ᠡᠷᠡ ᠡᠮᠡ ᠶᠢᠨ ᠶᠣᠰᠣᠨ – ᠳ ᠂ ᠪᠤᠯᠤᠳᠴᠡᠷᠢᠩ <ᠣᠷᠣᠰᠢᠯ ᠤᠨ ᠣᠷᠣᠨ ᠳᠤ> Эр эмийн ёсон – Д᠂ Болдцэрэн <Оршлын оронд>
2018ᠣᠷᠣᠰᠢᠯ ᠤᠨ ᠣᠷᠣᠨ ᠳᠤ
《ᠬᠡᠦᠬᠡᠳ ᠪᠣᠯᠭᠠᠨ ᠪᠠᠭᠰᠢ ᠳᠠᠷᠤᠭᠠ ᠪᠣᠯᠬᠤ ᠦᠭᠡᠢ᠂ ᠬᠠᠷᠢᠨ ᠬᠡᠦᠬᠡᠳ ᠪᠣᠯᠭᠠᠨ ᠡᠴᠢᠭᠡ ᠡᠬᠡ ᠪᠣᠯᠤᠨᠠ ᠰᠢᠦ》 ᠭᠡᠰᠡᠨ ᠨᠡᠷᠡᠲᠦ ᠰᠤᠷᠭᠠᠨ ᠬᠥᠮᠦᠵᠢᠭᠦᠯᠦᠭᠴᠢ ᠶ᠋ᠢᠨ· ᠰᠣᠬᠣᠮᠯᠢᠨᠰᠺᠢ ᠶ᠋ᠢᠨ ᠵᠠᠬᠢᠶᠠᠰᠤ ᠥᠨᠥ ᠪᠢᠳᠡᠨ ᠳ᠋ᠦ᠍ ᠤᠯᠠᠮ ᠴᠦ᠍ ᠰᠢᠨᠡ ᠥᠩᠭᠡ ᠰᠢᠨᠡ ᠤᠳᠬᠠ ᠪᠠᠷ ᠰᠣᠨᠣᠰᠤᠭᠳᠠᠵᠤ ᠪᠠᠢᠨᠠ᠃ ᠮᠠᠭᠠᠳ ᠦᠭᠡᠢ ᠪᠢᠳᠡᠨ ᠦ᠌ ᠭᠣᠣᠯ ᠠᠯᠳᠠᠭᠠ ᠡᠨᠳᠡᠯ ᠴᠦ᠍ ᠪᠠᠢᠵᠤ ᠪᠣᠯᠬᠤ᠃ ᠨᠡᠭᠡᠷᠡᠨ ᠯᠡ ᠪᠢᠳᠡ ᠬᠡᠦᠬᠡᠳ ᠦ᠋ᠳ ᠢ᠋ᠶ᠋ᠡᠨ ᠪᠠᠭᠰᠢ ᠪᠣᠯᠭᠠᠶᠠ᠂ ᠳᠠᠷᠤᠭᠠ ᠪᠣᠯᠭᠠᠶᠠ ᠭᠡᠵᠦ ᠴᠢᠷᠮᠠᠢᠵᠤ ᠪᠠᠢᠭᠰᠠᠨ ᠠ᠋ᠴᠠ ᠪᠤᠰᠤ ᠰᠣᠶᠣᠯᠲᠤ ᠬᠥᠮᠦᠨ ᠪᠣᠯᠭᠠᠶᠠ ᠭᠡᠮᠡᠨ ᠪᠣᠳᠣᠵᠤ ᠪᠠᠢᠭᠰᠠᠨ ᠨᠢ ᠬᠢᠷᠢ ᠣᠯᠠᠨ ᠪᠣᠯ! ᠭᠡᠰᠡᠨ ᠬᠡᠳᠦᠢ ᠴᠦ᠍ ᠬᠦᠰᠡᠯ ᠦ᠋ᠨ ᠡᠴᠦᠰ ᠲᠦ᠍᠂ ᠬᠦᠯᠢᠶᠡᠭᠰᠡᠨ ᠦ᠌ ᠡᠴᠦᠰ ᠲᠦ᠍ ᠡᠨᠡ ᠨᠣᠮ ᠣᠯᠠᠨ ᠤ᠋ ᠬᠦᠷᠲᠡᠭᠡᠯ ᠪᠣᠯᠤᠯᠠ᠃
