ᠭᠠᠯ ᠰᠠᠬᠢᠭᠤᠯᠰᠤᠨ – ᠴᠣ ᠂ ᠣᠷᠱᠤᠨ Гал сахиусан – Чо ᠂ Оршин
245ᠭᠠᠯ ᠰᠠᠬᠢᠭᠤᠯᠰᠤᠨ
ᠡᠷᠦᠬᠡ ᠶ᠋ᠢ ᠮᠢᠨᠢ ᠲᠠᠲᠠᠭᠠᠳ
ᠦᠨᠢᠶᠡ ᠪᠡᠨ ᠰᠠᠭᠠᠵᠤ
ᠲᠤᠭᠤᠯ ᠢ᠋ᠶ᠋ᠠᠨ ᠵᠡᠯᠡᠯᠡᠬᠦ ᠳ᠋ᠡᠭᠡᠨ
ᠭᠠᠯ ᠢ᠋ᠶ᠋ᠠᠨ ᠨᠣᠴᠣᠭᠠᠵᠤ
ᠲᠤᠯᠭᠠ ᠪᠠᠨ ᠬᠥᠭᠵᠢᠭᠡᠭᠡᠳ
ᠭᠠᠩ ᠲᠣᠭᠣᠭᠠ ᠪᠠᠨ ᠲᠠᠯᠪᠢᠵᠤ
ᠰᠦ ᠪᠡᠨ ᠬᠦᠰᠢᠶᠡᠬᠦ ᠳ᠋ᠡᠭᠡᠨ
ᠡᠴᠢᠭᠡ ᠡᠬᠡ ᠶ᠋ᠢ ᠮᠢᠨᠢ ᠡᠨᠡᠷᠢᠨ ᠠᠰᠠᠷᠠᠵᠤ
ᠡᠳᠦᠷ ᠲᠤᠷᠰᠢ ᠠᠵᠢᠯ ᠳ᠋ᠤ᠌ ᠮᠣᠩᠭᠢᠨᠠᠬᠤ ᠳ᠋ᠠᠭᠠᠨ
ᠴᠢ ᠮᠢᠨᠢ ᠬᠡᠦᠬᠡᠨ ᠬᠥᠮᠦᠨ ᠦ᠌
ᠵᠠᠶᠠᠭᠠ ᠡᠢᠮᠦ ᠭᠡᠵᠦ ᠪᠣᠳᠣᠳᠠᠭ ᠴᠤ᠌ ᠪᠣᠯ ᠤᠤ?
ᠬᠥᠪᠡᠭᠦᠨ ᠨᠠᠳᠠ ᠳ᠋ᠠᠭᠠᠨ ᠬᠠᠷᠠᠮᠰᠠᠵᠤ ᠰᠠᠨᠠᠨ
ᠭᠣᠮᠣᠳᠠᠳᠠᠭ ᠴᠤ᠌ ᠪᠣᠯ ᠤᠤ?
ᠦᠷᠡ ᠬᠡᠦᠬᠡᠳ ᠢ᠋ ᠮᠢᠨᠢ
ᠥᠰᠬᠡᠬᠦ ᠪᠡᠷ ᠨᠣᠴᠣᠯᠳᠤᠵᠤ
ᠦᠳᠡᠰᠢ ᠶ᠋ᠢᠨ ᠭᠦᠨ ᠪᠣᠯᠲᠠᠯᠠ
ᠣᠶᠣᠳᠠᠯ ᠬᠢᠬᠦ ᠳ᠋ᠡᠭᠡᠨ
ᠰᠠᠯᠪᠠᠷᠠᠵᠤ ᠤᠷᠠᠭᠳᠠᠭᠰᠠᠨ
ᠬᠤᠪᠴᠠᠰᠤ ᠶ᠋ᠢ ᠮᠢᠨᠢ ᠨᠥᠬᠥᠵᠦ
ᠰᠠᠷᠠ ᠲᠠᠢ ᠰᠥᠨᠢ
ᠨᠣᠢᠷ ᠦᠭᠡᠢ ᠰᠠᠭᠤᠬᠤ ᠳ᠋ᠠᠭᠠᠨ
ᠴᠢ ᠮᠢᠨᠢ ᠬᠡᠦᠬᠡᠨ ᠬᠥᠮᠦᠨ ᠦ᠌
ᠵᠠᠶᠠᠭᠠ ᠡᠢᠮᠦ ᠭᠡᠵᠦ ᠪᠣᠳᠣᠳᠠᠭ ᠴᠤ᠌ ᠪᠣᠯ ᠤᠤ?
