ᠵᠠᠯᠠᠭᠤ ᠨᠠᠰᠤ03-ᠷ ∙ ᠴᠣᠢᠨᠣᠮ-ᠨᠠᠢᠷᠠᠭᠯᠠᠯЗалуу нас-Р.Чойном Zaluu nas-R.Choinom
798ᠵᠠᠯᠠᠭᠤ ᠨᠠᠰᠤ03
ᠷ᠂ ᠴᠤᠢᠨᠥᠮ
ᠭᠤᠷᠪᠠᠳᠤᠭᠠᠷ ᠪᠦᠯᠦᠭ
1
ᠠᠵᠠ ᠦᠭᠡᠢ ᠵᠢᠯᠣᠭᠣᠴᠢ ᠶ᠋ᠢᠨ ᠣᠩᠬᠣᠯᠢᠳᠤᠭᠰᠠᠨ ᠭᠠᠵᠠᠷ
ᠠᠯᠪᠠᠨ ᠤ᠋ ᠰᠢᠯᠭᠠᠯᠲᠠ ᠣᠴᠢᠬᠤ ᠬᠣᠭᠣᠷᠣᠨᠳᠣ
ᠬᠠᠢᠷᠠᠲᠤ ᠤᠩᠰᠢᠭᠴᠢ ᠲᠠᠨ ᠲᠠᠢ ᠪᠠᠨ ᠪᠢ
ᠬᠠᠮᠲᠤᠷᠠᠨ ᠵᠥᠪᠯᠡᠮᠡᠷ ᠨᠢᠭᠡ ᠶᠠᠭᠤᠮᠠ ᠪᠠᠢᠨᠠ᠃
ᠴᠠᠢ ᠶ᠋ᠢᠨ ᠰᠢᠷᠬᠡ ᠲᠣᠭᠣᠷᠢᠨ ᠰᠠᠭᠤᠵᠤ
ᠴᠠᠭᠠᠨ ᠶᠠᠷᠢᠶᠠ ᠳᠡᠯᠭᠡᠬᠦ ᠴᠠᠭ ᠲᠤ᠌
ᠢᠨᠢᠶᠡᠳᠦ ᠨᠠᠷᠭᠢᠶᠠᠨ ᠳ᠋ᠤ᠌ ᠠᠮᠠ ᠨᠢ ᠬᠠᠯᠠᠵᠤ
ᠢᠩᠭᠢᠵᠦ ᠵᠠᠷᠢᠮ ᠨᠢ ᠬᠡᠯᠡᠵᠦ ᠪᠠᠢᠬᠤ ᠶᠤᠮ᠃
| ᠵᠠᠯᠠᠭᠤ ᠨᠠᠰᠤ᠂ ᠬᠠᠯᠠᠭᠤᠨ ᠪᠡᠶᠡ
ᠵᠠ ᠳᠠ᠁ ᠶᠠᠮᠠᠷ ᠮᠥᠩᠬᠡ ᠶᠠᠭᠤᠮᠠ ᠪᠢᠰᠢ!
ᠲᠡᠨᠡᠭ ᠴᠦ᠍ ᠶᠠᠪᠤᠭᠰᠠᠨ᠂ ᠴᠡᠴᠡᠨ ᠴᠦ᠍ ᠶᠠᠪᠤᠭᠰᠠᠨ
ᠲᠡᠷᠡ ᠲᠡᠢ ᠲᠡᠷᠡ ᠦᠭᠡᠢ ᠯᠡ ᠭᠠᠭᠴᠠ ᠣᠯᠳᠠᠬᠤ ᠶᠤᠮ᠃
ᠬᠥᠮᠦᠨ ᠶᠡᠷᠦ ᠨᠢ ᠪᠠᠭᠠᠬᠠᠨ ᠵᠣᠪᠠᠵᠤ
ᠬᠦᠰᠡᠭᠰᠡᠨ ᠪᠦᠬᠦᠨ ᠢ᠋ᠶ᠋ᠡᠨ ᠶᠡᠬᠡᠬᠡᠨ ᠡᠳ᠋ᠯᠡᠵᠦ
ᠡᠨᠡ ᠮᠠᠭᠤ ᠪᠡᠶᠡ ᠪᠡᠨ ᠴᠡᠩᠭᠡᠭᠦᠯᠬᠦ ᠦᠭᠡᠢ ᠪᠣᠯ
ᠡᠬᠡ ᠡᠴᠡ ᠲᠥᠷᠥᠭᠰᠡᠨ ᠦ᠌ ᠬᠡᠷᠡᠭ ᠶᠠᠭᠤ ᠪᠣᠢ! ᠭᠡᠨᠡ᠃
ᠡᠰᠡᠪᠡᠯ ᠵᠠᠷᠢᠮ ᠨᠢ ᠨᠢᠭᠡ ᠤᠳᠠᠭᠠ
ᠡᠬᠢᠨ ᠦ᠌ ᠰᠢᠯᠦᠭ ᠢ᠋ᠶ᠋ᠡᠨ ᠡᠪᠯᠡᠭᠦᠯᠵᠦ ᠠᠪᠤᠭᠠᠳ
ᠣᠯᠠᠨ ᠤ᠋ ᠵᠠᠢᠳᠠᠭᠤ᠂ ᠲᠠᠮᠠᠬᠢ ᠰᠣᠷᠣᠵᠤ
ᠣᠨᠴᠠᠭᠠᠢ ᠳᠦᠷᠢ ᠭᠠᠷᠭᠠᠨ ᠰᠠᠭᠤᠭᠠᠳ
ᠪᠡᠶᠡ ᠶ᠋ᠢᠨ ᠬᠥᠳᠡᠯᠮᠦᠷᠢ ᠶ᠋ᠢ ᠬᠠᠷᠠ ᠠᠵᠢᠯ ᠭᠡᠨᠡ
ᠪᠢᠰᠢᠳ ᠬᠥᠮᠦᠰ ᠢ᠋ ᠬᠠᠭᠠᠰ ᠰᠡᠳᠬᠢᠭᠴᠢ ᠭᠡᠨᠡ᠃
| ᠨᠡᠭᠡᠷᠡᠨ ᠯᠡ ᠬᠥᠭᠡᠷᠦᠬᠦᠢ᠂ ᠵᠠᠯᠠᠭᠤ ᠨᠠᠰᠤᠨ ᠤ᠋
ᠨᠡᠷᠡᠯᠡᠵᠦ ᠪᠣᠯᠳᠠᠭ ᠦᠭᠡᠢ ᠡᠪᠡᠳᠴᠢᠨ ᠶᠤᠮ ᠳᠡ
ᠨᠢᠭᠡ ᠯᠡ ᠮᠡᠳᠡᠬᠦ ᠳ᠋ᠦ᠍ ᠥᠪᠡᠷ ᠢ᠋ᠶ᠋ᠡᠨ ᠤᠬᠠᠭᠠᠷᠠᠳᠠᠭ ᠭᠡᠵᠦ
ᠨᠡᠷᠮᠡᠵᠦ ᠥᠭᠳᠡᠭ ᠬᠥᠮᠦᠨ ᠴᠦ᠍ ᠪᠠᠢᠳᠠᠭ ᠭᠡᠨᠡ᠃
ᠠᠶᠠᠨᠳᠠᠭᠠᠨ ᠲᠡᠳᠡᠨ ᠦ᠌《 ᠥᠪᠡᠷ ᠢ᠋ᠶ᠋ᠡᠨ ᠤᠬᠠᠭᠠᠷᠠᠬᠤ 》 ᠶ᠋ᠢ
ᠠᠯᠢ ᠪᠣᠯᠲᠠᠯᠠ ᠬᠥᠨᠳᠡᠯᠡᠨ ᠡᠴᠡ ᠬᠠᠷᠠᠬᠤ ᠪᠣᠢ?
ᠠᠬᠢᠨ ᠣᠯᠳᠠᠳᠠᠭ ᠦᠭᠡᠢ ᠵᠠᠯᠠᠭᠤ ᠨᠠᠰᠤ ᠶ᠋ᠢ
ᠠᠰᠢᠭ ᠦᠭᠡᠢ ᠵᠠᠮ ᠢ᠋ᠶ᠋ᠠᠷ ᠬᠡᠴᠢᠨᠡᠭᠡᠨ ᠶᠠᠪᠤᠭᠤᠯᠬᠤ ᠪᠣᠢ?
ᠳᠠᠩ ᠤ᠋ᠨ ᠠᠴᠢᠶᠠ ᠬᠠᠵᠠᠭᠠᠢ ᠠᠴᠢᠭᠳᠠᠪᠠᠯ
ᠲᠡᠷᠡ ᠳᠣᠣᠷᠠ ᠨᠢ ᠵᠠᠰᠠᠵᠤ ᠠᠴᠢᠬᠤ ᠡᠴᠡ ᠪᠢᠰᠢ
ᠲᠡᠭᠡᠵᠦ ᠶᠠᠪᠤᠭᠠᠳ ᠲᠡᠭᠰᠢᠷᠡᠨᠡ ᠪᠢᠵᠡ ᠭᠡᠳᠡᠭ
ᠲᠡᠨᠡᠭ ᠠᠶᠠᠨᠴᠢᠨ ᠪᠠᠢᠳᠠᠭ ᠭᠡᠵᠦ ᠤᠤ?
