ᠵᠠᠯᠠᠭᠤ ᠨᠠᠰᠤ02-ᠷ ∙ ᠴᠣᠢᠨᠣᠮ-ᠨᠠᠢᠷᠠᠭᠯᠠᠯЗалуу нас-Р.Чойном Zaluu nas-R.Choinom
1033ᠵᠠᠯᠠᠭᠤ ᠨᠠᠰᠤ02
ᠷ᠂ ᠴᠤᠢᠨᠥᠮ
ᠬᠣᠶᠠᠳᠤᠭᠠᠷ ᠪᠦᠯᠦᠭ
1
ᠶᠢᠰᠦᠳᠦᠭᠡᠷ ᠰᠠᠷᠠ ᠴᠦ᠍ ᠭᠠᠷᠤᠯᠠ
ᠶᠡᠷᠦ ᠨᠢ ᠯᠡ ᠨᠢᠭᠡ ᠰᠠᠢᠬᠠᠨ ᠨᠠᠮᠤᠷ ᠪᠠᠢᠯᠠ᠃
ᠶᠢᠷᠲᠢᠨᠴᠦ ᠶ᠋ᠢᠨ ᠡᠨᠡᠬᠡᠨ ᠬᠡᠰᠡᠭ ᠲᠦ᠍ ᠯᠡ
ᠢᠷᠦᠭᠡᠯ ᠲᠡᠢ ᠬᠣᠶᠠᠷ ᠠᠭᠤᠯᠵᠠᠵᠤ ᠪᠠᠢᠮᠠᠷ
ᠠᠭᠤᠯᠠ ᠤᠰᠤ᠂ ᠤᠷᠭᠤᠮᠠᠯ ᠨᠣᠭᠣᠭᠠ ᠨᠢ ᠴᠦ᠍
ᠤᠯᠠᠭᠠ ᠪᠤᠲᠠᠷᠠᠭᠰᠠᠨ ᠰᠢᠨᠡᠬᠡᠨ ᠲᠣᠰᠬᠣᠨ ᠴᠤ᠌
ᠨᠡᠭᠡᠭᠡᠯᠲᠡᠲᠡᠢ ᠴᠣᠩᠬᠣ ᠴᠤ᠌ ᠲᠡᠭᠡᠵᠦ ᠰᠠᠨᠠᠭᠳᠠᠭᠤᠯᠤᠮᠠᠷ
ᠨᠡᠷᠡ ᠦᠭᠡᠢ ᠭᠤᠳᠤᠮᠵᠢ ᠴᠤ᠌ ᠲᠡᠭᠡᠵᠦ ᠪᠣᠳᠣᠭᠳᠠᠭᠤᠯᠤᠮᠠᠷ᠁
ᠲᠡᠷᠡ ᠭᠤᠳᠤᠮᠵᠢ ᠪᠠᠷ ᠡᠳᠦᠷ ᠣᠷᠣᠢᠬᠠᠨ
ᠲᠡᠭᠰᠢ ᠬᠦᠦ ᠠᠯᠭᠤᠷ ᠠᠯᠬᠤᠨᠠ᠂
ᠠᠵᠢᠯ ᠤ᠋ᠨ ᠲᠣᠮᠣ ᠰᠠᠪᠢᠬᠢᠨ ᠭᠤᠲᠤᠯ ᠢ᠋ᠶ᠋ᠠᠷ
ᠠᠯᠲᠠᠨ ᠳᠡᠯᠡᠬᠡᠢ ᠳ᠋ᠦ᠍ ᠮᠥᠷ ᠢ᠋ᠶ᠋ᠡᠨ ᠭᠠᠷᠭᠠᠨᠠ᠃
ᠴᠢᠭᠢᠷᠠᠭ ᠨᠢᠭᠤᠷ ᠲᠤᠨᠢ ᠬᠥᠯᠥᠰᠥ ᠳᠠᠭᠠᠭᠠᠪᠤᠷᠢᠯᠠᠨᠠ
ᠴᠢᠮᠡᠭᠡ ᠪᠠᠭᠠᠲᠠᠢ ᠰᠡᠭᠦᠷᠡᠰᠦ ᠠᠯᠳᠠᠨᠠ᠂
ᠭᠡᠷᠡᠯ ᠲᠡᠢ ᠪᠠᠢᠳᠠᠭ ᠨᠥᠭᠦᠭᠡ ᠴᠣᠩᠬᠣ ᠶ᠋ᠢ
ᠬᠡᠮᠲᠡᠢ ᠶᠤᠮ ᠰᠢᠭ ᠰᠡᠮᠬᠡᠨ ᠰᠢᠷᠲᠡᠨᠡ᠁
《ᠳᠡᠯᠡᠬᠡᠢ ᠳᠡᠭᠡᠷᠡ ᠲᠡᠭᠰᠢ ᠬᠦᠦ
ᠳᠠᠪ ᠳᠡᠮᠡᠢ ᠲᠥᠷᠥᠭᠰᠡᠨ ᠭᠡᠵᠦ ᠤᠤ?
ᠨᠠᠢᠪᠢ ᠪᠠᠷᠢᠭᠠᠳ ᠲᠣᠭᠣᠰᠬᠠ ᠦᠷᠦᠬᠦ ᠳ᠋ᠡᠭᠡᠨ
ᠨᠡᠢᠲᠡ ᠶ᠋ᠢᠨ ᠲᠥᠯᠥᠭᠡ ᠪᠣᠳᠣᠳᠠᠭ ᠦᠭᠡᠢ ᠭᠡᠵᠦ ᠤᠤ?
ᠨᠡᠢᠲᠡ ᠶ᠋ᠢᠨ ᠳᠣᠲᠣᠷᠠ ᠵᠠᠮᠪᠠᠭᠠ ᠴᠢᠨᠦ
ᠠᠷᠢᠭᠤᠨ ᠳᠦᠷᠢ ᠴᠢᠨᠢ ᠪᠠᠭᠲᠠᠭᠰᠠᠨ ᠪᠢᠰᠢ ᠤᠤ?
ᠨᠡᠢᠯᠡᠬᠦ ᠶ᠋ᠢ ᠬᠦᠰᠡᠭᠰᠡᠨ ᠰᠡᠳᠬᠢᠯ ᠮᠢᠨᠢ
ᠠᠯᠠᠭ ᠨᠢᠳᠦ ᠶ᠋ᠢ ᠴᠢᠨᠢ ᠪᠠᠬᠠᠳᠤᠭᠰᠠᠨ ᠪᠢᠰᠢ ᠤᠤ?
ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠴᠢ ᠶ᠋ᠢᠨ ᠵᠢᠵᠢᠭᠬᠡᠨ ᠵᠤᠷᠪᠤᠰ ᠢ᠋
ᠬᠠᠷᠢᠭᠤᠴᠠᠵᠤ ᠬᠡᠨ ᠵᠠᠳᠠᠯᠤᠭᠰᠠᠨ ᠪᠢᠯᠡ?
ᠬᠠᠯᠠᠭᠤᠨ ᠬᠦᠰᠡᠯ ᠦ᠋ᠨ ᠮᠢᠨᠢ ᠬᠠᠷᠠᠮᠵᠢ ᠪᠣᠯᠭᠠᠵᠤ
ᠬᠠᠷᠢᠭᠤᠯᠤᠭᠰᠠᠨ ᠦᠭᠡ ᠴᠢᠨᠢ ᠬᠠᠮᠢᠭᠠ ᠪᠠᠢᠨᠠ ᠪᠣᠢ?
ᠣᠨᠴᠠᠯᠠᠵᠤ ᠦᠵᠡᠭᠰᠡᠨ ᠰᠡᠳᠬᠢᠯ ᠢ᠋ ᠳ᠋ᠦᠩᠨᠡᠬᠦ ᠳ᠋ᠡᠭᠡᠨ
ᠣᠯᠠᠨ ᠬᠣᠨᠣᠭ ᠤ᠋ᠨ ᠢᠲᠡᠭᠡᠯ ᠢ᠋ ᠱᠠᠩᠨᠠᠬᠤ ᠳ᠋ᠠᠭᠠᠨ
ᠲᠣᠪ ᠳᠤᠭᠤᠢ ᠢᠩᠭᠢᠭᠡᠳ ᠯᠡ ᠶᠠᠪᠤᠳᠠᠭ
ᠳᠤᠷᠠ ᠰᠡᠳᠬᠢᠯ ᠭᠡᠵᠦ ᠪᠠᠢᠳᠠᠭ ᠶᠤᠮ ᠤᠤ?
ᠳᠤᠷᠠ ᠰᠡᠳᠬᠢᠯ ᠴᠢᠨᠢ ᠥᠨᠥᠳᠥᠷ ᠦ᠋ᠨ ᠬᠤᠪᠢ ᠳ᠋ᠤ᠌
ᠪᠢᠰᠢ ᠶ᠋ᠢ ᠣᠨᠴᠠᠯᠠᠵᠤ ᠨᠠᠮᠠᠶ᠋ᠢ ᠮᠠᠷᠲᠠᠪᠠ ᠤᠤ?
