ᠵᠠᠯᠠᠭᠤ ᠨᠠᠰᠤ01-ᠷ ∙ ᠴᠣᠢᠨᠣᠮ-ᠨᠠᠢᠷᠠᠭᠯᠠᠯЗалуу нас-Р.Чойном Zaluu nas-R.Choinom
1795ᠵᠠᠯᠠᠭᠤ ᠨᠠᠰᠤ
ᠷ᠂ ᠴᠤᠢᠨᠥᠮ
ᠣᠷᠣᠰᠢᠯ ᠤ᠋ᠨ ᠣᠷᠣᠨ ᠳ᠋ᠤ᠌
ᠬᠠᠵᠠᠭᠠᠷ ᠦᠭᠡᠢ ᠲᠡᠮᠡᠦᠯᠬᠦ
ᠠᠭᠰᠤᠮ ᠮᠣᠷᠢᠨ ᠤ᠋ ᠳᠠᠪᠬᠢᠭᠠ ᠰᠢᠭ᠋
ᠬᠠᠭᠠᠯᠲᠠ ᠦᠭᠡᠢ ᠴᠡᠯᠡᠯᠵᠡᠬᠦ
ᠳᠣᠭᠰᠢᠨ ᠮᠥᠷᠡᠨ ᠦ᠌ ᠳᠣᠯᠭᠢᠶᠠ ᠰᠢᠭ᠋
ᠣᠯᠳᠠᠬᠤ ᠠᠯᠳᠠᠬᠤ ᠳ᠋ᠤ᠌ ᠠᠮᠠᠷᠬᠠᠨ
ᠵᠠᠯᠠᠭᠤ ᠨᠠᠰᠤᠨ ᠤ᠋ ᠲᠤᠬᠠᠢ
ᠣᠷᠣᠰᠢᠯ ᠮᠣᠷᠣᠰᠢᠯ ᠭᠡᠯ ᠦᠭᠡᠢ
ᠵᠠᠯᠭᠠᠭᠤᠯᠵᠤ ᠣᠳᠣ ᠪᠢᠴᠢᠶᠡ᠃
ᠵᠠᠯᠭᠠᠭᠤᠯᠵᠤ ᠪᠢᠴᠢᠬᠦ ᠦᠭᠡᠰ ᠦ᠋ᠨ ᠮᠢᠨᠢ
ᠥᠷᠭᠡᠨ ᠡᠩᠨᠡᠭᠡᠨ ᠳᠣᠲᠣᠭᠤᠷ
ᠵᠠᠷᠢᠮᠳᠤᠭ ᠨᠢᠭᠡᠨ ᠰᠡᠳᠬᠢᠯ ᠦ᠋ᠨ
ᠥᠨᠢ ᠶ᠋ᠢᠨ ᠬᠦᠰᠡᠯᠡᠩ ᠨᠢᠭᠤᠭᠳᠠᠵᠤ
《ᠠᠷᠠᠪ 》ᠥᠬᠢᠨ ᠦ᠌ ᠬᠥᠷᠥᠭ ᠰᠢᠭ
ᠲᠣᠷᠮᠣᠭᠣᠷ ᠨᠢᠳᠦ ᠲᠡᠢ ᠪᠦᠰᠡᠭᠦᠢ ᠶ᠋ᠢᠨ
ᠠᠯᠠᠭ ᠵᠢᠷᠦᠬᠡᠨ ᠦ᠌ ᠲᠣᠯᠲᠣ ᠳ᠋ᠤ᠌
ᠲᠣᠭᠲᠠᠵᠤ ᠦᠯᠡᠳᠡᠬᠦ ᠪᠣᠯᠲᠤᠭᠠᠢ !
ᠡᠬᠢᠯᠡᠯ
ᠣᠳᠣ ᠰᠠᠷᠠ ᠪᠠᠷ ᠰᠢᠭᠢᠳᠬᠡᠭᠡ ᠲᠠᠯᠪᠢᠭᠰᠠᠨ
ᠣᠭ᠌ᠶᠤ ᠲᠣᠷᠭᠠᠨ ᠨᠥᠮᠥᠷᠭᠡ ᠠᠳᠠᠯᠢ
ᠣᠷᠴᠢᠯᠠᠩ ᠬᠡᠭᠡᠨᠴᠢᠷ ᠰᠥᠨᠢ ᠶ᠋ᠢᠨ ᠲᠩᠷᠢ
ᠣᠭᠲᠣ ᠶ᠋ᠢᠨ ᠴᠢᠮᠡᠭᠡ ᠦᠭᠡᠢ ᠴᠡᠯᠡᠢᠵᠦ ᠪᠠᠢᠬᠤ ᠳ᠋ᠤ᠌
ᠣᠯᠤᠯᠲᠠ ᠪᠦᠲᠦᠭᠡᠯ᠂ ᠢᠷᠠᠭᠤ ᠠᠯᠳᠠᠷ ᠤ᠋ᠨ
ᠣᠢᠷᠠ ᠶ᠋ᠢᠨ ᠨᠢᠭᠡᠨ ᠵᠢᠱ᠌ᠢᠶᠡ ᠪᠣᠯᠤᠭᠰᠠᠨ
ᠣᠷᠴᠢᠨ ᠦᠶᠡ ᠶ᠋ᠢᠨ ᠰᠢᠨᠡᠬᠡᠨ ᠲᠣᠰᠬᠣᠨ
ᠣᠮᠣᠭ ᠪᠠᠷᠳᠠᠮ ᠨᠣᠢᠷᠰᠤᠵᠤ ᠪᠠᠢᠨᠠ᠃
ᠲᠣᠰᠬᠣᠨ ᠲᠡᠭᠦᠨ ᠦ᠌ ᠡᠷᠭᠢᠨ ᠲᠣᠭᠣᠷᠢᠨ ᠳ᠋ᠤ᠌
ᠬᠥᠪᠴᠢᠲᠦ ᠠᠭᠤᠯᠠᠰ ᠶᠡᠬᠡᠮᠰᠦᠭ ᠢ᠋ᠶ᠋ᠡᠷ ᠵᠣᠭᠰᠣᠵᠤ᠂
ᠲᠣᠣᠷᠠᠢ ᠮᠣᠳᠣ ᠲᠠᠢ ᠭᠦᠨᠵᠡᠭᠡᠢ ᠬᠠᠪᠴᠢᠯ ᠡᠴᠡ
ᠨᠠᠷᠢᠨ ᠭᠣᠣᠯ ᠡᠷᠬᠢᠮᠰᠦᠭ ᠢ᠋ᠶ᠋ᠡᠷ ᠤᠷᠤᠰᠤᠨᠠᠮ᠃
ᠵᠤᠨ ᠤ᠋ ᠣᠷᠣᠢ᠂ ᠭᠣᠣᠯ ᠤ᠋ᠨ ᠵᠠᠬᠠ ᠡᠴᠡ
ᠵᠤᠯᠵᠠᠭᠠ ᠨᠣᠭᠣᠭᠠᠨ ᠪᠤᠷᠭᠠᠰᠤ ᠳᠤᠮᠳᠠ ᠡᠴᠡ
ᠰᠠᠨᠠᠭᠠ ᠰᠡᠳᠬᠢᠯ ᠳ᠋ᠦ᠍ ᠡᠭᠦᠷᠢᠳᠡ ᠰᠢᠩᠭᠡᠮᠡᠷ
ᠰᠠᠢᠬᠠᠨ ᠳᠠᠭᠤᠯᠠᠯ ᠬᠠᠩᠭᠢᠨᠠᠵᠤ ᠪᠠᠢᠳᠠᠭ᠃
ᠵᠠᠯᠠᠭᠤ ᠡᠷᠡ ᠶ᠋ᠢᠨ ᠴᠢᠭᠢᠷᠠᠭ ᠴᠡᠭᠡᠵᠢᠨ ᠡᠴᠡ
ᠵᠠᠯᠭᠠᠨ ᠵᠠᠯᠭᠠᠨ ᠬᠠᠩᠭᠢᠨᠠᠬᠤ ᠳᠠᠭᠤ ᠨᠢ
ᠵᠠᠬᠠ ᠳ᠋ᠤ᠌ ᠪᠠᠢᠭᠠ ᠪᠠᠢᠰᠢᠩ ᠤ᠋ᠨ ᠴᠣᠩᠬᠣ ᠪᠠᠷ
ᠵᠠᠪᠰᠢᠶᠠᠨ ᠣᠯᠵᠤ ᠰᠣᠨᠣᠰᠳᠠᠬᠤ ᠶ᠋ᠢᠨ ᠴᠠᠭ ᠲᠤ᠌
ᠳᠠᠭᠤᠯᠠᠨ ᠰᠠᠭᠤᠭᠠ ᠲᠡᠭᠰᠢ ᠬᠦᠦ ᠶ᠋ᠢᠨ
ᠳᠤᠷᠠ ᠰᠡᠳᠬᠢᠯ ᠪᠠᠶᠠᠰᠬᠤ ᠶ᠋ᠢᠨ ᠠᠳᠠᠯᠢ
ᠲᠣᠭᠣᠷᠢᠭ ᠰᠠᠷᠠᠨ ᠤ᠋ ᠮᠥᠩᠭᠥᠨ ᠲᠤᠶᠠᠭᠠ
ᠳᠤᠯᠠᠭᠠᠬᠠᠨ ᠰᠥᠨᠢ ᠶ᠋ᠢ ᠮᠢᠯᠢᠶᠠᠨ ᠴᠢᠮᠡᠨᠡ᠃
ᠡᠬᠡ ᠨᠤᠲᠤᠭ ᠤ᠋ᠨ ᠡᠢᠮᠦ ᠰᠥᠨᠢ ᠶ᠋ᠢ
ᠡᠨᠳᠡ ᠪᠣᠯᠤᠭᠰᠠᠨ ᠲᠡᠢᠮᠦ ᠪᠠᠢᠳᠠᠯ ᠢ᠋
ᠳᠤᠯᠢᠮᠠᠭ ᠪᠣᠯᠪᠠᠴᠤ ᠭᠠᠷᠭᠠᠶᠠ ᠭᠡᠵᠦ
ᠳᠠᠭᠤᠯᠠᠯ ᠰᠢᠯᠦᠭ ᠢ᠋ᠶ᠋ᠡᠨ ᠢᠩᠭᠢᠵᠦ ᠡᠬᠢᠯᠡᠪᠡ᠃
ᠨᠢᠭᠡᠳᠦᠭᠡᠷ ᠪᠦᠯᠦᠭ
1
ᠵᠠᠬᠠ ᠶ᠋ᠢᠨ ᠲᠡᠷᠡ ᠨᠢᠭᠡ ᠪᠠᠢᠰᠢᠩ ᠳᠣᠲᠣᠷᠠ
ᠵᠠᠰᠠᠭᠰᠠᠨ ᠣᠷᠣ ᠶ᠋ᠢᠨ ᠢ᠋ᠶ᠋ᠡᠨ ᠲᠣᠯᠣᠭᠠᠢ ᠲᠤᠰᠢᠶᠠ
ᠵᠠᠮᠪᠠᠭᠠ ᠬᠡᠦᠬᠡᠨ ᠴᠣᠩᠬᠣ ᠪᠠᠨ ᠲᠦᠰᠢᠭᠡᠳ
ᠵᠠᠬᠢᠳᠠᠯ ᠪᠢᠴᠢᠭ ᠲᠡᠨᠢᠢᠯᠭᠡᠵᠦ ᠪᠠᠢᠨᠠ᠃
ᠴᠠᠬᠢᠯᠭᠠᠨ ᠳ᠋ᠧᠩ ᠦ᠋ᠨ ᠴᠠᠢᠪᠤᠷ ᠭᠡᠷᠡᠯ
