ᠬᠣᠭᠣᠰᠣᠨ -ᠲᠠᠩᠭᠤᠳ ᠫ᠂ ᠭᠡᠷᠡᠯᠲᠤᠶᠠᠭᠠХоосон-Тангад П,Гэрэлтуяа
831 ᠲᠠᠩᠭᠤᠳ ᠫ· ᠭᠡᠷᠡᠯᠲᠤᠶᠠᠭᠠ
《ᠣᠷᠣᠨ ᠳ᠋ᠠᠭᠠᠨ ᠣᠷᠣᠬᠤ ᠵᠠᠪ ᠦᠭᠡᠢ ᠣᠯᠵᠠᠯᠠᠳᠠᠨ ᠪᠠᠢᠯᠳᠤᠵᠤ᠂
ᠬᠤᠶᠠᠭ ᠢ᠋ᠶ᠋ᠠᠨ ᠲᠠᠢᠯᠬᠤ ᠴᠢᠯᠥᠭᠡ ᠦᠭᠡᠢ ᠬᠠᠳᠬᠤᠯᠳᠤᠨ ᠲᠤᠯᠤᠯᠳᠤᠵᠤ᠂》
— ᠡᠷᠲᠡᠨ ᠦ᠌ ᠮᠣᠩᠭᠣᠯ ᠡᠢᠨ ᠪᠠᠢᠵᠤ ᠥᠪᠡᠷᠰᠡᠳ ᠢ᠋ ᠪᠡᠨ ᠬᠦᠴᠦᠷᠬᠡᠭᠵᠢᠭᠦᠯᠦᠭᠰᠡᠨ ᠪᠢᠯᠡ᠃
ᠭᠡᠬᠦ ᠳ᠋ᠦ᠍—
ᠡᠳᠦᠭᠡ ᠶ᠋ᠢᠨ ᠪᠢᠳᠡᠨᠡᠷ ᠶᠠᠭᠠᠬᠢᠵᠤ ᠪᠠᠢᠨᠠᠮ
ᠤᠯᠠᠭᠠᠨ ᠬᠠᠯᠴᠠᠭᠠᠢ ᠨᠤᠲᠤᠭ ᠢ᠋ᠶ᠋ᠠᠨ
ᠤᠶᠠᠩᠭᠠ ᠰᠢᠯᠦᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠮᠠᠭᠲᠠᠵᠤ
ᠤᠰᠤ ᠪᠠᠷ ᠳᠤᠲᠠᠭᠰᠠᠨ ᠲᠠᠯᠠ ᠳ᠋ᠠᠭᠠᠨ
ᠤᠷᠲᠤ ᠶ᠋ᠢᠨ ᠳᠠᠭᠤᠤ ᠰᠢᠷᠤᠩᠬᠠᠢᠯᠠᠭᠤᠯᠵᠤ
ᠲᠠᠷ ᠨᠢ ᠶᠠᠳᠠᠭᠰᠠᠨ ᠮᠠᠯ ᠢ᠋ᠶ᠋ᠠᠨ
ᠲᠠᠷᠢᠶᠠᠨ ᠭᠤᠤᠷᠰᠤ ᠪᠠᠷ ᠲᠡᠵᠢᠭᠡᠵᠦ
ᠲᠠᠩᠰᠤᠭ ᠥᠩᠭᠡᠨ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ
ᠥᠷᠢᠨ ᠳᠠᠩᠰᠠ ᠪᠠᠷ ᠳᠦᠭᠦᠷᠭᠡᠵᠦ
ᠰᠢᠯᠢᠳᠡᠭ ᠦᠨᠡ ᠪᠡᠷ ᠠᠪᠤᠭᠰᠠᠨ
