ᠦᠷ ᠦᠨ ᠲᠤᠶᠠᠭᠠ II – ᠪ᠂ ᠷᠢᠨᠴᠢᠨ - ᠬᠣᠶᠠᠳᠤᠭᠠᠷ ᠲᠡᠪᠲᠡᠷ <ᠭᠠᠯ ᠤᠰᠤᠨ ᠤ ᠭᠠᠰᠢᠭᠤᠨ ᠵᠣᠪᠠᠯᠠᠩ>- ᠬᠤᠷᠢᠨ ᠬᠣᠶᠠᠷ Үүрийн туяа II – Б ᠂ Ренчин Хоёрдугаар дэвтэр "Гал усны гашуун зовлон"-22
455ᠬᠣᠷᠢᠨ ᠬᠣᠶᠠᠷ᠂ ᠴᠠᠭᠠᠭᠴᠢᠨ ᠲᠠᠬᠢᠶᠠ ᠵᠢᠯ ᠦ᠋ᠨ ᠭᠣᠷᠢ
ᠣᠴᠢ ᠠ᠋ᠴᠠ ᠭᠠᠯ ᠪᠠᠳᠠᠷᠠᠨᠠ᠃
(ᠫᠤᠱᠺᠢᠨ ᠳ᠋ᠤ᠌ ᠣᠳᠣᠶᠸᠸᠰᠺᠢ ᠶ᠋ᠢᠨ ᠬᠠᠷᠢᠭᠤᠯᠤᠭᠰᠠᠨ ᠦᠭᠡ)
ᠠᠷᠠᠳ ᠣᠯᠠᠨ ᠢ᠋ ᠬᠠᠷᠭᠢᠰ ᠲᠦᠷᠢᠮᠡᠬᠡᠢᠯᠡᠨ ᠡᠵᠡᠯᠡᠭᠴᠢᠳ ᠲᠡᠢ ᠲᠡᠮᠡᠴᠡᠨ ᠡᠰᠡᠷᠭᠦᠴᠡᠬᠦ ᠲᠡᠮᠡᠴᠡᠯ ᠳ᠋ᠦ᠍ ᠤᠷᠢᠶᠠᠯᠠᠭᠰᠠᠨ ᠬᠠᠭᠤᠳᠠᠰᠤ ᠪᠢᠴᠢᠭ᠂ ᠬᠦᠷᠢᠶᠡᠨᠡ ᠡᠨᠳᠡ ᠲᠡᠨᠳᠡ ᠪᠣᠢ ᠪᠣᠯᠵᠤ ᠡᠬᠢᠯᠡᠪᠡ᠃ ᠲᠡᠢᠮᠦ ᠬᠠᠭᠤᠳᠠᠰᠤ ᠪᠢᠴᠢᠭ᠂ ᠬᠥᠮᠦᠨ ᠦ᠌ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠮᠠ ᠦᠭᠡᠢ ᠭᠠᠵᠠᠷ ᠨᠠᠭᠠᠯᠳᠤᠭᠤᠯᠤᠭᠰᠠᠨ ᠪᠠᠢᠬᠤ ᠶ᠋ᠢ ᠬᠦᠷᠢᠶᠡ ᠶ᠋ᠢᠨ ᠬᠢᠨ ᠣᠯᠵᠤ ᠦᠵᠡᠪᠡ᠃ ᠬᠠᠭᠤᠴᠢᠨ ᠳᠣᠲᠣᠭᠠᠳᠤ ᠶᠠᠮᠤᠨ ᠤ᠋ ᠬᠠᠭᠠᠯᠭᠠ᠂《ᠪᠠᠷᠠᠭᠤᠨ ᠬᠣᠢᠲᠤ ᠬᠢᠵᠠᠭᠠᠷ ᠤ᠋ᠨ ᠬᠡᠷᠡᠭ ᠢ᠋ ᠪᠤᠳᠤᠭᠤᠯᠤᠨ ᠰᠢᠢᠳᠬᠡᠬᠦ ᠶᠠᠮᠤᠨ》 ᠭᠡᠭᠴᠢ ᠶ᠋ᠢᠨ ᠬᠠᠭᠠᠯᠭᠠᠨ ᠳ᠋ᠤ᠌ ᠬᠦᠷᠲᠡᠯᠡ᠂ ᠫᠤᠤ ᠲᠠᠢ ᠬᠢᠲᠠᠳ ᠴᠡᠷᠢᠭ ᠦ᠋ᠨ ᠪᠠᠷᠤᠭ ᠨᠢᠳᠦᠨ ᠦ᠌ ᠡᠮᠦᠨᠡ᠂ ᠭᠠᠮᠢᠩ ᠤ᠋ᠨ ᠵᠠᠷᠯᠠᠯ ᠤ᠋ᠨ ᠳᠡᠷᠭᠡᠳᠡ ᠶᠡᠬᠡ ᠵᠢᠷᠦᠬᠡᠲᠡᠢ ᠨᠠᠭᠠᠯᠳᠤᠭᠤᠯᠴᠢᠬᠠᠭᠰᠠᠨ ᠦᠵᠡᠭᠳᠡᠳᠡᠭ ᠪᠣᠯᠪᠠ᠃ ᠭᠠᠨᠳᠠᠩᠳᠡᠭᠴᠢᠩᠯᠢᠩ ᠬᠡᠢᠳ ᠢ᠋ ᠲᠣᠭᠣᠷᠢᠭᠰᠠᠨ ᠬᠦᠷᠳᠦᠨ ᠳ᠋ᠦ᠍᠂ ᠬᠦᠷᠢᠶᠡᠨ ᠦ᠌ ᠪᠠᠷᠠᠭᠤᠨ ᠵᠠᠬᠠ ᠳ᠋ᠤ᠌᠂ ᠬᠥᠳᠡᠭᠡ ᠡᠴᠡ ᠶᠠᠷᠠᠭᠠ(ᠶᠠᠷᠭᠠ) ᠶ᠋ᠢᠨ ᠬᠣᠨᠢ ᠲᠠᠭᠤᠵᠤ ᠢᠷᠡᠬᠦ ᠳ᠋ᠡᠭᠡᠨ(ᠳ᠋ᠦ᠍ ᠪᠡᠨ)ᠰᠠᠢᠨ ᠲᠥᠷᠥᠯ ᠣᠯᠵᠤ ᠲᠥᠷᠥᠬᠦ ᠪᠣᠯᠲᠤᠭᠠᠢ ᠭᠡᠵᠦ ᠳᠣᠣᠭᠤᠷ ᠨᠢ ᠲᠠᠭᠤᠵᠤ ᠭᠠᠷᠭᠠᠳᠠᠭ ᠰᠤᠪᠤᠷᠭᠠᠨ ᠤ᠋ ᠭᠤᠯᠳᠤᠩ ᠳ᠋ᠤ᠌᠂ ᠪᠠᠰᠠ ᠤᠯᠤᠰ ᠢ᠋ᠶ᠋ᠠᠨ ᠬᠤᠳᠠᠯᠳᠤᠵᠤ ᠤᠷᠪᠠᠭᠰᠠᠨ ᠬᠠᠨ ᠸᠠᠩ ᠤ᠋ᠳ ᠤ᠋ᠨ ᠠᠰᠠᠷᠲᠤ ᠬᠠᠭᠠᠯᠭᠠᠨ ᠳ᠋ᠤ᠌ ᠬᠤᠷᠴᠠ ᠥᠩᠭᠡ ᠶ᠋ᠢᠨ ᠪᠣᠳᠣᠭ ᠵᠦᠮᠪᠡᠷ(ᠵᠦᠮᠪᠦᠷ) ᠢ᠋ᠶ᠋ᠡᠷ ᠳᠦᠷᠰᠦᠯᠡᠭᠰᠡᠨ ᠡᠭᠦᠳᠡᠨ ᠦ᠌ ᠳᠣᠭᠰᠢᠨ ᠪᠠᠭᠠᠲᠤᠷ ᠰᠠᠬᠢᠭᠤᠯᠰᠤᠨ ᠤ᠋ ᠡᠯᠢᠭᠡᠨ ᠳᠡᠭᠡᠷᠡ ᠨᠢ ᠬᠦᠷᠲᠡᠯᠡ ᠨᠠᠭᠠᠯᠳᠤᠭᠤᠯᠤᠭᠰᠠᠨ ᠢ᠋ ᠤᠯᠤᠰ ᠬᠠᠪᠠᠷᠬᠠᠨ(ᠬᠠᠪᠤᠷᠬᠠᠨ— ᠬᠠᠪᠤ+ ᠊ᠷᠬᠠ+ ᠊ᠨ) ᠦᠵᠡᠳᠡᠭ ᠪᠠᠢᠵᠠᠢ᠃
ᠣᠯᠠᠨ ᠲᠦᠮᠡᠨ ᠳ᠋ᠦ᠍ ᠤᠴᠢᠷ ᠪᠠᠢᠳᠠᠯ ᠢ᠋ ᠲᠠᠨᠢᠭᠤᠯᠵᠤ ᠪᠠᠢᠭᠰᠠᠨ ᠲᠡᠷᠡ ᠤᠬᠠᠭᠤᠯᠬᠤ ᠬᠠᠭᠤᠳᠠᠰᠤ ᠶ᠋ᠢ ᠵᠠᠷᠢᠮ ᠳ᠋ᠠᠭᠠᠨ (ᠳ᠋ᠤ᠌ ᠪᠠᠨ)ᠰᠤᠳᠤᠷᠴᠢᠯᠠᠭᠰᠠᠨ ᠨᠣᠮ ᠤ᠋ᠨ ᠬᠠᠭᠤᠳᠠᠰᠤ ᠰᠢᠭ᠋ ᠤᠷᠲᠤᠯᠢᠭ ᠬᠡᠯᠪᠡᠷᠢ ᠲᠡᠢ ᠴᠠᠭᠠᠰᠤᠨᠠ ᠮᠣᠩᠭᠣᠯ ᠢ᠋ᠶ᠋ᠠᠷ᠂ ᠬᠤᠯᠤᠰᠤᠨ ᠦᠵᠦᠭ ᠢ᠋ᠶ᠋ᠡᠷ ᠪᠢᠴᠢᠭᠰᠡᠨ ᠪᠤᠶᠤ ᠮᠥᠨ ᠲᠥᠪᠡᠳ ᠦᠰᠦᠭ ᠢ᠋ᠶ᠋ᠡᠷ ᠮᠣᠩᠭᠣᠯ ᠦᠭᠡ ᠶ᠋ᠢ ᠪᠢᠴᠢᠵᠦ ᠡᠨᠳᠡ ᠲᠡᠨᠳᠡ ᠲᠠᠯᠪᠢᠭᠰᠠᠨ ᠢ᠋ ᠭᠠᠮᠢᠩ ᠤ᠋ᠨ ᠴᠠᠭᠳᠠᠨ ᠰᠡᠷᠭᠡᠢᠯᠡᠬᠦ ᠲᠠᠩᠨᠠᠭᠤᠯ᠂ ᠬᠥᠮᠦᠨ ᠦ᠌ ᠬᠥᠯ ᠳ᠋ᠦ᠍ ᠭᠢᠰᠬᠢᠭᠳᠡᠬᠦ ᠦᠭᠡᠢ᠂ ᠨᠣᠬᠠᠢ ᠶ᠋ᠢᠨ ᠰᠢᠭᠡᠰᠦ ᠭᠠᠷᠢ ᠪᠣᠯᠭᠠᠬᠤ ᠦᠭᠡᠢ ᠭᠡᠵᠦ ᠥᠨᠳᠥᠷ ᠴᠢᠯᠠᠭᠤᠨ ᠳᠡᠭᠡᠷᠡ ᠬᠠᠢᠷ ᠴᠢᠯᠠᠭᠤ ᠪᠠᠷ ᠳᠠᠷᠤᠭᠤᠯᠵᠤ ᠲᠠᠯᠪᠢᠳᠠᠭ ᠪᠤᠶᠤ ᠬᠦᠷᠳᠦᠨ ᠳ᠋ᠦ᠍ ᠬᠠᠪᠴᠢᠭᠤᠯᠳᠠᠭ᠂ ᠳᠤᠲᠠᠭᠤ ᠲᠠᠮᠲᠤᠭ ᠪᠣᠯᠤᠭᠰᠠᠨ ᠨᠣᠮ ᠤ᠋ᠨ ᠬᠠᠭᠤᠳᠠᠰᠤ ᠭᠡᠵᠦ ᠠᠩᠵᠠᠭᠠᠷᠠᠳᠠᠭ ᠦᠭᠡᠢ ᠪᠠᠢᠵᠠᠢ᠃
ᠲᠡᠳᠡᠭᠡᠷ ᠤᠬᠠᠭᠤᠯᠬᠤ ᠬᠠᠭᠤᠳᠠᠰᠤ᠂ ᠲᠦᠷᠢᠮᠡᠬᠡᠢᠯᠡᠨ ᠡᠵᠡᠯᠡᠭᠴᠢ ᠭᠠᠮᠢᠩ ᠤ᠋ᠨ ᠬᠠᠷᠭᠢᠰ ᠪᠤᠷᠤᠩᠬᠤᠢ ᠶ᠋ᠢ ᠥᠭᠦᠯᠡᠵᠦ᠂ ᠤᠯᠤᠰ ᠣᠯᠠᠨ ᠢ᠋ᠶ᠋ᠠᠨ ᠬᠤᠳᠠᠯᠳᠤᠨ᠂ ᠭᠠᠵᠠᠷ ᠣᠷᠣᠨ ᠢ᠋ ᠭᠠᠮᠢᠩ ᠳ᠋ᠤ᠌ ᠡᠵᠡᠯᠡᠭᠦᠯᠬᠦ ᠳ᠋ᠦ᠍ ᠬᠦᠷᠦᠭᠦᠯᠦᠭᠰᠡᠨ ᠵᠠᠰᠠᠭ ᠤ᠋ᠨ ᠡᠷᠬᠡ ᠪᠠᠷᠢᠭᠴᠢᠳ ᠤ᠋ᠨ ᠤᠷᠪᠠᠨ ᠲᠡᠷᠰᠯᠡᠭᠰᠡᠨ ᠭᠠᠵᠢᠭᠤ ᠪᠣᠳᠣᠯᠭᠠ ᠶ᠋ᠢ ᠪᠤᠷᠤᠭᠤᠰᠢᠶᠠᠨ ᠢᠯᠡᠷᠡᠭᠦᠯᠵᠦ᠂ ᠬᠦᠷᠢᠶᠡᠨ ᠳ᠋ᠦ᠍ ᠴᠠᠭᠠᠨᠲᠠᠨ ᠤ᠋ ᠲᠠᠷᠬᠠᠭᠠᠵᠤ ᠪᠠᠢᠭᠰᠠᠨ ᠡᠯᠳᠡᠪ ᠬᠤᠳᠠᠯ ᠴᠤᠤᠷᠬᠠᠯ ᠢ᠋ ᠰᠡᠬᠦᠭᠡᠨ (ᠰᠥᠬᠥᠭᠡᠨ) ᠨᠢᠴᠤᠭᠠᠵᠤ᠂ ᠲᠦᠷᠢᠮᠡᠬᠡᠢᠯᠡᠨ ᠡᠵᠡᠯᠡᠭᠴᠢ ᠨᠠᠷ ᠤ᠋ᠨ ᠪᠦᠬᠦᠢᠯᠡ ᠠᠷᠭᠠ ᠶᠠᠪᠤᠭᠤᠯᠤᠯᠭᠠ ᠶ᠋ᠢ ᠬᠡᠢᠳᠡᠭᠦᠯᠦᠨ ᠲᠠᠰᠤᠯᠳᠠᠭᠤᠯᠬᠤ ᠶᠠᠪᠤᠳᠠᠯ ᠳ᠋ᠤ᠌ ᠤᠯᠤᠰ ᠢ᠋ᠶ᠋ᠠᠨ ᠪᠣᠳᠣᠬᠤ ᠡᠬᠡ ᠣᠷᠣᠨᠴᠢ ᠬᠥᠮᠦᠰ ᠢ᠋ ᠤᠷᠢᠶᠠᠯᠠᠵᠤ᠂ ᠰᠢᠳᠤᠷᠭᠤ ᠡᠬᠡ ᠣᠷᠣᠨᠴᠢ ᠪᠦᠬᠦᠨ ᠦ᠌ ᠡᠮᠦᠨᠡ ᠲᠤᠯᠭᠠᠷᠠᠵᠤ ᠪᠠᠢᠭᠠ ᠡᠩ ᠲᠡᠷᠢᠭᠦᠨ ᠦ᠌ ᠴᠢᠬᠤᠯᠠ ᠵᠣᠷᠢᠯᠲᠠ ᠶ᠋ᠢ ᠰᠡᠩᠬᠡᠷᠡᠭᠦᠯᠦᠨ ᠲᠠᠢᠯᠪᠤᠷᠢᠯᠠᠬᠤ ᠠᠵᠤᠭᠤ᠃
ᠲᠡᠳᠡᠭᠡᠷ ᠤᠬᠠᠭᠤᠯᠬᠤ ᠬᠠᠭᠤᠳᠠᠰᠤ᠂ ᠣᠯᠠᠨ ᠤ᠋ ᠨᠢᠳᠦ ᠨᠡᠭᠡᠭᠡᠵᠦ᠂ ᠡᠷᠬᠡ ᠴᠢᠯᠥᠭᠡ ᠲᠡᠢ ᠲᠤᠰᠠᠭᠠᠷ ᠲᠣᠭᠲᠠᠨᠢᠬᠤ ᠶᠠᠪᠤᠳᠠᠯ ᠳ᠋ᠤᠨᠢ ᠴᠣᠬᠣᠮ ᠬᠡᠨ ᠨᠥᠬᠥᠷ᠂ ᠬᠡᠨ ᠳᠠᠢᠰᠤᠨ ᠪᠣᠯᠬᠤ ᠶ᠋ᠢ ᠲᠠᠢᠯᠪᠤᠷᠢᠯᠠᠵᠤ᠂ ᠰᠢᠦᠢ ᠱᠤ᠌ ᠵᠧᠩ᠂ ᠭᠣᠣ ᠰᠧ ᠯᠢᠩ᠂ ᠴᠧᠨ ᠢ ᠶ᠋ᠢᠨ ᠵᠡᠷᠭᠡ ᠡᠲᠡᠭᠡᠳ ᠣᠭᠲᠣ ᠬᠢᠲᠠᠳ ᠤ᠋ᠨ ᠠᠷᠠᠳ ᠲᠦᠮᠡᠨ ᠢ᠋ ᠲᠥᠯᠥᠭᠡᠯᠡᠵᠦ᠂ ᠲᠡᠭᠦᠨ ᠦ᠌ ᠬᠦᠰᠡᠯ ᠵᠣᠷᠢᠯ ᠢ᠋ ᠢᠯᠡᠷᠬᠡᠢᠯᠡᠵᠦ ᠪᠠᠢᠭᠠ ᠨᠢ ᠪᠤᠰᠤ ᠶ᠋ᠢ ᠠᠳᠠᠯᠢᠳᠬᠠᠪᠠᠰᠤ᠂ ᠤᠯᠤᠰ ᠢ᠋ᠶ᠋ᠠᠨ ᠬᠤᠳᠠᠯᠳᠤᠵᠤ ᠤᠷᠪᠠᠭᠰᠠᠨ ᠯᠠᠮᠠ ᠨᠣᠶᠠᠳ ᠢ᠋ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠲᠦᠮᠡᠨ ᠢ᠋ ᠲᠥᠯᠥᠭᠡᠯᠡᠵᠦ᠂ ᠲᠡᠭᠦᠨ ᠦ᠌ ᠰᠠᠨᠠᠯ ᠬᠦᠰᠡᠯ ᠢ᠋ ᠢᠯᠡᠷᠬᠡᠢᠯᠡᠵᠦ ᠪᠠᠢᠭᠠ ᠭᠡᠵᠦ ᠦᠵᠡᠵᠦ ᠪᠣᠯᠬᠤ ᠦᠭᠡᠢ ᠲᠡᠢ ᠠᠳᠠᠯᠢ ᠪᠠᠢᠭᠠ ᠶ᠋ᠢ ᠢᠷᠠᠭᠤ ᠲᠣᠳᠣᠷᠬᠠᠢ ᠪᠠᠷ ᠥᠭᠦᠯᠡᠵᠦ᠂ ᠮᠣᠩᠭᠣᠯ ᠬᠢᠲᠠᠳ ᠬᠣᠶᠠᠷ ᠤᠯᠤᠰ ᠤ᠋ᠨ ᠵᠢᠩᠬᠢᠨᠢ ᠠᠷᠠᠳ ᠲᠦᠮᠡᠨ ᠦ᠌ ᠬᠣᠭᠣᠷᠣᠨᠳᠣ ᠬᠠᠷᠢᠯᠴᠠᠨ ᠳᠠᠢᠰᠤᠩᠨᠠᠬᠤ ᠥᠰᠢᠶᠡ ᠨᠢᠭᠡ ᠴᠦ᠍ ᠪᠠᠢᠬᠤ ᠦᠭᠡᠢ᠂ ᠪᠠᠢᠬᠤ ᠴᠤ᠌ ᠶᠣᠰᠣ ᠦᠭᠡᠢ ᠶ᠋ᠢ ᠲᠣᠳᠣᠷᠬᠠᠢ ᠲᠣᠮᠣᠷᠤᠨ ᠢ᠋ᠶ᠋ᠠᠷ ᠥᠭᠦᠯᠡᠬᠦ ᠠᠵᠤᠭᠤ᠃
《ᠨᠡᠢᠰᠯᠡᠯ ᠬᠦᠷᠢᠶᠡᠨ ᠦ᠌ ᠰᠣᠨᠢᠨ ᠪᠢᠴᠢᠭ》 ᠭᠡᠳᠡᠭ ᠭᠠᠭᠴᠠ ᠰᠣᠨᠢᠨ ᠢ᠋ ᠭᠠᠷᠬᠤ ᠪᠠᠨ ᠪᠠᠢᠭᠰᠠᠨ ᠠ᠋ᠴᠠ ᠬᠣᠢᠰᠢ᠂ ᠭᠠᠭᠴᠠᠬᠦ ᠳᠠᠮ ᠦᠭᠡ ᠴᠤᠤᠷᠬᠠᠯ ᠢ᠋ᠶ᠋ᠠᠷ ᠪᠠᠢᠳᠠᠭ ᠪᠣᠯᠤᠭᠰᠠᠨ ᠬᠦᠷᠢᠶᠡᠨᠡ ᠲᠡᠷᠡ ᠤᠬᠠᠭᠤᠯᠬᠤ ᠬᠠᠭᠤᠳᠠᠰᠤ᠂ ᠲᠡᠷᠡ ᠦᠶᠡ ᠳ᠋ᠦ᠍ ᠪᠣᠯᠵᠤ ᠪᠠᠢᠭᠰᠠᠨ ᠡᠯᠳᠡᠪ ᠶᠠᠪᠤᠳᠠᠯ ᠤ᠋ᠨ ᠦᠨᠡᠨ ᠤᠴᠢᠷ ᠤᠳᠬᠠ ᠶ᠋ᠢ ᠣᠯᠬᠤ ᠳ᠋ᠤ᠌ ᠠᠷᠠᠳ ᠣᠯᠠᠨ ᠳ᠋ᠤ᠌ ᠲᠤᠰᠠ ᠪᠣᠯᠵᠤ᠂ ᠬᠠᠷᠭᠢᠰ ᠲᠦᠷᠢᠮᠡᠬᠡᠢᠯᠡᠨ ᠡᠵᠡᠯᠡᠭᠴᠢ ᠨᠠᠷ ᠤ᠋ᠨ ᠪᠤᠷᠤᠩᠬᠤᠢ ᠵᠠᠬᠢᠷᠭᠠᠨ ᠠ᠋ᠴᠠ ᠠᠩᠭᠢᠵᠢᠷᠠᠬᠤ ᠶ᠋ᠢᠨ ᠭᠣᠷᠢ ᠲᠥᠷᠥᠭᠦᠯᠵᠦ᠂ ᠵᠣᠷᠢᠭ ᠮᠣᠬᠣᠭᠰᠠᠨ ᠬᠥᠮᠦᠨ ᠦ᠌ ᠤᠷᠮᠠ ᠵᠣᠷᠢᠭ ᠢ᠋ ᠬᠥᠭᠵᠢᠭᠦᠯᠵᠦ᠂ ᠠᠷᠠᠳ ᠣᠯᠠᠨ ᠢ᠋ ᠭᠠᠮᠢᠩ ᠲᠠᠢ ᠡᠷᠡᠰᠯᠡᠨ ᠲᠡᠮᠡᠴᠡᠬᠦ ᠶᠠᠪᠤᠳᠠᠯ ᠳ᠋ᠤ᠌ ᠪᠡᠯᠡᠳᠬᠡᠬᠦ ᠶ᠋ᠢ ᠤᠷᠢᠶᠠᠯᠠᠵᠤ ᠪᠠᠢᠭᠰᠠᠨ ᠪᠢᠯᠡ᠃ ᠲᠡᠳᠡᠭᠡᠷ ᠤᠬᠠᠭᠤᠯᠬᠤ ᠬᠠᠭᠤᠳᠠᠰᠤ ᠶ᠋ᠢ ᠬᠥᠮᠦᠨ ᠪᠦᠷᠢ ᠪᠠᠬᠠᠳᠤᠵᠤ᠂ ᠠᠯᠤᠰ ᠬᠥᠳᠡᠭᠡ ᠨᠤᠲᠤᠭ ᠲᠤ᠌ ᠬᠦᠷᠲᠡᠯᠡ ᠬᠡᠯᠡᠯᠴᠡᠬᠦ ᠪᠣᠯᠵᠠᠢ᠃
ᠲᠦᠷᠢᠮᠡᠬᠡᠢᠯᠡᠨ ᠡᠵᠡᠯᠡᠭᠴᠢ ᠨᠠᠷ ᠰᠠᠨᠳᠤᠷᠴᠠᠭᠠᠵᠤ᠂ ᠲᠡᠷᠡ ᠬᠠᠭᠤᠳᠠᠰᠤ ᠵᠣᠬᠢᠶᠠᠨ ᠲᠠᠷᠬᠠᠵᠤ ᠪᠠᠢᠭᠠ ᠨᠢ ᠭᠠᠭᠴᠠ ᠨᠢᠭᠡᠨ ᠬᠥᠮᠦᠨ ᠪᠢᠰᠢ᠂ ᠠᠷᠠᠳ ᠣᠯᠠᠨ ᠲᠠᠢ ᠲᠦᠮᠡᠨ ᠬᠡᠯᠬᠢᠶᠡ ᠲᠡᠢ ᠪᠠᠲᠤ ᠨᠢᠭᠡᠳᠦᠯᠲᠡᠢ ᠪᠠᠢᠭᠤᠯᠤᠯᠭᠠ ᠪᠠᠢᠭᠠ ᠶ᠋ᠢ ᠬᠢᠷᠳ᠋ᠬᠢᠨ ᠮᠡᠳᠡᠪᠡ᠃ ᠲᠡᠷᠡ ᠪᠠᠢᠭᠤᠯᠤᠯᠭᠠ ᠶ᠋ᠢᠨ ᠰᠤᠷᠠᠭ ᠮᠥᠷ ᠢ᠋ ᠭᠠᠷᠭᠠᠬᠤ ᠭᠡᠵᠦ ᠴᠠᠭᠳᠠᠨ ᠰᠡᠷᠭᠡᠢᠯᠡᠬᠦ ᠶ᠋ᠢᠨ ᠲᠠᠩᠨᠠᠭᠤᠯ ᠤᠷᠤᠯᠳᠤᠵᠤ ᠶᠠᠳᠠᠭᠠᠳ᠂ ᠬᠠᠮᠤᠭ ᠢ᠋ ᠮᠡᠳᠡᠳᠡᠭ ᠮᠥᠷᠲᠡᠭᠡᠨ ᠬᠠᠮᠢᠭᠠ ᠴᠤ᠌ ᠪᠠᠢᠭᠠ ᠨᠢ ᠮᠡᠳᠡᠭᠳᠡᠵᠦ ᠥᠭᠬᠦ ᠦᠭᠡᠢ ᠰᠦᠷᠡᠬᠡᠢ ᠨᠢᠭᠤᠴᠠ ᠲᠡᠷᠡ ᠪᠠᠢᠭᠤᠯᠤᠯᠭᠠ ᠶ᠋ᠢ ᠶᠠᠭᠠᠬᠢᠵᠤ ᠣᠯᠳᠠᠭ ᠪᠢᠯᠡ ᠭᠡᠵᠦ ᠠᠷᠭᠠ ᠰᠠᠮᠠ ᠪᠠᠨ ᠪᠠᠷᠠᠵᠠᠢ᠃ ᠰᠢᠦᠢ ᠨᠣᠶᠠᠨ ᠤ᠋ ᠪᠠᠷᠠᠭᠤᠨ ᠭᠠᠷ᠂ ᠨᠢᠭᠤᠴᠠ ᠴᠠᠭᠳᠠᠨ ᠰᠡᠷᠭᠡᠢᠯᠡᠬᠦ ᠶ᠋ᠢᠨ ᠳᠠᠷᠤᠭᠠ ᠭᠣᠣ ᠰᠧ ᠯᠢᠩ ᠭᠧᠨᠧᠷᠠᠯ᠂ ᠲᠡᠷᠡ ᠣᠯᠳᠠᠵᠤ ᠥᠭᠳᠡᠭ ᠦᠭᠡᠢ ᠨᠢᠭᠤᠴᠠ ᠪᠠᠢᠭᠤᠯᠤᠯᠭᠠ ᠶ᠋ᠢᠨ ᠰᠤᠷᠠᠭ ᠭᠠᠷᠭᠠᠵᠤ ᠶᠠᠳᠠᠭᠠᠳ᠂ ᠲᠡᠰᠬᠡᠯ ᠦᠭᠡᠢ ᠬᠣᠷᠣᠰᠤᠨ ᠠᠭᠤᠷᠰᠠᠵᠤ ᠪᠠᠢᠲᠠᠯᠠ᠂ ᠡᠷᠢᠯ ᠬᠢᠵᠦ ᠴᠥᠬᠥᠷᠡᠭᠰᠡᠨ ᠭᠠᠮᠢᠩ ᠤ᠋ᠨ ᠲᠠᠩᠨᠠᠭᠤᠯᠴᠢᠨ ᠤ᠋ ᠬᠥᠭᠡᠭᠡᠴᠡᠯᠳᠦᠬᠦ ᠳ᠋ᠦ᠍ ᠲᠤᠰᠠ ᠪᠣᠯᠬᠤ《ᠦᠭᠡ ᠠᠯᠳᠠᠭᠳᠠᠵᠠᠢ》᠃ ᠪᠣᠭᠳᠠ ᠶ᠋ᠢᠨ ᠳᠡᠷᠭᠡᠳᠡ ᠶ᠋ᠢᠨ ᠨᠢᠭᠡᠨ ᠯᠠᠮᠠ᠂ ᠭᠠᠮᠢᠩ ᠤ᠋ᠨ ᠴᠠᠭᠳᠠᠨ ᠰᠡᠷᠭᠡᠢᠯᠡᠬᠦ ᠶ᠋ᠢᠨ ᠴᠠᠯᠢᠩ ᠲᠠᠢ ᠨᠢᠭᠡ ᠭᠣᠶᠣ ᠬᠡᠦᠬᠡᠨ ᠳ᠋ᠦ᠍ ᠦᠭᠡ ᠠᠯᠳᠠᠵᠤ᠂ ᠤᠯᠠᠭᠠᠨ ᠣᠷᠣᠰ ᠲᠤ᠌ ᠪᠣᠭᠳᠠ ᠬᠠᠭᠠᠨ ᠪᠢᠴᠢᠭ ᠶᠠᠪᠤᠭᠤᠯᠤᠭᠰᠠᠨ ᠭᠡᠵᠦ ᠳᠤᠷᠠᠳᠴᠠᠢ᠃
ᠰᠠᠢᠬᠠᠨ ᠬᠡᠦᠬᠡᠨ ᠦ᠌ ᠥᠩᠭᠡᠨ ᠳ᠋ᠦ᠍ ᠲᠠᠴᠢᠶᠠᠭᠰᠠᠨ ᠳᠡᠷᠭᠡᠳᠡ ᠶ᠋ᠢᠨ ᠲᠡᠷᠡ ᠬᠡᠦᠬᠡᠨᠰᠡᠭ ᠯᠠᠮᠪᠠ ᠭᠤᠸᠠᠢ᠂ ᠡᠷᠬᠡ ᠲᠠᠩᠬᠢᠯ ᠵᠠᠩ ᠲᠠᠢ ᠲᠡᠷᠡ ᠰᠠᠢᠬᠠᠨ ᠬᠡᠦᠬᠡᠨ ᠳ᠋ᠦ᠍ ᠨᠢᠭᠤᠷ ᠣᠯᠬᠤ ᠭᠡᠵᠦ ᠡᠯᠳᠡᠪ ᠢ᠋ᠶ᠋ᠡᠷ ᠤᠷᠤᠯᠳᠤᠵᠤ ᠪᠠᠢᠭᠠᠳ᠂ ᠬᠠᠭᠠᠨ ᠰᠠᠶᠢᠬᠠᠨ ᠭᠤᠷᠪᠠᠨ ᠨᠢᠭᠤᠴᠠ ᠵᠠᠬᠢᠶᠠᠨ ᠳ᠋ᠤ᠌ ᠮᠣᠳᠣᠷ ᠤ᠋ᠨ ᠲᠡᠮᠳᠡᠭ ᠳᠠᠷᠤᠵᠤ ᠥᠭᠪᠡ᠃ ᠨᠢᠭᠡ ᠵᠠᠬᠢᠶᠠ ᠶ᠋ᠢ ᠵᠠᠭᠠᠯᠬᠠᠩᠵᠠ ᠬᠤᠲᠤᠭᠲᠤ ᠳᠠᠮᠳᠢᠨᠪᠠᠵᠠᠷ ᠲᠤ᠌ ᠣᠯᠭᠣᠵᠤ᠂ ᠠᠮᠧᠷᠢᠺᠠ ᠶ᠋ᠢᠨ ᠶᠡᠷᠦᠩᠬᠡᠢᠯᠡᠭᠴᠢ ᠡᠴᠡ ᠲᠤᠰᠠᠯᠠᠮᠵᠢ ᠭᠤᠶᠤᠵᠠᠢ᠃ ᠪᠠᠰᠠ ᠨᠢᠭᠡ ᠵᠠᠬᠢᠶᠠ ᠶ᠋ᠢ ᠰᠢᠳᠠᠷ ᠰᠠᠢᠳ ᠰᠡᠴᠡᠨ ᠸᠠᠩ ᠳ᠋ᠤ᠌ ᠣᠯᠭᠣᠵᠤ᠂ ᠶᠠᠫᠣᠨ ᠠ᠋ᠴᠠ ᠲᠤᠰᠠᠯᠠᠮᠵᠢ ᠭᠤᠶᠤᠵᠤ᠂ ᠨᠢᠭᠡ ᠵᠠᠬᠢᠳᠠᠯ ᠢ᠋ ᠶᠡᠬᠡ ᠱᠠᠪᠢ ᠶ᠋ᠢᠨ ᠵᠠᠢᠰᠠᠩ ᠵᠠᠮᠢᠶᠠᠨ ᠳ᠋ᠤ᠌ ᠣᠯᠭᠣᠵᠤ᠂ ᠲᠦᠷᠢᠮᠡᠬᠡᠢᠯᠡᠨ ᠡᠵᠡᠯᠡᠭᠴᠢ ᠭᠠᠮᠢᠩ ᠢ᠋ ᠡᠰᠡᠷᠭᠦᠴᠡᠬᠦ ᠳ᠋ᠦ᠍ ᠲᠤᠰᠠᠯᠠᠮᠵᠢ ᠣᠯᠭᠣᠮᠤ ᠭᠡᠵᠦ ᠵᠥᠪᠯᠡᠯᠲᠦ ᠣᠷᠣᠰ ᠠ᠋ᠴᠠ ᠭᠤᠶᠤᠪᠠ᠃
ᠵᠠᠮᠢᠶᠠᠨ ᠤ᠋ ᠵᠠᠬᠢᠳᠠᠯ ᠳ᠋ᠤ᠌ ᠲᠡᠮᠳᠡᠭ ᠳᠠᠷᠤᠬᠤ ᠶ᠋ᠢᠨ ᠡᠮᠦᠨᠡ ᠬᠠᠭᠠᠨ ᠡᠳᠦᠷᠵᠢᠨ ᠪᠣᠳᠣᠯᠭᠠ ᠪᠣᠳᠣᠵᠤ᠂ ᠭᠠᠭᠴᠠᠬᠦ ᠭᠦᠨ ᠰᠥᠨᠢ ᠪᠣᠯᠤᠭᠰᠠᠨ ᠬᠣᠢᠨᠠ ᠰᠠᠢ᠍ᠢ(ᠰᠠᠶᠢ) ᠰᠠᠨᠠᠯ ᠲᠣᠭᠲᠠᠭᠠᠳ᠂ ᠭᠠᠨᠳᠠᠩ ᠵᠡᠭᠦᠨ ᠬᠦᠷᠢᠶᠡ ᠬᠣᠶᠠᠷ ᠠ᠋ᠴᠠ ᠭᠤᠷᠪᠠᠨ ᠲᠥᠯᠭᠡᠴᠢ ᠵᠢᠷᠤᠬᠠᠢᠴᠢ ᠠ᠋ᠴᠠ ᠬᠠᠷᠢᠭᠤ ᠠᠪᠤᠭᠰᠠᠨ ᠬᠣᠢᠨᠠ ᠲᠡᠮᠳᠡᠭ ᠢ᠋ᠶ᠋ᠡᠨ ᠳᠠᠷᠤᠵᠠᠢ ᠭᠡᠵᠦ ᠲᠡᠷᠡ ᠬᠡᠦᠬᠡᠨ ᠳ᠋ᠦ᠍ ᠥᠨᠥᠬᠢ ᠥᠩᠭᠡᠨ ᠳ᠋ᠦ᠍ ᠰᠢᠨᠤᠭᠴᠢ ᠯᠠᠮᠠ ᠶ᠋ᠢᠨ ᠶᠠᠷᠢᠭᠰᠠᠨ ᠨᠢ᠂ ᠭᠠᠨᠳᠠᠩ ᠤ᠋ᠨ ᠯᠠᠮᠠ᠂ ᠳᠠᠮᠳᠢᠨᠰᠦ᠋ᠷᠦᠩ ᠭᠠᠪᠵᠤ ᠭᠡᠳᠡᠭ ᠱᠣ ᠳ᠋ᠤ᠌ ᠮᠡᠷᠭᠡᠨ ᠨᠢᠭᠡᠨ ᠲᠥᠯᠭᠡᠴᠢ ᠱᠣ ᠣᠷᠬᠢᠵᠤ ᠦᠵᠡᠭᠡᠳ ᠤᠯᠠᠭᠠᠨ ᠣᠷᠣᠰ ᠡᠴᠦᠰ ᠲᠡᠭᠡᠨ(ᠲᠤ᠌ ᠪᠡᠨ) ᠯᠠᠪ ᠲᠤᠰᠠᠯᠠᠵᠤ ᠴᠢᠳᠠᠨᠠ᠃ ᠡᠨᠡ ᠳᠠᠷᠤᠢ ᠶᠠᠭᠠᠷᠠᠪᠴᠢᠯᠠᠪᠠᠯ᠂ ᠲᠤᠰᠠᠯᠠᠬᠤ ᠡᠰᠡᠬᠦ ᠶ᠋ᠢ ᠢᠯᠭᠠᠪᠤᠷᠢ ᠲᠣᠳᠣᠷᠬᠠᠢ ᠭᠠᠷᠬᠤ ᠦᠭᠡᠢ ᠪᠠᠢᠨᠠ ᠭᠡᠵᠡᠢ᠃
