ᠪᠦᠭᠦᠷᠭᠡ ᠲᠦᠰᠢᠭᠰᠡᠨ ᠪᠣᠳᠣᠯ - ᠴᠣ ᠂ ᠣᠷᠱᠤᠨ Бүүрэг түшсэн бодол – Чо ᠂ Оршин
344ᠪᠦᠭᠦᠷᠭᠡ ᠲᠦᠰᠢᠭᠰᠡᠨ ᠪᠣᠳᠣᠯ
ᠲᠥᠷᠥᠭᠳᠡᠭᠰᠡᠨ ᠪᠣᠳᠣᠯ ᠲᠡᠭᠦᠨ ᠦ᠌ ᠬᠢᠴᠢᠶᠡᠯ ᠪᠢᠯᠢᠤ》
— ᠡᠪᠦᠷ ᠳᠡᠪᠲᠡᠷ ᠡᠴᠡ
ᠪᠦᠭᠦᠷᠭᠡ ᠲᠦᠰᠢᠭᠰᠡᠨ ᠪᠣᠳᠣᠯ
ᠠᠯᠲᠠᠨ ᠡᠮᠡᠭᠡᠯ ᠦ᠋ᠨ ᠪᠦᠭᠦᠷᠭᠡ ᠲᠦᠰᠢᠬᠦ ᠳ᠋ᠦ᠍
ᠠᠢᠵᠠᠮ ᠬᠡᠮᠨᠡᠭᠰᠡᠨ ᠬᠡᠷᠦᠯᠦᠨ ᠰᠢᠯᠦᠭᠯᠡᠨᠡ᠂
ᠥᠨᠵᠢᠭᠡᠳ ᠭᠠᠷᠬᠤ ᠳ᠋ᠤ᠌ ᠠᠮᠢᠳᠤᠷᠠᠯ ᠷᠣᠮᠠᠨᠲ᠋ᠢᠭ ᠠᠮᠠᠭᠠᠢ ᠵᠠᠭᠤᠭᠰᠠᠨ ᠠᠭᠰᠤᠮ ᠬᠦᠯᠦᠭ ᠦ᠋ᠨ
《 ᠠᠯᠲᠠᠨ ᠡᠮᠡᠭᠡᠯ》 ᠬᠣᠲᠠ ᠨᠢ ᠪᠠᠢᠨᠠ᠂
ᠠᠯᠠᠪᠬᠢᠨ ᠮᠣᠷᠳᠠᠭᠠᠳ ᠠᠰᠢᠳᠠ ᠥᠨᠳᠡᠢᠭᠰᠡᠨ
ᠠᠵᠢᠯᠴᠢ ᠮᠠᠯᠴᠢᠳ ᠡᠵᠡᠨ ᠨᠢ ᠪᠠᠢᠨᠠ᠂
ᠥᠯᠵᠡᠢᠲᠦ ᠨᠤᠲᠤᠭ ᠲᠤ ᠦᠢᠯᠡᠰ ᠪᠤᠰᠬᠠᠭᠰᠠᠨ
ᠥᠷᠨᠢᠯ ᠬᠥᠭᠵᠢᠯ ᠦ᠋ᠨ ᠵᠢᠪᠬᠤᠭᠠ ᠪᠠᠢᠨᠠᠮ᠂
ᠦᠭᠡ ᠪᠡᠨ ᠶᠡᠭᠦᠯᠡᠭᠡᠳ ᠦᠨᠡᠨᠴᠢ ᠨᠥᠬᠥᠷᠯᠡᠳᠡᠭ
ᠥᠭᠭᠢᠶᠡᠮᠦᠷ ᠰᠡᠳᠬᠢᠯᠲᠦ ᠨᠥᠬᠥᠳ ᠮᠢᠨᠢ ᠪᠠᠢᠨᠠᠮ᠃
ᠬᠠᠨ ᠠᠭᠤᠯᠠ ᠴᠡᠩᠬᠡᠷᠯᠡᠨᠡ
— ᠬᠠᠨ ᠠᠭᠤᠯᠠ ᠰᠤᠮᠤ ᠳ᠋ᠤ᠌
ᠬᠠᠨ ᠠᠭᠤᠯᠠ ᠴᠡᠩᠬᠡᠷᠯᠡᠵᠡᠢ
ᠬᠠᠷᠠᠬᠤ ᠳᠣᠳᠣᠮ ᠣᠢᠷᠠᠳᠴᠠᠢ
ᠬᠠᠢᠷᠠ ᠰᠡᠳᠬᠢᠯ ᠦ᠋ᠨ ᠡᠷᠡᠮᠡᠯᠵᠡᠯ
ᠬᠠᠷᠠᠴᠠᠨ ᠤ᠋ ᠡᠮᠦᠨᠡ ᠲᠣᠳᠣᠷᠬᠠᠢ
ᠬᠠᠨ ᠠᠭᠤᠯᠠ ᠶ᠋ᠢᠨ ᠬᠠᠮᠢᠭᠠ ᠴᠤ᠌
ᠬᠠᠯᠠᠭᠤᠨ ᠬᠣᠰᠢᠭᠤᠲᠤ ᠶ᠋ᠢᠨ ᠰᠦᠷᠦᠭ
ᠬᠠᠷᠠᠬᠤ ᠦᠵᠡᠬᠦ ᠡᠴᠡ ᠢᠯᠡᠭᠦᠦ
ᠬᠠᠢᠷᠠᠯᠠᠬᠤ ᠶ᠋ᠢ ᠬᠠᠮᠢᠭᠠ ᠠ᠋ᠴᠠ ᠣᠯᠤᠨᠠ?
