ᠴᠠᠰᠤ ᠪᠢ ᠴᠠᠭᠠᠰᠤ - ᠴᠣ ᠂ ᠣᠷᠱᠤᠨ Цас би цаас – Чо ᠂ Оршин
262ᠴᠠᠰᠤ ᠪᠢ ᠴᠠᠭᠠᠰᠤ
ᠥᠰᠴᠦ ᠲᠥᠷᠥᠭᠰᠡᠨ ᠦ᠌ ᠵᠣᠯᠲᠠᠢ ᠶ᠋ᠢᠨ ᠬᠣᠪᠢᠨ ᠳ᠋ᠤ᠌
ᠴᠠᠰᠤ᠂ ᠴᠠᠭᠠᠰᠤᠨ ᠳ᠋ᠤ᠌ ᠢᠵᠢᠯᠢᠰᠢᠵᠦ ᠳᠠᠰᠤᠭᠰᠠᠨ ᠮᠢᠨᠢ
ᠰᠠᠨᠠᠭᠠ ᠪᠣᠳᠣᠯ ᠠ᠋ᠴᠠ ᠭᠠᠷᠳᠠᠭ ᠦᠭᠡᠢ᠃
ᠡᠪᠦᠯ ᠡᠪᠦᠭᠡᠨ ᠦ᠌ ᠮᠥᠩᠭᠥᠨ ᠡᠪᠦᠷ ᠡᠴᠡ
ᠦᠷᠪᠢᠰᠦᠨ ᠰᠠᠴᠤᠯᠠᠬᠤ ᠴᠢᠨᠳᠠᠭᠠᠨ ᠴᠠᠰᠤᠨ ᠠ᠋ᠴᠠ
ᠪᠣᠢᠵᠢᠵᠤ ᠲᠣᠷᠨᠢᠭᠰᠠᠨ ᠪᠠᠭᠠ ᠨᠠᠰᠤᠨ ᠤ᠋
ᠪᠣᠷᠣ ᠮᠥᠷ ᠢ᠋ᠶ᠋ᠡᠨ ᠣᠯᠤᠭᠠᠳ ᠬᠠᠷᠠᠯᠠ᠃
《 ᠵᠢᠪᠠᠷᠯᠠᠬᠤ ᠬᠦᠢᠲᠡᠨ ᠦ᠌ ᠢᠳᠡ ᠭᠣᠣᠯ ᠳ᠋ᠤ᠌
ᠵᠠᠯᠬᠠᠭᠤᠷᠠᠯ ᠦᠭᠡᠢ ᠴᠠᠰᠤ ᠪᠠᠷ ᠤᠬᠢᠶᠠ!
ᠥᠯᠴᠢᠷ ᠴᠢᠨᠠᠷ ᠢ᠋ ᠴᠢᠨᠢ ᠳᠠᠰᠬᠠᠨ ᠪᠠᠢᠵᠤ
ᠥᠰᠪᠥᠷᠢ ᠪᠡᠶᠡ ᠶ᠋ᠢ ᠴᠢᠨᠢ ᠳᠤᠯᠠᠭᠠᠴᠠᠭᠤᠯᠤᠨᠠ》 ᠭᠡᠰᠡᠨ
ᠡᠬᠡ ᠶ᠋ᠢᠨ ᠬᠡᠯᠡᠳᠡᠭ ᠦᠭᠡ ᠶ᠋ᠢ ᠵᠢᠷᠤᠮᠯᠠᠵᠤ
ᠡᠷᠲᠡ ᠪᠦᠷᠢ ᠴᠠᠰᠤ ᠪᠠᠷ ᠨᠢᠭᠤᠷ ᠢ᠋ᠶ᠋ᠠᠨ ᠠᠷᠴᠢᠳᠠᠭ᠂
ᠡᠪᠡᠢ ᠂ ᠲᠡᠲᠡᠭᠡᠢ ᠭᠡᠳ ᠳᠠᠭᠵᠢᠨ ᠴᠡᠴᠡᠷᠡᠪᠡᠴᠦ
ᠡᠷᠭᠢᠭᠡᠳ ᠬᠠᠯᠠᠰᠠᠨ ᠪᠦᠯᠢᠶᠡᠰᠴᠦ ᠢᠷᠡᠳᠡᠭ᠂
ᠦᠳᠡᠰᠢ ᠣᠷᠣᠢ ᠶ᠋ᠢᠨ ᠢ᠋ᠶ᠋ᠡᠨ ᠴᠢᠯᠥᠭᠡ ᠴᠠᠭ ᠢ᠋ᠶ᠋ᠠᠷ
