ᠰᠡᠳᠬᠢᠯ ᠦᠨ ᠤᠶᠠᠩᠭᠠ ᠲᠠᠲᠠᠯᠭᠠ – ᠴᠣ ᠂ ᠣᠷᠱᠤᠨ Сэтгэлийн уянга татлага – Чо ᠂ Оршин
292ᠰᠡᠳᠬᠢᠯ ᠦᠨ ᠤᠶᠠᠩᠭᠠ ᠲᠠᠲᠠᠯᠭᠠ
— ᠬᠥᠯᠥᠨ ᠪᠤᠢᠷ ᠠᠢᠮᠠᠭ ᠤ᠋ᠨ1992 ᠣᠨ ᠤ᠋ ᠨᠠᠭᠠᠳᠤᠮ ᠤ᠋ᠨ ᠬᠤᠷᠠᠯ ᠳ᠋ᠤ᠌
ᠨᠠᠢᠷ ᠤ᠋ᠨ ᠰᠥᠩ
ᠴᠣ· ᠣᠷᠱᠤᠨ
ᠤᠶᠠᠩᠭᠠ ᠰᠠᠢᠬᠠᠨ ᠲᠤᠤᠯᠢᠰ ᠤ᠋ᠨ ᠡᠬᠢ
ᠤᠳᠤᠮᠰᠢᠯᠲᠤ ᠨᠠᠢᠷ ᠤ᠋ᠨ ᠰᠥᠩ ᠥᠨᠳᠥᠷᠯᠡᠨᠡ᠃
ᠪᠠᠷᠭᠤ ᠨᠠᠭᠠᠳᠤᠮ ᠰᠠᠢᠬᠠᠨ ᠳᠤᠷᠠᠳᠬᠠᠯ
ᠪᠠᠰᠠ ᠴᠤ᠌ ᠴᠠᠭᠠᠨᠠ ᠪᠠᠨ ᠪᠢᠳᠡᠨ ᠦ᠌ ᠣᠮᠣᠭᠰᠢᠯ
ᠪᠠᠶᠠᠨ ᠨᠤᠲᠤᠭ ᠤ᠋ᠨ ᠬᠠᠢᠷᠠ ᠪᠠᠷ ᠦᠳᠡᠨᠡ!
ᠪᠠᠶᠠᠷᠲᠠᠢ ᠦᠭᠡ ᠬᠥᠯᠥᠨ ᠪᠤᠢᠷ ᠳᠤᠷᠠᠰᠤᠨᠠ!
ᠮᠣᠩᠭᠣᠯ ᠬᠤᠸᠠᠷᠠᠨ
ᠵᠡᠷᠭᠡᠯᠡᠵᠦ ᠪᠠᠭᠤᠭᠰᠠᠨ
ᠵᠡᠷᠭᠡᠯᠭᠡᠨ ᠳᠡᠷᠡᠯᠡᠭᠰᠡᠨ ᠮᠣᠩᠭᠣᠯ ᠭᠡᠷ
ᠵᠡᠷᠭᠡᠴᠡᠭᠦᠯᠵᠦ ᠬᠠᠲᠠᠭᠰᠠᠨ
ᠵᠢᠭᠳᠡ ᠭᠢᠯᠠᠯᠵᠠᠭᠰᠠᠨ ᠮᠥᠩᠭᠥᠨ ᠲᠣᠪᠴᠢ᠃
ᠪᠠᠷᠭᠤ ᠡᠸᠡᠩᠬᠢ ᠶ᠋ᠢᠨ ᠪᠠᠲᠤ ᠭᠠᠩ
ᠭᠠᠯ ᠲᠤᠯᠭᠠ —
ᠪᠠᠳᠠᠷᠠᠨ ᠳᠦᠷᠡᠯᠵᠡᠬᠦ ᠪᠠᠢᠩᠭᠤ ᠮᠥᠩᠬᠡᠵᠢᠬᠦ
ᠪᠠᠶᠠᠨ ᠳᠠᠯᠠᠯᠭᠠ!
ᠲᠣᠭᠣᠷᠢᠭ ᠮᠣᠷᠢᠨ ᠤᠷᠤᠯᠳᠤᠭᠠᠨ
ᠳᠡᠭᠳᠡᠭᠡᠳ ᠳᠡᠭᠦᠯᠢᠭᠡᠳ ᠭᠠᠷᠤᠭᠰᠠᠨ ᠮᠣᠷᠢᠳ
ᠳᠡᠷᠭᠡᠳᠡᠭᠦᠷ ᠲᠣᠭᠣᠷᠢᠵᠤ ᠪᠠᠢᠨᠠ
ᠳᠡᠯᠡᠬᠡᠢ ᠲᠣᠭᠣᠷᠢᠵᠤ ᠪᠠᠢᠨᠠ
ᠮᠣᠷᠢ᠂ ᠬᠥᠮᠦᠨ ᠬᠣᠶᠠᠷ ᠨᠢᠰᠳᠡᠭ
ᠮᠣᠩᠭᠣᠯ ᠡᠷᠡ ᠵᠢᠪᠬᠤᠭᠠᠵᠢᠳᠠᠭ
ᠲᠤᠭ ᠳᠡᠯ ᠨᠢ ᠬᠡᠢᠮᠣᠷᠢ ᠪᠣᠯᠵᠤ
ᠲᠤᠭᠤᠷᠠᠢ ᠲᠦᠪᠡᠷᠭᠡᠨ ᠨᠢ ᠬᠤᠭᠤᠷ ᠬᠠᠩᠭᠢᠨᠠᠨᠠ
ᠮᠣᠷᠢᠲᠠᠨ ᠤ᠋ ᠠᠯᠳᠠᠷ
ᠥᠨᠢᠳᠡ ᠮᠠᠨᠳᠤᠨᠠ
ᠮᠣᠷᠢ᠂ ᠬᠡᠦᠬᠡᠳ ᠬᠣᠶᠠᠷ ᠡᠩᠬᠡᠯᠬᠡᠨ ᠰᠤᠮᠤᠳᠠᠨᠠ᠃
ᠲᠠᠯᠠ ᠮᠢᠨᠦ
ᠳᠠᠭᠤᠤ ᠮᠥᠩᠬᠡᠷᠡᠭᠰᠡᠨ ᠲᠤᠤᠯᠢᠮᠠ ᠰᠠᠢᠬᠠᠨ ᠲᠠᠯᠠ ᠮᠢᠨᠢ
ᠠᠢᠷᠠᠭ ᠤ᠋ᠨ ᠦᠨᠦᠷ ᠢ᠋ᠶ᠋ᠡᠷ
ᠰᠡᠩᠭᠢᠨᠡᠵᠦ ᠪᠣᠰᠤᠨᠠ
ᠠᠳᠤᠭᠤᠨ ᠤ᠋ ᠰᠠᠯᠬᠢ
ᠱᠤᠤᠭᠢᠵᠤ ᠶᠦᠷᠭᠦᠭᠡᠨᠡ
ᠬᠡᠳᠦᠬᠡᠨ ᠦᠰᠦᠭ ᠬᠡᠯᠬᠢᠵᠦ ᠪᠢᠴᠢᠮᠡᠷ ᠦᠭᠡᠢ
ᠤᠬᠠᠭᠠᠨ ᠰᠠᠨᠠᠭᠠ ᠮᠢᠨᠢ
ᠶᠠᠭᠠᠬᠢᠬᠤ ᠪᠠᠷ ᠢ᠋ᠶ᠋ᠠᠨ ᠠᠮᠤᠷᠵᠢᠨᠠ ᠪᠢᠯᠡ ?
