《ᠬᠥᠬᠡ ᠰᠤᠳᠤᠷ》 ᠤᠨ ᠨᠥᠬᠥᠪᠦᠷᠢ ᠲᠡᠪᠲᠡᠷ - ᠢᠨᠵᠠᠨᠨᠠᠰᠢ < ᠳᠥᠴᠢᠨ ᠵᠢᠷᠭᠤᠳᠤᠭᠠᠷ ᠪᠦᠯᠦᠭ> "Хөх судар" он нөхвөр дэвтэр - Инжинаш <Дөчин зургадугаар бүлэг>
248 ᠳᠥᠴᠢᠨ ᠵᠢᠷᠭᠤᠳᠤᠭᠠᠷ ᠪᠦᠯᠦᠭ
ᠬᠤᠷᠮᠤᠰᠲᠠ ᠲᠡᠭᠷᠢ ᠶᠢᠰᠦᠨ ᠥᠷᠯᠥᠭᠡ ᠶ᠋ᠢᠨ ᠪᠡᠯᠭᠡ ᠢᠷᠦᠭᠡᠯ ᠢ᠋ ᠶᠢᠰᠦᠨ ᠵᠦᠢᠯ ᠢ᠋ᠶ᠋ᠡᠷ ᠬᠠᠢᠷᠠᠯᠠᠪᠠ
ᠪᠣᠭᠳᠠ ᠴᠢᠩᠭᠢᠰ ᠲᠦᠮᠡᠨ ᠦᠶᠡ ᠶ᠋ᠢᠨ ᠬᠠᠭᠠᠨ ᠤ᠋ ᠨᠡᠷᠡ ᠶ᠋ᠢ ᠲᠦᠮᠡᠨ ᠦ᠌ ᠰᠠᠨᠠᠭᠠ ᠪᠠᠷ ᠬᠦᠯᠢᠶᠡᠨ ᠠᠪᠤᠪᠠ
ᠢᠲᠡᠭᠡᠬᠦᠶᠡ ᠪᠡᠷᠬᠡ ᠦᠨᠡᠨ ᠬᠡᠷᠡᠭ ᠦ᠋ᠳ ᠬᠡᠵᠢᠶᠡ ᠴᠠᠭᠳᠠ ᠰᠠᠶᠢ ᠵᠣᠭᠰᠣᠮᠤᠢ ?
ᠢᠷᠡᠭᠡᠳᠦᠢ ᠶ᠋ᠢ ᠤᠭᠲᠤᠵᠤ ᠮᠡᠳᠡᠭᠴᠢᠳ ᠡᠷᠲᠡᠴᠡ ᠪᠠᠢᠭᠰᠠᠭᠠᠷ ᠢᠷᠡᠵᠦᠬᠦᠢ ᠃
ᠢᠷᠭᠡᠨ ᠬᠠᠭᠠᠨ ᠳᠠᠩ ᠲᠠᠢᠽᠥ᠋ᠩ ᠠᠷᠪᠠᠨ ᠵᠢᠷᠭᠤᠭᠠᠨ ᠪᠠᠲᠤᠳᠠ ᠠᠭᠴᠢ ᠶ᠋ᠢ ᠵᠠᠯᠠᠵᠤᠬᠤᠢ
ᠢᠯᠡ ᠲᠡᠭᠷᠢ ᠶᠤᠸᠠᠨ ᠲᠠᠢᠽᠦ ᠲᠦᠮᠡᠨ ᠦᠶᠡ ᠶ᠋ᠢᠨ ᠵᠢᠷᠤᠮᠲᠤ ᠪᠣᠭᠳᠠ ᠶ᠋ᠢ ᠦᠵᠡᠵᠦᠬᠦᠢ ᠃
ᠲᠡᠨᠳᠡᠴᠡ ᠭᠤᠷᠪᠠᠨ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠤ᠋ ᠰᠥᠨᠢ ᠬᠣᠷᠢᠨ ᠨᠢᠭᠡᠨ ᠦ᠌ ᠥᠷᠯᠥᠭᠡ ᠶ᠋ᠢᠨ ᠦᠬᠡᠷ ᠴᠠᠭ ᠲᠤᠷ ᠪᠦᠷᠦᠭ ᠪᠠᠷᠤᠭ ᠬᠠᠭᠠᠰ ᠬᠡᠯᠲᠡᠷᠡᠭᠰᠡᠨ ᠪᠦᠳᠡᠭᠢ ᠰᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ᠷ ᠸᠴᠢᠷ ᠮᠠᠨᠳᠠᠯ ᠤ᠋ᠨ ᠴᠢᠬᠡ ᠳᠤᠮᠳᠠᠳᠤ ᠶᠢᠰᠦᠨ ᠮᠠᠨᠵᠢᠯᠭᠠ ᠭᠤᠷᠪᠠᠨ ᠬᠥᠯᠲᠦ ᠰᠦᠯᠳᠡ ᠶ᠋ᠢᠨ ᠲᠤᠭ ᠠ᠋ᠴᠠ ᠨᠢᠭᠡᠨ ᠵᠤᠷᠪᠤᠰ ᠮᠥᠩᠭᠥᠨ ᠤᠰᠤᠨ ᠤ᠋ ᠮᠠᠷᠠᠯ ᠣᠳᠣᠨ᠂ ᠲᠠᠢᠽᠦ ᠶ᠋ᠢᠨ ᠨᠣᠢᠷᠰᠤᠬᠤ ᠶᠡᠬᠡ ᠬᠠᠭᠠᠨ ᠥᠷᠭᠥᠭᠡ ᠶ᠋ᠢᠨ ᠴᠢᠬᠡ ᠭᠣᠣᠯ ᠤ᠋ᠨ ᠰᠢᠵᠢᠷ ᠠᠯᠳᠠᠨᠠ ᠠᠯᠮᠠᠰ ᠡᠷᠳᠡᠨᠢ ᠰᠢᠭᠢᠳᠬᠡᠭᠰᠡᠨ ᠸᠴᠢᠷ ᠬᠦᠷᠳᠦᠨ ᠤ ᠴᠡᠭᠡᠯ ᠣᠷᠣᠢ ᠳ᠋ᠤᠷ ᠳᠤᠰᠤᠮᠠᠭᠴᠠ᠂ ᠲᠡᠷᠡ ᠸᠴᠢᠷ ᠦ᠋ᠨ ᠣᠷᠣᠢ ᠪᠠ ᠠᠯᠲᠠᠨ ᠭᠠᠳᠠᠰᠤ ᠣᠳᠣᠨ ᠤ ᠠᠯᠲᠠᠨ ᠲᠤᠭ ᠤ᠋ᠨ ᠣᠷᠣᠢ ᠰᠡᠷᠡᠭᠡ ᠡᠴᠡ ᠬᠠᠮᠲᠤ ᠴᠤᠭᠭᠠᠷ ᠴᠠᠭᠠᠨ ᠭᠡᠷᠡᠯ ᠰᠠᠴᠤᠷᠠᠨ ᠪᠠᠳᠠᠷᠠᠨ ᠭᠠᠷᠤᠭᠠᠳ᠂ ᠭᠱᠠᠨ ᠵᠠᠭᠤᠷᠠ ᠳ᠋ᠤᠷ ᠲᠤᠨᠤᠷᠠᠨ ᠭᠡᠢᠭᠦᠯᠵᠦ᠂ ᠥᠳᠬᠡᠷᠡᠨ ᠭᠡᠢᠭᠡᠳ᠂ ᠲᠦᠮᠡᠨ ᠲᠦᠰᠢᠮᠡᠯ ᠮᠢᠩᠭᠠᠨ ᠨᠣᠶᠠᠳ ᠪᠦᠭᠦᠳᠡᠭᠡᠷ ᠬᠤᠷᠠᠯᠳᠤᠨ ᠬᠤᠷᠠᠭᠰᠠᠨ ᠢ᠋ᠶ᠋ᠠᠷ ᠡᠳᠦᠭᠡ ᠡᠨᠡ ᠨᠢᠭᠡᠨ ᠴᠠᠭᠠᠨ ᠭᠡᠷᠡᠯ ᠰᠠᠴᠤᠷᠠᠭᠰᠠᠨ ᠢ᠋ ᠦᠵᠡᠵᠦ ᠰᠠᠢᠬᠠᠨ ᠦᠨᠦᠷ ᠲᠠᠷᠢᠭᠢᠨᠠ ᠨᠡᠪᠲᠡᠷᠡᠨ᠂ ᠬᠤᠪᠴᠠᠳ ᠲᠤᠷ ᠰᠢᠩᠭᠡᠭᠰᠡᠨ ᠳ᠋ᠦ᠍ᠷ ᠮᠤᠬᠤᠯᠢ ᠫᠤᠤ᠂ ᠲᠠᠰᠢᠭᠤᠷ᠂ ᠵᠦᠩ ᠬᠡᠩᠭᠡᠷᠭᠡ᠂ ᠬᠠᠷᠠᠩᠭᠠ ᠪᠦᠷᠢᠶᠡ ᠶ᠋ᠢᠨ ᠶᠡᠬᠡ ᠲᠦᠷᠬᠢᠯᠭᠡᠨᠲᠦ ᠲᠡᠮᠳᠡᠭ ᠢ᠋ ᠴᠠᠭᠠᠵᠠᠯᠠᠨ᠂ ᠭᠠᠭᠴᠠ ᠬᠣᠷᠢᠨ ᠨᠠᠢ᠍ᠮᠠᠨ ᠣᠳᠣᠳ ᠤ᠋ᠨ ᠬᠦᠷᠢᠶᠡᠨ ᠦ᠌ ᠬᠣᠷᠢᠨ ᠳᠥᠷᠪᠡᠨ ᠤᠯᠠᠷᠢᠯ ᠤ᠋ᠨ ᠨᠠᠢ᠍ᠮᠠᠨ ᠤ᠋ ᠪᠤᠯᠤ ᠢᠦᠢ ᠬᠠᠭᠠᠨ ᠤ᠋ ᠲᠠᠪᠤᠨ ᠵᠠᠭᠤᠨ ᠳᠠᠯᠠᠨ ᠵᠢᠷᠭᠤᠭᠠᠨ ᠬᠥᠮᠦᠨ ᠤ ᠲᠡᠭᠷᠢ ᠶ᠋ᠢᠨ ᠨᠠᠷᠢᠨ ᠬᠥᠭᠵᠢᠮ ᠢ ᠡᠭᠦᠰᠬᠡᠯᠭᠡᠨ᠂ ᠳᠣᠬᠢᠶᠠ ᠲᠠᠯᠪᠢᠭᠤᠯᠵᠤ᠂ ᠤᠭ ᠶᠢᠰᠦᠨ ᠮᠡᠩᠭᠡ᠂ ᠶᠢᠰᠦᠨ ᠥᠩᠭᠡ᠂ ᠶᠢᠰᠦᠨ ᠡᠩ ᠦ᠋ᠨ ᠶᠢᠰᠦ ᠶᠢᠰᠦᠨ ᠨᠠᠶᠠᠨ ᠨᠢᠭᠡᠨ ᠬᠣᠷᠣᠭᠠᠨ ᠤ᠋ ᠶᠢᠰᠦᠨ ᠲᠦᠮᠡᠨ᠂ ᠶᠢᠰᠦᠨ ᠮᠢᠩᠭᠠᠨ᠂ ᠶᠢᠰᠦᠨ ᠵᠠᠭᠤᠨ ᠶᠡᠷᠡᠨ ᠶᠢᠰᠦᠨ ᠬᠢᠭᠢᠷᠢ ᠪᠠᠷᠢᠭᠰᠠᠨ ᠴᠡᠷᠢᠭ ᠬᠤᠶᠠᠭ ᠶᠢᠰᠦᠨ ᠥᠩᠭᠡᠯᠡᠵᠦ᠂ ᠰᠣᠯᠣᠩᠭᠠ ᠣᠪᠣᠭᠠᠯᠠᠭᠰᠠᠨ ᠮᠡᠲᠦ ᠵᠢᠷᠪᠡᠯᠵᠡᠭᠦᠯᠦᠨ ᠪᠦᠷᠢᠳᠦᠭᠡᠳ᠂ ᠲᠡᠳᠡᠭᠡᠷ ᠦ᠋ᠨ ᠲᠦᠭ ᠲᠦᠮᠡᠨ ᠵᠤᠯᠠ ᠭᠡᠷᠡ ᠳᠣᠣᠷᠠ ᠠ᠋ᠴᠠ ᠥᠭᠡᠳᠡ ᠭᠡᠢᠭᠦᠯᠦᠨ ᠳᠡᠭᠡᠷᠡ ᠡᠴᠡ ᠴᠠᠢᠪᠤᠷ ᠭᠡᠢᠪᠡᠩ ᠰᠠᠷᠠᠨ ᠤ᠋ ᠲᠤᠶᠠᠭᠠ ᠬᠢᠭᠡᠳ ᠡᠳᠦᠭᠡ ᠬᠠᠭᠠᠨ ᠥᠷᠭᠥᠭᠡ ᠶ᠋ᠢᠨ ᠲᠤᠭ ᠠ᠋ᠴᠠ ᠰᠠᠴᠤᠷᠠᠨ ᠬᠡᠷᠡᠯᠳᠦᠬᠦ ᠰᠦᠨ ᠴᠠᠭᠠᠨ ᠲᠠᠷᠠᠭ ᠤ᠋ᠨ ᠥᠩᠭᠡ ᠶ᠋ᠢᠨ ᠴᠠᠭᠠᠨ ᠰᠤᠪᠤᠳ ᠤ᠋ᠨ ᠭᠡᠷᠡᠯ ᠴᠠᠰᠤᠨ ᠤ᠋ ᠬᠢᠯᠪᠠᠰᠤᠯ ᠮᠡᠲᠦ ᠳᠡᠭᠡᠷᠡ ᠡᠴᠡ ᠤᠷᠤᠭᠤ ᠰᠠᠴᠤᠷᠠᠨ ᠬᠡᠷᠡᠯᠳᠦᠵᠦ᠂ ᠲᠦᠮᠡᠨ ᠪᠣᠳᠠᠰ ᠮᠢᠩᠭᠠᠨ ᠮᠠᠨᠳᠠᠯ᠂ ᠵᠤᠯᠠ ᠭᠡᠷᠡᠯ ᠳ᠋ᠦ᠍ᠷ ᠬᠦᠷᠲᠡᠯᠡ ᠨᠡᠢᠭᠡᠮ ᠨᠡᠢᠲᠡ ᠪᠡᠷ ᠴᠥᠮ ᠭᠡᠢᠪᠡᠩ ᠴᠠᠭᠠᠨ ᠴᠠᠢᠪᠤᠷ ᠴᠡᠯᠡᠭᠡᠷ ᠰᠢᠯ ᠦ᠋ᠨ ᠣᠷᠴᠢᠯᠠᠩ᠂ ᠪᠣᠯᠣᠷ ᠤ᠋ᠨ ᠣᠭᠲᠠᠷᠭᠤᠢ ᠪᠣᠯᠤᠭᠠᠳ᠂ ᠲᠡᠭᠷᠢ ᠶ᠋ᠢᠨ ᠠᠩᠬᠢᠯᠤᠮᠠᠭ᠂ ᠣᠷᠴᠢᠯᠠᠩ ᠤ᠋ᠨ ᠠᠶᠠᠯᠭᠤ ᠡᠭᠡᠰᠢᠭ ᠯᠦ᠍ᠭᠡ ᠨᠠᠢᠷᠠᠭᠠᠳ᠂ ᠬᠥᠮᠦᠨ ᠦ᠌ ᠴᠣᠭ᠂ ᠣᠯᠠᠨ ᠤ᠋ ᠣᠮᠣᠭ ᠪᠠᠶᠠᠰᠬᠤᠯᠠᠩ ᠯᠤᠭᠠ ᠪᠠᠷᠢᠯᠳᠤᠨ᠂ ᠪᠥᠵᠢᠭ ᠦ᠋ᠨ ᠳᠥᠷᠪᠡᠨ ᠶᠡᠬᠡ ᠴᠠᠭᠠᠨ ᠵᠠᠭᠠᠨ᠂ ᠮᠠᠨᠳᠠᠯ ᠤ᠋ᠨ ᠳᠥᠷᠪᠡᠨ ᠵᠣᠪᠬᠢᠰ ᠥᠨᠴᠥᠭ ᠲᠣᠷ ᠬᠠᠰ ᠠᠭᠤᠯᠠ ᠮᠡᠲᠦ ᠰᠡᠬᠦᠢᠨ ᠵᠣᠭᠰᠣᠵᠤ᠂ ᠲᠦᠮᠡᠨ ᠠᠷᠢᠶᠠᠲᠠᠨ ᠤ᠋ ᠳᠠᠭᠤᠨ ᠦᠢᠮᠡᠭᠡᠨ ᠢ᠋ ᠳᠠᠷᠤᠨ᠂ ᠶᠢᠰᠦᠨ ᠶᠡᠬᠡ ᠠᠯᠲᠠᠨ ᠭᠥᠯᠢᠰ ᠲᠣᠷ ᠳᠣᠯᠣᠭᠠᠨ ᠡᠷᠳᠡᠨᠢᠰ ᠨᠠᠢ᠍ᠮᠠᠨ ᠥᠯᠵᠡᠢ ᠶ᠋ᠢᠨ ᠨᠠᠢᠷᠠᠯᠲᠤ ᠬᠥᠮᠦᠨ ᠦ᠌ ᠵᠢᠷᠦᠬᠡ ᠶ᠋ᠢ ᠲᠦᠭᠰᠢᠭᠦᠯᠦᠨ ᠰᠥᠰᠥ ᠶ᠋ᠢ ᠵᠥᠭᠡᠯᠡᠷᠡᠭᠦᠯᠬᠦ ᠯᠤᠤ ᠶ᠋ᠢᠨ ᠵᠠᠭᠠᠷ ᠤ᠋ᠨ ᠠᠩᠬᠢᠯᠤᠮᠠᠯ ᠢ᠋ ᠰᠢᠲᠠᠭᠠᠨ᠂ ᠲᠡᠷᠡ ᠨᠢᠭᠡᠨ ᠴᠠᠭ ᠤ᠋ᠨ ᠵᠡᠷᠭᠡᠯᠭᠡᠨ ᠦᠵᠡᠮᠵᠢ ᠢᠨᠦ ᠤᠨᠤᠨ ᠮᠥᠷᠡᠨ ᠦ᠌ ᠮᠤᠩ ᠭᠣᠣᠯ ᠤ᠋ᠨ ᠠᠮᠠᠨ ᠤ᠋ ᠊ᠧᠴᠢᠷ ᠮᠠᠨᠳᠠᠯᠲᠤ ᠵᠢᠪᠬᠤᠯᠠᠩᠲᠤ ᠪᠠᠯᠭᠠᠳ ᠤ᠋ᠨ ᠬᠣᠲᠠᠯᠠᠭᠠᠷ ᠤᠯᠤᠰ ᠢᠷᠭᠡᠳ ᠲᠦᠭ ᠲᠦᠮᠡᠨ ᠢ᠋ᠶ᠋ᠡᠷ ᠬᠤᠷᠠᠯᠳᠤᠭᠰᠠᠨᠠ᠂ ᠤᠰᠤ ᠲᠡᠭᠰᠢᠷᠡᠨ ᠨᠠᠭᠤᠷ ᠪᠢᠯᠬᠠᠮᠠᠯ ᠮᠡᠯᠮᠡᠯᠵᠡᠬᠦ ᠮᠡᠲᠦ ᠣᠯᠠᠨ ᠣᠳᠣᠳ ᠤ᠋ᠨ ᠨᠣᠶᠠᠳ ᠤ᠋ᠨ ᠴᠢᠭᠤᠯᠭᠠᠨ ᠴᠤᠭᠯᠠᠷᠠᠨ᠂ ᠤᠳᠠᠷᠢᠰᠠᠳ᠂ ᠷᠢᠸᠠᠳᠢ᠂ ᠪᠤᠷᠨᠠᠸᠠᠱᠤ᠂ ᠽᠸᠤᠡᠷᠡ ᠲᠡᠷᠢᠭᠦᠯᠡᠨ ᠪᠦᠷᠢᠳᠴᠦ ᠤᠲᠠᠷᠢᠰᠤᠨ ᠪᠠᠯᠭᠠᠰᠤᠨ ᠤ᠋ ᠰᠦᠷ ᠭᠡᠷᠡᠯ ᠢ᠋ᠶ᠋ᠡᠷ ᠭᠢᠯᠪᠠᠰᠤᠷᠤᠨ ᠭᠠᠨᠳᠠᠷᠢᠰᠤᠨ ᠬᠦᠮᠪᠢᠷᠡ ᠶ᠋ᠢᠨ ᠭᠠᠢᠬᠠᠮᠰᠢᠭ ᠪᠡᠯᠬᠡᠰ ᠪᠦᠷᠢᠳᠪᠡᠢ᠃ ᠲᠡᠨᠳᠡᠴᠡ ᠤᠯᠤᠰ ᠤ᠋ᠨ ᠬᠣᠲᠠᠯᠠᠭᠠᠷ ᠤ᠋ᠨ ᠵᠠᠭᠤᠨ ᠨᠣᠶᠠᠳ ᠮᠢᠩᠭᠠᠨ ᠲᠦᠰᠢᠮᠡᠳ᠂ ᠲᠦᠮᠡᠨ ᠪᠠᠭᠠᠲᠤᠳ᠂ ᠠᠷᠪᠠᠨ ᠵᠠᠭᠤᠨ ᠤ᠋ ᠲᠦᠭ ᠲᠦᠮᠡᠨ ᠴᠡᠷᠢᠭ ᠬᠤᠶᠠᠭ᠂ ᠠᠷᠠᠳ ᠢᠷᠭᠡᠳ᠂ ᠭᠠᠵᠠᠷ ᠳᠡᠯᠡᠬᠡᠢ ᠶ᠋ᠢᠨ ᠬᠥᠷᠥᠰᠥ ᠶ᠋ᠢ ᠪᠦᠷᠬᠦᠲᠡᠯᠡ ᠴᠤᠭᠯᠠᠯᠴᠠᠨ ᠵᠢᠭᠰᠠᠭᠠᠭᠠᠳ᠂ ᠲᠠᠪᠤᠨ ᠥᠲᠡᠭᠦᠰ ᠳᠥᠷᠪᠡᠨ ᠳᠥᠷᠪᠡ᠂ ᠵᠢᠷᠭᠤᠭᠠᠨ ᠰᠠᠢᠰᠢᠶᠠᠯ᠂ ᠶᠢᠰᠦᠨ ᠡᠩ ᠦ᠋ᠨ ᠲᠡᠷᠢᠭᠦᠯᠡᠭᠴᠢ ᠨᠣᠶᠠᠳ ᠳᠠᠯᠠᠨ ᠲᠠᠪᠤᠨ ᠠᠢᠮᠠᠭ ᠤ᠋ᠳ ᠤ᠋ᠨ ᠡᠵᠡᠳ ᠢ᠋ᠶ᠋ᠡᠷ ᠸᠴᠢᠷ ᠮᠠᠨᠳᠠᠯ ᠢ᠋ ᠲᠣᠭᠣᠷᠢᠨ ᠫᠢᠭ ᠳᠦᠭᠦᠷᠲᠡᠯᠡ ᠰᠥᠭᠥᠳᠦᠯᠴᠡᠨ᠂ ᠲᠡᠷᠢᠭᠦᠯᠡᠭᠰᠡᠨ ᠲᠦᠰᠢᠮᠡᠯ ᠰᠤᠷᠬᠠᠨ ᠰᠢᠷᠠ ᠴᠡᠷᠢᠭ ᠦ᠋ᠨ ᠶᠡᠬᠡ ᠵᠢᠨᠦᠩ ᠨᠣᠶᠠᠨ ᠮᠤᠬᠤᠯᠢ ᠬᠣᠶᠠᠭᠤᠯᠠ ᠣᠯᠠᠨ ᠢ᠋ ᠲᠡᠷᠢᠭᠦᠯᠡᠨ ᠬᠠᠭᠠᠨ ᠥᠷᠭᠥᠭᠡ ᠶ᠋ᠢᠨ ᠡᠭᠦᠳᠡᠨ ᠤ ᠣᠢᠷᠠ ᠰᠥᠭᠥᠳᠴᠦ᠂ ᠥᠨᠳᠥᠷ ᠶᠡᠬᠡ ᠡᠭᠡᠰᠢᠭᠲᠦ ᠳᠠᠭᠤᠨ ᠢ᠋ᠶ᠋ᠠᠷ ᠡᠢᠨ ᠭᠡᠮᠡᠨ ᠮᠡᠳᠡᠭᠦᠯᠦᠷᠦᠨ᠄
ᠡᠴᠢᠭᠡ ᠬᠡᠮᠡᠭᠴᠢ ᠨᠢᠭᠡᠬᠡᠨ ᠪᠡᠶᠡ ᠶ᠋ᠢᠨ ᠡᠭᠦᠰᠬᠡᠯ
ᠡᠵᠡᠨ ᠬᠡᠮᠡᠭᠴᠢ ᠲᠦᠭ ᠲᠦᠮᠡᠨ ᠦ᠌ ᠲᠣᠯᠣᠭᠠᠢ ᠃
ᠡᠬᠡ ᠬᠡᠮᠡᠭᠴᠢ ᠡᠨᠡ ᠪᠡᠶᠡ ᠶ᠋ᠢᠨ ᠡᠭᠦᠰᠬᠡᠯ
ᠡᠵᠡᠨ ᠬᠡᠮᠡᠭᠴᠢ ᠣᠷᠴᠢᠯᠠᠩ ᠳᠡᠯᠡᠬᠡᠢ ᠶ᠋ᠢᠨ ᠲᠡᠷᠢᠭᠦᠨ᠃
ᠡᠴᠢᠭᠡ ᠡᠬᠡ ᠡᠭᠦᠰᠬᠡᠨ ᠲᠥᠷᠥᠬᠦ ᠶ᠋ᠢ ᠴᠢᠳᠠᠪᠠᠴᠤ
ᠡᠷᠬᠢᠮ ᠪᠣᠯᠭᠠᠨ ᠡᠷᠭᠦᠮᠵᠢᠯᠡᠨ ᠦᠯᠦ ᠴᠢᠳᠠᠮᠤᠢ᠃
ᠡᠵᠡᠨ ᠬᠠᠭᠠᠨ ᠡᠭᠦᠷᠢ ᠵᠠᠰᠠᠯᠠᠨ ᠴᠢᠳᠠᠬᠤ ᠪᠥᠭᠡ᠊ᠤᠨ
ᠡᠯᠪᠡᠷᠢᠯ ᠰᠢᠳᠤᠷᠭᠤ ᠪᠠᠷ ᠡᠷᠬᠡᠪᠰᠢ ᠮᠥᠷᠳᠡᠭᠦᠯᠦᠨ ᠶᠠᠪᠤᠭᠤᠯᠤᠮᠤᠢ᠃
ᠡᠴᠢᠭᠡ ᠡᠬᠡ ᠦᠶᠡ ᠬᠥᠪᠡᠭᠦᠳ ᠢ᠋ᠶ᠋ᠡᠨ ᠠᠰᠠᠷᠠᠮᠤᠢ
ᠡᠵᠡᠨ ᠬᠠᠭᠠᠨ ᠬᠠᠮᠤᠭ ᠢᠷᠭᠡᠳ ᠢ᠋ᠶ᠋ᠡᠨ ᠠᠪᠤᠷᠠᠮᠤᠢ
ᠡᠷᠬᠡᠲᠦ ᠬᠠᠳ ᠵᠠᠰᠠᠭ ᠢ᠋ᠶ᠋ᠠᠨ ᠦᠯᠦ ᠪᠣᠯᠵᠣᠭᠤᠯᠤᠮᠤᠢ
ᠡᠵᠡᠨ ᠳᠡᠭᠷᠢᠯᠢᠭ ᠵᠠᠷᠯᠢᠭ ᠢ᠋ᠶ᠋ᠠᠨ ᠦᠯᠦ ᠪᠤᠴᠠᠮᠤᠢ᠃
ᠡᠷᠭᠡᠯᠵᠡᠨ ᠭᠤᠶᠤᠭᠰᠠᠨ ᠶᠢᠰᠦᠨ ᠥᠷᠯᠥᠭ ᠦ᠋ᠨ ᠪᠡᠯᠬᠡᠰ
ᠡᠪᠭᠦᠷ ᠳᠠᠪᠬᠤᠷ ᠡᠯᠡ ᠪᠦᠬᠦᠨᠡ ᠨᠡᠢᠯᠡᠭᠦᠯᠵᠦᠬᠦᠢ᠃
ᠡᠵᠡᠨ ᠪᠣᠭᠳᠠ ᠪᠠᠷ ᠨᠡᠢᠯᠡᠯᠳᠦᠨ ᠰᠣᠨᠣᠷᠳᠠᠵᠤ ᠬᠠᠢᠷᠠᠯᠠ
ᠡᠳᠡᠭᠡᠷ ᠪᠡᠯᠬᠡᠰ ᠢ᠋ ᠡᠬᠢᠨ ᠡᠴᠡ ᠠᠢᠯᠠᠳᠬᠠᠶᠠ᠃
ᠲᠡᠷᠢᠭᠦᠨ ᠪᠡᠯᠭᠡ ᠨᠢᠭᠡᠬᠡᠨ ᠬᠦᠵᠢ ᠠᠷᠪᠠᠨ ᠴᠠᠭ ᠤᠩᠭᠤᠰᠪᠠ
ᠳᠡᠳ᠋ ᠪᠡᠯᠭᠡ ᠭᠠᠩ ᠤ᠋ᠨ ᠬᠤᠷᠠ ᠬᠠᠮᠤᠭ ᠠᠮᠢᠲᠠᠨ ᠢ᠋ ᠬᠠᠩᠭᠠᠪᠠ᠃
ᠭᠤᠲᠠᠭᠠᠷ ᠪᠡᠯᠭᠡ ᠭᠤᠷᠪᠠᠨ ᠲᠣᠬᠣᠢ ᠴᠠᠰᠤ ᠶ᠋ᠢ ᠬᠠᠢᠯᠤᠭᠤᠯᠪᠠ
ᠳᠥᠲᠥᠭᠡᠷ ᠪᠡᠯᠭᠡ ᠠᠯᠲᠠᠨ ᠤᠯᠤᠰ ᠤ᠋ᠨ ᠠᠭᠲᠠ ᠮᠣᠷᠢᠳ ᠢᠷᠡᠪᠡ᠃
ᠲᠠᠪᠤᠳᠤᠭᠠᠷ ᠪᠡᠯᠭᠡ ᠡᠮᠦᠨᠡᠲᠦ ᠤᠯᠤᠰ ᠤ᠋ᠳ ᠪᠣᠳᠣᠷᠣᠣᠯ ᠪᠢᠴᠢᠭ ᠠᠢᠯᠠᠳᠬᠠᠪᠠ
ᠵᠢᠷᠭᠤᠳᠤᠭᠠᠷ ᠪᠡᠯᠭᠡ ᠬᠤᠪᠢᠯᠭᠠᠨ ᠺᠠᠷᠣᠳᠢ ᠲᠦᠮᠡᠨ ᠦ᠌ ᠳᠤᠮᠳᠠ ᠪᠠᠭᠤᠪᠠ᠃
ᠳᠣᠯᠣᠳᠤᠭᠠᠷ ᠪᠡᠯᠭᠡ ᠴᠢᠯᠠᠭᠤᠨ ᠠ᠋ᠴᠠ ᠲᠠᠮᠠᠭᠠ ᠶ᠋ᠢᠨ ᠬᠠᠰ ᠭᠠᠷᠪᠠ
ᠨᠠᠢ᠍ᠮᠠᠳᠤᠭᠠᠷ ᠪᠡᠯᠭᠡ ᠭᠤᠸᠠᠨ ᠪᠣᠭᠳᠠ ᠰᠠᠬᠢᠭᠤᠯᠰᠤᠨ ᠢ᠋ᠶ᠋ᠠᠨ ᠢᠯᠡᠳᠬᠡᠪᠡ᠃
ᠶᠢᠰᠦᠳᠦᠭᠡᠷ ᠪᠡᠯᠭᠡ ᠴᠠᠭᠠᠨ ᠭᠡᠷᠡᠯ ᠡᠳᠦᠭᠡ ᠬᠠᠷᠠᠬᠠᠨ ᠭᠡᠢᠭᠦᠯᠦᠨ ᠠᠮᠤᠢ
ᠠᠷᠪᠠᠳᠤᠭᠠᠷ ᠣᠷᠣᠨ ᠤ᠋ ᠡᠵᠡᠨ ᠮᠢᠨᠦ ᠠᠯᠲᠠ ᠠᠮᠠᠨ ᠢ᠋ᠶ᠋ᠠᠨ ᠭᠦᠢᠴᠡᠳᠭᠡ᠃
ᠭᠡᠮᠡᠨ ᠥᠴᠢᠨ ᠮᠡᠳᠡᠭᠦᠯᠦᠭᠰᠡᠨᠡ ᠠᠯᠲᠠᠨ ᠶᠠᠰᠤᠲᠤ ᠲᠠᠢᠽᠦ ᠪᠣᠭᠳᠠ ᠠᠷᠭᠠᠳᠠᠯ ᠦᠭᠡᠢ ᠵᠠᠯᠠᠷᠠᠨ ᠳᠡᠭᠡᠭᠰᠢᠯᠡᠵᠦ ᠠᠷᠢᠭᠤᠯᠠᠨ ᠤᠬᠢᠶᠠᠯᠠᠵᠤ᠂ ᠠᠷᠴᠠ ᠽᠠᠨᠳᠠᠨ ᠬᠦᠵᠢ ᠪᠡᠷ ᠠᠷᠢᠭᠤᠳᠬᠠᠨ ᠰᠦᠷᠴᠢᠨ ᠤᠲᠤᠵᠤ᠂ ᠠᠯᠲᠠᠨ ᠯᠤᠤ ᠶ᠋ᠢᠨ ᠠᠷᠢᠭᠤᠨ ᠰᠢᠨᠡ ᠬᠤᠪᠴᠠᠳ᠂ ᠠᠯᠮᠠᠰ ᠰᠤᠪᠤᠳ ᠤ᠋ᠨ ᠭᠡᠷᠡᠯ ᠲᠤᠶᠠᠭᠠᠲᠤ ᠡᠷᠳᠡᠨᠢ ᠶ᠋ᠢᠨ ᠪᠦᠰᠡ ᠪᠦᠰᠡᠯᠡᠨ᠂ ᠣᠯᠠᠨ ᠲᠦᠰᠢᠮᠡᠳ ᠦ᠋ᠨ ᠵᠠᠯᠠᠬᠤᠢ ᠳ᠋ᠤᠷ ᠵᠠᠯᠠᠷᠠᠨ ᠭᠠᠷᠴᠤ᠂ ᠳᠥᠷᠪᠡᠨ ᠵᠦᠭ ᠨᠠᠢ᠍ᠮᠠᠨ ᠵᠣᠪᠬᠢᠰ ᠳᠡᠭᠡᠷᠡ ᠳᠣᠣᠷᠠ ᠨᠡᠢᠲᠡ ᠪᠡᠷ ᠴᠥᠮ ᠴᠠᠭᠠᠨ ᠭᠡᠷᠡᠯ ᠵᠢᠷᠦᠪᠡᠯᠵᠡᠨ ᠬᠡᠷᠡᠯᠳᠦᠵᠦ᠂ ᠸᠴᠢᠷ ᠦ᠋ᠨ ᠬᠠᠭᠠᠨ ᠥᠷᠭᠥᠭᠡ ᠶ᠋ᠢᠨ ᠠᠯᠲᠠᠨ ᠣᠷᠣᠢ ᠠ᠋ᠴᠠ ᠳᠡᠭᠡᠭᠰᠢ ᠳᠣᠷᠣᠭᠰᠢ᠂ ᠴᠠᠭᠠᠨ ᠭᠡᠷᠡᠯ ᠦ᠋ᠨ ᠭᠡᠢᠪᠡᠩᠲᠡᠨ ᠭᠡᠢᠭᠦᠯᠬᠦ ᠢᠨᠦ᠂ ᠴᠠᠷᠠ ᠰᠠᠭᠤᠯᠠᠭᠠ ᠶ᠋ᠢᠨ ᠴᠢᠨᠡᠭᠡᠨ ᠪᠦᠳᠦᠭᠦᠨ ᠢ᠋ᠶ᠋ᠡᠷ ᠳᠡᠭᠡᠷᠡ ᠦᠵᠦᠭᠦᠷ ᠣᠭᠲᠠᠷᠭᠤᠢ ᠳ᠋ᠤᠷ ᠣᠷᠣᠵᠤ᠂ ᠳᠣᠣᠷᠠ ᠦᠵᠦᠭᠦᠷ ᠦᠷᠭᠦᠭᠡᠨ ᠦ᠌ ᠲᠣᠭᠣᠨᠣ ᠳ᠋ᠤᠷ ᠣᠷᠣᠵᠤᠬᠤᠢ᠃ ᠲᠠᠢᠽᠦ ᠦᠵᠡᠭᠡᠳ ᠰᠣᠨᠢᠷᠬᠠᠨ ᠪᠡᠶᠡᠰᠴᠦ ᠭᠠᠢᠬᠠᠨ ᠰᠠᠢᠰᠢᠶᠠᠵᠤ᠂ ᠦᠨᠡᠬᠡᠷ ᠳᠣᠲᠣᠷᠠ ᠢᠭᠲᠦᠯᠵᠦ᠂ ᠠᠢᠨ ᠭᠡᠮᠡᠨ ᠪᠡᠶᠡᠰᠦᠨ ᠵᠠᠬᠢᠷᠤᠨ :
ᠡᠷᠲᠡᠨ ᠦ᠌ ᠮᠣᠳᠣᠨ ᠰᠠᠷᠠᠨ ᠤ᠋ ᠭᠡᠷᠡᠯ ᠡᠴᠡ ᠣᠯᠤᠭᠰᠠᠨ
ᠡᠪᠦᠭᠡ ᠪᠤᠲᠠᠨᠴᠢᠷ ᠪᠤᠬᠳᠠᠨ ᠡᠵᠡᠨ ᠬᠡᠮᠡᠭᠴᠢ
ᠡᠴᠦᠰᠲᠡᠬᠡᠨ ᠪᠠᠰᠠ ᠡᠢᠮᠦ ᠭᠡᠭᠡᠨ ᠴᠠᠭᠠᠨ ᠢ᠋ ᠬᠡᠯᠡᠵᠦᠬᠦᠢ᠃