ᠠᠭᠤᠵᠢᠮ ᠳᠤᠬᠤ ᠶ᠋ᠢ ᠨᠢ ᠰᠡᠭᠦᠳᠡᠷᠲᠦᠭᠦᠯᠵᠦ
ᠴᠠᠭᠯᠠᠰᠢ ᠦᠭᠡᠢ ᠦᠵᠡᠮᠵᠢ ᠶ᠋ᠢᠨ ᠣᠮᠣᠭ ᠰᠤᠤ ᠪᠠᠷ
ᠤᠶᠠᠬᠠᠨ ᠪᠦᠰᠡᠭᠦᠢ ᠶ᠋ᠢ ᠴᠢᠮᠡᠨ ᠭᠡᠢᠭᠦᠯᠵᠦ
ᠡᠷᠡ ᠬᠥᠮᠦᠨ ᠦ᠌ ᠴᠢᠭᠢᠷᠠᠭ ᠭᠠᠷ ᠢ᠋ᠶ᠋ᠠᠷ
ᠡᠪᠯᠢᠭ ᠬᠣᠯᠪᠣᠭᠰᠠᠨ ᠵᠢᠵᠢᠭ ᠦᠰᠦᠭ ᠦ᠋ᠳ
ᠡᠬᠢᠨ ᠦ᠌ ᠳᠤᠷᠠᠯᠠᠯ ᠤ᠋ᠨ ᠨᠠᠷᠢᠨ ᠨᠢᠭᠤᠴᠠ ᠪᠠᠷ
ᠡᠨᠡ ᠪᠦᠰᠡᠭᠦᠢ ᠶ᠋ᠢ ᠵᠠᠷᠯᠠᠨ ᠳᠠᠭᠤᠳᠠᠪᠠ᠁
ᠬᠡᠦᠬᠡᠨ ᠬᠥᠮᠦᠨ ᠦ᠌ ᠰᠣᠳᠣᠨ ᠠᠮᠢᠳᠤᠷᠠᠯ
ᠬᠦᠰᠡᠯᠡᠩ ᠬᠠᠢᠷᠠ ᠶ᠋ᠢᠨ ᠰᠣᠨᠢᠨ ᠶᠠᠪᠤᠳᠠᠯ
ᠵᠠᠷᠢᠮ ᠪᠦᠰᠡᠭᠦᠢ ᠳ᠋ᠦ᠍ ᠢᠩᠭᠢᠵᠦ ᠢᠷᠡᠳᠡᠭ ᠶᠤᠮ᠂
ᠵᠠᠮᠪᠠᠭᠠ ᠲᠡᠭᠦᠨ ᠢ᠋ ᠣᠳᠣ ᠯᠠ ᠠᠮᠰᠠᠵᠠᠢ᠃
ᠬᠥᠭᠵᠢᠮ ᠳᠠᠭᠤᠤ ᠶ᠋ᠢᠨ ᠰᠤᠷᠭᠠᠭᠤᠯᠢ ᠲᠡᠭᠦᠰᠴᠦ
ᠬᠥᠳᠡᠭᠡ ᠲᠣᠰᠬᠣᠨ ᠳ᠋ᠤ᠌ ᠰᠠᠶᠢᠬᠠᠨ ᠢᠷᠡᠭᠰᠡᠨ
ᠵᠢᠭᠠᠯ ᠪᠦᠰᠡᠭᠦᠢ ᠶ᠋ᠢᠨ ᠶᠡᠷᠦ ᠶ᠋ᠢᠨ ᠨᠠᠮᠲᠠᠷ ᠡᠴᠡ
ᠵᠠᠬᠠ ᠵᠤᠬᠠ ᠶ᠋ᠢ ᠨᠢ ᠶᠡᠷᠦᠩᠬᠡᠢᠯᠡᠵᠦ ᠳᠤᠷᠠᠳᠤᠶᠠ᠃
ᠠᠷᠪᠠ ᠶᠢᠰᠦᠨ ᠵᠢᠯ ᠦ᠋ᠨ ᠡᠮᠦᠨᠡ
ᠠᠷᠤ| ᠤᠰᠤᠨ ᠤ᠋ ᠳᠡᠷᠡᠰᠦᠨ ᠳᠤᠮᠳᠠ
ᠠᠳᠤᠭᠤᠴᠢᠨ ᠤ᠋ ᠭᠡᠷ ᠲᠦ᠍᠂ ᠬᠠᠪᠤᠷ ᠤ᠋ᠨ ᠴᠠᠭ ᠲᠤ᠌
ᠠᠳᠠᠭ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠭᠤᠷᠪᠠᠨ ᠳ᠋ᠤ᠌
ᠡᠨᠡ ᠬᠡᠦᠬᠡᠨ ᠲᠥᠷᠥᠭᠰᠡᠨ ᠪᠠᠢᠵᠠᠢ
ᠡᠩᠬᠡ ᠠᠮᠤᠷ ᠲᠣᠷᠨᠢᠭᠰᠠᠨ ᠪᠠᠢᠵᠠᠢ
ᠡᠯᠳᠡᠪ ᠵᠠᠩ ᠦᠭᠡᠢ᠂ ᠪᠦᠷᠦᠭ ᠨᠣᠮᠣᠢ
ᠡᠭᠡᠯ ᠨᠢᠭᠡᠨ ᠥᠬᠢᠨ ᠪᠠᠢᠵᠠᠢ᠃
ᠵᠢᠯᠠᠭᠠ ᠶ᠋ᠢᠨ ᠳᠤᠮᠳᠠᠬᠢ ᠴᠡᠴᠡᠭ ᠦ᠋ᠨ ᠠᠳᠠᠯᠢ
ᠵᠢᠭᠠᠬᠠᠨ ᠲᠡᠭᠦᠨ ᠦ᠌ ᠪᠠᠭᠠ ᠶ᠋ᠢᠨ ᠨᠠᠮᠲᠠᠷ
ᠪᠤᠷᠭᠠᠰᠤ ᠤᠨᠤᠨ ᠬᠤᠷᠠᠭᠠ ᠬᠠᠷᠢᠭᠤᠯᠵᠤ
ᠪᠤᠰᠤᠳ ᠤ᠋ᠨ ᠠᠳᠠᠯᠢ ᠥᠩᠬᠥᠷᠢᠵᠦ ᠪᠠᠢᠭᠰᠠᠨ ᠴᠤ᠌
ᠬᠤᠭᠤᠷ ᠬᠥᠭᠵᠢᠮ ᠬᠤᠯᠤᠰᠤᠨ ᠯᠢᠮᠪᠦ
ᠬᠠᠭᠤᠴᠢᠨ ᠴᠠᠭ ᠤ᠋ᠨ ᠤᠷᠲᠤ ᠶ᠋ᠢᠨ ᠳᠠᠭᠤᠤ ᠶ᠋ᠢ
ᠪᠣᠷᠣᠬᠠᠨ ᠡᠪᠦᠳᠦᠭ ᠢ᠋ᠶ᠋ᠡᠨ ᠲᠡᠪᠡᠷᠢᠩᠭᠡᠨ ᠰᠠᠭᠤᠵᠤ
ᠪᠣᠳᠣᠯ ᠪᠣᠳᠣᠨ ᠴᠢᠩᠨᠠᠳᠠᠭ ᠪᠠᠢᠵᠠᠢ᠃
ᠵᠢᠯ ᠰᠠᠷᠠ ᠶ᠋ᠢᠨ ᠤᠯᠠᠷᠢᠬᠤ ᠤᠷᠤᠰᠬᠠᠯ ᠳ᠋ᠤ᠌
ᠵᠢᠭᠳᠡᠬᠡᠨ ᠤᠷᠭᠤᠬᠤ ᠵᠤᠯᠵᠠᠭᠠᠨ ᠬᠤᠰᠤ ᠰᠢᠭ᠋
ᠵᠢᠵᠢᠭᠬᠡᠨ ᠵᠠᠮᠪᠠᠭᠠ ᠦᠰᠦᠨ ᠥᠨᠳᠡᠢᠵᠦ
ᠵᠢᠷ ᠦ᠋ᠨ ᠪᠣᠯᠪᠠᠴᠤ ᠭᠣᠢᠳᠠ ᠲᠣᠷᠨᠢᠵᠠᠢ᠃
ᠰᠤᠷᠭᠠᠭᠤᠯᠢ ᠶ᠋ᠢᠨ ᠲᠠᠩᠬᠢᠮ᠂ ᠳᠣᠯᠣᠭᠠ ᠬᠣᠨᠣᠭ ᠤ᠋ᠳ᠂
ᠰᠤᠷᠤᠭᠴᠢ ᠶ᠋ᠢᠨ ᠰᠢᠷᠡᠭᠡ᠂ ᠤᠯᠤᠰ ᠤ᠋ᠨ ᠰᠢᠯᠭᠠᠯᠲᠠ᠂
ᠤᠳᠠᠭᠠ ᠳᠠᠷᠠᠭᠠ ᠶ᠋ᠢᠨ ᠪᠠᠭᠰᠢ ᠨᠠᠷ ᠤ᠋ᠨ ᠢ᠋ᠶ᠋ᠠᠨ ᠲᠤᠬᠠᠢ
ᠤᠶᠠᠬᠠᠨ ᠳᠤᠷᠠᠳᠬᠠᠯ ᠢ᠋ᠶ᠋ᠠᠷ ᠰᠡᠳᠬᠢᠯ ᠳᠦᠭᠦᠷᠡᠩ᠂
ᠳᠠᠮ ᠴᠤᠤᠷᠬᠠᠯ᠂ ᠨᠥᠬᠥᠳ ᠦ᠋ᠨ ᠵᠢᠮᠡᠯᠡᠯ
ᠳᠠᠭᠠᠵᠢᠩ ᠲᠣᠬᠣᠭᠤ᠂ ᠳᠠᠯᠳᠠ ᠶ᠋ᠢᠨ ᠬᠦᠰᠡᠯᠡᠩ
ᠡᠨᠡ ᠪᠦᠬᠦᠨ ᠢ᠋ ᠲᠡᠭᠡᠲᠡᠯᠡ ᠪᠡᠨ ᠰᠣᠨᠣᠰᠤᠯ ᠦᠭᠡᠢ
ᠡᠩᠬᠡ ᠲᠤᠩᠬᠠ ᠶ᠋ᠢᠨ ᠵᠢᠷᠭᠠᠯ ᠢ᠋ᠶ᠋ᠠᠷ ᠥᠰᠦᠭᠰᠡᠨ
ᠠᠶᠠᠳᠠᠭᠤ ᠬᠡᠯᠡᠬᠦ ᠳ᠋ᠦ᠍ ᠰᠤᠭᠤ ᠠᠳᠠᠯᠢ
ᠠᠬᠢᠭᠤᠯᠵᠤ ᠮᠠᠭᠲᠠᠬᠤ ᠳ᠋ᠤ᠌ ᠰᠣᠯᠣᠩᠭᠠ ᠠᠳᠠᠯᠢ
ᠢᠳᠡᠷ ᠪᠠᠭᠠ ᠶ᠋ᠢᠨ ᠵᠢᠪᠬᠤᠯᠠᠩ ᠪᠦᠷᠢᠳᠦᠭᠰᠡᠨ
ᠡᠢᠮᠦ ᠯᠡ ᠨᠢᠭᠡ ᠪᠦᠰᠡᠭᠦᠢ ᠳᠡ᠂ ᠵᠠᠮᠪᠠᠭᠠ!