ᠵᠠᠯᠠᠭᠤ ᠨᠠᠰᠤᠨ ᠤ᠋ ᠦᠨᠡᠨ ᠵᠣᠪᠠᠯᠠᠩ ᠢ᠋
ᠵᠠᠢᠯᠠᠭᠤᠯ ᠭᠡᠵᠦ ᠬᠠᠢᠷᠠᠯᠠᠨ ᠮᠡᠳᠡᠪᠡᠯ
ᠡᠴᠢᠭᠡ ᠪᠤᠶᠤ ᠨᠥᠬᠥᠷ ᠦ᠋ᠨ ᠭᠠᠷ ᠢ᠋ᠶ᠋ᠠᠷ
ᠡᠷᠲᠡᠬᠡᠨ ᠲᠦᠰᠢᠬᠦ ᠬᠡᠷᠡᠭᠲᠡᠢ ᠪᠢᠰᠢ ᠤᠤ?
ᠥᠨᠳᠥᠷ ᠥᠭᠡᠳᠡ ᠬᠣᠭᠣᠰᠣᠨ ᠳᠡᠭᠦᠯᠢᠬᠦ
ᠥᠪᠡᠷ ᠢ᠋ᠶ᠋ᠡᠨ ᠬᠥᠭᠡᠷᠳᠡᠭ ᠪᠥᠮᠪᠥᠯᠢᠭ ᠪᠢᠰᠢ᠂
ᠨᠡᠢᠲᠡ ᠶ᠋ᠢᠨ ᠢᠵᠢᠯ ᠬᠥᠮᠦᠨ ᠪᠣᠯᠬᠤ ᠪᠠᠷ ᠢ᠋ᠶ᠋ᠠᠨ
ᠨᠡᠢᠭᠡᠮ| ᠣᠷᠴᠢᠨ ᠳ᠋ᠠᠭᠠᠨ ᠪᠠᠢᠷᠢ ᠪᠠᠨ ᠡᠵᠡᠯᠡᠵᠦ
ᠡᠭᠦᠷᠴᠦ ᠳᠠᠭᠠᠭᠠᠮᠠ ᠦᠭᠡᠢ ᠠᠴᠢᠶᠠ ᠭᠠᠷᠪᠠᠯ
ᠤᠭᠤᠴᠠ ᠨᠢᠷᠤᠭᠤ ᠪᠠᠨ ᠭᠠᠮᠨᠠᠬᠤ ᠦᠭᠡᠢ ᠪᠠᠢᠬᠤ ᠶ᠋ᠢ
ᠦᠨᠡᠨᠴᠢ ᠪᠡᠨ ᠰᠢᠯᠭᠠᠭᠤᠯᠬᠤ ᠬᠡᠷᠡᠭ ᠭᠠᠷᠪᠠᠯ
ᠤᠯᠠᠭᠠᠨ ᠴᠢᠰᠤ ᠪᠠᠨ ᠭᠡᠮᠨᠡᠬᠦ ᠦᠭᠡᠢ ᠪᠠᠢᠬᠤ ᠶ᠋ᠢ
ᠵᠠᠰᠠᠭ ᠲᠥᠷᠥ ᠲᠡᠢ᠂ ᠡᠬᠡ ᠣᠷᠣᠨ ᠲᠠᠢ
ᠵᠠᠯᠠᠭᠤ ᠨᠠᠰᠤ ᠲᠠᠢ᠂ ᠡᠷᠬᠡ ᠴᠢᠯᠥᠭᠡ ᠲᠡᠢ
ᠢᠷᠭᠡᠨ ᠬᠥᠮᠦᠨ ᠦ᠌ ᠭᠠᠪᠢᠶᠠ ᠮᠥᠨ ᠭᠡᠵᠦ
ᠢᠳᠡᠷ ᠵᠠᠯᠠᠭᠤ ᠳ᠋ᠠᠭᠠᠨ ᠣᠢᠯᠠᠭᠠᠬᠤ ᠬᠡᠷᠡᠭᠲᠡᠢ!
ᠭᠡᠨᠡᠨ ᠰᠢᠯᠦᠭᠴᠢ ᠪᠡᠨ ᠠᠭᠤᠴᠢᠯᠠᠭᠠᠷᠠᠢ ᠲᠠ ᠮᠢᠨᠢ᠂
ᠭᠡᠨᠡᠳᠲᠡ ᠬᠥᠳᠡᠯᠦᠭᠰᠡᠨ ᠰᠡᠳᠬᠢᠯ ᠦ᠋ᠨ ᠳᠠᠭᠠᠤ ᠳ᠋ᠤ᠌
ᠭᠡᠮ ᠦᠭᠡᠢ ᠶᠠᠷᠢᠶᠠ ᠳᠡᠯᠭᠡᠨ ᠰᠠᠭᠤᠵᠤ
ᠭᠡᠮᠲᠦᠭᠰᠡᠨ ᠬᠣᠶᠠᠷ ᠢ᠋ᠶ᠋ᠠᠨ ᠮᠠᠷᠲᠠᠬᠤ ᠨᠢ ᠪᠠᠢᠨᠠ᠃
※※※
ᠠᠯᠠᠭ ᠨᠢᠳᠦᠨ ᠦ᠌ ᠵᠥᠭᠡᠯᠡᠨ ᠵᠣᠪᠬᠢ
ᠠᠭᠠᠵᠢᠮ ᠰᠤᠯᠠᠬᠠᠨ ᠨᠡᠭᠡᠭᠡᠭᠳᠡᠵᠦ ᠪᠠᠢᠨᠠ᠂
ᠠᠶᠤᠵᠤ ᠭᠠᠢᠬᠠᠭᠰᠠᠨ ᠪᠦᠦᠳᠡᠭᠡᠷ ᠬᠠᠷᠠᠴᠠ
ᠠᠵᠢᠨ ᠳᠥᠵᠢᠨ ᠭᠥᠯᠢᠷᠡᠵᠦ ᠪᠠᠢᠨᠠ!
ᠬᠦᠯᠢᠶᠡᠨ ᠬᠠᠷᠠᠬᠤ ᠨᠢᠳᠦᠨ ᠦ᠌ ᠴᠠᠭᠠᠨᠠ
ᠭᠦᠷᠦᠮᠡᠯ ᠬᠠᠷᠠᠬᠠᠨ ᠭᠡᠵᠢᠭᠡᠨ ᠳᠡᠭᠡᠷᠡ
ᠮᠥᠩᠬᠡ ᠰᠥᠨᠢ ᠶ᠋ᠢᠨ ᠨᠣᠢᠷ ᠡᠴᠡ ᠰᠡᠷᠡᠬᠦ ᠪᠡᠷ
ᠮᠥᠷᠥᠭᠡᠳᠦᠨ ᠪᠦᠬᠦᠢ ᠵᠠᠯᠠᠭᠤ ᠲᠠᠷᠢᠬᠢᠨᠠ᠄
《ᠪᠢ ᠠᠮᠢᠳᠤ ᠪᠠᠢᠨᠠ ᠤᠤ ᠳᠠ?》ᠭᠡᠰᠡᠨ
ᠪᠢᠲᠡᠭᠦᠦ ᠠᠰᠠᠭᠤᠯᠲᠠ ᠡᠬᠢᠯᠡᠨ ᠳᠠᠭᠤᠷᠢᠰᠴᠤ
| ᠵᠠᠮᠪᠠᠯ! ᠭᠡᠵᠦ ᠠᠷᠠᠢᠬᠠᠨ ᠰᠢᠪᠡᠭᠡᠨᠡᠯᠡ᠁
ᠵᠠᠮᠪᠠᠭᠠ ᠲᠡᠭᠡᠵᠦ ᠤᠬᠠᠭᠠᠨ ᠣᠷᠣᠯᠠ᠁
《ᠡᠷᠭᠢᠨ ᠲᠣᠭᠣᠷᠢᠨ ᠴᠠᠪ ᠴᠠᠭᠠᠨ᠁
ᠡᠨᠡ ᠴᠢᠨᠢ᠁ ᠡᠪᠦᠯ ᠪᠣᠯᠴᠢᠬᠠᠭᠠ ᠤᠤ ᠳᠠ?
ᠡᠯᠦᠢ ᠬᠤᠯᠤᠢ ᠴᠢᠪ ᠴᠢᠮᠡᠭᠡ ᠦᠭᠡᠢ ᠪᠠᠢᠬᠤ ᠴᠢᠨᠢ
ᠡᠬᠢᠨ ᠦ᠌ ᠬᠥᠭᠵᠢᠮ ᠲᠣᠭᠯᠠᠭᠠᠳ ᠳᠠᠭᠤᠰᠤᠭᠰᠠᠨ ᠤᠤ ᠳᠠ?
ᠬᠠᠮᠢᠭᠠ ᠪᠢ ᠪᠠᠢᠭᠠ ᠶᠤᠮ ᠪᠣᠯ
ᠬᠠᠭᠠᠯᠭᠠ ᠳᠤᠤᠭᠠᠷᠪᠠ ᠤᠤ᠁ ᠬᠡᠨ ᠶᠤᠮ ᠪᠣᠯ?
