ᠡᠬᠡ ᠣᠷᠣᠨ ᠤ ᠮᠠᠷᠭᠠᠰᠢ - ᠴᠣ ᠂ ᠣᠷᠱᠤᠨ Эх орны маргааш – Чо ᠂ Оршин
312ᠡᠬᠡ ᠣᠷᠣᠨ ᠤ ᠮᠠᠷᠭᠠᠰᠢ
ᠡᠬᠡ ᠳ᠋ᠡᠭᠡᠨ ᠴᠢ ᠪᠣᠯ ᠦᠷᠡ ᠪᠢᠯᠡ
ᠡᠬᠡ ᠣᠷᠣᠨ ᠳ᠋ᠠᠭᠠᠨ ᠴᠢ ᠪᠣᠯ ᠬᠣᠢᠴᠢ ᠪᠢᠯᠡ᠂
ᠠᠪᠤ ᠳ᠋ᠠᠭᠠᠨ ᠴᠢ ᠪᠣᠯ ᠠᠯᠳᠠᠷᠠᠢ ᠪᠢᠯᠡ
ᠠᠷᠠᠳ ᠲᠦᠮᠡᠨ ᠳ᠋ᠡᠭᠡᠨ ᠴᠢ ᠪᠣᠯ ᠡᠷᠳᠡᠨᠢ ᠪᠢᠯᠡ᠃
ᠭᠡᠪᠡᠴᠦ ᠣᠳᠣ ᠰᠤᠷᠭᠠᠭᠤᠯᠢ ᠳᠠᠪᠰᠢᠵᠤ
ᠭᠡᠷ ᠨᠤᠲᠤᠭ ᠠ᠋ᠴᠠ ᠪᠠᠨ ᠠᠶᠠᠷᠯᠠᠬᠤ ᠪᠣᠯᠤᠯᠠ᠂
ᠰᠠᠨᠠᠵᠤ ᠪᠣᠳᠣᠬᠤ ᠢᠲᠡᠭᠡᠯ ᠭᠡᠪᠡᠯ
ᠰᠠᠭᠠᠷᠠᠯ ᠦᠭᠡᠢ ᠬᠢᠴᠢᠶᠡᠬᠦ ᠯᠡ ᠬᠡᠷᠡᠭ᠃
ᠬᠥᠯ ᠢ᠋ᠶ᠋ᠡᠷ ᠬᠦᠷᠬᠦ ᠦᠭᠡᠢ ᠠᠯᠤᠰ ᠭᠠᠵᠠᠷ ᠠ᠋ᠴᠠ
ᠬᠥᠮᠦᠨ ᠦ᠌ ᠭᠠᠢᠬᠠᠮᠰᠢᠭ ᠢ᠋ ᠠᠪᠴᠢᠷᠠᠨᠠ ᠭᠡᠳᠡᠭ᠂
ᠵᠣᠷᠢᠭ ᠰᠥᠰᠥ ᠲᠡᠢ ᠰᠤᠷᠤᠯᠴᠠᠬᠤ ᠳ᠋ᠤ᠌ ᠪᠣᠢ
ᠵᠣᠷᠢᠯᠭᠠ ᠬᠠᠷᠠᠯᠲᠠ ᠲᠠᠢ ᠲᠡᠮᠡᠴᠡᠬᠦ ᠳ᠋ᠦ᠍ ᠯᠡ ᠪᠣᠢ᠃
ᠡᠷᠳᠡᠮ ᠮᠡᠳᠡᠯᠭᠡ ᠶ᠋ᠢ ᠰᠢᠨᠤᠨ ᠬᠦᠷᠳᠡᠭᠴᠢᠳ
ᠢᠳᠡᠵᠦ ᠲᠠᠷᠭᠤᠯᠠᠨ ᠭᠡᠳᠡᠰᠦᠯᠡᠬᠦ ᠪᠢᠰᠢ᠂
ᠡᠷᠪᠡᠢ ᠪᠡᠶᠡ ᠪᠡᠨ ᠣᠶᠤᠨ ᠢ᠋ᠶ᠋ᠠᠷ ᠵᠡᠪᠰᠡᠭᠯᠡᠵᠦ
ᠡᠨᠡᠷᠢᠯ ᠦ᠋ᠨ ᠠᠴᠢ ᠶ᠋ᠢ ᠬᠠᠷᠢᠭᠤᠯᠬᠤ ᠳ᠋ᠤ᠌ ᠪᠣᠢ᠃
ᠦᠷᠡ ᠶ᠋ᠢᠨ ᠭᠠᠭᠴᠠ ᠴᠢᠮᠠ ᠶ᠋ᠢ ᠡᠷᠬᠡᠯᠡᠭᠦᠯᠦᠭᠰᠡᠨ ᠦᠭᠡᠢ
ᠦᠶᠡ ᠶ᠋ᠢᠨ ᠨᠥᠬᠥᠳ ᠴᠢᠨᠢ ᠭᠠᠳᠠᠭᠤᠷᠴᠢᠯᠠᠭᠰᠠᠨ ᠦᠭᠡᠢ᠂
