ᠲᠡᠮᠳᠡᠭᠯᠡᠯ ᠪᠤᠶᠤ ᠮᠣᠩᠭᠣᠯ ᠪᠥᠬᠡ- ᠭ· ᠴᠢᠩᠪᠠᠭᠠᠲᠤᠷТэмдэглэл буюу монгол бөх-Г·ЧинбаатарTemdeglel buyuu mongol bökh
816ᠲᠡᠮᠳᠡᠭᠯᠡᠯ ᠪᠤᠶᠤ ᠮᠣᠩᠭᠣᠯ ᠪᠥᠬᠡ
ᠲᠡᠮᠳᠡᠭᠯᠡᠯ ᠪᠤᠶᠤ ᠮᠣᠩᠭᠣᠯ ᠪᠥᠬᠡ①
— ᠶᠡᠬᠡ ᠨᠠᠢᠷ ᠤ᠋ᠨ ᠲᠡᠮᠳᠡᠭᠯᠡᠯ ᠡᠴᠡ ᠪᠣᠳᠣᠭᠳᠠᠭᠰᠠᠨ ᠨᠢ
ᠭ· ᠴᠢᠩᠪᠠᠭᠠᠲᠤᠷ
ᠭᠢᠨᠢᠰ ᠦ᠋ᠨ ᠲᠡᠮᠳᠡᠭᠯᠡᠯ ᠢ᠋ ᠡᠭᠦᠳᠦᠭᠰᠡᠨ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠨᠠᠢᠷ ᠰᠠᠶᠢᠬᠠᠨ ᠪᠣᠯᠵᠤ ᠥᠩᠭᠡᠷᠡᠯᠡ᠃
ᠨᠠᠭᠠᠳᠤᠮ ᠤ᠋ᠨ ᠳᠠᠷᠠᠭᠠ ᠪᠠᠷ ᠮᠣᠩᠭᠣᠯᠴᠤᠳ ᠮᠠᠨᠢ ᠣᠯᠠᠨ ᠬᠣᠨᠣᠭ ᠢ᠋ᠶ᠋ᠠᠷ ᠤᠷᠮᠠᠲᠠᠢ ᠵᠥᠩᠨᠡᠨ ᠶᠠᠷᠢᠯᠴᠠᠳᠠᠭ ᠰᠢᠭ᠋ ᠢ᠋ᠶ᠋ᠡᠷ ᠲᠡᠦᠬᠡᠨ ᠳ᠋ᠦ᠍ ᠲᠣᠮᠣᠬᠠᠨ ᠡᠨᠡ ᠨᠠᠢᠷ ᠤ᠋ᠨ ᠠᠯᠳᠠᠭᠠ ᠤᠨᠤᠭᠠ ᠶ᠋ᠢᠨ ᠲᠤᠬᠠᠢ ᠪᠣᠯᠤᠭᠰᠠᠨ ᠵᠣᠭᠣᠭ ᠴᠤ᠌ ᠲᠦᠳᠡᠯ ᠦᠭᠡᠢ ᠱᠤᠤᠭᠢᠯᠳᠤᠨ ᠦᠷᠭᠦᠯᠵᠢᠯᠡᠭᠰᠡᠨ ᠪᠠᠢᠨᠠ᠃
ᠨᠠᠢᠷ ᠭᠢᠨᠢᠰ ᠦ᠋ᠨ ᠲᠡᠮᠳᠡᠭᠯᠡᠯ ᠢ᠋ ᠡᠭᠦᠳᠦᠭᠰᠡᠨ ᠲᠤᠯᠠ ᠠᠮᠵᠢᠯᠲᠠ ᠪᠦᠲᠦᠭᠡᠯ ᠶᠡᠬᠡ ᠪᠣᠯᠤᠭᠰᠠᠨ ᠨᠢ ᠶᠠᠷᠢᠶᠠᠨ ᠦᠭᠡᠢ᠂ ᠣᠷᠣᠯᠴᠠᠭᠰᠠᠨ ᠲᠠᠮᠡᠷᠴᠢᠨ ᠦ᠌ ᠲᠣᠭᠠ ᠡᠬᠢᠯᠡᠭᠡᠳ ᠦᠨᠳᠦᠰᠦᠲᠡᠨ ᠦ᠌ ᠪᠡᠨ ᠤᠯᠠᠮᠵᠢᠯᠠᠯᠲᠤ ᠪᠥᠬᠡ ᠶ᠋ᠢ ᠳᠠᠶᠠᠭᠠᠷ ᠭᠦᠷᠦᠨ ᠳ᠋ᠦ᠍ ᠰᠤᠷᠲᠠᠯᠴᠢᠯᠠᠬᠤ ᠪᠣᠯᠲᠠᠯᠠ ᠲᠤᠬᠠᠢ ᠶ᠋ᠢᠨ ᠬᠠᠷᠠᠯᠲᠠ ᠪᠠᠨ ᠪᠡᠶᠡᠯᠡᠭᠦᠯᠵᠦ ᠴᠢᠳᠠᠭᠰᠠᠨ ᠪᠢᠯᠡ᠃ ᠭᠡᠲᠡᠯᠡ ᠤᠷᠤᠯᠳᠤᠭᠠᠨ ᠤ᠋ ᠶᠠᠪᠤᠴᠠ ᠳ᠋ᠤ᠌ ᠨᠢᠭᠡᠳᠦᠯᠲᠡᠢ ᠳᠦᠷᠢᠮᠵᠢᠯ ᠳᠤᠲᠠᠭᠳᠠᠭᠰᠠᠨ ᠠ᠋ᠴᠠ ᠵᠣᠬᠢᠰ ᠦᠭᠡᠢ ᠦᠵᠡᠭᠳᠡᠯ ᠪᠠᠢᠨ ᠳᠠᠬᠢᠨ ᠢᠯᠡᠷᠡᠵᠦ ᠵᠠᠷᠢᠮ ᠲᠠᠮᠢᠷᠴᠢᠨ ᠪᠠ ᠦᠵᠡᠭᠴᠢᠳ ᠦ᠋ᠨ ᠲᠠᠰᠤᠷᠠᠯᠲᠠ ᠦᠭᠡᠢ ᠰᠢᠭᠦᠮᠵᠢᠯᠡᠯ ᠵᠢᠮᠡᠯᠡᠯ ᠢ᠋ ᠴᠦ᠍ ᠣᠯᠵᠠᠢ᠃ ᠮᠣᠩᠭᠣᠯ ᠪᠥᠬᠡ ᠠᠷᠠᠳᠴᠢ ᠴᠢᠨᠠᠷ᠂ ᠪᠦᠯᠬᠦᠮᠳᠡᠯᠲᠦ ᠴᠢᠨᠠᠷ ᠪᠠ ᠨᠠᠷᠢᠯᠢᠭ ᠤᠷᠠ ᠮᠡᠷᠭᠡᠵᠢᠯ ᠲᠡᠢ ᠰᠢᠯᠢᠳᠡᠭ ᠤᠯᠠᠮᠵᠢᠯᠠᠯ ᠪᠠᠢᠪᠠᠴᠤ ᠳᠡᠯᠡᠬᠡᠢ ᠶ᠋ᠢᠨ ᠳᠦᠷᠢᠮᠵᠢᠯ ᠳ᠋ᠦ᠍ ᠬᠦᠷᠭᠡᠬᠦ ᠳᠦ ᠪᠠᠰᠠ ᠨᠡᠯᠢᠶᠡᠳ ᠵᠦᠷᠢᠶᠡᠨ ᠲᠡᠢ ᠤᠴᠢᠷ ᠳᠤᠲᠠᠭᠳᠠᠯ ᠤ᠋ᠳ ᠨᠢ ᠴᠥᠮ ᠤᠷᠤᠯᠳᠤᠭᠠᠨ ᠤ᠋ ᠶᠠᠪᠤᠴᠠ ᠳ᠋ᠤ᠌ ᠢᠯᠡᠷᠡᠭᠰᠡᠨ ᠪᠠᠢᠵᠠᠢ᠃ ᠡᠭᠦᠨ ᠡᠴᠡ ᠪᠢᠳᠡ ᠣᠳᠣ ᠶ᠋ᠢᠨ ᠲᠠᠮᠢᠷ ᠤ᠋ᠨ ᠦᠨᠡ ᠥᠷᠲᠡᠭ ᠨᠢ ᠤᠷᠤᠯᠳᠤᠭᠠᠨ ᠤ᠋ ᠳ᠋ᠦᠩ ᠳ᠋ᠦ᠍ᠨᠢ ᠪᠢᠰᠢ ᠬᠠᠷᠢᠨ ᠶᠠᠪᠤᠴᠠ ᠳ᠋ᠤᠨᠢ ᠪᠠᠢᠳᠠᠭ ᠭᠡᠳᠡᠭ ᠶᠣᠰᠣ ᠶ᠋ᠢ ᠵᠣᠬᠢᠬᠤ ᠬᠡᠮᠵᠢᠶᠡ ᠪᠡᠷ ᠣᠢᠯᠠᠭᠠᠵᠤ ᠪᠣᠯᠬᠤ ᠪᠤᠶᠤ᠃ ᠤᠷᠤᠯᠳᠤᠭᠠᠨ ᠤ᠋ ᠶᠠᠪᠤᠴᠠ ᠨᠢ ᠵᠣᠬᠢᠰᠲᠠᠢ᠂ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠴᠢ ᠪᠠᠢᠪᠠᠯ ᠰᠠᠶᠢ ᠨᠡᠩ ᠣᠯᠠᠨ ᠬᠥᠮᠦᠨ ᠦ᠌ ᠠᠩᠬᠠᠷᠤᠯ ᠢ᠋ ᠲᠠᠲᠠᠭᠤᠯᠵᠤ ᠲᠠᠭᠠᠰᠢᠶᠠᠨ ᠬᠦᠯᠢᠶᠡᠯᠭᠡᠵᠦ ᠲᠡᠷᠡ ᠲᠠᠮᠢᠷ ᠢ᠋ᠶ᠋ᠠᠨ ᠥᠷᠭᠡᠨ ᠬᠡᠪᠴᠢᠶᠡᠨ ᠳ᠋ᠦ᠍ ᠲᠦᠭᠡᠮᠡᠯᠵᠢᠭᠦᠯᠵᠦ ᠴᠢᠳᠠᠨᠠ᠃ ᠲᠡᠢᠮᠦ ᠳ᠋ᠡᠭᠡᠨ ᠨᠡᠩ ᠣᠯᠠᠨ ᠮᠣᠩᠭᠣᠯᠴᠤᠳ ᠲᠤᠰ ᠴᠢᠭᠤᠯᠠᠭᠠ ᠶ᠋ᠢ ᠮᠣᠩᠭᠣᠯ ᠪᠥᠬᠡ ᠪᠡᠨ ᠳᠠᠪᠲᠠᠭᠤᠯᠵᠤ ᠰᠡᠷᠢᠵᠦ ᠰᠢᠯᠠᠭᠠᠷᠠᠭᠤᠯᠤᠨ ᠴᠢᠨᠠᠭᠰᠢᠯᠠᠨ ᠳᠡᠯᠡᠬᠡᠢ ᠶ᠋ᠢᠨ ᠲᠠᠪᠴᠠᠩ ᠳ᠋ᠤ᠌ ᠥᠷᠢᠰᠦᠯᠳᠦᠭᠦᠯᠬᠦ᠂ ᠨᠡᠩ ᠴᠢᠨᠠᠭᠰᠢᠯᠠᠪᠠᠯ ᠡᠨᠡ ᠬᠦ᠌ ᠵᠠᠪᠰᠢᠶᠠᠨ ᠢ᠋ᠶ᠋ᠠᠷ ᠳᠠᠮᠵᠢᠭᠤᠯᠤᠨ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠵᠣᠷᠢᠭ ᠰᠠᠨᠠᠭᠠ ᠪᠠ ᠣᠯᠢᠮᠫᠢᠺ ᠤ᠋ᠨ ᠵᠣᠷᠢᠭ ᠰᠠᠨᠠᠭᠠ ᠲᠠᠢ ᠤᠶᠠᠯᠳᠤᠭᠤᠯᠤᠨ ᠡᠷᠲᠡ ᠨᠢᠭᠡᠨ ᠡᠳᠦᠷ ᠮᠣᠩᠭᠣᠯ ᠪᠥᠬᠡ ᠪᠡᠨ ᠳᠡᠯᠡᠬᠡᠢ ᠶ᠋ᠢᠨ ᠲᠠᠪᠴᠠᠩ ᠳ᠋ᠤ᠌ ᠮᠠᠭᠰᠢᠭᠤᠯᠬᠤ ᠲᠦᠳᠡ ᠵᠠᠮ ᠢ᠋ ᠡᠷᠢᠯᠬᠢᠯᠡᠬᠦ ᠬᠦᠰᠡᠯ ᠲᠠᠯᠪᠢᠵᠤ ᠪᠠᠢᠭᠰᠠᠨ ᠶᠤᠮ᠃
ᠪᠥᠬᠡ ᠪᠡᠨ ᠳᠦᠷᠢᠮᠵᠢᠭᠦᠯᠬᠦ ᠨᠢ ᠳᠡᠯᠡᠬᠡᠢᠴᠢᠯᠡᠬᠦ ᠡᠴᠡ ᠢᠯᠡᠭᠦᠦ ᠴᠢᠬᠤᠯᠠ ᠲᠠᠢ᠂ ᠤᠯᠠᠮᠵᠢᠯᠠᠯ ᠶᠣᠰᠣᠭᠠᠷ ᠳᠡᠯᠡᠬᠡᠢ ᠨᠡᠢᠲᠡ ᠳ᠋ᠦ᠍ ᠣᠢᠯᠠᠭᠠᠭᠤᠯᠬᠤ ᠨᠢ ᠪᠤᠰᠤᠳ ᠪᠥᠬᠡ ᠶ᠋ᠢ ᠳᠠᠭᠤᠷᠢᠶᠠᠯᠭᠠᠨ ᠥᠭᠡᠷᠡᠴᠢᠯᠡᠬᠦ ᠡᠴᠡ ᠢᠯᠡᠭᠦᠦ ᠭᠡᠷᠩ ᠲᠡᠢ ᠶᠦᠮ᠃ ᠮᠣᠩᠭᠣᠯ ᠪᠥᠬᠡ ᠪᠣᠯ ᠮᠣᠩᠭᠣᠯᠴᠤᠳ ᠤ᠋ᠨ ᠣᠶᠤᠨ ᠤᠬᠠᠭᠠᠨ᠂ ᠵᠣᠷᠢᠭ ᠰᠠᠨᠠᠭᠠ᠂ ᠰᠣᠶᠣᠯ ᠣᠷᠡᠯᠢᠭ᠋᠂ ᠡᠪ ᠪᠦᠯᠬᠦᠮᠳᠡᠯ᠂ ᠵᠠᠩ ᠦᠢᠯᠡ᠁ ᠶ᠋ᠢᠨ ᠬᠠᠮ ᠨᠢᠭᠡᠳᠬᠡᠯ ᠰᠢᠨᠵᠢ ᠪᠦᠬᠦᠢ ᠦᠨᠡᠲᠦ ᠥᠪ ᠮᠥᠨ᠃
ᠬᠡᠨ ᠨᠢᠭᠡ ᠬᠥᠮᠦᠨ᠂ ᠠᠯᠢ ᠨᠢᠭᠡ ᠨᠤᠲᠤᠭ ᠤ᠋ᠨ ᠬᠢᠨ ᠦ᠌ ᠳᠤᠷᠠ ᠶ᠋ᠢᠨ ᠰᠠᠨᠠᠭᠠᠴᠢᠯᠠᠭᠠ ᠪᠠᠷ《ᠲᠠᠯᠬᠢᠬᠤ》 ᠬᠤᠪᠢ ᠶ᠋ᠢᠨ ᠥᠮᠴᠢ ᠪᠢᠰᠢ᠃ ᠡᠢᠨ ᠰᠠᠨᠠᠵᠤ ᠢᠩᠭᠢᠵᠦ ᠬᠠᠷᠢᠭᠤᠴᠠᠬᠤ ᠦᠭᠡᠢ ᠪᠣᠯ ᠳᠡᠯᠡᠬᠡᠢ ᠳ᠋ᠦ᠍ ᠵᠣᠳᠣᠭᠯᠠᠭᠤᠯᠤᠨᠠ᠂ ᠲᠡᠮᠳᠡᠭᠯᠡᠯ ᠡᠭᠦᠳᠦᠨᠡ ᠭᠡᠵᠦ ᠲᠠᠷᠪᠡᠬᠡᠳ ᠲᠣᠭᠠᠲᠠᠢ ᠬᠡᠳᠦᠨ ᠬᠥᠮᠦᠨ ᠵᠢᠳᠬᠦᠯ ᠲᠡᠢ ᠭᠡᠭᠳᠡᠨ ᠠᠯᠳᠠᠷᠰᠢᠬᠤ ᠠ᠋ᠴᠠ ᠪᠤᠰᠤ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠵᠢᠩᠬᠢᠨᠢ ᠬᠥᠭᠵᠢᠯ ᠳ᠋ᠦ᠍ ᠶᠠᠭᠤ ᠯᠠ ᠠᠪᠴᠢᠷᠠᠨᠠ ᠭᠡᠵᠦ ᠳᠡ! ᠲᠡᠮᠳᠡᠭᠯᠡᠯ ᠨᠢ ᠴᠦ᠍ ᠲᠣᠳᠣᠷᠬᠠᠢ ᠵᠣᠷᠢᠭᠤᠯᠤᠯᠲᠠ ᠲᠠᠢ ᠪᠠᠢᠵᠤ《ᠲᠡᠮᠳᠡᠭᠯᠩᠳᠡᠭᠡᠳ》 ᠪᠣᠯᠴᠢᠬᠠᠬᠤ ᠪᠢᠰᠢ᠂ ᠡᠨᠡ ᠡᠷᠴᠢᠮ ᠳᠡᠭᠡᠷᠡ ᠪᠡᠨ ᠥᠷᠭᠥᠯᠵᠢᠯᠩᠰᠡᠨ ᠰᠢᠰᠲ᠋ᠧᠮᠲᠦ ᠠᠵᠢᠯᠯᠠᠭᠠ ᠨᠤᠭᠤᠳ ᠢ᠋ᠶ᠋ᠠᠷ ᠮᠣᠩᠭᠣᠯ ᠪᠥᠬᠡ ᠪᠡᠨ ᠨᠡᠩ ᠳᠠᠯᠠᠢᠴᠠ ᠲᠠᠢ ᠤᠬᠠᠭᠤᠯᠬᠤ ᠶᠣᠰᠣᠲᠠᠢ᠃ ᠮᠡᠳᠡᠭᠡᠵᠢ ᠪᠡᠷ ᠢᠩᠭᠢᠪᠡᠯ ᠣᠯᠠᠨ ᠵᠢᠯ ᠦ᠋ᠨ ᠲᠤᠷᠰᠢᠬᠢ ᠮᠤᠨᠳᠠᠭ ᠬᠡᠮᠵᠢᠶᠡᠨ ᠦ᠌ ᠪᠡᠯᠡᠵᠢᠭᠦᠯᠦᠯᠲᠡ ᠡᠴᠡ ᠭᠠᠳᠠᠨᠠ ᠵᠠᠰᠠᠭ ᠤ᠋ᠨ ᠪᠠ ᠨᠡᠢᠲᠡ ᠬᠥᠮᠦᠰ ᠦ᠋ᠨ ᠰᠢᠡᠳᠡᠷᠰᠢ ᠦᠭᠡᠢ ᠴᠢᠷᠮᠠᠢᠯᠭᠠ ᠱᠠᠭᠠᠷᠳᠠᠭᠳᠠᠨᠠ᠃ ᠶᠠᠫᠣᠨᠴᠤᠳ ᠵᠢᠤᠳᠤᠤ ᠪᠥᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠥᠯᠥᠭᠡ800 ᠵᠢᠯ ᠵᠢᠳᠬᠦᠭᠰᠡᠨ ᠭᠡᠳ ᠪᠣᠳᠣᠭᠠᠴᠢ! ᠲᠡᠷᠡ ᠨᠥᠷᠢ ᠶᠡᠬᠡ ᠴᠢᠷᠮᠠᠢᠯᠭᠠ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠪᠢᠳᠡᠨ ᠦ᠌ ᠬᠣᠮᠰᠠᠬᠠᠨ ᠵᠢᠳᠬᠦᠯ ᠶᠠᠭᠤ ᠪᠠᠢᠬᠤ ᠪᠣᠢ ᠳᠠ᠃
