ᠬᠤᠨ ᠲᠤᠤᠯᠢ – ᠴᠣ ᠂ ᠣᠷᠱᠤᠨ Хун тууль – Чо ᠂ Оршин
396ᠬᠤᠨ ᠲᠤᠤᠯᠢ
ᠨᠢᠭᠡ
ᠬᠤᠨ ᠰᠢᠪᠠᠭᠤᠨ ᠤ᠋ ᠵᠡᠯᠡᠯᠡᠭᠡ
ᠬᠣᠪᠳᠣᠯ ᠵᠢᠷᠦᠬᠡ ᠪᠡᠷ ᠬᠣᠯᠪᠣᠭᠠ ᠲᠠᠢ
ᠬᠣᠩᠭᠣᠷ ᠳᠠᠭᠤᠨ ᠤ᠋ ᠴᠤᠤᠷᠢᠶᠠ
ᠬᠣᠯᠠ ᠶ᠋ᠢᠨ ᠬᠣᠯᠠ ᠵᠣᠯᠪᠣᠭᠠ ᠲᠠᠢ
ᠬᠥᠬᠡ ᠮᠥᠩᠭᠥᠨ ᠲᠩᠷᠢ ᠳ᠋ᠦ᠍
ᠬᠥᠲᠥᠴᠢ ᠵᠠᠯᠭᠠᠨ ᠳᠡᠪᠳᠡᠷᠢᠨᠡ᠂
ᠬᠥᠷᠥᠰᠥᠲᠦ ᠠᠯᠲᠠᠨ ᠳᠡᠯᠡᠬᠡᠢ ᠳ᠋ᠦ᠍
ᠬᠥᠭ ᠰᠣᠨᠣᠷᠳᠠᠨ ᠳᠠᠭᠤᠷᠢᠰᠤᠨᠠ᠂
ᠰᠠᠭᠠᠯᠢ ᠪᠠᠨ ᠡᠷᠭᠦᠭᠰᠡᠨ ᠮᠠᠯᠴᠢᠳ
ᠰᠠᠴᠤᠯᠢ ᠳᠡᠭᠡᠵᠢᠯᠡᠨ ᠵᠣᠭᠰᠣᠨᠠ᠂
ᠴᠠᠩ ᠪᠤᠭᠤᠷᠤᠯ ᠨᠠᠰᠤᠲᠠᠨ
ᠰᠠᠷᠠᠪᠴᠢᠯᠠᠵᠤ ᠡᠨᠡᠷᠢᠨ ᠪᠠᠷᠠᠯᠠᠨᠠ᠃
ᠭᠠᠩᠭᠠᠷ ᠭᠣᠩᠭᠣᠷ ᠳᠠᠭᠤ ᠨᠢ
ᠤᠶᠠᠷᠠᠭᠤᠨ ᠪᠠᠢᠳᠠᠭ ᠨᠢ ᠶᠠᠭᠤ ᠪᠣᠯ?
ᠭᠠᠵᠠᠷ ᠤ᠋ᠨ ᠲᠦᠪᠰᠢᠨ ᠢ᠋ ᠰᠢᠷᠲᠡᠭᠡᠳ
ᠡᠷᠭᠢᠴᠡᠵᠦ ᠪᠠᠢᠭᠠ ᠨᠢ ᠶᠠᠭᠤᠨ ᠳ᠋ᠤ᠌ ᠪᠣᠯ⁈
ᠥᠭᠡᠰᠢ ᠪᠡᠨ ᠠᠯᠳᠠᠭᠰᠠᠨ ᠭᠠᠵᠠᠷ ᠤᠤ?
ᠦᠷᠡ ᠪᠡᠨ ᠣᠷᠬᠢᠭᠰᠠᠨ ᠥᠯᠥᠭᠡᠢ ᠨᠢ ᠤᠤ?
ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠰᠡᠳᠬᠢᠯᠭᠡ ᠲᠡᠢ
ᠬᠦᠳᠡᠳ ᠶᠠᠮᠠᠷᠬᠠᠨ ᠲᠥᠰᠦᠭᠡ ᠪᠣᠢ⁈
ᠤᠤᠵᠢ ᠲᠠᠲᠠᠭᠤᠷᠲᠤ ᠡᠵᠢ ᠶ᠋ᠢᠨ
ᠤᠷᠢᠳᠤ ᠲᠥᠷᠥᠯ ᠦ᠋ᠨ ᠪᠦᠷᠢᠯᠸᠠ ᠰᠢᠭ᠋
ᠣᠪᠣᠭ ᠨᠢᠭᠡᠲᠡᠢ ᠡᠬᠡ ᠶ᠋ᠢᠨ
ᠤᠤᠭᠠᠨ ᠲᠦᠰ ᠦ᠋ᠨ ᠬᠢᠨᠢ ᠲᠥᠷᠬᠦ ᠰᠢᠭ
ᠳᠣᠮᠣᠭ ᠦᠯᠢᠭᠡᠷ ᠡᠴᠡ ᠠᠮᠢᠯᠠᠭᠰᠠᠨ
ᠳᠤᠷᠠᠳᠬᠠᠯ ᠶᠠᠷᠢᠶᠠᠨ ᠤ᠋ ᠬᠡᠰᠢᠭ
ᠪᠠᠷᠭᠤᠳᠠᠢ ᠮᠡᠷᠭᠡᠨ ᠦ᠌ ᠴᠠᠳᠢᠭ
ᠪᠠᠷᠭᠤ ᠶᠠᠰᠤᠲᠠᠨ ᠤ᠋ ᠲᠡᠦᠬᠡ ᠶ᠋ᠢ
ᠣᠳᠣᠨ ᠮᠡᠴᠢᠳ ᠭᠠᠷᠠᠭ ᠢ᠋ᠶ᠋ᠠᠷ
ᠣᠨᠣᠰᠢᠯᠠᠵᠤ ᠰᠢᠨᠵᠢᠯᠡᠨ ᠰᠢᠭᠦᠵᠦ
ᠣᠷᠴᠢᠯᠠᠩ ᠬᠣᠷᠸᠠ ᠶ᠋ᠢᠨ ᠳᠠᠩᠰᠠ ᠪᠠᠷ
ᠣᠨᠣᠪᠴᠢ ᠪᠠᠷᠢᠨ ᠨᠠᠮᠲᠠᠷᠯᠠᠵᠤ
ᠪᠠᠢᠭᠠᠯ ᠳᠠᠯᠠᠢ ᠶ᠋ᠢᠨ ᠱᠤᠤᠭᠢᠶᠠᠨ ᠲᠠᠢ
ᠪᠠᠶᠠᠨ ᠳᠥᠭᠥᠮ ᠦ᠋ᠨ ᠳᠡᠨᠵᠢ
ᠪᠠᠷᠭᠤᠵᠢᠨ ᠭᠣᠣᠯ ᠤ᠋ᠨ ᠬᠥᠪᠡᠭᠡᠨ ᠡᠴᠡ
ᠪᠠᠳᠠᠭ ᠰᠢᠯᠦᠭ ᠢ᠋ᠶ᠋ᠡᠷ ᠱᠠᠰᠲᠢᠷᠯᠠᠵᠤ
ᠲᠡᠦᠬᠡ ᠨᠡᠢᠭᠡᠮ ᠦ᠋ᠨ ᠲᠣᠭᠣᠭᠠᠨ ᠳ᠋ᠤ᠌
ᠲᠦᠭᠦᠬᠡᠢ ᠱᠦᠭᠦᠷᠬᠡᠢ ᠶ᠋ᠢ ᠪᠤᠴᠠᠯᠭᠠᠨᠠᠮ!
