ᠰᠢᠯᠦᠭ ᠦ᠋ᠨ ᠰᠢᠯᠦᠭ- ᠱ᠂ ᠭᠦᠷᠦᠪᠠᠽᠠᠷШүлгийн шүлэг-Ш᠂ Гүрбазар
413ᠰᠢᠯᠦᠭ ᠦ᠋ᠨ ᠰᠢᠯᠦᠭ
ᠱ᠂ ᠭᠦᠷᠦᠪᠠᠽᠠᠷ
ᠭᠤᠴᠢᠨ ᠵᠢᠯ
ᠨᠠᠢᠷᠠᠭ ᠤ᠋ᠨ ᠭᠠᠯ ᠳ᠋ᠤ᠌ ᠭᠠᠷ ᠢ᠋ᠶ᠋ᠠᠨ ᠡᠭᠡᠭᠡᠵᠦ
ᠭᠤᠶᠤᠯᠭᠠᠴᠢᠨ ᠬᠠᠭᠠᠨ ᠬᠣᠶᠠᠷ ᠤ᠋ᠨ
ᠵᠣᠪᠠᠯᠠᠩ ᠯᠠ ᠡᠷᠢᠶᠡᠴᠢᠭᠰᠡᠨ ᠦ᠌ ᠬᠡᠷᠡᠭ ᠶᠠᠭᠤ ᠪᠢᠯᠡ
ᠡᠮᠡᠭᠡᠯ ᠢ᠋ᠶ᠋ᠡᠨ ᠲᠡᠭᠡᠭᠡᠭᠰᠡᠨ ᠮᠣᠷᠢᠨ ᠤ᠋
ᠴᠠᠩᠭᠠ ᠶ᠋ᠢ ᠨᠠᠮᠵᠢᠲᠠᠯᠠ ᠰᠢᠯᠦᠭ ᠪᠢᠴᠢᠶᠡ᠂ ᠪᠠᠢᠵᠠ
ᠡᠬᠡᠨᠡᠷ ᠲᠡᠭᠡᠨ ᠬᠠᠶᠠᠭᠳᠠᠭᠰᠠᠨ ᠬᠥᠮᠦᠨ ᠢ᠋
ᠥᠪᠡᠷ ᠲᠡᠭᠡᠨ ᠪᠠᠶᠠᠷᠯᠠᠲᠠᠯᠠ ᠨᠢ ᠰᠢᠯᠦᠭ ᠪᠢᠴᠢᠶᠡ᠂ ᠪᠠᠢᠵᠠ
ᠢᠨᠵᠠᠨᠨᠠᠰᠢ ᠶ᠋ᠢ ᠲᠡᠮᠲᠡᠷᠢᠵᠦ
ᠶᠡᠬᠡ ᠨᠠᠴᠤᠭᠳᠣᠷᠵᠢ ᠶ᠋ᠢ ᠴᠡᠭᠡᠵᠢᠯᠡᠵᠦ
ᠶᠠᠪᠤᠭᠤᠬᠤᠯᠠᠩ ᠲᠠᠢ ᠠᠮᠢᠳᠤ ᠳ᠋ᠤᠨᠢ
ᠢᠷᠦᠭᠡᠯ ᠬᠤᠨᠳᠠᠭᠠ ᠲᠤᠯᠭᠠᠵᠤ ᠦᠵᠡᠭᠰᠡᠨ ᠦ᠌ ᠪᠤᠶᠠᠨ ᠨᠢ ᠶᠠᠭᠤ ᠪᠢᠯᠡ
ᠪᠠᠯ ᠳ᠋ᠤᠨᠢ ᠢᠨᠴᠠᠭᠠᠭᠰᠠᠨ ᠤᠨᠠᠭᠠᠨ ᠤ᠋ ᠦᠦᠷᠰᠡᠭᠡ ᠶ᠋ᠢ
ᠣᠷᠭᠢᠯ ᠳ᠋ᠤᠨᠢ ᠰᠣᠨᠣᠰᠲᠠᠯᠠ ᠰᠢᠯᠦᠭ ᠪᠢᠴᠢᠶᠡ᠂ ᠪᠠᠢᠵᠠ
ᠪᠤᠷᠬᠠᠨ ᠤ᠋ ᠵᠣᠬᠢᠶᠠᠩᠭᠤᠢ ᠶ᠋ᠢ ᠥᠭᠡᠷᠡᠴᠢᠯᠡᠵᠦ
ᠣᠷᠴᠢᠯᠠᠩ ᠢ᠋ ᠤᠢᠮᠤᠷᠠᠲᠠᠯᠠ ᠰᠢᠯᠦᠭ ᠪᠢᠴᠢᠶᠡ᠂ ᠪᠠᠢᠵᠠ
ᠬᠠᠯᠬᠠ ᠶ᠋ᠢᠨ ᠰᠠᠢᠬᠠᠨ ᠪᠦᠰᠡᠭᠦᠢ ᠶ᠋ᠢ
ᠡᠩᠭᠡᠷ ᠢ᠋ᠶ᠋ᠡᠨ ᠰᠤᠯᠠᠯᠠᠲᠠᠯᠠ ᠨᠢ ᠰᠢᠯᠦᠭ ᠪᠢᠴᠢᠶᠡ᠂ ᠪᠠᠢᠵᠠ
ᠬᠠᠵᠠᠭᠠᠷ ᠲᠠᠭᠠᠨ ᠪᠡᠶᠡᠯᠡᠭᠰᠡᠨ ᠮᠣᠷᠢᠳ ᠢ᠋
ᠡᠮᠡᠭᠡᠯ ᠲᠡᠢ ᠪᠡᠨ ᠪᠥᠵᠢᠲᠡᠯᠡ ᠨᠢ ᠰᠢᠯᠦᠭ ᠪᠢᠴᠢᠶᠡ᠂ ᠪᠠᠢᠵᠠ
ᠳᠣᠮᠣᠭ ᠰᠢᠭ᠋ ᠵᠠᠩᠰᠢᠯ ᠲᠠᠢ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ
ᠨᠠᠢᠷᠠᠭᠴᠢ ᠭᠡᠭᠳᠡᠭᠰᠡᠨ ᠦ᠌ ᠬᠡᠷᠡᠭ ᠶᠠᠭᠤ ᠪᠢᠯᠡ
ᠳᠣᠷᠣᠨᠠ ᠶ᠋ᠢᠨ ᠪᠤᠭᠤᠷᠤᠯ ᠲᠡᠦᠬᠡ ᠶ᠋ᠢ
ᠨᠠᠷᠠ ᠲᠠᠢ ᠲᠡᠩᠴᠡᠭᠡᠳᠡᠯᠡ ᠰᠢᠯᠦᠭ ᠪᠢᠴᠢᠶᠡ᠂ ᠪᠠᠢᠵᠠ
ᠨᠠᠮᠢᠷᠠᠭᠰᠠᠨ ᠬᠠᠳᠠᠨ ᠤ᠋ ᠰᠡᠵᠢᠭᠦᠷ ᠢ᠋ᠶ᠋ᠡᠷ
ᠰᠠᠯᠬᠢ ᠨᠢ ᠦᠨᠦᠰᠴᠦ ᠥᠭᠰᠥᠳᠡᠭ
ᠨᠠᠮᠤᠷ ᠡᠪᠦᠯ ᠦ᠋ᠨ ᠵᠢᠷᠭᠤᠭᠠᠨ ᠰᠠᠷᠠ ᠶ᠋ᠢᠨ
ᠨᠠᠷᠠ ᠶ᠋ᠢ ᠥᠨᠵᠢᠲᠡᠯᠡ ᠰᠢᠯᠦᠭ ᠪᠢᠴᠢᠶᠡ᠂ ᠪᠠᠢᠵᠠ
ᠣᠩᠭᠣᠳ ᠠᠪᠢᠶᠠᠰ ᠮᠢᠨᠢ ᠮᠡᠬᠦᠰᠳᠡᠭᠡᠳ
ᠣᠳᠣ ᠪᠢ ᠬᠦᠴᠦᠷᠡᠬᠦ ᠦᠭᠡᠢ ᠴᠤ᠌
ᠪᠢᠯᠢᠭᠦᠨ ᠬᠡᠢᠮᠣᠷᠢ ᠲᠠᠢ ᠬᠣᠢᠴᠢ ᠦᠶᠡ ᠮᠢᠨᠢ
ᠪᠢᠷ ᠪᠡᠬᠢ ᠪᠡᠨ ᠨᠡᠢᠯᠡᠨ ᠪᠠᠢᠵᠤ
ᠳᠡᠯᠡᠬᠡᠢ ᠶ᠋ᠢᠨ ᠳᠡᠭᠡᠪᠦᠷ ᠦ᠋ᠨ ᠴᠠᠰᠤ ᠶ᠋ᠢ ᠨᠤᠷᠠᠲᠠᠯᠠ
ᠳᠡᠯᠭᠡᠷ ᠮᠣᠩᠭᠣᠯ ᠢ᠋ᠶ᠋ᠠᠨ ᠳᠠᠭᠤᠯᠠᠬᠤ ᠯᠠ ᠪᠣᠯᠤᠨᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠡᠩᠬᠡᠪᠠᠲᠤ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