ᠬᠡᠳᠦᠨ ᠪᠠᠳᠠᠭ ᠴᠤ᠌ ᠴᠡᠭᠡᠵᠢᠯᠡᠮᠡᠷ ᠦᠭᠡᠢ ᠬᠡᠯᠡᠭᠡᠢᠬᠡᠨ ᠪᠢ
ᠶᠠᠭᠤᠨ ᠳ᠋ᠠᠭᠠᠨ ᠲᠠᠯᠪᠢᠭᠤᠷᠠᠨᠠ ᠪᠢᠯᠡ?
ᠠᠩᠭᠢᠷ ᠤ᠋ᠨ ᠥᠨᠳᠡᠭᠡ ᠠᠩᠭᠠᠯᠵᠠᠭᠰᠠᠨ ᠵᠤᠯᠵᠠᠭᠠ ᠰᠢᠭ᠋
ᠠᠩᠬᠠᠨ ᠤ᠋ ᠮᠦᠷᠯᠡᠯ ᠲᠣᠭᠠᠨ ᠤ᠋ ᠡᠬᠢ ᠪᠣᠯᠵᠤ
ᠲᠣᠳᠣᠬᠠᠨ ᠬᠠᠷᠠᠭᠳᠠᠨᠠ᠂
ᠠᠯᠳᠠᠰᠢ ᠤᠨᠤᠰᠢ ᠶ᠋ᠢᠨ ᠡᠭᠡᠯᠵᠢᠯᠡᠵᠦ ᠭᠤᠲᠤᠯᠳᠠᠭᠰᠠᠨ
ᠠᠭᠠᠯᠢᠭᠦᠢ ᠨᠠᠰᠤ ᠲᠣᠮᠣᠷᠠᠵᠤ ᠪᠠᠯᠠᠷᠠᠨ
ᠳᠤᠷᠠᠰᠤᠭᠠᠳ ᠢᠨᠢᠶᠡᠨᠡ ᠠ᠋᠂
ᠲᠡᠷᠡ ᠯᠠ ᠪᠠᠭᠤᠴᠠ
ᠶᠠᠭᠠᠬᠢᠭᠰᠠᠨ ᠪᠢᠯᠡ ᠳᠠ? ᠲᠡᠳᠡᠨ ᠦ᠌ ᠬᠢᠨ ᠲᠡᠭᠡᠭᠡᠳ
ᠣᠷᠢᠯᠠᠵᠤ ᠬᠣᠯᠠᠳᠠᠯᠠ ᠲᠡᠭᠡᠭᠡᠮᠡᠷ ᠦᠭᠡᠢ
ᠬᠠᠢᠷᠠ ᠮᠥᠷᠥᠭᠡᠳᠦᠯ ᠲᠡᠩᠴᠡᠭᠦᠷᠢ ᠦᠭᠡᠢ
ᠵᠣᠪᠠᠯᠠᠩ ᠡᠳ᠋ᠯᠡᠯᠡ ᠬᠣᠷᠢᠨ ᠨᠠᠰᠤᠨ ᠤ᠋ ᠬᠥᠨᠳᠡᠢ ᠶᠠᠪᠤᠳᠠᠯ
ᠬᠣᠨᠢᠨ ᠤ᠋ ᠪᠡᠯᠴᠢᠭᠡᠷ ᠦ᠋ᠨ ᠵᠠᠬᠠ ᠠ᠋ᠴᠠ ᠴᠤᠬᠤᠢᠵᠤ
ᠭᠤᠴᠢ ᠬᠦᠷᠦᠭᠰᠡᠨ ᠣᠮᠣᠭᠯᠠᠩ ᠳᠥᠷᠥᠭᠡ ᠭᠤᠨᠠ ᠶ᠋ᠢᠨ ᠡᠪᠡᠷ ᠲᠤ
ᠳᠤᠷᠠᠳᠬᠠᠯ ᠰᠡᠢᠯᠦᠭᠰᠡᠨ ᠤᠩᠰᠢᠬᠤ ᠳᠣᠳᠣᠮ
ᠤᠬᠠᠭᠠᠷᠠᠯ ᠰᠣᠷᠢᠳᠠᠭ ᠠᠭᠤᠵᠢᠮ ᠬᠣᠷᠸᠠ
