ᠡᠮᠨᠢᠭ ᠰᠢᠯᠦᠭ - ᠴᠣ ᠂ ᠣᠷᠱᠤᠨ Эмнэг шүлэг – Чо ᠂ Оршин
273ᠡᠮᠨᠢᠭ ᠰᠢᠯᠦᠭ
ᠠᠷᠳᠠᠭ ᠤ᠋ᠨ ᠨᠢᠷᠤᠭᠤᠨ ᠳ᠋ᠤ᠌ ᠲᠣᠪᠬᠢᠲᠠᠯᠠ ᠳᠠᠷᠤᠭᠠᠳ
ᠠᠲᠠᠷ ᠤ᠋ᠨ ᠬᠥᠷᠥᠰᠥᠨ ᠳ᠋ᠦ᠍ ᠴᠢᠯᠡᠭᠡ ᠶ᠋ᠢ ᠨᠢ ᠭᠠᠷᠭᠠᠵᠤ
ᠠᠮᠠᠭᠠᠢ ᠵᠠᠭᠤᠯᠭᠠᠨ ᠠᠮᠠ ᠶ᠋ᠢ ᠨᠢ ᠮᠡᠳᠡᠭᠦᠯᠳᠡᠭ ᠰᠢᠭ
ᠢᠰᠡᠭᠡᠢ ᠲᠤᠭᠤᠷᠭᠠᠲᠠᠨ ᠤ᠋ ᠡᠭᠡᠯ ᠮᠠᠯᠴᠢᠨ
ᠢᠰᠢᠭᠡ ᠬᠤᠷᠠᠭᠠ ᠬᠠᠷᠢᠭᠤᠯᠳᠠᠭ ᠪᠢ
ᠡᠷᠡᠮᠡᠭ ᠢ᠋ᠶ᠋ᠡᠨ ᠭᠠᠷᠭᠠᠭᠰᠠᠨ ᠲᠣᠢᠯᠡᠮᠡᠯ ᠠᠭᠲᠠ ᠰᠢᠭ᠋
ᠡᠮᠨᠢᠭ ᠰᠢᠯᠦᠭ ᠲᠡᠢ ᠵᠠᠮ ᠳ᠋ᠠᠭᠠᠨ ᠲᠠᠭᠠᠷᠠᠯᠠ᠃
ᠳᠠᠳᠴᠢᠬᠠᠭᠰᠠᠨ ᠬᠥᠮᠦᠨ ᠳ᠋ᠦ᠍ ᠪᠣᠯ ᠰᠢᠯᠦᠭ ᠴᠢ
ᠳᠠᠯᠠᠪᠴᠢ ᠤᠷᠭᠤᠭᠰᠠᠨ ᠵᠢᠭᠦᠷᠲᠦ ᠬᠦᠯᠦᠭ ᠴᠦ᠍
ᠳᠠᠯᠢᠩᠪᠤᠤ ᠳᠡᠪᠡᠯ ᠲᠡᠢ ᠬᠥᠪᠡᠭᠦᠨ ᠨᠠᠳᠠ
ᠳᠠᠭᠠᠨ ᠪᠣᠷᠣ ᠠ᠋ᠴᠠ ᠴᠦ᠍ ᠬᠡᠴᠡᠭᠦᠦ ᠯᠡ ᠪᠠᠢᠨᠠ᠃
ᠲᠡᠭᠡᠪᠡᠴᠦ ᠰᠦᠷᠳᠡᠬᠦ ᠪᠡᠷ ᠦᠭᠡᠢ
ᠲᠡᠭᠡᠬᠦ ᠮᠥᠷᠲᠡᠭᠡᠨ ᠮᠣᠩᠭᠣᠯ ᠬᠥᠮᠦᠨ ᠲᠤᠯᠠ
ᠭᠠᠩ ᠳᠥᠷᠥᠭᠡ ᠪᠡᠨ ᠰᠣᠨᠤᠲᠠᠯᠠ ᠵᠢᠭᠢᠭᠡᠳ
ᠭᠠᠨᠵᠤᠭᠠ ᠪᠤᠰᠬᠠᠨ ᠦᠵᠡᠶᠡ᠃
ᠳᠤᠭᠤᠢᠯᠠᠵᠤ ᠪᠤᠬᠠᠨᠠ ᠤᠤ᠂ ᠦᠰᠦᠷᠴᠦ ᠴᠣᠢᠯᠤᠨᠠ ᠤᠤ?
ᠳᠤᠭᠲᠤᠷᠴᠤ ᠴᠣᠪᠬᠣᠴᠢᠨᠠ ᠤᠤ᠂ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡ
ᠳᠡᠭᠡᠷᠡ ᠨᠢ ᠮᠣᠷᠳᠠᠭᠰᠠᠨ ᠪᠢ ᠶᠡᠷᠦ ᠨᠢ
ᠳᠠᠮ ᠢ᠋ ᠨᠢ ᠦᠵᠡᠵᠦ ᠳᠡᠢᠯᠦᠨᠡ ᠪᠠᠢᠬᠠ᠃
ᠠᠮᠠ ᠲᠣᠯᠣᠭᠠᠢ ᠪᠠᠨ ᠴᠢ ᠮᠢᠨᠢ ᠮᠡᠳᠡᠪᠡᠯ
ᠠᠯᠬᠤᠭᠠ ᠰᠠᠢᠪᠤᠷ ᠢ᠋ᠶ᠋ᠠᠨ ᠲᠡᠭᠡᠭᠡᠳ ᠣᠯᠪᠠᠯ
ᠮᠢᠩᠭᠠᠨ ᠰᠦᠷᠦᠭ ᠦ᠋ᠨ ᠢ᠋ᠶ᠋ᠡᠨ ᠪᠡᠯᠴᠢᠭᠡᠷ ᠲᠦ᠍
ᠮᠠᠨᠠᠨ ᠪᠣᠰᠲᠠᠯᠠ ᠳᠣᠷᠢᠭᠤᠨ ᠳᠠᠪᠬᠢᠨᠠ ᠳᠠ᠃
ᠢᠷᠡᠯᠲᠡ᠄ ᠴᠣ· ᠣᠷᠱᠤᠨ ᠤ᠋《 ᠮᠠᠯᠴᠢᠨ ᠬᠥᠮᠦᠨ ᠦ᠌ ᠳᠠᠭᠤᠤ》 ᠨᠣᠮ ᠠ᠋ᠴᠠ ᠡᠰᠢᠯᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠷᠴᠡᠴᠡᠭ
2024 05 03