ᠲᠦᠮᠡᠨ ᠣᠨ ᠤ᠋ ᠬᠠᠭᠤᠳᠠᠰᠤᠨ ᠳ᠋ᠤ᠌
ᠲᠤᠤᠯᠢ ᠨᠠᠢᠷᠠᠵᠤ ᠲᠣᠯᠢᠯᠠᠭᠤᠯᠤᠨᠠᠮ!
ᠬᠣᠶᠠᠷ
ᠪᠠᠢᠭᠠᠯ ᠳᠠᠯᠠᠢ ᠶ᠋ᠢᠨ ᠡᠪᠦᠷ
ᠪᠠᠷᠭᠤᠵᠢᠨ ᠭᠣᠣᠯ ᠤ᠋ᠨ ᠳᠡᠨᠵᠢ ᠠ᠋
ᠪᠠᠶᠠᠨ ᠥᠨᠢᠷ ᠲᠡᠩᠴᠡᠭᠰᠡᠨ
ᠪᠠᠶᠠᠯᠢᠭ ᠳᠥᠭᠥᠮ ᠦ᠋ᠨ ᠨᠤᠲᠤᠭ ᠠ᠋
ᠠᠯᠲᠠᠨ ᠬᠠᠢᠷᠰᠤᠲᠠᠢ ᠵᠢᠭᠠᠰᠤ
ᠠᠷᠯᠠᠬᠤ ᠳᠣᠯᠭᠢᠶᠠᠨ ᠳ᠋ᠤᠨᠢ ᠴᠣᠯᠭᠢᠭᠰᠠᠨ
ᠮᠥᠩᠭᠥᠨ ᠬᠤᠶᠠᠭ ᠲᠠᠢ ᠵᠢᠷᠠᠭᠠᠬᠠᠢ
ᠮᠥᠷᠭᠥ ᠬᠡᠯᠲᠡᠭᠡ ᠰᠦᠯᠵᠢᠭᠰᠡᠨ
ᠬᠥᠪᠴᠢ ᠶ᠋ᠢᠨ ᠥᠨᠳᠥᠷ ᠮᠣᠳᠣᠨ ᠳ᠋ᠤᠨᠢ
ᠬᠥᠬᠥᠭᠡ ᠭᠤᠷᠭᠤᠯᠳᠠᠢ ᠳᠣᠩᠭᠣᠳᠤᠭᠰᠠᠨ
ᠬᠥᠲᠥᠯ ᠴᠠᠢᠳᠠᠮ ᠬᠣᠭᠣᠯᠠᠢ ᠳ᠋ᠤᠨᠢ
ᠳᠡᠯᠡᠬᠡᠢ ᠶ᠋ᠢᠨ ᠭᠠᠢᠬᠠᠮᠰᠢᠭ ᠴᠡᠯᠭᠡᠷᠡᠭᠰᠡᠨ
ᠪᠤᠮᠪᠠ ᠶ᠋ᠢᠨ ᠰᠠᠢᠬᠠᠨ ᠣᠷᠣᠨ ᠰᠢᠭ᠋
ᠶᠢᠰᠦᠨ ᠥᠩᠭᠡ ᠶ᠋ᠢᠨ ᠰᠣᠯᠣᠩᠭᠠ ᠲᠠᠢ
ᠪᠤᠷᠬᠠᠨ ᠤ᠋ ᠰᠠᠷᠠᠭᠤᠯ ᠣᠷᠳᠣᠨ ᠰᠢᠭ᠋
ᠨᠠᠷᠠ ᠵᠢᠷᠭᠠᠬᠤ ᠦᠭᠡᠢ ᠭᠠᠵᠠᠷ
ᠪᠠᠷᠭᠤ ᠶᠠᠰᠤᠲᠠᠨ ᠤ᠋ ᠡᠪᠦᠭᠡ
ᠪᠠᠷᠭᠤᠳᠠᠢ ᠮᠡᠷᠭᠡᠨ ᠭᠡᠳᠡᠭ
ᠪᠠᠶᠠᠷᠭᠤ ᠤᠭᠰᠠᠭᠠ ᠪᠦᠷᠢᠯᠳᠦᠭᠡᠳ
ᠪᠠᠷᠭᠤᠵᠢᠨ ᠳᠥᠭᠥᠮ ᠳ᠋ᠦ᠍ ᠪᠠᠢᠵᠤ ᠭᠡᠨᠡ᠃
ᠠᠩ ᠬᠦᠷᠦᠭᠡ ᠬᠢᠵᠦ
ᠠᠮᠢᠳᠤᠷᠠᠯ ᠬᠥᠷᠥᠩᠭᠡ ᠪᠡᠨ ᠪᠤᠰᠬᠠᠵᠠᠢ
ᠠᠷᠭᠠᠯᠢ ᠶᠠᠩᠭᠢᠷ ᠢ᠋ ᠨᠠᠮᠨᠠᠵᠤ
ᠠᠳᠠᠯ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠡᠬᠢᠯᠡᠵᠡᠢ᠃
ᠪᠠᠷᠭᠤᠳᠠᠢ ᠮᠡᠷᠭᠡᠨ ᠦ᠌ ᠬᠦᠦ
ᠪᠠᠭᠠ ᠵᠠᠯᠠᠭᠤ ᠬᠣᠷᠢᠲᠠᠢ
ᠰᠠᠭᠠᠳᠠᠭ ᠨᠤᠮᠤ ᠪᠠᠨ ᠠᠭᠰᠠᠨ
