ᠲᠠᠮᠠᠴᠢ ᠶ᠋ᠢᠨ ᠶᠡᠬᠡ ᠲᠠᠯᠠ- ᠶᠣ᠂ ᠡᠷᠳᠡᠨᠢᠲᠣᠭᠲᠠᠬᠤТамцийн их тал-Ё Эрдэнэтогтох
690ᠲᠠᠮᠠᠴᠢ ᠶ᠋ᠢᠨ ᠶᠡᠬᠡ ᠲᠠᠯᠠ
ᠶᠣ᠂ ᠡᠷᠳᠡᠨᠢᠲᠣᠭᠲᠠᠬᠤ
ᠲᠠᠯᠠ ᠰᠢᠭ᠋ ᠲᠠᠯᠠ ᠲᠡᠮᠡᠴᠢ ᠶ᠋ᠢᠨ ᠶᠡᠬᠡ ᠲᠠᠯᠠ
ᠲᠠᠯᠪᠢᠭᠤᠨ ᠲᠡᠪᠴᠢᠶᠡᠷᠢ ᠲᠡᠢ ᠪᠠᠢᠬᠤ ᠶ᠋ᠢᠨ ᠭᠦᠨ ᠤᠬᠠᠭᠠᠨ ᠤ᠋ ᠲᠠᠯᠠ
ᠲᠠᠯᠠ ᠶ᠋ᠢᠨ ᠲᠠᠯᠠ ᠲᠡᠮᠡᠴᠢ ᠶ᠋ᠢᠨ ᠶᠡᠬᠡ ᠲᠠᠯᠠ
ᠳᠠᠶᠠᠩ ᠳᠡᠯᠡᠬᠡᠢ ᠶ᠋ᠢ ᠠᠭᠤᠵᠢᠷᠠᠭᠤᠯᠤᠭᠰᠠᠨ ᠭᠦᠨᠵᠡᠭᠡᠢ ᠠᠮᠢᠰᠬᠤᠯᠲᠤ ᠲᠠᠯᠠ
ᠣᠳᠣᠨ ᠴᠡᠩᠬᠡᠷ ᠪᠥᠮᠪᠥᠷᠴᠡᠭ ᠮᠢᠨᠢ ᠡᠬᠢᠯᠡᠨ ᠲᠣᠭᠲᠠᠨᠢᠬᠤ ᠳ᠋ᠤ᠌
ᠣᠷᠣᠨ ᠵᠠᠢ ᠶ᠋ᠢ ᠨᠢ ᠲᠡᠯᠡᠵᠦ ᠥᠭᠭᠦᠭᠰᠡᠨ ᠤᠴᠢᠷ ᠲᠠᠢ ᠲᠠᠯᠠ
ᠬᠥᠬᠡ ᠲᠩᠷᠢ ᠲᠡᠷᠡ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠭᠠᠵᠠᠷ ᠲᠤ᠌ ᠪᠠᠭᠤᠭᠰᠠᠨ ᠶᠤᠮ ᠰᠢᠭ᠋
ᠬᠥᠬᠡᠷᠡᠨ ᠨᠡᠯᠦᠢᠬᠦ ᠳᠠᠯᠠᠢ ᠪᠠᠷ ᠳᠠᠪᠠᠯᠭᠠᠯᠠᠵᠤ ᠪᠠᠢᠭᠰᠠᠨ ᠲᠠᠯᠠ
ᠮᠥᠰᠥᠲᠥᠯ ᠦ᠋ᠨ ᠭᠠᠯᠪᠠ ᠶ᠋ᠢᠨ ᠶᠡᠭᠦᠷᠡᠭᠰᠡᠨ ᠶᠡᠬᠡ ᠭᠠᠮᠰᠢᠭ ᠲᠤ᠌
ᠮᠥᠬᠥᠯ ᠦᠭᠡᠢ ᠲᠠᠯᠪᠢᠭᠤᠨ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠦᠯᠡᠳᠡᠭᠰᠡᠨ ᠲᠠᠯᠠ
