠦᠦ ᠶ᠋ᠢᠨ ᠮᠡᠩᠭᠡ ᠶ᠋ᠢ ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠮᠡᠳᠡᠬᠦ ᠶᠤᠮ᠃ ᠡᠬᠡ ᠡᠴᠡ ᠨᠢ ᠥᠭᠡᠷᠡ ᠬᠥᠮᠦᠨ ᠮᠡᠳᠡᠳᠡᠭ ᠪᠤᠰᠤ ᠤᠤ? ᠬᠥᠪᠡᠭᠡᠨ ᠦ᠌ ᠵᠣᠪᠬᠢ ᠥᠭᠡᠳᠡ ᠪᠡᠨ ᠪᠠᠢᠵᠠᠢ᠃ ᠵᠣᠪᠬᠢ ᠳᠡᠭᠡᠷᠡ ᠪᠡᠨ ᠨᠠᠷᠠ᠂ ᠰᠠᠷᠠ ᠲᠠᠢ ᠶᠤᠮ ᠪᠠᠢᠨᠠ᠃
— ᠬᠠᠲᠤᠨᠲᠠᠨ ᠲᠠ ᠵᠠᠬᠢᠬᠤ ᠵᠦᠢᠯ ᠢ᠋ᠶ᠋ᠡᠨ ᠠᠢᠪᠤᠭᠤ ᠲᠠᠢᠪᠤᠭᠤ ᠬᠡᠯᠡᠨᠡ ᠪᠢᠵᠡ᠃
ᠡᠴᠢᠭᠡ ᠬᠣᠩ ᠲᠠᠢᠵᠢ ᠬᠤᠪᠴᠠᠰᠤ ᠬᠤᠨᠠᠷ ᠢ᠋ᠶ᠋ᠠᠨ ᠬᠥᠩᠭᠡᠯᠡᠵᠦ ᠠᠮᠠᠷᠠᠬᠤ ᠪᠠᠷ ᠬᠡᠪᠲᠡᠭᠰᠡᠨ ᠬᠣᠢᠨᠠ ᠪᠠᠨ ᠬᠠᠲᠤᠨ ᠡᠬᠡ ᠲᠡᠢ ᠤᠳᠠᠭᠠᠨ ᠰᠢᠪᠡᠨᠡᠯᠳᠦᠵᠦ᠂ ᠨᠤᠭᠤ ᠲᠣᠬᠣᠢ ᠳ᠋ᠤ᠌ ᠠᠳᠤᠭᠤ ᠲᠤᠷᠭᠢᠬᠤ᠂ ᠰᠥᠨᠢ ᠶ᠋ᠢᠨ ᠵᠡᠯᠢᠭᠦᠳ ᠲᠠᠯᠠ ᠳ᠋ᠤ᠌ ᠨᠣᠭᠣᠭᠠ ᠰᠣᠭᠰᠣᠯᠵᠠᠬᠤ ᠴᠢᠮᠡᠭᠡ ᠰᠣᠨᠣᠰᠤᠭᠳᠠᠭᠰᠠᠭᠠᠷ ᠪᠠᠢᠬᠤ ᠠᠭᠱᠠᠨ ᠳ᠋ᠤ᠌ ᠭᠠᠢᠬᠠᠮᠰᠢᠭ ᠤ᠋ᠨ ᠰᠢᠳᠢᠲᠦ ᠨᠣᠢᠷ ᠲᠤ᠌ ᠪᠠᠢᠭᠠᠯᠢ ᠳᠡᠯᠡᠬᠡᠢ ᠳᠡᠯᠡᠩᠨᠡᠵᠦ ᠪᠠᠢᠯᠠ᠃ ᠰᠠᠷᠠᠨ ᠤ᠋ ᠭᠡᠷᠡᠯ ᠰᠠᠴᠤᠷᠠᠭᠰᠠᠭᠠᠷ ᠬᠣᠨᠣᠯᠠ᠃ ᠶᠠᠮᠠᠷ ᠭᠡᠭᠡᠨ ᠰᠥᠨᠢ ᠥᠩᠭᠡᠷᠡᠭᠰᠡᠨ ᠭᠡᠵᠦ ᠪᠣᠳᠣᠨᠠ᠃
ᠥᠷᠯᠥᠭᠡ ᠨᠢ ᠭᠠᠯᠳᠠᠨ ᠢ᠋ ᠪᠣᠰᠬᠤ ᠳ᠋ᠤ᠌ ᠡᠴᠢᠭᠡ ᠬᠠᠭᠠᠨ ᠳᠤᠬᠤᠨ ᠳᠡᠭᠡᠷᠡ ᠦᠨᠦᠷᠯᠡᠭᠡᠳ᠂
— ᠮᠢᠨᠦ ᠬᠥᠪᠡᠭᠦᠨ ᠪᠤᠷᠬᠠᠨ ᠤ᠋ ᠱᠠᠪᠢ ᠪᠣᠯᠤᠨᠠ ᠭᠡᠵᠦ ᠬᠡᠯᠡᠪᠡ᠃ ᠲᠡᠭᠡᠬᠦ ᠳ᠋ᠦ᠍ᠨᠢ ᠭᠠᠯᠳᠠᠨ᠂
— ᠪᠤᠷᠬᠠᠨ ᠬᠠᠮᠢᠭᠠ ᠪᠠᠢᠳᠠᠭ ᠪᠣᠯ᠁ ᠭᠡᠵᠦ ᠠᠰᠠᠭᠤᠪᠠ᠃
— ᠪᠤᠷᠬᠠᠨ ᠴᠢᠨᠦ ᠰᠡᠳᠬᠢᠯ ᠳ᠋ᠦ᠍ ᠪᠣᠢ᠁
— ᠰᠡᠩᠭᠡ ᠠᠬᠠ᠂ ᠠᠷᠴᠠ ᠬᠥᠪᠡᠭᠦᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠪᠠᠰᠠ ᠪᠤᠷᠬᠠᠨ ᠪᠣᠢ ᠤᠤ?
— ᠲᠡᠢᠮᠦ ᠠ᠋᠂ ᠪᠤᠷᠬᠠᠨ ᠴᠢᠮᠠᠶ᠋ᠢ ᠳᠠᠭᠤᠳᠠᠵᠤ ᠪᠠᠢᠨᠠ᠂ ᠲᠠᠨᠢᠵᠤ ᠪᠠᠢᠨᠠ᠃ ᠪᠤᠷᠬᠠᠨ ᠪᠤᠷᠬᠠᠨ ᠢ᠋ᠶ᠋ᠠᠨ ᠳᠠᠭᠤᠳᠠᠳᠠᠭ ᠶᠤᠮ᠃ ᠪᠤᠷᠬᠠᠨ ᠪᠣᠯ ᠬᠥᠮᠦᠨ ᠶᠤᠮ᠃ ᠰᠡᠩᠭᠡ ᠠᠬᠠ᠂ ᠠᠷᠴᠠ ᠬᠥᠪᠡᠭᠦᠨ ᠦ᠌ ᠬᠤᠪᠢ ᠵᠠᠶᠠᠭᠠ ᠥᠭᠡᠷᠡ ᠶᠤᠮ᠃
— ᠠᠪᠤ ᠠ᠋᠂ ᠲᠠ ᠥᠪᠡᠷ ᠢ᠋ᠶ᠋ᠡᠨ ᠪᠤᠷᠬᠠᠨ ᠮᠥᠨ ᠤᠤ?
— ᠠᠪᠤ ᠨᠢ ᠪᠤᠷᠬᠠᠨ ᠡᠴᠡ ᠬᠣᠯᠠ ᠪᠠᠢᠳᠠᠭ᠃
— ᠨᠠᠮᠠᠶ᠋ᠢ ᠶᠠᠭᠠᠬᠢᠭᠠᠳ ᠪᠤᠷᠬᠠᠨ ᠳᠠᠭᠤᠳᠠᠳᠠᠭ ᠪᠢᠯᠡ?
— ᠶᠠᠭᠤᠮᠠ ᠴᠠᠭᠠᠨᠠᠠ᠋ᠴᠠ ᠪᠠᠨ ᠤᠴᠢᠷᠲᠠᠢ᠃ ᠴᠢᠮᠠᠶ᠋ᠢ ᠲᠥᠷᠥᠭᠦᠯᠬᠦ ᠶ᠋ᠢᠨ ᠲᠤᠯᠠᠳᠠ ᠶᠦᠮ ᠠᠭᠠ ᠬᠠᠲᠤᠨ ᠡᠬᠡ ᠶ᠋ᠢᠨ ᠬᠡᠪᠡᠯᠢ ᠳ᠋ᠦ᠍ ᠰᠢᠩᠭᠡᠭᠡᠭᠰᠡᠨ ᠶᠤᠮ᠃ ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠪᠤᠷᠬᠠᠨ ᠡᠴᠡ ᠴᠢᠮᠠᠶ᠋ᠢ ᠭᠤᠶᠤᠵᠤ᠂ ᠭᠤᠶᠤᠭᠰᠠᠨ ᠶᠣᠰᠣᠭᠠᠷ ᠪᠤᠷᠬᠠᠨ ᠴᠢᠮᠠᠶ᠋ᠢ ᠢᠯᠡᠭᠡᠭᠰᠡᠨ ᠪᠢᠯᠡ᠃ ᠴᠢ ᠶᠦᠮ ᠠᠭᠠ ᠬᠠᠲᠤᠨ ᠡᠬᠡ ᠶ᠋ᠢᠨ ᠬᠡᠪᠡᠯᠢ ᠡᠴᠡ ᠲᠥᠷᠥᠬᠦ ᠤᠴᠢᠷᠲᠠᠢ ᠪᠠᠢᠵᠠᠢ᠃
ᠨᠢᠭᠡᠨᠲᠡ ᠴᠢ ᠪᠤᠷᠬᠠᠨ ᠤ᠋ ᠡᠮᠴᠢ ᠲᠤᠯᠠ ᠴᠠᠰᠤᠲᠤ ᠲᠥᠪᠡᠳ ᠦ᠋ᠨ ᠣᠷᠣᠨ ᠳ᠋ᠤ᠌ ᠣᠴᠢᠵᠤ ᠨᠣᠮ ᠰᠤᠳᠤᠷ ᠢ᠋ᠶ᠋ᠠᠨ ᠪᠢᠰᠢᠯᠭᠠᠵᠤ ᠰᠠᠭᠤᠬᠤ ᠬᠤᠪᠢ ᠲᠠᠢ᠃ ᠴᠢᠨᠦ ᠰᠠᠭᠤᠳᠠᠯ ᠲᠡᠨᠳᠡ ᠪᠣᠢ᠄ ᠲᠥᠪᠡᠳ ᠦ᠋ᠨ ᠣᠷᠣᠨ ᠳ᠋ᠤ᠌ ᠴᠢᠮᠠᠶ᠋ᠢ ᠯᠠᠮᠠ ᠪᠠᠭᠰᠢ ᠬᠦᠯᠢᠶᠡᠨ ᠠᠪᠤᠨᠠ᠃ ᠬᠥᠪᠡᠭᠦᠨ ᠴᠢ ᠪᠤᠷᠬᠠᠨ ᠤ᠋ ᠱᠠᠪᠢ ᠪᠣᠯᠤᠨᠠ᠃ ᠴᠢᠨᠦ ᠬᠣᠢᠨᠠ ᠡᠴᠡ ᠨᠢᠭᠡ ᠵᠠᠭᠤᠨ ᠳᠣᠯᠣᠭᠠᠨ ᠱᠠᠪᠢ ᠲᠡᠢᠰᠢ ᠮᠣᠷᠢᠯᠠᠨᠠ ᠭᠡᠯᠡ᠃
ᠬᠠᠲᠤᠨ ᠡᠵᠢ ᠲᠡᠳᠡᠨ ᠦ᠌ ᠬᠥᠭᠡᠷᠦᠯᠳᠦᠬᠦ ᠶ᠋ᠢ ᠰᠣᠨᠣᠰᠴᠤ ᠰᠠᠭᠤᠪᠠ᠃ ᠡᠴᠢᠭᠡ ᠬᠣᠩ ᠲᠠᠢᠵᠢ ᠭᠠᠯᠳᠠᠨ ᠢ᠋ ᠪᠤᠷᠬᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠶᠠᠪᠤᠭᠤᠯᠬᠤ ᠪᠠᠷ ᠨᠢᠭᠡᠨᠲᠡ ᠰᠢᠢᠳᠦᠭᠰᠡᠨ ᠪᠠᠢᠯᠠ᠃ ᠲᠡᠷᠡ ᠪᠡᠷ ᠪᠠᠶᠠᠷ ᠲᠠᠢ ᠴᠤ᠌ ᠶᠤᠮ ᠰᠢᠭ᠋᠂ ᠭᠤᠨᠢᠭ ᠲᠠᠢ ᠴᠤ᠌ ᠶᠤᠮ ᠰᠢᠭ᠋ ᠪᠣᠳᠣᠯᠭᠠᠰᠢᠷᠠᠨᠠ᠃ ᠬᠠᠲᠤᠨ ᠡᠵᠢ ᠶ᠋ᠢᠨ ᠰᠡᠳᠬᠢᠯ ᠶᠡᠬᠡᠳᠡ ᠳᠣᠭᠳᠣᠯᠵᠠᠢ᠃ ᠲᠡᠭᠦᠨ ᠦ᠌ ᠳᠠᠭᠤ ᠬᠣᠭᠣᠯᠠᠢ ᠳᠣᠭᠳᠣᠯᠤᠭᠰᠠᠨᠠ᠋ᠴᠠ ᠪᠠᠨ ᠪᠣᠯᠤᠭᠠᠳ ᠶᠠᠯᠢᠭᠦᠢ ᠴᠡᠴᠡᠷᠬᠢᠯᠡᠨᠡ᠃ ᠰᠥᠨᠢ ᠶ᠋ᠢᠨ ᠲᠤᠷᠰᠢ ᠭᠠᠯᠳᠠᠨ ᠤ᠋ ᠲᠤᠬᠠᠢ ᠶᠡᠬᠡ ᠦᠷᠭᠦᠭᠡᠨ ᠳ᠋ᠦ᠍ ᠶᠠᠷᠢᠵᠤ᠂ ᠢᠨᠠᠭ ᠤ᠋ᠨ ᠦᠯᠢᠭᠡᠷ ᠰᠢᠪᠡᠨᠡᠭᠰᠡᠨ ᠢ᠋ ᠭᠠᠯᠳᠠᠨ ᠶᠠᠭᠠᠬᠢᠨ ᠮᠡᠳᠡᠨᠡ᠃
— ᠬᠥᠪᠡᠭᠦᠨ ᠲᠩᠷᠢ ᠤᠭᠰᠠᠭᠠ ᠲᠠᠢ ᠶ᠋ᠢ ᠭᠡᠭᠡᠨᠲᠡᠨ ᠠᠯᠢ ᠬᠡᠳᠦᠢᠨᠡᠢ ᠮᠡᠳᠡᠵᠡᠢ᠃ᠪᠠᠷᠠᠭᠤᠨ ᠵᠡᠭᠦᠨ ᠵᠣᠪᠬᠢ ᠳᠡᠭᠡᠷᠡ ᠨᠢ ᠨᠠᠷᠠ ᠰᠠᠷᠠ ᠲᠠᠢ ᠶᠤᠮ ᠪᠠᠢᠨᠠ᠃ ᠲᠥᠪᠡᠳ ᠦ᠋ᠳ ᠠᠢᠬᠤᠪᠲᠤᠷ ᠬᠥᠮᠦᠰ ᠰᠢᠦ᠃
— ᠶᠠᠮᠠᠷ ᠠᠶᠤᠮᠠᠷ ᠶᠤᠮ ᠪᠣᠢ?
