ᠦᠷ ᠦᠨ ᠲᠤᠶᠠᠭᠠ III – ᠪ᠂ ᠷᠢᠨᠴᠢᠨ - ᠭᠤᠷᠪᠠᠳᠤᠭᠠᠷ ᠲᠡᠪᠲᠡᠷ <ᠪᠠᠢᠯᠳᠤᠵᠤ ᠣᠯᠣᠭᠰᠠᠨ ᠡᠬᠡ ᠣᠷᠣᠨ>- ᠶᠢᠰᠦ Үүрийн туяа III – Б ᠂ Ренчин Гуравдугаар дэвтэр "Баялдаж олсон эх орон"-9
233ᠶᠢᠰᠦ᠂ ᠬᠤᠰᠢᠭᠤᠨ ᠤ᠋ ᠰᠤᠷᠭᠠᠭᠤᠯᠢ ᠪᠠᠢᠭᠤᠯᠵᠠᠢ
ᠪᠠᠳᠠᠷᠠᠩᠭᠤᠢ ᠡᠷᠳᠡᠮ᠂ ᠮᠠᠨ ᠤ᠋ ᠰᠤᠷᠭᠠᠭᠤᠯᠢ ᠶ᠋ᠢᠨ ᠲᠠᠩᠬᠢᠮ ᠳ᠋ᠤ᠌ ᠮᠠᠨᠳᠤᠭᠠᠳ᠂
ᠪᠠᠯᠠᠷ ᠪᠦᠳᠦᠭᠦᠯᠢᠭ᠂ ᠬᠠᠷᠠᠩᠭᠤᠢ ᠮᠤᠩᠬᠠᠭ ᠤ᠋ᠨ ᠴᠠᠭ ᠠᠷᠢᠯᠲᠤᠭᠠᠢ᠃
ᠮᠠᠨ ᠤ᠋ ᠬᠥᠪᠡᠭᠦᠳ ᠥᠬᠢᠳ ᠰᠤᠷᠭᠠᠭᠤᠯᠢ ᠶ᠋ᠢ ᠲᠡᠭᠦᠰᠬᠡᠨ ᠭᠠᠷᠴᠠᠭᠠᠵᠤ᠂
ᠮᠠᠨᠳᠤᠭᠰᠠᠨ ᠡᠷᠳᠡᠮ ᠤᠬᠠᠭᠠᠨ ᠢ᠋ᠶ᠋ᠠᠷ ᠠᠷᠠᠳ ᠲᠦᠮᠡᠨ ᠢ᠋ᠶ᠋ᠡᠨ ᠭᠡᠢᠭᠦᠯᠲᠦᠭᠡᠢ᠃
ᠬᠠᠮᠽᠠ ᠬᠠᠺᠢᠮ ᠵᠠᠳ᠋ᠧ
— ᠬᠤᠰᠢᠭᠤᠨ ᠤ᠋ ᠲᠠᠮᠠᠭᠠ ᠶ᠋ᠢᠨ ᠣᠷᠴᠢᠮ ᠶᠡᠬᠡᠯᠡ ᠬᠥᠯ ᠲᠡᠢ ᠪᠣᠯᠵᠠᠢ᠃ ᠤᠷᠲᠤ ᠡᠪᠡᠷ ᠲᠡᠢ ᠮᠣᠩᠭᠣᠯ᠂ ᠤᠷᠲᠤ ᠰᠡᠪᠡᠭ ᠲᠡᠢ ᠰᠠᠷᠯᠤᠭ ᠤ᠋ᠨ ᠱᠠᠷ ᠢ᠋ᠶ᠋ᠠᠷ ᠠᠷᠠᠳ ᠤ᠋ᠳ ᠮᠣᠳᠣ ᠴᠢᠯᠠᠭᠤ ᠸᠠᠭᠠᠷ ᠲᠣᠭᠣᠰᠬᠠ ᠪᠠᠭᠤᠯᠭᠠᠵᠤ᠂ ᠲᠡᠷᠭᠡ ᠬᠢᠬᠤᠨᠠᠨ ᠰᠦᠬᠡ ᠴᠦᠴᠡ ᠴᠠᠪᠴᠢᠬᠤ ᠳᠥᠩᠭᠡᠬᠦ ᠴᠢᠮᠡᠭᠡ᠂ ᠬᠡᠷᠦᠭᠡ ᠱᠠᠷ ᠱᠠᠷ ᠭᠡᠬᠦ ᠠᠨᠢᠷ᠂ ᠮᠣᠩᠭᠣᠯ ᠣᠷᠣᠰ ᠬᠢᠲᠠᠳ ᠦᠭᠡ ᠬᠡᠯᠡᠯᠴᠡᠬᠦ ᠴᠢᠮᠡᠭᠡ ᠰᠣᠨᠣᠰᠳᠠᠨ᠂ ᠬᠤᠰᠢᠭᠤᠨ ᠤ᠋ ᠪᠠᠭᠠ ᠰᠤᠷᠭᠠᠭᠤᠯᠢ ᠪᠣᠰᠬᠠᠬᠤ ᠭᠠᠵᠠᠷ ᠤ᠋ᠨ ᠣᠷᠴᠢᠮ᠂ ᠠᠵᠢᠯ ᠬᠢᠬᠦ ᠬᠥᠮᠦᠨ ᠦ᠌ ᠡᠳᠦᠢ ᠲᠡᠳᠦᠢ ᠮᠠᠢᠬᠠᠨ ᠪᠣᠰᠴᠠᠭᠠᠪᠠ᠃ ᠭᠣᠣᠯ ᠤ᠋ᠨ ᠬᠠᠪᠢ ᠳ᠋ᠤ᠌ ᠰᠤᠷᠭᠠᠭᠤᠯᠢ ᠶ᠋ᠢᠨ ᠨᠣᠭᠣᠭᠠᠨ ᠤ᠋ ᠭᠠᠵᠠᠷ ᠡᠷᠲᠡᠨ ᠡᠴᠡ ᠪᠠᠵᠠᠭᠠᠵᠤ᠂ ᠲᠡᠷᠡ ᠪᠠᠢᠭᠤᠯᠬᠤ ᠰᠤᠷᠭᠠᠭᠤᠯᠢ ᠶ᠋ᠢᠨ ᠵᠠᠬᠢᠷᠤᠯ ᠪᠠᠭᠰᠢ ᠨᠠᠰᠤᠨᠪᠠᠲᠤ ᠶ᠋ᠢᠨ ᠤᠷᠢᠵᠤ ᠤᠯᠢᠶᠠᠰᠤᠲᠠᠢ ᠬᠣᠲᠠ ᠬᠠᠪᠢ ᠠ᠋ᠴᠠ ᠠᠪᠴᠢᠷᠠᠭᠰᠠᠨ ᠸᠠᠩ ᠣᠪᠣᠭᠲᠤ ᠨᠢᠭᠡᠳᠦᠭᠡᠷ ᠬᠦᠦ ᠭᠡᠭᠴᠢ ᠡᠪᠦᠭᠡᠨ᠂ ᠸᠠᠩ ᠣᠪᠣᠭᠲᠤ ᠬᠣᠶᠠᠳᠤᠭᠠᠷ ᠬᠦᠦ ᠬᠡᠮᠡᠭᠴᠢ ᠳᠡᠭᠦᠦ ᠲᠡᠢ ᠪᠡᠨ ᠤᠴᠠᠷᠠᠵᠤ᠂ ᠬᠠᠮᠲᠤ ᠨᠣᠭᠣᠭᠠᠨ ᠤ᠋ ᠬᠦᠷᠢᠶᠡᠯᠡᠩ ᠳ᠋ᠦ᠍ ᠢᠳᠡᠰᠢᠨ ᠦ᠌ ᠨᠣᠭᠣᠭᠠ ᠤᠰᠤᠯᠠᠬᠤ ᠪᠣᠷᠳᠣᠬᠤ ᠠᠵᠢᠯ ᠬᠢᠵᠦ ᠪᠠᠢᠯᠠ᠃ ᠨᠠᠰᠤᠨᠪᠠᠲᠤ ᠳ᠋ᠤ᠌ ᠲᠤᠰᠠᠯᠠᠵᠤ᠂ ᠡᠪᠦᠭᠡᠨ ᠢᠸᠠᠨ ᠤ᠋ ᠠᠪᠴᠢᠷᠠᠭᠰᠠᠨ ᠣᠷᠣᠰ ᠮᠣᠳᠣᠴᠢ ᠳᠠᠷᠬᠠᠨ᠂ ᠡᠮᠦᠨᠡ ᠵᠦᠭ ᠬᠠᠨᠳᠤᠭᠰᠠᠨ ᠰᠤᠷᠭᠠᠭᠤᠯᠢ ᠶ᠋ᠢᠨ ᠲᠠᠩᠬᠢᠮ ᠤ᠋ᠨ ᠶᠡᠬᠡ ᠮᠣᠳᠣᠨ ᠪᠠᠢᠰᠢᠩ ᠢ᠋ ᠪᠣᠰᠬᠠᠵᠤ᠂ ᠲᠡᠷᠡ ᠣᠷᠳᠣᠨ ᠪᠠᠢᠰᠢᠩ ᠤ᠋ᠨ ᠵᠡᠭᠦᠨ ᠪᠠᠷᠠᠭᠤᠨ ᠡᠲᠡᠭᠡᠳ᠂ ᠳᠣᠲᠣᠷ ᠬᠥᠮᠦᠨ ᠲᠣᠭᠣᠰᠬᠠ ᠪᠠᠷ ᠪᠠᠭᠰᠢ ᠰᠤᠷᠤᠭᠴᠢ ᠨᠠᠷ ᠤ᠋ᠨ ᠰᠠᠭᠤᠬᠤ ᠪᠠᠢᠷᠢ᠂ ᠬᠣᠭᠣᠯᠠ ᠢᠳᠡᠬᠦ ᠪᠠᠢᠰᠢᠩ ᠪᠠᠷᠢᠵᠠᠭᠠᠵᠤ᠂ ᠴᠢᠬᠢᠷᠰᠦ ᠪᠡᠷ ᠪᠠᠷᠢᠭᠰᠠᠨ ᠰᠠᠷᠠᠪᠴᠢᠨ ᠤ᠋ ᠨᠥᠮᠥᠷᠢ ᠳ᠋ᠦ᠍ ᠬᠣᠰᠢᠭᠤ ᠬᠡᠢᠳ ᠦ᠋ᠨ ᠬᠡᠳᠦᠨ ᠶᠠᠳᠠᠭᠤ ᠯᠠᠮᠠ ᠤᠷᠠᠴᠤᠳ᠂ ᠨᠠᠰᠤᠨᠪᠠᠲᠤ ᠶ᠋ᠢᠨ ᠵᠢᠷᠤᠭ ᠵᠢᠭᠠᠪᠤᠷᠢ ᠶᠣᠰᠣᠭᠠᠷ ᠰᠤᠷᠭᠠᠭᠤᠯᠢ ᠶ᠋ᠢᠨ ᠲᠠᠩᠬᠢᠮ ᠳ᠋ᠤ᠌ ᠬᠡᠷᠡᠭᠯᠡᠬᠦ ᠰᠠᠮᠪᠠᠷᠠ᠂ ᠰᠠᠪᠠ ᠱᠦᠭᠦᠢ᠂ ᠰᠤᠷᠤᠭᠴᠢᠳ ᠤ᠋ᠨ ᠰᠠᠭᠤᠬᠤ ᠰᠢᠷᠡᠭᠡ ᠰᠠᠨᠳᠠᠯᠢ ᠵᠡᠷᠭᠡ ᠶ᠋ᠢ ᠬᠢᠵᠦ ᠪᠠᠢᠯᠠ᠃ ᠨᠠᠮᠤᠷ ᠰᠤᠷᠤᠯᠴᠠᠬᠤ ᠬᠡᠦᠬᠡᠳ ᠦ᠋ᠨ ᠡᠴᠢᠭᠡ ᠡᠬᠡ᠂ ᠰᠤᠷᠭᠠᠭᠤᠯᠢ ᠶ᠋ᠢᠨ ᠦᠢᠯᠡᠳᠬᠡᠯ ᠢ᠋ ᠰᠣᠨᠢᠷᠬᠠᠨ ᠢᠷᠡᠵᠡᠭᠡᠵᠦ᠂ ᠬᠦᠬᠦᠷ ᠢ᠋ᠶ᠋ᠡᠷ ᠠᠢᠷᠠᠭ᠂ ᠳᠠᠰᠢᠮᠠᠭ ᠢ᠋ᠶ᠋ᠠᠷ ᠠᠷᠢᠬᠢ᠂ ᠪᠣᠷᠪᠢ ᠬᠠᠪᠴᠢᠭ ᠢ᠋ᠶ᠋ᠠᠷ ᠲᠠᠷᠠᠭ ᠠᠪᠴᠢᠷᠠᠵᠠᠭᠠᠵᠤ ᠥᠭᠳᠡᠭ ᠪᠠᠢᠯᠠ᠃ ᠬᠣᠰᠢᠭᠤ ᠳᠠᠷᠤᠭᠠ ᠪᠠᠲᠤᠪᠠᠶᠠᠷ ᠡᠳᠦᠷ ᠳᠣᠳᠣᠮ ᠡᠪᠦᠭᠡᠨ ᠨᠠᠢᠵᠠ ᠢᠸᠠᠨ ᠲᠠᠢ ᠬᠠᠮᠲᠤ ᠡᠷᠭᠢᠵᠦ ᠦᠵᠡᠳᠡᠭ ᠪᠠᠢᠵᠠᠢ᠃
ᠮᠠᠷᠭᠠᠰᠢ ᠲᠠᠢᠪᠤᠤ ᠨᠢᠷᠤᠭᠤ ᠶ᠋ᠢ ᠪᠤᠰᠬᠠᠨᠠ ᠭᠡᠵᠦ ᠪᠠᠲᠤᠪᠠᠶᠠᠷ ᠲᠤ᠌ ᠡᠪᠦᠭᠡᠨ ᠮᠣᠳᠣᠴᠢ ᠳᠠᠷᠬᠠᠨ ᠣᠷᠣᠰ ᠬᠡᠯᠡᠵᠡᠢ᠃ ᠰᠢᠪᠧᠷᠢᠶᠡ ᠶ᠋ᠢᠨ ᠲᠡᠷᠡ ᠡᠪᠦᠭᠡᠨ ᠳᠠᠷᠬᠠᠨ ᠪᠡᠶᠡ ᠮᠠᠰᠢ ᠲᠡᠩᠬᠡᠯᠡᠭᠦᠨ᠂ ᠰᠦᠬᠡ ᠪᠠᠷᠢᠬᠤ ᠳ᠋ᠠᠭᠠᠨ ᠴᠢᠳᠠᠮᠠᠭᠠᠢ᠂ ᠠᠮᠠᠰᠬᠢᠬᠦ ᠵᠠᠭᠤᠷᠠ ᠵᠦᠭᠡᠷ ᠰᠠᠭᠤᠬᠤ ᠪᠠᠷ ᠲᠡᠮᠡᠭᠡ ᠬᠠᠷᠢᠭᠤᠯ ᠭᠡᠭᠴᠢ ᠪᠡᠷ ᠰᠦᠬᠡ ᠪᠡᠨ ᠪᠠᠷᠢᠵᠤ᠂ ᠬᠡᠦᠬᠡᠳ ᠲᠦ᠍ ᠬᠡᠷᠡᠭᠯᠡᠬᠦ ᠮᠣᠳᠣᠨ ᠬᠠᠯᠪᠠᠭᠠ ᠵᠣᠷᠳᠠᠭ ᠪᠠᠢᠵᠠᠢ᠃
ᠰᠤᠷᠭᠠᠭᠤᠯᠢ ᠶ᠋ᠢᠨ ᠶᠡᠬᠡ ᠪᠠᠢᠰᠢᠩ ᠤ᠋ᠨ ᠲᠠᠢᠪᠤᠤ ᠨᠢᠷᠤᠭᠤ ᠶ᠋ᠢ ᠪᠤᠰᠬᠠᠬᠤ ᠳ᠋ᠤ᠌ ᠣᠯᠠᠨ ᠳᠠᠷᠬᠠᠨ᠂ ᠪᠠᠰᠠ ᠲᠠᠮᠠᠭᠠ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠠᠯᠪᠠᠨ ᠬᠠᠭᠠᠭᠴᠢ᠂ ᠮᠥᠨ ᠲᠡᠷᠡ ᠡᠳᠦᠷ ᠲᠠᠮᠠᠭᠠ ᠶ᠋ᠢᠨ ᠭᠠᠵᠠᠷ ᠬᠦᠷᠴᠦ ᠢᠷᠡᠭᠰᠡᠨ ᠠᠷᠠᠳ ᠤ᠋ᠳ ᠴᠤᠭᠯᠠᠵᠤ᠂ ᠪᠠᠲᠤᠪᠠᠶᠠᠷ ᠤ᠋ᠨ ᠲᠤᠰᠬᠠᠢᠯᠠᠨ ᠤᠷᠢᠵᠤ ᠢᠷᠡᠭᠦᠯᠦᠭᠰᠡᠨ ᠲᠠᠩᠰᠤᠭ ᠵᠡᠷᠭᠡ ᠣᠯᠠᠨ ᠬᠥᠮᠦᠨ ᠴᠤᠭᠯᠠᠵᠠᠢ᠃
ᠶᠡᠬᠡ ᠲᠠᠢᠪᠤᠤ ᠨᠢᠷᠤᠭᠤ ᠪᠤᠰᠬᠠᠬᠤ ᠵᠡᠭᠦᠨ ᠪᠠᠷᠠᠭᠤᠨ ᠬᠣᠶᠠᠷ ᠲᠤᠭᠤᠷᠭᠠ ᠶ᠋ᠢᠨ ᠪᠦᠳᠦᠭᠦᠨ ᠳ᠋ᠦᠨᠵᠡ ᠮᠣᠳᠣᠨ ᠳ᠋ᠤ᠌ ᠣᠨᠢ ᠭᠠᠷᠭᠠᠭᠰᠠᠨ ᠲᠤᠱᠠᠭᠠ ᠨᠢᠵᠡᠭᠡᠳ ᠱᠠᠲᠤ ᠲᠠᠯᠪᠢᠭᠰᠠᠨ ᠳ᠋ᠤ᠌ ᠪᠠᠲᠤᠪᠠᠶᠠᠷ ᠪᠠᠷᠠᠭᠤᠨ ᠲᠤᠭᠤᠷᠭᠠᠨ ᠤ᠋ ᠲᠡᠨᠳᠡ ᠵᠡᠭᠦᠨ ᠲᠡᠰᠢ ᠬᠠᠨᠳᠤᠨ ᠵᠣᠭᠰᠣᠵᠤ ᠬᠠᠳᠠᠭ ᠭᠠᠷᠭᠠᠵᠤ ᠢᠷᠦᠭᠡᠯ ᠬᠡᠯᠡᠭᠰᠡᠨ ᠨᠢ᠂