ᠵᠡᠭᠦᠨ ᠬᠦᠷᠢᠶᠡᠨ ᠦ᠌ ᠶᠡᠬᠡ ᠨᠣᠮ ᠲᠠᠢ ᠴᠦᠯᠲᠦᠮ ᠵᠢᠷᠤᠬᠠᠢᠴᠢ ᠶ᠋ᠢᠨ ᠬᠠᠷᠢᠭᠤᠯᠤᠭᠰᠠᠨ ᠨᠢ᠂ ᠵᠣᠷᠢᠭᠰᠠᠨ ᠬᠡᠷᠡᠭ ᠯᠠᠪᠲᠠᠢ ᠪᠦᠲᠦᠨᠡ᠃ ᠶᠡᠷᠦ ᠰᠠᠭᠠᠳ ᠲᠣᠳᠬᠠᠷ ᠪᠣᠯᠬᠤ ᠵᠦᠢᠯ ᠦᠭᠡᠢ ᠭᠡᠵᠡᠢ᠃
ᠵᠡᠭᠦᠨ ᠬᠦᠷᠢᠶᠡᠨ ᠦ᠌ ᠯᠠᠮᠠ ᠨᠠᠷ ᠤ᠋ᠨ ᠠᠢᠮᠠᠭ ᠤ᠋ᠨ ᠯᠣᠪᠣᠨ ᠴᠡᠷᠡᠨᠳᠣᠷᠵᠢ ᠭᠡᠭᠴᠢ ᠬᠠᠷᠢᠭᠤ ᠬᠡᠯᠡᠬᠦ ᠳ᠋ᠡᠭᠡᠨ(ᠳ᠋ᠦ᠍ ᠪᠡᠨ)᠂ ᠡᠢᠨᠬᠦ(ᠡᠨᠡ ᠬᠦ᠌) ᠤᠯᠤᠰ ᠲᠠᠢ ᠭᠡᠷᠡ ᠦᠢᠯᠡᠳᠬᠦ ᠳ᠋ᠦ᠍ ᠶᠡᠷᠦ ᠬᠠᠷᠰᠢᠯᠠᠬᠤ ᠰᠢᠯᠲᠠᠭᠠᠨ ᠦᠭᠡᠢ᠃ ᠤᠯᠤᠰ ᠤ᠋ᠨ ᠶᠡᠷᠦᠩᠬᠡᠢ ᠳ᠋ᠦ᠍ ᠲᠥᠯᠭᠡ ᠶ᠋ᠢᠨ ᠵᠢᠭᠠᠪᠤᠷᠢ ᠳ᠋ᠤ᠌ ᠪᠠᠭᠤᠭᠰᠠᠨ ᠨᠢ᠂ ᠦᠯᠢᠭᠡᠷᠯᠡᠪᠡᠰᠦ᠂ ᠴᠠᠰᠤᠲᠤ ᠠᠭᠤᠯᠠ ᠶ᠋ᠢᠨ ᠴᠠᠭᠠᠨ ᠠᠷᠰᠯᠠᠨ ᠣᠢ ᠳ᠋ᠤ᠌ ᠡᠷᠬᠡᠰᠢᠭᠰᠡᠨ ᠪᠠ ᠬᠠᠨ ᠭᠠᠷᠤᠳᠢ ᠵᠢᠭᠦᠷ ᠢ᠋ ᠲᠡᠯᠡᠵᠦ(ᠳᠡᠯᠢᠵᠦ) ᠠᠭᠠᠷ ᠲᠤ᠌ ᠬᠠᠯᠢᠭᠰᠠᠨ ᠠᠳᠠᠯᠢ ᠬᠦᠴᠦᠨ ᠲᠡᠭᠦᠯᠳᠡᠷ ᠢ᠋ᠶ᠋ᠡᠷ ᠪᠦᠷᠢᠳᠴᠦ᠂ ᠬᠡᠨ ᠴᠦ᠍ ᠬᠠᠯᠬᠠᠯᠠᠨ ᠴᠢᠳᠠᠬᠤ ᠦᠭᠡᠢ ᠭᠡᠰᠡᠨ ᠪᠣᠯᠠᠢ ᠭᠡᠵᠦ ᠬᠠᠷᠢᠭᠤ ᠬᠡᠯᠡᠵᠡᠢ᠃
ᠲᠥᠯᠭᠡᠴᠢ ᠵᠢᠷᠤᠬᠠᠢᠴᠢ ᠨᠠᠷ ᠤ᠋ᠨ ᠲᠡᠷᠡ ᠬᠠᠷᠢᠭᠤ ᠶ᠋ᠢ ᠣᠯᠵᠤ ᠠᠪᠤᠭᠠᠳ᠂ ᠬᠠᠭᠠᠨ ᠭᠦᠨ ᠪᠣᠳᠣᠯᠭᠠ ᠪᠣᠯᠵᠤ᠂ ᠬᠡᠷᠬᠢᠬᠦ ᠶ᠋ᠢ ᠪᠢᠰᠢᠯᠭᠠᠨ ᠰᠠᠭᠤᠭᠰᠠᠭᠠᠷ ᠰᠥᠨᠢ ᠳᠦᠯᠢ ᠶ᠋ᠢᠨ ᠦᠶᠡᠰ ᠰᠠᠢ᠍ᠢ (ᠰᠠᠶᠢ) ᠲᠡᠷᠡ ᠵᠠᠬᠢᠳᠠᠯ ᠳ᠋ᠤ᠌ ᠮᠣᠳᠣᠷ ᠤ᠋ᠨ ᠲᠡᠮᠳᠡᠭ ᠳᠠᠷᠤᠪᠠ᠃ *
ᠮᠢᠨᠦ ᠪᠣᠳᠣᠬᠤ ᠳ᠋ᠤ᠌᠂ ᠬᠠᠭᠠᠨ᠂ ᠲᠡᠷᠡᠬᠦ(ᠲᠡᠷᠡ ᠬᠦ᠌) ᠤᠯᠠᠭᠠᠨ ᠣᠷᠣᠰ ᠲᠤ᠌ ᠶᠠᠪᠤᠭᠤᠯᠬᠤ ᠵᠠᠬᠢᠳᠠᠯ ᠢ᠋ ᠲᠡᠳᠦᠢ ᠯᠡ ᠴᠢᠬᠤᠯᠠ ᠳ᠋ᠤ᠌ ᠦᠵᠡᠭᠰᠡᠨ ᠦᠭᠡᠢ᠂ ᠨᠥᠭᠦᠭᠡ ᠬᠣᠶᠠᠷ ᠪᠢᠴᠢᠭ ᠢ᠋ ᠯᠠᠪ ᠬᠡᠷᠡᠭ ᠪᠦᠲᠦᠭᠡᠵᠦ ᠥᠭᠬᠦ ᠪᠠᠢᠬᠤ ᠭᠡᠵᠦ ᠪᠣᠳᠣᠭᠰᠠᠨ ᠪᠣᠯᠤᠯᠲᠠᠢ᠃ ᠲᠡᠷᠡ ᠬᠠᠮᠤᠭ ᠤ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠵᠠᠬᠢᠶᠠ ᠶ᠋ᠢ ᠱᠠᠪᠢ ᠶ᠋ᠢᠨ ᠵᠠᠢᠰᠠᠩ ᠵᠠᠮᠢᠶᠠᠨ ᠥᠪᠡᠷ ᠢ᠋ᠶ᠋ᠡᠨ ᠵᠣᠬᠢᠶᠠᠵᠤ ᠪᠢᠴᠢᠭᠰᠡᠨ ᠢ᠋ ᠪᠣᠭᠳᠠ ᠬᠠᠭᠠᠨ᠂ ᠮᠣᠳᠣᠷ ᠤ᠋ᠨ ᠲᠡᠮᠳᠡᠭ ᠳᠠᠷᠤᠵᠤ ᠪᠠᠲᠤᠯᠠᠬᠤ ᠳ᠋ᠠᠭᠠᠨ(ᠳ᠋ᠤ᠌ ᠪᠠᠨ)᠂ ᠭᠠᠭᠴᠠ ᠬᠦ᠌ ᠵᠠᠮᠢᠶᠠᠨ ᠤ᠋ ᠵᠠᠬᠢᠳᠠᠯ ᠤ᠋ᠨ ᠲᠥᠯᠥᠭᠡ ᠬᠦᠴᠦᠯᠡᠨ ᠭᠤᠶᠤᠭᠰᠠᠨ ᠳᠦᠢᠩᠭᠡᠷ ᠦ᠋ᠨ ᠳᠡ ᠯᠠᠮᠠ ᠫᠤᠩᠴᠤᠭᠳᠣᠷᠵᠢ ᠶ᠋ᠢᠨ ᠨᠢᠭᠤᠷ ᠢ᠋ ᠪᠣᠳᠣᠭᠰᠠᠨ ᠪᠣᠯᠤᠯᠲᠠᠢ᠃ ᠲᠡᠮᠳᠡᠭ ᠳᠠᠷᠤᠬᠤ ᠦᠭᠡᠢ ᠭᠡᠬᠦ ᠳ᠋ᠦ᠍᠂ ᠳᠡ ᠯᠠᠮᠠ᠂ ᠪᠣᠭᠳᠠ ᠶ᠋ᠢ ᠨᠥᠭᠦᠭᠡ ᠬᠣᠶᠠᠷ ᠵᠠᠬᠢᠳᠠᠯ ᠳ᠋ᠤ᠌ ᠲᠡᠮᠳᠡᠭ ᠳᠠᠷᠤᠭᠰᠠᠨ ᠢ᠋ ᠦᠵᠡᠭᠰᠡᠨ ᠲᠤᠯᠠ᠂ ᠰᠢᠭᠤᠳ ᠦᠭᠡᠢ ᠭᠡᠵᠦ ᠠᠷᠠᠢ ᠪᠣᠯᠬᠤ ᠦᠭᠡᠢ ᠪᠠᠢᠵᠤ ᠳᠠ ᠭᠡᠵᠦ ᠲᠡᠷᠡ ᠯᠠᠮᠠ᠂ ᠥᠨᠥᠬᠢ ᠬᠡᠦᠬᠡᠨ ᠳ᠋ᠦ᠍ ᠲᠣᠳᠣᠨᠤᠯᠤᠨ ᠶᠠᠷᠢᠵᠠᠢ᠃
ᠭᠣᠣ ᠰᠧ ᠯᠢᠩ ᠲᠡᠷᠡ ᠮᠡᠳᠡᠭᠡ ᠶ᠋ᠢ ᠰᠣᠨᠣᠰᠤᠮᠠᠭᠴᠠ ᠠᠯᠠᠭᠠ ᠪᠠᠨ ᠢᠯᠢᠨ ᠪᠠᠶᠠᠷᠯᠠᠵᠤ᠂ ᠲᠡᠷᠡ ᠰᠠᠢᠬᠠᠨ ᠬᠡᠦᠬᠡᠨ ᠳ᠋ᠦ᠍ ᠶᠡᠬᠡ ᠱᠠᠩ ᠥᠭᠭᠦᠭᠡᠳ᠂ ᠥᠨᠥᠬᠢ ᠯᠠᠮᠠ ᠶ᠋ᠢ ᠡᠷᠬᠡᠨ ᠳ᠋ᠦ᠍ ᠪᠡᠨ ᠣᠷᠣᠭᠤᠯᠵᠤ᠂ ᠨᠢᠳᠦᠨ ᠪᠠᠯᠠᠢ ᠬᠠᠭᠠᠨ ᠤ᠋ ᠠᠯᠬᠤᠮ ᠪᠦᠷᠢ ᠶ᠋ᠢ ᠢᠩᠭᠢᠪᠡ ᠴᠢᠩᠭᠢᠪᠡ ᠭᠡᠵᠦ ᠮᠡᠳᠡᠭᠡᠯᠡᠬᠦ ᠥᠪᠡᠷ ᠦ᠋ᠨ ᠲᠠᠯᠠ ᠶ᠋ᠢᠨ ᠬᠥᠮᠦᠨ ᠪᠣᠯᠭᠠᠵᠠᠢ᠃ ᠲᠡᠭᠡᠭᠡᠳ ᠭᠤᠷᠪᠠᠨ ᠵᠠᠬᠢᠳᠠᠯ ᠶᠠᠪᠤᠭᠤᠯᠤᠭᠰᠠᠨ ᠭᠡᠵᠦ ᠥᠨᠥᠬᠢ ᠯᠠᠮᠠ ᠶ᠋ᠢᠨ ᠶᠠᠷᠢᠭᠰᠠᠨ ᠠ᠋ᠴᠠ ᠭᠠᠮᠢᠩ ᠭᠠᠭᠴᠠ ᠬᠦ᠌ ᠣᠷᠣᠰ ᠤᠯᠤᠰ ᠲᠤ᠌ ᠶᠠᠪᠤᠭᠤᠯᠤᠭᠰᠠᠨ ᠵᠠᠬᠢᠳᠠᠯ ᠠ᠋ᠴᠠ ᠠᠶᠤᠨ ᠡᠮᠢᠶᠡᠬᠦ ᠲᠤᠯᠠ᠂ ᠲᠡᠷᠡ ᠲᠤᠬᠠᠢ ᠮᠡᠳᠡᠭᠡ ᠪᠠᠢᠳᠠᠯ ᠢ᠋ ᠰᠠᠮ ᠵᠠᠩᠰᠢᠯᠠᠨ ᠲᠠᠩᠨᠠᠪᠠᠰᠤ᠂ ᠪᠣᠭᠳᠠ ᠬᠠᠭᠠᠨ ᠳ᠋ᠤ᠌ ᠲᠡᠷᠡ ᠵᠠᠬᠢᠳᠠᠯ ᠢ᠋ ᠦᠵᠡᠭᠦᠯᠬᠦ ᠶ᠋ᠢᠨ ᠡᠮᠦᠨᠡ ᠳᠡ ᠬᠦᠷᠢᠶᠡᠨ ᠡᠴᠡ ᠴᠣᠢᠪᠠᠯᠰᠠᠩ᠂ ᠣᠷᠣᠰ ᠲᠠᠢ ᠵᠠᠬᠠ ᠨᠡᠢᠯᠡᠭᠰᠡᠨ ᠬᠢᠵᠠᠭᠠᠷ ᠢ᠋ ᠰᠠᠢᠨ ᠮᠡᠳᠡᠬᠦ ᠨᠢᠭᠡᠨ ᠲᠦᠰᠢᠮᠡᠯ ᠳᠠᠭᠠᠭᠤᠯᠤᠨ᠂ ᠦᠯᠦ ᠮᠡᠳᠡᠭᠳᠡᠬᠦ ᠵᠦᠭ ᠰᠠᠮ ᠵᠠᠢᠯᠠᠨ ᠣᠳᠤᠭᠰᠠᠨ ᠮᠡᠳᠡᠭᠡ ᠢᠷᠡᠪᠡ᠃ ᠲᠡᠷᠡ ᠴᠣᠢᠪᠠᠯᠰᠠᠩ ᠭᠡᠳᠡᠭ ᠬᠥᠮᠦᠨ᠂ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠭᠠᠳᠠᠭᠠᠳᠤ ᠶᠠᠪᠤᠳᠠᠯ ᠤ᠋ᠨ ᠶᠠᠮᠤᠨ ᠤ᠋ ᠰᠠᠢᠳ ᠪᠥᠭᠡᠳ ᠰᠤᠷᠭᠠᠭᠤᠯᠢ ᠶ᠋ᠢᠨ ᠶᠠᠪᠤᠳᠠᠯ ᠢ᠋ ᠬᠠᠪᠰᠤᠷᠤᠨ ᠡᠷᠬᠡᠯᠡᠵᠦ ᠪᠠᠢᠭᠰᠠᠨ᠂ ᠮᠥᠨ ᠣᠷᠣᠰ ᠲᠤ᠌ ᠶᠡᠬᠡ ᠡᠯᠢᠭᠡ ᠲᠡᠢ ᠭᠡᠵᠦ ᠪᠠᠢᠭᠰᠠᠨ᠂ ᠬᠡᠳᠦᠢᠨ ᠨᠠᠰᠤᠨ ᠠ᠋ᠴᠠ ᠨᠥᠭᠴᠢᠭᠰᠡᠨ ᠬᠠᠨᠳᠠ ᠸᠠᠩ ᠤ᠋ᠨ ᠠᠯᠢ ᠲᠦᠷᠦᠭᠦᠨ ᠣᠷᠣᠰ ᠤᠯᠤᠰ ᠲᠤ᠌ ᠰᠢᠨᠡ ᠴᠠᠭ ᠤ᠋ᠨ ᠰᠤᠷᠭᠠᠭᠤᠯᠢ ᠬᠢᠬᠦ ᠭᠡᠵᠦ ᠶᠠᠪᠤᠭᠤᠯᠤᠭᠰᠠᠨ ᠬᠡᠳᠦᠨ ᠵᠠᠯᠠᠭᠤᠴᠤᠳ ᠤ᠋ᠨ ᠨᠢᠭᠡ ᠨᠢ ᠪᠠᠢᠵᠠᠢ᠃ ᠣᠷᠣᠰ ᠤᠯᠤᠰ ᠲᠤ᠌ ᠣᠺᠲ᠋ᠤᠪᠧᠷ ᠦ᠋ᠨ ᠬᠤᠪᠢᠰᠬᠠᠯ ᠭᠠᠷᠤᠮᠠᠭᠴᠠ᠂ ᠬᠦᠷᠢᠶᠡᠨ ᠦ᠌ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠲᠡᠷᠡ ᠬᠡᠳᠦᠨ ᠰᠤᠷᠤᠭᠴᠢᠳ ᠢ᠋ ᠣᠯᠠᠨᠠ ᠡᠷᠭᠦᠭᠳᠡᠭᠰᠡᠨ ᠦ᠌ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠲᠤ᠌ ᠬᠣᠣᠷᠲᠠᠢ᠂ ᠦᠯᠦ ᠵᠣᠬᠢᠬᠤ ᠰᠠᠨᠠᠭᠠ ᠰᠤᠷᠲᠠᠯ ᠲᠠᠢ ᠪᠣᠯᠭᠤᠵᠢᠨ ᠭᠡᠵᠦ ᠬᠡᠳᠦᠢᠨ ᠠᠶᠤᠨ ᠪᠣᠯᠭᠣᠮᠵᠢᠯᠠᠵᠤ᠂ ᠴᠣᠢᠪᠠᠯᠰᠠᠩ ᠢ᠋ ᠪᠤᠰᠤᠳ ᠰᠤᠷᠤᠭᠴᠢ ᠨᠥᠬᠥᠳ ᠦ᠋ᠨ ᠬᠠᠮᠲᠤᠪᠠᠷ ᠬᠦᠷᠢᠶᠡᠨᠡ ᠲᠡᠳᠡᠨ ᠪᠤᠴᠠᠭᠠᠭᠰᠠᠨ ᠪᠠᠢᠵᠠᠢ᠃
ᠨᠢᠭᠲᠠᠯᠠᠨ ᠨᠠᠷᠢᠪᠴᠢᠯᠠᠪᠠᠯ᠂ ᠪᠠᠭᠠ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠵᠠᠮᠢᠶᠠᠨ ᠢ᠋ᠶ᠋ᠠᠷ ᠮᠣᠩᠭᠣᠯ ᠦᠰᠦᠭ ᠪᠢᠴᠢᠭ ᠵᠢᠭᠠᠯᠭᠠᠵᠤ᠂ ᠪᠠᠭᠰᠢ ᠱᠠᠪᠢ ᠭᠡᠵᠦ ᠶᠠᠪᠤᠭᠰᠠᠨ ᠪᠥᠭᠡᠳ ᠬᠣᠵᠢᠮ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠳᠠᠢᠴᠢᠨ ᠳᠠᠷᠤᠭᠠ ᠨᠠᠷ ᠤ᠋ᠨ ᠨᠢᠭᠡ ᠨᠢ ᠪᠣᠯᠵᠤ᠂ ᠠᠦ᠋ᠲ᠋ᠣᠨᠣᠮᠢ ᠶ᠋ᠢᠨ ᠦᠶᠡᠰ ᠴᠡᠷᠢᠭ ᠦ᠋ᠨ ᠭᠠᠪᠢᠶᠠ ᠪᠠᠢᠭᠤᠯᠵᠤ ᠠᠷᠠᠳ ᠣᠯᠠᠨ ᠳ᠋ᠤ᠌ ᠬᠦᠨᠳᠦᠲᠡᠢ ᠪᠠᠭᠠᠲᠤᠷ ᠴᠣᠯᠠ ᠪᠠᠷ ᠱᠠᠩᠨᠠᠭᠤᠯᠤᠭᠰᠠᠨ ᠰᠦᠬᠡ ᠭᠡᠳᠡᠭ ᠬᠥᠮᠦᠨ᠂ ᠪᠣᠭᠳᠠ ᠬᠠᠭᠠᠨ ᠢ᠋ ᠣᠷᠣᠰ ᠤᠯᠤᠰ ᠠ᠋ᠴᠠ ᠲᠤᠰᠠᠯᠠᠮᠵᠢ ᠭᠤᠶᠤᠬᠤ ᠪᠢᠴᠢᠭ ᠲᠦ᠍ ᠮᠣᠳᠣᠷ ᠤ᠋ᠨ ᠲᠡᠮᠳᠡᠭ ᠳᠠᠷᠤᠭᠰᠠᠨ ᠤ᠋ ᠳᠠᠷᠠᠭᠠ ᠬᠡᠳᠦᠨ ᠨᠥᠬᠥᠳ ᠦ᠋ᠨ ᠬᠠᠮᠲᠤ ᠰᠠᠮ ᠠᠯᠠᠭᠠ ᠪᠣᠯᠤᠭᠰᠠᠨ ᠪᠠᠢᠪᠠ᠃
ᠡᠯᠡ ᠮᠡᠳᠡᠭᠡ ᠣᠯᠵᠤ ᠰᠣᠨᠣᠰᠤᠭᠠᠳ᠂ ᠭᠣᠣ ᠰᠧ ᠯᠢᠩ᠂ ᠬᠠᠮᠢᠶᠠᠷᠤᠭᠰᠠᠨ ᠰᠠᠢᠳ ᠰᠠᠮᠪᠤᠤ ᠭᠡᠳᠡᠭ ᠬᠠᠷᠠᠴᠢᠨ ᠮᠣᠩᠭᠣᠯ ᠲᠠᠢ ᠨᠡᠯᠢᠶᠡᠳ ᠰᠢᠷᠦᠭᠦᠨ ᠢ᠋ᠶ᠋ᠡᠷ ᠠᠪᠤᠯᠴᠠᠨ ᠲᠤᠯᠵᠤ᠂ ᠭᠠᠵᠠᠷ ᠣᠷᠣᠨ ᠤ᠋ ᠪᠠᠢᠳᠠᠯ᠂ ᠬᠥᠮᠦᠨ ᠠᠮᠢᠲᠠᠨ ᠤ᠋ ᠵᠠᠩ ᠰᠤᠷᠲᠠᠯ ᠢ᠋ ᠮᠡᠳᠡᠨᠡ ᠭᠡᠵᠦ ᠲᠠᠨ ᠤ᠋ ᠭᠠᠢᠬᠠᠭᠤᠯᠳᠠᠭ ᠲᠠᠨᠢ ᠠᠯᠢ ᠪᠣᠢ? ᠮᠠᠯᠠᠭᠠᠢ ᠳᠡᠭᠡᠷᠡ ᠪᠡᠨ ᠨᠣᠶᠠᠳ ᠤ᠋ᠨ ᠵᠢᠩᠰᠡ ᠵᠡᠭᠦᠭᠰᠡᠨ ᠳᠡᠪᠡᠯ ᠦ᠋ᠨ ᠡᠯᠭᠦᠭᠦᠷ ᠦ᠋ᠳ ᠦ᠋ᠨ ᠬᠣᠢᠨᠠ ᠠ᠋ᠴᠠ ᠲᠠᠨ ᠤ᠋ ᠬᠥᠭᠡᠭᠡᠴᠡᠯᠳᠦᠵᠦ ᠪᠠᠢᠬᠤ ᠳ᠋ᠤ᠌᠂ ᠪᠢᠳᠡᠨ ᠦ᠌ ᠣᠭᠲᠣ ᠮᠡᠳᠡᠵᠦ ᠴᠢᠳᠠᠭᠠ ᠦᠭᠡᠢ ᠡᠳᠦᠢ ᠲᠡᠳᠦᠢ ᠬᠡᠷᠡᠭ ᠶᠠᠪᠤᠳᠠᠯ ᠡᠨᠳᠡ ᠢᠩᠭᠢᠵᠦ ᠭᠠᠷᠴᠤ ᠪᠠᠢᠭᠰᠠᠨ ᠪᠠᠢᠨᠠ᠃ ᠲᠠᠨ ᠢ᠋ ᠪᠢᠳᠡᠨ ᠳ᠋ᠦ᠍ ᠠᠷᠤ ᠮᠣᠩᠭᠣᠯ ᠤ᠋ᠨ ᠨᠠᠶᠠᠨ ᠨᠢᠭᠡᠨ ᠰᠢᠳᠢᠲᠡᠨ ᠬᠤᠲᠤᠭᠲᠤ ᠯᠠᠮᠠ ᠨᠠᠷ ᠤ᠋ᠨ ᠰᠡᠳᠬᠢᠯ ᠰᠠᠨᠠᠭᠠ ᠶ᠋ᠢ ᠳᠠᠭᠠᠭᠤᠯᠪᠠᠯ᠂ ᠣᠯᠠᠨ ᠤ᠋ ᠰᠡᠳᠬᠢᠯ ᠢ᠋ ᠣᠯᠵᠤ ᠪᠣᠯᠤᠨᠠ ᠭᠡᠵᠦ ᠦᠯᠢᠭᠡᠷ ᠰᠢᠭ ᠶᠠᠭᠤᠮᠠ ᠳᠣᠩᠭᠣᠰᠴᠤ ᠪᠠᠢᠬᠤ ᠵᠠᠪᠰᠠᠷ ᠰᠦᠬᠡᠪᠠᠭᠠᠲᠤᠷ ᠴᠣᠢᠪᠠᠯᠰᠠᠩ ᠭᠡᠳᠡᠭ ᠬᠣᠶᠠᠷ ᠮᠠᠰᠢ ᠠᠶᠤᠯᠲᠠᠢ ᠬᠥᠮᠦᠨ ᠢ᠋ ᠪᠢᠳᠡ ᠮᠠᠲᠠᠯ ᠦᠭᠡᠢ ᠪᠠᠢᠭᠰᠠᠭᠠᠷ ᠠᠯᠳᠠᠭᠤᠯᠪᠠ᠃ ᠮᠤᠩᠬᠠᠭ ᠨᠣᠶᠠᠳ ᠠ᠋ᠴᠠ ᠠᠶᠤᠬᠤ ᠬᠡᠷᠡᠭ ᠪᠢᠰᠢ᠂ ᠠᠷᠠᠳ ᠣᠯᠠᠨ ᠠ᠋ᠴᠠ ᠪᠢᠳᠡ ᠠᠶᠤᠨ ᠪᠣᠯᠭᠣᠮᠵᠢᠯᠠᠬᠤ ᠶᠣᠰᠣᠲᠠᠢ ᠪᠠᠢᠵᠠᠢ᠃ ᠲᠡᠷᠡ ᠬᠣᠶᠠᠷ ᠬᠥᠮᠦᠨ᠂ ᠴᠣᠬᠣᠮ ᠬᠦ᠌ ᠠᠷᠠᠳ ᠤ᠋ᠨ ᠳᠤᠮᠳᠠ ᠠ᠋ᠴᠠ ᠭᠠᠷᠤᠭᠰᠠᠨ ᠪᠥᠭᠡᠳ ᠲᠠᠨ ᠤ᠋ ᠨᠠᠶᠠᠨ ᠨᠢᠭᠡᠨ ᠰᠢᠳᠢᠲᠡᠨ ᠦ᠌ ᠵᠡᠭᠦᠳᠦᠨ ᠳ᠋ᠦ᠍ᠨᠢ (ᠳ᠋ᠦ᠍ ᠨᠢ)ᠣᠷᠣᠭᠠ ᠦᠭᠡᠢ ᠰᠢᠳᠢ ᠶ᠋ᠢ ᠪᠢᠳᠡᠨ ᠳ᠋ᠦ᠍ ᠦᠵᠡᠭᠦᠯᠵᠦ᠂ ᠲᠦᠮᠡ ᠲᠦᠮᠡᠨ ᠮᠢᠩᠭᠠᠨ ᠲᠡᠰᠢ(ᠲᠡᠢᠰᠢ)ᠲᠠᠲᠠᠨᠠ ᠰᠢᠦ᠃ ᠲᠡᠢᠨ ᠳ᠋ᠦ᠍ ᠶᠠᠪᠤᠭᠰᠠᠨ᠂ ᠶᠡᠬᠡ ᠲᠤᠷᠰᠢᠯᠭᠠ ᠲᠠᠢ᠂ ᠬᠠᠰᠢᠷ᠂ ᠳᠠᠢᠴᠢᠨ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ ᠰᠦᠬᠡᠪᠠᠭᠠᠲᠤᠷ᠂ ᠨᠠᠰᠤ ᠵᠠᠯᠠᠭᠤ᠂ ᠧᠦ᠋ᠷᠣᠫᠠ ᠶ᠋ᠢᠨ ᠪᠣᠯᠪᠠᠰᠤᠷᠠᠯ ᠲᠠᠢ᠂ ᠠᠷᠠᠳ ᠤ᠋ᠨ ᠡᠷᠬᠡᠲᠦ ᠦᠵᠡᠯᠲᠡᠨ ᠴᠣᠢᠪᠠᠯᠰᠠᠩ᠂ ᠲᠡᠢᠮᠦ ᠠ᠋᠂ ᠲᠡᠷᠡ ᠬᠥᠮᠦᠨ ᠵᠠᠪᠠᠯ ᠠᠷᠠᠳ ᠤ᠋ᠨ ᠡᠷᠬᠡᠲᠦ ᠦᠵᠡᠯᠲᠡᠢ ᠪᠥᠭᠡᠳ ᠤᠯᠠᠭᠠᠨ ᠤ᠋ ᠰᠤᠷᠲᠠᠯ ᠲᠠᠢ ᠬᠥᠮᠦᠨ ᠪᠠᠢᠬᠤ ᠶᠣᠰᠣᠲᠠᠢ᠃ ᠲᠡᠷᠡ ᠬᠣᠶᠠᠷ ᠬᠥᠮᠦᠨ ᠪᠢᠳᠡᠨ ᠳ᠋ᠦ᠍᠂ ᠲᠠᠨ ᠤ᠋ ᠬᠠᠮᠤᠭ ᠨᠣᠶᠠᠳ ᠰᠢᠳᠢᠲᠡᠨ ᠲᠡᠢ ᠵᠠᠭᠤᠨ ᠰᠣᠬᠣᠷ ᠪᠣᠭᠳᠠ ᠠ᠋ᠴᠠ ᠢᠯᠡᠭᠦᠦ ᠠᠶᠤᠯᠲᠠᠢ ᠠᠵᠢ᠃ ᠪᠢᠳᠡ ᠲᠡᠷᠡ ᠬᠣᠶᠠᠷ ᠢ᠋ ᠨᠢᠭᠡ ᠪᠣᠯ ᠪᠡᠶᠡ ᠳ᠋ᠦ᠍ ᠪᠡᠨ ᠲᠠᠲᠠᠵᠤ᠂ ᠡᠷᠬᠡᠨ ᠳ᠋ᠦ᠍ ᠪᠡᠨ ᠣᠷᠣᠭᠤᠯᠵᠤ ᠠᠪᠬᠤ᠂ ᠨᠢᠭᠡ ᠪᠣᠯ ᠬᠢᠳᠤᠨ ᠰᠥᠨᠥᠭᠡᠵᠦ᠂ ᠦᠭᠡᠢ ᠬᠢᠬᠦ ᠶᠣᠰᠣᠲᠠᠢ ᠪᠢᠯᠡ! ᠭᠡᠬᠦ ᠳ᠋ᠦ᠍ ᠨᠢ ᠰᠠᠮᠪᠤᠤ ᠥᠭᠦᠯᠡᠷᠦᠨ᠂
— ᠭᠡᠮ ᠨᠢ ᠤᠷᠢᠳ ᠢ᠋ᠶ᠋ᠠᠨ᠂ ᠭᠡᠮᠰᠢᠯ ᠨᠢ ᠬᠣᠢᠨᠠ ᠪᠠᠨ ᠭᠡᠳᠡᠭ ᠪᠢᠯᠡ᠃ ᠮᠠᠨ ᠤ᠋ ᠮᠣᠩᠭᠣᠯ ᠤ᠋ᠨ ᠬᠠᠭᠤᠴᠢᠨ ᠦᠭᠡᠨ ᠳ᠋ᠦ᠍᠂ ᠲᠠ ᠴᠦ᠍ ᠥᠪᠡᠷ ᠢ᠋ᠶ᠋ᠡᠨ ᠮᠣᠩᠭᠣᠯ ᠣᠯᠠᠨ ᠢ᠋ ᠨᠢᠭᠡᠨ ᠰᠦᠷᠦᠭ ᠡᠪᠡᠷ ᠦᠭᠡᠢ ᠦᠬᠡᠷ᠃ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠰᠠᠨᠠᠭᠠ ᠵᠣᠪᠠᠬᠤ ᠬᠡᠷᠡᠭ ᠦᠭᠡᠢ᠃ ᠭᠠᠭᠴᠠ ᠬᠦ᠌ ᠦᠬᠡᠷᠴᠢᠨ ᠦ᠌ ᠬᠣᠢᠨᠠ ᠠ᠋ᠴᠠ ᠬᠠᠷᠠᠵᠤ ᠪᠠᠢᠪᠠᠯ ᠵᠣᠬᠢᠨᠠ ᠭᠡᠵᠦ ᠬᠡᠯᠡᠳᠡᠭ ᠪᠠᠢᠭᠰᠠᠨ ᠪᠢᠰᠢ ᠪᠢᠯᠢᠤ(ᠪᠢᠯᠡ ᠤᠤ)? ᠣᠳᠣ ᠪᠢᠳᠡ᠂ ᠥᠩᠭᠡᠷᠡᠭᠰᠡᠨ ᠬᠡᠷᠡᠭ ᠢ᠋ ᠨᠡᠬᠡᠵᠦ᠂ ᠴᠢᠨᠦ ᠮᠢᠨᠦ ᠪᠤᠷᠤᠭᠤ ᠭᠡᠵᠦ ᠬᠡᠯᠡᠯᠴᠡᠭᠰᠡᠨ ᠦ᠌ ᠲᠤᠰᠠ ᠠᠯᠠᠭᠠ᠃ ᠬᠠᠷᠢᠨ᠂ ᠲᠡᠷᠡ ᠨᠢᠭᠡᠨ ᠴᠠᠭ ᠤ᠋ᠨ ᠡᠨᠳᠡᠭᠳᠡᠯ ᠢ᠋ ᠬᠡᠷᠬᠢᠨ ᠵᠠᠯᠠᠷᠠᠭᠤᠯᠬᠤ ᠠᠷᠭᠠ ᠰᠦᠪᠡ ᠣᠯᠬᠤ ᠨᠢ ᠴᠢᠬᠤᠯᠠ ᠪᠣᠯᠵᠠᠢ ᠭᠡᠪᠡ᠃
ᠲᠡᠭᠡᠭᠡᠳ᠂《ᠪᠠᠷᠠᠭᠤᠨ ᠬᠣᠢᠲᠤ ᠬᠢᠵᠠᠭᠠᠷ ᠤ᠋ᠨ ᠬᠡᠷᠡᠭ ᠢ᠋ ᠪᠤᠳᠤᠭᠤᠯᠤᠨ ᠰᠢᠢᠳᠬᠡᠬᠦ ᠶᠠᠮᠤᠨ》 ᠭᠡᠭᠴᠢ ᠡᠴᠡ ᠲᠤᠰᠬᠠᠢᠯᠠᠨ ᠵᠠᠷᠯᠠᠵᠤ᠂ ᠤᠯᠤᠰ ᠲᠥᠷᠥ ᠳ᠋ᠦ᠍ ᠰᠠᠮᠠᠭᠤᠨ ᠥᠳᠥᠭᠥᠯᠬᠦ ᠶ᠋ᠢ ᠵᠠᠪᠳᠤᠨ ᠪᠣᠢ ᠠᠶᠤᠯ ᠲᠠᠢ ᠲᠡᠷᠰᠯᠡᠭᠦᠦ ᠰᠦᠬᠡᠪᠠᠭᠠᠲᠤᠷ ᠴᠣᠢᠪᠠᠯᠰᠠᠩ ᠨᠠᠷ ᠤ᠋ᠨ ᠪᠠᠢᠭᠠ ᠭᠠᠵᠠᠷ ᠢ᠋ ᠵᠢᠭᠠᠵᠤ ᠥᠭᠭᠦᠭᠰᠡᠨ ᠪᠤᠶᠤ ᠪᠠᠷᠢᠵᠤ ᠦᠭᠭᠦᠭᠰᠡᠨ ᠬᠥᠮᠦᠨ ᠳ᠋ᠦ᠍᠂ ᠲᠡᠷᠡ ᠲᠡᠷᠰᠯᠡᠭᠦᠦ ᠡᠲᠡᠭᠡᠳ ᠲᠤᠰ ᠪᠦᠷᠢ ᠶ᠋ᠢᠨ ᠨᠢᠭᠡᠨ ᠮᠢᠩᠭᠠᠨ ᠶᠠᠩᠴᠢᠶᠠᠨ ᠤ᠋ ᠱᠠᠩ ᠣᠯᠭᠣᠨᠠ ᠭᠡᠵᠦ ᠵᠠᠷᠯᠠᠵᠠᠢ᠃
ᠣᠷᠳᠣᠨ ᠳ᠋ᠤ᠌ ᠬᠢ ᠵᠠᠩᠰᠢᠯᠠᠨ ᠲᠠᠩᠨᠠᠬᠤ ᠬᠥᠮᠦᠨ ᠦ᠌ ᠮᠡᠳᠡᠭᠡᠨ ᠳ᠋ᠦ᠍᠂ ᠪᠣᠭᠳᠠ ᠬᠠᠭᠠᠨ ᠲᠡᠷᠡ ᠵᠠᠷᠯᠠᠯ ᠢ᠋ ᠦᠵᠡᠭᠡᠳ ᠶᠡᠬᠡ ᠯᠡ ᠬᠢᠷᠳ᠋ᠬᠢᠨ ᠰᠣᠴᠢᠵᠤ᠂ ᠤᠷᠢᠳᠤ᠂ ᠵᠠᠬᠢᠳᠠᠯ ᠳ᠋ᠤ᠌ ᠲᠡᠮᠳᠡᠭ ᠳᠠᠷᠤᠭᠰᠠᠨ ᠤ᠋ ᠬᠣᠯᠪᠣᠭᠳᠠᠯ ᠠ᠋ᠴᠠ ᠠᠶᠤᠭᠠᠳ᠂ ᠰᠢᠳᠠᠷ ᠯᠠᠮᠠ ᠪᠠᠷ ᠰᠠᠮ ᠤᠯᠠᠮᠵᠢᠯᠠᠨ᠂ ᠶᠡᠬᠡ ᠬᠦᠷᠢᠶᠡᠨ ᠦ᠌ ᠭᠠᠨᠳᠠᠩᠳᠡᠭᠴᠢᠩᠯᠢᠩ ᠦ᠋ᠨ ᠯᠠᠮᠠ ᠨᠠᠷ ᠲᠤ᠌ ᠨᠢᠭᠤᠴᠠ ᠵᠠᠷᠯᠢᠭ ᠯᠦᠩᠳᠦ᠋ᠩ ᠪᠠᠭᠤᠯᠭᠠᠵᠤ᠂ ᠤᠯᠤᠰ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠲᠦ᠍ ᠠᠶᠤᠯ ᠵᠣᠪᠠᠯᠠᠩ᠂ ᠭᠠᠢ ᠲᠣᠳᠬᠠᠷ ᠢ᠋ ᠠᠷᠢᠯᠭᠠᠬᠤ ᠭᠦᠷᠢᠮ ᠬᠢᠯᠭᠡᠬᠦ ᠭᠡᠵᠦ ᠠᠷᠭᠠ ᠰᠠᠮᠪᠠᠭᠠ ᠡᠷᠢᠵᠦ ᠪᠠᠢᠭᠠ ᠶ᠋ᠢ ᠮᠡᠳᠡᠭᠡᠯᠡᠵᠢ᠃ ᠭᠠᠢ ᠲᠣᠳᠬᠠᠷ ᠢ᠋ ᠳᠠᠷᠤᠨ ᠰᠥᠨᠥᠭᠡᠵᠦ᠂ ᠮᠠᠭᠤ ᠵᠦᠭ ᠦ᠋ᠨ ᠬᠣᠣᠷᠯᠠᠯ ᠢ᠋ ᠠᠷᠢᠯᠭᠠᠬᠤ ᠲᠡᠷᠡ ᠭᠦᠷᠢᠮ ᠢ᠋ ᠴᠠᠭᠠᠨ ᠪᠡᠴᠢᠨ ᠵᠢᠯ ᠦ᠋ᠨ(1920 ᠣᠨ ᠤ᠋) ᠨᠠᠮᠤᠷ ᠤ᠋ᠨ ᠲᠡᠷᠢᠭᠦᠨ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠶᠢᠰᠦᠨ ᠦ᠌ ᠰᠥᠨᠢ ᠭᠠᠷᠭᠠᠬᠤ ᠪᠠᠷ ᠲᠣᠭᠲᠠᠵᠠᠢ᠃ ᠵᠠᠩᠰᠢᠯᠠᠨ ᠲᠠᠩᠨᠠᠬᠤ ᠬᠥᠮᠦᠨ ᠦ᠌ ᠮᠡᠳᠡᠭᠡ ᠶ᠋ᠢ ᠦᠵᠡᠪᠡᠯ᠂ ᠨᠢᠭᠤᠴᠠ ᠴᠠᠭᠳᠠᠨ ᠰᠡᠷᠭᠡᠢᠯᠡᠬᠦ ᠳ᠋ᠦ᠍ ᠰᠡᠷᠡᠭᠳᠡᠨ ᠪᠠᠢᠭᠠ ᠵᠠᠮᠢᠶᠠᠨ᠂ ᠮᠠᠩᠯᠠᠢ ᠸᠠᠩ ᠳᠠᠮᠳᠢᠨᠰᠦ᠋ᠷᠦᠩ᠂ ᠬᠠᠳᠠᠨ ᠪᠠᠭᠠᠲᠤᠷ ᠮᠠᠭᠰᠤᠷᠵᠠᠪ ᠨᠠᠷ ᠤ᠋ᠨ ᠵᠡᠷᠭᠡ ᠬᠥᠮᠦᠰ ᠢ᠋ ᠬᠠᠭᠠᠨ᠂ ᠰᠥᠨᠢ ᠲᠡᠷᠡ ᠭᠦᠷᠢᠮ ᠢ᠋ ᠭᠠᠷᠭᠠᠬᠤ ᠳ᠋ᠤ᠌ ᠬᠦᠷᠦᠯᠴᠡᠨ ᠢᠷᠡᠵᠦ᠂ ᠤᠯᠤᠰ ᠲᠥᠷᠥ ᠶ᠋ᠢᠨ ᠤᠴᠢᠷ ᠬᠢᠴᠢᠶᠡᠨ ᠵᠠᠯᠪᠠᠷᠢᠭᠲᠤᠨ ᠭᠡᠵᠦ ᠨᠢᠭᠤᠴᠠ ᠵᠠᠷᠯᠢᠭ ᠢ᠋ ᠪᠠᠭᠤᠯᠭᠠᠭᠰᠠᠨ ᠭᠡᠨᠡ᠃
ᠲᠡᠷᠡ ᠬᠣᠷᠢᠨ ᠶᠢᠰᠦᠨ ᠦ᠌ ᠰᠥᠨᠢ᠂ ᠥᠨᠥᠬᠢ ᠭᠠᠢ ᠲᠣᠳᠬᠠᠷ ᠢ᠋ ᠠᠷᠢᠯᠭᠠᠬᠤ ᠭᠦᠷᠢᠮ ᠢ᠋ ᠭᠠᠨᠳᠠᠩ ᠠ᠋ᠴᠠ ᠪᠠᠷᠠᠭᠤᠨ ᠤᠷᠤᠭᠰᠢ ᠭᠠᠷᠭᠠᠵᠤ᠂ ᠮᠠᠭᠤ ᠵᠦᠭ ᠦ᠋ᠨ ᠠᠳᠠ ᠲᠣᠳᠬᠠᠷ ᠢ᠋ ᠠᠶᠤᠯᠭᠠᠨ ᠰᠦᠷᠳᠡᠭᠦᠯᠬᠦ ᠶ᠋ᠢᠨ ᠤᠴᠢᠷ᠂ ᠬᠠᠭᠤᠴᠢᠨ《ᠶᠡᠬᠡ ᠵᠠᠩᠵᠤᠨ ᠫᠤᠤ》 ᠭᠡᠳᠡᠭ ᠴᠣᠯᠠ ᠲᠠᠢ ᠫᠤᠤ ᠶ᠋ᠢ ᠴᠠᠭᠠᠰᠤᠨ ᠰᠤᠮᠤ ᠪᠠᠷ ᠰᠤᠮᠤᠯᠠᠵᠤ ᠫᠤᠤᠳᠠᠭᠠᠳ᠂ ᠭᠦᠷᠢᠮ ᠦ᠋ᠨ ᠰᠡᠭᠦᠯ ᠢ᠋ᠶ᠋ᠡᠷ ᠲᠤᠤᠯᠠ ᠳ᠋ᠠᠬᠢ ᠪᠣᠭᠳᠠ ᠶ᠋ᠢᠨ ᠨᠣᠭᠣᠭᠠᠨ ᠣᠷᠳᠣᠨ ᠤ᠋ ᠡᠮᠦᠨᠡ ᠰᠠᠢᠨ ᠵᠦᠭ ᠦ᠋ᠨ ᠲᠡᠭᠷᠢ ᠨᠠᠷ ᠢ᠋ ᠲᠠᠬᠢᠭᠯᠠᠨ᠂ ᠭᠠᠯ ᠤ᠋ᠨ ᠨᠠᠭᠠᠳᠤᠮ ᠦᠢᠯᠡᠳᠴᠡᠢ᠃
ᠠᠶᠤᠨ ᠰᠠᠨᠳᠤᠷᠤᠭᠰᠠᠨ᠂ ᠮᠤᠬᠤᠷ ᠰᠦᠰᠦᠭᠲᠦ᠂ ᠨᠢᠳᠦᠨ ᠪᠠᠯᠠᠢ ᠬᠠᠭᠠᠨ ᠢ᠋ ᠭᠦᠷᠢᠮ ᠨᠣᠮ ᠬᠢᠯᠭᠡᠵᠦ᠂ ᠵᠣᠪᠠᠯᠠᠩ ᠬᠣᠯᠪᠣᠭᠳᠠᠯ ᠠ᠋ᠴᠠ ᠮᠤᠯᠲᠤᠷᠠᠬᠤ ᠠᠷᠭᠠ ᠰᠦᠪᠡᠭᠴᠢᠯᠡᠬᠦ ᠲᠡᠷᠡ ᠬᠣᠭᠣᠷᠣᠨᠳᠣ᠂ ᠭᠠᠮᠢᠩ ᠤ᠋ᠨ ᠨᠢᠭᠤᠴᠠ ᠴᠠᠭᠳᠠᠨ ᠰᠡᠷᠭᠡᠢᠯᠡᠬᠦ ᠡᠴᠡ ᠬᠤᠪᠢᠰᠬᠠᠯᠴᠢ ᠨᠠᠷ ᠤ᠋ᠨ ᠨᠢᠭᠤᠴᠠ ᠪᠠᠢᠭᠤᠯᠤᠯᠭᠠ ᠳ᠋ᠤ᠌ ᠬᠠᠮᠢᠶᠠᠲᠠᠢ ᠪᠤᠶᠤ ᠤᠯᠤᠰ ᠢ᠋ᠶ᠋ᠠᠨ ᠭᠡᠵᠦ ᠪᠣᠳᠣᠭᠴᠢ ᠡᠬᠡ ᠣᠷᠣᠨᠴᠢ ᠨᠠᠷ ᠲᠤ᠌ ᠡᠯᠢᠭᠡ ᠲᠡᠢ ᠭᠡᠵᠦ ᠬᠠᠷᠠᠳᠠᠨ ᠰᠡᠵᠢᠭᠯᠡᠵᠦ ᠪᠠᠢᠭᠰᠠᠨ ᠬᠥᠮᠦᠨ ᠢ᠋ ᠡᠳᠦᠢ ᠲᠡᠳᠦᠢ ᠪᠡᠷ ᠨᠢ ᠲᠡᠷᠡ ᠰᠥᠨᠢ ᠪᠠᠷᠢᠵᠠᠢ᠃
ᠨᠠᠰᠤᠨᠪᠠᠲᠤ᠂ ᠳᠣᠲᠣᠭᠠᠳᠤ ᠶᠠᠮᠤᠨ ᠠ᠋ᠴᠠ ᠬᠠᠯᠠᠭᠳᠠᠭᠰᠠᠨ ᠠ᠋ᠴᠠ ᠬᠣᠢᠰᠢ᠂ ᠮᠣᠳᠣᠴᠢ ᠳᠠᠷᠬᠠᠨ ᠤ᠋ ᠠᠵᠢᠯ ᠬᠢᠵᠦ ᠠᠵᠤ ᠲᠥᠷᠥᠵᠦ ᠪᠠᠢᠭᠰᠠᠨ ᠨᠢ ᠬᠠᠮᠤᠭ ᠤ᠋ᠨ ᠲᠡᠷᠢᠭᠦᠨ ᠳ᠋ᠦ᠍ ᠪᠠᠷᠢᠭᠳᠠᠨ᠂ ᠭᠢᠨᠳᠠᠨ ᠤ᠋ ᠢᠷᠣᠭᠠᠷ ᠲᠤ᠌ ᠴᠢᠬᠢᠭᠳᠡᠪᠡ᠃ ᠦᠮᠡᠬᠡᠢ ᠴᠢᠭᠢᠭ ᠲᠡᠢ ᠭᠢᠨᠳᠠᠨ ᠤ᠋ ᠲᠠᠰᠤᠯᠭᠠᠨ ᠳ᠋ᠤ᠌ ᠲᠦᠯᠬᠢᠭᠦᠯᠵᠦ ᠣᠷᠣᠭᠠᠳ᠂ ᠨᠠᠰᠤᠨᠪᠠᠲᠤ ᠲᠡᠷᠡ ᠮᠠᠭᠤᠬᠠᠢ ᠲᠠᠰᠤᠯᠭᠠᠨ ᠤ᠋ ᠪᠠᠢᠳᠠᠯ ᠢ᠋ ᠠᠵᠢᠵᠤ ᠦᠵᠡᠪᠡ᠃ ᠬᠠᠭᠠᠯᠭᠠᠨ ᠳᠡᠭᠡᠷᠡᠬᠢ ᠨᠦᠬᠡᠨ ᠳ᠋ᠦ᠍ ᠠᠰᠠᠵᠤ ᠪᠠᠢᠭᠰᠠᠨ ᠳ᠋ᠧᠩᠯᠦ ᠶ᠋ᠢᠨ ᠪᠦᠳᠡᠭᠢ ᠭᠡᠷᠡᠯ ᠳ᠋ᠦ᠍ ᠬᠠᠷᠠᠪᠠᠰᠤ᠂ ᠮᠠᠭᠤᠬᠠᠢ ᠱᠠᠯ ᠤ᠋ᠨ(ᠱᠠᠯᠠᠨ) ᠳᠡᠭᠡᠷᠡ ᠭᠬᠢᠷ ᠲᠠᠭ ᠪᠣᠯᠤᠭᠰᠠᠨ ᠨᠢᠮᠭᠡᠨ ᠭᠡᠭᠴᠢ ᠶ᠋ᠢᠨ ᠬᠣᠶᠠᠷ ᠳᠡᠪᠢᠰᠬᠡᠷ ᠰᠢᠭ ᠶᠠᠭᠤᠮᠠ ᠲᠠᠢ᠂ ᠬᠥᠯ ᠦᠭᠡᠢ᠂ ᠬᠣᠶᠠᠷ ᠨᠠᠮᠬᠠᠨ ᠭᠡᠭᠴᠢ ᠶ᠋ᠢᠨ ᠣᠷᠣ ᠬᠠᠷᠠᠭᠳᠠᠵᠤ᠂ ᠪᠤᠯᠤᠩ ᠳ᠋ᠤ᠌ ᠢᠷᠣᠭᠠᠷ ᠲᠠᠭᠠᠨ (ᠳ᠋ᠤ᠌ ᠪᠠᠨ) ᠰᠢᠭᠡᠰᠦ ᠲᠡᠢ ᠦᠮᠡᠬᠡᠢ ᠬᠤᠪᠢᠩ ᠪᠠᠢᠪᠠ᠃ ᠠᠵᠢᠭᠯᠠᠵᠤ ᠦᠵᠡᠪᠡᠯ᠂ ᠭᠢᠨᠳᠠᠨ ᠤ᠋ ᠲᠡᠷᠡ ᠲᠠᠰᠤᠯᠭᠠᠨ ᠳ᠋ᠠᠬᠢ ᠬᠣᠷᠢᠭᠳᠠᠯ ᠬᠥᠮᠦᠨ ᠢ᠋ ᠲᠤᠩ ᠰᠠᠶᠢᠬᠠᠨ ᠵᠠᠢᠯᠠᠭᠤᠯᠤᠭᠰᠠᠨ ᠪᠣᠯᠤᠯᠲᠠᠢ᠃
— ᠣᠯᠠᠨ ᠲᠠᠰᠤᠯᠭᠠ ᠶ᠋ᠢ ᠴᠥᠮ ᠰᠤᠯᠠᠯᠠᠭᠰᠠᠨ ᠤᠤ? ᠭᠡᠵᠦ ᠱᠣᠷᠣᠩ ᠤ᠋ᠨ ᠬᠣᠩᠭᠢᠯ ᠳ᠋ᠤ᠌ ᠨᠢᠭᠡᠨ ᠬᠥᠮᠦᠨ ᠬᠢᠲᠠᠳ ᠢ᠋ᠶ᠋ᠠᠷ ᠠᠰᠠᠭᠤᠪᠠᠯ᠂
— ᠴᠥᠮ ᠢ᠋᠂
— ᠵᠠ ᠪᠣᠯᠵᠠᠢ᠂ ᠤᠳᠠᠬᠤ ᠦᠭᠡᠢ ᠬᠥᠮᠦᠨ ᠢᠷᠡᠨᠡ᠃ ᠲᠠᠰᠤᠯᠭᠠᠨ ᠳ᠋ᠤ᠌ ᠬᠢᠬᠦ ᠳ᠋ᠡᠭᠡᠨ(ᠳ᠋ᠦ᠍ ᠪᠡᠨ) ᠶᠠᠭ ᠤᠭ ᠴᠧᠰᠧ ᠶ᠋ᠢᠨ ᠶᠣᠰᠣᠭᠠᠷ ᠭᠦᠢᠴᠡᠳᠬᠡᠭᠡᠷᠡᠢ᠃
— ᠵᠠ ᠭᠡᠵᠦ ᠬᠡᠯᠡᠯᠴᠡᠬᠦ ᠦᠭᠡ ᠰᠣᠨᠣᠰᠳᠠᠪᠠ᠃
ᠨᠠᠰᠤᠨᠪᠠᠲᠤ᠂ ᠲᠡᠷᠡ ᠭᠢᠨᠳᠠᠨ ᠤ᠋ ᠮᠠᠭᠤᠬᠠᠢ ᠲᠠᠰᠤᠯᠭᠠᠨ ᠤ᠋ ᠳᠣᠲᠣᠭᠠᠳᠤ ᠪᠠᠢᠳᠠᠯ ᠢ᠋ ᠬᠠᠷᠠᠵᠤ ᠦᠵᠡᠭᠡᠳ᠂ ᠭᠬᠢᠷ ᠲᠠᠭ ᠪᠣᠯᠤᠭᠰᠠᠨ ᠮᠠᠭᠤᠬᠠᠢ ᠳᠡᠪᠢᠰᠬᠡᠷ ᠳᠡᠭᠡᠷᠡ ᠰᠠᠭᠤᠭᠠᠳ ᠪᠣᠳᠣᠯᠭᠠ ᠪᠣᠯᠪᠠ᠃ ᠶᠠᠭᠠᠬᠢᠭᠠᠳ᠂ ᠭᠠᠮᠢᠩ ᠨᠠᠮᠠᠶ᠋ᠢ(ᠨᠠᠮᠠ ᠶ᠋ᠢ) ᠪᠠᠷᠢᠪᠠ? ᠶᠠᠮᠠᠷ ᠠᠮᠢᠲᠠᠨ ᠵᠢᠭᠠᠨ ᠬᠣᠪᠯᠠᠵᠤ ᠪᠠᠷᠢᠭᠤᠯᠪᠠ? ᠵᠠᠮᠢᠶᠠᠨ ᠠᠪᠤᠭᠠᠢ ᠶ᠋ᠢᠨ ᠰᠠᠨᠠᠮᠰᠠᠷ ᠦᠭᠡᠢ ᠲᠠᠭᠠᠷᠠᠯᠳᠤᠭᠰᠠᠨ ᠨᠢᠮᠠᠵᠠᠪ ᠪᠠᠢᠰᠠ ᠠ᠋ᠴᠠ ᠪᠣᠯᠪᠠᠤ(ᠪᠣᠯᠪᠠ ᠤᠤ)? ᠭᠡᠵᠦ ᠪᠣᠳᠣᠬᠤ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠰᠣᠬᠣᠢᠭᠰᠠᠨ ᠠᠨᠢᠭᠠᠷ ᠨᠢᠳᠦ ᠲᠡᠢ᠂ ᠬᠠᠪᠲᠠᠭᠠᠷ ᠬᠠᠮᠠᠷ ᠲᠠᠢ ᠨᠢᠮᠠᠵᠠᠪ ᠤ᠋ᠨ ᠵᠢᠪᠡᠬᠡᠢ ᠰᠢᠷᠠ ᠨᠢᠭᠤᠷ ᠰᠡᠳᠬᠢᠯ ᠳ᠋ᠦ᠍ᠨᠢ(ᠳ᠋ᠦ᠍ ᠨᠢ) ᠤᠷᠭᠤᠵᠤ᠂ ᠰᠠᠨᠠᠭᠠᠨ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠣᠷᠣᠵᠠᠢ᠃
ᠡᠪᠦᠭᠡᠨ ᠵᠠᠮᠢᠶᠠᠨ ᠠᠪᠤᠭᠠᠢ᠂ ᠲᠡᠷᠡ ᠬᠥᠮᠦᠨ ᠦ᠌ ᠳᠡᠷᠭᠡᠳᠡ᠂ ᠪᠡᠶᠡ ᠨᠢᠭᠡ ᠶᠡᠬᠡ ᠡᠪ ᠦᠭᠡᠢ ᠪᠣᠯᠤᠭᠰᠠᠨ ᠶᠤᠮ ᠰᠢᠭ᠋ ᠬᠠᠪᠴᠢᠭᠠᠳ᠂ ᠭᠠᠭᠴᠠᠬᠦ (ᠭᠠᠭᠴᠠ ᠬᠦ᠌)ᠨᠢᠮᠠᠵᠠᠪ ᠢ᠋ ᠭᠠᠷᠴᠤ ᠣᠳᠤᠭᠰᠠᠨ ᠬᠣᠢᠨᠠ᠂ ᠰᠠᠢ᠍ᠢ (ᠰᠠᠶᠢ) ᠪᠡᠶᠡ ᠰᠡᠳᠬᠢᠯ ᠲᠠᠯᠪᠢᠭᠤᠨ ᠪᠣᠯᠵᠤ᠂ ᠰᠢᠦᠢ ᠱᠤ᠌ ᠵᠧᠩ ᠢ᠋ ᠵᠠᠰᠠᠭ ᠤ᠋ᠨ ᠡᠷᠬᠡ ᠶ᠋ᠢ ᠡᠵᠡᠷᠬᠡᠬᠦ ᠡᠴᠡ ᠡᠮᠦᠨᠡ ᠣᠯᠠᠨ ᠬᠦᠩ ᠢ᠋ ᠤᠯᠤᠰ ᠢ᠋ᠶ᠋ᠠᠨ ᠬᠤᠳᠠᠯᠳᠤᠨ ᠲᠡᠷᠰᠯᠡᠪᠡ ᠭᠡᠵᠦ ᠶᠡᠬᠡᠯᠡ (ᠶᠡᠬᠡ ᠯᠡ) ᠪᠤᠷᠤᠭᠤᠰᠢᠶᠠᠨ ᠰᠢᠭᠦᠮᠵᠢᠯᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠂ ᠰᠡᠭᠦᠯ ᠳ᠋ᠦ᠍ 《ᠪᠠᠷᠠᠭᠤᠨ ᠬᠢᠵᠠᠭᠠᠷ ᠤ᠋ᠨ ᠬᠡᠷᠡᠭ ᠢ᠋ ᠪᠤᠳᠤᠭᠤᠯᠤᠨ ᠰᠢᠢᠳᠬᠡᠬᠦ ᠶᠠᠮᠤᠨ》 ᠭᠡᠭᠴᠢ ᠳ᠋ᠦ᠍ ᠠᠯᠪᠠ ᠬᠠᠭᠠᠬᠤ ᠪᠣᠯᠤᠭᠰᠠᠨ ᠲᠡᠷᠡ ᠨᠣᠶᠠᠨ ᠲᠠᠢ ᠦᠭᠡ ᠬᠡᠯᠡᠯᠴᠡᠬᠦ ᠳ᠋ᠡᠭᠡᠨ(ᠳ᠋ᠦ᠍ ᠪᠡᠨ) ᠶᠡᠬᠡᠯᠡ (ᠶᠡᠬᠡ ᠯᠡ) ᠪᠣᠯᠭᠣᠮᠵᠢᠯᠠᠵᠤ ᠪᠠᠢ ᠭᠡᠵᠦ ᠵᠠᠬᠢᠭᠰᠠᠨ ᠪᠢᠯᠡ ᠭᠡᠵᠦ ᠪᠣᠳᠣᠵᠤ ᠰᠠᠭᠤᠲᠠᠯᠠ᠂ ᠭᠡᠨᠡᠳᠲᠡ ᠭᠠᠳᠠᠨᠠ ᠠ᠋ᠴᠠ ᠭᠢᠨᠳᠠᠨᠠ ᠣᠷᠣᠬᠤ ᠬᠠᠭᠠᠯᠭᠠ ᠳᠡᠰ ᠬᠢᠵᠦ᠂ ᠭᠢᠨᠳᠠᠨ ᠤ᠋ ᠬᠤᠶᠠᠭ ᠤ᠋ᠳ ᠤ᠋ᠨ ᠬᠡᠷᠴᠡᠭᠡᠢ ᠬᠠᠷᠭᠢᠰ ᠢ᠋ᠶ᠋ᠠᠷ ᠬᠠᠰᠬᠢᠷᠬᠤ᠂ ᠬᠥᠯ ᠢ᠋ᠶ᠋ᠡᠨ ᠴᠢᠷᠬᠦ᠂ ᠬᠥᠮᠦᠨ ᠢ᠋ ᠫᠢᠳ ᠫᠢᠳ ᠴᠣᠬᠢᠬᠤ ᠴᠢᠮᠡᠭᠡ᠂ ᠶᠣᠢᠯᠠᠬᠤ (ᠶᠣᠣᠯᠠᠬᠤ)ᠳᠠᠭᠤᠨ᠂ ᠮᠣᠩᠭᠣᠯ ᠬᠢᠲᠠᠳ ᠢ᠋ᠶ᠋ᠠᠷ ᠬᠠᠷᠢᠶᠠᠬᠤ ᠦᠭᠡ ᠰᠣᠨᠣᠰᠳᠠᠵᠤ᠂ ᠣᠢᠷᠠ ᠬᠠᠪᠢ ᠶ᠋ᠢᠨ ᠲᠠᠰᠤᠯᠭᠠᠨ ᠤ᠋ ᠬᠠᠭᠠᠯᠭᠠ ᠳᠠᠪ ᠶᠠᠪ ᠨᠡᠭᠡᠭᠡᠭᠳᠡᠨ ᠬᠠᠭᠠᠭᠳᠠᠵᠤ᠂ ᠴᠣᠣᠵᠢ ᠴᠤᠤᠷᠭᠠ(ᠴᠠᠭᠤᠷᠭᠠ) ᠬᠠᠷᠴᠢᠭᠢᠨᠠᠬᠤ ᠴᠢᠮᠡᠭᠡ ᠭᠠᠷᠪᠠ᠃ ᠨᠠᠰᠤᠨᠪᠠᠲᠤ ᠳ᠋ᠤ᠌ ᠪᠠᠰᠠ ᠬᠠᠳᠠᠨ ᠪᠠᠭᠠᠲᠤᠷ ᠤ᠋ᠨ ᠤᠨᠲᠤᠭᠤᠴᠠᠨ ᠳᠤᠤᠭᠠᠷᠬᠤ᠂ ᠵᠠᠮᠢᠶᠠᠨ ᠡᠪᠦᠭᠡᠨ ᠦ᠌ ᠨᠠᠰᠤᠲᠠᠢ ᠬᠥᠮᠦᠨ ᠦ᠌ ᠰᠢᠨᠵᠢ ᠲᠡᠢ ᠬᠠᠨᠢᠶᠠᠬᠤ ᠨᠢ ᠰᠣᠨᠣᠰᠳᠠᠭᠰᠠᠨ ᠮᠡᠲᠦ ᠪᠣᠯᠪᠠ᠃ ᠭᠡᠨᠡᠳᠲᠡ ᠲᠠᠰᠤᠯᠭᠠᠨ ᠤ᠋ ᠬᠠᠭᠠᠯᠭᠠ ᠬᠠᠷᠴᠢᠭᠢᠨᠠᠨ ᠨᠡᠭᠡᠭᠡᠭᠳᠡᠵᠦ᠂ ᠭᠠᠮᠢᠩ ᠤ᠋ᠨ ᠬᠦᠨᠳᠦ ᠱᠠᠬᠠᠢ ᠲᠠᠢ ᠬᠥᠯ ᠢ᠋ᠶ᠋ᠡᠷ ᠠᠷᠤ ᠠ᠋ᠴᠠ ᠢᠰᠬᠦᠯᠦᠭᠦᠯᠦᠭᠰᠡᠨ ᠨᠢᠭᠡᠨ ᠬᠥᠮᠦᠨ ᠭᠣᠳ ᠬᠢᠭᠡᠳ ᠣᠷᠣᠵᠤ ᠢᠷᠡᠪᠡ᠃ ᠦᠵᠡᠪᠡᠰᠦ᠂ ᠳᠡᠪᠡᠯ ᠦ᠋ᠨ ᠤᠷᠲᠤ ᠬᠠᠨᠴᠤᠢ ᠶ᠋ᠢ ᠠᠷᠤ ᠳ᠋ᠤ᠌ ᠵᠠᠩᠭᠢᠳᠤᠨ ᠬᠦᠯᠢᠵᠡᠢ᠃ ᠢᠰᠬᠦᠯᠦᠭᠦᠯᠦᠭᠰᠡᠨ ᠬᠦᠴᠦᠨ ᠳ᠋ᠡᠭᠡᠨ(ᠳ᠋ᠦ᠍ ᠪᠡᠨ) ᠲᠡᠷᠲᠡᠭᠡ ᠲᠤᠭᠤᠷᠭᠠᠨᠠ ᠬᠠᠷᠠ ᠬᠤᠷᠳᠤ ᠪᠠᠷ ᠢ᠋ᠶ᠋ᠠᠨ ᠣᠴᠢᠵᠤ ᠯᠣᠭ ᠬᠢᠲᠡᠯᠡ ᠮᠥᠷᠭᠥᠭᠡᠳ᠂ ᠲᠡᠷᠡ ᠬᠥᠮᠦᠨ ᠡᠷᠭᠢᠵᠦ ᠬᠠᠭᠠᠯᠭᠠᠨ ᠤ᠋ ᠵᠦᠭ ᠬᠠᠷᠢᠶᠠᠨ ᠬᠠᠰᠬᠢᠷᠤᠨ᠂
— ᠦᠬᠦᠭᠰᠡᠨ ᠮᠠᠭᠤ ᠬᠠᠷᠠ ᠡᠯᠵᠢᠭᠡ! ᠤᠯᠠᠭᠠᠨ ᠭᠠᠷ ᠲᠠᠢ ᠭᠠᠭᠴᠠ ᠬᠥᠮᠦᠨ ᠥᠭᠡᠳᠡ ᠵᠢᠷᠭᠤᠭᠤᠯᠠ ᠳᠠᠭᠠᠷᠢᠨ ᠣᠷᠣᠵᠤ ᠪᠠᠢᠬᠤ ᠳ᠋ᠠᠭᠠᠨ(ᠳ᠋ᠤ᠌ ᠪᠠᠨ) ᠢᠴᠢᠬᠦ ᠦᠭᠡᠢ ᠤᠤ? ᠡᠵᠡᠭᠦᠢ ᠬᠡᠭᠡᠷᠡ ᠭᠠᠵᠠᠷ ᠡᠷᠡ ᠬᠥᠮᠦᠨ ᠰᠢᠭ ᠠᠭᠤᠯᠵᠠᠭᠰᠠᠨ ᠪᠠᠢᠪᠠᠯ ᠤᠤ᠂ ᠪᠢ ᠲᠠᠨ ᠳ᠋ᠤ᠌ ᠬᠡᠨ ᠮᠠᠨᠢ ᠡᠷᠡᠭᠴᠢᠨ᠂ ᠬᠡᠨ ᠮᠠᠨᠢ ᠡᠮᠡᠭᠴᠢᠨ ᠪᠣᠯᠬᠤ ᠶ᠋ᠢ ᠦᠵᠡᠭᠦᠯᠬᠦ ᠶᠤᠮᠰᠠᠨ ᠳᠠ ᠭᠡᠳ ᠨᠠᠰᠤᠨᠪᠠᠲᠤ ᠶ᠋ᠢ ᠬᠠᠷᠠᠭᠠᠳ ᠠᠷᠤ ᠪᠠᠷ ᠢ᠋ᠶ᠋ᠠᠨ ᠡᠷᠭᠢᠵᠦ᠂ ᠬᠣᠶᠠᠷ ᠬᠠᠨᠴᠤᠢ ᠶ᠋ᠢᠨ ᠵᠠᠩᠭᠢᠳᠤᠭᠰᠠᠨ ᠦᠵᠦᠭᠦᠷ ᠢ᠋ ᠲᠣᠰᠴᠤ᠂
— ᠮᠠᠢ᠂ ᠲᠠᠢᠯᠤᠭᠠᠳ ᠥᠭ! ᠬᠡᠮᠡᠪᠡᠰᠦ᠂ ᠨᠠᠰᠤᠨᠪᠠᠲᠤ ᠭᠠᠢᠬᠠᠨ ᠦᠵᠡᠵᠦ᠂ ᠲᠡᠷᠡ ᠬᠥᠮᠦᠨ ᠢ᠋ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠠᠯᠢ ᠣᠯᠢᠭᠲᠠᠢ ᠭᠡᠳᠡᠭ ᠵᠠᠩᠵᠤᠨ ᠤ᠋ ᠨᠢᠭᠡ ᠭᠡᠵᠦ ᠬᠡᠯᠡᠯᠴᠡᠳᠡᠭ ᠮᠠᠩᠯᠠᠢ ᠸᠠᠩ ᠳᠠᠮᠳᠢᠨᠰᠦ᠋ᠷᠦᠩ ᠮᠥᠨ ᠪᠠᠢᠭᠠ ᠶ᠋ᠢ ᠲᠠᠨᠢᠪᠠ᠃ ᠤᠷᠢᠳᠤ ᠳᠣᠲᠣᠭᠠᠳᠤ ᠶᠠᠮᠤᠨ ᠳ᠋ᠤ᠌ ᠨᠠᠰᠤᠨᠪᠠᠲᠤ ᠲᠠᠢ ᠳᠠᠭᠠᠷᠢᠯᠳᠤᠵᠤ ᠪᠠᠢᠭᠰᠠᠨ ᠮᠠᠩᠯᠠᠢ ᠸᠠᠩ᠂ ᠲᠡᠭᠦᠨ ᠢ᠋ ᠪᠠᠰᠠ ᠲᠠᠨᠢᠵᠤ᠂
— ᠴᠢ ᠪᠠᠰᠠ ᠣᠷᠣᠭᠠᠳ ᠢᠷᠡᠭᠰᠡᠨ ᠶᠦᠮ ᠤᠤ? ᠵᠠ ᠶᠠᠭᠠᠬᠢᠬᠤ ᠪᠣᠢ᠂ ᠡᠷᠡ ᠬᠥᠮᠦᠨ ᠳᠣᠯᠣᠭᠠ ᠪᠦᠳᠦᠷᠢᠵᠦ᠂ ᠨᠠᠢ᠍ᠮᠠ ᠰᠡᠭᠡᠳᠡᠭ ᠭᠡᠳᠡᠭ᠃ ᠭᠠᠭᠴᠠᠬᠦ (ᠭᠠᠭᠴᠠ ᠬᠦ᠌)ᠵᠢᠷᠦᠬᠡ ᠦᠭᠡᠢ ᠬᠥᠮᠦᠨ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠠᠮᠢ ᠬᠣᠬᠢᠷᠠᠵᠤ᠂ ᠪᠤᠰᠤᠳ ᠢ᠋ ᠴᠦ᠍ ᠭᠠᠢ ᠳ᠋ᠤ᠌ ᠣᠷᠣᠭᠤᠯᠳᠠᠭ ᠭᠡᠳᠡᠭ ᠢ᠋ ᠪᠣᠳᠣᠭᠠᠷᠠᠢ᠃ ᠳᠠᠢᠰᠤᠨ ᠤ᠋ ᠭᠠᠷ ᠲᠤ᠌ ᠣᠷᠣᠭᠠᠳ ᠵᠢᠷᠦᠬᠡ ᠪᠡᠨ ᠦᠬᠦᠯ ᠦᠭᠡᠢ᠂ ᠡᠷᠡ ᠬᠥᠮᠦᠨ ᠰᠢᠭ ᠪᠠᠢᠵᠤ ᠦᠵᠡᠬᠦ ᠶᠣᠰᠣ ᠲᠠᠢ ᠭᠡᠵᠡᠢ᠃
ᠮᠠᠷᠭᠠᠰᠢ ᠶ᠋ᠢᠨ ᠣᠷᠣᠢ ᠠ᠋ᠴᠠ ᠡᠬᠢᠯᠡᠨ ᠮᠠᠩᠯᠠᠢ ᠸᠠᠩ ᠢ᠋ ᠪᠠᠢᠴᠠᠭᠠᠬᠤ ᠪᠠᠷ ᠳᠠᠭᠤᠳᠠᠨ ᠠᠪᠠᠴᠢᠵᠠᠢ᠃ ᠬᠣᠶᠠᠷ ᠡᠲᠡᠭᠡᠳ ᠦ᠋ᠨ ᠲᠠᠰᠤᠯᠭᠠᠨ ᠤ᠋ ᠴᠣᠣᠵᠢ ᠬᠠᠷᠴᠢᠭᠢᠨᠠᠵᠤ᠂ ᠬᠠᠭᠠᠯᠭᠠ ᠲᠦᠷᠴᠢᠭᠢᠨᠡᠵᠦ᠂ ᠭᠢᠨᠳᠠᠨ ᠤ᠋ ᠬᠤᠶᠠᠭ ᠤ᠋ᠳ ᠮᠣᠩᠭᠣᠯ ᠨᠡᠷᠡ ᠶ᠋ᠢ ᠬᠢᠲᠠᠳ ᠠᠶᠠᠯᠭᠤ ᠪᠠᠷ ᠰᠤᠨᠵᠤᠷᠠᠭᠤᠯᠤᠨ (ᠰᠤᠨᠵᠢᠷᠠᠭᠤᠯᠤᠨ) ᠳᠠᠭᠤᠳᠠᠵᠤ
— ᠵᠡᠦ ᠮᠧᠢ ᠶᠠᠨ!
— ᠮᠠ᠋ ᠺᠧ ᠰᠣ ᠯᠠ ᠵᠡᠦ ᠪᠣ!
— ᠨᠠ ᠰᠥᠩ ᠢ᠋ᠶ᠋ᠡᠨ ᠵᠢᠢ ᠡᠯ!
— ᠬᠠᠢ ᠳ᠋ᠠᠤ ᠪᠤᠤ ᠴᠧ ᠯᠢᠨ!
— ᠵᠢᠢ ᠭᠧᠢ ᠮᠢ ᠳᠧ ᠳ᠋ᠣ᠋ ᠯᠠ ᠵᠢᠢ! ᠡᠳᠡᠭᠡᠷ ᠮᠠᠯ ᠤ᠋ᠳ ᠤ᠋ᠨ ᠨᠡᠷᠡ ᠨᠢ ᠬᠦᠷᠲᠡᠯᠡ ᠬᠡᠯᠡ ᠡᠭᠡᠳᠡᠷᠡᠵᠦ ᠬᠥᠮᠦᠨ ᠦ᠌ ᠬᠡᠯᠡᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ᠂ ᠶᠣᠰᠣ ᠲᠠᠢ ᠮᠠᠯ ᠠᠳᠤᠭᠤᠰᠤᠨ ᠤ᠋ ᠨᠡᠷᠡ ᠠᠵᠢ! ᠭᠡᠯᠴᠡᠬᠦ ᠴᠢᠮᠡᠭᠡ ᠰᠣᠨᠣᠰᠳᠠᠪᠠ᠃
ᠰᠥᠨᠢ ᠳᠦᠯᠢ ᠶ᠋ᠢᠨ ᠦᠶᠡᠰ ᠲᠠᠰᠤ ᠵᠣᠳᠣᠭᠤᠯᠵᠤ᠂ ᠤᠯᠠᠭᠠᠨ ᠨᠡᠯᠦᠢ ᠪᠣᠯᠵᠤ ᠬᠥᠮᠦᠨ ᠲᠠᠨᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠣᠯᠤᠭᠰᠠᠨ ᠳᠠᠮᠳᠢᠨᠰᠦ᠋ᠷᠦᠩ ᠢ᠋ ᠠᠪᠴᠤ ᠢᠷᠡᠪᠡ᠃ ᠬᠤᠶᠠᠭ᠂ ᠲᠡᠭᠦᠨ ᠢ᠋ ᠲᠡᠮᠲᠡᠷᠢᠨ ᠪᠠᠷᠢᠵᠤ ᠦᠵᠡᠭᠡᠳ᠂ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠦᠨ᠂
— ᠮᠠᠨᠠᠢᠬᠢᠨ (ᠮᠠᠨ ᠤ᠋ ᠬᠢᠨ) ᠬᠥᠮᠦᠨ ᠢ᠋ ᠮᠥᠨ ᠰᠦᠢᠳ ᠪᠣᠯᠭᠠᠳᠠᠭ ᠶᠤᠮ ᠠ᠋ ᠳᠠ ᠭᠡᠵᠦ ᠭᠠᠢᠬᠠᠨ ᠳᠤᠤᠭᠠᠷᠪᠠ᠃
— ᠵᠦᠭᠡᠷ᠂ ᠡᠨᠡ ᠮᠠᠯ ᠤ᠋ᠳ ᠶᠡᠬᠡ ᠪᠥᠬᠡ ᠭᠣᠣᠯ ᠲᠠᠢ ᠶᠤᠮ ᠰᠢᠦ᠃ ᠴᠢ ᠨᠠᠭᠠᠳᠤᠬᠢ ᠳ᠋ᠠᠭᠠᠨ (ᠳ᠋ᠤ᠌ ᠪᠠᠨ)ᠵᠢᠩ ᠲᠠᠯᠪᠢᠭᠠᠳ ᠲᠡᠩᠬᠡᠷᠡᠭᠦᠯ ᠭᠡᠵᠦ ᠭᠢᠨᠳᠠᠨ ᠤ᠋ ᠠᠬᠠᠯᠠᠬᠤ ᠬᠤᠶᠠᠭ᠂ ᠬᠠᠷᠠ ᠲᠠᠮᠠᠬᠢᠨ ᠤ᠋ ᠨᠢᠯᠤᠭᠤᠨ ᠦᠨᠦᠷ ᠬᠠᠩᠬᠤᠯᠤᠭᠰᠠᠨ᠂ ᠬᠠᠷᠠ ᠲᠠᠮᠠᠬᠢᠨ ᠤ᠋ ᠢᠨᠳᠠᠢ ᠪᠣᠯᠤᠭᠰᠠᠨ ᠬᠥᠮᠦᠨ ᠦ᠌ ᠰᠢᠨᠵᠢ ᠲᠡᠢ ᠵᠢᠪᠡᠬᠡᠢ ᠰᠢᠷᠠ ᠴᠢᠷᠠᠢ ᠲᠠᠢ ᠬᠣᠷᠴᠢᠭᠠᠷ ᠭᠠᠮᠢᠩ ᠳᠤᠤᠭᠠᠷᠪᠠ᠃
ᠬᠣᠩᠭᠢᠯ ᠳ᠋ᠠᠬᠢ ᠬᠤᠶᠠᠭ ᠢ᠋ ᠦᠷᠭᠡᠯᠡᠨ ᠨᠣᠢᠷᠮᠤᠭᠯᠠᠵᠤ᠂ ᠭᠠᠭᠴᠠᠬᠦ ᠡᠷᠡᠭᠦᠦ ᠰᠢᠭᠦᠯᠲᠡ ᠲᠤᠯᠭᠠᠭᠤᠯᠵᠤ ᠵᠠᠨᠴᠢᠭᠤᠯᠤᠨ ᠵᠣᠳᠣᠭᠤᠯᠤᠭᠰᠠᠨ ᠬᠥᠮᠦᠨ ᠦ᠌ ᠶᠣᠢᠯᠠᠬᠤ ᠳᠠᠭᠤᠨ ᠰᠣᠨᠣᠰᠳᠠᠵᠤ ᠪᠠᠢᠬᠤ ᠦᠷ ᠦ᠋ᠨ ᠰᠥᠨᠢ ᠪᠡᠷ ᠮᠠᠩᠯᠠᠢ ᠸᠠᠩ ᠮᠡᠳᠡᠭᠡ ᠣᠷᠣᠵᠤ᠂ ᠲᠡᠭᠦᠨ ᠢ᠋ ᠦᠢᠯᠡᠴᠢᠯᠡᠵᠦ ᠪᠠᠢᠭᠰᠠᠨ ᠨᠠᠰᠤᠨᠪᠠᠲᠤ ᠳ᠋ᠤ᠌ ᠰᠢᠪᠡᠭᠡᠨᠡᠨ ᠥᠭᠦᠯᠡᠷᠦᠨ᠂
— ᠨᠠᠮᠠᠶ᠋ᠢ᠂ ᠡᠪᠦᠭᠡᠨ ᠵᠠᠮᠢᠶᠠᠨ᠂ ᠬᠠᠳᠠᠨ ᠪᠠᠭᠠᠲᠤᠷ᠂ ᠵᠢᠭᠮᠡᠳᠳᠣᠷᠵᠢ ᠪᠢᠳᠡᠨ ᠢ᠋ ᠨᠢᠭᠡᠨ ᠳᠣᠣᠷᠠ ᠪᠠᠢᠴᠠᠭᠠᠨ ᠠᠰᠠᠭᠤᠪᠠ᠃ ᠰᠠᠮᠪᠤᠤ᠂ ᠭᠣᠣ ᠰᠧ ᠯᠢᠩ᠂ ᠴᠦ᠍ ᠯᠢᠦᠢ ᠵᠠᠩ ᠪᠠᠢᠯᠴᠠᠨ ᠪᠠᠢᠴᠠᠭᠠᠪᠠ᠃ ᠪᠣᠭᠳᠠ ᠶ᠋ᠢᠨ ᠳᠡᠷᠭᠡᠳᠡᠬᠢ ᠬᠥᠮᠦᠨ ᠪᠢᠳᠡᠨ ᠢ᠋ ᠪᠠᠷᠢᠵᠤ ᠥᠭᠭᠦᠭᠰᠡᠨ ᠪᠠᠢᠨᠠ᠃ ᠭᠠᠮᠢᠩ ᠤ᠋ᠳ ᠵᠠᠮᠢᠶᠠᠨ ᠤ᠋ ᠵᠣᠬᠢᠶᠠᠨ ᠪᠢᠴᠢᠵᠦ᠂ ᠪᠣᠭᠳᠠ ᠶ᠋ᠢᠨ ᠮᠣᠳᠣᠷ ᠤ᠋ᠨ ᠲᠡᠮᠳᠡᠭ ᠳᠠᠷᠤᠭᠰᠠᠨ ᠪᠢᠴᠢᠭ ᠦ᠋ᠨ ᠤᠴᠢᠷ ᠢ᠋ ᠣᠯᠵᠤ ᠮᠡᠳᠡᠭᠰᠡᠨ ᠪᠠᠢᠨᠠ᠃ ᠪᠠᠰᠠ ᠬᠠᠭᠠᠨ ᠢ᠋ ᠵᠠᠮᠢᠶᠠᠨ᠂ ᠬᠠᠳᠠᠨ ᠪᠠᠭᠠᠲᠤᠷ ᠪᠢᠳᠡ ᠭᠤᠷᠪᠠ ᠶ᠋ᠢ ᠤᠯᠤᠰ ᠲᠥᠷᠥ ᠶ᠋ᠢᠨ ᠤᠴᠢᠷ ᠲᠡᠷᠡ ᠰᠥᠨᠢ ᠭᠦᠷᠢᠮ ᠭᠠᠷᠭᠠᠬᠤ ᠳ᠋ᠤ᠌ ᠪᠠᠢᠯᠴᠠᠵᠤ ᠬᠢᠴᠢᠶᠡᠨ ᠵᠠᠯᠪᠠᠷᠢ ᠭᠡᠰᠡᠨ ᠭᠡᠵᠦ ᠣᠯᠵᠤ ᠮᠡᠳᠡᠭᠰᠡᠨ ᠪᠠᠢᠨᠠ᠃ ᠵᠢᠭᠮᠡᠳᠳᠣᠷᠵᠢ ᠳ᠋ᠤ᠌ ᠲᠤᠯᠭᠠᠬᠤ ᠢᠯᠡᠷᠬᠡᠢ ᠪᠠᠷᠢᠮᠲᠠ ᠲᠡᠳᠦᠢᠯᠡ ᠦᠭᠡᠢ ᠲᠤᠯᠠ ᠲᠡᠷᠡ ᠮᠠᠨᠢ ᠣᠭᠲᠣ ᠬᠦᠯᠢᠶᠡᠭᠰᠡᠨ ᠦᠭᠡᠢ᠃ ᠬᠠᠳᠠᠨ ᠪᠠᠭᠠᠲᠤᠷ ᠵᠠᠮᠢᠶᠠᠨ ᠪᠢᠳᠡ ᠭᠤᠷᠪᠠ ᠪᠡᠶᠡ ᠪᠡᠨ ᠠᠷᠠᠳ ᠤ᠋ᠨ ᠨᠠᠮ ᠤ᠋ᠨ ᠭᠡᠰᠢᠭᠦᠨ ᠭᠡᠵᠦ ᠬᠦᠯᠢᠶᠡᠭᠰᠡᠨ᠃ ᠨᠢᠭᠤᠭᠠᠳ ᠴᠤ᠌ ᠶᠠᠭᠤ ᠬᠢᠬᠦ ᠪᠣᠢ᠂ ᠲᠡᠳᠡᠨ ᠦ᠌ ᠮᠡᠳᠡᠵᠦ ᠪᠠᠢᠭᠠ ᠶᠠᠭᠤᠮᠠ ᠶ᠋ᠢ᠃ ᠪᠠᠰᠠ ᠮᠠᠨ ᠤ᠋ ᠨᠥᠬᠥᠷ ᠰᠦᠬᠡᠪᠠᠭᠠᠲᠤᠷ᠂ ᠴᠣᠢᠪᠠᠯᠰᠠᠩ ᠨᠠᠷ ᠢ᠋ ᠣᠷᠣᠰ ᠤᠯᠤᠰ ᠠ᠋ᠴᠠ ᠲᠤᠰᠠᠯᠠᠮᠵᠢ ᠭᠤᠶᠤᠬᠤ ᠪᠠᠷ ᠣᠳᠤᠭᠰᠠᠨ ᠨᠢ ᠦᠨᠡᠨ᠂ ᠭᠦᠷᠢᠮ ᠭᠠᠷᠭᠠᠬᠤ ᠳ᠋ᠤ᠌ ᠪᠢᠳᠡᠨ ᠢ᠋ ᠪᠠᠢᠯᠴᠠᠨᠠ ᠤᠤ ᠭᠡᠵᠦ ᠬᠠᠭᠠᠨ ᠠ᠋ᠴᠠ ᠪᠢᠳᠡᠨ ᠳ᠋ᠦ᠍ ᠤᠯᠠᠮᠵᠢᠯᠠᠭᠰᠠᠨ ᠢ᠋ ᠦᠨᠡᠨ ᠭᠡᠵᠦ ᠬᠦᠯᠢᠶᠡᠯᠡ —— ᠲᠡᠭᠡᠭᠡᠳ ᠪᠢ ᠭᠣᠣ ᠰᠧ ᠯᠢᠩ ᠳ᠋ᠦ᠍ ᠪᠢ ᠴᠡᠷᠢᠭ ᠦ᠋ᠨ ᠡᠷᠡ᠃ ᠴᠢᠮᠠ ᠰᠢᠭ᠋ ᠳᠠᠢᠰᠤᠨ ᠡᠲᠡᠭᠡᠳ ᠲᠡᠢ ᠬᠠᠯᠠᠭᠤᠨ ᠠᠮᠢ ᠪᠦᠯᠢᠶᠡᠨ ᠴᠢᠰᠤ ᠪᠠᠨ ᠬᠠᠢᠷᠠ ᠦᠭᠡᠢ ᠪᠠᠢᠯᠳᠤᠵᠤ ᠶᠠᠪᠤᠭᠰᠠᠨ᠃ ᠮᠠᠨ ᠤ᠋ ᠨᠠᠮ ᠠ᠋ᠴᠠ ᠪᠠᠢᠯᠳᠤ ᠭᠡᠪᠡᠯ ᠪᠢ ᠪᠠᠰᠠ ᠯᠠ ᠪᠠᠢᠯᠳᠤᠨᠠ ᠭᠡᠵᠦ ᠬᠡᠯᠡᠭᠡᠳ ᠥᠭᠡᠷᠡ ᠶᠠᠭᠤ ᠴᠤ᠌ ᠬᠡᠯᠡᠭᠰᠡᠨ ᠦᠭᠡᠢ᠂ ᠨᠠᠮᠠᠶ᠋ᠢ ᠲᠦᠮᠡᠨ ᠬᠡᠰᠡᠭ ᠣᠭᠲᠣᠴᠢᠭᠰᠠᠨ ᠴᠤ᠌ ᠬᠡᠯᠡᠬᠦ ᠦᠭᠡᠢ᠃ ᠪᠢ ᠰᠦᠬᠡᠪᠠᠭᠠᠲᠤᠷ᠂ ᠴᠣᠢᠪᠠᠯᠰᠠᠩ ᠤ᠋ᠨ ᠬᠡᠷᠡᠭ ᠶᠠᠪᠤᠳᠠᠯ ᠬᠦᠴᠦᠨ ᠲᠡᠢ ᠪᠣᠯᠵᠤ ᠢᠯᠠᠨᠠ ᠭᠡᠵᠦ ᠢᠲᠡᠭᠡᠳᠡᠭ ᠬᠥᠮᠦᠨ᠃ ᠪᠢᠳᠡᠨ ᠦ᠌ ᠬᠡᠳᠦᠨ ᠬᠥᠮᠦᠨ ᠳᠠᠢᠰᠤᠨ ᠭᠠᠮᠢᠩ ᠤ᠋ᠨ ᠭᠠᠷ ᠲᠤ᠌ ᠪᠠᠷᠢᠭᠳᠠᠭᠠᠳ ᠦᠬᠦᠬᠦ ᠨᠢ ᠥᠴᠦᠬᠡᠨ ᠬᠡᠷᠡᠭ᠃ ᠶᠠᠮᠠᠷ ᠴᠤ᠌ ᠲᠡᠮᠡᠴᠡᠯ ᠳ᠋ᠦ᠍ ᠠᠮᠢ ᠬᠣᠬᠢᠷᠠᠬᠤ ᠬᠥᠮᠦᠨ ᠪᠠᠢᠬᠤ ᠨᠢ ᠶᠣᠰᠣ᠃ ᠬᠠᠷᠢᠨ ᠴᠢᠮᠠᠶ᠋ᠢ ᠠᠩ ᠤ᠋ᠨ ᠬᠠᠷᠠᠳᠠᠵᠤ ᠰᠡᠵᠢᠭᠯᠡᠭᠰᠡᠨ ᠢ᠋ᠶ᠋ᠡᠷ ᠪᠠᠷᠢᠭᠰᠠᠨ ᠪᠠᠢᠵᠤ ᠪᠣᠯᠣᠰᠢ ᠦᠭᠡᠢ᠃ ᠡᠰᠡᠪᠡᠰᠦ ᠲᠡᠷᠡ ᠤᠷᠪᠠᠨ ᠲᠡᠷᠰᠯᠡᠭᠰᠡᠨ ᠨᠢᠮᠠᠵᠠᠪ᠂ ᠵᠢᠭ᠌ᠮᠡᠳᠳᠣᠷᠵᠢ ᠲᠠ ᠬᠣᠶᠠᠷ ᠢ᠋ ᠵᠢᠭᠠᠵᠤ ᠥᠭᠭᠦᠭᠰᠡᠨ ᠶᠦᠮ ᠪᠢᠯᠢᠤ᠂ ᠶᠠᠭᠤ ᠴᠤ᠌ ᠪᠣᠯᠤᠭᠰᠠᠨ ᠴᠢ ᠶᠡᠷᠦ ᠭᠠᠳᠠᠨᠠ ᠪᠠᠢᠭᠠ ᠵᠢᠷᠤᠮ ᠤ᠋ᠨ ᠨᠥᠬᠥᠳ ᠢ᠋ ᠪᠠᠷᠢᠵᠤ ᠥᠭᠭᠦᠭᠡᠳ ᠳᠠᠢᠰᠤᠨ ᠳ᠋ᠤ᠌ ᠲᠤᠰᠠᠯᠠᠭᠰᠠᠨ ᠠ᠋ᠴᠠ ᠶᠠᠰᠤ ᠪᠠᠨ ᠬᠤᠭᠤᠷᠠᠭᠰᠠᠨ ᠨᠢ ᠳᠡᠭᠡᠷᠡ ᠭᠡᠵᠦ ᠮᠡᠳᠡᠭᠡᠷᠡᠢ᠃ ᠬᠥᠮᠦᠨ ᠨᠢᠭᠡ ᠯᠡ ᠦᠬᠦᠳᠡᠭ ᠶᠦᠮ᠃ ᠲᠡᠭᠡᠬᠦ ᠳ᠋ᠦ᠍ ᠤᠷᠪᠠᠨ ᠲᠡᠷᠰᠯᠡᠭᠰᠡᠨ ᠵᠢᠷᠤᠮ ᠦᠭᠡᠢ ᠬᠥᠮᠦᠨ ᠦ᠌ ᠶᠠᠰᠤ ᠢᠯᠵᠠᠷᠠᠨ ᠬᠡᠳᠦᠢ ᠦᠭᠡᠢ ᠪᠣᠯᠪᠠᠴᠤ᠂ ᠦᠮᠡᠬᠡᠢ ᠨᠡᠷᠡ ᠨᠢ ᠲᠦᠮᠡᠨ ᠦᠶᠡ ᠳ᠋ᠦ᠍ ᠬᠣᠴᠣᠷᠳᠠᠭ ᠭᠡᠳᠡᠭ ᠭᠡᠯᠡ᠃
ᠲᠡᠷᠡ ᠡᠳᠦᠷ ᠨᠠᠰᠤᠨᠪᠠᠲᠤ ᠶ᠋ᠢ ᠴᠦ᠍ ᠯᠢᠦᠢ ᠵᠠᠩ ᠳᠠᠭᠤᠳᠠᠨ ᠠᠪᠴᠢᠷᠠᠵᠤ ᠪᠠᠢᠴᠠᠭᠠᠨ ᠠᠰᠠᠭᠤᠪᠠ᠃ ᠭᠠᠮᠢᠩ ᠴᠡᠷᠢᠭ ᠦ᠋ᠨ ᠲᠡᠷᠡ ᠨᠣᠶᠠᠨ ᠮᠠᠰᠢ ᠡᠶᠡᠯᠳᠡᠭ ᠰᠠᠢᠬᠠᠨ ᠵᠠᠩ ᠲᠠᠢ ᠳᠦᠷᠢᠮ ᠦᠵᠡᠭᠦᠯᠵᠦ ᠬᠡᠯᠡᠬᠦ ᠦᠭᠡ ᠶᠡᠬᠡᠯᠡ ᠨᠠᠢᠷᠲᠠᠢ᠃ ᠨᠠᠰᠤᠨᠪᠠᠲᠤ ᠶ᠋ᠢᠨ ᠬᠢᠲᠠᠳ ᠠᠶᠠᠯᠭᠤ ᠮᠠᠰᠢ ᠴᠡᠪᠡᠷ ᠨᠠᠷᠢᠨ ᠭᠡᠵᠦ ᠮᠠᠭᠲᠠᠭᠠᠳ᠂ ᠳᠤᠮᠳᠠᠳᠤ ᠢᠷᠭᠡᠨ ᠶᠡᠬᠡ ᠤᠯᠤᠰ ᠤ᠋ᠨ ᠤᠳᠬᠠ ᠰᠣᠶᠣᠯ ᠨᠡᠪᠲᠡᠷᠡᠭᠰᠡᠨ ᠬᠥᠮᠦᠨ ᠦ᠌ ᠬᠤᠪᠢ ᠳ᠋ᠤ᠌ ᠤᠴᠢᠷ ᠢ᠋ ᠮᠡᠳᠡᠵᠦ᠂ ᠡᠷᠬᠡᠪᠰᠢ ᠨᠢᠭᠡᠨ ᠴᠠᠭ ᠤ᠋ᠨ ᠡᠨᠳᠡᠭᠳᠡᠯ ᠢ᠋ ᠬᠦᠯᠢᠶᠡᠵᠦ᠂《 ᠪᠠᠷᠠᠭᠤᠨ ᠬᠣᠢᠲᠤ ᠬᠢᠵᠠᠭᠠᠷ ᠤ᠋ᠨ ᠬᠡᠷᠡᠭ ᠢ᠋ ᠪᠤᠳᠤᠭᠤᠯᠤᠨ ᠰᠢᠳᠬᠡᠬᠦ》 ᠶᠠᠮᠤᠨᠠ ᠲᠠᠪᠤᠨ ᠤᠭᠰᠠᠭᠠ ᠶ᠋ᠢ ᠨᠠᠢᠷᠠᠭᠤᠯᠬᠤ ᠶ᠋ᠢᠨ ᠰᠤᠷᠲᠠᠯ ᠢ᠋ᠶ᠋ᠠᠷ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠣᠯᠠᠨ ᠢ᠋ ᠬᠥᠮᠦᠵᠢᠭᠦᠯᠬᠦ ᠶᠠᠪᠤᠳᠠᠯ ᠳ᠋ᠤ᠌ ᠡᠷᠬᠡ ᠦᠭᠡᠢ ᠦᠨᠡᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠬᠦᠴᠦᠨ ᠲᠤᠰᠠᠯᠠᠯᠴᠠᠬᠤ ᠪᠣᠯᠪᠠᠤ ᠭᠡᠳ ᠡᠴᠦᠰ ᠲᠦ᠋ᠨᠢ ᠶᠠᠩᠵᠤᠤᠷ ᠬᠦᠷᠲᠡᠯᠡ ᠲᠠᠲᠠᠭᠤᠯᠤᠭᠠᠳ ᠪᠤᠴᠠᠭᠠᠬᠤ ᠳ᠋ᠠᠭᠠᠨ᠂ ᠦᠳᠡᠰᠢ ᠪᠣᠯᠲᠠᠯᠠ ᠪᠣᠳᠣᠭᠠᠳ ᠢᠷᠡᠭᠡᠷᠡᠢ ᠭᠡᠵᠦ ᠵᠠᠬᠢᠨ ᠶᠠᠪᠤᠭᠤᠯᠪᠠ᠃
ᠲᠡᠷᠡ ᠦᠳᠡᠰᠢ ᠶ᠋ᠢᠨ ᠪᠠᠢᠴᠠᠭᠠᠯᠭᠠᠨ ᠠ᠋ᠴᠠ ᠨᠠᠰᠤᠨᠪᠠᠲᠤ ᠬᠠᠴᠠᠷ ᠢ᠋ᠶ᠋ᠠᠨ ᠱᠠᠬᠠᠢ ᠪᠠᠷ ᠬᠠᠪᠤᠳᠲᠠᠯᠠ ᠵᠠᠨᠴᠢᠭᠤᠯᠤᠭᠠᠳ ᠪᠤᠴᠠᠵᠤ ᠢᠷᠡᠪᠡ᠃ ᠲᠡᠭᠡᠭᠡᠳ᠂ ᠪᠤᠰᠤᠳ ᠬᠣᠷᠢᠭᠳᠠᠯ ᠤ᠋ᠨ ᠨᠢᠭᠡᠨ ᠠᠳᠠᠯᠢ ᠪᠠᠷ ᠲᠡᠷᠡ ᠬᠠᠷᠭᠢᠰ ᠭᠠᠮᠢᠩ ᠤ᠋ᠨ ᠲᠡᠮᠦᠯᠡᠨ ᠵᠣᠪᠠᠭᠠᠬᠤ ᠮᠥᠷᠳᠡᠨ ᠪᠠᠢᠴᠠᠭᠠᠯᠲᠠ ᠶ᠋ᠢᠨ ᠠᠶᠤᠮᠰᠢᠭᠲᠤ ᠭᠢᠨᠳᠠᠨ ᠳ᠋ᠤ᠌ ᠵᠦᠢᠯ ᠵᠦᠢᠯ ᠦ᠋ᠨ ᠳᠠᠷᠤᠯᠠᠵᠤ ᠳᠣᠷᠣᠮᠵᠢᠯᠠᠬᠤ᠂ ᠲᠠᠮᠤᠯᠠᠵᠤ ᠵᠣᠪᠠᠭᠠᠬᠤ ᠪᠡᠶᠡ ᠰᠡᠳᠬᠢᠯ ᠦ᠋ᠨ ᠡᠷᠡᠭᠦᠦ ᠬᠣᠣᠷ ᠢ᠋ ᠡᠳ᠋ᠯᠡᠬᠦ᠂ ᠬᠥᠮᠦᠨ ᠠᠮᠢᠲᠠᠨ ᠤ᠋ ᠤᠬᠠᠭᠠᠨ ᠰᠠᠨᠠᠭᠠᠨ ᠳ᠋ᠤ᠌ ᠤᠷᠤᠰᠢ ᠦᠭᠡᠢ ᠠᠶᠤᠮᠰᠢᠭᠲᠠᠢ ᠲᠠᠮᠤ ᠶ᠋ᠢᠨ ᠠᠮᠢᠳᠤᠷᠠᠯ ᠡᠬᠢᠯᠡᠪᠡ᠃
ᠬᠣᠰᠢᠭᠠᠳ(ᠬᠣᠰᠢᠶᠠᠳ) ᠰᠠᠷᠠ ᠥᠩᠭᠡᠷᠡᠲᠡᠯᠡ᠂ ᠮᠠᠩᠯᠠᠢ ᠸᠠᠩ ᠦᠬᠦᠪᠡ᠃ ᠰᠠᠬᠠᠯ ᠦᠰᠦ ᠨᠢ ᠰᠠᠭᠰᠠᠢᠨ ᠤᠷᠭᠤᠵᠤ᠂ ᠭᠡᠵᠢᠭᠡ ᠨᠢ ᠰᠢᠷᠢᠯᠳᠦᠨ ᠲᠠᠬᠢᠷᠠᠵᠤ (ᠳᠠᠭᠠᠬᠢᠷᠠᠵᠤ)᠂ ᠨᠢᠭᠤᠷ ᠨᠢ ᠵᠣᠲᠣ ᠵᠣᠳᠣᠭᠤᠯᠤᠭᠰᠠᠭᠠᠷ ᠡᠳᠡᠭᠡᠬᠦ ᠪᠡᠨ ᠪᠠᠢᠭᠰᠠᠨ ᠰᠢᠷᠬᠠ ᠶ᠋ᠢᠨ ᠬᠣᠯᠲᠣᠷᠠᠤ ᠪᠣᠯᠤᠭᠰᠠᠨ ᠮᠠᠩᠯᠠᠢ ᠸᠠᠩ ᠳᠠᠮᠳᠢᠨᠰᠦ᠋ᠷᠦᠩ ᠠᠯᠢ ᠬᠡᠳᠦᠢᠨ ᠨᠠᠮᠬᠠᠨ ᠮᠠᠭᠤᠬᠠᠢ ᠪᠠᠩᠵᠠᠨ (ᠪᠠᠨᠰᠠᠨ) ᠣᠷᠣᠨ ᠳᠡᠭᠡᠷᠡ ᠡᠴᠡ ᠪᠣᠰᠴᠤ ᠴᠢᠳᠠᠬᠤ ᠪᠠᠨ ᠪᠠᠢᠵᠤ ᠬᠡᠪᠲᠡᠬᠦ ᠪᠥᠯᠥᠭᠡ᠃ ᠦᠬᠦᠯ ᠣᠢᠷᠠᠲᠤᠭᠰᠠᠨ ᠢ᠋ ᠮᠡᠳᠡᠭᠡᠳ ᠭᠡᠨᠡᠳᠲᠡ ᠡᠴᠦᠰ ᠦ᠋ᠨ ᠬᠦᠴᠦ ᠶ᠋ᠢ ᠰᠢᠪᠬᠠᠨ ᠥᠨᠳᠡᠢᠵᠦ᠂ ᠴᠠᠩ ᠪᠣᠯᠤᠭᠰᠠᠨ ᠴᠣᠩᠬᠣᠨ ᠤ᠋ ᠮᠥᠰᠥᠲᠦᠭᠰᠡᠨ ᠲᠡᠮᠦᠷ ᠰᠡᠷᠡᠯᠵᠢᠨ ᠡᠴᠡ ᠲᠡᠳᠡᠨ ᠪᠠᠷᠢᠵᠤ ᠥᠭᠡᠳᠡ ᠪᠡᠨ ᠪᠣᠰᠤᠭᠠᠳ᠂
— ᠮᠣᠩᠭᠣᠯ ᠤ᠋ᠨ ᠪᠠᠭᠠᠲᠤᠷ ᠡᠷᠡ᠂ ᠳᠠᠢᠰᠤᠨ ᠤ᠋ ᠭᠠᠷ ᠲᠤ᠌ ᠣᠷᠣᠭᠠᠳ᠂ ᠬᠥᠯ ᠳ᠋ᠦ᠍ ᠨᠢ ᠨᠣᠬᠠᠢ ᠰᠢᠭ᠋ ᠦᠬᠦᠳᠡᠭ ᠦᠭᠡᠢ ᠶᠦᠮ᠃ ᠪᠢ ᠵᠣᠭᠰᠣᠭᠠ ᠪᠠᠷ ᠢ᠋ᠶ᠋ᠠᠨ ᠦᠬᠦᠨᠡ! ᠭᠡᠵᠦ ᠬᠠᠰᠬᠢᠷᠤᠭᠠᠳ ᠦᠬᠦᠳᠬᠢᠨ ᠤᠨᠠᠵᠠᠢ᠃ *
ᠮᠠᠩᠯᠠᠢ ᠸᠠᠩ ᠳᠠᠮᠳᠢᠨᠰᠦ᠋ᠷᠦᠩ ᠢ᠋ ᠦᠬᠦᠭᠰᠡᠨ ᠡᠴᠡ ᠬᠣᠢᠰᠢ ᠨᠠᠰᠤᠨᠪᠠᠲᠤ ᠶ᠋ᠢ ᠬᠥᠮᠦᠨ ᠠᠮᠢᠲᠠᠨ ᠫᠢᠭ ᠳᠦᠭᠦᠷᠡᠩ ᠴᠢᠬᠢᠭᠰᠡᠨ ᠨᠡᠢᠲᠡ ᠶ᠋ᠢᠨ ᠲᠠᠰᠤᠯᠭᠠᠨ ᠳ᠋ᠤ᠌ ᠣᠷᠣᠭᠤᠯᠵᠠᠢ᠃ ᠲᠡᠨᠳᠡ ᠣᠷᠣᠭᠠᠳ ᠨᠠᠰᠤᠨᠪᠠᠲᠤ《ᠰᠡᠭᠦᠯ ᠦ᠋ᠨ ᠰᠣᠨᠢᠨ》 ᠣᠯᠵᠤ ᠰᠣᠨᠣᠰᠬᠤ ᠨᠥᠬᠥᠴᠡᠯ ᠲᠡᠢ ᠪᠣᠯᠪᠠ᠃ ᠰᠢᠨᠡ ᠪᠠᠷᠢᠬᠳᠠᠭᠰᠠᠳ ᠳᠣᠲᠣᠷᠠ ᠠ᠋ᠴᠠ ᠬᠠᠭᠤᠴᠢᠨ ᠴᠡᠷᠢᠭ ᠦ᠋ᠨ ᠶᠠᠮᠤᠨ ᠤ᠋ ᠪᠢᠴᠢᠭᠡᠴᠢ ᠪᠠᠢᠭᠰᠠᠨ ᠰᠠᠢᠨᠪᠢᠯᠢᠭ᠌᠂ ᠨᠠᠰᠤᠨᠪᠠᠲᠤ ᠶ᠋ᠢᠨ ᠵᠢᠰᠦ ᠲᠠᠨᠢᠬᠤ ᠬᠥᠮᠦᠨ ᠪᠠᠢᠵᠤ ᠰᠣᠨᠢᠨ ᠢ᠋ ᠶᠠᠷᠢᠬᠤ ᠳ᠋ᠤ᠌ ᠪᠠᠨ᠂ ᠬᠦᠷᠢᠶᠡᠨ ᠦ᠌ ᠬᠥᠮᠦᠨ ᠠᠮᠢᠲᠠᠨ ᠢ᠋ ᠬᠠᠷᠭᠢᠰ ᠭᠠᠮᠢᠩ ᠤ᠋ᠳ ᠠᠶᠤᠯᠭᠠᠨ ᠰᠦᠷᠳᠡᠭᠦᠯᠦᠨ ᠰᠦᠢᠳ ᠪᠣᠯᠵᠤ ᠪᠠᠢᠨᠠ ᠭᠡᠵᠦ ᠶᠠᠷᠢᠪᠠ᠃
ᠬᠦᠷᠢᠶᠡᠨ ᠳ᠋ᠦ᠍ ᠭᠢᠨᠳᠠᠨ ᠱᠣᠷᠣᠩ ᠴᠥᠮ ᠲᠠᠭ ᠳᠦᠭᠦᠷᠡᠩ ᠪᠣᠯᠵᠠᠢ᠃ ᠪᠡᠭᠡᠵᠢᠩ ᠳ᠋ᠦ᠍ ᠶᠠᠫᠣᠨ ᠤ᠋ ᠲᠠᠯᠠ ᠶ᠋ᠢᠨ ᠠᠨ ᠹᠤᠤ ᠨᠠᠮ ᠤ᠋ᠨ ᠳ᠋ᠤᠸᠠᠨ ᠴᠢ ᠿᠦᠢ ᠶ᠋ᠢᠨ ᠪᠦᠯᠦᠭ ᠳᠠᠷᠤᠭᠳᠠᠨ ᠰᠦᠢᠷᠡᠭᠡᠳ᠂ ᠡᠷᠬᠡ ᠶ᠋ᠢ ᠰᠢᠨᠡ ᡁᠢ ᠯᠢ ᠨᠠᠮ ᠤ᠋ᠨ ᠡᠲᠡᠭᠡᠳ ᠪᠤᠯᠢᠶᠠᠨ ᠠᠪᠴᠤ᠂ ᠰᠢᠨᠡ ᠶᠡᠷᠦᠩᠬᠡᠢᠯᠡᠭᠴᠢ ᠼᠤᠤ ᠺᠦᠨ᠂ ᠳ᠋ᠤᠸᠠᠨ ᠴᠢ ᠿᠦᠢ᠂ ᠰᠢᠦᠢ ᠱᠤ᠌ ᠵᠧᠩ ᠬᠣᠶᠠᠷ ᠢ᠋ ᠪᠠᠷᠢᠵᠤ ᠠᠪᠤᠪᠠ᠃ ᠮᠣᠩᠭᠣᠯ ᠤᠯᠤᠰ ᠢ᠋ ᠳᠠᠷᠤᠩᠭᠤᠢᠯᠠᠨ ᠵᠠᠬᠢᠷᠴᠤ ᠪᠠᠢᠭᠰᠠᠨ᠂《ᠪᠠᠷᠠᠭᠤᠨ ᠬᠣᠢᠲᠤ ᠬᠢᠵᠠᠭᠠᠷ ᠤ᠋ᠨ ᠬᠡᠷᠡᠭ ᠢ᠋ ᠪᠣᠳᠣᠭᠤᠯᠤᠨ ᠰᠢᠳᠬᠡᠭᠴᠢ ᠳᠠᠷᠤᠭᠠ》 ᠭᠡᠭᠳᠡᠵᠦ ᠪᠠᠢᠭᠰᠠᠨ ᠰᠢᠦᠢ ᠣᠢᠷᠠᠬᠠᠨ ᠵᠠᠭᠤᠷᠠ᠂ ᠳ᠋ᠠᠩ ᠭᠠᠭᠴᠠ ᠬᠥᠳᠡᠯᠬᠦ ᠬᠥᠷᠥᠩᠭᠡ ᠭᠡᠪᠡᠯ ᠨᠢᠭᠡᠨ ᠰᠠᠶᠠ ᠶᠠᠩᠴᠢᠶᠠᠨ ᠤ᠋ ᠬᠥᠷᠥᠩᠭᠡ ᠲᠡᠢ ᠪᠣᠯᠤᠭᠠᠳ ᠶᠣᠰᠣ ᠪᠤᠰᠤ ᠪᠠᠷ ᠣᠯᠤᠭᠰᠠᠨ ᠬᠠᠮᠤᠭ ᠪᠦᠬᠦ ᠬᠥᠷᠥᠩᠭᠡ ᠪᠡᠨ ᠬᠤᠷᠢᠶᠠᠯᠭᠠᠨ ᠠᠯᠳᠠᠵᠤ᠂ ᠬᠦᠷᠢᠶᠡᠨᠡ ᠲᠡᠭᠦᠨ ᠢ᠋ ᠬᠠᠮᠢᠶᠠᠷᠤᠭᠰᠠᠨ ᠭᠣᠣ ᠰᠧ ᠯᠢᠩ ᠭᠧᠨᠧᠷᠠᠯ᠂ ᡁᠢ ᠯᠢ ᠨᠠᠮ ᠤ᠋ᠨ ᠲᠠᠯᠠ ᠳ᠋ᠤ᠌ ᠤᠷᠪᠠᠨ ᠣᠷᠣᠵᠠᠢ᠃
ᠤᠯᠠᠭᠠᠨ ᠴᠡᠷᠢᠭ᠂ ᠰᠢᠪᠢᠷ ᠲᠦ᠍ ᠴᠠᠭᠠᠨᠲᠠᠨ ᠢ᠋ ᠳᠠᠷᠤᠨ ᠰᠥᠨᠥᠭᠡᠵᠦ᠂ ᠮᠣᠩᠭᠣᠯ ᠤ᠋ᠨ ᠵᠠᠬᠠ ᠨᠤᠲᠤᠭ ᠬᠦᠷᠲᠡᠯᠡᠬᠢ ᠭᠠᠵᠠᠷ ᠣᠷᠣᠨ ᠢ᠋ᠶ᠋ᠠᠨ ᠠᠷᠢᠭᠤᠳᠬᠠᠪᠠ᠃ ᠴᠠᠭᠠᠨ ᠤ᠋ ᠦᠯᠡᠳᠡᠭᠳᠡᠯ ᠴᠡᠷᠢᠭ ᠮᠣᠩᠭᠣᠯ ᠭᠠᠵᠠᠷ ᠨᠡᠪᠲᠡᠷᠡᠨ ᠵᠠᠢᠯᠠᠵᠠᠢ᠃ ᠨᠠᠮᠤᠷ ᠤ᠋ᠨ ᠳᠤᠮᠳᠠ ᠰᠠᠷᠠ ᠳ᠋ᠤ᠌᠂ ᠪᠠᠷᠤᠨ ᠦᠩᠭᠧᠷᠡᠨ ᠦ᠌ ᠨᠢᠭᠡᠨ ᠳ᠋ᠢᠸᠢᠽᠢ ᠴᠡᠷᠢᠭ᠂ ᠰᠡᠴᠡᠨ ᠬᠠᠨ ᠤ᠋ ᠠᠢᠮᠠᠭ ᠲᠤ᠌ ᠴᠥᠮᠥᠷᠢᠨ ᠣᠷᠣᠵᠤ᠂ ᠪᠠᠷᠤᠨ᠂ ᠪᠣᠭᠳᠠ ᠳ᠋ᠤ᠌ ᠬᠥᠮᠦᠨ ᠵᠠᠷᠤᠵᠤ ᠰᠠᠮ ᠬᠡᠯᠡᠯᠴᠡᠭᠡ ᠬᠢᠭᠡᠳ᠂ ᠨᠠᠮᠤᠷ ᠤ᠋ᠨ ᠠᠳᠠᠭ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠳᠥᠷᠪᠡᠨ ᠦ᠌ ᠦᠷ ᠰᠥᠨᠢ ᠵᠠᠪᠰᠠᠷᠯᠠᠬᠤ ᠶ᠋ᠢᠨ ᠦᠶᠡ ᠪᠡᠷ ᠬᠦᠷᠢᠶᠡ ᠶ᠋ᠢ ᠪᠠᠢᠯᠳᠤᠨ ᠳᠠᠭᠠᠷᠢᠭᠠᠳ᠂ ᠵᠡᠭᠦᠨ ᠵᠦᠭ ᠪᠠᠶᠠᠨᠵᠢᠷᠦᠬᠡ ᠠᠭᠤᠯᠠ ᠶ᠋ᠢᠨ ᠬᠠᠪᠢ ᠳ᠋ᠤ᠌ ᠶᠡᠬᠡᠳᠡ ᠳᠠᠷᠤᠭᠳᠠᠵᠠᠢ᠃ ᠬᠠᠭᠠᠨ ᠡᠳᠦᠭᠡ ᠭᠢᠨᠳᠠᠨᠠ ᠬᠣᠷᠢᠭᠳᠠᠪᠠ᠃ ᠭᠠᠮᠢᠩ ᠳ᠋ᠤ᠌ ᠳᠤᠷᠠ ᠦᠭᠡᠢ ᠪᠠᠢᠭᠰᠠᠨ ᠨᠣᠶᠠᠳ᠂ ᠤᠰᠠᠳᠬᠠᠭᠰᠠᠨ ᠤᠯᠤᠰ ᠤ᠋ᠨ ᠳᠣᠣᠷᠠᠲᠤ ᠬᠤᠷᠠᠯ ᠤ᠋ᠨ ᠭᠡᠰᠢᠭᠦᠨ ᠪᠠᠢᠭᠰᠠᠨ ᠬᠥᠮᠦᠨ ᠴᠥᠮ ᠭᠢᠨᠳᠠᠨᠠ ᠬᠣᠷᠢᠭᠳᠠᠨ᠂ ᠬᠣᠲᠠ ᠳᠣᠲᠣᠷᠠ ᠪᠠᠢᠯᠳᠤᠭᠠᠨ ᠤ᠋ ᠴᠠᠭ ᠤ᠋ᠨ ᠬᠠᠤᠯᠢ ᠳᠦᠷᠢᠮ ᠢ᠋ ᠵᠠᠷᠯᠠᠵᠤ᠂ ᠭᠤᠳᠤᠮᠵᠢ ᠵᠡᠭᠡᠯᠢ ᠪᠡᠷ ᠴᠢᠯᠥᠭᠡᠲᠡᠢ ᠪᠡᠷ ᠶᠠᠪᠤᠵᠤ ᠪᠣᠯᠬᠤ ᠦᠭᠡᠢ ᠪᠣᠯᠵᠠᠢ᠃ ᠭᠠᠮᠢᠩ ᠬᠦᠷᠢᠶᠡ ᠬᠠᠪᠢ ᠶ᠋ᠢᠨ ᠠᠷᠠᠳ ᠤ᠋ᠨ ᠪᠠᠢᠳᠠᠭ ᠮᠠᠯ ᠢ᠋ ᠬᠤᠷᠢᠶᠠᠵᠤ᠂ ᠬᠣᠲᠠᠯᠠᠭᠰᠠᠨ ᠬᠣᠨᠢ ᠶ᠋ᠢ ᠲᠡᠷᠡ ᠬᠡᠪ ᠢ᠋ᠶ᠋ᠡᠷ ᠨᠢ᠂ ᠬᠡᠭᠡᠷᠡ ᠪᠠᠢᠭᠠ ᠰᠦᠷᠦᠭ ᠠᠳᠤᠭᠤ ᠶ᠋ᠢ ᠲᠡᠷᠡ ᠴᠢᠭ ᠢ᠋ᠶ᠋ᠡᠷ ᠨᠢ ᠲᠠᠭᠤᠵᠤ ᠠᠪᠠᠴᠢᠳᠠᠭ ᠪᠣᠯᠪᠠ᠃ ᠬᠦᠷᠢᠶᠡᠨ ᠳ᠋ᠦ᠍ ᠶᠠᠭᠤᠮᠠ ᠠᠪᠬᠤ ᠭᠡᠵᠦ ᠣᠷᠣᠵᠤ ᠢᠷᠡᠭᠰᠡᠨ ᠬᠥᠳᠡᠭᠡ ᠶ᠋ᠢᠨ ᠬᠥᠮᠦᠨ ᠢ᠋ ᠬᠥᠰᠬᠡ ᠤᠨᠤᠭᠠ ᠶ᠋ᠢᠨ ᠬᠠᠮᠲᠤ ᠪᠠᠷᠢᠵᠤ ᠠᠪᠤᠭᠠᠳ᠂ ᠲᠦᠷᠢᠮᠡᠬᠡᠢᠯᠡᠨ ᠡᠵᠡᠯᠡᠭᠰᠡᠨ ᠴᠡᠷᠢᠭ ᠦ᠋ᠨ ᠠᠭᠲᠠᠨ ᠤ᠋ ᠡᠪᠡᠰᠦ᠂ ᠴᠡᠷᠢᠭ ᠦ᠋ᠨ ᠬᠤᠸᠠᠷᠠᠨ ᠤ᠋ ᠲᠦᠯᠡᠭᠡ ᠠᠯᠪᠠᠲᠠᠨ ᠵᠥᠭᠡᠭᠡᠯᠭᠡᠳᠡᠭ ᠪᠠᠢᠨᠠ᠃ ᠲᠡᠷᠡ ᠰᠤᠷᠠᠭ ᠢ᠋ᠶ᠋ᠠᠷ ᠠᠮᠢᠲᠠᠨ ᠰᠣᠴᠢᠨ ᠭᠡᠯᠮᠡᠭᠳᠡᠵᠦ᠂ ᠬᠦᠷᠢᠶᠡ ᠣᠷᠣᠬᠤ ᠶ᠋ᠢ ᠪᠠᠢᠭᠠᠳ᠂ ᠣᠳᠣ ᠬᠦᠷᠢᠶᠡᠨ ᠳ᠋ᠦ᠍ ᠮᠢᠬᠠ᠂ ᠰᠦ᠂ ᠲᠣᠰᠣ᠂ ᠴᠠᠭᠠᠨ ᠢᠳᠡᠭᠡᠨ ᠦ᠌ ᠵᠡᠷᠭᠡ ᠢᠳᠡᠬᠦ ᠤᠤᠭᠤᠬᠤ ᠶᠠᠭᠤᠮᠠ ᠲᠠᠰᠤᠯᠳᠠᠵᠤ᠂ ᠬᠥᠮᠦᠨ ᠠᠮᠢᠲᠠᠨ ᠥᠯᠥᠰᠬᠦ ᠶ᠋ᠢᠨ ᠳᠠᠪᠠᠭᠠᠨ ᠳᠡᠭᠡᠷᠡ ᠭᠠᠷᠤᠭᠠᠳ ᠪᠠᠢᠨᠠ᠃ ᠬᠦᠷᠢᠶᠡ ᠶ᠋ᠢᠨ ᠬᠢᠨ ᠴᠥᠮ ᠠᠶᠤᠨ ᠡᠮᠢᠶᠡᠵᠦ᠂ ᠣᠷᠣᠢ ᠤᠨᠲᠠᠬᠤ ᠳ᠋ᠠᠭᠠᠨ (ᠳ᠋ᠤ᠌ ᠪᠠᠨ)᠂ ᠥᠷᠯᠥᠭᠡ ᠭᠡᠷ ᠲᠡᠭᠡᠨ(ᠲᠤ᠌ ᠪᠡᠨ) ᠬᠡᠪᠲᠡᠵᠦ ᠪᠠᠢᠳᠠᠭ ᠪᠢᠯᠡ ᠤᠤ᠂ ᠭᠠᠮᠢᠩ ᠤ᠋ᠨ ᠱᠣᠷᠣᠩ ᠳ᠋ᠤ᠌ ᠬᠡᠪᠲᠡᠵᠦ ᠪᠠᠢᠳᠠᠭ ᠪᠣᠯᠪᠠᠤ(ᠪᠣᠯᠪᠠ ᠤᠤ) ᠭᠡᠵᠦ ᠪᠣᠳᠣᠳᠠᠭ ᠪᠣᠯᠵᠠᠢ᠃ ᠨᠠᠷᠠᠨ ᠳ᠋ᠤ᠌ ᠲᠡᠭᠡᠵᠦ ᠠᠶᠤᠵᠤ ᠶᠠᠪᠤᠳᠠᠭ ᠢ᠋ ᠪᠣᠳᠣᠪᠠᠯ᠂ ᠡᠨᠡ ᠱᠣᠷᠣᠩ ᠳ᠋ᠤ᠌ ᠬᠠᠷᠢᠨ ᠬᠡᠵᠢᠶᠡ ᠪᠠᠷᠢᠭᠳᠠᠬᠤ ᠬᠣᠷᠢᠭᠳᠠᠬᠤ ᠪᠣᠯ? ᠭᠡᠵᠦ ᠠᠶᠤᠬᠤ ᠵᠣᠪᠠᠬᠤ ᠦᠭᠡᠢ ᠰᠠᠨᠠᠭᠠ ᠠᠮᠤᠷ ᠶᠤᠮ ᠰᠢᠪ ᠳᠡ ᠭᠡᠵᠦ ᠰᠠᠢᠨᠪᠢᠯᠢ᠍ᠭ᠌ ᠭᠠᠰᠢᠭᠤᠨ ᠢ᠋ᠶ᠋ᠠᠷ ᠬᠣᠱᠣᠩᠨᠠᠨ᠂ ᠨᠠᠰᠤᠨᠪᠠᠲᠤ ᠳ᠋ᠤ᠌ ᠭᠠᠳᠠᠨᠠᠬᠢ ᠰᠣᠨᠢᠨ ᠢ᠋ ᠶᠠᠷᠢᠵᠤ ᠭᠦᠢᠴᠡᠪᠡ᠃
ᠲᠦᠷᠢᠮᠡᠬᠡᠢᠯᠡᠨ ᠡᠵᠡᠯᠡᠭᠴᠢ ᠭᠠᠮᠢᠩ ᠤ᠋ᠨ ᠲᠡᠮᠦᠯᠡᠨ ᠵᠣᠪᠠᠭᠠᠬᠤ ᠭᠢᠨᠳᠠᠨ ᠳ᠋ᠤ᠌ ᠦᠬᠦᠬᠦ ᠴᠠᠭ ᠢ᠋ᠶ᠋ᠠᠨ ᠢᠷᠡᠭᠡ ᠦᠭᠡᠢ ᠳ᠋ᠦ᠍᠂ ᠬᠥᠮᠦᠨ ᠲᠡᠭᠡᠵᠦ ᠠᠶᠤᠮᠰᠢᠭ ᠲᠠᠢ ᠪᠡᠷᠬᠡ ᠲᠦᠮᠡᠨ ᠵᠣᠪᠠᠯᠠᠩᠲᠤ ᠠᠮᠢᠳᠤᠷᠠᠯᠭᠠ ᠪᠠᠷ ᠡᠳᠦᠷ ᠬᠣᠨᠣᠭ ᠢ᠋ ᠥᠩᠭᠡᠷᠡᠭᠦᠯᠵᠦ ᠪᠠᠢᠪᠠ᠃ ᠲᠡᠷᠡ ᠭᠠᠰᠢᠭᠤᠨ ᠲᠠᠮᠤ ᠳ᠋ᠤ᠌ ᠠᠮᠢᠳᠤ ᠪᠠᠢᠵᠤ ᠪᠠᠢᠭᠰᠠᠨ ᠤᠯᠤᠰ᠂ ᠬᠥᠮᠦᠨ ᠴᠢᠨᠠᠷ ᠢ᠋ᠶ᠋ᠠᠨ ᠬᠠᠷᠭᠢᠰ ᠤ᠋ᠨ ᠳᠠᠷᠤᠯᠠᠯ ᠳ᠋ᠤ᠌ ᠠᠯᠳᠠᠯ ᠦᠭᠡᠢ᠂ ᠡᠪᠡᠳᠴᠢᠲᠡᠢ ᠨᠥᠬᠥᠳ ᠢ᠋ᠶ᠋ᠡᠨ ᠠᠰᠠᠷᠠᠵᠤ᠂ ᠡᠷᠡᠭᠦᠦ ᠰᠢᠭᠦᠯᠲᠡᠨ ᠳ᠋ᠦ᠍ ᠡᠷᠡᠮᠳᠡᠭ ᠵᠡᠮᠳᠡᠭ ᠪᠣᠯᠤᠭᠰᠠᠨ ᠬᠥᠭᠡᠷᠦᠬᠦᠢ ᠨᠥᠬᠥᠳ ᠢ᠋ᠶ᠋ᠡᠨ ᠴᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠤᠪᠢᠯᠠᠵᠤ᠂ ᠪᠡᠶᠡ ᠪᠡᠶᠡ ᠶ᠋ᠢᠨ ᠰᠡᠳᠬᠢᠯ ᠢ᠋ ᠲᠡᠵᠢᠭᠡᠵᠦ᠂ ᠨᠢᠭᠡ ᠡᠳᠦᠷ ᠨᠢ ᠵᠢᠯ ᠮᠡᠲᠦ ᠰᠠᠨᠠᠭᠳᠠᠮᠠᠷ ᠵᠣᠪᠠᠯᠠᠩᠲᠤ ᠡᠳᠦᠷ ᠴᠠᠭ ᠢ᠋ ᠥᠩᠭᠡᠷᠡᠭᠡᠬᠦ ᠭᠡᠵᠦ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ(ᠳ᠋ᠦ᠍ ᠪᠡᠨ)ᠦᠯᠢᠭᠡᠷ ᠬᠡᠯᠡᠵᠦ ᠪᠠᠢᠳᠠᠭ᠂ ᠡᠭᠦᠨ ᠳ᠋ᠦ᠍᠂ ᠲᠡᠷᠡ ᠦᠯᠢᠭᠡᠷ ᠦ᠋ᠨ ᠳᠣᠲᠣᠷᠠ ᠦᠨᠡᠨ ᠰᠢᠳᠤᠷᠭᠤ ᠨᠢ ᠬᠠᠷᠭᠢᠰ ᠪᠤᠷᠤᠩᠬᠤᠢ ᠶ᠋ᠢ ᠡᠴᠦᠰ ᠲᠡᠭᠡᠨ ᠢᠯᠠᠵᠤ᠂ ᠬᠢᠯᠢᠰ ᠮᠤᠰᠬᠢᠭᠤ ᠶ᠋ᠢᠨ ᠵᠣᠪᠠᠯᠠᠩ ᠳ᠋ᠤ᠌ ᠡᠷᠡᠰᠳᠡᠭᠰᠡᠨ ᠨᠢ ᠦᠨᠡᠨ ᠵᠥᠪ ᠢ᠋ᠶ᠋ᠡᠨ ᠣᠯᠵᠤ᠂ ᠠᠮᠤᠷ ᠰᠠᠢᠬᠠᠨ ᠳ᠋ᠠᠭᠠᠨ(ᠳ᠋ᠤ᠌ ᠪᠠᠨ) ᠵᠢᠷᠭᠠᠳᠠᠭ ᠢ᠋ ᠰᠣᠨᠣᠰᠴᠤ᠂ ᠤᠢᠳᠬᠠᠷ ᠵᠣᠪᠠᠯᠠᠩ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠰᠡᠳᠬᠢᠯ ᠦ᠋ᠨ ᠭᠤᠨᠢᠭ ᠢ᠋ ᠰᠡᠷᠭᠦᠭᠡᠳᠡᠭ ᠪᠢᠯᠡ᠃ ᠲᠡᠭᠡᠵᠦ ᠡᠳᠦᠷ ᠬᠣᠨᠣᠭ ᠲᠦᠯᠬᠢᠨ ᠥᠩᠭᠡᠷᠡᠭᠦᠯᠵᠦ ᠪᠠᠢᠲᠠᠯᠠ᠂ ᠭᠡᠨᠡᠳᠲᠡ ᠡᠪᠦᠯ ᠦ᠋ᠨ ᠠᠳᠠᠭ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠳᠥᠷᠪᠡᠨ ᠳ᠋ᠦ᠍ ᠶᠡᠬᠡ ᠫᠤᠤ ᠨᠢᠵᠢᠭᠢᠨᠡᠨ ᠫᠤᠤᠳᠠᠵᠤ᠂ ᠫᠦᠯᠧᠮᠶᠣᠲ ᠸᠢᠨᠲ᠋ᠣᠸ ᠲᠠᠴᠢᠭᠢᠨᠠᠬᠤ ᠰᠦᠷ ᠲᠡᠢ ᠪᠠᠢᠯᠳᠤᠭᠠᠨ ᠤ᠋ ᠴᠢᠮᠡᠭᠡ ᠭᠠᠳᠠᠨᠠ ᠠ᠋ᠴᠠ ᠰᠣᠨᠣᠰᠳᠠᠪᠠ᠃ ᠪᠢᠲᠡᠭᠦᠦ ᠭᠢᠨᠳᠠᠨ ᠱᠣᠷᠣᠩ ᠤ᠋ᠨ ᠭᠠᠳᠠᠨᠠ ᠴᠣᠬᠣᠮ ᠶᠠᠭᠤᠬᠠᠨ ᠪᠣᠯᠵᠤ ᠪᠠᠢᠭᠠ ᠶᠤᠮ ᠪᠣᠯ? ᠭᠠᠮᠢᠩ ᠤ᠋ᠨ ᠬᠠᠷᠠ ᠲᠠᠮᠤ ᠠ᠋ᠴᠠ ᠠᠮᠢ ᠵᠤᠯᠪᠠᠵᠤ ᠭᠠᠷᠬᠤ ᠴᠠᠭ ᠣᠢᠷᠠᠲᠤᠵᠤ ᠪᠠᠢᠭᠠ ᠶᠤᠮ ᠪᠣᠯᠪᠠᠤ? ᠰᠦᠬᠡᠪᠠᠭᠠᠲᠤᠷ — ᠴᠣᠢᠪᠠᠯᠰᠠᠩ ᠬᠣᠶᠠᠷ ᠭᠠᠮᠢᠩ ᠲᠠᠢ ᠪᠠᠢᠯᠳᠤᠨ ᠲᠤᠯᠵᠤ᠂ ᠵᠣᠪᠠᠭᠰᠠᠨ ᠣᠯᠠᠨ ᠳ᠋ᠠᠭᠠᠨ ᠡᠷᠬᠡ ᠴᠢᠯᠥᠭᠡ ᠶ᠋ᠢ ᠨᠢ ᠣᠯᠭᠣᠬᠤ ᠭᠡᠵᠦ ᠲᠦᠷᠢᠮᠡᠬᠡᠢᠯᠡᠨ ᠡᠵᠡᠯᠡᠭᠴᠢ ᠬᠠᠷᠭᠢᠰ ᠤ᠋ᠳ ᠲᠠᠢ ᠳᠠᠢᠳᠤᠵᠤ ᠪᠠᠢᠭᠠ ᠶᠤᠮ ᠪᠣᠯᠪᠠᠤ? ᠭᠡᠵᠦ ᠱᠣᠷᠣᠩ ᠭᠢᠨᠳᠠᠨ ᠤ᠋ ᠢᠷᠣᠭᠠᠷ ᠲᠤ᠌ ᠵᠣᠪᠠᠨ ᠵᠦᠳᠡᠭᠰᠡᠨ ᠪᠦᠬᠦᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠭᠣᠷᠢᠳᠠᠯ ᠲᠥᠷᠥᠪᠡ᠃
ᠲᠡᠭᠡᠭᠰᠡᠭᠡᠷ ᠦᠳᠡᠰᠢ ᠳᠠᠰᠢ ᠨᠠᠰᠤᠨᠪᠠᠲᠤ᠂ ᠱᠣᠷᠣᠩ ᠤ᠋ᠨ ᠬᠣᠩᠭᠢᠯ ᠳ᠋ᠤ᠌ ᠭᠠᠮᠢᠩ ᠬᠤᠶᠠᠭ ᠤ᠋ᠨ ᠶᠠᠷᠢᠯᠴᠠᠬᠤ ᠭᠠᠭᠴᠠ ᠨᠢᠭᠡᠨ ᠦᠭᠡ ᠴᠢᠬᠢ ᠲᠠᠯᠪᠢᠨ ᠰᠣᠨᠣᠰᠪᠠᠰᠤ᠂ ᠪᠠᠷᠤᠨ ᠤ᠋ ᠴᠡᠷᠢᠭ ᠦ᠋ᠨ ᠬᠠᠯᠳᠠᠨ ᠳᠣᠪᠲᠣᠯᠵᠤ ᠪᠠᠢᠭᠠ ᠶ᠋ᠢ ᠭᠠᠮᠢᠩ ᠨᠢᠴᠤᠭᠠᠨ ᠪᠠᠢᠯᠳᠤᠵᠤ ᠪᠠᠢᠭᠠ ᠠᠵᠢ᠃ ᠲᠡᠷᠡ ᠰᠥᠨᠢ ᠮᠥᠷᠳᠡᠨ ᠪᠠᠢᠴᠠᠭᠠᠵᠤ ᠡᠷᠡᠭᠦᠦ ᠰᠢᠭᠦᠯᠲᠡ ᠲᠤᠯᠭᠠᠬᠤ ᠭᠡᠵᠦ ᠱᠣᠷᠣᠩ ᠠ᠋ᠴᠠ ᠨᠢᠭᠡ ᠴᠦ᠍ ᠬᠥᠮᠦᠨ ᠠᠪᠠᠴᠢᠭᠰᠠᠨ ᠦᠭᠡᠢ᠃ ᠬᠣᠢᠲᠤ ᠡᠳᠦᠷ ᠨᠢ ᠬᠤᠶᠠᠭ ᠤ᠋ᠳ᠂ ᠣᠯᠠᠨ ᠬᠣᠷᠢᠭᠳᠠᠯ ᠳ᠋ᠤ᠌ ᠬᠦᠢᠲᠡᠨ ᠴᠠᠢ᠂ ᠬᠣᠰᠢᠭᠠᠳ ᠬᠣᠰᠢᠭᠠᠳ ᠬᠥᠯᠳᠡᠭᠦᠦ ᠮᠠᠨᠲᠠᠤ ᠥᠭᠭᠦᠭᠡᠳ᠂ ᠪᠦᠯᠢᠶᠡᠨ ᠶᠠᠭᠤᠮᠠ ᠶᠡᠷᠦ ᠠᠮᠰᠠᠭᠤᠯᠤᠭᠰᠠᠨ ᠦᠭᠡᠢ᠃ ᠶᠡᠷᠦ ᠪᠠᠢᠳᠠᠯ ᠢ᠋ ᠠᠵᠢᠭᠯᠠᠪᠠᠯ᠂ ᠭᠠᠮᠢᠩ ᠤ᠋ᠳ ᠭᠢᠨᠳᠠᠨ ᠳ᠋ᠤ᠌ ᠬᠣᠷᠢᠭᠳᠠᠭᠰᠠᠨ ᠬᠥᠮᠦᠨ ᠢ᠋ ᠪᠣᠳᠣᠬᠤ ᠵᠠᠪ ᠦᠭᠡᠢ ᠪᠣᠯᠤᠭᠰᠠᠨ ᠪᠣᠯᠤᠯᠲᠠᠢ᠃ ᠬᠠᠮᠢᠶᠠ ᠨᠠᠮᠢᠶᠠ ᠦᠭᠡᠢ ᠫᠤᠤᠳᠠᠬᠤ ᠴᠢᠮᠡᠭᠡ ᠡᠳᠦᠷ ᠰᠥᠨᠢ ᠦᠭᠡᠢ ᠳᠤᠭᠤᠯᠳᠠᠬᠤ ᠪᠣᠯᠪᠠ᠃ ᠨᠢᠭᠡᠨ ᠥᠷᠯᠥᠭᠡ ᠭᠡᠨᠡᠳᠲᠡ ᠭᠠᠳᠠᠨᠠ ᠠ᠋ᠴᠠ ᠤᠷᠢᠳᠤ ᠡᠮᠦᠨᠡ ᠰᠣᠨᠣᠰᠳᠠᠭᠰᠠᠨ ᠦᠭᠡᠢ ᠬᠠᠴᠢᠨ ᠴᠢᠮᠡᠭᠡ ᠲᠦᠪᠦᠷᠭᠡᠨ ᠰᠣᠨᠣᠰᠳᠠᠵᠤ᠂ ᠬᠠᠶᠠ ᠫᠢᠳ ᠫᠢᠳ ᠫᠤᠤ ᠳᠤᠤᠭᠠᠷᠬᠤ ᠴᠢᠮᠡᠭᠡᠨ ᠳ᠋ᠦ᠍ ᠴᠦ᠍ ᠳᠠᠷᠤᠭᠳᠠᠬᠤ ᠦᠭᠡᠢ ᠫᠢᠴᠢᠭᠢᠨᠡᠬᠦ ᠨᠢ ᠲᠡᠮᠦᠷ ᠬᠠᠳᠠᠭᠠᠰᠤ ᠶ᠋ᠢ ᠵᠠᠪᠰᠠᠷ ᠦᠭᠡᠢ ᠬᠠᠲᠠᠭᠰᠠᠨ ᠤᠯᠠ ᠲᠠᠢ᠂ ᠭᠠᠮᠢᠩ ᠤ᠋ᠨ ᠬᠦᠨᠳᠦ ᠭᠡᠭᠴᠢ ᠶ᠋ᠢᠨ ᠴᠡᠷᠢᠭ ᠱᠠᠬᠠᠢ ᠶ᠋ᠢᠨ ᠴᠢᠮᠡᠭᠡ᠂ ᠲᠦᠮᠡᠨ ᠭᠠᠮᠢᠩ ᠤ᠋ᠨ ᠠᠯᠬᠤᠬᠤ ᠬᠥᠯ ᠦ᠋ᠨ ᠲᠦᠪᠦᠷᠭᠡᠨ ᠰᠣᠨᠣᠰᠳᠠᠪᠠ᠃ ᠱᠣᠷᠣᠩ ᠳ᠋ᠠᠬᠢ ᠨᠢᠭᠡᠨ ᠲᠠᠰᠤᠯᠭᠠᠨ ᠠ᠋ᠴᠠ ᠤᠴᠢᠷ ᠨᠠᠵᠢᠷ ᠦᠭᠡᠢ ᠬᠠᠭᠠᠯᠭᠠ ᠪᠠᠯᠪᠠᠬᠤ ᠴᠢᠮᠡᠭᠡ ᠰᠣᠨᠣᠰᠳᠠᠪᠠ᠃ ᠴᠢᠩᠨᠠᠪᠠᠯ ᠲᠠᠰᠤᠯᠭᠠ ᠶ᠋ᠢᠨ ᠳᠣᠲᠣᠷᠠ ᠠ᠋ᠴᠠ ᠬᠥᠮᠦᠨ᠂ ᠬᠠᠭᠠᠯᠭᠠ ᠶ᠋ᠢ ᠨᠢᠭᠡ ᠬᠦᠨᠳᠦ ᠶᠠᠭᠤᠮᠠ ᠪᠠᠷ ᠴᠣᠬᠢᠨ ᠡᠪᠳᠡᠵᠦ ᠪᠠᠢᠭᠠ ᠮᠡᠲᠦ ᠪᠠᠯᠪᠠᠭᠰᠠᠭᠠᠷ᠂ ᠬᠠᠭᠠᠯᠭᠠ ᠶ᠋ᠢᠨ ᠪᠠᠩᠵᠠ ᠡᠪᠳᠡᠷᠡᠬᠦ ᠴᠢᠮᠡᠭᠡ ᠰᠣᠨᠣᠰᠳᠠᠵᠠᠢ᠃
— ᠨᠥᠬᠥᠳ ᠠ᠋! ᠭᠠᠮᠢᠩ ᠴᠢᠨᠳᠠᠷᠤᠤ ᠵᠢᠭᠤᠲᠠᠵᠠᠢ! ᠭᠡᠵᠦ ᠲᠡᠰᠬᠡᠯ ᠦᠭᠡᠢ ᠪᠠᠶᠠᠷᠯᠠᠨ ᠬᠠᠰᠬᠢᠷᠬᠤ ᠴᠢᠮᠡᠭᠡ ᠰᠣᠨᠣᠰᠳᠠᠵᠤ᠂ ᠬᠠᠭᠠᠯᠭᠠ ᠶ᠋ᠢᠨ ᠴᠣᠣᠵᠢ ᠴᠣᠬᠢᠵᠤ ᠡᠪᠳᠡᠬᠦ᠂ ᠬᠠᠭᠠᠯᠭᠠ ᠬᠠᠪ ᠶᠠᠪ ᠬᠠᠭᠠᠭᠳᠠᠬᠤ ᠨᠡᠭᠡᠭᠡᠭᠳᠡᠬᠦ ᠴᠢᠮᠡᠭᠡ᠂
— ᠠ᠋᠂ ᠭᠢᠯᠠᠢᠯᠠ᠃ ᠠ᠋᠂ ᠭᠢᠯᠠᠢᠯᠠ! ᠭᠡᠵᠦ ᠪᠠᠶᠠᠷᠯᠠᠨ ᠳᠤᠤᠭᠠᠷᠬᠤ ᠳᠠᠭᠤᠨ ᠴᠢᠮᠡᠭᠡ ᠰᠣᠨᠣᠰᠳᠠᠪᠠ᠃
ᠮᠢᠬᠠ ᠮᠠᠷᠢᠶᠠ ᠰᠢᠭᠤᠷᠠᠵᠤ᠂ ᠲᠤᠷᠠᠵᠤ ᠵᠦᠳᠡᠭᠰᠡᠨ᠂ ᠦᠢᠯᠡ ᠲᠠᠮᠤ ᠪᠠᠨ ᠦᠵᠡᠭᠰᠡᠨ ᠤᠯᠤᠰ ᠪᠠᠶᠠᠷ ᠤ᠋ᠨ ᠮᠠᠩᠨᠠᠢ ᠲᠡᠨᠢᠢᠵᠦ᠂ ᠬᠣᠷᠢᠬᠤ ᠲᠠᠰᠤᠯᠭᠠᠨ ᠠ᠋ᠴᠠ ᠬᠣᠩᠭᠢᠯ ᠳ᠋ᠤ᠌ ᠪᠤᠵᠢᠭᠢᠨᠠᠨ ᠭᠦᠶᠦᠵᠦ ᠭᠠᠷᠪᠠ᠃ ᠶᠠᠪᠤᠵᠤ ᠴᠢᠳᠠᠬᠤ ᠦᠭᠡᠢ ᠨᠢᠭᠡ ᠶ᠋ᠢ ᠪᠡᠨ ᠨᠥᠬᠥᠳ ᠨᠢ ᠦᠮᠡᠬᠡᠢ ᠴᠢᠭᠢᠭᠲᠡᠢ ᠲᠠᠰᠤᠯᠭᠠᠨ ᠠ᠋ᠴᠠ ᠪᠠᠨ ᠳᠠᠮᠵᠢᠯᠠᠨ ᠭᠠᠷᠭᠠᠵᠤ᠂ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠱᠣᠷᠣᠩ ᠠ᠋ᠴᠠ ᠭᠠᠳᠠᠨᠠ ᠭᠠᠷᠤᠭᠠᠳ᠂ ᠭᠡᠭᠡᠬᠡᠨ ᠨᠠᠷᠠᠨ ᠤ᠋ ᠬᠤᠷᠴᠠ ᠭᠡᠷᠡᠯ ᠳ᠋ᠦ᠍ ᠨᠢᠳᠦ ᠭᠢᠯᠪᠠᠵᠤ᠂ ᠠᠷᠢᠬᠢ ᠮᠡᠲᠦ ᠰᠣᠭᠲᠣᠭᠠᠭᠴᠢ ᠵᠢᠬᠡᠭᠦᠨ ᠠᠷᠢᠭᠤᠨ ᠬᠡᠢ ᠶ᠋ᠢ ᠠᠮᠢᠰᠬᠤᠯᠯᠠᠪᠠ᠃
ᠬᠦᠷᠢᠶᠡ᠂ ᠰᠥᠨᠥᠵᠦ ᠮᠥᠬᠥᠭᠰᠡᠨ ᠶᠦᠮ ᠰᠢᠭ᠂ ᠭᠤᠳᠤᠮᠵᠢ ᠪᠠᠷ ᠶᠠᠪᠤᠬᠤ ᠵᠣᠷᠴᠢᠬᠤ ᠬᠥᠮᠦᠨ ᠨᠢᠭᠡ ᠴᠦ᠍ ᠦᠭᠡᠢ᠂ ᠭᠤᠳᠤᠮᠵᠢᠨ ᠳ᠋ᠤ᠌ ᠡᠨᠳᠡ ᠲᠡᠨᠳᠡ ᠦᠬᠦᠭᠰᠡᠨ ᠭᠠᠮᠢᠩ᠂ ᠬᠠᠶᠠᠭᠰᠠᠨ ᠫᠤᠤ᠂ ᠪᠣᠭᠣᠳᠠᠯ ᠲᠠᠢ ᠨᠣᠪᠰᠢ ᠦᠵᠡᠭᠳᠡᠵᠦ᠂ ᠬᠠᠶᠠ ᠭᠠᠭᠴᠠ ᠨᠢᠭᠡ ᠫᠤᠤ ᠳᠡᠰ ᠬᠢᠬᠦ ᠴᠢᠮᠡᠭᠡ ᠰᠣᠨᠣᠰᠳᠠᠪᠠ᠃ ᠨᠠᠰᠤᠨᠪᠠᠲᠤ ᠮᠠᠢᠮᠠᠢ ᠬᠣᠲᠠ ᠣᠷᠣᠬᠤ ᠵᠠᠮ ᠳ᠋ᠠᠭᠠᠨ(ᠳ᠋ᠤ᠌ ᠪᠠᠨ)᠂ ᠮᠥᠷᠦᠨ ᠳᠡᠭᠡᠷᠡ ᠪᠡᠨ ᠫᠣᠭᠣᠨ ᠬᠠᠲᠠᠭᠰᠠᠨ ᠣᠷᠣᠰ ᠴᠡᠷᠢᠭ᠂ ᠮᠣᠩᠭᠣᠯ ᠴᠡᠷᠢᠭ ᠫᠤᠤ ᠡᠭᠦᠷᠴᠦ᠂ ᠭᠠᠭᠴᠠ ᠨᠢᠭᠡ ᠪᠡᠷ᠂ ᠬᠡᠰᠡᠭ ᠪᠦᠯᠦᠭ ᠢ᠋ᠶ᠋ᠡᠷ ᠥᠭᠡᠳᠡ ᠡᠴᠡ ᠨᠢ ᠳᠠᠪᠬᠢᠵᠤ ᠶᠠᠪᠤᠬᠤ ᠶ᠋ᠢ ᠦᠵᠡᠭᠡᠳ ᠥᠨᠥᠬᠢ ᠪᠠᠷᠣᠨ ᠦᠩᠭᠧᠷᠠᠨ ᠭᠡᠭᠴᠢ ᠶ᠋ᠢᠨ ᠴᠠᠭᠠᠨ ᠨᠠᠮ ᠤ᠋ᠨ ᠴᠡᠷᠢᠭ ᠭᠡᠳᠡᠭ ᠡᠨᠡ ᠪᠠᠢᠵᠠᠢ ᠭᠡᠵᠦ ᠳᠠᠭᠠᠵᠤ ᠮᠡᠳᠡᠪᠡ᠃ ᠲᠡᠷᠡ ᠴᠡᠷᠢᠭ ᠦ᠋ᠨ ᠵᠠᠷᠢᠮ ᠨᠢ᠂ ᠦᠵᠡᠰᠢ ᠦᠭᠡᠢ ᠮᠠᠭᠤᠬᠠᠢ ᠤᠷᠠᠩᠬᠠᠢ᠂ ᠴᠢᠰᠤ ᠨᠥᠵᠢ ᠪᠣᠯᠤᠭᠰᠠᠨ ᠬᠤᠪᠴᠠᠰᠤ ᠲᠠᠢ᠂ ᠰᠠᠬᠠᠯ ᠦᠰᠦ ᠰᠠᠭᠰᠠᠢᠨ ᠤᠷᠭᠤᠭᠰᠠᠨ᠂ ᠬᠣᠬᠢᠭᠠᠷ ᠴᠠᠭᠠᠨ ᠴᠢᠷᠠᠢ ᠲᠠᠢ ᠬᠥᠮᠦᠨ ᠦ᠌ ᠴᠤᠤ ᠴᠢᠮᠠᠢ ᠭᠡᠵᠦ ᠬᠡᠯᠲᠦᠷᠢᠵᠦ ᠶᠠᠪᠤᠭᠠ ᠶ᠋ᠢ ᠬᠠᠷᠠᠭᠠᠳ᠂ ᠶᠠᠭᠤᠨ ᠬᠥᠮᠦᠨ ᠪᠣᠢ ᠭᠡᠵᠦ ᠳᠠᠪᠬᠢᠵᠤ ᠢᠷᠡᠭᠡᠳ᠂ ᠮᠣᠩᠭᠣᠯ ᠬᠥᠮᠦᠨ ᠭᠡᠵᠦ ᠮᠡᠳᠡᠭᠡᠳ ᠥᠩᠭᠡᠷᠡᠳᠡᠭ ᠪᠠᠢᠵᠠᠢ᠃ ᠵᠠᠷᠢᠮ ᠨᠢ ᠬᠠᠮᠢᠭᠠ ᠠ᠋ᠴᠠ ᠬᠠᠮᠢᠭᠠᠰᠢ ᠶᠠᠪᠤᠵᠤ ᠶᠠᠪᠤᠭᠠ ᠶ᠋ᠢ ᠠᠰᠠᠭᠤᠵᠤ ᠪᠠᠢᠪᠠ᠃
ᠮᠠᠢᠮᠠᠢ ᠬᠣᠲᠠᠨᠠ ᠬᠢᠲᠠᠳ ᠫᠦᠰᠡ ᠳᠡᠭᠡᠷᠡᠮᠳᠡᠨ ᠲᠣᠨᠣᠵᠤ ᠶᠠᠪᠤᠭᠰᠠᠨ᠂ ᠪᠠᠷᠣᠨ ᠤ᠋ ᠣᠷᠣᠰ ᠮᠣᠩᠭᠣᠯ ᠴᠡᠷᠢᠭ ᠨᠠᠰᠤᠨᠪᠠᠲᠤ ᠳ᠋ᠤ᠌ ᠳᠠᠭᠠᠷᠢᠯᠳᠤᠬᠤ ᠪᠣᠯᠪᠠ᠃ ᠰᠠᠭᠤᠳᠠᠭ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠᠨ ᠳ᠋ᠤ᠌ ᠬᠦᠷᠴᠦ᠂ ᠲᠠᠰᠢᠷᠠᠮ ᠤ᠋ᠨ ᠬᠠᠭᠠᠯᠭᠠ ᠶ᠋ᠢ ᠲᠣᠭᠰᠢᠲᠠᠯᠠ᠂ ᠪᠣᠭᠴᠣ ᠪᠠᠷ ᠳᠦᠭᠦᠷᠡᠩ ᠲᠣᠷᠭᠠ ᠴᠢᠬᠢᠭᠰᠡᠨ ᠨᠢᠭᠡᠨ ᠰᠣᠭᠲᠣᠭᠤ ᠳᠡᠭᠡᠷᠡᠮᠴᠢᠨ ᠴᠡᠷᠢᠭ᠂ ᠨᠠᠰᠤᠨᠪᠠᠲᠤ ᠶ᠋ᠢᠨ ᠬᠠᠵᠠᠭᠤ ᠪᠠᠷ ᠳᠠᠪᠬᠢᠨ ᠭᠠᠷᠤᠩᠭᠤᠲᠠ᠂ ᠨᠠᠺᠠᠨ ᠢ᠋ᠶ᠋ᠠᠷ ᠫᠤᠤᠳᠠᠵᠠᠢ᠃