ᠰᠠᠷᠠᠯ ᠬᠦᠯᠦᠭ ᠢ᠋ᠶ᠋ᠡᠨ ᠤᠨᠤᠵᠤ
ᠪᠠᠢᠭᠠᠯ ᠳᠠᠯᠠᠢ ᠶ᠋ᠢᠨ ᠬᠥᠪᠡᠭᠡ ᠪᠡᠷ
ᠪᠠᠬᠠᠷᠬᠠᠨ ᠠᠵᠢᠭᠯᠠᠵᠤ ᠶᠠᠪᠤᠲᠠᠯᠠ
ᠪᠠᠷᠠᠭᠤᠨ ᠬᠣᠢᠨᠠ ᠵᠦᠭ ᠡᠴᠡ
ᠪᠠᠷᠠᠭᠠᠨ ᠡᠭᠦᠯᠡ ᠰᠡᠬᠦᠭᠳᠡᠵᠦ
ᠶᠢᠰᠦᠨ ᠢᠵᠢᠯᠬᠡᠨ ᠬᠤᠨ
ᠵᠠᠬᠠ ᠲᠡᠳᠡᠨ ᠡᠩᠨᠡᠷᠡᠭᠡᠳ
ᠶᠡᠷᠦ ᠪᠤᠰᠤ ᠶ᠋ᠢᠨ ᠰᠣᠪᠢᠩ
ᠶᠢᠷᠲᠢᠨᠴᠦ ᠳ᠋ᠦ᠍ ᠭᠡᠨᠡᠳᠲᠡ ᠪᠠᠭᠤᠬᠤ ᠰᠢᠭ᠋
ᠨᠠᠭᠤᠷ ᠤ᠋ᠨ ᠳᠡᠭᠡᠭᠦᠷ ᠡᠷᠭᠢᠯᠳᠦᠵᠦ
ᠵᠡᠭᠡᠰᠦᠨ ᠦ᠌ ᠵᠠᠬᠠ ᠳ᠋ᠤ᠌ ᠪᠠᠭᠤᠯᠠ᠃
ᠨᠤᠭᠤᠨ ᠡᠬᠡ ᠶ᠋ᠢᠨ ᠦᠷᠡ ᠰᠢᠭ
ᠶᠢᠰᠦᠨ ᠬᠡᠦᠬᠡᠨ ᠬᠤᠪᠢᠯᠤᠯᠠ
ᠰᠠᠬᠠᠷᠠᠭᠰᠠᠨ ᠪᠤᠭᠤᠷᠤᠯ ᠳᠠᠪᠠᠯᠭᠠᠨ
ᠡᠬᠡ ᠶ᠋ᠢᠨ ᠬᠠᠢᠷᠠ ᠪᠠᠷ ᠳᠠᠪᠠᠷᠠᠨᠠ
ᠰᠠᠢᠬᠠᠨ ᠭᠤᠸᠠ ᠬᠡᠦᠬᠡᠨᠴᠦᠳ
ᠰᠠᠨᠠᠭᠠᠨ ᠲᠠᠪᠠ ᠪᠠᠷ ᠱᠤᠩᠪᠠᠨᠠ᠃
ᠳᠠᠢᠴᠢᠨ ᠪᠠᠭᠠᠲᠤᠷ ᠬᠣᠷᠢᠲᠠᠢ
ᠳᠠᠯᠳᠠ ᠨᠡᠭᠡᠭᠡᠪᠴᠢ ᠶ᠋ᠢ ᠠᠵᠢᠯᠠ
ᠰᠠᠷᠠᠯ ᠮᠣᠷᠢ ᠪᠠᠨ ᠴᠢᠳᠥᠷᠯᠡᠭᠡᠳ
ᠰᠠᠭᠠᠳᠠᠭ ᠨᠤᠮᠤ ᠪᠠᠨ ᠮᠥᠷᠥᠯᠡᠯᠡ
ᠶᠠᠭ ᠪᠠᠭᠤᠭᠰᠠᠨ ᠭᠠᠵᠠᠷ ᠨᠢ
ᠶᠠᠪᠠᠭᠠᠨ ᠠᠯᠬᠤᠯᠠᠵᠤ ᠣᠴᠢᠪᠠᠯ
ᠬᠤᠨ ᠤ᠋ ᠬᠠᠰ ᠬᠤᠪᠴᠠᠰᠤ
ᠬᠣᠶᠠᠷ ᠭᠤᠷᠪᠠ ᠪᠠᠷ ᠳᠡᠯᠭᠡᠭᠡᠰᠦᠲᠡᠢ
ᠦᠨᠡᠨ ᠬᠤᠳᠠᠯ ᠢ᠋ ᠨᠢ ᠲᠣᠳᠣᠯᠠᠬᠤ ᠪᠠᠷ
ᠥᠨᠥᠬᠢ ᠡᠴᠡ ᠨᠢᠭᠡ ᠶ᠋ᠢ ᠨᠢ ᠰᠤᠭᠤᠪᠴᠢᠯᠠᠭᠠᠳ
ᠬᠣᠯᠠᠬᠠᠨ ᠭᠠᠵᠠᠷ ᠢ᠋ ᠰᠣᠩᠭᠣᠵᠤ
ᠬᠣᠷᠭᠣᠳᠠᠨ ᠰᠠᠭᠤᠭᠠᠳ ᠬᠦᠯᠢᠶᠡᠯᠡ᠃
ᠦᠳᠡ ᠶ᠋ᠢᠨ ᠨᠠᠷᠠ ᠬᠡᠯᠪᠡᠢᠭᠡᠳ
ᠥᠶᠥᠭ ᠰᠠᠯᠬᠢ ᠰᠡᠪᠡᠯᠵᠡᠬᠦ ᠳ᠋ᠦ᠍
ᠱᠤᠤᠭᠢᠵᠤ ᠨᠠᠭᠠᠳᠤᠭᠰᠠᠨ ᠬᠤᠨ
ᠴᠤᠭᠭᠠᠷ ᠡᠷᠭᠢ ᠳ᠋ᠦ᠍ ᠭᠠᠷᠤᠮᠠᠭᠴᠠ
ᠬᠤᠨ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠴᠦ
ᠬᠣᠯᠠ ᠶ᠋ᠢ ᠵᠣᠷᠢᠨ ᠨᠢᠰᠦᠯᠡ᠂
ᠬᠣᠴᠣᠷᠴᠤ ᠨᠢᠭᠡ ᠨᠢ ᠦᠯᠡᠳᠡᠭᠡᠳ
ᠬᠣᠢᠨᠠ ᠠ᠋ᠴᠠ ᠨᠢ ᠭᠠᠨᠢᠬᠠᠷᠠᠵᠤ ᠰᠠᠭᠤᠯᠠ᠃
ᠪᠠᠭᠠᠲᠤᠷ ᠮᠡᠷᠭᠡᠨ ᠬᠣᠷᠢᠲᠠᠢ
ᠪᠡᠶᠡᠴᠢᠯᠡᠵᠦ ᠬᠥᠯ ᠲᠠᠲᠠᠭᠠᠳ
ᠪᠠᠶᠠᠨ ᠥᠨᠢᠷ ᠢ᠋ ᠴᠢᠮᠡᠵᠦ
ᠪᠡᠶᠡ ᠲᠡᠭᠰᠢ ᠪᠣᠯᠭᠠᠬᠤ
ᠠᠷᠢᠭᠤᠨ ᠴᠠᠭᠠᠪᠤᠷ ᠰᠡᠳᠬᠢᠯ
ᠠᠯᠲᠠᠨ ᠤᠷᠤᠭ ᠤ᠋ᠨ ᠬᠠᠳᠠᠭ ᠢ᠋ᠶ᠋ᠠᠷ
ᠠᠨᠳᠠᠭᠠᠢᠯᠠᠵᠤ ᠬᠦᠰᠡᠯ ᠢ᠋ᠶ᠋ᠡᠨ ᠬᠡᠯᠡᠬᠦ ᠳ᠋ᠦ᠍
ᠠᠮᠢᠨᠴᠢᠯᠠᠵᠤ ᠤᠴᠢᠷ ᠢ᠋ᠶ᠋ᠠᠨ ᠲᠣᠭᠠᠴᠢᠬᠤ ᠳ᠋ᠤ᠌
ᠬᠣᠶᠠᠷ ᠨᠢᠳᠦ ᠨᠢ ᠵᠠᠢᠷᠮᠠᠭᠲᠤᠭᠰᠠᠨ
ᠬᠤᠨ ᠬᠡᠦᠬᠡᠨ ᠢᠰᠪᠡᠯᠵᠡᠭᠡᠳ
ᠲᠤᠯᠭᠠ ᠶ᠋ᠢᠨ ᠭᠠᠯ ᠢ᠋ ᠨᠢ ᠨᠣᠴᠣᠭᠠᠵᠤ
ᠲᠤᠶᠠᠭᠠᠲᠤ ᠡᠷᠦᠬᠡ ᠶ᠋ᠢ ᠨᠢ ᠲᠠᠲᠠᠯᠠ ᠭᠡᠳᠡᠭ᠂
ᠲᠡᠷᠡ ᠴᠠᠭ ᠠ᠋ᠴᠠ ᠡᠬᠢᠯᠡᠵᠦ
ᠲᠡᠭᠰᠢ ᠰᠠᠢᠬᠠᠨ ᠠᠮᠢᠳᠤᠷᠠᠬᠤ
ᠳᠡᠭᠡᠳᠦᠰ ᠦ᠋ᠨ ᠤᠳᠤᠮ ᠪᠦᠷᠢᠯᠳᠦᠵᠦ
ᠳᠡᠮᠪᠡᠷᠢᠯ ᠵᠠᠶᠠᠭᠠ ᠲᠣᠭᠲᠠᠵᠤ
ᠪᠠᠷᠭᠤ ᠶ᠋ᠢᠨ ᠡᠭᠦᠰᠦᠯ ᠡᠰᠡᠨᠢᠵᠦ
ᠪᠠᠷᠭᠤᠵᠢᠨ ᠳᠥᠭᠥᠮ ᠴᠡᠯᠭᠡᠷᠡᠭᠡᠳ
ᠪᠠᠶᠠᠨ ᠥᠨᠢᠷ ᠬᠣᠣᠰᠯᠠᠵᠤ
ᠪᠠᠶᠠᠯᠢᠭ ᠣᠷᠣᠨ ᠥᠩᠭᠡᠵᠢᠭᠡᠳ
ᠳᠠᠢᠴᠢᠨ ᠪᠠᠭᠠᠲᠤᠷ ᠬᠠᠨᠠᠭᠠᠷ
ᠳᠠᠷᠬᠠᠨ ᠬᠠᠲᠤᠨ ᠲᠡᠨᠢᠭᠡᠷ
ᠳᠠᠯᠠᠢ ᠵᠢᠷᠭᠠᠯ ᠪᠢᠯᠬᠠᠮᠠ
ᠳᠠᠶᠠᠭᠠᠷ ᠪᠠᠷᠭᠤ ᠲᠡᠨᠢᠭᠦᠨ᠃
