ᠦᠷ ᠦᠨ ᠲᠤᠶᠠᠭᠠ III – ᠪ᠂ ᠷᠢᠨᠴᠢᠨ - ᠭᠤᠷᠪᠠᠳᠤᠭᠠᠷ ᠲᠡᠪᠲᠡᠷ <ᠪᠠᠢᠯᠳᠤᠵᠤ ᠣᠯᠣᠭᠰᠠᠨ ᠡᠬᠡ ᠣᠷᠣᠨ>- ᠠᠷᠪᠠᠨ ᠳᠣᠯᠣᠭᠠ Үүрийн туяа III – Б ᠂ Ренчин Гуравдугаар дэвтэр "Баялдаж олсон эх орон"-17
161ᠠᠷᠪᠠᠨ ᠳᠣᠯᠣᠭᠠ᠂ ᠥᠭᠡᠳᠡ ᠦᠭᠡᠢ ᠵᠣᠴᠢᠨ
ᠮᠠᠭᠤ ᠠ᠋ᠴᠠ ᠮᠠᠭᠤ᠂ ᠮᠣᠳᠣᠨ ᠠ᠋ᠴᠠ ᠬᠦ᠃
ᠠᠷᠠᠳ ᠤ᠋ᠨ ᠰᠡᠴᠡᠨ ᠦᠭᠡ
ᠳ᠋ᠤᠢᠩᠬᠤᠷ᠂ ᠭᠡᠷ ᠦ᠋ᠨ ᠬᠣᠢᠮᠣᠷ ᠲᠤ᠌ ᠭᠠᠷᠴᠤ ᠵᠠᠪᠢᠯᠠᠩᠬᠠᠨ ᠰᠠᠭᠤᠭᠠᠳ ᠶᠣᠰᠣ ᠬᠡᠮᠡᠵᠦ᠂ ᠮᠠᠯ ᠰᠦᠷᠦᠭ ᠦ᠋ᠨ ᠮᠡᠨᠳᠦ ᠶ᠋ᠢ ᠳᠤᠲᠠᠭᠤ ᠬᠠᠭᠠᠰ ᠠᠰᠠᠭᠤᠬᠤᠢᠴᠠ ᠪᠣᠯᠤᠭᠠᠳ ᠰᠢᠷᠴᠢᠨ ᠦ᠌ ᠳᠡᠷᠡ ᠶ᠋ᠢᠨ ᠦᠵᠦᠭᠦᠷ ᠲᠦ᠍ ᠠᠪᠳᠠᠷᠠ ᠳᠡᠭᠡᠷᠡ ᠪᠡᠨ ᠠᠶᠠᠲᠠᠢᠬᠠᠨ ᠬᠤᠷᠢᠶᠠᠭᠰᠠᠨ ᠰᠣᠨᠢᠨ ᠲᠠᠢᠰᠢ ᠭᠠᠷ ᠢ᠋ᠶ᠋ᠠᠨ ᠰᠠᠷᠪᠠᠢᠵᠤ᠂
— ᠠ ᠴᠢ᠂ ᠰᠣᠨᠢᠨ ᠪᠠᠰᠠ ᠵᠠᠬᠢᠳᠠᠭ ᠬᠥᠮᠦᠨ ᠪᠣᠢ? ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠲᠡᠭᠡᠳᠡᠭ ᠠ᠋᠂ ᠭᠠᠭᠴᠠ ᠵᠠᠷᠢᠮ ᠳ᠋ᠤᠭᠠᠷ ᠨᠢ ᠢᠷᠡᠳᠡᠭ ᠦᠭᠡᠢ ᠵᠠᠮ ᠳ᠋ᠠᠭᠠᠨ(ᠳ᠋ᠤ᠌ ᠪᠠᠨ)ᠭᠡᠭᠡᠭᠳᠡᠴᠢᠬᠡᠳᠡᠭ ᠪᠣᠯᠤᠯᠲᠠᠢ ᠭᠡᠲᠡᠯᠡ ᠨᠢ᠂
— ᠰᠡᠭᠦᠯᠴᠢ ᠶ᠋ᠢᠨ ᠳ᠋ᠦ᠍ᠭᠡᠷ ᠨᠢ ᠶᠠᠮᠠᠷ ᠳ᠋ᠤᠭᠠᠷ ᠪᠠᠢᠭᠰᠠᠨ ᠪᠣᠢ? ᠭᠡᠵᠦ ᠠᠰᠠᠭᠤᠵᠠᠢ᠃
— ᠪᠤᠤ ᠮᠡᠳᠡ᠃ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠬᠦ ᠳ᠋ᠦ᠍᠂ ᠪᠢ ᠶᠡᠷᠦ ᠳ᠋ᠦ᠍ᠭᠡᠷ ᠢ᠋ ᠨᠢ ᠴᠡᠭᠡᠵᠢᠯᠡᠳᠡᠭ ᠦᠭᠡᠢ ᠰᠢᠦ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠲᠡᠭᠡᠪᠡᠯ᠂ ᠰᠣᠨᠢᠨ ᠳ᠋ᠤ᠌ ᠳ᠋ᠤᠭᠠᠷ ᠶᠠᠭᠠᠬᠢᠬᠤ ᠭᠡᠵᠦ ᠲᠠᠯᠪᠢᠳᠠᠭ ᠶᠤᠮ ᠪᠣᠢ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ? ᠭᠡᠵᠦ ᠠᠰᠠᠭᠤᠵᠠᠢ᠃
ᠰᠢᠷᠴᠢᠨ ᠨᠢᠭᠤᠷ ᠳᠡᠭᠡᠷᠡ ᠨᠢ ᠪᠠᠲᠠᠭᠠᠨᠠ ᠰᠠᠭᠤᠭᠰᠠᠨ ᠶᠤᠮ ᠰᠢᠭ᠋ ᠢᠷᠪᠠᠢᠰᠬᠢᠭᠡᠳ ᠬᠠᠷᠢᠭᠤ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠪᠢᠴᠢᠬᠠᠨ ᠯᠸᠨᠢᠨᠮᠡ᠂ ᠮᠣᠢᠯ ᠬᠠᠷᠠ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠦᠯᠦ ᠲᠠᠭᠠᠯᠠᠬᠤ ᠵᠣᠴᠢᠨ ᠢ᠋ ᠰᠢᠷᠳᠡᠨ᠂ ᠦᠯᠦ ᠣᠢᠰᠢᠶᠠᠬᠤ ᠪᠠᠢᠳᠠᠯ ᠦᠵᠡᠭᠦᠯᠵᠦ᠂
— ᠠᠪᠤ ᠶ᠋ᠢᠨ ᠰᠣᠨᠢᠨ ᠭᠡᠵᠦ ᠳᠤᠤᠭᠠᠷᠬᠤ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠳ᠋ᠤᠢᠩᠬᠤᠷ᠂
— ᠴᠢᠨᠦ ᠠᠪᠤ ᠮᠠᠭᠤ! ᠭᠡᠵᠡᠢ᠃
— ᠮᠢᠨᠦ ᠠᠪᠤ ᠮᠠᠭᠤ ᠪᠢᠰᠢ᠂ ᠲᠠ ᠮᠠᠭᠤ ᠭᠡᠵᠦ ᠯᠸᠨᠢᠨᠮᠡ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍᠂
— ᠬᠡᠦᠬᠡ ᠲᠡᠭᠡᠳᠡᠭ ᠦᠭᠡᠢ ᠶᠦᠮ ᠰᠢᠦ ᠭᠡᠳ ᠴᠡᠷᠡᠨ᠂ ᠵᠢᠭᠠᠯ ᠥᠬᠢᠨ ᠢ᠋ᠶ᠋ᠡᠨ ᠡᠪᠦᠷ ᠳᠡᠭᠡᠷᠡ ᠪᠡᠨ ᠰᠠᠭᠤᠯᠭᠠᠭᠠᠳ ᠢᠯᠡᠭᠦᠦ ᠳᠤᠲᠠᠭᠤ ᠬᠠᠲᠠᠭᠤ ᠰᠢᠷᠦᠭᠦᠨ ᠦᠭᠡ ᠪᠢᠲᠡᠭᠡᠢ ᠬᠡᠯᠡ ᠳᠡ ᠭᠡᠰᠡᠨ ᠶᠦᠮ ᠰᠢᠭ᠂ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠥᠭᠡᠳᠡ ᠡᠴᠡ ᠵᠣᠪᠠᠨᠢᠨ ᠬᠠᠷᠠᠵᠠᠢ᠃ ᠴᠡᠷᠡᠨ᠂ ᠥᠬᠢᠨ ᠦ᠌ ᠨᠢᠭᠡ ᠠᠳᠠᠯᠢ ᠪᠠᠭ ᠤ᠋ᠨ ᠢ᠋ᠶ᠋ᠠᠨ ᠲᠡᠷᠡ ᠰᠢᠨᠡ ᠳᠠᠷᠤᠭᠠ ᠶ᠋ᠢ ᠬᠠᠷᠠᠬᠤ ᠳ᠋ᠤ᠌ ᠨᠢᠳᠦᠨ ᠳ᠋ᠦ᠍ ᠨᠢᠭᠡ ᠯᠡ ᠬᠦᠢᠲᠡᠨ ᠦᠵᠡᠭᠳᠡᠳᠡᠭ ᠪᠠᠢᠵᠠᠢ᠃ ᠲᠡᠷᠡ ᠵᠢᠯ ᠦ᠋ᠨ ᠬᠠᠪᠤᠷ ᠸᠠᠩ ᠣᠪᠣᠭᠲᠤ ᠬᠣᠶᠠᠳᠤᠭᠠᠷ ᠬᠦᠦ ᠭᠡᠳᠡᠭ ᠡᠪᠦᠭᠡᠨ ᠢ᠋ ᠣᠯᠵᠤ ᠴᠢᠬᠢ ᠶ᠋ᠢ ᠨᠢ ᠲᠤᠰᠢᠶᠠ ᠭᠡᠵᠦ ᠰᠢᠷᠴᠢᠨ ᠢ᠋ ᠰᠢᠬᠠᠭᠠᠳ᠂ ᠬᠠᠳᠠᠨ ᠪᠠᠭᠠᠲᠤᠷ ᠮᠠᠭᠰᠤᠷᠵᠠᠪ ᠲᠤ᠌ ᠰᠢᠢᠳᠬᠡᠭᠦᠯᠦᠨ ᠪᠠᠨᠰᠠᠳᠠᠭᠤᠯᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠰᠢᠷᠴᠢᠨ ᠳ᠋ᠦ᠍ ᠥᠰᠢᠶᠡᠲᠡᠢ ᠪᠣᠯᠤᠭᠰᠠᠨ ᠢ᠋ ᠨᠢ ᠰᠠᠨᠠᠭᠠᠳ ᠴᠡᠷᠡᠨ ᠦ᠌ ᠳᠣᠲᠣᠷᠠ ᠨᠢ ᠠᠶᠠ ᠦᠭᠡᠢ ᠪᠣᠯᠵᠤ ᠰᠠᠭᠤᠲᠠᠯᠠ᠂ ᠳ᠋ᠣᠢᠩᠬᠣᠷ ᠲᠦᠷᠦᠭᠦᠨ ᠠᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠯᠠᠪᠳᠠᠭᠠᠬᠤ ᠰᠠᠨᠠᠭᠠᠲᠠᠢ ᠪᠠᠷ ᠳᠠᠬᠢᠨ ᠠᠰᠠᠭᠤᠵᠤ᠂
