ᠰᠡᠷᠢᠭᠦᠬᠡᠨ ᠲᠠᠯᠠ ᠨᠤᠲᠤᠭ – <ᠰᠸᠢᠰ> ᠸᠠᠯᠲ᠋ᠸᠷ ᠪᠣᠰᠬᠠᠷᠳ᠋ - ᠭᠤᠷᠪᠠᠳᠣᠭᠠᠷ ᠪᠦᠯᠦᠭ᠂ ᠭᠤᠷᠪᠠᠳᠡᠬᠢ ᠠᠶᠠᠯᠠᠯ (ᠭᠤᠷᠪᠠ) Сэрүүхэн тал нутаг–<свис> Вальтер Босгард (Walter Bosshard)- Гуравдугаар бөлөг᠂Гуравдэх аялал 3
531ᠭᠤᠷᠪᠠ ᠂ ᠭᠣᠪᠢ ᠶ᠋ᠢᠨ ᠵᠠᠬᠠ ᠳ᠋ᠠᠬᠢ ᠬᠤᠪᠢ ᠵᠠᠶᠠᠭᠠ
ᠲᠡᠷᠡ ᠮᠠᠨᠢ ᠭᠠᠵᠠᠷ ᠪᠣᠯᠭᠠᠨ ᠳ᠋ᠤ᠌ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠣᠷᠣᠵᠤ ᠪᠣᠯᠳᠠᠭ ᠡᠷᠬᠡ ᠪᠦᠬᠦᠢ ᠬᠦᠷᠡᠩ ᠥᠩᠭᠡ ᠲᠡᠢ ᠣᠷᠬᠢᠮᠵᠢ ᠡᠮᠦᠰᠴᠦ᠂ ᠲᠡᠭᠦᠨ ᠦ᠌ ᠳᠡᠭᠡᠷᠡ ᠨᠢ ᠬᠠᠮᠤᠭ ᠤ᠋ᠨ ᠢᠳᠡᠬᠦ ᠳᠤᠷᠠᠲᠠᠢ ᠬᠣᠨᠢᠨ ᠰᠡᠭᠦᠯ ᠦ᠋ᠨ ᠲᠣᠰᠣᠨ ᠤ᠋ ᠣᠷᠣ ᠮᠥᠷ ᠦᠯᠡᠳᠡᠵᠦ᠂ ᠡᠩᠭᠡᠷ ᠲᠦ᠋ᠨᠢ ᠬᠡᠳᠦ ᠬᠡᠳᠦᠨ ᠭᠠᠵᠠᠷ ᠬᠠᠷᠠᠯᠠᠨ ᠭᠥᠯᠢᠢᠵᠡᠢ᠃ ᠮᠥᠨ ᠲᠡᠭᠡᠭᠡᠳ ᠤᠷᠠᠭᠳᠠᠵᠤ ᠨᠠᠪᠲᠠᠷᠠᠭᠰᠠᠨ ᠲᠡᠷᠯᠢᠭ ᠲᠡᠭᠡᠨ ᠠᠳᠠ ᠲᠡᠨᠳᠡ ᠨᠥᠬᠥᠭᠡᠰᠦ ᠲᠠᠯᠪᠢᠭᠰᠠ ᠪᠥᠭᠡᠳ ᠡᠮᠦᠰᠦᠭᠰᠡᠨ ᠭᠤᠲᠤᠯ ᠨᠢ ᠴᠦ᠍ ᠬᠠᠭᠤᠴᠢᠷᠠᠵᠤ ᠮᠠᠢᠵᠢᠢᠵᠠᠢ᠃ ᠦᠳᠡᠰᠢ ᠪᠣᠯᠭᠠᠨ ᠭᠤᠲᠤᠯ ᠢ᠋ᠶ᠋ᠠᠨ ᠲᠠᠢᠯᠵᠤ ᠨᠠᠪᠲᠠᠷᠬᠠᠢ ᠪᠥᠰ ᠢ᠋ᠶ᠋ᠡᠷ ᠬᠥᠯ ᠢ᠋ᠶ᠋ᠡᠨ ᠠᠬᠢᠨ ᠣᠷᠢᠶᠠᠬᠤ ᠳ᠋ᠠᠭᠠᠨ ᠷᠠᠰᠢ ᠬᠠᠵᠠᠭᠤ ᠶ᠋ᠢᠨ ᠭᠡᠷ ᠲᠦ᠍ ᠣᠷᠣᠳᠠᠭ ᠨᠢ ᠶᠠᠳᠠᠭᠤ ᠵᠦᠳᠡᠭᠦᠦ ᠶᠠᠪᠤᠭᠠ ᠪᠠᠨ ᠨᠠᠳᠠ ᠬᠠᠷᠠᠭᠤᠯᠬᠤ ᠠ᠋ᠴᠠ ᠬᠢᠴᠢᠶᠡᠵᠦ ᠪᠠᠢᠭᠠ ᠬᠡᠷᠡᠭ ᠠᠵᠢ᠃ ᠡᠢᠮᠦ ᠴᠦ᠍ ᠤᠴᠢᠷ ᠠ᠋ᠴᠠ ᠲᠡᠷᠡ ᠮᠥᠩᠭᠥ ᠪᠡᠷ ᠡᠮᠵᠢᠭᠰᠡᠨ ᠰᠢᠷᠠ ᠬᠦᠷᠡᠩ ᠬᠤᠰᠤ ᠮᠣᠳᠣᠨ ᠬᠦᠨᠳᠦ ᠠᠶᠠᠭᠠ ᠵᠢᠴᠢ ᠣᠭ᠌ᠶᠤ ᠱ᠌ᠢᠷᠦ ᠪᠡᠷ ᠴᠢᠮᠡᠭᠯᠡᠭᠰᠡᠨ ᠮᠥᠩᠭᠥᠨ ᠬᠤᠢ ᠲᠠᠢ ᠬᠢᠲᠤᠭᠠ ᠪᠠᠨ ᠪᠥᠰᠡᠨ ᠡᠴᠡ ᠪᠡᠨ ᠰᠠᠯᠭᠠᠯ ᠦᠭᠡᠢ ᠵᠡᠭᠦᠵᠦ ᠶᠠᠪᠤᠳᠠᠭ ᠰᠠᠨ᠃
ᠪᠢᠳᠡᠨ ᠬᠡᠳᠦᠨ ᠴᠠᠭ ᠢ᠋ᠶ᠋ᠠᠷ ᠳᠠᠪᠬᠢᠭᠤᠯᠤᠭᠠᠳ ᠷᠠᠰᠢ ᠶ᠋ᠢᠨ ᠠᠮᠢᠳᠤᠷᠠᠵᠤ ᠪᠠᠢᠭᠠ ᠭᠡᠷ ᠲᠦ᠍ ᠣᠢᠷᠠᠲᠤᠨ ᠬᠦᠷᠦᠯᠡ᠃ ᠲᠡᠨᠳᠡ ᠪᠢ ᠬᠣᠨᠣᠭᠯᠠᠭᠠᠳ ᠮᠠᠷᠭᠠᠰᠢ ᠥᠷᠯᠥᠭᠡ ᠡᠷᠲᠡ ᠥᠪᠧᠷᠬᠧ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠬᠦᠢᠬᠤᠸᠠ ᠬᠣᠲᠠ ᠤᠷᠤᠭᠤ ᠮᠣᠷᠢ ᠪᠠᠷ ᠬᠥᠳᠡᠯᠬᠦ ᠶᠦᠮ᠃ ᠷᠠᠰᠢ ᠨᠠᠮᠠᠶ᠋ᠢ ᠲᠡᠮᠡᠭᠡᠨ ᠵᠢᠩ ᠦ᠋ᠨ ᠵᠠᠮ ᠪᠣᠯᠲᠠᠯᠠ ᠬᠦᠷᠭᠡᠴᠢᠬᠡᠭᠡᠳ ᠲᠡᠨᠳᠡ ᠡᠴᠡ ᠪᠤᠴᠠᠵᠤ ᠥᠪᠡᠷ ᠦ᠋ᠨ ᠬᠣᠨᠢ ᠲᠡᠮᠡᠭᠡᠨ ᠰᠦᠷᠦᠭ ᠢ᠋ᠶ᠋ᠡᠨ ᠦᠵᠡᠨᠡ ᠭᠡᠵᠦ ᠠᠯᠢ ᠡᠷᠲᠡ ᠲᠣᠬᠢᠷᠠᠯᠴᠠᠭᠰᠠᠨ ᠶᠤᠮ᠃
- ᠪᠢ ᠴᠢᠮᠠᠶ᠋ᠢ ᠬᠦᠢᠬᠤᠸᠠ ᠬᠦᠷᠲᠡᠯᠡ ᠬᠦᠷᠭᠡᠨᠡ᠂ ᠪᠣᠯᠤᠨᠠ ᠪᠢᠵᠡ ᠳᠡ? ᠭᠡᠵᠦ ᠲᠡᠷᠡ ᠬᠡᠯᠡᠯᠡ᠃ ᠲᠡᠷᠡ ᠲᠠᠯᠠ ᠨᠤᠲᠤᠭ ᠤ᠋ᠨ ᠵᠠᠮ ᠪᠣᠯᠭᠠᠨ ᠢ᠋ ᠪᠦᠷ ᠰᠠᠢᠨ ᠮᠡᠳᠡᠳᠡᠭ ᠪᠣᠯᠬᠣᠷ ᠨᠠᠳᠠ ᠳ᠋ᠤ᠌ ᠠᠪᠴᠤ ᠬᠡᠯᠡᠪᠡᠯ ᠰᠠᠢᠨ ᠯᠠ ᠶᠠᠪᠤᠳᠠᠯ ᠳᠠ᠃ ᠭᠡᠬᠦ ᠳ᠋ᠦ᠍ ᠡᠨᠡ ᠬᠦ᠌ ᠭᠡᠨᠡᠳᠲᠡ ᠶ᠋ᠢᠨ ᠬᠤᠪᠢᠷᠠᠯᠲᠠ ᠨᠢ ᠨᠠᠮᠠᠶ᠋ᠢ ᠶᠡᠬᠡ ᠰᠣᠴᠢᠭᠠᠪᠠ᠃
- ᠴᠢ ᠬᠦᠢᠬᠤᠸᠠ ᠳ᠋ᠤ᠌ ᠣᠴᠢᠭᠠᠳ ᠶᠠᠭᠤ ᠬᠢᠨᠡ ᠪᠣᠢ?