ᠬᠥᠪᠡᠭᠦᠨ ᠨᠠᠳᠠ ᠳ᠋ᠠᠭᠠᠨ ᠬᠠᠷᠠᠮᠰᠠᠵᠤ ᠰᠠᠨᠠᠨ
ᠭᠣᠮᠣᠳᠠᠳᠠᠭ ᠴᠤ᠌ ᠪᠣᠯ ᠤᠤ?
ᠬᠠᠢᠷᠠ ᠶ᠋ᠢᠨ ᠰᠡᠳᠬᠢᠯ
ᠶᠠᠮᠠᠷ ᠴᠤ᠌ ᠪᠠᠢᠭ
ᠬᠠᠯᠠᠭᠤᠨ ᠴᠤ᠌ ᠭᠡᠳᠡᠭ
ᠭᠠᠯ ᠴᠤ᠌ ᠭᠡᠳᠡᠭ
ᠬᠠᠢᠷᠠᠲᠤ ᠴᠢᠮᠠᠶ᠋ᠢ ᠪᠠᠨ
ᠪᠢ ᠯᠡ ᠣᠢᠯᠠᠭᠠᠨᠠ
ᠬᠠᠷᠢᠨ ᠴᠢ
ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡ ᠭᠡᠪᠡᠯ
ᠭᠠᠯ ᠶᠤᠮ᠂ ᠴᠢ ᠮᠢᠨᠢ
ᠭᠠᠯ ᠭᠣᠯᠣᠮᠲᠠ ᠶ᠋ᠢᠨ ᠰᠠᠬᠢᠭᠤᠯᠰᠤᠨ ᠶᠤᠮ᠃
ᠭᠠᠯ ᠨᠣᠴᠣᠳᠠᠭ ᠠ᠋ᠴᠠ
ᠰᠡᠳᠬᠢᠯ ᠮᠢᠨᠢ ᠬᠥᠯᠳᠡᠬᠦ ᠦᠭᠡᠢ
ᠭᠠᠯ ᠨᠤᠷᠮᠠᠯᠠᠳᠠᠭ ᠠ᠋ᠴᠠ
ᠲᠤᠯᠭᠠ ᠮᠢᠨᠢ ᠤᠨᠲᠠᠷᠠᠬᠤ ᠦᠭᠡᠢ
ᠭᠠᠯ ᠲᠤᠶᠠᠭᠠᠷᠠᠳᠠᠭ ᠠ᠋ᠴᠠ
ᠭᠡᠷ ᠮᠢᠨᠢ ᠳᠤᠯᠠᠭᠠᠨ
ᠭᠠᠯ ᠳᠤᠯᠠᠭᠠᠴᠠᠭᠤᠯᠳᠠᠭ ᠠ᠋ᠴᠠ
ᠠᠮᠢᠳᠤᠷᠠᠯ ᠮᠢᠨᠢ ᠥᠷᠨᠢᠭᠦᠨ!
ᠢᠷᠡᠯᠲᠡ᠄· ᠴᠣ· ᠣᠷᠱᠤᠨ ᠤ᠋《 ᠮᠠᠯᠴᠢᠨ ᠬᠥᠮᠦᠨ ᠦ᠌ ᠳᠠᠭᠤᠤ》 ᠨᠣᠮ ᠠ᠋ᠴᠠ ᠡᠰᠢᠯᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠷᠴᠡᠴᠡᠭ
2024 04 18