ᠬᠡᠢ ᠬᠠᠪᠤᠳᠠᠷᠲᠤ 《ᠴᠡᠭᠡᠵᠢ》 ᠤᠳ - ᠶᠣᠨᠳᠣᠨ ᠤ ᠪᠢᠯᠢᠭ᠌ - ᠪᠠᠭᠠᠲᠤᠷ Хий хавдарт “чээж” үүд - Ёндоны Билиг - Баатар
241ᠬᠡᠢ ᠬᠠᠪᠤᠳᠠᠷᠲᠤ 《ᠴᠡᠭᠡᠵᠢ》 ᠤᠳ
– ᠵᠠᠷᠢᠮ ᠵᠠᠷᠢᠮᠲᠠᠭ ᠵᠤᠯᠵᠠᠭᠠᠨ ᠨᠠᠷ ᠪᠤᠶᠤ
ᠵᠠᠷᠠᠭᠠ ᠬᠡᠷᠢᠶᠡ ᠨᠦᠭᠦᠳ ᠲᠦ
ᠢᠯᠭᠤᠮ ᠠᠷᠢᠭᠤᠨ ᠮᠣᠩᠭᠣᠯ ᠢ ᠭᠠᠢᠳᠠᠭᠤᠯᠬᠤ
ᠢᠴᠢᠭᠦᠷᠢ ᠦᠭᠡᠢ ᠲᠦᠢᠯᠪᠤᠷᠢᠲᠠᠢ ᠲᠡᠨᠡᠭ ᠦᠳ
ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠯᠤᠲᠤ ᠪᠤᠷᠲᠠᠭ ᠲᠠᠢ
ᠲᠤᠩ ᠴᠦ᠍ ᠲᠣᠮᠣ ᠬᠦᠢᠲᠡᠨ ᠮᠠᠯᠠᠭᠠᠢ ᠵᠡᠭᠦᠭᠡᠳ
ᠲᠡᠷᠡ ᠮᠠᠭᠤᠬᠠᠢ ᠮᠠᠯᠠᠭᠠᠢ ᠳᠠᠭᠠᠨ ᠳᠠᠷᠤᠭᠳᠠᠭᠠᠳ
ᠲᠠᠷᠯᠠᠩ ᠠᠰᠮᠠᠨ ᠪᠤᠬᠠ ᠰᠢᠭ᠋ ᠮᠥᠷᠭᠥᠯᠳᠦᠭᠡᠳ
ᠲᠡᠳᠡᠨᠦᠰ ᠡᠴᠡ ᠣᠨᠳᠣᠣ ᠬᠥᠮᠥᠰ ᠬᠥᠭᠡᠷᠦᠬᠦᠢ
ᠲᠡᠭᠷᠢ ᠳᠣᠣᠷᠠ ᠲᠥᠷᠥᠭᠡᠳᠦᠢ ᠶᠤᠮᠰᠢᠭ ᠯᠠ
ᠲᠡᠳᠡᠨ ᠰᠢᠭ《 ᠭᠠᠢᠬᠠᠮᠰᠢᠭ 》 ᠲᠠᠢ ᠶᠠᠭᠤᠮᠠᠰ
ᠲᠥᠷᠥᠳᠡᠭ ᠦᠭᠡᠢ ᠶᠤᠮᠰᠢᠭ ᠣᠪᠣᠷᠳᠠᠭᠠᠳ
ᠡᠴᠢᠭᠡ ᠡᠬᠡ ᠡᠴᠡ ᠲᠥᠷᠥᠭᠡᠳᠦᠢ ᠬᠠᠷᠢᠨ
ᠡᠷᠭᠢ ᠡᠯᠡᠰᠦᠨ ᠡᠴᠡ ᠲᠥᠷᠥᠴᠢᠭᠰᠡᠨ ᠶᠤᠮᠰᠢᠭ
ᠡᠭᠦᠰᠦᠯ ᠭᠠᠷᠤᠯ ᠢᠶᠠᠨ ᠫᠠᠳ ᠤᠮᠠᠷᠲᠠᠭᠠᠳ
