ᠳᠣᠮᠣᠭᠲᠤ ᠬᠤᠷᠠᠭᠠ – ᠴᠣ ᠂ ᠣᠷᠱᠤᠨ Домогт хурга – Чо ᠂ Оршин
281ᠳᠣᠮᠣᠭᠲᠤ ᠬᠤᠷᠠᠭᠠ
ᠨᠣᠷᠤᠭᠰᠠᠨ ᠰᠢᠯᠦᠭ ᠲᠤ ᠱᠠᠭᠠ ᠡᠷᠬᠢᠮ
ᠴᠡᠩᠬᠡᠷ ᠪᠤᠯᠠᠭ ᠤ᠋ᠨ ᠤᠰᠤ ᠶ᠋ᠢ
ᠰᠢᠮᠡᠵᠦ ᠠᠮᠲᠠᠯᠠᠨ ᠤᠤᠭᠤᠪᠠᠯ
ᠰᠢᠪᠲᠦᠷ ᠭᠡᠵᠦ ᠦᠨᠦᠷᠲᠦᠬᠦ ᠦᠭᠡᠢ
ᠰᠢᠬᠢᠷ ᠪᠤᠷᠠᠮ ᠰᠢᠭ᠋ ᠰᠠᠨᠠᠭᠳᠠᠬᠤ ᠶᠤᠮ᠃
ᠤᠰᠤᠨ ᠤ᠋ ᠥᠩᠭᠡ ᠨᠢ ᠡᠢᠮᠦ ᠴᠤ᠌
ᠤᠤᠭᠤᠭᠠᠳ ᠶᠠᠭᠤᠨ ᠬᠠᠩᠬᠤ ᠦᠭᠡᠢ ᠪᠣᠢ?
ᠣᠨ ᠵᠢᠯ ᠤᠯᠠᠷᠢᠭᠰᠠᠨ ᠴᠤ᠌
ᠤᠨᠳᠤᠷᠤᠭᠠᠳ ᠶᠠᠭᠤᠨ ᠰᠢᠷᠭᠢᠬᠦ ᠦᠭᠡᠢ ᠪᠣᠢ?
ᠪᠤᠷᠬᠠᠨᠲᠤ ᠨᠡᠷᠡ ᠲᠡᠢ ᠳᠠᠷᠬᠠᠨ
ᠪᠤᠯᠠᠭ ᠥᠭᠡᠳᠡ ᠴᠢᠭᠯᠡᠭᠡᠳ
ᠡᠳᠦᠷ ᠰᠥᠨᠢ ᠪᠡᠷ ᠬᠤᠪᠴᠠᠯᠠᠵᠤ
ᠡᠭᠦᠷᠭᠡ ᠪᠠᠷᠢᠨ ᠶᠠᠪᠤᠳᠠᠭ ᠭᠡᠨᠡ᠃
ᠪᠠᠭᠰᠢ ᠭᠡᠳᠡᠭ ᠬᠣᠴᠢᠯᠠᠯ ᠲᠠᠢ
ᠪᠠᠨᠳᠢ ᠵᠢᠭᠠᠬᠠᠨ ᠯᠠᠮᠠ ᠯᠠ
ᠪᠠᠷᠢᠨ ᠵᠠᠯᠭᠠ ᠣᠴᠢᠳᠠᠭ ᠢ᠋
ᠪᠠᠷᠤᠭᠯᠠᠵᠤ ᠲᠥᠰᠥᠪᠯᠡᠨ ᠮᠡᠳᠡᠭᠡᠳ
ᠨᠢᠭᠡᠨ ᠡᠷᠲᠡ ᠶ᠋ᠢᠨ ᠵᠢᠪᠠᠷ ᠢ᠋ᠶ᠋ᠠᠷ
ᠨᠡᠬᠡᠵᠦ ᠠᠷᠤ ᠠ᠋ᠴᠠ ᠨᠢ ᠮᠥᠷᠳᠡᠵᠡᠢ᠂
ᠨᠡᠭᠡᠷᠡᠨ ᠶᠠᠭᠠᠬᠢᠬᠤ ᠤᠴᠢᠷ ᠢ᠋ ᠨᠢ
ᠨᠢᠭᠡᠮᠦᠰᠦᠨ ᠦᠵᠡᠭᠡᠳ ᠰᠣᠴᠢᠵᠠᠢ᠃
ᠠᠮᠢᠯᠠᠯ ᠤ᠋ᠨ ᠪᠤᠯᠠᠭ ᠠ᠋ᠴᠠ ᠤᠳᠬᠤᠭᠠᠳ
ᠠᠯᠲᠠᠨ ᠫᠢᠯᠠ ᠳ᠋ᠠᠭᠠᠨ ᠳᠦᠭᠦᠷᠭᠡᠨᠡ᠂
ᠠᠶᠤᠰᠢ ᠬᠠᠳᠠᠭ ᠢ᠋ᠶ᠋ᠠᠨ ᠳᠡᠯᠭᠡᠭᠡᠳ
ᠠᠯᠳᠠᠯᠠᠨ ᠠᠯᠳᠠᠯᠠᠨ ᠮᠥᠷᠭᠥᠨᠡ᠃
ᠨᠣᠭᠣᠭᠠᠨ ᠬᠤᠷᠠᠭᠠ ᠪᠠᠢᠨ ᠪᠠᠢᠨ
ᠨᠣᠷᠤᠭᠰᠠᠨ ᠦᠰᠦ ᠪᠡᠨ ᠰᠢᠯᠭᠡᠭᠡᠨᠡ᠂
ᠡᠷᠭᠢᠨ ᠡᠷᠭᠢᠨ ᠣᠢᠷᠠᠲᠤᠭᠠᠳ
ᠡᠪᠡᠰᠦ ᠴᠢᠮᠬᠢᠯᠡᠵᠦ ᠵᠣᠭᠰᠣᠨᠠ᠃
ᠠᠯᠲᠠᠨ ᠫᠢᠯᠠ ᠶ᠋ᠢᠨ ᠠᠮᠠᠰᠠᠷ ᠲᠤ
ᠠᠮᠠ ᠬᠣᠩᠰᠢᠶᠠᠷ ᠨᠢ ᠬᠦᠷᠲᠡᠯᠡ
ᠠᠯᠲᠠ ᠬᠦᠷᠬᠦ ᠦᠭᠡᠢ ᠭᠠᠵᠠᠷ
ᠠᠷᠠᠢ ᠳᠥᠭᠥᠬᠦ ᠭᠱᠠᠨ ᠳ᠋ᠤ᠌
ᠳᠠᠪ ᠬᠢᠨ ᠰᠢᠭᠦᠷᠡᠯᠡ ᠭᠡᠨᠡ᠂
ᠳᠠᠯᠳᠠ ᠠ᠋ᠴᠠ ᠬᠥᠮᠦᠨ ᠲᠣᠰᠬᠢᠷᠠᠯᠠ ᠭᠡᠨᠡ᠂
ᠳᠠᠷᠤᠢ ᠪᠤᠯᠲᠠ ᠦᠰᠦᠷᠦᠯᠡ ᠭᠡᠨᠡ
ᠳᠠᠷᠬᠠᠨ ᠪᠤᠯᠠᠭ ᠲᠤ ᠣᠷᠣᠯᠠ ᠭᠡᠨᠡ᠃
ᠦᠭᠡ ᠶᠠᠷᠢᠶᠠᠨ ᠤ᠋ ᠳᠣᠮᠣᠭ ᠲᠤ
ᠦᠨᠡᠨ ᠬᠤᠳᠠᠯ ᠤ᠋ᠨ ᠯᠠᠪᠯᠠᠯᠲᠠ ᠪᠣᠢ
ᠮᠠᠯ ᠤ᠋ᠨ ᠥᠨᠢᠷ ᠢ᠋ ᠵᠥᠩᠨᠡᠳᠡᠭ
ᠮᠠᠯᠴᠢᠳ ᠤ᠋ᠨ ᠡᠷᠬᠢᠮ ᠱᠠᠭᠠ ᠪᠣᠢ
ᠰᠠᠪᠳᠠᠭ ᠠᠭᠤᠯᠠ ᠶ᠋ᠢᠨ ᠰᠠᠬᠢᠭᠤᠰᠤ
ᠱᠠᠰᠲᠢᠷ ᠲᠡᠦᠬᠡᠨ ᠳ᠋ᠦ᠍ ᠲᠡᠮᠳᠡᠭᠯᠡᠯ ᠲᠡᠢ
ᠱᠠᠭᠢᠭᠰᠠᠨ ᠲᠥᠯ ᠢ᠋ᠶ᠋ᠡᠨ ᠣᠯᠠᠰᠢᠷᠠᠭᠤᠯᠳᠠᠭ
ᠱᠠᠭᠠ ᠶ᠋ᠢᠨ ᠨᠠᠭᠠᠳᠤᠮ ᠪᠡᠯᠭᠡᠳᠡᠯ ᠲᠡᠢ
ᠨᠣᠭᠣᠭᠠᠨ ᠬᠤᠷᠠᠭᠠᠨ ᠤ᠋ ᠰᠡᠲᠡᠷ ᠨᠢ
ᠨᠤᠲᠤᠭ ᠢ᠋ᠶ᠋ᠠᠨ ᠴᠢᠮᠡᠭᠰᠡᠨ ᠰᠦᠷᠦᠭ ᠲᠤ
ᠨᠤᠲᠤᠭ ᠢ᠋ᠶ᠋ᠠᠨ ᠴᠢᠮᠡᠭᠰᠡᠨ ᠰᠦᠷᠦᠭ ᠨᠢ
ᠳᠣᠮᠣᠭᠲᠤ ᠲᠥᠯ ᠦ᠋ᠨ ᠬᠡᠰᠢᠭ ᠶᠦᠮ᠃
ᠬᠡᠰᠢᠭ ᠬᠥᠷᠥᠩᠭᠡ ᠮᠠᠯ ᠮᠢᠨᠢ
ᠬᠡᠵᠢᠶᠡ ᠪᠣᠯᠪᠠᠴᠤ ᠮᠠᠨ ᠤ᠋ ᠬᠢ!
ᠬᠡᠭᠡᠷᠡ ᠲᠠᠯᠠ ᠬᠥᠳᠡᠭᠡ ᠮᠢᠨᠢ
ᠬᠡᠨ ᠦ᠌ ᠴᠤ᠌ ᠪᠢᠰᠢ᠂ ᠪᠢᠳᠡᠨ ᠦ᠌ ᠬᠢ!
ᠢᠷᠡᠯᠲᠡ᠄· ᠴᠣ· ᠣᠷᠱᠤᠨ ᠤ᠋《 ᠮᠠᠯᠴᠢᠨ ᠬᠥᠮᠦᠨ ᠦ᠌ ᠳᠠᠭᠤᠤ》 ᠨᠣᠮ ᠠ᠋ᠴᠠ ᠡᠰᠢᠯᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠷᠴᠡᠴᠡᠭ
2024 03 27