《 ᠵᠠ᠂ ᠲᠦᠭᠡᠮᠡᠯ ᠣᠯᠠᠨ ᠤ᠋ ᠬᠦᠰᠡᠯ ᠪᠠᠳᠠᠷᠠᠭᠰᠠᠨ᠂
《 ᠲᠦᠷᠭᠡᠨ ᠤᠷᠤᠭᠰᠢᠲᠠᠢ ᠪᠣᠰᠤᠭᠰᠠᠨ᠂
— ᠠᠷᠠᠳ ᠤ᠋ᠨ ᠪᠠᠭᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠠᠷᠢᠭᠤᠨ ᠰᠠᠢᠬᠠᠨ ᠲᠠᠩᠬᠢᠮ ᠤ᠋ᠨ
《 ᠠᠭᠠᠷᠤ ᠽᠠᠨᠳᠠᠨ ᠲᠠᠢᠪᠤᠤ ᠨᠢᠷᠤᠭᠤ ᠨᠢ
《 ᠠᠷᠪᠠᠨ ᠲᠦᠮᠡᠨ ᠵᠢᠯ ᠬᠣᠲᠣᠢᠯ ᠦᠭᠡᠢ᠂
《 ᠪᠠᠢᠭᠤᠯᠤᠭᠰᠠᠨ ᠰᠠᠢᠬᠠᠨ ᠰᠤᠷᠭᠠᠭᠤᠯᠢ ᠶ᠋ᠢᠨ
《 ᠪᠠᠲᠤ ᠲᠦᠰᠢᠭ ᠪᠣᠯᠵᠤ᠂
《 ᠪᠠᠲᠤ ᠰᠠᠢᠬᠠᠨ ᠪᠠᠢᠰᠢᠩ ᠳ᠋ᠠᠭᠠᠨ
《ᠪᠠᠬᠠᠲᠠᠢ ᠴᠢᠮᠡᠭ ᠪᠣᠯᠵᠤ᠂
《ᠳᠡᠯᠭᠡᠷ ᠰᠠᠢᠬᠠᠨ ᠡᠨᠡ ᠲᠠᠩᠬᠢᠮ᠂
《ᠳᠡᠪᠵᠢᠨ ᠬᠥᠭᠵᠢᠬᠦ ᠮᠠᠨ ᠤ᠋ ᠠᠷᠠᠳ ᠤ᠋ᠨ
《ᠡᠩᠬᠡ ᠲᠥᠷᠥ ᠶ᠋ᠢᠨ ᠡᠷᠳᠡᠮᠲᠡᠨ ᠮᠡᠷᠭᠡᠳ ᠭᠠᠷᠬᠤ ᠶ᠋ᠢᠨ ᠣᠷᠣᠨ᠂
《ᠡᠭᠦᠷᠢᠳᠡ ᠮᠠᠨᠳᠤᠬᠤ ᠡᠷᠳᠡᠮ ᠤᠬᠠᠭᠠᠨ ᠤ᠋ ᠰᠠᠩ ᠪᠣᠯᠲᠤᠭᠠᠢ》 ᠭᠡᠵᠦ ᠢᠷᠥᠭᠡᠪᠡᠰᠦ ᠬᠤᠷᠠᠭᠰᠠᠨ ᠪᠦᠭᠦᠳᠡ᠂ ᠢᠷᠦᠭᠡᠯ ᠢ᠋ᠶ᠋ᠡᠷ ᠪᠣᠯᠲᠤᠭᠠᠢ ᠭᠡᠵᠦ ᠥᠴᠢᠪᠡ᠃ ᠡᠪᠦᠭᠡᠨ ᠪᠠᠲᠤᠪᠠᠶᠠᠷ ᠬᠠᠳᠠᠭ ᠢ᠋ᠶ᠋ᠠᠨ ᠪᠠᠷᠢᠵᠤ᠂ ᠱᠠᠲᠤ ᠥᠭᠰᠥᠨ ᠠᠪᠠᠷᠢᠵᠤ ᠭᠠᠷᠤᠭᠠᠳ᠂ ᠲᠠᠢᠪᠤᠤ ᠨᠢᠷᠤᠭᠤ ᠰᠠᠭᠤᠯᠭᠠᠬᠤ ᠣᠨᠢ ᠳ᠋ᠤ᠌ ᠬᠥᠬᠡ ᠬᠠᠳᠠᠭ ᠤ᠋ᠨ ᠦᠵᠦᠭᠦᠷ ᠢ᠋ ᠳᠣᠭᠣᠭᠰᠢ ᠤᠨᠵᠢᠭᠤᠯᠤᠨ ᠬᠢᠭᠡᠳ ᠠᠶᠠᠷᠬᠠᠨ ᠪᠠᠭᠤᠪᠠᠰᠤ᠂ ᠵᠡᠭᠦᠨ ᠲᠤᠭᠤᠷᠭᠠ ᠶ᠋ᠢᠨ ᠲᠤᠰ ᠪᠠᠶᠠᠷᠯᠠᠨ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠲᠠᠩᠰᠤᠭ᠂ ᠬᠣᠰᠢᠭᠤ ᠰᠤᠷᠭᠠᠭᠤᠯᠢ ᠶ᠋ᠢᠨ ᠲᠠᠩᠬᠢᠮ ᠳ᠋ᠤ᠌ ᠲᠠᠢᠪᠤᠤ ᠨᠢᠷᠤᠭᠤ ᠥᠨᠳᠥᠷᠯᠡᠨ ᠪᠣᠰᠬᠠᠬᠤ ᠳ᠋ᠤ᠌ ᠬᠠᠳᠠᠭ ᠢᠷᠥᠭᠡᠨ ᠲᠠᠯᠪᠢᠬᠤ ᠬᠤᠪᠢ ᠲᠠᠢ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠪᠠᠬᠠᠳᠤᠵᠤ᠂ ᠲᠣᠪᠴᠢᠬᠠᠨ ᠬᠡᠳᠦᠨ ᠦᠭᠡ ᠪᠡᠷ ᠪᠠᠶᠠᠰᠬᠤᠯᠠᠩᠲᠤ ᠰᠡᠳᠬᠢᠯ ᠦ᠋ᠨ ᠭᠦᠨᠡ ᠡᠴᠡ ᠢᠷᠦᠭᠡᠪᠡ᠄
《ᠤᠯᠤᠰ ᠤ᠋ᠨ ᠪᠤᠶᠠᠨ ᠢ᠋ᠶ᠋ᠠᠷ ᠪᠦᠲᠦᠭᠰᠡᠨ ᠡᠨᠡ ᠰᠤᠷᠭᠠᠭᠤᠯᠢ ᠶ᠋ᠢ
《ᠤᠷᠠᠨ ᠭᠠᠷ ᠢ᠋ᠶ᠋ᠠᠷ ᠪᠦᠲᠦᠭᠡᠭᠴᠢ ᠤᠷᠠᠴᠤᠳ᠂
《ᠬᠡᠰᠢᠭ ᠪᠤᠶᠠᠨ ᠢ᠋ᠶ᠋ᠠᠨ ᠡᠳ᠋ᠯᠡᠵᠦ ᠵᠢᠷᠭᠠᠬᠤ ᠪᠣᠯᠲᠤᠭᠠᠢ!
《ᠥᠨᠳᠥᠷᠯᠡᠨ ᠪᠣᠰᠤᠭᠰᠠᠨ ᠡᠨᠡ ᠰᠠᠢᠬᠠᠨ ᠪᠠᠢᠰᠢᠩ ᠨᠢ
《ᠥᠨᠢ ᠤᠳᠠᠭᠠᠨ ᠪᠠᠲᠤ ᠪᠡᠬᠢ ᠣᠷᠣᠰᠢᠵᠤ᠂
《ᠬᠡᠵᠢᠶᠡᠳᠡ ᠡᠷᠳᠡᠮ ᠤᠬᠠᠭᠠᠨ ᠤ᠋ ᠭᠣᠯᠣᠮᠲᠠ ᠪᠣᠯᠲᠤᠭᠠᠢ! 》ᠭᠡᠵᠦ ᠢᠷᠦᠭᠡᠪᠡᠰᠦ ᠴᠤᠭᠯᠠᠭᠰᠠᠳ᠂ ᠢᠷᠦᠭᠡᠯ ᠢ᠋ᠶ᠋ᠡᠷ ᠪᠣᠯᠲᠤᠭᠠᠢ!ᠭᠡᠵᠦ ᠬᠥᠨᠳᠡᠢ ᠪᠠᠢᠰᠢᠩ ᠳᠣᠲᠣᠷᠠ ᠬᠦᠩᠭᠢᠨᠡᠲᠡᠯᠡ ᠳᠤᠤᠭᠠᠷᠴᠠᠭᠠᠵᠤ᠂ ᠲᠠᠩᠰᠤᠭ ᠵᠡᠭᠦᠨ ᠲᠤᠭᠤᠷᠭᠠ ᠥᠭᠡᠳᠡ ᠱᠠᠲᠤ ᠪᠠᠷ ᠠᠪᠠᠷᠢᠨ ᠭᠠᠷᠴᠤ᠂ ᠲᠠᠢᠪᠤᠤ ᠨᠢᠷᠤᠭᠤ ᠲᠠᠯᠪᠢᠬᠤ ᠰᠠᠭᠤᠷᠢ ᠳ᠋ᠤ᠌᠂ ᠥᠯᠵᠡᠢᠲᠦ ᠬᠡ ᠤᠭᠠᠯᠵᠠ ᠪᠦᠬᠦᠢ ᠬᠠᠳᠠᠭ ᠤ᠋ᠨ ᠢ᠋ᠶ᠋ᠠᠨ ᠦᠵᠦᠭᠦᠷ ᠢ᠋ ᠤᠨᠵᠢᠭᠤᠯᠤᠨ ᠲᠠᠯᠪᠢᠵᠤ᠂ ᠨᠡᠩ ᠪᠣᠯᠭᠣᠮᠵᠢᠯᠠᠨ ᠳᠣᠭᠣᠭᠰᠢ ᠪᠠᠭᠤᠪᠠᠰᠤ᠂ ᠳᠠᠷᠬᠠᠴᠤᠳ ᠬᠦᠨᠳᠦ ᠲᠠᠢᠪᠤᠤ ᠨᠢᠷᠤᠭᠤ ᠶ᠋ᠢ ᠮᠠᠰᠢ ᠰᠤᠷᠮᠠᠭᠠᠢ ᠪᠠᠷ ᠤᠭ ᠭᠠᠷᠭᠠᠭᠰᠠᠨ ᠣᠨᠢ ᠳ᠋ᠤ᠌ ᠣᠷᠣᠭᠤᠯᠤᠨ ᠲᠠᠯᠪᠢᠵᠠᠢ᠃
ᠦᠳᠡᠰᠢ᠂ ᠲᠡᠷᠡ ᠲᠠᠢᠪᠤᠤ ᠨᠢᠷᠤᠭᠤ ᠥᠨᠳᠥᠷᠯᠡᠨ ᠪᠤᠰᠬᠠᠭᠰᠠᠨ ᠤᠷᠠᠴᠤᠳ ᠢ᠋ ᠳᠠᠢᠯᠠᠵᠤ᠂ ᠰᠤᠷᠭᠠᠭᠤᠯᠢ ᠶ᠋ᠢᠨ ᠪᠦᠬᠦ ᠦᠢᠯᠡᠳᠬᠡᠯ ᠳ᠋ᠦ᠍ ᠵᠢᠳᠬᠦᠬᠦ ᠠᠵᠢᠯᠴᠢᠨ ᠴᠤᠭᠯᠠᠭᠰᠠᠨ ᠳ᠋ᠤ᠌᠂ ᠲᠠᠮᠠᠭᠠ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠲᠠᠬᠠᠷ ᠡᠪᠦᠭᠡᠨ ᠬᠤᠭᠤᠷᠴᠢ ᠮᠣᠷᠢᠨ ᠲᠣᠯᠣᠭᠠᠢᠲᠤ ᠬᠤᠭᠤᠷ ᠢ᠋ᠶ᠋ᠠᠨ ᠪᠠᠷᠢᠭᠠᠳ᠂ ᠬᠣᠰᠢᠭᠤ ᠨᠡᠢᠭᠡᠮ ᠦ᠋ᠨ ᠬᠥᠷᠥᠩᠭᠡ ᠪᠤᠶᠠᠨ ᠢ᠋ᠶ᠋ᠠᠷ ᠪᠠᠢᠭᠤᠯᠵᠤ ᠪᠠᠢᠭᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠲᠠᠩᠬᠢᠮ ᠢ᠋ ᠥᠨᠳᠥᠷᠯᠡᠨ ᠪᠤᠰᠬᠠᠬᠤ ᠦᠢᠯᠡᠳᠬᠡᠯ ᠳ᠋ᠦ᠍ ᠬᠦᠴᠦᠨ ᠵᠢᠳᠬᠦᠵᠦ ᠪᠠᠢᠭᠠ ᠣᠷᠣᠰ᠂ ᠮᠣᠩᠭᠣᠯ᠂ ᠲᠥᠪᠡᠳ᠂ ᠬᠠᠰᠠᠭ᠂ ᠳᠣᠲᠣᠷᠠ ᠲᠠᠪᠤᠨ ᠬᠡᠯᠡ ᠶ᠋ᠢᠨ ᠣᠯᠠᠨ ᠠᠵᠢᠯᠴᠢᠨ ᠢ᠋ ᠢᠷᠠᠭᠤ ᠰᠠᠢᠬᠠᠨ ᠦᠭᠡ ᠪᠡᠷ ᠡᠷᠭᠦᠨ ᠮᠠᠭᠲᠠᠵᠤ ᠡᠭᠡᠰᠢᠭᠯᠡᠯᠡ᠃
ᠸᠠᠩ ᠣᠪᠣᠭᠲᠤ ᠨᠢᠭᠡᠳᠦᠭᠡᠷ ᠬᠦᠦ ᠭᠡᠳᠡᠭ ᠡᠪᠦᠭᠡᠨ ᠨᠣᠭᠣᠭᠠᠴᠢᠨ ᠰᠢᠮᠡ ᠶ᠋ᠢᠨ ᠠᠷᠢᠬᠢᠨ ᠳ᠋ᠤ᠌ ᠪᠠᠬᠠᠨ ᠬᠥᠯᠴᠥᠨ ᠰᠣᠭᠲᠣᠭᠠᠳ ᠠᠶᠠᠭᠠ ᠲᠠᠢ ᠲᠠᠷᠠᠭ ᠠ᠋ᠴᠠ ᠠᠮᠰᠠᠵᠤ ᠢᠷᠪᠠᠢᠰᠬᠢᠭᠡᠳ᠂ ᠮᠠᠰᠢ ᠨᠠᠷᠢᠨ ᠬᠣᠭᠣᠯᠠᠢ ᠪᠠᠷ᠂ ᠦᠰᠦᠨ ᠠᠢᠮᠠᠭ ᠸᠠᠩ ᠳ᠋ᠤ᠌ ᠬᠠᠳᠠᠮ ᠳ᠋ᠤ᠌ ᠥᠭᠭᠦᠭᠰᠡᠨ ᠱᠢ ᠵᠢᠶᠦ᠋ᠨ ᠭᠦᠩᠵᠦ ᠶ᠋ᠢᠨ ᠳᠠᠭᠤᠤ ᠶ᠋ᠢ ᠳᠠᠭᠤᠯᠠᠭᠰᠠᠨ ᠨᠢ᠄
《ᠢᠰᠡᠭᠡᠢ ᠲᠤᠭᠤᠷᠭᠠ ᠲᠠᠢ᠂
《ᠲᠥᠭᠥᠷᠢᠭ ᠭᠡᠷ ᠣᠷᠣᠨ ᠮᠢᠨᠢ ᠪᠣᠯᠵᠤ᠂
《ᠢᠰᠬᠦᠯᠡᠩ ᠰᠦ ᠲᠠᠷᠠᠭ ᠤᠮᠳᠠ ᠮᠢᠨᠢ ᠪᠣᠯᠤᠯᠠ!
《ᠠᠶᠠ! ᠲᠥᠷᠥᠭᠰᠡᠨ ᠨᠤᠲᠤᠭ ᠢ᠋ᠶ᠋ᠠᠨ ᠰᠠᠨᠠᠬᠤ ᠳ᠋ᠤ᠌ ᠂
《ᠰᠡᠳᠬᠢᠯ ᠵᠢᠷᠦᠬᠡ ᠰᠢᠮᠰᠢᠷᠡᠨ ᠡᠪᠡᠳᠦᠨᠡᠮ!