ᠮᠣᠩᠭᠣᠯ ᠪᠥᠬᠡ ᠵᠥᠪᠬᠡᠨ ᠰᠢᠯᠢ ᠶ᠋ᠢᠨ ᠭᠣᠣᠯ ᠳ᠋ᠤ᠌᠂ ᠲᠡᠷᠡ ᠲᠣᠰᠤᠮ ᠢ᠋ᠶ᠋ᠠᠨ ᠥᠵᠤᠮᠤᠵᠢᠨ ᠳ᠋ᠤ᠌ ᠯᠠ ᠦᠯᠡᠳᠡᠨᠡ ᠭᠡᠪᠡᠯ ᠡᠷᠡᠭᠦᠯ ᠪᠤᠰᠤ ᠦᠵᠡᠭᠳᠡᠯ᠂ ᠴᠣᠬᠣᠮ ᠴᠤ᠌ ᠮᠣᠩᠭᠣᠯ ᠰᠣᠶᠣᠯ ᠤ᠋ᠨ ᠢᠪᠴᠤᠷᠠᠯ᠃ ᠥᠪᠥᠢ ᠮᠣᠩᠭᠣᠯ ᠳ᠋ᠠᠭᠠᠨ ᠬᠦᠷᠲᠡᠯᠡ ᠲᠦᠭᠡᠮᠡᠯ ᠣᠢᠯᠠᠭᠠᠯᠲᠠ᠂ ᠨᠢᠭᠡᠳᠦᠯᠲᠡᠢ ᠳᠦᠷᠢᠮᠵᠢᠯ ᠦᠭᠡᠢ ᠪᠠᠢᠵᠤ ᠶᠠᠭᠠᠬᠢᠵᠤ《ᠳᠡᠯᠡᠬᠡᠢ ᠳ᠋ᠦ᠍ ᠶᠠᠷᠢᠬᠤ》 ᠶᠤᠮ ᠪᠣᠢ? ᠶᠠᠭᠠᠬᠢᠵᠤ ᠤᠯᠢᠮᠫᠡᠺ ᠲᠦ᠍ ᠪᠠᠷᠢᠯᠳᠤᠬᠤ ᠶᠤᠮ ᠪᠣᠢ?《ᠲᠡᠮᠳᠡᠭᠯᠡᠯ ᠡᠭᠦᠳᠬᠦ》 ᠨᠢ ᠳᠡᠯᠡᠬᠡᠢ ᠳ᠋ᠦ᠍ ᠲᠠᠨᠢᠭᠳᠠᠬᠤ ᠠᠷᠭᠠ ᠮᠥᠨ ᠪᠣᠯᠪᠠᠴᠤ2048 ᠭᠡᠰᠡᠨ ᠲᠣᠭᠠ ᠯᠠ ᠲᠡᠮᠳᠡᠭᠯᠡᠯ ᠳ᠋ᠦ᠍ ᠪᠢᠴᠢᠭᠳᠡᠭᠰᠡᠨ ᠡᠴᠡ ᠪᠢᠰᠢ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠰᠣᠶᠣᠯ ᠤ᠋ᠨ ᠤᠯᠠᠮᠵᠢᠯᠠᠯ᠂ ᠪᠡᠶᠡ ᠶ᠋ᠢᠨ ᠲᠠᠮᠢᠷ ᠤ᠋ᠨ ᠵᠣᠷᠢᠭ ᠰᠠᠨᠠᠭᠠ᠂ ᠣᠯᠠᠨ ᠵᠠᠭᠤᠨ ᠤ᠋ ᠲᠡᠦᠬᠡ᠁ ᠶ᠋ᠢ ᠨᠢ ᠳᠡᠯᠡᠬᠡᠢ ᠲᠠᠨᠢᠭᠰᠠᠨ ᠪᠣᠯᠪᠠ ᠤᠤ ᠳᠠ! ᠠᠷᠠᠢ ᠳᠦᠷᠢᠮᠵᠢᠯ ᠦᠭᠡᠢ ᠪᠠᠷᠢᠯᠳᠤᠭᠠᠨ᠂ ᠪᠠᠷᠢᠮᠵᠢᠶᠠ ᠥᠬᠡᠢ ᠬᠢᠨᠠᠯᠲᠠ᠂ ᠬᠣᠰᠢᠭᠤ ᠨᠤᠲᠤᠭ ᠢᠯᠭᠠᠯᠴᠠᠨ ᠰᠦᠢᠳ ᠪᠣᠯᠳᠠᠭ ᠠᠲᠠᠭᠠ ᠵᠢᠲᠥᠭᠡ ᠪᠡᠨ ᠳᠡᠯᠡᠬᠡᠢ ᠳ᠋ᠦ᠍ ᠬᠠᠷᠠᠭᠤᠯᠬᠤ ᠭᠡᠰᠡᠨ ᠦᠭᠡᠢ ᠪᠢᠵᠡ?2048 ᠪᠥᠬᠡ ᠶ᠋ᠢᠨ ᠨᠠᠢᠷ ᠢ᠋ᠶ᠋ᠠᠷ ᠳᠠᠮᠵᠢᠭᠤᠯᠤᠨ ᠮᠣᠩᠭᠣᠯ ᠪᠥᠬᠡ ᠪᠡᠨ ᠳᠦᠷᠢᠮᠵᠢᠭᠦᠯᠬᠦ᠂ ᠲᠦᠭᠡᠮᠡᠯᠵᠢᠭᠦᠯᠬᠦ᠂ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠬᠥᠭᠵᠢᠯ ᠳ᠋ᠦ᠍ ᠲᠤᠰᠠ ᠦᠭᠡᠢ ᠨᠥᠯᠥᠭᠡ ᠠᠪᠴᠢᠷᠠᠬᠤ ᠵᠠᠷᠢᠮ ᠳᠦᠷᠢᠮ ᠢ᠋ ᠥᠭᠡᠷᠡᠴᠢᠯᠡᠬᠦ ᠰᠠᠨᠠᠭᠠᠴᠢᠯᠠᠭᠠ ᠲᠠᠯᠪᠢᠭᠰᠠᠨ ᠪᠣᠯ ᠵᠣᠬᠢᠬᠤ ᠪᠠᠢᠯᠠ᠃ ᠭᠡᠪᠡᠴᠦ ᠲᠡᠭᠡᠵᠦ ᠴᠢᠳᠠᠭᠠ ᠦᠭᠡᠢ ᠭᠡᠳᠡᠭ ᠢ᠋ ᠤᠭ ᠨᠠᠢᠷ ᠭᠡᠷᠡᠴᠢᠯᠡᠵᠦ ᠪᠠᠢᠨᠠ᠃ ᠲᠤᠭᠤᠯ ᠬᠤᠷᠠᠭᠠᠨ ᠤ᠋ ᠪᠡᠯᠴᠢᠭᠡᠷ᠂ ᠣᠪᠣᠭᠠ ᠤᠰᠤᠨ ᠤ᠋ ᠨᠠᠢᠷ ᠳᠡᠭᠡᠷᠡ ᠨᠣᠴᠣᠯᠳᠤᠵᠤ᠂《ᠥᠪᠡᠷ ᠦ᠋ᠨ ᠬᠣᠰᠢᠭᠤ》᠂《ᠬᠠᠷᠢ ᠶ᠋ᠢᠨ ᠬᠣᠰᠢᠭᠤ》 ᠢᠯᠭᠠᠯᠴᠠᠨ᠂ ᠨᠥᠭᠡᠭᠰᠡᠨ ᠪᠥᠬᠡ ᠨᠢ ᠨᠠᠢᠷ ᠤ᠋ᠨ ᠱᠠᠩ ᠢ᠋ᠶ᠋ᠠᠨ ᠢᠳᠡᠭᠡᠳ ᠠᠮᠤᠷ ᠰᠠᠢᠨ ᠳ᠋ᠠᠭᠠᠨ ᠵᠢᠷᠭᠠᠳᠠᠭ ᠥᠨᠥᠳᠥᠷ ᠦ᠋ᠨ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠤᠷᠤᠭᠤ ᠲᠠᠢ ᠪᠠᠢᠳᠠᠯ ᠢ᠋ᠶ᠋ᠠᠷ ᠳᠡᠯᠡᠬᠡᠢ ᠶ᠋ᠢᠨ ᠲᠠᠪᠴᠠᠩ ᠳ᠋ᠤ᠌ ᠵᠣᠳᠣᠭᠯᠠᠨᠠ ᠭᠡᠳᠡᠭ ᠠᠷᠠᠢ ᠪᠣᠯᠤᠭᠠ ᠦᠭᠡᠢ᠃ ᠳᠡᠯᠡᠬᠡᠢ ᠶ᠋ᠢᠨ ᠴᠠᠷᠠᠭᠠ ᠪᠠᠷ ᠵᠡᠭᠦᠳᠦᠯᠡᠬᠦ ᠡᠴᠡ ᠪᠡᠨ ᠡᠮᠦᠨᠡ᠂ ᠣᠷᠣᠨ ᠤ᠋ ᠪᠠᠨ ᠴᠠᠷᠠᠭᠠ ᠪᠠᠷ ᠰᠡᠳᠬᠢᠬᠦ ᠬᠡᠷᠡᠭᠲᠡᠢ ᠪᠠᠢᠨᠠ᠃ ᠬᠠᠷᠠᠮᠴᠢ ᠬᠥᠮᠦᠨ ᠢ᠋ ᠥᠭᠭᠢᠶᠡᠮᠦᠷᠴᠢ ᠪᠣᠯᠭᠠᠬᠤ ᠳ᠋ᠤ᠌ ᠤᠷᠢᠳ ᠢ᠋ᠶ᠋ᠠᠷ ᠨᠢᠭᠡ ᠭᠠᠷ ᠠ᠋ᠴᠠ ᠨᠢ ᠨᠥᠭᠦᠭᠡ ᠭᠠᠷ ᠤᠷᠤᠭᠤ ᠨᠢ ᠶᠠᠭᠤᠮᠠ ᠥᠭᠭᠦᠭᠦᠯᠵᠦ ᠰᠤᠷᠭᠠᠬᠤ ᠬᠡᠷᠡᠭᠲᠡᠢ ᠭᠡᠰᠡᠨ ᠦᠯᠢᠭᠡᠷ ᠪᠠᠢᠳᠠᠭ᠃ ᠡᠭᠦᠨ ᠲᠡᠢ ᠠᠳᠠᠯᠢᠬᠠᠨ ᠨᠠᠢᠷ ᠤ᠋ᠨ ᠲᠦᠷᠦᠭᠦᠦ ᠱᠠᠩ ᠬᠠᠮᠢᠭᠠᠬᠢ ᠶ᠋ᠢᠨ ᠬᠡᠨ ᠦ᠌ ᠪᠣᠯᠬᠤ ᠨᠢ ᠴᠢᠬᠤᠯᠠ ᠪᠢᠰᠢ᠃ ᠬᠠᠷᠢᠨ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠲᠦᠭᠡᠮᠡᠯᠵᠢᠯ᠂ ᠳᠦᠷᠢᠮᠵᠢᠯ ᠴᠢᠬᠤᠯᠠ ᠶᠤᠮ᠃ ᠡᠢᠮᠦ ᠡᠴᠡ《ᠪᠥᠬᠡ ᠣᠨᠣᠭᠠᠬᠤ》 ᠳᠦᠷᠢᠮ ᠢ᠋《ᠰᠢᠪᠠᠭᠠ ᠲᠠᠲᠠᠬᠤ》 ᠳᠦᠷᠢᠮ ᠢ᠋ᠶ᠋ᠡᠷ ᠣᠷᠣᠯᠠᠭᠤᠯᠪᠠᠯ ᠵᠦᠢᠲᠡᠢ! ᠭᠡᠪᠡᠴᠦ ᠲᠡᠮᠳᠡᠭᠯᠡᠯ ᠡᠭᠦᠳᠦᠭᠰᠡᠨ ᠨᠠᠢᠷ ᠤ᠋ᠨ ᠬᠢᠨ ᠮᠠᠨᠢ《ᠥᠪᠡᠷ ᠦ᠋ᠨ ᠨᠠᠢᠷ ᠤ᠋ᠨ ᠬᠦᠴᠦ ᠪᠡᠨ ᠠᠯᠳᠠᠬᠤ ᠦᠭᠡᠢ》 ᠭᠡᠰᠡᠨ ᠵᠣᠷᠢᠭ ᠰᠠᠨᠠᠭᠠ ᠪᠠᠷ ᠣᠨᠣᠭᠠᠯᠲᠠ ᠬᠢᠭᠰᠡᠨ ᠲᠡᠳᠦᠢ ᠦᠭᠡᠢ1500 ᠪᠥᠬᠡ ᠪᠡᠯᠡᠳᠬᠡᠨ ᠪᠠᠷᠢᠯᠳᠤᠭᠤᠯᠤᠭᠰᠠᠨ ᠪᠠ ᠴᠤᠤᠲᠠᠢ ᠪᠥᠬᠡᠴᠦᠳ ᠨᠢ ᠰᠠᠢᠨ ᠳᠠᠪᠠᠭᠠ ᠂ ᠳᠠᠪᠠᠭᠠ ᠦᠭᠡᠢ ᠳᠡᠭᠡᠭᠰᠢᠯᠡᠭᠰᠡᠨ᠂《ᠭᠠᠳᠠᠨᠠ ᠶ᠋ᠢᠨ ᠪᠥᠬᠡ ᠶ᠋ᠢ ᠭᠠᠳᠠᠨᠠᠬᠢ ᠲᠠᠢ ᠨᠢ ᠲᠤᠯᠭᠠᠭᠰᠠᠨ》᠂ ᠣᠯᠠᠨ ᠪᠥᠬᠡ ᠶ᠋ᠢ ᠤᠬᠠᠭᠠᠨ ᠲᠠᠢ ᠣᠨᠣᠭᠠᠬᠤ ᠭᠡᠮᠡᠨ ᠴᠠᠭ ᠥᠷᠡᠭᠡᠵᠦ ᠰᠥᠨᠢ ᠳᠤᠨᠳᠠᠯᠠᠲᠠᠯᠠ ᠦᠷᠭᠦᠯᠵᠢᠯᠡᠭᠰᠡᠨ᠂ ᠳᠠᠪᠠᠭᠠ ᠪᠠᠨ ᠳᠠᠪᠠᠭᠰᠠᠨ ᠵᠠᠷᠢᠮ ᠪᠥᠬᠡᠴᠦᠳ ᠦ᠋ᠨ ᠨᠡᠷᠡ ᠬᠠᠰᠤᠭᠳᠠᠭᠰᠠᠨ᠂ ᠪᠥᠬᠡ ᠶ᠋ᠢᠨ ᠲᠣᠭᠠ ᠣᠨᠣᠪᠴᠢ ᠮᠠᠭᠤᠲᠠᠢ ᠪᠣᠯᠤᠭᠰᠠᠨ᠂ ᠵᠠᠷᠢᠮ ᠪᠥᠬᠡ ᠮᠠᠷᠭᠤᠭᠠᠨ ᠶᠡᠬᠡᠲᠡᠢ ᠣᠢᠴᠢᠭᠰᠠᠨ᠁ ᠵᠡᠷᠭᠡ ᠨᠢ ᠤᠭ ᠨᠠᠢᠷ ᠤ᠋ᠨ ᠤᠳᠬᠠ ᠤᠴᠢᠷ ᠢ᠋ ᠬᠤᠪᠢᠷᠠᠭᠤᠯᠤᠭᠰᠠᠨ ᠪᠠᠢᠭᠠ ᠶᠤᠮ᠃ ᠢᠯᠠᠩᠭᠤᠶᠠ ᠨᠠᠢᠷ ᠤ᠋ᠨ ᠵᠠᠷᠢᠮ ᠬᠠᠷᠢᠭᠤᠴᠠᠯᠭᠠᠲᠠᠨ ᠰᠤᠷᠪᠤᠯᠵᠢᠯᠠᠭᠠ ᠬᠦᠯᠢᠶᠡᠵᠦ᠄《ᠪᠥᠬᠡ ᠶ᠋ᠢᠨ ᠴᠢᠳᠠᠪᠠᠯ ᠰᠢᠯᠢ ᠶ᠋ᠢᠨ ᠭᠣᠣᠯ ᠳ᠋ᠠᠭᠠᠨ᠂ ᠪᠣᠯᠪᠠᠯ ᠪᠠᠷᠠᠭᠤᠨ ᠦᠵᠦᠮᠦᠴᠢᠨ ᠳ᠋ᠡᠭᠡᠨ ᠦᠯᠡᠳᠡᠭᠡᠨᠡ ᠭᠡᠵᠦ ᠶᠠᠷᠢᠭᠰᠠᠨ ᠨᠢ ᠥᠪᠡᠷᠰᠡᠳ ᠦ᠋ᠨ ᠰᠠᠨᠠᠭᠠ ᠪᠠᠨ ᠢᠯᠡᠷᠭᠡᠢᠯᠩᠰᠡᠨ ᠤᠴᠢᠷ ᠶᠤᠮ᠃
ᠮᠢᠨᠦ ᠪᠣᠯᠬᠢ ᠪᠣᠳᠣᠯ ᠢ᠋ᠶ᠋ᠠᠷ᠂ ᠤᠭ ᠨᠠᠢᠷ ᠢ᠋ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠬᠥᠭᠵᠢᠯ ᠦ᠋ᠨ ᠡᠮᠦᠨᠡ ᠡᠴᠡ᠂ ᠪᠥᠬᠡ ᠳ᠋ᠦ᠍ ᠬᠠᠢᠷᠠᠲᠠᠢ ᠮᠣᠩᠭᠣᠯᠴᠤᠳ ᠤ᠋ᠨ ᠢ᠋ᠶ᠋ᠠᠨ ᠡᠮᠦᠨᠡ ᠡᠴᠡ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠤᠯᠠᠮᠵᠢᠯᠠᠯ ᠢ᠋ ᠰᠠᠭᠤᠷᠢ ᠰᠠᠢᠲᠠᠢ ᠠᠪᠴᠤ ᠦᠯᠡᠳᠡᠭᠰᠡᠨ (ᠶᠠᠭᠠᠬᠢᠭᠠᠳ ᠢᠩᠭᠢᠵᠦ ᠬᠡᠯᠡᠭᠳᠡᠭ ᠪᠣᠢ? ᠭᠡᠪᠡᠯ ᠮᠣᠩᠭᠣᠯ ᠪᠥᠬᠡ ᠶᠡᠬᠡ ᠡᠷᠲᠡ ᠳ᠋ᠡᠭᠡᠨ ᠨᠡᠢᠲᠡ ᠮᠣᠩᠭᠣᠯᠴᠤᠳ ᠤ᠋ᠨ ᠳᠤᠮᠳᠠ ᠲᠦᠭᠡᠮᠡᠯ ᠪᠠᠢᠭᠰᠠᠨ᠂ ᠰᠡᠭᠦᠯᠡᠷ ᠨᠢ ᠤᠯᠠᠮᠵᠢᠯᠠᠯ ᠲᠠᠰᠤᠷᠠᠨ ᠠᠯᠳᠠᠭᠳᠠᠭᠰᠠᠭᠠᠷ
ᠴᠥᠭᠡᠨ ᠨᠤᠲᠤᠭ ᠲᠤ ᠦᠯᠡᠳᠡᠭᠰᠡᠨ ᠭᠡᠷᠩ᠃ ᠡᠨᠡ ᠪᠣᠯ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠪᠠᠭᠤᠷᠠᠯᠲᠠ ᠶᠤᠮ᠃
ᠰᠢᠯᠢ ᠶ᠋ᠢᠨ ᠭᠣᠣᠯ ᠪᠥᠬᠡ ᠰᠠᠢᠲᠠᠢ ᠭᠡᠳᠡᠭ ᠵᠥᠪᠬᠡᠨ ᠪᠤᠰᠤᠳ ᠨᠤᠲᠤᠭ ᠤ᠋ᠨ ᠬᠢᠨᠢ ᠮᠣᠩᠭᠣᠯ ᠪᠥᠬᠡ ᠪᠡᠨ ᠲᠡᠳᠦᠢ ᠯᠡ ᠪᠠᠷᠢᠯᠳᠤᠬᠤ ᠦᠭᠡᠢ ᠪᠠᠢᠭᠠ ᠲᠠᠢ ᠬᠣᠯᠪᠣᠭᠠ ᠲᠠᠢ ᠠ᠋ᠴᠠ ᠪᠢᠰᠢ᠂ ᠠᠯᠢ ᠴᠤ᠌ ᠠᠡᠢᠮᠠᠭ᠋ ᠤ᠋ᠨ ᠬᠢᠨ ᠰᠠᠢᠨ ᠪᠠᠷᠢᠯᠳᠤᠳᠠᠭ᠂ ᠲᠡᠷᠡ ᠳᠤᠮᠳᠠ ᠪᠠᠨ ᠰᠢᠯᠢ ᠶ᠋ᠢᠨ ᠭᠣᠣᠯ ᠰᠠᠢᠨ ᠭᠡᠰᠡᠨ ᠤᠴᠢᠷ ᠪᠢᠰᠢ᠃
ᠠᠯᠢ ᠨᠢᠭᠡ ᠡᠳᠦᠷ ᠪᠥᠬᠡ ᠮᠠᠭᠤᠲᠠᠢ ᠭᠡᠭᠳᠡᠵᠦ ᠪᠠᠢᠭᠠ ᠨᠤᠲᠤᠭ ᠠ᠋ᠴᠠ ᠴᠤ᠌ ᠰᠠᠢᠨ ᠪᠥᠬᠡᠴᠦᠳ ᠴᠣᠯᠭᠣᠷᠠᠵᠤ᠂ ᠰᠢᠯᠢ ᠶ᠋ᠢᠨ ᠭᠣᠣᠯ ᠢ᠋ ᠬᠣᠯᠠ ᠳᠠᠪᠠᠪᠠᠯ ᠰᠠᠶᠢ ᠪᠠᠶᠠᠷᠯᠠᠭᠤᠰᠢᠲᠠᠢ ᠦᠵᠡᠭᠳᠡᠯ ᠪᠠᠢᠬᠤ ᠶᠣᠰᠣᠲᠠᠢ) ᠪᠠᠷᠠᠭᠤᠨ ᠦᠵᠦᠮᠦᠴᠢᠨ ᠬᠣᠰᠢᠭᠤ ᠡᠷᠬᠢᠯᠡᠵᠦ ᠬᠢᠯᠡ ᠭᠡᠵᠦ ᠣᠢᠯᠠᠭᠠᠭᠰᠠᠨ᠃
