ᠭᠠᠢᠬᠠᠮᠰᠢᠭᠲᠤ ᠮᠣᠩᠭᠣᠯ ᠬᠡᠯᠡ -ᠳ ᠪᠠᠭᠠᠲᠤᠷГайхамшигт монгол хэл-Д БаатарGaikhamshigt mongol khel
1119 ᠳ· ᠪᠠᠭᠠᠲᠤᠷ
ᠤᠯᠠᠭᠠᠨ ᠨᠢᠯᠬᠠ ᠠ᠋ᠴᠠ ᠪᠠᠨ
ᠠᠪᠤᠭᠠᠳ ᠰᠣᠨᠣᠰᠴᠤ ᠳᠠᠰᠤᠭᠰᠠᠨ ᠬᠡᠯᠡ ᠮᠢᠨᠢ
ᠤᠬᠠᠭᠠ ᠲᠥᠬᠥᠭᠡ ᠣᠷᠣᠩᠭᠤᠲᠠ ᠨᠢᠳᠦᠯᠡᠵᠦ ᠤᠩᠰᠢᠭᠰᠠᠨ ᠪᠢᠴᠢᠭ ᠮᠢᠨᠢ
ᠤᠷᠭᠤᠬᠤ ᠨᠠᠷᠠᠨ ᠤ᠋ ᠭᠠᠷᠠᠭ ᠲᠤ《ᠨᠢᠭᠤᠴᠠ ᠲᠣᠪᠴᠢᠶᠠᠨ》 ᠬᠣᠴᠣᠷᠭᠠᠭᠰᠠᠨ
ᠤᠴᠢᠷ ᠨᠢᠭᠤᠴᠠᠭᠠᠢ ᠲᠡᠦᠬᠡ ᠲᠡᠢ ᠭᠠᠢᠬᠠᠮᠰᠢᠭᠲᠤ ᠮᠣᠩᠭᠣᠯ ᠰᠣᠶᠣᠯ ᠮᠢᠨᠢ
ᠠᠽᠢᠶᠠ ᠶ᠋ᠢᠨ ᠣᠯᠠᠨ ᠨᠡᠭᠦᠳᠡᠯᠴᠢᠨ ᠡᠴᠡ ᠣᠢ ᠪᠢᠯᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠣᠳᠣᠷᠠᠵᠤ
ᠠᠷᠪᠠᠨ ᠭᠤᠷᠪᠠᠳᠤᠭᠠᠷ ᠵᠠᠭᠤᠨ ᠲᠠᠢ ᠱᠠᠰᠲᠢᠷ ᠲᠤ᠌ ᠮᠥᠩᠬᠡᠷᠡᠭᠰᠡᠨ ᠲᠡᠦᠬᠡ ᠮᠢᠨᠢ
ᠠᠪᠤᠷᠭᠤ ᠳᠡᠯᠡᠬᠡᠢ ᠶ᠋ᠢᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠡᠵᠡᠨᠲᠦ ᠭᠦᠷᠦᠨ ᠢ᠋ᠶ᠋ᠡᠨ ᠴᠣᠭᠴᠠᠯᠠᠵᠤ
ᠠᠯᠲᠠᠨ ᠫᠠᠢᠵᠠ ᠲᠠᠢ ᠵᠠᠷᠯᠢᠭ ᠢ᠋ᠶ᠋ᠠᠷ ᠲᠣᠢᠭᠲᠠᠨ ᠢ᠋ ᠰᠥᠭᠥᠳᠬᠡᠭᠰᠡᠨ ᠠᠯᠳᠠᠷ ᠮᠢᠨᠢ