《ᠠᠶᠠ᠂ ᠴᠠᠭᠠᠨ ᠬᠤᠨ ᠰᠢᠪᠠᠭᠤ ᠴᠤ᠌ ᠪᠣᠯᠤᠭᠠᠰᠠᠢ᠂
《ᠠᠯᠤᠰ ᠨᠤᠲᠤᠭ ᠤ᠋ᠨ ᠵᠦᠭ ᠳᠡᠪᠢᠩᠬᠡᠨ ᠨᠢᠰᠦᠭᠡᠰᠡᠢ!》 ᠬᠡᠮᠡᠵᠡᠢ᠃
ᠡᠪᠦᠭᠡᠨ ᠸᠠᠩ ᠤ᠋ᠨ ᠳᠠᠭᠤᠯᠠᠵᠤ ᠪᠠᠢᠭᠰᠠᠨ ᠦᠭᠡ ᠶ᠋ᠢ ᠨᠠᠰᠤᠨᠪᠠᠲᠦ ᠶ᠋ᠢᠨ ᠪᠤᠰᠤᠳ ᠲᠤ᠌ ᠬᠡᠯᠡᠵᠦ ᠥᠭᠬᠦ ᠳ᠋ᠦ᠍᠂ ᠬᠥᠳᠡᠭᠡ ᠶ᠋ᠢᠨ ᠬᠥᠮᠦᠨ ᠮᠢᠬᠠᠨ ᠤ᠋ ᠰᠢᠮᠡ ᠲᠡᠢ ᠳᠡᠭᠡᠷᠡ ᠨᠢ ᠢᠳᠡᠬᠦ ᠳᠤᠷᠠᠲᠠᠢ᠂ ᠮᠥᠨ ᠲᠠᠷᠠᠭ ᠢ᠋ ᠪᠠᠬᠠᠳᠤᠨ ᠤᠤᠭᠤᠳᠠᠭ ᠲᠤᠯᠠ ᠤᠯᠤᠰ᠂ ᠲᠡᠷᠡ ᠡᠷᠲᠡᠨ ᠦ᠌ ᠭᠦᠩᠵᠦ ᠶ᠋ᠢ ᠱᠦᠷᠬᠡᠢ ᠮᠢᠬᠠ᠂ ᠲᠠᠷᠠᠭ ᠬᠣᠶᠠᠷ ᠲᠤ᠌ ᠳᠤᠷᠠ ᠦᠭᠡᠢ ᠶ᠋ᠢ ᠰᠣᠨᠣᠰᠴᠤ ᠢᠨᠢᠶᠡᠯᠳᠦᠵᠦ ᠡᠬᠢᠯᠡᠲᠡᠯᠡ᠂ ᠲᠡᠷᠡ ᠳᠠᠭᠤᠨ ᠳ᠋ᠤ᠌ ᠨᠤᠲᠤᠭ ᠤᠰᠤ ᠪᠠᠨ ᠰᠠᠨᠠᠵᠤ ᠭᠤᠨᠢᠭᠠᠷᠠᠨ ᠳᠠᠭᠤᠯᠠᠭᠰᠠᠨ ᠢ᠋ ᠰᠣᠨᠣᠰᠤᠭᠠᠳ᠂ ᠡᠪᠦᠭᠡᠨ ᠸᠠᠩ ᠠᠪᠤᠭᠠᠢ ᠲᠠᠷᠠᠭ ᠠᠮᠰᠠᠭᠰᠠᠨ ᠢ᠋ᠶ᠋ᠠᠷ ᠲᠡᠷᠡ ᠭᠦᠩᠵᠦ ᠶ᠋ᠢᠨ ᠳᠠᠭᠤᠤ ᠰᠡᠳᠬᠢᠯ ᠳ᠋ᠦ᠍ᠨᠢ ( ᠳ᠋ᠦ᠍ ᠨᠢ) ᠰᠠᠨᠠᠮᠰᠠᠷ ᠦᠭᠡᠢ ᠣᠷᠣᠵᠤ᠂ ᠲᠡᠷᠡ ᠭᠤᠨᠢᠭᠲᠤ ᠳᠠᠭᠤᠤ ᠳ᠋ᠠᠭᠠᠨ ( ᠳ᠋ᠤ᠌ ᠪᠠᠨ) ᠨᠤᠲᠤᠭ ᠤᠰᠤ ᠪᠠᠨ ᠮᠥᠷᠥᠭᠡᠳᠦᠨ ᠳᠤᠷᠠᠳᠤᠭᠰᠠᠨ ᠳ᠋ᠤ᠌ ᠠᠪᠲᠠᠭᠳᠠᠨ᠂ ᠲᠥᠷᠥᠭᠰᠡᠨ ᠥᠰᠦᠭᠰᠡᠨ ᠨᠤᠲᠤᠭ ᠢ᠋ᠶ᠋ᠠᠨ ᠰᠠᠨᠠᠭᠰᠠᠨ ᠢ᠋ ᠮᠡᠳᠡᠭᠡᠳ ᠴᠥᠮ ᠢᠨᠢᠶᠡᠬᠦ ᠶ᠋ᠢ ᠪᠠᠢᠵᠠᠢ᠃
ᠸᠠᠩ ᠡᠪᠦᠭᠡᠨ ᠢ᠋ ᠭᠤᠨᠢᠭᠲᠤ ᠳᠠᠭᠤᠤ ᠳᠠᠭᠤᠯᠠᠵᠤ ᠭᠦᠢᠴᠡᠮᠡᠭᠴᠡ᠂ ᠬᠣᠶᠠᠷ ᠲᠥᠪᠡᠳ ᠠᠵᠢᠯᠴᠢᠨ ᠪᠣᠰᠴᠤ᠂ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠠᠶᠠᠯᠭᠤ ᠨᠡᠢᠯᠡᠭᠦᠯᠦᠨ ᠲᠥᠪᠡᠳ ᠦ᠋ᠨ ᠥᠨᠳᠥᠷ ᠠᠭᠤᠯᠠ ᠶ᠋ᠢᠨ ᠬᠢᠨ ᠦ᠌ ᠪᠥᠵᠢᠭ ᠢ᠋ ᠪᠥᠵᠢᠭᠯᠡᠵᠦ᠂ ᠵᠤᠵᠠᠭᠠᠨ ᠭᠡᠭᠴᠢ ᠶ᠋ᠢᠨ ᠤᠯᠠ ᠲᠠᠢ᠂ ᠮᠤᠬᠤᠷ ᠬᠣᠰᠢᠭᠤ ᠲᠠᠢ ᠲᠥᠪᠡᠳ ᠭᠤᠲᠤᠯ ᠢ᠋ᠶ᠋ᠠᠷ ᠭᠠᠵᠠᠷ ᠢ᠋ ᠰᠦᠷ ᠪᠠᠳᠠᠷᠠᠭᠤᠯᠤᠨ ᠳᠡᠪᠢᠰᠴᠦ ᠳᠡᠪᠬᠡᠴᠡᠨ ᠪᠥᠵᠢᠭᠯᠡᠪᠡᠰᠦ᠂ ᠣᠷᠣᠰ ᠮᠣᠳᠣᠴᠢ ᠳᠠᠷᠬᠠᠨ ᠠᠯᠸᠺᠰᠸᠢ ᠲᠠᠢᠪᠤᠤ ᠨᠢᠷᠤᠭᠤ ᠪᠣᠰᠬᠠᠭᠰᠠᠨ ᠪᠠᠶᠠᠷ ᠲᠤ᠌ ᠵᠣᠷᠢᠭᠤᠯᠤᠨ《ᠰᠢᠮᠡᠬᠡᠰᠢᠭ》 ᠣᠷᠣᠰ ᠤ᠋ᠨ ᠬᠠᠭᠤᠴᠢᠨ ᠤ᠋ ᠠᠯᠲᠠ ᠰᠤᠪᠰᠤ ᠪᠠᠷ ᠬᠠᠳᠬᠤᠮᠠᠯᠯᠠᠭᠰᠠᠨ ᠲᠢᠲᠢᠮ ᠰᠢᠭ ᠴᠢᠮᠡᠭ ᠮᠠᠯᠠᠭᠠᠢ ᠡᠮᠦᠰᠦᠭᠰᠡᠨ ᠡᠬᠡᠨᠡᠷ ᠲᠡᠭᠡᠨ( ᠳ᠋ᠦ᠍ ᠪᠡᠨ)᠂
— ᠮᠠᠱᠠ ᠴᠢ ᠪᠢᠳᠡ ᠬᠣᠶᠠᠷ᠂ ᠣᠯᠠᠨ ᠨᠥᠬᠥᠳ ᠲᠦ᠍ ᠨᠢᠭᠡᠨ ᠪᠥᠵᠢᠭ ᠡᠷᠭᠦᠨ ᠴᠡᠩᠭᠡᠭᠦᠯᠪᠡᠯ ᠶᠠᠮᠠᠷ ᠪᠣᠢ? ᠬᠡᠮᠡᠪᠡᠰᠦ ᠨᠥᠬᠥᠳ ᠨᠢ᠄
— ᠶᠠᠭᠤᠲᠠᠢ ᠰᠠᠢᠨ᠂ ᠶᠠᠭᠤᠲᠠᠢ ᠰᠠᠢᠨ! ᠡᠪᠦᠭᠡᠨ ᠸᠠᠩ ᠠᠪᠤᠭᠠᠢ ᠶ᠋ᠢ ᠪᠣᠰᠤᠨ ᠬᠠᠷᠠᠢᠵᠤ ᠪᠥᠵᠢᠭᠯᠡᠬᠦ ᠪᠡᠷ ᠤᠷᠮᠠ ᠵᠣᠷᠢᠭ ᠣᠷᠣᠭᠤᠯᠵᠤ᠂ ᠤᠢᠳᠬᠠᠷ ᠢ᠋ ᠰᠡᠷᠭᠦᠭᠡᠬᠦ ᠰᠠᠢᠬᠠᠨ ᠪᠥᠵᠢᠭ ᠪᠥᠵᠢᠭᠯᠡᠵᠦ ᠦᠵᠡ ᠭᠡᠵᠦ ᠳᠤᠤᠭᠠᠷᠴᠠᠭᠠᠪᠠ᠃
* * *
ᠵᠤᠨ ᠤ᠋ ᠰᠡᠭᠦᠯ ᠰᠠᠷᠠ ᠶ᠋ᠢᠨ ᠠᠳᠠᠭ ᠢ᠋ᠶ᠋ᠠᠷ ᠬᠣᠰᠢᠭᠤ ᠰᠤᠷᠭᠠᠭᠤᠯᠢ ᠶ᠋ᠢᠨ ᠲᠠᠩᠬᠢᠮ᠂ ᠣᠷᠣᠨ ᠰᠠᠭᠤᠴᠠ ᠶ᠋ᠢ ᠲᠣᠭᠣᠷᠢᠨ ᠥᠨᠳᠥᠷ ᠰᠠᠢᠬᠠᠨ ᠬᠠᠰᠢᠶᠠ ᠪᠠᠷᠢᠵᠤ ᠭᠦᠢᠴᠡᠯᠡ᠃ ᠬᠣᠰᠢᠭᠤ ᠬᠡᠢᠳ ᠦ᠋ᠨ ᠬᠠᠪᠢ ᠳ᠋ᠤ᠌ ᠯᠠᠮᠠ ᠨᠠᠷ ᠤ᠋ᠨ ᠵᠠᠩᠴᠢ᠂ ᠳᠡᠪᠡᠯ᠂ ᠪᠠᠩᠵᠠᠯ ᠣᠶᠣᠵᠤ ᠠᠮᠢ ᠵᠢᠭᠤᠵᠤ ᠪᠠᠢᠭᠰᠠᠨ ᠶᠠᠳᠠᠭᠤ ᠤᠢᠯᠠᠴᠢ ᠨᠠᠷ ᠰᠤᠷᠭᠠᠭᠤᠯᠢ ᠲᠠᠢ ᠭᠡᠷᠡ ᠪᠠᠢᠭᠤᠯᠵᠤ᠂ ᠰᠤᠷᠤᠭᠴᠢᠳ ᠤ᠋ᠨ ᠣᠷᠣ ᠳᠡᠪᠢᠰᠬᠡᠷ ᠦ᠋ᠨ ᠴᠠᠭᠠᠨ ᠳᠠᠪᠤᠤ ᠬᠥᠨᠵᠢᠯᠡ᠂ ᠳᠡᠪᠡᠯ᠂ ᠳᠣᠲᠣᠭᠠᠳᠤ ᠬᠤᠪᠴᠠᠰᠤ ᠣᠶᠣᠵᠠᠭᠠᠵᠤ᠂ ᠰᠤᠷᠭᠠᠭᠤᠯᠢ ᠶ᠋ᠢᠨ ᠨᠢᠷᠪᠠ ᠪᠣᠯᠤᠭᠰᠠᠨ ᠡᠪᠦᠭᠡᠨ ᠬᠡᠭᠡᠷᠡ ᠶ᠋ᠢᠨ ᠪᠣᠷᠣ᠂ ᠪᠠᠭᠠ ᠵᠠᠯᠠᠭᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠬᠡᠢᠳ ᠲᠦ᠍ ᠬᠣᠯᠠ ᠶ᠋ᠢᠨ ᠲᠥᠷᠥᠯ ᠨᠢᠭᠡᠨ ᠯᠠᠮᠠ ᠶ᠋ᠢᠨ ᠳ᠋ᠦ᠍ ᠵᠠᠷᠤᠭᠳᠠᠬᠤ ᠵᠠᠭᠤᠷᠠ ᠲᠥᠪᠡᠳ ᠴᠠᠭᠠᠨ ᠲᠣᠯᠣᠭᠠᠢ ᠶ᠋ᠢᠨ ᠭᠤᠴᠢᠨ ᠦᠰᠦᠭ ᠴᠢᠳᠠᠨ ᠶᠠᠳᠠᠨ ᠰᠤᠷᠤᠭᠰᠠᠨ ᠢ᠋ᠶ᠋ᠠᠨ ᠬᠡᠷᠡᠭᠯᠡᠵᠦ ᠳᠠᠩᠰᠠᠨ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠮᠣᠩᠭᠣᠯ ᠦᠭᠡ ᠶ᠋ᠢ ᠮᠤᠤᠬᠠᠢ(ᠮᠠᠭᠤᠬᠠᠢ) ᠭᠡᠭᠴᠢ ᠪᠡᠷ ᠪᠢᠴᠢᠭᠰᠡᠨ ᠲᠥᠪᠡᠳ ᠦᠰᠦᠭ ᠢ᠋ᠶ᠋ᠡᠷ ᠲᠡᠮᠳᠡᠭᠯᠡᠵᠦ᠂ ᠡᠳᠦᠷ ᠪᠦᠷᠢ ᠦᠢᠯᠡᠴᠢᠨ ᠡᠮᠡᠭᠲᠡᠢᠴᠦᠳ ᠡᠴᠡ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠥᠮᠥᠳᠥ ᠴᠠᠮᠴᠠ᠂ ᠳᠡᠪᠡᠯ᠂ ᠳᠣᠲᠣᠭᠣᠵᠢ ᠬᠤᠪᠴᠠᠰᠤ ᠵᠡᠷᠭᠡ ᠶ᠋ᠢ ᠲᠡᠮᠳᠡᠭᠯᠡᠨ ᠳᠠᠩᠰᠠᠯᠠᠳᠠᠭ ᠪᠠᠢᠯᠠ᠃
ᠬᠣᠰᠢᠭᠤ ᠰᠤᠷᠭᠠᠭᠤᠯᠢ ᠶ᠋ᠢᠨ ᠵᠠᠬᠢᠷᠤᠯ ᠪᠠᠭᠰᠢ ᠨᠠᠰᠤᠨᠪᠠᠲᠤ ᠳ᠋ᠤ᠌ ᠲᠤᠰᠠᠯᠠᠷᠠ ᠬᠦᠷᠢᠶᠡᠨ ᠡᠴᠡ ᠳᠣᠲᠣᠭᠠᠳᠤ ᠶᠠᠮᠤᠨ ᠤ᠋ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠡᠯᠲᠡᠰ ᠦ᠋ᠨ ᠬᠠᠷᠢᠶᠠᠨ ᠳ᠋ᠤ᠌ ᠪᠠᠢᠭᠤᠯᠤᠭᠰᠠᠨ ᠣᠶᠤᠲᠠᠨ ᠤ᠋ ᠰᠤᠷᠭᠠᠭᠤᠯᠢ ᠲᠡᠭᠦᠰᠦᠭᠰᠡᠨ ᠲᠠᠪᠬᠠᠢ ᠭᠡᠳᠡᠭ ᠵᠠᠯᠠᠭᠤ ᠪᠠᠭᠰᠢ ᠬᠦᠷᠴᠦ ᠢᠷᠡᠭᠡᠳ᠂ ᠡᠪᠯᠡᠯ ᠦ᠋ᠨ ᠭᠡᠰᠢᠭᠦᠨ ᠲᠡᠷᠡ ᠵᠠᠯᠠᠭᠤ᠂ ᠲᠤᠰ ᠳᠣᠲᠣᠭᠠᠳᠤ ᠶᠠᠮᠤᠨ ᠤ᠋ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠡᠯᠲᠡᠰ ᠡᠴᠡ ᠬᠣᠰᠢᠭᠤ ᠰᠤᠷᠭᠠᠭᠤᠯᠢ ᠶ᠋ᠢᠨ ᠲᠠᠩᠬᠢᠮ ᠳ᠋ᠤ᠌ ᠲᠠᠯᠪᠢᠨ ᠣᠯᠭᠣᠭᠰᠠᠨ ᠴᠠᠭᠠᠨ ᠲᠣᠯᠣᠭᠠᠢ᠂ ᠣᠷᠴᠢᠯᠠᠩᠲᠤ ᠶᠢᠷᠲᠢᠨᠴᠦ ᠶ᠋ᠢᠨ ᠪᠠᠢᠳᠠᠯ᠂ ᠲᠣᠭᠠ ᠪᠣᠳᠣᠯᠭᠠ ᠶ᠋ᠢᠨ ᠪᠢᠴᠢᠭ ᠵᠡᠷᠭᠡ ᠰᠤᠷᠬᠤ ᠪᠢᠴᠢᠭ᠂ ᠪᠡᠬᠡ᠂ ᠵᠢᠭᠤᠷᠠᠭᠤᠯ᠂ ᠪᠢᠷ ᠬᠠᠷᠠᠨᠳᠠ᠂ ᠰᠠᠮᠪᠠᠷᠠ ᠳᠡᠭᠡᠷᠡ ᠪᠢᠴᠢᠬᠦ ᠴᠠᠭᠠᠨ ᠴᠠᠷᠳ᠋ ᠵᠡᠷᠭᠡ ᠶ᠋ᠢ ᠥᠷᠲᠡᠭᠡ ᠪᠡᠷ ᠲᠡᠭᠡᠭᠡᠪᠦᠷᠢᠯᠡᠨ ᠠᠪᠴᠤ ᠢᠷᠡᠪᠡ᠃