ᠮᠥᠷᠡᠨ ᠳᠠᠯᠠᠢ ᠴᠠᠯᠭᠢᠭᠤᠯᠵᠤ ᠪᠠᠢᠭᠰᠠᠨ ᠣᠮᠣᠭᠯᠠᠩ ᠲᠡᠦᠬᠡ ᠪᠡᠨ
ᠮᠥᠨ ᠴᠦ᠍ ᠣᠯᠠᠨ ᠢᠷᠮᠡᠭ ᠴᠠᠪᠴᠢᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠥᠩᠭᠡᠢᠭᠰᠡᠨ ᠲᠠᠯᠠ
ᠥᠯᠭᠡ ᠬᠦᠷᠪᠡᠯ ᠦ᠋ᠨ ᠵᠡᠭᠦᠳᠦ ᠬᠥᠷᠥᠰᠥᠨ ᠳᠣᠣᠷᠠ ᠨᠢ ᠮᠠᠨᠠᠭᠳᠠᠭᠠᠳ
ᠥᠨᠢ ᠢᠵᠠᠭᠤᠷ ᠤ᠋ᠨ ᠪᠤᠭᠤᠷᠤᠯ ᠳᠣᠮᠣᠭ ᠢ᠋ᠶ᠋ᠠᠷ ᠠᠮᠢᠰᠬᠤᠭᠰᠠᠨ ᠲᠠᠯᠠ
ᠴᠡᠭᠡᠵᠢᠨ ᠦ᠌ ᠬᠢᠨᠢ ᠭᠦᠨ ᠳ᠋ᠦ᠍ ᠡᠷᠲᠡᠨ ᠦ᠌ ᠭᠣᠣᠯ ᠨᠢᠭᠤᠭᠳᠠᠨ ᠤᠨᠳᠤᠷᠤᠭᠠᠳ
ᠴᠢᠭᠢᠭᠯᠢᠭ ᠴᠡᠩᠬᠡᠷ ᠵᠡᠷᠭᠡᠯᠭᠡᠨ ᠬᠤᠪᠢᠯᠵᠤ ᠮᠢᠷᠠᠯᠵᠠᠨ ᠬᠠᠲᠠᠷᠢᠭᠰᠠᠨ ᠲᠠᠯᠠ
ᠡᠷᠲᠡᠨ ᠦ᠌ ᠳᠡᠭᠡᠳᠦᠰ ᠮᠢᠨᠢ ᠠᠩᠬᠠ ᠡᠨᠳᠡ ᠲᠤᠬᠠᠯᠠᠨ ᠰᠠᠭᠠᠳᠠᠭᠠᠳ
ᠡᠭᠦᠯᠡᠨ ᠬᠥᠬᠡ ᠪᠢᠯᠡᠭᠦᠦ ᠪᠡᠷ ᠨᠢ ᠤᠬᠠᠭᠠᠨ ᠢ᠋ᠶ᠋ᠠᠨ ᠢᠷᠯᠡᠭᠰᠡᠨ ᠲᠠᠯᠠ
ᠡᠯᠢᠭᠡᠨ ᠬᠦᠷᠡᠩ ᠬᠠᠳᠠ ᠶ᠋ᠢ ᠨᠢ ᠰᠦᠭ ᠵᠢᠷᠤᠭ ᠢ᠋ᠶ᠋ᠠᠷ ᠬᠠᠶᠢᠭᠯᠠᠵᠤ
ᠡᠳᠦᠭᠡ ᠶ᠋ᠢᠨ ᠪᠢᠳᠡᠨ ᠳ᠋ᠦ᠍ ᠢᠯᠡᠭᠡᠭᠰᠡᠨ ᠡᠷᠳᠡᠮ ᠦ᠋ᠨ ᠴᠠᠳᠢᠭ ᠲᠠᠢ ᠲᠠᠯᠠ
ᠲᠠᠯᠠ ᠰᠢᠭ᠋ ᠲᠠᠯᠠ ᠲᠡᠮᠡᠴᠢ ᠶ᠋ᠢᠨ ᠶᠡᠬᠡ ᠲᠠᠯᠠ
