ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠᠨ ᠭᠠᠢᠬᠠᠮᠰᠢᠭ- ᠳ· ᠨᠠᠴᠤᠭᠳᠣᠷᠵᠢЕртөнцийн гураван гайхамшиг-Д.Нацагдорж
449 ᠳ· ᠨᠠᠴᠤᠭᠳᠣᠷᠵᠢ
ᠪᠦᠭᠦᠳᠡ ᠶ᠋ᠢ ᠭᠡᠷᠡᠯᠲᠦᠭᠦᠯᠦᠨ ᠪᠦᠬᠦᠨ ᠢ᠋ ᠪᠠᠶᠠᠰᠬᠠᠭᠴᠢ ᠨᠠᠷᠠ ᠦᠨᠡᠬᠡᠷ ᠭᠠᠢᠬᠠᠮᠰᠢᠭ᠃
ᠠᠮᠢᠰᠬᠤᠯ ᠢ᠋ ᠰᠣᠯᠢᠵᠤ ᠠᠮᠢᠲᠠᠨ ᠢ᠋ ᠵᠢᠷᠭᠠᠭᠤᠯᠤᠭᠴᠢ ᠠᠭᠠᠷ ᠦᠨᠡᠬᠡᠷ ᠭᠠᠢᠬᠠᠮᠰᠢᠭ᠃
ᠤᠷᠭᠤᠮᠠᠯ ᠠᠮᠢᠲᠠᠨ ᠪᠣᠳᠠᠰ ᠢ᠋ ᠲᠡᠵᠢᠭᠡᠭᠴᠢ ᠤᠰᠤ ᠦᠨᠡᠬᠡᠷ ᠭᠠᠢᠬᠠᠮᠰᠢᠭ᠃
ᠠᠯᠲᠠᠨ ᠲᠤᠶᠠᠭᠠᠲᠤ ᠨᠠᠷᠠᠨ ᠤ᠋ ᠭᠡᠷᠡᠯ ᠲᠦᠮᠡᠨ ᠭᠠᠵᠠᠷ ᠰᠠᠴᠤᠷᠠᠵᠤ
ᠠᠮᠢᠲᠠᠨ ᠬᠥᠮᠦᠨ ᠤᠷᠭᠤᠮᠠᠯ ᠲᠡᠷᠢᠭᠦᠲᠡᠨ ᠢ᠋ ᠳᠤᠯᠠᠭᠠᠴᠠᠭᠤᠯᠤᠨ ᠪᠠᠶᠠᠰᠬᠠᠨᠠ᠃
ᠠᠤᠭᠠ ᠬᠦᠴᠦᠨ ᠪᠦᠷᠢᠨ ᠵᠣᠷᠢᠭ ᠲᠡᠭᠦᠨ ᠳ᠋ᠦ᠍ ᠰᠢᠲᠦᠨᠡ᠃
ᠮᠣᠩᠭᠣᠯ ᠤ᠋ᠨ ᠮᠠᠯᠴᠢᠨ ᠠᠷᠠᠳ ᠨᠠᠷᠠᠨ ᠤ᠋ ᠳᠣᠣᠷᠠ ᠨᠠᠰᠤ ᠶ᠋ᠢ ᠥᠩᠭᠡᠷᠡᠭᠦᠯᠦᠨᠡ᠃
ᠴᠢᠭᠢᠷᠠᠭ ᠪᠡᠶᠡ ᠡᠷᠡᠭᠦᠯ ᠴᠢᠷᠠᠢ ᠲᠦᠮᠡᠨ ᠦ᠌ ᠰᠡᠳᠬᠢᠯ ᠢ᠋ ᠬᠥᠳᠡᠯᠭᠡᠨᠡ᠃
