ᠰᠡᠷᠢᠭᠦᠬᠡᠨ ᠲᠠᠯᠠ ᠨᠤᠲᠤᠭ – <ᠰᠸᠢᠰ> ᠸᠠᠯᠲ᠋ᠸᠷ ᠪᠣᠰᠬᠠᠷᠳ᠋ - ᠭᠤᠷᠪᠠᠳᠣᠭᠠᠷ ᠪᠦᠯᠦᠭ᠂ ᠭᠤᠷᠪᠠᠳᠡᠬᠢ ᠠᠶᠠᠯᠠᠯ (ᠬᠣᠶᠠᠷ) Сэрүүхэн тал нутаг–<свис> Вальтер Босгард (Walter Bosshard)- Гуравдугаар бөлөг᠂Гуравдэх аялал 2
444ᠬᠣᠶᠠᠷ ᠂ ᠲᠠᠯᠠ ᠨᠤᠲᠤᠭ ᠤ᠋ᠨ ᠸᠠᠩ
ᠵᠣᠭᠰᠣᠯ ᠦᠭᠡᠢ ᠲᠦᠷᠴᠢᠭᠢᠨᠡᠨ ᠳᠤᠤᠭᠠᠷᠬᠤ ᠮᠠᠰᠢᠨ ᠤ᠋ ᠮᠣᠲ᠋ᠣᠷ ᠴᠢᠬᠢᠨ ᠳ᠋ᠦ᠍ ᠬᠠᠳᠠᠩᠰᠢᠵᠤ᠂ ᠦᠳᠡᠰᠢ ᠶ᠋ᠢᠨ ᠪᠦᠷᠦᠢ ᠳ᠋ᠡᠬᠢ ᠪᠣᠭᠣᠨᠢᠬᠠᠨ ᠳᠣᠪᠣᠴᠠᠭ ᠤ᠋ᠳ ᠬᠣᠢᠰᠢ ᠪᠠᠨ ᠰᠡᠭᠦᠳᠡᠭᠡᠨᠡᠨ ᠠᠯᠠᠭᠠ ᠪᠣᠯᠵᠤ ᠪᠠᠢᠯᠠ᠃ ᠰᠥᠨᠢ ᠶ᠋ᠢᠨ ᠬᠦᠢᠲᠡᠨ ᠵᠢᠪᠠᠷ ᠬᠠᠴᠠᠷ ᠢ᠋ ᠬᠠᠭᠠᠷᠢᠬᠤ ᠨᠢ ᠶᠠᠭ ᠯᠠ ᠲᠣᠭᠠᠯᠠᠰᠢ ᠦᠭᠡᠢ ᠨᠠᠷᠢᠬᠠᠨ ᠵᠡᠭᠦᠦ ᠪᠡᠷ ᠰᠢᠪᠡᠬᠦ ᠮᠡᠲᠦ ᠠᠵᠢ᠃ ᠭᠣᠣ ᠣᠪᠣᠭᠲᠠᠢ ᠬᠢᠲᠠᠳ ᠵᠠᠷᠤᠴᠠ ᠮᠢᠨᠢ ᠠᠶᠤᠭᠰᠠᠨ ᠴᠢᠷᠠᠢ ᠲᠠᠢ ᠴᠢᠮᠡᠭᠡ ᠦᠭᠡᠢ ᠠᠷᠤ ᠶ᠋ᠢᠨ ᠠᠴᠢᠶᠠᠨ ᠤ᠋ ᠳᠤᠮᠳᠠ ᠰᠠᠭᠤᠵᠤ ᠪᠠᠢᠪᠠ᠃ ᠵᠠᠮ ᠤ᠋ᠨ ᠮᠠᠭᠤ ᠵᠢᠴᠢ ᠤᠳᠠᠭᠠᠨ ᠴᠠᠭ ᠤ᠋ᠨ ᠠᠶᠠᠯᠠᠯ ᠨᠢ ᠲᠡᠭᠦᠨ ᠢ᠋ ᠡᠢᠮᠦ ᠪᠣᠯᠭᠠᠭᠰᠠᠨ ᠠᠵᠢ᠃ ᠡᠪᠦᠯ ᠦ᠋ᠨ ᠬᠦᠢᠲᠡᠨ ᠳ᠋ᠦ᠍ ᠬᠠᠴᠠᠷ ᠨᠢ ᠴᠡᠭᠡᠨ ᠭᠢᠯᠪᠠᠭᠠ ᠲᠠᠲᠠᠵᠤ᠂ ᠪᠠᠷᠤᠭ ᠯᠠ ᠬᠥᠬᠡᠷᠡᠬᠦ ᠳ᠋ᠡᠭᠡᠨ ᠳᠥᠭᠥᠵᠡᠢ᠃ ᠨᠢᠳᠦᠨ ᠡᠴᠡ ᠨᠢ ᠵᠥᠭᠡᠯᠡᠨ ᠳᠣᠷᠣᠢ᠂ ᠵᠦᠳᠡᠷᠡᠭᠰᠡᠨ ᠥᠩᠭᠡ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃ ᠠᠩᠬᠠ ᠬᠠᠷᠠᠵᠤ ᠪᠠᠢᠭᠠ ᠮᠣᠩᠭᠣᠯ ᠤ᠋ᠨ ᠲᠠᠯᠠ ᠨᠤᠲᠤᠭ ᠨᠢ ᠥᠪᠡᠷ ᠢ ᠨᠢ ᠬᠥᠯᠳᠡᠭᠡᠬᠦ ᠰᠢᠬᠠᠵᠤ ᠪᠠᠢᠭᠠ ᠨᠢ ᠲᠡᠭᠦᠨ ᠳ᠋ᠦ᠍ ᠬᠡᠴᠢᠨᠡᠭᠡᠨ ᠠᠶᠤᠮᠰᠢᠭᠲᠠᠢ ᠰᠠᠨᠠᠭᠳᠠᠭᠰᠠᠨ ᠪᠣᠯ !
ᠪᠢᠳᠡᠨ ᠢ ᠤᠷᠲᠤ ᠨᠠᠷᠢᠬᠠᠨ ᠬᠥᠨᠳᠡᠢ ᠳ᠋ᠦ᠍ ᠮᠤᠷᠤᠢᠨ ᠣᠷᠣᠬᠤ ᠳ᠋ᠤ᠌ ᠠᠯᠤᠰ ᠲᠤ᠌ ᠳ᠋ᠧᠩ ᠦ᠋ᠨ ᠭᠡᠷᠡᠯ ᠬᠠᠷᠠᠭᠳᠠᠪᠠ᠃
- ᠲᠡᠨᠳᠡ ᠯᠠ ᠬᠦᠷᠦᠨᠡ᠃ ᠲᠠᠯᠠ ᠨᠤᠲᠤᠭ ᠤ᠋ᠨ ᠸᠠᠩ ᠤ᠋ᠨ ᠬᠠᠲᠤᠨ ᠬᠣᠨᠢᠳ ᠢ᠋ᠶ᠋ᠠᠨ ᠡᠷᠭᠢᠨ ᠦᠵᠡᠵᠦ ᠪᠠᠢᠭᠠ ᠪᠣᠯᠤᠯᠲᠠᠢ ᠭᠡᠵᠦ ᠦᠪᠸᠷᠭᠸ ᠭᠠᠷ ᠢ᠋ᠶ᠋ᠠᠨ ᠥᠷᠥᠨ ᠶᠠᠷᠢᠬᠤ ᠨᠢ ᠶᠠᠭ ᠯᠠ ᠪᠠᠶᠠᠨ ᠲᠠᠩᠰᠤᠭ ᠨᠠᠢᠷ ᠲᠤ᠌ ᠣᠷᠣᠬᠤ ᠶ᠋ᠢᠨ ᠡᠮᠦᠨᠡᠬᠡᠨ ᠰᠢᠭ ᠪᠠᠢᠯᠠ᠃ ᠭᠡᠨᠡᠳᠲᠡ ᠲᠡᠷᠡ ᠬᠦ᠌ ᠭᠡᠷᠡᠯ ᠠᠯᠠᠭᠠ ᠪᠣᠯᠵᠤ᠂ ᠣᠳᠣᠳ ᠪᠦᠬᠦᠢ ᠲᠡᠭᠷᠢ ᠪᠠ ᠰᠥᠨᠢ ᠶ᠋ᠢᠨ ᠬᠦᠢᠲᠡᠨ ᠪᠢᠳᠡᠨ ᠢ᠋ ᠪᠦᠰᠡᠯᠡᠨ ᠠᠪᠤᠪᠠ᠃ ᠡᠨᠡ ᠬᠦ᠌ ᠲᠠᠨᠢᠯ ᠪᠤᠰᠤ ᠨᠠᠮᠵᠢᠭᠤᠬᠠᠨ ᠪᠠᠢᠳᠠᠯ ᠨᠢ ᠮᠢᠨᠦ ᠰᠡᠳᠬᠢᠯ ᠢ᠋ ᠲᠣᠭᠲᠠᠭᠤᠨ ᠦᠭᠡᠢ ᠪᠣᠯᠭᠠᠵᠤ ᠂ ᠮᠠᠰᠢᠨ ᠤ᠋ ᠬᠤᠷᠳᠤᠴᠠ ᠪᠣᠯᠤᠨ ᠳᠡᠭᠡᠷᠡᠮᠴᠢᠳ ᠦ᠋ᠨ ᠲᠤᠬᠠᠢ ᠶᠠᠷᠢᠵᠤ ᠭᠠᠷᠤᠯᠠ᠃
- ᠵᠠ ᠵᠠ᠂ ᠵᠠᠷᠢᠮ ᠬᠥᠮᠦᠨ ᠪᠤᠷᠤᠭᠤ ᠶᠠᠭᠤᠮᠠ ᠪᠣᠳᠣᠵᠤ ᠡᠬᠢᠯᠡᠯᠡ ᠶᠦᠮ ᠪᠠᠢᠨᠠ᠃ ᠪᠢᠳᠡ ᠣᠳᠣᠬᠠᠨ ᠳ᠋ᠤ᠌ ᠴᠠᠭ ᠲᠤ᠌ ᠬᠠᠮᠤᠭ ᠤ᠋ᠨ ᠬᠤᠷᠳᠤᠨ ᠳ᠋ᠠᠭᠠᠨ ᠭᠤᠴᠢᠨ ᠺᠢᠯᠣᠮᠧᠲ᠋ᠷ ᠦ᠋ᠨ ᠬᠤᠷᠳᠤᠴᠠ ᠪᠠᠷ ᠳᠠᠪᠬᠢᠭᠤᠯᠵᠤ ᠪᠠᠢᠬᠤ ᠪᠥᠭᠡᠳ ᠳᠡᠭᠡᠷᠡᠮᠴᠢᠳ ᠶᠠᠭᠠᠬᠢᠭᠰᠠᠨ ᠴᠤ᠌ ᠳᠠᠪᠬᠢᠵᠤ ᠪᠠᠢᠭᠠ ᠮᠠᠰᠢᠨ ᠢ᠋ ᠰᠥᠨᠢ ᠪᠡᠷ ᠳᠠᠭᠠᠷᠢᠳᠠᠭ ᠦᠭᠡᠢ ᠶᠦᠮ᠃ ᠢᠩᠭᠢᠬᠦ ᠨᠢ ᠰᠤᠮᠤ ᠶᠡᠬᠡ ᠪᠠᠷᠠᠳᠠᠭ ᠭᠡᠵᠦ ᠦᠪᠧᠷᠬᠧ ᠨᠠᠮᠠᠶ᠋ᠢ ᠲᠠᠢᠳᠬᠤᠷᠠᠭᠤᠯᠤᠨ ᠶᠠᠷᠢᠪᠠ᠃
ᠪᠢᠳᠡ ᠠᠬᠢᠭᠠᠳ ᠯᠠ ᠨᠠᠮᠵᠢᠭᠤᠨ ᠪᠣᠯᠤᠯᠠ᠃ ᠥᠪᠧᠷᠬᠧ ᠮᠠᠰᠢᠨ ᠢ᠋ᠶ᠋ᠠᠨ ᠲᠦᠷ ᠵᠣᠭᠰᠣᠭᠠᠪᠠ᠃ ᠬᠠᠷᠠᠩᠭᠤᠢ ᠳ᠋ᠤ᠌ ᠪᠢᠳᠡ ᠠᠩᠬᠠᠷᠤᠯᠲᠠᠢ ᠪᠠᠷ ᠭᠡᠷᠡᠯ ᠭᠡᠭᠡ ᠬᠠᠢᠭᠰᠠᠨ ᠪᠣᠯᠪᠠᠴᠤ ᠬᠠᠷᠠᠭᠳᠠᠭᠠ ᠦᠭᠡᠢ᠃ ᠮᠠᠰᠢᠨ ᠤ᠋ ᠭᠡᠷᠡᠯ ᠵᠠᠮ ᠳᠡᠭᠡᠷᠡ ᠥᠷᠭᠡᠨ ᠰᠢᠷᠠ ᠪᠦᠰᠡ ᠭᠠᠷᠭᠠᠨ ᠵᠠᠮ ᠤ᠋ᠨ ᠡᠩᠬᠦᠯ ᠳᠤᠩᠬᠤᠯ ᠨᠢ ᠠᠶᠤᠮᠰᠢᠭᠲᠠᠢ ᠰᠡᠭᠦᠳᠡᠷ ᠦ᠋ᠳ ᠢ ᠪᠣᠢ ᠪᠣᠯᠭᠠᠵᠠᠢ᠃