ᠡᠨᠡ ᠨᠣᠮ ᠤ᠋ᠨ ᠠᠩᠬᠠᠨ ᠤ᠋ ᠤᠩᠰᠢᠭᠴᠢ ᠪᠣᠯᠵᠤ ᠬᠢᠨᠠᠨ ᠲᠣᠬᠢᠶᠠᠯᠳᠤᠭᠤᠯᠬᠤ ᠠᠬᠠᠳᠠᠭᠰᠠᠨ ᠭᠡᠮᠡᠷ ᠨᠡᠷᠡ ᠬᠦᠨᠳᠦᠲᠡᠢ᠂ ᠬᠠᠷᠢᠭᠤᠴᠠᠯᠭᠠ ᠲᠠᠢ ᠠᠵᠢᠯ ᠳ᠋ᠤ᠌ ᠳᠣᠬᠢᠶᠠᠭᠳᠠᠭᠰᠠᠨ ᠳ᠋ᠠᠭᠠᠨ ᠨᠢᠭᠡ ᠪᠣᠳᠣᠯ ᠤ᠋ᠨ ᠪᠠᠶᠠᠷᠯᠠᠮᠠᠷ ᠴᠦ᠍᠂ ᠲᠦᠭᠰᠢᠮᠡᠷ ᠴᠦ᠍ ᠁
ᠡᠨᠡ ᠨᠣᠮ ᠠ᠋ᠴᠠ ᠲᠠ ᠪᠦᠬᠦᠨ ᠬᠡᠷᠬᠢᠨ ᠬᠠᠢᠷᠠᠯᠠᠵᠤ ᠳᠤᠷᠠᠯᠠᠬᠤ᠂ ᠡᠷᠡ ᠡᠮᠡ ᠶ᠋ᠢᠨ ᠬᠠᠷᠢᠴᠠᠭᠠᠨ ᠤ᠋ ᠰᠣᠶᠣᠯ ᠢ᠋ ᠲᠡᠳᠦᠢ ᠦᠭᠡᠢ ᠡᠷᠡ ᠡᠮᠡ ᠶ᠋ᠢᠨ ᠬᠠᠷᠢᠴᠠᠭᠠᠨ ᠠ᠋ᠴᠠ ᠡᠭᠦᠳᠦᠨ ᠭᠠᠷᠳᠠᠭ ᠣᠯᠠᠨ ᠶᠠᠩᠵᠤ ᠶ᠋ᠢᠨ ᠰᠥᠷᠭᠡᠦ ᠨᠥᠯᠥᠭᠡ᠂ ᠲᠡᠭᠦᠨ ᠦ᠌ ᠡᠭᠦᠰᠬᠦ ᠪᠣᠯᠤᠭᠠᠳ ᠠᠷᠢᠯᠬᠤ ᠬᠦᠴᠦᠨ ᠵᠦᠢᠯᠡᠰ ᠦ᠋ᠨ ᠲᠠᠯᠠ ᠪᠠᠷ ᠲᠣᠳᠣᠷᠬᠠᠢ ᠮᠡᠳᠡᠯᠭᠡ ᠣᠯᠵᠤ ᠠᠪᠬᠤ ᠪᠣᠯᠤᠨᠠ᠃ ᠢᠯᠠᠩᠭᠤᠶᠠ ᠵᠠᠯᠠᠭᠤᠰ ᠲᠠ ᠪᠦᠬᠦᠨ ᠦ᠌ ᠠᠮᠢᠳᠤᠷᠠᠯ ᠤ᠋ᠨ ᠲᠦᠮᠡᠨ ᠪᠠᠷᠲᠠᠭᠠ ᠶ᠋ᠢ ᠬᠠᠮᠲᠤ ᠲᠤᠭᠤᠯᠬᠤ ᠰᠠᠢᠨ ᠬᠠᠨᠢ ᠴᠢᠨᠢ᠂ ᠰᠢᠷᠡᠭᠡᠨ ᠦ᠌ ᠨᠣᠮ ᠴᠢᠨᠢ ᠪᠣᠯᠤᠭᠠᠰᠠᠢ ᠭᠡᠵᠦ ᠬᠦᠰᠡᠨᠡᠮ᠃
《ᠡᠷᠡ ᠡᠮᠡ ᠶ᠋ᠢᠨ ᠶᠣᠰᠣᠨ》 ᠬᠡᠮᠡᠬᠦ ᠨᠣᠮ ᠨᠢ ᠵᠣᠬᠢᠶᠠᠭᠴᠢ ᠶ᠋ᠢᠨ ᠰᠤᠳᠤᠯᠭᠠᠨ ᠤ᠋ ᠠᠵᠢᠯ ᠤ᠋ᠨ ᠦᠷᠡ ᠳ᠋ᠦᠩ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠤᠩᠰᠢᠭᠴᠢᠳ ᠲᠤ ᠣᠢᠯᠠᠭᠠᠮᠵᠢᠲᠠᠢ ᠠᠮᠢᠳᠤᠷᠠᠯ ᠳ᠋ᠤ᠌ ᠨᠡᠯᠢᠶᠡᠳ ᠣᠢᠷᠠ ᠲᠦᠳᠡ ᠪᠣᠳᠠᠲᠠᠢ ᠪᠣᠯᠤᠭᠰᠠᠨ ᠭᠡᠵᠦ ᠪᠣᠳᠣᠨᠠ᠃ ᠴᠣᠬᠣᠮ ᠬᠦ᠌ ᠡᠨᠡ ᠨᠣᠮ ᠳ᠋ᠤ᠌ ᠶᠠᠭᠤ ᠪᠠᠷ ᠴᠤ᠌ ᠦᠯᠦ ᠬᠡᠮᠵᠢᠭᠳᠡᠬᠦ ᠦᠨᠡ ᠴᠠᠨᠠ ᠡᠨᠳᠡ ᠯᠡ ᠪᠠᠢᠭᠠ ᠶᠤᠮ᠃