ᠳᠤᠷᠠᠲᠠᠢ ᠵᠢᠷᠭᠠᠯ ᠢ᠋ᠶ᠋ᠠᠨ ᠮᠥᠷᠥᠭᠡᠰᠴᠦ ᠶᠠᠪᠤᠳᠠᠭ ᠪᠣᠯ
ᠪᠢ ᠲᠡᠭᠦᠨ ᠢ᠋ ᠪᠡᠶᠡᠯᠡᠭᠦᠯᠵᠦ ᠴᠢᠳᠠᠬᠤ ᠦᠭᠡᠢ ᠤᠤ⁈ 》
ᠪᠠᠢᠨ ᠪᠠᠢᠨ ᠢᠩᠭᠢᠵᠦ ᠪᠣᠳᠣᠭᠰᠠᠭᠠᠷ
ᠪᠠᠰᠠ ᠳᠠᠬᠢᠨ ᠡᠷᠭᠢᠵᠦ ᠬᠠᠷᠠᠭᠰᠠᠭᠠᠷ
ᠪᠠᠷᠢᠯᠭᠠᠴᠢᠨ ᠵᠠᠯᠠᠭᠤ ᠳᠤᠷᠠᠮᠵᠢᠬᠠᠨ ᠶᠠᠪᠤᠵᠤ
ᠪᠠᠢᠷᠢᠨ ᠤ᠋ ᠪᠠᠨ ᠡᠭᠦᠳᠡᠨ ᠳ᠋ᠦ᠍ ᠬᠦᠷᠦᠭᠡᠳ ᠢᠷᠡᠯᠡ᠃
ᠥᠴᠦᠬᠡᠨ ᠴᠣᠣᠵᠢ ᠨᠢ ᠲᠦᠯᠬᠢᠭᠦᠷ ᠢ᠋ᠶ᠋ᠡᠨ ᠬᠦᠯᠢᠶᠡᠵᠦ
ᠥᠷᠯᠥᠭᠡᠨ ᠦ᠌ ᠣᠷᠬᠢᠭᠰᠠᠨ ᠲᠡᠷᠡ ᠯᠠ ᠶᠠᠩᠵᠤ ᠪᠠᠷ ᠢ᠋ᠶ᠋ᠠᠨ
ᠥᠷᠥᠭᠡ ᠲᠠᠰᠤᠯᠭᠠ ᠨᠢ ᠲᠡᠭᠰᠢ ᠪᠡᠨ ᠬᠦᠯᠢᠶᠡᠵᠦ
ᠥᠭᠡᠷᠡ ᠪᠣᠯᠤᠭᠰᠠᠨ ᠶᠠᠭᠤ ᠴᠤ᠌ ᠪᠠᠢᠬᠤ ᠪᠣᠢ ᠳᠠ᠁
ᠵᠠᠯᠠᠭᠤ ᠡᠷᠡ ᠶ᠋ᠢᠨ ᠭᠠᠭᠴᠠ ᠪᠠᠷ ᠠᠮᠢᠳᠤᠷᠠᠯ
ᠵᠠᠷᠢᠮ ᠦᠶᠡ ᠳ᠋ᠡᠭᠡᠨ ᠵᠢᠷᠭᠠᠯᠲᠠᠢ ᠪᠣᠯᠪᠠᠴᠤ
ᠡᠨᠡ ᠮᠡᠲᠦ ᠶ᠋ᠢᠨ ᠶᠠᠪᠤᠳᠠᠯ ᠲᠠᠢ ᠴᠠᠭ ᠢ᠋ᠶ᠋ᠠᠷ
ᠠ᠋ ᠳᠠ ᠶᠡᠷᠦ ᠨᠢ ᠲᠤᠰᠠ ᠦᠭᠡᠢ ᠪᠠᠢᠳᠠᠭ ᠰᠠᠨ᠁
2
ᠨᠡᠭᠡᠷᠡᠨ ᠰᠢᠦ ᠲᠠ ᠮᠢᠨᠢ᠂ ᠶᠣᠰᠣᠲᠠᠢ ᠳᠤᠷᠠᠯᠠᠯ
ᠨᠢᠭᠡ ᠯᠡ ᠰᠢᠳᠡᠵᠦ᠂ ᠨᠢᠭᠡ ᠳ᠋ᠦ᠍ ᠯᠡ ᠴᠢᠭᠯᠡᠳᠡᠭ ᠶᠤᠮ
ᠡᠭᠦᠪᠡᠷ ᠢ᠋ᠶ᠋ᠡᠨ ᠯᠡ ᠬᠥᠮᠦᠨ ᠭᠡᠳᠡᠭ ᠠᠮᠢᠲᠠᠨ ᠴᠢᠨᠢ
ᠦᠵᠡᠯ ᠰᠤᠷᠲᠠᠯ ᠨᠡᠷᠡ ᠲᠥᠷᠥ ᠲᠡᠢ ᠶᠠᠪᠤᠳᠠᠭ ᠶᠤᠮ᠃
ᠲᠡᠭᠰᠢ ᠬᠦᠦ ᠵᠠᠮᠪᠠᠭᠠ ᠬᠡᠦᠬᠡᠨ ᠢ᠋
ᠲᠡᠭᠡᠵᠦ ᠶᠡᠬᠡ ᠮᠥᠷᠥᠭᠡᠳᠳᠡᠭ ᠰᠢᠭ
ᠲᠠᠰᠢᠷᠠᠮ ᠳ᠋ᠤ᠌ ᠬᠡᠯᠡᠬᠦ ᠳ᠋ᠦ᠍ ᠪᠢ ᠴᠦ᠍ ᠭᠡᠰᠡᠨ
ᠳᠠᠰᠤᠭᠠ ᠦᠭᠡᠢ ᠬᠥᠮᠦᠨ ᠳ᠋ᠦ᠍ ᠰᠡᠳᠬᠢᠯ ᠢ᠋ᠶ᠋ᠡᠨ ᠥᠭᠴᠦ
ᠬᠣᠨᠣᠭ ᠪᠠᠢᠲᠤᠭᠠᠢ ᠤᠯᠠᠷᠢᠯ ᠲᠣᠭᠠᠯᠠᠨ
ᠬᠣᠭᠣᠰᠣᠨ ᠬᠦᠯᠢᠶᠡᠭᠰᠡᠭᠡᠷ ᠴᠠᠭ ᠢ᠋ᠶ᠋ᠠᠨ ᠪᠠᠷᠠᠭᠰᠠᠨ ᠢ᠋
ᠬᠣᠲᠠ ᠶ᠋ᠢᠨ ᠲᠡᠷᠡ ᠨᠢᠭᠡ ᠬᠡᠦᠬᠡᠨ ᠦ᠌ ᠰᠡᠳᠬᠢᠯ
ᠬᠣᠵᠢᠮ ᠤ᠋ᠨ ᠡᠳᠦᠷ ᠳᠤᠷᠠᠰᠬᠤ ᠪᠣᠯ ᠤᠤ ᠳᠠ⁈
ᠲᠣᠭᠣᠷᠠᠭ ᠨᠢᠭᠤᠷ᠂ ᠪᠣᠷᠣᠬᠠᠨ ᠬᠠᠮᠠᠷ᠂
ᠲᠣᠷᠠᠭᠠᠷ ᠨᠢᠳᠦ᠂ ᠵᠤᠷᠠᠭᠠᠷ ᠬᠥᠮᠥᠰᠬᠡ᠂
ᠬᠠᠯᠠᠮᠵᠢ ᠲᠡᠭᠦᠰ ᠮᠢᠬᠠᠯᠢᠭ ᠤᠷᠤᠭᠤᠯ᠂
ᠬᠠᠯᠠᠭ ᠭᠡᠵᠦ! ᠶᠠᠭᠤᠲᠠᠢ ᠰᠠᠢᠬᠠᠨ ᠪᠣᠢ?