ᠮᠠᠨ ᠤ᠋ ᠥᠷᠥᠭᠡ ᠯᠡ ᠪᠢᠰᠢ ᠰᠢᠭ ᠪᠠᠢᠨᠠ
ᠮᠠᠭᠠᠳ ᠵᠠᠮᠪᠠᠯ ᠤ᠋ᠨ ᠬᠢ ᠶᠤᠮ ᠪᠣᠯ ᠤᠤ 》
ᠢᠩᠭᠢᠵᠦ ᠪᠣᠳᠣᠭᠠᠳ ᠵᠠᠮᠪᠠᠭᠠ ᠮᠠᠨᠢ
ᠡᠷᠭᠢᠵᠦ ᠬᠠᠷᠠᠬᠤ ᠶ᠋ᠢ ᠬᠡᠴᠢᠨᠡᠭᠡᠨ ᠬᠦᠰᠡᠨᠡ ᠪᠣᠢ!
ᠡᠩᠬᠦᠷᠡᠢ ᠵᠥᠭᠡᠯᠡᠨ ᠪᠡᠶᠡ ᠴᠣᠭᠴᠠᠰ ᠨᠢ
ᠡᠯᠢᠭᠡᠨ ᠬᠠᠳᠠ ᠰᠢᠭ᠋ ᠬᠥᠰᠢᠭᠰᠡᠨ ᠢ᠋ ᠶᠠᠭᠠᠬᠢᠨᠠ ᠪᠣᠢ!
ᠬᠥᠯ ᠦ᠋ᠨ ᠲᠦᠷᠭᠡᠨ ᠠᠯᠬᠤᠭᠠ ᠣᠢᠷᠠᠲᠤᠯᠠ
ᠬᠥᠩᠭᠡᠨ ᠢ᠋ᠶ᠋ᠡᠷ ᠰᠡᠭᠦᠷᠡᠰᠦ ᠠᠯᠳᠠᠬᠤ ᠰᠣᠨᠣᠰᠲᠠᠯᠠ
ᠴᠢᠷᠠᠢ ᠵᠢᠰᠦ ᠶ᠋ᠢ ᠨᠢ ᠠᠵᠢᠭᠯᠠᠨ ᠪᠠᠢᠬᠤ ᠰᠢᠭ᠋····
ᠴᠠᠷᠪᠠᠭᠤ ᠰᠤᠳᠠᠰᠤ ᠶ᠋ᠢ ᠨᠢ ᠲᠡᠮᠲᠡᠷᠢᠨ ᠪᠠᠢᠬᠤ ᠰᠢᠭ᠋····
ᠨᠢᠳᠦ ᠪᠡᠨ ᠬᠦᠴᠦᠯᠡᠨ ᠨᠡᠭᠡᠭᠡᠯᠡ ᠵᠠᠮᠪᠠᠭᠠ
ᠨᠢᠭᠤᠷ ᠢ᠋ ᠨᠢ ᠰᠢᠷᠲᠡᠨ ᠲᠠᠨᠢᠯᠠ ····ᠵᠠᠮᠪᠠᠯ⁈
ᠪᠢᠰᠢ ᠠ᠋···· ᠡᠨᠡ ᠴᠢᠨᠢ ᠡᠮᠡᠭᠲᠡᠢ ᠬᠥᠮᠦᠨ ᠪᠠᠢᠨᠠ
ᠪᠢᠲᠡᠭᠦᠦ ᠴᠠᠭᠠᠨ ᠬᠤᠪᠴᠠᠰᠤ ᠲᠠᠢ ᠡᠮᠴᠢ ᠬᠥᠮᠦᠨ ᠪᠠᠢᠨᠠ
| ᠵᠠᠢᠯᠠᠭᠤᠯ᠂ ᠳᠥᠷᠪᠡ ᠬᠣᠨᠣᠭᠠᠳ ᠰᠡᠬᠡᠯᠡ ᠳᠡ
ᠵᠠᠯᠠᠭᠤ ᠬᠥᠮᠦᠨ ᠲᠤᠯᠠ ᠳ᠋ᠠᠭᠠᠨ ᠯᠠ ᠳᠠᠪᠠᠯᠠ ᠳᠠ
ᠭᠡᠵᠦ ᠶᠠᠷᠢᠵᠤ ᠶ᠋ᠢ ᠨᠢ ᠵᠠᠮᠪᠠᠭᠠ ᠣᠢᠯᠠᠭᠠᠯᠠ
ᠭᠡᠷ ᠲᠡᠭᠡᠨ ᠪᠢᠰᠢ᠂ ᠡᠮᠨᠡᠯᠭᠡ ᠳ᠋ᠦ᠍ ᠪᠠᠢᠯᠠ᠃
2
ᠠᠷᠪᠠᠭᠠᠳ ᠬᠣᠨᠣᠭ ᠲᠡᠭᠦᠨ ᠡᠴᠡ ᠬᠣᠢᠰᠢ
ᠠᠰᠤᠷᠤ ᠤᠳᠠᠬᠤ ᠰᠢᠭ᠋ ᠥᠩᠭᠡᠷᠡᠵᠦ ᠶᠠᠳᠠᠭᠠᠳ
ᠠᠶᠤᠯ ᠣᠰᠣᠯ ᠵᠠᠮᠪᠠᠯ ᠤ᠋ᠨ ᠲᠤᠬᠠᠢ
ᠠᠮᠢᠲᠠᠨ ᠤ᠋ ᠶᠠᠷᠢᠶᠠ ᠴᠤ᠌ ᠰᠢᠩᠭᠡᠷᠡᠵᠦ ᠤᠳᠤᠭᠠᠳ
ᠤᠴᠢᠷ ᠶᠠᠪᠤᠳᠠᠯ ᠢ᠋ ᠰᠢᠳᠬᠡᠬᠦ ᠪᠡᠷ ᠵᠥᠪᠬᠡᠨ
ᠠᠭᠤᠷ ᠤ᠋ᠨ ᠲᠡᠷᠭᠡᠨ ᠦ᠌ ᠺᠣᠮᠢᠰ ᠨᠤᠲᠠᠯᠠᠵᠤ
ᠤᠳᠠᠯ ᠦᠭᠡᠢ ᠲᠡᠭᠡᠭᠡᠳ ᠰᠡᠷᠭᠡᠢᠯᠡᠭᠴᠢᠳ
ᠤᠷᠢᠳᠴᠢᠯᠠᠭᠰᠠᠨ ᠪᠠᠢᠴᠠᠭᠠᠯᠲᠠ ᠪᠠᠨ ᠶᠠᠪᠤᠭᠤᠯᠤᠭᠠ ᠯᠠ ᠪᠢᠵᠡ᠃
ᠮᠠᠭᠠᠳ ᠣᠨᠣᠭᠳᠠᠬᠤ ᠰᠢᠳᠬᠡᠯ ᠦ᠋ᠨ ᠲᠤᠬᠠᠢ ᠳ᠋ᠤ᠌
ᠮᠠᠨᠢ ᠵᠢᠷᠤᠭᠠᠴᠢ ᠦᠬᠦᠲᠡᠯᠡ ᠪᠡᠨ ᠠᠶᠤᠨᠠ
ᠮᠠᠨᠠᠷᠠᠭᠰᠠᠨ ᠨᠣᠢᠷ ᠢ᠋ᠶ᠋ᠠᠨ ᠵᠡᠭᠦᠳᠦᠯᠡᠨ ᠦᠷᠭᠦᠭᠡᠵᠦ
ᠮᠠᠷᠭᠠᠰᠢ ᠪᠦᠬᠦᠨ ᠢ᠋ ᠲᠦᠭᠰᠢᠨ ᠬᠦᠯᠢᠶᠡᠨᠡ᠃
ᠠᠶᠤᠵᠤ ᠬᠦᠯᠢᠶᠡᠭᠰᠡᠨ ᠮᠠᠷᠭᠠᠰᠢ ᠭᠡᠭᠴᠢ ᠨᠢ
ᠠᠷᠠᠭᠠ ᠰᠣᠶᠣᠭᠠ ᠲᠠᠢ ᠠᠮᠢᠲᠠᠨ ᠰᠢᠭ᠋᠁
ᠠᠰᠠᠭᠤᠯᠲᠠ ᠶ᠋ᠢᠨ ᠴᠠᠭᠠᠨᠠ ᠴᠡᠴᠡᠷᠡᠨ ᠰᠠᠭᠤᠬᠤ ᠳ᠋ᠠᠭᠠᠨ
ᠠᠮᠠᠷᠠᠭ ᠵᠠᠮᠪᠠᠭᠠ ᠪᠠᠨ ᠴᠤ᠌ ᠮᠠᠷᠲᠠᠭᠰᠠᠨ ᠰᠢᠭ᠋᠁
《ᠵᠠᠮᠪᠠᠭᠠ ᠴᠤ᠌ ᠶᠠᠭᠠᠬᠢᠬᠤ ᠪᠣᠢ᠂ ᠳᠥᠴᠢᠨ ᠶᠢᠰᠦ ᠮᠠᠨᠢ
ᠵᠠᠮ ᠤ᠋ᠨ ᠬᠠᠵᠠᠭᠤ ᠳ᠋ᠤ᠌ ᠰᠡᠭ ᠪᠣᠯᠤᠭᠰᠠᠨ ᠰᠢᠦ ᠳᠡ᠂
ᠤᠯᠤᠰ ᠤ᠋ᠨ ᠨᠢᠭᠤᠷ ᠳᠡᠭᠡᠷᠡ ᠢᠩᠭᠢᠵᠦ ᠰᠢᠳᠬᠡᠭᠦᠯᠦᠭᠰᠡᠨ ᠡᠴᠡ
ᠤᠨᠠᠬᠤ ᠳ᠋ᠠᠭᠠᠨ ᠦᠬᠦᠴᠢᠬᠡᠬᠦ ᠦᠭᠡᠢ ᠶᠠᠭᠠᠬᠢᠪᠠ ᠠ᠋! 》ᠭᠡᠵᠦ
ᠪᠢᠲᠡᠭᠦᠦ ᠳ᠋ᠡᠭᠡᠨ ᠲᠡᠷᠡ ᠴᠢᠬᠤᠯᠳᠠᠨ ᠪᠠᠢᠪᠠᠴᠤ
ᠪᠡᠶᠡ ᠨᠢ ᠡᠷᠡᠭᠦᠯ᠂ ᠨᠢᠭᠤᠷ ᠨᠢ ᠤᠷᠠᠩᠬᠠᠢ ᠭᠡᠨᠡ
ᠥᠪᠡᠷ ᠢ᠋ ᠪᠡᠨ ᠲᠡᠷᠡ ᠴᠠᠭᠠᠳᠬᠠᠨ ᠪᠠᠢᠪᠠᠴᠤ
ᠡᠴᠢᠨᠡᠭᠡᠨ ᠠᠺᠲ ᠲᠠᠯᠪᠢᠭᠠᠰᠤᠲᠠᠢ ᠭᠡᠨᠡ᠃
ᠪᠣᠯᠤᠭᠠᠳ ᠥᠩᠭᠡᠷᠡᠭᠰᠡᠨ ᠬᠡᠷᠡᠭ ᠦ᠋ᠨ ᠲᠥᠯᠥᠭᠡ
ᠪᠣᠷᠣ ᠵᠢᠷᠦᠬᠡ ᠪᠡᠨ ᠶᠠᠭᠤᠨ ᠳ᠋ᠤ᠌ ᠲᠠᠮᠤᠯᠠᠨᠠ ᠪᠣᠢ?
