ᠢᠮᠠᠭᠠᠨ ᠵᠡᠭᠡᠷᠭᠡᠨᠡЯмаан зээргэнэ
442
ᠢᠮᠠᠭᠠᠨ ᠵᠡᠭᠡᠷᠭᠡᠨᠡ
ᠵᠡᠭᠡᠷᠭᠡᠨᠡ ᠶ᠋ᠢᠨ ᠢᠵᠠᠭᠤᠷ
ᠡᠪᠡᠰᠦ ᠰᠢᠭ ᠵᠢᠵᠢᠭ ᠪᠤᠲᠠ ᠮᠣᠳᠣ᠂ 5—10cm ᠥᠨᠳᠥᠷ᠃ ᠦᠨᠳᠦᠰᠦᠯᠢᠭ ᠡᠰᠢ ᠨᠢ ᠮᠣᠳᠣᠯᠢᠭ᠂ ᠭᠦᠨ ᠬᠦᠷᠡᠩ᠃ ᠰᠠᠯᠠᠭᠠ ᠮᠥᠴᠢᠷ ᠨᠢ ᠤᠭ ᠤ᠋ᠨ ᠬᠡᠰᠡᠭ ᠡᠴᠡ ᠣᠯᠠᠨ ᠭᠠᠷᠴᠤ ᠪᠠᠬᠠᠨ ᠲᠠᠰᠢᠭᠤᠯᠠᠵᠤ ᠪᠤᠲᠠᠯᠠᠨ ᠤᠷᠭᠤᠨᠠ᠂ ᠳᠠᠬᠢᠨ ᠳᠡᠮᠡᠢ ᠰᠠᠯᠠᠭᠠ ᠭᠠᠷᠬᠤ ᠦᠭᠡᠢ᠂ ᠨᠡᠯᠢᠶᠡᠳ ᠨᠠᠷᠢᠨ ᠮᠥᠷᠲᠡᠭᠡᠨ ᠣᠬᠣᠷ ᠪᠠᠢᠳᠠᠭ᠃ ᠮᠥᠴᠢᠷ ᠦ᠋ᠨ ᠳ᠋ᠢᠶᠠᠮᠧᠲ᠋ᠷ ᠨᠢ 1 mm ᠣᠷᠴᠢᠮ᠂ ᠢᠯᠡ ᠪᠤᠰᠤ ᠭᠤᠯᠳᠤ ᠠᠷᠲᠠᠢ᠂ ᠦᠶᠡ ᠶ᠋ᠢᠨ ᠬᠣᠭᠣᠷᠣᠨᠳᠣᠬᠢ ᠵᠠᠢ ᠨᠢ 0.8—3mm ᠤᠷᠲᠤ᠃ ᠨᠠᠪᠴᠢ ᠨᠢ ᠴᠢᠭᠲᠠᠯᠠᠨ ᠤᠷᠭᠤᠨᠠ᠂ ᠲᠣᠷᠭᠠᠨ ᠬᠠᠯᠢᠰᠤᠯᠢᠭ᠂ ᠳᠣᠣᠷᠠᠲᠤ ᠬᠠᠭᠠᠰ ᠠ᠋ᠴᠠ ᠢᠯᠡᠭᠦᠦ ᠬᠡᠰᠡᠭ ᠨᠢ ᠬᠠᠷᠢᠯᠴᠠᠨ ᠨᠡᠢᠯᠡᠵᠦ ᠲᠣᠭᠳᠣᠢ ᠰᠢᠭ᠋ ᠪᠣᠯᠵᠤ ᠡᠰᠢ ᠪᠡᠨ ᠪᠠᠭᠯᠠᠵᠤ ᠪᠣᠢ᠂ ᠳᠡᠭᠡᠳᠦ ᠰᠠᠯᠤᠩᠭᠢ ᠬᠡᠰᠡᠭ ᠨᠢ ᠬᠤᠷᠴᠠ ᠭᠤᠷᠪᠠᠯᠵᠢᠨ ᠦᠵᠦᠭᠦᠷ ᠲᠡᠢ᠃ ᠴᠡᠴᠡᠭ ᠨᠢ ᠭᠠᠭᠴᠠ ᠪᠡᠯᠭᠡ ᠲᠡᠢ᠂ ᠣᠨᠳᠣᠣ ᠭᠡᠷ ᠲᠡᠢ᠃ ᠡᠷᠡ ᠪᠠᠭ ᠴᠡᠴᠡᠭ ᠨᠢ ᠨᠠᠪᠴᠢᠨ ᠤ᠋ ᠥᠪᠥᠷ ᠲᠦ᠍ ᠬᠡᠳᠦ ᠬᠡᠳᠦ ᠪᠡᠷ ᠪᠠᠭᠯᠠᠷᠠᠨ ᠤᠷᠭᠤᠨᠠ᠂ 3—4 ᠬᠣᠣᠰ ᠨᠣᠭᠣᠭᠠᠨ ᠪᠠᠭᠯᠠᠭᠴᠢ ᠲᠠᠢ᠃ ᠳᠣᠣᠷᠠ ᠠ᠋ᠴᠠ ᠪᠣᠳᠣᠪᠠᠯ ᠨᠢᠭᠡᠳᠦᠭᠡᠷ ᠬᠣᠣᠰ ᠪᠠᠭᠯᠠᠭᠴᠢ ᠨᠢ ᠬᠣᠶᠠᠳᠤᠭᠠᠷ ᠠ᠋ᠴᠠ ᠪᠠᠨ 1—2.5mm ᠵᠠᠢᠲᠠᠢ᠂ ᠨᠢᠭᠡᠳᠦᠭᠡᠷ ᠪᠣᠯᠤᠨ ᠬᠣᠶᠠᠳᠤᠭᠠᠷ ᠬᠣᠣᠰ ᠪᠠᠭᠯᠠᠭᠴᠢ ᠨᠢ ᠪᠦᠷ ᠲᠣᠷᠭᠠᠨ ᠬᠠᠯᠢᠰᠤᠯᠢᠭ᠂ ᠳᠣᠣᠷᠠᠲᠤ ᠬᠠᠭᠠᠰ ᠬᠡᠰᠡᠭ ᠨᠢ ᠬᠠᠷᠢᠯᠴᠠᠨ ᠨᠡᠢᠯᠡᠵᠦ ᠲᠣᠭᠳᠣᠢ ᠰᠢᠭ᠋ ᠪᠣᠯᠵᠠᠢ᠃ ᠬᠠᠮᠤᠭ ᠤ᠋ᠨ ᠳᠡᠭᠡᠷᠡᠬᠢ ᠨᠢᠭᠡ ᠬᠣᠣᠰ ᠪᠠᠭᠯᠠᠭᠴᠢ ᠨᠢ ᠨᠢᠭᠡ ᠯᠡ ᠡᠷᠡ ᠴᠡᠴᠡᠭ ᠲᠡᠢ᠂ ᠳᠣᠣᠷᠠᠲᠤ ᠬᠠᠭᠠᠰ ᠠ᠋ᠴᠠ ᠢᠯᠡᠭᠦᠦ ᠬᠡᠰᠡᠭ ᠨᠢ ᠬᠠᠷᠢᠯᠴᠠᠨ ᠨᠡᠢᠯᠡᠵᠡᠢ᠃ ᠡᠮᠡ ᠪᠠᠭ ᠴᠡᠴᠡᠭ ᠨᠢ 1—3 ᠪᠠᠷ ᠪᠠᠭᠯᠠᠷᠠᠨ ᠤᠷᠭᠤᠨᠠ᠂ ᠪᠣᠯᠪᠠᠰᠤᠷᠠᠪᠠᠯ ᠬᠠᠮᠤᠭ ᠤ᠋ᠨ ᠳᠡᠭᠡᠷᠡᠬᠢ ᠨᠢᠭᠡ ᠬᠣᠣᠰ ᠪᠠᠭᠯᠠᠭᠴᠢ ᠨᠢ ᠮᠢᠬᠠᠯᠢᠭ ᠪᠣᠯᠬᠤ ᠮᠥᠷᠲᠡᠭᠡᠨ ᠤᠯᠠᠢᠨᠠ᠂ ᠨᠢᠭᠡ ᠯᠡ ᠦᠷᠡ ᠲᠡᠢ᠃ ᠦᠷᠡ ᠨᠠᠬᠢᠶᠠ ᠶ᠋ᠢᠨ ᠪᠦᠷᠬᠦᠭᠦᠯ ᠦ᠋ᠨ ᠬᠣᠭᠣᠯᠠᠢ ᠨᠢ ᠦᠵᠦᠭᠦᠷ ᠲᠡᠭᠡᠨ ᠮᠤᠷᠤᠢ᠃ ᠦᠷᠡ ᠨᠢ ᠤᠷᠲᠤ ᠥᠨᠳᠡᠭᠡᠯᠵᠢᠨ᠂ 5mm ᠤᠷᠲᠤ᠂ ᠬᠦᠷᠡᠩ᠂ ᠭᠢᠯᠦᠭᠡᠷ᠃
ᠬᠠᠢᠷ ᠴᠢᠯᠠᠭᠤᠲᠤ ᠭᠠᠵᠠᠷ᠂ ᠠᠭᠤᠯᠠ ᠶ᠋ᠢᠨ ᠬᠠᠵᠠᠭᠤ᠂ ᠡᠯᠡᠰᠦᠷᠬᠡᠭ ᠭᠠᠵᠠᠷ᠂ ᠬᠡᠭᠡᠷᠡ ᠲᠠᠯᠠ ᠳ᠋ᠤ᠌ ᠤᠷᠭᠤᠨᠠ᠃
ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠥᠪᠥᠷ ᠮᠣᠩᠭᠣᠯ᠂ ᠬᠥᠬᠡᠨᠠᠭᠤᠷ ᠵᠡᠷᠭᠡ ᠮᠣᠵᠢ ᠣᠷᠣᠨ ᠳ᠋ᠤ᠌ ᠤᠷᠭᠤᠳᠠᠭ᠃ ᠦᠨᠳᠦᠰᠦ ᠡᠴᠡ ᠪᠤᠰᠤᠳ ᠬᠡᠰᠡᠭ ᠨᠢ ᠪᠦᠷ ᠡᠮ ᠳ᠋ᠦ᠍ ᠣᠷᠣᠨᠠ᠃
ᠬᠢᠲᠠᠳ ᠨᠡᠷᠡ᠄单子麻黄
ᠠᠩᠭ᠌ᠯᠢ ᠨᠡᠷᠡ᠄ Ephedra monosperma Gmel. ex C.A.Mey.
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠳ ·ᠡᠷᠬᠢᠮᠪᠠᠭᠠᠲᠤᠷ
ᠬᠢᠨᠠᠭᠴᠢ᠄ ᠫᠣ· ᠴᠠᠭᠠᠨ ᠲᠤᠶᠠᠭᠠ