ᠤᠷᠤᠭᠤᠯ ᠠᠮᠠᠨ ᠤ᠋ ᠴᠢᠨᠢ ᠰᠠᠢᠬᠠᠨ ᠳ᠋ᠤ᠌ ᠠᠪᠲᠠᠭᠠ ᠦᠭᠡᠢ
ᠤᠶᠠᠬᠠᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠴᠦ᠍ ᠢᠯᠡᠴᠢᠯᠡᠨ ᠳᠠᠪᠲᠠᠭᠠ ᠦᠭᠡᠢ
ᠡᠷᠬᠢᠮ ᠪᠦᠰᠡᠭᠦᠢ ᠶ᠋ᠢᠨ ᠳᠣᠲᠣᠷᠠ᠂ ᠮᠢᠨᠦ ᠲᠤᠬᠠᠢ ᠳ᠋ᠤ᠌
ᠡᠨᠡ ᠰᠢᠯᠦᠭ ᠢ᠋ ᠤᠩᠰᠢᠬᠤ ᠳ᠋ᠠᠭᠠᠨ ᠨᠢᠭᠡ ᠪᠣᠳᠣᠬᠤ ᠪᠢᠵᠡ᠁
ᠲᠡᠷᠡ ᠬᠥᠮᠦᠨ ᠦ᠌ ᠵᠢᠷᠦᠬᠡᠨ ᠳ᠋ᠦ᠍ ᠣᠳᠣ ᠪᠠᠷ
ᠲᠡᠮᠳᠡᠭ ᠮᠥᠷ ᠮᠢᠨᠢ ᠦᠯᠡᠳᠡᠭᠡ ᠦᠭᠡᠢ ᠪᠠᠢᠬᠠ᠁
ᠲᠡᠭᠰᠢ ᠶ᠋ᠢ ᠳᠤᠷᠠᠯᠠᠭᠤᠯᠤᠭᠰᠠᠨ ᠵᠠᠮᠪᠠᠭᠠ ᠪᠦᠰᠡᠭᠦᠢ
ᠲᠡᠭᠡᠵᠦ ᠪᠠᠰᠠ ᠮᠠᠷᠲᠠᠭᠠ ᠪᠣᠯ ᠤᠤ?
ᠮᠠᠭᠠᠳ ᠲᠠᠢ ᠬᠦᠰᠡᠯᠡᠩ᠂ ᠰᠣᠨᠢᠷᠬᠠᠯ ᠢ᠋ᠶ᠋ᠠᠨ ᠳᠠᠭᠠᠵᠤ
ᠮᠠᠷᠲᠠᠬᠤ ᠡᠰᠡᠬᠦ ᠲᠡᠭᠦᠨ ᠦ᠌ ᠬᠡᠷᠡᠭ ᠪᠢᠵᠡ᠃
ᠮᠠᠨᠢ ᠪᠦᠬᠦᠨ ᠰᠢᠭ ᠥᠪᠡᠷ ᠢ᠋ᠶ᠋ᠡᠨ ᠰᠢᠢᠳᠦᠭᠰᠡᠨ ᠪᠠᠢᠪᠠᠯ
ᠮᠠᠶᠢᠭᠲᠠᠢ ᠬᠥᠮᠦᠨ ᠭᠡᠵᠦ ᠬᠡᠨ ᠲᠡᠭᠦᠨ ᠢ᠋ ᠬᠡᠯᠡᠬᠦ ᠪᠣᠢ?
ᠬᠥᠳᠡᠭᠡ ᠨᠤᠲᠤᠭ ᠡᠴᠡ ᠵᠠᠮᠪᠠᠭᠠ ᠶ᠋ᠢᠨ ᠡᠵᠢ
ᠬᠥᠰᠬᠡ ᠲᠡᠷᠭᠡ ᠲᠡᠢ ᠢᠷᠡᠭᠰᠡᠨ ᠭᠡᠨᠡ ᠯᠡ᠂
ᠬᠦᠷᠭᠡᠨ ᠬᠦᠦ ᠲᠡᠢ ᠪᠣᠯᠤᠯᠠ ᠭᠡᠵᠦ
ᠬᠥᠮᠦᠨ ᠠᠮᠢᠲᠠᠨ ᠳ᠋ᠤ᠌ ᠶᠠᠷᠢᠭᠰᠠᠨ ᠭᠡᠨᠡ ᠯᠡ᠃
ᠬᠥᠨᠳᠡᠯᠡᠨ ᠦ᠌ ᠪᠢ ᠶᠠᠭᠤ ᠪᠠᠨ ᠮᠡᠳᠡᠬᠦ ᠪᠣᠢ
ᠬᠥᠭᠰᠢᠨ ᠡᠵᠢ ᠨᠢ ᠶᠠᠭᠤ ᠪᠠᠨ ᠠᠨᠳᠠᠬᠤ ᠪᠣᠢ?
ᠺᠯᠦ᠋ᠪ ᠲᠦ᠍ ᠣᠴᠢᠵᠤ ᠪᠠᠢᠷᠢ ᠶ᠋ᠢ ᠨᠢ ᠮᠡᠳᠡᠵᠡᠭᠡᠶᠡ
ᠬᠥᠰᠢᠭᠡ ᠨᠡᠭᠡᠭᠡᠬᠦ ᠳ᠋ᠦ᠍ ᠵᠠᠮᠪᠠᠭᠠ ᠶ᠋ᠢ ᠬᠠᠷᠠᠵᠠᠭᠠᠶᠠ᠃
※※※
ᠰᠠᠭᠤᠳᠠᠯ ᠳᠦᠭᠦᠷᠡᠩ ᠦᠵᠡᠭᠴᠢᠳ ᠢᠷᠠᠢᠵᠤ
ᠰᠤᠯᠠ ᠰᠠᠨᠳᠠᠯᠢ ᠶ᠋ᠢ ᠵᠠᠮᠪᠠᠯ ᠡᠵᠡᠯᠡᠭᠡᠳ
ᠠᠯᠢ ᠬᠡᠳᠦᠢᠨ᠂ ᠪᠢᠳᠡᠨ ᠡᠴᠡ ᠤᠷᠢᠲᠠᠵᠤ
ᠠᠩᠬᠢᠯ ᠪᠦᠰᠡᠭᠦᠢ ᠶ᠋ᠢ ᠠᠨᠳᠠᠯ ᠦᠭᠡᠢ ᠰᠢᠷᠳᠡᠨᠡ᠃
ᠲᠠᠢᠵᠠᠨ ᠳᠡᠭᠡᠷᠡᠬᠢ ᠵᠠᠯᠠᠭᠤ ᠬᠡᠦᠬᠡᠨ
ᠲᠠᠢᠪᠤᠩ ᠪᠣᠯᠤᠭᠠᠳ ᠶᠡᠬᠡᠮᠰᠦᠭ ᠵᠣᠭᠰᠣᠨᠠ᠂
ᠲᠠᠩᠬᠢᠯ ᠴᠢᠭᠢᠷᠠᠭ ᠭᠠᠷ ᠤ᠋ᠨ ᠬᠢᠨᠢ ᠠᠶᠠ ᠪᠠᠷ
ᠲᠠᠩᠰᠤᠭ ᠳᠠᠭᠤᠯᠠᠯ ᠴᠢᠯᠥᠭᠡᠲᠡᠢ ᠬᠠᠩᠭᠢᠨᠠᠨᠠ᠃
᠁ ᠦᠵᠡᠬᠦ ᠲᠠᠩᠬᠢᠮ ᠤ᠋ᠨ ᠵᠡᠷᠭᠡᠴᠡᠭᠰᠡᠨ ᠰᠠᠭᠤᠳᠠᠯ ᠡᠴᠡ
ᠦᠢ ᠣᠯᠠᠨ ᠤ᠋ ᠰᠢᠷᠳᠡᠭᠰᠡᠨ ᠪᠠᠢᠳᠠᠯ ᠡᠴᠡ
ᠡᠨᠡ ᠲᠣᠭᠯᠠᠯᠲᠠ ᠰᠠᠢᠬᠠᠨ ᠪᠣᠯᠤᠭᠰᠠᠨ ᠨᠢ
ᠢᠪ ᠢᠯᠡᠬᠡᠨ ᠬᠠᠷᠠᠭᠳᠠᠵᠤ ᠪᠠᠢᠨᠠ᠃
ᠬᠠᠯᠠᠭᠤᠨ ᠵᠠᠯᠠᠭᠤᠰ ᠨᠢᠳᠦ ᠪᠡᠨ ᠪᠦᠯᠲᠡᠢᠵᠦ
ᠬᠠᠯᠵᠠᠨ ᠬᠥᠮᠦᠨ ᠳᠤᠬᠤ ᠪᠠᠨ ᠠᠷᠴᠢᠵᠤ
ᠬᠠᠷᠢᠮᠠᠯ ᠬᠥᠮᠦᠨ ᠰᠠᠬᠠᠯ ᠢ᠋ᠶ᠋ᠠᠨ ᠢᠮᠡᠷᠴᠦ