ᠭᠡᠬᠦ ᠳ᠋ᠡᠭᠡᠨ ᠭᠠᠭᠴᠠ ᠡᠨᠡ ᠨᠣᠮ ᠢ᠋ᠶ᠋ᠠᠷ ᠡᠷᠡ ᠡᠮᠡ ᠶ᠋ᠢᠨ ᠶᠣᠰᠣᠨ ᠬᠡᠮᠡᠬᠦ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠲᠠᠯᠠ ᠪᠠᠷ ᠪᠦᠷᠢᠨ ᠮᠡᠳᠡᠯᠭᠡ ᠲᠡᠢ ᠭᠡᠰᠡᠨ ᠦᠭᠡ ᠬᠠᠷᠠᠬᠠᠨ ᠪᠢᠰᠢ ᠠ᠋᠃ ᠬᠠᠷᠢᠨ ᠲᠠ ᠪᠦᠬᠦᠨ ᠦ᠌ ᠠᠵᠢᠯ ᠠᠮᠢᠳᠤᠷᠠᠯ ᠳ᠋ᠤ᠌᠂ ᠲᠡᠷᠡ ᠳᠤᠮᠳᠠ ᠪᠠᠨ ᠠᠮᠢᠳᠤᠷᠠᠯ ᠬᠡᠮᠡᠬᠦ ᠶᠡᠬᠡ ᠳᠠᠯᠠᠢ ᠶ᠋ᠢᠨ ᠵᠠᠬᠠ ᠳ᠋ᠤ᠌ ᠬᠥᠯ ᠢ᠋ᠶ᠋ᠡᠨ ᠲᠥᠷᠥᠨ ᠠᠯᠳᠠᠵᠤ ᠪᠣᠢ ᠵᠠᠯᠠᠭᠤᠰ ᠲᠤ ᠶᠠᠮᠠᠷ ᠨᠢᠭᠡᠨ ᠬᠡᠮᠵᠢᠶᠡ ᠪᠡᠷ ᠲᠤᠰᠠ ᠬᠦᠷᠭᠡᠵᠦ ᠴᠢᠳᠠᠪᠠᠯ ᠪᠢᠳᠡ ᠪᠠᠶᠠᠷᠯᠠᠬᠤ ᠪᠣᠯᠤᠨᠠ᠃
ᠳ᠂ ᠪᠤᠯᠤᠳᠴᠠᠷᠢᠩ ᠪᠣᠯ ᠰᠠᠢᠨ ᠪᠠᠭᠰᠢ᠂ ᠰᠠᠢᠨ ᠡᠮᠴᠢ ᠲᠡᠳᠦᠢ ᠦᠭᠡᠢ ᠪᠠᠰᠠ ᠰᠠᠢᠨ ᠨᠡᠢᠲᠡᠯᠡᠯᠴᠢ ᠭᠡᠳᠡᠭ ᠢ᠋ ᠲᠠ ᠪᠦᠬᠦᠨ ᠬᠡᠪᠯᠡᠯ ᠮᠡᠳᠡᠭᠡᠯᠡᠯ ᠦ᠋ᠨ ᠬᠠᠭᠤᠳᠠᠰᠤᠨ ᠠ᠋ᠴᠠ ᠣᠯᠵᠤ ᠬᠠᠷᠠᠭᠰᠠᠨ ᠪᠠᠢᠬᠠ᠃
ᠡᠭᠦᠨ ᠢ᠋ ᠪᠢᠴᠢᠭᠡᠴᠢ ᠳ᠂ ᠪᠤᠯᠤᠳᠴᠠᠷᠢᠩ ᠨᠢ ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠶ᠋ᠢ1984 ᠣᠨ ᠳ᠋ᠤ᠌ ᠣᠨᠴᠠ ᠰᠠᠢᠨ ᠳ᠋ᠦᠩ ᠲᠡᠢ ᠲᠡᠭᠦᠰᠦᠭᠰᠡᠨ ᠡᠴᠡ ᠬᠣᠢᠰᠢ ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠳ᠋ᠠᠭᠠᠨ ᠪᠠᠭᠰᠢᠯᠠᠬᠤ ᠶ᠋ᠢᠨ ᠰᠠᠴᠠᠭᠤ ᠡᠷᠳᠡᠮ ᠰᠢᠨᠵᠢᠯᠡᠭᠡᠨ ᠰᠤᠳᠤᠯᠭᠠᠨ ᠤ᠋ ᠠᠵᠢᠯ ᠡᠷᠬᠢᠯᠡᠵᠦ ᠪᠠᠢᠨᠠ᠃ ᠠᠯᠢᠪᠠ ᠳ᠋ᠤ᠌ ᠠᠩᠬᠠᠳᠠᠭᠴᠢ ᠪᠠᠢᠬᠤ ᠳ᠋ᠤ᠌ ᠶᠠᠮᠠᠷ ᠰᠠᠢᠬᠠᠨ ᠪᠠᠢᠳᠠᠭ ᠢ᠋ ᠪᠤᠯᠤᠳᠴᠠᠷᠢᠩ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠮᠡᠳᠡᠷᠡᠵᠦ ᠪᠣᠢ ᠭᠡᠵᠦ ᠪᠣᠳᠣᠨᠠ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ ᠲᠡᠭᠦᠨ ᠲᠡᠢ ᠬᠠᠮᠲᠤᠷᠠᠨ ᠵᠢᠳᠬᠦᠭᠴᠢ ᠨᠠᠷ ᠲᠤ ᠴᠤ᠌ ᠡᠨᠡ ᠵᠢᠷᠭᠠᠯ ᠠ᠋ᠴᠠ ᠨᠣᠭᠳᠠᠬᠤ ᠬᠤᠪᠢ ᠪᠣᠢ ᠭᠡᠵᠦ ᠢᠲᠡᠭᠡᠨᠡᠮ᠃
ᠠᠩᠬᠠᠨ ᠤ᠋ ᠡᠨᠡ ᠪᠦᠲᠦᠭᠡᠯ ᠨᠢ ᠮᠣᠩᠭᠣᠯ ᠤ᠋ᠨ ᠡᠷᠡ ᠡᠮᠡ ᠶ᠋ᠢᠨ ᠶᠣᠰᠣᠨ ᠤ᠋ ᠰᠤᠳᠤᠯᠤᠯ ᠤ᠋ᠨ ᠤᠬᠠᠭᠠᠨ ᠢ᠋ ᠡᠬᠡ ᠣᠷᠣᠨ ᠳ᠋ᠠᠭᠠᠨ ᠲᠡᠳᠦᠢ ᠦᠭᠡᠢ ᠬᠢᠯᠢ ᠶ᠋ᠢᠨ ᠴᠢᠨᠠᠳᠤ ᠳ᠋ᠤ᠌ ᠰᠤᠷᠲᠠᠯᠴᠢᠯᠠᠬᠤ ᠳ᠋ᠤ᠌ ᠬᠤᠪᠢ ᠨᠡᠮᠡᠷᠢ ᠣᠷᠣᠭᠤᠯᠤᠭᠠᠳ ᠵᠣᠭᠰᠣᠬᠤ ᠦᠭᠡᠢ《 ᠡᠭᠦᠯᠡ ᠪᠣᠷᠣᠭᠠᠨ ᠤ᠋ ᠶᠠᠪᠤᠳᠠᠯ》 ᠤ᠋ᠨ ᠲᠠᠯᠠ ᠪᠠᠷ ᠬᠢ ᠤᠩᠰᠢᠭᠴᠢᠳ ᠤ᠋ᠨ ᠢ᠋ᠶ᠋ᠠᠨ ᠣᠢᠯᠠᠭᠠᠯᠲᠠ ᠶ᠋ᠢ ᠪᠠᠶᠠᠵᠢᠭᠤᠯᠤᠨᠠ ᠭᠡᠳᠡᠭ ᠲᠦ᠍ ᠢᠲᠡᠭᠡᠯ ᠲᠡᠭᠦᠰ ᠪᠠᠢᠨᠠ᠃
