ᠠ Q ᠶ᠋ᠢᠨ ᠵᠢᠩᠬᠢᠨᠢ ᠨᠠᠮᠲᠠᠷ-ᠯᠦ᠍ ᠰᠢᠶᠦ᠋ᠨАа Qийн жинхэнэ намтар-Лү Шүнь
642ᠠ Q ᠶ᠋ᠢᠨ ᠵᠢᠩᠬᠢᠨᠢ ᠨᠠᠮᠲᠠᠷ
ᠯᠦ᠍ ᠰᠢᠶᠦ᠋ᠨ
ᠬᠡᠪᠲᠦ ᠶᠣᠰᠣᠨ ᠤ᠋ ᠭᠤᠷᠪᠠᠳᠤᠭᠠᠷ ᠣᠨ ᠤ᠋ ᠶᠢᠰᠦᠳᠦᠭᠡᠷ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠳᠥᠷᠪᠡᠨ ᠦ᠌ ᠡᠳᠦᠷ - ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠠ᠊ Q ᠳᠠᠯᠢᠶᠠᠷ ᠢ᠋ᠶ᠋ᠠᠨ ᠵᠣᠣ ᠪᠠᠢ ᠶᠠᠨ ᠳ᠋ᠤ᠌ ᠬᠤᠳᠠᠯᠳᠤᠵᠤ ᠥᠭᠭᠦᠭᠰᠡᠨ ᠲᠡᠷᠡ ᠡᠳᠦᠷ ᠦ᠋ᠨ ᠰᠥᠨᠢ ᠶ᠋ᠢᠨ ᠭᠤᠷᠪᠠᠨ ᠵᠢᠩ ᠳᠥᠷᠪᠡᠨ ᠮᠥᠴᠡ ᠳ᠋ᠦ᠍᠂ ᠨᠢᠭᠡᠨ ᠪᠦᠳᠦᠭᠦᠨ ᠬᠠᠷᠠ ᠮᠤᠬᠤᠯᠠᠭ ᠲᠠᠢ ᠣᠩᠭᠣᠴᠠ ᠵᠣᠣ ᠣᠪᠣᠭᠲᠠᠨ ᠤ᠋ ᠭᠡᠷ ᠦ᠋ᠨ ᠳᠡᠷᠭᠡᠳᠡᠬᠢ ᠭᠣᠣᠯ ᠤ᠋ᠨ ᠭᠠᠷᠠᠮ ᠳ᠋ᠤ᠌ ᠬᠦᠷᠴᠦ ᠢᠷᠡᠵᠡᠢ᠃ ᠲᠡᠷᠡ ᠣᠩᠭᠣᠴᠠ ᠬᠠᠪ ᠬᠠᠷᠠᠩᠭᠤᠢ ᠳ᠋ᠤ᠌ ᠬᠦᠷᠴᠦ ᠢᠷᠡᠭᠰᠡᠨ ᠲᠤᠯᠠ ᠬᠥᠳᠡᠭᠡᠨ ᠦ᠌ ᠬᠥᠮᠦᠰ ᠴᠥᠮ ᠲᠤᠭ ᠨᠣᠢᠷ ᠤᠨᠲᠠᠵᠠᠭᠠᠭᠠᠳ ᠨᠢᠭᠡ ᠴᠤ᠌ ᠮᠡᠳᠡᠭᠰᠡᠨ ᠦᠭᠡᠢ᠃ ᠪᠤᠴᠠᠵᠤ ᠶᠠᠪᠤᠬᠤ ᠳ᠋ᠤᠨᠢ ᠨᠢᠭᠡᠨᠲᠡ ᠦᠤᠷ ᠴᠠᠢᠬᠤ ᠵᠠᠪᠳᠤᠵᠤ ᠪᠠᠢᠭᠰᠠᠨ ᠲᠤᠯᠠ ᠬᠠᠷᠢᠨ ᠨᠡᠯᠢᠶᠡᠳ ᠬᠡᠳᠦᠨ ᠬᠥᠮᠦᠨ ᠣᠯᠵᠤ ᠬᠠᠷᠠᠭᠰᠠᠨ ᠪᠠᠢᠵᠠᠢ᠃ ᠬᠡᠷᠡᠭ ᠲᠦ᠍ ᠳᠤᠷᠠᠲᠠᠢ ᠤᠯᠤᠰ ᠤ᠋ᠳ ᠤ᠋ᠨ ᠭᠡᠲᠡᠵᠦ ᠮᠢᠷᠢᠶᠠᠵᠤ ᠣᠯᠤᠭᠰᠠᠨ ᠪᠠᠢᠴᠠᠭᠠᠯᠲᠠ ᠶ᠋ᠢ ᠦᠨᠳᠦᠰᠦᠯᠡᠪᠡᠯ ᠲᠡᠷᠡ ᠨᠢ ᠡᠷᠭᠦᠭᠰᠡᠳ ᠦ᠋ᠨ ᠣᠩᠭᠣᠴᠠ ᠠᠵᠢ!
ᠲᠡᠷᠡ ᠣᠩᠭᠣᠴᠠ ᠸᠧᠢ ᠵᠤᠸᠠᠩ ᠲᠣᠰᠬᠣᠨ ᠳ᠋ᠤ᠌ ᠶᠡᠬᠡ ᠦᠢᠮᠡᠭᠡᠨ ᠠᠪᠴᠢᠷᠠᠵᠤ ᠥᠭᠴᠡᠢ᠃ ᠦᠳᠡ ᠪᠣᠯᠬᠤ ᠠ᠋ᠴᠠ ᠡᠮᠦᠨᠡ ᠲᠣᠰᠬᠣᠨ ᠨᠡᠢᠲᠡ ᠶ᠋ᠢᠨ ᠰᠡᠳᠬᠢᠯ ᠶᠡᠬᠡ ᠯᠡ ᠦᠢᠮᠡᠪᠡ᠃ ᠣᠩᠭᠣᠴᠠᠨ ᠤ᠋ ᠲᠤᠬᠠᠢ ᠤᠴᠢᠷ ᠢ᠋ ᠵᠣᠣ ᠣᠪᠣᠭᠲᠠᠨ ᠤ᠋ ᠬᠢᠨ ᠬᠡᠳᠦᠢ ᠲᠠᠭ ᠨᠢᠭᠤᠵᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠬᠤᠪᠢᠰᠬᠠᠯᠲᠤ ᠨᠠᠮ ᠬᠣᠲᠠ ᠳ᠋ᠤ᠌ ᠣᠷᠣᠵᠤ ᠢᠷᠡᠬᠦ ᠭᠡᠵᠦ ᠪᠠᠢᠨᠠ᠃ ᠡᠷᠭᠦᠭᠰᠡᠳ ᠮᠠᠨ ᠤ᠋ ᠲᠣᠰᠬᠣᠨ ᠳ᠋ᠤ᠌ ᠳᠤᠲᠠᠭᠠᠵᠤ ᠢᠷᠡᠬᠦ ᠭᠡᠨᠡ ᠭᠡᠵᠦ ᠠᠷᠢᠬᠢᠨ ᠤ᠋ ᠫᠦᠰᠡ᠂ ᠴᠠᠢ ᠶ᠋ᠢᠨ ᠮᠤᠬᠤᠯᠠᠭ ᠮᠡᠲᠦ ᠶ᠋ᠢᠨ ᠭᠠᠵᠠᠷ ᠢ᠋ᠶ᠋ᠠᠷ ᠪᠦᠷ ᠬᠡᠯᠡᠯᠴᠡᠬᠦ ᠪᠣᠯᠪᠠ᠃ ᠭᠠᠭᠴᠠ ᠽᠧᠦ ᠴᠢ ᠪᠡᠷᠭᠡᠨ ᠯᠡ ᠢᠩᠭᠢᠵᠦ ᠦᠵᠡᠬᠦ ᠦᠭᠡᠢ᠂ ᠨᠢᠭᠡ ᠬᠡᠳᠦᠨ ᠮᠤᠤᠰᠠᠢᠨ ᠠᠪᠳᠠᠷᠠ ᠲᠠᠢ ᠶᠠᠭᠤᠮᠠ ᠶ᠋ᠢ ᠡᠷᠭᠦᠭᠰᠡᠳ ᠠᠪᠴᠢᠷᠠᠵᠤ ᠬᠠᠳᠠᠭᠠᠯᠠᠭᠤᠯᠬᠤ ᠭᠡᠰᠡᠨ ᠪᠣᠯᠪᠠᠴᠤ ᠵᠣᠣ ᠲᠠᠢᠶᠧ ᠨᠣᠶᠠᠨ ᠬᠠᠷᠢᠨ ᠭᠡᠳᠡᠷᠭᠦ ᠪᠤᠴᠠᠭᠠᠭᠰᠠᠨ ᠭᠡᠳᠡᠭ ᠪᠠᠢᠵᠠᠢ᠃ ᠦᠨᠡᠨ ᠳ᠋ᠡᠭᠡᠨ ᠡᠷᠭᠦᠭᠰᠡᠳ᠂ ᠵᠣᠣ ᠰᠢᠦᠼᠠᠢ ᠬᠣᠶᠠᠷ ᠪᠣᠯ ᠶᠡᠷᠦ ᠡᠪ ᠳᠠᠭᠠᠷᠠᠳᠠᠭ ᠦᠭᠡᠢ᠂《ᠦᠢᠯᠡ ᠵᠣᠪᠠᠯᠠᠩ ᠢ᠋ᠶ᠋ᠠᠨ ᠬᠤᠪᠢᠶᠠᠯᠴᠠᠬᠤ》 ᠨᠠᠢᠷ ᠲᠠᠯᠠ ᠪᠠᠢᠮᠠᠷ ᠦᠭᠡᠢ ᠡᠴᠡ ᠭᠠᠳᠠᠨᠠ᠂ ᠽᠧᠦ ᠴᠢ ᠪᠡᠷᠭᠡᠨ ᠪᠣᠯ ᠵᠣᠣ ᠣᠪᠣᠭᠲᠠᠨ ᠤ᠋ ᠠᠢᠯ ᠵᠡᠷᠭᠡᠯᠡᠳᠡᠭᠡ ᠬᠥᠮᠦᠨ᠂ ᠦᠵᠡᠵᠦ ᠰᠣᠨᠣᠰᠤᠭᠰᠠᠨ ᠨᠢ ᠦᠯᠡᠮᠵᠢ ᠨᠠᠢᠳᠠᠪᠤᠷᠢᠲᠠᠢ ᠲᠤᠯᠠ ᠲᠡᠷᠡ ᠨᠢ ᠶᠡᠬᠡ ᠲᠥᠯᠥᠪ ᠵᠥᠪ ᠪᠠᠢᠵᠤ ᠮᠠᠭᠠᠳ ᠦᠭᠡᠢ᠃
ᠭᠡᠲᠡᠯᠡ ᠴᠤᠤᠷᠬᠠᠯ ᠭᠡᠭᠴᠢ ᠰᠦᠷᠡᠬᠡᠢ ᠳᠡᠯᠭᠡᠷᠡᠵᠡᠢ᠃ ᠡᠷᠭᠦᠭᠰᠡᠳ ᠬᠡᠳᠦᠢ ᠥᠪᠡᠷ ᠢ᠋ᠶ᠋ᠡᠨ ᠢᠷᠡᠭᠰᠡᠨ ᠦᠭᠡᠢ ᠶᠠᠩᠵᠤᠲᠠᠢ ᠪᠣᠯᠪᠠᠴᠤ ᠨᠢᠭᠡ ᠤᠷᠲᠤ ᠵᠠᠬᠢᠳᠠᠯ ᠢᠷᠡᠭᠦᠯᠵᠦ ᠵᠣᠣ ᠣᠪᠣᠭᠲᠠᠨ ᠤ᠋ ᠬᠢᠨ ᠲᠡᠢ 《ᠰᠠᠳᠤᠨ ᠰᠦᠯᠪᠡᠭᠡ》 ᠪᠣᠯᠬᠤ ᠪᠠᠨ ᠦᠶᠡᠯᠡᠵᠦ ᠳᠠᠷᠠᠭᠠᠯᠠᠭᠰᠠᠨ ᠶᠤᠮ ᠭᠡᠨᠡ᠃ ᠵᠣᠣ ᠲᠠᠢᠶᠧ ᠳᠣᠲᠣᠷᠠ ᠪᠠᠨ ᠪᠣᠯᠭᠣᠭᠠᠵᠤ ᠲᠤᠩᠭᠠᠵᠤ ᠦᠵᠡᠭᠡᠳ᠂ ᠠᠷᠠᠢ ᠲᠡᠭᠦᠨ ᠳ᠋ᠦ᠍ ᠬᠣᠣᠷ ᠪᠣᠯᠤᠮᠠᠷ ᠦᠭᠡᠢ ᠰᠠᠨᠠᠭᠳᠠᠭᠰᠠᠨ ᠲᠤᠯᠠ ᠲᠡᠳᠡᠭᠡᠷ ᠠᠪᠳᠠᠷᠠ ᠶ᠋ᠢ ᠦᠯᠡᠳᠡᠭᠡᠵᠦ ᠠᠪᠤᠭᠰᠠᠨ ᠨᠢ ᠣᠳᠣ ᠬᠠᠲᠤᠨ ᠤ᠋ ᠣᠷᠣᠨ ᠳᠣᠣᠷᠠ ᠳᠠᠷᠤᠭᠳᠠᠵᠤ ᠪᠠᠢᠨᠠ ᠭᠡᠵᠡᠭᠡᠨᠡ᠃ ᠬᠤᠪᠢᠰᠬᠠᠯᠲᠤ ᠨᠠᠮ ᠤ᠋ᠨ ᠲᠤᠬᠠᠢ ᠵᠠᠷᠢᠮ ᠨᠢ ᠡᠨᠡ ᠰᠥᠨᠢ ᠬᠣᠲᠠ ᠳ᠋ᠤ᠌ ᠣᠷᠣᠵᠤ ᠢᠷᠡᠭᠰᠡᠨ᠂ ᠬᠥᠮᠦᠨ ᠪᠦᠷᠢ ᠴᠠᠭᠠᠨ ᠬᠤᠶᠠᠭ ᠳᠤᠭᠤᠯᠠᠭᠠ ᠡᠮᠦᠰᠴᠦ ᠭᠡᠨᠡ: ᠽᠥᠩᠵᠸᠩ ᠬᠠᠭᠠᠨ ᠳ᠋ᠤ᠌ ᠪᠡᠯᠪᠡᠰᠦᠷᠡᠵᠦ ᠥᠪᠴᠢ ᠴᠠᠭᠠᠨ ᠢ᠋ ᠡᠮᠦᠰᠦᠭᠰᠡᠨ ᠶᠦᠮ ᠭᠡᠯᠴᠡᠨᠡ᠃
ᠬᠤᠪᠢᠰᠬᠠᠯᠲᠤ ᠨᠠᠮ ᠭᠡᠳᠡᠭ ᠦᠭᠡ ᠠ᠊ Q ᠶᠢᠨ ᠴᠢᠬᠢᠨ ᠳ᠋ᠦ᠍ ᠠᠯᠢ ᠬᠡᠳᠦᠢᠨ ᠳᠤᠭᠤᠯᠳᠠᠵᠤ ᠪᠠᠢᠭᠰᠠᠨ ᠤ᠋ ᠳᠡᠭᠡᠷᠡ ᠡᠨᠡ ᠵᠢᠯ ᠬᠤᠪᠢᠰᠬᠠᠯᠲᠤ ᠨᠠᠮ ᠤ᠋ᠨ ᠬᠢᠨ ᠢ᠋ ᠠᠯᠠᠬᠤ ᠶ᠋ᠢ ᠪᠠᠰᠠ ᠥᠪᠡᠷ ᠦ᠋ᠨ ᠨᠢᠳᠦ ᠪᠡᠷ ᠣᠯᠵᠤ ᠦᠵᠡᠭᠰᠡᠨ ᠪᠠᠢᠵᠠᠢ᠃ ᠭᠡᠲᠡᠯᠡ ᠲᠡᠭᠦᠨ ᠳ᠋ᠦ᠍ ᠬᠠᠮᠢᠭᠠ ᠶᠠᠭᠤᠨ ᠠ᠋ᠴᠠ ᠡᠭᠦᠰᠦᠭᠰᠡᠨ ᠨᠢ ᠦᠯᠦ ᠮᠡᠳᠡᠭᠳᠡᠬᠦ ᠨᠢᠭᠡ ᠰᠠᠨᠠᠯ ᠪᠠᠢᠳᠠᠭ ᠪᠠᠢᠪᠠ᠃ ᠬᠤᠪᠢᠰᠬᠠᠯᠲᠤ ᠨᠠᠮ ᠭᠡᠭᠴᠢ ᠨᠢ ᠤᠷᠪᠠᠵᠤ ᠲᠡᠷᠰᠯᠡᠭᠰᠡᠨ ᠬᠡᠷᠡᠭ᠂ ᠤᠷᠪᠠᠵᠤ ᠲᠡᠷᠰᠯᠡᠬᠦ ᠨᠢ ᠲᠠᠭᠦᠨ ᠲᠠᠢ ᠥᠰᠢᠯᠳᠦᠭᠰᠡᠨ ᠬᠡᠷᠡᠭ ᠭᠡᠵᠦ ᠲᠡᠷᠡ ᠪᠣᠳᠣᠳᠠᠭ ᠲᠤᠯᠠ ᠢᠮᠠᠭᠲᠠ 《ᠭᠦᠨᠡ ᠵᠢᠭᠰᠢᠵᠦ ᠦᠬᠦᠨ ᠬᠣᠷᠣᠰᠳᠠᠭ》 ᠪᠠᠢᠯᠠ᠃ ᠭᠡᠲᠡᠯᠡ ᠡᠨᠡ ᠨᠢ ᠵᠠᠭᠤᠨ ᠭᠠᠵᠠᠷ ᠲᠤ᠌ ᠠᠯᠳᠠᠷᠲᠠᠢ ᠡᠷᠭᠦᠭᠰᠡᠳ ᠨᠣᠶᠠᠨ ᠢ᠋ ᠬᠦᠷᠲᠡᠯᠡ ᠢᠩᠭᠢᠵᠦ ᠰᠦᠷᠳᠡᠭᠦᠯᠦᠨᠡ ᠭᠡᠵᠦ ᠬᠡᠨ ᠰᠠᠨᠠᠪᠠ᠃ ᠢᠩᠭᠢᠬᠦᠯᠡᠷ ᠠ᠊ Q ᠪᠠᠰᠠ ᠠᠷᠭᠠ ᠦᠭᠡᠢ 《ᠰᠡᠳᠬᠢᠯ ᠲᠠᠲᠠᠭᠳᠠᠭᠰᠠᠨ》ᠰᠢᠭ᠋ ᠪᠣᠯᠤᠭᠰᠠᠨ ᠤ᠋ ᠳᠡᠭᠡᠷᠡ᠂ ᠸᠧᠢ ᠵᠤᠸᠠᠩ ᠲᠣᠰᠬᠣᠨ ᠤ᠋ ᠥᠨᠥ ᠮᠤᠤᠰᠠᠢᠨ ᠡᠷᠡ ᠡᠮᠡᠰ ᠦ᠋ᠨ ᠠᠶᠤᠵᠤ ᠰᠠᠨᠳᠤᠷᠤᠭᠰᠠᠨ ᠪᠠᠢᠳᠠᠯ ᠨᠢ ᠠ᠊ Q ᠶᠢ ᠨᠡᠩ ᠴᠤ᠌ ᠪᠠᠶᠠᠷᠯᠠᠭᠤᠯᠪᠠ᠃
《ᠬᠤᠪᠢᠰᠬᠠᠯ ᠴᠤ᠌ ᠶᠠᠭᠠᠮᠠᠢ᠂ ᠡᠨᠡ ᠮᠤᠤᠰᠠᠢᠨ ᠡᠬᠡ ᠪᠡᠨ ᠴᠢᠩᠭᠢᠭᠰᠡᠨ ᠨᠥᠬᠥᠳ ᠢ᠋ ᠬᠤᠪᠢᠰᠬᠠᠵᠤ ᠤᠷᠭᠢᠶᠠ᠃ ᠳᠠᠩᠴᠢ ᠵᠢᠭᠰᠢᠯᠲᠡᠢ! ᠳᠠᠩᠴᠢ ᠵᠠᠨᠤᠯᠲᠠᠢ!᠁ ᠪᠢ ᠴᠤ᠌ ᠭᠡᠰᠡᠨ ᠬᠤᠪᠢᠰᠬᠠᠯᠲᠤ ᠨᠠᠮ ᠳ᠋ᠤ᠌ ᠪᠠᠭᠤᠵᠤ ᠥᠭᠬᠦ ᠳ᠋ᠦ᠍ ᠬᠦᠷᠦᠯᠡ》 ᠭᠡᠵᠦ ᠠ᠊ Q ᠪᠣᠳᠣᠪᠠ᠃
ᠠ᠊ Q ᠣᠢᠷᠠ ᠡᠴᠡ ᠪᠠᠬᠠᠨ ᠭᠠᠷ ᠮᠤᠬᠤᠷᠳᠠᠵᠤ ᠳᠣᠲᠣᠷᠠ ᠨᠢ ᠨᠡᠯᠢᠶᠡᠳ ᠠᠶᠠᠭᠦᠢ ᠪᠠᠢᠭᠰᠠᠨ ᠤ᠋ ᠳᠡᠭᠡᠷᠡ᠂ ᠦᠳᠡ ᠶ᠋ᠢᠨ ᠦᠶᠡ ᠳ᠋ᠦ᠍ ᠬᠣᠭᠣᠰᠣᠨ ᠢ᠋ᠶ᠋ᠠᠷ ᠬᠣᠶᠠᠷ ᠠᠶᠠᠭᠠ ᠠᠷᠢᠬᠢ ᠵᠠᠯᠭᠢᠯᠠᠭᠰᠠᠨ ᠲᠤᠯᠠ ᠤᠯᠠᠮ ᠴᠤ᠌ ᠲᠦᠷᠭᠡᠨ ᠰᠣᠭᠲᠣᠭᠰᠠᠨ ᠪᠠᠢᠵᠠᠢ᠃ ᠢᠩᠭᠢᠭᠡᠳ ᠮᠠᠨᠠᠢ ᠬᠥᠮᠦᠨ ᠪᠣᠳᠣᠯᠭᠠ ᠪᠣᠯᠤᠭᠰᠠᠭᠠᠷ ᠶᠠᠪᠤᠲᠠᠯᠠ᠂ ᠰᠡᠳᠬᠢᠯ ᠨᠢ ᠰᠠᠭᠭᠠᠵᠤ ᠪᠠᠰᠠ ᠯᠠ ᠬᠥᠪᠦᠯᠵᠡᠵᠦ ᠡᠬᠢᠯᠡᠯᠡ᠃ ᠢᠩᠭᠢᠲᠡᠯᠡ ᠪᠤᠤ ᠮᠡᠳᠡ᠂ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠮᠠᠨᠠᠢ ᠬᠥᠮᠦᠨ ᠬᠠᠷᠢᠨ ᠥᠪᠡᠷ ᠢ᠋ᠶ᠋ᠡᠨ ᠬᠤᠪᠢᠰᠬᠠᠯᠲᠤ ᠨᠠᠮ ᠪᠣᠯᠤᠭᠠᠳ ᠸᠧᠢ ᠵᠤᠸᠠᠩ ᠤ᠋ᠨ ᠬᠥᠮᠦᠰ ᠴᠥᠮ ᠲᠡᠭᠦᠨ ᠦ᠌ ᠣᠯᠵᠠ ᠪᠣᠯᠤᠭᠰᠠᠨ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠪᠠ᠃ ᠢᠩᠭᠢᠭᠡᠳ ᠲᠡᠷᠡ ᠪᠠᠶᠠᠷᠯᠠᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠶᠡᠬᠡ ᠳ᠋ᠦ᠍ ᠲᠡᠰᠬᠡᠯ ᠦᠭᠡᠢ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ: 《ᠤᠷᠪᠠᠯᠠ! ᠤᠷᠪᠠᠯᠠ!》 ᠭᠡᠵᠦ ᠬᠠᠰᠬᠢᠷᠪᠠ᠃
ᠸᠧᠢ ᠵᠤᠸᠠᠩ ᠤ᠋ᠨ ᠬᠥᠮᠦᠰ ᠴᠥᠮ ᠲᠡᠭᠦᠨ ᠢ᠋ ᠡᠮᠢᠶᠡᠵᠦ ᠰᠣᠴᠢᠭᠰᠠᠨ ᠨᠢᠳᠦ ᠪᠡᠷ ᠰᠢᠷᠳᠡᠨᠡ᠃ ᠢᠩᠭᠢᠵᠦ ᠦᠷᠦ ᠡᠪᠡᠳᠦᠮᠡᠷ ᠬᠠᠷᠠᠴᠠ ᠶ᠋ᠢ ᠠ᠊ Q ᠶᠡᠷᠦ ᠣᠯᠵᠤ ᠦᠵᠡᠭᠡᠳᠦᠢ ᠪᠠᠢᠭᠰᠠᠨ ᠲᠤᠯᠠ ᠣᠳᠣ ᠣᠯᠵᠤ ᠦᠵᠡᠭᠡᠳ ᠵᠤᠨ ᠤ᠋ ᠵᠢᠷᠭᠤᠭᠠᠨ ᠰᠠᠷᠠ ᠳ᠋ᠤ᠌ ᠵᠢᠩᠭᠢᠨᠡᠮᠡ ᠮᠥᠰᠥ ᠵᠠᠯᠭᠢᠭᠰᠠᠨ ᠮᠡᠲᠦ ᠳᠣᠲᠣᠷᠠ ᠨᠢ ᠶᠡᠬᠡ ᠲᠠᠭᠠᠲᠠᠢ ᠰᠠᠨᠠᠭᠳᠠᠯᠠ᠃ ᠢᠩᠭᠢᠭᠡᠳ ᠤᠯᠠᠮ ᠶᠡᠬᠡ ᠪᠠᠶᠠᠷᠯᠠᠵᠤ ᠶᠠᠪᠤᠭᠤᠲᠠ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠳᠠᠭᠤᠯᠠᠨᠠ:
《ᠵᠠ ᠁ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠳᠣᠩᠬᠣᠯᠵᠠᠵᠤ ᠰᠠᠨᠠᠭᠠ ᠪᠠᠷ ᠢ᠋ᠶ᠋ᠠᠨ ᠰᠠᠪᠠᠯᠠᠨᠠ ᠪᠢ᠃
ᠳ᠋ᠦᠩ ᠳ᠋ᠦᠩ᠂ ᠴᠢᠶᠠᠩ ᠴᠢᠶᠠᠩ!
ᠭᠡᠮᠰᠢᠪᠡᠴᠦ ᠣᠷᠣᠢᠲᠠᠯᠠ᠂ ᠰᠣᠭᠲᠣᠭᠤ ᠶᠠᠪᠤᠭᠰᠠᠭᠠᠷ ᠮᠡᠷᠭᠡᠨ ᠳᠡᠭᠦᠦ ᠵᠧᠩ ᠢ᠋ ᠠᠯᠠᠴᠢᠬᠠᠪᠠ᠃
ᠭᠡᠮᠰᠢᠪᠡᠴᠦ ᠣᠷᠣᠢᠳᠠᠨ᠂ ᠠᠢ ᠶᠠ ᠶᠠ ᠁
ᠳ᠋ᠦᠩ ᠳ᠋ᠦᠩ᠂ ᠴᠢᠶᠠᠩ ᠴᠢᠶᠠᠩ ᠳ᠋ᠦᠩ᠂ ᠴᠢᠶᠠᠩ ᠯᠢᠩ ᠴᠢᠶᠠᠩ!
ᠭᠠᠷ ᠲᠠᠭᠠᠨ ᠪᠠᠷᠢᠭᠰᠠᠨ ᠭᠠᠩ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠭᠠᠢᠭᠤᠢᠬᠠᠨ ᠵᠣᠳᠣᠶᠠ ᠳᠠ ᠴᠢᠮᠠᠶ᠋ᠢ ᠪᠢ ᠁》
ᠵᠣᠣ ᠣᠪᠣᠭᠲᠠᠨ ᠤ᠋ ᠬᠣᠶᠠᠷ ᠪᠦᠰᠡᠲᠡᠢ ᠬᠥᠮᠦᠨ᠂ ᠪᠠᠰᠠ ᠬᠣᠶᠠᠷ ᠵᠢᠩᠬᠢᠨᠢ ᠲᠥᠷᠥᠯ ᠨᠢ ᠭᠠᠳᠠᠨᠠ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠵᠣᠭᠰᠣᠭᠠᠳ ᠬᠤᠪᠢᠰᠬᠠᠯ ᠤ᠋ᠨ ᠲᠤᠬᠠᠢ ᠶᠠᠷᠢᠶᠠ ᠪᠣᠯᠵᠤ ᠪᠠᠢᠪᠠ᠃ ᠠ᠊ Q ᠣᠯᠵᠤ ᠦᠵᠡᠭᠰᠡᠨ ᠦᠭᠡᠢ᠂ ᠠᠰ ᠳᠡᠭᠡᠭᠰᠢ ᠪᠡᠨ ᠬᠠᠷᠠᠭᠠᠳ ᠠᠶᠠᠯᠵᠤ ᠳᠠᠭᠤᠯᠠᠭᠰᠠᠭᠠᠷ ᠥᠩᠭᠡᠷᠡᠪᠡ᠃
《ᠳ᠋ᠦᠩ ᠳ᠋ᠦᠩ ᠁》
《Q ᠭᠤᠸᠠᠢ》 ᠭᠡᠵᠦ ᠵᠣᠣ ᠲᠠᠢᠶᠧ ᠨᠣᠶᠠᠨ ᠲᠣᠰᠴᠤ ᠣᠴᠢᠭᠠᠳ ᠳᠣᠷᠣᠢ ᠳᠤᠤᠭᠠᠷᠪᠠ᠃
《ᠴᠢᠶᠠᠩ ᠴᠢᠶᠠᠩ》
ᠠ᠊ Q ᠥᠪᠡᠷ ᠦ᠋ᠨ ᠨᠡᠷᠡ ᠶ᠋ᠢ 《ᠭᠤᠸᠠᠢ》 ᠦᠰᠦᠭ ᠲᠡᠢ ᠬᠠᠪᠢᠳᠠᠵᠤ ᠣᠴᠢᠨᠠ ᠭᠡᠵᠦ ᠰᠠᠨᠠᠭᠰᠠᠨ ᠦᠭᠡᠢ᠂ ᠨᠠᠳᠠ ᠲᠠᠢ ᠬᠠᠮᠢᠶᠠ ᠦᠭᠡᠢ ᠥᠭᠡᠷᠡ ᠦᠭᠡ ᠪᠠᠢᠯᠭᠦᠢ ᠭᠡᠳ ᠳᠠᠭᠤᠯᠠᠵᠤ ᠯᠠ ᠶᠠᠪᠤᠪᠠ᠃
《ᠳ᠋ᠦᠩ᠂ ᠴᠢᠶᠠᠩ᠂ ᠴᠢᠶᠠᠩ ᠯᠢᠩ ᠴᠢᠶᠠᠩ᠂ ᠴᠢᠶᠠᠩ!》
《Q ᠭᠤᠸᠠᠢ!》
《ᠭᠡᠮᠰᠢᠪᠡᠴᠦ ᠣᠷᠣᠢᠲᠠᠯᠠ ᠁》
《ᠠ᠊ Q》 ᠭᠡᠵᠦ ᠰᠢᠦᠼᠠᠢ ᠠᠷᠭᠠ ᠦᠭᠡᠢ ᠰᠢᠭᠤᠳ ᠨᠡᠷᠡ ᠪᠡᠷ ᠨᠢ ᠳᠠᠭᠤᠳᠠᠪᠠ᠃
ᠠ᠊ Q ᠢᠩᠭᠢᠬᠦᠯᠡᠷ ᠨᠢ ᠵᠣᠭᠰᠣᠵᠤ ᠲᠣᠯᠣᠭᠠᠢ ᠪᠠᠨ ᠳᠠᠯᠵᠢᠢᠯᠭᠠᠨ:
《ᠶᠠᠭᠤ ᠪᠣᠢ?》 ᠭᠡᠪᠡ᠃
《Q ᠭᠤᠸᠠᠢ ᠁ ᠣᠳᠣ ᠁》 ᠭᠡᠳ ᠵᠣᠣ ᠲᠠᠢᠶᠧ ᠨᠣᠶᠠᠨ ᠬᠠᠷᠢᠨ ᠬᠡᠯᠡᠬᠦ ᠦᠭᠡ ᠪᠡᠨ ᠣᠯᠵᠤ ᠶᠠᠳᠠᠨ: 《ᠣᠳᠣ ᠁ ᠪᠠᠶᠠᠵᠢᠬᠤ ᠨᠢ ᠤᠤ?》 ᠭᠡᠪᠡ᠃
《ᠪᠠᠶᠠᠵᠢᠨᠠ ᠠ᠋? ᠳᠡᠭᠡᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃ ᠶᠠᠭᠤ ᠯᠠ ᠭᠡᠪᠡᠯ ᠲᠡᠷᠡ ᠪᠡᠯᠡᠨ ᠁》
《ᠠ᠊ ᠁Q ᠠᠬᠠ ᠠ᠋᠂ ᠪᠢᠳᠡᠨ ᠰᠢᠭ᠋ ᠡᠢᠮᠦ ᠶᠠᠳᠠᠭᠤ ᠨᠠᠢᠵᠠ ᠶᠠᠮᠠᠷ ᠬᠠᠮᠢᠶᠠ ᠪᠠᠢᠬᠤ ᠪᠣᠢ ᠁》 ᠭᠡᠵᠦ ᠵᠣᠣ ᠪᠠᠢ ᠶᠠᠨ ᠬᠤᠪᠢᠰᠬᠠᠯᠲᠤ ᠨᠠᠮ ᠤ᠋ᠨ ᠲᠤᠬᠠᠢ ᠠᠵᠢᠭ ᠮᠡᠳᠡᠬᠦ ᠭᠡᠰᠡᠨ ᠪᠣᠯᠤᠯᠲᠠᠢ ᠠᠶᠤᠵᠤ ᠵᠢᠷᠦᠬᠡᠰᠢᠨ ᠠᠰᠠᠭᠤᠪᠠ᠃ 《ᠶᠠᠳᠠᠭᠤ ᠨᠠᠢᠵᠠ ᠠ᠋? ᠴᠢ ᠶᠠᠭᠠᠬᠢᠭᠰᠠᠨ ᠴᠤ᠌ ᠨᠠᠳᠠ ᠠ᠋ᠴᠠ ᠪᠠᠶᠠᠨ ᠰᠢᠦ ᠳᠡ 》 ᠭᠡᠳ ᠠ᠊ Q ᠶᠠᠪᠤᠭᠠᠳ ᠥᠭᠪᠡ᠃
ᠪᠦᠭᠦᠳᠡᠭᠡᠷ ᠭᠠᠢᠬᠠᠵᠤ ᠲᠣᠪ ᠳᠤᠭᠤᠢ ᠪᠣᠯᠪᠠ᠃ ᠵᠣᠣ ᠲᠠᠢᠶᠧ ᠨᠣᠶᠠᠨ ᠠᠪᠤ ᠬᠦᠦ ᠬᠣᠶᠠᠭᠤᠯᠠ ᠭᠡᠷ ᠲᠡᠭᠡᠨ ᠬᠠᠷᠢᠭᠠᠳ ᠣᠷᠣᠢ ᠳ᠋ᠧᠩ ᠰᠢᠲᠠᠭᠠᠲᠠᠯᠠ ᠶᠠᠷᠢᠯᠴᠠᠪᠠ᠃ ᠵᠣᠣ ᠪᠠᠢ ᠶᠠᠨ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠢᠷᠡᠭᠡᠳ ᠪᠥᠰᠡᠨ ᠡᠴᠡ ᠪᠡᠨ ᠳᠠᠯᠢᠶᠠᠷ ᠢ᠋ᠶ᠋ᠠᠨ ᠠᠪᠴᠤ ᠡᠬᠡᠨᠡᠷ ᠲᠡᠭᠡᠨ ᠥᠭᠭᠦᠭᠡᠳ ᠠᠪᠳᠠᠷᠠ ᠶ᠋ᠢᠨ ᠢᠷᠣᠭᠠᠷ ᠲᠤ᠌ ᠨᠢᠭᠤᠯᠭᠠᠪᠠ᠃