ᠪᠠᠭᠠᠬᠠᠨ ᠵᠠᠬᠢᠳᠠᠯ ᠢ᠋ᠶ᠋ᠠᠨ ᠤᠩᠰᠢᠵᠤ ᠳᠠᠭᠤᠰᠤᠯᠠ
ᠪᠠᠷᠢᠭᠰᠠᠨ ᠬᠡᠪ ᠢ᠋ᠶ᠋ᠡᠷ ᠤᠳᠠᠲᠠᠯᠠ ᠵᠣᠭᠰᠣᠯᠠ
ᠪᠠᠷᠠᠭᠠᠨ ᠨᠢᠳᠦ ᠪᠡᠨ ᠴᠠᠪᠴᠢᠯᠠᠨ ᠪᠣᠳᠣᠯᠠ
ᠪᠠᠶᠠᠷ ᠲᠦᠭᠰᠢᠭᠦᠷᠢ ᠵᠡᠷᠭᠡᠴᠡᠨ ᠲᠥᠷᠥᠯᠡ!᠁
ᠰᠠᠯᠬᠢᠪᠴᠢ ᠴᠣᠩᠬᠣ ᠪᠠᠷ ᠬᠣᠯᠠ ᠶ᠋ᠢᠨ ᠣᠳᠣᠳ
ᠰᠠᠢᠨ ᠢ᠋ ᠢᠷᠥᠭᠡᠬᠦ ᠰᠢᠭ ᠰᠡᠮᠬᠡᠨ ᠢᠷᠮᠡᠨᠡ᠂
ᠰᠠᠷᠠ ᠲᠠᠢ ᠰᠥᠨᠢ ᠶ᠋ᠢᠨ ᠪᠦᠯᠢᠶᠡᠨ ᠠᠮᠢᠰᠬᠤᠯ
ᠰᠠᠨᠠᠭᠠ ᠠᠯᠳᠠᠬᠤ ᠰᠢᠭ᠋ ᠲᠡᠭᠦᠨ ᠢ᠋ ᠢᠯᠪᠢᠨᠡ᠃
ᠲᠡᠷᠡ ᠪᠢᠴᠢᠭ ᠢ᠋ ᠵᠠᠮᠪᠠᠭᠠ ᠳ᠋ᠤ᠌ ᠵᠣᠷᠢᠭᠤᠯᠵᠤ
ᠲᠡᠮᠡᠦᠯᠬᠦ ᠰᠡᠳᠬᠢᠯ ᠢ᠋ᠶ᠋ᠡᠨ ᠴᠤᠬᠤᠰ ᠳᠤᠷᠠᠳᠴᠤ
ᠲᠡᠪᠡᠳᠡᠭᠦᠦ ᠲᠦᠷᠭᠡᠨ ᠬᠡᠳᠦᠬᠡᠨ ᠦᠭᠡ ᠪᠡᠷ
ᠲᠡᠭᠰᠢ ᠬᠦᠦ ᠪᠢᠴᠢᠭᠰᠡᠨ ᠪᠠᠢᠯᠠ᠃
2
ᠦᠨᠡᠨ ᠰᠡᠳᠬᠢᠯ ᠦ᠋ᠨ ᠨᠢᠭᠤᠴᠠᠭᠠᠢ ᠬᠠᠢᠷᠠ ᠪᠠᠨ
ᠦᠢ ᠵᠠᠢ ᠦᠭᠡᠢ ᠵᠣᠷᠢᠭᠤᠯᠵᠤ ᠪᠠᠢᠳᠠᠭ
ᠦᠶᠡᠯᠵᠡᠭᠦᠷ ᠵᠢᠭᠠᠬᠠᠨ ᠭᠣᠣᠯ ᠤ᠋ᠨ ᠡᠷᠭᠢ ᠳ᠋ᠦ᠍
ᠦᠳᠡᠰᠢ ᠶ᠋ᠢᠨ ᠰᠠᠢᠬᠠᠨ ᠳ᠋ᠤ᠌ ᠳᠠᠭᠤᠯᠠᠨ ᠰᠠᠭᠤᠳᠠᠭ
ᠡᠨᠡ ᠵᠠᠯᠠᠭᠤ ᠶ᠋ᠢᠨ ᠨᠠᠮᠲᠠᠷ ᠲᠡᠦᠬᠡ ᠶ᠋ᠢ
ᠵᠠᠮᠪᠠᠭᠠ ᠪᠦᠰᠡᠭᠦᠢ ᠰᠣᠨᠣᠰᠤᠭᠠ ᠴᠤ᠌ ᠦᠭᠡᠢ
ᠡᠯᠦᠢ ᠬᠤᠯᠤᠢ ᠲᠡᠭᠦᠨ ᠦ᠌ ᠥᠷᠥᠭᠡᠨ ᠳ᠋ᠦ᠍
ᠵᠢᠭᠠᠬᠠᠨ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠭᠢᠰᠬᠢᠭᠡ ᠴᠦ᠍ ᠦᠭᠡᠢ᠃
ᠲᠡᠷᠡ ᠪᠠᠢᠲᠤᠭᠠᠢ ᠠᠩᠬᠠᠨ ᠢᠷᠡᠭᠡᠳ
ᠲᠡᠷᠭᠡᠨ ᠳᠡᠭᠡᠷᠡ ᠡᠴᠡ ᠪᠠᠭᠤᠬᠤ ᠮᠥᠷᠲᠡᠭᠡᠨ
ᠲᠡᠪᠡᠳᠡᠨ ᠪᠠᠷᠢᠨ ᠮᠡᠨᠳᠦᠯᠡᠭᠰᠡᠨ ᠬᠥᠮᠦᠨ ᠢ᠋ᠶ᠋ᠡᠨ
ᠲᠡᠭᠰᠢ ᠪᠠᠢᠭᠰᠠᠨ ᠢ᠋ ᠮᠡᠳᠡᠭᠡ ᠴᠦ᠍ ᠦᠭᠡᠢ᠃
ᠬᠣᠨᠣᠭ ᠰᠠᠷᠠ ᠲᠡᠭᠦᠨ ᠡᠴᠡ ᠬᠣᠢᠰᠢ
ᠬᠣᠢᠨᠠ ᠬᠣᠢᠨᠠ ᠡᠴᠡ ᠴᠤᠪᠤᠷᠠᠨ ᠥᠩᠭᠡᠷᠡᠪᠡ᠂
ᠬᠣᠲᠠ ᠪᠢᠰᠢ ᠲᠣᠰᠬᠣᠨ ᠪᠣᠯᠬᠤ ᠪᠠᠷ
ᠬᠣᠶᠠᠷ ᠵᠠᠯᠠᠭᠤ ᠴᠤ᠌ ᠵᠥᠩᠳᠡᠭᠡᠨ ᠠᠭᠤᠯᠵᠠᠪᠠ᠃
ᠵᠡᠷᠭᠡ ᠪᠢᠰᠢ ᠴᠦ᠍ ᠨᠢᠭᠡ ᠶ᠋ᠢᠨ ᠬᠢᠨᠢ ᠨᠢᠳᠦᠨ ᠳ᠋ᠦ᠍
ᠵᠢᠪᠡᠭᠦᠨ ᠰᠢᠷᠲᠡᠯᠲᠡ ᠲᠣᠳᠣᠷᠠᠬᠤ ᠪᠣᠯᠵᠤ᠂
ᠵᠢᠷᠪᠢᠳ ᠪᠣᠯᠪᠠᠴᠤ ᠠᠭᠤᠯᠵᠠᠬᠤ ᠵᠠᠭᠤᠷᠠ ᠪᠠᠨ
ᠵᠡᠬᠡᠭᠰᠡᠨ ᠪᠢᠴᠢᠭ ᠢ᠋ᠶ᠋ᠡᠨ ᠥᠭᠭᠦᠭᠰᠡᠨ ᠪᠠᠢᠵᠠᠢ᠁
ᠤᠷᠢᠨ ᠴᠠᠭ ᠤ᠋ᠨ ᠬᠣᠶᠠᠷᠬᠠᠨ ᠰᠠᠷᠠ ᠳ᠋ᠤ᠌
ᠠᠭᠤᠯᠵᠠᠵᠤ ᠳᠠᠰᠤᠭᠰᠠᠨ ᠲᠡᠦᠬᠡ ᠨᠢ ᠡᠢᠮᠦ
ᠤᠨᠠᠭᠠᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠡᠬᠢᠯᠡᠨ ᠰᠣᠴᠢᠭᠠᠵᠤ
ᠤᠯᠤᠰ ᠡᠴᠡ ᠰᠢᠯᠢᠭᠰᠡᠨ ᠬᠡᠦᠬᠡᠨ ᠨᠢ ᠡᠨᠡ
ᠠᠮᠠᠷᠠᠭ ᠬᠡᠦᠬᠡᠨ ᠦ᠌ ᠬᠡᠳᠦ ᠶ᠋ᠢᠨ ᠲᠥᠯᠥᠪ ᠢ᠋
ᠠᠭᠠᠰᠢ ᠵᠠᠩ ᠬᠠᠯᠠᠮᠵᠢ ᠬᠠᠢᠷᠠ ᠶ᠋ᠢ
ᠠᠩᠬᠠᠨ ᠤ᠋ ᠬᠠᠢᠷᠠ ᠶ᠋ᠢᠨ ᠪᠤᠳᠠᠩ ᠳᠤᠮᠳᠠ ᠡᠴᠡ
ᠠᠵᠢᠭᠯᠠᠨᠠ ᠭᠡᠳᠡᠭ ᠠᠮᠠᠷᠬᠠᠨ ᠪᠢᠰᠢ ᠠ᠋!
ᠲᠡᠷᠡ ᠰᠥᠨᠢ ᠭᠣᠣᠯ ᠤ᠋ᠨ ᠲᠡᠨᠳᠡ ᠡᠴᠡ
ᠲᠡᠭᠰᠢ ᠬᠦᠦ ᠬᠠᠷᠢᠬᠤ ᠶ᠋ᠢᠨ ᠵᠠᠭᠤᠷᠠ ᠪᠠᠨ
ᠬᠠᠢᠷᠠᠲᠤ ᠬᠡᠦᠬᠡᠨ ᠦ᠌ ᠪᠡᠨ ᠴᠣᠩᠬᠣ ᠶ᠋ᠢ ᠰᠢᠷᠲᠡᠵᠦ
ᠬᠠᠷᠠᠩᠭᠤᠢ ᠳᠤᠮᠳᠠ ᠢᠨᠢᠶᠡᠮᠰᠦᠭᠯᠡᠵᠦ ᠶᠠᠪᠤᠨᠠ
ᠶᠠᠭᠠᠬᠢᠭᠠᠳ ᠪᠢ ᠵᠠᠷᠢᠮ ᠬᠥᠮᠦᠰ ᠰᠢᠭ
ᠶᠠᠷᠢᠨ ᠲᠡᠰᠴᠦ ᠴᠢᠳᠠᠳᠠᠭ ᠦᠭᠡᠢ ᠶᠤᠮ ᠪᠣᠢ?
ᠢᠯᠳᠠᠮ ᠵᠠᠩ ᠲᠠᠢ ᠡᠨᠡ ᠬᠡᠦᠬᠡᠨ
ᠢᠨᠠᠭ ᠬᠠᠢᠷᠠ ᠶ᠋ᠢ ᠮᠢᠨᠢ ᠶᠠᠭᠤ ᠭᠡᠬᠦ ᠪᠣᠯ?
ᠡᠳᠦᠢ ᠳ᠋ᠦ᠍ ᠮᠢᠨᠦ ᠵᠠᠬᠢᠶᠠ ᠶ᠋ᠢ ᠤᠩᠰᠢᠭᠠᠳ
ᠥᠭᠡᠳᠡᠰᠦ ᠪᠣᠯᠲᠠᠯᠠ ᠨᠢ ᠤᠷᠠᠵᠤ ᠰᠠᠭᠤᠨᠠ ᠤᠤ?
ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠪᠠᠰᠠ ᠨᠠᠳᠠ ᠰᠢᠭ᠋ ᠪᠣᠯᠤᠭᠠᠳ
ᠥᠷᠯᠥᠭᠡ ᠬᠠᠷᠢᠭᠤ ᠶ᠋ᠢ ᠨᠢ ᠥᠭᠬᠦ ᠭᠡᠵᠦ ᠪᠠᠢᠨᠠ ᠤᠤ?