— ᠶᠠᠭᠤᠨ ᠡᠴᠡ ᠠᠶᠤᠬᠤ ᠪᠢᠯᠡ ᠬᠠᠲᠤᠨ ᠮᠢᠨᠢ?
— ᠡᠬᠡ ᠬᠥᠮᠦᠨ ᠴᠢᠨᠢ ᠡᠮᠵᠡᠭ ᠪᠠᠢᠬᠤ ᠶᠤᠮ᠂ ᠠᠶᠤᠬᠤ ᠶᠤᠮ᠃
— ᠭᠠᠯᠳᠠᠨ ᠭᠠᠢᠬᠠᠯᠲᠠᠢ ᠲᠡᠮᠳᠡᠭ ᠲᠡᠢ᠃ ᠲᠡᠷᠡ ᠲᠡᠮᠳᠡᠭ ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠢ᠋ ᠰᠣᠷᠢᠨᠵᠢᠨ ᠮᠡᠲᠦ ᠲᠠᠲᠠᠵᠤ ᠪᠠᠢᠨᠠ᠃
— ᠬᠠᠭᠠᠨ ᠮᠢᠨᠢ᠂ ᠶᠠᠮᠠᠷ ᠲᠡᠮᠳᠡᠭ ᠪᠣᠢ? ᠨᠠᠷᠠ ᠰᠠᠷᠠ ᠬᠣᠶᠠᠷ ᠭᠡᠪᠡ ᠤᠤ ᠁ ᠮᠡᠩᠭᠡ ᠲᠡᠢ ᠶᠤᠮᠰᠠᠨ᠃
— ᠬᠠᠲᠤᠨ ᠲᠠ ᠰᠠᠢᠨ ᠠᠩᠵᠠᠭᠠᠷᠠᠭᠠᠴᠢ᠃
— ᠮᠡᠩᠭᠡ ᠮᠥᠨ᠂ ᠪᠢᠯᠢᠭᠦᠨ ᠤᠬᠠᠭᠠᠨ ᠨᠢ ᠮᠡᠩᠭᠡᠨ ᠳ᠋ᠦ᠍ ᠪᠣᠢ᠃ ᠰᠤᠳᠤᠷ ᠪᠢᠴᠢᠭ ᠲᠦ᠍ ᠮᠥᠨ ᠲᠡᠭᠡᠵᠦ ᠠᠢᠯᠠᠳᠴᠠᠢ᠃ ᠲᠡᠷᠡ ᠮᠡᠩᠭᠡ ᠭᠠᠯᠳᠠᠨ ᠳ᠋ᠤ᠌ ᠣᠷᠣᠰᠢᠵᠠᠢ᠃ ᠲᠥᠪᠡᠳ ᠦᠰᠦᠭ ᠢ᠋ᠶ᠋ᠡᠷ ᠨᠠᠷᠠ ᠰᠠᠷᠠ ᠭᠡᠵᠦ ᠲᠡᠮᠳᠡᠭᠯᠡᠵᠡᠢ᠃
— ᠬᠥᠪᠡᠭᠦᠨ ᠮᠢᠨᠢ ᠠᠵᠠᠲᠠᠢ ᠲᠥᠷᠥᠭᠰᠡᠨ ᠪᠤᠰᠤ ᠤᠤ?
— ᠮᠣᠩᠭᠣᠯᠴᠤᠳ ᠳᠥᠷᠪᠡᠨ ᠨᠢᠳᠦ ᠲᠡᠢ ᠁ ᠭᠡᠮᠡᠨ ᠪᠡᠯᠭᠡᠰᠢᠶᠡᠳᠡᠭ ᠵᠥᠪᠬᠡᠨ ᠳᠡᠭᠡᠷᠡᠬᠢ ᠮᠡᠩᠭᠡ ᠪᠣᠯ ᠢᠷᠦᠭᠡᠯ ᠤᠴᠠᠷᠠᠯ᠂ ᠬᠠᠭᠠᠴᠠᠯ ᠵᠣᠪᠠᠯᠠᠩ ᠤ᠋ᠨ ᠠᠯᠢ ᠠᠯᠢ ᠰᠢᠨᠵᠢ ᠪᠣᠯᠤᠯᠲᠠᠢ᠃ ᠶᠡᠷᠦ ᠨᠢ ᠲᠡᠢᠮᠦ ᠮᠡᠩᠭᠡᠨ ᠳ᠋ᠦ᠍ ᠵᠣᠯᠪᠣᠭᠠ ᠬᠡᠢᠮᠣᠷᠢ ᠣᠷᠣᠰᠢᠨᠠ᠃ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠦ᠋ᠨ ᠴᠢᠨᠠᠳᠤ ᠨᠡᠪᠲᠡᠷᠡᠬᠦ ᠳ᠋ᠦ᠍ ᠵᠣᠪᠬᠢ ᠳᠡᠭᠡᠷᠡᠬᠢ ᠮᠡᠩᠭᠡ ᠬᠠᠷᠠ᠂ ᠴᠠᠭᠠᠨ ᠢ᠋ ᠢᠯᠭᠠᠵᠤ ᠬᠠᠷᠠᠳᠠᠭ᠃
— ᠬᠠᠭᠠᠨᠲᠠᠨ ᠲᠠ ᠨᠠᠳᠠᠳᠤ ᠤᠷᠢᠳᠤ ᠨᠢ ᠶᠠᠷᠢᠳᠠᠭ ᠦᠭᠡᠢ ᠪᠡᠨ ᠶᠠᠷᠢᠳᠠᠭ ᠪᠣᠯᠤᠯᠠ᠃ ᠶᠠᠭᠤ ᠪᠣᠯᠤᠭᠠᠳ ᠪᠠᠢᠨᠠ ᠤᠤ? ᠬᠥᠪᠡᠭᠦᠨ ᠢ᠋ ᠪᠤᠷᠬᠠᠨ ᠱᠠᠪᠢ ᠪᠣᠯᠬᠤ ᠳ᠋ᠤ᠌ ᠪᠢ ᠶᠠᠭᠤᠨ ᠳ᠋ᠤ᠌ ᠲᠠᠲᠠᠭᠠᠯᠵᠠᠨᠠ᠃
— ᠪᠢ ᠭᠠᠯᠳᠠᠨ ᠤ᠋ ᠲᠥᠯᠥᠭᠡ ᠴᠢᠳᠠᠬᠤ ᠠ᠋ᠴᠠ ᠪᠠᠨ ᠴᠢᠳᠠᠬᠤ ᠦᠭᠡᠢ ᠪᠡᠨ ᠬᠦᠷᠲᠡᠯᠡ ᠵᠢᠳᠬᠦᠨᠡ᠃ ᠨᠠᠳᠠᠳᠤ ᠣᠯᠠᠨ ᠬᠥᠪᠡᠭᠦᠨ ᠪᠠᠢᠪᠠᠴᠤ ᠭᠠᠯᠳᠠᠨ ᠳ᠋ᠤ᠌ ᠪᠢ ᠢᠲᠡᠭᠡᠨᠡ᠃ ᠳᠤᠸᠠ ᠰᠣᠬᠣᠷ ᠤ᠋ᠨ ᠤᠳᠤᠮ ᠤᠭᠰᠠᠭᠠ ᠶ᠋ᠢ ᠥᠪᠯᠡᠵᠦ ᠲᠥᠷᠥᠭᠰᠡᠨ ᠨᠢ ᠭᠠᠯᠳᠠᠨ᠃ ᠳᠤᠸᠠ ᠰᠣᠬᠣᠷ ᠬᠥᠮᠦᠨ ᠦ᠌ ᠤᠰᠤᠨ ᠨᠢᠳᠦ ᠦᠵᠡᠭᠡ ᠦᠭᠡᠢ ᠶ᠋ᠢ ᠦᠵᠡᠳᠡᠭ ᠪᠢᠯᠢᠭ ᠦ᠋ᠨ ᠨᠢᠳᠦ ᠲᠡᠢ ᠪᠠᠢᠭᠰᠠᠨ᠃ ᠶᠠᠮᠠᠷ ᠲᠠᠭᠠᠨ ᠳᠤᠸᠠ ᠰᠣᠬᠣᠷ ᠢ᠋ ᠳᠤᠬᠤ ᠶ᠋ᠢᠨ ᠳᠡᠭᠡᠷᠡ ᠪᠡᠨ ᠭᠠᠭᠴᠠ ᠨᠢᠳᠦ ᠲᠡᠢ ᠬᠡᠮᠡᠬᠦ ᠳᠣᠮᠣᠭ ᠦᠯᠡᠳᠡᠬᠦ ᠪᠣᠢ᠃ ᠴᠣᠷᠣᠰ ᠤᠳᠤᠮ ᠤ᠋ᠨ ᠢ᠋ᠶ᠋ᠠᠨ ᠳᠣᠮᠣᠭ ᠢ᠋ ᠭᠠᠯᠳᠠᠨ ᠦᠷᠭᠦᠯᠵᠢᠯᠡᠭᠦᠯᠬᠦ ᠪᠣᠢ᠃
— ᠭᠠᠯᠳᠠᠨ ᠬᠥᠪᠡᠭᠦᠨ ᠳ᠋ᠡᠭᠡᠨ ᠬᠠᠭᠠᠨ ᠲᠠ ᠰᠠᠨᠠᠭᠠ ᠵᠣᠪᠠᠬᠤ ᠨᠢ ᠵᠦᠢ᠃ ᠭᠡᠬᠦ ᠳ᠋ᠡᠭᠡᠨ ᠡᠬᠡ ᠶ᠋ᠢᠨ ᠰᠡᠳᠬᠢᠯ ᠢ᠋ ᠶᠠᠭᠠᠬᠢᠨ ᠭᠦᠢᠴᠡᠬᠦ ᠪᠢᠯᠡ᠃ ᠪᠢ ᠭᠠᠯᠳᠠᠨ ᠳ᠋ᠠᠭᠠᠨ ᠶᠡᠬᠡ ᠬᠠᠢᠷᠠᠲᠠᠢ ᠶᠤᠮ᠃ ᠭᠠᠯᠳᠠᠨ ᠲᠠᠢ ᠴᠣᠭ ᠳᠡᠮᠪᠡᠷᠢᠯ ᠵᠠᠩᠵᠤᠨ ᠤ᠋ ᠬᠥᠪᠡᠭᠦᠨ ᠠᠷᠴᠠ ᠶ᠋ᠢ ᠶᠠᠪᠤᠭᠤᠯᠪᠠᠯ ᠶᠠᠭᠠᠬᠢᠨᠠ᠃ ᠠᠷᠴᠠ ᠪᠠᠰᠠ ᠯᠠᠮᠠ ᠪᠣᠯᠤᠭ᠃ ᠬᠥᠪᠡᠭᠦᠳ ᠲᠣᠭᠯᠠᠵᠤ ᠨᠠᠭᠠᠳᠤᠭᠠᠳ ᠨᠢᠭᠡ ᠨᠢᠭᠡᠨ ᠳ᠋ᠡᠭᠡᠨ ᠬᠠᠨᠢ ᠲᠠᠢ ᠪᠤᠰᠤ ᠤᠤ?