ᠲᠠᠯᠪᠢᠭᠤᠨ ᠬᠦᠴᠦᠷᠬᠡᠭ ᠪᠠᠢᠬᠤ ᠶ᠋ᠢᠨ ᠭᠦᠨ ᠤᠬᠠᠭᠠᠨ ᠤ᠋ ᠲᠠᠯᠠ
ᠲᠠᠯᠠ ᠶ᠋ᠢᠨ ᠲᠠᠯᠠ ᠲᠡᠮᠡᠴᠢ ᠶ᠋ᠢᠨ ᠶᠡᠬᠡ ᠲᠠᠯᠠ
ᠳᠠᠶᠠᠩ ᠳᠡᠯᠡᠬᠡᠢ ᠶ᠋ᠢ ᠠᠭᠤᠵᠢᠷᠠᠭᠤᠯᠤᠭᠰᠠᠨ ᠭᠦᠨᠵᠡᠭᠡᠢ ᠠᠮᠢᠰᠬᠤᠯᠲᠤ ᠲᠠᠯᠠ
ᠲᠡᠦᠬᠡ ᠶ᠋ᠢᠨ ᠳᠤᠷᠠᠨ ᠢ᠋ᠶ᠋ᠠᠷ ᠥᠩᠭᠡᠷᠡᠭᠰᠡᠨ ᠢ᠋ ᠨᠢ ᠲᠠᠲᠠᠵᠤ ᠬᠠᠷᠠᠪᠠᠯ
ᠲᠦᠮᠡᠨ ᠬᠦᠯᠦᠭ ᠢ᠋ᠶ᠋ᠡᠨ ᠰᠣᠢᠵᠤ ᠪᠠᠢᠭᠰᠠᠨ ᠲᠠᠮᠠᠴᠢ ᠴᠡᠷᠢᠭ ᠦ᠋ᠨ ᠲᠠᠯᠠ
ᠠᠮᠪᠠᠭᠠᠢ ᠬᠠᠭᠠᠨ ᠤ᠋ ᠭᠡᠷᠢᠶᠡᠰ ᠢ᠋ᠶ᠋ᠡᠷ ᠪᠢᠯᠡᠭᠦᠳᠡᠭᠰᠡᠨ ᠮᠠᠬᠢᠷ ᠰᠡᠯᠡᠮᠡ ᠪᠡᠨ ᠭᠢᠯᠠᠯᠵᠠᠭᠤᠯᠤᠭᠠᠳ
ᠠᠯᠲᠠᠨ ᠤᠯᠤᠰ ᠤ᠋ᠨ ᠪᠣᠷᠣ ᠬᠡᠷᠡᠮ ᠢ᠋ ᠦᠶᠡᠷ ᠰᠢᠭ ᠨᠤᠷᠠᠭᠠᠭᠰᠠᠨ ᠪᠠᠭᠠᠲᠤᠷᠴᠤᠳ ᠤ᠋ᠨ ᠲᠠᠯᠠ
ᠬᠠᠭᠠᠨ ᠴᠡᠷᠢᠭ ᠦ᠋ᠨ ᠵᠢᠭᠰᠠᠭᠠᠯ ᠢ᠋ ᠬᠡᠢᠮᠣᠷᠢᠯᠠᠨ ᠪᠠᠷᠰ ᠰᠢᠭ᠋ ᠳᠠᠭᠠᠷᠢᠭᠰᠠᠨ
ᠬᠠᠷᠢᠶᠠ ᠶᠡᠬᠡᠲᠦ ᠬᠠᠷᠠ ᠰᠦᠯᠳᠡᠲᠦ ᠰᠥᠨᠢᠳ ᠲᠦᠮᠡᠨ ᠦ᠌ ᠲᠠᠯᠠ
ᠡᠵᠡᠨ ᠪᠣᠭᠳᠠ ᠶ᠋ᠢᠨ ᠠᠯᠲᠠᠨ ᠱᠠᠷᠢᠯ ᠮᠣᠤ ᠶ᠋ᠢᠨ ᠬᠥᠬᠡᠪᠦᠷ ᠲᠦ᠍ ᠰᠠᠭᠠᠲᠠᠬᠤ ᠳ᠋ᠤ᠌
ᠡᠮᠭᠡᠨᠢᠯᠲᠦ ᠰᠢᠯᠦᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠭᠤᠶᠤᠨ ᠭᠠᠷᠭᠠᠭᠰᠠᠨ ᠭᠢᠯᠦᠭᠡᠨ ᠪᠠᠭᠠᠲᠤᠷ ᠤ᠋ᠨ ᠲᠠᠯᠠ
