ᠬᠣᠶᠠᠷ ᠦᠭᠡ ᠶ᠋ᠢᠨ ᠲᠥᠯᠥᠭᠡ - ᠴᠣ ᠂ ᠣᠷᠱᠤᠨ Хоёр үгийн төлөө – Чо ᠂ Оршин
240ᠬᠣᠶᠠᠷ ᠦᠭᠡ ᠶ᠋ᠢᠨ ᠲᠥᠯᠥᠭᠡ
ᠬᠣᠶᠠᠷ ᠦᠭᠡ ᠶ᠋ᠢᠨ ᠲᠥᠯᠥᠭᠡ
ᠬᠣᠷᠸ᠋ᠠ ᠳ᠋ᠦ᠍ ᠲᠥᠷᠥᠭᠰᠡᠨ ᠶᠤᠮ᠂
ᠬᠣᠶ᠋ᠢᠴᠢ ᠦᠶᠡ ᠠᠴᠢ ᠨᠠᠷ ᠲᠠᠭᠠᠨ
ᠨᠡᠷᠡᠯᠡᠵᠦ ᠳᠠᠭᠤᠳᠠᠭᠤᠯᠬᠤ ᠭᠡᠰᠡᠨ ᠶᠤᠮ᠃
ᠲᠡᠷᠡ ᠪᠣᠯ
ᠲᠡᠩᠬᠡᠭᠡ ᠲᠠᠮᠢᠷ ᠦ᠋ᠨ ᠰᠤᠤ ᠵᠠᠯᠢ
ᠲᠠᠩᠬᠢᠯ ᠬᠠᠶ᠋ᠢᠷᠠ ᠶ᠋ᠢᠨ ᠳᠡᠭᠡᠳᠦ
ᠲᠠᠯᠠ ᠳ᠋ᠦ᠍ ᠤᠨᠠᠭᠰᠠᠨ ᠦᠷᠡ ᠨᠠᠮᠠᠶ᠋ᠢ
ᠲᠠᠭᠠᠯᠠᠵᠤ ᠥᠰᠬᠡᠭᠰᠡᠨ ᠡᠬᠡ᠃
ᠡᠩᠬᠡ ᠶ᠋ᠢᠨ ᠲᠠᠭᠲᠠᠭᠠ ᠶ᠋ᠢ
ᠡᠯᠢᠭᠡᠨ ᠳ᠋ᠡᠭᠡᠨ ᠳᠡᠪᠲᠡᠷᠢᠭᠦᠯᠦᠭᠰᠡᠨ
ᠡᠪ ᠦ᠋ᠨ ᠲᠤᠩᠬᠠᠭ ᠊ᠢ
ᠳᠠᠶᠠᠩ ᠳ᠋ᠦ᠍ ᠵᠠᠷᠯᠠᠭᠰᠠᠨ
ᠡᠬᠡ ᠣᠷᠣᠨ ᠭᠡᠳᠡᠭ ᠬᠣᠶᠠᠷᠬᠠᠨ ᠦᠭᠡ ᠪᠣᠯ
ᠡᠭᠦᠷᠢᠳᠡ ᠨᠠᠮᠠᠶ᠋ᠢ ᠡᠷᠭᠦᠬᠦ
ᠡᠰᠡᠨ ᠮᠡᠨᠳᠦ ᠶ᠋ᠢᠨ ᠲᠤᠩᠬᠠᠭ
ᠦᠷᠡᠭᠳᠡᠭᠰᠡᠨ ᠪᠠᠭᠠᠲᠤᠷᠴᠤᠳ ᠦ᠋ᠨ ᠴᠢᠰᠤ ᠪᠠᠷ ᠪᠣᠰᠬᠠᠭᠰᠠᠨ
ᠦᠢᠯᠡᠰ ᠠᠮᠢᠳᠤᠷᠠᠯ ᠦ᠋ᠨ ᠪᠦᠲᠦᠮᠵᠢ ᠪᠡᠷ ᠭᠠᠩᠨᠠᠭᠳᠠᠭᠰᠠᠨ
ᠡᠬᠡ ᠣᠷᠣᠨ ᠲᠠᠨ ᠤ
ᠡᠷᠬᠢᠮ ᠨᠡᠷᠡ ᠬᠦᠨᠳᠦ ᠡᠭᠦᠷᠢᠳᠡ ᠪᠠᠯᠠᠷᠠᠬᠤ ᠦᠭᠡᠢ
ᠥᠨᠢᠳᠡ ᠰᠦᠢᠷᠡᠬᠦ ᠦᠭᠡᠢ᠃
ᠡᠬᠡ ᠣᠷᠣᠨ ᠤ ᠮᠢᠨᠢ ᠠᠯᠳᠠᠷ
ᠳᠤᠮᠳᠠᠳᠤ ᠤᠯᠤᠰ ᠭᠡᠳᠡᠭ
ᠡᠷᠪᠡᠢ ᠦᠷᠡᠰ ᠪᠢᠳᠡᠨ ᠦ
ᠡᠨᠡᠷᠢᠯ ᠬᠠᠶ᠋ᠢᠷᠠ ᠶ᠋ᠢᠨ ᠣᠷᠭᠢᠯ
ᠡᠬᠡ ᠣᠷᠣᠨ ᠭᠡᠵᠦ
