ᠮᠤᠭᠵᠤᠭᠤᠬᠠᠨ ᠳᠠᠭᠠ ᠲᠠᠢ ᠵᠤᠭᠵᠤᠭᠤᠬᠠᠨ ᠬᠦᠦМогжоохон даагатай Жогжоохон хүү
730ᠮᠤᠭᠵᠤᠭᠤᠬᠠᠨ ᠳᠠᠭᠠ ᠲᠠᠢ ᠵᠤᠭᠵᠤᠭᠤᠬᠠᠨ ᠬᠦᠦ
ᠡᠷᠲᠡ ᠳᠡᠭᠡᠷᠡ ᠴᠠᠭ ᠲᠤ᠌ ᠨᠢᠭᠡ ᠶᠠᠪᠤᠳᠠᠯ ᠪᠣᠯᠤᠭᠰᠠᠨ ᠶᠤᠮ ᠭᠡᠳᠡᠭ᠂ᠮᠤᠭᠵᠤᠭᠤᠬᠠᠨ ᠳᠠᠭᠠ ᠲᠠᠢ ᠵᠤᠭᠵᠤᠭᠤᠬᠠᠨ ᠬᠦᠦ ᠭᠡᠵᠦ ᠨᠤᠲᠤᠭ ᠤᠰᠤᠨ ᠳ᠋ᠤ᠌ ᠨᠡᠷᠡᠲᠡᠢ ᠬᠡᠯᠡᠮᠡᠭᠡᠢ ᠬᠤᠷᠴᠠ ᠦᠭᠡ ᠲᠡᠢ ᠬᠦᠦ ᠪᠠᠢᠵᠠᠢ᠃
ᠨᠢᠭᠡ ᠡᠳᠦᠷ ᠵᠤᠭᠵᠤᠭᠤᠬᠠᠨ ᠬᠦᠦ ᠮᠤᠭᠵᠤᠭᠤᠬᠠᠨ ᠳᠠᠭᠠ ᠪᠠᠨ ᠤᠨᠤᠭᠠᠳ᠂ ᠲᠠᠷᠳᠠᠩᠬᠠᠨ ᠵᠠᠮ ᠢ᠋ᠶ᠋ᠠᠷ ᠰᠢᠪᠲᠤᠷᠠᠩᠬᠠᠨ ᠳᠠᠪᠬᠢᠵᠤ ᠶᠠᠪᠤᠬᠤ ᠳ᠋ᠤ᠌ ᠰᠢᠯᠤᠭᠤᠬᠠᠨ ᠨᠦᠬᠡ ᠤᠷᠤᠭᠤ ᠱᠤᠯᠲᠤᠩᠬᠠᠨ ᠵᠤᠷᠠᠮᠠ ᠭᠤᠯᠳᠤᠩᠬᠠᠨ ᠭᠡᠳ ᠣᠷᠣᠴᠢᠬᠠᠵᠠᠢ ᠭᠡᠨᠡ᠃ ᠲᠡᠭᠡᠭᠡᠳ ᠵᠤᠷᠠᠮᠠ ᠶ᠋ᠢᠨ ᠨᠦᠬᠡ ᠶ᠋ᠢ ᠣᠬᠣᠩᠬᠠᠨ ᠣᠳᠤᠩᠬᠠᠨ ᠰᠠᠭᠤᠵᠤ ᠯᠠ ᠪᠠᠢᠲᠠᠯᠠ᠂ ᠬᠠᠷᠠ ᠠᠵᠢᠷᠭᠠ ᠤᠨᠤᠭᠰᠠᠨ ᠬᠠᠷᠠ ᠳᠠᠬᠤ ᠲᠠᠢ ᠲᠦᠰᠢᠮᠡᠯ ᠢᠷᠡᠭᠡᠳ᠄《ᠵᠠ ᠂ᠴᠢ ᠴᠦ᠍ ᠶᠠᠭᠤ ᠬᠢᠵᠦ ᠪᠠᠢᠭᠠ ᠬᠦᠦ ᠪᠣᠢ ?》ᠭᠡᠵᠦ ᠠᠰᠠᠭᠤᠵᠠᠢ᠃ ᠲᠡᠭᠡᠬᠦ ᠳ᠋ᠦ᠍ ᠨᠢ ᠬᠦᠦ᠄《ᠰᠢᠯᠤᠭᠤᠬᠠᠨ ᠨᠦᠬᠡ ᠤᠷᠤᠭᠤ ᠱᠤᠯᠲᠤᠩᠬᠠᠨ ᠵᠤᠷᠠᠮᠠ ᠭᠤᠯᠳᠤᠩᠬᠠᠨ ᠭᠡᠳ ᠣᠷᠣᠴᠢᠬᠠᠬᠤ ᠪᠠᠷ ᠨᠢ ᠤᠬᠤᠩᠬᠠᠨ ᠤᠳᠤᠩᠬᠠᠨ ᠰᠠᠭᠤᠵᠤ ᠪᠠᠢᠨᠠ》ᠭᠡᠵᠦ ᠬᠠᠷᠢᠭᠤᠯᠤᠭᠰᠠᠨ ᠳ᠋ᠤ᠌ ᠲᠦᠰᠢᠮᠡᠯ᠄《ᠬᠥᠶᠢ ᠶᠣᠷᠣ ᠤᠤ ? ᠶᠠᠭᠠᠬᠢᠭᠰᠠᠨ ᠪᠡᠯᠡᠨ ᠴᠡᠴᠡᠨ ᠦᠭᠡ ᠲᠡᠢ ᠭᠠᠢᠬᠠᠯ ᠪᠣᠢ ᠴᠢ? ᠵᠠᠮ ᠵᠠᠢᠯᠠ》ᠭᠡᠵᠦ ᠰᠢᠷᠦᠭᠦᠬᠡᠨ ᠳᠤᠤᠭᠠᠷᠤᠯᠠ ᠭᠡᠨᠡ᠃ ᠵᠤᠭᠵᠤᠭᠤᠬᠠᠨ ᠬᠦᠦ ᠰᠠᠭᠤᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠨ ᠬᠡᠳᠦ ᠴᠣᠬᠢᠭᠠᠳ᠄《ᠵᠠᠮ ᠠ᠋ ᠂ᠴᠢᠮᠠ ᠶ᠋ᠢ ᠵᠠᠢᠯᠠ ᠭᠡᠵᠦ ᠪᠠᠢᠨᠠ》ᠭᠡᠵᠦ ᠬᠡᠨᠡᠭ ᠬᠡᠯᠡᠭᠡᠳ ᠵᠤᠷᠠᠮᠠ ᠶ᠋ᠢᠨ ᠨᠦᠬᠡ ᠤᠷᠤᠭᠤ ᠤᠰᠤ ᠴᠢᠳᠬᠤᠭᠠᠳ ᠰᠠᠭᠤᠵᠠᠢ ᠭᠡᠨᠡ᠃ ᠲᠦᠰᠢᠮᠡᠯᠴᠢ ᠦᠭᠡ ᠰᠥᠷᠦᠭᠰᠡᠨ ᠬᠦᠦ ᠳ᠋ᠦ᠍ ᠠᠢᠬᠤᠪᠲᠤᠷ ᠠᠭᠤᠷᠯᠠᠵᠤ᠄《ᠴᠢᠮᠠ ᠶ᠋ᠢ ᠪᠢ ᠵᠠᠮ ᠲᠠᠯᠪᠢᠵᠤ ᠥᠭ ᠭᠡᠵᠦ ᠪᠠᠢᠨᠠ᠂ᠦᠭᠡᠢ ᠶᠠᠭᠤᠨ᠂ ᠠᠮᠠᠨ ᠤ᠋ ᠰᠦ ᠨᠢ ᠠᠷᠢᠯᠤᠭᠠ ᠦᠭᠡᠢ ᠪᠠᠢᠵᠤ ᠠᠢᠬᠤᠪᠲᠤᠷ ᠲᠣᠮᠣ ᠦᠭᠡ ᠲᠡᠢ ᠵᠣᠯᠢᠭ ᠪᠣᠢ?》ᠭᠡᠵᠦ ᠴᠢᠩᠭᠠ ᠳᠠᠭᠤ ᠪᠠᠷ ᠵᠠᠩᠳᠤᠷᠤᠯᠠ ᠭᠡᠨᠡ᠃《ᠲᠦᠰᠢᠮᠡᠯ ᠭᠤᠸᠠᠢ᠂ ᠲᠠᠤᠯᠠᠢ ᠶ᠋ᠢᠨ ᠪᠥᠵᠥᠩ ᠲᠥᠷᠥᠭᠰᠡᠨ ᠭᠠᠵᠠᠷ ᠢ᠋ᠶ᠋ᠠᠨ ᠭᠤᠷᠪᠠ ᠬᠣᠨᠣᠬᠤ ᠶᠤᠮ ᠪᠣᠯ ᠲᠥᠭᠡᠷᠢᠳᠡᠭ ᠦᠭᠡᠢ ᠭᠡᠳᠡᠭ᠂ ᠥᠨᠳᠡᠭᠡᠨ ᠡᠴᠡ ᠪᠡᠨ ᠭᠠᠷᠤᠭᠰᠠᠨ ᠠᠩᠭᠠᠬᠠᠢ ᠬᠦᠷᠲᠡᠯᠡ ᠭᠤᠷᠪᠠ ᠬᠣᠨᠣᠭᠠᠳ ᠥᠳᠥ ᠰᠥᠳᠥ ᠪᠡᠨ ᠳᠡᠯᠭᠡᠳᠡᠭ ᠪᠤᠰᠤ ᠤᠤ? ᠲᠡᠭᠡᠬᠦ ᠳ᠋ᠦ᠍ ᠬᠥᠮᠦᠨ ᠦ᠌ ᠬᠦᠦ ᠨᠠᠳᠠ ᠳ᠋ᠤ᠌ ᠡᠨᠡ ᠵᠡᠷᠭᠡ ᠶ᠋ᠢᠨ ᠦᠭᠡ ᠪᠠᠢᠯᠭᠦᠢ ᠳᠡ》ᠭᠡᠵᠦ ᠵᠤᠭᠵᠤᠭᠤᠬᠠᠨ ᠬᠦᠦ ᠬᠡᠯᠡᠵᠦ ᠣᠷᠬᠢᠯᠠ ᠭᠡᠨᠡ᠃ ᠲᠦᠰᠢᠮᠡᠯᠴᠢ ᠬᠡᠯᠡᠬᠦ ᠦᠭᠡ ᠦᠭᠡᠢ ᠪᠣᠯᠤᠭᠰᠠᠨ ᠳ᠋ᠤ᠌ ᠪᠠᠨ ᠪᠠᠬᠠᠨ ᠪᠠᠯᠠᠭᠳᠠᠵᠤ᠄《ᠡᠨᠡ ᠦᠭᠡᠢ ᠶᠣᠷᠣ ᠠ᠋᠂ ᠶᠠᠭᠠᠬᠢᠭᠰᠠᠨ ᠶᠡᠬᠡ ᠦᠭᠡ ᠲᠡᠢ ᠮᠣᠨᠳᠢ ᠪᠣᠢ ᠬᠥᠶᠢ᠂ ᠵᠠ ᠵᠠ ᠲᠡᠷᠡ ᠴᠦ᠍ ᠶᠠᠭᠠᠬᠢᠬᠤᠪ᠂ ᠤᠰᠤ ᠶᠠᠮᠠᠷ ᠪᠠᠢᠨᠠ?》᠃ ᠵᠤᠭᠵᠤᠭᠤᠬᠠᠨ ᠬᠦᠦ ᠬᠤᠪᠢᠩ ᠲᠠᠢ ᠤᠰᠤᠨ ᠤᠷᠤᠭᠤ ᠥᠩᠭᠡᠢᠵᠦ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠄《ᠤᠰᠤ ᠤᠤ? ᠤᠰᠤ ᠬᠠᠷᠠ ᠯᠠ ᠪᠠᠢᠨᠠ᠂ ᠬᠠᠮᠢᠭᠠ ᠭᠠᠵᠠᠷ ᠤ᠋ᠨ ᠤᠰᠤᠨ ᠬᠠᠷᠠ ᠪᠠᠢᠳᠠᠭ ᠪᠠᠢᠨᠠ ᠳᠠ》ᠭᠡᠬᠦ ᠳ᠋ᠦ᠍ ᠲᠦᠰᠢᠮᠡᠯ ᠪᠦᠷ ᠴᠦ᠍ ᠠᠭᠤᠷᠰᠠᠨ᠄《 ᠠ᠂ ᠪᠢ ᠴᠢᠮᠠ ᠠ᠋ᠴᠠ ᠬᠠᠷᠠ ᠴᠠᠭᠠᠨ ᠢ᠋ ᠨᠢ ᠠᠰᠠᠭᠤᠭᠠ ᠤᠤ? ᠤᠰᠤᠨ ᠤ᠋ ᠶᠡᠬᠡ ᠪᠠᠭᠠ ᠶ᠋ᠢ ᠨᠢ ᠠᠰᠠᠭᠤᠵᠤ ᠪᠠᠢᠨᠠ》ᠭᠡᠵᠦ ᠵᠠᠩᠳᠤᠷᠤᠯᠠ᠃《ᠠ ᠥᠷᠥᠰᠢᠶᠡᠭᠡᠷᠡᠢ ᠲᠦᠰᠢᠮᠡᠯ ᠭᠤᠸᠠᠢ ᠮᠢᠨᠢ᠂ ᠭᠣᠣᠯ ᠤ᠋ᠨ ᠤᠰᠤ ᠤᠤ? ᠦᠭᠡᠢ ᠮᠢᠨᠦ ᠬᠠᠷᠠᠭᠰᠠᠨ ᠢ᠋ᠶ᠋ᠠᠷ ᠪᠣᠯ ᠲᠦᠷᠦᠭᠦᠦ ᠰᠦᠷᠦᠭ ᠬᠣᠨᠢ᠂ ᠠᠵᠢᠷᠭᠠ ᠠᠳᠤᠭᠤ ᠤᠰᠤ ᠤᠤᠭᠤᠭᠠᠳ ᠭᠠᠷᠤᠭᠰᠠᠨ ᠳᠠ᠂ ᠳᠠᠷᠠᠭᠠᠬᠠᠨ ᠨᠢ ᠪᠢ ᠬᠣᠶᠠᠷ ᠴᠤ᠌ ᠲᠤᠩᠬᠤ ᠤᠰᠤ ᠠᠪᠤᠭᠰᠠᠨ᠂ ᠴᠠᠭᠠᠨᠠ ᠨᠢ ᠦᠯᠡᠳᠡᠵᠦ ᠯᠡ ᠪᠠᠢᠨᠠ ᠳᠠ》ᠭᠡᠵᠡᠢ᠃ ᠲᠦᠰᠢᠮᠡᠯ᠄《 ᠵᠠ ᠶᠠᠭᠠᠬᠢᠬᠤᠪ᠂ ᠴᠢ ᠠᠷᠭᠠ ᠦᠭᠡᠢ ᠶᠡᠬᠡ ᠪᠡᠯᠡᠨ ᠴᠡᠴᠡᠨ ᠦᠭᠡ ᠲᠡᠢ ᠬᠦᠦ ᠶᠦᠮ ᠂ ᠵᠠ᠂ ᠴᠢ ᠲᠡᠢᠮᠦ ᠯᠡ ᠰᠦᠷᠡᠬᠡᠢ ᠶᠦᠮ ᠪᠣᠯ ᠨᠠᠮᠠ ᠶ᠋ᠢ ᠡᠨᠡ ᠤᠨᠤᠵᠤ ᠪᠠᠢᠭᠠ ᠮᠣᠷᠢᠨ ᠠ᠋ᠴᠠ ᠮᠢᠨᠢ ᠪᠠᠭᠤᠯᠭᠠᠭᠠᠳ ᠲᠡᠭᠡ》ᠭᠡᠵᠦ ᠲᠦᠰᠢᠮᠡᠯ ᠬᠡᠯᠡᠭᠡᠳ ᠡᠮᠡᠭᠡᠯ ᠳᠡᠭᠡᠷᠡ ᠪᠡᠨ ᠯᠠᠪᠬᠢᠨ ᠰᠠᠭᠤᠯᠠ ᠃
ᠲᠡᠭᠡᠬᠦ ᠳ᠋ᠦ᠍ ᠨᠢ ᠵᠤᠭᠵᠤᠭᠤᠬᠠᠨ ᠬᠦᠦ᠄《ᠲᠦᠰᠢᠮᠡᠯ ᠭᠤᠸᠠᠢ᠂ ᠦᠨᠡᠨ ᠳ᠋ᠦ᠍ ᠪᠡᠨ ᠪᠣᠯ ᠲᠠᠨ ᠢ᠋ ᠮᠣᠷᠢᠨ ᠠ᠋ᠴᠠ ᠴᠢᠨᠢ ᠪᠠᠭᠤᠯᠭᠠᠴᠢᠬᠠᠬᠤ ᠪᠠᠷ ᠡᠷᠳᠡᠮ ᠨᠠᠳᠠ ᠳ᠋ᠤ᠌ ᠠᠯᠠᠭᠠ ᠯᠠ ᠳᠠ᠂ ᠭᠡᠬᠦ ᠳ᠋ᠦ᠍ ᠪᠡᠨ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠭᠠᠳ ᠢᠷᠡᠬᠦ ᠶᠦᠮ ᠪᠣᠯ ᠪᠤᠴᠠᠭᠠᠭᠠᠳ ᠮᠣᠷᠳᠠᠭᠤᠯᠴᠢᠬᠠᠬᠤ ᠪᠠᠷ ᠡᠷᠳᠡᠮ ᠪᠣᠯ ᠪᠠᠢᠨᠠ ᠬᠦ᠂ ᠪᠠᠢᠨᠠ》 ᠭᠡᠵᠦ ᠵᠤᠭᠵᠤᠭᠤᠬᠠᠨ ᠬᠦᠦ ᠬᠡᠯᠡᠯᠡ᠃ ᠲᠡᠭᠡᠲᠡᠯᠡ ᠴᠢᠨᠢ ᠲᠦᠰᠢᠮᠡᠯ ᠬᠦᠦ ᠶ᠋ᠢᠨ ᠦᠭᠡᠨ ᠳ᠋ᠦ᠍ ᠦᠨᠡᠮᠰᠢᠨ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠭᠠᠳ ᠶᠡᠬᠡᠯᠡ ᠯᠡ ᠳᠣᠳᠢᠭᠠᠷ ᠵᠣᠭᠰᠣᠵᠤ᠄《 ᠵᠠ᠂ ᠵᠠ ᠴᠢ ᠣᠳᠣ ᠨᠠᠮᠠ ᠶ᠋ᠢ ᠮᠣᠷᠢᠨ ᠳ᠋ᠤ᠌ ᠮᠢᠨᠢ ᠪᠤᠴᠠᠭᠠᠭᠠᠳ ᠮᠣᠷᠳᠠᠭᠤᠯᠤᠭᠠᠳ ᠲᠡᠭᠡ ᠯᠡ ᠳᠡ᠂ ᠠ》ᠭᠡᠵᠦ ᠶᠡᠬᠡᠯᠡ ᠲᠣᠬᠣᠭᠤᠷᠬᠠᠨ ᠢᠨᠢᠶᠡᠯᠡ ᠭᠡᠨᠡ᠃《 ᠪᠢ ᠰᠠᠶᠢ ᠲᠠᠨ ᠢ᠋ ᠮᠣᠷᠢᠨ ᠠ᠋ᠴᠠ ᠴᠢᠨᠢ ᠬᠠᠭᠤᠷᠤᠭᠠᠳ ᠪᠠᠭᠤᠯᠭᠠᠴᠢᠬᠠᠯᠠ ᠰᠢᠦ ᠳᠡ᠂ ᠲᠦᠰᠢᠮᠡᠯ ᠭᠤᠸᠠᠢ》ᠭᠡᠵᠦ ᠵᠤᠭᠵᠤᠭᠤᠬᠠᠨ ᠬᠦᠦ ᠵᠤᠮᠠᠯᠵᠠᠬᠤ ᠳ᠋ᠤ᠌᠂ ᠲᠦᠰᠢᠮᠡᠯ ᠠᠢᠬᠤᠪᠲᠤᠷ ᠶᠡᠬᠡ ᠪᠡᠷ ᠠᠭᠤᠷᠯᠠᠨ᠄《ᠥᠩ᠂ ᠴᠢ ᠨᠠᠮᠠ ᠶ᠋ᠢ ᠴᠢᠳᠠᠨᠠ ᠭᠡᠨᠡ᠂ᠴᠢᠮᠠ ᠰᠢᠭ ᠮᠠᠭᠤ ᠬᠦᠦ ᠶ᠋ᠢ ᠲᠩᠷᠢ ᠨᠢᠷᠭᠡᠵᠦ ᠪᠠᠢᠪᠠᠯ ᠲᠠᠭᠠᠷᠠᠨᠠ》ᠭᠡᠵᠦ ᠬᠠᠰᠬᠢᠷᠤᠯᠠ᠃ ᠲᠡᠭᠡᠬᠦ ᠳ᠋ᠦ᠍ ᠨᠢ ᠵᠤᠭᠵᠤᠭᠤᠬᠠᠨ ᠬᠦᠦ ᠪᠦᠷ ᠲᠣᠭᠣᠭᠰᠠᠨ ᠰᠢᠨᠵᠢ ᠦᠭᠡᠢ᠄《ᠲᠡᠭᠡᠪᠡᠯ ᠳᠡᠯ ᠲᠡᠢ ᠪᠡᠷ ᠨᠢ ᠠᠵᠢᠷᠭᠠ ᠶ᠋ᠢ ᠴᠢᠨᠢ ᠨᠢᠷᠭᠡᠭ᠂ ᠳᠠᠭᠠ ᠲᠠᠢ ᠪᠠᠷ ᠨᠢ ᠳᠠᠭᠠ ᠶ᠋ᠢ ᠮᠢᠨᠢ ᠥᠷᠥᠰᠢᠶᠡᠭ᠂ ᠥᠨᠳᠥᠷ ᠢ᠋ᠶ᠋ᠡᠷ ᠨᠢ ᠲᠠᠨ ᠢ᠋ ᠨᠢᠷᠭᠡᠭ᠂ ᠥᠴᠦᠬᠡᠨ ᠪᠠᠯᠴᠢᠷ ᠢ᠋ᠶ᠋ᠠᠷ ᠨᠢ ᠨᠠᠮᠠ ᠶ᠋ᠢ ᠥᠷᠥᠰᠢᠶᠡᠭ》ᠭᠡᠬᠦ ᠳ᠋ᠦ᠍᠂ ᠲᠦᠰᠢᠮᠡᠯ᠄《ᠦᠭᠡᠢ ᠶᠡᠷᠦ᠂ ᠢ ᠢ᠂ ᠴᠢᠮᠠ ᠶ᠋ᠢ ᠳᠡ᠂ ᠢ ᠶᠠᠭᠠᠬᠢᠶᠠ ᠳᠠ ᠪᠠᠢᠵᠠ᠂ ᠶᠡᠷᠦ ᠨᠢ ᠴᠢ ᠶᠠᠭᠠᠬᠢᠭᠰᠠᠨ ᠵᠠᠳᠠᠷᠠᠭᠰᠠᠨ ᠬᠦᠦ ᠪᠣᠢ! ᠡᠵᠡᠨ ᠨᠣᠶᠠᠨ ᠤ᠋ ᠪᠠᠨ ᠲᠦᠰᠢᠮᠡᠯ ᠢ᠋ ᠲᠩᠷᠢ ᠨᠢᠷᠭᠡᠭ ᠭᠡᠵᠦ ᠬᠠᠷᠢᠶᠠᠨᠠ ᠭᠡᠨᠡ? ᠵᠠ ᠡᠭᠦᠨ ᠢ᠋ ᠴᠢᠨᠢ ᠶᠠᠭᠠᠬᠢᠭᠰᠠᠨ ᠴᠤ᠌ ᠵᠦᠭᠡᠷ ᠥᠩᠭᠡᠷᠡᠭᠡᠬᠦ ᠦᠭᠡᠢ ᠳᠡ》ᠭᠡᠵᠦ ᠵᠠᠨᠤᠭᠠᠳ ᠶᠠᠪᠤᠭᠠᠳ ᠥᠭᠴᠡᠢ᠃
ᠢᠩᠭᠢᠭᠡᠳ ᠲᠦᠰᠢᠮᠡᠯ ᠡᠵᠡᠨ ᠨᠣᠶᠠᠨ ᠤ᠋ ᠪᠠᠨ ᠬᠠᠲᠤᠨ ᠳ᠋ᠤ᠌ ᠪᠠᠷᠠᠯᠬᠠᠵᠤ᠂ ᠶᠡᠬᠡᠯᠡ ᠵᠣᠪᠠᠭᠰᠠᠨ ᠴᠢᠷᠠᠢ ᠭᠠᠷᠭᠠᠨ ᠢᠩᠭᠢᠵᠦ ᠠᠢᠯᠠᠳᠬᠠᠯᠠ᠃《ᠡᠷᠬᠢᠮ ᠳᠡᠭᠡᠳᠦ ᠬᠠᠲᠤᠨ ᠮᠢᠨᠢ ᠠ᠋᠂ ᠪᠢ ᠬᠡᠯᠡ ᠠᠮᠠ ᠪᠠᠷ ᠳᠠᠭᠠᠷᠢᠭᠤᠯᠵᠤ ᠬᠡᠴᠡᠭᠦᠦ ᠪᠠᠢᠳᠠᠯ ᠳ᠋ᠤ᠌ ᠣᠷᠣᠭᠠᠳ ᠪᠠᠢᠨᠠ᠂ ᠦᠭᠡᠢ ᠴᠦ᠍ ᠣᠳᠣ ᠲᠦᠰᠢᠮᠡᠯ ᠨᠠᠮᠠ ᠶ᠋ᠢ ᠲᠩᠷᠢ ᠨᠢᠷᠭᠡᠭ ᠭᠡᠵᠦ ᠬᠠᠷᠢᠶᠠᠵᠤ ᠵᠥᠭᠡᠵᠦ ᠪᠠᠢᠨᠠ᠂ ᠡᠨᠡ ᠨᠢ ᠶᠡᠷᠦ ᠨᠢ ᠵᠥᠪ ᠤᠤ ᠪᠤᠷᠤᠭᠤ ᠤᠤ?》ᠭᠡᠵᠦ ᠢᠷᠡᠭᠡᠳ ᠯᠡ ᠤᠷᠤᠭᠤᠯ ᠠᠮᠠ ᠪᠠᠨ ᠤᠨᠵᠠᠢᠯᠭᠠᠨ᠂ ᠤᠬᠢᠯᠠᠩᠨᠠᠨ ᠪᠠᠢᠵᠤ ᠭᠣᠮᠣᠳᠠᠯ ᠭᠠᠷᠭᠠᠯᠠ᠃ ᠲᠡᠭᠡᠬᠦ ᠳ᠋ᠦ᠍ ᠨᠢ ᠬᠠᠲᠤᠨ ᠠᠪᠠᠬᠠᠢᠲᠠᠨ ᠶᠡᠬᠡᠳᠡ ᠬᠢᠯᠢᠩᠨᠡᠨ᠄《ᠦᠭᠡᠢ ᠶᠣᠷᠣ ᠠ᠋ ᠂ᠬᠡᠨ ᠭᠡᠭᠴᠢ ᠨᠢ ᠲᠡᠢᠮᠦ ᠠᠢᠬᠤᠪᠲᠤᠷ ᠬᠡᠷᠡᠭ ᠥᠳᠥᠭᠡᠪᠡ? ᠣᠳᠣᠬᠠᠨ ᠴᠠᠭᠠᠳᠤᠬᠢ ᠶ᠋ᠢ ᠪᠡᠨ ᠠᠪᠤᠭᠠᠳ ᠢᠷᠡ》ᠭᠡᠵᠦ ᠲᠤᠰᠢᠶᠠᠯᠠ᠃
ᠲᠦᠰᠢᠮᠡᠯᠴᠢ ᠲᠡᠷᠡ ᠳᠣᠣᠷᠠ ᠪᠠᠨ ᠪᠤᠴᠠᠵᠤ ᠣᠴᠢᠭᠠᠳ ᠬᠦᠦ ᠳ᠋ᠦ᠍᠄《 ᠵᠠ᠂ ᠵᠠ ᠪᠤᠰᠢᠭᠤᠬᠠᠨ ᠨᠠᠮᠠ ᠶ᠋ᠢ ᠳᠠᠭᠠᠵᠤ ᠶᠠᠪᠤ᠂ ᠬᠠᠲᠤᠨ ᠠᠪᠠᠬᠠᠢᠲᠠᠨ ᠴᠢᠮᠠ ᠶ᠋ᠢ ᠳᠠᠭᠤᠳᠠᠭᠤᠯᠤᠭᠰᠠᠨ》ᠭᠡᠰᠡᠨ ᠳ᠋ᠦ᠍᠂ᠮᠤᠭᠵᠤᠭᠤᠬᠠᠨ ᠳᠠᠭᠠ ᠲᠠᠢ ᠵᠤᠭᠵᠤᠭᠤᠬᠠᠨ ᠬᠦᠦ ᠶᠡᠷᠦ ᠲᠣᠭᠣᠭᠰᠠᠨ ᠰᠢᠨᠵᠢ ᠦᠭᠡᠢ ᠰᠠᠭᠤᠵᠤ᠄《ᠢᠮᠠᠭᠠᠨ ᠲᠣᠯᠣᠭᠠᠢ ᠶᠠᠮᠪᠠᠨ ᠳ᠋ᠤ᠌ ᠣᠷᠣᠳᠠᠭ ᠦᠭᠡᠢ᠂ ᠶᠠᠨᠲᠠᠭᠠᠷ ᠬᠠᠲᠤᠨ ᠵᠠᠷᠭᠤ ᠰᠢᠭᠦᠳᠡᠭ ᠦᠭᠡᠢ᠂ ᠲᠡᠮᠡᠭᠡᠨ ᠲᠣᠯᠣᠭᠠᠢ ᠲᠠᠪᠰᠢᠨ ᠳ᠋ᠤ᠌ ᠣᠷᠣᠳᠠᠭ ᠦᠭᠡᠢ᠂ ᠳᠡᠨᠳᠡᠭᠡᠷ ᠬᠠᠲᠤᠨ ᠵᠠᠷᠭᠤ ᠰᠢᠭᠦᠳᠡᠭ ᠦᠭᠡᠢ ᠶᠦᠮ᠂ ᠬᠠᠷᠢᠨ ᠬᠣᠨᠢᠨ ᠲᠣᠯᠣᠭᠠᠢ ᠬᠣᠢᠮᠣᠷ ᠵᠠᠯᠠᠷᠠᠳᠠᠭ ᠶᠤᠮ ᠴᠢᠨᠢ ᠬᠣᠲᠠᠯᠠᠭᠠᠷ ᠰᠠᠢᠬᠠᠨ ᠨᠣᠶᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠢᠭᠦᠯᠭᠡᠨᠡ》ᠭᠡᠳ ᠭᠡᠳᠡᠢᠭᠡᠳ ᠰᠠᠭᠤᠴᠢᠬᠠᠵᠠᠢ᠃ ᠲᠡᠭᠡᠲᠡᠯᠡ ᠴᠦ᠍ ᠤᠳᠠᠯ ᠦᠭᠡᠢ ᠬᠠᠲᠤᠨ ᠤ᠋ ᠵᠠᠷᠤᠴᠠ ᠬᠦᠷᠴᠦ ᠢᠷᠡᠭᠡᠳ᠂ ᠵᠤᠭᠵᠤᠭᠤᠬᠠᠨ ᠬᠦᠦ ᠶ᠋ᠢ ᠪᠠᠷᠢᠵᠤ ᠠᠪᠤᠭᠠᠳ ᠬᠠᠷᠠ ᠭᠡᠷ ᠲᠦ᠍ ᠬᠣᠷᠢᠴᠢᠬᠠᠴᠠᠢ᠃
ᠭᠤᠷᠪᠠ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠡᠵᠡᠨ ᠨᠣᠶᠠᠨᠲᠠᠨ ᠥᠪᠡᠷ ᠢ᠋ᠶ᠋ᠡᠨ ᠢᠷᠡᠵᠦ ᠂ᠮᠤᠭᠵᠤᠭᠤᠬᠠᠨ ᠳᠠᠭᠠ ᠲᠠᠢ ᠵᠤᠭᠵᠤᠭᠤᠬᠠᠨ ᠬᠦᠦ ᠶ᠋ᠢ ᠰᠢᠭᠦᠬᠦ ᠪᠣᠯᠵᠠᠢ᠃
《 ᠵᠠ ᠬᠦᠦ ᠮᠢᠨᠢ ᠴᠢ ᠶᠠᠭᠤᠨ ᠳ᠋ᠤ᠌ ᠡᠵᠡᠨ ᠨᠣᠶᠠᠨ ᠤ᠋ ᠪᠠᠨ ᠬᠠᠲᠤᠨ ᠢ᠋ ᠪᠠᠰᠤᠮᠵᠢᠯᠠᠵᠤ᠂ ᠴᠡᠴᠡᠨ ᠴᠡᠯᠮᠡᠭ ᠲᠦᠰᠢᠮᠡᠯ ᠢ᠋ ᠮᠢᠨᠢ ᠳᠣᠷᠣᠮᠵᠢᠯᠠᠪᠠ?》ᠭᠡᠵᠦ ᠬᠥᠮᠥᠰᠬᠡ ᠵᠠᠩᠭᠢᠳᠤᠨ ᠠᠰᠠᠭᠤᠯᠠ ᠭᠡᠨᠡ᠃ ᠬᠠᠷᠢᠨ ᠮᠤᠭᠵᠤᠭᠤᠬᠠᠨ ᠳᠠᠭᠠ ᠲᠠᠢ ᠵᠤᠭᠵᠤᠭᠤᠬᠠᠨ ᠬᠦᠦ ᠬᠠᠷᠠᠴᠠ ᠪᠤᠷᠤᠭᠤᠯᠠᠭᠰᠠᠨ ᠴᠤ᠌ ᠦᠭᠡᠢ ᠲᠠᠢᠪᠤᠩ ᠭᠡᠭᠴᠢ ᠨᠢ ᠡᠢᠨᠬᠦ ᠥᠴᠢᠯᠡ᠃《ᠡᠵᠡᠨ ᠳᠡᠭᠡᠳᠦᠰ ᠮᠢᠨᠢ ᠠ᠋᠂ ᠲᠠ ᠮᠢᠨᠦ ᠶᠠᠷᠢᠬᠤ ᠶ᠋ᠢ ᠪᠣᠯᠭᠣᠭᠠᠵᠤ ᠬᠠᠢᠷᠠᠯᠠᠨᠠ ᠤᠤ? ᠦᠭᠡᠢ ᠵᠤᠭᠵᠤᠭᠤᠬᠠᠨ ᠬᠦᠦ ᠪᠢ ᠮᠤᠭᠵᠤᠭᠤᠬᠠᠨ ᠳᠠᠭᠠ ᠪᠠᠨ ᠤᠨᠤᠭᠠᠳ᠂ ᠴᠤᠢᠰᠤᠷᠤᠩ ᠤ᠋ᠨ ᠵᠠᠮ ᠢ᠋ᠶ᠋ᠠᠷ ᠤᠢᠰᠷᠠᠩᠬᠠᠨ ᠴᠣᠭᠭᠢᠵᠤ ᠶᠠᠪᠤᠬᠤ ᠳ᠋ᠤ᠌᠂ ᠰᠢᠯᠤᠭᠤᠬᠠᠨ ᠨᠦᠬᠡ ᠤᠷᠤᠭᠤ ᠱᠤᠯᠲᠤᠩᠬᠠᠨ ᠵᠤᠷᠠᠮᠠ ᠭᠤᠯᠳᠤᠩᠬᠠᠨ ᠭᠡᠳ ᠣᠷᠣᠴᠢᠬᠠᠬᠤ ᠪᠠᠷ ᠨᠢ ᠪᠠᠷᠢᠬᠤ ᠭᠡᠳ ᠣᠬᠣᠩᠬᠠᠨ ᠤᠳᠤᠩᠬᠠᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠶᠤᠮ ᠠ᠋᠂ ᠲᠡᠭᠡᠲᠡᠯᠡ ᠲᠠᠨ ᠤ᠋ ᠲᠦᠰᠢᠮᠡᠯ ᠬᠦᠷᠴᠦ ᠢᠷᠡᠭᠡᠳ᠄〈ᠵᠠᠮ ᠵᠠᠢᠯᠠ᠂ ᠲᠩᠷᠢ ᠨᠢᠷᠭᠡᠭ ᠴᠢᠮᠠ ᠶ᠋ᠢ〉ᠭᠡᠵᠦ ᠬᠦᠦ ᠨᠠᠮᠠ ᠶ᠋ᠢ ᠳᠣᠷᠣᠮᠵᠢᠯᠠᠭᠰᠠᠨ ᠪᠢᠯᠡ᠂ ᠲᠡᠭᠡᠬᠦᠯᠡᠷ ᠨᠢ ᠪᠢ ᠳᠡᠯ ᠲᠡᠢ ᠪᠡᠷ ᠨᠢ ᠠᠵᠢᠷᠭᠠ ᠶ᠋ᠢ ᠴᠢᠨᠢ ᠨᠢᠷᠭᠡᠭ᠂ ᠳᠠᠭᠠ ᠲᠠᠢ ᠪᠠᠷ ᠨᠢ ᠳᠠᠭᠠ ᠶ᠋ᠢ ᠮᠢᠨᠢ ᠥᠷᠥᠰᠢᠶᠡᠭ᠂ ᠥᠨᠳᠥᠷ ᠢ᠋ᠶ᠋ᠡᠷ ᠨᠢ ᠲᠠᠨ ᠢ᠋ ᠨᠢᠷᠭᠡᠭ᠂ ᠥᠴᠦᠬᠡᠨ ᠪᠠᠯᠴᠢᠷ ᠢ᠋ᠶ᠋ᠠᠷ ᠨᠢ ᠨᠠᠮᠠ ᠶ᠋ᠢ ᠥᠷᠥᠰᠢᠶᠡᠭ ᠭᠡᠳ ᠬᠡᠯᠡᠴᠢᠬᠡᠭᠰᠡᠨ ᠮᠢᠨᠢ ᠦᠨᠡᠨ》ᠭᠡᠵᠦ ᠥᠴᠢᠯᠡ᠃ ᠨᠣᠶᠠᠨ ᠰᠠᠬᠠᠯ ᠢ᠋ᠶ᠋ᠠᠨ ᠢᠮᠡᠷᠦᠨ ᠬᠡᠰᠡᠭ ᠴᠢᠮᠡᠭᠡ ᠦᠭᠡᠢ ᠰᠠᠭᠤᠭᠠᠳ᠄《 ᠥᠩ ᠥᠩ᠂ ᠵᠠ ᠲᠡᠭᠡᠪᠡᠯ ᠴᠢ ᠶᠠᠭᠤᠨ ᠳ᠋ᠤ᠌ ᠬᠠᠲᠤᠨ ᠢ᠋ ᠮᠢᠨᠢ ᠬᠡᠯᠡ ᠠᠮᠠ ᠪᠠᠷ ᠳᠠᠭᠠᠷᠢᠨ ᠭᠤᠲᠤᠭᠠᠪᠠ?》ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠨᠢ᠄《ᠡᠵᠡᠨ ᠨᠣᠶᠠᠨᠲᠠᠨ ᠮᠢᠨᠢ ᠠ᠋᠂ ᠡᠷᠲᠡᠨ ᠡᠴᠡ ᠨᠠᠭᠠᠰᠢ ᠬᠠᠲᠤᠨ ᠬᠥᠮᠦᠨ ᠵᠠᠷᠭᠤ ᠰᠢᠭᠦᠵᠦ᠂ ᠬᠠᠭᠠᠳ ᠨᠣᠶᠠᠳ ᠤ᠋ᠨ ᠡᠮᠦᠨᠡᠭᠦᠷ ᠣᠷᠣᠳᠠᠭ ᠶᠣᠰᠣ ᠪᠣᠯ ᠪᠠᠢᠳᠠᠭ ᠦᠭᠡᠢ ᠪᠢᠯᠡ᠂ ᠲᠡᠭᠡᠭᠡᠳ ᠯᠡ ᠪᠢ〈ᠢᠮᠠᠭᠠᠨ ᠲᠣᠯᠣᠭᠠᠢ ᠶᠠᠮᠪᠠᠨ ᠳ᠋ᠤ᠌ ᠣᠷᠣᠳᠠᠭ ᠦᠭᠡᠢ᠂ ᠶᠠᠨᠲᠠᠭᠠᠷ ᠬᠠᠲᠤᠨ ᠵᠠᠷᠭᠤ ᠰᠢᠭᠦᠳᠡᠭ ᠦᠭᠡᠢ᠂ ᠲᠡᠮᠡᠭᠡᠨ ᠲᠣᠯᠣᠭᠠᠢ ᠲᠠᠪᠰᠢᠨ ᠳ᠋ᠤ᠌ ᠣᠷᠣᠳᠠᠭ ᠦᠭᠡᠢ᠂ ᠳᠡᠨᠳᠡᠭᠡᠷ ᠬᠠᠲᠤᠨ ᠵᠠᠷᠭᠤ ᠰᠢᠭᠦᠳᠡᠭ ᠦᠭᠡᠢ ᠂ ᠬᠣᠨᠢᠨ ᠲᠣᠯᠣᠭᠠᠢ ᠬᠣᠢᠮᠣᠷ ᠵᠠᠯᠠᠷᠠᠳᠠᠭ ᠪᠣᠯᠬᠣᠷ ᠬᠣᠲᠠᠯᠠᠭᠠᠷ ᠰᠠᠢᠬᠠᠨ ᠨᠣᠶᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠢᠭᠦᠯᠭᠡᠨᠡ〉ᠭᠡᠳ ᠬᠡᠯᠡᠴᠢᠬᠡᠭᠰᠡᠨ ᠮᠢᠨᠢ ᠦᠨᠡᠨ ᠠ᠋᠂ ᠥᠴᠦᠬᠡᠨ ᠮᠠᠭᠤ ᠬᠦᠦ ᠳ᠋ᠦ᠍ ᠬᠢᠭᠰᠡᠨ ᠭᠡᠮ ᠨᠢᠭᠦᠯ ᠭᠡᠪᠡᠯ ᠡᠭᠦᠨ ᠡᠴᠡ ᠥᠭᠡᠷᠡ ᠪᠠᠢᠬᠤ ᠦᠭᠡᠢ ᠪᠢᠯᠡ᠃ ᠡᠵᠡᠨ ᠳᠡᠭᠡᠳᠦᠰ ᠮᠢᠨᠢ ᠲᠠ ᠪᠣᠯᠭᠣᠭᠠᠵᠤ ᠬᠠᠢᠷᠠᠯᠠ》ᠭᠡᠵᠦ ᠬᠡᠯᠡᠭᠡᠳ ᠮᠡᠬᠦᠢᠨ ᠰᠥᠭᠥᠳᠦᠯᠡ᠃