ᠦᠶᠡ ᠶ᠋ᠢᠨ ᠬᠢᠨ ᠲᠡᠢ ᠪᠡᠨ ᠴᠤᠭᠯᠠᠷᠠᠨ ᠦᠢᠮᠡᠬᠦ ᠳ᠋ᠦ᠍
ᠬᠥᠮᠦᠨ ᠦ᠌ ᠱᠤᠭᠤᠮ ᠢ᠋ ᠴᠠᠰᠤ ᠪᠠᠷ ᠪᠦᠲᠦᠭᠡᠭᠡᠳ
ᠬᠦᠷᠢᠶᠡ ᠲᠡᠳᠡᠨ ᠵᠡᠭᠡᠷᠡᠩᠬᠡᠢᠯᠡᠵᠦ ᠨᠠᠭᠠᠳᠳᠠᠭ᠃
ᠬᠠᠶᠠ ᠵᠠᠷᠢᠮ ᠳ᠋ᠠᠭᠠᠨ ᠴᠠᠰᠤᠨ ᠪᠥᠮᠪᠥᠭᠡ ᠪᠡᠷ
ᠬᠠᠷᠢᠯᠴᠠᠨ ᠲᠠᠯᠠᠯᠠᠭᠠᠳ ᠰᠢᠳᠡᠯᠴᠡᠵᠦ ᠭᠠᠷᠳᠠᠭ᠂
ᠬᠠᠯᠠᠰᠴᠤ ᠬᠥᠯᠥᠷᠡᠭᠡᠳ ᠠᠩᠭᠠᠬᠤ ᠦᠶᠡᠰ
ᠬᠠᠮᠢᠶᠠ ᠨᠠᠮᠢᠶᠠ ᠦᠭᠡᠢ ᠠᠯᠠᠭᠠᠯᠠᠵᠤ ᠢᠳᠡᠳᠡᠭ᠃
ᠴᠠᠰᠤ ᠨᠠᠢᠵᠠ ᠨᠠᠳᠠ ᠳ᠋ᠠᠭᠠᠨ ᠢᠪᠡᠭ
ᠴᠠᠳᠢᠭ ᠨᠠᠮᠲᠠᠷ ᠤ᠋ᠨ ᠮᠢᠨᠢ ᠮᠥᠷ ᠭᠡᠬᠦ ᠳ᠋ᠦ᠍
ᠴᠢᠨᠠᠭᠰᠢᠯᠠᠨ ᠣᠳᠬᠤ ᠨᠠᠰᠤᠨ ᠤ᠋ ᠳᠠᠪᠠᠭᠠᠨ ᠳ᠋ᠤ᠌
ᠴᠠᠭᠠᠰᠤ ᠬᠠᠷᠢᠨ ᠨᠠᠳᠠᠳᠤ ᠨᠥᠬᠥᠷ ᠠ᠋!
ᠠ ᠦᠰᠦᠭ ᠢ᠋ ᠡᠬᠢᠯᠡᠨ ᠨᠢᠳᠦᠯᠡᠵᠦ
ᠠᠩᠬᠠᠨ ᠤᠳᠠᠭᠠ ᠦᠵᠦᠭ ᠪᠠᠷᠢᠬᠤ ᠳ᠋ᠠᠭᠠᠨ
ᠴᠠᠰᠤᠨ ᠳ᠋ᠤ᠌ ᠬᠦᠳᠡᠷᠰᠢᠭᠰᠡᠨ ᠮᠣᠢᠨᠣᠭ ᠭᠠᠷ ᠮᠢᠨᠢ
ᠴᠠᠭᠠᠰᠤᠨ ᠤ᠋ ᠡᠯᠢᠭᠡᠨ ᠳ᠋ᠦ᠍ ᠬᠥᠯ ᠠᠯᠳᠠᠭᠠᠳ
ᠪᠦᠳᠦᠷᠢᠵᠦ ᠣᠢᠴᠢᠳᠠᠭ ᠮᠥᠷ ᠲᠡᠢ ᠪᠡᠨ ᠪᠠᠷᠤᠭ
ᠪᠦᠳᠦᠭᠦᠨ ᠪᠦᠳᠦᠭᠦᠨ ᠡᠷᠢᠶᠡᠴᠢᠵᠦ ᠭᠠᠷᠤᠯᠠ᠂
ᠭᠡᠯᠡ ᠴᠦ᠍ ᠪᠢ ᠵᠣᠷᠢᠭ ᠮᠣᠬᠣᠭᠠ ᠦᠭᠡᠢ