— ᠵᠠ᠂ ᠳ᠋ᠤᠭᠠᠷ ᠢ᠋ ᠨᠢ ᠴᠢ ᠲᠣᠭᠲᠠᠭᠠᠳᠠᠭ ᠦᠭᠡᠢ ᠶᠦᠮ ᠪᠠᠢᠵᠠᠢ᠂ ᠲᠡᠭᠡᠭᠰᠡᠨ ᠴᠦ᠍᠂ ᠰᠡᠭᠦᠯᠴᠢ ᠶ᠋ᠢᠨ ᠳ᠋ᠤᠭᠠᠷ ᠲᠤᠨᠢ( ᠲᠤ ᠨᠢ) ᠴᠣᠬᠣᠮ ᠶᠠᠭᠤ ᠭᠡᠵᠦ ᠪᠢᠴᠢᠭᠡᠰᠦᠲᠡᠢ ᠪᠠᠢᠭᠰᠠᠨ ᠪᠣᠢ? ᠬᠡᠮᠡᠪᠡᠰᠦ᠂
— ᠪᠢ ᠪᠦᠭᠦᠳᠡ ᠶ᠋ᠢ ᠨᠢ ᠦᠵᠡᠭᠡ ᠦᠭᠡᠢ᠃ ᠣᠯᠠᠨ ᠤᠯᠤᠰ ᠤ᠋ᠨ ᠪᠠᠢᠳᠠᠯ ᠠ᠋ᠴᠠ ᠯᠠ ᠬᠣᠯᠪᠣᠭᠠᠲᠤ ᠤᠯᠤᠰ ᠲᠤ᠌ ᠦᠢᠯᠡᠳᠪᠦᠷᠢ ᠲᠤᠩ ᠶᠡᠬᠡ ᠬᠥᠭᠵᠢᠵᠦ ᠪᠠᠢᠭᠠ ᠶ᠋ᠢ᠂ ᠮᠥᠨ ᠬᠢᠲᠠᠳ ᠤ᠋ᠨ ᠠᠷᠠᠳ ᠲᠦᠮᠡᠨ ᠶᠠᠫᠣᠨ ᠤ᠋ ᠬᠠᠷᠭᠢᠰ ᠡᠵᠡᠷᠬᠡᠭ ᠲᠦᠷᠢᠮᠡᠬᠡᠢ ᠶ᠋ᠢ ᠤᠯᠠᠮ ᠤᠯᠠᠮ ᠡᠰᠡᠷᠭᠦᠴᠡᠵᠦ ᠪᠠᠢᠭᠠ ᠶ᠋ᠢ ᠤᠷᠢᠲᠠᠵᠤ ᠰᠣᠨᠢᠷᠬᠠᠨ ᠦᠵᠡᠭᠰᠡᠨ ᠳᠡ ᠭᠡᠵᠦ ᠰᠢᠷᠴᠢᠨ ᠦ᠌ ᠬᠠᠷᠢᠭᠤᠯᠬᠤ ᠳ᠋ᠤ᠌ ᠳ᠋ᠣᠢᠩᠬᠣᠷ ᠢᠷᠪᠠᠢᠵᠤ᠂ ᠪᠠᠭ ᠤ᠋ᠨ ᠳᠠᠷᠤᠭᠠ ᠪᠣᠯᠤᠭᠰᠠᠨ ᠠ᠋ᠴᠠ ᠬᠣᠢᠰᠢ᠂ ᠡᠳᠦᠷ ᠰᠥᠨᠢ ᠴᠦ᠍ ᠭᠡᠰᠡᠨ ᠪᠡᠶᠡ ᠡᠴᠡ ᠪᠡᠨ ᠬᠣᠯᠠᠳᠠᠭᠤᠯᠳᠠᠭ ᠦᠭᠡᠢ᠂ ᠫᠢᠭ ᠳᠦᠭᠦᠷᠡᠩ ᠪᠢᠴᠢᠭ ᠴᠠᠭᠠᠰᠤ ᠴᠢᠬᠢᠭᠰᠡᠨ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ ᠶ᠋ᠢᠨ ᠰᠢᠷᠠ ᠪᠤᠯᠢᠭᠠᠷᠢ ᠰᠦᠮᠺ ᠢ᠋ᠶ᠋ᠡᠨ ᠢᠯᠢᠯᠬᠢᠯᠡᠨ ᠯᠠᠪ ᠶᠠᠮᠠᠷᠬᠠᠨ ᠨᠢᠭᠡ ᠬᠥᠮᠦᠨ ᠦ᠌ ᠦᠭᠡ ᠬᠡᠯᠡᠬᠦ ᠪᠠᠢᠳᠠᠯ ᠢ᠋ ᠳᠠᠭᠤᠷᠢᠶᠠᠨ ᠥᠭᠦᠯᠡᠷᠦᠨ᠂
— ᠬᠡᠨ ᠲᠡᠭᠡᠵᠦ ᠰᠣᠨᠢᠨ ᠦᠵᠡᠳᠡᠭ ᠶᠦᠮ ᠪᠣᠢ? ᠰᠣᠨᠢᠨ ᠤ᠋ ᠳ᠋ᠤᠭᠠᠷ ᠢ᠋ ᠪᠦᠬᠦ ᠨᠡᠢᠲᠡᠯᠡᠭᠰᠡᠨ ᠵᠦᠢᠯ ᠦ᠋ᠨ ᠭᠠᠷᠴᠠᠭ ᠢ᠋ ᠳᠡᠰ ᠳᠠᠷᠠᠭᠠᠪᠠᠷ(ᠳᠠᠷᠠᠭᠠ ᠪᠠᠷ) ᠨᠢ ᠴᠡᠭᠡᠵᠢᠯᠡᠳᠡᠭ ᠶᠣᠰᠣᠲᠠᠢ ᠶᠤᠮ᠃ ᠠ ᠴᠢ ᠬᠣᠴᠣᠷᠤᠭᠳᠠᠭᠰᠠᠨ ᠬᠥᠮᠦᠨ ᠪᠠᠢᠨᠠ᠃ ᠢ ᠲᠡᠭᠡᠭᠡᠳ᠂ ᠲᠠᠨ ᠤ᠋ ᠬᠥᠮᠦᠨ᠂ ᠢᠰᠡᠬᠡᠢᠮᠦᠦᠰ ᠭᠡᠳᠡᠭ ᠢ᠋ ᠴᠦ᠍ ᠲᠣᠭᠣᠯᠤᠭᠠ ᠦᠭᠡᠢ ᠪᠠᠢᠯ ᠦᠭᠡᠢ ᠳᠡ᠂ ᠠ? ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠢᠰᠡᠬᠡᠢᠮᠦᠦᠰ ᠭᠡᠵᠦ ᠪᠢ ᠶᠡᠷᠦ ᠮᠡᠳᠡᠬᠦ ᠦᠭᠡᠢ ᠶᠦᠮ ᠪᠠᠢᠨᠠ ᠳᠠ᠃ ᠰᠣᠨᠢᠨ ᠳ᠋ᠤ᠌ ᠴᠤ᠌ ᠭᠡᠰᠡᠨ ᠮᠤᠤᠰ ᠭᠡᠵᠦ ᠲᠡᠢᠮᠦ ᠶᠠᠭᠤᠮᠠ ᠪᠠᠢᠳᠠᠭ ᠭᠡᠵᠦ ᠨᠠᠳᠠᠳᠤ(ᠨᠠᠳᠠ ᠳ᠋ᠤ᠌) ᠲᠠᠭᠠᠷᠢᠯᠳᠤᠭᠰᠨ ᠦᠭᠡᠢ᠃ ᠶᠠᠭᠤ ᠬᠢᠳᠡᠭ ᠶᠦᠮ ᠪᠣᠢ ᠲᠡᠷᠡ ᠮᠤᠤᠰ ᠢ᠋ᠶ᠋ᠠᠷ? ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠳ᠋ᠣᠢᠩᠬᠣᠷ ᠨᠢᠭᠡ ᠶᠡᠬᠡ ᠮᠡᠳᠡᠮᠡᠬᠡᠢᠷᠡᠭᠰᠡᠨ ᠪᠠᠢᠳᠠᠯ ᠲᠠᠢ᠄
— ᠢᠰᠡᠬᠡᠢᠮᠤᠤᠰ ᠭᠡᠵᠦ ᠤᠯᠤᠰ ᠪᠠᠢᠳᠠᠯ ᠶᠤᠮ᠃ ᠮᠠᠨᠠᠢᠬᠢᠨ ᠤ᠋ ᠳᠠᠬᠤ ᠰᠢᠭ᠋ ᠦᠰᠦ ᠶ᠋ᠢ ᠨᠢ ᠭᠠᠳᠠᠭᠰᠢ ᠨᠢ ᠬᠠᠷᠠᠭᠤᠯᠤᠭᠰᠠᠨ ᠳᠡᠪᠡᠯ ᠬᠤᠪᠴᠠᠰᠤ ᠲᠠᠢ᠂ ᠢ ᠲᠡᠭᠦᠨ ᠢ᠋ᠶ᠋ᠡᠨ ᠡᠳᠦᠷ ᠰᠥᠨᠢ ᠶᠡᠷᠦ ᠲᠠᠢᠯᠳᠠᠭ ᠦᠭᠡᠢ ᠪᠠ ᠢᠰᠡᠭᠡᠢ ᠪᠣᠯᠲᠠᠯᠠ ᠡᠮᠦᠰᠦᠭᠰᠡᠭᠡᠷ ᠢᠰᠡᠭᠡᠢᠮᠦᠦᠰ ᠭᠡᠵᠦ ᠨᠡᠷᠡᠲᠡᠢ ᠪᠣᠯᠤᠭᠰᠠᠨ ᠶᠤᠮ᠃ ᠤᠮᠠᠷᠠᠲᠤ ᠲᠤᠢᠯ ᠤ᠋ᠨ ᠴᠠᠭᠠᠷᠢᠭ ᠤ᠋ᠨ ᠲᠡᠷᠲᠡᠭᠡ ᠴᠠᠰᠤᠨ ᠭᠡᠷ ᠲᠦ᠍ ᠰᠠᠭᠤᠳᠠᠭ ᠪᠠ ᠶᠡᠷᠦ ᠳᠤᠯᠠᠭᠠᠨ ᠭᠠᠵᠠᠷ ᠪᠠᠢᠵᠤ ᠴᠢᠳᠠᠳᠠᠭ ᠦᠭᠡᠢ ᠶᠦᠮ᠃ ᠠ ᠮᠠᠨ ᠤ᠋ ᠡᠨᠳᠡ ᠲᠡᠳᠡᠨ ᠢ᠋ ᠠᠪᠴᠢᠷᠠᠪᠠᠯ᠂ ᠶᠠᠭ ᠯᠠ ᠬᠣᠶᠠᠷ ᠴᠠᠭ ᠪᠣᠯᠤᠭᠠᠳ ᠢ ᠦᠬᠦᠨᠡ᠃ ᠡᠨᠳᠡᠬᠢ ᠠᠭᠤᠷ ᠠᠮᠢᠰᠬᠤᠯ ᠲᠡᠳᠡᠨ ᠳ᠋ᠦ᠍ ᠵᠣᠬᠢᠬᠤ ᠦᠭᠡᠢ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠴᠡᠷᠡᠨ ᠦᠯᠦ ᠢᠳᠡᠭᠡᠨ᠂
— ᠬᠠᠮᠢᠭᠠ ᠠ᠋ᠴᠠ ᠲᠡᠢᠮᠦ ᠶᠠᠭᠤᠮᠠ ᠪᠠᠢᠬᠤ ᠭᠡᠵᠦ ᠳᠡ᠃ ᠲᠠᠨ ᠤ᠋ ᠲᠡᠷᠡ ᠢᠰᠡᠭᠡᠢᠮᠦᠦᠰ ᠴᠢᠨᠢ ᠢᠰᠡᠭᠡᠢᠮᠦᠦᠰ ᠪᠢᠰᠢ᠂ ᠥᠨᠥᠬᠢ ᠡᠰᠺᠢᠮᠥᠰ ᠭᠡᠳᠡᠭ ᠤᠯᠤᠰ ᠪᠠᠢᠬᠤ ᠰᠢᠪ ᠳᠡ᠃ ᠨᠠ᠊ ᠪᠠᠭᠰᠢ᠂ ᠲᠡᠷᠡ ᠡᠰᠺᠢᠮᠥᠰ ᠨᠠᠷ ᠢ᠋ ᠪᠢᠳᠡᠨ ᠲᠡᠢ ᠵᠢᠰᠦ ᠴᠢᠷᠠᠢ ᠲᠥᠰᠦᠷᠬᠡᠦ ᠤᠯᠤᠰ᠃ ᠮᠣᠩᠭᠣᠯᠴᠤᠳ᠂ ᠲᠡᠳᠡᠨ ᠢ᠋ ᠨᠣᠬᠠᠢ ᠡᠷᠡᠲᠡᠨ ᠭᠡᠵᠦ ᠪᠠᠷᠤᠭ ᠮᠢᠩᠭᠠᠭᠠᠳ ᠵᠢᠯ ᠨᠡᠷᠡᠯᠡᠭᠰᠡᠭᠡᠷ᠂ ᠲᠡᠳᠡᠨ ᠦ᠌ ᠲᠤᠬᠠᠢ ᠡᠯᠳᠡᠪ ᠬᠤᠳᠠᠯ ᠦᠨᠡᠨ ᠳᠣᠮᠣᠭ ᠦᠭᠡ ᠬᠡᠯᠡᠯᠴᠡᠭᠰᠡᠭᠡᠷ ᠢᠷᠡᠵᠦ ᠭᠡᠵᠦ ᠬᠡᠯᠡᠳᠡᠭ ᠰᠠᠨ᠃ ᠪᠢ ᠴᠦ᠍ ᠭᠡᠰᠡᠨ ᠪᠠᠭᠠ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠨᠣᠬᠠᠢ ᠡᠷᠡᠲᠡᠨ ᠦ᠌ ᠲᠤᠬᠠᠢ ᠲᠤᠭᠤᠯᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ)᠂ ᠡᠷᠲᠡ ᠳᠡᠭᠡᠷᠡ ᠴᠠᠭ ᠲᠤ᠌ ᠪᠤᠲᠠᠨᠴᠢᠷ ᠣᠪᠣᠭ ᠤ᠋ᠨ ᠠᠩᠴᠢᠨ ᠴᠡᠷᠢᠭ᠂ ᠬᠡᠨᠲᠡᠢ ᠬᠠᠨ ᠠᠭᠤᠯᠠ ᠬᠠᠮᠢᠭᠠ ᠬᠦᠷᠳᠡᠭ ᠶᠦᠮ ᠪᠣᠯ ᠭᠡᠵᠦ ᠦᠵᠡᠬᠦ ᠭᠡᠳ ᠥᠪᠥᠷ ᠢ᠋ᠶ᠋ᠡᠷ ᠨᠢ ᠳᠠᠭᠠᠭᠰᠠᠭᠠᠷ᠂ ᠵᠡᠭᠦᠨ ᠬᠣᠢᠰᠢ ᠪᠠᠨ ᠶᠠᠪᠤᠵᠤ ᠦᠵᠡᠭᠰᠡᠨ ᠶᠦᠮ ᠭᠡᠵᠦ ᠲᠤᠭᠤᠯᠤᠭᠰᠠᠨ ᠪᠢᠯᠡ᠃ ᠶᠠᠪᠤᠵᠤ ᠶᠠᠪᠤᠵᠤ᠂ ᠵᠠᠮ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠡᠯᠳᠡᠪ ᠦ᠋ᠨ ᠶᠠᠭᠤᠮᠠ ᠲᠠᠢ ᠳᠠᠭᠠᠷᠢᠯᠳᠤᠵᠤ᠂ ᠬᠡᠯᠡ ᠪᠤᠷᠤᠭᠤ ᠲᠠᠢ ᠣᠯᠠᠨ ᠠᠢᠮᠠᠭ ᠤ᠋ᠨ ᠬᠥᠮᠦᠨ ᠲᠡᠢ ᠲᠤᠯᠤᠭᠰᠠᠭᠠᠷ᠂ ᠴᠢᠯᠠᠭᠤᠨ ᠵᠡᠪᠡ᠂ ᠶᠠᠰᠤᠨ ᠵᠡᠪᠡ ᠲᠡᠢ ᠰᠤᠮᠤᠨ ᠳ᠋ᠤᠨᠢ( ᠳ᠋ᠤ᠌ ᠨᠢ)᠂ ᠠᠩ ᠠᠷᠢᠶᠠᠲᠠᠨ ᠳ᠋ᠤ᠌ ᠵᠠᠷᠢᠮ ᠨᠢᠭᠡ ᠨᠢ ᠠᠮᠢ ᠦᠷᠡᠭᠳᠡᠵᠦ᠂ ᠬᠠᠷᠢ ᠭᠠᠵᠠᠷ ᠶᠠᠰᠤ ᠪᠠᠨ ᠲᠠᠯᠪᠢᠭᠰᠠᠨ ᠪᠣᠯᠪᠠᠴᠤ ᠠᠮᠢᠳᠤ ᠦᠯᠡᠳᠡᠭᠰᠡᠨ ᠨᠥᠬᠥᠳ ᠨᠢ ᠪᠡᠷᠬᠡ ᠶ᠋ᠢ ᠵᠣᠷᠢᠭᠯᠠᠨ ᠳᠠᠪᠠᠵᠤ᠂ ᠠᠭᠤᠯᠠ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠷᠮᠣᠢ ᠳᠠᠭᠠᠭᠰᠠᠭᠠᠷ ᠭᠠᠳᠠᠭᠠᠳᠤ ᠶᠡᠬᠡ ᠳᠠᠯᠠᠢ ᠶ᠋ᠢᠨ ᠡᠷᠭᠢ ᠳ᠋ᠦ᠍ ᠬᠦᠷᠴᠦ᠂ ᠬᠡᠨᠲᠡᠢ ᠬᠠᠨ ᠠᠭᠤᠯᠠ ᠶ᠋ᠢᠨ ᠦᠵᠦᠭᠦᠷ ᠨᠢ ᠳᠠᠯᠠᠢ ᠳ᠋ᠤ᠌ ᠲᠤᠯᠤᠭᠰᠠᠨ ᠢ᠋ ᠦᠵᠡᠵᠦ ᠮᠡᠳᠡᠭᠰᠡᠨ ᠭᠡᠵᠦ ᠬᠡᠯᠡᠯᠴᠡᠬᠦ ᠶ᠋ᠢ ᠲᠤᠭᠤᠯᠤᠭᠰᠠᠨ ᠪᠢᠯᠡ᠃ ᠪᠤᠲᠠᠨᠴᠢᠷ ᠣᠪᠣᠭ ᠤ᠋ᠨ ᠲᠡᠷᠡ ᠵᠣᠷᠢᠭᠲᠠᠨ ᠡᠷᠡᠴᠦᠦᠯ᠂ ᠭᠠᠳᠠᠭᠠᠳᠤ ᠳᠠᠯᠠᠢ ᠶ᠋ᠢᠨ ᠵᠠᠬᠠ ᠳ᠋ᠤ᠌ ᠭᠠᠢᠬᠠᠮᠰᠢᠭᠲᠠᠢ ᠶᠠᠭᠤᠮᠠ ᠦᠵᠡᠵᠦ ᠭᠡᠨᠡ᠃ ᠡᠷᠲᠡᠨ ᠦ᠌ ᠦᠯᠢᠭᠡᠷ ᠲᠡᠦᠬᠡᠨ ᠳ᠋ᠦ᠍᠂ ᠪᠠᠭᠠᠲᠤᠷ ᠰᠠᠢᠨ ᠡᠷᠡᠰ ᠲᠡᠢ ᠲᠤᠯᠳᠠᠭ ᠬᠣᠣᠷᠲᠠᠨ ᠮᠠᠩᠭᠤᠰ᠂ ᠡᠳᠦᠷ ᠠᠩ ᠬᠥᠷᠥᠭᠡᠨ ᠳ᠋ᠦ᠍ ᠶᠠᠪᠤᠬᠤ ᠳ᠋ᠠᠭᠠᠨ ( ᠳ᠋ᠤ᠌ ᠪᠠᠨ)᠂ ᠭᠠᠳᠠᠭᠠᠳᠤ ᠶᠡᠬᠡ ᠳᠠᠯᠠᠢ ᠶ᠋ᠢᠨ ᠵᠠᠬᠠ ᠳ᠋ᠠᠬᠢ ᠲᠡᠷᠡ ᠠᠭᠤᠯᠠᠨ ᠳ᠋ᠤ᠌ ᠭᠠᠯ ᠲᠦᠳᠡᠭ ᠢ᠋ᠶ᠋ᠡᠨ ᠮᠠᠨᠠᠳᠠᠭ ᠪᠠᠢᠵᠤ᠂ ᠲᠡᠭᠡᠭᠡᠳ ᠲᠡᠷᠡ ᠭᠠᠯ ᠮᠠᠨᠠᠭᠰᠠᠨ ᠠᠭᠤᠯᠠᠨ ᠳ᠋ᠤᠨᠢ( ᠳ᠋ᠤ᠌ ᠨᠢ)᠂ ᠶᠡᠬᠡ ᠨᠣᠷᠮᠠ ᠠ᠋ᠴᠠ ᠨᠢ ᠤᠲᠤᠭᠠ ᠰᠤᠭᠤᠨᠠᠭᠯᠠᠨ ᠦᠵᠡᠭᠳᠡᠳᠡᠭ ᠪᠠᠢᠵᠠᠢ᠃ ᠥᠨᠥᠬᠢ ᠠᠩᠴᠢᠨ ᠨᠤᠭᠤᠳ᠂ ᠡᠳᠦᠷ ᠨᠢ ᠲᠡᠷᠡ ᠠᠭᠤᠯᠠᠨ ᠳ᠋ᠤ᠌ ᠮᠣᠷᠢ ᠲᠠᠢ ᠭᠠᠷᠴᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠰᠥᠨᠢ ᠭᠠᠯ ᠬᠠᠷᠠᠭᠳᠠᠬᠤ ᠶ᠋ᠢ ᠦᠵᠡᠭᠡᠳ᠂ ᠮᠠᠩᠭᠤᠰ ᠠᠩ ᠬᠦᠷᠦᠭᠡ ᠡᠴᠡ ᠪᠡᠨ ᠪᠠᠭᠤᠵᠤ ᠢᠷᠡᠭᠡᠳ᠂ ᠬᠣᠭᠣᠯᠠ ᠤᠮᠳᠠ ᠪᠠᠨ ᠬᠢᠵᠦ ᠪᠠᠢᠭᠠ ᠶᠤᠮ ᠪᠠᠢᠨᠠ ᠭᠡᠵᠦ ᠮᠡᠳᠡᠵᠡᠢ᠃ ᠲᠡᠷᠡ ᠦᠯᠡᠮᠵᠢ ᠪᠡᠶᠡᠳᠡᠨ ᠮᠠᠩᠭᠤᠰ ᠤ᠋ᠨ ᠦᠯᠡᠮᠵᠢ ᠶᠡᠬᠡ ᠲᠦᠳᠡᠭ ᠦ᠋ᠨ ᠭᠠᠯ ᠳ᠋ᠤ᠌ ᠠᠭᠤᠯᠠ ᠶ᠋ᠢᠨ ᠴᠢᠯᠠᠭᠤ ᠬᠦᠷᠲᠡᠯᠡ ᠬᠠᠢᠯᠤᠨ ᠤᠷᠤᠰᠴᠤ ᠪᠠᠢᠳᠠᠭ ᠢ᠋ ᠦᠵᠡᠵᠦ ᠭᠡᠨᠡ᠃ ᠲᠡᠭᠡᠭᠡᠳ ᠮᠠᠨ ᠤ᠋ ᠡᠨᠳᠡ ᠴᠦ᠍ ᠭᠡᠰᠡᠨ᠂ ᠡᠷᠲᠡ ᠴᠠᠭ ᠲᠤ᠌ ᠮᠠᠩᠭᠤᠰ ᠤ᠋ᠨ ᠭᠠᠯ ᠮᠠᠨᠠᠭᠰᠠᠨ ᠠᠭᠤᠯᠠ ᠪᠠᠢᠭᠰᠠᠨ ᠢ᠋ ᠲᠡᠭᠦᠪᠡᠷ ᠲᠠᠨᠢᠵᠤ ᠮᠡᠳᠡᠭᠰᠡᠨ ᠶᠦᠮ ᠭᠡᠨᠡ ᠯᠡ᠃ ᠮᠠᠩᠭᠤᠰ ᠤ᠋ᠨ ᠲᠡᠷᠡ ᠭᠠᠯ ᠭᠣᠯᠣᠮᠲᠠ ᠨᠢ ᠶᠠᠭᠠᠬᠢᠭᠠᠳ ᠦᠭᠡᠢ ᠪᠣᠯᠤᠭᠰᠠᠨ ᠶᠤᠮ ᠪᠣᠢ ᠭᠡᠪᠡᠯ᠂ ᠮᠠᠨ ᠤ᠋ ᠡᠷᠲᠡᠨ ᠦ᠌ ᠪᠠᠭᠠᠲᠤᠷ᠂ ᠡᠷᠡ ᠶ᠋ᠢᠨ ᠰᠠᠢᠨ ᠡᠷᠡᠰ᠂ ᠲᠡᠳᠡᠨ ᠦ᠌ ᠦᠨᠳᠦᠰᠦ ᠶ᠋ᠢ ᠲᠠᠰᠤᠯᠵᠤ᠂ ᠭᠠᠯ ᠭᠣᠯᠣᠮᠲᠠ ᠶ᠋ᠢ ᠨᠢ ᠤᠨᠲᠠᠷᠠᠭᠠᠭᠰᠠᠨ ᠶᠤᠮ ᠭᠡᠵᠦ ᠬᠠᠭᠤᠴᠢᠨ ᠤᠯᠤᠰ ᠶᠠᠷᠢᠳᠠᠭ ᠪᠠᠢᠵᠠᠢ᠃
— ᠭᠠᠳᠠᠭᠠᠳᠤ ᠳᠠᠯᠠᠢ ᠶ᠋ᠢᠨ ᠵᠠᠬᠠ ᠳ᠋ᠤ᠌ ᠬᠦᠷᠦᠭᠰᠡᠨ ᠲᠡᠷᠡ ᠵᠣᠷᠢᠭᠲᠠᠨ ᠡᠷᠡᠰ᠂ ᠨᠣᠬᠠᠢ ᠡᠷᠡᠲᠡᠨ ᠤᠯᠤᠰ ᠤ᠋ᠨ ᠣᠯᠠᠨ ᠠᠢᠯ ᠡᠷᠦᠬᠡ ᠪᠡᠷ ᠣᠷᠣᠵᠤ ᠦᠵᠡᠭᠰᠡᠨ ᠪᠠᠢᠵᠠᠢ᠃ ᠲᠡᠭᠡᠬᠦ ᠳ᠋ᠦ᠍ ᠶᠡᠷᠦ᠂ ᠡᠬᠡᠨᠡᠷ ᠬᠡᠦᠬᠡᠳ ᠳᠠᠭᠠᠷᠢᠯᠳᠤᠬᠤ ᠠ᠋ᠴᠠ ᠪᠢᠰᠢ᠂ ᠡᠷᠡ ᠬᠥᠮᠦᠨ ᠦᠵᠡᠭᠳᠡᠭᠰᠡᠨ ᠦᠭᠡᠢ᠂ ᠡᠷᠡ ᠬᠦᠢᠰᠦᠲᠡᠨ ᠡᠴᠡ ᠭᠠᠭᠴᠠ ᠨᠣᠬᠠᠢ ᠯᠠ ᠣᠯᠠᠨ ᠳᠠᠭᠠᠷᠢᠯᠳᠤᠵᠤ᠂ ᠪᠠᠰᠠ ᠬᠡᠭᠡᠷᠡ ᠴᠦ᠍ ᠭᠡᠰᠡᠨ ᠲᠡᠷᠡ ᠨᠣᠬᠠᠢ ᠪᠠᠨ ᠴᠢᠷᠭᠠ ᠳ᠋ᠤ᠌ ᠬᠥᠯᠦᠭᠡᠳ ᠶᠠᠪᠤᠬᠤ ᠡᠮᠡ ᠬᠥᠮᠦᠨ ᠲᠡᠢ ᠣᠯᠠᠨ ᠳᠠᠭᠠᠷᠢᠯᠳᠤᠭᠠᠳ᠂ ᠪᠤᠲᠠᠨᠴᠢᠷ ᠤ᠋ᠨ ᠲᠡᠷᠡ ᠴᠡᠷᠢᠭ ᠡᠷᠡᠰ᠂ ᠲᠡᠷᠡ ᠤᠯᠤᠰ ᠢ᠋ ᠡᠮᠡ ᠬᠥᠮᠦᠨ ᠨᠢ ᠨᠣᠬᠠᠢ ᠡᠷᠡ ᠲᠡᠢ ᠪᠠᠢᠳᠠᠭ ᠶᠤᠮ ᠪᠠᠢᠨᠠ ᠭᠡᠵᠦ ᠪᠣᠳᠣᠭᠠᠳ ᠨᠣᠬᠠᠢ ᠡᠷᠡᠲᠡᠨ ᠭᠡᠵᠦ ᠲᠡᠳᠡᠨ ᠢ᠋ ᠥᠪᠡᠷ ᠵᠠᠭᠤᠷᠠ ᠪᠠᠨ ᠭᠠᠢᠬᠠᠨ ᠨᠡᠷᠡᠯᠡᠭᠰᠡᠨ ᠪᠠᠢᠵᠠᠢ᠃ ᠲᠡᠷᠡ ᠨᠣᠬᠠᠢ ᠡᠷᠡᠲᠡᠨ ᠦ᠌ ᠬᠡᠦᠬᠡᠨ ᠡᠴᠡ ᠴᠦ᠍ ᠠᠪᠴᠢᠷᠠᠭᠰᠠᠨ ᠪᠠᠢᠵᠠᠢ᠃ ᠳᠦᠷᠢ ᠴᠢᠷᠠᠢ ᠮᠣᠩᠭᠣᠯ ᠬᠥᠮᠦᠨ ᠰᠢᠭ᠂ ᠰᠦᠷᠡᠬᠡᠢ ᠴᠢᠷᠠᠢᠯᠢᠭ ᠬᠡᠦᠬᠡᠨ ᠨᠦ᠍ᠭᠦᠳ ᠴᠦ᠍ ᠪᠠᠢᠭᠰᠠᠨ ᠶᠤᠮ ᠭᠡᠨᠡ ᠯᠡ᠃ ᠨᠤᠲᠤᠭ ᠢ᠋ᠶ᠋ᠠᠨ ᠯᠠ ᠶᠡᠬᠡ ᠰᠠᠨᠠᠳᠠᠭ ᠪᠠᠢᠵᠤ᠂ ᠪᠠᠰᠠ ᠪᠠᠭᠠ ᠠ᠋ᠴᠠ ᠪᠠᠨ ᠲᠡᠰᠴᠦ ᠰᠤᠷᠤᠭᠰᠠᠨ ᠬᠣᠭᠣᠯᠠ ᠤᠮᠳᠠ ᠪᠠᠨ ᠰᠠᠨᠠᠵᠤ᠂ ᠬᠥᠯᠳᠡᠭᠦᠦ ᠵᠢᠭᠠᠰᠤ ᠵᠣᠷᠴᠤ ᠲᠦᠭᠦᠬᠡᠢ ᠪᠡᠷ ᠨᠢ ᠢᠳᠡᠬᠦ᠂ ᠦᠨᠡᠰᠦ ᠲᠡᠢ ᠪᠤᠴᠠᠯᠭᠠᠭᠰᠠᠨ ᠤᠰᠤ ᠤᠤᠭᠤᠬᠤ ᠳᠤᠷᠠᠲᠠᠢ ᠪᠠᠢᠭᠰᠠᠨ ᠶᠤᠮ ᠭᠡᠵᠦ ᠬᠡᠯᠡᠯᠴᠡᠳᠡᠭ ᠪᠢᠯᠡ ᠯᠠ᠃ ᠲᠡᠭᠡᠬᠦ ᠳ᠋ᠦ᠍᠂ ᠲᠠ ᠲᠡᠳᠡᠨ ᠢ᠋ ᠬᠣᠶᠠᠷᠬᠠᠨ ᠴᠠᠭ ᠪᠣᠯᠤᠭᠠᠳ ᠦᠬᠦᠳᠡᠭ ᠭᠡᠵᠦ ᠳᠡᠮᠡᠢ ᠶᠠᠭᠤᠮᠠ ᠬᠡᠯᠡᠵᠦ ᠪᠠᠢᠨᠠ᠃ ᠬᠠᠮᠢᠭᠠ ᠠ᠋ᠴᠠ ᠲᠡᠭᠡᠬᠦ ᠭᠡᠵᠦ ᠳᠡ᠃ ᠴᠠᠰᠤᠨ ᠭᠡᠷ ᠲᠦ᠍ ᠰᠠᠭᠤᠳᠠᠭ ᠪᠣᠯᠪᠠᠴᠤ᠂ ᠴᠠᠰᠤ ᠪᠠᠷ ᠪᠦᠲᠦᠭᠰᠡᠨ ᠪᠢᠰᠢ᠂ ᠪᠢᠳᠡᠨ ᠲᠠᠢ ᠯᠠ ᠠᠳᠠᠯᠢ ᠮᠢᠬᠠ ᠴᠢᠰᠤ ᠪᠠᠷ ᠪᠦᠲᠦᠭᠰᠡᠨ ᠤᠯᠤᠰ ᠪᠠᠢᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ? ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠳ᠋ᠤᠢᠩᠬᠤᠷ᠂
— ᠲᠡᠷᠡ ᠨᠣᠬᠠᠢ ᠡᠷᠡᠳᠡᠨ ᠭᠡᠳᠡᠭ᠂ ᠢᠰᠡᠭᠡᠢᠮᠤᠤᠰ ᠪᠢᠰᠢ ᠴᠦ᠍ ᠪᠠᠢᠵᠤ ᠪᠣᠯᠤᠨᠠ ᠰᠢᠦ ᠳᠡ ᠭᠡᠵᠦ ᠰᠤᠯᠠᠬᠠᠨ ᠰᠢᠭ᠋ ᠢ᠋ᠶ᠋ᠡᠷ ᠳᠤᠤᠭᠠᠷᠤᠭᠠᠳ᠂ ᠣᠨᠳᠣᠣ ᠶᠠᠭᠤᠮᠠ ᠤᠷᠤᠭᠤ ᠶᠠᠷᠢᠶᠠ ᠪᠠᠨ ᠬᠠᠨᠳᠤᠭᠤᠯᠬᠤ ᠭᠡᠵᠦ ᠲᠠᠰᠤ ᠡᠯᠡᠭᠳᠡᠴᠢᠭᠰᠡᠨ ᠬᠠᠭᠤᠴᠢᠨ ᠰᠣᠨᠢᠨ ᠮᠣᠨᠢᠨ᠂ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠬᠠᠷᠠᠨᠳᠠ ᠮᠠᠷᠠᠨᠳᠠ ᠴᠢᠬᠢᠭᠰᠡᠨ ᠰᠦᠮᠺ ᠢ᠋ᠶ᠋ᠡᠨ ᠨᠡᠭᠡᠭᠡᠵᠦ᠂ ᠪᠠᠭ ᠤ᠋ᠨ ᠵᠠᠬᠢᠷᠭᠠᠨ ᠤ᠋ ᠪᠢᠴᠢᠬᠠᠨ ᠲᠡᠮᠳᠡᠭ ᠭᠠᠷᠭᠠᠭᠠᠳ᠂ ᠠᠯᠠᠭᠠ ᠶ᠋ᠢᠨ ᠳᠡᠭᠡᠷᠡ ᠪᠡᠨ ᠴᠣᠬᠢᠭᠠᠳ᠂ ᠰᠢᠷᠴᠢᠨ ᠴᠡᠷᠡᠨ ᠬᠣᠶᠠᠷ ᠲᠤ᠌ ᠲᠡᠷᠡ ᠲᠡᠮᠳᠡᠭ ᠢ᠋ᠶ᠋ᠡᠨ ᠭᠠᠢᠬᠠᠭᠤᠯᠤᠨ ᠦᠵᠡᠭᠦᠯᠵᠦ᠂
— ᠡᠢᠮᠦ ᠵᠢᠭᠠᠬᠠᠨ ᠶᠠᠭᠤᠮᠠ ᠮᠥᠷᠲᠡᠭᠡᠨ ᠪᠦᠬᠦ ᠪᠠᠭ ᠢ᠋ ᠵᠠᠬᠢᠷᠴᠤ᠂ ᠠᠯᠪᠠᠨ ᠪᠢᠴᠢᠭ ᠢ᠋ ᠬᠦᠴᠦᠨ ᠲᠡᠭᠦᠯᠳᠡᠷ ᠪᠣᠯᠭᠠᠳᠠᠭ᠂ ᠠ ᠮᠥᠨ ᠴᠦ᠍ ᠴᠢᠳᠠᠯᠲᠠᠢ ᠶᠤᠮ ᠰᠢᠦ! ᠠ ᠣᠳᠣ ᠡᠵᠡᠨ ᠨᠢ ᠪᠢ ᠪᠠᠢᠨᠠ ᠰᠢᠦ ᠳᠡ᠃ ᠪᠠᠭ ᠤ᠋ᠨ ᠳᠠᠷᠤᠭᠠ ᠮᠢᠨᠦ ᠪᠡᠶᠡ ᠠ ᠳᠤᠷᠠ ᠪᠠᠨ ᠬᠦᠷᠪᠡᠯ᠂ ᠢ ᠲᠡᠮᠳᠡᠭ ᠢ᠋ᠶ᠋ᠡᠨ ᠳᠠᠷᠤᠨᠠ᠂ ᠠ ᠳᠤᠷᠠ ᠪᠠᠨ ᠡᠰᠡ ᠬᠦᠷᠪᠡᠯ᠂ ᠶᠠᠭᠠᠬᠢᠭᠰᠠᠨ ᠴᠤ᠌ ᠳᠠᠷᠤᠬᠤ ᠦᠭᠡᠢ ᠭᠡᠵᠦ ᠰᠦᠷ ᠪᠠᠳᠠᠷᠠᠭᠤᠯᠤᠨ ᠬᠡᠯᠡᠵᠡᠢ᠃
ᠴᠡᠷᠡᠨ ᠰᠢᠷᠡᠮᠦᠨ ᠲᠣᠭᠣᠭᠠᠨ ᠠ᠋ᠴᠠ ᠪᠠᠨ ᠪᠤᠴᠠᠯᠤᠭᠰᠠᠨ ᠴᠠᠢ ᠶ᠋ᠢ ᠵᠡᠰ ᠳᠠᠩᠬᠤ ᠳ᠋ᠤ᠌ ᠬᠢᠵᠦ᠂ ᠠᠢᠯᠴᠢᠨ ᠳ᠋ᠤ᠌ ᠴᠠᠢ ᠪᠠᠷᠢᠯᠠ᠃ ᠳ᠋ᠤᠢᠩᠬᠤᠷ ᠥᠨᠥᠬᠢ ᠲᠡᠮᠳᠡᠭ ᠢ᠋ᠶ᠋ᠡᠨ ᠡᠪᠦᠷ ᠲᠡᠭᠡᠨ ᠬᠢᠭᠡᠳ᠂ ᠠᠶᠠᠭᠠ ᠲᠠᠢ ᠴᠠᠢ ᠠ᠋ᠴᠠ ᠱᠣᠷᠬᠢᠲᠠᠯᠠ ᠰᠣᠷᠣᠵᠤ ᠰᠢᠷᠴᠢᠨ ᠦ᠌ ᠵᠦᠭ ᠶᠡᠬᠡ ᠵᠠᠩᠲᠠᠢ ᠪᠠᠷ ᠥᠭᠦᠯᠡᠷᠦᠨ᠂
— ᠮᠠᠨᠠᠢ(ᠮᠠᠨ ᠤ᠋) ᠡᠨᠳᠡ ᠮᠥᠳᠳᠥ ᠬᠣᠯᠪᠣᠭᠠᠲᠤ ᠤᠯᠤᠰ ᠤ᠋ᠨ ᠬᠢ ᠲᠡᠢ ᠠᠳᠠᠯᠢ ᠬᠣᠮᠮᠥ᠋ᠨ ᠪᠠᠢᠭᠤᠯᠤᠭᠳᠠᠨᠠ᠃ ᠥᠨᠥᠳᠥᠷ ᠮᠠᠨᠠᠢᠳᠤ ᠬᠣᠲᠠ ᠠ᠋ᠴᠠ ᠢᠷᠡᠭᠰᠡᠨ ᠨᠢᠭᠡ ᠠᠢᠯᠴᠢᠨ ᠬᠣᠨᠣᠵᠤ᠂ ᠬᠤᠷᠰᠢᠶᠠ ᠶ᠋ᠢᠨ ᠶᠡᠷᠦᠩᠬᠡᠢ ᠬᠣᠷᠢᠶᠠᠨ ᠤ᠋ ᠭᠡᠰᠢᠭᠦᠨ ᠵᠢᠭᠵᠢᠳ ᠭᠡᠳᠡᠭ ᠮᠢᠨᠦ ᠨᠠᠢᠵᠠ᠂ ᠶᠡᠬᠡ ᠬᠥᠮᠦᠨ ᠰᠢᠦ᠂ ᠬᠡᠯᠲᠡᠰ ᠦ᠋ᠨ ᠳᠠᠷᠤᠭᠠ᠂ ᠠ ᠶᠡᠷᠦᠩᠬᠡᠢ ᠬᠣᠷᠢᠶᠠᠨ ᠤ᠋ ᠭᠡᠰᠢᠭᠦᠨ᠃ ᠠ ᠲᠡᠷᠡ ᠬᠥᠮᠦᠨ ᠨᠠᠳᠠᠳᠤ(ᠨᠠᠳᠠ ᠳ᠋ᠤ᠌) ᠲᠡᠭᠡᠵᠦ ᠬᠡᠯᠡᠭᠰᠡᠨ ᠶᠦᠮ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂ ᠲᠡᠷᠡ ᠶᠡᠬᠡ ᠵᠠᠩᠲᠠᠢ ᠲᠦᠰᠢᠮᠡᠯ ᠢ᠋ ᠮᠡᠳᠡᠳᠡᠭ ᠰᠢᠷᠴᠢᠨ ᠭᠠᠢᠬᠠᠰᠬᠢᠵᠦ᠂
