ᠵᠢᠷᠦᠬᠡᠨ ᠪᠦᠪᠡᠢ - ᠴᠣ ᠂ ᠣᠷᠱᠤᠨ Зүрхэн бүүвэй – Чо ᠂ Оршин
312ᠵᠢᠷᠦᠬᠡᠨ ᠪᠦᠪᠡᠢ
ᠡᠩ ᠲᠣᠬᠣᠢ ᠲᠡᠩᠴᠡᠭᠰᠡᠨ
ᠡᠯᠪᠡᠭ ᠪᠦᠲᠦᠨ ᠳᠡᠪᠡᠯ᠃
ᠡᠷᠳᠡᠨᠢ ᠪᠡᠷ ᠰᠢᠭᠢᠳᠬᠡᠮᠡᠯ
ᠡᠯᠡᠰᠦ ᠲᠡᠢ ᠱᠠᠩᠳᠠ
ᠡᠷᠬᠡᠰ ᠴᠡᠩᠬᠡᠷ ᠬᠠᠶᠠᠭ᠃
ᠨᠠᠷᠠᠨ ᠤ᠋ ᠭᠡᠷᠡᠯ ᠰᠢᠵᠢᠷᠲᠡᠵᠤ
ᠨᠠᠪᠴᠢ ᠨᠣᠭᠣᠭᠠ ᠴᠡᠯᠭᠡᠷᠡᠭᠰᠡᠨ
ᠨᠠᠯᠠᠭᠠᠷ ᠠᠭᠤᠳᠠᠮ ᠭᠠᠵᠠᠷ᠃
ᠰᠠᠷᠠᠨ ᠤ᠋ ᠲᠤᠶᠠᠭᠠ ᠬᠡᠷᠡᠯᠳᠦᠵᠦ
ᠰᠠᠢᠬᠠᠨ ᠳᠤᠷᠠᠳᠬᠠᠯ ᠮᠥᠩᠬᠡᠵᠢᠭᠰᠡᠨ
ᠴᠠᠢᠳᠠᠮ ᠮᠥᠩᠭᠥᠨ ᠳᠡᠯᠡᠬᠡᠢ᠃
ᠴᠠᠰᠤ᠂ ᠪᠣᠷᠣᠭᠠ᠂ ᠮᠥᠨᠳᠥᠷ
ᠴᠠᠭ ᠤ᠋ᠨ ᠵᠢᠮᠡ ᠡᠷᠬᠡᠰᠢᠶᠡᠭᠰᠡᠨ
ᠴᠠᠢᠯᠭᠠᠨ ᠮᠣᠩᠭᠣᠯ ᠤᠷᠲᠤᠷᠢᠭ᠃
ᠰᠠᠮᠠᠭᠤᠨ᠂ ᠲᠦᠪᠰᠢᠨ ᠠᠮᠢᠰᠬᠤᠯ ᠳ᠋ᠤ᠌
ᠰᠠᠭᠠᠳ ᠢ᠋ ᠢᠮᠡᠷᠴᠦ ᠵᠢᠷᠤᠭᠯᠠᠭᠰᠠᠨ
ᠴᠠᠩ ᠪᠤᠭᠤᠷᠤᠯ ᠥᠷᠭᠡᠷᠢᠭ᠃
ᠭᠠᠯᠪᠠ ᠶ᠋ᠢᠨ ᠲᠥᠭᠥᠷᠢᠭ ᠲᠣᠯᠢ
ᠭᠠᠯᠠᠭᠤ ᠰᠢᠪᠠᠭᠤᠳ ᠨᠤᠲᠤᠭᠰᠢᠭᠰᠠᠨ
ᠭᠠᠷᠠᠬᠠᠨ ᠨᠢᠳᠦᠲᠦ ᠪᠦᠷᠢᠳᠦ᠃
ᠭᠠᠨᠵᠤᠭᠠ ᠰᠢᠷᠦᠭᠦᠨ ᠶᠦᠷᠭᠦᠭᠡ
ᠭᠠᠳᠠ ᠮᠡᠢᠷᠡᠨ ᠢ᠋ ᠰᠠᠨᠠᠭᠠᠯᠵᠠᠭᠰᠠᠨ
