ᠡᠪᠦᠭᠡ ᠪᠣᠯᠬᠤ ᠶᠢᠨ ᠬᠢᠵᠠᠭᠠᠯᠠᠰᠢ ᠦᠭᠡᠢ ᠠᠮᠲᠠ – ᠶᠣᠨᠳᠣᠨ ᠤ ᠪᠢᠯᠢᠭ᠌ - ᠪᠠᠭᠠᠲᠤᠷ Өвөө болохын хязгаалшгүй амт - Ёндоны Билиг - Баатар
259ᠡᠪᠦᠭᠡ ᠪᠣᠯᠬᠤ ᠶᠢᠨ ᠬᠢᠵᠠᠭᠠᠯᠠᠰᠢ ᠦᠭᠡᠢ ᠠᠮᠲᠠ
ᠶᠢᠷᠲᠢᠨᠴᠦ ᠶ᠋ᠢᠨ ᠮᠥᠩᠬᠡ ᠬᠠᠤᠯᠢ ᠳ᠋ᠤ᠌ ᠦᠷᠡ ᠤᠳᠤᠮ ᠭᠠᠭᠴᠠ ᠶᠣᠰᠣ ᠠ᠋
ᠶᠡᠷᠦᠨᠢ ᠯᠡ ᠠᠮᠢᠲᠠᠨ ᠤᠷᠭᠤᠮᠠᠯ ᠲᠦᠮᠡᠨ ᠪᠣᠳᠠᠰ ᠪᠦᠭᠦᠳᠡ ᠠᠳᠠᠯᠢ ᠠ᠋
ᠠᠯᠪᠠᠨ ᠤ᠋ ᠬᠡᠮᠡᠳᠡᠭ ᠶᠠᠮᠠᠷᠴᠤ ᠬᠡᠷᠡᠭ ᠦᠭᠡᠢ ᠬᠠᠲᠠᠭᠤ ᠳᠢᠭᠯᠢᠮ ᠵᠦᠢ
ᠠᠮᠢᠳᠤᠷᠠᠯ ᠤ᠋ᠨ ᠡᠭᠡᠯ ᠵᠢᠷᠤᠮ ᠳ᠋ᠤ᠌ ᠶᠡᠷᠦ ᠡᠴᠡ ᠨᠡᠢᠴᠡᠬᠦ ᠦᠭᠡᠢ ᠠ᠋
ᠪᠥᠵᠥᠩ ᠦ᠋ᠨ ᠢ᠋ᠶ᠋ᠡᠨ ᠲᠥᠯᠥᠭᠡ ᠴᠢᠨᠳᠠᠭᠠᠨ ᠴᠠᠭᠠᠨ ᠲᠠᠤᠯᠠᠢ ᠬᠦᠷᠲᠡᠯᠡ
ᠪᠥᠮᠪᠥᠷᠴᠡᠭ ᠦ᠋ᠨ ᠨᠠᠷᠠ ᠶ᠋ᠢ ᠵᠠᠯᠭᠢᠳᠠᠭ ᠨᠠᠢᠷᠠᠮᠳᠠᠭᠤ ᠬᠦᠴᠦᠨ ᠲᠡᠢ ᠪᠤᠶᠤ
ᠪᠦᠭᠦᠳᠡ ᠠᠮᠢᠲᠠᠨ ᠤᠷᠭᠤᠮᠠᠯ ᠪᠣᠳᠠᠰ ᠤ᠋ᠨ ᠬᠠᠮᠤᠭ ᠣᠶᠤᠨᠲᠤ ᠬᠥᠮᠦᠰ
ᠪᠥᠮᠪᠥᠷᠴᠡᠭ ᠦ᠋ᠨ ᠡᠵᠡᠨ ᠬᠡᠮᠡᠭᠳᠡᠭᠰᠡᠨ ᠤᠴᠢᠷ ᠳᠠᠢᠴᠢᠨ ᠪᠠᠢᠯᠭᠦᠢ ᠳᠡ
ᠲᠡᠷᠡ ᠳᠣᠳᠣᠮ ᠢ᠋ᠶ᠋ᠠᠨ ᠨᠡᠢᠲᠡ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠬᠠᠭᠠᠳ
ᠲᠡᠭᠷᠢᠯᠢᠭ ᠢᠵᠠᠭᠤᠷᠲᠤ ᠢᠰᠡᠭᠡᠢ ᠲᠤᠭᠤᠷᠭᠠᠲᠠᠳ ᠤ᠋ᠨ ᠭᠠᠯ ᠦᠷᠡᠳᠦᠰ
ᠵᠥᠪᠬᠡᠨ ᠯᠡ ᠭᠠᠵᠠᠷ ᠨᠤᠲᠤᠭ ᠤ᠋ᠨ ᠲᠥᠯᠥᠭᠡᠨᠡ ᠳᠠᠢᠳᠤᠭᠰᠠᠨ ᠪᠢᠰᠢ
ᠵᠦᠢ ᠲᠠᠪᠢᠯᠠᠩ ᠳᠤ ᠯᠠ ᠦᠬᠦᠨ ᠢᠲᠡᠭᠡᠨ ᠪᠠᠷᠢᠭᠳᠠᠭᠰᠠᠨ ᠴᠤ᠌ ᠪᠢᠰᠢ
ᠵᠦᠩ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠯᠡ ᠵᠥᠪ ᠵᠦᠭ ᠢ᠋ᠶ᠋ᠡᠨ ᠣᠯᠬᠤ ᠪᠠᠢᠬᠠ ᠠ᠋ ᠭᠡᠵᠦ
ᠵᠦᠭ ᠪᠦᠬᠦᠨ ᠥᠭᠡᠳᠡ ᠰᠠᠨᠰᠠᠷ ᠤ᠋ᠨ ᠲᠥᠯᠥᠭᠡᠨᠡ ᠵᠢᠳᠬᠦᠭᠰᠡᠨ ᠳᠧ ᠠ᠋
ᠰᠢᠳᠤᠷᠭᠤ ᠪᠠᠭᠠᠲᠤᠷ ᠵᠢᠳᠬᠦᠭᠰᠡᠳ ᠦ᠋ᠨ ᠳᠤᠮᠳᠠ ᠡᠪᠦᠭᠡ ᠮᠢᠨᠢ ᠪᠣᠢ ᠳᠠ
ᠰᠢᠯᠤᠭᠤᠬᠠᠨ ᠬᠡᠯᠡᠬᠦ ᠳ᠋ᠦ᠍ ᠥᠴᠦᠬᠡᠨ ᠣᠯᠳᠣᠢ ᠪᠢ ᠯᠠᠪᠲᠠᠢ ᠪᠠᠢᠨᠠ ᠠ᠋
ᠬᠤᠯᠤᠨᠴᠠ ᠡᠪᠦᠭᠡ ᠮᠢᠨᠢ ᠭᠠᠯᠠᠨᠳᠢᠷᠠ ᠬᠡᠮᠡᠬᠦ ᠴᠤᠤᠲᠠᠨ ᠪᠠᠢᠭᠰᠠᠨ ᠠ᠋
ᠬᠠᠷᠢᠨ ᠡᠪᠦᠭᠡ ᠮᠢᠨᠢ ᠬᠣᠨᠢᠴᠢᠨ ᠤ᠋ ᠳᠣᠯᠣᠭᠠ ᠶ᠋ᠢᠨ ᠲᠣᠮᠣ ᠲᠡᠷᠢᠭᠦᠨ ᠠ᠋
ᠬᠠᠭᠤᠴᠢᠨ ᠤ᠋ ᠬᠡᠯᠡᠯᠭᠡ ᠪᠡᠷ ᠰᠢᠭᠤᠳ ᠦᠨᠡᠨ ᠢ᠋ᠶ᠋ᠡᠷ ᠨᠢ ᠶᠠᠷᠢᠪᠠᠯ ᠠ᠋
ᠬᠤᠳᠠᠯ ᠬᠣᠭᠣᠰᠣᠨ ᠢ᠋ ᠲᠡᠭᠰᠢᠯᠡᠬᠦ ᠰᠢᠯᠢ ᠶ᠋ᠢᠨ ᠰᠠᠢᠨ ᠡᠷᠡ ᠪᠠᠢᠪᠠᠢ⁈
