ᠬᠡᠦᠬᠡᠨ ᠳᠤᠷᠠᠯᠠᠯ ᠦ᠋ᠨ ᠸᠠᠯᠢᠰ – ᠴᠣ ᠂ ᠣᠷᠱᠤᠨ Хүүхэн дурлалын вальс – Чо ᠂ Оршин
334ᠬᠡᠦᠬᠡᠨ ᠳᠤᠷᠠᠯᠠᠯ ᠦ᠋ᠨ ᠸᠠᠯᠢᠰ
ᠳᠡᠭᠵᠢᠨ ᠨᠠᠰᠤᠨ ᠤ᠋ ᠳᠤᠷᠠᠯᠠᠯ ᠤ᠋ᠨ ᠮᠢᠨᠢ
ᠰᠢᠭᠦᠳᠡᠷᠢ ᠶ᠋ᠢᠨ ᠮᠥᠬᠥᠯᠢᠭ ᠪᠥᠮᠪᠥᠭᠡᠨᠡᠬᠦ ᠠᠳᠠᠯᠢ
ᠰᠢᠵᠢᠷᠬᠡᠨ ᠨᠠᠰᠤᠨ ᠤ᠋ ᠬᠠᠢᠷᠠ ᠶ᠋ᠢᠨ ᠢ᠋ᠶ᠋ᠡᠨ
ᠤᠤᠭᠠᠨ ᠢᠨᠠᠭ ᠤ᠋ᠨ ᠸᠠᠯᠢᠰ ᠪᠠᠳᠠᠭ ᠢ᠋ᠶ᠋ᠠᠨ
ᠣᠳᠣ ᠪᠢ ᠤᠩᠰᠢᠵᠤ ᠰᠠᠭᠤᠨᠠ
ᠣᠷᠴᠢᠯᠠᠩ ᠳ᠋ᠤ᠌ ᠵᠠᠶᠠᠭᠠᠭᠰᠠᠨ ᠬᠥᠮᠦᠨ ᠠᠷᠠᠳ ᠤ᠋ᠨ
ᠣᠯᠳᠠᠵᠤ ᠤᠴᠠᠷᠠᠬᠤ ᠬᠣᠪᠣᠷ ᠢ᠋ ᠳᠤᠷᠠᠰᠤᠨᠠ᠃
ᠴᠢᠮᠠ ᠲᠠᠢ ᠪᠢ ᠠᠭᠤᠯᠵᠠᠬᠤ ᠦᠭᠡᠢ ᠪᠣᠯ
ᠰᠡᠳᠬᠢᠯ ᠪᠣᠳᠣᠯ ᠮᠢᠨᠢ ᠡᠵᠡᠭᠦᠢᠷᠡᠬᠦ ᠷᠣᠮ᠂
ᠴᠢᠨᠦ ᠴᠢᠷᠠᠢ ᠶ᠋ᠢ ᠬᠠᠷᠠᠬᠤ ᠦᠭᠡᠢ ᠪᠣᠯ
ᠴᠡᠭᠡᠵᠢ ᠵᠢᠭᠲᠡᠢ ᠪᠠᠭᠲᠠᠷᠠᠬᠤ ᠶᠤᠮ᠃
ᠠᠵᠠ ᠲᠠᠭᠠᠷᠠᠵᠤ ᠵᠣᠯ ᠲᠠᠢ ᠤᠴᠠᠷᠠᠪᠠᠯ
ᠠᠭᠠᠯᠢᠭᠦᠢ ᠵᠠᠩ ᠮᠢᠨᠢ ᠨᠣᠮᠣᠬᠠᠷᠠᠴᠢᠬᠠᠨᠠ᠂
ᠠᠪᠤ ᠶ᠋ᠢᠨ ᠬᠦᠦ ᠶ᠋ᠢ ᠪᠢᠰᠢᠷᠡᠬᠦ ᠳᠣᠳᠣᠮ