ᠡᠨᠡ ᠪᠠᠰᠠᠴᠤ ᠲᠡᠭᠷᠢ ᠶ᠋ᠢᠨ ᠰᠠᠨᠠᠭᠠᠨ ᠦᠨᠡᠨ ᠠᠵᠤᠭᠤ᠃
ᠡᠷᠢᠭᠰᠡᠨ ᠬᠤᠲᠤᠭ ᠶᠢᠰᠦᠨ ᠥᠷᠯᠥᠭᠡ ᠪᠦᠷᠢᠳᠦᠭᠰᠡᠨᠡ
ᠡᠭᠦᠨᠴᠡ ᠬᠣᠶᠠᠷ ᠵᠦᠢᠯ ᠢ᠋ ᠲᠠᠰᠤᠷᠬᠠᠢ ᠴᠠᠭᠠᠵᠠᠯᠠᠬᠤ ᠮᠢᠨᠦ
ᠡᠯᠡ ᠤᠯᠤᠰ ᠤ᠋ᠳ ᠢ᠋ ᠳᠠᠢᠯᠠᠨ ᠳᠠᠭᠠᠭᠤᠯᠵᠤ ᠲᠦᠪᠰᠢᠳᠬᠡᠬᠦᠶᠡ
ᠡᠵᠡᠯᠡᠭᠰᠡᠨ ᠬᠠᠭᠠᠨ ᠢ᠋ ᠠᠨᠤ ᠠᠯᠠᠵᠤ ᠪᠣᠯᠬᠤ ᠦᠭᠡᠢ᠃
ᠡᠳᠦᠭᠡ ᠬᠠᠮᠲᠤ ᠤᠯᠤᠰ ᠪᠠᠢᠭᠤᠯᠤᠭᠰᠠᠨ ᠲᠦᠰᠢᠮᠡᠳ ᠢ᠋ ᠮᠢᠨᠦ
ᠡᠴᠦᠰᠯᠡᠨ ᠡᠴᠦᠰᠯᠡᠲᠡᠯᠡ ᠠᠯᠠᠬᠤᠢ ᠳ᠋ᠤᠷ ᠪᠢᠲᠡᠭᠡᠢ ᠬᠦᠷᠦᠭᠦᠯᠦᠭᠲᠦᠨ᠃
ᠡᠢᠮᠦ ᠪᠣᠯᠪᠠᠰᠤ ᠡᠷᠭᠢᠨ ᠴᠢᠩ ᠰᠠᠢᠳ ᠤ᠋ᠳ ᠲᠠᠨ ᠤ᠋
ᠡᠷᠭᠦᠬᠦ ᠬᠠᠭᠠᠨ ᠤ᠋ ᠰᠠᠭᠤᠷᠢᠨᠠ ᠰᠠᠭᠤᠰᠤᠭᠠᠢ ᠬᠡᠮᠡᠭᠰᠡᠳ ᠲᠣᠷ
ᠡᠩᠭᠡᠷ ᠨᠡᠢᠲᠡ ᠪᠡᠷ ᠡᠵᠡᠨ ᠲᠦᠮᠡᠨ ᠨᠠᠰᠤᠲᠤ ᠶ᠋ᠢᠨ
ᠡᠳᠡᠭᠡᠷ ᠵᠠᠷᠯᠢᠭ ᠢ᠋ ᠡᠭᠦᠷᠢᠳᠡ ᠶ᠋ᠢᠨ ᠬᠠᠤᠯᠢ ᠪᠣᠯᠭᠠᠰᠤᠭᠠᠢ᠃
ᠡᠨᠡ ᠴᠠᠭ ᠳᠠᠷᠤᠢ ᠡᠷᠬᠢᠮ ᠳᠡᠭᠡᠳᠦ ᠰᠠᠢᠨ ᠴᠠᠭ ᠮᠥᠨ
ᠡᠷᠳᠡᠨᠢ ᠶ᠋ᠢᠨ ᠰᠠᠭᠤᠷᠢᠨᠠ ᠡᠳᠦᠭᠡ ᠳᠠᠷᠤᠢ ᠡᠷᠭᠦᠨ ᠵᠠᠯᠠᠮᠤᠢ
ᠭᠡᠮᠡᠨ ᠡᠷᠲᠡᠨ ᠦ᠌ ᠳᠠᠩ ᠤᠯᠤᠰ ᠤ᠋ᠨ ᠲᠠᠢᠽᠥ᠋ᠩ ᠬᠠᠭᠠᠨ᠂ ᠯᠢ ᠱᠢ ᠮᠢᠨ ᠦ᠌ ᠬᠠᠭᠠᠨ ᠤ᠋ ᠮᠠᠯᠠᠭᠠ ᠳᠡᠪᠡᠯ ᠪᠦᠰᠡ᠂ ᠭᠤᠲᠤᠯ᠂ ᠥᠪᠡᠷ ᠦ᠋ᠨ ᠤᠯᠤᠰ ᠤ᠋ᠨ ᠶᠣᠰᠣᠲᠤ ᠬᠤᠪᠴᠠᠳ ᠠ᠋ᠴᠠ ᠨᠡᠮᠡᠭᠰᠡᠨ ᠢᠨᠦ᠂ ᠴᠢᠬᠢᠨ ᠦ᠌ ᠶᠡᠬᠡ ᠰᠤᠪᠤᠳ ᠲᠠᠨᠠ ᠶ᠋ᠢᠨ ᠤᠨᠵᠢᠯᠭᠠᠲᠤ ᠰᠦᠢᠬᠡ ᠴᠢᠮᠡᠭ ᠬᠦᠵᠦᠭᠦᠨᠡ ᠶᠢᠰᠦᠨ ᠠᠯᠲᠠᠨ ᠯᠤᠤ ᠶ᠋ᠢᠨ ᠰᠤᠪᠤᠳ ᠠᠯᠮᠠᠰ ᠡᠷᠳᠡᠨᠢᠰ ᠦ᠋ᠨ ᠶᠡᠬᠡ ᠬᠣᠭᠣᠯᠤᠪᠴᠢ ᠪᠠ ᠡᠷᠢᠭᠡ᠂ ᠰᠤᠭᠤᠨ ᠳ᠋ᠤᠷ ᠰᠤᠮᠤᠨ ᠠᠯᠴᠢᠭᠤᠷ᠂ ᠮᠠᠩᠨᠤᠭ ᠬᠠᠪᠲᠠᠭᠠ ᠳᠠᠩ ᠬᠠᠭᠠᠨ ᠤ᠋ ᠬᠤᠪᠴᠠᠳ᠂ ᠬᠠᠭᠤᠴᠢᠨ ᠯᠢᠶᠣᠣ ᠶ᠋ᠢᠨ ᠶᠡᠬᠡ ᠬᠦᠦ ᠳ᠋ᠦ᠍ᠷ ᠬᠡᠳᠦᠨ ᠠᠷᠪᠠᠨ ᠬᠤᠪᠢ ᠲᠠᠬᠢᠵᠤᠬᠤᠢ᠃ ᠡᠨᠡ ᠬᠢᠷᠢ ᠳ᠋ᠦ᠍ᠷ ᠲᠠᠩᠭᠤᠳ ᠤᠯᠤᠰ ᠴᠤ᠌ ᠳᠡᠭᠡᠷᠡ ᠳᠣᠣᠷᠠ ᠴᠥᠮ ᠢ᠋ᠶ᠋ᠡᠷ ᠳᠠᠩ ᠤᠯᠤᠰ ᠤ᠋ᠨ ᠳᠠᠩ ᠰᠢᠽᠥ᠋ᠩ ᠦ᠋ᠨ ᠡᠷᠭᠦᠮᠵᠢᠯᠡᠭᠰᠡᠨ ᠢ᠋ᠶ᠋ᠡᠷ ᠪᠠᠰᠠ ᠬᠦ᠌ ᠳᠠᠩ ᠤᠯᠤᠰ ᠤ᠋ᠨ ᠳᠡᠪᠡᠯ ᠮᠠᠯᠠᠭᠠ ᠲᠥᠷᠥ ᠶ᠋ᠢᠨ ᠬᠤᠪᠴᠠᠳ ᠢ᠋ ᠬᠡᠷᠡᠭᠯᠡᠭᠰᠡᠭᠡᠷ ᠪᠥᠯᠥᠭᠡ᠃ ᠲᠡᠢᠨ ᠬᠦ᠌ ᠬᠠᠭᠠᠨ ᠬᠡᠮᠡᠪᠡᠰᠦ ᠳᠠᠷᠤᠢ ᠳᠠᠩ ᠤᠯᠤᠰ ᠤ᠋ᠨ ᠬᠠᠭᠠᠨ ᠤ᠋ ᠮᠠᠯᠠᠭᠠ ᠡᠮᠦᠰᠳᠡᠭ ᠠᠵᠤᠭᠤ᠃ ᠵᠠᠭᠤᠨ ᠲᠦᠰᠢᠮᠡᠳ ᠴᠥᠮ ᠪᠤᠯᠠᠭᠠ ᠶ᠋ᠢᠨ ᠳᠠᠬᠤ᠂ ᠮᠠᠩᠨᠤᠭ ᠤ᠋ᠨ ᠳᠡᠪᠡᠯ᠂ ᠡᠷᠳᠡᠨᠢ ᠶ᠋ᠢᠨ ᠡᠷᠢᠭᠡ᠂ ᠰᠤᠮᠤᠨ ᠠᠯᠴᠢᠭᠤᠷ ᠬᠠᠪᠲᠠᠭᠠ ᠪᠠ ᠬᠡᠲᠡ ᠬᠢᠲᠤᠭᠠ ᠲᠠᠢ ᠬᠣᠯᠪᠣᠨ ᠵᠡᠭᠦᠮᠦᠢ᠃ ᠲᠡᠷᠡ ᠦᠶᠡ ᠶ᠋ᠢᠨ ᠠᠷᠤ ᠭᠠᠵᠠᠷ ᠳᠠᠩ ᠤᠯᠤᠰ ᠤ᠋ᠨ ᠲᠠᠢᠽᠥ᠋ᠩ ᠢ᠋ ᠮᠠᠰᠢ ᠡᠷᠬᠢᠯᠡᠨ᠂ ᠡᠮᠦᠨᠡ ᠨᠠᠩᠭᠢᠶᠠᠳ ᠤ᠋ᠨ ᠦᠨᠡᠨ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠭᠡᠮᠡᠨ ᠤᠯᠠᠮᠵᠢᠯᠠᠨ ᠬᠡᠯᠡᠯᠴᠡᠳᠡᠭ ᠠᠵᠤᠭᠤ᠃ ᠲᠡᠢᠨ ᠬᠦ᠌ ᠲᠠᠢᠽᠦ᠂ ᠳᠠᠩ ᠲᠠᠢᠽᠥ᠋ᠩ ᠯᠢ ᠱᠢ ᠮᠢᠨ ᠦ᠌ ᠶᠢᠰᠦᠨ ᠯᠤᠤᠲᠤ ᠮᠠᠯᠠᠭᠠ ᠶ᠋ᠢ ᠡᠮᠦᠰᠴᠦ᠂ ᠭᠠᠳᠠᠨᠠ ᠵᠢᠭᠰᠠᠭᠠᠭᠰᠠᠨ ᠲᠠᠪᠤᠨ ᠮᠠᠨᠳᠠᠯ᠂ ᠶᠢᠰᠦᠨ ᠰᠦᠮᠡ ᠶ᠋ᠢᠨ ᠰᠢᠲᠦᠭᠡᠨᠡ ᠮᠥᠷᠭᠥᠵᠦ᠂ ᠥᠪᠡᠷ ᠦ᠋ᠨ ᠡᠪᠦᠭᠡᠳ ᠬᠢᠭᠡᠳ ᠲᠥᠷᠥᠭᠰᠡᠨ ᠡᠬᠡ ᠥᠭᠡᠯᠦᠨ ᠦᠵᠢᠨ ᠡᠮᠡᠭᠡ ᠶ᠋ᠢᠨ ᠵᠦᠭ ᠬᠠᠨᠳᠤᠨ ᠮᠥᠷᠭᠥᠵᠦ᠂ ᠰᠠᠶᠢ ᠶᠡᠬᠡ ᠴᠠᠭᠠᠨ ᠰᠦᠯᠳᠡ ᠶ᠋ᠢᠨ ᠲᠤᠭ ᠢ᠋ᠶ᠋ᠠᠨ ᠳᠠᠬᠢᠭᠠᠳ᠂ ᠬᠠᠭᠠᠨ ᠥᠷᠥᠭᠡᠨ ᠤ ᠬᠣᠢᠮᠣᠷ ᠲᠠᠬᠢᠭᠰᠠᠨ ᠪᠠᠳᠠᠷᠠᠩᠭᠤᠢ ᠴᠠᠭᠠᠨ ᠰᠦᠯᠳᠡ ᠲᠡᠭᠷᠢ ᠡᠴᠢᠭᠡ ᠳ᠋ᠦ᠍ᠷ ᠢ᠋ᠶ᠋ᠡᠨ ᠮᠥᠷᠭᠥᠵᠦ᠂ ᠰᠠᠶᠢ ᠡᠮᠦᠨᠡ ᠪᠦᠬᠦᠢ ᠰᠢᠷᠡᠭᠡᠨ ᠳ᠋ᠦ᠍ᠷ ᠳᠥᠷᠪᠡᠨ ᠶᠡᠬᠡ ᠲᠥᠰᠢᠶᠡ ᠬᠦᠯᠦᠭ ᠰᠠᠢᠳ ᠮᠤᠬᠤᠯᠢ᠂ ᠪᠤᠭᠤᠷᠵᠢ᠂ ᠪᠤᠭᠤᠷᠤᠯ᠂ ᠴᠢᠯᠠᠭᠤᠨ ᠢ᠋ ᠳᠥᠰᠢᠨ ᠭᠠᠷᠴᠤ᠂ ᠱᠧᠩ ᠡᠦ ᠬᠤᠸᠠᠩᠳᠢ ᠬᠠᠭᠠᠨ ᠢ᠋ᠶ᠋ᠠᠨ ᠰᠠᠭᠤᠪᠠᠢ᠃ ᠵᠠᠭᠤᠨ ᠲᠦᠰᠢᠮᠡᠳ 《ᠲᠦᠮᠡᠨ ᠨᠠᠰᠤᠲᠤ᠂ ᠲᠦᠮᠡᠨ ᠨᠠᠰᠤᠲᠤ᠂ ᠲᠦᠮᠡᠨ ᠲᠦᠮᠡᠨ ᠨᠠᠰᠤᠲᠤ 》ᠭᠡᠮᠡᠨ ᠳᠠᠭᠤᠳᠠᠯᠴᠠᠨ᠂ ᠭᠤᠷᠪᠠᠨ ᠵᠡᠷᠭᠡ ᠰᠥᠭᠥᠳᠴᠦ᠂ ᠶᠢᠰᠦᠨ ᠵᠡᠷᠭᠡ ᠮᠥᠷᠭᠥᠵᠦ᠂ ᠳᠠᠩ ᠤᠯᠤᠰ ᠤ᠋ᠨ ᠬᠠᠤᠯᠢ ᠪᠠ ᠯᠢᠶᠣᠣ ᠤᠯᠤᠰ ᠤ᠋ᠨ ᠳᠦᠷᠢᠮ ᠡᠴᠡ ᠰᠣᠩᠭᠣᠨ ᠰᠢᠯᠭᠠᠵᠤ᠂ ᠲᠥᠷᠥ ᠶ᠋ᠢᠨ ᠶᠣᠰᠣᠯᠠᠯ ᠲᠥᠪ ᠢ᠋ ᠲᠣᠭᠲᠠᠭᠠᠯᠭᠠᠨ᠂ ᠵᠠᠷᠯᠢᠭ ᠪᠠᠭᠤᠯᠭᠠᠵᠤ :
《ᠤᠭ ᠤ᠋ᠨ ᠪᠸᠲ᠋ᠠ᠋ ᠤᠯᠤᠰ ᠬᠡᠮᠡᠭᠴᠢ ᠡᠷᠲᠡᠨ ᠦ᠌ ᠤᠮᠠᠷᠠ ᠡᠯᠡᠰᠦᠨ ᠦ᠌ ᠪᠠᠭᠠ ᠤᠯᠤᠰ ᠤ᠋ᠨ ᠨᠡᠷᠡ ᠪᠤᠶᠤ᠃ ᠡᠳᠦᠭᠡ ᠳᠠᠯᠠᠨ ᠲᠠᠪᠤᠨ ᠡᠠᠢᠮᠠᠭ ᠤ᠋ᠳ ᠨᠢᠭᠡᠨᠡ ᠨᠡᠢᠯᠡᠵᠦ᠂ ᠶᠡᠬᠡ ᠤᠯᠤᠰ ᠪᠣᠯᠤᠭᠰᠠᠨ ᠲᠤᠯᠠ ᠮᠥᠨ ᠨᠢᠭᠡᠨ ᠣᠯᠠᠨ ᠤ᠋ ᠭᠡᠷᠡᠴᠢ ᠲᠡᠮᠳᠡᠭ ᠪᠣᠯᠭᠠᠨ ᠨᠢᠭᠡᠨ ᠶᠡᠬᠡ ᠤᠯᠤᠰ ᠤ᠋ᠨ ᠨᠡᠷᠡ ᠪᠠᠢᠭᠤᠯᠪᠠᠰᠤ ᠵᠣᠬᠢᠮᠤᠢ᠃ ᠵᠢᠴᠢ ᠪᠠᠰᠠ ᠡᠷᠲᠡᠨ ᠦ᠌ ᠳᠠᠩ ᠬᠢᠭᠡᠳ ᠬᠣᠵᠢᠮ ᠤ᠋ᠨ ᠯᠢᠶᠣᠣ ᠳ᠋ᠤᠷ ᠴᠥᠮ ᠢ᠋ᠶ᠋ᠡᠷ ᠣᠨ ᠤ᠋ ᠴᠣᠯᠠ ᠪᠣᠢ ᠲᠤᠯᠠ᠂ ᠡᠨᠡ ᠣᠨ ᠢ᠋ ᠮᠥᠨ ᠨᠢᠭᠡᠨ ᠲᠡᠮᠳᠡᠭ ᠪᠣᠯᠭᠠᠨ ᠨᠡᠷᠡ ᠨᠡᠷᠡᠯᠡᠭᠲᠦᠨ 》ᠬᠡᠮᠡᠭᠰᠡᠨᠡ᠂ ᠤᠯᠤᠰ ᠤ᠋ᠨ ᠲᠠᠪᠤᠨ ᠲᠠᠢᠰᠢ᠂ ᠳᠥᠷᠪᠡᠨ ᠲᠠᠢᠪᠤᠤ᠂ ᠵᠢᠷᠭᠤᠭᠠᠨ ᠰᠠᠢᠳ᠂ ᠶᠢᠰᠦᠨ ᠴᠢᠩ ᠦ᠋ᠳ ᠪᠦᠭᠦᠳᠡᠭᠡᠷ ᠵᠥᠪᠯᠡᠯᠳᠦᠵᠦ᠂ ᠨᠠᠭᠠᠴᠤ ᠨᠣᠶᠠᠨ ᠳ᠋ᠠᠢ ᠰᠡᠴᠡᠨ᠂ ᠲᠡᠷᠢᠭᠦᠯᠡᠭᠰᠡᠨ ᠲᠦᠰᠢᠮᠡᠯ ᠰᠤᠷᠬᠠᠨ ᠰᠢᠷᠠ᠂ ᠴᠡᠷᠢᠭ ᠦ᠋ᠨ ᠶᠡᠬᠡ ᠵᠢᠨᠦᠩ ᠮᠤᠬᠤᠯᠢ᠂ ᠲᠥᠷᠥ ᠶ᠋ᠢᠨ ᠶᠡᠬᠡ ᠵᠠᠩᠵᠤᠨ ᠪᠤᠭᠤᠷᠵᠢ ᠳᠥᠷᠪᠡᠭᠦᠯᠡ ᠤᠷᠤᠭᠰᠢ ᠲᠡᠪᠰᠢᠨ ᠰᠥᠭᠥᠳᠴᠦ᠂ ᠤᠯᠤᠰ ᠤ᠋ᠨ ᠨᠡᠷᠡ᠂ ᠣᠨ ᠤ᠋ ᠴᠣᠯᠠ ᠶ᠋ᠢ ᠵᠥᠪᠳᠡᠨ ᠠᠢᠯᠠᠳᠬᠠᠭᠰᠠᠨ ᠨᠤᠭᠤᠯᠪᠤᠷᠢ ᠠᠨᠤ ᠰᠠᠶᠢ ᠯᠤᠤ ᠶ᠋ᠢᠨ ᠰᠢᠷᠡᠭᠡᠨᠡ ᠳᠠᠪᠰᠢᠲᠠᠯᠠ᠂ ᠬᠠᠭᠠᠨ ᠦᠷᠭᠦᠭᠡᠨ ᠤ ᠳᠡᠭᠡᠳᠦ ᠡᠷᠦᠬᠡ ᠶ᠋ᠢᠨ ᠲᠣᠭᠣᠨᠣ ᠶ᠋ᠢᠨ ᠴᠣᠭᠣᠷᠤᠬᠠᠢ ᠪᠠᠷ ᠬᠡᠢᠪᠡᠩ ᠪᠣᠯᠣᠷ ᠤ᠋ᠨ ᠰᠦᠨ ᠲᠠᠷᠠᠭ ᠮᠡᠲᠦ ᠴᠠᠢᠪᠤᠷ ᠭᠡᠭᠡᠨ ᠴᠠᠷᠠ ᠶ᠋ᠢᠨ ᠴᠢᠨᠡᠭᠡᠨ ᠪᠦᠳᠦᠭᠦᠨ ᠴᠠᠭᠠᠨ ᠭᠡᠷᠡᠯ ᠳᠣᠷᠣᠭᠰᠢ ᠠᠯᠭᠤᠷ ᠠᠭᠠᠵᠢᠮ ᠨᠠᠮ ᠳᠥᠯᠭᠡᠨ ᠢ᠋ᠶ᠋ᠡᠷ ᠲᠤᠩᠬᠤ ᠳᠤᠰᠤᠯᠠᠬᠤ ᠠᠳᠠᠯᠢ᠂ ᠤᠯᠠᠷᠢᠬᠤ ᠰᠢᠭ᠋᠂ ᠰᠣᠩᠬᠤ ᠶᠠᠩᠵᠤ ᠪᠠᠷ ᠲᠠᠢᠽᠦ ᠶ᠋ᠢᠨ ᠲᠤᠰ ᠡᠮᠦᠨᠡ ᠲᠤᠨᠤᠷᠠᠨ ᠪᠠᠭᠤᠵᠤ ᠢᠷᠡᠬᠦᠶᠡ᠂ ᠬᠠᠮᠤᠭ ᠤ᠋ᠨ ᠳᠣᠣᠷᠠᠲᠤ ᠦᠵᠦᠭᠦᠷᠡ᠂ ᠮᠥᠩᠭᠥᠨ ᠤᠰᠤ ᠮᠡᠲᠦ ᠭᠢᠯᠪᠠᠯᠤᠨ ᠮᠡᠯᠮᠡᠯᠵᠡᠬᠦ ᠬᠡᠪ ᠭᠡᠭᠡᠨ ᠲᠥᠭᠥᠷᠢᠭ ᠪᠥᠮᠪᠥᠯᠢᠭ ᠭᠡᠷᠡᠯ ᠦ᠋ᠨ ᠳᠣᠲᠣᠷᠠ ᠨᠢᠭᠡᠨ ᠪᠣᠯᠣᠷ ᠤ᠋ᠨ ᠠᠶᠠᠭᠠ ᠳᠦᠭᠦᠷᠡᠩ᠂ ᠠᠰᠬᠠᠮᠠ ᠣᠪᠣᠭᠠᠯᠠᠨ ᠮᠡᠯᠮᠡᠯᠵᠡᠬᠦ ᠲᠣᠪ ᠲᠤᠩᠭᠠᠯᠠᠭ᠂ ᠬᠡᠪ ᠭᠡᠭᠡᠨ ᠠᠷᠢᠭᠤᠨ ᠤᠰᠤ ᠲᠠᠢ ᠪᠠᠭᠤᠵᠤ ᠢᠷᠡᠭᠡᠳ᠂ ᠲᠠᠢᠽᠦ ᠶ᠋ᠢᠨ ᠡᠮᠦᠨᠡᠬᠢ ᠬᠠᠰ ᠢ᠋ᠶ᠋ᠠᠷ ᠰᠡᠢᠯᠦᠭᠰᠡᠨ ᠯᠤᠤ ᠶ᠋ᠢᠨ ᠰᠢᠷᠡᠭᠡᠨ ᠦ᠌ ᠳᠡᠭᠡᠷᠡ ᠬᠦᠷᠦᠮᠡᠷ ᠪᠣᠯᠤᠭᠠᠳ ᠬᠦᠷᠬᠦ ᠦᠭᠡᠢ᠂ ᠰᠢᠷᠡᠬᠡᠨᠡ ᠳᠤᠰᠤᠮᠠᠷ ᠪᠣᠯᠤᠭᠠᠳ ᠲᠤᠰᠬᠤ ᠦᠭᠡᠢ᠂ ᠳᠡᠭᠡᠭᠰᠢ ᠳᠡᠭᠳᠡᠵᠦ᠂ ᠪᠠᠰᠠ ᠥᠨᠳᠥᠷ ᠳᠡᠭᠳᠡᠬᠦ ᠦᠭᠡᠢ᠂ ᠲᠠᠢᠽᠦ ᠶ᠋ᠢᠨ ᠨᠢᠭᠤᠷ ᠤ᠋ᠨ ᠡᠮᠦᠨᠡ ᠳᠡᠭᠡᠭᠰᠢ ᠠᠲᠤᠷᠢᠰᠬᠢᠨ᠂ ᠪᠠᠰᠠ ᠳᠣᠷᠣᠭᠰᠢ ᠳᠤᠰᠤᠯᠠᠨ᠂ ᠲᠤᠨᠤᠨ ᠪᠠᠭᠤᠬᠤᠶᠠ᠂ ᠲᠠᠢᠽᠦ ᠭᠠᠢᠬᠠᠨ ᠮᠦᠰᠢᠶᠡᠵᠦ᠂ ᠲᠡᠷᠡ ᠠᠶᠠᠭᠠ ᠠᠨᠤ ᠰᠢᠷᠡᠭᠡᠨᠡ ᠤᠨᠠᠭᠤᠵᠠᠢ ᠭᠡᠮᠡᠨ ᠬᠣᠶᠠᠷ ᠮᠣᠳᠣᠷ ᠢ᠋ᠶ᠋ᠠᠷ ᠲᠣᠭᠣᠷᠢᠭᠤᠯᠤᠨ ᠲᠤᠰᠤᠭᠰᠠᠨ ᠠᠪᠠᠰᠤ᠂ ᠲᠡᠷᠡ ᠪᠣᠯᠣᠷ ᠬᠠᠰᠯᠢᠭ ᠠᠶᠠᠭᠠᠲᠤ ᠣᠪᠣᠭᠠᠯᠠᠨ ᠮᠡᠯᠮᠡᠯᠵᠡᠬᠦ ᠠᠷᠢᠭᠤᠨ ᠤᠰᠤ ᠲᠠᠢ ᠪᠠᠷ ᠲᠠᠢᠽᠦ ᠶ᠋ᠢᠨ ᠬᠣᠶᠠᠷ ᠮᠣᠳᠣᠷᠠ ᠬᠥᠪ ᠭᠡᠲᠡᠯᠡ ᠲᠣᠰᠤᠭᠠᠳ᠂ ᠴᠠᠭᠠᠨ ᠭᠡᠷᠡᠯ ᠳᠡᠭᠡᠭᠰᠢ ᠲᠠᠲᠠᠵᠤ ᠡᠴᠢᠬᠦᠶᠡ᠂ ᠲᠡᠷᠡ ᠠᠶᠠᠭᠠᠲᠤ ᠠᠷᠢᠭᠤᠨ ᠤᠰᠤ ᠶ᠋ᠢ ᠳᠡᠭᠡᠭᠰᠢ ᠲᠠᠲᠠᠵᠤ ᠠᠯᠭᠤᠷ ᠢ᠋ᠶ᠋ᠠᠷ ᠬᠤᠷᠢᠶᠠᠬᠤ ᠴᠠᠭᠠᠨ ᠭᠡᠷᠡᠯ ᠦ᠋ᠨ ᠳᠣᠣᠷᠠ ᠦᠵᠦᠭᠦᠷᠡ ᠠᠪᠠᠴᠢᠵᠤ ᠨᠠᠭᠠᠯᠳᠤᠭᠤᠯᠤᠨ ᠪᠠᠷᠢᠪᠠᠰᠤ᠂ ᠨᠢᠭᠡᠨᠲᠡ ᠨᠠᠭᠠᠯᠳᠤᠨ ᠳᠡᠭᠳᠡᠬᠦ ᠦᠭᠡᠢ ᠪᠣᠯᠤᠭᠰᠠᠨ ᠤ᠋ ᠲᠤᠯᠠᠳᠠ᠂ ᠲᠠᠢᠽᠦ ᠲᠣᠪ ᠲᠣᠳᠤᠷᠬᠠᠶᠠ ᠪᠡᠶᠡ ᠳ᠋ᠦ᠍ᠷ ᠪᠠᠭᠤᠵᠤ ᠢᠷᠡᠭᠰᠡᠨ ᠢ᠋ ᠮᠡᠳᠡᠵᠦ᠂ ᠬᠣᠣᠰ ᠮᠣᠳᠣᠷ ᠢ᠋ᠶ᠋ᠠᠷ ᠪᠠᠷᠢᠵᠤ᠂ ᠣᠪᠣᠭᠠᠯᠠᠨ ᠪᠢᠯᠬᠠᠯᠠᠨ ᠢᠯᠪᠠᠯᠵᠠᠨ ᠮᠡᠯᠮᠡᠯᠵᠡᠬᠦ ᠶ᠋ᠢ ᠠᠯᠲᠠᠨ ᠴᠥᠭᠥᠴᠡ ᠳ᠋ᠦ᠍ᠷ ᠠᠯᠭᠤᠷ ᠢ᠋ᠶ᠋ᠠᠷ ᠳᠤᠰᠤᠭᠠᠨ ᠨᠢᠵᠡᠭᠡᠳ ᠣᠭᠣᠴᠢ ᠬᠢᠭᠰᠡᠨᠡ ᠪᠣᠯᠣᠷ ᠠᠶᠠᠭᠠ ᠰᠠᠶᠢ ᠳᠡᠭᠡᠭᠰᠢ ᠪᠣᠯᠤᠭᠰᠠᠨᠠ᠂ ᠲᠡᠷᠡ ᠭᠡᠭᠡᠨ ᠲᠤᠩᠭᠠᠯᠠᠭ ᠠᠷᠢᠭᠤᠨ ᠰᠠᠢᠬᠠᠨ ᠲᠡᠭᠷᠢ ᠶ᠋ᠢᠨ ᠷᠠᠰᠢᠶᠠᠨ ᠤ᠋ ᠳᠡᠭᠡᠵᠢ ᠶ᠋ᠢ ᠰᠦᠯᠳᠡ ᠲᠡᠭᠷᠢ ᠶ᠋ᠢᠨ ᠬᠥᠷᠥᠭ ᠪᠠ ᠰᠦᠯᠳᠡ ᠲᠤᠭ ᠤ᠋ᠨ ᠳᠡᠭᠡᠷᠡ ᠲᠣᠭᠣᠰ ᠰᠢᠪᠠᠭᠤᠨ ᠤ᠋ ᠥᠳᠥ ᠰᠣᠳᠣ ᠪᠠᠷ ᠥᠰᠥᠷᠬᠡᠨ ᠲᠥᠰᠦᠷᠭᠡᠵᠦ ᠴᠠᠪᠳᠠᠭᠠᠳ᠂ ᠦᠯᠡᠭᠰᠡᠨ ᠢ᠋ ᠡᠬᠡ ᠲᠠᠢᠬᠡᠦ ᠳ᠋ᠦ᠍ᠷ ᠪᠠᠷᠢᠬᠤᠢ ᠶ᠋ᠢ ᠪᠡᠯᠡᠳᠬᠡᠨ᠂ ᠰᠠᠶᠢ ᠪᠣᠯᠣᠷ ᠠᠶᠠᠭᠠ ᠶ᠋ᠢᠨ ᠤᠰᠤ ᠤᠮᠳᠠ ᠶ᠋ᠢ ᠣᠭᠣᠴᠢᠵᠤ ᠦᠵᠡᠨ ᠠᠮᠲᠠᠯᠠᠨ ᠠᠮᠰᠠᠪᠠᠰᠤ᠂ ᠠᠮᠲᠠᠲᠠᠢᠬᠠᠨ ᠪᠥᠭᠡᠳ ᠠᠩᠬᠢᠯᠤᠮᠠᠯ ᠥᠳᠭᠡᠯᠢᠭ ᠪᠥᠭᠡᠳ ᠲᠤᠩᠭᠠᠯᠠᠭ᠂ ᠠᠷᠠᠵᠠ ᠬᠣᠣᠷᠠᠵᠠ᠂ ᠠᠷᠢᠬᠢ ᠳᠡᠷᠡᠰᠦᠨ ᠯᠤᠭᠠ ᠣᠭᠲᠣᠬᠠᠨ ᠴᠤ᠌ ᠠᠳᠠᠯᠢ ᠦᠭᠡᠢ᠂ ᠠᠮᠠᠨ ᠳ᠋ᠤᠷ ᠣᠷᠣᠮᠠᠭᠴᠠ ᠰᠡᠩᠭᠢᠨᠡᠨ ᠠᠮᠠᠷᠠᠵᠤ᠂ ᠵᠠᠯᠭᠢᠮᠠᠭᠴᠠ ᠬᠣᠳᠣᠭᠣᠳᠣᠨ ᠳ᠋ᠤᠷ ᠲᠤᠩᠭᠠᠯᠠᠭ ᠪᠣᠯᠤᠮᠤᠢ᠃ ᠠᠳᠠᠯᠢᠳᠬᠠᠨ ᠬᠡᠯᠡᠬᠦ ᠠᠮᠲᠠᠲᠠᠨ ᠦᠭᠡᠢ᠂ ᠠᠷᠭᠠᠴᠠᠰᠬᠢᠨ ᠬᠤᠰᠤᠵᠤ ᠬᠤᠷᠢᠶᠠᠭᠰᠠᠨ᠂ ᠱᠠᠪᠲᠠᠯᠠ ᠵᠢᠮᠢᠰ ᠦ᠋ᠨ ᠰᠢᠭᠦᠳᠡᠷᠢ ᠬᠢᠷᠠᠭᠤ ᠶ᠋ᠢᠨ ᠴᠡᠪᠡᠷ ᠰᠡᠷᠢᠭᠦᠨ ᠠᠮᠲᠠᠲᠠᠢ᠃ ᠠᠯᠢᠪᠠ ᠨᠣᠶᠠᠳ ᠲᠦᠰᠢᠮᠡᠳ ᠠᠯᠲᠠᠨ ᠲᠥᠷᠥ ᠳ᠋ᠦ᠍ᠷ ᠲᠥᠪ ᠳᠦᠭᠦᠷᠡᠩ ᠪᠥᠬᠥᠶᠡ ᠪᠠᠭᠤᠵᠤ ᠢᠷᠡᠭᠰᠡᠨ ᠦ᠌ ᠲᠤᠯᠠᠳᠠ᠂ ᠠᠯᠢᠪᠠ ᠪᠦᠭᠦᠳᠡᠭᠡᠷ ᠠᠮᠠᠨ ᠢ᠋ᠶ᠋ᠠᠨ ᠪᠠᠷᠢᠨ᠂ ᠠᠭᠠᠰᠢ ᠪᠠᠨ ᠠᠯᠳᠠᠲᠠᠯᠠ ᠭᠠᠢᠬᠠᠯᠳᠤᠨ ᠪᠢᠰᠢᠷᠡᠯᠴᠡᠵᠦ ᠰᠢᠲᠦᠨ ᠰᠦᠰᠦᠭᠯᠡᠯᠴᠡᠵᠦ᠂ ᠬᠠᠰᠠᠷ ᠪᠡᠯᠭᠦᠳᠡᠢ ᠬᠠᠵᠠᠭᠤᠳᠠ ᠣᠢᠷᠠ ᠪᠠᠢᠭᠰᠠᠨ ᠢ᠋ᠶ᠋ᠠᠷ ᠬᠠᠰᠠᠷ ᠤ᠋ᠨ ᠬᠠᠪᠠᠷ ᠲᠤᠷ ᠲᠤᠩᠭᠠᠯᠠᠭ ᠠᠩᠬᠢᠯᠤᠮᠠᠯ ᠰᠡᠷᠢᠭᠦᠨ ᠲᠠᠭᠠᠯᠠᠮᠵᠢᠲᠤ ᠰᠠᠢᠬᠠᠨ ᠦᠨᠦᠷ ᠦᠨᠦᠷᠲᠦᠭᠰᠡᠨᠡ᠂ ᠮᠥᠷᠭᠥᠵᠦ ᠠᠢᠯᠠᠳᠬᠠᠷᠤᠨ᠄
ᠬᠣᠷᠸᠠ ᠣᠷᠴᠢᠯᠠᠩ ᠪᠦᠲᠦᠭᠰᠡᠨ ᠡᠴᠡ ᠢᠨᠠᠷᠤ ᠲᠡᠭᠷᠢ ᠶ᠋ᠢᠨ ᠷᠠᠰᠢᠶᠠᠨ ᠢ᠋ ᠬᠡᠨ ᠣᠯᠵᠤ ᠦᠵᠡᠯᠦᠭᠡ
ᠬᠣᠲᠠᠯᠠ ᠳᠡᠯᠡᠬᠡᠢ ᠬᠤᠷᠠᠨ ᠴᠣᠭᠴᠠᠯᠠᠭᠰᠠᠭᠠᠷ ᠬᠤᠷᠮᠤᠰᠲᠠ ᠶ᠋ᠢᠨ ᠤᠮᠳᠠᠨ ᠢ᠋ ᠬᠡᠨ ᠣᠯᠵᠤ ᠠᠮᠰᠠᠪᠠᠢ ᠢ᠋ᠠ᠃
ᠬᠤᠷᠤᠮᠬᠠᠨᠠ ᠲᠡᠳᠦᠢ ᠮᠥᠬᠥᠯᠢᠭ ᠦ᠋ᠨ ᠴᠢᠨᠡᠭᠡᠨ ᠥᠴᠦᠬᠡᠨ ᠳᠤᠰᠤᠯᠭᠠᠵᠤ ᠬᠦᠷᠲᠡᠭᠡᠷᠡᠢ
ᠬᠣᠣᠰ ᠦᠭᠡᠢ ᠳᠡᠭᠷᠢᠯᠢᠭ ᠡᠵᠡᠨ ᠢ᠋ ᠳᠠᠭᠠᠵᠤ ᠲᠥᠷᠥᠭᠰᠡᠨ ᠲᠡᠢᠨ ᠰᠢᠯᠲᠠᠭᠠᠨ ᠤ᠋ ᠲᠡᠮᠳᠡᠭ ᠪᠤᠰᠤ ᠤᠤ ?
ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠱᠧᠩ ᠡᠤ ᠬᠤᠸᠠᠩᠳᠢ ᠲᠠᠢᠽᠦ ᠬᠠᠭᠠᠨ ᠮᠥᠨ ᠭᠡᠮᠡᠨ ᠵᠥᠪᠰᠢᠶᠡᠵᠦ᠂ ᠲᠡᠷᠡ ᠦᠶᠡ ᠳ᠋ᠦ᠍ᠷ ᠲᠡᠷᠡ ᠷᠠᠰᠢᠶᠠᠨ ᠤᠮᠳᠠᠨ ᠢ᠋ ᠵᠣᠭᠣᠭᠯᠠᠭᠰᠠᠭᠠᠷ ᠪᠣᠯᠣᠷ ᠠᠶᠠᠭᠠ ᠶ᠋ᠢᠨ ᠢᠷᠤᠭᠠᠷᠠ ᠠᠷᠪᠠᠨ ᠬᠤᠪᠢ ᠶ᠋ᠢᠨ ᠬᠣᠶᠠᠷ ᠬᠤᠪᠢ ᠦᠯᠡᠭᠰᠡᠨ ᠢ᠋ ᠬᠠᠰᠯᠢᠭ ᠪᠣᠯᠣᠷ ᠠᠶᠠᠭᠠ ᠲᠠᠢ ᠪᠠᠷ ᠬᠠᠰᠠᠷ ᠤ᠋ᠨ ᠭᠠᠷ ᠲᠤᠷ ᠥᠭᠴᠦ ᠬᠠᠷᠰᠢ ᠲᠥᠷᠥ ᠬᠠᠭᠠᠨ ᠥᠷᠭᠥᠭᠡ ᠳ᠋ᠦ᠍ᠷ ᠪᠦᠬᠦᠢ ᠬᠠᠮᠤᠭ ᠡᠷᠬᠡᠲᠡᠨ᠂ ᠳᠥᠷᠪᠡᠨ ᠳᠥᠷᠪᠡ᠂ ᠬᠣᠶᠠᠷ ᠲᠠᠪᠤᠨ ᠤ᠋ ᠨᠣᠶᠠᠳ ᠲᠦᠰᠢᠮᠡᠳ ᠦ᠋ᠨ ᠭᠠᠷ ᠤ᠋ᠨ ᠠᠯᠠᠭᠠ ᠪᠦᠬᠦᠨᠡ ᠪᠦᠷᠢᠳᠬᠡᠨ ᠲᠦᠭᠡᠭᠡᠵᠦ ᠭᠦᠢᠴᠡᠳᠬᠡᠭᠡᠳ᠂ ᠦᠯᠡᠭᠰᠡᠨ ᠢ᠋ ᠥᠪᠡᠷᠦᠨ ᠠᠯᠠᠭᠠᠨ ᠤ᠋ ᠬᠣᠲᠣᠭᠣᠷ ᠳᠦᠭᠦᠷᠡᠩ ᠬᠦᠨᠳᠡᠷᠴᠦ ᠨᠢᠭᠡᠨ ᠣᠭᠣᠴᠢ ᠬᠤᠷᠴᠢᠭᠢᠨᠠᠲᠠᠯᠠ ᠣᠭᠣᠴᠢᠭᠠᠳ᠂ ᠵᠠᠯᠭᠢᠪᠠᠰᠤ ᠠᠮᠠᠨ ᠳ᠋ᠤᠷ ᠬᠡᠳᠦᠢᠪᠡᠷ ᠠᠮᠲᠠᠲᠠᠢᠬᠠᠨ ᠠᠩᠬᠢᠯᠤᠮᠠᠯ ᠮᠡᠲᠦ ᠪᠣᠯᠪᠠᠴᠤ᠂ ᠵᠠᠯᠭᠢᠭᠠᠳ ᠴᠢᠨᠠᠭᠰᠢ ᠬᠣᠭᠣᠯᠠᠢ ᠳ᠋ᠤᠷ ᠡᠰᠡ ᠣᠷᠣᠪᠠᠢ᠃ ᠦᠯᠦᠭ《ᠬᠥᠬᠡ ᠰᠣᠳᠣᠷᠠ 》ᠡᠨᠡ ᠨᠢᠭᠡᠨ ᠬᠡᠰᠡᠭ ᠢ᠋ ᠬᠠᠰᠠᠷ ᠬᠠᠨ ᠢ᠋ᠶ᠋ᠠᠷ ᠬᠠᠪᠠᠷ ᠲᠤᠷ ᠲᠡᠭᠷᠢ ᠶ᠋ᠢᠨ ᠷᠠᠰᠢᠶᠠᠨ ᠤ᠋ ᠠᠩᠬᠢᠯᠤᠮᠠᠯ ᠦᠨᠦᠷ ᠢ᠋ ᠦᠨᠦᠰᠴᠦ ᠠᠮᠠᠨ ᠳ᠋ᠤᠷ ᠠᠮᠲᠠᠲᠠᠢᠬᠠᠨ ᠠᠮᠲᠠ ᠶ᠋ᠢ ᠪᠠᠬᠠᠨ ᠤᠬᠠᠭᠰᠠᠨ ᠢ᠋ᠶ᠋ᠠᠷ ᠠᠴᠢ ᠦᠷᠡ ᠠᠷᠪᠢᠨ ᠳᠡᠯᠭᠡᠷᠡᠵᠦ ᠪᠠᠷᠠᠭᠤᠨ ᠵᠡᠭᠦᠨ ᠨᠡᠢᠲᠡ ᠠᠷᠪᠠᠨ ᠠᠢᠮᠠᠭ ᠤ᠋ᠨ ᠮᠤᠬᠤᠷ ᠳᠥᠴᠢᠨ ᠬᠣᠰᠢᠭᠤ ᠪᠣᠯᠪᠠ ᠬᠡᠮᠡᠵᠦᠬᠦᠢ᠃
ᠲᠡᠨᠳᠡᠴᠡ ᠬᠠᠰᠠᠷ ᠤ᠋ᠨ ᠠᠮᠠᠨ ᠳ᠋ᠤᠷ ᠣᠷᠣᠭᠠᠳ᠂ ᠴᠢᠨᠠᠭᠰᠢ ᠬᠣᠭᠣᠯᠠᠢ ᠳ᠋ᠤᠷ ᠡᠰᠡ ᠣᠷᠣᠭᠰᠠᠨᠠ ᠶᠡᠬᠡᠯᠡ ᠭᠠᠢᠬᠠᠵᠤ᠂ ᠷᠠᠰᠢᠶᠠᠨ ᠠᠮᠰᠠᠭᠰᠠᠨ ᠣᠯᠠᠨ ᠨᠣᠶᠠᠳ ᠲᠦᠰᠢᠮᠡᠨ ᠢ᠋ ᠦᠵᠡᠪᠡᠰᠦ᠂ ᠣᠯᠠᠨ ᠢ᠋ᠶ᠋ᠠᠷ ᠭᠠᠢᠬᠠᠯᠳᠤᠨ ᠰᠣᠨᠢᠷᠬᠠᠬᠤ ᠳᠦᠷᠢ ᠪᠦᠬᠦᠢ ᠳ᠋ᠦ᠍ᠷ ᠨᠣᠶᠠᠳ ᠠ᠋ᠴᠠ ᠪᠦᠬᠦ ᠪᠡᠯᠭᠦᠳᠡᠢ᠂ ᠲᠦᠰᠢᠮᠡᠯ ᠡᠴᠡ ᠬᠦᠯᠦᠭ ᠪᠤᠷᠤᠭᠤᠵᠢ ᠬᠣᠶᠠᠭᠤᠯᠠ ᠴᠥᠮ ᠴᠤᠯᠭᠤᠢ ᠴᠢᠬᠡᠴᠢ ᠲᠤᠯᠠ᠂ ᠬᠠᠷᠢᠯᠴᠠᠨ ᠦᠭᠦᠯᠡᠯᠳᠦᠷᠦᠨ :
《ᠲᠡᠭᠷᠢ ᠶ᠋ᠢᠨ ᠷᠠᠰᠢᠶᠠᠨ ᠠᠮᠠᠨ ᠳ᠋ᠤᠷ ᠣᠷᠣᠪᠠᠴᠤ᠂ ᠴᠢᠨᠠᠭᠰᠢ ᠬᠣᠭᠣᠯᠠᠢ ᠳ᠋ᠤᠷ ᠡᠰᠡ ᠣᠷᠣᠪᠠᠢ 》ᠬᠡᠮᠡᠭᠰᠡᠨᠡ᠂ ᠣᠯᠠᠨ ᠢ᠋ᠶ᠋ᠠᠷ ᠴᠥᠮ ᠡᠢᠮᠦ ᠳ᠋ᠦ᠍ᠷ ᠬᠠᠷᠠᠬᠠᠨ ᠰᠡᠵᠢᠭᠯᠡᠯᠴᠡᠨ ᠭᠠᠢᠬᠠᠯᠳᠤᠬᠤᠶᠠ᠂ ᠡᠨᠡ ᠬᠣᠶᠠᠷ ᠤ᠋ᠨ ᠡᠢᠨ ᠬᠦ᠌ ᠬᠡᠯᠡᠵᠦ ᠭᠠᠷᠭᠠᠭᠰᠠᠨᠠ ᠪᠦᠭᠦᠳᠡᠭᠡᠷ ᠦᠨᠡᠬᠡᠷ ᠲᠡᠢᠮᠦ ᠬᠡᠮᠡᠬᠦᠢ ᠳ᠋ᠦ᠍ᠷ ᠳᠥᠲᠥᠭᠡᠷ ᠲᠠᠢᠽᠢ ᠲᠣᠯᠢ ᠤᠷᠢᠳᠠ ᠢᠨᠢᠶᠡᠨ ᠳᠠᠭᠠᠯᠳᠤᠭᠠ ᠭᠤᠷᠪᠠᠳᠤᠭᠠᠷ ᠲᠠᠢᠽᠢ ᠥᠭᠡᠳᠡᠢ ᠠᠬᠠ ᠳᠡᠭᠦᠦ ᠬᠣᠶᠠᠭᠤᠯᠠ ᠮᠥᠨ ᠬᠠᠷᠢᠯᠴᠠᠨ ᠦᠭᠦᠯᠡᠯᠳᠦᠷᠦᠨ :
《ᠠᠮᠠᠨᠠ ᠣᠷᠣᠭᠰᠠᠨ ᠪᠥᠭᠡᠲᠡᠯᠡ᠂ ᠴᠢᠨᠠᠭᠰᠢ ᠠᠳᠠᠪᠠᠰᠢ ᠬᠣᠯᠠ ᠠᠵᠢ ! 》ᠭᠡᠮᠡᠨ ᠲᠠᠢᠽᠦ ᠶ᠋ᠢᠨ ᠠᠷᠤ ᠶ᠋ᠢᠨ ᠬᠣᠢᠨᠠ ᠰᠡᠮᠡᠬᠡᠷ ᠬᠡᠯᠡᠯᠴᠡᠨ ᠢᠨᠢᠶᠡᠭᠰᠡᠨ ᠢ ᠲᠠᠢᠽᠦ ᠶ᠋ᠢᠨ ᠰᠣᠨᠣᠷ ᠴᠢᠬᠢᠨᠡ ᠬᠡᠳᠦᠢ ᠠᠢᠯᠠᠳᠤᠨ ᠰᠣᠨᠣᠰᠴᠤ᠂ ᠳᠣᠲᠣᠷᠠ ᠪᠠᠨ ᠰᠠᠨᠠᠵᠤ ᠪᠠᠢᠲᠠᠯᠠ᠂ ᠬᠠᠰᠯᠢᠭ ᠪᠣᠯᠣᠷ ᠠᠶᠠᠭᠠ ᠶ᠋ᠢ ᠬᠠᠨᠴᠤᠢ ᠪᠠᠷ ᠬᠢᠴᠢᠶᠡᠨ ᠠᠷᠴᠢᠵᠤ᠂ ᠠᠯᠠᠭᠠ ᠳ᠋ᠤᠷ ᠳᠠᠬᠢᠨ ᠳᠠᠬᠢᠨ ᠰᠢᠪᠬᠠᠷᠠᠨ᠂ ᠬᠣᠭᠣᠰᠣᠨ ᠠᠶᠠᠭᠠ ᠶ᠋ᠢ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠬᠢᠴᠢᠶᠡᠩᠭᠦᠢᠯᠡᠨ ᠬᠠᠷᠢᠭᠤ ᠡᠷᠭᠦᠨ ᠪᠠᠷᠢᠭᠠᠳ᠂ ᠲᠠᠢᠽᠦ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠲᠣᠰᠴᠤ ᠠᠪᠤᠮᠠᠭᠴᠠ᠂ ᠠᠶᠠᠭᠠ ᠶ᠋ᠢᠨ ᠳᠣᠲᠣᠷᠠ ᠪᠠᠰᠠ ᠮᠡᠯᠮᠡᠯᠵᠡᠨ ᠲᠡᠪᠡᠯᠬᠢᠯᠡᠨ ᠠᠩᠬᠠᠨ ᠤ᠋ ᠬᠠᠰᠠᠷ ᠤ᠋ᠨ ᠭᠠᠷ ᠲᠤᠷ ᠥᠭᠭᠦᠭᠰᠡᠨ ᠦᠶᠡ ᠶ᠋ᠢᠨ ᠬᠢᠷᠢ ᠲᠡᠢ ᠬᠣᠶᠠᠷ ᠬᠤᠪᠢ ᠶ᠋ᠢᠨ ᠷᠠᠰᠢᠶᠠᠨ ᠬᠣᠷᠣᠭᠳᠠᠭᠰᠠᠨ ᠦᠭᠡᠢ ᠤᠷᠭᠤᠨ ᠭᠠᠷᠴᠤ ᠢᠷᠡᠭᠡᠳ᠂ ᠲᠠᠢᠽᠦ ᠨᠡᠩ ᠰᠣᠨᠢᠷᠬᠠᠨ ᠠᠮᠠ ᠭᠦᠷᠦᠨ ᠦᠵᠡᠪᠡᠰᠦ ᠤᠭ ᠠᠮᠲᠠ ᠠ᠋ᠴᠠ ᠥᠴᠦᠬᠡᠨ ᠴᠦ᠍ ᠬᠤᠪᠢᠯᠤᠭᠰᠠᠨ ᠦᠭᠡᠢ᠃
ᠲᠡᠳᠦᠢ ᠬᠠᠰᠠᠷ ᠪᠡᠯᠭᠦᠳᠡᠢ ᠬᠣᠶᠠᠷ ᠤ᠋ᠨ ᠭᠠᠷᠤᠨ ᠠᠯᠠᠭᠠᠨᠠ ᠪᠠᠰᠠ ᠳᠦᠭᠦᠷᠲᠡᠯᠡ ᠬᠢᠵᠦ ᠥᠭᠬᠦ ᠪᠥᠭᠡᠳ ᠬᠠᠰᠠᠷ ᠤ᠋ᠨ ᠬᠠᠪᠤ᠂ ᠪᠡᠯᠭᠦᠳᠡᠢ ᠶ᠋ᠢᠨ ᠪᠦᠬᠦ ᠪᠡᠷ ᠬᠠᠷᠠᠳᠠᠨ ᠳᠠᠢᠰᠤᠨ ᠢ᠋ ᠳᠠᠷᠤᠨ᠂ ᠪᠡᠷᠬᠡ ᠬᠦᠴᠦᠲᠡᠨ ᠢ᠋ ᠵᠥᠭᠡᠳᠬᠡᠭᠦᠯᠦᠭᠡ ᠭᠡᠮᠡᠨ ᠳᠠᠬᠢᠨ ᠨᠢᠭᠡᠨ ᠤᠳᠠᠭᠠ ᠠᠮᠰᠠᠭᠤᠯᠪᠠᠰᠤ ᠪᠠᠰᠠ ᠬᠦ᠌ ᠤᠷᠢᠳᠠ ᠶ᠋ᠢᠨ ᠠᠳᠠᠯᠢ ᠠᠮᠡᠨᠡ ᠣᠷᠣᠵᠤ ᠬᠣᠭᠣᠯᠠᠢ ᠳ᠋ᠤᠷ ᠡᠰᠡ ᠣᠷᠣᠪᠠᠢ᠃ ᠠᠶᠠᠭᠠᠨ ᠢᠷᠤᠭᠠᠷᠡ ᠪᠠᠰᠠ ᠲᠡᠳᠦᠢ ᠬᠢᠷᠢᠲᠡᠢ ᠪᠣᠢ ᠲᠤᠯᠠ ᠳᠥᠷᠪᠡᠨ ᠬᠥᠪᠡᠭᠦᠨ ᠲᠠᠢᠽᠢ ᠳ᠋ᠤᠷ ᠨᠡᠷᠡ ᠬᠤᠪᠢᠶᠠᠨ ᠠᠮᠰᠠᠭᠤᠯᠪᠠᠰᠤ᠂ ᠺᠠᠷᠣᠳᠢ ᠮᠥᠨ ᠬᠦ᠌ ᠵᠣᠴᠢ ᠴᠠᠭᠠᠲᠠᠢ ᠬᠣᠶᠠᠷ ᠲᠠᠢᠽᠢ ᠶ᠋ᠢᠨ ᠵᠦᠭ ᠨᠢᠰᠦᠨ ᠡᠴᠢᠬᠦᠶᠡ᠂ ᠲᠠᠢᠽᠦ ᠠᠢᠯᠠᠳᠤᠨ ᠦᠵᠡᠵᠦ ᠵᠠᠷᠯᠢᠭ ᠪᠣᠯᠤᠨ ᠰᠠᠢᠰᠢᠶᠠᠷᠤᠨ:
ᠬᠤᠷᠮᠤᠰᠲᠠ ᠶ᠋ᠢᠨ ᠰᠠᠨᠠᠭᠠᠨ ᠢ᠋ ᠬᠤᠪᠢᠯᠭᠠᠨ ᠺᠠᠷᠣᠳᠢ ᠤᠯᠠᠮᠵᠢᠯᠠᠵᠤ
ᠬᠣᠲᠠᠯᠠ ᠤᠯᠤᠰ ᠤ᠋ᠨ ᠬᠤᠷᠠᠭᠰᠠᠨ ᠣᠯᠠᠨ ᠢ᠋ ᠬᠥᠭᠡᠷᠦᠬᠦᠢᠯᠡᠵᠦᠬᠦᠢ᠃
ᠬᠣᠢᠮᠣᠷ ᠲᠠᠭᠠᠨ ᠵᠢᠷᠭᠠᠬᠤ ᠬᠤᠪᠢᠲᠤ ᠲᠡᠮᠦᠵᠢᠨ ᠨᠠᠮᠠᠶ᠋ᠢ
ᠬᠣᠯᠠ ᠠᠭᠯᠠᠭ ᠢ᠋ ᠬᠤᠮᠪᠢᠨ ᠬᠤᠷᠢᠶᠠᠷᠠ ᠭᠠᠷᠭᠠᠮᠤᠢ ᠢ᠋ᠠ᠃
ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠣᠲᠠᠯᠠ ᠨᠣᠶᠠᠳ ᠲᠦᠰᠢᠮᠡᠳ 《ᠲᠦᠮᠡᠨ ᠨᠠᠰᠤᠲᠤ ᠶ᠋ᠢᠨ ᠠᠯᠲᠠᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠠᠯᠢᠪᠠ ᠤᠯᠤᠰ ᠤ᠋ᠳ ᠢ᠋ ᠠᠯᠠᠭᠠᠨ ᠳ᠋ᠤᠷ ᠠᠳᠬᠤᠨ᠂ ᠠᠮᠢᠲᠠᠨ ᠪᠦᠬᠦᠨ ᠢ ᠠᠮᠤᠭᠤᠯᠤᠨ ᠵᠢᠷᠭᠠᠭᠤᠯᠤᠭᠲᠤᠨ 》ᠭᠡᠮᠡᠨ ᠮᠥᠷᠭᠥᠵᠦ᠂ ᠰᠠᠶᠢ ᠮᠠᠨᠳᠤᠬᠤ ᠤᠯᠠᠭᠠᠨ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ᠷ ᠮᠠᠨᠳᠤᠭᠰᠠᠨ ᠲᠥᠷᠥ ᠶ᠋ᠢᠨ ᠮᠠᠭᠠᠳ ᠨᠡᠷᠡ ᠡᠷᠭᠦᠮᠵᠢᠯᠡᠯ ᠦ᠋ᠨ ᠯᠤᠤ ᠶ᠋ᠢᠨ ᠨᠤᠭᠤᠯᠪᠤᠷᠢ ᠶ᠋ᠢ ᠡᠷᠭᠦᠨ ᠳᠠᠭᠤᠳᠠᠭᠰᠠᠨ ᠠᠨᠤ :
ᠬᠥᠬᠡ ᠮᠥᠩᠬᠡ ᠳᠡᠭᠷᠢᠯᠢᠭ ᠬᠠᠭᠠᠨ ᠤ᠋ ᠭᠡᠭᠡᠨ ᠢ᠋ᠶ᠋ᠡᠷ
ᠬᠦᠷᠦᠭᠰᠡᠨ ᠡᠯᠡ ᠭᠠᠵᠠᠷ ᠤ᠋ᠨ ᠬᠠᠮᠤᠭ ᠢ᠋ ᠲᠦᠪᠰᠢᠳᠬᠡᠬᠦᠶᠡ᠂
ᠬᠦᠰᠡᠨ ᠪᠢᠰᠢᠷᠡᠵᠦ ᠥᠪᠡᠷ ᠢ᠋ᠶ᠋ᠡᠨ ᠳᠠᠭᠠᠭᠰᠠᠨ ᠶᠡᠬᠡ ᠬᠠᠭᠠᠰ
ᠬᠦᠴᠦᠨ ᠢ᠋ᠶ᠋ᠡᠷ ᠨᠣᠮᠣᠬᠠᠳᠬᠠᠨ ᠳᠠᠭᠠᠭᠤᠯᠤᠭᠰᠠᠨ ᠪᠠᠭᠠ ᠬᠠᠭᠠᠰ
ᠬᠦᠨᠳᠦ ᠬᠥᠩᠭᠡᠨ ᠨᠡᠢᠲᠡ ᠳᠠᠯᠠᠨ ᠲᠠᠪᠤᠨ ᠠᠢᠮᠠᠭ ᠤ᠋ᠳ ᠢ
ᠬᠥᠪ ᠶᠡᠬᠡ ᠬᠡᠷᠦᠯᠦᠨ ᠮᠥᠷᠡᠨ ᠦ᠌ ᠬᠥᠳᠡᠭᠡ ᠬᠡᠭᠡᠷᠡ ᠳ᠋ᠦ᠍ᠷ
ᠬᠦᠰᠡᠯᠲᠦ ᠤᠨᠤᠨ ᠮᠥᠷᠡᠨ ᠦ᠌ ᠣᠯᠣᠮ ᠤ᠋ᠨ ᠠᠷᠠᠯᠠ᠃
ᠬᠦᠨᠳᠦᠲᠡᠢ ᠮᠤᠩ ᠭᠣᠣᠯ ᠤ᠋ᠨ ᠠᠮᠠᠨᠠ ᠴᠢᠭᠤᠯᠭᠠᠨ ᠨᠡᠢᠯᠡᠭᠦᠯᠵᠦ᠂
ᠬᠦᠢ ᠶᠡᠬᠡ ᠮᠠᠨᠳᠠᠯ ᠪᠠᠯᠭᠠᠳ ᠵᠢᠪᠬᠤᠯᠠᠩᠲᠠᠶᠠ ᠴᠣᠭᠴᠠᠯᠠᠨ
ᠬᠥᠮᠦᠨ ᠪᠦᠬᠦᠨ ᠤ ᠬᠦᠰᠡᠯ ᠳ᠋ᠦ᠍ᠷ ᠭᠥᠷᠥᠭᠦᠯᠦᠨ ᠪᠠᠢᠭᠤᠯᠤᠭᠰᠠᠨ ᠢ᠋ᠶ᠋ᠠᠷ
ᠬᠦᠨᠳᠦᠯᠡᠯᠳᠦ ᠳᠡᠭᠡᠳᠦ ᠶᠡᠬᠡ ᠬᠥᠬᠡ ᠮᠣᠩᠭᠣᠯ ᠤᠯᠤᠰ ᠬᠡᠮᠡᠪᠡᠢ
ᠡᠭᠦᠡᠴᠡ ᠰᠠᠶᠢ ᠮᠣᠩᠭᠣᠯ ᠬᠡᠮᠡᠬᠦ ᠦᠰᠦᠭ ᠪᠠ ᠦᠭᠡ ᠭᠠᠷᠪᠠᠢ᠃
ᠬᠠᠰ ᠶᠡᠬᠡ ᠲᠥᠷᠥ ᠶ᠋ᠢᠨ ᠬᠠᠭᠠᠨ ᠡᠵᠡᠨ ᠦ᠌ ᠴᠣᠯᠠ ᠡᠷᠭᠦᠮᠵᠢᠯᠡᠯ ᠪᠠ ᠣᠨ ᠤ᠋ ᠴᠣᠯᠠ ᠪᠣᠯᠪᠠᠰᠤ : 《ᠬᠠᠨ ᠬᠤᠷᠮᠤᠰᠲᠠ ᠶ᠋ᠢᠨ ᠬᠠᠢᠷᠠ ᠰᠠᠨᠠᠭᠠᠨ ᠢ᠋ ᠬᠠᠮᠤᠭ ᠪᠦᠬᠦᠨᠡ ᠤᠬᠠᠭᠤᠯᠤᠨ ᠰᠠᠨᠠᠭᠤᠯᠤᠭᠰᠠᠨ ᠬᠠᠰ ᠡᠷᠳᠡᠨᠢ ᠶ᠋ᠢᠨ ᠲᠠᠮᠠᠭᠠ ᠶ᠋ᠢ ᠴᠢᠯᠠᠭᠤᠨ ᠤ᠋ ᠳᠣᠲᠣᠷᠠ ᠪᠦᠬᠦᠢ ᠶ᠋ᠢ ᠵᠢᠭᠠᠵᠤ ᠥᠭᠭᠦᠭᠰᠡᠨ ᠬᠠᠭᠠᠨ ᠥᠷᠭᠥᠭᠡ ᠶ᠋ᠢᠨ ᠲᠣᠭᠣᠨᠣ ᠳᠡᠭᠡᠷᠡ ᠳᠠᠬᠢᠨ ᠳᠠᠬᠢᠨ ᠢᠷᠡᠵᠦ ᠰᠠᠭᠤᠵᠤ ᠪᠡᠯᠡᠭᠯᠡᠨ ᠬᠠᠷᠠᠭᠠᠯᠵᠠᠨ ᠲᠡᠳᠬᠦᠭᠰᠡᠨ ᠬᠠᠨ ᠺᠠᠷᠣᠳᠢ ᠶ᠋ᠢᠨ ᠤᠳᠠᠭᠠ ᠳᠠᠷᠠᠭᠠ ＜ ᠴᠢᠩᠭᠢᠰ ᠴᠢᠩᠭᠢᠰ ＞ ᠭᠡᠮᠡᠨ ᠳᠣᠩᠭᠣᠳᠤᠭᠰᠠᠨ ᠬᠠᠮᠤᠭ ᠪᠦᠬᠦᠨ ᠢ᠋ ᠬᠠᠮᠲᠤᠳᠬᠠᠨ ᠡᠩᠬᠡᠵᠢᠭᠦᠯᠦᠨ᠂ ᠬᠠᠪᠤᠯ ᠬᠠᠭᠠᠨ ᠡᠯᠦᠨᠴᠡ ᠪᠡᠨ ᠵᠠᠯᠭᠠᠮᠵᠢᠯᠠᠨ ᠬᠡᠷᠡᠯᠳᠦᠭᠦᠯᠦᠭᠰᠡᠨ᠂ ᠬᠠᠨ ᠬᠤᠷᠮᠤᠰᠲᠠ ᠲᠡᠭᠷᠢ ᠶ᠋ᠢᠨ ᠪᠣᠱᠣᠭ ᠢ᠋ᠶ᠋ᠠᠷ ᠬᠠᠮᠤᠭ ᠤ᠋ᠨ ᠤᠯᠠᠷᠢᠯ ᠢ᠋ ᠶᠡᠬᠡᠳᠡ ᠨᠡᠭᠡᠭᠡᠭᠰᠡᠨ ᠬᠠᠳᠠᠨ ᠰᠦᠷᠲᠦ᠂ ᠰᠤᠤᠲᠤ ᠪᠣᠭᠳᠠ ᠪᠠᠭᠠᠲᠤᠷ ᠬᠤᠸᠠᠩᠳᠢ᠂ ᠴᠢᠩᠭᠢᠰ ᠶᠡᠬᠡ ᠬᠠᠭᠠᠨ 》ᠬᠡᠮᠡᠵᠦᠬᠦᠢ᠃ ᠬᠣᠢᠨᠠ ᠬᠤᠷᠢᠶᠠᠩᠭᠤᠢᠯᠠᠨ 《ᠲᠡᠭᠷᠢ ᠶ᠋ᠢᠨ ᠪᠣᠱᠣᠭ ᠢ᠋ᠶ᠋ᠠᠷ ᠤᠯᠠᠷᠢᠯ ᠢ᠋ ᠨᠡᠭᠡᠭᠡᠭᠰᠡᠨ ᠪᠣᠭᠳᠠ ᠪᠠᠭᠠᠲᠤᠷ ᠬᠤᠸᠠᠩᠳᠢ ᠴᠢᠩᠭᠢᠰ ᠬᠠᠭᠠᠨ 》ᠬᠡᠮᠡᠭᠰᠡᠨ ᠢ ᠬᠢᠲᠠᠳ ᠦᠰᠦᠭ ᠦ᠋ᠨ ᠶᠤᠸᠠᠨ ᠤᠯᠤᠰ ᠤ᠋ᠨ 《ᠭᠠᠩ ᠮᠦ᠍ ᠰᠤᠳᠤᠷ 》 ᠲᠤᠷ ᠢᠷᠭᠡᠨ ᠦᠰᠦᠭ ᠢ᠋ᠶ᠋ᠡᠷ ᠪᠢᠴᠢᠭᠰᠡᠨ ᠢᠨᠤ᠂ 《承天启运圣武皇帝》ᠡᠢᠮᠦ ᠨᠠᠢ᠍ᠮᠠᠨ ᠦᠰᠦᠭ ᠢ᠋ᠶ᠋ᠡᠷ ᠬᠤᠷᠢᠶᠠᠵᠤᠬᠤᠢ᠃ ᠠᠮᠢᠳᠤ ᠰᠡᠷᠢᠭᠦᠨ ᠪᠥᠬᠥᠶᠡ ᠳᠥᠴᠢᠨ ᠲᠠᠪᠤᠨ ᠰᠡᠭᠦᠳᠡᠷᠡ᠂ ᠴᠢᠩᠭᠢᠰ ᠶᠡᠬᠡ ᠳᠡ ᠬᠤᠸᠠᠩᠳᠢ ᠰᠠᠭᠤᠬᠤᠶᠠ ᠡᠷᠭᠦᠭᠰᠡᠨ ᠮᠣᠩᠭᠣᠯ ᠦᠭᠡᠰ ᠦ᠋ᠨ ᠡᠷᠭᠦᠮᠵᠢᠯᠡᠯ ᠪᠣᠢ ᠢ᠋ᠠ᠂ ᠶᠡᠷᠦ ᠬᠠᠯᠢᠭᠰᠠᠨ ᠤ᠋ ᠬᠣᠢᠨᠠ ᠡᠷᠭᠦᠮᠵᠢᠯᠡᠭᠰᠡᠨ ᠨᠡᠬᠡᠮᠵᠢᠯᠡᠯ ᠪᠤᠰᠤ᠃ ᠶᠤᠸᠠᠨ ᠲᠠᠢᠽᠦ ᠬᠡᠮᠡᠭᠴᠢ ᠢᠨᠤ ᠮᠥᠨ ᠦᠯᠢᠭᠡᠷᠯᠡᠨ ᠬᠡᠯᠡᠪᠡᠰᠦ᠂ ᠲᠠᠢᠴᠢᠩ ᠤᠯᠤᠰ ᠤ᠋ᠨ ᠶᠢᠰᠦᠳᠦᠭᠡᠷ ᠬᠠᠭᠠᠨ ᠲᠦᠭᠡᠮᠡᠯ ᠡᠯᠪᠡᠭᠲᠦ – ᠰᠢᠶᠠᠨ ᠹᠧᠩ ᠬᠡᠮᠡᠬᠦ ᠣᠨ ᠤ᠋ ᠸᠸᠨᠽᠥ᠋ᠩ ᠰᠢᠶᠠᠨ ᠬᠤᠸᠠᠩᠳᠢ ᠶ᠋ᠢᠨ ᠭᠤᠷᠪᠠᠳᠤᠭᠠᠷ ᠤᠳᠠᠭᠠ ᠡᠷᠭᠦᠮᠵᠢᠯᠡᠭᠰᠡᠨ ᠬᠤᠸᠠᠩᠬᠡᠦ ᠬᠣᠢᠨᠠ ᠪᠠᠷᠠᠭᠤᠨ ᠣᠷᠳᠣᠨ ᠤ᠋ ᠰᠢ ᠲᠠᠢᠬᠡᠦ ᠭᠡᠮᠡᠨ᠂ ᠪᠦᠷᠢᠨᠲᠦ ᠵᠠᠰᠠᠭᠴᠢ᠂ ᠪᠠᠳᠠᠷᠠᠭᠤᠯᠲᠤ ᠲᠥᠷᠥ ᠶ᠋ᠢᠨ ᠬᠣᠶᠠᠷ ᠬᠠᠳ ᠤ᠋ᠨ ᠦᠶᠡ ᠳ᠋ᠦ᠍ᠷ ᠡᠷᠭᠦᠮᠵᠢᠯᠡᠯ ᠨᠡᠮᠡᠭᠰᠡᠭᠡᠷ᠂ ᠬᠢᠲᠠᠳ ᠤ᠋ᠨ ᠳᠠᠩ ᠦᠰᠦᠭ ᠢ᠋ᠶ᠋ᠡᠷ ᠨᠡᠢᠲᠡ ᠠᠷᠪᠠᠨ ᠳᠥᠷᠪᠡᠨ ᠦᠰᠦᠭ ᠲᠣᠷ ᠬᠦᠷᠦᠭᠰᠡᠨ ᠮᠡᠲᠦ᠂ ᠪᠣᠭᠳᠠ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠦᠢᠯᠡ ᠶᠠᠪᠤᠳᠠᠯ ᠭᠠᠪᠢᠶᠠ ᠵᠢᠳᠬᠦᠯᠭᠡ ᠢᠨᠤ ᠮᠠᠰᠢᠳᠠ ᠦᠯᠡᠮᠵᠢ ᠶ᠋ᠢᠨ ᠲᠤᠯᠠ ᠠᠮᠢᠳᠤ ᠰᠡᠷᠢᠭᠦᠨ ᠪᠦᠬᠦᠢ ᠳ᠋ᠦ᠍ᠷ ᠳᠠᠷᠤᠢ ᠮᠠᠭᠲᠠᠭᠠᠯ ᠡᠷᠭᠦᠮᠵᠢᠯᠡᠯ ᠭᠠᠷᠤᠭᠰᠠᠨ ᠠᠨᠤ ᠪᠤᠶᠤ᠃ ᠵᠢᠴᠢ ᠳᠡᠭᠡᠭᠰᠢ ᠭᠤᠷᠪᠠᠨ ᠦᠶᠡ ᠶ᠋ᠢᠨ ᠡᠪᠦᠭᠡᠳ ᠢ᠋ ᠨᠡᠬᠡᠮᠵᠢᠯᠡᠨ ᠡᠷᠭᠦᠮᠵᠢᠯᠡᠭᠰᠡᠨ ᠢᠨᠤ᠂ ᠲᠠᠢᠽᠦ ᠪᠣᠭᠳᠠ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠡᠴᠢᠭᠡ᠂ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠡᠵᠡᠨ ᠢ᠋ ᠡᠷᠭᠦᠮᠵᠢᠯᠡᠭᠰᠡᠨ ᠢᠨᠤ : 《ᠵᠢᠪᠬᠤᠯᠠᠩ ᠬᠦᠴᠦᠲᠦ ᠬᠤᠸᠠᠩᠳᠢ ᠡᠴᠢᠭᠡ ᠬᠠᠭᠠᠨ 》᠂ ᠵᠢᠴᠢ ᠲᠠᠢᠽᠦ ᠶ᠋ᠢᠨ ᠡᠪᠦᠭᠡ ᠪᠠᠷᠳᠠᠮ ᠪᠠᠭᠠᠲᠤᠷ ᠢ᠋ ᠨᠡᠬᠡᠮᠵᠢᠯᠡᠨ ᠡᠷᠭᠦᠮᠵᠢᠯᠡᠭᠰᠡᠨ ᠢᠨᠤ : 《ᠪᠠᠳᠠᠷᠠᠭᠤᠯᠲᠤ ᠪᠠᠶᠠᠰᠬᠤᠯᠠᠩ ᠬᠤᠸᠠᠩᠳᠢ ᠡᠪᠦᠭᠡ ᠬᠠᠭᠠᠨ 》᠂ ᠵᠢᠴᠢ ᠲᠠᠢᠽᠦ ᠶ᠋ᠢᠨ ᠡᠯᠦᠨᠴᠡ ᠡᠴᠢᠭᠡ ᠬᠠᠪᠤᠯ ᠬᠠᠭᠠᠨ ᠢ᠋ ᠨᠡᠬᠡᠮᠵᠢᠯᠡᠨ ᠡᠷᠭᠦᠮᠵᠢᠯᠡᠭᠰᠡᠨ ᠢᠨᠤ : 《ᠬᠠᠮᠤᠭ ᠪᠠᠢᠭᠤᠯᠤᠯᠲᠤ ᠳᠠ ᠬᠤᠸᠠᠩᠳᠢ ᠡᠯᠦᠨᠴᠡ ᠶᠡᠬᠡ ᠬᠠᠭᠠᠨ 》᠂ ᠵᠢᠴᠢ ᠲᠠᠢᠽᠦ ᠶ᠋ᠢᠨ ᠲᠥᠷᠥᠭᠰᠡᠨ ᠡᠬᠡ ᠥᠭᠡᠯᠦᠨ ᠥᠵᠢᠨ ᠡᠮᠡᠭᠡ ᠶ᠋ᠢ ᠡᠷᠭᠦᠮᠵᠢᠯᠡᠭᠰᠡᠨ ᠢᠨᠣ᠄ 《ᠵᠢᠪᠬᠤᠯᠠᠩ ᠵᠣᠷᠢᠭᠲᠤ ᠦᠯᠡᠭᠦᠦ ᠢᠷᠦᠭᠡᠯᠲᠦ ᠲᠡᠢ ᠬᠤᠸᠠᠩ ᠲᠠᠢᠬᠡᠦ 》ᠬᠢᠲᠠᠳ ᠦᠭᠡᠰ ᠢ᠋ᠶ᠋ᠡᠷ 《 ᠲᠡᠢ ᠴᠢᠩ ᠲᠠᠢᠬᠡᠦ 》᠃ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠢ᠋ ᠬᠢᠲᠠᠳ ᠢ᠋ᠶ᠋ᠠᠷ 《ᠳᠠ ᠱᠧᠩ ᠯᠢᠶᠧ ᠽᠦ᠍ 》ᠬᠡᠮᠡᠮᠦᠢ᠃ ᠲᠠᠢᠽᠦ ᠶ᠋ᠢᠨ ᠲᠥᠪ ᠰᠠᠭᠤᠳᠠᠯ ᠤ᠋ᠨ ᠰᠡᠴᠡᠨ ᠵᠦᠰᠦᠨ ᠪᠥᠷᠲᠡᠭᠡᠯᠵᠢᠨ ᠬᠠᠲᠤᠨ ᠢ᠋ ᠡᠷᠭᠦᠮᠵᠢᠯᠡᠭᠰᠡᠨ ᠢᠨᠤ:《ᠶᠡᠬᠡᠮᠰᠦᠭ ᠢ᠋ᠶ᠋ᠡᠷ ᠭᠡᠢᠭᠦᠯᠦᠭᠰᠡᠨ ᠲᠠᠬᠢᠮᠳᠠᠭᠤ ᠭᠡᠭᠡᠨ ᠬᠤᠸᠠᠩᠬᠡᠦ 》᠂ ᠬᠢᠲᠠᠳ ᠦᠰᠦᠭ ᠢ᠋ᠶ᠋ᠡᠷ 《ᠭᠤᠸᠠᠩ ᠰᠢᠶᠠᠨ ᠲᠠᠢ ᠰᠢᠶᠣᠤ ᠬᠤᠸᠠᠩᠬᠡᠦ 》᠃ ᠵᠢᠴᠢ ᠵᠡᠭᠦᠨ ᠪᠠᠷᠠᠭᠤᠨ ᠬᠣᠶᠠᠷ ᠵᠢᠭᠦᠷ ᠦ᠋ᠨ ᠳᠡᠳ᠋ ᠬᠠᠲᠤᠳ ᠢ᠋ ᠡᠷᠭᠦᠮᠵᠢᠯᠡᠭᠰᠡᠨ ᠢᠨᠤ: ᠰᠣᠯᠣᠩᠭᠠ ᠤᠯᠤᠰ ᠤ᠋ᠨ ᠭᠣᠣᠯ ᠤ᠋ᠨ ᠰᠠᠷᠠᠨ ᠬᠠᠲᠤᠨ ᠢ᠋ 《ᠵᠡᠭᠦᠨ ᠰᠠᠷᠠᠨ ᠣᠷᠳᠣᠨ ᠤ᠋ ᠬᠦᠢ ᠹᠧᠢ ᠬᠠᠲᠤᠨ 》᠂ ᠮᠥᠨ ᠤᠯᠤᠰ ᠤ᠋ᠨ ᠲᠠᠲ᠋ᠠᠷ ᠤ᠋ᠨ ᠴᠣᠬᠣᠮ ᠡᠵᠡᠨ ᠂ ᠶᠡᠬᠡ ᠴᠤᠷᠤ ᠨᠣᠶᠠᠨ ᠤ᠋ ᠬᠣᠶᠠᠷ ᠥᠬᠢᠨ – ᠵᠢᠰᠦᠲᠦ ᠵᠢᠰᠦᠯᠢᠭ ᠬᠣᠶᠠᠷ ᠬᠠᠲᠤᠨ ᠢ᠋ 《ᠪᠠᠷᠠᠭᠤᠨ ᠣᠳᠣᠳ ᠤ᠋ᠨ ᠣᠷᠳᠣᠨ ᠤ᠋ ᠬᠦᠢ ᠹᠧᠢ ᠬᠠᠲᠤᠨ 》᠂ ᠲᠠᠢᠽᠦ ᠶ᠋ᠢᠨ ᠲᠥᠷᠥᠭᠰᠡᠨ ᠥᠬᠢᠨ ᠳᠡᠭᠦᠦ ᠂ ᠲᠤᠨᠤᠮᠠᠯ ᠲᠠᠵᠢ ᠭᠦᠩᠵᠦ ᠶ᠋ᠢ 《ᠲᠥᠷᠥ ᠶ᠋ᠢᠨ ᠡᠭᠡᠴᠢᠮᠡᠳ ᠦ᠋ᠨ ᠵᠢᠩ ᠭᠦᠩᠵᠦ 》᠂ ᠲᠠᠢᠽᠦ ᠶ᠋ᠢᠨ ᠦᠶᠡᠯᠢᠳ ᠥᠬᠢᠨ ᠳᠡᠭᠦᠦ ᠵᠠᠯᠮᠠ ᠳ᠋ᠤᠷ ᠬᠣᠯᠪᠣᠭᠰᠠᠨ ᠭᠦᠨ ᠠᠭᠠᠷ ᠭᠦᠩᠵᠦ ᠶ᠋ᠢ 《ᠬᠣᠱᠣᠢ ᠡᠭᠡᠴᠢᠮᠡᠳ ᠂ ᠾᠦᠢ ᠵᠢᠩ ᠭᠦᠩᠵᠦ 》᠂ ᠲᠠᠢᠽᠦ ᠶ᠋ᠢᠨ ᠭᠠᠭᠴᠠ ᠥᠬᠢᠨ ᠰᠡᠴᠡᠨ ᠰᠡᠴᠢᠭᠯᠢᠭ᠂ ᠵᠡᠯᠮᠡ ᠶ᠋ᠢᠨ ᠭᠠᠭᠴᠠ ᠬᠥᠪᠡᠭᠦᠨ ᠴᠡᠴᠡᠭᠡᠢ ᠴᠣᠯᠠᠲᠤ ᠵᠢᠪᠡᠭᠡ ᠳ᠋ᠦ᠍ᠷ ᠬᠣᠯᠪᠣᠭᠰᠠᠨ ᠭᠦᠩᠵᠦ ᠶ᠋ᠢ 《ᠤᠯᠤᠰ ᠤ᠋ᠨ ᠲᠥᠪ ᠦ᠋ᠨ ᠶᠡᠬᠡ ᠬᠤᠸᠠ ᠵᠢᠩ ᠳᠡ ᠭᠦᠩᠵᠦ 》ᠬᠡᠮᠡᠪᠡ᠃
ᠠᠷᠤ ᠭᠠᠵᠠᠷ ᠤ᠋ᠨ ᠦᠯᠦᠭ ᠮᠣᠩᠭᠣᠯ ᠤ᠋ᠨ ᠮᠤᠬᠤᠷ ᠬᠡᠯᠡᠨ ᠳ᠋ᠦ᠍ᠷ ᠬᠢᠲᠠᠳ ᠬᠡᠯᠡᠨ ᠦ᠌ ᠲᠦᠰᠢᠮᠡᠯ ᠲᠥᠰᠢᠶᠡ ᠶ᠋ᠢᠨ ᠨᠡᠷᠡᠰ ᠦ᠋ᠨ ᠴᠧᠩᠰᠢᠶᠠᠩ ᠬᠡᠮᠡᠬᠦ ᠶ᠋ᠢ 《ᠴᠸᠩᠰᠡᠨ 》ᠬᠡᠮᠡᠵᠦᠬᠦᠢ᠃ ᠽᠠᠢᠰᠢᠶᠠᠩ ᠬᠡᠮᠡᠬᠦ ᠶ᠋ᠢ《ᠵᠠᠢᠰᠠᠩ 》 ᠬᠡᠮᠡᠵᠦᠬᠦᠢ᠃ ᠤᠭ ᠠ᠋ᠴᠠ ᠡᠳᠡᠭᠡᠷ ᠲᠦᠰᠢᠮᠡᠳ ᠰᠠᠢᠳ ᠤ᠋ᠨ ᠵᠡᠷᠭᠡ ᠬᠡᠷᠬᠡᠮ ᠦ᠋ᠨ ᠨᠡᠷᠡ ᠳᠠᠭᠤᠳᠠᠯᠲᠠ ᠬᠡᠮᠡᠭᠴᠢ ᠬᠢᠲᠠᠳ ᠤ᠋ᠨ ᠬᠡᠯᠡᠨ ᠢ᠋ᠶ᠋ᠡᠷ ᠭᠠᠷᠤᠭᠰᠠᠨ ᠤ᠋ ᠲᠤᠯᠠᠳᠠ᠂ ᠲᠡᠢᠨ ᠬᠦ᠌ ᠲᠡᠭᠦᠨᠦ ᠲᠤᠬᠠᠢᠲᠤ ᠤᠭ ᠨᠡᠷᠡ ᠪᠡᠷ ᠳᠠᠭᠤᠳᠠᠬᠤ ᠠᠨᠤ ᠵᠦᠢ ᠲᠤᠯᠠ ᠲᠤᠰᠬᠠᠢ ᠳᠠᠭᠤᠳᠠᠯᠲᠠ ᠪᠠᠷ ᠠᠨᠤ ᠲᠠᠯᠪᠢᠪᠠ᠃ ᠭᠠᠭᠴᠠ 《ᠵᠢᠶᠠᠩᠵᠢᠶᠦ᠋ᠨ 》ᠬᠡᠮᠡᠬᠦ ᠶ᠋ᠢ ᠲᠠᠢᠴᠢᠩ ᠤᠯᠤᠰ ᠤ᠋ᠨ ᠲᠣᠭᠲᠠᠭᠠᠭᠰᠠᠨ ᠮᠣᠩᠭᠣᠯ ᠦᠰᠦᠭ ᠦ᠋ᠨ ᠶᠣᠰᠣᠭᠠᠷ《ᠵᠠᠩᠵᠤᠨ 》ᠭᠡᠮᠡᠨ ᠲᠠᠯᠪᠢᠪᠠᠢ᠃ ᠦᠯᠦᠭ ᠬᠠᠷᠠ ᠦᠭᠡᠰ ᠢ᠋ᠶ᠋ᠡᠷ ᠪᠢᠴᠢᠪᠡᠰᠦ ᠤᠯᠠᠩᠬᠢᠨ ᠲᠠᠨᠢᠬᠤ ᠦᠭᠡᠢ ᠲᠤᠯᠠ ᠶᠡᠷᠦ ᠶ᠋ᠢᠨ ᠬᠡᠷᠡᠭᠯᠡᠬᠦ ᠮᠣᠩᠭᠣᠯ ᠦᠰᠦᠭ ᠢ᠋ᠶ᠋ᠡᠷ ᠪᠢᠴᠢᠪᠡᠢ᠃ ᠭᠠᠭᠴᠠ ᠨᠡᠷᠡ ᠶ᠋ᠢ ᠢᠨᠤ ᠡᠰᠡ ᠬᠠᠯᠠᠪᠠᠢ᠃
ᠲᠡᠨᠳᠡᠴᠡ ᠲᠠᠢᠽᠦ ᠶ᠋ᠢᠨ ᠳᠥᠷᠪᠡᠨ ᠳᠡᠭᠦᠦ ᠨᠣᠶᠠᠳ ᠢ᠋ ᠡᠷᠭᠦᠮᠵᠢᠯᠡᠭᠰᠡᠨ ᠢᠨᠤ: ᠪᠦᠬᠦ ᠪᠡᠯᠭᠦᠳᠡᠢ ᠪᠠ ᠬᠠᠪᠤᠲᠤ ᠬᠠᠰᠠᠷ ᠬᠣᠶᠠᠭᠤᠯᠠ ᠶ᠋ᠢ ᠴᠡᠷᠢᠭ ᠦ᠋ᠨ ᠭᠠᠪᠢᠶᠠ ᠵᠢᠳᠬᠦᠯᠭᠡ ᠦᠯᠡᠮᠵᠢ ᠲᠤᠯᠠ ᠬᠣᠶᠠᠷ ᠳᠡᠭᠦᠦ ᠴᠢᠨ ᠸᠠᠩ ᠪᠥᠭᠡᠳ 《ᠴᠧᠩᠰᠢᠶᠠᠩ 》 ᠤ᠋ᠨ ᠴᠣᠯᠠ ᠬᠠᠪᠰᠤᠷᠭᠠᠵᠤᠬᠤᠢ᠃ ᠣᠢᠲᠤ ᠸᠴᠢᠷ᠂ ᠤᠷᠠᠨ ᠭᠠᠴᠤᠭ ᠬᠣᠶᠠᠷ ᠳᠡᠭᠦᠦ ᠶ᠋ᠢ ᠵᠢᠶᠦ᠋ᠨ ᠸᠠᠩ᠂ ᠳᠥᠷᠪᠡᠨ ᠪᠠᠭᠠ ᠡᠵᠡᠳ – ᠵᠣᠴᠢ᠂ ᠴᠠᠭᠠᠲᠠᠢ᠂ ᠥᠭᠡᠳᠡᠢ᠂ ᠲᠣᠯᠢ ᠳᠥᠷᠪᠡᠨ ᠲᠠᠢᠽᠢ ᠶ᠋ᠢ ᠳᠥᠷᠪᠡᠨ 《ᠲᠠᠢᠽᠢ ᠴᠢᠨ ᠸᠠᠩ 》᠂ ᠵᠢᠴᠢ ᠬᠦᠷᠭᠡᠨ ᠲᠠᠪᠤᠨᠠᠩ᠂ ᠡᠭᠡᠴᠢᠮᠡᠳ᠂ ᠲᠥᠷᠥ ᠶ᠋ᠢᠨ ᠹᠦᠮᠠ ᠵᠠᠯᠮᠠ᠂ ᠲᠥᠷᠥ ᠶ᠋ᠢᠨ ᠹᠦᠮᠠ ᠪᠣᠳᠣ ᠬᠣᠶᠠᠭᠤᠯᠠ ᠶ᠋ᠢ ᠬᠣᠶᠠᠷ ᠶᠡᠬᠡ 《ᠪᠡᠢᠯᠡ 》᠂ ᠵᠢᠴᠢ ᠬᠤᠸᠠ ᠵᠢᠩ ᠭᠦᠩᠵᠦ ᠳ᠋ᠦ᠍ᠷ ᠬᠣᠯᠪᠣᠭᠰᠠᠨ᠂ ᠴᠡᠴᠡᠭᠡᠢ ᠴᠣᠯᠠᠲᠤ ᠵᠢᠪᠡᠬᠡ ᠶ᠋ᠢ 《ᠤᠯᠤᠰ ᠤ᠋ᠨ ᠶᠡᠬᠡ ᠹᠦᠮᠠ ᠲᠠᠪᠤᠨᠠᠩ 》ᠪᠥᠭᠡᠳ 《ᠭᠦᠸᠧ ᠬᠦᠩ 》 ᠦ᠋ᠨ ᠴᠣᠯᠠ ᠬᠠᠪᠰᠤᠷᠭᠠᠪᠠᠢ᠃ ᠵᠢᠴᠢ ᠦᠨᠳᠦᠰᠦᠨ ᠨᠠᠭᠠᠴᠤ ᠣᠯᠬᠣᠨᠤᠳ ᠤ᠋ᠨ ᠲᠠᠢ ᠴᠢᠩ ᠲᠠᠢᠬᠡᠦ ᠶ᠋ᠢᠨ ᠠᠬᠠ ᠳᠡᠭᠦᠦ ᠥᠷᠯᠥᠭ ᠨᠣᠶᠠᠨ᠂ ᠯᠢᠳᠡᠷ ᠰᠡᠴᠡᠨ ᠬᠣᠶᠠᠭᠤᠯᠠ ᠤᠯᠤᠰ ᠤ᠋ᠨ ᠲᠠᠪᠤᠨ ᠲᠠᠢᠰᠢ ᠶ᠋ᠢᠨ ᠳᠣᠲᠣᠷᠠᠬᠢ ᠬᠣᠶᠠᠷ 《ᠲᠡᠢᠰᠢ 》ᠪᠥᠭᠡᠳ ᠪᠠᠰᠠ《ᠬᠦᠩ 》 ᠦ᠋ᠨ ᠴᠣᠯᠠ ᠬᠠᠪᠰᠤᠷᠭᠠᠪᠠᠢ᠃ ᠭᠤᠸᠠᠩ ᠰᠢᠶᠠᠨ ᠬᠤᠸᠠᠩᠬᠡᠦ ᠶ᠋ᠢᠨ ᠡᠴᠢᠭᠡ – ᠤᠯᠤᠰ ᠤ᠋ᠨ ᠨᠠᠭᠠᠴᠤ ᠡᠴᠢᠭᠡ ᠳ᠋ᠠᠢ ᠰᠡᠴᠡᠨ ᠨᠣᠶᠠᠨ ᠢ᠋ ᠲᠠᠪᠤᠨ ᠲᠠᠢᠰᠢ ᠶ᠋ᠢᠨ ᠳᠣᠲᠣᠷᠠᠬᠢ ᠨᠢᠭᠡᠨ ᠲᠠᠢᠰᠢ ᠪᠥᠭᠡᠳ 《ᠲᠥᠷᠥ ᠶ᠋ᠢᠨ ᠶᠡᠬᠡ ᠪᠡᠢᠯᠡ 》ᠬᠠᠪᠰᠤᠷᠭᠠᠵᠤᠬᠤᠢ ᠃ ᠬᠤᠸᠠᠩᠬᠡᠦ ᠶ᠋ᠢᠨ ᠬᠣᠶᠠᠷ ᠠᠬᠠ ᠠᠵᠢᠨᠠᠢ ᠮᠡᠷᠭᠡᠨ ᠬᠤᠳᠠᠷᠭᠠ ᠪᠠᠭᠠᠲᠤᠷ ᠬᠣᠶᠠᠭᠤᠯᠠ ᠶ᠋ᠢ 《ᠳᠡᠭᠡᠳᠦ ᠲᠠᠢᠹᠦ᠋ ᠮᠥᠷᠥ ᠶ᠋ᠢᠨ ᠵᠠᠩᠵᠤᠨ 》ᠪᠥᠭᠡᠳ ᠪᠠᠰᠠ 《ᠲᠥᠷᠥ ᠶ᠋ᠢᠨ ᠬᠦᠩ 》 ᠦ᠋ᠨ ᠴᠣᠯᠠ ᠬᠠᠪᠰᠤᠷᠭᠠᠵᠤᠬᠤᠢ ᠃ ᠵᠢᠴᠢ ᠬᠤᠸᠠᠩᠬᠡᠦ ᠶ᠋ᠢᠨ ᠬᠣᠷᠮᠣᠢ ᠶ᠋ᠢᠨ ᠲᠣᠭᠣᠰᠤᠨᠠ ᠬᠣᠷᠢᠶᠠᠨ ᠵᠢᠷᠤᠮ ᠤ᠋ᠨ ᠥᠬᠢᠳ ᠪᠣᠯᠭᠠᠨ ᠥᠷᠥᠰᠢᠶᠡᠭᠰᠡᠨ ᠬᠡᠷᠡᠢᠳ ᠦ᠋ᠨ ᠰᠡᠷᠭᠦᠯᠡᠩ ᠭᠦᠩᠵᠦ ᠰᠣᠯᠣᠩᠭᠣᠸᠠ ᠶ᠋ᠢ 《ᠲᠥᠷᠥ ᠶ᠋ᠢᠨ ᠭᠦᠩᠵᠦ 》 ᠪᠥᠭᠡᠳ ᠪᠠᠰᠠ 《ᠲᠥᠷᠥ ᠶ᠋ᠢᠨ ᠬᠤᠸᠠᠩᠬᠡᠦ ᠶ᠋ᠢᠨ ᠨᠠᠢ᠍ᠮᠠᠨ ᠡᠬᠡᠨᠡᠷ ᠰᠠᠢᠳ ᠤ᠋ᠨ ᠣᠷᠳᠣᠨ ᠵᠠᠬᠢᠷᠤᠭᠴᠢ ᠳᠡᠭᠡᠳᠦ ᠰᠠᠢᠳ 》᠂ ᠨᠠᠢ᠍ᠮᠠᠨ ᠤ᠋ ᠬᠠᠰᠲᠤᠶᠠᠭᠠ ᠭᠦᠩᠵᠦ᠂ ᠵᠢᠴᠢ ᠨᠠᠢ᠌ᠮᠠᠨᠴᠢ ᠭᠦᠩᠵᠦ ᠬᠣᠶᠠᠭᠤᠯᠠ ᠶ᠋ᠢ ᠴᠥᠮ《ᠲᠥᠷᠥ ᠶ᠋ᠢᠨ ᠭᠦᠩᠵᠦ 》᠂ ᠪᠠᠰᠠ ᠨᠠᠢ᠍ᠮᠠᠨ ᠠᠢᠮᠠᠭ ᠤ᠋ᠨ ᠲᠡᠢᠨ ᠡᠴᠡ ᠣᠯᠤᠭᠰᠠᠨ ᠬᠤᠸᠠᠩᠬᠡᠦ ᠶ᠋ᠢᠨ ᠳᠣᠣᠷᠠ ᠲᠡᠵᠢᠭᠡᠨ ᠬᠥᠮᠦᠵᠢᠭᠦᠯᠦᠭᠰᠡᠨ ᠂ ᠬᠣᠩᠭᠣᠷ ᠵᠤᠯᠠ ᠬᠡᠦᠬᠡᠨᠡ 《ᠳᠡᠳ᠋ ᠵᠡᠷᠭᠡ ᠶ᠋ᠢᠨ ᠬᠠᠲᠤᠨ 》ᠴᠣᠯᠠ ᠬᠥᠷᠳᠡᠭᠡᠯᠭᠡᠪᠡᠢ᠃
ᠡᠨᠡ ᠢᠨᠦ ᠤᠯᠤᠰ ᠤ᠋ᠨ ᠵᠠᠭᠤᠨ ᠰᠠᠢᠳ ᠲᠦᠰᠢᠮᠡᠳ ᠦ᠋ᠨ ᠬᠠᠭᠠᠨ ᠡᠵᠡᠨ ᠦ᠌ ᠬᠠᠷᠢᠶᠠᠲᠤ ᠠᠢᠮᠠᠭ ᠢ᠋ ᠡᠷᠭᠦᠨ ᠲᠣᠭᠲᠠᠭᠠᠭᠰᠠᠨ ᠨᠡᠷᠡ ᠡᠷᠭᠦᠮᠵᠢᠯᠡᠯ ᠮᠥᠨ᠃ ᠵᠢᠴᠢ ᠳᠡᠭᠦᠦ ᠸᠠᠩ ᠤ᠋ᠳ ᠲᠠᠢᠽᠢ ᠸᠠᠩ ᠤ᠋ᠳ ᠤ᠋ᠨ ᠬᠠᠲᠤᠳ ᠪᠠ ᠬᠥᠪᠡᠭᠦᠳ ᠢᠨᠤ᠂ ᠥᠪᠡᠷ ᠥᠪᠡᠷᠦᠨ ᠸᠠᠩ ᠤ᠋ᠨ ᠬᠤᠪᠢᠶᠠᠷᠢ ᠶ᠋ᠢᠨ ᠳᠡᠰ ᠵᠡᠷᠭᠡ ᠶ᠋ᠢᠨ ᠬᠠᠤᠯᠢ ᠳᠦᠷᠢᠮ ᠰᠠᠭᠤᠳᠠᠯ ᠵᠢᠭᠰᠠᠭᠠᠯ ᠤ᠋ᠨ ᠰᠢᠷᠠ ᠥᠷᠭᠥᠭᠡ᠂ ᠠᠯᠲᠠᠨ ᠣᠷᠣᠢᠲᠤ ᠰᠢᠷᠠ ᠲᠡᠷᠭᠡ ᠶ᠋ᠢᠨ ᠵᠦᠢᠯ ᠢ ᠸᠠᠩ ᠤ᠋ᠨ ᠴᠣᠯᠠ ᠬᠤᠪᠢᠶᠠᠷᠢ ᠪᠠᠨ ᠳᠠᠭᠠᠮᠤᠢ᠃ ᠡᠨᠡ ᠨᠠᠢ᠍ᠮᠠᠨ ᠴᠢᠨ ᠵᠢᠶᠦ᠋ᠨ ᠸᠠᠩ ᠤ᠋ᠳ ᠤ᠋ᠨ ᠳᠣᠲᠣᠷᠠ ᠬᠠᠲᠤᠨ ᠡᠷᠭᠦᠮᠵᠢᠯᠡᠭᠡᠳᠦᠢ ᠢᠨᠤ ᠳᠡᠳ᠋ ᠲᠠᠢᠽᠢ ᠴᠠᠭᠠᠲᠠᠢ ᠴᠢᠨ ᠸᠠᠩ ᠬᠢᠭᠡᠳ ᠳᠥᠲᠥᠭᠡᠷ ᠲᠠᠢᠽᠢ ᠲᠣᠯᠢ ᠴᠢᠨ ᠸᠠᠩ ᠬᠣᠶᠠᠭᠤᠯᠠ ᠶᠡᠬᠡ ᠲᠥᠪ ᠰᠢᠷᠡᠭᠡᠨ ᠦ᠌ ᠬᠠᠲᠤᠨ ᠡᠷᠭᠦᠮᠵᠢᠯᠡᠭᠡᠳᠦᠢ᠃ ᠳᠥᠲᠥᠭᠡᠷ ᠲᠠᠢᠽᠢ ᠡᠨᠡ ᠵᠢᠯ ᠮᠤᠬᠤᠷ ᠬᠣᠷᠢᠨ ᠨᠠᠰᠤᠯᠠᠲᠠᠯᠠ᠂ ᠲᠥᠪ ᠦ᠋ᠨ ᠬᠠᠲᠤᠨ ᠤ᠋ ᠬᠢᠷᠢ ᠬᠤᠪᠢᠶᠠᠷᠢ ᠲᠡᠩᠴᠡᠬᠦ ᠶ᠋ᠢ ᠰᠣᠩᠭᠣᠨ ᠲᠣᠭᠲᠠᠭᠠᠬᠤ ᠲᠤᠯᠠ ᠬᠣᠯᠪᠣᠭᠠᠳᠤᠢ᠃ ᠴᠠᠭᠠᠲᠠᠢ ᠲᠠᠢᠽᠢ ᠪᠥᠭᠡᠰᠦ ᠡᠨᠡ ᠵᠢᠯ ᠴᠢᠪ ᠴᠢᠬᠡ ᠬᠣᠷᠢᠨ ᠲᠠᠪᠤᠨ ᠨᠠᠰᠤᠲᠠᠢ᠃ ᠥᠭᠡᠳᠡᠢ ᠲᠠᠢᠽᠢ ᠡᠨᠡ ᠵᠢᠯ ᠬᠣᠷᠢᠨ ᠳᠣᠯᠣᠭᠠᠨ ᠨᠠᠰᠤᠲᠠᠢ᠃ ᠬᠡᠳᠦᠢᠨ ᠶᠡᠬᠡ ᠰᠢᠷᠡᠭᠡᠨ ᠦ᠌ ᠬᠠᠲᠤᠨ ᠡᠷᠭᠦᠮᠵᠢᠯᠡᠪᠡ ᠃ ᠳᠡᠳ᠋ ᠲᠠᠢᠽᠢ ᠶ᠋ᠢᠨ ᠠᠷᠪᠠᠨ ᠳᠣᠯᠣᠭᠠᠨ ᠨᠠᠰᠦᠨᠡ ᠭᠤᠸᠠᠩ ᠰᠢᠶᠠᠨ ᠬᠤᠸᠠᠩᠬᠡᠦ ᠶ᠋ᠢᠨ ᠶᠡᠬᠡ ᠠᠬᠠ ᠬᠣᠩᠭᠢᠷᠠᠳ ᠤ᠋ᠨ ᠨᠠᠭᠠᠴᠤ ᠨᠣᠶᠠᠨ ᠠᠵᠢᠨᠠᠢ ᠮᠡᠷᠭᠡᠨ ᠦ᠌ ᠶᠡᠬᠡ ᠬᠡᠦᠬᠡᠨ ᠰᠠᠷᠠᠨ ᠪᠣᠯᠣᠷ ᠠᠪᠠᠬᠠᠢ ᠶ᠋ᠢ ᠠᠷᠪᠠᠨ ᠲᠠᠪᠤᠨ ᠨᠠᠰᠤᠨᠠ ᠬᠠᠲᠤᠨ ᠪᠣᠯᠭᠠᠨ ᠠᠪᠴᠤ᠂ ᠮᠥᠨ ᠠᠪᠤᠭᠰᠠᠨ ᠰᠠᠷᠠ ᠳ᠋ᠠᠭᠠᠨ ᠤᠷᠤᠭ ᠣᠯᠵᠤ᠂ ᠠᠷᠪᠠᠨ ᠰᠠᠷᠠ ᠳᠦᠭᠦᠷᠴᠦ ᠬᠥᠪᠡᠭᠦᠨ ᠮᠡᠨᠳᠦᠯᠡᠭᠰᠡᠨ ᠢ᠋ᠶ᠋ᠡᠷ ᠬᠠᠲᠤᠨ ᠠᠪᠤᠮᠠᠭᠴᠠ ᠬᠥᠪᠡᠭᠦᠨ ᠲᠡᠢ ᠪᠣᠯᠪᠠ ᠭᠡᠮᠡᠨ ᠨᠡᠷᠡ ᠶ᠋ᠢ ᠠᠪᠲᠠᠯᠠ ᠭᠡᠮᠡᠨ ᠥᠭᠴᠦ᠂ ᠰᠠᠷᠠᠨ ᠬᠠᠲᠤᠨ ᠬᠣᠷᠢᠨ ᠨᠢᠭᠡᠨ ᠨᠠᠰᠤᠲᠠᠢ ᠳ᠋ᠠᠭᠠᠨ᠂ ᠴᠠᠭᠠᠲᠠᠢ ᠲᠠᠢᠽᠢ ᠶ᠋ᠢᠨ ᠬᠣᠷᠢᠨ ᠭᠤᠷᠪᠠᠨ ᠨᠠᠰᠤᠨᠠ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠪᠠᠰᠠᠴᠤ ᠬᠥᠪᠡᠭᠦᠨ ᠲᠡᠢ ᠲᠤᠯᠠ ᠡᠳᠦᠢ ᠬᠦᠷᠲᠡᠯᠡ ᠶᠡᠬᠡ ᠬᠠᠲᠤᠨ ᠡᠷᠭᠦᠮᠵᠢᠯᠡᠭᠡᠳᠦᠢ᠃ ᠡᠳᠦᠭᠡ᠂ ᠲᠡᠷᠡ ᠠᠪᠲᠠᠯᠠ ᠲᠠᠢᠽᠢ ᠨᠠᠢ᠍ᠮᠠᠨ ᠨᠠᠰᠤᠲᠠᠢ ᠪᠣᠯᠵᠤ᠂ ᠲᠡᠭᠦᠨᠦ ᠡᠬᠡ ᠶ᠋ᠢᠨ ᠴᠢᠨ ᠸᠠᠩ ᠤ᠋ᠨ ᠬᠠᠲᠤᠨ ᠤ᠋ ᠡᠷᠭᠦᠮᠵᠢ ᠬᠤᠪᠢ ᠶ᠋ᠢ ᠵᠢᠭᠰᠠᠭᠠᠯ ᠤ᠋ᠨ ᠮᠥᠩᠬᠡᠯᠡᠭᠰᠡᠨ ᠮᠥᠩᠬᠡᠨᠡ ᠬᠦᠷᠭᠡᠭᠦᠯᠦᠮᠦᠢ᠃ ᠵᠢᠴᠢ ᠥᠭᠡᠳᠡᠢ ᠲᠠᠢᠽᠢ ᠶ᠋ᠢᠨ ᠠᠪᠤᠭᠰᠠᠨ ᠠᠨᠤ᠂ ᠮᠥᠨ ᠬᠦ᠌ ᠬᠣᠩᠭᠢᠷᠠᠳ ᠤ᠋ᠨ ᠨᠠᠭᠠᠴᠤ ᠨᠣᠶᠠᠨ ᠠᠵᠢᠨᠠᠢ ᠮᠡᠷᠭᠡᠨ ᠦ᠌ ᠳᠡᠳ᠋ ᠬᠡᠦᠬᠡᠨ ᠽᠠᠮᠭᠠ ᠰᠡᠴᠢᠭ ᠠᠪᠠᠬᠠᠢ ᠪᠠᠰᠠ ᠬᠦ᠌ ᠠᠷᠪᠠᠨ ᠲᠠᠪᠤᠨ ᠨᠠᠰᠤᠲᠠᠢ᠃ ᠥᠭᠡᠳᠡᠢ ᠲᠠᠢᠽᠢ ᠠᠷᠪᠠᠨ ᠳᠣᠯᠣᠭᠠᠨ ᠨᠠᠰᠤᠲᠠᠢ ᠠᠪᠴᠤ᠂ ᠡᠳᠦᠭᠡ ᠲᠥᠪ ᠰᠢᠷᠡᠭᠡᠨ ᠦ᠌ ᠬᠠᠲᠤᠨ ᠡᠷᠭᠦᠮᠵᠢᠯᠡᠪᠡ᠃ ᠳᠣᠣᠷᠠ ᠪᠠᠰᠠ ᠬᠣᠶᠠᠷ ᠪᠠᠭᠠ ᠬᠠᠲᠤᠳ ᠪᠣᠢ᠂ ᠨᠡᠷᠡ ᠢᠯᠡᠷᠡᠭᠰᠡᠨ ᠦᠭᠡᠢ᠃ ᠳᠥᠲᠥᠭᠡᠷ ᠲᠠᠢᠽᠢ ᠲᠣᠯᠢ ᠳ᠋ᠤᠷ ᠪᠠᠰᠠ ᠬᠦ᠌ ᠬᠣᠩᠭᠢᠷᠠᠳ ᠤ᠋ᠨ ᠭᠤᠸᠠᠩ ᠰᠢᠶᠠᠨ ᠬᠤᠸᠠᠩᠬᠡᠦ ᠶ᠋ᠢᠨ ᠬᠣᠶᠠᠳᠤᠭᠠᠷ ᠠᠬᠠ᠂ ᠬᠤᠳᠠᠷᠭᠠ ᠪᠠᠭᠠᠲᠤᠷ ᠤ᠋ᠨ ᠬᠠᠭᠠᠨ ᠬᠡᠦᠬᠡᠨ ᠪᠡᠬᠢ ᠨᠡᠷᠡᠲᠦ ᠠᠪᠠᠬᠠᠢ ᠶ᠋ᠢ ᠲᠥᠷᠥᠬᠦᠶᠡ ᠰᠠᠢᠬᠠᠨ ᠦᠨᠦᠷ ᠲᠠᠯᠠ ᠬᠡᠭᠡᠷᠡ ᠳ᠋ᠦ᠍ᠷ ᠳᠦᠭᠦᠷᠴᠦ᠂ ᠥᠷᠭᠥᠭᠡ ᠶ᠋ᠢᠨ ᠣᠷᠣᠢ ᠠ᠋ᠴᠠ ᠴᠠᠭᠠᠨ ᠰᠣᠯᠣᠩᠭᠠ ᠲᠠᠲᠠᠭᠰᠠᠨ ᠢ᠋ᠶ᠋ᠠᠷ ᠬᠤᠪᠢᠯᠭᠠᠨ ᠰᠢᠳᠢᠲᠡᠨ ᠦ᠌ ᠲᠥᠯᠥᠪ ᠲᠡᠢ ᠲᠡᠵᠢᠭᠡᠬᠦᠶᠡ ᠪᠡᠷᠬᠡ ᠪᠣᠯᠭᠤᠵᠠᠢ ᠭᠡᠮᠡᠨ ᠨᠡᠷᠡ ᠶ᠋ᠢ ᠪᠡᠬᠢ ᠭᠡᠮᠡᠨ ᠥᠭᠴᠦ᠂ ᠭᠤᠷᠪᠠᠨ ᠨᠠᠰᠤᠨᠠ ᠡᠬᠡ ᠢᠨᠤ ᠦᠭᠡᠢ ᠪᠣᠯᠤᠭᠰᠠᠨᠠ᠂ ᠭᠤᠸᠠᠩ ᠰᠢᠶᠠᠨ ᠬᠤᠸᠠᠩᠬᠡᠦ ᠰᠢᠳᠠᠷ ᠳᠡᠷᠭᠡᠳᠡ ᠪᠡᠨ ᠠᠪᠴᠢᠷᠠᠭᠤᠯᠤᠨ ᠲᠡᠵᠢᠭᠡᠬᠦᠶᠡ ᠲᠡᠷᠡ ᠪᠡᠬᠢ ᠠᠪᠠᠬᠠᠢ᠂ ᠭᠤᠷᠪᠠᠬᠠᠨ ᠨᠠᠰᠤᠲᠠᠢ ᠪᠥᠭᠡᠳ ᠠᠪᠠᠭᠠ ᠡᠭᠡᠴᠢ ᠪᠡᠨ ᠡᠵᠡᠨ ᠦ᠌ ᠶᠡᠬᠡ ᠲᠥᠪ ᠰᠢᠷᠡᠭᠡᠨ ᠦ᠌ ᠵᠦᠰᠡ ᠬᠠᠲᠤᠨ ᠭᠡᠮᠡᠨ ᠮᠡᠳᠡᠵᠦ ᠳᠠᠬᠢᠨ ᠳᠠᠬᠢᠨ ᠮᠥᠷᠭᠥᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠦᠵᠡᠭᠡᠳ ᠮᠦᠰᠢᠶᠡᠵᠦ᠂ 《ᠡᠨᠡ ᠬᠡᠦᠬᠡᠨ ᠢ᠋ ᠬᠠᠲᠤᠨ ᠴᠢ ᠳᠡᠷᠭᠡᠳᠡ ᠪᠡᠨ ᠲᠡᠵᠢᠭᠡᠵᠦ ᠰᠤᠷᠭᠠᠯᠲᠠᠢ ᠪᠠᠢᠨᠠᠮ 》 ᠬᠡᠮᠡᠭᠰᠡᠨ ᠢ᠋ᠶ᠋ᠡᠷ ᠡᠵᠡᠨ ᠣ ᠠᠯᠲᠠᠨ ᠠᠮᠠᠨ ᠤ ᠲᠡᠭᠷᠢᠯᠢᠭ ᠦ᠋ᠨ ᠦᠨᠡᠨ ᠵᠠᠷᠯᠢᠭ ᠭᠡᠮᠡᠨ ᠳᠠᠷᠤᠢ ᠨᠡᠷᠡ ᠶ᠋ᠢ ᠰᠤᠷᠭᠠᠯᠲᠠᠢ ᠭᠡᠮᠡᠨ ᠬᠠᠯᠠᠨ ᠥᠭᠴᠦ᠂ ᠭᠦᠩᠵᠦ ᠴᠣᠯᠠ ᠬᠠᠢᠷᠠᠯᠠᠨ ᠲᠡᠵᠢᠭᠡᠭᠰᠡᠭᠡᠷ ᠡᠨᠡ ᠵᠢᠯ ᠠᠷᠪᠠᠨ ᠲᠠᠪᠤᠨ ᠨᠠᠰᠤᠯᠠᠵᠤᠬᠤᠢ᠃ ᠬᠠᠷᠠ ᠬᠤᠯᠤᠭᠠᠨᠠ ᠵᠢᠯ ᠲᠡᠢ᠃ ᠲᠡᠢ ᠴᠢᠩ ᠲᠠᠢᠬᠡᠦ ᠶ᠋ᠢᠨ ᠳᠥᠴᠢᠨ ᠶᠢᠰᠦᠨ ᠦ᠌ ᠵᠢᠯ ᠳᠡᠭᠡᠷᠡ ᠲᠥᠷᠥᠭᠰᠡᠨ ᠠᠵᠤᠭᠤ ᠃ ᠡᠨᠡ ᠤᠯᠠᠭᠠᠨ ᠪᠠᠷᠰ ᠵᠢᠯ ᠠᠷᠪᠠᠨ ᠲᠠᠪᠤᠨ ᠨᠠᠰᠤᠲᠠᠢ ᠪᠣᠯᠤᠭᠰᠠᠨᠠ᠂ ᠳᠥᠲᠥᠭᠡᠷ ᠲᠠᠢᠽᠢ ᠲᠣᠯᠢ ᠶ᠋ᠢᠨ ᠬᠣᠷᠢᠨ ᠨᠠᠰᠤᠨᠠ᠂ ᠡᠨᠡ ᠰᠤᠷᠭᠠᠯᠲᠠᠢ ᠪᠡᠬᠢ ᠭᠦᠩᠵᠦ ᠶ᠋ᠢ ᠭᠣᠣᠯ ᠰᠢᠷᠡᠭᠡᠨ ᠦ᠌ ᠶᠡᠬᠡ ᠬᠠᠲᠤᠨ ᠪᠣᠯᠭᠠᠨ ᠡᠷᠭᠦᠮᠵᠢᠯᠡᠵᠦ᠂ ᠬᠣᠢᠨᠠ ᠡᠨᠡ ᠬᠠᠲᠤᠨ ᠠ᠋ᠴᠠ ᠲᠥᠷᠥᠭᠰᠡᠨ ᠶᠡᠬᠡ ᠲᠠᠢᠽᠢ᠂ ᠮᠥᠩᠬᠡ ᠰᠢᠶᠠᠡᠽᠥ᠋ᠩ ᠬᠠᠭᠠᠨ ᠭᠡᠮᠡᠨ ᠶᠢᠰᠦᠨ ᠵᠢᠯ ᠬᠠᠭᠠᠨ ᠰᠠᠭᠤᠵᠤ᠂ ᠲᠠᠪᠢᠨ ᠬᠣᠶᠠᠷ ᠨᠠᠰᠤᠨᠠ᠂ ᠰᠥᠩ ᠤᠯᠤᠰ ᠢ᠋ ᠪᠠᠢᠯᠳᠤᠵᠤ ᠠᠵᠤ᠂ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠶ᠋ᠢ ᠰᠧ ᠴᠤᠸᠠᠨ ᠤ᠋ ᠳ᠋ᠢᠶᠣᠣ ᠢᠦᠢ ᠲᠡᠢ ᠬᠡᠮᠡᠬᠦ ᠭᠠᠵᠠᠷᠠ ᠪᠠᠭᠤᠵᠤ᠂ ᠳᠥᠷᠪᠡᠨ ᠵᠦᠭ ᠨᠠᠢ᠍ᠮᠠᠨ ᠵᠣᠪᠬᠢᠰ ᠲᠤᠷ ᠴᠡᠷᠢᠭ ᠬᠤᠪᠢᠶᠠᠨ ᠭᠠᠷᠭᠠᠵᠤ ᠪᠠᠢᠯᠳᠤᠭᠰᠠᠭᠠᠷ ᠪᠠᠢᠵᠤ᠂ ᠶᠡᠬᠡ ᠶᠤᠸᠠᠨ ᠤᠯᠤᠰ ᠤ᠋ᠨ ᠱᠢᠽᠣ ᠸᠸᠨ ᠡᠤ ᠬᠤᠸᠠᠩᠳᠢ ᠶ᠋ᠢᠨ 《ᠳᠤᠮᠳᠠ ᠨᠡᠢᠭᠡᠮ 》ᠵᠦᠩ ᠲᠦᠩ ᠬᠡᠮᠡᠬᠦ ᠶ᠋ᠢᠨ ᠲᠡᠷᠢᠭᠦᠨ ᠣᠨ ᠤ᠋ ᠤᠷᠢᠳᠤ ᠵᠢᠯ ᠰᠥᠩ ᠯᠢᠽᠥ᠋ᠩ ᠦ᠋ᠨ ᠺᠠᠢ ᠴᠢᠩ ᠬᠡᠮᠡᠬᠦ ᠶ᠋ᠢᠨ ᠲᠡᠷᠢᠭᠦᠨ ᠣᠨ ᠤ᠋ ᠰᠢᠷᠬᠠᠴᠢᠨ ᠬᠣᠨᠢᠨ ᠵᠢᠯ ᠬᠠᠯᠢᠭᠰᠠᠨᠠ᠂ ᠮᠥᠨ ᠡᠨᠡ ᠰᠤᠷᠭᠠᠯᠲᠠᠢ ᠲᠠᠢᠬᠡᠦ ᠡᠴᠡ ᠲᠥᠷᠥᠭᠰᠡᠨ ᠳᠥᠷᠪᠡᠳᠦᠭᠡᠷ ᠳᠡᠭᠦᠦ ᠢᠨᠦ᠂ ᠬᠤᠪᠢᠯᠠᠢ ᠰᠡᠴᠡᠨ ᠢ᠋ᠶ᠋ᠡᠷ ᠳᠡᠭᠦᠨᠦ ᠠᠬᠠ ᠳ᠋ᠤᠷ ᠬᠥᠪᠡᠭᠦᠨ ᠦᠭᠡᠢ ᠲᠤᠯᠠ᠂ ᠬᠤᠪᠢᠯᠠᠢ ᠰᠡᠴᠡᠨ ᠱᠢᠽᠣ ᠸᠸᠨ ᠡᠤ ᠬᠤᠸᠠᠩᠳᠢ ᠰᠠᠭᠤᠷᠢᠨ ᠢ᠋ ᠵᠠᠯᠭᠠᠮᠵᠢᠯᠠᠨ ᠰᠠᠭᠤᠵᠤ᠂ ᠬᠥᠪᠡᠭᠡ ᠬᠢᠵᠠᠭᠠᠷ ᠤ᠋ᠨ ᠪᠠᠭᠠ ᠰᠠᠭᠠ ᠦᠯᠡᠳᠡᠪᠦᠷᠢ ᠤᠯᠤᠰ ᠲᠢᠪ ᠦ᠋ᠳ ᠦ᠋ᠨ ᠳᠠᠬᠢᠨ ᠳᠠᠪᠲᠠᠨ ᠤᠷᠪᠠᠵᠤ ᠬᠥᠷᠪᠡᠬᠦ᠂ ᠰᠥᠩ ᠤᠯᠤᠰ ᠤ᠋ᠨ ᠵᠡᠷᠭᠡ ᠶ᠋ᠢᠨ ᠤᠯᠤᠰ ᠤ᠋ᠳ ᠪᠠ ᠠᠨ ᠨᠠᠨ᠂ ᠵᠢᠶᠣᠤ ᡁᠢ᠂ ᠪᠠᠷᠠᠭᠤᠨ ᠡᠮᠦᠨᠡ ᠠᠷᠪᠠᠨ ᠬᠡᠳᠦᠨ ᠵᠦᠢᠯ ᠦ᠋ᠨ ᠮᠢᠶᠣᠤ᠂ ᠮᠠᠨ ᠵᠡᠷᠭᠡ ᠶ᠋ᠢᠨ ᠤᠯᠤᠰ ᠤ᠋ᠳ ᠢ᠋ ᠢᠨ ᠳᠦ ᠬᠡᠮᠡᠬᠦ – ᠡᠨᠡᠳᠬᠡᠭ ᠤᠯᠤᠰ ᠲᠤᠷ ᠣᠷᠣᠲᠠᠯᠠ᠂ ᠦᠰᠦ ᠬᠢᠯᠭᠠᠰᠤᠨ ᠤ᠋ ᠲᠡᠳᠦᠢ ᠲᠢᠪ ᠳᠡᠯᠡᠬᠡᠢ ᠤᠯᠤᠰ ᠭᠦᠷᠦᠨ ᠢ᠋ ᠦᠯᠡᠳᠡᠭᠡᠯ ᠦᠭᠡᠢ ᠴᠥᠮ ᠢ᠋ᠶ᠋ᠡᠷ ᠠᠷᠢᠭᠤᠳᠬᠠᠨ ᠴᠡᠪᠡᠷᠯᠡᠵᠦ᠂ ᠲᠦᠪᠰᠢᠳᠬᠡᠨ ᠡᠩᠬᠡᠵᠢᠭᠦᠯᠦᠭᠡᠳ᠂ ᠠᠬᠠ ᠰᠢᠶᠠᠡᠽᠥ᠋ᠩ ᠬᠠᠭᠠᠨ ᠮᠥᠩᠬᠡ ᠶ᠋ᠢᠨ ᠬᠠᠷᠠᠬᠠᠨ ᠠᠷᠪᠠᠨ ᠲᠠᠪᠤᠨ ᠨᠠᠰᠤᠨ ᠠ᠋ᠴᠠ ᠳᠥᠷᠪᠡᠨ ᠵᠦᠭ ᠢ᠋ ᠳᠠᠢᠯᠠᠨ ᠶᠠᠪᠤᠵᠤ᠂ ᠳᠥᠴᠢᠨ ᠳᠥᠷᠪᠡᠨ ᠨᠠᠰᠤᠨᠠ ᠬᠠᠭᠠᠨ ᠰᠠᠭᠤᠷᠢᠨᠠ ᠰᠠᠭᠤᠭᠰᠠᠨ ᠪᠥᠭᠡᠳ ᠪᠠᠰᠠ ᠬᠦ᠌ ᠪᠡᠶᠡ ᠶ᠋ᠢᠨ ᠠᠮᠤᠷ ᠢ᠋ ᠡᠷᠢᠬᠦ ᠦᠭᠡᠢ᠂ ᠬᠠᠭᠠᠨ ᠤ᠋ ᠭᠡᠭᠡᠨ ᠢ᠋ᠶ᠋ᠡᠷ ᠳᠠᠢᠯᠠᠨ ᠶᠠᠪᠤᠭᠰᠠᠨ ᠭᠠᠪᠢᠶᠠ ᠵᠢᠳᠬᠦᠯᠭᠡ ᠭᠠᠢᠬᠠᠮᠰᠢᠭ ᠡᠷᠳᠡᠮ ᠳ᠋ᠦ᠍ᠷ ᠬᠡᠳᠦᠨ ᠮᠢᠩᠭᠠᠨ ᠦᠰᠦᠭ ᠢ᠋ᠶ᠋ᠡᠷ ᠢᠯᠡᠷᠬᠡᠢᠯᠡᠨ ᠲᠣᠭᠠᠴᠢᠵᠤ᠂ ᠲᠠᠢ ᠮᠢᠶᠣᠤ ᠰᠦᠮᠡ ᠳ᠋ᠦ᠍ᠷ ᠮᠥᠩᠬᠡ ᠬᠠᠭᠠᠨ ᠢ᠋ ᠰᠢᠶᠠᠡᠽᠥ᠋ᠩ ᠬᠤᠸᠠᠩᠳᠢ ᠭᠡᠮᠡᠨ ᠲᠠᠬᠢᠭᠰᠠᠨ ᠪᠥᠯᠥᠭᠡ᠃ ᠲᠡᠭᠦᠨᠴᠡ᠂ ᠬᠤᠪᠢᠯᠠᠢ ᠰᠡᠴᠡᠨ ᠱᠢᠽᠣ ᠬᠠᠭᠠᠨ᠂ ᠸᠸᠨ ᠡᠤ ᠬᠤᠸᠠᠩᠳᠢ᠂ ᠳᠥᠴᠢᠨ ᠵᠢᠷᠭᠤᠭᠠᠨ ᠰᠡᠭᠦᠳᠡᠷ ᠰᠠᠭᠤᠷᠢᠨᠠ ᠰᠠᠭᠤᠵᠤ᠂ ᠨᠠᠶᠠᠨ ᠰᠡᠭᠦᠳᠡᠷ ᠬᠦᠷᠦᠭᠰᠡᠨ ᠪᠥᠯᠥᠭᠡ᠃ ᠡᠨᠡ ᠬᠣᠶᠠᠷ ᠭᠠᠢᠬᠠᠮᠰᠢᠭᠲᠤ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠴᠥᠮ ᠢ᠋ᠶ᠋ᠡᠷ ᠡᠨᠡᠬᠦ ᠬᠣᠩᠭᠢᠷᠠᠳ ᠤ᠋ᠨ ᠰᠤᠷᠭᠠᠯᠲᠠᠢ ᠪᠡᠬᠢ ᠲᠠᠢᠬᠡᠦ ᠡᠴᠡ ᠮᠡᠨᠳᠦᠯᠡᠭᠰᠡᠨ ᠪᠥᠯᠥᠭᠡ᠃ ᠡᠨᠡ ᠲᠠᠢᠬᠡᠦ ᠤᠭ ᠲᠤᠷ ᠬᠤᠸᠠᠩᠬᠡᠦ ᠰᠠᠭᠤᠭᠰᠠᠨ ᠪᠤᠰᠤ ᠪᠤᠶᠤ᠃ ᠳᠡᠭᠦᠨᠦ ᠪᠡᠶᠡ ᠡᠴᠡ ᠲᠥᠷᠥᠭᠰᠡᠨ ᠬᠣᠶᠠᠷ ᠬᠥᠪᠡᠭᠦᠨ ᠮᠥᠩᠬᠡ ᠬᠤᠪᠢᠯᠠᠢ ᠠᠬᠠ ᠳᠡᠭᠦᠦ ᠬᠣᠶᠠᠭᠤᠯᠠ ᠵᠠᠯᠭᠠᠯᠳᠤᠭᠠ ᠪᠠᠷ ᠬᠠᠭᠠᠨ ᠰᠠᠭᠤᠵᠤ᠂ ᠡᠨᠡ ᠰᠤᠷᠭᠠᠯᠲᠠᠢ ᠪᠡᠬᠢ ᠲᠠᠢᠬᠡᠦ ᠨᠠᠶᠠᠨ ᠨᠠᠰᠤ ᠭᠠᠷᠴᠤ ᠬᠣᠶᠠᠷ ᠬᠠᠭᠠᠨ ᠤ᠋ ᠡᠬᠡ ᠲᠠᠢᠬᠡᠦ ᠶᠠᠪᠤᠭᠰᠠᠨ ᠢ᠋ᠶ᠋ᠠᠷ ᠲᠠᠢᠬᠡᠦ ᠬᠡᠮᠡᠵᠦᠬᠦᠢ᠃ ᠡᠨᠡ ᠴᠦ᠍ ᠶᠡᠬᠡ ᠬᠣᠵᠢᠮ ᠤ᠋ᠨ ᠬᠡᠷᠡᠭ ᠲᠤᠯᠠ ᠡᠳᠦᠭᠡ ᠨᠠᠷᠢᠪᠴᠢᠯᠠᠨ ᠲᠣᠭᠠᠴᠢᠬᠤ ᠦᠭᠡᠢ᠃ ᠭᠠᠭᠴᠠ ᠬᠦ᠌ ᠡᠨᠡ ᠰᠤᠷᠭᠠᠯᠲᠠᠢ ᠲᠠᠢᠬᠡᠦ ᠶ᠋ᠢᠨ ᠤᠯᠠᠭᠠᠨ ᠪᠠᠷᠰ ᠵᠢᠯ ᠠᠷᠪᠠᠨ ᠲᠠᠪᠤᠨ ᠨᠠᠰᠦᠨᠠ ᠳᠥᠲᠥᠭᠡᠷ ᠲᠠᠢᠽᠢ ᠲᠣᠯᠢ ᠳ᠋ᠤᠷ ᠶᠡᠬᠡ ᠬᠠᠲᠤᠨ ᠪᠣᠯᠭᠠᠨ ᠡᠷᠭᠦᠮᠵᠢᠯᠡᠬᠦ ᠶ᠋ᠢ ᠳᠤᠷᠠᠳᠬᠤᠢ ᠶ᠋ᠢᠨ ᠲᠡᠳᠦᠢ ᠳ᠋ᠦ᠍ᠷ ᠬᠣᠵᠢᠮ ᠤ᠋ᠨ ᠬᠡᠷᠡᠭ ᠢ᠋ ᠲᠣᠪᠬᠢᠨ᠂ ᠬᠣᠢᠨᠠ ᠮᠡᠳᠡᠬᠦᠶᠡ ᠬᠢᠯᠪᠠᠷ ᠬᠡᠮᠡᠪᠡᠢ᠃
ᠲᠡᠨᠳᠡᠴᠡ᠂ ᠵᠠᠭᠤᠨ ᠲᠦᠰᠢᠮᠡᠳ ᠵᠥᠪᠳᠡᠵᠦ᠂ ᠬᠠᠭᠠᠨ ᠬᠤᠸᠠᠩᠳᠢ ᠶ᠋ᠢᠨ ᠶᠢᠰᠦᠨ ᠳᠡᠰ ᠦ᠋ᠨ ᠬᠠᠲᠤᠨ᠂ ᠸᠠᠩ ᠬᠥᠮᠦᠨ ᠦ᠌ ᠳᠣᠯᠣᠭᠠᠨ ᠳᠡᠰ ᠦ᠋ᠨ ᠬᠠᠲᠤᠨ᠂ ᠮᠣᠵᠢ ᠶ᠋ᠢᠨ ᠡᠵᠡᠳ ᠦ᠋ᠨ ᠲᠠᠪᠤᠨ ᠳᠡᠰ ᠦ᠋ᠨ ᠬᠠᠲᠤᠨ᠂ ᠲᠠᠢᠹᠦ᠋ ᠲᠦᠰᠢᠮᠡᠳ ᠦ᠋ᠨ ᠭᠤᠷᠪᠠᠨ ᠳᠡᠰ ᠦ᠋ᠨ ᠬᠠᠲᠤᠳ᠂ ᠰᠤᠯᠠ ᠢᠷᠭᠡᠳ ᠴᠦ᠍ ᠨᠢᠭᠡᠨ ᠭᠡᠷᠭᠡᠢ᠂ ᠬᠣᠶᠠᠷ ᠲᠠᠲᠠᠪᠤᠷᠢ ᠬᠡᠮᠡᠬᠦᠶᠡ᠂ ᠴᠢᠩᠭᠢᠰ ᠬᠠᠭᠠᠨ ᠳᠠ ᠬᠤᠸᠠᠩᠳᠢ ᠪᠥᠭᠡᠳ ᠭᠤᠷᠪᠠᠨ ᠤ᠋ ᠨᠢᠭᠡᠨ ᠭᠡᠰᠢᠭᠦᠨ ᠳᠤᠲᠠᠭᠤ ᠶ᠋ᠢ ᠤᠯᠤᠰ ᠤ᠋ᠨ ᠨᠠᠭᠠᠴᠤ ᠶᠡᠬᠡ ᠪᠡᠢᠯᠡ᠂ ᠲᠡᠢᠰᠢ ᠬᠣᠩᠭᠢᠷᠠᠳ ᠤ᠋ᠨ ᠳ᠋ᠠᠢ ᠰᠡᠴᠡᠨ ᠢ᠋ᠶ᠋ᠡᠷ ᠲᠠᠢᠽᠦ ᠴᠢᠩᠭᠢᠰ ᠬᠠᠭᠠᠨᠠ ᠠᠢᠯᠠᠳᠬᠠᠯᠭᠠᠭᠰᠠᠨᠠ᠂ ᠲᠠᠢᠽᠦ ᠴᠢᠩᠭᠢᠰ ᠬᠠᠭᠠᠨ᠂ ᠥᠴᠦᠬᠡᠨ ᠮᠦᠰᠢᠶᠡᠵᠦ᠂ ᠵᠠᠷᠯᠢᠭ ᠪᠣᠯᠤᠷᠤᠨ᠂ ᠲᠡᠷᠡᠬᠦ ᠠᠯᠲᠠᠨ ᠠᠮᠠᠨ ᠤ᠋ ᠵᠠᠷᠯᠢᠭ ᠤ᠋ᠨ ᠦᠭᠡᠰ ᠢᠨᠦ᠄
ᠡᠷᠲᠡᠨ ᠡᠴᠡ ᠲᠡᠢᠮᠦ ᠶᠣᠰᠣᠨ ᠪᠠᠢᠬᠤ ᠠᠨᠤ ᠪᠠᠢᠵᠤᠬᠤᠢ
ᠡᠷᠬᠢᠯᠡᠭᠰᠡᠨ ᠢᠨᠤ ᠦᠷᠡ ᠬᠥᠪᠡᠭᠦᠳ ᠢ᠋ ᠬᠢᠴᠢᠶᠡᠭᠰᠡᠨ ᠢᠨᠤ ᠪᠣᠯᠠᠢ᠃
ᠡᠳᠦᠭᠡ ᠨᠠᠳᠤᠷ ᠳᠥᠷᠪᠡᠨ ᠬᠥᠪᠡᠭᠦᠨ ᠲᠠᠪᠤᠭᠠᠳ ᠠᠴᠢ ᠠᠬᠤᠢᠡ
ᠡᠬᠡᠨᠡᠷ ᠬᠠᠲᠤᠳ ᠳᠡᠮᠡᠢᠯᠡ ᠣᠯᠠᠨ ᠢ᠋ᠶ᠋ᠠᠷ ᠶᠠᠭᠤ ᠬᠢᠬᠦ ᠠᠵᠢ ?