ᠡᠪᠡᠰᠦᠨ ᠥᠲᠥ᠍ ᠬᠣᠷᠣᠬᠠᠢ ᠰᠢᠭ᠋ ᠮᠥᠯᠬᠥᠭᠡᠳ
ᠣᠷᠣᠭᠰᠠᠨ ᠪᠤᠤᠷᠠ ᠰᠢᠭ᠋ ᠰᠡᠪᠡᠰᠡᠯᠡᠭᠡᠳ ᠯᠡ
ᠠᠳᠠ ᠲᠡᠳᠡ ᠦᠭᠡᠢ ᠴᠡᠭᠡᠵᠢ ᠣᠷᠬᠢᠭᠠᠳ
ᠡᠴᠢᠭᠡ ᠡᠬᠡ ᠶ᠋ᠢᠨ ᠲᠣᠯᠣᠭᠠᠢ ᠶᠣᠷᠣᠳᠠᠭᠠᠳ
ᠡᠷᠡᠭᠦᠯ ᠮᠣᠷᠠᠯ ᠲᠠᠢ ᠮᠣᠩᠭᠣᠯ ᠵᠠᠶᠢᠭ ᠢ ᠡᠪᠳᠡᠵᠦ
ᠡᠯᠵᠢᠭᠡ ᠭᠠᠬᠠᠢ ᠠ᠋ᠴᠠ ᠴᠠᠭᠠᠰᠢ ᠠᠭᠠᠰᠢᠯᠠᠭᠠᠳ
ᠡᠪᠦᠭᠡᠳ ᠲᠣᠮᠣᠭᠠᠲᠠᠳ ᠡᠷᠳᠡᠮᠲᠦ ᠮᠡᠷᠭᠡᠳ ᠢ
ᠡᠷᠡᠦᠳᠡᠨ ᠳᠣᠷᠣᠮᠰᠢᠶᠠᠬᠤ ᠭᠡᠮᠡᠨ ᠭᠠᠯᠵᠠᠭᠤᠷᠠᠮᠤᠢ
ᠲᠡᠳᠡᠨᠦᠰ ᠬᠡᠳᠦᠨ ᠰᠢᠯᠦᠭ᠂ ᠬᠣᠶᠠᠷ ᠳᠠᠭᠤᠤ
ᠲᠡᠨᠡᠭ ᠶᠤᠮᠰᠢᠭ ᠡᠷᠢᠶᠡᠴᠢᠵᠦ ᠳᠠᠭᠤᠯᠠᠭᠰᠠᠨ ᠪᠤᠶᠤ
ᠭᠤᠷᠪᠠᠨ ᠨᠠᠭᠠᠳᠤᠮ ᠳᠥᠷᠪᠡᠨ ᠬᠤᠷᠢᠮ ᠨᠠᠢᠷ
ᠭᠤᠳᠤᠭᠠᠷᠳᠠᠭᠠᠳ ᠯᠠ ᠬᠥᠲᠥᠯᠦᠭᠰᠡᠨ ᠮᠠᠭᠠᠳ
ᠵᠢᠷᠭᠤᠭᠠ ᠶᠢᠨ ᠳᠠᠪᠠᠭᠠ ᠨᠢᠭᠡ ᠳᠠᠪᠠᠵᠤ
ᠵᠢᠷᠠᠨ ᠳᠥᠷᠪᠡ ᠳ᠋ᠦ᠍ ᠲᠡᠷᠢᠭᠦᠯᠡᠭᠰᠡᠨ ᠮᠠᠭᠠᠳ
᠁ ᠁
ᠲᠡᠭᠡᠪᠡᠴᠦ ᠡ ᠂ ᠲᠡᠭᠷᠢ ᠨᠤᠷᠠᠮᠠᠷ ᠯᠤᠲᠤ ᠴᠠᠯᠴᠢᠵᠤ
ᠲᠡᠮᠡᠭᠡᠨ ᠦ᠌ ᠨᠢᠭᠡ ᠬᠣᠷᠭᠣᠯ ᠢ ᠡᠷᠭᠦᠭᠡᠳ ᠴᠦ᠍
ᠲᠠᠪᠠᠲᠠᠢᠬᠠᠨ ᠳᠠᠪᠤ ᠠᠯᠬᠤᠵᠤ ᠴᠢᠳᠠᠯ ᠦᠭᠡᠢ
ᠲᠠᠷᠠ ᠪᠢᠷᠠ ᠲᠠᠮᠢᠷᠳᠠᠭᠠᠳ ᠵᠠᠮ ᠳᠠᠭᠠᠨ
ᠦᠬᠡᠷ ᠦᠨ ᠴᠣᠪᠣᠭᠠᠨ ᠳᠤ ᠪᠦᠳᠦᠷᠢᠳᠡᠭ ᠯᠠ
ᠦᠬᠡᠨᠴᠡ ᠪᠡᠷᠲᠡᠭᠴᠢᠳ ᠭᠠᠢᠬᠠᠯ ᠤ᠋ᠳ ᠶᠣᠮ
