ᠥᠨᠥᠴᠢᠨ ᠬᠤᠷᠠᠭᠠᠨ ᠤ ᠵᠠᠶᠠᠭᠠ - ᠴᠣ ᠂ ᠣᠷᠱᠤᠨ Өнчин хурганы заяа – Чо ᠂ Оршин
307ᠥᠨᠥᠴᠢᠨ ᠬᠤᠷᠠᠭᠠᠨ ᠤ ᠵᠠᠶᠠᠭᠠ
ᠬᠠᠩᠰᠢ ᠨᠡᠭᠡᠭᠡᠬᠦ ᠡᠴᠡ ᠡᠮᠦᠨᠡᠬᠡᠨ
ᠬᠠᠢᠯᠵᠤ ᠭᠦᠢᠴᠡᠭᠡ ᠦᠭᠡᠢ ᠴᠠᠰᠤᠨ ᠳ᠋ᠤ᠌
ᠨᠠᠰᠤᠨ ᠳ᠋ᠤ᠌ ᠬᠦᠷᠦᠭᠡᠳᠦᠢ ᠵᠤᠰᠠᠭ ᠠ᠋ᠴᠠ
ᠨᠢᠷᠠᠢ ᠪᠡᠶᠡ ᠮᠢᠨᠢ ᠲᠥᠷᠥᠯᠡ᠃
ᠰᠦ ᠵᠢᠯᠪᠢ ᠦᠭᠡᠢ ᠡᠬᠡ ᠮᠢᠨᠢ
ᠰᠦᠷᠦᠭ ᠢ᠋ᠶ᠋ᠡᠨ ᠳ᠋ᠡᠭᠡᠨ ᠬᠡᠯᠲᠦᠷᠢᠯᠡ
ᠬᠤᠪᠢ ᠮᠠᠭᠤᠲᠠᠢ ᠪᠢ ᠯᠡ
ᠬᠣᠯᠠ ᠶ᠋ᠢᠨ ᠪᠡᠯᠴᠢᠭᠡᠷ ᠲᠤ ᠦᠯᠡᠲᠡᠯᠡ
ᠠᠵᠢᠯᠴᠢ ᠬᠥᠮᠦᠨ ᠪᠠᠢᠭᠰᠠᠨ ᠪᠣᠯ
ᠠᠪᠤᠭᠠᠳ ᠨᠠᠮᠠᠶ᠋ᠢ ᠤᠭᠤᠲᠠᠯᠠᠬᠤ ᠰᠠᠨ᠂
ᠠᠭᠠᠰᠢ ᠮᠠᠭᠤᠲᠠᠢ ᠡᠵᠡᠨ ᠮᠢᠨᠢ
ᠠᠵᠢᠬᠤ ᠴᠤ᠌ ᠦᠭᠡᠢ ᠥᠩᠭᠡᠷᠡᠯᠡ᠃
ᠬᠦᠢᠲᠡᠨ ᠰᠠᠯᠬᠢ ᠦᠯᠢᠶᠡᠪᠡ
ᠬᠥᠷᠪᠡᠭᠦᠯᠵᠦ ᠨᠠᠮᠠᠶ᠋ᠢ ᠤᠨᠠᠭᠠᠪᠠ᠂
ᠬᠥᠳᠡᠭᠡ ᠬᠡᠭᠡᠷᠡ ᠪᠢ
ᠬᠡᠵᠢᠶᠡ ᠣᠰᠤᠭᠤᠵᠤ ᠦᠬᠦᠬᠦ ᠪᠣᠯ⁈
ᠦᠬᠦᠭᠰᠡᠨ ᠬᠣᠢᠨᠠ ᠴᠤ᠌ ᠶᠠᠭᠠᠬᠢᠬᠤᠪ
ᠥᠴᠦᠬᠡᠨ ᠭᠡᠵᠦ ᠭᠣᠯᠣᠬᠤ ᠦᠭᠡᠢ ᠶᠦᠮ᠂
ᠥᠨᠥᠬᠢ ᠡᠵᠡᠨ ᠮᠢᠨᠢ ᠬᠡᠳᠦᠢᠨᠡᠢ
ᠥᠪᠴᠢᠵᠦ ᠠᠷᠠᠰᠤ ᠶ᠋ᠢ ᠭᠠᠨᠵᠤᠭᠠᠯᠠᠨᠠ᠃
ᠠᠳᠬᠤ ᠭᠠᠷᠤᠢᠬᠠᠨ ᠪᠡᠶᠡ ᠮᠢᠨᠢ
ᠠᠷᠠᠰᠤᠨ ᠡᠯᠳᠡᠭᠦᠷ ᠲᠤ ᠣᠷᠣᠭᠠᠳ
ᠬᠣᠢᠷᠭᠣ ᠡᠨᠡᠬᠦ ᠵᠠᠯᠠᠭᠤ ᠶ᠋ᠢᠨ
ᠬᠤᠷᠠᠭᠠᠨ ᠳᠡᠪᠡᠯ ᠳ᠋ᠦ᠍ ᠠᠮᠠᠯᠠᠭᠳᠠᠨᠠ᠃
ᠭᠣᠯᠣᠭᠳᠠᠵᠤ ᠬᠠᠶᠠᠭᠳᠠᠭᠰᠠᠨ ᠪᠢ
