ᠰᠡᠷᠢᠭᠦᠬᠡᠨ ᠲᠠᠯᠠ ᠨᠤᠲᠤᠭ – <ᠰᠸᠢᠰ> ᠸᠠᠯᠲ᠋ᠸᠷ ᠪᠣᠰᠬᠠᠷᠳ᠋ - ᠭᠤᠷᠪᠠᠳᠣᠭᠠᠷ ᠪᠦᠯᠦᠭ᠂ ᠭᠤᠷᠪᠠᠳᠡᠬᠢ ᠠᠶᠠᠯᠠᠯ (ᠲᠠᠪᠤ) Сэрүүхэн тал нутаг–<свис> Вальтер Босгард (Walter Bosshard)- Гуравдугаар бөлөг᠂Гуравдэх аялал 5
255ᠲᠠᠪᠤ ᠂ ᠰᠸᠸᠳ᠋ᠸᠨ ᠦ᠌ ᠪᠤᠶᠠᠨᠲᠤ ᠦᠢᠯᠡᠰ
ᠯᠠᠷᠰᠤᠨ ᠬᠦᠩ ᠪᠣᠯᠤᠨ ᠱᠠᠰᠢᠨ ᠰᠤᠷᠲᠠᠯᠴᠢᠯᠠᠭᠴᠢ ᠨᠠᠷ ᠮᠣᠩᠭᠣᠯ ᠳ᠋ᠤ᠌ ᠪᠣᠯᠤᠭᠰᠠᠨ ᠬᠡᠴᠡᠭᠦᠦ ᠵᠤᠳ ᠢ᠋ ᠦᠵᠡᠭᠡᠳ ᠤᠤᠭᠠᠯ ᠨᠤᠲᠤᠭ ᠰᠸᠸᠳ᠋ᠸᠨ ᠡᠴᠡ ᠲᠤᠰᠠᠯᠠᠮᠵᠢ ᠭᠤᠶᠤᠬᠤ ᠪᠠᠷ ᠴᠠᠬᠢᠯᠭᠠᠨ ᠢᠯᠡᠭᠡᠪᠡ᠃
ᠰᠸᠸᠨ ᠾᠸᠳᠢᠨ᠂ ᠾᠸᠩᠨᠢᠩ ᠬᠠᠰᠯᠦ᠋ᠨᠳ᠋ ᠵᠢᠴᠢ ᠣᠯᠠᠨ ᠨᠠᠢᠵᠠ ᠨᠢ ᠮᠣᠩᠭᠣᠯᠴᠤᠳ ᠤ᠋ᠨ ᠬᠡᠴᠡᠭᠦᠦ ᠭᠠᠮᠰᠢᠭ ᠤ᠋ᠨ ᠲᠤᠬᠠᠢ ᠮᠡᠳᠡᠭᠡᠯᠡᠨ ᠨᠡᠢᠲᠡᠯᠡᠵᠦ ᠲᠤᠰᠠᠯᠠᠮᠵᠢ ᠳ᠋ᠤ᠌ ᠤᠷᠢᠶᠠᠯᠠᠭᠰᠠᠨ ᠢ᠋ᠶ᠋ᠠᠷ ᠣᠬᠣᠷᠬᠠᠨ ᠬᠤᠭᠤᠴᠠᠭᠠᠨ ᠤ᠋ ᠳᠣᠲᠣᠷᠠ ᠲᠦᠮᠡ ᠰᠢᠬᠠᠮ ᠺᠷᠣᠨ᠋ᠸ ᠬᠠᠨᠳᠢᠪ ᠴᠤᠭᠯᠠᠷᠠᠵᠠᠢ᠃ ᠯᠠᠷᠰᠤᠨ ᠪᠣᠯᠤᠨ ᠡᠸᠷᠢᠺᠰᠣᠨ ᠬᠣᠶᠠᠷ ᠡᠳᠡᠭᠡᠷ ᠮᠥᠩᠭᠥ ᠶ᠋ᠢ ᠬᠤᠪᠢᠶᠠᠬᠤ ᠠᠵᠢᠯ ᠢ᠋ ᠡᠭᠦᠷᠭᠡᠯᠡᠨ ᠠᠪᠴᠤ᠂ ᠦᠨᠡᠨ ᠶᠠᠳᠠᠭᠤ ᠵᠦᠳᠡᠭᠦᠦ ᠬᠥᠮᠦᠰ ᠦ᠋ᠨ ᠭᠠᠷ ᠲᠤ᠌ ᠡᠳᠡᠭᠡᠷ ᠬᠠᠨᠳᠢᠪ ᠢ᠋ ᠬᠦᠷᠭᠡᠬᠦ ᠶ᠋ᠢᠨ ᠲᠥᠯᠥᠭᠡ ᠶᠠᠳᠠᠷᠠᠯ ᠵᠦᠳᠡᠷᠡᠯ ᠢ᠋ ᠦᠯᠦ ᠬᠠᠢᠬᠣᠷᠠᠨ ᠠᠵᠢᠯᠯᠠᠵᠤ ᠡᠬᠢᠯᠡᠪᠡ᠃
ᠠᠩᠬᠠᠨ ᠤ᠋ ᠡᠭᠦᠷᠭᠡ ᠪᠣᠯ ᠠᠯᠢ ᠬᠡᠰᠡᠭ ᠣᠷᠣᠨ ᠨᠢ ᠬᠠᠮᠤᠭ ᠤ᠋ᠨ ᠬᠡᠴᠡᠭᠦᠦ ᠭᠠᠮᠰᠢᠭ ᠲᠤ᠌ ᠳᠠᠭᠠᠷᠢᠭᠳᠠᠭᠰᠠᠨ ᠢ᠋ ᠲᠣᠳᠣᠷᠬᠠᠢᠯᠠᠬᠤ ᠶᠠᠪᠤᠳᠠᠯ ᠪᠣᠯᠤᠨᠠ᠃ ᠡᠭᠦᠨ ᠤ ᠲᠤᠯᠠᠳᠠ ᠡᠸᠷᠢᠺᠰᠤᠨ ᠣᠯᠠᠨ ᠬᠣᠨᠣᠭ ᠤ᠋ᠨ ᠲᠤᠷᠰᠢ ᠠᠶᠠᠯᠠᠵᠤ᠂ ᠨᠣᠶᠠᠳ ᠲᠦᠰᠢᠮᠡᠳ ᠲᠡᠢ ᠠᠭᠤᠯᠵᠠᠨ ᠲᠡᠳᠡᠨ ᠦ᠌ ᠥᠭᠭᠦᠭᠰᠡᠨ ᠨᠡᠷᠡᠰ ᠦ᠋ᠨ ᠵᠢᠭᠰᠠᠭᠠᠯ ᠢ᠋ ᠠᠪᠴᠤ᠂ ᠮᠥᠨ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠲᠤᠬᠠᠢ ᠶ᠋ᠢᠨ ᠭᠠᠵᠠᠷ ᠲᠤᠨᠢ ᠣᠴᠢᠵᠤ ᠦᠨᠡᠨ ᠡᠰᠡᠬᠦ ᠶ᠋ᠢ ᠪᠠᠢᠴᠠᠭᠠᠨ ᠰᠢᠯᠭᠠᠬᠤ ᠪᠠᠷ ᠪᠣᠯᠪᠠ᠃ ᠡᠭᠦᠨ ᠳ᠋ᠦ᠍ ᠨᠡᠯᠢᠶᠡᠳ ᠮᠣᠩᠭᠣᠯᠴᠤᠳ ᠲᠡᠭᠦᠨ ᠦ᠌ ᠦᠨᠡ ᠥᠷᠲᠡᠭ ᠦᠭᠡᠢ ᠪᠡᠷ ᠪᠡᠯᠡᠭᠯᠡᠨ ᠥᠭᠭᠦᠨᠡ ᠭᠡᠵᠦ ᠪᠠᠢᠭᠠ ᠶ᠋ᠢ ᠥᠪᠡᠷ ᠦ᠋ᠨ ᠳᠤᠷᠠ ᠦᠭᠡᠢ ᠶᠠᠮᠠᠷ ᠨᠢᠭᠡᠨ ᠡᠭᠦᠷᠭᠡ ᠬᠠᠷᠢᠭᠤᠴᠠᠯᠭᠠ ᠲᠠᠢ ᠬᠣᠯᠪᠣᠨ ᠴᠢᠷᠦᠭᠳᠡᠭᠦᠯᠬᠦ ᠡᠴᠡ ᠠᠶᠤᠵᠠᠭᠠᠵᠤ᠂ ᠡᠸᠷᠢᠺᠰᠤᠨ ᠤ᠋ ᠠᠵᠢᠯ ᠢ᠋ ᠣᠢᠯᠠᠭᠠᠵᠤ ᠥᠭᠬᠦ ᠦᠭᠡᠢ ᠪᠠᠢᠯᠠ᠃