ᠤᠷᠢᠳ ᠢ᠋ᠶ᠋ᠠᠷ ᠨᠢ ᠬᠠᠷᠠᠭᠠ ᠦᠭᠡᠢ ᠪᠣᠯ ᠬᠣᠢᠨᠠ ᠨᠢ ᠰᠤᠷᠤᠨᠠ ᠪᠢᠵᠡ?
ᠤᠭ ᠨᠢ ᠵᠠᠮᠪᠠᠯ ᠲᠡᠢᠮᠦ ᠠᠶᠤᠮᠠᠬᠠᠢ ᠪᠢᠯᠡ ᠤᠤ?
ᠭᠠᠵᠠᠷ ᠤ᠋ᠨ ᠲᠣᠭᠣᠰᠣ ᠶ᠋ᠢ ᠪᠤᠰᠬᠠᠨ ᠪᠤᠰᠬᠠᠨ ᠳᠠᠪᠬᠢᠬᠤ ᠳ᠋ᠠᠭᠠᠨ
ᠭᠠᠷ ᠤ᠋ᠨ ᠬᠠᠭᠠᠵᠢ ᠪᠠᠨ ᠨᠡᠮᠡᠨ ᠨᠡᠮᠡᠨ ᠮᠤᠰᠬᠢᠬᠤ ᠳ᠋ᠠᠭᠠᠨ
ᠬᠡᠲᠦᠷᠬᠡᠢ ᠵᠣᠷᠢᠮᠠᠭ ᠴᠢᠷᠠᠢᠯᠠᠬᠤ ᠡᠴᠡ ᠪᠢᠰᠢ
ᠬᠡᠵᠢᠶᠡ ᠯᠡ ᠵᠠᠮᠪᠠᠯ ᠠᠶᠤᠵᠤ ᠪᠠᠢᠯᠠ ᠳᠠ !
ᠭᠡᠪᠡᠴᠦ ᠵᠣᠷᠢᠮᠠᠭ ᠤ᠋ᠨ ᠬᠢᠨᠢ ᠴᠠᠭᠠᠨᠠ
ᠭᠡᠨᠡᠨ ᠨᠢᠭᠤᠷ ᠨᠢ ᠴᠡᠴᠡᠷᠡᠨ ᠳᠠᠭᠵᠢᠪᠠᠴᠤ
ᠬᠠᠢᠷᠠᠲᠤ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡ ᠵᠣᠷᠢᠭᠲᠠᠨ ᠪᠣᠯᠬᠤ ᠭᠡᠵᠦ
ᠬᠠᠷᠠᠢᠯᠭᠠᠵᠤ ᠶᠠᠪᠤᠭᠰᠠᠨ ᠢ᠋ ᠬᠡᠨ ᠮᠡᠳᠡᠬᠦ ᠪᠣᠢ!
ᠣᠳᠣ ᠲᠡᠷᠡ᠂ ᠬᠠᠢᠷᠠᠲᠠᠢ ᠬᠥᠮᠦᠨ ᠨᠢ
ᠣᠷᠣ ᠳᠡᠭᠡᠷᠡ ᠰᠤᠪᠢᠯᠠᠭᠤᠯᠵᠤ ᠪᠠᠢᠭᠠ᠂
ᠣᠯᠠᠨ ᠤ᠋ ᠶᠣᠰᠣ ᠶ᠋ᠢ ᠪᠣᠳᠣᠭᠠᠳ ᠦᠵᠡᠭᠰᠡᠨ ᠴᠦ᠍
ᠣᠴᠢᠵᠤ ᠦᠵᠡᠬᠦ ᠦᠭᠡᠢ ᠪᠣᠯ ᠭᠣᠷᠢ ᠦᠭᠡᠢ ᠭᠡᠨᠡ᠃
ᠶᠢᠰᠦᠨ ᠰᠠᠷᠠ ᠶ᠋ᠢᠨ ᠳᠤᠮᠳᠠ ᠬᠢᠷᠢ ᠪᠡᠷ
ᠶᠡᠷᠦ ᠶ᠋ᠢᠨ ᠨᠢᠭᠡᠨ ᠰᠠᠢᠬᠠᠨ ᠣᠷᠣᠢ
ᠵᠠᠪ ᠭᠠᠷᠭᠠᠵᠤ᠂ ᠵᠠᠮᠪᠠᠯ
ᠵᠠᠮᠪᠠᠭᠠ ᠪᠠᠨ ᠡᠷᠭᠢᠬᠦ ᠪᠡᠷ ᠶᠠᠪᠤᠯᠠ᠃
ᠠᠶᠤᠯ ᠤᠨᠠᠯᠲᠠ᠂ ᠰᠢᠳᠬᠡᠯ ᠭᠡᠬᠦ ᠡᠴᠡ
ᠠᠯᠢᠪᠠ ᠪᠣᠳᠣᠯ ᠨᠢ ᠲᠦᠮᠡᠨ ᠴᠢᠯᠥᠭᠡ ᠦᠭᠡᠢ
ᠠᠶᠤᠨ ᠴᠡᠴᠡᠷᠡᠪᠡᠴᠦ᠂ ᠲᠡᠭᠦᠨ ᠦ᠌ ᠴᠠᠭᠠᠨᠠ
ᠠᠯᠠᠭ ᠨᠢᠳᠦᠨ ᠦ᠌ ᠳᠥᠯᠭᠡᠨ ᠬᠠᠷᠠᠴᠠ
ᠬᠡᠵᠢᠶᠡᠳᠡ ᠲᠡᠭᠦᠨ ᠢ᠋ ᠬᠦᠰᠡᠨ ᠬᠦᠯᠢᠶᠡᠭᠰᠡᠭᠡᠷ
ᠬᠡᠪᠲᠡᠵᠦ ᠪᠠᠢᠭᠠ ᠬᠥᠭᠡᠷᠦᠬᠦᠢ ᠬᠥᠮᠦᠨ᠂
ᠵᠠᠮᠪᠠᠭᠠ ᠭᠡᠳᠡᠭ ᠡᠩᠬᠦᠷᠡᠢ ᠨᠡᠷᠡ
ᠵᠠᠪᠠᠯ ᠨᠢᠭᠡ ᠬᠡᠷᠡᠯᠳᠦᠵᠦ ᠪᠠᠢᠭᠰᠠᠨ ᠪᠢᠵᠡ᠁
ᠵᠠᠮᠪᠠᠯ ᠴᠠᠭᠠᠨ ᠬᠠᠯᠠᠲ ᠨᠥᠮᠥᠷᠦᠭᠡᠳ
ᠵᠢᠭᠠᠬᠠᠨ ᠤᠯᠠᠢᠰᠬᠢᠭᠡᠳ ᠣᠷᠣᠵᠤ ᠢᠷᠡᠯᠡ᠂
ᠵᠠᠮᠪᠠᠭᠠ ᠨᠢᠭᠤᠷ ᠨᠢ ᠬᠦᠷᠲᠡᠯᠡ ᠪᠣᠭᠣᠯᠲᠠᠲᠠᠢ
ᠵᠠᠢᠯᠠᠭᠤᠯ᠂ ᠬᠥᠳᠡᠯᠬᠦ ᠴᠦ᠍ ᠴᠢᠳᠠᠯ ᠦᠭᠡᠢ ᠤᠭᠲᠤᠯᠠ᠃
ᠴᠠᠪ ᠴᠠᠭᠠᠨ ᠪᠣᠭᠣᠯᠲᠠ ᠶ᠋ᠢᠨ ᠴᠠᠭᠠᠨᠠ ᠡᠴᠡ
ᠬᠠᠪ ᠬᠠᠷᠠᠬᠠᠨ ᠭᠡᠵᠢᠭᠡ ᠨᠢ ᠴᠤᠬᠤᠢᠵᠤ
ᠴᠢᠷᠠᠢ ᠵᠢᠰᠦ ᠨᠢ ᠳᠠᠯᠳᠠ ᠴᠦ᠍ ᠭᠡᠰᠡᠨ
ᠬᠠᠯᠠᠭᠤᠨ ᠤᠷᠤᠭᠤᠯ᠂ ᠬᠠᠢᠷᠠᠲᠠᠢ ᠨᠢᠳᠦ ᠨᠢ
ᠬᠠᠪᠤᠷ ᠤ᠋ᠨ ᠴᠠᠰᠤᠨ ᠡᠴᠡ ᠳᠥᠩᠭᠡᠵᠦ ᠴᠤᠬᠤᠢᠬᠤ
ᠬᠠᠷᠢᠭᠤ ᠦᠭᠡᠢ ᠨᠢᠯᠬᠠ ᠢᠷᠭᠤᠢ ᠴᠡᠴᠡᠭ ᠰᠢᠭ᠋
ᠡᠭᠦᠨ ᠦ᠌ ᠳᠣᠲᠣᠷᠠ ᠵᠠᠮᠪᠠᠭᠠ ᠪᠣᠢ ᠭᠡᠵᠦ
ᠥᠭᠦᠯᠡᠨ ᠳᠠᠭᠤᠯᠠᠬᠤ ᠮᠡᠲᠦ ᠲᠤᠶᠠᠭᠠᠷᠠᠵᠤ ᠪᠠᠢᠨᠠ᠂