ᠬᠠᠨ ᠠᠭᠤᠯᠠ ᠬᠦᠷᠪᠡᠯ
ᠬᠠᠳᠠ ᠴᠢᠯᠠᠭᠤ ᠣᠯᠠᠨ ᠲᠠᠢ
ᠬᠠᠳᠠ ᠴᠢᠯᠠᠭᠤ ᠶ᠋ᠢᠨ ᠡᠪᠦᠷ ᠲᠤ
ᠬᠠᠯᠠᠭᠤᠨ ᠠᠮᠢᠰᠬᠤᠯ ᠤ᠋ᠨ ᠲᠦᠷᠢᠯᠭᠡ
ᠮᠠᠯ ᠨᠢ ᠭᠠᠵᠠᠷ ᠲᠠᠭᠠᠨ ᠲᠡᠰᠴᠦ
ᠮᠠᠯᠴᠢᠳ ᠨᠤᠲᠤᠭ ᠲᠠᠭᠠᠨ ᠢᠳᠡᠭᠡᠰᠢᠭᠡᠳ
ᠮᠠᠯᠵᠢᠬᠤ ᠰᠠᠭᠤᠷᠢᠰᠢᠯ ᠬᠠᠨᠠᠭᠠᠷ
ᠮᠠᠨ ᠤ᠋ ᠲᠠᠨᠢᠯ ᠴᠤ᠌ ᠲᠡᠨᠢᠭᠡᠷ
ᠮᠠᠯᠴᠢᠨ ᠤ᠋ ᠬᠥᠰᠢᠶᠡ
ᠬᠣᠯᠠ ᠠ᠋ᠴᠠ ᠠᠵᠢᠪᠠᠯ ᠴᠠᠬᠤᠯᠠᠢ ᠪᠣᠰᠬᠤ ᠰᠢᠭ᠋
ᠬᠣᠷᠮᠣᠢ ᠳ᠋ᠤᠨᠢ ᠬᠦᠷᠪᠡᠯ ᠬᠤᠨ ᠪᠠᠭᠤᠬᠤ ᠰᠢᠭ᠋
ᠬᠠᠨ ᠠᠭᠤᠯᠠ ᠰᠤᠮᠤ ᠶ᠋ᠢᠨ ᠵᠠᠬᠠ ᠭᠠᠷᠤᠮᠠᠭᠴᠠ
ᠬᠠᠵᠠᠭᠤ ᠳ᠋ᠤ᠌ ᠮᠡᠨᠳᠦᠯᠡᠬᠦ ᠬᠥᠰᠢᠶᠡ ᠰᠡᠬᠦᠢᠨᠡ᠂
ᠲᠠᠯᠠ ᠳ᠋ᠤ᠌ ᠪᠣᠰᠤᠭᠰᠠᠨ ᠬᠥᠰᠢᠶᠡ ᠶᠡᠷᠦ
ᠲᠠᠭᠠᠷᠠᠯᠳᠤᠵᠤ ᠨᠠᠳᠠ ᠤᠴᠠᠷᠠᠭᠰᠠᠨ ᠦᠭᠡᠢ ᠶᠦᠮ ᠤᠤ
ᠲᠠᠨᠢᠯᠴᠠᠵᠤ ᠵᠣᠭᠣᠭᠳᠠᠬᠤ ᠦᠭᠡ ᠶ᠋ᠢᠨ ᠰᠡᠵᠢᠭᠦᠷ ᠡᠴᠡ
ᠲᠠᠨ ᠢ᠋ᠶ᠋ᠠᠨ ᠬᠦᠨᠳᠦᠯᠡᠬᠦ ᠰᠡᠳᠬᠢᠯᠭᠡ ᠲᠥᠷᠥᠯᠡ᠂
ᠭᠠᠮᠰᠢᠭ ᠵᠤᠳ ᠲᠤ ᠮᠠᠯᠴᠢᠳ ᠬᠠᠷᠢᠨ