ᠲᠥᠷᠥᠭᠰᠡᠨ ᠡᠴᠡ ᠮᠢᠨᠢ ᠬᠣᠢᠰᠢᠬᠢ ᠣᠨ ᠵᠢᠯ ᠦ᠋ᠨ ᠤᠷᠤᠰᠬᠠᠯ ᠭᠡᠵᠦ
ᠲᠥᠷᠥᠭᠦᠯᠦᠭᠰᠡᠨ ᠡᠮᠧ ᠶ᠋ᠢᠨ ᠮᠢᠨᠢ ᠨᠠᠰᠤ ᠠ᠋ᠴᠠ ᠴᠤ᠌ ᠳᠠᠩᠴᠤ ᠣᠬᠣᠷ ᠠ᠋
ᠲᠡᠭᠡᠬᠦ ᠲᠤᠲᠤᠮ ᠢ᠋ᠶ᠋ᠡᠨ ᠬᠠᠯᠠᠭᠤᠨ ᠴᠠᠭᠠ ᠰᠢᠭ᠋ ᠬᠠᠯᠠᠬᠤ ᠭᠦᠷᠦᠬᠦ ᠲᠦᠷᠭᠡᠨ
ᠲᠡᠭᠷᠢ ᠶ᠋ᠢᠨ ᠮᠡᠯᠮᠡᠢ ᠲᠡᠷᠡ ᠬᠠᠮᠤᠭ ᠢ᠋ ᠲᠤᠢᠯᠪᠤᠷᠢᠲᠠᠢ ᠲᠣᠯᠢᠳᠠᠪᠠᠢ ᠪᠢᠰᠢᠦ
᠁ ᠮᠢᠨᠦ ᠭᠤᠴᠢᠨ ᠭᠤᠷᠪᠠᠳᠤᠭᠠᠷ ᠦᠶᠡ ᠶ᠋ᠢᠨ ᠯᠤᠤᠲᠤ ᠳᠡᠭᠡᠳᠦᠰ –
ᠲᠤᠯᠤᠢ ᠶᠡᠬᠡ ᠨᠣᠶᠠᠨ – ᠲᠣᠭᠣᠨᠲᠡᠮᠦᠷ ᠬᠦᠷᠲᠡᠯᠡ ᠭᠠᠯᠪᠠ ᠶᠡᠭᠦᠯᠡᠪᠡᠢ
ᠮᠠᠷᠺᠰ ᠨᠥᠬᠥᠷ ᠴᠤ᠌ ᠡᠪ ᠬᠠᠮᠲᠤ ᠶ᠋ᠢᠨ ᠡᠮᠦᠨᠡ ᠡᠴᠡ ᠭᠡᠷᠡᠴᠢᠯᠡᠪᠡᠢ!
ᠳᠣᠲᠣᠷᠠ ᠪᠠᠨ ᠯᠠᠪᠲᠠᠢ ᠲᠣᠭᠠ ᠪᠠᠢᠯᠭᠦᠢ ᠳᠡ᠂ ᠮᠣᠩᠭᠣᠯᠨᠢᠰᠮ ᠮᠢᠨᠢ ᠠ᠋
ᠪᠢ ᠵᠦᠭᠡᠷ ᠯᠡ ᠡᠭᠡᠯ ᠵᠢᠷᠤᠮ ᠤ᠋ᠨ ᠴᠡᠯ ᠪᠤᠭᠤᠷᠤᠯ ᠡᠪᠦᠭᠡ ᠬᠥᠮᠦᠨ
ᠪᠢᠯᠢᠭ ᠰᠠᠴᠤᠷᠠᠩᠭᠤᠢ ᠠᠭᠠᠳ ᠪᠡᠶᠡ ᠪᠡᠨ ᠲᠠᠨᠢᠭᠠᠳᠤᠢ ᠵᠢᠷ ᠦ᠋ᠨ ᠡᠷᠡ ᠠ᠋
᠁ ᠡᠭᠡᠭᠡ ᠯᠡ ᠨᠢᠯᠬᠠ ᠤᠨᠠᠭᠠ ᠶ᠋ᠢᠨ ᠰᠢᠭ᠋ ᠨᠣᠢᠲᠠᠨ ᠪᠠᠢᠳᠠᠭ
ᠡᠩᠬᠦᠷᠡᠢ ᠠᠴᠢ ᠣᠮᠪᠣᠯ ᠵᠦᠪᠷᠢᠳᠢ ᠶ᠋ᠢᠨ ᠢ᠋ᠶ᠋ᠡᠨ ᠨᠢᠳᠦᠨ ᠳ᠋ᠦ᠍ ᠬᠠᠢᠷᠠᠲᠠᠢ!