ᠡᠵᠡᠨ ᠬᠠᠭᠠᠨ ᠢ᠋ ᠡᠷᠳᠡᠮ ᠥᠷᠥᠰᠢᠶᠡᠯ ᠢ᠋ᠶ᠋ᠡᠷ ᠰᠠᠭᠤᠬᠤ ᠪᠣᠢ ᠢ᠋ᠠ
ᠡᠮᠡ ᠬᠠᠲᠤᠳ ᠤ᠋ᠨ ᠲᠣᠭᠠ ᠨᠡᠷᠡ ᠳ᠋ᠦ᠍ᠷ ᠪᠠᠢᠬᠤ ᠠᠨᠤ ᠪᠤᠰᠤ
ᠡᠷᠲᠡᠨ ᠦ᠌ ᠬᠠᠳ ᠤ᠋ᠳ ᠡᠭᠡᠨᠡᠷᠡ ᠡᠪᠳᠡᠷᠡᠭᠰᠡᠨ ᠣᠯᠠᠨᠲᠠ ᠪᠢᠰᠢᠦ ?
ᠡᠷᠬᠡᠪᠰᠢ ᠲᠡᠷᠡ ᠲᠣᠭᠠ ᠪᠠᠷ ᠬᠡᠦᠬᠡᠳ ᠠᠴᠢᠨᠠᠷ ᠰᠤᠷᠭᠠᠮᠲᠠᠢ ᠤᠤ ?
ᠡᠨᠡ ᠴᠦ᠍ ᠨᠢᠭᠡᠨ ᠴᠢᠬᠤᠯᠠ ᠪᠤᠰᠤ ᠭᠡᠰᠢᠭᠦᠨ
ᠠᠯᠢᠪᠠ ᠵᠦᠢᠯ ᠠᠷᠪᠠᠨ ᠬᠤᠪᠢ ᠪᠦᠷᠢᠳᠪᠡᠰᠦ
ᠠᠰᠢᠳᠠ ᠰᠠᠢᠨ ᠦᠭᠡᠢ ᠪᠠᠢᠳᠠᠭ ᠪᠥᠯᠥᠭᠡ᠃
ᠠᠯᠢᠯᠠ ᠳᠤᠲᠠᠭᠤ ᠶ᠋ᠢ ᠬᠡᠦᠬᠡᠳ ᠠᠴᠢᠨᠠᠷ ᠭᠦᠢᠴᠡᠳᠬᠡᠲᠦᠭᠡᠢ
ᠡᠭᠦᠨ ᠢ᠋ ᠳᠠᠬᠢᠨ ᠠᠢᠯᠠᠳᠬᠠᠬᠤ ᠬᠡᠷᠡᠭ ᠦᠭᠡᠢ᠃
ᠡᠷᠬᠢᠯᠡᠬᠦ ᠢᠨᠦ ᠤᠯᠤᠰ ᠲᠥᠷᠥ ᠶ᠋ᠢ ᠵᠢᠳᠬᠦᠨ ᠪᠦᠲᠦᠭᠡᠬᠦ
ᠣᠯᠠᠨ ᠬᠢᠩ ᠰᠠᠢᠳ ᠤ᠋ᠳ
ᠲᠦᠰᠢᠮᠡᠳ ᠪᠠᠭᠠᠲᠤᠳ ᠴᠡᠷᠢᠭ ᠢᠷᠭᠡᠨ ᠮᠢᠨᠦ ᠪᠣᠯᠠᠢ᠃
ᠬᠡᠮᠡᠵᠦ :《ᠡᠬᠡ ᠲᠠᠢᠬᠡᠦ ᠶ᠋ᠢᠨ ᠡᠷᠳᠡᠮ ᠢ᠋ᠶ᠋ᠡᠷ ᠡᠨᠡ ᠪᠡᠶᠡ ᠶ᠋ᠢ ᠮᠢᠨᠦ ᠬᠠᠮᠠᠭᠠᠯᠠᠨ ᠥᠰᠬᠡᠬᠦᠶᠡ᠂ ᠡᠴᠢᠭᠡ ᠯᠢᠶᠧ ᠽᠦ᠍ ᠥᠭᠡᠳᠡ ᠪᠣᠯᠤᠨ ᠡᠬᠡ ᠲᠠᠢᠬᠡᠦ ᠴᠡᠷᠢᠭ ᠢ᠋ ᠵᠠᠬᠢᠷᠤᠨ ᠡᠴᠢᠭᠰᠡᠳ ᠤᠷᠪᠠᠭᠰᠠᠳ ᠢ᠋ ᠡᠴᠦᠳᠯᠡᠭᠦᠯᠦᠨ ᠳᠠᠢᠯᠠᠵᠤ᠂ ᠡᠪᠦᠭᠡᠳ ᠦ᠋ᠨ ᠲᠥᠷᠥ᠂ ᠪᠸᠲ᠋ᠠ᠋ ᠤᠯᠤᠰ ᠢ᠋ ᠰᠠᠬᠢᠵᠤ᠂ ᠡᠯᠳᠡᠪ ᠢ᠋ᠶ᠋ᠡᠷ ᠵᠣᠪᠠᠨ ᠵᠦᠳᠡᠵᠦ᠂ ᠪᠢᠳᠡᠨ ᠤ ᠠᠬᠠ ᠳᠡᠭᠦᠦ ᠨᠠᠷ ᠢ᠋ ᠥᠰᠬᠡᠬᠦᠶᠡ᠂ ᠡᠬᠡ ᠶ᠋ᠢᠨ ᠵᠠᠷᠯᠢᠭ ᠠ᠋ᠴᠠ ᠭᠠᠳᠠᠭᠤᠷ ᠭᠠᠷᠴᠤ᠂ ᠭᠠᠭᠴᠠ ᠮᠣᠷᠢ ᠨᠢᠭᠡᠨ ᠢᠯᠳᠦ ᠪᠡᠷ ᠡᠴᠢᠭᠡ ᠶ᠋ᠢᠨ ᠥᠰᠲᠦ ᠤᠷᠭᠣᠳᠤᠤᠯ ᠪᠣᠭᠣᠯ ᠤ᠋ᠨ ᠨᠢᠭᠡᠨ ᠭᠡᠷ ᠢ᠋ ᠪᠠᠷᠠᠲᠠᠯᠠ ᠠᠯᠠᠵᠤ ᠲᠡᠢᠨ ᠳᠡᠭᠳᠡᠭᠡᠨ᠂ ᠮᠢᠨᠦ ᠪᠡᠶᠡ ᠲᠠᠲ᠋ᠠᠷ ᠬᠢᠭᠡᠳ ᠲᠠᠢᠴᠢᠭᠤᠳ ᠤ᠋ᠨ ᠲᠠᠲᠠᠭᠰᠠᠨ ᠵᠡᠯᠡ ᠳ᠋ᠦ᠍ᠷ ᠤᠨᠠᠵᠤ ᠪᠠᠷᠢᠭᠳᠠᠨ ᠠᠪᠠᠴᠢᠭᠳᠠᠵᠤ᠂ ᠳᠥᠩᠭᠡᠯᠡᠭᠳᠡᠨ ᠬᠠᠳᠠᠭᠠᠯᠠᠭᠳᠠᠬᠤᠶᠠ᠂ ᠲᠡᠭᠷᠢ ᠰᠠᠬᠢᠭᠤᠯᠰᠤᠨ ᠤ᠋ ᠬᠠᠷᠠᠭᠠᠯᠵᠠᠯᠭᠠ᠂ ᠰᠦᠯᠳᠡ ᠡᠴᠢᠭᠡ ᠶ᠋ᠢᠨ ᠢᠪᠡᠭᠡᠯ ᠢ᠋ᠶ᠋ᠡᠷ ᠳᠥᠩᠭᠡ ᠶ᠋ᠢ ᠰᠡᠳᠡ ᠢᠰᠬᠦᠯᠦᠨ᠂ ᠬᠠᠳᠠᠭᠠᠯᠠᠭᠴᠢ ᠮᠠᠭᠤ ᠬᠠᠷᠢᠶᠠᠯᠳᠤ ᠬᠣᠶᠠᠷ ᠪᠣᠭᠣᠯ ᠢ᠋ ᠭᠠᠩ ᠳᠥᠩᠭᠡ ᠪᠡᠷ ᠴᠣᠬᠢᠨ ᠠᠯᠠᠵᠤ᠂ ᠬᠦᠵᠦᠭᠦᠨ ᠤ ᠭᠢᠨᠵᠢ ᠶ᠋ᠢ ᠵᠡᠭᠦᠭᠰᠡᠭᠡᠷ ᠡᠪᠡᠰᠦᠲᠦ ᠨᠠᠭᠤᠷᠠᠨᠠ ᠳᠡᠪᠡᠯ ᠬᠤᠪᠴᠠᠳ ᠲᠠᠢ ᠪᠠᠷ ᠣᠷᠣᠵᠤ᠂ ᠠᠮᠠᠨ ᠢ᠋ᠶ᠋ᠠᠨ ᠭᠠᠷᠭᠠᠵᠤ ᠨᠢᠭᠤᠨ ᠬᠡᠪᠲᠡᠬᠦᠶᠡ᠂ ᠰᠦᠯᠲᠠᠨ ᠤ᠋ ᠰᠤᠷᠬᠠᠨ ᠰᠢᠷᠠ ᠨᠠᠮᠠᠶ᠋ᠢ ᠲᠠᠨᠢᠵᠤ ᠭᠡᠷ ᠲᠦ᠍ᠷ ᠢ᠋ᠶ᠋ᠡᠨ ᠡᠴᠢᠭᠡᠳ᠂ ᠨᠡᠩᠵᠢᠬᠦ ᠠᠷᠠᠳ ᠠ᠋ᠴᠠ ᠵᠠᠢᠯᠠᠭᠤᠯᠤᠨ᠂ ᠬᠣᠨᠢᠨ ᠤ᠋ ᠤᠩᠭᠠᠰᠤᠨ ᠳᠡᠷᠭᠡᠨᠡ ᠨᠢᠭᠤᠯᠭᠠᠨ ᠭᠠᠷᠭᠠᠵᠤ᠂ ᠬᠣᠨᠢ ᠠᠯᠠᠵᠤ ᠬᠦᠨᠡᠰᠦ ᠪᠣᠯᠭᠠᠨ᠂ ᠡᠷᠡᠮᠡᠭ ᠰᠢᠷᠭᠠ ᠠᠭᠲᠠ ᠪᠠᠨ ᠡᠮᠡᠭᠡᠯᠯᠡᠨ ᠥᠭᠴᠦ ᠡᠷᠬᠡ ᠬᠥᠪᠡᠭᠦᠨ ᠬᠦᠯᠦᠭ ᠴᠢᠯᠠᠭᠤᠨ ᠢ᠋ᠶ᠋ᠠᠨ ᠳᠠᠭᠠᠭᠤᠯᠤᠨ ᠬᠥᠷᠭᠡᠭᠦᠯᠦᠭᠰᠡᠨ ᠢᠨᠦ ᠲᠡᠷᠡ ᠪᠥᠯᠥᠭᠡ᠃ ᠲᠡᠷᠡ ᠦᠶᠡ ᠳ᠋ᠦ᠍ᠷ ᠲᠠᠢᠴᠢᠭᠤᠳ ᠲᠤᠷ ᠲᠠᠰᠤᠯᠤᠭᠳᠠᠨ᠂ ᠲᠠᠲ᠋ᠠᠷ ᠲᠤᠷ ᠲᠠᠯᠬᠢᠭᠳᠠᠭᠰᠠᠨ ᠪᠥᠭᠡᠰᠦ᠂ ᠡᠳᠦᠭᠡᠬᠢ ᠦᠶᠡ ᠶ᠋ᠢᠨ ᠡᠳᠦᠢᠴᠢᠨᠡᠭᠡᠨ ᠲᠦᠭ ᠲᠦᠮᠡᠨ ᠦ᠌ ᠲᠥᠷᠥ ᠶᠣᠰᠣᠨ ᠬᠠᠮᠢᠭᠠ ᠠ᠋ᠴᠠ ᠢᠷᠡᠬᠦ ᠪᠣᠢ ? ᠲᠡᠷᠡ ᠦᠶᠡ ᠶ᠋ᠢᠨ ᠬᠥᠵᠦᠭᠦᠨᠡ ᠵᠡᠭᠦᠭᠰᠡᠨ ᠲᠡᠮᠦᠷ ᠣᠨᠢᠰᠣ ᠶ᠋ᠢ ᠰᠦᠬᠡ ᠪᠡᠷ ᠲᠦᠭᠰᠡᠨ ᠬᠡᠮᠬᠡᠴᠢᠬᠦ ᠲᠡᠷᠡ ᠲᠤᠬᠠᠢ ᠳ᠋ᠤᠷ ᠬᠡᠨ ᠡᠨᠡ ᠬᠠᠭᠠᠨ ᠲᠥᠷᠥ ᠶ᠋ᠢᠨ ᠬᠠᠮᠤᠭ ᠪᠦᠭᠦᠳᠡᠭᠡᠷ ᠢ᠋ ᠮᠡᠳᠡᠬᠦ ᠪᠥᠯᠥᠭᠡ 》ᠭᠡᠮᠡᠨ ᠠᠯᠲᠠᠨ ᠬᠤᠨᠳᠠᠭᠠ ᠳ᠋ᠤᠷ ᠠᠷᠢᠬᠢ ᠬᠢᠯᠭᠡᠨ ᠮᠣᠳᠣᠷ ᠢ᠋ᠶ᠋ᠠᠷ ᠰᠣᠶᠣᠷᠬᠠᠨ :
ᠤᠰᠤᠲᠤ ᠡᠪᠡᠰᠦᠨᠡ ᠬᠡᠪᠲᠡᠬᠦ ᠦᠶᠡ ᠳ᠋ᠦ᠍ᠷ ᠲᠠᠨᠢᠭᠰᠠᠨ ᠲᠠᠨᠢᠯ
ᠤᠩᠭᠠᠰᠤᠨ ᠤ᠋ ᠳᠡᠷᠭᠡᠨᠡ ᠨᠢᠭᠤᠵᠤ ᠭᠠᠷᠭᠠᠭᠰᠠᠨ ᠠᠴᠢᠲᠠᠨ ᠬᠥᠮᠦᠨ᠂
ᠣᠨᠢᠰᠣᠲᠤ ᠰᠣᠨᠣᠨᠠᠭ ᠢ᠋ ᠣᠭᠲᠣᠴᠢᠨ ᠬᠡᠮᠬᠡᠴᠢᠭᠰᠡᠨ ᠨᠥᠬᠥᠷ
ᠤᠤᠭᠠᠨ ᠦᠷᠡ ᠪᠡᠷ ᠤᠷᠲᠤᠳᠠ ᠬᠠᠮᠠᠭᠠᠯᠠᠭᠤᠯᠤᠭᠰᠠᠨ ᠲᠡᠢᠰᠢ᠃
ᠭᠡᠮᠡᠨ ᠵᠠᠷᠯᠢᠭ ᠪᠣᠯᠤᠨ:《ᠰᠦᠯᠲᠠᠨ ᠤ᠋ ᠰᠤᠷᠬᠠᠨ ᠰᠢᠷᠠ ᠶ᠋ᠢ ᠠᠨᠤ＜ᠶᠢᠰᠦᠨ ᠡᠩ ᠦ᠋ᠨ ᠪᠦᠭᠦᠳᠡ ᠰᠠᠢᠳ ᠲᠦᠰᠢᠮᠡᠳ ᠦ᠋ᠨ ᠲᠡᠷᠢᠭᠦᠨ ᠦ᠌ ᠲᠡᠷᠢᠭᠦᠨ ᠲᠡᠢᠰᠢ᠂ ᠲᠦᠰᠢᠮᠡᠯ ＞ ᠪᠥᠭᠡᠳ ᠭᠡᠷ ᠦ᠋ᠨ ᠬᠤᠪᠢᠨᠠ ＜ᠮᠢᠩᠭᠠᠨ ᠡᠷᠦᠬᠡ ᠶ᠋ᠢ ᠵᠠᠬᠢᠷᠬᠤ᠂ ᠶᠡᠬᠡ ᠪᠡᠢᠯᠡ ᠨᠣᠶᠠᠨ ＞ ᠬᠠᠪᠰᠤᠷᠭᠠᠵᠤ᠂ ᠦᠶᠡ ᠤᠯᠠᠷᠢᠨ ᠲᠠᠰᠤᠷᠠᠯ ᠦᠭᠡᠢ ᠵᠠᠯᠭᠠᠮᠵᠢᠯᠠᠭᠤᠯ ! 》᠂ ᠵᠢᠴᠢ ᠤᠷᠢᠶᠠᠩᠬᠠᠨ ᠤ᠋ ᠡᠵᠡᠨ ᠵᠠᠷᠴᠢᠭᠤᠲᠠᠢ ᠥᠲᠡᠭᠦᠰ ᠲᠣᠷ ᠠᠯᠲᠠᠨ ᠬᠤᠨᠳᠠᠭᠠᠲᠤ ᠠᠷᠠᠵᠠ ᠶ᠋ᠢ ᠮᠣᠳᠣᠷ ᠢ᠋ᠶ᠋ᠠᠷ ᠬᠠᠢᠷᠠᠯᠠᠨ ᠵᠠᠷᠯᠢᠭ ᠪᠣᠯᠤᠷᠤᠨ᠄
ᠳᠡᠯᠢᠭᠦᠨ ᠪᠣᠯᠳᠣᠭ ᠲᠤᠷ ᠴᠠᠭᠠᠨ ᠭᠡᠷᠡᠯ ᠢ᠋ ᠲᠠᠨᠢᠭᠰᠠᠨ
ᠳᠠᠷᠢ ᠳᠡᠭᠡᠭᠰᠢ ᠥᠯᠵᠡᠢᠲᠦ ᠥᠯᠥᠭᠡᠢ ᠳ᠋ᠦ᠍ᠷ ᠣᠷᠣᠭᠤᠯᠤᠭᠰᠠᠨ᠂
ᠲᠠᠮᠲᠤ ᠦᠷᠡ ᠪᠡᠨ ᠲᠤᠰᠠᠯᠠᠭᠴᠢ ᠲᠡᠳᠬᠦᠭᠴᠢ ᠪᠣᠯᠭᠠᠭᠰᠠᠨ
ᠳᠡᠭᠡᠳᠦ ᠤᠷᠤᠭ ᠤ᠋ᠨ ᠮᠡᠷᠭᠡᠨ ᠥᠲᠡᠭᠦᠰ ᠲᠠᠢᠰᠢ !