ᠠᠶᠤᠤᠯᠢᠬᠠᠢ ᠤᠯᠠᠮ ᠡᠮᠵᠡᠭᠯᠡᠴᠢᠬᠡᠨᠡ᠃
ᠬᠠᠢᠷᠠᠲᠠᠢ ᠰᠢᠦ᠂ ᠪᠢ ᠴᠢᠮᠠ ᠳ᠋ᠤ᠌ ᠭᠡᠳ
ᠬᠠᠴᠠᠷ ᠢ᠋ ᠮᠢᠨᠢ ᠲᠠᠭᠠᠯᠠᠪᠠᠯ ᠶᠠᠭᠠᠬᠢᠨᠠ⁈
ᠬᠠᠷᠢᠨ ᠪᠢ ᠰᠢᠲᠠᠵᠤ ᠦᠬᠦᠮᠡᠷ
ᠬᠠᠯᠠᠭᠤᠳᠠᠵᠤ ᠬᠥᠯᠥᠷᠡᠭᠰᠡᠨ ᠢ᠋ᠶ᠋ᠡᠨ ᠰᠠᠨᠠᠨᠠ᠃
ᠭᠠᠭᠴᠠᠬᠠᠨ ᠴᠢᠮᠠ ᠳ᠋ᠤ᠌ ᠳᠤᠷᠠᠯᠠᠨᠠ ᠭᠡᠳ
ᠭᠠᠷ ᠢ᠋ ᠮᠢᠨᠢ ᠠᠳᠬᠤᠪᠠᠯ ᠶᠠᠭᠠᠬᠢᠨᠠ⁈
ᠬᠠᠢᠷᠠ ᠶ᠋ᠢᠨ ᠢᠯᠴᠢᠨ ᠳ᠋ᠦ᠍ ᠲᠦᠯᠡᠭᠳᠡᠵᠦ
ᠬᠠᠭᠠᠯᠭᠠ ᠲᠦᠯᠬᠢᠭᠡᠳ ᠭᠠᠷᠬᠤ ᠶ᠋ᠢ ᠪᠣᠳᠣᠨᠠ᠃
ᠭᠡᠬᠦ ᠳ᠋ᠦ᠍ ᠴᠢ ᠮᠢᠨᠢ ᠶᠠᠭᠠᠬᠢᠭᠰᠠᠨ ᠴᠤ᠌ ᠦᠭᠡᠢ
ᠭᠡᠮ ᠦᠭᠡᠢ ᠴᠢᠷᠠᠢᠯᠠᠭᠠᠳ ᠲᠠᠭ ᠳᠤᠭᠤᠢ᠂
ᠡᠷᠡ ᠬᠥᠮᠦᠨ ᠪᠢᠰᠢ ᠤᠤ᠂ ᠴᠢ ᠵᠣᠷᠢᠭᠯᠠᠭᠠᠳ
ᠡᠭᠴᠡᠯᠡᠵᠦ ᠨᠠᠮᠠᠶ᠋ᠢ ᠬᠠᠷᠠᠬᠤ ᠳ᠋ᠤ᠌ ᠶᠠᠭᠠᠬᠢᠨᠠ᠃
ᠲᠡᠭᠡᠭᠡᠳ ᠴᠢ ᠲᠠᠩᠳᠠ ᠮᠠᠨ ᠤ᠋ ᠳ᠋ᠤ᠌ ᠢᠷᠡᠳᠡᠭ
ᠲᠡᠢᠮᠦ ᠡᠢᠮᠦ ᠴᠤ᠌ ᠦᠭᠡᠢ ᠨᠣᠮᠣᠬᠠᠨ ᠰᠠᠭᠤᠳᠠᠭ ᠂
ᠪᠢ ᠴᠢᠨᠢ ᠬᠡᠦᠬᠡᠨ ᠬᠥᠮᠦᠨ ᠶᠦᠮ ᠰᠢᠦ ᠳᠡ
ᠪᠡᠶᠡ ᠰᠡᠳᠬᠢᠯ ᠢ᠋ ᠲᠠᠭᠠᠪᠤᠷᠢᠯᠠᠵᠤ ᠮᠡᠳᠡᠬᠦ ᠤᠤ?