ᠬᠠᠷᠠᠩᠭᠤᠢ ᠳᠣᠲᠣᠷᠠ ᠠ᠋ᠴᠠ ᠨᠢᠭᠡ ᠲᠠᠤᠯᠠᠢ ᠦᠰᠦᠷᠦᠨ ᠭᠠᠷᠴᠤ ᠳ᠋ᠧᠩ ᠦ᠋ᠨ ᠭᠡᠷᠡᠯ ᠳ᠋ᠦ᠍ ᠣᠷᠣᠭᠠᠳ ᠠᠬᠢᠨ ᠳᠡᠭᠵᠢᠨ ᠱᠠᠯᠠᠮᠠᠭᠠᠢ ᠪᠠᠷ ᠪᠢᠳᠡᠨ ᠡᠴᠡ ᠵᠢᠭᠤᠲᠠᠨ ᠠᠯᠠᠭᠠ ᠪᠣᠯᠪᠠ᠃ ᠲᠡᠭᠦᠨ ᠦ᠌ ᠬᠠᠷᠠᠩᠭᠤᠢ ᠳ᠋ᠤ᠌ ᠦᠰᠦᠷᠦᠨ ᠣᠷᠣᠬᠤ ᠨᠢ ᠮᠣᠲ᠋ᠣᠷ ᠤ᠋ᠨ ᠳᠠᠭᠤᠨ ᠠ᠋ᠴᠠ ᠴᠤ᠌ ᠠᠶᠤᠮᠰᠢᠭᠲᠠᠢ ᠰᠠᠨᠠᠭᠳᠠᠭᠰᠠᠨ ᠪᠠᠢᠵᠤ ᠮᠡᠳᠡᠬᠦ ᠶᠦᠮ᠃
ᠭᠡᠨᠡᠳᠲᠡ ᠪᠢᠳᠡ ᠰᠠᠭᠤᠳᠠᠯ ᠳᠡᠭᠡᠷᠡ ᠪᠡᠨ ᠳᠠᠢᠪᠠᠯᠵᠠᠪᠠ᠃ ᠮᠠᠰᠢᠨ ᠴᠣᠴᠢᠮᠠᠭ ᠮᠤᠷᠤᠢᠵᠤ᠂ ᠮᠠᠰᠢᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠰᠢᠷᠠ ᠬᠦᠷᠡᠩ ᠥᠩᠭᠡ ᠲᠡᠢ ᠬᠡᠷᠡᠮ ᠬᠠᠷᠠᠭᠳᠠᠨ᠂ ᠥᠳᠬᠡᠨ ᠳᠠᠭᠤ ᠲᠠᠢ ᠨᠣᠬᠠᠢ ᠬᠤᠴᠠᠵᠤ ᠡᠬᠢᠯᠡᠪᠡ᠃ ᠬᠦᠨᠳᠦ ᠲᠣᠮᠣ ᠮᠣᠳᠣᠨ ᠬᠠᠭᠠᠯᠭᠠ ᠶ᠋ᠢᠨ ᠡᠮᠦᠨᠡ ᠬᠦᠷᠦᠭᠡᠳ ᠮᠠᠰᠢᠨ ᠵᠣᠭᠰᠣᠪᠠ᠃
ᠬᠦᠢᠲᠡᠨ ᠠᠭᠠᠷ ᠴᠢᠷᠠᠢ ᠶ᠋ᠢ ᠤᠳᠠᠲᠠᠯᠠ ᠦᠯᠢᠶᠡᠭᠰᠡᠨ ᠡᠴᠡ ᠪᠣᠯᠵᠤ᠂ ᠪᠣᠳᠣᠯ ᠰᠡᠳᠬᠢᠬᠦᠢ ᠴᠦ᠍ ᠴᠠᠷᠴᠠᠭᠰᠠᠨ ᠮᠡᠲᠦ᠃ ᠨᠢᠳᠦ ᠢᠷᠬᠢᠷᠡᠨ ᠡᠪᠡᠳᠦᠨᠡ᠃ ᠪᠢ ᠨᠢᠳᠦ ᠪᠡᠨ ᠠᠨᠢᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠦᠢᠲᠡᠨ ᠨᠢᠯᠪᠤᠰᠤ ᠪᠠᠨ ᠠᠷᠴᠢᠪᠠ᠃
ᠥᠪᠧᠷᠬᠧ ᠬᠡᠳᠦᠢᠨ ᠮᠠᠰᠢᠨ ᠠ᠋ᠴᠠ ᠪᠠᠭᠤᠭᠠᠳ ᠬᠠᠭᠠᠯᠭᠠ ᠶ᠋ᠢ ᠪᠠᠯᠪᠠᠵᠤ ᠪᠠᠢᠪᠠ ᠃ ᠲᠣᠭᠰᠢᠨ ᠨᠣᠬᠠᠢ ᠶ᠋ᠢᠨ ᠰᠢᠷᠦᠭᠦᠨ ᠬᠤᠴᠠᠯᠲᠠ ᠯᠠ ᠬᠠᠷᠢᠭᠤ ᠪᠠᠷᠢᠵᠤ ᠪᠠᠢᠯᠠ᠃ ᠨᠡᠯᠢᠶᠡᠳ ᠤᠳᠠᠭᠰᠠᠨ ᠤ᠋ ᠰᠡᠭᠦᠯᠡᠷ ᠬᠥᠯ ᠦ᠋ᠨ ᠴᠢᠮᠡᠭᠡ ᠣᠢᠷᠠᠳᠴᠤ 《ᠬᠡᠨ ᠪᠣᠢ ?》ᠭᠡᠯᠡ᠃
- ᠨᠠᠢᠵᠠ ! ᠭᠡᠵᠦ ᠥᠪᠧᠷᠬᠧ ᠬᠠᠷᠢᠭᠤᠯᠪᠠ᠃
ᠲᠡᠭᠡᠭᠡᠳ ᠬᠠᠭᠠᠯᠭᠠᠨ ᠤ᠋ ᠣᠨᠢᠰᠣ ᠶ᠋ᠢ ᠨᠡᠭᠡᠭᠡᠬᠦ ᠴᠢᠮᠡᠭᠡ ᠭᠠᠷᠤᠭᠠᠳ ᠬᠦᠨᠳᠦ ᠴᠦ ᠨᠢ ᠨᠡᠭᠡᠭᠡᠭᠳᠡᠨ ᠬᠠᠭᠠᠯᠭᠠ ᠣᠩᠭᠣᠢᠪᠠ᠃ ᠬᠦᠷᠢᠶᠡᠨ ᠦ᠌ ᠭᠣᠣᠯ ᠳ᠋ᠠᠬᠢ ᠭᠡᠷ ᠦ᠋ᠨ ᠡᠮᠦᠨᠡ ᠢᠷᠢᠨᠴᠢᠨ ᠵᠣᠭᠰᠣᠵᠤ ᠪᠠᠢᠪᠠ᠃ ᠬᠠᠯᠲᠠᠷᠲᠤᠭᠰᠠᠨ ᠳᠡᠭᠦᠵᠢᠩ ᠳ᠋ᠧᠩ ᠦ᠋ᠨ ᠭᠡᠷᠡᠯ ᠳ᠋ᠦ᠍ ᠲᠡᠭᠦᠨ ᠦ᠌ ᠬᠥᠷᠥᠰᠥᠯᠢᠭ ᠬᠦᠷᠡᠩ ᠥᠷᠭᠡᠨ ᠴᠢᠷᠠᠢ ᠨᠢ ᠬᠠᠷᠠᠭᠳᠠᠨᠠ᠃ ᠵᠤᠵᠠᠭᠠᠨ ᠵᠣᠪᠬᠢ ᠶ᠋ᠢᠨ ᠳᠣᠣᠷᠠᠬᠢ ᠵᠢᠵᠢᠭᠬᠡᠨ ᠨᠠᠷᠢᠬᠠᠨ ᠨᠢᠳᠦ ᠨᠢ ᠶᠠᠭᠤ ᠪᠣᠯᠪᠠ ᠭᠡᠰᠡᠨ ᠮᠠᠶᠢᠭᠲᠠᠢ ᠨᠠᠭᠠᠰᠢ ᠬᠠᠷᠠᠵᠤ ᠪᠠᠢᠪᠠ᠃ ᠥᠪᠧᠷᠬᠧ ᠲᠡᠭᠦᠨ ᠲᠡᠢ ᠠᠯᠢ ᠡᠷᠲᠡ ᠶ᠋ᠢᠨ ᠲᠠᠨᠢᠯ ᠮᠥᠷᠲᠡᠭᠡᠨ ᠥᠪᠧᠷᠬᠧ ᠶ᠋ᠢᠨ ᠬᠥᠮᠦᠨ ᠲᠠᠯᠠ ᠨᠢ ᠴᠦ᠍ ᠰᠠᠢᠨ ᠲᠤᠯᠠ ᠬᠠᠮᠢᠭᠠ ᠣᠴᠢᠪᠠᠴᠤ ᠬᠦᠨᠳᠦᠳᠬᠡᠭᠳᠡᠳᠡᠭ ᠠᠵᠢ᠃
ᠢᠷᠢᠨᠴᠢᠨ ( ᠵᠢᠷᠤᠭ 63 ) - ᠡᠨᠡ ᠬᠦ᠌ ᠵᠢᠩᠬᠢᠨᠢ ᠵᠡᠷᠭᠡ ᠬᠡᠷᠬᠡᠮ ᠦᠭᠡᠢ ᠲᠠᠯᠠ ᠨᠤᠲᠤᠭ ᠤ᠋ᠨ ᠸᠠᠩ ᠤ᠋ᠨ ᠲᠤᠬᠠᠢ ᠪᠢ ᠣᠯᠠᠨᠲᠠ ᠰᠣᠨᠣᠰᠴᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠥᠨᠥᠳᠥᠷ ᠠᠩᠬᠠ ᠤᠳᠠᠭᠠ ᠠᠭᠤᠯᠵᠠᠵᠤ ᠪᠠᠢᠨᠠ᠃ ᠣᠯᠠᠨ ᠵᠢᠯ ᠦ᠋ᠨ ᠲᠤᠷᠰᠢ ᠲᠡᠷᠡ ᠡᠨᠡ ᠣᠷᠴᠢᠮ ᠤ᠋ᠨ ᠴᠠᠭᠳᠠᠭᠠᠨ ᠳᠠᠷᠤᠭᠠ ᠶ᠋ᠢᠨ ᠠᠵᠢᠯ ᠬᠢᠵᠦ᠂ ᠥᠪᠡᠷ ᠦ᠋ᠨ ᠴᠡᠷᠢᠭ ᠠᠩᠭᠢ ᠲᠠᠢ ᠪᠠᠨ ᠳᠤᠮᠳᠠᠳᠤ ᠠᠽᠢᠶᠠ ᠬᠦᠷᠬᠦ ᠲᠡᠮᠡᠭᠡᠨ ᠵᠢᠩ ᠦ᠋ᠨ ᠵᠠᠮ ᠢ᠋ ᠬᠠᠮᠠᠭᠠᠯᠠᠳᠠᠭ ᠶᠤᠮ᠃ ᠡᠨᠡ ᠠᠵᠢᠯ ᠳ᠋ᠤᠨᠢ ᠭᠦᠢᠬᠤᠸᠠ ᠬᠣᠲᠠ ᠶ᠋ᠢᠨ ᠠᠷᠠᠯᠵᠢᠶᠠᠨ ᠤ᠋ ᠬᠣᠯᠪᠣᠭᠠ ᠲᠡᠭᠦᠨ ᠳ᠋ᠦ᠍ ᠵᠢᠯ ᠪᠦᠷᠢ ᠬᠡᠳᠦᠨ ᠲᠦᠮᠡᠨ ᠲᠥᠭᠥᠷᠢᠭ ᠦ᠋ᠨ ᠬᠠᠷᠠᠮᠵᠢ ᠥᠭᠳᠡᠭ ᠪᠠᠢᠨᠠ᠃
