ᠮᠥᠷᠥᠭᠡᠳᠦᠯ ᠦᠨ ᠠᠢ - ᠶᠣᠨᠳᠣᠨ ᠤ ᠪᠢᠯᠢᠭ᠌ - ᠪᠠᠭᠠᠲᠤᠷ Мөрөөдлийн ай - Ёндоны Билиг - Баатар
251ᠮᠥᠷᠥᠭᠡᠳᠦᠯ ᠦᠨ ᠠᠢ
ᠲᠠ ᠲᠡᠳᠦᠢ ᠦᠨᠳᠦᠷ ᠲᠦ ᠲᠡᠭᠦᠯᠢᠬᠦ ᠪᠣᠯᠣᠨᠠ
ᠬᠣᠯᠠ ᠪᠣᠯ ᠴᠡᠩᠬᠡᠷ ᠥᠩᠭᠡᠲᠡᠢ
ᠣᠢᠷᠠ ᠪᠣᠯ ᠰᠦᠨ ᠥᠩᠭᠡᠲᠡᠶ
ᠬᠥᠩᠭᠡᠨ ᠠᠨᠤ ᠶᠠᠭᠠᠨ ᠥᠩᠭᠡᠲᠡᠢ
ᠬᠦᠨᠳᠦ ᠠᠨᠤ ᠠᠯᠲᠠᠨ ᠥᠩᠭᠡᠲᠡᠢ
ᠬᠤᠳᠠᠯ ᠠᠨᠤ ᠠᠯᠠᠭ ᠥᠩᠭᠡᠲᠡᠢ
ᠨᠢᠴᠦᠭᠦᠨ ᠦᠨᠡᠨ ᠯᠡ ᠥᠩᠭᠡ ᠦᠭᠡᠢ
ᠨᠢᠭᠦᠯ ᠪᠣᠯᠪᠠᠰᠤ ᠫᠠᠳ ᠬᠠᠷᠠ ᠥᠩᠭᠡᠲᠡᠶ
ᠮᠥᠩᠭᠥ ᠴᠠᠭᠠᠨ ᠨᠢᠳᠦ ᠤᠯᠠᠭᠠᠨ
ᠮᠥᠷᠥᠭᠡᠳᠦᠯ ᠴᠡᠩᠬᠡᠷ ᠥᠩᠭᠡᠲᠡᠶ
ᠭᠠᠳᠠᠭᠠᠲᠤ ᠳᠠᠯᠠᠢ ᠶ᠋ᠢᠨ ᠡᠷᠭᠢ ᠶ᠋ᠢ
ᠳᠣᠲᠣᠭᠠᠳᠤ ᠰᠡᠳᠬᠢᠯ ᠳ᠋ᠠᠭᠡᠨ
ᠭᠠᠢᠬᠠᠮᠠ ᠭᠣᠶᠣ ᠮᠥᠷᠥᠭᠡᠳᠦᠪᠡᠰᠦ
ᠳᠡᠷᠡᠰᠦᠨ ᠬᠣᠩᠬᠣᠷ ᠠ᠋ᠴᠠ ᠪᠠᠨ ᠬᠣᠯᠠᠳᠤᠨᠠᠮ
ᠣᠷᠴᠢᠯᠠᠩ ᠤᠨ ᠴᠡᠩᠬᠡᠷ ᠨᠠᠷᠠ ᠶ᠋ᠢ
ᠣᠢ ᠲᠠᠷᠢᠬᠢᠨ ᠳ᠋ᠠᠭᠠᠨ ᠮᠡᠰᠢᠳᠡ ᠬᠦᠰᠡᠪᠡᠰᠦ
ᠮᠤᠩᠬᠠᠭ ᠤᠨ ᠬᠠᠷᠠᠩᠭᠤᠢ ᠨᠢᠴᠦᠭᠦᠨ ᠭᠣᠪᠢ ᠶ᠋ᠢ
ᠮᠣᠷᠢᠲᠠᠢ ᠭᠡᠲᠦᠯᠦᠨ ᠰᠠᠨᠰᠠᠷᠯᠢᠭ ᠠᠢ ᠪᠢᠯᠬᠠᠨᠠᠮ
ᠶᠠᠮᠠᠷᠴᠤ ᠮᠥᠷᠥᠭᠡᠳᠦᠯ ᠦᠭᠡᠢ ᠦᠨᠳᠦᠰᠦᠲᠡᠨ
ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠰᠢᠭᠤᠳ ᠮᠥᠬᠥᠨᠡᠮ