ᠡᠸᠷᠢᠺᠰᠤᠨ ᠢ᠋ ᠠᠵᠢᠯ ᠳ᠋ᠠᠭᠠᠨ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠪᠠᠷ ᠯᠠᠷᠰᠤᠨ ᠬᠦᠩ ᠵᠠᠭᠤ ᠰᠢᠬᠠᠮ ᠲᠤᠭᠤᠯ ᠲᠠᠢ ᠦᠨᠢᠶᠡ ᠬᠤᠳᠠᠯᠳᠤᠨ ᠠᠪᠤᠭᠠᠳ᠂ ᠶᠡᠬᠡ ᠵᠤᠳ ᠤ᠋ᠨ ᠳᠠᠷᠠᠭᠠᠬᠢ ᠮᠠᠯᠴᠢᠳ ᠤ᠋ᠨ ᠠᠮᠢᠳᠤᠷᠠᠯᠭᠠ ᠳ᠋ᠤ᠌ ᠴᠢᠬᠤᠯᠠ ᠪᠦᠬᠦᠢ ᠳᠡᠮᠵᠢᠯᠭᠡ ᠦᠵᠡᠭᠦᠯᠬᠦ ᠳ᠋ᠦ᠍ ᠪᠡᠯᠡᠬᠡᠨ ᠪᠣᠯᠭᠠᠪᠠ᠃
ᠬᠣᠢᠲᠤ ᠬᠡᠰᠡᠭ ᠪᠠ ᠪᠠᠷᠠᠭᠤᠨ ᠬᠡᠰᠡᠭ ᠦ᠋ᠨ ᠵᠤᠳ ᠨᠢ ᠡᠸᠷᠢᠺᠰᠤᠨ ᠤ᠋ ᠪᠣᠳᠣᠭᠰᠠᠨ ᠠ᠋ᠴᠠ ᠬᠣᠯᠠ ᠨᠣᠴᠢᠲᠠᠢ ᠪᠠᠢᠵᠤ᠂ ᠲᠡᠨᠳᠡ ᠠᠮᠢᠳᠤᠷᠠᠵᠤ ᠪᠠᠢᠬᠤ ᠬᠡᠳᠦᠨ ᠵᠠᠭᠤᠨ ᠡᠷᠦᠬᠡ ᠵᠥᠪᠬᠡᠨ ᠡᠪᠡᠰᠦ᠂ ᠡᠪᠡᠰᠦᠨ ᠦ᠌ ᠦᠨᠳᠦᠰᠦ ᠪᠣᠯᠤᠨ ᠥᠭᠡᠷᠡ ᠪᠤᠰᠤᠳ ᠤ᠋ᠨ ᠳᠡᠮᠵᠢᠯᠭᠡ ᠪᠡᠷ ᠠᠮᠢ ᠵᠠᠯᠭᠠᠵᠤ ᠪᠠᠢᠪᠠ᠃ ᠲᠡᠭᠦᠨ ᠦ᠌ ᠬᠡᠯᠡᠬᠦ ᠪᠡᠷ ᠬᠡᠳᠦᠨ ᠠᠷᠪᠠᠨ ᠭᠠᠵᠠᠷ ᠤ᠋ᠨ ᠲᠤᠷᠰᠢ ᠭᠠᠭᠴᠠ ᠬᠣᠨᠢ᠂ ᠥᠷᠥᠭᠡᠰᠦᠨ ᠲᠤᠭᠤᠯ ᠤ᠋ᠨ ᠪᠠᠷᠠ ᠴᠦ᠍ ᠬᠠᠷᠠᠭᠳᠠᠬᠤ ᠦᠭᠡᠢ ᠠᠵᠢ᠃ ᠲᠤᠰᠠᠯᠠᠮᠵᠢ ᠳ᠋ᠤ᠌ ᠢᠷᠡᠭᠰᠡᠨ ᠮᠥᠩᠭᠥ ᠪᠡᠷ ᠵᠣᠪᠠᠯᠠᠩ ᠳ᠋ᠤ᠌ ᠤᠴᠠᠷᠠᠭᠰᠠᠨ ᠠᠢᠯ ᠪᠣᠯᠭᠠᠨ ᠳ᠋ᠤ᠌ ᠨᠢᠭᠡ ᠲᠤᠭᠤᠯ ᠲᠠᠢ ᠦᠨᠢᠶᠡ ᠪᠡᠯᠡᠭᠯᠡᠨ ᠥᠭᠴᠦ ᠳᠡᠢᠯᠬᠦ ᠦᠭᠡᠢ ᠲᠤᠯᠠ ᠡᠨᠡ ᠬᠣᠶᠠᠷ ᠰᠸᠸᠳ᠋ᠸᠨ ᠶᠠᠮᠠᠷ ᠠᠷᠭᠠ ᠪᠠᠷ ᠬᠠᠮᠤᠭ ᠤ᠋ᠨ ᠰᠠᠢᠨ ᠬᠤᠪᠢᠶᠠᠷᠢᠯᠠᠯᠲᠠ ᠬᠢᠬᠦ ᠲᠤᠬᠠᠢ ᠤᠳᠠᠭᠠᠨ ᠵᠥᠪᠳᠡᠯᠴᠡᠪᠡ᠃
ᠡᠸᠷᠢᠺᠰᠤᠨ ᠤ᠋ ᠰᠠᠨᠠᠯ ᠢ᠋ᠶ᠋ᠠᠷ ᠪᠣᠯ ᠪᠡᠯᠡᠨ ᠮᠥᠩᠭᠥ ᠶ᠋ᠢ ᠬᠤᠪᠢᠶᠠᠨ ᠥᠭᠴᠦ᠂ ᠮᠠᠯᠴᠢᠳ ᠢ᠋ᠶ᠋ᠠᠷ ᠥᠪᠡᠷᠰᠡᠳ ᠲᠦ᠍ ᠨᠢ ᠬᠡᠷᠡᠭ ᠲᠡᠢ ᠵᠦᠢᠯᠡᠰ ᠢ᠋ ᠨᠢ ᠬᠤᠳᠠᠯᠳᠤᠨ ᠠᠪᠤᠭᠤᠯᠤᠨᠠ ᠃ ᠭᠡᠬᠦ ᠳ᠋ᠦ᠍ ᠯᠠᠷᠰᠤᠨ ᠬᠦᠩ ᠡᠨᠡ ᠰᠠᠨᠠᠯ ᠢ᠋ ᠭᠦᠢᠴᠡᠳ ᠵᠥᠪᠰᠢᠶᠡᠷᠡᠭᠡ ᠦᠭᠡᠢ᠃ ᠲᠡᠷᠡ ᠬᠢᠲᠠᠳ ᠬᠤᠳᠠᠯᠳᠤᠭᠠᠴᠢᠳ ᠶᠠᠭᠤᠮᠠ ᠮᠡᠳᠡᠬᠦ ᠦᠭᠡᠢ ᠮᠠᠯᠴᠢᠳ ᠢ᠋ ᠮᠡᠬᠡᠯᠡᠨ ᠮᠥᠯᠵᠢᠬᠦ ᠡᠴᠡ ᠠᠶᠤᠵᠤ᠂ ᠬᠠᠮᠤᠭ ᠤ᠋ᠨ ᠰᠠᠢᠨ ᠨᠢ ᠴᠠᠢ᠂ ᠭᠤᠯᠢᠷ᠂ ᠪᠥᠰ ᠭᠡᠬᠦ ᠮᠡᠲᠦ ᠪᠡᠷ ᠬᠤᠪᠢᠶᠠᠭᠰᠠᠨ ᠨᠢ ᠳᠡᠭᠡᠷᠡ ᠭᠡᠵᠦ ᠦᠵᠡᠪᠡ᠃ ᠡᠢᠮᠦ ᠨᠢᠭᠡᠨ ᠲᠤᠰᠠᠯᠠᠮᠵᠢ ᠶ᠋ᠢᠨ ᠲᠥᠯᠥᠪᠯᠡᠭᠡ ᠶᠠᠪᠤᠭᠳᠠᠭᠤᠯᠬᠤ ᠳ᠋ᠤ᠌ ᠦᠨᠡᠬᠡᠷ ᠲᠡᠢᠮᠦ ᠬᠢᠯᠪᠠᠷᠬᠠᠨ ᠪᠢᠰᠢ ᠠᠵᠢ᠃