ᠲᠠᠩᠰᠤᠭ ᠨᠤᠲᠤᠭ ᠳᠠᠷᠬᠠᠨ ᠤᠳᠤᠮ ᠢ᠋ᠶ᠋ᠠᠨ ᠬᠠᠷᠢᠲᠠᠨ ᠠ᠋ᠴᠠ ᠥᠮᠥᠭᠡᠷᠡᠨ
ᠲᠠᠩᠭᠢᠰ ᠮᠡᠷᠭᠡᠨ ᠳᠠᠢᠴᠢᠨ ᠨᠣᠶᠠᠨ ᠤ᠋ ᠪᠠᠭᠠᠲᠤᠷᠯᠠᠨ ᠲᠡᠮᠡᠴᠡᠭᠰᠡᠨ ᠲᠠᠯᠠ
ᠲᠠᠷᠨᠢ ᠶ᠋ᠢᠨ ᠰᠢᠳᠢᠲᠡᠢ ᠨᠠᠢᠷᠠᠭ ᠢ᠋ᠶ᠋ᠠᠨ ᠳᠠᠷᠠᠰᠤ ᠲᠠᠢ ᠣᠩᠭᠣᠳ ᠢ᠋ᠶ᠋ᠠᠷ ᠬᠥᠯᠭᠡᠯᠡᠵᠦ
ᠳᠠᠶᠠᠭᠠᠷ ᠣᠯᠠᠨ ᠳ᠋ᠤ᠌ ᠪᠠᠨ ᠰᠢᠪᠰᠢᠨ ᠡᠷᠭᠦᠭᠰᠡᠨ ᠲᠣᠭᠰᠢᠨ ᠬᠤᠲᠤᠭᠲᠤ ᠶ᠋ᠢᠨ ᠲᠠᠯᠠ
ᠰᠢᠳᠤᠷᠭᠤ ᠶ᠋ᠢ ᠱᠤᠯᠤᠵᠤ᠂ ᠱᠤᠯᠤᠮ ᠢ᠋ ᠳᠠᠬᠢᠬᠴᠢᠳ ᠤ᠋ᠨ ᠰᠥᠰᠥ ᠶ᠋ᠢ ᠬᠡᠮᠬᠡᠯᠵᠦ ᠪᠠᠢᠭᠰᠠᠨ
ᠰᠢᠯᠢ ᠶ᠋ᠢᠨ ᠰᠠᠢᠨ ᠡᠷᠡ ᠮᠥᠩᠭᠥᠨ ᠫᠠᠪᠠᠭ· ᠳᠣᠷᠣᠢ ᠪᠠᠨᠳᠢ· ᠵᠠᠨᠢᠮᠠᠢᠳᠠᠷ ᠦ᠋ᠨ ᠦᠯᠢᠭᠡᠷ ᠳᠣᠮᠣᠭᠲᠤ ᠲᠠᠯᠠ
ᠠᠬᠤᠢ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠠᠯᠳᠠᠷ ᠨᠡᠷᠡ ᠶ᠋ᠢ ᠠᠷᠪᠠᠨ ᠵᠦᠭ ᠲᠦ᠍ ᠳᠠᠭᠤᠷᠢᠰᠬᠠᠭᠰᠠᠨ
ᠠᠪᠤᠷᠭᠤ ᠲᠠᠪᠤᠲᠠᠢ᠂ ᠠᠷᠪᠠᠨ ᠵᠢᠷᠭᠤᠭᠠᠲᠤ ᠠᠭᠸᠠᠩᠭᠡᠨᠳᠦᠨ ᠨᠠᠷ ᠤ᠋ᠨ ᠪᠠᠷᠢᠯᠳᠤᠵᠤ ᠶᠠᠪᠤᠭᠰᠠᠨ ᠲᠠᠯᠠ
ᠲᠠᠯᠠ ᠰᠢᠭ᠋ ᠲᠠᠯᠠ ᠲᠡᠮᠡᠴᠢ ᠶ᠋ᠢᠨ ᠶᠡᠬᠡ ᠲᠠᠯᠠ
ᠲᠠᠯᠪᠢᠭᠤᠨ ᠶᠡᠬᠡᠮᠰᠦᠭ ᠪᠠᠢᠬᠤ ᠶ᠋ᠢᠨ ᠭᠦᠨ ᠤᠬᠠᠭᠠᠨ ᠤ᠋ ᠲᠠᠯᠠ
ᠲᠠᠯᠠ ᠶ᠋ᠢᠨ ᠲᠠᠯᠠ ᠲᠠᠮᠠᠴᠢ ᠶ᠋ᠢᠨ ᠶᠡᠬᠡ ᠲᠠᠯᠠ
ᠳᠠᠶᠠᠩ ᠳᠡᠯᠡᠬᠡᠢ ᠶ᠋ᠢ ᠠᠭᠤᠵᠢᠷᠠᠭᠤᠯᠤᠭᠰᠠᠨ ᠭᠦᠨᠵᠡᠭᠡᠢ ᠠᠮᠢᠰᠬᠤᠯᠲᠤ ᠲᠠᠯᠠ
ᠪᠣᠰᠤᠭᠠ ᠲᠡᠦᠬᠡ ᠪᠡᠨ ᠡᠷᠭᠦᠨ ᠲᠩᠷᠢ ᠲᠤᠯᠲᠠᠯᠠ ᠰᠢᠷᠤᠩᠬᠠᠢᠯᠠᠭᠰᠠᠨ
ᠪᠣᠷᠵᠢᠭᠢᠨ ᠬᠥᠭ ᠠᠶᠠᠯᠭᠤ ᠲᠠᠢ ᠤᠷᠲᠤ ᠶ᠋ᠢᠨ ᠳᠠᠭᠤᠤ ᠶ᠋ᠢᠨ ᠲᠠᠯᠠ
ᠠᠷᠭᠤᠮᠠᠭ ᠤ᠋ᠨ ᠬᠤᠷᠳᠤ ᠲᠠᠢ ᠰᠢᠨᠳᠠᠰᠤ ᠪᠠᠨ ᠤᠳᠤᠮ ᠳᠠᠮᠵᠢᠭᠤᠯᠤᠨ ᠥᠪᠯᠡᠭᠦᠯᠦᠭᠡᠳ
ᠠᠷᠠᠳ ᠤ᠋ᠨ ᠳᠠᠭᠤᠤ ᠪᠠᠷ ᠮᠥᠩᠬᠡᠷᠡᠭᠰᠡᠨ ᠬᠥᠭᠰᠢᠨ ᠬᠣᠤᠬᠤᠩ ᠤ᠋ᠨ ᠲᠠᠯᠠ
ᠰᠦᠮᠡᠲᠡᠢ ᠪᠤᠳᠠᠷ ᠤ᠋ᠨ ᠴᠢᠯᠠᠭᠤ ᠪᠠᠨ ᠬᠣᠢᠮᠣᠷ ᠲᠤ᠌ ᠪᠠᠨ ᠳᠡᠭᠡᠳᠦᠯᠡᠨ ᠵᠠᠰᠠᠭᠠᠳ
ᠰᠥᠨᠢᠳ ᠬᠣᠨᠢᠨ ᠡᠷᠳᠡᠨᠢ ᠪᠡᠷ ᠬᠣᠷᠭᠣᠢ ᠨᠤᠲᠤᠭ ᠢ᠋ᠶ᠋ᠠᠨ ᠴᠢᠮᠡᠭᠯᠡᠭᠰᠡᠨ ᠲᠠᠯᠠ
ᠰᠦᠨ ᠰᠢᠮᠡᠳᠦ ᠭᠣᠪᠢ ᠪᠠᠨ ᠡᠩᠭᠡᠷ ᠲᠦ᠍ ᠪᠡᠨ ᠨᠡᠷᠡᠯᠡᠨ ᠰᠢᠷᠭᠠᠯᠲᠤᠭᠤᠯᠤᠭᠠᠳ
ᠰᠦᠮᠪᠦᠨ ᠰᠢᠷᠡᠭᠡ ᠲᠡᠮᠡᠭᠡᠳ ᠢ᠋ᠶ᠋ᠡᠨ ᠥᠯᠥᠭᠡᠢᠳᠡᠨ ᠪᠦᠪᠡᠢᠯᠡᠭᠰᠡᠨ ᠲᠠᠯᠠ
ᠮᠢᠩᠭᠠᠨ ᠲᠠᠬᠢᠯ ᠰᠦᠮᠡᠲᠦ ᠶ᠋ᠢᠨ ᠪᠤᠯᠠᠭ ᠤ᠋ᠳ ᠨᠢ ᠰᠦᠵᠢᠷᠡᠨ ᠤᠨᠳᠤᠷᠤᠭᠠᠳ