ᠠ᠊ Q ᠪᠠᠬᠠᠨ ᠬᠥᠪᠦᠯᠵᠡᠨ ᠨᠢᠰᠴᠦ ᠶᠠᠪᠤᠭᠠᠳ ᠶᠢᠰᠦᠨ ᠡᠵᠡᠳ ᠦ᠋ᠨ ᠰᠦᠮᠡ ᠳ᠋ᠡᠭᠡᠨ ᠬᠠᠷᠢᠵᠤ ᠢᠷᠡᠲᠡᠯᠡ ᠠᠷᠢᠬᠢ ᠨᠢ ᠪᠦᠷ ᠰᠡᠷᠭᠦᠵᠡᠢ᠃ ᠡᠨᠡ ᠣᠷᠣᠢ ᠰᠦᠮᠡ ᠬᠠᠷᠠᠭᠴᠢ ᠡᠪᠦᠭᠡᠨ ᠪᠠᠰᠠ ᠰᠦᠷᠡᠬᠡᠢ ᠡᠶᠡᠯᠳᠡᠭ ᠪᠣᠯᠵᠤ ᠲᠡᠭᠦᠨ ᠢ᠋ ᠤᠷᠢᠵᠤ ᠴᠠᠢ ᠤᠤᠭᠤᠯᠭᠠᠪᠠ᠃ ᠠ᠊ Q ᠲᠡᠭᠦᠨ ᠡᠴᠡ ᠬᠣᠶᠠᠷ ᠪᠣᠭᠣᠷᠰᠣᠭ ᠠᠪᠴᠤ ᠢᠳᠡᠵᠦ ᠪᠠᠷᠠᠭᠠᠳ ᠪᠠᠰᠠ ᠬᠠᠭᠠᠰ ᠨᠣᠴᠣᠭᠠᠭᠰᠠᠨ ᠳᠥᠷᠪᠡᠨ ᠯᠠᠩ ᠤ᠋ᠨ ᠯᠠ ᠣᠯᠵᠤ᠂ ᠲᠡᠭᠦᠨ ᠢ᠋ᠶ᠋ᠡᠨ ᠠᠰᠠᠭᠠᠭᠠᠳ ᠪᠢᠴᠢᠬᠠᠨ ᠲᠠᠰᠤᠯᠭᠠᠨ ᠳ᠋ᠠᠭᠠᠨ ᠭᠠᠭᠴᠠᠭᠠᠷ ᠬᠡᠪᠲᠡᠪᠡ᠃ ᠳᠣᠲᠣᠷᠠ ᠨᠢ ᠥᠭᠦᠯᠡᠰᠢ ᠦᠭᠡᠢ ᠰᠠᠢᠬᠠᠨ ᠰᠠᠨᠠᠭᠳᠠᠵᠤ ᠪᠠᠰᠠ ᠶᠡᠬᠡ ᠪᠠᠶᠠᠷ ᠲᠠᠢ ᠪᠣᠯᠪᠠ᠃ ᠯᠠ ᠶᠢᠨ ᠳᠥᠯᠥ ᠨᠢ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠲᠠᠪᠤᠨ ᠤ᠋ ᠰᠥᠨᠢ ᠰᠢᠭ ᠳᠤᠯᠠᠯᠵᠠᠨ ᠭᠡᠢᠵᠦ ᠰᠡᠳᠬᠢᠯ ᠨᠢ ᠴᠤ᠌ ᠮᠥᠨ ᠡᠭᠦᠨ ᠦ᠌ ᠬᠠᠮᠲᠤ ᠬᠥᠪᠦᠯᠵᠡᠨ ᠪᠥᠵᠢᠭᠯᠡᠵᠦ ᠡᠬᠢᠯᠡᠯᠡ᠃
《ᠤᠷᠪᠠᠨᠠ ᠠ᠋? ᠪᠠᠰᠠ ᠪᠠᠬᠠᠲᠠᠢ ᠬᠡᠷᠡᠭ ᠳᠡ ᠁ ᠴᠠᠭᠠᠨ ᠬᠤᠶᠠᠭ ᠳᠤᠭᠤᠯᠠᠭᠠ ᠡᠮᠦᠰᠦᠭᠰᠡᠨ ᠨᠢᠭᠡ ᠣᠯᠠᠨ ᠬᠤᠪᠢᠰᠬᠠᠯᠲᠤ ᠨᠠᠮ ᠤ᠋ᠨ ᠬᠢᠨ ᠬᠦᠷᠴᠦ ᠢᠷᠡᠯᠡ᠃ ᠭᠠᠷ ᠲᠠᠭᠠᠨ ᠴᠥᠮ ᠳᠠᠮ ᠢᠯᠳᠦ᠂ ᠭᠠᠩ ᠲᠠᠰᠢᠭᠤᠷ᠂ ᠳᠡᠯᠪᠡᠷᠡᠬᠦ ᠪᠥᠮᠪᠥᠭᠡ᠂ ᠣᠷᠣᠰ ᠫᠤᠤ᠂ ᠵᠢᠳᠠ ᠰᠡᠷᠡᠭᠡ᠂ ᠬᠤᠷᠳᠤᠨ ᠫᠤᠤ ᠪᠠᠷᠢᠵᠠᠭᠠᠭᠠᠳ ᠶᠢᠰᠦᠨ ᠡᠵᠡᠳ ᠦ᠋ᠨ ᠰᠦᠮᠡ ᠪᠡᠷ ᠳᠠᠭᠠᠷᠢᠵᠤ ᠭᠠᠷᠬᠤ ᠳ᠋ᠠᠭᠠᠨ: 〈ᠠ᠊ Q! ᠬᠠᠮᠲᠤ ᠶᠠᠪᠤᠶᠠ᠂ ᠬᠠᠮᠲᠤ ᠶᠠᠪᠤᠶᠠ!〉 ᠭᠡᠯᠴᠡᠨᠡ᠃ ᠲᠡᠭᠡᠭᠡᠳ ᠬᠠᠮᠲᠤ ᠶᠠᠪᠤᠪᠠ᠃
《ᠡᠨᠡ ᠦᠶᠡ ᠳ᠋ᠦ᠍ ᠸᠧᠢ ᠵᠤᠸᠠᠩ ᠤ᠋ᠨ ᠥᠨᠥ ᠮᠤᠤᠰᠠᠢᠨ ᠡᠮᠡᠰ ᠦ᠋ᠳ ᠴᠣᠬᠣᠮ ᠢᠨᠢᠶᠡᠳᠦᠮᠲᠡᠢ ᠰᠢᠦ᠂ ᠰᠥᠭᠥᠳᠴᠢᠬᠡᠭᠡᠳ: 〈ᠠ᠊ Qᠮᠢᠨᠢ᠂ ᠠᠮᠢ ᠠᠪᠤᠷᠠ!〉 ᠭᠡᠵᠡᠭᠡᠨᠡ᠃ ᠬᠡᠨ ᠲᠡᠭᠦᠨ ᠢ᠋ ᠰᠣᠨᠣᠰᠬᠤ ᠪᠣᠢ! ᠡᠩ ᠲᠡᠷᠢᠭᠦᠨ ᠳ᠋ᠦ᠍ ᠵᠢᠭᠠᠯ D᠂ ᠵᠣᠣ ᠲᠠᠢᠶᠧ ᠨᠣᠶᠠᠨ ᠬᠣᠶᠠᠷ ᠤ᠋ᠨ ᠴᠢᠰᠤ ᠶ᠋ᠢ ᠬᠣᠯᠢᠶᠠ᠂ ᠪᠠᠰᠠ ᠰᠢᠦᠼᠠᠢ ᠶ᠋ᠢ᠂ ᠬᠠᠭᠤᠷᠮᠠᠴᠢ ᠬᠠᠷᠢ ᠶ᠋ᠢᠨ ᠴᠢᠳᠬᠥᠷ ᠢ᠋ ᠁ ᠨᠢᠭᠡ ᠬᠡᠳᠦ ᠦᠯᠡᠳᠡᠭᠡᠬᠦ ᠤᠤ ᠳᠠ ? ᠸᠠᠩ ᠰᠠᠬᠠᠯᠲᠤ ᠶ᠋ᠢ ᠦᠯᠡᠳᠡᠭᠡᠭᠰᠡᠨ ᠴᠤ᠌ ᠪᠣᠯᠬᠤ ᠶᠤᠮ᠃ ᠵᠠ ᠶᠠᠷᠰᠢᠭ᠂ ᠠᠪᠤᠭᠠᠳ ᠭᠠᠷ᠃ ᠁
《ᠡᠳ᠋ ᠶᠠᠭᠤᠮᠠ ᠁ ᠰᠢᠭᠤᠳ ᠣᠷᠣᠵᠤ ᠣᠴᠢᠭᠠᠳ ᠠᠪᠳᠠᠷᠠ ᠬᠣᠷᠭᠣ ᠶ᠋ᠢ ᠨᠡᠭᠡᠭᠡᠨᠡ᠃ ᠶᠤᠸᠠᠮᠪᠤᠤ᠂ ᠮᠥᠩᠭᠥᠨ ᠵᠣᠭᠣᠰ᠂ ᠶᠠᠩᠱᠠ ᠴᠠᠮᠴᠠ ᠁ ᠰᠢᠦᠼᠠᠢ ᠶ᠋ᠢᠨ ᠡᠬᠡᠨᠡᠷ ᠦ᠋ᠨ ᠨᠢᠩᠪᠦ᠋ᠸᠧ ᠮᠠᠶᠢ᠍ᠭ ᠤ᠋ᠨ ᠣᠷᠣ ᠶ᠋ᠢ ᠤᠷᠢᠳᠠ ᠪᠠᠷ ᠶᠢᠰᠦᠨ ᠡᠵᠡᠳ ᠦ᠋ᠨ ᠰᠦᠮᠡ ᠳ᠋ᠡᠭᠡᠨ ᠠᠪᠴᠢᠷᠠᠶᠠ᠂ ᠡᠭᠦᠨ ᠡᠴᠡ ᠭᠠᠳᠠᠨᠠ ᠴᠢᠶᠠᠨ ᠣᠪᠣᠭᠲᠠᠨ ᠤ᠋ ᠰᠢᠷᠡᠭᠡ ᠰᠠᠨᠳᠠᠯᠢ ᠶᠢ ᠴᠤ᠌ ᠠᠪᠴᠢᠷᠠᠵᠤ ᠲᠠᠯᠪᠢᠶᠠ᠂ ᠡᠰᠡᠬᠦᠯᠡ ᠵᠤᠤ ᠣᠪᠣᠭᠲᠠᠨ ᠤ ᠴᠤ᠌ ᠶᠠᠭᠠᠮᠠᠢ᠃ ᠥᠪᠡᠷ ᠢ᠋ᠶ᠋ᠡᠨ ᠭᠠᠷ ᠬᠥᠳᠡᠯᠬᠦ ᠦᠭᠡᠢ ᠰᠢᠦ! ᠵᠢᠭᠠᠯ D ᠪᠠᠷ ᠵᠥᠭᠡᠭᠡᠯᠭᠡᠨᠡ᠂ ᠪᠤᠰᠢᠭᠤ ᠵᠥᠭᠡᠭᠡᠬᠦ ᠦᠭᠡᠢ ᠪᠣᠯ ᠲᠦᠭᠦᠰᠢ ᠶ᠋ᠢ ᠨᠢ ᠠᠪᠤᠨᠠ᠃᠁
《ᠵᠣᠣ ᠰᠧ ᠴᠧᠨ ᠦ᠌ ᠥᠬᠢᠨ ᠳᠡᠭᠦᠦ ᠶᠠᠭ ᠵᠢᠰᠦ ᠦᠭᠡᠢ᠃ ᠽᠧᠦ ᠴᠢ ᠪᠡᠷᠭᠡᠨ ᠦ᠌ ᠥᠬᠢᠨ ᠢ᠋ ᠬᠡᠳᠦᠨ ᠵᠢᠯ ᠡᠴᠡ ᠮᠡᠳᠡᠶᠡ᠃ ᠬᠠᠭᠤᠷᠮᠠᠴᠢ ᠬᠠᠷᠢ ᠶ᠋ᠢᠨ ᠴᠢᠳᠬᠥᠷ ᠦ᠋ᠨ ᠡᠬᠡᠨᠡᠷ ᠨᠢ ᠭᠡᠵᠢᠭᠡ ᠦᠭᠡᠢ ᠬᠥᠮᠦᠨ ᠲᠡᠢ ᠤᠨᠲᠠᠳᠠᠭ ᠶᠤᠮ᠃ ᠫᠦ᠂ ᠣᠯᠢᠭᠲᠠᠢ ᠠᠮᠢᠲᠠᠨ ᠪᠢᠰᠢ! ᠰᠢᠦᠼᠠᠢ ᠶ᠋ᠢᠨ ᠡᠬᠡᠨᠡᠷ ᠦ᠋ᠨ ᠨᠢᠳᠦᠨ ᠳᠡᠭᠡᠷᠡ ᠨᠢ ᠰᠣᠷᠪᠢ ᠲᠠᠢ ᠪᠢᠯᠡ᠃ ᠁ ᠡᠦ ᠮᠠ᠋ ᠤᠳᠠᠲᠠᠯᠠ ᠬᠠᠷᠠᠭᠳᠠᠭᠰᠠᠨ ᠦᠭᠡᠢ᠂ ᠬᠠᠮᠢᠭᠠ ᠪᠠᠢᠬᠤ ᠶ᠋ᠢ ᠪᠤᠤ ᠮᠡᠳᠡ᠂ ᠭᠡᠪᠡᠴᠦ ᠬᠥᠯ ᠨᠢ ᠳᠠᠩᠴᠢ ᠶᠡᠬᠡ ᠨᠢ ᠬᠠᠷᠠᠮᠰᠠᠯᠲᠠᠢ᠃ 》
ᠠ᠊ Q ᠭᠦᠢᠴᠡᠳ ᠵᠢᠪ ᠳᠠᠪ ᠪᠣᠳᠣᠬᠤ ᠶ᠋ᠢᠨ ᠠᠮᠵᠢᠯ ᠦᠭᠡᠢ ᠬᠠᠮᠠᠷ ᠲᠠᠲᠠᠵᠤ ᠭᠠᠷᠪᠠ᠃ ᠳᠥᠷᠪᠡᠨ ᠯᠠᠩ ᠤ᠋ᠨ ᠯᠠ ᠳᠥᠩᠭᠡᠵᠢ ᠬᠤᠷᠤᠭᠤ ᠬᠢᠷᠢᠲᠡᠢᠬᠡᠨ ᠰᠢᠳᠡᠵᠦ᠂ ᠳᠤᠯᠠᠯᠵᠠᠭᠰᠠᠨ ᠤᠯᠠᠭᠠᠨ ᠭᠡᠷᠡᠯ ᠨᠢ ᠠ᠊ Q ᠶᠢᠨ ᠠᠩᠭᠠᠢᠭᠰᠠᠨ ᠠᠮᠠᠨ ᠳ᠋ᠤ᠌ ᠲᠤᠰᠤᠨᠠ᠃
《ᠬᠠ ᠬᠠ!》 ᠭᠡᠵᠦ ᠠ᠊ Q ᠭᠡᠨᠡᠳᠲᠡ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠪᠠᠷᠬᠢᠷᠠᠪᠠ᠃ ᠥᠨᠳᠡᠢᠵᠦ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠰᠠᠨᠳᠤᠷᠤᠨ ᠠᠵᠢᠭᠯᠠᠵᠤ ᠦᠵᠡᠭᠡᠳ ᠳᠥᠷᠪᠡᠨ ᠯᠠᠩ ᠤ᠋ᠨ ᠯᠠ ᠨᠢᠳᠦᠨ ᠳ᠋ᠦ᠍ᠨᠢ ᠬᠠᠷᠠᠭᠳᠠᠬᠤᠯᠠᠷ ᠳᠠᠬᠢᠨ ᠬᠡᠪᠲᠡᠭᠡᠳ ᠤᠨᠲᠠᠴᠢᠬᠠᠪᠠ᠃
ᠮᠠᠷᠭᠠᠰᠢ ᠨᠢ ᠲᠡᠷᠡ ᠶᠡᠬᠡ ᠣᠷᠣᠢ ᠪᠣᠰᠪᠠ᠃ ᠭᠤᠳᠤᠮᠵᠢᠨ ᠳ᠋ᠤ᠌ ᠭᠠᠷᠴᠤ ᠦᠵᠡᠬᠦᠯᠡ ᠬᠠᠮᠤᠭ ᠶᠠᠭᠤᠮᠠ ᠴᠥᠮ ᠬᠡᠪ ᠢ᠋ᠶ᠋ᠡᠷ᠂ ᠭᠡᠳᠡᠰᠦ ᠨᠢ ᠴᠤ᠌ ᠮᠥᠨ ᠥᠯᠥᠰᠦᠭᠰᠡᠭᠡᠷ ᠪᠠᠢᠨᠠ᠃ ᠪᠣᠳᠣᠵᠤ ᠦᠵᠡᠭᠰᠡᠨ ᠴᠤ᠌ ᠪᠣᠳᠣᠭᠳᠠᠬᠤ ᠶᠠᠭᠤᠮᠠ ᠠᠯᠠᠭᠠ᠃ ᠭᠡᠲᠡᠯᠡ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠠᠱ᠌ᠢᠭᠦᠢ ᠰᠠᠢᠨ ᠠᠷᠭᠠ ᠣᠯᠤᠭᠰᠠᠨ ᠶᠤᠮ ᠰᠢᠭ᠋ ᠠᠭᠠᠵᠢᠮ ᠢ᠋ᠶ᠋ᠠᠷ ᠠᠯᠬᠤᠭᠰᠠᠭᠠᠷ ᠴᠢᠪᠠᠭᠠᠨᠴᠠ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠰᠠᠨᠠᠮᠰᠠᠷ ᠦᠭᠡᠢ ᠬᠦᠷᠴᠦ ᠣᠴᠢᠪᠠ᠃