— ᠵᠠᠭᠤᠨ ᠨᠠᠢ᠍ᠮᠠᠨ ᠬᠥᠪᠡᠭᠦᠨ ᠦ᠌ ᠲᠣᠭᠠᠨ ᠳ᠋ᠤ᠌ ᠠᠷᠴᠠ ᠶ᠋ᠢ ᠣᠷᠣᠭᠤᠯᠵᠤ ᠪᠣᠯᠬᠤ ᠶᠤᠮ᠃ ᠭᠡᠬᠦ ᠳ᠋ᠡᠭᠡᠨ ᠳᠡᠮᠪᠡᠷᠢᠯ᠂ ᠪᠥᠭᠡᠷᠡ ᠬᠣᠶᠠᠷ ᠮᠡᠳᠡᠬᠦ ᠪᠣᠢ ᠊ᠶᠠ᠃ ᠪᠥᠭᠡᠷᠡ ᠡᠬᠡᠨᠡᠷ ᠠᠷᠴᠠ ᠶ᠋ᠢ ᠪᠤᠷᠬᠠᠨ ᠠ᠋ᠴᠠ ᠴᠤ᠌ ᠬᠠᠷᠠᠮᠯᠠᠵᠤ ᠪᠠᠢᠬᠤ ᠰᠢᠦ᠃ ᠡᠨᠡ ᠶᠠᠷᠢᠶᠠ ᠶ᠋ᠢ ᠲᠦᠷ ᠤᠷᠭᠢᠶᠠ ᠁ ᠭᠠᠯᠳᠠᠨ ᠢ᠋ ᠲᠥᠷᠥᠭᠰᠡᠨ ᠡᠴᠡ ᠬᠣᠢᠰᠢ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠳᠤ ᠶᠡᠬᠡ ᠥᠭᠡᠷᠡᠴᠢᠯᠡᠯᠲᠡ ᠭᠠᠷᠪᠠ᠃ ᠬᠥᠪᠡᠭᠦᠨ ᠶᠡᠷᠦ ᠡᠴᠡ ᠬᠤᠷᠠ ᠳᠠᠭᠠᠭᠤᠯᠵᠤ᠂ ᠰᠣᠯᠣᠩᠭᠠ ᠳᠠᠭᠠᠭᠤᠯᠵᠤ᠂ ᠯᠤᠤᠰ ᠪᠠᠶᠠᠰᠬᠠᠵᠤ ᠲᠥᠷᠥᠭᠰᠡᠨ ᠪᠤᠰᠤ ᠤᠤ ᠁ ᠴᠠᠭᠠᠨ ᠢᠷᠪᠢᠰ ᠴᠠᠬᠢᠯᠠᠵᠤ ᠦᠵᠡᠭᠳᠡᠭᠰᠡᠨ ᠪᠤᠰᠤ ᠤᠤ ᠁ ᠢᠷᠪᠢᠰ ᠲᠡᠢ ᠴᠣᠭ ᠣᠳᠤᠭᠰᠠᠨ ᠪᠤᠰᠤ ᠤᠤ ᠁
ᠶᠥᠮ ᠠᠭᠠ ᠬᠠᠲᠤᠨ ᠤ᠋ ᠨᠢᠭᠤᠷ ᠴᠢᠷᠠᠢ ᠰᠢᠩᠭᠡᠷᠡᠵᠦ ᠨᠢᠯᠬᠠᠷᠠᠭᠠᠳ ᠬᠣᠩ ᠲᠠᠢᠵᠢ ᠶ᠋ᠢᠨ ᠭᠦᠵᠢᠷᠮᠡᠭ ᠬᠠᠲᠠᠭᠤ ᠠᠷᠠᠨᠰᠢᠨ ᠢ᠋ ᠵᠥᠭᠡᠯᠡᠷᠡᠭᠦᠯᠵᠦ ᠬᠣᠨᠣᠭᠰᠠᠨ ᠪᠠᠢᠪᠠ᠃ ᠬᠣᠩ ᠲᠠᠢᠵᠢ ᠥᠷᠥᠮᠡ ᠲᠡᠢ ᠴᠠᠢ ᠤᠤᠭᠤᠵᠤ ᠰᠠᠭᠤᠬᠤ ᠳ᠋ᠠᠭᠠᠨ《ᠶᠥᠮ ᠠᠭᠠ ᠪᠣᠯ ᠤᠭᠰᠠᠭᠠ ᠭᠠᠷᠪᠠᠯᠢ ᠰᠠᠢᠲᠠᠢ ᠡᠮᠡᠭᠲᠡᠢ᠃ ᠶᠥᠮ ᠠᠭᠠ ᠬᠠᠲᠤᠨ ᠠ᠋ᠴᠠ ᠲᠥᠷᠥᠭᠰᠡᠨ ᠰᠡᠩᠭᠡ᠂ ᠭᠠᠯᠳᠠᠨ ᠬᠣᠶᠠᠷ ᠳᠤ ᠢᠯᠡᠭᠦᠦ ᠨᠠᠢᠳᠠᠨᠠ᠃ ᠰᠡᠩᠭᠡ ᠪᠣᠯᠪᠠᠰᠤ ᠶᠠᠭᠤᠮᠠ ᠶ᠋ᠢ ᠭᠦᠢᠴᠡᠭᠡᠵᠦ ᠪᠣᠳᠣᠬᠤ ᠳ᠋ᠠᠭᠠᠨ ᠰᠠᠢᠨ ᠬᠠᠷᠠ ᠰᠠᠨᠠᠭᠠ ᠪᠠᠭᠠ ᠲᠠᠢ ᠰᠠᠨᠠᠭᠳᠠᠨᠠ᠃ ᠬᠠᠭᠠᠨ ᠬᠥᠮᠦᠨ ᠳᠠᠪᠬᠤᠷ ᠳᠠᠯᠳᠠ ᠰᠠᠨᠠᠭᠠ ᠲᠠᠢ ᠪᠠᠢᠪᠠᠯ ᠣᠯᠠᠨ ᠤ᠋ ᠲᠤᠰᠠ ᠶ᠋ᠢᠨ ᠲᠤᠯᠠᠳᠠ ᠶᠡᠬᠡ ᠦᠢᠯᠡ ᠬᠢᠨᠡ᠃ ᠭᠦᠶᠦᠮᠡᠭ᠂ ᠬᠥᠩᠭᠡᠨ ᠰᠠᠨᠠᠭᠠ ᠲᠠᠢ ᠪᠣᠯ ᠠᠯᠳᠠᠭᠠ ᠣᠯᠠᠨ ᠭᠠᠷᠤᠨᠠ᠃ ᠰᠡᠩᠭᠡ ᠶᠠᠪᠤᠭᠠᠨ ᠳ᠋ᠠᠭᠠᠨ ᠬᠠᠭᠠᠨ ᠣᠷᠣ ᠰᠠᠭᠤᠬᠤ ᠲᠤᠯᠠ ᠡᠷᠲᠡᠨ ᠡᠴᠡ ᠤᠬᠠᠭᠠᠨ ᠵᠢᠭᠠᠬᠤ ᠬᠡᠷᠡᠭᠲᠡᠢ》 ᠭᠡᠵᠦ ᠪᠣᠳᠣᠯᠬᠢᠯᠠᠨᠠ᠃ ᠶᠥᠮ ᠠᠭᠠ《ᠡᠨᠡ ᠬᠣᠩ ᠲᠠᠢᠵᠢ ᠨᠢᠭᠡᠯᠡ ᠵᠥᠭᠡᠯᠡᠨ ᠡᠶᠡᠷᠡᠭᠦᠨ ᠵᠠᠩ ᠲᠠᠢ ᠪᠠᠢᠬᠤ ᠴᠢᠨᠢ᠃ ᠰᠡᠳᠬᠢᠯ ᠨᠢ ᠪᠠᠷᠤᠭᠲᠠᠢ ᠳ᠋ᠤ᠌ ᠢᠩᠭᠢᠵᠦ ᠨᠢᠯᠬᠠᠷᠠᠵᠤ ᠪᠠᠢᠳᠠᠭ ᠦᠭᠡᠢ ᠶᠤᠮᠰᠠᠨ᠃ ᠨᠠᠳᠠ ᠠ᠋ᠴᠠ ᠬᠣᠯᠠᠳᠤᠭᠠᠳ ᠤᠳᠠᠭᠠ ᠦᠭᠡᠢ ᠴᠦ᠍ ᠶᠡᠬᠡ ᠦᠷᠭᠦᠭᠡᠨ ᠳ᠋ᠡᠭᠡᠨ ᠮᠣᠷᠢᠯᠠᠵᠤ ᠳᠠᠭᠠᠯᠠᠬᠤ ᠨᠢ ᠨᠢᠭᠡᠯᠡ ᠶᠡᠷᠦ ᠪᠤᠰᠤ ᠶ᠋ᠢᠨ ᠪᠠᠢᠬᠤ ᠶᠤᠮ》 ᠭᠡᠮᠡᠨ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠤ᠋ ᠭᠦᠵᠢᠷ ᠴᠢᠷᠠᠢ ᠶ᠋ᠢ ᠬᠠᠷᠠᠨ ᠪᠠᠢᠵᠤ ᠰᠠᠨᠠᠭᠠᠰᠢᠷᠠᠨᠠ᠃
ᠠᠷᠪᠠᠨ ᠨᠠᠢ᠍ᠮᠠ
ᠠᠭᠤᠯᠠᠨ ᠡᠴᠡ ᠡᠬᠢ ᠠᠪᠤᠭᠰᠠᠨ ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠴᠢᠯᠠᠭᠤᠨ ᠡᠴᠡ ᠪᠤᠯᠭᠢᠨ ᠴᠢᠯᠠᠭᠤ ᠳᠣᠯᠢᠶᠠᠵᠤ ᠬᠦᠷᠬᠢᠷᠡᠨᠡ᠃ ᠬᠠᠷᠠ ᠡᠷᠴᠢᠰ ᠦ᠋ᠨ ᠬᠥᠪᠡᠭᠡᠨ ᠳ᠋ᠦ᠍ ᠴᠣᠷᠣᠰ ᠣᠪᠣᠭ ᠤ᠋ᠨ ᠬᠣᠲᠠ ᠬᠦᠷᠢᠶᠡ ᠬᠥᠯ ᠳ᠋ᠦ᠍ ᠳᠠᠷᠤᠭᠳᠠᠵᠠᠢ᠃ ᠲᠠᠰᠢᠭᠤ ᠵᠠᠬᠠ ᠲᠠᠢ᠂ ᠥᠷᠭᠡᠨ ᠡᠮᠵᠢᠶᠡᠷᠢ ᠲᠡᠢ ᠳᠡᠪᠡᠯ ᠡᠮᠦᠰᠦᠭᠰᠡᠨ ᠴᠡᠴᠡᠨ᠂ ᠵᠣᠳᠪᠠ ᠲᠡᠷᠢᠭᠦᠲᠡᠢ ᠠᠬᠠ ᠨᠠᠷ ᠨᠢ ᠠᠯᠤᠰ ᠬᠣᠯᠠ ᠶ᠋ᠢᠨ ᠴᠠᠰᠤᠲᠤ ᠲᠥᠪᠡᠳ ᠦ᠋ᠨ ᠣᠷᠣᠨ ᠳ᠋ᠤ᠌ ᠵᠣᠷᠢᠨ ᠮᠣᠷᠳᠠᠬᠤ ᠪᠠᠷ ᠵᠡᠬᠡᠵᠦ ᠪᠣᠢ ᠭᠠᠯᠳᠠᠨ ᠢ᠋ ᠠᠵᠢᠨᠠ᠃ ᠭᠡᠭᠡᠨᠲᠡᠨ ᠦ᠌ ᠳᠠᠭᠠᠯᠲᠠ ᠠᠴᠢᠶᠠ ᠬᠥᠰᠬᠡ ᠬᠡᠳᠦᠢᠨ ᠬᠥᠳᠡᠯᠵᠡᠢ᠃ ᠪᠤᠷᠬᠠᠨ ᠤ᠋ ᠣᠷᠣᠨ ᠪᠤᠳᠠᠯᠠᠩ ᠬᠡᠢᠳ ᠢ᠋ ᠰᠡᠷᠭᠦᠭᠡᠨ ᠵᠠᠰᠠᠬᠤ ᠨᠦᠰᠡᠷ ᠠᠵᠢᠯ ᠳ᠋ᠤ᠌ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠨᠢᠭᠡ ᠵᠠᠭᠤᠨ ᠠᠷᠪᠠᠨ ᠲᠠᠪᠤᠨ ᠮᠢᠩᠭᠠᠨ ᠯᠠᠩ ᠮᠥᠩᠭᠥ ᠬᠠᠨᠳᠢᠪᠯᠠᠭᠰᠠᠨ ᠨᠢ ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠪᠣᠯᠤᠨ ᠭᠠᠯᠳᠠᠨ ᠬᠥᠪᠡᠭᠦᠨ ᠦ᠌ ᠬᠥᠰᠬᠡ ᠲᠡᠷᠭᠡ ᠳ᠋ᠦ᠍ ᠠᠴᠢᠭᠳᠠᠵᠠᠢ᠃ ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠦ᠌ ᠮᠥᠷᠭᠥᠯ ᠦ᠋ᠨ ᠬᠥᠮᠦᠰ ᠡᠴᠡ ᠴᠠᠩ ᠬᠡᠩᠭᠡᠷᠭᠡ᠂ ᠬᠣᠩᠬᠣ ᠳᠠᠮᠠᠷᠤ᠂ ᠪᠦᠷᠢᠶᠡ ᠪᠢᠰᠬᠢᠭᠦᠷ ᠦ᠋ᠨ ᠳᠠᠭᠤ ᠴᠢᠬᠢᠨ ᠳ᠋ᠦ᠍ ᠬᠠᠲᠠᠵᠤ ᠪᠠᠢᠯᠠ᠃ ᠲᠡᠷᠡ ᠰᠥᠨᠢ ᠡᠴᠢᠭᠡ ᠬᠣᠩ ᠲᠠᠢᠵᠢ ᠬᠠᠲᠤᠨ ᠡᠬᠡ ᠲᠡᠢ ᠰᠢᠪᠡᠨᠡᠯᠳᠦᠵᠦ ᠬᠣᠨᠣᠭᠰᠠᠨ ᠡᠴᠡ ᠬᠣᠢᠰᠢ ᠭᠠᠯᠳᠠᠨ ᠤ᠋ ᠬᠤᠪᠢ ᠵᠠᠶᠠᠭᠠ ᠣᠷᠪᠣᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠡᠷᠭᠢᠵᠦ ᠪᠢᠯᠡ᠃ ᠬᠠᠷᠢᠨ ᠠᠷᠪᠠᠭᠠᠳ ᠵᠢᠯ ᠦ᠋ᠨ ᠳᠠᠷᠠᠭᠠ ᠡᠨᠡ ᠬᠦ᠌ ᠲᠤᠤᠯᠢ ᠲᠡᠮᠳᠡᠭᠯᠡᠯ ᠢ᠋ᠶ᠋ᠡᠨ ᠬᠥᠲᠥᠯᠬᠦ ᠳ᠋ᠦ᠍ ᠲᠡᠷᠡ ᠦᠶᠡ ᠶ᠋ᠢᠨ ᠪᠦᠬᠦ ᠵᠦᠢᠯ ᠭᠠᠯᠳᠠᠨ ᠤ᠋ ᠨᠢᠳᠦᠨ ᠳ᠋ᠦ᠍ ᠬᠠᠷᠠᠭᠳᠠᠵᠤ ᠪᠠᠢᠪᠠ᠃ ᠨᠢᠳᠦᠨ ᠦ᠌ ᠣᠢ ᠲᠣᠭᠲᠠᠭᠠᠯ ᠳ᠋ᠤ᠌ ᠭᠣᠢᠳᠠ ᠭᠡᠳᠡᠭ ᠢ᠋ᠶ᠋ᠡᠨ ᠣᠢᠯᠠᠭᠠᠪᠠ᠃ ᠡᠬᠡ ᠶᠦᠮ ᠠᠭᠠ ᠬᠠᠲᠤᠨ ᠭᠠᠯᠳᠠᠨ ᠤ᠋ ᠬᠥᠬᠥᠯ ᠢ᠋ ᠢᠯᠢᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠣᠬᠢᠷᠤᠨ ᠰᠠᠭᠤᠵᠤ᠂
— ᠬᠥᠪᠡᠭᠦᠨ ᠮᠢᠨᠢ᠁ ᠨᠢᠯᠬᠠ ᠠᠮᠢᠲᠠᠨ ᠮᠢᠨᠢ᠁ ᠭᠡᠳ ᠲᠤᠩᠭᠠᠯᠠᠭ ᠨᠢᠯᠪᠤᠰᠤ ᠳᠤᠬᠤᠨ ᠳᠡᠭᠡᠷᠡ ᠤᠨᠠᠭᠠᠪᠠ᠃
ᠡᠵᠢ ᠶ᠋ᠢᠨ ᠨᠢᠯᠪᠤᠰᠤ ᠳᠤᠬᠤ ᠤᠷᠤᠭᠤ ᠨᠢ ᠤᠷᠤᠰᠪᠠ᠃ ᠨᠢᠯᠪᠤᠰᠤ ᠪᠦᠯᠢᠶᠡᠨ ᠪᠠᠢᠪᠠ᠃ ᠭᠠᠯᠳᠠᠨ ᠤ᠋ ᠳᠤᠬᠤ᠂ ᠬᠠᠴᠠᠷ᠂ ᠤᠷᠤᠭᠤᠯ ᠳ᠋ᠤ᠌ ᠲᠡᠷᠡ ᠬᠦ᠌ ᠪᠦᠯᠢᠶᠡᠨ ᠨᠢᠯᠪᠤᠰᠤ ᠰᠢᠩᠭᠡᠪᠡ᠃ ᠤᠷᠤᠭᠤᠯ ᠢ᠋ᠶ᠋ᠠᠨ ᠰᠢᠯᠡᠮᠡᠳᠡᠬᠦ ᠳ᠋ᠦ᠍ ᠶᠠᠯᠢᠭᠦᠢ ᠱᠣᠷᠪᠣᠭ ᠠᠮᠲᠠᠯᠠᠭᠳᠠᠭᠰᠠᠨ ᠨᠢ ᠨᠢᠯᠪᠤᠰᠤᠨ ᠤ᠋ ᠠᠮᠲᠠ ᠪᠠᠢᠵᠠᠢ᠃ ᠡᠬᠡ ᠶ᠋ᠢᠨ ᠨᠢᠯᠪᠤᠰᠤ ᠭᠠᠯᠳᠠᠨ ᠢ᠋ ᠤᠬᠢᠶᠠᠪᠠ᠃ ᠡᠬᠡ ᠶ᠋ᠢᠨ ᠨᠢᠯᠪᠤᠰᠤᠨ ᠤ᠋ ᠠᠮᠲᠠ ᠶ᠋ᠢ ᠬᠡᠳᠦᠢ ᠳ᠋ᠦ᠍ ᠭᠦᠢᠴᠡᠳ ᠮᠡᠳᠡᠷᠡᠬᠦ ᠪᠣᠯ᠁
ᠭᠠᠯᠳᠠᠨ ᠳ᠋ᠤ᠌ ᠺᠢᠷᠭᠢᠽ ᠮᠠᠶᠢᠭ ᠤ᠋ᠨ ᠵᠢᠤᠵᠠ ᠲᠡᠷᠭᠡ ᠪᠡᠯᠡᠳᠬᠡᠵᠡᠢ᠃ ᠦᠨᠡᠨ ᠳ᠋ᠡᠭᠡᠨ ᠲᠡᠭᠦᠨ ᠳ᠋ᠦ᠍ ᠵᠢᠤᠵᠠ ᠲᠡᠷᠭᠡᠨ ᠳ᠋ᠦ᠍ ᠰᠠᠭᠤᠬᠤ ᠬᠦᠰᠡᠯ ᠪᠠᠢᠭᠰᠠᠨ ᠦᠭᠡᠢ᠃ ᠬᠥᠲᠥᠴᠢ ᠲᠠᠢᠭᠠᠨ ᠨᠦᠰᠡᠷ ᠬᠦᠨᠳᠦ ᠶᠤᠮ ᠰᠢᠭ ᠵᠢᠤᠵᠠ ᠲᠡᠷᠭᠡᠨ ᠦ᠌ ᠳᠡᠷᠭᠡᠳᠡ ᠵᠣᠭᠰᠣᠨᠠ᠃
ᠡᠬᠡ ᠬᠠᠲᠤᠨ᠂
— ᠦᠷᠡ ᠮᠢᠨᠢ ᠭᠡᠵᠦ ᠰᠢᠪᠡᠨᠡᠪᠡ᠂ ᠡᠴᠢᠭᠡ ᠬᠠᠭᠠᠨ ᠭᠠᠯᠳᠠᠨ ᠢ᠋ ᠰᠡᠪᠬᠡᠢᠲᠡᠯᠡ ᠡᠷᠭᠦᠵᠦ᠂
— ᠬᠥᠪᠡᠭᠦᠨ ᠮᠢᠨᠢ ᠪᠤᠷᠬᠠᠨ ᠤ᠋ ᠡᠯᠴᠢ ᠪᠣᠯᠤᠯᠠ ᠭᠡᠳ ᠬᠠᠩᠬᠠᠢᠲᠠᠯᠠ ᠰᠠᠨᠠᠭᠠ ᠠᠯᠳᠠᠪᠠ᠃ ᠪᠣᠬᠢᠷᠴᠤ ᠰᠠᠭᠤᠭᠰᠠᠨ ᠶᠦᠮ ᠠᠭᠠ ᠡᠬᠡ ᠨᠢ ᠲᠤᠩᠭᠠᠯᠠᠭ ᠳᠤᠯᠠᠭᠠᠨ ᠬᠠᠷᠠᠴᠠ ᠢᠯᠡᠭᠡᠵᠦ᠂
— ᠡᠵᠢ ᠨᠢ ᠬᠦᠦ ᠪᠡᠨ ᠰᠠᠨᠠᠨᠠ᠃ ᠴᠢ ᠡᠵᠢ ᠪᠡᠨ ᠰᠠᠨᠠᠪᠠᠯ ᠡᠨᠡ ᠴᠢᠯᠠᠭᠤ ᠶ᠋ᠢ ᠳᠡᠷᠡ ᠶ᠋ᠢᠨ ᠳᠣᠣᠷᠠ ᠪᠠᠨ ᠬᠢᠵᠦ ᠤᠨᠲᠠᠭᠠᠷᠠᠢ᠃ ᠡᠵᠢ ᠨᠢ ᠴᠢᠨᠦ ᠵᠡᠭᠦᠳᠦ ᠶ᠋ᠢ ᠮᠡᠨᠡᠨᠡ᠃ ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠦ᠌ ᠴᠢᠯᠠᠭᠤ ᠪᠠᠢᠭᠠ ᠶᠤᠮ᠃ ᠡᠨᠡ ᠮᠥᠷᠡᠨ ᠦ᠌ ᠤᠰᠤ ᠪᠠᠷ ᠤᠬᠢᠶᠠᠵᠤ᠂ ᠴᠢᠯᠠᠭᠤ ᠪᠠᠷ ᠴᠢ ᠲᠣᠭᠯᠠᠵᠤ ᠥᠰᠦᠭᠰᠡᠨ ᠰᠢᠦ ᠳᠡ ᠭᠡᠪᠡ᠃ ᠡᠴᠢᠭᠡ ᠬᠣᠩ ᠲᠠᠢᠵᠢ᠂
— ᠴᠢ ᠡᠷᠡ ᠬᠥᠮᠦᠨ᠃ ᠡᠬᠢᠯᠡᠭᠡᠳ ᠪᠤᠷᠬᠠᠨ ᠳ᠋ᠠᠭᠠᠨ ᠣᠢᠷᠠᠲᠤ᠃ ᠴᠢᠮᠠ ᠳ᠋ᠤ᠌ ᠵᠣᠷᠢᠭ ᠲᠡᠪᠴᠢᠶᠡᠷᠢ ᠶ᠋ᠢ ᠪᠤᠷᠬᠠᠨ ᠥᠭᠭᠦᠨᠡ᠃ ᠪᠢ ᠬᠥᠪᠡᠭᠦᠨ ᠴᠢᠮᠠᠶ᠋ᠢ ᠪᠤᠷᠬᠠᠨ ᠤ᠋ ᠡᠯᠴᠢ ᠪᠣᠯᠭᠠᠬᠤ ᠪᠠᠷ ᠲᠥᠪᠡᠳ ᠤᠷᠤᠭᠤ ᠢᠯᠡᠭᠡᠵᠦ ᠪᠠᠢᠨᠠ᠃᠃᠂᠂᠂᠂᠂᠂᠂ ᠪᠤᠷᠬᠠᠯᠢᠭ ᠪᠣᠯᠤᠭᠠᠳ ᠢᠷᠡᠭᠡᠷᠡᠢ ᠭᠡᠵᠦ ᠳᠠᠬᠢᠭᠠᠳ ᠬᠣᠶᠠᠷ ᠭᠠᠷ ᠳᠡᠭᠡᠷᠡ ᠪᠡᠨ ᠡᠷᠭᠦᠪᠡ᠃