ᠭᠡᠪᠡᠴᠦ ᠦᠷᠡ ᠳ᠋ᠦᠩ ᠨᠢ ᠲᠡᠢᠮᠦ ᠪᠢᠰᠢ ᠪᠠᠢᠭᠠ ᠨᠢ ᠬᠠᠷᠠᠮᠰᠠᠯᠲᠠᠢ᠃
ᠨᠤᠲᠤᠭ ᠤ᠋ᠨ ᠪᠥᠬᠡ ᠲᠡᠷᠢᠭᠦᠯᠡᠬᠦ ᠨᠢ ᠪᠤᠷᠤᠭᠤ ᠪᠢᠰᠢ᠂ ᠭᠡᠪᠡᠴᠦ ᠨᠤᠲᠤᠭ ᠤ᠋ᠨ ᠪᠥᠬᠡ ᠪᠡᠨ ᠲᠡᠷᠢᠭᠦᠯᠡᠭᠦᠯᠬᠦ ᠶ᠋ᠢᠨ ᠲᠥᠯᠥᠭᠡ ᠴᠢᠷᠮᠡᠢᠠᠡᠰᠠᠨ ᠴᠢᠷᠮᠠᠢᠯᠲᠠ ᠨᠢ ᠮᠣᠩᠭᠣᠯ ᠤ᠋ᠨ ᠬᠥᠭᠵᠢᠯ ᠦ᠋ᠨ ᠲᠥᠯᠥᠭᠡ ᠭᠡᠳᠡᠭ ᠰᠠᠢᠬᠠᠨ ᠤᠷᠢᠢᠡ ᠶ᠋ᠢ ᠨᠢ ᠪᠠᠯᠠᠯᠤᠭᠠᠳ ᠪᠠᠢᠭᠠ ᠶᠤᠮ᠃ 《ᠣᠨᠣᠭᠠᠬᠤ ᠦᠭᠡᠢ ᠪᠣᠯ ᠰᠠᠢᠨ ᠪᠥᠬᠡ ᠰᠢᠷᠣᠢ ᠳ᠋ᠤ᠌ ᠣᠢᠴᠢᠨᠠ ᠰᠢᠦ!》 ᠭᠡᠳᠡᠭ ᠨᠢ ᠮᠠᠨ ᠤ᠋ ᠬᠢᠨ ᠦ᠌ ᠥᠪᠡᠷ ᠢ᠋ ᠪᠡᠨ ᠵᠥᠪᠲᠦᠭᠡᠳᠡᠭ ᠠᠷᠭᠠ᠃ ᠪᠥᠬᠡ ᠪᠡᠨ ᠬᠠᠢᠷᠷᠠᠯᠠᠬᠤ ᠨᠢ ᠵᠥᠪ ᠪᠣᠯᠪᠠᠴᠤ ᠪᠥᠬᠡ ᠶ᠋ᠢᠨ ᠰᠣᠶᠣᠯ ᠤ᠋ᠨ ᠢ᠋ᠶ᠋ᠠᠨ ᠵᠥᠪ ᠬᠥᠭᠵᠢᠯ ᠦ᠋ᠨ ᠲᠥᠯᠥᠭᠡ ᠭᠠᠭᠴᠠ ᠬᠣᠶᠠᠷ ᠬᠥᠮᠦᠨ ᠳᠣᠣᠷᠠ
ᠤᠨᠠᠬᠤ ᠨᠢ ᠨᠥᠬᠥᠪᠥᠷᠢᠯᠡᠰᠢ ᠦᠭᠡᠢ ᠬᠣᠬᠢᠷᠠᠯ ᠪᠣᠯᠤᠭᠠᠳ ᠬᠠᠮᠢᠭᠠ ᠬᠦᠷᠬᠦ ᠪᠣᠢ ᠳᠠ! ᠲᠡᠭᠡᠵᠦ ᠬᠠᠢᠷᠠᠯᠠᠭᠠᠳ ᠪᠠᠢᠪᠠᠯ ᠬᠠᠢᠷᠠ ᠨᠢ ᠬᠠᠯᠠ ᠪᠣᠯᠬᠤ ᠳ᠋ᠤ᠌ ᠬᠣᠯᠠ ᠦᠭᠡᠢ᠃ ᠬᠠᠷᠢᠨ ᠬᠡᠳᠦᠢ ᠡᠷᠬᠡ ᠲᠠᠩᠰᠢ ᠪᠠᠷ ᠥᠷᠢᠰᠦᠯᠳᠦᠬᠦ ᠲᠣᠰᠤᠮ ᠢ᠋ᠶ᠋ᠠᠨ ᠪᠥᠬᠡᠴᠦᠳ ᠦ᠋ᠨ ᠦ ᠨᠢ ᠠᠷᠢᠯᠵᠤ᠂ ᠴᠢᠷᠮᠠᠢᠯᠲᠠ ᠨᠢ ᠴᠢᠩᠭᠠᠷᠠᠵᠤ᠂ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠬᠥᠭᠵᠢᠯ ᠳ᠋ᠦ᠍ ᠴᠦ᠍ ᠲᠤᠰᠠᠲᠠᠢ ᠪᠣᠯᠬᠤ ᠶᠤᠮ᠃ ᠲᠡᠢᠮᠦ ᠪᠢᠰᠢ ᠪᠣᠯ ᠲᠡᠷᠢᠭᠦᠯᠡᠴᠢᠬᠡᠯᠡ ᠬᠳ ᠨᠥᠭᠡᠭᠡᠳ ᠳᠡᠭᠡᠭᠰᠢᠯᠡᠯᠡ ᠭᠡᠵᠦ ᠬᠡᠯᠡᠭᠳᠡᠨᠡ ᠰᠢᠦ ᠳᠡ᠃ ᠴᠤᠤᠲᠤ ᠪᠥᠬᠡᠴᠦᠳ ᠦ᠋ᠨ ᠢ᠋ᠶ᠋ᠡᠨ ᠴᠢᠷᠠᠢ ᠶ᠋ᠢ ᠲᠡᠭᠡᠵᠦ ᠤᠯᠠᠢᠯᠭᠠᠭᠠᠳ ᠴᠤ᠌ ᠶᠠᠭᠠᠬᠢᠬᠤ ᠪᠣᠢ! ᠰᠢᠪᠠᠭᠠ ᠲᠠᠲᠠᠭᠤᠯᠵᠤ ᠴᠢᠳᠠᠬᠤ ᠡᠰᠡᠬᠦ ᠨᠢ ᠠᠤᠬᠠᠠᠭ᠋ ᠰᠡᠳᠬᠢᠯ ᠦ᠋ᠨ ᠬᠦᠯᠢᠶᠡᠰᠦ ᠡᠴᠡ ᠰᠠᠯᠵᠤ ᠴᠢᠳᠠᠬᠤ ᠡᠰᠡᠬᠦ᠂ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠥᠭᠵᠢᠯ ᠳ᠋ᠦ᠍ ᠵᠥᠪ ᠣᠢᠯᠠᠭᠠᠯᠲᠠ ᠪᠠᠷ ᠬᠠᠨᠳᠤᠵᠤ ᠴᠢᠳᠠᠬᠤ ᠡᠰᠡᠬᠦ ᠲᠡᠢ ᠬᠣᠯᠪᠣᠭᠳᠠᠨᠠ᠃
ᠨᠠᠢᠷ ᠤ᠋ᠨ ᠶᠠᠪᠤᠴᠠ ᠳ᠋ᠤ᠌ ᠪᠥᠬᠡ ᠶ᠋ᠢᠨ ᠳᠦᠷᠢᠮᠵᠢᠯ ᠲᠡᠢ ᠬᠣᠯᠪᠣᠭᠳᠠᠭᠰᠠᠨ ᠡᠳᠦᠢ ᠲᠡᠳᠦᠢ ᠣᠷᠣᠯᠳᠣᠯᠭᠠ ᠬᠢᠭᠰᠡᠨ ᠪᠣᠯᠪᠠᠴᠤ ᠲᠤᠭᠤᠰᠢᠲᠠᠢ ᠪᠢᠰᠢ᠃ ᠵᠢᠱ᠌ᠢᠶᠡᠯᠡᠪᠡᠯ ᠵᠣᠳᠣᠭ ᠤ᠋ᠨ ᠵᠠᠭᠠᠮᠠ᠂ ᠬᠠᠨᠴᠤᠢ ᠰᠠᠨᠴᠢᠭ᠂ ᠪᠦᠰᠡ ᠵᠢᠴᠢ ᠵᠠᠩᠭᠢᠶᠠ ᠶ᠋ᠢ ᠶᠠᠮᠠᠷ ᠪᠠᠷᠢᠮᠵᠢᠶᠠ ᠪᠠᠷ ᠬᠢᠬᠦ (ᠵᠠᠩᠭᠢᠶᠠ ᠨᠢ ᠤᠯᠠᠮ ᠢ᠋ᠶ᠋ᠠᠷ ᠦᠵᠡᠮᠵᠢ ᠵᠠᠰᠠᠯ ᠤ᠋ᠨ ᠣᠷᠣᠨ ᠳ᠋ᠤ᠌ ᠰᠠᠭᠰᠠᠯᠵᠠᠬᠤ ᠨᠢ ᠣᠯᠠᠨ ᠪᠣᠯᠵᠤ᠂ ᠭᠬᠢᠪ ᠨᠢ ᠬᠡᠲᠦᠷᠬᠡᠢ ᠰᠠᠭᠰᠠᠭᠠᠷ ᠤᠷᠲᠤ ᠪᠠᠢᠨᠠ)᠂ ᠬᠠᠢᠨᠴᠠᠬᠤ᠂ ᠴᠠᠭ ᠬᠡᠲᠦᠷᠡᠬᠦ᠂ ᠮᠠᠷᠭᠤᠭᠠᠨ ᠲᠠᠢ ᠪᠠᠷᠢᠯᠳᠤᠭᠠᠨ ᠢ᠋ ᠰᠢᠢᠳᠪᠦᠷᠢᠯᠡᠬᠦ ᠵᠡᠷᠭᠡ ᠳ᠋ᠦ᠍ ᠲᠣᠳᠣᠷᠬᠠᠢ ᠲᠣᠭᠲᠠᠭᠠᠯ ᠦᠭᠡᠢ ᠪᠠᠢᠪᠠᠴᠤ᠂ ᠰᠠᠶᠢᠩ ᠣᠷᠬᠢᠬᠤ᠂ ᠴᠠᠭᠠᠷᠢᠭ ᠲᠤ ᠲᠦᠯᠬᠢᠭᠦᠯᠬᠦ ᠵᠡᠷᠭᠡ ᠪᠦᠳᠦᠭᠦᠯᠢᠭ ᠠᠷᠭᠠ ᠠᠪᠤᠭᠰᠠᠨ ᠨᠢ ᠵᠣᠬᠢᠰᠲᠠᠢ ᠪᠢᠰᠢ᠃ ᠡᠳᠡᠭᠡᠷ ᠢ᠋ ᠳᠦᠷᠢᠮᠵᠢᠭᠦᠯᠬᠦ ᠨᠢ ᠪᠥᠬᠡ ᠶ᠋ᠢᠨ ᠲᠦᠭᠡᠮᠡᠯᠵᠢᠯ ᠬᠥᠭᠵᠢᠯ ᠦ᠋ᠨ ᠤᠷᠢᠳᠠᠯ᠃ ᠪᠥᠬᠡ ᠶ᠋ᠢᠨ ᠲᠠᠯᠠ ᠪᠠᠷ《ᠡᠷᠬᠡ ᠰᠦᠷ ᠲᠡᠢ》 ᠭᠡᠭᠳᠡᠵᠦ ᠪᠠᠢᠭᠠ ᠰᠢᠯᠢ ᠶ᠋ᠢᠨ ᠭᠣᠣᠯ ᠤ᠋ᠨ ᠪᠠᠷᠢᠮᠵᠢᠶᠠ ᠪᠠᠷ ᠰᠢᠢᠳᠪᠦᠷᠢ ᠭᠠᠷᠭᠠᠬᠤ ᠨᠢ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠴᠢ ᠪᠢᠰᠢ᠂ ᠬᠡᠨ ᠨᠢᠭᠡ ᠨᠡᠷᠡᠲᠦ ᠬᠥᠮᠦᠨ ᠦ᠌ ᠦᠭᠡ ᠪᠡᠷ ᠳᠦᠷᠢᠮ ᠲᠣᠭᠲᠠᠭᠠᠬᠤ ᠨᠢ ᠴᠦ᠍ ᠪᠤᠷᠤᠭᠤ᠃
ᠶᠡᠬᠡ ᠨᠠᠢᠷ ᠮᠠᠨᠢ 《ᠪᠠᠷᠠᠭᠤᠨ ᠦᠵᠦᠮᠦᠴᠢᠨ ᠬᠤᠰᠢᠭᠤᠨ ᠤ᠋ ᠭᠢᠨᠢᠰ ᠦ᠋ᠨ ᠲᠡᠮᠳᠡᠭᠯᠡᠯ ᠢ᠋ ᠡᠭᠦᠳᠬᠦ2048 ᠪᠥᠬᠡ ᠶ᠋ᠢᠨ ᠶᠡᠬᠡ ᠨᠠᠢᠷ》 ᠭᠡᠰᠡᠨ ᠣᠢᠯᠠᠭᠠᠮᠵᠢ ᠮᠠᠭᠤᠲᠠᠢ ᠨᠡᠷᠡ ᠪᠡᠷ ᠬᠢᠭᠳᠡᠯᠡ᠃ ᠶᠠᠭᠠᠬᠢᠭᠠᠳ ᠪᠠᠷᠠᠭᠤᠨ ᠦᠵᠦᠮᠦᠴᠢᠨ ᠦ᠌ ᠭᠢᠨᠢᠰ ᠦ᠋ᠨ ᠲᠡᠮᠳᠡᠭᠯᠡᠯ ᠪᠣᠯᠴᠢᠬᠠᠪᠠ? ᠶᠠᠭᠠᠬᠢᠭᠠᠳ ᠵᠠᠷᠢᠮ ᠳ᠋ᠠᠭᠠᠨ ᠪᠠᠰᠠ《ᠭᠢᠨᠢᠰ ᠦ᠋ᠨ ᠲᠡᠮᠳᠡᠭᠯᠡᠯ ᠢ᠋ ᠡᠪᠳᠡᠭᠰᠡᠨ᠁》 ᠭᠡᠵᠦ ᠪᠤᠷᠤᠭᠤ ᠵᠠᠷᠯᠠᠭᠠᠳ ᠪᠠᠢᠳᠠᠭ ᠪᠣᠢ? ᠴᠣᠬᠣᠮ ᠳ᠋ᠠᠭᠠᠨ ᠲᠡᠮᠳᠡᠭᠯᠡᠯ ᠨᠢ ᠳᠡᠯᠡᠬᠡᠢ ᠶ᠋ᠢᠨ ᠬᠢ᠂ ᠡᠪᠳᠡᠭᠰᠡᠨ ᠪᠢᠰᠢ᠂ ᠡᠭᠦᠳᠦᠭᠰᠡᠨ ᠡᠰᠡᠬᠦᠯᠡ ᠲᠡᠮᠳᠡᠭᠯᠡᠭᠳᠡᠭᠰᠡᠨ ᠪᠠᠢᠬᠤ ᠶᠣᠰᠣᠲᠠᠢ᠃ ᠡᠨᠡ ᠨᠡᠷᠡ ᠪᠠᠷᠠᠭᠤᠨ ᠦᠵᠦᠮᠦᠴᠢᠨ ᠦ᠌ ᠪᠡᠨ ᠪᠥᠬᠡ ᠶ᠋ᠢ ᠲᠡᠮᠳᠡᠭᠯᠡᠯ ᠳ᠋ᠦ᠍ ᠲᠡᠮᠳᠡᠭᠯᠡᠭᠦᠯᠬᠦ ᠭᠡᠰᠡᠨ ᠮᠡᠲᠦ ᠣᠢᠯᠠᠭᠠᠯᠲᠠ ᠶ᠋ᠢ ᠥᠭᠴᠦ ᠪᠠᠢᠨᠠ᠃《ᠪᠠᠷᠠᠭᠤᠨ ᠦᠵᠦᠮᠦᠴᠢᠨ ᠬᠤᠰᠢᠭᠤᠨ ᠤ᠋᠁》 ᠭᠡᠰᠡᠨ ᠲᠣᠳᠣᠳᠬᠠᠯ ᠨᠢ ᠴᠦ᠍《ᠵᠥᠪᠬᠡᠨ ᠮᠠᠨ ᠤ᠋ ᠬᠤᠰᠢᠭᠤᠨ ᠤ᠋᠁》 ᠭᠡᠰᠡᠨ ᠠᠮᠢᠨᠴᠢᠷᠬᠠᠨ ᠥᠩᠭᠡ ᠨᠡᠮᠡᠭᠡᠳ ᠪᠠᠢᠭᠠ ᠶᠤᠮ᠃ ᠨᠡᠩ ᠴᠦ᠍ ᠨᠤᠲᠤᠭ ᠤ᠋ᠨ ᠪᠥᠬᠡ ᠪᠡᠨ ᠲᠡᠷᠢᠭᠦᠯᠡᠭᠦᠯᠬᠦ ᠭᠡᠰᠡᠨ ᠴᠢᠷᠮᠠᠢᠯᠭᠠ ᠨᠢ ᠨᠠᠢᠷ ᠤ᠋ᠨ ᠨᠡᠷᠡ ᠶ᠋ᠢ ᠤᠯᠠᠮ ᠣᠨᠳᠣᠣ ᠲᠠᠢᠰᠢ ᠣᠢᠯᠠᠭᠠᠭᠤᠯᠤᠭᠠᠳ ᠪᠠᠢᠬᠤ ᠶᠤᠮ᠃ ᠲᠡᠭᠡᠪᠡᠯ ᠱᠠᠩᠨᠠᠯ ᠤ᠋ᠨ ᠢᠯᠡᠷᠬᠡᠢᠯᠡᠯ ᠨᠢ ᠭᠠᠭᠴᠠ ᠴᠤ ᠮᠣᠩᠭᠣᠯ ᠦᠰᠦᠭ ᠦᠭᠡᠢ ᠪᠡᠷ ᠢ᠋ᠶ᠋ᠡᠨ ᠲᠡᠮᠳᠡᠭᠯᠡᠯ ᠡᠭᠦᠳᠴᠡᠢ᠃ ᠳᠡᠯᠡᠬᠡᠢ ᠶ᠋ᠢᠨ ᠲᠡᠮᠳᠡᠭᠯᠡᠯ ᠡᠭᠦᠳᠴᠦ ᠪᠣᠢ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠨᠠᠢᠷ (ᠨᠢᠭᠡ ᠶᠣᠰᠣᠨ ᠳ᠋ᠠᠭᠠᠨ ᠮᠣᠩᠭᠣᠯ ᠰᠣᠶᠣᠯ ᠤ᠋ᠨ ᠨᠠᠢᠷ ᠰᠢᠦ ᠳᠡ) ᠪᠠᠢᠭᠠᠳ ᠮᠣᠩᠭᠣᠯ ᠦᠰᠦᠭ ᠢ᠋ᠶ᠋ᠡᠨ ᠬᠦᠨᠳᠦᠳᠬᠡᠨ ᠬᠡᠷᠡᠭᠯᠡᠬᠦ ᠦᠭᠡᠢ ᠭᠡᠳᠡᠭ ᠳᠠᠩᠴᠤ ᠳᠠ! ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠬᠡᠪᠴᠢᠶᠡᠨ ᠳ᠋ᠡᠬᠢ ᠥᠩᠭᠡᠨ ᠬᠡᠷᠡᠭᠯᠡᠭᠡᠨ ᠳ᠋ᠦ᠍ ᠮᠣᠩᠭᠣᠯ ᠢ᠋ᠶ᠋ᠠᠷ ᠪᠢᠴᠢᠬᠦ ᠶ᠋ᠢ ᠣᠷᠬᠢᠭᠳᠠᠭᠤᠯᠵᠤ ᠪᠣᠯᠬᠤ ᠦᠭᠡᠢ ᠭᠡᠰᠡᠨ ᠲᠣᠳᠣᠷᠬᠠᠢ ᠲᠣᠭᠲᠠᠭᠠᠯ ᠴᠤ ᠪᠣᠢ ᠰᠢᠦ ᠳᠡ! ᠮᠣᠩᠭᠣᠯ ᠪᠥᠬᠡ᠂ ᠮᠣᠩᠭᠣᠯ ᠦᠰᠦᠭ ᠬᠣᠶᠠᠷ ᠡᠢᠮᠦ ᠬᠤᠪᠢ ᠢᠷᠦᠭᠡᠯ ᠮᠠᠭᠤᠲᠠᠢ ᠶᠤᠮ ᠭᠡᠵᠦ ᠤᠤ? ᠮᠣᠩᠭᠣᠯ ᠦᠰᠦᠭ ᠮᠠᠨᠢ ᠲᠡᠷᠡ ᠠᠤᠭᠠ ᠲᠡᠮᠳᠡᠭᠯᠡᠯ ᠦ᠋ᠨ ᠢᠷᠠᠭᠤ ᠠᠯᠳᠠᠷ ᠢ᠋ ᠪᠦᠷᠢᠨ ᠭᠦᠢᠴᠡᠳ ᠢᠯᠡᠷᠬᠡᠢᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠶᠦᠮ ᠭᠡᠵᠦ ᠤᠤ?