ᠡᠨᠡ ᠨᠢᠳᠦ᠂ ᠡᠨᠡ ᠤᠷᠤᠭᠤᠯ
ᠡᠷᠡᠭᠦᠯ ᠪᠠᠢᠬᠤ ᠳ᠋ᠠᠭᠠᠨ ᠲᠡᠷᠡ ᠴᠣᠭᠴᠠᠰ
ᠡᠬᠢᠨ ᠦ᠌ ᠬᠠᠢᠷᠠ ᠪᠠᠷ ᠵᠠᠮᠪᠠᠯ ᠤ᠋ᠨ ᠡᠩᠭᠡᠷ ᠲᠦ᠍
ᠡᠷᠬᠡᠯᠡᠨ ᠵᠡᠭᠦᠭᠳᠡᠭᠡᠳ ᠢᠨᠢᠶᠡᠵᠦ ᠪᠠᠢᠳᠠᠭ ᠰᠠᠨ᠁
3
ᠠᠶᠤᠭᠠᠳ ᠶᠠᠭᠠᠬᠢᠬᠤ ᠪᠣᠢ ᠵᠠᠮᠪᠠᠯ ᠮᠢᠨᠢ
ᠠᠪᠢᠶᠠᠰ ᠴᠢᠳᠠᠯ᠂ ᠵᠠᠯᠠᠭᠤ ᠨᠠᠰᠤᠨ ᠳ᠋ᠤ᠌
ᠠᠵᠠ ᠮᠡᠳᠡᠨ ᠬᠠᠷᠠᠢᠯᠭᠠᠭᠰᠠᠨ ᠬᠥᠮᠦᠨ ᠳ᠋ᠦ᠍
ᠠᠯᠳᠠᠭᠠ ᠭᠡᠳᠡᠭ ᠢᠩᠭᠢᠵᠦ ᠢᠷᠡᠳᠡᠭ ᠶᠤᠮ᠃
ᠪᠣᠳᠠᠲᠤ ᠣᠷᠴᠢᠯᠠᠩ ᠬᠥᠮᠦᠨ ᠢ᠋ ᠰᠢᠯᠭᠠᠵᠤ
ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠨᠢᠭᠡ ᠶ᠋ᠢ ᠮᠡᠳᠡᠭᠦᠯᠵᠦ
ᠪᠡᠶᠡ ᠪᠡᠨ ᠵᠠᠬᠢᠷᠴᠤ ᠭᠡᠮ ᠢ᠋ᠶ᠋ᠡᠨ ᠵᠠᠰᠠᠳᠠᠭ ᠢ᠋
ᠪᠢ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠦᠵᠡᠭᠰᠡᠨ ᠶᠤᠮ ᠴᠢᠨᠢ᠁
ᠡᠮᠨᠡᠯᠭᠡ ᠳ᠋ᠦ᠍ ᠪᠠᠢᠭᠠ ᠵᠠᠮᠪᠠᠭᠠ ᠶ᠋ᠢᠨ ᠲᠤᠬᠠᠢ ᠳ᠋ᠤ᠌
ᠡᠳᠡᠭᠡᠷᠡᠵᠦ ᠬᠣᠵᠢᠮ ᠪᠣᠰᠤᠯᠠ ᠴᠤ᠌ ᠭᠡᠰᠡᠨ
ᠡᠷᠡᠮᠳᠡᠭ ᠪᠣᠯᠵᠤ ᠦᠯᠡᠳᠡᠬᠦ ᠲᠤᠬᠠᠢ
ᠡᠮᠴᠢ ᠶ᠋ᠢᠨ ᠠᠺᠲ ᠭᠠᠷᠭᠠᠭᠠᠳ ᠢᠷᠡᠯᠡ᠃
ᠢᠨᠠᠭ ᠵᠢᠭᠠᠬᠠᠨ ᠪᠦᠰᠡᠭᠦᠢ ᠶ᠋ᠢ ᠥᠮᠥᠭᠯᠡᠵᠦ
ᠶᠠᠮᠠᠷ ᠴᠤ᠌ ᠭᠡᠰᠡᠨ ᠬᠥᠮᠦᠰ ᠢ᠋ ᠬᠠᠮᠠᠭᠠᠯᠠᠵᠤ
ᠢᠯᠠᠭᠤᠭᠰᠠᠨ ᠲᠥᠷᠥ ᠶ᠋ᠢᠨ ᠨᠡᠷᠡ ᠶ᠋ᠢᠨ ᠡᠮᠦᠨᠡ ᠡᠴᠡ
ᠶᠠᠯᠠ ᠶ᠋ᠢᠨ ᠲᠣᠭᠲᠠᠭᠠᠯ ᠤᠩᠰᠢᠬᠤ ᠴᠠᠭ ᠲᠤ᠌
ᠮᠠᠨᠢ ᠵᠢᠷᠤᠭᠠᠴᠢ ᠤᠷᠤᠭᠤ ᠴᠢᠷᠠᠢᠯᠠᠵᠤ
ᠮᠠᠯᠠᠭᠠᠢ ᠪᠠᠨ ᠠᠪᠴᠤ ᠨᠣᠮᠣᠬᠠᠨ ᠵᠣᠭᠰᠣᠭᠠᠳ
ᠮᠠᠭᠠᠳᠯᠠᠨ ᠬᠡᠯᠡᠯᠴᠡᠬᠦ ᠡᠳᠦᠷ ᠢ᠋ ᠬᠦᠷᠲᠡᠯᠡ
ᠮᠠᠨ ᠤ᠋ ᠵᠢᠭᠰᠠᠭᠠᠯ ᠡᠴᠡ ᠲᠦᠷ ᠭᠠᠷᠤᠯᠠ᠁
᠁ ᠁ ᠁
᠁ ᠁ ᠁
ᠤᠷᠠᠨ ᠵᠢᠷᠤᠭᠠᠴᠢ ᠳ᠋ᠤ᠌ ᠮᠥᠩᠬᠡᠳᠡ ᠵᠣᠷᠢᠭᠤᠯᠤᠭᠰᠠᠨ
ᠤᠶᠠᠨ ᠰᠡᠳᠬᠢᠯ ᠶᠠᠭᠤ ᠶ᠋ᠢ ᠪᠣᠳᠣᠨᠠᠮ ᠪᠣᠢ
ᠤᠩᠰᠢᠭᠴᠢ ᠮᠢᠨᠢ ᠣᠳᠣ ᠲᠠᠢᠰᠢ ᠪᠠᠨ ᠬᠠᠨᠳᠤᠶᠠ
ᠤᠢᠳᠬᠠᠷ ᠭᠤᠨᠢᠭ ᠢ᠋ ᠨᠢ ᠬᠤᠪᠢᠶᠠᠯᠴᠠᠵᠤ ᠥᠭᠭᠦᠶᠡ᠃
4
ᠴᠡᠪᠡᠷ ᠴᠡᠮᠴᠡᠭᠡᠷ ᠥᠷᠥᠭᠡᠨ ᠳᠣᠲᠣᠷᠠ
ᠴᠡᠩᠬᠡᠷ ᠨᠣᠣᠰᠣᠨ ᠬᠥᠨᠵᠢᠯᠡ ᠳᠣᠣᠷᠠ
ᠰᠠᠮᠪᠠᠢ ᠳᠠᠪᠤᠤ ᠪᠠᠷ ᠪᠢᠲᠡᠭᠦᠦ ᠪᠣᠭᠣᠯᠭᠠᠭᠰᠠᠨ
ᠰᠠᠢᠬᠠᠨ ᠪᠦᠰᠡᠭᠦᠢ ᠬᠡᠪᠲᠡᠵᠦ ᠪᠠᠢᠨᠠ᠃
ᠬᠠᠪᠤᠲᠠᠢ ᠴᠢᠭᠢᠷᠠᠭ ᠪᠡᠶᠡ ᠶ᠋ᠢ ᠨᠢ ᠡᠪᠳᠡᠭᠰᠡᠨ
ᠬᠠᠯᠠᠭᠤᠨ ᠰᠢᠷᠬᠠ ᠨᠤᠭᠤᠳ ᠠᠨᠠᠵᠤ ᠪᠠᠢᠪᠠᠴᠤ
ᠬᠠᠢᠷᠠ ᠬᠦᠰᠡᠯ ᠦ᠋ᠨ ᠬᠢᠨᠢ ᠭᠠᠭᠴᠠᠬᠠᠨ ᠰᠢᠷᠬᠠ
ᠬᠡᠵᠢᠶᠡ ᠡᠳᠡᠭᠡᠬᠦ ᠶ᠋ᠢ ᠬᠡᠷᠬᠢᠨ ᠮᠡᠳᠡᠬᠦ ᠪᠣᠢ!