ᠲᠡᠢᠮᠦ ᠬᠢᠷᠢ ᠨᠢ ᠪᠡᠨ ᠴᠢᠩᠭᠢᠰ ᠡᠴᠡ ᠴᠦ᠍
ᠲᠣᠮᠣ ᠯᠤᠲᠤ ᠨᠦᠰᠡᠷ ᠰᠦᠷ ᠳᠤᠤᠭᠠᠷᠤᠭᠠᠳ
ᠪᠢᠷᠠᠭᠤ ᠪᠣᠯᠤᠭᠠᠳᠤᠢ ᠪᠠᠷ ᠁ ᠪᠦᠷ ᠴᠦ᠍ ᠁
ᠪᠤᠬᠠᠨ ᠤ ᠪᠠᠭᠠᠳᠠᠯ ᠢᠶᠠᠷ ᠁ ᠪᠦᠳᠦᠭᠦᠨ ᠁
ᠪᠦᠳᠦᠭᠦᠨ ᠪᠦᠳᠦᠭᠦᠨ ᠠᠳᠠ ᠲᠡᠨᠳᠡ ᠦᠭᠡᠢ
ᠪᠠᠭᠠᠰᠤ ᠰᠢᠭᠢᠰᠦ ᠠᠯᠳᠠᠵᠤ ᠰᠣᠯᠢᠶᠠᠷᠠᠭᠠᠳ ᠯᠠ
ᠰᠣᠬᠣᠷ ᠨᠣᠮᠣᠨ ᠮᠡᠲᠦ ᠭᠠᠵᠠᠷ ᠬᠥᠷᠥᠰᠥ ᠶ᠋ᠢ
ᠰᠥᠨᠢ ᠡᠳᠦᠷ ᠦᠭᠡᠢ ᠰᠡᠭᠴᠢᠭᠡᠳ ᠲᠡᠨᠦᠨᠡᠮ
ᠬᠤᠯᠠᠨ ᠲᠣᠯᠣᠩ ᠪᠣᠲᠣᠭᠣᠨ ᠬᠥᠭᠵᠢᠯ ᠬᠡᠮᠡᠬᠦ
ᠬᠣᠷᠸᠠ ᠡᠩᠬᠡ ᠰᠠᠨᠰᠠᠷ ᠮᠠᠢᠳᠠᠷ ᠬᠡᠮᠡᠬᠦ
ᠭᠡᠨᠡᠲᠡᠢ ᠠᠶᠤᠮᠠᠷ ᠠᠭᠤᠤ ᠨᠡᠷᠡ ᠡᠯᠭᠦᠭᠡᠳ
ᠬᠡᠷᠴᠡᠭᠡᠢ ᠣᠷᠬᠢᠭᠠ ᠬᠦᠩᠭᠢᠨᠡᠭᠡᠳ ᠪᠦᠷ ᠴᠦ᠍
ᠣᠪᠣᠭᠠ ᠲᠣᠪᠣᠭᠠ ᠴᠡᠭᠡᠵᠢ ᠣᠪᠣᠷ ᠬᠠᠶᠠᠵᠤ
ᠣᠷᠴᠢᠯᠠᠩ ᠶᠢᠷᠲᠢᠨᠴᠦ ᠶᠢ ᠣᠯᠠᠨ ᠳᠤ ᠬᠢᠰᠭᠢᠵᠦ
ᠮᠠᠨᠠᠢᠬᠢᠨ ᠤ ᠡᠪᠦᠭᠡᠳ ᠦᠨ ᠶᠠᠷᠢᠭᠠᠳ ᠪᠠᠢᠳᠠᠭ
ᠮᠠᠩᠭᠤᠰ ᠰᠢᠭ᠋ ᠥᠨᠥ᠍《ᠴᠡᠭᠡᠵᠢ》ᠬᠦᠦᠴᠤᠤᠯ
ᠮᠠᠩᠬᠠᠨ ᠨᠤᠲᠤᠭ᠂ ᠴᠠᠭᠠᠨ ᠬᠥᠳᠡᠭᠡ ᠪᠠᠷ
ᠮᠠᠨ ᠤ ᠲᠠᠨ ᠤ ᠶᠡᠬᠡ ᠪᠠᠭᠠ ᠬᠣᠲᠠ ᠪᠠᠷ
《ᠠᠪᠤ》 ᠵᠠᠯᠠᠭᠤᠰ
ᠰᠢᠳᠦᠯᠡᠩ 《ᠮᠥᠮᠥ᠍》 ᠨᠠᠷ
ᠠᠶᠤᠩᠭᠠ ᠰᠢᠭ᠋ ᠠᠭᠰᠤᠷᠠᠭᠠᠳ ᠁
ᠰᠣᠯᠣᠩᠭᠠ ᠰᠢᠭ᠋ ᠬᠡᠢᠲᠡᠭᠡᠳ ᠁