ᠶᠡᠷᠦ ᠨᠢ ᠭᠢᠨᠢᠰ ᠦ᠋ᠨ ᠲᠡᠮᠳᠡᠭᠯᠡᠯ ᠮᠣᠩᠭᠣᠯ ᠪᠥᠬᠡ ᠳ᠋ᠦ᠍ ᠮᠠᠨᠢ ᠶᠠᠭᠤ ᠠᠪᠴᠢᠷᠠᠪᠠ? ᠭᠡᠳᠡᠭ ᠢ᠋ ᠬᠥᠮᠦᠨ ᠪᠦᠬᠦᠨ ᠲᠤᠩᠭᠠᠨ ᠪᠣᠳᠣᠵᠤ᠂ ᠰᠠᠨᠠᠯ ᠪᠣᠳᠣᠯ ᠢ᠋ᠶ᠋ᠠᠨ ᠶᠠᠷᠢᠵᠤ ᠪᠢᠴᠢᠬᠦ ᠬᠡᠷᠡᠭᠲᠡᠢ᠃ ᠮᠡᠳᠡᠭᠡᠵᠢ ᠡᠨᠡ ᠲᠡᠮᠳᠡᠭᠯᠡᠯ ᠢ᠋ ᠡᠪᠳᠡᠬᠦ ᠭᠡᠵᠦ ᠳᠠᠷᠠᠭᠠᠴᠢ ᠪᠠᠷ 4096 ᠪᠥᠬᠡ ᠶ᠋ᠢᠨ ᠲᠣᠭᠠ ᠭᠦᠢᠴᠡᠯᠳᠦᠭᠦᠯᠦᠨᠡ ᠭᠡᠵᠦ ᠪᠤᠵᠢᠭᠢᠨᠠᠬᠤ ᠪᠠᠢᠬᠠ᠃ ᠪᠠᠰᠠ ᠠᠯᠢ ᠨᠢᠭᠡ ᠠᠢᠮᠠᠭ ᠪᠤᠶᠤ ᠬᠣᠰᠢᠭᠤ ᠨᠢ ᠥᠪᠡᠷ ᠦ᠋ᠨ ᠪᠥᠬᠡ ᠪᠡᠨ ᠦᠵᠦᠭᠦᠷᠯᠡᠭᠦᠯᠦᠨᠡ ᠭᠡᠵᠦ ᠨᠥᠬᠥᠵᠦ ᠳᠡᠭᠡᠭᠰᠢᠯᠡᠭᠦᠯᠦᠭᠡᠳ᠂ ᠬᠢᠲᠠᠳ ᠦᠰᠦᠭ ᠲᠡᠢ ᠲᠡᠮᠳᠡᠭ ᠠᠳᠬᠤᠭᠤᠯᠤᠭᠠᠳ ᠥᠨᠳᠥᠷᠯᠡᠬᠦ ᠪᠣᠯᠤᠭᠤᠵᠠᠢ! ᠶᠡᠷᠦ ᠨᠢ ᠬᠡᠨ ᠴᠦ᠍᠂ ᠬᠡᠵᠢᠶᠡ ᠴᠦ᠍ ᠡᠪᠳᠡᠵᠦ ᠴᠢᠳᠠᠮᠠ ᠦᠭᠡᠢ ᠲᠡᠮᠳᠡᠭᠯᠡᠯ ᠢ᠋ ᠮᠣᠩᠭᠣᠯᠴᠤᠳ ᠲᠡᠦᠬᠡᠨ ᠳᠡᠭᠡᠷᠡ ᠲᠡᠮᠳᠡᠭᠯᠡᠭᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠢᠳᠡ ᠲᠡᠮᠳᠡᠭᠯᠡᠯ ᠢ᠋ᠶ᠋ᠡᠷ ᠳᠤᠲᠠᠬᠤ ᠦᠭᠡᠢ᠂ ᠳᠠᠶᠠᠭᠠᠷᠴᠢᠯᠠᠯ ᠤ᠋ᠨ ᠠᠩᠬᠠᠨ ᠤ᠋ ᠠᠯᠬᠤᠮ ᠢ᠋ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠡᠮᠦᠨᠡ ᠡᠴᠡ ᠠᠯᠬᠤᠵᠤ ᠥᠭᠭᠦᠭᠰᠡᠨ ᠡᠪᠦᠭᠡ ᠳᠡᠭᠡᠳᠦᠰ ᠮᠠᠨᠢ21 ᠳ᠋ᠤᠭᠡᠷ ᠵᠠᠭᠤᠨ ᠳ᠋ᠤ᠌ ᠠᠮᠢᠳᠤᠷᠠᠭᠠ ᠪᠢᠳᠡᠨ ᠡᠴᠡ ᠬᠡᠴᠢᠨᠡᠨ ᠬᠣᠯᠠᠴᠢ ᠤᠬᠠᠭᠠ ᠲᠠᠢ ᠪᠠᠢᠯᠠ ᠭᠡᠳᠡᠭ ᠢ᠋ ᠲᠡᠦᠬᠡ ᠭᠡᠷᠡᠴᠢᠯᠡᠨᠡ᠃ ᠮᠣᠩᠭᠣᠯ ᠤ᠋ᠨ ᠬᠠᠭᠠᠳ ᠥᠪᠡᠷ ᠦ᠋ᠨ ᠪᠥᠬᠡ ᠪᠡᠨ ᠫᠧᠷᠰ᠂ ᠬᠢᠪᠴᠠᠭ᠂ ᠬᠢᠲᠠᠳ ᠭᠠᠵᠠᠷ ᠤ᠋ᠨ ᠪᠥᠬᠡᠴᠦᠳ ᠲᠡᠢ ᠪᠠᠷᠢᠯᠳᠤᠭᠤᠯᠵᠤ《ᠠᠶᠤᠮᠰᠢᠭ ᠦᠭᠡᠢ ᠠᠪᠤᠷᠭᠤᠴᠤᠳ ᠠ᠋! ᠪᠠᠷᠢᠯᠳᠤᠵᠠᠭᠠ! ᠭᠤᠷᠪᠠᠨ ᠨᠤᠭᠤᠯᠭᠠᠨ ᠤ᠋ ᠮᠥᠷᠥᠢᠴᠡᠭᠡᠨ ᠳ᠋ᠦ᠍ ᠮᠥᠷᠥ ᠪᠡᠨ ᠰᠢᠷᠤᠢᠳᠠᠭᠤᠯᠤᠭᠠ ᠦᠭᠡᠢ ᠬᠥᠮᠦᠨ ᠢ᠋ ᠪᠠᠭᠠᠲᠤᠷ ᠭᠡᠵᠦ ᠴᠣᠯᠠᠯᠠᠨᠠ᠁》 ᠭᠡᠵᠦ ᠬᠠᠮᠢᠭᠠᠬᠢ ᠶ᠋ᠢᠨ ᠬᠡᠨ ᠴᠦ᠍ ᠲᠡᠷᠢᠭᠦᠯᠡᠵᠦ ᠪᠣᠯᠬᠤ ᠪᠦᠷᠢᠨ ᠪᠣᠯᠤᠮᠵᠢ ᠶ᠋ᠢ ᠬᠠᠢᠷᠠᠯᠠᠳᠠᠭ ᠪᠠᠢᠭᠰᠠᠨ ᠪᠠ ᠬᠠᠷᠢ ᠶ᠋ᠢᠨ ᠰᠠᠢᠨ ᠡᠷᠡᠴᠦᠳ ᠮᠣᠩᠭᠣᠯ ᠪᠥᠬᠡ ᠶ᠋ᠢ ᠬᠠᠭᠠᠨ ᠤ᠋ ᠬᠢᠨᠢ ᠡᠮᠦᠨᠡ ᠬᠠᠶᠠᠵᠤ ᠬᠦᠨᠳᠦ ᠱᠠᠩᠨᠠᠭᠳᠠᠵᠤ ᠪᠠᠢᠭᠰᠠᠨ ᠲᠡᠮᠳᠡᠭᠯᠡᠯ ᠪᠣᠢ᠃ ᠡᠢᠨ ᠬᠦ᠌ ᠲᠡᠦᠬᠡ ᠶ᠋ᠢᠨ ᠤᠷᠲᠤ ᠤᠳᠠᠭᠠᠨ ᠶᠠᠪᠤᠴᠠ ᠳ᠋ᠤ᠌ ᠮᠣᠩᠭᠣᠯ ᠪᠥᠬᠡ ᠨᠢ ᠵᠥᠪ ᠬᠥᠭᠵᠢᠯ ᠦ᠋ᠨ ᠵᠢᠮᠡ ᠪᠡᠷ ᠢ᠋ᠶ᠋ᠡᠨ ᠲᠦᠭᠡᠮᠡᠯ ᠪᠠᠢᠳᠠᠯ ᠢ᠋ᠶ᠋ᠠᠷ ᠭᠣᠣᠯᠴᠢ ᠥᠷᠢᠰᠦᠯᠳᠦᠭᠡᠨ ᠲᠡᠢ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠠᠷᠠᠳᠴᠢ ᠰᠢᠨᠵᠢ ᠪᠡᠨ ᠨᠢᠭᠡ ᠬᠡᠮᠵᠢᠶᠡ ᠪᠡᠷ ᠠᠯᠳᠠᠵᠤ᠂ ᠦᠵᠡᠭᠦᠯᠦᠯᠭᠡ ᠶ᠋ᠢᠨ ᠲᠣᠭᠯᠠᠯᠲᠠ ᠶ᠋ᠢᠨ ᠰᠢᠨᠵᠢ ᠲᠡᠢ ᠪᠣᠯᠤᠭᠠ ᠶᠤᠮ᠃ ᠠᠯᠢ ᠴᠤ ᠦᠨᠳᠦᠰᠦᠲᠡᠨ ᠦ᠌ ᠤᠯᠠᠮᠵᠢᠯᠠᠯᠲᠤ ᠲᠠᠮᠢᠷ ᠤ᠋ᠨ ᠬᠥᠳᠡᠯᠭᠡᠭᠡᠨ ᠨᠢ ᠬᠥᠮᠦᠨ ᠠᠷᠠᠳ ᠤ᠋ᠨ ᠢ᠋ᠶ᠋ᠠᠨ ᠡᠷᠡ ᠵᠣᠷᠢᠭ᠂ ᠢᠲᠡᠭᠡᠯ ᠤᠬᠠᠭᠠᠨ ᠢ᠋ ᠰᠡᠷᠭᠦᠭᠡᠨ ᠳᠠᠭᠤᠳᠠᠬᠤ ᠳ᠋ᠤ᠌ ᠵᠣᠷᠢᠭᠤᠯᠤᠭᠳᠠᠭᠰᠠᠨ ᠪᠠᠢᠳᠠᠭ ᠠ᠋ᠴᠠ ᠪᠢᠰᠢ ᠴᠥᠭᠡᠨ ᠬᠡᠳᠦᠨ ᠬᠥᠮᠦᠨ ᠦ᠌ ᠲᠣᠭᠯᠠᠯᠲᠠ ᠪᠣᠯᠵᠤ ᠦᠵᠡᠭᠴᠢ ᠶ᠋ᠢᠨ ᠨᠢᠳᠦ ᠶ᠋ᠢ ᠬᠤᠵᠢᠷᠯᠠᠬᠤ ᠲᠡᠳᠦᠢ ᠬᠦᠷᠲᠡᠭᠡᠯ ᠪᠣᠯᠳᠠᠭ ᠦᠭᠡᠢ ᠶᠦᠮ᠃
