ᠠᠭᠤᠯᠠᠨ ᠭᠨᠧᠲ᠋ᠣᠮУулан гнетм
319
ᠠᠭᠤᠯᠠᠨ ᠭᠨᠧᠲ᠋ᠣᠮ
ᠭ᠌ᠨᠧᠲ᠋ᠤᠮ ᠤ᠋ᠨ ᠢᠵᠠᠭᠤᠷ
ᠣᠯᠠᠩᠬᠢ ᠳ᠋ᠠᠭᠠᠨ ᠲᠤᠷᠤᠭ ᠮᠣᠳᠣᠨ ᠳᠡᠭᠡᠷᠡ ᠠᠪᠠᠷᠢᠵᠤ ᠤᠷᠭᠤᠳᠠᠭ ᠮᠥᠩᠬᠡ ᠨᠣᠭᠣᠭᠠᠨ ᠲᠣᠮᠣ ᠲᠡᠩᠰᠡᠯᠢᠭ ᠤᠷᠭᠤᠮᠠᠯ᠂ ᠢᠯᠡᠬᠡᠨ ᠦᠶᠡ ᠲᠡᠢ᠃ ᠨᠠᠪᠴᠢ ᠨᠢ ᠴᠢᠭᠲᠠᠯᠠᠨ ᠤᠷᠭᠤᠨᠠ᠂ ᠰᠠᠷᠢᠰᠤᠯᠢᠭ ᠴᠢᠨᠠᠷᠲᠠᠢ᠂ ᠤᠷᠲᠤᠯᠵᠢᠨ ᠵᠤᠤᠪᠠᠩ᠂ ᠤᠷᠲᠤᠯᠵᠢᠨ ᠲᠣᠭᠣᠷᠢᠭ ᠰᠢᠭ᠋ ᠬᠠᠪᠲᠠᠭᠠᠢ ᠲᠡᠪᠡᠨᠡ ᠪᠤᠶᠤ ᠥᠨᠳᠡᠭᠡᠯᠵᠢᠨ ᠰᠢᠭ ᠤᠷᠲᠤ ᠲᠣᠭᠣᠷᠢᠭ ᠬᠡᠯᠪᠡᠷᠢ ᠲᠡᠢ᠂ 7—25cm ᠤᠷᠲᠤ᠂ 4.5—11cm ᠥᠷᠭᠡᠨ᠂ ᠪᠦᠲᠦᠨ ᠬᠥᠪᠡᠭᠡ ᠲᠡᠢ᠂ ᠬᠣᠶᠠᠷ ᠲᠠᠯᠠ ᠳ᠋ᠠᠭᠠᠨ ᠦᠰᠦ ᠦᠭᠡᠢ᠂ ᠭᠥᠯᠢᠭᠡᠷ᠂ 8—15mm ᠤᠷᠲᠤ ᠪᠠᠷᠢᠭᠤᠯ ᠲᠠᠢ᠃ ᠴᠡᠴᠡᠭ ᠨᠢ ᠭᠠᠭᠴᠠ ᠪᠡᠯᠭᠡ ᠲᠡᠢ᠂ ᠨᠢᠭᠡ ᠭᠡᠷ ᠲᠡᠢ ᠪᠤᠶᠤ ᠣᠨᠳᠣᠣ ᠭᠡᠷ ᠲᠡᠢ ᠪᠥᠭᠡᠳ ᠲᠦᠷᠦᠭᠦᠦ ᠬᠡᠯᠪᠡᠷᠢᠲᠦ ᠪᠠᠭ ᠴᠡᠴᠡᠭ ᠪᠣᠯᠵᠤ ᠤᠷᠭᠤᠨᠠ᠃ ᠡᠷᠡ ᠪᠠᠭ ᠴᠡᠴᠡᠭ ᠨᠢ ᠨᠢᠭᠡ ᠡᠴᠡ ᠬᠣᠶᠠᠷᠳᠠᠭᠰᠠᠨ ᠭᠤᠷᠪᠠᠯᠠᠭᠰᠠᠨ ᠰᠠᠯᠠᠭᠠ ᠭᠠᠷᠴᠤ᠂ ᠰᠠᠯᠠᠭᠠ ᠪᠦᠷᠢ ᠳ᠋ᠦ᠍ᠨᠢ 13—17 ᠴᠠᠭᠠᠷᠢᠭ ᠶᠡᠷᠦᠩᠬᠡᠢ ᠪᠠᠭᠯᠠᠭᠴᠢ ᠲᠠᠢ ᠪᠠ ᠶᠡᠷᠦᠩᠬᠡᠢ ᠪᠠᠭᠯᠠᠭᠴᠢ ᠪᠦᠷᠢ ᠶ᠋ᠢᠨ ᠥᠪᠥᠷ ᠦ᠋ᠨ ᠤᠭ ᠲᠤᠨᠢ ᠦᠰᠦ ᠲᠡᠢ 20—40 ᠡᠷᠡ ᠴᠡᠴᠡᠭ ᠪᠣᠢ᠃ ᠡᠮᠡ ᠪᠠᠭ ᠴᠡᠴᠡᠭ ᠨᠢ ᠭᠠᠭᠴᠠᠭᠠᠷ ᠪᠤᠶᠤ ᠬᠡᠳᠦ ᠬᠡᠳᠦ ᠪᠡᠷ ᠪᠠᠭᠯᠠᠷᠠᠵᠤ ᠤᠷᠭᠤᠨᠠ᠂ 3—4 ᠬᠣᠣᠰ ᠰᠠᠯᠠᠭᠠ ᠲᠠᠢ ᠪᠠ ᠶᠡᠷᠦᠩᠬᠡᠢ ᠪᠠᠭᠯᠠᠭᠴᠢ ᠪᠦᠷᠢ ᠶ᠋ᠢᠨ ᠥᠪᠥᠷ ᠲᠤ 5—8 ᠡᠮᠡ ᠴᠡᠴᠡᠭ ᠲᠡᠢ᠃ ᠦᠷᠡ ᠨᠢ ᠶᠠᠰᠤᠲᠤ ᠵᠢᠮᠢᠰ ᠰᠢᠭ᠂ ᠥᠨᠳᠡᠭᠡᠯᠵᠢᠨ ᠪᠥᠭᠡᠷᠡᠩᠬᠡᠢ ᠪᠤᠶᠤ ᠤᠷᠲᠤᠯᠵᠢᠨ ᠵᠤᠤᠪᠠᠩ᠂ 14—20mm ᠤᠷᠲᠤ᠂ ᠪᠣᠯᠪᠠᠰᠤᠷᠠᠪᠠᠯ ᠬᠠᠭᠤᠷᠮᠠᠭ ᠦᠷᠡ ᠶ᠋ᠢᠨ ᠬᠠᠯᠢᠰᠤ ᠨᠢ ᠰᠢᠷᠠ ᠬᠦᠷᠡᠩ ᠪᠤᠶᠤ ᠤᠯᠠᠭᠠᠨ ᠬᠦᠷᠡᠩ᠂ ᠡᠰᠡᠬᠦᠯᠡ ᠮᠥᠩᠭᠥᠨ ᠴᠠᠭᠠᠨ ᠬᠠᠢᠷᠰᠤᠨ ᠲᠣᠯᠪᠣ ᠲᠠᠢ ᠪᠣᠯᠳᠠᠭ᠃
ᠴᠢᠭᠢᠭᠯᠢᠭ ᠬᠥᠷᠥᠰᠥᠲᠦ ᠡᠭᠡᠮᠡ ᠬᠠᠯᠠᠭᠤᠨ ᠭᠠᠵᠠᠷ ᠤ᠋ᠨ ᠠᠭᠤᠯᠠ ᠶ᠋ᠢᠨ ᠬᠠᠵᠠᠭᠤ ᠪᠠᠷ ᠤᠷᠭᠤᠳᠠᠭ᠃ ᠠᠭᠤᠯᠠ ᠶ᠋ᠢᠨ ᠭᠣᠣ ᠵᠢᠯᠠᠭᠠ᠂ ᠭᠣᠣᠯ ᠤ᠋ᠨ ᠬᠥᠪᠡᠭᠡ ᠶ᠋ᠢᠨ ᠢᠬᠴᠤ ᠣᠢ ᠰᠢᠭᠤᠢ ᠶ᠋ᠢᠨ ᠳᠣᠣᠷᠠ ᠮᠠᠰᠢ ᠰᠠᠢᠨ ᠤᠷᠭᠤᠨᠠ᠃
ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠶᠦᠨᠨᠠᠨ᠂ ᠭᠤᠸᠠᠩᠰᠢ᠂ ᠭᠤᠸᠠᠩᠳᠦᠩ ᠬᠢᠭᠡᠳ ᠹᠦᠵᠢᠶᠠᠨ ᠤ᠋ ᠡᠮᠦᠨᠡᠲᠦ ᠬᠡᠰᠡᠭ ᠢ᠋ᠶ᠋ᠡᠷ ᠤᠷᠭᠤᠳᠠᠭ᠃
ᠡᠰᠢᠨ ᠦ᠌ ᠬᠢᠨᠢ ᠬᠠᠯᠢᠰᠤᠨ ᠤ᠋ ᠰᠢᠷᠬᠡᠭ ᠢ᠋ᠶ᠋ᠡᠷ ᠰᠢᠷᠠ ᠣᠯᠣᠰᠣ ᠶ᠋ᠢ ᠣᠷᠣᠯᠠᠭᠤᠯᠤᠨ ᠮᠠᠳᠠᠢ᠂ ᠵᠢᠭᠠᠰᠤᠨ ᠲᠣᠣᠷ ᠵᠡᠷᠭᠡ ᠨᠡᠬᠡᠵᠦ ᠪᠣᠯᠤᠨᠠ᠃ ᠦᠷᠡ ᠡᠴᠡ ᠨᠢ ᠲᠣᠰᠣ ᠠᠪᠴᠤ ᠪᠣᠯᠤᠨᠠ᠂ ᠪᠠᠰᠠ ᠬᠠᠭᠤᠷᠴᠤ ᠢᠳᠡᠵᠦ ᠪᠣᠯᠳᠠᠭ᠃
ᠬᠢᠲᠠᠳ ᠨᠡᠷᠡ᠄买麻藤
ᠠᠩᠭ᠌ᠯᠢ ᠨᠡᠷᠡ᠄ Gnetum montanum Markgr.
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠳ᠂ ᠡᠷᠬᠢᠮᠪᠠᠭᠠᠲᠤᠷ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