ᠠᠭᠤᠳᠠᠮ ᠰᠠᠨᠰᠠᠷ ᠤ᠋ᠨ ᠭᠦᠨ ᠳ᠋ᠦ᠍ ᠡᠬᠡᠰᠢᠭ ᠨᠢ ᠴᠤᠤᠷᠢᠶᠠᠳᠠᠭᠰᠠᠨ ᠬᠡᠯᠡ ᠮᠢᠨᠢ
ᠤᠷᠠᠨ ᠰᠠᠨᠠᠭᠠᠨ ᠤ᠋ ᠣᠷᠴᠢᠯᠠᠩ ᠳ᠋ᠤ᠌ ᠴᠠᠴᠤᠯᠭᠠ ᠨᠢ ᠨᠠᠮᠢᠷᠠᠭᠰᠠᠨ ᠦᠰᠦᠭ ᠮᠢᠨᠢ
ᠤᠶᠠᠩᠭᠠ ᠨᠠᠢᠷᠠᠭ ᠤ᠋ᠨ ᠶᠢᠷᠲᠢᠨᠴᠦ ᠳ᠋ᠦ᠍ 《ᠭᠡᠰᠡᠷ》᠂《ᠵᠠᠩᠭᠠᠷ》 ᠬᠠᠢᠯᠠᠭᠰᠠᠨ
ᠤᠳᠬᠠ ᠭᠦᠢᠴᠡᠳ ᠠᠶᠠᠯᠭᠤ ᠲᠠᠢ ᠭᠠᠢᠬᠠᠮᠰᠢᠭᠲᠤ ᠮᠣᠩᠭᠣᠯ ᠬᠡᠯᠡ ᠮᠢᠨᠢ
ᠬᠣᠯᠠ ᠶ᠋ᠢᠨ ᠲᠡᠷᠲᠡᠭᠡᠬᠢ ᠡᠷᠢᠨ ᠡᠴᠡ ᠰᠢᠳᠤᠷᠭᠤ ᠠᠷᠠᠨᠰᠢᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠢᠯᠭᠠᠷᠠᠵᠤ
ᠬᠣᠷᠢᠨ ᠨᠢᠭᠡᠳᠦᠭᠡᠷ ᠵᠠᠭᠤᠨ ᠳ᠋ᠤ᠌ ᠮᠣᠷᠢ ᠲᠠᠢ ᠪᠠᠨ ᠡᠷᠭᠦᠭᠰᠡᠨ ᠲᠤᠭ ᠮᠢᠨᠢ
ᠬᠣᠷᠸᠠ ᠶ᠋ᠢᠨ ᠰᠡᠭᠡᠷ ᠨᠢᠷᠤᠭᠤᠨ ᠳᠡᠭᠡᠷᠡ ᠤᠷᠲᠤ ᠶ᠋ᠢᠨ ᠳᠠᠭᠤᠤ ᠪᠠᠨ ᠬᠠᠩᠭᠢᠨᠠᠭᠤᠯᠵᠤ
ᠬᠣᠵᠢᠮ ᠮᠠᠷᠭᠠᠰᠢ ᠬᠡᠵᠢᠶᠡ ᠴᠦ᠍ ᠪᠣᠯᠤᠭᠰᠠᠨ ᠪᠣᠰᠤᠭᠠ ᠪᠢᠴᠢᠭᠳᠡᠬᠦ ᠨᠡᠷᠡ ᠮᠢᠨᠢ
ᠪᠤᠭᠤᠷᠤᠯ ᠠᠯᠲᠠᠢ ᠶ᠋ᠢᠨ ᠪᠠᠯ ᠳ᠋ᠤ᠌ ᠲᠠᠲᠠᠲᠤᠩᠭᠠ ᠰᠠᠢᠳ ᠤ᠋ᠨ ᠡᠪᠦᠷ ᠡᠴᠡ
ᠪᠤᠷᠬᠠᠨ ᠲᠩᠷᠢ ᠶ᠋ᠢᠨ ᠬᠠᠢᠷᠠᠯᠠᠭᠰᠠᠨ ᠮᠥᠩᠭᠥᠨ ᠪᠠᠷᠢᠭᠤᠯ ᠲᠠᠢ ᠲᠠᠮᠠᠭᠠ
ᠬᠠᠭᠠᠨ ᠴᠢᠩᠭᠢᠰ ᠦ᠋ᠨ ᠰᠣᠶᠣᠷᠬᠠᠯ ᠢ᠋ᠶ᠋ᠠᠷ ᠣᠷᠣᠢ ᠶ᠋ᠢᠨ ᠲᠡᠷᠢᠭᠦᠨ ᠳ᠋ᠦ᠍ ᠬᠦᠨᠳᠦᠯᠡᠭᠳᠡᠵᠦ