ᠰᠦᠮᠡ ᠳ᠋ᠦ᠍ ᠮᠥᠨ ᠬᠠᠪᠤᠷ ᠤ᠋ᠨ ᠠᠳᠠᠯᠢ ᠨᠠᠮ ᠵᠢᠮᠬᠡᠨ᠂ ᠴᠠᠪ ᠴᠠᠭᠠᠨ ᠬᠡᠷᠡᠮ᠂ ᠬᠠᠪ ᠬᠠᠷᠠ ᠬᠠᠭᠠᠯᠭᠠ ᠬᠡᠪ ᠢ᠋ᠶ᠋ᠡᠷ ᠪᠠᠢᠯᠠ᠃ ᠠ᠊ Q ᠲᠦᠷ ᠪᠣᠳᠣᠰᠬᠢᠵᠦ ᠠᠪᠤᠭᠠᠳ ᠣᠴᠢᠵᠤ ᠡᠭᠦᠳᠡ ᠲᠣᠭᠰᠢᠬᠤᠯᠠ᠂ ᠬᠠᠰᠢᠶᠠᠨ ᠳᠣᠲᠣᠷᠠ ᠡᠴᠡ ᠨᠣᠬᠠᠢ ᠬᠤᠴᠠᠵᠤ ᠡᠬᠢᠯᠡᠯᠡ᠃ ᠲᠡᠷᠡ ᠰᠠᠨᠳᠤᠷᠴᠤ ᠲᠣᠭᠣᠰᠬᠠ ᠶ᠋ᠢᠨ ᠬᠡᠯᠲᠡᠷᠬᠡᠢ ᠬᠡᠳᠦᠨ ᠬᠡᠰᠡᠭ ᠰᠢᠭᠦᠷᠡᠵᠦ ᠠᠪᠤᠭᠠᠳ ᠳᠠᠬᠢᠨ ᠣᠴᠢᠵᠤ ᠪᠠᠬᠠᠨ ᠬᠦᠴᠦᠲᠡᠢ ᠲᠣᠭᠰᠢᠯᠠ᠃ ᠬᠠᠷᠠ ᠬᠠᠭᠠᠯᠭᠠ ᠳᠡᠭᠡᠷᠡ ᠨᠡᠯᠢᠶᠡᠳ ᠣᠷᠣ ᠭᠠᠷᠲᠠᠯᠠ ᠲᠣᠭᠰᠢᠭᠰᠠᠨ ᠬᠣᠢᠨᠠ ᠬᠠᠭᠠᠯᠭᠠ ᠨᠡᠭᠡᠭᠡᠬᠦ ᠪᠡᠷ ᠬᠥᠮᠦᠨ ᠭᠠᠷᠴᠤ ᠢᠷᠡᠬᠦ ᠴᠢᠮᠡᠭᠡ ᠰᠣᠨᠣᠰᠳᠠᠪᠠ᠃
ᠠ᠊ Q ᠰᠡᠩᠳᠡ ᠮᠡᠩᠳᠡ ᠲᠣᠭᠣᠰᠬᠠ ᠪᠠᠨ ᠬᠦᠴᠦᠯᠡᠨ ᠠᠳᠬᠤᠵᠤ᠂ ᠠᠯᠴᠠᠢᠵᠤ ᠯᠠᠪᠳᠠᠭᠤᠬᠠᠨ ᠵᠣᠭᠰᠣᠭᠠᠳ᠂ ᠬᠠᠷᠠ ᠨᠣᠬᠠᠢ ᠲᠠᠢ ᠦᠵᠡᠯᠴᠡᠬᠦ ᠪᠡᠷ ᠪᠡᠯᠡᠳᠬᠡᠯᠡ᠃ ᠭᠡᠲᠡᠯᠡ ᠰᠦᠮᠡ ᠶ᠋ᠢᠨ ᠬᠠᠭᠠᠯᠭᠠ ᠨᠠᠷᠢᠬᠠᠨ ᠠᠩᠭᠠᠢᠭᠠᠳ ᠬᠠᠷᠠ ᠨᠣᠬᠠᠢ ᠴᠤ᠌ ᠭᠠᠷᠴᠤ ᠢᠷᠡᠭᠰᠡᠨ ᠦᠭᠡᠢ᠂ ᠠᠵᠢᠭᠯᠠᠵᠤ ᠳᠣᠲᠣᠭᠰᠢ ᠨᠢ ᠬᠠᠷᠠᠪᠠᠯ᠂ ᠬᠥᠭᠰᠢᠨ ᠴᠢᠪᠠᠭᠠᠨᠴᠠ ᠭᠠᠭᠴᠠᠭᠠᠷ ᠪᠠᠢᠪᠠ᠃
《ᠴᠢ ᠪᠠᠰᠠ ᠶᠠᠭᠤᠨ ᠳ᠋ᠤ᠌ ᠢᠷᠡᠪᠡ?》 ᠭᠡᠵᠦ ᠬᠥᠭᠰᠢᠨ ᠴᠢᠪᠠᠭᠠᠨᠴᠠ ᠶᠡᠬᠡ ᠯᠡ ᠰᠣᠴᠢᠵᠤ ᠠᠰᠠᠭᠤᠪᠠ᠃ 《ᠬᠤᠪᠢᠰᠬᠠᠯ ᠪᠣᠯᠤᠭᠰᠠᠨ ᠰᠢᠦ ᠁ ᠴᠢ ᠮᠡᠳᠡᠨᠡ ᠤᠤ?᠁》 ᠭᠡᠵᠦ ᠠ᠊ Q ᠳᠤᠲᠠᠭᠤ ᠬᠠᠭᠠᠰ ᠬᠡᠯᠡᠪᠡ᠃
《ᠬᠤᠪᠢᠰᠬᠠᠯ ᠬᠤᠪᠢᠰᠬᠠᠯ ᠭᠡᠳ ᠬᠤᠪᠢᠰᠬᠠᠵᠤ ᠥᠩᠭᠡᠷᠡᠭᠰᠡᠨ ᠁ ᠲᠠ ᠨᠠᠷ ᠪᠢᠳᠡᠨ ᠢ᠋ ᠶᠠᠭᠠᠬᠢᠵᠤ ᠬᠤᠪᠢᠰᠬᠠᠬᠤ ᠨᠢ ᠪᠣᠢ?》 ᠭᠡᠵᠦ ᠬᠥᠭᠰᠢᠨ ᠴᠢᠪᠠᠭᠠᠨᠴᠠ ᠬᠣᠶᠠᠷ ᠨᠢᠳᠦ ᠪᠡᠨ ᠴᠢᠰ ᠤᠯᠠᠭᠠᠨ ᠢ᠋ᠶ᠋ᠠᠷ ᠡᠷᠭᠢᠯᠳᠦᠭᠦᠯᠦᠨ ᠬᠡᠯᠡᠪᠡ᠃
《ᠶᠠᠭᠤ? ᠁》 ᠭᠡᠵᠦ ᠠ᠊ Q ᠠᠰᠠᠭᠤᠪᠠ᠃
《ᠴᠢ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ᠂ ᠲᠡᠳᠡ ᠴᠢᠨᠢ ᠢᠷᠡᠭᠡᠳ ᠬᠤᠪᠢᠰᠬᠠᠴᠢᠬᠠᠭᠰᠠᠨ!》
《ᠬᠡᠨ?》 ᠭᠡᠵᠦ ᠠ᠊ Q ᠤᠯᠠᠮ ᠭᠠᠢᠬᠠᠪᠠ᠃
《ᠥᠨᠥ ᠰᠢᠦᠼᠠᠢ᠂ ᠬᠠᠭᠤᠷᠮᠠᠴᠢ ᠬᠠᠷᠢ ᠶ᠋ᠢᠨ ᠴᠢᠳᠬᠥᠷ ᠬᠣᠶᠠᠷ!》
ᠠ᠊ Q ᠶᠢᠨ ᠵᠡᠭᠦᠳᠦᠨ ᠳ᠋ᠦ᠍ ᠴᠤ᠌ ᠪᠠᠢᠭᠰᠠᠨ ᠦᠭᠡᠢ ᠲᠤᠯᠠ ᠰᠣᠨᠣᠰᠤᠭᠠᠳ ᠰᠠᠨᠠᠮᠰᠠᠷ ᠦᠭᠡᠢ ᠰᠣᠴᠢᠨ ᠭᠡᠯᠮᠡᠭᠳᠡᠪᠡ᠃ ᠬᠥᠭᠰᠢᠨ ᠴᠢᠪᠠᠭᠠᠨᠴᠠ ᠠ᠊ Q ᠶᠢᠨ ᠰᠦᠷ ᠪᠠᠭᠤᠷᠠᠭᠰᠠᠨ ᠢ᠋ ᠦᠵᠡᠭᠡᠳ ᠬᠠᠭᠠᠯᠭᠠ ᠪᠠᠨ ᠳᠠᠷᠤᠢ ᠬᠠᠭᠠᠵᠤ ᠣᠷᠬᠢᠪᠠ᠃ ᠠ᠊ Q ᠳᠠᠬᠢᠨ ᠲᠦᠯᠬᠢᠲᠡᠯᠡ ᠨᠡᠭᠡᠭᠡᠭᠳᠡᠮᠡᠷ ᠦᠭᠡᠢ ᠪᠠᠲᠤ ᠲᠦᠭᠵᠢᠷᠡᠭᠰᠡᠨ ᠪᠥᠭᠡᠳ ᠳᠠᠬᠢᠵᠤ ᠲᠣᠭᠰᠢᠬᠤᠯᠠ ᠲᠠᠭ ᠳᠤᠭᠤᠢ ᠪᠣᠯᠪᠠ᠃
ᠲᠡᠷᠡ ᠨᠢ ᠦᠳᠡ ᠶ᠋ᠢᠨ ᠡᠮᠦᠨᠡ ᠭᠠᠷᠤᠭᠰᠠᠨ ᠬᠡᠷᠡᠭ ᠪᠢᠯᠡ᠃ ᠵᠣᠣ ᠰᠢᠦᠼᠠᠢ ᠰᠤᠷᠠᠭ ᠠᠵᠢᠭ ᠢ᠋ ᠠᠨᠳᠤᠬᠤ ᠦᠭᠡᠢ ᠰᠣᠨᠣᠰᠳᠠᠭ ᠲᠤᠯᠠ ᠬᠤᠪᠢᠰᠬᠠᠯᠲᠤ ᠨᠠᠮ ᠰᠥᠨᠢ ᠬᠣᠲᠠᠨ ᠳ᠋ᠤ᠌ ᠣᠷᠣᠵᠤ ᠢᠷᠡᠭᠰᠡᠨ ᠢ᠋ ᠮᠡᠳᠡᠮᠡᠭᠴᠡ ᠭᠡᠵᠢᠭᠡ ᠪᠡᠨ ᠣᠷᠣᠢ ᠳᠡᠭᠡᠷᠡ ᠪᠡᠨ ᠣᠷᠢᠶᠠᠭᠠᠳ ᠬᠠᠷᠠ ᠥᠷᠯᠥᠭᠡᠭᠦᠷ ᠥᠨᠥ ᠶᠡᠷᠦ ᠡᠪ ᠲᠠᠭᠠᠷᠠᠬᠤ ᠦᠭᠡᠢ ᠬᠠᠷᠢ ᠶ᠋ᠢᠨ ᠴᠢᠳᠬᠥᠷ ᠲᠦ᠍ ᠪᠠᠷᠠᠯᠬᠠᠬᠤ ᠪᠠᠷ ᠣᠴᠢᠵᠠᠢ᠃ ᠣᠳᠣ 《ᠳᠠᠶᠠᠭᠠᠷ ᠰᠢᠨᠡᠳᠭᠡᠵᠡᠭᠡᠬᠦ》 ᠴᠠᠭ ᠪᠣᠯᠤᠭᠰᠠᠨ ᠲᠤᠯᠠ ᠲᠡᠳᠡᠨ ᠦ᠌ ᠦᠭᠡ ᠲᠠᠭᠠᠷᠠᠵᠤ ᠶᠠᠷᠢᠶᠠ ᠨᠡᠢᠯᠡᠭᠡᠳ ᠳᠣᠣᠷᠠ ᠪᠠᠨ ᠰᠠᠨᠠᠭᠠ ᠰᠡᠳᠬᠢᠯ ᠢ᠋ᠶ᠋ᠡᠨ ᠮᠡᠳᠡᠯᠴᠡᠭᠰᠡᠨ ᠰᠠᠢᠨ ᠨᠥᠬᠥᠷ ᠪᠣᠯᠤᠯᠴᠠᠵᠤ ᠬᠠᠮᠲᠤ ᠶᠠᠪᠤᠵᠤ ᠬᠤᠪᠢᠰᠬᠠᠯ ᠬᠢᠬᠦ ᠪᠡᠷ ᠪᠣᠯᠵᠣᠨ ᠲᠣᠭᠲᠠᠵᠠᠢ᠃ ᠲᠡᠳᠡ ᠪᠣᠳᠣᠭᠰᠠᠨ ᠳᠡᠭᠡᠷᠡ ᠪᠣᠳᠣᠭᠰᠠᠭᠠᠷ ᠠᠷᠠᠢ ᠭᠡᠵᠤ ᠴᠢᠪᠠᠭᠠᠨᠴᠠ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠨᠢᠭᠡᠨ 《ᠡᠵᠡᠨ ᠪᠣᠭᠳᠠ ᠲᠦᠮᠡᠨ ᠲᠦᠮᠡᠨ ᠨᠠᠰᠤᠯᠠᠲᠤᠭᠠᠢ》 ᠭᠡᠰᠡᠨ ᠦᠰᠦᠭᠲᠡᠢ ᠯᠤᠤᠲᠤ ᠫᠠᠢᠰᠠ ᠪᠠᠢᠳᠠᠭ ᠢ᠋ ᠪᠣᠳᠣᠵᠤ ᠣᠯᠤᠭᠠᠳ ᠮᠥᠨ ᠳᠠᠷᠤᠢ ᠲᠡᠭᠦᠨ ᠢ᠋ ᠬᠤᠪᠢᠰᠬᠠᠵᠤ ᠣᠷᠬᠢᠬᠤ ᠶᠣᠰᠣᠲᠠᠢ ᠭᠡᠵᠡᠢ᠃ ᠢᠩᠭᠢᠭᠡᠳ ᠰᠦᠮᠡ ᠳ᠋ᠦ᠍ ᠬᠠᠮᠲᠤ ᠬᠦᠷᠴᠦ ᠣᠴᠢᠭᠠᠳ ᠬᠤᠪᠢᠰᠬᠠᠯ ᠬᠢᠪᠡ᠃ ᠲᠡᠭᠡᠬᠦ ᠳ᠋ᠦ᠍ᠨᠢ ᠬᠥᠭᠰᠢᠨ ᠴᠢᠪᠠᠭᠠᠨᠴᠠ ᠢᠷᠡᠭᠡᠳ ᠬᠠᠰᠢᠵᠤ ᠬᠡᠳᠦᠨ ᠦᠭᠡ ᠬᠡᠯᠡᠭᠰᠡᠨ ᠳ᠋ᠦ᠍᠂ ᠲᠡᠳᠡ ᠬᠥᠭᠰᠢᠨ ᠴᠢᠪᠠᠭᠠᠨᠴᠠ ᠶ᠋ᠢ ᠮᠠᠨᠵᠤ ᠶ᠋ᠢᠨ ᠲᠥᠷᠥ ᠪᠡᠷ ᠦᠵᠡᠵᠦ ᠲᠣᠯᠣᠭᠠᠢ ᠤᠷᠤᠭᠤ ᠨᠢ ᠪᠠᠭᠠ ᠦᠭᠡᠢ ᠨᠢᠳᠤᠷᠭᠠᠳᠠᠵᠤ ᠨᠢᠰᠠᠯᠵᠠᠢ᠃ ᠲᠡᠳᠡᠨ ᠢ᠋ ᠶᠠᠪᠤᠭᠤᠯᠤᠭᠠᠳ ᠴᠢᠪᠠᠭᠠᠨᠴᠠ ᠠᠭᠤᠷ ᠢ᠋ᠶ᠋ᠠᠨ ᠳᠠᠷᠤᠭᠳᠠᠭᠰᠠᠨ ᠬᠣᠢᠨᠠ ᠣᠴᠢᠵᠤ ᠪᠠᠢᠴᠠᠭᠠᠵᠤ ᠦᠵᠡᠪᠡᠯ᠂ ᠯᠤᠤᠲᠤ ᠫᠠᠢᠰᠠ ᠴᠤ᠌ ᠦᠨᠡᠬᠡᠷ ᠭᠠᠵᠠᠷ ᠤᠨᠠᠵᠤ ᠬᠡᠮᠬᠡᠷᠡᠭᠡᠳ ᠪᠠᠢᠭᠰᠠᠨ ᠪᠥᠭᠡᠳ ᠳ᠋ᠾᠷᠠ ᠡᠬᠡ ᠪᠤᠷᠬᠠᠨ ᠤ᠋ ᠡᠮᠦᠨᠡ ᠲᠠᠯᠪᠢᠵᠤ ᠪᠠᠢᠭᠰᠠᠨ ᠡᠷᠲᠡᠨ ᠦ᠌ ᠰᠢᠦᠸᠠᠨ ᠳᠧ ᠬᠠᠭᠠᠨ ᠤ᠋ ᠦᠶᠡ ᠳ᠋ᠦ᠍ ᠴᠢᠳᠬᠤᠭᠰᠠᠨ ᠱᠠᠩᠯᠤᠤ ᠨᠢ ᠠᠯᠠᠭᠠ ᠪᠣᠯᠤᠭᠰᠠᠨ ᠪᠠᠢᠪᠠ᠃
ᠡᠨᠡ ᠶᠠᠪᠤᠳᠠᠯ ᠢ᠋ ᠠ᠊ Q ᠰᠡᠭᠦᠯ ᠳ᠋ᠦ᠍ᠨᠢ ᠣᠯᠵᠤ ᠮᠡᠳᠡᠵᠡᠢ᠃ ᠢᠩᠭᠢᠭᠡᠳ ᠥᠪᠡᠷ ᠦ᠋ᠨ ᠤᠨᠲᠠᠵᠤ ᠬᠣᠴᠣᠷᠤᠭᠰᠠᠨ ᠳ᠋ᠠᠭᠠᠨ ᠮᠠᠰᠢ ᠬᠠᠷᠠᠮᠰᠠᠬᠤ ᠪᠣᠯᠪᠠᠴᠤ᠂ ᠲᠡᠳᠡᠨ ᠦ᠌ ᠢᠷᠡᠵᠦ ᠳᠠᠭᠤᠳᠠᠭᠰᠠᠨ ᠦᠭᠡᠢ ᠳ᠋ᠦ᠍ᠨᠢ ᠮᠥᠨ ᠰᠦᠷᠡᠬᠡᠢ ᠭᠣᠮᠣᠳᠠᠨᠠ᠃ ᠲᠡᠷᠡ ᠪᠠᠰᠠ:
《ᠮᠢᠨᠦ ᠬᠤᠪᠢᠰᠬᠠᠯᠲᠤ ᠨᠠᠮ ᠳ᠋ᠤ᠌ ᠪᠠᠭᠤᠵᠤ ᠥᠭᠭᠦᠭᠡᠳ ᠪᠠᠢᠬᠤ ᠶ᠋ᠢ ᠲᠡᠳᠡ ᠪᠠᠰᠠ ᠮᠡᠳᠡᠭᠡᠳᠦᠢ ᠪᠠᠢᠭᠰᠠᠭᠠᠷ ᠶᠤᠮ ᠭᠡᠵᠦ ᠤᠤ?》 ᠭᠡᠵᠦ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠯᠠ᠃