ᠬᠠᠮᠤᠭ ᠣᠯᠠᠨ ᠢ᠋ᠶ᠋ᠠᠷ ᠢᠨᠢᠶᠡᠮᠰᠦᠭᠯᠡᠨᠡ
ᠤᠤᠯᠭᠠᠴᠢ ᠠᠪᠠᠭᠠᠢ᠂ ᠳᠡᠷᠭᠡᠳᠡᠬᠢ ᠬᠥᠮᠦᠨ ᠢ᠋ᠶ᠋ᠡᠨ
ᠤᠳᠠᠭᠠ ᠳᠠᠷᠠᠭᠠᠯᠠᠨ ᠶᠣᠪᠣᠷᠤᠭᠰᠠᠭᠠᠷ ᠰᠠᠭᠤᠨᠠ᠂
ᠤᠴᠢᠷ ᠦᠭᠡᠢ ᠴᠢᠩᠭᠠ ᠢᠨᠢᠶᠡᠬᠦ ᠭᠡᠬᠦ ᠳ᠋ᠦ᠍ᠨᠢ
ᠤᠯᠤᠰ ᠤ᠋ᠳ ᠲᠡᠭᠦᠨ ᠢ᠋《ᠴᠢᠮᠡᠭᠡ ᠦᠭᠡᠢ》ᠭᠡᠨᠡ᠃
ᠦᠶᠡᠷ ᠪᠣᠷᠣᠭᠠ ᠰᠢᠭ᠋ ᠱᠤᠤᠭᠢᠵᠤ ᠪᠠᠢᠭᠠ
ᠦᠵᠡᠬᠦ ᠲᠠᠩᠬᠢᠮ ᠤ᠋ᠨ ᠠᠯᠠᠭᠠ ᠲᠠᠰᠢᠯᠲᠠ ᠳ᠋ᠤ᠌
ᠡᠷᠭᠦᠭᠦᠯᠵᠦ ᠶᠠᠪᠤᠭᠠ ᠵᠢᠭᠠᠬᠠᠨ ᠵᠢᠭᠠᠯ ᠤ᠋ᠨ
ᠥᠴᠦᠬᠡᠨ ᠭᠠᠷ ᠴᠤ᠌ ᠣᠷᠣᠯᠴᠠᠵᠤ ᠪᠠᠢᠨᠠ᠁
ᠲᠣᠭᠯᠠᠯᠲᠠ ᠳᠠᠭᠤᠰᠤᠭᠠᠳ ᠵᠠᠮᠪᠠᠭᠠ ᠮᠠᠨᠢ
ᠲᠣᠯᠣᠭᠠᠢ ᠪᠥᠬᠥᠢᠨ ᠶᠣᠰᠣᠯᠠᠵᠤ ᠪᠠᠢᠨᠠ᠂
ᠲᠣᠷᠮᠣᠭᠣᠷ ᠨᠢᠳᠦ ᠨᠢ ᠵᠠᠮᠪᠠᠯ ᠤᠷᠤᠭᠤ
ᠰᠡᠮᠬᠡᠨ ᠬᠠᠷᠠᠭᠠᠳ ᠪᠤᠯᠲᠠᠵᠤ ᠪᠠᠢᠨᠠ᠃
※※※
ᠬᠥᠮᠦᠰ ᠲᠠᠷᠠᠵᠤ ᠵᠠᠮᠪᠠᠭᠠ ᠴᠤ᠌ ᠭᠠᠷᠬᠤ ᠨᠢ
ᠬᠦᠯᠢᠶᠡᠵᠡᠨᠡᠵᠦ ᠪᠠᠰᠠ ᠲᠠᠢᠰᠢ ᠪᠠᠨ ᠬᠠᠷᠠᠬᠤ ᠨᠢ᠁
《ᠬᠦᠷᠭᠡᠨ ᠬᠦᠦ》ᠶ᠋ᠢᠨ ᠳᠥᠴᠢᠨ ᠶᠢᠰᠦ
ᠬᠦᠷᠭᠡᠭᠡᠳ ᠥᠭᠬᠦ ᠨᠢ ᠮᠠᠭᠠᠳ ᠪᠢᠵᠡ ᠠ᠋᠃
3
ᠵᠤᠨ| ᠨᠠᠮᠤᠷ ᠤ᠋ᠨ ᠵᠠᠭᠠᠭ ᠲᠤ᠌ ᠪᠠᠢᠳᠠᠭ
ᠵᠤᠭᠠ ᠲᠠᠲᠠᠭᠰᠠᠨ ᠰᠠᠢᠬᠠᠨ ᠣᠷᠣᠢ
ᠵᠢᠷᠭᠤᠭᠠᠨ ᠴᠠᠭ ᠥᠩᠭᠡᠷᠡᠵᠦ ᠪᠠᠢᠨᠠ
ᠵᠢᠷᠤᠭᠠᠴᠢ ᠶ᠋ᠢᠨ ᠴᠣᠩᠬᠣ ᠣᠩᠭᠣᠷᠬᠠᠢ ᠪᠠᠢᠨᠠ᠃
ᠣᠩᠭᠣᠷᠬᠠᠢ ᠴᠣᠩᠬᠣᠨ ᠤ᠋ ᠵᠥᠭᠡᠯᠡᠨ ᠰᠠᠯᠬᠢᠨ ᠳ᠋ᠤ᠌
ᠣᠷᠣᠢ ᠶ᠋ᠢᠨ ᠬᠣᠭᠣᠯᠠ ᠪᠠᠨ ᠢᠳᠡᠵᠦ ᠰᠠᠭᠤᠭᠠ
ᠵᠠᠯᠠᠭᠤ ᠵᠢᠷᠤᠭᠠᠴᠢ ᠲᠠᠢ ᠮᠥᠷᠥ ᠵᠡᠷᠭᠡᠴᠡᠨ
ᠵᠠᠮᠪᠠᠭᠠ ᠬᠡᠦᠬᠡᠨ ᠢᠨᠢᠶᠡᠵᠦ ᠰᠠᠭᠤᠨᠠ᠃
ᠠᠯᠠᠭ ᠵᠢᠷᠦᠬᠡᠨ ᠳ᠋ᠡᠭᠡᠨ ᠲᠡᠭᠦᠨ ᠢ᠋ ᠵᠥᠪᠰᠢᠶᠡᠷᠡᠵᠦ
ᠠᠮᠢᠳᠤᠷᠠᠯ ᠳᠤᠮᠳᠠ ᠪᠠᠨ ᠲᠦᠰᠢᠬᠦ ᠶ᠋ᠢ ᠰᠢᠢᠳᠴᠦ
ᠠᠩᠬᠠᠨ ᠤ᠋ ᠮᠡᠨᠳᠦ ᠡᠴᠡ ᠥᠨᠥ ᠶ᠋ᠢ ᠬᠦᠷᠲᠡᠯᠡ
ᠠᠯᠢᠶᠠᠯᠠᠵᠤ ᠨᠠᠷᠭᠢᠭᠰᠠᠭᠠᠷ ᠠᠢᠬᠤᠪᠲᠤᠷ ᠳᠠᠰᠬᠤ ᠳ᠋ᠠᠭᠠᠨ
ᠬᠥᠭᠵᠢᠯᠲᠡᠢ ᠬᠥᠭᠡᠷᠦᠬᠦᠨ ᠵᠠᠮᠪᠠᠭᠠ ᠮᠠᠨᠢ
ᠬᠥᠭᠵᠢᠮ ᠬᠥᠲᠥᠯᠦᠭᠴᠢ ᠶ᠋ᠢᠨ ᠬᠤᠪᠢ ᠪᠠᠷ ᠪᠢᠰᠢ
ᠬᠥᠳᠡᠭᠡ ᠥᠰᠦᠭᠡᠳ ᠬᠣᠲᠠ ᠳ᠋ᠤ᠌ ᠳᠠᠰᠤᠭᠰᠠᠨ
ᠬᠥᠭᠡᠷᠦᠬᠦᠢ ᠬᠣᠩᠭᠣᠷ ᠰᠡᠳᠬᠢᠯ ᠦ᠋ᠨ ᠢ᠋ᠶ᠋ᠡᠨ ᠬᠤᠪᠢ ᠪᠠᠷ
ᠠᠭᠠᠰᠢ ᠵᠠᠩ ᠤ᠋ᠨ ᠤᠷᠢᠬᠠᠨ ᠪᠦᠬᠦᠨ ᠢ᠋ᠶ᠋ᠡᠨ ᠴᠦ᠍
ᠠᠷᠪᠠᠨ ᠶᠢᠰᠦᠲᠡᠢ ᠲᠤᠷᠢᠬᠠᠨ ᠪᠡᠶᠡ ᠪᠡᠨ ᠴᠦ᠍
ᠠᠬᠤᠢ ᠬᠦᠰᠡᠯ ᠦ᠋ᠨ ᠠᠮᠢᠨᠴᠢᠬᠠᠨ ᠵᠦᠢᠯ ᠢ᠋ᠶ᠋ᠡᠨ ᠴᠦ᠍
ᠠᠮᠠᠷᠠᠭ ᠵᠠᠯᠠᠭᠤ ᠳ᠋ᠠᠭᠠᠨ ᠪᠦᠷᠢᠨ ᠵᠣᠷᠢᠭᠤᠯᠵᠠᠢ᠃
ᠡᠷᠬᠢᠮ ᠤᠩᠰᠢᠭᠴᠢ ᠬᠡᠵᠢᠶᠡ ᠭᠡᠰᠡᠨ ᠴᠦ᠍