- ᠪᠢ ᠤᠲᠠᠢ ᠳ᠋ᠠᠬᠢ ᠪᠤᠷᠬᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠬᠦᠷᠦᠶᠡ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠭᠡᠵᠦ ᠬᠡᠯᠡᠭᠡᠳ ᠳᠣᠣᠷᠠ ᠳᠠᠭᠤᠨ ᠢ᠋ᠶ᠋ᠠᠷ ᠨᠠᠳᠠ ᠤᠷᠤᠭᠤ ᠪᠢ ᠵᠠᠪᠠᠯ ᠰᠠᠷᠵᠢ ᠲᠡᠳᠡᠨ ᠡᠴᠡ ᠰᠠᠯᠬᠤ ᠶᠣᠰᠣᠲᠠᠢ᠃ ᠠᠳᠠ ᠴᠢᠳᠬᠥᠷ ᠨᠠᠮᠠᠶ᠋ᠢ ᠰᠠᠯᠤᠯ ᠦᠭᠡᠢ ᠳᠠᠭᠠᠵᠤ᠂ ᠵᠦᠭᠡᠷ ᠪᠠᠢᠯᠭᠠᠬᠤ ᠦᠭᠡᠢ ᠪᠠᠢᠨᠠ᠂ ᠮᠢᠨᠦ ᠬᠣᠨᠢ ᠲᠡᠮᠡᠭᠡ ᠦᠬᠦᠵᠦ ᠪᠠᠢᠭᠠ ᠨᠢ ᠰᠢᠢᠳᠬᠡᠯ ᠮᠥᠨ᠂ ᠪᠢ ᠬᠠᠷᠠ ᠬᠥᠮᠦᠨ ᠦ᠌ ᠶᠢᠷᠲᠢᠨᠴᠦ ᠳ᠋ᠦ᠍ ᠣᠷᠣᠬᠤ ᠨᠢ ᠶᠡᠷᠦ ᠡᠴᠡ ᠪᠡᠨ ᠪᠤᠷᠤᠭᠤ ᠪᠠᠢᠭᠰᠠᠨ ᠶᠤᠮ ᠳᠠ ᠭᠡᠯᠡ᠃
- ᠮᠠᠯ ᠠᠳᠤᠭᠤᠰᠤᠨ ᠤ᠋ ᠦᠬᠦᠬᠦ ᠨᠢ ᠠᠳᠠ ᠴᠢᠳᠬᠥᠷ ᠡᠴᠡ ᠪᠣᠯᠤᠭᠰᠠᠨ ᠪᠢᠰᠢ ᠰᠢᠦ ᠳᠡ ᠂ ᠬᠠᠷᠢᠨ ᠬᠠᠯᠳᠠᠪᠤᠷᠢᠲᠤ ᠡᠪᠡᠳᠴᠢᠨ ᠡᠴᠡ ᠪᠣᠯᠵᠤ ᠪᠠᠢᠭᠠ ᠰᠢᠦ᠃
- ᠴᠢ ᠪᠣᠯ ᠮᠣᠩᠭᠣᠯ ᠪᠢᠰᠢ᠂ ᠴᠢᠨᠦ ᠬᠡᠯᠡᠵᠦ ᠪᠠᠢᠭᠠ ᠵᠦᠢᠯᠡᠰ ᠲᠠᠨ ᠤ᠋ ᠤᠯᠤᠰ ᠲᠠᠭᠠᠨ ᠪᠣᠯ ᠦᠨᠡᠨ ᠪᠠᠢᠵᠤ ᠮᠠᠭᠠᠳ ᠦᠭᠡᠢ᠃ ᠠᠳᠠ ᠬᠠᠷᠢᠨ ᠪᠢ ᠰᠠᠢᠨ ᠮᠡᠳᠡᠨᠡ ᠰᠢᠦ᠂ ᠪᠢ ᠴᠢᠨᠢ ᠨᠢᠭᠡ ᠯᠠᠮᠠ ᠪᠠᠢᠭᠠ ᠪᠢᠵᠡ ᠳᠡ ? ᠭᠡᠵᠦ ᠠᠭᠤᠷᠯᠠᠨ ᠬᠡᠯᠡᠭᠡᠳ ᠵᠥᠷᠢᠭᠦᠳᠯᠡᠨ ᠮᠣᠷᠢᠨ ᠤ᠋ ᠪᠠᠨ ᠵᠢᠯᠣᠭᠣ ᠶ᠋ᠢ ᠲᠡᠳᠡᠨ ᠨᠠᠳᠠ ᠠ᠋ᠴᠠ ᠬᠡᠳᠦᠨ ᠠᠯᠬᠤᠮ ᠬᠣᠢᠨᠠ ᠬᠣᠴᠣᠷᠴᠤ ᠭᠡᠷ ᠲᠡᠭᠡᠨ ᠬᠦᠷᠲᠡᠯᠡ ᠬᠣᠢᠨᠠ ᠠ᠋ᠴᠠ ᠮᠢᠨᠢ ᠳᠠᠭᠠᠨ ᠬᠠᠲᠠᠷᠢᠭᠤᠯᠪᠠ᠃
ᠰᠠᠷᠵᠢ ᠬᠣᠩᠭᠣᠷ ᠬᠣᠶᠠᠭᠤᠯᠠ ᠥᠭᠡᠳᠡ ᠡᠴᠡ ᠲᠣᠰᠴᠤ ᠢᠷᠡᠭᠡᠳ ᠤᠭᠲᠤᠨ ᠠᠪᠤᠯᠠ ᠃ ᠡᠨᠡ ᠨᠢ ᠪᠢ ᠠᠩᠬᠠ ᠤᠳᠠᠭᠠ ᠰᠠᠷᠵᠢ ( ᠵᠢᠷᠤᠭ 67 ) ᠲᠠᠢ ᠠᠭᠤᠯᠵᠠᠵᠤ ᠪᠠᠢᠭᠠ ᠶᠤᠮ ᠃ ᠬᠠᠲᠠᠭᠤ ᠬᠦᠨᠳᠦ ᠠᠵᠢᠯ ᠤ᠋ᠨ ᠳᠠᠷᠤᠭᠠᠰᠤ ᠨᠢ ᠲᠡᠭᠦᠨ ᠢ᠋ ᠬᠥᠭᠰᠢᠨ ᠪᠣᠯᠭᠠᠭᠠᠳ᠂ ᠨᠢᠭᠤᠷ ᠲᠤᠨᠢ ᠶᠠᠳᠠᠷᠠᠯ ᠵᠦᠳᠡᠷᠡᠯ ᠦ᠋ᠨ ᠭᠦᠨ ᠭᠡᠭᠴᠢ ᠠᠲᠤᠷᠢᠶᠠ ᠰᠠᠭᠤᠯᠭᠠᠵᠠᠢ᠃ ᠷᠠᠰᠢ ᠡᠭᠦᠨ ᠢ᠋ ᠠᠩᠵᠠᠭᠠᠷᠠᠨᠠ ᠭᠡᠭᠴᠢ ᠪᠠᠢᠳᠠᠭ ᠦᠭᠡᠢ᠂ ᠮᠣᠷᠢᠨ ᠴᠤᠯᠪᠤᠭᠤᠷ ᠢ᠋ᠶ᠋ᠠᠨ ᠥᠭᠭᠦᠭᠡᠳ ᠶᠠᠭ ᠯᠠ ᠣᠯᠠᠨ ᠬᠣᠨᠣᠭ ᠢ᠋ᠶ᠋ᠠᠷ ᠭᠠᠳᠠᠨᠠ ᠪᠠᠢᠭᠰᠠᠨ ᠪᠢᠰᠢ᠂ ᠬᠠᠷᠢᠨ ᠲᠠᠪᠤ ᠠᠷᠪᠠᠨ ᠮᠢᠨᠦ᠋ᠲ ᠭᠠᠳᠠᠭᠤᠷ ᠭᠠᠷᠤᠭᠠᠳ ᠯᠠ ᠢᠷᠡᠭᠰᠡᠨ ᠰᠢᠭ ᠪᠠᠢᠯᠠ᠃ ᠨᠠᠮᠠᠶ᠋ᠢ ᠭᠡᠷ ᠲᠦ᠍ ᠣᠷᠣᠨ ᠵᠣᠭᠰᠣᠵᠤ ᠪᠠᠢᠬᠤ ᠳ᠋ᠤ᠌ ᠰᠠᠷᠵᠢ ᠶ᠋ᠢᠨ 《ᠳᠥᠴᠢᠨ ᠬᠣᠨᠢ ᠦᠬᠦᠵᠦ ᠳᠦᠭᠦᠷᠦᠯᠡ ᠂ ᠮᠥᠨ ᠲᠡᠷᠡ ᠬᠣᠶᠠᠷ ᠴᠠᠭᠠᠨ ᠲᠡᠮᠡᠭᠡ ᠥᠴᠥᠭᠡᠳᠦᠷ ᠡᠴᠡ ᠡᠬᠢᠯᠡᠨ ᠢᠳᠡᠬᠦ ᠪᠡᠨ ᠪᠣᠯᠢᠪᠠ 》ᠭᠡᠵᠦ ᠶᠠᠷᠢᠬᠤ ᠨᠢ ᠰᠣᠨᠣᠰᠳᠠᠭᠰᠠᠨ ᠪᠣᠯᠪᠠᠴᠤ ᠷᠠᠰᠢ ᠬᠠᠷᠢᠭᠤ ᠶᠠᠭᠤ ᠴᠤ᠌ ᠶᠠᠷᠢᠭᠰᠠᠨ ᠦᠭᠡᠢ᠃
ᠭᠡᠷ ᠲᠦ᠍ ᠲᠡᠮᠡᠭᠡᠨ ᠬᠣᠷᠭᠣᠯ ᠳᠦᠷᠡᠯᠵᠡᠨ ᠨᠣᠴᠣᠵᠤ᠂ ᠭᠡᠷ ᠦ᠋ᠨ ᠳᠣᠲᠣᠷᠠᠬᠢ ᠢᠰᠡᠭᠡᠢ ᠨᠢ ᠤᠲᠤᠭᠠᠨ ᠳ᠋ᠤ᠌ ᠪᠣᠷᠣᠯᠠᠨ ᠬᠠᠷᠠᠯᠠᠵᠠᠢ᠃ ᠰᠠᠷᠵᠢ ᠡᠷᠭᠢᠨᠡᠭ ᠡᠴᠡ ᠬᠤᠰᠤᠨ ᠠᠶᠠᠭᠠ ᠠᠪᠴᠤ ᠭᠠᠷᠭᠠᠨ ᠭᠬᠢᠷᠲᠦᠵᠦ ᠨᠠᠪᠲᠠᠷᠠᠭᠰᠠᠨ ᠬᠠᠨᠴᠤᠢ ᠪᠠᠷ ᠢ᠋ᠶ᠋ᠠᠨ ᠠᠷᠴᠢᠭᠠᠳ ᠴᠠᠢ ᠠᠶᠠᠭᠠᠯᠠᠭᠰᠠᠨ ᠤ᠋ ᠳᠠᠷᠠᠭᠠ ᠡᠭᠦᠳᠡᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠬᠦᠷᠴᠦ ᠨᠣᠮᠣᠬᠠᠨ ᠰᠠᠭᠤᠯᠠ᠃ ᠷᠠᠰᠢ ᠬᠣᠨᠢ ᠭᠠᠷᠭᠠᠵᠤ ᠦᠳᠡᠰᠢ ᠶ᠋ᠢᠨ ᠬᠣᠭᠣᠯᠠ ᠪᠡᠯᠡᠳᠬᠡᠭᠡᠷᠡᠢ ᠭᠡᠵᠦ ᠵᠠᠷᠯᠢᠭᠳᠠᠬᠤ ᠳ᠋ᠤ᠌ ᠪᠣᠰᠴᠤ ᠲᠤᠯᠭᠠᠨ ᠳ᠋ᠤ᠌ ᠨᠢᠭᠡ ᠪᠢᠲᠡᠭᠦᠦ ᠲᠡᠮᠡᠭᠡᠨ ᠬᠣᠷᠭᠣᠯ ᠨᠡᠮᠡᠭᠰᠡᠨ ᠢ᠋ᠶ᠋ᠡᠨ ᠭᠠᠳᠠᠭᠰᠢ ᠭᠠᠷᠤᠯᠠ᠃
- ᠪᠢ ᠵᠠᠪᠠᠯ ᠡᠳᠡᠨ ᠡᠴᠡ ᠰᠠᠯᠬᠤ ᠬᠡᠷᠡᠭᠲᠡᠢ ᠪᠣᠯᠵᠠᠢ᠃ ᠠᠷᠪᠠᠨ ᠬᠣᠶᠠᠷ ᠵᠢᠯ ᠨᠠᠳᠠ ᠲᠠᠢ ᠴᠣᠭ ᠠᠮᠢᠳᠤᠷᠠᠯᠠ᠂ ᠬᠥᠳᠡᠭᠡ ᠲᠠᠯᠠ ᠠᠷᠪᠠᠨ ᠬᠣᠶᠠᠷ ᠤᠳᠠᠭᠠ ᠨᠣᠭᠣᠭᠠᠷᠠᠵᠤ ᠰᠢᠷᠠᠯᠠᠪᠠ᠃ ᠤᠳᠠᠭᠠ ᠪᠣᠯᠭᠠᠨ ᠪᠢ ᠮᠥᠷᠭᠥᠯ ᠳ᠋ᠦ᠍ ᠶᠠᠪᠤᠨᠠ ᠭᠡᠮᠡᠨ ᠪᠣᠳᠣᠳᠠᠭ ᠪᠣᠯᠪᠠᠴᠤ ᠨᠢᠭᠡ ᠯᠡ ᠵᠣᠷᠢᠭᠯᠠᠵᠤ ᠳᠡᠢᠯᠳᠡᠭ ᠦᠭᠡᠢ᠃ ᠰᠠᠷᠵᠢ ᠶᠡᠬᠡ ᠬᠦᠷᠢᠶᠡ ᠶ᠋ᠢᠨ ᠲᠡᠨᠳᠡ ᠨᠤᠲᠤᠭ ᠲᠠᠢ ᠪᠥᠭᠡᠳ ᠣᠳᠣ ᠲᠠᠢᠰᠢ ᠪᠠᠨ ᠪᠤᠴᠠᠵᠤ ᠳᠡᠢᠯᠬᠦ ᠡᠴᠡ ᠨᠢᠭᠡᠨᠲᠡ ᠥᠩᠭᠡᠷᠡᠵᠡᠢ ᠭᠡᠵᠦ ᠷᠠᠰᠢ ᠥᠪᠡᠷ ᠦ᠋ᠨ ᠪᠡᠶᠡ ᠳ᠋ᠡᠭᠡᠨ ᠬᠡᠯᠡᠵᠦ ᠪᠠᠢᠭᠠ ᠮᠡᠲᠦ ᠭᠠᠯ ᠢ᠋ ᠰᠢᠷᠲᠡᠨ ᠤᠳᠠᠭᠠᠨ ᠪᠥᠭᠡᠳ ᠴᠣᠬᠢᠯᠭᠠ ᠲᠠᠢ ᠪᠠᠷ ᠥᠭᠦᠯᠡᠪᠡ᠃ ᠲᠡᠭᠦᠨ ᠳ᠋ᠦ᠍ ᠠᠪᠴᠤ ᠬᠡᠯᠡᠪᠡᠯ ᠡᠨᠡ ᠪᠣᠯ ᠦᠨᠡᠨ ᠲᠤᠩ ᠬᠡᠴᠡᠭᠦᠦ ᠰᠢᠢᠳᠪᠦᠷᠢ ᠪᠠᠢᠯᠠ᠃ ᠲᠡᠭᠡᠭᠡᠳ ᠲᠠᠯᠪᠢᠭᠤᠷᠠᠭᠰᠠᠨ ᠮᠡᠲᠦ ᠭᠦᠨ ᠭᠡᠭᠴᠢ ᠠᠮᠢᠰᠬᠤᠪᠠ᠃
- ᠴᠢ ᠲᠡᠭᠡᠭᠡᠳ ᠪᠦᠰᠡᠭᠦᠢ ᠪᠡᠨ ᠬᠡᠦᠬᠡᠳ ᠲᠡᠢ ᠨᠢ ᠣᠷᠬᠢᠬᠤ ᠪᠠᠷ ᠪᠠᠢᠨᠠ ᠤᠤ ? ᠭᠡᠵᠦ ᠪᠢ ᠭᠡᠳᠡᠷᠭᠦ ᠠᠰᠠᠭᠤᠬᠤ ᠳ᠋ᠤ᠌ ᠷᠠᠰᠢ ᠶᠠᠭ ᠯᠠ ᠳᠣᠷᠣᠮᠵᠢᠯᠠᠭᠳᠠᠭᠰᠠᠨ ᠮᠡᠲᠦ ᠪᠣᠯᠵᠤ:
- ᠰᠠᠷᠵᠢ ᠮᠢᠨᠦ ᠪᠦᠰᠡᠭᠦᠢ ᠪᠢᠰᠢ ᠰᠢᠦ᠂ ᠲᠡᠷᠡ ᠶᠠᠭᠠᠬᠢᠵᠤ ᠪᠣᠯᠳᠠᠭ ᠶᠤᠮ? ᠴᠢ ᠮᠢᠨᠦ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠤ᠋ ᠲᠡᠷᠯᠢᠭ ᠦ᠋ᠨ ᠥᠩᠭᠡ ᠶ᠋ᠢ ᠬᠠᠷᠠᠵᠤ ᠪᠠᠢᠭᠠ ᠪᠢᠵᠡ ᠳᠡ ? ᠲᠡᠷᠡ ᠵᠥᠪᠬᠡᠨ ᠵᠠᠷᠤᠴᠠ ᠪᠣᠯᠤᠨ ᠥᠬᠢᠨ ᠳᠡᠭᠦᠦ ᠶ᠋ᠢᠨ ᠬᠤᠪᠢ ᠪᠠᠷ ᠮᠢᠨᠦ ᠭᠡᠷ ᠲᠦ᠍ ᠠᠮᠢᠳᠤᠷᠠᠵᠤ ᠪᠠᠢᠭᠠ ᠶᠤᠮ ᠭᠡᠵᠦ ᠰᠡᠭᠦᠯᠴᠢ ᠶ᠋ᠢᠨ ᠪᠠᠳᠠᠭ ᠦᠭᠡ ᠪᠡᠨ ᠪᠤᠷᠤᠭᠤ ᠪᠠᠨ ᠮᠡᠳᠡᠵᠦ ᠪᠠᠢᠭᠠ ᠮᠡᠲᠦ ᠳᠣᠣᠷᠠ ᠳᠠᠭᠤ ᠪᠠᠷ ᠬᠡᠯᠡᠯᠡ᠃ ᠲᠡᠭᠡᠭᠡᠳ ᠭᠦᠨ ᠪᠣᠳᠣᠯᠭᠠᠰᠢᠷᠠᠯ ᠳ᠋ᠠᠭᠠᠨ ᠠᠪᠲᠠᠨ ᠰᠠᠭᠤᠪᠠ᠃
- ᠲᠡᠭᠡᠭᠡᠳ ᠴᠢ ᠣᠳᠣ ᠰᠦᠮᠡ ᠳ᠋ᠡᠭᠡᠨ ᠪᠤᠴᠠᠨᠠ ᠭᠡᠵᠦ ᠪᠠᠢᠨᠠ ᠤᠤ ? ᠴᠢᠮᠠ ᠲᠠᠢ ᠪᠢ ᠠᠬᠢᠭᠠᠳ ᠠᠭᠤᠯᠵᠠᠬᠤ ᠡᠰᠡᠬᠦ ᠶ᠋ᠢ ᠬᠡᠨ ᠮᠡᠳᠡᠨᠡ ᠳᠠ᠂ ᠨᠠᠳᠠ ᠳ᠋ᠤ᠌ ᠠᠮᠢᠳᠤᠷᠠᠯ ᠡᠴᠡ ᠪᠡᠨ ᠶᠠᠷᠢᠵᠤ ᠥᠭᠭᠦᠭᠡᠴᠢ ᠳᠡ !
