《ᠬᠥᠬᠡ ᠰᠤᠳᠤᠷ》 ᠤᠨ ᠨᠥᠬᠥᠪᠦᠷᠢ ᠲᠡᠪᠲᠡᠷ - ᠢᠨᠵᠠᠨᠨᠠᠰᠢ <ᠳᠥᠴᠢᠳᠦᠭᠡᠷ ᠪᠦᠯᠦᠭ> "Хөх судар" он нөхвөр дэвтэр - Инжинаш <Дөчдүгээр бүлэг>
345《ᠬᠥᠬᠡ ᠰᠤᠳᠤᠷ》 ᠤᠨ ᠨᠥᠬᠥᠪᠦᠷᠢ ᠲᠡᠪᠲᠡᠷ - ᠳᠥᠴᠢᠳᠦᠭᠡᠷ ᠪᠦᠯᠦᠭ
ᠡᠮᠦᠨᠡᠲᠦ ᠰᠥᠩ ᠤᠯᠤᠰ ᠤ᠋ᠨ ᠨᠢᠩᠽᠦ᠋ᠩ ᠬᠠᠭᠠᠨ ᠤ᠋ ᠺᠠᠢ ᠰᠢ ᠭᠡᠮᠡᠨ ᠬᠠᠯᠠᠭᠰᠠᠨ ᠤ᠋ ᠲᠡᠷᠢᠭᠦᠨ ᠣᠨ ᠪᠥᠭᠡᠳ ᠳᠤᠮᠳᠠᠳᠤ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠩᠽᠦ᠋ᠩ ᠬᠠᠭᠠᠨ ᠤ᠋ ᠳᠠᠢ ᠾᠧ ᠬᠡᠮᠡᠬᠦ ᠶ᠋ᠢᠨ ᠲᠠᠪᠤᠳᠤᠭᠠᠷ ᠣᠨ ᠪᠠᠢᠭᠰᠠᠭᠠᠷ᠂ ᠬᠣᠢᠲᠤ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠲᠠᠢᠽᠦ ᠳᠥᠴᠢᠨ ᠳᠥᠷᠪᠡᠨ ᠰᠡᠭᠦᠳᠡᠷ ᠲᠡᠢ ᠬᠥᠬᠡᠭᠴᠢᠨ ᠦᠬᠡᠷ ᠵᠢᠯ ᠪᠠᠢᠭᠰᠠᠭᠠᠷ᠃
ᠳᠥᠴᠢᠳᠦᠭᠡᠷ ᠪᠦᠯᠦᠭ
ᠥᠯᠵᠡᠢᠲᠦ ᠥᠷᠯᠥᠭᠡ ᠲᠠᠢᠽᠦ ᠪᠡᠶᠡᠰᠦᠷᠦᠨ ᠥᠨᠢᠳᠡ ᠶ᠋ᠢᠨ ᠢᠷᠦᠭᠡᠳ ᠣᠷᠣᠰᠢᠪᠠᠢ
ᠥᠭᠯᠢᠭᠡ ᠪᠠᠶᠠᠰᠬᠤᠯᠠᠩᠲᠤ ᠪᠣᠭᠳᠠ ᠥᠷᠥᠰᠢᠶᠡᠨ ᠥᠬᠢᠨ ᠭᠦᠩᠵᠦ ᠶ᠋ᠢ ᠠᠬᠤᠭᠤᠯᠪᠠᠢ
ᠥᠬᠡᠨᠴᠡ ᠪᠠᠭᠤᠷᠠᠢ ᠲᠣᠳᠣ ᠵᠤᠯᠪᠢᠨ ᠦ ᠳᠡᠭᠳᠡᠭᠡᠭᠰᠡᠭᠡᠷ ᠴᠢᠬᠢ ᠶᠦ᠍ᠭᠡᠨ ᠠᠪᠲᠠᠪᠠᠢ
ᠥᠷᠢᠭᠦᠦ ᠳᠦᠷᠢᠭᠦᠦ ᠪᠤᠯᠤ ᠸᠠᠩ ᠦᠯᠡᠮᠵᠢ ᠬᠥᠭᠡᠷᠦᠭᠰᠡᠭᠡᠷ ᠦᠷᠢᠯ ᠵᠣᠭᠣᠭᠯᠠᠷᠠ ᠠᠵᠢᠷᠠᠪᠠᠢ᠂
ᠦᠰ ᠡᠪᠦᠷᠯᠡᠭᠰᠡᠨ ᠴᠢᠦᠢ ᠴᠦ ᠯᠢᠦᠢ ᠦᠷᠪᠡᠯᠵᠡᠬᠦ ᠭᠠᠯ ᠢ᠋ᠶ᠋ᠠᠷ ᠳᠤᠷᠤᠮᠳᠠᠭᠤᠯᠤᠨ ᠳᠤᠲᠠᠭᠠᠪᠠᠢ
ᠦᠬᠦᠨ ᠪᠠᠢᠯᠳᠤᠭᠰᠠᠨ ᠠᠬᠠᠢ ᠨᠣᠶᠠᠨ ᠤ᠋ ᠥᠮᠬᠥᠷᠢᠲᠡᠯᠡ ᠲᠠᠰᠢᠭᠤᠷᠳᠠᠭᠳᠠᠭᠰᠠᠨ ᠠᠳᠠᠪᠠᠰᠢ ᠢᠨᠢᠶᠡᠯᠲᠡᠢ᠃
ᠲᠡᠨᠳᠡᠴᠡ ᠵᠢᠨᠦᠩ ᠮᠤᠬᠤᠯᠢ᠂ ᠬᠣᠷᠢᠨ ᠳᠥᠷᠪᠡᠨ ᠠᠩᠭᠢ ᠵᠠᠩᠵᠤᠨ ᠴᠡᠷᠢᠭ ᠢ᠋ᠶ᠋ᠡᠷ ᠲᠠᠩᠭᠤᠳ ᠤᠯᠤᠰ ᠠ᠋ᠴᠠ ᠣᠯᠵᠠᠯᠠᠭᠰᠠᠨ ᠠᠮᠤ ᠪᠤᠳᠠᠭᠠ ᠬᠣᠶᠠᠷ ᠵᠠᠭᠤ ᠢᠯᠡᠭᠦᠦ ᠲᠦᠮᠡᠨ ᠲᠠᠭᠠᠷ ᠢ᠋ ᠵᠥᠭᠡᠭᠡᠯᠭᠡᠬᠦᠶᠡ᠂ ᠡᠭᠦᠷᠭᠡ ᠠᠴᠢᠶᠠ ᠳᠠᠮᠨᠠᠭᠤᠷ ᠬᠠᠰᠠᠭ ᠬᠢᠭᠡᠳ ᠬᠣᠨᠢᠨ ᠰᠦᠷᠦᠭ ᠦ᠋ᠨ ᠪᠢᠴᠢᠬᠠᠨ ᠠᠴᠢᠶᠠ ᠶ᠋ᠢᠨ ᠵᠦᠢᠯ ᠢ᠋ ᠲᠣᠯᠣᠭᠠᠢ ᠰᠡᠭᠦᠯ ᠵᠠᠯᠭᠠᠯᠳᠤᠭᠤᠯᠤᠨ᠂ ᠬᠡᠳᠦᠨ ᠠᠷᠪᠠᠨ ᠲᠦᠮᠡᠨ ᠬᠥᠮᠦᠨ ᠢ᠋ᠶ᠋ᠡᠷ ᠲᠠᠩᠭᠤᠳ ᠤᠯᠤᠰ ᠤ᠋ᠨ ᠵᠡᠭᠦᠨ ᠬᠣᠢᠲᠤ ᠵᠢᠷᠭᠤᠭᠠ ᠳᠣᠯᠣᠭᠠᠨ ᠵᠧᠦ᠂ ᠵᠢᠶᠦ᠋ᠨ ᠦ᠌ ᠰᠠᠩ ᠬᠥᠮᠥᠷᠭᠡ ᠶ᠋ᠢ ᠪᠠᠷᠠᠲᠠᠯᠠ ᠠᠪᠠᠴᠢᠭᠤᠯᠵᠤ᠂ ᠮᠤᠩ ᠭᠣᠣᠯ ᠤ᠋ᠨ ᠠᠮᠠᠨ ᠤ᠋ ᠰᠢᠨᠡ ᠬᠣᠲᠠ - ᠮᠠᠷᠠᠯ ᠳ᠋ᠤᠷ ᠰᠢᠨᠡ ᠡᠷᠦᠭᠰᠡᠨ ᠨᠦᠬᠡ᠂ ᠬᠥᠮᠥᠷᠭᠡ ᠪᠡᠨ ᠴᠥᠮ ᠳᠦᠭᠦᠷᠭᠡᠵᠦ᠂ ᠬᠣᠢᠲᠤ ᠣᠨ ᠲᠡᠨᠳᠡ ᠶᠡᠬᠡ ᠴᠢᠭᠤᠯᠭᠠᠨ ᠴᠢᠭᠤᠯᠬᠤᠢ ᠳ᠋ᠤᠷ ᠤᠭᠲᠤᠵᠤ ᠪᠡᠯᠡᠳᠬᠡᠭᠡᠳ᠂ ᠮᠥᠨ ᠲᠠᠩᠭᠤᠳ ᠤᠯᠤᠰ ᠤ᠋ᠨ ᠢᠷᠭᠡᠨ ᠦ᠌ ᠮᠣᠷᠢ᠂ ᠦᠬᠡᠷ᠂ ᠬᠣᠨᠢ ᠪᠠᠷ ᠠᠴᠢᠭᠤᠯᠵᠤ ᠬᠡᠷᠡᠭᠯᠡᠭᠰᠡᠨ ᠢ᠋ ᠲᠣᠭᠠ ᠶᠣᠰᠣᠭᠠᠷ ᠡᠭᠡᠭᠦᠯᠦᠨ ᠲᠤᠰᠢᠶᠠᠵᠤ᠂ ᠣᠨ ᠤ᠋ ᠠᠮᠢᠳᠤᠷᠠᠯ ᠢ᠋ ᠦᠯᠡᠳᠡᠭᠡᠨ ᠥᠭᠭᠦᠭᠰᠡᠨ ᠳ᠋ᠦ᠍ᠷ ᠲᠠᠩᠭᠤᠳ ᠤᠯᠤᠰ ᠤ᠋ᠨ ᠣᠯᠠᠨ ᠢᠷᠭᠡᠳ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠪᠠᠲᠤ ᠢᠲᠡᠭᠡᠮᠵᠢ ᠶ᠋ᠢ ᠥᠪᠡᠷᠦᠨ ᠲᠠᠩᠭᠤᠳ ᠤᠯᠤᠰ ᠤ᠋ᠨ ᠠᠯᠪᠠᠨ ᠴᠡᠷᠢᠭ ᠡᠴᠡ ᠴᠦ᠍ ᠢᠯᠡᠭᠦᠦ ᠢᠭᠲᠦᠯᠦᠨ ᠰᠢᠲᠦᠯᠴᠡᠨ ᠢᠲᠡᠭᠡᠮᠵᠢᠯᠡᠨ ᠪᠢᠰᠢᠷᠡᠯᠴᠡᠪᠡᠢ᠃ ᠡᠨᠡ ᠴᠦ᠍ ᠮᠥᠨ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢᠨ ᠰᠢᠳᠠᠷ ᠵᠡᠷᠭᠡᠯᠡᠳᠡᠭᠡ ᠣᠢᠷᠠᠯᠴᠠᠭᠠ ᠤᠯᠤᠰ ᠤ᠋ᠨ ᠣᠯᠠᠨ ᠤ᠋ ᠰᠡᠳᠬᠢᠯ ᠢ᠋ ᠠᠪᠴᠤ᠂ ᠥᠪᠡᠷᠦᠨ ᠤᠯᠤᠰ ᠲᠤᠷ ᠬᠠᠰᠢᠶᠠ ᠲᠦᠰᠢᠶᠡ ᠪᠣᠯᠭᠠᠵᠤ᠂ ᠤᠷᠲᠤ ᠤᠳᠠᠭᠠᠨ ᠠᠮᠤᠭᠤᠯᠬᠤ ᠰᠠᠨᠠᠭᠠ ᠪᠤᠶᠤ᠃ ᠵᠢᠴᠢ ᠠᠷᠤ ᠭᠠᠵᠠᠷ ᠤ᠋ᠨ ᠬᠠᠰᠠᠭ ᠲᠡᠷᠭᠡ ᠬᠡᠮᠡᠭᠴᠢ᠂ ᠨᠢᠭᠡᠬᠡᠨ ᠦᠬᠡᠷ ᠬᠥᠯᠵᠦ᠂ ᠠᠷᠪᠠᠭᠠᠳ ᠲᠡᠷᠭᠡ ᠶ᠋ᠢ ᠨᠢᠭᠡᠨ ᠬᠥᠮᠦᠨ ᠭᠡᠯᠢᠬᠦ ᠮᠣᠳᠣᠨ ᠬᠦᠷᠳᠦᠲᠦ ᠠᠭᠠᠯᠵᠢᠨ ᠲᠡᠷᠭᠡ ᠶ᠋ᠢ ᠬᠡᠯᠡᠬᠦ ᠪᠣᠯᠠᠢ᠃ ᠲᠡᠢᠨ ᠬᠦ᠌ ᠡᠭᠦᠨ ᠢ᠋ ᠭᠠᠭᠴᠠ ᠣᠯᠠᠨ ᠲᠣᠭᠠ ᠪᠠᠷ ᠡᠯᠡᠰᠦᠨ ᠲᠠᠯᠠ ᠳ᠋ᠤᠷ ᠬᠡᠷᠡᠭᠯᠡᠬᠦ ᠪᠣᠯᠠᠢ᠃ ᠬᠠᠳᠠ ᠴᠢᠯᠠᠭᠤ ᠶ᠋ᠢᠨ ᠬᠠᠲᠠᠭᠤ ᠵᠠᠮ ᠳ᠋ᠤᠷ ᠳᠣᠯᠣᠭᠠ ᠨᠠᠢ᠍ᠮᠠᠨ ᠤᠨᠠᠭᠠ ᠬᠥᠯᠵᠦ ᠠᠷᠪᠠᠭᠠᠳ ᠲᠠᠭᠠᠷ ᠠᠮᠤ ᠲᠡᠭᠡᠭᠡᠬᠦ ᠲᠡᠮᠦᠷ ᠲᠡᠷᠭᠡ ᠪᠤᠰᠤ ᠪᠤᠶᠤ᠃ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢᠨ ᠠᠮᠤ ᠪᠤᠳᠠᠭᠠ ᠵᠥᠭᠡᠭᠡᠬᠦ᠂ ᠴᠤᠭᠯᠠᠭᠤᠯᠬᠤ ᠶᠠᠪᠤᠳᠠᠯ ᠢ᠋ ᠤᠷᠢᠳᠠᠰᠠ ᠴᠠᠷᠤᠨ ᠴᠢᠷᠮᠠᠢᠵᠤ ᠳᠥᠷᠭᠡᠨᠡ ᠶᠠᠪᠤᠭᠤᠯᠤᠭᠰᠠᠨ ᠠᠨᠤ ᠲᠠᠢᠽᠦ ᠶ᠋ᠢᠨ ᠡᠨᠡᠷᠢᠯᠲᠦ ᠶᠡᠬᠡ ᠵᠠᠩ ᠰᠠᠨᠠᠭᠠᠨ ᠢ᠋ᠶ᠋ᠠᠷ ᠪᠢᠲᠡᠭᠡᠢ ᠵᠥᠭᠡᠭᠡᠭᠲᠦᠨ ᠭᠡᠮᠡᠨ ᠬᠣᠷᠢᠬᠤ ᠠ᠋ᠴᠠ ᠠᠶᠤᠵᠤ᠂ ᠰᠠᠶᠢ ᠡᠢᠨ ᠬᠦ᠌ ᠶᠠᠭᠠᠷᠠᠨ ᠶᠠᠪᠤᠭᠤᠯᠤᠭᠰᠠᠨ ᠠᠵᠤᠭᠤ᠃ ᠡᠨᠡ ᠦᠨᠡᠬᠡᠷ᠄
ᠬᠠᠢᠷᠠ ᠥᠷᠥᠰᠢᠶᠡᠯ ᠦ᠋ᠨ ᠬᠠᠮᠤᠭ ᠬᠡᠰᠢᠭ ᠢ᠋ ᠡᠵᠡᠨ ᠢᠨᠤ ᠵᠠᠷᠯᠠᠵᠤ
ᠬᠠᠮᠤᠨ ᠴᠤᠭᠯᠠᠭᠤᠯᠤᠨ ᠨᠥᠭᠡᠨᠡ ᠬᠤᠷᠢᠶᠠᠬᠤ ᠶ᠋ᠢ ᠰᠠᠢᠳ ᠠᠨᠤ ᠵᠢᠳᠬᠦᠮᠦᠢ᠃
ᠲᠡᠨᠳᠡᠴᠡ ᠡᠳᠡᠭᠡᠷ ᠴᠤᠭᠯᠠᠭᠤᠯᠬᠤ᠂ ᠬᠤᠷᠢᠶᠠᠬᠤ᠂ ᠨᠥᠭᠡᠬᠦ ᠵᠦᠢᠯ ᠢ᠋ ᠰᠠᠶᠢ ᠵᠠᠪᠳᠤᠨ ᠲᠡᠭᠦᠰᠬᠡᠲᠡᠯᠡ ᠦᠨᠡᠬᠡᠷ ᠡᠵᠡᠨ ᠪᠠᠷᠠᠭᠤᠨ ᠠ᠋ᠴᠠ ᠪᠠᠢᠴᠠᠭᠠᠭᠰᠠᠭᠠᠷ ᠣᠢᠷᠠ ᠬᠦᠷᠴᠦ ᠢᠷᠡᠪᠡ᠃ ᠤᠭ ᠠ᠋ᠴᠠ ᠡᠨᠡ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠴᠢᠭᠤᠯᠭᠠᠨ ᠲᠠᠷᠬᠠᠵᠤ ᠵᠦᠭ ᠵᠦᠭ ᠲᠦ᠍ᠷ ᠡᠴᠢᠭᠰᠡᠨᠡ ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍ᠷ ᠶᠡᠬᠡ ᠬᠦᠯᠦᠭ ᠨᠣᠶᠠᠨ ᠴᠢᠯᠠᠭᠤᠨ ᠢ᠋ᠶ᠋ᠠᠷ ᠭᠤᠴᠢᠨ ᠵᠢᠷᠭᠤᠭᠠᠨ ᠪᠠᠭᠠᠲᠤᠳ ᠤ᠋ᠨ ᠭᠤᠴᠢᠨ ᠵᠢᠷᠭᠤᠭᠠᠨ ᠠᠩᠭᠢ ᠪᠠᠭ ᠢ᠋ ᠬᠣᠶᠠᠷ ᠳᠠᠰᠢ ᠲᠡᠭᠰᠢᠯᠡᠨ ᠬᠠᠭᠠᠰᠯᠠᠵᠤ᠂ ᠨᠢᠭᠡᠨ ᠬᠠᠭᠠᠰ ᠢ᠋ ᠶᠡᠬᠡ ᠬᠦᠯᠦᠭ ᠨᠣᠶᠠᠨ ᠪᠤᠭᠤᠷᠤᠯ ᠳ᠋ᠤᠷ ᠦᠯᠡᠳᠡᠭᠡᠨ ᠥᠭᠴᠦ᠂ ᠤᠯᠤᠰ ᠢ᠋ ᠳᠥᠷᠪᠡᠨ ᠵᠢᠰᠢᠶᠠ ᠪᠠᠷ ᠡᠳᠦᠷ ᠰᠥᠨᠢ ᠡᠷᠭᠢᠨ ᠰᠠᠬᠢᠵᠤ᠂ ᠨᠢᠭᠡᠨ ᠬᠠᠭᠠᠰ ᠢ᠋ ᠴᠢᠯᠠᠭᠤᠨ ᠠᠪᠴᠤ᠂ ᠭᠤᠷᠪᠠᠨ ᠬᠦᠷᠢᠶᠡ ᠪᠣᠯᠭᠠᠨ ᠵᠣᠬᠢᠶᠠᠵᠤ᠂ ᠲᠡᠷᠢᠭᠦᠨ ᠠᠩᠭᠢ ᠶ᠋ᠢ ᠠᠵᠢᠨᠠᠢ ᠮᠡᠷᠭᠡᠨ ᠡᠵᠡᠯᠡᠨ ᠳᠤᠮᠳᠠᠳᠤ ᠬᠦᠷᠢᠶᠡ ᠶ᠋ᠢ ᠬᠦᠯᠦᠭ ᠴᠢᠯᠠᠭᠤᠨ ᠲᠠᠢᠽᠦ ᠶ᠋ᠢ ᠬᠠᠮᠠᠭᠠᠯᠠᠨ ᠲᠡᠷᠢᠭᠦᠯᠡᠵᠦ᠂ ᠰᠡᠭᠦᠯ ᠦ᠋ᠨ ᠪᠠᠭ ᠢ᠋ ᠬᠤᠳᠠᠷᠭᠠ ᠪᠠᠭᠠᠲᠤᠷ ᠵᠠᠬᠢᠷᠤᠨ ᠬᠣᠢᠨᠠ ᠰᠡᠭᠦᠯ ᠪᠣᠯᠵᠤ᠂ ᠲᠠᠢᠽᠦ ᠶ᠋ᠢᠨ ᠶᠡᠬᠡ ᠬᠦᠷᠢᠶᠡᠨ ᠦ᠌ ᠳᠥᠷᠪᠡᠨ ᠥᠨᠴᠥᠭ ᠲᠣᠷ ᠳᠥᠷᠪᠡᠨ ᠬᠥᠯ ᠦ᠋ᠨ ᠳᠥᠷᠪᠡᠨ ᠪᠠᠭᠠ ᠬᠦᠷᠢᠶᠡ ᠳ᠋ᠦ᠍ᠷ ᠬᠡᠷᠡᠢᠳ ᠠᠢᠮᠠᠭ ᠤ᠋ᠨ ᠫᠣᠯᠭᠤᠳᠠᠢ᠂ ᠴᠢᠮᠡᠳ ᠠᠢᠮᠠᠭ ᠤ᠋ᠨ ᠪᠤᠯᠭᠤᠨ ᠡᠮᠦᠨᠡ ᠬᠣᠶᠠᠷ ᠬᠥᠯ ᠪᠣᠯᠤᠨ ᠨᠠᠢ᠍ᠮᠠᠨ ᠠᠢᠮᠠᠭ ᠤ᠋ᠨ ᠢᠳᠡᠷ ᠳᠣᠪᠣ᠂ ᠴᠠᠢᠯᠵᠢ ᠠᠢᠮᠠᠭ ᠤ᠋ᠨ ᠪᠣᠳᠣᠯᠭᠠᠲᠤ ᠪᠣᠰᠣᠩ ᠬᠣᠢᠲᠤ ᠬᠣᠶᠠᠷ ᠬᠥᠯ ᠪᠣᠯᠤᠨ᠂ ᠠᠵᠢᠨᠠᠢ ᠮᠣᠷᠢᠨ ᠤ᠋ ᠪᠠᠭᠠ ᠵᠢᠭᠰᠠᠭᠠᠯ ᠢ᠋ᠶ᠋ᠠᠷ ᠰᠢᠭᠤᠳ ᠵᠡᠭᠦᠨ ᠡᠮᠦᠨᠡ ᠬᠡᠲᠦᠷᠡᠨ ᠭᠠᠷᠴᠤ ᠲᠠᠩᠭᠤᠳ ᠤᠯᠤᠰ ᠤ᠋ᠨ ᠡᠮᠦᠨᠡ ᠵᠠᠮ ᠢ᠋ᠶ᠋ᠠᠷ ᠪᠠᠷᠠᠭᠤᠨᠰᠢ ᠥᠩᠭᠡᠷᠡᠨ ᠲᠠᠩᠭᠤᠳ ᠤᠯᠤᠰ ᠤ᠋ᠨ ᠨᠡᠢᠰᠯᠡᠯ ᠢ᠋ ᠵᠥᠪ ᠢ᠋ᠶ᠋ᠡᠷ ᠨᠢᠭᠡ ᠡᠷᠭᠢᠨ ᠪᠠᠷᠠᠭᠤᠨ ᠬᠣᠢᠭᠤᠷ ᠲᠣᠭᠣᠷᠢᠨ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠣᠯᠠᠨ ᠵᠠᠮ ᠤ᠋ᠨ ᠴᠡᠷᠢᠭ ᠶᠠᠪᠤᠭᠰᠠᠨ ᠭᠠᠵᠠᠷ ᠪᠦᠷᠢ ᠪᠡᠷ ᠳᠠᠷᠤᠨ ᠶᠠᠪᠤᠵᠤ ᠳᠠᠢᠰᠤᠨ ᠤ᠋ ᠥᠷᠨᠢᠯ ᠢ᠋ ᠳᠠᠷᠤᠩᠭᠤᠢᠯᠠᠨ᠂ ᠣᠯᠠᠨ ᠤ᠋ ᠠᠮᠢᠰᠬᠤᠯ᠂ ᠤᠯᠤᠰ ᠤ᠋ᠨ ᠪᠠᠢᠳᠠᠯ ᠢ᠋ ᠠᠨᠤ ᠪᠠᠢᠴᠠᠭᠠᠨ ᠦᠵᠡᠭᠰᠡᠭᠡᠷ ᠬᠣᠢᠲᠤ ᠵᠠᠮ ᠳ᠋ᠤᠷ ᠬᠦᠷᠴᠦ᠂ ᠵᠡᠯᠮᠡ ᠶ᠋ᠢᠨ ᠶᠠᠪᠤᠭᠰᠠᠨ ᠵᠠᠮ ᠢ᠋ᠶ᠋ᠠᠷ ᠵᠡᠭᠦᠨ ᠵᠦᠭ ᠵᠠᠯᠠᠷᠠᠨ ᠢᠷᠡᠬᠦᠶᠡ᠂ ᠵᠢᠷᠯᠤᠭ ᠬᠣᠲᠠ ᠳ᠋ᠤᠷ ᠰᠠᠭᠤᠬᠤ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢᠨ ᠭᠤᠷᠪᠠᠨ ᠤᠭᠲᠤᠯᠭᠠ ᠶ᠋ᠢᠨ ᠰᠠᠢᠳ ᠤ᠋ᠳ ᠬᠣᠯᠠ ᠣᠢᠷᠠ ᠪᠠᠷ ᠲᠡᠩᠨᠡᠭᠦᠯᠦᠨ ᠤᠭᠲᠤᠬᠤ ᠶ᠋ᠢ ᠬᠡᠳᠦᠢᠨ ᠳᠠᠷᠠᠭᠠ ᠳᠠᠷᠠᠭᠠ ᠪᠠᠷ ᠪᠡᠯᠡᠳᠬᠡᠨ ᠬᠦᠯᠢᠶᠡᠭᠰᠡᠨ ᠲᠤᠯᠠ ᠤᠳᠠᠭᠠ ᠪᠦᠷᠢ ᠫᠤᠤ ᠳᠠᠭᠤᠷᠢᠰᠤᠨ ᠬᠡᠩᠭᠡᠷᠭᠡ ᠬᠦᠷᠴᠢᠭᠢᠨᠡᠨ᠂ ᠬᠥᠭᠵᠢᠮ ᠡᠭᠦᠰᠬᠡᠨ᠂ ᠰᠥᠭᠥᠳᠴᠦ ᠤᠭᠲᠤᠯᠴᠠᠭᠰᠠᠭᠠᠷ ᠳᠥᠷᠪᠡᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠵᠢᠷᠭᠤᠭᠠᠨᠠ ᠴᠢᠪ ᠴᠢᠬᠡ ᠲᠠᠢᠽᠦ ᠶ᠋ᠢᠨ ᠮᠡᠨᠳᠦᠯᠡᠭᠰᠡᠨ ᠲᠦᠮᠡᠨ ᠥᠯᠵᠡᠢᠲᠦ ᠡᠳᠦᠷ ᠵᠢᠷᠯᠤᠭ ᠬᠣᠲᠠ ᠳ᠋ᠤᠷ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍ᠷ ᠴᠡᠷᠢᠭ ᠦ᠋ᠨ ᠶᠡᠬᠡ ᠵᠢᠨᠦᠩ ᠬᠦᠯᠦᠭ ᠨᠣᠶᠠᠨ ᠮᠤᠬᠤᠯᠢ᠂ ᠲᠥᠪ ᠴᠡᠷᠢᠭ ᠦ᠋ᠨ ᠶᠡᠬᠡ ᠵᠠᠩᠵᠤᠨ ᠬᠦᠯᠦᠭ ᠨᠣᠶᠠᠨ ᠪᠤᠭᠤᠷᠵᠢ ᠬᠣᠶᠠᠭᠤᠯᠠ ᠲᠡᠷᠢᠭᠦᠯᠡᠨ ᠰᠥᠭᠥᠳᠴᠦ᠂ ᠪᠠᠰᠠ ᠬᠣᠣᠰ ᠬᠤᠨᠳᠠᠭᠠ ᠶ᠋ᠢᠨ ᠰᠠᠷᠬᠤᠳ ᠤ᠋ᠨ ᠰᠢᠷᠡᠭᠡ ᠵᠢᠭᠰᠠᠭᠠᠨ ᠬᠣᠣᠰ ᠬᠣᠣᠰ ᠢ᠋ᠶ᠋ᠠᠷ ᠬᠣᠣᠰᠯᠠᠨ ᠪᠠᠷᠢᠵᠤ ᠬᠣᠷᠢᠨ ᠳᠥᠷᠪᠡᠨ ᠪᠦᠯᠦᠭ ᠦ᠋ᠨ ᠬᠥᠭᠵᠢᠮ ᠢ᠋ᠶ᠋ᠡᠷ ᠤᠭᠲᠤᠨ ᠦᠯᠢᠶᠡᠨ ᠳᠡᠯᠡᠳᠦᠭᠰᠡᠭᠡᠷ ᠬᠣᠲᠠᠨ ᠳ᠋ᠤᠷ ᠣᠷᠣᠵᠤ᠂ ᠳᠤᠮᠳᠠᠳᠤ ᠶᠡᠬᠡ ᠭᠣᠣᠯ ᠵᠠᠮ ᠢ᠋ᠶ᠋ᠠᠷ ᠰᠢᠭᠤᠳ ᠮᠣᠷᠢᠯᠠᠭᠰᠠᠭᠠᠷ ᠳᠣᠯᠣᠭᠠᠨ ᠳᠠᠪᠬᠤᠷ ᠤ᠋ᠨ ᠯᠤᠤᠲᠤ ᠬᠠᠭᠠᠯᠭᠠ ᠪᠠᠷ ᠬᠠᠭᠠᠨ ᠤ᠋ ᠶᠡᠬᠡ ᠬᠠᠷᠰᠢ ᠳ᠋ᠤᠷ ᠠᠨᠤ ᠣᠷᠣᠵᠤ᠂ ᠲᠠᠢᠽᠦ ᠠᠷᠰᠯᠠᠨᠲᠤ ᠰᠠᠭᠤᠷᠢ ᠶ᠋ᠢᠨ ᠳᠡᠷᠭᠡᠳᠡ ᠮᠣᠷᠢᠨ ᠠ᠋ᠴᠠ ᠵᠠᠯᠠᠷᠠᠨ ᠪᠠᠭᠤᠵᠤ ᠰᠠᠭᠤᠭᠰᠠᠨ ᠠᠪᠠᠰᠤ᠂ ᠭᠠᠳᠠᠨᠠ ᠭᠤᠷᠪᠠᠨ ᠶᠡᠬᠡ ᠥᠭᠡᠷᠯᠢᠭ ᠬᠠᠨ ᠫᠤᠤ ᠶ᠋ᠢᠨ ᠳᠠᠭᠤᠨ ᠲᠡᠭᠷᠢ ᠭᠠᠵᠠᠷ ᠳᠡᠯᠪᠡᠷᠡᠲᠡᠯᠡ ᠭᠤᠷᠪᠠᠨᠲᠠ ᠲᠦᠴᠢᠭᠢᠨᠡᠵᠦ᠂ ᠲᠡᠭᠷᠢ ᠶ᠋ᠢᠨ ᠬᠡᠩᠭᠡᠷᠭᠡ ᠠᠭᠠᠷ ᠤ᠋ᠨ ᠵᠦᠩ ᠬᠠᠮᠲᠤᠪᠠᠷ ᠳᠠᠭᠤᠷᠢᠰᠤᠨ᠂ ᠦᠷᠡᠯ ᠬᠠᠷᠠᠩᠭᠠ ᠯᠠᠪᠠᠢ ᠪᠦᠷᠢᠶᠡ ᠵᠡᠷᠭᠡ ᠪᠡᠷ ᠦᠯᠢᠶᠡᠨ᠂ ᠬᠣᠷᠢᠨ ᠳᠥᠷᠪᠡᠨ ᠠᠢᠮᠠᠭ ᠤ᠋ᠨ ᠨᠠᠷᠢᠨ ᠪᠦᠳᠦᠭᠦᠨ ᠱᠠᠪᠠᠩ ᠬᠥᠭᠵᠢᠮ᠂ ᠬᠣᠷᠢᠨ ᠳᠥᠷᠪᠡᠨ ᠬᠣᠷᠢᠨ ᠳᠥᠷᠪᠡᠨ ᠢ᠋ᠶ᠋ᠡᠷ ᠨᠡᠢᠲᠡ ᠲᠠᠪᠤᠨ ᠵᠠᠭᠤᠨ ᠳᠠᠯᠠᠨ ᠵᠢᠷᠭᠤᠭᠠᠨ ᠮᠠᠭᠰᠢᠯᠭᠠ ᠶ᠋ᠢᠨ ᠮᠠᠩᠨᠤᠭ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠪᠥᠵᠢᠭ ᠳᠠᠭᠤᠯᠠᠯ ᠤ᠋ᠨ ᠠᠷᠠᠳ ᠬᠣᠷᠢᠨ ᠳᠥᠷᠪᠡᠨ ᠤᠯᠠᠷᠢᠯ ᠤ᠋ᠨ ᠳᠡᠰ ᠵᠡᠷᠭᠡ ᠪᠡᠷ ᠵᠢᠭᠰᠠᠨ᠂ ᠬᠣᠶᠠᠷ ᠮᠥᠷ ᠰᠠᠷᠠᠨ ᠤ᠋ ᠳᠦᠷᠢᠮ ᠢ᠋ᠶ᠋ᠡᠷ ᠳᠠᠪᠬᠤᠷᠯᠠᠨ᠂ ᠲᠠᠢᠽᠦ ᠶ᠋ᠢᠨ ᠵᠦᠭ ᠬᠠᠨᠳᠤᠨ ᠵᠡᠷᠭᠡᠯᠡᠨ ᠬᠦᠷᠢᠶᠡᠯᠡᠭᠡᠳ᠂ ᠬᠣᠷᠢᠨ ᠳᠥᠷᠪᠡᠨ ᠬᠢᠭᠢᠷᠢ ᠪᠠᠭ ᠤ᠋ᠨ᠂ ᠬᠣᠷᠢᠨ ᠳᠥᠷᠪᠡᠨ ᠬᠡᠭᠡᠳᠡᠰᠦᠨ ᠦ᠌ ᠬᠥᠭᠵᠢᠮ ᠦ᠋ᠨ ᠨᠠᠢ᠍ᠮᠠᠨ ᠵᠦᠢᠯ ᠦ᠋ᠨ ᠡᠭᠡᠰᠢᠭ ᠦ᠋ᠨ ᠰᠠᠪᠠ ᠵᠡᠪᠰᠡᠭ᠂ ᠰᠢᠷᠬᠡᠭ ᠬᠤᠯᠤᠰᠤᠨ ᠪᠠ ᠬᠥᠭᠰᠢᠨ ᠵᠠᠯᠠᠭᠤ᠂ ᠡᠷᠡ ᠡᠮᠡ᠂ ᠥᠬᠢᠳ ᠬᠡᠦᠬᠡᠳ᠂ ᠭᠡᠭᠡᠲᠡᠰᠦ ᠪᠦᠷᠢ ᠳ᠋ᠦ᠍ᠷ ᠪᠦᠳᠦᠭᠦᠨ ᠨᠠᠷᠢᠨ᠂ ᠥᠨᠳᠥᠷ ᠪᠣᠭᠣᠨᠢ᠂ ᠴᠢᠩᠭᠠ ᠰᠤᠯᠠ᠂ ᠬᠥᠨᠳᠡᠢ ᠬᠦᠩᠭᠢᠨᠡᠮᠡ᠂ ᠨᠢᠭᠡᠨ ᠬᠡᠪ᠂ ᠨᠢᠭᠡᠨ ᠠᠶᠠᠰ᠂ ᠨᠢᠭᠡᠨ ᠡᠷᠭᠦᠯᠲᠡ᠂ ᠨᠢᠭᠡᠨ ᠳᠠᠷᠤᠯᠲᠠ᠂ ᠦᠰᠦ ᠬᠢᠯᠭᠠᠰᠤᠨ ᠤ᠋ ᠲᠡᠳᠦᠢ ᠴᠦ᠍ ᠵᠥᠷᠢᠴᠡᠯᠳᠦᠬᠦ ᠦᠭᠡᠢ᠂ ᠦᠨᠡᠬᠡᠷ ᠨᠠᠮ ᠠᠶᠠᠯᠭᠤ ᠳ᠋ᠤᠷ ᠲᠡᠮᠡᠭᠡ ᠤᠶᠠᠷᠠᠨ ᠤᠮᠳᠠᠮᠠᠷ᠂ ᠥᠨᠳᠥᠷ ᠬᠦᠩᠭᠢᠨᠡᠯ ᠳ᠋ᠦ᠍ᠷ ᠲᠣᠭᠣᠷᠤᠤ ᠮᠠᠭᠰᠢᠨ ᠪᠥᠵᠢᠭᠯᠡᠮᠡᠷ᠂ ᠮᠥᠨ ᠬᠥᠭ ᠠᠶᠠᠯᠭᠤ ᠳ᠋ᠤᠷ ᠨᠡᠢᠴᠡᠭᠦᠯᠦᠨ ᠶᠡᠬᠡ ᠪᠠᠶᠠᠰᠬᠤᠯᠠᠩ ᠤ᠋ᠨ ᠶᠡᠬᠡ ᠬᠤᠷᠢᠮ ᠤ᠋ᠨ ᠰᠠᠷᠬᠤᠳ ᠤ᠋ᠨ ᠰᠢᠳᠠᠷ ᠲᠡᠷᠢᠭᠦᠯᠡᠨ᠂ ᠶᠢᠰᠦ ᠶᠢᠰᠦᠨ ᠨᠠᠶᠠᠨ ᠨᠢᠭᠡᠨ ᠰᠢᠷᠡᠭᠡ᠂ ᠬᠣᠢᠨᠠ ᠬᠣᠢᠨᠠ ᠠ᠋ᠴᠠᠭᠠᠨ ᠲᠠᠭᠠᠯᠴᠠᠨ ᠵᠢᠷᠪᠢᠭᠢᠨᠡᠨ ᠣᠷᠣᠵᠤ ᠢᠷᠡᠭᠡᠳ᠂ ᠰᠠᠷᠬᠤᠳ ᠵᠢᠮᠢᠰ ᠨᠣᠭᠣᠭᠠ ᠵᠠᠭᠤᠰᠢ ᠮᠢᠬᠠ ᠢᠳᠡᠭᠡ ᠶ᠋ᠢᠨ ᠳᠡᠭᠡᠳᠦ ᠭᠤᠷᠪᠠᠨ ᠰᠢᠷᠡᠭᠡ᠂ ᠬᠠᠷᠰᠢ ᠳ᠋ᠤᠷ ᠣᠷᠣᠵᠤ᠂ ᠲᠠᠢᠽᠦ ᠶ᠋ᠢᠨ ᠡᠮᠦᠨᠡ ᠵᠢᠭᠰᠠᠭᠠᠨ᠂ ᠳᠡᠭᠡᠳᠦ ᠶ᠋ᠢᠨ ᠵᠣᠭᠣᠭ ᠲᠤᠷ ᠪᠡᠯᠡᠳᠬᠡᠨ᠂ ᠦᠯᠡᠭᠰᠡᠨ ᠶᠢᠰᠦᠨ ᠶᠡᠬᠡ ᠪᠦᠬᠦᠯᠢ ᠰᠢᠭᠦᠰᠦᠨ ᠦ᠌ ᠰᠢᠷᠡᠭᠡ ᠲᠡᠷᠢᠭᠦᠯᠡᠨ᠂ ᠳᠠᠯᠠᠨ ᠨᠠᠢ᠍ᠮᠠᠨ ᠶᠣᠰᠣᠯᠠᠯ ᠤ᠋ᠨ ᠰᠢᠷᠡᠭᠡ᠂ ᠬᠠᠷᠰᠢ ᠶ᠋ᠢᠨ ᠶᠡᠬᠡ ᠶᠡᠨᠳᠡᠷ ᠦ᠋ᠨ ᠬᠣᠶᠠᠷ ᠡᠲᠡᠭᠡᠳ ᠲᠣᠷ ᠬᠣᠣᠰ ᠬᠣᠣᠰ ᠢ᠋ᠶ᠋ᠠᠷ ᠬᠣᠣᠰᠯᠠᠨ ᠵᠢᠭᠰᠠᠭᠠᠭᠰᠠᠨ ᠠᠪᠠᠰᠤ᠂ ᠬᠠᠷᠰᠢ ᠶ᠋ᠢᠨ ᠳᠡᠭᠡᠷᠡ ᠠᠷᠢᠬᠢ ᠪᠠᠷᠢᠬᠤ ᠯᠤᠤ ᠶ᠋ᠢᠨ ᠲᠣᠯᠣᠭᠠᠢᠲᠤ ᠪᠣᠷᠣ ᠽᠠᠨᠳᠠᠨ ᠤ᠋ ᠬᠠᠪᠲᠠᠭᠠᠢᠯ ᠲᠠᠮᠰᠢᠶᠠᠯ ᠤ᠋ᠨ ᠳᠠᠭᠤᠨ ᠨᠢᠭᠡᠨᠲᠡ ᠭᠠᠷᠤᠮᠠᠭᠴᠠ᠂ ᠳᠣᠣᠷᠠᠲᠤ ᠲᠠᠪᠤᠨ ᠵᠠᠭᠤᠨ ᠳᠠᠯᠠᠨ ᠵᠢᠷᠭᠤᠭᠠᠨ ᠲᠠᠮᠰᠢᠶᠠᠯ ᠮᠣᠳᠣᠨ ᠨᠢᠭᠡᠬᠡᠨ ᠴᠠᠭ ᠨᠢᠭᠡᠬᠡᠨ ᠳᠣᠬᠢᠶᠠ ᠪᠠᠷ ᠲᠠᠴᠢᠭᠢᠨᠠᠨ ᠳᠠᠭᠤᠷᠢᠰᠴᠤ ᠥᠩᠭᠡᠷᠡᠮᠡᠭᠴᠡ᠂ ᠲᠦᠭ ᠲᠦᠮᠡᠨ ᠳᠠᠭᠤᠨ ᠴᠢᠮᠡᠭᠡ ᠶᠠᠭ ᠲᠠᠭ ᠢᠪ ᠴᠢᠪ ᠵᠣᠭ ᠵᠣᠭᠰᠣᠭᠠᠳ᠂ ᠬᠣᠣᠰ ᠬᠤᠨᠳᠠᠭᠠ ᠶ᠋ᠢᠨ ᠬᠣᠣᠷᠠᠵᠠ ᠰᠠᠷᠬᠤᠳ ᠪᠠᠷᠢᠬᠤ᠂ ᠬᠣᠶᠠᠷ ᠶᠡᠬᠡ ᠲᠡᠷᠢᠭᠦᠯᠡᠭᠰᠡᠨ ᠰᠠᠢᠳ - ᠮᠤᠬᠤᠯᠢ᠂ ᠪᠤᠭᠤᠷᠵᠢ ᠭᠠᠳᠠᠭᠠᠳᠤ ᠳᠠᠬᠤ ᠪᠠᠨ ᠲᠠᠢᠯᠤᠨ᠂ ᠮᠠᠩᠨᠤᠭ ᠨᠢᠳᠤᠷᠭᠠ ᠪᠠᠨ ᠪᠠᠭᠤᠯᠭᠠᠨ᠂ ᠠᠯᠲᠠᠨ ᠪᠠ ᠬᠠᠰ ᠬᠣᠶᠠᠷ ᠴᠥᠭᠥᠴᠡ ᠶ᠋ᠢ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠮᠠᠩᠯᠠᠢ ᠯᠤᠭᠠ ᠪᠠᠨ ᠰᠠᠴᠠᠭᠤ ᠥᠨᠳᠥᠷ ᠡᠷᠭᠦᠨ᠂ ᠭᠤᠷᠪᠠᠨ ᠳᠠᠪᠬᠤᠷ ᠳᠡᠭᠲᠡᠷ ᠶᠡᠨᠳᠡᠷ ᠦ᠋ᠨ ᠳᠣᠣᠷᠠ ᠠ᠋ᠴᠠ ᠥᠭᠡᠳᠡᠯᠡᠨ ᠠᠯᠬᠤᠵᠤ ᠠᠰᠬᠠᠯ ᠴᠠᠯᠭᠢᠯ ᠦᠭᠡᠢ ᠪᠡᠷ ᠠᠪᠠᠴᠢᠵᠤ᠂ ᠲᠠᠢᠽᠦ ᠶ᠋ᠢᠨ ᠰᠠᠭᠤᠳᠠᠯ ᠤ᠋ᠨ ᠡᠮᠦᠨᠡ ᠡᠭᠦᠯᠡ ᠡᠪᠬᠡᠬᠦ ᠮᠡᠲᠦ ᠬᠣᠣᠰ ᠡᠪᠦᠳᠦᠭ ᠢ᠋ᠶ᠋ᠡᠷ ᠥᠨᠳᠥᠷᠯᠡᠨ ᠰᠥᠭᠥᠳᠴᠦ ᠡᠷᠭᠦᠨ ᠪᠠᠷᠢᠭᠠᠳ᠂ ᠡᠷᠭᠢᠨ ᠤᠬᠤᠷᠢᠭᠰᠠᠭᠠᠷ ᠰᠠᠮ ᠰᠠᠮ ᠪᠠᠭᠤᠵᠤ ᠢᠷᠡᠭᠡᠳ᠂ ᠬᠠᠷᠰᠢ ᠶ᠋ᠢᠨ ᠪᠣᠱᠣᠭᠠ ᠶ᠋ᠢᠨ ᠭᠠᠳᠠᠨᠠ᠂ ᠭᠢᠰᠬᠢᠯᠭᠡ ᠶ᠋ᠢᠨ ᠳᠤᠮᠳᠠ ᠰᠥᠭᠥᠳᠴᠦ᠂ ᠮᠤᠬᠤᠯᠢ ᠥᠨᠳᠥᠷ ᠢᠷᠠᠭᠤ ᠬᠦᠨᠳᠦᠯᠡᠮᠡᠳᠡᠭᠦᠦ ᠡᠭᠡᠰᠢᠭ ᠢ᠋ᠶ᠋ᠡᠷ ᠡᠢᠨ ᠭᠡᠮᠡᠨ ᠪᠡᠯᠡᠭᠯᠡᠨ ᠣᠴᠢᠷᠤᠨ᠄
ᠠᠰᠤᠷᠢ ᠲᠡᠭᠷᠢ ᠡᠴᠡ ᠡᠩᠭᠡᠵᠢᠭᠦᠯᠡᠷᠡ ᠢᠯᠡᠭᠡᠭᠰᠡᠨ
ᠡᠩᠭᠡᠷ ᠳᠡᠯᠡᠬᠡᠢ ᠶ᠋ᠢᠨ ᠡᠵᠡᠨ᠃
ᠬᠠᠭᠠᠨ ᠬᠤᠷᠮᠤᠰᠲᠠ ᠠᠴᠠ ᠬᠠᠮᠲᠤᠳᠬᠠᠷᠠ ᠵᠠᠷᠤᠭᠰᠠᠨ
ᠬᠠᠮᠤᠭ ᠬᠥᠮᠦᠨ ᠦ᠌ ᠪᠣᠭᠳᠠ᠃
ᠪᠠᠳᠠᠷᠠᠩᠭᠤᠢ ᠴᠠᠭᠠᠨ ᠰᠦᠯᠳᠡ ᠲᠡᠭᠷᠢ ᠶ᠋ᠢᠨ
ᠪᠠᠷᠢᠳᠠᠯ ᠦᠭᠡᠢ ᠦᠨᠡᠨ ᠦᠷᠡ᠃
ᠭᠡᠭᠡᠬᠡᠨ ᠭᠡᠷᠡᠯ ᠭᠡᠢᠪᠡᠩ ᠰᠠᠴᠤᠷᠠᠯ ᠠ᠋ᠴᠠ ᠭᠡᠢᠨ ᠮᠡᠨᠳᠦᠯᠡᠭᠰᠡᠨ ᠲᠡᠭᠷᠢᠯᠢᠭ᠃
ᠤᠨᠤᠨ ᠮᠥᠷᠡᠨ ᠤᠷᠲᠤ ᠳᠡᠯᠢᠭᠦᠨ ᠦᠶᠡᠲᠦ ᠴᠠᠭᠠᠨ ᠡᠪᠡᠰᠦᠨᠡ
ᠣᠭ᠌ᠶᠤ ᠶ᠋ᠢᠨ ᠪᠣᠯᠳᠣᠭ ᠤᠨᠳᠤᠷᠤᠮᠠᠯ ᠪᠤᠯᠠᠭᠲᠤ ᠴᠡᠴᠡᠭᠲᠦ ᠠᠷᠢᠭᠤᠨ ᠵᠦᠯᠭᠡ ᠳ᠋ᠦ᠍ᠷ
ᠤᠯᠤᠰ ᠪᠦᠬᠦᠨ ᠢ᠋ ᠠᠮᠤᠵᠢᠭᠤᠯᠬᠤᠢ ᠶ᠋ᠢᠨ ᠲᠤᠯᠠ ᠨᠥᠵᠢ ᠠᠳᠬᠤᠭᠰᠠᠭᠠᠷ ᠮᠡᠨᠳᠦᠯᠡᠭᠰᠡᠨ᠂
ᠤᠳᠢᠷᠠᠰᠠᠳ ᠪᠠᠯᠭᠠᠰᠤᠨᠠ ᠲᠤᠯᠲᠠᠯᠠ᠂ ᠴᠠᠭᠠᠨ ᠭᠡᠷᠡᠯ ᠢ᠋ᠶ᠋ᠡᠷ ᠭᠡᠢᠭᠦᠯᠦᠭᠰᠡᠨ ᠴᠢᠨᠦ
ᠤᠷᠲᠤ ᠬᠣᠯᠠ ᠶ᠋ᠢᠨ ᠲᠦᠮᠡᠨ ᠪᠡᠯᠭᠡ ᠶ᠋ᠢᠨ ᠥᠯᠵᠡᠢᠲᠦ ᠥᠷᠯᠥᠭᠡ ᠶ᠋ᠢᠨ ᠪᠠᠶᠠᠷᠠ᠂
ᠤᠷᠢᠳ ᠬᠣᠵᠢᠳ ᠳᠠᠯᠠᠨ ᠲᠠᠪᠤᠨ ᠤᠯᠤᠰ ᠤ᠋ᠳ ᠪᠦᠭᠦᠳᠡᠭᠡᠷ ᠮᠥᠷᠭᠥᠨ ᠬᠦᠰᠡᠬᠦ ᠢᠨᠦ
ᠤᠯᠤᠰ ᠲᠥᠷᠥ ᠪᠡᠨ ᠤᠷᠤᠭᠰᠢ ᠳᠠᠯᠠᠢ ᠳ᠋ᠤᠷ ᠲᠤᠯᠲᠠᠯᠠ ᠤᠯᠠᠷᠢᠨ ᠳᠡᠯᠭᠡᠷᠡᠵᠦ ᠮᠠᠨᠳᠤᠭᠠᠳ
ᠤᠯᠠᠮᠵᠢᠯᠠᠭᠰᠠᠨ ᠲᠡᠭᠷᠢᠯᠢᠭ ᠦ᠋ᠨ ᠦᠷᠡᠰ ᠢ᠋ᠶ᠋ᠡᠷ ᠤᠮᠠᠷᠠᠲᠤ ᠲᠢᠪ ᠲᠣᠷ ᠤᠷᠲᠤᠳᠠ ᠳᠦᠭᠦᠷᠡᠩ ᠠᠲᠤᠭᠠᠢ!
ᠭᠡᠮᠡᠨ ᠣᠯᠠᠨ ᠲᠦᠮᠡᠨ ᠢ᠋ᠶ᠋ᠡᠷ ᠭᠤᠷᠪᠠᠨ ᠵᠡᠷᠭᠡ ᠮᠥᠷᠭᠥᠲᠡᠯᠡ ᠲᠠᠢᠽᠦ ᠮᠥᠩᠭᠥᠨ ᠦ᠌ ᠬᠤᠨᠳᠠᠭᠠᠲᠤ ᠳᠠᠷᠠᠰᠤ ᠶ᠋ᠢ ᠮᠣᠳᠣᠷ ᠢ᠋ᠶ᠋ᠠᠷ ᠬᠦᠷᠲᠡᠭᠡᠨ᠂ ᠬᠠᠷᠢᠭᠤ ᠡᠢᠨ ᠭᠡᠮᠡᠨ ᠪᠡᠯᠩᠯᠠᠷᠤᠨ᠄
ᠣᠯᠠᠨ ᠪᠦᠬᠦᠨᠡ ᠲᠤᠰᠠᠲᠠᠢ ᠪᠣᠯᠪᠠᠰᠤ
ᠤᠬᠤᠷᠢᠰᠢ ᠦᠭᠡᠢ ᠤᠷᠤᠭᠰᠢᠯᠠᠨ ᠵᠢᠳᠬᠦᠶᠡ ᠪᠢ᠃
ᠤᠯᠤᠰ ᠤ᠋ᠨ ᠲᠥᠯᠥᠭᠡ ᠲᠦᠷᠦᠭᠦᠯᠡᠭᠰᠡᠨ ᠪᠥᠭᠡᠰᠦ
ᠤᠮᠠᠷᠲᠠᠰᠢ ᠦᠭᠡᠢ ᠤᠷᠤᠯᠳᠤᠵᠤ ᠪᠦᠲᠦᠭᠡᠶᠡ ᠪᠢ᠃
ᠤᠳᠤᠷᠢᠳᠤᠨ ᠣᠷᠣᠬᠤ ᠶ᠋ᠢ ᠡᠵᠡᠨ ᠡᠭᠦᠰᠬᠡᠪᠡᠴᠦ᠂
ᠤᠯᠠᠮᠵᠢᠯᠠᠨ ᠵᠠᠰᠠᠬᠤ ᠲᠦᠰᠢᠮᠡᠳ ᠲᠠ ᠨᠠᠷ ᠪᠠᠢᠨᠠ ᠃
ᠤᠮᠠᠷᠠᠲᠤ ᠡᠮᠦᠨᠡᠲᠦ ᠶ᠋ᠢ ᠤᠯᠠᠮ ᠡᠩᠬᠡᠵᠢᠭᠦᠯᠬᠦ
ᠤᠬᠠᠮᠵᠢᠲᠤ ᠵᠢᠨᠦᠩ ᠦ᠋ᠨ ᠪᠡᠯᠡᠭ ᠢ᠋ᠶ᠋ᠡᠷ ᠪᠣᠯᠲᠤᠭᠠᠢ !