ᠪᠠᠲᠤᠪᠠᠶᠠᠷ ᠡᠪᠦᠭᠡᠨ ᠬᠥᠪᠡᠭᠦᠨ ᠢ᠋ ᠭᠠᠮᠢᠩ ᠤ᠋ᠨ ᠱᠣᠷᠣᠩ ᠳ᠋ᠤ᠌ ᠣᠷᠣᠭᠰᠠᠨ ᠢ᠋ ᠰᠣᠨᠣᠰᠤᠭᠠᠳ ᠬᠥᠳᠡᠭᠡ ᠡᠴᠡ ᠢᠷᠡᠵᠦ᠂ ᠡᠨᠡ ᠲᠡᠷᠡ ᠭᠠᠮᠢᠩ ᠨᠣᠶᠠᠨ ᠳ᠋ᠤ᠌ ᠬᠡᠭᠡᠯᠢ ᠬᠠᠬᠤᠤᠯᠢ ᠥᠭᠴᠦ ᠬᠦᠦ ᠪᠡᠨ ᠱᠣᠷᠣᠩ ᠠ᠋ᠴᠠ ᠭᠠᠷᠭᠠᠬᠤ ᠭᠡᠵᠦ ᠶᠠᠳᠠᠨ᠂ ᠬᠦᠷᠢᠶᠡᠨ ᠳ᠋ᠦ᠍ ᠰᠠᠷᠠ ᠭᠠᠷᠤᠢ ᠪᠣᠯᠤᠭᠠᠳ ᠪᠠᠢᠭᠰᠠᠨ ᠪᠠᠢᠵᠠᠢ᠃ ᠲᠡᠷᠡ ᠡᠳᠦᠷ ᠬᠠᠭᠠᠯᠭᠠ ᠲᠣᠭᠰᠢᠬᠤ ᠪᠠ ᠪᠠᠢᠰᠢᠩ ᠠ᠋ᠴᠠ ᠭᠠᠷᠤᠭᠠᠳ ᠭᠡᠨᠡᠳᠲᠡ ᠬᠠᠭᠠᠯᠭᠠ ᠶ᠋ᠢᠨ ᠲᠤᠰ ᠫᠤᠤ ᠳᠤᠤᠭᠠᠷᠴᠤ᠂ ᠬᠥᠮᠦᠨ ᠫᠢᠳ ᠬᠢᠵᠦ ᠣᠢᠴᠢᠬᠤ ᠴᠢᠮᠡᠭᠡ ᠰᠣᠨᠣᠰᠳᠠᠭᠠᠳ᠂ ᠶᠠᠭᠤ ᠪᠢᠯᠡ? ᠭᠡᠵᠦ ᠰᠡᠵᠢᠭᠯᠡᠨ ᠵᠣᠭᠰᠣᠲᠠᠯᠠ᠂ ᠭᠡᠨᠡᠳᠲᠡ ᠬᠥᠮᠦᠨ ᠰᠤᠯᠠᠬᠠᠨ ᠢ᠋ᠶ᠋ᠠᠷ ᠶᠣᠢᠯᠠᠬᠤ (ᠶᠣᠣᠯᠠᠬᠤ)ᠳᠠᠭᠤᠨ ᠰᠣᠨᠣᠰᠳᠠᠪᠠ᠃ ᠬᠦᠦ ᠶ᠋ᠢᠨ ᠳᠠᠭᠤᠨ ᠲᠠᠢ ᠶᠡᠬᠡᠯᠡ(ᠶᠡᠬᠡ ᠯᠡ)ᠠᠳᠠᠯᠢᠬᠠᠨ ᠲᠤᠯᠠ᠂ ᠡᠨᠡ ᠶᠠᠭᠤ ᠪᠢᠯᠡ᠂ ᠨᠠᠰᠤᠨᠪᠠᠲᠤ ᠮᠢᠨᠢ ᠪᠢᠰᠢ ᠪᠠᠢᠭᠠ ᠳᠠ? ᠭᠡᠵᠦ ᠡᠪᠦᠭᠡᠨ ᠦ᠌ ᠳᠣᠲᠣᠷᠠ ᠭᠡᠨᠡᠳᠲᠡ ᠪᠣᠳᠣᠯᠭᠠ ᠣᠷᠣᠵᠤ ᠵᠣᠭ ᠲᠤᠰᠤᠭᠰᠠᠨ ᠢ᠋ᠶ᠋ᠠᠨ ᠶᠠᠭᠠᠷᠠᠨ ᠬᠠᠭᠠᠯᠭᠠ ᠶ᠋ᠢᠨ ᠵᠦᠭ ᠭᠦᠶᠦᠵᠦ ᠨᠡᠭᠡᠭᠡᠨ ᠦᠵᠡᠪᠡᠰᠦ᠂ ᠴᠠᠰᠤᠨ ᠳᠡᠭᠡᠷᠡ ᠨᠢᠭᠡᠨ ᠤᠷᠠᠩᠬᠠᠢ ᠨᠣᠣᠷᠬᠠᠢ ᠳᠡᠪᠡᠯ ᠲᠡᠢ ᠬᠥᠮᠦᠨ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠢ᠋ ᠦᠵᠡᠪᠡᠯ᠂ ᠬᠣᠩᠬᠣᠢᠨ ᠰᠢᠷᠭᠢᠭᠰᠡᠨ ᠨᠢᠳᠦ ᠪᠡᠨ ᠠᠨᠢᠭᠰᠠᠨ᠂ ᠰᠠᠬᠠᠯ ᠰᠠᠮᠪᠠᠢ ᠳ᠋ᠠᠭᠠᠨ(ᠳ᠋ᠤ᠌ ᠪᠠᠨ)ᠳᠠᠷᠤᠭᠳᠠᠭᠰᠠᠨ᠂ ᠴᠢᠰᠤ ᠦᠭᠡᠢ ᠴᠠᠩᠬᠢᠭᠠᠷ ᠴᠠᠭᠠᠨ ᠴᠢᠷᠠᠢ ᠲᠠᠢ ᠨᠢᠭᠡᠨ ᠬᠥᠮᠦᠨ ᠪᠠᠢᠬᠤ ᠲᠤᠯᠠ ᠡᠪᠦᠭᠡᠨ ᠠᠩᠬᠠ ᠡᠰᠡ ᠲᠠᠨᠢᠵᠠᠢ᠃ ᠭᠡᠨᠡᠳᠲᠡ ᠲᠡᠷᠡ ᠬᠥᠮᠦᠨ ᠨᠢᠳᠦ ᠪᠡᠨ ᠨᠡᠭᠡᠭᠡᠮᠡᠭᠴᠡ᠂ ᠡᠪᠦᠭᠡᠨ ᠬᠥᠭᠡᠷᠦᠬᠦᠢ ᠬᠦᠦ ᠪᠡᠨ ᠲᠠᠨᠢᠵᠤ᠂
— ᠬᠦᠦ ᠮᠢᠨᠢ! ᠭᠡᠵᠦ ᠳᠠᠭᠤᠨ ᠠᠯᠳᠠᠭᠠᠳ᠂ ᠤᠯᠠᠭᠠᠨ ᠨᠡᠯᠦᠢ ᠪᠣᠯᠤᠭᠰᠠᠨ ᠪᠡᠶᠡ ᠶ᠋ᠢ ᠨᠢ ᠰᠢᠪᠠᠭᠤᠨ ᠤ᠋ ᠥᠳᠥ ᠡᠷᠭᠦᠬᠦ ᠠᠳᠠᠯᠢ ᠬᠥᠩᠭᠡᠨ ᠢ᠋ᠶ᠋ᠡᠷ ᠡᠷᠭᠦᠭᠡᠳ᠂ ᠬᠥᠯ ᠢ᠋ᠶ᠋ᠡᠷ ᠬᠠᠭᠠᠯᠭᠠ ᠶ᠋ᠢ ᠬᠠᠭᠠᠵᠤ᠂ ᠰᠠᠭᠤᠬᠤ ᠪᠠᠢᠰᠢᠩ ᠤ᠋ᠨ ᠵᠦᠭ ᠶᠠᠭᠠᠷᠠᠨ ᠠᠯᠬᠤᠪᠠᠰᠤ᠂ ᠥᠭᠡᠳᠡ ᠡᠴᠡ ᠨᠢ ᠬᠥᠭᠡᠷᠦᠬᠦᠢ ᠵᠠᠩ ᠱᠢ᠂ ᠨᠥᠬᠥᠷ ᠶᠦ᠍ᠭᠡᠨ ᠲᠠᠨᠢᠵᠤ᠂ ᠬᠠᠳᠠᠮ ᠡᠴᠢᠭᠡ ᠶ᠋ᠢᠨ ᠥᠭᠡᠳᠡ ᠡᠴᠡ ᠤᠬᠤᠰᠬᠢᠨ ᠭᠦᠶᠦᠪᠡ ᠁
* * *
ᠦᠩᠭᠧᠷᠡᠨ ᠹᠤᠨ ᠱᠲ᠋ᠧᠷᠨᠪᠧᠷᠭ ᠦ᠋ᠨ ᠠᠽᠢ ᠶ᠋ᠢᠨ ᠮᠣᠷᠢᠨ ᠳ᠋ᠢᠸᠢᠽᠢ ᠬᠦᠷᠢᠶᠡᠨ ᠳ᠋ᠦ᠍ ᠣᠷᠣᠵᠤ ᠢᠷᠡᠭᠡᠳ᠂ ᠳᠡ ᠬᠦᠷᠢᠶᠡᠨ ᠳ᠋ᠦ᠍ ᠪᠠᠢᠭᠰᠠᠨ ᠣᠷᠣᠰ ᠴᠠᠭᠠᠨᠲᠠᠨ ᠤ᠋ ᠲᠠᠪᠠ ᠪᠠᠨ ᠬᠠᠨᠵᠤ ᠵᠢᠭᠠᠨ ᠪᠠᠷᠢᠵᠤ ᠥᠭᠭᠦᠭᠰᠡᠨ ᠣᠷᠣᠰ ᠬᠤᠪᠢᠰᠬᠠᠯᠴᠢ ᠨᠠᠷ ᠢ᠋ ᠬᠢᠳᠤᠬᠤ᠂ ᠡᠩ ᠦ᠋ᠨ ᠨᠣᠮᠣᠬᠠᠨ ᠮᠣᠩᠭᠣᠯ ᠬᠢᠲᠠᠳ ᠠᠷᠠᠳ ᠢᠷᠭᠡᠨ ᠢ᠋ ᠬᠠᠷᠭᠢᠰᠯᠠᠨ ᠠᠯᠠᠬᠤ᠂ ᠳᠠᠯᠠᠨ ᠲᠤᠨᠤᠬᠤ ᠶᠠᠪᠤᠳᠠᠯ ᠢ᠋ᠶ᠋ᠠᠷ ᠨᠡᠢᠰᠯᠡᠯ ᠬᠦᠷᠢᠶᠡ ᠶ᠋ᠢ ᠡᠵᠡᠯᠡᠵᠦ ᠠᠪᠤᠭᠰᠠᠨ ᠢ᠋ᠶ᠋ᠠᠨ ᠲᠡᠮᠳᠡᠭᠯᠡᠪᠡ᠃ ᠬᠥᠮᠦᠨ ᠢ᠋ ᠲᠠᠮᠤᠯᠠᠬᠤ ᠳ᠋ᠠᠭᠠᠨ ᠲᠠᠪᠠ ᠪᠠᠨ ᠬᠠᠨᠳᠠᠭ ᠬᠠᠷᠭᠢᠰ ᠵᠠᠩᠳᠠᠯᠴᠢᠨ ᠰᠢᠫᠡᠢᠯᠦ ᠪᠡᠷ ᠲᠣᠯᠣᠭᠠᠢᠯᠠᠭᠤᠯᠤᠭᠰᠠᠨ《ᠤᠯᠤᠰ ᠲᠥᠷᠥ ᠶ᠋ᠢᠨ ᠪᠠᠢᠴᠠᠭᠠᠨ ᠲᠠᠩᠨᠠᠬᠤ ᠲᠣᠪᠴᠢᠶᠠ》 ᠭᠡᠳᠡᠭ ᠦ᠋ᠨ ᠲᠠᠮᠤᠯᠠᠨ ᠲᠠᠷᠴᠢᠯᠠᠭᠠᠬᠤ ᠭᠢᠨᠳᠠᠨ ᠳ᠋ᠤ᠌ ᠬᠦᠷᠢᠶᠡᠨ ᠦ᠌ ᠣᠷᠣᠰ ᠬᠤᠪᠢᠰᠬᠠᠯᠴᠢ ᠺᠦᠴᠧᠷᠸᠨ᠋ᠺᠦ᠂ ᠭᠧᠮᠪᠡᠷᠵᠧᠸᠰᠺᠢ᠂ ᠠᠭᠠᠹᠤᠨᠣᠹ᠂ ᠴᠧᠷᠧᠫᠡᠨᠦᠹ᠂ ᠳ᠋ᠣᠺᠲ᠋ᠣᠷ ᠱᠠᠨᠵᠢᠮᠢᠳᠤᠪ᠂ ᠴᠡᠪᠡᠭᠳᠡᠷᠡᠪ ᠨᠠᠷ ᠤ᠋ᠨ ᠵᠡᠷᠭᠡ ᠣᠯᠠᠨ ᠬᠤᠪᠢᠰᠬᠠᠯᠴᠢ ᠨᠠᠷ ᠠᠮᠢ ᠠᠯᠳᠠᠵᠠᠢ᠃
ᠦᠭᠡ ᠵᠣᠬᠢᠶᠠᠬᠤ ᠨᠠᠢᠷᠠᠭᠤᠯᠬᠤ ᠳ᠋ᠠᠭᠠᠨ ᠴᠢᠳᠠᠮᠠᠭᠠᠢ ᠵᠠᠯᠢᠬᠠᠢ ᠵᠤᠢᠭᠤᠷ ᠤᠰᠰᠸᠠᠳᠤᠪᠰᠺᠢ ᠶ᠋ᠢ ᠬᠡᠷᠡᠭᠯᠡᠵᠦ᠂ ᠪᠠᠷᠤᠨ ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢ《ᠮᠣᠩᠭᠣᠯ ᠤᠯᠤᠰ ᠲᠤ᠌ ᠮᠠᠰᠢ ᠶᠡᠬᠡ ᠠᠴᠢ ᠲᠠᠢ ᠪᠥᠭᠡᠳ ᠲᠦᠮᠡᠨ ᠦᠶᠡ ᠶ᠋ᠢᠨ ᠲᠡᠦᠬᠡᠨ ᠳ᠋ᠦ᠍ ᠶᠡᠬᠡ ᠭᠠᠪᠢᠶᠠ ᠦᠯᠡᠳᠡᠭᠡᠭᠰᠡᠨ ᠳᠠᠢᠴᠢᠩ ᠤᠯᠤᠰ ᠢ᠋ ᠳᠠᠬᠢᠨ ᠮᠠᠨᠳᠤᠭᠤᠯᠵᠤ᠂ ᠳᠡᠯᠡᠬᠡᠢ ᠳ᠋ᠠᠬᠢᠨ ᠢ᠋ ᠬᠤᠪᠢᠰᠬᠠᠯᠴᠢ ᠨᠠᠷ ᠤ᠋ᠨ ᠬᠣᠣᠷᠯᠠᠨ ᠬᠥᠨᠥᠭᠡᠬᠦ ᠡᠴᠡ ᠠᠪᠤᠷᠠᠬᠤ ᠶᠡᠬᠡ ᠦᠢᠯᠡᠰ ᠢ᠋ ᠪᠦᠲᠦᠭᠡᠬᠦ ᠵᠠᠶᠠᠭᠠ ᠲᠠᠢ ᠪᠢᠯᠡ》* ᠭᠡᠵᠦ ᠭᠠᠯᠵᠠᠭᠤ ᠰᠣᠯᠢᠶᠠᠲᠠᠢ ᠮᠡᠲᠦ ᠪᠡᠷ ᠲᠤᠩᠬᠠᠭ ᠪᠢᠴᠢᠭᠦᠯᠦᠨ ᠲᠠᠷᠬᠠᠭᠠᠵᠠᠢ᠃ ᠰᠢᠷᠠ ᠹᠧᠣᠳᠠᠯ ᠤ᠋ᠳ᠂ ᠪᠠᠷᠤᠨ ᠤ᠋ ᠲᠡᠷᠡ ᠵᠠᠷᠯᠠᠭᠰᠠᠨ ᠪᠢᠴᠢᠭ ᠢ᠋ ᠦᠵᠡᠵᠡᠭᠡᠭᠡᠳ᠂《ᠬᠤᠪᠢᠰᠬᠠᠯ ᠤ᠋ᠨ ᠭᠠᠯᠵᠠᠭᠤ ᠰᠣᠯᠢᠶᠠ ᠮᠡᠲᠦ ᠠᠶᠤᠯ ᠠ᠋ᠴᠠ》 ᠪᠢᠳᠡᠨ ᠢ᠋ ᠠᠪᠤᠷᠠᠬᠤ ᠡᠵᠡᠨ ᠭᠠᠷᠴᠤ ᠢᠷᠡᠪᠡ ᠭᠡᠵᠦ ᠥᠩᠭᠧᠷᠡᠨ ᠢ᠋ ᠶᠠᠭᠠᠷᠠᠨ ᠡᠷᠭᠦᠨ ᠮᠠᠨᠳᠤᠭᠤᠯᠵᠤ᠂ ᠨᠡᠷᠡ ᠰᠦᠷ ᠢ᠋ ᠨᠢ ᠪᠠᠳᠠᠷᠠᠭᠤᠯᠤᠨ᠂ ᠲᠩᠷᠢ ᠪᠤᠷᠬᠠᠨ ᠤ᠋ ᠬᠤᠪᠢᠯᠭᠠᠨ᠂ ᠠᠤᠭᠠ ᠶᠡᠬᠡ ᠴᠢᠳᠠᠯᠲᠠᠨ ᠭᠡᠵᠦ ᠴᠤᠤᠷᠬᠠᠵᠠᠢ᠃
《ᠬᠠᠭᠠᠳ ᠨᠣᠶᠠᠳ ᠤ᠋ᠨ ᠪᠠᠲᠤ ᠲᠥᠷᠥ ᠶ᠋ᠢ ᠪᠤᠰᠬᠠᠵᠤ᠂ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠢ᠋ ᠰᠥᠨᠥᠭᠡᠨ ᠮᠥᠬᠥᠭᠡᠬᠦ ᠶ᠋ᠢᠨ ᠠᠶᠤᠯ ᠬᠣᠣᠷ ᠠ᠋ᠴᠠ ᠠᠪᠤᠷᠠᠬᠤ ᠨᠢ ᠴᠢᠬᠤᠯᠠ ᠪᠣᠯᠪᠠ᠃ ᠬᠤᠪᠢᠰᠬᠠᠯᠲᠤ ᠰᠤᠷᠭᠠᠯ ᠤ᠋ᠨ ᠬᠢᠵᠢᠭ ᠲᠠᠬᠤᠯ ᠠᠳᠠᠯᠢ ᠠᠶᠤᠮᠰᠢᠭᠲᠤ ᠬᠠᠯᠳᠠᠪᠤᠷᠢ ᠶ᠋ᠢ ᠡᠰᠡᠷᠭᠦᠴᠡᠨ ᠲᠡᠮᠡᠴᠡᠵᠦ᠂ ᠲᠠᠢᠴᠢᠩ ᠤᠯᠤᠰ ᠤ᠋ᠨ ᠬᠠᠭᠠᠨ ᠢ᠋ ᠰᠢᠷᠡᠭᠡᠨ ᠳ᠋ᠦ᠍ ᠵᠠᠯᠠᠨ ᠮᠠᠨᠳᠤᠭᠤᠯᠤᠨᠠ》 ᠭᠡᠵᠦ ᠪᠠᠷᠬᠢᠷᠠᠨ ᠬᠠᠰᠬᠢᠷᠬᠤ ᠳ᠋ᠤᠨᠢ᠂ ᠯᠠᠮᠠ ᠨᠠᠷ ᠪᠠᠷᠤᠨ ᠢ᠋ ᠰᠢᠷᠠ ᠶᠢᠨ ᠱᠠᠰᠢᠨ ᠤ᠋ ᠲᠣᠭᠰᠢᠨ ᠤᠯᠠᠭᠠᠨ ᠰᠠᠬᠢᠭᠤᠯᠰᠤ ᠵᠠᠮᠰᠦ᠋ᠷᠦᠩ ᠪᠤᠶᠤ ᠪᠧᠭᠵᠢᠨ ᠬᠤᠪᠢᠯᠭᠠᠨ ᠳᠠᠷᠤᠢ ᠮᠥᠨ ᠭᠡᠵᠦ ᠦᠵᠡᠵᠦ᠂ ᠮᠠᠨᠵᠤ ᠳᠠᠢᠴᠢᠩ ᠤᠯᠤᠰ ᠢ᠋ ᠮᠠᠨᠳᠤᠭᠤᠯᠤᠨᠠ ᠭᠡᠳᠡᠭ ᠨᠢ ᠵᠠᠮᠰᠦ᠋ᠷᠦᠩ ᠰᠠᠬᠢᠭᠤᠯᠰᠤᠨ ᠤ᠋ ᠬᠤᠪᠢᠯᠭᠠᠨ᠂ ᠠᠷᠪᠠᠨ ᠵᠦᠭ ᠦ᠋ᠨ ᠠᠷᠪᠠᠨ ᠬᠣᠣᠷ ᠤ᠋ᠨ ᠦᠨᠳᠦᠰᠦ ᠶ᠋ᠢ ᠲᠠᠰᠤᠯᠤᠭᠴᠢ ᠪᠣᠭᠳᠠ ᠭᠡᠰᠡᠷ ᠬᠠᠭᠠᠨ᠂ ᠳᠠᠷᠤᠢ ᠮᠠᠨᠵᠤ ᠳᠠᠢᠴᠢᠩ ᠤᠯᠤᠰ ᠤ᠋ᠨ ᠲᠥᠷᠥ ᠶ᠋ᠢᠨ ᠰᠠᠬᠢᠭᠤᠯᠰᠤᠨ ᠰᠦᠯᠳᠡ ᠪᠠᠢᠭᠰᠠᠨ ᠲᠤᠯᠠ ᠣᠳᠣ ᠲᠡᠭᠦᠨ ᠦ᠌ ᠬᠤᠪᠢᠯᠭᠠᠨ ᠪᠠᠷᠣᠨ ᠵᠠᠩᠵᠤᠨ᠂ ᠮᠠᠨᠵᠤ ᠤᠯᠤᠰ ᠶᠤᠭᠠᠨ ᠳᠠᠬᠢᠨ ᠪᠤᠰᠬᠠᠨ ᠮᠠᠨᠳᠤᠭᠤᠯᠬᠤ ᠭᠡᠵᠦ ᠪᠠᠢᠭᠠ ᠬᠡᠷᠡᠭ ᠭᠡᠵᠦ ᠦᠵᠡᠵᠡᠢ᠃
ᠰᠢᠷᠠ ᠹᠧᠣᠳᠠᠯ ᠤ᠋ᠳ᠂ ᠪᠠᠷᠣᠨ ᠢ᠋ ᠡᠨᠡ ᠮᠡᠲᠦ ᠳᠠᠬᠢᠨ ᠡᠷᠭᠦᠮᠵᠢᠯᠡᠵᠦ᠂ ᠵᠢᠰᠤᠷᠳᠠᠨ ᠮᠠᠨᠳᠤᠭᠤᠯᠵᠤ᠂ ᠠᠯᠢᠪᠠ ᠬᠦᠰᠡᠯ ᠢ᠋ ᠨᠢ ᠬᠠᠩᠭᠠᠵᠤ᠂ ᠠᠶᠠᠳᠠᠨ ᠳᠠᠭᠠᠵᠤ ᠪᠠᠢᠬᠤ ᠳ᠋ᠠᠭᠠᠨ (ᠳ᠋ᠤ᠌ ᠪᠠᠨ)᠂ ᠮᠠᠨᠵᠤ ᠶ᠋ᠢᠨ ᠲᠥᠷᠥ ᠶ᠋ᠢ ᠲᠡᠳᠬᠦᠵᠦ᠂ ᠠᠷᠪᠠᠨ ᠵᠦᠭ ᠦ᠋ᠨ ᠠᠷᠪᠠᠨ ᠬᠣᠣᠷ ᠤ᠋ᠨ ᠦᠨᠳᠦᠰᠦ ᠶ᠋ᠢ ᠲᠠᠰᠤᠯᠤᠭᠴᠢ ᠠᠴᠢᠲᠤ ᠮᠡᠷᠭᠡᠨ ᠪᠣᠭᠳᠠ ᠭᠡᠰᠡᠷ ᠬᠠᠭᠠᠨ ᠤ᠋ ᠬᠤᠪᠢᠯᠭᠠᠨ ᠪᠠᠷᠣᠨ ᠵᠠᠩᠵᠤᠨ᠂ ᠳᠠᠷᠤᠢ ᠬᠤᠪᠢᠰᠬᠠᠯ ᠤ᠋ᠨ ᠬᠣᠣᠷ ᠤ᠋ᠨ ᠦᠨᠳᠦᠰᠦ ᠶ᠋ᠢ ᠲᠠᠰᠤᠯᠵᠤ᠂ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠢ᠋ ᠶᠡᠬᠡᠳᠡ ᠨᠢᠭᠦᠯᠡᠰᠦᠨ ᠦᠵᠡᠭᠴᠢ ᠮᠠᠨᠵᠤ ᠬᠠᠭᠠᠨ ᠢ᠋ ᠳᠠᠬᠢᠨ ᠡᠷᠳᠡᠨᠢ ᠶ᠋ᠢᠨ ᠰᠢᠷᠡᠭᠡᠨ ᠳ᠋ᠦ᠍ ᠵᠠᠯᠠᠵᠤ᠂ ᠪᠢᠳᠡᠨ ᠳ᠋ᠡᠭᠡᠨ(ᠳ᠋ᠦ᠍ ᠪᠡᠨ) ᠬᠡᠰᠢᠭ ᠬᠦᠷᠲᠡᠭᠡᠬᠦ ᠪᠣᠯᠪᠠ ᠤᠤ ᠭᠡᠵᠦ ᠳᠣᠲᠣᠷᠠ ᠪᠠᠨ ᠭᠣᠷᠢᠳᠠᠵᠠᠢ᠃ ᠪᠣᠭᠳᠠ ᠬᠠᠭᠠᠨ ᠣᠯᠠᠨ ᠵᠠᠰᠠᠭ ᠨᠣᠶᠠᠳ ᠰᠢᠷᠠ ᠹᠧᠣᠳᠠᠯ ᠤ᠋ᠳ ᠲᠤ᠌ ᠵᠠᠷᠯᠠᠨ ᠶᠠᠪᠤᠭᠤᠯᠤᠭᠰᠠᠨ ᠪᠢᠴᠢᠭ ᠲᠡᠭᠡᠨ (ᠲᠤ᠌ ᠪᠡᠨ)᠂ ᠡᠨᠡ ᠬᠤᠪᠢᠰᠬᠠᠯᠴᠢ ᠰᠤᠷᠲᠠᠯ ᠪᠣᠯᠪᠠᠯ ᠳᠡᠯᠡᠬᠡᠢ ᠳ᠋ᠠᠬᠢᠨ ᠤ᠋ ᠳᠠᠢᠰᠤᠨ ᠪᠣᠯᠤᠭᠰᠠᠨ ᠤᠯᠠᠭᠠᠨ ᠤ᠋ ᠰᠤᠷᠲᠠᠯ ᠪᠥᠭᠡᠳ ᠲᠩᠷᠢ ᠪᠤᠷᠬᠠᠨ ᠬᠠᠭᠠᠳ ᠨᠣᠶᠠᠳ᠂ ᠦᠨᠡᠨ ᠶᠣᠰᠣᠨ ᠳ᠋ᠤ᠌ ᠬᠠᠷᠰᠢ ᠲᠠᠢ ᠶᠣᠰᠣ ᠪᠢᠯᠡ ᠭᠡᠵᠦ ᠪᠢᠴᠢᠵᠦ ᠪᠠᠢᠭᠰᠠᠨ ᠪᠢᠯᠡ᠃ ᠲᠩᠷᠢ ᠰᠠᠬᠢᠭᠤᠯᠰᠤᠨ ᠤ᠋ ᠬᠤᠪᠢᠯᠭᠠᠨ ᠭᠡᠵᠦ ᠯᠠᠮᠠ ᠨᠠᠷ ᠤ᠋ᠨ ᠡᠷᠭᠦᠮᠵᠢᠯᠡᠭᠰᠡᠨ ᠪᠠᠷᠣᠨ ᠤ᠋ ᠬᠠᠷᠠ ᠬᠠᠷᠭᠢᠰ ᠢ᠋ ᠬᠠᠭᠠᠨ᠂ ᠣᠯᠠᠨ ᠬᠤᠲᠤᠭᠲᠤ ᠬᠤᠪᠢᠯᠭᠠᠨ ᠵᠥᠪᠲᠥᠭᠡᠨ ᠦᠵᠡᠵᠦ᠂ ᠬᠠᠷᠠᠴᠤ ᠣᠯᠠᠨ ᠢ᠋ ᠡᠷᠬᠢᠮ ᠳᠡᠭᠡᠳᠦᠰ ᠦ᠋ᠨ ᠡᠮᠦᠨᠡ ᠠᠶᠤᠨ ᠪᠢᠰᠢᠷᠡᠵᠦ᠂ ᠨᠣᠮᠣᠬᠠᠨ ᠳᠠᠷᠤᠤ ᠪᠠᠢᠯᠭᠠᠵᠤ ᠪᠠᠢᠬᠤ ᠨᠢ ᠵᠦᠢᠲᠡᠢ ᠶᠦᠮ᠂ ᠬᠠᠭᠠᠨ ᠲᠥᠷᠥ᠂ ᠪᠤᠷᠬᠠᠨ ᠱᠠᠰᠢᠨ ᠤ᠋ ᠡᠰᠡᠷᠭᠦ ᠠᠮᠠ ᠭᠠᠷᠬᠤ ᠦᠢᠮᠡᠭᠦᠯᠬᠦ ᠡᠲᠡᠭᠡᠳ ᠢ᠋ ᠲᠣᠭᠣᠰᠣᠨ ᠲᠣᠪᠷᠠᠭ ᠪᠣᠯᠭᠠᠵᠤ ᠣᠯᠠᠨ ᠳ᠋ᠤ᠌ ᠴᠡᠭᠡᠷᠯᠡᠯ ᠦᠵᠡᠭᠦᠯᠦᠨ᠂ ᠪᠤᠷᠤᠭᠤ ᠨᠣᠮᠲᠤ ᠤᠯᠠᠭᠠᠨ ᠤ᠋ ᠲᠡᠷᠰᠬᠦᠳ ᠰᠤᠷᠲᠠᠯ ᠢ᠋ ᠬᠠᠮᠠᠭᠤ ᠮᠡᠲᠦ ᠬᠠᠯᠳᠠᠭᠠᠬᠤ ᠠ᠋ᠴᠠ ᠰᠡᠷᠭᠡᠢᠯᠡᠵᠦ᠂ ᠭᠡᠰᠬᠡᠨ ᠴᠠᠭᠠᠵᠠᠯᠠᠬᠤ ᠨᠢ ᠲᠦᠮᠡᠨ ᠵᠦᠢ ᠭᠡᠵᠦ ᠦᠵᠡᠳᠡᠭ ᠪᠠᠢᠵᠠᠢ᠃
ᠦᠩᠭᠧᠷᠠᠨ ᠤ᠋ ᠬᠠᠷᠠ ᠬᠠᠷᠭᠢᠰ ᠪᠠᠯᠠᠮᠠᠳ ᠬᠡᠷᠴᠡᠭᠡᠢ ᠨᠢ ᠲᠤᠢᠯ ᠳ᠋ᠠᠭᠠᠨ (ᠳ᠋ᠤ᠌ ᠪᠠᠨ) ᠬᠦᠷᠴᠦ ᠪᠠᠢᠭᠰᠠᠨ ᠲᠡᠷᠡ ᠪᠡᠷᠬᠡ ᠠᠶᠤᠯ ᠲᠠᠢ ᠴᠠᠭ ᠢ᠋ᠶ᠋ᠠᠷ᠂ ᠠᠮᠢ ᠨᠠᠰᠤᠨ ᠳ᠋ᠠᠭᠠᠨ ᠠᠶᠤᠯ ᠬᠣᠣᠷ ᠪᠣᠯᠭᠤᠵᠢᠨ ᠭᠡᠵᠦ ᠬᠡᠯᠮᠡᠭᠳᠡᠭᠰᠡᠳ ᠭᠡᠰᠡᠷ ᠢ᠋ ᠲᠠᠬᠢᠵᠤ ᠰᠠᠩ ᠲᠠᠬᠢᠯ ᠡᠷᠭᠦᠳᠡᠭ ᠪᠠᠢᠵᠠᠢ᠃ ᠬᠥᠳᠡᠯᠮᠦᠷᠢᠴᠢᠨ ᠠᠷᠠᠳ ᠲᠦᠮᠡᠨ ᠢ᠋ ᠳᠣᠭᠰᠢᠨ ᠰᠠᠬᠢᠭᠤᠯᠰᠤᠨ ᠥᠮᠥᠭ ᠲᠡᠢ ᠮᠥᠯᠵᠢᠭᠴᠢ ᠨᠠᠷ ᠤ᠋ᠨ ᠬᠦᠴᠦᠨ ᠮᠠᠰᠢ ᠶᠡᠬᠡ ᠶ᠋ᠢᠨ ᠡᠮᠦᠨᠡ ᠰᠦᠷᠳᠡᠭᠦᠯᠦᠨ ᠰᠥᠭᠥᠳᠬᠡᠵᠦ ᠠᠶᠤᠯᠭᠠᠨ ᠡᠮᠢᠶᠡᠯᠭᠡᠬᠦ ᠮᠥᠷᠭᠥᠨ ᠳᠠᠭᠠᠭᠤᠯᠬᠤ ᠵᠣᠷᠢᠯᠭᠠ ᠪᠠᠷ ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠌ ᠭᠡᠰᠡᠷ ᠦ᠋ᠨ ᠰᠠᠩ ᠲᠠᠬᠢᠯᠭᠠ ᠭᠡᠵᠦ ᠯᠠᠮᠠ ᠨᠠᠷ ᠤ᠋ᠨ ᠵᠣᠬᠢᠶᠠᠭᠰᠠᠨ ᠲᠠᠬᠢᠯᠭᠠ ᠮᠠᠭᠲᠠᠭᠠᠯ ᠤ᠋ᠨ ᠵᠢᠷᠬᠡᠮᠰᠡᠭᠲᠦ * ᠦᠭᠡ ᠨᠢ ᠲᠤᠩ ᠰᠦᠷᠲᠡᠢ ᠰᠠᠨᠠᠭᠳᠠᠵᠤ᠂ ᠳᠣᠭᠰᠢᠨ ᠬᠡᠷᠴᠡᠭᠡᠢ ᠪᠡᠷ ᠵᠠᠮᠰᠥ᠋ᠷᠦᠩ ᠭᠡᠰᠡᠷ ᠢ᠋ ᠮᠠᠭᠲᠠᠭᠰᠠᠨ ᠯᠠᠮᠠ ᠨᠠᠷ ᠤ᠋ᠨ ᠮᠠᠭᠲᠠᠭᠠᠯ ᠳ᠋ᠤ᠌ ᠶᠠᠪ ᠴᠠᠪ ᠨᠡᠢᠯᠡᠭᠰᠡᠨ ᠪᠠᠷᠤᠨ ᠤ᠋ ᠰᠢᠷᠦᠭᠦᠯᠵᠦ ᠪᠠᠢᠬᠤ ᠦᠶᠡᠰ ᠲᠦ᠍ ᠶᠡᠬᠡᠯᠡ ᠰᠦᠷᠲᠡᠢ ᠠᠶᠤᠮᠠᠷ ᠳᠠᠭᠤᠷᠢᠰᠳᠠᠭ ᠪᠠᠢᠵᠠᠢ᠃ ᠥᠷᠥᠰᠢᠶᠡᠨ ᠦᠷᠦ ᠡᠪᠡᠳᠬᠦ ᠶ᠋ᠢ ᠮᠡᠳᠡᠬᠦ ᠦᠭᠡᠢ᠂ ᠬᠠᠳᠠᠨ ᠰᠡᠳᠬᠢᠯᠲᠦ ᠭᠡᠰᠬᠡᠭᠴᠢ ᠰᠠᠬᠢᠭᠤᠯᠰᠤᠨ ᠬᠠᠭᠠᠨ ᠤ᠋ ᠠᠶᠤᠮᠰᠢᠭᠲᠤ ᠳᠦᠷᠰᠦ ᠶ᠋ᠢ ᠰᠦᠷ ᠪᠠᠳᠠᠷᠠᠭᠤᠯᠤᠨ ᠦᠵᠡᠭᠦᠯᠦᠭᠰᠡᠨ ᠯᠠᠮᠠ ᠨᠠᠷ ᠤ᠋ᠨ ᠵᠣᠬᠢᠶᠠᠯ ᠭᠡᠰᠡᠷ ᠦ᠋ᠨ ᠰᠠᠩ ᠮᠠᠭᠲᠠᠭᠠᠯ ᠳ᠋ᠤ᠌ ᠂
《ᠬᠠᠷᠠ ᠰᠢᠪᠠᠭᠤ ᠶ᠋ᠢ ᠲᠡᠷᠢᠭᠦᠨ ᠳᠡᠭᠡᠷᠡ ᠪᠡᠨ ᠨᠢᠰᠬᠡᠭᠰᠡᠨ᠂
《ᠬᠠᠷᠠᠩᠭᠤᠢ ᠡᠭᠦᠯᠡ ᠪᠤᠳᠠᠩ ᠢ᠋ ᠦᠢᠮᠡᠭᠦᠯᠦᠨ ᠪᠦᠷᠬᠦᠭᠦᠯᠦᠭᠰᠡᠨ᠂
《ᠬᠠᠲᠠᠭᠤ ᠯᠤᠤ ᠶ᠋ᠢᠨ ᠬᠠᠬᠢᠷ ᠳᠠᠭᠤᠨ ᠢ᠋ ᠳᠠᠭᠤᠷᠢᠰᠤᠭᠤᠯᠤᠭᠰᠠᠨ᠂
《ᠬᠠᠵᠠᠭᠤ ᠲᠣᠭᠣᠷᠢᠨ ᠢ᠋ᠶ᠋ᠠᠷ ᠭᠢᠯᠪᠠᠭᠠ ᠴᠠᠬᠢᠯᠭᠠᠨ ᠢ᠋ ᠭᠢᠯᠪᠠᠯᠵᠠᠭᠤᠯᠤᠭᠰᠠᠨ᠂
《ᠲᠤᠩ ᠮᠡᠲᠦ ᠴᠠᠭᠠᠨ ᠮᠥᠨᠳᠥᠷ ᠢ᠋ ᠰᠢᠷᠦᠭᠦᠯᠦᠨ ᠪᠠᠭᠤᠯᠭᠠᠭᠰᠠᠨ᠁
《ᠳᠡᠯᠡᠬᠡᠢ ᠳ᠋ᠠᠬᠢᠨ ᠢ᠋ ᠡᠵᠡᠯᠡᠭᠰᠡᠨ ᠳᠡᠭᠡᠳᠦ ᠲᠩᠷᠢ ᠶ᠋ᠢᠨ ᠬᠤᠪᠢᠯᠭᠠᠨ᠂
《ᠳᠡᠭᠡᠷᠡᠬᠢ ᠳᠠᠢᠰᠤᠨ ᠢ᠋ ᠳᠠᠷᠤᠭᠴᠢ ᠠᠴᠢᠲᠤ ᠭᠡᠰᠡᠷ ᠪᠣᠭᠳᠠ ᠬᠠᠭᠠᠨ᠂
《ᠲᠥᠷᠥ ᠱᠠᠰᠢᠨ ᠢ᠋ ᠲᠦᠢᠪᠡᠭᠡᠭᠴᠢ ᠳᠠᠢᠰᠤᠨ ᠤ᠋ ᠨᠢᠳᠦ ᠶ᠋ᠢ ᠰᠣᠬᠣᠯᠤᠨ᠂
《ᠴᠢᠬᠢ ᠶ᠋ᠢ ᠣᠭᠲᠣᠯᠵᠤ᠂ ᠬᠠᠮᠠᠷ ᠢ᠋ ᠬᠠᠯᠵᠠᠯᠠᠨ᠂
《ᠲᠡᠷᠰᠬᠦᠳ ᠢ᠋ ᠲᠣᠭᠣᠰᠣᠨ ᠲᠣᠪᠷᠠᠭ ᠪᠣᠯᠭᠠᠵᠤ᠂
《ᠲᠡᠷᠢᠭᠦᠨ ᠢ᠋ ᠣᠭᠲᠣᠯᠤᠨ᠂ ᠵᠢᠷᠦᠬᠡ ᠶ᠋ᠢ ᠭᠠᠷᠭᠠᠵᠤ᠂ ᠬᠡᠰᠡᠭᠯᠡᠨ ᠲᠠᠰᠤᠯᠤᠭᠠᠳ᠂
《ᠡᠮᠢᠶᠡᠨ ᠰᠢᠲᠦᠭᠴᠢ ᠬᠥᠮᠦᠨ ᠨᠦ᠍ᠭᠦᠳ ᠢ᠋ ᠡᠮᠦᠨᠡ ᠡᠴᠡ ᠨᠢ ᠤᠭᠲᠤᠭᠠᠳ᠂
《ᠬᠣᠢᠨᠠ ᠠ᠋ᠴᠠ ᠨᠢ ᠰᠡᠭᠦᠳᠡᠷ ᠮᠡᠲᠦ ᠳᠠᠭᠠᠵᠤ ᠥᠮᠥᠭᠯᠡᠨ ᠰᠠᠬᠢᠮᠤ᠂