— ᠲᠡᠷᠡ ᠬᠠᠵᠠᠭᠠᠷ ᠵᠢᠭᠵᠢᠳ ᠤᠤ? ᠡᠪᠦᠯ ᠨᠠᠮᠠᠶ᠋ᠢ ᠥᠷᠲᠡᠭᠡᠨ ᠳ᠋ᠦ᠍ ᠪᠠᠢᠬᠤ ᠳ᠋ᠤ᠌᠂ ᠪᠢ ᠲᠠᠭᠠᠷᠠᠵᠤ ᠪᠠᠢᠨᠠ᠂ ᠴᠢ ᠰᠥᠨᠢ ᠭᠠᠯ ᠲᠦᠯᠡᠵᠦ ᠬᠣᠨᠣ ᠭᠡᠵᠦ ᠨᠠᠳᠠᠳᠤ(ᠨᠠᠳᠠ ᠳ᠋ᠤ᠌) ᠲᠤᠰᠢᠶᠠᠵᠤ ᠪᠢᠯᠡ᠃ ᠪᠢ ᠤᠷᠢᠳᠤ ᠰᠥᠨᠢ ᠨᠢ ᠬᠡᠭᠡᠷᠡ ᠶ᠋ᠢᠨ ᠨᠣᠬᠠᠢ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠵᠤ᠂ ᠠᠳᠤᠭᠤ ᠪᠠᠨ ᠮᠠᠨᠠᠭᠠᠳ᠂ ᠨᠣᠢᠷ ᠦᠭᠡᠢ ᠬᠣᠨᠣᠭᠰᠠᠨ ᠤ᠋ ᠳᠡᠭᠡᠷᠡ᠂ ᠲᠡᠷᠡ ᠵᠢᠭᠵᠢᠳ ᠲᠦ᠍ ᠭᠠᠯ ᠥᠷᠳᠡᠵᠦ᠂ ᠪᠠᠰᠠ ᠨᠢᠭᠡ ᠰᠥᠨᠢ ᠶ᠋ᠢᠨ ᠨᠣᠢᠷ ᠠᠯᠳᠠᠭᠰᠠᠨ ᠪᠢᠯᠡ᠃ ᠲᠤᠩ ᠶᠠᠩᠪᠠᠷᠠᠬᠤ(ᠶᠠᠮᠪᠠᠷᠬᠠᠭ) ᠳᠠᠷᠤᠭᠠ ᠪᠠᠢᠵᠤ ᠪᠢᠯᠡ᠃ ᠵᠥᠭᠡᠯᠡᠨ ᠳᠡᠪᠢᠰᠬᠡᠷ ᠵᠠᠰᠠ ᠭᠡᠵᠦ ᠬᠡᠳᠦᠨ ᠢᠰᠡᠭᠡᠢ ᠳᠡᠪᠢᠰᠦᠭᠦᠯᠵᠦ ᠪᠠᠰᠠ ᠰᠥᠨᠢ ᠬᠤᠴᠢᠯᠭᠠ ᠶ᠋ᠢ ᠮᠢᠨᠢ ᠵᠠᠰᠠᠵᠤ ᠪᠠᠢ ᠭᠡᠵᠦ ᠨᠠᠳᠠ ᠳ᠋ᠤ᠌ ᠲᠤᠰᠢᠶᠠᠵᠤ ᠪᠠᠢᠭᠰᠠᠨ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠳ᠋ᠤᠢᠩᠬᠤᠷ᠂
— ᠠ ᠲᠡᠷᠡ ᠬᠥᠮᠦᠨ᠂ ᠲᠤᠩ ᠶᠡᠬᠡ ᠬᠥᠮᠦᠨ ᠰᠢᠦ᠃ ᠬᠡᠨᠳᠡᠨ ᠰᠠᠢᠳ ᠤ᠋ᠨ ᠳ᠋ᠤ᠌ ᠡᠳᠦᠷ ᠪᠦᠷᠢ ᠠᠢᠯᠴᠢᠯᠠᠵᠤ ᠣᠴᠢᠳᠠᠭ ᠶᠤᠮ ᠭᠡᠨᠡ ᠯᠡ᠃ ᠪᠢ ᠵᠢᠭᠵᠢᠳ ᠭᠤᠸᠠᠢ ᠶ᠋ᠢ ᠮᠠᠨᠠᠢᠳᠤ(ᠮᠠᠨ ᠤ᠋ ᠳ᠋ᠤ᠌) ᠬᠣᠨᠣᠭᠠᠳ ᠶᠠᠪᠤᠬᠤ ᠳ᠋ᠤᠨᠢ( ᠳ᠋ᠤ᠌ ᠨᠢ)᠂ ᠨᠢᠭᠡ ᠭᠦᠵᠡᠭᠡ ᠰᠠᠢᠬᠠᠨ ᠰᠢᠷᠠ ᠲᠣᠰᠣ᠂ ᠠ ᠪᠠᠰᠠ ᠬᠤᠷᠠᠭᠠᠨ ᠳᠣᠲᠣᠷ᠂ ᠢ ᠨᠢᠭᠡ ᠦᠬᠡᠷ ᠦ᠋ᠨ ᠲᠠᠷᠭᠤᠨ ᠮᠢᠬᠠ ᠪᠡᠯᠡᠭ ᠥᠭᠭᠦᠭᠰᠡᠨ ᠶᠦᠮ᠃ ᠲᠠᠨᠢᠯ ᠲᠠᠢ ᠬᠥᠮᠦᠨ ᠲᠠᠯᠠ ᠶ᠋ᠢᠨ ᠴᠢᠨᠡᠭᠡ᠂ ᠠ ᠲᠠᠨᠢᠯ ᠦᠭᠡᠢ ᠬᠥᠮᠦᠨ ᠠᠳᠬᠤ ᠶ᠋ᠢᠨ ᠴᠢᠨᠡᠭᠡ ᠭᠡᠳᠡᠭ᠃ ᠪᠢ ᠬᠣᠲᠠ ᠣᠷᠣᠪᠠᠯ᠂ ᠵᠢᠭᠵᠢᠳ ᠭᠤᠸᠠᠢ ᠶ᠋ᠢᠨ ᠳ᠋ᠦ᠍ ᠰᠢᠯᠦᠨ ᠪᠠᠢᠰᠢᠩ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠲᠠᠪᠠ ᠪᠠᠷ ᠢ᠋ᠶ᠋ᠠᠨ ᠠᠢᠯᠠᠴᠢᠯᠠᠵᠤ ᠪᠠᠢᠬᠤ ᠪᠣᠯᠤᠨᠠ᠃ ᠠ ᠴᠢᠮᠠ ᠶ᠋ᠢ ᠣᠴᠢᠪᠠᠯ᠂ ᠭᠠᠯ ᠲᠣᠭᠣᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠪᠠᠢᠰᠢᠩ ᠠ᠋ᠴᠠ ᠴᠢᠨᠠᠭᠰᠢ ᠣᠷᠣᠭᠤᠯᠬᠤ ᠭᠡᠵᠦ ᠤᠤ ᠳᠠ? ᠭᠡᠬᠦ ᠳ᠋ᠦ᠍ᠨᠢ ( ᠳ᠋ᠦ᠍ ᠨᠢ)᠂
— ᠨᠡᠭᠡᠷᠡᠨ ᠴᠦ᠍ ᠲᠡᠭᠡᠬᠦ ᠪᠠᠢᠯ ᠦᠭᠡᠢ ᠳᠡ᠃ ᠪᠢ ᠲᠡᠭᠡᠭᠦᠯᠬᠦ ᠭᠡᠵᠦ ᠲᠡᠳᠡᠨᠡᠢᠳᠦ( ᠲᠡᠳᠡᠨ ᠦ᠌ ᠳ᠋ᠦ᠍ )ᠣᠷᠣᠭᠠᠳ ᠴᠤ᠌ ᠶᠠᠭᠠᠬᠢᠬᠤᠪ ᠳᠠ? ᠭᠡᠵᠡᠢ᠃
— ᠬᠣᠮᠮᠥᠢ᠍ᠨ ᠳ᠋ᠦ᠍ ᠣᠷᠣᠭᠰᠠᠨ ᠬᠥᠮᠦᠨ᠂ ᠰᠢᠯᠦᠨ ᠪᠠᠢᠰᠢᠩ ᠳ᠋ᠤ᠌ ᠰᠠᠭᠤᠵᠤ ᠢ ᠡᠳᠦᠷ ᠲᠦ᠍ ᠲᠠᠪᠤᠨ ᠤᠳᠠᠭᠠ ᠲᠠᠷᠭᠤᠨ ᠬᠣᠨᠢᠨ ᠤ᠋ ᠮᠢᠬᠠ᠂ ᠠ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠨᠠᠷᠢᠨ ᠬᠣᠭᠣᠯᠠ ᠢᠳᠡᠬᠦ ᠪᠣᠯᠤᠨᠠ᠃ ᠬᠣᠲᠠ ᠠ᠋ᠴᠠ ᠵᠣᠷᠢᠭᠤᠳᠠ ᠲᠣᠭᠣᠭᠠᠴᠢ ᠬᠢᠲᠠᠳ ᠢ᠋ ᠶᠠᠪᠤᠭᠤᠯᠤᠨᠠ᠂ ᠢ ᠡᠮᠡᠭᠲᠡᠢᠴᠦᠳ ᠢ᠋ ᠲᠣᠭᠣᠭᠠ ᠶ᠋ᠢᠨ ᠬᠠᠷᠠ ᠠᠵᠢᠯ ᠠ᠋ᠴᠠ ᠮᠤᠯᠲᠤᠯᠤᠨᠠ᠃ ᠵᠢᠭᠵᠢᠳ ᠭᠤᠸᠠᠢ ᠨᠠᠳᠠᠳᠤ(ᠨᠠᠳᠠ ᠳ᠋ᠤ᠌) ᠲᠡᠭᠡᠵᠦ ᠬᠡᠯᠡᠭᠰᠡᠨ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠴᠡᠷᠡᠨ᠂
— ᠲᠡᠷᠡ ᠣᠯᠠᠨ ᠠᠮᠢᠲᠠᠨ ᠢ᠋ ᠡᠳᠦᠷ ᠲᠦ᠍ ᠲᠠᠪᠤᠨ ᠤᠳᠠᠭᠠ ᠬᠣᠨᠢᠨ ᠤ᠋ ᠲᠠᠷᠭᠤᠨ ᠮᠢᠬᠠ ᠪᠠᠷ ᠰᠢᠬᠠᠬᠤ ᠲᠡᠷᠡ ᠬᠣᠨᠢ ᠨᠢ ᠬᠠᠮᠢᠭᠠ ᠠ᠋ᠴᠠ ᠣᠯᠳᠠᠳᠠᠭ ᠪᠢᠯᠡ? ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠠ ᠰᠢᠷᠠ ᠬᠠᠷᠠ ᠹᠧᠣᠳᠠᠯ ᠠ᠋ᠴᠠ ᠬᠤᠷᠢᠶᠠᠭᠰᠠᠨ ᠮᠠᠯ ᠶᠠᠭᠠᠬᠢᠭᠠ ᠪᠣᠢ? ᠲᠡᠭᠦᠨ ᠢ᠋ ᠪᠠᠨ ᠯᠠ ᠢᠳᠡᠵᠦ ᠭᠠᠷᠤᠨᠠ᠂ ᠹᠧᠣᠳᠠᠯ ᠤ᠋ᠨ ᠮᠠᠯ ᠢ᠋ ᠬᠠᠢᠷᠠᠯᠠᠨ ᠬᠠᠮᠠᠭᠠᠯᠠᠵᠤ᠂ ᠠᠷᠠᠴᠢᠯᠠᠵᠤ ᠮᠠᠯᠯᠠᠭᠰᠠᠨ ᠤ᠋ ᠬᠡᠷᠡᠭ ᠠᠯᠠᠭᠠ᠃ ᠶᠠᠮᠠᠷ᠂ ᠹᠧᠣᠳᠠᠯ ᠳ᠋ᠤ᠌ ᠳᠠᠬᠢᠨ ᠳᠠᠷᠤᠯᠠᠭᠤᠯᠵᠤ ᠪᠠᠢᠭᠠ ᠶᠤᠮ ᠪᠢᠰᠢ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠴᠡᠷᠡᠨ ᠰᠢᠷᠭᠠᠵᠤ(ᠰᠢᠷᠭᠠᠭᠠᠵᠤ)᠂