— ᠭᠠᠵᠠᠷ ᠵᠦᠢ᠂ ᠣᠷᠴᠢᠯᠠᠩᠲᠤ ᠶᠢᠷᠲᠢᠨᠴᠦ ᠶ᠋ᠢᠨ ᠪᠠᠢᠳᠠᠯ ᠢ᠋ ᠥᠭᠦᠯᠡᠭᠰᠡᠨ ᠡᠨᠡ ᠪᠢᠴᠢᠭ ᠢ᠋ ᠬᠦᠷᠢᠶᠡᠨ ᠦ᠌ ᠯᠠᠮᠠ ᠨᠠᠷ᠂ ᠲᠡᠷᠰᠬᠦᠳ ᠪᠤᠷᠤᠭᠤ ᠨᠣᠮᠲᠠᠨ ᠤ᠋ ᠦᠵᠡᠯ ᠢ᠋ ᠨᠣᠮᠯᠠᠭᠰᠠᠨ ᠲᠤᠰᠠ ᠦᠭᠡᠢ ᠵᠣᠬᠢᠶᠠᠯ᠂ ᠪᠣᠭᠳᠠᠰ ᠤ᠋ᠨ ᠨᠣᠮ ᠳ᠋ᠤ᠌ ᠣᠷᠴᠢᠯᠠᠩᠲᠤ ᠶᠢᠷᠲᠢᠨᠴᠦ᠂ ᠨᠠᠷᠠ ᠰᠠᠷᠠ ᠬᠢᠭᠡᠳ ᠭᠠᠵᠠᠷ ᠤ᠋ᠨ ᠪᠦᠲᠦᠭᠰᠡᠨ ᠪᠠᠢᠳᠠᠯ ᠢ᠋ ᠨᠣᠮᠯᠠᠭᠰᠠᠨ ᠠ᠋ᠴᠠ ᠱᠠᠯ ᠥᠮᠨᠥᠭᠡ ᠪᠡᠷ ᠲᠠᠢᠯᠪᠤᠷᠢᠯᠠᠭᠰᠠᠨ ᠲᠤᠯᠠ ᠪᠤᠷᠬᠠᠨ ᠤ᠋ ᠨᠣᠮ ᠳ᠋ᠤ᠌ ᠰᠦᠰᠦᠭ ᠠᠯᠳᠠᠭᠳᠠᠭᠤᠯᠬᠤ ᠪᠢᠴᠢᠭ ᠭᠠᠷᠴᠠᠢ ᠭᠡᠵᠦ ᠳᠤᠷᠠ ᠦᠭᠡᠢᠴᠡᠳᠡᠭ ᠶᠦᠮ ᠭᠡᠨᠡ ᠪᠢᠯᠡ ᠭᠡᠵᠦ ᠲᠠᠪᠬᠠᠢ᠂ ᠲᠡᠷᠡ ᠣᠷᠴᠢᠯᠠᠩᠲᠤ ᠶᠢᠷᠲᠢᠨᠴᠦ ᠶ᠋ᠢᠨ ᠪᠠᠢᠳᠠᠯ ᠢ᠋ ᠦᠵᠡᠭᠦᠯᠦᠭᠰᠡᠨ ᠪᠢᠴᠢᠭ ᠦ᠋ᠨ ᠲᠤᠬᠠᠢ ᠨᠠᠰᠤᠨᠪᠠᠲᠤ ᠳ᠋ᠤ᠌ ᠶᠠᠷᠢᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ)᠂ ᠬᠦᠷᠢᠶᠡᠨ ᠳ᠋ᠦ᠍ ᠨᠢᠭᠡ ᠦᠶᠡ ᠯᠠᠮᠠ ᠨᠠᠷ ᠲᠡᠷᠡ ᠳᠡᠪᠲᠡᠷ ᠢ᠋ ᠰᠤᠷᠠᠭᠯᠠᠨ ᠠᠰᠠᠭᠤᠵᠤ᠂ ᠶᠡᠬᠡᠯᠡ(ᠶᠡᠬᠡ ᠯᠡ)ᠠᠪᠳᠠᠭ ᠪᠣᠯᠤᠭᠰᠠᠨ ᠳ᠋ᠤ᠌ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠡᠯᠲᠡᠰ ᠦ᠋ᠨ ᠬᠢᠨ᠂ ᠯᠠᠮᠠ ᠨᠠᠷ ᠣᠷᠴᠢᠯᠠᠩᠲᠤ ᠶᠢᠷᠲᠢᠨᠴᠦ ᠶ᠋ᠢᠨ ᠬᠡᠷᠬᠢᠨ ᠲᠣᠭᠲᠠᠭᠰᠠᠨ ᠲᠤᠬᠠᠢ ᠣᠳᠣ ᠴᠠᠭ ᠤ᠋ᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠲᠠᠢᠯᠪᠤᠷᠢ ᠶ᠋ᠢ ᠰᠣᠨᠢᠷᠬᠠᠳᠠᠭ ᠪᠣᠯᠵᠤ ᠪᠠᠢᠭᠠ ᠪᠣᠯᠪᠠ ᠤᠤ? ᠭᠡᠵᠦ ᠨᠡᠯᠢᠶᠡᠳ ᠳᠤᠷᠠᠲᠠᠢ ᠪᠠᠢᠭᠰᠠᠨ ᠨᠢ᠂ ᠨᠢᠭᠡ ᠮᠡᠳᠡᠬᠦᠨᠡ᠂ ᠬᠠᠷᠢᠨ ᠯᠠᠮᠠ ᠨᠠᠷ ᠥᠪᠡᠷ ᠥᠪᠡᠷ ᠦ᠋ᠨ ᠪᠠᠭᠰᠢ ᠨᠠᠷ ᠤ᠋ᠨ ᠵᠠᠬᠢᠶᠠ ᠳᠠᠭᠠᠵᠤ ᠲᠡᠷᠡ ᠨᠣᠮ ᠬᠤᠳᠠᠯᠳᠤᠵᠤ ᠠᠪᠤᠭᠠᠳ᠂ ᠣᠯᠠᠨ ᠳ᠋ᠤ᠌ ᠳᠡᠯᠭᠡᠷᠡᠭᠦᠯᠬᠦ ᠦᠭᠡᠢ ᠭᠡᠵᠦ ᠰᠢᠲᠠᠭᠠᠵᠤ ᠪᠠᠢᠭᠰᠠᠨ ᠶᠤᠮ ᠪᠠᠢᠵᠠᠢ *᠃
ᠡᠨᠳᠡ ᠮᠥᠨ ᠲᠡᠢᠮᠦ ᠬᠡᠷᠡᠭ ᠭᠠᠷᠴᠤ ᠪᠣᠯᠵᠣᠰᠢ ᠦᠭᠡᠢ ᠳ᠋ᠦ᠍ ᠡᠷᠬᠡᠪᠰᠢ ᠪᠣᠯᠭᠣᠮᠵᠢᠯᠠᠨ᠂ ᠰᠦᠢᠳᠬᠡᠨ ᠰᠢᠲᠠᠭᠠᠬᠤ ᠳ᠋ᠤ᠌ ᠦᠯᠦ ᠬᠦᠷᠦᠭᠦᠯᠦᠮᠦ ᠭᠡᠵᠦ ᠠᠮᠠ ᠪᠠᠷ ᠲᠠᠨ ᠳ᠋ᠤ᠌ ᠵᠠᠬᠢᠭᠰᠠᠨ ᠢ᠋ ᠤᠯᠠᠮᠵᠢᠯᠠᠶᠠ ᠭᠡᠵᠡᠢ᠃
ᠲᠠᠪᠬᠠᠢ ᠪᠠᠭᠰᠢ ᠪᠠᠰᠠ ᠨᠠᠰᠤᠨᠪᠠᠲᠤ ᠶ᠋ᠢᠨ ᠬᠦᠦ ᠥᠯᠵᠡᠢᠪᠠᠲᠤ᠂ ᠥᠬᠢᠨ ᠴᠡᠴᠡᠭ ᠡᠴᠡ ᠵᠠᠬᠢᠶᠠ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠨᠢ᠂ ᠬᠦᠦ ᠴᠡᠷᠢᠭ ᠦ᠋ᠨ ᠠᠯᠪᠠ ᠬᠠᠭᠠᠵᠤ᠂ ᠶᠡᠬᠡ ᠫᠤᠤ ᠶ᠋ᠢᠨ ᠠᠩᠭᠢ ᠳ᠋ᠤ᠌ ᠠᠵᠤ᠂ ᠥᠬᠢᠨ ᠡᠮᠨᠡᠯᠭᠡ ᠶ᠋ᠢᠨ ᠰᠤᠪᠢᠯᠠᠭᠴᠢ ᠶ᠋ᠢᠨ ᠲᠦᠷ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠰᠤᠷᠤᠯᠴᠠᠵᠤ ᠪᠠᠢᠭᠰᠠᠨ ᠡᠭᠦᠨ ᠳ᠋ᠦ᠍᠂ ᠡᠬᠡ ᠵᠠᠩ ᠱᠢ ᠬᠥᠪᠡᠭᠦᠨ ᠥᠬᠢᠨ ᠬᠣᠶᠠᠷ ᠢ᠋ ᠶᠡᠬᠡᠯᠡ( ᠶᠡᠬᠡ ᠯᠡ) ᠮᠥᠷᠥᠭᠡᠳᠴᠦ ᠪᠠᠢᠭᠰᠠᠨ ᠲᠤᠯᠠ ᠵᠠᠬᠢᠶᠠ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠳ᠋ᠦ᠍ ᠮᠠᠰᠢᠳᠠ ᠪᠠᠶᠠᠷᠯᠠᠵᠤ᠂ ᠲᠠᠪᠠᠬᠠᠢ ᠶ᠋ᠢ ᠥᠪᠡᠷ ᠦ᠋ᠨ ᠬᠥᠪᠡᠭᠦᠨ ᠦ᠌ ᠠᠳᠠᠯᠢ ᠳᠣᠲᠣᠨᠣ ᠦᠵᠡᠪᠡ᠃
ᠵᠠᠯᠠᠭᠤ ᠪᠠᠭᠰᠢ ᠲᠡᠷᠡ ᠵᠠᠬᠢᠷᠤᠯ ᠪᠠᠭᠰᠢ ᠨᠠᠰᠤᠨᠪᠠᠲᠤ ᠶ᠋ᠢᠨ ᠪᠢᠴᠢᠭ ᠤᠳᠬᠠ ᠳ᠋ᠤ᠌ ᠨᠡᠪᠲᠡᠷᠬᠡᠢ ᠶ᠋ᠢ ᠶᠡᠬᠡᠯᠡ( ᠶᠡᠬᠡ ᠯᠡ) ᠪᠢᠰᠢᠷᠡᠨ ᠭᠠᠢᠬᠠᠵᠤ᠂ ᠢᠯᠠᠩᠭᠤᠶᠠ ᠨᠠᠰᠤᠨᠪᠠᠲᠤ ᠶ᠋ᠢᠨ ᠨᠣᠮ ᠤ᠋ᠨ ᠰᠠᠩ ᠢ᠋ ᠮᠠᠰᠢ ᠰᠣᠨᠢᠷᠬᠠᠯᠠ᠃ ᠲᠡᠷᠡ ᠨᠣᠮ ᠤ᠋ᠨ ᠰᠠᠩ ᠳ᠋ᠤ᠌ ᠭᠠᠵᠠᠷ ᠤ᠋ᠨ ᠵᠦᠢ᠂ ᠲᠦᠮᠡᠨ ᠪᠣᠳᠠᠰ ᠤ᠋ᠨ ᠲᠡᠦᠬᠡ᠂ ᠪᠣᠳᠠᠰ ᠤ᠋ᠨ ᠵᠦᠢ᠂ ᠲᠣᠭᠠᠨ ᠤ᠋ ᠤᠬᠠᠭᠠᠨ ᠤ᠋ ᠪᠢᠴᠢᠭ᠂ ᠵᠢᠴᠢ ᠤᠬᠠᠭᠠᠨ ᠪᠦᠭᠦᠳᠡ ᠶ᠋ᠢ ᠪᠦᠷᠢᠳᠬᠡᠭᠰᠡᠨ ᠼᠢ ᠶᠤᠸᠠᠨ ᠭᠡᠳᠡᠭ ᠨᠡᠪᠲᠡᠷᠬᠡᠢ ᠲᠣᠯᠢ ᠪᠢᠴᠢᠭ᠂ ᠠᠮᠢᠲᠠᠨ ᠤᠷᠭᠤᠮᠠᠯ ᠤ᠋ᠨ ᠲᠤᠬᠠᠢ ᠲᠣᠯᠢ ᠪᠢᠴᠢᠭ᠂ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠶᠡᠬᠡ ᠪᠢᠴᠢᠭ ᠦ᠋ᠨ ᠬᠥᠮᠦᠨ ᠯᠦ᠍ ᠰᠢᠶᠦ᠋ᠨ ᠦ᠌ ᠵᠣᠬᠢᠶᠠᠯ ᠢ᠋ ᠠᠯᠲᠠᠨ ᠦᠰᠦᠭ ᠳᠠᠷᠤᠮᠠᠯ᠂ ᠮᠠᠰᠢ ᠭᠣᠶᠣᠮᠰᠣᠭ ᠰᠠᠢᠬᠠᠨ ᠬᠠᠪᠲᠠᠰᠤᠲᠠᠢ ᠶ᠋ᠢ ᠦᠵᠡᠭᠡᠳ ᠪᠠᠰᠠ ᠲᠠᠪᠠᠬᠠᠢ ᠶ᠋ᠢᠨ ᠤᠷᠢᠳᠤ ᠡᠮᠦᠨᠡ ᠨᠡᠷᠡ ᠰᠣᠨᠣᠰᠤᠭᠠ ᠦᠭᠡᠢ ᠲᠤᠯᠰᠲ᠋ᠤᠢ᠂ ᠢᠪᠰᠧᠨᠢ ᠵᠡᠷᠭᠡ ᠥᠷᠥᠨᠡ ᠵᠦᠭ ᠦ᠋ᠨ ᠵᠣᠬᠢᠶᠠᠯᠴᠢ ᠨᠠᠷ ᠤ᠋ᠨ ᠵᠣᠬᠢᠶᠠᠯ ᠵᠡᠷᠭᠡ ᠶ᠋ᠢ ᠨᠠᠩᠭᠢᠶᠠᠳ ᠬᠢᠲᠠᠳ ᠬᠡᠯᠡ ᠪᠡᠷ ᠣᠷᠴᠢᠭᠤᠯᠤᠭᠰᠠᠨ ᠣᠯᠠᠨ ᠳᠡᠪᠲᠡᠷ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ᠂
— ᠨᠠ᠊ ᠪᠠᠭᠰᠢ ᠲᠠᠨ ᠤ᠋ ᠡᠨᠡ ᠣᠯᠠᠨ ᠰᠠᠢᠬᠠᠨ ᠪᠢᠴᠢᠭ ᠬᠠᠷᠠ ᠨᠣᠮ ᠳᠡᠪᠲᠡᠷ ᠢ᠋ ᠦᠵᠡᠭᠡᠳ ᠮᠢᠨᠦ ᠬᠣᠷᠣᠬᠠᠢ ᠬᠦᠷᠴᠦ ᠪᠠᠢᠨᠠ᠃ ᠬᠢᠲᠠᠳ ᠬᠡᠯᠡ ᠪᠡᠷ ᠶᠠᠭᠤ ᠰᠣᠨᠢᠷᠬᠠᠵᠤ ᠦᠵᠡᠶᠡ ᠭᠡᠪᠡᠯ ᠪᠦᠭᠦᠳᠡ ᠶ᠋ᠢ ᠦᠵᠡᠵᠦ ᠴᠢᠳᠠᠬᠤ ᠲᠠ ᠶᠡᠷᠦ ᠶᠠᠮᠠᠷ ᠰᠠᠢᠬᠠᠨ ᠬᠤᠪᠢ ᠵᠠᠶᠠᠭᠠᠲᠠᠢ ᠬᠥᠮᠦᠨ ᠪᠢᠯᠡ? ᠪᠢ ᠭᠠᠭᠴᠠ ᠮᠣᠩᠭᠣᠯ ᠲᠠᠢ ᠲᠤᠯᠠ ᠲᠠᠨ ᠤ᠋ ᠠᠳᠠᠯᠢ ᠲᠡᠢᠮᠦ ᠰᠠᠢᠬᠠᠨ ᠨᠥᠬᠥᠴᠡᠯ ᠢ᠋ ᠬᠦᠰᠡᠪᠡᠴᠦ ᠲᠦᠮᠡ ᠳ᠋ᠦ᠍ ᠨᠢᠭᠡ ᠤᠳᠠᠭᠠ ᠣᠯᠳᠠᠬᠤ ᠦᠭᠡᠢ᠂ ᠶᠠᠭᠤᠲᠠᠢ ᠬᠠᠷᠠᠮᠰᠠᠯᠲᠠᠢ᠃ ᠮᠢᠨᠦ ᠪᠡᠶᠡ ᠨᠢᠭᠡᠨ ᠵᠢᠯ ᠦ᠋ᠨ ᠬᠤᠭᠤᠴᠠᠭᠠ ᠪᠦᠬᠦᠢ ᠣᠶᠤᠲᠠᠨ ᠤ᠋ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠰᠤᠷᠤᠯᠴᠠᠭᠠᠳ᠂ ᠪᠠᠭᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠪᠠᠭᠰᠢ ᠪᠣᠯᠬᠤ ᠨᠥᠬᠥᠴᠡᠯ ᠪᠦᠷᠢᠳᠴᠦ ᠪᠠᠰᠠ ᠰᠤᠷᠤᠯᠭᠠ ᠠᠰᠠᠭᠤᠯᠭᠠ ᠪᠠᠨ ᠨᠡᠮᠡᠭᠳᠡᠭᠦᠯᠬᠦ ᠬᠦᠰᠡᠯ ᠴᠡᠭᠡᠵᠢᠨ ᠳ᠋ᠦ᠍ ᠲᠥᠷᠥᠵᠡᠢ᠃ ᠭᠠᠭᠴᠠ ᠬᠦ᠌ ᠮᠢᠨᠦ ᠦᠵᠡᠬᠦ ᠳ᠋ᠦ᠍᠂ ᠮᠠᠨ ᠤ᠋ ᠮᠣᠩᠭᠣᠯ ᠤ᠋ᠨ ᠬᠠᠭᠤᠴᠢᠨ ᠤᠳᠬᠠ ᠵᠣᠬᠢᠶᠠᠯ ᠬᠡᠳᠦᠢ ᠮᠠᠰᠢ ᠠᠷᠪᠢᠨ ᠪᠣᠯᠪᠠᠴᠤ᠂ ᠮᠢᠨᠦ ᠬᠦᠰᠡᠯ ᠡᠷᠢᠯ ᠢ᠋ ᠬᠠᠷᠢᠭᠤᠯᠤᠨ ᠬᠠᠩᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠠᠵᠢ᠃ ᠪᠣᠯᠣᠷ ᠲᠣᠯᠢ ᠭᠡᠳᠡᠭ ᠪᠢᠴᠢᠭ ᠲᠦ᠍ ᠤᠮᠠᠷᠠ ᠳᠣᠷᠣᠨᠠ ᠶ᠋ᠢᠨ ᠵᠦᠭ ᠨᠣᠬᠠᠢ ᠡᠷᠡᠲᠡᠨ ᠪᠠᠢᠳᠠᠭ᠂ ᠮᠥᠨ ᠮᠠᠨ ᠦ᠌ ᠡᠨᠡ ᠽᠠᠮᠪᠤᠲᠢᠢᠪ ᠲᠤ᠌ ᠰᠦᠮᠪᠦᠷ ᠠᠭᠤᠯᠠ ᠭᠡᠵᠦ ᠶᠡᠬᠡ ᠠᠭᠤᠯᠠ ᠪᠠᠢᠳᠠᠭ᠃ ᠲᠡᠭᠦᠨ ᠢ᠋ ᠡᠷᠭᠢᠨ ᠲᠣᠭᠣᠷᠢᠨ ᠨᠠᠷᠠ ᠰᠠᠷᠠ ᠣᠷᠴᠢᠳᠠᠭ ᠭᠡᠬᠦ ᠵᠡᠷᠭᠡ ᠶ᠋ᠢᠨ ᠦᠯᠢᠭᠡᠷ ᠢ᠋ ᠪᠢ ᠣᠳᠣ ᠬᠡᠳᠦᠢᠨ ᠢᠲᠡᠭᠡᠬᠦ ᠦᠭᠡᠢ ᠪᠣᠯᠵᠠᠢ᠃ ᠨᠠᠰᠤᠨ ᠠ᠋ᠴᠠ ᠨᠥᠭᠴᠢᠭᠡᠳ ᠡᠷᠯᠢᠭ ᠲᠠᠮᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠣᠴᠢᠵᠤ᠂ ᠲᠡᠨᠳᠡᠬᠢ ᠶ᠋ᠢᠨ ᠡᠯᠳᠡᠪ ᠪᠠᠢᠳᠠᠯ ᠢ᠋ ᠦᠵᠡᠵᠦ᠂ ᠳᠠᠬᠢᠨ ᠡᠷᠭᠢᠵᠦ ᠢᠷᠡᠭᠰᠡᠨ ᠴᠣᠢᠵᠢᠳ ᠳᠠᠭᠢᠨᠢ ᠶ᠋ᠢᠨ ᠲᠣᠭᠣᠵᠢ ᠶ᠋ᠢ ᠤᠩᠰᠢᠬᠤ ᠳ᠋ᠠᠭᠠᠨ ( ᠳ᠋ᠤ᠌ ᠪᠠᠨ ) ᠪᠢ ᠣᠶᠤᠲᠠᠨ ᠤ᠋ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠪᠠᠢᠬᠤ ᠦᠶᠡᠰ᠂ ᠡᠷᠳᠡᠮᠲᠡᠨ ᠪᠠᠭᠰᠢ ᠨᠠᠷ ᠠ᠋ᠴᠠ ᠬᠥᠮᠦᠨ ᠦ᠌ ᠦᠬᠦᠳᠬᠢᠨ ᠤᠨᠠᠵᠤ᠂ ᠠᠮᠢᠰᠬᠤᠯ ᠲᠠᠰᠤᠷᠠᠭᠰᠠᠨ ᠠᠳᠠᠯᠢ ᠪᠣᠯᠳᠠᠭ ᠲᠡᠢᠮᠦ ᠡᠪᠡᠳᠴᠢᠨ ᠪᠣᠢ᠃ ᠲᠡᠷᠡ ᠡᠪᠡᠳᠴᠢᠨ ᠢ᠋ᠶ᠋ᠡᠷ ᠡᠪᠡᠳᠦᠭᠰᠡᠨ ᠬᠥᠮᠦᠨ ᠢ᠋ ᠦᠬᠦᠭᠡᠳ ᠰᠡᠬᠡᠭᠰᠡᠨ ᠭᠡᠵᠦ ᠤᠴᠢᠷ ᠢ᠋ ᠦᠯᠦ ᠮᠡᠳᠡᠬᠦ ᠬᠥᠮᠦᠨ ᠤᠷᠢᠳᠤ ᠬᠡᠯᠡᠯᠴᠡᠳᠡᠭ ᠪᠠᠢᠭᠰᠠᠨ ᠭᠡᠵᠦ ᠰᠣᠨᠣᠰᠤᠭᠰᠠᠨ ᠲᠤᠯᠠ ᠴᠣᠢᠵᠢᠳ ᠳᠠᠭᠢᠨᠢ ᠶ᠋ᠢᠨ ᠲᠣᠭᠣᠵᠢ ᠶ᠋ᠢ ᠤᠷᠢᠳᠤ ᠶ᠋ᠢᠨ ᠬᠥᠮᠦᠨ ᠦ᠌ ᠳᠡᠮᠡᠢ ᠰᠠᠨᠠᠭᠠ ᠪᠠᠷ ᠵᠣᠬᠢᠶᠠᠭᠴᠢᠳ᠂ ᠡᠷᠯᠢᠭ ᠲᠠᠮᠤ ᠶ᠋ᠢᠨ ᠣᠷᠣᠨ ᠤ᠋ ᠪᠠᠢᠳᠠᠯ ᠡᠢᠮᠦ ᠲᠡᠢᠮᠦ ᠭᠡᠵᠦ ᠪᠢᠴᠢᠭᠰᠡᠨ ᠤᠢᠳᠬᠠᠷ ᠰᠡᠷᠭᠦᠭᠡᠨ ᠤᠩᠰᠢᠬᠤ ᠵᠣᠬᠢᠶᠠᠯ ᠭᠡᠵᠦ ᠦᠵᠡᠬᠦ ᠡᠴᠡ ᠪᠢᠰᠢ ᠢᠲᠡᠭᠡᠬᠦ ᠦᠭᠡᠢ ᠪᠢᠯᠡ᠃ ᠲᠠᠨ ᠤ᠋ ᠡᠨᠡ ᠨᠣᠮ ᠤ᠋ᠨ ᠰᠠᠩ ᠳ᠋ᠤ᠌ ᠪᠠᠢᠭᠠ ᠡᠨᠡ ᠣᠯᠠᠨ ᠰᠠᠢᠬᠠᠨ ᠨᠣᠮ ᠳᠡᠪᠲᠡᠷ ᠪᠢᠴᠢᠭ ᠬᠠᠷᠠ ᠶ᠋ᠢ ᠦᠵᠡᠭᠡᠳ᠂ ᠶᠠᠭᠤᠲᠠᠢ ᠡᠷᠳᠡᠮᠲᠡᠢ᠂ ᠠᠯᠢ ᠳᠤᠷᠠᠲᠠᠢ ᠨᠣᠮ ᠢ᠋ᠶ᠋ᠠᠨ ᠳᠡᠯᠭᠡᠨ ᠦᠵᠡᠬᠦ ᠶᠠᠭᠤᠲᠠᠢ ᠰᠠᠢᠬᠠᠨ ᠵᠣᠯ ᠵᠠᠪᠰᠢᠶᠠᠨ ᠪᠦᠷᠢᠳᠦᠭᠰᠡᠨ ᠬᠥᠮᠦᠨ ᠪᠢᠯᠡ! ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ )ᠨᠠᠰᠤᠨᠪᠠᠲᠤ ᠥᠴᠢᠷᠦᠨ᠂
— ᠠᠶᠠ᠂ ᠨᠠᠮᠠᠶ᠋ᠢ( ᠨᠠᠮᠠ ᠶ᠋ᠢ) ᠡᠷᠳᠡᠮᠲᠡᠢ ᠭᠡᠪᠡᠯ᠂ ᠬᠣᠯᠠ ᠬᠡᠪᠲᠡᠵᠦ ᠪᠠᠢᠨᠠ᠂ ᠪᠢ ᠳᠣᠲᠣᠷᠠ ᠭᠠᠵᠠᠷ ᠣᠯᠠᠨ ᠵᠢᠯ ᠰᠠᠭᠤᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ)᠂ ᠠᠶᠠᠭᠠ ᠬᠣᠭᠣᠯᠠ ᠣᠯᠵᠤ ᠢᠳᠡᠬᠦ ᠭᠡᠵᠦ ᠠᠵᠢᠯ ᠬᠢᠬᠦ ᠶ᠋ᠢᠨ ᠵᠠᠪᠰᠠᠷ ᠵᠠᠪ ᠲᠠᠭᠠᠨ( ᠳ᠋ᠤ᠌ ᠪᠠᠨ) ᠦᠰᠦᠭ ᠵᠢᠭᠠᠯᠭᠠᠭᠰᠠᠭᠠᠷ᠂ ᠪᠠᠭᠠ ᠵᠡᠷᠭᠡ ᠰᠤᠷᠤᠭᠰᠠᠨ ᠪᠣᠯᠪᠠᠴᠤ ᠴᠣᠬᠣᠮ ᠬᠦ᠌ ᠵᠢᠩᠬᠢᠨᠢ ᠰᠤᠷᠭᠠᠭᠤᠯᠢ ᠬᠢᠭᠰᠡᠨ ᠦᠭᠡᠢ ᠲᠤᠯᠠ ᠣᠳᠣ ᠬᠦᠷᠲᠡᠯᠡ ᠥᠪᠡᠷ ᠦ᠋ᠨ ᠪᠣᠯᠪᠠᠰᠤᠷᠠᠯ ᠢ᠋ ᠵᠤᠵᠠᠭᠠᠳᠬᠠᠬᠤ ᠭᠡᠵᠦ ᠪᠢᠴᠢᠭ ᠦᠵᠡᠭᠰᠡᠭᠡᠷ ᠪᠢᠯᠡ᠃
ᠡᠳᠡᠭᠡᠷ ᠪᠢᠴᠢᠭ ᠬᠠᠷᠠ ᠶ᠋ᠢᠨ ᠶᠡᠬᠡ ᠲᠥᠯᠥᠪ ᠢ᠋ ᠪᠢ ᠰᠡᠭᠦᠯ ᠦ᠋ᠨ ᠬᠣᠶᠠᠷ ᠵᠢᠯ ᠦ᠋ᠨ ᠳᠣᠲᠣᠷᠠ ᠵᠠᠬᠢᠵᠤ ᠢᠷᠡᠭᠦᠯᠦᠭᠰᠡᠨ ᠨᠢ ᠳᠠᠷᠤᠢ ᠮᠢᠨᠦ ᠬᠠᠮᠤᠭ ᠬᠥᠷᠥᠩᠭᠡ ᠡᠨᠡ ᠪᠣᠯᠵᠠᠢ᠃ ᠣᠳᠣᠬᠠᠨ ᠦᠶᠡᠰ᠂ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠦᠰᠦᠭ ᠢ᠋ᠶ᠋ᠡᠷ ᠭᠠᠷᠴᠤ ᠪᠠᠢᠭᠠ ᠪᠢᠴᠢᠭ ᠳᠡᠪᠲᠡᠷ ᠦ᠋ᠨ ᠲᠣᠭᠠ᠂ ᠮᠣᠩᠭᠣᠯ ᠦᠰᠦᠭ ᠢ᠋ᠶ᠋ᠡᠷ ᠭᠠᠷᠴᠤ ᠪᠠᠢᠭᠠ ᠲᠠᠢ ᠠᠳᠠᠯᠢ ᠦᠭᠡᠢ᠂ ᠮᠠᠰᠢ ᠠᠷᠪᠢᠨ ᠭᠡᠵᠦ ᠲᠠᠨ ᠤ᠋ ᠬᠡᠯᠡᠭᠰᠡᠨ ᠠᠷᠭᠠ ᠦᠭᠡᠢ ᠦᠨᠡᠨ᠃ ᠮᠠᠨ ᠤ᠋ ᠤᠯᠤᠰ ᠲᠤ᠌ ᠡᠨᠡᠬᠡᠨ ᠵᠠᠪᠰᠠᠷ᠂ ᠣᠷᠴᠢᠨ ᠦᠶᠡ ᠶ᠋ᠢᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠪᠢᠴᠢᠭ ᠵᠣᠬᠢᠶᠠᠯ ᠭᠡᠪᠡᠯ᠂ ᠭᠠᠭᠴᠠ ᠬᠦ᠌ ᠪᠠᠭᠠ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠦᠵᠡᠬᠦ ᠬᠡᠳᠦᠬᠡᠨ ᠳᠡᠪᠲᠡᠷ ᠦ᠋ᠨ ᠲᠡᠳᠦᠢᠬᠡᠨ ᠪᠥᠭᠡᠳ ᠪᠠᠭᠠ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠦᠵᠡᠬᠦ ᠪᠢᠴᠢᠭ ᠪᠠᠰᠠ ᠪᠦᠷᠢᠨ ᠭᠦᠢᠴᠡᠳ ᠭᠠᠷᠤᠭᠠᠳᠤᠢ᠃ ᠶᠠᠪᠤᠨ ᠶᠠᠪᠤᠭᠰᠠᠭᠠᠷ ᠬᠣᠵᠢᠮ ᠪᠠᠰᠠ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠦᠵᠡᠬᠦ ᠪᠢᠴᠢᠭ᠂ ᠮᠥᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠵᠦᠢᠯ ᠢ᠋ ᠤᠬᠠᠬᠤ ᠳ᠋ᠤ᠌ ᠬᠢᠯᠪᠠᠷ ᠪᠣᠯᠭᠠᠭᠰᠠᠨ ᠪᠢᠴᠢᠭ ᠵᠣᠬᠢᠶᠠᠯ ᠪᠣᠢ ᠪᠣᠯᠤᠭᠰᠠᠭᠠᠷ᠂ ᠡᠳᠦᠭᠡ ᠲᠠ ᠪᠢᠳᠡ ᠬᠣᠶᠠᠷ ᠤ᠋ᠨ ᠠ ᠭᠡᠵᠦ ᠨᠣᠮ ᠤ᠋ᠨ ᠦᠰᠦᠭ ᠵᠢᠭᠠᠬᠤ ᠭᠡᠵᠦ ᠪᠠᠢᠭᠠ ᠪᠠᠭᠠᠴᠤᠳ ᠤ᠋ᠨ ᠳᠤᠮᠳᠠ ᠠ᠋ᠴᠠ ᠥᠨᠳᠥᠷ ᠵᠡᠷᠭᠡ ᠶ᠋ᠢᠨ ᠰᠤᠷᠭᠠᠭᠤᠯᠢ ᠲᠡᠭᠦᠰᠬᠡᠭᠡᠳ ᠮᠣᠩᠭᠣᠯ ᠤ᠋ᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠢ᠋ ᠪᠠᠳᠠᠷᠠᠭᠤᠯᠤᠨ ᠵᠢᠳᠬᠦᠬᠦ ᠴᠠᠭ᠂ ᠬᠡᠳᠦᠨ ᠠᠷᠪᠠᠨ ᠵᠢᠯ ᠦ᠋ᠨ ᠲᠡᠷᠲᠡᠭᠡ ᠡᠴᠡ ᠢᠷᠡᠬᠦ ᠪᠣᠢ᠃ ᠴᠠᠭᠠᠨ ᠬᠠᠭᠠᠨ᠂ ᠡᠵᠡᠷᠬᠡᠭ ᠬᠥᠷᠥᠩᠭᠡᠲᠡᠨ ᠦ᠌ ᠬᠠᠷᠭᠢᠰ ᠵᠠᠰᠠᠭ ᠢ᠋ ᠲᠦᠯᠬᠢᠨ ᠤᠨᠠᠭᠠᠭᠰᠠᠨ ᠣᠷᠣᠰ ᠤᠯᠤᠰ ᠤ᠋ᠨ ᠠᠵᠢᠯᠴᠢᠨ ᠲᠠᠷᠢᠶᠠᠴᠢᠨ ᠠᠷᠠᠳ᠂ ᠪᠢᠳᠡᠨ ᠳ᠋ᠦ᠍ ᠲᠤᠰᠠᠯᠠᠭᠰᠠᠨ ᠢ᠋ᠶ᠋ᠠᠷ ᠮᠠᠨ ᠤ᠋ ᠤᠯᠤᠰ ᠲᠤ᠌ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯ ᠮᠠᠨᠳᠤᠨ ᠢᠯᠠᠵᠠᠢ᠃ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠬᠤ ᠳ᠋ᠤ᠌ ᠂ ᠬᠥᠷᠥᠩᠭᠡᠲᠡᠨ ᠦ᠌ ᠶᠣᠰᠣᠨ ᠤ᠋ ᠲᠠᠯᠬᠢᠨ ᠠ᠋ᠴᠠ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠠᠩᠭᠢᠵᠢᠷᠠᠭᠠᠳ᠂ ᠪᠤᠰᠤᠳ ᠲᠦᠮᠡᠨ ᠤᠯᠤᠰ ᠲᠤ᠌ ᠠᠩᠭᠢᠵᠢᠷᠠᠵᠤ ᠡᠷᠬᠡ ᠴᠢᠯᠥᠭᠡ ᠪᠡᠨ ᠣᠯᠬᠤ ᠵᠠᠮ ᠢ᠋ ᠭᠡᠢᠭᠦᠯᠦᠨ ᠵᠢᠭᠠᠵᠤ ᠥᠭᠭᠦᠭᠰᠡᠨ ᠣᠷᠣᠰ ᠤᠯᠤᠰ᠂ ᠳᠡᠯᠡᠬᠡᠢ ᠳ᠋ᠠᠬᠢᠨᠠ ᠲᠡᠷᠢᠭᠦᠨ ᠵᠡᠷᠭᠡ ᠶ᠋ᠢᠨ ᠪᠣᠯᠪᠠᠰᠤᠨ ᠳᠠᠪᠰᠢᠯᠲᠠ ᠰᠣᠶᠣᠯ ᠤᠬᠠᠭᠠᠨ ᠢ᠋ ᠥᠷᠨᠢᠭᠦᠯᠦᠨ ᠮᠠᠨᠳᠤᠭᠤᠯᠵᠤ ᠪᠠᠢᠭᠠ ᠲᠤᠯᠠ ᠣᠷᠣᠰ ᠬᠡᠯᠡ ᠪᠣᠯ ᠮᠠᠨ ᠤ᠋ ᠮᠣᠩᠭᠣᠯ ᠤ᠋ᠨ ᠵᠡᠷᠭᠡ ᠡᠷᠬᠡ ᠴᠢᠯᠥᠭᠡ ᠪᠡᠨ ᠣᠯᠤᠭᠰᠠᠨ ᠪᠤᠶᠤ ᠡᠨᠡ ᠬᠢᠷᠢ ᠬᠠᠷᠠᠬᠠᠨ ᠡᠷᠬᠡ ᠴᠢᠯᠥᠭᠡ ᠪᠡᠨ ᠣᠯᠤᠭᠠ ᠦᠭᠡᠢ ᠲᠡᠮᠡᠴᠡᠨ ᠪᠠᠢᠭᠠ ᠣᠯᠠᠨ ᠤᠯᠤᠰ ᠲᠤ᠌ ᠳᠠᠷᠤᠢ ᠲᠡᠷᠢᠭᠦᠨ ᠵᠡᠷᠭᠡ ᠶ᠋ᠢᠨ ᠳᠠᠪᠰᠢᠯᠳᠤ ᠰᠣᠶᠣᠯ ᠤ᠋ᠨ ᠡᠷᠬᠢᠮ ᠬᠡᠯᠡ ᠪᠣᠯᠬᠤ ᠶᠣᠰᠣᠲᠠᠢ᠃ ᠰᠣᠨᠣᠰᠪᠠᠯ᠂ ᠶᠡᠬᠡ ᠪᠠᠭᠰᠢ ᠯᠧᠨᠢᠨ ᠦ᠌ ᠵᠣᠬᠢᠶᠠᠯ ᠣᠷᠣᠰ ᠭᠠᠵᠠᠷ ᠬᠡᠪᠯᠡᠭᠳᠡᠨ᠂ ᠬᠣᠷᠢ ᠰᠢᠬᠠᠮ ᠪᠣᠳᠢ ᠪᠣᠯᠵᠤ ᠭᠠᠷᠬᠤ ᠰᠤᠷᠠᠭ ᠪᠣᠢ᠃ ᠪᠢ ᠡᠨᠡ ᠬᠢᠷᠢ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠦᠭᠡ ᠪᠡᠷ ᠣᠷᠴᠢᠭᠤᠯᠤᠭᠰᠠᠨ ᠬᠣᠰᠢᠶᠠᠳ ᠭᠤᠷᠪᠠᠭᠠᠳ ᠪᠢᠴᠢᠬᠠᠨ ᠥᠭᠦᠯᠡᠯᠭᠡ ᠶ᠋ᠢᠨ ᠲᠡᠳᠦᠢ ᠶ᠋ᠢ ᠠᠷᠠᠢ ᠭᠡᠵᠦ ᠣᠯᠵᠤ ᠠᠪᠤᠯᠠ᠃ ᠪᠠᠰᠠ᠂ ᠡᠨᠡ ᠬᠢᠷᠢ ᠬᠠᠷᠠᠬᠠᠨ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠦᠰᠦᠭ ᠢ᠋ᠶ᠋ᠡᠷ ᠣᠷᠴᠢᠭᠤᠯᠤᠭᠳᠠᠬᠤ ᠺᠠᠷᠯ ᠮᠠᠷᠺᠰ ᠤ᠋ᠨ ᠺᠠᠫᠢᠲ᠋ᠠᠯ ᠬᠥᠷᠥᠩᠭᠡ ᠭᠡᠳᠡᠭ ᠶᠡᠬᠡ ᠵᠣᠬᠢᠶᠠᠯ ᠪᠠᠢᠳᠠᠭ ᠢ᠋ ᠣᠯᠵᠤ ᠰᠣᠨᠣᠰᠤᠭᠰᠠᠨ᠃ ᠣᠷᠣᠰ ᠬᠡᠯᠡᠨ ᠳ᠋ᠦ᠍ ᠲᠡᠷᠡ ᠵᠣᠬᠢᠶᠠᠯ ᠢ᠋ ᠬᠡᠳᠦᠢᠨ ᠣᠷᠴᠢᠭᠤᠯᠵᠠᠢ᠃ ᠬᠡᠷᠪᠡ ᠪᠢ ᠣᠷᠣᠰ ᠬᠡᠯᠡ ᠪᠢᠴᠢᠭ ᠮᠡᠳᠡᠳᠡᠭ ᠪᠣᠯᠪᠠᠯ᠂ ᠶᠠᠭᠤᠲᠠᠢ ᠶᠡᠬᠡ ᠰᠠᠢᠬᠠᠨ ᠶᠠᠭᠤᠮᠠ ᠦᠵᠡᠬᠦ ᠪᠢᠯᠡ᠃ ᠦᠭᠡᠢ᠂ ᠲᠠ ᠵᠠᠪᠠᠯ ᠣᠷᠣᠰ ᠬᠡᠯᠡ ᠰᠤᠷᠤᠯᠴᠠ᠃ ᠲᠠᠨ ᠤ᠋ ᠨᠠᠰᠤ ᠵᠠᠯᠠᠭᠤ ᠨᠠᠷᠠ ᠡᠷᠲᠡ᠂ ᠡᠷᠬᠡᠪᠰᠢ ᠣᠷᠣᠰ ᠬᠡᠯᠡ ᠰᠤᠷᠴᠤ᠂ ᠣᠷᠣᠰ ᠤᠯᠤᠰ ᠲᠤ᠌ ᠶᠠᠪᠤᠵᠤ ᠰᠤᠷᠭᠠᠭᠤᠯᠢ ᠬᠢᠪᠡᠯ ᠦᠨᠡᠬᠡᠷ ᠪᠠᠬᠠᠲᠠᠢ ᠪᠢᠯᠡ ᠭᠡᠲᠡᠯᠡ᠂
— ᠲᠠ ᠥᠪᠡᠷ ᠢ᠋ᠶ᠋ᠡᠨ ᠣᠷᠣᠰ ᠤᠯᠤᠰ ᠲᠤ᠌ ᠰᠤᠷᠭᠠᠭᠤᠯᠢ ᠬᠢᠬᠦ ᠪᠡᠷ ᠶᠠᠪᠤᠪᠠᠯ᠂ ᠪᠠᠰᠠ ᠪᠣᠯᠬᠤ ᠶᠤᠮ ᠪᠢᠰᠢ ᠤᠤ? ᠭᠡᠬᠦ ᠳ᠋ᠦ᠍᠂
— ᠠᠶᠠ᠂ ᠮᠢᠨᠦ ᠨᠠᠰᠤ ᠥᠲᠡᠯᠵᠡᠢ᠃ ᠲᠠ ᠪᠣᠳᠣ᠂ ᠮᠢᠨᠦ ᠥᠬᠢᠨ᠂ ᠲᠠᠨ ᠲᠠᠢ ᠰᠠᠴᠠᠭᠤ ᠰᠢᠦ᠃ ᠮᠢᠨᠦ ᠲᠤᠢᠯ ᠤ᠋ᠨ ᠭᠣᠷᠢᠳᠠᠬᠤ ᠶ᠋ᠢ ᠬᠡᠯᠡᠪᠡᠯ᠂ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠪᠢᠴᠢᠭ ᠦᠰᠦᠭ ᠢ᠋ᠶ᠋ᠡᠷ ᠤᠯᠠᠮᠵᠢᠯᠠᠨ ᠥᠪᠡᠷ ᠦ᠋ᠨ ᠰᠤᠷᠤᠯᠭᠠ ᠶ᠋ᠢ ᠨᠡᠮᠡᠭᠳᠡᠭᠦᠯᠵᠦ᠂ ᠪᠠᠰᠠ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠪᠣᠱᠣᠭ ᠢ᠋ ᠬᠠᠯᠠᠬᠤ ᠬᠤᠪᠢᠰᠬᠠᠯᠴᠢ ᠨᠠᠷ ᠵᠢᠯ ᠢᠷᠡᠬᠦ ᠳᠣᠳᠣᠮ ᠯᠧᠨᠢᠨ᠂ ᠰᠲ᠋ᠠᠯᠢᠨ ᠤ᠋ ᠵᠣᠬᠢᠶᠠᠯ ᠠ᠋ᠴᠠ ᠤᠯᠠᠮ ᠠᠷᠪᠢᠨ ᠶᠡᠬᠡᠪᠡᠷ ᠣᠷᠴᠢᠭᠤᠯᠤᠨ ᠬᠡᠪᠯᠡᠬᠦ ᠪᠣᠯᠪᠠᠤ? ᠭᠡᠵᠦ ᠭᠣᠷᠢᠳᠠᠨ ᠪᠠᠢᠭᠠ ᠪᠢᠯᠡ᠃ ᠮᠢᠨᠦ ᠵᠣᠷᠢᠯᠭᠠ ᠭᠡᠪᠡᠯ᠂ ᠪᠢᠳᠡᠨ ᠦ᠌ ᠬᠣᠢᠴᠢᠬᠢ ᠶ᠋ᠢ ᠵᠠᠯᠭᠠᠵᠤ᠂ ᠮᠠᠨ ᠤ᠋ ᠰᠢᠨᠡ ᠪᠣᠯᠪᠠᠰᠤᠨ ᠪᠠᠢᠳᠠᠯ ᠢ᠋ ᠵᠣᠬᠢᠶᠠᠬᠤ ᠪᠠᠭᠠᠴᠤᠳ ᠵᠠᠯᠠᠭᠤᠴᠤᠳ ᠢ᠋ ᠠᠩᠬᠠ ᠰᠤᠷᠭᠠᠬᠤ ᠡᠨᠡ ᠪᠠᠭᠠ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠪᠦᠬᠦ ᠴᠢᠳᠠᠯ ᠢ᠋ᠶ᠋ᠠᠨ ᠰᠢᠪᠬᠠᠨ ᠥᠭᠬᠦ ᠶ᠋ᠢ ᠵᠣᠷᠢᠨᠠ᠃ ᠲᠠ ᠪᠣᠳᠣᠵᠤ ᠦᠵᠡ᠃ ᠡᠨᠡ ᠬᠢᠷᠢ᠂ ᠲᠤᠰ ᠤᠯᠤᠰ ᠲᠤ᠌ ᠪᠠᠭᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠪᠠᠭᠰᠢ ᠬᠡᠮᠡᠪᠡᠰᠦ᠂ ᠠᠷᠠᠢᠬᠠᠨ ᠬᠣᠷᠢᠭᠠᠳ ᠣᠷᠴᠢᠮ ᠪᠣᠢ ᠶ᠋ᠢ ᠪᠢᠳᠡ ᠪᠠᠰᠠ ᠤᠷᠢᠳᠤ ᠶ᠋ᠢᠨ ᠴᠠᠭ ᠢ᠋ ᠪᠣᠳᠣᠪᠠᠯ᠂ ᠣᠪᠣᠣ ᠪᠣᠯᠵᠤ ᠪᠠᠢᠭᠠ ᠭᠡᠵᠦ ᠦᠵᠡᠵᠦ ᠪᠠᠢᠨᠠ ᠰᠢᠦ ᠳᠡ᠃ ᠡᠭᠦᠨ ᠳ᠋ᠦ᠍ ᠲᠠ ᠪᠢᠳᠡ ᠬᠣᠶᠠᠷ᠂ ᠲᠡᠷᠡ ᠬᠣᠷᠢᠭᠠᠳ ᠪᠠᠭᠰᠢ ᠨᠠᠷ ᠤ᠋ᠨ ᠬᠣᠶᠠᠷ ᠨᠢ ᠳᠠᠷᠤᠢ ᠮᠥᠨ ᠦ᠌ ᠲᠤᠯᠠ ᠪᠢᠳᠡ ᠬᠣᠶᠠᠷ᠂ ᠤᠯᠤᠰ ᠠᠷᠠᠳ ᠤ᠋ᠨ ᠡᠮᠦᠨᠡ ᠬᠡᠴᠢᠨᠡᠨ ᠬᠦᠨᠳᠦ ᠡᠷᠬᠢᠮ ᠡᠭᠦᠷᠭᠡ ᠪᠡᠶᠡ ᠳ᠋ᠡᠭᠡᠨ ᠳᠠᠭᠠᠭᠠᠵᠤ ᠠᠪᠤᠪᠠ ᠭᠡᠵᠡᠢ᠃
* * *
ᠬᠣᠰᠢᠭᠤ ᠲᠠᠮᠠᠭᠠ ᠶ᠋ᠢᠨ ᠭᠠᠵᠠᠷ ᠠ᠋ᠴᠠ ᠪᠦᠬᠦ ᠳᠥᠷᠪᠡᠨ ᠰᠤᠮᠤᠨ ᠳ᠋ᠤ᠌ ᠪᠢᠴᠢᠭ ᠢ᠋ᠶ᠋ᠡᠷ ᠵᠠᠷᠯᠠᠵᠤ᠂ ᠰᠤᠮᠤ ᠲᠤᠰ ᠪᠦᠷᠢ ᠡᠴᠡ ᠬᠣᠰᠢᠭᠤ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠬᠣᠷᠢᠨ ᠬᠡᠦᠬᠡᠳ ᠢᠷᠡᠭᠦᠯᠬᠦ ᠶ᠋ᠢ ᠲᠤᠰᠢᠶᠠᠨ ᠮᠡᠳᠡᠭᠳᠡᠭᠰᠡᠨ ᠳ᠋ᠦ᠍᠂ ᠰᠤᠷᠭᠠᠭᠤᠯᠢ ᠡᠬᠢᠯᠡᠬᠦ ᠦᠶᠡᠰ ᠲᠦ᠍ ᠨᠠᠢ᠍ᠮᠠ ᠠ᠋ᠴᠠ ᠠᠷᠪᠠᠨ ᠨᠠᠰᠤᠨ ᠦ᠌ ᠳᠠᠯᠠᠨ ᠲᠠᠪᠤᠨ ᠬᠡᠦᠬᠡᠳ ᠢᠷᠡᠵᠡᠢ᠃ ᠣᠯᠠᠩᠬᠢ ᠶ᠋ᠢᠨ ᠡᠴᠢᠭᠡ ᠡᠬᠡ ᠨᠢ ᠳᠠᠭᠠᠯᠳᠤᠨ ᠢᠷᠡᠵᠦ᠂ ᠬᠡᠦᠬᠡᠳ ᠢ᠋ ᠬᠡᠷᠬᠢᠨ ᠰᠠᠭᠤᠵᠤ᠂ ᠴᠣᠬᠣᠮ ᠶᠠᠭᠤ ᠰᠤᠷᠤᠯᠴᠠᠬᠤ ᠶ᠋ᠢ ᠮᠡᠳᠡᠷᠡᠬᠦ ᠬᠦᠰᠡᠯᠲᠡᠢ ᠠᠵᠢ᠃ ᠬᠥᠳᠡᠭᠡ ᠡᠴᠡ ᠢᠷᠡᠭᠰᠡᠨ ᠲᠡᠷᠡ ᠮᠠᠯᠴᠢᠨ ᠠᠷᠠᠳ ᠤ᠋ᠳ ᠰᠠᠷᠠᠭᠤᠯ ᠠᠭᠤᠳᠠᠮ ᠲᠠᠩᠬᠢᠮ᠂ ᠰᠢᠷᠠ ᠪᠣᠳᠣᠭ ᠭᠢᠯᠠᠯᠵᠠᠭᠰᠠᠨ ᠰᠢᠪ ᠰᠢᠨᠡ ᠰᠢᠷᠡᠭᠡᠲᠦ ᠰᠠᠨᠳᠠᠯᠢ᠂ ᠲᠤᠭᠤᠷᠭᠠᠨ ᠳ᠋ᠠᠬᠢ ᠭᠠᠵᠠᠷ ᠵᠦᠢ ᠶ᠋ᠢᠨ ᠵᠢᠷᠤᠭ᠂ ᠬᠠᠯᠠᠭᠤᠨ ᠣᠷᠣᠨ ᠤ᠋ ᠠᠷᠰᠯᠠᠨ ᠪᠠᠷᠰ᠂ ᠵᠠᠭᠠᠨ ᠰᠡᠯᠡᠭᠴᠡ ᠭᠡᠬᠦ ᠵᠡᠷᠭᠡ ᠶ᠋ᠢᠨ ᠤᠷᠢᠳᠤ ᠡᠮᠦᠨᠡ ᠦᠵᠡᠭᠡ ᠦᠭᠡᠢ ᠠᠮᠢᠲᠠᠨ ᠤ᠋ ᠵᠢᠷᠤᠭ ᠳᠦᠷᠰᠦ ᠶ᠋ᠢ ᠭᠠᠢᠬᠠᠨ ᠦᠵᠡᠵᠦ᠂ ᠰᠤᠷᠤᠭᠴᠢᠳ ᠤ᠋ᠨ ᠰᠠᠭᠤᠬᠤ ᠪᠠᠢᠷᠢ ᠲᠣᠬᠢᠯᠢᠭ ᠠᠷᠢᠭᠤᠬᠠᠨ᠂ ᠪᠠᠰᠠ ᠬᠥᠳᠡᠭᠡ ᠡᠴᠡ ᠢᠷᠡᠭᠰᠡᠨ ᠣᠯᠠᠨ ᠪᠠᠭᠠᠴᠤᠳ ᠲᠤ᠌ ᠴᠥᠮ ᠰᠢᠪ ᠰᠢᠨᠡ ᠬᠥᠬᠡ ᠳᠠᠯᠢᠩ ᠲᠡᠷᠯᠢᠭ᠂ ᠥᠮᠥᠳᠥ ᠴᠠᠮᠴᠠ᠂ ᠭᠤᠲᠤᠯ ᠵᠡᠷᠭᠡ ᠬᠤᠪᠴᠠᠰᠤ ᠲᠠᠯᠪᠢᠨ ᠣᠯᠭᠣᠭᠰᠠᠨ ᠢ᠋ ᠦᠵᠡᠭᠡᠳ᠂ ᠦᠨᠡᠨ ᠰᠡᠳᠬᠢᠯ ᠡᠴᠡ ᠪᠠᠶᠠᠷᠯᠠᠨ ᠪᠠᠬᠠᠳᠤᠵᠠᠢ᠃
ᠬᠥᠳᠡᠭᠡ ᠡᠴᠡ ᠢᠷᠡᠭᠰᠡᠨ ᠬᠡᠦᠬᠡᠳ ᠦ᠋ᠨ ᠡᠴᠢᠭᠡ ᠡᠬᠡ ᠶ᠋ᠢ ᠰᠢᠨᠡ ᠰᠤᠷᠭᠠᠭᠤᠯᠢ ᠶ᠋ᠢᠨ ᠪᠦᠬᠦ ᠪᠠᠢᠳᠠᠯ ᠲᠠᠢ ᠲᠠᠨᠢᠯᠴᠠᠨ ᠶᠠᠪᠤᠵᠤ ᠦᠵᠡᠭᠰᠡᠨ ᠦ᠌ ᠳᠠᠷᠠᠭᠠ᠂ ᠵᠣᠴᠢᠯᠠᠬᠤ ᠲᠣᠮᠣ ᠠᠰᠠᠷ ᠲᠤ᠌ ᠤᠷᠢᠨ ᠵᠠᠯᠠᠵᠤ ᠪᠢᠯᠡ᠃ ᠡᠭᠦᠨ ᠳ᠋ᠦ᠍ ᠬᠣᠰᠢᠭᠤ ᠲᠠᠮᠠᠭᠠ ᠶ᠋ᠢᠨ ᠭᠠᠵᠠᠷ ᠠ᠋ᠴᠠ ᠠᠪᠤᠭᠰᠠᠨ ᠬᠡᠳᠦᠨ ᠲᠣᠮᠣ ᠠᠰᠠᠷ ᠢ᠋ ᠬᠠᠰᠢᠶᠠᠨ ᠳ᠋ᠠᠬᠢ ᠵᠦᠯᠭᠡ ᠳᠡᠭᠡᠷᠡ ᠤᠭᠰᠠᠷᠠᠨ ᠪᠠᠷᠢᠵᠤ᠂ ᠢᠰᠡᠭᠡᠢ ᠰᠢᠷᠳᠡᠭ ᠵᠡᠷᠭᠡ ᠶ᠋ᠢ ᠳᠡᠪᠢᠰᠴᠦ᠂ ᠤᠷᠲᠤ ᠰᠢᠷᠡᠭᠡ ᠲᠠᠯᠪᠢᠨ᠂ ᠰᠢᠷᠡᠭᠡᠨᠡ ᠪᠣᠭᠣᠷᠰᠣᠭ᠂ ᠴᠢᠪᠠᠭᠠ᠂ ᠰᠢᠬᠠᠮᠠᠯ ᠶᠣᠣᠲᠠᠩ᠂ ᠦᠵᠦᠮ᠂ ᠬᠤᠷᠤᠳ ᠵᠡᠷᠭᠡ ᠶ᠋ᠢ ᠲᠠᠯᠪᠢᠭᠰᠠᠨ ᠲᠠᠪᠠᠭ ᠲᠠᠢ ᠢᠳᠡᠭᠡ ᠦᠷᠦᠵᠡᠭᠡᠵᠦ᠂ ᠣᠯᠠᠨ ᠵᠣᠴᠢᠳ ᠢ᠋ ᠳᠠᠢᠯᠠᠵᠤ ᠪᠢᠯᠡ᠃
ᠬᠣᠰᠢᠭᠤ ᠳᠠᠷᠤᠭᠠ ᠪᠤᠭᠤᠷᠤᠯ ᠡᠪᠦᠭᠡᠨ ᠪᠠᠲᠤᠪᠠᠶᠠᠷ ᠠᠪᠤᠭᠠᠢ᠂ ᠣᠯᠠᠨ ᠵᠣᠴᠢᠳ ᠤ᠋ᠨ ᠡᠮᠦᠨᠡ ᠡᠴᠡ ᠬᠠᠨᠳᠤᠭᠰᠠᠨ ᠤᠷᠲᠤ ᠰᠢᠷᠡᠭᠡᠨ ᠦ᠌ ᠠᠷᠤ ᠳ᠋ᠤ᠌᠂ ᠲᠤᠰ ᠰᠤᠷᠭᠠᠭᠤᠯᠢ ᠶ᠋ᠢᠨ ᠪᠠᠭᠰᠢ ᠨᠠᠷ ᠤ᠋ᠨ ᠬᠠᠮᠲᠤ ᠰᠠᠭᠤᠵᠤ᠂ ᠣᠯᠠᠨ ᠵᠣᠴᠢᠳ ᠲᠤ᠌ ᠲᠣᠪᠴᠢ ᠦᠭᠡ ᠬᠡᠯᠡᠭᠰᠡᠨ ᠨᠢ᠄