ᠬᠤᠳᠠᠯᠳᠤᠨ ᠠᠪᠤᠭᠰᠠᠨ ᠲᠤᠭᠤᠯ ᠲᠠᠢ ᠦᠨᠢᠶᠡ ᠪᠡᠨ ᠳᠥᠷᠪᠡᠨ ᠪᠦᠯᠦᠭ ᠠᠩᠭᠢᠯᠠᠵᠤ᠂ ᠬᠡᠰᠡᠭ ᠪᠣᠯᠭᠠᠨ ᠳ᠋ᠤ᠌ ᠬᠣᠷᠢ ᠠ᠋ᠴᠠ ᠬᠣᠷᠢᠨ ᠲᠠᠪᠤᠨ ᠦᠨᠢᠶᠡ ᠨᠣᠭᠳᠠᠪᠠ᠃ ᠯᠠᠷᠰᠤᠨ ᠬᠦᠩ ᠦ᠋ᠨ ᠠᠮᠢᠳᠤᠷᠠᠵᠤ ᠪᠠᠢᠭᠠ ᠴᠠᠭᠠᠨ ᠬᠦᠷᠢᠶᠡᠨ ᠦ᠌ ᠰᠦᠮᠡ ᠶ᠋ᠢᠨ ᠪᠠᠢᠭᠠ ᠰᠤᠮᠤ ᠨᠤᠭᠤᠳ ᠲᠤ᠌ ᠠᠩᠬᠠᠨ ᠤ᠋ ᠪᠦᠯᠦᠭ ᠦᠨᠢᠶᠡ ᠶ᠋ᠢ ᠰᠤᠮᠤ ᠪᠠᠭ ᠤ᠋ᠨ ᠨᠣᠶᠠᠳ ᠢ᠋ᠶ᠋ᠠᠷ ᠳᠠᠮᠵᠢᠭᠤᠯᠤᠨ ᠶᠠᠳᠠᠭᠤ ᠠᠢᠯ ᠳ᠋ᠤ᠌ ᠬᠤᠪᠢᠶᠠᠨ ᠥᠭᠴᠦ ᠡᠬᠢᠯᠡᠪᠡ᠃ ᠭᠡᠬᠦ ᠳ᠋ᠦ᠍ ᠲᠥᠪ ᠭᠣᠣᠯᠴᠢ ᠪᠠᠷ ᠬᠤᠪᠢᠶᠠᠷᠢᠯᠠᠬᠤ ᠬᠡᠷᠡᠭᠲᠡᠢ ᠭᠡᠰᠡᠨ ᠴᠢᠩᠭᠠ ᠰᠠᠨᠠᠭᠤᠯᠭᠠ ᠶ᠋ᠢ ᠣᠢᠰᠢᠶᠠᠯ ᠦᠭᠡᠢ ᠪᠡᠷ ᠰᠤᠮᠤ ᠪᠠᠭ ᠤ᠋ᠨ ᠶᠡᠬᠡ ᠪᠠᠭᠠ ᠨᠣᠶᠠᠳ ᠳᠠᠮ ᠳᠠᠮ ᠢ᠋ᠶ᠋ᠠᠷ ᠰᠠᠢᠨ ᠦᠨᠢᠶᠡ ᠶ᠋ᠢ ᠨᠢ ᠥᠪᠡᠷ ᠲᠡᠭᠡᠨ ᠦᠯᠡᠳᠡᠭᠡᠨ ᠠᠪᠴᠤ᠂ ᠠᠬᠢᠭᠠᠳ ᠥᠪᠡᠷ ᠦ᠋ᠨ ᠰᠦ ᠮᠠᠭᠤᠲᠠᠢ ᠦᠨᠢᠶᠡ ᠪᠡᠨ ᠣᠷᠣᠨ ᠳ᠋ᠤᠨᠢ ᠬᠤᠪᠢᠶᠠᠷᠢᠯᠠᠯ ᠳ᠋ᠤ᠌ ᠶᠠᠪᠤᠭᠤᠯᠵᠤ ᠪᠠᠢᠬᠤ ᠴᠤᠤᠷᠬᠠᠯ ᠤᠳᠠᠯ ᠦᠭᠡᠢ ᠳᠡᠭᠳᠡᠵᠡᠢ᠃
ᠡᠨᠡ ᠶᠠᠪᠤᠳᠠᠯ ᠠ᠋ᠴᠠ ᠰᠤᠷᠭᠠᠮᠵᠢ ᠬᠦᠷᠲᠡᠵᠦ᠂ ᠡᠸᠷᠢᠺᠰᠤᠨ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠬᠥᠮᠦᠨ ᠳ᠋ᠦ᠍ᠨᠢ ᠣᠯᠭᠣᠬᠤ ᠠᠵᠢᠯ ᠳ᠋ᠤ᠌ ᠣᠷᠣᠯᠴᠠᠪᠠ᠃ ᠢᠩᠭᠢᠭᠡᠳ ᠪᠠᠷᠠᠭᠤᠨ ᠳᠥᠷᠪᠡᠳ ᠲᠦ᠍ ᠬᠦᠷᠴᠦ ᠬᠤᠪᠢᠶᠠᠷᠢᠯᠠᠬᠤ ᠪᠠᠷ ᠪᠣᠯᠪᠠ᠃ ᠲᠡᠨᠳᠡ ᠬᠤᠪᠢᠶᠠᠬᠤ ᠬᠣᠷᠢᠨ ᠲᠤᠭᠤᠯ ᠲᠠᠢ ᠦᠨᠢᠶᠡ ᠶ᠋ᠢ ᠬᠣᠶᠠᠷ ᠭᠠᠷᠠᠭ ᠤ᠋ᠨ ᠡᠮᠦᠨᠡ ᠠᠳᠠ ᠠ᠋ᠴᠠ ᠲᠠᠭᠤᠵᠤ ᠬᠥᠳᠡᠯᠦᠭᠰᠡᠨ ᠶᠦᠮ᠃
ᠪᠢ ᠱᠠᠰᠢᠨ ᠰᠤᠷᠲᠠᠯᠴᠢᠯᠠᠭᠴᠢ ᠶ᠋ᠢ ᠳᠠᠭᠠᠵᠤ ᠶᠠᠪᠤᠬᠤ ᠪᠠᠷ ᠪᠣᠯᠪᠠ᠃ ᠨᠠᠢ᠍ᠮᠠᠳᠤᠭᠠᠷ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠲᠠᠪᠤᠨ ᠳ᠋ᠤ᠌ ᠮᠥᠷᠭᠥᠭᠴᠢ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠬᠠᠵᠠᠭᠤ ᠳ᠋ᠠᠬᠢ ᠮᠥᠷᠭᠥᠭᠴᠢ ᠭᠡᠳᠡᠭ ᠠᠢᠯ ᠳ᠋ᠤ᠌ ᠨᠣᠶᠠᠳ ᠲᠦᠰᠢᠮᠡᠳ ᠵᠢᠴᠢ ᠶᠠᠳᠠᠭᠤ ᠵᠦᠳᠡᠭᠦᠦ ᠮᠠᠯᠴᠢᠳ ᠴᠤᠭᠯᠠᠷᠠᠬᠤ ᠪᠠᠷ ᠪᠣᠯᠤᠭᠰᠠᠨ ᠠᠵᠢ᠃
