ᠬᠠᠢᠷᠠ ᠶᠢᠨ ᠤᠶᠠᠭᠠ – ᠴᠣ ᠂ ᠣᠷᠱᠤᠨ Хайрын уяа – Чо ᠂ Оршин
294ᠬᠠᠢᠷᠠ ᠶᠢᠨ ᠤᠶᠠᠭᠠ
ᠴᠡᠭᠡᠵᠢᠨ ᠳ᠋ᠡᠭᠡᠨ ᠬᠠᠢᠷᠠ ᠲᠠᠢ ᠪᠤᠴᠠᠯᠠ ᠪᠢ᠂
ᠰᠡᠷᠮᠡᠭᠦᠨ ᠪᠣᠳᠣᠯ ᠳ᠋ᠤ᠌ ᠰᠢᠯᠦᠭ ᠲᠡᠢ
ᠴᠡᠩᠬᠡᠷ ᠲᠠᠯᠠ ᠳ᠋ᠠᠭᠠᠨ ᠤᠶᠠᠭᠠ ᠲᠠᠢ ᠬᠠᠷᠢᠯᠠ ᠪᠢ᠃
ᠲᠠᠪᠢ ᠳᠥᠭᠥᠭᠰᠡᠨ ᠴᠤ᠌ ᠠᠵᠠ ᠲᠠᠭᠠᠷᠠᠵᠤ
ᠲᠠᠷᠭᠤᠨ ᠤ᠋ ᠣᠪᠣᠭᠠᠨ ᠳ᠋ᠤ᠌ ᠬᠦᠷᠦᠭᠰᠡᠨ ᠰᠠᠨ
ᠲᠠᠪᠤ ᠵᠢᠷᠭᠤᠭᠠᠲᠠᠢ ᠬᠡᠦᠬᠡᠳ ᠨᠠᠰᠤᠨ ᠳ᠋ᠠᠭᠠᠨ
ᠲᠠᠴᠢᠭᠢᠨᠠᠵᠤ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠮᠠᠷᠲᠠᠭᠠ ᠦᠭᠡᠢ
ᠳᠠᠰᠤᠭᠰᠠᠨ ᠭᠠᠵᠠᠷ ᠮᠢᠨᠢ ᠭᠡᠬᠦ ᠡᠴᠡ
ᠲᠡᠷᠡ ᠤᠤ ᠳᠠ᠂ ᠰᠡᠳᠬᠢᠯ ᠤᠶᠠᠰᠤᠯᠠ
ᠳᠠᠩᠴᠢ ᠬᠠᠯᠠᠭᠤᠨ ᠪᠣᠳᠣᠭᠳᠠᠬᠤ ᠠ᠋ᠴᠠ
ᠲᠡᠢᠮᠦ ᠶᠦᠮ ᠤᠤ ᠳᠠ᠂ ᠪᠣᠳᠣᠯ ᠡᠭᠡᠨᠡᠭᠰᠢᠯᠡ
ᠲᠠᠷᠠᠭ ᠠᠢᠷᠠᠭ ᠰᠢᠭ᠋ ᠬᠥᠭᠡᠰᠦᠷᠡᠵᠦ ᠱᠠᠭᠢᠭᠰᠠᠨ
ᠲᠠᠷᠭᠤᠨ ᠨᠠᠭᠤᠷ ᠤ᠋ᠨ ᠬᠣᠢᠮᠣᠷ ᠳᠡᠨᠵᠢᠨ ᠳ᠋ᠦ᠍
ᠲᠠᠯᠠ ᠶ᠋ᠢᠨ ᠢ᠋ᠶ᠋ᠡᠨ ᠣᠮᠣᠭᠯᠠᠩ ᠰᠦᠯᠳᠡ ᠨᠢ ᠪᠣᠯᠵᠤ
ᠳᠠᠨᠠᠭᠠᠷ ᠰᠡᠬᠦᠢᠨᠡ᠂ ᠲᠠᠷᠭᠤᠨ ᠤ᠋ ᠣᠪᠣᠭᠠ ᠮᠢᠨᠢ!
ᠠᠶᠠᠭᠠ ᠲᠠᠢ ᠰᠦ ᠰᠢᠭ ᠲᠡᠭᠰᠢᠬᠡᠨ
ᠠᠢᠯ ᠵᠤᠨ ᠢ᠋ᠶ᠋ᠠᠨ ᠬᠦᠷᠢᠶᠡᠯᠡᠭᠦᠯᠦᠭᠰᠡᠨ
ᠠᠮᠠᠨ ᠬᠡᠰᠢᠭ ᠪᠡᠯᠭᠡᠳᠡᠯ ᠲᠡᠢ
ᠠᠯᠤᠰ ᠤ᠋ᠨ ᠲᠥᠰᠥᠪ ᠴᠡᠯᠭᠡᠷᠡᠭᠰᠡᠨ
ᠬᠣᠯᠠ ᠭᠦᠶᠦᠳᠡᠯ ᠦ᠋ᠨ ᠬᠤᠯᠠᠨ ᠴᠢᠬᠢᠲᠡᠢ ᠠᠳᠤᠭᠤᠳ
ᠬᠣᠲᠠ ᠪᠠᠷ ᠬᠣᠲᠠᠯᠠᠬᠤ ᠲᠦᠮᠡᠨ ᠢᠷᠠᠭᠠᠷ ᠬᠣᠨᠢᠳ
ᠬᠣᠲᠣᠭᠣᠷ ᠢ᠋ᠶ᠋ᠠᠷ ᠬᠡᠮᠵᠢᠬᠦ ᠮᠢᠩᠭᠠᠨ ᠪᠠᠷᠠᠭᠠᠨ ᠦᠬᠡᠷ
ᠬᠣᠩᠬᠣᠷ ᠪᠤᠯᠳᠤᠷᠤᠤ ᠪᠠᠷ ᠲᠠᠷᠬᠠᠭᠰᠠᠨ ᠣᠯᠠᠨ ᠰᠢᠷᠭᠠᠯ ᠲᠡᠮᠡᠭᠡᠳ
ᠲᠠᠷᠭᠤᠨ ᠤ᠋ ᠰᠦᠯᠳᠡ ᠶᠡᠬᠡ ᠣᠪᠣᠭᠠ ᠮᠢᠨᠢ
ᠲᠠᠷᠭᠤᠨ ᠨᠠᠭᠤᠷ᠂ ᠥᠵᠢ ᠪᠠᠶᠠᠨ ᠨᠤᠲᠤᠭ ᠮᠢᠨᠢ!
ᠲᠠᠨᠢᠯ ᠤ᠋ᠨ ᠬᠤᠪᠢ᠂ ᠦᠷᠡᠰ ᠦ᠋ᠨ ᠨᠢᠭᠡ ᠪᠡᠷ ᠣᠮᠣᠭᠰᠢᠯᠠ ᠪᠢ
ᠲᠠᠩᠰᠤᠭᠬᠠᠨ ᠤᠶᠠᠩᠭᠠ᠂ ᠬᠠᠢᠷᠠ ᠶ᠋ᠢᠨ ᠤᠶᠠᠭᠠ ᠲᠠᠢ ᠮᠣᠷᠳᠠᠯᠠ ᠪᠢ
ᠢᠷᠡᠯᠲᠡ᠄· ᠴᠣ· ᠣᠷᠱᠤᠨ ᠤ᠋《 ᠮᠠᠯᠴᠢᠨ ᠬᠥᠮᠦᠨ ᠦ᠌ ᠳᠠᠭᠤᠤ》 ᠨᠣᠮ ᠠ᠋ᠴᠠ ᠡᠰᠢᠯᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠷᠴᠡᠴᠡᠭ
2024 04 08