ᠮᠥᠨ ᠬᠦ᠌ ᠭᠡᠷ ᠦ᠋ᠨ ᠬᠤᠪᠢᠨᠠ᠂ ᠮᠢᠩᠭᠠᠨ ᠡᠷᠦᠬᠡ ᠶ᠋ᠢ ᠵᠠᠬᠢᠷᠬᠤ ＜ ᠶᠡᠬᠡ ᠪᠡᠢᠯᠡ ᠨᠣᠶᠠᠨ ＞ ᠬᠠᠪᠰᠤᠷᠭᠠᠵᠤ᠂ ᠪᠠᠰᠠ ᠬᠦ᠌ ᠦᠶᠡ ᠤᠯᠠᠷᠢᠨ ᠤᠷᠤᠭ ᠪᠠᠷᠢᠬᠤ ᠶ᠋ᠢ ᠲᠠᠰᠤᠷᠠᠯ ᠦᠭᠡᠢ ᠵᠠᠯᠭᠠᠮᠵᠢᠯᠠᠭᠤᠯ᠃ ᠢᠯᠡᠭᠦᠨᠡ ᠶ᠋ᠢᠨ ᠨᠤᠲᠤᠭ ᠤ᠋ᠨ ᠴᠠᠢᠯᠵᠢ ᠠᠢᠮᠠᠭ ᠤ᠋ᠨ ᠬᠦᠷᠭᠡᠨ ᠲᠠᠪᠤᠨᠠᠩ ᠪᠣᠳᠣ ᠬᠢᠭᠡᠳ ᠡᠨᠡ ᠤᠷᠢᠶᠠᠩᠬᠠᠨ ᠠᠢᠮᠠᠭ ᠤ᠋ᠨ ᠵᠡᠯᠮᠡ ᠲᠠᠨ ᠤ᠋ ᠡᠨᠡ ᠤᠷᠤᠭ ᠢ᠋ ᠬᠠᠮᠤᠭ ᠤᠯᠤᠰ ᠢ᠋ ᠬᠣᠷᠢᠶᠠᠨ᠂ ᠬᠠᠭᠠᠨ ᠲᠥᠷᠥ ᠪᠦᠲᠦᠭᠰᠡᠨ ᠦ᠌ ᠬᠣᠢᠨᠠ ᠤᠷᠤᠭ ᠪᠣᠯᠭᠠᠨ ᠪᠠᠷᠢᠭᠰᠠᠨ ᠤᠯᠤᠰ ᠠᠢᠮᠠᠭ ᠲᠤᠷ ᠠᠳᠠᠯᠢ ᠪᠤᠰᠤ ᠠᠨᠤ ᠪᠦᠲᠦᠬᠦᠢ ᠶ᠋ᠢᠨ ᠤᠷᠢᠳᠠ ᠪᠥᠭᠰᠢᠵᠦ ᠵᠣᠪᠠᠨ ᠪᠣᠯᠬᠤ ᠶ᠋ᠢᠨ ᠤᠷᠢᠳᠠ ᠪᠣᠭᠣᠭᠳᠠᠵᠤ ᠵᠦᠳᠡᠭᠰᠡᠨ ᠦ᠌ ᠲᠤᠯᠠᠳᠠ᠂ ᠬᠠᠮᠲᠤ ᠵᠢᠳᠬᠦᠵᠦ ᠤᠯᠤᠰ ᠢ᠋ ᠪᠦᠲᠦᠭᠡᠨ ᠬᠠᠭᠠᠨ ᠪᠣᠯᠭᠠᠭᠰᠠᠨ ᠭᠠᠪᠢᠶᠠ ᠠ᠋ᠴᠠ ᠭᠠᠳᠠᠨᠠ᠂ ᠡᠷᠲᠡ ᠡᠳᠦᠷ᠂ ᠵᠢᠭᠠᠯ ᠬᠠᠨ ᠤ᠋ ᠠᠷᠤ᠂ ᠢᠯᠠᠮᠠ ᠬᠠᠨ ᠤ᠋ ᠥᠯᠭᠡ ᠳ᠋ᠦ᠍ᠷ ᠲᠠᠲ᠋ᠠᠷ ᠤ᠋ᠨ ᠮᠡᠭᠵᠢᠨ ᠰᠡᠭᠦᠯ᠂ ᠤᠷᠭᠤᠯ ᠬᠣᠶᠠᠭᠤᠯᠠ ᠬᠡᠳᠡᠷ ᠬᠠᠪᠴᠢᠯ ᠳ᠋ᠤᠷ ᠰᠠᠮᠠᠭᠤᠨ ᠵᠡᠪᠡ ᠶ᠋ᠢᠨ ᠬᠤᠯᠠᠭᠠᠢ ᠴᠡᠷᠢᠭ ᠢ᠋ᠶ᠋ᠡᠷ ᠬᠠᠭᠠᠵᠤ ᠪᠠᠢᠯᠳᠤᠨ᠂ ᠮᠥᠨᠳᠥᠷ ᠪᠣᠷᠣᠭᠠᠨ ᠳᠡᠯᠡᠳᠬᠦ ᠮᠡᠲᠦ ᠵᠠᠢ ᠵᠠᠪᠰᠠᠷ ᠦᠭᠡᠢ ᠬᠠᠷᠪᠤᠬᠤᠢ ᠳ᠋ᠤᠷ ᠰᠡᠴᠡᠨ ᠵᠡᠯᠮᠡ ᠰᠠᠢᠳ ᠢ᠋ᠶ᠋ᠠᠷ ᠲᠦᠮᠡᠨ ᠵᠡᠪᠡ ᠶ᠋ᠢᠨ ᠡᠰᠡᠷᠭᠦ ᠰᠢᠷᠭᠤᠯᠤᠨ ᠣᠷᠣᠵᠤ᠂ ᠰᠢᠷᠠ ᠳᠡᠪᠰᠡᠭ ᠦ᠋ᠨ ᠳᠡᠭᠡᠷᠡᠬᠢ ᠬᠠᠷᠠ ᠳᠡᠰ ᠰᠢᠪᠠᠭᠤᠨ ᠤ᠋ ᠲᠤᠭ ᠢ ᠪᠠᠷᠢᠭᠰᠠᠨ ᠵᠠᠩᠵᠤᠨ ᠢ᠋ ᠴᠠᠪᠴᠢᠨ ᠤᠨᠠᠭᠠᠵᠤ᠂ ᠲᠤᠭ ᠤ᠋ᠨ ᠲᠣᠯᠣᠭᠠᠢ ᠶ᠋ᠢ ᠤᠷᠤᠭᠤ ᠬᠠᠨᠳᠤᠭᠤᠯᠤᠨ ᠬᠠᠳᠬᠤᠵᠤ᠂ ᠬᠠᠷᠭᠢᠰ ᠬᠤᠯᠠᠭᠠᠢ ᠰᠠᠮᠠᠭᠤᠷᠠᠯᠴᠠᠨ ᠳᠠᠷᠤᠭᠳᠠᠵᠤ᠂ ᠬᠠᠮᠲᠤ ᠶᠠᠪᠤᠭᠰᠠᠨ ᠪᠢᠳᠡᠨ ᠦ᠌ ᠡᠵᠡᠨ ᠰᠠᠢᠳ ᠲᠣᠯᠣᠭᠠᠭᠤᠯᠠ ᠰᠠᠶᠢ ᠠᠮᠢᠨ ᠣᠯᠵᠤ ᠭᠠᠷᠤᠨ᠂ ᠠᠯᠢᠪᠠ ᠬᠤᠯᠠᠭᠠᠢ ᠶ᠋ᠢ ᠠᠷᠢᠯᠭᠠᠭᠰᠠᠨ ᠭᠠᠪᠢᠶᠠ ᠳ᠋ᠤᠷ ᠰᠡᠴᠡᠨ ᠤᠬᠠᠭᠠᠨ ᠤ᠋ ᠰᠠᠢᠨ ᠢ᠋ᠶ᠋ᠠᠷ ᠰᠡᠷᠢᠭᠦᠨ ᠪᠦᠭᠦᠳᠡᠭᠡᠷ ᠠᠮᠢᠳᠤᠷᠠᠭᠰᠠᠨ ᠲᠤᠯᠠ᠂ ᠰᠡᠴᠡᠨ ᠰᠡᠴᠢᠭᠯᠢᠭ ᠦᠷᠡ ᠪᠡᠨ ᠴᠡᠴᠡᠬᠢ ᠬᠥᠪᠡᠭᠦᠨ ᠳ᠋ᠦ᠍ᠷ ᠢᠨᠤ ᠬᠣᠯᠪᠣᠵᠤ᠂ ᠴᠡᠷᠢᠭ ᠦ᠋ᠨ ᠭᠠᠪᠢᠶᠠ ᠳ᠋ᠤᠷ ᠠᠨᠤ ᠱᠠᠩᠨᠠᠨ ᠡᠷᠭᠦᠮᠵᠢᠯᠡᠭᠰᠡᠨ ᠢᠨᠤ ᠪᠣᠢ ᠶᠠ᠃ ᠠᠳᠠᠪᠠᠰᠢ ᠥᠪᠡᠷᠦᠨ ᠦᠷᠡ ᠭᠦᠩᠵᠦ ᠪᠡᠨ ᠥᠭᠪᠡ ᠭᠡᠮᠡᠨ ᠡᠷᠬᠢᠯᠡᠨ ᠡᠷᠭᠦᠭᠰᠡᠨ ᠢᠨᠤ ᠪᠤᠰᠤ ᠶ᠋ᠢ ᠣᠯᠠᠨ ᠢ᠋ᠶ᠋ᠠᠷ ᠮᠡᠳᠡᠭᠳᠡᠬᠦᠢ᠃ ᠰᠦᠯᠲᠠᠨ ᠤ᠋ ᠲᠡᠷᠢᠭᠦᠯᠡᠭᠰᠡᠨ ᠲᠦᠰᠢᠮᠡᠯ ᠰᠤᠷᠬᠠᠨ ᠰᠢᠷᠠ ᠲᠡᠢᠰᠢ᠂ ᠣᠯᠬᠣᠨᠤᠳ ᠤ᠋ᠨ ᠦᠨᠳᠦᠰᠦᠨ ᠨᠠᠭᠠᠴᠤ ᠥᠷᠯᠥᠭ ᠨᠣᠶᠠᠨ ᠲᠡᠢᠰᠢ ᠪᠠᠰᠠ ᠤᠯᠬᠣᠨᠤᠳ ᠤ᠋ᠨ ᠦᠨᠳᠦᠰᠦᠨ ᠨᠠᠭᠠᠴᠤ ᠯᠢᠳᠡᠷ ᠰᠡᠴᠡᠨ ᠲᠠᠢᠰᠢ᠂ ᠬᠣᠩᠭᠢᠷᠠᠳ ᠤ᠋ᠨ ᠤᠯᠤᠰ ᠤ᠋ᠨ ᠨᠠᠭᠠᠴᠤ ᠨᠣᠶᠠᠨ ᠳ᠋ᠠᠢ ᠰᠡᠴᠡᠨ ᠲᠡᠢᠰᠢ᠂ ᠣᠷᠢᠶᠠᠩᠬᠠᠨ ᠤ᠋ ᠤᠯᠤᠰ ᠤ᠋ᠨ ᠤᠷᠤᠭ ᠵᠠᠷᠴᠢᠭᠤᠲᠠᠢ ᠮᠡᠷᠭᠡᠨ ᠲᠠᠢᠰᠢ᠂ ᠡᠨᠡ ᠲᠠᠪᠤᠭᠤᠯᠠ ᠶ᠋ᠢ ᠲᠠᠪᠤᠨ ᠲᠠᠢᠰᠢ ᠬᠡᠮᠡᠮᠦᠢ᠃ ᠲᠠᠢᠰᠢ ᠪᠤᠯᠬᠤᠢ ᠶ᠋ᠢᠨ ᠤᠷᠢᠳᠠ ᠴᠤ᠌᠂ ᠴᠡᠳᠢᠭ ᠰᠤᠳᠤᠷᠠ ᠲᠠᠪᠤᠨ ᠲᠠᠢᠰᠢ ᠭᠡᠮᠡᠨ ᠡᠨᠡ ᠦᠶᠡ ᠶ᠋ᠢᠨ ᠶᠣᠰᠣᠭᠠᠷ ᠲᠣᠪᠴᠢᠶᠠᠯᠠᠨ ᠪᠢᠴᠢᠵᠦᠬᠦᠢ᠃ ᠵᠢᠴᠢ ᠴᠡᠷᠢᠭ ᠦ᠋ᠨ ᠶᠡᠬᠡ ᠵᠢᠨᠦᠩ ᠨᠣᠶᠠᠨ ᠮᠤᠬᠤᠯᠢ ᠶ᠋ᠢᠨ ᠡᠴᠢᠭᠡ ᠳᠡᠯᠭᠡᠳᠦ ᠪᠠᠶᠠᠨ ᠢ᠋ ᠮᠥᠨ ᠬᠦ᠌ ＜ ᠤᠯᠤᠰ ᠤ᠋ᠨ ᠥᠲᠡᠭᠦᠰ ᠭᠦᠸᠧ ᠯᠤᠤ ᠨᠣᠶᠠᠨ ＞᠂ ᠵᠢᠴᠢ ᠢᠯᠡᠭᠦᠨᠡ ᠶ᠋ᠢᠨ ᠬᠦᠷᠭᠡᠨ ᠲᠠᠪᠤᠨᠠᠩ ᠹᠦᠮᠠ ᠨᠣᠶᠠᠨ ᠤ᠋ ᠠᠪᠠᠭᠠ ᠶᠠᠪᠤᠴᠢᠲᠠᠢ ᠨᠣᠶᠠᠨ ᠢ᠋ ᠮᠥᠨ ＜ ᠤᠯᠤᠰ ᠤ᠋ᠨ ᠥᠲᠡᠭᠦᠰ ᠭᠦᠸᠧ ᠯᠤᠤ ᠨᠣᠶᠠᠨ ＞ ᠬᠡᠮᠡᠪᠡᠢ᠃ ᠡᠨᠡ ᠬᠤᠷᠪᠠᠭᠤᠯᠠ ᠶ᠋ᠢ ᠤᠯᠤᠰ ᠤ᠋ᠨ ᠭᠤᠷᠪᠠᠨ ᠥᠲᠡᠭᠦᠰ ᠨᠣᠶᠠᠨ ᠭᠡᠮᠡᠨ ᠵᠡᠷᠭᠡ ᠬᠤᠪᠢ ᠵᠢᠭᠰᠠᠭᠠᠯ ᠳᠡᠮᠵᠢᠶᠡᠯᠭᠡ ᠱᠠᠩᠨᠠᠨ ᠡᠷᠭᠦᠮᠵᠢᠯᠡᠪᠡ᠃ ᠵᠢᠴᠢ ᠵᠠᠯᠠᠢᠳ ᠤ᠋ᠨ ᠬᠦᠯᠦᠭ ᠨᠣᠶᠠᠨ᠂ ᠴᠡᠷᠢᠭ ᠦ᠋ᠨ ᠶᠡᠬᠡ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢ ᠡᠷᠭᠦᠨ ᠪᠠᠷᠢᠯᠳᠤᠵᠤ ᠨᠠᠭᠠᠳᠤᠨ ᠪᠠᠭᠠᠲᠤᠷ ᠢ᠋ ᠠᠨᠤ ᠲᠠᠨᠢᠵᠤ ᠪᠠᠬᠠᠷᠬᠠᠨ ᠬᠡᠯᠡᠯᠴᠡᠭᠰᠡᠭᠡᠷ ᠬᠡᠴᠡᠭᠦᠦ ᠶ᠋ᠢ ᠢᠨᠤ ᠮᠡᠳᠡᠨ ᠨᠠᠰᠤᠨ ᠳᠡᠭᠦᠦ ᠪᠣᠯᠪᠠᠴᠤ ᠨᠠᠳᠠ ᠠ᠋ᠴᠠ ᠮᠡᠷᠭᠡᠨ ᠪᠠᠭᠠᠲᠤᠷ ᠂ ᠨᠠᠢᠷ ᠦᠭᠡᠢ ᠪᠥᠭᠡᠲᠡᠯᠡ ᠨᠠᠮᠠᠶᠢ ᠲᠠᠨᠢᠵᠤ ᠤᠷᠢᠳᠠ ᠳᠠᠭᠠᠭᠰᠠᠨ᠂ ᠨᠠᠴᠢᠨ ᠰᠢᠪᠠᠭᠤ ᠮᠡᠲᠦ ᠪᠦᠳᠦᠭᠦᠨ ᠠᠷᠭᠠ ᠬᠦᠴᠦᠲᠦ᠂ ᠨᠠᠷᠠᠨ ᠮᠡᠲᠦ ᠬᠤᠷᠴᠠ ᠰᠠᠷᠠᠨ ᠠᠳᠠᠯᠢ ᠭᠡᠭᠡᠬᠡᠨ ᠵᠢᠨᠦᠩ ᠮᠢᠨᠦ ᠭᠡᠮᠡᠨ ＜ ᠲᠠᠢᠪᠤᠤ ᠶᠡᠬᠡ ᠲᠦᠰᠢᠮᠡᠯ ＞ ᠪᠥᠭᠡᠳ ＜ ᠬᠦᠩ ＞ ᠦ᠋ᠨ ᠴᠣᠯᠠ ᠬᠠᠪᠰᠤᠷᠭᠠᠨ᠂ ᠮᠢᠩᠭᠠᠨ ᠡᠷᠦᠬᠡ ᠶ᠋ᠢᠨ ᠡᠵᠡᠨ ᠨᠣᠶᠠᠨ ᠪᠥᠭᠡᠳ ᠲᠠᠭᠠᠴᠠᠭᠰᠠᠨ ᠦᠭᠡᠢ ᠡᠵᠡᠨ ᠦ᠌ ᠶᠠᠪᠤᠳᠠᠯ ᠦᠢᠯᠡᠰ ᠢ᠋ ᠲᠠᠪᠠ ᠪᠠᠷ ᠪᠤᠷᠤᠭᠤᠰᠢᠶᠠᠨ ᠬᠣᠷᠢᠭᠯᠠᠨ ᠠᠢᠯᠠᠳᠬᠠᠭᠴᠢ ᠶᠡᠬᠡ ᠬᠠᠰᠢᠶᠠ ᠲᠥᠰᠢᠶᠡ ᠲᠦᠰᠢᠮᠡᠯ᠃ ᠬᠠᠭᠠᠨ ᠤ᠋ ᠪᠡᠶᠡ ᠳ᠋ᠦ᠍ᠷ ᠬᠠᠵᠠᠭᠠᠢ ᠦᠢᠯᠡᠰ ᠭᠠᠷᠪᠠᠰᠤ ᠂ ᠬᠠᠰᠢᠯᠭᠠ ᠰᠠᠢᠳ ᠯᠤᠭᠠ ᠬᠠᠭᠠᠰ ᠶᠠᠯᠠ ᠶ᠋ᠢ ᠬᠡᠯᠡᠯᠴᠡᠬᠦ ᠪᠣᠯᠤᠮᠤᠢ 》ᠭᠡᠮᠡᠨ ᠬᠠᠰ ᠬᠤᠨᠳᠠᠭᠠᠲᠤ ᠬᠣᠣᠷᠠᠵᠠ ᠶ᠋ᠢ ᠮᠣᠳᠣᠷ ᠢ᠋ᠶ᠋ᠠᠷ ᠬᠠᠢᠷᠠᠯᠠᠨ 《ᠬᠠᠳ ᠡᠵᠡᠳ ᠨᠣᠶᠠᠳ ᠲᠦᠰᠢᠮᠡᠳ ᠬᠡᠨ ᠡᠴᠡ ᠴᠦ᠍ ᠰᠠᠭᠤᠳᠠᠯ ᠦᠯᠦ ᠪᠣᠰᠤᠨ ᠂ ᠨᠡᠷᠡ ᠶ᠋ᠢ ᠦᠯᠦ ᠨᠡᠷᠡᠯᠡᠭᠲᠦᠨ 》ᠬᠡᠮᠡᠪᠡᠢ᠃ ᠵᠢᠴᠢ ᠠᠷᠯᠤᠳ ᠤ᠋ᠨ ᠬᠦᠯᠦᠭ ᠨᠣᠶᠠᠨ ᠲᠥᠷᠥ ᠶ᠋ᠢᠨ ᠶᠡᠬᠡ ᠵᠠᠩᠵᠤᠨ ᠪᠤᠭᠤᠷᠵᠢ ᠶ᠋ᠢ ᠡᠷᠭᠦᠮᠵᠢᠯᠡᠭᠰᠡᠨ ᠢᠨᠤ᠄ 《ᠨᠠᠢ᠍ᠮᠠᠨ ᠠᠭᠲᠠ ᠶ᠋ᠢᠨ ᠳᠥᠷᠪᠡᠨ ᠬᠤᠯᠠᠭᠠᠢ ᠶ᠋ᠢ ᠬᠢᠳᠤᠭᠰᠠᠨ ᠨᠠᠰᠤᠨ ᠳᠡᠭᠦᠦ ᠪᠥᠭᠡᠲᠡᠯᠡ ᠂ ᠨᠠᠳᠠ ᠠ᠋ᠴᠠ ᠤᠬᠠᠭᠠᠨᠲᠠᠢ ᠪᠠᠭᠠᠲᠤᠷ ᠃ ᠨᠢᠰᠬᠦ ᠪᠠᠷᠰ ᠮᠡᠲᠦ ᠂ ᠨᠡᠰᠢ ᠴᠠᠰᠢ ᠪᠠᠷᠠᠲᠠᠯᠠ ᠠᠯᠠᠭᠰᠠᠨ ᠂ ᠨᠠᠷᠠᠰᠤ ᠮᠡᠲᠦ ᠪᠠᠲᠤ ᠂ ᠮᠠᠢᠯᠠᠰᠤ ᠠᠳᠠᠯᠢ ᠵᠠᠩᠲᠤ ᠵᠠᠩᠵᠤᠨ ᠮᠢᠨᠦ 》ᠭᠡᠮᠡᠨ 《ᠲᠠᠢᠪᠤᠤ ᠶᠡᠬᠡ ᠲᠦᠰᠢᠮᠡᠯ 》ᠪᠥᠭᠡᠳ 《ᠬᠦᠩ 》 ᠦ᠋ᠨ ᠴᠣᠯᠠ ᠬᠠᠪᠰᠤᠷᠭᠠᠨ ᠂ 《ᠮᠢᠩᠭᠠᠨ ᠡᠷᠦᠬᠡ ᠶ᠋ᠢᠨ ᠡᠵᠡᠨ ᠨᠣᠶᠠᠨ 》ᠪᠥᠭᠡᠳ ᠪᠠᠰᠠ ᠡᠵᠡᠨ ᠬᠠᠭᠠᠨ ᠤ᠋ ᠡᠰᠡ ᠵᠣᠬᠢᠴᠠᠭᠰᠠᠨ ᠬᠡᠷᠡᠭ ᠦᠢᠯᠡᠰ ᠢ᠋ ᠵᠣᠷᠢᠭ ᠢ᠋ᠶ᠋ᠠᠷ ᠪᠤᠷᠤᠭᠤᠰᠢᠶᠠᠨ ᠬᠣᠷᠢᠭᠯᠠᠨ ᠠᠢᠯᠠᠳᠬᠠᠭᠴᠢ ᠶᠡᠬᠡ ᠬᠠᠰᠢᠶᠠ ᠲᠥᠰᠢᠶᠡ ᠲᠦᠰᠢᠮᠡᠯ ᠂ ᠬᠠᠭᠠᠨ ᠤ᠋ ᠪᠡᠶᠡ ᠳ᠋ᠦ᠍ᠷ ᠬᠠᠵᠠᠭᠠᠢ ᠦᠢᠯᠡᠰ ᠭᠠᠷᠪᠠᠰᠤ ᠂ ᠬᠠᠮᠵᠢᠭᠴᠢ ᠰᠠᠢᠳ ᠯᠤᠭᠠ ᠬᠠᠪᠰᠤᠵᠤ ᠶᠠᠯᠠ ᠶ᠋ᠢ ᠬᠡᠯᠡᠯᠴᠡᠬᠦ ᠪᠣᠯᠤᠮᠤᠢ ᠭᠡᠮᠡᠨ ᠬᠠᠰ ᠴᠥ᠋ᠬᠥᠴᠡᠲᠦ ᠰᠠᠷᠬᠤᠳ ᠢ᠋ ᠮᠣᠳᠣᠷ ᠢ᠋ᠶ᠋ᠠᠷ ᠬᠠᠢᠷᠠᠯᠠᠨ᠂ ᠬᠠᠳ ᠡᠵᠡᠳ ᠨᠣᠶᠠᠳ ᠲᠦᠰᠢᠮᠡᠳ ᠬᠡᠨ ᠡᠴᠡ ᠴᠦ᠍ ᠰᠠᠭᠤᠳᠠᠯ ᠦᠯᠦ ᠪᠣᠰᠤᠨ ᠂ ᠪᠤᠰᠤᠳ ᠬᠥᠮᠦᠨ ᠨᠡᠷᠡ ᠶ᠋ᠢ ᠢᠨᠤ ᠴᠡᠭᠡᠷᠯᠡᠭᠲᠦᠨ ᠬᠡᠮᠡᠪᠡᠢ᠃ ᠵᠢᠴᠢ ᠦᠬᠦᠰᠢᠨ ᠦ᠌ ᠬᠦᠯᠦᠭ ᠨᠣᠶᠠᠨ ᠂ ᠵᠡᠭᠦᠨ ᠡᠲᠡᠭᠡᠳ ᠦ᠋ᠨ ᠮᠥᠷᠥ ᠶ᠋ᠢᠨ ᠶᠡᠬᠡ ᠵᠠᠩᠵᠤᠨ ᠪᠤᠭᠤᠷᠤᠯ ᠳ᠋ᠤᠷ ᠠᠷᠢᠬᠢ ᠬᠠᠢᠷᠠᠯᠠᠨ ᠵᠠᠷᠯᠢᠭ ᠪᠣᠯᠤᠷᠤᠨ᠄
《ᠲᠣᠯᠣᠭᠠᠢ ᠳ᠋ᠠᠭᠠᠨ ᠵᠡᠪᠡ ᠬᠠᠲᠠᠵᠤ᠂ ᠲᠣᠬᠣᠮ ᠢ᠋ᠶ᠋ᠠᠷ ᠬᠠᠪᠬᠠᠯᠠᠭᠰᠠᠨ᠂ ᠳᠠᠢᠰᠤᠨ ᠪᠦᠭᠦᠳᠡ ᠶ᠋ᠢ ᠲᠣᠪᠷᠠᠭ ᠪᠣᠯᠭᠠᠨ ᠪᠠᠢᠯᠳᠤᠨ ᠳᠠᠷᠤᠭᠰᠠᠨ ᠲᠤᠵᠢ ᠲᠣᠭᠮᠣᠭ ᠤ᠋ᠨ ᠣᠯᠠᠨ ᠠᠢᠮᠠᠭ ᠢ᠋ ᠲᠣᠭᠣᠰᠣᠨ ᠦᠭᠡᠢ ᠪᠣᠯᠭᠠᠭᠰᠠᠨ᠂ ᠲᠣᠳᠣᠷᠬᠠᠢ ᠪᠠᠭᠠᠲᠤᠷ ᠲᠤᠤᠰ ᠬᠠᠳᠠᠮ ᠤ᠋ᠨ ᠲᠤᠰᠠᠯᠠᠨ ᠲᠡᠳᠬᠦᠭᠴᠢ ᠰᠠᠢᠳ ᠮᠢᠨᠦ 》ᠭᠡᠮᠡᠨ ᠂ ᠶᠡᠬᠡ 《ᠲᠠᠢᠪᠤᠤ 》ᠲᠦᠰᠢᠮᠡᠯ ᠪᠥᠭᠡᠳ 《ᠬᠦᠩ 》 ᠦ᠋ᠨ ᠴᠣᠯᠠ ᠬᠠᠪᠰᠤᠷᠭᠠᠨ ᠂ ᠮᠢᠩᠭᠠᠨ ᠡᠷᠦᠬᠡ ᠶ᠋ᠢᠨ ᠡᠵᠡᠯᠡᠭᠴᠢ ᠨᠣᠶᠠᠨ᠂ ᠡᠵᠡᠨ ᠢ᠋ ᠢᠳᠬᠠᠭᠴᠢ ᠬᠠᠭᠠᠨ ᠡᠵᠡᠨ ᠦ᠌ ᠬᠠᠰᠢᠯᠭᠠ ᠲᠦᠰᠢᠯᠭᠡ ᠳᠠᠢᠪᠠᠩ ᠪᠥᠭᠡᠳ ᠬᠠᠰ ᠲᠥᠷᠥ ᠶ᠋ᠢᠨ ᠬᠠᠮᠤᠭ ᠤ᠋ᠨ ᠳᠡᠭᠡᠷᠡ ᠡᠵᠡᠨ ᠢ᠋ ᠰᠠᠬᠢᠭᠴᠢ ᠬᠠᠮᠵᠢᠯᠭᠠ᠃ ᠵᠢᠴᠢ ᠰᠦᠯᠲᠠᠨ ᠤ᠋ ᠬᠦᠯᠦᠭ ᠨᠣᠶᠠᠨ ᠪᠠᠷᠠᠭᠤᠨ ᠡᠲᠡᠭᠡᠳ ᠦ᠋ᠨ ᠮᠥᠷᠥ ᠶ᠋ᠢᠨ ᠶᠡᠬᠡ ᠵᠠᠩᠵᠤᠨ ᠴᠢᠯᠠᠭᠤᠨ ᠳ᠋ᠤᠷ ᠠᠷᠢᠬᠢ ᠬᠠᠢᠷᠠᠯᠠᠨ ᠵᠠᠷᠯᠢᠭ ᠪᠣᠯᠤᠷᠤᠨ᠄
《ᠡᠷᠳᠡᠨᠢ ᠶ᠋ᠢᠨ ᠰᠠᠷᠢᠶᠠ ᠪᠠᠷ ᠭᠡᠨᠵᠢ ᠶ᠋ᠢ ᠲᠠᠰᠤ ᠬᠡᠮᠬᠡ ᠴᠠᠪᠴᠢᠭᠰᠠᠨ᠂ ᠡᠷᠡ ᠬᠦᠴᠦᠨ ᠢ᠋ᠶ᠋ᠡᠷ ᠮᠡᠭᠵᠢᠨ ᠰᠡᠭᠦᠯ ᠢ᠋ ᠡᠪᠴᠢᠭᠦᠦ ᠪᠡᠷ ᠨᠡᠪᠲᠡ ᠵᠢᠳᠠᠯᠠᠭᠰᠠᠨ᠂ ᠡᠰᠡᠷᠭᠦᠴᠡᠯ ᠦ᠋ᠨ ᠳᠣᠲᠣᠷᠠ ᠡᠩ ᠦ᠋ᠨ ᠭᠠᠵᠠᠷᠠ ᠶᠠᠪᠤᠬᠤ ᠮᠡᠲᠦ ᠪᠠᠢᠯᠳᠤᠭᠴᠢ᠂ ᠡᠷᠡᠮᠡᠭ ᠰᠢᠷᠭᠠ ᠪᠠᠨ ᠡᠮᠡᠭᠡᠯᠯᠡᠨ ᠥᠭᠴᠦ ᠡᠪᠰᠡᠨ ᠬᠠᠪᠰᠤᠭᠰᠠᠨ ᠲᠤᠰᠠᠯᠠᠭᠴᠢ 》ᠭᠡᠮᠡᠨ ᠶᠡᠬᠡ《ᠲᠠᠢᠪᠤᠤ 》ᠲᠦᠰᠢᠮᠡᠯ ᠪᠥᠭᠡᠳ《ᠬᠦᠩ 》 ᠦ᠋ᠨ ᠴᠣᠯᠠ ᠬᠠᠪᠰᠤᠷᠭᠠᠨ᠂ ᠮᠢᠩᠭᠠᠨ ᠡᠷᠦᠬᠡ ᠶ᠋ᠢᠨ ᠡᠵᠡᠯᠡᠭᠴᠢ ᠨᠣᠶᠠᠨ᠂ ᠡᠵᠡᠨ ᠢ᠋ ᠢᠳᠬᠠᠭᠴᠢ ᠬᠠᠭᠠᠨ ᠡᠵᠡᠨ ᠤ ᠬᠠᠰᠢᠯᠭᠠ ᠲᠦᠰᠢᠯᠭᠡ ᠳᠠᠢᠪᠠᠩ ᠪᠥᠭᠡᠳ ᠬᠠᠰ ᠲᠥᠷᠥ ᠶ᠋ᠢᠨ ᠬᠠᠮᠤᠭ ᠤ᠋ᠨ ᠳᠡᠭᠡᠷᠡ ᠡᠵᠡᠨ ᠦ᠌ ᠰᠠᠬᠢᠭᠴᠢ ᠬᠠᠮᠵᠢᠯᠭᠠ ᠬᠡᠮᠡᠵᠦᠬᠦᠢ᠃
ᠲᠡᠨᠳᠡᠴᠡ ᠲᠠᠪᠤᠨ ᠲᠡᠢᠰᠢ ᠂ ᠳᠣᠯᠣᠭᠠᠨ ᠳᠠᠢᠪᠠᠩ ᠢ᠋ ᠡᠷᠭᠦᠮᠵᠢᠯᠡᠨ ᠪᠠᠷᠠᠲᠠᠯᠠ ᠤᠯᠠᠭᠠᠨ ᠨᠠᠷᠠᠨ ᠥᠨᠳᠥᠷ ᠮᠠᠨᠳᠤᠨ᠂ ᠵᠠᠭᠤᠨ ᠲᠡᠮᠳᠡᠭ ᠮᠢᠩᠭᠠᠨ ᠳᠣᠬᠢᠶᠠ ᠵᠡᠷᠭᠡ ᠪᠡᠷ ᠲᠠᠯᠪᠢᠨ᠂ ᠬᠣᠷᠢᠨ ᠳᠥᠷᠪᠡᠨ ᠬᠣᠷᠢᠶᠠᠨ ᠤ᠋ ᠲᠡᠭᠷᠢ ᠶ᠋ᠢᠨ ᠬᠥᠭᠵᠢᠮ ᠡᠭᠦᠰᠬᠡᠨ᠂
ᠬᠠᠭᠠᠨ ᠡᠵᠡᠨ ᠢ᠋ ᠬᠠᠮᠤᠭ ᠨᠣᠶᠠᠨ ᠢ᠋ᠶ᠋ᠠᠷ ᠬᠠᠰᠢᠵᠤ ᠬᠠᠮᠵᠢᠨ
ᠬᠠᠰ ᠶᠡᠬᠡ ᠲᠥᠷᠥ ᠶ᠋ᠢᠨ ᠮᠠᠨᠳᠠᠯ ᠠ᠋ᠴᠠ ᠵᠠᠯᠠᠨ ᠪᠠᠭᠤᠯᠭᠠᠨ᠂
ᠬᠠᠮᠤᠭ ᠤ᠋ᠨ ᠡᠮᠡᠭᠡ ᠶ᠋ᠢ ᠲᠡᠢ ᠴᠢᠩ ᠲᠠᠢᠬᠡᠦ ᠶ᠋ᠢ ᠲᠠᠪᠴᠠᠩ ᠳ᠋ᠤᠷ ᠵᠠᠯᠠᠵᠤ
ᠬᠠᠭᠠᠨ ᠬᠠᠲᠤᠨ ᠢ᠋ᠶ᠋ᠠᠷ ᠬᠠᠮᠤᠭ ᠤᠯᠤᠰ ᠤ᠋ᠨ ᠬᠣᠲᠠᠯᠠᠭᠠᠷ ᠢ᠋ᠶ᠋ᠠᠨ ᠠᠪᠴᠤ᠂
ᠬᠠᠩᠭᠠᠷᠢᠰᠤᠨ ᠬᠥᠩᠭᠢᠷᠡᠰᠦᠨ ᠶᠢᠰᠦᠨ ᠳᠡᠭᠲᠡᠷ ᠳᠦᠭᠦᠷᠲᠡᠯᠡ ᠴᠤᠭᠯᠠᠨ
ᠬᠠᠪᠤᠷᠤᠨ ᠵᠦᠯᠭᠡ ᠳ᠋ᠦ᠍ᠷ ᠲᠠᠵᠢ ᠮᠠᠩᠨᠤᠭ ᠨᠢᠳᠦᠨ ᠢ᠋ ᠭᠢᠯᠠᠰᠬᠠᠨ᠂
ᠬᠠᠳᠠᠮᠠᠯ ᠰᠤᠪᠤᠳ ᠤ᠋ᠨ ᠬᠠᠵᠢᠯᠭᠠᠲᠤ ᠠᠯᠲᠠᠨ ᠯᠤᠤ ᠶ᠋ᠢᠨ ᠣᠯᠪᠣᠭ ᠲᠤᠷ
ᠬᠠᠭᠠᠨ ᠴᠢᠩᠭᠢᠰ ᠪᠣᠭᠳᠠ ᠬᠣᠣᠰ ᠡᠪᠦᠳᠦᠭ ᠢ᠋ᠶ᠋ᠡᠷ ᠰᠥᠭᠥᠳᠴᠦ᠂
ᠬᠠᠢᠷᠠᠯᠠᠭᠰᠠᠨ ᠬᠤᠷᠮᠤᠰᠲᠠ ᠲᠡᠭᠷᠢ ᠶ᠋ᠢᠨ ᠷᠠᠰᠢᠶᠠᠨ ᠢ᠋ ᠡᠷᠭᠦᠨ ᠪᠠᠷᠢᠵᠤ
ᠬᠠᠮᠲᠤ ᠴᠤᠭᠭᠠᠷ ᠲᠡᠷᠢᠭᠦᠨ ᠪᠥᠬᠥᠢᠵᠦ ᠨᠢᠭᠡᠨᠲᠡ ᠮᠥᠷᠭᠥᠭᠡᠳ᠂
ᠬᠠᠭᠠᠨ ᠲᠠᠢᠽᠦ ᠬᠠᠵᠢᠯᠭᠠ ᠯᠤᠤ ᠶ᠋ᠢᠨ ᠨᠢᠳᠤᠷᠭᠠ ᠶᠤᠭᠠᠨ ᠪᠠᠭᠤᠯᠭᠠᠵᠤ
ᠬᠠᠰ ᠠᠮᠠᠨ ᠥᠪᠡᠷ ᠢ᠋ᠶ᠋ᠡᠨ ᠡᠢᠨ ᠭᠡᠮᠡᠨ ᠪᠡᠯᠡᠭᠯᠡᠨ ᠠᠢᠯᠠᠳᠬᠠᠷᠤᠨ᠄
ᠠᠯᠲᠠᠨ ᠡᠬᠡ ᠶ᠋ᠢᠨ ᠠᠷᠪᠠᠨ ᠰᠠᠷᠠ ᠠᠴᠢᠵᠤ ᠬᠣᠷᠢᠨ ᠰᠠᠷᠠ ᠬᠣᠷᠮᠣᠢᠯᠠᠵᠤ
ᠠᠰᠠᠷᠠᠨ ᠨᠢᠭᠦᠯᠡᠰᠬᠦᠢ ᠬᠥᠮᠦᠵᠢᠭᠦᠯᠦᠨ ᠲᠡᠵᠢᠭᠡᠭᠰᠡᠨ ᠠᠴᠢ ᠬᠡᠮᠡᠭᠴᠢ ᠶ᠋ᠢ