ᠬᠠᠮᠤᠭ ᠮᠣᠩᠭᠣᠯ ᠳ᠋ᠤ᠌ ᠲᠠᠷᠬᠠᠭᠰᠠᠨ ᠤᠷᠲᠤ ᠨᠠᠰᠤᠲᠤ ᠬᠤᠳᠤᠮ ᠦᠰᠦᠭ
ᠴᠠᠰᠤᠲᠤ ᠶ᠋ᠢᠨ ᠣᠷᠣᠨ ᠤ᠋ ᠰᠤᠳᠤᠷ ᠠ᠋ᠴᠠ ᠫᠠᠭᠪᠠ ᠯᠠᠮᠠ ᠶ᠋ᠢᠨ ᠤᠯᠠᠷᠢᠭᠤᠯᠤᠭᠰᠠᠨ
ᠴᠠᠭᠠᠵᠠ ᠵᠠᠷᠯᠢᠭ ᠶᠤᠸᠠᠨ ᠭᠦᠷᠦᠨ ᠦ᠌ ᠳᠥᠷᠪᠡᠯᠵᠢᠨ ᠦᠰᠦᠭ
ᠠᠷᠤ ᠡᠩᠭᠡᠷ ᠢ᠋ ᠵᠠᠭᠠᠭᠯᠠᠭᠰᠠᠨ ᠴᠠᠭᠠᠨ ᠬᠡᠷᠡᠮ ᠦ᠋ᠨ ᠢᠷᠣᠭᠠᠷ ᠠ᠋ᠴᠠ
ᠠᠶᠤᠰᠢ ᠭᠦᠦᠰᠢ ᠶ᠋ᠢᠨ ᠵᠣᠬᠢᠶᠠᠭᠰᠠᠨ ᠰᠤᠳᠤᠷ ᠪᠢᠴᠢᠭ ᠦ᠋ᠨ ᠠᠯᠢ ᠭᠠᠯᠢ ᠦᠰᠦᠭ
ᠵᠠᠬᠠ ᠬᠥᠪᠡᠭᠡ ᠨᠢ ᠮᠠᠨᠠᠨᠲᠤᠭᠰᠠᠨ ᠬᠥᠬᠡ ᠨᠠᠭᠤᠷ ᠤ᠋ᠨ ᠬᠢᠵᠠᠭᠠᠷ ᠠ᠋ᠴᠠ
ᠵᠠᠶᠠ ᠪᠠᠨᠳᠢᠳᠠ ᠶ᠋ᠢᠨ ᠲᠤᠭᠤᠷᠪᠢᠭᠰᠠᠨ ᠳᠥᠷᠪᠡᠨ ᠣᠢᠷᠠᠳ ᠤ᠋ᠨ ᠲᠣᠳᠣ ᠦᠰᠦᠭ
ᠥᠭᠯᠢᠭᠡ ᠪᠤᠶᠠᠨ ᠤ᠋ ᠰᠢᠳᠢ ᠶ᠋ᠢ ᠬᠠᠯᠬᠠ ᠶ᠋ᠢᠨ ᠬᠠᠪᠲᠠᠭᠠᠢ ᠳ᠋ᠤ᠌ ᠰᠠᠴᠤᠷᠠᠭᠤᠯᠤᠭᠰᠠᠨ
ᠥᠨᠳᠥᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ ᠤ᠋ᠨ ᠨᠣᠮ ᠤ᠋ᠨ ᠭᠡᠷᠡᠯᠲᠦ ᠰᠣᠶᠣᠩᠪᠣ ᠦᠰᠦᠭ
ᠴᠡᠩᠬᠡᠷ ᠪᠠᠢᠭᠠᠯ ᠤ᠋ᠨ ᠪᠣᠷᠭᠢᠶᠠᠨ ᠠ᠋ᠴᠠ ᠤᠳᠬᠠ ᠶ᠋ᠢᠨ ᠰᠢᠳᠢ ᠶ᠋ᠢ ᠬᠦᠷᠲᠡᠵᠦ
ᠴᠡᠴᠡᠨ ᠮᠡᠷᠭᠡᠳ ᠦ᠋ᠨ ᠵᠣᠬᠢᠶᠠᠭᠰᠠᠨ ᠬᠣᠷᠢ ᠪᠤᠷᠢᠶᠠᠳ ᠤ᠋ᠨ ᠸᠠᠭᠢᠨᠳᠠᠷᠠ ᠦᠰᠦᠭ