ᠭᠠᠷ ᠢ᠋ᠶ᠋ᠠᠨ ᠬᠠᠨᠴᠤᠢᠯᠠᠵᠤ ᠵᠦᠭᠡᠷ ᠰᠠᠭᠤᠳᠠᠭ ᠦᠭᠡᠢ
ᠭᠠᠢ ᠲᠠᠢ ᠲᠡᠷᠡ ᠴᠠᠰᠤ ᠰᠢᠭᠤᠷᠭᠠᠨ ᠳ᠋ᠤ᠌
ᠭᠠᠷᠳᠠᠵᠤ ᠥᠰᠬᠡᠭᠰᠡᠨ ᠮᠠᠯ ᠢ᠋ᠶ᠋ᠠᠨ ᠬᠠᠮᠠᠭᠠᠯᠠᠭᠰᠠᠭᠠᠷ
ᠲᠦᠮᠡ ᠣᠯᠠᠨ ᠤ᠋ ᠬᠠᠷᠠᠬᠤ ᠪᠠᠷᠠ ᠳ᠋ᠤ᠌
ᠲᠥᠯ ᠮᠠᠯ ᠤ᠋ᠨ ᠱᠠᠭᠢᠬᠤ ᠭᠠᠵᠠᠷ
ᠲᠥᠷᠥᠯᠬᠢ ᠨᠤᠲᠤᠭ ᠤ᠋ᠨ ᠬᠥᠷᠥᠰᠥᠨ ᠳᠣᠣᠷᠠ
ᠲᠦᠪᠰᠢᠨ ᠨᠣᠢᠷᠰᠤᠵᠤ ᠬᠥᠰᠢᠶᠡ ᠰᠦᠨᠳᠡᠷᠯᠡᠭᠰᠡᠨ ᠢ᠋
ᠪᠣᠳᠣᠬᠤ ᠪᠦᠷᠢ ᠰᠠᠨᠠᠬᠤ ᠳᠣᠳᠣᠮ
ᠪᠣᠳᠣᠯᠭᠠ ᠥᠭᠴᠦ ᠬᠦᠦᠷᠨᠢᠨ ᠰᠢᠪᠡᠨᠡᠨᠡ᠃
ᠪᠣᠷᠣᠭᠵᠢᠭᠤᠨ ᠮᠠᠯᠴᠢᠨ ᠤ᠋ ᠪᠠᠭᠠᠲᠤᠷᠯᠢᠭ ᠳᠦᠷᠢ
ᠪᠥᠷᠲᠥᠢᠨ ᠪᠥᠷᠲᠥᠢᠨ ᠢᠯᠡᠷᠡᠵᠦ ᠦᠵᠡᠭᠳᠡᠨᠡ᠃
ᠮᠠᠯ ᠮᠠᠯᠴᠢᠨ ᠠᠮᠢ ᠨᠢᠭᠡᠲᠡᠢ
ᠮᠠᠬᠠᠷᠠᠵᠤ ᠵᠢᠳᠬᠦᠳᠡᠭ ᠤᠳᠤᠮ ᠤ᠋ᠨ ᠵᠠᠶᠠᠭᠠ
ᠮᠠᠯᠴᠢᠨ ᠦᠷᠡ ᠶ᠋ᠢᠨ ᠨᠢᠭᠡ ᠨᠢ ᠪᠢ
ᠮᠠᠷᠲᠠᠬᠤ ᠦᠭᠡᠢ ᠴᠡᠭᠡᠵᠢᠯᠡᠵᠦ ᠶᠠᠪᠤᠶᠠ!
ᠬᠡᠷᠦᠯᠦᠨ ᠭᠣᠣᠯ ᠮᠡᠯᠲᠡᠯᠵᠡᠨᠡ
ᠬᠡᠨᠲᠡᠢ ᠡᠴᠡ ᠮᠣᠷᠳᠠᠵᠤ ᠴᠣᠭᠭᠢᠭᠤᠯᠤᠭᠰᠠᠨ
ᠬᠥᠮᠦᠨ ᠦ᠌ ᠦᠷᠡ ᠶ᠋ᠢᠨ ᠵᠠᠶᠠᠭᠠ ᠪᠢᠯᠢᠤ?