ᠠᠶᠠᠭᠠ ᠴᠠᠢ ᠤᠤᠭᠤᠬᠤ ᠲᠠᠢ ᠦᠭᠡᠢ ᠲᠡᠢ
ᠠᠯᠠᠪᠬᠢᠨ ᠮᠣᠷᠳᠠᠭᠠᠳ ᠴᠢ ᠶᠠᠪᠤᠴᠢᠬᠠᠨᠠ᠂
ᠠᠷᠤ ᠠ᠋ᠴᠠ ᠨᠢ ᠭᠠᠷᠬᠤ ᠵᠢᠷᠦᠬᠡ ᠦᠭᠡᠢ ᠯᠡ
ᠠᠯᠠᠭᠠ ᠪᠠᠨ ᠵᠦᠯᠭᠦᠭᠡᠳ ᠳᠡᠮᠡᠢ ᠯᠡ ᠵᠣᠭᠰᠣᠨᠠ᠃
ᠬᠥᠮᠦᠨ ᠬᠠᠷᠠᠬᠤ ᠠ᠋ᠴᠠ ᠪᠠᠰᠠ ᠢᠴᠢᠨᠡ
ᠬᠦᠦ ᠶ᠋ᠢᠨ ᠬᠠᠢᠷᠠ ᠳ᠋ᠤ᠌ ᠨᠡᠩ ᠴᠤ᠌ ᠤᠨᠠᠨᠠ᠂
ᠬᠡᠦᠬᠡᠨ ᠳᠤᠷᠠᠯᠠᠯ ᠤ᠋ᠨ ᠮᠢᠨᠢ ᠲᠠᠪᠢᠯᠠᠩ ᠶᠤᠮ ᠴᠢᠨᠢ
ᠬᠦᠰᠡᠬᠦ ᠲᠡᠳᠦᠢ ᠬᠠᠢᠷᠠ ᠢᠴᠢᠮᠡᠬᠡᠢ᠃
ᠠᠮᠢᠳᠤᠷᠠᠯ ᠬᠣᠷᠸᠠ ᠵᠢᠮᠡ ᠪᠡᠷ ᠢ᠋ᠶ᠋ᠡᠨ ᠡᠷᠭᠢᠵᠦ
ᠠᠰᠠᠴᠢᠮᠠᠷ ᠪᠠᠢᠭᠰᠠᠨ ᠳᠤᠷᠠᠯᠠᠯ ᠰᠢᠲᠠᠬᠤ ᠳ᠋ᠤ᠌
ᠠᠩᠬᠠᠨ ᠰᠠᠨᠠᠭᠰᠠᠨ ᠴᠢ ᠬᠠᠷᠢᠨ ᠨᠣᠴᠣᠭᠠᠭᠠ ᠦᠭᠡᠢ
ᠠᠪᠤ ᠶ᠋ᠢᠨ ᠬᠥᠪᠡᠭᠦᠨ ᠦ᠌ ᠨᠥᠭᠦᠭᠡ ᠨᠢᠭᠡ ᠯᠡ ᠪᠠᠢᠵᠤ ᠳᠠ᠃
ᠠᠮᠢᠳᠤᠷᠠᠯ ᠬᠥᠮᠦᠨ ᠳ᠋ᠦ᠍ ᠵᠠᠶᠠᠭᠠᠳᠠᠭ ᠪᠣᠯᠬᠣᠷ
ᠠᠪᠠᠭᠠᠢ ᠪᠣᠯᠤᠭᠰᠠᠨ ᠬᠣᠢᠨᠠ ᠪᠠᠨ ᠤᠬᠠᠭᠠᠷᠠᠯᠠ᠂
ᠠᠳᠠᠯᠢᠬᠠᠨ ᠪᠠᠢᠭᠰᠠᠨ ᠴᠢᠨᠦ ᠮᠢᠨᠢ ᠰᠡᠳᠬᠢᠯ ᠳ᠋ᠦ᠍