ᠬᠡᠢᠰᠪᠦᠷᠢ ᠵᠠᠯᠠᠭᠤ ᠶ᠋ᠢ ᠲᠡᠷᠡ ᠠᠭᠤᠴᠢᠯᠠᠪᠠᠴᠤ
ᠬᠡᠴᠢᠨᠡᠭᠡᠨ ᠤᠳᠠᠭᠠ ᠭᠣᠮᠣᠳᠠᠯ ᠦᠭᠡᠢ ᠭᠡᠪᠡᠴᠦ
ᠬᠢᠭᠰᠡᠨ ᠬᠡᠷᠡᠭ ᠢ᠋ ᠨᠢ ᠤᠯᠤᠰ ᠬᠠᠷᠠᠵᠤ
ᠬᠢᠷᠢ ᠬᠡᠮᠵᠢᠶᠡ ᠶ᠋ᠢ ᠨᠢ ᠬᠠᠤᠯᠢ ᠮᠡᠳᠡᠵᠦ
ᠵᠠᠮᠪᠠᠭᠠ ᠮᠠᠨᠢ ᠵᠥᠪᠬᠡᠨ ᠰᠡᠳᠬᠢᠯ ᠳ᠋ᠡᠭᠡᠨ
ᠵᠠᠯᠠᠭᠤ ᠨᠠᠰᠤᠨ ᠤ᠋ ᠬᠠᠯᠠᠭᠤᠨ ᠢᠲᠡᠭᠡᠯ ᠳ᠋ᠡᠭᠡᠨ
ᠵᠢᠷᠭᠠᠯ ᠵᠣᠪᠠᠯᠠᠩ ᠢ᠋ᠶ᠋ᠠᠨ ᠡᠭᠦᠷᠢᠳᠡ ᠨᠢᠭᠡᠳᠬᠡᠭᠰᠡᠨ
ᠵᠠᠮᠪᠠᠯ ᠶᠤᠭᠠᠨ ᠥᠷᠥᠪᠳᠦᠨ ᠬᠣᠴᠣᠷᠴᠠᠢ᠃
ᠬᠣᠨᠣᠭ ᠪᠦᠬᠦᠨ ᠲᠡᠭᠦᠨ ᠦ᠌ ᠨᠠᠰᠤᠨ ᠡᠴᠡ
ᠬᠣᠷᠣᠭᠠᠵᠤ ᠶᠠᠪᠤᠭᠠ ᠨᠢ ᠮᠡᠳᠡᠭᠡᠵᠢ ᠪᠣᠯᠬᠤ ᠪᠠᠷ
ᠬᠣᠩᠭᠣᠷ ᠨᠥᠬᠥᠳ ᠲᠡᠢ ᠪᠡᠨ ᠵᠡᠷᠭᠡᠴᠡᠨ ᠠᠯᠬᠤᠬᠤ
ᠴᠠᠭ ᠬᠤᠭᠤᠴᠠᠭᠠ ᠪᠠᠨ ᠬᠠᠷᠠᠮᠰᠠᠨ ᠪᠣᠳᠣᠭᠰᠠᠭᠠᠷ᠁
ᠶᠠᠮᠠᠷ ᠴᠤ᠌ ᠭᠡᠰᠡᠨ ᠵᠡᠭᠦᠳᠦᠨ ᠳᠤᠮᠳᠠ ᠨᠢ
ᠢᠨᠠᠭ ᠤ᠋ᠨ ᠴᠢᠷᠠᠢ ᠭᠡᠷᠡᠯᠲᠦᠨ ᠠᠭᠤᠯᠵᠠᠵᠤ
ᠶᠠᠳᠠᠮᠠᠭ ᠲᠡᠭᠦᠨ ᠦ᠌ ᠬᠡᠪᠲᠡᠷᠢ ᠶ᠋ᠢᠨ ᠣᠷᠴᠢᠮ ᠢ᠋ᠶ᠋ᠠᠷ
ᠶᠠᠭ ᠦᠭᠡᠢ ᠬᠣᠨᠣᠭ ᠤ᠋ᠳ ᠢᠩᠭᠢᠵᠦ ᠤᠯᠠᠷᠢᠯᠠ᠃
ᠡᠪᠡᠳᠴᠢᠨ ᠦ᠌ ᠬᠦᠨᠳᠦ ᠶ᠋ᠢ ᠪᠡᠶᠡ ᠨᠢ ᠳᠠᠪᠠᠵᠤ
ᠥᠪᠡᠷ ᠦ᠋ᠨ ᠭᠤᠨᠢᠭ ᠢ᠋ ᠰᠡᠳᠬᠢᠯ ᠨᠢ ᠲᠤᠭᠤᠯᠵᠤ
ᠡᠪᠦᠯ ᠦ᠋ᠨ ᠰᠠᠷᠠ ᠳᠠᠭᠤᠰᠬᠤ ᠳᠥᠭᠥᠬᠦ ᠳ᠋ᠦ᠍
ᠥᠷᠥᠭᠡᠨ ᠳᠣᠲᠣᠷᠠ ᠪᠠᠨ ᠵᠠᠮᠪᠠᠭᠠ ᠪᠣᠰᠤᠯᠠ᠃
ᠡᠮᠴᠢ ᠶ᠋ᠢᠨ ᠭᠠᠷ ᠢ᠋ᠶ᠋ᠠᠷ ᠲᠦᠰᠢᠭᠦᠯᠦᠨ ᠪᠠᠢᠵᠤ
ᠡᠮᠨᠡᠯᠭᠡ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠴᠡᠪᠡᠷᠬᠡᠨ ᠱᠠᠯᠠ ᠳᠡᠭᠡᠷᠡ
ᠬᠥᠭᠵᠢᠮ ᠦ᠋ᠨ ᠠᠶᠠ ᠪᠠᠷ ᠪᠥᠵᠢᠭᠯᠡᠵᠦ ᠶᠠᠪᠤᠭᠰᠠᠨ
ᠬᠥᠭᠡᠷᠦᠬᠦᠢ ᠬᠥᠯ ᠨᠢ ᠰᠤᠯᠠᠬᠠᠨ ᠭᠢᠰᠬᠢᠪᠡ᠁
ᠣᠷᠣ ᠶ᠋ᠢᠨ ᠲᠣᠯᠣᠭᠠᠢ ᠡᠴᠡ ᠳᠡᠭᠡᠭᠰᠢ ᠭᠠᠷᠴᠤ
ᠣᠷᠴᠢᠯᠠᠩ ᠢ᠋ ᠳᠠᠬᠢᠨ ᠴᠣᠩᠬᠣ ᠪᠠᠷ ᠬᠠᠷᠠᠭᠠᠳ
ᠠᠮᠢᠳᠤᠷᠠᠯ ᠤ᠋ᠨ ᠰᠠᠢᠬᠠᠨ ᠢ᠋ ᠳᠤᠷᠠᠰᠤᠨ ᠮᠡᠳᠡᠵᠦ
ᠠᠯᠠᠭ ᠵᠢᠷᠦᠬᠡ ᠨᠢ ᠰᠢᠷᠦᠭᠦᠨ ᠢ᠋ᠶ᠋ᠡᠷ ᠴᠣᠬᠢᠯᠠᠪᠠ᠃
《ᠲᠦᠷᠭᠡᠨ ᠰᠢᠭ ᠬᠡᠳᠦ ᠬᠣᠨᠣᠭ ᠥᠩᠭᠡᠷᠡᠪᠡᠯ
ᠲᠦᠰᠢᠭᠦᠯᠦᠯ ᠦᠭᠡᠢ ᠪᠡᠷ ᠪᠣᠰᠴᠤ ᠴᠢᠳᠠᠬᠤ ᠪᠠᠢᠯᠭᠦᠢ
ᠪᠤᠴᠠᠭᠠᠳ ᠬᠠᠪᠤᠷ ᠲᠣᠰᠬᠣᠨ ᠳ᠋ᠠᠭᠠᠨ ᠣᠴᠢᠨᠠ
ᠪᠤᠭᠤᠷᠤᠯ ᠡᠵᠢ ᠶ᠋ᠢᠨ ᠮᠢᠨᠢ ᠰᠡᠳᠬᠢᠯ ᠴᠦ᠍ ᠠᠮᠠᠷᠠᠨᠠ᠁
ᠮᠠᠢ ᠶ᠋ᠢᠨ ᠪᠠᠶᠠᠷ ᠤ᠋ᠨ ᠥᠷᠭᠡᠨ ᠵᠢᠭᠰᠠᠭᠠᠯ ᠳ᠋ᠤ᠌