ᠬᠥᠯᠥᠨ ᠡᠬᠡ ᠳ᠋ᠡᠭᠡᠨ ᠵᠣᠯᠭᠠᠭᠰᠠᠨ
ᠬᠦᠰᠡᠯ ᠮᠥᠷᠥᠭᠡᠳᠦᠯ ᠦ᠋ᠨ ᠲᠠᠪᠢᠯᠠᠩ ᠴᠤ᠌ ᠶᠤᠮ ᠤᠤ?
ᠬᠡᠷᠦᠯᠦᠨ ᠭᠣᠣᠯ ᠤᠷᠤᠰᠤᠨᠠ
ᠬᠡ ᠲᠡᠢ ᠬᠠᠳᠠᠭ ᠪᠣᠳᠣᠭᠳᠠᠨᠠ᠂
ᠬᠡᠵᠢᠶᠡᠨᠡᠢ ᠳᠣᠮᠣᠭ ᠤ᠋ᠨ ᠤᠯᠠᠭᠠ
ᠬᠡᠨ ᠡᠴᠡ ᠴᠤ᠌ ᠶᠠᠭᠠᠷᠠᠤ ᠲᠡᠮᠡᠦᠯᠦᠨᠡ᠃
《 ᠠᠷᠳᠠᠭ ᠬᠦᠷᠡᠩ》 ᠦ᠋ᠨ ᠶᠦᠷᠭᠡᠭᠡᠨ
ᠠᠯᠳᠠᠷᠠᠵᠤ ᠴᠤᠴᠠᠭᠰᠠᠨ ᠰᠢᠨᠵᠢ ᠦᠭᠡᠢ᠂
ᠠᠵᠢᠨᠠᠢ ᠬᠦᠯᠦᠭ ᠦ᠋ᠨ《 ᠳᠥᠷᠥᠭᠡ》 ᠶ᠋ᠢᠨ
ᠰᠠᠨᠵᠢ ᠨᠢ ᠳᠥᠯᠥᠷᠡᠬᠦ ᠶᠠᠩᠵᠤ ᠦᠭᠡᠢ᠃
ᠬᠡᠷᠦᠯᠦᠨ ᠭᠣᠣᠯ ᠮᠡᠯᠲᠡᠯᠵᠡᠨᠡ
ᠰᠠᠨᠠᠭᠠ ᠨᠢᠭᠡ ᠯᠡ ᠤᠶᠠᠩᠭᠠᠷᠠᠨᠠ᠂
ᠬᠡᠪᠯᠡᠭᠡ ᠦᠭᠡᠢ ᠰᠤᠳᠤᠷ ᠲᠤ
ᠰᠡᠳᠬᠢᠯ ᠳᠡᠭᠳᠡᠨ ᠬᠥᠪᠦᠯᠵᠡᠨᠡ᠃
ᠠᠯᠲᠠᠨ ᠡᠮᠡᠭᠡᠯ
ᠮᠥᠩᠭᠥᠨ ᠬᠡᠷᠦᠯᠦᠨ ᠦ᠌ ᠬᠥᠪᠡᠭᠡ ᠰᠠᠬᠢᠭᠰᠠᠨ ᠲᠠᠭᠲᠠᠭᠠ
ᠮᠥᠩᠬᠡ ᠲᠩᠷᠢ ᠶ᠋ᠢᠨ ᠬᠣᠷᠮᠣᠢ ᠰᠢᠭᠦᠷᠦᠭᠰᠡᠨ ᠪᠦᠷᠭᠦᠳ
ᠪᠠᠷᠭᠤ ᠮᠣᠩᠭᠣᠯ ᠤ᠋ᠨ ᠠᠯᠳᠠᠷ ᠰᠢᠩᠭᠡᠭᠰᠡᠨ ᠨᠡᠷᠡ
ᠪᠠᠶᠠᠨ ᠨᠤᠲᠤᠭ ᠤ᠋ᠨ ᠭᠣᠯᠣᠮᠲᠠ ᠳᠡᠷᠡᠯᠡᠭᠰᠡᠨ ᠰᠦᠯᠳᠡ᠃
ᠢᠷᠡᠯᠲᠡ᠄ ᠴᠣ· ᠣᠷᠱᠤᠨ ᠤ᠋《 ᠮᠠᠯᠴᠢᠨ ᠬᠥᠮᠦᠨ ᠦ᠌ ᠳᠠᠭᠤᠤ 》ᠭᠡᠳᠡᠭ ᠰᠢᠯᠦᠭ ᠦ᠋ᠨ ᠲᠡᠭᠦᠪᠦᠷᠢ ᠡᠴᠡ ᠡᠰᠢᠯᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠷᠴᠡᠴᠡᠭ
2024 04 03