— ᠹᠧᠣᠳᠠᠯ ᠤ᠋ᠨ ᠢ᠋ᠶ᠋ᠠᠨ ᠮᠠᠯ ᠢᠳᠡ ᠢᠳᠡᠭᠰᠡᠭᠡᠷ ᠳᠠᠭᠤᠰᠴᠢᠪᠠᠯ(ᠳᠠᠭᠤᠰᠴᠢᠬᠠᠪᠠᠯ) ᠶᠠᠭᠤ ᠪᠠᠨ ᠢᠳᠡᠬᠦ ᠪᠣᠯᠬᠤ ᠪᠣᠢ? ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠠ ᠲᠡᠭᠡᠪᠡᠯ᠂ ᠨᠢᠳᠤᠷᠭᠠᠨ ᠪᠠᠶᠠᠴᠤᠳ ᠤ᠋ᠨ ᠮᠠᠯ ᠢ᠋ ᠬᠤᠷᠢᠶᠠᠨᠠ᠂ ᠲᠡᠭᠡᠭᠡᠳ ᠲᠠᠢᠵᠢ ᠨᠠᠷ ᠤ᠋ᠨ ᠮᠠᠯ ᠢ᠋ ᠬᠤᠷᠢᠶᠠᠨᠠ᠃ ᠮᠠᠨᠠᠢ(ᠮᠠᠨ ᠤ᠋) ᠬᠦᠵᠦᠭᠦᠨ ᠳᠡᠭᠡᠷᠡ ᠰᠠᠭᠤᠵᠤ᠂ ᠮᠠᠨᠠᠢ( ᠮᠠᠨ ᠤ᠋) ᠬᠥᠮᠦᠨ ᠠᠮᠠ ᠶ᠋ᠢ ᠳᠠᠷᠤᠯᠠᠵᠤ ᠪᠠᠢᠭᠰᠠᠨ ᠢ᠋ ᠨᠢ ᠡᠴᠦᠰ ᠪᠣᠯᠭᠠᠨᠠ᠃ ᠮᠢᠨᠦ ᠡᠨᠡ ᠰᠦᠮᠺ ᠲᠦ᠍ ᠪᠦᠬᠦ ᠪᠠᠭ ᠤ᠋ᠨ ᠨᠢᠳᠤᠷᠭᠠᠨ ᠪᠠᠶᠠᠴᠤᠳ᠂ ᠠ ᠲᠠᠢᠵᠢ ᠹᠧᠣᠳᠠᠯ ᠬᠡᠳᠦ ᠬᠡᠴᠢᠨᠡᠨ ᠡᠷᠦᠬᠡ᠂ ᠬᠡᠳᠦ ᠬᠡᠴᠢᠨᠡᠨ ᠮᠠᠯ ᠲᠠᠢ ᠨᠢ ᠴᠥᠮ ᠳᠠᠩᠰᠠ ᠲᠠᠢ᠃ ᠮᠠᠯ ᠢ᠋ᠶ᠋ᠠᠷ ᠬᠣᠮᠮᠥ᠋ᠨ ᠦ᠌ ᠬᠢᠨ ᠳᠤᠲᠠᠭᠳᠠᠬᠤ ᠦᠭᠡᠢ᠃ ᠨᠠᠭᠠᠳᠤ ᠵᠠᠬᠠ ᠨᠢ ᠲᠠᠨᠠᠢᠬᠢ( ᠲᠠᠨ ᠤ᠋ ᠬᠢ) ᠡᠴᠡ ᠮᠠᠯ ᠬᠤᠷᠢᠶᠠᠨᠠ᠃ ᠲᠠᠨᠠᠢᠬᠢ( ᠲᠠᠨ ᠤ᠋ ᠬᠢ )ᠳᠥᠷᠪᠡᠨ ᠵᠠᠭᠤᠨ ᠬᠣᠨᠢ ᠲᠠᠢ —— ᠶᠣᠰᠣᠲᠠᠢ ᠨᠢᠳᠤᠷᠭᠠᠨ ᠪᠠᠶᠠᠨ ᠠᠢᠯ᠃ ᠠᠢ᠂ ᠲᠡᠭᠡᠭᠡᠳ ᠪᠠᠰᠠ᠂ ᠬᠠᠭᠤᠴᠢᠨ ᠡᠵᠡᠷᠬᠡᠭ ᠵᠠᠰᠠᠭ ᠤ᠋ᠨ ᠦᠶᠡ ᠳ᠋ᠦ᠍ ᠰᠠᠢᠨ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠴᠡᠷᠢᠭ ᠲᠦ᠍ ᠶᠠᠪᠤᠵᠤ᠂ ᠵᠢᠩᠰᠡ ᠤᠲᠤᠭᠠ ᠱᠠᠩᠨᠠᠭᠤᠯᠵᠤ ᠪᠠᠢᠭᠰᠠᠨ ᠢ᠋ ᠴᠢᠨᠢ ᠦᠵᠡᠪᠡᠯ ᠯᠡ ᠶᠣᠰᠣᠲᠠᠢ ᠬᠠᠷᠭᠢᠰ ᠲᠦᠰᠢᠮᠡᠯ ᠭᠡᠬᠦ ᠳ᠋ᠦ᠍ ᠦᠯᠦ ᠪᠣᠯᠬᠤ ᠭᠠᠵᠠᠷ ᠦᠭᠡᠢ᠃ ᠠ ᠲᠡᠢᠮᠦ ᠬᠥᠮᠦᠨ ᠰᠣᠩᠭᠣᠭᠤᠯᠢ ᠶ᠋ᠢᠨ ᠡᠷᠬᠡ ᠦᠭᠡᠢ ᠪᠣᠯᠤᠨᠠ᠃ ᠮᠢᠨᠦ ᠡᠨᠳᠡ ᠪᠦᠭᠦᠳᠡ ᠲᠡᠮᠳᠡᠭᠯᠡᠭᠡᠰᠦᠲᠡᠢ ᠭᠡᠵᠦ ᠰᠦᠮᠺ ᠢ᠋ᠶ᠋ᠡᠨ ᠠᠯᠠᠭᠠᠳᠠᠭᠠᠳ᠂ ᠠ᠂ ᠴᠢ ᠬᠠᠷᠢᠨ ᠨᠠᠳᠠ ᠲᠠᠢ ᠰᠠᠢᠨ ᠪᠠᠢᠬᠤ ᠶᠤᠮ ᠪᠣᠯ᠂ ᠠᠶᠤᠬᠤ ᠢᠴᠢᠬᠦ ᠶᠦᠮ ᠠᠯᠠᠭᠠ᠃ ᠬᠣᠮᠮᠥ᠋ᠨ ᠳ᠋ᠦ᠍ ᠴᠦ᠍ ᠴᠢᠮᠠᠶ᠋ᠢ( ᠴᠢᠮᠠ ᠶ᠋ᠢ) ᠣᠷᠣᠭᠤᠯᠵᠤ ᠪᠣᠯᠤᠨᠠ᠃ ᠮᠢᠨᠦ ᠪᠡᠶᠡ ᠪᠠᠭ ᠤ᠋ᠨ ᠳᠠᠷᠤᠭᠠ ᠮᠥᠨ ᠦ᠌ ᠲᠤᠯᠠ᠂ ᠮᠢᠨᠦ ᠦᠭᠡ ᠵᠢᠩᠲᠡᠢ ᠰᠢᠦ᠃ ᠬᠣᠲᠠ ᠳ᠋ᠤ᠌ ᠪᠢ ᠳᠡᠭᠡᠭᠦᠷ ᠨᠢᠭᠤᠷ ᠲᠠᠢ᠂ ᠲᠣᠮᠣᠴᠤᠤᠯ ᠳ᠋ᠤ᠌ ᠲᠠᠯᠠ ᠲᠠᠢ ᠬᠥᠮᠦᠨ ᠰᠢᠦ᠃ ᠠ ᠴᠢ ᠪᠢᠳᠡ ᠬᠣᠶᠠᠷ ᠠᠢᠯ ᠠᠬᠠ ᠳᠡᠭᠦᠦ ᠶᠣᠰᠣᠭᠠᠷ᠂ ᠡᠢ ᠡᠪ ᠨᠠᠢᠷᠠᠮᠳᠠᠯᠲᠠᠢ ᠰᠠᠭᠤᠬᠤ ᠪᠣᠯᠤᠨᠠ᠃ ᠴᠢ ᠨᠠᠳᠠᠳᠤ( ᠨᠠᠳᠠ ᠳ᠋ᠤ᠌) ᠵᠢᠷᠣᠭᠠ ᠤᠯᠠᠭᠠᠨ ᠢ᠋ᠶ᠋ᠠᠨ ᠪᠡᠯᠡᠭᠯᠡ᠂ ᠮᠢᠨᠦ ᠵᠣᠷᠢᠵᠤ ᠢᠷᠡᠭᠰᠡᠨ ᠬᠡᠷᠡᠭ ᠲᠡᠷᠡ ᠠ᠋᠃ ᠲᠡᠷᠡ ᠵᠢᠷᠣᠭᠠ ᠮᠣᠷᠢ ᠴᠢᠨᠢ᠂ ᠲᠤᠩ ᠰᠠᠢᠨ ᠮᠣᠷᠢ ᠰᠢᠦ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠰᠠᠢᠨ ᠪᠣᠯᠪᠠᠴᠤ ᠲᠠᠨ ᠳ᠋ᠤ᠌ ᠬᠦᠷᠲᠡᠭᠡᠯ ᠦᠭᠡᠢ ᠪᠠᠢᠬᠠ ᠭᠡᠵᠦ ᠰᠢᠷᠴᠢᠨ ᠦ᠌ ᠵᠢᠪᠡᠭᠦᠦ ᠨᠢ ᠬᠦᠷᠴᠡᠢ᠃
— ᠠ᠂ ᠡᠢᠮᠦ ᠪᠣᠢ? ᠵᠠ ᠲᠡᠭᠡᠪᠡᠯ᠂ ᠨᠢᠳᠤᠷᠭᠠᠨ ᠪᠠᠶᠠᠨ ᠭᠡᠵᠦ ᠡᠷᠬᠡ ᠪᠡᠨ ᠬᠠᠰᠤᠭᠤᠯᠤᠭᠠᠳ᠂ ᠡᠯᠳᠡᠪ ᠮᠠᠭᠤ ᠪᠠᠨ ᠦᠵᠡᠬᠦ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠤᠬᠠᠭᠠᠨ ᠣᠷᠣᠬᠤ ᠪᠣᠢ ᠳᠠ᠂ ᠴᠢ᠃ ᠠ ᠲᠡᠷᠡ ᠴᠠᠭ ᠲᠤ᠌ ᠨᠠᠳᠠ ᠶ᠋ᠢ ᠠᠵᠢᠷᠭᠠ ᠪᠠᠷ ᠠᠳᠤᠭᠤ ᠲᠠᠭᠤᠵᠤ ᠪᠡᠯᠡᠭᠯᠡᠭᠰᠡᠨ ᠴᠦ᠍ ᠪᠢ ᠠᠪᠬᠤ ᠦᠭᠡᠢ ᠰᠢᠦ! ᠭᠡᠵᠦ ᠰᠦᠷᠳᠡᠭᠦᠯᠵᠦ ᠬᠡᠯᠡᠭᠡᠳ ᠳᠤᠲᠠᠭᠤ ᠤᠤᠭᠤᠭᠰᠠᠨ ᠠᠶᠠᠭᠠ ᠲᠠᠢ ᠴᠠᠢ ᠪᠠᠨ ᠬᠣᠢᠰᠢ ᠲᠠᠯᠪᠢᠵᠤ᠂ ᠭᠡᠷ ᠦ᠋ᠨ ᠡᠭᠦᠳᠡ ᠳᠡᠰ ᠬᠢᠲᠡᠯᠡ ᠣᠷᠬᠢᠵᠤ ᠭᠠᠷᠬᠤ ᠳ᠋ᠤᠨᠢ ( ᠳ᠋ᠤ᠌ ᠨᠢ) ᠪᠤᠷᠤᠭᠤ ᠡᠭᠦᠳᠡ᠂ ᠭᠠᠳᠠᠨᠠ ᠠ᠋ᠴᠠ ᠨᠢᠭᠡᠨ ᠶᠠᠭᠤᠮᠠ ᠣᠷᠣᠬᠤ ᠭᠡᠰᠡᠨ ᠰᠢᠭ ᠰᠡᠬᠦᠭᠳᠡᠵᠡᠢ᠃
— ᠳ᠋ᠤᠢᠩᠬᠤᠷ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠪᠤᠷᠤᠭᠤ ᠡᠭᠦᠳᠡ ᠪᠡᠷ ᠪᠤᠭ ᠠᠳᠠ ᠣᠷᠣᠭᠰᠠᠨ ᠶᠤᠮ ᠰᠢᠭ᠋᠂ ᠡᠨᠡ ᠤᠰᠤᠨ ᠮᠥᠷᠲᠦ ᠠᠮᠢᠲᠠᠨ ᠡᠯᠳᠡᠪ ᠲᠦᠪᠡᠭ ᠲᠠᠲᠠᠬᠤ ᠭᠡᠵᠦ ᠣᠷᠣᠯᠳᠣᠬᠤ ᠪᠠᠢᠬᠤ ᠳᠠ᠃ ᠮᠠᠭᠤ ᠠ᠋ᠴᠠ ᠮᠠᠭᠤ᠂ ᠮᠣᠳᠣᠨ ᠠ᠋ᠴᠠ ᠬᠦ ᠭᠡᠵᠦ ᠶᠡᠷᠦ ᠨᠢ ᠡᠨᠡ ᠮᠠᠭᠤ ᠠᠮᠢᠲᠠᠨ ᠲᠠᠢ ᠮᠠᠭᠤᠳᠠᠯᠴᠠᠭᠰᠠᠨ ᠤ᠋ ᠬᠡᠷᠡᠭ ᠪᠠᠢᠨᠠᠤ(ᠪᠠᠢᠨᠠ ᠤᠤ) ᠳᠠ? ᠡᠯᠳᠡᠪ ᠬᠣᠪ ᠭᠦᠳᠬᠡᠯᠭᠡᠨ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠬᠥᠮᠦᠨ ᠴᠢᠷᠦᠭᠳᠡᠬᠦ ᠪᠣᠯᠤᠨᠠ᠃ ᠵᠢᠷᠣᠭᠠ ᠤᠯᠠᠭᠠᠨ ᠢ᠋ᠶ᠋ᠠᠨ ᠥᠭᠭᠦᠭᠡᠳ ᠰᠠᠯᠬᠤ ᠶᠤᠮ ᠪᠢᠰᠢ ᠤᠤ ᠳᠠ? ᠭᠡᠵᠦ ᠴᠡᠷᠡᠨ ᠦ᠌ ᠬᠡᠯᠡᠬᠦ ᠳ᠋ᠦ᠍᠂