ᠮᠢᠨᠵᠢ ᠶ᠋ᠢᠨ ᠰᠤᠷ ᠰᠢᠭ᠋ ᠲᠣᠷᠭᠠᠨ ᠪᠡᠯᠴᠢᠭᠡᠷ ᠢ᠋ᠶ᠋ᠡᠨ ᠷᠠᠰᠢᠶᠠᠯᠠᠭᠰᠠᠨ ᠲᠠᠯᠠ
ᠮᠢᠩᠭᠠᠨ ᠲᠠᠢᠵᠢ ᠶ᠋ᠢᠨ ᠪᠠᠭᠤᠴᠠ ᠲᠠᠢ ᠳᠥᠷᠪᠡᠨ ᠴᠠᠭ ᠤ᠋ᠨ ᠨᠤᠲᠤᠭ ᠢ᠋ᠶ᠋ᠠᠨ
ᠮᠢᠷᠠᠯᠵᠠᠨ ᠢᠪᠡᠯᠦᠭᠰᠡᠨ ᠡᠩᠭᠡᠷ ᠨᠦᠬᠡᠰ᠂ ᠬᠠᠯᠢᠭᠤᠲᠤ ᠶ᠋ᠢᠨ ᠭᠣᠣᠯ ᠨᠤᠭᠤᠳ ᠨᠢ ᠤᠮᠳᠠᠯᠠᠭᠰᠠᠨ ᠲᠠᠯᠠ
ᠬᠣᠷᠸᠠ ᠶ᠋ᠢᠨ ᠠᠮᠤᠭᠤᠯᠠᠩ ᠢ᠋ ᠮᠥᠩᠬᠡ ᠲᠩᠷᠢ ᠳ᠋ᠦ᠍ ᠪᠡᠨ ᠵᠠᠯᠪᠠᠷᠢᠨ ᠰᠦᠮᠪᠦᠷᠯᠡᠭᠰᠡᠨ
ᠬᠣᠰᠢᠭᠤ ᠣᠪᠣᠭᠠ᠂ ᠪᠠᠶᠠᠨ ᠣᠪᠣᠭᠠᠨ ᠤ᠋ ᠥᠭᠭᠢᠶᠡᠮᠦᠷ ᠬᠤᠷᠠ ᠶ᠋ᠢᠨ ᠬᠡᠰᠢᠭ ᠲᠡᠢ ᠲᠠᠯᠠ
ᠰᠠᠷᠠᠭᠤᠯᠬᠠᠨ ᠠᠯᠤᠰ ᠠ᠋ᠴᠠ ᠪᠠᠷᠠ ᠪᠠᠷᠠ ᠪᠠᠨ ᠬᠠᠷᠠᠨ ᠢᠵᠢᠯᠢᠰᠢᠨ ᠵᠦᠮᠪᠦᠷᠯᠡᠭᠰᠡᠨ
ᠰᠠᠢᠬᠠᠨ ᠥᠯᠵᠡᠢ᠂ ᠳᠠᠷᠬᠠᠨ ᠬᠠᠢᠷᠬᠠᠨ ᠤ᠋ ᠥᠨᠳᠥᠷ ᠪᠤᠶᠠᠨ ᠤ᠋ ᠲᠦᠰᠢᠭ ᠲᠡᠢ ᠲᠠᠯᠠ
ᠲᠠᠯᠠ ᠰᠢᠭ᠋ ᠲᠠᠯᠠ ᠲᠡᠮᠡᠴᠢ ᠶ᠋ᠢᠨ ᠶᠡᠬᠡ ᠲᠠᠯᠠ
ᠲᠠᠯᠪᠢᠭᠤᠨ ᠲᠠᠩᠰᠤᠭ ᠪᠠᠢᠬᠤ ᠶ᠋ᠢᠨ ᠭᠦᠨ ᠤᠬᠠᠭᠠᠨ ᠤ᠋ ᠲᠠᠯᠠ
ᠲᠠᠯᠠ ᠶ᠋ᠢᠨ ᠲᠠᠯᠠ ᠲᠡᠮᠡᠴᠢ ᠶ᠋ᠢᠨ ᠶᠡᠬᠡ ᠲᠠᠯᠠ
ᠳᠠᠶᠠᠩ ᠳᠡᠯᠡᠬᠡᠢ ᠶ᠋ᠢ ᠠᠭᠤᠵᠢᠷᠠᠭᠤᠯᠤᠭᠰᠠᠨ ᠭᠦᠨᠵᠡᠭᠡᠢ ᠠᠮᠢᠰᠬᠤᠯᠲᠤ ᠲᠠᠯᠠ
ᠠᠯᠲᠠᠨ ᠨᠠᠷᠠᠨ ᠳ᠋ᠤ᠌ ᠠᠳᠤᠭᠤ ᠮᠠᠯ ᠤ᠋ᠨ ᠬᠢᠨᠢ ᠵᠢᠰᠦ ᠭᠢᠯᠲᠠᠭᠠᠨᠠᠭᠠᠳ
ᠠᠷᠢᠭᠤᠨ ᠠᠭᠠᠷ ᠨᠢ ᠠᠢᠷᠠᠭ ᠤ᠋ᠨ ᠦᠨᠦᠷ ᠢ᠋ᠶ᠋ᠡᠷ ᠠᠮᠢᠰᠬᠤᠨ ᠰᠡᠩᠭᠢᠨᠡᠭᠰᠡᠨ ᠲᠠᠯᠠ
ᠠᠯᠤᠰ ᠤ᠋ᠨ ᠴᠢᠮᠡᠭᠡ ᠨᠢ《ᠦᠯᠡᠮᠵᠢ ᠶ᠋ᠢᠨ ᠴᠢᠨᠠᠷ》 ᠢ᠋ᠶ᠋ᠠᠷ ᠤᠶᠠᠩᠭᠠᠯᠠᠨ ᠰᠢᠷᠣᠩᠬᠠᠢᠯᠠᠭᠠᠳ
ᠠᠶᠠᠰ ᠤ᠋ᠨ ᠰᠠᠯᠬᠢ ᠨᠢ《ᠠᠯᠲᠠᠨᠵᠤᠯᠠ ᠴᠡᠴᠡᠭ》 ᠢ᠋ᠶ᠋ᠡᠷ ᠪᠡᠶᠡᠰᠦᠨ ᠪᠥᠵᠢᠭᠰᠡᠨ ᠲᠠᠯᠠ
ᠥᠷᠯᠥᠭᠡ ᠶ᠋ᠢᠨ ᠨᠠᠷᠠᠨ ᠳᠡᠨᠵᠢᠨ ᠳᠡᠭᠡᠷᠡ ᠡᠴᠡ ᠨᠢ ᠰᠢᠭᠦᠳᠡᠷᠢ ᠭᠢᠯᠲᠠᠭᠠᠨᠠᠭᠤᠯᠤᠨ ᠮᠠᠨᠳᠤᠬᠤ ᠳ᠋ᠤ᠌
ᠦᠯᠢᠭᠡᠷ ᠦ᠋ᠨ ᠳᠠᠭᠢᠨᠢ ᠰᠢᠭ᠋ ᠦᠵᠡᠰᠬᠦᠯᠡᠩ ᠪᠦᠰᠡᠭᠦᠢ ᠰᠦ ᠪᠡᠨ ᠳᠡᠭᠡᠵᠢᠯᠡᠵᠦ ᠡᠷᠭᠦᠭᠰᠡᠨ ᠲᠠᠯᠠ
ᠳᠣᠯᠣᠭᠠᠨ ᠥᠩᠭᠡ ᠪᠡᠷ ᠨᠤᠮᠤᠯᠠᠭᠰᠠᠨ ᠥᠯᠵᠡᠢᠲᠦ ᠰᠣᠯᠣᠩᠭᠠᠨ ᠳᠣᠭᠤᠤᠷ
ᠲᠤᠤᠯᠢᠰ ᠤ᠋ᠨ ᠪᠠᠭᠠᠲᠤᠷ ᠰᠢᠭ᠋ ᠠᠳᠤᠭᠤᠴᠢᠨ ᠵᠠᠯᠠᠭᠤ ᠰᠦᠷᠦᠭ ᠢ᠋ᠶ᠋ᠡᠨ ᠬᠤᠷᠢᠶᠠᠵᠤ ᠳᠠᠪᠬᠢᠭᠰᠠᠨ ᠲᠠᠯᠠ
ᠲᠤᠩ ᠴᠠᠭᠠᠨ ᠭᠡᠷ ᠦ᠋ᠳ ᠨᠢ ᠲᠡᠭᠷᠢ ᠶ᠋ᠢᠨ ᠬᠠᠶᠠᠭᠠᠨ ᠠ᠋ᠴᠠ ᠮᠥᠩᠭᠥᠷᠡᠨ ᠴᠠᠢᠯᠵᠠᠭᠠᠳ
ᠳᠤᠷᠳᠤᠩ ᠴᠡᠩᠬᠡᠷ ᠠᠷᠭᠠᠯ ᠤ᠋ᠨ ᠤᠲᠤᠭᠠ ᠨᠢ ᠠᠮᠤᠭᠤᠯᠠᠩ ᠰᠤᠪᠤᠷᠠᠭᠰᠠᠨ ᠲᠠᠯᠠ