ᠲᠡᠷᠡ ᠭᠠᠵᠠᠷ ᠲᠤ᠌ ᠬᠦᠷᠬᠦ ᠳ᠋ᠦ᠍ ᠲᠤᠩ ᠠᠮᠠᠷᠬᠠᠨ ᠭᠡᠳᠡᠭ ᠪᠣᠯᠪᠠᠴᠤ ᠡᠸᠷᠢᠺᠰᠤᠨ ᠶᠡᠷᠦ ᠡᠴᠡ ᠲᠡᠨᠳᠡ ᠬᠦᠷᠴᠦ ᠪᠠᠢᠭᠠ ᠦᠭᠡᠢ᠃ ᠬᠥᠳᠡᠭᠡ ᠲᠠᠯᠠ ᠳ᠋ᠤ᠌ ᠠᠮᠢᠵᠢᠷᠠᠯ ᠤ᠋ᠨ ᠬᠦᠴᠦᠨ ᠴᠢᠩᠭᠠ ᠡᠪᠡᠰᠦ ᠤᠷᠭᠤᠮᠠᠯ ᠠᠳᠠ ᠲᠡᠨᠳᠡ ᠴᠤᠬᠤᠢᠨ ᠣᠷᠭᠣᠭᠠᠳ᠂ ᠲᠡᠭᠦᠨ ᠦ᠌ ᠳᠤᠮᠳᠠ ᠨᠢ ᠰᠢᠷᠦᠭᠦᠨ ᠰᠠᠯᠬᠢᠨ ᠳ᠋ᠤ᠌ ᠲᠠᠭᠤᠭᠳᠠᠵᠤ ᠶᠠᠪᠤᠭᠠ ᠦᠭᠡᠢ ᠬᠠᠢᠷᠬᠠᠭ ᠡᠯᠡᠰᠦ ᠲᠣᠭᠲᠠᠵᠠᠢ᠃ ᠡᠨᠡ ᠬᠦ᠌ ᠭᠠᠩ ᠬᠠᠭᠤᠷᠠᠢ ᠲᠠᠯᠠ ᠨᠤᠲᠤᠭ ᠤ᠋ᠨ ᠳᠤᠮᠳᠠ ᠡᠷᠳᠡᠨᠢ ᠪᠣᠯᠵᠤ ᠰᠢᠭᠢᠳᠬᠡᠭᠳᠡᠭᠰᠡᠨ ᠨᠢ ᠮᠥᠷᠭᠥᠭᠴᠢ ᠶ᠋ᠢᠨ ᠰᠦᠮᠡ ᠪᠠᠢᠪᠠ᠃ ᠰᠦᠮᠡ ᠶ᠋ᠢᠨ ᠬᠡᠷᠡᠮ ᠢ᠋ᠶ᠋ᠡᠨ ᠴᠠᠪ ᠴᠠᠭᠠᠨ ᠥᠩᠭᠡ ᠪᠡᠷ ᠵᠢᠴᠢ ᠲᠥᠪᠡᠳ ᠮᠠᠶᠢᠭ ᠤ᠋ᠨ ᠴᠣᠩᠬᠣ ᠪᠠᠨ ᠭᠦᠨ ᠤᠯᠠᠭᠠᠨ ᠢ᠋ᠶ᠋ᠠᠷ ᠰᠢᠨᠡᠬᠡᠨ ᠪᠣᠳᠣᠵᠠᠢ᠃ ᠠᠷᠪᠠᠨ ᠬᠣᠶᠠᠷ ᠭᠡᠷ ᠢ᠋ᠶ᠋ᠡᠷ ᠪᠦᠷᠢᠯᠳᠦᠭᠰᠡᠨ ᠡᠨᠡ ᠬᠣᠲᠠ ᠨᠢ ᠥᠷᠭᠡᠨ ᠲᠠᠯᠠ ᠶ᠋ᠢᠨ ᠬᠣᠢᠲᠤ ᠬᠥᠪᠡᠭᠡᠨ ᠳ᠋ᠦ᠍ ᠪᠠᠢᠷᠢᠯᠠᠵᠠᠢ᠃ ᠲᠡᠨᠳᠡ ᠡᠨᠡ ᠬᠡᠰᠡᠭ ᠢ᠋ ᠬᠠᠮᠢᠶᠠᠷᠤᠭᠴᠢ ᠮᠡᠢᠷᠡᠨ ᠵᠠᠩᠭᠢ ᠲᠦᠳᠦᠪ᠂ ᠳᠣᠣᠷᠠᠬᠢ ᠬᠥᠮᠦᠰ ᠵᠢᠴᠢ ᠠᠮᠢᠳᠤᠷᠠᠯ ᠳ᠋ᠠᠭᠠᠨ ᠵᠤᠳᠠᠷᠠᠵᠤ ᠶᠠᠪᠤᠭᠠ ᠶᠠᠳᠠᠭᠤ ᠮᠠᠯᠴᠢᠳ ᠢ᠋ᠶ᠋ᠠᠨ ᠳᠠᠭᠠᠭᠤᠯᠵᠤ᠂ ᠡᠸᠷᠢᠺᠰᠤᠨ ᠢ᠋ ᠸᠠᠩ ᠨᠣᠶᠠᠨ ᠮᠡᠲᠦ ᠬᠦᠨᠳᠦᠲᠡᠢ ᠪᠡᠷ ᠲᠣᠰᠴᠤ ᠠᠪᠤᠯᠠ᠃ ᠲᠦᠳᠦᠪ ᠳᠣᠷᠣᠭᠰᠢ ᠪᠠᠨ ᠭᠦᠨᠡ ᠪᠥᠬᠥᠢᠨ ᠶᠣᠰᠣᠯᠠᠬᠤ ᠳ᠋ᠤ᠌ ᠪᠤᠰᠤᠳ ᠨᠢ ᠴᠦ᠍ ᠳᠠᠭᠠᠯᠳᠤᠨ ᠡᠨᠡ ᠶᠣᠰᠣ ᠶ᠋ᠢ ᠬᠢᠭᠡᠳ ᠡᠨᠡ ᠬᠦ᠌ ᠬᠦᠨᠳᠦᠲᠡᠢ ᠥᠭᠯᠢᠭᠡ ᠶ᠋ᠢᠨ ᠡᠵᠡᠨ ᠢ᠋ᠶ᠋ᠡᠨ ᠲᠣᠭᠣᠷᠢᠨ ᠵᠣᠭᠰᠣᠯᠠ᠃
– ᠠᠮᠤᠷᠬᠠᠨ ᠰᠠᠢᠨ! ᠭᠡᠵᠦ ᠲᠠᠯᠠ ᠪᠣᠯᠭᠠᠨ ᠠ᠋ᠴᠠ ᠲᠡᠭᠦᠨ ᠤᠷᠤᠭᠤ ᠮᠡᠨᠳᠦᠴᠢᠯᠡᠬᠦ ᠳ᠋ᠦ᠍ ᠡᠸᠷᠢᠺᠰᠤᠨ ᠬᠠᠷᠢᠭᠤ ᠳ᠋ᠤᠨᠢ :
– ᠰᠠᠢᠨ ᠰᠠᠢᠨ᠂ ᠲᠠ ᠨᠠᠷ ᠰᠠᠢᠨ ᠪᠢᠵᠡ ? ᠭᠡᠵᠦ ᠬᠠᠷᠢᠭᠤ ᠮᠡᠨᠳᠦᠯᠡᠵᠦ ᠪᠠᠢᠪᠠ᠃