ᠬᠢ ᠰᠦ᠍ ᠬᠢ ᠰᠦ᠍ ᡀᠠᠬᠠᠵᠠᠯᠯᠤ᠂ ᠰᠦ᠍ ᠰᠦ᠍ ᡀᠠᠬᠠᠵᠠᠯᠯᠤ* !》 ᠭᠡᠵᠦ ᠬᠠᠭᠠᠨ ᠲᠥᠷᠥ᠂ ᠪᠤᠷᠬᠠᠨ ᠱᠠᠰᠢᠨ ᠤ᠋ ᠥᠭᠡᠳᠡ ᠡᠴᠡ ᠠᠮᠠ ᠭᠠᠷᠴᠤ ᠬᠥᠳᠡᠯᠭᠡᠭᠴᠢᠳ ᠢ᠋ ᠳᠠᠷᠤᠨ ᠤᠰᠠᠳᠬᠠᠵᠤ ᠦᠨᠳᠦᠰᠦ ᠶ᠋ᠢ ᠨᠢ ᠲᠠᠰᠤᠯᠤᠨ ᠠᠶᠤᠯᠭᠠᠭᠴᠢ ᠭᠡᠰᠡᠷ ᠬᠠᠭᠠᠨ ᠢ᠋ ᠮᠠᠭᠲᠠᠭᠰᠠᠨ ᠯᠠᠮᠠ ᠨᠠᠷ ᠤ᠋ᠨ ᠬᠠᠭᠤᠴᠢᠨ ᠰᠠᠩ ᠲᠠᠬᠢᠯᠭᠠ ᠶ᠋ᠢᠨ ᠵᠢᠷᠬᠡᠮᠰᠡᠭᠲᠦ ᠦᠭᠡ ᠨᠢ ᠪᠡᠶᠡ ᠮᠠᠬᠠᠪᠣᠳ ᠲᠠᠢ ᠪᠣᠯᠵᠤ᠂ ᠨᠢᠳᠦᠨ ᠦ᠌ ᠡᠮᠦᠨᠡ ᠦᠵᠡᠭᠳᠡᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠠᠶᠤᠯ ᠲᠠᠢ ᠪᠡᠷᠬᠡ ᠴᠠᠭ ᠪᠠᠢᠵᠠᠢ᠃
ᠲᠠᠰᠢᠰᠠᠮᠲᠠᠩᠯᠢᠩ ᠳᠠᠴᠠᠩ ᠤ᠋ᠨ ᠭᠤᠷᠪᠠᠨ ᠵᠠᠭᠤᠨ ᠯᠠᠮᠠ ᠨᠠᠷ ᠨᠢ ᠵᠠᠮᠰᠥ᠋ᠷᠦᠩ ᠦ᠋ᠨ ᠱᠦᠨᠰᠡᠭ ᠢ᠋ᠶ᠋ᠡᠷ ᠱᠦᠨᠰᠡᠭᠯᠡᠭᠰᠡᠨ ᠭᠡᠰᠡᠷ ᠢ᠋ᠶ᠋ᠡᠨ ᠲᠠᠬᠢᠵᠤ᠂ ᠠᠶᠤᠨ ᠭᠡᠯᠮᠡᠭᠳᠡᠭᠰᠡᠨ ᠬᠦᠷᠢᠶᠡ ᠮᠠᠢᠮᠠᠢ ᠶ᠋ᠢᠨ ᠬᠢᠨ ᠳᠠᠰᠢᠰᠠᠮᠲᠠᠩᠯᠢᠩ ᠳᠠᠴᠠᠩ ᠤ᠋ᠨ ᠲᠡᠷᠡ ᠭᠡᠰᠡᠷ ᠲᠦ᠍ ᠮᠥᠷᠭᠥᠵᠦ᠂ ᠰᠠᠮᠠᠭᠤᠨ ᠲᠦᠭᠰᠢᠭᠦᠷᠢᠲᠡᠢ ᠲᠡᠷᠡ ᠴᠠᠭ ᠲᠤ᠌ ᠥᠷᠯᠥᠭᠡ ᠦᠳᠡᠰᠢ ᠠᠮᠢ ᠨᠠᠰᠤ ᠬᠠᠮᠢᠭᠠᠰᠢ ᠪᠣᠯᠬᠤ ᠪᠠᠨ ᠳᠣᠭᠰᠢᠨ ᠭᠡᠰᠡᠷ ᠮᠡᠷᠭᠡᠨ ᠬᠠᠭᠠᠨ ᠤ᠋ ᠰᠠᠬᠢᠭᠤᠯᠰᠤᠨ ᠳ᠋ᠤ᠌ ᠡᠮᠢᠶᠡᠨ ᠳᠠᠭᠠᠳᠬᠠᠵᠤ᠂ ᠲᠡᠷᠡ ᠳᠠᠴᠠᠩ ᠳ᠋ᠤ᠌ ᠣᠴᠢᠵᠤ ᠭᠡᠰᠡᠷ ᠦ᠋ᠨ ᠰᠤᠳᠤᠷ ᠲᠥᠯᠭᠡ ᠲᠠᠲᠠᠵᠤ᠂ ᠯᠠᠮᠠ ᠨᠠᠷ ᠤ᠋ᠨ ᠪᠢᠲᠡᠭᠦᠯᠢᠭ ᠦᠭᠡ ᠪᠡᠷ ᠲᠠᠢᠯᠬᠤ ᠶ᠋ᠢ ᠤᠬᠠᠭᠠᠷᠠᠵᠤ ᠶᠠᠳᠠᠨ᠂ ᠳᠡᠮᠡᠢ ᠯᠡ ᠠᠷᠪᠠᠨ ᠵᠦᠭ ᠦ᠋ᠨ ᠠᠷᠪᠠᠨ ᠬᠣᠣᠷ ᠤ᠋ᠨ ᠦᠨᠳᠦᠰᠦ ᠶ᠋ᠢ ᠲᠠᠰᠤᠯᠤᠭᠴᠢ ᠠᠶᠤᠬᠤ ᠮᠡᠲᠦ ᠲᠣᠭᠰᠢᠨ ᠭᠡᠰᠡᠷ ᠬᠠᠭᠠᠨ ᠮᠢᠨᠢ ᠨᠠᠭᠠᠨᠠ ᠳᠠ ᠭᠡᠵᠦ ᠭᠡᠰᠡᠷ ᠢ᠋ ᠲᠠᠬᠢᠭᠴᠢ ᠲᠡᠷᠡ ᠳᠠᠴᠠᠩ ᠤ᠋ᠨ ᠯᠠᠮᠠ ᠨᠠᠷ ᠲᠤ᠌ ᠠᠮᠢ ᠨᠠᠰᠤ ᠪᠠᠨ ᠳᠠᠭᠠᠳᠬᠠᠳᠠᠭ ᠪᠠᠢᠵᠠᠢ᠃
ᠪᠠᠷᠤᠨ ᠥᠩᠭᠧᠷᠡᠨ ᠨᠢ ᠬᠥᠮᠦᠨ ᠠᠷᠠᠳ ᠢ᠋ ᠨᠢᠭᠲᠠᠯᠠᠨ ᠪᠠᠢᠴᠠᠭᠠᠵᠤ᠂ ᠦᠭᠡ ᠥᠴᠢᠭ ᠢ᠋ ᠠᠪᠤᠯ ᠦᠭᠡᠢ ᠬᠢᠳᠤᠨ ᠠᠯᠠᠬᠤ ᠮᠥᠷᠲᠡᠭᠡᠨ᠂ ᠬᠦᠷᠢᠶᠡᠨ ᠦ᠌ ᠣᠯᠠᠨ ᠤ᠋ ᠡᠮᠦᠨᠡ ᠪᠡᠶᠡ ᠪᠡᠨ ᠴᠢᠩᠳᠠ ᠬᠠᠲᠠᠭᠤ ᠴᠠᠭᠠᠵᠠ ᠲᠠᠢ᠂ ᠴᠢᠩ ᠰᠢᠳᠤᠷᠭᠤ ᠭᠡᠵᠦ ᠦᠵᠡᠭᠦᠯᠬᠦ ᠶ᠋ᠢ ᠬᠢᠴᠢᠶᠡᠳᠡᠭ ᠪᠠᠢᠵᠠᠢ᠃ ᠨᠢᠭᠡ ᠡᠳᠦᠷ ᠪᠠᠲᠤᠪᠠᠶᠠᠷ ᠢ᠋ ᠭᠠᠨᠳᠠᠩ ᠭᠠᠷᠴᠤ᠂ ᠡᠮᠴᠢ ᠯᠠᠮᠠ ᠠ᠋ᠴᠠ ᠬᠦᠦ ᠳ᠋ᠡᠭᠡᠨ ᠡᠮ ᠵᠠᠯᠠᠭᠠᠳ ᠪᠤᠴᠠᠵᠤ ᠶᠠᠪᠤᠲᠠᠯᠠ᠂ ᠬᠡᠳᠦᠨ ᠮᠣᠷᠢᠲᠤ ᠴᠡᠷᠢᠭ ᠲᠡᠭᠦᠨ ᠢ᠋ ᠵᠣᠭᠰᠣᠭᠠᠵᠤ᠂ ᠬᠢᠲᠠᠳ ᠤ᠋ᠨ ᠥᠷᠭᠡᠨ ᠴᠢᠯᠥᠭᠡᠨ ᠳ᠋ᠦ᠍ ᠨᠢᠭᠡ ᠫᠦᠰᠡ ᠶ᠋ᠢᠨ ᠬᠠᠭᠠᠯᠭᠠᠨ ᠤ᠋ ᠡᠮᠦᠨᠡ᠂ ᠴᠤᠭᠯᠠᠭᠰᠠᠨ ᠣᠯᠠᠨ ᠤ᠋ ᠲᠡᠨᠳᠡ ᠣᠴᠢ ᠭᠡᠵᠦ ᠲᠤᠰᠢᠶᠠᠵᠠᠢ᠃
— ᠲᠡᠨᠳᠡ ᠪᠠᠷᠤᠨ ᠵᠠᠩᠵᠤᠨ ᠭᠡᠮᠲᠦ ᠬᠡᠷᠡᠭ ᠦᠲᠦᠭᠦᠯᠦᠭᠰᠡᠨ ᠴᠡᠷᠢᠭ ᠢ᠋ ᠰᠢᠳᠬᠡᠵᠦ (ᠰᠢᠢᠳᠬᠡᠵᠦ)ᠪᠠᠢᠨᠠ ᠭᠡᠵᠦ ᠪᠠᠷᠤᠨ ᠤ᠋ ᠨᠢᠭᠡ ᠮᠣᠩᠭᠣᠯ ᠴᠡᠷᠢᠭ ᠪᠠᠲᠤᠪᠠᠶᠠᠷ ᠲᠤ᠌ ᠲᠠᠢᠯᠪᠤᠷᠢᠯᠠᠵᠤ ᠥᠭᠦᠯᠡᠷᠦᠨ᠂ ᠲᠡᠷᠡ ᠫᠦᠰᠡ ᠡᠴᠡ ᠬᠣᠶᠠᠷ ᠣᠷᠣᠰ᠂ ᠨᠢᠭᠡ ᠮᠣᠩᠭᠣᠯ ᠴᠡᠷᠢᠭ ᠨᠢᠭᠡ ᠯᠣᠩᠬᠣ ᠬᠢᠲᠠᠳ ᠠᠷᠢᠬᠢ ᠵᠦᠢ ᠪᠤᠰᠤ ᠪᠠᠷ ᠪᠤᠯᠢᠶᠠᠨ ᠠᠪᠤᠭᠠᠳ ᠵᠠᠩᠵᠤᠨ ᠳ᠋ᠤ᠌ ᠪᠠᠷᠢᠭᠳᠠᠵᠠᠢ᠃ ᠳᠡᠭᠡᠷᠡᠮ ᠬᠤᠯᠠᠭᠠᠢ ᠬᠢᠳᠡᠭ ᠬᠥᠮᠦᠨ ᠢ᠋ ᠪᠠᠷᠤᠨ ᠵᠠᠩᠵᠤᠨ ᠢᠩᠭᠢᠵᠦ ᠵᠠᠯᠬᠠᠭᠠᠨ ᠰᠢᠳᠬᠡᠳᠡᠭ(ᠰᠢᠢᠳᠬᠡᠳᠡᠭ) ᠶᠦᠮ ᠪᠠᠢᠨᠠ ᠭᠡᠵᠦ ᠦᠵᠡᠭᠡᠳ᠂ ᠴᠢ ᠡᠭᠦᠨ ᠡᠴᠡ ᠬᠣᠢᠰᠢ ᠳᠡᠭᠡᠷᠡᠮ ᠬᠢᠪᠡᠯ ᠢᠩᠭᠢᠳᠡᠭ ᠪᠠᠢᠨᠠ ᠭᠡᠵᠦ ᠮᠡᠳᠡᠵᠦ ᠶᠠᠪᠤ! ᠭᠡᠪᠡ᠃
ᠹᠢᠶᠠᠲ᠋ ᠭᠡᠳᠡᠭ ᠠᠥ᠋ᠲ᠋ᠤ — ᠶ᠋ᠢᠨ ᠳᠡᠷᠭᠡᠳᠡ ᠵᠣᠷᠢᠮᠠᠭ ᠮᠠᠰᠢ ᠶᠡᠬᠡᠷᠬᠡᠭ ᠬᠡᠭᠵᠢᠭᠦᠨ ᠳᠦᠷᠢᠮ ᠦᠵᠡᠭᠦᠯᠵᠦ᠂ ᠨᠠᠷᠢᠨ ᠭᠡᠭᠴᠢ ᠶ᠋ᠢᠨ ᠬᠦᠵᠦᠭᠦᠦ ᠲᠡᠢ᠂ ᠪᠢᠴᠢᠬᠠᠨ ᠭᠡᠭᠴᠢ ᠶ᠋ᠢᠨ ᠲᠣᠯᠣᠭᠠᠢ ᠲᠠᠢ ᠨᠢᠭᠡᠨ ᠲᠠᠩᠬᠠᠢᠭᠰᠠᠨ ᠥᠨᠳᠥᠷ ᠧᠦ᠋ᠷᠣᠫᠠ ᠬᠥᠮᠦᠨ ᠵᠣᠭᠰᠣᠵᠤ ᠪᠠᠢᠪᠠ᠃ ᠺᠠᠷᠠᠺᠦ᠋ᠯ ᠬᠤᠷᠠᠭᠠᠨ ᠫᠠᠫᠠᠬᠠ ᠭᠡᠳᠡᠭ ᠮᠠᠯᠠᠭᠠᠢ ᠳᠣᠣᠷᠠ ᠠ᠋ᠴᠠ ᠪᠤᠯᠳᠤᠷᠤᠤᠲᠤᠭᠰᠠᠨ ᠲᠦᠨᠲᠦᠭᠦᠷ ᠳᠤᠬᠤᠨ ᠳᠡᠭᠡᠷᠡ ᠨᠢ ᠰᠢᠷᠠ ᠦᠰᠦ ᠤᠨᠵᠢᠵᠠᠢ᠃ ᠬᠦᠢᠲᠡᠨ᠂ ᠳᠣᠭᠰᠢᠨ᠂ ᠮᠠᠭᠤᠬᠠᠢ ᠭᠡᠭᠴᠢ ᠶ᠋ᠢᠨ ᠬᠠᠷᠠᠴᠠ ᠲᠠᠢ ᠴᠡᠩᠬᠡᠷ ᠪᠣᠷᠣ ᠨᠢᠳᠦ᠂ ᠤᠯᠠᠪᠤᠷ ᠴᠢᠷᠠᠢ ᠶ᠋ᠢᠨ ᠪᠠᠢᠳᠠᠯ ᠮᠠᠰᠢ ᠬᠠᠷᠭᠢᠰ ᠬᠦᠢᠲᠡᠨ ᠢ᠋ ᠪᠠᠲᠤᠪᠠᠶᠠᠷ ᠦᠵᠡᠭᠡᠳ ᠳᠣᠲᠣᠷᠠ ᠠᠷᠵᠠᠰᠬᠢᠪᠡ᠃ ᠮᠥᠷᠦᠨ ᠳᠡᠭᠡᠷᠡ ᠪᠡᠨ ᠭᠧᠨᠧᠷᠠᠯ ᠤ᠋ᠨ ᠠᠯᠲᠠᠨ ᠫᠣᠭᠣᠨ ᠬᠠᠲᠠᠵᠤ᠂ ᠮᠣᠩᠭᠣᠯ ᠬᠥᠬᠡ ᠲᠣᠷᠭᠠᠨ ᠳᠡᠪᠡᠯ ᠡᠮᠦᠰᠦᠭᠰᠡᠨ ᠨᠢ ᠲᠡᠷᠡ ᠲᠣᠭᠰᠢᠨ ᠬᠠᠷᠭᠢᠰ ᠮᠠᠭᠤᠬᠠᠢ ᠬᠦᠢᠲᠡᠨ ᠴᠢᠷᠠᠢ ᠳ᠋ᠤᠨᠢ ᠲᠤᠩ ᠵᠣᠬᠢᠬᠤ ᠦᠭᠡᠢ ᠲᠤᠯᠠ᠂ ᠤᠯᠠᠮ ᠠᠶᠤᠮᠰᠢᠭ ᠲᠠᠢ ᠮᠠᠭᠤᠬᠠᠢ ᠦᠵᠡᠭᠳᠡᠪᠡ᠃
— ᠲᠡᠷᠡ ᠠᠶᠤᠮᠰᠢᠭ ᠲᠠᠢ ᠬᠥᠮᠦᠨ ᠡᠢᠮᠦ ᠰᠢᠨᠵᠢ ᠲᠡᠢ ᠬᠥᠮᠦᠨ ᠠᠵᠠᠢ᠃ ᠨᠢᠳᠦ ᠠᠮᠠ ᠵᠢᠰᠦ ᠴᠢᠷᠠᠢ ᠶ᠋ᠢ ᠦᠵᠡᠪᠡᠯ᠂ ᠦᠨᠡᠬᠡᠷ ᠥᠷᠥᠰᠢᠶᠡᠬᠦ ᠨᠢᠭᠦᠯᠡᠰᠬᠦ᠂ ᠦᠷᠦ ᠡᠪᠡᠳᠬᠦ ᠬᠠᠢᠷᠠᠯᠠᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠠᠯᠠᠭᠤᠷᠴᠢᠨ ᠤ᠋ ᠰᠢᠨᠵᠢᠲᠡᠶᠡ ᠭᠡᠵᠦ ᠪᠠᠲᠤᠪᠠᠶᠠᠷ ᠤ᠋ᠨ ᠨᠢᠳᠦ ᠬᠠᠯᠲᠤᠷᠢᠪᠠ᠃ ᠪᠠᠷᠤᠨ ᠤ᠋ ᠲᠡᠷᠡ ᠬᠠᠷᠭᠢᠰ ᠮᠠᠭᠤᠬᠠᠢ ᠪᠠᠢᠳᠠᠯ ᠢ᠋ ᠦᠵᠡᠭᠡᠳ᠂ ᠲᠡᠰᠬᠡᠯ ᠦᠭᠡᠢ ᠠᠶᠤᠨ ᠡᠮᠢᠶᠡᠭᠰᠡᠨ ᠬᠡᠳᠦᠨ ᠮᠣᠩᠭᠣᠯᠴᠤᠳ ᠰᠣᠴᠢᠨ ᠭᠡᠯᠮᠡᠭᠳᠡᠵᠦ᠂ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ ᠰᠢᠬᠠᠴᠠᠯᠳᠤᠨ ᠪᠠᠢᠭᠠ ᠶ᠋ᠢ ᠦᠵᠡᠭᠡᠳ ᠪᠠᠷᠤᠨ᠂ ᠲᠡᠳᠡᠨ ᠢ᠋ ᠲᠡᠭᠡᠵᠦ ᠠᠶᠤᠯᠭᠠᠨ ᠰᠦᠷᠳᠡᠭᠦᠯᠦᠭᠰᠡᠨ ᠳ᠋ᠡᠭᠡᠨ ᠶᠡᠬᠡᠯᠡ ᠪᠠᠬᠠᠳᠤᠭᠰᠠᠨ ᠪᠠᠢᠳᠠᠯ ᠲᠠᠢ ᠠᠵᠢ᠃
ᠪᠠᠷᠤᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠪᠠᠰᠠ ᠬᠣᠶᠠᠷ ᠧᠦ᠋ᠷᠣᠫᠠ ᠨᠠᠷ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠢ᠋ ᠠᠵᠢᠭᠯᠠᠪᠠᠯ᠂ ᠪᠠᠲᠤᠪᠠᠶᠠᠷ ᠤ᠋ᠨ ᠲᠡᠮᠡᠭᠡᠨ ᠦ᠌ ᠳᠡᠷᠭᠡᠳᠡ ᠵᠣᠭᠰᠣᠵᠤ ᠪᠠᠢᠭᠰᠠᠨ᠂ ᠪᠠᠷᠤᠨ ᠤ᠋ ᠮᠣᠩᠭᠣᠯ ᠮᠣᠷᠢᠨ ᠴᠡᠷᠢᠭ᠂ ᠡᠪᠦᠭᠡᠨ ᠦ᠌ ᠡᠮᠦᠨᠡ ᠡᠯᠳᠡᠪ ᠨᠠᠷᠢᠨ ᠤᠴᠢᠷ ᠢ᠋ ᠮᠡᠳᠡᠳᠡᠭ ᠢ᠋ᠶ᠋ᠡᠨ ᠭᠠᠢᠬᠠᠭᠤᠯᠤᠨ ᠰᠢᠪᠡᠭᠡᠨᠡᠵᠦ ᠥᠭᠦᠯᠡᠷᠦᠨ᠂ ᠲᠡᠷᠡ ᠪᠠᠷᠤᠨ ᠵᠠᠩᠵᠤᠨ ᠤ᠋ ᠵᠡᠭᠦᠨ ᠲᠠᠯᠠ ᠳ᠋ᠤ᠌ ᠵᠣᠭᠰᠣᠵᠤ ᠪᠠᠢᠭᠠ ᠬᠥᠮᠦᠨ᠂ ᠵᠠᠩᠵᠤᠨ ᠤ᠋ ᠶᠡᠬᠡ ᠳᠣᠲᠣᠨᠣ ᠨᠠᠢᠵᠠ ᠬᠥᠮᠦᠨ᠂ ᠨᠡᠷᠡ ᠣᠰᠰᠸᠠᠳᠤᠪᠰᠺᠢ ᠭᠡᠳᠡᠭ᠂ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤᠨᠢ ᠳᠤᠬᠤ ᠪᠠᠨ ᠠᠷᠴᠢᠵᠤ ᠪᠠᠢᠭᠠ᠂ ᠡᠮᠡᠭᠡᠯ ᠰᠢᠭ ᠬᠣᠲᠣᠭᠣᠷ ᠬᠠᠴᠢᠨ ᠲᠣᠯᠣᠭᠠᠢ ᠲᠠᠢ ᠲᠡᠷᠡ ᠨᠢᠭᠡ ᠣᠷᠣᠰ ᠬᠥᠮᠦᠨ᠂ ᠤᠯᠤᠰ ᠲᠥᠷᠥ ᠶ᠋ᠢᠨ ᠪᠠᠢᠴᠠᠭᠠᠨ ᠲᠠᠩᠨᠠᠬᠤ ᠭᠠᠵᠠᠷ ᠤ᠋ᠨ ᠳᠠᠷᠤᠭᠠ ᠰᠢᠫᠠᠢᠯᠦ ᠭᠡᠳᠡᠭ ᠶᠡᠬᠡ ᠠᠶᠤᠮᠰᠢᠭᠲᠠᠢ ᠬᠥᠮᠦᠨ᠃ ᠬᠡᠷᠪᠡ ᠬᠥᠮᠦᠨ ᠢ᠋ ᠲᠡᠮᠦᠯᠡᠨ ᠵᠣᠪᠠᠭᠠᠵᠤ ᠲᠠᠷᠴᠢᠯᠠᠭᠠᠬᠤ ᠦᠭᠡᠢ ᠶᠦᠮ ᠪᠣᠯ ᠰᠥᠨᠢ ᠤᠨᠲᠠᠵᠤ ᠴᠢᠳᠠᠳᠠᠭ ᠦᠭᠡᠢ ᠶᠦᠮ ᠭᠡᠵᠦ ᠲᠡᠭᠦᠨ ᠢ᠋ ᠬᠡᠯᠡᠯᠴᠡᠳᠡᠭ ᠶᠦᠮ ᠰᠢᠦ ᠭᠡᠪᠡ᠃
— ᠴᠢ ! ᠡᠭᠦᠨ ᠢ᠋ ᠳᠡᠭᠦᠵᠢᠯᠡ! ᠭᠡᠵᠦ ᠡᠥ᠋ᠩᠬᠧᠷᠡᠨ᠂ ᠴᠠᠭᠠᠨ ᠮᠣᠩᠭᠣᠯ ᠴᠡᠷᠢᠭ ᠲᠦ᠍᠂ ᠰᠠᠨᠳᠤᠷᠴᠤ ᠨᠣᠮᠣᠬᠠᠨ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠣᠷᠣᠰ ᠺᠠᠽᠠᠭ ᠴᠡᠷᠢᠭ ᠦ᠋ᠨ ᠵᠦᠭ ᠬᠤᠷᠤᠭᠤ ᠪᠠᠷ ᠵᠢᠭᠠᠵᠠᠢ᠃
— ᠶᠡᠬᠡ ᠵᠠᠩᠵᠤᠨ ᠬᠡᠯᠡᠨᠡ᠄ ᠲᠠᠨᠠᠢ ᠬᠥᠮᠦᠨ᠂ ᠡᠨᠡ ᠬᠥᠮᠦᠨ ᠳᠡᠭᠦᠵᠢᠯᠡᠨᠡ ᠬᠡᠷᠡᠺᠳᠡᠢ(ᠬᠡᠷᠡᠭᠲᠡᠢ)᠃ ᠢ ᠪᠣᠰᠢᠭᠣ᠂ ᠠ ᠦᠭᠡᠢ ᠪᠣᠯ ᠶᠡᠬᠡ ᠵᠠᠩᠵᠤᠨ ᠠᠭᠤᠷᠯᠠᠨᠠ᠃ ᠢ ᠴᠢᠮᠠᠲᠤ ᠮᠠᠭᠤ ᠪᠣᠯᠤᠨᠠ ᠭᠡᠵᠦ ᠣᠷᠣᠰ ᠴᠠᠭᠠᠨ ᠴᠡᠷᠢᠭ᠂ ᠪᠠᠷᠤᠨ ᠤ᠋ ᠲᠡᠷᠡ ᠦᠭᠡ ᠶ᠋ᠢ ᠮᠣᠩᠭᠣᠯᠴᠢᠯᠠᠵᠤ᠂
ᠴᠠᠭᠠᠨ ᠮᠣᠩᠭᠣᠯ ᠴᠡᠷᠢᠭ ᠢ᠋ ᠲᠡᠷᠡ ᠬᠢᠲᠠᠳ ᠫᠦᠰᠡᠨ ᠦ᠌ ᠴᠠᠯᠠᠢᠲᠠᠯᠠ ᠨᠡᠭᠡᠭᠡᠭᠰᠡᠨ ᠠᠰᠠᠷ ᠲᠠᠢ ᠬᠠᠭᠠᠯᠭᠠᠨ ᠤ᠋ ᠳᠡᠭᠡᠳᠦ ᠨᠢᠷᠤᠭᠤ ᠮᠣᠳᠣᠨ ᠳ᠋ᠤ᠌ ᠣᠯᠣᠰᠣ ᠪᠠᠨ ᠬᠠᠶᠠᠵᠤ ᠪᠠᠢᠬᠤ ᠵᠠᠪᠰᠠᠷ᠂ ᠰᠢᠫᠠᠢᠯᠤ ᠲᠡᠷᠡ ᠫᠦᠰᠡᠨ ᠦ᠌ ᠭᠡᠯᠮᠡᠭᠳᠡᠨ ᠰᠣᠴᠢᠵᠤ᠂ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ(ᠳ᠋ᠦ᠍ ᠪᠡᠨ) ᠰᠢᠬᠠᠴᠠᠯᠳᠤᠨ ᠪᠥᠭᠡᠮᠨᠡᠷᠡᠭᠰᠡᠨ ᠪᠢᠴᠢᠭᠡᠴᠢ ᠨᠠᠷ ᠲᠤ᠌ ᠠᠭᠤᠷ ᠲᠠᠢ ᠮᠠᠭᠤᠬᠠᠢ ᠳᠠᠭᠤᠨ ᠢ᠋ᠶ᠋ᠠᠷ ᠰᠦᠷ ᠪᠠᠳᠠᠷᠠᠭᠤᠯᠤᠨ᠂
— ᠠ ᠬᠠᠢᠷᠴᠢᠺᠡ ᠪᠠᠢᠨᠠ? ᠶᠠᠰᠢᠺᠡ ᠲᠠᠸᠡᠢ! ᠢ ᠲᠡᠭᠡᠭᠡᠳ ᠪᠤᠰᠢᠭᠤᠯ! ᠭᠡᠵᠦ᠃
ᠬᠣᠶᠠᠷ ᠬᠢᠲᠠᠳ ᠰᠡᠩᠳᠡᠨ ᠮᠡᠩᠳᠡᠨ ᠨᠢᠭᠡ ᠲᠣᠮᠣ ᠬᠠᠢᠷᠴᠠᠭ ᠳᠠᠮᠵᠢᠯᠠᠨ ᠠᠪᠴᠤ ᠢᠷᠡᠵᠦ᠃
— ᠭᠠᠷ! ᠭᠡᠵᠦ ᠪᠠᠷᠤᠨ ᠤ᠋ ᠮᠣᠩᠭᠣᠯ ᠴᠡᠷᠢᠭ᠂ ᠬᠠᠮᠲᠤ ᠣᠯᠵᠠ ᠬᠠᠢᠭᠰᠠᠨ ᠲᠡᠷᠡ ᠣᠷᠣᠰ ᠺᠠᠽᠠᠭ ᠴᠡᠷᠢᠭ ᠢ᠋ ᠲᠦᠯᠬᠢᠪᠡᠰᠦ᠂ ᠲᠡᠷᠡ ᠨᠢ ᠦᠭᠡ ᠳᠠᠭᠤᠨ ᠦᠭᠡᠢ ᠬᠠᠢᠷᠴᠠᠭ ᠳᠡᠭᠡᠷᠡ ᠭᠠᠷᠤᠭᠠᠳ᠂ ᠠᠶᠤᠮᠰᠢᠭᠲᠤ ᠪᠠᠷᠤᠨ ᠤᠷᠤᠭᠤ ᠰᠣᠴᠢᠨ ᠡᠮᠢᠶᠡᠭᠰᠡᠨ ᠨᠢᠳᠦ ᠪᠡᠷ ᠬᠠᠷᠠᠵᠤ᠂ ᠬᠠᠢᠷᠴᠠᠭ ᠳᠡᠭᠡᠷᠡ ᠪᠡᠨ ᠮᠥᠨ ᠨᠣᠮᠣᠬᠠᠨ ᠵᠣᠭᠰᠣᠪᠠ᠃ ᠴᠠᠭᠠᠨ ᠮᠣᠩᠭᠣᠯ ᠴᠡᠷᠢᠭ ᠣᠯᠣᠰᠣᠨ ᠤ᠋ ᠦᠵᠦᠭᠦᠷ ᠡᠴᠡ ᠲᠠᠲᠠᠵᠤ᠂ ᠲᠡᠷᠡ ᠬᠠᠢᠷᠴᠠᠭ ᠳᠡᠭᠡᠷᠡ ᠨᠢ ᠭᠠᠷᠤᠭᠠᠳ᠂ ᠭᠣᠭᠴᠣᠭᠠ ᠶ᠋ᠢ ᠺᠠᠽᠠᠭ ᠤ᠋ᠨ ᠬᠦᠵᠦᠭᠦᠨ ᠳ᠋ᠦ᠍ ᠨᠢᠮᠪᠠᠢ ᠭᠡᠭᠴᠢ ᠪᠡᠷ ᠵᠡᠭᠦᠭᠡᠳ᠂ ᠦᠰᠦᠷᠦᠨ ᠪᠠᠭᠤᠮᠠᠭᠴᠠ ᠲᠡᠷᠡ ᠺᠠᠽᠠᠭ ᠤ᠋ᠨ ᠬᠥᠯ ᠳᠣᠣᠷᠠᠬᠢ ᠬᠠᠢᠷᠴᠠᠭ ᠢ᠋ ᠨᠢᠭᠡᠨᠲᠡ ᠬᠦᠴᠦᠯᠡᠨ ᠢᠰᠬᠦᠯᠵᠦ ᠰᠤᠭᠤ ᠲᠦᠯᠬᠢᠪᠡ᠃ ᠥᠨᠥᠬᠢ ᠺᠠᠽᠠᠭ ᠳᠡᠭᠦᠵᠢᠯᠡᠭᠳᠡᠨ ᠲᠠᠷᠴᠢᠯᠠᠵᠤ᠂ ᠠᠮᠢ ᠲᠡᠮᠡᠴᠡᠨ ᠳᠥᠷᠪᠡᠨ ᠮᠥᠴᠢ ᠠᠷᠪᠠᠯᠵᠠᠵᠤ᠂ ᠰᠤᠨᠤᠨ ᠠᠲᠤᠷᠢᠨ ᠬᠥᠳᠡᠯᠬᠦ ᠳ᠋ᠦ᠍ᠨᠢ ᠲᠡᠷᠡ ᠮᠣᠩᠭᠣᠯ ᠬᠥᠮᠦᠨ ᠤᠬᠤᠰᠬᠢᠵᠦ ᠦᠰᠦᠷᠦᠭᠡᠳ ᠥᠨᠥᠬᠢ ᠺᠠᠽᠠᠭ ᠤ᠋ᠨ ᠪᠡᠶᠡ ᠡᠴᠡ ᠲᠡᠪᠡᠷᠢᠨ ᠡᠯᠭᠦᠭᠳᠡᠵᠦ᠂ ᠲᠡᠭᠦᠨ ᠦ᠌ ᠬᠠᠮᠲᠤ ᠴᠠᠭ ᠤ᠋ᠨ ᠳᠡᠭᠦᠵᠢᠩ ᠮᠡᠲᠦ ᠤᠨᠵᠢᠬᠨᠠᠨ ᠬᠥᠳᠡᠯᠪᠡᠰᠦ ᠪᠠᠷᠤᠨ ᠤ᠋ ᠴᠡᠷᠢᠭ ᠲᠦ᠍ ᠲᠠᠭᠤᠭᠳᠠᠵᠤ ᠢᠷᠡᠭᠡᠳ ᠬᠠᠷᠠᠵᠤ ᠪᠠᠢᠭᠰᠠᠨ ᠣᠯᠠᠨ ᠬᠥᠮᠦᠨ ᠳᠠᠭᠤᠨ ᠠᠯᠳᠠᠵᠤ ᠶᠡᠬᠡᠳᠡ ᠠᠶᠤᠨ᠂ ᠵᠠᠷᠢᠮ ᠨᠢ ᠮᠠᠨᠢ ᠰᠢᠪᠡᠭᠡᠨᠡᠨ ᠤᠩᠰᠢᠪᠠ᠃
— ᠣᠳᠣ ᠨᠥᠭᠥᠭᠡᠳᠡᠬᠢ ᠶ᠋ᠢ ᠭᠡᠵᠦ ᠬᠢᠬᠠᠷᠠᠭᠰᠠᠨ ᠮᠠᠭᠤᠬᠠᠢ ᠬᠣᠭᠣᠯᠠᠢ ᠪᠠᠷ ᠪᠠᠷᠤᠨ ᠤ᠋ ᠳᠠᠬᠢᠨ ᠥᠭᠦᠯᠡᠬᠦ ᠳ᠋ᠦ᠍᠂ ᠮᠣᠩᠭᠣᠯ ᠴᠢᠰᠤ ᠬᠣᠯᠢᠯᠳᠤᠭᠰᠠᠨ ᠡᠷᠯᠢᠵᠡ ᠪᠠᠢᠳᠠᠯ ᠲᠠᠢ᠂ ᠭᠡᠷᠡ ᠬᠠᠴᠢᠷ ᠲᠣᠮᠣ ᠲᠠᠢ᠂ ᠡᠷᠭᠢᠭᠦᠯᠭᠡᠨ ᠦᠰᠦ ᠲᠡᠢ᠂ ᠪᠠᠢᠭᠠᠯᠢ ᠶ᠋ᠢᠨ ᠡᠮᠦᠨᠡᠬᠢ ᠵᠠᠯᠠᠭᠤ ᠣᠷᠣᠰ ᠺᠠᠽᠠᠭ ᠨᠥᠬᠥᠷ ᠢ᠋ᠶ᠋ᠡᠨ ᠬᠠᠭᠠᠯᠭᠠᠨ ᠳ᠋ᠤ᠌ ᠤᠷᠢᠳᠠ ᠶᠣᠰᠣᠭᠠᠷ ᠳᠡᠭᠦᠵᠢᠯᠡᠭᠡᠳ᠂ ᠬᠠᠮᠲᠤ ᠶᠠᠪᠤᠭᠰᠠᠨ ᠠᠷᠢᠬᠢᠨ ᠤ᠋ ᠪᠠᠨ ᠨᠥᠬᠥᠳ ᠢ᠋ ᠠᠯᠠᠭᠠᠳ᠂ ᠲᠤᠰᠢᠶᠠᠯ ᠢ᠋ ᠳᠤᠭᠤᠯᠭᠠᠪᠤᠷᠢᠲᠠᠢ ᠰᠠᠢᠬᠠᠨ ᠢ᠋ᠶ᠋ᠠᠷ ᠭᠦᠢᠴᠡᠳᠬᠡᠭᠰᠡᠨ ᠤᠴᠢᠷ ᠪᠡᠶᠡ ᠳ᠋ᠦ᠍ ᠣᠨᠣᠭᠳᠠᠬᠤ ᠶᠠᠯᠠ ᠬᠡᠯᠲᠦᠷᠢᠭᠰᠡᠨ ᠪᠣᠯᠪᠠᠤ(ᠪᠣᠯᠪᠠ ᠤᠤ) ᠭᠡᠵᠦ ᠪᠠᠷᠤᠨ ᠤ᠋ ᠡᠮᠦᠨᠡ ᠢᠨᠢᠶᠡᠮᠰᠦᠭᠯᠡᠨ ᠨᠣᠮᠣᠬᠠᠨ ᠵᠣᠭᠰᠣᠪᠠᠯ᠂ ᠪᠠᠷᠤᠨ᠂ ᠰᠢᠫᠠᠢᠯᠤ ᠳ᠋ᠤ᠌᠂
— ᠣᠳᠣ ᠥᠭᠡᠷᠡ ᠶ᠋ᠢ ᠨᠢ ᠳᠡᠭᠦᠵᠢᠯᠡ ᠭᠡᠬᠦ ᠳ᠋ᠦ᠍ ᠂ ᠲᠡᠷᠡ ᠮᠣᠩᠭᠣᠯ ᠢ᠋ ᠬᠣᠶᠠᠷ ᠨᠥᠬᠥᠳ ᠦ᠋ᠨ ᠳᠡᠷᠭᠡᠳᠡ ᠳ᠋ᠦ᠍ᠨᠢ ᠨᠢᠭᠡᠨ ᠠᠳᠠᠯᠢ ᠳᠡᠭᠦᠵᠢᠯᠡᠪᠡ᠃
ᠫᠦᠰᠡ ᠶ᠋ᠢᠨ ᠳ᠋ᠠᠩᠵᠢᠶᠠᠳᠠ᠂ ᠤᠯᠴᠠᠭᠠᠷ ᠰᠢᠷᠠ ᠴᠢᠷᠠᠢ ᠲᠠᠢ ᠪᠦᠳᠦᠭᠦᠨ ᠬᠢᠲᠠᠳ ᠲᠡᠷᠡ ᠭᠤᠷᠪᠠᠨ ᠬᠡᠭᠦᠷ ᠢ᠋ ᠵᠠᠢᠯᠠᠭᠤᠯᠵᠤ ᠥᠭᠭᠦᠨᠡ ᠤᠤ ᠭᠡᠵᠦ ᠪᠠᠷᠤᠨ ᠢ᠋ ᠭᠤᠶᠤᠵᠤ᠂
— ᠳᠠ ᠯᠣᠣᠶᠧ᠂ ᠬᠥᠮᠦᠨ ᠮᠠᠨᠠᠢ(ᠮᠠᠨ ᠤ᠋) ᠫᠦᠰᠡᠨ ᠳ᠋ᠦ᠍ ᠣᠷᠣᠬᠤ ᠦᠭᠡᠢ ᠪᠣᠯᠤᠨᠠ᠂ ᠲᠠ ᠥᠴᠦᠬᠡᠨ ᠬᠤᠳᠠᠯᠳᠤᠭᠠᠴᠢᠨ ᠢ᠋ ᠥᠷᠥᠰᠢᠶᠡᠵᠦ ᠬᠠᠢᠷᠠᠯᠠ ᠭᠡᠵᠦ ᠭᠤᠶᠤᠪᠠ᠃