ᠡᠩᠬᠦᠷᠡᠢ ᠰᠡᠳᠬᠢᠯ᠂ ᠬᠠᠢᠷᠠ ᠶ᠋ᠢᠨ ᠬᠦᠴᠦᠨ ᠳ᠋ᠦ᠍
ᠵᠠᠯᠠᠭᠤᠬᠠᠨ ᠢᠨᠠᠭ ᠢ᠋ᠶ᠋ᠠᠨ ᠢᠯᠪᠢᠩᠭᠡᠨ ᠰᠠᠭᠤᠬᠤ ᠳ᠋ᠠᠭᠠᠨ
ᠵᠠᠮᠪᠠᠭᠠ ᠡᠴᠡ ᠠᠶᠠᠭᠦᠢ ᠪᠣᠯ ᠢᠯᠡᠭᠦᠦ ᠪᠠᠢᠭᠰᠠᠨ ᠪᠢᠵᠡ᠂
ᠤᠷᠠᠯᠢᠭ ᠤ᠋ᠨ ᠰᠤᠷᠭᠠᠭᠤᠯᠢ ᠶ᠋ᠢᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠴᠦ᠍
ᠤᠰᠤᠨ ᠮᠥᠷᠡᠨ ᠦ᠌ ᠰᠢᠷᠢᠩᠭᠢᠨ ᠳᠡᠭᠡᠷᠡ ᠴᠦ᠍
ᠤᠷᠢᠨ ᠴᠠᠭ ᠤ᠋ᠨ ᠰᠥᠨᠢ ᠳᠦᠯᠢ ᠪᠡᠷ ᠴᠦ᠍
ᠤᠨᠲᠠᠬᠤ ᠨᠣᠢᠷ᠂ ᠵᠡᠭᠦᠳᠦᠨ ᠦ᠌ ᠭᠦᠨ ᠢ᠋ᠶ᠋ᠡᠷ ᠴᠦ᠍
ᠪᠡᠶᠡ ᠲᠥᠯᠵᠢᠨ ᠤᠬᠠᠭᠠᠨ ᠰᠠᠭᠤᠵᠤ
ᠪᠢᠰᠢ ᠶ᠋ᠢ ᠮᠥᠷᠥᠭᠡᠳᠬᠦ ᠰᠡᠭᠡᠭᠡ ᠣᠷᠣᠵᠤ
ᠢᠳᠡ ᠲᠤᠶᠠᠭᠠᠷᠠᠭᠰᠠᠨ ᠪᠦᠰᠡᠭᠦᠢ ᠶ᠋ᠢᠨ ᠰᠡᠳᠬᠢᠯ
ᠡᠢᠮᠦ ᠦᠶᠡ ᠶ᠋ᠢ ᠬᠡᠴᠢᠨᠡᠭᠡᠨ ᠬᠦᠰᠡᠭᠰᠡᠨ ᠪᠣᠢ⁈
ᠮᠥᠨ ᠢ᠋ᠶ᠋ᠡᠨ ᠣᠯᠤᠭᠰᠠᠨ ᠬᠠᠢᠷᠠ ᠶ᠋ᠢᠨ ᠳᠡᠷᠭᠡᠳᠡ
ᠮᠥᠩᠭᠥᠨ ᠪᠠᠭᠤᠪᠴᠢ ᠶᠠᠭᠤ ᠶᠤᠮ ᠪᠣᠢ?
ᠮᠥᠩᠬᠡ ᠶ᠋ᠢᠨ ᠡᠢᠮᠦ ᠵᠢᠷᠭᠠᠯ ᠤ᠋ᠨ ᠳᠡᠷᠭᠡᠳᠡ
ᠠᠯᠲᠠᠨ ᠪᠥᠭᠡᠵᠢ ᠪᠡᠷ ᠴᠦ᠍ ᠶᠠᠭᠤ ᠪᠠᠨ ᠬᠢᠬᠦ ᠪᠣᠢ?
ᠠᠮᠠᠷᠠᠭᠯᠠᠨ ᠴᠡᠩᠭᠡᠵᠦ᠂ ᠠᠮᠢᠳᠤᠷᠠᠨ ᠵᠢᠷᠭᠠᠬᠤ
ᠠᠵᠠᠲᠠᠢ ᠲᠥᠷᠥᠭᠰᠡᠨ ᠬᠥᠮᠦᠨ ᠦ᠌ ᠦᠷᠡ ᠭᠡᠵᠦ
ᠠᠩᠬᠢᠯ ᠪᠦᠰᠡᠭᠦᠢ ᠥᠪᠡᠷ ᠲᠡᠭᠡᠨ ᠪᠡᠶᠡᠰᠴᠦ
ᠠᠭᠤᠤ ᠪᠦᠬᠦᠨ ᠢ᠋ᠶ᠋ᠡᠷ ᠥᠨᠢ ᠶ᠋ᠢ ᠰᠡᠳᠬᠢᠨᠡ᠁
ᠦᠰᠦ ᠪᠤᠭᠤᠷᠤᠯᠴᠤᠳ ᠤ᠋ᠨ ᠦᠷᠴᠢᠯᠡᠭᠡᠲᠦ ᠨᠢᠳᠦᠨ ᠡᠴᠡ ᠴᠦ᠍
ᠦᠶᠡ ᠶ᠋ᠢᠨ ᠨᠠᠰᠤᠲᠠᠨ ᠨᠤᠭᠤᠳ ᠤ᠋ᠨ ᠦᠢᠮᠡᠭᠡᠨ ᠱᠤᠤᠭᠢᠶᠠᠨ ᠡᠴᠡ ᠴᠤ᠌
ᠦᠨᠡᠨ ᠬᠤᠳᠠᠯ ᠰᠢᠪᠡᠨᠡᠭᠡ ᠶᠠᠷᠢᠶᠠᠨ ᠡᠴᠡ ᠴᠤ᠌
ᠦᠢᠯᠡ ᠨᠢ ᠪᠦᠲᠦᠭᠡ ᠦᠭᠡᠢ ᠲᠡᠭᠰᠢ ᠬᠦᠦ ᠡᠴᠡ ᠴᠦ᠍
ᠵᠠᠮᠪᠠᠯ ᠢ᠋ ᠰᠢᠯᠢᠭᠰᠡᠨ ᠢ᠋ᠶ᠋ᠡᠨ ᠵᠠᠮᠪᠠᠭᠠ ᠨᠢᠭᠤᠭᠰᠠᠨ ᠦᠭᠡᠢ
ᠵᠢᠷᠭᠠᠯ ᠢ᠋ ᠡᠳ᠋ᠯᠡᠭᠰᠡᠨ ᠢ᠋ᠶ᠋ᠡᠨ ᠦᠭᠡᠢᠰᠬᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ
ᠵᠢᠯᠠᠭᠠ ᠴᠥᠭᠥᠷᠥᠮ᠂ ᠣᠢ ᠳᠤᠮᠳᠠᠭᠤᠷ ᠴᠤ᠌ ᠬᠣᠶᠠᠭᠤᠯᠠ ᠪᠠᠨ
ᠵᠢᠭᠠᠬᠠᠨ ᠲᠣᠰᠬᠣᠨ ᠤ᠋ ᠭᠤᠳᠤᠮᠵᠢ ᠪᠦᠷᠢ ᠪᠡᠷ ᠴᠦ᠍ ᠬᠣᠶᠠᠭᠤᠯᠠ ᠪᠠᠨ᠃
ᠠᠩᠬᠠᠨ ᠨᠡᠢᠯᠡᠭᠰᠡᠨ ᠵᠠᠯᠠᠭᠤ ᠬᠥᠮᠦᠰ ᠦ᠋ᠨ
ᠠᠮᠠᠷᠠᠭ ᠵᠢᠷᠭᠠᠯ ᠤ᠋ᠨ ᠳᠡᠭᠡᠵᠢ ᠪᠦᠬᠦᠨ ᠢ᠋ᠶ᠋ᠡᠷ
《ᠠᠯᠲᠠᠨ ᠰᠠᠷᠠ 》ᠭᠡᠵᠦ ᠨᠡᠷᠡᠯᠡᠵᠦ ᠪᠠᠢᠮᠠᠷ
ᠠᠷᠪᠠᠭᠠᠳ ᠬᠣᠨᠣᠭ ᠢᠩᠭᠢᠵᠦ ᠤᠯᠠᠷᠢᠪᠠ᠃
ᠬᠠᠢᠷᠠᠲᠤ ᠵᠠᠮᠪᠠᠯ ᠨᠢ ᠪᠢᠷ ᠢ᠋ᠶ᠋ᠡᠨ ᠪᠠᠷᠢᠵᠤ
ᠬᠠᠴᠢᠨ ᠰᠠᠢᠬᠠᠨ ᠵᠢᠷᠤᠭ ᠵᠢᠷᠤᠬᠤ ᠳ᠋ᠤ᠌