ᠲᠠᠯᠠ ᠮᠢᠨᠦ᠃
ᠤᠬᠠᠭᠠᠵᠢᠬᠤ ᠳᠣᠳᠣᠮ
ᠬᠢᠴᠢᠶᠡᠮᠵᠢ ᠳᠠᠪᠲᠠᠳᠠᠭ ᠣᠶᠤᠨ ᠮᠡᠳᠡᠯᠭᠡ ᠶ᠋ᠢᠨ
ᠬᠢᠴᠢᠶᠡᠯ ᠮᠢᠨᠢ ᠪᠢᠯᠢᠤ⁈
ᠳᠠᠪᠬᠢᠭᠤᠯᠵᠤ ᠥᠨᠳᠡᠢᠬᠦ ᠳ᠋ᠦ᠍ ᠰᠡᠳᠬᠢᠯ ᠬᠠᠨᠠᠷᠠᠭᠰᠠᠨ
ᠳᠠᠭᠤᠯᠠᠵᠤ ᠴᠣᠭᠭᠢᠭᠤᠯᠬᠤ ᠳ᠋ᠤ᠌ ᠵᠣᠷᠢᠭ ᠪᠣᠰᠬᠠᠭᠰᠠᠨ
ᠲᠠᠯᠠ ᠴᠢ᠂ ᠮᠢᠨᠦ
ᠥᠯᠥᠭᠡᠢ ᠬᠠᠢᠷᠠ
ᠲᠠᠯᠠ ᠴᠢ᠂ ᠮᠢᠨᠦ
ᠪᠦᠪᠡᠢ ᠡᠬᠡᠰᠢᠭ᠃
ᠮᠣᠷᠢᠲᠠᠢ ᠬᠥᠮᠦᠨ ᠲᠤᠭᠤᠷᠠᠢ ᠪᠠᠷ ᠢ᠋ᠶ᠋ᠠᠨ
ᠮᠣᠷᠢᠨ ᠬᠤᠭᠤᠷ ᠦᠦᠷᠰᠡᠭᠦᠯᠦᠨᠡ᠂
ᠮᠣᠩᠭᠣᠯ ᠣᠷᠣᠨ ᠵᠠᠩ ᠲᠠᠢ
ᠮᠥᠩᠬᠡ ᠠᠶᠠᠰ ᠠᠶᠠᠯᠤᠨᠠ᠃
ᠮᠠᠯ ᠤ᠋ᠨ ᠬᠥᠮᠦᠨ ᠬᠠᠶᠠᠭ ᠲᠠᠢ ᠮᠢᠨᠦ ᠲᠠᠯᠠ᠂
ᠨᠠᠳᠠ ᠲᠠᠢ ᠦᠢᠯᠡᠰ ᠢ᠋ᠶ᠋ᠡᠷ ᠴᠡᠴᠡᠭᠯᠡᠨᠡ
ᠥᠭᠡᠳᠡᠷᠬᠡᠭ ᠢ᠋ᠶ᠋ᠡᠷ ᠴᠠᠯᠠᠢᠨᠠ
ᠵᠤᠰᠠᠭᠠᠯ ᠤ᠋ᠨ ᠰᠠᠭᠠᠯᠢᠴᠢᠨ ᠤ᠋
ᠲᠣᠭᠠ ᠠᠪᠴᠤ ᠰᠠᠷᠠᠪᠴᠢᠯᠠᠭᠠᠯᠤᠭᠰᠠᠨ
ᠵᠣᠨᠠᠨ ᠴᠠᠪᠢᠳᠠᠷᠲᠤ ᠲᠠᠪᠠᠬᠠᠢ ᠶ᠋ᠢᠨ ᠳᠠᠭᠤᠯᠠᠭᠰᠠᠨ
《 ᠵᠧ ᠬᠥᠶᠢ》 ᠵᠢᠷᠤᠭ ᠰᠢᠭ᠋ ᠬᠡᠭᠡᠨᠴᠢᠷ
ᠸᠠᠷᠱᠠᠸᠠ ᠶ᠋ᠢᠨ ᠲᠠᠢᠵᠠ —