ᠡᠴᠢᠭᠡ ᠬᠣᠩ ᠲᠠᠢᠵᠢ ᠭᠠᠯᠳᠠᠨ ᠡᠴᠡ ᠬᠣᠯᠠᠳᠬᠤ ᠲᠤᠩ ᠳᠤᠷᠠ ᠦᠭᠡᠢ ᠪᠠᠢᠭᠠ ᠶ᠋ᠢ ᠲᠡᠷᠡ ᠮᠡᠳᠡᠪᠡ᠃ ᠨᠢᠭᠡᠨᠲᠡ ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠦ᠌ ᠠᠰᠠᠷᠠᠮᠵᠢ ᠳ᠋ᠤ᠌ ᠲᠥᠪᠡᠳ ᠲᠦ᠍ ᠶᠠᠪᠤᠭᠤᠯᠬᠤ ᠪᠣᠯᠤᠭᠰᠠᠨ ᠠᠲᠠᠯᠠ ᠪᠠᠨ ᠶᠠᠭᠤᠨ ᠳ᠋ᠤ᠌ ᠢᠩᠭᠡᠳᠡᠯᠡ ᠰᠠᠯᠵᠤ ᠶᠠᠳᠠᠪᠠ᠃ ᠬᠥᠮᠦᠨ ᠦ᠌ ᠬᠣᠯᠪᠣᠭᠠ ᠡᠴᠢᠭᠡ ᠶ᠋ᠢ ᠴᠢᠩᠭᠠᠳᠬᠠᠬᠤ ᠪᠠᠢᠵᠠᠢ᠃ ᠡᠴᠢᠭᠡ ᠬᠣᠩ ᠲᠠᠢᠵᠢ ᠭᠠᠯᠳᠠᠨ ᠢ᠋ ᠵᠥᠪ ᠵᠠᠮ ᠳ᠋ᠤ᠌ ᠣᠷᠣᠭᠤᠯᠪᠠ ᠭᠡᠳᠡᠭ ᠲᠡᠭᠡᠨ ᠡᠷᠡᠭᠡᠯᠵᠡᠭᠰᠡᠨ ᠬᠡᠷᠡᠭ᠃
ᠤᠴᠢᠷ ᠶᠠᠭᠤᠨ ᠬᠡᠮᠡᠪᠡᠯ ᠭᠠᠯᠳᠠᠨ ᠳᠡᠩᠳᠡᠭᠦᠦ ᠪᠠᠯᠴᠢᠷ ᠪᠠᠢᠭᠰᠠᠨ ᠶᠤᠮ᠃ ᠵᠢᠷᠭᠤᠭᠠᠬᠠᠨ ᠨᠠᠰᠤᠲᠠᠢ ᠬᠥᠪᠡᠭᠦᠨ ᠬᠠᠪᠴᠢᠶᠠᠬᠠᠢ ᠨᠤᠮᠤ ᠰᠤᠮᠤ᠂ ᠠᠭᠠᠷ ᠬᠥᠭᠯᠡᠳᠡᠭ ᠲᠣᠪᠰᠢᠭᠤᠷ᠂ ᠳᠥᠷᠪᠡᠨ ᠪᠡᠷᠬᠡ ᠪᠡᠨ ᠣᠷᠬᠢᠭᠠᠳ ᠲᠥᠪᠡᠳ ᠲᠦ᠍ ᠶᠠᠪᠤᠵᠠᠢ᠃ ᠬᠡᠦᠬᠡᠳ ᠨᠠᠰᠤ ᠶ᠋ᠢ ᠨᠢ ᠲᠠᠰᠤᠷ ᠲᠠᠲᠠᠵᠤ᠂ ᠴᠡᠴᠡᠭ ᠦ᠋ᠨ ᠪᠤᠳᠠᠩ ᠳᠤᠮᠳᠠᠭᠤᠷ ᠰᠢᠩᠭᠡᠭᠰᠡᠨ ᠴᠠᠭᠠᠨ ᠢᠷᠪᠢᠰ ᠲᠡᠢ ᠳᠣᠮᠣᠭ ᠪᠣᠯᠭᠠᠵᠠᠢ᠃ ᠴᠠᠭᠠᠨ ᠢᠷᠪᠢᠰ ᠦ᠋ᠨ ᠳᠣᠮᠣᠭ ᠬᠡᠳᠦᠢ ᠳ᠋ᠦ᠍ ᠲᠡᠭᠦᠰᠬᠦ ᠶ᠋ᠢ ᠬᠡᠨ ᠴᠣ ᠦᠯᠦ ᠮᠡᠳᠡᠨᠡ᠃ ᠭᠠᠯᠳᠠᠨ ᠳ᠋ᠤ᠌ ᠲᠡᠭᠦᠰᠬᠡᠯ ᠦᠭᠡᠢ ᠪᠣᠳᠣᠯ ᠦᠯᠡᠳᠡᠵᠡᠢ᠃ ᠴᠡᠴᠡᠭ ᠦ᠋ᠨ ᠪᠣᠳᠣᠩ ᠳᠤᠮᠳᠠ ᠴᠠᠭᠠᠨ ᠢᠷᠪᠢᠰ ᠦᠯᠡᠲᠡᠯᠡ᠃
ᠠᠷᠪᠠ ᠶᠢᠰᠦ
ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠨᠠᠮᠬᠠᠢᠵᠠᠮᠰᠣ ᠬᠤᠪᠢᠯᠭᠠᠨ ᠪᠣᠯ ᠪᠣᠰᠤᠭᠠ ᠭᠣᠵᠣᠭᠣᠷ ᠨᠢᠭᠤᠷ ᠲᠠᠢ᠂ ᠤᠷᠲᠤ ᠡᠷᠡᠦ ᠲᠡᠢ᠂ ᠳᠡᠯᠪᠢᠭᠡ ᠲᠣᠮᠣ ᠭᠤᠷᠪᠠᠯᠵᠢᠨ ᠴᠢᠬᠢ ᠲ ᠢ᠂ ᠴᠡᠭᠡᠵᠢ ᠨᠢ ᠰᠢᠪᠠᠭᠤᠨ ᠤ᠋ ᠬᠢ ᠯᠤᠭᠠ ᠠᠳᠠᠯᠢ ᠬᠠᠪᠴᠢᠭ᠂ ᠨᠢᠳᠦ ᠪᠣᠷᠣ᠂ ᠵᠣᠪᠬᠢ ᠴᠡᠯᠬᠡᠭᠡᠷ ᠬᠥᠮᠦᠨ ᠪᠠᠢᠯᠠ᠃ ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠡᠬᠡ ᠶᠦᠮ ᠠᠭᠠ ᠬᠠᠲᠤᠨ ᠳ᠋ᠤ᠌᠂
— ᠬᠥᠪᠡᠭᠦᠨ ᠪᠠᠭᠠ ᠪᠠᠯᠴᠢᠷ ᠪᠣᠯᠪᠠᠴᠤ ᠱᠠᠪᠢᠯᠠᠨ ᠰᠠᠭᠤᠬᠤ ᠭᠠᠵᠠᠷ ᠨᠢ ᠪᠤᠷᠬᠠᠳ ᠤ᠋ᠨ ᠣᠷᠣᠨ ᠲᠤᠯᠠ ᠳᠠᠷᠤᠢ ᠠᠶᠠᠭᠠᠴᠢ ᠯᠠᠮᠠ ᠲᠠᠢ ᠪᠣᠯᠵᠤ ᠲᠣᠬᠢᠶᠠᠨᠠ᠃ ᠳᠠᠯᠠᠢ ᠯᠠᠮᠠ᠂ ᠪᠠᠨᠴᠢᠨ ᠪᠣᠭᠳᠠ ᠬᠣᠶᠠᠷ ᠬᠥᠪᠡᠭᠦᠨ ᠢ᠋ ᠳᠡᠷᠭᠡᠳᠡ ᠪᠡᠨ ᠠᠪᠤᠨᠠ᠃ ᠲᠡᠳᠡᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠨᠣᠮ ᠡᠷᠳᠡᠮ ᠰᠤᠷᠬᠤ ᠪᠠᠷ ᠣᠴᠢᠬᠤ ᠳ᠋ᠤ᠌ ᠣᠷᠴᠢᠨ ᠲᠣᠭᠣᠷᠢᠨ ᠨᠠᠮ ᠭᠦᠮ᠂ ᠬᠦᠨᠳᠦᠳᠬᠡᠯ ᠭᠦᠨᠵᠡᠭᠡᠢ᠂ ᠶᠣᠰᠣ ᠭᠣᠷᠢᠮ ᠴᠢᠩᠭᠠ ᠪᠠᠢᠬᠤ ᠪᠣᠯᠤᠨᠠ᠃ ᠬᠠᠲᠤᠨᠲᠠᠨ ᠳᠠᠭᠠᠭᠠᠮᠠᠢ ᠭᠡᠭᠡᠯᠵᠡᠭᠡᠳ ᠪᠠᠢᠪᠠᠯ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠡᠷᠭᠢᠵᠦ ᠲᠣᠭᠣᠷᠢᠨᠠ ᠪᠢᠵᠡ᠃ ᠬᠥᠪᠡᠭᠦᠨ ᠦ᠌ ᠮᠥᠷ ᠴᠠᠭᠠᠨ᠂ ᠦᠢᠯᠡ ᠶ᠋ᠢᠨ ᠦᠷᠡ ᠨᠢ ᠬᠤᠲᠤᠭᠲᠠᠨ ᠤ᠋ ᠳᠦᠷᠢ ᠶ᠋ᠢ ᠣᠯᠬᠤ ᠳ᠋ᠤ᠌ ᠡᠷᠬᠢᠮ ᠨᠠᠮᠪᠠᠯᠢᠭ ᠪᠣᠯᠬᠤ ᠶ᠋ᠢ ᠪᠣᠯᠭᠣᠭᠠᠪᠠᠯ ᠰᠠᠢᠨ ᠪᠠᠢᠨᠠ ᠭᠡᠮᠡᠨ ᠠᠢᠯᠠᠳᠬᠠᠪᠠ᠃
ᠡᠴᠢᠭᠡ ᠬᠣᠩ ᠲᠠᠢᠵᠢ ᠯᠠᠮᠠ ᠲᠠᠢ ᠳᠣᠣᠷᠠ ᠨᠠᠢᠷᠰᠠᠭ ᠢ᠋ᠶ᠋ᠠᠷ ᠪᠥᠬᠥᠯᠵᠡᠨ᠂
— ᠯᠠᠮᠠᠳᠠᠨ ᠤ᠋ ᠠᠢᠯᠠᠳᠪᠤᠷᠢ ᠲᠦᠮᠡᠨ ᠵᠥᠪ᠃ ᠤᠭ ᠡᠴᠡ ᠪᠤᠷᠬᠠᠨ ᠤ᠋ ᠱᠠᠰᠢᠨ ᠢ᠋ ᠵᠡᠭᠦᠨᠭᠠᠷ ᠳᠠᠶᠠᠭᠠᠷ ᠳᠡᠯᠭᠡᠷᠡᠭᠦᠯᠬᠦ ᠠᠷᠢᠭᠤᠨ ᠦᠢᠯᠡᠰ ᠲᠦ᠍ ᠬᠡᠵᠢᠶᠡᠳᠡ ᠵᠢᠳᠬᠦᠭᠰᠡᠨ ᠲᠠᠨ ᠤ᠋ ᠤᠷᠮᠠ ᠶ᠋ᠢ ᠬᠤᠭᠤᠯᠬᠤ ᠦᠭᠡᠢ ᠭᠡᠵᠦ ᠪᠢ ᠭᠠᠯᠳᠠᠨ ᠬᠥᠪᠡᠭᠦᠨ ᠳ᠋ᠡᠭᠡᠨ ᠢᠲᠡᠭᠡᠳᠡᠭ ᠭᠡᠯᠡ᠃
ᠡᠨᠡ ᠦᠶᠡ ᠳ᠋ᠦ᠍ ᠶᠦᠮ ᠠᠭᠠ ᠬᠠᠲᠤᠨ ᠲᠠᠭᠠᠯᠠᠯ ᠢ᠋ ᠪᠣᠯᠭᠣᠭᠠᠨ ᠰᠣᠶᠣᠷᠬᠠᠵᠤ᠂
— ᠭᠡᠭᠡᠨᠲᠡᠨ ᠮᠢᠨᠢ᠂ ᠨᠠᠮᠠᠶ᠋ᠢ ᠥᠷᠥᠰᠢᠶᠡ! ᠭᠠᠯᠳᠠᠨ ᠬᠥᠪᠡᠭᠦᠨ ᠲᠠᠪᠤᠨ ᠣᠢ ᠬᠦᠷᠲᠡᠯᠡ ᠪᠡᠨ ᠬᠥᠬᠥ ᠪᠡᠨ ᠬᠥᠬᠥᠵᠦ ᠥᠰᠦᠭᠰᠡᠨ ᠪᠣᠯᠬᠣᠷ ᠰᠦ ᠶ᠋ᠢᠨ ᠦᠨᠦᠷ ᠠᠷᠢᠯᠤᠭᠠ ᠦᠭᠡᠢ ᠪᠠᠯᠴᠢᠷ ᠪᠠᠢᠨᠠ᠃ ᠬᠥᠪᠡᠭᠦᠨ ᠢ᠋ ᠪᠢ ᠦᠷᠭᠦᠭᠡᠨ ᠳ᠋ᠡᠭᠡᠨ ᠳᠠᠭᠠᠭᠤᠯᠵᠤ ᠣᠷᠣᠭᠠᠳ ᠰᠦ ᠪᠡᠷ ᠴᠠᠳᠬᠠᠭᠠᠳ ᠶᠠᠪᠤᠭᠤᠯᠪᠠᠯ ᠶᠠᠮᠠᠷ ᠪᠣᠢ? ᠭᠡᠮᠡᠨ ᠥᠴᠢᠯᠡ᠃
ᠭᠡᠭᠡᠨᠲᠡᠨ ᠲᠣᠯᠣᠭᠠᠢ ᠳᠣᠬᠢᠪᠠ᠃ ᠵᠡᠭᠦᠨᠭᠠᠷ ᠤ᠋ᠨ ᠶᠡᠬᠡ ᠴᠡᠷᠢᠭ ᠡᠩᠨᠡᠨ ᠵᠢᠭᠰᠠᠵᠠᠢ᠃ ᠣᠢᠷᠠᠳ ᠤ᠋ᠨ ᠬᠣᠲᠠ ᠬᠦᠷᠢᠶᠡᠨ ᠦ᠌ ᠡᠮᠬᠢ ᠴᠡᠭᠴᠡ᠂ ᠲᠢᠭ ᠵᠠᠶᠢᠭ ᠨᠠᠷᠢᠨ ᠪᠥᠭᠡᠳ ᠬᠠᠭᠠᠨ ᠤ᠋ ᠬᠥᠪᠡᠭᠦᠨ ᠢ᠋ ᠦᠳᠡᠬᠦ ᠶᠣᠰᠣᠯᠠᠯ ᠳ᠋ᠤ᠌ ᠪᠠᠷᠠ ᠰᠦᠷ ᠲᠡᠢ ᠪᠡᠯᠡᠳᠬᠡᠵᠡᠢ᠃
ᠭᠠᠯᠳᠠᠨ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠨᠢᠳᠦ ᠥᠭᠡᠳᠡ ᠰᠢᠷᠳᠡᠪᠡ᠃ ᠡᠬᠡ ᠨᠢ ᠲᠡᠭᠦᠨ ᠦ᠌ ᠬᠠᠷᠠᠴᠠ ᠡᠴᠡ ᠬᠡᠷᠪᠡᠰᠢᠶᠡᠵᠦ᠂
— ᠠᠯᠢᠪ ᠬᠥᠪᠡᠭᠦᠨ ᠠᠯᠠᠭᠠ ᠪᠠᠨ ᠲᠤᠰ ᠭᠡᠯᠡ᠃
ᠭᠧ ᠨᠢ ᠲᠣᠳᠣᠷᠠᠭᠰᠠᠨ ᠠᠯᠠᠭᠠᠨ ᠳᠡᠭᠡᠷᠡ ᠡᠬᠡ ᠶ᠋ᠢᠨ ᠬᠥᠬᠥ ᠶ᠋ᠢᠨ ᠰᠦ ᠲᠤᠰᠪᠠ᠃ ᠴᠠᠭᠠᠨ ᠰᠦ ᠰᠢᠩᠭᠡᠪᠡ᠃ ᠶᠦᠮ ᠠᠭᠠ ᠡᠬᠡ ᠬᠦᠦ ᠳ᠋ᠡᠭᠡᠨ ᠠᠯᠠᠭᠠ ᠪᠠᠨ ᠬᠥᠮᠦᠨ ᠳ᠋ᠦ᠍ ᠪᠤᠤ ᠦᠵᠡᠭᠦᠯᠦᠭᠡᠷᠡᠢ᠃ ᠲᠥᠷᠥᠭᠰᠡᠨ ᠵᠢᠯ᠂ ᠮᠡᠩᠭᠡ ᠪᠡᠨ ᠨᠢᠭᠤᠵᠤ ᠶᠠᠪᠤᠭᠠᠷᠠᠢ ᠭᠡᠵᠦ ᠠᠮᠢᠨᠴᠢᠯᠠᠨ ᠵᠠᠬᠢᠭᠰᠠᠨ ᠪᠢᠯᠡ᠃
ᠬᠣᠷᠢ
ᠨᠠᠮᠤᠷ ᠤ᠋ᠨ ᠴᠡᠴᠡᠭ ᠦ᠋ᠨ ᠲᠣᠭᠣᠰᠣᠨ ᠤ᠋ ᠴᠠᠭ ᠢᠷᠡᠵᠡᠢ᠃ ᠲᠡᠷᠲᠡᠭᠡ ᠴᠠᠪ ᠴᠡᠩᠬᠡᠷ ᠬᠥᠨᠳᠡᠢ ᠳ᠋ᠦ᠍ ᠴᠡᠴᠡᠭ ᠦ᠋ᠨ ᠲᠣᠭᠣᠰᠣᠨ ᠤ᠋ ᠪᠣᠰᠤᠭᠠ ᠴᠠᠭᠠᠨ ᠵᠢᠷᠤᠭᠠᠰᠤ ᠲᠠᠲᠠᠨᠠ᠃ ᠨᠠᠮᠤᠷ ᠤ᠋ᠨ ᠲᠣᠭᠣᠰᠣᠨ ᠤ᠋ ᠴᠠᠭ ᠢ᠋ᠶ᠋ᠠᠷ ᠪᠤᠭ ᠮᠠᠯ ᠤ᠋ᠨ ᠬᠥᠯ ᠢ᠋ᠶ᠋ᠡᠷ ᠬᠤᠷᠠᠭᠠᠨ ᠮᠠᠨᠠᠨ ᠮᠡᠲᠦ ᠲᠣᠭᠣᠰᠣ ᠳᠡᠭᠳᠡᠨ ᠪᠠᠢᠳᠠᠭ ᠰᠠᠨ᠃ ᠨᠠᠮᠤᠷ ᠤ᠋ᠨ ᠲᠣᠭᠣᠰᠣ ᠨᠢᠭᠡᠨ ᠶᠡᠬᠡ ᠤᠢᠳᠬᠠᠷ ᠲᠥᠷᠥᠭᠦᠯᠳᠡᠭ ᠶᠤᠮ᠃ ᠠᠩᠬᠠ ᠴᠠᠰᠤᠨ ᠢ᠋ᠶ᠋ᠠᠷ ᠲᠣᠭᠣᠰᠣ ᠳᠠᠷᠤᠭᠳᠠᠵᠤ ᠠᠯᠤᠰ ᠤ᠋ᠨ ᠬᠠᠷᠠ ᠠᠭᠤᠯᠠᠰ ᠤᠯᠠᠮ ᠲᠣᠳᠣᠷᠠᠵᠤ ᠰᠦᠷᠯᠢᠭ ᠪᠣᠯᠳᠠᠭ ᠰᠠᠨ᠃
ᠴᠣᠬᠣᠮ ᠳ᠋ᠠᠭᠠᠨ ᠲᠡᠷᠡ ᠬᠦ᠌ ᠲᠣᠭᠣᠰᠣ ᠪᠣᠯ ᠤᠷᠭᠤᠮᠠᠯ᠂ ᠴᠡᠴᠡᠭ ᠨᠠᠪᠴᠢ ᠬᠠᠲᠠᠵᠤ ᠲᠣᠭᠣᠰᠤᠨᠴᠢᠷ ᠪᠣᠯᠵᠤ ᠳᠡᠭᠳᠡᠬᠦ ᠳ᠋ᠡᠭᠡᠨ ᠢᠷᠡᠬᠦ ᠬᠠᠪᠤᠷ ᠤ᠋ᠨ ᠦᠷᠡ ᠦᠨᠳᠦᠰᠦ ᠪᠡᠨ ᠭᠠᠵᠠᠷ ᠳᠡᠯᠡᠬᠡᠢ ᠳ᠋ᠦ᠍ ᠰᠠᠴᠤᠵᠤ ᠪᠠᠢᠭᠠ ᠶᠤᠮ᠃ ᠡᠪᠡᠰᠦ ᠤᠷᠭᠤᠮᠠᠯ ᠤ᠋ᠨ ᠲᠣᠭᠣᠰᠤᠨᠴᠢᠷ ᠭᠠᠵᠠᠷ ᠤ᠋ᠨ ᠬᠡᠪᠡᠯᠢ ᠳ᠋ᠦ᠍ ᠳᠠᠷᠬᠠᠨ ᠰᠢᠩᠭᠡᠬᠦ ᠳ᠋ᠡᠭᠡᠨ ᠦᠷᠡ ᠨᠢ ᠪᠣᠯᠪᠠᠰᠤᠷᠠᠵᠤ ᠬᠠᠪᠤᠷ ᠤ᠋ᠨ ᠤᠷᠢ ᠣᠷᠣᠬᠤ ᠳ᠋ᠤ᠌ ᠦᠨᠳᠦᠰᠦᠯᠡᠳᠡᠭ ᠪᠢᠯᠡ᠃ ᠶᠡᠬᠡ ᠴᠠᠭᠠᠨ ᠲᠣᠭᠣᠰᠣ ᠳᠡᠭᠳᠡᠵᠡᠢ᠃ ᠴᠡᠴᠡᠭ ᠬᠠᠭᠳᠠᠷᠠᠵᠤ ᠲᠣᠭᠣᠰᠣᠨ ᠤ᠋ ᠮᠠᠨᠠᠨ ᠳᠡᠭᠳᠡᠵᠡᠢ᠃
ᠡᠴᠢᠭᠡ ᠬᠠᠭᠠᠨ ᠠᠯᠤᠰ ᠲᠤ᠌ ᠴᠠᠭᠠᠨ ᠵᠢᠷᠤᠭᠠᠰᠤ ᠲᠠᠲᠠᠬᠤ ᠳ᠋ᠤ᠌ ᠲᠡᠷᠡ ᠪᠡᠷ ᠨᠢᠳᠦ ᠪᠡᠨ ᠰᠦᠮᠡᠢᠯᠭᠡᠨ᠂
— ᠵᠡᠭᠡᠷᠡ ᠪᠤᠳᠤᠷᠭᠠᠨᠠ ᠢᠳᠡᠬᠦ ᠪᠡᠷ ᠨᠡᠭᠦᠳᠡᠯᠯᠡᠵᠦ ᠪᠠᠢᠨᠠ᠃ ᠤᠳᠠᠬᠤ ᠦᠭᠡᠢ ᠠᠪᠠ ᠬᠣᠮᠣᠷᠭᠠ ᠳ᠋ᠤ᠌ ᠮᠣᠷᠳᠠᠬᠤ ᠴᠠᠭ ᠪᠣᠯᠵᠠᠢ᠃ ᠰᠢᠭᠦᠰᠦ ᠲᠡᠢ ᠡᠪᠡᠰᠦ ᠢᠳᠡᠭᠰᠡᠨ ᠭᠥᠷᠦᠭᠡᠰᠦᠨ ᠦ᠌ ᠮᠢᠬᠠ ᠠᠮᠲᠠ ᠲᠠᠢ ᠰᠠᠨ ᠭᠡᠮᠡᠨ ᠲᠠᠮᠰᠢᠶᠠᠯᠠᠬᠤ ᠮᠡᠲᠦ ᠬᠡᠯᠡᠪᠡ᠃
ᠨᠠᠮᠠᠬᠠᠢᠵᠠᠮᠰᠤ ᠭᠡᠭᠡᠨᠲᠡᠨ᠂
— ᠥᠩᠭᠡ ᠲᠡᠢ ᠡᠪᠦᠯ ᠪᠣᠯᠤᠨᠠ ᠭᠡᠵᠦ ᠴᠠᠭ ᠤ᠋ᠨ ᠪᠠᠢᠳᠠᠯ ᠢ᠋ ᠰᠢᠨᠵᠢᠵᠦ ᠲᠠᠨᠢᠳᠠᠭ ᠬᠥᠮᠦᠨ ᠦ᠌ ᠶᠣᠰᠣ ᠪᠠᠷ ᠥᠭᠦᠯᠡᠪᠡ᠃