ᠡᠰᠡᠪᠡᠯ ᠬᠣᠶᠠᠭᠤᠯᠠ ᠪᠠᠨ ᠦᠳᠡᠰᠢ ᠶ᠋ᠢᠨ ᠴᠠᠭ ᠢ᠋ᠶ᠋ᠠᠷ
ᠡᠷᠬᠡ ᠬᠡᠦᠬᠡᠳ ᠰᠢᠭ ᠨᠣᠴᠣᠯᠳᠤᠨ ᠲᠣᠭᠯᠠᠬᠤ ᠳ᠋ᠤ᠌
ᠠᠯᠲᠠᠨ ᠳᠡᠯᠡᠬᠡᠢ ᠳ᠋ᠦ᠍ ᠨᠠᠳᠠ ᠡᠴᠡ ᠢᠯᠡᠭᠦᠦ
ᠠᠵᠠᠲᠠᠢ ᠬᠡᠦᠬᠡᠨ ᠪᠠᠢᠨᠠ ᠤᠤ⁈ ᠭᠡᠵᠦ
ᠵᠠᠮᠪᠠᠭᠠ ᠥᠪᠡᠷ ᠢ᠋ᠶ᠋ᠡᠨ᠂ ᠬᠡᠨ ᠨᠢᠭᠡᠨ ᠳ᠋ᠦ᠍
ᠵᠠᠪᠠᠯ ᠬᠡᠯᠡᠮᠡᠷ ᠰᠠᠨᠠᠭᠳᠠᠵᠤ ᠪᠠᠢᠪᠠ····
ᠡᠨᠡ ᠰᠠᠢᠬᠠᠨ ᠨᠠᠮᠤᠷ ᠤ᠋ᠨ ᠴᠠᠭ ᠢ᠋ᠶ᠋ᠠᠷ
ᠡᠭᠡᠯᠵᠢ ᠶ᠋ᠢᠨ ᠠᠮᠠᠷᠠᠯᠲᠠ ᠪᠠᠨ ᠵᠠᠮᠪᠠᠭᠠ ᠠᠪᠤᠯᠠ
ᠤᠯᠠᠭᠠᠨᠪᠠᠭᠠᠲᠤᠷ ᠲᠤ᠌ ᠬᠤᠷᠠᠯ ᠳ᠋ᠤ᠌ ᠰᠠᠭᠤᠬᠤ
ᠤᠷᠢᠯᠭᠠ ᠶ᠋ᠢᠨ ᠤᠲᠠᠰᠤ ᠶ᠋ᠢ ᠵᠠᠮᠪᠠᠯ ᠨᠢ ᠠᠪᠤᠯᠠ᠃
ᠬᠣᠶᠠᠭᠤᠯᠠ ᠬᠠᠮᠲᠤ ᠨᠡᠢᠰᠯᠡᠯ ᠣᠷᠣᠬᠤ ᠪᠠᠷ
ᠬᠣᠭᠣᠷᠣᠨᠳᠣ ᠪᠠᠨ ᠶᠠᠷᠢᠭᠠᠳ ᠶᠠᠭᠤᠮᠠ ᠪᠠᠨ ᠵᠡᠬᠡᠯᠡ᠂
ᠬᠣᠶᠠᠷ ᠳᠤᠭᠤᠢᠲᠤ ᠶ᠋ᠢᠨ ᠠᠷᠤ ᠶ᠋ᠢᠨ ᠡᠮᠡᠭᠡᠯ ᠳᠡᠭᠡᠷᠡ
ᠬᠣᠩᠭᠣᠷ ᠪᠦᠰᠡᠭᠦᠢ ᠨᠢ ᠲᠤᠬᠠᠯᠠᠨ ᠰᠠᠭᠤᠯᠠ᠃
ᠳᠥᠴᠢᠨ ᠶᠢᠰᠦ ᠶ᠋ᠢᠨ ᠳᠠᠪᠬᠢᠭᠠᠨ ᠳ᠋ᠤ᠌
ᠠᠭᠠᠷ ᠰᠠᠯᠬᠢᠨ ᠢᠰᠬᠡᠷᠦᠨᠡ᠂
ᠲᠦᠳᠡ ᠶ᠋ᠢᠨ ᠵᠠᠮ ᠳᠤᠷᠠᠢᠵᠤ
ᠠᠮᠢᠳᠤ ᠶᠠᠭᠤᠮᠠ ᠰᠢᠭ᠋ ᠮᠤᠰᠬᠢᠷᠠᠨᠠ᠃
ᠳᠡᠯᠭᠡᠴᠡ ᠳᠡᠭᠡᠷᠡᠬᠢ ᠵᠢᠷᠤᠭ ᠲᠤ᠌
ᠳᠡᠩᠳᠡᠭᠦᠦ ᠣᠢᠷᠠᠬᠠᠨ ᠰᠠᠭᠤᠭᠰᠠᠨ ᠰᠢᠭ᠋
ᠵᠠᠮ ᠤ᠋ᠨ ᠬᠠᠵᠠᠭᠤ ᠶ᠋ᠢᠨ ᠶᠠᠭᠤᠮᠠᠰ
ᠵᠠᠮᠪᠠᠷᠠᠭᠠ ᠪᠠᠢᠬᠤ ᠦᠭᠡᠢ ᠵᠢᠷᠢᠯᠵᠡᠨᠡ᠁
4
ᠣᠯᠠᠨ ᠠᠷᠪᠢᠨ ᠲᠣᠰᠬᠣᠨ ᠳ᠋ᠤ᠌
ᠰᠤᠷᠭᠠᠮᠵᠢ ᠪᠣᠯᠤᠨ ᠥᠨᠳᠥᠷᠯᠡᠵᠦ
ᠣᠷᠴᠢᠨ ᠦᠶᠡ ᠶ᠋ᠢᠨ ᠬᠥᠭᠵᠢᠯ ᠦ᠋ᠨ
ᠰᠤᠳᠠᠰᠤ ᠨᠢ ᠪᠣᠯᠤᠨ ᠰᠦᠨᠳᠡᠷᠯᠡᠵᠦ
ᠣᠯᠤᠯᠲᠠ ᠢᠯᠠᠯᠲᠠ ᠶ᠋ᠢᠨ ᠲᠡᠦᠬᠡ ᠪᠡᠨ
ᠰᠤᠳᠤᠷ ᠨᠣᠮ ᠳ᠋ᠤ᠌ ᠪᠢᠴᠢᠭᠦᠯᠦᠭᠰᠡᠨ
ᠣᠷᠣᠨ| ᠤᠯᠤᠰ ᠤ᠋ᠨ ᠨᠡᠢᠰᠯᠡᠯ ᠳ᠋ᠦ᠍
ᠡᠳᠦᠷ ᠳᠤᠮᠳᠠ ᠪᠣᠯᠵᠤ ᠪᠠᠢᠨᠠ᠃
ᠪᠥᠵᠢᠭ ᠦ᠋ᠨ ᠲᠣᠮᠣ ᠬᠦᠷᠢᠶᠡᠯᠡᠩ ᠰᠢᠭ
ᠠᠮᠢᠳᠤᠷᠠᠯ ᠵᠢᠷᠭᠠᠯ ᠪᠤᠵᠢᠭᠢᠨᠠᠭᠰᠠᠨ
ᠪᠦᠬᠦᠯᠢ ᠨᠠᠢᠷᠠᠯ ᠬᠥᠭᠵᠢᠮ ᠰᠢᠭ
ᠠᠵᠢᠯ ᠤ᠋ᠨ ᠳᠠᠭᠤᠯᠠᠯ ᠨᠢᠵᠢᠭᠢᠨᠡᠭᠰᠡᠨ
ᠰᠦᠮᠪᠦᠷ ᠲᠣᠮᠣ ᠪᠠᠷᠢᠯᠭᠠ ᠨᠤᠭᠤᠳ ᠢ᠋ᠶ᠋ᠠᠷ
ᠵᠢᠭᠦᠷ ᠳᠡᠯᠭᠡᠨ ᠲᠣᠷᠨᠢᠭᠰᠠᠨ
ᠰᠦᠷᠯᠢᠭ ᠨᠡᠢᠰᠯᠡᠯ ᠬᠣᠲᠠ ᠶ᠋ᠢᠨ
ᠪᠡᠶᠡ ᠨᠢ ᠠᠯᠤᠰ ᠡᠴᠡ ᠲᠣᠳᠣᠬᠠᠨ᠁
ᠪᠤᠴᠠᠯᠵᠤ ᠪᠠᠢᠭᠠ ᠠᠮᠢᠳᠤᠷᠠᠯ ᠤ᠋ᠨ
ᠰᠡᠳᠬᠢᠯ ᠲᠠᠲᠠᠭᠰᠠᠨ ᠴᠡᠩᠭᠡᠯ ᠳᠤᠮᠳᠠ
ᠪᠤᠯᠠᠭ ᠤᠰᠤᠨ ᠵᠢᠭᠠᠰᠤ ᠰᠢᠭ᠋
ᠰᠡᠯᠢᠨ ᠱᠤᠮᠪᠠᠵᠤ ᠶᠠᠪᠤᠭᠠ
ᠵᠠᠯᠠᠭᠤ᠂ ᠬᠥᠭᠰᠢᠨ ᠬᠥᠮᠦᠰ ᠢ᠋
ᠲᠣᠭᠠᠯᠠᠵᠤ ᠶᠠᠭᠠᠬᠢᠨ ᠪᠠᠷᠠᠬᠤ ᠪᠣᠢ!