ᠡᠭᠡᠰᠢᠭᠯᠡᠵᠦ ᠳᠠᠭᠤᠯᠠᠵᠤ ᠶᠠᠪᠤᠬᠤ
ᠡᠷᠡᠳᠡᠭᠦᠨ ᠵᠠᠶᠠᠭᠠ ᠲᠠᠢ ᠪᠢ᠂
ᠡᠷᠬᠢᠮᠰᠦᠭ ᠬᠤᠪᠢᠲᠠᠢ ᠪᠢ᠃
ᠬᠣᠯᠠ ᠭᠠᠵᠠᠷ ᠳᠠᠷᠪᠢᠵᠤ
ᠬᠣᠷᠸ᠋ᠠ ᠪᠦᠬᠦᠯᠢ ᠲᠣᠭᠣᠷᠢᠪᠠᠴᠤ
ᠡᠬᠡ ᠣᠷᠣᠨ ᠠ᠋ᠴᠠ ᠥᠭᠡᠷᠡ
ᠡᠵᠡᠮᠳᠡᠬᠦ ᠬᠠᠶ᠋ᠢᠷᠠ ᠦᠭᠡᠢ
ᠡᠬᠡ ᠣᠷᠣᠨ ᠤ ᠡᠰᠡᠨᠢᠯ
ᠡᠩᠬᠡᠵᠢᠭᠰᠡᠨ ᠣᠨ ᠰᠠᠷᠠ ᠳ᠋ᠦ᠍
ᠡᠳᠡᠯ ᠪᠦᠳᠦᠷᠢᠯ ᠦ᠋ᠨ ᠰᠣᠷᠪᠢ ᠴᠤ᠌ ᠪᠠᠶ᠋ᠢᠳᠠᠭ
ᠡᠷᠴᠢᠮᠯᠡᠭ ᠳᠣᠷᠢᠭᠤᠨ ᠵᠠᠮᠨᠠᠯ ᠴᠤ᠌ ᠪᠠᠶ᠋ᠢᠳᠠᠭ ᠡ᠃
ᠲᠡᠭᠡᠯᠡ ᠭᠡᠳ
ᠲᠡᠮᠡᠴᠡᠯ ᠦᠢᠯᠡᠳᠦᠯᠭᠡ ᠴᠤ᠌
ᠡᠬᠡ ᠣᠷᠣᠨ ᠭᠡᠰᠡᠨ ᠬᠣᠶᠠᠷ ᠦᠭᠡ
ᠤᠶᠠᠷᠠᠵᠤ ᠨᠤᠭᠤᠷᠠᠳᠠᠭ ᠦᠭᠡᠢ
ᠤᠰᠠᠳᠴᠤ ᠠᠷᠢᠯᠳᠠᠭ ᠦᠭᠡᠢ
ᠳᠥᠷᠦᠭᠡᠨ ᠳᠡᠭᠡᠷᠡ ᠪᠡᠨ ᠥᠨᠳᠡᠶ᠋ᠢᠭᠰᠡᠨ ᠮᠣᠩᠭᠣᠯ ᠪᠢ
ᠳᠥᠴᠢ ᠬᠦᠷᠦᠭᠰᠡᠨ ᠳᠤᠮᠳᠠᠳᠤ ᠶ᠋ᠢᠨ ᠠᠯᠳᠠᠷ ᠊ᠢ ᠨᠠᠨᠳᠢᠩᠨᠠᠨᠠ
ᠨᠡᠷᠡ ᠨᠢᠳᠡᠷ ᠬᠣᠶᠠᠷ ᠨᠡᠶ᠋ᠢᠯᠡᠵᠦ ᠪᠣᠰᠳᠠᠭ ᠪᠢᠯᠡ
ᠨᠡᠭᠡᠷᠡᠨ ᠡᠨᠡ ᠬᠣᠶᠠᠷ ᠦᠭᠡ
ᠮᠢᠨᠦ ᠬᠡᠶ᠋ᠢᠮᠣᠷᠢ ᠪᠢᠯᠡ᠃
ᠮᠢᠨᠦ ᠬᠡᠶ᠋ᠢᠮᠣᠷᠢ ᠮᠠᠨᠳᠤᠲᠤᠭᠠᠢ!
ᠮᠢᠨᠦ ᠡᠬᠡ ᠣᠷᠣᠨ ᠮᠠᠨᠳᠤᠲᠤᠭᠠᠢ!
ᠢᠷᠡᠯᠲᠡ᠄· ᠴᠣ· ᠣᠷᠱᠤᠨ ᠤ᠋《 ᠮᠠᠯᠴᠢᠨ ᠬᠥᠮᠦᠨ ᠦ᠌ ᠳᠠᠭᠤᠤ》 ᠨᠣᠮ ᠠ᠋ᠴᠠ ᠡᠰᠢᠯᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠷᠴᠡᠴᠡᠭ
2024 04 24