ᠢᠷᠢᠨᠴᠢᠨ ᠥᠪᠡᠷ ᠦ᠋ᠨ ᠬᠦᠴᠦ ᠪᠡᠷ ᠢ᠋ᠶ᠋ᠡᠨ ᠳᠡᠭᠵᠢᠷᠡᠨ ᠪᠣᠰᠤᠭᠰᠠᠨ ᠶᠤᠮ᠃ ᠲᠡᠭᠦᠨ ᠦ᠌ ᠭᠠᠷᠤᠯ ᠨᠢ ᠴᠦ᠍ ᠪᠠᠰᠠ ᠲᠡᠭᠦᠨ ᠦ᠌ ᠠᠮᠢᠳᠤᠷᠠᠯ ᠢ᠋ ᠰᠢᠭᠤᠳ ᠨᠥᠯᠥᠭᠡᠯᠡᠵᠡᠢ᠃ ᠣᠯᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠲᠡᠷᠡ ᠴᠢᠩ ᠭᠦᠷᠦᠨ ᠦ᠌ ᠬᠠᠭᠠᠨ ᠤ᠋ ᠴᠡᠷᠢᠭ ᠠᠩᠭᠢ ᠳ᠋ᠤ᠌ ᠴᠡᠷᠢᠭ ᠪᠣᠯᠵᠤ ᠶᠠᠪᠤᠭᠰᠠᠭᠠᠷ ᠪᠠᠢᠭᠠᠳ ᠬᠠᠭᠠᠨ ᠲᠥᠷᠥ ᠶ᠋ᠢᠨ ᠨᠤᠷᠠᠨ ᠤᠨᠠᠬᠤ ᠶ᠋ᠢ ᠳᠠᠭᠠᠯᠳᠤᠨ ᠬᠢᠳᠡᠯ ᠦᠭᠡᠢ ᠬᠥᠮᠦᠨ ᠪᠣᠯᠵᠠᠢ᠃ ᠬᠢᠲᠠᠳ ᠴᠡᠷᠢᠭ ᠦ᠋ᠨ ᠨᠢᠭᠡ ᠵᠠᠩᠵᠤᠨ ᠲᠡᠭᠦᠨ ᠢ᠋ ᠪᠣᠯᠤᠨ ᠨᠡᠢᠵᠡᠳ ᠢ᠋ ᠨᠢ ᠥᠪᠡᠷ ᠦ᠋ᠨ ᠳᠣᠣᠷᠠ ᠪᠠᠨ ᠠᠪᠠᠴᠢᠵᠤ ᠴᠡᠷᠢᠭ ᠪᠣᠯᠭᠠᠨᠠ ᠭᠡᠰᠡᠨ ᠪᠣᠯᠪᠠᠴᠤ ᠲᠡᠷᠡ ᠵᠥᠪᠰᠢᠶᠡᠷᠡᠭᠡ ᠦᠭᠡᠢ᠃ ᠲᠡᠷᠡ ᠪᠣᠯ ᠲᠠᠯᠠ ᠨᠤᠲᠤᠭ ᠤ᠋ᠨ ᠬᠥᠪᠡᠭᠦᠨ᠂ ᠮᠣᠷᠢᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠥᠰᠦᠭᠰᠡᠨ ᠬᠥᠮᠦᠨ᠃ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠᠨ ᠳ᠋ᠤ᠌ ᠡᠳᠦᠷ ᠲᠤᠵᠢ ᠵᠢᠭᠰᠠᠭᠠᠯ ᠬᠢᠬᠦ ᠨᠢ ᠲᠡᠭᠦᠨ ᠳ᠋ᠦ᠍ ᠠᠪᠴᠤ ᠬᠡᠯᠡᠪᠡᠯ ᠲᠡᠰᠪᠦᠷᠢᠯᠡᠰᠢ ᠦᠭᠡᠢ ᠵᠦᠢᠯ ᠠᠵᠢ᠃
ᠢᠩᠭᠢᠭᠡᠳ ᠬᠡᠳᠦᠨ ᠨᠠᠢᠵᠠ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠮᠲᠤ ᠲᠠᠯᠠ ᠨᠤᠲᠤᠭ ᠲᠠᠭᠠᠨ ᠦᠯᠡᠳᠡᠵᠦ᠂ ᠥᠪᠡᠷ ᠦ᠋ᠨ ᠬᠥᠷᠥᠩᠭᠡ ᠮᠥᠩᠭᠥ ᠨᠢ ᠪᠠᠷᠠᠭᠳᠠᠬᠤ ᠳ᠋ᠤ᠌ ᠳᠡᠭᠡᠷᠡᠮ ᠪᠣᠯᠵᠤ ᠬᠤᠪᠢᠷᠠᠵᠠᠢ᠃ ᠲᠡᠷᠡ ᠪᠡᠷ ᠶᠡᠬᠡ ᠬᠤᠪᠢᠰᠬᠠᠯ ᠤ᠋ᠨ ᠰᠠᠮᠠᠭᠤᠷᠠᠯ ᠢ᠋ᠶ᠋ᠠᠷ ᠲᠡᠮᠡᠭᠡᠨ ᠵᠢᠩ ᠢ᠋ ᠳᠣᠪᠲᠣᠯᠵᠤ ᠲᠣᠮᠣ ᠠᠷᠠᠯᠵᠢᠶᠠᠴᠢᠳ ᠢ᠋ ᠪᠠᠷᠢᠴᠠᠭᠠᠯᠠᠨ ᠠᠪᠤᠭᠠᠳ᠂ ᠥᠨᠳᠥᠷ ᠵᠣᠯᠢᠶᠠᠨ ᠤ᠋ ᠮᠥᠩᠭᠥ ᠣᠯᠳᠠᠭ ᠪᠠᠢᠪᠠ᠃ ᠲᠡᠢᠨ ᠬᠦ᠌ ᠡᠳᠡᠭᠡᠷ ᠳᠡᠭᠡᠷᠡᠮ ᠦ᠋ᠳ ᠦ᠋ᠨ ᠳᠣᠲᠣᠷᠠ ᠲᠡᠭᠦᠨ ᠦ᠌ ᠨᠡᠷᠡ ᠬᠦᠨᠳᠦ ᠨᠢ ᠮᠠᠰᠢ ᠲᠦᠷᠭᠡᠨ ᠢ᠋ᠶ᠋ᠡᠷ ᠳᠡᠭᠡᠭᠰᠢᠯᠡᠨ ᠤᠳᠤᠷᠢᠳᠤᠭᠴᠢ ᠨᠢ ᠪᠣᠯᠪᠠ᠃ ᠲᠡᠷᠡ ᠠᠮᠢ ᠨᠠᠰᠤᠨ ᠤ᠋ ᠠᠶᠤᠯ ᠲᠦᠭᠰᠢᠭᠦᠷᠢ ᠶ᠋ᠢ ᠦᠯᠦ ᠬᠠᠢᠬᠤᠷᠤᠨ ᠰᠤᠮᠤᠨ ᠮᠥᠨᠳᠥᠷ ᠢ᠋ᠶ᠋ᠡᠷ ᠰᠢᠷᠭᠤᠯᠠᠨ ᠳᠡᠭᠡᠷᠡᠮᠳᠡᠳᠡᠭ ᠲᠤᠯᠠ ᠲᠡᠭᠦᠨ ᠢ᠋ ᠳᠠᠭᠠᠭᠴᠢ ᠬᠥᠮᠦᠰ ᠡᠳᠦᠷ ᠡᠴᠡ ᠡᠳᠦᠷ ᠣᠯᠠᠰᠢᠷᠠᠨ᠂ ᠢᠷᠢᠨᠴᠢᠨ ᠢᠯᠠᠭᠳᠠᠰᠢ ᠦᠭᠡᠢ ᠭᠡᠮᠡᠨ ᠡᠷᠭᠦᠭᠳᠡᠨ᠂ ᠨᠡᠷᠡ ᠰᠦᠷ ᠨᠢ ᠣᠢᠷᠠ ᠣᠷᠴᠢᠮ ᠳ᠋ᠠᠭᠠᠨ ᠠᠯᠳᠠᠷᠰᠢᠭᠰᠠᠨ ᠶᠤᠮ᠃ ᠲᠡᠷᠡ ᠳᠠᠭᠠᠭᠰᠠᠳ ᠲᠠᠭᠠᠨ ᠬᠣᠭᠣᠯᠠ ᠤᠮᠳᠠ ᠳᠤᠲᠠᠭᠤᠯᠬᠤ ᠦᠭᠡᠢ᠂ ᠳᠡᠭᠡᠷᠡᠮᠳᠡᠬᠦ ᠪᠣᠯᠭᠠᠨ ᠲᠡᠳᠡᠨ ᠳ᠋ᠡᠭᠡᠨ ᠮᠥᠩᠭᠥ ᠭᠠᠮᠨᠠᠯ ᠦᠭᠡᠢ ᠥᠭᠳᠡᠭ ᠮᠥᠷᠲᠡᠭᠡᠨ ᠥᠯᠥᠰᠴᠦ ᠲᠠᠭᠠᠷᠠᠬᠤ ᠶ᠋ᠢᠨ ᠵᠣᠪᠠᠯᠠᠩ ᠢ᠋ ᠬᠠᠮᠲᠤ ᠲᠤᠭᠤᠯᠳᠠᠭ ᠪᠣᠯᠬᠣᠷ ᠳᠠᠭᠠᠭᠰᠠᠳ ᠨᠢ ᠰᠡᠳᠬᠢᠯ ᠬᠠᠩᠭᠠᠯᠤᠭᠤᠨ ᠪᠠᠢᠳᠠᠭ ᠠᠵᠢ᠃
ᠭᠦᠢᠬᠤᠸᠠ ᠶ᠋ᠢᠨ ᠠᠷᠠᠯᠵᠢᠶᠠᠴᠢᠳ ᠤ᠋ᠨ ᠨᠢᠳᠦᠨ ᠳ᠋ᠦ᠍ ᠠᠪᠴᠤ ᠬᠡᠯᠡᠪᠡᠯ ᠲᠡᠷᠡ ᠪᠣᠯ ᠠᠶᠤᠩᠭᠠ᠃ ᠲᠡᠳᠡ ᠳᠤᠮᠳᠠᠳᠤ ᠠᠽᠢᠶᠠ ᠲᠠᠢ ᠠᠷᠠᠯᠵᠢᠶᠠ ᠪᠠᠨ ᠦᠷᠭᠦᠯᠵᠢᠯᠡᠭᠦᠯᠬᠦ ᠭᠡᠮᠡᠨ ᠰᠠᠨᠠᠳᠠᠭ ᠪᠣᠯᠪᠠᠴᠤ ᠢᠷᠢᠨᠴᠢᠨ ᠲᠡᠳᠡᠨ ᠦ᠌ ᠣᠯᠬᠤ ᠣᠯᠵᠠ ᠶ᠋ᠢ ᠪᠠᠭᠠᠰᠬᠠᠭᠠᠳ ᠯᠠ ᠪᠠᠢᠳᠠᠭ ᠠᠵᠢ᠃ ᠲᠡᠭᠦᠨ ᠲᠡᠢ ᠬᠦᠴᠦ ᠪᠡᠷ ᠲᠡᠮᠡᠴᠡᠭᠡᠳ ᠳᠡᠢᠯᠬᠦ ᠦᠭᠡᠢ ᠪᠡᠨ ᠮᠡᠳᠡᠳᠡᠭ ᠪᠣᠯᠬᠣᠷ ᠡᠳ᠋ ᠮᠥᠩᠭᠥ ᠪᠡᠷ ᠬᠤᠳᠠᠯᠳᠤᠨ ᠠᠪᠤᠭᠠᠳ᠂ ᠢᠷᠢᠨᠴᠢᠨ ᠳᠡᠭᠡᠷᠡᠮᠴᠢᠳ ᠦ᠋ᠨ ᠲᠦᠷᠦᠭᠦᠦ ᠡᠴᠡ ᠪᠡᠨ ᠲᠡᠮᠡᠭᠡᠨ ᠵᠢᠩ ᠦ᠋ᠨ ᠵᠠᠮ ᠬᠠᠮᠠᠭᠠᠯᠠᠭᠴᠢ ᠠᠩᠭᠢ ᠶ᠋ᠢᠨ ᠨᠢᠭᠡ ᠳᠠᠷᠤᠭᠠ ᠪᠣᠯᠵᠤ ᠬᠤᠪᠢᠷᠠᠭᠰᠠᠨ ᠪᠠᠢᠨᠠ᠃
ᠲᠡᠭᠦᠨ ᠦ᠌ ᠳᠠᠭᠠᠭᠰᠠᠳ ᠨᠢ ᠡᠭᠦᠨ ᠡᠴᠡ ᠡᠬᠢᠯᠡᠭᠡᠳ ᠲᠡᠮᠡᠭᠡᠨ ᠵᠢᠩ ᠢ᠋ ᠳᠠᠭᠠᠵᠤ ᠪᠤᠰᠤᠳ ᠳᠡᠭᠡᠷᠡᠮᠴᠢᠳ ᠦ᠋ᠨ ᠳᠠᠭᠠᠷᠢᠯᠲᠠ ᠠ᠋ᠴᠠ ᠬᠠᠮᠠᠭᠠᠯᠠᠳᠠᠭ ᠪᠠᠢᠨᠠ᠃ ᠬᠠᠷᠢᠨ ᠡᠨᠡ ᠠᠵᠢᠯ ᠳ᠋ᠤ᠌ ᠶᠠᠮᠠᠷ ᠨᠢᠭᠡᠨ ᠭᠡᠷᠡ ᠪᠢᠴᠢᠭ ᠭᠡᠵᠦ ᠬᠡᠷᠡᠭ ᠠᠯᠠᠭᠠ᠂ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠶᠠᠷᠢᠭᠰᠠᠨ ᠬᠡᠯᠡᠯᠴᠡᠭᠡ ᠪᠤᠶᠤ ᠪᠣᠯᠵᠣᠭᠠ ᠨᠢ ᠠᠯᠢ ᠨᠢᠭᠡᠨ ᠴᠠᠭᠠᠰᠤᠨ ᠳᠡᠭᠡᠷᠡ ᠪᠢᠴᠢᠭᠰᠡᠨ ᠭᠡᠷᠡ ᠪᠢᠴᠢᠭ ᠡᠴᠡ ᠴᠦ᠍ ᠢᠲᠡᠭᠡᠯᠲᠡᠢ ᠪᠠᠢᠳᠠᠭ ᠶᠤᠮ᠃ ᠭᠡᠬᠦ ᠳ᠋ᠦ᠍ ᠤᠳᠠᠯ ᠦᠭᠡᠢ ᠢᠷᠢᠨᠴᠢᠨ ᠳ᠋ᠦ᠍ ᠰᠢᠨᠡ ᠳᠠᠢᠰᠤᠨ ᠢᠯᠡᠷᠡᠪᠡ᠃ ᠬᠠᠮᠠᠭᠠᠯᠠᠭᠴᠢ ᠠᠩᠭᠢ ᠶ᠋ᠢᠨ ᠳᠣᠲᠣᠷᠠᠬᠢ ᠪᠤᠰᠤᠳ ᠬᠡᠳᠦᠨ ᠬᠢᠲᠠᠳ ᠳᠠᠷᠤᠭᠠ ᠨᠢ ᠡᠨᠡ ᠬᠦ᠌ ᠰᠡᠷᠭᠦᠯᠡᠩ ᠮᠣᠩᠭᠣᠯ ᠳ᠋ᠤ᠌ ᠡᠷᠬᠡ ᠮᠠᠲᠠᠯ ᠢ᠋ᠶ᠋ᠠᠨ ᠪᠤᠯᠢᠶᠠᠭᠳᠠᠴᠢᠬᠠᠯᠠ ᠭᠡᠵᠦ ᠬᠣᠷᠣᠰᠴᠠᠭᠠᠵᠤ ᠪᠠᠢᠪᠠ᠃ ᠭᠡᠨᠡᠳᠲᠡ ᠨᠢᠭᠡᠨ ᠡᠳᠦᠷ ᠶᠡᠬᠡ ᠳᠠᠷᠤᠭᠠ ᠨᠢ ᠦᠬᠦᠪᠡ᠃ ᠮᠥᠨ ᠰᠥᠨᠢ ᠳ᠋ᠦ᠍ᠨᠢ ᠬᠢᠲᠠᠳ ᠳᠠᠷᠤᠭᠠ ᠨᠤᠭᠤᠳ ᠤᠪ ᠬᠤᠤᠪᠢᠯᠳᠤᠯᠭᠠ ᠬᠢᠵᠦ ᠢᠷᠢᠨᠴᠢᠨ ᠪᠣᠯᠤᠨ ᠰᠢᠳᠠᠷ ᠳᠠᠭᠠᠭᠰᠠᠳ ᠢ ᠨᠢ ᠤᠰᠠᠳᠬᠠᠬᠤ ᠪᠠᠷ ᠲᠥᠯᠥᠪᠯᠡᠵᠡᠢ᠃ ᠬᠠᠷᠢᠨ ᠬᠣᠶᠠᠷ ᠬᠢᠲᠠᠳ ᠳᠠᠷᠤᠭᠠ ᠶ᠋ᠢᠨ ᠶᠠᠷᠢᠯᠴᠠᠭᠠ ᠶ᠋ᠢ ᠨᠢᠭᠡ ᠴᠡᠷᠢᠭ ᠣᠯᠵᠤ ᠰᠣᠨᠣᠰᠤᠭᠠᠳ ᠂ ᠮᠣᠩᠭᠣᠯᠴᠤᠳ ᠲᠤ᠌ ᠦᠭᠡ ᠥᠭᠭᠦᠭᠰᠡᠨ ᠡᠴᠡ ᠰᠥᠨᠢ ᠳᠤᠮᠳᠠ ᠶ᠋ᠢᠨ ᠦᠶᠡ ᠪᠡᠷ ᠬᠢᠲᠠᠳ ᠤ᠋ᠨ ᠨᠢᠭᠤᠴᠠ ᠠᠵᠢᠯᠯᠠᠭᠠ ᠪᠠᠨ ᠡᠬᠢᠯᠡᠭᠦᠯᠬᠦ ᠪᠡᠷ ᠰᠠᠭᠤᠴᠠ ᠠ᠋ᠴᠠ ᠪᠠᠨ ᠰᠠᠯᠬᠤ ᠳ᠋ᠤᠨᠢ ᠰᠤᠮᠤᠨ ᠮᠥᠨᠳᠥᠷ ᠳᠡᠭᠡᠷᠡ ᠡᠴᠡ ᠨᠢ ᠪᠠᠭᠤᠵᠠᠢ᠃
ᠲᠡᠮᠡᠴᠡᠯ ᠬᠣᠶᠠᠷ ᠡᠳᠦᠷ ᠲᠤᠷᠰᠢ ᠦᠷᠭᠦᠯᠵᠢᠯᠡᠵᠦ᠂ ᠡᠴᠦᠰ ᠦ᠋ᠨ ᠢᠯᠠᠯᠲᠠ ᠢᠷᠢᠨᠴᠢᠨ ᠦ᠌ ᠬᠢ ᠪᠣᠯᠪᠠ᠃ ᠲᠡᠷᠡ ᠪᠡᠷ ᠶᠡᠬᠡ ᠳᠠᠷᠤᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠲᠠᠮᠠᠭᠠ ᠶ᠋ᠢ ᠠᠪᠴᠤ᠂ ᠳᠦᠭᠦᠷᠲᠡᠯᠡ ᠰᠤᠮᠤ ᠳᠠᠷᠤᠭᠰᠠᠨ ᠭᠠᠷ ᠫᠤᠤ ᠪᠠᠨ ᠪᠥᠰᠡᠨ ᠳ᠋ᠡᠭᠡᠨ ᠬᠠᠪᠴᠢᠭᠤᠯᠵᠤ᠂ ᠭᠦᠢᠬᠤᠸᠠ ᠶ᠋ᠢᠨ ᠠᠷᠠᠯᠵᠢᠶᠠᠴᠢᠳ ᠤ᠋ᠨ ᠬᠣᠯᠪᠣᠭᠠᠨ ᠤ᠋ ᠳᠠᠷᠤᠭᠠ ᠳᠡᠭᠡᠷᠡ ᠬᠦᠷᠦᠭᠡᠳ ᠫᠤᠤ ᠲᠠᠮᠠᠭᠠ ᠪᠠᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠯᠪᠢᠭᠠᠳ :
- ᠵᠠ ᠂ ᠪᠢ ᠠᠳᠠ ᠪᠠᠢᠨᠠ᠃ ᠲᠠᠮᠠᠭᠠ ᠪᠠᠷ ᠨᠢ ᠲᠠ ᠨᠠᠷ ᠨᠠᠮᠠᠶ᠋ᠢ ᠶᠡᠬᠡ ᠳᠠᠷᠤᠭᠠ ᠪᠣᠯᠭᠠᠵᠤ ᠪᠣᠯᠤᠨᠠ᠂ ᠫᠤᠤ ᠪᠠᠷ ᠨᠢ ᠨᠠᠮᠠᠶ᠋ᠢ ᠫᠤᠤᠳᠠᠵᠤ ᠪᠣᠯᠤᠨᠠ ᠭᠡᠵᠡᠢ᠃
ᠲᠡᠭᠦᠨ ᠡᠴᠡ ᠬᠣᠢᠰᠢ ᠢᠷᠢᠨᠴᠢᠨ ᠨᠢᠭᠡᠨᠲᠡ ᠬᠡᠴᠢᠨᠡᠭᠡᠨ ᠵᠢᠯ ᠦ᠋ᠨ ᠲᠤᠷᠰᠢ ᠴᠤᠤ ᠬᠤ᠌ ᠶ᠋ᠢᠨ ᠵᠢᠵᠢᠭ ᠴᠠᠢᠵᠠ ᠶ᠋ᠢᠨ ᠶᠡᠬᠡ ᠳᠠᠷᠤᠭᠠ ᠶ᠋ᠢᠨ ᠠᠵᠢᠯ ᠢ᠋ ᠬᠢᠭᠰᠡᠭᠡᠷ ᠢᠷᠡᠪᠡ᠃ ᠳᠡᠭᠡᠷᠡ ᠡᠴᠡ ᠴᠠᠯᠢᠩ ᠵᠠᠷᠤᠳᠠᠯ ᠢ᠋ ᠨᠢ ᠴᠠᠭ ᠲᠤᠨᠢ ᠬᠦᠷᠭᠡᠨ ᠢᠷᠡᠵᠦ᠂ ᠲᠡᠭᠦᠨ ᠦ᠌ ᠮᠠᠯ ᠰᠦᠷᠦᠭ ᠨᠢ ᠵᠢᠯ ᠡᠴᠡ ᠵᠢᠯ ᠣᠯᠠᠨ ᠪᠣᠯᠵᠠᠢ᠃ ᠲᠡᠷᠡ ᠣᠳᠣ ᠵᠢᠷᠭᠤᠭᠠᠨ ᠵᠠᠭᠤᠨ ᠠᠳᠤᠭᠤ᠂ ᠮᠢᠩᠭᠠ ᠰᠢᠬᠠᠮ ᠲᠡᠮᠡᠭᠡ ᠲᠡᠢ ᠪᠥᠭᠡᠳ ᠲᠡᠮᠡᠭᠡᠨ ᠵᠢᠩ ᠦ᠋ᠨ ᠵᠠᠮ ᠳᠠᠭᠠᠤ ᠣᠷᠣᠰᠢᠬᠤ ᠬᠢᠲᠠᠳ ᠮᠠᠢᠮᠠᠢ ᠶ᠋ᠢᠨ ᠳᠣᠲᠣᠷᠠ ᠪᠠᠰᠠ ᠲᠡᠭᠦᠨ ᠦ᠌ ᠮᠥᠩᠭᠥᠨ ᠲᠥᠭᠥᠷᠢᠭ ᠡᠷᠭᠢᠯᠳᠦᠵᠦ ᠪᠠᠢᠳᠠᠭ ᠶᠤᠮ᠃
ᠠᠷᠪᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠲᠡᠷᠡ ᠣᠢᠷᠠ ᠣᠷᠴᠢᠮ ᠤ᠋ᠨ ᠬᠠᠮᠤᠭ ᠤ᠋ᠨ ᠭᠣᠶᠣ ᠬᠡᠦᠬᠡᠨ ᠪᠣᠯᠬᠤ ᠳᠤᠯᠮᠠ (ᠵᠢᠷᠤᠭ 62 ) ᠢ᠋ ᠪᠠᠭᠤᠯᠭᠠᠨ ᠠᠪᠴᠠᠢ ᠃ ᠳᠤᠯᠮᠠ ᠶ᠋ᠢᠨ ᠬᠣᠨᠢᠨ ᠰᠦᠷᠦᠭ ᠨᠢ ᠴᠦ᠍ ᠥᠨᠢᠷ ᠥᠰᠴᠦ ᠂ ᠲᠡᠭᠦᠨ ᠦ᠌ ᠥᠪᠡᠷ ᠦ᠋ᠨ ᠬᠢᠨᠢ ᠶᠠᠷᠢᠬᠤ ᠪᠠᠷ ᠪᠠᠷᠤᠭ ᠲᠦᠮᠡᠨ ᠬᠣᠨᠢ ᠲᠠᠢ ᠪᠣᠯᠵᠤ ᠭᠡᠨᠡ ᠃ ᠢᠩᠭᠢᠭᠡᠳ ᠢᠷᠢᠨᠴᠢᠨ ᠬᠣᠯᠠ ᠣᠢᠷᠠ ᠳ᠋ᠤ᠌ ᠠᠯᠳᠠᠷᠰᠢᠭᠰᠠᠨ ᠨᠡᠷᠡ ᠬᠦᠨᠳᠦᠲᠡᠢ ᠬᠥᠮᠦᠨ ᠪᠣᠯᠵᠤ ᠂ ᠲᠡᠭᠦᠨ ᠦ᠌ ᠭᠤᠷᠪᠠᠨ ᠨᠠᠰᠤ ᠪᠠ ᠲᠠᠪᠤᠨ ᠨᠠᠰᠤ ᠲᠠᠢ ᠬᠣᠶᠠᠷ ᠬᠦᠦ ᠲᠣᠬᠣᠮ ᠪᠣᠯᠤᠨ ᠶᠦᠩᠷᠦᠪ ( ᠵᠢᠷᠤᠭ 65 ) ᠨᠢ ᠨᠢᠭᠡᠨᠲᠡ ᠮᠣᠷᠢ ᠲᠡᠮᠡᠭᠡᠨ ᠳ᠋ᠦ᠍ ᠲᠡᠰᠴᠦ ᠡᠬᠢᠯᠡᠯᠡ᠃