ᠸᠧᠢ ᠵᠤᠸᠠᠩ ᠲᠣᠰᠬᠣᠨ ᠤ᠋ ᠤᠯᠤᠰ ᠤ᠋ᠨ ᠰᠡᠳᠬᠢᠯ ᠤᠯᠠᠮ ᠢ᠋ᠶ᠋ᠠᠷ ᠲᠠᠢᠪᠤᠷᠠᠪᠠ᠃ ᠤᠯᠤᠰ ᠤ᠋ᠨ ᠶᠠᠷᠢᠯᠴᠠᠬᠤ ᠪᠠᠷ ᠪᠣᠯ ᠬᠤᠪᠢᠰᠬᠠᠯᠲᠤ ᠨᠠᠮ ᠬᠡᠳᠦᠢᠪᠡᠷ ᠬᠣᠲᠠ ᠳ᠋ᠤ᠌ ᠣᠷᠣᠭᠰᠠᠨ ᠪᠣᠯᠪᠠᠴᠤ᠂ ᠬᠤᠪᠢᠰᠴᠤ ᠥᠭᠡᠷᠡᠲᠦᠭᠰᠡᠨ ᠵᠦᠢᠯ ᠲᠡᠳᠦᠢ ᠯᠡ ᠦᠭᠡᠢ ᠭᠡᠨᠡ᠃ ᠰᠢᠶᠠᠨ ᠤ᠋ ᠨᠣᠶᠠᠨ ᠮᠥᠨ ᠬᠠᠭᠤᠴᠢᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠥᠳᠡᠯᠦᠭᠰᠡᠨ ᠦᠭᠡᠢ᠂ ᠨᠡᠷᠡ ᠳᠠᠭᠤᠳᠠᠯᠭᠠ ᠶ᠋ᠢ ᠨᠢ ᠬᠠᠯᠠᠭᠰᠠᠨ ᠲᠡᠳᠦᠢ ᠪᠥᠭᠡᠳ ᠡᠷᠭᠦᠭᠰᠡᠳ ᠪᠠᠰᠠ ᠶᠠᠮᠠᠷ ᠨᠢᠭᠡᠨ ᠨᠣᠶᠠᠨ ᠪᠣᠯᠤᠭᠰᠠᠨ ᠭᠡᠨᠡ - ᠡᠳᠡᠭᠡᠷ ᠨᠡᠷᠡᠰ ᠢ᠋ ᠸᠧᠢ ᠵᠤᠸᠠᠩ ᠤ᠋ᠨ ᠬᠥᠮᠦᠰ ᠴᠥᠮ ᠲᠣᠳᠣᠷᠬᠠᠢ ᠬᠡᠯᠡᠵᠦ ᠭᠠᠷᠬᠤ ᠦᠭᠡᠢ ᠶᠦᠮ᠃ ᠴᠡᠷᠢᠭ ᠵᠠᠬᠢᠷᠤᠭᠴᠢ ᠨᠢ ᠪᠠᠰᠠ ᠯᠠ ᠤᠷᠢᠳ ᠤ᠋ᠨ ᠥᠨᠥ ᠠᠩᠭᠢ ᠶ᠋ᠢᠨ ᠳᠠᠷᠤᠭᠠ ᠪᠠᠢᠪᠠ᠃ ᠭᠠᠭᠴᠠᠬᠠᠨ ᠠᠶᠤᠮᠰᠢᠭᠲᠠᠢ ᠨᠢᠭᠡ ᠬᠡᠷᠡᠭ ᠭᠡᠪᠡᠯ᠂ ᠬᠤᠪᠢᠰᠬᠠᠯᠲᠤ ᠨᠠᠮ ᠳ᠋ᠤ᠌ ᠬᠡᠳᠦᠨ ᠦᠯᠦ ᠪᠦᠲᠦᠬᠦ ᠠᠮᠢᠲᠠᠨ ᠬᠤᠳᠬᠤᠯᠳᠤᠨ ᠣᠷᠣᠵᠤ ᠰᠠᠮᠠᠭᠤᠷᠠᠭᠤᠯᠤᠭᠰᠠᠨ ᠠ᠋ᠴᠠ᠂ ᠳᠠᠷᠠᠭᠠ ᠡᠳᠦᠷ ᠡᠴᠡ ᠨᠢ ᠡᠬᠢᠯᠡᠵᠦ ᠭᠡᠵᠢᠭᠡ ᠬᠠᠢᠴᠢᠯᠠᠬᠤ ᠪᠣᠯᠤᠭᠰᠠᠨ ᠪᠥᠭᠡᠳ ᠵᠡᠷᠭᠡᠯᠡᠳᠡᠭᠡ ᠲᠣᠰᠬᠣᠨ ᠤ᠋ ᠣᠩᠭᠣᠴᠠ ᠰᠡᠯᠢᠭᠴᠢ ᠳᠣᠯᠣᠭᠠᠲᠠᠢ ᠳ᠋ᠤ᠌ ᠡᠨᠡ ᠭᠠᠢ ᠨᠢ ᠲᠠᠭᠠᠷᠠᠭᠠᠳ ᠭᠡᠵᠢᠭᠡ ᠪᠡᠨ ᠬᠠᠢᠴᠢᠯᠠᠭᠳᠠᠭᠠᠳ ᠬᠥᠮᠦᠨ ᠦ᠌ ᠰᠢᠨᠵᠢ ᠦᠭᠡᠢ ᠪᠣᠯᠤᠭᠰᠠᠨ ᠶᠤᠮ ᠭᠡᠨᠡ ᠪᠢᠯᠡ᠃ ᠭᠡᠪᠡᠴᠦ ᠸᠧᠢ ᠵᠤᠸᠠᠩ ᠤ᠋ᠨ ᠬᠥᠮᠦᠰ ᠤᠤᠯ ᠠ᠋ᠴᠠ ᠬᠣᠲᠠ ᠣᠯᠠᠨ ᠣᠷᠣᠳᠠᠭ ᠦᠭᠡᠢ ᠪᠠᠢᠭᠰᠠᠨ ᠪᠥᠭᠡᠳ ᠬᠠᠶᠠ ᠨᠢᠭᠡ ᠬᠣᠲᠠ ᠳ᠋ᠤ᠌ ᠣᠷᠣᠶᠠ ᠭᠡᠰᠡᠨ ᠬᠥᠮᠦᠰ ᠪᠠᠢᠭᠰᠠᠨ ᠴᠤ᠌ ᠮᠥᠨ ᠲᠡᠷᠡ ᠳᠠᠷᠤᠢ ᠠᠷᠭᠠ ᠤᠬᠠᠭᠠᠨ ᠢ᠋ᠶ᠋ᠠᠨ ᠣᠯᠵᠤ ᠡᠨᠡ ᠠᠶᠤᠯ ᠠ᠋ᠴᠠ ᠮᠤᠯᠲᠤᠷᠠᠵᠤ ᠪᠠᠢᠭᠰᠠᠨ ᠲᠤᠯᠠ ᠡᠨᠡ ᠨᠢ ᠲᠡᠳᠦᠢ ᠯᠡ ᠶᠡᠬᠡ ᠠᠶᠤᠯ ᠪᠣᠯᠤᠭᠰᠠᠨ ᠦᠭᠡᠢ᠃ ᠠ᠊ Q ᠤᠤᠯ ᠨᠢ ᠪᠠᠰᠠ ᠬᠠᠭᠤᠴᠢᠨ ᠲᠠᠨᠢᠯ ᠢ᠋ᠶ᠋ᠠᠨ ᠡᠷᠢᠬᠦ ᠪᠡᠷ ᠬᠣᠲᠠ ᠳ᠋ᠤ᠌ ᠣᠷᠣᠬᠤ ᠰᠠᠨᠠᠭᠠ ᠲᠠᠢ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠡᠨᠡ ᠴᠢᠮᠡᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠠᠷᠭᠠ ᠦᠭᠡᠢ ᠪᠣᠯᠢᠵᠠᠢ᠃
ᠭᠡᠪᠡᠴᠦ ᠸᠧᠢ ᠵᠤᠸᠠᠩ ᠳ᠋ᠤ᠌ ᠨᠢᠭᠡ ᠴᠤ᠌ ᠥᠭᠡᠷᠡᠴᠢᠯᠡᠯᠲᠡ ᠭᠠᠷᠤᠭᠰᠠᠨ ᠦᠭᠡᠢ ᠭᠡᠵᠦ ᠪᠣᠳᠣᠬᠤ ᠦᠭᠡᠢ ᠶᠦᠮ᠃ ᠬᠡᠳᠦ ᠬᠣᠨᠣᠭᠰᠠᠨ ᠤ᠋ ᠳᠠᠷᠠᠭᠠ ᠭᠡᠵᠢᠭᠡ ᠪᠡᠨ ᠣᠷᠣᠢ ᠳᠡᠭᠡᠷᠡ ᠪᠡᠨ ᠣᠷᠢᠶᠠᠭᠰᠠᠳ ᠤᠯᠠᠮ ᠢ᠋ᠶ᠋ᠠᠷ ᠣᠯᠠᠰᠢᠷᠠᠪᠠ᠃ ᠳᠡᠭᠡᠷᠡ ᠬᠡᠯᠡᠵᠦ ᠥᠩᠭᠡᠷᠡᠭᠰᠡᠨ ᠮᠡᠲᠦ ᠪᠡᠷ ᠡᠩ ᠲᠡᠷᠢᠭᠦᠨ ᠳ᠋ᠦ᠍ ᠶᠠᠷᠢᠶᠠᠨ ᠦᠭᠡᠢ ᠮᠠᠤᠼᠠᠢ ᠠᠪᠤᠭᠠᠢ᠂ ᠲᠡᠭᠦᠨ ᠦ᠌ ᠳᠠᠷᠠᠭᠠ ᠵᠣᠣ ᠰᠧ ᠴᠧᠨ᠂ ᠵᠤᠤ ᠪᠠᠢ ᠶᠠᠨ ᠬᠣᠶᠠᠷ᠂ ᠰᠡᠭᠦᠯᠡᠷ ᠨᠢ ᠠ᠊ Q ᠪᠠᠢᠵᠠᠢ᠃ ᠵᠤᠨ ᠤ᠋ ᠴᠠᠭ ᠪᠠᠢᠭᠰᠠᠨ ᠪᠣᠯ ᠪᠦᠭᠦᠳᠡᠭᠡᠷ ᠭᠡᠵᠢᠭᠡ ᠪᠡᠨ ᠣᠷᠣᠢ ᠳᠡᠭᠡᠷᠡ ᠪᠡᠨ ᠣᠷᠢᠶᠠᠬᠤ ᠪᠤᠶᠤ ᠵᠠᠩᠭᠢᠳᠴᠤ ᠣᠷᠬᠢᠬᠤ ᠨᠢ ᠲᠡᠳᠦᠢ ᠯᠡ ᠭᠠᠢᠬᠠᠯᠲᠠᠢ ᠬᠡᠷᠡᠭ ᠪᠢᠰᠢ ᠶᠦᠮ᠂ ᠭᠡᠲᠡᠯᠡ ᠣᠳᠣ ᠪᠣᠯ ᠨᠠᠮᠤᠷ ᠤ᠋ᠨ ᠰᠡᠭᠦᠯ ᠪᠣᠯᠬᠤ ᠲᠤᠯᠠ ᠢᠩᠭᠢᠵᠦ 《ᠨᠠᠮᠤᠷ ᠴᠠᠭ ᠲᠤ᠌ ᠵᠤᠨ ᠤ᠋ ᠶᠠᠩᠵᠤ ᠪᠠᠷ ᠠᠭᠠᠰᠢᠯᠠᠬᠤ》ᠨᠢ᠂ ᠭᠡᠵᠢᠭᠡ ᠪᠡᠨ ᠣᠷᠢᠶᠠᠭᠴᠢᠳ ᠲᠤ᠌ ᠪᠣᠯ ᠴᠠᠭᠯᠠᠰᠢ ᠦᠭᠡᠢ ᠮᠡᠷᠭᠡᠨ ᠠᠷᠭᠠ ᠪᠣᠯᠬᠤ ᠨᠢ ᠡᠷᠡᠭᠡᠯᠵᠡᠭᠡ ᠦᠭᠡᠢ ᠪᠥᠭᠡᠳ ᠸᠧᠢ ᠵᠤᠸᠠᠩ ᠲᠣᠰᠬᠣᠨ ᠳ᠋ᠤ᠌ ᠡᠭᠦᠨ ᠢ᠋ ᠥᠭᠡᠷᠡᠴᠢᠯᠡᠯᠲᠡ ᠲᠡᠢ ᠶᠠᠭ ᠬᠣᠯᠪᠣᠭᠠ ᠦᠭᠡᠢ ᠭᠡᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ ᠶᠦᠮ᠃
ᠵᠣᠣ ᠰᠧ ᠴᠧᠨ ᠦ᠌ ᠰᠢᠯᠢᠨ ᠬᠦᠵᠦᠭᠦᠦ ᠪᠡᠨ ᠣᠩᠭᠣᠯᠵᠠᠭᠤᠯᠤᠨ ᠶᠠᠪᠤᠬᠤ ᠶ᠋ᠢ ᠦᠵᠡᠭᠰᠡᠨ ᠬᠥᠮᠦᠨ ᠴᠥᠮ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ:
《ᠬᠦᠢ᠂ ᠬᠤᠪᠢᠰᠬᠠᠯᠲᠤ ᠨᠠᠮ ᠬᠦᠷᠦᠭᠡᠳ ᠢᠷᠡᠯᠡ!》 ᠭᠡᠯᠴᠡᠨᠡ᠃
ᠠ᠊ Q ᠰᠣᠨᠣᠰᠤᠭᠠᠳ ᠲᠤᠩ ᠪᠠᠬᠠᠷᠬᠠᠨᠠ᠃ ᠰᠢᠦᠼᠠᠢ ᠭᠡᠵᠢᠭᠡ ᠪᠡᠨ ᠣᠷᠢᠶᠠᠭᠰᠠᠨ ᠲᠤᠬᠠᠢ ᠶᠡᠬᠡ ᠰᠣᠨᠢᠨ ᠢ᠋ ᠲᠡᠷᠡ ᠬᠡᠳᠦᠢᠨ ᠣᠯᠵᠤ ᠰᠣᠨᠣᠰᠤᠭᠰᠠᠨ ᠪᠣᠯᠪᠠᠴᠤ ᠪᠡᠶᠡ ᠪᠡᠨ ᠪᠠᠰᠠ ᠢᠩᠭᠢᠵᠦ ᠪᠣᠯᠤᠨᠠ ᠭᠡᠵᠦ ᠶᠡᠷᠦ ᠰᠠᠨᠠᠭᠰᠠᠨ ᠦᠭᠡᠢ ᠪᠢᠯᠡ᠃ ᠣᠳᠣ ᠵᠣᠣ ᠰᠧ ᠴᠧᠨ ᠪᠠᠰᠠ ᠢᠩᠭᠢᠭᠰᠡᠨ ᠢ᠋ ᠣᠯᠵᠤ ᠦᠵᠡᠭᠡᠳ ᠡᠢᠨ ᠬᠦ ᠳᠠᠭᠠᠵᠤ ᠬᠢᠬᠦ ᠰᠠᠨᠠᠭᠠ ᠲᠥᠷᠥᠵᠦ ᠪᠦᠷ ᠵᠣᠷᠢᠭ ᠰᠢᠭᠤᠳᠪᠠ᠃ ᠢᠩᠭᠢᠭᠡᠳ ᠨᠢᠭᠡᠨ ᠬᠤᠯᠤᠰᠤᠨ ᠰᠠᠪᠬᠠ ᠪᠠᠷ ᠭᠡᠵᠢᠭᠡ ᠪᠡᠨ ᠣᠷᠣᠢ ᠳᠡᠭᠡᠷᠡ ᠪᠡᠨ ᠪᠠᠷᠢᠵᠤ ᠣᠷᠢᠶᠠᠭᠠᠳ᠂ ᠤᠳᠠᠲᠠᠯᠠ ᠲᠦᠳᠡᠭᠡᠯᠵᠡᠨ ᠪᠠᠢᠵᠤ ᠵᠢᠷᠦᠬᠡ ᠭᠠᠷᠭᠠᠨ ᠭᠠᠷᠴᠤ ᠶᠠᠪᠤᠪᠠ᠃