ᠬᠥᠮᠦᠨ ᠦ᠌ ᠬᠦᠦ᠂ ᠬᠡᠨ ᠴᠦ᠍ ᠢᠯᠭᠠᠭᠠ ᠦᠭᠡᠢ
ᠬᠦᠰᠡᠯ ᠬᠠᠢᠷᠠ ᠪᠠᠨ ᠬᠡᠯᠡᠳᠡᠭ ᠵᠢᠮᠡ ᠲᠡᠢ᠂
ᠬᠡᠦᠬᠡᠨ ᠬᠥᠮᠦᠨ᠂ ᠬᠡᠨ ᠴᠦ᠍ ᠥᠭᠡᠷᠡ ᠴᠦ᠍ ᠦᠭᠡᠢ
ᠬᠦᠯᠢᠶᠡᠵᠦ ᠠᠪᠤᠭᠠᠳ ᠰᠢᠢᠳᠳᠡᠭ ᠶᠣᠰᠣ ᠲᠠᠢ᠁ ᠭᠡᠵᠦ
ᠡᠯᠳᠡᠪ ᠢ᠋ ᠦᠵᠡᠭᠡ ᠦᠭᠡᠢ ᠡᠨᠡᠬᠡᠨ ᠵᠠᠯᠠᠭᠤ
ᠡᠩ ᠦᠭᠡᠢ ᠢᠲᠡᠭᠡᠯ ᠢ᠋ᠶ᠋ᠡᠷ ᠪᠡᠶᠡᠰᠦᠨ ᠪᠣᠳᠣᠨᠠ᠂
ᠡᠷᠭᠢᠨ ᠲᠣᠭᠣᠷᠢᠨ ᠤ᠋ ᠶᠠᠭᠤᠮᠠ ᠪᠦᠬᠦᠨ ᠢ᠋
ᠡᠨᠡᠷᠢᠨ ᠲᠡᠪᠡᠷᠢᠵᠦ ᠦᠨᠦᠰᠦᠮᠡᠷ ᠪᠣᠯᠤᠨᠠ᠃
※※※
ᠰᠠᠢᠬᠠᠨ ᠭᠡᠵᠢᠭᠡ ᠪᠡᠨ ᠬᠣᠢᠰᠢ ᠨᠢ ᠪᠣᠯᠭᠠᠭᠠᠳ
ᠰᠠᠨᠳᠠᠯᠢ ᠳᠡᠭᠡᠷᠡ ᠪᠡᠨ ᠵᠠᠮᠪᠠᠭᠠ ᠰᠠᠭᠤᠨᠠ
ᠰᠠᠶᠢ ᠶ᠋ᠢᠨ ᠤᠩᠰᠢᠭᠰᠠᠨ ᠵᠠᠬᠢᠳᠠᠯ ᠢ᠋ᠶ᠋ᠠᠨ ᠪᠠᠷᠢᠭᠰᠠᠭᠠᠷ
ᠰᠠᠷᠠᠭᠤᠯ ᠤᠬᠠᠭᠠᠨ ᠳ᠋ᠠᠭᠠᠨ ᠡᠢᠨ ᠰᠡᠳᠬᠢᠨᠡ᠃
《ᠢᠯᠡᠭᠦᠦ ᠳᠤᠲᠠᠭᠤ ᠶᠠᠷᠢᠶᠠ ᠦᠭᠡᠢ ᠮᠥᠷᠲᠡᠭᠡᠨ
ᠢᠨᠢᠶᠡᠵᠦ ᠨᠠᠷᠭᠢᠵᠤ ᠶᠠᠪᠤᠭᠠ ᠦᠭᠡᠢ ᠮᠥᠷᠲᠡᠭᠡᠨ
ᠡᠢᠮᠦ ᠵᠠᠬᠢᠳᠠᠯ ᠭᠡᠨᠡᠳᠲᠡ ᠥᠭᠳᠡᠭ
ᠶᠡᠬᠡ ᠬᠠᠴᠢᠨ ᠬᠥᠮᠦᠨ ᠠ᠋ ᠳᠠ ᠲᠡᠷᠡ⁈
ᠣᠯᠠᠩᠬᠢ ᠡᠷᠡᠴᠦᠦᠯ ᠥᠪᠡᠷ ᠰᠢᠭ ᠢ᠋ᠶ᠋ᠡᠨ
ᠣᠨᠴᠠ ᠶ᠋ᠢᠨ ᠬᠠᠲᠠᠭᠤ ᠭᠠᠷ ᠰᠢᠭ᠋ ᠢ᠋ᠶ᠋ᠡᠨ
ᠰᠢᠷᠦᠭᠦᠨ ᠲᠦᠷᠭᠡᠨ ᠰᠡᠳᠬᠢᠯ ᠲᠡᠢ ᠪᠠᠢᠬᠠ
ᠰᠢᠢᠳᠴᠦ ᠪᠠᠷᠢᠬᠤ ᠨᠢ ᠠᠮᠠᠷᠬᠠᠨ ᠪᠠᠢᠬᠠ᠁
ᠨᠠᠳᠠ ᠰᠢᠭ᠋ ᠡᠢᠮᠦ ᠭᠡᠨᠡᠬᠡᠨ ᠪᠠᠯᠴᠢᠷ
ᠨᠠᠪᠴᠢ ᠰᠢᠭ᠋ ᠡᠢᠮᠦ ᠬᠥᠩᠭᠡᠨ ᠬᠡᠦᠬᠡᠨ
ᠶᠠᠭᠤ ᠴᠤ᠌ ᠮᠠᠲᠠᠯ ᠦᠭᠡᠢ᠂ ᠵᠠᠬᠢᠳᠠᠯ ᠤᠩᠰᠢᠭᠠᠳ
ᠶᠠᠭᠤᠮᠠᠨ ᠤ᠋ ᠲᠦᠷᠦᠭᠦᠨ ᠳ᠋ᠦ᠍ ᠢᠲᠡᠭᠡᠵᠦ ᠪᠣᠯᠬᠤ ᠤᠤ?》
3
ᠪᠠᠭᠠᠬᠠᠨ ᠪᠦᠰᠡᠭᠦᠢ ᠤᠷᠠᠯᠢᠭ ᠤ᠋ᠨ ᠰᠤᠷᠭᠠᠭᠤᠯᠢ ᠶ᠋ᠢ
ᠪᠠᠶᠠᠨ ᠬᠤᠭᠤᠷ ᠢ᠋ᠶ᠋ᠠᠷ ᠱᠠᠩᠨᠠᠭᠤᠯᠵᠤ ᠲᠡᠭᠦᠰᠦᠭᠡᠳ
ᠣᠨᠴᠠ ᠰᠤᠷᠤᠯᠭᠠ ᠶ᠋ᠢᠨ ᠬᠦᠨᠳᠦ ᠦᠨᠡᠮᠯᠡᠬᠦ ᠶ᠋ᠢ
ᠣᠮᠣᠭ ᠪᠠᠷᠳᠠᠮ ᠡᠪᠦᠷᠲᠦᠯᠡᠭᠰᠡᠨ ᠭᠡᠪᠡᠴᠦ
ᠰᠡᠮᠬᠡᠨ ᠬᠠᠷᠢᠯᠴᠠᠬᠤ ᠶ᠋ᠢ ᠵᠢᠭᠠᠯᠭᠠᠭᠠ ᠴᠤ᠌ ᠦᠭᠡᠢ
ᠰᠡᠳᠬᠢᠯ ᠦ᠋ᠨ ᠨᠢᠭᠤᠴᠠ ᠶ᠋ᠢ ᠣᠢᠯᠠᠭᠠᠭᠠ ᠴᠤ᠌ ᠦᠭᠡᠢ
ᠤᠯᠠᠪᠤᠷ ᠬᠢᠯᠢᠩ ᠬᠥᠰᠢᠭᠡ ᠶ᠋ᠢᠨ ᠴᠠᠭᠠᠨᠠ ᠯᠠ
ᠤᠷᠠᠯᠢᠭ ᠤ᠋ᠨ ᠲᠠᠪᠴᠠᠩ ᠳ᠋ᠤ᠌ ᠪᠠᠢᠷᠢ ᠪᠠᠨ ᠡᠵᠡᠯᠡᠭᠰᠡᠨ ᠶᠤᠮ᠃
ᠠᠩᠬᠠᠨ ᠤ᠋ ᠵᠠᠬᠢᠶᠠ ᠶ᠋ᠢ ᠵᠠᠳᠠᠯᠤᠭᠰᠠᠨ ᠬᠣᠢᠨᠠ
ᠠᠯᠢᠨ ᠪᠣᠯᠪᠠᠴᠤ ᠬᠠᠷᠢᠭᠤᠯᠬᠤ ᠯᠠ ᠪᠢᠵᠡ
ᠠᠵᠢᠯ ᠳᠡᠭᠡᠷᠡ ᠪᠡᠨ ᠵᠠᠮᠪᠠᠭᠠ ᠬᠠᠷᠢᠨ
ᠠᠯᠢ ᠵᠡᠷᠭᠡ ᠲᠡᠰᠴᠦ ᠪᠠᠢᠭᠠ ᠪᠢᠯᠡ?
※※※
᠁ ᠥᠨᠥ ᠴᠠᠭ ᠤ᠋ᠨ ᠰᠢᠨᠡᠬᠡᠨ ᠳᠠᠭᠤᠤ ᠨᠤᠭᠤᠳ
ᠬᠥᠭᠵᠢᠮ ᠪᠦᠬᠦᠨ ᠦ᠌ ᠭᠤᠤᠷᠰᠤ ᠪᠠᠷ ᠬᠠᠩᠭᠢᠨᠠᠨᠠ
ᠡᠮᠦᠨᠡ ᠲᠠᠯᠠ ᠳ᠋ᠤᠨᠢ ᠵᠠᠮᠪᠠᠭᠠ ᠪᠦᠰᠡᠭᠦᠢ
ᠬᠥᠲᠥᠯᠦᠭᠴᠢ ᠶ᠋ᠢᠨ ᠪᠠᠢᠷᠢᠨ ᠳ᠋ᠤ᠌ ᠶᠡᠬᠡᠮᠰᠦᠭ ᠢ᠋ᠶ᠋ᠡᠷ ᠵᠣᠭᠰᠣᠨᠠ
ᠠᠯᠢ ᠴᠤ᠌ ᠬᠥᠭᠵᠢᠮ ᠲᠡᠭᠦᠨ ᠦ᠌ ᠭᠠᠷ ᠤ᠋ᠨ
ᠠᠶᠠᠰ ᠢ᠋ ᠳᠠᠭᠠᠨ ᠳᠤᠤᠭᠠᠷᠴᠤ ᠪᠠᠢᠬᠤ ᠨᠢ
ᠠᠷᠠᠴᠢ ᠦᠭᠡᠢ ᠪᠠᠭᠠ ᠡᠴᠡ ᠪᠠᠨ ᠣᠳᠣ ᠶ᠋ᠢ ᠬᠦᠷᠲᠡᠯᠡᠬᠢ
ᠠᠷᠢᠭᠤᠨ ᠬᠦᠰᠡᠯ ᠦ᠋ᠨ ᠬᠢᠨᠢ ᠪᠡᠶᠡᠯᠡᠯ ᠪᠢᠰᠢ ᠤᠤ
ᠪᠠᠭᠠ ᠳ᠋ᠠᠭᠠᠨ ᠵᠠᠮᠪᠠᠭᠠ ᠣᠯᠠᠨ ᠰᠥᠨᠢ
ᠪᠠᠯᠴᠢᠷ ᠥᠬᠢᠨ ᠦ᠌ ᠪᠠᠶᠠᠨ ᠵᠡᠭᠦᠳᠦ ᠪᠡᠷ ᠢ᠋ᠶ᠋ᠡᠨ
ᠡᠷᠡ ᠮᠡᠳᠡᠬᠦ ᠦᠭᠡᠢ ᠵᠥᠩᠳᠡᠭᠡᠨ ᠬᠥᠭᠵᠢᠮ ᠢ᠋
ᠨᠢᠭᠡ ᠶ᠋ᠢ ᠴᠦ᠍ ᠦᠯᠡᠳᠡᠭᠡᠯ ᠦᠭᠡᠢ ᠳᠤᠤᠭᠠᠷᠭᠠᠳᠠᠭ ᠰᠠᠨ
ᠬᠡᠦᠬᠡᠳ ᠨᠠᠰᠤᠨ ᠤ᠋ ᠵᠡᠭᠦᠳᠦ ᠨᠢ ᠪᠡᠶᠡᠯᠡᠵᠦ
ᠬᠦᠰᠡᠵᠦ ᠶᠠᠪᠤᠭᠰᠠᠨ ᠨᠠᠰᠤᠨ ᠳ᠋ᠠᠭᠠᠨ ᠬᠦᠷᠦᠯᠡ
ᠠᠩᠬᠠᠨ ᠤ᠋ ᠲᠣᠭᠯᠠᠯᠲᠠ ᠪᠠᠨ ᠰᠠᠢᠨ ᠳᠠᠭᠤᠰᠬᠠᠵᠤ
ᠠᠮᠠᠷᠠᠭ ᠤ᠋ᠨ ᠵᠠᠬᠢᠶᠠ ᠶ᠋ᠢ ᠴᠦ᠍ ᠵᠠᠳᠠᠯᠵᠤ ᠦᠵᠡᠯᠡ᠃
ᠰᠤᠷᠬᠤ ᠳ᠋ᠤ᠌ ᠬᠥᠩᠭᠡᠨ ᠵᠠᠯᠠᠭᠤ ᠴᠠᠭ ᠤ᠋ᠨ
ᠰᠤᠤ ᠵᠠᠯᠢ ᠪᠠᠷ ᠪᠠᠳᠠᠷᠠᠵᠤ ᠶᠠᠪᠤᠬᠤ ᠳ᠋ᠤ᠌
ᠬᠦᠰᠡᠭᠰᠡᠨ ᠡᠷᠳᠡᠮ ᠢ᠋ᠶ᠋ᠡᠨ ᠡᠵᠡᠮᠰᠢᠬᠦ ᠡᠴᠡ ᠢᠯᠡᠭᠦᠦ
ᠬᠦᠨᠳᠦᠲᠡᠢ ᠶᠠᠭᠤᠮᠠ ᠭᠡᠵᠦ ᠬᠠᠮᠢᠭᠠ ᠪᠠᠢᠬᠤ ᠪᠣᠢ!