ᠪᠢ ᠲᠡᠳᠡᠨ ᠦ᠌ ᠬᠦᠷᠢᠶᠡᠨ ᠳ᠋ᠦ᠍ ᠪᠠᠢᠰᠢᠩ ᠤᠷᠤᠭᠤ ᠠᠯᠬᠤᠯᠠᠵᠤ ᠪᠠᠢᠬᠤ ᠳ᠋ᠠᠭᠠᠨ ᠡᠨᠡ ᠪᠦᠭᠦᠳᠡ ᠶ᠋ᠢ ᠡᠷᠭᠢᠴᠡᠭᠦᠯᠵᠦ ᠠᠮᠵᠢᠪᠠ᠃ ᠢᠷᠢᠨᠴᠢᠨ ᠪᠢᠳᠡᠨ ᠢ᠋ ᠬᠠᠭᠠᠯᠭᠠᠨ ᠤ᠋ ᠡᠰᠡᠷᠭᠦ ᠳ᠋ᠦ᠍ ᠪᠠᠢᠷᠢᠯᠠᠬᠤ ᠵᠣᠴᠢᠨ ᠤ᠋ ᠪᠠᠢᠰᠢᠩ ᠳ᠋ᠤ᠌ ᠵᠠᠯᠠᠨ ᠣᠷᠣᠭᠤᠯᠤᠭᠠᠳ᠂ ᠮᠣᠩᠭᠣᠯ ᠭᠡᠷ ᠬᠦᠢᠲᠡᠨ ᠪᠠᠢᠬᠠ ᠳᠠ ᠭᠡᠵᠦ ᠪᠢᠳᠡᠨ ᠡᠴᠡ ᠠᠭᠤᠴᠢᠯᠠᠯ ᠬᠦᠰᠡᠨ ᠶᠠᠷᠢᠪᠠ᠃ ᠲᠡᠷᠡ ᠵᠠᠷᠤᠴᠠ ᠪᠠᠷ ᠬᠠᠯᠠᠭᠤᠨ ᠬᠠᠨᠵᠤᠨ ᠳ᠋ᠤ᠌ ᠳᠡᠪᠢᠰᠬᠦ ᠢᠰᠡᠭᠡᠢ ᠠᠪᠴᠢᠷᠠᠭᠤᠯᠤᠨ ᠪᠢᠳᠡᠨ ᠢ᠋ ᠰᠠᠭᠤᠯᠭᠠᠭᠠᠳ᠂ ᠬᠠᠮᠢᠭᠠ ᠠ᠋ᠴᠠ ᠢᠷᠡᠵᠦ ᠶᠠᠪᠤᠭᠠ ᠵᠢᠴᠢ ᠬᠠᠮᠢᠭᠠᠰᠢ ᠣᠳᠬᠤ ᠭᠡᠵᠦ ᠪᠠᠢᠭᠠ ᠶ᠋ᠢ ᠠᠰᠠᠭᠤᠯᠠ᠃
ᠤᠳᠠᠯ ᠦᠭᠡᠢ ᠳᠤᠯᠮᠠ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠵᠤ ᠢᠷᠡᠯᠡ᠃ ᠲᠣᠯᠣᠭᠠᠢ ᠶ᠋ᠢᠨ ᠮᠥᠩᠭᠥᠨ ᠵᠠᠰᠠᠯ ᠨᠢ ᠲᠡᠭᠦᠨ ᠦ᠌ ᠭᠢᠯᠠᠯᠵᠠᠭᠰᠠᠨ ᠬᠠᠷᠠ ᠭᠡᠵᠢᠭᠡ ᠶ᠋ᠢ ᠳᠠᠷᠤᠵᠠᠢ᠃ ᠲᠡᠷᠡ ᠶᠣᠰᠣᠷᠬᠠᠭ ᠢ᠋ᠶ᠋ᠠᠷ ᠢᠨᠢᠶᠡᠮᠰᠦᠭᠯᠡᠭᠡᠳ ᠪᠤᠴᠠᠯᠤᠭᠰᠠᠨ ᠤᠰᠤ ᠶ᠋ᠢ ᠠᠪᠴᠤ ᠴᠠᠢ ᠶ᠋ᠢᠨ ᠳᠡᠪᠦᠷᠡ ᠳ᠋ᠦ᠍ ᠶᠡᠭᠦᠯᠡᠨ᠂ ᠠᠶᠠᠭᠠ ᠲᠠᠢ ᠬᠠᠮᠲᠤ ᠬᠠᠨᠵᠤᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠯᠪᠢᠭᠠᠳ ᠬᠠᠢᠷᠴᠠᠭ ᠲᠠᠢ ᠰᠢᠬᠢᠷ ᠵᠢᠴᠢ ᠬᠠᠲᠠᠭᠠᠭᠰᠠᠨ ᠵᠢᠮᠢᠰ ᠠᠪᠴᠢᠷᠠᠨ ᠲᠠᠯᠪᠢᠪᠠ᠃ ᠪᠦᠬᠦ ᠬᠥᠳᠡᠯᠦᠯ ᠪᠠᠷᠢᠯ ᠨᠢ ᠶᠠᠭᠠᠷᠠᠵᠤ ᠰᠠᠨᠳᠤᠷᠤᠯ ᠦᠭᠡᠢ ᠲᠠᠯᠪᠢᠭᠤᠬᠠᠨ ᠠᠶᠠᠲᠠᠢ ᠪᠠᠢᠵᠤ᠂ ᠬᠥᠮᠦᠨ ᠪᠦᠷᠢ ᠳ᠋ᠦ᠍ ᠴᠠᠢ ᠪᠠᠨ ᠠᠶᠠᠭᠠᠯᠠᠵᠤ ᠳᠠᠭᠤᠰᠤᠭᠠᠳ᠂ ᠢᠷᠢᠨᠴᠢᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠬᠦᠷᠴᠦ ᠰᠠᠭᠤᠪᠠ᠃ ᠭᠡᠬᠦ ᠳ᠋ᠦ᠍ ᠪᠢᠳᠡᠨ ᠦ᠌ ᠶᠠᠷᠢᠯᠴᠠᠭᠠᠨ ᠳ᠋ᠤ᠌ ᠶᠡᠷᠦ ᠡᠴᠡ ᠦᠭᠡ ᠲᠥᠷᠥᠨ ᠣᠷᠣᠯᠴᠠᠬᠤ ᠦᠭᠡᠢ ᠪᠠᠢᠯᠠ᠃ ᠵᠢᠵᠢᠭᠬᠡᠨ ᠲᠣᠰᠣᠨ ᠳ᠋ᠧᠩ ᠦ᠋ᠨ ᠭᠡᠷᠡᠯ ᠳᠣᠣᠷᠠ ᠪᠢ ᠲᠡᠭᠦᠨ ᠦ᠌ ᠴᠢᠷᠠᠢ ᠶ᠋ᠢ ᠠᠵᠢᠭᠯᠠᠪᠠ᠃ ᠲᠡᠷᠡ ᠣᠳᠣ ᠴᠤ᠌ ᠭᠡᠰᠡᠨ ᠭᠤᠸᠠ ᠦᠵᠡᠰᠬᠦᠯᠡᠩ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠭᠰᠠᠭᠠᠷ᠃ ᠲᠡᠷᠡ ᠪᠣᠯ ᠲᠠᠯᠠ ᠨᠤᠲᠤᠭ ᠳᠡᠭᠡᠷᠡ ᠮᠢᠨᠦ ᠬᠠᠷᠠᠭᠰᠠᠨ ᠬᠠᠮᠤᠭ ᠤ᠋ᠨ ᠭᠤᠸᠠ ᠦᠵᠡᠰᠬᠦᠯᠡᠩ ᠮᠣᠩᠭᠣᠯ ᠪᠦᠰᠡᠭᠦᠢ ᠶᠤᠮ᠃ ᠲᠡᠭᠦᠨ ᠦ᠌ ᠲᠣᠷᠮᠣᠯᠵᠠᠭᠰᠠᠨ ᠬᠠᠷᠠ ᠨᠢᠳᠦ᠂ ᠲᠤᠩᠭᠠᠯᠠᠭ ᠰᠠᠢᠬᠠᠨ ᠬᠠᠷᠠᠴᠠ ᠨᠢ ᠰᠡᠳᠬᠢᠯ ᠳ᠋ᠦ᠍ ᠮᠢᠨᠢ ᠮᠠᠷᠲᠠᠭᠳᠠᠰᠢ ᠦᠭᠡᠢ ᠰᠠᠭᠤᠭᠳᠠᠭᠰᠠᠨ ᠪᠢᠯᠡ᠃ ᠨᠠᠷᠠᠨ ᠳ᠋ᠤ᠌ ᠪᠣᠷᠣᠯᠠᠭᠰᠠᠨ ᠬᠠᠴᠠᠷ ᠤ᠋ᠨ ᠴᠠᠭᠠᠨᠠ ᠠ᠋ᠴᠠ ᠨᠢ ᠡᠷᠡᠭᠦᠯ ᠴᠢᠭᠢᠷᠠᠭ ᠪᠠᠢᠭᠠ ᠥᠩᠭᠡ ᠭᠢᠯᠠᠯᠵᠠᠨ ᠬᠠᠷᠠᠭᠳᠠᠵᠤ ᠪᠠᠢᠪᠠ᠃ (ᠵᠢᠷᠤᠭ 64)
- ᠴᠠᠭ ᠮᠠᠭᠤᠳᠠᠵᠠᠢ᠃ ᠬᠣᠶᠠᠷ ᠵᠠᠭᠤᠨ ᠲᠡᠮᠡᠭᠡ ᠮᠢᠨᠢ ᠭᠤᠷᠪᠠᠨ ᠰᠠᠷᠠ ᠶ᠋ᠢᠨ ᠬᠣᠭᠣᠷᠣᠨᠳᠣ ᠦᠬᠦᠵᠦ ᠰᠦᠢᠳᠪᠡ᠃ ᠪᠠᠰᠠ ᠬᠡᠳᠦᠢ ᠲᠡᠮᠡᠭᠡ ᠡᠨᠡ ᠡᠪᠡᠳᠴᠢᠨ ᠳ᠋ᠦ᠍ ᠬᠠᠯᠳᠠᠪᠤᠷᠢᠯᠠᠭᠳᠠᠭᠰᠠᠨ ᠢ᠋ ᠬᠡᠨ ᠮᠡᠳᠡᠨᠡ ᠳᠠ ? ᠲᠡᠮᠡᠭᠡᠨ ᠵᠢᠩ ᠦ᠋ᠳ ᠨᠢᠭᠡᠨᠲᠡ ᠵᠣᠭᠰᠣᠪᠠ᠃ ᠣᠷᠣᠰ ᠤ᠋ᠳ ᠲᠦᠷᠺᠰᠲ᠋ᠠᠨ᠂ ᠠᠷᠤ ᠮᠣᠩᠭᠣᠯ ᠤ᠋ᠨ ᠠᠷᠠᠯᠵᠢᠶᠠ ᠶ᠋ᠢ ᠴᠠᠭᠠᠰᠢ ᠨᠢ ᠲᠡᠳᠡᠨ ᠠᠪᠠᠴᠢᠭᠰᠠᠨ ᠲᠤᠯᠠ ᠠᠷᠠᠯᠵᠢᠶᠠᠴᠢᠳ ᠤ᠋ᠨ ᠬᠣᠯᠪᠣᠭᠠ ᠴᠤ᠌ ᠮᠥᠩᠭᠥ ᠴᠠᠯᠢᠩ ᠢ᠋ᠶ᠋ᠠᠨ ᠥᠭᠬᠦ ᠪᠡᠨ ᠨᠢᠭᠡᠨᠲᠡ ᠪᠣᠯᠢᠵᠠᠢ ᠭᠡᠮᠡᠨ ᠢᠷᠢᠨᠴᠢᠨ ᠵᠣᠪᠠᠯᠠᠩ ᠢ᠋ᠶ᠋ᠠᠨ ᠲᠣᠭᠠᠴᠢᠯᠠ᠃
ᠲᠠᠪᠤᠨ ᠨᠠᠰᠤ ᠲᠠᠢ ᠶᠦᠩᠷᠦᠪ ᠡᠭᠦᠳᠡ ᠪᠡᠷ ᠣᠷᠣᠵᠤ ᠢᠷᠡᠭᠡᠳ᠂ ᠢᠴᠢᠭᠰᠡᠨ ᠮᠥᠷᠲᠡᠭᠡᠨ ᠰᠣᠨᠢᠷᠬᠠᠭᠰᠠᠨ ᠪᠠᠢᠳᠠᠯ ᠲᠠᠢ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠵᠣᠴᠢᠳ ᠢ᠋ ᠠᠵᠢᠭᠯᠠᠨ ᠬᠠᠷᠠᠪᠠ᠃ ᠡᠵᠢ ᠨᠢ ᠢᠨᠢᠶᠡᠮᠰᠦᠭᠯᠡᠵᠦ ᠴᠢᠬᠢᠨ ᠳ᠋ᠦ᠍ᠨᠢ ᠶᠠᠭᠤ ᠨᠢᠭᠡ ᠶ᠋ᠢ ᠰᠢᠪᠡᠨᠡᠬᠦ ᠳ᠋ᠦ᠍ ᠥᠪᠧᠷᠬᠧ ᠶ᠋ᠢᠨ ᠵᠦᠭ ᠠᠯᠬᠤᠨ ᠬᠦᠷᠦᠯᠡ᠃ ᠲᠡᠷᠡ ᠬᠣᠶᠠᠷ ᠶᠡᠬᠡ ᠤᠳᠠᠭᠠᠨ ᠬᠠᠮᠠᠷ ᠢ᠋ᠶ᠋ᠠᠨ ᠱᠦᠷᠭᠦᠭᠡᠯᠴᠡᠭᠰᠡᠨ ᠨᠢ ᠳᠠᠬᠢᠨ ᠠᠭᠤᠯᠵᠠᠵᠤ ᠪᠠᠢᠭᠠ ᠶ᠋ᠢᠨ ᠥᠷᠥᠨᠡᠳᠠᠬᠢᠨ ᠤ᠋ ᠮᠡᠨᠳᠦᠴᠢᠯᠡᠯ ᠠᠵᠢ᠃ ᠢᠷᠢᠨᠴᠢᠨ ᠦᠷᠭᠦᠯᠵᠢᠯᠡᠨ ᠶᠠᠷᠢᠭᠰᠠᠭᠠᠷ ᠯᠠ ᠪᠠᠢᠪᠠ᠃