— ᠣᠳᠣ ᠠ᠋ᠴᠠ ᠨᠡᠯᠢᠶᠡᠳ ᠣᠯᠠᠨ ᠵᠢᠯ ᠦ᠋ᠨ ᠡᠮᠦᠨᠡ᠂ ᠮᠠᠨᠵᠤ ᠳᠠᠢᠴᠢᠩ ᠤᠯᠤᠰ ᠤ᠋ᠨ ᠬᠠᠷᠭᠢᠰ ᠬᠠᠷᠠᠩᠭᠤᠢ ᠵᠠᠰᠠᠭ ᠤ᠋ᠨ ᠦᠶᠡ ᠳ᠋ᠦ᠍ ᠮᠢᠨᠦ ᠪᠡᠶᠡ᠂ ᠣᠷᠬᠣᠨ ᠭᠣᠣᠯ ᠤ᠋ᠨ ᠬᠥᠪᠡᠭᠡᠨᠡ ᠡᠷᠲᠡᠨ ᠦ᠌ ᠤᠢᠭᠤᠷ ᠤᠯᠤᠰ ᠤ᠋ᠨ ᠨᠡᠢᠰᠯᠡᠯ ᠬᠠᠷᠠ ᠪᠠᠯᠭᠠᠰᠤ ᠬᠣᠲᠠ ᠶ᠋ᠢ ᠰᠢᠨᠵᠢᠯᠡᠷᠡ ᠶᠠᠪᠤᠭᠰᠠᠨ ᠨᠢᠭᠡᠨ ᠣᠷᠣᠰ ᠡᠷᠳᠡᠮᠲᠡᠨ ᠲᠡᠢ ᠠᠭᠤᠯᠵᠠᠭᠰᠠᠨ ᠪᠢᠯᠡ᠃ ᠬᠡᠳᠦ ᠬᠣᠯᠠ ᠶ᠋ᠢᠨ ᠢᠷᠡᠭᠡᠳᠦᠢ ᠶ᠋ᠢᠨ ᠪᠠᠢᠳᠠᠯ ᠢ᠋ ᠪᠢᠯᠢᠭ ᠦ᠋ᠨ ᠨᠢᠳᠦ ᠪᠡᠷ ᠦᠵᠡᠭᠴᠢ ᠲᠡᠷᠡ ᠡᠪᠦᠭᠡᠨ ᠡᠷᠳᠡᠮᠲᠡᠨ᠂ ᠲᠠᠨ ᠤ᠋ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠦᠷᠡ ᠬᠡᠦᠬᠡᠳ ᠦ᠋ᠨ ᠡᠮᠦᠨᠡ ᠡᠷᠳᠡᠮ ᠢ᠋ ᠲᠤᠭᠤᠯᠬᠤ ᠳᠠᠷᠳᠠᠩ ᠵᠠᠮ ᠨᠡᠭᠡᠭᠡᠭᠳᠡᠵᠦ᠂ ᠬᠥᠮᠦᠨ ᠦ᠌ ᠶᠣᠰᠣᠲᠠᠢ ᠰᠠᠢᠨ ᠠᠵᠤ ᠠᠮᠢᠳᠤᠷᠠᠯ ᠤ᠋ᠨ ᠶᠡᠬᠡ ᠵᠠᠮ ᠨᠡᠭᠡᠭᠡᠭᠳᠡᠬᠦ ᠴᠠᠭ ᠠᠰᠤᠷᠤ ᠬᠣᠯᠠ ᠦᠭᠡᠢ᠃ ᠲᠡᠷᠡ ᠴᠠᠭ ᠢ᠋ ᠴᠢ ᠴᠦ᠍ ᠥᠪᠡᠷ ᠦ᠋ᠨ ᠨᠢᠳᠦ ᠪᠡᠷ ᠦᠵᠡᠬᠦ ᠬᠤᠪᠢ ᠲᠠᠢ ᠪᠠᠢᠵᠤ ᠶᠠᠭᠤᠨ ᠤ᠋ ᠮᠠᠭᠠᠳ ᠭᠡᠵᠦ ᠬᠡᠯᠡᠭᠰᠡᠨ ᠪᠢᠯᠡ᠃
ᠲᠡᠷᠡ ᠴᠠᠭ ᠣᠳᠣ ᠦᠨᠡᠬᠡᠷ ᠢᠷᠡᠵᠡᠢ᠃ ᠳᠠᠷᠤᠯᠠᠨ ᠮᠥᠯᠵᠢᠭᠴᠢ ᠨᠠᠷ ᠠ᠋ᠴᠠ ᠠᠩᠭᠢᠵᠢᠷᠠᠨ ᠰᠠᠯᠵᠤ᠂ ᠡᠷᠬᠡ ᠴᠢᠯᠥᠭᠡ ᠪᠡᠨ ᠣᠯᠤᠭᠠᠳ᠂ ᠪᠢᠳᠡᠨ ᠢ᠋ ᠭᠠᠳᠠᠭᠠᠳᠤ ᠳᠣᠲᠣᠭᠠᠳᠤ ᠶ᠋ᠢᠨ ᠳᠠᠷᠤᠯᠠᠭᠴᠢᠳ ᠤ᠋ᠨ ᠲᠠᠯᠬᠢᠨ ᠳᠣᠣᠷᠠ ᠠ᠋ᠴᠠ ᠮᠤᠯᠲᠤᠷᠠᠵᠤ ᠡᠷᠬᠡ ᠴᠢᠯᠥᠭᠡ ᠪᠡᠨ ᠣᠯᠵᠤ ᠠᠪᠬᠤ ᠳ᠋ᠤ᠌ ᠮᠠᠨᠢ ᠬᠠᠷᠠᠮ ᠦᠭᠡᠢ ᠰᠡᠳᠬᠢᠯ ᠢ᠋ᠶ᠋ᠡᠷ ᠲᠤᠰᠠᠯᠠᠵᠤ ᠥᠭᠭᠦᠭᠰᠡᠨ ᠣᠷᠣᠰ ᠤ᠋ᠨ ᠠᠷᠠᠳ ᠲᠦᠮᠡᠨ ᠦ᠌ ᠬᠠᠯᠠᠮᠵᠢᠲᠤ ᠲᠤᠰᠠᠯᠠᠮᠵᠢ ᠶ᠋ᠢᠨ ᠠᠴᠢ ᠪᠠᠷ ᠪᠢᠳᠡ ᠣᠳᠣ ᠠᠷᠠᠳ ᠤᠯᠤᠰ ᠤ᠋ᠨ ᠢ᠋ᠶ᠋ᠠᠨ ᠲᠤᠯᠭᠠᠭᠤᠷᠢ ᠲᠥᠷᠥ ᠶ᠋ᠢ ᠪᠣᠰᠬᠠᠨ ᠪᠦᠲᠦᠭᠡᠪᠡ᠃
ᠮᠥᠩᠭᠥ ᠬᠦᠦᠯᠡᠭᠴᠢ ᠬᠢᠲᠠᠳ ᠤ᠋ᠨ ᠰᠢᠨᠤᠬᠠᠢ ᠫᠦᠰᠡᠨ ᠳ᠋ᠦ᠍ ᠪᠢᠳᠡ᠂ ᠣᠯᠠᠨ ᠲᠠᠢᠵᠢ ᠨᠠᠷ ᠤ᠋ᠨ ᠲᠠᠯᠪᠢᠭᠰᠠᠨ ᠥᠷᠢ ᠰᠢᠷᠢ ᠶ᠋ᠢ ᠲᠥᠯᠥᠵᠦ᠂ ᠪᠠᠰᠠ ᠮᠠᠨ ᠤ᠋ ᠨᠣᠶᠠᠨ ᠪᠠᠢᠭᠰᠠᠨ ᡀᠠ ᠪᠡᠢᠯᠡ ᠶ᠋ᠢ ᠠᠯᠢ ᠬᠡᠳᠦᠢᠨ ᠮᠠᠨᠵᠤ ᠳᠠᠢᠴᠢᠩ ᠤᠯᠤᠰ ᠤ᠋ᠨ ᠪᠠᠳᠠᠷᠠᠭᠤᠯᠲᠤ ᠶ᠋ᠢᠨ ᠦᠶᠡᠰ ᠪᠡᠭᠡᠵᠢᠩ ᠣᠷᠣᠵᠤ᠂ ᠪᠠᠢᠰᠠ ᠶ᠋ᠢᠨ ᠵᠢᠩᠰᠡ ᠵᠡᠷᠭᠡ ᠬᠤᠳᠠᠯᠳᠤᠨ ᠠᠪᠴᠤ᠂ ᠡᠴᠢᠨᠡᠭᠡᠨ ᠲᠡᠴᠢᠨᠡᠭᠡᠨ ᠥᠷᠢ ᠲᠠᠯᠪᠢᠭᠰᠠᠨ ᠢ᠋ ᠰᠠᠶᠢᠬᠠᠨ ᠪᠣᠯᠲᠠᠯᠠ ᠲᠥᠯᠥᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠢᠳᠡ ᠪᠦᠭᠦᠳᠡ ᠮᠡᠳᠡᠭᠰᠡᠭᠡᠷ ᠪᠢᠯᠡ᠃ ᠣᠳᠣ ᠡᠷᠬᠢᠮ ᠵᠣᠴᠢᠳ ᠲᠠ ᠪᠦᠭᠦᠳᠡᠭᠡᠷ᠂ ᠤᠯᠤᠰ ᠲᠠᠭᠠᠨ( ᠳ᠋ᠤ᠌ ᠪᠠᠨ) ᠠᠯᠪᠠᠨ ᠲᠠᠲᠠᠪᠤᠷᠢ ᠭᠡᠵᠦ ᠲᠤᠰᠢᠶᠠᠵᠤ ᠪᠠᠢᠭᠠ ᠮᠥᠩᠭᠥ ᠬᠥᠷᠥᠩᠭᠡ ᠶ᠋ᠢ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠦᠶᠡᠰ ᠲᠦ᠍ ᠴᠣᠬᠣᠮ ᠶᠠᠮᠠᠷ ᠵᠦᠢᠯ ᠳ᠋ᠦ᠍ ᠵᠠᠷᠤᠳᠠᠭ ᠢ᠋ ᠪᠡᠯᠡᠬᠡᠨ ᠲᠣᠯᠢᠯᠠᠨ ᠦᠵᠡᠵᠦ ᠪᠠᠢᠨᠠ᠃ ᠮᠠᠨ ᠤ᠋ ᠡᠨᠡ ᠬᠤᠰᠢᠭᠤᠨ ᠤ᠋ ᠰᠤᠷᠭᠠᠭᠤᠯᠢ ᠶ᠋ᠢ ᠴᠥᠮ ᠲᠠ ᠪᠢᠳᠡᠨ ᠦ᠌ ᠬᠥᠷᠥᠩᠭᠡ ᠪᠡᠷ ᠪᠠᠢᠭᠤᠯᠤᠭᠰᠠᠨ ᠢ᠋ ᠣᠳᠣ ᠪᠦᠭᠦᠳᠡᠭᠡᠷ ᠦᠵᠡᠵᠡᠭᠡᠪᠡ᠃ ᠪᠢᠳᠡ ᠪᠦᠭᠦᠳᠡ ᠡᠴᠡ ᠲᠠᠲᠠᠵᠤ ᠠᠪᠤᠭᠰᠠᠨ ᠮᠥᠩᠭᠥ ᠭᠥᠷᠥᠩᠬᠡᠨ ᠡᠴᠡ ᠠᠯᠪᠠᠨ ᠲᠠᠲᠠᠪᠤᠷᠢ ᠶ᠋ᠢᠨ ᠲᠣᠭᠲᠠᠭᠠᠭᠰᠠᠨ ᠳᠦᠷᠢᠮ ᠶᠣᠰᠣᠭᠠᠷ᠂ ᠣᠳᠣ ᠪᠠᠰᠠ ᠲᠠ ᠪᠦᠭᠦᠳᠡ ᠶ᠋ᠢᠨ ᠦᠷᠡ ᠬᠡᠦᠬᠡᠳ ᠢ᠋ ᠥᠯᠥᠰᠬᠦ ᠤᠮᠳᠠᠭᠠᠰᠬᠤ᠂ ᠲᠠᠭᠠᠷᠠᠬᠤ ᠪᠡᠭᠡᠷᠡᠬᠦ ᠶ᠋ᠢᠨ ᠵᠣᠪᠠᠯᠠᠩ ᠢ᠋ ᠦᠵᠡᠯ ᠦᠭᠡᠢ᠂ ᠡᠷᠡᠭᠦᠯ ᠡᠩᠬᠡ ᠪᠡᠷ ᠬᠥᠮᠦᠵᠢᠵᠦ᠂ ᠡᠷᠳᠡᠮ ᠨᠣᠮ ᠰᠤᠷᠴᠤ᠂ ᠠᠷᠠᠳ ᠤᠯᠤᠰ ᠲᠠᠭᠠᠨ( ᠳ᠋ᠤ᠌ ᠪᠠᠨ) ᠦᠨᠡᠨ ᠰᠢᠳᠤᠷᠭᠤ ᠪᠠᠷ ᠵᠢᠳᠬᠦᠵᠦ᠂ ᠪᠢᠳᠡᠨ ᠦ᠌ ᠬᠣᠢᠴᠢ ᠶ᠋ᠢ ᠵᠠᠯᠭᠠᠮᠵᠢᠯᠠᠬᠤ ᠡᠷᠳᠡᠮᠲᠡᠢ ᠪᠣᠯᠪᠠᠰᠤᠨ᠂ ᠤᠴᠢᠷ ᠢ᠋ᠶ᠋ᠠᠨ ᠮᠡᠳᠡᠬᠦ ᠬᠥᠮᠦᠨ ᠪᠣᠯᠭᠠᠬᠤ ᠶᠠᠪᠤᠳᠠᠯ ᠳ᠋ᠤ᠌ ᠵᠣᠷᠢᠭᠤᠯᠬᠤ ᠶ᠋ᠢ ᠲᠠ ᠪᠦᠬᠦᠨ ᠣᠳᠣ ᠡᠬᠡ ᠵᠠᠬᠠ ᠶ᠋ᠢ ᠨᠢ ᠪᠡᠯᠡᠬᠡᠨᠡ ᠲᠣᠯᠢᠯᠠᠨ ᠦᠵᠡᠵᠦ ᠪᠠᠢᠨᠠ᠃
ᠡᠨᠡ ᠰᠤᠷᠭᠠᠭᠤᠯᠢ ᠶ᠋ᠢᠨ ᠲᠠᠩᠬᠢᠮ ᠤᠷᠲᠤ ᠶ᠋ᠢ ᠳᠠᠩ ᠭᠠᠭᠴᠠ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠬᠦᠴᠦ ᠪᠡᠷ ᠪᠦᠲᠦᠭᠡᠨ ᠪᠤᠰᠬᠠᠭᠰᠠᠨ ᠬᠡᠷᠡᠭ ᠪᠢᠰᠢ᠂ ᠪᠢᠳᠡᠨ ᠳ᠋ᠦ᠍ ᠲᠤᠰᠠᠯᠠᠷᠠ ᠬᠦᠴᠦᠨ ᠵᠢᠳᠬᠦᠭᠰᠡᠨ ᠣᠷᠣᠰ᠂ ᠢᠷᠭᠡᠨ᠂ ᠲᠥᠪᠡᠳ᠂ ᠬᠠᠰᠠᠭ ᠲᠠᠪᠤᠨ ᠬᠡᠯᠡᠨ ᠦ᠌ ᠬᠥᠮᠦᠨ ᠬᠦᠴᠦᠨ ᠴᠢᠷᠮᠠᠢᠵᠠᠢ᠃ ᠡᠨᠡ ᠰᠠᠢᠬᠠᠨ ᠣᠷᠣᠨ ᠪᠠᠢᠰᠢᠩ ᠢ᠋ ᠪᠤᠰᠬᠠᠨ ᠪᠦᠲᠦᠭᠡᠭᠰᠡᠨ ᠨᠥᠬᠥᠳ ᠦ᠋ᠨ ᠵᠠᠷᠢᠮ ᠨᠢ ᠲᠠ ᠪᠦᠬᠦᠨ ᠦ᠌ ᠳᠤᠮᠳᠠ ᠣᠳᠣ ᠴᠤ᠌ ᠪᠠᠢᠨᠠ᠃ ᠡᠭᠦᠨ ᠳ᠋ᠦ᠍᠂ ᠡᠨᠡ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠦᠷᠡ ᠬᠡᠦᠬᠡᠳ ᠢ᠋ᠶ᠋ᠡᠨ ᠡᠷᠳᠡᠮ ᠤᠬᠠᠭᠠᠨ ᠳ᠋ᠤ᠌ ᠰᠤᠷᠭᠠᠬᠤ ᠡᠴᠢᠭᠡ ᠡᠬᠡ ᠪᠣᠯᠤᠭᠰᠠᠨ ᠲᠠ ᠪᠦᠭᠦᠳᠡ ᠶ᠋ᠢᠨ ᠡᠮᠦᠨᠡ ᠡᠴᠡ ᠡᠪᠦᠭᠡᠨ ᠪᠢ᠂ ᠡᠨᠡ ᠰᠤᠷᠭᠠᠭᠤᠯᠢ ᠶ᠋ᠢ ᠥᠨᠳᠥᠷᠯᠡᠨ ᠪᠣᠰᠬᠠᠵᠤ ᠥᠭᠭᠦᠭᠰᠡᠨ ᠲᠡᠷᠡ ᠡᠷᠬᠢᠮ ᠨᠥᠬᠥᠳ ᠲᠦ᠍ ᠲᠠᠯᠠ ᠥᠭᠴᠦ ᠮᠡᠬᠦᠢᠨ ᠶᠣᠰᠣᠯᠠᠶᠠ᠃ ᠪᠠᠰᠠ᠂ ᠡᠨᠡ ᠲᠠᠪᠤᠨ ᠬᠡᠯᠡ ᠶ᠋ᠢᠨ ᠰᠢᠳᠤᠷᠭᠤ ᠵᠢᠷᠤᠮᠲᠠᠨ ᠰᠠᠢᠴᠤᠤᠯ ᠤ᠋ᠨ ᠬᠦᠴᠦᠨ ᠵᠢᠳᠬᠦᠯ ᠢ᠋ᠶ᠋ᠡᠷ ᠪᠦᠲᠦᠭᠰᠡᠨ ᠡᠨᠡ ᠰᠠᠢᠬᠠᠨ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠰᠤᠷᠤᠯᠴᠠᠬᠤ ᠪᠠᠭᠠᠴᠤᠳ᠂ ᠬᠥᠪᠡᠭᠦᠳ ᠥᠬᠢᠳ ᠢ᠋ ᠡᠨᠡ ᠮᠡᠲᠦ ᠣᠯᠠᠨ ᠦᠨᠳᠦᠰᠦᠲᠡᠨ ᠠᠷᠠᠳ ᠤ᠋ᠨ ᠡᠷᠬᠢᠮ ᠶᠡᠬᠡ ᠡᠪ ᠨᠠᠢᠷᠠᠮᠳᠠᠯ ᠢ᠋ ᠡᠭᠦᠷᠢᠳᠡ ᠴᠡᠭᠡᠵᠢᠨ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ )ᠰᠠᠨᠠᠵᠤ ᠶᠠᠪᠤᠭᠠᠷᠠᠢ! ᠭᠡᠵᠦ ᠵᠠᠬᠢᠶᠠ ᠭᠡᠬᠦ ᠳ᠋ᠦ᠍ ᠣᠯᠠᠨ ᠪᠠᠭᠠᠴᠤᠳ ᠨᠢᠭᠡᠨ ᠵᠡᠷᠭᠡ᠂
— ᠵᠠ! ᠭᠡᠵᠦ ᠥᠴᠢᠪᠡ᠃