ᠡᠴᠦᠰ ᠲᠦ᠍ ᠨᠢ ᠬᠡᠯᠡᠬᠦ ᠳ᠋ᠦ᠍ ᠡᠨᠡ ᠨᠣᠮ ᠵᠠᠯᠠᠭᠤᠰ ᠤ᠋ᠨ ᠲᠡᠳᠦᠢ ᠦᠭᠡᠢ ᠪᠦᠬᠦᠢᠯᠡ ᠬᠥᠮᠦᠰ ᠦ᠋ᠨ ᠢ᠋ᠶ᠋ᠡᠨ ᠣᠯᠠᠨ ᠵᠢᠯ ᠦ᠋ᠨ ᠣᠶᠤᠨ ᠤ᠋ ᠭᠠᠩ ᠢ᠋ ᠲᠠᠢᠯᠤᠭᠰᠠᠨ ᠢ᠋ᠶ᠋ᠠᠷ ᠤ᠋ᠳ ᠪᠤᠶᠠᠨ ᠤ᠋ ᠦᠢᠯᠡᠰ ᠪᠣᠯᠤᠭᠰᠠᠨ ᠢ᠋ ᠳᠠᠬᠢᠨ ᠲᠡᠮᠳᠡᠭᠯᠡᠮᠡᠷ ᠰᠠᠨᠠᠭᠳᠠᠯᠠ᠃
ᠡᠨᠡ ᠨᠣᠮ ᠢ᠋ ᠪᠢᠴᠢᠬᠦ ᠳ᠋ᠦ᠍ ᠰᠡᠳᠬᠢᠯ ᠬᠠᠷᠠᠮ ᠦᠭᠡᠢ ᠲᠤᠰᠠᠯᠠᠯᠴᠠᠭᠠ ᠦᠵᠡᠭᠦᠯᠦᠭᠰᠡᠨ ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠳ᠋ᠣᠺᠲ᠋ᠣᠷ᠂ ᠳ᠋ᠣᠽᠧᠨ᠋ᠲ᠂ [ ᠴ· ᠬᠦᠷᠳᠣᠷᠵᠢ]· ᠴ· ᠳᠣᠷᠵᠢᠵᠠᠳᠠᠮᠪᠠ᠂ ᠳᠡᠳ᠋ ᠡᠷᠳᠡᠮᠲᠡᠨ ᠰ· ᠪᠢᠮᠪᠠᠰᠦ᠋ᠷᠦᠩ᠂ ᠡᠮᠴᠢ ᠣᠷᠶᠤᠯᠤ᠂ ᠴᠡᠷᠢᠩᠵᠢᠩᠮᠡᠳ᠂ ᠰᠢᠭᠦᠮᠵᠢᠯᠡᠭᠴᠢ ᠴ· ᠬᠠᠰᠪᠠᠭᠠᠲᠤᠷ᠂ ᠵᠠᠯᠠᠭᠤ ᠢᠷᠠᠭᠤ ᠨᠠᠢᠷᠠᠭᠴᠢ ᠬ· ᠪᠦᠷᠢᠨᠳᠣᠭᠲᠠᠬᠤ ᠨᠠᠷ ᠲᠤ ᠭᠦᠨ ᠲᠠᠯᠠᠷᠬᠠᠯ ᠢ᠋ᠶ᠋ᠠᠨ ᠢᠯᠡᠷᠬᠡᠢᠯᠡᠶᠡ᠃ ᠬᠡᠷᠪᠡ ᠲᠡᠢᠮᠦ ᠠᠬᠤᠯᠠ᠂ ᠬᠦᠯᠢᠴᠡᠨ ᠥᠴᠢᠮᠦ᠃ ᠬᠠᠢᠷᠠ ᠰᠡᠳᠬᠢᠯ ᠦ᠋ᠨ ᠵᠢᠩᠬᠢᠨᠢ ᠪᠠᠯ ᠪᠤᠷᠠᠮ ᠢ᠋ ᠠᠮᠲᠠᠯᠠᠭᠠ ᠦᠭᠡᠢ ᠬᠥᠮᠦᠨ ᠪᠦᠦ ᠭᠠᠷᠤᠭᠠᠰᠠᠢ ᠭᠡᠮᠡᠨ ᠢᠷᠦᠭᠡᠯ ᠠᠢᠯᠠᠳᠬᠠᠨᠠᠮ᠃
ᠴᠡᠷᠢᠩᠰᠣᠨᠣᠮ ᠤ᠋ᠨ ᠪᠠᠲᠤᠪᠠᠶᠠᠷ