ᠳᠠᠷᠠᠰᠤДэрс
374
ᠳᠠᠷᠠᠰᠤ
ᠦᠶᠡᠲᠦ ᠤᠷᠭᠤᠮᠠᠯ ᠤ᠋ᠨ ᠢᠵᠠᠭᠤᠷ
ᠣᠯᠠᠨ ᠨᠠᠰᠤᠲᠤ ᠡᠪᠡᠰᠦᠯᠢᠭ ᠤᠷᠭᠤᠮᠠᠯ᠂ ᠳ᠋ᠢᠶᠠᠮᠧᠲ᠋ᠷ ᠨᠢ 3mm ᠣᠷᠴᠢᠮ᠂ ᠮᠠᠰᠢ ᠪᠥᠬᠡ ᠦᠨᠳᠦᠰᠦ ᠲᠡᠢ᠃ ᠰᠦᠷᠡᠯ ᠨᠢ ᠪᠤᠲᠠᠯᠠᠵᠤ ᠰᠢᠯᠤᠭᠤᠨ ᠤᠷᠭᠤᠨᠠ᠂ ᠬᠠᠲᠠᠭᠤ᠂50—250cm ᠥᠨᠳᠥᠷ᠂ ᠶᠡᠷᠦ ᠳ᠋ᠡᠭᠡᠨ ᠭᠥᠯᠢᠭᠡᠷ᠂ ᠣᠵᠣᠭᠣᠷ ᠲᠤᠨᠢ ᠬᠤᠪᠠᠬᠠᠢᠷᠠᠭᠰᠠᠨ ᠰᠢᠷᠠᠪᠲᠤᠷ ᠬᠦᠷᠡᠩ ᠮᠥᠩᠬᠡ ᠣᠷᠣᠰᠢᠬᠤ ᠨᠠᠪᠴᠢᠨ ᠤ᠋ ᠲᠣᠭᠳᠣᠢ ᠪᠣᠢ᠃ ᠨᠠᠪᠴᠢᠨ ᠤ᠋ ᠲᠣᠭᠳᠣᠢ ᠨᠢ ᠦᠰᠦ ᠦᠭᠡᠢ᠂ ᠲᠣᠷᠭᠠᠨ ᠬᠠᠯᠢᠰᠤᠯᠢᠭ ᠬᠥᠪᠡᠭᠡ ᠲᠡᠢ ; ᠨᠠᠪᠴᠢ ᠨᠢ ᠮᠠᠰᠢ ᠪᠡᠬᠢ᠂ ᠭᠣᠣᠯᠲᠤ ᠪᠠᠷ ᠬᠤᠮᠢᠷᠠᠨᠠ᠂ 30—60cm ᠤᠷᠲᠤ᠂ ᠳᠡᠭᠡᠳᠦ ᠲᠠᠯᠠ ᠳ᠋ᠤᠨᠢ ᠬᠦᠷᠡᠢᠭᠰᠡᠨ ᠰᠤᠳᠠᠯ ᠤ᠋ᠳ ᠲᠠᠢ᠂ ᠠᠷᠤ ᠨᠢ ᠭᠥᠯᠢᠭᠡᠷ᠃ ᠱᠣᠷᠣᠯᠵᠢᠨ ᠬᠡᠯᠪᠡᠷᠢᠲᠦ ᠪᠠᠭ ᠴᠡᠴᠡᠭ ᠨᠢ40—60cm ᠤᠷᠲᠤ᠂ ᠴᠡᠴᠡᠭᠯᠡᠬᠦ ᠦᠶᠡ ᠳ᠋ᠦ᠍ ᠰᠤᠪᠤᠷᠭᠠᠨ ᠲᠥᠯᠥᠪ ᠲᠡᠢ ᠪᠣᠯᠤᠨᠠ᠂ ᠰᠠᠯᠠᠭᠠ ᠨᠢ ᠨᠠᠷᠢᠨ᠂ ᠬᠡᠳᠦ ᠬᠡᠳᠦ ᠪᠡᠷ ᠪᠠᠭᠯᠠᠷᠠᠵᠤ ᠤᠷᠭᠤᠨᠠ᠂17cm ᠣᠷᠴᠢᠮ ᠤᠷᠲᠤ ; ᠵᠢᠵᠢᠭ ᠲᠦᠷᠦᠭᠦᠦ ᠨᠢ 4.5—6.5mm ᠤᠷᠲᠤ᠂ ᠴᠠᠢᠪᠤᠷ ᠨᠣᠭᠣᠭᠠᠨ ᠪᠤᠶᠤ ᠪᠣᠷᠣᠪᠲᠤᠷ᠂ ᠡᠰᠡᠬᠦᠯᠡ ᠰᠠᠭᠠᠷᠠᠯ ᠰᠢᠷᠠ ; ᠬᠠᠯᠢᠰᠤ ᠨᠢ ᠨᠢᠮᠭᠡᠨ᠂ ᠱᠣᠪᠬᠣ ᠦᠵᠦᠭᠦᠷ ᠲᠡᠢ᠂ ᠨᠢᠭᠡᠳᠦᠭᠡᠷ ᠬᠠᠯᠢᠰᠤ ᠨᠢ ᠬᠣᠶᠠᠳᠤᠭᠠᠷ ᠬᠠᠯᠢᠰᠤ ᠠ᠋ᠴᠠ ᠪᠠᠨ ᠣᠬᠣᠷ ᠪᠠᠢᠳᠠᠭ ; ᠭᠠᠳᠠᠷ ᠬᠡᠪᠡᠭ ᠨᠢ4.5mm ᠤᠷᠲᠤ᠂ ᠲᠠᠪᠤᠨ ᠰᠤᠳᠠᠯ ᠲᠠᠢ᠂ ᠠᠷᠤ ᠳ᠋ᠤᠨᠢ ᠨᠢᠭ ᠵᠥᠭᠡᠯᠡᠨ ᠦᠰᠦ ᠲᠡᠢ᠂ ᠣᠷᠣᠢ ᠳ᠋ᠤᠨᠢ ᠣᠨᠢ ᠲᠠᠢ ; ᠰᠠᠭᠤᠷᠢ ᠲᠠᠪᠠᠭ ᠨᠢ ᠮᠣᠭᠣᠲᠣᠷ ᠲᠣᠭᠣᠷᠢᠭ᠂ ᠦᠰᠦ ᠲᠡᠢ᠂ 0.5mm ᠣᠷᠴᠢᠮ ᠤᠷᠲᠤ ; ᠰᠤᠷ ᠨᠢ ᠰᠢᠯᠤᠭᠤᠨ ᠪᠤᠶᠤ ᠵᠢᠭᠠᠬᠠᠨ ᠮᠤᠷᠤᠢ᠂ ᠮᠤᠰᠬᠢᠷᠠᠬᠤ ᠦᠭᠡᠢ᠂ 5—10mm ᠤᠷᠲᠤ᠂ ᠲᠤᠩ ᠬᠢᠯᠪᠠᠷ ᠬᠤᠭᠤᠷᠠᠵᠤ ᠤᠨᠠᠨᠠ ; ᠳᠣᠲᠣᠷ ᠬᠡᠪᠡᠭ ᠨᠢ ᠬᠣᠶᠠᠷ ᠰᠤᠳᠠᠯ ᠲᠠᠢ᠂ ᠦᠰᠦ ᠲᠡᠢ ; ᠲᠣᠭᠣᠰᠣᠪᠴᠢ ᠨᠢ 2.5—3mm ᠤᠷᠲᠤ᠂ ᠣᠷᠣᠢ ᠳ᠋ᠤᠨᠢ ᠵᠢᠵᠢᠭ ᠦᠰᠦ ᠲᠡᠢ᠃
ᠬᠡᠭᠡᠷᠡ ᠲᠠᠯᠠ᠂ ᠪᠠᠬᠠᠨ ᠬᠤᠵᠢᠷᠯᠢᠭ ᠴᠠᠢᠳᠠᠮ ᠲᠠᠯᠠ ᠳ᠋ᠤ᠌ ᠤᠷᠭᠤᠨᠠ᠃
ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠥᠪᠥᠷ ᠮᠣᠩᠭᠣᠯ ᠬᠢᠭᠡᠳ ᠪᠠᠷᠠᠭᠤᠨ ᠬᠣᠢᠲᠤ ᠣᠷᠣᠨ ᠤ᠋ ᠡᠯᠡ ᠮᠣᠵᠢ ᠣᠷᠣᠨ ᠳ᠋ᠤ᠌ ᠤᠷᠭᠤᠳᠠᠭ᠃
ᠬᠠᠪᠤᠷ ᠡᠷᠲᠡ ᠮᠠᠯ ᠲᠡᠵᠢᠭᠡᠪᠦᠷᠢ ᠶ᠋ᠢᠨ ᠰᠠᠢᠨ ᠪᠣᠷᠳᠣᠭᠠ ᠡᠪᠡᠰᠦ᠃ ᠡᠰᠢ ᠨᠠᠪᠴᠢ ᠨᠢ ᠴᠠᠭᠠᠰᠤ᠂ ᠬᠢᠮᠡᠯ ᠬᠥᠪᠥᠩ ᠦ᠋ᠨ ᠰᠠᠢᠨ ᠲᠦᠭᠦᠬᠡᠢ ᠡᠳ᠋᠃ ᠡᠰᠢ ᠪᠡᠷ ᠨᠢ ᠣᠯᠠᠨ ᠵᠦᠢᠯ ᠦ᠋ᠨ ᠰᠠᠭᠰᠤ ᠵᠡᠷᠭᠡ ᠶ᠋ᠢ ᠬᠦᠷᠦᠨᠡ᠂ ᠪᠠᠰᠠ ᠱᠦᠭᠦᠷ ᠬᠢᠳᠡᠭ᠃ ᠮᠥᠨ ᠤᠰᠤ ᠰᠢᠷᠣᠢ ᠶ᠋ᠢ ᠬᠠᠮᠠᠭᠠᠯᠠᠬᠤ ᠰᠠᠢᠨ ᠤᠷᠭᠤᠮᠠᠯ᠃
ᠬᠢᠲᠠᠳ ᠨᠡᠷᠡ᠄芨芨草
ᠠᠩᠭ᠌ᠯᠢ ᠨᠡᠷᠡ᠄ Achnatherum splendens (Trin.) Nevski
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠳ᠂ ᠡᠷᠬᠢᠮᠪᠠᠭᠠᠲᠤᠷ
ᠬᠢᠨᠠᠭᠴᠢ᠄ ᠫᠣ· ᠴᠠᠭᠠᠨ