- ᠣᠷᠣᠰ ᠲᠤ᠌ ᠬᠠᠭᠠᠭᠳᠠᠵᠤ ᠪᠠᠢᠭᠰᠠᠨ ᠶᠡᠬᠡ ᠯᠠᠮᠠ ᠶ᠋ᠢᠨ ᠠᠮᠢᠳᠤ ᠪᠠᠢᠭᠠ ᠡᠰᠡᠬᠦ ᠶ᠋ᠢ ᠦᠵᠡᠬᠦ ᠪᠡᠷ ᠪᠢ ᠬᠣᠶᠠᠷ ᠤᠳᠠᠭᠠ ᠰᠠᠨᠲ ᠫᠸᠲ᠋ᠸᠪᠦ᠋ᠷᠡᠭ ᠬᠦᠷᠦᠭᠰᠡᠨ ᠶᠦᠮ ᠭᠡᠯᠡ᠃
ᠡᠨᠡ ᠦᠯᠢᠭᠡᠷ ᠢ᠋ ᠪᠢ ᠪᠠᠷᠤᠭ ᠯᠠ ᠴᠡᠭᠡᠵᠢᠯᠡᠬᠦ ᠰᠢᠬᠠᠵᠤ ᠪᠠᠢᠨᠠ᠃ ᠷᠠᠰᠢ ᠣᠯᠠᠨ ᠤᠳᠠᠭᠠ ᠡᠭᠦᠨ ᠢ᠋ ᠶᠠᠷᠢᠵᠤ ᠥᠩᠭᠡᠷᠡᠭᠰᠡᠨ ᠶᠦᠮ᠃ ᠥᠪᠡᠷ ᠦ᠋ᠨ ᠨᠡᠷᠡᠯᠬᠡᠦ ᠰᠡᠳᠬᠢᠯ ᠡᠴᠡ ᠪᠣᠯᠤᠭᠰᠠᠨ ᠪᠤᠶᠤ ᠲᠡᠷᠡ ᠦᠶᠡ ᠳ᠋ᠦ᠍ ᠣᠷᠣᠰ ᠤ᠋ᠨ ᠨᠡᠢᠰᠯᠡᠯ ᠳ᠋ᠦ᠍ ᠠᠶᠠᠯᠠᠨ ᠬᠦᠷᠬᠦ ᠨᠢ ᠦᠨᠡᠨ ᠲᠣᠮᠣ ᠤᠴᠢᠷ ᠪᠠᠢᠭᠰᠠᠨ ᠪᠠᠢᠵᠤ ᠴᠤ᠌ ᠮᠡᠳᠡᠨᠡ᠃
- ᠥᠨᠥᠳᠥᠷ ᠪᠠᠬᠠᠨ ᠣᠨᠳᠣᠣ ᠶᠠᠭᠤᠮᠠ ᠶᠠᠷᠢᠵᠤ ᠪᠣᠯᠤᠨᠠ ᠰᠢᠦ ᠭᠡᠵᠦ ᠪᠢ ᠲᠡᠭᠦᠨ ᠦ᠌ ᠶᠠᠷᠢᠶᠠ ᠶ᠋ᠢ ᠲᠠᠰᠤᠯᠤᠭᠠᠳ:
- ᠴᠢ ᠬᠠᠮᠢᠭᠠ ᠴᠢᠨᠦ ᠵᠠᠷᠤᠴᠠ ᠰᠠᠷᠵᠢ ᠲᠠᠢ ᠠᠭᠤᠯᠵᠠᠭᠰᠠᠨ ᠪᠣᠢ ? ᠭᠡᠵᠦ ᠠᠰᠠᠭᠤᠯᠠ᠃
ᠷᠠᠰᠢ ᠨᠠᠮᠠᠶ᠋ᠢ ᠢᠲᠡᠭᠡᠬᠦ ᠦᠭᠡᠢ ᠮᠡᠲᠦ ᠨᠡᠯᠢᠶᠡᠳ ᠤᠳᠠᠭᠠᠨ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠤᠴᠠᠨ ᠢᠨᠢᠶᠡᠮᠰᠦᠭᠯᠡᠭᠡᠳ:
- ᠬᠣᠩᠭᠣᠷ ᠣᠳᠣ ᠤᠳᠠᠯ ᠦᠭᠡᠢ ᠠᠷᠪᠠᠨ ᠬᠣᠶᠠᠷ ᠵᠢᠯ ᠦ᠋ᠨ ᠡᠮᠦᠨᠡᠬᠢ ᠰᠠᠷᠵᠢ ᠶ᠋ᠢᠨ ᠠᠪᠤ ᠶ᠋ᠢᠨ ᠬᠢᠨ ᠳ᠋ᠦ᠍ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠵᠤ ᠪᠠᠢᠭᠰᠠᠨ ᠰᠢᠭ᠋ ᠰᠡᠷᠭᠦᠯᠡᠩ ᠮᠥᠷᠲᠡᠭᠡᠨ ᠬᠥᠭᠡᠷᠦᠬᠦᠨ ᠬᠡᠦᠬᠡᠨ ᠪᠣᠯᠤᠨᠠ ᠠ᠋᠃ ᠬᠣᠩᠭᠣᠷ ᠴᠢᠨᠢ ᠮᠢᠨᠦ ᠥᠬᠢᠨ ᠰᠢᠦ ! ᠨᠢᠭᠡ ᠬᠦᠦ ᠲᠡᠢ ᠪᠣᠯᠤᠶᠠ ᠭᠡᠵᠦ ᠲᠡᠷᠡ ᠦᠶᠡ ᠳ᠋ᠦ᠍ ᠪᠢ ᠦᠨᠡᠨ ᠳ᠋ᠡᠭᠡᠨ ᠶᠡᠬᠡ ᠬᠦᠰᠡᠵᠦ ᠪᠠᠢᠭᠰᠠᠨ ᠶᠤᠮ ᠭᠡᠵᠦ ᠣᠮᠣᠭᠰᠢᠯᠲᠠᠢ ᠮᠥᠷᠲᠡᠭᠡᠨ ᠢᠴᠢᠭᠰᠡᠨ ᠮᠡᠲᠦ ᠶᠠᠷᠢᠪᠠ᠃
ᠪᠢ ᠠᠪᠴᠤ ᠶᠠᠪᠤᠵᠤ ᠪᠠᠢᠭᠠ ᠠᠷᠢᠬᠢᠨ ᠠ᠋ᠴᠠ ᠷᠠᠰᠢ ᠳ᠋ᠤ᠌ ᠨᠢᠭᠡ ᠪᠠᠯᠭᠤ ᠥᠭᠭᠦᠭᠡᠳ ᠨᠡᠩ ᠣᠯᠠᠨ ᠢ᠋ ᠰᠣᠨᠣᠰᠤᠨᠠ ᠭᠡᠮᠡᠨ ᠣᠷᠣᠯᠳᠣᠯᠠ᠃
- ᠬᠠᠷᠠᠭᠠ ᠦᠭᠡᠢ ᠤᠤ ? ᠮᠥᠨ ᠡᠨᠡ ᠠᠷᠢᠬᠢ ᠶ᠋ᠢ ᠤᠤᠭᠤᠬᠤ ᠨᠢ ᠪᠤᠷᠤᠭᠤ ᠮᠡᠲᠦ ᠲᠡᠷᠡ ᠦᠶᠡ ᠳ᠋ᠦ᠍ ᠰᠠᠷᠵᠢ ᠶ᠋ᠢᠨ ᠠᠪᠤ ᠶ᠋ᠢᠨ ᠬᠢᠨ ᠳ᠋ᠦ᠍ ᠨᠢᠭᠡ ᠬᠣᠨᠣᠭ ᠠ᠋ᠴᠠ ᠢᠯᠡᠭᠦᠦ ᠬᠣᠨᠣᠭᠯᠠᠬᠤ ᠦᠭᠡᠢ ᠪᠠᠢᠭᠰᠠᠨ ᠪᠣᠯ ᠲᠠᠭᠠᠷᠠᠬᠤ ᠶᠤᠮᠰᠠᠨ᠃
ᠷᠠᠰᠢ ᠠᠶᠠᠭᠠᠨ ᠳ᠋ᠠᠬᠢ ᠦᠯᠡᠳᠡᠪᠦᠷᠢ ᠪᠡᠨ ᠰᠣᠷᠣᠨ ᠵᠠᠯᠭᠢᠵᠤ᠂ ᠴᠢᠷᠠᠢ ᠪᠠᠨ ᠦᠷᠴᠢᠢᠯᠭᠡᠭᠰᠡᠨ ᠢ᠋ᠶ᠋ᠡᠨ ᠵᠠᠯᠭᠠᠵᠤ ᠥᠩᠭᠡᠷᠡᠯᠲᠡ ᠪᠡᠨ ᠬᠡᠯᠡᠯᠡ᠃
- ᠲᠡᠷᠡ ᠦᠶᠡ ᠳ᠋ᠦ᠍ ᠪᠢ ᠵᠠᠯᠠᠭᠤ ᠪᠠᠢᠭᠰᠠᠨ᠂ ᠰᠠᠷᠵᠢ ᠴᠤ᠌ ᠭᠣᠶᠣ ᠰᠠᠢᠬᠠᠨ ᠬᠡᠦᠬᠡᠨ ᠪᠠᠢᠭᠰᠠᠨ ᠶᠤᠮ᠃ ᠪᠢ ᠰᠠᠨᠲ ᠫᠸᠲ᠋ᠸᠪᠦ᠋ᠷᠡᠭ ᠦ᠋ᠨ ᠬᠣᠯᠠ ᠠᠶᠠᠯᠠᠯ ᠠ᠋ᠴᠠ ᠪᠤᠴᠠᠵᠤ ᠢᠷᠡᠭᠰᠡᠨ ᠦᠶᠡ ᠳ᠋ᠦ᠍ ᠪᠠᠢᠭᠰᠠᠨ ᠰᠠᠨ᠃ ᠰᠠᠷᠵᠢ ᠶ᠋ᠢᠨ ᠦᠵᠡᠰᠬᠦᠯᠡᠩ ᠴᠣᠪᠣᠭᠣᠯᠢᠭ ᠨᠢ ᠶᠠᠭ ᠯᠠ ᠬᠣᠩᠭᠣᠷ ᠰᠢᠭ᠋ ᠪᠠᠢᠭᠰᠠᠨ᠂ ᠵᠥᠪᠬᠡᠨ ᠨᠠᠰᠤ ᠨᠢ ᠪᠠᠬᠠᠨ ᠶᠡᠬᠡ ᠲᠡᠳᠦᠢ᠃ ᠪᠢ ᠪᠤᠷᠬᠠᠨ ᠤ᠋ ᠡᠮᠦᠨᠡ ᠡᠷᠭᠦᠭᠰᠡᠨ ᠲᠠᠩᠭᠠᠷᠢᠭ ᠢ᠋ᠶ᠋ᠠᠨ ᠮᠠᠷᠲᠠᠵᠤ᠂ ᠲᠡᠳᠡᠨ ᠦ᠌ ᠳ᠋ᠦ᠍ ᠣᠯᠠᠨ ᠬᠣᠨᠣᠭ ᠰᠠᠭᠤᠪᠠ᠃ ᠬᠡᠳᠦᠢᠪᠡᠷ ᠡᠷᠡ ᠬᠥᠮᠦᠨ ᠦ᠌ ᠠᠵᠢᠯ ᠪᠢᠰᠢ ᠪᠣᠯᠪᠠᠴᠤ ᠡᠳᠦᠷ ᠲᠤᠵᠢ ᠪᠢ ᠰᠠᠷᠵᠢ ᠶ᠋ᠢ ᠬᠠᠪᠰᠤᠷᠤᠨ ᠬᠥᠳᠡᠭᠡ ᠭᠠᠳᠠᠨᠠᠬᠢ ᠠᠵᠢᠯ ᠢ᠋ ᠨᠢ ᠬᠢᠵᠦ᠂ ᠰᠥᠨᠢ ᠳ᠋ᠡᠭᠡᠨ ᠲᠡᠳᠡᠨ ᠦ᠌ ᠴᠣᠷ ᠤ᠋ᠨ ᠭᠠᠭᠴᠠᠬᠠᠨ ᠭᠡᠷ ᠲᠦ᠍ ᠨᠢ ᠠᠪᠤ ᠡᠵᠢ᠂ ᠰᠠᠷᠵᠢ ᠪᠢᠳᠡᠨ ᠳᠥᠷᠪᠡᠭᠦᠯᠡ ᠬᠣᠨᠣᠳᠠᠭ ᠪᠠᠢᠭᠰᠠᠨ ᠶᠤᠮ᠃ ᠮᠢᠨᠦ ᠬᠠᠢᠷᠠ ᠶ᠋ᠢᠨ ᠬᠠᠷᠢᠭᠤ ᠳ᠋ᠤ᠌ ᠰᠠᠷᠵᠢ ᠥᠴᠦᠬᠡᠨ ᠴᠦ᠍ ᠠᠵᠢᠭ ᠮᠡᠳᠡᠭᠳᠡᠬᠦ ᠦᠭᠡᠢ ᠪᠠᠢᠯᠠ᠃ ᠨᠢᠭᠡᠨ ᠰᠥᠨᠢ ᠪᠢ ᠲᠡᠭᠦᠨ ᠦ᠌ ᠭᠠᠷ ᠪᠣᠯᠤᠨ ᠬᠠᠴᠠᠷ ᠢ᠋ ᠨᠢ ᠢᠯᠢᠬᠦ ᠭᠡᠮᠡᠨ ᠣᠷᠣᠯᠳᠣᠭᠰᠠᠨ ᠳ᠋ᠤ᠌ ᠲᠡᠷᠡ ᠠᠭᠤᠷᠯᠠᠨ ᠵᠠᠩᠨᠠᠭᠰᠠᠨ ᠪᠥᠭᠡᠳ ᠴᠠᠭᠠᠰᠢ ᠪᠠᠨ ᠬᠠᠨᠳᠤᠵᠤ ᠬᠡᠪᠲᠡᠪᠡ᠃ ᠡᠨᠡ ᠦᠶᠡ ᠳ᠋ᠦ᠍ ᠲᠡᠭᠦᠨ ᠦ᠌ ᠡᠵᠢ ᠠᠪᠤ ᠨᠢ ᠬᠥᠨᠵᠢᠯᠡ ᠪᠡᠷ ᠢ᠋ᠶ᠋ᠡᠨ ᠲᠣᠯᠣᠭᠠᠢ ᠪᠠᠨ ᠪᠦᠲᠡᠭᠡᠵᠦ᠂ ᠨᠠᠳᠠ ᠵᠣᠷᠢᠭ ᠣᠷᠣᠭᠤᠯᠵᠤ ᠪᠠᠢᠯᠠ᠃ ᠬᠡᠳᠦᠢᠪᠡᠷ ᠨᠢᠭᠡ ᠤᠳᠠᠭᠠᠨ ᠤ᠋ ᠡᠰᠡᠷᠭᠦᠴᠡᠯ ᠳ᠋ᠦ᠍ ᠤᠴᠠᠷᠠᠭᠰᠠᠨ ᠪᠣᠯᠪᠠᠴᠤ ᠨᠠᠳᠠ ᠳ᠋ᠤ᠌ ᠠᠳᠠ ᠠ᠋ᠴᠠ ᠠᠶᠠᠷᠯᠠᠬᠤ ᠵᠣᠷᠢᠭ ᠢ᠋ ᠣᠯᠭᠣᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠶᠦᠮ᠃ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠡᠵᠢ ᠳ᠋ᠦ᠍ᠨᠢ ᠪᠢ ᠵᠣᠪᠠᠯᠠᠩ ᠢ᠋ᠶ᠋ᠠᠨ ᠲᠣᠭᠠᠯᠠᠵᠤ: 《ᠲᠠ ᠴᠦ᠍ ᠬᠥᠮᠦᠨ ᠳ᠋ᠦ᠍ ᠨᠠᠢᠷᠰᠠᠭ ᠪᠤᠰᠤ ᠨᠢᠭᠡ ᠥᠬᠢᠨ ᠲᠡᠢ ᠶᠦᠮ ᠠ᠋᠂ ᠲᠠ ᠲᠡᠭᠦᠨ ᠳ᠋ᠦ᠍ ᠵᠣᠴᠢᠨ ᠳ᠋ᠠᠭᠠᠨ ᠬᠠᠯᠠᠭᠤᠮᠰᠤᠭ ᠰᠠᠢᠬᠠᠨ ᠪᠠᠢᠭᠠᠴᠢ ᠭᠡᠵᠦ ᠵᠠᠬᠢᠵᠤ ᠪᠠᠢᠭᠠᠷᠠᠢ! 》 ᠭᠡᠰᠡᠨ ᠳ᠋ᠦ᠍ ᠬᠥᠭᠰᠢᠨ ᠬᠠᠳᠠᠭᠠᠨᠠᠲᠠᠯᠠ ᠪᠠᠨ ᠢᠨᠢᠶᠡᠭᠡᠳ: 《ᠲᠡᠭᠡᠪᠡᠯ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠲᠡᠭᠦᠨ ᠳ᠋ᠦ᠍ ᠬᠡᠯᠡᠳᠡᠭ ᠪᠢᠵᠡ ᠳᠡ᠃ ᠴᠢ ᠴᠢᠨᠢ ᠲᠡᠭᠡᠭᠡᠳ ᠡᠷᠡ ᠬᠥᠮᠦᠨ ᠮᠥᠷᠲᠡᠭᠡᠨ ᠯᠠᠮᠠ ᠬᠤᠪᠴᠠᠰᠤ ᠲᠠᠢ ᠪᠠᠢᠭᠠ ᠪᠢᠰᠢ ᠶᠦᠮ ᠤᠤ ? 》 ᠭᠡᠯᠡ᠃ ᠢᠩᠭᠢᠭᠡᠳ ᠪᠢ ᠰᠦᠮᠡ ᠳ᠋ᠦ᠍ ᠪᠤᠴᠠᠬᠤ ᠪᠠᠨ ᠪᠣᠯᠢᠭᠠᠳ ᠰᠠᠷᠵᠢ ᠲᠠᠢ ᠬᠠᠮᠲᠤ ᠪᠠᠢᠬᠤ ᠪᠣᠯᠤᠭᠰᠠᠨ ᠶᠤᠮ᠃ ᠲᠡᠷᠡ ᠮᠢᠨᠦ ᠬᠠᠢᠷᠠ ᠶ᠋ᠢ ᠬᠦᠯᠢᠶᠡᠨ ᠠᠪᠲᠠᠯᠠ ᠪᠠᠰᠠ ᠨᠡᠯᠢᠶᠡᠳ ᠤᠳᠠᠭᠰᠠᠨ ᠪᠥᠭᠡᠳ ᠲᠡᠭᠦᠨ ᠡᠴᠡ ᠬᠣᠢᠰᠢ ᠪᠢᠳᠡ ᠭᠤᠷᠪᠠᠨ ᠵᠢᠯ ᠵᠢᠷᠭᠠᠯᠲᠠᠢ ᠰᠠᠢᠬᠠᠨ ᠠᠮᠢᠳᠤᠷᠠᠭᠰᠠᠨ ᠪᠢᠯᠡ᠃ ᠪᠢ ᠮᠥᠨ ᠯᠠᠮᠠ ᠪᠠᠷ ᠢ᠋ᠶ᠋ᠠᠨ ᠪᠠᠢᠵᠤ᠂ ᠪᠢᠳᠡ ᠬᠤᠷᠢᠮ ᠬᠢᠭᠰᠡᠨ ᠦᠭᠡᠢ᠃ ᠭᠡᠬᠦ ᠳ᠋ᠦ᠍ ᠪᠢᠳᠡ ᠡᠨᠡ ᠵᠢᠷᠭᠠᠯᠲᠠᠢ ᠰᠠᠢᠬᠠᠨ ᠠᠮᠢᠳᠤᠷᠠᠯ ᠪᠠ ᠬᠤᠪᠢ ᠵᠠᠶᠠᠭᠠᠨ ᠳ᠋ᠠᠭᠠᠨ ᠰᠡᠳᠬᠢᠯ ᠬᠠᠨᠤᠮᠵᠢᠲᠠᠢ ᠪᠠᠢᠵᠤ᠂ ᠬᠣᠩᠭᠣᠷ ᠶᠠᠭ ᠡᠨᠡ ᠰᠠᠢᠬᠠᠨ ᠴᠠᠭ ᠦᠶᠡ ᠳ᠋ᠦ᠍ ᠶᠢᠷᠲᠢᠨᠴᠦ ᠳ᠋ᠦ᠍ ᠬᠦᠷᠴᠦ ᠢᠷᠡᠭᠰᠡᠨ ᠶᠦᠮ᠃ ᠲᠡᠭᠡᠭᠡᠳ ᠯᠡ ᠬᠥᠭᠰᠢᠴᠦᠦᠯ ᠤᠷᠢᠳ ᠬᠣᠵᠢᠳ ᠪᠤᠷᠬᠠᠨ ᠪᠤᠯᠵᠠᠭᠠᠵᠤ ᠂ ᠪᠣᠯᠱᠧᠸᠢᠭ ᠨᠠᠮ ᠤ᠋ᠨ ᠬᠢᠨ ᠬᠦᠷᠴᠦ ᠢᠷᠡᠯᠡ᠃ ᠲᠡᠭᠡᠭᠡᠳ ᠶᠡᠬᠡ ᠬᠦᠷᠢᠶᠡ ᠳ᠋ᠦ᠍ ᠪᠠᠢᠭᠰᠠᠨ ᠪᠣᠭᠳᠠ ᠬᠤᠲᠤᠭᠲᠤ ᠶ᠋ᠢᠨ ᠬᠣᠣᠷᠯᠠᠭᠳᠠᠭᠰᠠᠨ ᠬᠤᠪᠢ ᠵᠠᠶᠠᠭᠠ ᠲᠠᠢ ᠠᠳᠠᠯᠢ ᠪᠣᠯᠬᠤ ᠠ᠋ᠴᠠ ᠡᠮᠢᠶᠡᠨ ᠪᠢᠳᠡ ᠳᠦᠷᠪᠡᠭᠰᠡᠨ ᠶᠦᠮ ᠭᠡᠯᠡ᠃
ᠷᠠᠰᠢ ᠴᠠᠢ ᠶ᠋ᠢᠨ ᠳᠡᠪᠦᠷᠡ ᠶ᠋ᠢ ᠡᠷᠭᠦᠨ ᠠᠪᠴᠤ ᠠᠶᠠᠭᠠ ᠪᠠᠨ ᠳᠦᠭᠦᠷᠭᠡᠭᠡᠳ᠂ ᠲᠠᠮᠠᠬᠢ ᠪᠠᠨ ᠨᠣᠴᠣᠭᠠᠵᠤ ᠠᠪᠤᠭᠰᠠᠨ ᠢ᠋ᠶ᠋ᠠᠨ ᠦᠷᠭᠦᠯᠵᠢᠯᠡᠨ ᠶᠠᠷᠢᠯᠠ:
- ᠪᠢᠳᠡ ᠰᠡᠳᠬᠢᠯ ᠥᠶᠥᠭ ᠡᠩᠬᠡ ᠲᠠᠢᠪᠤᠩ ᠠᠮᠢᠳᠤᠷᠠᠵᠤ ᠪᠠᠢᠭᠰᠠᠨ᠃ ᠭᠡᠬᠦ ᠳ᠋ᠦ᠍ ᠥᠨᠢᠷ ᠰᠠᠢᠬᠠᠨ ᠠᠮᠢᠳᠤᠷᠠᠯ ᠮᠢᠨᠢ ᠡᠪᠳᠡᠭᠳᠡᠵᠦ᠂ ᠠᠳᠠ ᠴᠢᠳᠬᠥᠷ ᠮᠢᠨᠦ ᠬᠣᠢᠨᠠ ᠠ᠋ᠴᠠ ᠬᠥᠭᠡᠭᠡᠴᠡᠯᠳᠦᠨ ᠪᠠᠢᠪᠠ᠃ ᠲᠡᠳᠡ ᠠᠳᠤᠭᠤ ᠶ᠋ᠢ ᠮᠢᠨᠢ ᠡᠪᠡᠳᠴᠢᠯᠡᠭᠦᠯᠵᠦ᠂ ᠲᠠᠪᠤᠬᠠᠨ ᠲᠡᠮᠡᠭᠡ ᠠᠮᠢᠳᠤ ᠦᠯᠡᠳᠡᠭᠰᠡᠨ ᠪᠥᠭᠡᠳ ᠲᠡᠭᠦᠨ ᠡᠴᠡ ᠬᠣᠶᠠᠷ ᠨᠢ ᠪᠠᠰᠠ ᠤᠳᠠᠯ ᠦᠭᠡᠢ ᠦᠬᠦᠬᠦ ᠪᠡᠷ ᠪᠠᠢᠨᠠ᠃ ᠪᠢ ᠵᠠᠪᠠᠯ ᠪᠦᠬᠦ ᠶᠠᠭᠤᠮᠠ ᠪᠠᠨ ᠣᠷᠬᠢᠵᠤ᠂ ᠶᠠᠳᠠᠭᠤ ᠨᠢᠴᠦᠭᠦᠨ ᠢ᠋ᠶ᠋ᠡᠷ ᠪᠠᠳᠢᠷᠴᠢᠯᠠᠨ ᠮᠥᠷᠭᠥᠯ ᠳ᠋ᠦ᠍ ᠮᠣᠷᠳᠠᠬᠤ ᠬᠡᠷᠡᠭᠲᠡᠢ᠃