ᠣᠨᠴᠠᠯᠠᠵᠤ ᠨᠢᠭᠡ ᠶ᠋ᠢ ᠬᠦᠰᠡᠭᠡ ᠦᠭᠡᠢ ᠬᠥᠮᠦᠨ
ᠣᠷᠴᠢᠯᠠᠩ ᠳᠡᠯᠡᠬᠡᠢ ᠳ᠋ᠦ᠍ ᠪᠠᠢᠳᠠᠭ ᠦᠭᠡᠢ ᠪᠢᠵᠡ
ᠣᠷᠣᠯᠳᠣᠭᠰᠠᠨ ᠶᠠᠭᠤᠮᠠ ᠪᠠᠨ ᠰᠤᠷᠤᠯ ᠦᠭᠡᠢ ᠬᠣᠴᠣᠷᠬᠤ
ᠣᠶᠤᠨ ᠤᠬᠠᠭᠠᠨ ᠭᠡᠵᠦ ᠴᠦ᠍ ᠪᠠᠢᠳᠠᠭ ᠦᠭᠡᠢ ᠶᠤᠮ
ᠣᠷᠣᠯᠳᠣᠯᠭᠠ ᠠᠪᠢᠶᠠᠰ ᠢ᠋ᠶ᠋ᠠᠷ ᠣᠨᠳᠣᠣ ᠣᠨᠳᠣᠣ
ᠣᠯᠠᠨ ᠬᠥᠭᠵᠢᠮᠴᠢᠨ ᠢ᠋ ᠤᠳᠤᠷᠢᠳᠤᠨᠠ ᠭᠡᠳᠡᠭ
ᠬᠡᠴᠡᠭᠦᠦ ᠨᠠᠷᠢᠨ ᠠᠶᠠᠯᠭᠤ ᠳᠠᠭᠤᠤ ᠶ᠋ᠢᠨ
ᠬᠡᠮᠵᠢᠶᠡ ᠶ᠋ᠢ ᠴᠥᠮ ᠳ᠋ᠦ᠍ ᠮᠥᠷᠳᠡᠭᠦᠯᠦᠨᠡ ᠭᠡᠳᠡᠭ
ᠠᠷᠪᠠᠨ ᠶᠢᠰᠦᠲᠡᠢ ᠭᠡᠨᠡᠬᠡᠨ ᠪᠦᠰᠡᠭᠦᠢ ᠳ᠋ᠦ᠍
ᠠᠭᠰᠤᠮ ᠮᠣᠷᠢ ᠪᠠᠷ ᠤᠷᠤᠯᠳᠤᠨ ᠳᠠᠪᠬᠢᠵᠤ
ᠠᠮᠠ ᠶ᠋ᠢ ᠨᠢ ᠪᠤᠯᠢᠶᠠᠴᠠᠯᠳᠤᠨ ᠭᠠᠷ ᠢ᠋ᠶ᠋ᠠᠨ ᠤᠷᠠᠬᠤ ᠡᠴᠡ
ᠠᠷᠠᠢ ᠬᠡᠴᠡᠭᠦᠦ ᠪᠠᠢᠭᠰᠠᠨ ᠪᠠᠢᠯᠭᠦᠢ᠁᠁
ᠵᠠᠷᠢᠮ ᠬᠥᠭᠵᠢᠮᠴᠢ ᠪᠤᠷᠤᠭᠤ ᠲᠣᠭᠯᠠᠴᠢᠬᠠᠭᠠᠳ
ᠵᠠᠮᠪᠠᠭᠠ ᠶ᠋ᠢᠨ ᠥᠭᠡᠳᠡ ᠡᠴᠡ ᠭᠡᠮ ᠦᠭᠡᠢ ᠴᠢᠷᠠᠢᠯᠠᠨᠠ
ᠬᠡᠯᠡᠭᠡᠳ ᠥᠭᠬᠦ ᠳ᠋ᠦ᠍ ᠳᠠᠬᠢᠭᠠᠳ ᠯᠠ ᠠᠯᠳᠠᠨᠠ
ᠬᠡᠰᠡᠭ ᠪᠠᠢᠵᠠᠨᠠᠭᠠᠳ ᠨᠥᠭᠦᠭᠡ ᠨᠢ ᠠᠯᠳᠠᠨᠠ᠁
ᠪᠠᠰᠠ ᠵᠠᠷᠢᠮ ᠨᠢ ᠨᠣᠲ ᠢ᠋ᠶ᠋ᠠᠨ ᠴᠡᠭᠡᠵᠢᠯᠡᠴᠢᠬᠡᠭᠡᠳ
ᠪᠠᠷᠤᠭ ᠲᠡᠭᠦᠨ ᠢ᠋ᠶ᠋ᠡᠨ ᠬᠠᠷᠠᠬᠤ ᠦᠭᠡᠢ ᠲᠣᠭᠯᠠᠪᠠᠴᠤ
ᠪᠠᠢᠷᠢ ᠰᠣᠯᠢᠬᠤ ᠵᠢᠵᠢᠭ ᠲᠡᠮᠳᠡᠭ ᠢ᠋
ᠪᠠᠢᠨ ᠪᠠᠢᠨ ᠮᠠᠷᠲᠠᠭᠠᠳ ᠥᠩᠭᠡᠷᠡᠭᠡᠨᠡ᠁
ᠬᠠᠷᠢᠨ ᠥᠨᠥᠳᠥᠷ᠂ ᠤᠷᠢᠳᠤ ᠶ᠋ᠢᠨ ᠬᠢ ᠡᠴᠡ ᠣᠪᠣᠭᠠ
ᠬᠠᠮᠤᠭ ᠨᠣᠲ ᠢ᠋ᠶ᠋ᠠᠨ ᠳᠠᠭᠤᠰᠲᠠᠯᠠ ᠲᠣᠭᠯᠠᠭᠤᠯᠵᠤ
ᠬᠠᠨᠤᠮᠵᠢᠲᠠᠢ ᠰᠠᠢᠬᠠᠨ ᠴᠢᠷᠠᠢ ᠨᠢ ᠰᠢᠩᠭᠡᠷᠡᠵᠦ
ᠬᠠᠷᠢᠬᠤ ᠪᠠᠷ ᠵᠠᠮᠪᠠᠭᠠ ᠶᠠᠭᠠᠷᠠᠯ ᠦᠭᠡᠢ ᠶᠠᠪᠤᠯᠠ᠃
ᠢᠳᠡ ᠵᠤᠨ ᠤ᠋ ᠣᠷᠣᠢ ᠶ᠋ᠢᠨ ᠨᠠᠷᠠᠨ
ᠢᠯᠴᠢᠲᠡᠢ ᠭᠡᠭᠴᠢ ᠶ᠋ᠢᠨ ᠲᠥᠭᠡᠨᠡᠵᠦ ᠪᠠᠢᠨᠠ᠂
ᠶᠡᠬᠡ ᠶ᠋ᠢᠨ ᠶᠡᠬᠡ ᠬᠥᠪᠴᠢ ᠶ᠋ᠢᠨ ᠵᠦᠭ ᠡᠴᠡ
ᠶᠧᠯᠸᠢ ᠶ᠋ᠢᠨ ᠶᠠᠭᠤᠮᠠ ᠰᠢᠭ᠋ ᠴᠤᠤᠷᠢᠶᠠ ᠰᠣᠨᠣᠰᠳᠠᠨᠠ᠃
ᠲᠡᠷᠡᠬᠡᠨ ᠳᠣᠣᠷᠠ ᠪᠠᠨ ᠪᠤᠯᠤᠩ ᠣᠷᠢᠶᠠᠵᠤ
ᠲᠡᠭᠰᠢ ᠬᠦᠦ ᠲᠡᠢ ᠭᠡᠨᠡᠳᠲᠡᠬᠡᠨ ᠲᠤᠯᠭᠠᠷᠠᠯᠠ᠂
ᠲᠡᠪᠡᠳᠡᠭᠰᠡᠨ ᠬᠣᠶᠠᠷ ᠤ᠋ᠨ ᠳᠥᠷᠪᠡᠨ ᠨᠢᠳᠦ
ᠲᠡᠩᠬᠡᠭᠡ ᠮᠡᠳᠡᠨ ᠡᠰᠡᠷᠭᠦ ᠰᠢᠷᠳᠡᠯᠴᠡᠯᠡ᠁
ᠬᠠᠯᠠᠭᠤ ᠰᠢᠲᠠᠬᠤ ᠤᠷᠤᠭᠤᠯ ᠤ᠋ᠨ ᠴᠠᠭᠠᠨᠠ ᠡᠴᠡ
ᠬᠠᠯᠲᠤᠬᠠᠨ ᠰᠣᠨᠣᠰᠳᠠᠬᠤ ᠮᠡᠨᠳᠦ ᠶ᠋ᠢᠨ ᠦᠭᠡᠰ
ᠭᠡᠨᠡᠳᠲᠡ ᠶ᠋ᠢᠨ ᠪᠠᠢᠳᠠᠯ ᠡᠴᠡ ᠲᠡᠳᠡᠨ ᠢ᠋ ᠠᠪᠤᠷᠠᠵᠤ
ᠭᠡᠷ ᠦ᠋ᠨ ᠵᠦᠭ ᠵᠡᠷᠭᠡᠴᠡᠨ ᠠᠯᠬᠤᠯᠠ᠃
ᠬᠤᠭᠤᠰ ᠡᠳᠦᠷ ᠦ᠋ᠨ ᠰᠣᠨᠢᠨ ᠢ᠋ ᠶᠠᠷᠢᠵᠤ
ᠬᠤᠪᠢᠰᠴᠤ ᠪᠠᠢᠳᠠᠭ ᠪᠠᠢᠭᠠᠯᠢ ᠶ᠋ᠢ ᠮᠠᠭᠲᠠᠵᠤ
ᠬᠤᠪᠢ ᠵᠠᠶᠠᠭᠠᠨ ᠤ᠋ ᠪᠠᠨ ᠬᠠᠷᠢᠭᠤ ᠵᠤᠷᠪᠤᠰ ᠢ᠋
ᠬᠤᠯᠠᠭᠠᠢ ᠨᠢᠳᠦ ᠪᠡᠷ ᠲᠡᠭᠰᠢ ᠬᠦᠯᠢᠶᠡᠨᠡ᠃
ᠲᠣᠪᠴᠢᠬᠠᠨ ᠶᠠᠷᠢᠵᠤ᠂ ᠬᠥᠭᠡᠷᠦᠬᠦᠨ ᠢᠨᠢᠶᠡᠵᠦ
ᠲᠣᠮᠣᠭᠠᠲᠠᠢ ᠶᠠᠩᠵᠤ ᠪᠠᠷ ᠠᠯᠬᠤᠬᠤ ᠲᠠᠰᠢᠷᠠᠮ ᠳ᠋ᠤ᠌
ᠲᠣᠭᠣᠰᠣ ᠳᠠᠷᠤᠭᠰᠠᠨ ᠲᠡᠭᠰᠢ ᠶ᠋ᠢᠨ ᠪᠠᠢᠳᠠᠯ ᠢ᠋
ᠲᠣᠭᠣᠷᠢᠭᠤᠯᠵᠤ ᠪᠠᠰᠠ ᠵᠠᠮᠪᠠᠭᠠ ᠨᠢ ᠠᠵᠢᠭᠯᠠᠨᠠ᠃
《ᠠᠷᠤ ᠨᠢ ᠰᠠᠭᠠᠷᠢᠲᠤᠭᠰᠠᠨ ᠪᠣᠯᠢᠶᠠ ᠭᠠᠷ ᠲᠠᠢ
ᠠᠷᠭᠢᠯ ᠳᠠᠭᠤ ᠲᠠᠢ᠂ ᠡᠪ ᠦᠭᠡᠢ ᠠᠯᠬᠤᠭᠠ ᠲᠠᠢ
ᠠᠮᠤᠭᠤᠯᠠᠩ ᠴᠢᠷᠠᠢᠯᠠᠭᠰᠠᠨ ᠡᠨᠡ ᠵᠠᠯᠠᠭᠤ ᠡᠴᠡ
ᠠᠮᠠᠷᠠᠭ ᠤ᠋ᠨ ᠤᠶᠠᠨ ᠰᠡᠳᠬᠢᠯ ᠭᠠᠷᠴᠠᠢ ᠳᠠ?》
ᠭᠡᠵᠦ ᠵᠠᠮᠪᠠᠭᠠ ᠳᠣᠲᠣᠷᠠ ᠪᠠᠨ ᠰᠡᠳᠬᠢᠪᠡᠴᠦ
ᠭᠡᠨᠡᠨ ᠵᠠᠯᠠᠭᠤ ᠲᠡᠭᠦᠨ ᠢ᠋ ᠨᠢ ᠮᠡᠳᠡᠬᠦ ᠦᠭᠡᠢ᠁
ᠲᠡᠭᠡᠭᠡᠳ ᠴᠦ᠍ ᠵᠠᠮᠪᠠᠭᠠ ᠮᠠᠨᠢ ᠠᠯᠤᠰ ᠲᠠᠭᠠᠨ
ᠲᠡᠭᠰᠢ ᠶ᠋ᠢ ᠪᠦᠷᠢᠨ ᠣᠢᠯᠠᠭᠠᠬᠤ ᠶᠤᠮ ᠴᠢᠨᠢ᠁
ᠭᠣᠢᠳᠠ ᠶᠠᠭᠤᠮᠠ ᠶᠠᠷᠢᠭᠰᠠᠨ ᠴᠤ᠌ ᠦᠭᠡᠢ
ᠭᠣᠷᠢᠳᠠᠭᠰᠠᠨ ᠬᠠᠷᠢᠭᠤ ᠶ᠋ᠢ ᠨᠢ ᠥᠭᠭᠦᠭᠰᠡᠨ ᠴᠦ᠍ ᠦᠭᠡᠢ
ᠵᠠ ᠪᠠᠶᠠᠷᠲᠠᠢ ᠲᠡᠭᠰᠢ! ᠭᠡᠳ
ᠵᠠᠮᠪᠠᠭᠠ ᠬᠡᠦᠬᠡᠨ ᠬᠥᠭᠡᠷᠦᠬᠦᠨ ᠢᠨᠢᠶᠡᠮᠰᠦᠭᠯᠡᠪᠡ᠃