ᠭᠤᠷᠪᠠ
ᠬᠤᠨ ᠭᠤᠸᠠ ᠡᠬᠡ
ᠠᠷᠪᠠᠨ ᠨᠢᠭᠡᠨ ᠬᠥᠪᠡᠭᠦᠨ ᠲᠡᠢ
ᠬᠣᠲᠠᠯᠠ ᠳᠡᠯᠭᠡᠷ ᠦᠷᠡᠰ ᠨᠢ
ᠠᠪᠤ ᠶ᠋ᠢᠨ ᠭᠣᠯᠣᠮᠲᠠ ᠶ᠋ᠢ ᠮᠠᠨᠳᠤᠭᠠᠵᠠᠢ᠃
ᠤᠢᠳᠬᠠᠷ ᠭᠤᠨᠢᠭ ᠪᠣᠳᠣᠭᠳᠠᠬᠤ
ᠤᠷᠢᠬᠠᠨ ᠬᠠᠪᠤᠷ ᠤ᠋ᠨ ᠡᠳᠦᠷ
ᠣᠶᠣᠳᠠᠯ ᠤᠷᠠᠯᠠᠵᠤ ᠰᠠᠭᠤᠭᠰᠠᠨ
ᠤᠬᠠᠭᠠᠨᠲᠤ ᠬᠤᠨ ᠬᠠᠲᠤᠨ ᠨᠢ
《 ᠬᠤᠨ ᠬᠤᠪᠴᠠᠰᠤ ᠶ᠋ᠢ ᠮᠢᠨᠢ ᠭᠠᠷᠭᠠᠭᠠᠴᠢ
ᠬᠤᠪᠴᠠᠰᠤᠯᠠᠵᠤ ᠪᠢ ᠦᠵᠡᠶᠡ》 ᠭᠡᠯᠡ᠂
ᠲᠣᠭᠣᠭᠠᠨ ᠤ᠋ ᠪᠠᠷᠢᠭᠤᠯ ᠢ᠋ ᠠᠳᠬᠤᠵᠤ
ᠲᠤᠯᠭᠠ ᠳ᠋ᠤ᠌ ᠲᠦᠯᠡᠰᠢ ᠨᠡᠮᠡᠭᠡᠳ
ᠲᠣᠭᠲᠠᠭᠤᠨ ᠵᠠᠩ ᠲᠠᠢ ᠬᠣᠷᠢᠲᠠᠢ
ᠲᠤᠩᠭᠠᠭᠠᠵᠤ ᠰᠠᠢᠬᠠᠨ ᠰᠡᠳᠬᠢᠪᠡᠯ
ᠦᠷᠡ ᠪᠡᠶᠡᠲᠡᠢ ᠪᠣᠯᠭᠠᠭᠰᠠᠨ ᠨᠢ
ᠥᠷᠯᠥᠭ ᠬᠠᠲᠤᠨ ᠤ᠋ ᠭᠠᠪᠢᠶᠠ ᠶᠤᠮ
ᠥᠨᠥ ᠪᠢ ᠬᠠᠷᠠᠳᠠᠬᠤ ᠶᠠᠭᠤ
ᠦᠵᠡᠭᠦᠯᠵᠦ ᠥᠭᠭᠦᠶᠡ᠂ ᠬᠥᠭᠡᠷᠦᠬᠦᠢ ᠭᠡᠳ
ᠤᠨᠠᠭᠠᠨ ᠬᠠᠢᠷᠠ ᠶ᠋ᠢ ᠶᠡᠭᠦᠯᠡᠭᠰᠡᠨ
ᠣᠨᠢᠰᠣᠲᠠᠢ ᠣᠶᠤᠩᠭᠤ ᠠᠪᠳᠠᠷᠠ ᠠ᠋ᠴᠠ
ᠣᠷᠬᠣᠳᠠᠢ ᠬᠤᠪᠴᠠᠰᠤ ᠶ᠋ᠢ ᠨᠢ ᠭᠠᠷᠭᠠᠵᠤ
ᠤᠷᠢᠲᠠᠢ ᠨᠢ ᠲᠠᠯᠪᠢᠭᠠᠳ ᠣᠷᠬᠢᠯᠠ᠃
ᠲᠦᠷ ᠲᠠᠷ ᠴᠢᠮᠡᠭᠡ ᠭᠠᠷᠴᠤ
ᠲᠦᠳᠡᠬᠡᠨ ᠬᠤᠨ ᠬᠤᠪᠢᠯᠤᠭᠠᠳ
ᠲᠣᠲᠣᠭᠣ ᠪᠠᠷ ᠭᠠᠷᠬᠤ ᠭᠡᠲᠡᠯᠡ
《 ᠬᠥᠶᠢ ᠬᠥᠶᠢ ᠪᠣᠯᠢᠭᠠᠴᠢ!》 ᠭᠡᠵᠦ
ᠬᠦ ᠪᠣᠯᠤᠭᠰᠠᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ
ᠬᠥᠯ ᠡᠴᠡ ᠨᠢ ᠪᠠᠷᠢᠵᠤ ᠵᠣᠭᠰᠣᠭᠠᠭᠠᠳ
ᠬᠦᠰᠡᠬᠦ ᠦᠭᠡ ᠪᠡᠨ ᠬᠡᠯᠡᠵᠦ ᠭᠡᠨᠡ᠃