ᠭᠡᠮ ᠦᠭᠡᠢ ᠳᠠᠰᠤᠭᠰᠠᠨ ᠴᠠᠰᠤ ᠰᠢᠭ᠋ ᠢ᠋ᠶ᠋ᠡᠨ
ᠦᠶᠡ ᠮᠢᠨᠢ ᠰᠢᠮᠰᠢᠷᠡᠵᠦ ᠬᠤᠷᠤᠭᠤ ᠮᠢᠨᠢ ᠬᠥᠰᠢᠭᠰᠡᠨ ᠴᠦ᠍
ᠦᠵᠦᠭ ᠢ᠋ᠶ᠋ᠡᠨ ᠠᠳᠬᠤᠭᠠᠳ ᠪᠢᠴᠢᠭᠰᠡᠭᠡᠷ ᠪᠠᠢᠯᠠ᠃
ᠴᠠᠰᠤ ᠰᠢᠭ᠋ ᠴᠠᠭᠠᠨ ᠴᠠᠭᠠᠰᠤᠨ ᠪᠡᠯᠴᠢᠭᠡᠷ ᠲᠦ᠍
ᠴᠠᠭᠠᠷᠠᠭᠰᠠᠨ ᠦᠵᠦᠭ ᠮᠢᠨᠢ ᠢᠷᠠᠯᠵᠠᠨ ᠳᠠᠪᠬᠢᠬᠤ ᠳ᠋ᠤ᠌
ᠡᠬᠡ ᠨᠤᠲᠤᠭ ᠤ᠋ᠨ ᠴᠠᠰᠤ ᠬᠠᠨᠢ
ᠡᠷᠬᠡ ᠨᠠᠰᠤᠨ ᠳ᠋ᠤ᠌ ᠳᠠᠳᠤᠯᠭᠠ ᠪᠣᠯᠤᠭᠰᠠᠨ ᠠ᠋ᠴᠠ
ᠡᠬᠡ ᠬᠡᠯᠡᠨ ᠦ᠌ ᠡᠷᠳᠡᠨᠢ ᠦᠰᠦᠭ ᠲᠦ᠍
ᠡᠩ ᠦᠭᠡᠢ ᠴᠠᠭᠠᠰᠤ ᠰᠤᠷᠭᠠᠭᠤᠯᠢᠯᠠᠯ ᠪᠣᠯᠤᠭᠰᠠᠨ ᠠ᠋ᠴᠠ
ᠪᠢᠷ ᠦ᠋ᠨ ᠤᠰᠤ ᠪᠠᠨ ᠴᠠᠰᠤ ᠪᠠᠷ ᠳᠡᠪᠲᠦᠭᠡᠵᠦ
ᠪᠢᠯᠢᠭ ᠦ᠋ᠨ ᠵᠢᠭᠦᠷ ᠢ᠋ᠶ᠋ᠡᠨ ᠴᠠᠭᠠᠰᠤᠨᠠ ᠳᠡᠷᠪᠢᠭᠦᠯᠦᠭᠡᠳ
ᠰᠢᠮᠳᠠᠯᠭᠠ ᠴᠢᠷᠮᠠᠢᠯᠭᠠ ᠪᠠᠨ ᠲᠠᠯᠠ ᠰᠢᠭ᠋ ᠬᠠᠨᠠᠷᠠᠭᠤᠯᠤᠨᠠᠮ!
ᠰᠢᠯᠦᠭ ᠰᠣᠷᠢᠯᠲᠠ ᠪᠠᠨ ᠬᠥᠯᠥᠨ ᠰᠢᠭ ᠬᠠᠯᠭᠢᠭᠤᠯᠤᠨᠠᠮ!
ᠢᠷᠡᠯᠲᠡ᠄ ᠴᠣ· ᠣᠷᠱᠤᠨ ᠤ᠋《 ᠮᠠᠯᠴᠢᠨ ᠬᠥᠮᠦᠨ ᠦ᠌ ᠳᠠᠭᠤᠤ》 ᠨᠣᠮ ᠠ᠋ᠴᠠ ᠡᠰᠢᠯᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠷᠴᠡᠴᠡᠭ
2024 04 28