ᠡᠭᠦᠯᠳᠡᠷ ᠤᠭᠰᠢᠯ ᠤ᠋ᠨ ᠮᠣᠷᠢᠳ ᠢ᠋ᠶ᠋ᠠᠨ
ᠰᠢᠮᠡᠯᠳᠡᠭ ᠣᠪᠢᠶᠠᠰᠤ ᠪᠠᠷ ᠪᠣᠷᠳᠣᠵᠤ
ᠱᠠᠩᠨᠠᠯ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠤᠷᠤᠯᠳᠤᠵᠤ
ᠰᠢᠷᠢᠨ ᠵᠣᠳᠣᠭᠲᠤ ᠪᠥᠬᠡᠴᠦᠳ ᠨᠢ
ᠭᠤᠲᠤᠯ ᠢ᠋ᠶ᠋ᠠᠨ ᠲᠠᠢᠯᠬᠤ ᠵᠠᠪᠳᠤᠯ ᠦᠭᠡᠢ
ᠰᠢᠯᠢ ᠶ᠋ᠢᠨ ᠠᠭᠤᠳᠠᠮ ᠳᠡᠨᠵᠢ ᠶ᠋ᠢ
ᠬᠣᠲᠣᠢᠲᠠᠯᠠ ᠨᠢ ᠨᠣᠴᠣᠯᠳᠤᠵᠤ
ᠰᠢᠨᠡ ᠶ᠋ᠢᠨ ᠨᠢᠭᠡᠨ ᠡᠴᠡ ᠡᠬᠢᠯᠡᠭᠡᠳ
ᠪᠢᠲᠡᠭᠦᠨ ᠪᠣᠯᠲᠠᠯᠠ ᠨᠠᠢᠷᠯᠠᠵᠤ
ᠰᠢᠯᠢᠨ ᠭᠤᠸᠠᠩᠵᠠᠨ ᠤ᠋ ᠠᠲᠠᠷ ᠢ᠋
ᠴᠤᠤ ᠲᠠᠲᠠᠲᠠᠯᠠ ᠬᠤᠷᠢᠮᠯᠠᠵᠤ
ᠮᠠᠯ ᠤ᠋ᠨ ᠦᠨᠡ ᠪᠠᠭᠤᠷᠠᠭᠰᠠᠨ ᠴᠤ᠌
ᠮᠡᠳᠬᠢᠵᠦ ᠰᠡᠳᠬᠢᠵᠦ ᠪᠣᠳᠣᠳᠠᠭ ᠦᠭᠡᠢ
ᠮᠠᠩᠬᠠᠨ ᠲᠩᠷᠢ ᠨᠢ ᠰᠠᠯᠬᠢᠯᠠᠭᠰᠠᠨ ᠴᠤ᠌
ᠮᠠᠵᠢᠶᠠᠩ ᠰᠢᠷᠡᠭᠡᠨ ᠡᠴᠡ ᠰᠠᠯᠳᠠᠭ ᠦᠭᠡᠢ
ᠦᠨᠳᠦᠰᠦ ᠦᠭᠡᠢ ᠪᠣᠯᠤᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠨ
ᠠᠭᠤᠷᠬᠠᠢ ᠮᠥᠩᠭᠥ ᠪᠡᠷ ᠠᠷᠠᠯᠵᠢᠵᠤ
ᠡᠭᠦᠯᠡ ᠶ᠋ᠢ ᠫᠤᠤᠳᠠᠭᠰᠠᠨ᠂ ᠨᠢᠰᠬᠡᠯ ᠨᠢᠰᠦᠭᠰᠡᠨ
ᠦᠩᠭᠢᠨᠡᠭᠰᠡᠨ ᠵᠥᠭᠡᠢ ᠰᠢᠭ ᠶᠠᠷᠬᠢᠯᠳᠤᠵᠤ
ᠳᠡᠭᠡᠷᠡ ᠡᠴᠡ ᠥᠭᠳᠡᠭ ᠨᠥᠬᠥᠪᠥᠷᠢ ᠪᠡᠨ
ᠲᠡᠰᠬᠡᠯ ᠠᠯᠲᠠᠨ ᠬᠦᠯᠢᠶᠡᠵᠦ
ᠳᠡᠯᠡᠬᠡᠢ ᠶᠠᠭᠠᠬᠢᠬᠤ ᠪᠠᠨ ᠠᠯᠳᠠᠷᠠ
ᠲᠡᠮᠦᠷ ᠲᠤᠤᠷᠤᠨ ᠳ᠋ᠠᠭᠠᠨ
ᠬᠡᠷᠡᠯᠳᠦᠵᠦ
ᠣᠷᠣᠢ ᠱᠠᠯᠴᠢᠲᠠᠯᠠ ᠪᠠᠨ ᠤᠤᠭᠤᠵᠤ
ᠥᠷᠯᠥᠭᠡᠨ ᠨᠢ ᠣᠪᠣᠭᠠᠨ ᠳ᠋ᠠᠭᠠᠨ ᠰᠢᠷᠠᠳᠠᠳᠠᠭ
ᠥᠭᠭᠦᠭᠡᠴᠢ ᠬᠥᠬᠡ ᠲᠩᠷᠢ ᠪᠡᠨ
ᠥᠭᠭᠦᠭᠰᠡᠨ ᠦᠭᠡᠢ ᠭᠡᠵᠦ ᠭᠣᠮᠣᠳᠠᠳᠠᠭ
ᠨᠤᠲᠤᠭ ᠤ᠋ᠨ ᠨᠠᠪᠲᠠᠭ ᠰᠠᠪᠳᠠᠭ ᠢ᠋ᠶ᠋ᠠᠨ
ᠠᠷᠭᠠᠳᠠᠵᠤ ᠪᠦᠦ ᠬᠡᠯᠡ᠂ ᠲᠣᠭᠣᠳᠠᠭ ᠦᠭᠡᠢ
ᠨᠤᠷᠠᠵᠤ ᠪᠠᠢᠭᠠ ᠠᠬᠤᠢ ᠪᠠᠨ
ᠰᠡᠷᠡᠬᠦ ᠶ᠋ᠢ ᠪᠦᠦ ᠬᠡᠯᠡ᠂ ᠨᠣᠢᠷᠮᠤᠭᠯᠠᠳᠠᠭ
ᠭᠠᠭᠴᠠ ᠬᠡᠳᠦᠨ ᠬᠡᠦᠬᠡᠳ ᠨᠢ
ᠠᠵᠢᠯ ᠡᠷᠢᠨ ᠪᠡᠳᠡᠷᠢᠵᠦ
ᠬᠣᠶᠠᠷ ᠨᠢᠭᠡ ᠡᠪᠦᠭᠡᠳ ᠬᠥᠭᠰᠢᠳ ᠨᠢ
ᠬᠣᠷᠣᠭᠠᠨ ᠤ᠋ ᠡᠩᠭᠡᠷ ᠪᠦᠳᠦᠴᠢᠵᠦ
ᠠᠰᠠᠷ ᠰᠢᠭ᠋ ᠲᠣᠭᠣᠰᠬᠠᠨ ᠪᠠᠢᠰᠢᠩ
ᠪᠣᠯᠣᠷ ᠣᠷᠳᠣᠨ ᠮᠡᠲᠦ ᠭᠢᠯᠠᠯᠵᠠᠵᠤ
ᠵᠡᠭᠡᠯᠢ ᠰᠢᠭ ᠪᠢᠲᠡᠭᠦᠦ ᠫᠧᠩ
ᠬᠣᠲᠠ ᠪᠠᠭᠲᠠᠬᠤ ᠦᠭᠡᠢ ᠦᠷᠭᠦᠯᠵᠢᠯᠡᠵᠦ
ᠤᠤᠭᠤᠵᠤ ᠢᠳᠡᠬᠦ ᠪᠡᠷ ᠳᠤᠲᠠᠬᠤ ᠦᠭᠡᠢ
ᠤᠨᠤᠭᠠ ᠮᠠᠰᠢᠨ ᠢ᠋ᠶ᠋ᠠᠷ ᠭᠠᠴᠢᠭᠳᠠᠬᠤ ᠦᠭᠡᠢ
ᠠᠭᠤᠵᠢᠮ ᠮᠣᠩᠭᠣᠯ ᠤᠭᠰᠠᠭᠠᠲᠠᠨ ᠮᠢᠨᠢ
ᠤᠨᠲᠠᠵᠤ ᠪᠠᠢᠨᠠ ᠤᠤ
ᠤᠴᠢᠷ ᠤᠬᠠᠭᠠᠨ ᠨᠢ ᠪᠠᠯᠠᠢᠷᠠᠵᠤ