ᠠᠰᠠᠩᠭᠢ ᠲᠢᠪ ᠲᠣᠷ ᠠᠯᠲᠠᠨ ᠢ᠋ᠶ᠋ᠠᠷ ᠳᠦᠭᠦᠷᠲᠡᠯᠡ ᠣᠪᠣᠭᠠᠯᠠᠪᠠᠴᠤ
ᠠᠴᠢ ᠡᠨᠡᠷᠢᠯ ᠳ᠋ᠦ᠍ᠷ ᠬᠠᠷᠢᠭᠤᠯᠠᠨ ᠴᠢᠳᠠᠬᠤ ᠬᠠᠮᠢᠭᠠ ᠪᠠᠢᠬᠤ ᠠᠵᠢ᠃
ᠠᠯᠮᠠᠰ ᠤ᠋ᠨ ᠬᠡᠮᠬᠡᠷᠬᠡᠢ ᠬᠢᠴᠢ ᠶ᠋ᠢᠨ ᠦᠷᠡ ᠶ᠋ᠢᠨ ᠲᠡᠳᠦᠢᠬᠡᠨ ᠢ᠋ᠶ᠋ᠡᠷ
ᠠᠴᠢᠯᠠᠯ ᠲᠠᠬᠢᠮᠳᠠᠭᠤ ᠶ᠋ᠢᠨ ᠲᠡᠮᠳᠡᠭ ᠦ᠋ᠨ ᠲᠡᠳᠦᠢᠬᠡᠨ ᠢ᠋ ᠮᠥᠷᠳᠡᠬᠦᠶᠡ
ᠠᠭᠠᠷ ᠠ᠋ᠴᠠ ᠪᠠᠭᠤᠭᠰᠠᠨ ᠲᠡᠭᠷᠢ ᠶ᠋ᠢᠨ ᠰᠢᠮᠡ ᠤᠮᠳᠠ ᠶ᠋ᠢ ᠪᠠᠷᠢᠵᠤ
ᠠᠰᠠᠷᠠᠯᠲᠤ ᠵᠠᠷᠯᠢᠭ ᠢ᠋ᠶ᠋ᠠᠷ ᠬᠠᠭᠠᠨ ᠪᠣᠯᠭᠠᠭᠰᠠᠨ ᠬᠡᠰᠢᠭ ᠲᠣᠷ ᠮᠥᠷᠭᠥᠮᠦ᠃
ᠠᠯᠲᠠᠨ ᠥᠩᠭᠡᠲᠦ ᠪᠠᠷᠠᠷᠠᠩᠭᠤᠢ ᠴᠠᠭᠠᠨ ᠰᠦᠯᠳᠡ ᠲᠩᠷᠢ ᠳ᠋ᠦ᠍ᠷ ᠠᠭᠤᠯᠵᠠᠭᠰᠠᠨ
ᠠᠮᠢᠳᠤ ᠪᠣᠭᠳᠠ ᠡᠬᠡ ᠲᠠᠢᠬᠡᠦ ᠶ᠋ᠢᠨ ᠠᠯᠲᠠᠨ ᠥᠯᠮᠡᠢ ᠪᠠᠲᠤᠳᠲᠤᠭᠠᠢ ᠭᠡᠮᠡᠨ
ᠠᠷᠪᠠᠨ ᠭᠠᠵᠠᠷ ᠤ᠋ᠨ ᠲᠠᠯᠠ ᠶ᠋ᠢ ᠪᠥᠬᠥᠭᠰᠡᠨ ᠨᠠᠷᠮᠠᠢ ᠶᠡᠬᠡ ᠣᠯᠠᠨ ᠢ᠋ᠶ᠋ᠠᠷ
ᠠᠶᠠᠯᠭᠤ ᠶ᠋ᠢ ᠳ᠋ᠡᠭᠡᠨ ᠭᠤᠷᠪᠠᠨ ᠵᠡᠷᠭᠡ ᠰᠥᠭᠥᠳᠴᠦ ᠶᠢᠰᠦᠨ ᠵᠡᠷᠭᠡ ᠮᠥᠷᠭᠥᠪᠡᠢ᠃
ᠠᠯᠲᠠᠨ ᠡᠬᠡ ᠠᠶᠠᠷᠬᠠᠨ ᠠᠢᠯᠠᠳᠴᠤ ᠠᠩᠬᠠᠷᠤᠨ ᠦᠵᠡᠪᠡᠰᠦ
ᠠᠷᠪᠠᠨ ᠭᠠᠵᠠᠷ ᠤ᠋ᠨ ᠲᠠᠭᠠᠯᠠᠮᠵᠢᠲᠤ ᠬᠠᠪᠤᠷᠤᠨ ᠬᠥᠬᠡ ᠵᠦᠯᠭᠡ ᠶ᠋ᠢᠨ ᠬᠥᠷᠥᠰᠥ ᠶ᠋ᠢ
ᠠᠯᠠᠭ ᠪᠤᠯᠠᠭ ᠲᠠᠵᠢ ᠮᠠᠩᠨᠤᠭ ᠢ᠋ᠶ᠋ᠠᠷ ᠠᠯᠠᠭᠯᠠᠨ ᠪᠦᠷᠬᠦᠭᠰᠡᠨ ᠮᠡᠲᠦ᠃
ᠠᠯᠢᠪᠠ ᠪᠦᠭᠦᠳᠡᠭᠡᠷ ᠲᠦᠮᠡᠨ ᠨᠠᠰᠤᠲᠤ ᠲᠠᠢᠬᠡᠦ ᠪᠣᠭᠳᠠ ᠭᠡᠮᠡᠨ ᠮᠥᠷᠭᠥᠬᠦᠶᠡ
ᠠᠭᠠᠷ ᠤ᠋ᠨ ᠷᠠᠰᠢᠶᠠᠨ ᠤᠮᠳᠠᠨ ᠢ᠋ ᠠᠮᠰᠠᠨ ᠵᠣᠭᠣᠭᠯᠠᠨ ᠠᠵᠤ
ᠠᠩᠭᠢᠳᠠ ᠰᠠᠢᠬᠠᠨ ᠰᠣᠨᠢᠨ ᠪᠠᠶᠠᠰᠬᠤᠯᠠᠩ ᠲᠥᠷᠥᠵᠦ ᠵᠠᠷᠯᠢᠭ ᠪᠣᠯᠤᠷᠤᠨ᠂
ᠠᠯᠲᠠᠨ ᠥᠩᠭᠡᠲᠦ ᠪᠠᠳᠠᠷᠠᠩᠭᠤᠢ ᠴᠠᠭᠠᠨ ᠰᠦᠯᠳᠡ ᠲᠩᠷᠢ ᠳ᠋ᠦ᠍ᠷ
ᠠᠭᠤᠯᠵᠠᠨ ᠵᠣᠯᠭᠠᠭᠰᠠᠨ ᠠᠳᠠᠪᠠᠰᠢ ᠬᠠᠷᠢᠨ ᠴᠢᠩ ᠦᠨᠡᠨ ᠬᠡᠷᠡᠭ᠃
ᠠᠷᠭᠠ ᠬᠦᠴᠦᠲᠦ ᠂ ᠪᠠᠭᠠᠲᠤᠷ ᠡᠵᠡᠨ ᠴᠦ᠍ ᠮᠠᠰᠢᠳᠠ ᠠᠢᠯᠠᠳᠤᠮᠤᠢ ᠃
ᠠᠴᠢᠯᠠᠯᠲᠤ ᠲᠡᠮᠦᠵᠢᠨ ᠮᠠᠭᠠᠳ ᠲᠡᠭᠷᠢ ᠶ᠋ᠢᠨ ᠦᠷᠡ ᠲᠣᠳᠣᠷᠬᠠᠢ ᠮᠥᠨ
ᠠᠯᠲᠠᠨ ᠶᠠᠰᠤᠲᠤ ᠂ ᠬᠢᠶᠠᠳ ᠢᠵᠠᠭᠤᠷ ᠤ᠋ᠨ ᠬᠠᠭᠠᠨ ᠬᠥᠪᠡᠭᠦᠨ ᠴᠢ ᠪᠡᠷ
ᠠᠯᠢᠯᠠ ᠨᠣᠶᠠᠳ ᠲᠦᠰᠢᠮᠡᠯ ᠰᠡᠴᠡᠳ ᠪᠠᠭᠠᠲᠤᠳ ᠴᠡᠷᠢᠭ ᠢᠷᠭᠡᠨ ᠳ᠋ᠡᠭᠡᠨ ᠬᠦᠷᠲᠡᠯᠡ
ᠠᠷᠢᠯᠤᠭᠰᠠᠨ ᠣᠭᠲᠠᠷᠭᠤᠢ ᠶ᠋ᠢᠨ ᠨᠠᠷᠠᠨ ᠰᠠᠷᠠᠨ ᠮᠡᠲᠦ ᠬᠤᠷᠴᠠ ᠭᠡᠭᠡᠬᠡᠨ ᠢ᠋ᠶ᠋ᠡᠷ
ᠠᠪᠤᠷᠭᠤ ᠠᠷᠢᠯᠭᠠᠬᠤ ᠶ᠋ᠢ ᠠᠰᠢᠳᠠ ᠡᠷᠬᠡᠪᠰᠢ ᠴᠢᠩ ᠦᠨᠡᠨᠡ ᠬᠦᠷᠦᠭᠦᠯ᠃
ᠠᠯᠤᠰᠳᠠ ᠡᠮᠢᠶᠡᠨ ᠳᠥᠴᠢᠨ ᠲᠠᠪᠤᠨ ᠵᠢᠯ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ ᠪᠠᠷ
ᠠᠩᠬᠠ ᠡᠯᠦᠨᠴᠡ ᠶᠦ᠍ᠭᠡᠨ ᠬᠠᠭᠠᠨ ᠲᠥᠷᠥ ᠶ᠋ᠢ ᠳᠠᠬᠢᠨ ᠪᠠᠢᠭᠤᠯᠵᠤ ᠴᠢᠳᠠᠭᠰᠠᠨᠠ
ᠠᠷᠢᠭᠤᠨ ᠢᠵᠠᠭᠤᠷᠲᠤ ᠬᠠᠳᠠᠮ ᠤ᠋ᠨ ᠬᠠᠳ ᠲᠤᠷ
ᠠᠴᠢᠯᠠᠯᠲᠠᠢ ᠪᠡᠷᠢ ᠪᠣᠯᠭᠠᠪᠠ ᠨᠠᠮᠠᠶᠢ ᠠᠰᠢᠳᠠ ᠶ᠋ᠢᠨ
ᠠᠯᠲᠠᠨ ᠤ᠋ ᠨᠠᠪᠴᠢ ᠬᠠᠰ ᠤ᠋ᠨ ᠰᠠᠯᠠᠭᠠ ᠴᠢᠨᠦ ᠵᠠᠯᠭᠠᠮᠵᠢᠯᠠᠨ ᠳᠡᠯᠭᠡᠷᠡᠲᠦᠭᠡᠢ᠃
ᠰᠠᠢᠨ ᠡᠵᠡᠨ ᠳ᠋ᠦ᠍ᠷ ᠤᠴᠠᠷᠠᠭᠰᠠᠨ ᠢ᠋ᠶ᠋ᠠᠷ ᠴᠢᠨᠳᠠᠮᠠᠨᠢ ᠡᠷᠳᠡᠨᠢᠲᠦ
ᠼᠠᠮᠠᠭᠠ ᠰᠡᠴᠢᠭ ᠢ᠋ᠶ᠋ᠡᠷ ᠵᠢᠷᠭᠠᠯᠤᠭᠠ ᠪᠢ ᠃
ᠰᠠᠢᠨ ᠬᠥᠪᠡᠭᠦᠨ ᠢ᠋ ᠲᠥᠷᠥᠭᠰᠡᠨ ᠢ᠋ᠶ᠋ᠡᠷ ᠰᠠᠨᠰᠠᠷ ᠳᠡᠯᠡᠬᠡᠢ ᠶ᠋ᠢ ᠡᠵᠡᠯᠡᠭᠰᠡᠨ
ᠰᠠᠺᠡᠷᠸᠠᠳᠢ ᠬᠠᠭᠠᠨ ᠤ᠋ ᠡᠬᠡ ᠪᠣᠯᠪᠠ ᠪᠢ ᠃
ᠰᠠᠨᠠᠭᠠ ᠣᠯᠠᠨ ᠡᠬᠡᠨᠡᠷ ᠬᠥᠮᠦᠨ ᠦ᠌
ᠰᠠᠨᠠᠯ ᠬᠦᠰᠡᠯ ᠦ᠋ᠨ ᠦᠵᠦᠭᠦᠷ ᠦᠭᠡᠢ ᠶ᠋ᠢ ᠬᠡᠷᠬᠢᠪᠡᠴᠦ ᠭᠡᠮᠡᠨ ᠰᠠᠨᠠᠮᠤᠢ ᠪᠢ ᠃
ᠡᠭᠡᠯ ᠠᠷᠠᠳ ᠡᠴᠢᠭᠡ ᠡᠬᠡ ᠪᠡᠨ ᠡᠳᠦᠷ ᠪᠦᠷᠢ ᠵᠥᠭᠡᠯᠡᠪᠴᠢᠯᠡᠨ ᠪᠠᠶᠠᠷᠯᠠᠭᠤᠯᠬᠤ᠃
ᠡᠵᠡᠳ ᠬᠠᠳ ᠡᠴᠢᠭᠡ ᠡᠬᠡ ᠪᠡᠨ ᠡᠯᠡ ᠤᠯᠤᠰ ᠢ᠋ ᠡᠩᠬᠡᠵᠢᠭᠦᠯᠦᠨ ᠪᠠᠶᠠᠷᠯᠠᠭᠤᠯᠬᠤ ᠬᠡᠮᠡᠪᠡᠢ᠃
ᠡᠷᠲᠡᠨ ᠦ᠌ ᠶᠣᠣ ᠬᠠᠭᠠᠨ ᠤ᠋ ᠡᠬᠡ ᠶ᠋ᠢ ᠴᠢᠩ ᠳᠦ ᠲᠡᠭᠷᠢ ᠬᠡᠮᠡᠵᠦᠬᠦᠢ᠃
ᠡᠨᠡ ᠬᠦ᠌ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠡᠬᠡ ᠶ᠋ᠢ ᠲᠡᠢ ᠴᠢᠩ ᠲᠠᠢᠬᠡᠦ ᠬᠡᠮᠡᠵᠦᠬᠦᠢ᠃
ᠡᠳᠡᠭᠡᠷ ᠪᠣᠭᠳᠠᠰ ᠢ᠋ ᠡᠩ ᠦ᠋ᠨ ᠡᠬᠡᠨᠡᠷ ᠦ᠋ᠳ ᠮᠡᠨᠳᠦᠯᠡᠵᠦ ᠦᠯᠦ ᠴᠢᠳᠠᠬᠤ ᠶ᠋ᠢᠨ ᠲᠤᠯᠠᠳᠠ
ᠡᠯᠳᠡᠪ ᠥᠩᠭᠡ ᠶ᠋ᠢᠨ ᠳ᠋ᡁᠡᠷᠡ ᠡᠬᠡ ᠬᠡᠮᠡᠭᠴᠢ ᠪᠠᠢᠬᠤ ᠬᠡᠷᠡᠭ ᠲᠡᠢ ᠠᠵᠤᠭᠤ ᠃
ᠬᠥᠮᠦᠨ ᠲᠥᠷᠥᠭᠰᠡᠳ ᠦ᠋ᠨ ᠪᠠᠶᠠᠷᠯᠠᠪᠠᠰᠤ ᠪᠣᠯᠬᠤ ᠨᠢᠭᠡᠨ ᠵᠦᠢᠯ ᠦ᠋ᠨ ᠬᠡᠷᠡᠭ ᠪᠠᠢᠬᠤ ᠪᠣᠢ ᠢ᠋ᠠ᠃
ᠬᠥᠮᠦᠨ ᠪᠦᠬᠦᠨ ᠦ᠌ ᠦᠯᠦ ᠮᠡᠳᠡᠬᠦ ᠶ᠋ᠢ ᠮᠡᠳᠡᠭᠦᠯᠦᠨ ᠲᠠᠢᠯᠵᠤ ᠦᠯᠡᠳᠡᠭᠡᠪᠡᠰᠦ ᠪᠠᠶᠠᠷᠯᠠᠯᠲᠠᠢ ᠪᠤᠶᠤ
ᠬᠥᠮᠦᠨ ᠦᠬᠦᠪᠡᠴᠦ ᠪᠡᠷ ᠭᠡᠮᠡᠨ ᠦᠯᠦ ᠬᠣᠭᠣᠰᠣᠷᠠᠨ ᠭᠣᠮᠣᠳᠠᠬᠤ ᠪᠠᠰᠠ ᠨᠢᠭᠡᠨ ᠬᠡᠷᠡᠭ ᠠᠮᠤᠢ᠃
ᠬᠥᠮᠦᠨ ᠦᠬᠦᠭᠰᠡᠨ ᠦ᠌ ᠬᠣᠢᠨᠠ ᠠᠮᠢᠳᠤ ᠬᠥᠮᠦᠨ ᠯᠦ᠍ᠭᠡ ᠬᠡᠯᠡᠯᠴᠡᠨ ᠴᠢᠳᠠᠬᠤ ᠶ᠋ᠢ ᠦᠯᠡᠳᠡᠭᠡ᠃
ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠣᠷᠴᠢᠯᠠᠩ ᠤ᠋ᠨ ᠳᠡᠭᠡᠷᠡ ᠬᠡᠳᠦᠢ ᠬᠡᠳᠦᠢᠴᠢᠨᠡᠭᠡᠨ ᠢᠷᠡᠭᠡᠳ ᠪᠠᠰᠠ ᠡᠴᠢᠵᠦ ᠪᠣᠢ᠃
ᠬᠥᠮᠦᠨ ᠪᠥᠬᠥᠶᠡ ᠡᠳᠦᠷ ᠡᠳᠦᠷ ᠢ᠋ ᠦᠢᠮᠡᠨ ᠥᠩᠭᠡᠷᠡᠭᠡᠪᠡᠴᠦ ᠡᠴᠦᠰ ᠲᠦ᠍ᠷ ᠨᠢᠭᠡᠬᠡᠨ ᠦᠭᠡ ᠴᠦ᠍ ᠦᠭᠡᠢ ᠶ᠋ᠢ
ᠬᠥᠮᠦᠨ ᠪᠦᠷᠢ ᠨᠠᠷᠢᠪᠴᠢᠯᠠᠨ ᠰᠠᠨᠠᠮᠵᠢᠯᠠᠪᠠᠰᠤ ᠭᠡᠨᠡᠳᠲᠡ ᠰᠡᠬᠡᠰᠬᠢᠨ ᠤᠬᠠᠮᠵᠢᠯᠠᠪᠠᠰᠤ ᠪᠣᠯᠬᠤᠢ ᠶ᠋ᠢᠨ ᠲᠤᠯᠠᠳᠠ
ᠬᠥᠮᠦᠨ ᠦ᠌ ᠣᠷᠴᠢᠯᠠᠩ ᠤ᠋ᠨ ᠤᠷᠢᠳᠠᠬᠢ ᠶ᠋ᠢᠨ ᠬᠥᠮᠦᠨ ᠬᠣᠵᠢᠮ ᠤ᠋ᠨ ᠲᠥᠷᠥᠭᠰᠡᠨ ᠬᠣᠢᠲᠤᠬᠢ ᠬᠥᠮᠦᠨ ᠢ᠋ ᠰᠠᠨᠠᠬᠤ ᠶ᠋ᠢ ᠠᠨᠤ
ᠬᠥᠮᠦᠨ ᠬᠥᠮᠦᠨ ᠶᠠᠭᠤᠨᠠᠢ ᠮᠠᠲᠠᠨᠠᠮ ᠬᠥᠮᠦᠨ ᠬᠥᠮᠦᠨ ᠨᠠᠶᠠᠨ ᠨᠠᠰᠤᠯᠠᠲᠠᠯᠠ ᠦᠢᠮᠡᠨ ᠠᠢᠮᠠᠨ ᠠᠮᠢᠳᠤᠷᠠᠪᠠᠴᠤ
ᠬᠥᠮᠦᠨ ᠬᠥᠮᠦᠨ ᠤ ᠦᠭᠡ ᠦᠭᠡᠢ ᠬᠥᠮᠦᠨ ᠦ᠌ ᠬᠣᠴᠣᠷᠯᠠᠯ ᠦᠭᠡᠢ ᠪᠡᠷ ᠥᠩᠭᠡᠷᠡᠭᠴᠢᠳ ᠲᠣᠭᠠ ᠪᠠᠢᠮᠤᠢ ᠤᠤ ?
ᠬᠥᠮᠦᠨ ᠡᠴᠡ ᠬᠥᠮᠦᠨ ᠲᠤᠯᠠ ᠬᠥᠮᠦᠨ ᠦ᠌ ᠬᠥᠮᠦᠨ ᠢ᠋ ᠬᠡᠨ ᠬᠥᠮᠦᠨ ᠶᠠᠮᠪᠠᠷ ᠬᠥᠮᠦᠨ ᠭᠡᠮᠡᠨ ᠬᠥᠮᠦᠨ ᠮᠡᠳᠡᠬᠦ ᠠᠵᠢ
ᠬᠥᠮᠦᠨ ᠢᠨᠦ ᠬᠥᠮᠦᠨ ᠪᠣᠯᠪᠠᠴᠤ ᠬᠥᠮᠦᠨ ᠬᠥᠮᠦᠨ ᠦ᠌ ᠳᠣᠲᠣᠷᠠᠬᠢ ᠶᠠᠭᠤᠨ ᠤ ᠬᠥᠮᠦᠨ ᠢ᠋ ᠮᠡᠷᠭᠡᠨ ᠬᠥᠮᠦᠨ ᠮᠡᠳᠡᠭᠳᠡᠬᠦᠢ᠃
ᠤᠷᠢᠳᠤ ᠪᠦᠯᠦᠭ ᠦ᠋ᠨ ᠪᠡᠯᠡᠭᠲᠦ ᠺᠠᠷᠣᠳᠢ ᠶ᠋ᠢᠨ ᠤᠴᠢᠷ ᠢ᠋ ᠴᠣᠬᠣᠯᠠᠭᠰᠠᠨ ᠠᠨᠤ : ᠡᠷᠲᠡᠨ ᠦ᠌《ᠱᠠᠰᠢᠨᠲᠤ ᠨᠣᠮ – ᠱᠤ᠌ ᠵᠢᠩ 》 ᠳ᠋ᠦ᠍ᠷ ᠶᠡᠬᠡ ᠪᠣᠭᠳᠠ ᠶᠣᠣ ᠬᠠᠭᠠᠨ ᠬᠥᠬᠡ ᠯᠤᠤ ᠵᠢᠯ ᠰᠠᠭᠤᠷᠢᠨᠠ ᠡᠬᠢᠯᠡᠨ ᠰᠠᠭᠤᠵᠤ ᠳᠠᠯᠠᠨ ᠬᠣᠶᠠᠷ ᠣᠨ ᠶᠡᠬᠡᠳᠡ ᠡᠩᠬᠡᠵᠢᠨ ᠵᠢᠷᠭᠠᠬᠤᠢ ᠳ᠋ᠤᠷ ᠬᠠᠷᠰᠢ ᠬᠦᠷᠢᠶᠡᠯᠡᠩ ᠳ᠋ᠦ᠍ᠷ ᠪᠡᠯᠡᠭᠲᠦ ᠺᠠᠷᠣᠳᠢ ᠬᠣᠨᠣᠭᠰᠢᠨ ᠡᠭᠦᠷᠯᠡᠵᠦ᠂ ᠢᠳᠡᠭᠡᠨ ᠦ᠌ ᠭᠡᠷ ᠲᠦ᠍ᠷ ᠮᠢᠬᠠ ᠤᠷᠭᠤᠬᠤ ᠬᠠᠲᠠᠭᠠᠮᠠᠯ ᠰᠢᠭᠦᠰᠦ ᠠᠵᠤ᠂ ᠬᠡᠩᠭᠡᠷᠭᠡ ᠴᠣᠬᠢᠮᠠᠭᠴᠠ ᠰᠡᠷᠢᠭᠦᠨ ᠰᠠᠯᠬᠢᠨ ᠳᠡᠭᠳᠡᠵᠦ᠂ ᠵᠤᠨ ᠤ᠋ ᠬᠠᠯᠠᠭᠤᠨᠠ ᠢᠳᠡᠭᠡᠨ ᠤᠮᠳᠠᠭᠠᠨ ᠦᠮᠡᠬᠡᠢᠷᠡᠨ ᠡᠪᠳᠡᠷᠡᠬᠦ ᠦᠭᠡᠢ ᠬᠡᠮᠡᠵᠦᠬᠦᠢ᠃ ᠬᠣᠢᠨᠠ ᠵᠧᠦ ᠤᠯᠤᠰ ᠤ᠋ᠨ ᠡᠩᠬᠡᠵᠢᠬᠦ ᠶ᠋ᠢᠨ ᠪᠡᠯᠭᠡ ᠳ᠋ᠦ᠍ᠷ ᠴᠢ ᠱᠠᠨ ᠠᠭᠤᠯᠠᠨᠠ ᠪᠡᠯᠡᠭᠲᠦ ᠺᠠᠷᠣᠳᠢ ᠮᠠᠭᠰᠢᠨ ᠳᠣᠩᠭᠣᠳᠴᠤ ᠂ ᠴᠠᠭᠠᠨ ᠵᠢᠭᠠᠰᠤ ᠣᠩᠭᠣᠴᠠᠨ ᠳ᠋ᠤᠷ ᠭᠠᠷᠴᠤ᠂ ᠤᠯᠠᠭᠠᠨ ᠰᠢᠪᠠᠭᠤ ᠭᠡᠷ ᠲᠦ᠍ᠷ ᠨᠢᠰᠴᠦ ᠣᠷᠣᠪᠠ ᠬᠡᠮᠡᠵᠦᠬᠦᠢ᠃ ᠲᠡᠢᠨ ᠬᠦ᠌ ᠡᠨᠡ ᠬᠣᠶᠠᠷ ᠺᠠᠷᠣᠳᠢ ᠶ᠋ᠢᠨ ᠬᠡᠷᠡᠭ ᠴᠥᠮ ᠳᠤᠯᠠᠭᠠᠨ ᠨᠠᠢᠷᠠᠮᠳᠠᠭᠤ ᠠᠮᠢᠰᠬᠤᠯᠲᠤ ᠡᠮᠦᠨᠡᠲᠦ ᠭᠠᠵᠠᠷ ᠲᠤᠯᠠ ᠴᠥᠮ ᠪᠠᠢᠵᠤ ᠪᠠᠢᠬᠤ ᠬᠡᠷᠡᠭ᠃ ᠭᠠᠭᠴᠠ ᠡᠨᠡ ᠶᠤᠸᠠᠨ ᠤᠯᠤᠰ ᠤ᠋ᠨ ᠲᠠᠢᠽᠦ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠴᠧᠩ ᠲᠢᠶᠠᠨ ᠴᠢ ᠶᠦᠨ ᠱᠧᠩ ᠡᠤ ᠬᠤᠸᠠᠩᠳᠢ᠂ ᠶᠡᠬᠡ ᠠᠷᠤ ᠡᠯᠡᠰᠦᠨ ᠦ᠌ ᠮᠤᠩ ᠭᠣᠣᠯ ᠤ᠋ᠨ ᠠᠮᠠᠨᠠ᠂ ᠳᠠᠯᠠᠨ ᠲᠠᠪᠤᠨ ᠠᠢᠮᠠᠭ ᠤᠯᠤᠰ ᠤ᠋ᠨ ᠨᠡᠢᠯᠡᠯᠲᠡ ᠶᠡᠬᠡ ᠴᠢᠭᠤᠯᠭᠠᠨ ᠴᠢᠭᠤᠯᠵᠤ᠂ ᠤᠨᠢᠭᠤᠯ ᠬᠤᠲᠠᠳᠤ ᠵᠢᠪᠬᠤᠯᠠᠩ ᠪᠠᠯᠭᠠᠰᠤᠨ ᠤ᠋ ᠸᠴᠢᠷ ᠮᠠᠨᠳᠠᠯ ᠳ᠋ᠤᠷ ᠬᠠᠭᠠᠨ ᠰᠠᠭᠤᠷᠢᠨ ᠳ᠋ᠤᠷ ᠰᠠᠭᠤᠬᠤᠶᠠ᠂ ᠪᠠᠰᠠ ᠡᠨᠡ ᠪᠡᠯᠡᠭᠲᠦ ᠺᠠᠷᠣᠳᠢ ᠰᠢᠪᠠᠭᠤ ᠳᠣᠩᠭᠣᠳᠪᠠ ᠭᠡᠮᠡᠨ᠂ ᠠᠷᠪᠠᠨ ᠭᠤᠷᠪᠠᠨ ᠵᠦᠢᠯ ᠦ᠋ᠨ ᠴᠡᠳᠢᠭ ᠲᠡᠦᠬᠡ《ᠬᠥᠬᠡ ᠰᠣᠳᠣᠷᠠ 》ᠤᠯᠠᠩᠭᠢᠨᠠ ᠡᠨᠡ ᠨᠢᠭᠡᠨ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠬᠢᠯᠪᠠᠰᠤᠲᠤ ᠥᠳᠥ ᠰᠣᠳᠣᠳᠤ ᠬᠤᠪᠢᠯᠭᠠᠨ ᠰᠢᠪᠠᠭᠤ ᠬᠡᠮᠡᠭᠰᠡᠨ ᠪᠠ ᠵᠠᠷᠢᠮ ᠳ᠋ᠤᠷ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠦᠬᠡᠷ ᠦ᠋ᠨ ᠴᠢᠨᠡᠭᠡᠨ ᠶᠡᠬᠡ ᠬᠤᠪᠢᠯᠭᠠᠨ ᠪᠣᠯᠵᠣᠮᠣᠷ《ᠴᠢᠩᠭᠢᠰ ᠴᠢᠩᠭᠢᠰ 》ᠭᠡᠮᠡᠨ ᠳᠣᠩᠭᠣᠳᠪᠠ ᠬᠡᠮᠡᠮᠦᠢ᠃ ᠵᠠᠷᠢᠮ ᠨᠠᠷᠢᠨ ᠨᠢᠭᠲᠠ ᠶᠡᠬᠡᠬᠡᠨ ᠮᠡᠳᠡᠯᠲᠦ ᠪᠠᠭᠰᠢ ᠨᠠᠷ ᠤ᠋ᠨ ᠪᠢᠴᠢᠭᠰᠡᠨ ᠢᠨᠦ᠂ ᠵᠢᠷᠭᠤᠭᠠᠨ ᠲᠣᠬᠣᠢ ᠶ᠋ᠢᠨ ᠥᠨᠳᠥᠷ ᠪᠡᠶᠡᠲᠦ ᠪᠡᠯᠡᠭᠲᠦ ᠺᠠᠷᠣᠳᠢ ᠳᠣᠩᠭᠣᠳᠪᠠ ᠬᠡᠮᠡᠵᠦᠬᠦᠢ᠃ ᠡᠳᠡᠭᠡᠷ ᠰᠤᠳᠤᠷ ᠤ᠋ᠳ ᠢ᠋ ᠪᠢ ᠬᠣᠷᠢᠭᠠᠳ ᠨᠠᠰᠤᠨ ᠤ᠋ ᠦᠶᠡ ᠳ᠋ᠦ᠍ᠷ ᠡᠳᠡᠭᠡᠷ ᠢ᠋ ᠴᠤᠭᠯᠠᠭᠤᠯᠤᠨ ᠣᠪᠣᠭᠠᠯᠠᠵᠤ ᠢᠯᠭᠠᠨ ᠴᠥᠯᠪᠡᠬᠦᠶᠡ ᠡᠮᠦᠨᠡᠲᠦ ᠬᠠᠯᠠᠭᠤᠨ ᠳᠤᠯᠠᠭᠠᠨ ᠭᠠᠵᠠᠷ ᠤ᠋ᠨ ᠺᠠᠷᠣᠳᠢ ᠰᠢᠪᠠᠭᠤᠨ ᠬᠡᠳᠦᠢᠪᠡᠷ ᠬᠠᠪᠤᠷ ᠤ᠋ᠨ ᠦᠶᠡ ᠬᠡᠮᠡᠪᠡᠴᠦ ᠶᠠᠭᠤᠨᠠᠢ ᠠᠷᠤ ᠡᠯᠡᠰᠦᠨ ᠦ᠌ ᠲᠡᠢᠮᠦ ᠬᠦᠢᠲᠡᠨ ᠵᠢᠬᠡᠭᠦᠨ ᠭᠠᠵᠠᠷᠠ ᠨᠢᠰᠦᠨ ᠬᠦᠷᠬᠦ ᠠᠵᠢ ! ᠭᠡᠮᠡᠨ ᠵᠦᠢ ᠳ᠋ᠦ᠍ᠷ ᠦᠯᠦ ᠨᠡᠢᠴᠡᠬᠦᠶᠡ ᠬᠠᠷᠠᠬᠠᠨ ᠰᠡᠵᠢᠭᠯᠡᠭᠢᠯᠡᠨ ᠭᠤᠴᠢᠭᠠᠳ ᠣᠨ ᠪᠣᠯᠵᠤ᠂ ᠲᠠᠪᠢᠨ ᠨᠠᠰᠤᠨ ᠤ᠋ ᠣᠷᠴᠢᠮ ᠮᠠᠨ ᠤ᠋ ᠲᠠᠢᠴᠢᠩ ᠤᠯᠤᠰ ᠲᠤᠷ ᠲᠣᠭᠣᠷᠢᠭᠰᠠᠨ ᠳᠥᠷᠪᠡᠨ ᠲᠢᠪ ᠦ᠋ᠨ 《ᠪᠦᠦ ᠪᠢᠴᠢᠭ 》 ᠦ᠋ᠳ ᠪᠠ ᠵᠢᠴᠢ ᠪᠠᠰᠠ ᠪᠢᠳᠡᠨ ᠦ᠌ ᠥᠪᠡᠷᠦᠨ ᠤᠯᠤᠰ ᠤ᠋ᠨ ᠵᠠᠷᠯᠢᠭ ᠤ᠋ᠨ ᠰᠠᠢᠳ ᠶᠡᠬᠡ ᠽᠦᠩᠳᠦ᠋ ᠪᠧᠢ ᠶᠠᠩ ᠳᠠ ᠴᠧᠨ – ᠯᠢ ᠾᠦᠩ ᠵᠠᠩ ᠂ ᠽᠧᠩ ᠭᠦᠸᠧ ᠹᠠᠨ ᠂ ᠽᠦᠸᠧ ᠽᠦᠩ ᠳᠠᠩ ᠵᠡᠷᠭᠡ ᠶ᠋ᠢᠨ ᠣᠯᠠᠨ ᠨᠣᠶᠠᠳ ᠲᠦᠰᠢᠮᠡᠳ ᠤᠷᠢᠳ ᠬᠣᠵᠢᠳ ᠳᠥᠴᠢ ᠲᠠᠪᠢᠨ ᠪᠠᠭᠠ ᠨᠣᠶᠠᠳ ᠭᠠᠳᠠᠭᠠᠳᠤ ᠵᠢᠷᠭᠤᠭᠠᠨ ᠶᠡᠬᠡ ᠤᠯᠤᠰ ᠤ᠋ᠳ ᠯᠤᠭᠠ ᠶᠡᠬᠡ ᠳᠠᠯᠠᠢ ᠪᠠᠷ ᠣᠷᠴᠢᠯᠠᠩ ᠢ᠋ ᠣᠷᠴᠢᠨ ᠡᠷᠭᠢᠭᠰᠡᠨ ᠣᠯᠠᠨ ᠪᠢᠴᠢᠭ ᠦ᠋ᠳ ᠢ᠋ ᠣᠯᠵᠤ ᠦᠵᠡᠭᠡᠳ᠂ ᠡᠨᠡ ᠺᠠᠷᠣᠳᠢ ᠰᠢᠪᠠᠭᠤ ᠵᠤᠨ ᠤ᠋ ᠦᠶᠡ ᠳ᠋ᠦ᠍ᠷ ᠶᠡᠬᠡ ᠤᠮᠠᠷᠠ ᠲᠢᠪ ᠦ᠋ᠨ ᠮᠥᠰᠥᠨ ᠳᠠᠯᠠᠢ ᠶ᠋ᠢᠨ ᠴᠠᠰᠤᠲᠤ ᠠᠭᠤᠯᠠ ᠳ᠋ᠤᠷ ᠮᠥᠨ ᠪᠠᠢᠬᠤ ᠶ᠋ᠢ ᠣᠯᠠᠨ ᠬᠥᠮᠦᠨ ᠦᠵᠡᠵᠦ ᠲᠡᠮᠳᠡᠭᠯᠡᠭᠰᠡᠨ ᠢ᠋ ᠦᠵᠡᠵᠦ ᠭᠤᠴᠢᠨ ᠣᠨ ᠤ᠋ ᠰᠡᠵᠢᠭ ᠰᠠᠶᠢ ᠠᠷᠢᠯᠤᠨ ᠲᠠᠰᠤᠷᠠᠪᠠᠢ᠃ ᠴᠠᠰᠤᠲᠤ ᠠᠭᠤᠯᠠ᠂ ᠬᠠᠯᠬᠠ ᠠ᠋ᠴᠠ ᠨᠡᠩ ᠬᠦᠢᠲᠡᠨ ᠦᠭᠡᠢ᠃