ᠨᠠᠷᠠᠨ ᠳ᠋ᠤ᠌ ᠰᠢᠷᠠᠭᠳᠠᠭᠰᠠᠨ ᠮᠣᠩᠭᠣᠯ ᠬᠥᠮᠦᠨ ᠳᠡᠯᠡᠬᠡᠢ ᠳ᠋ᠠᠬᠢᠨ ᠳ᠋ᠤ᠌ ᠳᠤᠷᠠᠰᠤᠭᠳᠠᠨᠠ᠃
ᠨᠠᠪᠴᠢ ᠴᠡᠴᠡᠭ ᠭᠣᠶᠣᠮᠰᠣᠭ ᠰᠠᠢᠬᠠᠨ ᠨᠠᠷᠠ ᠶ᠋ᠢ ᠬᠦᠰᠡᠨᠡ᠃
ᠨᠠᠭᠠᠳᠤᠮ ᠴᠡᠩᠭᠡᠯ ᠪᠠᠶᠠᠷ ᠶᠣᠰᠣᠯᠠᠯ ᠨᠠᠷᠠᠨ ᠳᠣᠣᠷᠠ ᠬᠥᠭᠵᠢᠨᠡ᠃
ᠨᠠᠷᠠ ᠭᠡᠭᠴᠢ ᠵᠢᠷᠭᠠᠯ ᠤ᠋ᠨ ᠲᠤᠶᠠᠭᠠ ᠮᠥᠨ᠃
ᠠᠮᠢᠰᠬᠤᠯ ᠤ᠋ᠨ ᠬᠦᠢᠲᠡᠨ ᠠᠮᠢᠲᠠᠨ ᠤ᠋ ᠠᠮᠢ ᠶ᠋ᠢ ᠪᠠᠷᠢᠮᠲᠠᠯᠠᠨᠠ᠃
ᠠᠭᠠᠷ ᠤ᠋ᠨ ᠬᠡᠢ ᠬᠥᠮᠦᠨ ᠦ᠌ ᠪᠡᠶᠡ ᠶ᠋ᠢ ᠲᠡᠳᠬᠦᠨᠡ᠃
ᠠᠴᠢᠲᠤ ᠶᠣᠰᠣ ᠠᠭᠠᠷ ᠲᠡᠭᠦᠨ ᠳ᠋ᠦ᠍ ᠣᠷᠣᠰᠢᠨᠠ᠃
ᠠᠭᠤᠳᠠᠮ ᠲᠠᠯᠠ ᠶ᠋ᠢᠨ ᠴᠡᠯᠡᠭᠡᠷ ᠠᠭᠠᠷ ᠲᠤ᠌ ᠮᠣᠩᠭᠣᠯ ᠬᠥᠮᠦᠨ ᠠᠮᠢᠳᠤᠷᠠᠨᠠ᠃
ᠠᠭᠤᠵᠢᠮ ᠴᠡᠭᠡᠵᠢᠨ ᠳ᠋ᠦ᠍ ᠴᠡᠪᠡᠷ ᠠᠮᠢᠰᠬᠤᠯ ᠢ᠋ ᠰᠣᠯᠢᠨᠠ᠃
ᠤᠷᠲᠤ ᠶ᠋ᠢᠨ ᠰᠠᠢᠬᠠᠨ ᠳᠠᠭᠤᠤ ᠪᠠᠨ ᠬᠣᠯᠠ ᠶ᠋ᠢᠨ ᠬᠣᠯᠠᠠ᠋ᠴᠠ ᠳᠠᠭᠤᠯᠠᠨᠠ᠃
ᠤᠯᠠᠭᠠ ᠪᠤᠲᠠᠷᠠᠵᠤ ᠬᠦᠷᠡᠩ ᠪᠣᠷᠣᠯᠠᠭᠰᠠᠨ ᠮᠣᠩᠭᠣᠯ ᠴᠢᠷᠠᠢ
ᠤᠬᠠᠮᠰᠠᠷ ᠪᠦᠷᠢᠳᠴᠦ ᠣᠶᠤᠨ ᠲᠣᠳᠣᠷᠠᠭᠰᠠᠨ ᠮᠡᠷᠭᠡᠨ ᠤᠬᠠᠭᠠᠨ ᠳ᠋ᠤ᠌
ᠠᠭᠠᠷ ᠨᠠᠷᠠ ᠤᠰᠤ ᠭᠤᠷᠪᠠ ᠬᠡᠵᠢᠶᠡᠳᠡ ᠬᠣᠯᠪᠣᠭᠳᠠᠨᠠ᠃