— ᠡᠷᠲᠡᠨ ᠦ᠌ ᠦᠭᠡᠨ ᠳ᠋ᠦ᠍᠂ ᠪᠤᠭᠤᠷᠤᠯ ᠠ᠋ᠴᠠ ᠦᠭᠡ ᠰᠣᠨᠣᠰᠴᠤ᠂ ᠪᠣᠯᠤᠭᠰᠠᠨ ᠠ᠋ᠴᠠ ᠠᠮᠰᠠ ᠭᠡᠳᠡᠭ ᠪᠢᠯᠡ᠃ ᠬᠦᠨᠳᠦᠲᠦ ᠣᠯᠠᠨ ᠭᠡᠢᠴᠢᠨ᠂ ᠲᠤᠰ ᠰᠤᠷᠭᠠᠭᠤᠯᠢ ᠣᠳᠣ ᠣᠯᠠᠨ ᠱᠠᠪᠢ ᠨᠠᠷ ᠰᠤᠷᠤᠭᠴᠢᠳ ᠲᠠᠭᠠᠨ( ᠳ᠋ᠤ᠌ ᠪᠠᠨ) ᠪᠠᠵᠠᠭᠠᠭᠰᠠᠨ ᠡᠳ᠋ ᠢᠳᠡᠭᠡᠨ ᠦ᠌ ᠳᠡᠭᠡᠵᠢᠨ ᠡᠴᠡ ᠲᠠ ᠪᠦᠬᠦᠨ ᠳ᠋ᠦ᠍ ᠪᠠᠷᠢᠵᠤ ᠪᠠᠢᠭᠠ ᠠ᠋ᠴᠠ ᠵᠣᠭᠣᠭᠯᠠᠮᠤ᠃ ᠭᠠᠭᠴᠠ ᠬᠦ᠌ ᠮᠠᠨ ᠤ᠋ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠡᠦᠬᠡᠳ ᠲᠠ ᠪᠦᠬᠦᠨ᠂ ᠡᠳᠦᠷ ᠪᠣᠯᠭᠠᠨ ᠡᠢᠮᠦ ᠬᠣᠭᠣᠯᠠ ᠢᠳᠡᠵᠦ ᠪᠠᠢᠬᠤ ᠪᠣᠯᠤᠨᠠ ᠭᠡᠵᠦ ᠪᠢᠲᠡᠭᠡᠢ ᠠᠨᠳᠠᠭᠤᠷᠠᠨ ᠪᠣᠳᠣᠭᠠᠷᠠᠢ᠃ ᠣᠳᠣᠬᠠᠨ ᠳᠡᠭᠡᠷᠡ᠂ ᠪᠢᠳᠡ ᠲᠠ ᠨᠠᠷ ᠢ᠋ ᠡᠳᠦᠷ ᠪᠣᠯᠭᠠᠨ ᠪᠤᠤᠰᠠ ᠬᠤᠤᠱᠤᠤᠷ ᠪᠠᠷ ᠰᠢᠬᠠᠵᠤ ᠪᠠᠢᠬᠤ ᠲᠡᠢᠮᠦ ᠵᠤᠵᠠᠭᠠᠨ ᠬᠥᠷᠥᠩᠭᠡ ᠲᠡᠢ ᠪᠣᠯᠵᠤ ᠴᠢᠳᠠᠭᠠ ᠦᠭᠡᠢ ᠰᠢᠦ ᠭᠡᠵᠦ ᠡᠪᠦᠭᠡᠨ ᠦ᠌ ᠢᠨᠢᠶᠡᠮᠰᠦᠭᠯᠡᠬᠦ ᠳ᠋ᠦ᠍᠂ ᠣᠯᠠᠨ ᠵᠣᠴᠢᠨ᠂ ᠡᠪᠦᠭᠡᠨ ᠪᠠᠲᠤᠪᠠᠶᠠᠷ ᠤ᠋ᠨ ᠦᠭᠡᠨ ᠳ᠋ᠦ᠍ ᠪᠠᠶᠠᠷᠯᠠᠨ ᠢᠨᠢᠶᠡᠵᠦ ᠱᠤᠤᠭᠢᠯᠳᠤᠪᠠ᠃
ᠣᠯᠠᠨ ᠭᠡᠢᠴᠢᠨ ᠳ᠋ᠦ᠍ ᠴᠠᠢ ᠶ᠋ᠢᠨ ᠰᠡᠭᠦᠯᠡᠷ ᠪᠤᠤᠵᠠ᠂ ᠯᠣᠣᠮᠢ ᠪᠤᠳᠠᠭᠠ ᠲᠠᠢ ᠫᠦᠨᠲ᠋ᠢᠦᠽᠢ ᠲᠡᠢ ᠱᠥᠯᠥ᠂ ᠠᠢᠷᠠᠭ ᠪᠠᠷᠢᠭᠰᠠᠨ ᠢ᠋ ᠡᠨᠳᠡ ᠨᠤᠷᠰᠢᠨ ᠥᠭᠦᠯᠡᠭᠡᠳ ᠶᠠᠭᠠᠬᠢᠮ᠃ ᠬᠠᠭᠤᠴᠢᠨ ᠦᠭᠡᠨ ᠳ᠋ᠦ᠍᠂ ᠮᠠᠭᠤ ᠬᠥᠮᠦᠨ ᠢᠳᠡᠭᠰᠡᠨ ᠢ᠋ᠶ᠋ᠡᠨ᠂ ᠰᠠᠢᠨ ᠬᠥᠮᠦᠨ ᠦᠵᠡᠭᠰᠡᠨ ᠢ᠋ᠶ᠋ᠡᠨ ᠭᠡᠳᠡᠭ ᠲᠤᠯᠠ ᠢᠳᠡᠭᠰᠡᠨ ᠤᠤᠭᠤᠭᠰᠠᠨ ᠢ᠋ ᠨᠤᠷᠰᠢᠨ ᠥᠭᠦᠯᠡᠪᠡᠯ᠂ ᠮᠠᠭᠤ ᠬᠥᠮᠦᠨ ᠦ᠌ ᠲᠣᠭᠠᠨ ᠳ᠋ᠤ᠌ ᠣᠷᠣᠬᠤ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠵᠤ ᠦᠯᠦ ᠥᠭᠦᠯᠡᠨ᠂ ᠥᠭᠦᠯᠡᠬᠦ ᠢᠨᠦ᠂ ᠰᠤᠷᠭᠠᠭᠤᠯᠢ ᠶ᠋ᠢᠨ ᠵᠠᠬᠢᠷᠤᠯ ᠪᠠᠭᠰᠢ ᠨᠠᠰᠤᠨᠪᠠᠲᠤ᠂ ᠣᠯᠠᠨ ᠭᠡᠢᠴᠢᠨ ᠳ᠋ᠦ᠍ ᠳᠠᠢᠯᠠᠵᠤ ᠭᠦᠢᠴᠡᠭᠰᠡᠨ ᠦ᠌ ᠳᠠᠷᠠᠭᠠ ᠵᠠᠷᠯᠠᠨ ᠰᠣᠨᠣᠰᠬᠠᠭᠰᠠᠨ ᠨᠢ᠂ ᠪᠢᠳᠡᠨ ᠦ᠌ ᠡᠨᠡ ᠰᠠᠢᠬᠠᠨ ᠨᠠᠢᠷ ᠳᠡᠭᠡᠷᠡ ᠢᠷᠡᠭᠡᠳ ᠪᠠᠢᠭᠠ ᠬᠦᠨᠳᠦᠲᠦ ᠵᠣᠴᠢᠨ ᠡᠪᠦᠭᠡᠨ ᠪᠤᠭᠤᠷᠤᠯ ᠢᠸᠠᠨ ᠠᠪᠤᠭᠠᠢ ᠶ᠋ᠢᠨ ᠠᠴᠢ᠂ ᠤᠯᠠᠭᠠᠨ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ᠂ ᠤᠮᠰᠺ ᠬᠣᠲᠠ ᠠ᠋ᠴᠠ ᠪᠣᠳᠣᠭ ᠲᠠᠢ ᠰᠡᠭᠦᠳᠡᠷ ᠵᠢᠷᠤᠭ ᠦᠵᠡᠭᠦᠯᠬᠦ ᠳ᠋ᠧᠩᠯᠦ ᠲᠡᠢ ᠬᠡᠷᠡᠭᠰᠡᠯ ᠲᠤᠰ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠪᠡᠯᠡᠭ ᠪᠣᠯᠭᠠᠨ ᠶᠠᠪᠤᠭᠤᠯᠤᠭᠰᠠᠨ ᠢ᠋ ᠢᠸᠠᠨ ᠠᠪᠤᠭᠠᠢ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠡᠭᠦᠨ ᠳ᠋ᠦ᠍᠂ ᠲᠠᠯᠠᠷᠬᠠᠨ ᠬᠦᠯᠢᠶᠡᠨ ᠠᠪᠴᠤ᠂ ᠲᠡᠷᠡ ᠰᠠᠢᠬᠠᠨ ᠰᠡᠭᠦᠳᠡᠷ ᠵᠢᠷᠤᠭ ᠢ᠋ ᠣᠯᠠᠨ ᠭᠡᠢᠴᠢᠨ ᠳ᠋ᠦ᠍ ᠡᠨᠡ ᠣᠷᠣᠢ ᠲᠤᠰ ᠠᠰᠠᠷ ᠲᠤ᠌ ᠰᠣᠨᠢᠷᠬᠠᠭᠤᠯᠤᠨ ᠦᠵᠡᠭᠦᠯᠬᠦ ᠶ᠋ᠢ ᠵᠠᠷᠯᠠᠶᠠ ᠭᠡᠪᠡ᠃
ᠰᠢᠷᠴᠢᠨ ᠲᠡᠷᠡ ᠲᠤᠬᠠᠢ᠂ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠠᠪᠴᠢᠷᠠᠭᠰᠠᠨ ᠪᠢᠯᠡ᠃ ᠵᠣᠴᠢᠳ ᠤ᠋ᠨ ᠳᠤᠮᠳᠠ ᠠ᠋ᠴᠠ ᠪᠣᠰᠴᠤ᠂ ᠬᠣᠰᠢᠭᠤ ᠲᠠᠮᠠᠭᠠ ᠶ᠋ᠢᠨ ᠭᠠᠵᠠᠷ ᠪᠠᠶᠠᠷ ᠬᠦᠷᠭᠡᠵᠦ᠂ ᠡᠢᠮᠦ ᠰᠠᠢᠬᠠᠨ ᠰᠤᠷᠭᠠᠭᠤᠯᠢ ᠪᠠᠢᠭᠤᠯᠤᠭᠰᠠᠨ ᠳ᠋ᠤ᠌ ᠲᠠᠯᠠ ᠥᠭᠴᠦ᠂ ᠪᠠᠰᠠ ᠠᠴᠢ ᠬᠥᠪᠡᠭᠦᠨ ᠦ᠌ ᠡᠷᠬᠢᠮ ᠪᠡᠯᠡᠭ ᠢ᠋ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠡᠪᠦᠭᠡᠨ ᠢᠸᠠᠨ ᠳ᠋ᠤ᠌ ᠲᠠᠯᠠ ᠥᠭᠴᠦ᠂ ᠰᠡᠳᠬᠢᠯ ᠬᠥᠳᠡᠯᠦᠨ ᠥᠭᠦᠯᠡᠷᠦᠨ᠄
— ᠪᠢ᠂ ᠬᠤᠪᠢ ᠠ᠋ᠴᠠ ᠲᠤᠰ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠮᠣᠷᠢ ᠬᠣᠶᠠᠷ᠂ ᠬᠣᠨᠢ ᠬᠣᠶᠠᠷ ᠢ᠋ ᠪᠡᠯᠡᠭᠯᠡᠶᠡ ᠭᠡᠵᠦ ᠬᠡᠯᠡᠯᠡ᠃ ᠲᠠᠩᠰᠤᠭ᠂ ᠰᠢᠷᠴᠢᠨ ᠦ᠌ ᠦᠭᠡ ᠶ᠋ᠢ ᠡᠯᠭᠦᠵᠦ ᠠᠪᠤᠭᠠᠳ᠂
— ᠪᠢ ᠴᠦ᠍ ᠬᠣᠶᠠᠷ ᠬᠣᠨᠢ ᠪᠡᠯᠡᠭᠯᠡᠶᠡ ᠭᠡᠪᠡ᠃
— ᠪᠢ ᠭᠠᠭᠴᠠ ᠲᠡᠮᠡᠭᠡ ᠪᠡᠨ ᠰᠤᠷᠭᠠᠭᠤᠯᠢ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠪᠡᠯᠡᠭᠯᠡᠶᠡ ᠭᠡᠵᠦ ᠬᠡᠭᠡᠷᠡ ᠶ᠋ᠢᠨ ᠪᠣᠷᠣ ᠳᠤᠤᠭᠠᠷᠴᠤ᠂ ᠠᠰᠠᠷ ᠤ᠋ᠨ ᠭᠦᠨ ᠡᠲᠡᠭᠡᠳ ᠡᠴᠡ ᠥᠳᠬᠡᠨ ᠭᠡᠭᠴᠢ ᠶ᠋ᠢᠨ ᠳᠠᠭᠤᠨ ᠲᠠᠢ ᠨᠢᠭᠡ ᠬᠥᠮᠦᠨ᠂
— ᠪᠢ ᠮᠣᠷᠢ ᠨᠢᠭᠡ᠂ ᠬᠣᠨᠢ ᠲᠠᠪᠤ ᠶ᠋ᠢ ᠪᠡᠯᠡᠭᠯᠡᠶᠡ ᠭᠡᠵᠦ ᠡᠨᠳᠡ ᠲᠡᠨᠳᠡ ᠡᠴᠡ ᠬᠥᠮᠦᠨ ᠪᠣᠰᠴᠤ᠂ ᠪᠢ ᠲᠡᠢᠮᠦ ᠮᠠᠯ ᠪᠡᠯᠡᠭᠯᠡᠶᠡ ᠭᠡᠵᠦ ᠵᠦᠭ ᠵᠦᠭ ᠡᠴᠡ ᠳᠤᠤᠭᠠᠷᠪᠠᠰᠤ᠂
— ᠳᠠᠭᠤ ᠦᠭᠡᠢᠬᠡᠨ ᠥᠩᠭᠡᠷᠡᠬᠦ ᠭᠡᠰᠡᠨ ᠴᠢᠨᠢ ᠪᠣᠯᠬᠤ ᠦᠭᠡᠢ ᠨᠢ ᠳᠡ ᠭᠡᠵᠦ ᠪᠠᠲᠤᠪᠠᠶᠠᠷ ᠢᠨᠢᠶᠡᠮᠰᠦᠭᠯᠡᠵᠦ᠂ ᠪᠢ ᠴᠦ᠍ ᠭᠡᠰᠡᠨ ᠲᠤᠰ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠰᠠᠢᠨ ᠲᠡᠮᠡᠭᠡ ᠬᠣᠶᠠᠷ᠂ ᠬᠣᠨᠢ ᠭᠤᠴᠢ ᠶ᠋ᠢ ᠲᠤᠰᠠᠯᠠᠶᠠ ᠭᠡᠵᠡᠢ᠃
— — — —
* ᠰᠢᠨᠡ ᠴᠠᠭ ᠤ᠋ᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠮᠡᠳᠡᠯᠭᠡ ᠶ᠋ᠢ ᠣᠯᠠᠨ ᠳ᠋ᠤ᠌ ᠳᠡᠯᠭᠡᠷᠡᠭᠦᠯᠬᠦ ᠶᠠᠪᠤᠳᠠᠯ ᠢ᠋ ᠬᠠᠷᠭᠢᠰ ᠯᠠᠮᠠ ᠨᠠᠷ ᠶᠡᠬᠡᠯᠡ (ᠶᠡᠬᠡ ᠯᠡ) ᠡᠰᠡᠷᠭᠦᠴᠡᠵᠦ ᠪᠠᠢᠭᠰᠠᠨ ᠢ᠋ ᠬᠣᠷᠢᠳᠤᠭᠠᠷ ᠵᠠᠭᠤᠨ ᠤ᠋ ᠡᠬᠢ ᠪᠡᠷ ᠮᠣᠩᠭᠣᠯ ᠤ᠋ᠨ ᠲᠤᠬᠠᠢ ᠪᠢᠴᠢᠭᠰᠡᠨ ᠭᠠᠳᠠᠭᠠᠳᠤ ᠶ᠋ᠢᠨ ᠵᠣᠬᠢᠶᠠᠯᠴᠢᠳ ᠤ᠋ᠨ ᠵᠣᠬᠢᠶᠠᠯ ᠳ᠋ᠤ᠌ ᠪᠠᠷᠢᠮᠲᠠ ᠮᠠᠰᠢ ᠣᠯᠠᠨ ᠪᠣᠢ᠃ ᠡᠭᠦᠨ ᠳ᠋ᠦ᠍ ᠭᠠᠵᠠᠷ ᠤ᠋ᠨ ᠵᠦᠢ᠂ ᠣᠷᠴᠢᠯᠠᠩᠲᠤ ᠶᠢᠷᠲᠢᠨᠴᠦ ᠶ᠋ᠢᠨ ᠪᠠᠢᠳᠠᠯ ᠢ᠋ ᠥᠭᠦᠯᠡᠭᠰᠡᠨ ᠵᠣᠬᠢᠶᠠᠯ ᠢ᠋ ᠶᠡᠬᠡᠳᠡ ᠠᠳᠠ ᠦᠵᠡᠳᠡᠭ ᠪᠠᠢᠭᠰᠠᠨ ᠢ᠋ ᠲᠡᠮᠳᠡᠭᠯᠡᠵᠡᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠴᠤᠯᠮᠤᠨᠭᠡᠷᠡᠯ᠂ ᠣᠶᠤᠨᠪᠠᠲᠤ᠂ ᠣᠶᠤᠨᠪᠢᠯᠢᠭ᠌᠂
ᠤᠢᠭᠤᠷᠵᠢᠨ·ᠣᠳᠬᠣᠨᠪᠠᠪᠠ᠂ ᠴᠤᠯᠮᠤᠨᠭᠡᠷᠡᠯ᠂ ᠮᠧᠢ ᠬᠤᠸᠠ
ᠬᠢᠨᠠᠭᠴᠢ᠄ ᠲ·ᠬᠦᠮᠦᠵᠢᠯᠲᠦ᠂ ᠴᠤᠯᠮᠤᠨᠭᠡᠷᠡᠯ᠂ ᠣᠳᠬᠣᠨᠴᠡᠴᠡᠭ᠂ ᠤᠢᠭᠤᠷᠵᠢᠨ·ᠣᠳᠬᠣᠨᠪᠠᠪᠠ᠂ ᠪᠠᠯ
ᠤᠩᠰᠢᠭᠴᠢ᠄ ᠨᠠᠰᠤᠨ᠌ᠦ᠌ᠯᠵᠡᠢ