ᠠᠷᠠᠢ ᠴᠤ᠌ ᠢᠵᠢᠯ ᠪᠠᠢᠭᠰᠠᠨ ᠪᠣᠯ ᠤᠤ⁈
ᠬᠥᠮᠦᠨ ᠦ᠌ ᠰᠡᠳᠬᠢᠯ ᠦ᠋ᠨ ᠬᠦᠨᠳᠦ ᠨᠢ
ᠬᠥᠮᠦᠨᠯᠢᠭ ᠬᠠᠢᠷᠠ ᠶ᠋ᠢᠨ ᠳᠡᠭᠡᠳᠦ ᠨᠢ ᠪᠢᠵᠡ᠂
ᠬᠦᠰᠡᠯ ᠬᠠᠢᠷᠠ ᠶ᠋ᠢᠨ ᠡᠷᠬᠢᠮ ᠨᠢ
ᠬᠡᠦᠬᠡᠨ ᠳᠤᠷᠠᠯᠠᠯ ᠤ᠋ᠨ ᠤᠤᠭᠠᠨ ᠨᠢ ᠪᠢᠵᠡ᠃
ᠳ᠋ᠧᠩ ᠦ᠋ᠨ ᠡᠷᠪᠡᠬᠡᠢ ᠰᠢᠭ ᠰᠢᠲᠠᠬᠤ ᠰᠢᠬᠠᠭᠰᠠᠨ
ᠳᠡᠭᠵᠢᠨ ᠨᠠᠰᠤᠨ ᠤ᠋ ᠬᠠᠢᠷᠠ ᠶ᠋ᠢᠨ ᠮᠢᠨᠢ᠂
ᠰᠢᠭᠦᠳᠡᠷᠢ ᠶ᠋ᠢᠨ ᠮᠥᠬᠥᠯᠢᠭ ᠪᠥᠮᠪᠥᠭᠡᠨᠡᠬᠦ ᠠᠳᠠᠯᠢ
ᠰᠢᠵᠢᠷᠬᠡᠨ ᠨᠠᠰᠤᠨ ᠤ᠋ ᠳᠤᠷᠠᠯᠠᠯ ᠤ᠋ᠨ ᠢ᠋ᠶ᠋ᠠᠨ
ᠤᠤᠭᠠᠨ ᠢᠨᠠᠭ ᠤ᠋ᠨ ᠸᠠᠯᠢᠰ ᠪᠠᠳᠠᠭ ᠢ᠋ᠶ᠋ᠠᠨ
ᠣᠳᠣ ᠪᠢ ᠤᠩᠰᠢᠵᠤ ᠰᠠᠭᠤᠨᠠ᠂
ᠣᠷᠴᠢᠯᠠᠩ ᠳ᠋ᠤ᠌ ᠠᠮᠢᠳᠤᠷᠠᠬᠤ ᠬᠥᠮᠦᠨ ᠴᠢᠨᠠᠷ ᠤ᠋ᠨ
ᠣᠯᠳᠠᠵᠤ ᠤᠴᠠᠷᠠᠬᠤ ᠬᠣᠪᠣᠷ ᠢ᠋ ᠳᠤᠷᠠᠰᠤᠨᠠ᠃
ᠢᠷᠡᠯᠲᠡ᠄· ᠴᠣ· ᠣᠷᠱᠤᠨ ᠤ᠋《 ᠮᠠᠯᠴᠢᠨ ᠬᠥᠮᠦᠨ ᠦ᠌ ᠳᠠᠭᠤᠤ》 ᠨᠣᠮ ᠠ᠋ᠴᠠ ᠡᠰᠢᠯᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠷᠴᠡᠴᠡᠭ
2024 04 19