ᠠᠷᠬᠠᠭ ᠬᠠᠭᠤᠴᠢᠨ ᠤᠴᠠᠷᠠᠪᠠᠯ ᠷᠠᠰᠢᠶᠠᠨ ᠤᠰᠤᠨ ᠳ᠋ᠤ᠌ ᠣᠷᠣᠨᠠ᠃
ᠠᠷᠢᠭᠤᠨ ᠴᠡᠪᠡᠷ ᠭᠣᠶᠣᠮᠰᠣᠭ ᠡᠷᠡᠭᠦᠯ ᠢ᠋ ᠬᠦᠰᠡᠪᠡᠯ ᠤᠰᠤᠨ ᠳ᠋ᠤ᠌ ᠤᠬᠢᠶᠠᠨᠠ᠃
ᠠᠭᠤᠤ ᠬᠦᠴᠦᠨ ᠠᠷᠢᠭᠤᠨ ᠴᠡᠪᠡᠷ ᠤᠰᠤ ᠲᠡᠭᠦᠨ ᠳ᠋ᠦ᠍ ᠪᠣᠯᠪᠠᠰᠤᠷᠠᠨᠠ᠃
ᠠᠭᠤᠳᠠᠮ ᠲᠠᠯᠠ ᠳ᠋ᠤ᠌ ᠤᠰᠤᠨ ᠪᠤᠯᠠᠭ ᠤᠨᠳᠤᠷᠤᠮᠠᠯ ᠷᠠᠰᠢᠶᠠᠨ ᠪᠦᠷᠢᠨ
ᠤᠬᠢᠶᠠᠵᠤ ᠴᠡᠪᠡᠷᠯᠡᠬᠦ ᠡᠪᠡᠳᠴᠢᠨ ᠡᠮᠭᠡᠭ ᠪᠠᠰᠠ ᠴᠤ᠌ ᠬᠣᠪᠣᠷ ᠪᠢᠰᠢ᠃
ᠤᠴᠢᠷ ᠢ᠋ ᠮᠡᠳᠡᠭᠰᠡᠨ ᠮᠡᠷᠭᠡᠨ ᠠᠪᠢᠶᠠᠰᠲᠠᠨ ᠠᠷᠢᠭᠤᠨ ᠢ᠋ ᠡᠷᠬᠢᠯᠡᠨᠡ᠃
ᠤᠷᠭᠤᠮᠠᠯ᠂ ᠠᠮᠢᠲᠠᠨ᠂ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠠᠯᠢᠨ ᠪᠣᠯᠪᠠᠴᠤ
ᠤᠰᠤ ᠶ᠋ᠢ ᠬᠦᠰᠡᠵᠦ ᠬᠤᠷᠠ ᠶ᠋ᠢ ᠤᠷᠢᠬᠤ ᠨᠢ ᠬᠣᠪᠣᠷ ᠦᠭᠡᠢ᠃
ᠤᠬᠠᠮᠰᠠᠷᠯᠠᠬᠤ ᠳ᠋ᠤ᠌ ᠡᠨᠡ ᠭᠤᠷᠪᠠ ᠮᠠᠷᠲᠠᠰᠢ ᠦᠭᠡᠢ ᠭᠠᠢᠬᠠᠮᠰᠢᠭ᠃
1935 ᠣᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠡᠷᠳᠡᠨᠢᠭᠣᠤᠠ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