《 ᠲᠥᠷᠬᠥᠮ ᠳ᠋ᠡᠭᠡᠨ ᠬᠠᠷᠢᠬᠤ ᠨᠢ ᠶᠣᠰᠣ
ᠲᠥᠷᠥᠭᠰᠡᠨ ᠦᠷᠡ ᠳ᠋ᠡᠭᠡᠨ
ᠨᠡᠷᠡ ᠣᠪᠣᠭ ᠢ᠋ ᠨᠢ ᠬᠠᠢᠷᠠᠯᠠᠵᠤ᠂
ᠨᠠᠰᠤ ᠵᠢᠯ ᠢ᠋ ᠨᠢ ᠣᠯᠭᠣᠭᠠᠴᠢ!》 ᠭᠡᠪᠡᠯ
ᠲᠣᠲᠣᠭᠣ ᠲᠤᠯᠤᠭᠰᠠᠨ ᠭᠡᠷ ᠦ᠋ᠨ
ᠲᠣᠭᠣᠨᠣ ᠶ᠋ᠢᠨ ᠳᠡᠭᠡᠭᠦᠷ ᠡᠷᠭᠢᠭᠡᠳ
ᠲᠣᠳᠣᠬᠠᠨ ᠢᠷᠠᠭᠤ ᠳᠠᠭᠤᠨ ᠢ᠋ᠶ᠋ᠠᠷ
ᠲᠣᠭᠲᠠᠬᠤ ᠢᠷᠦᠭᠡᠯ ᠲᠠᠯᠪᠢᠵᠠᠢ᠄
《 ᠭᠠᠷ ᠲᠠᠭᠠᠨ ᠤᠷᠠᠨ ᠭᠠᠯᠵᠤᠳ* ᠬᠦᠦ ᠮᠢᠨᠢ
ᠬᠥᠮᠦᠨ ᠲᠡᠢ ᠡᠶᠡᠯᠳᠡᠭ ᠬᠦᠪᠳᠦᠳ ᠬᠦᠦ ᠮᠢᠨᠢ
ᠬᠣᠭᠰᠢᠯ ᠢ᠋ ᠡᠷᠬᠢᠮᠨᠡᠬᠦ ᠬᠤᠸᠠᠰᠠᠢ ᠬᠦᠦ ᠮᠢᠨᠢ
ᠬᠠᠮᠤᠭ ᠢ᠋ ᠪᠣᠳᠣᠬᠤ ᠬᠠᠯᠪᠢᠨ ᠬᠦᠦ ᠮᠢᠨᠢ
ᠪᠠᠲᠤ ᠵᠢᠷᠤᠮᠲᠠᠢ ᠪᠠᠲᠤᠨᠠᠢ ᠬᠦᠦ ᠮᠢᠨᠢ
ᠬᠣᠲᠠ ᠪᠠᠨ ᠪᠠᠶᠠᠵᠢᠭᠤᠯᠬᠤ ᠬᠤᠳᠠᠢ ᠬᠦᠦ ᠮᠢᠨᠢ
ᠬᠣᠯᠠ ᠶ᠋ᠢ ᠵᠣᠷᠢᠬᠤ ᠬᠤᠰᠢᠭᠤᠳ ᠬᠦᠦ ᠮᠢᠨᠢ
ᠴᠠᠭᠠ ᠶ᠋ᠢᠨ ᠡᠵᠡᠨ ᠴᠠᠭᠠᠩᠭᠤᠳ ᠬᠦᠦ ᠮᠢᠨᠢ
ᠱᠠᠰᠲᠢᠷ ᠤ᠋ᠨ ᠨᠣᠶᠠᠨ ᠱᠠᠷᠠᠢᠳ ᠬᠦᠦ ᠮᠢᠨᠢ
ᠪᠣᠳᠣᠯᠭᠠ ᠬᠡᠴᠡᠭᠦᠦ ᠪᠣᠳᠤᠩᠭᠤᠳ ᠬᠦᠦ ᠮᠢᠨᠢ
ᠬᠠᠮᠤᠭ ᠢ᠋ ᠵᠠᠬᠢᠷᠬᠤ ᠬᠠᠷᠭᠠᠨᠠ ᠬᠦᠦ ᠮᠢᠨᠢ
ᠬᠠᠯᠠ ᠣᠪᠣᠭ ᠢ᠋ᠶ᠋ᠠᠨ ᠮᠠᠨᠳᠤᠭᠤᠯᠬᠤ ᠬᠠᠢᠷᠠᠯᠠᠯᠲᠠᠢ ᠬᠥᠪᠡᠭᠦᠳ ᠮᠢᠨᠢ
ᠡᠴᠢᠭᠡ ᠳᠡᠭᠡᠳᠦ ᠪᠡᠨ ᠬᠦᠨᠳᠦᠯᠡᠵᠦ
ᠡᠷᠦᠬᠡ ᠭᠡᠷ ᠢ᠋ᠶ᠋ᠡᠨ ᠪᠣᠰᠬᠠᠭᠠᠷᠠᠢ!
ᠠᠬᠠᠮᠠᠳ ᠨᠠᠰᠤᠲᠠᠨ ᠢ᠋ᠶ᠋ᠠᠨ ᠠᠰᠠᠷᠠᠵᠤ
ᠠᠬᠠ ᠳᠡᠭᠦᠦ ᠨᠠᠷ ᠢ᠋ᠶ᠋ᠠᠨ ᠳᠡᠮᠵᠢᠭᠡᠷᠡᠢ!
ᠦᠶᠡ ᠶ᠋ᠢᠨ ᠦᠶᠡ ᠳ᠋ᠦ᠍ ᠥᠭᠡᠳᠡᠯᠡᠵᠦ
ᠥᠨᠢᠷ ᠲᠡᠭᠰᠢ ᠵᠢᠷᠭᠠ!