– ᠰᠠᠢᠨ ᠰᠠᠢᠨ ᠭᠡᠵᠦ ᠮᠣᠩᠭᠣᠯᠴᠤᠳ ᠬᠠᠷᠢᠭᠤᠯᠵᠠᠭᠠᠬᠤ ᠪᠥᠭᠡᠳ ᠡᠨᠡ ᠨᠢ ᠮᠣᠩᠭᠣᠯᠴᠤᠳ ᠤ᠋ᠨ ᠠᠯᠢ ᠡᠷᠲᠡᠨ ᠡᠴᠡ ᠤᠯᠠᠮᠵᠢᠯᠠᠭᠳᠠᠨ ᠢᠷᠡᠭᠰᠡᠨ ᠶᠣᠰᠣ ᠵᠠᠩᠰᠢᠯ – ᠢᠷᠡᠭᠰᠡᠨ ᠵᠣᠴᠢᠳ ᠢ᠋ᠶ᠋ᠠᠨ ᠤᠭᠲᠤᠬᠤ ᠳ᠋ᠤ᠌ ᠮᠠᠭᠤ ᠴᠢᠮᠡᠭᠡ ᠶᠠᠷᠢᠬᠤ ᠶ᠋ᠢ ᠴᠡᠭᠡᠷᠯᠡᠳᠡᠭ ᠳᠠᠳᠬᠠᠯ ᠠᠵᠢ᠃ ᠪᠢᠳᠡᠨ ᠢ᠋ ᠭᠡᠷ ᠲᠦ᠍ ᠣᠷᠣᠵᠤ ᠴᠠᠢᠯᠠᠬᠤ ᠵᠠᠭᠤᠷᠠ ᠲᠡᠳᠡ ᠴᠠᠭᠠᠨ ᠵᠤᠳ ᠤ᠋ᠨ ᠬᠡᠴᠡᠭᠦᠦ ᠪᠠᠢᠳᠠᠯ ᠤ᠋ᠨ ᠢ᠋ᠶ᠋ᠠᠨ ᠲᠤᠬᠠᠢ ᠶᠠᠷᠢᠵᠠᠭᠠᠵᠤ ᠪᠠᠢᠪᠠ᠃ ᠵᠠᠷᠢᠮ ᠬᠥᠮᠦᠰ ᠨᠢ ᠡᠸᠷᠢᠺᠰᠤᠨ ᠡᠮᠴᠢ ᠶ᠋ᠢᠨ ᠥᠭᠯᠢᠭᠡ ᠳᠡᠮᠵᠢᠯᠭᠡ ᠥᠭᠬᠦ ᠶ᠋ᠢ ᠰᠣᠨᠣᠰᠤᠭᠠᠳ᠂ ᠲᠠᠪᠤ ᠪᠤᠶᠤ ᠵᠢᠷᠭᠤᠭᠠ᠂ ᠴᠢᠨᠠᠭᠰᠢᠯᠠᠭᠠᠳ ᠳᠣᠯᠣᠭᠠ ᠬᠣᠨᠣᠭ ᠶᠠᠪᠠᠭᠠᠨ ᠶᠠᠪᠤᠵᠤ ᠪᠠᠢᠮᠠᠨᠵᠢᠨ ᠠᠳᠠ ᠬᠦᠷᠴᠦ ᠢᠷᠡᠭᠰᠡᠨ ᠠᠵᠢ᠃ ᠪᠣᠢᠳᠠ ᠪᠥᠭᠯᠡᠭᠦᠦ ᠬᠣᠯᠠ ᠭᠠᠵᠠᠷ ᠠ᠋ᠴᠠ ᠴᠤ᠌ ᠭᠡᠰᠡᠨ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠲᠥᠯᠥᠭᠡᠯᠡᠭᠴᠢ ᠶ᠋ᠢ ᠲᠣᠮᠢᠯᠠᠨ ᠢᠷᠡᠭᠦᠯᠦᠭᠰᠡᠨ ᠪᠠᠢᠪᠠ᠃
– ᠮᠠᠨ ᠤ᠋ ᠲᠡᠨᠳᠡ ᠬᠠᠮᠤᠭ ᠤ᠋ᠨ ᠪᠠᠶᠠᠨ ᠠᠢᠯ ᠨᠢ ᠵᠢᠯ ᠦ᠋ᠨ ᠡᠮᠦᠨᠡ ᠬᠣᠶᠠᠷ ᠮᠢᠩᠭᠠᠨ ᠬᠣᠨᠢ᠂ ᠳᠠᠯᠠᠨ ᠦᠨᠢᠶᠡ ᠲᠡᠢ ᠪᠠᠢᠭᠰᠠᠨ ᠪᠣᠯ ᠲᠡᠭᠦᠨ ᠡᠴᠡ ᠬᠣᠶᠠᠷᠬᠠᠨ ᠦᠨᠢᠶᠡ᠂ ᠬᠣᠶᠠᠷ ᠵᠠᠭᠤᠭᠠᠳ ᠬᠣᠨᠢ ᠨᠢ ᠯᠡ ᠵᠤᠳ ᠢ᠋ ᠲᠤᠭᠤᠯᠵᠤ ᠴᠢᠳᠠᠪᠠ᠃ ᠮᠥᠨ ᠲᠡᠭᠡᠭᠡᠳ ᠡᠨᠡ ᠦᠯᠡᠳᠡᠭᠰᠡᠨ ᠮᠠᠯ ᠨᠢ ᠴᠦ᠍ ᠮᠠᠭᠤᠳᠠᠵᠤ ᠭᠦᠢᠴᠡᠭᠡᠳ᠂ ᠭᠠᠭᠴᠠᠬᠠᠨ ᠲᠥᠯ ᠴᠦ᠍ ᠲᠣᠰᠴᠤ ᠳᠡᠢᠯᠦᠭᠡ ᠦᠭᠡᠢ᠃ ᠬᠡᠳᠦᠢ ᠬᠡᠴᠡᠭᠦᠦ ᠭᠡᠳᠡᠭ ᠢ᠋ ᠪᠣᠳᠣᠵᠤ ᠦᠵᠡᠭᠡᠴᠢ ᠳᠡ ! ᠭᠡᠵᠦ ᠳᠥᠷᠪᠡᠳ ᠦ᠋ᠨ ᠬᠣᠢᠲᠤ ᠬᠡᠰᠡᠭ ᠡᠴᠡ ᠢᠷᠡᠭᠰᠡᠨ ᠲᠦᠰᠢᠮᠡᠯ ᠶᠠᠷᠢᠵᠤ ᠪᠠᠢᠯᠠ᠃
ᠡᠸᠷᠢᠺᠰᠤᠨ ᠰᠣᠨᠣᠰᠴᠤ ᠪᠠᠷᠠᠭᠠᠳ ᠥᠪᠡᠷ ᠦ᠋ᠨ ᠠᠵᠢᠯ ᠢ᠋ᠶ᠋ᠠᠨ ᠡᠬᠢᠯᠡᠭᠦᠯᠦᠯᠡ᠃ ᠲᠦᠳᠦᠪ ᠶᠠᠳᠠᠭᠤ ᠮᠠᠯᠴᠢᠳ ᠤ᠋ᠨ ᠶᠡᠬᠡ ᠤᠷᠲᠤ ᠨᠡᠷᠡᠰ ᠦ᠋ᠨ ᠵᠢᠭᠰᠠᠭᠠᠯ ᠬᠢᠵᠦ ᠭᠠᠷᠭᠠᠭᠠᠳ ᠲᠡᠳᠡᠨ ᠦ᠌ ᠠᠢᠯ ᠪᠦᠷᠢ ᠶ᠋ᠢᠨ ᠲᠤᠬᠠᠢ ᠨᠠᠷᠢᠨ ᠲᠡᠮᠳᠡᠭᠯᠡᠭᠰᠡᠨ ᠪᠠᠢᠪᠠ᠃ ᠲᠥᠪ ᠭᠣᠣᠯᠴᠢ᠂ ᠵᠦᠢ ᠵᠣᠬᠢᠰᠲᠠᠢ ᠰᠠᠢᠬᠠᠨ ᠬᠤᠪᠢᠶᠠᠨᠠ ᠭᠡᠳᠡᠭ ᠴᠦ᠍ ᠦᠨᠡᠬᠡᠷ ᠰᠠᠢᠨ ᠪᠣᠳᠣᠵᠤ ᠲᠣᠭᠠᠴᠠᠬᠤ ᠠᠵᠢᠯ ᠪᠠᠢᠯᠠ᠃ ᠵᠢᠷᠠᠨ ᠲᠠᠪᠤᠨ ᠠᠢᠯ᠂ ᠨᠡᠢᠲᠡ ᠵᠠᠭᠤ ᠵᠢᠷᠠ ᠶᠢᠰᠦᠨ ᠬᠥᠮᠦᠨ ᠳ᠋ᠦ᠍ ᠬᠣᠷᠢᠨ ᠲᠤᠭᠤᠯ ᠲᠠᠢ ᠦᠨᠢᠶᠡ ᠂ ᠬᠣᠶᠠᠷ ᠵᠠᠭᠤᠨ ᠮᠥᠩᠭᠥᠨ ᠲᠥᠭᠥᠷᠢᠭ ᠬᠤᠪᠢᠶᠠᠬᠤ ᠪᠣᠯᠤᠨᠠ᠃ ᠬᠣᠷᠢᠨ ᠦᠨᠢᠶᠡ ᠪᠡᠨ ᠶᠠᠭᠠᠬᠢᠵᠤ ᠡᠢᠮᠦ ᠨᠢᠭᠡ ᠨᠢᠭᠡᠨ ᠡᠴᠡ ᠪᠡᠨ ᠬᠣᠯᠠ ᠰᠠᠭᠤᠷᠢᠰᠢᠵᠤ ᠪᠠᠢᠭᠠ ᠮᠥᠷᠲᠡᠭᠡᠨ ᠦᠨᠢᠶᠡᠨ ᠦ᠌ ᠲᠣᠭᠠᠨ ᠠ᠋ᠴᠠ ᠭᠤᠷᠪᠠ ᠳᠠᠬᠢᠨ ᠢᠯᠡᠭᠦᠦ ᠠᠢᠯ ᠳ᠋ᠤ᠌ ᠬᠤᠪᠢᠶᠠᠵᠤ ᠥᠭᠳᠡᠭ ᠪᠢᠯᠡ ? ᠡᠸᠷᠢᠺᠰᠤᠨ ᠣᠢᠷᠠ ᠵᠠᠭᠤᠷᠠ ᠶ᠋ᠢᠨ ᠰᠠᠢᠨ ᠬᠠᠷᠢᠴᠠᠭᠠ ᠲᠠᠢ ᠠᠢᠯ ᠤ᠋ᠳ ᠢ᠋ ᠨᠡᠢᠯᠡᠭᠦᠯᠵᠦ ᠨᠢᠭᠡ ᠪᠠᠭ ᠪᠣᠯᠭᠠᠭᠠᠳ᠂ ᠲᠡᠳᠡᠨ ᠦ᠌ ᠲᠦᠷᠦᠭᠦᠦ ᠨᠠᠷ ᠲᠤᠨᠢ ᠦᠨᠢᠶᠡ ᠶ᠋ᠢ ᠬᠤᠳᠠᠯᠳᠤᠬᠤ ᠪᠤᠶᠤ ᠠᠯᠠᠵᠤ ᠪᠣᠯᠤᠨᠠ ᠭᠡᠮᠡᠨ ᠵᠥᠪᠰᠢᠶᠡᠷᠡᠪᠡ᠃ ᠡᠭᠦᠨ ᠦ᠌ ᠳᠡᠭᠡᠷᠡ ᠠᠢᠯ ᠤ᠋ᠨ ᠡᠵᠡᠨ ᠪᠦᠷᠢ ᠳ᠋ᠦ᠍ ᠨᠢᠭᠡ ᠨᠢᠭᠡ ᠮᠥᠩᠭᠥᠨ ᠲᠥᠭᠥᠷᠢᠭ ᠭᠠᠷᠳᠠᠭᠤᠯᠵᠤ᠂ ᠬᠡᠷᠡᠭᠴᠡᠭᠡ ᠪᠦᠬᠦᠢ ᠵᠦᠢᠯᠡᠰ ᠢ᠋ᠶ᠋ᠡᠨ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠬᠤᠳᠠᠯᠳᠤᠨ ᠠᠪ ᠭᠡᠪᠡ᠃ ᠲᠦᠳᠦᠪ᠂ ᠡᠸᠷᠢᠺᠰᠤᠨ ᠬᠣᠶᠠᠭᠤᠯᠠ ᠬᠠᠮᠤᠭ ᠠ᠋ᠴᠠ ᠵᠦᠢ ᠵᠣᠬᠢᠰᠲᠠᠢ ᠬᠤᠪᠢᠶᠠᠬᠤ ᠶ᠋ᠢᠨ ᠲᠤᠯᠠᠳᠠ ᠪᠦᠲᠦᠨ ᠦᠳᠡ ᠶ᠋ᠢᠨ ᠬᠣᠢᠨᠠ ᠴᠢᠷᠮᠠᠢᠨ ᠠᠵᠢᠯᠯᠠᠵᠤ ᠪᠢᠯᠡ᠃ ᠲᠡᠳᠡᠨ ᠢ᠋ ᠭᠡᠷ ᠲᠦ᠍ ᠰᠠᠭᠤᠵᠤ ᠰᠢᠨᠡ ᠪᠡᠷ ᠬᠤᠪᠢᠶᠠᠬᠤ ᠨᠡᠷᠡᠰ ᠦ᠋ᠨ ᠵᠢᠭᠰᠠᠭᠠᠯ ᠭᠠᠷᠭᠠᠵᠤ ᠪᠠᠢᠭᠠ ᠬᠣᠭᠣᠷᠣᠨᠳᠣ ᠭᠠᠳᠠᠨᠠ ᠪᠠᠢᠭᠠ ᠡᠷᠡᠴᠦᠦᠯ ᠪᠦᠰᠡᠭᠦᠢᠴᠦᠦᠯ ᠢ᠋ ᠪᠢ ᠠᠵᠢᠭᠯᠠᠪᠠ᠃ ᠲᠡᠳᠡ ᠬᠦᠰᠡᠯ ᠳᠦᠭᠦᠷᠦᠭᠰᠡᠨ ᠬᠠᠷᠠᠴᠠ ᠲᠠᠢ ᠭᠡᠷ ᠦ᠋ᠨ ᠡᠭᠦᠳᠡ ᠪᠣᠯᠤᠨ ᠬᠠᠶᠠᠭᠠ ᠶ᠋ᠢ ᠲᠣᠭᠣᠷᠢᠨ ᠵᠦᠳᠡᠷᠡᠭᠰᠡᠨ᠂ ᠪᠠᠴᠢᠮᠳᠠᠭᠰᠠᠨ ᠴᠢᠷᠠᠢ ᠲᠠᠢ ᠰᠠᠭᠤᠵᠠᠭᠠᠭᠠᠳ ᠬᠠᠶᠠ ᠨᠢᠭᠡ ᠨᠢᠭᠡᠨ ᠲᠡᠢ ᠪᠡᠨ ᠰᠢᠪᠡᠨᠡᠯᠳᠦᠨ ᠶᠠᠷᠢᠯᠴᠠᠵᠠᠭᠠᠵᠤ ᠪᠠᠢᠪᠠ᠃ ᠰᠸᠧᠳᠧᠨ ᠭᠡᠬᠦ ᠡᠨᠡ ᠬᠦ᠌ ᠪᠤᠶᠠᠨᠲᠤ ᠦᠢᠯᠡᠰ ᠢ᠋ ᠵᠣᠬᠢᠶᠠᠨ ᠪᠠᠢᠭᠤᠯᠤᠭᠰᠠᠨ ᠥᠭᠯᠢᠭᠡ ᠶ᠋ᠢᠨ ᠡᠵᠡᠨ ᠤᠯᠤᠰ ᠢ᠋ ᠮᠡᠳᠡᠬᠦ ᠬᠥᠮᠦᠨ ᠡᠳᠡᠨ ᠦ᠌ ᠳᠣᠲᠣᠷᠠ ᠨᠢᠭᠡ ᠴᠦ᠍ ᠦᠭᠡᠢ ᠶ᠋ᠢ ᠪᠠᠢᠲᠤᠭᠠᠢ ᠪᠡᠭᠡᠵᠢᠩ ᠬᠣᠲᠠ ᠳ᠋ᠤ᠌ ᠬᠦᠷᠴᠦ ᠥᠩᠭᠡᠷᠡᠭᠰᠡᠨ ᠬᠥᠮᠦᠨ ᠴᠦ᠍ ᠠᠯᠠᠭᠠ ᠠᠵᠢ᠃ ᠤᠷᠢᠳᠤ ᠡᠷᠲᠡ ᠳ᠋ᠡᠭᠡᠨ ᠲᠡᠳᠡ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠪᠤᠶᠤ ᠶᠡᠬᠡ ᠬᠦᠷᠢᠶᠡ ᠳ᠋ᠦ᠍ ᠬᠦᠷᠴᠦ ᠪᠠᠢᠭᠰᠠᠨ ᠪᠣᠯ ᠬᠣᠯᠠ ᠶᠠᠪᠤᠵᠤ ᠭᠠᠵᠠᠷ ᠦᠵᠡᠭᠰᠡᠨ ᠬᠥᠮᠦᠨ ᠳ᠋ᠡᠭᠡᠨ ᠲᠣᠭᠠᠴᠠᠭᠳᠠᠳᠠᠭ ᠶᠤᠮᠰᠠᠨ᠃