— ᠦᠭᠡᠢ᠂ ᠪᠢ ᠲᠡᠭᠦᠨ ᠳ᠋ᠦ᠍ ᠶᠠᠭᠠᠬᠢᠭᠰᠠᠨ ᠴᠤ᠌ ᠮᠣᠷᠢ ᠪᠠᠨ ᠥᠭᠬᠦ ᠦᠭᠡᠢ᠃ ᠴᠢ ᠵᠠᠩ ᠢ᠋ ᠨᠢ ᠮᠡᠳᠡᠬᠦ ᠦᠭᠡᠢ ᠭᠡᠵᠦ ᠤᠤ? ᠮᠣᠷᠢ ᠪᠠᠨ ᠥᠭᠪᠡᠯ ᠤᠯᠠᠮ ᠠᠮᠲᠠᠰᠢᠭᠠᠳ᠂ ᠪᠠᠰᠠ ᠶᠠᠭᠤᠮᠠ ᠨᠡᠬᠡᠭᠡᠳ ᠰᠠᠯᠬᠤ ᠦᠭᠡᠢ ᠭᠡᠵᠦ ᠰᠢᠷᠴᠢᠨ ᠬᠠᠷᠢᠭᠤᠯᠵᠠᠢ᠃ ᠲᠡᠭᠡᠪᠡᠯ ᠶᠠᠭᠠᠬᠢᠳᠠᠭ ᠪᠢᠯᠡ? ᠪᠢᠳᠡᠨ ᠳ᠋ᠦ᠍ ᠶᠠᠮᠠᠷ ᠤᠷᠰᠢᠭ ᠲᠦᠪᠡᠭ ᠲᠠᠲᠠᠳᠠᠭ ᠪᠣᠯ? ᠭᠡᠳ ᠯᠡ ᠬᠦᠯᠢᠶᠡᠵᠦ ᠰᠠᠭᠤᠬᠤ ᠤᠤ ᠳᠠ? ᠭᠡᠵᠦ ᠴᠡᠷᠡᠨ ᠦ᠌ ᠠᠰᠠᠭᠤᠬᠤ ᠳ᠋ᠤ᠌᠂ ᠰᠢᠷᠴᠢᠨ᠂ ᠲᠦᠷᠡᠢ ᠡᠴᠡ ᠪᠡᠨ ᠭᠠᠩᠰᠠ ᠪᠠᠨ ᠭᠠᠷᠭᠠᠵᠤ ᠬᠡᠳᠦ ᠰᠤᠷᠤᠭᠠᠳ ᠪᠠᠬᠠᠨ ᠪᠣᠳᠣᠯᠭᠠ ᠪᠣᠯᠵᠤ᠂
— ᠠᠷᠠᠢ ᠯᠠ ᠡᠢᠮᠦ ᠪᠠᠢᠬᠤ ᠶᠣᠰᠣ ᠦᠭᠡᠢ ᠶᠤᠮᠰᠠᠨ ( ᠶᠤᠮ ᠰᠠᠨ)᠃ ᠳᠠᠢᠰᠤᠨ ᠡᠲᠡᠭᠡᠳ ᠣᠯᠠᠨ ᠤ᠋ ᠰᠡᠳᠬᠢᠯ ᠠᠯᠳᠠᠭᠳᠠᠭᠤᠯᠵᠤ᠂ ᠠᠷᠠᠳ ᠤ᠋ᠨ ᠵᠠᠰᠠᠭ ᠲᠤ᠌ ᠥᠰᠢᠶᠡ ᠲᠡᠢ ᠪᠣᠯᠭᠠᠬᠤ ᠭᠡᠵᠦ ᠬᠠᠳᠬᠤᠨ ᠬᠣᠣᠷᠯᠠᠬᠤ ᠭᠡᠵᠦ ᠪᠠᠢᠭᠠ ᠶᠤᠮ ᠪᠢᠰᠢ ᠪᠠᠢᠭᠠ ᠳᠠ? ᠲᠡᠷᠡ ᠵᠢᠯ ᠬᠣᠰᠢᠭᠤ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠢᠷᠡᠵᠦ ᠪᠠᠢᠭᠰᠠᠨ ᠥᠨᠥᠬᠢ ᠰᠠᠢᠳ ᠪᠠᠭᠰᠢ ᠶ᠋ᠢ ᠴᠢ ᠰᠠᠨᠠᠵᠤ ᠪᠠᠢᠨᠠᠤ?(ᠪᠠᠢᠨᠠ ᠤᠤ)ᠲᠡᠷᠡ ᠴᠢᠨᠢ ᠥᠨᠥᠬᠢ ᠣᠯᠢᠭᠲᠤ ᠪᠠᠷᠠᠭᠤᠨ ᠭᠡᠭᠴᠢ ᠨᠢ ᠪᠠᠢᠭᠰᠠᠨ ᠶᠤᠮ ᠭᠡᠬᠦ ᠰᠢᠭ ᠪᠢᠯᠡ᠃ ᠣᠳᠣ ᠵᠡᠭᠦᠨᠲᠡᠨ ᠭᠡᠳᠡᠭ ᠨᠢ ᠪᠠᠰᠠ ᠨᠤᠭᠤᠯᠵᠤ ᠬᠤᠭᠤᠯᠵᠤ ᠪᠠᠢᠭᠠ ᠶᠤᠮ ᠪᠢᠰᠢ ᠪᠢᠵᠡ ᠭᠡᠵᠡᠢ᠃
— ᠪᠠ᠊ ᠶᠧ ᠰᠡᠷᠡᠭᠦᠨ ᠲᠤᠩᠭᠠᠯᠠᠭ ᠪᠠᠢᠭᠰᠠᠨ ᠪᠣᠯ᠂ ᠤᠴᠢᠷ ᠢ᠋ ᠮᠡᠳᠡᠬᠦ ᠶᠤᠮᠰᠠᠨᠵᠠᠢ( ᠶᠤᠮ ᠰᠠᠨᠵᠠᠢ) ᠳᠠ ᠭᠡᠵᠦ ᠪᠠᠲᠤᠪᠠᠶᠠᠷ ᠭᠤᠸᠠᠢ ᠶ᠋ᠢ ᠶᠡᠬᠡᠳᠡ ᠪᠢᠰᠢᠷᠡᠨ ᠬᠦᠨᠳᠦᠳᠬᠡᠳᠡᠭ ᠴᠡᠷᠡᠨ ᠰᠡᠭᠦᠷᠡᠰᠦ ᠠᠯᠲᠠᠨ ᠥᠭᠦᠯᠡᠷᠦᠨ᠂ ᠮᠠᠯ ᠢ᠋ᠶ᠋ᠠᠨ ᠪᠡᠯᠴᠢᠭᠡᠭᠡᠳ᠂ ᠪᠤᠴᠠᠬᠤ ᠵᠠᠮ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠥᠷᠯᠥᠭᠡ ᠪᠢ ᠯᠣᠳᠣᠢ ᠪᠠᠶᠠᠨ ᠤ᠋ ᠳᠡᠭᠦᠦ ᠵᠠᠩᠲᠠᠢ ᠴᠢᠪᠠᠭᠠᠨᠴᠠ ᠲᠠᠢ ᠳᠠᠭᠠᠷᠢᠯᠳᠤᠵᠤ᠂ ᠶᠠᠭᠤ ᠭᠡᠰᠡᠨ ᠮᠠᠭᠤ ᠠᠭᠠᠰᠢ ᠲᠠᠢ ᠬᠥᠮᠦᠨ ᠪᠣᠢ? ᠶᠠᠭᠤᠮᠠᠨ ᠤ᠋ ᠲᠦᠷᠦᠭᠦᠨ ᠳ᠋ᠦ᠍ ᠭᠡᠵᠢᠭᠡ ᠪᠡᠨ ᠠᠪᠴᠤ᠂ ᠮᠤᠬᠤᠷ ᠲᠣᠯᠣᠭᠠᠢ ᠲᠠᠢ ᠪᠣᠯᠤᠭᠰᠠᠨ ᠥᠨᠥᠬᠢ ᠲᠠᠢᠵᠢ ᠨᠠᠷ ᠢ᠋ ᠴᠥᠮ ᠢ᠋ ᠨᠢ ᠱᠣᠷᠣᠩ ᠳ᠋ᠤ᠌ ᠬᠢᠴᠢᠬᠡᠭᠰᠡᠨ ᠰᠢᠦ᠃ ᠣᠳᠣ ᠲᠡᠳᠡ ᠴᠢᠨᠢ ᠮᠤᠬᠤᠷ ᠲᠣᠯᠣᠭᠠᠢ ᠪᠠᠷ ᠪᠠᠷᠠᠬᠤ ᠦᠭᠡᠢ ᠲᠣᠯᠣᠭᠠᠢ ᠦᠭᠡᠢ ᠴᠢᠳᠬᠥᠷ ᠪᠣᠯᠬᠤ ᠨᠢ ᠳᠡ᠃ ᠲᠠ ᠨᠠᠷ ᠴᠤ᠌ ᠨᠢᠭᠡ ᠶᠡᠬᠡ ᠤᠳᠠᠭᠠᠨ ᠢᠩᠭᠢᠵᠦ ᠶᠠᠪᠤᠬᠤ ᠦᠭᠡᠢ᠂ ᠮᠤᠬᠤᠷ ᠲᠣᠯᠣᠭᠠᠢᠲᠠᠨ᠂ ᠮᠠᠨᠠᠢ(ᠮᠠᠨ ᠤ᠋) ᠶᠠᠭᠤᠮᠠ ᠦᠭᠡᠢ ᠬᠢᠵᠦ ᠪᠠᠷᠠᠭᠰᠠᠨ ᠲᠠᠢ ᠪᠠᠨ ᠠᠳᠠᠯᠢ᠂ ᠲᠠᠨᠠᠢ( ᠲᠠᠨ ᠤ᠋) ᠶᠠᠭᠤᠮᠠ ᠪᠠᠰᠠ ᠳᠠᠭᠤᠰᠤᠨᠠ ᠳᠠ᠃ ᠤᠳᠠᠬᠤ ᠦᠭᠡᠢ᠂ ᠤᠳᠠᠬᠤ ᠦᠭᠡᠢ᠃ ᠲᠠ ᠨᠠᠷ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠮᠠᠨᠠᠢ(ᠮᠠᠨ ᠤ᠋) ᠯᠣᠳᠣᠢ ᠠᠬᠠ ᠶ᠋ᠢᠨ ᠣᠷᠣᠭᠰᠠᠨ ᠭᠠᠵᠠᠷ ᠣᠷᠣᠨᠠ ᠳᠠ ᠭᠡᠵᠦ ᠵᠠᠩᠨᠠᠭᠠᠳ᠂ ᠨᠠᠮᠠᠶ᠋ᠢ(ᠨᠠᠮᠠ ᠶ᠋ᠢ)ᠮᠣᠷᠢ ᠪᠠᠨ ᠡᠷᠭᠢᠭᠦᠯᠵᠦ ᠵᠠᠢᠯᠠᠬᠤ ᠳ᠋ᠤ᠌᠂ ᠬᠣᠢᠨᠠ ᠠ᠋ᠴᠠ ᠮᠢᠨᠢ ᠨᠤᠯᠮᠤᠵᠤ᠂ ᠬᠠᠷᠢᠶᠠᠯ ᠰᠢᠷᠢᠶᠠᠯ ᠲᠠᠯᠪᠢᠵᠤ ᠪᠢᠯᠡ᠃ ᠲᠡᠷᠡ ᠬᠡᠳᠦᠨ ᠬᠥᠭᠡᠷᠦᠬᠦᠢ ᠬᠣᠬᠢ ᠲᠠᠢᠵᠢ ᠶ᠋ᠢ ᠱᠣᠷᠣᠩ ᠳ᠋ᠤ᠌ ᠶᠠᠭᠠᠬᠢᠬᠤ ᠴᠤ᠌ ᠭᠡᠵᠦ ᠬᠢᠭᠰᠡᠨ ᠶᠦᠮ ᠪᠣᠯ ᠳᠠ? ᠯᠣᠳᠣᠢ ᠪᠠᠢᠰᠠ᠂ ᡀᠠ ᠪᠡᠢᠯᠡ ᠰᠢᠭ ᠮᠠᠭᠤᠬᠠᠢ ᠬᠠᠷᠭᠢᠰ ᠪᠠᠢᠭᠰᠠᠨ ᠪᠣᠯ ᠴᠤ᠌ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ᠂ ᠲᠠᠢᠵᠢ ᠢᠵᠠᠭᠤᠷᠲᠠᠢ ᠭᠡᠵᠦ ᠲᠡᠳᠡᠨ ᠢ᠋ ᠳᠡᠮᠡᠢ ᠴᠦ᠍ ᠲᠡᠭᠡᠭᠰᠡᠨ ᠪᠢᠰᠢ ᠤᠤ ᠳᠠ? ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠨᠢᠳᠦ ᠲᠡᠢ ᠵᠠᠰᠠᠭ᠂ ᠤᠴᠢᠷ ᠢ᠋ ᠨᠢ ᠣᠯᠬᠤ ᠶᠤᠮ ᠪᠠᠢᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ? ᠴᠣᠢᠪᠠᠯᠰᠠᠩ ᠵᠠᠩᠵᠤᠨ ᠤᠴᠢᠷ ᠤᠬᠠᠭᠠᠨ ᠢ᠋ ᠨᠢ ᠵᠠᠪᠠᠯ ᠣᠯᠤᠨᠠ ᠬᠡᠮᠡᠪᠡᠰᠦ᠂