ᠭᠠᠩ ᠲᠠᠢ ᠰᠢᠷᠠ ᠮᠥᠷᠡᠨ᠃
ᠡᠷᠭᠢᠨᠡ ᠬᠤᠨ ᠤ᠋ ᠲᠦᠳᠡᠭ
ᠡᠨᠳᠡ ᠮᠠᠨᠠᠭᠰᠠᠨ ᠴᠣᠭ
ᠡᠷᠡᠨ ᠳᠠᠮᠵᠢᠭᠰᠠᠨ ᠣᠴᠢ᠃
ᠡᠯᠦᠨᠴᠡ ᠬᠤᠯᠤᠨᠴᠠ ᠤᠭᠰᠠᠭᠠ
ᠡᠬᠡ ᠭᠠᠵᠠᠷ ᠯᠤᠭᠰᠢᠭᠰᠠᠨ
ᠡᠯᠢᠭᠡᠨ ᠰᠤᠳᠠᠰᠤᠨ ᠤ᠋ ᠴᠣᠬᠢᠯᠭᠠ᠃
ᠠᠭᠤᠯᠠᠰ ᠦᠯᠢᠭᠡᠷ ᠬᠦᠦᠷᠨᠢᠵᠦ
ᠤᠶᠠᠩᠭᠠ ᠥᠪᠡᠷᠮᠢᠴᠡ ᠨᠠᠮᠪᠠᠵᠠᠭᠰᠠᠨ
ᠤᠷᠢᠳᠤ ᠶ᠋ᠢᠨ ᠤᠷᠢᠳᠤ ᠬᠦᠯᠦᠭ᠃
ᠤᠰᠤ ᠲᠤᠤᠯᠢ ᠬᠠᠢᠯᠵᠤ
ᠣᠮᠣᠭᠯᠠᠩ ᠳᠠᠭᠤᠯᠠᠯ ᠳᠡᠪᠲᠡᠷᠯᠡᠭᠰᠡᠨ
ᠣᠷᠣᠨ ᠨᠤᠲᠤᠭ ᠤ᠋ᠨ ᠴᠠᠳᠢᠭ᠃
ᠰᠥᠰᠥ ᠡᠷᠡᠯᠬᠡᠭ ᠵᠠᠶᠠᠭᠠᠨ ᠤ᠋
ᠰᠦᠯᠳᠡ ᠲᠤᠯᠤᠭᠰᠠᠨ ᠭᠣᠯᠣᠮᠲᠠ
ᠵᠡᠭᠦᠳᠦᠨ ᠦ᠌ ᠡᠪᠡᠢ᠂ ᠥᠯᠥᠭᠡᠢ᠃
ᠵᠣᠷᠢᠭ ᠪᠣᠰᠤᠭᠠ ᠰᠡᠳᠬᠢᠯ ᠦ᠋ᠨ
ᠵᠣᠯᠪᠣᠭᠠ ᠮᠠᠨᠳᠤᠭᠠᠭᠰᠠᠨ ᠬᠡᠢᠮᠣᠷᠢ
ᠵᠢᠷᠦᠬᠡᠨ ᠦ᠌ ᠪᠦᠪᠡᠢ᠂ ᠨᠤᠲᠤᠭ᠃
ᠢᠷᠡᠯᠲᠡ᠄ ᠴᠣ· ᠣᠷᠱᠤᠨ ᠤ᠋《 ᠮᠠᠯᠴᠢᠨ ᠬᠥᠮᠦᠨ ᠦ᠌ ᠳᠠᠭᠤᠤ 》ᠭᠡᠳᠡᠭ ᠰᠢᠯᠦᠭ ᠦ᠋ᠨ ᠲᠡᠭᠦᠪᠦᠷᠢ ᠡᠴᠡ ᠡᠰᠢᠯᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠷᠴᠡᠴᠡᠭ
2024 04 02