ᠬᠡᠮᠡᠭᠡᠳ ᠠᠯᠲᠠᠨ ᠴᠥᠬᠥᠴᠡᠲᠦ ᠠᠷᠠᠵᠠ ᠳᠡᠷᠡᠰᠦᠨᠡ ᠠᠮᠠ ᠭᠦᠷᠦᠨ ᠠᠮᠰᠠᠨ ᠵᠣᠭᠣᠭᠯᠠᠭᠰᠠᠨ ᠳ᠋ᠤᠷ ᠠᠯᠢᠪᠠ ᠲᠦᠰᠢᠮᠡᠳ ᠪᠦᠬᠦᠨ ᠦ᠌ ᠠᠯᠠᠭᠠᠨᠠ ᠪᠦᠬᠦᠢ ᠬᠡᠰᠢᠭ ᠰᠠᠷᠬᠤᠳ ᠢ᠋ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢᠨ ᠠᠶᠠ ᠶ᠋ᠢ ᠳ᠋ᠡᠭᠡᠨ ᠴᠥᠮ ᠠᠮᠰᠠᠨ ᠬᠦᠷᠲᠡᠯᠴᠡᠭᠡᠳ ᠬᠡᠰᠢᠭ ᠲᠣᠷ ᠮᠥᠷᠭᠥᠵᠦ ᠪᠣᠰᠴᠤ ᠵᠣᠭᠰᠣᠯᠴᠠᠲᠠᠯᠠ ᠲᠣᠭᠣᠷᠠ ᠶ᠋ᠢᠨ ᠶᠣᠰᠣᠯᠠᠯ ᠤ᠋ᠨ ᠬᠣᠣᠰ ᠬᠤᠨᠳᠠᠭᠠ ᠶ᠋ᠢᠨ ᠳᠣᠬᠢᠶᠠ ᠲᠠᠯᠪᠢᠮᠠᠭᠴᠠ ᠬᠠᠮᠤᠭ ᠪᠦᠭᠦᠳᠡᠭᠡᠷ ᠰᠡᠯᠭᠦᠯᠳᠦᠵᠦ᠂ ᠡᠵᠡᠨ ᠲᠦᠷᠦᠭᠦᠯᠡᠨ ᠰᠠᠢᠳ ᠪᠦᠭᠦᠳᠡᠭᠡᠷ ᠦ᠋ᠨ ᠬᠤᠨᠳᠠᠭᠠ ᠶ᠋ᠢ ᠴᠥᠮ ᠬᠤᠷᠢᠶᠠᠭᠠᠳ ᠬᠥᠭᠵᠢᠮ ᠡᠭᠦᠰᠬᠡᠵᠦ᠂ ᠲᠡᠭᠦᠰ ᠬᠤᠨᠳᠠᠭᠠ ᠶ᠋ᠢᠨ ᠬᠣᠣᠰ ᠲᠡᠭᠦᠰ ᠦ᠋ᠨ ᠬᠤᠷᠢᠮ ᠤ᠋ᠨ ᠰᠢᠷᠡᠭᠡ ᠶ᠋ᠢ ᠬᠣᠶᠠᠷ ᠨᠡᠮᠡᠨ ᠲᠡᠭᠰᠢᠯᠡᠵᠦ᠂ ᠬᠣᠣᠰ ᠬᠤᠨᠳᠠᠭᠠᠲᠤ ᠬᠣᠶᠠᠷ ᠬᠣᠣᠰ ᠰᠠᠷᠬᠤᠳ ᠤ᠋ᠨ ᠰᠢᠷᠡᠭᠡ ᠶ᠋ᠢ ᠰᠢᠨᠡ ᠪᠡᠷ ᠬᠣᠶᠠᠷ ᠬᠣᠣᠰ ᠳᠠᠮᠨᠠᠨ ᠢᠷᠡᠵᠦ ᠵᠢᠭᠰᠠᠭᠠᠭᠠᠳ ᠬᠣᠶᠠᠷ ᠬᠣᠣᠰ᠂ ᠳᠥᠷᠪᠡᠨ ᠶᠡᠬᠡ ᠰᠠᠢᠳ - ᠮᠤᠬᠤᠯᠠᠢ᠂ ᠪᠤᠭᠤᠷᠵᠢ᠂ ᠴᠢᠯᠠᠭᠤᠨ᠂ ᠠᠵᠢᠨᠠᠢ᠂ ᠭᠤᠷᠪᠠᠨ ᠬᠦᠯᠦᠭ ᠨᠣᠶᠠᠨ᠂ ᠨᠢᠭᠡᠨ ᠤᠷᠤᠭ ᠨᠣᠶᠠᠨ᠂ ᠳᠥᠷᠪᠡᠭᠦᠯᠡ ᠬᠣᠶᠠᠷ ᠬᠣᠣᠰ ᠠᠯᠲᠠᠨ ᠬᠠᠰ ᠤ᠋ᠨ ᠴᠥᠬᠥᠴᠡᠲᠦ ᠠᠷᠠᠵᠠ ᠬᠣᠣᠷᠠᠵᠠ ᠶ᠋ᠢ ᠤᠷᠢᠳᠤ ᠶ᠋ᠢᠨ ᠬᠠᠤᠯᠢ ᠳᠦᠷᠢᠮ ᠦ᠋ᠨ ᠦᠶᠡᠰ ᠭᠡᠰᠢᠭᠦᠨ ᠦ᠌ ᠶᠣᠰᠣᠭᠠᠷ ᠬᠣᠣᠰ ᠬᠣᠣᠰ ᠢ᠋ᠶ᠋ᠠᠷ ᠬᠣᠣᠰᠯᠠᠨ ᠪᠠᠷᠢᠭᠠᠳ᠂ ᠤᠭ ᠶᠣᠰᠣᠭᠠᠷ ᠠᠵᠢᠨ ᠠᠵᠢᠨ ᠴᠡᠴᠡᠷᠬᠢᠯᠡᠨ ᠴᠡᠴᠡᠷᠬᠢᠯᠡᠨ᠂ ᠰᠠᠮ ᠰᠠᠮ ᠤᠬᠤᠷᠢᠯᠴᠠᠨ ᠪᠠᠭᠤᠯᠴᠠᠨ ᠡᠴᠢᠯᠴᠡᠵᠦ ᠣᠷᠣᠨ ᠣᠷᠣᠨ ᠳ᠋ᠠᠭᠠᠨ ᠰᠥᠭᠦᠳᠦᠯᠴᠡᠭᠰᠡᠨ ᠠᠪᠠᠰᠤ ᠬᠠᠪᠲᠠᠭᠠᠢᠯᠠᠯ ᠲᠠᠮᠰᠢᠶᠠᠯᠭᠠ ᠶ᠋ᠢᠨ ᠳᠣᠬᠢᠶᠠ ᠨᠢᠭᠡᠨᠲᠡ ᠳᠠᠭᠤᠷᠢᠰᠴᠤ ᠢᠪ ᠴᠢᠪ ᠴᠢᠮᠡᠭᠡ ᠦᠭᠡᠢ ᠪᠣᠯᠵᠤ ᠶᠡᠬᠡ ᠵᠠᠩᠵᠤᠨ ᠪᠤᠭᠤᠷᠵᠢ᠂ ᠪᠣᠷᠣ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠵᠤ᠂ ᠪᠣᠯᠭᠣᠮᠵᠢᠯᠠᠨ ᠬᠢᠴᠢᠶᠡᠭᠰᠡᠨ ᠥᠨᠳᠥᠷ ᠬᠦᠩᠬᠢᠨᠡᠮᠡ ᠠᠶᠠᠯᠭᠤ ᠪᠠᠷ ᠡᠢᠨ ᠭᠡᠮᠡᠨ ᠮᠥᠷᠭᠥᠵᠦ ᠪᠡᠯᠡᠭᠯᠡᠨ ᠥᠴᠢᠷᠦᠨ :
ᠡᠷᠬᠡᠲᠦ ᠳᠡᠭᠡᠳᠦ ᠲᠡᠭᠷᠢ ᠡᠴᠢᠭᠡ
ᠡᠭᠡᠯᠢᠲᠡᠢ ᠳᠣᠣᠷᠠᠲᠤ ᠭᠠᠵᠠᠷ ᠡᠬᠡ᠂
ᠡᠷᠳᠡᠮᠲᠦ ᠳᠡᠭᠡᠳᠦ ᠡᠵᠡᠨ ᠪᠣᠭᠳᠠ ᠶ᠋ᠢ
ᠡᠨᠡᠬᠦ ᠣᠷᠴᠢᠯᠠᠩ ᠳ᠋ᠤᠷ ᠪᠠᠭᠤᠯᠭᠠᠨ ᠲᠥᠷᠥᠭᠦᠯᠵᠦ᠂
ᠡᠷᠬᠡᠲᠡᠨ ᠬᠦᠴᠦᠲᠡᠨ ᠡᠪᠳᠡᠷᠡᠨ ᠰᠠᠮᠠᠭᠤᠷᠠᠵᠤ
ᠡᠯᠡ ᠠᠮᠢᠲᠠᠨ ᠤ᠋ᠳ ᠢ᠋ ᠡᠩᠰᠡᠯᠭᠡᠨ ᠳᠡᠩᠰᠡᠯᠭᠡᠬᠦ ᠶ᠋ᠢ
ᠡᠷᠬᠡ ᠪᠡᠷ ᠳᠠᠷᠤᠨ ᠡᠯᠰᠡᠨ ᠳᠠᠭᠠᠭᠤᠯᠤᠨ
ᠡᠷᠬᠡ ᠳ᠋ᠡᠭᠡᠨ ᠬᠣᠷᠢᠶᠠᠨ ᠡᠵᠡᠯᠡᠨ ᠡᠩᠬᠡᠵᠢᠭᠦᠯᠬᠦᠶᠡ᠂
ᠡᠰᠡᠨ ᠪᠣᠰᠤᠨ ᠡᠯᠳᠡᠪ ᠬᠠᠳ ᠢ᠋ ᠡᠢᠨᠡᠨ ᠲᠠᠢ᠍ᠢᠨᠠᠨ ᠡᠪᠰᠡᠨ ᠲᠦᠪᠰᠢᠳᠬᠡᠵᠦ᠂
ᠡᠷᠭᠢᠵᠦ ᠲᠣᠭᠣᠷᠢᠨ ᠡᠩᠭᠡᠷ ᠨᠡᠢᠲᠡ ᠶ᠋ᠢ ᠡᠪᠬᠡᠨ ᠬᠣᠷᠢᠶᠠᠨ ᠡᠶᠡᠳᠡᠭᠦᠯᠬᠦᠢ ᠳ᠋ᠦ᠍ᠷ
ᠡᠵᠡᠨ ᠦ᠌ ᠮᠡᠨᠳᠦᠯᠡᠭᠰᠡᠨ
ᠡᠨᠡ ᠰᠠᠷᠠ᠂ ᠡᠨᠡ ᠡᠳᠦᠷ ᠢᠨᠦ
ᠡᠢᠮᠦ ᠪᠠᠯᠭᠠᠰᠤᠨ ᠳ᠋ᠤᠷ ᠲᠣᠬᠢᠶᠠᠯᠳᠤᠵᠤ
ᠡᠩᠬᠡᠵᠢᠭᠦᠨ ᠪᠦᠭᠦᠳᠡᠭᠡᠷ
ᠡᠷᠳᠡᠨᠢ ᠶ᠋ᠢᠨ ᠲᠡᠭᠦᠰ ᠬᠣᠣᠰ ᠬᠣᠣᠷᠠᠵᠠ ᠪᠠᠨ ᠡᠷᠭᠦᠨ ᠡᠷᠭᠡᠯᠵᠡᠬᠦ ᠢᠨᠦ᠂
ᠡᠷᠬᠢᠮ ᠥᠨᠳᠥᠷ ᠡᠰᠡᠷᠸᠠ ᠶ᠋ᠢᠨ ᠢᠵᠠᠭᠤᠷᠲᠤ ᠶ᠋ᠢᠨ ᠡᠷᠬᠡᠲᠡᠨ ᠴᠣᠭᠴᠠ ᠡᠭᠦᠷᠢ ᠪᠠᠲᠤᠳᠠᠭᠠᠳ᠂
ᠡᠮᠦᠨᠡ ᠤᠮᠠᠷᠠ ᠶ᠋ᠢᠨ ᠡᠯᠡ ᠤᠯᠤᠰ ᠤ᠋ᠳ ᠡᠩᠭᠡᠷ ᠬᠣᠷᠮᠣᠢ ᠳ᠋ᠤᠷ ᠣᠷᠣᠯᠴᠠᠨ ᠳᠠᠭᠠᠭᠠᠳ᠂
ᠡᠭᠦᠷᠢ ᠤᠷᠲᠤᠳᠠ ᠡᠩᠬᠡ ᠲᠦᠪᠰᠢᠨ ᠡᠶᠡᠯᠰᠡᠭ ᠨᠠᠢᠷᠠᠮᠳᠠᠭᠤ ᠪᠠᠷ ᠵᠢᠷᠭᠠᠯᠳᠤᠵᠤ᠂
ᠡᠭᠦᠨᠴᠡ ᠡᠬᠢᠯᠡᠨ ᠡᠵᠡᠨ ᠦ᠌ ᠤᠭᠰᠠᠭᠠ ᠡᠮᠦᠨᠡᠲᠦ ᠳᠠᠯᠠᠢ ᠶ᠋ᠢ ᠳᠠᠪᠠᠲᠠᠯᠠ ᠡᠵᠡᠯᠡᠲᠦᠭᠡᠢ᠃
ᠭᠡᠮᠡᠨ ᠪᠡᠯᠡᠭᠯᠡᠨ ᠲᠡᠭᠦᠰᠴᠦ᠂ ᠪᠦᠭᠦᠳᠡᠭᠡᠷ ᠬᠣᠶᠠᠷ ᠵᠡᠷᠭᠡ ᠰᠥᠭᠥᠳᠴᠦ᠂ ᠵᠢᠷᠭᠤᠭᠠᠨ ᠵᠡᠷᠭᠡ ᠬᠣᠣᠰᠯᠠᠨ ᠮᠥᠷᠭᠥᠬᠦᠶᠡ ᠡᠵᠡᠨ ᠲᠠᠢᠽᠦ᠂ ᠡᠷᠳᠡᠨᠢ ᠶ᠋ᠢᠨ ᠪᠣᠯᠣᠷ ᠤ᠋ᠨ ᠨᠠᠢ᠍ᠮᠠᠨ ᠬᠤᠨᠳᠠᠭᠠᠲᠤ ᠰᠠᠷᠬᠤᠳ ᠢ᠋ ᠮᠥᠨ ᠬᠦ᠌ ᠳᠥᠷᠪᠡᠨ ᠰᠠᠢᠳ ᠲᠤᠷ ᠬᠣᠣᠰ ᠬᠣᠣᠰ ᠢ᠋ᠶ᠋ᠠᠷ ᠬᠣᠣᠰᠯᠠᠵᠤ ᠮᠣᠳᠣᠷ ᠢ᠋ᠶ᠋ᠠᠷ ᠬᠠᠷᠢᠭᠤ ᠬᠠᠢᠷᠠᠯᠠᠬᠤᠶᠠ ᠂ ᠬᠠᠷᠰᠢ ᠶ᠋ᠢᠨ ᠰᠠᠢᠳ ᠤ᠋ᠨ ᠬᠠᠮᠤᠭ ᠲᠦᠰᠢᠮᠡᠳ ᠪᠦᠬᠦᠨ ᠴᠥᠮ ᠢ᠋ᠶ᠋ᠡᠷ ᠬᠣᠣᠰ ᠬᠤᠨᠳᠠᠭᠠ ᠶ᠋ᠢᠨ ᠬᠡᠰᠢᠭ ᠰᠠᠷᠬᠤᠳ ᠢ᠋ ᠪᠠᠷᠢᠨ ᠬᠣᠢᠰᠢ ᠬᠠᠨᠳᠤᠨ ᠬᠡᠰᠢᠭ ᠲᠣᠷ ᠮᠥᠷᠭᠥᠭᠡᠳ ᠰᠥᠭᠥᠳᠴᠦ ᠬᠦᠯᠢᠶᠡᠬᠦᠶᠡ ᠡᠵᠡᠨ ᠪᠣᠭᠳᠠ ᠪᠠᠷ ᠡᠷᠳᠡᠨᠢ ᠶ᠋ᠢᠨ ᠴᠥᠭᠥᠴᠡ ᠪᠡᠨ ᠡᠷᠭᠦᠨ ᠠᠮᠰᠠᠨ ᠵᠣᠭᠣᠭᠯᠠᠵᠤ ᠂ ᠥᠨᠳᠥᠷ ᠡᠷᠭᠦᠨ ᠮᠦᠰᠢᠶᠡᠵᠦ ᠂ ᠬᠠᠷᠢᠭᠤ ᠡᠢᠨ ᠭᠡᠮᠡᠨ ᠪᠡᠶᠡᠰᠦᠨ ᠪᠡᠯᠡᠭᠯᠡᠷᠦᠨ᠄
ᠡᠴᠢᠭᠡ ᠲᠡᠭᠷᠢ ᠡᠷᠭᠢᠨ ᠴᠢᠩ ᠲᠠᠨ ᠢ᠋
ᠡᠷᠭᠦᠨ ᠲᠡᠳᠭᠦᠯᠡᠷᠡ ᠥᠭᠴᠦ ᠲᠥᠷᠥᠭᠦᠯᠦᠭᠰᠡᠨ ᠢ᠋ᠶ᠋ᠡᠷ
ᠡᠭᠡᠯ ᠨᠠᠮᠠᠶ᠋ᠢ ᠡᠵᠡᠨ ᠪᠣᠯᠭᠠᠨ ᠡᠯᠡ ᠵᠦᠭ ᠦ᠋ᠳ ᠢ᠋
ᠡᠶᠡᠪᠡᠷ ᠪᠣᠯᠭᠠᠯᠴᠠᠨ ᠡᠪᠰᠡᠨ ᠬᠠᠪᠰᠤᠷᠬᠤᠶᠠ᠂
ᠡᠨᠡ ᠡᠳᠦᠷ ᠦ᠋ᠨ ᠡᠨᠡ ᠬᠦ᠌ ᠬᠣᠣᠰᠯᠠᠭᠰᠠᠨ
ᠡᠢᠮᠦ ᠲᠡᠭᠦᠰ ᠪᠡᠯᠡᠭᠯᠡᠭᠰᠡᠨ ᠪᠡᠯᠡᠭ ᠦ᠋ᠨ
ᠠᠶᠠ ᠪᠠᠷ ᠪᠢᠳᠡ᠂
ᠡᠯᠢᠭᠡ ᠵᠢᠷᠦᠬᠡ ᠡᠴᠡᠭᠡᠨ ᠡᠶᠡᠲᠡᠢ ᠡᠪ ᠲᠡᠢ
ᠡᠭᠦᠷᠢ ᠤᠷᠲᠤᠳᠠ ᠡᠵᠡᠨ ᠲᠡᠢ
ᠰᠠᠢᠳ ᠲᠠᠢ ᠪᠣᠯᠤᠶᠠ ᠪᠢᠳᠡ᠃
ᠭᠡᠮᠡᠨ ᠢᠷᠥᠭᠡᠨ ᠪᠡᠯᠡᠭᠯᠡᠭᠡᠳ ᠡᠷᠳᠡᠨᠢᠰ ᠦ᠋ᠨ ᠴᠥᠭᠥᠴᠡ ᠶ᠋ᠢ ᠬᠣᠶᠠᠷ ᠵᠡᠷᠭᠡ ᠪᠠᠷᠠᠲᠠᠯᠠ ᠵᠣᠭᠣᠭᠯᠠᠭᠰᠠᠨᠠ ᠡᠷᠭᠢᠨ ᠳᠥᠷᠪᠡᠨ ᠰᠠᠢᠳ ᠲᠡᠷᠢᠭᠦᠯᠡᠨ᠂ ᠡᠩᠭᠡᠷ ᠨᠡᠢᠲᠡ ᠲᠥᠷᠥ ᠶ᠋ᠢᠨ ᠲᠦᠰᠢᠮᠡᠳ ᠪᠦᠭᠦᠳᠡᠭᠡᠷ ᠬᠣᠣᠰ ᠬᠤᠨᠳᠠᠭᠠ ᠪᠠᠨ ᠬᠣᠭᠣᠰᠣᠷᠠᠲᠠᠯᠠ ᠬᠦᠷᠲᠡᠯᠴᠡᠨ᠂ ᠲᠡᠭᠦᠰ ᠬᠤᠨᠳᠠᠭᠠ ᠪᠠᠨ ᠲᠡᠭᠦᠰᠲᠡᠯᠡ ᠨᠠᠢᠷᠠᠭᠠᠳ ᠲᠦᠴᠢᠭᠢᠨᠡᠲᠡᠯᠡ ᠮᠥᠷᠭᠥᠯᠴᠡᠵᠦ ᠰᠠᠶᠢ ᠪᠣᠰᠴᠤ᠂ ᠳᠣᠬᠢᠶᠠ ᠲᠡᠮᠳᠡᠭ ᠬᠥᠳᠡᠯᠵᠦ ᠬᠥᠭᠵᠢᠮ ᠡᠬᠢᠯᠡᠭᠡᠳ᠂ ᠵᠠᠭᠤᠨ ᠲᠦᠰᠢᠮᠡᠳ ᠭᠤᠷᠪᠠᠨ ᠵᠡᠷᠭᠡ ᠰᠥᠭᠥᠳᠴᠦ ᠶᠢᠰᠦᠨ ᠵᠡᠷᠭᠡ ᠮᠥᠷᠭᠥᠵᠦ᠂ ᠥᠯᠵᠡᠢᠲᠦ ᠥᠷᠯᠥᠭᠡ ᠶ᠋ᠢᠨ ᠪᠠᠶᠠᠰᠬᠤᠯᠠᠩ ᠤ᠋ᠨ ᠶᠣᠰᠣᠯᠠᠯ ᠢ᠋ ᠭᠦᠢᠴᠡᠳᠬᠡᠵᠦ ᠳᠡᠰ ᠳᠠᠷᠠᠭᠠᠯᠠᠨ ᠬᠡᠰᠢᠭ ᠬᠤᠷᠢᠮ ᠳ᠋ᠤᠷ ᠰᠠᠭᠤᠯᠴᠠᠪᠠ᠃
ᠡᠷᠲᠡᠨ ᠦ᠌ ᠬᠠᠭᠤᠴᠢᠨ《ᠬᠥᠬᠡ ᠰᠤᠳᠤᠷ 》ᠡᠨᠡ ᠥᠷᠯᠥᠭᠡ ᠶ᠋ᠢᠨ ᠡᠨᠡ ᠬᠤᠷᠢᠮ ᠤ᠋ᠨ ᠪᠡᠯᠡᠭ ᠢ᠋ ᠡᠵᠡᠨ ᠦ᠌ ᠰᠢᠩᠬᠤᠲᠤ ᠡᠷᠳᠡᠨᠢ ᠶ᠋ᠢᠨ ᠰᠠᠮᠪᠠᠷᠠ ᠳ᠋ᠤᠷ ᠤᠢᠯᠠᠨ ᠪᠢᠴᠢᠭᠦᠯᠵᠦ᠂ ᠡᠢᠮᠦ ᠭᠤᠷᠪᠠᠨ ᠪᠡᠯᠡᠭ ᠭᠡᠮᠡᠨ ᠲᠡᠮᠳᠡᠭᠯᠡᠵᠦᠬᠦᠢ᠃ ᠠᠯᠢ ᠭᠤᠷᠪᠠ ᠬᠡᠮᠡᠪᠡᠰᠦ᠂ ᠡᠩ ᠡᠷᠲᠡᠨ ᠡᠵᠡᠨ ᠪᠣᠭᠳᠠ ᠶ᠋ᠢ ᠮᠡᠨᠳᠦᠯᠡᠭᠰᠡᠨᠡ ᠥᠭᠡᠯᠦᠨ ᠦᠵᠢᠨ ᠦ᠌ ᠦᠵᠡᠮᠡᠭᠴᠡ ᠢᠷᠥᠭᠡᠨ ᠪᠡᠯᠡᠭᠯᠡᠭᠰᠡᠨ ᠨᠢᠭᠡ᠃ ᠪᠡᠵᠣᠨᠠᠢ ᠮᠥᠷᠡᠨᠡ ᠬᠣᠷᠢᠮᠯᠬᠤᠶᠠ ᠡᠵᠡᠨ ᠴᠢᠬᠢᠲᠡᠢ ᠶ᠋ᠢᠨ ᠮᠢᠬᠠ᠂ ᠪᠤᠯᠠᠩᠭᠢᠷ ᠤᠰᠤᠨ ᠵᠣᠭᠣᠭᠯᠠᠵᠤ᠂ ᠲᠡᠭᠷᠢ ᠳ᠋ᠦ᠍ᠷ ᠵᠠᠯᠪᠠᠷᠢᠨ ᠠᠮᠠ ᠠᠯᠲᠠᠨ ᠪᠡᠯᠡᠭᠯᠡᠭᠰᠡᠨ ᠬᠣᠶᠠᠷ᠃ ᠡᠨᠡ ᠡᠳᠦᠷ ᠵᠢᠷᠯᠤᠭ ᠬᠣᠲᠠ ᠳ᠋ᠤᠷ ᠵᠢᠷᠭᠠᠯᠠᠩᠲᠤ ᠥᠯᠵᠡᠢᠲᠦ ᠥᠷᠯᠥᠭᠡ ᠶ᠋ᠢᠨ ᠬᠣᠣᠰ ᠲᠡᠭᠦᠰ ᠦ᠋ᠨ ᠬᠤᠷᠢᠮ ᠳ᠋ᠤᠷ ᠮᠦᠰᠢᠶᠡᠨ ᠪᠡᠶᠡᠰᠴᠦ ᠠᠮᠠ ᠠᠯᠲᠠᠨ ᠢᠨᠢᠶᠡᠨ ᠪᠡᠯᠡᠭᠯᠡᠭᠰᠡᠨ ᠡᠨᠡ ᠭᠤᠷᠪᠠᠨ ᠤ᠋ ᠦᠨᠡᠨ ᠦᠭᠡᠰ ᠪᠦᠲᠦᠭᠰᠡᠨ ᠢ᠋ᠶ᠋ᠡᠷ ᠡᠳᠦᠭᠡ ᠳᠣᠯᠣᠭᠠᠨ ᠵᠠᠭᠤᠨ ᠢᠯᠡᠭᠦᠦ ᠣᠨ ᠵᠢᠯ ᠪᠣᠯᠲᠠᠯᠠ ᠠᠷᠤ ᠥᠪᠥᠷ ᠲᠦᠮᠡᠨ ᠪᠠᠷᠠ ᠶ᠋ᠢᠨ ᠳᠣᠲᠣᠷᠠ ᠡᠳᠦᠭᠡ ᠡᠳᠦᠷ ᠪᠣᠯᠤᠨ ᠪᠣᠯᠲᠠᠯᠠ᠂ ᠬᠣᠰᠢᠭᠤ ᠪᠦᠷᠢ ᠴᠢᠭᠤᠯᠭᠠᠨ ᠪᠦᠬᠦᠨᠡ᠂ ᠬᠠᠨ᠂ ᠴᠢᠨ ᠸᠠᠩ᠂ ᠵᠢᠶᠦ᠋ᠨ ᠸᠠᠩ ᠂ ᠪᠡᠢᠯᠡ ᠂ ᠪᠡᠢᠰᠡ ᠂ ᠬᠦᠩ ᠂ ᠲᠠᠢᠵᠢ ᠂ ᠲᠠᠪᠤᠨᠠᠩ ᠨᠣᠶᠠᠳ ᠡᠵᠡᠳ ᠲᠣᠷ ᠬᠦᠷᠲᠡᠯᠡ᠂ ᠲᠦᠰᠢᠮᠡᠯ ᠲᠦᠰᠢᠶᠡ᠂ ᠲᠦᠰᠢᠮᠡᠰ ᠵᠢᠩᠰᠠᠲᠠᠨ᠂ ᠠᠷᠠᠳ ᠠᠯᠪᠠᠲᠤ ᠬᠠᠷᠢᠶᠠᠲᠤ ᠬᠠᠮᠵᠢᠯᠭᠠ ᠲᠠᠢ ᠶᠠᠪᠤᠵᠤ᠂ ᠠᠯᠢᠪᠠ ᠲᠥᠷᠥ ᠶ᠋ᠢᠨ ᠦᠭᠡᠰ ᠪᠦᠬᠦᠨᠡ᠂ ᠨᠣᠶᠠᠳ ᠲᠦᠰᠢᠮᠡᠳ ᠬᠡᠮᠡᠬᠦ ᠦᠭᠡᠰ ᠢ᠋ ᠲᠡᠷᠰ ᠲᠦᠰᠢᠮᠡᠳ ᠪᠣᠯᠪᠠᠴᠤ ᠠᠷᠢᠯᠭᠠᠨ ᠤᠭᠠᠵᠤ ᠦᠯᠦ ᠴᠢᠳᠠᠬᠤ ᠪᠠ ᠵᠢᠴᠢ ᠳᠣᠷᠣᠭᠰᠢ ᠠᠷᠠᠳ ᠠᠯᠪᠠᠲᠤ ᠳ᠋ᠤᠷ ᠪᠣᠯᠪᠠᠴᠤ ᠬᠡᠷᠬᠢᠨ ᠵᠠᠷᠤᠴᠠ᠂ ᠬᠢᠲᠠᠳ ᠪᠣᠭᠣᠯ ᠪᠠᠢᠰᠠᠩ ᠬᠡᠷᠬᠡᠳ ᠭᠡᠮᠡᠨ ᠪᠠᠢᠬᠤ ᠠᠨᠤ ᠲᠡᠷᠡ ᠦᠶᠡ ᠶ᠋ᠢᠨ ᠳᠡᠭᠷᠢᠯᠢᠭ ᠪᠣᠭᠳᠠ ᠲᠡᠮᠦᠵᠢᠨ ᠡᠵᠡᠨ᠂ ᠲᠡᠢᠨᠬᠦ ᠪᠡᠶᠡᠰᠦᠨ ᠢᠷᠥᠭᠡᠨ ᠪᠡᠯᠡᠭᠯᠡᠵᠦ ᠠᠯᠲᠠᠨ ᠠᠮᠠ ᠠᠯᠳᠠᠭᠰᠠᠨ ᠠ᠋ᠴᠠ ᠪᠣᠯᠪᠠ ᠭᠡᠮᠡᠨ ᠰᠢᠩᠬᠤᠲᠤ ᠪᠢᠷᠲᠤ ᠰᠠᠨᠠᠩ ᠰᠡᠴᠡᠨ ᠴᠣᠬᠣᠯᠠᠨ ᠲᠡᠮᠳᠡᠭᠯᠡᠵᠦᠬᠦᠢ᠃ ᠡᠳᠦᠭᠡ ᠮᠣᠩᠭᠣᠯ ᠤ᠋ᠨ ᠵᠠᠰᠠᠭ᠂ ᠬᠣᠰᠢᠭᠤ ᠳ᠋ᠤᠷ ᠡᠷᠬᠡ ᠬᠡᠲᠦᠷᠡᠨ ᠡᠵᠡᠨ ᠢ᠋ᠶ᠋ᠡᠨ ᠳᠠᠷᠤᠯᠠᠭᠴᠢ ᠡᠵᠡᠲᠦᠭᠴᠢ ᠲᠦᠰᠢᠮᠡᠳ ᠬᠠᠶᠠ ᠪᠣᠢ ᠪᠣᠯᠪᠠᠴᠤ᠂ ᠡᠭᠡᠨᠡᠭᠲᠡ ᠤᠳᠠᠭᠠᠨ ᠤᠷᠲᠤ ᠡᠵᠡᠲᠦᠨ ᠦᠯᠦ ᠴᠢᠳᠠᠬᠤ ᠪᠠ ᠨᠣᠶᠠᠨ ᠬᠡᠮᠡᠬᠦ ᠦᠰᠦᠭ ᠢ᠋ ᠦᠭᠡᠢ ᠪᠣᠯᠭᠠᠵᠤ ᠲᠠᠰᠤᠯᠵᠤ ᠦᠯᠦ ᠴᠢᠳᠠᠬᠤ ᠠᠨᠤ ᠡᠭᠦᠨᠴᠡ ᠪᠣᠯᠪᠠ ᠬᠡᠮᠡᠬᠦ ᠪᠤᠶᠤ᠃ ᠡᠳᠦᠭᠡ ᠨᠢᠳᠦᠨ ᠦᠵᠡᠲᠡᠯᠡ᠂ ᠡᠮᠦᠨᠡ ᠭᠠᠵᠠᠷ ᠲᠤᠷ ᠵᠠᠭᠤᠨ ᠲᠦᠮᠡᠨ ᠢ᠋ ᠳᠤᠷᠠ ᠪᠠᠷ ᠡᠵᠡᠯᠡᠨ ᠵᠠᠬᠢᠷᠬᠤ ᠽᠥᠩᠳᠦ᠋᠂ ᠵᠢᠶᠦ᠋ᠨ ᠹᠦ ᠂ ᠳᠦ ᠂ ᠹᠦ ᠂ ᠲᠡᠢ ᠂ ᠵᠸᠨ ᠦ᠌ ᠵᠡᠷᠭᠡ ᠶ᠋ᠢᠨ ᠶᠡᠬᠡ ᠡᠷᠬᠡ ᠰᠠᠭᠤᠷᠢᠲᠤ ᠬᠢᠲᠠᠳ ᠲᠦᠰᠢᠮᠡᠯ ᠣᠯᠠᠨᠲᠠ ᠪᠣᠢ ᠪᠥᠭᠡᠳ ᠠᠯᠢ ᠨᠢᠭᠡᠨ ᠢᠨᠦ᠂ ᠲᠡᠭᠦᠨᠦ ᠲᠤᠰ ᠬᠠᠷᠢᠶᠠᠲᠤ ᠠᠯᠪᠠᠲᠤ ᠲᠠᠢ ᠭᠡᠮᠡᠨ ᠪᠠᠢᠬᠤ ᠶ᠋ᠢ ᠣᠯᠵᠤ ᠰᠣᠨᠣᠰᠤᠭᠰᠠᠨ ᠭᠠᠵᠠᠷ ᠪᠣᠢ ᠠᠮᠤᠢ ᠤᠤ ? ᠡᠳᠦᠭᠡ ᠡᠮᠦᠨᠡ ᠳ᠋ᠦ᠍ᠷ ᠴᠠᠭᠠᠨ ᠬᠡᠷᠡᠮ᠂ ᠬᠣᠢᠲᠤ ᠳ᠋ᠤᠷ ᠣᠷᠣᠰ ᠤᠯᠤᠰ ᠂ ᠡᠭᠦᠨᠦ ᠵᠠᠪᠰᠠᠷᠠ ᠡᠮᠦᠨᠡ ᠤᠮᠠᠷᠠ ᠪᠠᠷ ᠵᠢᠷᠭᠤᠭᠠ ᠳᠣᠯᠣᠭᠠᠨ ᠮᠢᠩᠭᠠᠨ ᠭᠠᠵᠠᠷ᠂ ᠵᠡᠭᠦᠨᠰᠢ ᠬᠠᠷᠠ ᠮᠥᠷᠡᠨ᠂ ᠪᠠᠷᠠᠭᠤᠨᠰᠢ ᠲᠥᠪᠡᠳ ᠤᠯᠤᠰ ᠤ᠋ᠨ ᠵᠣᠣ ᠂ ᠡᠭᠦᠨᠦ ᠳᠣᠲᠣᠷᠠ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠲᠦᠮᠡᠨ ᠢᠯᠡᠭᠦᠦ ᠭᠠᠵᠠᠷ ᠤ᠋ᠨ ᠤᠷᠲᠤ ᠳ᠋ᠤᠷ ᠣᠷᠣᠰᠢᠬᠤ ᠬᠠᠮᠢ᠂ ᠬᠣᠲᠣᠩ᠂ ᠳᠦᠰᠸ ᠂ ᠬᠥᠬᠡ ᠨᠠᠭᠤᠷ ᠤ᠋ᠨ ᠥᠭᠡᠯᠡᠳ ᠂ ᠵᠢᠴᠢ ᠮᠠᠨ ᠤ᠋ ᠮᠣᠩᠭᠣᠯ ᠤ᠋ᠨ ᠭᠤᠷᠪᠠᠨ ᠵᠠᠭᠤᠨ ᠢᠯᠡᠭᠦᠦ ᠵᠠᠰᠠᠭ ᠬᠣᠰᠢᠭᠤ ᠪᠦᠬᠦᠢ᠂ ᠵᠠᠭᠤᠨ ᠵᠠᠭᠤᠨ ᠲᠦᠮᠡᠨ᠂ ᠠᠯᠪᠠᠲᠤ ᠬᠠᠷᠢᠶᠠᠲᠤ ᠡᠵᠡᠳ ᠨᠣᠶᠠᠳ ᠬᠡᠮᠡᠭᠲᠡᠭᠦᠨ ᠪᠦᠭᠦᠳᠡᠭᠡᠷ ᠢᠨᠤ ᠲᠡᠷᠡ ᠬᠦ᠌ ᠦᠶᠡ ᠶ᠋ᠢᠨ ᠲᠡᠷᠡ ᠴᠠᠭ ᠤ᠋ᠨ ᠲᠡᠢᠨ ᠪᠡᠯᠡᠭᠯᠡᠭᠰᠡᠨ ᠲᠡᠭᠷᠢᠯᠢᠭ ᠡᠵᠡᠨ ᠲᠠᠢᠽᠦ ᠪᠣᠭᠳᠠ ᠶ᠋ᠢ ᠰᠢᠲᠦᠨ ᠰᠦᠰᠦᠭᠯᠡᠨ ᠰᠢᠪᠰᠢᠨ ᠵᠡᠯᠪᠷᠢᠪᠡᠰᠤ ᠵᠣᠬᠢᠨᠠᠮ ᠪᠢᠰᠢᠦ ᠬᠡᠮᠡᠵᠦᠬᠦᠢ᠃
ᠲᠡᠭᠦᠨᠴᠡ ᠡᠵᠡᠨ ᠰᠠᠢᠳ ᠪᠦᠭᠦᠳᠡᠭᠡᠷ ᠶᠡᠬᠡ ᠬᠤᠷᠢᠮ ᠬᠤᠷᠢᠮᠯᠠᠨ ᠰᠠᠭᠤᠬᠤᠶᠠ ᠲᠠᠢᠽᠦ ᠵᠠᠬᠢᠶᠠ ᠪᠠᠭᠤᠯᠭᠠᠨ ᠵᠢᠷᠭᠠᠯᠠᠩᠲᠤ ᠵᠢᠷᠯᠤᠭ ᠬᠣᠲᠠ ᠭᠡᠮᠡᠨ ᠨᠡᠷᠡᠯᠡᠭᠡᠳ᠂ ᠵᠢᠭᠰᠠᠭᠠᠨ ᠵᠣᠭᠰᠣᠭᠰᠠᠨ ᠲᠠᠪᠤᠨ ᠵᠠᠭᠤᠨ ᠳᠠᠯᠠᠨ ᠵᠢᠷᠭᠤᠭᠠᠨ᠂ ᠬᠣᠷᠢᠨ ᠳᠥᠷᠪᠡᠨ ᠬᠣᠷᠢᠶᠠᠨ ᠤ᠋ ᠪᠥᠵᠢᠭ ᠮᠠᠭᠰᠢᠯᠭᠠ ᠶ᠋ᠢᠨ ᠬᠡᠦᠬᠡᠳ ᠲᠡᠭᠦᠳᠡᠷ᠂ ᠥᠬᠢᠳ ᠬᠥᠪᠡᠭᠦᠳ ᠦ᠋ᠨ ᠬᠥᠭᠵᠢᠮᠴᠢ ᠶ᠋ᠢ ᠵᠢᠭᠠᠯᠬᠢᠯᠠᠨ ᠠᠰᠠᠭᠤᠷᠤᠨ᠄
《ᠡᠳᠡᠭᠡᠷ ᠢ᠋ ᠴᠥᠮ ᠪᠤᠯᠤ ᠢᠦᠢ ᠬᠠᠰ ᠬᠠᠭᠠᠨ ᠤ᠋ ᠭᠠᠭᠴᠠᠭᠠᠷ ᠤ᠋ᠨ ᠡᠭᠦᠰᠬᠡᠯ ᠪᠡᠯᠡᠳᠬᠡᠯ ᠤᠤ ?》 ᠬᠡᠮᠡᠭᠰᠡᠨᠡ ᠵᠢᠨᠦᠩ ᠮᠤᠬᠤᠯᠢ ᠰᠠᠭᠤᠭᠰᠠ᠊ᠨ ᠣᠷᠣᠨ ᠳ᠋ᠠᠭᠠᠨ ᠰᠥᠭᠥᠳᠴᠦ ᠮᠡᠳᠡᠯᠦᠭᠦᠷᠦᠨ:
《ᠡᠳᠡᠭᠡᠷ ᠦ᠋ᠳ ᠦ᠋ᠨ ᠡᠯᠡ ᠵᠠᠩ ᠵᠢᠷᠤᠮ ᠬᠡᠪ ᠲᠥᠯᠥᠪ ᠢᠨᠤ ᠨᠡᠢᠲᠡ ᠪᠡᠷ ᠴᠥᠮ ᠡᠷᠲᠡᠨ ᠦ᠌ ᠬᠠᠭᠤᠴᠢᠨ ᠶᠡᠬᠡ ᠯᠢᠶᠣᠣ ᠤᠯᠤᠰ ᠤ᠋ᠨ ᠡᠵᠡᠳ᠂ ᠶᠧ ᠯᠢᠦᠢ ᠳᠡ ᠱᠢ᠂ ᠶᠧ ᠯᠢᠦᠢ ᠳᠧ ᠭᠤᠸᠠᠩ ᠨᠠᠷ ᠤ᠋ᠨ ᠵᠡᠭᠦᠨ ᠾᠦᠨ ᠲᠦᠩ ᠵᠢᠶᠠᠩ ᠮᠥᠷᠡᠨᠡ ᠵᠢᠭᠠᠰᠤ ᠭᠥᠷᠥᠭᠡᠯᠡᠬᠦ ᠶᠡᠬᠡ ᠬᠤᠷᠠᠯ ᠴᠢᠭᠤᠯᠭᠠᠨ ᠬᠢᠵᠦ ᠵᠠᠭᠤᠨ ᠪᠠᠭᠠ ᠠᠢᠮᠠᠭ ᠤ᠋ᠳ ᠤ᠋ᠨ ᠡᠵᠡᠳ ᠢ᠋ ᠬᠤᠷᠢᠮᠯᠠᠨ ᠴᠡᠩᠭᠡᠯᠳᠦᠬᠦᠶᠡ᠂ ᠤᠯᠤᠰ ᠤᠯᠤᠰ᠂ ᠠᠢᠮᠠᠭ ᠠᠢᠮᠠᠭ ᠤ᠋ᠨ ᠡᠵᠡᠳ ᠨᠠ᠊ᠷ ᠥᠪᠡᠷ ᠥᠪᠡᠷ ᠦ᠋ᠨ ᠭᠠᠵᠠᠷ ᠣᠷᠣᠨ ᠤ᠋ ᠬᠥᠭᠵᠢᠮ ᠦ᠋ᠨ ᠠᠶᠠᠯᠭᠤ ᠶ᠋ᠢ ᠬᠣᠷᠢᠶᠠᠨ ᠡᠢᠮᠦ ᠣᠯᠠᠨ ᠵᠦᠢᠯ ᠪᠣᠯᠤᠭᠰᠠᠨ ᠢ᠋ ᠬᠣᠵᠢᠮ ᠯᠢᠶᠣᠣ ᠤᠯᠤᠰ ᠳᠠᠬᠢᠨ ᠡᠪᠯᠡᠨ ᠬᠥᠭᠯᠡᠵᠦ᠂ ᠡᠢᠮᠦ ᠬᠣᠷᠢᠨ ᠳᠥᠷᠪᠡᠨ ᠤᠯᠠᠷᠢᠯ ᠤ᠋ᠨ ᠪᠥᠵᠢᠭ ᠭᠡᠮᠡᠨ ᠨᠠᠷᠠᠯᠠᠨ ᠵᠣᠬᠢᠶᠠᠵᠤ᠂ ᠰᠠᠯᠭᠠᠪᠠᠰᠤ ᠬᠣᠷᠢᠨ ᠳᠥᠷᠪᠡᠨ ᠠᠩᠭᠢ ᠬᠣᠷᠢᠨ ᠳᠥᠷᠪᠡᠨ ᠤᠯᠤᠰ ᠤ᠋ᠨ ᠡᠭᠡᠰᠢᠭ ᠪᠣᠯᠤᠭᠠᠳ ᠨᠡᠢᠯᠡᠭᠦᠯᠪᠡᠰᠦ ᠬᠣᠷᠢᠨ ᠳᠥᠷᠪᠡᠨ ᠤᠯᠠᠷᠢᠯ ᠤ᠋ᠨ ᠠᠩᠬᠠ ᠲᠣᠪᠴᠢᠶᠠ ᠬᠠᠪᠤᠷ ᠤ᠋ᠨ ᠠᠭᠤᠷ ᠣᠷᠣᠬᠤ᠂ ᠴᠠᠭᠠᠯᠠᠬᠤ ᠥᠷᠯᠥᠭᠡ ᠳ᠋ᠦ᠍ᠷ ᠣᠷᠣᠯᠠᠨ ᠬᠡᠷᠡᠭᠯᠡᠵᠦᠬᠦᠢ᠃ ᠯᠢᠶᠣᠣ ᠤᠯᠤᠰ ᠤ᠋ᠨ ᠡᠴᠦᠰ ᠦ᠋ᠨ ᠰᠡᠭᠦᠯ ᠢ᠋ ᠨᠠᠢ᠍ᠮᠠᠨ ᠤᠯᠤᠰ ᠬᠤᠷᠢᠶᠠᠭᠰᠠᠨ ᠢ᠋ᠶ᠋ᠠᠷ ᠡᠳᠡᠭᠡᠷ ᠬᠥᠭᠵᠢᠮ ᠦ᠋ᠨ ᠬᠡᠪ ᠬᠠᠤᠯᠢ᠂ ᠰᠠᠪᠠ ᠵᠡᠪᠰᠡᠭ ᠨᠡᠢᠲᠡ ᠪᠡᠷ ᠴᠥᠮ ᠨᠠᠢ᠍ᠮᠠᠨ ᠤᠯᠤᠰ ᠲᠤᠷ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠪᠤᠯᠤ ᠸᠠᠩ᠂ ᠵᠢᠷᠯᠤᠭ ᠬᠣᠲᠠ ᠶ᠋ᠢᠨ ᠴᠡᠷᠢᠭ ᠢᠷᠭᠡᠨ ᠦ᠌ ᠢᠪᠴᠤᠤ ᠵᠤᠵᠠᠭᠠᠨᠠ᠂ ᠬᠠᠪᠤᠷᠰᠢᠬᠤ ᠬᠥᠭᠵᠢᠮ ᠢ᠋ ᠳᠠᠬᠢᠨ ᠰᠡᠯᠪᠢᠨ ᠰᠤᠷᠭᠠᠵᠤ ᠪᠣᠯᠪᠠᠰᠤᠷᠠᠭᠤᠯᠤᠭᠠᠳ ᠳᠡᠮᠡᠢ ᠴᠢᠯᠥᠭᠡ ᠣᠯᠵᠤ ᠴᠡᠩᠭᠡᠯᠳᠦᠨ ᠴᠢᠳᠠᠭᠰᠠᠨ ᠦᠭᠡᠢ ᠪᠡᠷ ᠪᠤᠷᠤᠭᠤᠲᠠᠨ ᠪᠤᠷᠤᠭᠤᠯᠠᠭᠠᠳ ᠪᠤᠶᠠᠨ ᠪᠡᠯᠡᠭᠲᠦ ᠪᠣᠭᠳᠠ ᠲᠡᠭᠷᠢᠯᠢᠭ ᠲᠣᠷ ᠪᠣᠯᠪᠠᠰᠤᠨ ᠪᠣᠯᠭᠠᠨ ᠡᠷᠭᠦᠨ ᠪᠠᠷᠢᠵᠤᠬᠤᠢ 》ᠬᠡᠮᠡᠭᠰᠡᠨ ᠡᠨᠡ ᠨᠢᠭᠡᠨ ᠵᠡᠷᠭᠡ ᠶ᠋ᠢᠨ ᠦᠭᠡᠰ ᠲᠣᠷ ᠡᠩᠭᠡᠷ ᠨᠡᠢᠲᠡ ᠲᠥᠷᠥ ᠶ᠋ᠢᠨ ᠬᠣᠲᠠᠯᠠᠭᠠᠷ ᠴᠥᠮ ᠰᠡᠮᠡᠬᠡᠷ ᠢᠨᠢᠶᠡᠯᠴᠡᠭᠰᠡᠨ ᠢ ᠴᠦ᠍ ᠪᠠᠢᠲᠤᠭᠠᠢ᠂ ᠡᠷᠬᠡᠲᠦ ᠡᠵᠡᠨ ᠲᠠᠢᠽᠦ ᠴᠦ᠍ ᠥᠴᠦᠬᠡᠨ ᠮᠦᠰᠢᠶᠡᠵᠦ᠄
ᠪᠣᠳᠠᠲᠠᠶᠠ ᠳᠡᠭᠷᠢᠯᠢᠭ ᠪᠤᠰᠤ ᠪᠣᠯᠪᠠᠰᠤ
ᠳᠡᠭᠵᠢᠵᠦ ᠦᠯᠦ ᠴᠢᠳᠠᠮᠤᠢ ᠶᠠ᠂
ᠪᠣᠭᠳᠠ ᠲᠥᠷᠥᠯᠬᠢᠲᠡᠨ ᠪᠤᠰᠤ ᠪᠣᠯᠪᠠᠰᠤ
ᠪᠤᠶᠠᠨ ᠦᠯᠦ ᠳᠠᠭᠠᠭᠠᠮᠤᠢ ᠶᠠ!
ᠪᠣᠷᠵᠢᠭᠢᠳ ᠢᠵᠠᠭᠤᠷᠲᠤ ᠪᠢ ᠴᠦ᠍ ᠮᠥᠨ
ᠬᠦᠯᠢᠶᠡᠨ ᠦᠯᠦ ᠬᠦᠴᠦᠷᠡᠮᠦᠢ ᠶᠠ᠃
ᠪᠤᠯᠤ ᠬᠠᠭᠠᠨ ᠤ᠋ ᠪᠤᠷᠤᠭᠤᠳᠴᠤ ᠪᠤᠷᠤᠭᠤᠯᠠᠭᠰᠠᠨ ᠠᠨᠤ
ᠪᠤᠷᠤᠭᠤ ᠦᠭᠡᠢ ᠪᠣᠯᠵᠤᠬᠤᠢ᠃
ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠪᠤᠯᠲᠤ ᠰᠠᠢᠳ ᠤ᠋ᠳ ᠪᠤᠲᠠᠷᠠᠲᠠᠯᠠ ᠢᠨᠢᠶᠡᠯᠴᠡᠨ ᠮᠥᠷᠭᠥᠯᠳᠦᠵᠦ᠂ ᠪᠣᠭᠳᠠ ᠶ᠋ᠢᠨ ᠳᠠᠭᠤᠷᠢᠶᠠᠨᠠ ᠨᠡᠢᠯᠡᠭᠦᠯᠦᠨ ᠪᠤᠭᠤᠷᠵᠢ ᠨᠣᠶᠠᠨ ᠪᠤᠯᠠᠭᠠ ᠶ᠋ᠢᠨ ᠣᠯᠪᠣᠭ ᠲᠠᠭᠠᠨ ᠰᠥᠭᠥᠳᠦᠭᠰᠡᠭᠡᠷ ᠮᠥᠷᠭᠥᠵᠦ ᠡᠷᠢᠨ ᠮᠡᠳᠡᠭᠦᠯᠦᠷᠦᠨ᠄
ᠪᠤᠯᠤ ᠸᠠᠩ ᠤ᠋ᠨ ᠪᠣᠭᠳᠠ ᠲᠥᠷᠥᠯᠬᠢᠲᠡᠨ ᠪᠤᠰᠤ ᠶ᠋ᠢ
ᠪᠣᠭᠣᠯ ᠪᠢ ᠯᠠᠪᠳᠠ ᠣᠯᠵᠤ ᠮᠡᠳᠡᠪᠡ᠂
ᠪᠣᠭᠳᠠ ᠬᠥᠮᠦᠨ ᠦ᠌ ᠬᠥᠭᠵᠢᠮ ᠢ᠋ᠶ᠋ᠡᠷ
ᠪᠣᠰᠤᠨ ᠪᠣᠰᠤᠨ ᠪᠣᠷᠬᠢᠷᠠᠭᠤᠯᠤᠨ ᠵᠢᠷᠭᠠᠨ ᠴᠡᠩᠭᠡᠯᠳᠦᠭᠰᠡᠭᠡᠷ
ᠪᠤᠲᠠᠷᠠᠨ ᠰᠠᠷᠨᠢᠵᠤ ᠪᠤᠷᠤᠭᠤᠲᠠᠨ ᠡᠴᠢᠬᠦᠢ ᠳ᠋ᠡᠭᠡᠨ᠂
ᠪᠣᠳᠠᠲᠠᠶᠠ ᠲᠥᠷᠥᠭᠰᠡᠨ ᠣᠢᠷᠠ ᠪᠠᠨ ᠴᠥᠮ ᠬᠡᠭᠡᠵᠦᠬᠦᠢ᠃
ᠭᠡᠮᠡᠨ ᠪᠣᠰᠴᠤ᠂ ᠬᠠᠷᠰᠢ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠡᠷᠡ ᠡᠮᠡ ᠨᠢᠭᠡᠨ ᠰᠦᠷᠦᠭ ᠬᠥᠮᠦᠨ ᠢ᠋ ᠳᠠᠭᠠᠭᠤᠯᠤᠨ ᠡᠬᠡᠨᠡᠷ ᠦ᠋ᠳ ᠢ᠋ ᠶᠡᠨᠳᠡᠷ ᠦ᠋ᠨ ᠳᠣᠣᠷᠠ ᠦᠯᠡᠳᠡᠭᠡᠵᠦ᠂ ᠡᠷᠡᠮᠳᠡᠭ ᠢ᠋ ᠡᠭᠦᠳᠡᠨ ᠦ᠌ ᠭᠠᠳᠠᠨᠠ ᠰᠥᠭᠥᠳᠬᠡᠵᠦ᠂ ᠨᠢᠭᠡᠨ ᠨᠢᠯᠬᠠ ᠠᠪᠠᠬᠠᠢ ᠶ᠋ᠢ ᠥᠪᠡᠷ ᠢ᠋ᠶ᠋ᠡᠨ ᠬᠥᠲᠥᠯᠦᠨ ᠠᠪᠴᠢᠷᠠᠵᠤ᠂ ᠥᠪᠡᠷᠦᠨ ᠣᠯᠪᠣᠭ ᠤ᠋ᠨ ᠥᠨᠴᠥᠭ ᠲᠣᠷ ᠰᠥᠭᠥᠳᠬᠡᠵᠦ᠂ ᠲᠠᠢᠽᠦ ᠳ᠋ᠦ᠍ᠷ ᠮᠥᠷᠭᠥᠭᠦᠯᠪᠡ᠃
ᠲᠡᠳᠦᠢ ᠲᠠᠢᠽᠦ ᠡᠨᠡ ᠥᠷᠯᠥᠭᠡ ᠶ᠋ᠢᠨ ᠵᠡᠭᠦᠳᠦᠨᠡ ᠳᠥᠷᠪᠡᠨ ᠵᠢᠭᠦᠷᠲᠦ ᠯᠤᠤ ᠶ᠋ᠢᠨ ᠵᠤᠯᠵᠠᠭᠠ ᠣᠯᠪᠠ ᠭᠡᠮᠡᠨ ᠵᠡᠭᠦᠳᠦᠯᠡᠭᠰᠡᠨ ᠢ᠋ᠶ᠋ᠡᠷ ᠡᠳᠦᠭᠡ ᠪᠤᠯᠤ ᠢᠦᠢ ᠬᠠᠰ ᠬᠠᠭᠠᠨ ᠤ᠋ ᠣᠢᠷᠠ ᠦᠷᠡᠰ ᠭᠡᠮᠡᠨ ᠰᠣᠨᠣᠰᠴᠤ᠂ ᠲᠡᠷᠡ ᠦᠬᠢᠨᠡ ᠨᠢᠳᠦ ᠣᠷᠬᠢᠨ ᠠᠢᠯᠠᠳᠤᠨ ᠦᠵᠡᠪᠡᠰᠦ ᠲᠡᠷᠡ ᠪᠢᠴᠢᠬᠠᠨ ᠥᠬᠢᠨ ᠨᠢᠭᠤᠷ ᠳᠦᠭᠦᠷᠡᠩ ᠭᠡᠷᠡᠯ ᠂ ᠨᠢᠳᠦ ᠳᠦᠭᠦᠷᠡᠩ ᠭᠠᠯ᠂ ᠮᠥᠷᠥ ᠳᠦᠭᠦᠷᠡᠩ ᠬᠡᠰᠢᠭ᠂ ᠪᠡᠶᠡ ᠳᠦᠭᠦᠷᠡᠩ ᠡᠷᠬᠢᠮ᠂ ᠨᠠᠰᠤ ᠠᠷᠪᠠᠭᠠᠳ ᠪᠣᠯᠵᠤᠬᠤᠢ᠃ ᠪᠤᠭᠤᠷᠵᠢ ᠡᠭᠦᠨᠦ ᠤᠴᠢᠷ ᠢ᠋ ᠡᠬᠢᠯᠡᠨ ᠮᠡᠳᠡᠭᠦᠯᠬᠦ ᠶ᠋ᠢᠨ ᠲᠠᠰᠢᠷᠠᠮ ᠳ᠋ᠤᠷ ᠡᠨᠡ ᠨᠢᠭᠡᠨ ᠴᠢᠭ ᠢ᠋ ᠡᠬᠢ ᠡᠴᠦᠰ ᠲᠡᠢ ᠪᠦᠷᠢᠳᠬᠡᠨ ᠬᠡᠯᠡᠵᠦ ᠭᠠᠷᠭᠠᠰᠤᠭᠠᠢ᠃
ᠦᠵᠡᠰᠡ ᠡᠨᠡ ᠪᠢᠴᠢᠬᠠᠨ ᠥᠬᠢᠨ᠂ ᠦᠭᠡᠢ ᠪᠣᠯᠤᠭᠰᠠᠨ ᠲᠠᠢᠶᠠᠩ ᠬᠠᠨ ᠤ᠋ ᠬᠠᠮᠤᠭ ᠤ᠋ᠨ ᠪᠠᠭᠠ ᠹᠧᠢ ᠡᠴᠡ ᠲᠥᠷᠥᠭᠰᠡᠨ ᠬᠠᠮᠤᠭ ᠤ᠋ᠨ ᠣᠳᠬᠣᠨ ᠵᠢᠶᠦ᠋ᠨ ᠵᠣ᠌ ᠠᠵᠤᠭᠤ᠃ ᠲᠠᠢᠶᠠᠩ ᠬᠠᠨ ᠤ᠋ ᠪᠠᠭᠠ ᠹᠧᠢ ᠢᠨᠤ ᠪᠤᠯᠤ ᠸᠠᠩ ᠤ᠋ᠨ ᠶᠡᠬᠡ ᠬᠠᠲᠤᠨ ᠤ᠋ - ᠪᠠᠰᠠ ᠬᠦ᠌ ᠪᠠᠭᠠ ᠥᠬᠢᠨ ᠳᠡᠭᠦᠦ ᠪᠤᠯᠬᠤᠢ ᠶ᠋ᠢᠨ ᠲᠤᠯᠠᠳᠠ ᠂ ᠠᠩᠬᠠ ᠤᠳᠠᠭᠠ ᠶ᠋ᠢᠨ ᠨᠠᠢ᠍ᠮᠠᠨ ᠤ᠋ ᠡᠮᠦᠨᠡ ᠪᠠᠯᠭᠠᠰᠤᠨ ᠠᠨᠤ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠠᠪᠲᠠᠬᠤᠢ ᠳ᠋ᠤᠷ ᠡᠨᠡ ᠥᠬᠢᠨ ᠡᠬᠡ ᠯᠦ᠍ᠭᠡ ᠪᠡᠨ ᠪᠤᠯᠤ ᠸᠠᠩ ᠤ᠋ᠨ ᠳᠡᠷᠭᠡᠳᠡ ᠡᠴᠢᠭᠰᠡᠨ ᠠᠵᠤᠭᠤ᠃ ᠳᠠᠷᠠᠭᠠ ᠪᠠᠷ ᠡᠬᠡ ᠢᠨᠦ ᠮᠠᠭᠤ ᠮᠡᠳᠡᠭᠡ ᠶ᠋ᠢ ᠰᠣᠨᠣᠰᠴᠤ ᠡᠪᠡᠳᠴᠢᠨ ᠣᠯᠵᠤ ᠦᠭᠡᠢ ᠪᠣᠯᠤᠭᠰᠠᠨ ᠳ᠋ᠤᠷ ᠠᠪᠠᠭᠠ ᠡᠬᠡ ᠪᠡᠨ ᠳᠠᠭᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠷ ᠡᠳᠦᠭᠡ ᠡᠨᠡ ᠬᠣᠲᠠ ᠪᠠᠰᠠ ᠠᠪᠲᠠᠵᠤ᠂ ᠣᠯᠠᠨ ᠢ᠋ᠶ᠋ᠠᠷ ᠶᠡᠬᠡᠯᠡ ᠰᠠᠮᠠᠭᠤᠷᠠᠯᠴᠠᠨ ᠪᠤᠷᠤᠭᠤᠯᠠᠬᠤᠶᠠ ᠡᠨᠡ ᠥᠬᠢᠨ ᠦ᠌ ᠲᠥᠷᠥᠭᠰᠡᠨ ᠠᠬᠠ ᠠᠯᠲᠠᠨᠱᠠᠭᠠ᠂ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠳᠠᠭᠠᠵᠤ᠂ ᠬᠠᠭᠤᠴᠢᠨ ᠪᠠᠯᠭᠠᠰᠤᠨ ᠢ᠋ᠶ᠋ᠠᠨ ᠣᠯᠵᠤ᠂ ᠪᠠᠰᠠ ᠦᠶᠡᠯᠢᠳ ᠠᠬᠠ ᠴᠢᠦᠢ ᠴᠦ ᠯᠢᠦᠢ᠂ ᠲᠡᠭᠦᠨᠤ ᠡᠴᠢᠭᠡ ᠶ᠋ᠢ ᠨᠢᠭᠤᠴᠠ ᠪᠠᠷ ᠬᠣᠣᠷᠯᠠᠨ ᠠᠯᠠᠵᠤ᠂ ᠥᠪᠡᠷᠦᠨ ᠡᠴᠢᠭᠡ ᠪᠡᠨ ᠪᠤᠯᠤ ᠶ᠋ᠢ ᠬᠠᠨ ᠭᠡᠮᠡᠨ ᠡᠷᠭᠦᠭᠰᠡᠨ ᠢ᠋ ᠤᠳᠠᠭᠠᠨ ᠳ᠋ᠠᠭᠠᠨ ᠴᠥᠮ ᠮᠡᠳᠡᠭᠰᠡᠨ ᠢ᠋ᠶ᠋ᠡᠷ ᠡᠳᠦᠭᠡ ᠡᠨᠡ ᠲᠠᠰᠢᠷᠠᠮ ᠥᠪᠡᠷᠦᠨ ᠬᠠᠷᠢᠶᠠᠲᠠᠶ ᠬᠣᠶᠠᠷ ᠲᠠᠢᠭᠠᠨ᠂ ᠳᠥᠷᠪᠡᠨ ᠡᠷᠭᠦᠯᠳᠦ ᠡᠬᠡᠨᠡᠷ ᠢ᠋ ᠠᠪᠤᠨ᠂ ᠵᠠᠮ ᠤ᠋ᠨ ᠭᠣᠳᠣᠰ ᠲᠤᠷ ᠰᠠᠨᠠᠭᠠᠳᠠᠶᠠ ᠬᠣᠴᠣᠷᠤᠨ ᠬᠣᠵᠢᠭᠳᠠᠵᠤ᠂ ᠡᠮᠦᠨᠡᠲᠦ ᠨᠠᠢ᠌ᠮᠠᠨᠠ ᠡᠴᠢᠰᠦᠭᠡᠢ ᠭᠡᠮᠡᠨ ᠡᠭᠡᠵᠦ ᠶᠠᠪᠤᠬᠤᠶᠠ ᠰᠥᠨᠢ ᠣᠷᠣᠢᠳᠠᠭᠠᠳ ᠲᠥᠭᠡᠷᠢᠵᠦ ᠵᠠᠮ ᠤ᠋ᠨ ᠬᠠᠵᠠᠭᠤᠳᠠ ᠭᠦᠨ ᠡᠪᠡᠰᠦᠨᠡ ᠰᠠᠭᠤᠯᠴᠠᠨ᠂ ᠵᠢᠴᠢ ᠥᠷᠯᠥᠭᠡ ᠭᠡᠭᠡᠷᠡᠬᠦ ᠶ᠋ᠢ ᠬᠦᠯᠢᠶᠡᠬᠦᠶᠡ᠂ ᠴᠢᠪᠬᠢᠲᠡᠯᠡ ᠴᠢᠦᠢ ᠴᠦ ᠯᠢᠦᠢ ᠶ᠋ᠢ ᠨᠡᠭᠡᠭᠦᠯᠦᠭᠰᠡᠨ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠶ᠋ᠢᠨ ᠬᠣᠶᠠᠷ ᠵᠠᠩᠵᠤᠨ - ᠷᠢᠨᠴᠢᠨ᠂ ᠴᠠᠷᠠᠰᠤ ᠬᠣᠶᠠᠭᠤᠯᠠ ᠶ᠋ᠢᠨ ᠴᠡᠷᠢᠭ ᠲᠡᠷᠡ ᠵᠠᠮ ᠢ᠋ᠶ᠋ᠠᠷ ᠥᠩᠭᠡᠷᠡᠬᠦᠶᠡ᠂ ᠥᠨᠳᠥᠷ ᠡᠪᠡᠰᠦᠨ ᠦ᠌ ᠳᠣᠲᠣᠷᠠ ᠤᠯᠠᠭᠠᠨ ᠭᠡᠷᠡᠯ ᠲᠤᠶᠠᠭᠠᠯᠠᠨ᠂ ᠴᠡᠷᠢᠭ ᠦ᠋ᠨ ᠮᠣᠷᠢᠳ ᠨᠠᠳᠬᠤᠬᠤᠢ ᠳ᠋ᠤᠷ ᠬᠣᠶᠠᠷ ᠵᠠᠩᠵᠤᠨ ᠴᠡᠷᠢᠭ ᠢ᠋ ᠵᠠᠩᠳᠠᠨ ᠨᠡᠩᠵᠢᠭᠦᠯᠵᠦ ᠣᠯᠵᠤ ᠪᠠᠷᠢᠭᠠᠳ ᠤᠴᠢᠷ ᠢ ᠰᠣᠨᠣᠰᠪᠠᠰᠤ ᠪᠠᠬᠠᠨ ᠬᠡᠷᠡᠭ ᠲᠡᠢ ᠬᠥᠮᠦᠨ ᠰᠢᠭ ᠲᠤᠯᠠ ᠴᠢᠦᠢ ᠴᠦ ᠯᠢᠦᠢ ᠶ᠋ᠢ ᠨᠡᠬᠡᠵᠦ ᠭᠦᠢᠴᠡᠭᠰᠡᠨ ᠦᠭᠡᠢ ᠪᠤᠷᠤᠭᠤ ᠪᠠᠨ ᠡᠭᠦᠨ ᠢ᠋ᠶ᠋ᠡᠷ ᠪᠠᠬᠠᠨ ᠬᠠᠯᠬᠠᠯᠠᠰᠤᠭᠠᠢ ᠭᠡᠮᠡᠨ ᠠᠪᠴᠤ ᠢᠷᠡᠭᠡᠳ ᠦᠭᠡ ᠡᠭᠡᠭᠦᠯᠦᠭᠰᠡᠨᠡ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠴᠤ᠌ ᠠᠷᠭᠠ ᠦᠭᠡᠢ᠂ ᠶᠡᠬᠡ ᠬᠦᠯᠦᠭ ᠨᠣᠶᠠᠨ ᠪᠤᠭᠤᠷᠵᠢ ᠳ᠋ᠤᠷ ᠪᠤᠯᠤ ᠸᠠᠩ ᠡᠴᠢᠭᠡ ᠬᠥᠪᠡᠭᠦᠨ ᠢ᠋ ᠣᠯᠵᠤ ᠪᠠᠷᠢᠭᠰᠠᠨ ᠦᠭᠡᠢ ᠶᠠᠯᠠ ᠪᠠᠨ ᠬᠦᠯᠢᠶᠡᠨ ᠡᠨᠡ ᠥᠬᠢᠨ ᠦ᠌ ᠨᠢᠭᠡᠨ ᠰᠦᠷᠦᠭ ᠢ᠋ ᠡᠷᠭᠦᠨ ᠪᠠᠷᠢᠭᠰᠠᠨᠠ᠂ ᠪᠤᠭᠤᠷᠵᠢ᠂ ᠪᠣᠭᠣᠮᠲᠠ ᠬᠣᠲᠠ ᠶ᠋ᠢ ᠣᠯᠤᠭᠰᠠᠨ ᠭᠠᠪᠢᠶᠠ ᠳ᠋ᠤᠷ ᠪᠤᠷᠤᠭᠤᠳᠠᠭᠰᠠᠨ ᠳᠠᠢᠰᠤᠨ ᠢ᠋ ᠪᠤᠯᠲᠠᠷᠠᠭᠤᠯᠤᠭᠰᠠᠨ ᠢ᠋ ᠪᠦᠷᠢᠮᠦᠰᠦᠨ ᠬᠠᠯᠬᠠᠯᠠᠵᠤ ᠪᠣᠯᠤᠮᠠᠷ ᠭᠡᠮᠡᠨ ᠬᠦᠯᠢᠶᠡᠨ ᠠᠪᠴᠤ ᠨᠠᠷᠢᠨ ᠤᠴᠢᠷ ᠢ᠋ ᠤᠬᠤᠴᠢᠯᠠᠨ ᠠᠰᠠᠭᠤᠵᠤ ᠤᠬᠠᠭᠠᠳ᠂ ᠡᠨᠡ ᠡᠳᠦᠷ ᠦ᠋ᠨ ᠬᠤᠷᠢᠮ ᠳ᠋ᠤᠷ ᠨᠢᠭᠡᠨ ᠳ᠋ᠦ᠍ᠷ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠰᠠᠭᠠ ᠶ᠋ᠢᠨ ᠲᠡᠷᠢᠭᠦᠨ ᠭᠠᠪᠢᠶᠠ ᠶ᠋ᠢ ᠭᠠᠷᠭᠠᠶᠠ᠂ ᠬᠣᠶᠠᠷ ᠲᠤᠷ ᠳᠡᠭᠦᠨᠦ ᠪᠢᠴᠢᠬᠠᠨ ᠠᠯᠳᠠᠰᠢ ᠶ᠋ᠢ ᠠᠷᠢᠯᠭᠠᠶᠠ ᠭᠡᠮᠡᠨ ᠠᠪᠤᠨ ᠭᠠᠷᠴᠤ ᠮᠥᠷᠭᠥᠭᠦᠯᠦᠭᠰᠡᠨ ᠠᠵᠤᠭᠤ᠃ ᠳᠡᠭᠦᠨᠦ ᠲᠡᠷᠡ ᠬᠥᠭᠰᠢᠨ ᠲᠠᠢᠭᠠᠨ ᠠᠨᠤ ᠡᠷᠲᠡᠨ ᠦ᠌ ᠯᠢᠶᠣᠣ ᠤᠯᠤᠰ ᠤ᠋ᠨ ᠦᠶᠡ ᠶ᠋ᠢᠨ ᠵᠠᠯᠠᠭᠤ ᠲᠠᠢᠭᠠᠨ ᠪᠥᠯᠥᠭᠡ᠃ ᠪᠢᠴᠢᠬᠠᠨ ᠲᠠᠢᠭᠠᠨ ᠠᠨᠤ ᠨᠢᠯᠬᠠ ᠳ᠋ᠤᠷ ᠮᠣᠳᠣᠴᠢ ᠶ᠋ᠢᠨ ᠣᠭᠣᠯᠢ ᠳᠡᠭᠡᠷᠡ ᠣᠢᠴᠢᠵᠤ ᠪᠡᠯᠬᠡᠭᠦᠰᠦ ᠲᠠᠰᠤᠷᠠᠭᠰᠠᠨ ᠢ᠋ ᠬᠥᠭᠰᠢᠨ ᠲᠠᠢᠭᠠᠨ ᠵᠠᠰᠠᠵᠤ ᠰᠠᠢᠨ ᠪᠣᠯᠭᠠᠨ ᠦᠷᠡ ᠱᠠᠪᠢ ᠪᠠᠨ ᠪᠣᠯᠭᠠᠵᠤᠬᠤᠢ᠃ ᠬᠠᠭᠤᠴᠢᠨ ᠨᠠᠢ᠌ᠮᠠᠨᠠ ᠠᠯᠲᠠᠨᠱᠠᠭᠠ ᠶ᠋ᠢ ᠡᠷᠢᠨ ᠡᠴᠢᠬᠦ ᠬᠡᠮᠡᠭᠰᠡᠨ ᠡᠨᠡ ᠲᠠᠢᠭᠠᠨ ᠤ᠋ ᠤᠬᠠᠭᠠᠨ ᠠᠨᠤ ᠨᠢᠭᠡᠨ ᠳ᠋ᠦ᠍ᠷ ᠤᠭ ᠡᠵᠡᠨ ᠬᠣᠶᠠᠷ ᠲᠤᠷ ᠪᠤᠯᠤ ᠸᠠᠩ᠂ ᠡᠴᠦᠰ ᠲᠦ᠍ᠷ ᠪᠧᠲ᠋ᠠ᠋ ᠤᠯᠤᠰ ᠠ᠋ᠴᠠ ᠪᠤᠯᠲᠠᠷᠠᠬᠤᠶᠠ ᠪᠡᠷᠬᠡ ᠶ᠋ᠢ ᠮᠡᠳᠡᠭᠰᠡᠨ ᠦ᠌ ᠤᠴᠢᠷ ᠪᠣᠯᠠᠢ᠃ ᠵᠢᠴᠢ ᠡᠨᠡ ᠠᠪᠠᠬᠠᠢ ᠡᠨᠡ ᠵᠢᠯ ᠰᠠᠶᠢ ᠶᠢᠰᠦᠬᠡᠨ ᠨᠠᠰᠤᠲᠠᠢ᠂ ᠰᠡᠴᠡᠨ ᠭᠡᠭᠡᠬᠡᠨ ᠣᠯᠠᠨ ᠠ᠋ᠴᠠ ᠬᠡᠲᠦᠢᠳᠵᠦᠬᠦᠢ᠃ ᠪᠡᠶᠡ ᠲᠥᠯᠥᠪ ᠮᠥᠨ ᠳᠡᠮᠡᠢ ᠪᠠᠭᠤᠷᠠᠢ ᠪᠢᠴᠢᠬᠠᠨ ᠦᠭᠡᠢ᠂ ᠪᠠᠭᠠ ᠶ᠋ᠢᠨ ᠨᠡᠷᠡ ᠶᠠᠨ ᠵᠢᠢ᠂ ᠠᠷᠤ ᠭᠠᠵᠠᠷ ᠤ᠋ᠨ ᠬᠡᠯᠡᠨ ᠢ᠋ᠶ᠋ᠡᠷ ᠢᠷᠭᠡᠨ ᠦᠭᠡᠨ ᠦ᠌ ᠵᠢᠶᠦ᠋ᠨ ᠵᠣ᠌ ᠬᠡᠮᠡᠬᠦ ᠶ᠋ᠢ ᠶᠠᠨ ᠵᠢᠢ ᠭᠡᠮᠡᠨ ᠬᠠᠯᠭᠤᠷᠠᠨ ᠳᠠᠭᠤᠳᠠᠭᠰᠠᠨ ᠢ᠋ᠶ᠋ᠠᠷ ᠪᠦᠭᠦᠳᠡᠭᠡᠷ ᠶᠠᠨ ᠵᠢᠢ ᠠᠪᠠᠬᠠᠢ ᠬᠡᠮᠡᠭᠰᠡᠭᠡᠷ ᠨᠡᠷᠡ ᠪᠣᠯᠭᠠᠵᠤᠬᠤᠢ᠃ ᠴᠣᠬᠣᠮ ᠶᠡᠬᠡ ᠨᠡᠷᠡ ᠢᠨᠤ ᠵᠡᠭᠦᠨ ᠨᠠᠷᠠᠨ ᠪᠥᠯᠥᠭᠡ᠂ ᠶᠠᠭᠤᠨ ᠤ᠋ ᠲᠤᠯᠠ ᠲᠡᠢᠨ ᠬᠦ᠌ ᠨᠠᠷᠠᠯᠠᠪᠠ? ᠬᠡᠮᠡᠪᠡᠰᠦ᠂ ᠳᠡᠭᠦᠨᠦ ᠲᠥᠷᠥᠭᠰᠡᠨ ᠡᠬᠡ ᠲᠣᠯᠢᠨ ᠪᠣᠯᠣᠷ ᠬᠠᠲᠤᠨ ᠲᠡᠭᠦᠨ ᠢ᠋ ᠲᠦᠷᠦᠬᠦᠶᠡ᠂ ᠰᠥᠨᠢ ᠶ᠋ᠢᠨ ᠵᠡᠭᠦᠳᠦᠨᠡ᠂ ᠪᠠᠷᠠᠭᠤᠨᠲᠠ ᠲᠠᠰᠢᠭᠰᠠᠨ ᠨᠠᠷᠠᠨ ᠰᠠᠶᠢ ᠤᠨᠠᠵᠤ ᠬᠠᠷᠠᠩᠭᠤᠢ ᠪᠣᠯᠣᠮᠠᠭᠴᠠ ᠵᠡᠭᠦᠨ ᠡᠴᠡ ᠨᠢᠭᠡᠨ ᠴᠠᠢᠪᠤᠷ ᠤᠯᠠᠭᠠᠨ ᠨᠠᠷᠠᠨ ᠮᠠᠨᠳᠤᠨ ᠭᠠᠷᠴᠤ ᠢᠷᠡᠭᠡᠳ ᠰᠠᠶᠢ ᠦᠳᠡ ᠥᠩᠭᠡᠷᠡᠲᠡᠯᠡ ᠳᠣᠣᠷᠠ ᠠ᠋ᠴᠠ ᠪᠠᠰᠠ ᠨᠢᠭᠡᠨ ᠪᠢᠴᠢᠬᠠᠨ ᠨᠠᠷᠠᠨ ᠭᠠᠷᠤᠭᠠᠳ ᠤᠳᠠᠭᠰᠠᠨ ᠦᠭᠡᠢ ᠵᠡᠭᠦᠨ ᠡᠴᠡ ᠪᠠᠰᠠ ᠨᠢᠭᠡᠨ ᠶᠡᠬᠡ ᠤᠪ ᠤᠯᠠᠭᠠᠨ ᠨᠠᠷᠠᠨ ᠮᠠᠨᠳᠤᠨ ᠭᠠᠷᠴᠤ ᠢᠷᠡᠭᠡᠳ᠂ ᠦᠳᠡ ᠪᠤᠯᠬᠤᠢ ᠶ᠋ᠢᠨ ᠤᠷᠢᠳᠠ ᠵᠡᠭᠦᠨ ᠣᠭᠲᠠᠷᠭᠤᠢ ᠳ᠋ᠤᠷ ᠭᠡᠨᠡᠳᠲᠡ ᠠᠶᠤᠩᠭᠠ ᠳᠠᠭᠤᠷᠢᠰᠤᠨ᠂ ᠬᠠᠭᠠᠰ ᠲᠡᠭᠷᠢ ᠶ᠋ᠢᠨ ᠴᠢᠨᠡᠭᠡᠨ ᠶᠡᠬᠡ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠭᠡᠷᠡᠯ ᠲᠡᠢ ᠨᠠᠷᠠ ᠰᠠᠴᠤᠷᠠᠭᠰᠠᠭᠠᠷ ᠮᠠᠨᠳᠤᠨ ᠭᠠᠷᠴᠤ ᠢᠷᠡᠭᠡᠳ᠂ ᠭᠠᠯ ᠮᠡᠲᠦ ᠬᠢᠯᠠᠪᠠᠯᠵᠠᠨ ᠬᠢᠯᠠᠰᠬᠢᠬᠦᠶᠡ᠂ ᠤᠷᠢᠳᠠ ᠪᠠᠷ ᠭᠠᠷᠤᠭᠰᠠᠨ ᠴᠠᠢᠪᠤᠷ ᠨᠠᠷᠠᠨ᠂ ᠪᠠᠰᠠ ᠪᠢᠴᠢᠬᠠᠨ ᠨᠠᠷᠠᠨ᠂ ᠪᠠᠰᠠ ᠤᠯᠠᠭᠠᠨ ᠨᠠᠷᠠᠨ ᠴᠥᠮ ᠭᠡᠷᠡᠯ ᠳ᠋ᠦ᠍ᠷ ᠳᠠᠷᠤᠭᠳᠠᠨ᠂ ᠡᠨᠡ ᠭᠤᠷᠪᠠᠨ ᠨᠠᠷᠠᠨ ᠣᠷᠣᠨ ᠣᠷᠣᠨ ᠳ᠋ᠠᠭᠠᠨ ᠰᠢᠩᠭᠡᠭᠰᠡᠭᠡᠷ ᠵᠠᠪᠬᠠᠷᠠᠪᠠᠢ ᠭᠡᠮᠡᠨ ᠵᠡᠭᠦᠳᠦᠯᠡᠭᠰᠡᠨ ᠢ᠋ᠶ᠋ᠡᠷ ᠨᠢᠭᠡᠨ ᠰᠥᠨᠢ ᠳᠠᠭᠤᠰᠤᠨ ᠵᠡᠭᠦᠨ ᠡᠴᠡ ᠨᠠᠷᠠᠨ ᠮᠠᠨᠳᠤᠪᠠ ᠭᠡᠮᠡᠨ ᠵᠡᠭᠦᠳᠦᠯᠡᠭᠡᠳ ᠠᠶᠤᠩᠭᠠ ᠶ᠋ᠢᠨ ᠳᠠᠭᠤᠨ ᠳ᠋ᠤᠷ ᠰᠣᠴᠢᠨ ᠰᠡᠷᠢᠮᠡᠭᠴᠡ᠂ ᠡᠨᠡ ᠥᠬᠢᠨ ᠢ᠋ ᠦᠵᠡᠭᠳᠡᠭᠰᠡᠨ ᠢ᠋ᠶ᠋ᠡᠷ ᠨᠡᠷᠡ ᠶ᠋ᠢ 《ᠵᠡᠭᠦᠨ ᠨᠠᠷᠠᠨ 》 ᠬᠡᠮᠡᠭᠰᠡᠨ ᠪᠥᠯᠥᠭᠡ ᠃ ᠡᠨᠡ ᠵᠡᠭᠦᠳᠦᠨ ᠢ᠋ ᠰᠠᠨᠠᠩ ᠰᠡᠴᠡᠨ ᠦ᠌ ᠴᠣᠬᠣᠯᠠᠭᠰᠠᠨ ᠲᠠᠪᠤᠨ ᠨᠠᠷᠠᠨ ᠤ᠋ ᠲᠠᠢᠯᠪᠤᠷᠢ ᠳ᠋ᠤᠷ ᠪᠣᠢ ᠪᠥᠯᠥᠭᠡ᠃ ᠡᠳᠦᠭᠡ ᠡᠭᠦᠨ ᠢ᠋ ᠥᠭᠦᠯᠡᠬᠦ ᠴᠢᠯᠥᠭᠡ ᠦᠭᠡᠢ᠃
ᠲᠡᠳᠦᠢ ᠪᠤᠭᠤᠷᠵᠢ ᠡᠨᠡ ᠶᠠᠨ ᠵᠢᠢ ᠠᠪᠠᠬᠠᠢ ᠶ᠋ᠢ ᠤᠯᠠᠭᠠᠨ ᠲᠤᠶᠠᠭᠠᠯᠠᠭᠰᠠᠨ ᠭᠡᠷᠡᠯ ᠡᠴᠡ ᠣᠯᠵᠤ᠂ ᠲᠡᠭᠦᠨᠦ ᠤᠭ ᠤᠴᠢᠷ ᠤ᠋ᠨ ᠶᠡᠬᠡ ᠲᠥᠯᠥᠪ ᠪᠠ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠶ᠋ᠢᠨ ᠲᠡᠷᠢᠭᠦᠨ ᠭᠠᠪᠢᠶᠠ ᠳ᠋ᠤᠷ ᠪᠠᠰᠠ ᠪᠤᠯᠤ ᠸᠠᠩ ᠲᠠᠨ ᠢ᠋ ᠣᠯᠵᠤ ᠡᠰᠡ ᠪᠠᠷᠢᠭᠰᠠᠨ ᠶᠠᠯᠠ ᠪᠠᠨ ᠭᠤᠶᠤᠨ ᠮᠡᠳᠡᠭᠦᠯᠦᠭᠰᠡᠨ ᠤᠴᠢᠷ ᠲᠠᠢ ᠡᠷᠭᠦᠨ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠮᠠᠰᠢ ᠪᠡᠶᠡᠰᠦᠨ᠂ ᠵᠡᠭᠦᠳᠦᠨᠡ ᠨᠡᠢᠴᠡᠭᠰᠡᠨ ᠳ᠋ᠦ᠍ᠷ ᠶᠡᠬᠡᠳᠡ ᠰᠣᠨᠢᠷᠬᠠᠨ ᠭᠠᠢᠬᠠᠵᠤ᠂ ᠣᠢᠷᠠ ᠳᠠᠭᠤᠳᠠᠨ ᠠᠪᠴᠢᠷᠠᠵᠤ ᠰᠢᠨᠵᠢᠨ ᠦᠵᠡᠭᠡᠳ᠂ ᠮᠠᠰᠢᠳᠠ ᠨᠢᠭᠦᠯᠡᠰᠦᠨ ᠡᠨᠡᠷᠢᠵᠦ ᠪᠡᠶᠡᠰᠦᠨ ᠰᠠᠢᠰᠢᠶᠠᠭᠠᠳ ᠡᠢᠨ ᠭᠡᠮᠡᠨ ᠵᠠᠬᠢᠷᠤᠨ᠄
ᠰᠠᠢᠨ ᠮᠣᠷᠢᠨ ᠤᠨᠠᠭᠠᠨ ᠠᠬᠤᠢ ᠠ᠋ᠴᠠᠭᠠᠨ
ᠰᠠᠢᠨ ᠬᠥᠮᠦᠨ ᠬᠡᠦᠬᠡᠳ ᠠᠬᠤᠢ ᠠ᠋ᠴᠠᠭᠠᠨ ᠬᠡᠮᠡᠭᠰᠡᠨᠴᠢᠯᠡᠨ
ᠤᠳᠤᠮᠲᠤ ᠬᠠᠭᠠᠨ ᠤ᠋ ᠬᠡᠦᠬᠡᠨ
ᠤᠯᠠᠭᠠᠨ ᠭᠡᠷᠡᠯᠲᠦ ᠵᠢᠶᠦ᠋ᠨ ᠵᠣ᠌
ᠤᠴᠠᠷᠠᠯ ᠲᠣᠬᠢᠶᠠᠯ ᠪᠡᠯᠭᠡ ᠲᠡᠢ ᠪᠠᠢᠨᠠᠮ
ᠤᠮᠳᠠᠯᠠᠨ ᠲᠡᠵᠢᠭᠡᠪᠡᠰᠦ ᠰᠠᠶᠢ ᠵᠣᠬᠢᠨᠠᠮ ᠶᠠ᠃
ᠲᠡᠳᠦᠢ ᠬᠠᠮᠤᠭ ᠤ᠋ᠨ ᠲᠡᠷᠢᠭᠦᠨ ᠭᠠᠪᠢᠶᠠ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠶ᠋ᠢᠨ ᠪᠣᠯᠵᠤ᠂ ᠪᠤᠯᠤ ᠸᠠᠩ ᠤ᠋ᠨ ᠠᠢᠮᠠᠭ ᠢ᠋ ᠣᠯᠵᠤ ᠪᠠᠷᠢᠭᠰᠠᠨ ᠦᠭᠡᠢ ᠶᠠᠯᠠ ᠶ᠋ᠢ ᠲᠠᠢᠯᠤᠭᠤᠯᠬᠤ ᠪᠠᠷ ᠪᠤᠭᠤᠷᠵᠢ ᠶ᠋ᠢᠨ ᠪᠤᠷᠤᠭᠤᠳᠠᠰᠢ ᠡᠲᠡᠭᠡᠳ ᠰᠥᠭᠥᠳᠴᠦ ᠪᠦᠬᠦᠢ ᠶ᠋ᠢ ᠦᠵᠡᠭᠡᠳ᠂ ᠲᠠᠢᠽᠦ ᠲᠠᠭᠠᠯᠠᠨ ᠪᠡᠶᠡᠰᠴᠦ ᠵᠠᠬᠢᠷᠤᠨ᠄
《ᠪᠤᠷᠤᠭᠤᠯᠠᠭᠰᠠᠨ ᠳᠠᠢᠰᠤᠨ ᠢ᠋ ᠪᠢᠲᠡᠭᠡᠢ ᠨᠡᠬᠡᠭᠲᠦᠨ᠂ ᠪᠤᠲᠠᠷᠠᠭᠰᠠᠨ ᠬᠠᠳ ᠢ᠋ ᠪᠢᠲᠡᠭᠡᠢ ᠠᠯᠠ ᠬᠡᠮᠡᠭᠴᠢ ᠮᠢᠨᠦ ᠤᠭ ᠴᠠᠭᠠᠵᠠ ᠵᠠᠰᠠᠭ ᠪᠣᠯᠠᠢ᠃ ᠵᠢᠷᠯᠤᠭ ᠬᠣᠲᠠ ᠶ᠋ᠢᠨ ᠣᠯᠠᠨ ᠢ᠋ ᠡᠩᠬᠡᠵᠢᠭᠦᠯᠦᠨ ᠳᠠᠭᠠᠭᠤᠯᠤᠭᠰᠠᠨ ᠶᠡᠬᠡ ᠭᠠᠪᠢᠶᠠ ᠳ᠋ᠤᠷ ᠰᠠᠢᠰᠢᠶᠠᠨ ᠪᠠᠷᠠᠬᠤ ᠦᠭᠡᠢ ᠪᠥᠭᠡᠲᠡᠯᠡ ᠵᠢᠯᠢᠢᠵᠦ ᠲᠡᠯᠢᠢᠭᠰᠡᠨ᠂ ᠪᠤᠷᠤᠭᠤᠲᠠᠨ ᠪᠤᠲᠠᠷᠠᠭᠰᠠᠨ ᠪᠤᠯᠤ ᠸᠠᠩ ᠤ᠋ᠨ ᠡᠰᠡ ᠪᠠᠷᠢᠭᠳᠠᠭᠰᠠᠨ ᠳ᠋ᠤᠷ ᠶᠠᠭᠤᠨ ᠤ᠋ ᠶᠠᠯᠠ ᠪᠠᠢᠬᠤ ᠠᠵᠠᠢ ? ᠨᠡᠩ ᠪᠠᠰᠠ ᠨᠠᠳᠤᠷ ᠠᠰᠢᠳᠠ ᠰᠡᠳᠬᠢᠯ ᠢ᠋ᠶ᠋ᠡᠨ ᠥᠭᠴᠦ ᠳᠠᠭᠠᠭᠰᠠᠨ᠂ ᠠᠯᠲᠠᠨᠱᠠᠭᠠ ᠬᠠᠨ ᠬᠥᠪᠡᠭᠦᠨ ᠦ᠌ ᠲᠥᠷᠥᠭᠰᠡᠨ ᠥᠬᠢᠨ ᠳᠡᠭᠦᠦ ᠶ᠋ᠢ ᠣᠯᠵᠤ ᠬᠠᠮᠲᠤᠳᠬᠠᠨ ᠤᠴᠠᠷᠠᠭᠤᠯᠬᠤ ᠠᠨᠤ᠂ ᠬᠠᠢᠷᠠᠲᠤ ᠮᠢᠨᠦ ᠬᠠᠮᠤᠭ ᠦᠵᠡᠯ ᠳ᠋ᠦ᠍ᠷ ᠮᠠᠰᠢᠳᠠ ᠵᠣᠬᠢᠴᠠᠭᠰᠠᠨᠠ᠂ ᠠᠳᠠᠪᠠᠰᠢ ᠪᠠᠶᠠᠷᠯᠠᠨ ᠠᠮᠤᠢ 》ᠭᠡᠮᠡᠨ ᠠᠩᠭᠢᠳᠠ ᠨᠢᠭᠡᠨ ᠠᠯᠲᠠᠨ ᠬᠤᠨᠳᠠᠭᠠᠲᠤ ᠰᠠᠷᠬᠤᠳ ᠢ᠋ ᠮᠣᠳᠣᠷ ᠢ᠋ᠶ᠋ᠠᠷ ᠪᠠᠷᠢᠵᠤ᠂ ᠮᠤᠬᠤᠯᠢ ᠳ᠋ᠤᠷ ᠥᠭᠴᠦ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠳ᠋ᠤᠷ ᠱᠠᠩᠨᠠᠨ ᠲᠡᠭᠦᠨ ᠢ᠋ ᠮᠥᠷᠭᠥᠭᠰᠡᠨ ᠬᠣᠢᠨᠠ ᠤᠷᠤᠭᠰᠢ ᠳᠡᠪᠰᠢᠭᠦᠯᠦᠨ ᠰᠥᠭᠥᠳᠬᠡᠵᠦ ᠵᠠᠬᠢᠷᠤᠨ᠄
《 ᠴᠢ ᠨᠢᠯᠬᠠ ᠶ᠋ᠢᠨ ᠴᠠᠭᠳᠠ᠂ ᠲᠡᠩᠳᠦ ᠶ᠋ᠢᠨ ᠭᠣᠣᠯ ᠳ᠋ᠤᠷ ᠪᠠᠷᠢᠭᠰᠠᠨ ᠦᠵᠦᠭᠦᠷᠲᠦ ᠰᠢᠳᠠᠮ ᠢ᠋ᠶ᠋ᠠᠨ ᠡᠯᠡᠰᠦᠨᠡ ᠬᠠᠳᠬᠤᠵᠤ᠂ ᠳᠡᠭᠡᠷᠡ ᠢᠨᠤ ᠮᠠᠯᠠᠭᠠ ᠪᠠᠨ ᠡᠮᠦᠰᠬᠡᠭᠡᠳ᠂ ᠳᠡᠭᠦᠨᠦ ᠵᠦᠭ ᠮᠥᠷᠭᠥᠨ ᠰᠥᠭᠥᠳᠴᠦ ᠶᠣᠰᠣᠯᠠᠬᠤᠶᠠ᠂ ᠮᠢᠨᠦ ᠪᠡᠶᠡ ᠠᠪᠠ ᠳ᠋ᠤᠷ ᠭᠠᠷᠴᠤ ᠶᠠᠪᠤᠬᠤ ᠳ᠋ᠠᠭᠠᠨ ᠦᠵᠡᠭᠡᠳ᠂ ᠤᠴᠢᠷ ᠢ᠋ ᠠᠰᠠᠭᠤᠪᠠᠰᠤ ᠴᠢᠨᠦ ᠥᠴᠢᠭᠰᠡᠨ ᠢᠨᠤ᠄