ᠵᠠᠮᠪᠠᠭᠠ ᠶ᠋ᠢᠨ ᠦᠶᠡ ᠶ᠋ᠢᠨ ᠬᠡᠦᠬᠡᠨ ᠨᠤᠬᠥᠳ ᠢ᠋
ᠲᠣᠢᠮᠣᠯᠠᠵᠤ ᠶᠠᠭᠠᠬᠢᠨ ᠬᠦᠷᠬᠦ ᠪᠣᠢ!
ᠵᠢᠰᠦᠨ ᠪᠦᠷᠢ ᠶ᠋ᠢᠨ ᠬᠥᠮᠦᠰ
ᠢᠲᠡᠭᠡᠵᠦ ᠡᠨᠳᠡ ᠬᠠᠮᠲᠤᠷᠠᠭᠠᠳ
ᠵᠦᠢᠯ ᠪᠦᠷᠢ ᠶ᠋ᠢᠨ ᠲᠧᠭᠨᠢᠭ
ᠵᠢᠳᠬᠦᠵᠦ ᠨᠢᠵᠢᠭᠢᠨᠡᠵᠦ ᠪᠠᠢᠪᠠᠴᠤ
ᠦᠢ ᠵᠠᠢ ᠦᠭᠡᠢ ᠬᠥᠳᠡᠯᠭᠡᠭᠡᠨ ᠨᠢ
ᠳᠠᠭᠠᠭᠠᠮᠠᠢ ᠲᠠᠢᠪᠤᠭᠤᠨ ᠰᠦᠯᠵᠢᠯᠳᠦᠨᠡ
ᠦᠢᠮᠡᠵᠦ ᠪᠤᠳᠤᠯᠢᠬᠤ ᠶᠣᠰᠣ ᠦᠭᠡᠢ
ᠳᠠᠷᠬᠠᠨ ᠳᠢᠭᠯᠢᠮ ᠨᠣᠶᠠᠷᠬᠠᠨᠠ᠃
ᠳᠠᠷᠬᠠᠨ ᠳᠢᠭᠯᠢᠮ ᠦ᠋ᠨ ᠲᠤᠬᠠᠢ
ᠬᠣᠷᠣᠮ ᠤ᠋ᠨ ᠲᠡᠳᠦᠢ ᠮᠠᠷᠲᠠᠭᠠᠳ
ᠳᠠᠪᠬᠢᠬᠤ ᠬᠤᠷᠳᠤᠨ ᠤ᠋ ᠳᠡᠭᠡᠳᠦ ᠪᠡᠷ
ᠬᠣᠯᠠ ᠡᠴᠡ ᠳᠥᠲᠡᠯᠡᠭᠴᠢ ᠶᠠᠭᠤ ᠪᠣᠢ⁈
ᠴᠠᠯᠮᠠ ᠦᠭᠡᠢ ᠬᠥᠭᠡᠷᠬᠦ ᠰᠡᠳᠬᠢᠯ ᠦ᠋ᠨ
ᠬᠠᠯᠠᠭᠤᠨ ᠪᠦᠬᠦᠨ ᠢ᠋ᠶ᠋ᠡᠷ ᠣᠮᠣᠭᠰᠢᠵᠤ
ᠴᠠᠷᠳᠠᠮᠠᠯ ᠵᠠᠮ ᠤ᠋ᠨ ᠡᠩ ᠢ᠋ᠶ᠋ᠡᠷ
ᠬᠠᠷᠪᠤᠭᠤᠯᠵᠤ ᠶᠠᠪᠤᠭᠠ ᠬᠡᠨ ᠪᠣᠢ?
ᠴᠠᠷᠳᠠᠮᠠᠯ ᠵᠠᠮ ᠤ᠋ᠨ ᠵᠠᠭᠤᠷᠠ ᠳ᠋ᠤ᠌
ᠥᠨᠳᠥᠷ ᠭᠦᠦᠷ ᠪᠠᠷᠠᠭᠠᠯᠠᠨᠠ
ᠴᠠᠭᠠᠨ ᠠᠯᠠᠭ ᠱᠣᠩ ᠨᠤᠭᠤᠳ
ᠥᠩᠭᠡ ᠢᠯᠭᠠᠷᠠᠨ ᠳᠠᠷᠠᠭᠠᠯᠠᠨᠠ
ᠴᠠᠭᠠᠨᠠ ᠨᠠᠭᠠᠨᠠ ᠡᠴᠡ ᠶᠠᠪᠤᠭᠠ
ᠲᠡᠷᠭᠡ ᠨᠦ᠍ᠭᠦᠳ ᠲᠡᠨᠳᠡ ᠵᠥᠷᠢᠯᠡ
ᠴᠠᠪᠴᠢᠬᠤ ᠨᠢᠳᠦᠨ ᠦ᠌ ᠦᠵᠦᠭᠦᠷ ᠡᠴᠡ
ᠲᠡᠮᠳᠡᠭᠷᠡᠵᠦ ᠨᠥᠭᠥᠭᠡᠳᠡᠬᠢ ᠳᠥᠲᠡᠯᠡᠯᠡ᠃
ᠳᠥᠲᠡᠯᠡᠵᠦ ᠶᠠᠪᠤᠭᠠ ᠴᠠᠭ
ᠳᠥᠮᠥᠨ ᠳᠥᠮᠥᠨ ᠲᠣᠳᠣᠷᠠᠵᠤ
ᠳᠥᠷᠪᠡ ᠲᠠᠪᠤᠬᠠᠨ ᠠᠭᠱᠠᠨ ᠳ᠋ᠤ᠌
ᠳᠥᠴᠢᠨ ᠶᠢᠰᠦ ᠲᠠᠨᠢᠭᠳᠠᠵᠤ
ᠲᠣᠮᠣᠭᠠ ᠰᠠᠭᠤᠭᠠ ᠦᠭᠡᠢ ᠬᠡᠦᠬᠡᠳ ᠦ᠋ᠨ
ᠰᠢᠳᠡᠵᠦ ᠣᠷᠬᠢᠭᠰᠠᠨ ᠴᠢᠯᠠᠭᠤ ᠰᠢᠭ᠋
ᠲᠣᠭᠠᠴᠢᠵᠤ ᠪᠣᠳᠣᠬᠤ ᠵᠠᠪ ᠦᠭᠡᠢ
ᠬᠦᠷᠦᠭᠡᠳ ᠢᠷᠡᠯᠡ᠂ ᠶᠠᠭᠠᠬᠢᠨᠠ ᠪᠣᠢ⁈
ᠨᠡᠢᠰᠯᠡᠯ ᠣᠷᠣᠬᠤ ᠶ᠋ᠢᠨ ᠡᠮᠦᠨᠡ ᠭᠡᠵᠦ
ᠬᠤᠨᠳᠠᠭᠠ ᠬᠡᠳᠦ ᠶ᠋ᠢ ᠡᠷᠭᠦᠭᠰᠡᠨ
ᠨᠡᠯᠢᠶᠡᠳ ᠬᠥᠮᠦᠨ ᠲᠡᠢ ᠮᠠᠰᠢᠨ ᠢ᠋
ᠬᠤᠷᠳᠤ ᠬᠤᠪᠢᠶᠠᠵᠤ ᠲᠡᠷᠢᠭᠦᠯᠡᠭᠰᠡᠨ
ᠵᠠᠯᠠᠭᠤ ᠡᠷᠡ ᠢᠩᠭᠢᠵᠦ
ᠰᠡᠩᠳᠡ ᠮᠡᠩᠳᠡ ᠳᠠᠪᠬᠢᠭᠤᠯᠪᠠ
ᠵᠠᠮ ᠤ᠋ᠨ ᠴᠠᠭᠳᠠᠭᠠ ᠱᠦᠭᠯᠦᠳᠡᠪᠡᠴᠦ
ᠰᠠᠯᠬᠢ ᠲᠠᠲᠠᠭᠤᠯᠤᠨ ᠥᠩᠭᠡᠷᠡᠪᠡ····
ᠬᠤᠷᠳᠤ ᠬᠡᠮᠵᠢᠬᠦ ᠵᠡᠭᠦᠦ ᠨᠢ
ᠶᠡᠷᠡ ᠶ᠋ᠢᠨ ᠲᠣᠭᠠ ᠶ᠋ᠢ ᠮᠥᠷᠭᠥᠨᠡ᠂
ᠬᠠᠭᠤᠷᠠᠢ ᠬᠠᠯᠠᠭᠤᠨ ᠰᠠᠯᠬᠢ
ᠶᠡᠷᠦ ᠶ᠋ᠢᠨ ᠪᠢᠰᠢ ᠪᠡᠷ ᠰᠥᠷᠭᠡᠨᠡ᠁