ᠠᠯᠢᠶᠠ ᠳᠡᠭᠵᠢᠨ ᠨᠢᠳᠦ ᠲᠡᠢ ᠵᠢᠭᠠᠯ ᠬᠣᠩᠭᠣᠷ ᠭᠡᠷ ᠲᠦ᠍ ᠰᠡᠮᠡᠭᠡᠷᠬᠡᠨ ᠣᠷᠣᠵᠤ ᠢᠷᠡᠪᠡ᠃ ᠲᠡᠷᠡ ᠷᠠᠰᠢ ᠪᠢᠳᠡ ᠬᠣᠶᠠᠷ ᠤ᠋ᠨ ᠳᠤᠮᠳᠠ ᠰᠠᠭᠤᠵᠤ᠂ ᠤᠳᠠᠬᠤ ᠦᠭᠡᠢ ᠤᠳᠠᠬᠤ ᠦᠭᠡᠢ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠴᠢᠬᠢᠨ ᠡᠴᠡ ᠪᠤᠶᠤ ᠮᠢᠨᠦ ᠠᠷᠠᠰᠤᠨ ᠳᠡᠪᠡᠯ ᠡᠴᠡ ᠲᠠᠲᠠᠵᠤ ᠪᠠᠢᠪᠠ᠃ ᠷᠠᠰᠢ ᠬᠠᠢᠷᠠ ᠪᠢᠯᠬᠠᠭᠰᠠᠨ ᠨᠢᠳᠦ ᠪᠡᠷ ᠬᠣᠩᠭᠣᠷ ᠢ᠋ ᠬᠠᠷᠠᠬᠤ ᠶ᠋ᠢᠨ ᠳᠠᠭᠠᠤ ᠭᠢᠯᠲᠦᠭᠡᠨᠡᠭᠰᠡᠨ ᠬᠦ ᠬᠠᠷᠠ ᠭᠡᠵᠢᠭᠡ ᠶ᠋ᠢ ᠨᠢ ᠢᠯᠪᠢᠵᠦ ᠪᠠᠢᠯᠠ᠃ ᠪᠢᠳᠡᠨ ᠦ᠌ ᠨᠢᠭᠡᠨ ᠵᠡᠷᠭᠡ ᠳᠤᠭᠤᠢ ᠪᠠᠢᠭᠰᠠᠨ ᠡᠨᠡ ᠬᠣᠷᠣᠮ ᠳ᠋ᠤ᠌ ᠭᠡᠷ ᠦ᠋ᠨ ᠡᠵᠡᠨ ᠦ᠌ ᠨᠢᠭᠤᠷ ᠴᠢᠷᠠᠢ ᠳ᠋ᠠᠬᠢ ᠭᠤᠨᠢᠭ ᠵᠣᠪᠠᠯᠠᠩ ᠨᠢ ᠪᠦᠷᠢᠮᠦᠰᠦᠨ ᠠᠷᠢᠯᠵᠤ᠂ ᠪᠠᠶᠠᠷ ᠪᠠᠶᠠᠰᠤᠯ ᠲᠣᠳᠣᠷᠠᠯᠠ᠃ ᠷᠠᠰᠢ ᠬᠡᠦᠬᠡᠳ ᠲᠡᠢ ᠪᠡᠨ ᠢᠨᠢᠶᠡᠯᠳᠦᠨ ᠲᠣᠭᠯᠠᠵᠤ᠂ ᠬᠣᠩᠭᠣᠷ ᠢ᠋ᠶ᠋ᠠᠷ ᠲᠡᠭᠦᠨ ᠦ᠌ ᠬᠠᠮᠠᠷ᠂ ᠤᠷᠤᠭᠤᠯ ᠵᠢᠴᠢ ᠲᠣᠭᠠᠲᠠᠢ ᠬᠡᠳᠦᠨ ᠰᠠᠬᠠᠯ ᠢ᠋ᠶ᠋ᠠᠨ ᠪᠠᠷᠢᠭᠤᠯᠵᠤ ᠯᠠ ᠪᠠᠢᠪᠠ᠃ ᠲᠡᠭᠡᠭᠡᠳ ᠬᠣᠩᠭᠣᠷ ᠨᠠᠳᠠ ᠤᠷᠤᠭᠤ ᠣᠢᠷᠠᠳᠴᠤ:
- ᠴᠢ ᠬᠡᠳᠦᠢ ᠲᠡᠮᠡᠭᠡ ᠲᠡᠢ ᠶᠦᠮ ᠪᠣᠢ ? ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠷᠠᠰᠢ ᠪᠢᠳᠡ ᠬᠣᠶᠠᠭᠤᠯᠠ ᠬᠠᠳᠠᠭᠠᠨᠠᠲᠠᠯᠠ ᠪᠠᠨ ᠢᠨᠢᠶᠡᠯᠳᠦᠪᠡ᠃
- ᠴᠢ ᠲᠡᠭᠡᠪᠡᠯ ᠬᠡᠳᠦᠢ ᠬᠣᠨᠢ ᠲᠠᠢ ᠶᠤᠮ ᠪᠣᠢ ? ᠭᠡᠵᠦ ᠠᠬᠢᠨ ᠯᠠᠪᠯᠠᠪᠠ᠃
- ᠪᠠᠢᠬᠤ ᠦᠭᠡᠢ᠃
- ᠲᠡᠭᠡᠪᠡᠯ ᠴᠢ ᠯᠠᠪ ᠶᠡᠬᠡ ᠣᠯᠠᠨ ᠰᠠᠢᠬᠠᠨ ᠮᠣᠷᠢ ᠲᠠᠢ ᠪᠢᠵᠡ ?
- ᠪᠢ ᠴᠢᠨᠢ ᠶᠡᠬᠡ ᠶᠠᠳᠠᠭᠤ ᠰᠢᠦ᠂ ᠲᠠᠨ ᠤ᠋ ᠳ᠋ᠤ᠌ ᠢᠷᠡᠬᠦ ᠳ᠋ᠡᠭᠡᠨ ᠪᠢ ᠨᠢᠭᠡ ᠮᠣᠷᠢ ᠵᠢᠭᠡᠯᠡᠮᠡᠨᠵᠢᠨ ᠰᠠᠶᠢ ᠢᠷᠡᠵᠦ ᠳᠡᠢᠯᠦᠨᠡ ᠰᠢᠦ ᠭᠡᠵᠦ ᠪᠢ ᠬᠠᠷᠢᠭᠤᠯᠪᠠ᠃ ᠡᠨᠡ ᠥᠬᠢᠨ ᠢᠰᠡᠭᠡᠢ ᠳᠡᠭᠡᠷᠡ ᠬᠡᠪᠲᠡᠭᠡᠳ ᠢᠨᠢᠶᠡᠬᠦ ᠶ᠋ᠢᠨ ᠳᠠᠭᠠᠤ ᠨᠠᠳᠠ ᠤᠷᠤᠭᠤ ᠬᠠᠨᠳᠤᠨ:
- ᠪᠢ ᠴᠢᠮᠠᠶ᠋ᠢ ᠶᠡᠬᠡ ᠪᠠᠶᠠᠨ ᠬᠥᠮᠦᠨ ᠭᠡᠳᠡᠭ ᠢ᠋ ᠮᠡᠳᠡᠨᠡ᠃ ᠴᠢ ᠲᠡᠭᠡᠭᠡᠳ ᠣᠳᠣ ᠨᠠᠳᠠ ᠪᠡᠭᠡᠵᠢᠩ ᠳ᠋ᠦ᠍ ᠬᠡᠳᠦᠨ ᠬᠡᠦᠬᠡᠳ ᠲᠡᠢ ᠪᠠᠢᠭᠠ ᠪᠠᠨ ᠦᠨᠡᠨ ᠢ᠋ᠶ᠋ᠡᠷ ᠨᠢ ᠬᠡᠯᠡᠭᠡᠴᠢ ! ᠭᠡᠯᠡ᠃
- ᠬᠡᠷᠪᠡ ᠴᠢ ᠨᠠᠳᠠ ᠲᠠᠢ ᠴᠣᠭ ᠶᠠᠪᠤᠬᠤ ᠳ᠋ᠤ᠌ ᠬᠦᠷᠪᠡᠯ ᠴᠢ ᠮᠢᠨᠦ ᠴᠣᠷ ᠤ᠋ᠨ ᠭᠠᠭᠴᠠ ᠥᠬᠢᠨ ᠪᠣᠯᠤᠨᠠ ᠳᠠ᠃
- ᠦᠭᠡᠢ᠂ ᠦᠭᠡᠢ ! ᠴᠢ ᠬᠡᠷᠪᠡ ᠲᠡᠮᠡᠭᠡ ᠬᠣᠨᠢ ᠠᠳᠤᠭᠤ ᠦᠭᠡᠢ ᠶᠦᠮ ᠪᠣᠯ ᠪᠢ ᠴᠦ᠍ ᠴᠢᠨᠦ ᠥᠬᠢᠨ ᠪᠣᠯᠬᠤ ᠦᠭᠡᠢ ᠭᠡᠵᠦ ᠬᠣᠩᠭᠣᠷ ᠵᠢᠵᠢᠭᠬᠡᠨ ᠬᠥᠯ ᠢ᠋ᠶ᠋ᠡᠨ ᠢᠰᠬᠦᠴᠢᠨ ᠬᠡᠯᠡᠪᠡ᠃ ᠷᠠᠰᠢ ᠲᠡᠭᠦᠨ ᠢ᠋ ᠶᠣᠰᠣ ᠦᠭᠡᠢ ᠭᠡᠮᠡᠨ ᠵᠢᠮᠡᠯᠡᠭᠡᠳ᠂ ᠪᠡᠶᠡ ᠳ᠋ᠡᠭᠡᠨ ᠲᠡᠳᠡᠨ ᠠᠪᠠᠴᠢᠵᠤ᠂ ᠬᠠᠴᠠᠷ ᠢ᠋ ᠨᠢ ᠢᠯᠪᠢᠨ ᠬᠠᠢᠷᠠᠯᠠᠵᠤ ᠪᠠᠢᠪᠠ᠃
- ᠡᠵᠢ ᠨᠢ ᠭᠡᠵᠦ ᠡᠢᠮᠦ ᠯᠡ ᠬᠥᠮᠦᠨ ᠪᠠᠢᠭᠰᠠᠨ ᠶᠤᠮ ᠭᠡᠵᠦ ᠬᠡᠯᠡᠭᠡᠳ᠂ ᠰᠠᠷᠵᠢ ᠶ᠋ᠢ ᠲᠣᠮᠣ ᠢᠯᠠᠭᠠᠷ ᠲᠣᠭᠣᠭᠠ ᠪᠠᠷᠢᠨ ᠣᠷᠣᠵᠤ ᠢᠷᠡᠬᠦ ᠪᠡᠷ ᠨᠢ ᠴᠢ ᠥᠬᠢᠨ ᠳ᠋ᠡᠭᠡᠨ ᠶᠣᠰᠣᠷᠬᠠᠭ ᠳᠠᠷᠤᠤ ᠪᠠᠢᠬᠤ ᠶ᠋ᠢ ᠰᠤᠷᠭᠠᠵᠤ ᠪᠠᠢᠭᠠᠴᠢ ᠭᠡᠵᠦ ᠬᠡᠯᠡᠯᠡ᠃ ᠰᠠᠷᠵᠢ ᠨᠢᠳᠦ ᠪᠡᠨ ᠭᠠᠷ ᠳᠠᠬᠢ ᠬᠢᠵᠦ ᠪᠠᠢᠭᠠ ᠠᠵᠢᠯ ᠠ᠋ᠴᠠ ᠪᠠᠨ ᠰᠠᠯᠭᠠᠵᠤ ᠥᠬᠢᠨ ᠢ᠋ᠶ᠋ᠡᠨ ᠭᠠᠢᠬᠠᠨ ᠬᠠᠷᠠᠵᠤ ᠠᠪᠤᠭᠰᠠᠨ ᠢ᠋ᠶ᠋ᠠᠨ :《ᠬᠡᠦᠬᠡ ᠠ᠋᠂ ᠨᠠᠭᠠᠰᠢ ᠪᠠᠨ ! ᠴᠢ ᠨᠠᠳᠠ ᠬᠠᠪᠰᠤᠷᠴᠤ ᠪᠣᠯᠤᠨᠠ ᠰᠢᠦ 》ᠭᠡᠯᠡ᠃ ᠬᠣᠩᠭᠣᠷ ᠦᠰᠦᠷᠦᠨ ᠪᠣᠰᠤᠭᠠᠳ᠂ ᠬᠠᠯᠠᠭᠤᠨ ᠲᠣᠭᠣᠭᠠᠨ ᠳ᠋ᠤ᠌ ᠬᠢᠭᠰᠡᠨ ᠥᠭᠡᠬᠦ ᠶ᠋ᠢ ᠬᠤᠳᠬᠤᠵᠤ ᠡᠬᠢᠯᠡᠪᠡ᠃ ᠷᠠᠰᠢ ᠴᠤ᠌ ᠪᠣᠰᠴᠤ ᠭᠠᠷ ᠢ᠋ᠶ᠋ᠠᠨ ᠤᠬᠢᠶᠠᠭᠠᠳ᠂ ᠲᠣᠭᠣᠭᠠᠨ ᠳ᠋ᠤ᠌ ᠬᠢᠬᠦ ᠬᠣᠨᠢᠨ ᠤ᠋ ᠮᠢᠬᠠ ᠶ᠋ᠢ ᠦᠶᠡᠯᠡᠨ ᠡᠪᠳᠡᠵᠦ ᠡᠬᠢᠯᠡᠪᠡ᠃ ᠰᠠᠷᠵᠢ ᠨᠢᠭᠡ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠲᠡᠭᠦᠨ ᠢ᠋ ᠬᠠᠪᠰᠤᠷᠴᠤ᠂ ᠨᠥᠭᠦᠭᠡ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠲᠤᠯᠭᠠᠨ ᠭᠠᠯ ᠳ᠋ᠠᠭᠠᠨ ᠨᠢᠳᠦ ᠲᠠᠯᠪᠢᠵᠤ ᠪᠠᠢᠪᠠ᠃ ᠮᠢᠬᠠ ᠣᠭᠲᠣᠯᠵᠤ ᠪᠠᠢᠭᠰᠠᠨ ᠷᠠᠰᠢ ᠭᠡᠨᠡᠳᠲᠡ ᠵᠣᠭᠰᠣᠭᠠᠳ᠂ ᠬᠢᠲᠤᠭᠠ ᠪᠠᠨ ᠬᠠᠮᠢᠭᠠᠰᠢ ᠪᠠᠨ ᠬᠥᠳᠡᠯᠭᠡᠬᠦ ᠪᠡᠨ ᠪᠣᠳᠣᠯᠬᠢᠯᠠᠬᠤ ᠮᠡᠲᠦ ᠪᠣᠯᠵᠤ᠂ ᠰᠠᠷᠵᠢ ᠶ᠋ᠢ ᠬᠠᠷᠠᠭᠰᠠᠨ ᠴᠤ᠌ ᠦᠭᠡᠢ ᠡᠪ ᠡᠩ ᠦ᠋ᠨ ᠳᠠᠭᠤᠨ ᠢ᠋ᠶ᠋ᠠᠷ᠄
- ᠪᠢ ᠮᠠᠷᠭᠠᠰᠢ ᠮᠥᠷᠭᠥᠯ ᠬᠢᠬᠦ ᠪᠡᠷ ᠶᠠᠪᠤᠨᠠ ᠭᠡᠯᠡ᠃ ᠲᠤᠯᠭᠠᠨ ᠤ᠋ ᠡᠮᠦᠨᠡ ᠣᠴᠣᠢᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠰᠠᠷᠵᠢ ᠬᠣᠶᠠᠷ ᠤᠳᠠᠭᠠ ᠭᠠᠯ ᠤ᠋ᠨ ᠴᠣᠭ ᠢ᠋ ᠦᠯᠢᠶᠡᠭᠰᠡᠨ ᠢ᠋ᠶ᠋ᠡᠨ ᠦᠭᠡ ᠶᠠᠷᠢᠬᠤ ᠪᠠᠷ ᠪᠣᠰᠴᠤ ᠵᠣᠭᠰᠣᠯᠠ᠃ ᠬᠠᠷᠢᠨ ᠬᠣᠩᠭᠣᠷ ᠡᠮᠦᠨᠡ ᠨᠢ ᠭᠦᠶᠦᠨ ᠢᠷᠡᠵᠦ᠂ ᠪᠠᠶᠠᠷᠲᠠᠢ ᠪᠠᠷ ᠠᠬᠢᠨ ᠳᠠᠬᠢᠨ᠄ 《ᠪᠢᠳᠡ ᠮᠠᠷᠭᠠᠰᠢ ᠮᠥᠷᠭᠥᠯ ᠬᠢᠬᠦ ᠪᠡᠷ ᠶᠠᠪᠤᠨᠠ 》ᠭᠡᠮᠡᠨ ᠬᠡᠯᠡᠵᠦ ᠪᠠᠢᠪᠠ᠃
- ᠴᠢ ᠬᠠᠷᠢᠨ ᠨᠠᠳᠠ ᠲᠠᠢ ᠴᠣᠭ ᠪᠠᠢᠬᠤ ᠪᠣᠯᠤᠨᠠ᠃ ᠷᠠᠰᠢ ᠭᠠᠭᠴᠠ ᠪᠠᠷ ᠢ᠋ᠶ᠋ᠠᠨ ᠶᠠᠪᠤᠬᠤ ᠪᠣᠯᠤᠨᠠ ᠭᠡᠵᠦ ᠳᠤᠷᠠ ᠮᠠᠭᠤᠲᠠᠢᠬᠠᠨ ᠰᠢᠭ᠋ ᠬᠠᠲᠠᠭᠤᠬᠠᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠰᠠᠷᠵᠢ ᠠᠬᠢᠨ ᠰᠠᠢᠬᠠᠨ ᠦᠭᠡ ᠪᠡᠷ ᠥᠬᠢᠨ ᠢ᠋ᠶ᠋ᠡᠨ ᠠᠷᠭᠠᠳᠠᠭᠠᠳ ᠠᠯᠢ ᠡᠷᠲᠡᠨ ᠡᠴᠡ ᠮᠡᠳᠡᠳᠡᠭ ᠷᠠᠰᠢ ᠶ᠋ᠢᠨ ᠲᠥᠯᠥᠪᠯᠡᠭᠡ ᠳ᠋ᠦ᠍ ᠴᠢᠭᠯᠡᠭᠦᠯᠵᠦ᠄
- ᠡᠢᠮᠦ ᠤᠳᠠᠭᠠᠨ ᠪᠤᠷᠬᠠᠨ ᠢ᠋ᠶ᠋ᠠᠨ ᠳᠠᠭᠢᠭᠰᠠᠨ ᠦᠭᠡᠢ ᠰᠢᠦ ᠳᠡ᠂ ᠪᠤᠷᠬᠠᠨ ᠤ᠋ ᠥᠭᠭᠢᠶᠡᠮᠦᠷ ᠰᠡᠳᠬᠢᠯ ᠵᠢᠴᠢ ᠭᠡᠷᠡᠯ ᠭᠢᠯᠪᠠᠭᠠ ᠨᠢ ᠦᠭᠡᠢ ᠪᠣᠯᠤᠭᠰᠠᠨ ᠪᠠᠢᠬᠠ᠃ ᠴᠢ ᠲᠡᠭᠡᠭᠡᠳ ᠬᠡᠵᠢᠶᠡ ᠪᠤᠴᠠᠵᠤ ᠢᠷᠡᠨᠡ ᠪᠣᠢ ? ᠭᠡᠪᠡ᠃
- ᠲᠦᠮᠡᠨ ᠠᠮᠢᠲᠠᠨ ᠤ᠋ ᠳᠡᠭᠡᠳᠦ ᠪᠤᠷᠬᠠᠨ ᠯᠠ ᠪᠦᠬᠦᠨ ᠢ᠋ ᠮᠡᠳᠡᠨᠡ᠃ ᠪᠢ ᠤᠲᠠᠢ ᠠᠭᠤᠯᠠᠨ ᠳ᠋ᠠᠬᠢ ᠰᠦᠮᠡ ᠬᠡᠢᠳ ᠲᠦ᠍ ᠬᠦᠷᠴᠦ᠂ ᠯᠠᠮᠠ ᠶ᠋ᠢᠨ ᠶᠣᠰᠣ ᠪᠠᠷ ᠬᠠᠷᠠ ᠶᠢᠷᠲᠢᠨᠴᠦ ᠳ᠋ᠦ᠍ ᠬᠢᠭᠰᠡᠨ ᠠᠯᠢᠪᠠ ᠶᠠᠯᠠ ᠨᠢᠭᠦᠯ ᠢ᠋ᠶ᠋ᠡᠨ ᠠᠷᠢᠯᠭᠠᠵᠤ᠂ ᠬᠠᠮᠤᠭ ᠤ᠋ᠨ ᠰᠠᠢᠬᠠᠨ ᠪᠤᠷᠬᠠᠨ ᠤ᠋ ᠭᠠᠵᠠᠷ ᠪᠣᠯᠬᠤ ᠵᠢᠷᠭᠠᠯ ᠤ᠋ᠨ ᠣᠷᠣᠨ ᠳ᠋ᠤ᠌ ᠬᠦᠷᠬᠦ ᠪᠣᠯᠤᠨᠠ ᠭᠡᠵᠦ ᠲᠥᠪ ᠶᠡᠬᠡᠮᠰᠦᠭ ᠢ᠋ᠶ᠋ᠡᠷ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠱᠠᠰᠢᠨ ᠤ᠋ ᠲᠠᠩᠭᠠᠷᠢᠭ ᠢ᠋ᠶ᠋ᠠᠨ ᠶᠠᠷᠢᠵᠤ ᠭᠠᠷᠪᠠ᠃ ᠡᠳᠡᠭᠡᠷ ᠴᠢᠩ ᠦᠨᠡᠨᠴᠢ ᠦᠭᠡᠰ ᠨᠢ ᠡᠨᠡ ᠬᠦ᠌ ᠪᠠᠭᠠ ᠭᠡᠷ ᠪᠦᠯᠢ ᠳ᠋ᠦ᠍ ᠶᠣᠰᠣᠲᠠᠢ ᠯᠠ ᠬᠦᠨᠳᠦ ᠳᠠᠷᠤᠭᠠᠰᠤ ᠪᠣᠯᠤᠨ ᠪᠠᠭᠤᠵᠤ᠂ ᠬᠡᠨ ᠴᠦ᠍ ᠡᠨᠡ ᠬᠦ᠌ ᠨᠠᠮ ᠵᠢᠮ ᠪᠠᠢᠳᠠᠯ ᠢ᠋ ᠡᠪᠳᠡᠬᠦ ᠵᠣᠷᠢᠭ ᠦᠭᠡᠢ ᠪᠠᠢᠯᠠ᠃ ᠵᠢᠭᠠᠯ ᠬᠣᠩᠭᠣᠷ ᠴᠤ᠌ ᠭᠡᠳ ᠥᠪᠡᠷ ᠦ᠋ᠨ ᠭᠠᠷ ᠳᠠᠬᠢ ᠠᠵᠢᠯ ᠢ᠋ᠶ᠋ᠠᠨ ᠵᠣᠭᠰᠣᠭᠠᠭᠠᠳ᠂ ᠰᠣᠴᠢᠭᠰᠠᠨ ᠨᠢᠳᠦ ᠪᠡᠷ ᠠᠪᠤ ᠪᠠᠨ ᠪᠦᠯᠲᠡᠢᠨ ᠬᠠᠷᠠᠵᠤ ᠪᠠᠢᠪᠠ᠃
ᠡᠨᠡ ᠬᠦ᠌ ᠤᠳᠠᠯ ᠦᠭᠡᠢ ᠪᠣᠯᠬᠤ ᠭᠡᠵᠦ ᠪᠠᠢᠭᠠ ᠰᠠᠯᠤᠯᠲᠠ ᠶ᠋ᠢ ᠡᠰᠡᠷᠭᠦᠴᠡᠯ ᠦᠭᠡᠢ ᠬᠦᠯᠢᠴᠡᠨ ᠪᠠᠢᠭᠠ ᠨᠢ ᠨᠠᠮᠠᠶ᠋ᠢ ᠶᠡᠬᠡ ᠰᠣᠴᠢᠭᠠᠪᠠ᠃ ᠷᠠᠰᠢ ᠶ᠋ᠢᠨ ᠡᠨᠡ ᠬᠦ᠌ ᠰᠢᠢᠳᠪᠦᠷᠢ ᠨᠢ ᠥᠪᠡᠷ ᠲᠤᠨᠢ ᠬᠢᠷᠢ ᠵᠡᠷᠭᠡ ᠶ᠋ᠢᠨ ᠴᠢᠬᠤᠯᠠ ᠦᠷᠡ ᠳ᠋ᠦᠩ ᠠᠪᠴᠤ ᠢᠷᠡᠬᠦ ᠶ᠋ᠢ ᠰᠠᠷᠵᠢ ᠣᠢᠯᠠᠭᠠᠵᠤ ᠪᠠᠢᠭᠠ ᠶᠤᠮ᠃ ᠬᠣᠭᠣᠯᠠᠨ ᠤ᠋ ᠴᠠᠭ ᠲᠤ᠌ ᠴᠤ᠌ ᠭᠡᠳ ᠬᠦᠨᠳᠦ ᠴᠢᠬᠢᠮᠠᠢ ᠪᠠᠢᠳᠠᠯ ᠪᠦᠷᠬᠦᠭᠰᠡᠭᠡᠷ ᠪᠠᠢᠯᠠ᠃ ᠰᠠᠷᠵᠢ ᠪᠣᠯᠤᠨ ᠬᠣᠩᠭᠣᠷ ᠤᠯᠠᠮᠵᠢᠯᠠᠯᠲᠤ ᠶᠣᠰᠣ ᠵᠠᠩᠰᠢᠯ ᠢ᠋ᠶ᠋ᠠᠨ ᠪᠠᠷᠢᠮᠲᠠᠯᠠᠨ ᠪᠢᠳᠡᠨ ᠢ᠋ ᠴᠠᠳᠤᠭᠰᠠᠨ ᠤ᠋ ᠳᠠᠷᠠᠭᠠ ᠦᠯᠡᠳᠡᠭᠰᠡᠨ ᠢ᠋ ᠢᠳᠡᠬᠦ ᠪᠡᠷ ᠬᠦᠯᠢᠶᠡᠭᠰᠡᠭᠡᠷ ᠪᠠᠢᠪᠠ᠃ ᠪᠢ ᠬᠠᠶᠠ ᠬᠠᠶᠠ ᠬᠠᠪᠢᠰᠤᠨ ᠤ᠋ ᠵᠥᠭᠡᠯᠡᠨ ᠮᠢᠬᠠ ᠶ᠋ᠢ ᠬᠣᠩᠭᠣᠷ ᠲᠤ᠌ ᠣᠭᠲᠣᠯᠤᠨ ᠥᠭᠬᠦ ᠳ᠋ᠦ᠍ ᠲᠡᠷᠡ ᠪᠡᠷ ᠲᠡᠭᠦᠨ ᠢ᠋ ᠨᠢ ᠠᠮᠠᠨ ᠳ᠋ᠠᠭᠠᠨ ᠬᠦᠷᠭᠡᠯ ᠦᠭᠡᠢ ᠡᠵᠢ ᠳ᠋ᠡᠭᠡᠨ ᠳᠠᠮᠵᠢᠭᠤᠯᠤᠨ ᠥᠭᠴᠦ ᠯᠡ ᠪᠠᠢᠯᠠ᠃ ᠷᠠᠰᠢ ᠶ᠋ᠢᠨ ᠱᠠᠯᠠᠯᠭᠠ ᠳᠣᠣᠷᠠ ᠰᠠᠶᠢ ᠲᠡᠳᠡ ᠪᠢᠳᠡᠨ ᠲᠡᠢ ᠴᠣᠭ ᠬᠣᠭᠣᠯᠠᠨ ᠳ᠋ᠤ᠌ ᠣᠷᠣᠪᠠ᠃