ᠠ᠊ Q ᠵᠡᠭᠡᠯᠢ ᠪᠡᠷ ᠶᠠᠪᠤᠪᠠ᠃ ᠬᠥᠮᠦᠨ ᠲᠡᠭᠦᠨ ᠢ᠋ ᠬᠠᠷᠠᠭᠰᠠᠨ ᠪᠣᠯᠪᠠᠴᠤ ᠶᠠᠭᠤᠮᠠ ᠳᠤᠤᠭᠠᠷᠬᠤ ᠦᠭᠡᠢ ᠲᠤᠯᠠ ᠠ᠊ Q ᠡᠬᠢᠯᠡᠭᠡᠳ ᠪᠠᠬᠠᠨ ᠪᠠᠶᠠᠷ ᠦᠭᠡᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠡᠭᠦᠯᠡᠷ ᠨᠢ ᠪᠦᠷ ᠳᠤᠷᠠ ᠦᠭᠡᠢᠴᠡᠪᠡ᠃ ᠲᠡᠷᠡ ᠣᠢᠷᠠ ᠡᠴᠡ ᠲᠤᠩ ᠠᠮᠠᠷᠬᠠᠨ ᠠᠭᠤᠷᠯᠠᠵᠤ ᠪᠤᠬᠢᠨᠢᠳᠤᠳᠠᠭ ᠪᠣᠯᠵᠠᠢ᠃ ᠦᠨᠡᠨ ᠳ᠋ᠡᠭᠡᠨ ᠲᠡᠭᠦᠨ ᠦ᠌ ᠠᠮᠢᠳᠤᠷᠠᠯ ᠴᠤ᠌ ᠤᠷᠪᠠᠬᠤ ᠠ᠋ᠴᠠ ᠡᠮᠦᠨᠡᠬᠢ ᠰᠢᠭ ᠲᠦᠪᠡᠭ ᠭᠠᠴᠢᠭᠳᠠᠯ ᠦᠭᠡᠢ᠂ ᠠᠭᠤᠯᠵᠠᠭᠰᠠᠨ ᠬᠥᠮᠦᠨ ᠴᠤ᠌ ᠲᠡᠭᠦᠨ ᠳ᠋ᠦ᠍ ᠡᠶᠡᠯᠳᠡᠭ᠂ ᠫᠦᠰᠡ ᠮᠠᠢᠮᠠᠢ ᠴᠤ᠌ ᠪᠡᠯᠡᠨ ᠮᠥᠩᠭᠥ ᠠᠪᠤᠨᠠ ᠭᠡᠬᠦ ᠦᠭᠡᠢ ᠪᠣᠯᠤᠭᠰᠠᠨ ᠶᠤᠮ᠃ ᠭᠡᠲᠡᠯᠡ ᠠ᠊ Q ᠥᠪᠡᠷ ᠢ᠋ ᠪᠡᠨ ᠳᠠᠩᠴᠢ ᠰᠠᠨᠠᠭᠠᠨ ᠳ᠋ᠠᠭᠠᠨ ᠬᠦᠷᠦᠭᠰᠡᠨ ᠦᠭᠡᠢ᠂ ᠨᠢᠭᠡᠨᠲᠡᠶᠡ ᠬᠤᠪᠢᠰᠬᠠᠯ ᠬᠢᠭᠡᠳ ᠪᠠᠢᠲᠠᠯᠠ ᠡᠢᠮᠦᠬᠡᠨ ᠪᠠᠢᠬᠤ ᠶᠣᠰᠣ ᠦᠭᠡᠢ ᠭᠡᠵᠦ ᠪᠣᠳᠣᠳᠠᠭ ᠪᠠᠢᠯᠠ᠃ ᠢᠯᠠᠩᠭᠤᠶᠠ ᠵᠢᠭᠠᠯ D ᠶᠢ ᠨᠢᠭᠡ ᠤᠳᠠᠭᠠ ᠣᠯᠵᠤ ᠦᠵᠡᠭᠡᠳ ᠭᠡᠳᠡᠰᠦ ᠪᠡᠨ ᠬᠠᠭᠠᠷᠠᠲᠠᠯᠠ ᠠᠭᠤᠷᠯᠠᠪᠠ᠃
ᠵᠢᠭᠠᠯ D ᠴᠤ᠌ ᠭᠡᠵᠢᠭᠡ ᠪᠡᠨ ᠣᠷᠣᠢ ᠳᠡᠭᠡᠷᠡ ᠪᠡᠨ ᠣᠷᠢᠶᠠᠴᠢᠬᠠᠵᠠᠢ᠃ ᠲᠡᠷᠡ ᠪᠠᠰᠠ ᠨᠢᠭᠡᠨ ᠬᠤᠯᠤᠰᠤᠨ ᠰᠠᠪᠬᠠ ᠬᠡᠷᠡᠭᠯᠡᠭᠰᠡᠨ ᠪᠠᠢᠪᠠ᠃ ᠡᠨᠡ ᠮᠠᠭᠤ ᠪᠠᠰᠠ ᠢᠩᠭᠢᠨᠡ ᠭᠡᠵᠦ ᠠ᠊ Q ᠶᠢᠨ ᠵᠡᠭᠦᠳᠦᠨ ᠳ᠋ᠦ᠍ ᠴᠤ᠌ ᠣᠷᠣᠭᠰᠠᠨ ᠦᠭᠡᠢ᠂ ᠢᠩᠭᠢᠬᠦ ᠶ᠋ᠢ ᠨᠢ ᠴᠤ᠌ ᠣᠭᠲᠣ ᠵᠥᠪᠰᠢᠶᠡᠷᠡᠵᠦ ᠪᠣᠯᠬᠤ ᠦᠭᠡᠢ ᠶᠦᠮ! ᠲᠡᠷᠡ ᠮᠠᠭᠤ ᠵᠢᠭᠠᠯ D ᠶᠠᠭᠤ ᠶᠤᠮ ᠪᠣᠢ? ᠲᠡᠷᠡ ᠳᠣᠣᠷᠠ ᠨᠢ ᠪᠠᠷᠢᠵᠤ ᠠᠪᠤᠭᠠᠳ ᠬᠤᠯᠤᠰᠤᠨ ᠰᠠᠪᠬᠠ ᠶ᠋ᠢ ᠨᠢ ᠬᠤᠭᠤ ᠲᠠᠲᠠᠵᠤ᠂ ᠭᠡᠵᠢᠭᠡ ᠶ᠋ᠢ ᠨᠢ ᠪᠠᠭᠤᠯᠭᠠᠵᠤ ᠬᠠᠶᠠᠭᠠᠳ᠂ ᠬᠠᠴᠠᠷ ᠢ᠋ ᠨᠢ ᠬᠡᠳᠦ ᠰᠠᠢᠨ ᠠᠯᠠᠭᠠᠳᠠᠵᠤ᠂ ᠨᠡᠷᠡ ᠨᠠᠰᠤ ᠪᠠᠨ ᠮᠠᠷᠲᠠᠵᠤ ᠠᠶᠤᠮᠰᠢᠭ ᠦᠭᠡᠢ ᠬᠤᠪᠢᠰᠬᠠᠯᠲᠤ ᠨᠠᠮ ᠪᠣᠯᠤᠭᠰᠠᠨ ᠳ᠋ᠤᠨᠢ ᠵᠢᠭᠠᠬᠠᠨ ᠰᠢᠳᠬᠡᠯ ᠦᠵᠡᠭᠦᠯᠬᠦ ᠭᠡᠵᠦ ᠲᠡᠷᠡ ᠶᠡᠬᠡ ᠰᠠᠨᠠᠵᠤ ᠪᠢᠯᠡ᠃ ᠭᠡᠪᠡᠴᠦ ᠲᠡᠷᠡ ᠡᠴᠦᠰ ᠲᠦ᠍ ᠥᠷᠥᠰᠢᠶᠡᠯ ᠦᠵᠡᠭᠦᠯᠵᠦ ᠵᠥᠪᠬᠡᠨ ᠬᠢᠯᠢᠩᠲᠦ ᠨᠢᠳᠦ ᠪᠡᠷ ᠭᠢᠯᠦᠢᠵᠦ: 《ᠲᠦᠢ!》 ᠭᠡᠵᠦ ᠨᠢᠯᠪᠤᠭᠠᠳ ᠯᠠ ᠵᠣᠭᠰᠣᠵᠠᠢ᠃
ᠡᠨᠡ ᠬᠡᠳᠦᠨ ᠡᠳᠦᠷ᠂ ᠭᠠᠭᠴᠠᠬᠠᠨ ᠬᠠᠭᠤᠷᠮᠠᠴᠢ ᠬᠠᠷᠢ ᠶ᠋ᠢᠨ ᠴᠢᠳᠬᠥᠷ ᠯᠡ ᠬᠣᠲᠠ ᠳ᠋ᠤ᠌ ᠣᠷᠣᠵᠠᠢ᠃ ᠵᠣᠣ ᠰᠢᠦᠼᠠᠢ ᠤᠤᠯ ᠨᠢ ᠪᠠᠰᠠ ᠠᠪᠳᠠᠷᠠ ᠬᠠᠳᠠᠭᠠᠯᠠᠵᠤ ᠥᠭᠭᠦᠭᠰᠡᠨ ᠨᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠡᠷᠭᠦᠭᠰᠡᠳ ᠲᠦ᠍ ᠪᠡᠶᠡ ᠪᠡᠷ ᠪᠠᠷᠠᠳᠠᠬᠤ ᠪᠠᠷ ᠣᠴᠢᠬᠤ ᠭᠡᠰᠡᠨ ᠪᠣᠯᠪᠠᠴᠤ ᠭᠡᠵᠢᠭᠡ ᠬᠠᠢᠴᠢᠯᠠᠬᠤ ᠠᠶᠤᠯ ᠪᠣᠢ ᠭᠡᠵᠦ ᠰᠣᠨᠣᠰᠤᠭᠠᠳ ᠵᠣᠭᠰᠣᠵᠠᠢ᠃ ᠲᠡᠷᠡ᠂ 《ᠰᠢᠷᠠ ᠰᠢᠭᠦᠷ ᠦ᠋ᠨ ᠬᠡᠯᠪᠡᠷᠢᠲᠦ》 ᠵᠠᠬᠢᠳᠠᠯ ᠨᠢᠭᠡ ᠶ᠋ᠢ ᠪᠢᠴᠢᠵᠦ ᠬᠠᠭᠤᠷᠮᠠᠴᠢ ᠬᠠᠷᠢ ᠶ᠋ᠢᠨ ᠴᠢᠳᠬᠥᠷ ᠢ᠋ᠶ᠋ᠡᠷ ᠬᠣᠲᠠᠨ ᠳ᠋ᠤ᠌ ᠢᠯᠡᠭᠡᠭᠡᠳ ᠪᠠᠰᠠ ᠽᠢ ᠢᠦ ᠳ᠋ᠠᠩ ᠨᠠᠮ ᠳ᠋ᠤ᠌ ᠪᠡᠶᠡ ᠪᠡᠨ ᠡᠯᠰᠡᠭᠦᠯᠬᠦ ᠪᠡᠷ ᠲᠠᠨᠢᠯᠴᠠᠭᠤᠯᠵᠤ ᠥᠭᠬᠦ ᠶ᠋ᠢ ᠲᠡᠭᠦᠨ ᠳ᠋ᠦ᠍ ᠨᠠᠢᠳᠠᠭᠰᠠᠨ ᠠᠵᠢ᠃ ᠬᠠᠭᠤᠷᠮᠠᠴᠢ ᠬᠠᠷᠢ ᠶ᠋ᠢᠨ ᠴᠢᠳᠬᠥᠷ ᠬᠠᠷᠢᠵᠤ ᠢᠷᠡᠭᠡᠳ᠂ ᠰᠢᠦᠼᠠᠢ ᠠ᠋ᠴᠠ ᠳᠥᠷᠪᠡᠨ ᠮᠥᠩᠭᠥᠨ ᠲᠥᠭᠥᠷᠢᠭ ᠠᠪᠤᠭᠠᠳ ᠨᠢᠭᠡ ᠮᠥᠩᠭᠥᠨ ᠲᠣᠭᠣᠷ ᠥᠭᠭᠦᠭᠰᠡᠨ ᠢ᠋ ᠰᠢᠦᠼᠠᠢ ᠠᠪᠴᠤ ᠡᠩᠭᠡᠷ ᠳᠡᠭᠡᠷᠡ ᠪᠡᠨ ᠵᠡᠭᠦᠪᠡ᠃ ᠡᠭᠦᠨ ᠳ᠋ᠦ᠍ᠨᠢ ᠸᠧᠢ ᠵᠤᠸᠠᠩ ᠤ᠋ᠨ ᠬᠥᠮᠦᠰ ᠴᠥᠮ ᠭᠠᠢᠬᠠᠨ ᠪᠢᠰᠢᠷᠡᠵᠦ ᠡᠨᠡ ᠪᠣᠯ ᠽᠢ ᠢᠦ ᠳ᠋ᠠᠩ ᠨᠠᠮ ᠤ᠋ᠨ ᠵᠢᠩᠰᠡ ᠶᠦᠮ᠂ ᠪᠢᠴᠢᠭ ᠦ᠋ᠨ ᠲᠦᠰᠢᠮᠡᠯ ᠲᠡᠢ ᠲᠡᠩᠴᠡᠨᠡ ᠭᠡᠵᠡᠭᠡᠨᠡ᠃ ᠵᠣᠣ ᠲᠠᠢᠶᠧ ᠴᠤ᠌ ᠡᠭᠦᠨ ᠦ᠌ ᠤᠯᠠᠮ ᠠ᠋ᠴᠠ ᠪᠦᠷ ᠶᠡᠬᠡ ᠶᠠᠩᠪᠠᠷᠬᠠᠵᠤ᠂ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠠᠩᠬᠠ ᠰᠢᠦᠼᠠᠢ ᠪᠣᠯᠬᠤ ᠦᠶᠡ ᠡᠴᠡ ᠬᠣᠯᠠ ᠳᠠᠪᠠᠵᠠᠢ᠃ ᠢᠩᠭᠢᠭᠡᠳ ᠪᠦᠷ ᠨᠢᠳᠦᠨ ᠳ᠋ᠦ᠍ᠨᠢ ᠬᠠᠷᠠᠭᠳᠠᠬᠤ ᠬᠥᠮᠦᠨ ᠦᠭᠡᠢ ᠪᠣᠯᠤᠭᠰᠠᠨ ᠲᠤᠯᠠ ᠠ᠊ Q ᠶᠢ ᠪᠦᠷ ᠴᠤ᠌ ᠣᠯᠵᠤ ᠬᠠᠷᠠᠬᠤ ᠦᠭᠡᠢ ᠪᠣᠯᠤᠯᠠ᠃
ᠠ᠊ Q ᠶᠠᠭ ᠲᠠᠭᠠᠯᠠᠮᠵᠢ ᠦᠭᠡᠢ ᠪᠠᠢᠭᠰᠠᠨ ᠳᠡᠭᠡᠷᠡ ᠪᠠᠰᠠ ᠦᠷᠭᠦᠯᠵᠢ ᠤᠢᠳᠬᠠᠷᠯᠠᠵᠤ ᠪᠠᠢᠭᠰᠠᠨ ᠲᠤᠯᠠ ᠡᠨᠡ ᠮᠥᠩᠭᠥᠨ ᠲᠣᠭᠣᠷ ᠤ᠋ᠨ ᠲᠤᠬᠠᠢ ᠶᠠᠷᠢᠶᠠ ᠶ᠋ᠢ ᠰᠣᠨᠣᠰᠤᠮᠠᠭᠴᠠ ᠬᠤᠪᠢᠰᠬᠠᠯ ᠬᠢᠶᠡ ᠭᠡᠪᠡᠯ ᠵᠥᠪᠬᠡᠨ ᠪᠠᠭᠤᠵᠤ ᠥᠭᠭᠦᠨᠡ ᠭᠡᠵᠦ ᠬᠡᠯᠡᠭᠡᠳ ᠪᠣᠯᠬᠤ ᠦᠭᠡᠢ᠂ ᠭᠡᠵᠢᠭᠡ ᠪᠡᠨ ᠣᠷᠢᠶᠠᠭᠠᠳ ᠪᠠᠰᠠ ᠪᠣᠯᠬᠤ ᠦᠭᠡᠢ᠂ ᠶᠠᠭᠤᠨ ᠤ᠋ ᠡᠮᠦᠨᠡ ᠬᠤᠪᠢᠰᠬᠠᠯᠲᠤ ᠨᠠᠮ ᠤ᠋ᠨ ᠬᠢᠨ ᠲᠡᠢ ᠠᠭᠤᠯᠵᠠᠵᠤ ᠲᠠᠨᠢᠯᠴᠠᠬᠤ ᠨᠢ ᠴᠢᠬᠤᠯᠠ ᠶᠤᠮ ᠪᠠᠢᠨᠠ ᠭᠡᠵᠦ ᠥᠪᠡᠷ ᠦ᠋ᠨ ᠤᠢᠳᠬᠠᠷᠲᠠᠢ ᠪᠠᠢᠭᠰᠠᠨ ᠤ᠋ ᠴᠤ᠌ᠬᠣᠮ ᠰᠢᠯᠲᠠᠭᠠᠨ ᠢ᠋ ᠲᠡᠷᠡ ᠳᠠᠷᠤᠢ ᠣᠯᠵᠤ ᠮᠡᠳᠡᠪᠡ᠃ ᠲᠡᠭᠦᠨ ᠦ᠌ ᠨᠠᠰᠤᠨ ᠳ᠋ᠠᠭᠠᠨ ᠣᠯᠵᠤ ᠮᠡᠳᠡᠭᠰᠡᠨ ᠬᠤᠪᠢᠰᠬᠠᠯᠲᠤ ᠨᠠᠮ ᠤ᠋ᠨ ᠬᠢᠨ ᠭᠡᠪᠡᠯ ᠬᠣᠶᠠᠷᠬᠠᠨ ᠬᠥᠮᠦᠨ ᠪᠣᠢ᠃ ᠬᠣᠲᠠ ᠳ᠋ᠤ᠌ ᠪᠠᠢᠭᠰᠠᠨ ᠨᠢᠭᠡ ᠶ᠋ᠢ ᠨᠢ ᠠᠯᠢ ᠬᠡᠳᠦᠢᠨ 《ᠴᠠ》 ᠬᠢᠵᠦ ᠣᠷᠬᠢᠭᠰᠠᠨ ᠪᠥᠭᠡᠳ ᠣᠳᠣ ᠭᠠᠭᠴᠠᠬᠠᠨ ᠬᠠᠭᠤᠷᠮᠠᠴᠢ ᠬᠠᠷᠢ ᠶ᠋ᠢᠨ ᠴᠢᠳᠬᠥᠷ ᠲᠡᠢ ᠵᠥᠪᠳᠡᠬᠦ ᠡᠴᠡ ᠥᠭᠡᠷᠡ ᠵᠠᠮ ᠦᠭᠡᠢ ᠪᠣᠯᠵᠠᠢ᠃ ᠴᠢᠶᠠᠨ ᠣᠪᠣᠭᠲᠠᠨ ᠤ᠋ ᠭᠠᠳᠠᠷ ᠬᠠᠭᠠᠯᠭᠠ ᠨᠡᠭᠡᠭᠡᠯᠲᠡ ᠲᠡᠢ ᠪᠠᠢᠨᠠ᠃ ᠠ᠊ Q ᠠᠶᠤᠵᠤ ᠳᠠᠯᠳᠢᠷᠠᠭᠰᠠᠭᠠᠷ ᠣᠷᠣᠵᠤ ᠣᠴᠢᠯᠠ᠃ ᠳᠣᠲᠣᠷᠠ ᠨᠢ ᠣᠷᠣᠵᠤ ᠣᠴᠢᠭᠠᠳ ᠶᠡᠬᠡ ᠯᠡ ᠰᠣᠴᠢᠪᠠ᠃ ᠬᠠᠭᠤᠷᠮᠠᠴᠢ ᠬᠠᠷᠢ ᠶ᠋ᠢᠨ ᠴᠢᠳᠬᠥᠷ ᠬᠠᠰᠢᠶᠠᠨ ᠤ᠋ ᠪᠠᠨ ᠲᠥᠪ ᠲᠦ᠍᠂ ᠥᠪᠴᠢ ᠪᠡᠶᠡ ᠬᠠᠷᠢ ᠭᠠᠳᠠᠨᠠ ᠶ᠋ᠢᠨ ᠪᠣᠯᠤᠯᠲᠠᠢ ᠫᠠᠳ ᠬᠠᠷᠠ ᠬᠤᠪᠴᠠᠰᠤ ᠡᠮᠦᠰᠴᠦ᠂ ᠡᠩᠭᠡᠷ ᠳᠡᠭᠡᠷᠡ ᠪᠡᠨ ᠪᠠᠰᠠ ᠨᠢᠭᠡ ᠮᠥᠩᠭᠥᠨ ᠲᠣᠭᠣᠷ ᠵᠡᠭᠦᠴᠢᠬᠡᠭᠡᠳ ᠭᠠᠷ ᠲᠠᠭᠠᠨ ᠠ᠊ Q ᠶᠢᠨ ᠠᠮᠲᠠᠯᠠᠵᠤ ᠥᠩᠭᠡᠷᠡᠭᠰᠡᠨ ᠥᠨᠥ ᠲᠠᠰᠢᠭᠤᠷ ᠢ᠋ ᠠᠳᠬᠤᠵᠤ᠂ ᠲᠣᠬᠣᠢ ᠢᠯᠡᠭᠦᠦ ᠤᠷᠭᠤᠭᠰᠠᠨ ᠤᠷᠲᠤ ᠭᠡᠵᠢᠭᠡ ᠪᠡᠨ ᠵᠠᠳᠠᠯᠵᠤ᠂ ᠠᠯᠲᠠᠨ ᠮᠡᠯᠡᠬᠡᠢ ᠶ᠋ᠢᠨ ᠰᠠᠬᠢᠭᠤᠯᠰᠤᠨ ᠰᠢᠭ᠋ ᠮᠥᠷᠥ ᠤᠷᠤᠭᠤ ᠪᠠᠨ ᠰᠡᠭᠰᠡᠢᠯᠭᠡᠨ ᠤᠨᠵᠢᠭᠤᠯᠤᠭᠰᠠᠨ ᠪᠠᠢᠪᠠ᠃ ᠶᠠᠭ ᠡᠮᠦᠨᠡ ᠨᠢ ᠵᠣᠣ ᠪᠠᠢ ᠶᠠᠨ ᠭᠤᠷᠪᠠᠨ ᠲᠡᠨᠦᠭᠦᠯᠴᠢᠨ ᠦ᠌ ᠬᠠᠮᠲᠤ ᠳᠠᠪ ᠲᠡᠭᠰᠢᠬᠡᠨ ᠵᠣᠭᠰᠣᠭᠠᠳ᠂ ᠲᠡᠭᠦᠨ ᠦ᠌ ᠶᠠᠷᠢᠶᠠ ᠶ᠋ᠢ ᠶᠡᠬᠡ ᠯᠡ ᠬᠢᠴᠢᠶᠡᠩᠭᠦᠢ ᠰᠣᠨᠣᠰᠤᠨᠠ᠃