ᠮᠠᠨᠠᠨ ᠮᠡᠲᠦ ᠶᠡᠬᠡ ᠴᠠᠭᠠᠨ ᠲᠣᠭᠣᠰᠣ ᠲᠠᠲᠠᠵᠤ ᠪᠣᠢ ᠬᠥᠨᠳᠡᠢ ᠬᠣᠭᠣᠯᠠᠢ᠂ ᠠᠭᠤᠳᠠᠮ ᠲᠡᠨᠢᠭᠦᠨ ᠲᠠᠯᠠ ᠬᠡᠭᠡᠷᠡ ᠨᠤᠲᠤᠭ᠂ ᠲᠡᠷᠲᠡᠭᠡ ᠬᠣᠯᠠ ᠰᠦᠮᠡᠯᠵᠡᠬᠦ ᠬᠥᠨᠳᠡᠯᠡᠨ ᠠᠭᠤᠯᠠᠰ᠂ ᠬᠥᠪᠡᠭᠡ ᠲᠤᠯᠤᠭᠠᠳ ᠂ ᠳᠠᠷᠠᠰᠤᠲᠤ ᠲᠦᠩ᠂ ᠠᠭᠠᠵᠢᠮᠬᠠᠨ ᠲᠣᠷᠣᠯᠵᠠᠭᠰᠠᠭᠠᠷ ᠪᠠᠢᠭᠠ ᠲᠡᠮᠡᠭᠡᠨ ᠵᠢᠩ ᠦ᠋ᠨ ᠴᠤᠪᠤᠭᠠ ᠥᠨᠥ ᠬᠢᠷᠢ ᠰᠠᠨᠠᠭᠠᠨ ᠳ᠋ᠤ᠌ ᠲᠣᠳᠣᠷᠬᠠᠢ ᠪᠠᠭᠤᠵᠠᠢ᠃ ᠴᠣᠷᠣᠰ ᠠᠢᠮᠠᠭ ᠤ᠋ᠨ ᠬᠣᠲᠠ ᠬᠦᠷᠢᠶᠡᠨ ᠦ᠌ ᠡᠷᠭᠢᠨ ᠲᠣᠭᠣᠷᠢᠨ ᠳ᠋ᠤ᠌ ᠠᠷᠪᠠᠲᠤ ᠵᠠᠭᠤᠲᠤ ᠴᠡᠷᠢᠭ ᠦ᠋ᠳ ᠵᠢᠭᠰᠠᠵᠤ ᠡᠩᠨᠡᠨ ᠠᠷᠠᠳ ᠢᠷᠭᠡᠳ ᠭᠡᠷ ᠦᠷᠭᠦᠭᠡᠨ ᠦ᠌ ᠡᠭᠦᠳᠡ ᠬᠠᠪᠢᠴᠠᠭᠠ ᠪᠥᠭᠡᠮᠨᠡᠷᠡᠬᠦ ᠠᠵᠢ᠃ ᠭᠠᠯᠳᠠᠨ ᠲᠠᠢ ᠬᠡᠵᠢᠶᠡ ᠴᠦ᠍ ᠣᠢᠷᠠ ᠳᠣᠲᠣᠨᠣ ᠪᠠᠢᠭᠠ ᠦᠭᠡᠢ ᠡᠴᠢᠭᠡ ᠶ᠋ᠢᠨ ᠪᠠᠯᠵᠢᠳᠠᠷᠡ ᠶᠡᠬᠡ ᠬᠠᠲᠤᠨ ᠤ᠋ ᠬᠥᠪᠡᠭᠦᠨ ᠴᠡᠴᠡᠨ᠂ ᠵᠤᠳᠪᠠᠪᠠᠭᠠᠲᠤᠷ ᠨᠠᠷ ᠬᠢᠷᠬᠢᠽ ᠴᠢᠮᠡᠭᠯᠡᠯ ᠲᠡᠢ ᠮᠣᠳᠣᠨ ᠵᠢᠤᠵᠠ ᠲᠡᠷᠭᠡᠨ ᠦ᠌ ᠳᠡᠷᠭᠡᠳᠡ ᠵᠣᠭᠰᠣᠨᠠ᠃ ᠡᠨᠡ ᠲᠡᠷᠭᠡᠨ ᠳ᠋ᠦ᠍ ᠽᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠨᠠᠮᠠᠬᠠᠢᠵᠠᠮᠰᠤ ᠬᠤᠲᠤᠭᠲᠤ ᠭᠠᠯᠳᠠᠨ ᠲᠠᠢ ᠴᠣᠭ ᠵᠠᠯᠠᠷᠠᠵᠤ ᠴᠠᠰᠤᠲᠤ ᠳᠥᠷᠪᠡᠳ ᠦ᠋ᠨ ᠣᠷᠣᠨᠠ ᠣᠳᠬᠤ ᠶᠤᠮ᠃
ᠬᠣᠷᠢᠨ ᠨᠢᠭᠡ
ᠣᠢᠷᠠᠳ ᠮᠣᠩᠭᠣᠯ ᠤ᠋ᠨ ᠨᠤᠲᠤᠭ ᠲᠤ᠌ ᠬᠠᠪᠤᠷ ᠤ᠋ᠨ ᠰᠡᠭᠦᠯᠴᠢ᠂ ᠵᠤᠨ ᠤ᠋ ᠡᠬᠢ ᠪᠡᠷ ᠪᠣᠷᠣᠭᠠᠨ ᠤ᠋ ᠪᠤᠳᠠᠩ ᠲᠠᠲᠠᠵᠤ᠂ ᠠᠯᠲᠠᠢ ᠶ᠋ᠢᠨ ᠠᠭᠤᠯᠠ ᠶ᠋ᠢᠨ ᠰᠦᠷ ᠪᠠᠷᠠ ᠶ᠋ᠢ ᠲᠣᠳᠣᠷᠠᠭᠤᠯᠵᠤ ᠥᠭᠳᠡᠭ ᠪᠢᠯᠡ᠃ ᠪᠣᠷᠣᠭᠠ ᠰᠥᠨᠢᠵᠢᠨ ᠱᠠᠭᠢᠨᠠ ᠣᠷᠣᠬᠤ ᠳ᠋ᠤ᠌ ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠦ᠌ ᠤᠰᠤ ᠨᠡᠮᠡᠭᠳᠡᠨ᠂ᠡᠪᠡᠰᠦ ᠨᠣᠭᠣᠭᠠ ᠲᠥᠭᠡ ᠲᠥᠭᠡ ᠪᠡᠷ ᠤᠷᠭᠤᠵᠤ᠂ ᠰᠠᠢᠷ ᠵᠢᠯᠠᠭᠠ ᠶ᠋ᠢᠨ ᠬᠠᠳᠠ ᠴᠢᠯᠠᠭᠤ ᠡᠪᠡᠰᠦᠨ ᠳ᠋ᠦ᠍ ᠪᠤᠯᠠᠭᠳᠠᠨᠠ᠃
ᠪᠣᠷᠣᠭᠠᠨ ᠤ᠋ ᠪᠤᠳᠠᠩ ᠢ᠋ ᠭᠠᠯᠳᠠᠨ ᠲᠥᠪᠡᠳ ᠲᠦ᠍ ᠰᠠᠨᠠᠭᠠᠰᠢᠷᠠᠨ ᠬᠠᠷᠠᠳᠠᠭ ᠪᠠᠢᠯᠠ᠃ ᠲᠥᠪᠡᠳ ᠦ᠋ᠳ ᠪᠤᠳᠠᠩ ᠳ᠋ᠤ᠌ ᠳᠤᠷᠠ ᠦᠭᠡᠢ᠃ ᠣᠢᠷᠠᠳ ᠤ᠋ᠳ ᠪᠤᠳᠠᠩ ᠮᠠᠨᠠᠨ ᠳ᠋ᠤ᠌ ᠳᠤᠷᠠ ᠲᠠᠢ ᠶᠤᠮ᠃ ᠵᠤᠨ ᠤ᠋ ᠶᠡᠬᠡᠩᠬᠢ ᠡᠳᠦᠷ ᠦ᠋ᠳ ᠨᠠᠷᠠ ᠲᠠᠢ ᠪᠠᠢᠬᠤ ᠲᠤᠯᠠ ᠣᠢᠷᠠᠳ ᠮᠣᠩᠭᠣᠯᠴᠤᠳ ᠪᠤᠳᠠᠩ ᠬᠦᠰᠡᠳᠡᠭ ᠪᠢᠵᠡ ᠳᠡ᠃ ᠪᠤᠳᠠᠩ ᠮᠠᠨᠠᠨ ᠲᠠᠲᠠᠬᠤ ᠪᠠᠷ ᠠᠳᠤᠭᠤᠰᠤ᠂ ᠬᠥᠮᠦᠨ ᠬᠣᠶᠠᠷ ᠨᠤᠲᠤᠭ ᠢ᠋ᠶ᠋ᠠᠨ ᠢᠯᠡᠭᠦᠦ ᠰᠠᠨᠠᠳᠠᠭ ᠪᠢᠯᠡ᠃
ᠢᠳᠡ ᠵᠤᠨ ᠤ᠋ ᠰᠠᠷᠠ ᠳ᠋ᠤ᠌ ᠠᠯᠲᠠᠢ ᠶ᠋ᠢᠨ ᠠᠭᠤᠯᠠᠨ ᠳ᠋ᠤ᠌ ᠴᠡᠴᠡᠭ ᠦ᠋ᠨ ᠪᠤᠳᠠᠩ ᠶᠠᠭᠠᠷᠠᠳᠠᠭ᠃ ᠶᠠᠭᠠᠨ ᠪᠤᠳᠠᠩ ᠪᠠᠢᠳᠠᠭ ᠢ᠋ ᠪᠠᠭᠠ ᠳ᠋ᠠᠭᠠᠨ ᠮᠢᠭᠮᠠᠨᠰᠠᠩᠵᠠᠢ ᠣᠬᠢᠨ ᠲᠠᠢ ᠪᠠᠨ ᠲᠣᠭᠯᠠᠵᠤ ᠪᠠᠢᠬᠤ ᠳ᠋ᠤ᠌ ᠪᠠᠨ ᠮᠡᠳᠡᠭᠰᠡᠨ᠃ ᠮᠡᠳᠡᠬᠦ ᠪᠡᠷ ᠦᠯᠦ ᠪᠠᠷᠠᠮ ᠴᠡᠴᠡᠭ ᠦ᠋ᠨ ᠪᠤᠳᠠᠩ ᠳ᠋ᠤ᠌ ᠲᠥᠭᠡᠷᠢᠵᠦ᠂ ᠮᠠᠩᠰᠢᠭᠤᠷᠠᠵᠤ ᠦᠵᠡᠭᠰᠡᠨ᠃ ᠴᠡᠴᠡᠭ ᠦ᠋ᠨ ᠶᠠᠭᠠᠨ ᠪᠤᠳᠠᠩ ᠲᠠᠲᠠᠳᠠᠭ ᠠᠭᠤᠯᠠ ᠶ᠋ᠢᠨ ᠬᠠᠪᠲᠠᠭᠠᠢ ᠬᠥᠨᠳᠡᠢ ᠪᠡᠷ ᠠᠷᠢᠶᠠᠲᠠᠨ ᠵᠢᠭᠦᠷᠲᠡᠨ ᠳᠦᠭᠦᠷᠴᠦ᠂ ᠬᠠᠳᠠᠨ ᠬᠠᠪᠴᠢᠯ ᠳ᠋ᠤ᠌ ᠶᠠᠩᠭᠢᠷ ᠢᠮᠠᠭᠠ᠂ ᠠᠷᠭᠠᠯᠢ ᠤᠭᠠᠯᠵᠠ ᠰᠦᠷᠦᠭᠯᠡᠨ ᠪᠡᠯᠴᠢᠵᠦ ᠪᠠᠢᠳᠠᠭ ᠰᠠᠨ᠃ ᠬᠣᠵᠢᠮ ᠠᠢᠷᠠᠭᠲᠤ ᠬᠠᠪᠴᠢᠯ ᠡᠴᠡ ᠤᠭᠠᠯᠵᠠ ᠶ᠋ᠢᠨ ᠡᠪᠡᠷ ᠲᠡᠭᠦᠵᠦ ᠪᠦᠲᠦᠭᠡᠯ ᠦ᠋ᠨ ᠰᠦᠮᠡ ᠶ᠋ᠢᠨ ᠳᠡᠭᠡᠪᠦᠷ ᠬᠢᠵᠦ ᠪᠢᠯᠡ᠃
ᠤᠭᠠᠯᠵᠠ ᠶ᠋ᠢᠨ ᠰᠦᠮᠡ ᠮᠥᠷᠭᠥᠯᠴᠢᠳ ᠦ᠋ᠨ ᠳᠠᠯᠠᠯᠭᠠ ᠲᠠᠢ ᠭᠠᠵᠠᠷ ᠪᠣᠯᠵᠠᠢ᠃ ᠤᠭᠠᠯᠵᠠ ᠶ᠋ᠢᠨ ᠡᠪᠡᠷ ᠢ᠋ ᠬᠢᠷᠥᠭᠡᠳᠡᠵᠦ ᠲᠡᠭᠰᠢᠯᠡᠨ ᠵᠡᠭᠦᠵᠦ᠂ ᠰᠦᠮᠡ ᠶ᠋ᠢᠨ ᠳᠡᠭᠡᠭᠦᠷ ᠬᠢᠭᠰᠡᠨ ᠢ᠋ ᠽᠠᠶᠠ ᠪᠠᠨᠳᠢᠳᠠ ᠨᠠᠮᠬᠠᠢᠵᠠᠮᠰᠤ ᠦᠵᠡᠭᠡᠳ᠂