ᠦᠳᠡᠰᠢ ᠨᠡᠯᠢᠶᠡᠳ ᠡᠷᠲᠡ ᠪᠢᠳᠡ ᠤᠨᠲᠠᠬᠤ ᠪᠠᠷ ᠬᠡᠪᠲᠡᠵᠡᠭᠡᠪᠡ᠃ ᠬᠣᠩᠭᠣᠷ ᠬᠣᠨᠢᠨ ᠬᠥᠨᠵᠢᠯᠡ ᠳ᠋ᠡᠭᠡᠨ ᠣᠷᠣᠭᠠᠳ ᠷᠠᠰᠢ ᠪᠢᠳᠡ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠬᠡᠪᠲᠡᠵᠦ᠂ ᠰᠠᠷᠵᠢ ᠶᠡᠬᠡ ᠤᠳᠠᠭᠠᠨ ᠶᠠᠭᠤᠮᠠ ᠪᠠᠨ ᠴᠡᠪᠡᠷᠯᠡᠵᠦ ᠠᠬᠤᠢᠯᠠᠪᠠ᠃ ᠰᠥᠨᠢ ᠶ᠋ᠢᠨ ᠭᠦᠨ ᠳ᠋ᠦ᠍ ᠨᠠᠮᠠᠶ᠋ᠢ ᠰᠡᠷᠡᠬᠦ ᠳ᠋ᠦ᠍ ᠲᠣᠭᠣᠨᠣ ᠪᠠᠷ ᠣᠳᠣᠳ ᠭᠢᠯᠠᠯᠵᠠᠵᠤ ᠪᠠᠢᠯᠠ᠃ ᠲᠡᠳᠡ ᠲᠠᠭ ᠴᠢᠮᠡᠭᠡ ᠦᠭᠡᠢ ᠭᠠᠳᠠᠭᠰᠢ ᠭᠠᠷᠤᠭᠰᠠᠨ ᠪᠣᠯᠤᠯᠲᠠᠢ᠂ ᠪᠢ ᠬᠠᠷᠢᠨ ᠠᠳᠠ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠤᠨᠲᠠᠵᠤ ᠪᠠᠢᠪᠠ᠃ ᠦᠦᠷ ᠦ᠋ᠨ ᠲᠤᠶᠠᠭᠠ ᠲᠠᠲᠠᠬᠤ ᠶ᠋ᠢᠨ ᠦᠶᠡᠰ ᠢ᠋ᠶ᠋ᠡᠷ ᠲᠡᠳᠡ ᠭᠤᠷᠪᠠᠭᠤᠯᠠ ᠮᠣᠷᠢᠳ ᠢ᠋ᠶ᠋ᠠᠨ ᠤᠳᠠᠭᠠᠨ ᠠᠯᠬᠤᠭᠤᠯᠤᠭᠰᠠᠭᠠᠷ ᠬᠥᠳᠡᠭᠡ ᠡᠴᠡ ᠬᠠᠷᠢᠵᠤ ᠢᠷᠡᠪᠡ᠃ ᠰᠠᠷᠵᠢ ᠨᠢᠭᠡ ᠪᠦᠯᠦᠭ ᠬᠤᠪᠴᠠᠰᠤ ᠶ᠋ᠢ ᠡᠪᠬᠡᠨ ᠪᠠᠭᠯᠠᠵᠤ᠂ ᠡᠮᠡᠭᠡᠯ ᠳᠡᠭᠡᠷᠡ ᠨᠢ ᠳᠠᠷᠤᠭᠤᠯᠪᠠ᠃ ᠡᠮᠦᠨᠡ ᠦᠳᠡᠰᠢ ᠶ᠋ᠢᠨ ᠶᠠᠷᠢᠶᠠᠨ ᠤ᠋ ᠲᠤᠬᠠᠢ ᠥᠴᠦᠬᠡᠨ ᠴᠦ᠍ ᠪᠤᠯᠲᠠᠢᠯᠭᠠᠭᠰᠠᠨ ᠦᠭᠡᠢ᠃ ᠰᠡᠷᠵᠢ ᠭᠡᠷ ᠲᠦ᠍ ᠣᠷᠣᠵᠤ ᠷᠠᠰᠢ ᠶ᠋ᠢᠨ ᠨᠡᠬᠡᠢ ᠳᠡᠪᠡᠯ ᠢ᠋ ᠣᠶᠣᠬᠤ ᠳ᠋ᠤ᠌ ᠬᠠᠵᠠᠭᠤ ᠳ᠋ᠤᠨᠢ ᠬᠣᠩᠭᠣᠷ ᠰᠠᠭᠤᠭᠠᠳ ᠳᠣᠣᠷᠠ ᠳᠠᠭᠤᠨ ᠢ᠋ᠶ᠋ᠠᠷ ᠱᠣᠭᠰᠢᠨ ᠤᠬᠢᠯᠠᠵᠤ ᠪᠠᠢᠪᠠ᠃ ᠷᠠᠰᠢ ᠭᠡᠷ ᠦ᠋ᠨ ᠡᠭᠦᠳᠡᠨ ᠳᠡᠭᠡᠷᠡ ᠠᠯᠭᠤᠷᠬᠠᠨ ᠰᠠᠭᠤᠬᠤ ᠳ᠋ᠠᠭᠠᠨ ᠲᠡᠭᠦᠨ ᠦ᠌ ᠵᠠᠷᠤᠴᠠ ᠶ᠋ᠢᠨ ᠭᠠᠷ ᠳᠠᠬᠢ ᠠᠵᠢᠯ ᠢ᠋ ᠬᠠᠷᠠᠵᠤ ᠠᠪᠤᠭᠰᠠᠨ ᠢ᠋ᠶ᠋ᠠᠨ ᠬᠦᠰᠡᠯ ᠳᠦᠭᠦᠷᠦᠭᠰᠡᠨ ᠨᠢᠳᠦ ᠪᠡᠷ ᠰᠡᠷᠡᠵᠦ ᠪᠣᠢ ᠠᠯᠤᠰ ᠤ᠋ᠨ ᠬᠥᠳᠡᠭᠡ ᠲᠠᠯᠠ ᠶ᠋ᠢ ᠰᠢᠷᠲᠡᠯᠡ ᠃ ᠲᠥᠪ ᠰᠦᠷᠯᠢᠭ ᠪᠠᠢᠳᠠᠯ ᠲᠠᠯᠠ ᠨᠤᠲᠤᠭ ᠵᠢᠴᠢ ᠲᠡᠨᠳᠡᠬᠢ ᠬᠥᠮᠦᠰ ᠢ᠋ ᠪᠦᠷᠬᠦᠭᠰᠡᠭᠡᠷ ᠪᠠᠢᠪᠠ ᠃ ᠬᠡᠨ ᠴᠦ᠍ ᠭᠡᠳ ᠡᠨᠡ ᠲᠠᠢᠪᠤᠩ ᠪᠠᠢᠳᠠᠯ ᠢ᠋ ᠡᠪᠳᠡᠬᠦ ᠵᠣᠷᠢᠭ ᠦᠭᠡᠢ ᠠᠵᠢ᠃ ᠰᠠᠷᠵᠢ ᠣᠶᠣᠵᠤ ᠪᠠᠷᠠᠭᠰᠠᠨ ᠨᠡᠬᠡᠢ ᠳᠡᠪᠡᠯ ᠢ᠋ᠶ᠋ᠡᠨ ᠠᠪᠴᠤ ᠭᠠᠷᠤᠭᠠᠳ ᠡᠷᠡ ᠳ᠋ᠡᠭᠡᠨ ᠨᠥᠮᠥᠷᠭᠡᠬᠦ ᠳ᠋ᠦ᠍ ᠷᠠᠰᠢ ᠴᠤ᠌ ᠥᠨᠳᠡᠢᠪᠡ᠃
- ᠠᠮᠤᠷᠬᠠᠨ ᠰᠠᠢᠨ ᠶᠠᠪᠤᠭᠠᠷᠠᠢ ! ᠭᠡᠰᠡᠨ ᠦᠭᠡ ᠡᠴᠡ ᠣᠨᠳᠣᠣ ᠦᠭᠡ ᠠᠯᠠᠭᠠ᠃ ᠰᠠᠯᠬᠤ ᠦᠶᠡ ᠶ᠋ᠢᠨ ᠰᠡᠳᠬᠢᠯ ᠰᠢᠮᠰᠢᠷᠡᠭᠰᠡᠨ ᠪᠠᠢᠳᠠᠯ ᠭᠡᠵᠦ ᠴᠦ᠍ ᠠᠯᠠᠭᠠ᠃ ᠪᠢᠳᠡ ᠬᠣᠶᠠᠭᠤᠯᠠ ᠠᠬᠢᠭᠠᠳ ᠯᠠ ᠬᠥᠳᠡᠭᠡ ᠲᠠᠯᠠ ᠶ᠋ᠢ ᠵᠦᠰᠦᠨ ᠳᠠᠪᠬᠢᠵᠤ ᠠᠶᠠᠯᠠᠬᠤ ᠳ᠋ᠠᠭᠠᠨ ᠳᠠᠭᠤ ᠦᠭᠡᠢ ᠳᠦᠩᠰᠦᠭᠡᠷ ᠪᠠᠢᠳᠠᠯ ᠮᠥᠨ ᠯᠡ ᠦᠷᠭᠦᠯᠵᠢᠯᠡᠵᠦ᠂ ᠰᠠᠶᠢᠬᠠᠨ ᠠᠷᠤ ᠳ᠋ᠠᠭᠠᠨ ᠣᠷᠬᠢᠭᠰᠠᠨ ᠭᠡᠷ ᠲᠦ᠍ ᠪᠣᠯᠤᠭᠰᠠᠨ ᠵᠦᠢᠯᠡᠰ ᠢ᠋ ᠪᠣᠳᠣᠭᠰᠠᠭᠠᠷ ᠪᠠᠢᠪᠠ᠃ ᠨᠢᠭᠡ ᠴᠠᠭ ᠥᠩᠭᠡᠷᠡᠭᠰᠡᠨ ᠦ᠌ ᠰᠡᠭᠦᠯᠡᠷ ᠷᠠᠰᠢ ᠤᠨᠤᠵᠤ ᠪᠠᠢᠭᠠ ᠬᠡᠭᠡᠷ ᠮᠣᠷᠢᠨ ᠤ᠋ ᠪᠠᠨ ᠵᠢᠯᠣᠭᠣ ᠶ᠋ᠢ ᠰᠤᠯᠠ ᠲᠠᠯᠪᠢᠵᠤ᠂ ᠤᠨᠤᠭᠠᠨ ᠤ᠋ ᠪᠠᠨ ᠳᠤᠷᠠ ᠪᠠᠷ ᠳᠠᠪᠬᠢᠭᠤᠯᠪᠠ᠃ ᠬᠡᠭᠡᠷ ᠮᠣᠷᠢ ᠨᠢ ᠶᠠᠪᠤᠵᠤ ᠪᠠᠢᠭᠰᠠᠨ ᠴᠢᠭᠯᠡᠯ ᠡᠴᠡ ᠪᠡᠨ ᠰᠠᠯᠵᠤ᠂ ᠲᠡᠮᠡᠭᠡᠨ ᠵᠢᠩ ᠦ᠋ᠨ ᠵᠠᠮ ᠳ᠋ᠤ᠌ ᠬᠠᠲᠠᠷᠢᠭᠤᠯᠤᠭᠰᠠᠭᠠᠷ ᠬᠦᠷᠦᠯᠡ᠃ ᠮᠥᠨ ᠲᠡᠨᠳᠡ ᠬᠠᠨᠢ ᠮᠢᠨᠢ ᠵᠢᠯᠣᠭᠣ ᠪᠠᠨ ᠲᠡᠳᠡᠨ ᠵᠣᠭᠰᠣᠭᠠᠳ ᠨᠠᠮᠠᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠪᠠ᠃