ᠬᠤᠪᠢᠰᠬᠠᠯᠲᠤ ᠮᠣᠩᠭᠣᠯ ᠤ᠋ᠨ ᠡᠷᠳᠡᠮᠲᠡᠨ ᠳᠠᠮᠳᠢᠨᠰᠦ᠋ᠷᠦᠩ ᠦ᠋ᠨ ᠪᠢᠷ ᠢ᠋ᠶ᠋ᠡᠷ
ᠬᠣᠷᠢᠳᠤᠭᠠᠷ ᠵᠠᠭᠤᠨ ᠢ᠋ ᠮᠢᠯᠢᠶᠠᠭᠰᠠᠨ ᠰᠸᠯᠸ ᠪᠢᠴᠢᠯᠭᠡ ᠶ᠋ᠢᠨ ᠺᠢᠷᠢᠯ ᠦᠰᠦᠭ
ᠳᠣᠯᠣᠭᠠᠬᠠᠨ ᠡᠬᠡᠰᠢᠭ ᠡᠴᠡ ᠪᠦᠲᠦᠭᠰᠡᠨ ᠢᠷᠠᠭᠤ ᠰᠠᠢᠬᠠᠨ ᠬᠡᠯᠡ ᠪᠡᠨ
ᠳᠣᠯᠣᠭᠠᠬᠠᠨ ᠨᠣᠲ ᠢ᠋ᠶ᠋ᠠᠷ ᠲᠡᠮᠳᠡᠭᠯᠡᠳᠡᠭ ᠳᠠᠭᠤᠤ ᠪᠣᠯᠭᠠᠯ ᠦᠭᠡᠢ ᠶᠠᠭᠠᠬᠢᠬᠤᠪ
ᠳᠣᠯᠣᠭᠠᠬᠠᠨ ᠡᠭᠡᠰᠢᠭ ᠢ᠋ ᠤᠯᠠᠷᠢᠭᠤᠯᠤᠭᠰᠠᠨ ᠪᠠᠶᠠᠨ ᠲᠠᠩᠰᠤᠭ ᠪᠢᠴᠢᠭ ᠢ᠋ᠶ᠋ᠡᠨ
ᠳᠣᠯᠣᠭᠠᠨ ᠳᠣᠯᠣᠭᠠ ᠳᠥᠴᠢ ᠶᠢᠰᠦ ᠪᠦᠭᠦᠳᠡᠭᠡᠷ ᠳᠠᠭᠤᠯᠠᠯ ᠦᠭᠡᠢ ᠶᠠᠭᠠᠬᠢᠬᠤᠪ
ᠳᠣᠯᠣᠭᠠᠨ ᠳᠣᠯᠣᠭᠠ ᠶ᠋ᠢᠨ ᠪᠡᠯᠭᠡᠳᠡᠯ ᠲᠡᠢ ᠠᠭᠤᠳᠠᠮ ᠮᠣᠩᠭᠣᠯ ᠨᠤᠲᠤᠭ ᠢ᠋ᠶ᠋ᠠᠨ
ᠳᠣᠯᠣᠭᠠ ᠨᠠᠢ᠍ᠮᠠ ᠶ᠋ᠢᠨ ᠲᠠᠪᠢᠨ ᠵᠢᠷᠭᠤᠭᠠ ᠭᠡᠵᠦ ᠭᠠᠭᠴᠠ ᠣᠷᠬᠢᠭᠠᠳ ᠶᠠᠭᠠᠬᠢᠬᠤᠪ
ᠳᠣᠯᠣᠭᠠᠨ ᠡᠬᠡᠰᠢᠭ ᠡᠴᠡ ᠬᠤᠪᠢᠯᠤᠭᠰᠠᠨ ᠲᠣᠭᠠ ᠲᠣᠮᠰᠢ ᠦᠭᠡᠢ ᠦᠭᠡ ᠶ᠋ᠢ
ᠳᠣᠯᠣᠭᠠᠨ ᠵᠦᠢᠯ ᠢ᠋ᠶ᠋ᠡᠷ ᠪᠢᠴᠢᠳᠡᠭ ᠭᠠᠢᠬᠠᠮᠰᠢᠭ ᠢᠭᠲᠦᠯᠦᠯ ᠦᠭᠡᠢ ᠶᠠᠭᠠᠬᠢᠬᠤᠪ
ᠦᠰᠦᠭ᠄ ᠠᠮᠢᠯᠠᠭᠤᠯᠤᠭᠴᠢ ᠳᠣᠷᠣᠨᠠ
ᠦᠰᠦᠭ ᠬᠢᠨᠠᠭᠴᠢ᠄ ᠪᠠᠶᠠᠨ᠌ᠠᠠᠭᠤᠯᠠ᠂ ᠣᠳᠬᠠᠨᠰᠣᠠ