- ᠬᠢᠲᠠᠳ ᠳᠡᠭᠡᠷᠡᠮᠴᠢᠳ ᠬᠡᠳᠦ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠬᠣᠶᠠᠷ ᠵᠠᠭᠤ ᠭᠠᠷᠤᠢ ᠠᠳᠤᠭᠤ ᠲᠠᠢ ᠰᠦᠷᠦᠭ ᠢ᠋ ᠮᠠᠨᠢ ᠬᠤᠯᠠᠭᠠᠢᠯᠠᠨᠠ ᠭᠡᠮᠡᠨ ᠣᠷᠣᠯᠳᠣᠭᠠᠳ ᠳᠡᠢᠯᠦᠭᠰᠡᠨ ᠦᠭᠡᠢ᠃ ᠲᠡᠳᠡᠨ ᠡᠴᠡ ᠬᠣᠶᠠᠷ ᠨᠢ ᠴᠢᠰᠤ ᠪᠠᠨ ᠡᠯᠡᠰᠦᠨ ᠳ᠋ᠦ᠍ ᠬᠣᠯᠢᠭᠠᠳ ᠦᠬᠦᠳᠡᠯ ᠪᠣᠯᠵᠤ᠂ ᠦᠯᠡᠳᠡᠭᠰᠡᠨ ᠬᠣᠷᠢᠭᠠᠳ ᠨᠢ ᠵᠢᠭᠤᠲᠠᠨ ᠣᠳᠪᠠ᠃ ᠣᠷᠴᠢᠮ ᠳ᠋ᠤ᠌ ᠶᠡᠬᠡ ᠮᠠᠭᠤ ᠪᠣᠯᠤᠯᠠ᠂ ᠳᠤᠯᠮᠠ ᠶ᠋ᠢᠨ ᠬᠣᠨᠢ ᠴᠤ᠌ ᠪᠠᠰᠠ ᠶᠡᠬᠡ ᠣᠯᠠᠨ ᠦᠬᠦᠵᠦ ᠰᠦᠢᠳᠴᠦ ᠪᠣᠢ ᠭᠡᠵᠦ ᠴᠠᠭ ᠮᠠᠭᠤ ᠶ᠋ᠢᠨ ᠲᠤᠬᠠᠢ ᠶᠠᠷᠢᠬᠤ ᠪᠠᠷ ᠨᠢ ᠳᠤᠯᠮᠠ ᠲᠠᠢᠪᠤᠰᠢᠷᠠᠭᠤᠯᠵᠤ:
- ᠤᠳᠠᠯ ᠦᠭᠡᠢ ᠬᠠᠪᠤᠷ ᠪᠣᠯᠪᠠᠯ ᠪᠢᠳᠡ ᠨᠡᠭᠦᠳᠡᠯᠯᠡᠨᠡ ᠰᠢᠦ᠃ ᠲᠡᠭᠡᠭᠡᠳ ᠰᠢᠨᠡ ᠰᠣᠷᠭᠣᠭ ᠪᠡᠯᠴᠢᠭᠡᠷ ᠲᠦ᠍ ᠲᠡᠮᠡᠭᠡ ᠬᠣᠨᠢ ᠴᠤ᠌ ᠵᠦᠭᠡᠷ ᠪᠣᠯᠤᠨᠠ ᠭᠡᠵᠦ ᠢᠲᠡᠭᠡᠯ ᠳᠦᠭᠦᠷᠡᠩ ᠶᠠᠷᠢᠯᠠ᠃ ᠳᠠᠷᠠᠭᠠ ᠨᠢ ᠪᠢᠳᠡᠨ ᠳ᠋ᠦ᠍ ᠲᠡᠷᠡ ᠠᠬᠢᠨ ᠴᠠᠢ ᠪᠠᠨ ᠨᠡᠮᠡᠨ ᠠᠶᠠᠭᠠᠯᠠᠵᠤ ᠪᠠᠷᠠᠭᠠᠳ᠂ ᠵᠠᠷᠤᠴᠠ ᠰᠠᠨᠳᠠᠮᠠ ᠪᠠᠨ ᠲᠠᠭᠤᠲᠠᠯᠠ᠃
- ᠴᠢ ᠨᠢᠭᠡ ᠬᠣᠨᠢ ᠭᠠᠷᠭᠠᠭᠠᠳ ᠵᠣᠴᠢᠳ ᠲᠤ᠌ ᠬᠣᠭᠣᠯᠠ ᠪᠡᠯᠡᠳᠬᠡᠭᠡᠷᠡᠢ ᠭᠡᠵᠦ ᠲᠤᠰᠢᠶᠠᠪᠠ᠃ ᠰᠠᠨᠳᠠᠮᠠ (ᠵᠢᠷᠤᠭ 66）ᠡᠳᠡᠨ ᠦ᠌ ᠭᠡᠷ ᠪᠦᠯᠢ ᠳ᠋ᠦ᠍ ᠬᠠᠷᠢᠶᠠᠯᠠᠭᠳᠠᠬᠤ ᠪᠥᠭᠡᠳ ᠠᠯᠢ ᠡᠷᠲᠡ ᠬᠡᠦᠬᠡᠳ ᠪᠠᠯᠴᠢᠷ ᠦᠶᠡ ᠡᠴᠡ ᠪᠡᠨ ᠳᠤᠯᠮᠠ ᠶ᠋ᠢᠨ ᠳ᠋ᠦ᠍ ᠪᠠᠢᠭᠰᠠᠨ ᠶᠤᠮ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠲᠡᠭᠦᠨ ᠦ᠌ ᠠᠪᠤ ᠨᠢ ᠳᠠᠢᠰᠤᠨ ᠤ᠋ ᠰᠤᠮᠤᠨ ᠳ᠋ᠤ᠌ ᠥᠷᠲᠥᠵᠦ ᠦᠷᠡᠭᠳᠡᠭᠡᠳ᠂ ᠡᠵᠢ ᠨᠢ ᠴᠦ᠍ ᠬᠣᠢᠨᠠ ᠠ᠋ᠴᠠ ᠨᠢ ᠤᠳᠠᠭᠠᠨ ᠵᠢᠯ ᠦ᠋ᠨ ᠡᠪᠡᠳᠴᠢᠨ ᠢ᠋ᠶ᠋ᠡᠷ ᠪᠤᠷᠬᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠮᠣᠷᠳᠠᠵᠠᠢ᠃ ᠳᠤᠯᠮᠠ ᠶ᠋ᠢ ᠮᠣᠷᠳᠠᠬᠤ ᠦᠶᠡ ᠳ᠋ᠦ᠍ ᠳᠠᠭᠠᠨ ᠢᠷᠡᠵᠦ ᠢᠨᠵᠢ ᠪᠣᠯᠤᠭᠠᠳ᠂ ᠣᠳᠣ ᠨᠢᠭᠡᠨᠲᠡ ᠠᠷᠪᠠᠨ ᠵᠢᠷᠭᠤᠭᠠᠨ ᠨᠠᠰᠤᠯᠠᠵᠤ ᠤᠷᠤᠭᠯᠠᠬᠤ ᠨᠠᠰᠤᠨ ᠳ᠋ᠤ᠌ ᠬᠦᠷᠦᠭᠰᠡᠨ ᠠᠵᠢ᠃ ᠲᠡᠭᠦᠨ ᠦ᠌ ᠭᠣᠶᠣ ᠦᠵᠡᠰᠬᠦᠯᠡᠩ ᠳᠤᠲᠠᠮᠠᠭ ᠪᠠᠢᠬᠤ ᠪᠠ ᠢᠨᠢᠶᠡᠬᠦ ᠳ᠋ᠦ᠍ ᠵᠣᠪᠬᠢᠨ ᠤ᠋ ᠬᠢᠨᠢ ᠠᠲᠤᠷᠢᠶᠠ ᠨᠡᠮᠡᠭᠳᠡᠬᠦ ᠨᠢ ᠨᠢᠳᠦᠨ ᠳ᠋ᠦ᠍ ᠢᠯᠡᠬᠡᠨ ᠲᠣᠰᠴᠤ ᠪᠠᠢᠯᠠ᠃ ᠵᠠᠷᠢᠮ ᠵᠠᠯᠠᠭᠤᠴᠤᠳ ᠲᠡᠭᠦᠨ ᠢ᠋ ᠭᠣᠬᠠᠳᠠᠬᠤ ᠭᠡᠮᠡᠨ ᠣᠷᠣᠯᠳᠣᠳᠠᠭ ᠪᠣᠯᠪᠠᠴᠤ ᠲᠡᠷᠡ ᠴᠡᠷᠢᠭ ᠦ᠋ᠨ ᠨᠢᠭᠡ ᠳᠠᠷᠤᠭᠠ ᠲᠠᠢ ᠬᠠᠪᠤᠷ ᠬᠤᠷᠢᠮᠯᠠᠬᠤ ᠪᠠᠷ ᠲᠣᠭᠲᠠᠭᠠᠳ ᠪᠠᠢᠭᠠ ᠶᠤᠮ ᠭᠡᠨᠡ᠃ ᠡᠨᠡ ᠬᠦ᠌ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ ᠨᠢ ᠣᠳᠣ ᠬᠠᠮᠤᠭ ᠤ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠲᠡᠮᠡᠭᠡᠨ ᠵᠢᠩ ᠢ᠋ ᠳᠠᠭᠠᠨ ᠲᠦᠷᠺᠰᠲ᠋ᠠᠨ ᠳ᠋ᠤ᠌ ᠬᠠᠭᠠᠰ ᠵᠢᠯ ᠦ᠋ᠨ ᠬᠤᠭᠤᠴᠠᠭᠠ ᠪᠠᠷ ᠶᠠᠪᠤᠭᠰᠠᠨ ᠪᠠᠢᠨᠠ᠃
ᠪᠢᠳᠡᠨ ᠦ᠌ ᠣᠷᠣ ᠶ᠋ᠢ ᠬᠠᠨᠵᠤᠨ ᠳᠡᠭᠡᠷᠡ ᠵᠠᠰᠠᠪᠠ᠃ ᠳᠤᠯᠮᠠ ᠣᠯᠠᠨ ᠤᠳᠠᠭᠠ ᠤᠰᠤ ᠪᠤᠴᠠᠯᠭᠠᠨ ᠰᠠᠨᠳᠠᠮᠠ ᠤᠷᠤᠭᠤ ᠢᠯᠡᠭᠡᠭᠰᠡᠨ ᠪᠥᠭᠡᠳ ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍ᠨᠢ ᠬᠢᠰᠠ ᠳ᠋ᠤ᠌ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠨᠢᠭᠡ ᠪᠢᠲᠡᠭᠦᠦ ᠲᠡᠮᠡᠭᠡᠨ ᠬᠣᠷᠭᠣᠯ ᠨᠡᠮᠡᠭᠡᠳ ᠮᠣᠩᠭᠣᠯ ᠭᠡᠷ ᠲᠡᠭᠡᠨ ᠪᠤᠴᠠᠪᠠ᠃ ᠢᠷᠢᠨᠴᠢᠨ ᠴᠦ᠍ ᠳᠠᠭᠠᠵᠤ ᠭᠠᠷᠤᠭᠠᠳ᠂ ᠳᠡᠮᠡᠢ ᠤᠳᠠᠯ ᠦᠭᠡᠢ ᠬᠤᠷᠬᠢᠷᠠᠬᠤ ᠳᠠᠭᠤᠨ ᠨᠢ ᠬᠦᠷᠢᠶᠡᠨ ᠡᠴᠡ ᠰᠣᠨᠣᠰᠳᠠᠨ ᠡᠬᠢᠯᠡᠯᠡ᠃