ᠬᠣᠩᠭᠣᠷ ᠬᠡᠦᠬᠡᠨ ᠦ᠌ ᠪᠡᠨ ᠢᠯᠳᠠᠮ ᠬᠠᠷᠠᠴᠠ ᠶ᠋ᠢ
ᠬᠣᠷᠣᠮᠬᠠᠨ ᠪᠣᠯᠪᠠᠴᠤ ᠥᠪᠡᠷ ᠲᠡᠭᠡᠨ ᠲᠤᠰᠤᠭᠰᠠᠨ ᠳ᠋ᠤ᠌
ᠬᠣᠭᠣᠰᠣᠨ ᠪᠠᠶᠠᠷᠯᠠᠭᠠᠳ ᠶᠠᠷᠢᠵᠤ ᠶᠠᠪᠤᠳᠠᠭ
ᠬᠣᠷᠢᠭᠠᠳ ᠨᠠᠰᠤᠲᠠᠢ ᠵᠠᠯᠠᠭᠤᠰ ᠤ᠋ᠨ ᠠᠳᠠᠯᠢ
ᠲᠡᠭᠰᠢ ᠴᠦ᠍ ᠪᠠᠰᠠ ᠲᠡᠭᠰᠢ ᠪᠠᠶᠠᠰᠤᠭᠠᠳ
ᠲᠡᠨᠳᠡ ᠡᠴᠡ ᠴᠠᠭᠠᠰᠢ ᠪᠠᠨ ᠤᠷᠮᠠᠲᠠᠢ ᠠᠯᠬᠤᠪᠠ
ᠬᠣᠶᠠᠷ ᠳᠤᠭᠤᠢᠲᠤ ᠶ᠋ᠢᠨ ᠫᠠᠷᠭᠢᠶᠠ ᠳᠠᠭᠤ
ᠬᠣᠯᠠ ᠶ᠋ᠢᠨ ᠬᠣᠯᠠ ᠡᠴᠡ ᠲᠣᠳᠣᠷᠠᠨ ᠳᠤᠭᠤᠯᠳᠠᠪᠠ᠃
4
ᠳᠥᠴᠢᠨ ᠶᠢᠰᠦ ᠶ᠋ᠢᠨ ᠳᠠᠪᠬᠢᠭᠠᠨ ᠳ᠋ᠤ᠌
ᠠᠭᠠᠷ ᠰᠠᠯᠬᠢᠨ ᠢᠰᠬᠡᠷᠦᠨᠡ᠂
ᠲᠦᠳᠡ ᠶ᠋ᠢᠨ ᠵᠠᠮ ᠵᠤᠷᠠᠢᠵᠤ
ᠠᠮᠢᠳᠤ ᠶᠠᠭᠤᠮᠠ ᠰᠢᠭ᠋ ᠮᠤᠰᠬᠢᠷᠠᠨᠠ᠃
ᠡᠮᠵᠡᠭ ᠵᠥᠭᠡᠯᠡᠨ ᠰᠡᠳᠬᠢᠯ ᠦ᠋ᠨ
ᠣᠳᠣ ᠨᠢ ᠪᠣᠯᠤᠮᠠᠷ ᠬᠥᠮᠦᠨ
ᠡᠨᠡ ᠵᠢᠵᠢᠭ ᠲᠣᠰᠬᠣᠨ ᠤ᠋
ᠣᠬᠢ ᠨᠢ ᠭᠡᠮᠡᠷ ᠵᠠᠯᠠᠭᠤ
ᠵᠠᠯᠠᠭᠤᠷ ᠳᠡᠭᠡᠷᠡ ᠪᠡᠨ ᠪᠥᠬᠥᠢᠵᠦ
ᠵᠠᠮ ᠤ᠋ᠨ ᠠᠯᠤᠰ ᠢ᠋ ᠰᠢᠷᠲᠡᠨᠡ᠂
ᠵᠠᠮ ᠤ᠋ᠨ ᠲᠡᠷᠡ ᠠᠯᠤᠰ ᠲᠤᠨᠢ
ᠵᠠᠮᠪᠠᠭᠠ ᠶ᠋ᠢᠨ ᠪᠠᠢᠰᠢᠩ ᠣᠢᠷᠠᠲᠤᠨᠠ᠃
ᠰᠢᠨᠡᠬᠡᠨ ᠬᠣᠶᠠᠷ ᠳᠤᠭᠤᠢᠲᠤ ᠶ᠋ᠢᠨ
ᠰᠢᠷᠦᠭᠦᠨ ᠳᠠᠪᠬᠢᠭᠠᠨ ᠳᠤᠮᠳᠠᠭᠤᠷ
ᠰᠢᠯ ᠦ᠋ᠨ ᠴᠣᠩᠬᠣᠨ ᠤ᠋ ᠬᠢᠨᠢ ᠵᠦᠭ
ᠰᠢᠷᠪᠢᠵᠦ ᠨᠢᠭᠡ ᠬᠠᠷᠠᠪᠠᠯ
ᠲᠣᠭᠲᠠᠭᠤᠨ ᠰᠠᠯᠬᠢᠨ ᠳ᠋ᠤ᠌ ᠰᠡᠪᠡᠯᠵᠡᠬᠦ
ᠲᠣᠷᠭᠠᠨ ᠬᠥᠰᠢᠭᠡᠨ ᠦ᠌ ᠬᠢᠨᠢ ᠵᠠᠪᠰᠠᠷ ᠢ᠋ᠶ᠋ᠠᠷ
ᠦᠰᠦ ᠪᠡᠨ ᠬᠠᠭᠠᠯᠵᠤ ᠰᠠᠮᠨᠠᠭᠰᠠᠨ
ᠦᠵᠡᠮᠵᠢᠲᠦ ᠲᠡᠷᠢᠭᠦᠨ ᠴᠤᠬᠤᠢᠨᠠ᠁
ᠤᠷᠠᠨ ᠵᠢᠷᠤᠭᠠᠴᠢ ᠵᠠᠮᠪᠠᠯ
ᠤᠲᠤᠭᠠ᠂ ᠲᠣᠭᠣᠰᠣ ᠲᠠᠲᠠᠭᠤᠯᠤᠭᠰᠠᠭᠠᠷ
ᠤᠷᠢᠳᠤᠭᠤᠷ ᠨᠢ ᠢᠩᠭᠢᠵᠦ ᠥᠩᠭᠡᠷᠡᠬᠦ ᠳ᠋ᠡᠭᠡᠨ
ᠤᠴᠢᠷᠲᠠᠢ ᠨᠢᠳᠦ ᠪᠡᠷ ᠰᠢᠷᠳᠡᠭᠰᠡᠨ ᠢ᠋
ᠵᠠᠯᠠᠭᠤ ᠭᠡᠨᠡᠨ ᠰᠡᠳᠬᠢᠯ ᠲᠡᠢ
ᠵᠠᠮᠪᠠᠭᠠ ᠬᠡᠦᠬᠡᠨ ᠮᠡᠳᠡᠭᠡ ᠦᠭᠡᠢ ᠴᠦ᠍
ᠬᠠᠷᠢᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠲᠡᠭᠰᠢ
ᠬᠠᠷᠠᠭᠰᠠᠨ ᠴᠤ᠌ ᠪᠠᠢᠵᠤ ᠪᠣᠯᠬᠤ ᠶᠤᠮ᠃
ᠥᠷᠥᠭᠡᠨ ᠳ᠋ᠡᠭᠡᠨ ᠢᠷᠡᠭᠡᠳ ᠵᠠᠮᠪᠠᠯ
ᠥᠷᠥᠭᠡᠰᠦᠨ ᠮᠥᠷᠦᠨ ᠳ᠋ᠡᠭᠡᠨ ᠵᠡᠭᠦᠭᠰᠡᠨ
ᠰᠤᠳᠤᠯᠪᠤᠷᠢ ᠵᠢᠷᠤᠭ ᠤ᠋ᠨ ᠬᠠᠢᠷᠴᠠᠭ ᠢ᠋ᠶ᠋ᠠᠨ
ᠰᠤᠷᠮᠠᠭᠠᠢ ᠮᠠᠶᠢᠭ ᠢ᠋ᠶ᠋ᠠᠷ ᠮᠤᠯᠲᠤᠯᠵᠤ
ᠰᠢᠯ ᠲᠣᠯᠢ ᠦᠷᠦᠭᠡᠰᠦᠲᠡᠢ
ᠰᠢᠮᠡ ᠶ᠋ᠢᠨ ᠪᠣᠳᠣᠭ ᠳᠡᠯᠭᠡᠭᠡᠰᠦᠲᠡᠢ
ᠥᠷᠭᠡᠨ ᠰᠠᠢᠬᠠᠨ ᠰᠢᠷᠡᠭᠡᠨ ᠦ᠌
ᠥᠨᠴᠥᠭ ᠳᠡᠭᠡᠷᠡ ᠲᠠᠯᠪᠢᠭᠠᠳ
ᠭᠠᠢᠬᠠᠵᠤ ᠬᠡᠰᠡᠭ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ
ᠭᠠᠳᠠᠭᠤᠷ ᠴᠠᠮᠴᠠ ᠪᠠᠨ ᠲᠠᠢᠯᠵᠤ᠂
ᠭᠠᠷ ᠨᠢᠭᠤᠷ ᠢ᠋ᠶ᠋ᠠᠨ ᠤᠬᠢᠶᠠᠬᠤ ᠪᠠᠷ
ᠭᠠᠯ ᠤ᠋ᠨ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠯᠠ᠃
ᠡᠨᠡᠬᠡᠨ ᠰᠠᠮᠪᠠᠭᠠᠨ ᠳ᠋ᠤᠨᠢ ᠠᠮᠵᠢᠵᠤ
ᠡᠷᠬᠢᠮ ᠵᠢᠷᠤᠭᠠᠴᠢ ᠶ᠋ᠢᠨ ᠲᠤᠬᠠᠢ
ᠲᠣᠮᠣᠭᠠᠲᠠᠢ ᠬᠥᠮᠦᠨ ᠡᠴᠡ ᠲᠤᠭᠤᠯᠤᠭᠰᠠᠨ ᠢ᠋ᠶ᠋ᠠᠨ
ᠲᠣᠢᠮᠣ ᠲᠡᠳᠦᠢ ᠥᠭᠦᠯᠡᠪᠡᠯ :
ᠡᠷᠦᠬᠡ ᠭᠡᠷ ᠲᠡᠭᠡᠨ ᠭᠠᠭᠴᠠ ᠪᠡᠷ ᠢ᠋ᠶ᠋ᠡᠨ ᠴᠦ᠍
ᠥᠩᠭᠡ ᠲᠡᠢ ᠰᠠᠷᠠᠭᠤᠯᠬᠠᠨ ᠶᠠᠩᠵᠤ ᠪᠠᠷ ᠢ᠋ᠶ᠋ᠠᠨ
ᠥᠨᠥᠳᠥᠷ ᠦ᠋ᠨ ᠬᠤᠪᠢ ᠳ᠋ᠤ᠌ ᠵᠠᠮᠪᠠᠯ ᠢ᠋
ᠦᠭᠡᠴᠢᠯᠡᠵᠦ ᠬᠡᠯᠡᠬᠦ ᠶᠠᠭᠤᠮᠠ ᠦᠭᠡᠢ ᠲᠠᠭ ᠁
ᠣᠢᠭᠠ ᠦᠭᠡᠢ ᠰᠠᠢᠨ ᠠᠵᠢᠯᠯᠠᠳᠠᠭ ᠭᠡᠵᠦ
ᠤᠳᠤᠷᠢᠳᠬᠤ ᠭᠠᠵᠠᠷ ᠨᠢ ᠮᠠᠭᠲᠠᠳᠠᠭ ᠂
ᠤᠷᠠᠯᠢᠭ ᠤ᠋ᠨ ᠲᠥᠯᠥᠭᠡ ᠲᠥᠷᠥᠭᠰᠡᠨ ᠭᠡᠵᠦ
ᠠᠭᠤᠯᠵᠠᠭᠰᠠᠨ ᠨᠥᠬᠥᠳ ᠨᠢ ᠪᠠᠬᠠᠳᠣᠳᠠ᠊ᠭ ᠃
ᠬᠤᠷᠠᠯ ᠳᠡᠭᠡᠷᠡ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠨ ᠳ᠋ᠦ᠍
ᠬᠤᠪᠢ ᠶ᠋ᠢᠨ ᠰᠠᠨᠠᠯ ᠢ᠋ᠶ᠋ᠠᠨ ᠭᠠᠷᠭᠠᠳᠠᠭ ᠂
ᠳᠠᠪᠲᠠᠵᠤ ᠶᠡᠷᠦ ᠳ᠋ᠡᠭᠡᠨ ᠪᠣᠯᠵᠣᠰᠢ ᠦᠭᠡᠢ