ᠭᠣᠮᠣᠳᠠᠯ ᠢᠩᠭᠢᠵᠦ ᠲᠥᠷᠥᠭᠡᠳ
ᠭᠣᠣᠯ ᠵᠢᠷᠦᠬᠡ ᠴᠡᠴᠡᠷᠡᠨ
ᠭᠤᠲᠤᠷᠠᠵᠤ ᠲᠡᠯᠴᠢᠯᠡᠨ ᠪᠠᠢᠲᠠᠯᠠ
ᠥᠭᠭᠢᠶᠡᠮᠦᠷ ᠰᠠᠢᠨ ᠰᠠᠨᠠᠭᠠ ᠲᠠᠢ
ᠦᠬᠡᠷᠴᠢᠨ ᠡᠪᠦᠭᠡᠨ ᠲᠠᠭᠠᠷᠠᠵᠠᠢ
ᠦᠷᠦ ᠡᠪᠡᠳᠴᠦ ᠬᠣᠷᠮᠣᠢᠯᠠᠭᠠᠳ
ᠡᠷᠦᠬᠡ ᠭᠡᠷ ᠲᠡᠭᠡᠨ ᠠᠪᠠᠴᠢᠵᠠᠢ᠃
《 ᠬᠠᠷᠠᠬᠠᠨ ᠭᠠᠭᠴᠠ ᠬᠤᠷᠠᠭᠠ ᠴᠤ᠌
ᠬᠠᠮᠲᠤ ᠨᠡᠢᠲᠡ ᠶ᠋ᠢᠨ ᠬᠥᠷᠥᠩᠭᠡ ᠰᠢᠦ᠂
ᠬᠠᠢᠷᠠᠯᠠᠵᠤ ᠲᠡᠭᠦᠨ ᠢ᠋ ᠥᠰᠬᠡᠬᠦ ᠳ᠋ᠦ᠍
ᠬᠠᠷᠢᠨ ᠪᠢᠳᠡᠨ ᠦ᠌ ᠬᠠᠷᠢᠭᠤᠴᠠᠯᠭᠠ》 ᠭᠡᠳ
ᠡᠮᠡᠭᠡᠨ ᠡᠪᠦᠭᠡᠨ ᠬᠣᠶᠠᠭᠤᠯᠠ ᠪᠠᠨ
ᠡᠩᠬᠦᠷᠡᠢᠯᠡᠵᠦ ᠨᠠᠮᠠᠶ᠋ᠢ ᠲᠡᠵᠢᠭᠡᠯᠡ᠃
ᠡᠷᠬᠢᠮ ᠦᠨᠡᠲᠦ ᠲᠤᠷᠰᠢᠯᠭᠠ ᠪᠠᠷ
ᠡᠳᠡᠭᠡᠭᠡᠵᠦ ᠬᠤᠷᠳᠤᠨ ᠠᠪᠤᠷᠠᠯᠠ᠃
ᠰᠢᠮᠡᠳᠦ ᠰᠦ ᠪᠡᠷ ᠤᠭᠵᠢᠬᠳᠠᠵᠤ
ᠰᠢᠨᠡᠬᠡᠨ ᠢᠰᠡᠭᠡᠢ ᠪᠡᠷ ᠨᠡᠮᠨᠡᠭᠳᠡᠵᠦ
ᠳᠤᠯᠠᠭᠠᠨ ᠭᠡᠷ ᠲᠤ ᠳᠡᠭᠵᠢᠷᠡᠵᠦ
ᠳᠣᠣᠷᠠ ᠪᠠᠨ ᠳᠡᠪᠢᠰᠬᠡᠷ ᠬᠢᠯᠭᠡᠭᠡᠳ᠂
ᠲᠣᠷᠮᠣᠭᠣᠷ ᠨᠢᠳᠦ ᠮᠢᠨᠢ ᠭᠡᠷᠡᠯᠲᠦᠪᠡ
ᠲᠣᠷᠨᠢᠨ ᠪᠣᠢᠵᠢᠵᠤ ᠡᠬᠢᠯᠡᠪᠡ
ᠲᠤᠩ ᠴᠤ᠌ ᠬᠥᠭᠡᠷᠦᠬᠦᠨ ᠦᠰᠪᠡ
ᠲᠣᠭᠯᠠᠨ ᠬᠠᠷᠠᠢᠯᠠᠵᠤ ᠨᠠᠭᠠᠳᠪᠠ᠃
ᠢᠷᠡᠯᠲᠡ᠄ ᠴᠣ· ᠣᠷᠱᠤᠨ ᠤ᠋《 ᠮᠠᠯᠴᠢᠨ ᠬᠥᠮᠦᠨ ᠦ᠌ ᠳᠠᠭᠤᠤ》 ᠭᠡᠳᠡᠭ ᠰᠢᠯᠦᠭ ᠦ᠋ᠨ ᠲᠡᠭᠦᠪᠦᠷᠢ ᠡᠴᠡ ᠡᠰᠢᠯᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠷᠴᠡᠴᠡᠭ
2024 03 30