ᠬᠢᠶᠠᠭ Хиаг
301
ᠬᠢᠶᠠᠭ (ᠬᠠᠷᠠ ᠬᠢᠶᠠᠭ)
ᠦᠶᠡᠲᠦ ᠤᠷᠭᠤᠮᠠᠯ ᠤ᠋ᠨ ᠢᠵᠠᠭᠤᠷ
ᠣᠯᠠᠨ ᠨᠠᠰᠤᠲᠤ ᠡᠪᠡᠰᠦᠯᠢᠭ ᠤᠷᠭᠤᠮᠠᠯ᠂ ᠦᠨᠳᠦᠰᠦᠯᠢᠭ ᠡᠰᠢ ᠲᠡᠢ᠂ ᠡᠯᠡᠰᠦᠨ ᠲᠣᠭᠳᠣᠢ ᠪᠦᠬᠦᠢ ᠰᠠᠬᠠᠯ ᠦᠨᠳᠦᠰᠦ ᠲᠡᠢ᠃ ᠰᠦᠷᠡᠯ ᠨᠢ ᠭᠠᠭᠴᠠᠭᠠᠷ ᠪᠤᠶᠤ ᠴᠥᠭᠡᠬᠡᠨ ᠬᠡᠳᠦ ᠪᠡᠷ ᠪᠤᠲᠠᠯᠠᠵᠤ ᠤᠷᠭᠤᠨᠠ᠂ ᠰᠢᠯᠤᠭᠤᠨ᠂ ᠦᠰᠦ ᠦᠭᠡᠢ᠂ 30—90cm ᠥᠨᠳᠥᠷ᠂ 2—3 ᠦᠶᠡ ᠲᠡᠢ᠂ ᠣᠵᠣᠭᠣᠷ ᠲᠤᠨᠢ ᠰᠢᠷᠬᠡᠭ ᠮᠡᠲᠦ ᠪᠣᠯᠤᠭᠰᠠᠨ ᠬᠤᠪᠠᠬᠠᠢᠷᠠᠭᠰᠠᠨ ᠨᠠᠪᠴᠢᠨ ᠤ᠋ ᠲᠣᠭᠳᠣᠢ ᠶ᠋ᠢᠨ ᠦᠯᠡᠳᠡᠭᠳᠡᠯ ᠪᠣᠢ᠃ ᠨᠠᠪᠴᠢ ᠨᠢ 7—14cm ᠤᠷᠲᠤ᠂ 3—5mm ᠥᠷᠭᠡᠨ᠂ ᠬᠠᠲᠠᠭᠤ ᠮᠥᠷᠲᠡᠭᠡᠨ ᠵᠤᠵᠠᠭᠠᠨ᠂ ᠲᠡᠭᠰᠢᠬᠡᠨ ᠬᠠᠪᠲᠠᠭᠠᠢ᠂ ᠭᠡᠪᠡᠴᠦ ᠭᠠᠩ ᠬᠠᠭᠤᠷᠠᠢ ᠪᠣᠯᠪᠠᠯ ᠳᠣᠲᠣᠭᠰᠢ ᠬᠤᠮᠢᠷᠠᠨᠠ᠂ ᠳᠡᠭᠡᠳᠦ ᠲᠠᠯᠠ ᠪᠣᠯᠤᠨ ᠬᠥᠪᠡᠭᠡ ᠨᠢ ᠠᠷᠵᠠᠭᠠᠷ᠃ ᠲᠦᠷᠦᠭᠦᠦ ᠬᠡᠯᠪᠡᠷᠢᠲᠦ ᠪᠠᠭ ᠴᠡᠴᠡᠭ ᠨᠢ12—18cm ᠤᠷᠲᠤ᠂ 6—10mm ᠥᠷᠭᠡᠨ᠂ ᠰᠢᠯᠤᠭᠤᠨ ᠤᠷᠭᠤᠨᠠ ; ᠵᠢᠵᠢᠭ ᠲᠦᠷᠦᠭᠦᠦ ᠨᠢ 10—20mm ᠤᠷᠲᠤ᠂ 5—10 ᠴᠡᠴᠡᠭ ᠲᠡᠢ᠂ ᠴᠠᠭᠠᠪᠲᠤᠷ ᠨᠣᠭᠣᠭᠠᠨ᠂ ᠪᠣᠯᠪᠠᠰᠤᠷᠠᠪᠠᠯ ᠰᠢᠷᠠ ᠪᠣᠯᠵᠤ ᠬᠤᠪᠢᠷᠠᠨᠠ᠂ ᠲᠦᠷᠦᠭᠦᠦ ᠶ᠋ᠢᠨ ᠲᠡᠩᠭᠡᠯᠢᠭ ᠦ᠋ᠨ ᠦᠶᠡ ᠪᠦᠷᠢ ᠳ᠋ᠦ᠍ ᠬᠣᠣᠰ ᠢ᠋ᠶ᠋ᠠᠷ ᠪᠤᠶᠤ ᠦᠵᠦᠭᠦᠷ ᠪᠣᠯᠤᠨ ᠳᠣᠣᠷᠠᠲᠤ ᠬᠡᠰᠡᠭ ᠦ᠋ᠨ ᠦᠶᠡ ᠪᠦᠷᠢ ᠳ᠋ᠦ᠍ ᠭᠠᠭᠴᠠᠭᠠᠷ ᠤᠷᠭᠤᠨᠠ ; ᠵᠢᠵᠢᠭ ᠲᠦᠷᠦᠭᠦᠦ ᠶ᠋ᠢᠨ ᠲᠡᠩᠭᠡᠯᠢᠭ ᠨᠢ ᠭᠢᠯᠦᠭᠡᠷ ; ᠬᠠᠯᠢᠰᠤ ᠨᠢ ᠰᠢᠪᠦᠭᠡᠨ ᠬᠡᠯᠪᠡᠷᠢ ᠲᠡᠢ᠂ ᠬᠠᠲᠠᠭᠤ᠂ ᠨᠢᠭᠡ ᠯᠡ ᠰᠤᠳᠠᠯ ᠲᠠᠢ᠂ ᠠᠷᠤ ᠲᠠᠯᠠ ᠶ᠋ᠢᠨ ᠳᠤᠮᠳᠠ ᠠ᠋ᠴᠠ ᠳᠣᠭᠣᠭᠰᠢ ᠬᠡᠰᠡᠭ ᠨᠢ ᠭᠢᠯᠦᠭᠡᠷ ᠪᠠᠢᠵᠤ ᠳᠡᠭᠡᠳᠦ ᠬᠡᠰᠡᠭ ᠨᠢ ᠠᠷᠵᠠᠭᠠᠷ ᠮᠥᠷᠲᠡᠭᠡᠨ ᠨᠠᠷᠢᠨ ᠰᠢᠷᠬᠡᠭ ᠦᠰᠦ ᠪᠦᠬᠦᠢ ᠬᠥᠪᠡᠭᠡ ᠲᠡᠢ᠂ ᠭᠠᠳᠠᠷ ᠬᠡᠪᠡᠭ ᠦ᠋ᠨ ᠶᠠᠭ ᠠᠷᠤ ᠠ᠋ᠴᠠ ᠨᠢ ᠪᠦᠷᠬᠦᠵᠦ ᠤᠷᠭᠤᠭᠰᠠᠨ ᠦᠭᠡᠢ ᠲᠤᠯᠠ ᠭᠠᠳᠠᠷ ᠬᠡᠪᠡᠭ ᠦ᠋ᠨ ᠤᠭ ᠤ᠋ᠨ ᠬᠡᠰᠡᠭ ᠨᠢ ᠢᠯᠡ ᠭᠠᠷᠳᠠᠭ ; ᠨᠢᠭᠡᠳᠦᠭᠡᠷ ᠬᠠᠯᠢᠰᠤ ᠨᠢ 5—9mm ᠤᠷᠲᠤ ; ᠭᠠᠳᠠᠷ ᠬᠡᠪᠡᠭ ᠨᠢ ᠭᠢᠯᠦᠭᠡᠷ᠂ᠨᠠᠷᠢᠨ᠂ ᠲᠣᠷᠭᠠᠨ ᠬᠠᠯᠢᠰᠤᠯᠢᠭ ᠬᠥᠪᠡᠭᠡ ᠲᠡᠢ ᠂ ᠱᠣᠪᠣᠭᠣᠷ ᠪᠤᠶᠤ ᠰᠤᠷ ᠮᠡᠲᠦ ᠦᠵᠦᠭᠦᠷ ᠲᠡᠢ ; ᠰᠠᠭᠤᠷᠢ ᠲᠠᠪᠠᠭ ᠨᠢ ᠭᠢᠯᠦᠭᠡᠷ ; ᠳᠣᠲᠣᠷ ᠬᠡᠪᠡᠭ ᠦ᠋ᠨ ᠦᠵᠦᠭᠦᠷ ᠨᠢ ᠶᠡᠷᠦ ᠳ᠋ᠡᠭᠡᠨ ᠪᠠᠬᠠᠨ ᠣᠨᠢ ᠲᠠᠢ ; ᠲᠣᠭᠣᠰᠣᠪᠴᠢ ᠨᠢ 3—4mm ᠤᠷᠲᠤ᠃