ᠲᠡᠷᠭᠡ ᠵᠥᠷᠢᠭᠡᠳ ᠵᠠᠢ ᠦᠭᠡᠢ
ᠭᠦᠦᠷ ᠭᠡᠨᠡᠳᠲᠡ ᠲᠤᠯᠭᠠᠷᠠᠪᠠ᠁
ᠲᠡᠮᠳᠡᠭ ᠱᠣᠩ ᠤ᠋ᠨ ᠳᠦᠷᠰᠦ
ᠭᠦᠢᠴᠡᠳ ᠪᠢᠰᠢ ᠢᠯᠭᠠᠷᠠᠪᠠ᠁
ᠠᠯᠠᠭ ᠱᠣᠩ ᠢ᠋ ᠮᠥᠷᠭᠥᠭᠡᠳ
ᠲᠡᠷᠲᠡᠭᠡ ᠳᠡᠭᠡᠷᠡ ᠣᠢᠬᠤ ᠳ᠋ᠠᠭᠠᠨ
ᠠᠭᠰᠤᠮ ᠬᠤᠷᠳᠤᠨ ᠤᠨᠤᠭᠠ ᠨᠢ
ᠲᠡᠩᠬᠡᠭᠡ ᠮᠡᠳᠡᠨ ᠣᠷᠢᠯᠠᠪᠠ····
ᠤᠯᠠᠭᠠᠨ ᠠᠯᠴᠢᠭᠤᠷ ᠲᠠᠢ ᠬᠥᠮᠦᠨ
ᠣᠷᠣᠭᠰᠢ ᠬᠠᠷᠪᠤᠨ ᠨᠢᠰᠴᠦ
ᠬᠠᠰᠢᠯᠭᠠ ᠮᠣᠳᠣ ᠶ᠋ᠢ ᠮᠥᠷᠭᠥᠭᠡᠳ
ᠬᠠᠵᠠᠭᠤ ᠲᠡᠢᠰᠢ ᠤᠨᠠᠯᠠ····
※※※
ᠳᠥᠴᠢᠨ ᠶᠢᠰᠦ ᠶ᠋ᠢᠨ ᠳᠠᠭᠤ
ᠣᠷᠢᠯᠠᠵᠤ ᠳᠠᠭᠤᠰᠤᠭᠠ ᠦᠭᠡᠢ ᠪᠠᠢᠬᠤ ᠳ᠋ᠤ᠌
ᠲᠥᠯᠥᠭᠰᠡᠨ ᠴᠡᠩᠬᠡᠷ ᠤᠲᠤᠭᠠ ᠨᠢ
ᠠᠷᠢᠯᠵᠤ ᠭᠦᠢᠴᠡᠭᠡ ᠦᠭᠡᠢ ᠪᠠᠢᠬᠤ ᠳ᠋ᠤ᠌
ᠠᠶᠤᠯ ᠣᠰᠣᠯ ᠢ᠋ ᠬᠠᠷᠠᠭᠠᠳ
ᠠᠯᠠᠭ ᠨᠢᠳᠦ ᠨᠢ ᠲᠣᠮᠣᠷᠠᠵᠤ
ᠠᠶᠤᠭᠰᠠᠨ᠂ ᠶᠠᠭᠠᠷᠠᠭᠰᠠᠨ ᠬᠥᠮᠦᠰ
ᠠᠮᠵᠢᠵᠤ ᠲᠡᠨᠳᠡ ᠴᠤᠭᠯᠠᠷᠠᠯᠠ᠁
ᠬᠠᠮᠤᠭ ᠤ᠋ᠨ ᠨᠠᠭᠠᠨᠠ ᠨᠢ᠂ ᠤᠨᠤᠭᠠ ᠨᠢ
ᠡᠪᠳᠡᠷᠡᠵᠦ ᠭᠦᠢᠴᠡᠭᠡᠳ ᠬᠡᠪᠲᠡᠨᠡ᠂
ᠬᠠᠢᠷᠴᠠᠭ ᠲᠠᠢ ᠪᠣᠳᠣᠭ ᠤ᠋ᠨ ᠳᠡᠭᠡᠷᠡ ᠡᠴᠡ
ᠡᠷᠡᠭᠲᠡᠢ ᠬᠥᠮᠦᠨ ᠥᠨᠳᠡᠢᠨᠡ᠃
ᠴᠠᠭᠠᠨᠠ ᠨᠢ ᠰᠤᠨᠤᠭᠠᠳ ᠣᠢᠴᠢᠭᠰᠠᠨ
ᠵᠠᠯᠠᠭᠤ ᠪᠦᠰᠡᠭᠦᠢ ᠪᠠᠢᠮᠠᠷ᠂
ᠴᠠᠭᠠᠨ ᠣᠢᠮᠣᠰᠤ ᠶ᠋ᠢ ᠨᠢ ᠬᠠᠷᠠᠪᠠᠯ
ᠵᠠᠮᠪᠠᠭᠠ ᠬᠡᠦᠬᠡᠨ ᠭᠡᠮᠡᠷ᠁
※※※
ᠦᠢᠮᠡᠭᠡᠨ ᠶᠡᠬᠡᠲᠡᠢ ᠵᠠᠮ ᠳᠡᠭᠡᠷᠡ
ᠦᠩᠭᠡᠵᠦ ᠬᠠᠶᠠᠭᠰᠠᠨ ᠴᠡᠴᠡᠭ ᠰᠢᠭ᠋
ᠦᠵᠡᠮᠵᠢᠲᠦ ᠲᠡᠭᠦᠨ ᠦ᠌ ᠪᠡᠶᠡ
ᠦᠷᠴᠢᠢᠨ ᠬᠣᠷᠴᠢᠢᠨ ᠠᠲᠤᠷᠢᠨᠠ᠂
ᠴᠢᠭᠢᠷᠠᠭ ᠤᠯᠠᠭᠠᠨ ᠤᠷᠤᠭᠤᠯ ᠨᠢ
ᠴᠡᠴᠡᠷᠡᠬᠦ ᠴᠦ᠍ ᠦᠭᠡᠢ ᠤᠨᠵᠢᠢᠨᠠ
ᠴᠢᠭᠢᠭᠲᠡᠢ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥᠨ ᠳ᠋ᠦ᠍
ᠠᠷᠢᠭᠤᠨ ᠴᠢᠰᠤ ᠨᠢ ᠳᠤᠰᠤᠯᠠᠨᠠ᠁
ᠬᠥᠲᠥᠯᠦᠭᠴᠢ ᠶ᠋ᠢᠨ ᠪᠠᠢᠷᠢᠨ ᠳ᠋ᠤ᠌ ᠰᠠᠶᠢᠬᠠᠨ ᠯᠠ
ᠠᠭᠤᠯᠠ ᠶ᠋ᠢᠨ ᠰᠤᠭᠤ ᠰᠢᠭ᠋ ᠵᠣᠭᠰᠣᠵᠤ
ᠬᠥᠭᠵᠢᠮ ᠦ᠋ᠨ ᠨᠠᠢᠷᠠᠯ ᠢ᠋ ᠥᠪᠡᠷ ᠦ᠋ᠨ
ᠤᠶᠠᠬᠠᠨ ᠭᠠᠷ ᠢ᠋ᠶ᠋ᠠᠷ ᠵᠢᠯᠣᠭᠣᠳᠴᠤ
ᠬᠥᠨᠳᠡᠯᠡᠨ ᠦ᠌ ᠨᠠᠳᠠᠳᠤ ᠴᠤ᠌ ᠲᠠᠭᠠᠯᠠᠭᠳᠠᠭᠰᠠᠨ
ᠬᠥᠭᠡᠷᠦᠬᠦᠢ ᠬᠣᠩᠭᠣᠷ ᠪᠦᠰᠡᠭᠦᠢ
ᠬᠥᠷᠥᠰᠥᠲᠦ ᠭᠠᠵᠠᠷ ᠢ᠋ ᠴᠢᠮᠡᠬᠦ ᠪᠡᠷ
ᠬᠥᠭᠵᠢᠯᠲᠦ ᠶᠢᠷᠲᠢᠨᠴᠦ ᠶ᠋ᠢ ᠣᠷᠬᠢᠪᠠ ᠤᠤ?