ᠮᠠᠭᠠᠳ ᠣᠷᠣᠯᠴᠠᠨ ᠠᠯᠬᠤᠯᠠᠨᠠ ᠳᠠ᠁? 》ᠭᠡᠵᠦ
ᠵᠠᠯᠠᠭᠤ ᠨᠠᠰᠤᠨ ᠤ᠋ ᠰᠠᠢᠬᠠᠨ ᠪᠦᠬᠦᠨ ᠢ᠋
ᠵᠠᠮᠪᠠᠭᠠ ᠬᠡᠦᠬᠡᠨ ᠮᠥᠷᠥᠭᠡᠳᠦᠨ ᠰᠡᠳᠬᠢᠪᠡ᠃
ᠦᠢᠮᠡᠬᠦ ᠪᠣᠳᠣᠯ ᠤ᠋ᠨ ᠬᠢᠨᠢ ᠨᠢᠭᠡᠨ ᠥᠨᠴᠥᠭ ᠲᠦ᠍
ᠦᠯᠦ ᠠᠷᠢᠯᠬᠤ ᠶᠠᠭᠠᠨ ᠲᠤᠶᠠᠭᠠ
ᠦᠦᠷ ᠦ᠋ᠨ ᠴᠣᠯᠮᠣᠨ ᠰᠢᠭ᠋ ᠲᠤᠶᠠᠭᠠᠷᠠᠵᠤ ᠪᠠᠢᠨᠠ
ᠡᠭᠦᠷᠢᠳᠡ ᠶ᠋ᠢᠨ ᠶᠦ᠍ᠮ ᠰᠢᠭ ᠲᠠᠢᠪᠤᠩ ᠪᠠᠢᠨᠠ᠃
ᠡᠨᠡ ᠪᠣᠯ ᠰᠡᠳᠬᠢᠯ ᠦ᠋ᠨ ᠬᠢᠨᠢ ᠣᠳᠣ
ᠡᠭᠡᠯ ᠲᠡᠭᠦᠨ ᠦ᠌ ᠢᠲᠡᠭᠡᠯ ᠦ᠋ᠨ ᠣᠳᠣ
ᠡᠬᠡ ᠳᠡᠯᠡᠬᠡᠢ ᠶ᠋ᠢᠨ ᠬᠠᠮᠢᠭᠠ ᠨᠢ ᠴᠦ᠍ ᠭᠡᠰᠡᠨ
ᠡᠪᠡᠢᠯᠡᠵᠦ ᠰᠠᠨᠠᠬᠤ ᠵᠠᠮᠪᠠᠯ ᠨᠢ ᠮᠥᠨ᠃
5
ᠲᠤᠩ ᠴᠠᠭᠠᠨ ᠳᠠᠬᠤ ᠪᠠᠨ ᠲᠠᠢᠯᠵᠤ
ᠳᠤᠯᠠᠭᠠᠨ ᠤ᠋ ᠤᠯᠠᠷᠢᠯ ᠳ᠋ᠤ᠌ ᠰᠡᠳᠬᠢᠯ ᠨᠢ ᠤᠶᠠᠷᠠᠵᠤ
ᠳᠤᠰᠤᠭᠠᠯ ᠤᠰᠤ ᠪᠠᠷ ᠤᠬᠢᠯᠠᠨ ᠢᠨᠢᠶᠡᠵᠦ᠂
ᠳᠠᠭᠤᠤ ᠪᠠᠨ ᠳᠠᠭᠤᠯᠠᠭᠰᠠᠭᠠᠷ ᠰᠡᠷᠡᠯᠡ᠃
ᠪᠣᠷᠣ ᠪᠣᠯᠵᠣᠮᠣᠷ ᠴᠣᠩᠬᠣᠨ ᠳᠡᠭᠡᠷᠡ
ᠪᠣᠳᠣᠯ ᠪᠣᠳᠣᠭᠰᠠᠨ ᠰᠢᠭ᠋ ᠬᠡᠰᠡᠭ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ
ᠥᠴᠦᠬᠡᠨ ᠬᠥᠪᠥᠩ ᠢ᠋ ᠣᠯᠵᠤ ᠵᠠᠭᠤᠭᠠᠳ
ᠡᠭᠦᠷ ᠢ᠋ᠶ᠋ᠡᠨ ᠵᠠᠰᠠᠬᠤ ᠪᠠᠷ ᠶᠠᠭᠠᠷᠠᠨ ᠨᠢᠰᠦᠯᠡ
《ᠬᠥᠭᠡᠷᠦᠬᠦᠢ ᠰᠢᠪᠠᠭᠤᠬᠠᠢ ᠮᠥᠨ ᠴᠦ᠍ ᠡᠷᠡᠭᠦᠯᠬᠡᠨ
ᠬᠥᠬᠡ ᠲᠩᠷᠢ ᠮᠥᠨ ᠴᠦ᠍ ᠰᠠᠷᠠᠭᠤᠯᠬᠠᠨ
ᠲᠡᠭᠷᠢ ᠶ᠋ᠢᠨ ᠬᠦᠷᠢᠶᠡᠯᠡᠩ ᠳ᠋ᠦ᠍ ᠴᠤᠢᠯᠤᠨ ᠶᠠᠪᠤᠭᠠ
ᠲᠡᠭᠦᠨ ᠳ᠋ᠦ᠍ ᠶᠠᠭᠠᠬᠢᠭᠰᠠᠨ ᠰᠠᠢᠬᠠᠨ ᠪᠠᠢᠭᠠ ᠪᠣᠯ⁈ 》
ᠠᠯᠠᠭ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠪᠣᠯᠵᠣᠮᠣᠷ ᠤ᠋ᠨ ᠬᠣᠢᠨᠠ ᠡᠴᠡ
ᠬᠥᠭᠡᠷᠦᠬᠦᠢ ᠪᠦᠰᠡᠭᠦᠢ ᠠᠲᠠᠭᠠᠷᠬᠠᠨ ᠰᠢᠷᠳᠡᠨᠡ᠁
ᠠᠵᠢᠨ ᠪᠠᠭᠠ ᠶ᠋ᠢᠨ ᠬᠥᠩᠭᠡᠨ ᠰᠢᠩᠭᠡᠨ ᠢ᠋ᠶ᠋ᠡᠨ ᠪᠣᠳᠣᠬᠤ ᠳ᠋ᠤ᠌
ᠬᠥᠳᠡᠭᠡ ᠨᠤᠲᠤᠭ ᠨᠢ ᠭᠡᠨᠡᠳᠲᠡᠬᠡᠨ ᠰᠠᠨᠠᠭᠳᠠᠨᠠ᠃
《ᠠᠷᠤ| ᠤᠰᠤᠨ ᠤ᠋ ᠳᠡᠷᠡᠰᠦᠨ ᠳᠤᠮᠳᠠᠭᠤᠷ
ᠠᠯᠠᠭ ᠳᠠᠭᠠ ᠰᠢᠭ᠋ ᠳᠡᠭᠳᠡᠵᠦ ᠶᠠᠪᠤᠬᠤ ᠳ᠋ᠤ᠌
ᠪᠣᠭᠣᠨᠢᠬᠠᠨ ᠦᠰᠦ ᠮᠢᠨᠢ ᠨᠠᠮᠢᠷᠠᠨ ᠬᠡᠢᠰᠴᠦ
ᠪᠣᠯᠵᠣᠮᠣᠷ ᠰᠢᠪᠠᠭᠤᠨ ᠡᠴᠡ ᠴᠤ᠌ ᠳᠤᠲᠠᠬᠤ ᠦᠭᠡᠢ ᠪᠠᠢᠵᠠᠢ᠁ 》
ᠢᠳᠡ ᠵᠠᠯᠠᠭᠤ ᠵᠠᠮᠪᠠᠭᠠ ᠬᠡᠦᠬᠡᠨ
ᠡᠢᠮᠦ ᠰᠡᠳᠬᠢᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠠᠪᠤᠷ ᠢ᠋ ᠤᠭᠲᠤᠵᠤ