ᠪᠠᠷᠳᠠᠮ ᠢ᠋ ᠲᠡᠪᠴᠢᠵᠦ ᠳᠠᠷᠤᠤ ᠶ᠋ᠢ ᠡᠷᠬᠢᠮᠯᠡᠭᠡᠳ
ᠪᠠᠰᠠ ᠴᠣᠯᠭᠣᠷᠠᠬᠤ ᠳ᠋ᠤ᠌ ᠤᠷᠮᠠ ᠴᠢᠨᠢ ᠬᠥᠭᠵᠢᠯᠡ᠃
ᠥᠴᠥᠭᠡᠳᠦᠷ ᠭᠡᠬᠦ ᠳ᠋ᠦ᠍ ᠴᠢ ᠮᠢᠨᠢ ᠥᠰᠪᠥᠷᠢ
ᠦᠰᠦᠭ ᠢ᠋ ᠰᠢᠮᠡᠳᠬᠡᠵᠦ ᠣᠷᠭᠢᠯ ᠳ᠋ᠤ᠌ ᠠᠪᠠᠷᠢᠯᠠ
ᠥᠨᠥᠳᠥᠷ ᠪᠣᠯᠬᠤ ᠳ᠋ᠤ᠌ ᠴᠢ ᠮᠢᠨᠢ ᠥᠰᠴᠦ
ᠥᠭᠭᠢᠶᠡᠮᠦᠷ ᠰᠣᠶᠣᠯ ᠤ᠋ᠨ ᠳᠡᠭᠲᠡᠷ ᠲᠦ᠍ ᠮᠠᠴᠤᠯᠠ᠃
ᠡᠬᠡ ᠴᠢᠨᠢ ᠴᠢᠮᠠ ᠶ᠋ᠢ ᠰᠠᠨᠠᠨᠠ ᠭᠡᠳᠡᠭ
ᠡᠷᠳᠡᠮ ᠢ᠋ᠶ᠋ᠡᠷ ᠰᠢᠮᠡᠵᠢᠪᠡᠯ ᠰᠠᠨᠠᠭᠠ ᠠᠮᠤᠷᠤᠨᠠ᠂
ᠡᠴᠢᠭᠡ ᠴᠢᠨᠢ ᠴᠢᠮᠠ ᠶ᠋ᠢ ᠪᠣᠳᠣᠨᠠ ᠭᠡᠭᠴᠢ
ᠮᠡᠳᠡᠯᠭᠡ ᠡᠪᠦᠷᠯᠡᠪᠡᠯ ᠴᠡᠭᠡᠵᠢ ᠲᠡᠨᠢᠢᠨᠡ᠃
ᠡᠨᠡ ᠪᠦᠭᠦᠳᠡ ᠵᠢᠷᠦᠬᠡᠨ ᠦ᠌ ᠮᠢᠨᠢ ᠪᠡᠯᠭᠡᠳᠡᠯ
ᠡᠷᠡᠨ ᠦ᠌ ᠦᠢᠯᠡᠰ ᠴᠢᠨᠦ ᠬᠣᠷᠸᠠ᠂
ᠡᠷᠭᠢᠭᠡᠳ ᠪᠠᠰᠠ ᠴᠢᠮᠠ ᠳ᠋ᠠᠭᠠᠨ ᠨᠠᠢᠳᠠᠬᠤ
ᠡᠬᠡ ᠣᠷᠣᠨ ᠤ᠋ ᠵᠢᠪᠬᠤᠭᠠᠲᠤ ᠮᠠᠷᠭᠠᠰᠢ᠃
ᠵᠠᠰᠠᠮᠵᠢ ᠪᠠᠷ ᠰᠦᠯᠡᠭᠰᠡᠨ ᠰᠢᠯᠦᠭ ᠦ᠋ᠨ ᠬᠦᠰᠡᠯ
ᠪᠦᠷᠢᠨ ᠰᠤᠷᠤᠯᠭᠠ ᠶ᠋ᠢᠨ ᠴᠢᠨᠢ ᠡᠷᠴᠢ ᠪᠣᠯᠪᠠᠯ᠂
ᠵᠠ ᠶᠠᠭᠠᠬᠢᠬᠤᠪ᠂ ᠠᠪᠤ ᠴᠢᠨᠢ ᠡᠨᠳᠡ ᠪᠡᠨ
ᠪᠦᠲᠦᠮᠵᠢ ᠴᠢᠩᠨᠠᠵᠤ ᠪᠡᠶᠡᠰᠦᠨ ᠰᠠᠭᠤᠨᠠ ᠳᠠ᠃
ᠢᠷᠡᠯᠲᠡ᠄· ᠴᠣ· ᠣᠷᠱᠤᠨ ᠤ᠋《 ᠮᠠᠯᠴᠢᠨ ᠬᠥᠮᠦᠨ ᠦ᠌ ᠳᠠᠭᠤᠤ》 ᠨᠣᠮ ᠠ᠋ᠴᠠ ᠡᠰᠢᠯᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠷᠴᠡᠴᠡᠭ
2024 04 26