ᠠᠢᠬᠤᠪᠲᠤᠷ ᠠᠲᠠᠭᠠᠴᠢ ᠭᠠᠮᠰᠢᠭ ᠪᠣᠯᠤᠭᠠᠳ
ᠠᠢᠯ ᠠᠮᠢᠲᠠᠳ ᠲᠤ ᠭᠠᠢ ᠵᠣᠪᠠᠯ ᠲᠠᠷᠢᠭᠠᠳ
ᠨᠢᠭᠡᠮᠦᠰᠦᠨ ᠳᠡᠢᠯᠳᠡᠬᠦ ᠪᠡᠨ ᠪᠣᠯᠢᠭᠠᠳ ᠯᠠ
ᠨᠡᠢᠬᠡᠮ ᠨᠡᠢᠲᠡ ᠳᠦ ᠨᠣᠪᠰᠢ ᠬᠢᠵᠢᠭ ᠪᠣᠯᠵᠤ
ᠬᠡᠬᠡᠮᠰᠦᠭ ᠢᠵᠠᠭᠤᠷᠲᠠᠨ ᠮᠣᠩᠭᠣᠯ ᠢ ᠮᠢᠨᠢ
ᠬᠡᠲᠦᠷᠬᠡᠢ ᠬᠡᠴᠡᠭᠦᠳᠡᠭᠦᠯᠦᠭᠡᠳ ᠪᠠᠢᠨᠠ ⁈
ᠪᠣᠭᠳᠠ ᠡᠵᠡᠨ ᠥᠷᠯᠥᠭ ᠬᠠᠭᠠᠳ ᠮᠢᠨᠢ ᠡ
ᠪᠤᠷᠬᠠᠨ ᠲᠡᠭᠷᠢ ᠶᠡᠬᠡᠰ ᠳᠡᠭᠡᠳᠦᠰ ᠮᠢᠨᠢ ᠡ
ᠪᠣᠭ ᠣᠷᠣᠯᠠᠩ ᠪᠦᠲᠦᠭᠰᠡᠨ ᠭᠠᠢᠬᠠᠯ ᠤᠳ ᠢ
ᠪᠤᠯᠠᠰᠢᠯᠠᠭᠠᠳ ᠨᠢᠭᠡ ᠥᠷᠥᠰᠢᠶᠡᠬᠦ ᠪᠣᠯᠲᠤᠭᠠᠢ
ᠪᠤᠶᠠᠨ ᠢᠶᠠᠨ ᠪᠠᠷᠠᠭᠰᠠᠨ ᠰᠡᠭ ᠦᠳ ᠢ
ᠪᠤᠲᠠ ᠨᠢᠷᠭᠡᠴᠢ ᠡ᠂ ᠭᠤᠷᠪᠠ ᠮᠥᠷᠭᠥᠶᠡ
ᠢᠰᠡᠭᠡᠢ ᠲᠤᠭᠤᠷᠭᠠᠲᠠᠳ ᠬᠣᠭ ᠢ᠋ᠶ᠋ᠠᠨ ᠴᠡᠪᠡᠷᠯᠡᠭᠦ
ᠡᠩᠬᠡᠵᠢᠨ ᠮᠥᠩᠬᠡᠵᠢᠨ ᠡᠷᠢᠨ ᠠᠢᠰᠦᠢ ᠰᠢᠦ
ᠭᠠᠢᠬᠠᠮᠰᠢᠭᠲᠤ ᠬᠠᠭᠠᠨ ᠤ ᠠᠯᠲᠠᠨ ᠤᠷᠤᠭ ᠤᠨ
34 ᠳ᠋ᠤᠷ ᠦᠶᠡ ᠶᠢᠨ ᠰᠢᠳᠤᠷᠭᠤ ᠠᠴᠢ
ᠠᠯᠠᠭᠠᠨ ᠴᠢᠨᠡᠭᠡᠨ ᠠᠳᠠᠷᠭᠠᠨ ᠤ᠋ ᠬᠥᠪᠡᠭᠦᠨ
ᠠᠯᠳᠠᠷᠰᠢᠭᠠ ᠦᠭᠡᠢ ᠨᠠᠢᠷᠠᠭᠴᠢ ᠥᠭᠦᠯᠡᠨᠡᠮ
᠁ ᠁
2024᠂ 5᠂ 6 ᠦᠳᠡ ᠳᠦ
ᠬᠥᠬᠡᠬᠣᠲᠠᠨᠠ ᠬᠢᠨᠠᠮᠠᠭᠠᠢ ᠲᠤᠩᠭᠠᠨ ᠪᠠᠢᠵᠤ
ᠬᠢᠴᠢᠶᠡᠩᠭᠦᠢᠯᠡᠩᠬᠡᠨ ᠭᠢᠯᠠᠰ ᠪᠦᠲᠦᠭᠡᠪᠡᠢ᠃