ᠠ᠊ Q ᠬᠥᠪ ᠬᠥᠩᠭᠡᠨ ᠠᠯᠬᠤᠵᠤ ᠣᠷᠣᠭᠠᠳ ᠵᠣᠣ ᠪᠠᠢ ᠶᠠᠨ ᠤ᠋ ᠠᠷᠤ ᠳ᠋ᠤ᠌ ᠵᠣᠭᠰᠣᠪᠠ᠃ ᠴᠢᠩᠭᠢᠭᠡᠳ ᠦᠭᠡ ᠳᠤᠤᠭᠠᠷᠬᠤ ᠭᠡᠵᠦ ᠶᠡᠬᠡ ᠰᠠᠨᠠᠭᠰᠠᠨ ᠪᠣᠯᠪᠠᠴᠤ ᠶᠠᠭᠤ ᠭᠡᠵᠦ ᠳᠠᠭᠤᠳᠠᠬᠤ ᠪᠠᠨ ᠣᠯᠵᠤ ᠶᠠᠳᠠᠨ᠂ ᠬᠠᠭᠤᠷᠮᠠᠴᠢ ᠬᠠᠷᠢ ᠶ᠋ᠢᠨ ᠴᠢᠳᠬᠥᠷ ᠭᠡᠵᠦ ᠪᠣᠯᠬᠤ ᠦᠭᠡᠢ ᠨᠢ ᠯᠠᠪ᠂ ᠬᠠᠷᠢ ᠶ᠋ᠢᠨ ᠬᠥᠮᠦᠨ ᠭᠡᠬᠦ ᠨᠢ ᠪᠠᠰᠠ ᠵᠣᠬᠢᠰ ᠦᠭᠡᠢ᠂ ᠬᠤᠪᠢᠰᠬᠠᠯᠲᠤ ᠨᠠᠮ ᠭᠡᠬᠦ ᠨᠢ ᠮᠥᠨ ᠡᠪ ᠦᠭᠡᠢ᠂ ᠡᠰᠡᠬᠦᠯᠡ ᠬᠠᠷᠢ ᠶ᠋ᠢᠨ ᠪᠠᠭᠰᠢ ᠭᠡᠬᠦ ᠴᠤ᠌ ᠶᠦᠮ ᠤᠤ ᠭᠡᠵᠦ ᠪᠣᠳᠣᠨ ᠵᠣᠭᠰᠣᠪᠠ᠃
ᠬᠠᠷᠢ ᠶ᠋ᠢᠨ ᠪᠠᠭᠰᠢ ᠨᠢ ᠬᠠᠷᠢᠨ ᠲᠡᠭᠦᠨ ᠢ᠋ ᠣᠯᠵᠤ ᠦᠵᠡᠭᠰᠡᠨ ᠦᠭᠡᠢ᠂ ᠤᠴᠢᠷ ᠨᠢ ᠲᠡᠷᠡ ᠨᠢᠳᠦ ᠪᠡᠨ ᠴᠠᠭᠠᠨ ᠢ᠋ᠶ᠋ᠠᠷ ᠡᠷᠭᠢᠭᠦᠯᠵᠦ ᠶᠡᠬᠡ ᠯᠡ ᠲᠠᠭᠠᠲᠠᠢ ᠪᠠᠷ:
《ᠪᠢ ᠪᠣᠯ ᠳᠠᠪᠴᠢᠭᠤ ᠵᠠᠩ ᠲᠠᠢ ᠬᠥᠮᠦᠨ ᠲᠤᠯᠠ ᠨᠢᠭᠤᠷ ᠤᠴᠠᠷᠠᠪᠠᠯ ᠯᠠ ᠵᠠᠪᠠᠯ ᠾᠦᠩ ᠠᠬᠠ ᠠ᠋! ᠪᠢᠳᠡ ᠭᠠᠷ ᠬᠥᠳᠡᠯᠦᠶᠡ! ᠭᠡᠳᠡᠭ ᠶᠦᠮ᠃ ᠭᠡᠲᠡᠯᠡ ᠲᠡᠷᠡ ᠬᠡᠵᠢᠶᠡᠳᠡ NO! ᠭᠡᠳ ᠯᠡ ᠪᠠᠢᠯᠠ᠃ - ᠡᠨᠡ ᠪᠣᠯ ᠬᠠᠷᠢ ᠶ᠋ᠢᠨ ᠦᠭᠡ᠂ ᠲᠠ ᠨᠠᠷ ᠮᠡᠳᠡᠬᠦ ᠦᠭᠡᠢ᠃ ᠦᠭᠡᠢᠪᠡᠯ ᠬᠤᠪᠢᠰᠬᠠᠯ ᠠᠯᠢ ᠬᠡᠳᠦᠢᠨ ᠪᠦᠳᠦᠴᠢᠭᠡᠭᠰᠡᠨ ᠰᠢᠦ ᠳᠡ᠃ ᠭᠡᠲᠡᠯᠡ ᠡᠨᠡ ᠨᠢ ᠶᠠᠭ ᠲᠡᠭᠦᠨ ᠦ᠌ ᠬᠡᠷᠡᠭ ᠤᠴᠢᠷ ᠲᠤ᠌ ᠬᠢᠴᠢᠶᠡᠮᠡᠲᠡᠭᠡᠢ ᠪᠠᠢᠳᠠᠭ ᠭᠠᠵᠠᠷ ᠨᠢ ᠶᠦᠮ᠃ ᠲᠡᠷᠡ ᠨᠠᠮᠠᠶ᠋ᠢ ᠬᠤᠪᠧᠢ ᠳ᠋ᠦ᠍ ᠣᠴᠢᠭᠠᠴᠢ ᠭᠡᠵᠦ ᠳᠠᠬᠢᠨ ᠳᠠᠬᠢᠨ ᠭᠤᠶᠤᠭᠰᠠᠨ ᠰᠢᠦ᠂ ᠪᠢ ᠣᠴᠢᠭᠰᠠᠨ ᠦᠭᠡᠢ᠃ ᠬᠡᠨ ᠲᠡᠷᠡ ᠪᠢᠴᠢᠬᠠᠨ ᠰᠢᠶᠠᠨ ᠤ᠋ ᠭᠠᠵᠠᠷ ᠠᠵᠢᠯᠯᠠᠬᠤ ᠪᠣᠢ? ᠁》
《ᠵᠠ ᠁ ᠣᠳᠣ ᠁》 ᠭᠡᠵᠦ ᠠ᠊ Q ᠲᠡᠭᠦᠨ ᠦ᠌ ᠶᠠᠷᠢᠶᠠ ᠲᠦᠷ ᠵᠣᠭᠰᠣᠰᠬᠢᠬᠦ ᠵᠠᠭᠤᠷᠠ᠂ ᠠᠷᠪᠠᠨ ᠬᠤᠪᠢ ᠶ᠋ᠢᠨ ᠵᠣᠷᠢᠭ ᠭᠠᠷᠭᠠᠵᠤ ᠠᠷᠠᠢᠭᠡᠵᠦ ᠠᠮᠠ ᠨᠡᠭᠡᠭᠡᠪᠡ᠃ ᠭᠡᠲᠡᠯᠡ ᠶᠠᠭᠠᠬᠢᠭᠠᠳ ᠴᠤ᠌ ᠶᠤᠮ ᠪᠤᠤ ᠮᠡᠳᠡ᠂ ᠬᠠᠷᠢ ᠶ᠋ᠢᠨ ᠪᠠᠭᠰᠢ ᠭᠡᠵᠦ ᠳᠠᠭᠤᠳᠠᠭᠰᠠᠨ ᠴᠤ᠌ ᠦᠭᠡᠢ᠃
ᠦᠭᠡ ᠰᠣᠨᠣᠰᠴᠤ ᠪᠠᠢᠭᠰᠠᠨ ᠳᠥᠷᠪᠡᠨ ᠬᠥᠮᠦᠨ ᠴᠥᠮ ᠰᠣᠴᠢᠵᠤ ᠲᠡᠭᠦᠨ ᠢ᠋ ᠡᠷᠭᠢᠵᠦ ᠬᠠᠷᠠᠪᠠ᠃ ᠬᠠᠷᠢ ᠶ᠋ᠢᠨ ᠪᠠᠭᠰᠢ ᠪᠠᠰᠠ ᠣᠯᠵᠤ ᠦᠵᠡᠭᠡᠳ:
《ᠶᠠᠭᠤ?》 ᠭᠡᠪᠡ᠃
《ᠪᠢ ᠁》
《ᠭᠠᠷ!》
《ᠪᠢ ᠪᠠᠭᠤᠵᠤ ᠁》
《ᠲᠣᠨᠢᠯ!》 ᠭᠡᠵᠦ ᠬᠠᠷᠢ ᠶ᠋ᠢᠨ ᠪᠠᠭᠰᠢ 《ᠪᠡᠯᠪᠡᠰᠦᠷᠡᠯ ᠦ᠋ᠨ ᠰᠢᠳᠠᠮ》 ᠢ᠋ᠶ᠋ᠠᠨ ᠳᠠᠯᠠᠢᠪᠠ᠃
ᠵᠣᠣ ᠪᠠᠢ ᠶᠠᠨ ᠪᠣᠯᠤᠨ ᠲᠡᠨᠦᠭᠦᠯᠴᠢᠳ ᠴᠥᠮ: 《ᠪᠠᠭᠰᠢ ᠴᠢᠮᠠᠶ᠋ᠢ ᠲᠣᠨᠢᠯ ᠭᠡᠵᠦ ᠪᠠᠢᠬᠤ ᠳ᠋ᠤ᠌ ᠴᠢ ᠪᠠᠰᠠ ᠰᠣᠨᠣᠰᠬᠤ ᠦᠭᠡᠢ ᠤᠤ?》 ᠭᠡᠵᠦ ᠵᠠᠩᠳᠤᠷᠪᠠ᠃
ᠠ᠊ Q ᠭᠠᠷ ᠢ᠋ᠶ᠋ᠠᠷ ᠲᠣᠯᠣᠭᠠᠢ ᠪᠠᠨ ᠬᠠᠯᠬᠠᠯᠠᠭᠠᠳ ᠰᠠᠨᠠᠮᠰᠠᠷ ᠦᠭᠡᠢ ᠭᠠᠳᠠᠭᠰᠢ ᠳᠤᠲᠠᠭᠠᠨ ᠭᠠᠷᠪᠠ᠃ ᠬᠠᠷᠢ ᠶ᠋ᠢᠨ ᠪᠠᠭᠰᠢ ᠬᠠᠷᠢᠨ ᠨᠡᠬᠡᠵᠦ ᠲᠠᠭᠤᠭᠰᠠᠨ ᠴᠤ᠌ ᠦᠭᠡᠢ᠃ ᠠ᠊ Q ᠵᠢᠷᠠ ᠭᠠᠷᠤᠢ ᠠᠯᠬᠤᠮ ᠲᠦᠷᠭᠡᠨ ᠭᠦᠶᠦᠭᠡᠳ ᠠᠯᠭᠤᠷᠬᠠᠨ ᠠᠯᠬᠤᠪᠠ᠃ ᠢᠩᠭᠢᠭᠡᠳ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠤᠢᠳᠬᠠᠷ ᠭᠤᠨᠢᠭ ᠢ᠋ᠶ᠋ᠠᠷ ᠳᠦᠭᠦᠷᠴᠦ: ᠬᠠᠷᠢ ᠶ᠋ᠢᠨ ᠪᠠᠭᠰᠢ ᠲᠡᠭᠦᠨ ᠢ᠋ ᠬᠤᠪᠢᠰᠬᠠᠯ ᠬᠢᠯᠭᠡᠬᠦ ᠦᠭᠡᠢ ᠪᠠᠢᠨᠠ᠂ ᠣᠳᠣ ᠥᠭᠡᠷᠡ ᠵᠠᠮ ᠦᠭᠡᠢ ᠪᠣᠯᠪᠠ᠃ ᠡᠭᠦᠨ ᠡᠴᠡ ᠬᠣᠢᠰᠢ ᠴᠠᠭᠠᠨ ᠬᠤᠶᠠᠭ ᠳᠤᠭᠤᠯᠠᠭᠠ ᠲᠠᠢ ᠬᠥᠮᠦᠨ ᠢᠷᠡᠵᠦ ᠳᠠᠭᠤᠳᠠᠬᠤ ᠶ᠋ᠢ ᠬᠦᠰᠡᠵᠦ ᠣᠭᠲᠣ ᠪᠣᠯᠬᠤ ᠦᠭᠡᠢ᠂ ᠲᠡᠭᠦᠨ ᠦ᠌ ᠪᠦᠬᠦ ᠡᠭᠦᠷᠭᠡ ᠬᠠᠷᠢᠭᠤᠴᠠᠯᠭᠠ᠂ ᠬᠦᠰᠡᠯ ᠵᠣᠷᠢᠭ᠂ ᠭᠣᠷᠢᠳᠠᠯ ᠡᠷᠡᠮᠡᠯᠵᠡᠯ᠂ ᠬᠡᠳᠦ ᠶ᠋ᠢᠨ ᠵᠣᠷᠢᠯᠭᠠ ᠪᠦᠷ ᠨᠢᠭᠡᠮᠦᠰᠦᠨ ᠪᠠᠯᠠᠷᠠᠪᠠ᠃ ᠰᠤᠯᠠ ᠲᠡᠨᠦᠭᠦᠯᠴᠢᠳ ᠦᠭᠡ ᠭᠠᠷᠭᠠᠵᠤ ᠵᠢᠭᠠᠯ D᠂ ᠸᠠᠩ ᠰᠠᠬᠠᠯᠲᠤ ᠮᠡᠲᠦᠰ ᠲᠦ᠍ ᠡᠯᠡᠭ ᠪᠣᠯᠬᠤ ᠨᠢ ᠴᠤ᠌ ᠶᠠᠭᠠᠮᠠᠢ᠂ ᠲᠡᠳᠦᠢ ᠯᠡ ᠴᠢᠬᠤᠯᠠ ᠬᠡᠷᠡᠭ ᠪᠢᠰᠢ ᠭᠡᠵᠦ ᠪᠣᠳᠣᠵᠤ ᠶᠠᠪᠤᠪᠠ᠃
ᠠ᠊ Q ᠡᠢᠮᠦ ᠣᠯᠢᠭ ᠦᠭᠡᠢ ᠶᠠᠪᠤᠳᠠᠯ ᠳ᠋ᠤ᠌ ᠶᠡᠷᠦ ᠡᠴᠡ ᠤᠴᠠᠷᠠᠵᠤ ᠦᠵᠡᠭᠡᠳᠦᠢ ᠶᠦᠮ ᠰᠢᠭ ᠰᠠᠨᠠᠭᠳᠠᠨᠠ᠃ ᠭᠡᠵᠢᠭᠡ ᠣᠷᠢᠶᠠᠭᠰᠠᠨ ᠢ᠋ᠶ᠋ᠠᠨ ᠮᠥᠨ ᠤᠴᠢᠷ ᠦᠭᠡᠢ᠂ ᠳᠡᠮᠡᠢ ᠢᠴᠢᠭᠦᠷᠢ ᠭᠡᠵᠦ ᠰᠠᠨᠠᠨᠠ᠃ ᠥᠰᠢᠶᠡ ᠪᠣᠳᠣᠵᠤ ᠳᠣᠣᠷᠠ ᠨᠢ ᠭᠡᠵᠢᠭᠡ ᠪᠡᠨ ᠲᠠᠯᠪᠢᠴᠢᠬᠠᠶᠠ ᠭᠡᠵᠦ ᠰᠠᠨᠠᠭᠰᠠᠨ ᠪᠣᠯᠪᠠᠴᠤ ᠪᠠᠰᠠ ᠠᠷᠠᠢ ᠲᠠᠯᠪᠢᠭᠰᠠᠨ ᠦᠭᠡᠢ᠂ ᠰᠥᠨᠢ ᠪᠣᠯᠲᠠᠯᠠ ᠬᠡᠰᠦᠵᠦ ᠶᠠᠪᠤᠭᠰᠠᠭᠠᠷ ᠬᠣᠶᠠᠷ ᠠᠶᠠᠭᠠ ᠠᠷᠢᠬᠢ ᠵᠢᠭᠡᠯᠡᠵᠦ ᠵᠠᠯᠭᠢᠯᠠᠬᠤᠯᠠ ᠠᠭᠠᠵᠢᠮ ᠢ᠋ᠶ᠋ᠠᠷ ᠪᠠᠶᠠᠷ ᠪᠠᠶᠠᠰᠤᠯ ᠲᠥᠷᠥᠭᠳᠡᠵᠦ ᠨᠢᠳᠦᠨ ᠳ᠋ᠦ᠍ᠨᠢ ᠴᠠᠭᠠᠨ ᠳᠤᠭᠤᠯᠠᠭᠠ ᠶ᠋ᠢᠨ ᠬᠡᠯᠲᠡᠷᠬᠡᠢ ᠲᠠᠰᠤᠷᠬᠠᠢ ᠨᠤᠭᠤᠳ ᠪᠠᠰᠠ ᠳᠠᠬᠢᠭᠠᠳ ᠦᠵᠡᠭᠳᠡᠬᠦ ᠮᠡᠲᠦ ᠪᠣᠯᠪᠠ᠃
ᠨᠢᠭᠡᠨ ᠡᠳᠦᠷ ᠲᠡᠷᠡ ᠮᠥᠨ ᠰᠥᠨᠢ ᠣᠷᠣᠢ ᠪᠣᠯᠲᠠᠯᠠ ᠲᠡᠨᠦᠵᠦ ᠠᠷᠢᠬᠢᠨ ᠤ᠋ ᠫᠦᠰᠡᠨ ᠦ᠌ ᠬᠠᠭᠠᠯᠭᠠ ᠪᠠᠨ ᠲᠦᠭᠵᠢᠬᠦ ᠦᠶᠡ ᠳ᠋ᠦ᠍ ᠶᠢᠰᠦᠨ ᠡᠵᠡᠳ ᠦ᠋ᠨ ᠰᠦᠮᠡ ᠳ᠋ᠡᠭᠡᠨ ᠬᠡᠯᠲᠦᠷᠢᠨ ᠬᠠᠷᠢᠪᠠ᠃