ᠰᠠᠷᠠᠭᠤᠯᠬᠠᠨ ᠰᠥᠨᠢ ᠪᠠᠢᠪᠠ᠃ ᠰᠠᠷᠠ ᠠᠯᠭᠤᠷᠬᠠᠨ ᠳᠡᠭᠡᠭᠰᠢᠯᠡᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠭᠡᠷᠡᠯ ᠳ᠋ᠦ᠍ ᠪᠣᠭᠣᠨᠢᠬᠠᠨ ᠬᠥᠲᠥᠯ ᠳᠣᠪᠣᠴᠠᠭ ᠤ᠋ᠳ ᠬᠠᠷᠠᠭᠳᠠᠨᠠ᠃ ᠰᠥᠨᠢ ᠶ᠋ᠢᠨ ᠨᠠᠮ ᠭᠦᠮ ᠨᠢ ᠨᠠᠮᠠᠶ᠋ᠢ ᠤᠯᠠᠮ ᠤᠨᠲᠠᠵᠤ ᠣᠷᠣᠬᠤ ᠦᠭᠡᠢ ᠪᠣᠯᠭᠠᠪᠠ᠃ ᠪᠢ ᠳᠡᠯᠡᠬᠡᠢ ᠳ᠋ᠠᠬᠢᠨ ᠳ᠋ᠤ᠌ ᠬᠠᠮᠤᠭ ᠤ᠋ᠨ ᠲᠣᠮᠣ ᠬᠠᠭᠠᠨᠲᠤ ᠤᠯᠤᠰ ᠢ᠋ ᠪᠠᠢᠭᠤᠯᠤᠭᠰᠠᠨ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠴᠡᠷᠢᠭ ᠠᠩᠭᠢ ᠶ᠋ᠢᠨ ᠲᠤᠬᠠᠢ᠂ ᠲᠡᠭᠦᠨ ᠤ ᠬᠣᠢᠴᠢᠰ ᠪᠣᠯᠬᠤ ᠢᠷᠢᠨᠴᠢᠨ ᠳᠤᠯᠮᠠ ᠶ᠋ᠢᠨ ᠲᠤᠬᠠᠢ᠂ ᠵᠢᠴᠢ ᠲᠡᠳᠡᠨ ᠦ᠌ ᠡᠪᠡᠳᠴᠢᠯᠡᠨ ᠦᠬᠦᠵᠦ ᠪᠠᠢᠭᠠ ᠲᠡᠮᠡᠭᠡ ᠬᠣᠨᠢᠨ ᠰᠦᠷᠦᠭ ᠲᠦ᠍ ᠬᠠᠪᠰᠤᠷᠤᠮᠵᠢ ᠪᠣᠯᠵᠤ ᠳᠡᠢᠯᠬᠦ ᠦᠭᠡᠢ ᠪᠠᠢᠭᠠ ᠲᠤᠬᠠᠢ ᠪᠠᠨ ᠪᠣᠳᠣᠨ ᠬᠡᠪᠲᠡᠪᠡ᠃ ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍ ᠥᠴᠦᠬᠡᠨ ᠴᠦ᠍ ᠳᠠᠷᠤᠭᠠᠰᠤ ᠦᠭᠡᠢ ᠪᠠᠶᠠᠷᠲᠠᠢ ᠪᠠᠷ ᠬᠠᠨᠢᠯᠠᠵᠤ ᠰᠠᠭᠤᠬᠤ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ ᠪᠠᠨ ᠬᠦᠯᠢᠶᠡᠵᠦ ᠪᠠᠢᠭᠠ ᠰᠠᠨᠳᠠᠮᠠ ᠶ᠋ᠢᠨ ᠲᠤᠬᠠᠢ ᠪᠣᠳᠣᠪᠠ᠃ ᠲᠡᠷᠡ ᠴᠦ᠍ ᠤᠳᠠᠯ ᠦᠭᠡᠢ ᠨᠢᠭᠡᠨ ᠴᠢᠷᠮᠠᠢᠯᠲᠠᠲᠠᠢ ᠪᠦᠰᠡᠭᠦᠢ᠂ ᠭᠠᠷᠮᠠᠭᠠᠢ ᠡᠵᠢ ᠪᠣᠯᠵᠤ ᠳᠡᠭᠡᠳᠦᠰ ᠲᠡᠢ ᠪᠡᠨ ᠠᠳᠠᠯᠢᠬᠠᠨ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠨ ᠠᠳᠠ ᠲᠡᠨᠳᠡ ᠨᠡᠭᠦᠳᠡᠯᠯᠡᠨ᠂ ᠬᠡᠦᠬᠡᠳ ᠢ᠋ᠶ᠋ᠡᠨ ᠥᠰᠬᠡᠨ ᠪᠣᠢᠵᠢᠭᠤᠯᠬᠤ ᠪᠥᠭᠡᠳ ᠳᠤᠯᠮᠠ ᠲᠠᠢ ᠠᠳᠠᠯᠢᠬᠠᠨ ᠬᠣᠨᠢᠨ ᠰᠦᠷᠦᠭ ᠮᠠᠯᠵᠢᠬᠤ ᠪᠣᠯᠤᠨᠠ᠃
ᠠᠳᠠ ᠬᠦᠷᠦᠭᠡᠳ ᠪᠢ ᠰᠠᠶᠢ ᠨᠣᠢᠷᠮᠤᠭᠯᠠᠨ ᠡᠬᠢᠯᠡᠪᠡ᠃ ᠭᠡᠬᠦ ᠳ᠋ᠦ᠍ ᠳᠡᠮᠡᠢ ᠤᠳᠠᠯ ᠦᠭᠡᠢ ᠨᠣᠬᠠᠢ ᠬᠤᠴᠠᠬᠤ ᠳᠠᠭᠤᠨ ᠳ᠋ᠤ᠌ ᠰᠡᠷᠡᠭᠰᠡᠨ ᠶᠦᠮ᠃ ᠬᠠᠭᠠᠯᠭᠠ ᠴᠣᠬᠢᠬᠤ ᠴᠢᠮᠡᠭᠡ ᠭᠠᠷᠴᠤ᠂ ᠦᠦᠷ ᠦ᠋ᠨ ᠰᠤᠪᠤᠷᠠᠭᠰᠠᠨ ᠭᠡᠭᠡ ᠪᠡᠷ ᠱᠠᠯ ᠬᠥᠯᠥᠷᠡᠭᠰᠡᠨ ᠮᠣᠷᠢ ᠬᠥᠲᠥᠯᠦᠭᠰᠡᠨ ᠫᠤᠤ ᠲᠠᠢ ᠬᠣᠶᠠᠷ ᠡᠷᠡ ᠣᠷᠣᠵᠤ ᠢᠷᠡᠯᠡ᠃ ᠲᠡᠳᠡ ᠶᠡᠬᠡ ᠬᠣᠯᠠ ᠠ᠋ᠴᠠ ᠶᠠᠭᠠᠷᠠᠯᠲᠠᠢ ᠳᠣᠪᠲᠣᠯᠵᠤ ᠢᠷᠡᠭᠰᠡᠨ ᠨᠢ ᠢᠯᠡᠬᠡᠨ ᠪᠠᠢᠵᠤ᠂ ᠢᠷᠢᠨᠴᠢᠨ ᠦ᠌ ᠮᠣᠩᠭᠣᠯ ᠭᠡᠷ ᠲᠦ᠍ ᠣᠷᠣᠭᠠᠳ ᠳᠣᠣᠷᠠ ᠳᠠᠭᠤᠨ ᠢ᠋ᠶ᠋ᠠᠷ ᠶᠠᠷᠢᠯᠴᠠᠵᠤ ᠡᠬᠢᠯᠡᠪᠡ᠃
ᠥᠷᠯᠥᠭᠡ ᠪᠣᠯᠵᠤ ᠨᠠᠷᠠ ᠮᠠᠨᠳᠤᠯᠠ᠃ ᠥᠷᠯᠥᠭᠡ ᠶ᠋ᠢᠨ ᠨᠠᠷᠠᠨ ᠲᠤᠶᠠᠭᠠᠨ ᠳ᠋ᠤ᠌ ᠳᠣᠪᠣᠴᠠᠭ ᠲᠤᠯᠤᠭᠠᠳ ᠤᠯᠠᠪᠢᠷ ᠥᠩᠭᠡ ᠲᠡᠢ ᠬᠠᠷᠠᠭᠳᠠᠬᠤ ᠠᠵᠢ᠃ ᠪᠢᠳᠡ ᠠᠶᠠᠨ ᠳ᠋ᠠᠭᠠᠨ ᠮᠣᠷᠳᠠᠬᠤ ᠳ᠋ᠤ᠌ ᠪᠡᠯᠡᠨ ᠪᠣᠯᠪᠠ᠃ ᠢᠷᠢᠨᠴᠢᠨ ᠪᠢᠳᠡᠨ ᠢ᠋ ᠠᠬᠢᠭᠠᠳ ᠨᠢᠭᠡ ᠥᠨᠵᠢᠭᠡᠳ ᠶᠠᠪᠤᠭᠠᠴᠢ ᠭᠡᠵᠦ ᠤᠷᠢᠯᠠ᠃ ᠡᠨᠡ ᠪᠣᠯ ᠮᠣᠩᠭᠣᠯᠴᠤᠳ ᠤ᠋ᠨ ᠪᠢᠴᠢᠭᠯᠡᠭᠡ ᠦᠭᠡᠢ ᠶᠣᠰᠣ ᠵᠠᠩᠰᠢᠯ ᠶᠤᠮ᠃ ᠪᠢᠳᠡ ᠲᠡᠳᠡᠨ ᠦ᠌ ᠤᠷᠢᠯᠭᠠ ᠶ᠋ᠢ ᠲᠠᠲᠠᠭᠠᠯᠵᠠᠪᠠ᠃ ᠲᠠᠯᠠ ᠶ᠋ᠢᠨ ᠸᠠᠩ ᠮᠢᠨᠢ ᠬᠠᠮᠤᠭ ᠤ᠋ᠨ ᠰᠠᠢᠬᠠᠨ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠴᠡᠢ᠃ ᠡᠯᠪᠡᠭᠬᠡᠨ ᠲᠣᠷᠭᠠᠨ ᠲᠡᠷᠯᠢᠭ ᠦ᠋ᠨ ᠭᠠᠳᠠᠭᠤᠷ ᠦᠨᠡᠲᠡᠢ ᠪᠤᠯᠠᠭᠠᠨ ᠳᠠᠬᠤ ᠡᠮᠦᠰᠴᠡᠢ᠃
- ᠲᠠ ᠨᠠᠷ ᠡᠮᠦᠨᠡᠰᠢ ᠪᠡᠨ ᠶᠠᠪᠤᠪᠠᠯ ᠵᠦᠭᠡᠷ ᠪᠠᠢᠬᠠ᠃ ᠳᠡᠭᠡᠷᠡᠮᠴᠢᠳ ᠵᠡᠭᠦᠨᠲᠡᠢ ᠡᠴᠡ ᠨᠠᠭᠠᠰᠢᠯᠠᠵᠤ ᠪᠣᠢ᠃ ᠪᠠᠷᠤᠭ ᠦᠳᠡᠰᠢ ᠶ᠋ᠢᠨ ᠦᠶᠡᠰ ᠢ᠋ᠶ᠋ᠡᠷ ᠲᠡᠮᠡᠭᠡᠨ ᠵᠢᠩ ᠦ᠋ᠨ ᠵᠠᠮ ᠳ᠋ᠤ᠌ ᠬᠦᠷᠬᠦ ᠪᠣᠯᠤᠨᠠ ᠭᠡᠵᠦ ᠢᠷᠢᠨᠴᠢᠨ ᠶᠠᠷᠢᠯᠠ᠃