ᠮᠠᠨᠳᠠᠯᠲᠤ ᠰᠠᠢᠬᠠᠨ ᠲᠠᠯᠠ ᠬᠣᠲᠠᠬᠠᠨ ᠴᠡᠭᠡᠯ ᠳ᠋ᠦ᠍ ᠨᠢ ᠢᠵᠢᠯᠢᠰᠢᠨ ᠵᠦᠮᠪᠦᠷᠯᠡᠭᠡᠳ
ᠮᠠᠷᠭᠠᠰᠢ ᠶ᠋ᠢᠨ ᠰᠠᠢᠬᠠᠨ ᠬᠥᠭᠵᠢᠯ ᠭᠠᠨᠳᠠᠷᠢᠯᠠᠨ ᠬᠠᠷᠠᠭᠳᠠᠭᠰᠠᠨ ᠲᠠᠯᠠ
ᠥᠷᠯᠥᠭ ᠳᠡᠭᠡᠳᠦᠰ ᠮᠢᠨᠢ ᠠᠮᠢᠨ ᠠ᠋ᠴᠠ ᠪᠠᠨ ᠢᠯᠡᠭᠦᠦ ᠬᠠᠷᠠᠮᠨᠠᠭᠠᠳ
ᠥᠨᠳᠥᠷ ᠵᠠᠶᠠᠭᠠ ᠥᠷᠭᠡᠨ ᠬᠡᠰᠢᠭ ᠲᠡᠢ ᠨᠢ ᠪᠢᠳᠡᠨ ᠳ᠋ᠦ᠍ ᠦᠯᠡᠳᠡᠭᠡᠭᠰᠡᠨ ᠲᠠᠯᠠ
ᠦᠶᠡ ᠶ᠋ᠢᠨ ᠦᠶᠡ ᠳ᠋ᠦ᠍ ᠪᠡᠨ ᠠᠮᠢ ᠲᠠᠢ ᠪᠠᠨ ᠬᠣᠯᠪᠣᠨ ᠨᠠᠨᠳᠢᠩᠨᠠᠭᠠᠳ
ᠥᠪ ᠰᠣᠶᠣᠯ ᠥᠨᠢᠷ ᠪᠠᠶᠠᠯᠢᠭ ᠲᠠᠢ ᠨᠢ ᠦᠷᠡ ᠬᠣᠢᠴᠢᠰ ᠲᠤ᠌ ᠪᠠᠨ ᠥᠪᠯᠡᠭᠦᠯᠬᠦ ᠲᠠᠯᠠ
ᠲᠠᠯᠠ ᠰᠢᠭ᠋ ᠲᠠᠯᠠ ᠲᠠᠮᠠᠴᠢ ᠶ᠋ᠢᠨ ᠶᠡᠬᠡ ᠲᠠᠯᠠ
ᠲᠠᠯᠪᠢᠭᠤᠨ ᠲᠠᠢᠪᠤᠩ ᠪᠠᠢᠬᠤ ᠶ᠋ᠢᠨ ᠭᠦᠨ ᠤᠬᠠᠭᠠᠨ ᠤ᠋ ᠲᠠᠯᠠ
ᠲᠠᠯᠠ ᠶ᠋ᠢᠨ ᠲᠠᠯᠠ ᠲᠠᠮᠠᠴᠢ ᠶ᠋ᠢᠨ ᠶᠡᠬᠡ ᠲᠠᠯᠠ
ᠳᠠᠶᠠᠩ ᠳᠡᠯᠡᠬᠡᠢ ᠶ᠋ᠢ ᠠᠭᠤᠵᠢᠷᠠᠭᠤᠯᠤᠭᠰᠠᠨ ᠭᠦᠨᠵᠡᠭᠡᠢ ᠠᠮᠢᠰᠬᠤᠯᠲᠤ ᠲᠠᠯᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠮᠢᠳᠤᠭᠮᠠ
ᠦᠰᠦᠭ ᠬᠠᠲᠠᠭᠴᠢ᠄ ᠮᠢᠳᠤᠭᠮᠠ
ᠬᠢᠨᠠᠭᠴᠢ᠄ ᠮᠥᠴᠢᠷ᠂ ᠣᠳᠬᠠᠨᠰᠣᠠ