ᠫᠢᠩ᠂ ᠫᠢᠩ ᠁
ᠲᠡᠷᠡ ᠭᠡᠨᠡᠳᠲᠡ ᠨᠢᠭᠡᠨ ᠰᠣᠨᠢᠬᠠᠨ ᠳᠠᠭᠤᠨ ᠣᠯᠵᠤ ᠰᠣᠨᠣᠰᠪᠠ᠃ ᠫᠤᠤᠵᠢᠩ ᠤ᠋ᠨ ᠳᠠᠭᠤᠨ ᠠᠷᠠᠢ ᠴᠤ᠌ ᠪᠢᠰᠢ ᠪᠠᠢᠯᠠ᠃ ᠠ᠊ Q ᠶᠡᠷᠦ ᠨᠢ ᠦᠢᠮᠡᠭᠡᠨ ᠳ᠋ᠦ᠍ ᠳᠤᠷᠠᠲᠠᠢ ᠰᠠᠪᠠᠭᠠ ᠦᠭᠡᠢ ᠵᠠᠩ ᠲᠠᠢ ᠬᠥᠮᠦᠨ ᠲᠤᠯᠠ ᠬᠠᠷᠠᠩᠭᠤᠢ ᠪᠠᠷ ᠰᠢᠭᠤᠳ ᠭᠠᠷᠴᠤ ᠡᠷᠢᠪᠡ᠃ ᠡᠮᠦᠨᠡ ᠨᠢ ᠬᠥᠯ ᠦ᠋ᠨ ᠴᠢᠮᠡᠭᠡ ᠭᠠᠷᠬᠤ ᠰᠢᠭ᠋ ᠪᠣᠯᠤᠭᠰᠠᠨ ᠳ᠋ᠤ᠌ ᠲᠡᠷᠡ ᠶᠠᠭ ᠵᠣᠭᠰᠣᠭᠠᠳ ᠴᠢᠩᠨᠠᠵᠤ ᠪᠠᠢᠲᠠᠯᠠ᠂ ᠭᠡᠨᠡᠳᠲᠡ ᠥᠭᠡᠳᠡ ᠡᠴᠡ ᠨᠢ ᠨᠢᠭᠡ ᠬᠥᠮᠦᠨ ᠳᠤᠲᠠᠭᠠᠵᠤ ᠢᠷᠡᠨᠡ᠃ ᠠ᠊ Q ᠣᠯᠵᠤ ᠦᠵᠡᠮᠡᠭᠴᠡ ᠲᠦᠷᠭᠡᠨ ᠪᠤᠴᠠᠭᠠᠳ ᠬᠣᠢᠨᠠ ᠠ᠋ᠴᠠ ᠨᠢ ᠳᠠᠭᠠᠵᠤ ᠳᠤᠲᠠᠭᠠᠪᠠ᠃ ᠲᠡᠷᠡ ᠬᠥᠮᠦᠨ ᠮᠤᠷᠤᠢᠪᠠᠯ ᠠ᠊ Q ᠪᠠᠰᠠ ᠮᠤᠷᠤᠢᠵᠤ ᠭᠦᠶᠦᠨᠡ᠃ ᠲᠡᠷᠡ ᠬᠥᠮᠦᠨ ᠮᠤᠷᠤᠢᠵᠤ ᠡᠷᠭᠢᠮᠡᠭᠴᠡ ᠵᠣᠭᠰᠣᠭᠰᠠᠨ ᠳ᠋ᠤ᠌ ᠠ᠊ Q ᠪᠠᠰᠠ ᠵᠣᠭᠰᠣᠪᠠ᠃ ᠠ᠊ Q ᠠᠷᠤ ᠳ᠋ᠤᠨᠢ ᠬᠥᠮᠦᠨ ᠦᠭᠡᠢ ᠶ᠋ᠢ ᠮᠡᠳᠡᠭᠡᠳ ᠡᠮᠦᠨᠡᠬᠢ ᠪᠡᠨ ᠬᠠᠷᠠᠬᠤᠯᠠ ᠭᠠᠢᠬᠠᠯ ᠵᠢᠭᠠᠯ D ᠪᠠᠢᠪᠠ᠃
《ᠶᠠᠭᠤ ᠪᠣᠢ?》 ᠭᠡᠵᠦ ᠠ᠊ Q ᠳᠤᠷᠠ ᠦᠭᠡᠢᠴᠡᠨ ᠠᠰᠠᠭᠤᠪᠠ᠃
《ᠵᠣᠣ ᠁ ᠵᠣᠣ ᠣᠪᠣᠭᠲᠠᠨ ᠤ᠋ ᠲᠠᠯᠬᠠᠳᠠᠭᠰᠠᠨ!》 ᠭᠡᠵᠦ ᠵᠢᠭᠠᠯ D ᠠᠮᠢᠰᠬᠤᠭᠠ ᠳᠡᠭᠡᠷᠡᠳᠡᠭᠰᠡᠭᠡᠷ ᠬᠡᠯᠡᠪᠡ᠃
ᠠ᠊ Q ᠶᠢᠨ ᠵᠢᠷᠦᠬᠡ ᠲᠦᠭ ᠲᠦᠭ ᠲᠦᠭᠰᠢᠨᠡ᠃ ᠵᠢᠭᠠᠯ D ᠬᠡᠯᠡᠵᠦ ᠪᠠᠷᠠᠭᠠᠳ ᠶᠠᠪᠤᠵᠤ ᠥᠭᠪᠡ᠃ ᠠ᠊ Q ᠬᠣᠶᠠᠷ ᠭᠤᠷᠪᠠ ᠳᠠᠬᠢᠨ ᠳᠤᠲᠠᠭᠠᠰᠬᠢᠵᠦ ᠵᠣᠭᠰᠣᠰᠬᠢᠪᠡ᠃ ᠭᠡᠪᠡᠴᠦ ᠠ᠊ Q ᠬᠠᠰᠢ ᠯᠠ 《ᠡᠢᠮᠦ ᠦᠢᠯᠡ》 ᠦᠢᠯᠡᠳᠴᠦ ᠥᠩᠭᠡᠷᠡᠭᠰᠡᠨ ᠬᠥᠮᠦᠨ ᠪᠣᠯᠬᠣᠷ ᠰᠥᠰᠥ ᠵᠣᠷᠢᠭ ᠰᠦᠷᠡᠬᠡᠢ ᠶᠡᠬᠡ᠂ ᠵᠠᠮ ᠤ᠋ᠨ ᠬᠠᠵᠠᠭᠤ ᠳ᠋ᠤ᠌ ᠵᠠᠢᠯᠠᠵᠤ ᠭᠠᠷᠤᠭᠠᠳ ᠴᠢᠬᠢ ᠲᠠᠯᠪᠢᠵᠤ ᠴᠢᠩᠨᠠᠪᠠᠯ ᠬᠠᠰᠬᠢᠷᠤᠯᠳᠤᠬᠤ ᠪᠣᠯᠤᠯᠲᠠᠢ ᠰᠣᠨᠣᠰᠳᠠᠪᠠ᠃ ᠳᠠᠬᠢᠭᠠᠳ ᠨᠠᠷᠢᠨ ᠠᠵᠢᠭᠯᠠᠪᠠᠯ ᠴᠠᠭᠠᠨ ᠬᠤᠶᠠᠭ ᠴᠠᠭᠠᠨ ᠳᠤᠭᠤᠯᠠᠭᠠ ᠡᠮᠦᠰᠦᠭᠰᠡᠨ ᠣᠯᠠᠨ ᠬᠥᠮᠦᠨ ᠬᠣᠢᠨᠠ ᠬᠣᠢᠨᠠᠴᠠ ᠪᠠᠨ ᠴᠤᠪᠤᠷᠠᠯᠳᠤᠨ ᠭᠠᠳᠠᠭᠰᠢ ᠪᠠᠨ ᠠᠪᠳᠠᠷᠠ ᠵᠥᠭᠡᠭᠡᠵᠡᠭᠡᠬᠦ ᠶᠦᠮ ᠰᠢᠭ᠂ ᠰᠢᠦᠼᠠᠢ ᠶ᠋ᠢᠨ ᠡᠬᠡᠨᠡᠷ ᠦ᠋ᠨ ᠨᠢᠩᠪᠦ᠋ᠸᠧ ᠮᠠᠶᠢ᠍ᠭ ᠤ᠋ᠨ ᠣᠷᠣ ᠶ᠋ᠢ ᠴᠤ᠌ ᠵᠥᠭᠡᠭᠡᠬᠦ ᠶᠦᠮ ᠰᠢᠭ ᠪᠣᠯᠤᠭᠰᠠᠨ ᠴᠤ᠌ ᠲᠣᠳᠣ ᠰᠠᠢᠬᠠᠨ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠣᠯᠪᠠ᠃ ᠣᠴᠢᠬᠤ ᠴᠤ᠌ ᠶᠤᠮ ᠤᠤ ᠭᠡᠵᠦ ᠰᠠᠨᠠᠭᠰᠠᠨ ᠴᠤ᠌ ᠬᠣᠶᠠᠷ ᠬᠥᠯ ᠨᠢ ᠬᠥᠳᠡᠯᠵᠦ ᠥᠭᠭᠦᠭᠰᠡᠨ ᠦᠭᠡᠢ᠃
ᠡᠨᠡ ᠰᠥᠨᠢ ᠰᠠᠷᠠ ᠦᠭᠡᠢ᠂ ᠸᠧᠢ ᠵᠤᠸᠠᠩ ᠲᠣᠰᠬᠣᠨ ᠬᠠᠷᠠᠩᠭᠤᠢ ᠶ᠋ᠢᠨ ᠳᠣᠲᠣᠷᠠ ᠴᠢᠮᠡᠭᠡ ᠠᠨᠢᠷ ᠦᠭᠡᠢ᠂ ᠹᠦᠰᠢ ᠬᠠᠭᠠᠨ ᠤ᠋ ᠦᠶᠡ ᠰᠢᠭ ᠨᠠᠮ ᠲᠠᠢᠪᠤᠩ ᠪᠠᠢᠪᠠ᠃ ᠠ᠊ Q ᠲᠡᠨᠳᠡ ᠪᠡᠨ ᠵᠣᠭᠰᠣᠭᠠᠳ ᠵᠠᠯᠬᠠᠭᠤ ᠪᠠᠨ ᠬᠦᠷᠲᠡᠯᠡ ᠬᠠᠷᠠᠪᠠ᠃ ᠪᠠᠰᠠ ᠯᠠ ᠤᠷᠢᠳᠠᠬᠢ ᠲᠠᠢ ᠪᠠᠨ ᠠᠳᠠᠯᠢ ᠥᠭᠡᠳᠡ ᠤᠷᠤᠭᠤ ᠶᠠᠭᠤᠮᠠ ᠵᠥᠭᠡᠭᠡᠵᠦ᠂ ᠠᠪᠳᠠᠷᠠ ᠬᠣᠷᠭᠣ ᠨᠤᠭᠤᠳ ᠠᠪᠤᠭᠠᠳ ᠭᠠᠷᠤᠨᠠ᠃ ᠡᠳ᠋ᠯᠡᠯ ᠬᠡᠷᠡᠭᠯᠡᠯ ᠢ᠋ ᠴᠤ᠌ ᠵᠥᠭᠡᠭᠡᠵᠦ ᠭᠠᠷᠤᠨᠠ᠃ ᠰᠢᠦᠼᠠᠢ ᠶ᠋ᠢᠨ ᠡᠬᠡᠨᠡᠷ ᠦ᠋ᠨ ᠨᠢᠩᠪᠦ᠋ᠸᠧ ᠮᠠᠶᠢ᠍ᠭ ᠤ᠋ᠨ ᠣᠷᠣ ᠶ᠋ᠢ ᠴᠤ᠌ ᠠᠪᠴᠤ ᠭᠠᠷᠤᠨᠠ ᠁ ᠠ᠊ Q ᠡᠭᠦᠨ ᠢ᠋ ᠬᠠᠷᠠᠭᠰᠠᠭᠠᠷ ᠥᠪᠡᠷ ᠦ᠋ᠨ ᠨᠢᠳᠦ ᠪᠡᠨ ᠢᠲᠡᠭᠡᠬᠦ ᠦᠭᠡᠢ ᠰᠢᠬᠠᠮ ᠪᠣᠯᠪᠠ᠃ ᠭᠡᠪᠡᠴᠦ ᠲᠡᠷᠡ ᠲᠡᠨᠳᠡ ᠣᠴᠢᠬᠤ ᠦᠭᠡᠢ ᠭᠡᠵᠦ ᠰᠢᠭᠤᠳᠤᠭᠠᠳ ᠶᠢᠰᠦᠨ ᠡᠵᠡᠳ ᠦ᠋ᠨ ᠰᠦᠮᠡ ᠳ᠋ᠡᠭᠡᠨ ᠬᠠᠷᠢᠪᠠ᠃
ᠶᠢᠰᠦᠨ ᠡᠵᠡᠳ ᠦ᠋ᠨ ᠰᠦᠮᠡ ᠳᠣᠲᠣᠷᠠ ᠨᠡᠩ ᠴᠤ᠌ ᠬᠠᠷᠠᠩᠭᠤᠢ ᠪᠣᠯᠪᠠ᠃ ᠲᠡᠷᠡ ᠭᠠᠳᠠᠷ ᠬᠠᠭᠠᠯᠭᠠ ᠪᠠᠨ ᠶᠠᠭ ᠳᠠᠷᠤᠭᠠᠳ᠂ ᠥᠷᠥᠭᠡᠨ ᠳ᠋ᠡᠭᠡᠨ ᠲᠡᠮᠲᠡᠷᠢᠨ ᠣᠷᠣᠪᠠ᠃ ᠲᠡᠭᠡᠭᠡᠳ ᠨᠡᠯᠢᠶᠡᠳ ᠤᠳᠠᠲᠠᠯᠠ ᠬᠡᠪᠲᠡᠭᠡᠳ ᠳᠣᠲᠣᠷᠠ ᠨᠢ ᠪᠠᠬᠠᠨ ᠲᠠᠢᠪᠤᠷᠠᠵᠤ ᠥᠪᠡᠷ ᠦ᠋ᠨ ᠲᠤᠬᠠᠢ ᠪᠠᠨ ᠪᠣᠳᠣᠵᠤ ᠡᠬᠢᠯᠡᠪᠡ: ᠴᠠᠭᠠᠨ ᠬᠤᠶᠠᠭ ᠴᠠᠭᠠᠨ ᠳᠤᠭᠤᠯᠠᠭᠠ ᠡᠮᠦᠰᠦᠭᠰᠡᠨ ᠬᠥᠮᠦᠨ ᠦᠵᠡᠲᠡᠯᠡ ᠬᠦᠷᠦᠭᠡᠳ ᠢᠷᠡᠭᠰᠡᠨ ᠪᠠᠢᠲᠠᠯᠠ ᠨᠠᠮᠠᠶ᠋ᠢ ᠢᠷᠡᠵᠦ ᠳᠠᠭᠤᠳᠠᠬᠤ ᠴᠤ᠌ ᠦᠭᠡᠢ᠃ ᠲᠡᠳᠦᠢ ᠠᠷᠪᠢᠨ ᠰᠠᠢᠨ ᠶᠠᠭᠤᠮᠠ ᠣᠯᠤᠭᠰᠠᠨ ᠪᠠᠢᠲᠠᠯᠠ ᠮᠢᠨᠦ ᠬᠤᠪᠢ ᠭᠡᠵᠦ ᠠᠯᠠᠭᠠ᠃ ᠡᠨᠡ ᠪᠣᠯ ᠴᠥᠮ ᠬᠠᠭᠤᠷᠮᠠᠴᠢ ᠬᠠᠷᠢ ᠶ᠋ᠢᠨ ᠴᠢᠳᠬᠥᠷ ᠦ᠋ᠨ ᠬᠢᠭᠰᠡᠨ ᠤᠷᠰᠢᠭ ᠠ᠋᠂ ᠨᠠᠮᠠᠶ᠋ᠢ ᠤᠷᠪᠠᠭᠤᠯᠬᠤ ᠦᠭᠡᠢ᠂ ᠲᠡᠢᠮᠦ ᠪᠢᠰᠢ ᠪᠣᠯ ᠡᠨᠡ ᠤᠳᠠᠭᠠ ᠶᠠᠭᠤᠨ ᠳ᠋ᠤ᠌ ᠬᠤᠪᠢ ᠦᠭᠡᠢ ᠳ᠋ᠦ᠍ ᠬᠦᠷᠬᠦ ᠪᠢᠯᠡ? ᠭᠡᠵᠦ ᠠ᠊ Q ᠪᠣᠳᠣᠬᠤ ᠳᠣᠳᠣᠮ ᠠᠭᠤᠷ ᠨᠢ ᠬᠦᠷᠴᠦ ᠲᠡᠰᠬᠡᠯ ᠦᠭᠡᠢ ᠴᠡᠭᠡᠵᠢ ᠳᠦᠭᠦᠷᠡᠩ ᠬᠢᠯᠢᠩ ᠲᠥᠷᠥᠭᠡᠳ ᠲᠣᠯᠣᠭᠠᠢ ᠪᠠᠨ ᠬᠣᠣᠷᠲᠠᠢᠬᠠᠨ ᠳᠣᠬᠢᠵᠤ:
《ᠪᠢ ᠤᠷᠪᠠᠵᠤ ᠪᠣᠯᠬᠤ ᠦᠭᠡᠢ᠂ ᠴᠢ ᠯᠡ ᠤᠷᠪᠠᠵᠤ ᠪᠣᠯᠤᠨᠠ ᠠ᠋? ᠡᠬᠡ ᠪᠡᠨ ᠴᠢᠩᠭᠢᠭᠰᠡᠨ ᠮᠠᠭᠤ ᠬᠠᠭᠤᠷᠮᠠᠴᠢ ᠬᠠᠷᠢ ᠶ᠋ᠢᠨ ᠴᠢᠳᠬᠥᠷ - ᠪᠣᠯᠵᠠᠢ᠂ ᠴᠢ ᠤᠷᠪᠠᠵᠤ ᠪᠠᠢ! ᠤᠷᠪᠠᠨᠠ ᠭᠡᠭᠴᠢ ᠲᠣᠯᠣᠭᠠᠢ ᠤᠨᠠᠬᠤ ᠶᠠᠯᠠ ᠰᠢᠦ ᠳᠡ᠂ ᠴᠢᠮᠠᠶ᠋ᠢ ᠪᠢ ᠵᠠᠪᠠᠯ ᠵᠠᠭᠠᠯᠳᠤᠵᠤ᠂ ᠰᠢᠶᠠᠨ ᠤ᠋ ᠭᠠᠵᠠᠷ ᠲᠣᠯᠣᠭᠠᠢ ᠶ᠋ᠢ ᠴᠢᠨᠢ ᠠᠪᠬᠤ ᠶ᠋ᠢ ᠦᠵᠡᠨᠡ ᠳᠡ - ᠡᠭᠦᠳᠡ ᠳᠠᠷᠤᠵᠤ ᠬᠦᠢᠰᠦ ᠶ᠋ᠢ ᠴᠢᠨᠢ ᠲᠡᠮᠲᠡᠷᠢᠨᠡ - ᠴᠠ! ᠴᠠ!》 ᠭᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠨᠤᠮᠤᠴᠢᠨ ᠪᠢᠯᠢᠭ
ᠬᠢᠨᠠᠭᠴᠢ᠄ ᠣᠭ᠌ᠶᠤ