ᠨᠣᠶᠠᠨ ᠴᠤ᠌ ᠨᠢᠭᠡ ᠶ᠋ᠢ ᠪᠣᠳᠣᠪᠠ ᠪᠣᠯᠤᠯᠲᠠᠢ ᠠᠯᠤᠰ ᠢ᠋ ᠬᠠᠷᠠᠨ ᠬᠡᠰᠡᠭ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠄《ᠥᠩ᠂ ᠵᠠ ᠵᠠ᠂ ᠴᠡᠴᠡᠨ ᠦᠭᠡ ᠴᠡᠭᠡᠵᠢᠨ ᠳ᠋ᠦ᠍᠂ ᠴᠡᠴᠡᠭ ᠨᠠᠪᠴᠢ ᠠᠭᠤᠯᠠᠨ ᠳ᠋ᠤ᠌ ᠭᠡᠳᠡᠭ᠂ ᠤ᠌ᠭ ᠨᠢ ᠪᠠᠭᠠ ᠪᠠᠯᠴᠢᠷ ᠲᠡᠳᠦᠢ ᠴᠦ᠍᠂ ᠤᠬᠠᠭᠠᠨ ᠲᠠᠢ ᠲᠥᠷᠥᠭᠰᠡᠨ ᠬᠦᠦ ᠶᠦᠮ ᠠ᠋ ᠴᠢ᠂ ᠬᠠᠭᠠᠨ ᠲᠥᠷᠥ ᠳ᠋ᠦ᠍ ᠪᠡᠨ ᠲᠡᠷᠰᠯᠡᠬᠦ ᠪᠡᠷ ᠬᠠᠷᠠ ᠮᠠᠭᠤ ᠦᠢᠯᠡ ᠬᠢᠭᠡ ᠦᠭᠡᠢ ᠪᠣᠯᠬᠣᠷ ᠴᠢᠮᠠ ᠶ᠋ᠢ ᠪᠢ ᠥᠷᠥᠰᠢᠶᠡᠵᠦ ᠪᠠᠢᠨᠠ᠂ ᠢᠩᠭᠢᠭᠡᠳ ᠬᠦᠦ ᠮᠠᠨᠢ ᠢᠷᠡᠭᠰᠡᠨ ᠵᠠᠮ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠤᠷᠤᠭᠰᠠᠨ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠭᠠᠳ ᠪᠤᠴᠠ ᠳᠠ》ᠭᠡᠵᠦ ᠬᠡᠯᠡᠭᠡᠳ ᠢᠨᠢᠶᠡᠮᠰᠦᠭᠯᠡᠨ ᠥᠲᠡᠯᠡ᠃
ᠢᠩᠭᠢᠭᠡᠳ ᠵᠤᠭᠵᠤᠭᠤᠬᠠᠨ ᠬᠦᠦ ᠮᠤᠭᠵᠤᠭᠤᠬᠠᠨ ᠳᠠᠭᠠ ᠪᠠᠨ ᠤᠨᠤᠭᠠᠳ᠂ ᠢᠷᠡᠭᠰᠡᠨ ᠵᠠᠮ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠤᠷᠤᠭᠰᠠᠨ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠭᠠᠳ ᠪᠤᠴᠠᠭᠰᠠᠨ ᠶᠤᠮ ᠭᠡᠳᠡᠭ᠃
ᠳᠠᠭᠤᠤ᠄
ᠮᠤᠭᠵᠤᠭᠤᠬᠠᠨ ᠳᠠᠭᠠ ᠲᠠᠢ
ᠵᠤᠭᠵᠤᠭᠤᠬᠠᠨ ᠬᠦᠦ ᠪᠢ
ᠨᠠᠮᠬᠠᠨ ᠨᠢᠷᠤᠭᠤ ᠲᠠᠢ
ᠨᠠᠮᠰᠠᠭᠠᠷ ᠬᠠᠮᠠᠷ ᠲᠠᠢ ᠁
ᠦᠰᠦᠭ ᠠᠮᠢᠯᠠᠭᠤᠯᠵᠤ ᠬᠠᠲᠠᠭᠴᠢ᠄ ᠾᠦᠩ ᠸᠧᠢ
ᠬᠢᠨᠠᠭᠴᠢ᠄ ᠰᠡᠴᠡᠨᠴᠢᠮᠡᠭ ᠂ᠮᠥᠴᠢᠷ