ᠪᠤᠶᠠᠨᠳᠡᠯᠭᠡᠷ ᠦ᠋ᠨ ᠵᠠᠭᠤᠨ ᠲᠦᠮᠡᠨ ᠦ᠌
ᠠᠯᠠᠭᠠ ᠬᠡᠢᠮᠦᠷᠢᠯᠡᠭᠰᠡᠨ
《 ᠰᠠᠷᠠᠭᠤᠯ ᠲᠠᠯᠠ》 ᠭᠠᠵᠠᠷ ᠤ᠋ᠨ ᠬᠣᠯᠠᠬᠠᠨ ᠳ᠋ᠤ᠌
ᠵᠢᠯᠣᠭᠣ ᠰᠤᠯᠠᠷᠠᠯ ᠥᠬᠡᠢ ᠲᠡᠮᠡᠦᠯᠳᠡᠭ
ᠭᠠᠩᠭᠠᠩ ᠬᠠᠷᠠ ᠲᠠᠢ ᠪᠠᠳᠮᠠ ᠡᠭᠡᠴᠢ ᠶ᠋ᠢᠨ
ᠦᠨᠡᠨᠴᠢᠬᠡᠨ ᠵᠠᠬᠢᠶᠠ《 ᠭᠠᠷᠤᠳᠢ》ᠮᠥᠷᠥᠢᠴᠡᠭᠡᠨ ᠳ᠋ᠦ᠍
《 ᠮᠥᠨᠲᠥᠭᠡᠷ ᠰᠠᠷᠠᠯ》 ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠡᠢᠰᠬᠡᠵᠦ ᠶᠠᠪᠤᠭᠰᠠᠨ
ᠭᠠᠯᠲᠠᠢ ᠴᠣᠭᠲᠠᠢ ᠨᠠᠴᠤᠭᠳᠣᠷᠵᠢ ᠬᠦᠦ ᠶ᠋ᠢᠨ
ᠰᠣᠷᠢᠯᠲᠠ ᠳᠠᠪᠬᠢᠭᠠ ᠲᠠᠯᠠ ᠴᠢᠨᠦ ᠮᠢᠨᠢ
ᠥᠯᠥᠭᠡᠢ ᠬᠠᠢᠷᠠ ᠶ᠋ᠢᠨ ᠡᠬᠢ ᠶᠦᠮ
ᠲᠠᠯᠠ ᠴᠢᠨᠦ ᠮᠢᠨᠢ
ᠪᠦᠪᠡᠢ ᠡᠭᠡᠰᠢᠭ ᠦ᠋ᠨ ᠣᠨᠳᠣᠷᠣᠯ ᠶᠤᠮ
ᠬᠣᠲᠠ ᠳ᠋ᠤ᠌ ᠠᠵᠢᠯᠯᠠᠭᠰᠠᠨ ᠴᠤ᠌
ᠲᠠᠯᠠ ᠳ᠋ᠠᠭᠠᠨ ᠡᠭᠡᠨᠡᠭᠰᠢᠳᠡᠭ
ᠳᠣᠨᠳᠤᠪ ᠠᠬᠠ ᠶ᠋ᠢᠨ ᠠᠶᠠ ᠨᠠᠮᠢᠶᠠ
ᠬᠣᠭᠣᠯᠠᠢ ᠰᠥᠭᠡᠩᠭᠢ ᠴᠤ᠌
ᠬᠤᠭᠤᠷ ᠨᠢ ᠴᠣᠪᠬᠣᠴᠢᠳᠠᠭ
ᠲᠥᠬᠥᠷ ᠦ᠋ᠨ ᠮᠢᠨᠢ《 ᠪᠤᠢᠷ ᠬᠥᠯᠥᠨ》
ᠰᠣᠳᠣᠨ ᠨᠠᠢᠷᠠᠭᠴᠢ ᠪᠤ᠌· ᠳᠣᠩᠶᠤᠳᠳᠣᠷᠵᠢ ᠶ᠋ᠢᠨ
《 ᠪᠢ ᠮᠠᠯᠴᠢᠨ ᠤ᠋ ᠬᠦᠦ》ᠴᠣᠭ ᠲᠠᠭᠠᠨ ᠭᠢᠯᠠᠯᠵᠠᠭᠰᠠᠨ
ᠴ · ᠮᠥᠩᠬᠡᠰᠦ᠋ᠷᠦᠩ ᠦ᠋ᠨ《 ᠬᠠᠩᠭᠠᠢ ᠶ᠋ᠢᠨ ᠴᠡᠩᠬᠡᠷ ᠢᠷᠭᠤᠢ》
ᠲᠠᠯᠠ ᠴᠢᠨᠦ ᠮᠢᠨᠢ
ᠥᠯᠥᠭᠡᠢ ᠬᠠᠢᠷᠠ ᠲᠥᠯᠥᠪ ᠠᠭᠠᠰᠢ
ᠲᠠᠯᠠ ᠴᠢᠨᠦ ᠮᠢᠨᠢ
ᠪᠦᠪᠡᠢ ᠡᠬᠡᠰᠢᠭ ᠲᠥᠷᠬᠦ ᠳᠦᠷᠢ
ᠨᠠᠢ᠍ᠮᠠᠨ ᠨᠡᠷᠡ ᠨᠠᠶᠠᠨ ᠠᠯᠳᠠᠷᠠᠢ
ᠨᠡᠷᠡᠲᠦ ᠬᠣᠷᠸᠠ ᠰᠠᠷᠠᠲᠤ ᠪᠥᠮᠪᠥᠯᠢᠭ
ᠢᠵᠢᠯ ᠢ᠋ᠶ᠋ᠡᠷ ᠴᠣᠭᠴᠠᠯᠠᠬᠤ ᠦᠷᠡᠰ ᠨᠢ ᠪᠢᠯᠡ
ᠠᠯᠲᠠ ᠪᠠᠷ ᠪᠢᠴᠢᠬᠦ ᠢᠷᠭᠡᠳ ᠨᠢ ᠪᠢᠯᠡ᠃
ᠥᠰᠴᠦ ᠪᠣᠢᠵᠢᠭᠰᠠᠨ ᠦᠷᠡ ᠨᠢ ᠪᠢᠳᠡ
ᠥᠳᠥ ᠰᠣᠳᠣ ᠪᠦᠷᠢᠳᠦᠭᠡᠳ
ᠵᠠᠢ ᠬᠣᠯᠠᠳᠬᠠᠵᠤ ᠵᠠᠭᠠᠭ ᠠᠯᠤᠰᠯᠠᠭᠰᠠᠨ ᠴᠤ᠌
ᠲᠠᠨ ᠰᠢᠭ᠋ ᠢ᠋ᠶ᠋ᠡᠨ ᠲᠠᠯᠠ ᠶᠤᠮ ᠠ᠋᠂
ᠲᠠᠯᠠ ᠰᠢᠭ᠋ ᠢ᠋ᠶ᠋ᠡᠨ ᠠᠭᠤᠳᠠᠮ ᠶᠤᠮ ᠠ᠋᠃
ᠲᠠᠯᠠ ᠶ᠋ᠢᠨ ᠮᠠᠯᠴᠢᠨ ᠤ᠋ ᠪᠣᠳᠣᠯ ᠨᠢ ᠴᠡᠩᠬᠡᠷ
ᠬᠦᠰᠡᠯ ᠨᠢ ᠪᠣᠰᠤᠭᠠ
ᠲᠠ ᠶᠡᠷᠦ ᠨᠢ ᠨᠠᠳᠠ ᠲᠠᠢ ᠪᠠᠨ ᠠᠳᠠᠯᠢ
ᠪᠢ ᠶᠡᠷᠦ ᠳ᠋ᠡᠭᠡᠨ ᠲᠠᠨ ᠤ᠋ ᠬᠣᠷᠸᠠ