— ᠬᠡᠨ ᠰᠡᠳᠬᠢᠪᠡ᠃ ᠭᠠᠢᠬᠠᠯᠲᠠᠢ ᠳᠡᠭᠡᠪᠦᠷ ᠪᠣᠯᠵᠠᠢ᠃ ᠨᠢᠭᠡᠨ ᠨᠠᠰᠤᠨ ᠤ᠋ ᠶᠠᠭᠤᠮᠠ ᠭᠡᠮᠡᠨ ᠬᠡᠯᠡᠵᠦ ᠪᠢᠯᠡ᠃
ᠨᠠᠮᠤᠷ ᠲᠤ᠌ ᠣᠢᠷᠠᠳ ᠤ᠋ᠨ ᠨᠤᠲᠤᠭ ᠲᠤ᠌ ᠴᠠᠭᠠᠨ ᠲᠣᠭᠣᠰᠣ ᠲᠠᠲᠠᠨᠠ᠃ ᠲᠡᠷᠡ ᠲᠣᠭᠣᠰᠣ ᠪᠣᠯ ᠴᠡᠴᠡᠭ ᠨᠣᠭᠣᠭᠠᠨ ᠤ᠋ ᠲᠣᠭᠣᠰᠣ ᠮᠥᠨ ᠪᠥᠭᠡᠳ ᠬᠠᠭᠤᠷᠠᠢ ᠪᠤᠳᠠᠩ ᠶᠤᠮ᠃ ᠲᠡᠷᠡ ᠲᠣᠭᠣᠰᠣᠨ ᠤ᠋ ᠦᠨᠦᠷ ᠢ᠋ ᠲᠠᠷᠭᠤᠨ ᠲᠡᠮᠡᠭᠡ ᠬᠠᠮᠠᠷ ᠲᠠᠭᠠᠨ ᠰᠣᠷᠣᠵᠤ ᠰᠠᠯᠬᠢᠯᠠᠳᠠᠭ ᠠᠵᠠᠢ᠃
ᠴᠠᠭᠠᠨ ᠲᠣᠭᠣᠰᠣ ᠲᠠᠲᠠᠬᠤ ᠴᠠᠭ ᠢ᠋ᠶ᠋ᠠᠷ ᠵᠡᠭᠡᠷᠡ ᠭᠥᠷᠥᠭᠡᠰᠦ᠂ ᠣᠨᠣ ᠰᠢᠷᠬᠠᠴᠢᠨ ᠢ᠋ᠶ᠋ᠠᠷ ᠢᠯᠭᠠᠷᠠᠨ ᠰᠦᠷᠦᠭᠯᠡᠵᠦ ᠲᠠᠷᠭᠤ ᠬᠦᠴᠦ ᠪᠡᠨ ᠲᠣᠭᠲᠠᠭᠠᠳᠠᠭ᠃ ᠴᠡᠴᠡᠭ ᠦ᠋ᠨ ᠲᠣᠭᠣᠰᠣ ᠪᠠᠷ ᠠᠮᠢᠰᠬᠤᠯᠯᠠᠬᠤ ᠨᠢ ᠪᠢᠯᠬᠠᠷᠠᠲᠠᠯᠠ ᠪᠠᠨ ᠢᠳᠡᠰᠢᠯᠡᠭᠰᠡᠨ ᠠᠩ ᠠᠮᠢᠲᠠᠨ ᠳ᠋ᠤ᠌ ᠡᠮ ᠮᠡᠲᠦ ᠬᠡᠷᠡᠭ ᠲᠡᠢ ᠪᠢᠯᠡ᠃ ᠴᠡᠴᠡᠭ ᠦ᠋ᠨ ᠲᠣᠭᠣᠰᠣᠨ ᠤ᠋ ᠴᠠᠭ ᠥᠩᠭᠡᠷᠡᠩᠭᠦᠲᠡ ᠰᠠᠯᠬᠢᠨ ᠤ᠋ ᠦᠵᠦᠭᠦᠷ ᠲᠦ᠍ ᠬᠦᠢᠲᠡᠨ ᠠᠭᠠᠷ ᠬᠤᠷᠠᠮᠳᠤᠯᠠᠭᠳᠠᠨ ᠨᠡᠭᠦᠳᠡᠯᠴᠢᠳ ᠦ᠋ᠨ ᠨᠡᠭᠦᠳᠡᠯ ᠦ᠋ᠨ ᠬᠥᠯ ᠢ᠋ ᠲᠤᠱᠠᠨᠠ᠃
ᠨᠡᠭᠦᠳᠡᠯᠴᠢᠳ ᠠᠯᠲᠠᠢ ᠶ᠋ᠢᠨ ᠠᠭᠤᠯᠠᠰ ᠢ᠋ᠶ᠋ᠠᠨ ᠳᠠᠪᠠᠵᠤ ᠭᠣᠪᠢ ᠪᠠᠶᠠᠨ ᠪᠦᠷᠢᠳᠦ ᠳ᠋ᠦ᠍ ᠪᠠᠭᠤᠭᠰᠠᠨ ᠬᠣᠢᠨᠠ ᠴᠡᠴᠡᠭ᠂ ᠨᠣᠭᠣᠭᠠᠨ ᠤ᠋ ᠴᠠᠭᠠᠨ ᠲᠣᠭᠣᠰᠣ ᠠᠭᠠᠵᠢᠮ ᠢ᠋ᠶ᠋ᠠᠷ ᠴᠠᠰᠤ ᠪᠣᠯᠵᠤ ᠬᠤᠪᠢᠷᠠᠭᠠᠳ ᠠᠭᠤᠯᠠ ᠶ᠋ᠢᠨ ᠥᠨᠳᠥᠷ ᠳᠠᠪᠠᠭᠠ ᠴᠠᠰᠤᠨ ᠳ᠋ᠤ᠌ ᠬᠠᠭᠠᠭᠳᠠᠨᠠ᠃ ᠴᠠᠰᠤ ᠪᠤᠳᠠᠩ ᠲᠠᠢ᠃ ᠴᠠᠰᠤᠨ ᠤ᠋ ᠪᠤᠳᠠᠩ ᠪᠥᠭᠡᠰᠦ ᠬᠦᠢᠲᠡᠨ ᠦ᠌ ᠡᠷᠴᠢ ᠴᠢᠩᠭᠠᠷᠠᠬᠤ ᠳᠣᠳᠣᠮ ᠴᠡᠩᠬᠡᠷ ᠬᠥᠰᠢᠭᠡ ᠯᠦ᠍ᠭᠡ ᠨᠠᠮᠢᠯᠵᠠᠨᠠ᠃
ᠴᠠᠰᠤᠨ ᠤ᠋ ᠪᠤᠳᠠᠩ ᠳᠤᠮᠳᠠ ᠡᠴᠡ ᠦᠶᠡ ᠦᠶᠡ ᠨᠡᠭᠦᠳᠡᠯ ᠦ᠋ᠨ ᠴᠤᠪᠤᠭᠠ᠂ ᠬᠡᠰᠡᠭ ᠪᠦᠯᠦᠭ ᠵᠢᠩᠴᠢᠳ ᠢᠷᠡᠬᠦ ᠨᠢ ᠣᠢᠷᠠᠳ ᠲᠤ᠌ ᠰᠣᠨᠢᠨ ᠪᠢᠯᠡ᠃ ᠢᠯᠠᠩᠭᠤᠶᠠ ᠨᠣᠬᠠᠳ ᠪᠣᠷᠭᠣᠨ ᠬᠤᠴᠠᠵᠤ ᠪᠠᠶᠠᠰᠬᠤ ᠪᠥᠭᠡᠳ ᠣᠢᠷᠠᠳ ᠤ᠋ᠨ ᠬᠣᠲᠠ ᠬᠦᠷᠢᠶᠡᠨ ᠦ᠌ ᠬᠥᠯ᠂ ᠡᠵᠡᠭᠦᠢ ᠪᠠᠭᠤᠴᠠ ᠬᠥᠨᠳᠡᠢ ᠶ᠋ᠢ ᠪᠠᠷᠠᠳᠠᠨ ᠪᠠᠭᠤᠵᠤ ᠬᠡᠳᠦ ᠬᠣᠨᠣᠭ ᠲᠡᠩᠬᠡᠷᠡᠭᠡᠳ ᠠᠪᠳᠠᠭ ᠰᠠᠨ᠃
ᠨᠡᠭᠦᠳᠡᠯᠴᠢᠳ ᠦ᠋ᠨ ᠠᠮᠢᠳᠤᠷᠠᠯ ᠬᠠᠪᠤᠷ ᠂ ᠵᠤᠨ᠂ ᠨᠠᠮᠤᠷ᠂ ᠡᠪᠦᠯ ᠦ᠋ᠨ ᠪᠤᠳᠠᠩ ᠳᠤᠮᠳᠠ ᠥᠩᠭᠡᠷᠡᠨᠡ᠃ ᠲᠥᠪᠡᠳ ᠦ᠋ᠨ ᠠᠭᠤᠯᠠᠨ ᠳ᠋ᠤ᠌ ᠬᠦᠢᠲᠡᠨ ᠴᠡᠩᠬᠡᠷ ᠪᠤᠳᠠᠩ ᠲᠠᠲᠠᠬᠤ ᠳ᠋ᠤ᠌ ᠥᠨᠳᠥᠷ ᠱᠣᠪᠬᠣ ᠣᠷᠭᠢᠯ ᠪᠡᠭᠡᠷᠡᠵᠦ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠳᠠᠭ᠃ ᠠᠯᠲᠠᠢ ᠳ᠋ᠤ᠌ ᠪᠣᠯ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠦ᠋ᠨ ᠳᠤᠯᠠᠭᠠᠨ ᠪᠠᠭᠤᠴᠠ ᠳ᠋ᠤ᠌ ᠡᠪᠦᠯᠵᠢᠬᠦ ᠠᠢᠯ ᠤ᠋ᠨ ᠤᠲᠤᠭᠠ᠂ ᠮᠠᠯ ᠠᠳᠤᠭᠤᠰᠤ ᠶ᠋ᠢᠨ ᠠᠭᠤᠷ ᠴᠠᠩ ᠲᠡᠷᠡ ᠬᠦ᠌ ᠴᠡᠩᠬᠡᠷ ᠬᠠᠲᠠᠭᠤ ᠵᠢᠪᠠᠷ ᠢ᠋ ᠤᠶᠠᠷᠠᠭᠤᠯᠳᠠᠭ ᠲᠤᠯᠠ ᠨᠢᠳᠦ ᠬᠠᠭᠠᠷᠢᠳᠠᠭ ᠦᠭᠡᠢ ᠪᠠᠢᠯᠠ᠃
ᠣᠢᠷᠠᠳ ᠬᠥᠪᠡᠭᠦᠨ ᠦ᠌ ᠣᠢ ᠲᠣᠢ ᠳ᠋ᠤ᠌ ᠲᠣᠭᠲᠠᠭᠰᠠᠨ ᠨᠤᠲᠤᠭ ᠤ᠋ᠨ ᠠᠭᠤᠯᠠ ᠤᠰᠤ᠂ ᠭᠠᠵᠠᠷ ᠨᠤᠲᠤᠭ᠂ ᠴᠠᠭ ᠠᠭᠠᠷ ᠤ᠋ᠨ ᠪᠠᠢᠳᠠᠯ ᠤ᠋ᠨ ᠲᠤᠬᠠᠢ ᠲᠡᠮᠳᠡᠭᠯᠡᠬᠦ ᠭᠠᠯᠳᠠᠨ ᠳ᠋ᠤ᠌ ᠲᠠᠭᠠᠲᠠᠢ ᠪᠠᠢᠳᠠᠭ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠ᠊·ᠮᠢᠬᠤᠸᠠᠷ᠂ ᠨᠠᠷᠠᠨᠲᠣᠭᠣᠰ᠂ ᠣᠳᠬᠠᠨᠴᠡᠴᠡᠭ᠂ ᠪᠦᠷᠢᠨᠴᠡᠴᠡᠭ᠂ ᠨᠠ᠊· ᠴᠠᠭᠠᠨ᠂ ᠳ᠂ ᠣᠶᠤᠨᠴᠢᠮᠡᠭ᠂ ᠪᠦᠷᠢᠨᠴᠡᠴᠡᠭ᠂ ᠠ᠊·ᠴᠠᠭᠠᠨ᠂ ᠠᠨᠢᠷ
ᠬᠢᠨᠠᠭᠴᠢ ᠪᠠᠭᠰᠢ᠄ ᠣᠳᠬᠠᠨᠰᠣᠠ᠂ ᠨᠠᠷᠠᠨ᠂ ᠮᠣᠩᠭᠣᠯ ᠰᠦᠨᠡᠰᠦ