ᠳᠡᠩᠳᠡᠵᠦ ᠪᠠᠢᠨᠠ ᠤᠤ
ᠥᠨᠳᠥᠷ ᠱᠠᠩ ᠲᠠᠢ ᠨᠠᠢᠷ ᠲᠤᠨᠢ
ᠱᠠᠩᠳᠠᠭᠤᠷᠠᠵᠤ ᠪᠠᠢᠨᠠ ᠤᠤ
ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠪᠠᠨ ᠮᠠᠷᠲᠠᠭᠠᠳ
ᠮᠠᠨᠠᠷᠠᠭᠠᠵᠤ ᠪᠠᠢᠨᠠ ᠤᠤ
᠁ ᠁ ᠁
᠁ ᠁ ᠁
ᠪᠦᠬᠦ ᠶᠠᠭᠤᠮᠠ
ᠪᠢᠳᠡᠨ ᠦ᠌ ᠪᠤᠷᠤᠭᠤ ᠪᠢᠰᠢ ᠠ᠋
ᠲᠡᠢᠮᠦ ᠤᠤ
ᠪᠥᠮᠪᠥᠷᠴᠡᠭ ᠴᠢᠨᠢ
ᠲᠦᠮᠡᠨ ᠦ᠌ ᠬᠢ
ᠲᠠᠭᠠᠷᠠᠨᠠ ᠤᠤ
ᠲᠠᠷᠢᠬᠢ ᠲᠠᠢ ᠴᠤ᠌
ᠮᠣᠩᠭᠣᠯ ᠪᠠᠢᠭᠰᠠᠨ ᠶᠤᠮ ᠳᠠ
ᠵᠠᠢᠯᠠᠭᠤᠯ
ᠠᠷᠢᠬᠢ ᠲᠠᠢ ᠰᠡᠩᠭᠢᠨᠡᠵᠦ ᠶᠠᠪᠤᠬᠤ
ᠭᠠᠢᠬᠠᠭᠤᠯ
ᠠᠷᠤ ᠳ᠋ᠤ᠌ ᠮᠢᠨᠢ
ᠠ᠂ ᠠ᠋᠂ ᠢ᠂ ᠰᠤᠷᠤᠭᠰᠠᠨ
ᠠᠴᠢᠷ ᠦᠷᠡᠰ ᠦ᠋ᠳ ᠮᠢᠨᠢ
ᠠᠪᠤᠭᠠᠳ ᠲᠠᠲᠠᠭᠠᠳ
ᠪᠤᠰᠬᠠᠴᠢᠬᠠᠭᠠᠷᠠᠢ
ᠳᠠᠳᠬᠠᠯ᠃᠃
ᠶᠠᠷᠢᠭᠰᠠᠨ ᠪᠦᠬᠦᠨ ᠮᠠᠨᠢ
ᠬᠣᠭᠣᠰᠣᠨ ᠶᠤᠮ ᠪᠠᠢᠨᠠ
ᠣᠮ ᠠ ᠬᠣᠮ
ᠶᠠᠳᠠᠭᠰᠠᠨ ᠪᠢ ᠬᠤᠳᠠᠯᠴᠢ ᠶᠤᠮ ᠠ᠋
ᠥᠷᠥᠰᠢᠶᠡᠵᠦ ᠪᠣᠯᠭᠣᠭᠠ
ᠭᠣᠪᠢ ᠴᠢᠯᠠᠭᠤᠲᠤ ᠳ᠋ᠤ᠌
2024.07.04. ᠦᠳᠡ ᠳ᠋ᠦ᠍
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠱᠠᠭᠰᠠᠯ
ᠬᠢᠨᠠᠭᠴᠢ᠄ ᠤᠷᠠᠨᠲᠠᠨᠠ᠂ ᠣᠳᠬᠠᠨᠰᠣᠠ