ᠡᠢᠨ ᠬᠦ᠌ ᠬᠥᠭᠵᠢᠭᠰᠡᠨ ᠤᠯᠤᠰ ᠤ᠋ᠳ ᠦᠨᠳᠦᠰᠦᠲᠡᠨ ᠦ᠌ ᠪᠡᠨ ᠤᠯᠠᠮᠵᠢᠯᠠᠯᠲᠤ ᠲᠠᠮᠢᠷ ᠤ᠋ᠨ ᠬᠥᠳᠡᠯᠭᠡᠭᠡᠨ ᠢ᠋ᠶ᠋ᠡᠨ ᠪᠦᠬᠦ ᠠᠷᠠᠳ ᠲᠠᠭᠠᠨ ᠲᠦᠭᠡᠮᠡᠯᠵᠢᠭᠦᠯᠬᠦ ᠲᠠᠢᠰᠢ ᠵᠢᠳᠬᠦᠵᠦ ᠰᠤᠷᠭᠠᠭᠤᠯᠢ ᠶ᠋ᠢᠨ ᠲᠠᠮᠢᠷ ᠤ᠋ᠨ ᠬᠢᠴᠢᠶᠡᠯ ᠳ᠋ᠡᠬᠢ ᠵᠠᠪᠠᠯ ᠰᠤᠷᠬᠤ ᠲᠥᠷᠥᠯ ᠪᠣᠯᠭᠠᠵᠤ ᠪᠣᠢ᠃ ᠬᠠᠷᠢᠨ ᠮᠣᠩᠭᠣᠯ ᠪᠥᠬᠡ ᠬᠥᠭᠵᠢᠯ ᠦ᠋ᠨ ᠡᠨᠡ ᠴᠢᠭᠯᠡᠯ ᠡᠴᠡ ᠪᠠᠭᠠ ᠭᠠᠵᠢᠵᠤ ᠪᠠᠢᠨᠠ᠃ ᠮᠦᠽᠧᠢ ᠳ᠋ᠦ᠍ ᠣᠷᠣᠬᠤ ᠦᠵᠡᠭᠦᠯᠦᠯᠭᠡ ᠪᠣᠯᠬᠤ ᠨᠢ ᠦᠨᠡ ᠳ᠋ᠦ᠍ ᠣᠷᠣᠭᠰᠠᠨ ᠶᠠᠪᠤᠳᠠᠯ ᠮᠥᠨ ᠪᠣᠯᠪᠠᠴᠤ ᠲᠦᠭᠡᠮᠡᠯ ᠰᠢᠨᠵᠢ ᠪᠡᠨ ᠠᠯᠳᠠᠵᠤ᠂ ᠤᠯᠠᠮᠵᠢᠯᠠᠯ ᠲᠠᠰᠤᠷᠠᠵᠤ ᠪᠠᠢᠬᠤ ᠶ᠋ᠢᠨ ᠲᠣᠭᠢᠢᠡ ᠪᠢᠯᠡ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ᠂ ᠰᠣᠶᠣᠯ ᠤ᠋ᠨ ᠦᠨᠡ ᠴᠠᠨᠠ ᠨᠢ ᠬᠢᠮᠳᠠᠷᠠᠵᠤ ᠪᠠᠢᠭᠠ ᠤᠴᠢᠷ ᠶᠤᠮ᠃ ᠱᠠᠩ ᠤ᠋ᠨ ᠶᠡᠬᠡ ᠪᠠᠭᠠ᠂ ᠢᠷᠠᠭᠤ ᠠᠯᠳᠠᠷ ᠤ᠋ᠨ ᠭᠡᠷᠡᠯ ᠭᠢᠯᠪᠠᠭᠠ᠂ ᠮᠥᠩᠭᠥ ᠵᠣᠭᠣᠰ ᠢ᠋ᠶ᠋ᠠᠷ ᠥᠷᠲᠡᠭᠯᠡᠬᠦ᠁ ᠵᠡᠷᠭᠡ ᠨᠢ ᠮᠣᠩᠭᠣᠯ ᠪᠥᠬᠡ ᠪᠠ ᠮᠣᠩᠭᠣᠯ ᠰᠣᠶᠣᠯ ᠳ᠋ᠤ᠌ ᠶᠠᠮᠠᠷ ᠲᠤᠰᠠᠲᠠᠢ ᠭᠡᠳᠡᠭ ᠢ᠋ ᠲᠤᠩᠭᠠᠬᠤ ᠬᠡᠷᠡᠭᠲᠡᠢ᠃
ᠶᠠᠮᠠᠷ ᠴᠤ᠌ ᠭᠡᠰᠡᠨ ᠴᠤᠤ ᠶᠡᠬᠡᠲᠡᠢ ᠨᠠᠢᠷ ᠴᠤᠤ ᠶᠡᠬᠡᠲᠡᠢ ᠥᠨᠳᠥᠷᠯᠡᠵᠦ᠂ ᠲᠡᠮᠳᠡᠭᠯᠡᠯ ᠳ᠋ᠦ᠍ ᠲᠣᠭᠠ ᠪᠠᠨ ᠪᠢᠴᠢᠭᠦᠯᠦᠭᠰᠡᠨ ᠶ᠋ᠢᠡᠷ ᠶ᠋ᠢᠡᠨ ᠠᠮᠲᠠᠷᠬᠠᠵᠠᠭᠠᠵᠤ ᠪᠠᠢᠨᠠ᠃ ᠬᠦᠰᠡᠬᠦ ᠨᠢ ᠡᠭᠦᠨ ᠡᠴᠡ ᠪᠣᠯᠵᠤ ᠲᠡᠮᠳᠡᠭᠯᠡᠯ ᠡᠪᠳᠡᠬᠦ ᠬᠡᠨᠡᠭᠡ ᠲᠡᠢ ᠪᠣᠯᠴᠢᠬᠠᠵᠤ᠂ ᠲᠠᠯᠠ ᠳᠦᠭᠦᠷᠡᠩ ᠪᠥᠬᠡ ᠳᠡᠪᠢᠭᠦᠯᠵᠦ ᠲᠣᠭᠠ ᠶ᠋ᠢ ᠨᠢ ᠪᠦᠷᠢᠳᠬᠡᠴᠢᠬᠡᠭᠡᠳ᠂ 《ᠮᠠᠨ ᠤ᠋ ᠮᠣᠩᠭᠣᠯ ᠪᠥᠬᠡ ᠳᠡᠯᠡᠬᠡᠢ ᠳ᠋ᠦ᠍ ᠠᠯᠳᠠᠷᠰᠢᠭᠰᠠᠨ》 ᠭᠡᠮᠡᠨ ᠬᠡᠲᠦᠷᠬᠡᠢ ᠳᠣᠭᠳᠣᠯᠬᠤ ᠦᠭᠡᠢ ᠪᠠᠢᠭᠠᠰᠠᠢ! ᠮᠣᠩᠭᠣᠯ ᠨᠤᠲᠤᠭ ᠮᠠᠨᠢ ᠲᠡᠷᠡ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠰᠣᠶᠣᠯ ᠤ᠋ᠨ ᠳᠠᠭᠰᠢᠨ ᠣᠷᠣᠨ ᠶᠤᠮ᠃ ᠡᠨᠡ ᠲᠠᠭᠰᠢᠨ ᠣᠷᠣᠨ ᠤ᠋ ᠪᠠᠨ ᠪᠦᠬᠦ ᠶᠠᠭᠤᠮᠠᠨ ᠳ᠋ᠤ᠌ ᠮᠣᠩᠭᠣᠯ ᠬᠥᠮᠦᠨ ᠪᠦᠬᠦᠨ ᠡᠷᠬᠡ ᠲᠡᠩᠴᠡᠭᠦᠦ ᠡᠵᠡᠨ ᠨᠢ ᠶᠦᠮ ᠭᠡᠳᠡᠭ ᠢ᠋ ᠰᠠᠨᠠᠵᠤ ᠶᠠᠪᠤᠵᠠᠭᠠᠶᠠ!
——————
① ᠡᠨᠡ ᠵᠣᠬᠢᠶᠠᠯ《ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠠᠮᠢᠳᠤᠷᠠᠯ》— ᠰᠡᠳᠬᠦᠯ ᠦ᠋ᠨ2004 ᠣᠨ ᠤ᠋10 ᠳ᠋ᠤᠭᠠᠷ ᠬᠤᠭᠤᠴᠠᠭᠠ ᠳ᠋ᠤ᠌ ᠨᠡᠢᠲᠡᠯᠡᠭᠳᠡᠭᠰᠡᠨ ᠪᠠᠢᠵᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠸᠠᠩ᠂ ᠪᠠᠳᠮᠠ
ᠬᠢᠨᠠᠭᠴᠢ᠄ ᠰᠡᠬᠡᠭᠡᠷᠡᠯ᠂ ᠣᠳᠬᠠᠨᠰᠣᠠ