ᠰᠠᠢᠨ ᠰᠠᠢᠬᠠᠨ ᠣᠨᠳᠣᠷᠣᠵᠤ
ᠰᠠᠢᠨ ᠤ᠋ ᠥᠯᠵᠡᠢ ᠣᠷᠣᠰᠢᠭ!》 ᠭᠡᠵᠦ
ᠰᠠᠨᠠᠭᠰᠠᠨ ᠵᠣᠷᠢᠯᠭᠠ ᠪᠠᠨ ᠪᠡᠶᠡᠯᠡᠭᠦᠯᠵᠦ
ᠬᠦᠰᠡᠭᠰᠡᠨ ᠵᠣᠷᠢᠭ ᠢ᠋ᠶ᠋ᠠᠨ ᠭᠦᠢᠴᠡᠳᠬᠡᠭᠡᠳ
ᠨᠠᠴᠤᠭ ᠡᠷᠳᠡᠨᠢ ᠶ᠋ᠢᠨ ᠲᠣᠭᠣᠨᠣ ᠪᠠᠨ ᠮᠢᠯᠢᠶᠠᠵᠤ
ᠨᠠᠷᠠᠨ ᠵᠥᠪ ᠭᠤᠷᠪᠠ ᠡᠷᠭᠢᠭᠡᠳ
ᠣᠭᠲᠠᠷᠭᠤᠢ ᠶ᠋ᠢᠨ ᠭᠦᠨ ᠳ᠋ᠦ᠍ ᠳᠡᠪᠳᠡᠷᠢᠨ
ᠣᠷᠴᠢᠯᠠᠩ ᠤ᠋ᠨ ᠠᠭᠤᠳᠠᠮ ᠳ᠋ᠤ᠌ ᠵᠢᠵᠢᠭᠷᠡᠵᠡᠢ᠃
ᠬᠣᠪᠳᠣᠯ ᠵᠢᠷᠦᠬᠡᠨ ᠳ᠋ᠦ᠍ ᠬᠣᠨᠣᠭᠰᠢᠭᠰᠠᠨ
ᠬᠤᠨ ᠰᠢᠪᠠᠭᠤᠨ ᠤ᠋ ᠳᠡᠪᠳᠡᠷᠢᠯᠲᠡ ᠳ᠋ᠦ᠍
ᠪᠠᠢᠭᠠᠯ ᠳᠠᠯᠠᠢ ᠶ᠋ᠢᠨ ᠬᠥᠪᠡᠭᠡ
ᠪᠠᠷᠭᠤᠵᠢᠨ ᠳᠥᠭᠥᠮ ᠦ᠋ᠨ ᠨᠤᠲᠤᠭ ᠲᠤ
ᠪᠠᠷᠭᠤᠳᠠᠢ ᠮᠡᠷᠭᠡᠨ ᠦ᠌ ᠬᠥᠪᠡᠭᠦᠨ
ᠠᠷᠪᠠᠨ ᠨᠢᠭᠡᠨ ᠣᠪᠣᠭᠲᠠᠨ
ᠪᠦᠷᠢᠳᠴᠦ ᠥᠨᠢᠷ ᠲᠣᠭᠲᠠᠵᠠᠢ
ᠪᠦᠷᠢᠨ ᠤᠭᠰᠠᠭᠠ ᠡᠭᠦᠰᠴᠡᠢ᠃
ᠳᠥᠷᠪᠡ
ᠠᠷᠪᠠᠨ ᠨᠢᠭᠡᠨ ᠬᠥᠪᠡᠭᠦᠳ ᠦ᠋ᠨ
ᠠᠰᠠᠵᠤ ᠳᠦᠷᠡᠯᠵᠡᠭᠰᠡᠨ ᠭᠣᠯᠣᠮᠲᠠ ᠠ᠋ᠴᠠ
ᠤᠭᠰᠠᠭᠠ ᠶᠠᠰᠤᠲᠠᠨ ᠳᠡᠭᠵᠢᠷᠡᠭᠡᠳ
ᠤᠳᠤᠮ ᠭᠡᠷ ᠣᠷᠣᠮᠯᠠᠯᠠ᠂
ᠬᠤᠨ ᠰᠢᠪᠠᠭᠤᠨ ᠤ᠋ ᠡᠩᠨᠡᠭᠡ
ᠬᠣᠯᠠ ᠭᠠᠵᠠᠷ ᠤ᠋ᠨ ᠴᠤᠤᠷᠠᠢ
ᠬᠣᠩᠭᠣᠷ ᠵᠢᠷᠦᠬᠡᠨ ᠦ᠌ ᠬᠣᠯᠪᠣᠭᠠᠰᠤ
ᠬᠣᠢᠴᠢ ᠮᠠᠨ ᠤ᠋ ᠳᠤᠤᠨᠢᠯ
ᠬᠥᠬᠡ ᠮᠥᠩᠭᠥᠨ ᠲᠩᠷᠢ ᠪᠡᠷ
ᠬᠥᠲᠥᠴᠢ ᠵᠠᠯᠭᠠᠭᠰᠠᠨ ᠵᠠᠮᠨᠠᠯ
ᠬᠥᠷᠥᠰᠥᠲᠦ ᠠᠯᠲᠠᠨ ᠳᠡᠯᠡᠬᠡᠢ ᠳ᠋ᠦ᠍
ᠬᠦᠰᠡᠯ ᠡᠭᠦᠷᠦᠭᠰᠡᠨ ᠳᠠᠭᠤᠯᠠᠯ
ᠰᠠᠭᠠᠯᠢ ᠳᠡᠭᠡᠵᠢᠯᠡᠭᠰᠡᠨ ᠮᠠᠯᠴᠢᠨ ᠤ᠋
ᠰᠠᠴᠤᠯᠢ ᠡᠷᠭᠦᠭᠰᠡᠨ ᠢᠷᠦᠭᠡᠯ
ᠴᠠᠩ ᠪᠤᠭᠤᠷᠤᠯ ᠨᠠᠰᠤᠲᠠᠨ ᠤ᠋
ᠰᠠᠷᠠᠪᠴᠢᠯᠠᠵᠤ ᠡᠨᠡᠷᠢᠭᠰᠡᠨ ᠵᠥᠩᠨᠡᠯ