ᠲᠠᠯᠠ — ᠠᠮᠢᠳᠤᠷᠠᠯ
ᠲᠠᠷᠠᠭ — ᠠᠢᠷᠠᠭ
ᠲᠡᠰᠬᠢᠮᠡ — ᠠᠭᠠᠭᠢᠮᠠ
ᠤᠯᠠᠷᠢᠯ ᠤ᠋ᠨ ᠨᠤᠬᠤᠴᠠᠭᠠᠨ ᠳ᠋ᠤ᠌
ᠠᠮᠢᠳᠤᠷᠠᠯ᠂ ᠬᠥᠮᠦᠨ ᠠᠵᠤ ᠪᠠᠨ ᠪᠠᠷᠠᠭᠰᠠᠨ
ᠪᠡᠯᠡ ᠦᠭᠡᠢ ᠲᠡᠮᠡᠴᠡᠯ ᠭᠡᠳᠡᠭ
ᠳᠠᠷᠬᠠᠨ ᠨᠣᠲ᠋ᠯᠠᠯ ᠲᠠᠯᠠ ᠴᠢᠮᠠᠶ᠋ᠢ ᠪᠠᠨ
ᠳᠠᠭᠤᠯᠠᠵᠤ ᠶᠠᠪᠤᠨᠠ
ᠲᠠᠯᠠ ᠡᠷᠡ ᠶ᠋ᠢᠨ ᠴᠡᠭᠡᠵᠢᠨ ᠳ᠋ᠦ᠍
ᠡᠮᠡᠭᠡᠯ ᠲᠡᠢ ᠮᠣᠷᠢ ᠪᠠᠭᠲᠠᠴᠢᠬᠠᠬᠤ
ᠳᠠᠨᠠᠭᠠᠷ ᠳᠠᠭᠤᠴᠢᠨ ᠤ᠋ ᠬᠣᠭᠣᠯᠠᠢ ᠳ᠋ᠤ᠌
ᠡᠷᠡᠮᠡᠭ ᠬᠠᠷᠴᠠᠭᠠᠢ ᠵᠢᠷᠭᠢᠴᠢᠬᠡᠬᠦ
ᠬᠤᠳᠠᠯ ᠪᠢᠰᠢ ᠦᠨᠡᠨ
ᠬᠤᠤᠳᠤᠤ ᠪᠢᠰᠢ ᠨᠡᠭᠡᠷᠡᠨ
ᠨᠠᠢᠷᠠᠭ ᠠᠢᠷᠠᠭ ᠲᠤ ᠥᠰᠦᠭᠰᠡᠨ ᠪᠢ
ᠨᠠᠷᠠ ᠲᠠᠢ ᠬᠣᠷᠸᠠ ᠳ᠋ᠤ᠌ ᠵᠠᠷᠯᠠᠨᠠᠮ ᠪᠢᠯᠢᠤ᠃
ᠴᠢᠮᠠᠶ᠋ᠢ ᠪᠣᠳᠣᠳᠠᠭ ᠬᠥᠮᠦᠨ
ᠵᠡᠭᠦᠳᠦ ᠪᠡᠷ ᠤᠴᠠᠷᠠᠬᠤ ᠦᠭᠡᠢ
ᠵᠢᠷᠦᠬᠡ ᠪᠡᠷ ᠢ᠋ᠶ᠋ᠡᠨ ᠠᠭᠤᠯᠵᠠᠳᠠᠭ᠃
ᠴᠢᠮᠠ ᠳ᠋ᠤ᠌ ᠬᠠᠢᠷᠠᠲᠠᠢ ᠬᠣᠢᠴᠢᠰ
ᠮᠥᠷᠥᠭᠡᠳᠦᠯ ᠢ᠋ᠶ᠋ᠡᠷ ᠳᠤᠷᠠᠰᠬᠤ ᠦᠭᠡᠢ
ᠢᠲᠡᠭᠡᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠤᠯᠳᠠᠭ᠃
ᠡᠨᠡᠬᠡᠨ ᠬᠣᠷᠸᠠ ᠶ᠋ᠢᠨ ᠶᠣᠰᠣ ᠬᠣᠢᠨᠠ
ᠡᠯᠳᠡᠩ ᠴᠣᠭᠴᠠ ᠶ᠋ᠢᠨ ᠴᠢᠨᠢ
ᠬᠠᠮᠢᠭᠠ ᠨᠢᠭᠡ ᠡᠪᠡᠰᠦ ᠨᠢ ᠪᠣᠯᠵᠤ
ᠤᠷᠭᠤᠭᠰᠠᠨ ᠴᠤ᠌ ᠶᠠᠭᠠᠮᠠᠢ᠃
ᠡᠯᠡᠷᠢᠰᠢ ᠦᠭᠡᠢ ᠡᠨᠡᠷᠢᠯ ᠦ᠋ᠨ
ᠨᠥᠬᠥᠭᠡᠰᠦ ᠡᠩᠭᠡᠷ ᠨᠢ ᠪᠣᠯᠵᠤ
ᠰᠢᠬᠯᠠᠭᠳᠠᠬᠤ ᠳᠤᠷᠠ ᠲᠠᠢ᠃
ᠳᠠᠭᠤᠤ ᠰᠢᠯᠦᠭ ᠦ᠋ᠨ ᠠᠢᠵᠠᠮ ᠬᠡᠮᠨᠡᠭᠰᠡᠨ
ᠲᠤᠤᠯᠢᠮᠠ ᠬᠣᠷᠸᠠ ᠲᠠᠯᠠ ᠮᠢᠨᠦ ᠳᠡ
ᠨᠡᠷᠡ ᠪᠡᠨ ᠪᠢ ᠪᠢᠴᠢᠳᠡᠭ
ᠨᠢᠳᠡᠷ ᠢ᠋ᠶ᠋ᠡᠨ ᠴᠢᠮᠠ ᠳ᠋ᠤ᠌ ᠥᠪᠯᠡᠯᠡ
ᠨᠡᠢᠭᠡᠮ ᠡᠬᠡ᠂ ᠠᠮᠢᠳᠤᠷᠠᠯ ᠡᠴᠢᠭᠡ ᠶ᠋ᠢ
ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠬᠠᠢᠷᠠᠯᠠᠵᠤ ᠡᠷᠭᠦᠨᠡ ᠪᠢ
ᠨᠠᠮᠲᠠᠷ ᠢ᠋ᠶ᠋ᠠᠨ ᠪᠠᠰᠠ ᠮᠥᠩᠬᠡᠯᠡᠨᠡ ᠪᠢ᠃
ᠢᠷᠡᠯᠲᠡ᠄· ᠴᠣ· ᠣᠷᠱᠤᠨ ᠤ᠋《 ᠮᠠᠯᠴᠢᠨ ᠬᠥᠮᠦᠨ ᠦ᠌ ᠳᠠᠭᠤᠤ》 ᠨᠣᠮ ᠠ᠋ᠴᠠ ᠡᠰᠢᠯᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠷᠴᠡᠴᠡᠭ
2024 04 10