ᠵᠡᠭᠡᠰᠦЗэгс
339
ᠵᠡᠭᠡᠰᠦ (ᠣᠳᠣᠯ ᠡᠪᠡᠰᠦ)
ᠵᠡᠭᠡᠰᠦ ᠶ᠋ᠢᠨ ᠢᠵᠠᠭᠤᠷ
ᠣᠯᠠᠨ ᠨᠠᠰᠤᠲᠤ ᠡᠪᠡᠰᠦᠯᠢᠭ ᠤᠷᠭᠤᠮᠠᠯ᠂80—150cm ᠥᠨᠳᠥᠷ᠃ ᠡᠰᠢ ᠨᠢ ᠰᠠᠯᠠᠭᠠ ᠦᠭᠡᠢ᠂ ᠦᠶᠡ ᠦᠭᠡᠢ᠂ ᠪᠥᠭᠡᠷᠡᠩᠬᠡᠢ ᠪᠠᠭᠠᠨᠠ ᠬᠡᠯᠪᠡᠷᠢ ᠲᠡᠢ᠃ ᠨᠠᠪᠴᠢ ᠨᠢ ᠴᠤᠪᠤᠷᠠᠨ ᠤᠷᠭᠤᠨᠠ᠂ ᠨᠠᠷᠢᠨ ᠪᠦᠰᠡ ᠬᠡᠯᠪᠡᠷᠢ ᠲᠡᠢ᠂2—4mm ᠥᠷᠭᠡᠨ᠂ ᠨᠡᠯᠢᠶᠡᠳ ᠤᠷᠲᠤ ᠨᠠᠪᠴᠢᠨ ᠤ᠋ ᠲᠣᠭᠳᠣᠢ ᠲᠠᠢ ᠪᠥᠭᠡᠳ ᠴᠡᠴᠡᠭ ᠦ᠋ᠨ ᠲᠦᠷᠦᠭᠦᠦ ᠡᠴᠡ ᠪᠡᠨ ᠥᠨᠳᠥᠷ᠃ ᠴᠡᠴᠡᠭ ᠨᠢ ᠭᠠᠭᠴᠠ ᠪᠡᠯᠭᠡ ᠲᠡᠢ᠂ ᠨᠢᠭᠡ ᠭᠡᠷ ᠲᠡᠢ; ᠡᠷᠡ ᠡᠮᠡ ᠲᠦᠷᠦᠭᠦᠦ ᠨᠢ ᠬᠣᠭᠣᠷᠣᠨᠳᠣ ᠪᠠᠨ1—6cm ᠵᠠᠢ ᠲᠠᠢ ᠤᠷᠭᠤᠨᠠ; ᠡᠷᠡ ᠲᠦᠷᠦᠭᠦᠦ ᠨᠢ ᠳᠡᠭᠡᠳᠦ ᠬᠡᠰᠡᠭ ᠲᠦ ᠤᠷᠭᠤᠨᠠ᠂ ᠲᠡᠩᠬᠡᠯᠢᠭ ᠨᠢ ᠰᠢᠷᠬᠡᠭ ᠰᠢᠭᠦᠰᠦ ᠲᠡᠢ᠂ ᠡᠮᠡ ᠲᠦᠷᠦᠭᠦᠦ ᠨᠢ ᠨᠠᠷᠢᠬᠠᠨ ᠤᠷᠲᠤ ᠪᠥᠭᠡᠷᠡᠩᠬᠡᠢ ᠪᠠᠭᠠᠨᠠ ᠬᠡᠯᠪᠡᠷᠢ ᠲᠡᠢ᠂ ᠳᠣᠣᠷᠠᠲᠤ ᠬᠡᠰᠡᠭ ᠲᠤ ᠤᠷᠭᠤᠨᠠ᠂3—5cm ᠤᠷᠲᠤ ᠳ᠋ᠢᠶᠠᠮᠧᠲ᠋ᠷ ᠨᠢ0.5—1cm ᠬᠦᠷᠡᠩ ᠥᠩᠭᠡ ᠲᠡᠢ; ᠤᠮᠠᠢ ᠨᠢ ᠪᠡᠶᠡ ᠡᠴᠡ ᠪᠡᠨ2—2.5 ᠳᠠᠬᠢᠨ ᠤᠷᠲᠤ ᠪᠠᠷᠢᠭᠤᠯ ᠲᠠᠢ ᠪᠠ ᠪᠠᠷᠢᠭᠤᠯ ᠨᠢ ᠤᠷᠲᠤ ᠦᠰᠦ ᠲᠡᠢ; ᠴᠡᠴᠡᠭ ᠦ᠋ᠨ ᠪᠠᠭᠠᠨᠠ ᠶ᠋ᠢᠨ ᠠᠮᠠᠰᠠᠷ ᠨᠢ ᠥᠨᠳᠡᠭᠡᠯᠵᠢᠨ ᠬᠠᠪᠲᠠᠭᠠᠢ ᠲᠡᠪᠡᠨᠡ ᠰᠢᠭ ᠪᠤᠶᠤ ᠬᠠᠪᠲᠠᠭᠠᠢ ᠲᠡᠪᠡᠨᠡ ᠬᠡᠯᠪᠡᠷᠢ ᠲᠡᠢ; ᠡᠮᠡ ᠲᠣᠭᠣᠷᠴᠣᠭ ᠤ᠋ᠨ ᠪᠠᠷᠢᠭᠤᠯ ᠤ᠋ᠨ ᠦᠰᠦ ᠨᠢ ᠪᠠᠭᠠᠨᠠ ᠶ᠋ᠢᠨ ᠠᠮᠠᠰᠠᠷ ᠠ᠋ᠴᠠ ᠪᠠᠨ ᠣᠬᠣᠷ; ᠬᠥᠭᠵᠢᠯ ᠦᠭᠡᠢ ᠡᠮᠡ ᠴᠡᠴᠡᠭ ᠨᠢ ᠦᠰᠦ ᠪᠦᠬᠦᠢ ᠤᠷᠲᠤ ᠪᠠᠷᠢᠭᠤᠯ ᠤ᠋ᠨ ᠣᠷᠣᠢ ᠳ᠋ᠤ᠌ ᠨᠢ ᠤᠷᠭᠤᠨᠠ᠂ ᠦᠷᠡᠯᠡᠬᠦ ᠦᠭᠡᠢ ᠤᠮᠠᠢ ᠨᠢ ᠮᠠᠰᠢ ᠲᠣᠮᠣ᠃ ᠵᠢᠮᠢᠰ ᠨᠢ ᠵᠢᠵᠢᠭ ᠬᠠᠲᠠᠭᠤ ᠵᠢᠮᠢᠰ᠂ ᠣᠷᠣᠢ ᠳ᠋ᠤ᠌ ᠨᠢ ᠥᠨᠢᠳᠡ ᠣᠷᠣᠰᠢᠬᠤ ᠴᠡᠴᠡᠭ ᠦ᠋ᠨ ᠪᠠᠭᠠᠨᠠ ᠲᠠᠢ᠃ ᠭᠣᠣᠯ ᠴᠥᠭᠥᠷᠥᠮ ᠦ᠋ᠨ ᠬᠥᠪᠡᠭᠡ ᠪᠤᠶᠤ ᠭᠣᠣᠯ ᠤ᠋ᠨ ᠬᠣᠶᠠᠷ ᠬᠥᠪᠡᠭᠡ ᠶ᠋ᠢᠨ ᠴᠢᠭᠢᠭᠲᠡᠢ ᠭᠠᠵᠠᠷ ᠬᠢᠭᠡᠳ ᠨᠠᠮᠤᠭ ᠲᠤ ᠤᠷᠭᠤᠨᠠ᠃
ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠥᠪᠥᠷ ᠮᠣᠩᠭᠣᠯ᠂ ᠬᠠᠷᠠᠮᠦ᠋ᠷᠡᠨ᠂ ᠬᠢᠷᠢᠨ᠂ ᠯᠢᠶᠣᠤᠨᠢᠩ᠂ ᠾᠧᠪᠧᠢ᠂ ᠱᠠᠨ ᠰᠢ᠂ ᠱᠠᠨᠰᠢ᠂ ᠭᠠᠨᠰᠦ᠂ ᠬᠥᠬᠡᠨᠠᠭᠤᠷ᠂ ᠨᠢᠩᠰᠢᠶᠠ᠂ ᠰᠢᠨᠵᠢᠶᠠᠩ ᠵᠡᠷᠭᠡ ᠮᠣᠵᠢ ᠣᠷᠣᠨ ᠳ᠋ᠤ᠌ ᠤᠷᠭᠤᠳᠠᠭ᠃
ᠨᠠᠪᠴᠢ ᠪᠠᠷ ᠨᠢ ᠴᠢᠬᠢᠷᠰᠦ᠂ ᠳᠡᠪᠢᠰᠬᠡᠷ ᠬᠦᠷᠦᠵᠦ ᠪᠣᠯᠬᠤ ᠠ᠋ᠴᠠ ᠭᠠᠳᠠᠨᠠ ᠳᠡᠭᠡᠰᠦ ᠪᠠᠰᠠ ᠲᠠᠮᠤᠵᠤ ᠪᠣᠯᠤᠨᠠ᠃ ᠣᠳᠣᠯ ᠢ᠋ ᠨᠢ ᠳᠡᠷᠡ ᠳ᠋ᠦ᠍ ᠬᠢᠨᠡ᠃ ᠴᠡᠴᠡᠭ ᠦ᠋ᠨ ᠲᠣᠭᠣᠰᠣ ᠨᠢ ᠡᠮ ᠳ᠋ᠦ᠍ ᠣᠷᠣᠨᠠ᠃
ᠬᠢᠲᠠᠳ ᠨᠡᠷᠡ᠄蒙古香蒲
ᠠᠩᠭ᠌ᠯᠢ ᠨᠡᠷᠡ᠄Typha davidiana (Kronf.)Hana.—Mazz
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣ ᠰᠡᠴᠡᠨᠲᠦ
ᠬᠢᠨᠠᠭᠴᠢ᠄ ᠲᠤᠶᠠᠭᠠ