ᠬᠢᠮᠤᠰᠤᠨ ᠲᠣᠯᠢᠨ ᠴᠢᠨᠡᠭᠡᠨ
ᠬᠢᠮᠳᠠᠬᠠᠨ ᠪᠢᠴᠠᠯ ᠮᠥᠷᠥᠭᠡᠳᠦᠯ ᠲᠠᠶ
ᠶᠠᠳᠠᠮᠠᠭ ᠳᠤᠯᠢᠮᠠᠭ ᠪᠡᠷᠲᠡᠭᠴᠢᠳ
ᠶᠠᠰᠤ ᠨᠢ ᠬᠠᠷᠠᠯᠠᠨ ᠳᠡᠯᠪᠡᠷᠡᠵᠦ ᠰᠥᠨᠥᠮᠦᠢ
ᠭᠡᠷᠡᠯᠳᠡᠶ ᠰᠠᠢᠨ ᠡᠷᠡᠰ ᠪᠦᠭᠦᠳᠡᠭᠡᠷ ᠢᠶᠠᠨ
ᠭᠡᠭᠡᠨ ᠠᠯᠤᠰ ᠮᠥᠷᠥᠭᠡᠳᠦᠯ ᠢ᠋ᠶ᠋ᠡᠨ
ᠬᠠᠮᠢᠭᠠ ᠶᠠᠪᠤᠪᠠᠴᠤ ᠬᠥᠲᠥᠯᠦᠳᠡᠭ
ᠬᠠᠮᠢᠭᠠ ᠴᠤ᠌ ᠲᠡᠭᠡᠭᠡᠳ ᠬᠦᠷᠲᠡᠭ
ᠭᠡᠮ ᠦᠭᠡᠢ ᠮᠥᠩᠬᠡ ᠮᠥᠷᠥᠭᠡᠳᠦᠯ ᠢᠶᠡᠨ
ᠭᠡᠭᠡᠨ ᠰᠤᠭᠤᠨᠠᠭ ᠲᠠᠲᠠᠭᠤᠯᠤᠨ ᠬᠥᠲᠥᠯᠦᠳᠡᠭ
ᠭᠡᠮᠰᠢᠯ ᠦᠭᠡᠢ ᠮᠥᠷᠥᠭᠡᠳᠦᠯ ᠪᠦᠬᠦᠨ ᠳ᠋ᠡᠭᠡᠨ
ᠭᠠᠷᠠᠭ ᠣᠳᠣᠳ ᠲᠠᠢ ᠴᠣᠭ ᠬᠥᠲᠥᠯᠦᠭᠳᠡᠳᠡᠭ
ᠠᠶᠠ ᠂ ᠮᠥᠷᠥᠭᠡᠳᠦᠯ ᠶᠠᠭᠤᠲᠠᠢ ᠰᠠᠢᠬᠠᠨ
ᠠᠮᠢ ᠠᠮᠢᠨ ᠮᠥᠷᠥᠭᠡᠳᠦᠯ ᠶᠠᠭᠤᠲᠠᠢ ᠰᠠᠢᠬᠠᠨ
ᠲᠤᠭᠤᠯ ᠤᠨ ᠪᠡᠯᠴᠢᠭᠡᠷ ᠡᠴᠡ ᠪᠠᠨ ᠯᠠ
ᠲᠣᠮᠣᠭᠠ ᠦᠭᠡᠢ ᠮᠢᠨᠦ ᠮᠥᠷᠥᠭᠡᠳᠦᠯ ᠡᠬᠢᠯᠡᠨ
ᠠᠯᠠᠭᠠ ᠳᠠᠷᠤᠮ ᠠᠳᠢᠷᠭᠠᠨ ᠠᠢᠯ ᠠ᠋ᠴᠠ ᠪᠠᠨ
ᠠᠷᠠᠪ ᠠᠮᠧᠷᠢᠺᠠ ᠶ᠋ᠢᠨ ᠲᠡᠭᠷᠢ ᠥᠭᠡᠳᠡ
ᠠᠯᠳᠠᠷᠲᠤ ᠢᠵᠠᠭᠤᠷᠲᠠᠨ ᠶᠣᠨᠳᠣᠨ ᠤ ᠬᠦᠦ ᠶ᠋ᠢ
ᠠᠯᠲᠠᠢ ᠶ᠋ᠢᠨ ᠪᠦᠷᠭᠦᠳ ᠰᠢᠭ᠌ ᠳᠡᠪᠲᠡᠷᠢᠭᠦᠯᠵᠡᠢ
ᠰᠠᠨᠰᠠᠷ ᠠᠭᠤᠳᠠᠮ ᠠ᠋ᠴᠠ ᠳᠡᠯᠡᠬᠡᠢ ᠶ᠋ᠢ ᠬᠠᠷᠠᠪᠠᠯ
ᠰᠢᠪᠠᠭᠤᠨ ᠤ ᠥᠨᠳᠡᠭᠡ ᠰᠢᠭ᠌ ᠵᠢᠵᠢᠭᠬᠡᠨ