ᠠᠯᠲᠠᠨ ᠤᠷᠤᠭ ᠤ᠋ᠨ ᠭᠠᠯ ᠭᠣᠯᠣᠮᠲᠠ ᠶ᠋ᠢᠨ ᠠᠮᠤᠭᠤᠯᠠᠩ ᠦᠷᠭᠦᠯᠵᠢᠯᠡᠯ
ᠠᠮᠢᠨ ᠬᠠᠢᠷᠠᠲᠠᠢ ᠣᠮᠪᠣᠯ ᠤ᠋ᠨ ᠮᠢᠨᠢ ᠮᠥᠷᠥ ᠯᠠᠪᠲᠠᠢ ᠳᠠᠭᠠᠭᠠᠴᠠᠲᠠᠢ ᠠ᠋
ᠴᠠᠢ ᠪᠤᠴᠠᠯᠭᠠᠭᠠᠳ ᠯᠠ ᠁ ᠴᠢᠷᠠᠢ ᠶᠠᠪ ᠶᠠᠭᠠᠭᠠᠷᠠᠭᠠᠳ ᠯᠠ
ᠶᠠᠷᠢᠬᠤ ᠶᠠᠷᠢᠬᠤ ᠦᠭᠡᠢ ᠦᠭᠡ ᠶ᠋ᠢ ᠵᠠᠯᠠᠭᠤᠰ ᠪᠦᠷ ᠬᠠᠷᠪᠤᠭᠠᠳ ᠯᠠ
ᠶᠠᠭ ᠬᠠᠯᠠᠭᠤᠨ ᠵᠣᠭᠣᠭ ᠳᠡᠭᠡᠷᠡ ᠨᠢ ᠡᠷᠳᠡᠨᠢᠲᠦ ᠦᠭᠡᠰ ᠦ᠋ᠨ ᠰᠣᠯᠣᠩᠭᠠ
ᠴᠠᠭᠠᠨ ᠴᠡᠩᠬᠡᠷ ᠣᠷᠴᠢᠯᠠᠩ ᠤ᠋ᠨ ᠣᠳᠣᠢ ᠨᠠᠷᠠᠨ ᠢ᠋ ᠴᠢᠩᠨᠠᠮᠤᠢ ᠪᠢᠰᠢᠦ ᠤᠤ
ᠡᠪᠦᠭᠡ ᠪᠠᠢᠭᠰᠠᠨ ᠡᠴᠢᠭᠡ ᠳᠡᠭᠡᠳᠦ ᠪᠡᠨ ᠳᠠᠭᠤᠷᠢᠶᠠᠨ ᠮᠥᠷᠳᠡᠭᠡᠳ
ᠡᠪᠦᠭᠡ ᠪᠠᠢᠵᠤ ᠴᠢᠳᠠᠬᠤ ᠶ᠋ᠢᠨ ᠡᠷᠳᠡᠮ ᠢ᠋ ᠰᠤᠷᠬᠤ ᠴᠢᠬᠤᠯᠠᠲᠠᠢ!
ᠠᠴᠢ ᠣᠮᠪᠣᠯ ᠤ᠋ᠨ ᠮᠢᠨᠢ ᠡᠯᠦᠨᠴᠡ ᠬᠤᠯᠤᠨᠴᠠ ᠡᠪᠦᠭᠡ ᠡᠮᠡᠭᠡ ᠨᠢ
ᠠᠷᠠᠳ ᠤ᠋ᠨ ᠢ᠋ᠶ᠋ᠠᠨ ᠴᠡᠴᠡᠨ ᠦᠭᠡ ᠪᠡᠷ ᠨᠠᠮᠠ ᠶ᠋ᠢ ᠲᠠᠰᠢᠭᠤᠷᠳᠠᠪᠠᠢ᠃
2024᠂ 1᠂ 25᠃ ᠦᠦᠷ ᠢ᠋ᠶ᠋ᠡᠷ
ᠬᠥᠬᠡᠬᠣᠲᠠᠨᠠ ᠪᠦᠲᠦᠭᠡᠪᠡᠢ᠃