– ᠲᠡᠢᠨ ᠳᠠᠵᠢᠨ ᠪᠣᠯᠤᠨᠠ ᠭᠡᠵᠦ ᠪᠠᠢᠭᠠ ᠨᠢ ᠦᠨᠡᠨ ᠤᠤ ? ᠭᠡᠵᠦ ᠨᠢᠭᠡ ᠨᠢ ᠪᠤᠰᠤᠳ ᠠ᠋ᠴᠠ ᠪᠠᠨ ᠠᠰᠠᠭᠤᠪᠠ᠃ ᠡᠨᠡ ᠬᠦ᠌ ᠤᠯᠤᠰ ᠲᠥᠷᠥ ᠶ᠋ᠢᠨ ᠡᠰᠡᠷᠭᠦᠴᠡᠯᠳᠦᠯ ᠦ᠋ᠨ ᠪᠠᠢᠳᠠᠯ ᠨᠢ ᠡᠢᠮᠦ ᠴᠥᠭᠡᠬᠡᠨ ᠬᠥᠮᠦᠨ ᠲᠡᠢ ᠬᠥᠳᠡᠭᠡ ᠨᠤᠲᠤᠭ ᠢ᠋ ᠬᠦᠷᠲᠡᠯᠡ ᠴᠤᠤᠷᠬᠠᠯ ᠶᠠᠷᠢᠶᠠ ᠪᠠᠷ ᠳᠦᠭᠦᠷᠭᠡᠭᠰᠡᠨ ᠪᠠᠢᠪᠠ᠃ ᠬᠠᠴᠠᠷ ᠪᠠ ᠮᠠᠩᠨᠠᠢ ᠳ᠋ᠠᠭᠠᠨ ᠳᠦᠭᠦᠷᠡᠩ ᠦᠷᠴᠢᠯᠡᠭᠡᠰᠦ ᠲᠡᠢ ᠡᠪᠦᠭᠡᠨ :
– ᠡᠨᠡ ᠦᠨᠡᠨ ᠤᠤ ? ᠡᠸᠷᠢᠺᠰᠤᠨ ᠡᠮᠴᠢ ᠠ᠋ ! ᠭᠡᠯᠡ᠃
– ᠪᠢ ᠴᠦ᠍ ᠰᠠᠢᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ᠃ ᠮᠢᠨᠦ ᠦᠵᠡᠬᠦ ᠪᠡᠷ ᠲᠠᠨᠤᠰ ᠠᠶᠤᠭᠰᠠᠨ ᠤ᠋ ᠬᠡᠷᠡᠭ ᠠᠯᠠᠭᠠ᠂ ᠲᠠ ᠨᠠᠷ ᠠ᠋ᠴᠠ ᠠᠪᠬᠤ ᠶᠠᠭᠤᠮᠠ ᠭᠡᠵᠦ ᠦᠭᠡᠢ ᠰᠢᠦ ᠳᠡ ᠭᠡᠵᠦ ᠡᠸᠷᠢᠺᠰᠤᠨ ᠬᠠᠷᠢᠭᠤᠯᠤᠯᠠ᠃
ᠨᠠᠷᠠ ᠰᠢᠩᠭᠡᠬᠦ ᠣᠢᠷᠠᠳᠴᠤ᠂ ᠭᠡᠷ ᠦ᠋ᠨ ᠰᠡᠭᠦᠳᠡᠷ ᠬ᠌ᠡᠤᠰᠢᠯᠡᠬᠦ ᠦᠶᠡ ᠪᠡᠷ ᠦᠨᠢᠶᠡ ᠲᠤᠭᠤᠯ ᠤᠶᠠᠵᠤ ᠲᠠᠯᠪᠢᠭᠰᠠᠨ ᠭᠠᠵᠠᠷ ᠲᠤ᠌ ᠪᠠᠶᠠᠷ ᠬᠥᠷ ᠲᠡᠢ ᠶᠣᠰᠣᠯᠠᠯ ᠤ᠋ᠨ ᠠᠵᠢᠯᠯᠠᠭᠠ ᠶᠠᠪᠤᠭᠳᠠᠯᠠ ( ᠵᠢᠷᠤᠭ 68 )᠃ ᠡᠸᠷᠢᠺᠰᠤᠨ ᠪᠣᠯᠤᠨ ᠮᠡᠢᠷᠡᠨ ᠵᠠᠩᠭᠢ ᠬᠣᠶᠠᠭᠤᠯᠠ ᠤᠷᠠᠩᠬᠠᠢ ᠪᠤᠵᠠᠷ ᠬᠤᠪᠴᠠᠰᠤ ᠲᠠᠢ ᠮᠣᠩᠭᠣᠯᠴᠤᠳ ᠤ᠋ᠨ ᠡᠮᠦᠨᠡ ᠨᠢ ᠭᠠᠷᠴᠤ ᠵᠣᠭᠰᠣᠪᠠ᠃ ᠪᠦᠰᠡᠭᠦᠢᠴᠦᠦᠯ ᠨᠢ ᠮᠥᠩᠭᠥ ᠱ᠌ᠢᠷᠦ ᠪᠡᠷ ᠬᠢᠭᠰᠡᠨ ᠳᠠᠷᠤᠭᠤᠯᠭᠠ ᠵᠡᠭᠦᠭᠡ ᠪᠡᠷ ᠵᠠᠰᠠᠨ ᠴᠢᠮᠡᠭᠯᠡᠭᠰᠡᠨ ᠪᠠᠢᠯᠠ᠃
– ᠢᠳᠡᠬᠦ ᠶᠠᠭᠤᠮᠠ ᠦᠭᠡᠢ ᠪᠣᠯᠵᠤ ᠪᠠᠢᠭᠠ ᠦᠶᠡ ᠳ᠋ᠦ᠍ ᠶᠠᠭᠤᠨ ᠳ᠋ᠤ᠌ ᠲᠡᠳᠡ ᠡᠨᠡ ᠬᠡᠷᠡᠭ ᠦᠭᠡᠢ ᠴᠢᠮᠡᠭᠯᠡᠯ ᠦ᠋ᠨ ᠡᠳ᠋ᠯᠡᠯ ᠢ᠋ᠶ᠋ᠡᠨ ᠬᠤᠳᠠᠯᠳᠤᠬᠤ ᠦᠭᠡᠢ ᠪᠠᠢᠭᠠ ᠪᠣᠢ ? ᠭᠡᠵᠦ ᠪᠢ ᠡᠸᠷᠢᠺᠰᠤᠨ ᠠ᠋ᠴᠠ ᠠᠰᠠᠭᠤᠪᠠ᠃
– ᠧᠦ᠋ᠷᠣᠫᠠ ᠶ᠋ᠢᠨ ᠪᠦᠰᠡᠭᠦᠢᠴᠦᠳ ᠲᠡᠳᠡᠨ ᠦ᠌ ᠥᠪᠡᠷ ᠦ᠋ᠨ ᠬᠤᠷᠢᠮ ᠤ᠋ᠨ ᠪᠥᠭᠡᠵᠢ ᠪᠡᠨ ᠬᠥᠮᠦᠨ ᠳ᠋ᠦ᠍ ᠥᠭᠳᠡᠭ ᠶᠦᠮ ᠤᠤ ? ᠭᠡᠵᠢᠭᠡ ᠶ᠋ᠢᠨ ᠳᠠᠷᠤᠭᠤᠯᠭᠠ ᠪᠣᠯ ᠪᠦᠬᠦ ᠭᠡᠷ ᠦ᠋ᠨ ᠥᠮᠴᠢ ᠶᠦᠮ᠃ ᠲᠡᠭᠦᠨ ᠢ᠋ ᠳᠠᠷᠠᠭᠠᠴᠢ ᠶ᠋ᠢᠨ ᠦᠶᠡ ᠶ᠋ᠢᠨ ᠬᠢᠨ ᠳ᠋ᠡᠭᠡᠨ ᠦᠯᠡᠳᠡᠭᠡᠵᠦ ᠥᠭᠬᠦ ᠶᠣᠰᠣ ᠲᠠᠢ ᠪᠣᠯᠬᠣᠷ ᠶᠠᠳᠠᠭᠤᠷᠠᠬᠤ ᠶ᠋ᠢᠨ ᠲᠤᠢᠯ ᠳ᠋ᠤ᠌ ᠬᠦᠷᠦᠯᠡ ᠴᠦ᠍ ᠭᠡᠰᠡᠨ ᠥᠭᠡᠷᠡ ᠬᠥᠮᠦᠨ ᠳ᠋ᠦ᠍ ᠬᠤᠳᠠᠯᠳᠤᠨ ᠥᠭᠬᠦ ᠦᠭᠡᠢ ᠶᠦᠮ ᠭᠡᠵᠦ ᠬᠠᠷᠢᠭᠤᠯᠤᠯᠠ᠃ ᠶᠣᠰᠣᠲᠠᠢ ᠨᠢᠭᠡᠨ ᠬᠠᠯᠠᠭᠤᠨ ᠡᠳᠦᠷ ᠪᠣᠯᠵᠤ ᠥᠩᠭᠡᠷᠡᠯᠡ᠃ ᠦᠳᠡᠰᠢ ᠶ᠋ᠢᠨ ᠰᠡᠷᠢᠭᠦᠬᠡᠨ ᠰᠠᠯᠬᠢ ᠮᠣᠩᠭᠣᠯ ᠭᠡᠷ ᠦ᠋ᠳ ᠦ᠋ᠨ ᠳᠤᠮᠳᠠᠭᠤᠷ ᠬᠠᠴᠠᠷ ᠢ᠋ ᠦᠯᠢᠶᠡᠨ ᠥᠩᠭᠡᠷᠡᠬᠦ ᠨᠢ ᠠᠶᠠᠲᠠᠢ ᠰᠠᠢᠬᠠᠨ ᠰᠠᠨᠠᠭᠳᠠᠵᠤ ᠪᠠᠢᠯᠠ᠃ ᠪᠢᠳᠡ ᠮᠣᠩᠭᠣᠯ ᠭᠡᠷ ᠦ᠋ᠨ ᠡᠮᠦᠨᠡ ᠵᠣᠭᠰᠣᠵᠤ᠂ ᠪᠦᠰᠡᠭᠦᠢ ᠬᠡᠦᠬᠡᠳ ᠦ᠋ᠳ ᠦ᠋ᠨ ᠵᠦᠭ ᠪᠦᠬᠦᠨ ᠳ᠋ᠦ᠍ ᠦᠨᠢᠶᠡ ᠲᠤᠭᠤᠯ ᠢ᠋ᠶ᠋ᠠᠨ ᠳᠠᠭᠤᠨ ᠣᠳᠬᠤ ᠶ᠋ᠢ ᠬᠠᠷᠠᠭᠰᠠᠭᠠᠷ ᠪᠠᠢᠪᠠ᠃ ᠡᠷᠡᠴᠦᠦᠯ ᠨᠢ ᠪᠤᠴᠠᠨ ᠢᠷᠡᠵᠡᠭᠡᠵᠦ᠂ ᠶᠠᠭ ᠯᠠ ᠥᠪᠡᠷ ᠦ᠋ᠨ ᠸᠠᠩ ᠨᠣᠶᠠᠳ ᠲᠠᠭᠠᠨ ᠬᠠᠨᠳᠤᠵᠤ ᠪᠠᠢᠭᠠ ᠮᠡᠲᠦ ᠭᠦᠨᠡ ᠮᠡᠬᠦᠢᠨ ᠶᠣᠰᠣᠯᠠᠵᠤ ᠲᠠᠯᠠᠷᠬᠠᠯ ᠢ᠋ᠶ᠋ᠠᠨ ᠢᠯᠡᠳᠬᠡᠭᠡᠳ᠂ ᠳᠠᠭᠤᠨ ᠦᠭᠡᠢ ᠵᠠᠮ ᠳ᠋ᠠᠭᠠᠨ ᠣᠷᠣᠵᠠᠭᠠᠯᠠ᠃
– ᠣᠳᠣ ᠪᠣᠯᠲᠠᠯᠠ ᠴᠢ ᠶᠡᠬᠡ ᠣᠯᠠᠨ ᠰᠠᠢᠨ ᠠᠵᠢᠯ ᠬᠢᠯᠡ᠃ ᠥᠨᠥᠳᠥᠷ ᠦ᠋ᠨ ᠥᠭᠯᠢᠭᠡ ᠥᠭᠴᠦ ᠪᠠᠢᠭᠠ ᠴᠢᠨᠢ ᠪᠣᠯ ᠴᠢᠨᠦ ᠬᠢᠭᠰᠡᠨ ᠠᠵᠢᠯ ᠤ᠋ᠨ ᠳᠣᠲᠣᠷᠠᠬᠢ ᠬᠠᠮᠤᠭ ᠤ᠋ᠨ ᠲᠣᠮᠣ ᠨᠢᠭᠦᠯᠡᠰᠦᠩᠭᠦᠢ ᠠᠵᠢᠯᠯᠠᠭᠠ ᠪᠣᠯᠤᠨᠠ ᠭᠡᠵᠦ ᠲᠦᠳᠦᠪ ᠡᠸᠷᠢᠺᠰᠤᠨ ᠳ᠋ᠤ᠌ ᠬᠠᠨᠳᠤᠵᠤ ᠶᠠᠷᠢᠪᠠ᠃
– ᠢᠰᠥ᠋ᠰ ᠢ᠋ ᠰᠢᠲᠦᠳᠡᠭ ᠮᠢᠨᠦ ᠨᠡᠢᠵᠡᠳ ᠲᠠ ᠨᠠᠷ ᠲᠤ᠌ ᠲᠤᠰᠠᠯᠠᠵᠤ ᠪᠠᠢᠨᠠ᠃ ᠢᠰᠥ᠋ᠰ ᠬᠥᠮᠦᠨ ᠪᠦᠬᠦᠨ ᠳ᠋ᠦ᠍ ᠲᠤᠰᠠᠯᠠᠳᠠᠭ᠃ ᠬᠡᠨ ᠬᠡᠷᠪᠡ ᠢᠰᠥ᠋ᠰ ᠦ᠋ᠨ ᠬᠦᠴᠦᠨ ᠴᠢᠳᠠᠯ ᠢ᠋ ᠪᠢᠰᠢᠷᠡᠨ ᠰᠢᠲᠦᠪᠡᠯ᠂ ᠢᠰᠥ᠋ᠰ ᠪᠣᠭᠳᠠ ᠲᠡᠳᠡᠭᠡᠷ ᠬᠥᠮᠦᠰ ᠢ᠋ ᠢᠪᠡᠭᠡᠵᠦ ᠭᠠᠢ ᠵᠣᠪᠠᠯᠠᠩ ᠢ᠋ ᠨᠢ ᠠᠷᠢᠯᠭᠠᠳᠠᠭ ᠶᠤᠮ ᠭᠡᠵᠦ ᠡᠸᠷᠢᠺᠰᠤᠨ ᠬᠠᠷᠢᠭᠤᠯᠤᠯᠠ᠃
– ᠲᠡᠢᠮᠦ ᠠ᠋᠂ ᠲᠡᠢᠮᠦ ! ᠭᠡᠵᠦ ᠲᠦᠳᠦᠪ ᠶᠠᠷᠢᠪᠠ᠃ ᠭᠡᠬᠦ ᠳ᠋ᠦ᠍ ᠳᠣᠲᠣᠷᠠ ᠪᠠᠨ ᠦᠨᠡᠨ ᠲᠡᠢᠮᠦ ᠭᠡᠵᠦ ᠪᠣᠳᠣᠭᠰᠠᠨ ᠡᠰᠡᠬᠦ ᠶ᠋ᠢ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ᠃
– ᠰᠠᠢᠬᠠᠨ ᠡᠳᠦᠷ ᠪᠣᠯᠤᠯᠠ ᠰᠢᠦ ᠳᠡ ! ᠨᠤᠲᠤᠭ ᠤ᠋ᠨ ᠪᠤᠶᠠᠨᠲᠤ ᠥᠭᠯᠢᠭᠡᠴᠢᠳ ᠮᠠᠨᠢ ᠴᠤ᠌ ᠥᠨᠥᠳᠥᠷ ᠠᠳᠠ ᠪᠠᠢᠭᠰᠠᠨ ᠳᠠ ! ᠭᠡᠵᠦ ᠡᠸᠷᠢᠺᠰᠤᠨ ᠶᠠᠷᠢᠯᠠ᠃