ᠭᠣᠯᠣᠮᠲᠠ ᠳ᠋ᠤ᠌ ᠮᠥᠷᠭᠥᠭᠰᠡᠨ ᠪᠡᠷᠢ
ᠬᠣᠷᠮᠣᠢ ᠳᠡᠪᠢᠰᠬᠦ ᠨᠢ ᠲᠤᠤᠯᠢᠰ
ᠭᠤᠤᠭᠯᠠᠬᠤ ᠢᠷᠠᠭᠤ ᠨᠠᠮᠢᠶᠠᠨ
ᠰᠢᠲᠦᠯᠭᠡ ᠪᠣᠯᠬᠤ ᠨᠢ ᠳᠠᠭᠤᠷᠢᠰᠤᠯ
ᠤᠭᠤᠷᠠᠭ ᠰᠦᠨ ᠳ᠋ᠦ᠍ ᠰᠢᠮᠡᠵᠢᠭᠰᠡᠨ
ᠣᠷᠬᠣᠳᠠᠢ ᠪᠡᠶᠡ ᠶ᠋ᠢᠨ ᠴᠣᠭᠴᠠ
ᠣᠴᠢᠨ ᠬᠣᠶᠠᠷ ᠨᠢᠳᠦᠨ ᠳ᠋ᠦ᠍
ᠤᠰᠤᠨ ᠪᠣᠯᠣᠷ ᠨᠢᠯᠪᠤᠰᠤ
ᠭᠠᠩᠭᠠᠷ ᠭᠣᠩᠭᠣᠷ ᠳᠠᠭᠤᠨ
ᠤᠶᠠᠷᠠᠭᠤᠨ ᠪᠠᠢᠭᠰᠠᠨ ᠨᠢ ᠡᠯᠢᠭᠡ
ᠭᠠᠵᠠᠷ ᠤ᠋ᠨ ᠲᠦᠪᠰᠢᠨ ᠢ᠋ ᠰᠢᠷᠲᠡᠭᠡᠳ
ᠡᠷᠭᠢᠵᠦ ᠪᠠᠢᠭᠰᠠᠨ ᠨᠢ ᠵᠢᠷᠦᠬᠡ
ᠤᠤᠵᠢ ᠲᠠᠲᠠᠭᠤᠷᠲᠤ ᠡᠵᠢ ᠶ᠋ᠢᠨ
ᠤᠷᠢᠳᠤ ᠲᠥᠷᠥᠯ ᠦ᠋ᠨ ᠪᠦᠷᠢᠯᠸᠠ
ᠣᠪᠣᠭ ᠨᠢᠭᠡᠲᠦ ᠬᠦᠢ ᠶ᠋ᠢᠨ
ᠤᠭ ᠢ᠋ ᠲᠣᠳᠣᠯᠠᠭᠰᠠᠨ ᠲᠥᠷᠬᠦ
ᠳᠣᠮᠣᠭ ᠦᠯᠢᠭᠡᠷ ᠲᠤ ᠰᠢᠮᠡᠳᠬᠡᠭᠰᠡᠨ
ᠳᠤᠷᠠᠳᠬᠠᠯ ᠶᠠᠷᠢᠶᠠᠨ ᠤ᠋ ᠬᠦᠮᠦᠭ
ᠪᠠᠷᠭᠤᠳᠠᠢ ᠮᠡᠷᠭᠡᠨ ᠦ᠌ ᠴᠠᠳᠢᠭᠯᠠᠭᠰᠠᠨ
ᠪᠠᠷᠭᠤ ᠶᠠᠰᠤᠲᠠᠨ ᠤ᠋ ᠲᠤᠤᠯᠢ ᠶ᠋ᠢ
ᠪᠠᠢᠭᠠᠯ ᠳᠠᠯᠠᠢ ᠶ᠋ᠢ ᠲᠦᠰᠢᠭᠰᠡᠨ
ᠪᠠᠶᠠᠨ ᠳᠥᠭᠥᠮ ᠡᠩᠭᠡᠷᠯᠡᠭᠰᠡᠨ
ᠪᠠᠷᠭᠤᠵᠢᠨ ᠭᠣᠣᠯ ᠤ᠋ᠨ ᠤᠷᠤᠰᠬᠠᠯ ᠳ᠋ᠤ᠌
ᠪᠠᠳᠠᠭᠲᠤ ᠨᠠᠢᠷᠠᠭ ᠣᠩᠭᠣᠯᠠᠭᠠᠳ
ᠲᠡᠦᠬᠡ ᠨᠡᠢᠭᠡᠮ ᠦ᠋ᠨ ᠬᠡᠮᠵᠢᠶᠡᠨ ᠳ᠋ᠦ᠍
ᠲᠥᠬᠥᠷ ᠪᠦᠲᠦᠨ ᠢ᠋ ᠪᠦᠷᠢᠳᠬᠡᠨᠡᠮ!
ᠲᠦᠮᠡᠨ ᠣᠨ ᠤ᠋ ᠲᠣᠭᠠᠯᠠᠯ ᠳ᠋ᠤ᠌
ᠲᠤᠤᠯᠢ ᠬᠠᠢᠯᠠᠵᠤ ᠡᠷᠭᠦᠨᠡᠮ!
ᠢᠷᠡᠯᠲᠡ᠄· ᠴᠣ· ᠣᠷᠱᠤᠨ ᠤ᠋《 ᠮᠠᠯᠴᠢᠨ ᠬᠥᠮᠦᠨ ᠦ᠌ ᠳᠠᠭᠤᠤ》 ᠨᠣᠮ ᠠ᠋ᠴᠠ ᠡᠰᠢᠯᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠷᠴᠡᠴᠡᠭ
2024 04 15 ~17