ᠳᠠᠩᠴᠤ ᠬᠥᠭᠡᠷᠦᠬᠦᠨ ᠲᠡᠷᠡ ᠥᠨᠳᠡᠭᠡ ᠶ᠋ᠢ
ᠳᠠᠩᠽᠠᠨᠷᠠᠪᠵᠠᠢ ᠪᠢᠳᠡ ᠬᠣᠶᠠᠷ ᠨᠡᠪᠴᠢᠭᠦᠯᠦᠨᠡᠮ
ᠳᠠᠷᠠᠭᠠ ᠳᠠᠷᠠᠭᠠᠴᠢ ᠶ᠋ᠢᠨ ᠠᠩᠭᠠᠬᠠᠢ ᠨᠠᠷ ᠤᠨ
ᠳᠠᠯᠠᠪᠴᠢ ᠵᠢᠭᠦᠷ ᠨᠢ ᠠᠭᠠᠷ ᠲᠤ ᠪᠦᠲᠦᠨᠡᠮ
ᠪᠢᠳᠡᠨ ᠬᠣᠶᠠᠭᠤᠯᠠ ᠶ᠋ᠢ ᠮᠠᠷᠲᠠᠬᠤ ᠬᠥᠮᠦᠰ
ᠪᠢᠲᠡᠭᠦᠦ ᠬᠠᠯᠢᠰᠤᠨ ᠳ᠋ᠠᠭᠠᠨ ᠦᠨᠡᠭᠡᠴᠢᠯᠡᠨᠡᠮ
ᠪᠢ ᠴᠤ᠌ ᠶᠠᠭᠠᠬᠢᠬᠤᠪ ᠳ᠋ᠠ᠂ ᠬᠣᠢᠴᠢᠰ ᠮᠢᠨᠢ
ᠪᠢᠲᠡᠭᠡᠢ ᠯᠡ ᠨᠣᠶᠠᠨ ᠬᠤᠲᠤᠭᠲᠤ ᠶ᠋ᠢ ᠮᠠᠷᠲᠠ
ᠪᠢᠨᠳᠠᠷᠢᠶᠠᠨ ᠮᠥᠩᠬᠡ ᠬᠥᠬᠡ ᠲᠡᠭᠷᠢ ᠴᠢᠨᠢ
ᠪᠢᠯᠢᠭᠦᠨ ᠤᠬᠠᠭᠠᠨ ᠢ᠋ᠶ᠋ᠠᠨ ᠬᠤᠷᠢᠶᠠᠵᠤ ᠮᠠᠭᠠᠳ
ᠨᠠᠮᠠ ᠶ᠋ᠢ ᠥᠨᠢ ᠮᠠᠷᠲᠠᠭᠰᠠᠨ ᠲᠠᠨᠠᠷ ᠲᠤ
ᠨᠠᠷᠠ ᠮᠢᠨᠦ ᠡᠮᠦᠨᠡ ᠡᠴᠡ ᠲᠠᠯᠠᠷᠬᠠᠨᠠ
ᠨᠠᠮᠠ ᠶ᠋ᠢ ᠮᠠᠷᠲᠠᠬᠤ ᠶᠠᠭᠤ ᠴᠤ᠌ ᠪᠢᠰᠢ ᠡ
ᠨᠠᠢᠷᠠᠭ ᠰᠢᠯᠦᠭ ᠢ ᠮᠢᠨᠢ ᠯᠡ ᠤᠩᠰᠢᠵᠤ ᠪᠡᠶ
ᠨᠠᠰᠤ ᠬᠤᠲᠤᠭ ᠲᠠᠨᠢ ᠵᠢᠷᠭᠤᠭᠠᠲᠠᠢ ᠲᠠᠶᠢᠭ᠋ ᠲᠠᠢ
ᠨᠠᠷᠮᠠᠢ ᠮᠣᠩᠭᠣᠯ ᠲᠠᠨᠢ ᠬᠡᠢᠮᠣᠷᠢᠲᠠᠢ ᠶᠠᠪᠤᠨᠠᠮ
2024 . 5 . 5 ᠦᠳᠡ ᠶ᠋ᠢᠨ ᠬᠣᠢᠨᠠ
ᠵᠤᠨ ᠤ ᠠᠭᠤᠷ ᠣᠷᠣᠭᠰᠠᠨ ᠥᠯᠵᠡᠢᠲᠦ ᠰᠠᠢᠨ ᠡᠳᠦᠷ
ᠰᠢᠯᠦᠭ ᠪᠦᠲᠦᠭᠡᠳᠡᠭ ᠰᠢᠷᠭᠠᠯ ᠬᠠᠳᠠᠨ ᠪᠢᠴᠢᠭ᠌ ᠦᠨ
ᠰᠢᠷᠡᠭᠡᠨ ᠳᠡᠭᠡᠷᠡ ᠪᠡᠨ ᠭᠢᠯᠠᠰ ᠪᠦᠲᠦᠭᠡᠪᠡᠢ᠃
ᠬᠦᠬᠡᠬᠣᠲᠠᠨᠠ᠃