ᠳᠠᠢᠴᠢᠨ ᠰᠢᠭᠦᠮᠵᠢᠯᠡᠯ ᠲᠠᠯᠪᠢᠳᠠᠭ ᠁
ᠭᠤᠸᠠ ᠰᠠᠢᠬᠠᠨ ᠢ᠋ ᠳᠠᠭᠤᠷᠢᠶᠠᠯᠭᠠᠬᠤ
ᠭᠣᠢᠳᠠ ᠶ᠋ᠢᠨ ᠠᠪᠢᠶᠠᠰ ᠲᠠᠢ ᠪᠣᠯᠬᠤ ᠪᠠᠷ
ᠭᠣᠣᠯᠳᠠᠭᠤ ᠥᠪᠡᠷ ᠦ᠋ᠨ ᠨᠢᠳᠦ ᠪᠡᠷ
ᠭᠣᠯᠣᠵᠤ ᠰᠢᠯᠢᠬᠦ ᠵᠢᠰᠢᠶᠠ ᠲᠠᠢ ᠁
※※※
ᠵᠠᠮᠪᠠᠯ ᠤᠭ ᠨᠢ ᠨᠢᠮᠪᠠᠢ
ᠵᠢᠶᠠᠵᠠ ᠵᠢᠷᠤᠭ ᠲᠠᠭᠠᠨ ᠴᠢᠮᠪᠠᠢ
ᠢᠯᠡᠭᠦᠦ ᠥᠮᠥᠳᠥᠨ ᠳ᠋ᠦ᠍ᠨᠢ ᠴᠦ᠍ ᠭᠡᠰᠡᠨ
ᠢᠡᠳᠦᠦ ᠶ᠋ᠢᠨ ᠨᠤᠭᠤᠯᠤᠭᠠᠰᠤ ᠪᠠᠯᠠᠷᠠᠭᠠ ᠦᠭᠡᠢ᠃
ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠ ᠳ᠋ᠤ᠌
ᠤᠷᠠᠯᠢᠭ ᠤ᠋ᠨ ᠰᠤᠷᠭᠠᠭᠤᠯᠢ ᠲᠡᠭᠦᠰᠦᠭᠰᠡᠨ᠂
ᠬᠣᠯᠠ ᠣᠢᠷᠠ ᠦᠭᠡᠢ ᠠᠵᠢᠯᠯᠠᠭᠰᠠᠭᠠᠷ
ᠬᠣᠷᠢᠨ ᠲᠠᠪᠤ ᠬᠦᠷᠦᠭᠰᠡᠨ ᠬᠥᠮᠦᠨ ᠳᠡ᠃
5
ᠬᠣᠷᠢᠨ ᠲᠠᠪᠤ ᠬᠦᠷᠴᠦ ᠪᠠᠢᠭᠠ ᠴᠤ᠌
ᠬᠣᠲᠠ ᠶ᠋ᠢᠨ ᠬᠡᠭᠡᠨᠴᠢᠷ ᠵᠢᠷᠤᠭᠠᠴᠢ ᠮᠠᠨᠢ
ᠬᠣᠩᠭᠣᠷ ᠰᠡᠡᠣᠬᠢᠯ ᠪᠠᠭᠠ ᠶ᠋ᠢᠨ ᠶᠠᠪᠤᠳᠠᠯ ᠨᠢ
ᠬᠣᠨᠣᠭ ᠤ᠋ᠨ ᠣᠯᠠᠨ ᠳ᠋ᠤ᠌ ᠨᠠᠮᠳᠠᠭᠠ ᠦᠭᠡᠢ ᠭᠡᠨᠡ᠃
ᠵᠤᠰᠠᠯᠠᠩ ᠭᠣᠣᠯ ᠤ᠋ᠨ ᠡᠷᠭᠢ ᠣᠷᠴᠢᠮ ᠡᠴᠡ
ᠵᠤᠭᠠᠲᠤ ᠰᠡᠳᠬᠢᠯ ᠢ᠋ ᠨᠢ ᠬᠥᠳᠡᠯᠭᠡᠨ ᠲᠠᠲᠠᠬᠤ
ᠵᠤᠯᠠ ᠨᠢ ᠪᠣᠯᠤᠭᠰᠠᠨ ᠵᠠᠮᠪᠠᠭᠠ ᠪᠦᠰᠡᠭᠦᠢ ᠶ᠋ᠢ
ᠵᠢᠷᠤᠭᠠᠴᠢ ᠶ᠋ᠢᠨ ᠨᠢᠳᠦ ᠬᠡᠳᠦᠢᠨ ᠠᠵᠢᠭᠰᠠᠨ ᠶᠤᠮ᠃
※※※
ᠨᠠᠢ᠍ᠮᠠᠨ ᠰᠠᠷᠠ ᠶ᠋ᠢᠨ ᠢᠳᠡ ᠳᠤᠮᠳᠠᠭᠤᠷ
ᠨᠠᠷᠠ ᠬᠡᠪᠡᠢᠭᠰᠡᠨ ᠣᠷᠣᠢ ᠶ᠋ᠢᠨ ᠴᠠᠭ ᠢ᠋ᠶ᠋ᠠᠷ
ᠨᠠᠷᠢᠨ ᠭᠣᠣᠯ ᠤ᠋ᠨ ᠰᠡᠷᠢᠭᠦᠨ ᠳᠡᠨᠵᠢ ᠪᠡᠷ
ᠵᠠᠮᠪᠠᠭᠠ ᠪᠦᠰᠡᠭᠦᠢ ᠵᠤᠭᠠᠯᠠᠵᠤ ᠶᠠᠪᠤᠨᠠ᠃
ᠭᠡᠨᠡᠬᠡᠨ ᠥᠬᠢᠨ ᠦ᠌ ᠳᠠᠯᠳᠠ ᠶ᠋ᠢᠨ ᠬᠦᠰᠡᠯᠡᠩ ᠰᠢᠭ
ᠭᠡᠷᠡᠯ ᠲᠠᠲᠠᠭᠰᠠᠨ ᠳᠠᠪᠬᠤᠷᠠ ᠨᠢᠳᠦ ᠰᠢᠭ
ᠤᠰᠤ ᠲᠡᠭᠡᠵᠦ ᠨᠠᠮᠤᠭᠤᠬᠠᠨ ᠮᠡᠯᠲᠡᠢᠨᠡ
ᠤᠯᠤᠰ ᠠᠮᠢᠲᠠᠨ ᠡᠷᠭᠢ ᠪᠡᠷ ᠨᠢ ᠵᠤᠭᠠᠯᠠᠨᠠ᠃
ᠰᠠᠷᠠᠭᠤᠯ ᠮᠠᠩᠨᠠᠢ ᠳ᠋ᠤᠨᠢ ᠦᠷᠴᠢᠯᠡᠭᠡ ᠰᠠᠭᠤᠭᠰᠠᠨ
ᠰᠠᠨᠴᠢᠭ ᠤ᠋ᠨ ᠦᠰᠦᠨ ᠳ᠋ᠦ᠍ᠨᠢ ᠪᠤᠭᠤᠷᠤᠯ ᠣᠷᠣᠭᠰᠠᠨ
ᠰᠠᠢᠬᠠᠨ ᠵᠠᠩᠲᠠᠢ ᠡᠪᠦᠭᠡᠵᠢᠶᠡᠷ ᠬᠥᠮᠦᠨ
ᠵᠠᠯᠠᠭᠤ ᠨᠠᠰᠤᠨ ᠤ᠋ ᠲᠡᠦᠬᠡ ᠪᠡᠨ ᠶᠠᠷᠢᠨᠠ᠃
ᠰᠣᠨᠣᠰᠬᠤ ᠦᠵᠡᠬᠦ ᠬᠦᠰᠡᠯ ᠢ᠋ᠶ᠋ᠡᠷ ᠳᠦᠭᠦᠷᠡᠩ
ᠰᠣᠨᠢᠭᠤᠴᠢ ᠪᠠᠭᠠᠴᠤᠤᠯ ᠠᠮᠠ ᠪᠠᠨ ᠠᠩᠭᠠᠢᠵᠤ
ᠪᠤᠭᠤᠷᠤᠯ ᠤ᠋ᠨ ᠶᠠᠷᠢᠶᠠ ᠶ᠋ᠢ ᠳᠤᠷᠠᠲᠠᠢ ᠴᠢᠩᠨᠠᠨᠠ
ᠪᠤᠰᠤᠳ ᠨᠢ ᠪᠠᠰᠠ ᠲᠣᠭᠣᠷᠢᠨ ᠰᠠᠭᠤᠵᠠᠭᠠᠨᠠ᠃
ᠵᠠᠯᠠᠭᠤ ᠬᠡᠦᠬᠡᠨ ᠨᠦ᠍ᠭᠦᠳ ᠵᠠᠢᠳᠠᠭᠤ ᠰᠠᠭᠤᠵᠠᠭᠠᠵᠤ
ᠵᠠᠷᠢᠮ ᠵᠦᠢᠯ ᠢ᠋ᠶ᠋ᠡᠨ ᠰᠢᠪᠡᠨᠡᠨ ᠶᠠᠷᠢᠵᠠᠭᠠᠨᠠ
ᠵᠢᠪᠡᠭᠦᠨ ᠴᠣᠪᠣᠭᠣᠯᠢᠭ ᠢᠨᠢᠶᠡᠬᠦ ᠳᠠᠭᠤᠨ ᠳ᠋ᠤᠨᠢ
ᠵᠡᠷᠯᠢᠭ ᠨᠤᠭᠤᠰᠤ ᠨᠢᠰᠦᠨ ᠠᠯᠳᠠᠨᠠ᠃
ᠲᠡᠳᠡᠨ ᠦ᠌ ᠵᠦᠭ ᠰᠢᠷᠳᠡᠭᠰᠡᠭᠡᠷ ᠵᠠᠮᠪᠠᠭᠠ
ᠲᠡᠷᠡᠬᠡᠨ ᠬᠡᠰᠡᠭ ᠮᠣᠳᠣ ᠤᠷᠤᠭᠤ ᠣᠷᠣᠬᠤ ᠳ᠋ᠠᠭᠠᠨ
ᠲᠡᠭᠰᠢ ᠶ᠋ᠢᠨ ᠲᠤᠬᠠᠢ᠂ ᠵᠠᠬᠢᠳᠠᠯ ᠤ᠋ᠨ ᠲᠤᠬᠠᠢ
ᠲᠠᠰᠤ ᠥᠭᠡᠷᠡ ᠶᠠᠭᠤᠮᠠ ᠪᠣᠳᠣᠵᠤ ᠶᠠᠪᠤᠯᠠ᠁
《ᠢᠳᠡ ᠰᠡᠳᠬᠢᠯ ᠦ᠋ᠨ ᠳᠤᠷᠠᠯᠠᠯ ᠭᠡᠳᠡᠭ
ᠢᠩᠭᠢᠵᠦ ᠭᠡᠨᠡᠳᠲᠡ ᠢᠷᠡᠳᠡᠭ ᠶᠤᠮ ᠪᠣᠯ ᠤᠤ?
ᠢᠲᠡᠭᠡᠵᠦ ᠪᠢᠴᠢᠭᠰᠡᠨ ᠵᠠᠬᠢᠳᠠᠯ ᠭᠡᠳᠡᠭ
ᠡᠢᠮᠦ ᠯᠡ ᠵᠢᠭᠠᠬᠠᠨ ᠪᠠᠢᠳᠠᠭ ᠶᠤᠮ ᠪᠣᠯ ᠤᠤ?
ᠬᠠᠷᠢᠭᠤ ᠶ᠋ᠢ ᠨᠢ ᠪᠢ ᠬᠡᠵᠢᠶᠡ ᠥᠭᠬᠦ ᠪᠣᠢ?
ᠬᠠᠷᠢᠭᠠᠳ ᠪᠢᠴᠢᠬᠦ ᠤᠤ? ᠬᠣᠵᠢᠮ ᠪᠣᠯᠬᠤ ᠤᠤ?
ᠬᠡᠵᠢᠶᠡ ᠴᠦ᠍ ᠢᠯᠭᠠᠭᠠ ᠦᠭᠡᠢ᠁ ᠬᠠᠷᠢᠨ ᠶᠠᠭᠤ ᠭᠡᠬᠦ ᠪᠣᠢ?
ᠬᠡᠨ ᠳ᠋ᠦ᠍ ᠢᠯᠭᠠᠭᠠ ᠦᠭᠡᠢ ᠨᠢᠭᠡ ᠯᠡ ᠵᠥᠪᠰᠢᠶᠡᠷᠡᠬᠦ ᠪᠠᠢᠬᠠ᠁
ᠲᠡᠭᠡᠬᠦ ᠳ᠋ᠡᠭᠡᠨ᠁ ᠣᠳᠣ ᠯᠠ ᠵᠥᠪᠰᠢᠶᠡᠷᠡᠬᠦ ᠭᠡᠵᠦ ᠤᠤ?
ᠲᠡᠭᠰᠢ᠁ ᠶᠡᠷᠦ ᠳ᠋ᠡᠭᠡᠨ ᠯᠡ ᠲᠡᠭᠰᠢ ᠭᠡᠵᠦ ᠤᠤ?
ᠲᠡᠷᠡ ᠶᠡᠷᠦ ᠨᠢ ᠠᠯᠢ ᠵᠡᠷᠭᠡ ᠶ᠋ᠢᠨ ᠵᠠᠯᠠᠭᠤ ᠪᠣᠯ?
ᠭᠡᠷ ᠣᠷᠣᠨ ᠳ᠋ᠠᠭᠠᠨ ᠠᠮᠢᠳᠤᠷᠠᠯ ᠠᠬᠤᠢ ᠨᠢ ᠬᠢᠷᠢ ᠪᠣᠯ?