— ᠮᠠᠷᠭᠠᠰᠢ ᠪᠣᠯᠲᠠᠯᠠ ᠳᠡᠭᠦᠵᠢᠯᠡᠰᠥᠳᠡᠢ ᠪᠠᠢᠭ᠃ ᠬᠠᠷᠢᠨ ᠮᠠᠷᠭᠠᠰᠢ ᠥᠷᠯᠥᠭᠡ᠂ ᠡᠨᠡ ᠭᠤᠷᠪᠠᠨ ᠰᠡᠭ ᠢ᠋ ᠵᠠᠢᠯᠠᠭᠤᠯᠵᠤ ᠬᠠᠶᠠᠭᠠᠷᠠᠢ ᠭᠡᠵᠦ ᠬᠡᠯᠡᠭᠡᠳ᠂ ᠥᠩᠬᠧᠷᠡᠨ ᠦ᠌ ᠮᠠᠰᠢᠨ ᠳ᠋ᠠᠭᠠᠨ ᠰᠠᠭᠤᠬᠤ ᠳ᠋ᠤᠨᠢ(ᠳ᠋ᠤ᠌ ᠨᠢ)᠂ ᠠᠶᠤᠨ ᠭᠡᠯᠮᠡᠭᠳᠡᠭᠰᠡᠨ ᠣᠯᠠᠨ᠂ ᠪᠠᠷᠤᠨ ᠢ᠋ ᠬᠠᠮᠠᠭᠠᠯᠠᠵᠤ ᠶᠠᠪᠤᠬᠤ ᠴᠡᠷᠢᠭ ᠢ᠋ ᠮᠠᠰᠢᠨ ᠤ᠋ ᠬᠣᠢᠨᠠ ᠠ᠋ᠴᠠ ᠬᠥᠳᠡᠯᠦᠮᠡᠭᠴᠡ ᠵᠦᠭ ᠵᠦᠭ ᠳᠠᠰᠢ ᠲᠠᠷᠬᠠᠪᠠ᠃
— ᠶᠡᠬᠡ ᠵᠠᠩᠵᠤᠨ ᠬᠡᠯᠡᠨᠡ᠂ ᠮᠠᠷᠭᠠᠰᠢ ᠪᠣᠯᠳᠤᠷ(ᠪᠣᠯᠲᠠᠯᠠ) ᠪᠠᠢᠨᠠ ᠬᠡᠷᠡᠺᠲᠡᠢ(ᠬᠡᠷᠡᠭᠲᠡᠢ)᠃ ᠢ ᠲᠡᠭᠦᠨᠴᠢᠯᠡᠨ ᠬᠥᠳᠡᠯᠭᠡᠬᠦ ᠪᠠ ᠠᠪᠬᠤ ᠪᠣᠯᠬᠤ ᠦᠭᠡᠢ ᠪᠠᠢᠨᠠ᠃ ᠠ ᠮᠠᠷᠭᠠᠰᠢ᠂ ᠲᠠᠨᠠᠢ ᠬᠥᠮᠦᠨ᠂ ᠡᠨᠡ ᠦᠬᠦᠭᠰᠡᠨ ᠬᠥᠮᠦᠨ ᠠᠪᠬᠤ ᠪᠠ ᠬᠠᠶᠠᠬᠤ ᠪᠣᠯᠤᠨᠠ᠃ ᠠ ᠣᠳᠣ ᠪᠣᠯᠬᠤ ᠦᠭᠡᠢ᠂ ᠵᠠᠩᠵᠤᠨ ᠠᠭᠤᠷᠯᠠᠨᠠ᠃ ᠠᠢ ᠲᠡᠭᠡᠭᠡᠳ᠂ ᠲᠠᠨᠠᠢ(ᠲᠠᠨ ᠤ᠋) ᠬᠥᠮᠦᠨ ᠢ᠋ ᠵᠣᠳᠣᠨᠠ᠂ ᠪᠠᠷᠢᠨᠠ᠂ ᠠᠯᠠᠨᠠ᠂ ᠬᠢᠳᠤᠨᠠ᠂ ᠳᠡᠭᠦᠵᠢᠯᠡᠨᠡ᠃
ᠮᠠᠨᠠᠢ(ᠮᠠᠨ ᠤ᠋) ᠵᠠᠩᠵᠤᠨ ᠲᠠᠨᠠᠢ(ᠲᠠᠨ ᠤ᠋) ᠲᠥᠯᠥᠭᠡ ᠥᠪᠡᠷ ᠦ᠋ᠨ ᠬᠣᠶᠠᠷ ᠴᠡᠷᠢᠭ ᠰᠢᠢᠳᠬᠡᠭᠰᠡᠨ ᠪᠠ ᠳᠡᠭᠦᠵᠢᠯᠡᠭᠰᠡᠨ ᠪᠠᠢᠨᠠ᠃ ᠠ ᠲᠠᠨ ᠤ᠋ ᠬᠥᠮᠦᠨ ᠶᠣᠰᠣ ᠮᠡᠳᠡᠬᠦ ᠦᠭᠡᠢ ᠪᠠ ᠶᠠᠮᠠᠷ ᠮᠠᠭᠤ ᠬᠥᠮᠦᠨ ᠪᠠᠢᠨᠠ? ᠶᠡᠬᠡ ᠵᠠᠩᠵᠤᠨ ᠳ᠋ᠤ᠌ ᠪᠡᠯᠡᠭ ᠪᠠᠷᠢᠨᠠ᠂ ᠮᠥᠷᠭᠥᠨᠡ᠂ ᠰᠥᠭᠥᠳᠦᠨᠡ᠂ ᠠᠢ ᠪᠠᠶᠠᠷ ᠬᠦᠷᠭᠡᠨᠡ ᠬᠡᠷᠡᠭᠲᠡᠢ᠃ ᠠ᠂ ᠦᠭᠡᠢ ᠪᠣᠯ᠂ ᠮᠠᠭᠤ ᠪᠣᠯᠤᠨᠠ ᠭᠡᠵᠦ ᠲᠡᠷᠡ ᠴᠠᠭᠠᠨ ᠤ᠋ ᠣᠷᠣᠰ ᠴᠡᠷᠢᠭ᠂ ᠥᠨᠥᠬᠢ ᠫᠦᠰᠡᠨ ᠦ᠌ ᠬᠢᠲᠠᠳ ᠪᠢᠴᠢᠭᠡᠴᠢ ᠨᠠᠷ ᠲᠤ᠌ ᠬᠡᠯᠡᠵᠦ᠂ ᠲᠡᠳᠡ ᠨᠢ ᠰᠡᠩᠳᠡ ᠮᠡᠩᠳᠡ ᠪᠠᠷᠤᠨ ᠤ᠋ ᠡᠮᠦᠨᠡ ᠰᠥᠭᠥᠳᠦᠨ ᠮᠥᠷᠭᠥᠵᠦ᠂ ᠳ᠋ᠠᠩᠵᠢᠶᠠᠳᠠ (ᠳᠠᠩᠵᠢᠶᠠᠳ) ᠨᠢ ᠨᠢᠭᠡ ᠪᠣᠭᠣᠳᠠᠯ ᠲᠠᠢ ᠶᠠᠭᠤᠮᠠ ᠪᠠᠷᠤᠨ ᠳ᠋ᠤ᠌ ᠶᠣᠰᠣᠯᠠᠨ ᠪᠠᠷᠢᠵᠠᠢ᠃
ᠪᠣᠰᠤᠭᠠ ᠪᠥᠬᠡ ᠲᠡᠢ ᠲᠣᠮᠣ ᠡᠨᠳᠡ ᠤᠨᠤᠭᠰᠠᠨ ᠬᠥᠳᠡᠭᠡ ᠶ᠋ᠢᠨ ᠨᠢᠭᠡ ᠡᠪᠦᠭᠡᠨ᠂ ᠪᠠᠲᠤᠪᠠᠶᠠᠷ ᠤ᠋ᠨ ᠠᠮᠤᠷᠯᠠᠩᠭᠤᠢ ᠰᠠᠢᠬᠠᠨ ᠴᠢᠷᠠᠢ ᠶ᠋ᠢ ᠨᠢ ᠬᠠᠷᠠᠭᠠᠳ᠂ ᠨᠠᠮ ᠳᠠᠭᠤᠨ ᠢ᠋ᠶ᠋ᠠᠷ ᠥᠭᠦᠯᠡᠷᠦᠨ᠂
— ᠴᠣᠬᠣᠮ ᠶᠣᠰᠣ ᠬᠡᠯᠡᠯᠴᠡᠪᠡᠯ ᠡᠨᠡ ᠭᠤᠷᠪᠠ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠪᠠᠷᠤᠨ ᠢ᠋ ᠥᠪᠡᠷ ᠢ᠋ ᠨᠢ ᠳᠡᠭᠦᠵᠢᠯᠡᠪᠡᠯ ᠵᠣᠬᠢᠬᠤ ᠶᠤᠮᠰᠠᠨᠵᠢ ᠳᠠ᠃ ᠲᠡᠭᠦᠨ ᠦ᠌ ᠤᠷᠰᠢᠭ ᠢ᠋ᠶ᠋ᠠᠷ ᠡᠨᠡ ᠵᠠᠪᠰᠠᠷ ᠡᠬᠡᠨᠡᠷ ᠬᠡᠦᠬᠡᠳ᠂ ᠡᠪᠦᠭᠡᠳ ᠨᠠᠰᠤᠲᠠᠨ᠂ ᠬᠡᠴᠢᠨᠡᠨ ᠠᠮᠢᠲᠠᠨ ᠠᠮᠢ ᠪᠠᠨ ᠬᠢᠯᠢᠰ ᠭᠠᠰᠢᠭᠤᠨ ᠢ᠋ᠶ᠋ᠠᠷ ᠠᠯᠳᠠᠪᠠ᠃ ᠬᠡᠴᠢᠨᠡᠨ ᠠᠮᠢᠲᠠᠨ ᠬᠠᠮᠤᠭ ᠶᠠᠭᠤᠮᠠ ᠪᠠᠨ ᠪᠠᠷᠤᠨ ᠳ᠋ᠤ᠌ ᠪᠤᠯᠢᠶᠠᠯᠭᠠᠵᠤ᠂ ᠪᠠᠢᠳᠠᠭ ᠮᠠᠯ ᠢ᠋ᠶ᠋ᠠᠨ ᠲᠠᠯᠠᠭᠤᠯᠪᠠ᠃ ᠤᠳᠠᠬᠤ ᠦᠭᠡᠢ ᠨᠢᠭᠦᠯ ᠦ᠋ᠨ ᠰᠠᠪᠠ ᠨᠢ ᠳᠦᠭᠦᠷᠬᠦ ᠶᠦᠮ ᠪᠠᠢᠯ ᠦᠭᠡᠢ ᠳᠡ᠃ ᠰᠢᠷᠬᠠᠳᠤᠭᠰᠠᠨ ᠭᠠᠮᠢᠩ ᠴᠡᠷᠢᠭ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠬᠢᠲᠠᠳ ᠡᠮᠨᠡᠯᠭᠡ ᠶ᠋ᠢᠨ ᠬᠠᠵᠠᠭᠤ ᠪᠠᠷ ᠭᠠᠷᠬᠤ ᠳ᠋ᠤ᠌᠂ ᠣᠳᠣ ᠬᠦᠷᠲᠡᠯᠡ ᠬᠥᠮᠦᠨ ᠦ᠌ ᠮᠢᠬᠠᠨ ᠤ᠋ ᠬᠡᠩᠰᠢᠭᠦᠦ ᠬᠠᠩᠬᠤᠯᠤᠭᠰᠠᠭᠠᠷ ᠪᠠᠢᠨᠠ ᠪᠢᠯᠡ᠃ ᠲᠡᠷᠡ ᠰᠢᠲᠠᠵᠤ ᠦᠬᠦᠭᠰᠡᠨ ᠰᠢᠷᠬᠠᠳᠤᠨ (ᠰᠢᠷᠬᠠᠲᠠᠨ) ᠨᠤᠭᠤᠳ᠂ ᠬᠡᠳᠦᠢ ᠳᠠᠢᠰᠤᠨ ᠤ᠋ ᠴᠡᠷᠢᠭ ᠪᠣᠯᠪᠠᠴᠤ ᠬᠥᠮᠦᠨ ᠦ᠌ ᠦᠷᠡ ᠰᠢᠦ ᠳᠡ ᠭᠡᠵᠦ ᠲᠡᠷᠡ ᠡᠪᠦᠭᠡᠨ ᠦ᠌ ᠬᠡᠯᠡᠬᠦ ᠳ᠋ᠦ᠍ ᠪᠠᠲᠤᠪᠠᠶᠠᠷ᠂
— ᠮᠢᠨᠦ ᠬᠦᠦ ᠶ᠋ᠢ ᠠᠷᠠᠢ ᠴᠤᠤ ᠭᠡᠵᠦ ᠭᠠᠮᠢᠩ ᠤ᠋ᠨ ᠱᠣᠷᠣᠩ ᠠ᠋ᠴᠠ ᠭᠠᠷᠴᠤ ᠢᠷᠡᠬᠦ ᠳ᠋ᠦ᠍ᠨᠢ(ᠳ᠋ᠦ᠍ ᠨᠢ) ᠪᠠᠷᠤᠨ ᠤ᠋ ᠴᠡᠷᠢᠭ ᠫᠤᠤᠳᠠᠨ ᠰᠢᠷᠬᠠᠲᠤᠭᠤᠯᠵᠤ᠂ ᠬᠠᠰᠢᠶᠠᠨ ᠤ᠋ ᠪᠠᠨ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠨᠢ ᠳᠥᠩᠭᠡᠵᠢ ᠬᠦᠷᠴᠦ ᠢᠷᠡᠲᠡᠯᠡ ᠪᠠᠷᠤᠨ ᠤ᠋ ᠨᠢᠭᠡᠨ ᠴᠡᠷᠢᠭ ᠭᠠᠢ ᠪᠣᠯᠵᠤ ᠳᠠᠭᠠᠷᠢᠯᠳᠤᠵᠠᠢ ᠭᠡᠬᠦ ᠳ᠋ᠦ᠍ᠨᠢ(ᠳ᠋ᠦ᠍ ᠨᠢ)᠂
— ᠬᠠᠷᠭᠢᠰ ᠪᠠᠷᠣᠨ ᠠᠷᠠᠳ ᠠᠮᠢᠲᠠᠨ ᠢ᠋ ᠤᠳᠠᠲᠠᠯᠠ ᠳᠠᠷᠤᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠵᠤ ᠪᠠᠢᠭᠠ ᠰᠢᠦ ᠭᠡᠵᠦ ᠲᠡᠷᠡ ᠡᠪᠦᠭᠡᠨ ᠰᠢᠪᠡᠭᠡᠨᠡᠨ ᠥᠭᠦᠯᠡᠷᠦᠨ᠂ ᠬᠣᠢᠲᠤ ᠵᠦᠭ ᠲᠦ᠍ ᠰᠦᠬᠡᠪᠠᠭᠠᠲᠤᠷ ᠴᠣᠢᠪᠠᠯᠰᠠᠩ ᠬᠣᠶᠠᠷ ᠤ᠋ᠨ ᠰᠤᠷᠠᠭ ᠪᠣᠢ᠃ ᠵᠢᠷᠤᠮ ᠤ᠋ᠨ ᠴᠡᠷᠢᠭ ᠡᠯᠰᠡᠵᠦ᠂ ᠠᠷᠠᠳ ᠣᠯᠠᠨ ᠢ᠋ ᠭᠠᠰᠢᠭᠤᠨ ᠵᠣᠪᠠᠯᠠᠩ ᠠ᠋ᠴᠠ ᠠᠩᠭᠢᠵᠢᠷᠠᠭᠤᠯᠬᠤ ᠵᠣᠷᠢᠯᠭᠠ ᠲᠠᠢ ᠶᠤᠮ ᠭᠡᠨᠡ ᠪᠢᠯᠡ ᠭᠡᠬᠦ ᠳ᠋ᠦ᠍ᠨᠢ(ᠳ᠋ᠦ᠍ ᠨᠢ)᠂ ᠪᠠᠲᠤᠪᠠᠶᠠᠷ᠂ ᠲᠡᠷᠡ ᠡᠪᠦᠭᠡᠨ ᠦ᠌ ᠵᠦᠭ ᠡᠷᠭᠢᠵᠦ᠂
— ᠦᠨᠡᠬᠡᠷ ᠤᠤ? ᠶᠠᠮᠠᠷ ᠰᠠᠢᠬᠠᠨ ᠦᠭᠡ ᠪᠣᠢ? ᠭᠡᠬᠦ ᠳ᠋ᠦ᠍ᠨᠢ(ᠳ᠋ᠦ᠍ ᠨᠢ)᠂
— ᠮᠠᠨᠠᠢ(ᠮᠠᠨ ᠤ᠋) ᠬᠦᠷᠭᠡᠨ ᠰᠠᠢ᠍ᠢ (ᠰᠠᠶᠢ) ᠲᠡᠷᠡ ᠵᠢᠷᠤᠮ ᠤ᠋ᠨ ᠴᠡᠷᠢᠭ ᠲᠦ᠍ ᠡᠯᠰᠡᠬᠦ ᠭᠡᠵᠦ ᠰᠠᠮ ᠮᠣᠷᠳᠠᠭᠰᠠᠨ᠃ ᠥᠨᠥ ᠥᠷᠯᠥᠭᠡ ᠪᠢ ᠬᠦᠷᠭᠡᠨ ᠡᠴᠡ ᠠᠮᠠ ᠵᠠᠬᠢᠶᠠ ᠰᠠᠢᠨ ᠬᠥᠮᠦᠨ ᠢ᠋ᠶ᠋ᠡᠷ ᠳᠠᠮᠵᠢᠭᠤᠯᠤᠭᠰᠠᠨ ᠢ᠋ ᠣᠯᠵᠤ ᠰᠣᠨᠣᠰᠤᠯᠠ᠃ ᠡᠷᠬᠡ ᠴᠢᠯᠥᠭᠡ ᠪᠡᠨ ᠣᠯᠬᠤ ᠶ᠋ᠢᠨ ᠪᠠᠶᠠᠷ ᠦᠵᠡᠨᠡ ᠭᠡᠵᠦ ᠪᠢ ᠡᠨᠡ ᠴᠠᠭᠠᠭᠴᠢᠨ ᠲᠠᠬᠢᠶᠠ ᠵᠢᠯ ᠳ᠋ᠦ᠍ ᠭᠣᠷᠢ ᠶᠡᠬᠡᠲᠡᠢ ᠪᠠᠢᠨᠠ ᠰᠢᠦ ᠬᠡᠮᠡᠪᠡᠰᠦ᠂
— ᠠᠮᠠᠨ ᠤ᠋ ᠪᠡᠯᠭᠡ ᠡᠴᠡ ᠠᠰᠢᠳᠠ ᠶ᠋ᠢᠨ ᠪᠡᠯᠭᠡ ᠭᠡᠵᠦ ᠲᠡᠷᠡ ᠰᠠᠢᠬᠠᠨ ᠠᠮᠠ ᠪᠠᠷ ᠴᠢᠨᠢ ᠪᠣᠯᠲᠤᠭᠠᠢ! ᠭᠡᠳ ᠪᠠᠲᠤᠪᠠᠶᠠᠷ ᠲᠡᠮᠡᠭᠡ ᠪᠡᠨ ᠲᠠᠰᠢᠭᠤᠷᠳᠠᠨ ᠵᠣᠭᠳᠣᠷ ᠬᠥᠳᠡᠯᠭᠡᠪᠡ᠃
* * *
ᠵᠢᠷᠤᠬᠠᠢᠴᠢ ᠨᠠᠷ ᠤ᠋ᠨ ᠰᠣᠩᠭᠣᠵᠤ ᠲᠣᠭᠲᠠᠭᠠᠭᠰᠠᠨ᠂ ᠣᠯᠠᠨᠠ ᠡᠷᠭᠦᠭᠳᠡᠭᠰᠡᠨ ᠦ᠌ ᠠᠷᠪᠠᠨ ᠨᠢᠭᠡᠨ ᠣᠨ ᠤ᠋ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠲᠠᠪᠤᠨ ᠤ᠋ ᠡᠳᠦᠷ ᠬᠠᠭᠠᠨ ᠳᠠᠬᠢᠨ ᠰᠢᠷᠡᠭᠡᠨᠡ ᠵᠠᠯᠠᠷᠠᠪᠠ᠃ ᠤᠯᠤᠰ ᠤ᠋ᠨ ᠶᠡᠷᠦᠩᠬᠡᠢ ᠰᠠᠢᠳ ᠤ᠋ᠨ ᠲᠤᠰᠢᠶᠠᠯ ᠳ᠋ᠤ᠌ ᠵᠠᠭᠠᠯᠬᠠᠩᠵᠠ ᠬᠤᠲᠤᠭᠲᠤ ᠶ᠋ᠢ ᠲᠣᠬᠣᠭᠠᠨ ᠲᠣᠮᠢᠯᠠᠵᠤ᠂ ᠬᠠᠮᠢᠶᠠᠷᠤᠭᠰᠠᠨ ᠶᠡᠷᠦᠩᠬᠡᠢ ᠰᠠᠢᠳ ᠲᠤ᠌ ᠮᠠᠨᠵᠤᠰᠢᠷᠢ ᠬᠤᠲᠤᠭᠲᠤ ᠶ᠋ᠢ ᠲᠣᠬᠣᠭᠠᠵᠠᠢ᠃ ᠪᠣᠭᠳᠠ ᠬᠠᠭᠠᠨ᠂ ᠪᠠᠷᠣᠨ ᠦᠩᠭᠧᠷᠠᠨ ᠳ᠋ᠤ᠌《ᠤᠯᠤᠰ ᠢ᠋ ᠮᠠᠨᠳᠤᠭᠤᠯᠤᠭᠴᠢ ᠶᠡᠬᠡ ᠪᠠᠭᠠᠲᠤᠷ ᠵᠠᠩᠵᠤᠨ》 ᠴᠣᠯᠠ᠂ ᠴᠢᠨ ᠸᠠᠩ ᠤ᠋ᠨ ᠵᠡᠷᠭᠡ ᠬᠠᠭᠠᠨ ᠤ᠋ ᠬᠡᠷᠬᠢᠮ( ᠬᠡᠷᠬᠡᠮ) ᠱᠠᠩᠨᠠᠵᠠᠢ᠃
ᠪᠠᠷᠤᠨ ᠦᠩᠭᠧᠷᠡᠨ ᠳ᠋ᠦ᠍ ᠡᠷᠭᠦᠮᠵᠢᠯᠡᠭᠦᠯᠦᠭᠰᠡᠨ ᠳ᠋ᠡᠭᠡᠨ (ᠳ᠋ᠦ᠍ ᠪᠡᠨ) ᠪᠠᠬᠠᠷᠬᠠᠵᠤ ᠮᠠᠨᠵᠤᠰᠢᠷᠢ ᠬᠤᠲᠤᠭᠲᠤ ᠪᠠᠷᠳᠠᠮᠨᠠᠨ ᠥᠭᠦᠯᠡᠷᠦᠨ᠂
— ᠣᠳᠣ᠂ ᠮᠠᠨᠠᠢ(ᠮᠠᠨ ᠤ᠋) ᠤᠯᠤᠰ ᠲᠥᠷᠥ᠂ ᠸᠴᠢᠷ ᠠᠯᠮᠠᠰ ᠠᠳᠠᠯᠢ ᠪᠠᠲᠤ ᠪᠡᠬᠢ ᠪᠣᠯᠪᠠ᠃ ᠤᠯᠤᠰ ᠤ᠋ᠨ ᠡᠵᠡᠨ ᠪᠣᠭᠳᠠ ᠬᠠᠭᠠᠨ᠂ ᠷᠢᠬᠰᠤᠮᠭᠣᠮᠪᠤᠤ ᠠᠷᠢᠶᠠᠪᠠᠯᠤ ᠶ᠋ᠢᠨ ᠬᠤᠪᠢᠯᠭᠠᠨ᠂ ᠮᠠᠨᠠᠢ (ᠮᠠᠨ ᠤ᠋) ᠤᠯᠤᠰ ᠤ᠋ᠨ ᠶᠡᠷᠦᠩᠬᠡᠢ ᠰᠠᠢᠳ ᠵᠠᠭᠠᠯᠬᠠᠩᠵᠠ ᠬᠤᠲᠤᠭᠲᠤ᠂ ᠸᠠᠴᠢᠷᠪᠠᠨᠢ ᠶ᠋ᠢᠨ ᠬᠤᠪᠢᠯᠭᠠᠨ᠂ ᠬᠠᠮᠢᠶᠠᠷᠤᠭᠰᠠᠨ ᠶᠡᠷᠦᠩᠬᠡᠢ ᠰᠠᠢᠳ ᠮᠢᠨᠦ ᠪᠡᠶᠡ ᠮᠠᠨᠵᠤᠰᠢᠷᠢ ᠶ᠋ᠢᠨ ᠬᠤᠪᠢᠯᠭᠠᠨ᠂ ᠮᠠᠨᠠᠢ(ᠮᠠᠨ ᠤ᠋)ᠤᠯᠤᠰ ᠢ᠋ ᠮᠠᠨᠳᠤᠭᠤᠯᠤᠭᠴᠢ ᠶᠡᠬᠡ ᠪᠠᠭᠠᠲᠤᠷ ᠵᠠᠩᠵᠤᠨ ᠪᠠᠷᠤᠨ ᠦᠩᠭᠧᠷᠡᠨ ᠪᠣᠯᠪᠠᠯ ᠤᠯᠠᠭᠠᠨ ᠰᠠᠬᠢᠭᠤᠯᠰᠤ ᠭᠡᠰᠡᠷ ᠦ᠋ᠨ ᠬᠤᠪᠢᠯᠭᠠᠨ ᠭᠡᠵᠡᠢ᠃*
ᠭᠡᠪᠡᠴᠦ᠂ ᠰᠢᠷᠠ ᠬᠠᠷᠠ ᠹᠧᠣᠳᠠᠯ ᠤ᠋ᠨ ᠲᠡᠷᠡ ᠣᠯᠠᠨ《ᠪᠤᠷᠬᠠᠨ ᠤ᠋ ᠬᠤᠪᠢᠯᠭᠠᠨ》 ᠪᠦᠷᠢᠳᠦᠭᠰᠡᠨ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠨᠢ᠂ ᠰᠥᠨᠥᠨ ᠮᠥᠬᠥᠵᠦ ᠪᠠᠢᠭᠠ ᠲᠥᠷᠥᠯᠬᠢᠲᠡᠨ ᠦ᠌ ᠬᠠᠪᠴᠢᠭ ᠭᠠᠪᠠᠯᠠ ᠲᠠᠢ ᠤᠰᠲ᠋ᠣᠸ** ᠤ᠋ᠨ ᠪᠠᠷᠤᠨ ᠤ᠋ ᠠᠳᠬᠤᠨ ᠳ᠋ᠠᠬᠢ ᠲᠣᠭᠯᠠᠭᠠᠮ ᠪᠠᠢᠭᠰᠠᠨ ᠪᠥᠭᠡᠳ ᠠᠷᠠᠳ ᠲᠦᠮᠡᠨ ᠦ᠌ ᠰᠡᠳᠬᠢᠯ ᠰᠠᠨᠠᠭᠠ ᠶ᠋ᠢ ᠠᠯᠳᠠᠵᠤ᠂ ᠣᠯᠠᠨ ᠳ᠋ᠤ᠌ ᠨᠡᠷᠡ ᠮᠠᠭᠤᠲᠠᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠵᠦ ᠪᠠᠢᠭᠠ ᠶ᠋ᠢᠨ ᠳᠡᠭᠡᠷᠡ᠂ ᠮᠠᠨᠵᠤᠰᠢᠷᠢ ᠬᠤᠲᠤᠭᠲᠤ ᠶ᠋ᠢᠨ ᠪᠠᠷᠳᠠᠮᠨᠠᠨ ᠬᠡᠯᠡᠭᠰᠡᠨ ᠲᠡᠢ ᠠᠳᠠᠯᠢ ᠲᠡᠢᠮᠦ ᠪᠡᠬᠢ ᠪᠠᠲᠤ ᠪᠢᠰᠢ ᠭᠡᠳᠡᠭ ᠢ᠋ᠶ᠋ᠡᠨ ᠮᠥᠨ ᠭᠠᠳᠠᠷᠯᠠᠵᠤ ᠪᠠᠢᠪᠠ᠃
ᠬᠦᠷᠢᠶᠡᠨ ᠦ᠌ ᠵᠠᠰᠠᠭ ᠤ᠋ᠨ ᠡᠷᠬᠡ ᠪᠠᠷᠢᠭᠴᠢᠳ᠂ ᠭᠠᠯ ᠤᠰᠤᠨ ᠤ᠋ ᠭᠠᠰᠢᠭᠤᠨ ᠵᠣᠪᠠᠯᠠᠩ ᠳ᠋ᠤ᠌ ᠨᠡᠷᠪᠡᠭᠳᠡᠵᠦ ᠪᠠᠢᠭᠠ ᠠᠷᠠᠳ ᠲᠦᠮᠡᠨ ᠦ᠌ ᠪᠡᠨ ᠡᠷᠬᠡ ᠴᠢᠯᠥᠭᠡ᠂ ᠲᠤᠰᠠᠭᠠᠷ ᠲᠣᠭᠲᠠᠨᠢᠬᠤ ᠶ᠋ᠢᠨ ᠲᠥᠯᠥᠭᠡ ᠲᠤᠯᠤᠯᠳᠤᠬᠤ ᠭᠡᠵᠦ ᠬᠦᠴᠦᠨ ᠵᠤᠵᠠᠭᠠᠳᠬᠠᠵᠤ ᠪᠠᠢᠭᠰᠠᠨ ᠰᠦᠬᠡᠪᠠᠭᠠᠲᠤᠷ᠂ ᠴᠣᠢᠪᠠᠯᠰᠠᠩ ᠤ᠋ᠨ ᠵᠢᠷᠤᠮ ᠤ᠋ᠨ ᠴᠡᠷᠢᠭ ᠦ᠋ᠨ ᠲᠤᠬᠠᠢ ᠤᠮᠠᠷᠠ ᠵᠦᠭ ᠡᠴᠡ ᠮᠡᠳᠡᠭᠡ ᠢᠷᠡᠭᠰᠡᠭᠡᠷ ᠪᠠᠢᠭᠠ ᠶ᠋ᠢ ᠶᠡᠬᠡᠯᠡ(ᠶᠡᠬᠡ ᠯᠡ)ᠡᠮᠢᠶᠡᠨ ᠰᠣᠨᠣᠰᠴᠤ ᠪᠠᠢᠭᠰᠠᠨ ᠪᠥᠯᠥᠭᠡ᠃
ᠠᠷᠪᠠᠨ ᠲᠠᠪᠤᠳᠤᠭᠠᠷ ᠮᠥᠴᠡᠯᠭᠡ ᠰᠢᠪᠲᠤᠷᠴᠤ᠂ ᠤᠯᠤᠰ ᠣᠷᠣᠨ ᠨᠢ ᠣᠺᠲ᠋ᠣᠪᠧᠷ ᠦ᠋ᠨ ᠭᠡᠷᠡᠯ ᠢ᠋ᠶ᠋ᠡᠷ ᠭᠡᠢᠭᠦᠯᠦᠭᠰᠡᠨ ᠬᠣᠷᠢᠳᠤᠭᠠᠷ ᠮᠥᠴᠡᠯᠭᠡ ᠶ᠋ᠢᠨ ᠬᠣᠷᠢᠭᠠᠳ ᠣᠨ ᠤ᠋ ᠦᠶᠡ ᠳ᠋ᠦ᠍ ᠦᠰᠦᠷᠦᠨ ᠣᠷᠣᠬᠤ ᠭᠡᠵᠦ ᠪᠠᠢᠪᠠ᠃ ᠹᠧᠣᠳᠠᠯ ᠤ᠋ᠨ ᠳᠤᠮᠳᠠᠳᠤ ᠡᠷᠲᠡᠨ ᠦ᠌ ᠦᠶᠡ ᠶ᠋ᠢᠨ ᠪᠠᠯᠠᠷ ᠬᠠᠷᠠᠩᠭᠤᠢ ᠰᠥᠨᠢ ᠨᠥᠭᠴᠢᠨ ᠡᠴᠦᠰᠯᠡᠵᠦ᠂ ᠬᠥᠮᠦᠨ ᠢ᠋ ᠲᠤᠢᠯ ᠤ᠋ᠨ ᠬᠠᠷᠭᠢᠰ ᠢ᠋ᠶ᠋ᠠᠷ ᠲᠠᠮᠤᠯᠠᠨ ᠵᠣᠪᠠᠭᠠᠭᠴᠢ ᠦᠩᠭᠧᠷᠡᠨ ᠦ᠌ ᠶᠠᠮᠠᠷ ᠴᠤ᠌ ᠡᠷᠡᠭᠦᠦ ᠰᠢᠭᠦᠯᠲᠡ᠂ ᠨᠢᠳᠦ ᠦᠭᠡᠢ ᠰᠣᠬᠣᠷ ᠬᠠᠭᠠᠨ ᠤ᠋ ᠶᠠᠮᠠᠷ ᠴᠤ᠌ ᠨᠣᠮ ᠭᠦᠷᠢᠮ ᠨᠢ ᠬᠠᠭᠤᠴᠢᠨ ᠢ᠋ ᠡᠭᠡᠭᠦᠯᠬᠦ ᠬᠦᠴᠦᠨ ᠦᠭᠡᠢ ᠪᠥᠯᠥᠭᠡ᠃
ᠬᠣᠶᠠᠳᠤᠭᠠᠷ ᠳᠡᠪᠲᠡᠷ ᠲᠡᠭᠦᠰᠪᠡ᠃
— — — —
* ᠦᠨᠡᠨ ᠬᠡᠷᠡᠭ
* ᠦᠨᠡᠨ ᠬᠡᠷᠡᠭ
* ᠬᠡ· ᠺᠦᠨᠬᠦᠷᠦᠹ᠂ ᠢ· ᠰᠤᠷᠤᠺᠦᠸᠢᠺᠣᠹ᠂《᠁᠁᠁》᠂ ᠡᠷᠭᠡᠦ ᠬᠣᠲᠠ1946 ᠣᠨ᠂ 60 ᠳ᠋ᠤᠭᠠᠷ ᠲᠠᠯᠠ᠃
* ᠵᠢᠷᠬᠡᠮᠰᠡᠭᠲᠦ ᠭᠡᠵᠦ ᠶᠠᠰᠤ ᠦᠰᠦ ᠰᠠᠵᠢᠬᠢᠨᠠᠮ ᠠᠶᠤᠯ ᠲᠠᠢ ᠭᠡᠰᠡᠨ ᠦᠭᠡ᠃
* ᡀᠠᠬᠠᠵᠠᠯᠯᠤ ᠭᠡᠵᠦ ᠲᠩᠷᠢ ᠢᠯᠠᠪᠠ ᠭᠡᠰᠡᠨ ᠦᠭᠡ᠃
* ᠭᠡᠰᠡᠷ ᠦ᠋ᠨ ᠰᠠᠩ ᠲᠠᠬᠢᠯᠭᠠ ᠶ᠋ᠢᠨ ᠰᠤᠳᠤᠷ ᠠ᠋ᠴᠠ ᠡᠰᠢ ᠲᠠᠲᠠᠪᠠ᠃ ᠲᠠᠷᠢᠶᠠᠲᠤ ᠶ᠋ᠢᠨ ᠬᠦᠷᠢᠶᠡ᠂ ᠢᠯᠠᠭᠤᠭᠰᠠᠨ ᠬᠤᠲᠤᠭᠲᠤ ᠶ᠋ᠢᠨ ᠬᠡᠢᠳ ᠲᠦ᠍ ᠰᠠᠶᠢᠬᠠᠨ ᠬᠦᠷᠲᠡᠯᠡ ᠭᠡᠰᠡᠷ ᠦ᠋ᠨ ᠴᠠᠮ ᠲᠠᠢ ᠪᠠᠢᠵᠤ ᠪᠢᠯᠡ᠃
* ᠮᠠᠨᠵᠤᠰᠢᠷᠢ ᠯᠠᠮᠠ ᠶ᠋ᠢᠨ ᠡᠨᠡ ᠦᠭᠡ ᠶ᠋ᠢ ᠲᠡᠭᠦᠨ ᠦ᠌ ᠠᠮᠠᠨ ᠠ᠋ᠴᠠ ᠰᠣᠨᠣᠰᠤᠭᠰᠠᠨ ᠬᠥᠮᠦᠨ ᠡᠴᠡ ᠡᠭᠦᠨᠡ ᠲᠡᠮᠳᠡᠭᠯᠡᠪᠡ᠃
** ᠣᠰᠲ᠋ᠤᠸ ᠭᠡᠵᠦ ᠪᠡᠯᠲ᠋ ᠦ᠋ᠨ ᠲᠠᠩᠭᠢᠰ ᠤ᠋ᠨ ᠥᠭᠡᠷᠡ ᠨᠡᠷᠡ᠃ ᠦᠩᠭᠧᠷᠡᠨ ᠪᠣᠯ ᠪᠡᠯᠲ᠋ ᠦ᠋ᠨ ᠬᠠᠪᠢ ᠶ᠋ᠢᠨ ᠭᠧᠷᠮᠠᠨ ᠪᠠᠷᠤᠨ ᠤ᠋ ᠤᠳᠤᠮ ᠤᠭᠰᠠᠭᠠ ᠪᠥᠭᠡᠳ ᠲᠡᠭᠦᠨ ᠦ᠌ ᠳᠡᠭᠡᠳᠦ ᠡᠪᠦᠭᠡ — ᠳᠠᠯᠠᠢ ᠶ᠋ᠢᠨ ᠳᠡᠭᠡᠷᠡᠮᠴᠢᠳ᠂ ᠣᠷᠣᠰ ᠤ᠋ᠨ ᠬᠠᠭᠤᠴᠢᠨ ᠰᠤᠳᠤᠷ ᠲᠡᠦᠬᠡᠨ ᠳ᠋ᠦ᠍《ᠨᠣᠬᠠᠢ ᠷᠢᠴᠠᠷ》 ᠭᠡᠳᠡᠭ ᠵᠠᠭᠠᠯᠮᠠᠢᠲᠠᠨ ᠪᠢᠯᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠤᠢᠭᠤᠷᠵᠢᠨ· ᠣᠳᠬᠣᠨᠪᠠᠪᠠ᠂ ᠪᠠᠯ᠂ ᠰᠠᠷᠠᠨᠲᠤᠶᠠᠭᠠ᠂ ᠴᠤᠯᠮᠤᠨᠭᠡᠷᠡᠯ᠂
ᠰᠠᠷᠠᠨᠲᠤᠶᠠᠭᠠ᠂ ᠣᠶᠤᠨᠪᠢᠯᠢᠭ᠌᠂ ᠮᠧᠢ ᠬᠤᠸᠠ᠂ ᠲᠠᠪᠤᠨ ᠤᠰᠤ
ᠬᠢᠨᠠᠭᠴᠢ᠄ ᠣᠶᠤᠨᠪᠠᠲᠤ᠂ ᠴᠤᠯᠮᠤᠨᠭᠡᠷᠡᠯ᠂ ᠴᠡᠩᠬᠡᠯᠴᠡᠴᠡᠭ᠂ ᠪᠠᠳᠮᠠᠰᠡᠴᠡᠨ᠂
ᠣᠳᠬᠣᠨᠴᠡᠴᠡᠭ᠂ ᠮᠥᠩᠭᠥᠨᠭᠣᠸᠠ᠂ ᠲ· ᠬᠦᠮᠦᠵᠢᠯᠲᠦ᠂ ᠪᠠᠯ
ᠤᠩᠰᠢᠭᠴᠢ᠄ ᠨᠠᠰᠤᠨ᠌ᠦ᠌ᠯᠵᠡᠢ