ᠥᠷᠯᠥᠭᠡ ᠡᠴᠡ ᠡᠬᠢᠯᠡᠭᠡᠳ ᠴᠣᠩᠬᠣᠨ ᠤ᠋ ᠴᠠᠭᠠᠨᠠ
ᠡᠳᠦᠷ ᠢ᠋ ᠳᠠᠭᠤᠰᠤᠨ ᠵᠣᠭᠰᠣᠳᠠᠭ ᠪᠣᠯᠤᠯᠠ᠃
ᠬᠠᠢᠷᠠᠲᠠᠢ ᠡᠵᠢ ᠨᠢ ᠡᠷᠭᠢᠵᠦ ᠢᠷᠡᠬᠦ ᠳ᠋ᠦ᠍
ᠬᠠᠶᠠ ᠵᠠᠮᠪᠠᠯ ᠡᠴᠡ ᠰᠤᠷᠠᠭ ᠳᠤᠭᠤᠯᠳᠠᠨᠠ᠂
ᠡᠷᠡᠭᠦᠯ ᠯᠡ ᠪᠣᠯ ᠶᠠᠭᠠᠮᠠᠢ ᠳᠠ ᠭᠡᠵᠦ
ᠡᠯᠢᠭᠡ ᠵᠢᠷᠦᠬᠡ ᠨᠢ ᠤᠶᠠᠷᠠᠨ ᠰᠡᠳᠬᠢᠨᠡ᠃
ᠪᠠᠯᠴᠢᠷ ᠨᠠᠰᠤᠨ ᠤ᠋ ᠨᠠᠢᠵᠠ ᠥᠬᠢᠳ ᠨᠢ
ᠪᠠᠰᠠ ᠥᠪᠡᠷ ᠦ᠋ᠨ ᠬᠥᠭᠵᠢᠮᠴᠢᠳ ᠨᠢ
ᠪᠠᠭᠠ ᠵᠠᠯᠠᠭᠤ ᠤᠳᠤᠷᠢᠳᠤᠭᠠᠴᠢ ᠪᠠᠨ
ᠪᠠᠢᠨ ᠪᠠᠢᠨ ᠡᠷᠭᠢᠵᠦ ᠢᠷᠡᠭᠰᠡᠭᠡᠷ
ᠠᠭᠤᠯᠠ ᠶ᠋ᠢᠨ ᠮᠣᠳᠣᠨ ᠳ᠋ᠤ᠌ ᠤᠨᠢᠶᠠᠷ ᠲᠠᠲᠠᠵᠤ
ᠤᠰᠤᠨ ᠤ᠋ ᠰᠢᠪᠠᠭᠤᠳ ᠭᠠᠩᠭᠠᠨᠠᠵᠤ ᠪᠠᠢᠬᠤ ᠳ᠋ᠤ᠌
ᠵᠠᠮᠪᠠᠭᠠ ᠮᠠᠨᠢ ᠲᠣᠰᠬᠣᠨ ᠳ᠋ᠠᠭᠠᠨ ᠢᠷᠡᠵᠦ
ᠵᠠᠬᠠ ᠶ᠋ᠢᠨ ᠪᠠᠢᠰᠢᠩ ᠤ᠋ᠨ ᠬᠠᠭᠠᠯᠭᠠ ᠶ᠋ᠢ ᠲᠠᠲᠠᠯᠠ
ᠵᠠᠬᠠ ᠶ᠋ᠢᠨ ᠡᠨᠡ ᠪᠠᠢᠰᠢᠩ ᠳᠣᠲᠣᠷᠠ
ᠵᠠᠰᠠᠭᠰᠠᠨ ᠣᠷᠣ ᠶ᠋ᠢᠨ ᠢ᠋ᠶ᠋ᠡᠨ ᠲᠣᠯᠣᠭᠠᠢ ᠲᠤᠰᠢᠶᠠ
ᠵᠠᠮᠪᠠᠭᠠ ᠪᠦᠰᠡᠭᠦᠢ ᠲᠡᠭᠰᠢ ᠶ᠋ᠢᠨ ᠵᠠᠬᠢᠶᠠ ᠶ᠋ᠢ
ᠵᠠᠳᠠᠯᠵᠤ ᠪᠠᠢᠭᠰᠠᠨ ᠤᠳᠠᠭᠠ ᠪᠣᠢ ᠪᠢᠯᠡ ᠤᠤ?
ᠬᠣᠨᠣᠭ ᠰᠠᠷᠠ ᠤᠯᠠᠷᠢᠵᠤ ᠭᠠᠪᠢᠭᠠ ᠦᠭᠡᠢ ᠴᠦ᠍
ᠬᠣᠩᠭᠣᠷ ᠰᠡᠳᠬᠢᠯ ᠶᠡᠬᠡ ᠶ᠋ᠢ ᠦᠵᠡᠵᠦ
ᠬᠣᠶᠠᠷ ᠭᠠᠷ ᠲᠠᠭᠠᠨ ᠰᠤᠭᠤ ᠲᠠᠶᠠᠭ ᠲᠠᠢ
ᠲᠡᠷᠡ ᠥᠷᠥᠭᠡᠨ ᠳ᠋ᠡᠭᠡᠨ ᠡᠷᠭᠢᠵᠦ ᠢᠷᠡᠯᠡ!
ᠭᠤᠲᠤᠯ ᠤ᠋ᠨ ᠥᠨᠳᠥᠷ ᠥᠰᠥᠭᠡᠢ ᠳᠡᠭᠡᠷᠡ
ᠶᠠᠪᠤᠭᠰᠠᠨ ᠲᠡᠷᠡ ᠡᠳᠦᠷ ᠦ᠋ᠳ
ᠭᠤᠨᠢᠭ ᠵᠣᠪᠠᠯᠠᠩ ᠢ᠋ ᠣᠭᠲᠣ ᠮᠡᠳᠡᠭᠡ ᠦᠭᠡᠢ
ᠭᠠᠩᠬᠤᠵᠤ ᠶᠠᠪᠤᠭᠰᠠᠨ ᠲᠡᠢᠮᠦ ᠨᠢᠭᠡᠨ ᠦᠶᠡ ᠨᠦ᠍ᠭᠦᠳ᠃
ᠬᠠᠨᠢ ᠨᠥᠬᠥᠳ ᠦ᠋ᠨ ᠴᠣᠪᠣᠭᠣ ᠢᠨᠢᠶᠡᠳᠦ
ᠬᠠᠮᠲᠤᠷᠠᠨ ᠳᠠᠭᠤᠯᠠᠭᠰᠠᠨ ᠠᠮᠠᠷᠠᠭ ᠤ᠋ᠨ ᠳᠠᠭᠤᠤ
ᠬᠠᠷᠠᠩᠭᠤᠢ ᠰᠥᠨᠢ ᠶ᠋ᠢᠨ ᠬᠠᠯᠠᠭᠤᠨ ᠶᠠᠷᠢᠶᠠ
ᠬᠠᠮᠤᠭ ᠤ᠋ᠨ ᠠᠩᠬᠠᠨ ᠤ᠋ ᠵᠥᠭᠡᠯᠡᠨ ᠦᠨᠦᠰᠦ᠃
ᠪᠠᠵᠠᠭᠠᠳ ᠬᠠᠶᠠᠭᠰᠠᠨ ᠳᠤᠷᠠᠯᠠᠯ ᠣᠨ ᠵᠤᠷᠪᠤᠰ
ᠪᠠᠶᠠᠷᠯᠠᠭᠠᠳ ᠤᠨᠠᠭᠠᠭᠰᠠᠨ ᠳᠤᠰᠤᠯ ᠨᠢᠯᠪᠤᠰᠤ
ᠶᠡᠷᠦ ᠨᠢ ᠡᠷᠡᠭᠦᠯ ᠰᠠᠷᠠᠭᠤᠯ ᠳ᠋ᠠᠭᠠᠨ ᠠᠮᠰᠠᠭᠰᠠᠨ
ᠣᠨ ᠣᠨᠴᠠᠭᠠᠢ ᠵᠦᠢᠯ ᠦ᠋ᠳ᠃
ᠣᠶᠣᠮᠠᠯ ᠲᠣᠷᠭᠠᠨ ᠬᠥᠰᠢᠭᠡᠨ ᠦ᠌ ᠴᠠᠭᠠᠵᠠ
ᠣᠷᠣ ᠶ᠋ᠢᠨ ᠡᠷᠢᠶᠡᠨ ᠪᠦᠲᠡᠭᠡᠯᠭᠡ ᠨᠢ ᠳᠣᠣᠷᠠ ᠴᠤ᠌
ᠣᠢᠷᠠᠬᠠᠨ ᠭᠡᠭᠴᠢ ᠨᠢ ᠨᠢᠭᠤᠢᠬᠠᠨ
ᠣᠷᠣᠭᠠᠳ ᠢᠷᠡᠮᠡᠭᠴᠡ ᠰᠡᠳᠬᠢᠯ ᠨᠢ ᠬᠥᠳᠡᠯᠪᠡ᠃