- ᠴᠢᠨᠦ ᠶᠠᠷᠢᠬᠤ ᠴᠤ᠌ ᠦᠨᠡᠬᠡᠷ ᠵᠥᠪ ᠪᠠᠢᠵᠤ ᠮᠠᠭᠠᠳ ᠦᠭᠡᠢ᠃ ᠴᠢᠨᠦ ᠦᠵᠡᠭᠰᠡᠨ ᠶᠠᠭᠤᠮᠠ ᠣᠯᠠᠨ᠂ ᠮᠡᠳᠡᠯᠭᠡ ᠶ᠋ᠢᠨ ᠲᠠᠯᠠ ᠪᠠᠷ ᠮᠠᠨ ᠤ᠋ ᠮᠣᠩᠭᠣᠯ ᠠ᠋ᠴᠠ ᠢᠯᠡᠭᠦᠦ ᠪᠠᠢᠬᠠ ᠳᠠ ᠭᠡᠵᠦ ᠲᠡᠷᠡ ᠨᠠᠳᠠ ᠳ᠋ᠤ᠌ ᠶᠠᠭᠤᠨ ᠤ᠋ ᠲᠤᠬᠠᠢ ᠶᠠᠷᠢᠨᠠ ᠭᠡᠵᠦ ᠪᠠᠢᠭᠠ ᠨᠢ ᠰᠠᠢᠨ ᠣᠢᠯᠠᠭᠠᠭᠳᠠᠬᠤ ᠦᠭᠡᠢ ᠶᠠᠭᠤᠮᠠ ᠶᠠᠷᠢᠭᠰᠠᠨ ᠢ᠋ᠶ᠋ᠠᠨ᠄
- ᠪᠢ ᠮᠠᠯ ᠤ᠋ᠨ ᠬᠠᠯᠳᠠᠪᠤᠷᠢᠲᠤ ᠡᠪᠡᠳᠴᠢᠨ ᠢ᠋ ᠬᠡᠯᠡᠵᠦ ᠪᠠᠢᠨᠠ᠃ ᠴᠢᠨᠦ ᠥᠴᠥᠭᠡᠳᠦᠷ ᠦ᠋ᠨ ᠶᠠᠷᠢᠭᠰᠠᠨ ᠨᠢ ᠶᠠᠭ ᠦᠨᠡᠨ ᠦᠭᠡ ᠭᠡᠵᠢ ᠤᠤ ? ᠭᠡᠵᠦ ᠨᠡᠮᠡᠨ ᠠᠰᠠᠭᠤᠯᠠ᠃
- ᠮᠢᠨᠦ ᠰᠠᠢᠨ ᠨᠠᠢᠵᠠ ᠷᠠᠰᠢ ᠮᠢᠨᠢ ! ᠴᠢᠨᠦ ᠮᠠᠯ ᠳ᠋ᠤ᠌ ᠣᠷᠣᠵᠤ ᠪᠠᠢᠭᠠ ᠬᠠᠯᠳᠠᠪᠤᠷᠢᠲᠤ ᠡᠪᠡᠳᠴᠢᠨ ᠪᠣᠯ ᠠᠳᠠ ᠴᠢᠳᠬᠥᠷ ᠲᠡᠢ ᠥᠴᠦᠬᠡᠨ ᠴᠦ᠍ ᠬᠣᠯᠪᠣᠭᠠ ᠦᠭᠡᠢ ᠰᠢᠦ ᠃ ᠲᠡᠮᠡᠭᠡᠳ ᠢ᠋ᠶ᠋ᠡᠨ ᠰᠢᠨᠡ ᠪᠡᠯᠴᠢᠭᠡᠷ ᠲᠦ᠍ ᠰᠣᠯᠢᠵᠤ ᠪᠡᠯᠴᠢᠭᠡᠷᠯᠡᠭᠦᠯᠬᠦ ᠪᠥᠭᠡᠳ ᠡᠪᠡᠳᠴᠢᠨ ᠦᠭᠡᠢ ᠮᠠᠯ ᠢ᠋ᠶ᠋ᠠᠨ ᠡᠪᠡᠳᠴᠢᠨ ᠲᠡᠢ ᠮᠠᠯ ᠠ᠋ᠴᠠ ᠰᠠᠯᠭᠠᠨ ᠲᠤᠰᠠᠭᠠᠷᠯᠠᠬᠤ ᠬᠡᠷᠡᠭᠲᠡᠢ !
- ᠪᠢ ᠪᠦᠲᠦᠨ ᠰᠥᠨᠢ ᠡᠨᠡ ᠲᠤᠬᠠᠢ ᠪᠣᠳᠣᠯᠬᠢᠯᠠᠪᠠ᠃ ᠣᠯᠠᠨ ᠵᠦᠢᠯ ᠢ᠋ ᠲᠥᠯᠭᠡᠳᠡᠵᠦ᠂ ᠳᠠᠯᠤ ᠰᠢᠲᠠᠭᠠᠵᠤ ᠴᠤ᠌ ᠰᠢᠨᠵᠢᠭᠰᠡᠨ ᠪᠢᠯᠡ᠃ ᠭᠡᠬᠦ ᠳ᠋ᠦ᠍ ᠰᠦᠮᠡ ᠬᠡᠢᠳ ᠪᠣᠯᠤᠨ ᠨᠢᠭᠦᠯ ᠬᠢᠯᠢᠨᠴᠡ ᠶ᠋ᠢᠨ ᠲᠤᠬᠠᠢ ᠶᠠᠭᠤ ᠴᠤ᠌ ᠪᠠᠢᠬᠤ ᠦᠭᠡᠢ᠃ ᠴᠢ ᠰᠠᠷᠵᠢ ᠪᠣᠯᠤᠨ ᠤᠬᠢᠯᠠᠵᠤ ᠪᠠᠢᠭᠠ ᠵᠢᠭᠠᠬᠠᠨ ᠬᠣᠩᠭᠣᠷ ᠢ᠋ ᠬᠠᠷᠠᠭᠰᠠᠨ ᠪᠢᠵᠡ? ᠰᠠᠷᠵᠢ ᠪᠣᠯ ᠮᠢᠨᠦ ᠦᠨᠡᠨᠴᠢ ᠵᠠᠷᠤᠴᠠ᠃ ᠲᠡᠷᠡ ᠥᠷᠯᠥᠭᠡ ᠨᠠᠳᠠ ᠳ᠋ᠤ᠌ ᠶᠠᠭᠤ ᠬᠡᠯᠡᠯᠡ ᠭᠡᠵᠦ ᠰᠠᠨᠠᠨᠠ ? ᠭᠡᠵᠦ ᠶᠡᠬᠡ ᠯᠡ ᠨᠢᠭᠤᠴᠠᠭᠠᠢ ᠪᠠᠷ ᠨᠠᠮᠠᠶ᠋ᠢ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠄
- ᠲᠡᠷᠡ ᠬᠡᠦᠬᠡᠳ ᠣᠯᠤᠭᠰᠠᠨ ᠭᠡᠨᠡ ᠰᠢᠦ ! ᠭᠡᠳ ᠣᠮᠣᠭ ᠲᠠᠢ ᠪᠠᠷ ᠰᠠᠭᠤᠳᠠᠯ ᠢ᠋ᠶ᠋ᠠᠨ ᠵᠠᠰᠠᠨ ᠰᠠᠭᠤᠭᠠᠳ ᠤᠤᠯ ᠤ᠋ᠨ ᠢ᠋ᠶ᠋ᠠᠨ ᠠᠳᠠᠯᠢ ᠪᠠᠶᠠᠰᠤᠯ ᠲᠠᠢ ᠪᠠᠷ ᠬᠠᠳᠠᠭᠠᠨᠠᠲᠠᠯᠠ ᠢᠨᠢᠶᠡᠪᠡ᠃
- ᠣᠳᠣ ᠪᠢ ᠲᠡᠳᠡᠨ ᠢ᠋ ᠣᠷᠬᠢᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠠ᠋ ! ᠴᠢ ᠪᠣᠳᠣᠵᠤ ᠦᠵᠡᠭᠡᠴᠢ ᠳᠡ᠂ ᠬᠡᠷᠪᠡ ᠨᠢᠭᠡ ᠬᠦᠦ ᠵᠠᠶᠠᠭᠠᠬᠤ ᠳ᠋ᠤ᠌ ᠬᠦᠷᠪᠡᠯ ᠪᠢ ᠢᠩᠭᠢᠵᠦ ᠴᠢᠳᠠᠬᠤ ᠦᠭᠡᠢ ᠰᠢᠦ ᠳᠡ᠃ ᠴᠢ ᠣᠳᠣ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠦᠷᠭᠦᠯᠵᠢᠯᠡᠨ ᠠᠶᠠᠯᠠᠭᠠᠷᠠᠢ ! ᠪᠢ ᠰᠠᠷᠵᠢ ᠪᠣᠯᠤᠨ ᠬᠣᠩᠭᠣᠷ ᠳᠡᠭᠡᠷᠡ ᠪᠡᠨ ᠪᠤᠴᠠᠨᠠ᠃ ᠬᠡᠷᠪᠡ ᠪᠤᠷᠬᠠᠨ ᠢᠪᠡᠭᠡᠵᠦ ᠨᠠᠳᠠ ᠳ᠋ᠤ᠌ ᠨᠢᠭᠡ ᠬᠦᠦ ᠵᠠᠶᠠᠭᠠᠬᠤ ᠳ᠋ᠤ᠌ ᠬᠦᠷᠪᠡᠯ ᠲᠡᠷᠡ ᠴᠢᠨᠢ ᠨᠠᠳᠠ ᠳ᠋ᠤ᠌ ᠭᠠᠢ ᠵᠣᠪᠠᠯᠠᠩ ᠤᠴᠠᠷᠠᠭᠤᠯᠤᠨᠠ ᠭᠡᠳ ᠪᠠᠢᠳᠠᠭ ᠠᠳᠠ ᠴᠢᠳᠬᠥᠷ ᠡᠴᠡ ᠬᠣᠯᠠ ᠢᠳᠡ ᠬᠦᠴᠦᠲᠡᠢ ᠪᠣᠯᠬᠤ ᠪᠢᠰᠢ ᠤᠤ ?
- ᠲᠡᠷᠡ ᠴᠦ᠍ ᠯᠠᠪᠲᠠᠢ ᠰᠢᠦ ᠭᠡᠵᠦ ᠪᠢ ᠬᠠᠷᠢᠭᠤᠯᠪᠠ᠃
- ᠪᠢ ᠡᠴᠦᠰ ᠲᠡᠭᠡᠨ ᠡᠨᠡ ᠯᠠᠮᠠ ᠬᠤᠪᠴᠠᠰᠤ ᠠ᠋ᠴᠠ ᠰᠠᠯᠬᠤ ᠪᠣᠯᠤᠨᠠ ᠳᠠ᠃ ᠴᠢ ᠠᠬᠢᠭᠠᠳ ᠠᠳᠠ ᠢᠷᠡᠬᠦ ᠶ᠋ᠢᠨ ᠦᠶᠡ ᠳ᠋ᠦ᠍ ᠪᠢᠳᠡ ᠬᠠᠮᠲᠤ ᠳ᠋ᠠᠭᠠᠨ ᠲᠣᠭᠣᠷᠢᠬᠤ ᠳᠤᠷᠠᠲᠠᠢ ᠭᠠᠵᠠᠷ ᠢ᠋ᠶ᠋ᠠᠷ ᠴᠢᠨᠢ ᠳᠠᠪᠬᠢᠭᠤᠯᠵᠤ᠂ ᠠᠩ ᠬᠦᠷᠦᠭᠡ ᠬᠢᠶᠡ! ᠵᠥᠪᠬᠡᠨ ᠥᠨᠥᠳᠥᠷ ᠭᠡᠬᠦ ᠳ᠋ᠦ᠍ ᠪᠢ ᠴᠢᠮᠠ ᠲᠠᠢ ᠴᠣᠭ ᠦᠷᠭᠦᠯᠵᠢᠯᠡᠨ ᠠᠶᠠᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠵᠠᠢ᠃ ᠴᠢ ᠬᠠᠷᠠᠭᠠᠴᠢ ᠳᠠ ! ᠮᠢᠨᠦ ᠬᠡᠭᠡᠷ ᠮᠣᠷᠢ ᠴᠤ᠌ ᠪᠤᠴᠠᠨᠠ ᠭᠡᠳ ᠪᠠᠢᠨᠠ ᠰᠢᠦ ᠳᠡ ! ᠠᠶᠠᠨ ᠵᠠᠮ ᠳ᠋ᠠᠭᠠᠨ ᠰᠠᠢᠬᠠᠨ ᠶᠠᠪᠤᠭᠠᠷᠠᠢ ᠭᠡᠮᠡᠨ ᠨᠠᠮᠠᠶ᠋ᠢ ᠢᠷᠥᠭᠡᠯᠡ᠃