— ᠵᠠᠩᠵᠤᠨ ᠭᠠᠭᠴᠠᠭᠠᠷᠳᠠᠵᠤ ᠪᠠᠢᠭᠠ ᠶᠤᠮ ᠪᠢᠰᠢ ᠪᠠᠢᠭᠠ ᠳᠠ? ᠳ᠋ᠣᠢᠩᠬᠣᠷ ᠢ᠋ ᠵᠢᠭᠵᠢᠳ ᠲᠡᠢ ᠲᠠᠨᠢᠯ ᠭᠡᠵᠦ ᠰᠠᠭᠰᠠᠭᠤᠷᠠᠵᠤ᠂ ᠲᠡᠷᠡ ᠶ᠋ᠢ ᠪᠡᠨ ᠬᠡᠨᠳᠡᠨ ᠰᠠᠢᠳ ᠲᠤ᠌ ᠨᠢᠭᠤᠷ ᠲᠠᠢ ᠭᠡᠵᠦ ᠪᠠᠢᠭᠠ ᠶ᠋ᠢ ᠲᠠ ᠲᠤᠭᠤᠯᠤᠭᠰᠠᠨ ᠪᠢᠵᠡ ᠳᠡ ᠭᠡᠵᠦ ᠴᠡᠷᠡᠨ ᠦ᠌ ᠰᠡᠭᠦᠷᠡᠰᠦ ᠠᠯᠳᠠᠬᠤ ᠳ᠋ᠤ᠌᠂
— ᠵᠠᠩᠵᠤᠨ ᠭᠠᠭᠴᠠᠭᠠᠷᠳᠠᠬᠤ ᠬᠥᠮᠦᠨ ᠪᠢᠰᠢ᠂ ᠠᠷᠠᠳ ᠲᠦᠮᠡᠨ᠂ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯᠲᠤ ᠨᠠᠮ᠂ ᠵᠠᠩᠵᠤᠨ ᠤ᠋ ᠠᠮᠲᠤ ᠰᠢᠦ ᠳᠡ ᠭᠡᠬᠦ ᠳ᠋ᠦ᠍ᠨᠢ(ᠳ᠋ᠦ᠍ ᠨᠢ)᠂
— ᠲᠠ ᠨᠠᠮ ᠳ᠋ᠤ᠌ ᠡᠯᠰᠡᠪᠡᠯ ᠳᠡᠭᠡᠷᠡ ᠶᠦᠮ ᠪᠢᠰᠢ ᠪᠠᠢᠭᠠ? ᠨᠠᠭᠠᠳᠤ ᠵᠠᠬᠠ ᠨᠢ᠂ ᠳ᠋ᠤᠢᠩᠬᠣᠷ ᠮᠡᠲᠦ ᠶ᠋ᠢᠨ ᠠᠮᠢᠲᠠᠨ ᠦᠭᠡᠯᠡᠬᠦ ᠬᠠᠯᠳᠠᠬᠤ᠂ ᠤᠯᠠ ᠱᠠᠭᠠᠢᠬᠤ ᠨᠢ ᠭᠠᠢ ᠦᠭᠡᠢ ᠪᠣᠯᠬᠤ ᠰᠠᠨ ᠪᠠᠢᠬᠤ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂ ᠰᠢᠷᠴᠢᠨ ᠭᠠᠩᠰᠠ ᠪᠠᠨ ᠦᠨᠡᠰᠦᠨ ᠦ᠌ ᠰᠠᠪᠠ ᠶ᠋ᠢᠨ ᠪᠢᠴᠢᠬᠠᠨ ᠳᠣᠪᠣᠭᠣᠷ ᠲᠤ᠌ ᠲᠣᠭᠰᠢᠭᠠᠳ᠂ ᠦᠨᠡᠨ ᠭᠣᠣᠯ ᠠ᠋ᠴᠠ ᠪᠠᠨ ᠥᠭᠦᠯᠡᠷᠦᠨ᠂
— ᠪᠢ ᠴᠣᠢᠪᠠᠯᠰᠠᠩ ᠵᠠᠩᠵᠤᠨ ᠤ᠋ ᠪᠠᠨ ᠲᠥᠯᠥᠭᠡ᠂ ᠠᠷᠠᠳ ᠤ᠋ᠨ ᠢ᠋ᠶ᠋ᠠᠨ ᠨᠠᠮ ᠵᠠᠰᠠᠭ ᠤ᠋ᠨ ᠲᠥᠯᠥᠭᠡ ᠠᠮᠢ ᠪᠠᠨ ᠥᠭᠬᠦ ᠡᠴᠡ ᠪᠡᠨ ᠪᠤᠴᠠᠬᠤ ᠦᠭᠡᠢ᠃ ᠮᠠᠨᠵᠤ ᠬᠠᠭᠠᠨ ᠤ᠋ ᠲᠡᠷᠡ ᠴᠡᠷᠢᠭ ᠲᠡᠢ᠂ ᠶᠤᠸᠠᠨᠱ᠍ᠢᠬᠠᠢ ᠶ᠋ᠢᠨ ᠳ᠋ᠥ᠋ᠵᠢᠶᠥ᠋ᠨ ᠨᠦ᠍ᠭᠦᠳ ᠦ᠋ᠨ ᠬᠠᠷᠠ ᠴᠡᠷᠢᠭ ᠲᠡᠢ ᠳᠠᠢᠳᠤᠵᠤ ᠶᠠᠪᠤᠭᠰᠠᠨ ᠠ᠋ᠴᠠ ᠪᠠᠨ ᠠᠷᠪᠠᠨ ᠬᠤᠪᠢ ᠢᠯᠡᠭᠦᠦ ᠬᠦᠴᠦ ᠵᠣᠷᠢᠭ ᠭᠠᠷᠭᠠᠵᠤ ᠡᠨᠡ ᠭᠡᠭᠡᠨ ᠵᠠᠰᠠᠭ ᠤ᠋ᠨ ᠢ᠋ᠶ᠋ᠠᠨ ᠲᠥᠯᠥᠭᠡ ᠪᠠᠢᠯᠳᠤᠬᠤ ᠳ᠋ᠤ᠌ ᠪᠡᠯᠡᠬᠡᠨ᠃ ᠦᠷᠡ ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠨ ᠬᠡᠳᠦ ᠶ᠋ᠢᠨ ᠵᠢᠷᠭᠠᠯ ᠤ᠋ᠨ ᠲᠥᠯᠥᠭᠡ ᠡᠨᠡ ᠪᠡᠶᠡ ᠶ᠋ᠢᠨ ᠬᠦᠴᠦ ᠲᠡᠩᠬᠡᠭᠡ ᠲᠠᠰᠤᠷᠠᠭᠠ ᠦᠭᠡᠢ ᠴᠠᠭ ᠲᠤ᠌ ᠴᠤᠴᠠᠯᠲᠠ ᠦᠭᠡᠢ ᠵᠢᠳᠬᠦᠬᠦ ᠳ᠋ᠦ᠍ ᠪᠡᠯᠡᠬᠡᠨ᠃ ᠭᠠᠭᠴᠠ᠂ ᠨᠠᠮ ᠳ᠋ᠤ᠌ ᠡᠯᠰᠡᠨᠡ ᠭᠡᠬᠦ ᠳ᠋ᠦ᠍᠂ ᠶᠠᠮᠠᠷ ᠶᠡᠬᠡ ᠭᠠᠪᠢᠶᠠ ᠪᠠᠢᠭᠤᠯᠤᠭᠰᠠᠨ ᠭᠡᠵᠦ ᠡᠯᠰᠡᠨᠡ ᠭᠡᠬᠦ ᠪᠢᠯᠡ? ᠠᠮᠢᠨ ᠤ᠋ ᠪᠠᠨ ᠠᠷᠪᠠ ᠲᠠᠪᠤᠨ ᠮᠠᠯ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠨᠣᠬᠠᠢ ᠰᠢᠭ᠋ ᠳᠠᠭᠠᠵᠤ᠂ ᠬᠦᠢᠲᠡᠨ ᠳ᠋ᠦ᠍ ᠲᠠᠭᠠᠷᠠᠵᠤ᠂ ᠬᠠᠯᠠᠭᠤᠨ ᠳ᠋ᠤ᠌ ᠬᠠᠯᠠᠵᠤ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠭᠠᠪᠢᠶᠠ ᠭᠡᠬᠦ ᠤᠤ? ᠠᠮᠢᠨ ᠤ᠋ ᠪᠠᠨ ᠮᠠᠯ ᠢ᠋ ᠳᠥᠷᠪᠡᠨ ᠵᠠᠭᠤ ᠪᠣᠯᠭᠠᠭᠰᠠᠨ ᠢ᠋ᠶ᠋ᠠᠨ ᠭᠠᠪᠢᠶᠠ ᠭᠡᠵᠦ ᠭᠠᠢᠬᠠᠭᠤᠯᠬᠤ ᠤᠤ? ᠲᠡᠭᠦᠨ ᠳ᠋ᠦ᠍ ᠶᠠᠮᠠᠷ ᠭᠠᠪᠢᠶᠠ ᠪᠠᠢᠬᠤ ᠪᠣᠢ᠃ ᠡᠨᠡ ᠳ᠋ᠣᠢᠩᠬᠣᠷ ᠮᠡᠲᠦ ᠶ᠋ᠢᠨ ᠠᠮᠢᠲᠠᠨ ᠠ᠋ᠴᠠ ᠠᠮᠢ ᠪᠠᠨ ᠬᠠᠭᠠᠴᠠᠢᠯᠠᠬᠤ ᠭᠡᠵᠦ ᠨᠠᠮ ᠳ᠋ᠤ᠌ ᠶᠠᠮᠠᠷ ᠨᠢᠭᠤᠷ ᠢ᠋ᠶ᠋ᠠᠷ ᠡᠯᠰᠡᠬᠦ ᠪᠢᠯᠡ? ᠦᠭᠡᠢ᠂ ᠲᠡᠭᠡᠵᠦ ᠪᠣᠯᠬᠤ ᠦᠭᠡᠢ ᠰᠢᠦ᠂ ᠬᠣᠩᠭᠣᠷ ᠮᠢᠨᠢ ᠭᠡᠬᠦ ᠳ᠋ᠦ᠍ᠨᠢ(ᠳ᠋ᠦ᠍ ᠨᠢ)᠂
— ᠲᠠᠨ ᠤ᠋ ᠲᠡᠷᠡ ᠲᠦᠮᠡᠨ ᠵᠥᠪ᠂ ᠲᠡᠨᠡᠭ ᠬᠥᠮᠦᠨ ᠦ᠌ ᠠᠮᠠ ᠠ᠋ᠴᠠ ᠭᠠᠷᠤᠭᠰᠠᠨ ᠶᠠᠭᠤᠮᠠ ᠲᠡᠷᠭᠡ ᠲᠡᠮᠡᠭᠡᠨ ᠳ᠋ᠦ᠍ ᠪᠠᠭᠲᠠᠬᠤ ᠦᠭᠡᠢ ᠭᠡᠳᠡᠭ᠃ ᠮᠤᠩᠬᠠᠭ ᠪᠢ ᠡᠰᠡ ᠤᠬᠠᠵᠤ᠂ ᠤᠴᠢᠷ ᠢ᠋ ᠪᠣᠳᠣᠯ ᠦᠭᠡᠢ ᠡᠨᠳᠡᠭᠦᠷᠡᠯᠡ ᠭᠡᠵᠦ ᠬᠡᠯᠡᠭᠡᠳ ᠴᠡᠷᠡᠨ᠂ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠭᠠᠷᠤᠭᠰᠠᠨ ᠵᠢᠭᠠᠯ ᠬᠡᠦᠬᠡᠳ ᠢ᠋ᠶ᠋ᠡᠨ ᠡᠯᠢᠭᠡᠨ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠲᠡᠪᠡᠷᠢᠵᠡᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠴᠤᠯᠮᠤᠨᠭᠡᠷᠡᠯ᠂ ᠪᠠᠯ᠂ ᠤᠢᠭᠤᠷᠵᠢᠨ· ᠣᠳᠬᠣᠨᠪᠠᠪᠠ᠂ ᠪᠠᠳᠮᠠᠰᠡᠴᠡᠨ
ᠬᠢᠨᠠᠭᠴᠢ᠄ ᠣᠳᠬᠣᠨᠴᠡᠴᠡᠭ᠂ ᠤᠢᠭᠤᠷᠵᠢᠨ· ᠣᠳᠬᠣᠨᠪᠠᠪᠠ᠂ ᠴᠤᠯᠮᠤᠨᠭᠡᠷᠡᠯ᠂ ᠪᠠᠯ
ᠤᠩᠰᠢᠭᠴᠢ᠄ ᠨᠠᠰᠤᠨ᠌ᠦ᠌ᠯᠵᠡᠢ