<ᠬᠣᠶᠠᠷ ᠬᠥᠮᠦᠨ ᠬᠠᠮᠲᠤ ᠶᠠᠪᠤᠪᠠᠰᠤ᠄
ᠨᠠᠰᠤ ᠠᠬᠠ ᠪᠠᠨ ᠠᠨᠤ ᠬᠦᠨᠳᠦᠯᠡᠮᠦᠢ ᠪᠢ᠃
ᠬᠣᠭᠣᠰᠣᠨ ᠪᠡᠶᠡ ᠭᠠᠭᠴᠠᠭᠠᠷ ᠠᠪᠠᠰᠤ
ᠮᠠᠯᠠᠭᠠ ᠲᠡᠷᠢᠭᠦᠨ ᠳ᠋ᠦ᠍ᠷ ᠠᠬᠤᠢ ᠪᠠᠨ ᠬᠦᠨᠳᠦᠯᠡᠮᠦᠢ ᠪᠢ᠃
ᠬᠣᠲᠠᠯᠠ ᠤᠯᠤᠰ ᠤ᠋ᠨ ᠬᠡᠯᠡᠯᠴᠡᠬᠦ ᠢᠨᠤ
ᠬᠤᠲᠤᠭᠲᠤ ᠳᠡᠭᠷᠢᠯᠢᠭ ᠡᠵᠡᠨ ᠢ᠋ ᠡᠨᠳᠡ ᠠᠪᠠᠯᠠᠮᠤᠢ ᠭᠡᠮᠡᠨ ᠰᠣᠨᠣᠰᠴᠤ
ᠬᠤᠷᠠᠯᠳᠤᠨ ᠪᠠᠷᠠᠭᠠᠯᠠᠪᠠᠰᠤ᠂
ᠬᠣᠢᠰᠢ ᠤᠬᠤᠷᠢᠨ ᠣᠷᠣᠭᠰᠢ ᠮᠥᠷᠭᠥᠬᠦ
ᠬᠠᠤᠯᠢ ᠶᠣᠰᠣᠯᠠᠯ ᠢ᠋ ᠰᠣᠷᠣᠮᠤᠢ ᠪᠢ> ᠬᠡᠮᠡᠭᠰᠡᠨᠡ
ᠬᠣᠣᠰ ᠦᠭᠡᠢ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠴᠣᠯᠠ ᠬᠠᠢᠷᠠᠯᠠᠨ
ᠬᠣᠢᠮᠣᠷ ᠠᠨᠤ ᠰᠢᠷᠡᠭᠡᠨ ᠬᠠᠳᠤᠨᠠ ᠲᠤᠰᠢᠶᠠᠨ ᠲᠡᠵᠢᠭᠡᠯᠭᠡᠵᠦ
ᠬᠣᠩᠭᠣ ᠳ᠋ᠠᠭᠠᠨ ᠲᠤᠯᠤᠭᠰᠠᠨᠠ᠂
ᠬᠣᠩᠭᠣᠷ ᠵᠤᠯᠠ ᠳ᠋ᠤᠷ ᠬᠣᠯᠪᠣᠨ
ᠬᠣᠲᠠ ᠪᠠᠯᠭᠠᠳ ᠠᠪᠬᠤᠢ ᠳ᠋ᠤᠷ ᠬᠦᠷᠴᠦ᠂
ᠬᠤᠷᠢᠮᠯᠠᠨ ᠵᠢᠷᠭᠠᠬᠤ ᠡᠨᠡ ᠪᠠᠢᠯᠳᠤᠭᠠᠨ ᠤ᠋
ᠬᠣᠲᠠᠯᠠ ᠶ᠋ᠢᠨ ᠲᠡᠷᠢᠭᠦᠨ ᠭᠠᠪᠢᠶᠠ ᠶ᠋ᠢ ᠴᠢᠨᠦ ᠪᠠᠢᠭᠤᠯᠤᠭᠰᠠᠨ ᠢ᠋ᠶ᠋ᠠᠷ
ᠬᠣᠢᠰᠢ ᠡᠭᠡᠨ ᠡᠨᠡ ᠪᠠᠶᠠᠷ ᠢ᠋ ᠥᠵᠢᠨ ᠡᠮᠡᠭᠡ ᠲᠡᠷᠢᠭᠦᠯᠡᠨ
ᠤᠯᠤᠰ ᠤ᠋ᠨ ᠡᠬᠡ ᠬᠠᠲᠤᠨ ᠳ᠋ᠠᠭᠠᠨ ᠮᠡᠳᠡᠭᠦᠯᠦᠭᠲᠦᠨ
ᠬᠣᠴᠣᠷᠤᠭᠰᠠᠨ ᠵᠢᠯ ᠯᠢ ᠵᠢᠢ ᠯᠢ ᠬᠣᠷᠣᠭᠠ ᠳ᠋ᠤᠷ
ᠬᠣᠶᠠᠷ ᠳᠣᠯᠣᠭᠠᠨ ᠤ᠋ ᠪᠠᠭᠠ ᠥᠬᠢᠨ ᠢ᠋ ᠬᠣᠢᠰᠢ ᠡᠭᠡᠭᠦᠯᠲᠡᠯᠡ
ᠬᠤᠲᠤᠭᠲᠤ ᠣᠨ ᠵᠢᠷᠯᠤᠭ ᠬᠤᠳᠠᠨᠠ ᠪᠠᠰᠠ
ᠭᠤᠷᠪᠠᠨ ᠭᠤᠷᠪᠠ ᠶ᠋ᠢᠨ ᠨᠢᠯᠬᠠ ᠬᠡᠦᠬᠡᠨ ᠢ᠋ ᠣᠯᠤᠭᠰᠠᠨ ᠤ᠋ ᠲᠤᠯᠠᠳᠠ
ᠡᠨᠡ ᠤᠳᠠᠭᠠ ᠶ᠋ᠢᠨ ᠴᠡᠷᠢᠭ ᠳᠡᠢᠯᠦᠭᠰᠡᠨ ᠲᠡᠷᠢᠭᠦᠨ ᠪᠠᠶᠠᠷ ᠢ᠋
ᠮᠥᠨ ᠬᠦ᠌ ᠴᠢ ᠮᠡᠳᠡᠭᠦᠯᠦᠷᠡ ᠡᠴᠢᠬᠦᠢ ᠳ᠋ᠡᠭᠡᠨ᠂
ᠡᠨᠡ ᠬᠦ᠌ ᠨᠠᠢ᠍ᠮᠠᠨ ᠤ᠋ ᠵᠡᠭᠦᠨ ᠨᠠᠷᠠᠨ ᠠᠪᠠᠬᠠᠢ ᠶ᠋ᠢᠨ ᠡᠯᠡ ᠳᠠᠭᠠᠯᠲᠠ ᠲᠠᠢ᠂
ᠪᠠᠰᠠ ᠬᠦ᠌ ᠴᠢ ᠤᠯᠤᠰ ᠲᠤᠷ ᠬᠦᠷᠭᠡᠭᠲᠦᠨ᠂
ᠡᠴᠢᠬᠦ ᠵᠠᠮ ᠳ᠋ᠠᠭᠠᠨ ᠡᠨᠡ ᠬᠡᠦᠬᠡᠨ ᠢ᠋
ᠡᠵᠡᠨ ᠦ᠌ ᠪᠡᠨ ᠦᠷᠡ ᠮᠡᠲᠦ ᠡᠷᠬᠢᠯᠡᠨ ᠦᠵᠡᠵᠦ
ᠡᠷᠭᠦᠯᠬᠢᠯᠡᠨ ᠠᠪᠠᠴᠢᠭᠠᠳ ᠡᠮᠡᠭᠡ ᠥᠵᠢᠨᠡ ᠮᠥᠷᠭᠥᠭᠦᠯᠦᠭᠡᠳ᠂
ᠤᠯᠤᠰ ᠤ᠋ᠨ ᠡᠬᠡ ᠳ᠋ᠡᠭᠡᠨ ᠡᠷᠭᠦᠨ ᠲᠤᠰᠢᠶᠠᠵᠤ
ᠡᠩᠭᠡᠷᠡᠭᠦᠯᠦᠨ ᠰᠠᠢᠬᠠᠨᠠ ᠲᠡᠵᠢᠭᠡᠯᠭᠡᠭᠲᠦᠨ᠃
ᠡᠷᠲᠡ ᠡᠳᠦᠷ ᠴᠢᠮᠠᠶ᠋ᠢ ᠥᠭᠴᠦ ᠲᠡᠵᠢᠭᠡᠯᠭᠡᠭᠡᠳ ᠂
ᠡᠨᠡ ᠡᠳᠦᠷ ᠡᠢᠮᠦ ᠶᠡᠬᠡ ᠲᠤᠰᠠ ᠶ᠋ᠢ ᠠᠨᠤ ᠣᠯᠤᠨᠠᠮ ᠪᠢᠰᠢᠦ ᠂
ᠡᠢᠮᠦ ᠶ᠋ᠢᠨ ᠲᠤᠯᠠ ᠂ ᠡᠨᠡ ᠠᠪᠠᠬᠠᠢ ᠶ᠋ᠢ
ᠡᠭᠡᠨᠡᠭᠲᠡ ᠪᠠᠰᠠ ᠬᠦ᠌ ᠴᠢᠮᠠᠳᠦᠷ ᠲᠤᠰᠢᠶᠠᠨ᠂
ᠴᠢᠮᠠ ᠪᠠᠷ ᠡᠷᠭᠦᠨ ᠬᠥᠷᠭᠡᠭᠦᠯᠦᠮᠦᠢ᠃
ᠡᠪᠡᠦ ᠪᠢ ᠡᠭᠦᠨ ᠢ᠋ ᠣᠯᠬᠤᠶᠠ
ᠳᠥᠷᠪᠡᠨ ᠵᠢᠭᠦᠷᠲᠦ ᠯᠤᠤ ᠶ᠋ᠢᠨ ᠵᠤᠯᠵᠠᠭᠠ ᠣᠯᠪᠠ ᠭᠡᠮᠡᠨ ᠵᠡᠭᠦᠳᠦᠯᠡᠪᠡᠢ᠃
ᠡᠨᠡ ᠬᠡᠳᠦᠢ ᠥᠬᠢᠨ ᠪᠣᠯᠪᠠᠴᠤ ᠡᠷᠬᠡ ᠦᠭᠡᠢ
ᠡᠩ ᠥᠲᠡᠯᠡ ᠡᠬᠡᠨᠡᠷ ᠦᠯᠦ ᠭᠠᠷᠤᠨᠠᠮ ᠶᠠ᠃
ᠡᠭᠦᠨᠦ ᠠᠪᠠᠭᠠ ᠢᠦᠢ ᠬᠠᠭᠠᠨ ᠤ᠋ ᠡᠷᠳᠡᠨᠢ ᠶ᠋ᠢᠨ ᠰᠡᠦᠬᠡ ᠳ᠋ᠦ᠍ᠷ ᠢᠨᠥ ᠰᠠᠭᠤᠯᠭᠠᠨ
ᠡᠯᠡ ᠵᠢᠭᠰᠠᠭᠠᠯ ᠢ᠋ ᠬᠡᠷᠡᠭᠯᠡᠭᠦᠯᠦᠨ ᠡᠪᠭᠡᠯᠡᠨ ᠳᠠᠪᠬᠤᠯᠠᠨ ᠲᠠᠪᠤᠨ ᠵᠠᠭᠤᠨ ᠴᠡᠷᠢᠭ ᠠᠪᠴᠤ
ᠡᠳᠦᠭᠡ ᠳᠠᠷᠤᠢ ᠡᠭᠡᠵᠦ ᠮᠣᠷᠳᠠᠭᠲᠤᠨ !》
ᠬᠡᠮᠡᠭᠰᠡᠨᠡ ᠡᠷᠳᠡᠨᠢᠰ ᠦ᠋ᠨ ᠤᠷᠲᠣᠨᠠ ᠥᠰᠦᠭᠰᠡᠨ ᠰᠠᠭᠠ ᠠᠨᠤ ᠡᠨᠡ ᠮᠡᠲᠦ ᠶᠡᠬᠡ ᠪᠡᠷ ᠥᠷᠥᠰᠢᠶᠡᠨ ᠡᠷᠭᠦᠯᠬᠢᠯᠡᠭᠰᠡᠨᠡ ᠰᠠᠶᠢ ᠡᠷᠬᠢᠮ ᠢ᠋ᠶ᠋ᠡᠨ ᠮᠡᠳᠡᠵᠦ᠂ ᠡᠭᠡᠨ ᠪᠣᠰᠴᠤ ᠂ ᠭᠤᠷᠪᠠᠨᠲᠠ ᠰᠥᠭᠥᠳᠴᠦ ᠶᠢᠰᠦᠨᠲᠡ ᠮᠥᠷᠭᠥᠵᠦ ᠠᠶᠠᠷᠯᠠᠪᠠ᠃
ᠡᠳᠦᠭᠡᠬᠢ ᠶ᠋ᠢᠨ ᠲᠠᠢᠴᠢᠩ ᠤᠯᠤᠰ ᠤ᠋ᠨ ᠡᠩᠬᠡ ᠠᠮᠤᠭᠤᠯᠠᠩ ᠪᠣᠭᠳᠠ ᠬᠠᠯᠬᠠ ᠶ᠋ᠢᠨ ᠼᠡᠷᠢᠩ ᠢ᠋ ᠣᠷᠲᠣᠨᠠ ᠥᠰᠬᠡᠵᠦ᠂ ᠭᠦᠩᠵᠦ ᠳ᠋ᠦ᠍ᠷ ᠬᠣᠯᠪᠣᠨ ᠪᠠᠷᠠᠭᠤᠨ ᠢ᠋ ᠲᠣᠭᠲᠠᠭᠠᠯᠭᠠᠨ ᠴᠢᠨ ᠸᠠᠩ ᠡᠷᠭᠦᠮᠵᠢᠯᠡᠭᠰᠡᠨ ᠪᠠ ᠡᠳᠦᠭᠡᠬᠢ ᠶ᠋ᠢᠨ ᠲᠠᠢᠴᠢᠩ ᠤᠯᠤᠰ ᠤ᠋ᠨ ᠲᠡᠭᠷᠢ ᠲᠡᠳᠬᠦᠭᠰᠡᠨ ᠬᠠᠭᠠᠨ᠂ ᠬᠠᠷᠠᠴᠢᠨ ᠤ᠋ ᠵᠠᠯᠹᠤᠩᠬᠡ ᠶ᠋ᠢ ᠳᠣᠲᠣᠷᠠ ᠲᠡᠵᠢᠭᠡᠵᠦ ᠵᠢᠭᠡ ᠳ᠋ᠦ᠍ᠷ ᠬᠣᠯᠪᠣᠵᠤ ᠥᠭᠡᠯᠡᠳ ᠢ᠋ ᠳᠠᠢᠯᠠᠨ ᠳᠠᠭᠠᠭᠤᠯᠵᠤ᠂ ᠪᠠᠰᠠ ᠴᠢᠨ ᠸᠠᠩ ᠡᠷᠭᠦᠮᠵᠢᠯᠡᠭᠰᠡᠨ ᠢᠨᠥ ᠴᠥᠮ ᠢ᠋ᠶ᠋ᠡᠷ ᠲᠡᠷᠡ ᠦᠶᠡ ᠶ᠋ᠢᠨ ᠲᠡᠭᠷᠢᠯᠢᠭ ᠡᠵᠡᠳ ᠮᠥᠨ ᠲᠠᠢᠽᠦ ᠶ᠋ᠢᠨ ᠬᠠᠤᠯᠢ ᠶ᠋ᠢ ᠮᠥᠷᠳᠡᠭᠰᠡᠨ ᠢᠨᠥ ᠪᠤᠶᠤ᠃
ᠲᠡᠨᠳᠡᠴᠡ ᠬᠠᠷᠠᠬᠠᠨ ᠶᠡᠬᠡ ᠬᠤᠷᠢᠮ ᠤ᠋ᠨ ᠳᠤᠮᠳᠠ ᠬᠢᠷᠢ ᠳ᠋ᠦ᠍ᠷ ᠭᠠᠳᠠᠨᠠ ᠪᠠᠰᠠ ᠶᠡᠬᠡ ᠥᠭᠡᠷᠯᠢᠭ ᠬᠠᠨ ᠫᠤᠤ ᠶ᠋ᠢᠨ ᠳᠠᠭᠤᠨ ᠭᠤᠷᠪᠠᠨᠲᠠ ᠬᠥᠩᠭᠢᠷᠡᠰᠦᠨ᠂ ᠵᠠᠭᠤᠨ ᠬᠥᠭᠵᠢᠮ ᠨᠡᠮᠡᠨ ᠡᠭᠦᠰᠬᠡᠵᠦ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠬᠡ ᠲᠡᠷᠢᠭᠦᠯᠡᠨ ᠪᠦᠭᠦᠳᠡᠭᠡᠷ ᠦ᠋ᠨ ᠡᠮᠦᠨᠡ ᠡᠴᠡ ᠲᠡᠷᠢᠭᠦᠨ ᠤᠭᠲᠤᠯᠭᠠᠨᠠ ᠭᠤᠷᠪᠠᠳᠤᠭᠠᠷ ᠲᠠᠢᠽᠢ ᠪᠠᠭᠠ ᠡᠵᠡᠨ ᠥᠭᠡᠳᠡᠢ ᠬᠦᠷᠴᠦ ᠢᠷᠡᠭᠡᠳ᠂ ᠪᠠᠶᠠᠷ ᠤ᠋ᠨ ᠤᠭᠲᠤᠯᠭᠠ ᠶ᠋ᠢᠨ ᠶᠢᠰᠦᠨ ᠪᠦᠬᠦᠯᠢ ᠰᠢᠭᠦᠰᠦᠨ ᠤ ᠬᠤᠷᠢᠮ ᠤ᠋ᠨ ᠰᠢᠷᠡᠭᠡ ᠶ᠋ᠢ ᠳᠠᠪᠬᠤᠷᠯᠠᠨ ᠵᠢᠭᠰᠠᠭᠠᠵᠤ᠂ ᠥᠭᠡᠳᠡᠢ ᠥᠩᠭᠡᠲᠦ ᠮᠠᠩᠨᠤᠭ ᠤ᠋ᠨ ᠨᠢᠳᠤᠷᠭᠠ ᠪᠠᠨ ᠪᠠᠭᠤᠯᠭᠠᠨ᠂ ᠠᠯᠲᠠᠨ ᠴᠥᠬᠥᠴᠡᠲᠦ ᠪᠠᠶᠠᠷ ᠤ᠋ᠨ ᠰᠠᠷᠬᠤᠳ ᠢ᠋ ᠪᠠᠷᠢᠵᠤ ᠣᠯᠠᠨ ᠰᠠᠢᠳ ᠤ᠋ᠳ ᠢ ᠠᠪᠤᠨ ᠮᠥᠷᠭᠥᠬᠦᠶᠡ᠂ ᠡᠨᠡ ᠶᠢᠰᠦᠬᠡᠨ ᠨᠠᠰᠤᠲᠤ ᠶᠠᠨ ᠵᠢᠢ ᠠᠪᠠᠬᠠᠢ ᠮᠥᠨ ᠳᠠᠭᠠᠵᠤ ᠮᠥᠷᠭᠥᠲᠡᠯᠡ᠂ ᠣᠯᠠᠨ ᠬᠥᠮᠦᠨ ᠲᠠᠢᠽᠢ ᠥᠭᠡᠳᠡᠢ ᠭᠡᠮᠡᠨ ᠰᠣᠨᠣᠰᠤᠮᠠᠭᠴᠠ ᠦᠢᠮᠡᠭᠡᠨ ᠵᠣᠭᠰᠣᠨ᠂ ᠡᠵᠡᠨ ᠲᠠᠢᠽᠦ ᠳ᠋ᠦ᠍ᠷ ᠬᠤᠷᠢᠮ ᠪᠠᠷᠢᠨ᠂ ᠲᠡᠷᠢᠭᠦᠯᠡᠭᠰᠡᠨ ᠳᠥᠷᠪᠡᠨ ᠰᠠᠢᠳ ᠯᠤᠭᠠ᠂ ᠲᠡᠭᠰᠢ ᠰᠠᠴᠠᠭᠤ ᠰᠢᠷᠡᠭᠡᠨᠡ ᠰᠠᠭᠤᠯᠭᠠᠨ᠂ ᠬᠠᠷᠢᠭᠤ ᠲᠦᠰᠢᠮᠡᠳ ᠨᠠᠷ ᠬᠡᠰᠢᠭ ᠰᠠᠷᠬᠤᠳ ᠢ᠋ ᠪᠠᠷᠢᠯᠴᠠᠨ ᠰᠡᠯᠡᠭᠦᠨ ᠪᠣᠯᠤᠭᠰᠠᠨ ᠠᠪᠠᠰᠤ᠂ ᠬᠠᠵᠠᠭᠤ ᠠ᠋ᠴᠠ ᠡᠨᠡ ᠶᠠᠨ ᠵᠢᠢ ᠠᠪᠠᠬᠠᠢ ᠬᠡᠳᠦᠨ ᠠᠯᠬᠤᠮ ᠳᠠᠪᠰᠢᠵᠤ᠂ ᠥᠪᠡᠷ ᠦ᠋ᠨ ᠬᠤᠪᠢ ᠪᠠᠷ ᠬᠣᠶᠠᠷ ᠵᠡᠷᠭᠡ ᠰᠥᠭᠥᠳᠴᠦ ᠵᠢᠷᠭᠤᠭᠠᠨ ᠵᠡᠷᠭᠡ ᠮᠥᠷᠭᠥᠬᠦᠢ ᠳ᠋ᠦ᠍ᠷ ᠲᠥᠷᠥ ᠶ᠋ᠢᠨ ᠬᠣᠲᠠᠯᠠᠭᠠᠷ ᠶᠡᠬᠡᠯᠡ ᠭᠠᠢᠬᠠᠯᠳᠤᠪᠠ᠃
ᠲᠠᠢᠽᠢ ᠥᠭᠡᠳᠡᠢ ᠡᠴᠢᠭᠡ ᠡᠵᠡᠨ ᠦ᠌ ᠡᠮᠦᠨᠡ ᠲᠤᠯᠠ ᠪᠤᠰᠤᠳ ᠤ᠋ᠨ ᠮᠥᠷᠭᠥᠬᠦᠢ ᠶ᠋ᠢ ᠰᠠᠭᠤᠭᠰᠠᠭᠠᠷ ᠬᠦᠯᠢᠶᠡᠨ ᠠᠪᠴᠤ ᠪᠣᠯᠬᠤ ᠦᠭᠡᠢ᠂ ᠣᠷᠣᠭᠰᠢ ᠲᠠᠪᠰᠢᠰᠬᠢᠨ ᠲᠡᠳᠬᠦᠨ ᠪᠤᠰᠬᠠᠭᠠᠳ᠂ ᠵᠢᠴᠢ ᠲᠡᠷᠡ ᠥᠬᠢᠨ ᠦ᠌ ᠨᠢᠭᠤᠷ ᠢ᠋ ᠦᠵᠡᠭᠡᠳ ᠰᠣᠴᠢᠨ ᠭᠠᠢᠬᠠᠵᠤ᠂ ᠰᠠᠢᠰᠢᠶᠠᠨ ᠥᠭᠦᠯᠡᠷᠦᠨ᠄《ᠶᠠᠭᠤᠲᠠᠢ ᠨᠢᠭᠡᠨ ᠪᠤᠶᠠᠨ ᠬᠡᠰᠢᠭ ᠪᠦᠷᠢᠳᠦᠭᠰᠡᠨ ᠪᠤᠯᠪᠠᠷᠠᠢ ᠰᠠᠢᠬᠠᠨ ᠥᠬᠢᠨ ᠪᠣᠢ ?》 ᠬᠡᠮᠡᠪᠡ᠃ ᠲᠡᠷᠡ ᠶᠠᠨ ᠵᠢᠢ ᠠᠪᠠᠬᠠᠢ ᠴᠤ᠌ ᠥᠭᠡᠳᠡᠢ ᠲᠠᠢᠽᠦ ᠶ᠋ᠢᠨ ᠲᠥᠷᠥᠭᠰᠡᠨ ᠪᠠᠢᠳᠠᠯ ᠠᠨᠤ ᠲᠥᠪᠯᠡᠵᠦ ᠬᠥᠷᠥᠭᠯᠡᠭᠰᠡᠨ ᠵᠠᠯᠠᠭᠤ ᠰᠦᠯᠳᠡ ᠲᠡᠭᠷᠢ ᠮᠡᠲᠦ ᠰᠦᠷ ᠭᠡᠷᠡᠯ ᠴᠣᠭ ᠵᠢᠪᠬᠤᠯᠠᠩ ᠲᠠᠢ ᠶ᠋ᠢ ᠠᠨᠤ ᠦᠵᠡᠭᠡᠳ᠂ ᠳᠣᠲᠣᠷᠠ ᠠ᠋ᠴᠠᠭᠠᠨ ᠳᠣᠯᠭᠢᠰᠤᠨ ᠭᠠᠢᠬᠠᠵᠤ᠂ ᠳᠠᠬᠢᠨ ᠳᠠᠬᠢᠨ ᠰᠢᠷᠲᠡᠨ ᠬᠠᠷᠠᠵᠤ᠂ ᠪᠠᠢᠨ ᠪᠠᠢᠨ ᠪᠠᠬᠠᠷᠬᠠᠨ ᠥᠨᠳᠡᠢᠨ ᠬᠠᠷᠠᠬᠤᠢ ᠳ᠋ᠤᠷ ᠲᠠᠢᠽᠦ ᠳᠣᠲᠣᠷᠠ ᠪᠠᠨ ᠭᠠᠢᠬᠠᠵᠤ᠂ ᠶᠠᠨ ᠵᠢᠢ ᠠᠪᠠᠬᠠᠢ ᠠ᠋ᠴᠠ ᠠᠰᠠᠭᠤᠷᠤᠨ᠄《 ᠴᠢ ᠰᠠᠶᠢ ᠢᠷᠡᠭᠰᠡᠨ ᠲᠡᠷᠡ ᠬᠥᠮᠦᠨ ᠢ᠋ ᠲᠠᠨᠢᠮᠤᠢ ᠤᠤ ? ᠶᠠᠭᠤᠲᠠᠢ ᠤᠷᠢᠳᠠ ᠠ᠋ᠴᠠ ᠲᠠᠨᠢᠬᠤ ᠬᠥᠮᠦᠨ ᠮᠡᠲᠦ ᠳᠠᠬᠢᠨ ᠳᠠᠬᠢᠨ ᠬᠠᠷᠠᠮᠤᠢ ?》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠡᠷᠡ ᠥᠬᠢᠨ ᠰᠠᠭᠤᠭᠰᠠᠨ ᠰᠠᠭᠤᠳᠠᠯ ᠠ᠋ᠴᠠ ᠪᠣᠰᠴᠤ ᠰᠥᠭᠥᠳᠦᠨ ᠮᠥᠷᠭᠥᠵᠦ ᠮᠡᠳᠡᠭᠦᠯᠦᠷᠦᠨ᠄《ᠰᠠᠢᠳ ᠥᠬᠢᠨ ᠤᠭ ᠠ᠋ᠴᠠ ᠲᠠᠨᠢᠬᠤ ᠦᠭᠡᠢ ᠪᠥᠯᠥᠭᠡ᠃ ᠭᠠᠭᠴᠠ ᠳᠠᠭᠠᠴᠢᠭᠤᠯᠤᠨ ᠦᠵᠡᠪᠡᠰᠦ ᠰᠠᠬᠠᠯ ᠲᠠᠢ ᠲᠩᠷᠢᠯᠢᠭ ᠡᠴᠡ ᠰᠠᠬᠠᠯ ᠦᠭᠡᠢ ᠳᠡᠭᠷᠢᠯᠢᠭ ᠮᠡᠨᠳᠦᠯᠡᠭᠰᠡᠨ ᠳ᠋ᠦ᠍ᠷ ᠢᠨᠤ ᠭᠠᠢᠬᠠᠵᠤ ᠬᠠᠷᠠᠭᠰᠠᠨ ᠪᠥᠯᠥᠭᠡ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠡᠴᠡ ᠲᠡᠷᠢᠭᠦᠯᠡᠨ ᠲᠥᠷᠥ ᠬᠣᠲᠠᠯᠠᠭᠠᠷ ᠲᠦᠷᠴᠢᠭᠢᠨᠡᠲᠡᠯᠡ ᠢᠨᠢᠶᠡᠯᠴᠡᠵᠦ ᠭᠠᠢᠬᠠᠯᠳᠤᠪᠠᠢ᠃ ᠲᠠᠢᠽᠦ ᠬᠠᠷᠢᠨ ᠮᠠᠰᠢᠳᠠ ᠲᠠᠭᠠᠯᠠᠨ ᠪᠡᠶᠡᠰᠴᠦ᠂ ᠵᠠᠬᠢᠷᠤᠨ᠄《ᠡᠨᠡ ᠬᠡᠦᠬᠡᠨ ᠦ᠌ ᠡᠴᠢᠭᠡ ᠢᠨᠤ ᠬᠠᠭᠠᠨ ᠬᠥᠮᠦᠨ ᠲᠤᠯᠠᠳᠠ ᠳᠡᠭᠦᠨᠦ ᠥᠬᠢᠨ ᠦ᠌ ᠭᠦᠩᠵᠦ ᠴᠣᠯᠠ ᠶ᠋ᠢ ᠠᠨᠤ ᠠᠬᠤᠭᠤᠯᠵᠤ᠂ ᠲᠠᠨ ᠤ᠋ ᠣᠯᠠᠨ ᠢ᠋ᠶ᠋ᠠᠷ ᠨᠠᠢ᠍ᠮᠠᠨᠴᠢ ᠭᠦᠩᠵᠦ ᠭᠡᠮᠡᠨ ᠳᠠᠭᠤᠳᠠᠯᠴᠠᠭᠲᠤᠨ !》ᠭᠡᠮᠡᠨ ᠰᠣᠶᠣᠷᠬᠠᠭᠰᠠᠨᠠ᠂ ᠨᠠᠢ᠍ᠮᠠᠨᠴᠢ ᠭᠦᠩᠵᠦ ᠶ᠋ᠢᠨ ᠨᠠᠰᠤ ᠮᠠᠰᠢ ᠪᠠᠭᠠ ᠪᠥᠭᠡᠲᠡᠯᠡ᠂ ᠦᠳᠲᠡᠷ ᠳᠦᠷᠭᠡᠨᠡ ᠥᠨᠳᠡᠢᠨ ᠳᠠᠪᠰᠢᠵᠤ᠂ ᠦᠨᠡᠬᠡᠷ ᠭᠤᠷᠪᠠᠨ ᠵᠡᠷᠭᠡ ᠰᠥᠭᠥᠳᠴᠦ ᠶᠢᠰᠦᠨ ᠵᠡᠷᠭᠡ ᠮᠥᠷᠭᠥᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠲᠡᠭᠦᠨ ᠦ᠌ ᠰᠡᠴᠡᠨ ᠰᠡᠷᠭᠦᠯᠡᠩ ᠪᠠ ᠶᠣᠰᠣ ᠨᠣᠮ ᠠᠨᠤ ᠨᠠᠰᠤ ᠠ᠋ᠴᠠᠭᠠᠨ ᠬᠡᠲᠦᠢᠳᠦᠭᠰᠡᠨ ᠢ᠋ ᠢᠨᠦ ᠭᠠᠢᠬᠠᠨ ᠰᠠᠢᠰᠢᠶᠠᠵᠤ᠂ ᠱᠠᠭᠰᠢᠨ ᠮᠦᠰᠢᠶᠡᠵᠦ᠂ ᠱᠠᠩ ᠬᠡᠰᠢᠭ ᠢ᠋ ᠭᠦᠩᠵᠦ ᠶ᠋ᠢᠨ ᠬᠤᠪᠢᠶᠠᠷᠢ ᠪᠠᠷ ᠱᠠᠩᠨᠠᠭᠤᠯᠤᠨ《ᠢᠵᠠᠭᠤᠷᠲᠠᠨ ᠡᠭᠦᠳᠡᠨ ᠦ᠌ ᠢᠯᠭᠠᠮᠵᠢᠲᠠᠢ ᠦᠷᠡ᠂ ᠬᠠᠭᠠᠨ ᠬᠥᠮᠦᠨ ᠦ᠌ ᠬᠠᠢᠷᠠᠯᠠᠯᠲᠠᠢ ᠭᠦᠩᠵᠦ ᠪᠠᠢᠨᠠᠮ!》ᠬᠡᠮᠡᠵᠦ ᠨᠠᠢ᠍ᠮᠠᠨ ᠠᠢᠮᠠᠭ ᠤ᠋ᠨ ᠠᠯᠪᠠᠲᠤ ᠠ᠋ᠴᠠ ᠡᠷᠡ ᠡᠮᠡ ᠨᠠᠶᠠᠨ ᠠᠮᠠ ᠶ᠋ᠢ ᠰᠣᠩᠭᠣᠭᠤᠯᠤᠨ ᠠᠪᠤᠭᠤᠯᠵᠤ᠂ ᠨᠠᠢ᠍ᠮᠠᠨ ᠬᠥᠮᠦᠨ ᠦ᠌ ᠳᠠᠮᠨᠠᠭᠰᠠᠨ ᠰᠡᠦᠬᠡ ᠪᠡᠷ ᠤᠯᠤᠰ ᠲᠤᠷ ᠮᠢᠨᠦ ᠠᠪᠴᠤ ᠶᠠᠪᠤ ᠬᠡᠮᠡᠭᠰᠡᠨᠡ᠄
ᠨᠠᠢ᠍ᠮᠠᠨᠴᠢ ᠭᠦᠩᠵᠦ ᠲᠡᠷᠢᠭᠦᠯᠡᠨ
ᠨᠠᠢᠵᠢᠮ ᠤ᠋ᠨ ᠲᠦᠰᠢᠮᠡᠯ ᠰᠠᠭᠠ ᠯᠤᠭᠠ
ᠨᠠᠢᠷ ᠤ᠋ᠨ ᠡᠮᠦᠨᠡ ᠬᠡᠰᠢᠭ ᠲᠣᠷ ᠮᠥᠷᠭᠥᠪᠡ᠃
ᠨᠠᠮᠠᠶ᠋ᠢ ᠲᠠᠨᠢᠭᠴᠢ ᠵᠢᠨᠦᠩ ᠨᠠᠬᠠᠨ ᠦᠭᠡᠢ ᠪᠠᠶᠠᠷᠯᠠᠵᠤ
ᠨᠠᠢ᠍ᠮᠠᠨ ᠤᠯᠤᠰ ᠲᠣᠭᠲᠠᠨᠢᠪᠠᠢ᠃
ᠬᠡᠮᠡᠪᠡᠢ᠃ ᠡᠭᠦᠨᠦ ᠤᠴᠢᠷ ᠠᠨᠤ ᠶᠠᠭᠤᠨ? ᠬᠡᠮᠡᠪᠡᠰᠦ᠂ ᠡᠨᠡ ᠨᠠᠢ᠍ᠮᠠᠨᠴᠢ ᠭᠦᠩᠵᠦ ᠨᠠᠰᠤᠨ ᠪᠢᠴᠢᠬᠠᠨ ᠪᠥᠭᠡᠲᠡᠯᠡ ᠨᠣᠮ ᠶᠣᠰᠣᠯᠠᠯ ᠳ᠋ᠤᠷ ᠮᠠᠰᠢᠳᠠ ᠮᠡᠷᠭᠡᠨ ᠦ᠌ ᠲᠤᠯᠠᠳᠠ᠂ ᠨᠠᠰᠤᠲᠤ ᠲᠠᠢᠬᠡᠦ᠂ ᠬᠤᠸᠠᠩᠬᠡᠦ ᠲᠠᠨᠠ ᠭᠦᠨᠡ ᠥᠷᠦᠰᠢᠶᠡᠭᠳᠡᠵᠦ᠂ ᠨᠠᠰᠤᠨᠠ ᠬᠦᠷᠴᠦ ᠶᠡᠬᠡ ᠪᠣᠯᠤᠭᠰᠠᠨ ᠳ᠋ᠤᠷ ᠠᠨᠤ᠂ ᠨᠠᠢᠷᠲᠤ ᠲᠠᠢᠽᠢ ᠳ᠋ᠤᠷ ᠬᠠᠵᠠᠭᠤ ᠶ᠋ᠢᠨ ᠹᠧᠢ ᠪᠣᠯᠭᠠᠨ ᠡᠷᠭᠦᠮᠵᠢᠯᠡᠯᠦᠭᠡ᠃ ᠬᠣᠢᠨᠠ ᠲᠠᠢᠽᠥ᠋ᠩ ᠥᠭᠡᠳᠡᠢ ᠰᠠᠭᠤᠷᠢᠨ ᠢ ᠵᠠᠯᠭᠠᠮᠵᠢᠯᠠᠭᠠᠳ᠂ ᠬᠤᠪᠢᠲᠤ ᠨᠠᠢ᠍ᠮᠠᠨᠴᠢ ᠭᠥᠭᠵᠦ ᠳᠡᠪᠰᠢᠭᠰᠡᠭᠡᠷ ᠬᠤᠸᠠᠩᠬᠡᠦ ᠳ᠋ᠦ᠍ᠷ ᠬᠦᠷᠴᠦ᠂ ᠠᠷᠪᠠᠨ ᠭᠤᠷᠪᠠᠨ ᠣᠨ ᠠᠮᠤᠭᠤᠯᠠᠩ ᠢ᠋ᠶ᠋ᠠᠷ ᠮᠠᠰᠢᠳᠠ ᠵᠢᠷᠭᠠᠵᠤ᠂ ᠠᠴᠢᠯᠠᠯᠲᠤ ᠲᠠᠢᠽᠥ᠋ᠩ ᠬᠠᠭᠠᠨ ᠥᠭᠡᠳᠡ ᠪᠣᠯᠤᠨ ᠬᠠᠯᠢᠭᠰᠠᠨᠠ᠂ ᠠᠯᠢᠪᠠ ᠲᠠᠢᠽᠢ ᠨᠠᠷ ᠤ᠋ᠨ ᠠᠯᠢᠨᠠ ᠵᠠᠯᠭᠠᠮᠵᠢᠯᠠᠬᠤ ᠶ᠋ᠢ ᠠᠴᠢᠯᠠᠯᠲᠠᠨ᠂ ᠠᠷᠠᠢ ᠭᠦᠶᠦᠭ ᠳ᠋ᠢᠩᠽᠦ᠋ᠩ ᠢ᠋ ᠪᠠᠢᠭᠤᠯᠵᠤ᠂ ᠭᠤᠷᠪᠠᠬᠠᠨ ᠣᠨ ᠠᠶᠠ ᠪᠠᠰᠠ ᠲᠠᠭᠠᠯᠠᠯ ᠲᠡᠭᠦᠰᠴᠦ᠂ ᠬᠠᠭᠠᠨ ᠪᠠᠰᠠ ᠬᠠᠯᠢᠭᠰᠠᠨ ᠢ᠋ᠶ᠋ᠠᠷ ᠠᠷᠭᠠ ᠦᠭᠡᠢ ᠤᠷᠢᠳ ᠬᠣᠵᠢᠳ ᠲᠠᠢ ᠶᠢᠰᠦᠨ ᠣᠨ ᠲᠥᠷᠥ ᠶ᠋ᠢ ᠰᠠᠬᠢᠵᠤ ᠠᠯᠢ ᠡᠲᠡᠭᠡᠳ ᠢ᠋ ᠴᠦ᠍ ᠰᠠᠮᠠᠭᠤᠷᠠᠭᠤᠯᠤᠭᠰᠠᠨ ᠦᠭᠡᠢ ᠪᠡᠷ ᠰᠢᠶᠠᠡᠽᠦ᠋ᠩ ᠬᠠᠭᠠᠨ ᠢ ᠪᠠᠢᠭᠤᠯᠵᠤ᠂ ᠠᠷᠪᠠᠭᠠᠳ ᠣᠨ ᠲᠥᠷᠥ ᠶ᠋ᠢ ᠬᠠᠮᠠᠭᠠᠯᠠ᠊ᠨ ᠴᠢᠳᠠᠭᠰᠠᠨ ᠭᠠᠪᠢᠶᠠ ᠲᠠᠢ ᠭᠡᠮᠡᠨ ᠠᠩᠭᠢᠳᠠ ᠨᠢᠭᠡᠨ ᠨᠠᠢ᠍ᠮᠠᠨ ᠤ᠋ ᠲᠥᠷᠬᠥᠮ ᠢ᠋ ᠬᠦᠩ ᠪᠠᠢᠭᠤᠯᠤᠨ᠂ ᠠᠰᠢᠳᠠ ᠨᠢᠭᠡᠨ ᠬᠣᠰᠢᠭᠤ ᠭᠡᠮᠡᠨ ᠵᠠᠯᠭᠠᠮᠵᠢᠯᠠᠭᠤᠯᠤᠭᠰᠠᠨ ᠪᠥᠯᠥᠭᠡ᠃ ᠬᠠᠭᠠᠨ ᠠᠮᠢᠳᠤ ᠰᠡᠷᠡᠭᠦᠨ ᠠᠬᠤ ᠦᠶᠡᠰ ᠲᠣᠷ ᠵᠠᠯᠭᠠᠮᠵᠢᠯᠠᠭᠰᠠᠨ ᠦᠷᠡ ᠦᠭᠡᠢ ᠶ᠋ᠢᠨ ᠲᠤᠯᠠ᠂ ᠠᠯᠲᠠᠨ ᠶᠠᠰᠤᠲᠠᠨ ᠲᠠᠨ ᠢ᠋ᠶ᠋ᠠᠷ ᠨᠡᠷᠡ ᠶ᠋ᠢ ᠢᠨᠦ ᠣᠷᠣᠯᠠᠨ ᠵᠠᠯᠭᠠᠮᠵᠢᠯᠠᠨ ᠠᠪᠠᠢ ᠡᠳᠦᠭᠡ ᠪᠣᠯᠲᠠᠯᠠ ᠨᠠᠢ᠍ᠮᠠᠨ ᠬᠣᠰᠢᠭᠤ ᠭᠡᠮᠡᠨ ᠨᠡᠷᠡᠯᠡᠵᠦ ᠠᠭᠰᠠᠭᠠᠷ ᠪᠠᠢᠬᠤ ᠤᠴᠢᠷ ᠢ᠋ ᠮᠡᠳᠡᠪᠡᠰᠦ ᠵᠣᠬᠢᠨᠠᠮ ᠪᠢᠰᠢᠦ᠃ ᠠᠳᠠᠪᠠᠰᠢ ᠬᠣᠵᠢᠮ ᠤ᠋ᠨ ᠬᠡᠷᠡᠭ ᠲᠤᠯᠠ ᠠᠷᠪᠢᠨ ᠲᠣᠭᠠᠴᠢᠬᠤ ᠶ᠋ᠢ ᠪᠠᠢᠵᠤ᠂ ᠠᠯᠳᠠᠷᠲᠤ 《ᠬᠥᠬᠡ ᠰᠤᠳᠤᠷ 》ᠲᠤᠬᠠᠢᠲᠤ ᠬᠡᠷᠡᠭ ᠢ᠋ᠶ᠋ᠡᠨ ᠬᠡᠯᠡᠰᠦᠭᠡᠢ᠃
ᠵᠢᠷᠠᠨ ᠣᠨ ᠤ᠋ ᠳᠣᠲᠣᠷᠠᠬᠢ ᠶ᠋ᠢᠨ
ᠵᠠᠶᠠᠭᠠ ᠤᠯᠠᠷᠢᠯ ᠢ᠋ ᠮᠡᠳᠡᠭᠴᠢ ᠵᠢᠨᠦᠩ᠂
ᠮᠣᠬᠣᠰᠢ ᠦᠭᠡᠢ ᠣᠶᠤᠨᠲᠤ
ᠮᠣᠬᠣᠲᠠᠯᠠ ᠪᠣᠯᠪᠠᠰᠤᠷᠠᠭᠤᠯᠤᠨ ᠪᠣᠳᠣᠭᠴᠢ ᠮᠤᠬᠤᠯᠢ ᠪᠠᠷ
ᠠᠩᠬᠠᠨ ᠳ᠋ᠤᠷ ᠰᠠᠶᠢ ᠲᠠᠢᠽᠦ ᠪᠡᠷ
ᠠᠷᠪᠠᠨ ᠳᠦᠷᠪᠡᠭᠡᠨ ᠨᠠᠰᠤᠲᠠᠢ ᠥᠬᠢᠨ ᠢ᠋
ᠠᠮᠠᠳᠠᠨ ᠳᠤᠷᠠᠳᠴᠤ ᠭᠠᠷᠭᠠᠭᠰᠠᠨ ᠳᠠᠷᠤᠢ
ᠠᠷᠪᠠᠨ ᠠᠴᠢᠶᠠ ᠪᠠᠷᠢᠯᠭᠠ ᠶ᠋ᠢᠨ ᠡᠳ᠋ ᠢ᠋
ᠠᠪᠴᠤ ᠵᠡᠷᠭᠡᠯᠡᠨ ᠣᠪᠣᠭᠠᠯᠠᠨ ᠲᠠᠯᠪᠢᠭᠠᠳ
ᠠᠯᠭᠤᠷ ᠠᠭᠠᠵᠢᠮ ᠠᠢᠯᠠᠤᠬᠠᠨ ᠮᠡᠳᠡᠭᠦᠯᠦᠷᠦᠨ ᠄
《ᠠᠮᠢᠨ ᠬᠡᠯᠲᠦᠷᠢᠭᠰᠡᠨ ᠲᠠᠩᠭᠤᠳ ᠤ᠋ᠨ ᠥᠬᠢᠨ
ᠠᠴᠢ ᠳ᠋ᠤᠷ ᠬᠠᠷᠢᠭᠤᠯᠠᠬᠤ ᠠᠷᠪᠠᠨ ᠠᠴᠢᠶᠠ᠂
ᠠᠯᠲᠠᠨ ᠮᠠᠩᠨᠤᠭ ᠬᠣᠷᠢᠨ ᠰᠢᠷᠠ ᠶ᠋ᠢ
ᠠᠪᠤᠨ ᠢᠷᠡᠬᠦ ᠵᠠᠮ ᠤ᠋ᠨ ᠵᠠᠭᠤᠷᠠ ᠳ᠋ᠤᠷ ᠂
ᠴᠠ ᠲᠠᠢᠽᠢ ᠶ᠋ᠢᠨ ᠴᠠᠭᠳᠠᠭᠤᠯ ᠤ᠋ᠨ ᠴᠡᠷᠢᠭ
ᠴᠠᠪᠴᠢᠨ ᠪᠠᠷᠢᠵᠤ ᠠᠪᠤᠭᠠᠳ ᠢᠷᠡᠭᠰᠡᠨ ᠢ᠋
ᠡᠵᠡᠨ ᠡᠴᠢᠭᠡ ᠶ᠋ᠢᠨ ᠡᠭᠡᠭᠦᠯᠦᠭᠰᠡᠨ ᠬᠥᠮᠦᠨ ᠢ᠋
ᠡᠢᠨ ᠬᠦ᠌ ᠪᠠᠷᠢᠪᠠᠰᠤ ᠦᠯᠦ ᠪᠣᠯᠬᠤ ᠭᠡᠮᠡᠨ
ᠡᠭᠡᠭᠦᠯᠦᠨ ᠲᠠᠯᠪᠢᠵᠤ ᠢᠯᠡᠭᠡᠬᠦᠢ ᠶ᠋ᠢᠨ ᠵᠡᠪᠰᠡᠷᠡ᠂
ᠡᠨᠡ ᠥᠬᠢᠨ ᠢ᠋ᠶ᠋ᠡᠷ ᠡᠮᠭᠡᠨᠢᠨ ᠭᠤᠶᠤᠵᠤ
ᠡᠴᠢᠭᠡ ᠸᠠᠩ ᠤ᠋ᠨ ᠢ᠋ᠶ᠋ᠠᠷ ᠠᠮᠢᠨ ᠢ᠋ ᠠᠪᠤᠷᠠᠬᠤ
ᠡᠷᠲᠡ ᠣᠷᠣᠢ ᠶ᠋ᠢᠨ ᠴᠡᠷᠢᠭ ᠢ᠋ ᠭᠤᠶᠤᠭᠰᠠᠨ ᠳ᠋ᠤᠷ
ᠡᠵᠡᠨ ᠡᠴᠢᠭᠡ ᠡᠴᠡ ᠡᠰᠢᠯᠡᠵᠦ ᠥᠭᠰᠦᠭᠡᠢ ᠬᠡᠮᠡᠪᠡ᠃
ᠡᠨᠡ ᠡᠳᠦᠷ ᠡᠵᠡᠨ ᠦ᠌ ᠳᠤᠷᠠᠳᠬᠤᠢ ᠶ᠋ᠢᠨ ᠲᠠᠰᠢᠷᠠᠮ
ᠡᠷᠭᠦᠨ ᠮᠡᠳᠡᠭᠦᠯᠵᠦ ᠡᠰᠢ ᠵᠠᠬᠢᠶᠠ ᠡᠷᠢᠮᠦ
ᠡᠵᠡᠨ ᠮᠢᠨᠦ ᠠᠢᠯᠠᠳᠤᠨ ᠲᠣᠭᠲᠠᠭᠠ ᠭᠡᠮᠡᠨ ᠮᠥᠷᠭᠥᠭᠰᠡᠨᠡ᠃
ᠲᠠᠢᠽᠦ ᠵᠠᠬᠢᠷᠤᠨ :
ᠠᠮᠢ ᠪᠠᠨ ᠰᠢᠷᠭᠤᠭᠴᠢᠳ ᠢ᠋ ᠠᠪᠤᠷᠠᠬᠤ ᠠᠨᠤ
ᠠᠯᠢᠪᠠ ᠡᠵᠡᠳ ᠦ᠋ᠨ ᠡᠷᠬᠢᠯᠡᠳᠡᠭ ᠶᠠᠪᠤᠳᠠᠯ ᠪᠢᠰᠢᠦ᠃
ᠠᠯᠢ ᠴᠠᠭ ᠲᠤᠷ ᠬᠡᠷᠡᠭᠯᠡᠬᠦ ᠪᠥᠭᠡᠰᠦ
ᠠᠪᠤᠷᠠᠭᠴᠢ ᠵᠢᠨᠦᠩ ᠵᠣᠬᠢᠰ ᠢ᠋ᠶ᠋ᠠᠷ ᠠᠪᠠᠴᠢᠭᠲᠤᠨ ᠬᠡᠮᠡᠪᠡᠢ᠃
ᠠᠰᠠᠭᠤᠭᠰᠠᠨ ᠵᠢᠨᠦᠩ ᠦ᠋ᠨ ᠠᠮᠠᠨ ᠵᠠᠬᠢᠶᠠ ᠳ᠋ᠤᠷ ᠮᠥᠷᠭᠥᠨ
ᠠᠯᠪᠠᠨ ᠤ᠋ ᠠᠷᠠᠳ ᠢ᠋ ᠠᠪᠤᠨ ᠲᠠᠪᠰᠢᠨ ᠣᠷᠣᠵᠤ᠂
ᠠᠷᠠᠰᠤ ᠰᠢᠷᠢ ᠶ᠋ᠢ ᠬᠠᠩᠵᠠᠯᠤᠨ ᠨᠡᠭᠡᠭᠡᠵᠦ
ᠠᠯᠲᠠᠨ ᠰᠤᠪᠤᠳ ᠣᠭ᠌ᠶᠤ ᠱ᠌ᠢᠷᠦ ᠶ᠋ᠢᠨ ᠵᠦᠢᠯ ᠢ᠋
ᠠᠷᠪᠠᠨ ᠱᠧᠩ ᠦ᠋ᠨ ᠲᠤᠯᠤᠮ ᠢ᠋ ᠭᠠᠷᠭᠠᠵᠤ
ᠠᠩᠭᠢᠳᠠ ᠪᠠᠰᠠ ᠬᠠᠳᠬᠤᠮᠠᠯ ᠮᠠᠩᠨᠤᠭ ᠪᠦᠬᠦᠨ ᠢ᠋
ᠠᠯᠠᠭ ᠪᠤᠯᠠᠭ ᠲᠠᠪᠤᠨ ᠵᠠᠭᠤᠨ ᠣᠷᠢᠶᠠᠳᠠᠰᠤ ᠶ᠋ᠢ
ᠠᠷᠢᠭᠤᠨ ᠴᠠᠭᠠᠨ ᠬᠣᠨᠢᠨ ᠤ᠋ ᠢᠰᠡᠭᠡᠢ ᠳ᠋ᠦ᠍ᠷ ᠳᠡᠯᠭᠡᠨ
ᠠᠭᠠᠷ ᠣᠭᠲᠠᠷᠭᠤᠢ ᠲᠡᠭᠷᠢ ᠭᠠᠵᠠᠷ ᠲᠤᠷ ᠦᠵᠡᠭᠦᠯᠦᠨ
ᠠᠪᠴᠤ ᠰᠠᠶᠢ ᠰᠠᠩ ᠬᠠᠰᠢᠯᠭᠠ ᠳ᠋ᠤᠷ ᠣᠷᠣᠭᠤᠯᠤᠭᠤᠯᠪᠠᠢ᠃
ᠲᠡᠨᠳᠡᠴᠡ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠲᠠᠢᠽᠦ ᠲᠡᠷᠢᠭᠦᠯᠡᠨ ᠶᠡᠬᠡ ᠵᠢᠨᠦᠩ ᠮᠤᠬᠤᠯᠢ ᠣᠯᠠᠨ ᠢ᠋ ᠲᠡᠭᠰᠢᠯᠡᠨ ᠲᠠᠩᠭᠤᠳ ᠤᠯᠤᠰ ᠤ᠋ᠨ ᠵᠢᠷᠯᠤᠭ ᠬᠣᠲᠠ ᠶ᠋ᠢᠨ ᠯᠢ ᠵᠢᠢ ᠯᠢ ᠬᠣᠷᠣᠭᠠ ᠲᠡᠷᠢᠭᠦᠯᠡᠨ ᠣᠯᠠᠨ ᠭᠠᠵᠠᠷ ᠣᠷᠣᠨ ᠢ᠋ ᠡᠯᠰᠡᠨ ᠲᠡᠭᠰᠢᠯᠡᠬᠦ ᠪᠠ ᠣᠯᠠᠨ ᠰᠠᠢᠳ ᠲᠦᠰᠢᠮᠡᠳ ᠦ᠋ᠨ ᠴᠡᠷᠢᠭ ᠦ᠋ᠨ ᠭᠠᠪᠢᠶᠠ ᠵᠢᠳᠬᠦᠯ ᠢ᠋ ᠢᠯᠭᠠᠨ ᠰᠠᠯᠭᠠᠨ ᠬᠥᠬᠢᠭᠦᠯᠦᠨ ᠱᠠᠩᠨᠠᠵᠤ᠂ ᠵᠤᠨ ᠤ᠋ ᠲᠡᠷᠢᠭᠦᠨ ᠰᠠᠷᠠ ᠶ᠋ᠢᠨ ᠳᠣᠲᠣᠷᠠ᠂ ᠲᠠᠩᠭᠤᠳ ᠤ᠋ᠨ ᠪᠠᠷᠠᠭᠤᠨ ᠰᠢᠩ ᠵᠡᠪᠡ ᠳ᠋ᠦ᠍ᠷ ᠡᠴᠢᠵᠦ᠂ ᠡᠬᠡ ᠶ᠋ᠢᠨ ᠲᠦᠮᠡᠨ ᠥᠯᠵᠡᠢ ᠳ᠋ᠦ᠍ᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠶᠡᠬᠡ ᠪᠡᠯᠡᠭ ᠦ᠋ᠨ ᠬᠠᠷᠢᠭᠤ ᠮᠢᠩᠭᠠᠨ ᠠᠭᠲᠠ ᠪᠠᠷ ᠬᠠᠷᠢᠭᠤᠯᠠᠨ ᠸᠧᠢ ᠸᠠᠩ ᠶᠦᠩ ᠵᠢᠢ ᠤᠭᠲᠤᠨ ᠠᠪᠬᠤᠶᠠ ᠶᠡᠬᠡᠷᠬᠡᠭᠰᠡᠨᠡ ᠲᠠᠢᠽᠦ ᠬᠦᠨᠳᠦᠯᠡᠭᠰᠡᠨ ᠦᠭᠡᠢ᠂ ᠶᠦᠩ ᠵᠢᠢ ᠨᠡᠩᠳᠡ ᠬᠢᠯᠢᠩᠯᠡᠨ ᠡᠭᠡᠵᠦ ᠬᠣᠴᠢᠯᠠᠨ ᠬᠡᠯᠡᠪᠡ᠃ ᠡᠨᠡ ᠴᠢᠯᠦᠭᠡᠨᠡ᠂ ᠡᠮᠦᠨᠡᠲᠦ ᠰᠥᠩ ᠤᠯᠤᠰ ᠪᠠ ᠳᠤᠮᠳᠠᠳᠤ ᠠᠯᠲᠠᠨ ᠤᠯᠤᠰ ᠤ᠋ᠳ ᠤ᠋ᠨ ᠬᠡᠷᠡᠭ ᠶᠠᠪᠤᠳᠠᠯ ᠢ᠋ ᠥᠴᠦᠬᠡᠨ ᠲᠣᠪᠴᠢᠯᠠᠨ ᠭᠠᠷᠭᠠᠵᠤ᠂ ᠡᠨᠡ ᠬᠥᠬᠡᠭᠴᠢᠨ ᠦᠬᠡᠷ ᠵᠢᠯ ᠦ᠋ᠨ ᠡᠮᠦᠨᠡ ᠤᠮᠠᠷᠠ ᠶ᠋ᠢᠨ ᠦᠢᠯᠡᠰ ᠤᠴᠢᠷ ᠢ᠋ ᠪᠠᠬᠠᠨ ᠪᠦᠷᠢᠳᠬᠡᠬᠦ ᠢᠨᠣ᠄
ᠡᠨᠡ ᠦᠶᠡ ᠳ᠋ᠦ᠍ᠷ ᠡᠮᠦᠨᠡᠲᠦ ᠰᠥᠩ ᠤᠯᠤᠰ ᠤ᠋ᠨ ᠳᠥᠷᠪᠡᠳᠦᠭᠡᠷ ᠦᠶᠡ ᠶ᠋ᠢᠨ ᠡᠵᠡᠨ ᠰᠥᠩ ᠨᠢᠩᠽᠥ᠋ᠩ ᠵᠣᠣ ᠺᠦᠸᠧ ᠲᠥᠷᠥᠯᠬᠢ ᠵᠥᠭᠡᠯᠡᠨ ᠪᠠᠭᠤᠷᠠᠢ ᠶ᠋ᠢᠨ ᠳᠡᠭᠡᠷᠡ ᠪᠠᠰᠠ ᠵᠢᠶᠠᠩ ᠨᠠᠨ - ᠮᠥᠷᠡᠨ ᠦ᠌ ᠡᠮᠦᠨᠡᠲᠦ ᠶ᠋ᠢᠨ ᠨᠠᠷᠢᠨ ᠵᠥᠭᠡᠯᠡᠨ ᠦ᠌ ᠵᠢᠷᠭᠠᠯ ᠴᠡᠩᠭᠡᠯ ᠳ᠋ᠦ᠍ᠷ ᠰᠢᠨᠤᠬᠠᠢᠷᠠᠨ᠂ ᠠᠷᠢᠬᠢ ᠥᠩᠭᠡ᠂ ᠬᠥᠭ ᠳᠠᠭᠤᠨ᠂ ᠡᠭᠡᠰᠢᠭ ᠦᠵᠡᠮᠵᠢ ᠶ᠋ᠢᠨ ᠵᠡᠷᠭᠡ ᠶ᠋ᠢᠨ ᠵᠢᠷᠭᠤᠭᠠᠨ ᠤᠵᠢᠳ ᠤ᠋ᠨ ᠴᠡᠩᠭᠡᠯ ᠳ᠋ᠦ᠍ᠷ ᠨᠡᠷᠪᠡᠭᠳᠡᠨ ᠵᠢᠪᠦᠭᠡᠳ᠂ ᠡᠳᠦᠷ ᠳᠠᠭᠤᠰᠤᠨ᠂ ᠵᠦᠴᠦᠭᠡ ᠬᠥᠭᠵᠢᠮ ᠠᠷᠢᠬᠢ ᠬᠤᠷᠢᠮ ᠤ᠋ᠨ ᠬᠦᠷᠢᠶᠡᠯᠡᠩ ᠳ᠋ᠦ᠍ᠷ ᠬᠦᠵᠢᠰ ᠵᠠᠭᠠᠷ᠂ ᠴᠡᠴᠡᠭ ᠤᠳᠠ ᠯᠤᠭᠠ ᠵᠠᠭᠤᠷᠠᠯᠳᠤᠨ᠂ ᠣ ᠡᠩᠭᠡᠰᠬᠡ ᠶ᠋ᠢᠨ ᠰᠢᠬᠤᠢ᠂ ᠲᠠᠵᠢ ᠮᠠᠩᠨᠤᠭ ᠤ᠋ᠨ ᠬᠠᠷᠰᠢ ᠳ᠋ᠤᠷ ᠢ᠋ᠶ᠋ᠠᠨ ᠰᠢᠷᠢᠯᠳᠦᠨ᠂ ᠵᠠᠷᠢᠮ ᠳ᠋ᠤᠷ ᠬᠡᠳᠦ ᠬᠡᠳᠦᠨ ᠡᠳᠦᠷ ᠢ᠋ᠶ᠋ᠡᠷ ᠲᠥᠷᠥ ᠳ᠋ᠦ᠍ᠷ ᠭᠠᠷᠬᠤ ᠦᠭᠡᠢ᠂ ᠤᠯᠤᠰ ᠤ᠋ᠨ ᠦᠢᠯᠡ᠂ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠬᠡᠮᠡᠪᠡᠰᠦ ᠳᠤᠷᠠ ᠦᠭᠡᠢ᠂ ᠨᠢᠭᠡᠮᠦᠰᠦᠨ ᠵᠥᠭᠡᠯᠡᠨ ᠨᠡᠮᠡᠭᠦᠨ ᠦ᠌ ᠨᠠᠷᠢᠨ ᠵᠢᠭᠰᠠᠭᠠᠯ ᠳ᠋ᠤᠷ ᠤᠨᠠᠭᠠᠳ᠂ ᠥᠬᠢᠳ ᠦ᠋ᠨ ᠪᠥᠵᠢᠭ᠂ ᠡᠷᠡᠮᠳᠡᠭ ᠦ᠋ᠨ ᠮᠠᠭᠰᠢᠯᠭᠠ ᠪᠠᠷ ᠪᠦᠷᠢᠯᠭᠡᠨ ᠴᠢᠮᠡᠭᠯᠡᠨ ᠥᠩᠭᠡᠯᠡᠵᠦ ᠶᠠᠩᠵᠤᠯᠠᠬᠤ ᠠᠨᠤ ᠲᠠᠩᠭᠤᠳ ᠤᠯᠤᠰ ᠤ᠋ᠨ ᠡᠵᠡᠨ ᠯᠢ ᠴᠦᠨ ᠢᠦ ᠶ᠋ᠢᠨ ᠮᠠᠢᠭ ᠲᠠᠢᠭ ᠠ᠋ᠴᠠ ᠪᠠᠰᠠ ᠠᠷᠪᠠᠨ ᠬᠤᠪᠢ ᠢᠯᠡᠭᠦᠦ᠃ ᠡᠳᠦᠭᠡᠬᠢ ᠶ᠋ᠢᠨ ᠱᠧ ᠵᠢᠢ ᠲᠡᠢ ᠮᠢᠶᠣᠤ᠂ ᠲᠠᠪᠤᠨ ᠲᠠᠬᠢᠯᠭᠠ᠂ ᠨᠠᠢ᠍ᠮᠠᠨ ᠰᠥᠮᠡᠲᠦ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠦ᠌ ᠳᠦᠷᠢᠮ ᠢ᠋ᠶ᠋ᠡᠷ ᠳᠦᠷᠢᠮᠯᠡᠭᠴᠢ᠂ ᠡᠮᠦᠨᠡᠲᠦ ᠰᠥᠩ ᠤᠯᠤᠰ ᠤ᠋ᠨ ᠨᠢᠩᠽᠥ᠋ᠩ ᠵᠣᠣ ᠺᠦᠸᠧ᠂ ᠳᠤᠮᠳᠠᠳᠤ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠩᠽᠥ᠋ᠩ ᠸᠠᠨ ᠶᠠᠨ ᠵᠢᠩ᠂ ᠲᠠᠩᠭᠤᠳ ᠤᠯᠤᠰ ᠬᠤᠸᠠᠨᠽᠥ᠋ᠩ ᠯᠢ ᠴᠦᠨ ᠢᠣ᠂ ᠡᠨᠡ ᠭᠤᠷᠪᠠᠨ ᠬᠠᠭᠠᠨ ᠤ᠋ ᠳᠣᠲᠣᠷᠠ᠂ ᠪᠠᠬᠠᠨ ᠤᠬᠠᠭᠠᠨ ᠲᠤᠯᠭᠠᠭᠤᠷᠢᠲᠠᠢᠬᠠᠨ ᠠᠨᠤ ᠡᠨᠡ ᠵᠠᠩᠽᠥ᠋ᠩ ᠸᠠᠨ ᠶᠠᠨ ᠵᠢᠩ ᠢᠨᠣ᠂ ᠤᠯᠤᠰ ᠲᠥᠷᠥ ᠶ᠋ᠢᠨ ᠤᠷᠢᠳ ᠬᠣᠵᠢᠳ ᠢ᠋ ᠪᠠᠬᠠᠨ ᠪᠣᠳᠣᠵᠤ᠂ ᠬᠣᠢᠲᠤᠬᠢ ᠶ᠋ᠢ ᠠᠮᠠᠷᠬᠠᠯᠠᠨ᠂ ᠡᠮᠦᠨᠡᠬᠢ ᠶ᠋ᠢ ᠲᠤᠯᠤᠨ᠂ ᠤᠯᠤᠰ ᠤ᠋ᠨ ᠬᠡᠷᠡᠭ ᠢ᠋ᠶ᠋ᠡᠨ ᠬᠡᠷᠡᠭ ᠪᠣᠯᠭᠠᠮᠤᠢ᠃ ᠭᠠᠭᠴᠠ ᠡᠨᠡ ᠡᠮᠦᠨᠡᠲᠦ ᠰᠥᠩ ᠤᠯᠤᠰ ᠤ᠋ᠨ ᠡᠵᠡᠨ ᠨᠢᠩᠽᠥ᠋ᠩ ᠵᠣᠣ ᠺᠦᠸᠧ᠂ ᠤᠯᠤᠰ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠪᠦᠬᠦᠨ ᠢ᠋ ᠣᠭᠲᠣᠬᠠᠨ ᠴᠤ᠌ ᠬᠠᠢᠬᠤᠷᠬᠤ ᠦᠭᠡᠢ᠃ ᠭᠠᠭᠴᠠ ᠨᠢᠭᠡᠨ ᠲᠤᠢᠯ ᠤ᠋ᠨ ᠵᠠᠯᠢᠬᠠᠢ ᠬᠠᠷᠭᠢᠰ᠂ ᠬᠣᠪᠳᠣᠭ ᠠᠪᠯᠢᠭᠠᠴᠢ ᠬᠠᠨ ᠲᠦᠸᠧ ᠵᠧᠦ ᠬᠡᠮᠡᠭᠴᠢ ᠶ᠋ᠢ ᠴᠧᠩᠰᠢᠶᠠᠩ ᠪᠣᠯᠭᠠᠨ ᠴᠡᠷᠢᠭ ᠢᠷᠭᠡᠨ ᠦ᠌ ᠶᠡᠬᠡ ᠪᠠᠭᠠ ᠬᠡᠷᠡᠭ ᠵᠠᠷᠭᠤ ᠶ᠋ᠢ ᠲᠡᠷᠡ ᠨᠢᠭᠡᠬᠡᠨ ᠬᠥᠮᠥᠨᠡ ᠨᠢᠭᠡᠮᠦᠰᠦᠨ ᠨᠠᠢᠳᠠᠨ ᠲᠤᠰᠢᠶᠠᠭᠠᠳ᠂ ᠵᠣᠣ ᠺᠦᠸᠧ ᠵᠢᠷᠭᠠᠯ ᠳ᠋ᠠᠭᠠᠨ ᠰᠢᠨᠤᠵᠤ᠂ ᠰᠤᠯᠠ ᠲᠤᠩᠭᠠᠯᠠᠭ ᠲᠤᠷ ᠰᠣᠭᠲᠣᠭᠤᠷᠠᠭᠰᠠᠨ ᠳ᠋ᠤᠷ ᠡᠨᠡ ᠬᠣᠪᠳᠣᠭ ᠬᠠᠷᠭᠢᠰ ᠬᠠᠨ ᠲᠦᠸᠧ ᠵᠧᠦ ᠵᠠᠪᠰᠢᠨ ᠳᠠᠪᠰᠢᠵᠤ᠂ ᠡᠵᠡᠷᠬᠡᠨ ᠡᠵᠡᠲᠦᠭᠡᠳ ᠮᠥᠷᠡᠨ ᠦ᠌ ᠡᠮᠦᠨᠡ ᠦᠯᠡᠭᠰᠡᠨ ᠬᠡᠳᠦᠨ ᠮᠣᠵᠢ ᠳ᠋ᠤᠷ ᠢ᠋ᠶ᠋ᠠᠨ ᠬᠥᠨᠳᠡᠯᠡᠨ ᠭᠤᠯᠳᠤ ᠠᠭᠠᠰᠢᠯᠠᠨ ᠬᠥᠮᠦᠨ ᠢ᠋ ᠨᠢᠳᠦᠨ ᠳ᠋ᠦ᠍ᠷ ᠦᠵᠡᠬᠦ ᠦᠭᠡᠢ ᠪᠣᠯᠵᠤ᠂ ᠰᠡᠳᠬᠢᠯ ᠦ᠋ᠨ ᠲᠠᠪᠠ᠂ ᠰᠠᠨᠠᠭᠠᠨ ᠤ᠋ ᠵᠣᠷᠢᠭ ᠢ᠋ᠶ᠋ᠠᠷ ᠶᠠᠪᠤᠨ ᠡᠭᠡᠨᠡᠭᠲᠡ ᠨᠢᠭᠡᠨ ᠠᠩᠭᠢ ᠶ᠋ᠢᠨ ᠶᠡᠬᠡ ᠴᠡᠷᠢᠭ ᠪᠠᠢᠭᠤᠯᠵᠤ᠂ ᠥᠪᠡᠷᠦᠨ ᠪᠡᠶᠡ ᠪᠡᠷ ᠪᠠᠢᠯᠳᠤᠬᠤ ᠳᠠᠢᠯᠠᠬᠤ᠂ ᠠᠯᠠᠬᠤ ᠨᠢᠲᠤᠯᠬᠤ ᠡᠷᠬᠡ ᠲᠡᠢ ᠪᠣᠯᠤᠭᠠᠳ ᠡᠮᠦᠨᠡᠲᠦ ᠰᠥᠩ ᠤᠯᠤᠰ ᠲᠤᠷ ᠪᠠᠢᠨ ᠪᠠᠢᠨ ᠤᠷᠤᠭᠤᠯ ᠢ᠋ᠶ᠋ᠠᠷ ᠤᠷᠤᠯᠳᠤᠨ᠂ ᠪᠢᠴᠢᠭ ᠢ᠋ᠶ᠋ᠡᠷ ᠪᠢᠯᠴᠠᠯᠵᠠᠭᠤᠯᠤᠭᠴᠢ ᠵᠥᠷᠢᠭᠦᠦ ᠢᠰᠬᠦᠯᠡᠩ ᠬᠡᠯᠡᠯᠴᠡᠭᠴᠢ᠂ ᠬᠣᠴᠢᠯᠠᠭᠴᠢ ᠰᠠᠢᠳ ᠲᠦᠰᠢᠮᠡᠳ ᠭᠠᠷᠳᠠᠭ ᠲᠤᠯᠠ᠂ ᠲᠡᠳᠡᠭᠡᠷ ᠠᠷᠠᠳ ᠢ᠋ ᠠᠶᠤᠯᠭᠠᠨ ᠳᠠᠷᠤᠩᠭᠤᠢᠯᠠᠬᠤᠢ ᠶ᠋ᠢᠨ ᠲᠤᠯᠠᠳᠠ᠂ ᠤᠷᠢᠳᠤ ᠡᠵᠡᠨ ᠰᠢᠪᠠᠷ ᠮᠣᠷᠢ ᠪᠠᠷ ᠮᠥᠷᠡᠨ ᠢ᠋ ᠭᠡᠲᠦᠯᠪᠡ ᠭᠡᠮᠡᠨ ᠠᠷᠠᠳ ᠢᠷᠭᠡᠳ ᠢ᠋ ᠮᠡᠬᠡᠯᠡᠨ᠂ ᠡᠪᠳᠡᠷᠡᠭᠰᠡᠨ ᠰᠥᠩ ᠢ᠋ ᠵᠠᠯᠭᠠᠮᠵᠢᠯᠠᠨ ᠯᠢᠨ ᠠᠨ ᠬᠣᠲᠠ ᠳ᠋ᠤᠷ ᠰᠠᠭᠤᠭᠰᠠᠨ ᠠᠷᠪᠠᠳᠤᠭᠠᠷ ᠬᠠᠭᠠᠨ ᠰᠥᠩ ᠭᠣᠣᠽᠥ᠋ᠩ ᠦ᠋ᠨ ᠦᠶᠡ ᠠᠴᠠ ᠠᠯᠲᠠᠨ ᠤᠯᠤᠰ ᠤ᠋ᠨ ᠸᠠᠨ ᠶᠠᠨ ᠡᠦ ᠵᠣ᠌ ᠳ᠋ᠤᠷ ᠦᠬᠦᠲᠡᠯᠡ ᠳᠠᠷᠤᠭᠳᠠᠨ ᠪᠤᠰᠠᠨᠢᠲᠠᠯᠠ ᠭᠢᠰᠬᠢᠯᠡᠭᠳᠡᠵᠦ᠂ ᠨᠢᠭᠡᠨᠲᠡ ᠠᠪᠠᠭᠠ ᠡᠴᠢᠭᠡ ᠬᠠᠭᠠᠨ ᠭᠡᠮᠡᠨ ᠡᠷᠭᠦᠮᠵᠢᠯᠡᠨ᠂ ᠠᠯᠲᠠᠨ ᠤᠯᠤᠰ ᠢ᠋ ᠴᠦ᠍ ᠠᠪᠠᠭᠠ ᠡᠴᠢᠭᠡ ᠤᠯᠤᠰ ᠭᠡᠮᠡᠨ ᠡᠶᠡᠳᠡᠨ ᠳᠠᠭᠠᠵᠤ᠂ ᠵᠢᠯ ᠪᠦᠷᠢ ᠶ᠋ᠢᠨ ᠠᠯᠲᠠᠨ ᠮᠥᠩᠭᠥᠨ᠂ ᠲᠣᠷᠭᠠ ᠲᠥᠷᠭᠡ᠂ ᠱᠠ ᠱᠤ᠌ ᠶ᠋ᠢᠨ ᠵᠦᠢᠯ ᠦ᠋ᠨ ᠡᠳ᠋ ᠠᠭᠤᠷᠠᠰᠤᠨ ᠢ᠋ ᠬᠡᠳᠦ ᠬᠡᠳᠦᠨ ᠵᠠᠭᠤᠨ ᠲᠦᠮᠡᠨ ᠢ᠋ᠶ᠋ᠡᠷ ᠠᠯᠪᠠ ᠪᠠᠷᠢᠵᠤ ᠶᠠᠪᠤᠭᠰᠠᠭᠠᠷ ᠳᠥᠴᠢ ᠲᠠᠪᠢᠨ ᠣᠨ ᠪᠣᠯᠲᠠᠯᠠ ᠪᠢᠯᠳᠠᠤᠴᠢᠯᠠᠨ ᠬᠦᠨᠳᠦᠯᠡᠭᠰᠡᠭᠡᠷ ᠨᠢᠭᠡᠮᠦᠰᠦᠨ ᠳᠠᠳᠤᠭᠰᠠᠨ ᠢ᠋ ᠡᠨᠡ ᠬᠠᠷᠭᠢᠰ ᠬᠠᠨ ᠲᠦᠸᠧ ᠵᠧᠦ ᠴᠡᠷᠢᠭ ᠠᠶᠠᠨ ᠤ᠋ ᠠᠶᠤᠯ ᠲᠦᠭᠰᠢᠭᠦᠷᠢ ᠪᠠ ᠪᠠᠢᠯᠳᠤᠭᠠᠨ ᠳᠠᠢᠯᠠᠯᠳᠤᠭᠠᠨ ᠤ᠋ ᠪᠡᠷᠬᠡ ᠵᠣᠪᠠᠭᠤᠷᠢ ᠬᠢᠭᠡᠳ ᠡᠮᠦᠨᠡ ᠭᠠᠵᠠᠷ ᠤ᠋ᠨ ᠬᠥᠮᠦᠨ ᠤ ᠲᠥᠷᠥᠬᠦ ᠦᠬᠡᠨᠴᠡ ᠪᠠᠭᠤᠷᠠᠢ᠂ ᠤᠮᠠᠷᠠ ᠣᠭᠲᠠᠷᠭᠤᠢ ᠶ᠋ᠢᠨ ᠵᠠᠩᠵᠤᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠲᠡᠨᠡᠭ ᠴᠢᠭᠢᠷᠠᠭ ᠲᠤᠷ ᠦᠯᠦ ᠲᠡᠩᠴᠡᠬᠦ ᠬᠤᠪᠢᠶᠠᠷᠢ ᠢᠯᠭᠠᠮᠵᠢ ᠶ᠋ᠢ ᠥᠴᠦᠬᠡᠨ ᠴᠦ᠍ ᠮᠡᠳᠡᠬᠦ ᠦᠭᠡᠢ ᠪᠡᠷ ᠨᠢᠭᠡᠬᠡᠨ ᠴᠠᠭ ᠤ᠋ᠨ ᠬᠠᠷᠠᠩᠭᠤᠢ ᠣᠮᠣᠭ᠂ ᠬᠠᠷᠭᠢᠰ ᠠᠳᠬᠠᠭ ᠢ᠋ᠶ᠋ᠠᠷ ᠥᠪᠡᠷᠦᠨ ᠰᠦᠷ ᠡᠷᠬᠡ ᠪᠡᠨ ᠥᠰᠬᠡᠬᠦᠢ ᠶ᠋ᠢ ᠪᠣᠳᠣᠵᠤ ᠮᠤᠰᠬᠢᠨ ᠴᠢᠷᠮᠠᠢᠵᠤ ᠬᠦᠴᠦᠯᠡᠨ ᠱᠠᠭᠠᠷᠳᠠᠬᠤ ᠪᠣᠢ ᠶᠠ᠃ ᠴᠡᠷᠢᠭ ᠲᠡᠢᠨ ᠦᠷᠭᠦᠯᠵᠢᠯᠡᠨ ᠤᠯᠤᠰ ᠢᠷᠭᠡᠨᠡ ᠭᠠᠮᠰᠢᠭ ᠪᠣᠯᠭᠠᠨ᠂ ᠡᠳ᠋ ᠰᠠᠷᠨᠢᠨ ᠠᠮᠤ ᠳᠤᠲᠠᠵᠤ᠂ ᠠᠯᠪᠠᠨ ᠭᠤᠪᠴᠢᠭᠤᠷ ᠳᠠᠪᠬᠤᠷᠳᠠᠵᠤ᠂ ᠭᠠᠢᠯᠢ ᠬᠤᠷᠢᠶᠠᠯᠭᠠ ᠵᠤᠵᠠᠭᠠᠷᠠᠬᠤ ᠶ᠋ᠢ ᠪᠠᠬᠠᠨ ᠴᠤ᠌ ᠰᠠᠨᠠᠬᠤ ᠦᠭᠡᠢ᠂ ᠡᠮᠦᠨᠡ ᠵᠦᠭ ᠳᠤᠲᠠᠭᠠᠵᠤ ᠢᠷᠡᠨ᠂ ᠯᠢᠨ ᠠᠨ ᠬᠣᠲᠠ ᠳ᠋ᠤᠷ ᠰᠠᠭᠤᠵᠤ᠂ ᠭᠤᠤᠽᠦ᠋ᠩ ᠦ᠋ᠨ ᠵᠢᠶᠠᠨ ᠶᠠᠨ ᠤ᠋ ᠠᠩᠬᠠ ᠣᠨ ᠤ᠋ ᠤᠯᠠᠭᠠᠭᠴᠢᠨ ᠬᠣᠨᠢᠨ ᠵᠢᠯ ᠡᠴᠡ ᠡᠨᠡ ᠬᠥᠬᠡᠭᠴᠢᠨ ᠦᠬᠡᠷ ᠵᠢᠯ ᠪᠣᠯᠲᠠᠯᠠ᠂ ᠳᠠᠯᠠᠨ ᠶᠢᠰᠦᠨ ᠣᠨ ᠤ᠋ ᠳᠣᠲᠣᠷᠠ ᠳᠥᠴᠢᠭᠡᠳ ᠵᠢᠯ ᠠᠯᠲᠠᠨ ᠤᠯᠤᠰ ᠲᠤᠷ ᠰᠡᠭᠬᠢᠯ ᠦᠭᠡᠢ ᠳᠠᠷᠤᠭᠳᠠᠵᠤ᠂ ᠵᠠᠭᠤᠨ ᠵᠦᠢᠯ ᠢ᠋ᠶ᠋ᠡᠷ ᠭᠤᠲᠤᠭᠠᠭᠳᠠᠨ ᠳᠣᠷᠣᠮᠵᠢᠯᠠᠭᠳᠠᠵᠤ᠂ ᠭᠤᠶᠤᠴᠢᠯᠠᠨ ᠮᠥᠷᠭᠥᠵᠦ ᠠᠪᠠᠭᠠ ᠡᠴᠢᠭᠡ ᠪᠥᠯᠥᠭᠡ᠂ ᠡᠪᠦᠭᠡ ᠡᠴᠢᠭᠡ ᠪᠥᠯᠥᠭᠡ ᠭᠡᠮᠡᠨ ᠡᠷᠭᠦᠯᠬᠢᠯᠡᠨ ᠪᠠᠢᠵᠤ ᠡᠶᠡᠳᠡᠵᠦ᠂ ᠴᠡᠷᠢᠭ ᠲᠡᠢᠨ ᠵᠣᠭᠰᠣᠨ᠂ ᠵᠣᠪᠠᠯᠠᠩ ᠢ᠋ᠶ᠋ᠠᠨ ᠬᠥᠩᠭᠡᠷᠡᠭᠦᠯᠦᠭᠰᠡᠭᠡᠷ ᠠᠷᠠᠢᠬᠠᠨ ᠳᠥᠴᠢᠨ ᠢᠯᠡᠭᠦᠦ ᠲᠠᠪᠢᠭᠠᠳ ᠣᠨ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠣᠭᠲᠣ ᠰᠠᠨᠠᠬᠤ ᠦᠭᠡᠢ ᠪᠡᠷ ᠪᠠᠰᠠ ᠠᠯᠲᠠᠨ ᠤᠯᠤᠰ ᠲᠤᠷ ᠲᠣᠯᠣᠭᠠᠢ ᠳᠠᠷᠤᠭᠳᠠᠨ ᠠᠯᠪᠠ ᠪᠠᠷᠢᠬᠤ ᠦᠭᠡᠢ᠂ ᠥᠪᠡᠷ ᠦ᠋ᠨ ᠬᠦᠴᠦᠨ ᠢ᠋ ᠨᠡᠮᠡᠭᠳᠡᠭᠦᠯᠰᠦᠭᠡᠢ ᠭᠡᠮᠡᠨ ᠲᠡᠨᠡᠭ ᠬᠡᠦᠬᠡᠳ ᠮᠡᠲᠦ ᠪᠡᠷ ᠵᠣᠷᠢᠭ ᠮᠡᠳᠡᠨ ᠳᠤᠷᠠ ᠪᠠᠷ ᠦᠢᠯᠡᠳᠦᠨ ᠡᠭᠦᠰᠬᠡᠵᠦ᠂ ᠨᠢᠳᠤᠨᠤᠨ ᠤ᠋ ᠬᠥᠬᠡ ᠬᠤᠯᠤᠭᠠᠨᠠ ᠵᠢᠯ ᠡᠴᠡ ᠡᠬᠢᠯᠡᠨ᠂ ᠪᠠᠷᠠᠭᠤᠨ ᠱᠤ᠌ ᠶ᠋ᠢᠨ ᠭᠠᠵᠠᠷ ᠠ᠋ᠴᠠ ᠲᠡᠷᠢᠭᠦᠯᠡᠨ ᠡᠯᠡ ᠭᠠᠵᠠᠷ ᠣᠷᠣᠨ ᠤ᠋ ᠲᠡᠳᠡᠭᠡᠷ ᠰᠢᠳᠤᠷᠭᠤ ᠢᠷᠭᠡᠳ ᠢ᠋ ᠳᠠᠷᠤᠯᠠᠨ ᠬᠥᠨᠥᠭᠡᠵᠦ ᠠᠮᠢᠳᠤᠷᠠᠭᠴᠢ ᠬᠠᠷᠭᠢᠰ ᠪᠤᠷᠤᠩᠬᠤᠢ ᠪᠤᠰᠤᠴᠢᠷ ᠪᠣᠭᠣᠯᠴᠤᠳ ᠢ᠋ ᠡᠯᠰᠡᠨ ᠴᠤᠭᠯᠠᠭᠤᠯᠵᠤ ᠂ ᠴᠡᠷᠢᠭ ᠪᠠᠢᠭᠤᠯᠬᠤ ᠰᠢᠯᠲᠠᠭ ᠵᠢᠭᠠᠵᠤ᠂ ᠵᠢᠶᠦ᠋ᠨ᠂ ᠹᠦ ᠂ ᠵᠧᠦ ᠂ ᠰᠢᠶᠠᠨ ᠪᠦᠬᠦᠨ ᠡᠴᠡ ᠮᠣᠷᠢ ᠬᠣᠷᠢᠶᠠᠨ ᠡᠳ᠋ ᠲᠠᠲᠠᠪᠤᠷᠢᠯᠠᠨ᠂ ᠠᠮᠤ ᠨᠥᠭᠡᠵᠦ ᠵᠡᠪᠰᠡᠭ ᠦᠢᠯᠡᠳᠬᠦᠶᠡ ᠠᠯᠲᠠᠨ ᠤᠯᠤᠰ ᠤ᠋ᠨ ᠣᠯᠠᠨ ᠵᠥᠪᠯᠡᠯ ᠦ᠋ᠨ ᠰᠠᠢᠳ ᠤ᠋ᠳ ᠬᠡᠳᠦᠢᠨᠡᠢ ᠰᠣᠨᠣᠰᠴᠤ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠩᠽᠦ᠋ᠩ ᠬᠠᠭᠠᠨ ᠳ᠋ᠠᠭᠠᠨ ᠪᠣᠳᠣᠷᠣᠣᠯ ᠪᠢᠴᠢᠭ ᠠᠢᠯᠠᠳᠬᠠᠵᠤ᠄
《ᠡᠮᠦᠨᠡᠲᠦ ᠰᠥᠩ ᠤᠯᠤᠰ ᠨᠢᠳᠤᠨᠤᠨ ᠵᠢᠯ ᠬᠣᠢᠲᠤᠬᠢ ᠪᠧᠲ᠋ᠠ᠋ ᠤᠯᠤᠰ ᠪᠠ ᠲᠠᠩᠭᠤᠳ ᠤᠯᠤᠰ ᠢ᠋ ᠠᠮᠠᠷᠬᠠᠯᠠᠨ᠂ ᠶᠡᠬᠡ ᠪᠡᠯᠡᠭ ᠬᠥᠷᠭᠡᠭᠦᠯᠦᠨ ᠭᠤᠶᠤᠴᠢᠯᠠᠭᠠᠳ᠂ ᠡᠨᠡ ᠵᠢᠯ ᠣᠳᠣ ᠡᠮᠦᠨᠡ ᠵᠦᠭ ᠢ᠋ ᠠᠪᠬᠤ ᠶ᠋ᠢ ᠪᠡᠯᠡᠳᠬᠡᠯᠴᠡᠨ ᠪᠠᠢᠮᠤᠢ᠃ ᠰᠥᠩ ᠤᠯᠤᠰ ᠤ᠋ᠨ ᠤᠭ ᠲᠣᠭᠲᠠᠨᠢᠭᠰᠠᠨ ᠠᠨᠤ᠂ ᠰᠥᠩ ᠤᠯᠤᠰ ᠤ᠋ᠨ ᠵᠦᠩ ᠢ ᠵᠢᠶᠦ᠋ᠨ᠂ ᠪᠤᠤ ᠵᠢᠶᠧ ᠵᠢᠶᠦ᠋ᠨ ᠵᠡᠷᠭᠡ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠢ᠋ᠶ᠋ᠡᠷ ᠰᠥᠩ ᠤᠯᠤᠰ ᠤ᠋ᠨ ᠲᠠᠢᠽᠦ ᠶ᠋ᠢᠨ ᠺᠠᠢ ᠪᠤᠤ ᠶ᠋ᠢᠨ ᠣᠨ ᠠ᠋ᠴᠠ ᠡᠬᠢᠯᠡᠨ᠂ ᠳᠤᠮᠳᠠᠳᠤ ᠤᠯᠤᠰ ᠢ᠋ ᠪᠠᠢᠯᠳᠤᠵᠤ᠂ ᠬᠡᠵᠢᠶᠡ ᠬᠣᠵᠢᠮ ᠰᠥᠩ ᠵᠸᠨ᠋ᠽᠦ᠋ᠩ ᠦ᠋ᠨ ᠦᠶᠡ ᠶ᠋ᠢᠨ ᠲᠢᠶᠠᠨ ᠰᠢ ᠶ᠋ᠢᠨ ᠣᠨ ᠪᠣᠯᠲᠠᠯᠠ ᠲᠠᠪᠢᠨ ᠵᠢᠯ ᠪᠠᠢᠯᠳᠤᠵᠤ ᠰᠠᠶᠢ ᠳᠤᠮᠳᠠᠳᠤ ᠤᠯᠤᠰ ᠢ᠋ ᠪᠦᠷᠢᠨ ᠣᠯᠤᠭᠰᠠᠨ ᠪᠥᠭᠡᠲᠡᠯᠡ ᠪᠢᠳᠡ ᠡᠳᠦᠭᠡ ᠡᠷᠲᠡᠬᠡᠨ ᠡᠰᠡ ᠵᠠᠪᠰᠢᠪᠠᠰᠤ ᠯᠠᠪ ᠣᠯᠤᠭᠰᠠᠨ ᠭᠠᠵᠠᠷ ᠣᠷᠣᠨ ᠢ᠋ ᠡᠭᠡᠭᠦᠯᠦᠨ ᠠᠪᠲᠠᠮᠤᠢ᠃ ᠡᠳᠦᠭᠡ ᠰᠥᠩ ᠤᠯᠤᠰ ᠤ᠋ᠨ ᠪᠡᠯᠡᠳᠬᠡᠬᠦ ᠠᠨᠤ ᠴᠥᠮ ᠵᠦᠩ ᠢ᠂ ᠪᠤᠤ ᠵᠢᠶᠧ ᠶ᠋ᠢᠨ ᠠᠳᠠᠯᠢ ᠴᠡᠷᠢᠭ ᠪᠣᠯᠠᠢ !》 ᠬᠡᠮᠡᠭᠰᠡᠨᠡ ᠠᠯᠲᠠᠨ ᠤ᠋ ᠵᠠᠩᠽᠦ᠋ᠩ ᠬᠠᠭᠠᠨ ᠳᠠᠷᠤᠢ ᠫᠦ ᠰᠠᠨ ᠺᠦᠢ ᠶ᠋ᠢ ᠫᠢᠩ ᠵᠠᠩ ᠵᠧᠩ ᠱᠢ ᠪᠥᠭᠡᠳ ᠾᠧᠨᠠᠨ ᠮᠣᠵᠢ ᠶ᠋ᠢᠨ ᠨᠡᠢᠭᠡᠮᠯᠡᠨ ᠵᠠᠬᠢᠷᠬᠤ ᠶᠡᠬᠡ ᠰᠢᠦᠸᠠᠨ ᠹᠦ ᠱᠢ ᠲᠦᠰᠢᠮᠡᠯ ᠢ᠋ ᠬᠠᠪᠰᠤᠷᠤᠭᠤᠯᠤᠨ᠂ ᠪᠠᠰᠠ ᠪᠢᠶᠠᠨ ᠯᠢᠶᠠᠩ ᠤ᠋ᠨ ᠴᠡᠷᠢᠭ ᠲᠡᠢ ᠠᠪᠴᠤ ᠡᠮᠦᠨᠡ ᠵᠦᠭ ᠣᠷᠣᠪᠠ᠃ ᠡᠨᠡ ᠭᠤᠷᠪᠠᠨ ᠰᠡᠷᠡᠳᠡ᠂ ᠭᠡᠭᠡᠬᠡᠨ ᠡᠳᠦᠷ ᠨᠡᠷᠡᠨᠡ ᠲᠠᠢ ᠪᠠᠢ - ᠴᠣᠯᠮᠣᠨ ᠬᠡᠮᠡᠬᠦ ᠠᠯᠲᠠᠨ ᠣᠳᠣᠨ ᠦᠵᠡᠭᠳᠡᠵᠦ ᠰᠥᠩ ᠤᠯᠤᠰ ᠬᠠᠷᠠᠬᠠᠨ ᠦᠢᠮᠡᠯᠳᠦᠬᠦᠶᠡ᠂ ᠠᠯᠲᠠᠨ ᠤ᠋ ᠴᠡᠷᠢᠭ ᠦ᠋ᠨ ᠮᠡᠳᠡᠭᠡ ᠳᠣᠪᠲᠣᠯᠤᠨ ᠬᠦᠷᠴᠦᠬᠦᠢ᠃
ᠮᠤᠬᠤᠯᠢ ᠪᠤᠭᠤᠷᠵᠢ ᠶ᠋ᠢᠨ ᠰᠢᠯᠦᠭᠯᠡᠯ ᠪᠡᠯᠡᠭᠯᠡᠯ ᠦᠨᠡᠬᠡᠷ ᠶᠠᠭᠤᠲᠠᠢ ᠴᠤ᠌ ᠰᠠᠢᠬᠠᠨ!
ᠮᠣᠩᠭᠣᠯ ᠤ᠋ᠨ ᠪᠣᠭᠳᠠ ᠶ᠋ᠢᠨ ᠰᠠᠢᠰᠢᠶᠠᠯ ᠢᠷᠦᠭᠡᠳ ᠦᠶᠡ ᠤᠯᠠᠷᠢᠲᠠᠯᠠ ᠰᠢᠩᠭᠡᠵᠦᠬᠦᠢ᠃
ᠮᠤᠬᠤᠭᠳᠠᠯ ᠭᠠᠴᠢᠭᠳᠠᠯ ᠤ᠋ᠨ ᠨᠠᠢ᠍ᠮᠠᠨᠴᠢ ᠭᠦᠩᠵᠦ ᠨᠠᠬᠠᠨ ᠴᠤ᠌ ᠦᠭᠡᠢ ᠢᠷᠦᠭᠡᠯᠲᠡᠢ᠂
ᠮᠤᠳᠣᠳᠠᠭᠠᠨ ᠮᠥᠷᠭᠥᠭᠰᠡᠨ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠮᠣᠬᠣᠰᠢ ᠦᠭᠡᠢ ᠴᠢᠳᠠᠪᠤᠷᠢᠲᠠᠢ᠃