- ᠲᠡᠷᠡ ᠦᠶᠡ ᠳ᠋ᠦ᠍ ᠪᠢᠳᠡ ᠬᠡᠵᠢᠶᠡᠨ ᠤ ᠬᠥᠬᠡ ᠡᠷᠭᠢ ᠳ᠋ᠦ᠍ ᠬᠦᠷᠦᠭᠰᠡᠨ ᠪᠠᠢᠬᠤ ᠪᠣᠯᠤᠨᠠ ᠭᠡᠵᠦ ᠥᠪᠧᠷᠬᠧ ᠬᠠᠷᠢᠭᠤᠯᠤᠭᠠᠳ ᠬᠡᠳᠦᠢ ᠣᠯᠠᠨ ᠬᠥᠮᠦᠨ ᠪᠠᠢᠭᠠ ᠪᠣᠢ? ᠭᠡᠵᠦ ᠪᠤᠴᠠᠭᠤᠯᠤᠨ ᠠᠰᠠᠭᠤᠪᠠ᠃
- ᠮᠠᠨ ᠤ᠋ ᠬᠥᠮᠦᠨ ᠤ ᠬᠡᠯᠡᠬᠦ ᠪᠡᠷ ᠬᠣᠶᠠᠷ ᠵᠠᠭᠤᠭᠠᠳ ᠮᠣᠷᠢᠲᠠᠳ ᠪᠠᠢᠨᠠ ᠭᠡᠵᠦ ᠪᠠᠢᠨᠠ᠃ ᠲᠡᠭᠦᠨ ᠡᠴᠡ ᠣᠯᠠᠨ ᠴᠤ᠌ ᠪᠠᠢᠵᠤ ᠮᠡᠳᠡᠨᠡ ᠰᠢᠦ᠃ ᠲᠡᠭᠷᠢ ᠪᠢᠳᠡᠨ ᠳ᠋ᠦ᠍ ᠭᠠᠢ ᠵᠣᠪᠠᠯᠠᠩ ᠪᠠᠭᠤᠯᠭᠠᠵᠤ ᠯᠠ ᠪᠠᠢᠬᠤ ᠴᠢᠷᠠᠢ ! ᠲᠡᠭᠡᠭᠡᠳ ᠪᠢ ᠴᠦ᠍ ᠬᠥᠭᠰᠢᠷᠡᠯᠡ ᠰᠢᠦ ᠳᠡ ᠭᠡᠯᠡ᠃
ᠳᠤᠯᠮᠠ ᠮᠣᠩᠭᠣᠯ ᠭᠡᠷ ᠡᠴᠡ ᠭᠠᠷᠴᠤ ᠢᠷᠡᠪᠡ᠃ ᠲᠡᠷᠡ ᠴᠦ᠍ ᠲᠡᠭᠦᠨ ᠦ᠌ ᠬᠠᠮᠤᠭ ᠤ᠋ᠨ ᠰᠠᠢᠬᠠᠨ ᠵᠠᠰᠠᠯ ᠳᠠᠷᠤᠭᠤᠯᠭᠠ ᠪᠠᠨ ᠵᠡᠭᠦᠵᠦ᠂ ᠭᠣᠶᠣᠬᠠᠨ ᠬᠤᠪᠴᠠᠰᠤᠯᠠᠵᠠᠢ᠃ ᠳᠠᠷᠤᠭᠤᠯᠭᠠ ᠵᠠᠰᠠᠯ ᠨᠢ ᠴᠣᠯ ᠠᠯᠲᠠ ᠪᠠᠢᠭᠰᠠᠨ ᠪᠥᠭᠡᠳ ᠤᠷᠲᠤ ᠰᠢᠪᠠᠭ ᠨᠢ ᠠᠯᠬᠤᠳᠠᠯ ᠢ᠋ ᠳ᠋ᠡᠭᠡᠨ ᠦᠯᠦ ᠮᠡᠳᠡᠭᠳᠡᠮᠡ ᠳᠤᠤᠭᠠᠷᠬᠤ ᠠᠵᠢ᠃ ᠲᠡᠷᠡ ᠴᠦ᠍ ᠡᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠮᠤᠭ ᠤ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠦᠭᠡ ᠶ᠋ᠢ ᠰᠣᠨᠣᠰᠤᠭᠰᠠᠨ ᠲᠤᠯᠠ :
- ᠴᠢ ᠵᠠᠯᠠᠭᠤ ᠮᠥᠷᠲᠡᠭᠡᠨ ᠴᠢᠳᠠᠯᠲᠠᠢ ᠪᠠᠢᠭᠰᠠᠭᠠᠷ ! ᠪᠢᠳᠡ ᠡᠨᠡ ᠡᠪᠦᠯ ᠢ᠋ ᠲᠤᠭᠤᠯᠵᠤ ᠬᠠᠪᠤᠷ ᠢ᠋ᠶ᠋ᠠᠷ ᠲᠠᠯᠠ ᠳ᠋ᠤ᠌ ᠪᠠᠭᠤᠨᠠ᠃ ᠡᠭᠦᠨ ᠢ᠋ ᠬᠡᠨ ᠴᠦ᠍ ᠪᠢᠳᠡᠨ ᠡᠴᠡ ᠪᠤᠯᠢᠶᠠᠨ ᠠᠪᠴᠤ ᠴᠢᠳᠠᠬᠤ ᠦᠭᠡᠢ ᠳᠡ ᠭᠡᠯᠡ᠃
- ᠲᠡᠢᠮᠦ ᠳᠡ ! ᠭᠡᠵᠦ ᠢᠷᠢᠨᠴᠢᠨ ᠬᠠᠳᠠᠭᠠᠨᠠᠲᠠᠯᠠ ᠢᠨᠢᠶᠡᠭᠡᠳ᠂ ᠬᠡᠷᠪᠡ ᠴᠠᠭ ᠰᠠᠢᠵᠢᠷᠠᠬᠤ ᠦᠭᠡᠢ ᠶᠦᠮ ᠪᠣᠯ ᠪᠢ ᠳᠠᠬᠢᠭᠠᠳ ᠯᠠ ᠮᠣᠷᠢᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠪᠡᠨ ᠭᠠᠷᠴᠤ ᠤᠤᠯ ᠤ᠋ᠨ ᠬᠢ ᠲᠡᠢ ᠪᠡᠨ ᠠᠳᠠᠯᠢᠬᠠᠨ ᠳᠡᠭᠡᠷᠡᠮᠴᠢᠨ ᠪᠣᠯᠤᠨᠠ ᠭᠡᠰᠡᠨ ᠳ᠋ᠦ᠍᠂
- ᠲᠡᠷᠡ ᠪᠣᠯᠲᠠᠯᠠ ᠵᠥᠩᠳᠡᠭᠡᠨ ᠴᠠᠭ ᠪᠣᠢ ᠯᠠ ᠳᠠ ᠭᠡᠵᠦ ᠳᠤᠯᠮᠠ ᠬᠠᠷᠢᠭᠤᠯᠤᠭᠠᠳ ᠪᠢᠳᠡᠨ ᠢ᠋ ᠥᠷᠯᠥᠭᠡ ᠶ᠋ᠢᠨ ᠴᠠᠢ ᠳ᠋ᠤ᠌ ᠤᠷᠢᠯᠠ᠃ ᠲᠡᠷᠡ ᠲᠣᠭᠲᠠᠭᠤᠬᠠᠨ ᠬᠣᠭᠣᠯᠠᠢ ᠲᠠᠢ ᠠᠯᠭᠤᠷᠬᠠᠨ ᠳᠠᠭᠤ ᠪᠠᠷ ᠵᠠᠷᠤᠴᠠ ᠨᠠᠷ ᠲᠠᠭᠠᠨ ᠵᠠᠷᠯᠢᠭ ᠵᠠᠬᠢᠶᠠ ᠪᠠᠨ ᠶᠠᠷᠢᠵᠤ ᠪᠠᠢᠪᠠ᠃ ᠪᠢᠳᠡᠨ ᠢ᠋ ᠠᠶᠠᠨ ᠳ᠋ᠤ᠌ ᠪᠡᠯᠡᠨ ᠪᠣᠯᠬᠤ ᠳ᠋ᠤ᠌ ᠮᠣᠩᠭᠣᠯ ᠭᠡᠷ ᠦ᠋ᠨ ᠡᠭᠦᠳᠡᠨ ᠳ᠋ᠦ᠍ ᠬᠣᠶᠠᠷ ᠡᠮᠡᠭᠡᠯ ᠲᠡᠢ ᠮᠣᠷᠢ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠨᠢ ᠳᠤᠯᠮᠠ ᠢᠷᠢᠨᠴᠢᠨ ᠬᠣᠶᠠᠭᠤᠯᠠ ᠰᠦᠷᠦᠭ ᠢ᠋ᠶ᠋ᠡᠨ ᠡᠷᠭᠢᠨ ᠦᠵᠡᠬᠦ ᠭᠡᠵᠦ ᠪᠠᠢᠭᠠ ᠠᠵᠢ᠃ ᠢᠷᠢᠨᠴᠢᠨ ᠪᠢᠳᠡᠨ ᠢ᠋ ᠬᠠᠭᠠᠯᠭᠠᠨ ᠤ᠋ ᠭᠠᠳᠠᠨᠠ ᠭᠠᠷᠲᠠᠯᠠ ᠬᠦᠷᠭᠡᠪᠡ᠃
- ᠲᠠ ᠨᠠᠷ ᠵᠤᠨ ᠤ᠋ ᠰᠠᠢᠬᠠᠨ ᠴᠠᠭ ᠲᠤ᠌ ᠨᠠᠭᠠᠳᠤᠮ ᠢ᠋ᠶ᠋ᠠᠷ ᠠᠬᠢᠭᠠᠳ ᠬᠦᠷᠦᠭᠡᠳ ᠢᠷᠡᠭᠡᠷᠡᠢ ! ᠡᠪᠦᠯ ᠪᠣᠯ ᠪᠦᠲᠦᠨ ᠵᠢᠯ ᠳ᠋ᠡᠬᠢ ᠬᠠᠮᠤᠭ ᠤ᠋ᠨ ᠬᠠᠲᠠᠭᠤ ᠴᠠᠭ ᠪᠠᠢᠭᠠ ᠶᠤᠮ ᠭᠡᠳ ᠪᠢᠳᠡᠨ ᠢ᠋ ᠦᠳᠡᠨ ᠮᠣᠷᠳᠠᠭᠤᠯᠪᠠ᠃
ᠮᠠᠰᠢᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠫᠤᠤ ᠲᠠᠢ ᠬᠣᠶᠠᠷ ᠮᠣᠩᠭᠣᠯ ᠵᠣᠭᠰᠣᠵᠤ ᠪᠠᠢᠪᠠ᠃ ᠢᠷᠢᠨᠴᠢᠨ ᠪᠢᠳᠡᠨ ᠢ᠋ ᠠᠶᠠᠨ ᠵᠠᠮ ᠳ᠋ᠠᠭᠠᠨ ᠰᠠᠭᠠᠳ ᠬᠠᠷᠰᠢ ᠦᠭᠡᠢ ᠠᠶᠠᠯᠠᠭᠤᠯᠬᠤ ᠵᠣᠷᠢᠯᠭᠠ ᠪᠠᠷ ᠲᠡᠳᠡᠨ ᠢ᠋ ᠲᠣᠮᠢᠯᠠᠨ ᠪᠢᠳᠡᠨ ᠳ᠋ᠦ᠍ ᠵᠠᠮ ᠵᠢᠭᠠᠯᠭᠠᠵᠤ ᠥᠭᠬᠦ ᠠᠵᠢ᠃ ᠤᠴᠢᠷ ᠨᠢ ᠡᠨᠡ ᠦᠶᠡ ᠳ᠋ᠦ᠍ ᠲᠡᠮᠡᠭᠡᠨ ᠵᠢᠩ ᠦ᠋ᠨ ᠵᠠᠮ ᠳᠠᠭᠠᠤ ᠳᠡᠭᠡᠷᠡᠮᠴᠢᠳ ᠦ᠋ᠨ ᠲᠦᠭᠰᠢᠭᠦᠷᠢᠲᠡᠢ ᠴᠢᠮᠡᠭᠡ ᠪᠦᠷ ᠬᠦᠷᠦᠭᠰᠡᠨ ᠪᠥᠭᠡᠳ ᠳᠡᠭᠡᠷᠡᠮᠴᠢᠳ ᠲᠡᠢ ᠲᠡᠮᠡᠴᠡᠬᠦ ᠵᠠᠷᠯᠠᠯ ᠨᠢᠭᠡᠨᠲᠡ ᠲᠠᠷᠬᠠᠭᠰᠠᠨ ᠪᠠᠢᠵᠠᠢ᠃