ᠠᠷᠠᠢ ᠬᠡᠳᠦᠨ ᠰᠠᠷᠠ ᠶ᠋ᠢᠨ ᠳᠠᠷᠠᠭᠠ ᠪᠠᠷ
ᠠᠭᠠᠰᠢ ᠵᠠᠩ ᠢ᠋ᠶ᠋ᠠᠨ ᠭᠡᠨᠡᠳᠲᠡᠬᠡᠨ ᠥᠭᠡᠷᠡᠴᠢᠯᠡᠭᠡᠳ
ᠠᠮᠢᠳᠤᠷᠠᠵᠤ ᠰᠤᠷᠤᠭᠠ ᠦᠭᠡᠢ ᠨᠠᠮᠠᠶ᠋ᠢ ᠪᠠᠨ ᠥᠭᠡᠷᠡᠴᠢᠯᠡᠭᠡᠳ
ᠠᠷᠤ ᠪᠠᠷ ᠨᠢ ᠲᠠᠯᠪᠢᠴᠢᠬᠠᠬᠤ ᠬᠥᠮᠦᠨ ᠪᠢᠰᠢ ᠪᠠᠢᠬᠠ!》
ᠪᠦᠰᠡᠭᠦᠢ ᠵᠠᠮᠪᠠᠭᠠ ᠢᠩᠭᠢᠵᠦ ᠪᠣᠳᠣᠭᠰᠠᠭᠠᠷ᠂
ᠪᠦᠷᠦᠭ ᠵᠠᠯᠠᠭᠤ ᠶ᠋ᠢ ᠢᠲᠡᠭᠡᠵᠦ ᠶᠠᠳᠠᠭᠰᠠᠭᠠᠷ᠁
ᠤᠯᠢᠶᠠᠰᠤ ᠬᠤᠰᠤᠨ ᠤ᠋ ᠰᠡᠢᠷᠡᠭᠬᠡᠨ ᠣᠢ ᠳᠤᠮᠳᠠᠭᠤᠷ
ᠤᠯᠪᠠᠭᠠ ᠵᠠᠮ ᠢ᠋ᠶ᠋ᠠᠷ ᠴᠢᠭᠢᠷᠠᠭᠬᠠᠨ ᠠᠯᠬᠤᠭᠰᠠᠭᠠᠷ᠁
ᠠᠯᠠᠭ ᠨᠢᠳᠦ ᠪᠡᠨ ᠣᠯᠠᠨ ᠣᠯᠠᠨ ᠴᠠᠪᠴᠢᠯᠠᠵᠤ
ᠠᠯᠴᠢᠭᠤᠷ ᠶᠤᠭᠠᠨ ᠢᠮᠡᠴᠢᠨ ᠨᠤᠬᠤᠴᠢᠨ ᠪᠠᠢᠵᠤ
ᠠᠯᠤᠰ ᠢ᠋ ᠨᠢ ᠪᠠᠢᠲᠤᠭᠠᠢ ᠣᠳᠣ ᠶ᠋ᠢ ᠨᠢ ᠮᠡᠳᠡᠭᠡ ᠦᠭᠡᠢ
ᠠᠩᠬᠠᠨ ᠤ᠋ ᠬᠠᠢᠷᠠ ᠶ᠋ᠢᠨ ᠲᠤᠬᠠᠢ ᠳᠠᠭᠠᠵᠤ ᠶᠠᠳᠠᠨᠠ᠃
ᠬᠦᠦ ᠴᠦ᠍ ᠭᠡᠰᠡᠨ᠂ ᠬᠡᠦᠬᠡᠨ ᠴᠦ᠍ ᠭᠡᠰᠡᠨ
ᠬᠡᠦᠬᠡᠳ ᠨᠠᠰᠤ ᠪᠠᠨ ᠥᠩᠭᠡᠷᠡᠭᠡᠳ ᠢᠷᠡᠬᠦ ᠳ᠋ᠦ᠍
ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠠᠪᠤᠷᠭᠤ ᠶᠢᠷᠲᠢᠨᠴᠦ ᠡᠴᠡ
ᠳᠡᠭᠡᠳᠦ ᠱᠠᠩᠨᠠᠯ ᠢ᠋ ᠢᠩᠭᠢᠵᠦ ᠬᠦᠷᠲᠡᠳᠡᠭ ᠶᠤᠮ᠃
ᠳᠡᠯᠡᠬᠡᠢ ᠳᠡᠭᠡᠷᠡᠬᠢ ᠪᠦᠲᠦᠭᠡᠯᠴᠢ ᠠᠮᠢᠳᠤᠷᠠᠯ ᠤ᠋ᠨ
ᠳᠡᠭᠡᠭᠰᠢᠯᠡᠨ ᠬᠥᠭᠵᠢᠬᠦ ᠦᠨᠳᠦᠰᠦ ᠪᠣᠯᠤᠭᠰᠠᠨ
ᠦᠨᠡᠨ ᠵᠥᠪ ᠳᠤᠷᠠᠯᠠᠯ ᠭᠡᠳᠡᠭ ᠴᠢᠨᠢ
ᠦᠵᠡᠬᠦ ᠦᠵᠡᠯ᠂ ᠳᠠᠭᠠᠬᠤ ᠭᠣᠷᠢᠮ ᠲᠠᠢ!
ᠭᠡᠳᠡᠰᠦ ᠨᠢ ᠴᠠᠳᠪᠠᠴᠤ ᠰᠠᠨᠠᠭᠠ ᠨᠢ ᠴᠠᠳᠳᠠᠭ ᠦᠭᠡᠢ
ᠵᠠᠷᠢᠮ ᠨᠢᠭᠡ ᠲᠢᠭ ᠦᠭᠡᠢ ᠵᠢᠭᠠᠯ ᠰᠢᠭ᠋
ᠭᠡᠷ ᠪᠦᠯᠢ᠂ ᠳᠤᠷᠠᠯᠠᠯ ᠤ᠋ᠨ ᠲᠠᠯᠠ ᠳᠡᠭᠡᠷᠡ
ᠵᠠᠯᠠᠭᠤ ᠮᠢᠨᠢ ᠪᠤᠤ ᠳᠠᠪᠠᠷᠠᠭᠠᠷᠠᠢ᠁
ᠡᠬᠢᠯᠡᠭᠡᠳ ᠤᠴᠠᠷᠠᠬᠤ ᠰᠠᠢᠬᠠᠨ ᠲᠣᠬᠢᠶᠠᠯ
ᠡᠷᠭᠢᠬᠦ ᠨᠢᠳᠦ ᠶ᠋ᠢ ᠪᠤᠯᠢᠶᠠᠵᠤ ᠪᠠᠢᠪᠠᠴᠤ
ᠲᠡᠷᠡ ᠡᠴᠡ ᠰᠠᠢᠬᠠᠨ ᠴᠠᠭᠠᠨᠠ ᠨᠢ ᠪᠣᠢ ᠭᠡᠵᠦ
ᠲᠡᠪᠴᠢᠵᠦ ᠬᠦᠯᠢᠶᠡᠬᠦ ᠬᠡᠷᠡᠭᠲᠡᠢ ᠶᠤᠮ ᠰᠢᠦ᠂᠂᠂᠂
ᠠᠨᠢᠷ ᠴᠢᠮᠡᠭᠡ ᠦᠭᠡᠢ ᠳᠥᠬᠥᠯ ᠳᠤᠮᠳᠠᠭᠤᠷ
ᠠᠯᠮᠠᠢᠷᠠᠵᠤ ᠶᠠᠪᠤᠭᠰᠠᠭᠠᠷ ᠵᠠᠮᠪᠠᠭᠠ ᠮᠠᠨᠢ
ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠤᠷᠢᠳᠤ ᠬᠡᠨ ᠨᠢᠭᠡᠨ ᠦ᠌
ᠥᠷᠭᠡᠨ ᠨᠢᠷᠤᠭᠤ ᠶ᠋ᠢ ᠭᠡᠨᠡᠳᠲᠡ ᠬᠠᠷᠠᠯᠠ᠃
ᠴᠠᠭᠠᠰᠢ ᠪᠠᠨ ᠬᠠᠷᠠᠵᠤ ᠰᠠᠭᠤᠭᠰᠠᠨ ᠬᠥᠮᠦᠨ ᠦ᠌
ᠴᠠᠭᠠᠨ ᠵᠠᠬᠠ᠂ ᠪᠤᠷᠵᠢᠢᠯᠭᠠᠭᠰᠠᠨ ᠦᠰᠦ᠂
ᠢᠳᠡᠷᠬᠡᠨ ᠬᠦᠵᠦᠭᠦᠦ᠂ ᠬᠦᠳᠡᠷᠬᠡᠨ ᠴᠡᠭᠡᠵᠢ ᠶ᠋ᠢ
ᠢᠷᠮᠡᠬᠦ ᠲᠡᠳᠦᠢ ᠪᠦᠭᠦᠳᠡ ᠶ᠋ᠢ ᠨᠢ ᠠᠵᠢᠬᠤ ᠳ᠋ᠠᠭᠠᠨ
ᠭᠤᠸᠠ ᠬᠥᠯ ᠦ᠋ᠨ ᠢ᠋ᠶ᠋ᠡᠨ ᠲᠣᠷᠭᠠᠨ ᠥᠯᠮᠡᠢ ᠪᠡᠷ
ᠭᠤᠷᠪᠠ ᠳᠥᠷᠪᠡ ᠰᠡᠮᠬᠡᠨ ᠭᠢᠰᠬᠢᠵᠦ
ᠬᠢᠵᠦ ᠰᠠᠭᠤᠭᠠ ᠵᠦᠢᠯ ᠢ᠋ ᠨᠢ ᠠᠵᠢᠭᠯᠠᠵᠤ
ᠬᠡᠢᠰᠪᠦᠷᠢ ᠵᠥᠭᠡᠯᠡᠨ ᠢ᠋ᠶ᠋ᠡᠷ ᠠᠮᠠᠨ ᠳ᠋ᠠᠭᠠᠨ ᠱᠣᠭᠰᠢᠷᠠᠪᠠ᠃
ᠲᠣᠷᠭᠠᠨ ᠵᠤᠲᠠᠩ ᠳᠠᠪᠤᠤ ᠳᠡᠭᠡᠷᠡ
ᠲᠣᠢᠮᠣ ᠲᠡᠳᠦᠢ ᠳᠦᠷᠰᠦ ᠭᠠᠷᠭᠠᠵᠤ
ᠲᠣᠮᠣ ᠪᠢᠷ ᠦ᠋ᠨ ᠬᠠᠪᠲᠠᠭᠠᠢ ᠬᠢᠯᠭᠠᠰᠤ ᠪᠠᠷ
ᠲᠣᠰᠣᠨ ᠪᠣᠳᠣᠭ ᠢ᠋ ᠵᠢᠷᠦᠬᠡ ᠲᠡᠢ ᠨᠢᠯᠠᠬᠤ ᠳ᠋ᠠᠭᠠᠨ
ᠠᠭᠤᠯᠠ ᠶ᠋ᠢ ᠴᠦ᠍ ᠠᠭᠤᠯᠠ ᠰᠢᠭ᠋ ᠴᠡᠩᠬᠡᠷᠲᠦᠭᠦᠯᠦᠨᠡ
ᠤᠰᠤ ᠶ᠋ᠢ ᠴᠦ᠍ ᠤᠰᠤ ᠰᠢᠭ᠋ ᠴᠡᠯᠡᠯᠵᠡᠭᠦᠯᠦᠨᠡ
ᠮᠥᠩᠭᠥᠨ ᠬᠤᠰᠤ ᠴᠤ᠌ ᠤᠷᠭᠤᠵᠤ ᠪᠠᠢᠬᠤ ᠰᠢᠭ᠋
ᠮᠥᠴᠢᠷ ᠨᠠᠪᠴᠢ ᠨᠢ ᠴᠦ᠍ ᠴᠡᠴᠡᠷᠡᠵᠦ ᠪᠠᠢᠬᠤ ᠰᠢᠭ᠋᠁
ᠶᠡᠷᠦ ᠡᠴᠡ ᠪᠡᠨ ᠵᠠᠮᠪᠠᠯ ᠤ᠋ᠨ ᠬᠤᠷᠴᠠ ᠨᠢᠳᠦᠨ ᠳ᠋ᠦ᠍
ᠶᠢᠷᠲᠢᠨᠴᠦ ᠶ᠋ᠢᠨ ᠰᠠᠢᠬᠠᠨ ᠡᠴᠡ ᠶᠠᠭᠤ ᠯᠠ ᠥᠷᠲᠥᠨᠡ ᠪᠣᠢ?
ᠠᠮᠢᠳᠤ ᠬᠡᠪ ᠢ᠋ᠶ᠋ᠡᠷ ᠨᠢ ᠲᠡᠭᠦᠨ ᠢ᠋ ᠪᠠᠭᠤᠯᠭᠠᠬᠤ
ᠠᠪᠢᠶᠠᠰ ᠴᠢᠳᠠᠯ ᠢ᠋ᠶ᠋ᠠᠷ ᠳᠦᠭᠦᠷᠡᠩ ᠪᠢᠰᠢ ᠤᠤ?
ᠠᠪᠢᠶᠠᠰ ᠴᠢᠳᠠᠯ ᠢ᠋ ᠦᠨᠡᠯᠡᠵᠦ ᠮᠡᠳᠡᠬᠦ
ᠠᠮᠠᠷᠠᠭ ᠬᠠᠢᠷᠠ ᠪᠡᠷ ᠴᠦ᠍ ᠱᠠᠩᠨᠠᠵᠤ ᠴᠢᠳᠠᠬᠤ
ᠠᠭᠠᠰᠢ ᠡᠶᠡᠯᠳᠡᠭ ᠠᠩᠬᠢᠯ ᠪᠦᠰᠡᠭᠦᠢ ᠶ᠋ᠢ
ᠠᠷᠤ ᠳ᠋ᠠᠭᠠᠨ ᠢᠷᠡᠭᠰᠡᠨ ᠢ᠋ ᠮᠡᠳᠡᠭᠰᠡᠨ ᠪᠢᠰᠢ ᠤᠤ᠁