ᠬᠡᠭᠡᠷᠡ ᠲᠠᠯᠠ᠂ ᠴᠢᠭᠢᠭᠲᠡᠢ ᠭᠠᠵᠠᠷ᠂ ᠭᠣᠣᠯ ᠤ᠋ᠨ ᠬᠥᠪᠡᠭᠡ᠂ ᠪᠣᠭᠣᠨᠢᠬᠠᠨ ᠠᠭᠤᠯᠠ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠪᠦᠷ ᠤᠷᠭᠤᠨᠠ᠃ ᠬᠦᠢᠲᠡᠨ᠂ ᠭᠠᠩ ᠬᠠᠭᠤᠷᠠᠢ᠂ ᠬᠤᠵᠢᠷ ᠳᠤ ᠲᠡᠰᠪᠦᠷᠢᠲᠡᠢ ᠪᠡᠷ ᠦᠯᠦ ᠪᠠᠷᠠᠨ ᠮᠠᠯ ᠤᠨᠤᠭᠠᠨ ᠤ᠋ ᠭᠢᠰᠬᠢᠯᠡᠬᠦ ᠳ᠋ᠦ᠍ ᠪᠠᠰᠠ ᠲᠡᠰᠪᠦᠷᠢᠲᠡᠢ᠃
ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠥᠪᠥᠷ ᠮᠣᠩᠭᠣᠯ᠂ ᠰᠢᠨᠵᠢᠶᠠᠩ᠂ ᠱᠠᠨ ᠰᠢ᠂ ᠱᠠᠨᠰᠢ᠂ ᠾᠧᠪᠧᠢ ᠬᠢᠭᠡᠳ ᠵᠡᠭᠦᠨ ᠬᠣᠢᠲᠤ ᠣᠷᠣᠨ ᠳ᠋ᠤ᠌ ᠪᠦᠷ ᠤᠷᠭᠤᠳᠠᠭ᠃
ᠰᠠᠢᠨ ᠪᠣᠷᠳᠣᠭᠠ᠃ ᠣᠳᠣ ᠶᠡᠬᠡ ᠬᠡᠮᠵᠢᠶᠡ ᠪᠡᠷ ᠠᠷᠠᠴᠢᠯᠠᠨ ᠲᠠᠷᠢᠵᠤ ᠪᠣᠢ᠃
ᠬᠢᠲᠠᠳ ᠨᠡᠷᠡ᠄羊草（碱草）
ᠠᠩᠭ᠌ᠯᠢ ᠨᠡᠷᠡ᠄ Leymus chinensis (Trin. ex Bunge) Tzvel.
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠳ᠂ ᠡᠷᠬᠢᠮᠪᠠᠭᠠᠲᠤᠷ
ᠬᠢᠨᠠᠭᠴᠢ᠄ ᠫᠣ· ᠴᠠᠭᠠᠨ